69th Emmy Awards-2017

69-emmys-generic-key-900x600

පසුගිය වසරේ ජුනි මස 01 වැනිදා සිට මේ වසරේ මැයි මස 31 වැනිදා දක්වා වූ කාල වකවානුව අතරතුර විකාශය වූ හොඳම ඇමෙරිකානු රූපවාහිනී කලා කෘති වෙනුවෙන් සම්මාන පිදෙන 69 වැනි Emmy Awards සම්මාන උලෙළ පසුගිය 17 වැනිදා නිමාවට පත් විය. ලොස් ඇන්ජලීස් නගරයේ මයික්‍රොසොෆ්ට් රඟහලේදී පැවති මෙම සම්මාන උලෙළ මෙහෙයවනු ලැබුවේ ජනප්‍රිය හොලිවුඩ් හාස්‍ය නළුවකු වන ස්ටීවන් කූල්බර්ට් විසිනි.
ඒ අනුව මෙවර සම්මාන උලෙළේදී වැඩිම සම්මාන ප්‍රමාණයකට නිර්දේශ වීමට HBO නාළිකාවේ විකාශය වූ විද්‍යාත්මක ශානරයේ ටෙලිනාට්‍යයක් වූ West world සහ NBC නාළිකාවේ විකාශය වූ හාස්‍ය ටෙලිනාට්‍යයක් වූ Saturday Night Live සමත් වූ අතර, ඒ සම්මාන 22 බැගින් නිර්දේශ වෙමිනි.

එසේම මෙවර වෙබ් කතා මාලාවක් ලෙසින් ලෙසින් විකාශය වූ The Handmaid’s Tale මාලා නාටකය පළමු වතාවට හොඳම නාට්‍යමය මාලා නාටකයට හිමි සම්මානය දිනාගත් අතර, එය අධ්‍යක්ෂණය කළේ රීඩ් මොරානෝය. එහි රඟපෑ එළිසබෙත් මොස් හොඳම නාට්‍යමය නිළිය ලෙසින්ද, ආරාධිත රූපණ ශිල්පිනිය ලෙසින් ඇලෙක්සිස් බ්ලෙඩල්ද සම්මාන දිනාගත් අතර, හොඳම නාට්‍යමය මාලා නාටක තිර රචක සම්මානය හිමිවූයේද මෙයටයි.

මෙහිදී හොඳම රූපවාහිනී චිත්‍රපටයට හිමි සම්මානය දිනාගත්තේ %Black Mirror^ චිත්‍රපටයයි. එසේම හොඳම රූපවාහිනී චිත්‍රපට/සීමිත කොටස් සහිත නාටක අංශයෙන් හොඳම නළුවාට හිමි සම්මානය දිනාගත්තේ රිස් අහ්මඩ් වීමද කැපී පෙනේ. මුස්ලිම් ජාතික ඔහුට මෙම සම්මානය හිමි වූයේ HBO නාළිකාවේ විකාශය වූ The Night Of වෙනුවෙනි. මීට තරග කළ සෙසු නම් අතර විශිෂ්ට සිනමා නළුවන් වූ බෙනඩික් කම්බර්බැච්, රොබට් ඩි නිරෝ, ජෙෆ්රි රෂ් වැනි විශිෂ්ටයන් සිටීමද ඔවුන් පරයා මෙම සම්මාන ලබා ගැනීමද කැපී පෙනේ. මෙහිදී එම අංශයේ හොඳම නිළිය සම්මානය හිමි වූයේ එම නාළිකාවේම විකාශය වූ Big Little Lies හි රඟපෑ නිකොල් කිඩ්මන්ටය.

CnybnyE005022_20170918_NYMFN0A001_11n

මෙවර Atlanta හාස්‍ය මාලා නාටකය වෙනුවෙන් හොඳම අධ්‍යක්ෂවරයා ලෙසින් සම්මාන දිනූ ඩොනල්ඩ් ග්ලෝවර්ද බොහෝදෙනාගේ අවධානයට ලක් වූ අතර, ඒ ඔහු කළුජාතික ඇමෙරිකානු අධ්‍යක්ෂවරයකු වීම හේතුවෙනි. මීට තරග කළ සෙසු මාලා නාටක වූයේ ජැමී බැබිට්ගේ %Silicon Valley (Episode: Intellectual Property)^, මයික් ජජ්ගේ %Silicon Valley (Episode: “Server Error”)^, මෝගන් සැකට්ගේ Veep(Episode: Blurb) සහ ඩේවිඩ් මැන්ඩෙල්ගේ Veep (Episode: Ground breaking) යන හාස්‍ය මාලා නාටකයි. එහෙත් හොඳම හාස්‍ය මාලා නාටකය වූයේ HBO නාළිකාවේ විකාශය වූ Veepය. මෙවර හොඳම සංගීතමය රියලිටි වැඩසටහන බවට පත්වූයේ NBC නාළිකාවේ විකාශය වූ The Voice ය. 

stephen-colbert_3d0c43aa-9c0c-11e7-a38e-8ee9fe2ac8e7

මෙවර හොඳම හාස්‍ය මාලා නාටක නිළිය බවට පත්වූයේ ජූලියා ලොයිස් -ඩ්‍රේෆස්ය. ඒ HBO නාළිකාවේ විකාශය වූ Veep (Episode: Ground breaking) වෙනුවෙනි. මෙවර හොඳම නාට්‍යමය මාලා නාටක නළුවා වූයේ ස්ටර්ලින් කේ. බ්‍රවුන්ය. ඒ NBC නාළිකාවේ විකාශය වූ This Is Us (Episode: Memphis) වෙනුවෙනි. එහෙත් ඊට තරග කළ අය අතර, අන්තෝනි හොප්කින්ස්, කෙවින් ස්පේසි වැනි දක්ෂ සිනමා නළුවන්ද සිටීම සුවිශේෂී විශේෂත්වයකි.

මෙවර සම්මාන උලෙළේදී වැඩිම සම්මාන ප්‍රමාණයකට නිර්දේශ වූයේ HBO නාළිකාව වන අතර, එය සටහන් වන්නේ 46ක් ලෙසිනි. CBS නාළිකාව හරහා විකාශය වූ මෙම සම්මාන උලෙළ මිලියන 11.4ක ප්‍රමාණයක් නරඹා ඇති අතර, වත්මන් ජනාධිපති ඩොනල්ඩ් ට්‍රම්ප් විවේචනය කරමින් රූපවාහිනී ක්ෂේත්‍රය පිළිබඳ කතා පැවැත්වීමද කැපී පෙනේ.

393847-thumb-630x330 2427773_1280x720 a7b8cce2e32cc257_stephen-colbert-emmys-1920 ad_258005429 awards-emmys c11426f4c2a7713dc0eb0f4592eb2883 download

‍ඔබගේ පියයුරු පිළිබඳව දැනුම්වත් වන්න

අද වනවිට ලංකාවේ වසරකට පිළිකා රෝගයට ගොදුරු වන සංඛ්‍යාව 17000ක් පමණ වන අතර, ඉන් 2500ක්ම පියයුරු පිළිකා රෝගීන් වේ. අද වනවිට ලංකාවේ කාන්තාවන් අතර බහුලවම වාර්තා වන පිළිකාව වනුයේ පියයුරු පිළිකාවයි. එමෙන්ම පසුගිය වසර 25ක කාලය තුළ අලුතෙන් හඳුනාගත් පියයුරු පිළිකා රෝගීන්ගේ සංඛ්‍යාව ක්‍රම ක්‍රමයෙන් වැඩි වී තිබේ.

පියයුරු පිළිකාව මුල් අවස්ථාවේ හඳුනාගෙන ප්‍රතිකාර සඳහා යොමු වීමෙන් සම්පූර්ණයෙන්ම පියයුරම ඉවත් නොකර වඩාත් සරල ශල්‍යකර්ම ක්‍රම මගින් පිළිකාව පමණක් ඉවත් කර වඩාත් ගුණාත්මක ජීවිතයක් ගතකිරීමේ හැකියාව තිබේ. නමුත් අද බොහෝ දෙනෙක් ප්‍රතිකාර සඳහා යොමු වන්නේ රෝගය උත්සන්න වූ විටදීය. 

එමෙන්ම යම් සැක සහිත බවක් ඇති වුවහොත් පිළිකාවක්ද යන බිය නිසාම බොහෝ දෙනෙකු මේ පරීක්ෂාව කිරීමට මැළිකමක් දක්වයි. ඒ හේතුවෙන් පිළිකා රෝගී තත්වය උත්සන්නම අවස්ථාව දක්වා පැතිර ගිය අවස්ථාවේදී ප්‍රතිකාර සඳහා යොමු වේ. එවිට පිළිකාව අනෙකුත් ඉන්ද්‍රියන් කරාද පැතිරී ගොස් තිබීමට පුළුවන. 

Abstract-logo-illustration

'ඔබගේ පියයුරු පිළිබඳ දැනුම්වත් වන්න' යන මැයෙන් 'ලෝක පියයුරු පිළිකා පිළිබඳ දැනුවත් කිරීමේ මාසය' වෙනුවෙන් පසුගියදා මාධ්‍ය සාකච්ඡාවක් පැවැත්විණි.
කාන්තාවන් තමන්ගේ පියයුරුවල යම් වෙනසක් නොපමාව හඳුනාගෙන වෛද්‍ය උපදෙස් කරා යොමු කිරීම මේ සංකල්පයේ අපේක්ෂාවයි. එමෙන්ම සෑම කාන්තාවක්ම තමන්ගේ පියයුරු වල සාමාන්‍ය තත්ත්වය කුමක්ද යන්න මනා අවබෝධයකින් සිටීමත්, සාමාන්‍ය තත්ත්වය වෙනස් වූ ඕනෑම අවස්ථාවක ඉක්මනින් හඳුනාගෙන වෛද්‍ය උපදෙස් සඳහා යොමු වීමට අවශ්‍ය දැනුම ලබාදීමත් මෙම සංකල්පයේ අරමුණ වේ. 

මෙම මාධ්‍ය සාකච්ඡාවේදී දැක්වූ අදහස් කාන්තා ඔබට වඩා වැදගත් වේ යැයි හැඟුණු බැවින් පියයුරු පිළිකාවක් හඳුනා ගන්නා ආකාරය පිළිබඳ ඔබව දැනුවත් කිරීමට 'අද' අපි තීරණය කළෙමු.

පියයුරු පිළිකාවක් සෑදීමේ අවදානම වැඩි කාටද?

 පියයුරු පිළිකා සඳහා පවුල් ඉතිහාසයක් ඇති කාන්තාවන්

ඩිම්බකෝෂ පිළිකා සඳහා පවුල් ඉතිහාසයක් ඇති කාන්තාවන්

පියයුරේ අනෙකුත් රෝග පිළිබඳ පෙර ඉතිහාසයක් ඇති කාන්තාවන්

ආර්ථව චක්‍රය වැඩි වාර ගණනකට භාජනය වූ කාන්තාවන්

අවුරුදු 11ට පෙර වැඩිවියට පත්වූ කාන්තාවන්

අවුරුදු 55ට පසුව වුවත් ආර්තථවය නතර නොවු කාන්තාවන්

දරුවන් නොමැති කාන්තාවන්

මවුකිරි ලබා නොදුන් කාන්තාවන්

පළමු දරු උපත අවුරුදු 35ට පසු සිදු වූ කාන්තාවන්

හෝමෝන ප්‍රතිස්ථාපන ප්‍රතිකාර දිගු කාලීනව ලබා ගන්නා කාන්තාවන්

මීට අමතරව තරබාරු සහ මත්ද්‍රව්‍ය ගන්නා, ශාරීරික ව්‍යායම් අඩු අයටද පියයුරු පිළිකා සෑදීමේ ප්‍රවණතාවක් ඇත.
මෙවැනි තත්ත්වයන් ඇති කාන්තාවන් අනිවාර්යයෙන්ම තමන්ගේ පියයුරු සම්බන්ධව සැලකිළිමත් විය යුතුය.

ඔබගේ පියයුරු පිළිබඳව දැනුම්වත් වීමේදී ඔබේ පියයුරුවල සාමාන්‍ය ලක්ෂණ හඳුනාගත යුතුය.

breast-cancer-screening-risks-and-benefits-what-you-need-to-know-about-mammograms

පියයුරුවල සාමාන්‍ය ලක්ෂණ

බොහෝ කාන්තාවන්ගේ පියයුරු දෙකම එක සමාන නැත.

මාස් ශුද්ධිය සිදුවන කාන්තාවන්ගේ පියයුරු හෝමෝනවල බලපෑම නිසා විවිධ වෙනස්කම්වලට භාජනය වේ.

 මාස් ශුද්ධියට පෙර පියයුරුවල ඇතිවන ගැටිති ස්වභාවය, වේදනාව වැනි ලක්ෂණ සාමාන්‍ය වේ.

 මාස් ශුද්ධිය නැවතුණු කාන්තාවන්ගේ පියයුරු මෘදු, සැහැල්ලු තත්ත්වයට පත්වේ.

පියයුරුවල දැකිය හැකි අසාමාන්‍යතා

පියයුරුවල මෑතකදී ඇති වූ හැඩයේ වෙනස්වීමක් හෝ පැහැදිලි අසමමිතික බවක්

පියයුරුවල ගැටිත්තක් හෝ ඉදිමීමක්

පියයුරෙහි වළගැසීමක්

 සමේ වෙනස් වීමක් 
උදා- දොඩම් ලෙල්ලක මතුපිට වැනි ස්වභාවයක්, සම මතුපිට දදයක්/ තුවාලයක්

තනපුඩුවේ ගිලී යාමක් හෝ අසමමිතික බවක්

තනපුඩුවේ කිරි නොවන වෙනත් ශ්‍රාවයක් පිටවීමක්

මෙවැනි ලක්ෂණ ඔබටත් පැවතුණහොත් අනිවාර්යයෙන්ම පරීක්ෂාවක් සඳහා ඔබ යොමු විය යුතුය.

පියයුරු අසාමාන්‍යතාවන් හඳුනා ගැනීමට නම් සෑම කාන්තාවක්ම තමාගේ පියයුරුවල සාමාන්‍ය ස්වභාවය කුමක්දැයි හඳුනාගත යුතුය. මේ සඳහා ස්වයං පියයුරු පරීක්ෂාව වැදගත් වේ. 

ස්වයං පියයුරු පරීක්ෂාව කොටස් දෙකකින් යුක්තය

 පියයුරු නිරීක්ෂණය

පියයුරු අතින් අල්ලා පරීක්ෂා කිරීම

පියයුරු පරීක්ෂාව කළ යුත්තේ කවදාද?

අවුරුදු 20ට වැඩි සෑම කාන්තාවක්ම මසකට වරක් මෙම පරීක්ෂාව කළ යුතුය.
මාස් ශුද්ධිය සිදුවන කාන්තාවන්, මාස් ශුද්ධිය අවසාන වී සතියකට පසුව පියයුරු පරීක්ෂාව කළ යුතුය.
 මාස් ශුද්ධිය නතර වූ කාන්තාවන් සෑම මසකම නිශ්චිත දිනයක් පියයුරු පරීක්ෂාව සඳහා යොදාගත යුතුය.

පියයුරු නිරීක්ෂණය කිරීම

මේ සඳහා ආවරණය වූ ස්ථානයක් (උදා- කාමරයක්) තොරා ගන්න.
ඔබගේ උඩුකය සම්පූර්ණයෙන්ම නිරාවරණය කර කැඩපතක් ඉදිරියේ සිට ගන්න
අසාමාන්‍යතා ඇතිදැයි පරීක්ෂා කර බලන්න.

පියයුරු අතින් අල්ලා පරීක්ෂා කිරීම

ඇඳක හෝ ඝන මතුපිටක වැතිර පියයුරු පරීක්ෂා කළ හැක. පරීක්ෂා කරන පියයුර ඇති පැත්තේ උරහිසට යටින් ඝන රෙද්දක් නවා තබා හෝ පැතලි කොට්ටයක් තබා , පරීක්ෂා කරන පැත්තේ අත ඉහළට ඔසවා අත්ල මත හිස තබා අනෙක් අතින් පරීක්ෂා කරන්න.

පියයුරු පරීක්ෂාව කරන්නේ සිටගෙන නම් පරීක්ෂා කරන පියයුරු ඇති පැත්තේ අත ඉහළට ඔසවා අනෙක් අතින් පියයුර පරීක්ෂා කරන්න.

අතේ ඇඟිලි එක්කොට ඇඟිලිවල ඇතුළු පැත්තෙන් පියයුරෙහි ගැටිති හෝ සමට යටින් ඝණ වීමක්, එහාට මෙහාට නොයන තද ගතියක් හෝ ඇතිදැයි පරීක්ෂා කරන්න.

වම් අතින් දකුණු පියයුර සහ දකුණු කිහිල්ලද, දකුණු අතින් වම් පියයුර සහ වම් කිහිල්ලද පරීක්ෂා කරන්න.

පියයුරෙහි සෑම කොටසක්ම ආවරණය වන පරිදි පිටත සිට ඔරලෝසුවේ කටු යන අතට අඛණ්ඩව හසුරවමින් පියයුරෙහි ගැටිත්තක්, වේදනාවක් හෝ ඝණවීමක් ඇතිදැයි පරීක්ෂා කරන්න.

පියයුරු පරීක්ෂා කිරීමේදී එකිනෙකට වෙනස් තෙරපීමක් යොදමින් පහත පරිදි පරීක්ෂා කළ යුතුය.

මහපට ඇඟිල්ල හා දබරඟිල්ලෙන් තනපුඩුව වටා ඇති තද පැහැති කොටස මිරිකා තනපුඩුවෙන් අසාමාන්‍ය ශ්‍රාවයක් පිටවන්නේ දැයි බලන්න.

පියයුරුවල අසාමාන්‍ය තත්ත්වයක් හඳුනාගත්තොත් ඔබ යා යුත්තේ,

ඔබේ ප්‍රදේශයේ සුවනාරී සායනය වෙත
ඔබේ රෝහලේ සුවදිවි මධ්‍යස්ථානය වෙත
ඔබේ පවුලේ වෛද්‍යවරයා වෙත
රජයේ හෝ පෞද්ගලික රෝහලක් වෙත
පිළිකා කලින් හඳුනා ගැනීමේ ජාතික සායනය වෙත

ඔබ මේ කරුණු සම්බන්ධව සැලකිළිමත් වී මේ ලක්ෂණ ඔබට ඇත්නම් ප්‍රතිකාර සඳහා යොමු වන්න. එවිට ඔබට මෙය පැතිරීමට පෙර සුව කරගත හැක.

අගමැතිගෙන් විශේෂ ප්‍රකාශයක්

වත්මන් ආණ්ඩුව විසින් ගෙන ඒමට නියමිත නව ආණ්ඩුක්‍රම ව්‍යවස්ථාවට පදනම බෞද්ධ ප්‍රතිපති හා මූලධර්ම බවත් ආණ්ඩුක්‍රම ව්‍යවස්ථාවෙන් බුද්ධාගමට ඇති ප්‍රමුඛස්ථානය ආරක්ෂා කර බවත් අග්‍රාමාත්‍ය රනිල් වික්‍රමසිංහ මහතා පැවැසීය.

නව ආණ්ඩුක්‍රම ව්‍යවස්ථාව සම්බන්ධයෙන් පාර්ලිමේන්තුවේදි අද (21දා) විශේෂ ප්‍රකාශයක් කරමින් අග්‍රාමාත්‍යවරයා මේ බව සඳහන් කළේය.

“අපි අග්‍රගන්‍ය ප්‍රෞඩ බෞද්ධ ජාතියක්. අපේ ආණ්ඩුක්‍රම ව්‍යවස්ථාවෙන් මේ තත්ත්වය සුරැකෙනවා. ඒ වාගේම බුද්ධාගමට ඇති ප්‍රමුඛස්ථානය අපේ සමාජය තුළ ආරක්‍ෂා කෙරෙනවා. ඇත්ත වශයෙන්ම අපේ නව ව්‍යවස්ථාවට පදනම් වන්නේ බෞද්ධ ප්‍රතිපත්ති හා මූලධර්මයි. බුදුරජාණන් වහන්සේ ඉගැන්වූයේ වෛරයෙන් වෛරය නොසන්සිදෙන බවයි. අවෛරයෙන් වෛරය ජයගතයුතු බවයි. අද අපි ඉටු කර ගන්න බලාපොරොත්තු වන අරමුණෙහි හරය එයයි. ඒ වගේම ඉදිරියේදීත් අපේ ජාතියට මඟපෙන්වීම සඳහා මේ බෞද්ධ ඉගැන්වීම් කෙරෙහි අප විශ්වාසය තබනවා.” යැයි ඔහු සඳහන් කරයි.  

මේ හරහා බලය බෙදීම, රාජ්‍ය සේවය ප්‍රතිව්‍යුහගත කිරීම ආදි කරුණු පිළිබඳව අවධානය යොමුකරන බවත් ඔහු පැවැසීය.

“මේ වාර්තාවෙන් අපේ රට මුහුණ දෙන බරපතළ අභියෝග කිහිපයක් ආමන්ත්‍රණය කර තිබෙනවා. වඩාත් කාර්යක්‍ෂම හා ඵලදායී කරලීම සඳහා රජය ප්‍රතිව්‍යූහගත කිරීමේ අවශ්‍යතාව අප හඳුනාගෙන තිබෙනවා. අපේ ආර්ථික ප්‍රතිසංස්කරණ හේතුවෙන්, දැඩි ලෙස මධ්‍යගත වූ පාලන ව්‍යූහය වෙනුවට ප්‍රාදේශීය කලාපවල අවශ්‍යතා ආමන්ත්‍රණය කළ හැකි ක්‍රමවේදයක් නිර්මාණය වෙනවා. බලය බෙදීම ප්‍රමුඛතාවක් වන්නේ ඒ නිසයි.

උතුරේ සිට දකුණ දක්වා සියළු පළාත්, බලය බෙදීමට සහය දක්වා තිබෙනවා. ඇත්ත වශයෙන්ම දකුණේ පළාත් සභාවල ප්‍රධාන අමාත්‍යවරු මෙහි ප්‍රමුඛ කාර්යභාරයක් ඉටු කළා. අපේ විවිධාකාර අවශ්‍යතා කාර්යක්‍ෂමව ආමන්ත්‍රණය කිරීම සඳහා අවශ්‍ය බලය බෙදීමේ මූලධර්ම සකස් කළේ ඔවුන්ගේ නිර්දේශ පදනම් කර ගෙනයි. රාජ්‍යයේ ස්වභාවය ආරක්‍ෂා කර ගන්නා අතරම පළාත් සභා වෙත වැඩි බලයක් බෙදාහැරීමෙන් පළාත් මට්ටමේ සංවර්ධනය ක්‍රියාත්මක කරවීම පිණිස රාජ්‍ය පාලනයේ දෙවන තලය නිර්මාණය කිරීම පිළිබඳව වැඩි අවධානයක් යොමු කරන්න අපට හැකි වනවා.

අතුරු වාර්තාවේ ඇතුළත් යෝජනාවල කොටසක් වශයෙන් පළාත් පාලන ආයතන රාජ්‍ය පාලනයේ  තුන්වන තලය වශයෙන් හඳුනාගනු ලබනවා. එමගින් විවිධ ප්‍රජාවන්හි විශේෂිත අවශ්‍යතා ආමන්ත්‍රණය කිරීමට ඉලක්ක ගත වියදම් හා විශේෂයෙන් සැකසූ රාජ්‍ය සේවා වඩාත් හොදින් සැපයීම පහසු කිරීමට බලාපොරොත්තු වනවා. මෙයටත්, එසේම මේ වාර්තාවේ ඇතුළත් අනෙකුත් යෝජනා බොහෝමයකටත් ආණ්ඩු පක්‍ෂයේත් විපක්‍ෂයේත් පුළුල් සහයෝගයක් ලැබීම මට සතුටක්.

කෙසේ වෙතත් විධායකයේ සහ ජනාධිපතිවරයාගේ කාර්ය භාරය නිර්වචනය කිරීමේ කටයුතුවල තවත් නිරාකරණය කර ගත යුතු ක්ෂේත්‍ර තිබෙනවා. මේ සම්බන්ධයෙන් පාර්ලිමේන්තුවේත්, ජනතාව අතරත් පුළුල් සංවාදයක් අවශ්‍යයි. නමුත් වැඩි කල් නොගොස් ඒ සම්බන්ධයෙන් පොදු එකඟතාවයකට පැමිණෙන්නට හැකි බව අපට විශ්වාසයි.” යැයිද ඔහු වැඩිදුරටත් පැවැසීය.

 

ආණ්ඩුක්‍රම ව්‍යවස්ථාව ගැන අතුරු වාර්තාව පාර්ලිමේන්තුවට

ආණ්ඩුක්‍රම ව්‍යවස්ථා මෙහෙයුම් කමිටුවේ අතුරු වාර්තාව අද (21දා) පාර්ලිමේන්තුවේ සභාගත කිරීමට අග්‍රාමාත්‍ය රනිල් වික්‍රමසිංහ මහතා කටයුතු කළේය.

ආණ්ඩුක්‍රම ව්‍යවස්ථා මණ්ඩලයේ සභාපති කතානායක කරු ජයසූරිය මහතාගේ ප්‍රධානත්වයෙන් එම කමිටුව රැස්වූ අවස්ථාවේදී එය සභාගත කෙරිණි.

මෙම වාර්තාවේ කමිටු සාමාජික යෝජනා ඇතුළත් වෙයි. අතුරු වාර්තාව ඉදිරිපත් කරමින් අග්‍රාමාත්‍ය රනිල් වික්‍රමසිංහ මහතා පාර්ලිමේන්තුවට විශේෂ ප්‍රකාශයක්ද ඉදිරිපත් කළේය. 

‘රෝහින්ග්‍යා අනාථයන් ලංකාවට බාරගැනීමට තීරණයක් නෑ’

මියන්මාරයේ රෝහින්ග්‍යා සරණාගතයන් ලංකාවට බාරගැනීමට තීරණයක් නැතැයි මහා නගර හා බස්නාහිර සංවර්ධන අමාත්‍ය පාඨලී චම්පික රණවක මහතා කියා සිටියි. ඔහු මෙම අදහස් පළ කළේ දෙස් විදෙස්හි දේශපාලන හා සමාජීය කාරණා විශ්ලේෂණය කරමින් තම ෆේස්බුක් පිටුවට අදහස් එක් කරමිනි.


එහිදී වැඩිදුරටත් අදහස් දක්වන අමාත්‍යවරයා මෙලෙස සිය අදහස් ගොනු කළේය.

මියන්මාරයේ රෝහින්ග්‍යා අනාථයන් දසදහස් ගණනක් ශ්‍රී ලංකාවට බාරගැනීමට ශ්‍රී ලංකා ආණ්ඩුව තීරණය කර ඇති බවට යම් යම් ප්‍රවෘත්ති විවිධ මාධ්‍ය හරහා ප්‍රචාරය වෙමින් පවතිනවා. මේ නිසා රට තුළ කිසියම් ආකාරයක ආතතියක් ඇති වී තිබෙනවා. විශේෂයෙන්ම ඉස්ලාමීය ඇතැම් දේශපාලනික හා ආගමික කණ්ඩායම් රෝහින්ග්‍යා මුස්ලිම්වරුන්ගේ අනාගතය පිළිබඳ යම් යම් උද්ඝෝෂණ කොළඹ නගරයේ දියත් කර තිබෙන අතර, බෞද්ධ පාර්ශ්වයෙනුත් එවැනි උද්ඝෝෂණ සිදු කිරීමට යන බව වාර්තා වෙනවා.
ශ්‍රී ලංකා ආණ්ඩුව හෝ අමාත්‍ය මණ්ඩලය රෝහින්ග්‍යා අනාථයන් ශ්‍රී ලංකාවට බාර ගැනීම සඳහා කිසිදු ආකාරයක පොරොන්දුවක් හෝ කිසිදු උත්සාහයක් දරා නැහැ. ඒ වගේම කාලයකට පෙර ඇති වූ සිදුවීමක දී අපේ නාවික හමුදාව විසින් මුහුදේ අතරමංව සිටි රෝහින්ග්‍යා අනාථයන් කිහිප ගොල්ලක් බේරාගනු ලැබුවා. පසුව ඔවුන් මියන්මාරයට පිටත් කර හරිනු ලැබුවා. ඒ හැරෙන්නට පසුගිය කාලය තුළ මියන්මාර රෝහින්ග්‍යා අනාථයන් ශ්‍රී ලංකාවට පැමිණ නැහැ. ඒ අනුව මෙයින් පෙනී යන්නේ කිසියම් පිරිසක් මේ පිළිබඳ රට තුළ නොසන්සුන්තාවක් ඇති කරගැනීම සඳහා සංවිධානාත්මක ව්‍යාජ ප්‍රචාරයක් ගෙන යමින් තිබෙන බවයි.

71-voluntary-displaced-Myanmar-people-back-home

රෝහින්ග්‍යා හි සිදුවන්නේ කුමක්ද? එය ඉතාම වැදගත් ප්‍රශ්නයක්. එම ප්‍රාන්තයේ බුරුමයට, එහෙම නැත්නම් මියන්මාරයට අයත් එම ප්‍රාන්තයේ මුස්ලිම් ජනතාව සියදහස් ගණනින් අසල්වැසි රටවලට පලා යමින් තිබෙන බව වාර්තා වෙනවා. දැනටමත් බංග්ලාදේශය එවැනි අනාථයන් හාරලක්‍ෂයකට ආසන්න පිරිසක් බාරගත් බව ප්‍රකාශ කොට තිබෙනවා. ඒ වගේම ඉන්දියාව බලා පලාගිය හතළිස්දහසක පිරිසක් බාරගැනීම ඉන්දියාව ප්‍රතික්ෂේප කර තිබෙනවා. ඒ අනුව මෙය කිසියම් ආකාරයකට මානව අපරාධයක් බව ඉන්දියාවට එරෙහිව එක්සත් ජාතීන්ගේ මානව හිමිකම් මණ්ඩලයේ ප්‍රධානියා චෝදනාවක් ගොනු කළා. කෙසේ වෙතත් ඉන්දියාව තම ස්ථාවරය වෙනස් කළේ නැහැ. ඒ වගේම බංග්ලාදේශයත් දැන් කිසියම් ආකාරයක සහනශීලී ප්‍රතිපත්තියක හිටියත් රෝහින්ග්‍යා අනාථයන් පිළිගැනීමට එතරම් සූදානමක් නොමැති බව පැහැදිලියි.

මෑත කාලයේ මේ ගැටලුව ඇතිවීමට ප්‍රධාන හේතුව වූයේ, එම රෝහින්ග්‍යා ප්‍රදේශයේ මුස්ලිම්වරුන් අතරේ අන්තවාදී කණ්ඩායමක් බිහිවෙලා, පොලිස් ස්ථානවලට පහර දෙමින් ස්වයං පාලන ප්‍රදේශයක් ඇති කරලීමට උත්සාහ කිරීමයි. මේ සඳහා සෞදි ආරාබියේ, කටාර් රාජ්‍යයේ හා පාකිස්තානයේ සිට ක්‍රියාත්මක වන ඇතැම් අන්තවාදී, ඉස්ලාමීය මූලධර්මවාදී සුන්නි කල්ලි, කණ්ඩායම් ක්‍රියා කරන බවට චෝදනා නැගුණා. ඉන්දියාව විවෘතවම මේ සම්බන්ධයෙන් සිය විරෝධය පළ කර තිබුණා. කිසියම් හෙයකින් කාෂ්මීරයේ මෙන් මියන්මාරයේ මේ ප්‍රදේශයෙත් ත්‍රස්තවාදී ගැටලුවක් ඇති වුවහොත් එය තමන්ගේ ප්‍රාන්තවලට බලපාන බව වහාම ඉන්දියාවට වැටහී ගිය නිසයි එවැනි තත්ත්වයක් ඇති වුණේ. ඒ වගේම ඉන්දියාවේ ප්‍රාන්ත ගණනාවකම හින්දු, ඉස්ලාමීය, ඒ වගේම බෞද්ධ ඉස්ලාමීය ආතතීන් ඇති වී බරපතළ ප්‍රශ්න මතුවෙමින් තිබෙන බවත් ප්‍රකාශ කළ යුතුයි. ඇත්තටම බුරුමයේ, එහෙම නැත්නම් මියන්මාරයේ ඉතිහාසය දන්නා අයට මෙය එතරම් මවිත වීමට කාරණයක් නෙමෙයි. මියන්මාරය හෙවත් බුරුමය ඓතිහාසික රාජ්‍යයක්. කෙසේ වෙතත් එය විශාල ගෝත්‍ර ගණනාවක්, ඒ වගේම ජනවාර්ගික කණ්ඩායම් ගණනාවක්, භාෂා ගණනාවක් කතා කරන රටක්. එක්තරා ආකාරයක ෆෙඩරල් රටක් එම රට. එම රට මීට වසර 2000කටත් පොරොතුව එක්සේසත් කර රජ පෙළපතක් බවට පත් කරනු ලැබුවා. ඒ අභියාසා රජ පෙළපත බෞද්ධ පදනම මතයි ඇති වුණේ.

29china_600

ශ්‍රී ලංකාවේ අමරපුර හා රාමඤ්ඤ කියන නිකායන් දෙකම ඇතිවුණේ පිළිවෙළින් අමරපුර හා රාමඤ්ඤ රට නමින් මියන්මාරයේ විවිධ ප්‍රාදේශීය රාජ්‍යයන්ගෙන් පැමිණි උපසම්පදා උත්සවයන් සමගයි. ඒ වගේම ථේරවාදී බුද්ධාගම අදහන රටක් හැටියට මියන්මාරයට විශාල ශක්තියක් ථේරවාදී බෞද්ධ ලෝකයේ පවතිනවා. ශ්‍රී ලංකාවත් ථේරවාදී රටක් නිසා ඒ ඓතිහාසික සම්බන්ධය අපත් මියන්මාරයත්, තායිලන්තයත් අතර නිබඳවම පවතිනවා. අභියාසා රජ පෙළපතත් සමග රජවරුන් ගණනාවක් හරහා මියන්මාරය විවිධ ආකාරයේ බලපෑම්වලට නතුවෙමින් කටයුතු වුණා. එක් කලෙක මොංගෝලියානු ආක්‍රමණවලට, තවත් කලෙක චීනයේ බලපෑම්වලට ආදී වශයෙන් පැමිණි මියන්මාරයට මහත් ප්‍රහාරයක් එල්ල කළේ බ්‍රිතාන්‍ය අධිරාජ්‍යය විසින්. බ්‍රිතාන්‍යය දකුණු මියන්මාරයේ, එහෙම නැත්නම් බුරුමයේ කොටස් අත්පත් කරගනු ලැබුවා. ඒ වගේම මියන්මාරය සමග යුද්ධ ගනණාවක් 19 වැනි සියවසේ ඇති වුණා. අවසාන වශයෙන් 1885 දී මුළු මියන්මාරයම අත්පත් කර ගැනීමට බ්‍රිතාන්‍ය අධිරාජ්‍යය සමත් වුණා. එහිදී මියන්මාරයේ සිටි රජතුමා වන තීබෝ අපේ ශ්‍රී වික්‍රම රාජසිංහ රජු මෙන් අත්අඩංගුවට ගෙන ඉන්දියාවට පිටුවහල් කරනු ලැබුවා. එම රජතුමාගේ මුණුපුරන් සහ මී මුණුපුරන් මේ මෑත කාලයේදී මියන්මාරයට පැමිණි බවත් වාර්තා වෙනවා. කෙසේ වෙතත් එතනින් රාජවංශය අවසන් වෙනවා. රාජවංශය අවසන් වෙලා බ්‍රිතාන්‍ය ඉන්දීය සමාගමට මියන්මාරයත් අයිති වුණා. ඉන්දියාවේ සිට තමයි, බ්‍රිටිප් රාජ් කියන සමාගම විසින් එම කලාපය පාලනය කරනු ලැබුවේ.

කෙසේ වෙතත් බ්‍රිතාන්‍යයට අභියෝගයක් එල්ල කරමින් ජපානය මේ කලාපයේ වර්ධනය වෙන්න පටන් ගත්තා. විශේෂයෙන්ම චීනය සමග 1890 ගණන්වල කළ යුද්ධය ජය ගැනීමත්, 1904 දී රුසියාව සමග කළ යුද්ධය ජයගැනීමත්, ඉන්පසුව මැන්චූරියාව සහ කොරියානු ප්‍රදේශවලට ඇතුළු වීමත් නිසා ජපානය අධිරාජ්‍යයක් ලෙස පෙරට එමින් තිබුණා. මේ අවස්ථාවේදී විශාල ප්‍රශ්නයක් මියන්මාර අභ්‍යන්තරයේ දැවෙමින් තිබුණා. ඒ තමයි මියන්මාරයේ ස්වදේශිකයන්ගේ ජනගහනයට අභියෝගයක් එල්ල කරමින්, ඔවුන්ගේ ව්‍යාපාර හා වෘත්තීයවේදීත්වයට අභියෝගයක් එල්ල කරමින් බ්‍රිතාන්‍යයන් විසින් ඉන්දියාවේ සිට විශාල වශයෙන් ඉන්දීය ජාතිකයන් ගෙන ඒම. එය වර්තමාන බංග්ලාදේශ ප්‍රදේශයෙනුත් ගෙන ආවා. ඒ නිසා රෝහින්ග්‍යා ප්‍රශ්නයේ මුල තිබෙන්නේ එක්තරා අතකට මේ බ්‍රිතාන්‍ය පාලන සමය යටතේ ලක්‍ෂ සංඛ්‍යාත ලෙස බුරුමයට ගෙන ආ ඒ මහා ඉන්දීය ජනගඟ නිසයි. එක පැත්තකින් බුරුමයේ අගනගරවල ව්‍යාපාරික තැන්, රැන්ගූන්, මණ්ඩලේ ආදී අගනගරවල ව්‍යාපාරික ස්ථාන ඉන්දීය ජාතීන් අත්පත් කර ගත්තා. ඒ වගේම ප්‍රධාන වරායන් හා සිවිල් සේවාව බොහෝ දුරට ඉන්දීය ජාතීන්ගෙන් පිරී තිබුණා. මියන්මාර ස්වදේශිකයන්ට එම රාජ්‍යයේ තැනක් තිබුණේ නැහැ. ඒ වගේම කම්කරුවන් ලෙසත් අතිවිශාල පිරිසක් ගෙනැවිත් තිබුණා. මේ නිසා එම බ්‍රිතාන්‍ය විරෝධී ජාතික අරගලයේ එක අංගයක් වුණේ ඉන්දියානු විරෝධයයි. ඒ වගේම ඉන්දියාවත්, බංග්ලාදේශයත් එයට අයත්. ඔවුන් රටින් පිටුවහල් විය යුතු යැයි කියන හැඟීම ඒ ඇතුළේ ගැබ් වී තිබුණා.

අවුන් සාන් නම් තරුණ නීතිවේදී ශිෂ්‍යයෙක් මේ විමුක්ති අරගලයට නායකත්වය දුන්නා. ඔහු පසුව ජපානය සමග එක් වී කිසියම් සන්නද්ධ ක්‍රියාදාමයක් අනුගමනය කළා. මේ සන්නද්ධ ක්‍රියාමාර්ගයේ ප්‍රතිඵලය වුණේ මියන්මාරය ජපානයට නතු වීමයි. බ්‍රිතාන්‍යයන් පරාජය කරමින් මියන්මාරය අල්ලාගෙන ගොඩබිමින් යුරෝපය දක්වා ගිය සේද මාවත අල්ලාගන්න ජපානය සමත් වුණා. ඇත්තටම මේ කාලය ඓතිහාසික වශයෙන් තවත් සිදුවීමක් සිදුවුණා. ඒ තමයි ඉන්දීය ජාතික කොංග්‍රසයේ ගාන්ධි අනුගමනය කළ බ්‍රිතාන්‍යයට පක්ෂපාතී ක්‍රියාදාමය හෙළා දකිමින්, එහි ප්‍රධාන චරිතයක් වන සුභාෂ් චන්ද්‍රබෝස් ජපානය සමග එක්වීම. අන්දමන් හා මියන්මාරයේ සිට ඔහු බ්‍රිතාන්‍යයට එරෙහිව සන්නද්ධ සටනක් දියත් කිරීමට නිදහස් ඉන්දීය හමුදාව බිහි කිරීමත් සිදු වුණා.

කෙසේ වෙතත් ඉන්දීය විරෝධී මහා ජාතිවාදී අරගල මැද මියන්මාරයට නිදහස ලැබුණා. අවුන් සාන් එහි ප්‍රධාන අගමැතිවරයා හැටියට පත් වුණා. නමුත් ඔහුට වැඩිකල් ආණ්ඩු කිරීමට හැකිවුණේ නැහැ. ඔහුත්, ඔහුගේ කැබිනට් මණ්ඩලයත් ඝාතනය කරනු ලැබුවා. ඉන්පසු ප්‍රජාතන්ත්‍රවාදීව බලයට පත් වූ ඌනුට වැඩිකල් රට කරන්නට ලැබුණේ නැහැ. එහි තිබූ ජනවාර්ගික ගැටුම් හා නොයෙකුත් ආකාරයේ ගැටලු නිසා මියන්මාරයේ බලය නේවීන් නමැති යුද සෙනෙවියා අතට ගියා. ඒ කාලයේ ඇති වෙමින් තිබූ කොමියුනිස්ට් සමාජවාදී රැල්ල සමග යමින් ඔවුන්ගේ ප්‍රදේශයේ තිබූ කාම්බෝජියාව, ලාඕසය, වියට්නාමය ආදී රටවල් විශේෂයෙන්ම රතු චීනය එය ආදර්ශයට ගනිමින් සමාජවාදය බිහි කිරීම සඳහා කියමින් නේවින් හමුදා බලයක් පිහිටෙව්වා. ඒ වගේම 1962 චීනය හා ඉන්දියාව යුද වැදුණු අවස්ථාවේදී නේවින් එය ප්‍රයෝජනයට අරගෙන හමුදා පාලනයක් පිහිටෙව්වා පමණක් නෙමෙයි, සියලුම ඉන්දියානුවන් එම මියන්මාරයෙන් පිටුවහල් කළා. ලක්‍ෂ සංඛ්‍යාත පිරිසක් මියන්මාරයෙන් පිටුවහල් කළා. ඉන්දියාවට මේ අවස්ථාවේදී මියන්මාරයට එරෙහිව යුද වැදීමට හෝ එය වැළැක්වීමට හැකියාවක් තිබුණේ නැහැ. මොකද චීනයත් සමග ඔවුන් පැටලී සිටි නිසාත් පාකිස්තානය සමග ගැටුම් ඇති කරගෙන සිටි නිසාත්. කෙසේ වෙතත් අතිවිශාල ජනගහනයක් මේ ලෙසම ඉන්දියාව කරා පලවා හරින්න මියන්මාරය ඒ අවස්ථාවේ කටයුතු කළා. ඇත්ත වශයෙන්ම ඔවුන් ඉන්දීය ජාතිකයන්. බ්‍රිතාන්‍යයන්ගේ සමයේ ගෙන ආ පිරිසක්.

ඒ වගේම මේ කාලයේ සිටම මේ අරකන් නමැති මේ ගෝත්‍රය ජීවත්වන ප්‍රදේශයේ, බංගලිදේශය නමින් පසුව ඇති වූ නැගෙනහිර පාකිස්තානයේ ජනතාව පැමිණීම ගැන විශාල විරෝධයක් පැතිරී තිබුණා. ඔවුන් පිටුවහල් කළයුතු බවට විශාල උද්ඝෝෂණයක් රට තුළ ඇති වුණා. කෙසේ වෙතත් 1982 දී හඳුන්වාදෙන ලද නව නීතිරීති අනුව මේ රෝහින්ග්‍යාහි ජීවත්වන පිරිසට මියන්මාරයේ පුරවැසිකමක් නැහැ. මියන්මාරයේ පුරවැසිකමක් ලබාගැනීමට අවශ්‍ය කරන කොන්දේසි ඔවුන් සපුරා තිබුණේ නැහැ. ඒ නිසා ඔවුන් රටක් නැති පිරිසක් හැටියටයි සටහන් වුණේ.

කෙසේ වෙතත් පසුගිය කාලයේ ප්‍රජාතන්ත්‍රවාදී විප්ලවය ජයගැනීමත්, අවුන් සාන්ගේ දියණිය, අවුන් සාන් සුකී බටහිර රටවල ආධාරයෙන් මියන්මාරයේ ප්‍රජාතන්ත්‍රවාදය ඉෂ්ට කිරීමත් නිසා කිසියම් දුරකට මියන්මාරයට බටහිර අවධානය යොමු වුණා. කොටින්ම බරැක් ඔබාමා පවා මියන්මාරයේ සංචාරයක නියැළුණා, පමණක් නොව, මියන්මාරයද විවෘත ආර්ථිකය කරා ගමන් කළා. ඒ පැවතුණු ස්වදේශීය සමාජවාදී ස්වයංපෝෂිත ආර්ථිකය වෙනුවට විවෘත ආර්ථිකය තෝරා ගැනීමත් සමගම මියන්මාරයේ විශාල ආයෝජන පිබිදීමක් ඇති වුණා. ඒ වගේම මියන්මාරය අවට ප්‍රදේශය තෙල් ගවේෂණය ආදිය සිදුකිරීම නිසා තවත් ආකාරයකින් ආර්ථික සමෘද්ධියක් ඇති වෙන්නට පටන් ගත්තා. ඒ වගේම සුපුරුදු පරිදි අසල්වැසි යෝධ චීනයේ බලපෑමත් මියන්මාරයට එල්ල වුණා. චීනය විසින් මියන්මාරය ආර්ථික අතින් අකර්මණ්‍ය කරනවාය කියන චෝදනාවත් සමග මියන්මාරය එක් අවස්ථාවක චීනය දියත් කළ ප්‍රධාන ජලවිදුලි බලාගාරයක් පවා ප්‍රතිෂේප කිරීමට කටයුතු කළා. 

කෙසේ වෙතත් අවුන් සාන් සුකී ක්‍රමයෙන් චීනයේ ආයෝජන කරා ගමන් කරමින් සිටින බව පැහැදිලියි. ඒ නිසා කිසියම් ආකාරයකට අවුන් සාන් සුකීව බලයට ගෙන ඒම සඳහා ක්‍රියාකළ බටහිර රටවල් සහ ඉන්දියානුවන්ගේ මැදිහත්වීම්වලින් සිදුකළ මෙහෙයුම අසාර්ථක වෙමින් අවුන් සාන් සුකී චීනය පැත්ත ගැනීම ගැන කිසියම් ආකාරයක වෛරයක්, කිසියම් ආකාරයක දේශපාලන පළිගැනීමක් සිදුවෙමින් තිබෙන බවත් වාර්තා වෙනවා. ඒ වගේම මියන්මාරය කාලයක් මුළුල්ලේ පාලනය කළ යුද හමුදාව තවමත් එහි පාර්ලිමේන්තුවේ විශාල බලයක් උසුලනවා. එය නැවත වතාවක් සිවිල් පාලනයකට ලබාදීමට ඇති අකමැත්තත් අපට පෙනී යනවා.

rohingys-escping-in-boats

මියන්මාරයේ බෞද්ධයන් පවසන්නේ මේ රෝහින්ග්‍යා මුස්ලිම්වරුන් වර්තමාන බංග්ලාදේශයෙන් පැමිණි විදේශිකයන් පිරිසක් බවයි. ඔවුන් ඉතා ශීඝ්‍රයෙන් සිය ජනගහනය වර්ධනය කරමින් මියන්මාරයේ ජනවාර්ගික සංතුලනය බිඳ දමන බවත්, ශීඝ්‍රයෙන් සෞදි අරාබියේ මුදල්වලින් පල්ලි පිහිටුවමින් ආක්‍රමණික වේශයෙන් හැසිරෙන බවටත් ඔවුන් චෝදනා කරනවා. එය වඩාත් දියුණු තියුණු වුණේ වහබ්වාදී අදහස් ඇති සුන්නි ත්‍රස්තවාදී ක්‍රියාවලියක් රෝහින්ග්‍යාහි ආරම්භ වීමත් සමගයි. මාස කිහිපයකට පෙර පොලිස් ස්ථාන 09කට පහර දුන්නා. ඒ වගේම සති කිහිපයකට පෙර පොලිස් ස්ථාන 43කට පහර දුන්නා. ඊට පස්සේ සිදු වුණා යුද නීතිය පනවලා හමුදාව ඒ ප්‍රදේශවලට යවන්න.

ඒ වගේම මුස්ලිම් රටවල්වලින් කිසියම් ආකාරයක ප්‍රචාරක යුද්ධයක් ගෙනයන බවට අපට පෙනී යනවා. විශේෂයෙන්ම කටාරයේ සිට ක්‍රියාත්මක වන %අල් ජසීරා^ නාළිකාව, %සීඑන්එන්^, %බීබීසී^ වැනි නාළිකා විශාල ප්‍රමුඛතාවක් මෙයට ලබාදෙනවා. ඔවුන් පවසන්නේ ඉතාම දුගී රෝහින්ග්‍යා මුස්ලිම් ජනතාව ඉතාම භයානක ලෙස මියන්මාර ආරක්‍ෂක හමුදා විසින් ඝාතනය කරමින්, සිය ප්‍රදේශවලින් පලවා හරිමින්, ගම්බිම් ගිනිබත් කරමින් තිබෙන බවයි. මේ ජනතාව ඉතාම දුගී ජනතාවක් බව ඇත්ත. ඒ වගේම මේ ජනතාවට මියන්මාර හමුදාවේ ප්‍රහාරවලට මුහුණදීමේ හැකියාවක් නැති බවත් ඇත්ත. ඔවුන් ඉතා විශාල වශයෙන් අනාථ වෙමින් හාරලක්‍ෂයකට අධික පිරිසක් ඒ ප්‍රදේශවලින් පලා ගිහින් තිබෙන බවත් ඇත්ත. නමුත් තවත් සමහර විදේශීය විචාරකයන් පවසන්නේ මේ පිළිබඳ පවතින මේ මහා උද්ඝෝෂණය, ඊජිප්තුවේ කොප්ටික් ක්‍රිස්තියානින් වනසා දැමීමට ඉස්ලාමීය මූලධර්මවාදීන් කටයුතු කළ අවස්ථාවේදී, පල්ලිවල බෝම්බ පුපුරවපු අවස්ථාවේදී, ඒ ජනතාව සමූල ඝාතනය කළ අවස්ථාවේ නැගුණේ නැති බවයි. සිරියාවේ, ලෙබනනයේ, ඉරාකයේ, ඒ වගේම වර්තමාන පාකිස්තානයේ, ඇෆ්ගනිස්තානයේ ජීවත් වූ සුළුතර ක්‍රිස්තියානීන් සහ බෞද්ධයන් ආදිය මරා දමා පලවා හරින විට ඇයි මේ උද්ඝෝෂණය පැන නොනැගුණේ කියා ඇතැමුන් ප්‍රශ්න කරනවා.

විශේෂයෙන්ම බංගලිදේශයේ බෞද්ධ ප්‍රාන්තය වන චිතගුන්හි බෞද්ධයන්ට සිදු කරන අසාධාරණයන් පිළිබඳ ඇයි එක්සත් ජාතීන්ගේ සංවිධානය නිවේදන නිකුත් නොකරන්නේ. 'බීබීසීය', 'සීඑන්එන්' සේවය, 'අල් ජසීරා' සේවය අවධානය යොමු නොකරන්නේ ඇයි කියාත් යම්කිසි ආකාරයකට ප්‍රශ්න කිරීමක් සිදු කෙරෙනවා. ඇත්ත වශයෙන්ම ඉස්ලාමීය මූලධර්මවාදීන් විසින් ඔවුන්ට බලය තිබෙන ප්‍රදේශවල දියත් කර තිබෙන මනුෂ්‍ය සංහාර දෙස බලන විට අප්‍රිකාවේ, ඒ වගේම මැද පෙරදිග හා වෙනත් රටවල සිදු කරගෙන යන ව්‍යසන තත්ත්වයන් දෙස බලන විට මේ මියන්මාරයේ සිදු වෙමින් තිබෙන කාරණය එතරම් ගණන් ගතයුතු කාරණයක් නොවන බවටත් ඇතැම් විචාරකයන් පෙන්වා දෙනවා. කෙසේ වෙතත් එහි මනුෂ්‍ය ඛේදවාචකයක් සිදුවෙමින් තිබෙන බව අප සියලු දෙනාම පිළිගත යුතුයි. ඒ වගේම මෙහි දේශපාලන පසුබිමකුත් අනිවාර්යයෙන්ම තිබෙනවා. ඒ තමයි අවුන් සාන් සුකී චීනය සමග එකතු වීම නිසා චීනයේ %එක මාවතක් – එක තීරයක්^, එහෙම නැත්නම් %වන් බෙල්ට් – වන් රූට්^ කියන එම තේමාව යටතට චිතගොන්හි හා මියන්මාරයේ විශාල වශයෙන් වරායන් ඉදිකරන්නට, අධිවේගී මාර්ග ඉදිකරන්නට ඉඩදීමත්, තෙල් සම්පත ගවේෂණයට ඉඩ දීමත් පිළිබඳ කෝපයෙන් පසුවන බටහිර රටවල්, අවුන් සාන් සුකීට එරෙහිව යම් දේශපාලන ප්‍රහාරකයක් එල්ල කරමින් තිබෙන බවයි. මෙය අපට එක්වරම ප්‍රතික්‍ෂෙප කළ නොහැකියි. දැන් අද වනවිට දකුණු පැසිපික් සාගරයේත්, ඒ වගේම ඉන්දියානු සාගරයේත්, ඇමෙරිකා එක්සත් ජනපදය සහ බටහිර ලෝකයත්, ජපානය ඉන්දියාව ආදී කණ්ඩායමත්, සෞදි ආරබිය එක පැත්තකටත්, අනෙක් පැත්තට චීනය, පකිස්තානය හා රුසියාවේත් සහාය ලබා ගනිමින් ගැටුමක් ඇති වී තිබෙන බවයි. වර්තමාන උතුරු කොරියාවේ ඇතිවෙමින් තිබෙන සිදුවීමත් එහිම කොටසක් බව පැහැදිලියි.

කෙසේ වෙතත් ඉතාම කනගාටුදායක දෙය නම් මේ රෝහින්ග්‍යා අරගලය ඉස්ලාමීය මූලධර්මවාදීන් හා අනෙකුත් ලෝක ජනතාව අතර කෙරෙන අරගලයක් වීමත්, ඒ වගේම එයට දැන් ලෝක බලවතුන්ගේ සීතල යුද්ධය ඇතුළු වීමත්ය. මෙයින් අවසාන වශයෙන් බැට කන්නේ ඒ දුගී රෝහින්ග්‍යා ජනතාවයි. ඒ නිසා ඒ රොහින්ග්‍යා ජනතාවගේ ඛේදවාචකය ජාත්‍යන්තරකරණය වීමට ඉඩ නොදී, එය මැදිහත්ව විසඳීම සඳහා මැදිහත් ක්‍රියාදාමිකයෙකු මිස අරාබි සල්ලිවලින් රෝහින්ග්‍යා මුස්ලිම්වරුන්ට අවි ලබාදීම හෝ ප්‍රචාරක යුද්ධයක් මගින් අවුන් සාන් සුකී කොටු කිරීම හෝ ඒ වගේම නැවත වතාවක් මියන්මාරයේ හමුදා පාලනයක් එන තැනට වැඩ කටයුතු සැකසීම හෝ සිදු නොකොට, ඉතාම උපේක්‍ෂා සහගතව මේ ගැන බැලිය යුතුයි. විශේෂයෙන්ම ශ්‍රී ලංකාවේ මුස්ලිම්වරුත්, ශ්‍රී ලංකාවේ බෞද්ධයනුත් මේ පිළිබඳ උපේක්‍ෂාවෙන් බැලිය යුතුයි. මානුෂීය ගැටලුව ගැන එක් ආකාරයකටත්, අන්තවාදය හා ජාත්‍යන්තර දේශපාලනය ගැන තවත් ආකාරයකටත් අවබෝධ කරගනිමින් අප සියලු දෙනා කටයුතු කළයුතු වෙනවා."

දස හැවිරිදි දැරිය දූෂණය කළ දෙවැනි මාමාත් දැලේ

ඉන්දියාවේ දූෂණයට ලක්වූ වයස අවුරුදු 10ක දැරියට දාව උපන් දරුවාගේ පියා සොයාගැනීම සඳහා ඇයගේ දෙවැනි මාමාවද අත්අඩංගුවට ගෙන ඇති බව වාර්තා වෙයි.

මීට පෙර මෙම ළමා අපචාරය සම්බන්ධයෙන් ඇයගේ මාමා කෙනෙකු අත්අඩංගුවට පත්වූ අතර, පසුව දරුවාගේ හා මාමාගේ ඩී.එන්.ඒ. පරීක්ෂණ සිදුකිරීමේදී ඒවා නොගැළපීමෙන් තවත් සැකකරුවෙකු පිළිබඳ සැකය අලුත් විය.

කෙසේ වෙතත්, මෙම සිදුවීම සම්බන්ධයෙන් අත්අඩංගුවට පත්වූ පළමු වැනි සැකකාර මාමාද තවමත් අත්අඩංගුවේ පසුවන බවද වාර්තා වෙයි.

ඒ අනුව, මෙම දෙවැනි මාමා අත්අඩංගුවට පත්වීම ඊයේ පසුගිය අඟහරුවාදා දිනයේ සිදුවූයේ දරුවා විසින් සිදුකරන ලද පාපොච්චාරණයක් හේතුවෙනි.

38 හැවිරිදි වියේ පසුවන මෙම දෙවැනි මාමාද තමාව අතවරයට පත්කළ බව දැරිය පවසා තිබේ. ඒ අනුව, ඔහුගේ ඩී.එන්.ඒ. පරීක්ෂණයක් සිදුකිරීම සඳහා පොලීසිය අධිකරණයේ අවසරය ලැබෙන තෙක් බලා සිටී.

ඒ අනුව, මෙම 10 හැවිරිදි දැරියගේ අනුවේදනීය කතා ප්‍රවෘත්තිය මේ වනවිට ඉන්දීයාව තුළ ආන්දෝලනයක් ඇති කර තිබේ.

සහල්, එළවළු හා පීකු දුවල ඊයම් අඩංගු යැයි පරීක්ෂණයකින් සොයා ගැනෙයි

මෙරට පරිභෝජනය කෙරෙන සහල් හා එළවළු වර්ගවල ඊයම් අඩංගු වන බව නවතම පරීක්ෂණයක් මගින් ඔප්පු වී ඇතැයි පසුගියදා සෞඛ්‍ය අමාත්‍යාංශයේ ආහාර  වසවිස විශ්ලේෂණය කිරීමේ ව්‍යාපෘතියේ ප්‍රධාන සමීක්ෂක විශේෂඥ වෛද්‍ය ටී.බී ආනන්ද ජයලාල් මහතා පැවසුවේය. 


වකුගඩු රෝගය වැඩි වශයෙන් පැතිර ඇති උතුරු මැද පළාතේ අනුරාධපුර දිස්ත්‍රික්කය මූලික කරගෙන ඔවුන් සිදු කළ ආහාර සාම්පල හා රුධිර පරීක්ෂණ වාර්තා අනුව මෙම නවතම තොරතුරු ඉදිරිපත් කර ඇති අතර, එම ආහාර පරිභෝජනය කරනු ලැබූ නිවැසියන්ගෙන් ලබාගත් ලේ සාම්පල අතරින් 60%කම ඊයම් අඩංගු වී ඇති බව අනාවරණය වී තිබිණි. ඔහු විසින් පරීක්ෂා කරන ලද රුධිර සාම්පල පිළිබඳ විස්තර මෙසේ විය.
01
 
මේ අනුව ලබාගත් රුධිර සාම්පල 55 න් 26කම ඊයම් අඩංගුව තිබී ඇත. මෙම පුද්ගලයන්ගේ රුධිර සාම්පලවල ඊයම් අන්තර්ගත වීමට හේතු වී ඇත්තේ ආහාර බව වෛද්‍යවරයා පවසන්නේ ඔහු විසින් එළවළු, හාල් හා පලතුරුවල අඩංගු ඊයම් ප්‍රමාණ පිළිබඳවද පරීක්ෂා කිරීමෙන් අනතුරුවය. ඔහු සිදුකළ පරීක්ෂණයේදී සාමාන්‍යයෙන් වැඩිහිටි පුද්ගලයෙකු සතියකට හාල් කිලෝ 03ක ප්‍රමාණයක් පරිභෝජනය කරන අතර, එළවලු කිලෝ 01 ක ප්‍රමාණයක් පරිභෝජනය කරයි. මේ හරහා ඊයම් මයික්‍රො ග්‍රෑම් 1600 ක ප්‍රමාණයකට සතියකදී ශරීරය නිරාවරණය වන බවද ඔහු සඳහන් කරයි. 
 
මෙරට ආහාර පරිභෝජන රටාව පිළිබඳ සැලකිලිමත් වීමේදී ඊයම් ශරීරගත වීම නිසා සැලකිය යුතු සෞඛ්‍ය බලපෑම් සිදුවන බවද හෙතෙම සඳහන් කරයි. ඒ හේතුවෙන් තුන් වේලම එකම ආහාර පරිභෝජන රටාවකට හුරු වී සිටීම, එනම් තුන්වේලම බත් කන පුරුද්දෙන් ඈත් විය යුතු බව වෛද්‍යවරයා පෙන්වා දෙයි. එළවළුවල ඊයම් අඩංගු වන නිසා නිර්මාංශ ආහාර වේලකට හුරුවීමද ගැටලුකාරී බව පෙන්වා දෙන වෛද්‍යවරයා මස්, මාළු වැඩි වශයෙන් පරිභෝජනය කිරීමට හුරුවිය යුතු බවද සඳහන් කරයි. නමුත් සත්ත්ව පීකුදුවල විෂ ද්‍රව්‍ය තැන්පත් වන බැවින් පීකුදු ආහාරයට නොගත යුතු බවද ඔහු සඳහන් කරයි. 
 
ආහාරවලින් ශරීරයට එකතු වන ඊයම් රුධිරගත වී මාස දෙක තුනක කාලයක් පවතින බවත්, දිගුකාලීනව ඊයම් ශරීරගත වන ආකාරය පිළිබඳ විවිධ අවයව ආශ්‍රිතව පර්යේෂණ සිදුකර වාර්තා ලබාගැනීම මෙන්ම අස්ථිවල මෙම ඊයම් තැන්පත්ව පවතීද යන්න පිළිබඳ පර්යේෂණ සිදුකළ යුතු බවත් වෛද්‍යවරයා සඳහන් කළේය.
මිනිස් පාරිභෝජන ද්‍රව්‍යයන්ගේ හා ආහාරවල ඊයම් අන්තර්ගත වීම පිළිබඳ මෙලෙස අපට අසන්නට ලැබෙන පළමු අවස්ථාව නොවන නිසා ඊයම් පිළිබඳ පෙරටත් වඩා අවධානය යොමු කිරීමේ අවශ්‍යතාවක් පැන නැගී තිබේ. විශේෂයෙන් මීට වසර කිහිපයකට පෙර පරිසර යුක්ති කේන්ද්‍රයේ විධායක අධ්‍යක්ෂ හේමන්ත විතානගේ මහතා සඳහන් කර තිබුණේ දූවිලි හා ඊයම් සම්බන්ධයෙන් සිදුකළ පරීක්ෂණයට අනුව ශ්‍රී ලංකාවේ ඇතැම් පාසල්වල කාමර තුළ ඊයම් ප්‍රතිශතය වර්ග අඩියට මයික්‍රො ග්‍රෑම් 600 ක් පමණ වී තිබෙන බවයි.
ඇමෙරිකා එක්සත් ජනපද පරිසර ආරක්ෂණ කාර්යාංශයට අනුව ආරක්ෂිත ඊයම් මට්ටම වන්නේ වර්ග අඩියට මයික්‍රො ග්‍රෑම් 40 ක් පමණක් බවද ඔහු වැඩිදුරටත් ප්‍රකාශ කර තිබිණි.  ඒ අනුව ශ්‍රී ලංකා ප්‍රමිති ආයතනය විසින් නියම කරන ලද ඊයම් ප්‍රමාණයට වඩා වැඩි ඊයම් ප්‍රමාණයක් ගෘහාශ්‍රිතව භාවිත කරන තීන්තවල අන්තර්ගතද යන්න සොයා බැලීම සඳහා පාරිභෝගික අධිකාරිය මගින්ද මීට වසර කිහිපයකට පෙර පරීක්ෂණ පවත්වනු ලැබීය. ජීවිතවලට අවදානමක් සහිත ඊයම්, තීන්ත සඳහා භාවිත කිරීම පිළිබඳ ලෝක පරිසර සංවිධාන විරෝධය පළ කිරීමත් සමග 2002 වසරේ රියෝ සමුළුවේදී ඊයම් භාවිතය පිළිබඳ කරුණු කිහිපයක් පිළිබඳ අවධානයට ලක්විය. ඒ අතරින් තීන්ත සඳහා ඊයම් භාවිතය හා පෙට්‍රල් සඳහා ඊයම් භාවිතය පිළිබඳ බොහෝ විරෝධතා ගොනුවිය. ඒ අනුව අවම කිරීම සඳහා සියලුම වගකිවයුතු පාර්ශ්ව එකඟතාවකට පැමිණියහ. 
health-effects-of-lead-poisoning
 
2003 වසරේදී ලංකාවේද ඊයම් අඩංගු පෙට්‍රල් භාවිතයට සම්පූර්ණයෙන්ම තිත තැබෙන්නේ ඒ එකඟතාවන්ගේ ප්‍රතිඵලයක් ලෙසටය. නමුත් තීන්තවල අඩංගු ඊයම් නිසාද සෞඛ්‍ය ගැටලු ඇති වන බවට හඳුනාගැනෙන්නේ ඊට වසර කිහිපයක් ඉක්ම ගොස් ලොව පුරා ජීවත්වන දරුවන්ගෙන් මිලියන 40 ක් පමණ ඊයම් හේතුවෙන් සෞඛ්‍ය ගැටලුවලට ගොදුරු වීමත් සමගය.
තීන්තවල අඩංගු ඊයම් පිළිබඳ මෙලෙස වාර්තා වීමෙන් පසු ඊයම් පිළිබඳ යළිත් කතාබහ මතුවන්නට පටන් ගැනුණේ ක්ෂණික නූඩ්ල්ස්වල ඊයම් අඩංගු බවට තහවුරු වී ඉන්දියානු රජය විසින් අදාළ බහුජාතික සමාගම මගින් වෙළෙඳ පොළට එක් කරන නූඩ්ල්ස් ඉවත් කිරීමත් සමගය. ඒ අනුව මෙරට වෙළෙඳ පොළෙහිද ජනප්‍රිය නූඩ්ල්ස් නිෂ්පාදනයක් වන අදාළ බහුජාතික සමාගමට අයත් ක්ෂණික නූඩ්ල්ස්වල ඊයම් අඩංගු වේ ද යන්න පිළිබඳ පරීක්ෂා කර බැලිණි. මෙලෙස බලන විට අපට පෙනී යන දෙය වන්නේ අප කන බොන ආහාර පිළිබඳ මෙන්ම එදිනෙදා භාවිතයට ගැනෙන ඕනෑම නිෂ්පාදනයක් පිළිබඳ වෙනදාටත් වඩා අවධානයෙන් පසුවිය යුතු බවයි. එයට හේතුව නම් ඊයම් නිසා මිනිස්  සිරුරට ඇති කෙරෙන සෞඛ්‍ය හානි අධික බැවිනි. වෛද්‍යවරුන් පවසන අන්දමට ඊයම් නිසා ගර්භිණී කාන්තාවන්ට ගබ්සා වීම්, අඩුබර දරු උපත් ඇති වීම්, මළදරු උපත් සිදුවීම් මෙන්ම නොමේරු දරුවන් බිහිවීමටද ඊයම් ඍජුව බලපායි.
 
එමෙන්ම දරුවන්ට ඊයම් ශරීරගත වීමෙන් ඉගෙනීමේ දුර්වලතා, දඩබ්බර හැසිරීම් රටා, බුද්ධි මට්ටම පහළයෑම්, මීමැස්මොරය, අඩු වර්ධනය, මානසික රෝග, අවධානයේ හීනවීම්, හිසරදය, අති ක්‍රියාශීලී වීම මෙන්ම දෘශ්‍ය හා ශ්‍රවණ ආබාධ ආදියද හටගැනීමට පුළුවන. එසේම ආහාර මගින් ඊයම් රුධිරගත වීම නිසා වැඩිහිටියන්ටද ශ්‍රවණාබාධ, අධිරුධිර පීඩනය වැනි රෝගාබාධ ඇතිවිය හැකි අතරම, ඊයම් ප්‍රමාණය ක්‍රමයෙන් ඉහළ අගයක් ගතහොත් සිහි මඳ ගතිය මෙන්ම මරණය පවා සිදුවිය හැකි බව විශේෂඥ වෛද්‍ය ටී.බී. ආනන්ද ජයලාල් මහතා පසුගියදා පැවැති මාධ්‍ය හමුවේදී පැවසුවේය.
Document
 
ඔහු පෙන්වාදෙන ආකාරයට රටක්, ජාතියක් වශයෙන් අනාගත පරපුරේ බුද්ධි වර්ධනය අඩාළ වීම පිළිබඳ වඩාත් අවධානය යොමු කිරීම සිදුවිය යුත්තකි. විශේෂයෙන් රටවල ජීවත්වන රටවැසියන්ගේ බුද්ධි මට්ටම් පිළිබඳ සිදුකරන ලද අන්තර්ජාතික සමීක්ෂණයක ප්‍රතිඵල මතද අප රටේ වැසියන්ගේ බුද්ධි මට්ටම පහළ අගයක පවතින බව සඳහන් වන බවද ඔහු පැවසුවේය. අතීතයේ ඉතා දියුණු ශිෂ්ටාචාරයක් පැවැති රෝමයේ කොලෝසියම බිඳ වැටීමට හේතු වී ඇත්තේද ඊයම් බවට වර්තමානය වනවිට ප්‍රබල මතයක් ගොඩනැගී තිබෙන බව සඳහන් කළ වෛද්‍යවරයා වැඩිදුරටත් පැවසුවේ ආහාරවල ඊයම් අඩංගු වීම යන ගැටලුව  පිළිබඳ රටේ වගකිවයුතු අංශ සියල්ල එකට එක්ව අවධානය යොමුකළ යුතු බවයි. මේ අනුව ඔහු වැඩිදුරටත් සඳහන් කළේ කෘෂිකර්මාන්තයේදී යොදන රසායනික පොහොර වර්ග මේ තත්ත්වයට හේතු වී ඇති බැවින් හැකිතාක් කාබනික වගාවන් කෙරෙහි යොමුවීමේ අවශ්‍යතාව මතුවන බවයි.
පසුගියදා විශේෂඥ වෛද්‍ය ටී.බී. ආනන්ද ජයලාල්  මහතා විසින් හෙළිදරව් කරන ලද පරීක්ෂණ ප්‍රතිඵල පිළිබඳ මාධ්‍ය නිවේදනයක් නිකුත් කරමින් පාරිභෝගික අයිතීන් සුරැකීමේ ජාතික ව්‍යාපාරයේ සභාපති රංජිත් විතානගේ මහතා පවසන්නේ එළවළුවල හා සහල්වල ඊයම් අඩංගු නම් සෞඛ්‍ය අමාත්‍යවරයා ඊට වගකිවයුතු බවයි. 
 
වැඩිදුරටත් අදහස් දක්වමින් ඒ මහතා ප්‍රකාශ කරන්නේ ජනතාව ආහාරයට ගනු ලබන සහල් සහ එළවළු තුළ සැලකිය යුතු මට්ටමක ඊයම් අඩංගු බවත්, ඒවා ආහාරයට ගනු ලබන ජනතාවගේ රුධිරයේ ඊයම් අඩංගු බව තම පරීක්ෂණවලින් සොයාගත් බවත්ය.
මෙරට සෞඛ්‍ය අමාත්‍යාංශයේ නිද්‍රාශීලී ප්‍රතිපත්තිය හේතුවෙන් වන්දි ගෙවීමට සිදුව ඇත්තේ අප රටේ  සමස්ත පාරිභෝගිකයාටය. ජනතාව ලෙඩ රෝගවලට නිරාවරණය කොට අඩු මිලට බෙහෙත් ද්‍රව්‍ය හා වෙනත් උපකරණ ලබාදීමට කටයුතු කරනවා යැයි කයිවාරු ගසන සෞඛ්‍ය අමාත්‍යවරයෙකු සිටින රටක  සමීක්ෂණ වාර්තා මගින් මෙවැනි කරුණු හෙළිවීම අපට පුදුමයක් නොවේ.
 
ලෝකය ක්ෂණිකව වෙනස් වෙද්දී අපට ඇත්තේ යල්පැනගිය නීතිරීති වන අතර, ඒවාට මුවා වී ව්‍යාපාරිකයෝ තම සාක්කු පුරවා ගනිති.
පාලන මිලක් නොමැතිව වැඩි මුදලක් ගෙවා පාරිභෝගිකයන්ට ඊයම් අඩංගු සහල් පරිභෝජනය කිරීමට සිදුවීම සබන්ධයෙන් මෙරට ජනතාවගේ බදු මුදලින් නඩත්තු වන සෞඛ්‍ය අමාත්‍යවරයා ලැජ්ජා විය යුතුය. බෙහෙත් මිල අඩු කිරීම පිළිබඳ අමාත්‍යවරයාට ස්තූති කරමින් රට පුරා පෝස්ටර් ඇලවීමට හා දැන්වීම්  සඳහා ඇමතිවරයාගේ හෙංචයියන්ට වියදම් කරන ජනතා මුදලෙන් මෙරට ජනතාවගේ සෞඛ්‍ය තත්ත්වය නගා සිටුවීමට කටයුතු කරන ලෙස අප රජයෙන් ඉල්ලා සිටිමු.
 
මෙරට තුන්වේලම බත් කෑ ජනතාවක් සිටින රටක වසවිසෙන් තොරව ජනතාවට සහල් සහ එළවළු ලබාදීමට අසමත් සෞඛ්‍ය බලධාරීන් සූදානම් වන්නේ අතීසාරයට අමුඩ ගැසීමටය. ආහාරවල ඊයම් ඇත්නම් සහ ඊට විකල්පය එම ආහාර පරිභෝජනය නොකිරීම නම් එම රටට සෞඛ්‍ය අමාත්‍යාංශයක් අවශ්‍ය නැත.
 
ආනන්ද ජයලාල් මහතා කරන ප්‍රකාශය සම්බන්ධයෙන් සෞඛ්‍ය ඇමතිවරයාගේ ප්‍රතිචාරය පිළිබඳ අප බලා සිටින අතර, ඉතා ඉක්මනින් මෙරට සහල් එළවළුවල පමණක් නොව සියලු ආහාරවල අන්තර්ගත වසවිසෙන් පාරිභෝගිකයා ආරක්ෂා කිරීම සඳහා කටයුතු කරන අයුරු පිළිබඳවද විමසිල්ලෙන් සිටිමු.

ගේමින්ග් ලැප්ටොප් පරිණාමයේ මීළඟ පුරුක

ගේමින්ග් පරිගණකයක් යැයි කියූ විට දැවැන්ත දෘඪාංග එකලස් කළ ටවර් කේසිනයන්, විවිධාකාරයේ ගේමින්ග් ආදාන උපාංග ඇතුළු සම්පූර්ණ ගේමින්ග් ස්ටේෂන් එකක් සිහියට නැගෙනා කාලයක් මීට දශක දෙකකට තුනකට පෙර තිබූ බව අප මින් පෙරද යළි යළිත් කියා ඇත්තෙමු. තවමත් පරිගණක ක්‍රීඩා වෙනුවෙන්ම එවැනි අතිප්‍රබල ගේමින්ග් ස්ටේෂන් එකලස් කරන්නන් සිටියද, මේ වනවිට එය අතීතකාමී මතකයක් පමණක් බවට හැරෙමින් තිබේ. මන්දයත් මේ වනවිට පරිගණක ක්‍රීඩා වෙනුවෙන්ම නිර්මාණය වූ ගේමින්ග් ලැප්ටොප් වැනි වඩාත් හුරුබුහුටි උපාංගයන් පැමිණෙමින් තිබෙනා බැවිනි. කෙසේ නමුත් මෙය තාක්ෂණික ලෝකයේ සෑම තැනම සිදුවූ පරිද්දෙන් පරිගණක ක්‍රීඩා ලෝකයේද සිදුවෙමින් පවතින නොවැළැක්විය හැකි පරිණාමයයි. මිනිසා ක්‍රම ක්‍රමයෙන් තමන්ගේ දැවැන්ත පරිගණකයන් අතේ ගෙනයා හැකි හුරුබුහුටි උපාංගයන් තුළට සංයුක්ත කළ ආකාරයටම, ගේමින්ග් පරිගණක උපාංගයන්ද එම පරිණාම රීතියම අනුගමනය කරමින් තිබේ.

1 (1)

 මෙතෙක් ගේමින්ග් පරිගණකද ක්‍රම ක්‍රමයෙන් සිය හැඩිදැඩි මුහුණුවර හලා, වඩාත් සුමට සහ හුරුබුහුටි හැඩයන් ලබාගනිමින් තිබූ බව දකින්නට හැකිවිණි. කෙසේ නමුත් මෙතෙක් වෙනස් කළ හැකි තිර හා යතුරුපුවරු ආකාරයන් සමගින් නිර්මාණය වූ 'කන්වර්ටබල්' ලැප්ටොප් යන්ත්‍ර ලෙසින් ගේමින්ග් පරිගණක නිෂ්පාදනය වී තිබෙනු දක්නට නොලැබුණි. දැන් එම පියවරද සම්පූර්ණ කරමින් Acer වෙතින් කන්වර්ටබල් නෝට්බුක් පරිගණකයක් වෙතට ගේමින්ග් පරිගණක යන්ත්‍රයක් එකලස් කර ඇත්තේ එය ගේමින්ග් පරිගණක යන්ත්‍ර පරිණාමයේ මීළඟ පුරුක බවට පත්කරමිනි.

මේ හඳුන්වාදෙන Acer Nitro 5 Spin කන්වර්ටබල් ගේමින්ග් ලැප්ටොප් උපාංගයයි.

1 (2)

මෙය දැනට වෙළෙඳ පොළේ ඇති වඩාත්ම ප්‍රබල ගේමින්ග් ලැප්ටොප් උපාංගයන්ගෙන් එකක් නොවේ. එසේ වුවත් ඔබ දිනපතා ඔබේ කාර්යාලයීය සහ පුද්ගලික වැඩකටයුතු සඳහා යොදාගත හැකි, එසේම අවශ්‍ය මොහොතක නවීන පරිගණක ක්‍රීඩා ධාවනය කරමින් උපරිම ක්‍රීඩා අත්දැකීමක් හා තෘප්තියක් ලබාගත හැකි පරිගණක බලයක් සහිත, හුරුබුහුටි කන්වර්ටබල් ලැප්ටොප් උපාංගයක් සොයන්නේ නම් Acer Nitro 5 Spin යනු ඔබටම ගැළපෙන යන්ත්‍රයයි.

මෙය ප්‍රධාන වශයෙන්ම ස්පර්ශ තිරයකින් සහ අංශක 360ක් දක්වා ක්‍රියාත්මක වන අල්ලු පද්ධතියකින් සමන්විත, අඟල් 15.6ක තිරයක් සහිත ලැප්ටොප් පරිගණකයකි. එනම් ඔබට අවශ්‍ය ඕනෑම මොහොතක මෙය ලැප්ටොප් ආකාරයෙන් විශාල ටැබ්ලට් උපාංගයක් බවටත් හරවා ගැනීමට හැකියාව තිබේ. එසේම ඔබට චිත්‍රපට හෝ වීඩියෝ ක්ලිප නැරඹීම සඳහා සි‍ටුවා තැබිය හැකි ආකාරයට පවා මෙය පහසුවෙන් පරිවර්තනය කළ හැකි වේ. මේ සියල්ලම සමගින් පහසුවෙන් වසා ලැප්ටොප් බෑගයක දමාගෙන ගෙන යෑමටද හැකි තරම් මෙය හුරුබුහුටි වේ. සාමාන්‍යයෙන් ඔබ දකිනා ගේමින්ග් ලැප්ටොප් උපාංගයන්ට වඩා නවීන හුරුබුහුටි ගේමින්ග් ලැප්ටොප් උපාංගයන්ගේ දක්නට ඇති සිහින් හැඩය සහ නිමාව වෙත අනුහුරු වී ඇති මෙම Acer Nitro 5 Spin උපාංගය සම්පූර්ණයෙන්ම ඇලුමිනියම් බඳකින් යුතුව, වඩාත් සැහැල්ලු ලෙසින් නිර්මාණය වී ඇත.

මෙම උපාංගයේ ඇති අඟල් 15.6ක FHD, IPS ස්පර්ශ තිරය පහසුවෙන්ම 1080p ප්‍රමාණයේ විභේදනයක් ලබාදෙනු ඇත. එසේම පුළුල්ව නැරඹිය හැකි කෝණයන්ද සහිත මෙම තිරය සමගින් Acer Color Intelligence™ තාක්ෂණයද, Acer BluelightShield™ තාක්ෂණයද පැමිණෙන බැවින් ඔබේ පරිගණක ක්‍රීඩා අත්දැකීම් මෙන්ම සිනමා අත්දැකීම්ද සුපැහැදිලි දසුන් හා තියුණු වර්ණයන්ද සහිතව ලබාගැනීමට හැකියාව ලැබෙනු ඇත.  එසේම Dolby Audio™ Premium, Acer TrueHarmony, Acer Smart Amplifier තාක්ෂණයන් සමගින් ස්ථාපනය කොට ඇති මෙහි ශ්‍රව්‍ය ප්‍රතිදාන පද්ධතියෙන් ලබාදෙන හඬ අත්දැකීම ගැනද කිව යුත්තේ ඔබ ඉහළින්ම තෘප්තිමත් කරන්නට එය සමත්වනු ඇති බවයි. 

1 (3)

මෙය අටවෙනි පරම්පරාවේ ඉන්ටෙල් කෝර් ප්‍රොසෙසරයකින් සහ Nvidia GEForce GTX 1050 ග්‍රැ‍ෆික් ප්‍රොසෙසරයකින් සන්නද්ධව ඇත. එසේම ගිගාබයිට් 16 දක්වා වන ‍රැම් මතකයකින් සහ ගිගාබයිට් 512ක SSD මතක ධාරිතාවකින්ද මෙය සමන්විත වේ. මෙසේ බැලූ විට මෙම Acer Nitro 5 Spin උපාංගය Acer සමාගමේ නිල ගේමින්ග් පරිගණක පතාක යෝධයින් වන Predator ගේමින්ග් ලැප්ටොප් තරම් ප්‍රබල නොවන බව පෙනේ. නමුත් ඔබට පෙනෙනු ඇත්තේ වර්තමානයේ ඇති නවීන පරිගණක ක්‍රීඩා බොහෝමයක් සමගින් සුමට හා සන්තතික ක්‍රීඩා අත්දැකීමක් ලබාදීම සඳහා මෙයට හැකියාව තිබෙනා බවයි.

එසේම මෙහි දෘඪාංග ක්‍රියාකාරීත්වය සලකා බලන විට එයට තත්‍යාසන්න යතාර්ථ (VR) පරිගණක ක්‍රීඩාවන් පවා න්‍යායිකව ධාවනය කිරීමේ හැකියාව තිබුණත්, අතිප්‍රබල ගේමින්ග් පරිගණක යන්ත්‍රයක මෙන් සුමට ක්‍රියාකාරීත්වයක් බලාපොරොත්තු වීමට හැකි නොවනු ඇත.
එසේ නම් මෙය මිලදී ගැනීමට පරිශීලකයන් පෙළඹෙනු ඇත්තේ මක්නිසාද? ඊට පිළිතුර සරල වේ. මෙතෙක් කාලයකට කන්වර්ටබල් ලැප්ටොප් පරිගණකයක් ලෙසින් ජනප්‍රිය වූ ගේමින්ග් පරිගණකයක් ඉදිරිපත් වී නැත. එසේම මෙය ඔබට පහසුවෙන්ම ගේමින්ග් පරිගණකයක් ලෙසින් මෙන්ම, එදිනෙදා වැඩකටයුතු සඳහා අවශ්‍ය වන නෝට්බුක් එකක්, ටැබ්ලට් එකක්, ග්‍රැ‍ෆික් ටැබ්ලට් එකක් මෙන්ම විනෝදාස්වාදය සපයන පුද්ගල පරිගණකයක් ලෙසින් වුවත් භාවිත කිරීමට හැකියාව ඇත. එසේ සලකා බැලූ විට Acer Nitro 5 Spin හි උපයෝග්‍ය වටිනාකම සැබවින්ම ඉහළ බව කිව යුතු වේ.

එසේම මේ මග යමින් තව තවත් නිෂ්පාදකයින් කන්වර්ටබල් ලැප්ටොප් ලෙසත්, සමහර විට අනාගතයේදී ටැබ්ලට් ලෙසිනුත් ප්‍රබල ගේමින්ග් පරිගණක යන්ත්‍ර නිර්මාණය කරනු ඇත.

1 (4)

‘විදුලි වැටුප් වැඩිවීම අවසානයේදී විදුලි බිලට’

විදුලි බිල අඩු කරන ලෙස ඉල්ලා විදුලිබල මණ්ඩල වෘත්තීය සමිති 13%ක වැටුප් වැඩිකර ගැනීමක් සිදුකර තිබෙන බවත්, අවසානයේදී එම මුදලත් විදුලි බිලට එකතු වන බවත් පාරිභෝගික අයිතීන් සුරැකීමේ සංවිධානය සඳහන් කරයි.

විදුලි බිලෙන් 50%ක මුදලක් මණ්ඩලය තුළ සිදුවන මූල්‍ය වංචා හේතුවෙන් එකතු වී තිබෙන බවට වෘත්තීය සමිති සඳහන් කරන බැවින් මේ පිළිබඳව වහාම සොයා බලන ලෙස මහජන උපයෝගිතා කොමිෂමෙන් අද (21දා) ලිඛිතව ඉල්ලා සිටි බවද එම සංවිධානයේ සභාපති රංජිත් විතානගේ මහතා සඳහන් කළේය.

විසඳුම්වලට එකඟතා පැමිණීමේදී විදුලි බිල අඩු කිරීමේ යෝජනාව වෘත්තීය සමිති අමතක කර දැමූ බවද හෙතෙම පවසා සිටියේය. 

 

 

ආරක්ෂාව මදි නම් පාකිස්තානයට යන්නේ නෑ

ශ්‍රී ලංකා ක්‍රිකට් කණ්ඩායම පාකිස්තානයෙදී විස්සයි20 තරගයට ක්‍රීඩාකරනවාද යන්න පිළිබඳව වන තීරණය ශ්‍රී ලංකා කණ්ඩායම හා පාකිස්තාන කණ්ඩායම අතර ආරම්භවීමට නියමිත ටෙස්ට්, එක්දින හා විස්සයි20 තරගාවලිය ක්‍රියාත්මක වෙන අතර තුළදී ගන්නා බව ශ්‍රී ලංකා ක්‍රිකට් ආයතනයේ ප්‍රධාන විධායක නිළධාරී ඈශ්ලිද සිල්වා මහතා පැවැසීය.

එසේම පාකිස්තානයේ ආරක්ෂාව පිළිබඳව සෑහීමකට පත්විය නොහැකිවුවහොත් ශ්‍රී ලංකා කණ්ඩායම පාකිස්තානයට යොමු නොකරන බවත් ඔහු පැවැසීය.

අද (21දා) කොළඹදී පැවැති මාධ්‍ය හමුවකදී ඔහු මේ බව සඳහන් කළේය. පාකිස්තානය හා ශ්‍රී ලංකාව අතර පැවැත්වීමට නියමිත විස්සයි20 තරග තුනෙන් අවසන් තරගය ලාහෝර් නුවරදී පැවැත්වීමට මේ වන විට දෙරටේම අවධානය යොමුව තිබේ. 

" අාරක්ෂක තත්ත්වය තරගාවලිය ක්‍රියාත්මක වන අතරතුළදී තක්සේරු කර තීරණයක් ගන්නවා. ඒ වගේම අපි ශ්‍රී ලංකාවේ ආරක්ෂක නිලධාරියෙකු පාකිස්තානයට යොමුකරනවා. තරගය පැවැත්වීමට සති දෙකකට පෙර අපේ ආරක්ෂක නිලධාරියෙක් පාකිස්තානයට යොමුකරනවා" යැයි ඔහු සඳහන් කළේය.

පාකිස්තානය හා ශ්‍රී ලංකාව අතර පැවැත්වෙන ටෙස්ට් තරග දෙක, එක්දින තරග 5 හා විස්සයි20 තරග තුනෙන් දෙකක් මැද පෙරදිග පැවැත්වීමට නියමිතය.

2009 වසරේදී ශ්‍රී ලංකා ක්‍රිකට් කණ්ඩායමට පාකිස්තානයේදී ත්‍රස්ත ප්‍රහාරයක් එල්ල වීමෙන් පසුව මේ දක්වා ශ්‍රී ලංකාව පාකිස්තානයේ තරගයකට ක්‍රීඩා කර නොමැත.

මේ අතර ලෝක ක්‍රිකට් කණ්ඩායම හා පාකිස්තාන ක්‍රිකට් කණ්ඩායම අතර ප්‍රදර්ශන විස්සයි20 තරග තුනක්ද පසුගියදා පාකිස්තානයේදී පැවැත්වීය.