ඥානසාර හිමි වැරදිකරු බවට අධිකරණයෙන් තීන්දුවක්

එක්නැලිගොඩ නඩුවේ පැමිණිලිකාරිය වන සන්ධ්‍යා එක්නැලිගොඩ මහත්මියට හෝමාගම අධිකරණය ඉදිරිපිට බැන තර්ජනය කර සාපරාධී බිය ගැන්වීම් පිළිබඳව බොදුබල සේනා සංවිධානයේ ලේකම් ගලගොඩඅත්තේ ඥානසාර හිමිට එරෙහිව හෝමාගම අධිකරණයේ ගොනුකළ නඩුවේ පළමු හා දෙවැනි චෝදනාවන් සඳහා වරදකරු බවට ඊයේ (24) නිගමනය කළ හෝමාගම මහේස්ත්‍රාත් හා අතිරේක දිසා විනිසුරු උදේෂ් රණතුංග මහතා එහි දඬුවම් නියම කිරීම ලබන මස 14 වැනිදාට ලබාදීම සඳහා නඩුව කල්දැමීමට නියම කළේය.

මාධ්‍යවේදී ප්‍රගීත් එක්නැලිගොඩ මහතා අතුරුදන්වීම පිළිබඳ නඩුව ඉකුත් 2016 ජනවාරි මස 25 වන දින සවස විභාගයට ගැනීමෙන් පසුව එහි සැකකරුවන් 9 දෙනා යළි රිමාන්ඩ් භාරයේ රැඳවීමට හෝමාගම අධිකරණය කළ නියෝගයට එරෙහිව අධිකරණය තුළ කලබලකාරීව හැසුරුණු ඥානසාර හිමි ඉන් පිටත සිටි නඩුවේ පැමිණිලිකාරියටද බැන තර්ජනය කර සාපරාධී බියගැන්වීම පිළිබඳව ලංකා දණ්ඩ නීති සංග්‍රහයේ 346 හා 486 වගන්ති යටතේ නීතිපති උපදෙස් මත හෝමාගම පොලීසිය මගින් ඥානසාර හිමිට එරෙහිව එම නඩුව පවරා තිබුණි.

විත්තිකාර හිමි පෙර ඇප මත මෙහිදී මුදාහරින ලද අතර එම හිමිගේ ඇඟිලි සටහන් ලබා ගන්නා ලෙසද විනිසුරුවරයා හෝමාගම පොලීසියට නියම කළේය.

 

ghana

හෝමාගම – ජයසේන හත්වැල්ල

කඩුවෙල – බියගම පාලම සම්පූර්ණයෙන්ම වැසෙයි

අයහපත් කාලගුණය හේතුවෙන් හානියට පත්ව ඇති දැනට එක් මංතීරුවක පමණක් ගමනා ගමන කයටතු කරන කඩුවෙල – බියගම පාලම අලුත් වැඩිය කිරිම සඳහා වසා තබන බව පොලීසිය පවසයි. ඒ අනුව අද රාත්‍රී 10.00 සිට හෙට (25දා) උදෑසන 5.00 දක්වා පාලම වසා තැබෙනු ඇත.

IMG_20180523_121749

ඡායාරූපය කඩුවෙල ආසිරි

 

ඉන්ෆ්ලුවන්සාවෙන් දකුණේ දරුවන් 08ක් මරුට

මෙම මස පළමු වැනිදා සිට මේ දක්වා අතර කාලය තුළදී ඉන්ෆ්ලුවන්සා  වෛරස් උණ වැළඳුණු කුඩා දරුවන් 270දෙනෙකු කරාපිටිය ශික්ෂණ රෝහලෙන් නේවාසික ප්‍රතිකාර ලබා ගෙන ඇති අතර ඉන් දරුවන් අට දෙනෙකු මියගොස් ඇති බව කරාපිටිය  ශික්ෂණ රෝහලේ අධ්‍යක්ෂ වෛද්‍ය ජයම්පති සේනානායක මහතා පවසයි.

මේ වනවිටත් කුඩා දරුවන් 29 දෙනෙකු රෝගය වැළඳීමෙන්  රෝහලේ ළමා වාට්ටුවල නේවාසිකව ප්‍රතිකාර ලබන බවද හෙතෙම පැවසීය.

එහිදී වැඩිදුරටත් අදහස් දැක් වූ රෝහල් අධ්‍යක්ෂවරයා,

 “වෛරස් උණ වැලඳී රෝහලට ඇතුළත් කරන දරුවන් බාහිර රෝගී අංශයේදී පරීක්ෂණයට ලක් කරනවා. ඉන්ෆලුවන්සා වෛරස් උණ වැලඳුණු දරුවන් තමයි නේවාසික ප්‍රතිකාර ලබාදීමට ළමා වාට්ටුවලට ඇතුළත් කරන්නේ. අනෙක් දරුවන්ට අවශ්‍ය ප්‍රතිකාර කර බෙහෙත් ලබදී ඔවුන් පිටත් කරනවා. පසුගිය දින දෙක තුළ මාස හයක දරුවෙක් මියගියා. ඒ දරුවා උපතින්ම හෘද රෝගී තත්ත්වයෙන් පෙළුණු අයෙක්. මේ වනවිට  කුඩා දරුවන් 08 දෙනෙකු මෙකී වෛරස් උණ වැලඳීමෙන් මියගොස් තියෙනවා. ඉන් දරුවන් පස් දෙනෙකු ඉන්ෆලුවන්සා ඇඩිනෝ ඇතුළු වෛරස් කිහිපයකින් මියගිය බවට හඳුනාගෙන තියෙනවා. අනික් දරුවන් තිදෙනාත් මෙම වෛරස් උණ වැලඳීමෙන් මියගිය බවට සැකකරනවා”යැයිද පවසා සිටියේය.

ifli

 

 

ආණ්ඩුවෙන් ඉවත්වූ TBට FCID කැඳවීමක්

හිටපු අමාත්‍ය ටී.බී. ඒකනායක මහතා සමග ආණ්ඩුවෙන් ඉවත් වූ 15 දෙනා ලබන 28 වැනිදා පොලිස් මූල්‍ය අපරාධ කොට්ඨාසයට යන බව පාර්ලිමේන්තු මන්ත්‍රී ලක්ෂ්මන් යාපා අබේවර්ධන මහතා සඳහන් කළේය.

සංස්කෘතික අමාත්‍ය ධුරය දරන කාලයේදී පන්සලක පැවැත්වූ පෙරහරක වාහනයක් ලබාදී තිබෙන බවට චෝදනා කර ටී.බී. ඒකනායක මහතාට ලබන සඳුදා පොලිස් මූල්‍ය අපරාධ කොට්ඨාසයට පැමිණෙන ලෙස දන්වා තිබෙන බවද ඔහු පවසා සිටියේය.

ආණ්ඩුවෙන් ඉවත් වීමත් සමග සුපුරුදු පලිගැනීම ආරම්භ කර තිබෙන බවත්, මහ බැංකුව හොරා කෑ පුද්ගලයා නිදැල්ලේ සිටීමට ඉඩහැර පන්සලකට වාහනයක් දුන් පුද්ගලයාට එරෙහිව කටයුතු කරමින් සිටින බවද අද (24දා) පැවැති සාකච්ඡාවකදී මන්ත්‍රීවරයා සඳහන් කලේය.

මේ නිසා මන්ත්‍රීවරයාට සහයෝගය ලබා දීම සඳහා ආණ්ඩුවෙන් ඉවත් වූ ඉතිරි 15 දෙනාද එදිනට පොලිස් මූල්‍ය අපරාධ කොට්ඨාසයට යන බවද ඔහු පවසා සිටියේය.

TB

සෞඛ්‍යයේ ගුණත්වයෙන් දකුණු ආසියාවේ අංක එක ලංකාවට

සෞඛ්‍යය සේවයේ ගුණාත්මකභාවය හා එයට ප්‍රවේශ වීමට ඇති හැකියාව අතින් දකුණු ආසියාව් හොඳම රට බවට ශ්‍රී ලංකාව පත්ව තිබේ.

ලෝකයේ අංක එකේ ව්‍යාපාරිකයා වන බිල් ගේට්ස් මහතාගේ ‘බිල් ඇන්ඩ් මෙලින්ඩා’ පදනම මගින් සපයන අරමුදල් හරහා ලැන්සෙන්ට් ආයතනය විසින් නිකුත් කරන ලද නවතම වාර්තාවක මේ බව දැක්වෙයි.

ලෝකයේ රටවල් 195ක දත්ත උපයෝගී කරගෙන සකස් කර ඇති මෙම වාර්තාවට අනුව ශ්‍රී ලංකාවට 71 වැනි ස්ථානය හිමිව ඇත. මාලදිවයින 72 වැනි ස්ථානයේ පසුවන අතර, ඉන්දියාව 145 වැනි ස්ථානයේ පසුවෙයි.

දකුණු ආසියාතික රටවල් අතරින් සෞඛ්‍යය සේවයේ ගුණාත්මකභාවය හා එයට ප්‍රවේශවීමට ඇති හැකියාව අවම රට ලෙස ඇෆ්ගනිස්ථානය නම් කර ඇති අතර, ඔවුන් 191 වැනි ස්ථානයේ පසුවෙන්නේ ලෝක දර්ශකයේ පහළම රටවල් 10 අතරට එක්වෙමිනි.

මෙම දර්ශකයේ පළමු ස්ථානය අයිස්ලන්තයට හිමිව ඇති අතර, අවසන් ස්ථානය මධ්‍යම අප්‍රිකානු ජන රජයට හිමිව තිබේ. චීනය 48 වැනි ස්ථානයට පත්ව ඇත.

සෞඛ්‍යය සේවයේ ගුණාත්මකභාවය හා එයට ප්‍රවේශ වීමට ඇති හැකියාව අතින් ඉහළ රටවල් 10

01 – අයිස්ලන්තය

02 -නෝර්වේ

03 – නෙදර්ලන්තය

04 – ලක්ෂම්බර්ග්

05 – ඔස්ට්‍රේලියාව

06 – ෆිනලන්තය

07 – ස්විට්සර්ලන්තය

08 – ස්වීඩනය

09 – ඉතාලිය

10 – ඇන්ඩෝරා

සෞඛ්‍යය සේවයේ ගුණාත්මකභාවය හා එයට ප්‍රවේශ වීමට ඇති හැකියාව අතින් අවම රටවල් 10

195 – මධ්‍යම අප්‍රිකානු ජනරජය

194 – සෝමාලියාව

193 – ගිනියා බිසව්

192 – චැඩි

191 – ඇෆ්ගනිස්ථානය

190 – ගිනියාව

189 – කිරිබති

188 – දකුණු සුඩානය

187 – අයිවර් කොස්ට්

186 – බුරුන්ඩි

Healthcare-India1

2020දී වැට් සියයට 2.5කින් අඩු කරනවා – මුදල් ඇමති

දැනට 15%ක්ව පවතින එකතු කළ අගය මත බද්ද 2020 වන විට 12.5% දක්වා පහත හෙලීම සිය අපේක්ෂාව බව මුදල් හා ජනමාධ්‍ය අමාත්‍ය මංගල සමරවීර මහතා පවසයි.

අද සියලු ජනතාව වක්‍ර ආකාරයට බදු ගෙවන බැවින් එම ජනතාව වක්‍ර බදු බරින් නිදහස් කිරීම සඳහා 2020 වන විට වැට් බද්ද 2.5%කින් අඩු කිරීමට බලාපොරොත්තු වන බව හෙතෙම අවධාරණය කළේය.

අමාත්‍යවරයා මේ බව කියා සිටියේ සහකාර රේගු අධිකාරීවරුන් 68 දෙනෙකුට පත්වීම් ලිපි ප්‍රදානය කිරීම සඳහා අද (24දා) මුදල් අමාත්‍යාංශයේ පැවති උත්සවයකදීය. 

විධායකය අහෝසි කිරීමේ යෝජනාව හෙට පාර්ලිමේන්තුවට

විධායක ජනාධිපති ධුරය අහෝසි කිරීම සඳහා ජනතා විමුක්ති පෙරමුණ මැදිහත් වී ගෙන එන 20 වැනි ව්‍යවස්ථා සංශෝධන කෙටුම්පත හෙට (25දා) පාර්ලිමේනතුවට ඉදිරිපත් කිරීමට සැලසුම් කර තිබේ.  පක්ෂ නායක අනුර කුමාර දිසානායක මහතා විසින් පෞද්ගලික මන්ත්‍රී යෝජනාවක් ලෙස මෙම කෙටුම්පත ඉදිරිපත් කිරීමට සැලසුම් කර ඇත.

 

anura

අර්ජුන් මහේන්ද්‍රන් සිංගප්පූරුවේ ඉන්නවා – ඉන්ටපෝල් දැනුම් දෙයි

හිටපු මහ බැංකු අධිපති අර්ජුන් මහේන්ද්‍රන් මහතා සිංගප්පූරුවේ සිටින බව ජාත්‍යන්තර පොලීසියේ සිංගප්පූරු ශාඛාව රහස් පොලීසිය වෙත දන්වා ඇති බව  නීතිපති දෙපාර්තමේනතුව විසින්  කොටුව මහේස්ත්‍රාත් අධිකරණයට කරුණු වාර්තා කොට තිබේ.

මහ බැංකු බැඳුම්කර වංචාවට අදාළව අර්ජුන් මහේනද්‍රන් මහතාට එරෙහිව නඩු පවරා ඇති අතර ඒ අනුව ඔහු අධිකරණයේ පෙනී සිටිය යුතු වුවද එය මගහැර   සිංගප්පූරුවේ සැඟව සිටින බවට තොරතුරු වාර්තා විය.

 

arju

 

SLFP 16යේ ඉල්ලීමට කථානායකගේ ප්‍රතිචාර නැතිලු

ආණ්ඩුවෙන් ඉවත්වූ ශ්‍රීලනිප මන්ත්‍රිවරුන් 16 දෙනාට ස්ථාවර කාරක සභා නියෝජනය කිරීමට අවස්ථාව ලබාදෙන්නැයි සුසිල් ප්‍රේම්ජයන්ත මහතා පාර්ලිමේන්තුවේදී අද (24දා) පැවසීය.

මේ සම්බන්ධව කථානායක කරු ජයසූරිය මහතාගෙන් ලිඛිතව ඉල්ලා තිබෙන බවත්,මේ දක්වා එයට යහපත් ප්‍රතිචාරයක් ලැබී නැති බවත් මන්ත්‍රිවරයා සඳහන් කළේය.

Karu-Jayasuriya-

නිට්ටඹුවේ වෙඩි තැබීමකින් මවක් ජීවිතක්ෂයට

යතුරුපැදියකින් ගමන් කරමින් සිටි  මවකට සහ ඇයගේ පුතාට නිට්ටඹුව හත්වඩුන්න ප්‍රදේශයේදී යතුරුපැදියකින් පැමිණි පුද්ගලයන් දෙදෙනෙකු වෙඩි තබා පලා ගොස් ඇති අතර එම වේඩි ප්‍රහාරයෙන් මව ජීවිතක්ෂයට පත්ව ඇති   බව පොලීසිය පවසයි.

මෙසේ වෙඩි ප්‍රහාරයකට‍ ලක්ව ඇතතේ දුමුන්නේගෙදර කල්එළිය පදිංචි රාමනායක පතිරණලාගේ විනීතා පද්මිණි  නැමැති 53 හැවිරිදි  මව සහ ඇයගේ 26 හැවිරිදි පුත්‍රයායි.

 තුවාලකරුවන්  වතුපිටිවල රෝහලට ඇතුළත් කර ඇති අතර ඒ වනවිටත්  මව මියගොස්ව සිටි බවත්  ඇයගේ පුත්‍රයා ප්‍රතිකාර ලබමින් සිටින බවත් සැකකරුවන් සොයා මෙහෙයුමක් දියක් කොට ඇති බවත්  පොලීසිය පැවසීය.

 

wwwwww