Category Archives: technology

අඟල් 100 ක තිරයකින් යුතු රූපවාහිනී ප්‍රොජෙක්ටරයක්

අතීතයේ පැවති හැඩි දැඩි දැවැන්ත රූපවාහිනී යන්ත්‍ර වෙනුවට හුරුබුහුටි සිහින් හැඩයෙන් යුතු නවීන රූපවාහිනී පැමිණීමත් සමගින්, වඩාත් විශාල රූපවාහිනී යනු එතරම් අරුමයක් නොවුණි. වර්තමානයේ වෙළෙඳපොළේ දක්නට ඇති රූපවාහිනී යන්ත්‍ර බොහෝ විට ආරම්භ වන්නේම අඟල් 32 නි. එසේම වඩ වඩාත් විශාල තිර ප්‍රමාණයන්ගෙන් යුතු රූපවාහිනී යන්ත්‍ර මිලදී ගැනීමට බොහෝ දෙනෙකු පෙළැඹෙන්නේ, තිරය විශාල වීමත් සමගින් ලැබෙන වින්දනාත්මක අත්දැකීම වැඩිවන නිසාවෙනි. එසේ නම් අඟල් 100 ක තිර ප්‍රමාණයකින් යුක්ත රූපවාහිනී යන්ත්‍රයක් ඇතිනම් එය නිවසේ මිනි තියෙටරයක් නිර්මාණය කළා හා සමාන අත්දැකීමක් වනු ඇති බව අමුතුවෙන් කිව යුතු නොවේ. කෙසේ වුවත් ගැටලුව වන්නේ වර්තමානයේ ඇති සිහින්, සැහැල්ලු රූපවාහිනියක් වුවද අඟල් 100 ක් තරමේ විශාලත්වයක් ඇති විටදී එය හැසිරවීම ලෙහෙසි පහසු කර්තව්‍යයක් නොවීමයි. එසේම එය ඔබේ විසිත්ත කාමරයේ හැර වෙනත් තැනක භාවිතා කිරීමට නොහැකි වන බවද නොකිවමනායි.
ප්‍රමුඛ පෙළේ රූපවාහිනී නිෂ්පාදන සමාගමක් වන Hisense මගින් මෙම ගැටලුව විසඳීම සඳහා නිවසේ රූපවාහිනිය වෙනුවට භාවිතා කළ හැකි රූපවාහිනී/ප්‍රොජෙක්ටර් දෙමුහුම් යන්ත්‍රයක් නිෂ්පාදනය කොට ඇත. මේ ඔවුන්ගේ නවතම හඳුන්වාදීම වන Hisense 4K Ultra HD Smart Laser TV උපාංගයයි.

hisense-4k-ultra-hd-smart-laser-tv-1

රූපවාහිනී යන්ත්‍රයක් ලෙසින් භාවිතා කළ හැකි ප්‍රක්ෂේපණ යන්ත්‍ර හෙවත් ප්‍රොජෙක්ටරයන් යනු නව අදහසක් නොවේ. කෙසේ නමුත් මෙම Hisense 4K Ultra HD Smart Laser TV රූපවාහිනී ප්‍රොජෙක්ටරය සුවිශේෂී වන්නේ එහි ඇති රූපවාහිනියකටත් වඩා ඉහළ ගුණාත්මක තත්වයේ දසුන් සහ වර්ණ රටාවන් මෙන්ම රූපවාහිනියක් වැනිම වූ පහසුකම්ද සමගින් වේ. මෙය “breakthrough new way for TVs to present images” යන උදෘතය සමගින් වෙළෙඳපොළට නිකුත් කරන්නට Hisense සමාගම කටයුතු කොට ඇති අතර, මෙහි 4K Ultra HD විභේදනයෙන් යුතු සුපැහැදිලි, තියුණු දසුන්, ස්වභාවික වර්ණ සංකලනයන් සහ විශිෂ්ට දීප්තියක් ලබාදීම සඳහා මයික්‍රෝ කණ්ණාඩි මිලියන හතරක් ස්ථාපනය කොට තිබේ. මෙම තිරයෙන් ඔබට යමක් නැරඹීම සඳහා ඔබේ වටාපිටාව කෙතරම් තීව්‍ර ආලෝකයකින් නැහැවී ඇතිද යන්න පවා ගැටළුවක් නොවේ. සාමාන්‍යයෙන් ප්‍රොජෙක්ටරයකින් යමක් නරඹන විට කාමරයේ ආලෝකය අවම කළ යුතු වුවත්, Hisense රූපවාහිනී ප්‍රොජෙක්ටරය භාවිතයේදී එවැනි ගැටලුවක් පැන නොනඟිනු ඇත.
එසේම මෙයට වර්තමානයේ වෙළෙඳපොළේ ඇති රූපවාහිනියකටත් වඩා වේගයෙන් දසුන් තිරය මතට ගෙන ඒමට  (Rendering) හැකියාවක් ඇති නිසා වඩාත් සුමට ලෙසින් අන්තර්ගතයන් මෙයින් දර්ශනය වනු ඇත. එසේම මෙහි ඇති upscaling engine එක නිසා සාමාන්‍ය HD අන්තර්ගතයන් වුවත් මේ හරහා දර්ශනය වනු ඇත්තේ වඩාත් විස්තර සහිතව 4K ගුණාත්මක තත්වයෙනි.

hisense-4k-ultra-hd-smart-laser-tv-2

මෙය සමන්විත වන්නේ රූපවාහිනී ප්‍රොජෙක්ටර් යන්ත්‍රයකින් සහ අඟල් 100 ක නවීනතම ප්‍රොජෙක්ටර තිරයකිනි. කෙසේ නමුත් මෙය අති කෙටි දුර ප්‍රක්ෂේපණ යන්ත්‍රයක් නිසා, උපාංගය තැබිය යුතු වන්නේ ප්‍රොජෙක්ටර් තිරයට අඟල් කීපයක් පහතිනි. මෙම Hisense 4K Ultra HD Smart Laser TV රූපවාහිනී ප්‍රොජෙක්ටර් යන්ත්‍රයේ රූපවාහිනී OTA ටියුනරයක්ද ස්ථාපනය කොට ඇත්තේ ඊට ඇන්ටනාවක් සම්බන්ධ කොට, රූපවාහිනී විකාශන විසුරුවා හැරීම් ග්‍රහණය කරගැනීමට හැකියාව ලබාදෙමිනි. එසේම මෙහි HDMI පෝට් දෙකක් ඇත්තේ සැටලයිට් ටීවී පහසුකම් සඳහා මෙන්ම බාහිර උපාංග මගින් අන්තර්ගතයන් ලබාගැනීමට හැකියාව ලබාදෙමිනි. මෙහි වයි-ෆයි ‍රැහැන් රහිත සම්බන්ධතාවයද ඇති අතර, Netflix, Amazon Video, YouTube, Tiki Live වැනි පෙරනිමියෙන් ස්ථාපනය කොට ඇති යෙදුම් ගණනාවක්ද මෙහි තිබේ. එසේම මෙහි 110-watt 2.1-channel ඕඩියෝ සිස්ටම් එකක්ද ඇත්තේ සාමාන්‍ය රසවින්දනය සඳහා ප්‍රමාණවත් ශ්‍රව්‍ය ප්‍රතිදානයක් ලබාදෙමිනි.

hisense-4k-ultra-hd-smart-laser-tv-3 hisense-4k-ultra-hd-smart-laser-tv-4 lp-04 lp-06

ටෙරා බයිට් 40 දැවැන්ත මතක ධාරිතාවක් වෙනුවෙන් MAMR HARD DRIVE

වර්තමානය වනවිට දැකගත හැකි ටෙරාබයිට් ප්‍රමාණයේ මතක ධාරිතාවන් මෙයට වසර ගණනාවකට පෙරදී සිතිය නොහැකි තරමේ සංකල්පයන් වූ අතර, අනාගතය වනවිට ටෙරාබයිට් එකක හෝ දෙකක ධාරිතාවන්ද ප්‍රමාණවත් නොවනු ඇත. වර්තමානයේදී SSD හෙවත් Solid State ධාවකයන් මතක ධාරිතාවන් ලෙසින් ජනප්‍රිය වී තිබුණත්, බොහෝ දෙනෙකු තවමත් ඩිස්ක් ධාවකයන් භාවිත කරන්නේ ඒවාට ඉහළ මතක ප්‍රමාණයන් රඳවා ගැනීමට ඇති හැකියාවට තවමත් අභියෝගයන් එල්ල වී නොමැති බැවිනි.

දෘඪ තැටි නිර්මාණයේ ප්‍රමුඛ නාමයක් වන Western Digital විසින් MAMR නමින් හඳුන්වා දී ඇති තාක්ෂණය තවමත් ප්‍රවර්ධනය වෙමින් පවතින අතර, මෑතකදී Western Digital සමාගම විසින් හෙළිදරව් කළ දැවැන්ත නිෂ්පාදනය වූයේ ටෙරාබයිට් 40 ක ප්‍රමාණයේ දෘඪ තැටියකි. මෙම MAMR යන්නෙන් කියවෙන්නේ microwave-assisted magnetic recording යන්න වන අතර, එය මෙහි දත්ත ලිවීමේ සහ කියවීමේ තාක්ෂණය සම්බන්ධයෙන් කියාපායි. 

තවමත් මෙය සොයාගැනීමක් ලෙසින් පමණක් හඳුන්වා දිය හැකි අතර, Western Digital සමාගම විසින් පවසා සිටින්නේ තව වසර කිහිපයක ඇවෑමෙන් තමන්ට පාරිභෝගික භාවිතය සඳහා විකිණිය හැකි ටෙරාබයිට් 40ක MAMR දෘඪ තැටි නිෂ්පාදනය කළ හැකි බවයි. ආරංචි මාර්ග පවසන්නේ, 40TB MAMR දෘඪ තැටි වෙළෙඳ පොළට පැමිණෙන විට 2025 පමණ වනු ඇති බවයි.

intro

 

 

 

එකම ස්මාට්ෆෝනයක තිර දෙකක්

සම්පූර්ණයෙන්ම එකිනෙකින් වෙනස් සත්ත්ව විශේෂයන් ලෙසින් පෙනී යන තරමට ආකෘතීන් සහ හැඩයන් අතින් වෙනස් වන ජංගම දුරකථන සංස්කෘතියක් මෙයට දශකයකට, දෙකකට පමණ පෙරාතුව තිබුණු බව තවමත් අමතක වීමට ඉඩක් නැත. එම කාලයේදී සැබවින්ම ස්මාට්ෆෝනයන් සුලභ නොවූ අතර, ඒ වෙනුවට පියනකින් ඇරිය හැකි ජංගම දුරකථන, පහතට ඇදිය හැකි ස්ලයිඩ් යතුරු පුවරුවක් තිබූ ජංගම දුරකථන, පි‍ටුපස පියන විවෘත කළ විට ගේම්පෑඩයක් බවට පත්වන ජංගම දුරකථන ආදී නානා විධ උපාංගයන් වෙළෙඳ පොළේ තිබූ අතර, මේ සියල්ලේම විවිධාංගීකරණය සැබවින්ම එකිනෙකට වෙනස් සංස්කෘතීන් ගණනාවකට අයත් මිනිසුන් සිටිනා රටක ජීවත් වනවාක් වැනි ආකර්ෂණීය අත්දැකීමක්ව තිබිණි. කෙසේ හෝ ස්මාට්ෆෝන් ලෝකය තුළ ප්‍රචලිත වීම ඇරඹුණු පසුවද මෙම ‍රැල්ල එලෙසින්ම තවත් අවුරුදු කිහිපයක් පැමිණි අතර, මුල් කාලීන ස්මාට්ෆෝන්වලද එම විවිධාංගීකරණය වූ හැඩයන් සහ ආකෘතීන් දක්නට ලැබිණි.

කෙසේ නමුත් වර්තමානය වනවිට ස්මාට්ෆෝනයන් යනුවෙන් නිශ්චිත හැඩයක් සහ ආකෘතියක් ඇති උපාංගයක් සම්මතකරණය වී ඇති අතර, අතීතය හා සසඳන විට වර්තමාන ස්මාට්ෆෝන් උපාංග කෙතරම් බලසම්පන්න යන්ත්‍ර වූවද, ඒවා හැඩය හා ආකෘතිය අතින් නීරස වී ඇති බවද කිව යුතුවේ.

ZTE යනු ලෝකයේ ප්‍රමුඛ පෙළේ ස්මාට්ෆෝන් නිෂ්පාදන නාමයක් බවට පත්ව නොතිබුණත්, මේ වනවිට ඔවුන් සිය සන්නාමය ශ්‍රී ලංකාව තුළද යම්තාක් දුරට ගොඩනගාගෙන ඇති බව කිව යුතුවේ. මෙම සමාගම විසින් හඳුන්වා දෙන්නට යෙදුණු ZTE Axon M ස්මාට්ෆෝනය සැබවින්ම අතීතයේ තිබූ තිර දෙකක ජංගම දුරකථනය නැවත කරළියට ‍රැගෙන ඒමක් දැයි බැලූ බැල්මට සැක පහළ කර ගැනීම ස්වාභාවික වේ. එසේ වුවත් මෙය එම ද්විත්ව තිර ජංගම දුරකථනයන්ට වඩා වෙනස් වේ.

මෙම ස්මාට්ෆෝනයේ සම්පූර්ණ ප්‍රමාණයේ 1080p HD විභේදනයක් සහිත තිර දෙකක් තිබේ. සාමාන්‍යයෙන් ස්මාට්ෆෝනය හකුළා ඇති අවස්ථාවේදී එක් තිරයක් ඉදිරිපස සහ අනෙක් තිරය පසුපස පිහිටන ආකාරයෙන් තිබෙනා අතර, මෙම තිර දෙක අල්ලුවලින් එකට බැඳී තිබේ.

ZTE-axon-m-1   

බැලූ බැල්මට මෙවැනි දෙපස තිර දෙකක් ඇති ස්මාට්ෆෝනයකින් ඇති ප්‍රයෝජනය කුමක්ද? ඔබ එක් පස තිරයකින් කාර්යාලයීය කටයුත්තක් සිදුකරමින් සිටිනා අතර අනෙක් පස තිරය හරහා ඔබට ෆේස්බුක්හි සැරිසරමින් සිටිය හැක. හදිසියේ ආයතන ප්‍රධානියා ඔබේ මේසය අසලට ආ විට කාර්යාල කටයුත්තක් පෙනෙනා තිරය ඉහළටත්, ෆේස්බුක් තිරය පහතටත් සිටිනා ලෙසින් ස්මාට්ෆෝනය මේසය මත තැබිය හැක. කෙසේ නමුත් සැබෑවටම මෙම ස්මාට්ෆෝනයෙන් ඇත්තේ මෙවැනි සරල ප්‍රයෝජනයක් නොවේ.

මෙහි ඇති ප්‍රධානතම උපයෝගීතාව වන්නේ ඔබට අවශ්‍ය විටක තිර දෙකම එකට පිහිටන ලෙසින් සකසා තනි තිරයක් ලෙසින් ප්‍රයෝජනයට ගැනීමට ඇති හැකියාවයි. සරලවම මෙහිදී ඔබේ Axon M ස්මාට්ෆෝනය අඟල් හයක පමණ ටැබ්ලට් උපාංගයක් බවට පත්වනු ඇත. මෙහිදී ස්වයංක්‍රීයවම ස්මාට්ෆෝනය මගින් හෝම් ස්ක්‍රීනය මෙන්ම යෙදුම් පෙළගැස්ම ඇතුළු පරිශීලක අතුරු මුහුණතේ ඇති සියලුම දේ මෙම තනි විශාල තිරයට ගැළපෙන පරිදි සකස් කරගනු ඇත. දැන් ඔබට විවිධ යෙදුම් ක්‍රියාත්මක කිරීමේ සිට ඕනෑම ක්‍රියාවක් සඳහා මෙම විශාල තිරය භාවිත කළ හැක. එසේම අවශ්‍ය නම් මෙම පිහි‍ටුමේ තිබියදීම ඉහළ තිරයේ එක් කාර්යයකුත්, පහළ තිරයේ වෙනත් කාර්යයකුත් ධාවනය කරගැනීමට හැකි ලෙසින්ද මෙහි සැකසුම් ඇත.

මෙම ZTE Axon M ස්මාට්ෆෝනයේ තිරය අඟල් 5.2 ක ප්‍රමාණයේ වන අතර, ඒ නයින් තිර දෙකම එක්ව භාවිත කිරීමේදී ඔබට අඟල් 6.75 ක විශාල තිරයක් ලැබෙනු ඇත. මෙම තිර Fifth-gen Gorilla Glass ආරක්ෂක වීදුරුවකින් ආවරණය කොට තිබේ. මෙය ධාවනය වන්නේ 2.15GHz quad-core ARMv8 ප්‍රොසෙසරයක් හරහා වන අතර, 4GB ‍රැම් මතකයක් සහ 64GB මතක ධාරිතාවක් මෙහි තිබේ.

ZTE-axon-m-2

එසේම ඔබට බාහිරව MicroSD කාඩ්පත් හරහා මතකය 256GB දක්වා ඉහළ දමාගැනීමටද හැකියාව ඇත. මෙහි ඉදිරිපස මෙන්ම පසුපසද මෙගා පික්සල් 20 බැගින් වූ කැමරා දෙකක් තිබෙනා අතර, එම කැමරාවන්ට 4K ගුණාත්මක මට්ටමෙන් වීඩියෝ පටිගත කිරීමටද හැකියාව තිබේ. මෙහි බැටරිය 3,180 mAh ධාරිතාවක වන අතර, එමගින් පැය 28 ක් දක්වා වූ කථා කාලයක් ලබාදෙන බව නිෂ්පාදකයින් විසින් පැවසුවද එය සනාථ කරගැනීමට සිදුවන්නේ ප්‍රායෝගික භාවිතයේදීම වේ. මෙහි පවර් බොත්තමේ ස්ථාපිත කළ ඇඟිලි සලකුණු ස්කෑනරයක්ද තිබේ. මෙය Android 7.1.2 (Nougat) මෙහෙයුම් පද්ධතිය මතින් ධාවනය වේ.

මෙහි ප්‍රධානතම ගැටලුවක් ලෙසින් දැක්විය හැක්කේ, මේ තුළ සාපේක්ෂව ප්‍රබල දෘඪාංග හැකියාවන් තිබුණද එම හැකියාවන් ඇත්තේ තිර දෙකක් වෙනුවෙන් වීමයි. එනම් ඔබට මෙම තිර දෙකින්ම විශාල පරිගණක බලයක් අවශ්‍ය වන කාර්යයන් සිදුකරමින්, තිර දෙකෙන්ම එක හා සමාන සුමට ක්‍රියාකාරීත්වයක් බලාපොරොත්තු වීම උගහට වනු ඇත. ඒ හා සමගින් බලනා විට මෙය ශ්‍රී ලංකා මුදලින් රුපියල් ලක්ෂයකටද අධික වීම සැබවින්ම පාරිභෝගිකයන්ව අධෛර්යමත් කරනා සාධකයක් වනු ඇත. කෙසේ නමුත් මෙම සියලුම කරුණු පසෙකින් තබා බැලුවද, ZTE Axon M ස්මාට්ෆෝනය ආකර්ෂණීය අදහසක් බව නම් කිව යුතුම වේ.

ZTE-axon-m-4ZTE-axon-m-3

 

සුපුරුදු බලයෙන්, නවතම මාදිලියකින් Huawei Mate 10 Pro

Huawei සමාගමේ අලුතෙන්ම නිකුත් වන ස්මාට්ෆෝනය වන Mate 10 Pro මේ වනවිට විශාල වශයෙන් ලෝකයේ බොහෝ දෙනෙකුගේ අවධානය දිනාගෙන අවසන්ය. මේ මස නිකුත් වූ Huawei Mate 10 උපාංගය මෙන්ම, Huawei Mate 10 හී Porsche Design සංස්කරණයත් නිසා බොහෝ දෙනෙකුගේ ඇස Huawei Mate 10 Pro වෙත යොමු වී තිබේ. ඒ මෙම නොවැම්බරයේ නිකුත් වීමට නියමිත උපාංගය Huawei Mate 10ටත් වඩා විශේෂිත සංස්කරණයන්ගෙන් හෙබි වනු ඇතැයි ඔවුන් අපේක්ෂා කරන නිසා වෙනි. 
ඉදිරිපස සහ පසුපසින් වීදුරු නිමාවකින් සේම ඒ වටා ඇලුමිනියම් රාමුවකින් සුසැඳි Huawei Mate 10 Pro හි පෙනුම ආකර්ෂණීය වෙනවා මෙන්ම, එය IP67 සහතිකය සමගින් දූවිලි සහ තෙතමනය සඳහා ප්‍රතිරෝධයද දක්වයි. Huawei Mate 10 Pro උපාංගය ඉදිරිපස පෙනුම සැලකීමේදී හැකි තරම් තිරය වටා දාරයන්ට යන ඉඩ අඩු කර ඇති බව දැකිය හැකි අතර, අඟල් 6.07ක ඉදිරිපසින් තිරයට අඟල් 6ක් වෙන් වීම මෙහිදී අරුමයක් නොවේ. 
Android 8.0 (Oreo) මෙහෙයුම් පද්ධතියෙන් බලගැන්වෙන මෙම Huawei Mate 10 Pro උපාංගයේ Octa-core ප්‍රොසෙසරයක් තිබේ. මෙහි මතක ධාරිතාව සහ ‍රැම් මතකය පිළිවෙළින් සැලකූ විට 64 GB/4 GB හෝ 128 GB/6 GB ලෙසින් පරිශීලකයින්ට ‍තෝරාගත හැකි සංස්කරණ දෙකක් නිකුත් වේ. මෙහි ද්විත්ව කැමරා පද්ධතියක් (20 MP +12 MP) තිබෙනා අතර, එහි OIS, 2x lossless zoom, Leica optics, phase detection සහ laser autofocus, dual-LED (dual tone) flash යන පහසුකම් ඇත.
උපාංගය ඉදිරිපසින් Fingerprint සෙන්සරය සහිතව පැමිණෙන මෙහි accelerometer, gyro, proximity, barometer, compass යන සම්මත සෙන්සර පද්ධතියක්ද තිබේ. මෙන සියලුම කරුණු සමගින්, Huawei යනු මේ වනවිට ශ්‍රී ලංකාවේද බොහෝ දෙනෙකු මිලදී ගැනීමට පෙළඹෙන සන්නාමයක් බවත්, Huawei උපාංගයන්ගේ මිල සාපේක්ෂව පහළ බවත් සැලකූ විට Huawei Mate 10 Pro උපාංගය සම්බන්ධයෙන් පැමිණිලි කිරීමට කාරණාවක් නොමැති බව කිව යුතුවේ.

huawei-mate10-pro-1 huawei-mate10-pro-2 huawei-mate10-pro-3

 

 

අධිබලැති යන්ත්‍රයක්, හුරුබුහුටි නිමාවකින් Microsoft Surface Book 2

එක්තරා සමයකදී ඩෙක්ස්ටොප් පරිගණක අභිභවා ලැප්ටොප් පරිගණකයන් ක්‍රමයෙන් ජනප්‍රියත්වය අත්පත් කරගත්තා සේම, මේ වනවිට ලැප්ටොප්/නෝට්බුක් පරිගණකයන් අභිභවමින් නෝට්බුක්-ටැබ්ලට් දෙමුහුම් පරිගණකයන් ලොව පුරා පරිශීලක ආකර්ෂණය දිනාගනිමින් තිබේ. තවමත් ලංකාව වැනි රටක මෙම ලැප්ටොප්-ටැබ්ලට් කන්වර්ටබල් පරිගණක උපාංගයන් ඉහළ ජනප්‍රියත්වයක් නොලැබීමට ප්‍රධානතම කාරණයක් ලෙසින් මේවායේ ඉහළ මිල සඳහන් කළ හැක. කෙසේ නමුත් බලාපොරොත්තු විය හැකි තත්ත්වය වන්නේ අනාගතයේදී මෙම උපාංගයන් සාමාන්‍ය පරිශීලකයින් හටද පරිහරණය කළ හැකි ආකාරයට මේවායේ මිල පහත වැටීමයි. 

microsoft-surface-book-2-4

මෙම දෙමුහුම් පරිගණක උපාංගයන් සම්බන්ධයෙන් කථා කිරීමේදී මයික්‍රොසොෆ්ට් සමාගම මගින් ඉදිරිපත් කරන්නට යෙදුණු Surface Book පරිගණකය ලබාගත් ඉහළ ජනප්‍රියත්වය සම්බන්ධයෙන් සඳහන් කිරීම අනිවාර්ය වේ. මෙයට හේතුව සිහින් නිමාවකින් යුතු, ප්‍රයෝජනවත් ආකාරයට ටැබ්ලට් උපාංගයක් ලෙසින්ද ක්‍රියාත්මක කළ හැකි අන්දමට කන්වර්ටබල් හැකියාවෙන් යුක්ත, ඉහළ ග්‍රැ‍ෆික් නිර්මාණ කටයුතු හෝ පරිගණක ක්‍රීඩා සඳහා පවා හොඳින් ගැළපෙන ආකාරයේ ප්‍රබල දෘඩාංග හැකියාවන්ගෙන් යුක්ත උපාංගයක් ලෙසින් Surface Book නිර්මාණය කිරීම යැයි සිතීමට හැක. මෙයද මිලෙන් අධික වූවත්, පහසුවෙන්ම Macbook Pro උපාංගය සඳහා තරගකරුවෙකු ලෙසින් මෙය සැලකුණි.

මෙය සැබවින්ම ප්‍රබල යන්ත්‍රයක් ලෙසින් ඔබ සලකන්නේ නම්, මෑතකදී මයික්‍රොසොෆ්ට් සමාගම මගින් ඉදිරිපත් කළ නවතම Surface Book 2 උපාංගය දෙස බැලීම වටී. පෙර මෙන්ම සිහින්, හුරුබුහුටි නිමාවකින් පැමිණෙන මෙම Surface Book 2 උපාංගය එහි පූර්වජයාටද වඩා අතිවිශාල පරිගණක බලයක් ලබාදීමට සමර්ථ වන ලෙසින් දෘඩාංග හැකියාවන්ගෙන් සන්නද්ධ වී සිටී. මෙය ඉහළම මට්ටමේ පරිගණක ක්‍රීඩාවල යෙදෙන්නන් නැතිනම් තත්‍යාසන්න යතාර්ථය හා නිර්මාණය වූ අන්තර්ගතයන් හා ගනුදෙනු කරන්නන්ට පමණක් නොව, එවැනි දෑ නිර්මාණය කරන්නන්ටද සිහින සැබෑ වීමක් වනු ඇතැයි ඔබට සිතෙන්නේ නම් එය පුදුමයක් නොවේ.

සැබවින්ම මෙම Surface Book 2 උපාංගයේ ප්‍රබලත්වය දෙස බැලීමට නම් එහි දෘඩාංග හැකියාවන් සම්බන්ධයෙන් දැනුවත් වීමට සිදුවේ. මෙය තිර ප්‍රමාණයෙන් අඟල් 13.5 සහ අඟල් 15 ලෙසින් වන සංස්කරණයන් දෙකක් ලෙසින් පැමිණේ. අඟල් 13.5 සංස්කරණය තුළද දෘඩාංග හැකියාවන් එකිනෙකින් වෙනස් වන ආකාරයෙන් ‍තෝරාගැනීමක් සිදුකිරීමට අවකාශ සලසා ඇත. කෙසේ නමුත් මෙහිදී අප සලකා බලන්නේ වඩාත් ඉහළ දෘඩාංග සැකසුමකින් යුතු අඟල් 15 Surface Book 2 උපාංගයයි. 
මෙහි ප්‍රොසෙසර බලය සපයන්නේ 8th Gen Intel® Core™ i7-8650U quad-core processor (4.2GHz Max Turbo) මධ්‍යම සැකසුම් ඒකකයකි. එසේම මෙහි ග්‍රැ‍ෆික් ප්‍රොසෙසරය ලෙසින් 6GB ප්‍රමාණයේ NVIDIA® GeForce® GTX 1060 discrete GPU එකක් ස්ථාපිතව තිබේ. මෙහි 16GB ප්‍රමාණයේ LPDDR3 ‍රැම් මතකයක් තිබෙනා අතර, මතක ධාරිතාවන් ලෙසින් 256GB, 512GB සහ 1TB යන SSD (Solid State Drive) මතකයන් අතුරින් ‍තෝරාගැනීමක් සිදුකළ හැක. මෙහි තිරය අඟල් 15 ක PixelSense™ Display එකක් වන අතර, එයට පොයින්ට් 10 ක් දක්වා මල්ටිටච් හැකියාව තිබේ. මෙම අධිබලැති යන්ත්‍රය ධාවනය වන්නේ Windows 10 Pro Creators Update 64-bit මෙහෙයුම් පද්ධති සංස්කරණය මතින් වේ. මෙම දෘඩාංග හැකියාවන් දෙස බැලූ විට පෙනී යන්නේ වර්තමානයේ හෝ නුදුරු අනාගතයේ නිර්මාණය වන ඕනෑම AAA පරිගණක ක්‍රීඩාවක් සමගින් සුමට, ශීඝ්‍ර අත්දැකීමක් පහසුවෙන්ම ලබාදෙන්නට මෙම Surface Book 2 ලැප්ටොප්-ටැබ්ලට් දෙමුහුම් පරිගණකය සමත් වනු ඇති බවයි.

microsoft-surface-book-2-2

මෙම Surface Book 2 උපාංගයේ පූර්වජයා ලෙසින්ම මෙයටද සාමාන්‍ය ටැබ්ලට් උපාංගයක් හෝ ඩ්‍රෝවින් පෑඩ් උපාංගයක් මෙන් තිරය ගලවා පාවිච්චි කළ හැක. එසේම අනෙක් අතටද තිරය සවි කොට ආධාරකයක් සහිත ටැබ්ලටයක් ලෙසින් භාවිත කළ හැකිවාක් මෙන්ම සාමාන්‍ය නෝට්බුක් පරිගණකයක් ලෙසින්ද මෙය පහසුවෙන් භාවිත කළ හැක. එසේම මින් පෙර හඳුන්වා දී ඇති Surface Dial උපාංගයද මේ සමගින් පහසුවෙන්ම භාවිත කළ හැකි අතර, සරලවම Surface Dial උපාංගය තිරය මත තැබීමෙන් ඔබට අවශ්‍ය ක්‍රියාකාරකම් ඉ‍ටුකරගත හැකි ඩයලයක් ලෙසින් එය ක්‍රියාත්මක කළ හැකි වේ.

මෙම Surface Book 2 උපාංගයේ USB type-A පෝට් 2 ක් හා USB type-C පෝට් එකක් ඇති අතර, එය උපාංගය බලගැන්වීමටද භාවිත කළ හැක. එසේම මෙහි Surface Connect පෝට් 2 ක්, 3.5mm හෙඩ්ෆෝන් ජැක් එකක් මෙන්ම සම්පූර්ණ හැකියාවන්ගෙන් යුතු SD කාඩ් රීඩරයක්ද තිබේ. මෙහි Wi-Fi, Bluetooth 4.1 යන ‍රැහැන් රහිත සම්බන්ධතා හැකියාවන් මෙන්ම Xbox Wireless built-in පහසුකමද තිබේ. මෙයට අමතරව Ambient light sensor, Proximity sensor, Accelerometer, Gyroscope, Magnetometer යන සෙන්සරයන්ද මෙයට ඇතුළත් කොට ඇති නිසා සාමාන්‍ය ලැප්ටොප් උපාංගයකට වඩා වැඩි හැකියාවන් ප්‍රමාණයක් මෙයට ප්‍රදානය කෙරී ඇත. මේ සියලුම දේ අතුරින් Surface Book 2 උපාංගයේ විශේෂයෙන් දැක්විය යුතු නවතාව වන්නේ එහි බැටරි බලයයි. මෙය සාමාන්‍ය ක්‍රියාකාරීත්වය යටතේ එක දිගට පැය 17 ක් ක්‍රියාත්මක වීම සඳහා උපාංගයට බැටරි බලය ලබාදෙනු ඇත.

microsoft-surface-book-2-1

වෘත්තිය මට්ටමේ බලවන්ත වර්ක්ස්ටේෂන් පරිගණකයක්, සිහින් හුරුබුහුටි කේසියනක් තුළ සිර කොට නිර්මාණය කොට ඇති බව පෙනී යන මෙම Surface Book 2 උපාංගය මයික්‍රොසොෆ්ට් සමාගම මගින් හඳුන්වා දෙන්නේ The most powerful Surface ever යනුවෙනි. මෙහි හැකියාවන් හා පිරිවිතර දෙස බැලීමේදී එම කියමන සත්‍ය බව පෙනී ගියත්, මෙහි අඟල් 13.5 මූලික Surface Book 2 උපාංගය පවා ඇමෙරිකානු ඩොලර් 1.499 සිට ඉහළට මිල කෙරී ඇත. ශ්‍රී ලංකාවේ මෙය එතරම් ජනප්‍රිය නොවීමට මෙම ඉහළ මිල හේතුවක් වනු ඇතැයි බැලූ බැල්මට හැඟී ගියත්, මෙය සැබවින්ම ප්‍රයෝජනවත් වනු ඇත්තේ සාමාන්‍ය පරිශීලකයෙකුට නොව ඉහළ මට්ටමේ වෘත්තිකයෙකුට යන කරුණත්, මෙහි ප්‍රබලත්වයත් සැලකීමේදී එම මිල සම්බන්ධයෙන් පැමිණිලි කිරීමටද නොහැක.

මේ වසරේදී මිලියන 90ක කඩඉම පසුකරන Xiaomi

Xiaomi සමාගම මේ වසරේදී නව වාර්තාවක් තැබීමේ සූදානමින් පසුවෙනවා. 2016 වසරට සාපේක්ෂව අතිසාර්ථක අලෙවි වාර්ථාවක් තබන්නට සමත් වන Xiaomi සමාගම මේ වසරේදී උපාංග මිලියන 90ක අලෙවියක් ලබාගැනීමේ අපේක්ෂාවෙන් පසුවෙනවා. එසේම ඔවුන් දැනටත් එයින් වැඩි ප්‍රමාණයක් අලෙවි කර අවසන්. 2016 වසරේදී Xiaomi අලෙවිය අතින් යම් තරමක් පහළ බැස්සද, ඔවුන් 2017 වසරේදී එය මිලියන 70 සීමාවේ තබාගන්නට සමත් වුනා. 

මෙම අලෙවිය තබාගන්නට ඔවුන්ගේ ආරම්භක මට්ටමේ ස්මාට්ෆෝන් උපාංග වන Xiaomi Redmi 5A වැනි සාර්ථක නිර්මාණ හඳුන්වාදීම ඉවහල් වුණා. ඇ‍ෙමරිකානු ඩොලර් 90ක පමණ මිලකට සාර්ථකව බොහෝ මිනිසුන්ගේ සාක්කුවට ආ මෙම ස්මාට්ෆෝනය සේම, Xiaomi හී ඉහළ පන්නයේ ෆ්ලෑග්ෂිප් ස්මාට්ෆෝනද තවමත් හොඳින් අලෙවි වෙනවා. පසුගිය සැප්තැම්බර් මාසයේදී පමණක් ඔවුන් ස්මාට්ෆෝන් මිලියන 10ක් අලෙවි කරන්නට සමත්ව තිබෙනවා. මෙලෙස එක් මාසයකදී ස්මාට්ෆෝන් කෝටියක් අලෙවි කිරීමම Xiaomi සමාගම චීනය තුළ අංක දෙකට ඉහළ අලෙවියක් ඇති ස්මාට්ෆෝන් සමාගම බවට පත් කර තිබෙනවා. Huawei සමාගම මෙම වාර්තාවෙහි චීන ස්මාට්ෆෝන් වෙළෙඳ පොළෙහි අංක එක දිනා සිටින අතර, දෙවැනි ස්ථානය Xiaomi ගෙන් අනතුරුව අනෙක් ස්ථාන දෙක Oppo සහ Vivo දිනාගෙන තිබෙනවා.

gsmarena_002

ඔබ සිටිනා තැන WhatsApp වලින් කියන්න

WhatsApp කියන වේදිකාව බොහොදෙනෙකුට තමුන්ගේ අදහස් බෙදාගැනීම සහ සන්නිවේදනය කියන කාරණාව වෙනුවෙන් මහඟු සේවයක් කරන තැනක්. WhatsApp අතිවිශාල ව්‍යාපාරයක් වන්නේ ඒ හා අතිවිශාල පරිශීලකයින් පිරිසක් සම්බන්ධ වෙලා සිටින නිසායි. ඒ අනුව බලද්දී  WhatsApp යනු සන්නිවේදනයේ උපරිම නිදහස මිනිසුන් වෙනුවෙන් ඇති කළ තැනක් විදියට හඳුන්වන්නට පුළුවන්. මෙම කෙටි පුවත් WhatsApp තුළදී අලුතින් හඳුන්වා දෙන තවත් සංස්කරණයක් පිළිබඳවයි.

Location Sharing නොහොත් තමන් සිටින ස්ථානය අනෙකා හා බෙදාගැනීමේ හැකියාව WhatsApp වෙත මෙලෙස හඳුන්වා දෙනවා. ඒ අනුව අන්තර්ජාල ලෝකයේ මැවෙන කල්ලියක, භෞතික මුණගැසිම් ඵලදරන්නට මෙම තාක්ෂණය වඩාත් යෝග්‍ය වනු ඇත. එසේම තමුන් නොදත් පළාතක සිටින විට තමුන් මේ මොහොතේ සිටින ස්ථානය අනෙකෙකුට පවසන්නට සහ ඒ ඇසුරෙන් උදවුවක් ලබාගන්නට මෙම ක්‍රමය වඩා යෝග්‍යයි. ඇපල් අයිඕඑස් සහ ඇන්ඩ්‍රොයිඩ් වෙත මෙම සේවය පළමුවෙන්ම හිමි වනු ඇත. එසේම අනාගතයේදී තවත් අලුත් සංස්කරණයන් කිහිපයක්ම වඩා ප්‍රයෝජනවත් ලෙසින් එක් කිරීමට WhatsApp සූදානම්. 

මෙම හැකියාව මින් පෙර ගූග්ල් මැප්ස් සහ ෆේස්බුක් මෙසෙන්ජරයේද දැකිය හැකි වුවත් බොහෝදෙනෙකු සම්බන්ධව සිටින කතාබහ කරන මෙවැනි වේදිකාවක මෙම හැකියාව නොමැති වීම අඩුපාඩුවක්ව පැවතිණි.

gsmarena_001

පොද වැස්සක තෙමි තෙමී වුවද පොත් කියවීමට Amazon Kindle Oasis

අද දිනයේ අප පරිශීලනය කරනා පොත් පත්වල තැන, අනාගතය වන විට ඩිජිටල් උපාංගයන් මගින් සම්පූර්ණයෙන්ම අත්පත් කරගනු ඇතැයි යන බිය බොහෝ දෙනෙකු වර්තමානයේදී පවා දක්වා සිටී. එනමුත් ස්මාට්ෆෝන් සහ ටැබ් සෑම අයෙකු අතම ගැවසෙන උපාංග බවට පත්වීත් තවමත් පොත් පත් අභාවයට යන්නේ යැයි කීමට හැකි නොවේ. එසේම ඊ – බුක් රීඩරයන්ද වර්තමානය වන විට සාමාන්‍ය පාරිභෝගික උපාංගයක් බවට පත්වෙමින් තිබෙනා අතර එයද යම්තාක් දුරකට පොත් කියවීමේ පුරුද්ද වැඩි වර්ධනය කිරීමට උපකාරී වේ යැයි සිතීමට හැක.


ශ්‍රී ලංකාවේ තවමත් ඊ – බුක් රීඩරයන් භාවිත කරන්නේ සාපේක්ෂව අතළොස්සක් වන අතර, එම ප්‍රමාණයද මුළුමනින්ම පාහේ ඇමසන් කින්ඩ්ල් උපාංගයන් භාවිත කරන්නේ යැයි අනුමාන කළ හැක. ඇමසන් කින්ඩ්ල් ඊ – බුක් රීඩරයන් දැරිය හැකි මිලකට පැවතීම මෙන්ම, ඒවායේ නිමාව සහ විශේෂයෙන් ලැබෙන පහසුකම් මෙයට එක් හේතුවකි.

කෙසේ නමුත් ඇමසන් කින්ඩ්ල් උපාංගයන් සෑම විටකදීම ලාභදායී නොවන බවද ඇමසන් සමාගම මගින් යළි යළිත් අපට සිහිපත් කර දෙනු ඇත. වඩාත් නිවැරදිව පවසන්නේ නම් තමන් සතුව දැරිය හැකි මිලකට අලෙවි කෙරෙනා සාමාන්‍ය ඊ – බුක් රීඩරයන් මෙන්ම, ඉහළ මිලකට අලෙවි වන වඩාත් විශේෂිත හැකියාවන් සහ නිමාවන්ගෙන් යුක්ත ඉහළ මට්ටමේ ඊ – බුක් රීඩරයන්ද තිබෙන බව ඔවුන් පාරිභෝගිකයින්ට සිහිපත් කර දෙන්නේ, ඔවුන්ගේ ඉහළ මට්ටමේ ඊ – බුක් රීඩරයන් සඳහාද හොඳ වෙළෙඳ පොළක් තිබෙනා බැව් දන්නා නිසාවෙනි. මෙය තහවුරු කෙරෙන එක් එළිදැක්වීමක් වූයේ, පසුගිය වසරේදී වෙළෙඳ පොළට පැමිණි නවතම Amazon Kindle Oasis ඊ – බුක් රීඩරයයි.

amazon-kindle-oasis-2

මෙය එතෙක් මෙතෙක් ඇමසන් සමාගම මගින් නිකුත් කළ සිහින්ම හැඩයකින් යුක්ත කින්ඩ්ල් උපාංගය වීමත්, වඩාත් පහසුවෙන් අල්ලාගෙන කියැවීමට හැකි ආකාරයේ වෙනස්ම හැඩයක් මේ සඳහා ලබාදී තිබීමත් සමගින් මෙය සුවිශේෂී අවධානයක් දිනාගැනීමට සමත්ව තිබිණි.මෙම අඟල් 0.13 ක් තරමේ සිහින් නිමාවකින් සහ අවුන්ස 4.7 ක් තරමේ සැහැල්ලු බවකින් යුතු Amazon Kindle Oasis උපාංගය සම්බන්ධයෙන් දැන් අපි කතා කරන්නේ ඇයි? ඊට හේතුව ඇමසන් සමාගම මෙම වසර සඳහාද Kindle Oasis හි නවතම වැඩිදියුණු කළ සංස්කරණයක් එළිදක්වා තිබීම නිසායි. මෙය ජලයට සහ තෙතමනයට ප්‍රතිරෝධය දක්වන ඇමසන් කින්ඩ්ල් උපාංගයකි.

ජලයෙන් හානි නොවනා බවට IPX8 සහතිකයද සමගින් නිකුත් වන මෙම ඉහළ මට්ටමේ ඇමසන් කින්ඩ්ල් උපාංගයේ තෙතමනයෙන් හානි නොවන ගුණය ඔබට ප්‍රයෝජනවත් වන්නේ කෙසේද? සැබවින්ම කින්ඩ්ල් උපාංගයක් හරහා පොතක් කියැවීම සඳහා එළිමහනේ පොද වැස්සක් වුවද තවදුරටත් බාධාවක් නොවනු ඇත. ඔබට නාන කාමරයේ ටබ් එකේ නිස්කලංකව සිටිනා විටකදී පවා පොතක් කියැවීමට මෙය පහසුවෙන් භාවිත කිරීමට හැකි වනු ඇත.
මෙම නවතම Kindle Oasis සංස්කරණය වඩාත් විශාල අඟල් 7 ක තිරයක් සමගින් පැමිණෙන අතර, එහි විභේදනය 300ppi ප්‍රමාණයේ වේ. වෙනත් ලෙසකින් පවසන්නේ නම් මේ හරහා පොතක් කියවීම, සැබෑ කඩදාසියක මුද්‍රිත දෑ කියවීමට වඩාත් සමාන වනු ඇත. එසේම මෙහි තිරයේ දිළිසීම කොහෙත්ම නැති අතර, එනිසා සෘජු දැඩි හිරුඑළිය මධ්‍යයේ වුවත් පහසුවෙන් කියැවීමට හැකියාව ලැබෙනු ඇත.

amazon-kindle-oasis-1

පසුගිය වසරේ නිකුත් වූ මෙම Kindle Oasis උපාංගයේ ආරම්භකයා සේම මෙයද සැහැල්ලු, සිහින් නිමාවකින් යුක්ත වන අතර, එක් පසක වඩාත් අතට හසුවන ලෙසින් පුළුල් වූ දාරයකින් නිමා වී ඇත. එසේම ඔබ වමත් හෝ දකුණත් වුවත් එම පුළුල් දාරය ඇති පස ඔබට පහසු පැත්තකට එන ලෙසින් තබාගෙන කියැවිය හැකි අතර, ඊට අනුකූලව මෙම කින්ඩ්ල් උපාංගය එහි තිරය වෙනස් කරගනු ඇත. මෙයට අමතරව මෙම නවතම Kindle Oasis සංස්කරණයට ඇමසන් සමාගම මගින් වඩාත් වැඩි LED ආලෝකයන් ප්‍රමාණයක් ඇතුළත් කර ඇතැයි අසන්නට ලැබේ.

මෙම Kindle Oasis උපාංගයේ මුල් සාමාජිකයාගේ මෙන් පසුපස ප්ලාස්ටික් පුවරුවක් නොව, මෙහි ඇත්තේ වඩාත් සවිමත් ඇලුමිනියම් පසුපස පුවරුවකි. එසේම මෙහි බැටරියේ ධාරිතාවද නව සංස්කරණයට පැමිණෙන විට වඩාත් ඉහළ ගොස් තිබෙනා බව දැකිය හැක. එනම් එක් ආරෝපණයකින් සති හයක් පමණ කාලයක් ඔබට මෙය භාවිත කිරීමට හැකියාව තිබෙනු ඇත. එසේම මෙහි මුල් නිර්මාණයේ මෙන්ම මෙහිද පි‍ටු පෙරළීම සඳහා වඩාත් පුළුල් දාරය මත බොත්තම් දෙකක් පිහි‍ටුවා ඇති අතර, අවශ්‍ය නම් ඒ සඳහා ස්පර්ශ තිරය භාවිත කිරීමේද කිසිදු ගැටළුවක් නොමැත. මෙයට අමතරව යාවත්කාලීන කළ ඇමසන් කින්ඩ්ල් මෘදුකාංගයද ඔබට නවතම හැකියාවන් සහ පහසුකම් ගණනාවක් හඳුන්වා දෙනු ඇත. ඔබේ පොත්වල තබාගන්නා සටහන් ඊමේල් වෙතට ගෙන ඒම මෙන්ම ශබ්දකෝෂය හා බැඳි ස්මාට් ලුක්-අප් පහසුකම ඉන් කීපයකි. 

amazon-kindle-oasis-3

මෙයට අමතරව ඔබට ඕඩියෝ බුක් සඳහා සවන් දීමටද හැකි ආකාරයෙන් නවතම යෙදුමක් මෙහි අන්තර්ගත කොට තිබේ. මේ නිසාවෙන්ම මෙහි මතකය 8GB දක්වා වැඩි කර තිබෙනා අතර, අවශ්‍ය නම් ඔබට 32GB සංස්කරණයක්ද මිලදී ගැනීමට හැකියාව තිබේ. කෙසේ නමුත් ඔබට ඕඩියෝ බුක් කියැවීම සඳහා හෙඩ්ෆෝන් යුවළක් සම්බන්ධ කළ හැකි 3.5mm ජැක් එකක් මෙහි නොමැති අතර, ඒ වෙනුවට මෙහි බ්ලූටූත් හැකියාව මගින් ඔබට බ්ලූටූත් ස්පීකරයකට හෝ බ්ලූටූත් හෙඩ්සෙට් උපාංගයකට සම්බන්ධ වී ඕඩියෝ බුක් ඇසීමට සිදුවනු ඇත.

ඇමසන් වෙබ් අඩවියේ දක්වා ඇති ආකාරයට මෙම නවතම Kindle Oasis සංස්කරණයේ මිල රුපියල් 38,000කට මඳක් අඩු වනු ඇත. ඊ – බුක් රීඩරයකට එතරම් මුදලක් වැය කළ යුතුදැයි යමෙකු අසන්නට හැකි වුවත්, සමගින් ලබාදෙන නවතම විශේෂාංගයන් සහ නිමාව සමගින් එම මුදල අපතේ නොයන බව අපගේ හැඟීමයි.

amazon-kindle-oasis-4

ඉහළ මට්ටමක හැකියාවන් එකතුවක් අඩු මිලකට Huawei Honor 9

Huawei සම්බන්ධයෙන් කියැවෙන සටහනක මේ දිනවල වැඩි වශයෙන්ම දැකිය හැක්කේ Huawei Mate 10 උපාංගය වුවත්, මෙම සටහන වෙන්වන්නේ පසුගිය ජුනි මාසයේදී එළිදැක්වුණු වෙනත් Huawei ස්මාට්ෆෝනයක් සම්බන්ධයෙනි. මේ Huawei Honor 9 ස්මාට්ෆෝනයයි. මෙයට Hybrid Dual SIM තාක්ෂණයෙන් සිම්පත් දෙකක් අන්තර්ගත කළ හැක. LTPS IPS LCD capacitive touchscreen තිරය අඟල් 5.15ක ඉඩක් ගනියි. 

Android 7.0 (Nougat) මෙහෙයුම් පද්ධතියෙන් බලගැන්වෙන Huawei Honor 9 උපාංගයට HiSilicon Kirin 960 චිප් පද්ධතියක් අන්තර්ගත කර ඇත. මෙහි ඇත්තේ Octa-core ප්‍රොසෙසරයකි. අභ්‍යන්තර මතකය ගිගාබයිට් 64 සහ 128 ලෙසින් සමන්විත ස්මාට්ෆෝන් සංස්කරණ දෙකක් පැමිණෙන අතර, පිටතින් ගිගාබයිට් 256ක් දක්වා මතකය ඉහළ දැමිය හැක. 

huawei-honor-9-10

මෙහි ද්විත්ව කැමරා පද්ධතියක් පසුපස ප්‍රධාන කැමරාවේ කාර්යභාරය ඉ‍ටු කරයි. එනම් 20MP + 12 MP ලෙසිනි. f/2.2, phase detection autofocus, 2x lossless zoom, dual-LED (dual tone) flash ලෙසින් හැකියාවන් සහ සැකසුම් දැක්වෙන මෙම කැමරා පද්ධතියට Geo-tagging, touch focus, face detection, HDR, panorama යන විශේෂාංග ඇතුළත්ය.

Glacier Grey, Sapphire Blue, Midnight Black, Gold, Blue Bird, Robin Egg Blue ලෙසින් වර්ණ පෙළකින් මෙය පැමිණෙන නිසා, පරිශීලකයින්ට ‍තෝරාගැනීමට මනා විවිධත්වයක් මෙහි ඇත. Huawei Honor 9 උපාංගය පෙණුමින් තරමක් දුරට තාරුණ්‍යයට ඔබින බවක් හැඟවුනද, මෙහි වඩාත් ප්‍රබල දෘඩාංගයන්ද සමග ගත්විට මෙය සාධනීය වැඩ කොටසක් ඉටු කරගත හැකි ස්මාට්ෆෝනයක් බව බැලූ බැල්මට පෙනෙයි. පොදුවේ Huawei Mate උපාංග පෙළ තබා ඇති ඉහළ ස්ථානයේ තබා Huawei Honor 9 ස්මාට්ෆෝනය මැනීමට නොහැකි වුවත්, ප්‍රබල දෘඩාංග, පහසු මිල සහ නොයෙකුත් හැකියාවන් සමගින් ස්මාට්ෆෝනයකින් ඔබ බලාපොරොත්තු වන සියලු කටයුතු මෙම උපාංගයෙන් ඉටු කරගත හැකි බව නම් කිවයුතුමය.

  huawei-honor-9-12 huawei-honor-9-11 huawei-honor-9-3

තත්‍යකාලීන භාෂා පරිවර්තන සහාය සමගින් Google Pixel Buds

මේ වනවිට ලෝකයේ බොහෝ දෙනෙකුට තමන්ගේ මවු භාෂාවන් කුමක් වුවත්, බහුලව භාවිත වන ජාත්‍යන්තර භාෂාව වන ඉංග්‍රීසි භාෂාව භාවිතයෙන් අදහස් ප්‍රකාශ කිරීමේ හැකියාව තිබේ. එය එසේ වුවත්, එයින් කියැවෙන්නේ ලෝකයේ භාෂා බාධකය සම්පූර්ණයෙන්ම ජයග්‍රහණය කෙරී ඇති බවද නොවේ. ඉංග්‍රීසි හෝ වෙනත් පොදු භාෂාවක් නොදන්නා විදේශිකයින් මෙන්ම ශ්‍රී ලාංකිකයින්ද අපිට බොහෝ විට මුණගැසේ. මෙවැනි භාෂා ගැටලු ජයගැනීම සඳහා තත්‍යකාලීකව භාෂාවන් පරිවර්තනය වන උපාංග නිර්මාණය කෙරෙහි බොහෝ දෙනෙකුගේ  සිත් යොමුවී තිබුණේ අද ඊයේ නොවේ. කෙසේ වුවත් තත්‍යකාලීන භාෂා පරිවර්තන කාර්යය ඉෂ්ට කළ හැකි, සාර්ථක ක්‍රියාකාරීත්වයකින් යුක්ත ජංගම උපාංගයක් නැතිනම් හෙඩ්සෙට් උපාංගයක් තවමත් වෙළෙඳ පොළට පැමිණ නැති අතර, එම අඩුව පි‍රවීම සඳහා ගූග්ල් සමාගම මගින් සිය අවධානය යොමුකොට තිබේ. ඔවුන් විසින් අභිනවයෙන් හඳුන්වා දෙන Google Pixel Buds නමින් හැඳින්වෙන ‍රැහැන් රහිත ඉයර්බඩ්ස් හෙඩ්ෆෝන් කට්ටලය නිර්මාණය වන්නේ ඒ අයුරිනි.


google-pixel-buds-2

සැබවින්ම විද්‍යා ප්‍රබන්ධයන්හි දක්නට ලැබෙන ආකාරයේ තත්‍යකාලීන භාෂා පරිවර්තන පහසුකම් සපයන මෙම Google Pixel Buds උපාංගය වඩාත් වැදගත් වන්නේ රට රටවල සංචාරය කරනා සංචාරකයින්ට බව අමුතුවෙන් කිව යුතු නොවේ. එසේම මෙහි ඇති වඩාත් සිත් ඇදගන්නා සුළු ගුණය වන්නේ මෙය භාවිත කිරීම සඳහා සන්නිවේදනයේ යෙදෙන දෙදෙනාම Google Pixel Buds උපාංගය පැලඳ සිටීම අනිවාර්ය නොවීමයි. එනම්, ඔබ අත පමණක් Google Pixel Buds උපාංගයක් තිබුණද, ගැටලුවකින් තොරව දෙදෙනාටම භාෂා පරිවර්තන සහාය ලබාදෙමින් මනා සන්නිවේදනයක් ගොඩනැංවීමට මෙයට හැකියාව තිබේ.

සාමාන්‍ය සාම්ප්‍රදායික ‍රැහැන් රහිත සම්බන්ධතාව හරහා ක්‍රියාත්මක වන හෙඩ්ෆෝන් යුවළක් ලෙසින් ක්‍රියාත්මක විය හැකි මෙම Google Pixel Buds හෙඩ්ෆෝන් උපාංගය එකිනෙක හා තනි කේබලයකින් සම්බන්ධ වී තිබේ. දැන් මෙයට බ්ලූටූත් සම්බන්ධතාව හරහා ඔබේ ස්මාට්ෆෝනය වෙත සම්බන්ධ වී ඔබට ලැබෙනා දුරකථන ඇමතුම් සඳහා සවන්දීමට මෙන්ම දුරකථන ඇමතුමකට කථා කිරීමටද ඉඩ ලබාදෙනු ඇත. ඊට අමතරව ඔබ ඕනෑම කාර්යයක නිරතව සිටිනා විටකදී ඔබේ ස්මාට්ෆෝනයේ ඇති සංගීතයට සවන් දීමටද මේ හරහා ඔබට හැකියාව තිබේ.

කෙසේ වුවත් මෙම හෙඩ්ෆෝන් උපාංගයේ ඇති සුවිශේෂී හැකියාව මේ කිසිවක් නොවේ. ඔබ ඉදිරිපිටට පැමිණෙන්නේ ජපන් භාෂාව පමණක් දන්නා අයෙකු යැයි සිතන්න. ඔබ ජපන් භාෂාව දන්නේද නැත. මෙහිදී ඔබ කළ යුත්තේ ඔබේ හෙඩ්ෆෝනයේ දකුණු ඉයර් බඩ් එක තද කොට “Help me speak Japanese" යනුවෙන් හඬ නගා කීම පමණි. හඬ විධානයන්ට සංවේදී මෙම හෙඩ්ෆෝනය මෙතැන් සිට ඔබ පවසන්නා වූ සියලු දේට සවන් දීම ආරම්භ කරයි. එසේම ඔබ පවසන සියලුම දේ තත්‍යකාලීනව පරිවර්තනය වෙමින් ඔබේ ස්මාට්ෆෝනයේ ස්පීකරය හරහා ජපන් බසින් හඬ නගා ඇසෙනු ඇත. දැන් ජපන් බස පමණක් දන්නා අනෙකුත් පුද්ගලයාට ඔබ කියනා දේ පැහැදිලිව වැටහේ. එසේම අනෙක් පුද්ගලයා ජපන් බසින් කතා කිරීම ආරම්භ කළ විටදී Google Pixel Buds හෙඩ්ෆෝනයේ මයික්‍රෆෝනය මගින් එම අන්තර්ගතය ග්‍රහණය කරගැනීමට පටන් ගනු ඇත. දැන් එයද තත්‍යකාලීනව ඔබ කතා කරනා ඉංග්‍රීසි බසට පරිවර්තනය වී ඔබේ සවනට ඇසෙනු ඇත.

google-pixel-buds-1

වෙනත් කිසිදු ශබ්දයක් නැති තැනකදී මෙම පරිවර්තන කාර්යය දැනෙනා තරමේ කාල ප්‍රමාදයකින් තොරව සිදුවනු ඇති වුවත්, ප්‍රායෝගික තත්වයන් යටතේදී ඔබට එම කාර්යක්ෂමතාව බලාපොරොත්තු විය නොහැකි බව තේරුම් ගත යුතුවේ. කෙසේ වුවත් ඝෝෂාවෙන් පිරි වීථියකදී වුවත් Google Pixel Buds උපාංගය මගින් සිදුවන භාෂා පරිවර්තනය ප්‍රායෝගික අපහසුතාවක් නොදැනෙනා මට්ටමකින් සිදුවනු ඇත.

මෙම Google Pixel Buds හෙඩ්ෆෝන් උපාංගය ප්‍රථමයෙන් වෙළෙඳ පොළට හඳුන්වාදීමේදී එය භාෂා හතළිහක් සඳහා සහාය දක්වන බව දැක්වී තිබිණි. එසේම සන්නිවේදනයේ යෙදෙනා දෙදෙනාම Google Pixel Buds හෙඩ්ෆෝන් පැළඳ සිටින්නේ නම් සිදුවන ආකර්ෂණීය සිදුවීම වන්නේ භාෂා පරිවර්තනය සඳහා ඔබට මුලපිරීමට අවශ්‍ය නොවීමයි. එවිට භාෂා පරිවර්තනය ස්වයංක්‍රීයවම සිදුවනු ඇත.

google-pixel-buds-4

මෙයට අමතරව Google Pixel Buds හෙඩ්ෆෝන් උපාංගයේ දකුණු ඉයර් බඩ් එක දීර්ඝ කාලයක් ඔබාගෙන සිටීම මගින් Google Assistant පහසුකම සක්‍රීය වනු ඇති අතර, ඔබට සාමාන්‍ය පරිදිම දැනගැනීමට අවශ්‍ය යම් යම් තොරතුරු ඉල්ලා සිටීම, දුරකථන ඇමතුම් ගැනීමට ඉල්ලා සිටීම මෙන්ම ඔබේ ප්‍රියතම ගීතයන් වාදනය කරන මෙන් ඉල්ලා සිටීමද කළ හැක. මේ හරහා ඔබට ඔබේ ස්මාට්ෆෝනය සාක්කුවෙන් පිටතට ගැනීම අවශ්‍ය නොවනු ඇත. මෙම Google Pixel Buds හෙඩ්ෆෝන් උපාංගය සිංහල භාෂාව සඳහා සහාය දක්වන බවක් තවමත් දැනගැනීමට නොමැති වූවත්, ඉදිරියේදී සිංහල සඳහාද සහාය Google Pixel Buds හරහා ලැබෙනු ඇතැයි අපට අපේක්ෂා කළ හැක.