Category Archives: woman

සිතිවිල්ල යථාර්ථයක් බවට පත්කර ගනිමින් මහා පරිමාණ ව්‍යාපාරයක් ඇරඹූ දිරිය කතක්

ජීවිතයේ බාධක හමුවේ නොසැලී සිටින්නට ගතින් ශක්තියක් නොමැති කලකදී ඇය සිතින් ශක්තිමත් විය. එකී චිත්ත ශක්තිය තුළින් තනිවම ව්‍යාපාරයක් ආරම්භ කළ ඇය අද වන විට විශ්වවිද්‍යාල උපාධිධාරීන්ට පවා රැකියා අපේක්ෂාවන් රැසක් උදා කරදී අවසන්ය. ඇය නමින් සේනානි ප්‍රනාන්දු මහත්මියයි. මොරටුව ප්‍රදේශයේ පදිංචිකාරිනියක වන ඇය දැන් සංචාරක ඒජන්සියක හිමිකාරිනියකි. අභියෝගකාරී ජීවිතයෙන් මිදී මෙම ව්‍යාපාරය හරහා ඉදිරියට පැමිණි ඇය ඒ බව අද හමුවේ පැවසූවේ මෙලෙසිනි. 


DSC_0008

ඔබ කරන ව්‍යාපාරයට පසුබිම සකස් වූ ආකාරය ගැන සඳහන් කළොත්?

මම මුලින් කාර්යාලයක රැකියාවක් කළ කෙනෙක්. ඒ කාලයේදී මම කිතුල්ගල වෝටර් රාෆ්ටින් ගිහින් අඩි 30ක් පමණ උස දිය ඇල්ලකින් පහළට වැටුණා. එහිදී මගේ කකුල කැඩුණා. ඒ නිසා මට අවුරුදු තුනක් පමණ යනකම් අධාරකයක් මගින් තමයි ඇවිදින්න සිද්ධ වුණේ. ඒ කාලෙදී මගේ හිතට ගොඩක් දේවල් ආවා. මම හදිසියේවත් පැරලයිස් වුණොත් කියලා හිතුණ අවස්ථාද බොහෝ තිබුණා. ඒ නිසා තමයි මගේම කියලා ව්‍යාපාරයක් ආරම්භ කරන්න මම හිතුවේ. ඒ නිසා මගේ තියෙන දැනුම පාවිච්චි කරලා ව්‍යාපාරයක් ආරම්භ කරන්න න්‍යායික දැනුම සඳහා ජයවර්ධනපුර විශ්වවිද්‍යාලයේ ව්‍යවසායක අධ්‍යයනය හදාරන්න පටන් ගත්තා. මම මුල් දවස්වල ආධාරකයක් භාවිතයෙන් තමයි අදාළ දේශනවලට පවා සහාභාගි වුණේ.

ඔබ කරන ව්‍යාපාරය ගැන කෙටියෙන් හැඳින්වුවහොත්?

ගුවන් ටිකට්පත් සේවා හා  ඒ ආශ්‍රිත වීසා ලබාගැනීම, හොලිඩේ පැකෙජ් වැනි දේවල් තමයි අප ආයතනය මගින් අපේ සේවාදායකයන්ට ලබාදෙන්නේ. කොහුවල තිබෙන මගේ ඒජන්සිය %ලෙගසි ට්‍රැවල්ස්^ පෞද්ලික සමාගම නමින් තමයි හඳුන්වන්නේ. දැන් මම මේ ව්‍යාපාරය  ආරම්භ කරලා වසර 8ක් වගේ කාලයක් වෙනවා. 

අපි යුරෝපය, චීනය, මැලේසියාව ආදී රටවලටත් යෑමට අවශ්‍ය සේවාදායකයන්ගේ විදෙස් ගමන් සම්බන්ධ කටයුතු සිදුකරනවා. ඒ වගේම විශාල කණ්ඩායම් වශයෙන් යනකොට එවැනි අවස්ථාවන්ට අවශ්‍ය පහසුකම්ද අපි සලසනවා. බොහෝ වේලාවට විදෙස්ගත වන්නෙකු ට්‍රැවල් ඒජන්සියක් වෙත පැමිණෙන්නේ ඔවුන්ට විදෙස්ගත වීමට අවශ්‍ය ලියකියවිලි හා පැකේජයක් නම්, නවාතැන්, ප්‍රවාහන, ආහාර ආදී සෑම පහසුකමක්ම සලසා ගැනීමේ අපේක්ෂාවෙන්. අපි ඔවුන්ගේ ඒ අවශ්‍යතා ඉටු කර දීමට කටයුතු කරන්නේ ඔවුන්ට ඒ පිළිබඳ තනිවම කර ගැනීමට නිසි අවබෝධයක් නොමැති නිසා. අපි අපේ සේවාදායකයන්ගේ ගුවන් ටිකට්පතේ සිට සියලු කටයුතු වගකීමෙන් හා විශ්වාසනීයත්වයෙන් යුතුව සිදුකර දෙනවා. 
මීට අමතරව ජයවර්ධනපුර, කැලණිය යන විශ්වවිද්‍යාලවල ආරාධිත දේශන සඳහාද මම සහභාගි වෙනවා.

ඔබ ඒවා අතරින් මොනවගේ විදෙස් සංචාර සඳහාද වැඩි උනන්දුවක් දක්වන්නේ?

මම වැඩිපුරම උනන්දුවක් දක්වන්නේ අධ්‍යාපනික සංචාර සඳහා. ශ්‍රී ජයවර්ධනපුර, කැලණිය, මොරටුව හා ශ්‍රී ලංකා විවෘත  විශ්වවිද්‍යාලය වැනි විශ්වවිද්‍යාලවල බොහෝ විදෙස් අධ්‍යයන චාරිකා මෙහෙයවීමට මට හැකි වී තිබෙනවා. විශේෂයෙන්ම එවැනි අධ්‍යයන සංචාර දැනට යුරෝපය මෙන්ම ආසියාවේ බොහෝ රටවලට සිදු කර තිබෙනවා. 

DSC_0024

ව්‍යාපාරයක් කෙසේ හෝ ආරම්භ කිරීමට සිටි ඔබ ඇයි මේ වගේ සංචාරක ක්ෂේත්‍රයක ව්‍යාපාරයක් ආරම්භ කිරීමට යොමු වෙන්නේ?

මම සංචාරය කරන්න ගොඩක් කැමති කෙනෙක්. ඒ නිසා තමයි මේ වගේ දෙයක් තෝරා ගැනීමට මුල් වුණේ. මේ ව්‍යාපාරය ආරම්භ කරන්න ඇත්තෙන්ම මම සත පහක්වත් යෙදෙවූයේ නැහැ. මුලින්ම නිවසේ සිටින අතරතුරම තමයි මම මේ රැකියාව ආරම්භ කළේ. එහිදී මම දන්න අඳුරන සම්බන්ධතා මත මුලින්ම අන්තර්ජාලය හරහා මේ වැඩකටයුතු සිදුකරගෙන ගියා. ඒ හැම කෙනෙක්ම මම හොඳින් දන්නා හඳුනන අය. මම අන්තර්ජාලය හරහා ඔවුන් හා සම්බන්ධ වෙලා මුදල් ගනුදෙනු සිදුකළා. ඇත්තෙන්ම මම මෙහි හුවමාරු කිරීමක් පමණයි මුලින්ම  සිදුකළේ. මම මේ ව්‍යාපාරය ආරම්භ කළ මුල් කාලයේ හරිහැටි ක්‍රමවේදයක්වත් තිබුණේ නැහැ. අඩුම තරමේ කාර්යාලයක්වත් නැහැ. 

නමුත් මේ විදිහට කාලයක් අන්තර්ජාලය ඔස්සේ වැඩකටයුතු සිදුකරනකොට මම හිතුවා මේක මීට වඩා දියුණු කරන්න අවශ්‍යයි කියා. පසුව බොරලැස්ගමුවේ පොඩි කාර්යාලයක් සකස් කරලා එහි සේවය සඳහා දෙන්නෙක් වැඩට ගත්තා. අන්න ඒ විදිහට තමයි මම වැඩ පටන් ගත්තේ.

ධෛර්යයෙන් ආරම්භ කළ මේ ව්‍යාපාරය ඉදිරියට පවත්වාගෙන යෑම සඳහා ප්‍රමාණවත් න්‍යායික දැනුමක් දැන් ඔබ සතු වෙනවාද?

ඔව්. මම ව්‍යාපාරයක් ආරම්භ කරන්නට අවශ්‍ය නිසා ජයවර්ධනපුර විශ්වවිද්‍යාලයේ ව්‍යවසායක අධ්‍යයන අංශයේ පාඨමාලා හැදෑරීමට යොමු වුණේ. අද වෙන කොට මට ව්‍යවසායක අධ්‍යයන අංශයේ පශ්චාත් උපාධිය පවා හිමිකර ගැනීමට හැකි වී තිබෙනවා. ඇත්තෙන්ම ඒ උපාධිය නිසා තමයි මම මේ වගේ තමන්ගේම කියලා ව්‍යාපාරයක් කරන්න යොමු වුණේ. 

දැන් ඔබේ ව්‍යාපාරික තත්ත්වය කොහොමද?

ජයවර්ධනපුර විශ්වවිද්‍යාලයෙන් ලැබුණු ආභාසය නිසා මට විශ්වවිද්‍යාල රැසක සම්බන්ධතා ඇතිකර ගැනීමට හැකි වුණා. ඒ ඔස්සේ මගේ ව්‍යාපාර කටයුතු අද වන විට ගොඩක් දියුණු වෙලා තිබෙනවා. මම දැන් විශ්වවිද්‍යාල අධ්‍යාපන  සංචාරවලට තමයි වැඩි නැඹුරුවක් දක්වන්නේ.

අනාගත සැලසුම් ගැන කතා කළොත්?

මිනිසුන් වැඩිපුරම කැමති විදෙස්ගත වීම් සම්බන්ධ කටයුතු ඔන්ලයින් හරහා සිදුකරන්න. වෙබ් පිටු හරහා අපි දැනට කටයුතු සිදුකරගෙන ගියත් මේ ඔන්ලයින් ක්‍රමවලට මිනිසුන් බහුතරයක් යොමු වී තිබෙනවා. ඒ නිසා මමත් ඔන්ලයින් ක්‍රමයකට යොමු වෙන්න අපේක්ෂා කරනවා. පළවෙනි පාර වෙනත් රටකට යන්න ඉන්න අයට ටිකක් මේ වැඩ තනියම කර ගැනීමේ අපහසුවක් තිබෙනවා. පළමු වර ඔන්ලයින් හරහා විදෙස්ගතවීම් කටයුතු සිදුකිරීමත් අපහසු දෙයක්. ඒ නිසා අපේ ආයතනය විසින් ඉදිරියේදී එය සේවාදායකයන්ට හඳුන්වා දීමට අපේක්ෂා කරනවා.  

ඔබේ ව්‍යාපාර කටයුතු ප්‍රවර්ධනය කිරීම සඳහා සුවිශේෂී ක්‍රමවේදයක් යොදා ගන්නවාද?

බොහෝ අය දකින්නේ ෆේස්බුක්වල නරක පැත්ත විතරයි. නමුත් මම නම් මෙහි හොඳ පැත්තකුත් දකිනවා. මගේ ව්‍යාපාරයේ බොහෝ සම්බන්ධතා සකස් වුණේ මේ ෆේස්බුක් පිටුව හරහා. මම හිතනවා ඕනම දෙයක් හරි විදිහකට යොදා ගත්තොත් ඇත්තෙන්ම එයින් හොඳ දෙයක් ලබාගන්න පුළුවන් කියලා. මම ගොඩක් වැඩකටයුතු සිදු කරන්නේ ෆේස්බුක් හරහා. මම දැනට ඔන්ලයින් වැඩ නොකළත්, විද්‍යුත් ලිපි හරහා ඊමේල් කැම්පේන් වගේ දේවල් සිදුකරනවා. 
ඔබට මේ ව්‍යාපාරය හරහා විශ්වවිද්‍යාල උපාධිධාරීන්ට පවා රැකියා අවස්ථා උදා කර දීමට හැකියාව ලැබිලා තිබෙනවා. ඒ ගැන මොකද හිතන්නේ?
මගේ ළඟ දැනට ජයවර්ධනපුර විශ්වවිද්‍යාලයේ අලෙවිකරණ උපාධිය හැදෑරූ ශිෂ්‍යයෙකු වැඩ කරනවා. ඊට කලිනුත් මගේ ආයතනයේ ජයවර්ධනපුර විශ්වවිද්‍යාල ළමයින් සේවය කරලා තිබෙනවා. මම ඇත්තෙන්ම සතුටු වෙනවා මේ වගේ විශ්වවිද්‍යාලවලින් උපාධිය නිම කර පැමි‍ණෙන ශිෂ්‍යයන්ට පවා රැකියා අවස්ථා ලබාදීමට පුළුවන් වීම පිළිබඳ. 

නොයෙක් බාධක හමුවේ මේ තරම් දුර පැමිණීම ගැන ඔබ සිතන්නේ කොහොමද?

ඇත්තෙන්ම මගේ හිතේ තිබෙන ශක්තිය තුළින් තමයි මම මේ තරම් දුරක් පැමිණියේ. දරාගැනීමේ හැකියාව ඇත්තෙන්ම මට ඒ කාලේ ඉඳන්ම තිබුණ දෙයක්. මොන අභියෝගයක් ආවත් ඒ සඳහා සාර්ථකව මුහුණදෙන්න හිතාගෙන තමයි මම මේ ව්‍යාපාරය ආරම්භ කළේ. ඇත්තෙන්ම ගැහැනු කෙනෙක් වීමත් ඇතැම් අවස්ථාවල වාසි සහගත වෙනවා. නරක විදිහට නම් නෙමෙයි. ඕන තැනක ගිහින් ඉක්මනට වැඩක් කර ගන්න පිරිමි කෙනෙකුට වඩා ගැහැනු කෙනෙකුට වැඩි අවස්ථාවක් තිබෙනවා. 
අපි මේ ව්‍යාපාරයක් කරන්න වුණත් බලපත්‍රයක් ගන්න අවශ්‍යයි. මේ වගේ ලියකියවිලි වැඩ කරගන්න ගියහම ඇත්තෙන්ම කාන්තාවකට වැඩි ගෞරවයක් ඒ නිලධාරීන් දක්වනවා. ගොඩක් කාන්තාවන් සිතන්නේ කාන්තාවන් වීම ඇත්තෙන්ම ඇතැම් තැන්වලදී පීඩනයක්, බාධාවක් ලෙසින්. නමුත් කාන්තාවක් වීම මම හිතන විදියට ඇත්තෙන්ම බොහෝ අවස්ථාවලදී වාසිදායකයි. ඇත්තෙන්ම එය ව්‍යාපාරික අංශයටත් ඉතාම සාර්ථකව යොදා ගැනීමට පුළුවන්. මම හිතන විදිහට නම් ඒ ගැහැනුකම අභියෝගයක් කරගෙනම යම් දෙයක් ආරම්භ කරනවා නම් එයින් හුඟක් දුර යන්න අපිට පුළුවන්. 

කාන්තාවක් වශයෙන් මෙවැනි ව්‍යාපාරයක් තනිව කරන විට නොයෙක් අභියෝග බාධක එන්න පුළුවන්. ඒවා ඔබ බාරගන්නේ කොහොමද?

මම ඇත්තෙන්ම අභියෝගවලින් පැනලා යන කෙනෙක් නෙමෙයි. අභියෝග බාරගෙන සාර්ථකව ඉදිරියට යන්න මම හරි කැමතියි. මම මගේම යහළුවෙක් සමග තමයි මේ ව්‍යාපාරය ආරම්භ කළේ. නමුත් කාලයක් යන විට මට තේරුණා අපි දෙන්නගේ ව්‍යාපාර අදහස් මාර්ග දෙකක යන ඒවා කියලා. නමුත් මම මුලදී බය වුණා එයා ගියොත් මේ ව්‍යාපාරයේ කඩා වැටීමක් වේවි කියලා. නමුත් මට ඊට වඩා වැඩි ලාභයක යටතේ මගේ ව්‍යාපාරය කරගෙන යන්න මට හැකි වුණා. 

ව්‍යාපාර කටයුතුවලදී ඔබට මතු වුණ ගැටලු ගැන කතා කළොත්?

අපේ ආයතනවලට සේවකයන් ගැනීමේදී ඇත්තෙන්ම ගැටලුකාරී තත්ත්වයන්ට අපි මුහුණදෙනවා. විශ්වවිද්‍යාල විද්‍යාර්ථයන් ඇතැම් විට අපේ ආයතනවලට පැමිණ සේවය කරනවා. ඔවුන් අපේ කාර්යභාරයන්ට හොඳින් පුරුදු පුහුණු කළ විට අවසානයේ රැකියා සුලභත්වය හා ඒ ඒ ක්ෂේත්‍රයේ තවත් රැකියාවක් සොයා යෑම මත සේවයෙන් ඉවත්ව යනවා. 
රැකියාව සඳහා කෙනෙක්ව ගත්තහම අවුරුද්දක් වගේ ඉඳලා හොඳ මට්ටමකට පැමිණියාට පස්සේ ඔහු හෝ ඇය යන්න යනවා. තව කෙනෙක් පුහුණුව සඳහා ගත්තත් ඒ ගැටලුවම තමයි මතුවෙන්නේ. ඒක තමයි මට මේ ව්‍යාපාර ක්ෂේත්‍රය තුළ ආපු ලොකුම ගැටලුව. නමුත් දැන් මම යටතේ වැඩකටයුතු කරන්න හොඳ සේවක මණ්ඩලයක් ඉන්නවා. 

 මේ සඳහා ලැබෙන සහයෝගය ගැන පැවසුවොත්?

ඇත්තෙන්ම මට අම්මයි, තාත්තයි දෙන්නම නැහැ. මගේ වයස අවුරුදු දහතුනක් විතර වෙනකොට ඔවුන් දෙන්නම මට නැති වුණා. ඒ නිසා හැම දෙයක්ම තනිවම තමයි සිදුකළේ. 
මගේ පවුල් පසුබිම වුණත් ව්‍යාපාරික අංශයට වැඩි නැඹුරුවක් තිබෙන එකක්. අපේ තාත්තා වගේම අයියලා අක්කලා ඔක්කොමලා එවැනි ව්‍යාපාරික පසුබිමකින් පැමිණි අය. 
මටත් තිබුණා ගොඩක් අයට හිතෙනවා වගේ රස්සාවක් කරන්න ඕන කියන මතය. කාර්යාලයක සේවය කරන්න. නමුත් පස්සේ හිතුණා මගේම කියලා ව්‍යාපාරයක් ආරම්භ කරලා තව කෙනෙක්ට හරි රැකියාවක් ලබාදෙන්න පුළුවන් නම් ඒක හොඳයි කියලා. විශේෂයෙන්ම මගේ අක්කා මේ හැම දෙයක් පිටුපසම මගේ උදව්වට හිටියා. ව්‍යාපාර වැඩවලදී පැනනගින ගැටලු විසඳා ගන්න ඇය මට ලබාදුන් සහයෝගය පිළිබඳ බෙහෙවින් කෘතඥ විය යුතුයි. 

අනෙකුත් කාන්තාවන්ට ඔබ මොන වගේ උපදෙසක්ද දෙන්න කැමති?

කාන්තාව, කාන්තාවක් වීම සම්බන්ධයෙන් යම් බියක් හිතේ තබාගෙන සිටිනවා. ඔවුන් සිතන්නේ කාන්තාවකට වැඩක් කරගන්න බැහැ, පිරිමි ඉක්මනින් දියුණු වෙනවා කියන කාරණය. නමුත් මම නම් කියන්නේ එසේ නොසිතා කුමක් හෝ අලුත් වැඩක් සාර්ථකව පටන් ගන්න කියලා. 

කාන්තාවක් වීම අනිවාර්යයෙන් තමාට ලැබුණු වාසියක් සේ සිතා කටයුතු කිරීම අවශ්‍යයි. සමාජයේ තියෙන ප්‍රශ්නත් එක්ක කාන්තාවට අලුතින් තමන්ගේම කියලා ව්‍යාපාරයක් ආරම්භ කරන්න බියක් ඇති වෙන්න පුළුවන්. අපි ඒ හැම දෙයකටම නොබියව මුහුණදිය යුතුයි. ඒ හැම දෙයකටම අපි හුරුවෙන්න ඕන. ඇතැම් කාරණා අප එතරම් ගණන් ගතයුතු දේවල් නෙමෙයි. 
සමාජයේ මිනිසුන් බොහෝ කතා කියනවා. නමුත් අපි ඒ හැම දෙයක් ගැනම සිතන්ට අවශ්‍ය නැහැ. ඒ නිසා මේ සෑම අභියෝග හමුවේ සාර්ථකව ව්‍යාපාරයන් ආරම්භ කිරීමට කාන්තාව කිසිවිටකත් පසුබට වීම හොඳ නැහැ. කෙනෙකුගේ යටතේ සේවය කරනවාට වඩා අලුතින් එක් අයෙකුට හෝ රැකියා සඳහා ඉඩප්‍රස්ථා ලබාදීමට ඒ තුළින් ඔබට හැකි වේවි. 

ආර්ථික පැත්ත බලාගෙනම කණ්ඩායමට ක්‍රීඩා කරන්න සම්බන්ධ වෙන්න එපා

ශ්‍රී ලංකා කාන්තා ක්‍රිකට් කණ්ඩායම අද වන විට ලංකාවේ මෙන්ම ජාත්‍යන්තරයේ ඉතාමත් කැපී පෙනෙන කණ්ඩායමක් බවට පත් වී හමාරය. ඒ තැනට කණ්ඩායම ගෙන යෑමට දහඩිය මහන්සිය කැප කළ කාන්තාවෝ බොහෝය. ඒ අතර කැපී පෙනෙන ක්‍රීඩිකාවක ලෙස ශෂිකලා සිරිවර්ධන හැඳින්විය හැකිය. ඇය දැනට කණ්ඩායමේ සිටින අත්දැකීම් බහුලම ජ්‍යෙෂ්ඨතම ක්‍රීඩිකාවද වේ. අද අප මේ කතාබහ සිදුකරනුයේ ඇය සමගය.


IMG_6208

ඔබ ගැන විස්තරයක් කළොත්?

මගේ පවුලේ ඉන්නෙ අම්මයි, තාත්තයි, අයියයි.නංගියි. තාත්තා දැන් ජීවතුන් අතර නැහැ. මම ක්‍රිකට්වලට යොමු වුණේ තාත්තයි, අයියයි නිසා. ඒ මට අවුරුදු 11දී විතර. මගේ අයියා චාමර සිරිවර්ධන. ඔහු වෙස්ලි විද්‍යාලයේ ක්‍රිකට් කණ්ඩායම වගේම ඉතාලි කණ්ඩායම නියෝජනය කළා.

ක්‍රිකට් ක්‍රීඩාවේ මේතාක් ඔබ ආ ගමන ගැන සඳහන් කළොත්?

තාත්තා තමා මාව අවුරුදු ගණනක් පුහුණුවීම්වලට එක්කගෙන ගියේ. මම හාර්ඩ් බෝල් ක්‍රිකට් පටන් ගත්තෙ %පාලින්ච් කෝච්^ ක්ලබ් එකේ. තාත්තාගෙ යාළුවෙක් වන ජයන්ත දිසානායක අංකල් තමා මාව පාලිත ගුණසේකර සර්ට හඳුන්වලා දුන්නේ. ඒ වෙද්දී ඒ සර් පිරිමි ළමයින්ට තමයි පුහුණුවීම් සිදුකළේ. නමුත් ඔහුට කාන්තා කණ්ඩායමක් නිර්මාණය කිරීමට අවශ්‍ය වෙලා තිබුණා. ඊට පස්සේ %පාලින්ක් ගර්ල්ස්^ කියලා ටීම් එකක් ආරම්භ කළා 98 අවුරුද්දේ. ඒ වෙද්දී මට අවුරුදු 12ක් වගේ වෙනවා. ඉන් අනතුරුව 2003 වර්ෂයේදී මම ජාතික කණ්ඩායමට තේරී පත්වෙනවා. මගේ පාසල කෝට්ටේ ජනාධිපති විද්‍යාලය. එහි ක්‍රිකට් ක්‍රීඩාව තිබුණෙ නැහැ ගැහැනු ළමයින්ට. නමුත් මම ඇත්ලැටික්ස් කළා. පළාත් වගේම සමස්ත ලංකා තරගවලට සහභාගි වුණා. මම 2005 අවුරුද්දෙ තමා මුලින්ම ශ්‍රී ලංකා කාන්තා ක්‍රිකට් කණ්ඩායමේ නායකත්වයට පත්වුණේ. ඉන් පසු වරින්වර තෙවතාවක් පමණ මම නායකත්වයට පත්වුණා. අවසන් වතාවට 2016 විස්සයි20 ලෝක කුසලානයේ නායකත්වය දැරුවා. ඉන්පසු මම අබාධයට ලක්වුණා. ඒ වගේම අනතුරකටත් ලක්වුණා. ඒ නිසා අවුරුද්දයි මාස 2ක් වගේ මම ක්‍රීඩාවෙන් ඉවත් වී ඉඳලා 2017 පන්දු වාර 50 ලෝක කුසලාන තරගාවලියට තමයි නැවත කණ්ඩායමට පැමිණියේ. 

විවාහ ජීවිතයයි, ක්‍රිකට් ජීවිතයයි කොහොමද කාන්තාවක් විදියට  ඔබ සමබර කර ගන්නේ?

මම 2013 වර්ෂයේ විවාහ වුණේ. මගේ සැමියා නාමල් සෙනෙවිරත්න. මම විවාහයෙන් පසුව ක්‍රිකට් ක්‍රීඩාවෙන් සමුගන්න අදහස් කර තිබුණේ. නමුත් සැමියාගෙන් ලැබෙන සහයෝගය නිසා තමයි මම තවමත් ක්‍රීඩාවේ නියැළෙන්නේ. 
මම විවාහ වන විටත් කණ්ඩායම වෙනුවෙන් වසර 10කට වැඩි කාලයක් ක්‍රීඩා කළා. 2013 වර්ෂයේ ලෝක කුසලාන තරගාවලිය අපි හොඳට කළා. පළවෙනි වතාවට ඉන්දියාව, එංගලන්තය වගේ කණ්ඩායම් පරාජය කළා. ඉතිං මම හිතුවා විවාහයෙන් පසුව ක්‍රීඩාවෙන් සමුගත්තට ප්‍රශ්නයක් නැහැ කියලා. මොකද මට බය තිබුණා ක්‍රීඩාව වෙනුවෙන් මට කැපවෙන්න අවස්ථාවක් නොලැබෙයි කියලා. නමුත් මගේ සැමියාත් කෑගලු විද්‍යාලයේ ක්‍රිකට් ක්‍රීඩකයෙක්. ඉන්පසු ඔහු එංගලන්තය වෙනුවෙන් ප්‍රාන්ත කණ්ඩායම්වලත් ක්‍රීඩා කරලා තිබෙනවා. මේ වෙද්දී ඔහු %මර්කන්ටයිල්^ ක්‍රිකට් සමාජයේ ප්‍රධාන පුහුණුකරුවෙක් විදිහට සේවය කරනවා. ඒ නිසා ඔහුට හොඳට මේ ක්ෂේත්‍රය ගැන අවබෝධයක් තිබෙනවා. ඔහු පවසන්නේ මේ ලැබිලා තිබෙන අවස්ථාව හැමෝටම ලැබෙන දෙයක් නොවන නිසා දිගටම කණ්ඩායම වෙනුවෙන් ක්‍රීඩා කරන්න කියා. විවාහයෙන් පසුව මට 2014 වසරේ විස්සයි20 ශ්‍රේණිගත කිරීම්වලින් පළමු තැන ලැබුණා. ඒ දෙයින්ම මට ලොකු සහයෝගයක් ලැබෙන බව පෙනෙනවා. මොකද මම ඒ වන විට ශ්‍රේණිගත කිරීම්වල හිටියේ 5 වැනි ස්ථානයේ. නමුත් මට කලින් කරපු කැපවීමම කරන්න පුළුවන් වුණා සැමියා මට ගොඩක් උස්සයිවා. ඒ කියන්නෙ නෑයන්ගෙ දේවල්වලට යන්න වෙන්නෙ නැහැ. ගෙදර වැඩ ගොඩක් අතපසු වෙනවා. සමහර දාට සතියෙ දවස් පහම පුහුණුවීම්. උදේ 6ට ගෙදරින් ආවම හවස හයයි ඉවර වෙද්දී. එහෙම බලද්දී මම හිතනවා ක්‍රීඩිකාවක් විදියට ලේසි නැහැ සැමියගේ සහයෝගය නැතිව සාර්ථකව පවුල සමබර කර ගන්න. මම ඒ අතින් ගොඩක් වාසනාවන්තයි. 

කාන්තාවක් විදිහට ක්‍රිකට් ක්‍රීඩාවට යොමු වීමේදී මුහුණදුන් අභියෝග ගැන සඳහන් කළොත්?

ඇත්තටම පොඩි කාලේ බස් එකේ ලොකු බෑග් එකත් අරන් පුහුණුවීම්වලට යද්දී ගොඩක් දෙනෙක් හිනා වුණා. ඒක තමා ඒ කාලයේ හිතට දැණුනු ලොකුම අභියෝගය. ඉතිං මම සමහර දාට තාත්තට කියනවා තාත්තෙ මට බස් එකේ යන්න බැහැ. මට ලැජ්ජයි කියලා. තාත්තා කිව්වා දැන්ම ඉඳන්ම ඒ දේවල්වලට මුහුණදෙන්න පුරුදු වෙන්න. මොකද මේක පිරිමි ළමයින්ගේ ක්‍රීඩාවක් නිසා කියලා. 2000 වර්ෂය පමණ වෙද්දී කාන්තාවන් අතර මේ ක්‍රීඩාව ගොඩක් ප්‍රචලිත වී තිබුණෙ නැහැ. ඊට පස්සෙ ක්‍රීඩා කරද්දී ගොඩක් අභියෝග ආවා. ආර්ථික ප්‍රශ්නවලට ගොඩක් මුහුණදෙන්න සිදුවුණා. 2006 ශ්‍රී ලංකා ක්‍රිකට් ආයතනයට තේරී පත්වන තෙක් අපිට ආර්ථික අපහසුතා තිබුණා. ඒ අපිට ඒ වෙද්දී අනුග්‍රාහකයො හිටියෙ නැති නිසා. ඉන් පස්සෙ 2006 ශ්‍රී ලංකා ක්‍රිකට් ආයතනයට සම්බන්ධ වුණාම තමයි මේ හැම පහසුකමම ලැබුණෙ. නමුත් දැන් වෙද්දී ඒ අභියෝග ගොඩක් අඩුයි. ගැහැනු ළමයින්ට ලෙහෙසියි. 

කණ්ඩායමේ අත්දැකීම් වැඩිම ක්‍රීඩිකාව ලෙසට කණ්ඩායමට අලුතෙන් සම්බන්ධ වන අයට ඔබ මොන වගේ මගපෙන්වීමක්ද ලබාදෙන්නේ?

මම මේ වෙද්දී ජෙනරේෂන් තුනක් එක්ක පමණ සෙල්ලම් කරලා තියෙනවා. ඒ කියන්නෙ කාන්තා ක්‍රිකට් පටන් ගත්ත අක්කලා එක්කත්, මගේ වයසේ කට්ටිය එක්කත්, දැන් ක්‍රිකට්වලට අලුතෙන්ම සම්බන්ධ වුණ අය එක්ක මම ක්‍රීඩා කරලා තියෙනවා. මේ වෙද්දී ක්‍රීඩා කරන ක්‍රීඩිකාවන්ගෙන් අත්දැකීම් වැඩිම ක්‍රීඩිකාව මමයි. මම ශ්‍රී ලංකා ක්‍රිකට් කණ්ඩායමට සම්බන්ධ වෙලා අවුරුදු 15ක් පමණ වෙනවා. අලුතෙන් කණ්ඩායමට සම්බන්ධ වෙන්න ඉන්න අයට මම කියන්නෙ ආර්ථික පැත්ත බලාගෙන කණ්ඩායමට ක්‍රීඩා කරන්න සම්බන්ධ වෙන්න එපා කියලා. මම හැමෝටම කියන්නෙ ඒ දේවල් අපේ දක්ෂතාව මත ඉබේ ලැබෙන දෙයක්. මම ඒ අයට කියලා දෙන්නෙ මේ සිංහ ලාංඡනයේ තියෙන වටිනාකම සහ කණ්ඩායමේ තියන වටිනාකම ගැන. ඒ වගේම විනය සහ කැපවීම මේ සඳහා ගොඩක් අවශ්‍යයි. මම කියන්නෙ ක්‍රීඩා පිටිය තුළ අපිට ගැහැනු ළමයෙක් විදිහට සෙල්ලම් කරන්න බැහැ.මොකද මේක පිරිමි ළමයින්ගේ ක්‍රීඩාවක්. හොඳ කැපවීමක් වගේම හොඳ ජවයකින් ක්‍රීඩා කරන්න ඕන. නමුත් ක්‍රීඩා පිටියෙන් පිටතදී අපි සාමාන්‍ය ගැහැනු ළමයෙක්. ඒ වගේම ක්‍රීඩාවට සියයට සියයක් කැපවීම ලබාදෙන ගමන් අධ්‍යාපනයට මූලිකත්වය ලබාදෙන්න ඕන. මොකද අධ්‍යාපන දැනුමත් සමග ක්‍රිකට් ක්‍රීඩා කරද්දී ගොඩක් පහසුයි. මොකද ඒ බුද්ධි මට්ටම අවශ්‍යයි ක්‍රිකට් ක්‍රීඩාවෙන් හොඳ තැනකට එන්න. මම අලුතෙන් කණ්ඩායමට එක්වන ක්‍රීඩිකාවන්ට ඒ දේ තමයි කියන්නෙ.

154014

කණ්ඩායම් නායිකාවක් ලෙස කටයුතු කිරීමේදී ලබාගත් ජයග්‍රහණ ගැන කතා කළොත්

2013 නායකත්වයෙන් පසු එක්දින තරගාවලියන්හිදී ළඟා කර ගත්ත ලොකුම ජයග්‍රහණය තමයි ශ්‍රේණිගත කිරීම්වලින් පස්වැනි ස්ථානයට පැමිණීම. එය 2013 ලෝක කුසලාන එකේදී තමයි ලබා ගත්තේ. ඒ වගේම පන්දුවාර 50 තරගවලින් ලංකාව පස්වෙනි තැනට ගේන්න පුළුවන් වුණේ මගේ නායකත්වය යටතේ පළමු වතාවට එංගලන්තය හා ඉන්දියාව පරාජය කරලා. ඒ වගේම ඉන්දියාවේදි විස්සයි20 තරගාවලියක් අපි ජයග්‍රහණය කළා. ඒ වගේ ජයග්‍රහණ ළඟා කරගන්න මට නායිකාවක් විදිහට හැකියාවක් ලැබුණා. 
ඒ වගේම සාමාන්‍ය ක්‍රීඩිකාවක් විදියට මම විස්සයි20 ශ්‍රේණිගත කිරීම්වල අංක එක වුණා. එමෙන්ම මම පන්දු රැකීම, පන්දු යැවීම සහ පන්දුවට පහරදීම් පැත්තෙන් පළමු දහය අතර ඉඳලා තිබෙනවා. ඒ වගේම අාසියා කණ්ඩායමේ උපනායකත්වය දරලා ඇෆ්ෙරා්ඒෂියා තරගාවලිය ජයග්‍රහණය කළා. ඒ වගේම මම ලකුණු 1500යි කඩුලු 100යි ගත්ත ආසියාවේ පළමු ක්‍රීඩිකාව. ඒ වගේම ලෝකයේ 4 වැනි ක්‍රීඩිකාව. 

වර්තමානයේ පාසල් කාන්තා ක්‍රිකට් කණ්ඩායම්වල තත්ත්වය මොන වගේද?

වර්තමාන ශ්‍රී ලංකා ක්‍රිකට් ආයතනයේ සැලැස්ම යටතේ කාන්තා පාසල් බොහොමයක කාන්තා ක්‍රිකට් ආරම්භ කර තිබෙනවා. ඉස්සර හැම පළාතකම තුන හතරක පමණයි තිබුණේ. අලුතෙන් සංචිතයට පැමිණි ගොඩක් ළමයි අගනුවරින් පිටත ළමයි. මේ වෙද්දී දහනවයෙන් පහළ වගේම දහතුනෙන් පහළ කණ්ඩායම් වෙන වෙනම තිබෙනවා. ඉස්සර වගේ නෙමේ ගොඩක් තරගාවලි තිබෙනවා. ඉස්සර අපිට තිබුණෙ මුළු වසරටම තරග 6ක් වගේ ප්‍රමාණයක්. නමුත් මේ වෙද්දී තරග විශාල ප්‍රමාණයක් ලැබෙනවා. 

කාන්තා ක්‍රීඩිකාවන් බොහොමයක් ජ්‍යෙෂ්ඨත්වයට පත්වීමෙන් පසු ක්‍රීඩා දිවියෙන් සමුගන්නවා. එය කණ්ඩායමට මුහුණදෙන්න වන අවාසි සහගත තත්ත්වයක් නේද?

දැන් තත්ත්වය ඊට තරමක් වෙනස්. මොකද දැන් පාසල් ක්‍රිකට් තිබෙනවා. මම අහඹු ලෙස අවුරුදු 12දී ක්‍රිකට් ක්‍රීඩාවට පැමිණියාට ගොඩක් ක්‍රීඩිකාවෝ අවුරුදු 19දී විතර ක්ලබ්වල සෙල්ලම් කරලා කණ්ඩායමට ඇතුළු වෙන්නෙ. එතකොට ඒ අය ජ්‍යෙෂ්ඨත්වයට පත්වෙද්දී සමහර වෙලාවට වයස අවුරුදු 32 ,33 වෙනවා. එතැන තමා අපිට ගොඩක් ගැටලුව තිබෙන්නෙ. මොකද ලංකාවේ, ආසියාව ගත්තම 32,33 වෙද්දී විවාහ වෙන ගැටලු එනවා. එතකොට ක්‍රීඩාවෙන් ජ්‍යෙෂ්ඨත්වයට පත්වෙද්දීම ගොඩක් ක්‍රීඩිකාවන්ට ක්‍රීඩාවෙන් සමුගන්න සිදු වෙනවා. ඒ ප්‍රශ්නය දැනට තිබෙනවා. නමුත් පාසල් ක්‍රිකට් දැන් තිබෙන නිසා ඉදිරියේදී ඒ ගැටලුව නැතිවෙයි කියා හිතනවා. පාසල් ක්‍රිකට් නිසා ජ්‍යෙෂ්ඨත්වයට පත් වෙන්න 30,31 වෙනකන් ඉන්න අවශ්‍ය නැහැ. අවුරුදු 25, 26දී ජ්‍යෙෂ්ඨත්වයට පත් වෙන්න පුළුවන් වෙනවා.විශේෂ ක්‍රීඩිකාවෝ ඉන්නවා අවුරුදු 30ට පසුවත් ශරීර යෝග්‍යතාව තිබෙන. ඒ අය කවුද කියන එක හඳුනගෙන නවක ක්‍රීඩිකාවන් සමග ක්‍රීඩාවේ යෙදෙන්න පුළුවන්.

ඔබගේ ඉදිරි බලාපොරොත්තු ගැන කතා කළොත්?

ඉදිරියේදී ලෝක කුසලාන 3ක් වගේ පැවැත්වීමට නියමිතයි. මගේ ශරීර යෝග්‍යතාව තිබෙන තාක්කල් ක්‍රීඩා කරන්න බලාපොරොත්තුවෙන් ඉන්නවා. මම දැනට පුහුණුකාරිනියක වශයෙන්ද සේවය කරනවා. ඉදිරියේදී ක්‍රිකට් වැඩකටයුතුයි, මගේ පවුලේ වැඩකටයුතුයි හොඳින් සාර්ථක කරගන්න බලාපොරොත්තු වෙනවා. 

ක්‍රිකට් ක්‍රීඩාවට යොමු වීමට බලාපොරොත්තුවෙන් සිටින ගැහැනු ළමයින්ට කියන්න තිබෙන්නේ මොන වගේ දේවල්ද?

ඇත්තටම ක්‍රිකට් බලලා දැකලා ගැහැනු ළමයි ගොඩක් ආසයි මේ ක්‍රීඩාව සඳහා යොමු වෙන්න. ගැහැනු ළමයෙක් ක්‍රිකට්වලට යන්නද කියලා ඇහුවොත් ගොඩක් අඩුයි ඒ දේට අවස්ථාව ලබාදෙන. මම දෙමවුපියන්ට කියන්න කැමතියි තමන්ගේ දුව එවැනි ඉල්ලීමක් කළොත් ඒ දරුවගෙ හැකියාව විශ්වාස කරලා ඒ දරුවට ඒ අවස්ථාව ලබාදෙන්න ඕන. ඒ වගේම ක්‍රිකට් කණ්ඩායමට එන්න බලාපොරොත්තුවෙන් ඉන්න ගැහැනු ළමයින්ට කියන්න කැමතියි ලංකාවට ක්‍රීඩා කිරීම ප්‍රධාන අරමුණ කරගෙන ජය පරාජය හොඳින් තේරුම් අරන් ක්‍රීඩා කිරීම තමා වැදගත්ම දේ. ඒ දේ සිහි තබාගෙන මෙතෙන්ට පැමිණියොත් අනෙක් හැමදේම ළඟා කරගන්න පුළුවන්. 

ස්තුති කළ යුතු පිරිසක් සිටිනවාද?

අම්මා, තාත්තා ඇතුළු පවුලේ සැවොම වගේම. විශේෂයෙන් මගේ සැමියාටත්, මගේ පුහුණුකරුවන්ටත්, මේ දක්වා සෑම දෙයින්ම උපකාර කළ සැමටත් ස්තුති කරනවා.

අලුත් අවුරුදු කැවිලි ගැන නොදත් කථා

කිරිබත්, කැවුම් සහ කොකිස් ශ්‍රී ලාංකේය සංස්කෘතිය තුළ සුබ කටයුත්තකදී හෝ උත්සව අවස්ථාවකදී අනිවාර්යයෙන් දක්නට ලැබෙන්නක්. ඒ අතරින් සිංහල අලුත් අවුරුදු කෑම මේසය හැඩ ගන්වන්නට මේවා අනිවාර්යයෙන්ම යොදා ගන්නේ ඈත අතීතයේ සිටය. මේ සියලු කැවිලි වර්ගවලට ඇත්තේ ඉතා දීර්ඝ වූ කතා ඉතිහාසයකි. එය ආගමික ග්‍රන්ථවල මෙන්ම සාහිත්‍ය ග්‍රන්ථවලද යොදා ගන්නා ඇතැම් උපහැරණවලින් මැනවින් පසක් වේ. එදා දඹදිව විසූ අසූ කෙළක් ධනස්කන්ධයකට හිමිකම් කියූ මසුරු සිටාණන් කෙනෙකු වන මච්ඡරිය කෝසිය සිටාණන්ට ඇතිවූයේ පැණිකැවුම් කෑමේ ආශාවකි. එකල කබලු නමින් හැඳින් වූයේ අද අපි හඳුන්වන කැවුම්ය. අතීත ලාංකේය සමාජ සංස්කෘතික සන්දර්භය මැනවින් විග්‍රහ කළා වූ රොබට් නොක්ස් පවා ලාං‍ෙක්ය ගැමි ජනයා අතර ප්‍රචලිතව තිබූ ඒ කැවිලි ගැන විශේෂයෙන් වාර්තා කළේය. මේ අයුරින් දීර්ඝ ඉතිහාසයකට උරුමකම් කියන කැවිලිපෙවිළි අද වන විට කෙමෙන් කෙමෙන් අප අතරින් ඈත්ව යයි. පුද්ගල කාර්යබහුලත්වය සහ පිළියෙල කිරීමට නොදන්නාකම මේ සඳහා මූලික ලෙස බලපා තිබේ. නමුත් අපේ දෑතින්ම පිළියෙල කළා වූ කැවිලිවලින් මේ වසරේ අලුත් අවුරුදු කෑම මේසය හැඩ කරන්නට කැමති ගෘහණියන්ට රසකැවිලි රැසක් පිළිබඳ අද අප මෙසේ ගෙන එන්නට සිතුවෙමු.


Traditional-Avurudu-Table-1333428541

කැවුම්

අප කැවුම් වර්ග කිහිපයක් පිළිබඳවම අසා තිබේ. ඒ අතර ලාංකික ප්‍රජාව තුළ වඩාත්ම ජනප්‍රිය වන්නේ කොණ්ඩ කැවුම්ය. නාරං කැවුම්, තල කැවුම්, මුං කැවුම්, සීනි කැවුම් හා අතිරස කැවුම් පවුලේ තවත් සාමාජිකයන්ය. උඩරට පළාත්වල අච්චු කැවුම් බෙහෙවින් ජනප්‍රියයි. පැරණි ජනප්‍රවාදවලට අනුව කැවුම් වර්ග 18ක් පමණ තිබෙන බවට වාර්තා කියැවේ. ඒ අතර මුං කැවුම්, සෙදි කැවුම්, උළුඳු කැවුම්, උතුපු කැවුම් හා ගිනිපු කැවුම් කිහිපයකි. 

කොණ්ඩ කැවුම්

අඳුරු රතු පැහැයක් සහිත වර්ණයෙන් යුත් මේ කැවුම් වර්ගය ලාංකිකයන් අතර ඉතාම ජනප්‍රිය කැවිල්ලකි. සහල් පිටි හා කිතුල් පැණියෙන් සකස් කර ගන්නා මෙම මිශ්‍රණයට පදමට ලුණු සහ කරඳමුංගු එකතු කිරීමෙන් මෙය වඩා රසවත්ව පිළියෙල කිරීමට හැකි වේ. කොණ්ඩ යන වචයෙන් හිසකෙස් අරුත් ගන්වන අතර, හිසෙහි මුදුණේ ඇති කොණ්ඩය නිරූපණය වන සේ මෙම කැවුම් සකස් කරයි. මේ සඳහා පොල්කූරක් හා හැන්දක් අවශ්‍ය වන අතර, රත් වූ තෙලෙහි පිසගන්නා අතරතුර පොල්කූරෙන් කොණ්ඩය සකස් කෙරේ. මේ සඳහා වෙනත් කිසිදු උපකරණයක් අවශ්‍ය වන්නේ නැත. 

අවශ්‍ය ද්‍රව්‍ය - 

-තිරිඟු පිටි කෝප්ප එකයි
-හාල් පිටි කෝප්ප එකයි
-කරඳමුංගු අවශ්‍ය ප්‍රමාණයට
-ලුණු ස්වල්පයක්
-කිතුල් පැණි
-ගැඹුරු තෙලේ බැද ගන්නට අවශ්‍ය තරම් පොල්තෙල්
අවශ්‍ය උපකරණ 
-කැවුම් තෙලෙන් බැද ගැනීමට හැන්දක්
-අවශ්‍ය නම් වෙළෙඳ පොළේ ඇති අච්චුවක් භාවිත කළ හැකිය. 

නාරං කැවුම්

 අප නාරං ලෙසින් හඳුන්වන්නේ මෙන්ඩරින් (Mendarin) නම්න් හඳුන්වනු ලබන දොඩම් විශේෂයකටය. නමුත් මේවා ආහාර පිසීම සඳහා භාවිත නොකරන අතර, ප්‍රමාණයන් හා වර්ණයෙන් නාරං කැවුම්වලට මේවා සමානකමක් දක්වයි. මේ හැඩයෙන් සකස් කරගනු ලබන නාරං කැවුම් සඳහා සහල් පිටි හා පොල්කිරි මිශ්‍ර කර දියරයක් ප්‍රථමයෙන්ම සෑදිය යුතුය. ඉන්පසුව පොල්පැණි මිශ්‍රණයෙන් ටිකෙන් ටික ගුලි කර ඒ මත තවරා පසුව එය ගැඹුරු තෙලෙන් පිසිණු ලැබේ. මෙම කැවුම් වර්ගය  වර්ණයෙන් මෙන්ඩරින් දොඩම් පැහැයට සමානය. 
නාරං කැවුම් සඳහා අවශ්‍ය ද්‍රව්‍ය

-ජලය කෝප්ප 4/1ක්
-නැවුම් ගාගත් පොල් කෝප්ප 2/1ක්
-හාල් පිටි ග්‍රෑම් 100ක්
-දුඹුරු පැහැති සීනි ග්‍රෑම් 100ක්
-කරඳමුංගු අවශ්‍ය ප්‍රමාණයට
-කහ කුඩු ස්වල්පයක් 
-ලුණු ස්වල්පයක්

මුං කැවුම් 

 රන් පැහැති දියමන්ති හැඩයෙන් යුක්ත වන කැවුම් අපි සිංහලෙන් මුං කැවුම් නමින් හඳුන්වයි. හාල් පිටි හා පැණිවලට අමතරව මේ සඳහා යොදා ගන්නා මුංඇට පිටි නිසා කැවුම හරිත වර්ණයක්ද ඇති කරනු ලබයි. 

අවශ්‍ය ද්‍රව්‍ය

-සුදු සහල්/ තිරිඟු පිටි කෝප්ප එකක්
-පිටි කරගත් මුංඇට කෝප්ප එකක්
-කරඳමුංගු දෙකක්
-ලුණු ස්වල්පයක්
-කිතුල් පැණි කෝප්ප එකක්
-ගැඹුරු තෙල් පිස ගැනීමට අවශ්‍ය පොල්තෙල් 

අතිරස 

අතිරස යනු නිවුඩු සහල් පිටි සහ පැණි මිශ්‍ර කර සකස් කර ගන්නා දකුණු ඉන්දියාවේ ජනප්‍රිය රසකැවිලි වර්ගයකි. මෙය ශ්‍රී ලාංකික ආහාර සංස්කෘතියට අනන්‍ය වූ හැඳි කැවුම් සමග සමානකමක් දක්වයි. 
මේ ආදී වශයෙන් අවුරුදු කාලයත් සමග නොයෙක් කැවුම් වර්ග ගම්වල පිළියෙල කෙරෙන අතර, මේ හා සම්බන්ධ ක්‍රියාවලිය බැඳී මිත්‍යා විශ්වාසයන්ද සියවස් ගණනාවක සිට මුඛ පරම්පරාවෙන් පැවත එයි. මෙහිලා පිසගනු ලබන පළමු කැවුම %කෝඳුරු කැවුම^ නමින් හඳුන්වයි. කෝඳුරුවා යනු මේ කැවුම් සාදන තැනට ඇදී එන කුඩා කෘමි විශේෂයෙකි. එමෙන්ම පළමු කැවුම පිස අවසන් වනතෙක් කැවුම් පිසින අය කතාබස් නොකර කටයුතු කිරීමට වගබලා ගනී. එය සිරිතකි. එමෙන්ම අවසානයේ සකස් කරන කැවුම %දිය කැවුම^ වශයෙන් හඳුන්වනු ලබයි. ගැමි කතුන් විසින් එම කැවුම අවසාන පිටි ගුලියෙන් සකස් කරන නිසා එහි එතරම් රසක් නොමැති බව අඟවා මෙලෙසින් ව්‍යවහාර කෙරේ. 

කොකිස්

කොකිස් යන්න ශ්‍රී ලාංකේය සංස්කෘතික උත්සවයන්හි අනිවාර්යයෙන් දැකගත හැකිවුවත් එහි නාමය පැවත එන්නේ 17 වැනි සියවසේ මැද භාගයේ සිටය. ඒ 18 වැනි සියවසේ අග භාගය දක්වා මෙරට රැඳී සිටි ලන්දේසින්ගෙනි. %Kokis^ යන නාමය ඩෙන්මාර්කයේ koekjes යන්නෙන් ව්‍යුත්පන්න වී පැමිණි බව බොහෝ දෙනාගේ මතයයි. ස්වීඩනයේ භාවිතා කරන කූකීස් යන නාමය ලංකාවේ කොකිස් හා අනන්‍ය වූ ආහාරයකි. 
කොකිස් සෑදීම සඳහා අද වන විට වෙළෙඳ පොළ තුළ මලක, කොළයක හෝ සමනලයෙකු ආදී විවිධ හැඩයෙන් සකස් කරගත් අලංකාර අච්චු දැකගත හැකිය. මෙය පොදුවේ අපි %කොකිස් අච්චුව^ නමින් හඳුන්වයි. සහල් පිටි, පොල්කිරි හා පදමට දමාගත් ලුණු මිශ්‍ර කරමින් සකස් කළ කොකිස් මිශ්‍රණයට රත්කළ තෙල්වලින් පොඟවා ගත් කොකිස් අච්චුව දමා මිශ්‍රණය එහි ආලේප කර ඉන්පසු එය තෙල් තාච්චියේ දමා කොකිස් බැද ගනී. 
මෙහිදී කොකිස් මිශ්‍රණය සකස් කිරීමේදී ඇතැමුන් බිත්තරයක්ද, මිරිස් කුඩු ස්වල්පයක්ද එක් කරයි. මෙහිදී මඳක් එය බැදීගෙන එන විට අච්චුවෙන් ඉවත් කළ යුතුය. මේ සඳහා පොල්කූරක් භාවිතයට ගනී. 

අවශ්‍ය ද්‍රව්‍ය 

-සහල් පිටි ග්‍රෑම් 200ක්
-පොල් කිරි කෝප්ප 4/3ක්
-කහ කුඩු තේ හැඳි 2/1ක්
-සීනි තේ හැඳි 1 2/1ක්
-ලුණු තේ හැඳි 2/1ක්
-ගැඹුරු තෙලේ බැදීමට අවශ්‍ය තරම් පොල්තෙල්

ආස්මි

ආස්මි සකස් කිරීම සඳහා යොදා ගන්නා දවුලු කුරුඳු ඉතා ගුණදායී වේ. එමෙන්ම එම ශාක පත්‍ර සෙවෙල් නිසා ‍ෙමයින් සකස් කර ගන්නා ආස්මි හොඳින් පෙඟෙන්නට කලක් තිබූ පසු දෙවැනි වර තෙ‍ෙලන් බදින විට හොඳට පිපේ. සමාන්‍යයෙන් ආස්මි මාස 6ක් වැනි කාලයක් කල් තබා ගැනීමේ හැකියාව තිබේ. 

අවශ්‍ය ද්‍රව්‍ය

-සුදු හාල් පිටි ග්‍රෑම් 225ක්
-ඝන පොල්කිරි කෝප්ප එකක්
-දිය පොල්කිරි කෝප්ප එකක්
-ලුණු තේ හැඳි 2/1ක්
-ආස්මි බැදීම සඳහා පොල්තෙල් අවශ්‍ය ප්‍රමාණයට
-දවුලු කුරුඳු කොළ ස්වල්පයක් 
-පැණි මිශ්‍රණය සකස් කර ගැනීමට අවශ්‍ය ද්‍රව්‍ය
-සීනි ග්‍රෑම් 225ක්
-ජලය කෝප්ප 4/1ක්
-කැමති වර්ණ කාරකයක්

අග්ගලා 

බොහෝ විට අග්ගලා සකස් කිරීමට ගනු ලබන්නේ ඉතුරුම් හාල් සෝදා වේලා හෝ ඉතුරුම් බත් වේලා ගනිමිනි. එය අතීතයේ සිට ගෘහණියන් විසින් සිදුකරන ක්‍රියාවකි. ඔවුන් කිසිවක් අපතේ නොයවා සෑම දෙයක්ම පරිහරණය කළේය. නාස්තිය අවම කරමින් සකස් කළ මෙම රසකැවිල්ල අද වන විටත් ඉතා ජනප්‍රියය. අප ශ්‍රීරිපාදය වඳින්නට යන විට අග්ගලා රැගෙන යාම සිරිතකි. එනිසා ඈත අතීතයේ සිට මේ හා බැඳි සංස්කෘතියක් පවා ගොඩනැගී තිබේ. 

අවශ්‍ය ද්‍රව්‍ය

-කිතුල් පැණි කෝප්ප 4/1ක්
-සහල් පිටි කෝප්ප බාගයක් 
-ලුණු ස්වල්පයක්
-ගම්මිරිස් ස්වල්පයක්

හැලප 

පෝෂ්‍යදායී මෙන්ම ගුණදායී ආහාරයක් වන හැලප සකස් කිරීමට ගන්නා කුරක්කන් බොහෝ රෝග පාලනය කරන ඖෂධයක්ද වේ. කුරක්කන්වලින් සාදා ගන්නා හැලපය කැන්ද කොළයක නවා ජල වාෂ්පයෙන් තැම්බූ විට ඉතා රසවත් කෑමකි.
අවශ්‍ය ද්‍රව්‍ය
කුරක්කන් පිටි කෝප්ප එකක්
ගාගත් පොල් තේහැඳි දෙකක්
පැණි කෝප්ප 4/1ක්

උඳුවැල් හෙවත් පැණි වළලු

නුවර ප්‍රදේශයේ ඉතා ජනප්‍රිය කෑමක් වන උඳු වළලු හෙවත් පැණි වළලු ඉතා රසවත් ආහාරයකි. මෙය ගුණදායී බවින්ද ඉහළය. බාල, මහලු වයස් භේදයකින් තොරව කවුරුත් රස විඳීමට ප්‍රිය කරන මෙය අවුරුදු කෑම අතරට එක් වී ඇති තවත් රස කැවිල්ලකි.

අවශ්‍ය ද්‍රව්‍ය

කළු පැහැති පොත්ත ඉවත් කරගත් උඳු පිටි කෝප්ප දෙකක්
-සහල් පිටි කෝප්ප එකක්
-පොල් කෝප්ප 2 2/1ක්
-ලුණු තේහැන්දක් පමණ
-කිතුල් පැණි කෝප්ප 3ක් හෝ 4ක්
-ජලය කෝප්ප එකක්

කළු දොදොල් 

කළු වර්ණයෙන් යුක්ත මෙය පොල්කිරි හා හාල් පිටිවලින් සකස් කර ගනු ලබන්නකි. කරඳමුංගු ස්වල්පයක් එක් කරමින් කජු දමා පදමට සකස් කරගත් කළු දොදොල් අවුරුදු මේසය හැඩ ගන්වයි. 

අවශ්‍ය ද්‍රව්‍ය

-බැදගත් සහල් පිටි කෝප්ප දෙකක්
-සිහින්ව ගාගත් පොල් කෝප්ප දෙකක කිරි
-කරඳමුංගු තේ හැඳි එකක්
-කුඩාවට කපාගත් කජු කෝප්ප 4/1ක්
-ගාන ලද හකුරු කෝප්ප දෙකක්

වැලි තලප හෙවත් සව් දොදොල්

අවශ්‍ය ද්‍රව්‍ය

-තැම්බූ පාන් පිටි කෝප්ප දෙකක්
-හාල් පිටි කෝප්ප එකක්
-උකු පොල් කිරි කෝප්ප තුනක්
-පැණි කෝප්ප දෙකක්
-ලුණු දියර ස්වල්පයක්
උණු ජලය 

සිංහලයන් අතර ජනප්‍රිය අලුවා 

අවශ්‍ය ද්‍රව්‍ය 

-සුදු (අමු) සහල් පිටි කෝප්ප 10ක්
-සීනි කෝප්ප දෙකක්
-ජලය කෝප්ප තුනක්
-කරඳමුංගු තුනක් හෝ හතරක්
-කුඩාවට කපාගත් කජු අවශ්‍ය ප්‍රමාණයට

මම බලාපොරොත්තු වෙන්නේ මගේ රටට උපරිමයෙන් සේවය කරන්න

කාන්තාවකට පිත්තයි පන්දුවයි අකැප වූ යුගයක් මීට දශක කිහිපයකට පෙර තිබුණි. නමුත් අද වන විට ඒ තත්ත්වය හාත්පසින්ම වෙනස් වී තිබේ. අද වන විට එයින් දස්කම් පා ලංකාවේ නම ජාත්‍යන්තරයට ගෙන යන්නට ලාංකේය කාන්තා ක්‍රිකට් කණ්ඩායමට හැකි වී තිබේ. අද අපගේ කතාබහ සිදුවන්නේ ශ්‍රී ලංකා කාන්තා ක්‍රිකට් කණ්ඩායමේ නායිකාව මෙන්ම කණ්ඩායමේ දක්ෂතම පිතිකාරිනිය වන චමරි අතපත්තු සමගයි.


ඔබ ගැන විස්තරයක් කළොත්?

මගේ ගම කුරුණෑගල ගොකරැල්ලෙ. මගේ අප්පච්චි මහජන සෞඛ්‍ය පරීක්ෂකවරයෙක්. අම්මා හෙදියක් විදියට කටයුතු කළා. මගේ අප්පච්චි මේ වන විට ජීවතුන් අතර නැහැ. 

ක්‍රිකට් ක්‍රීඩාවේ මේතාක් දුර ඔබ ආ ගමන ගැන සඳහන් කළොත්?

මම ක්‍රිකට් ක්‍රීඩාවට කැමති වුණේ මගේ මාමා නිසා. ඔහු ක්‍රිකට් පුහුණුකරුවෙක්. මට වයස අවුරුදු 4ක් වගේ වෙද්දී මම ක්‍රිකට් ක්‍රීඩාව සඳහා යොමු වුණා. ඒ කාලෙ පටන් මම මාමා සමග ක්‍රිකට් තරග නරඹන්න වගේම ක්‍රිකට් ක්‍රීඩා කරන්න යනවා. ඇත්තටම මට බෝනික්කෝ එක්ක සෙල්ලම් කරන ළමා කාලයක් තිබුණෙ නැහැ. පිත්තයි පන්දුවයි එක්ක ගෙවුණු ජීවිතයක් තමා මට තිබුණෙ. 
ගොකරැල්ලෙ මහා විද්‍යාලයේ අධ්‍යාපනය ලැබූ මම ශිෂ්‍යත්වය සමත් වීමත් සමග ඉබ්බාගමුව මධ්‍ය විද්‍යාලයට මම ඇතුළත් වෙනවා.  මගේ වාසනාවකට ඉබ්බාගමුව මධ්‍ය විද්‍යාලයේ කාන්තා ක්‍රිකට් තිබුණා. ඒ නිසා මට පාසල තුළ කාන්තා ක්‍රිකට් කණ්ඩායමේ ක්‍රීඩා කරන්න ලැබෙනවා. පුංචි කාලෙ පටන් හාර්ඩ් බෝල් වගේම සොෆ්ට් බෝල් ක්‍රිකට් පුහුණු වීම් කළ නිසා මට ක්‍රිකට් ක්‍රීඩාවට එන්න පහසු වුණා. පාසල තුළ දැක් වූ දක්ෂතාවත් සමග මට කොළඹ කෝල්ට්ස් ක්‍රීඩා සමාජයෙන් ඇරයුමක් ලැබෙනවා ප්‍රිමියර් ක්‍රිකට් තරගාවලියේ ක්‍රීඩා කරන්න. මම ඒ පළමු වසරේ ක්‍රීඩා කළාට පස්සේ මට අවස්ථාවක් ලැබෙනවා ජාතික සංචිතයට එන්න. ඒ 2008 වර්ෂයේ. අවාසනාවකට මගේ අප්පච්චි ඒ වර්ෂයේ ජීවිතයෙන් සමුගන්නවා. ඒ නිසා මට වසරක් වගේ කාලයක් ක්‍රිකට් ක්‍රීඩාවෙන් ඈත් වෙන්න සිදු වෙනවා. ඒ නිසා ජාතික ක්‍රිකට් කණ්ඩායමට එන්න අවස්ථාව මගහැරෙනවා. නමුත් නැවත වතාවක් කුරුණෑගලදී පුහුණු වීම් කටයුතු කරලා 2009 වර්ෂයේදී නැවතත් ජාතික කණ්ඩායමට එනවා. එදා ඉඳන් අද දක්වා මම ජාතික කණ්ඩායම නියෝජනය කරනවා. 

මේ පැමිණි ගමනේ ඔබට බාධා නොතිබුණා  විය නොහැකියි. ඔබ මුහුණදුන් බාධා ගැන  සඳහන් කළොත්?

අප්පච්චිගේ වියෝවත් සමග මට පුහුණු වීම්වලට සහභාගි වෙන්න කොළඹ යන්න එන්න කෙනෙක් හිටියේ නැහැ. නැවතත් ක්‍රිකට් ක්‍රීඩාවට පැමිණියේ ගොඩක් බාධක වගේම හැලහැප්පීම් මැද්දෙ. අප්පච්චි එක්ක එන කාලෙත් පුහුණුවීම් සඳහා කොළඹ උදෑසන 6 පමණ වෙද්දී සහභාගි වෙන්න ඕන. සමහර වෙලාවට පුහුණුවීම් අවසන් වෙද්දී සවස 6.30/7.00 වෙනවා.  ගෙදර යද්දී රෑ 10 වගේ වෙනවා. ඒ ඇවිත් පහුවදා පාසල් යන්නත් ඕන. මේ වගේ බාධක මැද්දෙ තමයි ක්‍රිකට් ක්‍රීඩාවට සහභාගි වුණේ. නමුත් අද හිතනවා මේ කොපමණ බාධා තිබුණත් මම අද සාර්ථකයි කියලා. 

ජාතික කණ්ඩායමට ඇතුළු වීමත් සමග ඔබ ලබාගත් සුවිශේෂී ජයග්‍රහණ ගැන  කතා කළොත්?

මම ජාතික කණ්ඩායමට ආවට පස්සේ ගොඩක් දේවල් ජීවිතයට ළඟා කර ගත්තා. මට ලංකාවේ ප්‍රථම ශතකය ලබා ගන්න හැකි වෙනවා. මම හිතන්නෙ පසුගිය ලෝක කුසලානෙත් මම හොඳට ක්‍රීඩා කරලා ලකුණු 178ක් ලබාගත්තා.  ඒ වගේම විස්සයි 20 ලෝක කුසලානෙත් ශ්‍රී ලංකා ක්‍රීඩිකාවක් ලබාගත්ත ප්‍රථම අර්ධ ශතකය මම වාර්තා කළා. ඒ වගේම 2014 වසරේ සිට 2015 දක්වා කණ්ඩායම් නායිකාව බවට පත් වෙනවා. ඉන් පස්සෙ උපනායිකාව විදියට කටයුතු කළා. ඊට පසුව සාමාන්‍ය ක්‍රීඩිකාවක් ලෙස වසර එකහමාරක් වගේ කටයුතු කරනවා.  ඉන් පසු නැවත වතාවක් මේ වසරේ නායකත්වයට පත්වෙනවා.

IMG_6189

කණ්ඩායම් නායිකාව ලෙස ඔබට පැවරී ඇති වගකීම් ගැන කතා කළොත්?

කණ්ඩායමේ සිටින ක්‍රීඩිකාවන් විවිධ ප්‍රදේශ, විවිධ පවුල් පසුබිම් අය. ඉතිං ඒ විවිධාකාර අය එකට කැටි කර ගන්න එක ටිකක් අපහසුයි. මම උපරිමයෙන්ම සියලු දෙනාට එක විදියට සලකන්නෙ. මම  ඔවුන්ගේ උපරිම හැකියාව ගන්න බලාපොරොත්තු වෙනවා ඒ හැම ක්‍රීඩිකාවකගෙන්ම. ඒ වගේම කණ්ඩායම තුළ විවිධ අදහස් වගේම විවිධ අත්දැකීම් තිබෙන ක්‍රීඩිකාවන් සිටිනවා. මගේ වගකීම තමා මේ සියලු දෙනාම එකට කැටි කරලා හොඳ කණ්ඩායමක් නිර්මාණය කිරීම.

කාන්තාවක් විදියට ක්‍රිකට් ක්‍රීඩාවේ  යොමු වීමේදී මුහුණදෙන අභියෝග ගැන  සඳහන් කළොත්?

මම හිතන්නේ කාන්තාවක් විදියට ක්‍රිකට් ක්‍රීඩාව තෝරා ගැනීමම අභියෝගයක්. ගොඩක් කාන්තාවෝ තෝරා ගන්නේ නෙට්බෝල්, බාස්කට් බෝල් වගේ ක්‍රීඩාවන්. නමුත් අද වන විට ඒ මතය මග ඇරිලා තිබෙනවා.  නමුත් මම ක්‍රිකට් ක්‍රීඩාවට එළඹෙද්දී ගොඩක් අය උපහාසයෙන් බලපු අවස්ථා තිබුණා. මම ගියේ මිශ්‍ර පාසලකට. මම බැට් එක අරන් යද්දී පිරිමි ළමයි හිනා වුණ අවස්ථා ඕන තරම් තිබුණා. නමුත් මම හිතන්නෙ අද වෙද්දී ඒ තත්ත්වය වෙනස් වෙලා කියලා. ඒ වගේම මම පුහුණුවීම් ඉවර වෙලා ඒ කාලෙ බැට් එකයි, ලොකු බෑග් එකයි අරන් බස් එකේ යද්දී හිනා වුණ අය ඉන්නවා. නමුත් දැන් වෙද්දී ඒ තත්ත්වය වෙනස් වෙලා. මගෙ නම කිව්වම, මාව දැක්කම හැමෝම අඳුනන මට්ටමට ඇවිත් තිබෙනවා. මම හිතන්නෙ කාන්තා ක්‍රිකට් ක්‍රීඩාවටත් දැන් පිළිගත් තත්ත්වයක් තිබෙනවා. 

කාන්තා හා පිරිමි ක්‍රිකට් කණ්ඩායම්වලට ලැබෙන වරප්‍රසාදයන්ගේ  සමානාත්මතාවක් තිබෙනවාද?

ලෝකයේ ක්‍රිකට් ක්‍රීඩාව  ගත්තම ක්‍රීඩිකාවක් හා ක්‍රීඩකයෙක් ගතහොත් මූල්‍යමය වටිනාකම එකම මට්ටමක නැහැ. නමුත් ක්‍රීඩිකාවකට අවශ්‍ය පෝෂණ පහසුකම්, ඇඳුම් පැලඳුම්, පුහුණුවීම් පහසුකම් සියල්ල ලබා දෙනවා. නමුත් මූල්‍යමය වටිනාකම ක්‍රිකට් ක්‍රීඩිකාවකට සාපේක්ෂව ක්‍රීඩකයෙක්ට ඉහළ මට්ටමක තිබෙනවා. නමුත් ටිකෙන් ටික මූල්‍යම වටිනාකම ක්‍රීඩිකාවන්ගෙත් ඉහළ නැංවීමක් සිදුකරනවා. මේ වන විට ක්‍රිකට් ක්‍රීඩිකාවන් ලීග් තරගාවලිවලට සහභාගි වෙනවා. ඒ නිසා ඔවුන්ගේ මූල්‍යමය වටිනාකම වැඩි වී තිබෙනවා. ඒ නිසා වසරක්, වසර එකහමාරක් යද්දී ක්‍රිකට් ක්‍රීඩිකාවක් හා ක්‍රීඩකයෙක්ට එකම මූල්‍යමය වටිනාකමක් ලැබේවි. මේ වෙද්දී සෑහෙන වෙනසක් තිබූ නමුත් මම හිතනවා අනාගතයේදී ඒ තත්ත්වය වෙනස් වෙයි කියා. 

ක්‍රිකට් ක්‍රීඩිකාවන් ඇයි ඉක්මනින්ම ක්‍රීඩාවට සමුදෙන්නේ? කාන්තාවක් වීමද?

 අනිවාර්යයෙන් ඔව්. මෙය ක්‍රීඩිකාවගෙන් ක්‍රීඩිකාවට වෙනස් වෙනවා. එය තීරණය වෙන්නෙ ශරීර යෝග්‍යතාව මත. ඒ වගේම විවාහයෙන් පසු ලැබෙන සහකරුගේ සහයෝගය මත එය තීරණය වෙනවා. මම තීරණය කර තිබෙන්නේ තව වසර 3, 4ක් ක්‍රීඩා කරලා ක්‍රිකට් ක්‍රීඩාවට සමුදෙනවා කියලා. මෙය පුද්ගලයාගෙන් පුද්ගලයාට වෙනස් වෙනවා. ක්‍රිකට් ක්‍රීඩාවේ නායකත්වය, උපනායකත්වය යන්න සැම විටම වෙනස් වීම්වලට ලක් වෙනවා. 

Chamari-Atapattu-

ඒ නායකත්වයන් මාරු වීමේදී දැනෙන හැඟීම මොන වගේද?

මම ක්‍රීඩා කරන්නේ මගේ රටට. නායකත්වය ලැබුණා හෝ නැතා මම බලාපොරොත්තු වෙන්නේ මගේ රටට උපරිමයෙන් සේවය කරන්න. මම නායකත්වයේ ඉද්දිත් හොඳින් ක්‍රීඩා කළා. නායකත්වයේ නැතිවත් හොඳින් ක්‍රීඩා කළා. මම ලකුණු 178ක් ලබාගත්තෙ මම නායිකාවක් හැටියට ඉද්දි නෙමේ. ඒ වගේම මගෙ ප්‍රථම ශතකය වාර්තා කළෙත් සාමාන්‍ය ක්‍රීඩිකාවක් ලෙසට ඉද්දී. ඒ වගේම %ICC Champions^ ශ්‍රේණිගත කිරීම්වල මාස 6ක් ලෝකයේ අංක එකේ ක්‍රිකට් ක්‍රීඩිකාව ලෙස මම හිටියා. ඒ වෙද්දී මම නායිකාව. ඉතිං මම හිතන්නේ නායකත්වය තිබුණා හෝ නැතා කෙසේ හෝ මගේ කණ්ඩායම වෙනුවෙන් මගේ උපරිමයෙන් ක්‍රීඩා කරන්න තමයි මගේ බලාපොරොත්තුව වෙන්නේ. 

කණ්ඩායමේ සිටින බොහෝ ක්‍රීඩිකාවන්  ත්‍රිවිධ හමුදාව නියෝජනය කරන්නේ ඇයි?

මුලින්ම ක්‍රීඩිකාවන් පාසලේ ක්‍රීඩා කරලා, ක්ලබ්වල ක්‍රීඩා කරලා තමයි ක්‍රීඩාවට පැමිණියේ. මේ වෙද්දී ගුවන් හමුදාව, නාවික හමුදාව සහ යුද හමුදාවෙන් ඔවුන්ට රැකියා ලබාදීලා අවස්ථාව ලබාදී තිබෙනවා. ඒ නිසා ඒ ක්‍රීඩිකාවන් හමුදාවට සම්බන්ධයි. නමුත් ඔවුන් මූලිකව සිදු කරන්නේ ක්‍රිකට් ක්‍රීඩාවේ නියැළෙන එක. ඔවුන් හමුදාව නිසා ක්‍රිකට් ක්‍රීඩාවට පැමිණියා නෙමේ. ක්‍රිකට් නිසා හමුදාවට සම්බන්ධ වුණ එකයි. ඒ නිසා ත්‍රිවිධ හමුදාවෙන් ලොකු සහයෝගයක් කණ්ඩායම සඳහා ලැබෙනවා. 

ඔබගේ ඉදිරි බලාපොරොත්තු  ගැන කතා කළොත්?

මම ක්‍රීඩා කරන්න බලාපොරොත්තු වෙන්නේ තව වසර 3ක් හෝ 4ක්. ඒ කාලයේ ඉතා හොඳට ක්‍රීඩා කරලා ලංකාව හොඳ තැනකට ගෙන එන්න බලාපොරොත්තු වෙනවා. ඉන් පසුව පුහුණුකාරිනියක් විදියට අවශ්‍ය සහයෝගය ලබාදෙන්න බලාපොරොත්තු වෙනවා. ඒ වගේම මම බලාපොරොත්තු වෙනවා ස්ථිර පදිංචිය සඳහා ඔස්ට්‍රේලියාවට යන්න. 

ඇයි ලංකාව අතහැර පිටරට  පදිංචියට යන්න තීරණය කළේ?

මගේ බලාපොරොත්තුවක් තිබෙනවා අනාගතයේ ක්‍රිකට් ක්‍රීඩාවට සම්බන්ධ දේවල් ඉගෙන ගන්න. මට ඒ දේවල් ලබාගන්න පහසුයි ඔස්ට්‍රේලියාවේ සිටියොත්. ඒ වගේම ක්‍රිකට් පුහුණුකාරිනියක වීම සඳහා ඔස්ට්‍රේලියාවේ තිබෙන ලෙවල් 2 විභාගය කරන්නත් බලාපොරොත්තුවෙන් ඉන්නවා. නමුත් මම මගේ රටට වගේම කණ්ඩායමට අවශ්‍ය දේවල් සිදුකරනවා. 

ස්තුති කළ යුතු  පිරිසක් සිටිනවාද?

අම්මා ,අප්පච්චී, පවුලේ සැවොමත් වගේම මෙතෙක් සිටිය සියලුම පුහුණුකරුවන්ටත්, ජීවිතයේ හැම වැටුණු අවස්ථාවකදීම මගෙත් එක්ක සිටිය සියලු යහළුවන්ටත් මා මෙහිදී ස්තුති කරනවා.

කැවිලි රහස් දැනගන්න

අලුත් අවුරුද්දේ සිරිත්-විරිත්, චාරිත්‍ර-වාරිත්‍ර, අවුරුදු ක්‍රීඩා වගේම අලුත් අවුරුදු කැවිලි-පෙවිළිවලට හිමිවන්නේ ඒ හා නොදෙවැනි සුවිශේෂී ස්ථානයක්. එය අවුරුදු මංගල්‍ය හා බද්ධ වී අද දක්වා පැවත එයි. මෙය අතීතයේ සිට අධ්‍යයනය කිරීමේදී එක් ආකාරයක කලාවක් වශයෙන්ද හඳුනාගත හැකිය.


65004_460488924049050_958198095_n

එකී කලාවේ සාම්ප්‍රදායික බව හා ගුණාත්මක බව ආරක්ෂා කරමින් කැවිලි සකස් කිරීම පිළිබඳ අද ගෘහණියන් සතුව ඇත්තේ අල්ප වූ දැනුමකි. දේශීයත්වය අගය කරමින් දේශීය කැවිලි කලාව ජාත්‍යන්තරයට ගෙන ගිය ඉංජිනේරුවරියක වූ අයේෂා ගමගේ මහත්මිය සෑම විටම සිය පාරිභෝගිකයාට ලබාදෙන කැවිලි වර්ග පිළිබඳ හොඳ අවබෝධයකින් යුතුව පසුවන්නියකි. ළඟ එන අවුරුද්දේ ඇගේ ව්‍යාපාර කටයුතු සේම එහි ගුණාත්මකභාවය පිළිබඳව ඇය %අද^ හා දැක්වූයේ මෙවන් අදහසකි. 
වෙනත් අවුරුදුවලට වඩා මේ වර්ෂයේදී කැවිලි සඳහා වන ඉල්ලුම ගොඩක් වැඩියි. අපි මේ වන විට විදෙස් රටවල වෙසෙන ලාංකීකයන් ඇණවුම් කළ කැවිලි වර්ග සියල්ලම ඔවුන්ට යවලා තිබෙන්නේ. විදේශිකයන්ගෙන් පමණක් නොවේ නොයෙක් ආයතන මගින්ද කැවිලි ඇණවුම් ලැබිලා තියෙනවා. සමාන්‍යයෙන් රුපියල් 2000යේ සිට ඉහළට කැවිලි ඇසුරුම් කළ කූඩ තමයි අපි ළඟ තිබෙන්නේ. නමුත් මේ සිංහල අලුත් අවුරුද්දේ %ඇතුල්පත ^ යන නමින් අලුත් කැවිලි කූඩයක් අපි හඳුන්වා දී තිබෙනවා. සාමාන්‍යයෙන් එය පොඩි පවුලකට ප්‍රමාණවත් වන පරිදි කොණ්ඩ කැවුම්, මුං කැවුම්, අලුවා, ආස්මි හා කොකිස් ආදී කැවිලිවලින් සකස් කර තිබෙනවා. දේශීය වශයෙන් අලෙවි කිරීමේදී  විශේෂයෙන් අපේ අය කැවිලි ඇසුරුම් කළ කූඩ වගේම අවශ්‍ය ප්‍රමාණයට වෙන වෙනම කැවිලි වර්ගත් මිලදී ගන්නවා. මේ ක්‍රම දෙකත් එක්ක තමයි මගේ දේශීය වෙළෙඳ පොළ සකස් වී තිබෙන්නේ. සාමාන්‍යයෙන් කොළඹ අවට සිටින අයගෙන් මේ සඳහා හොඳ ඉල්ලුමක් තිබෙනවා. නෑදෑයන්ට, යාළුවන්ට වගේම කාර්යාලයේ සේවකයන්ට දෙන්න තමයි මේ කැවිලි ඇසුරුම් කළ කූඩ ඔවුන් වැඩියෙන්ම මිලදී ගන්නේ. 

අපේ පාරිභෝගිකයාට අවශ්‍ය පරිදි අපි මේ කැවිලි කූඩ (Hampers) ගෙන ගොස් දෙනවා. සමහර අය නම් කලින්ම ඇණවුම් කරනවා. ඒත් සමහර පාරිභෝගිකයන් 12 වැනිදාට හෝ 13 වැනිදාට ලැබෙන පරිදි ඇණවුම් කරනවා. අපි ඒ හැම කෙනෙක්ටම තමන්ගේ රුචිකත්වය පරිදි අවුරුදු රසකැවිලි ලබාදෙනවා. වෙනදට වඩා කැවිලිවලට දැන් දැන් හොඳ  ඉල්ලුමක් තිබෙනවා. අපි මේ සියලු කැවිලි වර්ග නිෂ්පාදනය කරන්නේ අපේම තැනක. යම් පාරිභෝගිකයෙකුට අවශ්‍ය නම් ඒ තැන නිරීක්ෂණය කරන්න ඒ සඳහා කිසිදු බාධාවක් නැහැ. අපි නිෂ්පාදනය කරන කැවිලිවල ගුණාත්මකභාවය පිළිබඳවත් අපිට 100%ක් සහතික වෙන්න පුළුවන්. 

කැවිලි පිළියෙල කිරීමත් එක්තරා ආකාරයක කලාවක්. කොණ්ඩ කැවුමේ හැඩය ගන්න නම් හැන්ද වගේම කූරත් අනිවාර්යයෙන්ම තියෙන්නට ඕන. කොකිස් හදන්න කොකිස් අච්චුවයි කූරයි තියෙන්න ඕන. මේ වගේ හැම කැවිල්ලක් සඳහාම ඒවාට අනන්‍ය වූ දෙයක් අනිවාර්යයෙන්ම තිබෙනවා. අපි දේශීය කැවිලිවලට මුල්තැනදී මෙය පිළියෙල කරන නිසා සෑම විටම උපරිමයෙන්ම දේශීයත්වය ඉස්මතුවන ආකාරයෙන් පාරිභෝගිකයා හට කැවිලි ලබාදෙන්නට අපේක්ෂා කරනවා. මේ නිසා  සාම්ප්‍රදායික රසය ගැන අපි වඩා සුපරික්ෂාකාරී වෙනවා. 

15032320_1056713827759887_907543484575553463_n

අපේ පාරිභෝගිකයාට ලබාදෙන කැවිලි ඇසුරුම් පෙට්ටි සඳහා අපි මීට පෙර භාවිත කළේ සව්කොළ. මේ පාර අපි පොඩි වෙනසකටත් එක්ක පන් කොළවලින් ඇසුරුම් පෙට්ටිය සකස් කරලා තියෙන්නේ. ලබන අවුරුද්ද වන විට මේ ඇසුරුම් පෙට්ටිය සම්පූර්ණයෙන් වෙනස් කරන්න මම අපේක්ෂා කරනවා. පරණ %ට්‍රන්ක පෙට්ටි^ යනුවෙන් අපි හඳුන්වපු, ඒ පෙටිටිය ලීවලින් සකස් කර කැවිලි ඇසුරුම් කරන්න මම ඉදිරියේදී අපේක්ෂා කරනවා. මේ නිසා අපේ ඕනෑම පාරිභෝගිකයෙකුට තමන්ට අවශ්‍ය නෑදෑ ගෙදරකට මේ කැවිලි ඇසුරුම් කූඩය යැවීමේ හැකියාව තිබෙනවා. අපිට දුරකථනයෙන් ඇණවුම ලබාදීම සිදුකරන්න පුළුවන්. එවිට අපි නිවසටම ගෙන ගොස් දෙනවා. ඒවගේම මුදල් වුවත් ඒ මොහොතේදීම ගෙවා ලබාගැනීමට හෝ බැංකුවට දැමීමේ හැකියාව තිබෙනවා. පාරිභෝගිකයාගේ අවශ්‍යතාවට අපි සෑම වේලාවකදීම මූලිකත්වය ලබාදෙනවා. ඒ නිසා අවශ්‍ය ප්‍රමාණයට තමන්ට මෙම කැවිල වර්ග ලබාගැනීමේ හැකියාව තිබෙනවා. අපි දැනට කොකිස්, මුං ඇට කැවුම්, අතිරස, අග්ගලා, නාරං කැවුම්, උඳු වළලු, හැලප, වැලි තලප වගේ කැවිලි 14ක් නිෂ්පාදනය කරනවා. 
මේ අවුරුදු සමයේ පාරිභෝගිකයන්ට රසකැවිලිවලට අමතරව සිංහල අච්චාරු, මැලේ අච්චාරු හා බටු මෝජු අපි පිළියෙල කරනවා. පාරිභෝගිකයාගේ ඉල්ලීම පරිදි ප්‍රමාණය කුමක් වූවත් අපි එය ඔවුන්ට ලබාදීම සිදුකරනවා. 

ඇත්තෙන්ම මේ සියලු දේ පිළිබඳ පාරිභෝගිකයාට සවිස්තරව දැනගැනීමට අපි වෙබ් පිටුවක් පවත්වාගෙන යනවා. ඒ හරහා කැවිලි වර්ග ඇතුළු සෑම දෙයක් පිළිබඳවම මිල ගණන් පැහැදිලිව දක්වලා තිබෙනවා. ඒවගේම ඉදිරියේදී මේ සඳහා නව ඇප් එකක් හඳුන්වා දීමටද අප අපේක්ෂා කරනවා. දැනට එය භාගයක් වගේ ප්‍රමාණයට සකස් කරලා තියෙන්නේ. එය ක්‍රියාත්මක කිරීම සඳහා කවුරුන් හෝ කෙනෙක් යොමු කොට ඉදිරියට පවත්වාගෙන යන්න තමයි මම සැලසුම් කරලා තිබෙන්නේ. එයට පලතුරු, කිරිපැණි, අච්චාරු, මාළු ඇඹුල් තියල් වගේ දේවල් ඇතුළත් කරන්න අපේක්ෂා කරනවා.  අද ගොඩක්ම අය කරන්නේ කාර්යබහුල නිසා සල්ලි දීලා මේ දේවල් කරගන්න එක. ඒ නිසා සුළු හා මධ්‍ය පරිමාණ ව්‍යාපාරිකයන්ට වෙළෙඳ පොළක් සකස් වෙනවා. ඒත් බොහෝ විට ඔවුන්ද නියමිත ප්‍රමිතියක් යටතේ මෙය සිදුනොකිරීම නිසා මේ වර්ෂයේ එන පාරිභෝගිකයාව ලබන වර්ෂයේදීත් ගෙන්නා ගැනීමේ හැකියාවක් නැති වෙනවා. ඒ නිසා මෙය නියමිත ප්‍රමිතියකින් ගුණාත්මකභාවයෙන් යුතුව කිරීම ව්‍යාපාරයේ දියුණුවට මෙන්ම පාරිභෝගිකයාගේ විශ්වාසයටත් සිදුකරන උතුම් කාර්යයක් ලෙසයි මම දකින්නේ. 

63906_460488520715757_417104654_n

කොණ්ඩ කැවුම්වලට එනසාල් එක් කිරීමෙන් ඇඟට උරාගන්නා තෙල් ප්‍රමාණය අඩු කරගැනීමට පුළුවන්
අපි කොණ්ඩ කැවුම් පිළියෙල කිරීමේදී එම මිශ්‍රණයට එනසාල්, මාදූරු හා සූදුරු එක් කරනවා. එවිට හැමදාම අපි කන කොණ්ඩ කැවුමේ රසයට වඩා රසයේ වෙනසක් අපිට දැනෙනවා. අවුරුදු කාලේට අපි ගන්නා ගොඩක් කෑම වර්ග තෙල්වලින් පිරි ඒවා. කොණ්ඩ කැවුම් කියන්නෙත් තෙල් කෑම වර්ගයක්. නමුත් මේ එනසාල් දැමීම මගින් ඇඟට උරාගන්නා ප්‍රමාණය අඩු කරනවා. 

කොලොස්ටරෝල් ප්‍රමාණය අඩු කරන මුරුංගා කොකිස්

*ඒ වගේම අපි කොකිස් හදනකොට රස වගේම ගුණයටත් විශේෂ අවධානයක් යොමු කරනවා. අපි මුරුංගා කොකිස්, කරපිංචා කොකිස්, ස්පයිසි කොකිස් වගේ විවිධ රසයෙන් හා ගුණයෙන් යුත් කොකිස් පිළියෙල කරන්නේ විශේෂයෙන් අපේ පාරිභෝගිකයාගේ රුචිකත්වය මත. අපි දන්න දෙයක් තමයි බොහෝ වෙලාවට මුරුංගා වගේ දෙයකින් කොලොස්ටරෝල් වගේ දේවල් අඩු කරන එක. ඒවගේම හාල් පිටියි, පොල් කිරියි පමණක් භාවිතයෙන් පිළියෙල කරන කොකිස් අහිතකර කෑමක් නෙමෙයි. ඒ නිසා මේවා කෑමේදී අගුණ වෙන ප්‍රතිශතය ඉතා අඩුයි. අනික අපි මේ සඳහා යොදාගන්නේ ගමේ හින්දන පොල් තෙල්. ඒ නිසා ඒ ගුණයත් මෙයට එකතු වෙනවා*.

අලුත් අවුරුදු මේසයට  රුලන් අලුවා

මේ සැරේ අවුරුද්දේ තිබෙන්නේ තල මිශ්‍ර කෑම මේසයක්. ඒ නිසා අපි රුලන්වලින් සකස් කරගත් අලුවා වර්ගයක් අලුතින් හඳුන්වා දී තිබෙනවා. සාමාන්‍යයෙන් අලුවා හදන මිශ්‍රණයට රුලන් එකතුකර ගනිමින් මෙය සකස් කරගන්න පුළුවන්*. 
ආස්මි පිළියෙල කිරීමට ගන්නා දවුල් කුරුඳු ගුණදායී බවින් ඉහළයි

අපි හදන කැවිලි වර්ගවලින් ආස්මිවලටත් හොඳ ඉල්ලුමක් තිබෙනවා. ලොකු හා පොඩි වශයෙන් ආස්මි වර්ග දෙකක් අපි හදනවා. ලොකු ආස්මි එක අපි සාමාන්‍යයෙන් පළවෙනි පාර හදා සති දෙකක් විතර තියනවා. ඒ තියන්නේ පෙඟෙන්න. ආස්මි පෙඟෙන තරමට තමයි තෙලෙන් බැදගත් විට හොඳට පිපිලා එන්නේ. ආස්මි හදන්නේ දවුල් කුරුඳුවලින්. ඇත්තෙන්ම එය ඇඟට ගුණදායී දෙයක්. කුරුඳු ගස්වලම ප්‍රභේදයක් තමයි මේ නමින් අපි හඳුන්වන්නේ. ඒක ටිකක් සෙවෙල ගතියයි. ඒ සේවල ගතිය නිසා වටේ තියෙන වතුර හොඳට උරා ගන්නවා. මේ නිසා බැදගත් පසු පැණි දැමීමට පෙර අපට පපඩමක් වගේ කන්නත් පුළුවන්. සුළං නොවදින සේ ආස්මි ගබඩා කර තබා ගත්තොත් සාමාන්‍යයෙන් මාස හයක පමණ කාලයක් වුණත් තියා ගන්න පුළුවන්.  මේ නිසා අපි රට යවන ආස්මි ටිකක් කලියෙන් පිළියෙල කරලා යවනවා.  

 පිරිමැස්ම හා කල් තබාගැනීම ගැන කියාදෙන මී වද කැවුම් 

කැවුම් ජාති දෙකක් තියෙනවා. අලුත් අවුරුද්දකට සතියකට විතර කලින් කැවුම් හදලා පසුව මැටි මුට්ටියක පැණි දාලා එය ගිල්වලා තියනවා. ටික දිනක් යන විට පැණි ටික කැවුම වටේ මීවදයක් වගේ හැදෙනවා. මේ නිසා කැවුම ගල් වෙන්නෙත් නැහැ. ඒ නිසා ඇතැමුන් %මී වද කියලත් මේ කැවුම් වර්ගය හඳුන්වනවා. 
අනෙක් ක්‍රමය තමයි අපි කැවුම් හදලා මැටි මුට්ටිවල අසුරලා තියනවා. ටික දවසක් යන විට ඒ කැවුම්වල තියෙන තෙල් ටික ඔක්කොම මැටි මුට්ටියට උරා ගන්නවා. ඊට පස්සේ කැවුම ටිකෙන් ටික ගල් වෙන්න බලනවා. මේ කැවුම සමහර අයට වණ්ඩුවේ තම්බලා අනුභව කරන්න පුළුවන්. ඒතකොට අමුතුම රසයක් එනවා. වෙනත් රටවල සිටින ලාංකිකයන් මේ ලෙස කැවුම් කල් තියාගෙන අවශ්‍ය වේලාවට කන්න ගන්නවා*. 

ඉතුරුම් හාල්වලින් පිළියෙල කරගන්නා ගම්මිරිස් මුසු අග්ගලා

ඒ වගේම අග්ගලා වලත් සුවිශේෂීත්වයක් තිබෙනවා. සාමාන්‍යයෙන් අග්ගලා කියන්නේ බර ආහාරයක්. ඉස්සර කාලේ නම් ඉතිරිවන හාල් ටික අවුවට දාලා කෙටීමෙන් පසුවයි අග්ගලා හදන්නේ. දැන් අපි කරන්නේ හාල් ගෙනවිත් සෝදා වේළාගෙන අග්ගලා හදන එක. ඒ පිටි කරගත් හාල් පිටිවලට මුට්ටියේ රත්කළ පැණි මිශ්‍රණය එක් කරනවා. මේ විදිහට හැදුවම සිනි රහයි, පිටි රහයි විතරයිනේ ඇත්තෙන්ම තියෙන්නේ. ඒ නිසා තමයි අපි ගම්මිරිස් පොඩ්ඩක් එකතු කරන්නේ. පොඩි අයට කන්න අමාරු නිසා අපි බොහෝ වේලාවට ගම්මිරිස් දානවා අඩුයි. සාමාන්‍යයෙන් අපි අග්ගලා පිළියෙල කරනකොට පාරිභෝගිකයාගෙන් අසා ඔවුන්ගේ රුචිකත්වය පරිදි අවශ්‍ය පදමට සකස් කර දෙනවා. සාමාන්‍යයෙන් කෑමක් ගන්නකොට කුමක් හෝ අගුණයක් වෙන්න තිබෙනවා නම් එය වැළැක්වීමක් ගම්මිරිස්වලින් කරනවා. අපි අග්ගලා හදනකොට හාල් සෝදා වේලා ගන්න අවස්ථාවේ විෂබීජ ඇතුළු වුවහොත් එය මේ නිසා අඩු කර ගන්න පුළුවන්. 


ඔබට අයේෂා ගමගේ මහත්මිය සම්බන්ධ කරගැනීමට අවශ්‍ය නම් 0714900669 යන දුරකථන අංකය ඔස්සේ හෝ http://kavumkokis.com/ecart/ වෙබ් පිටුව ඔස්සේ සම්බන්ධ කරගත හැක.

අත්යන්ත්‍ර ෙරදි කලාවෙන් ව්‍යාපාර ලොව ජයගත් කතක්

කාලයෙන් කාලයට විලාසිතා අලුත් වේ. අත්යනුත්‍ර (handloom) ඇඳුම් විලාසිතා යැයි  පවසන්නේත් එවැනි විලාසිතාවකි. අද වන විට මේ විලාසිතාව කා අතරත් ජනප්‍රියත්වයට පත්ව තිබේ. එමෙන්ම අවුරුදු සමය කියන්නෙත් මේ විලාසිතා සඳහා හොඳම ඉල්ලුමක් තිබෙන කාලයකි.


0U6A4975

අද අප මේ පැවසීමට සූදානම් වන්නේ හෑන්ඩ්ලූම් සාරි නිර්මාණයන්ගෙන්  ජීවිතය ජයගත් කාන්තාවක් පිළිබඳවයි. ඇය %කසී සළු^ වෙළෙඳ ආයතනයේ අධිපතිනිය වන කාංචනා හේරත් මහත්මියයි. මේ ඇගේ කතාවයි. 
මම මේ ව්‍යාපාරය පටන් අරන් අවුරුදු 20ක් පමණ වෙනවා. මගේ දුවයි පුතයි පොඩිම කාලෙ තමා මම මේ ව්‍යාපාරය පටන් ගත්තෙ. මුලින්ම මගේ නැන්දම්මා තමයි මේ ව්‍යාපාරය කරගෙන ගියේ. මම ඒ කාලෙ ඉඳන් හෑන්ඩ්ලූම් අඳින්න තමයි ආස කළේ. ඉතිං මම ඒ විදියට අඳිද්දී ගොඩක් අය අහනවා කොහෙන්ද ගන්නෙ, හරි ලස්සනයි කියලා. ඉතිං ඒ අයත් ගෙනත් දෙන්න කියලා මට කියනවා. ඒ විදියට මගේ යාළුවෝ 5ක් 10ක් අතරෙ මගෙ ව්‍යාපාරය පටන් ගත්තා.

IMG_2541

මම ව්‍යාපාරය මුලින්ම ආරම්භ කළේ සාරි 5කින් 10කින් තමයි. නමුත් මට ඒ කාලේ ගොඩක් කැපවෙලා මේ ව්‍යාපාරය කරන්න පුළුවන්කමක් තිබුණෙ නැහැ. මොකද මගේ බබාලා දෙන්නා ඒ කාලේ ගොඩක් පොඩියි. ඒ වගේම මගේ සැමියා සේවය කළේ හමුදාවේ නිසා මට නිවසේ වැඩත් එක්ක කාර්යබහුල වෙන්න සිදු වුණා. නමුත් කාලය කළමනාකරණය කරගෙන පොඩියට ව්‍යාපාරය කරගෙන ගියා. 

ඉන් පස්සෙ මට පුවත්පත්වල විලාසිතා කවරවලට සාරි විලාසිතා ඉදිරිපත් කරන්න අවස්ථාව ලැබුණා. ඒ දෙයින් ගොඩක් අය මාව අඳුන ගත්තා. ඒ වගේම ගොඩක් අය මගෙන් ෙතාගයට සාරි මිලදී ගත්තා. ඊට පස්සෙ මම සාරි තොග පිටින් ගෙදර ගෙනත් බිස්නස් එක කළා. ව්‍යාපාරය ටිකක් සාර්ථක වේගෙන එනකොට මම ලොකු ලොකු සාප්පු වෙත ෙතාග වෙළඳාමක් සාරි දුන්නා.  ඊට පස්සෙ කාලයක් මට ව්‍යාපාරය නවත්තන්න වුණා. මොකද මගෙ මහත්තයා හමුදාවේ හිටපු නිසා. ඊට පස්සෙ මගේ දුව විවාහ වුණා. ඒත් එක්කම දුව රැකියාවෙන් අස් වුණා. ඒ නිසා දුවට මේ ව්‍යාපාරය නැවත ගොඩනගලා දෙන්න ඕන කියලා මට හිතුණා. ඊට පස්සෙ මමයි දුවයි එකතු වෙලා මේ ව්‍යාපාරය වෙන පැත්තකට ගෙන ගියා. 

හෑන්ඩ්ලූම් ගත්තම අතීතයෙ ඒවා ඇන්දෙ රදළ පරම්පරාවේ අය. ඊට පස්සෙ සාමාන්‍ය ජනතාවත් අඳින්න පටන් ගත්තා. ඊට පස්සෙ ඒක නැති වෙලා ගියා. ඊට පස්සෙ අද වන විට මේ තත්ත්වයට ඇවිත් තිබෙනවා. මේ නිසා මට හිතුණා මේ හෑන්ඩ්ලූම් කියන එක වෙනස් කරන්න ඕන කියලා. මොකද සමහර අය හිතනවා මේවා විවාහ උත්සවවලට අඳින්න බැහැනෙ. පෙනුමක් නෑනෙ කියලා. එහෙම කියනවා මටම ඇහිලා තිබෙනවා. ඒ නිසා හෑන්ඩ්ලූම්වලට වෙනසක් අවශ්‍යයි කියලා හිතුණ නිසා මම පැච්වර්ක්, කට්වර්ක්වලට ගියා. 
මුල් කාලයේ මමයි මගේ දුවයි මේ සියලු නිර්මාණ කළේ. නමුත් මම ළඟ මේ වන විට සේවය කරන්න දුවලා 20ක් විතර ඉන්නවා. මගෙයි දුවගෙයි ඔළුවෙ මැවෙන ඩිසයින් මේ දරුවන්ට කිව්වම ඒ විදියට නිර්මාණය කරනවා.
ඇත්තටම මේ දේවල්වලට ලොකු ඉල්ලුමක් තිබෙනවා. ලංකාවේ ගොඩක් අය කැමතියි වෙනස් දේකට. ඒ වගේම දේශීය දේවලට කැමතියි කියලා මට හිතුණා. ඒ වගේම මේ රෙදි ඕනම කෙනෙක්ට ඕනම අවස්ථාවකට අඳින්න පුළුවන්. ඒ වගේම විවාහ උත්සවයකට ගියත් කැපිලා පෙනෙනවා. මොකද ගොඩක් අය ඉන්දියන් සාරි අඳින නිසා. මේ සාරිවල ඇත්තටම වෙනසක් තිබෙනවා. මේ වන විට මම මේ දෙයින් එහා ගිහින් බතික් සාරි නිර්මාණය කරන්නත් යොමු වුණා. ඒ හෑන්ඩ්ලූම් බතික්. ඒක ටිකක් කාලය යන වගේම ගොඩක් අමාරු කටයුත්තක්. ඒ නිසා බතික් හෑන්ඩ්ලූම් මිල අධික වෙනවා. 

ඇත්තටම මම ළඟ සේවය කරන දරුවො මට ලොකු සහයෝගයක් ලබාදෙනවා. ටොප් එකක් මැහුවත්, ලුන්ගියක් මැහුවත්, සාරි ජැකට් එකක් මැහුවත් හැම එක්කෙනාම හරිම උනන්දුවෙන් මාත් එක්ක ඒ දේ කරනවා. ඒ වගේම මගේ සැමියා, මගේ දරුවෝ උදව් කරනවා. ඇත්තටම අද මේ විදියට සාර්ථකත්වයක් ලබන්න ඒ සියලු දෙනාගේ කැපවීම සහ සහයෝගය හේතු වෙනවා.  ඇත්තටම මෙය ලොකු තෘප්තියක් ලබන්න පුළුවන් ව්‍යාපාරයක් කියන්න පුළුවන්. 

අපි මුල් කාලයේ නම් කළේ අවශ්‍ය නූල් ඉන්දියාවෙන් ගෙනත් රෙදි වියන අයට දී සාරි නිර්මාණය කර ගත්තු එක. නමුත් මේ වෙද්දී හෑන්ඩ්ලූම් සඳහා ඉල්ලුම ගොඩක් වැඩියි. ඒ නිසා කුරුණෑගල, දිවුලපිටිය, මඩකලපුව, අම්පාර, අනුරාධපුරය වැනි පළාත්වල මේ රෙදි වියන ගම්මාන බිහි වෙලා තිබෙනවා. ඒ ගම්මානවලින් අපි අවශ්‍ය රෙදි මිලදී ගන්නවා. මේ ව්‍යාපාරය ගොඩක් හොඳ ව්‍යාපාරයක්. ඇත්තටම කොළඹ වුණත් මේ රෙදි වියන්න පුළුවන්. ඇත්තටම වෙලා තියෙන්නෙ ගොඩක් අය මේ වගේ දේවල් කරන්න කම්මැලි වීමයි. ඇත්තටම ස්වයං රැකියාවක් විදියට රෙදි විවීම පටන් ගත්තොත් ඒක හොඳ ව්‍යාපාරයක්. මොකද අද වෙද්දී දේශීය මෙන්ම විදේශීය වශයෙන් එයට ලොකු ඉල්ලුමක් තිබෙන නිසා. 

ඇත්තෙන්ම මේ වගේ ව්‍යාපාරයක් ආරම්භ කරනවා නම් පළමුවෙන්ම ඒ සඳහා ආශාවක් තියෙන්න ඕන. දෙවනුව ඊට අවශ්‍ය දැනුම ලබාගන්න ඕන. තුන්ෙවනුව හරියට ඒ කරන දේ කරන්න ඕන. මොකද හෑන්ඩ්ලූම් එකකට එකක් වෙනස් වෙන්න ඕන. එතකොට පාරිභෝගිකයන්ගේ තිබෙන ඉල්ලුම වැඩියි. ඒ නිසා ඒ පාරිභෝගිකයාව රැකගන්න අපි ඔවුන්ට හොඳ සේවයක් ලබාදෙන්න ඕන. එයාලට ඕන දේ අපි දෙන්න ඕන. අපිට ඕන දේ නෙමේ දෙන්න ඕන. ඒ වගේම හැමෝම කරන නිසා පටන් ගන්නෙ නැතිව කැපවීමෙන් කළොත් ගොඩක් දියුණු වෙන්න පුළුවන් ව්‍යාපාරයක් තමයි මේක. 

IMG_2520

ඇත්තෙන්ම මේ වගේ ව්‍යාපාරයක් කරන්න කැමැත්තෙන් ඉන්න කාන්තාවන්ට මට කියන්න තිබෙන්නේ මහන්න අතේ හුරුවක් තියෙනවා නම් අතේ තිෙයන මුදලට රෙදි ටිකක් අරන් ගිහින් ඇඳුම් මහන්න ගන්න කියලයි. මම උදව් කරපු පිට පළාත් වල කාන්තාවෝ ඉන්නවා ඒ වගේ පොඩියට රෙදි අරන් ගිහින් අද වෙද්දි ගොඩක් දියුණු වුණ. මම ඒ වගේ අයට මට පුළුවන් උපරිමයෙන් උදව් කරනවා. මේ රස්සාව කාටවත් අතනොපා ආසාවෙන් කරන්න පුළුවන් රස්සාවක්. 

මේ වෙද්දී ගොඩක් විදේශිකයො මගෙන් සාරි, ඇඳුම් මිලදී ගන්නවා. ඒ වගේම ලංකාවෙන් පිටරට ගිය අය මගෙන් අැඳුම් මිලදී ගන්නවා. ඔවුන්ට අවශ්‍ය අාකාරයට සාරි ජැකට් පවා නිර්මාණය කරදී අපි ඒවා විදෙස් රටවලට යවනවා. ඒ වගේ මිලදී ගන්න ගොඩ දෙනෙක් විදේශ රටවල ඉන්නවා. 

ඒ වගේම මම මේ වන විට අත්යන්ත්‍ර රෙදි කලාව තව ඉදිරියට ගෙනෙන්න එක පියවරක් විදියට මානාලියන් සඳහා හෑන්ඩ්ලූම් සාරි නිර්මාණයටත් යොමු වුණා. අපේ හෑන්ඩ්ලූම්වලින් මනමාලියක් ලස්සනට සරසන්න පුළුවන්. මොකද ඒ මගින් ලොකු ගාණක් වියදම් කරන්නෙ නැතිව සරලව චාම්ව සැරසෙන්න පුළුවන්. 
ඇත්තෙන්ම උත්සාහය තිබෙනවා නම් කළ නොහැකි යමක් නැති බව ඔබට ඔප්පු කළ දිරිය කතකගේ කතාවයි මේ. මෙහි හෙට දින ලියැවෙන්නේ ඔබේ කතාව විය හැකිය. එනිසා තැබූ පියවර ඉදිරියටම තබන්න යැයි අද අපි ඔබට ඇරයුම් කරන්නෙමු.

IMG_2581 IMG_2601

අවුරුදු කාලේ කැවිලි කලාව

කැවුම් වූ කලී අවුරුදු කෑම මේසයට නැතිවම බැරි කැවිලි විශේෂයකි. කැවුම් ඉවීම ගජරාමෙට කෙරෙන්නේද සිංහල අවුරුදු කාලයටය. එකල සෑම සිංහල ගෙදරකින්ම පාහේ කිසියම් රස කැවිල්ලක සුවඳ විහිදී ආවේය. කොටින්ම කිවහොත් කැවුම්, කිරිබත් නොමැති උත්සවයක්‌ සිංහලයාට නොමැති තරම්ය. සැබවින්ම සිංහල කැවිලි වර්ගවලට ඇත්තේ ඉතා දිගු ඉතිහාසයකි. කැවිලි වර්ග වැඩි වශයෙන්ම දක්‌නට ලැබී ඇත්තේ නුවර යුගයේදීය. විවිධ මාදිලියේ කැවිලි වර්ග ඉවීමට අපේ ගැමි කාන්තාවට ඇත්තේ සුවිශේෂී වූ හැකියාවකි. 


5

කැවුම් වර්ගවලට නම් පටබැඳී ඇත්තේ කැවුම් ඉවීම සඳහා යොදාගන්නා ද්‍රව්‍ය අනුවය. ඒ අනුව නාරං කැවුම්, පැණි කැවුම්, සීනි කැවුම්, හැඳි කැවුම්, කොණ්‌ඩ කැවුම්, මුං කැවුම් ආදී කැවුම් වර්ග රාශියකි. කොණ්‌ඩයක්‌ නොමැති කැවුම් හැඳින්වෙන්නේ අතිරස වශයෙනි. එමෙන්ම වලස්‌මුල්ල ප්‍රදේශටම ආවේණික වූ කැවුම් වර්ගයක්‌ද ඇත්තේය. එම කැවිලි වර්ගය හැඳින්වෙන්නේ මුකුදු යනුවෙනි. අපේ ගැමි කාන්තාවන් විසින් සාදන කැවිලි වර්ග ඉතා රසවත්ය. එදා රොබට්‌ නොක්‌ස්‌ පවා අපේ රටේ ළඳුන් විසින් සාදනු ලැබූ රසකැවිලි අනුභව කොට එම රස කැවිලිවලට වශී වී තිබේ. එමෙන්ම ඕලන්දකාරයන් මෙරටට පැමිණි අවධියේ ඔවුන් හට රාජකීය සංග්‍රහයක්‌ කිරීමට කැමති වූ උඩරට රජු මොවුන්ට කැවුම් පිස යවන ලෙස රාජපුරුෂයන් හට නියම කොට තිබේ. 

එම කැවුම් කා පුදුමයට පත්වී ඇති ඕලන්දකාරයන් එපමණ ප්‍රණීත ආහාරයක්‌ මිනිස්‌ අතකින් නම් සෑදිය නොහැකි යැයි සිතා මේවා ගස්‌වලින් කඩා ගන්නා දෙයක්‌ දැයි අසා ඇති බව රොබට්‌ නොක්‌ස්‌ගේ %එදා හෙළදිව^ නමැති ග්‍රන්ථයේ සඳහන් වී ඇත්තේය. &මේ රටේ කාන්තාවන් විසින් සාදනු ලබන රසකැවිලි විවිධය. ඒ රසකැවිලි අතර ප්‍රධානත්වයක්‌ ගන්නා කැවුම් සහල් පිටියෙන් හා පැණියෙන් සාදාගනු ලැබේ. සහල් පිටි අනා ගුලි ගසා කොළපතක තබා ඇඟිල්ලෙන් පැතලිකොට පෑහෙන තෙල් ඇතිලියේ බහා පදමට කරවූ පසු තෙලෙන් එළියට ගනියි යනුවෙන් එදා ගැමි කාන්තාව කැවුම් ඉවීම කළ අයුරු රොබට්‌ නොක්‌ස්‌ හරි අපූරුවට එහි විස්‌තර කොට තිබේ.

එමෙන්ම රසකැවිලි අතර ප්‍රමුඛයා වන කැවුම් මිනිසාගේ පමණක්‌ නොව දෙවි බඹුන්ගේද රස නහර පිනවීමට සමත් කෑම විශේෂයකි. නොයෙකුත් දේවපූජා, ශාන්තිකර්ම සඳහාද කැවුම් ගෙඩිය අවශ්‍යම දෙයකි. කුඩා දරුවන් ගණ දෙවියන්ගෙන් නුවණ ඉල්ලා යදින්නේද අතිරස අග්ගලා පුදමි යනුවෙන් පොරොන්දු වීමෙනි. සැබවින්ම රසකැවිලිවලින් මිනිසාගේ රස නහර පමණක්‌ නොව අපේ සිංහල බස්‌වහරද පෝෂණය වී තිබේ.

සිංහලයා මෝඩයා, කැවුම් කන්න යෝධයා* මේ එවැනි ජනවහරකි. සිංහලයා කොයි දේට අදක්‌ෂ වුවත් කැවුම් කෑමට ශූරයෙකු බව මේ ජනවහරින්ද පැහැදිලි වන්නේය. එමෙන්ම සිංහලයා කොතනද කැවුම්ද එතැනය. අදටත් අපේ පැරැන්නෝ මේ වැකිය කියමින් තමාටම සරදම් කර ගනිති. එකල අපේ කොල්ලෝ, කුරුට්‌ටෝ පවා අප්පුඩි ගසමින් &අප්පුඩි පුඩි පුවත්තා කැවුම් දෙකක්‌ දියත්තා යනුවෙන් කැවුම් ඉල්ලූහ.
සැබවින්ම කෙතරම් අගහිඟකම් ඇති ගැමි නිවසක වුවද ගැමිලිය අලුත් අවුරුද්දට කැවුම් ඉවීමට අමතක නොකරයි. කැවුම් ඉවීම සෑම කාන්තාවකටම කළ හැකි දෙයක්‌ නොවේ. එදා කැවිලි පෙවිලි ඉවීමට දක්‍ෂ කාන්තාවන් සෑම ගමකම පාහේ සිටියේය. එවැනි ගැමි කාන්තාවන් අදත් ගම්බද ප්‍රදේශවල සිටිති. මෙම කතුන් හඳුන්වන්නේ කැවුම් අම්මලා යනුවෙනි. 

2

එවැනි කැවුම් ඉවීමට දක්ෂ තැනැත්තියක් අපට පසුගියදා හමුවිය. ඇය ගාල්ලේ උළුවිටිකේ ඕපාත පදිංචි එස්‌. ඒ. උදුලාවතී මහත්මියයි.
මේ ඇය අප හා දැක් වූ අදහස්ය. 

කැවුම් ඉවීම ලේසි වැඩක්‌ නොවෙයි. නියම විදියට පදම ගන්න ඕන. පදම වැරදුනොත් ඔක්‌කොම ඉවරයි. හාල් දියේ දාලා පිටි කොටා ගන්නෙත් අපිමයි. අසල්වැසි කාන්තාවන් එක්‌වෙලා තමයි පිටි කොටන්නේ. එකිනෙකාට උදව් කර ගනිමින් තමයි වැඩ කළේ. ඒ කාලයේ හාල් සේරු දෙකක තුනේ කැවුම් උයලා තියෙනවා. දැනුත් මඟුල් ගෙවල්වල කැවුම් උයන්න යනවා. ඇත්තටම ඒ කාලයේ කැවුම් ඉවීමට දක්‍ෂ ගැහැනු ළමයි දෙතුන් දෙනෙක්‌ හැම ගෙදරකම හිටියා. දැන් ඉන්න ගැහැනු ළමයින්ට කැවුම් ගෙඩියක්‌ උයන්න තියා තෙල් වළඳක්‌වත් ළිපේ තියාගන්න බැහැ. මේ කාලයේ හැම දෙයක්‌ම වෙනස්‌ වෙලා

ගාල්ලේ, උණවටුනේ, මැටරඹ පදිංචි කේ.එම්.කුසුමා ප්‍රියංගනී(54) මහත්මියද කැවුම් ඉවීමට දක්ෂ කාන්තාවකි. ඇය තම දියණිය සමග එක්වී ස්වයං රැකියාවක් වශයෙන් කැවිලි පෙවිලි සෑදීමේ ව්‍යාපාරයක්ද පවත්වාගෙන යන්නීය.  ඇය කැවිලි පෙවිලි සාදන්නේ සිංහල අලුත් අවුරුදු කාලයට පමණක් නොවේ. ඇය සතියකට දින තුන හතරක්වත් කැවිලි පෙවිලි  සාදයි. ඈ සාදන කැවුම්වලට ඇත්තේ හොඳ ඉල්ලුමකි.
ඇය අප හා මෙසේ අදහස් දැක්වූවාය. 

6

මද්දු ආච්චිගෙන් තමයි මට කැවිලි පෙවිලි හදන්න පුළුවන් වුෙණ්. ඇය කැවිලි හදනවා බලන් ඉඳලා තමයි කැවිලි හදන්න පුරුදු වුණේ. සීනි උණුකරලා තමයි කැවුම් හදන්න ගන්න ඕන. සමහරක් අය සීනි උණු කරන්නේ නැතිව කැවිලි හදනවා. එහෙම හැදූවිට කැවිලි වැඩි දවසක් තියාගන්න බැහැ හයි වෙනවා. හාල් සේරුවකින් කැවුම් ගෙඩි 55ක් විතර හදන්න පුළුවන්. අතිරස, කොකිස්, මුං කැරලි, කොණ්ඩ කැවුම්, නාරං කැවුම් දොදොල් වගේ රසකැවිලි වර්ග හදනවා.

ඉස්සර ගල් වංගෙඩියෙන් කෙටූ පිටි තමයි කැවුම් උයන්න ගත්තේ. දැන් නම් ගල් වංගෙඩිවල පිටි කොටන්න යන්නේ නැහැ. මෝලට ගිහින් පිටි කොටාගෙන එනවා. අලුත් සහල්වලින් පිටි කොටන්නේ නැහැ. පරණ සහල් තමයි පිටි කොටන්න ගන්නේ. දර ලිපේ නම් දැන් කැවුම් උයනවා අඩුයි. ගෑස් ලිපේ තමයි කැවුම් ඉවීම කරන්නේ. දැන් ඉතින් හැමදෙයක්ම දියුණුවෙලානේ. ඒ වුණත් කැවුම් හදන්න අතේ හුරුව  තියෙන්න ඕන. අලුත් අවුරුදු කාලයට කැවිලි පෙවිලි හදන්න ගොඩක් ඇණවුම් එනවා. ඒ කාලයට පමණක් නෙවෙයි කොහොමත් දින දෙකකට සැරයක් කැවුම් හදන්න  ඇණවුමක් මට එනවා.  පොල්තෙල්, සීනි, පිටි වගේ දේවල්වල මිල වැඩිවෙලා තියෙනවා. ඒ නිසා මේ ජනවාරි මාසයේ සිට කැවුම් ගෙඩියක මිල රුපියල් 20කින් වැඩි කළා

කැවිලි ඉවීමද එතරම් පහසු කාරියක් නොවේ. ගින්දර රස්නේ කාගෙන කැවුම් ඉවිය යුතුය. ඒ විතරක් නොව කැවුම් ඉවීමට ගන්නා පිටි සීනි අඩංගු මිශ්‍රණය නියම පදමට තිබිය යුතුය. එසේ නොවුණහොත් නියම ප්‍රමිතියට කැවුම් ඉවීම කළ නොහැකිය. දැනට වසර පහළොවක විස්සක පමණ සිට කැවුම් උයන කුසුමා අම්මාට නම් කැවුම් ඉවීමට පදම සකස් කරගැනීම එතරම් අපහසු කාරියක් නොවේ. ඇය දර කොලපු කිහිපයක් ගිනි දල්වා දර ලිපේ කැවුම් ඉවීම කළාය. ඇය සාදනු ලබන කැවුම් ගෙඩිවලින් අමුතු සුවඳක් විහිදී අවේය.
කුසුමාගේ  වැඩිමහල් දියණිය ඩිනිෂා හේමාලි විසිපස් හැවිරිදි වියේ පසුවන්නීය. ඇයද කැවිලි පෙවිලි  ඉවීමට හොඳ පළපුරුදුකාරියකි. ඇයද දැනට වසර පහ හයක පමණ සිට කැවිලි පෙවිලි සැදීම සිදුකරගෙන යන්නීය.
ඇය අප සමග මෙසේ අදහස් දැක්වූවාය.
කැවුම් ගෙඩියේ රසය මෙන්ම හැඩයද ඉතා වැදගත්. කැවුම්වල හැඩය නැති වුණොත් විකුණන්න බැහැ. අලුත් අවුරුදු කාලයට නම් 13 වැනිදාත් කැවුම් උයනවා.

12 13 14 15

 

 

 

තල් කොළයෙන් රටා මවා දිවිය සරිකරගත් ඇය

තල් කොළ තම්බා, සියුම් ලෙස සකසා, එමගින් කලාත්මක නිර්මාණ සිදුකර, ඒවා දෙස් විදෙස් ගැනුම්කරුවන්ට අලෙවි කර ආර්ථිකය සරු කරගන්නා දිරිය කාන්තාවක් අපට පසුගියදා හමුවිය. 
ඇය වීරවිල දිස්නා කොඩිතුවක්කු මහත්මියයි. 1998දී වීරවිල තල් නිපැයුම් මධ්‍යස්ථානය මගින් ලබාදුන් පුහුණුකිරීමේ වැඩසටහනකට සහභාගි වෙමින් ඇය මෙම තල් නිපැයුම් කර්මාන්තයට අත්පොත් තබා තිබේ. එහිදී ලැබූ මාස හයක පුහුණුවට පසු මෙම නිර්මාණ නිෂ්පාදනය කිරීමෙන්, ඇය මෙම කර්මාන්තය ආරම්භ කර ඇත.

තල් කොළ ආශ්‍රිත නිර්මාණයන් වන කාන්තා අත්බෑග්, ගමන්මලු, කාන්තා පසුම්බි, බිත්ති සැරසිලි, වට්ටි පෙට්ටි, පැදුරු මෙකී නොකී භාණ්ඩයන් දිස්නා තල් කොළයෙන් නිෂ්පාදනය කරන්නීය. අම්පාර ප්‍ර‘දේශයෙන් වීරවිලට රැගෙන එන තල් කොළ අතු මිලදී ගෙන, ඒවායින් නිර්මාණ සකස් කිරීමෙන් මේ කර්මාන්තය වසර 20ක් පුරාවට දිස්නා සිදුකරනුයේ මහත් සතුටිනි.

හදිසි අනතුරකින් මියගිය තම ස්වාමිපුරුෂයාගේ වියෝවෙන් පසු සිය එකම දියණියගේ රැකවරණය, අනාගතය වෙනුවෙන් දිස්නා මෙම කර්මාන්තය ආරම්භ කර තිබේ. තමා තල් කොළයෙන් රටා ගෙත්තම් කරමින්, භාණ්ඩ නිෂ්පාදනය කරන අයුරු දැක බලා ගැනීමටත්, එය ප්‍රගුණ කර ඉගෙන ගැනීමටත්, වීරවිල තිස්සමහාරාම, සංචාරක හෝටල්වලට පැමිණෙන විදේශිකයන් පවා ඒමට පටන්ගෙන ඇති බව ඇය පැවසුවාය.

Untitled-2 copy

ජාතික ශිල්ප සභාවේද සාමාජිකත්වය ලබා ඇති, තමා පිළිබඳව කිසිදු රාජ්‍ය ආයතනයකින් දිරිගැන්වීමක්, මෙම වකවානුව තුළ සිදු නොවීම පිළිබඳ ඈ අප හා පැවසුවේ,දැඩි කනගාටුවෙනි.තමාගේ මෙම කටයුතු සඳහා මොස්තර නිර්මාණ මධ්‍යස්ථානයේද උනන්දුව, සහයෝගය ලබාදෙන බවට ඇය අප හා ප්‍රකාශ කර සිටියාය. සාමාන්‍ය ප්‍රමාණයේ, තල් කොළ අත්බෑග් දෙකක් දිනකට නිෂ්පාදනය කිරීමට තමාට හැකියාව ඇති බවත්, ප්‍ර‘දේශයේ අනිකුත් ළඳුන්ද, නිපදවන තල් ආශ්‍රිත නිර්මාණ මුදල් දී ලබාගෙන තම වෙළෙඳ කුටියේ අලෙවි කිරීමටද කටයුතු කරන බවත් ඇය පැවසූවාය.

වීරවිල ප්‍ර‘දේශයේ පවුල් 300ක් පමණ මෙම තල්කොළ කර්මාන්තයෙන් සිය ආර්ථිකය සවිමත් කර ගන්නා අතර, රටට බරක් නොවන ලෙසට මෙම කාන්තාවන් කටයුතු කිරීම රටට මහත් ආදර්ශයක් සහ අභිමානයක් ගෙන එයි.කිසිවෙකුගේ උදව් උපකාරයක් නොමැතිව, සිය දරුවාගේ අධ්‍යාපන කටයුතුවලටද සවියක් වෙමින්, තල්කොළ නිර්මාණ කර්මාන්තය තමා දිගටම සිදුකරනා බවත්, මේ සම්බන්ධව රජයේ අවධානය යොමුකර තල් කොළ නිර්මාණ ශිල්පිනියන්ගේ හෙට දිනය ආලෝකමත් කර දීමට බලධාරීන් කටයුතු කළ යුතු බවත් දිස්නා අවසන් වශයෙන් අප හා කියා සිටියාය. 

රුක්මන් රත්නායක

 Untitled-1 copy

සිය රටේ තරුණ ජවයෙන් විදේශ මූල්‍ය මෙරටට ගෙනෙන උගත් ව්‍යාපාරික කත

ලාංකේය සමාජයේ රැකියා අපේක්ෂකයන් තමන් කැමති රැකියාවක් විදෙස් රටවලට ගොසින් සිදුකිරීමට බොහෝ විට ඇල්මක් දක්වයි. ඔවුන් ඒ වැය කරන ශ්‍රමයෙන් අපේ රටට ගලාගෙන එන විදේශ මූල්‍ය ශක්තිය රටේ ආර්ථිකයට මනා පිටිවහලකි.  එමෙන්ම වර්තමානය වන විට උසස් අධ්‍යාපනය සඳහා විදේශ ගතවන ළමයින් ප්‍රමාණයේද ඉහළ අගයක් ගනියි. මෙවැනි අවශ්‍යතා සහිත ළමයින්ට හා රැකියා අපේක්ෂකයන්ට අවශ්‍ය මාර්ගෝපදේශකත්වය ලබාදෙමින් ඒ සඳහා ඔවුන් යොමු කරන ආයතන දෙකක හිමිකාරියක වශයෙන් ශෂිකා බුද්ධිනී අපට හඳුනාගත හැකිය. වයස 23ක් වැනි තරුණ කාලයක තමන්ගේම ව්‍යාපාරයක් ඇරඹූ ඇය මේ දක්වා පැමිණි ගමන පිළිබඳ අද හමුවේ දැක්වූවේ මෙවන් අදහසකි. 


19030501_1764446813846751_2286131130702702565_n

ඔබ කරන ව්‍යාපාරය ගැන කෙටි හැඳින්වීමක් කළොත්?

විධිමත් රැකියා සඳහා රැකියා අයදුම්කරුවන් විදේශගත කරවීම තමයි මම මූලික ලෙස සිදුකරන්නේ. %ඔරියන්ට් ලංකා එම්ප්ලෝයිමන්ට්^ කියන මගේ ආයතනය හරහා ගණකාධිකාරිවරුන්, අලෙවි ප්‍රවර්ධන නිලධාරීන් ලෙස සේවය කිරීමට ලංකාවෙන් රැකියා අපේක්ෂකයන් විදේශගත කිරීම සිදු කරනවා. නමුත් මගේ අනෙක් ආයතනය වන ඕවසීස් ඇකඩමිය තුළින් සිදුකරන්නේ විදේශීය අධ්‍යාපනය ලබාගැනීම සඳහා වීසා ලබාදීම හා ඒ සඳහා අවශ්‍ය මාර්ගෝපදේශකත්වය සැපයීමයි. 

වෘත්තීය හෝ උසස් අධ්‍යාපනය සඳහා විදේශගත කිරීම සිදු කරන්නේ කුමන රටවලටද?

ප්‍රධාන වශයෙන් ජපානය, සිංගප්පූරුව, මැලේසියාව වගේම කැනඩා, සයිප්‍රස් හා ලැට්වියා යන රටවල් සඳහා රැකියා අපේක්ෂිත පුද්ගලයන් හා අධ්‍යාපනය සඳහා සිසුන් යැවීම මම දැනට සිදුකරනවා.

 ව්‍යාපාරිකාවක් වශයෙන් ඔබ පැමිණි ගමන් මාර්ගය ගැන කතා කළොත්?

අධ්‍යාපනය අවසන් කර රැකියා සඳහා ඉල්ලුම් කරන කාලයේදී මගේ අම්මා තමයි මේ ව්‍යාපාරය ආරම්භ කරන්න මට උපදෙස් දුන්නේ. වෙනම තැනක රැකියාවක් කරනවාට වඩා තමන්ගේම කියලා රැකියාවක් කරනවට අම්මා කැමති වුණා. මොකද අම්මත් එවැනිම ව්‍යාපාර පසුබිමක සිටින කාන්තාවක් නිසා. ඒ නිසා අම්මා තමයි මුලින්ම එක ආයතනයක් 2012 වර්ෂයේ %ඔරියන්ට් ලංකා එම්ප්ලොයිමන්ට්^ නමින් ආරම්භ කර දුන්නේ. ඉන්පසුව මගේ දෙවැනි ආයතනය %ඔරියන්ට් ලංකා ඕවසීස් ඇකඩමිය^ 2016 වර්ෂය වන විට ආරම්භ කිරීමට හැකි වුණා.  

අඩු වයසකින් යුත් තරුණියක් වශයෙන් මෙවැනි ව්‍යාපාරයක් ආරම්භ කරනවිට ඔබට මොකද හිතුණේ?FB_IMG_1522123113409

2012 වර්ෂයේ තමයි මම මගේ ව්‍යාපාරය සඳහා අනුමැතියලත් බලපත්‍රයක් ලබාගත්තේ. ඒ වෙනකොට මම තමයි ලංකාවේ මේ සඳහා බලපත්‍රයක් ලබාගත්ත එකම තරුණිය. ඒ වෙනකොට මගේ වයස අවුරුදු 23ක් වෙනවා. 
අපි වෘත්තීය පුහුණු නිලධාරීන් හෝ සිසුන් විදේශගත කිරීමේදී ඒ සඳහා ශ්‍රී ලංකා වෘත්තීය සම්මේලනයේ ලියාපදිංචි වී බලපත්‍රයක් ලබාගත යුතුයි. එසේ නොමැතිව මෙවැනි ව්‍යාපාර සිදු කරන්න බැහැ. දැනට ලංකාවේ මේ සම්බන්ධ බලපත්‍ර 3000ක් නිකුත් කර තිබෙනවා. නමුත් මේ වන විට එම බලපත්‍ර ලබාදීම නතර කර දමා තිබෙන බව දැනගන්නට ලැබුණා.  

මේ වන විට ඔබ ආරම්භ කළ ව්‍යාපාරයේ ප්‍රගතිය ගැන කතා කළොත්?

මම මුලින්ම ව්‍යාපාරයට ප්‍රවේශ වන විට මගේ යටතේ එක් සේවකයෙක් පමණයි සේවය කළේ. ඒ පන්නිපිටියේ ඔරියන්ට් ලංකා එම්ප්ලෝයිමන්ට් ආයතනය තුළ. 2012 සිට 2014 වෙනකම් පන්නිපිටියේ එලෙසම ඒ ආයතනය පවත්වාගෙන ගියා. පසුව 2014 වර්ෂයේ කිරුළපන නව ස්ථානයට රැගෙන ආවා.  
මගේ විවාහයත් සිදු වුණේ එය වසර එකහමාරක් පමණ කරගෙන යන විට. ඉන් පසුව 2016 වර්ෂයේ මගේ මහත්තයා හා එකතු වෙලයි ඕව සීස් ඇකඩමියේ කටයුතු සිදුකරගෙන ගියේ. ආයතන දෙකක් තිබෙන නිසා මගේ මහත්තයත් ඒ සඳහා විශාල සහයෝගයක් ලබාදුන්නා. නමුත් දැන් මට පලපුරුද්ද හා අත්දැකීම් ඔස්සේ ආයතන දෙක තුළම කටයුතු කළමනාකරණය කරමින් වැඩකටයුතු කිරීමේ හැකියාව තිබෙනවා. දැන් ඒ ආයතන දෙකම තිබෙන්නේ නුගේගොඩ. වර්තමානයේ මගේ යටතේ නිත්‍ය සේවයකයන් දහයක් හා තාවකාලික සේවකයන් හය දෙනෙක් පමණ සේවය කරනවා. 

ව්‍යාපාරයක් හෝ වේවා ඕනෑම කටයුත්තකදී අභියෝග හා බලපෑම් අනිවාර්යයෙන් පැමිණෙනවා. ඔබේ ව්‍යාපාරය තුළින් ඔබට මුහුණපෑමට සිදු වූ බාධක හා අභියෝග ගැන කතා කළොත්?

මගේ දෙමවුපියන් ලංකාවේ නෙමෙයි ඉන්නේ. මගේ මුළු පවුලම සිටින්නෙ සිංගප්පූරුවල. මම ඒ වන විට විවාහවෙලා ඉඳලා නැති නිසා මූල්‍යමය අංශයෙන් මට අවශ්‍ය හැම උදව්වක්ම කළේ මගේ අම්මා. මම උසස් පෙළ කටයුතු අවසන් කර ගණකාධිකරණ පාඨමාලාව හදාරමින් සිටින කාලයේ තමයි මේ ව්‍යාපාරය ආරම්භ කළේ. 
මගේ ව්‍යාපාර වැඩක් සඳහා රජයේ ආයතනයකට ගියත් මම පොඩි නිසා කවුරුත් වැඩි සැලකිල්ලක් දැක්වූයේ නැහැ. රජයේ ආයතනයකින් වැඩක් කරගන්න එක මට හරි අමාරු දෙයක් වුණා.  මගේ වයසත් එක්ක ගොඩක් ප්‍රශ්නවලට මේ ව්‍යාපාර ක්ෂේත්‍රය තුළ මම මුහුණදීලා තිබෙනවා. 
ඒ වගේම ව්‍යාපාරය ආරම්භ කරන්නට පෙර සේම ආරම්භ කළ පසුත් බොහෝ ප්‍රශ්නවලට මට මුහුණදෙන්න සිදු වුණා. මගේ ආයතනයට විදේශ රටකින් රැකියා විශාල ප්‍රමාණයක ඉල්ලීමක් පැමිණි විට තව කෙනෙක් මැදිහත් වෙලා එය නතර කර දමන අවස්ථාද ඕනෑ තරම් තිබුණා. අපේ ආයතනය ආරම්භ කළ මුල් වකවානුව නිසා විශාල බලපෑමක් හෝ සටනක් අනෙක් ආයතනයන් සමග සිදුකරන්න හැකියාවක් තිබුණේ නැහැ. ඒවගේ ගැටලුකාරී තත්ත්වයන් තුළ මට ආයතනය වසා දමන්න සිතුණු වාර අනන්තයි.  
අධ්‍යාපන සුදුසුකම් අනුව සම්පත් හා ඩී. එෆ්.සී. සී බැංකු දෙක සඳහාම මම තෙරී පත් වුණා. නමුත් මේ කිසිම දේකට යන්න මගේ අම්මා මට ඉඩ දුන්නේ නැහැ. මම ව්‍යාපාර ක්ෂේත්‍රයේ මනසින් බිඳ වැටුණු සෑම අවස්ථාවකම වගේ මගේ අම්මා මගේ පිහිටට හිටියා. 

FB_IMG_1522123401338

මේ දිනවල ව්‍යාපාර කටයුතුවල තත්ත්වය කොහොමද? ප්‍රවර්ධන කටයුතු සිදුකරන්න ඔබ විශේෂ ක්‍රමවේදයන් අනුගමනය කරනවාද?

දැන් නම් ඉතින් මම හැමදෙයක්ම සමබරව කරගෙන යනවා. ලංකාවේ දැන් තිබෙන තත්ත්වයත් එක්ක මිනිස්සුන්ට විදේශගත වීමේ අවශ්‍යතාව ප්‍රබලව තිබෙනවා. නමුත් ඔවුන්ට එතරම් ආර්ථික ශක්තියක් නොමැති වීම එයට ප්‍රධාන ගැටලුවක්. එය තමයි දැනට තිබෙන ප්‍රධාන ගැටලුවක් වෙලා තිබෙන්නේ. 
මම මගේ ආයතනයේ ප්‍රවර්ධන කටයුතු කරන්න වෙළෙඳ දැන්වීම් කිසිම අවස්ථාවක භාවිත කර නැහැ. හොඳ සේවාවක් ලබාදෙන විට අපි ළඟට එන සේවාදායකයන් ප්‍රමාණය වැඩියි. මම මගේ ව්‍යාපාරය ප්‍රවර්ධනය කරන්නේ විශ්වාසය හා ප්‍රමිතිය තුළින්. අපි විදේශ රටකට යවන ළමයෙක්, අඩුම වශයෙන් එක් ළමයෙක් හෝ එම සේවාව ලබාගැනීම සඳහා අපේ ආයතනයට සහතික කර එවනවා. වෘත්තීයමය වශයෙන් විදෙස්ගත වූවත් ඊළඟට පැවැත්වෙන සම්මුඛ පරීක්ෂණ සඳහා ඔහුගේ හෝ ඇයගේ යහළුවෙකු අපේ සේවාව ලබාගැනීම සඳහා පැමිණෙන සාම්භාවිතාව ඉතාම ඉහළයි. ඔවුන් තබන විශ්වාසය හා ප්‍රමිතිය මතයි මගේ ව්‍යාපාරයේ දියුණුව රැඳී තිබෙන්නේ. 

ඔබ කාන්තාවක් වශයෙන් සමාජයේ වගකීම් බහුල කෙනෙක්. කොහොමද නිවසේ කටයුතු මෙන්ම ව්‍යාපාර කටයුතු සමබරව සිදුකරන්නේ?

ඇත්තෙන්ම නිවසේ වැඩකටයුතු සියල්ල සිදුකරන්නේ තනිවමයි. නිවසේ වැඩට වුණත් මම කවුරුත් මේ වන තෙක් අරගෙන නැහැ. මම හැමදෙයක් සඳහාම වේලාව කළමනාකරණය කරමින් සිදුකරගෙන යනවා. හැම වෙලාවෙම ගෙදර කවුරුත් නැති නිසා වැඩට කෙනෙක් වුණත් ගන්න එක හරි අපහසුයි. මට දැන් දරුවෙක් ලැබෙන්න ඉන්නේ. ඒත් මම අධ්‍යාපන කටයුතු සිදුකරමින්, ආයතන දෙකේම වැඩ බලාගනිමින් මේ සියල්ල හොඳින් කළමනාකරණය කරනවා. 

පිරිමින් හා සමානව ව්‍යාපාර ක්ෂේත්‍රයට කාන්තාවන් අවතීර්ණ වීමේ ප්‍රවණතාවක් මෑතක සිට දැකගන්න පුළුවන්. ඒ ගැන ඔබේ මතය කුමක්ද?

මගේ අත්දැකීමට අනුව කාන්තාවක් ව්‍යාපාරයක් ආරම්භ කිරීමට යන විට ඒ සඳහා ඇගේ හිත ප්‍රබල ලෙස බලපානවා. මෙවැනි දෙයක් කරන්න පුළුවන්ද? මොනවගේ ප්‍රතිචාරයක් මිනිස්සු දක්වයිද? යනාදිය සිතට ඒම වළක්වන්න බැහැ. නමුත් අපි ඒ කිසිවකින් සැලිය යුතු නැහැ.
සාමාන්‍ය දැනුමක් ව්‍යාපාරයක් කරන්න ප්‍රමාණවත් කියන දේ බොහෝ අය සිතන දෙයක්. නමුත් කාන්තාවකට ව්‍යාපාරයක් ආරම්භ කරන්න, ඒ පිළිබද දැනුමක් ලබාගන්න යම් අධ්‍යාපනයක් ලබා තිබීම අනිවාර්යය දෙයක් ලෙසයි මම දකින්නේ. පුරුෂයෙකුට සාමාන්‍ය දැනීමෙන්, භාවිතයෙන් හා අත්දැකීම තුළින් ඔවුන්ට ව්‍යාපාරික ඥානය ඉබේම ලැබෙන දෙයක්. නමුත් ගැහැනු කෙනෙකුට අධ්‍යාපනය කියන දෙය අනිවාර්යයෙන් වැදගත්. ව්‍යාපාරයක් ආරම්භ කරන්නට ප්‍රථම ඒ පිළිබඳ හොඳට අධ්‍යයනය කරන්නට අවශ්‍යයි. 
අපි ආරම්භ කරන ව්‍යාපාරයේ හෝ ආයතනයේ හෝ වේවා වැඩකරන සේවකයෙකුගෙන් වැඩක් ගන්න නම් අපි මුල සිට අවසානය දක්වාම ඒ ව්‍යාපාරයේ හෝ ආයතනයේ ක්‍රියා පිළිවෙත පිළිබඳ දැන සිටිය යුතුයි.  ව්‍යාපාරයේ ගිණුම් වාර්තා මගේ සේවකයෙකු සකස් කර වාර්තාවක් ලෙසින් ඉදිරිපත් කළත් එය නිවැරදිද යන්න බැලීමට මම දැන සිටින්නට අවශ්‍යයි. ව්‍යාපාර ක්ෂේත්‍රයේදී කෙනෙකුට අපට බොරුවක් නොකර සිටින විදිහට අපි දැනුවත්ව සිටින එක හොඳ දෙයක්. 
ව්‍යාපාරයක් කරන විට කැපකිරීම, අතරමග හැර නොයෑම අනිවාර්යයෙන් තිබිය යුතුයි. පිරිමි පුද්ගලයෙකුට වඩා මේ ක්ෂේත්‍රය තුළ ගැහැනු කෙනෙකුට බාධා වැඩියි. 

FB_IMG_1522123536685

විරැකියා ප්‍රශ්නය ලංකාව පුරාම වෙළාගෙන සිටින යුගයක තමන්ගේම ව්‍යාපාරයක් අරම්භ කිරීම ඉතා ප්‍රශංසනීය දෙයක්. මේ සම්බන්ධයෙන් රජයේ දායකත්වය හා මගපෙන්වීම ගැන ඔබට තිබෙන්නේ කුමන ආකල්පයක්ද?

මේ සම්බන්ධයෙන් රජය දක්වන සහයෝගය ගැන නම් අපිට සතුටු වෙන්න දෙයක් නැහැ. ඒ විදිහට තමයි ලංකාවේ රාජ්‍ය ආයතන සියල්ල සකස් වෙලා තිබෙන්නේ. මම විදෙස් රටවල් කිහිපයක හිටපු කෙනෙක්. ඒ තුළින් මම ගොඩාක් ලොකු වෙනසක් දකිනවා ලංකාවේ රාජ්‍ය සේවකයන්ගේ. මම බොහෝ කාලයක් ජීවත් වුණේ සිංගප්පූරුවේ. ඒ රටේ රජයේ ආයතනයකට ගියාම විනාඩි කිහිපයක් ඇතුළත අපේ වැඩේ කරගන්න පුළුවන්. ඒ රටවල අල්ලසට කිසිම තැනක් නැහැ. නමුත් ලංකාවේ මේ තත්ත්වය වෙනස්. සල්ලි පාචිච්චි කරලා ඕන දෙයක් කරන්න පුළුවන්. නමුත් අප යා යුත්තේ හැම විටම නිවැරදි මාර්ගයේ. එනිසා මම කවදාවත් එවැනි වංචනික ක්‍රියාවලට නම් යොමු වන්නේ නැහැ. 
උගත් අය විදිහට අපි එවැනි දෙයක් කළොත් අනෙක් පුද්ගලයන්ට පණිවිඩයක් දෙන්න අපිට බැරි වෙනවා. ලංකාවේ බොහෝ අය වැරද්දක් දැක්කහම වුණත් සද්ද නැතිව කටවහන් ඉන්නවා. රාජ්‍ය ආයතනයක් වුණත්, පෞද්ගලික ආයතනයක් වුණත් මට සාධාරණයක් කර ගැනීමට නොහැකි වූණත් මම අනිත් අය වෙනුවෙන් හරි කතා කරනවා. ආයතනවල යෝජනා, චෝදනා පිළිබඳ අදහස් දක්වන්න මිනිස්සුන්ට අවස්ථාව තිබෙනවා. නමුත් ඔවුන් එවැනි  අවස්ථාවලදී කිසිදු යෝජනාවක් හෝ චෝදනාවක් ඉදිරිපත් කරන්නේ නැහැ. 

ව්‍යාපාරයක් කරන්න උගත්කමත් වැදගත් කාරණයක්. ඔබගේ අධ්‍යාපන පසුබිම පිළිබඳ කතා කළොත්?

මම උසස් පෙළ දක්වාම අධ්‍යාපනය හැදෑරුවේ තංගල්ලේ. මගේ අම්මයි, තාත්තයි ලංකාවේ හිටියේ නැති නිසා පහ වසරේ ඉඳලම වගේ හොස්ටල් හිටියේ. මගේ අම්මගේ නෑදෑයන් ඉන්නේ තංගල්ලේ නිසා ඔවුන්ට මාව නිතරම බලන්න පුළුවන් වෙන්න තමයි තංගල්ලේ පාසලකට ඇතුළත් කළේ. මම උපාධිය කළේ සිංගප්පූරුවේ. මම පශ්චාත් උපාධිය ශ්‍රී ජයවර්ධනපුර විශ්වවිද්‍යාලයේ ව්‍යවසායක අධ්‍යයන අංශයේ සිදුකරනවා. මට තව උපාධිය නිමා කරන්න තිබෙන්නේ මසක පමණ කාලයක්. ගණකාධිකරණය පිළිබඳ පාඨමාලාවක් කර තිබෙනවා. ඒ වගේම අලෙවිකරණය පිළිබඳ පශ්චාත් උපාධියක් තිබෙනවා. 

ඉදිරියේදී ඔබේ ව්‍යාපාරය වැඩිදියුණු කිරීමට අපේක්ෂා කරන්නේ කෙසේද?  

මම වැඩියෙන්ම දියුණු කිරීමට අපේක්ෂා කරන්නේ ඕවසීස් ඇකඩමිය. සෑම දෙයක්ම රජය හා එකතු වෙමින් පියවරෙන් පියවරට තමයි සිදුකරන්න අවශ්‍ය. නමුත් ඕවසීස් ඇකඩමිය දියුණු කිරීමට සීමා නැහැ. මට අපේ රටේ මෙන්ම වෙනත් රටක ශාඛා ආරම්භ කිරීමේ හැකියාව තිබෙනවා. දැනට අපේ සිංගප්පූරුවේ හා ජපානයේ ශාඛා දෙකක් තිබෙනවා. ඒ වගේම මාතර, නුවර වැනි ප්‍රදේශ ආවරණය කරමින් එවැනි ශාඛා ආරම්භ කිරීමට මම ඉදිරියේදී අපේක්ෂා කරනවා. මගේ ඉලක්කය වන්නේ 2020 වන විට ශාඛා අවම වශයෙන් 04ක්වත් විවෘත කිරීම.

අපි උසස් අධ්‍යාපනය සඳහා විදෙස් රටවලට යවන ළමයින්ගේ ඒ කාලය අවසන් වූ විට අපි ඒ සම්බන්ධයෙන් වගකීමක් දරන්නේ නැහැ. අපේ ගොඩාක් ළමයි ඒ රට තුළම නැවතීමේ වැඩි ප්‍රණතාවක් තිබෙනවා. මට ඕන මේ විදෙස්ගත වන ළමයි හා සම්බන්ධ වෙමින් සංවිධානයක් සකස් කර ලංකාවට වැඩක් වෙන ආකාරයේ කුමක් හෝ දෙයක් කිරීමට. ඔවුන් ගත්ත දැනුමෙන් අපේ රටට වැඩක් කරන විදිහේ දෙයක් ආරම්භ කරන්නයි මට අවශ්‍ය. 
ලංකාවේ උසස් පෙළ හෝ සාමාන්‍ය පෙළ බොහෝ විට ප්‍රායෝගික අංශයට නැඹුරු වෙන්නේ නැති තරම්. ඒ නිසා දැන් ගොඩක් ළමයි උසස් පෙළ කරන්නෙත් නැහැ. සමාන්‍ය පෙළ ලියපු ගමන් මොකක් හරි රටකට යනවා. නමුත් අපිට ළමයින්ට මොකුත් කියන්න බැහැ. පෞද්ගලිකව අපිත් කැමති නැහැ අපේ සම්පත් පිටට යනවට. සාමාන්‍ය පෙළ අවසන් කර තරුණයෙක් හෝ තරුණියකට කරන්න ලංකාවේ හොඳ උපාධියක් නැහැ. බේකරි හෝ මොටර් රථ කාර්මිකරණය පිළිබඳ තවමත් වැදගත් තැනක් ලංකාවේ හැදිලා නැහැ. කාර්මික විද්‍යාලවලට යන ළමයින්ට වුණත් රස්සාවකට යන විට ඔවුන් සතු ප්‍රායෝගික දැනුම හරිම සීමිතයි. මේ ළමයින්ට දෙන අධ්‍යාපනය විධිමත්ව හරියට දෙනවා නම් අපිට රට යන පිරිස අවම කරගන්න පුළුවන්. රැකියා සඳහා යන අය ඒ කාල සීමාව අවසන් වූ විට ලංකාවට පැමිණ නැවත රටකට යනවා. ලංකාවේ තිබෙන ආර්ථික මට්ටමත් එක්ක ඒ මිනිස්සුන්ට ලංකාවේ රැඳෙන්න බැරි තත්ත්වයක් තිබෙන්නේ. මේ නිසා ඔවුන්ට චෝදනා කිරීම සාධාරණ නැහැ. 

ඉදිරියේදී ව්‍යාපාරයක් ආරම්භ කිරීමට සිටිනවා නම් ඒ කාන්තාවන්ට ඔබ මොන වගේ උපදෙසක්ද දෙන්න කැමති?

මුලින්ම අපි ව්‍යාපාරයක් ආරම්භ කිරීමේදී එය ආරම්භ කරන ක්ෂේත්‍රය පිළිබඳ තිබෙන අවබෝධය ඉතාම වටිනවා. හැමෝම කරනවා වගේ බොහෝ තරුණියෝ සැලොන් එකක් දාගන්නවා කිසිදු පදනමක් නොමැතිව. නමුත් ටික කාලයක් යද්දී වහන්න වෙනවා. ඒ නිසා තමන් කරන ව්‍යාපාරය ගැන ස්වං අධ්‍යයනයක් කරන්න. වසරින් වසර ගුණාත්මක තත්ත්වය පිළිබඳ ඇගයීමක් කර බලන්න. අනිවාර්යයෙන් කාන්තාවක් වූවත් ව්‍යාපාරයක් තුළ අවදානමක් ගැනීමට පුරුදු වෙන්න ඕන. අපේ රටේ ආර්ථිකයත් එක්ක කුමන වේලාවක ව්‍යාපාර කඩාගෙන වැටෙයිද කියලා කියන්න බැහැ. ඒ සියල්ලටම මුහුණදිය හැකි ආත්ම ශක්තියක් තිබෙන්නට ඕන. 

 

Colombo Fashion Week 15

Colombo Fashion Week 15 වැනි වරටත් අති උත්කර්ෂවත් අන්දමින් පසුගිය සතියේදී ආරම්භ විය. මෙම විලාසිතා දැක්ම 19දා සිට 25දා දක්වා කොළඹ හිල්ටන් හෝටල් පරිශ්‍රයේදී පුරා සතියක කාලයක් පවැත්විණි.
මෙහිදී දේශීය මෙන්ම ජාත්‍යන්තර වශයෙන් ප්‍රසිද්ධියට පත් විලාසිතා නිර්මාණ ශිල්පීන්ගේ විලාසිතාවන් එළිදැක්විණි. ඒ විලාසිතා අද කැමරා කාචයේ සටහන් වූයේ මෙලෙසිනි. 


IMG_4287 IMG_4306 IMG_4400 IMG_4459 IMG_4549 IMG_4593 IMG_5132 IMG_5440 IMG_5519