Category Archives: Top_story

අර්ජුන් මහේන්ද්‍රන්ට ඉන්ටර්පෝල් රතු නිවේදන

මහ බැංකු බැඳුම්කර ගනුදෙනුව සම්බන්ධයෙන් අත්අඩංගුවට ගැනීමට වරෙන්තු නිකුත් කර ඇති හිටපු මහ බැංකු අධිපති අර්ජුන් මහේන්ද්‍රන් මහතා අත්අඩංගුවට ගැනීමට ජාත්‍යන්තර පොලීසිය සමගින්ද රතු නිවේදනයක් නිකුත් කර ඇත.

 පොලිස් මාධ්‍ය ප්‍රකාශක පොලිස් අධිකාරී රුවන් ගුණසේකර මහතාගේ අත්සනින් යුතුව පොලිස් මාධ්‍ය ප්‍රකාශක කාර්යාලය මාධ්‍ය වෙත නිකුත් කළ නිවේදනයක මේ බව දැක්වෙයි.

Arjun-1

ක්‍රිකට් සභාපති පුටුවට අර්ජුන පත්කිරීමට සාකච්ඡා

ශ්‍රී ලංකා ක්‍රිකට් ආයතනයේ සභාපති තනතුර සඳහා අර්ජුන රණතුංග මහතා පත්කිරීමට රජයේ ඉහළම බලධාරීන්ගේ අවධානය යොමුව ඇතැයි වාර්තා වෙයි.

ඉදිරියේදී පැවැත්වීමට නියමිත ක්‍රිකට් නිලවරණයට අර්ජුන රණතුංග මහතාව පුළුල් සන්ධානයකින් ඉදිරිපත් කර ඔහුව ජයග්‍රහණය කරවීමට මෙහිදී අවධානය යොමුව තිබේ.

වත්මන් ක්‍රිකට් ආයතනයේ සභාපති තිලංග සුමතිපාල මහතාද නැවතවරක් ක්‍රිකට් සභාපති ධුරයට තරග කිරීමට නියමිතව තිබේ. පසුගිය නිලවරණයේදී අර්ජුන රණතුංග මහතා උපසභාපති තනතුරට තරග කළ අතර එහිදී ඔහු පරාජයට පත්ව ඇත.

අග්‍රාමාත්‍ය රනිල් වික්‍රමසිංහ මහතා අද (19දා) පෙරවරුවේදී අරලිය ගහ මන්දිරයේදි අලුත් අවුරුද්ද වෙනුවෙන් තේ පැන් සංග්‍රහයක් පැවැත්වූ අතර එයට අර්ජුණ රණතුංග මහතාද එක්ව සිටියේය.

මෙහිදීද මේ සම්බන්ධයෙන් නොනිල මට්ටමින් සාකච්ඡා වී ඇති බව වාර්තා වෙයි. 

09

අගමැති රනිල් වික්‍රමසිංහ මහතා හා අමාත්‍ය අර්ජුන රණතුංග මහතා අරලියගහ මන්දිරයේදී අද පැවැති තේ පැන් සංග්‍රහයේදී

ක්‍රිකට්වලින් ගහපු ගැහිල්ල මුල ඉඳලා අදිනවා – රන්ජන්

ක්‍රිකට් ක්‍රීඩාවේ සිදු වූ දූෂණ හා අක්‍රමිකතා ඉදිරියේදී හෙළි කරන බවත්, තරග පාවාදීම, සුපිරි ක්‍රීඩකයන් ඇමතිවරුන්ට නිවාස ලබාදීම පිළිබඳව මෙහිදී හෙළි කිරීමට කටයුතු කරන බවත් රාජ්‍ය අමාත්‍ය රන්ජන් රාමනායක මහතා පැවසීය.

ඊයේ (18දා) මාධ්‍යවේදීන් හමුවේ ඔහු මේ බව ඔහු ප්‍රකාශ කළේය.

මෙහිදී අදහස් දැක් වූ ඒ මහතා,

“ මා ළඟ තිබෙනවා මේ ගොල්ලෝ ක්‍රිකට් බෝඩ් එක හරහා හා ක්‍රිකට් ක්ෂේත්‍රය හරහා ගහපු ගැහිලි. බොන්ඩ් ස්කෑම් එක මොනවද? ළඟදී මට කියන්න බැරි මහත්වරු ගොඩක් එංගලන්තයේ සිට එනවා. අපි ළඟදී හම්බවෙනවා.

මම මුල ඉඳලා අදින්නම් ඩොලර් ලක්ෂ ගණන් ගහපුවා. මැච් විකිණීම, තරග පාවාදීම, සිම්බාබ්වේ මැච් එක ගැන. ක්‍රිකට්වල ටී.වී රයිට්ස් විකිණීම ගැන. කොහොමද ජාතික නාළිකාව තිබෙද්දී සී.එස්.එන්. එකට විකුණන්නේ. ඒවට එංගලන්තයේ තෑගි හැටියට ගෙවල් ලැබුණ ඒවා.

සුපිරි ක්‍රිකට් ක්‍රීඩකයෝ වෙලා හිටපු ඒ අය ක්‍රීඩා ඇමතිවරුන්ට ගෙවල් අරන් දීපුවා. කොළඹ ඉඩම් අරන් දීපුවා. වාහන තෑගි දීපුවා. මේ සියලු දේවල් ලිපි ගොනු සමග තිබෙනවා. මේ සියල්ලම ළඟදීම අණාවරණය කරනවා. ඒක පාර්ලිමේන්තුවේ සභාගත කරනවා. එෆ්.සී.අයි.ඩී, සී.අයි.ඩී, බ්‍රයිබරි කොමිෂන් එකට මේවා දීලා මේ ක්‍රිකට් හොරු ටික, ක්‍රිකට් ක්‍රීඩාව විනාශ කරපු සූදුකාරයෝව, බුකී කාරයොන්ව බෙල්ලෙන් අල්ලලා සිරගත කරන වැඩපිළිවෙළ මම දියත් කරනවා.

ඒකට මට ක්‍රිකට් බෝඩ් එකේ කොන්ද පණ තියෙන, කශේරුකාව තියෙන නිලධාරීන්ගේ, හිටපු ක්‍රිකට් ක්‍රීඩකයන්ගේ පූර්ණ සහයෝගය තියෙනවා. මාව විශ්වාස කරලා අදාළ ලිපිගොනු මට ගෙනත් දීලා තියෙනවා. අපි ළඟදීම හමුවෙනවා” යැයි පැවසීය.

Ranjan-Ramanayaka

 

ලංකාවේ සිටින තානාපතිවරු සීමාව ඉක්මවා කතා කළා

මහනුවර ඇතිවූ සිදුවීම් පාලනය කිරීමට රජය ගත් ඇතැම් ක්‍රියාමාර්ග පිළිබඳ ශ්‍රී ලංකාවේ සිටින විදෙස් තානාපතිවරුන් සීමාවෙන් එහාට ගොස් කතා කළ බවත්, ඒවාට ආණ්ඩුවක් ලෙස නොසැලුණු බවත් ජනපති මෛත්‍රීපාල සිරිසේන මහතා පැවසීය. එංගලන්තයේ සංචාරයක නිරත ජනාධිපතිවරයා ලන්ඩන් නුවර වෙසෙන ශ‍්‍රී ලාංකිකයන් අමතා මේ බව ඊයේ (17දා) ප්‍රකාශ කළේය.

එසේම විදේශයන්හි සිටින ශ්‍රී ලාංකිකයන්ට ශ්‍රී ලංකාව පිළිබඳ නිවැරදි තොරතුරු ගලා යෑම පිළිබඳ ප්‍රශ්නයක් තිබෙන බවද ඔහු කීය.

“ඔබ මෙහි ජීවත් වූවත් අපගේ මාතෘභූමිය පිළිබඳ තොරතුරු ඔබ දන්නවා. නමුත් කොතෙක් දුරට නිවැරදි තොරතුරු ඔබ වෙත ගලා එනවාද යන්න පිළිබඳ ප‍්‍රශ්නයක් තිබෙන බව මම දන්නවා. බොහෝ වෙලාවට පෞද්ගලික සහ සංවිධාන වශයෙන් හමුවී කතා කරනවා. එම සාකච්ඡා මගින් මා අවබෝධ කරගත් කරුණක් වන්නේ, මොනතරම් වැරදි තොරතුරු ඔබ අහනවාද, දකිනවාද කියන කාරණාවයි. අන්තර්ජාලයෙහි තිබෙන ප‍්‍රකාශන, ප‍්‍රවෘත්ති තුළ පැහැදිලි ලෙසම 75%ට වඩා තිබෙන්නේ සත්‍යයෙන් තොරවූ දේවල්. අසත්‍ය වූ දේවල්.

වැරදි තොරතුරු මොනතරම් වේගයෙන් විදේශයන්හි සිටින ශ‍්‍රී ලාංකිකයන්ට ලැබී තිබෙනවාද කියන කාරණාව මම දැකපු දෙයක්. රටේ සිදුවන දේ පිළිබඳ නිවැරදි තොරතුරු නොලැබීම සහ නොදැකීම. රජය සිදුකරන කටයුතු සම්බන්ධයෙන් හරිහැටි අවබෝධයක් නොතිබීම වැනි කරුණු ගණනාවක් මම දකිනවා.

මහනුවර ඇති වූ සිදුවීමේදී පැය කිහිපයක් තුළ අපි රජය විදියට ඇඳිරි නීතිය දැම්මා. හදිසි නීතිය දැම්මා. ත‍්‍රිවිධ හමුදාව යෙදෙව්වා. සමාජ වෙබ් අඩවි සම්පූර්ණයෙන්ම වසා දැම්මා. දැඩි විරෝධතා මැද තානාපතිවරුන්ට අපේ රටේ සිටින සමහර අයට ලොකු අමාරුවක් හැදුණා මේවා අපි කරනකොට. සමහර අය චෝදනා ස්වරූපයෙන් කතා කරන්න ගත්තා. විදේශීය තානාපතිවරු සීමාවෙන් එහා කතා කරන්න ගත්තා. ඒ කිසිම දෙයකට අපි සැලුණේ නැහැ. බය වුණේ නැහැ. ගන්න තිබුණු තීන්දු තීරණ අපි නිසියාකාරව ගත්තා. රටක් විදියට සිදුවීමට ගිය විශාල විනාශයක් අපට වළක්වාගන්න පුළුවන්කම ලැබුණා.

පසුගිය අවුරුදු තුනක තුනහමාරක කාලය තුළ අපේ රජය විශාල වැඩකොටසක් කරලා තිබෙනවා. ඒ වැඩවල ප්‍රතිඵල තිබෙනවා. ඒ ප‍්‍රතිඵල නිවැරදි ලෙස සමාජයට ගලා එන්නේ නැහැ. සත්‍යයෙන් තොර දේවල් තමයි වේගයෙන් ව්‍යාප්ත වෙන්නේ.

අපේ රටේ ඇතැම් මුද්‍රිත මාධ්‍ය සහ විද්‍යුත් මාධ්‍ය ආයතන රට තුළ තිබෙන නිදහස, ප‍්‍රජාතන්ත්‍රවාදය කොතරම් වැරදි විදියට භාවිත කරනවද කියන ප‍්‍රශ්නය අපි දකිනවා. සත්‍යයෙන් තොර දේවල්. ගැටුම් සහගත දේවල් නිතරම ඒවායේ ප‍්‍රචාරය වෙනවා. මාධ්‍යයේ තිබිය යුතු ගුණාත්මකභාවය කොතෙක් දුරට ඔවුන් රකිනවාද කියන ප‍්‍රශ්නය තිබෙනවා. ඒ නිසයි මම කියන්නේ අයහපත් දේ සමාජයට දීම නිසා රටේ ඇතිවන පසුබෑම් වෙනුවෙන් ඒ සෑම අංශයකම කෙනෙක් ඒ වගකීම ගත යුතු වෙනවා.”

Ms-01

දේශපාලකයන් ලංකාවේ ක්‍රිකට් විනාශ කරනවා – මුරලි

දේශපාලකයන් විසින් ශ්‍රී ලංකාවේ ක්‍රිකට් ක්‍රීඩාව විනාශ කරන බවත්, අවුරුද්දක් තුළ ක්‍රීඩකයන් 60ක් අත්හදා බැලීම අතාර්කික බවත් ශ්‍රී ලංකාවේ හිටපු සුපිරි දඟපන්දු යවන ක්‍රීඩක මුත්තයියා මුරලිදරන් සඳහන් කරයි.

ඉන්දියාවේ ‘ද ඉකොනොමික්ස් ටයිම්ස්’ පුවත් සේවය හා සම්මුඛ සාකච්ඡාවකට එක්වෙමින් ඔහු මේ බව ඊයේ (17දා) පවසා තිබේ.

එහිදී හෙතෙම වැඩිදුරටත් මෙසේ අදහස් දක්වා ඇත.

“ශ්‍රී ලංකා ක්‍රිකට් ක්‍රීඩාව මේ වන විට අවුල් ජාලාවක තිබෙන්නේ. දේශපාලකයන් ක්‍රීඩාව පාලනය කිරීමට පටන් අරගෙන තිබෙන්නේ. ක්‍රිකට් ක්‍රීඩාව පිළිබඳව අවම දැනුමක් සහිතව හෝ දැනුමක් නොමැති මේ අය ගතවන සෑම දිනයකම එය විනාශ කරමින් තිබෙනවා. ක්‍රිකට් කියන්නේ විශ්වාසයයි. ක්‍රීඩකයන්ට දක්ෂතා දැක්වීමට විශ්වාසයක් ගොඩ නැගිය යුතුයි.

ශ්‍රී ලංකා වර්ණ ඇඳුම අඳින විට ඔවුන්ට ගෞරවයක් ඇති විය යුතුයි. මම දිනකින් හොඳ පන්දු යවන්නෙක් වුණේ නෑ. අවුරුදු 4-5ක් අර්ජුන මට විශ්වාසය දුන්නා. දැන් පිතිකරුවන් පන්දුවට පහරදීමට යන විට කියන්නේ ඔබ ලකුණු රැස්කළ යුතුයි නැති නම් අපි ඔබව බංකුවේ තබනවා කියලා. පන්දු යවන්නන්ටත් මේ දේමයි.

හැම අංශයකින්ම ශ්‍රී ලංකාවේ ක්‍රීඩකයන් 60ක් පමණ අත්හදා බලා තිබෙනවා. අවුරුද්දකට ක්‍රීඩකයන් 60? මෙය අතාර්කිකයි. මෙයින් පේනවා දැක්මක් නැතිකම. සෑම අවස්ථාවකම සිදුකරන වෙනස්වීම්වලින් අනාගතයේදී ක්‍රීඩාව වෙනස් වෙනවා.”

Murali

විධායක ජනපති ධුරය අහෝසි කිරීමේ සහායට මහින්දගෙන් අනුරට කොන්දේසියක්

විධායක ජනාධිපති ධූරය අහෝසි කිරිමේ යෝජනාව සම්මත කර ගැනීම සඳහා ඒකාබද්ධ විපක්ෂයේ මන්ත්‍රිවරුන්ගේ සහය අවශ්‍යනම් එම යෝජනාව පාර්ලිමේන්තුවට ඉදිරිපත් කර සම්මත කළ දිනයේදීම පාර්ලිමේන්තුව විසුරුවා හැරිය යුතුයැයි හිටපු ජනාධිපති මහින්ද රාජපක්ෂ මහතා විසින්  ජනතා විමුක්ති පෙරමුණේ නායක අනුර කුමාර දිසානායක මහතාට දැනුම්දුන් බව පාර්ලිමේන්තු මන්ත්‍රි බන්දුල ගුණවර්ධන මහතා පැවසීය.

 අද (17දා) කොළඹදී පැවැති මාධ්‍ය හමුවකදී ඔහු මේ බව සඳහන් කළේය.

පාර්ලිමේන්තුව විසුරුවා හැර මහමැතිවරණයක් පැවැත්වීමේ සූදානමක් නොමැතිනම් ඒකාබද්ධ විපක්ෂයේ සහය බලාපොරොත්තු නොවන ලෙස හිටපු ජනාධිපතිවරයා එහිදි අවධාරණය කළ බවද මන්ත්‍රිවරයා සඳහන් කළේය.

62

 

 

මහින්දානන්ද අලුත්ගමගේට ඇප

ඇප කොන්දේසි සපුරා ගැනීමට නොහැකිවීමෙන් ඊයේ (16දා) රක්ෂිත බන්ධනාගාර ගත කෙරුණු හිටපු ක්‍රීඩා අමාත්‍ය මහින්දානන්ද අලුත්ගමගේ මහතා අද (17දා) ඇප කොන්දේසි සපුරාලීමට සමත්වූ හෙයින් ඔහුව ඇප මත නිදහස් කිරීමට කොටුව මහේස්ත්‍රාත් අධිකරණය නියෝග කළේය.

රුපියල් මිලියන 39ක රාජ්‍ය මුදල් අවභාවිත කරමින් පසුගිය ජනපතිවරණ සමයේදී කැරම් හා දාම්බෝඩ් මිලදී ගැනීමේ සිදුවීමකට අදාළව ප්‍රකාශයක් ලබාගැනීමට පොලිස් මූල්‍ය අපරාධ ඒකකයට කැඳවූ හිටපු ක්‍රීඩා අමාත්‍යවරයා එහිදී අත්අඩංගුවට පත්විය.

පසුව ඔහු රුපියල් 35000ක මුදල් ඇපයක් හා රුපියල් ලක්ෂ 5 බැගින් වූ ශරීර ඇප දෙකක් මත මුදාහැරණි. මෙහිදී මන්ත්‍රීවරයාගෙන් විදෙස් ගමන් තහනම් කළ අතර එයට අදාළව ඔහුගේ විදෙස් ගමන් බලපත්‍රය අධිකරණයට ඉදිරිපත් කිරීමට නොහැකිවීම හේතුවෙන් ඔහු රක්ෂිත බන්ධනාගාර ගත කෙරිණ.

මන්ත්‍රීවරයා තම ගමන් බලපත්‍රය මහාධිකරණය හමුවේ පවතින බවට ප්‍රකාශ කළත් එය තහවුරු කර ගැනීමට නොහැකිවීම හේතුවෙන් බන්ධනාගාර ගත කෙරිණි.

Mahindananda-Aluthgamage

 

හිටපු ඇමති මහින්දානන්ද අලුත්ගමගේ රිමාන්ඩ්

Mahindananda-Aluthgamage

පොලිස් මූල්‍ය අපරාධ විමර්ශන කොට්ඨාසයෙන් අත්අඩංගුවට ගනු ලැබ ඇප නියම වූ හිටපු ක්‍රීඩා ඇමැති මහින්දානන්ද අලුත්ගමගේ මහතා  ඇප කොන්දේසි සපුරාලීමට අපහොසත් වීම හේතුවෙන් රිමාන්ඩ් කරන ලෙස කොටුව මහේස්ත්‍රාත් ලංකා ජයරත්න මහත්මිය නියෝග කළාය.
 
හිටපු ඇමැතිවරයාට රුපියල් 35,000ක මුදල් සහ රුපියල් ලක්ෂ පහ බැගින් වූ ශරීර ඇප දෙකක් මත මුදා හැරීමට කොටුව මහේස්ත්‍රාත් අධිකරණය අද නියෝග කර තිබුණි. 
 
හිටපු අමාත්‍යවරයාගේ විදෙස් ගමන් තහනම් කළ මහේස්ත්‍රාත්වරිය විදෙස් ගමන් බලපත්‍රයට අධිකරණට ඉදිරිපත් කරන ලෙස නියෝග කළත් එම ඇප කොන්දේසිය සපුරාලීමට ඒ මහතා අපහොසත්වීම හේතුවෙන් ඔහු මෙලෙස රිමාන්ඩ් භාරයට පත් කෙරිණි.  
 
කොළඹ මහාධිකරණයේ විභාග කෙරෙන වෙනත් නඩුවක් සඳහා ඔහුගේ ගමන් බලපත්‍රය අධිකරණයේ භාරයට පත් කර ඇති බව ඔහුගේ නීතීඥවරුන් පැවසුවත් ඒ බව සනාථ කිරීම සඳහා අවශ්‍ය ලේඛණ ඉදිරිපත් කිරීමට නොහැකි වූ බවද අධිකරණයේදී හෙළි විය.

මහින්දානන්ද අලුත්ගමගේට ඇප

පොලිස් මූල්‍ය අපරාධ ඒකකය විසින් අත්අඩංගුවට ගත් හිටපු ක්‍රීඩා අමාත්‍ය මහින්දානන්ද අලුත්ගමගේ මහතා රුපියල් 35000ක මුදල් ඇපයක් හා රුපියල් ලක්ෂ පහ බැගින් වූ ශරිර ඇප දෙකක් මත මුදා හැරීමට කොටුවව මහේස්ත්‍රාත් අධිකරණය නියෝග කළේය.

ඊට අමතරව ඔහුගේ විදෙස් ගමන් තහනම් කෙරිණ. පසුගිය ජනපතිවරණ සමයේදී රජයෙ මුදල් අවභාවිත කරමින් කැරම් හා දාම් ලෑලි මිලදී ගැනීමේ සිදුවීමකට අදාළව ප්‍රකාශයක් ලබාගැනීමට පොලිස් මූල්‍ය අපරාධ ඒකකයට කැඳවූ හිටපු ක්‍රීඩා අමාත්‍යවරයා එහිදී අත්අඩංගුවට පත්විය.

Mahindananda-Aluthgamage

 

ජනපති මැඳුරේ අවුරුදු සැමරුම – විපක්ෂ නායකත් එයි

ජනපති මෛත්‍රීපාල සිරිසේන මහතාගේ ප්‍රධානත්වයෙන් අලුත් අවුරුදු සැමරුම ජනපති නිල නිවසේදී පැවැත්විණි. මෙම අවස්ථාවට විපක්ෂනායක ආර් සම්බන්ධන් මහතාද එක්ව සිටි අතර එය විශේෂත්වයක් විය.

05 07 09 10 12 15 16 17 18