Category Archives: woman

මේ දිනවල කුඩා දරුවන් අතර පැතිර යන ‘හෑන්ඩ් ෆුට් ඇන්ඩ් මවුත්’ වෛරසය

මේ දිනවල කුඩා දරුවන් අතර පැතිර යන වෛරසයක් ලෙස %හෑන්ඩ්, ෆුට් ඇන්ඩ් මවුත්^ වෛරසය හැඳින්විය හැක. මෙහිදී දරුවන්ගේ අත්, කකුල් සහ මුඛයේ බිබිලි හට ගැනීමක් සිදු වේ. එම බිබිලි කැසීමෙන් එහි ඇති ශ්‍රාවයන් ගෑවීම ඔස්සේ මේ වෛරසය පැතිරීම සිදුවේ. සාමාන්‍යයෙන් මෙම වෛරසය දැනට වයස අවුරුදු 10ට අඩු දරුවන් අතර පැතිරීම සිදුවන නමුත් මෙය වැඩිහිටියන්ට බෝවීමේ ප්‍රවණතාවක්ද තිබේ. 

මෙම රෝගය සඳහා විශේෂ ප්‍රතිකාරයක් නැති අතර, මේ බිබිලි හට ගැනීමෙන් උණ ඇති වීමට පුළුවන. පැනඩෝල් දීමෙන් එයට සහනයක් ලබාගැනීමට හැක.

බොහෝවිට දරුවන්ගේ අත්ල, වැලමිට යට, විලුඹ, තට්ටම් ප්‍ර‘දේශයේ සහ මුඛයේ මේ බිබිලි හට ගැනීම සිදු වේ. මුඛයේ මේ බිබිලි ආ විට කුඩා දරුවන්ට ආහාර ගැනීමේ අපහසුතා ඇති වන නිසා දියර ආහාර සහ මිරිස් අඩු ආහාර ලබා දීමට කටයුතු කරනවා නම් වඩාත් සුදුසුයි. 

සාමාන්‍යයෙන් දින 07ක පමණ කාලයක් මෙම රෝගී තත්ත්වය පවතින අතර, ඉක්මනින් වෛද්‍ය ප්‍රතිකාරවලට යොමු වීමෙන් මෙය බෝවීමේ ප්‍රවණතාව අඩුකර ගත හැක.

තොරතුරු සැපයීම. 
මහාචාර්ය දුලානි ගුණසේකර 
ළමා රෝග අංශය
වෛද්‍ය විද්‍යා පීඨය
ශ්‍රී ජයවර්ධනපුර විශ්වවිද්‍යාලය.

Baby-With-FEver-And-Rash-due-to-HAnd-Mouth-And-Foot-Disease image001 phototake_hand-foot-mouth_disease_foot_rash M130/0596

දරුවාෙග් අක්ෂි ආබාධ හඳුනාගන්නේ මෙහෙමයි

තම දරුවා අක්ෂි ආබාධයකින් පෙළෙන්නේද නොපෙළෙන්නේද යන්න පිළිබඳව අද බොහෝ මවුවරුන්ට දැනුමක් නොමැත. ඒ හේතුවෙන් අක්ෂි ආබාධයකින් පෙළෙන දරුවෙකුට ප්‍රතිකාර කිරීමද ප්‍රමාද වී ඔහුගේ හෝ ඇයගේ පෙනීමේ දුර්වලතාව තවත් වැඩිවිය හැක.

එ් නිසාවෙන් මේ සම්බන්ධව ඔබව දැනුවත් කිරීම වැදගත් යැයි හැඟුණු බැවින් ඒ සම්බන්ධව ඔබව දැනුවත් කිරීමට රිජ්වේ ආර්යා ළමා රෝහලේ ළමා අක්ෂි ශල්‍ය විශේෂඥ හිරණ්‍ය අබේසේකර මහතා අප 'අද'ට සම්බන්ධ කර ගත්තෙමු.

Q කුඩා වයසේදී හැදෙන අක්ෂි ආබාධ හඳුනාගන්නේ කෙසේද?

අක්ෂි ආබාධවල ස්වභාවය වයස අනුව වෙනස් වෙනවා. කුඩාම දරුවෙකු නම් සති හය වනවිට මවගේ මුහුණ දෙස නොබලන්නේ නම්, ආලෝකය දෙස හෝ එක එල්ලේ බලන්නේ නැතිනම් සහ ඇස් වපර කර බලනවා නම් දරුවාට අක්ෂි ආබාධයක් තිබෙනවා කියා සැක කරන්න පුළුවන්. කුඩාම අවධියේදී දරුවෙක්ට අක්ෂි ආබාධයක් තිබෙනවාද කියා හොයා ගන්න ඉහත ක්‍රම අනුව පුළුවන්.

ඒ වගේම වයස අවුරුදු 3,4 පෙරපාසල් වයසේ දරුවෙකුට අක්ෂි ආබාධ තිබෙනවාද කියලා මේ දේවල්වලින් නිගමනය කරන්න පුළුවන්. ඒ රූපවාහිනිය නරඹනවිට ගොඩාක් ළඟට ගිහින් නරඹනවා නම්, චිත්‍රයක් අඳිනවිට, පොතක් කියවනවිට නිතරම ගොඩක් මූණට ළං කරලා බලනවා නම් , ඇස් වපර කර බලනවා නම් ඇස්වල අබාධයක් තිබෙනවා කියා හිතන්න පුළුවන්.

පාසල් යන ළමයෙක් නම් බ්ලැක් බෝඩ් එකේ දාන දේවල් හරියට පිටපත් කර ගෙන එන්නෙ නැත්නම්, ඒ දේවල් හරියට පැහැදිලිව පෙනෙන්නේ නෑ කියලා කියනවා නම්, අකුරු අඩුවෙන් ලියාගෙන එනවා, ඉලක්කම් ලියද්දී වරද්දලා ලියනවා නම්, ඇස්වලින් කඳුළු ගලනවා නම් අක්ෂි අබාධයක් කියලා හිතන්න පුළුවන්.

මේ වගේ තත්ත්වයක් දරුවාට තිබෙනවා නම් අනිවාර්යයෙන්ම දරුවාව අක්ෂි වෛද්‍යවරයෙක් ළඟට යොමු කරන්න අවශ්‍යයි.

Q අද වනවිට කුඩා දරුවන් අතර අක්ෂි ආබාධ තත්ත්වයන් ඉහළ යාමක් තිබෙනවාද?

අද වනවිට අක්ෂි ආබාධ තත්ත්වයන් ඉක්මනින් හඳුනා ගැනීමක් තිබෙනවා දෙමාපියන් , ගුරුවරුන්ගේ දැනුවත්භාවය නිසා. මේ නිසා ඉහත සඳහන් කළ ලක්ෂණ දරුවෙකු පෙන්වනවා නම් වෛද්‍යවරයෙක් ළඟට යොමු කරන ප්‍රමාණය අද අඩු වෙලා තිබෙනවා. ඒ නිසා අතීතයට වඩා අක්ෂි අබාධ සඳහා ඉක්මනින් ප්‍රතිකාර සඳහා යොමු වන ප්‍රමාණය වැඩි වෙලා තිබෙනවා.

Q දරුවන්ගේ අක්ෂි ආබාධවලින් බහුලව පවතින ආබාධ තත්ත්වයන් මොනවාද?

ඒකත් වයස අනුව වෙනස් වෙනවා. කුඩාම කාලයේ නම් දරුවන්ට උපතින් ආපු ආබාධ තිබෙන්න පුළුවන්. සංජානනීය ප්‍රශ්න වගේ දේවල්. එහෙම නැත්නම් ඇසේ සුද වගේ තිබෙන්න පුළුවන්. ඇසේ ග්ලුකෝමා කියන තත්ත්වය තිබෙන්න පුළුවන්. 

ඊට පස්සේ එන්න පුළුවන් දුර පෙනීමේ අක්ෂි රෝගී තත්ත්වයන්. අවිදුර දෘෂ්ටිකත්වය තිබෙන්න පුළුවන්. මේ වගේ අක්ෂි ආබාධයන් එන්නෙ දරුවා ටිකෙන් ටික ලොකු වෙද්දී. ඒ වගේම ඇස් වපර කිරීම් එන්න පුළුවන්. ඊට අමතරව විවිධ අනතුරුවලින්ද යම් යම් ආබාධ එන්න පුළුවන්. 

Q කුඩාම අවධියේ දරුවන්ට කණ්ණාඩි පැලඳීමෙන් තොරව ප්‍රතිකාර කිරීමේ හැකියාවක් තිබෙනවාද?

කාණ්ණාඩි දෙකක් පලඳින්න අවශ්‍ය නම් අනිවාර්යයෙන්ම එය පලඳින්න ඕන. කණ්ණාඩි දැමිය යුතු අබාධයක් ඇස්වල තිබෙනවා නම් වයස ප්‍රශ්නයක් නැහැ. ඒක පලඳින්න ඕන. එය දරුවාට අපහසු වුවත් අනිවාර්යයෙන් පලඳින්න ඕන.

උදාහරණයක් විදිහට මාස 6 දරුවොත් ඉන්නවා කණ්ණාඩි පලඳින. කණ්ණාඩි දාන්න ඕන අසනීපවලට බෙහෙත් නැහැ. ඒ නිසා අනිවාර්යයෙන්ම වෛද්‍යවරයෙක් කණ්ණාඩි දෙකක් නිර්දේශ කළ හොත් අනිවාර්යයෙන්ම කණ්ණාඩි පැලඳිය යුතුයි. 

Q අක්ෂි අබාධයන් සඳහා කරන ලේසර් ප්‍රතිකාර ක්‍රමය ගැන කතා කළොත්?

ලෙසර් ප්‍රතිකාර  ක්‍රමය කුඩා දරුවන්ට සිදු කරන්නෙ නැහැ. දුර පෙනීමේ ආබාධ තිබෙන කුඩා දරුවන්ට ඒ ප්‍රතිකාර ක්‍රමය ගැළපෙන්නේ නැහැ. එය ගැළපෙන්නෙ වැඩිහිටි පිරිසට. අවුරුදු 18ක්වත් වෙන්න ඕනෙ ඒ වගේ ප්‍රතිකාරෙකට යොමු වෙන්න. 

Q වපරය කියන්නේ මොකද්ද?

ඇස් දෙක සාමාන්‍යයෙන් සමාන්තරයි. වපරය කියන්නේ ඇස් දෙක අතර තිබෙන සමාන්තරභාවය නැති වීම.

Q මාස ගාණක දරුවෙකුගේ ඇස්වල සාමාන්‍යයෙන් වපර ගතියක් දැක ගන්න පුළුවන්. එය සාමාන්‍ය තත්ත්වයක්ද? නැත්නම් එය වපරයක්ද කියා හඳුනා ගන්නේ කොහොමද?

සාමාන්‍යයෙන් ළමයි සියදෙනෙක් ගත්තොතින් ඒ අතරින් හතකට අටකට වගේ විවිධ වු වපර තත්ත්වයන් තිබෙන්න පුළුවන්. දෙමාපියන්ට හිතෙනවා නම් දරුවාගේ යම්කිසි වපරයක් තිබෙනවා කියලා අනිවාර්යයෙන්ම දරුවව අක්ෂි වෛද්‍යවරයෙක්ට පෙන්වන්න ඕන. මෙහිදී දරුවගේ වයසෙ ප්‍රශ්නයක් නැහැ. කුඩාම දරුවෙක් වුණත් අක්ෂි වෛද්‍යවරයෙකුට පෙන්වන්න ඕන.

මොකද සමහර වපර පිටිපස්සෙ භයානක ලෙඩ තිබෙන්න පුළුවන්. සමහරවිට දරුවන්ගේ ඇසේ සුද තිබෙන්න පුළුවන්. ඒ වගේම කලාතුරකින් ඇතිවෙන පිළිකා තත්ත්වයන් තිබෙන්නත් පුළුවන්. ඒ වගේම වපරයට ප්‍රතිකාර ගන්න එක ප්‍රමාද කළොත් දරුවාගේ පෙනුමට එය බාධාවක් වෙන්න පුළුවන්. 

Q වපරයක් තිබුණ හොත් අනිවාර්යයෙන්ම ශල්‍යකර්ම සිදු කළ යුතුද?

සමහර අයට ශල්‍යකර්ම සිදු කරනවා. සමහර අයට කණ්ණාඩි මගින් වපරය පාලනය කරන්න පුළුවන්. වපරයේ වර්ගය අනූව අවශ්‍ය ප්‍රතිකාරය තීරණය කරනවා. 

Q වපරයක් තිබූවිට කාලයක් යාමේදී එය ඇසේ පෙනීමේ තත්ත්වයට බාධාවක් වෙනවාද? 

වපරය තිබෙන ඇසේ පෙනීම අඩු වීමක් වෙනවා. ඒ වගේම පිටට අවලස්සන ගතියක් තිබෙනවා. එය දරුවාගේ පෞරුෂයට බාධා කරනවා. පාසල් යන වයස වනවිට හරි පෙනුමක් ගන්න බැරි වෙනවා වගේම එය අධ්‍යාපන කටයුතුවලට බාධාවක්. ඒ නිසා මෙවැනි වපර තත්ත්වයන් කුඩා කාලයේම තිබෙන බව දැන ගත්තම ප්‍රතිකාරවලට යොමු වෙන්න ඕන.

babyb-rs h9991401_001_pi

පිළිකා රෝගීන් වෙනුවෙන් කෙස් දන්දෙයි

පිළිකා රෝගය නිසා කෙස් කළඹ අහිමි වූවන්ට ස්වාභාවික හිසකෙස්වලින් කෙස් කළඹක් (විග්) ලබාදීමේ ව්‍යාපෘතියක් 'පිළිකා සරණ භාරය' සහ 'රමණි ප්‍රනාන්දු සැලෝන්ස්' එක්ව ආරම්භ කර තිබේ.

මෙහි සමාරම්භක උත්සවය අද (20දා) බොරැල්ල හරස් පාරේ පිහිටි රමණි ප්‍රනාන්දු සැලෝන්හිදී පැවැත්වුණු අතර, පරිත්‍යාගශීලීන් රැසක් පිළිකා රෝගීන් වෙනුවෙන් සිය කෙස් කළඹ පරිත්‍යාග කළහ.

IMG_3555

IMG_3566 IMG_3575 IMG_3600 IMG_3612 IMG_3630 IMG_3635

රූ රැජින තරග වෙනුවෙන් නවකයො ආවම අපිට පුළුවන් ජාත්‍යන්තර තරග සඳහා සුදුසුම කෙනාව යවන්න

මේ වසරට අදාළ Mrs. Sri Lanka for Mrs. Universe සහ Miss Sri Lanka for Tourism World යන තරගාවලි දෙක අගෝස්තු මසයේදී පැවැත්වීමට නියමිතය. අද වනවිට මෙවැනි තරගාවලි බොහොමයක් දැකගත හැකි අතර, එනිසාම මේ ක්ෂේත්‍රය සම්බන්ධව ඇතිවන කටකතාවලද අඩුවක් නැත.

එමෙන්ම අද වනවිට මේ ක්ෂේත්‍රය පිළිබඳ අසත්‍ය තොරතුරු සමාජගත කිරීමක්ද දැකගත හැක. ඒ නිසාවෙන් මෙහි සත්‍ය අසත්‍යතාව පිළිබඳ විමසා බැලීමට අප තීරණය කළෙමු. ඒ සඳහා අප Mrs. Sri Lanka for Mrs. Universe සහ Miss Sri Lanka for Tourism World තරගාවලියේ ජාතික අධ්‍යක්‍ෂ මලිත් රණසිංහ මහතා 'අද'ට සම්බන්ධ කර ගත්තෙමු.

Q පැවැත්වීමට නියමිත Mrs. Sri Lanka for Mrs. Universe සහ Miss Sri Lanka for Tourism World යන තරගාවලි දෙක ගැන කතා කළොත්?

මේ වසරෙදී Mrs. Sri Lanka for Mrs. Universe සහ Miss Sri Lanka for Tourism World යන තරගාවලි දෙකම සංවිධානය කරනවා. එය අගෝස්තු මස 07 වෙනිදා කොළඹ ගලධාරී හෝටලයේදී පැවැත්වීමට නියමිතව තිබෙනවා. මේ තරගාවලිය සඳහා පර්යේෂණ වට දෙකක් තිබුණා. ඒ ජුනි 25 සහ ජුලි 01 යන දිනවලදී. ඒ හරහා Miss සහ Mrs යන අංශ දෙකෙන්  අවසන් මහා තරගයට තරගකාරියන් තෝරා ගෙන තිබෙනවා.

Mrs. Universe කියන්නේ විවාහක අංශයෙන් ලෝකයේ තිබෙන ලොකුම තරගය. Miss Tourism World කියන්නෙත් ලෝකයේ තිබෙන හොඳම තරගයක්. මෙහිදී Mrs. Universe තරගයෙන් ජයග්‍රහණය කරන තරගකාරිය අගෝසතු මාසයේ 26 වෙනිදා ලංකාවෙන් පිටත් වෙනවා ජාත්‍යන්තර තරගෙට දකුණු අප්‍රිකාවට. Miss Sri Lanka for Tourism World තරගයෙන් ජයග්‍රහණය කරන තරගකාරිය ලබන ජනවාරි මාසයේ මැලේසියාවේ තිබෙන ජාත්‍යන්තර තරගෙට සහභාගි වෙන්න නියමිතයි. 

Q මේ තරගාවලියේ තිබෙන ප්‍රමිතිය ගැන කතා කළොත් එය මොන වගේ මට්ටමකද තිබෙන්නෙ?

මේ තරගාවලිය ලංකාවේ ඉහළම මට්ටමේ (Top Class) තිබෙන බියුටි පැජන්ට් එකක්. 

Q මේ තරගාවලිය ලංකාවේ පවත්වන්නේ කීවෙනි වරටද?

Mrs. Universe තරගාවලිය ලංකාවේ පවත්වන්නේ දෙවෙනි වරට. 2016 වසරේ තමා පළමු වරට ලංකාවේ මේ තරගාවලිය පැවැත්වූයේ.

Q මේ තරගාවලියට ලෝකයේ කොපමණ රටවල් ප්‍රමාණයක් සහභාගි වෙනවාද?

සාමාන්‍යයෙන් Mrs පැජන්ට් එකට රටවල් 70කට අධික ප්‍රමාණයක් සහභාගි වෙනවා. ඒ වගේම Miss පැජන්ට් එකට රටවල් 40ක් පමණ සහභාගි වෙනවා. 

Q මෙවැනි තරගවලට ඉදිරිපත් වීම හේතුවෙන් අපේ රටට ලැබෙන්නේ මොන වගේ ප්‍රතිලාභද?

ලංකාව කියන්නේ පොඩි රටක්. ලංකාව ගැන ලෝකය දන්නේ ඉතා සීමිත අංශ කිහිපයකින් පමණයි. නමුත් මේ වගේ ජාත්‍යන්තර තරගෙකට අපේ රටේ තරගකාරියක් සහභාගි වීම නිසාම ලංකාව කියල රටක් තිබෙන බව ඔවුන් හඳුනා ගන්නවා.

ජාත්‍යන්තර ප්‍රමිතියට අනූව අපි තරගකාරියක්ව තෝරාගෙන යැව්වම ජයග්‍රහණය කරන්න තිබෙන අවස්ථාව වැඩියි. ඒ හරහා ජයග්‍රහණයක් ලබා ගත්තොත් ලංකාවට මේ හරහා විශාල කීර්තියක් ලැබෙනවා. 

Q අද වනවිට වසරකට මේ වගේ තරගාවලි විවිධ නම්වලින් පවත්වන බවක් දැක ගන්න පුළුවන්. ඒ තරගාවලි අතරින් මෙහි තිබෙන වෙනස මොන වගේද?

අපි බියුටි පැජන්ට් එකක් හෝ කුමන හෝ තරගයක් පවත්වන්න ඕන තිබෙන හොඳම මට්ටමෙන්. දැන් පවත්වන සමහර බියුටි පැජන්ට් රටටවත් වැඩක් නැහැ. ඒ වගේම ඒ තරගාවලිවල ප්‍රමිතියක් නැහැ. නමුත් Mrs. Universe සහ Miss Tourism World කියන්නේ ලෝකයේ හොඳම පිළිගැනීමක් තිබෙන පැජන්ට් දෙකක්.

ඒ වගේ තරගෙකට තරගකාරියන් සහභාගි වෙනවා කියන්නේම ඒ අයට ලොකු ජයග්‍රහණයක් ලබනවා කියන එකයි. ඊට අමතරව ජාත්‍යන්තර තරගයකට සහභාගි වීමෙන් ලැබෙන අත්දැකීම් ඉහළයි. මේ වගේ ජාත්‍යන්තර තරගයකට සහභාගි වෙන්න ලැබීමම තරගකාරියන්ට ලොකු අවස්ථාවක්

නමුත් සමහර බියුටි පැජන්ට්වලදී වෙන්නේ මුදල් ලබා ගෙන ඒ තරගෙට සුදුසු නැති කෙනෙක් යවනවා. එහෙම නැත්නම් අනුග්‍රාහකයන්ගේ හිතවතුන් යවනවා මිසක් ලංකාවට ජයග්‍රහණයකට මගපාද ගන්න පුළුවන් තරගකාරියක් යවන්නෙ නැහැ.

මම හිතන්නේ මේ හැමදේම සිදු වෙලා තියෙන්නේ වාණිජකරණයත් එක්කයි. මම ඉල්ලා සිටිනවා ඒ තරග පවත්වන තරග සංවිධායකයන්ගෙන් හරි ප්‍රමිතියකින් යුතුව තරග පවත්වන ලෙස. එසේ වුවහොත් මේ ක්ෂේත්‍රයට තවත් අලුත් මුහුණු නුදුරේදී අපට දැක ගන්න පුළුවන් වෙයි. 

Q මේ වගේ තරගාවලි සඳහා ලංකාවේ ප්‍රසිද්ධ කාන්තා චරිත සහභාගි වී ජයග්‍රහණ අත් කර ගත්තා. නමුත් පසුව ඒ ජයග්‍රහණ සම්බන්ධව විවිධ කටකතා ඇතිවුණා. මේ සම්බන්ධව ඔබගේ අදහස මොන වගේද?

ප්‍රසිද්ධ චරිත කිව්වම අපි ඉස්සෙල්ලාම කරන්නේ ෆේස් බුක් එක හරහා හෝ මාධ්‍යක් හරහා ප්‍රචාරය කරනවා මේ වගේ තරගාවලියක් පවත්වන බව සහ ඒ සඳහා අයදුම් පත්‍ර ඉදිරිපත් කරන්න කියා. ඒ වගේම මේ අවුරුද්දේ විශේෂත්වය දමිළ තරගකාරියන් අයදුම් කරලා තිබෙනවා. ඒ වගේම ලංකාවේ හැම පැත්තකින්ම මේ තරගය සඳහා අයදුම්පත් ඇවිත් තිබෙනවා.

ඒ අතර ජනප්‍රිය චරිතත් මෙයට අයදුම් කරනවා. නමුත් අපි මේ සියලු දෙනාට සලකන්නේ එක හා සමානව. මේ සියලු දෙනාම සම්මුඛ පරීක්ෂණවලට සහභාගි වෙලා , අනු තරගවලට සහභාගි වෙලා ඒ සියලුම තරගවලින් වැඩිම ජයග්‍රහණයක් ලබා ගන්නා සහ එයාලගේ පුරුදු සහ ඒ අචාරශීලී ගතිගුණ අනූව තමා තේරීම් කරන්නෙ.

මේ තරගාවලියට සහභාගි වන තරගකාරියන් පැමිණෙන කෙනා නෙවේ මේ තරගාවලියෙන් එළියට යන්නෙ. ඒ අයට මේ තරගාවලිය ඔස්සේ ලොකු දැනුමක් ලබා ගන්න පුළුවන්. ජාත්‍යන්තර තරගවලියකට අවශ්‍ය සියලු සුදුසුකම් සෑදීම තමයි මේ ජාතික තරගාවලියෙන් සිදු කරන්නෙ. මේ අනු තරගවලින් වැඩිපුරම ලකුණු ගන්න තරගකාරියන්ව අවසාන මහා තරගාවලියේදී ඔවුන්ගේ දක්ෂතා බලා වැඩිම ලකුණු ගත් තරගකාරිය ජයග්‍රාහිකාව ලෙස තෝරා පත් කර ගන්නවා. 

මෙහිදී විශේෂයෙන් කියන්න ඕන කිසිම කෙනෙකුට පෞද්ගලිකව ඇරයුම් කරලා මේ තරගාවලියට සහාභාගි වෙන්න ජයග්‍රහණයක් ලබා දෙන්නම් කියා කිසිම අවස්ථාවක එවැනි දේ සිදු කරලා නැහැ. අපිට එහෙම කරන්න අවශ්‍ය නැහැ. මේ ක්ෂේත්‍රයට එන්න ඕන අලුත් අය. 

ප්‍රසිද්ධ අයට තිබෙන එක වාසියක් තමා ඒ අය මේ ක්ෂේත්‍රයේ කාලයක් තිස්සේ වැඩ කරගෙන ගිහින් ගත් අත්දැකීම්. ඔවුන් දන්නවා මේ වගේ තරගාවලියකදී තරගකරුවෙකුගෙන් බලාපොරොත්තු වන කුසලතා මොනවාද කියා.

ඒ නිසා අලුත් කෙනෙකුට වඩා ඒ වගේ දේවල්වලදී මොවුන්ට ලකුණු ලැබෙනවා. ඒ සියලු දේවල් අරන් බලද්දී ඔබ සඳහන් කරන විදිහට ප්‍රසිද්ධ මේ ක්ෂේත්‍රෙය් රැඳිලා ඉන්න කෙනෙකුට ජයග්‍රහණයක් අත් වුණා කියන්න පුළුවන්. නමුත් මම හිතනවා ඒ හැම කෙනෙක්ම අභිබවලා අලුත් කෙනෙක්ට එන්න අවස්ථාව තියෙනවා කියලා. 

Q අද වෙද්දී නිරූපණ ක්ෂේත්‍රයට එන පිරිසෙහි යම් වැඩි වීමක් තිබෙනවා. ඒ පිළිබඳ ඔබේ අදහස මොන වගේද? 

ඇත්තටම ඒක හොඳයි. ඇත්තටම දෙවෙනි පෙළක්, තුන්වෙනි පෙළක් හැදෙන්න ඕන. උදාහරණයක් විදියට කිව්වොත් අපේ වර්තමාන ක්‍රිකට් කණ්ඩායම දැක්කම අපිට දෙවෙනි පෙළක් නිර්මාණය නොකිරීමේ පළවිපාක අපි මේ වනවිට අත්විඳිනවා.

නමුත් මම හිතන්නෙ මේ ක්ෂේත්‍රයේ විතරක් නෙමේ ඕනම ක්ෂේත්‍රයක අපි අනිවාර්යෙන්ම දෙවෙනි පෙළක් තුන්වෙනි පෙළක් නිර්මාණය කරලා තිබෙන්න ඕන. 

නිරූපණ ක්ෂේත්‍රයෙන් ජාත්‍යන්තර තලයට ගිහින් ලොකු සේවයක් කරපු අය ඉන්නවා. ඒ අයගෙන් කිහිපදෙනෙක් විශ්‍රාම අරන් සහ කිහිපදෙනෙක් මේ තරගවලින් අයින් වෙලා තිබෙනවා. ඉතිං ඒ නිසා මම හිතන්නෙ මේ ක්ෂේත්‍රයට අලුතෙන් අය පැමිණෙන එක හොඳයි. මෙහෙම නවකයො අපුවම අපිට පුළුවන් ජාත්‍යන්තර තරග සඳහා සුදුම කෙනාව යවන්න.

සීමිත පිරිසක් ඉන්නව නම් අපිට එතනින් කෙනෙක් තමා යවන්න වෙන්නෙ. නමුත් ලංකාවෙ හැම පැත්තෙන්ම සහභාගි වුණාම හොඳ උසක් තිබෙන හොඳ පෙනුමක් තිබෙන හොඳ හැකියාවක් තිබෙන, හැම අතකින්ම තමන්ගේ දක්ෂතාවන් පෙන්වන, තැනකට ගිහින් හොඳට කතා කරන්න පුළුවන් තරගකාරියන් අපිට තෝර ගන්න පුළුවන්. 

අද සමහර කිහිපදෙනෙක් මේ ක්ෂේත්‍රෙය් වැරදි ආකල්ප ඇති කරලා තිබෙනවා. මට කියන්න තියෙන්නේ ඒ අය මේ ක්ෂේත්‍රයේ දියුණුවට කිසිම දෙයක් කරපු අය නෙමේ. ඒ අය ෆේස්බුක් එකේ යූ ටියුබ් එකේ කාඩ්බෝඩ් වීරයන් වෙලා ඒ අයගේ වෙන පෞද්ගලික මතිමතාන්තර ඉදිරිපත් කර ගන්න හදනවා මිසක් මේ ක්ෂේත්‍රය වෙනුවෙන් සේවයක් කළ අය නෙමේ.

මම කියන්න කැමතියි අලුතෙන් එන අයට මේ කිසිම දේකට සැලෙන්න එපා කියලා. තමන් කරන දේ හරි නම් තමන්ට හොඳ දැක්මක් තිබෙනවා නම්, හොඳ දැනුමක් තිබෙනවා නම් අනිවාර්යයෙන්ම නවකයන් අපිත් එක්ක එකතු වෙන්න. අපි කැමතියි අලුත් අයට ඉදිරියට යන්න අත දෙන්න.

Q මේ වගේ තරගාවලිවලට සහභාගි වීමට කැමැත්තෙන් ඉන්න අයට මොන වගේ දෙයක්ද කියන්න තියෙන්නෙ? 

මේ ක්ෂේත්‍රයේ ඉස්සරහට ලංකාව කියන අපේ රට ජාත්‍යන්තර වශයෙන් නිරූපණ ශිල්පීන් සහ ශිල්පිණියන් එක්වෙලා ලොකු ගමනක් ගෙනියන්න පුළුවන්. ඒ වගේම මම කියනවා මේ වගේ තරගාවලිවලට සහභාගි වෙන්න කියා. ඒ වගේම මේ තරගවලින් ජයග්‍රහණ ලබා ගන්න උත්සහ කරන්න.

මේක තමන් කවුද කියලා ලෝකෙට පෙන්නන්න තිබෙන හෙඳම අවස්ථාවක්. ඒ නිසා මේ අවස්ථාවන් මග හැර ගන්න එපා. මේ ක්ෂේත්‍රය ගැන වැරදි ආකල්පයක් ඇති කරන්න හදනවා නම් ඒ සියලු දෙනාගෙන් කාරුණිකව ඉල්ලනවා  ඒ දේවල් නවත්වන්න කියා. 

Q මේ වගේ තරගයකින් ජයග්‍රහණය කරන්න මොන වගේ සුදුකම්ද අවශ්‍ය?

සුදුසුකම් ගැන කතා කළොත් අපිට ජාත්‍යන්තරයෙන් පනවන ඒ අදාළ තරගාවලියට අවශ්‍ය උසක් තිබෙනවා. සමාන්‍යයෙන් අඩි 5යි අඟල් 7 වගේ තිබෙනවා නම් ජාත්‍යන්තර තරගාවලියකට මූලිකම සුදුසුකමක්.

නමුත් අද ලංකාවේ තිබෙන ලොකුම ගැටලුවක් තමා උස කියන කාරණය. අපි ජාත්‍යන්තර විදියට 5.7 ක් බලාපොරොත්තු වුණාට ලංකාවේ දැන් එන්න එන්න උස අඩු වීමක් තිබෙනවා. නමුත් අපිට ලංකාවේ තිබෙන සම්පත්වලින් තමා ප්‍රයෝජන ගන්න වෙන්නෙ.

ලංකාවේ ඕන තරම් තරගකාරියන් ඉන්නවා මේ වගේ තරගවලට සහභාගි වෙන්න බයේ. මොකද මේ ක්ෂේත්‍රය ගැන තිබෙන වැරදි කටකතා නිසා. මම කියන්නෙ හොඳ පෙනුමක්, හොඳ හැකියාවක් තිබෙනව නම් ඔබට සමාජයත් සමග හොඳට ගනුදෙනු කරන්න පුළුවන් නම් මේ වගේ තරගවලට අයදුම් කරන්න පුළුවන්.

Q මේ වගේ තරගවලට විවාහක කාන්තාවන්ගේ සහභාගිත්වය මොන වගේ මට්ටමකද තිබෙන්නේ?

අද වනවිට විවාහක කාන්තාවන්ගේ මේ ක්ෂේත්‍රයට විශාල නැඹුරුවක් තිබෙනවා. ලංකාවේ මෙහෙම දෙයක් තිබෙනවා. ඒ විවාහ වුණාට පස්සෙ ගෙදරට කොටු වෙන ගතියක්. නමුත් අද වනවිට ලෝකය ගොඩක් දියුණු වෙලා තිබෙනවා. නමුත් අද සිටින කාන්තාවන් ගොඩක් සමාජශීලියි. ඒ නිසා අද වෙද්දී මේ තරඟවලට සහභාගී වෙන්න ලොකු නැඹුරුතාවයක් තිබෙනවා.

19510086_1426398114110047_4204806148428162250_n 19598791_331199540634304_637293413462474112_n 19601375_331198507301074_2679006427656984071_n 19904898_336154210138837_724555908926993872_n

නළදරු උපත් මඳසරුභාවය අන්තර් ගර්භාෂ සංසේචනය සහ කෘත්‍රිම සංසේචනය පිළිබඳ ඔබ දැනගත යුතු කරුණු

ගැබ් ගැනීමේ නොහැකියාව සම්බන්ධයෙන් අතීතයේ සමාජයේ පැතිරී පැවැති සාවද්‍ය මත බොහොමයක් මේ වනවිට වේගයෙන් අවලංගු වෙමින් පවතී. නවීන වෛද්‍ය තාක්‍ෂණයේ දියුණුව හා කෘත්‍රිම සංසේචන ක්‍රමවල දියුණුව සමග මේ වනවිට ගැබ්ගැනීම් උත්සාහයන් කිහිපයක් අසාර්ථක වූ කාන්තාවකට පවා මවු පදවිය ලැබීමේ අවස්ථාව හිමිව තිබේ.

කෘත්‍රිම සංසේචනය IVF (In Vitro Fertilization) සම්බන්ධයෙන් කලාපීය මෙන්ම ගෝලීය මට්ටමින් විශිෂ්ට සාර්ථකත්වයක් අත්පත් කරගනිමින් සිටින 'ලංකා හොස්පිට්ල්ස්'හි සාඵල්‍යතා මධ්‍යස්ථානය නුදුරු අනාගතයේදී 1,000 වැනි සාර්ථක කෘත්‍රිමව සංසේචිත දරු උපත නිවේදනය කිරීම සඳහා සූදානමින් සිටියි. 2008 වසරේදී ආරම්භ කළදා පටන් ලංකා හොස්පිට්ල් සාඵල්‍යතා මධ්‍යස්ථානය දහස් ගණනකගේ දරුඵල සිහින සැබෑකර තිබේ.

මේ සම්බන්ධයෙන් ලංකා හොස්පිට්ල්ස්හි සායනික කළල විද්‍යා වෛද්‍ය සාඵල්‍යතා මධ්‍යස්ථානයේ ප්‍රධානී වෛද්‍ය මදාර රළපනාව මහතා සහ ප්‍රසව හා කාන්තා රෝග විශේෂඥ වෛද්‍ය නිශේන්ද්‍ර කරුණාරත්න මහතා සමග 'අද' මෙලෙස කතාබහක නිරතවිය. 

Q කෘත්‍රිම සංසේචනය හෙවත් IVF යනු කුමක්ද? දරුඵල අපේක්ෂා කරන යුවළක් මේ සඳහා යොමුවිය යුත්තේ කුමන අවස්ථාවේදීද?

වෛද්‍ය මදාර – කෘත්‍රිම සංසේචනය හෙවත් 'IVF' යනු පාලිත තත්ත්ව යටතේ විද්‍යාගාරයක් තුළ සිදුවන සායනික ක්‍රියාවලියක්. කාන්තාවකට ස්වාභාවිකව ගැබ්ගැනීම දුෂ්කර වනවිට මේ ක්‍රමය භාවිත කළ හැකියි. අදාළ යුවළගේ මදසරුභාවය නිසා ස්වාභාවිකව ගැබ්ගැනීම අසාර්ථක වුණා වන්නට පුළුවන්.

Q මඳසරුභාවය යනු කුමක්ද?

වෛද්‍ය නිශේන්ද්‍ර – කාන්තාවකගේ මඳසරුභාවය යනු උපත් පාලන ක්‍රමවේද භාවිතයෙන් තොරව සංසර්ගයේ යෙදී මාස 06ත් අවුරුද්දත් අතර කාලයක් තුළ ගැබ් ගැනීමට නොහැකි වීමයි. ඩිම්බ මෝචනය නිසි ලෙස සිදුනොවීම වගේම Endometriosis, Polycystic ovarian syndrome වැනි රෝග තත්ත්ව මීට බලපාන්න පුළුවන්. පිරිමින් තුළ නම් ශුක්‍රාණුවල සචලතාව, සඵලතාව, රූපාකාරය හා මුළු ප්‍රමාණය යනාදී සාධක මීට බලපානවා.

Q මඳසරුභාවය ඇතිවන්නේ කුමක් නිසාද?

වෛද්‍ය නිශේන්ද්‍ර – මඳසරුභාවය සම්බන්ධයෙන් තුනෙන් එකකට හේතුවෙන්නේ පිරිමින් තුළ පවතින මඳසරුභාවයයි. තවත් තුනෙන් එකකට පමණ කාන්තාවන් තුළ පවතින මඳසරුභාවය හේතු වනවා. ඉතිරි තුනෙන් එක ඇතිවන්නේ දෙදෙනා තුළම පවතින තත්ත්වයන්ගේ බලපෑම මතයි.

මේ හේතූන් අතරින් 20%ක් පමණ නිශ්චිත හඳුනා ගැනීමට හැකියාවක් නැහැ. 

Q ස්වාභාවික ගැබ්ගැනීමේ ක්‍රියාවලිය විස්තර කරන්න පුළුවන්ද?

වෛද්‍ය නිශේන්ද්‍ර – තරුණ කාන්තාවකගේ සාඵල්‍යතා කාලසීමාව වන්නේ මාසික ආර්තවයේ සිට දින 12ත් 16ත් අතර කාලයයි. සංසර්ගය මගින් යෝනිය තුළට ශුක්‍රාණු මිලියන ගණනක් ඇතුළු වෙනවා. ස්වාභාවික ගැබ්ගැනීමකදී නිරෝගී හා සජීවී ශුක්‍රාණු බහුතරයක් ගැබ්ගෙල කරා පිහිනා යනවා.

ඉන්පසු ඒ ශුක්‍රාණු ගමන් කරන්නේ පැලෝපීය නාළය හරහායි. මේ කාලයේදී ඩිම්බ මෝචනය සිදුවනවා. එසේ ඩිම්බ කෝෂ මගින් නිකුත් කරන ඩිම්බයක් පැලෝපීය නාළය තුළදී ශුක්‍රාණුවක් හා එක්වී සංසේචනය වීම සිදුවනවා. මේ ආකාරයට ස්වභාවික ක්‍රියාවලිය ඔස්සේ ගැබ්ගැනීම වසරක කාලයක් තුළ සිදු නොවුණොත් එම යුවළට ප්‍රතිකාර වෙත යොමු වෙන්න පුළුවන්.

Q මේ ආකාරයට මඳසරුභාවය නිසා පීඩා විඳින අයට ඇති එකම විසඳුම කෘත්‍රිම සංසේචනය පමණද?

වෛද්‍ය මදාර - පිරිමින් තුළ මද පමණින් දැකිය හැකි මඳසරුභාවය සහ කාන්තාවන්ගේ ගැබ්ගෙල ආශ්‍රිත ගැටලු නිසා ඇතිවන මඳසරුභාවය සඳහා මූලික ප්‍රතිකාර ක්‍රමයක් ලෙස 'අන්තර් ගර්භාෂ සංසේචනය' හෙවත් Intra Uterine Insemination (IUI) භාවිත කරන්නට පුළුවන්.

මෙහිදී සංසේචනය පහසු කිරීම සඳහා තෝරාගත් සචල ශුක්‍රාණු කාන්තාවකගේ ගර්භාෂය තුළ තැන්පත් කිරීම සිදුවනවා. ඩිම්බ වර්ධනය වීම හෝ ඩිම්බ මෝචනය සිදුවූ පසුවත් කාන්තාව ගැබ් නොගැනීමට ඉඩ තිබෙනවා. පැලෝපීය නාළ තුළ සිදුවන දේ දැකීමට නොහැකි නිසා මෙවැනි අසාර්ථක වීම් ඇතිවන්නට පුළුවන්.

කෙසේ වුවත් මේ වනවිට කාන්තාව හෝමෝන ප්‍රතිකාර වැනි දේ ලබාගෙන තිබීමට ඉඩ ඇති නිසා 'IVF' ප්‍රතිකර්මය ආරම්භ කිරීමට පවා ඇයගේ හෝමෝන මට්ටම නිසි ප්‍රමාණයට වඩා ඉහළ මට්ටමට පැමිණ තිබීමට පුළුවන්. ඇතැම් අය වසර ගණනාවක් තිස්සේ IUI මධ්‍යස්ථාන එකින්එක කරා යමින් ප්‍රතිකර්ම 15ත්, 20 ත් අතර කරමින් දරුඵල ලැබීමට උත්සාහ කරන අවස්ථා අප දැක තිබෙනවා.

Q කෘත්‍රිම සංසේචනය හෙවත් 'IVF' ප්‍රතිකර්මයේදී සිදුවන්නේ කුමක්ද?

වෛද්‍ය මදාර - මෙහිදී සිදුවන්නේ රසායනාගාරයක් තුළදී ශුක්‍රාණුව හා ඩිම්බය කෘත්‍රිමව සංසේචනය කිරීමයි. මේ සඳහා Standard iy ICSI (Intra Cyto-Plasmic Sperm Injection) යනුවෙන් ක්‍රම දෙකක් භාවිත වනවා.

Standard ක්‍රමයේදී සිදුවන්නේ කාන්තාවගේ ඩිම්බ කෝෂවලින් ලබාගත් පරිණත ඩිම්බ දෙකක් හෝ තුනක් ශුක්‍රාණු 80,000ක් හෝ 100,000ක් පමණ සමග සංසේචනය කර, පැලෝපීය නාළයේ සංයුතියට සමාන (උෂ්ණත්වය සෙල්සියස් අංශක 37/ආර්ද්‍රතාව කාබන් ඩයොක්සයිඩ් 6%, ඔක්සිජන් 5%) ඉන්කියුබේටරයක තැන්පත් කිරීමයි.

මෙහි රෝපණ මාධ්‍ය සියල්ලත් පැලෝපීය නළයේ තත්ත්වයන්ට සමාන ලෙස පවත්වාගනු ලබනවා. මෙහිදී ශුක්‍රාණුව ස්වාභාවික ලෙස ඩිම්බය හා සම්බන්ධ විය යුතුයි.

ICSI ක්‍රමයේදී ශුක්‍රාණු ඍජුවම ඩිම්බවලට ඇතුළු කෙරෙන අතර, මෙම ඇතුළු වීම රසායනාගාරය තුළ තහවුරු කරගැනීමට හැකියි. මේ ආකාරයට ශුක්‍රාණුව ඩිම්බයට ඇතුළු වීම නිසා සංසේචන ක්‍රියාවලිය ආරම්භ වනවා. ස්වාභාවික ක්‍රියාවලියට සමානවම ශුක්‍රාණු හා ඩිම්බ සම්බන්ධ වීම සිදුකෙරෙන නිසා ICSI ක්‍රමයේ සාර්ථකත්ව අනුපාතය ඉහළයි.

පවුල් සෞඛ්‍ය නිලධාරීන්ගේ හිඟය ඉදිරියෙදි මිනිසුන්ට ලොකු ගැටලුවක් වේවි

පවුල් සැලසුම් කිරීම මානව අයිතිවාසිකමක් ලෙස හැඳින්විය හැකිය. මේ මගින් කාන්තාවකට තමන් ගර්භිණීභාවයට පත්විය යුතුද? එසේ නම් කුමන අවස්ථාවකදීද සහ කොපමණ වතාවක්ද යන්න තීරණය කිරීමට අවස්ථාව ලබාදේ.

ඒ මගින් කාන්තාවට ඇයගේ ශරීරය සහ ඇගේ අනාගතය පිළිබඳ දැනුවත්ව තීරණ ගැනීම සඳහා සවිබලගැන්වීම තුළින් සෞඛ්‍යමත් සහ ආරක්ෂාකාරී ජීවිතයක් ගත කිරීමටත් ජාතික ආර්ථිකයේ සංවර්ධනයට තම දායකත්වය ලබාදීමටත් අවස්ථාව උදාකර දේ. 

මේ නිසා පවුල් සැලසුම් කිරීමේ වැදගත්කම හඳුනාගනිමින් සෞඛ්‍ය අමාත්‍යාංශය ශ්‍රී ලංකාවේ ජාතික පවුල් සැලසුම් වැඩසටහනේ පළමු සමාලෝචන වාර්තාවක් පසුගිය සතියේ එළිදැක්වීය.

ඒ නිසා පවුල් සැලසුම් කිරීමේ වැදගත්කම සම්බන්ධව ඔබව දැනුවත් කිරීමට තීරණය කළෙමු. මේ සඳහා 'අද' ට අදහස් දැක්වූයේ සමස්ත ලංකා පවුල් සෞඛ්‍ය සේවා නිලධාරිනී සංගමයේ සභාපති දීප්ති කෞෂානි  ජයතුංග මහත්මියයි. 

Q පවුල් සැලසුම් ක්‍රමය කොහොමද රටක තිරසාර සංවර්ධනයට වැදගත් වන්නේ?

පවුල් සංවිධානය කියන්නෙම අනවශ්‍ය දරු උපතක් වළක්වා ගැනීම. අනවශ්‍ය දරු උපතක් කියලා කියන්නේ තමන්ගේ ආර්ථික මට්ටම අනුව දරුවො හදන එක සැලසුම් කරන එකයි. එසේ කළේ නැත්තම්, දරුවො හතර පස්දෙනෙක් හැදුවොත් ඒ දරුවන්ට කුඩා කාලයේ අදාළ පෝෂණය ලබාදෙන්න වෙන්නෙ නෑ.

ඒ වගේම දරුවන්ට හරි අධ්‍යාපනයක් දෙන්න වෙන්නෙ නැහැ. ලෙඩ රෝගවලට හරියට ප්‍රතිකාර දෙන්න වෙන්නෙ නැහැ. ඒ වගේම පවුල් සෞඛ්‍ය සේවාව පැත්තෙන් ගත්තොත් පූර්ව ළමාවිය සංවර්ධනය කියන දේ දරුවන්ට ඉතාම වැදගත්. ඒකට උපදෙස් ලැබුණට අම්මට ඉඩකඩක් නැති වෙනවා දරුවන්ට හරියට ඒ දේ ලබාදෙන්න. ඒ නිසා පවුල් සැලසුම් ක්‍රමය වැදගත් වෙනවා.

අනිත් කාරණය තමයි ළමයින්ගේ අවශ්‍යතාවන් ඉෂ්ට කරන්න අම්මලා විදේශගත වෙනවා. අම්මා විදේශගත වෙනවාත් එක්කම තාත්තා වෙන පැත්තකට යොමු වෙන අවස්ථා අපේ රටේ ඕනතරම් තිබෙනවා. ඒ සමගම මේ දරුවො අනාරක්ෂිත වෙනවා.

අනිත් කාරණය තමයි ආදායම් මාර්ගයක් උපයන්න යන බොහෝ කාන්තාවෝ තමන්ගේ ලෙඩ දුක ගැන බලන්නෙ නැති වෙනවා. එවිට අනවශ්‍ය ලෙඩ රෝගවලට වගේම කරදරවලට පවුලේ සියල්ලන්ම ගොදුරු වෙනවා. ඒ සියල්ලට වක්‍රව ගත්තොත් රටේ යම්කිසි මුදලක් වියදම් වෙනවා. එය රටේ සංවර්ධනයට බාධාවක් වෙනවා.

ඒ වගේම මීට අවුරුදු ගණනකට කලින් රටේ සාපරාධී ගබ්සා වලින් මිය ගිය මව්වරු ප්‍රතිශතයක් තිබුණා. දැන් ඒක බොහෝදුරට අඩුවෙලා තිබෙනවා. ඒ දේ එලෙස නැතිවෙලා තියෙන්නෙ මෙන්න මේ පවුල් සංවිධාන ක්‍රමය නිසා. රටේ පවුල් සංවිධාන ආවරණය 70%ක්. ඒ 70% ඇතුළෙ මේ කතා කරපු සියලු ප්‍රශ්නවලට උත්තරදී තිබෙනවා.

මේ නිසා පවුල් සංවිධාන ක්‍රමයෙන් වෙන්නේ අපේ ආර්ථිකයට ගැළපෙන අපේ පවුල හදාගන්න උපදෙස් ලැබෙන එකයි. ඒ උපදෙස් අනුව වැඩ කරපුවාම අපිට සෞඛ්‍ය, අධ්‍යාපනය, ආර්ථිකයේ සුරක්ෂිතභාවය යන සියල්ලම ඒ ඇතුළෙ රැකෙනවා. එය රටේ ආර්ථිකයට වගේම රටේ තිරසාර සංවර්ධනය‍ට බලපානවා.

Q පසුගිය සතියේ පවුල් සැලසුම් සමාලෝචන වාර්තාවක් ඉදිරිපත් කළා. ඊට අනුව ලංකාවේ පවුල් සැලසුම් ක්‍රම අද වනවිට මොන වගේ තත්ත්වයකද තිබෙන්නේ?

ලංකාවේ පවුල් සැලසුම් ක්‍රම ගත්තම නික්ෂේපණ තිබෙනවා. පෙති වශයෙන් තිබෙනවා. මෙයින් බහුතරයක් කරන ක්‍රමය තමා අඩු වයසේ විවාහක අයට කරන no plant ක්‍රමය, ලූප් පැලඳීම සහ පෙති භාවිතය යන ක්‍රම.

ඊට අමතරව කොන්ඩම් පාවිච්චි කරනවා. කොන්ඩම් පාවිච්චි කිරීම සම්බන්ධ දැනුම මදිකමක් තිබෙනවා. ඒ නිසා වැඩිපුරම පවුල් සෞඛ්‍ය නිලධාරීන් නැඹුරු වෙනවා අර ක්‍රම තුනට අනූව සිදුකරන්න. 

Q ඔබ හිතන විදියට මේ උපත් පාලන ක්‍රමවලින් වඩාත් ප්‍රතිඵලදායක ක්‍රමය කුමක්ද?

100%ක් සෑම උපත් පාලන ක්‍රමයක්ම ප්‍රතිඵලදායක නැහැ. නමුත් මේ ඉහත සඳහන් කළ ක්‍රම සෑහෙන ප්‍රතිඵලදායකයි. ඒ ක්‍රම 4 ඇතුළෙ 70%ක පවුල් සංවිධාන ආවරණයක් රට ඇතුළෙ තිබෙනවා. 

Q ඒ වගේ උපත් පාලන ක්‍රම පාවිච්චියෙන් කාලයත් සමග අතුරු ආබාධ හට ගන්නවාද?

මේවායින් යම්කිසි හෝමෝන මට්ටමේ වෙනසක් වෙනවා. නමුත් පවුල් සංවිධාන ක්‍රමයෙන් අයින් වුණාම වසරක් පමණ ගතවෙද්දී සාමාන්‍ය මට්ටමට එනවා. 

Q පවුල් සැලසුම් සමාලෝචන වාර්තාව ඉදිරිපත් කිරීමෙන් බලාපොරොත්තු වූයේ කුමක්ද? 

එයින් බොහෝ විට බලාපොරොත්තු වූයේ රටේ අලුතෙන් හඳුන්වාදෙන පවුල් සැලසුම් ක්‍රමවල සාර්ථකත්වය හා නැවත අලුතෙන් පවුල් සැලසුම්වලට යොමු කරගන්න අවශ්‍ය ප්‍රතිශතය සහ දැනට කරපු ප්‍රතිශතය අතර ඇති ප්‍රතිඵල මොන වගේද කියා සොයා බලන එකයි. 

Q කාන්තාවන් සවිබල ගන්වන්න පවුල් සැලසුම් කිරීමේ වැදගත්කම ගැන කතා කළොත්?

බොහෝ විට ළමයි සමග කාන්තාව ගෙදරට කොටු වීමක් සිදු වෙනවා. ළමයි දාලා යන්න විදිහක් නැහැ. ඒ නිසා රටේ තිබෙන ආර්ථිකයත් එක්ක අද වනවිට සැමියාත් , බිරිඳත් මුදල් ඉපයීමේ මාර්ගයකට යොමු වෙන්න ඕන.

මේ ක්‍රම මගින් වයස් පරතරය පාලනය කරගෙන පවුල් සංවිධාන ක්‍රම භාවිත කළාම තමන්ට අවශ්‍ය කරන වයස් පරතරය හදා ගැනීමේ හැකියාව තිබෙනවා. එවිට කාන්තාව ගෙදරට කොටු වෙන එක අඩුකර ගන්න පුළුවන් වෙනවා. ඒ තුළින් කාන්තාවට යම් කිසි ආදායම් මාර්ගයකට යොමු වෙන්න හැකියාව ලැබෙනවා.

අධ්‍යාපනයට යොමු වෙන්න පුළුවන්. මන්ද කාන්තාව කියන්නෙ නිවසට සිර වී සිටිය යුතු කෙනෙක් නෙමේ. නිදහසේ දරුවන්ගේ අධ්‍යාපන කටයුතු ගැන සොයා බලන්න, නිවසේ ආර්ථිකයට ශක්තියක් වෙන්න, තමන්ගේ අධ්‍යාපන කටයුතු කරගන්න ඒ වගේ දේවල්වලට නිදහස ගන්න පුළුවන් වෙනවා මේ පවුල් සැලසුම් ක්‍රම භාවිත කිරීම මගින්. ඒ ඔස්සේ කාන්තාවන් සවිබල ගැන්වීමක් සිදු වෙනවා. 

Q දුෂ්කර පළාත්වල කාන්තාවන් මේ පවුල් සැලසුම් ක්‍රම සම්බන්ධව දැනුවත් කිරීම ලබා ගන්නේ කෙසේද?

ඒ පිළිබඳ අදාළ ප්‍රදේශයේ පවුල් සෞඛ්‍ය සේවා නිලධාරීන් 100%ක් ඒ වෙනුවෙන් කැප වෙලා ඉන්නවා. දුෂ්කර පළාත් කියලා නිලධාරීන් තමන්ගේ වගකීම පැහැර හැරලා නැහැ. එහෙම පැහැර හැරිය නම් මේ ඉලක්කයට එන්න බැහැ. ඒ වගකීම පවුල් සෞඛ්‍ය සේවා නිලධාරීන් 100%ක් ඉෂ්ට කරලා තියෙනවා. නමුත් රටේ ප්‍රශ්නයක් තිබෙනවා. රටේ පවුල් සෞඛ්‍ය නිලධාරීන්ගේ හිඟයක් තිබෙනවා.

හෙට දවස වෙද්දී ඒ හිඟය 50%ක් විතර වැඩි වෙනවා. තව වසරක් වෙද්දී මේ තත්ත්වය තවත් වැඩි වෙනවා. අන්න එතෙනදි මේ මිනිස්සුන්ට ප්‍රශ්නයක් එනවා තමන්ට මේ සේවාව සපයා ගැනීම සම්බන්ධයෙන්. නිසි පවුල් සංවිධානය කියන්නෙම නිසි උපදෙස් නිසි වේලාවට ලබා ගන්න ඕන දෙයක්. එතකොට තමන්ට අදාළ නිලධාරිනිය නැති වීමෙන් රටේ ඉලක්ක සමහර විට පහළට වැටෙයි. 

Q ඒ සම්බන්ධයෙන් රජය පියවරක් අරන් නැද්ද?

රජයෙන් මේ සම්බන්ධව තාම කිසිම සැලසුමක් නැහැ. 

Q පුංචි පවුල රත්තරං කියන සංකල්පයට අද වනවිට විවිධ බලවේග දෝෂාරෝපණය එල්ල කරමින් ඉන්නවා. ඒ සම්බන්ධව ඔබතුමියගේ අදහස මොන වගේද?

මේ නිසා සිංහල අම්මලා දරුවො දෙන්නෙක් හැදුවා. මේ දේ ඒ කාලේ තිබුණ එකක්. දැන් සිංහල කියලා නෑ. සිංහල, දෙමළ , මුස්ලිම් යන සියලු මවුවරුන් මේ තියෙන ආර්ථික රටාවත් සමග පවුල් සැලසුම්වලට නැඹුරු වෙලා තිබෙනවා. 

මුස්ලිම්, දෙමළ ආගම් අනුව ඒ කාලේ මේ ෙද් ජීවිතයක් නැති කිරීමක් කියා සිතා ඒ දේට විරුද්ධ වුණා. නමුත් අද වෙද්දී මේ දැනුවත් කිරීම සහ රටේ ආර්ථිකයත් සමග ඔවුනුත් මේ වෙද්දී පවුල් සංවි‘ධාන ක්‍රම අනුගමනය කරනවා. මේ කතාව ඇත්තටම ආගම්වාදය, ජාති වාදය මුල් කරගත්ත කතාවක්.

ඒ දෙයින් සිංහල ජාතියේ අඩු වීමක් වුණා කියන කාරණය. මේ දෙස අන්තවාදයෙන් බැලුවෙ නැත්නම් උතුරු නැගෙනහිර පළාත්වල පවුල් සංවිධානය අඩු වෙන්න ඕන. රටේ ඉලක්කයට අදාළව ඒ ඒ පළාත් අනුව මෙය සිදු කර තිබෙනවා. ඒ නිසා සිංහල ජාතිය පමණක් නොවේ අනෙකුත් ජාතීන්ද අඩු වීමක් සිදු වෙනවා. 

Q පවුල් සැලසුම් සම්බන්ධව විවාහ වීමට බලාපොරොත්තුවෙන් ඉන්න කාන්තාවන්ට දෙන්න තිබෙන උපදෙස කුමක්ද?

මෙහිදී වයසත් අනුව දෙන උපදෙස්වල වෙනස් වීමක් තිබෙනවා. අඩු වයසේ කෙනෙක් නම් අවුරුදු 25ක් වත් යනකම් දරුවෙක් හදන්න ඉන්න කියනවා. රටේ දුෂ්කර පළාත් ගත්තොත් මොනරාගල, අම්පාර, හම්බන්තොට පළාත්වල අඩු වයස් විවාහයන් වැඩියි.

එතකොට ඒ අයට දෙන උපදෙස තමයි ළමයෙකු හදන්න  සුදුසු වයස එනකම් උපත් පාලන ක්‍රමයක් පාවිච්චි කරන්න කියන එක. ඒකට අඩු වයසේ කෙනෙක්ට හඳුන්වලා දෙන්නෙ NO PLANT කියන ක්‍රමය තමයි. ඒ වගේම මේ දේත් මතක් කරන්න ඕන සාමාන්‍ය‘යෙන් ළමයෙකු හදන්න සුදුසු වයස කියලා අපි නිර්දේශ කරන්නෙ වයස අවුරුදු 24 -30 අතර කාලයයි. 

 

වසරේ කාන්තාව ඇමතිනි තලතා අතුකෝරළ

Top 50 profession & career Women Awards Sri lanka-2017 සම්මාන උළෙලේදී වසරේ කාන්තාව ලෙස රන් සම්මානයෙන් පිදුම් ලැබීමට විදේශ රැකියා අමාත්‍ය තලතා අතුකෝරළ මහත්මිය සමත්ව ඇත. පසුගිය 14 දා කොළඹදී මෙම සම්මාන උළෙල පැවැතියේය.

විදෙස්ගත ශ‍්‍රමිකයින් වෙනුවෙන් සිදුකළ සේවාවන් හා දේශපාලනික වශයෙන් ඇය ලබාගත් ජයග‍්‍රහණයන් හා සිදුකළ සුවිශේෂි දායකත්වය වෙනුවෙන් IFC ආයතනය හා Women Management ආයතනය විසින් මෙම සම්මානය පිරිනමා ඇත.

1

තම්බපණ්ණී Wedding Fair 2017 ගාලු පුරහලේදී

දකුණුලක දැවැන්තම විවාහ මංගල ප්‍රදර්ශනය වන "තම්බපණ්ණී Wedding Fair 2017"  මෙම මස 14,15,16 තෙදින පුරා ගාලු පුරහල පරිශ්‍රයේදී පැවැත්වේ.

මනාලියන් දැක්ම,මනාලියන් හැඩගැන්වීමේ තරග, ක්ෂේත්‍රයේ ප්‍රවීණයන්ගේ උපදෙස් සහ විවාහ මංගල උත්සවයක් සාර්ථකව සංවිධානය කරගැනීමට අවශ්‍ය තවත් අංග රාශියකින් මෙම ප්‍රදර්ශනය සමන්විතය.

 නොමිලේ පැවැත්වෙන මෙම ප්‍රදර්ශනය Thambapannie wedding Planning and Event Management ආයතය සංවිධානය කරයි.

ඔබේ දරුවාටත් උණ වැලඳී අැත්නම්

අද වනවිට ඩෙංගු උණ රෝගය වසංගත තත්ත්වයක් බවට පත්ව තිබේ. වයස් භේදයකින් තොරව ඩෙංගු උණට ගොදුරු වීමක් දැකගත හැකිය. නමුත් කුඩා දරුවන්ට ඩෙංගු උණ වැලඳුණොත් ඔවුන්ට ඔවුන්ගේ අපහසුතා හරිහැටි කියාගත නොහැකි වීම හේතුවෙන් රෝගය උත්සන්න වීම සිදුවේ.

එබැවින් දෙමව්පියන් ලෙස ඔබේ දරුවාට මේ දිනවල උණ රෝගය වැලඳී ඇත්නම් සැලකිලිමත් විය යුතුය. ඒ සම්බන්ධව ඔබ දැනුවත් කිරීමට කොළඹ ජාතික රෝහලේ හෙද පුහුණු නිලධාරිනී පුෂ්පා රම්‍යාණී සොයිසා මෙනවිය 'අද' සම්බන්ධ කර ගත්තෙමු.

වසංගත රෝග කාලයකදී කුඩා දරුවෙක් හෝ ළඳරුවෙකුට උණ රෝගය වැලඳුණොත් කල් මරන්න හොඳ නැහැ. මේ කාලයේදී දරුවෙකුට උණක් හැඳුණොත් අනිවාර්යයෙන්ම ඔබ කරන්නට ඕනේ වහාම පවුලේ වෛද්‍යවරයාට හෝ කුමන හෝ වෛද්‍යවරයෙකු ළඟට ගොස් අනිවාර්යයෙන්ම මෙය ඩෙංගුද නැතිනම් වෙන රෝගී තත්ත්වයක්ද කියා බැලීම අත්‍යවශ්‍යයි.

මන්ද සමහර වෙලාවට රෝග තත්ත්වය උත්සන්න වෙනතෙක් දන්නෙ නැති නිසා. ඊට පසුව අවශ්‍ය ප්‍රතිකාර සඳහා යොමු වෙන්න අවශ්‍යයි.

ඒ වගේම උණ පොඩ්ඩක් හරි ඇති වුණොත් වෛද්‍ය නියමයෙන් තොරව ඖෂධ භාවිත කරන්න හොඳ නැහැ. ඔබ කරන්න අවශ්‍ය දරුවාට උණ තියෙනවා නම්, ගෙදර උණ කටුවක් තියා ගෙන උණ කටුවෙන් නිවැරදිව උණ පරීක්ෂා කර බලන්න එක. ඒ වගේම එහි සටහන් පවත්වා ගන්න අවශ්‍යයි.

එතකොට වෛද්‍යවරයා ළඟට යන කොට ඔබට කියන්න පුළුවන් උණ ප්‍රමාණය වැඩිවෙනවද, අඩුවෙනවද කියාලා. ඒ වගේම ඔබට උණ පාලනය කරන්න හැකියාවක් තිබෙනවා. තුවායක් අරගෙන මඳ උණු වතුර හොඳට පොඟවලා මුළු ඇඟම තෙතමාත්තු කරන්න පුළුවන් නම්, උණ බස්සන්න පුළුවන්. නැතිනම් දරුවාට උණවලිප්පුව දක්වා යන්න පුළුවන්. 

ඒ වගේම දරුවන්ගේ විවිධාකාර රෝග ලක්ෂණ මතුවෙනවා. උණ, කැස්ස, හෙම්බිරිස්සාව ඇතිවෙනවා. අප්‍රාණිකභාවය, ඇඟපත පණ නැතිකම, ශරීරයේ සන්ධි වේදනාව, පළු මතුවීම, හුස්ම ගැනීම වේගවත් වීම, නාඩිවැටීම වේගවත් වීම, මේ වගේ මෙන්ම දරුවගේ පොඩි හරි වෙනසක් තිබෙනවා නම් ඉක්මනින් වෛද්‍යවරයෙකු ගාවට යොමුකිරීම අත්‍යවශ්‍යයි. 

එකවර ව්‍යාපාර දෙකක් කරන දිරිය මවක්

සිය සැමියාගේ වියෝවෙන් පසුව ඔහු විසින් කරගෙන යනු ලැබූ  විසිතුරු බඩු අලෙවි සැල පමණක් නොව ඊට අමතරව මල් වෙළෙඳාමක්ද කරගෙන යමින් සිය පවුලේ ආර්ථීකය  ගොඩනගා ගන්නට දහදිය වගුරුවන ආදර්ශවත් මවක් නුවරඑළිය බදුල්ල මාර්ගයේ පිහිටි හග්ගල මල්වත්ත අබියසදී අපට හමුවිය.

කාන්ති රූපලතා නම් වූ මේ දිරිය මාතාව හග්ගල නව කොළණිය ගම්මානයේ පදිංචිකාරියකි.

වැඩිමහල් දරු තිදෙනෙකුගේ මවක් වන ඇය තාරුණ්‍යය ඉක්මවා බොහෝ කලක් ගෙවී ගොස් ඇතැයි දැණුනද තවමත් තරුණියක සේ බෙහෙවින්ම කඩිසරය. 

මාර්ගය අද්දර නවතා ඇති ලොරි රථයේ පසුපස කොටසේ ඇති ඇගේ මල් අලෙවි සැල වෙත රොක් වන පිරිසට අවශ්‍ය මල් පැළ තෝරා දෙන ඇය තවත් ඇසිල්ලකදී ඒ ආසන්නව පිහිටි ඇයගේ සිල්ලර බඩු අලෙවි සැලට දිව යන්නේ එහි පැමිණි පාරිභෝගිකයන්ට අවශ්‍ය දෑ රැගෙන දෙන්නටය.

සැබෑවටම තරුණ වැඩිහිටි කාටත් ආදර්ශයක් වූ මේ දිරිය මාතාව සමග කතා කළ යුතු යැයි සිතූ අප ලද අවසරයකින් ඇය කතාවට එක්කර ගත්තේ ඇයගෙන් බොහෝ දේ දැන කියා ගන්නටය. 

අපේ ඉල්ලීමට නිහතමානීව  ප්‍රතිචාර දැක්වූවද  ඇය සිය කතාව ආරම්භ කළේ කදුළු කැට කිහිපයක් දෙනෙතේ සඟවාගන්නට තැත් කරමිනි. 

''වසර දෙකකට විතර ඉස්සර වකුගඩු රෝගයක් හැදිලා මගේ මහත්තය නැති වුණා. මගේ එක පුතෙක් ගුරුවරයෙක්. අනෙක් පුතාට ස්ථීර රස්සාවක් නැහැ. දුව උසස් පෙළ කරනවා. මගේ ගෙවල් මේ ළඟ. 

මහත්තය නැති වුණාට පස්සේ මහත්තයා ගෙදරට ගෙනාව ආදායම නැති වුණා. ඒ නිසා මහත්තයට අයිති මේ කඩේ මම කරන්න පටන් ගත්තා. හැබැයි මුලදී මේ රස්සාව මට නුහුරු නිසා කරගෙන යන්න අමාරු වුණා. ඒත් මම උත්සාහය අත් හැරියේ නැහැ. කල්පනාවෙන් වෙළෙදාම කරගෙන යද්දී මේක කරන්න පුළුවන් දෙයක් බව මට තේරුණා. 

මෙතන්ට එන සංචාරකයො මල්වත්ත බලලා ආපහු යද්දී මතක හිටින්න මොනව හරි අරන් යනවා. මාල, වළලු, කණ්ණාඩි, කැප්, තොප්පි, අත් පලඳනා, සෙල්ලම් බඩු, මේ වගේ දේවල්වලට ඒ අයගේ ඉල්ලුමක් තියෙනවා. ඒ නිසා තමයි මම මේ අලෙවි සැලේ මේව අලෙවි කරන්න පටන් ගත්තේ. 

මෙහෙට එන සමහරු මල් වත්ත බලලා ආපහු යන අතරේ ගෙදරට අරන් යන්න මල් පැළ හොයනවා.  මට හිතුනා මේක හොඳ ව්‍යාපාරයක් වෙයි කියලා. ඊට පස්සේ මගේ දරුවොත් හවුල් කරගෙන මල් අලෙවි සැලක් පටන් ගත්තා.

අපිට තියෙනවා පොඩි ලොරියක්. මේ අවට තියෙන මල් පැළ තවාන්වලින් මල් පැළ අරන් උදේට පුතා මෙතන ලොරිය නවත්තලා යනවා. මම සිල්ලර කඩේ බඩු අලෙවි කරන ගමන් මේ මල් වෙළෙඳාමත් කරනවා. 

මේක බලා ඉන්නකොට නම් අමාරුයි වගේ පේනවා. ඇත්තටම ඇස් හත අටක් තියාගෙන කරන්න ඕනි වැඩක් තමා මම මේ තනියම කරන්නේ. මේ වගේ වැඩක් කරන එක එච්චර අමාරු දෙයක් කියලා මම හිතන්නේ නැහැ.

සමහර වෙලාවට වෙළෙඳ සැල් දෙකටම කට්ටිය ගොඩවදිනවා. ඒ වෙලාවට ඉතින් හරි පරිස්සමට දෙගොල්ලගෙම අවශ්‍යතා ඉටුවෙන විදිහට වැඩ කරන්න ඕනි. ඒ විතරක් නෙමෙයි සමහර වංචනිකයන්ගෙන් බඩු රැක ගන්නත් ඕනි. 

කොහොම වුණත් මගේ උත්සාහය නිසා මම අද වෙනකම් දරුවන්ට තාත්තා නැති අඩුව දැනෙන්න නොදී මේ වෙළෙඳාම තනිවම කරගෙන යනවා. පුතාල දෙන්නත් විවේකයක් තියෙන විදිහට ඇවිත් උදව් කරනවා. දුවත් හොඳට ඉ‍ෙගන ගන්නවා. මම මහන්සිවෙලා වැඩ කරන නිසා මට පාලූවක් දැනෙන්නෙත් නැහැ. ලෙඩක් දුකක් හැදෙන්නෙත් නැහැ.  

කිසි දෙයක් අපිට කරන්න බැහැ කියල හිතනව නම් ඒක බොරු සිතිවිල්ලක් විතරයි. මේ රටේ ඕනැ තැනක  ජීවත් වෙන්න සාධාරණව මුදල් හොයන්න මාර්ග තියෙනවා. එහෙම තියෙද්දී සමහරු කෙටි ක්‍රමවලින් මුදල් හොයන්න ගිහින් තමන් විතරක් නෙමේ සමාජයත් විනාශ කරනවා.'' යනුවෙන් රූපලතා මහත්මිය පැවසූවාය. 

ඔබ හග්ගල නැරඹීමට පැමිණෙන්නේ නම් ඇයගේ දුරකථන අංකය වන 075 8 237 153 ට කතා කර මල් පැළ ආදිය ඇනවුම් කළ හැකි බවද ඇය පැවසූවාය. 

මීගහකිවුල –  එන්.කේ. නිශ්ෂංක

මල් අලවි සැල  (2) මල් අලවි සැල  (3) මල් අලවි සැල  (4)