Category Archives: Uncategorized

SLFP මහ ලේකම් උප ලේකම් තනතුර වෙනස් කළ යුතු බවට යෝජනාවක්

ශ්‍රී ලංකා නිදහස් පක්ෂ ප්‍රතිසංවිධාන කටයුතු සිදුකිරීමේදී පක්ෂයේ මහලේකම් තනතුරේ හා උප ලේකම් තනතුර විශේෂයෙන් වෙනස් කළ යුතු බවට ශ්‍රී ලංකා මධ්‍යම කාරක සභාවට යෝජනාවක් ගෙන ඒමට ශ්‍රී ලංකා නිදහස් පක්ෂ මන්ත්‍රීවරුන් පිරිසක් සැලසුම් කර තිබේ.

පක්ෂයේ සභාපති ජනාධිපති මෛත්‍රීපාල සිරිසේන මහතාගේ විදේශ සංචාරය නිමවීමෙන් පසු මේ මස 18 වැනිදා හෝ ඊට ආසන්න දිනයකදී ශ්‍රී ලංකා නිදහස් පක්ෂ මධ්‍යම කාරක සභාව රැස්වීමටනියමිත බවද එම පිරිස් පෙන්වා දෙති.

මේ අනුව ශ්‍රී ලංකා නිදහස් පක්ෂ මහලේකම් ධූරය අමාත්‍ය දුමින්ද දිසානායක මහතා දරණ අතර උපලේකම්වරයෙකු ලෙස අමාත්‍ය මහින්ද අමරවීර මහතා කටයුතු කරයි.

මීට අමතරව සන්ධාන මහලේකම් ධුරයෙන් අමාත්‍ය මහින්ද අමරවීර මහතා ඉවත් කළයුතු බවට ශ්‍රී ලංකා නිදහස් පක්ෂ මන්ත්‍රීවරුන්ගේ මතය වී තිබෙන බවද වාර්තාවේ.

විශ්වාසභංග යෝජනාවට පක්ෂව ඡන්දය ලබාදීමට තීරණය කර තිබියදී කිසිදු හේතුවක් නොමැතිව ඡන්දය ලබාදීමෙන් වැළකී සිටීමේ තීරණය මහලේකම්වරුන් දෙදෙනා විසින් තනි කැමැත්තට තීරණය කිරීම මූලික කරගනිමින් මොවුන් තනතුරුවලින් ඉවත් කළයුතු බවට ශ්‍රී ලංකා නිදහස් පක්ෂය තුළ මතයක් නිර්මාණයවී තිබෙන බවද ශ්‍රී ලංකා නිදහස් පක්ෂ මන්ත්‍රීවරු සඳහන් කරති.

මෙම කුමන්ත්‍රණය සඳහා තවත් ප්‍රබල අමාත්‍යවරයෙකුද මූලිකත්වය ගෙන කටයුතු කර තිබෙන බවද එම පිරිස් පෙන්වා දෙති.

1510391718-slfp3

 

ඒකාබද්ධය මහින්දගේ ප්‍රධානත්වයෙන් සාකච්ඡාවකට

mr 01 copyහෙට (04) දිනයේදී කටයුතු කළ යුතු ආකාරය පිළිබඳව සාකච්ඡා කිරීමට අද (03දා) සවස හිටපු ජනාධිපති මහින්ද රාජපක්ෂ මහතාගේ ප්‍රධානත්වයෙන් විශේෂ සාකච්ඡාවක් පවත්වන බව ඒකාබද්ධ විපක්ෂය සඳහන් කරයි.

ශ්‍රී ලංකා නිදහස් පක්ෂය ගත් තීරණයක් සමග හෙට (04දා) දිනයේදී අගමැතිවරයාට ගෙදර යෑමට සිදුවීම කිසි ලෙසකින් වළක්වා ගත නොහැකි බවද එම සංවිධානයේ ජාතික සංවිධායක රංජිත් සොයිසා මහතා සඳහන් කළේය.

මේ නිසා අගමැතිවරයා අද දිනයේදීම ඉල්ලා අස්විය යුතු බවද හෙතෙම පවසා සිටියේය. හිටපු ජනාධිපති මහින්ද රාජපක්ෂ මහතා සමග පැවැත්වෙන සාකච්ඡාවට ඒකාබද්ධ විපක්ෂයේ සියලුම දෙනාම සහභාගි වීමට නියමිත බවත්, විදේශ ගතව සිටි සියලුම දෙනාත් මේ වන විට ලංකාවට පැමිණ තිබෙන බවත් හෙතෙම කියා සිටියේය.

නැවතත් ඖෂධ මිල අඩුකිරීමක්

Rajitha-Senaratne1මාසයක කාලයක් තුළ තවත් ඖෂධ වර්ග රැසක මිල අඩු කරන බව සෞඛ්‍ය අමාත්‍ය රාජිත සේනාරත්න මහතා පවසයි. එහිදී මිල අධික ඖෂධ සහ පිළිකා ඖෂධවල මිල අඩු කරන බව සෞඛ්‍ය අමාත්‍යවරයා සඳහන් කරයි.

දකුණු ආසියානු රටවල බෝනොවන රෝග පාලනය කිරීමේ ප්‍රථම සමුළුවට සමගාමීව කොළඹ ගාලුමුවදොර හෝටලයේ ඊයේ (31දා) පැවැති මාධ්‍ය හමුවකට එක්වෙමින් සෞඛ්‍ය අමාත්‍යවරයා මේ බව පැවසීය.

“අත්‍යවශ්‍ය ඖෂධ වර්ග 48ක මිල අඩු කර තිබෙනවා. ඒ ආකාරයට තවත් ඖෂධ වර්ග රැසක මිල ඉදිරි මාසය තුළදී අඩු කිරීමට අපි සැලසුම් කර තිබෙනවා. පිළිකා ඖෂධ වැනි මිල අධික ඖෂධ ඊට ඇතුළත්. හෘද රෝගීන් සඳහා නොමිලේ ස්ටෙන්ස් ලබාදීම හේතුවෙන් අද වනවිට පොරොත්තු ලේඛනය ඉහළ ගොස් තිබෙනවා. පසුගිය කාලයේ කොළඹ ජාතික රෝහලේ හෘද සැත්කම් මසකට සිදු කළේ 50 – 60ත් අතර ප්‍රමාණයක්. නොමිලේ ස්ටෙන්ස් ලබාදීමත් සමග හෘද සැත්කම් 450 – 500ත් අතර සංඛ්‍යාවක් මාසයක් තුළ දී සිදු කරනවා.

තවද හෘද රෝගයක් ඇතිවීමට පෙර ලබාදෙන ටෙනෙක්ට්ටප්ලෙස් (Tenecteplase) නමැති ඖෂධය හේතුවෙන් ජනතාවට විශාල සහනයක් ලැබී තිබෙනවා. පසුගිය කාලයේ හෘද රෝගීන් 06කගෙන් 05 දෙනෙකු පමණ විවිධ හේතු මත මියගියා. නමුත් යහපාලන රජය හෘද රෝගීන්ට සහන සැලසීම තුළ අද වනවිට රෝගීන් 06කගෙන් 01 රෝගියෙකු පමණයි මියයන්නේ. රෝහල්වල රුධිර පරීක්ෂණ නොමිලේ සිදු කිරීමේ වැඩපිළිවෙළ තුළින් රුධිර පරික්ෂණ 61%කින් වැඩි වී තිබෙනවා" යනුවෙන්ද අමාත්‍යවරයා කියා සිටියේය.

 

 

 

 

සැලකිල්ල

සැලකිල්ල ලබන්නට අකැමැති කෙනෙකු නැත්තේය. වැඩි වැඩියෙන් සැලකිලි ලබන්නට අප කවුරුත් කැමැතිය. ඒත් අනුන්ට සැලකිලි දක්වන්නාට කැමැති අය නම් අඩුය. අනුන්ගෙන් ගරු සැලකිලි නම්බු නාම ලැබෙනවා නම් ඒවා ඉහටත් උඩින් පිළිගන්නා අය එමටය. එහෙම නිතර සැලකිලි ලැබෙන අයට සැලකිලි නොලැබුණාම හිතට හරි අමාරුය. ඒ නිසා හැම විටම අනුන්ගෙන් සැලකිලි ලැබීම බලාපොරොත්තු වීම නරක බව තේරුම් ගත්තොත් හොඳය.

සමහරුන් කියන්නේ කාගේ කාගෙත් සැලකිල්ල ලැබෙන්නේ කාසි පනම් හොඳට තියෙන විට කියලාය. කාසි පනම් විතරක් නොව තනතුරු ගරු නම්බු තියෙන තියෙන අයට සැලකිල්ලද වැඩිය. ඒත් මුදල්, වත්කම් තනතුරු නැතිවුණු විට ඒ අයට බල්ලෙකුට තරම්වත් සලකන්නේ නැත කියලා කියනවාය. පොහොසත් ගෙවල්වල සැපට හැදෙන උසස් බල්ලන්ට නම් මිනිස්සුන්ටත් වඩා සැලකිලි ලැබෙනවාය. ඒත් ගමේ නන්නත්තාරේ යන වල් බල්ලන්ට නම් ලැබෙන සැලකිල්ලක් නැත්තේය.
සැලකිල්ල නොලැබෙනවාට කියන්නේ නොසැලකිල්ල කියලාය. මුලින් සැලකිල්ල ලැබුණු කෙනාට පසුව නොසලකන විට සෑහෙන්න හිතේ අමාරුය. දරුවන් බොහෝ වේලාවට දෙමවුපියන්ට සලකන්නේ ඔවුන්ගේ දේපළ ලියවා ගන්නාතුරු පමණය. ඊට පස්සේ සැලකිල්ල නොසැලකිල්ල වෙලා දෙමවුපියන්ට  මහලු මඩම් උරුම වෙනවාය.

සැලකිල්ල ගැන බොහෝ දේවල් කියාදෙන්නේ සිඟාලෝවාද සූත්‍රයෙන්ය. දූ දරුවන් දෙමවුපියන්ට සැලකිය යුතු අන්දම වගේම දෙමවුපියන් දූ දරුවන්ට සැලකිය යුතු අන්දමද එහි මනාව විස්තර කර තිබෙනවාය. එසේම සිසුන් ගුරුවරුන්ට සැලකිය යුතු අන්දම වගේම ගුරුවරුන් සිසුන්ට සැලකිය යුතු හැටිද එහි දැක්වෙනවාය. සේවකයා ස්වාමියාට සැලකිය යුතු හැටි මෙන්ම ආපසු ස්වාමියා සේවකයාට සැලකිය යුතු අන්දමද එහි සඳහන්ය. මේ සූත්‍රය පෙන්වා දෙන්නේ එකිනෙකාට සැලකිල්ල දෙපාර්ශ්වය විසින්ම කළයුතු දෙයක් බවය. එසේ නැතුව එක් පාර්ශ්වයකට නොසලකා ඔවුන්ගෙන් සැලකිල්ල බලාපොරොත්තු වෙතොත් එය නොලැබෙන බවද එයින් සනාථ වෙනවාය. ඒත් අද වනවිට සැලකිය යුත්තන්ට සැලකීම සමාජය විසින් අමතක කරනු ලැබ තියෙනවාය. 

මේ සැලකිලි අතර වඩාත් උසස් සැලකිල්ල වන්නේ රෝගීන්ට සැලකිල්ලය. බුදුන් වහන්සේද රෝගීවී සිටි පූතිගත්ථතිස්ස තෙරුන්ට සැලකීමෙන් සැලකිල්ලේ උසස් බව ආදර්ශයෙන් පෙන්වාදී ඇත්තේය. ඒත් අද සමාජයේ රෝගීන්ට හා වයසක අයට සැලකිල්ල දැක්වීම අඩුවෙලා තියෙනවාය. රජයේ සමහර රෝහල්වලද රෝගීන්ට හරිහැටි සැලකිල්ලක් නොදක්වන වෛද්‍යවරුන් සහ හෙද හෙදියන් සිටිනවාය. මේ ඊයේ පෙරේදා රෝහලකට රැගෙන ගිය දරුවකුගේ අතේ තුවාල ඇඟිල්ල වෙනුවට වෙනත් ඇඟිල්ලක බෙහෙත් දැම්මේ නොසැලකිල්ල නිසාය. සමහර වෛද්‍යවරුන්ගේ නොසැලකිල්ල නිසා රෝගීන් මිය පරලොව ගිය අවස්ථාද තිබෙනවාය. තමන්ගේ පඩිනඩි සහ දීමනා ගැන  ඉහළ සැලකිල්ලක් දක්වන බොහෝ සේවකයන් තමන්ගේ රාජකාරිය දක්වන සැලකිල්ල අවමය. මෙම නොසැලකිල්ල නිසාම අද රාජ්‍ය සේවය අකාර්යක්ෂම වෙලා යැයි කියනවාය.

සෑම වැඩක්ම සැලකිල්ලෙන් හා වගකීමෙන් යුතුව ඉටු කළ යුතු අතර නොසැලකිල්ල නිසා අඩුපාඩු සිදුවන්නේද තමන්ටමය. සුළු නොසැලකිල්ල නිසා සිදුවන පාඩුව විශාලය. අද අපේ රටද මෙලෙස පරිහානියට පත්ව ඇත්තේ තම තමන් ගැන මිස රට ගැන දක්වන සැලකිල්ල අඩුවීම නිසාය. බොහෝදෙනා පුද්ගලික දේවලට සැලකිල්ලක් දක්වන අතර පොදු දේවලට දක්වන සැලකිල්ල අඩුවෙලාය. පොදු දේ ගැන තමන්ගේ දේවලට වඩා සැලකිල්ලක් දැක්විය යුතු වග ඔවුන්ට මතක් කර දිය යුතුය.
ලෝකයේ මිනිසුන් අපේ රට ගැන දක්වන සැලකිල්ලෙන් දෙකෙන් පංගුවක් අපේ මිනිසුන් රට ගැන දක්වන්නේ නැත්තේය. දේශපාලුවන් පවා රට ගැන සලකන්නේ නැතුව වංචා දූෂණවලින් සල්ලි හොයන්නට යාම නිසා අද අපේ රට පරිහානියට පත්වෙලා තියෙනවාය. ඒත් සියල්ලටම පෙර රටක් අවශ්‍ය නිසා රට ගැන වැඩි සැලකිල්ලක් දැක්විය යුතුය. සිංහලයා ජාතිය ගැන දක්වන සැලකිල්ල ද පහළටම වැටිලාය. 

අද තරුණයන් වැඩි සැලකිල්ලක් දක්වන්නේ තරුණියන් කෙරෙහිය. මුහුණු පොතෙන් ඇසුරට ලැබෙන තරුණියනට සලකන්න ගොස් අමාරුවේ වැටුණු තරුණයන්ද සිටිනවාය. තරුණියන්ද තරුණයන්ට වැඩි සැලකිල්ලක් දක්වන බව පෙන්වා තම අවශ්‍යතා ඉටුකර ගන්නවාය. බස් රියේ, දුම්රියේ සිටගෙන යන විට තමන් අසල අමාරුවෙන් සිටගෙන යන මහලු අම්මාට සැලකිල්ලක් නොදක්වන තරුණයන් රූමත් තරුණියකට සැලකිල්ලක් දක්වා ඇය තම සීට් කොනේ වාඩිකර ගන්නවාය. ඒත් තමන් සැලකිලි දක්වලා තිබෙන්නේ වැරදි කෙනෙකුට බව ඔහුට තේරෙන්නේ තම පොකැට්ටුවද පන්නා ගෙන ඇය බැස ගියාට පසුවය. ඒ නිසා හදිසියේ හමුවෙන අයට වැඩි සැලකිල්ලක් දක්වන්නට යාම නරකට හිටින බව දැන ගත යුතුය.
අපට කවුරුත් සලකන්නේ නැති වන විට සැලකිලි ලබන්නට නොකරන දේවල් කරන්නේය. තමන් ලොකු වැඩකාරයෙක් බව පෙන්වලා අන් අයගෙන් නැති සැලකිලි ලබාගන්නට සූදානම් වෙනවාය. පෙම්වතා හා පෙම්වතිය එකිනෙකාට දක්වන සැලකිල්ල තවත් අඩු වන්නේ දරු සම්පතක් ලැබුණු විටය. එහෙම වුණාට පස්සේ ඇය වැඩිපුර සලකන්න පටන් ගන්නේ දරුවාටය.

අපේ සමහරු නම් ඇතැම් වෙලාවට හොඳින් බැරිනම් නරකින් හරි සැලකිල්ල දක්වන්නට සූදානම්ය. මම එයාට හොඳට සලකලා ඇරියා යැයි උපහාසයෙන් කියන්නේ ඇතැම් වෙලාවට බැණලා එළවාගෙන විය හැකිය. නැතිනම් අතින් පයින් පොලු මුගුරු වලින්ද සලකන්නට බැරි කමක්ද නැත්තේය.
සෑම දෙනාම  වැඩිපුර සලකන්නේ කාටද කියා අසූ විට ලැබෙන නිවැරදි පිළිතුර විය යුත්තේ තමන්ටමය යන්නය. එහෙත් බොහෝ දෙනා තමා තමාටම වැඩි සැලකිල්ලක් දක්වන බව කියන්නේ නැතිය. සෑම දෙනාම තම තමන්ට දක්වන සැලකිල්ලෙන් අල්පමාත්‍රයක්වත් අනුන් කෙරෙහි දක්වන්නේ නැත්තේය.

අපේ දේශපාලුවන් ඡන්දදාසලාට සලකන්නේ ඡන්දයක් ළං වූ විටය. ඡන්දයෙන් දිනුවාට පසු ඡන්දය දෙන අයට දක්වන සැලකිල්ල ක්‍රමයෙන් අඩුවෙලා යනවාය. තමන් අමතක කළ දේශපාලුවන්ට හොඳට සලකන්නට ඊළඟ ඡන්දය එනතුරු ඡන්දදාසලා මග බලා ඉන්නවාය.

ලිහිණින් රෑන සමග ගීත ලොවට අලුත් කතාවක්

 ගීතයක් රසවිඳන විට අපි එය වඩාත් රසවිඳින්නේ අපට දැනෙන තැනිණි. මේ නිසා ඇතැම් ගීත අපේ කරගන්නට යෑම තුළ අපට හමුවෙන්නේ ගීත රචකයා ලියූ අදහසම නොවේ. ඇතැම් විට වරදවා වටහා ගන්නා ඒ ගීතයේ රසය අප හොඳින්ම අත්විඳින්නේ කාලාන්තරයක් ගතවී අහම්බයෙන් විය හැකිය. එය ගීත රචකයා සහ අප අතර ඇති දුරස්ථභාවය නිසාද? ගීත ලොවට විසල් ගී සංඛ්‍යාවක් එකතු කළ ධර්මරත්න පෙරේරා නම් වූ ගේය පද රචකයා අලුත් වැඩකට මුලපුරනුයේ ඔහු ලියූ ගීත නිසි පරිද්දෙන් විචාරයට ලක්කරන පොතක් එළිදක්වමිනි.  


M46A1271

ලිහිණින් රෑන යනු එසේ ඔහුගේ ගීත විචාරයට ලක් වී රසිකයා වෙත පිදෙන පොතයි. මේ මස 23 වැනි දින සවස 3ට කොළඹ පදනම් ආයතනයේදී ලිහිණින් රෑන එළිදකියි.
ධර්මරත්න පෙරේරා යැයි කියනවාට වඩා ඔහු බොහෝ දෙනෙකු හඳුනන්නේ දේවින්ද දසනායක ලෙසින් පැවසුවහොත් එහි වරදක් නොවේ. කුමරි යොවුන් පුවත්පතේ රතුරෝස නමින් පළවූ විශේෂාංගයට ඔහු ලියූ කවි එකල තරුණ තරුණියන් මෙන්ම වැඩිහිටි පරපුරද රසවින්දේ එහි වූ ප්‍රේමය ඒ සෑම හදවතක්ම ස්පර්ෂ කිරීම හේතුවෙනි. ධර්මරත්න පෙරේරා  නම් වූ මාධ්‍යවේදියා ගීත රචනයට පිවිසෙන්නේ කාව්‍යකරණයෙහි වූ ඔහුගේ දස්කම් එවකට කුමරි පුවත්පතෙහි විශේෂාංග ලේඛකයෙකු වූ ප්‍රනීත් අබේසුන්දරගේ ඇස ගැසීමත් සමගය. එදා මෙදාතුර ඔහු ලියූ ජනප්‍රිය වූ ගීත අපමණය. ජනප්‍රිය ගොන්න තරම්ම එතරම් අසන්නට නොලැබුණු ඔහු ලියූ ගීතවල පවතින රසයත් අමතක කළ හැකි නොවේ. මේ අවදිවන්නේ ධර්මරත්න පෙරේරාගේ හඬයි.

ඒ දවස්වල මම පත්තර ජීවිතේ ඇරඹුවේ බන්දුල පද්මකුමාර මහත්තයාගේ කුමරි පත්තරෙන්.  පසු කාලෙක මම කුමරි පත්තරේ කර්තෘ පදවියට පත්වුණ එක හරිම දෛවෝපගතයි. කුමරි විශේෂාංග ලේඛකයෙක් විදිහට අරඹපු පත්තර ජීවිතේ යුවති පුවත්පතේ කර්තෘ ලෙසත් රන්ලිය පුවත්පතේ මෙන්ම කුමරිය කර්තෘ ලෙසත් ගෙවී ගියා.  ඒ කාලේ කුමරියට මම ගොඩාක් විශේෂාංග ලිපි ලිව්වා. ඒ නිසා එකම නමෙන් ලියනවට වඩා වෙනසක් කරන්න තිබුණ නම් හොඳ නිසා මං රතුරෝස කියන මම ලියූ විශේෂාංග ලිපියට දේවින්ද දසනායක යන නම යෙදුවා. අන්තිමේ ධර්මරත්න පෙරේරා නමටත් වඩා දේවින්ද දසනායක ජනප්‍රිය වුණා.  

ඔබ ලියූ ගීත අතරින් වඩාත් ජනප්‍රියත්වයට පත් වූ ගීත ගැන කතා කළොත්?

ඔබෙ සුවඳ පිරුණු පුංචි කාමරේ, හමුවෙන්නදෝ ආයෙ වෙන් වෙන්නදෝ, ළිහිණින් රෑන පියා සලන්නේ, වෙස්සන්තර බිසෝ නුඹව දන් දෙන්නෙ නෑ,  අප හමුවීම වෙන්වීමදෝ ආදරේ ඇතුළු ගීත ගොන්නක්ම තිබෙනවා.  බොහෝ විට මේ ගීතවලට ප්‍රස්තුත වුණේ ප්‍රේමය.

අද පවතින ප්‍රේමය සම්බන්ධයෙන් ලියන්න අදහසක් නැතිද? 

අපේ වයසේ කෙනෙකුට තරුණ ඇසකින් ප්‍රේමය දිහා බලන්නටත්, ලියන්නටත් ලැබීම හරි අපූරු කාරණයක්. මම හිතන්නේ ඒක තමයි මගේ සාර්ථකත්වයේ රහස. මම ප්‍රේම ගීත ලිව්වේ පරිණත පුද්ගලයෙකු ලෙස මිසක පාසල් පෙම්වතෙකු ලෙස නෙවෙයි. නමුත් පාසල් වියේ පෙම්වතුන් ඒ ගීත ආදරෙන් වැලඳ ගත්තා. ඒවා අදත් තරුණ පරපුර අතර රැඳිලා තියෙනවා. මට තාමනම් කවුරුවත් දැන් පවතින ප්‍රේමය ආකාරයේ ගීතයක් ලියන්න ඇරයුම් කරලා නැහැ. ලියන්න පුළුවන්කම තිබුණත් කවුරුන් හෝ එහෙම ගීතයක් ඉල්ලන්න ඕනනේ.
 ගීත ක්ෂේත්‍රයේ පද සංකල්පනා එකතුවක් වශයෙන් බොහෝ පොත් මීට පෙර එළිදක්වා තිබෙනවා. නමුත් ඒ අතර ඔබේ පොත වෙනස් එකක්. 
 ඔව්. මේ පොතේ එන්නේ මා ලියූ ජනප්‍රිය ගීත සම්බන්ධයෙන් ප්‍රවීණයන් දැක්වූ විචාරයන් එකතුවුණ පොතක්. එයින් ගීතයේ නියම අරුත යම් රසිකයෙකුට ග්‍රහණය කරගන්න අවස්ථාව ලැබෙනවා. සමහර ගීත සම්බන්ධයෙන් එය ග්‍රහණය කරගන්නා දක්වන්නේ රචකයා නොසිතූ දෙයක්. මෙවැනි පොතකින් යම් කෙනෙකුට නියම රසයකින් තමන් රසවිඳින ගීතය හා රැඳෙන්න පුළුවන්. 

ලිහිණින් රෑන එළිදැක්වීමේදී ගීත අහන්නටත් අවස්ථාවක් ලැබෙනවාද?

ඔව් ගීත කීපයක් සහ විද්වත් කතා කීපයක් එහි ඇතුළත්. මෙයින් අපි බලාපොරොත්තු වෙන්නේ ඒ ගීත ගැන අලුතින් කතිකාවතක් ඇතිකරවීම නොවුණත් ගීතයක රසය සම්බන්ධයෙන් නියම රසඥතාවක් ඇතිකර ගන්න කැමති අයට ඒ සඳහා උදවුවක් සැපයීමයි. 

එදා මෙදාතුර බිහිවූ ප්‍රේම ගීත සම්බන්ධයෙන් ඔබේ අදහස මොන වගේද? 

 ප්‍රේමය කියන්නේ එකම ආකාරයේ දෙයකට නෙවෙයිනේ. ප්‍රේමය විවිධාකාරයි. නමුත් එයින් මතුවන රසය හැම අයෙකුටම දැනෙන පොදු දෙයක්. නමුත් එදා ගීතවල වෛරයක් තිබුණෙ නැහැ. ඒ වගේම ඒ කාලේ ප්‍රේමය කියන්නේ අහිංසක දෙයක්. කැමැත්ත නොලැබුණොත් පිහියෙන් ඇනලා පෙම්වතිය මරණ වෛරී ප්‍රේමයක් ඇතිවුණේ පසුකාලීනව. අයිතිය කියන්නේ ප්‍රේමය කියන තැන නෙවෙයි කියලයි එදා බිහිවුණ ගීත බොහෝමයක් බිහිවුණේ. පසුකාලීනව ප්‍රේමයේ විරහව තරහව බවට පත්වෙලා ගීත බිහිවූ බවක් දකින්නට ලැබෙනවා. නමුත් ප්‍රේමය කියන්නේ අනෙකා වෙනුවෙන් කරන කැපකිරීමක් කියන එක අමතක වීමයි වැරැද්ද. මම හිතන්නේ ප්‍රේමය කියන්නේ කිසිවෙකුට හිංසාවක් නැති හා නොසිතන ලෝකයේ ඇති අහිංසක හැඟීම්වලින් එකක්.

අද ඔබ පත්තර ජීවිතයෙන් ඈත් වෙලාද? 

දැන් මම පුවත්පතකට සම්බන්ධ නැහැ. විශ්‍රාම සුවයෙන් පසුවෙන අතර මා ලියූ ගීත මෙන්ම නොලියූ ගීත ගැනත් සිතමින් බොහෝ නිදහස්ව කල් ගෙවනවා. කවුරුන් හෝ ගීතයක් ලියා දෙන්න යැයි කිවහොත් ඒ ගීත ලියනවා. %ලිහිණින් රෑන^ එළිදක්වන උත්සවයට ඒ ගීතවල රසිකයන්ටත් පැමිණෙන්නට හැකි නම් තවදුරටත් ඒ ගීත රසවිඳින්න ඔවුන්ට සුවිශේෂී අවස්ථාවක් ලැබේවි. ඒ නිසා විශේෂයෙන්ම ඒ ගීත ජනප්‍රිය තලයට ඔසවා තැබූ ඔවුන්ට මේ පොත දොරට වැඩීම සම්බන්ධයෙන් කියන්නම ඕන. ගීතය කියන්නේ හරිම හදවතට දැනෙන කලා මාධ්‍යයක්. ඇතැම් ගීත ඇහෙන විට ඒ නම් අපගේම ජීවිත කතාව ලෙස දැනෙන්නට හේතුව එයයි. දෑස වසා ගත්තත් ගීතයක් අහන්න බාධාවක් නැහැ. හිතේ මැවෙන රූ රටා ගීත වෙනුවෙන් නිමවෙන රූප රචනා ඉක්මවා යන්නක්. ඒ දවස්වල ගීතවලට රූප රචනා තිබුණෙ නැහැ. නමුත් රූප රචනා ඉතාම නිදහසේ ඒ ගීත හරහා අපේ හිත්වල මැවුණා. පදමාලාව කියන දේ ගීතයකට ආභරණයක් වුණේ එහෙමයි.

මුස්ලිම්වරුන්ට වෙනමම පළාතක් ඉල්ලා සිටියේ නෑ

ශ්‍රී ලංකාවේ ජීවත්වෙන මුස්ලිම් ජනයා වෙනුවෙන් වෙනමම ප්‍ර දේශයක් ඉල්ලා නොසිටි බවත් ඇතැම් අන්තවාදී කොටස් විසින් අසත්‍ය ප්‍රකාශ ප්‍රචාරය කරන බවත් අමාත්‍ය ෆයිසර් මුස්තාෆා මහතා පවසයි. මල්වතු මහා නායක අතිපූජ්‍ය තිබ්බොටුවාවේ සුමංගල හිමිපාණනන් බැහැදැකීමට පැමිණි අවස්ථාවේදී ඔහු මේ බව පවසා ඇත.

රජ කාලයේ පටන් සිංහල හා මුස්ලිම් ජනතාව සාමකාමීව සිටි බවත් අන්තවාදී පිරිසි මුස්ලිම් පිරිස් අතර පමණක් නොවන සිංහල හා දමිළ ජනතාව අතර සිටින බවත් ඔහු පවසයි.

faizer-mustapha copy

ශ්‍රී ලංකාව පිළිබඳ එජා මානව හිමිකම් මහ කොමසාරිස් දැඩි අවධානයෙන්

downloadශ්‍රී ලංකාවේ අම්පාර හා මහනුවර දිස්ත්‍රික්කවල ඇතිව තිබෙන නොසන්සුන්කාරී තත්ත්වය පිළිබඳව තමන් දැඩි අවධානයෙන් පසුවන බව එක්සත් ජාතීන්ගේ මානව හිමිකම් කොමිසමේ කොමසාරිස් සෙයිද් අල් හුසේන් කුමරු සඳහන් කරයි.

එක්සත් ජාතීන්ගේ මානව හිමිකම් කොමිසමේ 37 වැනි සැසිවාරයේදී එහි සාමාජික රටවල් පිළිබඳව වාචික යාවත්කාලීනය කරමින් මහ කොමසාරිස්වරයා මේ බව සඳහන් කරයි.

“ශ්‍රී ලංකාවේ සුළු ජන කොටසටකට එරෙහිව ඇතිව තිබෙන ප්‍රචණ්ඩකාරී තත්ත්වය පිළිබඳව මම දැඩි අවධානය යොමුකර තිබෙනවා. මේ හරහා දිවයින තුළ හදිසි තත්ත්වයක්ද ප්‍රකාශයට පත්කර තිබෙනවා. මෙවැනි ප්‍රහාර සඳහා වගකිව  යුත්තන් දුර්විපාක නොලබා සිටින්නට බෑ. මම රජයට කියනවා සංක්‍රාන්ති යුක්තිය ක්‍රියාත්මක කරන්න කියලා. වගවීම හා සංක්‍රාන්ති යුක්තිය ක්‍රියාත්මක නොවීම මේ සඳහා හේතුව වී තිබෙනවා. මෙවැනි ආකාරයට ක්‍රියාත්මක නොවීම ගැන මම සාමාජික රටවලින් ඉල්ලා සිටිනවා විශ්වීය යුක්තිය අනුව කටයුතු කරන්න කියලා. මේ පිළිබඳව මාර්තු 21 දා පූර්ණ දැනුම් දීමක් කවුන්සිලයට සිදුකරනවා”  යැයි ඔහු සිය ප්‍රකාශයෙන් පවසයි.

 

 

 

කෝබි බ්‍රයන්ට්ට ඔස්කාර් සම්මානයක්

ලොව ධනවත්ම පැසිපන්දු ක්‍රීඩකයෙක් මෙන්ම 05 වරක් දක්ෂතම ඇමෙරිකානු පැසිපන්දු ක්‍රීඩකයා කිරුළ දිනූ කෝබි බ්‍රයන්ට් 90 වැනි ඔස්කාර් සම්මාන උළෙලේදී හොඳම සජීවිකරණ කෙටි චිත්‍රපටයට හිමි සම්මානය දිනාගැනීමට සමත්විය.

90 වැනි ඔස්කාර් සම්මාන උළෙල පෙරේදා (04දා) ඇමෙරිකා එක්සත් ජනපදයේ කැලිෆෝනියා ප්‍රාන්තයේ ලොස් ඇන්ජලීස් නුවරදී පැවැත්විණි.

කෝබි බ්‍රයන්ට් කුඩා කල සිට පුහුණුවීම් කර පැසිපන්දු ක්‍රීඩාව ජයගන්නා ආකාරය ඇතුළත් විනාඩි 05ක් පුරා දිවයන 'Dear Basket ball' කෙටි චිත්‍රපටයට මෙම සම්මානය හිමිවිය.

'Dear Basket ball' කෙටි චිත්‍රපටය ග්ලේන් කීන්ගේ අධ්‍යක්ෂණයක් වන අතර එහි පිටපත ලියා ඇත්තේ කෝබි බ්‍රයන්ට්ම වීම සුවිශේෂීය. එමෙන්ම ඔස්කාර් සම්මානයක් දිනාගත් පළමු වෘත්තීය ක්‍රීඩකයා සහ වෘත්තීය පැසිපන්දු ක්‍රීඩකයා වීමේ ගෞරවයද කෝබි බ්‍රයන්ට්ට හිමිව තිබේ.

'Dear Basket ball' කෙටි චිත්‍රපටය හැර ඔස්කාර් සම්මාන උළෙලේදී තවත් සජීවිකරණ කෙටි චිත්‍රපට 04ක් (ගාර්ඩ්න් පාර්ටි, ලූ, නෙගටිව් ස්පේස් සහ රිවොල්ටින් රයිම්ස්) හොඳම සජීවිකරණ කෙටි චිත්‍රපටය සඳහා නිර්දේශ වී තිබුණු අතර, පැන්සල් තුඩක් ආධාරයෙන් නිර්මාණය කර ඇති 'Dear Basketball' සජීවිකරණ කෙටි චිත්‍රපටය අවසානයේදී හොඳම සජීවිකරණ කෙටි චිත්‍රපටය ලෙස සම්මානයට පාත්‍ර විය.

කෝබි බ්‍රයන්ට් ඇමෙරිකානු පැසිපන්දු සංගමය (NBA) සංවිධානය කරන ප්‍රධානතම තරගාවලිය සඳහා 1996 සිට 2016 දක්වා ලොස් ඇන්ජලීස් ලේකර්ස් කණ්ඩායමට ක්‍රීඩා කළ අතර, ඔලිම්පික් රන් පදක්කම් ද්විත්වයකටද (2008 – බීජිං සහ 2012 – ලන්ඩන්) හිමිකම් කීමට ඔහු සමත්ව සිටියි.

06bryantoscar-web1-master768

චන්දිමාල්ගේ සොහොයුරාගේ ශතකයෙන් සුලෝහිත සංග්‍රාමය ජය පැරදුමින් තොරව නිමවෙයි

89 වැනි ආනන්ද-නාළන්ද සුලෝහිත සංග්‍රාමය අද (04) ජය පැරදුමින් තොරව නිමා විය.  තරගයේ අවසන් දිනයේ දෙවැනි ඉනිමේ ලකුණු 54 ක් පසුපසින් ඉනිම ආරම්භ කළද ආනන්ද කණ්ඩායම වෙනුවෙන් කමේෂ් නිර්මාල් විශිෂ්ඨ ඉනිමක් දියත් කලේ නොදැවී ලකුණු 100 ක් ලබමිනි. 17 හැවිරිදි කමේෂ් , ශ්‍රී ලංකා ටෙස්ට් ක්‍රිකට් කණ්ඩායමේ නායක දිනේෂ් චන්දිමාල්ගේ බාල සොහොයුරාද වේ.

නාළන්ද විදුහල වෙනුවෙන් උමේක්ෂ දිල්ෂාන් කඩුළු 3 ක් දවා ලීය.

තරගයේ කාසියේ වාසිය දිනූ නාළන්ද විදුහල පළමුව පන්දුවට පහරදීමට නාළන්ද විදුහලට ආරාධනා කලේය. ඒ අනුව නාළන්ද විදුහළ සිය පළමු ඉනිමට පන්දුවාර 64.3 කදී සියල්ලන් දැවී ලකුණු 213 ක් රැස් කලේය. 

කෙසේ වෙතත් ආනන්ද විදුහල් පළමු ඉනිම ලකුණූ 141 කට සීමා කිරීමට නාළන්ද පන්දු යවන්නන් සමත් විය. එහිදී ආනන්ද ඉනිම විනාශ කළ සුහඟ විජේවර්ධන කඩුළු 6 ක් දවා ලීමට සමත් විය.

තරගයේ වීරයා ලෙසින් නාළන්ද විදුහල් නායක ලක්ෂිත රසාංජන සම්මාන දිනා ගත් අතර දක්ෂතම පිතිකරු ලෙසින් ආනන්ද විදුහලේ ශතක ලාබී කමේෂ් නිර්මාල් ද දක්ෂතම පන්දු යවන්නා ලෙසින් සුහග විජේවර්ධන සම්මාන දිනා ගත්තේය.

_KSR7128 _KSR7132 _KSR7149 _KSR7159 _KSR7165 _KSR7177 _KSR7182 _KSR7478 _KSR7483 _KSR7489 _KSR7493 3V2A6079 IBA_7586

 

ඡායාරූප- ක්‍රිශාන් රණසිංහ

 

 

කුසලධම්ම හිමිගේ දේහයට නන්දෙසින් ගෞරව

අපවත්වී වදාළ පුජ්‍ය දරණාගම කුසලධම්ම නාහිමිගේ මේවනවිට කොළඹ ශ්‍රී සම්බෝධී විහාරයේ තැන්පත්කර තිබේ.  උන්වහන්සේගේ දේහය  අද (04) අලුයම ශ්‍රී සම්බෝධී විහාරය වෙත වැඩම කරවා ඇත.

ඊයේ (03) උදෑසන අපවත් වූ දරණාගම කුසලධම්ම නාහිමිගේ දේහය පිළිබඳ ආදාහන පූජෝත්සවය ලබන 08 වන දින කොළඹ නිදහස් චතුරස්‍රයේ දී රාජ්‍ය අනුග්‍රහය සහිතව සිදුකිරීමට නියමිතය.

පුජ්‍ය දරණාගම කුසලධම්ම නාහිමිගේ දේහයට අවසන් ගෞරව දැක්වීම  සඳහා මේ වන විට දේශපාලඥයින් සහ ගිහි පැවිදි විශාල පිරිසක් පැමිණෙමින් සිටිති.

_DSC1130 _DSC1143 _DSC1185 _DSC1205 _DSC1230 _DSC1238 _DSC1266 _DSC1270