Category Archives: Top_story

අයවැය දෙවැනිවර කියවීම සම්මතයි

 

2018 වර්ෂය සඳහා ආණ්ඩුව ඉදිරිපත් කළ අයවැය ලේඛණය වැඩි ඡන්ද 93 න්  පාර්ලිමේන්තුවේදී සම්මත විය. අයවැය දෙවැනිවර කියවීමේ ඡන්ද විමසීම අද(16දා) පස්වරුවේ පාර්ලිමේන්තුවේදී පැවැත්වුණ අතර අයවැයට පක්ෂව ඡන්ද 151 ක් ලැබුණු අතර විරුද්ධව ඡන්ද 58 ක් ලැබුණි . විපක්ෂයේ ජනතා විමුක්ති පෙරමුණ සහ ඒකාබද්ධ විපක්ෂයේ මන්ත්‍රීවරුන් අයවැයට විරුද්ධව ඡන්දය භාවිතා කළේය.

දෙමල ජාතික සන්ධානයේ මන්ත්‍රීවරුන් අයවැයට විරුද්ධව ඡන්දය ප්‍රකාශ කරන බව පවසා තිබුණද ඡන්දය විමසන අවස්ථාවේදී පක්ෂව ඡන්දය භාවිතාකළේය.

sri_lanka_parliament_march_2016

මොරටුව සරසවිය ලෝකයේ තෙවැනි තැනට

අන්තර්ජාතික විදුලි හා ඉලෙක්ට්‍රොනික ඉංජිනේරු ආයතනයේ සංවේදක කවුන්සිලය සංවිධානය කළ ‘2017 IEEE' සංවේදක සම්මේලනයේදී ගොඩනැගිලි ස්වයංක්‍රීයකරණ පද්ධතියක් ඉදිරිපත් කළ මොරටුව සරසවියේ යාන්ත්‍රික ඉංජිනේරු දෙපාර්තමේන්තුවට තෙවැනි ස්ථානය හිමිව තිබේ.

එංගලන්තයේ ග්ලාස්ගොව්හිදී මෙම සම්මේලනය 16 වැනි වරට පැවැති අතර, ලෝකයේ දියුණු රටවල් ඇතුළු රටවල් රැසක් විවිධ තාක්‍ෂණික අංශ නියෝජනය කරමින් සංවේදක හා ඒවායේ යෙදුම් සම්බන්ධ පර්යේෂණ ව්‍යාපෘති 1000කට අධික ප්‍රමාණයක් ඉදිරිපත් කර තිබිණි.

පශ්චාත් උපාධි පර්යේෂණයේ එක් අදියරක් ලෙස ආරම්භ කළ මෙම ව්‍යාපෘතිය යාන්ත්‍රික ඉංජිනේරු දෙපාර්තමේන්තුවේ පශ්චාත් උපාධි අපේක්‍ෂක ජානක බස්නායක සහ කසුන් දේවින්ද විසින් නිර්මාණය කරන ලදී.

යාන්ත්‍රික ඉංජිනේරු දෙපාර්තමේන්තුවේ ජ්‍යෙෂ්ඨ කතිකාචාර්ය, මෙකාෙටානික් අංශයේ සම්බන්ධීකාරක ආචාර්ය  රංජිත් අමරසිංහ, යාන්ත්‍රික ඉංජිනේරු දෙපාර්තමේන්තුවේ මහාචාර්ය රාහුල අතලගේ, විදුලි ඉංජිනේරු දෙපාර්තමේන්තුවේ ආචාර්ය බුද්ධික ජයසේකර යන මහත්වරුන්ගේ උපදේශන සහ අධීක්‍ෂණයට යටතේ මෙය නිර්මාණය කර තිබේ. එමෙන්ම මෙකාට්‍රොනික්ස් විද්‍යාගාරයේ සලිත රණසිංහ සහ චතුර ජීවන්ත යන මහත්වරුන්ගේද සහාය ලැබී ඇත.

අප කළ විමසීමකදී අදහස් දැක්වූ ආචාර්ය රංජිත් අමරසිංහ මහතා, ‘

“වර්තමාන ලෝකයේ විදුලිබල සැපයුම් අර්බුදය සහ බලශක්ති නිෂ්පාදනයේදී සිදුවන පාරිසරික බලපෑම මත විවිධ ක්‍ෂේත්‍ර ඔස්සේ බලශක්ති සුරැකීමේ කාර්යක්‍ෂමතාව ඉහළ දැමීම සඳහා පර්යේෂණ සිදුවෙමින් පවතිනවා. සමස්ත බලශක්ති පරිභෝජනයෙන් සියයට 30 – 50ක් පමණ ගෘහස්ථ සහ වාණිජමය ගොඩනැගිලි මගින් සිදුවෙනවා. ගොඩනැගිලි තුළ සුවපහසුව වැඩිදියුණු කිරීමේ අවශ්‍යතාව මත ස්වයංක්‍රීයකරණ කිරීමට අපේ අවධානය යොමුවුණා. ක්‍ෂුද්‍ර විද්‍යුත්, විශේෂිතව නිපද වූ සංවේදක කිහිපයක් සහ ඩිජිටල් සංඥා සකසන මත මෙම පද්ධතිය ගොඩනැගී තිබෙනවා. මෙහිදී මූලික වශයෙන් සිදු කෙරෙනුයේ ගොඩනැගිල්ල තුළ ක්‍රියාකාරී උපකරණ සහ ඒවායේ විදුලි පරිභෝජන තත්ත්ව ස්වයංක්‍රීයව සංවේදනය වීමයි.

ගොඩනැගිල්ල තුළ සිටින මිනිසුන්, ඔවුන්ගේ ස්ථාන, ගොඩනැගිල්ලේ බිම් තලය මත විවිධ ස්ථාන (ක්‍රියාකාරී ස්ථාන, අක්‍රීය ස්ථාන, පදික ස්ථාන) සැකසී ඇති ආකරයත්, ගොඩනැගිල්ලේ ඇතුළත සහ පිටත පාරිසරික තත්ත්වයනුත් සංවේදනය වීම මෙම පද්ධතිය තුළින් සිදුකෙරෙනවා. මෙම පද්ධතියේ සංවේදන දත්ත පරිගණක අතුරු මුහුණතක් මතින් නිරීක්‍ෂණය කළ හැකි වෙනවා. මෙය රැහන් රහිතව ස්වයංක්‍රීය පද්ධතියක් සමග සම්බන්ධ වෙමින් ගොඩනැගිල්ල තුළ වඩා කාර්යක්‍ෂම සහ සුවපහසු පරිශ්‍රයක් පවත්වාගෙන යෑමට අවස්ථාව සලස්වනවා.

මෙම සම්මේලනයට ලෝකයේ දැවැන්ත රටවල් රැසක් සහභාගි වුණා. එහිදී හොඳම පර්යේෂණ 22 අතරට අපට එන්න හැකිවුණා. ඉන් අනතුරු එම පර්යේෂණ 22 අතරින් විශිෂ්ට පර්යේෂණ අතරින් තෙවැන් ස්ථානය දිනාගැනීමට හැකිවුණා. එහි ප්‍රථම ස්ථානය සහ දෙවැනි ස්ථානය ඇමෙරිකා එක්සත් ජනපදයට හිමිවුණා.” යැයි පැවසීය.

1 copy 2 copy 2 Untitled-1 copy

ගයාන් සූරියඅාරච්චි

 

වෙල්ගම හා පවිත්‍රා ඇතුළු පිරිසකගේ ශ්‍රීලනිප සාමාජිකත්වය අහෝසියි?

ඒකාබද්ධ විපක්ෂය නියෝජනය කරන  කුමාර වෙල්ගම, ප්‍රසන්න රණතුංග, සී.බී. රත්නායක, පවිත්‍රාවන්නිආරච්චි සහ දිලුම් අමුණුගම යන මන්ත්‍රීවරුන්ට එරෙහිව විනය පරීක්ෂණ පවත්වා ශ්‍රී ලංකා නිදහස් පක්ෂ සාමාජිකත්වය අහෝසි කිරීමට එම පක්ෂය සූදානම් වන බව වාර්තා වේ.

ඉදිරි පළාත් පාලන මැතිවරණයට පෙර පවත්වන  මීළඟ මධ්‍යම කාරක සභා රැස්වීමේදී විනය පරීක්ෂණ පැවැත්වීමේ තීන්දුව ගත යුතුයැයි පක්ෂයේ ජ්‍යෙෂ්ඨයන් පිරිසක් සාකච්ඡා කර තිබෙන බවද දේශපාලන ආරංචි මාර්ග සඳහන් කරයි.

ඒ අනුව මෙම මන්ත්‍රීවරුන්ට එරෙහිව  විනය පරීක්ෂණ පවත්වා පක්ෂ සාමාජිකත්වය අහෝසි කිරීමටත්, සන්ධානයේ මහලේකම්වරයා මාර්ගයෙන් මැතිවරණ කොමිසම දැනුවත් කර පාර්ලිමේන්තු මන්ත්‍රී ධුර අහෝසි කිරීමටත් මෙම සාකච්ඡාවේදී අවධානය යොමුවී ඇතැයිද වාර්තා වේ.

මෙවැනි ක්‍රියාමාර්ගයක් ගත් පසු ඒකාබද්ධ විපක්ෂයේ අනෙකුත් මන්ත්‍රීවරුන් නිතැතින්ම පක්ෂයේ තීන්දුවලට අනුකූල වන තත්ත්වයක් නිර්මාණය විය හැකි බවද මෙහිදී අවධානයට යොමුවී තිබේ.

ශ්‍රී ලංකා නිදහස් පක්ෂයත්, ඒකාබද්ධ විපක්ෂයත් අතරේ හවුල් ගිවිසුමක් ඇති කරගැනීමට ගත් සියලු උත්සාහයන් ව්‍යර්ථ වීම සම්බන්ධයෙන් මෙහිදී දීර්ඝ වශයෙන් සාකච්ඡා කර තිබෙන අතර, එවැනි හවුලකට දැඩි විරෝධය පළ කරන වෙල්ගම, ප්‍රසන්න, පවිත්‍රා, සී.බී, දිලුම් වැනි මන්ත්‍රීවරුන්  පළමු වටයේදීම ඉවත් කර දැමිය යුතුයැයි එක් ඇමැතිවරයෙකු එහිදී පවසා ඇතැයිද වාර්තා වේ.

SLFP-Logo copy

 

 

 

ශ්‍රීලංනිප අැමති 6ක් විපක්ෂයට?

පළාත් පාලන මැතිවරණය ප්‍රකාශයට පත් කළ විට ආණ්ඩුවේ සිටින ආමාත්‍යවරුන් හා නියෝජ්‍ය අමාත්‍යවරුන් 6 දෙනෙකු අවස්ථා දෙකකදී පාර්ලිමේන්තුවේ විශේෂ ප්‍රකාශයක් සිදුකර විපක්ෂයට එක්වීමට සූදානමින් සිටින බව වාර්තා වෙයි.

බස්නාහිර, සබරගමුව, වයඹ, නැගෙනහිර යන පළාත් නියෝජනය කරන මෙම ඇමතිවරුන් ආණ්ඩුවේ නායකයන්ගේ ක්‍රියාකලාපය සම්බන්ධව දැටි කළකිරීමෙන් පසුවන බව දේශපාලන ආරංචි මාර්ග සඳහන් කරයි.

මැතිවරණ කොමිසම විසින් පළාත් පාලන මැතිවරණයට දින නියම කළ විට ප්‍රථමයෙන් බස්නාහිර,වයඹ හා නැගෙනහිර පළාත් නියෝජනය කරන ඇමතිවරයෙකු හා නියෝජ්‍ය ඇමතිවරුන් දෙදෙනෙකු ආණ්ඩුවෙන් ඉවත්වීමට පළාත් පාලන මැතිවරණ ව්‍යාපාරය අතරතුරදී බස්නාහිර,වයඹ හා සබරගමුව යන පළාත් නියේජනය කරන ඇමතිවරුන් .තුන්දෙනෙකු ආණ්ඩුවෙන්ඉවත්වීමටද සාකච්ඡා කොට ඇතිබව වාර්තා වෙයි.

ජනාධිපති මෛත්‍රීපාල සිරිසේන මහතාගේ පාර්ශ්වය හා හිටපු ජනාධිපති මහින්ද රාජපක්ෂ මහතාගේ පාර්ශ්වය සමගි කරවීමට පසුගිය කාලය පුරා සාකච්චා පැවැත්වූ මෙම ඇමතිවරුන්ට බලාපොරොත්තු වූ මට්ටමේ ප්‍රතිඵලයක් ලබාගැනීමට නොහැකි වී ඇතැයිද වාර්තා වෙයි.

SLFP-Logo copy

තිසාවැව් ජලයෙන් ශ්‍රී මහා බෝධීන් වහන්සේ දෝවනය කරන්නේ නෑ

තිසාවැවේ ජලය ලබාගෙන ශ්‍රී මහ බෝධීන්වහන්සේ දෝවනය කිරීම සිදුනොකරන බවත්, ගිහිපැවිදි කණ්ඩායමක් ගෙනයන ප්‍රචාරක වැඩපිළිවෙළ නිසා අටමස්ථාන පූජා භූමියට වන්දනාවේ පැමිණෙන බැතිමතුන්ට පිරිසුදුවීම සඳහා දියනා ගැනීමට ස්ථානයක් නොමැතිවී ඇතිබවත් අටමස්ථානාධිපති පූජ්‍ය පල්ලේගම සිරිනිවාස නාහිමියෝ පැවසූහ.

පොලිස්පති පූජිත ජයසුන්දර මහතා අටමස්ථානාධිපති නාහිමියන් බැහැදැක සුවදුක් විමසීමට පැමිණි අවස්ථාවේ උන්වහන්සේ මේබව පැවසූහ.බැතිමතුන්ට අවහිර ඇතිවන නීති ඉවත්කිරීමට පොලීසිය පියවර ගතයුතු බව උන්වහන්සේ අවධාරණය කළ අතර, තිසාවැවේ දියනාන පිරිස් අත්අඩංගුවට ගැනීම වැළැක්වීමට පියවර ගතයුතු බවට උන්වහන්සේ මෙහිදී පොලිස්පතිවරයාට අවධාරණය කළහ.

එහිදි වැඩිදුරටත් අනුශාසනාවක්කළ පූජ්‍ය පල්ලේගම සිරිනිවාස නාහිමියන්,

“පිටස්තරින් පැමිණි ස්වාමීන්වහන්සේලා පිරිසක් ගිහි පිරිසක් සමග එක්වෙලා තමයි මේ දේවල් කරන්නේ.මේ පුරාණ වැව් රජදරුවන් ඉදිකළේ බැතිමතුන්ගේ අවශ්‍යතාවන්ට.රජකාලේ රජ දරුවන්ගේ සිට මේ දේවල් ආරක්ෂා කළේ අපි.පැරණි ඇත්තෝඒවා දන්නවා.දැන් පිටින් ආපු කට්ටිය මේවට නීති දාන්න පටන් අරගෙන.පසුගිය දිනක තිසාවැවේ දියනෑ අයෙකු අත්අඩංගුවට අරගෙන අධිකරණයට ඉදිරිපත්කර තිබ්බා.

සිරිපාදේ යන උදවිය නල්ලතන්නියේ සීත ගඟුලෙන් දිය නානවා.කතරගමට යන උදවිය මැණික් ගඟෙන් දිය නානවා.අනුරාධපුර අටමස්ථානයට පැමිණෙන බැතිමතුන්ට මේ වන විට දිය නාගෙන පිරිසුදු වෙන්න තැනක් නෑ.බැතිමතුන් දියනාගෙන පිරිසුදුවෙලයි මේ සිද්ධස්ථාන වැදපුදා ගන්න එන්න ඕන.

ජයශ්‍රී මහබෝධීන්වහන්සේ දෝවනය කිරීමට තිසාවැවේ පැන් භාවිතයට ගන්නවා, ඒ නිසා ජලය අපවිත්‍ර වෙනවා කියලා විවිධ බොරු ප්‍රචාර යවලා නැති ගැටලු ඇති කරනවා.ජය ශ්‍රී මහ බෝධීන් වහන්සේ දෝවනය සඳහා තිසාවැවේ ජලය භාවිත කරන්නෙ නෑ.ජනතාවට අවහිරයක් නොවන ආකාරයෙන් කටයුතු සිදුකරන්න කියලා පොලිස් නිලධාරීන්ට උපදෙස් දෙන්න කියා මා ඉල්ලා සිටිනවා”

1

 

 

පොලිස් නිලධාරීන් 16362ක් සහභාගිවූ විශේෂ මෙහෙයුමක්

පොලිස්පති පූජිත් ජයසුන්දර මහතාගේ උපදෙස් මත පොලිස් නිලධාරින් 16362ක සහභාගිත්වයෙන් විශේෂ මෙහෙයුමක් පවත්වා ඇත. ඊයේ රාත්‍රී 11.00 සිට අද අලුයම 3.00 දක්වා මෙම මෙහෙයුම පවත්වා ඇත.

එහිදී රථවාහන නඩු 5744ක් ඇතුළු විවධ අපරාධ සම්බන්ධයෙන් වැටලීම් කිහිපයක්ම සිදුකර තිබේ. එසේම සැකපිට පුද්ගලයන් 962ක් අත්අඩංගුවට ගෙන ඇත.

මීට අමතරව නීති විරෝධී මත්පැන් වැටලීම් 948ක්, වරෙන්තුකරුවන් 758ක් අත්අඩංගුවට ගැනීම, අපරාධ සඳහා අවශ්‍ය පුද්ගයන් 86ක් අත්අඩංගුවට ගැනීම නීති විරෝධී ගින අවි 03ක්ද අත්අඩංගුවට ගෙන තිබේ.

sri_lanka_police

 

 

විදුලි මෝටර් රථවලට අඩුකළ ලක්ෂ 10ක වාසිය පාරිභෝගිකයන්ට නෑ – වාහන ආනයනකරුවෝ

මෙවර අයවැයෙන් විදුලි මෝටර් රථ සඳහා අඩුකළ රුපියල් ලක්ෂ 10ක මුදලේ වාසිය පාරිභෝගිකයන්ට හිමි නොවන බව වාහන ආනයනකරුවන්ගේ සංගමයේ සභාපති සම්පති මෙරින්චගේ මහතා පවසයි.

එම වාසිය පාරිභෝගිකයාට අත්වීමට නම් විදුලි මෝටර් රථ ආනයනයේදී දැනට නම් කර ඇති බ්‍රෑන්ඩ් නිව් හා රීකන්ඩිෂන් නම් වූ බෙදීම් ඉවත් කළ යුතු බවත් ඔහු සඳහන් කළේය.

කොළඹදී අද (10දා) පැවැති මාධ්‍ය හමුවකදී ඔහු මේ බව සඳහන් කළේය.

අයවැයෙන් ලැබුණ වාසිය දැනට විදුලි මොටර් රථ ගෙන්වන නියෝජිත ආයතනවලට හිමිවන බවත් ඒ හරහා රට තුළ ඒකාධිකාරියක් නිර්මාණය විය හැකි බවත් එම සංගමයේ ලේකම් කිර්ති ගුණවර්ධන මහතා පැවැසීය. 

මීට අමතරව අයවැය හරහා ඇක්වා, වෙසල් හා ඇක්සියෝ මෝටර් රථවල මිල ලක්ෂ 7.5 කින් පමණ වැඩිවිය හැකි බවත් එම සංගමය සඳහන් කළේය.

අයවැය හරහා පොඩි වාහනයක් මිලදී ගැනිමේ සිහිනයෙන් සිටි පුද්ගලයන්ගේ සිහිනය බොඳවි ඇති බවත් එම සංගමය වැඩිදුරටත් සඳහන් කළේය.

Electric-Vehicles

රුපියල් බිලියන 675ක අයවැය හිඟයක්

(UPDATE) 

2018 වසර සඳහා රුපියල් බිලියන 675ක අයවැය හිඟයක් සහිතව 2018 වසර සඳහා වන අයවැය මුදල් අමාත්‍ය මංගල සමරවීර මහතා පාර්ලිමේන්තුවට ඊයේ (09දා) ඉදිරිපත් කළේය.

'නීල හරිත අයවැය : එන්ටර්ප්‍රයිස් ශ්‍රී ලංකා' යන තේමාව යටතේ එම අයවැය ඉදිරිපත්කෙරිණි.

2018 සමස්ත ආදායම රුපියල් බිලියන 2,326ක් ලෙස ඇස්තමේන්තු ගත කර ඇති අතර, එහි සමස්ත වියදම රුපියල් බිලියන 3001ක් බවට ඇස්තමේන්තුගත කර තිබේ.

ඒ අනුව සමස්ත අයවැය හිඟය රුපියල් බිලියන 675ක් වන අතර, එය දළ දේශීය නිෂ්පාදිතයෙන් 4.8% කි. 2017 වසර සඳහා ඉදිරිපත් කළ අයවැයේ හිඟය රුපියල් බිලියන 680ක් විය.එය දළ දේශීය නිෂ්පාදිතයෙන් 5.2%ක් විය. රාජ්‍ය ආදයමෙන් රුපියල් බිලියන 2034ක්ම ආණ්ඩුව ලබා ගැනීමට අපේක්ෂා කරන්නේ බදු හරහාය.

2018 සඳහා වන ආදායම් යෝජනාවලදී රජය වැඩිම බදු ආදායමක් ලබාගැනීමට අපේක්ෂා කරන්නේ මෝටර් රථ නිෂ්පාදන බදු, සුඛෝපභෝගී වාහන සඳහා වන බදු සශෝධන, එකතු කළ අගය මත බදු සහ ජාතිය ගොඩනැගීමේ බදු හරහා රුපියල් මිලියන 25,000 බැගින් බදු අය කරමිනි.

ණය ආපසු ගෙවීමේ බද්ද රුපියල් මිලියන 20,000ක් සහ  මද්‍යසාර සඳහා වන බදු සංශෝධන හරහා රුපියල් මිලියන 10000ක් උපයාගැනීමටද රජය අපේක්ෂා කරයි.

මෙය යහපාලන ආණ්ඩුවේ තෙවැනි අයවැය වන අතර, සමස්තයක් ලෙස ශ්‍රී ලංකාවේ 72 වැනි අයවැයයි. මුදල් අමාත්‍ය මංගල සමරවීර මහතාගේ මංගල අයවැයද මෙය වෙයි.

අයවැය යෝජනා යටතේ විද්‍යුත් වාහන සඳහා රුපියල් ලක්ෂ 10ක බදු සහනයක් ලබාදී ඇති අතර,එන්ජින් ධාරිතාව 2500ට වැඩි සුඛෝපභෝගී වාහන සඳහා විශේෂ බද්දක් අයකෙරේ. ඒ හරහා එවැනි වාහනවලින් රුපියල් ලක්ෂ 25ක පමණ බද්දක් අයවනු ඇත.

ඩීසල් ත්‍රිරෝද රථ සඳහා රුපියල් 50,000ක බද්දක් අය කෙරෙනු ඇති අතර, විද්‍යුත් ත්‍රිරෝද රථ හා විද්‍යුත් බස් රථ සඳහාද බදු සහන හිමිව තිබේ. එසේම එවැනි වාහන සඳහා ණය අනුපාතය 90/10ක් බවටද පත්කර ඇත.

වාහන සඳහා කාබන් බද්දක් හඳුන්වාදී ඇති අතර,මෙම බද්ද දිනකපදනම යටතේ අයකිරීමට නියමිතය. එම බද්ද දිනකට යතුරුපැදි සඳහා ශත 17ක්, මෝටර් රථ සඳහා රුපියල් 1.78ක් සහ බස් රථ සඳහා රුපියල් 2.74ක් වෙයි.

කෑන් බීර මත අදාළ වූ නිෂ්පාදන විධි විධාන බද්ද ඉවත් කිරීමට අයවැයෙන් යෝජනා කෙරුණු අතර, සැර මත්පැන් සඳහා බදු වැඩි කර තිබේ.

පැණි රස බීම සඳහා සීනි බද්දක් හඳුන්වා දී ඇති අතර, එය  ග්‍රෑමයකට ශත 50ක අගයකි.

ක්‍රීඩා සපත්තු සඳහා බදු නිදහස් කර තිබේ.  මේ අතර ක්‍රීඩා, සංචාරක කර්මාන්තය ප්‍රවර්ධනය කිරීමේ අදහස ඇතිව මාර්ගවල ධාවනය නොකරන සංයෝජිත ක්‍රීඩා  වාහන සඳහා බදු සංශෝධන ගෙන ඒමට නියමිතය.

විශ්විවිද්‍යාල ශිෂ්‍යයන් සඳහා රක්ෂණ ක්‍රමයක් හඳුන්වාදීමටත්, විශ්වවිද්‍යාලවල පහසුකම් වර්ධනය කිරීමටත් මුදල් වෙන් කර තිබිණි.

ජංගම දුරකථන කුලුනු සංඛ්‍යාව අඩු කිරීමේ ක්‍රියාවක් ලෙස එක් කුලුනකට මසකට රුපියල් ලක්ෂ 02ක ගාස්තුවක් අයකිරීමටද යෝජනා කර තිබේ.

සියලු බැංකු ගණුදෙනුවලදි ණය ආපසු ගෙවීමේ බද්දයක් ලෙස 1000කට ශත විස්සක් අය කෙරේ.

ජාතික ආරක්ෂාව,තරුණ හා කාන්තා ව්‍යවසායකයන් දිරිමත් කිරීම සඳහාදපුහුණු පාඨමාලා සහ ණය පහසුකම් යෝජනා කර තිබේ.

තිරසාර කෘෂි සහ ධීවර ආයෝජන අවස්ථා දිරිගැන්වීම, සංවර්ධන බැංකුවක් ස්ථාපිත කිරීම ඇතුළු ව්‍යාපාර ආරම්භ කිරීමට සහාය වීම, දේශීය ව්‍යවසායකයන් තුළින් ගෝලීය නායකයන් බිහිකිරීම,සංචාරක කර්මාන්තය දියුණු කිරීම, දේශීය ආයෝජන සවිබලගැන්වීම, අධ්‍යාපන හා උසස් අධ්‍යාපනය, ක්‍රීඩා, සෞඛ්‍ය, නිවාස නාගරික හා ග්‍රාමීය යටිතල පහසුකම් සංවර්ධනය,සංහිඳියාව, රාජ්‍ය අංශයේ සේවා සැපයීම,ජාතික උරුමය, සංස්කෘතික හා සෞන්දර්ය, ප්‍රාග්ධන වෙළෙඳපොළ ශක්තිමත් කිරීම, නීති ප්‍රතිසංස්කරණ,සැමට සුරක්ෂිත පරිසරයක් නිර්මාණය කිරීම ආදී යෝජනා ක්‍රියාත්මක කිරීම සඳහාද අයවැයෙන් මුදල් වෙන්කර තිබිණි.

blog_1510225674-teDVwi0SLG


ෂෙහානි දිල්රුක්ෂිකා

th-(3)

වාහන ප්‍රතිපත්තිය 

  1. රටේ සියලුම වාහන 2040 ඛනිජ තෙල් නොවන වාහන මගින් ධාවනය කිරීමට අපේක්ෂා කෙරේ.
  2. රජයේ සියලුම වාහන 2025 වන විට දෙමුහුන් හෝ විදුලි ධාවන කිරීම, විදුලි ත්‍රිරෝද රථ, බස්රථ ආනයනය කිරීම සඳහා ආයතනියක බදු අඩු කෙරේ.
  3. විදුලියෙන් ධාවනය වන මෝටර් රථ සඳහා බදු රුපියල් ලක්ෂ 10 කින් අඩුවේ. සුපිරි සුඛෝපභෝගී රථවල මිල රුපියල් ලක්ෂ 25කින් වැඩි කිරීමට නියමිතයි.
  4. එන්ජින් ධාරිතාව  2500 සී.සී. කට වැඩි වාහන සඳහා සුඛෝපභෝගී බද්ධක්.
  5. ඩීසල් ත්‍රි‘රෝද රථ සඳහා බදු රු. 50,000කින් වැඩිකෙරේ.
  6. විදුලි ත්‍රි‘රෝද රථ සඳහා ආනයන සහන සලසා දේ.
  7. පවතින ත්‍රිරෝද රථ බංග්ලාදේශ වැනි රටවලට විකිණීමට ඉඩකඩ සලසා දේ.
  8. ලංගම හරිතකරණයට ලක්කිරීමට අපේක්ෂා කරමින් විදුලි බස් 50ක් ඇති කිරීමට රු.මි. 500ක් වෙන් කෙරේ.
  9. සූර්ය බලයෙන් ක්‍රියාත්මක Charging Station ඇතිකිරීම සඳහා පෞද්ගලික අංශයට සඳහා බලය ලබාදීමට කටයුතු කෙරේ.

අයවැයෙන් ඇත්තටම පුංචි කාර්වල මිල අඩු වුණාද?

2018 අයවැය මගින් පුංචි කාර්වල මිල අඩුවනු ඇති බවට දැනට මාස කිහිපයක සිට කසුකුසුවක් තිබුණද, මෙවර අයවැයෙන් එන්ජින් ධාරිතාව 1000cc වලට වඩා අඩු මෝටර් රථවල මිල ගණන්වල වෙනසක් සිදු නොවනු ඇති බව කියැවේ.

මෙවර අයවැය යෝජනාවලියේදී මෝටර් වාහන මත අයකළ වටිනාකම පදනම් වූ නිෂ්පාදන බද්ද ඉවත් කර පෙට්‍රල් සහ ඩීසල් වාහන සඳහා එන්ජින් ධාරිතාව මත පමණක් (cc ධාරිතාව) පදනම්ව නිෂ්පාදන බදු අය කෙරෙන බව පෙන්වා දී තිබේ. එය එසේ වුවත්, මේ දක්වා රටට ගෙන්වනු ලැබූ මෝටර් රථවල නිෂ්පාදන බදු අයකිරීම බොහෝ අවස්ථාවල සිදුවූයේ එන්ජින් ධාරිතාව මත පමණක් බව වෙළෙඳ පොළ ආරංචි මාර්ග පවසයි.

ඒ අනුව, සලකා බැලීමේදී 1,000cc වලට වඩා අඩු එන්ජින් ධාරිතාවයේ පෙට්‍රල් වාහන සඳහා මීට පෙර සලකා බැලුණේ වටිනාකමින් 150% ක් හෝ ඝන සෙන්ටි මීටරයට රු.1,750/- ක බදු මුදලකි. එමෙන්ම, හයිබ්‍රිඩ් වාහන සඳහා මීට පෙර සලකා බැලුණේ වටිනාකමින් 70% ක් හෝ ඝන සෙන්ටි මීටරයකට රු.1,250 ක බදු මුදලකි.

නමුත්, 2018 අයවැය යෝජනාවලියේදී පිළිවෙළින් පෙට්‍රල් හා හයිබ්‍රිඩ් වාහන සඳහා වූ වටිනාකම පදනම් වූ නිෂ්පාදන බද්ද අයවන ක්‍රමවේදය පමණක් ඉවත් කළත්, එම බදු අය කිරීමේ කියුබික් සෙන්ටිමීටරයකට අය කෙරෙන බදු මුදල් පිළිවෙළින් රු.1,750/- ක් සහ රු.1,250/- ක් ලෙස ඒ ආකාරයෙන්ම පවතින බැවින් පුංචි කාර්වල මිලෙහි වෙනසක් සිදු නොවනු ඇති බව වාහන ආනයනකරුවෝ වැඩිදුරටත් පවසති.

සයිටම් ආයතනය අහෝසි කළා

මාලඹේ සයිටම් පෞද්ගලික වෛද්‍ය විද්‍යාලය අහෝසි කළ බවත්, නැවත ඒ සඳහා සිසුන් බඳවා නොගන්නා බවත් සයිටම් පිළිබඳ සොයාබැලීමට පත්කළ කමිටුවේ සභාපති, නියෝජ්‍ය අමාත්‍ය ආචාර්ය හර්ෂද සිල්වා මහතා ප්‍රකාශ කළේය.

පාර්ලිමේන්තුවේදී රැස්වූ ව්‍යවස්ථා සභාවේදී ප්‍රකාශයක් සිදුකරමින් නියෝජ්‍ය අමාත්‍යවරයා අද (08දා) මේ බව කීවේය.

එමෙන්ම සයිටම් වෛද්‍ය විද්‍යාලයේ මේවනවිට අධ්‍යාපනය හදාරන වෛද්‍ය සිසුන් සම්බන්ධයෙන් විශ්වවිද්‍යාල ප්‍රතිපාදන කොමිෂන් සභා පනත අනුව කටයුතු කරන බවද හර්ෂද සිල්වා මහතා ප්‍රකාශ කළේය.

දැනට උපවාසයේ යෙදී සිටින වෛද්‍ය සිසුන්ගේ දෙමාපියන් සමග අද (08දා) කළ සාකච්ඡාව සහ වැඩබලන ජනාධිපති ලේකම් සුමිත් අබේසිංහ සහ අගමැති ලේකම් සමන් ඒකනායක මහත්වරුන් සමග පැවැත්වූ සාකච්ඡාවලින් පසු මෙම ප්‍රකාශය සිදුකරන බවද අමාත්‍යවරයා කීවේය.

ඒ අනුව දැනට උපවාසයේ යෙදී සිටින දෙමාපියන් එය නවතා දමනු ඇති බවත්, විශ්වවිද්‍යාල සිසුන් නැවත විශ්වවිද්‍යාල වෙත වාර්තා කරනු ඇතැයි තමා විශ්වාස කරන බවත් අමාත්‍යවරයා කීවේය.

HDS