Category Archives: technology

සංයුක්ත ඩිජිටල් කැමරාවක සැඟවූ අතිප්‍රබල ලෙන්සයක්

කැමරාවක් මිලදී ගැනීමට යන ඕනෑම අයෙකුට පැන නගිනා පොදු ගැටලුවක් තිබේ. එනම් මිලදී ගත යුත්තේ කුමනාකාරයේ කැමරාවක්ද යන්නයි. අවශ්‍ය නම් DSLR හෝ Mirrorless වර්ගයක වඩාත් වෘත්තිය මට්ටමේ කැමරාවක් මිලදී ගැනීමට හැකි වුවත්, ඒ සඳහා විශාල මුදලක් වැය වනු ඇත. එසේම එවැනි වෘත්තීය මට්ටමේ කැමරාවක් භාවිත කිරීමද එතරම් පහසු නොවනා අතර, එයට යම් පළපුරුද්දක් අවශ්‍ය වේ. අවශ්‍ය නම් DSLR හෝ Mirrorless කැමරාවක්ම ආධුනිකයන් සඳහා නිමවා ඇති entry-level සංස්කරණයකින් මිලදී ගැනීමට හැකි අතර, එවිට පූර්ව පළපුරුද්දක් අවශ්‍ය නොවේ.


sony-rx100-vi-2

එසේත් නැතිනම් වඩාත් අඩු මුදලකට මිලදී ගත හැකි Point and Shoot ඩිජිටල් කැමරාද විශාල ප්‍රමාණයක් වෙළෙඳ පොළේ තිබේ. මේවාද අඩු මිල මූලික කැමරාවල සිට වඩාත් ඉහළ මට්ටමේ ලෙන්සයන් සහ හැකියාවන් ඇති වැඩි මිල ඩිජිටල් කැමරා දක්වා ඉහළ පරාසයක වේ. මේවායින්ද ස්වයංක්‍රීය සැකසුම් යටතේ ඕනෑම අයෙකුට ඡයාරූප ගැනීමට හැකිය. නමුත් වෘත්තිය මට්ටමේ කැමරාවකින් සහ විශාල ලෙන්සයකින් ලබාගත හැකි ආකාරයේ සුන්දර ඡායාරූපයන් බලාපොරොත්තුවෙන් ඩිජිටල් කැමරාවන් මිලදී ගන්නවුන්ගේ බලාපොරොත්තු ක්ෂණයකින් සුන්ව යනු ඇත.

මේ අතරේදී වර්තමානයේ වෙළෙඳ පොළේ ඇති බොහෝ ස්මාට්ෆෝන් සමගින් වඩාත් දියුණු කැමරා පද්ධතීන් ඇත. බොහෝ දෙනෙකු ඩිජිටල් කැමරාවක් සඳහා වන මිලටත් වඩා වැඩි මුදලක් ගෙවා ස්මාට්ෆෝනයක් මිලදී ගන්නේ, සිය ඡායාරූප ශිල්පීය කටයුතුද ඒ සමගින්ම ඉ‍ටු කරගැනීමට සිතමිනි. සැබවින්ම එයට වරදක් කීමට නොහැක්කේ බුද්ධිමත් තාක්ෂණයන් සහ විවිධ ‍ෆිල්ටරයන් සමගින් වඩාත් සුන්දර ඡායාරූප පහසුවෙන් ගැනීමට පමණක් නොව, වෘත්තිය මට්ටමේ කැමරාවන්ගෙන් ලබාගත හැකි ආකාරයේ පසුතලය බොඳ වූ ඡායාරූපයන් ගැනීමටද හැකියාව ලබාදෙන බැවිනි. 

කෙසේ වෙතත් මේ කතාකරන්නට යන්නේ කැමරා අතර මෙම හිඩැස පිරවීම සඳහා නිර්මාණය වී ඇති සෝනි ඩිජිටල් කැමරාවක් සම්බන්ධයෙනි. බොහෝ දෙනෙකු සෝනි ඩිජිටල් කැමරාවක් වෙනුවට ඉහළ මට්ටමේ කැමරා පද්ධතියක් සහිත ස්මාට්ෆෝනයක් ‍තෝරාගන්නට පෙළඹිය හැකි වුවත්, වෙළෙඳ පොළේ බහුලව ඇති කිසිදු ස්මාට්ෆෝනයකට මෙම නව ඩිජිටල් කැමරාව මගින් ලබාදෙන විශේෂත්වය ලබාදීමට නොහැකි වනු ඇත. ඒ, අතිශයින්ම සංයුක්ත කැමරා බඳක් තුළ සැඟවූ අතිවිශාල සූම් ලෙන්සයකි. මේ Sony Cyber-Shot RX100 VI ඩිජිටල් කැමරාවයි.

sony-rx100-vi-3

සෝනි සමාගම මගින් දියත් කළ RX100 කැමරා පෙළෙහි නවතම සාමාජිකයා වන මෙම Cyber-Shot RX100 VI කැමරාවේ විශාල ඇපචර් ලෙන්සයක් තිබෙනා අතර, බැලූ බැල්මට එතරම් විශාල සූම් ලෙන්සයක් මෙවැනි හුරුබුහුටි කැමරාවක සඟවා ඇත්තේ කෙසේද යන්න පිළිබඳව ඔබ මවිත වනු ඇත. 

මෙහි මෙගාපික්සල් 20 ක 1.0-type Exmor RS CMOS සෙන්සරයක් තිබෙනා අතර, වඩාත් උපරිම වේගයක් ලබාදීම සඳහා කැමරා පද්ධතියේ ස්ථාපනය කළ DRAM චිපයක් තිබේ. එසේම සෝනි සමාගමේ ඉහළ මට්ටමේ Mirrorless කැමරාවන්හි දක්නට ලැබෙනා ආකාරයේ BIONZ X ඉමේජ් ප්‍රොසෙසරයක්ද මෙහි ඇත. සෝනි සමාගම සඳහන් කරනා ආකාරයට මෙම නව ප්‍රොසෙසරය සමගින්, 315-point autofocus tracking හැකියාවට තත්පර 0.03ක් තරම් ක්ෂණික කාලයක් තුළදී ඡායාරූපයට බඳුන් වන තැනැත්තාව හෝ වස්තුව ඉලක්ක කරගැනීමට අවකාශය ලැබෙනු ඇත. එසේම continues shooting ආකාරයේදී පවා තත්පරයට රාමු 24 ක් දක්වා ශීඝ්‍රතාවකින් ඉහත වේගයම පවත්වා ගැනීමට එම ඉමේජ් ප්‍රොසෙසරයට හැකියාව ලැබෙනු ඇත. මෙම ආකාරයේදී කැමරාවට හැසිරවිය හැකි උපරිම සීමාව වන්නේ සේයාරූ 233ක් වන නිසා, ඉහළ වේගයකින් එක දිගට ඡායාරූප ගැනීමේදී පවා කිසිදු මන්දගාමීත්වයක්, සිරවීමක් අත්විඳින්නට නොලැබෙනු ඇත.

මෙහි ඇති ප්‍රධානතම විශේෂත්වය වන දැවැන්ත 24-200mm ප්‍රමාණයේ ලෙන්සයේ f අගය2.8 සිට 4.5  දක්වා වේ. මෙවැනි ලෙන්සයක් සාමාන්‍යයෙන් සංයුක්ත ඩිජිටල් කැමරාවක් දක්නට නොලැබේ. එයට ප්‍රධාන හේතුව වන්නේ වීදුරු කොටස් 15 කින් පමණ තැනුණු, 8X සූම් බලයක් සහිත ටෙලිෆොටෝ ලෙන්සයක් කුඩා ඩිජිටල් කැමරා බඳක අන්තර්ගත කිරීම සැබවින්ම අභියෝගයක් වන බැවිනි. එනමුත් සෝනි සමාගම එම අභියෝගය සාර්ථකව ජය ගෙන ඇති සැටියක් පෙනේ.

sony-rx100-vi-4

මෙම Cyber-Shot RX100 VI කැමරාවේ ස්පර්ෂ තිරයක් තිබෙනා අතර, එය ඔබට ග්‍රහණය කර ගැනීමට අවශ්‍ය දර්ශනය නැරඹීමට පමණක් නොව ඇඟිලි තුඩින් ඔබට නාභිගත කිරීමට අවශ්‍ය ප්‍රදේශය පිළිබඳව විධානයක් ලබාදීමටද භාවිත කළ හැකිය. මෙය මින් පෙර සංස්කරණයන්හි දක්නට ලැබුණු එකට වඩා අතිශයින්ම පරිශීලක මිත්‍රශීලී බව නොකිවමනායි. එසේම මෙම ස්පට්ෂ තිරය අංශක 180ක් දක්වා කරකැවීමට හැකි බැවින් ඔබට අපහසු කෝණයන්ගෙන් ඡායාරූප ගැනීමට මෙන්ම සෙල්ෆි ඡායාරූප ගැනීමටද පහසුවෙන්ම මෙම ඩිජිටල් කැමරාව භාවිත කළ හකිය. එසේම මේ සමගින් OLED ඉලෙක්ට්‍රොනික වීව්ෆයින්ඩරයක්ද තිබෙනා අතර, එය කැමරාවෙන් පිටතට අවශ්‍ය විට ගැනීමට හැකි යාන්ත්‍රණයක්ද තිබේ.

මෙයට අමතරව මෙහි වීඩියෝ පටිගත කිරීමේ හැකියාවන් සම්බන්ධයෙන් සඳහන් කරන්නේ නම්, ඊට 4K ගුණාත්මක තත්වයේ වීඩියෝ තත්පරයට රාමු 30ක ශීඝ්‍රතා‍ෙවන් සහ 1080p ගුණාත්මකභාවයේ වීඩියෝ අන්තර්ගතයන් තත්පරයට රාමු 120 ක ශීඝ්‍රතාවකින් ග්‍රහණය කරගැනීමට හැකියාව ඇත. එසේම මෙහි HDR හැකියාවන් තිබෙනා අතර, පසු-නිෂ්පාදනයේදී විශාල වශයෙන් වර්ණ සීරුමාරු කිරීමට උත්සුක වන පරිශීලකයන් සඳහා Hybrid Log-Gamma picture ප්‍රොෆයිලයක්ද තිබේ. මෙහි උපරිම වීඩියෝ පටිගත කිරීමේ ශීඝ්‍රතාව වන්නේ තත්පරයට රාමු 1000ක් වන අතර, එහිදී වීඩියෝවේ ගුණාත්මකභාවය 480p දක්වා පහත බසිනු ඇත. මෙසේ ශීඝ්‍ර වේගයකින් සිදුවන ක්‍රියාදාමයන් පවා මෙම කැමරාව මගින් ඔබට ග්‍රහණය කරගැනීමට හැකියාව ලැබෙනු ඇත. නමුත් මෙහි ඇති එක් ගැටලුවක් වන්නේ මෙහි මයික්‍රෆෝනයක් නොමැති වීමයි.

මෙම Sony Cyber-Shot RX100 VI කැමරාව ලබන මාසයේ සිට වෙළෙඳ පොළට නිකුත් වනු ඇත.

ගේමින්ග් ස්මාට්ෆෝන් පරිණාමයේ තවත් මං සලකුණක්

asus-rog-phone-1

මොබයිල් ගේම්ස් හෙවත් ජංගම දුරකථන ක්‍රීඩා යනු මෙයට වසර විස්සකට පමණ පෙරාතුව සාමාන්‍ය විශේෂාංග ජංගම දුරකථන භාවිත කළ පිරිසට පවා අමුතු අත්දැකීමක් නොවේ. මන්දයත්, දුරකථන ඇමතුමක් ගැනීම සහ කෙටි පණිවුඩයක් යැවීම යන කර්තව්‍යයන් දෙකට වඩා එපිටට ගිය හැකියාවන් සහිත විශේෂාංග ජංගම දුරකථන නිර්මාණය වීම ඇරඹුණු කාලයේ පටන්ම එම උපාංගයන් තුළ ප්‍රාථමික මට්ටමකින් හෝ දුරකථන ක්‍රීඩාවන් දක්නට ලැබුණු බැවිනි. පසුකාලීනව මෙම ජංගම දුරකථනයන් දියුණු වීමත් සමගින් මෙම ක්‍රීඩාවන්ද ක්‍රමයෙන් පරිණාමය වුණි. 

කෙසේ නමුත් ජංගම දුරකථන ක්‍රීඩාවන් සැබවින්ම පරිණාමයේ ඉදිරි පිම්මක් පැනීම සිදුවන්නේ ජංගම දුරකථනයන් 'ස්මාට්' වීමත් සමගිනි. වෙනත් ලෙසකින් පවසන්නේ නම්, ස්මාට්ෆෝන් නිර්මාණය වීම සහ ඒ සඳහා මෙහෙයුම් පද්ධතීන් නිර්මාණය වීමත් සමගිනි. එතැන් සිට අද දක්වා නිෂ්පාදනය වන ස්මාට්ෆෝනයන් තුළ වඩාත් දියුණු වීඩියෝ ක්‍රීඩාවන් තිබීම අතිශයින්ම සාමාන්‍යකරණය වී තිබේ. එසේම මෙම වීඩියෝ ක්‍රීඩාවන්ද ශීඝ්‍රයෙන් දියුණු වන අතර, වර්තමානයේ දක්නට ලැබෙන බොහෝ ස්මාට්ෆෝන් වීඩියෝ ක්‍රීඩාවන් පරිගණක ක්‍රීඩාවන් තරමටම දියුණු තියුණු වී තිබේ. ඒ සඳහා වඩාත් ඉහළ පරිගණක බලයක් අවශ්‍ය වන අතර, වර්තමානයේ දක්නට ලැබෙන බොහෝ ස්මාට්ෆෝනයන් බලසම්පන්න ප්‍රොසෙසරයන්ගෙන්, ඉහළ ධාරිතාවන් ඇති ‍රැම් මතකයන් හා අභ්‍යන්තර මතකයන්ගෙන් සමන්විත වන බැවින් එය එතරම් ගැටලුවක්ද නොවේ.

මෙම ස්මාට්ෆෝන් වීඩියෝ ක්‍රීඩාවන් සම්බන්ධයෙන් නැවතත් මං සලකුණක් නිර්මාණය වන්නේ, ගේමින් ස්මාර්ට්ෆෝන් නමින් වීඩියෝ ක්‍රීඩාවන් සඳහාම වූ ස්මාට්ෆෝනයන් විශේෂයක් නිෂ්පාදනය වීමත් සමගිනි. හඳුන්වා දෙන ASUS ROG Phone ස්මාට්ෆෝනය, එම නව ස්මාට්ෆෝන් පරම්පරාවේ තවත් එක් පුරුකකි. එය එම පරපුරේ පරිණාමය නව දිශාවකට ගෙන යන තරමේ පුරෝගාමී පුරුකක් වේද? එය සැබවින්ම සොයා බැලීමට වටිනා කරුණකි.

මෙම වසරේ අවසාන භාගයේදී වෙළෙඳ පොළට නිකුත් වනු ඇති බවට ASUS සමාගම මගින් පසුගියදා නිල වශයෙන් නිවේදනය කොට හඳුන්වා දුන් ASUS ROG Phone ස්මාට්ෆෝනය, මෙතෙක් වෙළෙඳ පොළට ඉදිරිපත් වූ අනෙකුත් ගේමින්ග් ස්මාට්ෆෝන් මෙන්ම වඩාත් ප්‍රබල දෘඩාංගයන් සහ වීඩියෝ ක්‍රීඩා සඳහාම ඉලක්ක කොට ගත් සුවිශේෂී දෘඪාංග හා මෘදුකාංග දියුණු කිරීම්වලින් සමන්විත වනු ඇත.

සාමාන්‍යයෙන් වර්තමානයේ දක්නට ලැබෙන ඉහළ-පරාසයේ ස්මාට්ෆෝනයන් සියල්ලක්ම පාහේ අඩු වැඩි වශයෙන් සමාන ප්‍රබලතාවන් සහිත දෘඪාංගයන් භාවිත කරයි. මෙය ගේමින්ග් ස්මාට්ෆෝනයන් සඳහාද අදාළ වේ. කෙසේ වෙතත් ASUS ROG Phone ස්මාට්ෆෝනය සමගින් සමාගම සිදුකොට ඇත්තේ, ගේමින්ග් පරිගණක පද්ධතියක මෙන්ම මෙම ස්මාට්ෆෝනයේද නිර්මාණ සැලසුම වීඩියෝ ක්‍රීඩාවන් සඳහා වඩාත් උචිත වන ලෙසින් නිම කිරීමත්, එහි දෘඪාංග හැකියාවන් වීඩියෝ ක්‍රීඩාවන් සඳහාම ගැළපෙන ලෙසින් සීරු මාරු කිරීමත් බව සැලවේ.

asus-rog-phone-2

මෙම ROG Phone ස්මාට්ෆෝනයේ අඟල් 6ක AMOLED තිරයක් තිබෙනා අතර, එහි තිර ප්‍රමාණ අනුපාතය 18:9 ක් සහ තිර විභේදනය 2160×1080 ක් වේ. මෙහි එම 1080p විභේදනය සහ 90Hzක රාමු වෙනස්වීමේ ශීඝ්‍රතාව
 (refresh rate) සමගින් මෙම උපාංගයට සාමාන්‍ය ස්මාට්ෆෝනයකට වඩා 50%ක් වැඩියෙන් රාමු ප්‍රමාණයක් තත්පරයක් තුළ දර්ශනය කරවීමට හැකි වේ. එම නිසා ඕනෑම ඉහළ මට්ටමේ ස්මාට්ෆෝන් වීඩියෝ ක්‍රීඩාවක් ඉතාමත් සුමට ගලායෑමක් සමගින්, ඉහළ ගුණාත්මක තත්ත්වයකින් අත්විඳීමට මෙම ස්මාට්ෆෝනය ඉඩ ලබාදෙනු ඇත. එසේම ASUS සමාගම පවසන ආකාරයට ඔවුන්ගේ ස්මාට්ෆෝන් තිරයට මිලි තත්පරයක ප්‍රතිචාර කාලයක් තිබෙන බැවින්, ඉතාමත් වේගවත් පරිගණක ක්‍රීඩා ක්‍රියාදාමයන් පවා ඒ ආකාරයෙන්ම අත්විඳින්නට පරිශීලකයාට හැකියාව ලැබෙනු ඇත. මෙයට අමතරව ROG Phone ස්මාට්ෆෝනයේ තිරය DCI-P3 color gamut සඳහා සම්පූර්ණ සහාය ලබාදෙන අතර, HDR සහායද එහි ඇත.

එසේම මෙහි 10-point multi-touch හැකියාව තිබෙන අතර, අත්වැසුම් මතින් වුවද නිවරදිව ස්පර්ෂ තිරය හැසිරවීමට හැකියාව ඇත.
මෙහි සුවිශේෂී 2.96GHz octa-core Qualcomm Snapdragon 845 ප්‍රොසෙසරයක් මගින් ඉහළ මට්ටමේ වීඩියෝ ක්‍රීඩාවන් සඳහා සැකසුම් බලය ලබාදෙන අතර, මෙහි ඇති Qualcomm Adreno 630 ග්‍රැ‍ෆික් සැකසුම් ඒකකය හා එය දෘඪාංග බලය අතින් මනාව සැස‍ඳෙනු ඇත. මේ සමගින් ගිගාබයිට් 8ක ‍ LPDDR4X රැම් මතකයක්ද තිබෙනා අතර, ගිගාබයිට් 128 ක සහ ගිගාබයිට් 512ක අභ්‍යන්තර මතක ධාරිතාවන්ගෙන් යුතු සංස්කරණයන් දෙකක් ලෙසින් මෙය පැමිණෙනු ඇත. මෙසේ දෘඪාංග බලය අතින් ගත් විට, මෙය මෙතෙක් නිර්මාණය වී ඇති අති බලසම්පන්න ස්මාට්ෆෝනයක් බවට සැකයක් නැත. කෙසේ වෙතත් මෙවැනි ප්‍රබල දෘඪාංග සැකසුමක් සහිත පද්ධතියක දක්නට ලැබෙනු ඇති උෂ්ණත්වය ඉහළ යෑමේ ගැටලුව ජයගැනීම සඳහා, මෙහි තඹ තාප පතුරුවා හරිනයක් සහ ත්‍රිමාණ වාෂ්පීකරණ කුටීරයක් තිබේ. මීට අමතරව මෙහි විකල්ප AeroActive සිසිලන යාන්ත්‍රණයක්ද ස්ථාපනය කොට ඇත. මේ නිසා ඉතාමත් ඉහළ මට්ටමේ වීඩියෝ ක්‍රීඩාවන් ධාවනය කිරීම තුළින් පවා ROG Phone ස්මාට්ෆෝනය ඉහළ උෂ්ණත්වයකට රත් නොවනු ඇත.

සාමාන්‍යයෙන් ස්මාට්ෆෝනයකින් වීඩියෝ ක්‍රීඩාවක් ධාවනය කිරීමේදී පරිශීලකයාට සිදුවන්නේ ස්පර්ෂ තිරය පමණක් ඉවහල් කර ගැනීමෙන් ක්‍රීඩා විධානයන් සැපයීමටයි. මෙය එතරම් කාර්යක්ෂම නොවන අතර, බොහෝ පරිශීලකයන් ඊට අකැමැති බවද සත්‍යයකි. මේ නිසා ROG Phone ස්මාට්ෆෝනය සමගින් අතිධ්වනික භෞතික පාලක බොත්තම් ත්‍රිත්වයක් පැමිණේ. නවීන ගේම්පෑඩ් උපාංගයක මෙන් ඉතාමත් සුළු ස්පර්ෂයකින් පවා ක්‍රියාකාරී වන මෙම පාලකයන් AirTriggers ලෙසින් ASUS සමාගම විසින් හඳුන්වා දෙයි. මෙම ට්‍රිගරයන් පරිශීලකයාට අවශ්‍ය ප්‍රතිචාරයන් දැක්වීම සඳහා ක්‍රමලේඛනය කිරීමටද හැකියාව තිබේ. එසේම මෙහි වඩාත් සිත්ගන්නා සුළු කරුණ වන්නේ, ඔබට වීඩියෝ ක්‍රීඩා සඳහා පමණක් නොව සාමාන්‍ය ස්මාට්ෆෝන් ක්‍රියාකාරකම් සඳහාද මෙම පාලක ට්‍රිගරයන් භාවිත කිරීමට හැකි වීමයි.

asus-rog-phone-3

වඩාත් ඉහළ කාලයක් සඳහා ROG Phone ස්මාට්ෆෝනය භාවිත කිරීමට අවකාශ ලබාදෙමින් 4,000mAh ප්‍රමාණයේ බැටරියක් මෙහි ස්ථාපනය කොට ඇත. කෙසේ නමුත් ඉහළ මට්ටමේ වීඩියෝ ක්‍රීඩාවන් ධාවනය සමගින් කෙතරම් කාලයක් මෙම බැටරිය එක් ආරෝපණයකින් බලය ලබාදීමට සමර්ථ වනු ඇතිද යන්න දැන්ම කිව නොහැකිය. එසේම මෙහි මෙගා පික්සල් 12ක සහ 8ක කැමරා දෙකකින් සැදි කැමරා පද්ධතියක් පසුපස තිබෙනා අතර, මෙගාපික්සල් 8ක ඉදිරි කැමරාවක්ද තිබේ. එසේම මෙය TwinView Dock විකල්පය මගින් ද්විතීයික මොනිටරයක් හා ස්මාට්ෆෝනය ඈඳීමේ හැකියාව මෙන්ම, ඩෙක්ස්ටොප් පද්ධතියක් හා මෙය ඈඳිමේ හැකියාවද ASUS සමාගම විසින් මෙයට ලබාදී ඇත.

මෙය ගේමින්ග් ස්මාට්ෆෝන් පරිණාමයේ වැදගත් පුරුකක් වනු ඇතිද? සැබවින්ම ASUS සමාගම මගින් ගේමින්ග් ස්මාට්ෆෝනයක් සහ සාමාන්‍ය ස්මාට්ෆෝනයක් වෙනස් කොට පෙන්වන බොහෝ විශේෂත්වයන් මෙයට එක් කොට තිබේ. එනිසා උක්ත පැනයට පිළිතුර වනුයේ, අනාගතයේ බිහිවන ගේමින්ග් ස්මාට්ෆෝනයන් අනිවාර්යයෙන්ම ASUS ROG Phone ස්මාට්ෆෝනය පුරෝගාමියෙකු ලෙසින් සලකමින්, ඒ හා හඳුන්වා දෙනු ලබන නවීන විශේෂත්වයන් ගුරු කොට ගනු ඇති බවයි.

නවක වදය ගැන කියන්න APP එකක්

විශ්වවිද්‍යාල නවකවදය මේ වන විට අශිෂ්ට, අශීලාචාර, අමානුෂික ක්‍රියාවක් බවට පත්ව තිබෙන බව උසස් අධ්‍යාපන අමාත්‍ය ආචාර්ය විජයදාස රාජපක්ෂ මහතා සඳහන් කළේය.

මෙම තත්ත්වය විශ්වවිද්‍යාල බලධාරීන්ට හෝ පාලනය කිරීමට නොහැකි තත්ත්වයක් උදාවී තිබෙන බවත්, නවකවදය ලබාදෙන කණ්ඩායම් සංවිධානාත්මක අපරාධ කල්ලි ලෙස හැසිරීම හේතුවෙන් මේ පිළිබඳ පැමිණිලි ලැබීමද ඉතා සීමිත බවද හෙතෙම පවසා සිටියේය.

මේ අනුව ජංගම දුරකථන නව යෙදුමක් (App) හඳුන්වා දී තිබෙන බවත්, මෙම යෙදුම මගින් අදාළ පැමිණිලි කළ හැකි බවත් අමාත්‍යවරයා පවසා සිටියේය.

මෙම ක්‍රමය මගින් නවකවදය නවතා දැමීමට නොහැකි වුවහොත් මීට වඩා වැඩපිළිවෙළක් ඒ වෙනුවෙන් ක්‍රියාත්මක කරන බවද ජංගම දුරකථන යෙදුම (App) හඳුන්වා දීම වෙනුවෙන් අද (06දා) පැවැති වැඩසටහනකදී හෙතෙම සඳහන් කළේය.

iphone-x-54

තාරුණ්‍යයට ගැලපෙන තරුණ ස්මාට්ෆෝනයක් VIVO V9

Vivo-V9-3

මෑතකාලීන ස්මාට්ෆෝන් ලෝකයට මේ වනවිට වේගයෙන් එකතු වූ නව තාක්ෂණික විලාසිතාවන් කිහිපයකි. එයින් එකක් නම් සම්පූර්ණ ස්මාට්ෆෝනයේ ඉදිරිපස රාමුව පුරා, දාරයන් දක්වා විහිදී ගිය තිරයයි. මෙහිදී ස්මාට්ෆෝනයේ ඉදිරිපස පෘෂ්ඨයෙන් කෙතරම් ප්‍රතිශතයක් ස්මාට්ෆෝනයේ තිරය වන්නේද යන සාධකය වැදගත් තැනක් ගනී. මෑතකදී පැමිණි iPhone X ස්මාට්ෆෝනයේ තිරය ඉහළ මධ්‍යයේ කැමරාව සහ මයික්‍රෆෝනය සඳහා වන ඉඩ හැරුණු විට අනෙක් සෑම වර්ග සෙන්ටිමීටරයක්ම අත්පත් කොටගෙන තිබීමත් සමගින් මෙම විලාසිතාව සඳහා උද්‍යෝගයක් පැන නැගුණි.

තවත් මේ කාලයේ ප්‍රසිද්ධ තාක්ෂණික විලාසිතාවක් වන්නේ, DSLR වැනි වෘත්තීමය කැමරාවන්හි ආකාරයට ඡායාරූපයක ගැඹුරද හුවා දක්වමින් ඡායාරූප ගැනීමට ස්මාට්ෆෝනයට ලබාදී ඇති හැකියාවයි. මේ සඳහා මේ වනවිට ජනප්‍රිය ක්‍රමය වන්නේ පසුපස කැමරා ද්විත්වයක පද්ධතියක් ස්ථාපනය කිරීමයි. ඒ අතරේදී HUAWEI සමාගම මගින් සිය නවතම ෆ්ලැග්ෂිප් ස්මාට්ෆෝනයට කැමරා තුනක පද්ධතියක් ලබාදීම දක්වා මෙම සංකල්පය ඉදිරියට ගෙන ගොස් තිබිණි.
මෙම කරුණු දෙකට අමතරව ඇඟිලි සලකුණු සංවේදකය සහ මුහුණු හඳුනාගැනීමේ හැකියාව නවීන තාක්ෂණික විලාසිතා යැයි කීමට නොහැකි වූවත්, මේ වනවිට ස්මාට්ෆෝන් පරිශීලකයෙකු විසින් ස්මාට්ෆෝනයකින් බලාපොරොත්තු වන අංගයන් බවට පත්ව තිබේ.
මෙම සියලුම අ‍ටුවා ටීකා කීමට අවශ්‍ය වූයේ, VIVO සමාගම විසින් පසුගිය මාසයේදි එනම් අප්‍රේල් මස 

වෙළෙඳ පොළට දියත් කළ VIVO V9 ස්මාට්ෆෝනය සම්බන්ධයෙන් විස්තර පැවසීම වෙනුවෙනි.

ආකර්ෂණීය පෙනුම

මෙම නවතම VIVO V9 ස්මාට්ෆෝනය බැලූ බැල්මට Apple iPhone X ලෙසින් වරදවා වටහා ගැනීම අහඹුවක් නොවේ. සම්පූර්ණයෙන්ම අනුකරණාත්මක නිර්මාණ සැලසුමක් යැයි කීමට නොහැකි වුවත්, VIVO V9 ස්මාට්ෆෝනය මගින් iPhone X හරහා ඇති කළ ස්මාට්ෆෝනයේ ඉහළ කෙළවර දක්වා විහිද ගිය තිරයේ උන්මාදය සිය නිෂ්පාදනය සඳහාද මනාව උපයෝගී කොට ගෙන ඇත. සැබවින්ම ඔවුන් iPhone X උපාංගයටත් වඩා හොඳින්, වඩාත් අඩු ඉඩ ප්‍රමාණයක් කැමරාවට සහ අනෙකුත් සෙන්සරයන්ට ස්මාට්ෆෝනයේ ඉහළ ගැටියෙන් ලබාදෙමින් සිය VIVO V9 උපාංගයේ ඉදිරිපස පෘෂ්ඨය හා තිරය අතර අනුපාතය නිෂ්පාදකයන් පවසන ආකාරයට 90෴ ක් දක්වා ගෙනැවිත් ඇත. එසේම මෙහි IPS LCD තිරයද අඟල් 6.3 ක් (2280 x 1080) වේ. එනමුත් වර්තමානයේ ඇති තවත් නව තාක්ෂණික හැඩසවීමක් වන තිර අනුපාතය 19:9 දක්වා වෙනස් කිරීම හරහා, විශාල තිරයක් ඇති ස්මාට්ෆෝනයක් අතට පහසුවෙන් අල්වා ගත හැකි ප්‍රමාණයක උස්, සිහින් උපාංගයක් බවට පරිවර්තනය කිරීමට V9 නිෂ්පාදකයන් සමත් වී ඇත. මෙහි දසුන්වල සුපැහැදිලිතාව සහ තියුණු වර්ණයන්ද සැබවින්ම ප්‍රශංසාවට ලක්විය යුතු තරමට ඉහළ ගුණාත්මක මට්ටමක තිබේ.

මෙහි ඉදිරිපස පෙනුම මගින් V9 ස්මාට්ෆෝනයට වඩාත් නවීන, ඉහළ පරාසයේ ස්මාට්ෆෝනයක පෙනුම ලැබී ඇත. කෙසේ වෙතත් මෙහි පසුපස ප්ලාස්ටික් නිමැවුමක් වීම නිසා හොඳ සහ නරක තත්ත්වයන් දෙකක් ඇතිවී තිබේ. හොඳ නම් ඒ මගින් වඩාත් සැහැල්ලු ස්මාට්ෆෝනයක් නිර්මාණය කිරීමට ඉඩ ලැබී තිබීමයි. නරක වන්නේ ප්ලාස්ටික් පසුපස නිසා ස්මාට්ෆෝනයේ ඉදිරිපස ඇති පෙනුමට මඳ හානියක් සිදුවී තිබීමයි.

දෘඪාංග සහ මෘදුකාංග ප්‍රබලත්වය

මෙහි Qualcomm MSM8953-Pro Snapdragon 626 චිප පද්ධතිය මත නිර්මාණය වුණු Octa-core 2.2 GHz Cortex-A53 ප්‍රොසෙසරයක් ස්ථාපනය කොට ඇත. එසේම Adreno 506 ග්‍රැ‍ෆික් ප්‍රොසෙසරයක්ද තිබේ. මෙහි ගිගාබයිට් 4ක ‍රැම් මතකයක් තිබෙන අතරම අභ්‍යන්තර මතක ධාරිතාව ගිගාබයිට් 64 ක් වේ. එසේම microSD කාඩ්පත් හරහා ගිගාබයිට් 256 ක් දක්වා ඉහළ නැංවිය හැකි බාහිර මතකයක්ද තිබේ. 
සාමාන්‍යයෙන් මධ්‍යම-පරාසයේ ස්මාට්ෆෝනයක් සම්බන්ධයෙන් සිතන්නෙකුට මෙම දෘඪාංග හැකියාවන් අතිශයින්ම ප්‍රමාණවත් වේ. නමුත් ගැටලුව වන්නේ VIVO V9 ස්මාට්ෆෝනය එම සන්නාමයේ ඉහළ-පරාසයේ ස්මාට්ෆෝනයක්ය යනුවෙන් බොහෝ විට වටහා ගැනීම් තිබීමත්, ඒ අනුව එය මිලදී ගැනීමට යන පරිශීලකයන්ගේ අපේක්ෂාවන් මෙම දෘඪාංග පිරිවිතර මගින් ඉ‍ටු නොවීමත් වේ. ඔවුන් බලාපොරොත්තු වනු ඇත්තේ ගිගාබයිට් 6 ක ‍රැම් මතකයක් සහ වඩාත් ප්‍රබල ප්‍රොසෙසරයකි. සැබවින්ම VIVO V9 අයත් වන්නේ කුමන පරාසයටද යන්න සම්බන්ධයෙන් අප අදහස් නොදක්වමු.

මෙම VIVO V9 ස්මාට්ෆෝනය Android 8.1 Oreo මෙහෙයුම් පද්ධතිය මතින් දිවෙන අතර, මෙහි පරිශීලක අතුරු මුහුණත ලෙසින් VIVO සඳහා ආවේණික Funtouch OS 4.0 මෙහෙයුම් පද්ධතිය ඇත. V9 ස්මාට්ෆෝනය සමගින් පෙරනිමියෙන් ස්ථාපනය වී පැමිණෙන අනවශ්‍ය යැයි කිව හැකි යෙදවුම් වැඩි ප්‍රමාණයක් තිබීම ඇතැම් විට පරිශීලකයෙකුගේ නොරිස්සුමට හේතු විය හැකිය. එසේ වුවත් සමස්තයක් ලෙසින් ගත් විට මෙහෙයුම් පද්ධතිය සහ යෙදෙවුම් ඉතාමත් හොඳින්, සිරවීමකින් තොරව ක්‍රියාත්මක වීම V9 ස්මාට්ෆෝනයේ විශිෂ්ට ජයග්‍රහණයක් ලෙසින් දැක්විය යුතුවේ.

කැමරා පද්ධතිය

මෙම VIVO V9 ස්මාට්ෆෝනයේ කැමරා මොඩියුල දෙකක පද්ධතියක් තිබේ. එයින් ප්‍රධාන කැමරාව මෙගා පික්සල් 16 ක් වන අතර, ගැඹුර සඳහා සංවේදී වන දෙවැනි කැමරාව මෙගාපික්සල් 5ක් වේ. මෙම කැමරා පද්ධතියෙන් ලබාගන්නා ඡායාරූපයන් සම්බන්ධයෙන් පරිශීලකයෙකු තෘප්තිමත් වනු ඇති අතර, විශේෂයෙන්ම ඡායාරූපයක පසුතලය බොඳ කොට ඊට වඩාත් කලාත්මක මුහුණුවරක් ලබාදෙන bokeh ආකාරය ඉතාමත්ම නිරවද්‍ය සහ ආකර්ෂණීය ඡායාරූප ලබාගැනීමට හේතු වනු ඇත. මෙහි dual-LED ෆ්ලෑෂරයක් ඇති අතර, Geo-tagging, touch focus, face detection, HDR, panorama යන සුපුරුදු විශේෂාංගයන්ද තිබේ. 2160p විභේදනයකින්, තත්පරයට රාමු 30 ක වේගයකින් වීඩියෝ පටිගත කිරීමටද මෙයට හැකියාව ඇත. වඩාත් අඳුරු පරිසරයක ඡායාරූප ගැනීමේදී මෙම ගුණාත්මකභාවය මඳක් පහත වැටීමට හැකිය.

මෙහි ඉදිරිපස ද්විතීයික කැමරාව මෙගා පික්සල් 24ක් වන අතර, එය විශිෂ්ට සෙල්ෆිකැමරාවක් ලෙසින් හැඳින්විය හැකිය. ඉහළ ගුණාත්මක මට්ටමක සෙල්ෆි ඡායාරූප ගැනීම සඳහා මෙහි ඇති බුද්ධිමත් ස්වයංක්‍රීය සැකසුම් හැකියාව සහ beautification ආකාරය උපකාරී වනු ඇත. 

Vivo-V9-4

තවත් තාක්ෂණික කරුණු

මෙහි ඇති ඇඟිලි සලකුණ කියැවීම මගින් ස්මාට්ෆෝනය අගුලු හැරීමේ හැකියාවත්, මුහුණ හඳුනා ගැනීම මගින් ස්මාට්ෆෝනය අගුලු හැරීමේ හැකියාවත් ක්ෂණික වීම බොහෝ පරිශීලකයන්ගේ සතුටට හේතු වී ඇති කරුණකි.
මෙහි සම්බන්ධතාවන් සඳහා Wi-Fi 802.11, Bluetooth 4.2 සහ GPS පහසුකම් ඇති අතර, USB On-The-Go හැකියාව සමගින් microUSB 2.0 ද්වාරයක්ද ඇත. අනෙකුත් තරගකාරී නවීන ස්මාට්ෆෝනයන් හා සසඳන විට මෙහි USB Type-C ද්වාරයක් නැතිවීම VIVO V9 හි අඩුවක් ලෙසින් දැකීමට හැකිය.

එසේම මෙහි ඇති 3260mAh ප්‍රමාණයේ බැටරියද සැලකිය යුතු තරම් කාලයක් එක් ආරෝපණයකින් ස්මාට්ෆෝනයෙන් වැඩ ගැනීමට අවකාශ ලබාදේ. මෙය සැබවින්ම ඉහළින් ලකුණු ලබාදිය හැකි කරුණක් වන්නේ, ස්මාට්ෆෝනයේ බැටරි බලය ප්‍රමාණවත් කාලයක් රඳවා ගැනීම ඕනෑම සන්නාමයක ස්මාට්ෆෝන් පරිහරණය කරන්නෙකුට අත්විඳීමට සිදුවන ගැටලුවක් බැවිනි.

මිල සහ වටිනාකම

OPPO සහ OnePlus සන්නාමයන් සමගින් අත්වැල් බැඳගෙන පැමිණෙන ඉහළ ගුණාත්මක භාවයක ස්මාට්ෆෝන් වෙළෙඳ නාමයක් ලෙසින් VIVO හැඳින්වීමට හැකිය. මෙම V9 ස්මාට්ෆෝනය ශ්‍රී ලංකාව තුළ අලෙවි වන මිල ගණන් රුපියල් 48,500ක සිට 
රුපියල් 55,000 ක් දක්වා පරාසයක වේ. ඉහත දැක්වූ ආකාරයේ තාක්ෂණික පිරිවිතර, දෘඪාංග හා මෘදුකාංග හැකියාවන් සහ මනා නිමාවක් ඇති VIVO V9 ස්මාට්ෆෝනය මධ්‍යම-පරාසයේ ස්මාට්ෆෝනයක් ලෙසින් සලකා බලන විට එම මුදලට වටිනා බව අවසාන වශයෙන් කීමට හැකිය. 

කාර්යාල පරිශ්‍රයේ නව ඩිජිටල් වයිට්බෝඩ් උපාංගය Microsoft Surface Hub 2

microsoft-surface-hub-2-1

මෙයට වසර තුනකටත් වැඩි කාලයකට පෙර එළිදැක්වුණු Microsoft Surface Hub උපාංගය ඔවුන් විසින් 
වෙළෙඳ පොළට හඳුන්වා දෙනු ලැබුවේ, විශාල පරිගණක තිරයක ප්‍රමාණයේ කාර්යක්ෂම ස්පර්ෂ තිර පරිගණකයක් ලෙසිනි. මෙය කාර්යාලයන්හි මෙන්ම ධනවතුන්ගේ නිවෙස්වලද ස්ථාපනය වනු ඇතැයි ඒ වනවිට බොහෝ දෙනෙකු උදක්ම බලාපොරොත්තු විණි. වසර තුනකට අධික කාලයක් ගතවී ඇතත් මෙය සාමාන්‍ය කාර්යාලයන්හි හෝ සාමාන්‍ය පරිශීලකයන් අතර දක්නට නොලැබීමට හේතුව, අඟල් 84ක ප්‍රමාණයේ අතිදැවැන්ත ටැබ්ලට් පරිගණකයක මිල දැරීමට සාමාන්‍ය ප්‍රමාණයේ ආයතනයක් ඉදිරිපත් නොවීම විය හැකිය. කෙසේ වෙතත් මයික්‍රොසොෆ්ට් සමාගම පවසන්නේ මේ වනවිට වෙළෙඳ පොළ 25කට අධික ප්‍රමාණයක, ලොව පුරා කාර්යාලයන් 5,000කට අධික ප්‍රමාණයක මෙම Surface Hub උපාංගය භාවිත වන බවයි. එසේම අනාගතයේදී මෙම Surface Hub දැවැන්ත ටැබ්ලට් පරිගණක ඕනෑම කාර්යාලයක සභා ශාලාවේ නිත්‍ය අංගයක් වනු ඇති බවයි. ඒ සම්බන්ධයෙන් ඔවුන්ට ඇති විශ්වාසය පිළිබිඹු කෙරෙන්නේ ඔවුන් අභිනවයෙන් Microsoft Surface Hub 2 උපාංගයද එළිදැක්වීමත් සමගිනි.

මෙම නවතම Microsoft Surface Hub 2 සංස්කරණය මූලික කොටසේ සිටම නිර්මාණය කොට ඇත්තේ වෘත්තීමය කටයුතුවලදී සහයෝගීත්වයෙන් යුතුව කටයුතු කිරීමට උපකාරී වීම සඳහා යැයි මයික්‍රොසොෆ්ට් සමාගම සඳහන් කරයි. මෙහිදී කාර්යාලයක වෘත්තීමය සගයන් සිටින්නේ එකම කාමරයක වුවත්, ලෝකයේ කෙළවර කිහිපයක වුවත් එය ගැටලුවක් නොවන අයුරින් මෙය නිර්මාණය කිරීමට මයික්‍රොසොෆ්ට් සමාගම සමර්ථ වී ඇතැයි කියැවේ.
මෙම Surface Hub 2 ටැබ්ලට් පරිගණකය අඟල් 50.5ක තරම් සුවිශාල තිරයකින් යුක්ත වේ. මෙය මෙහි පෙර සංස්කරණය වූ Surface Hubහි අතිදැවැන්ත අඟල් 

84ක තිරයට වඩා සැලකිය යුතු මට්ටමකින් කුඩා යැයි කෙනෙකුට සිතෙන්නට හැකිය. නමුත් මෙම Surface Hub 2 නව උපාංගය නිර්මාණය කොට ඇත්තේ වඩාත් හුරුබුහුටි ප්‍රමාණයකින් උපරිම ප්‍රයෝජනය ගැනීමට බැවින් එය ගැටලුවක් නොවනු ඇත. මෙම අඟල් 50.5 ක ස්පර්ෂ තිර පැනලයට 4K තිර විභේදනයක් ලබාදීමට හැකිය. එසේම එම ස්පර්ෂ තිර පැනලයට කිහිප දෙනෙකුට එක විට එය හා කටයුතු කළද ගැටලුවකින් තොරව කළමනාකරණය කර ගැනීමට හැකි වනු ඇත. වෙනත් ලෙසකින් පවසන්නේ නම්, මෙම තිරය මත tap කිරීම් සහ swipe කිරීම් ගණනාවක් එක විට සිදුවූවත් ඒවා වෙන් වෙන් වශයෙන් වාර්තා කොට ගැනීම Surface Hub 2 උපාංගයට ගැටලුවක් නොවනු ඇත. එසේම මෙම නව උපාංගයේ පරිශීලකයන් කිහිප දෙනෙකුට එකම උපාංගයේ ගිණුම් කිහිපයක් පවත්වාගෙන යෑමටද, එකම විට එම ගිණුම් වෙත ඇතුළත් වීමටද හැකියාව ලබාදී ඇත.

මෙහි 4K කැමරාවක් තිබෙන අතර, එනිසා ඔබගේ වෘත්තීය සගයන් ලෝකය වටා විසිරි සිටියද පහසුවෙන් ඔවුන් හා එක් කාමරයක සිටිනා ලෙසින් සම්බන්ධ වී සහයෝගීතාවෙන් ව්‍යාපෘති කටයුතු කිරීම පහසු වනු ඇත. එසේම මෙම ටැබ්ලට් පරිගණකය චිත්‍ර කැන්වසයක් ලෙසින් හරවා තැබුවද, එකම දර්ශන පථය ලබාදීම සඳහා මෙහි කැමරාව පහසුවෙන්ම තම තැන් වෙනස් කරගනු ඇත.

මෙම Microsoft Surface Hub 2 උපාංගය සමගින් පැමිණෙන තවත් සුවිශේෂී පහසුකමක් වන්නේ, මයික්‍රොසොෆ්ට් සමාගමේ මිලෙන් අධික Windows 10 වැනි මෙහෙයුම් පද්ධතියක් වුවත්, Office 365, මෘදුකාංග කට්ටලයක් වුවත්, Team chat නැතිනම් Whiteboard වැනි මෘදුකාංග වුවත් පරිශීලකයාට ලබාදීමයි.

මෙම Surface Hub 2 උපාංගය සාම්ප්‍රදායික වයිට් බෝඩ් එකක් හා සැසඳීමේදී සාපේක්ෂව කුඩා බව සැබෑ වේ. කෙසේ නමුත් ඔබට වයිට් බෝඩ් එකක් ලෙසින් වන පරිදි Surface Hub 2 උපාංග හතරක් වැනි ප්‍රමාණයක් එක්ව භාවිත කිරීමේ හැකියාවද තිබෙන බව අමතක කළ නොහැක. මෙම ටැබ්ලට් පරිගණක හතරම ජාලගත කළ විට මුළු කණ්ඩායමටම මෙය පහසුවෙන්ම භාවිත කිරීමට හැකියාව ලැබෙනු ඇත.

මෙම Surface Hub 2 උපාංගය සමගින් පහසුවෙන් බිත්තියක් වැනි පෘෂ්ඨයක එය එල්ලීමට හැකි වානේ කේසිනයක්ද, එසේත් නැතිනම් චිත්‍ර ඵලකයක මෙන් මෙම උපාංගය සි‍ටුවා තැබිය හැකි ආධාරකයක්ද ලබාදීමට මයික්‍රොසොෆ්ට් සමාගම කටයුතු කර ඇත්තේ, මෙය පහසුවෙන් එහා මෙහා ගෙන යෑමට සහ මොහොතකින් එක් තැනක ස්ථාපනය කිරීමට හැකියාව ලබාදීමට වේ.

කෙසේ වෙතත් මෙම Surface Hub 2 උපාංග දෙකක් හෝ හතරක් වැනි ප්‍රමාණයක් එකට ඈඳා වඩාත් කාර්යක්ෂම වැඩබිමක් නිර්මාණය කිරීමේ අදහසට මතුවන ප්‍රධාන ගැටලුව වන්නේ මෙම එක් උපාංගයක් අධික මිලක් වීමට හැකියාවක් තිබීමයි. මෙම නව Surface Hub 2 උපාංගය තවමත් මිල නියම කොට නැතත්, එහි පෙර සංස්කරණය වූ Surface Hub උපාංගයේ අඟල් 55 සංස්කරණය ඇමරිකානු ඩොලර් 8,999ක් සහ අඟල් 84 සංස්කරණය ඇමරිකානු ඩොලර් 21,999 වී තිබුණි. ඒ අනුව මෙයද සාමාන්‍ය පරිශීලකයෙකුට විනා සාමාන්‍ය කාර්යාලයීය වැය ශීර්ෂයකට පවා දැරිය නොහැකි ඉහළ මිලක් ගනු ඇතැයි සිතිය හැකිය.

නමුත් සඳහන් කළ යුතුම කරුණ වන්නේ, මෙවැනි අධික මිලක් යටතේ වුවද මෙම Surface Hub 2 දැවැන්ත ටැබ්ලට් පරිගණකය, කාර්යාලයක කණ්ඩායම් ව්‍යාපෘති කටයුතු සඳහා ඉහළ තාක්ෂණික දායකත්වයක් ලබාදෙන මෙවලමක් වනු ඇතැයි මයික්‍රොසොෆ්ට් සමාගම තුළ මෙන්ම මේ සම්බන්ධයෙන් උනන්දු වන්නන් තුළද ඇති විශ්වාසයයි.

microsoft-surface-hub-2-2 microsoft-surface-hub-2-3 microsoft-surface-hub-2-4

යූටියුබි හරහා ඉංග්‍රීසි වචන ඉගෙන ගැනීමට Holy Dictionary

ශ්‍රී ලංකාවේ ශිෂ්‍ය ශිෂ්‍යාවන්ට පමණක් නොව, වැඩිහිටි බොහෝ දෙනෙකුටද ඇති එක් අභියෝගයක් වන්නේ ඉංග්‍රීසි භාෂාව ඉගෙනීම බව නොකිවමනායි. බොහෝ විට පාසල් කාලයේදීම ඉංග්‍රීසි බස සම්බන්ධයෙන් අප්‍රියතාවක් වර්ධනය කරගන්නා බොහෝ දෙනෙකු එතැනින් එහාටද ඉංග්‍රීසි බස ඉගෙනීමට උනන්දු නොවන්නේ, ඉංග්‍රීසි යනු ඉගෙනීමට 'අසීරු' භාෂාවක් යැයි සිතමිනි. එනමුත් ඉදිරි තරග විභාගයන් සඳහා පමණක් නොව උසස් අධ්‍යාපන කටයුතු සඳහාද, ‍රැකී රක්ෂා කටයුතු සඳහාද, එදිනෙදා ජීවිතයේ යම් යම් කටයුතු සඳහාද මෙම ජාත්‍යන්තර භාෂාව දැන සිටීම අනිවාර්යය වී ඇත. මේ නිසාම සාම්ප්‍රදායික ක්‍රමයෙන් මිදී ඉංග්‍රීසි ඉගෙන ගැනීම සඳහා වන විවිධ පාඨමාලාවන්, ඉංග්‍රීසි ස්වයං අධ්‍යාපනය සඳහා වන පොත් පත්, ඕඩියෝ පොත්, මෘදුකාංග සහ ස්මාට්ෆෝන් යෙදුම් විශාල වශයෙන් වෙළෙඳ පොළේ දක්නට තිබේ. එසේ වුවත් වඩාත් සරල, මතකයේ ‍රැ‍ඳෙන ආකාරයකින් ඉංග්‍රීසි යූටියුබ් වීඩියෝ හරහා ඉගෙනගත නොහැකිද? ඒ සඳහා දිනකට මිනිත්තුවක් හෝ දෙකක් වැය කිරීම ඵලදායී නොවේද? ඒ සඳහා කදිම පිළිතුරක් සපයන්නේ 'ශුද්ධ වූ ඩික්ෂනරිය' හෙවත් Holy dictionary යූටියුබ් චැනලයයි!

32544027_10155190137150216_6318386711961272320_n

මෙම ‘ශුද්ධ වූ ඩික්ෂනරිය' හෙවත් Holy dictionary යනු බොහෝ විට දිනපතාම නව වීඩියෝවන් එකතුවන යූටියුබ් චැනලයකි. ඔබට මෙම යූටියුබ් චැනලය වෙත සබ්ස්ක්‍රයිබ් වී දිනකට මිනිත්තුවක් හෝ දෙකක් වැනි කාලයක් ඇතුළතදී සිත් ඇදගන්නා කතාන්දරයක් නැරඹීමට හැකි වන අතර, එම කතාන්දරය මගින් එක් ඉංග්‍රීසි වචනයක් හෝ දෙකක් හඳුන්වා දීමට කටයුතු කරනු ඇත. සැබවින්ම මෙම කතාන්දරයන් නිර්මාණය වී ඇත්තේ එම ඉංග්‍රීසි වචනය සෑදුණු අයුර මේ යැයි කීමටයි. මෙහිදී සිහිතබා ගත යුත්තේ මෙම කථාන්තරයන් තුළින් දැක්වෙන්නේ එම ඉංග්‍රීසි වචනයන්ගේ සැබෑ මූලය හෝ උත්පත්තිය නොවන බවයි. ඒ වෙනුවට වඩාත් විකාර රූපී, වඩාත් සිත් ඇදගන්නා සුළු ෆැන්ටසිමය ගුණයක්ද සහිත රසවත් කතාන්දරයන් නිර්මාණය කොට, එම වචනයන් උපත ලැබුවේ ඒ ආකාරයෙන් යැයි ඉදිරිපත් කිරීමේ අරමුණ වන්නේ එම ඉංග්‍රීසි වචන මතකයේ ‍රැඳීම සඳහා වන සුවිශේෂීත්වයක් ඊට ලබාදීමයි. සැබවින්ම විකාර සහගත රසවත් ස්වභාවයක් නිසා හෝ සුවිශේෂි වන යමක් මිනිස් මොළයේ පහසුවෙන් ‍රැ‍ඳෙනු ඇත. එනිසා ඔබ සාමාන්‍ය ශබ්ද කෝෂයක් පෙරළා බලා ඉගෙනගන්නා වචනයක් මතකයේ ‍රැඳීමේ සම්භාවිතාවට වඩා, මේ ආකාරයෙන් ඉගෙන ගන්නා වචනයක් මතකයේ ‍රැඳීමේ ඉහළ සම්භාවිතාවක් ඇත.

සැබවින්ම මෙවැනි කතාන්දරයන් මගින් ඉගැන්වීම ලෝකය පුරා බොහෝ දෙනෙකුගේ අවධානයට පාත්‍ර වී ඇති ඉගැන්වීම් ක්‍රමයකි.

මෙම ‘ශුද්ධ වූ ඩික්ෂනරිය' හෙවත් Holy dictionary ව්‍යාපෘතිය ක්‍රියාත්මක කරන්නේ ග්‍රන්ථ කර්තෘවරයෙකු සහ AMDT විශ්වවිද්‍යාලයේ ආචාර්යවරයෙකු ලෙසින් සේවය කරන නිරන්ජය රත්නායක විසිනි. ඔහු පවසන ආකාරයට මෙම කතාන්දරයන් ඩිජිටල් අවකාශයෙන් මුදවා නුදුරු අනාගතයේදී කෘතියක් බවට පරිවර්තනය කිරීමටද ඔහුට අදහසක් ඇත.
www.youtube.com/c/holydictionary

32652388_10155190135195216_7202094357875261440_n 32675358_10155190134490216_3043266237984407552_n 32690320_10155190135040216_9016500590536032256_n

සෙල්ෆි ස්මාට් OPPO F7

F7-1

මේ වනවිට ස්මාට්ෆෝන් ලෝකයේ OPPO යනු දැවැන්තයෙකි. ප්‍රමුඛ පෙළේ ස්මාට්ෆෝන් සන්නාමයක් ලෙසින් ශ්‍රී ලංකාවේද ප්‍රචලිතව ඇති OPPO නාමය යටතේ පැමිණෙන ස්මාට්ෆෝන් උපාංගයන් ඒවායේ දියුණු තාක්ෂණය, අලංකාරවත් නිමාව, විශිෂ්ට තලයේ කැමරාවන් මෙන්ම ඉහළ ක්‍රියාකාරීත්වයද සමගින් පරිශීලක විශ්වාසය දිනාගෙන ඇත. විශේෂයෙන්ම තරුණ පරපුර ස්මාට්ෆෝනයක ආකර්ෂණය වන සෙල්ෆි කැමරාව වැනි අංගෝපාංගයන් කෙරෙහි විශේෂ අවධානයක් යොමු කරමින්, OPPO ස්මාට්ෆෝනයන් වෙළෙඳ පොළට ඉදිරිපත් වේ. හඳුන්වා දෙන OPPO F7 උපාංගයද ඊට උදාහරණයකි.

පසුගිය මාසයේදී ශ්‍රී ලංකාවේද දියත් කෙරුණු OPPO F7 ස්මාට්ෆෝනය අඟල් 6.23 ක FHD+ Super Full Screen තිරයකින් යුක්ත වෙයි. එනම් මෙහි තිරය ස්මාට්ෆෝනයේ දාරයන් අද්දර දක්වාම පැතිර ගිය Bezel-less නිර්මාණ සැලසුමකට අනුව නිමවී ඇත. ස්මාට්ෆෝනයේ ඉහළ කැමරාව සහ ස්පීකරය සඳහා කුඩා අවකාශයක් පමණක් වෙන්වී ඇත. ස්මාට්ෆෝනයේ සම්පූර්ණ තිරයම භාවිත කරමින් වීඩියෝ අන්තර්ගතයක් නරඹන අවස්ථාවකදී එම අවකාශය මඳක් කරදරකාරී යැයි හැඟී යා හැකි වුවත්, ඉක්මනින්ම ඔබ එයට හුරුවනු ඇත. මෙම තිරය 2280x 1080 විභේදනයකින් යුක්ත වන අතර, තීව්‍ර වර්ණයන්ගෙන් යුතු සුපැහැදිලි දසුන් ලබාදෙන්නට සමර්ථ වනු ඇත. මෙයට Corning Gorilla Glass 5 ආරක්ෂක තිරයක් මගින් ආරක්ෂාව සැලසී ඇත.
ඔබට ඇතැම් විටක අඟල් 6.23ක තිර ප්‍රමාණයක් සහිත ස්මාට්ෆෝනයක් ප්‍රමාණයෙන් විශාල වැඩි නිසා භාවිතයට අපහසු වේ යැයි හැඟී යා හැකිය. එනමුත් මෙය පහසුවෙන්ම අත්ල මත රඳවා තබා ගත හැකි ලෙසින් සැලසුම් කර තිබෙනා අතර, මෙහි ඇති සුවිශේෂී 19:9 තිර අනුපාතයද වඩාත් පහසුබවක් ලබාදෙනු ඇත. වීඩියෝ ක්‍රීඩාවන් සඳහාද එම තිර අනුපාතය ඉතාමත් සුදුසු බව නොකිවමනායි.

ඔබට මේ වනවිට ශ්‍රී ලංකාවේ මිලදී ගත හැකි OPPO F7 ස්මාට්ෆෝනය නවතම Android 8.1 Oreo සංස්කරණය පදනම් කොට ගත් ColorOS 5.0 මෙහෙයුම් පද්ධතිය මතින් ධාවනය වේ. මෙය Mediatek Helio P60 64-bit Octa-core ප්‍රොසෙසරයකින් බලගැන්වෙන අතර, ග්‍රැ‍ෆික් සැකසුම් සඳහා Mali-G72 MP3 ග්‍රැ‍ෆික් ප්‍රොසෙසරයක්ද මෙහි තිබේ. බාහිර මතකය microSD කාඩ්පත් හරහා ගිගාබයිට් 256 දක්වා ඉහළ දැමීමට හැකි වේ. ‍රැම් මතකය සහ අභ්‍යන්තර මතකය සම්බන්ධයෙන් ගත් විට මෙය සංස්කරණයන් දෙකකින් වෙළෙඳ පොළට පැමිණේ. එක් සංස්කරණයක ගිගාබයිට් 4ක ‍රැම් මතකයක් සහ ගිගාබයිට් 64ක අභ්‍යන්තර මතකයක් තිබෙනා අතර, අනෙක් වඩාත් ඉහළ සංස්කරණයේ ‍රැම් මතකය සහ අභ්‍යන්තර මතකය පිළිවෙළින් ගිගාබයිට් 6 සහ ගිගාබයිට් 128 බැගින් වේ. මේ සමගින් අදාළ යෙදුම්වලට අනුකූලව උපරිම කාර්යක්ෂමතාවක් ලබාදීමට මෙම ස්මාට්ෆෝනයට හැකියාව ඇති අතර, මෙහි App-in-App හැකියාවද තිබේ. එනිසා ඔබ වීඩියෝවක් නරඹමින් හෝ ක්‍රීඩාවක නිරත වෙමින් සිටිනා විටකදී එයින් ඉවත් නොවීම පැමිණෙන දුරකථන ඇමතුමකට ප්‍රතිචාර දැක්වීමේ හැකියාව ලැබේ. එසේම මෙහි ඇති Full Screen Multitasking හැකියාව නිසා හුදෙක් ඔබේ හස්ත චලනයන් හරහා එක් යෙදුමකින් තවත් යෙදුමකට මාරු වීමේ හැකියාවද පවතී.

F7-3

මෙහි දෘඪාංග හැකියාවන් ඉහළ ශක්‍යතා ස්මාට්ෆෝනයක මට්ටමේ ඇති නමුත්, මෙහි සුවිශේෂීම අංගය ලෙසින් නිෂ්පාදකයන් විසින් පෙන්වා දෙන්නේ මෙහි ඇති කැමරා පද්ධතියයි. විශේෂයෙන්ම දක්වන්නේ නම් මෙහි ඉදිරිපස සෙල්ෆි කැමරාවයි. මෙගා පික්සල් 25ක ඉදිරිපස සෙල්ෆි කැමරාව කෘත්‍රිම බුද්ධියකින් (Artificial Intelligence) බලගැන්වෙන බව මෙහි ප්‍රචාරණ කටයුතුවල සඳහන් වෙයි. සැබවින්ම මෙයින් අදහස් වන්නේ, මෙම ඉදිරිපස කැමරාවේ ආලෝක තත්ත්වය කුමක් වුවත්, එයට හසුවන වස්තුව කුමක් වුවත් ඒවා හඳුනාගනිමින් ඒවාට අනුකූලව යෝග්‍යම සැකසුම් ‍තෝරාගනිමින් ඔබට විශිෂ්ට මට්ටමේ ඡායාරූප ලබා දීමට හැකියාව ඇති බවයි. මෙම ඉදිරිපස කැමරාව සමගින් real-time High Dynamic Range (HDR) සෙන්සරයක්ද තිබෙනා අතර, ඒ සමගින් AI Beauty 2.0 තාක්ෂණයද එක් වී තිබේ. මෙහි පසුපස ප්‍රධාන කැමරාව මෙගා පික්සල් 16කින් යුක්ත වේ.

මෙම AI Beauty 2.0 තාක්ෂණයට ස්ත්‍රී පුරුෂභාවය අනුව ඡායාරූපයට මුහුණ දෙන්නාව හඳුනා ගනිමින් එම ඡායාරූපය ඒ අනුව සැකසීමට හැකියාව ඇත. එසේම OPPO F7 ස්මාට්ෆෝනයේ පරිශීලකයාගේ ඡායාරූප ගැනීම සම්බන්ධයෙන් වන පුද්ගලික රුචි අරුචිකම්ද, නිතර සිදුකරනා සැකසුම් අනුසාරයෙන් හඳුනාගනිමින් මතක තබා ගැනීමට එයට හැකිය. මෙම AI Beauty 2.0  තාක්ෂණයට මිනිස් මුහුණක ස්ථාන 296ක් හඳුනා ගනිමින් ඒ අනුව ගන්නා ඡායාරූපය වැඩි දියුණු කිරීමට හැකියාව තිබීමද විශේෂත්වයකි. එසේම නිෂ්පාදකයින් පවසන ආකාරයට මෙම තාක්ෂණයට සෙල්ෆි ඡායාරූපය සඳහා පෙනී සිටිනා පුද්ගලයන් 4 දෙනෙකු දක්වා වයස, ස්ත්‍රී පුරුෂ බව, සමේ වර්ණය සහ වර්ගය පාදක කරමින් හඳුනා ගෙන ඒ අනුව ඡායාරූපය හැඩගැස්වීමටද හැකියාව ඇත.

මෙම OPPO F7 ස්මාට්ෆෝනය ගිගාබයිට් 64 සංස්කරණය සඳහා Solar Red, Moonlight Silver සහ Diamond Black යන වර්ණයන්ගෙන් යුතු උපාංග පෙළක් හඳුන්වාදී තිබෙනා අතර, ගිගාබයිට් 128 සංස්කරණය Solar Red  සහ Diamond Black යන වර්ණයන්ගෙන් ලබාගැනීමට හැකියාව ඇත. මෙම Diamond Black සංස්කරණය සම්බන්ධයෙන් විශේෂයෙන්ම සඳහන් කළ යුතු වන්නේ, එහි පසුපස දියමන්ති ආකාරයේ නිමාවකින් යුක්ත වන අතරම, එයට ආලෝකය පතිත වන දිශාව අනුව වෙනස් වර්ණ දිස්වන ආකාරයේ කාල වර්ණයකින් යුතුව අලංකාරවත්ව එය නිමවා තිබීම නිසායි.

ඔබට OPPO F7 ස්මාට්ෆෝනය දිවයින පුරා බලයලත් නියෝජිතයන්ගෙන් ලබා ගැනීමට හැකියාව ඇත. OPPO F7 64 GB සංස්කරණය රුපියල් 54,990ක් ලෙසින් මිල නියම කොට ඇති අතර, OPPO F7 128 GB සංස්කරණය රුපියල් 69,990ක් ලෙසින් මිල නියම කොට ඇත.

 

පොකට් ප්‍රමාණයට ගැළපෙන සිනමා කැමරාව Blackmagic Pocket Cinema Camera 4K

blackmagic-pocket-cinema-camera-1

සිනමා කැමරාවක් යැයි කියූ විට බොහෝ විට ඔබට සිහියට පැමිණෙනු ඇත්තේ උරහිස මත තබාගෙන හෝ විශේෂ ආදාරකයක රුවා ක්‍රියාත්මක කළ යුතු, විශාල ප්‍රමාණයේ කැමරාවක් වනු ඇත. කෙසේ වෙතත් වර්තමානය වන විට සංයුක්ත ප්‍රමාණයේ සිනමා කැමරාද නිර්මාණය වී තිබෙනා අතර, මෙයට වසර පහකට පමණ පෙර වෙළෙඳ පොළට පැමිණි Blackmagic Pocket සංයුක්ත සිනමා කැමරාවද ඊට උදාහරණයක් ලෙසින් සඳහන් කළ හැකිය. කෙසේ වෙතත් ගැටළුව වූයේ එම කැමරාව නිෂ්පාදනය වන කාලයේදී 4k ගුණාත්මක තත්ත්වය ජනප්‍රිය වී නොතිබීම නිසා, එහි 4K හැකියාවන් අන්තර්ගත නොවීමයි. මෙම අඩුපාඩුවද සම්පූර්ණ කරමින් සන්නාමය මගින් නවතම සිනමා කැමරා සංස්කරණයක් නිකුත් කොට ඇති අතර එය Blackmagic Pocket Cinema Camera 4K නමින් හැඳින්වේ.
නමින් කියැවෙන ආකාරයටම මෙම නව Blackmagic Pocket Cinema 4K  කැමරාවට 4K ගුණාත්මක භාවයෙන් යුතුව වීඩියෝ පටිගත කිරීමේ හැකියාව තිබෙනා අතර, එය සංයුක්ත භාවය අතින් වඩාත් විශාල DSLR කැමරාවන්ගෙන් වෙන්වී වඩාත් හුරුබුහුටි හා සංයුක්ත Mirrorless කැමරාවන්ට සමාන වේ. මෙම සංයුක්ත ප්‍රමාණය නිසාම මෙවැනි කැමරාවක් වඩාත් පහසුවෙන් හැසිරවීමට හැකියාව ලැබෙනා අතර, වඩාත් පරිශීලක මිත්‍රශීලී භාවයක්ද මෙහි ඇත. සැබවින්ම මෙවැනි සංයුක්ත සිනමා කැමරාවන් යනු වර්තමානයේදී ආගන්තුක සංකල්පයක් නොවනා අතර මේවාට පැරණි විශාල සිනමා කැමරාවන්ට වඩා පුළුල් උපයෝගීතාවයක් ලබාදීමටද හැකියාව ඇත. එසේම මිල අතින් බැලූ කලද මෙය වඩාත් සුවිශාල සිනමා කැමරා උපාංගයන්ට වඩා සෑම අතකින්ම ලාභදායී වේ.

blackmagic-pocket-cinema-camera-2

මෙම Blackmagic Pocket Cinema 4K  උපාංගයේ සෙන්සරය 3/4 ප්‍රමාණයේ වන අතර, එය මෙහි පූර්වජයාට වඩා ප්‍රමාණයෙන් විශාල වේ. එසේම මෙම නව සෙන්සරයත් සමගින් ඔබට 4096 x 2160 විභේදනයේ RAW අන්තර්ගතයන් තත්පරයකට රාමු 60 ක වේගයෙන් පටිගත කිරීමට හැකියාව ඇති අතර, 1080p විභේදනයේ අන්තර්ගතයන් තත්පරයකට රාමු 120 ක වේගයකින් පටිගත කිරීමටද හැකියාව ඇත. එසේම මෙහි  25,600 ක් දක්වා Dual native ISO අගයක් ද ඇත. මෙහි වඩාත් විශාල ඉමේජ් සෙන්සරය නිසාවෙන්ම පරිශීලකයාට වඩා පුළුල් දර්ශන පථයක් ලබාදෙනු ඇත. එසේම වඩාත් වැඩි ක්ෂේත්‍ර ගැඹුරක් මෙන්ම වඩාත් අඩු ආලෝකයේ පවා පැහැදිලි දසුන් ලබාදීමටද මෙම සෙන්සරයට හැකියාව ලැබෙනු ඇත. මෙම සෙන්සරය හරහා 10-bit ProRes සහ 12-bit RAW අන්තර්ගතයන් පටිගත කිරීමටද සහාය ලැබෙනු ඇත. මෙසේ අන්තර්ගතයන් සංක්ෂිප්ත නොකෙරෙන ගොනු ආකෘතියකින් ඔබට පටිගත කිරීම් සිදුකිරීමට හැකියාව ලැබෙනා බැවින්, පසු නිෂ්පාදන කටයුතු වලදී සංස්කරණයන් සඳහා වඩාත් වැඩි පහසුවක් ලැබීමද සිදුවේ. 

blackmagic-pocket-cinema-camera-10

ඔබට මෙම Blackmagic Pocket Cinema 4K  උපාංගයේ ඇති 3.5mm ජැක් එක හෝ mini-XLR පෝට් එක ඔස්සේ ඔබ කැමති මයික්‍රෆෝනයක් හෝ බූම් එකක් සවි කිරීමට හැක. කෙසේ වෙතත් එය අත්‍යාවශ්‍ය නොවන්නේ මෙම කැමරාවේ ශ්‍රව්‍ය පටිගත කිරීම වෙනුවෙන් මයික්‍රෆෝන් හතරක පද්ධතියක් ස්ථාපනය කොට ඇති බැවිනි. කැමරාවේ පසුපස අඟල් 5 ක 1080p විභේදනයක් සහිත LCD capacitive touchscreen තිරයක් පිහි‍ටුවා ඇති බැවින් ඔබට පහසුවෙන් ඔබේ දර්ශන රාමුව සකසා ගැනීමට, නාභිගත කිරීම් සීරු මාරු කිරීම ඇතුළු වෙනත් බොහෝ පාලනයන් සිදු කිරීමට එයින් හැකියාව ලැබෙනු ඇත. මෙහි ස්පර්ෂ තිර පාලකයන්ට අමතරව භෞතික බොත්තම්ද පිහි‍ටුවා ඇති බැවින් ඉන් ඔබ කැමති ආකාරයක් ‍තෝරාගැනීමට හැකියාව ඇත.

මෙම කැමරා උපාංගයේ ලෙන්සයන් සවි කිරීම සඳහා MFT lens mount එකක් ඇත. එනම් ඔබට මේ සඳහා විශේෂයෙන්ම ලෙන්සයන් මිලදී ගැනීමට අවශ්‍ය නොවනා අතර, Mirrorless කැමරාවන් හා ගැළපෙන ඕනෑම ලෙන්සයක් දැනටමත් ඔබ අත ඇති නම්, එම ලෙන්සයන් මෙම කැමරාව හා භාවිත කළ හැක. විශේෂයෙන්ම මේ සමගින් ඔබට භාවිතා කළ හැකි ලෙන්ස් ‍තෝරාගැනීම් ප්‍රමාණයද ඉතාමත් ඉහළ බවද සඳහන් කළ යුතු වේ. එසේම මෙහි මතක ධාරිතාවය ලෙසින් ඔබට ‍තෝරාගැනීම් කිහිපයක්ම ඇත. මෙහි SD card, UHS-II සහ CFast 2.0 කාඩ්පත් ඇතුළත් කිරීම සඳහා ද්වාරයන් පිහි‍ටුවා තිබීමෙන් එයට ඉඩ ලැබෙනු ඇත. එසේම මෙහි USB-C පෝට් එකක්ද ඇති අතර, අවශ්‍ය නම් ඒ හරහා ඔබට සෘජුවම ඉහළ මතක ධාරිතාවක් ඇති බාහිර මතක ධාවකයක් සවි කොට එයට පරිගත කෙරෙනා අන්තර්ගතයන් සුරක්ෂිත කිරීමටද හැකියාව ඇත.

මෙම Blackmagic Pocket Cinema 4K  උපාංගය බලගැන්වෙන්නේ LP-E6 බැටරි හරහා වන අතර, එක් බැටරියක බලය සිඳී ගිය විට පහසුවෙන්ම තවත් බැටරියක් මාරු කිරීමට හැකියාව ඇත. එසේම එක් බැටරියකට පැයක පමණ කාලයක් එක දිගට පටිගත කිරීම් සඳහා බලය සැපයීමට හැකියාව ඇත. මෙම කැමරාව ධාවනය වන්නේ Blackmagic  සන්නාමය යටතේ පැමිණෙන මෙහෙයුම් පද්ධතියක් මතිනි. මෙයට අමතරව මෙම කැමරාව සමගින් ඔබට පසු නිෂ්පාදන කටයුතු සිදුකිරීම සඳහා DaVinci Resolve Studio මෘදුකාංගයේ සම්පූර්ණ සංස්කරණයක්ද ලැබෙනු ඇත.

 

වට්ස්ඇප් සම නිර්මාතෘ ෆේස්බුක් සමාගමෙන් ඉවත්වෙයි

වට්ස්ඇප් සම නිර්මාතෘ මෙන්ම ප්‍රධාන විධායක නිලධාරී ජෑන් කොයුම් ෆේස්බුක් සමාගමෙන් ඉවත්වි ඇත. පුද්ගලිකත්වය පිළිබඳව පැන නැගුණු ගැටලු හේතුවෙන් ඔහු මෙසේ සිය තනතුරින් ඉල්ලා අස්වී ඇති අතර ඔහු ෆේස්බුක් සමාගමේ අධ්‍යක්ෂ මණ්ඩලයෙන් ඉවත්ව ඇත.

ෆේස්බුක් සමාගම විසින් වට්ස්ඇප් සමාගම මිලදී ගැනීමත් සමග වට්ස්ඇප් ෆේස්බුක් සමාගම යටතේ පාලනය විය. ෆේස්බුක් සමාගම හා ඇතිවූ ගැටලුකාරී තත්ත්වයක් මත ඔහු මෙහේ ඉල්ලා අස්වී තිබේ.

an146841452file-photo-jan-k

 

 

මතක ධාවකයක් තුළ පරිගණකයක්! Gnarbox 2.0 SSD

ඔබ වෘත්තීයමය ඡායාරූප ශිල්පියෙකු හෝ වීඩියෝ ශිල්පියෙකු නැතිනම් වීඩියෝ බ්ලොගර් කෙනෙකු වුවත්, ඔබ පිටත රූගත කිරීමක් හෝ ඡායාරූප ගැනීමක් සිදුකරන්නේ නම් එයට පිටත් වීමට පෙර සිතිය යුතු කරුණු කාරණා ගණනාවක් තිබේ. ඔබට විය හැකි බොහෝ දෑ, රූගත කිරීමට හෝ ඡායාරූප ගැනීමට ප්‍රථම සැලසුම් කිරීමට සිදුවනු ඇත. ඔබ ගෙන යා යුතු දේ මොනවාද යන්නද එම සැලසුම් කිරීමට අයත් වේ. මෙහිදී ඔබේ කැමරා, ලෙන්ස, අමතර බැටරි, අමතර මතක චිපයන්, ඩ්‍රෝන් යානාවන්, ත්‍රිපාද ඇතුළු අනෙකුත් වුවමනා දහසකුත් එකක් අතිරේක උපාංග හෝ උපකරණයන්ට අමතරව, බොහෝ විට ඔබට ලැප්ටොප් පරිගණකයක්ද තිබීම අවශ්‍ය වනු ඇත. එයට හේතුව වන්නේ ඔබ එක දිගට රූගත කිරීම්, ඡායාරූප ගැනීම් සිදුකරන්නේ නම් එක් මොහොතකදී ඔබට මතක චිපයන්ගේ ඇති අන්තර්ගතයන් සුරක්ෂිත කළ යුතු වෙනත් උපාංගයක් අවශ්‍ය වන බැවිනි. එසේම එම මොහොතේම යම් යම් සංස්කරණයන් සිදු කිරීමටද අවශ්‍ය මෘදුකාංගයන් ස්ථාපිත ලැප්ටොප් උපාංගයකින් සැලසෙන සේවය සුළු කොට තැකිය නොහැකිය.

exklim-ex-core-external-gpu-1

කෙසේ නමුත් ඔබට අවශ්‍ය සියලුම උපාංග සහ උපකරණ අතරතුර ලැප්ටොප් පරිගණකයක්ද ‍රැගෙන යෑම අසීරු කරුණකි. එහි ආරක්ෂාව සම්බන්ධයෙන් මතුවන ගැටළු මෙන්ම, ඔබට ගෙන යා හැකි උපාංග, උපකරණ ප්‍රමාණයේ සීමාවන්ද මෙම අසීරුතාවට හේතු වනු ඇත. 
මෙයට වසර තුනකට පමණ පෙරාතුව හඳුන්වා දුන් Gnarbox උපාංගය ඉදිරිපත් වූයේ මෙම ගැටළුවට සාර්ථක විසඳුමක් ලෙසිනි. සරලව හඳුන්වන්නේ නම් Gnarbox යනු ස්ථාපනය කළ පරිගණක පද්ධතියක් සහිත මතක ධාවකයක් ලෙසින් හැඳින්විය හැකිය. කෙසේ හෝ මේ වනවිට එම නිෂ්පාදන සමාගම සිය නවතම යාවත්කාලීන උපාංගය වන Gnarbox 2.0 මතක ධාවකයද නිර්මාණය කිරීමට පියවර තබා ඇත. මෙම සටහන ඒ සම්බන්ධයෙනි.

පැරණි Gnarbox උපාංගය සහ නව Gnarbox 2.0 උපාංගය සසඳා බලන විට බැලූ බැල්මට පෙනී යන්නේ Gnarbox 2.0 හි නිෂ්පාදකයන් විසින් සඳහන් කරන වැඩිදියුණු කිරීම්වලට අමතරව, වඩාත් හැඩි දැඩි, රළු භාවිතයට ඔරොත්තු දෙන ලෙසින් තැනූ කේසිනයක ආරක්ෂාවද තිබෙන බවයි. ඊට අමතරව මෙහි හැකියාවන් සහ විශේෂාංගයන්ද වඩාත් ප්‍රායෝගික මට්ටමක තිබෙන අතර, පරිශීලකයින්ට ‍තෝරාගත හැකි මතක ධාරිතා සංස්කරණ කිහිපයකින්ම මෙය පැමිණීමද විශේෂත්වයකි.

මෙහි මුල් උපාංගය සේම Gnarbox 2.0 ද නිර්මාණය කොට ඇත්තේ ඡායාරූප හෝ වීඩියෝ ශිල්පියෙකුට නැතිනම් ඡායාරූප/වීඩියෝ අවශ්‍යතා ඇති ඕනෑම අයෙකුට තම ලැප්ටොප් උපාංගය වෙනුවට භාවිත කළ හැකි වඩාත් ජංගම, හුරුබුහුටි, ප්‍රමාණයෙන් කුඩා උපාංගයක් ලෙසිනි. මෙහිදී සැලකිල්ලට ගත යුත්තේ Gnarbox 2.0 උපාංගය ලැප්ටොප් උපාංගයක් වෙනුවට භාවිත කළ හැක්කේ වීඩියෝ හෝ ඡායාරූප බැක්-අප් කිරීම, කළමනාකරණය කිරීම, සංස්කරණය කිරීම හෝ රෙන්ඩර් කිරීම වැනි කාර්යයන් සඳහා මිස වෙනත් එදිනෙදා පරිගණක අවශ්‍යතා සඳහා නොවන බවයි.

මෙම උපාංගය මූලිකවම බාහිර SSD (Solid State Drive) මතක ධාරිතා උපාංගයක් වන අතර, එහි NVMe SSD මතකයක් තිබේ. එය ගිගාබයිට් 128 සිට ටෙරාබයිට් 1 දක්වා වන ධාරිතා සංස්කරණයන්ගෙන් වෙළෙඳ පොළට පැමිණෙනු ඇත. එසේම සම්මත සාම්ප්‍රදායික බාහිර මතක ධාවකයක දක්නට නොලැබෙන ලෙසින් මෙහි 2.4GHz Intel quad-core Atom ප්‍රොසෙසරයක්, ගිගාබයිට් 4 ක LPDDR3 ‍රැම් මතකයක්, 4 Core Intel HD Graphics ග්‍රැ‍ෆික් ප්‍රොසෙසරයක් ස්ථාපනය කොට ඇත. මෙහි SD Card චිපයන් ඇතුළු කිරීම සඳහා විවරයක් මෙන්ම ‍රැහැන් රහිත Wi-Fi හැකියාවද තිබේ. එසේම මෙහි USB-C ද්වාරයන් දෙකක් හා Micro HDMI ද්වාරයන් ද තිබේ. 3200mAh Lithium ion බැටරියක්ද මෙහි ඇත.

exklim-ex-core-external-gpu-2

මෙහි ඉදිරිපස කුඩා OLED තිරයක් මෙන්ම එයට පහතින් සුවිශේෂී බොත්තම් හතරක පාලක යාන්ත්‍රණයක්ද පිහි‍ටුවා ඇති අතර, ඔබට පහසුවෙන්ම වෙනත් උපාංගයක උපකාරය රහිතව SD කාඩ්පතකින් හෝ ෆ්ලෑෂ් මතක ධාවකයකින් හෝ සෘජුවම USB සම්බන්ධතාව ඔස්සේ දත්ත මෙම Gnarbox 2.0 මතක ධාවකයට සුරක්ෂිත කිරීමට හැකිය. මෙහිදී SD කාඩ්පත් සඳහා වන වේගය තත්පරයකට මෙගාබයිට් 75-100 දක්වා වන අතර, USB සම්බන්ධතාවය හරහා දත්ත උඩුගත කරන්නේ නම් තත්පරයකට මෙගාබයිට් 400-500 දක්වා වේගයක් ලැබෙනු ඇත. මෙයද වෙනත් ක්‍රමයන් ඔස්සේ ලැප්ටොප් උපාංගයකට ඔබේ කැමරාවන්ගේ දත්ත උඩුගත කිරීමේදී ලැබෙන සාපේක්ෂ දුර්වල වේගය වෙනුවට වැඩිදියුණු වීමක් ලෙසින් ගණන් ගැනීමට හැකිය. එසේම මෙහි බැටරි බලය ඔබට 
එකදිගට පැය පහක පමණ කාලයක් දත්ත බැක්-අප් කිරීමටද, පැය තුනක පමණ කාලයක් සංස්කරණ කටයුතු සඳහාද අවකාශය ලබාදෙනු ඇත. එසේම මෙම බැටරිය ඔබට පහසුවෙන් ගලවා ඉවත් කළ හැකි බැවින්, අමතර බැටරියක් ගෙන යෑම පමණක් වඩාත් වැඩි කාලයක් Gnarbox 2.0 උපාංගයේ මෙහෙයුම් බලය ලබාගැනීම සඳහා ප්‍රමාණවත් වනු ඇත.

exklim-ex-core-external-gpu-3

මෙම Gnarbox 2.0 උපාංගයේ පරිගණක පද්ධතිය සමගින් ඔබට ස්මාට්ෆෝනයේ හෝ ටැබ්ලට් උපාංගයේ ස්ථාපනය කළ හැකි මොබයිල් ඇප් හතරක් ලැබෙනු ඇත. ඒවා නම් වශයෙන් Safekeep, Selects, Sequence සහ Showcase ලෙසින් දැක්වේ. මෙයින් Safekeep යනු Dropbox සහායද සහිත බැක්-අප් සහ ගොනු කළමනාකරණ මෙවලමක් වේ. ඡායාරූප සහායක යෙදුමක් වන Selects මගින් RAW ඡායාරූප නැරඹීමට සහ මූලික වර්ණ නිවැරදි කිරීම් සිදුකිරීමට අවකාශ සපයනු ඇත. එසේම වීඩියෝ සංස්කරණ යෙදුමක් වන Sequence මගින් වීඩියෝ ක්ලිපයන් සඳහා මූලික සංස්කරණයන් කිරීමට ඉඩ ලබාදීම සහ වීඩියෝ ක්ලිපයන් රෙන්ඩර් කිරීමට සහ වෙනත් යෙදුම් වෙත එක්ස්පෝට් කිරීමට පහසුකම් සලසයි. අවසාන වශයෙන් Showcase මගින් ඔබට විශාල තිරයකට උපාංගය HDMI ද්වාරය ඔස්සේ සම්බන්ධ කොට, වීඩියෝ සහ ඡායාරූප නැරඹීමට ඉඩ සලසයි. මෙම යෙදුම් සතරට අමතරව Adobe Lightroom CC, Lumafusion, සහ Gnarbox Classic යන මෘදුකාංගයන් හා සම්පූර්ණ අනුකූලත්වය සමගින් Gnarbox 2.0 උපාංගය වෙළෙඳ පොළට පැමිණෙනු ඇත.
මෙම සම්පූර්ණ උපාංගයම දැඩි, රළු භාවිතයට ඔරොත්තු දෙන බාහිර ආවරණයකින් නැතිනම් කේසිනයකින් යුක්ත වන අතර, එය දුහුවිල්ලෙන් සහ ජලයෙන් ආරක්ෂා වන බවට පැවසෙන IP67 සහතිකයද අත්පත් කොටගෙන ඇත. එසේම මෙහි මානයන් අඟල් 6 X 3 X1.16 ප්‍රමාණයේ වන අතර, ඔබට මෙය ඕනෑම රළු වාතාවරණයක භාවිත කිරීමට හැකිවාක් මෙන්ම පහසුවෙන් ඔබේ කැමරා බෑගයේ සුළු ඉඩක තැන්පත් කොට එහා මෙහා ගෙන යෑමටද හැකියාව ලැබෙනු ඇත.
මෙය මෙම වසර අවසාන කාර්තුවේදී පමණ වෙළෙඳ පොළට නිකුත් කිරීමට Gnarbox 2.0 නිෂ්පාදකයන් බලාපොරොත්තු වේ.

වැඩි විස්තර සඳහා: 
goo.gl/HqAkEv