Category Archives: pilisaran

මහේලගෙන් ඉල්ලීමක්

කොළඹ නවලෝක රෝහලේ ප්‍රතිකාර ලබන 37 හැවැරිදි පියෙකුට බී නෙගටිව් වර්ගයේ රුධිරය අත්‍යාවශ්‍ය වී ඇති බව මහේල ජයවර්ධන ට්විටර් පණිවිඩයකින් සඳහන් කරයි. ඔහුට අවුරුදු 4ට වඩා අඩු දියණියන් දෙදෙනෙක් සිටින බවත් එම රුධිරය ඇති කිසිවෙක් සිටීනම් 077- 3622589 අමතන ලෙසත් මහේල පවසයි.

CaptureMahela-jayawardene

 

 

 

ලාංකේය සියලු පිළිකා රෝගීන් වෙනුවෙන් අලුත් බලාපොරොත්තුවක්

සුවහසක් පිළිකා රෝගීන්ගේ පරීක්ෂණ කටයුතු සඳහා මෙතෙක් ලංකාවේ රජයේ රෝහල්වල නොතිබුණු පෙට් ස්කෑනර් යන්ත්‍රයක් ගෙන ඒමට ලාං‍ෙක්ය දුක හඳුනන, අනෙකාගේ වේදනාව දැනෙන රන් හදවත්වලට හැකි විය. එය පිළිකා රෝගීන් වෙනුවෙන් ලබාදීමේ අවස්ථාවට  ඇත්තේ තවත් දින කිහිපයකි. උතුරා යන පිය සෙනෙහසේ කඳුළකින් ආරම්භ වූ මෙය  අරගලයක් තුළින් දිනාගත් දෙයක් ලෙස කිවහොත් වඩාත් නිවැරදි වේ. මේ ඒ පිළිබඳ තබනා සටහනකි. 

ආසියානු කලාපයේ රටක් ලෙස ලංකාව තුළ පිළිකා රෝගීන් සෑම ප්‍රදේශයකම පාහේ දැකගත හැකි අතර, මොවුන්ට සේවය සලසා  දෙන ලංකාවේ ප්‍රධාන පිළිකා රෝහල මහරගම අපේක්ෂා පිළිකා රෝහලයි. නමුත් ලංකාවේ පිළිකා රෝගීන්ට ස්වකීය පරීක්ෂණ කටයුතු සිදුකර ගැනීමට මේ වනතුරුත් රජයේ රෝහල්වල අත්‍යවශ්‍ය යන්ත්‍රයක් වන පෙට් ස්කෑන් යන්ත්‍රයක් නොමැත. අපේ  රටේ සිටින බහුතරයක් දුප්පත් මිනිසුන්ට එවැනි පරීක්ෂණයක් පෞද්ගලික රෝහලක මුදල් වියදම් කරමින් සිදුකර ගැනීමට වත්කමක් නොමැති නිසාවෙන් එය මහත් අඩුපාඩුවකි. 

එම යන්ත්‍රය රෝගී සිරුරේ පටක හා අවයව ක්‍රියාත්මක වී ඇති ආකාරය හෙළි කිරීමට අත්‍යවශ්‍ය වේ. මේ තුළින් ශරීරයේ පරිවෘත්තීය ක්‍රියාකාරකම් හඳුනාගැනීමට හැකියාවක් ඇති අතර, ආරම්භක අවදියේදී පිළිකා රෝග තත්ත්වය හඳුනා ගැනීමටද මෙය උපකාරී වේ. 
ලෝකයේ පෙට් ස්කෑන් යන්ත්‍රය නිපදවා අද වන විට වසර 26ක් පමණ කාලයක් ගතවූ නමුත්, තවමත් ලංකාවේ එවැනි යන්ත්‍රයක් නොමැති වීම කනගාටුවට කරුණකි. 

Capture copy

එකී අඩුපාඩුව සකස්කර සුවහසක් දුප්පත් ජනතාවගේ සුවය වෙනුවෙන් මෙවැනි පෙට් ස්කෑන් යන්ත්‍රයක් වෙනුවෙන් සමාජ අරගලයක් දියත් කළ ආදරණීය පියෙකු ලෙස එම්.එස්.එච්. මොහොමඩ් මහතා හඳුන්වාදිය හැකිය. මොහොමඩ් මහතාගේ පුතු 2013 වර්ෂයේදී පිළිකා රෝගියෙකු බවට පත්විය. දෙමවුපියන්ට තමන්ගේ දරුවන් තරම් වටින වෙනත් සම්පතක් නොමැති බව පසක් කරමින් ඔහු තම පුතු වෙනුවෙන් තමන්ගේ ඉඩකඩම් සහිත සියලුම දේපළ වියදම් කළේය. වරෙක ඔහු සිය පුතු ඉන්දියාවට ගෙනගොස් පෞද්ගලික රෝහලක ප්‍රතිකාර ආරම්භ කළේය. නමුත් ඉන් කිසිදු සුභවාදී ප්‍රතිඵලයක් අත් නොවීය.

නැවතත් ලංකාවට පැමිණි මොහොමඩ් මහතා තම පුතු කොළඹ පිහිටි පෞද්ගලික රෝහලක නතර කර ප්‍රතිකාර කරනුයේ තාවකාලික හෝ සුවයක් අපේක්ෂාවෙනි. නමුත් ඒ වන විට ඔවුන් ආර්ථික වශයෙන් පමණක් නොව කායික හා මානසික වශයෙන්ද කඩා වැටී අවසන්ය. ඔහුට අවසානයේ ඉතිරි වූයේ තම පුතු බේරා ගැනීමේ ආත්ම ශක්තිය පමණි. නමුත් ඔහු සමස්ත පිළිකා රෝගීන්ගේ විමුක්තිය උදෙසා අරගල කරන්නට විය.

පෙට් ස්කෑන් යන්ත්‍රයක් පිළිකා රෝහලට ලබාගැනීම සඳහා අරමුදලක් ස්ථාපිත කර ඒ වෙනුවෙන් ඇපකැප වී කටයුතු කරන්නට විය.  ලාංකිකයයන් අනෙකුත් ජාතීන් අතරින් සුවිශේෂී වන්නේ ඔවුන් සතු සුහදශීලී ආගන්තුක සත්කාර ගුණය නිසාවෙනි. නමුත් මේ තුළින් ලාංකිකයන්ගේ ආගන්තුක සත්කාරය පමණක් නොව පරිත්‍යාගශීලී බව, අනුන්ගේ දුක හඳුනනන ජාතියක් බවද පසක් විය. මේ සියල්ල සඳහා ගත වූයේ දින 90ක් පමණ ඉතා කෙටි කාල සීමාවකි. මොහොමඩ්ගේ පුතාගේ ඉල්ලීම වූයේ පිළිකා රෝගීන් සඳහා පෙට් ස්කෑන් යන්ත්‍රයක් කෙසේ හෝ පරිත්‍යාග කිරීමයි. ඒ වන විටත් මොහොමඩ් කදීජා සම්මේලනයේ සභාපති වශයෙන් කටයුතු කර තිබේ. ඔහු ඒ යටතේ වෙනම %ෆයිට් කැන්සර්^ නමින් කණ්ඩායමක් අාරම්භ කර අරමුදලක් එකතු කරන්නට වූයේ 2016 වර්ෂයේ මාර්තු මස සිටය. එම අරමුදල ඇරඹීමේ නිල අවස්ථාව බණ්ඩාරනායක සම්මන්ත්‍රණ ශාලාවේදී පැවැත්විය. 

ඔවුන් මුලදී අපේක්ෂා කළ මුදලටත් වඩා වැඩි මුදලක් එනම් මිලියන 250ටත් වඩා වැඩි මුදලක් රන් හදවත් උරුම වූ ලාංකික ජනතාවගේ ධන පරිත්‍යාගයෙන් එකතු කර ගැනීමට හැකි විය. මෙය ජාති, කුල, ආගම් හෝ වෘත්තීන් පසෙකළා සියලුදෙනා ලාංකිකයන් සේ එකාවන්ව එක්ව සිදුකළ ජාතික කර්තව්‍යයකි. 

fight cancer team (4) copy

නමුත් කනගාටුවට කරුණ වන්නේ පෙට් ස්කෑන් යන්ත්‍රය ගෙන එන තෙක් මගබලා සිටි මොහොමඩ්ගේ පුතණුවන්ගේ සිහිනය සඵල වීමට මත්තෙන් ඔහු සදහටම දෑස් පියා ගැනීමය. ඔහුගේ ආශාව වූ ඒ යන්ත්‍රය ලාං‍ෙක්ය සුවහසක් පිළිකා රෝගීන්ට අප්‍රේල් මස 01 වැනිදා විවෘත වුවත් එය බලන්නට ඔහුගේ දෑස විවර වන්නේ නැත. නමුත් එයින් දුප්පත් පිළිකා රෝගීන් විශාල ප්‍රමාණයකට තවත් දිනක් හෝ කාලයක් ජීවත් වීමට අවස්ථාවක් උදා වේ. 

මෙම ප්‍රමාදය එක් අතකින් පරිපාලන ක්‍රියාවලියේ අක්‍රමිකතාවකි. මාස තුනක් වැනි කෙටි කාලයක් තුළ මුදල් එකතු වුවත් එය ලබාගැනීමට ලාංකික වැසියාට වසර දෙකකට ආසන්න කාලයක් බලා සිටීමට සිදුවිය. මේ සඳහා එකතු වූ මුදල් සියල්ල බැර කළේ රජයේ ගිණුමකටය. පරිපාලන සේවයේ අක්‍රමවත් ටෙන්ඩර් පටිපාටිය නිසා මෙසේ කල්ගත වන්නට ඇත. 

ඒ සිදුවීම් එසේ සිදුවුවද දැන් එය රෝහලේ සවි කිරීමේ කටයුතු නිමා කරමින් සිටියි. ලාංකික ජනයාගේ උත්සාහයේ ප්‍රතිඵලයෙන් ලබාගත් මෙය පාගමනින් ගොස් රෝහලට බාරදීමේ කටයුතු අප්‍රේල් මස පළමු වැනිදා උදෑසන 7ට වැල්ලවත්ත රොක්සි සිනමාහල අසලින් ආරම්භ වේ. පසුව උදෑසන 10ට මෙහි සමාරම්භක අවස්ථාව රෝහල් පරිශ්‍රයේදී පැවැත්වෙන අතර, ඉන්පසුව මෙය මහජනතාවට විවෘත වේ. මේ සඳහා සහභාගි වන ලෙස කදිජා සම්මේලනයේ සභාපති මොහොමඩ් මහතා මානුෂීය අනුකම්පා සහිත සිත් ඇති ඔබ සැමට  ආදරයෙන්  ඇරයුම් කරයි. 

නමුත් මෙය අවසානයක් නොවේ. හුදෙක් අරගලයක ආරම්භයක් පමණකි. මොවුන්ගේ ඉදිරි අපේක්ෂාව වන්නේ රෝහලට මිලියන 200ක් වටිනා එම්.ආර්.අයි. ස්කෑනර් යන්ත්‍රයක් හා මිලියන 100ක් වටිනා සී.ටී. ස්කෑනර් යන්ත්‍රයක් ලබාදීමය. අපේ රටේ රෝහල් තුළ තවත් බොහෝ නවීන තාක්ෂණික උපකරණ වන එනම්, බ්‍රොන්චොස්කොපීස්, එන්ඩොස්කොපීස්, රේඩියෝ අයඩින් ආදී උපකරණවල අවශ්‍යතා රැසකි. අද වන විට ලාංකික සමාජයෙන් මිනිස් ජීවිත බිලිගන්නා දරුණු රෝගයක් ලෙස පිළිකාව පත් වී හමාරය. එවන් සමාජීය පසුබිමක් තුළ 2022 වන විට මහරගම අපේක්ෂා රෝහල දකුණු ආසියාවේ හොඳම රෝහල්වලින් එකක් බවට පත් කිරීම ෆයිට් කැන්සරින් කණ්ඩායමේ මූලික අභිප්‍රාය වේ. එයට ඔවුන්ට අවශ්‍ය ධෛර්ය ශක්තිය ලැබේවායි අපි හදවතින් සුබපතමු. 

  


එම්.එස්.එච් මොහොමඩ්,

මගේ පුතාට පිළිකාවක් වැලඳුණේ 2013 වර්ෂයේදී. ඔහුගේ ප්‍රතිකාර කටයුතු සඳහා ඉන්දියාවේ පෞද්ගලික රෝහලකට එක්ක ගියා. එහිදීත් වසරක් පමණ ප්‍රතිකාර කළා. නමුත් ඉන් සුවයක් නොලැබුණ නිසා නැවතත් ලංකාවට එක්ක ඇවිත් මෙහේ පෞද්ගලික රෝහලක මාස හයක පමණ කාලයක් ප්‍රතිකාර කළා. මේවායින් ප්‍රගතියක් අත්නොවුණත් පෞද්ගලිකව මට කෝටි ගාණක මුදලක් වියදම් වුණා.  අවසානයේ පුතාගේ ප්‍රතිකාර කටයුතු සඳහා දේපළ පවා විකුණන්න සිද්ධ වුණා.

ඒ නිසා අපි ආර්ථිකව පමණක් නොවෙයි මානසික හා කායික වශයෙනුත් කඩාගෙන වැටුණා. ඒ පසුබිමත් එක්ක 2015 වර්ෂයේදී තමයි අපි මහරගම පිළිකා රෝහලට පුතාව එක්ක යන්න තීරණය කළේ. ඒ ගියාට පසුවයි දැනගැනීමට ලැබුණේ මහරගම පිළිකා රෝහල තුළ පෙට් ස්කෑනර් යන්ත්‍රයක් නොමැති බව. මම පුදුම වුණා මහරගම එවැනි ස්කෑනරයක් නැති වීම ගැන. ඒ වෙනකොටත් මගේ පුතාට ඉන්දියාවේ හා ලංකාවේ පෞද්ගලික රෝහල්වලින් පෙට් ස්කෑන් හතක් හෝ අටක් අරගෙන තිබුණා. මගේ පුතාගේ ඉල්ලීම වුණේ පෙට් ස්කෑනර් යන්ත්‍රයක් මහරගම රෝහලට පරිත්‍යාග කරන්න කියලයි. 

ටෙන්ඩර් පටිපාටියේ තිබෙන අඩුපාඩු හා ප්‍රමාද දෝෂයන් නිසා පෙට් ස්කෑනර් යන්ත්‍රය ගෙනෙන කාර්යය අවුරුද්දකට වඩා වැඩි කාලයක් ගත වුණා. යල්පැනපු ටෙන්ඩර් පටිපාටිය ගැන මෙහිදී මම ඉතාමත් කනගාටුවට පත්වෙනවා. ඒ නිසා පෙට් ස්කෑන් යන්ත්‍රය කවදා ලැබේදෝ යන සිහිනයෙන් සදහටම දෑස් පියා ගන්නට මගේ පුතාට සිදුවුණා. 

මගේ ජීවිතේ හීන අතරින් මේක තමයි මට තිබුණ අභියෝගාත්මක හීනය කිව්වොත් නිවැරදියි. ඒක මගේ සහ රටේ මිනිසුන්ගේ ජීවිත සමග බැඳිච්ච හීනයක්. මගේ පුතා හුමයිඩ්ගේ ඉල්ලීම නිසා ඒ හීනේ සැබෑ කරගන්න අපට පුළුවන් වුණා. ඒ සඳහා මට ආපු බාධක එමටයි. බුදුහාමුදුරුවන්ට ගල් පෙරළලා ආනන්තරීය පාපකර්ම කරගත්ත දේවදත්තලා වගේ අය තවමත් අපේ සමාජයේ ඉන්නවා කියල දැනෙනකොට මට ලොකු කලකිරීමක් ආවා. නමුත් මම ඒ කිසිම දෙයකින් සැලුණේ නැහැ. ඒ නිසා අද ඒ හීනෙ සැබෑ වෙලා තිබෙනවා.

1 copy copy

දරුවන් තිදෙනා වෙනුවෙන් ඔබේ පිහිට අවසියි

දිඹුල ක්‍රිස්ටස්ෆාම් වතුයායේ වතුකම්කරු පවුලක අලුත උපන් තුන් නිවුන් සිඟිති ගැහැනු දරුවන් තිදෙනා පෝෂණය කිරීමට එම සිඟිත්තියන්ගේ දෙමව්පියෝ පරිත්‍යාගශීලීන්ගේ ආධාර උපකාර බලාපොරොත්තු වෙති.

දික්ඔය මූලික රෝහලේදී පසුගිය ජනවාරි 29 වැනි දින උපත ලබා ඇති එම සිගිත්තන්ගේ බර අඩුකම නිසා දින කිහිපයක් ඔවුන් පේරාදෙණිය, ගම්පොළ සහ අවිස්සාවේල්ල යන මූලික රෝහල්වල ළමා ඒකකවල රඳවා තැබීමෙන් අනතුරුව නැවත දෙමව්පියන්ට භාරදී තිබේ.

දරුවන්ගේ මව වේලු සරෝජා දේවි (39) වන අතර පියා වීරන් ක්‍රිෂ්ණකුමාරන් (49) මහතායි.

එම දෙපළට මෙම සිගිත්තන්ට අමතරව පාසල් වියේ පසුවන 12 සහ 11 වියේ පසුවන තවත් ගැහැනු දරුවෝ දෙදෙනෙක්ද සිටින අතර ඔවුහු මේ වන විට හැටන් සහ කොටගල පාසල්වල අධ්‍යාපනය ලබති. දරුවන්ගේ පියා මේ වන විට පියා කොළඹ ප්‍රදේශයේ කුලී රැකියාවක නිරතව සිටින අතර මව එම වතුයායේ තේදලු නෙළන්නියක ලෙස කටයුතු කරයි. මීට අමතරව එම නිවසේ ක්‍රිෂ්ණකුමාරන්ගේ මව සහ පියාද ජීවත් වෙති.

තමත් පත්ව ඇති තත්ත්වය පිළිබඳ අදහස් දැක්වූ ක්‍රිෂ්ණ කුමාර් මහතා මෙසේ පවසා සිටියේය.

 ʻමට ලැබෙන සොච්චම් වැටුපෙන් සියලුම දෙනා ජීවත් වෙන්නේ. අලුත උපන් සිඟිත්තන්ට මව් කිරි ලබාදීමට තරම් ප්‍රමාණවත් මව් කිරි බිරිඳ සතුව නොමැති නිසා වෛද්‍යවරුන්ගේ නිර්දේශ මත මෙම සිඟිත්තන්ට දිනකට මව් කිරිවලට අමතරව නිර්දේශිත පිටි කිරිද ලබා දෙනවා. එම කිරි පිටි ලබාගැනීමට විශාල මුදලක් වැය වන බැවින් විශාල ආර්ථික අපහසුතා මධ්‍යයේ ජීවත් වන අප දැඩි අසීරුතාවට පත්ව සිටිනවා.ʼ

සිඟිත්තන්ගේ මව වන වේලු සරෝජා දේවි මහත්මිය මෙසේ පවසා සිටියාය.

ʻආර්ථික අපහසුතා මධ්‍යයේ හෝ මෙලවට බිහිවූ දරුවන් හොඳන් රැක බලා ගැනීම මගේ එකම අධිෂ්ඨානයයි. ඒ සඳහා කිසියම් අයෙකු හෝ ආයතනයක් උදවු උපකාර කරන්නේ නම් එය මහඟු පින්කමක්.ʼ

මොහුන්ගේ ලිපිනය විරන් ක්‍රිෂ්ණකුමාරන්, ක්‍රිස්ටස්ෆාම් වත්ත, කොටගල වන අතර 077-2591462 දුරකථන අංකය ඇමතීමෙන් ඒ පිළිබඳ වැඩිදුර තොරතුරු ලබා ගත හකිය.

01 copy 03 copy 06 copy 09 copy 13 copy

දෘශ්‍යාබාධිත අශෝකට ප්‍රතිකාර කටයුතු සඳහා ආධාර කරමු

මේ වන විට දෘශ්‍යාබාධිත තත්ත්වයට පත්ව සිටින වැලිගෙපොළ ප්‍රාදේශීය ලේකම් බල ප්‍රදේශයේ  අයත් පල්ලෙබැද්ද පුස්සතොට පදිංචි ඩබ්.අශෝක තිලකරත්න තරුණයා තම ප්‍රතිකාර කටයුතු සඳහා පරිත්‍යාගශීලීන්ගේ ආධාර උපකාර බලාපොරොත්තු වෙයි. ඉපදී වසර කිහිපයකට පසුව ඇති වූ රෝගාබාධයක් හේතුවෙන් ඔහු දෘශ්‍යාබාධිත තත්ත්වයට පත්ව ඇත. මෙසේ වුවද  සිය වයෝවෘද්ධ පියා සහ ආබාධිත සොයුරියද රැක බලා ගැනීමට සිදුවී ඇත්තේ අශෝකටයි.

තමන් පත්ව ඇති තත්ත්වය පිළිබඳ අදහස් දැක්නූ අශෝක තිලකරත්න මහතා මෙසේ පවසා සිටියේය.

 “මට මාසෙකට ප්‍රතිකාර ගන්නත් ලොකු මුදලක් වැය වෙනවා. මගේ පවුලේ අය ජීවත් කරන්න තියෙන්නෙත් මටමයි. මට කිසිම ආදායම් මාර්ගයක් නැහැ . මගේ ආබාධිත තත්ත්වය සලකා බලා අපි වෙනුවෙන් යම් කිසි උපකාරයක් කිරීමට හැකි නම් එය මහඟු පුණ්‍යකර්මයක්.

අශෝක වෙනුවෙන් උපකාර කිරීමට කැමැත්තක් දක්වන්නෙකුට ඒ සඳහා වන ආධාර ගොඩකවෙල මහජන බැංකුවේ බ්.අශෝක තිලකරත්න මහාතා නමින් 245200120056034 ගිණුම් අංකය යටතේ විවෘත කොට ඇති ගිණුමට බැර කළ හැකිය. මේ පිළිබඳ වැඩිදුර තොරතුරු 071- 9966935 දුරකථන අංකයෙන් ලබා ගත හැකිය.

27336871_1104189116382213_3819230291815105557_n copy

බලන්ගොඩ අරුණ දිසානායක

 

මෙම දරුවාට ඔබේ පිහිට අවැසිය

AID_9458

පුවත්පත් කාර්යාලයට අවුරුදු දහතුනක දරුවකු තම මවත් කුඩා මලණුවනුත් සමග පැමිණ සිටි අතර, ඔවුන් අප කෙරෙන් යම් උදවුවක් බලාපොරොත්තු විය. එය කිසිසේත්ම අපට ඉටු කරන්නට අපහසු උදවුවක් නොවුණු නිසාම මෙම සටහන ලියැවෙයි. අප සැවොම ජීවත් වන පොළොව මත ඉහළ නගින මිනිසුන් සේම ජීවිතයේ අතිශය දුක්ඛිත කාලයන් ගෙවා දමමින් සිටින මිනිසුන් අපට හමුවෙයි.  

අප හැකි පමණින් මිනිසුන් ලෙසින් තම වර්ගයාට ඉටු කළ හැකි තරමේ උදවු කරමින් මේ ජීවිතයේ ඉදිරියට යන මුත් ඒ අතරේ අපට මගහැරෙන අපගේ උදවු අවැසි බොහෝ පිරිසක් වෙයි. මෙම දහතුන් හැවිරිදි දරුවා එසේ මග නොහැරෙනු පිණිස මෙම සටහන තැබෙයි. මේ ඔහුගේ මව විසින් අපට පැවසූ කතාව සංස්කරණයකින් පසුව තබන සටහනයි. මෙම සටහන හා බැඳෙන දත්තවල සක්ෂි අප සතුව ඇති අතර, මෙම කාරණාවට මනුසත් බවින් බැඳෙන පිරිසට අවැසි වන ලෙස ඒවාද මෙම සටහනට එක් වෙනු ඇත.
“පුතාගෙ නම සියුම් ඉඳුවර. වයස අවුරුදු  13 යි. පුතා ඉපදෙනකොට පුතාගෙ ඇස් දෙකේම කළු ඉඟිරියාව තිබුණෙ නැහැ. අත් දෙකේම එක අතක ඇඟිලි දහය ගානෙ විස්සක් තිබුණා. කකුල් දෙකෙත් ඒ විදියටමයි. ඒ ඇඟිලි සියල්ල එකිනෙක බැඳිලයි තිබුණෙ. ඉන්පසුව කුඩා කාලයේදි කොළඹ අක්ෂි රෝහලෙන් පුතාට ඇහැක් බද්ධ කළා. නමුත් සිංගප්පූරු ගිහිල්ලා පරීක්ෂණ කළාම ඒ ඇහැ පේනවා අඩුයි කියල කිව්වා. ඒ සැත්කම සාර්ථක මදියි කියා ඔවුන් පැවසුවා. ඉන්පස්සෙ කැලණියේ සිටින මහත්තයෙකුගේ වියදමින් සිංගප්පූරුවෙනුත් ඔපරේෂන් එකක් කළා. ඒ ඔපරේෂන් එකෙන් පස්සෙ පුතාට ඉස්සරට වැඩිය ටිකක් පේනවා. දැන් පුතා පාට කියනවා. සල්ලි කොළ අඳුන ගන්නවා.

AID_9465

දකුණු අතේ එක් ඇඟිල්ලක් මම ළමා රෝහලෙන් හැදෙවුවා. අනිත් ඇඟිලිවල සැත්කම් කළේ ඩර්ඩන්ස් රෝහලෙන්. ඒ සම්බන්ධ සැත්කම් පුතා පුංචි කාලෙ ඉඳන්ම කරනවා. ඒකෙ අන්තිම ඔපරේෂන් එක කළේ ගිය අවුරුද්දෙ මැයි මාසෙ. වම් අතටත් ඒ වගේම ඔපරේෂන් කරන්න තියෙනවා. දැනට ටිකක් කරලා තියෙන්නෙ. මේ වෙද්දි දරුවාගෙ අත්දෙකට විතරක් ප්ලාස්ටික් සැත්කම් දහයක් කරල තියෙනවා. ඒ කරලයි මේ තත්ත්වෙට ගෙනාවෙ.මෙයාගෙ කකුල පිහිටලා තියෙන විදියට කකුලෙ ඇඟිලි හදන්න අමාරුයි කියල දොස්තර මහත්තයා කිව්වා. ඒ නිසා සෙරෙප්පු දෙකක් දාන්න පුළුවන් වෙන විදියට ඇඟිලි කරු දෙකක් විතරක් හිටින්න හදල දෙන්නට පුළුවන් වග කිව්වා. ඊළඟට ආයෙත් අනිත් අතට කරන ඔපරේෂන් එක කරන්න තියෙනවා. ඒක කරන්නෙ ප්ලාස්ටික් සැත්කම් අංශයේ රොමේෂ් ගුණසේකර වෛද්‍යවරයායි. දැනට අතට කරන්න තියෙන ඔපරේෂන් එකට ලක්ෂ තුනක වියදමක් යනවා. ඒක කරන්න නියමිත වෙලා තියෙන්නෙ ලබන මාසෙ දහ තුන් වැනිදා ඩර්ඩන්ස් රෝහලේදියි. කකුල්වලට යන වියදම ගැන තවම දන්නෙ නැහැ. මේ අතේ ඔපරේෂන් එක ඉවර වෙලා තමයි ඒ ගැන බලන්න වෙන්නෙ”

එසේම දිවයින පුරා නොයෙකු වූ ප්‍රෝඩාකාරී පිරිස් විසින් මෙවැනි අසරණ පිරිස් හරහා මුදල් ගරමින් සිටින අතර එවන් වූ අයෙකු මෙම දරුවා තම කළු සල්ලි වෙනුවෙන් උපයෝගී නොකර ගන්නට තරම් කාරුණික වන්න.

ඡායාරූප – ඉසුරු පෙරේරා

 

රුධිරය පරිත්‍යාග කරන්නයි ඉල්ලීමක්

ඩෙංගු සහ වෙනත් රෝග තත්ත්වයන් හේතුවෙන් සෑම වසරකදීම ගබඩාගත රුධිර ප්‍රමාණය අඩුවන බැවින් රුධිරය පරිත්‍යාග කරන ලෙස ජාතික රුධිර පාරවිලයන මධ්‍යස්ථානය ජනතාවගෙන් ඉල්ලා සිටියි.

 එම මධ්‍යස්ථානයේ අධ්‍යක්ෂ වෛද්‍ය රුක්ෂාන් බෙල්ලන මහතා සඳහන් කළේ සෑම වසරකම ජනවාරි සිට අප්‍රේල් මාසය දක්වා කාලය තුළ රුධිරය පරිත්‍යාග කිරීම ද අවම වන බවයි.

එම නිසා රුධිරය හගයක් ඇතිවිය හැකි බැවින් රුධිර පරිත්‍යාගශීලීන්ගෙන් කඩිනමින් රුධිරය පරිත්‍යාග කර ගැනීමට සිදුව ඇති බව අධ්‍යක්ෂවරයා සඳහන් කරයි. එ

ම නිසා නාරාහේන්පිට ජාතික රුධිර පාරවිලයන මධ්‍යස්ථානයට හෝ ළඟම පිහිටි රෝහලේ රුධිර මධ්‍යස්ථානයට පැමිණ රුධිරය පරිත්‍යාග කරන ලෙස අධ්‍යක්ෂවරයා ජනතාවගෙන් ඉල්ලා සිටියි.

blood donation in hands website

ඔබේ පිහිට අවැසි මොහොතක්

වකුගඩු රෝගයෙන් පීඩා විඳිමින් කුඩා දරුවන් දෙදෙනෙකු සමග අසරණ තත්ත්වයෙන් ජීවත් වන මවක පිළිබඳ පුවතක් ගලේවෙල, බඹරගස් වැව, ගොන්නගස් යාය ප්‍රදේශයෙන් වාර්තා වේ.

එච්.වයි. අසෝකා මාලනී (අවු.26) නමැති ඇය වසර දොළහක පමණ කාලයක සිට දරුණු වකුගඩු රෝගයකින් පෙළෙන්නීය. ඇය වයස අවුරුදු දෙකහමාරක් සහ අවුරුද්දක් වන කුඩා දරුවන් දෙදෙනෙකු සමග කටුමැටි ගැසූ නිවසක අසරණව සිටිනු අයුරු එහි ගිය අපට දැකගත හැකි විය.

අසෝකා මාලනී මහත්මියගේ ස්වාමි පුරුෂයා කුලී වැඩ කරමින් සිය බිරිඳ හා කුඩා දරු දෙදෙනා පෝෂණය කිරීමට හා රැකබලා ගැනීමට දැඩි වෙහෙසක් දරයි. මේ දිනවල පවතින නියං තත්ත්වය නිසා ඔහුට කුලී වැඩක් හෝ නොමැති වීම බරපතළ ප්‍රශ්නයකි. මෙම කාන්තාවට රජයෙන් ලැබිය යුතු කිසිදු වරප්‍රසාදයක් නොලැබී ඇති අතර, අවම වශයෙන් සමෘද්ධි සහනාධාරය හෝ වකුගඩු ආධාර කිසිවක් ඇයට ලැබී නොමැත.
සිය සැමියා උපයා ගන්නා මුදලින් දරුවන් දෙදෙනාට ආහාර ලබාදීම සිදුකරන බවත්, වකුගඩු රෝග සඳහා ප්‍රතිකාර ලබා ගැනීමට මහනුවරට සහ කොළඹට ගමන් කිරීමට මුදල් නොමැති නිසා මාස 06ක පමණ කාලයක සිට ප්‍රතිකාර නොලබා සිටින බවත් ඇය හැඬූ කඳුළින් පවසා සිටියාය.

මෙම අසරණ පවුලට උපකාර කළ හැකි අයෙකු වෙතොත් එච්.වයි. අශෝකා මාලනී නමින් කොමර්ෂල් බැංකුව, ගලේවෙල ශා‍ඛාවේ පවතින 8090020656 දරන ගිණුමට ආධාර මුදල් බැරකළ හැකිය. මේ පිළිබඳ වැඩි විස්තර 072-6553713 යන දුරකථන අංකය ඇමතීමෙන් ලබාගත හැකිය.

??????????????????????????????? ??????????????????????????????? ???????????????????????????????

දික්යාය විදුහලේ දරුවන්ට හෙට වෙනුවෙන් අද

'අද' පුවත්පතේ අපි පසුගිය 20දා විශේෂ කටයුත්තක් වෙනුවෙන් මහියංගණය බලා ගියෙමු. ඒ ඌව පළාතේ මහියංගණය, අරාව, දික්යාය කනිටු විදුහලෙහි ඉගෙනුම ලබන දරු දැරියන් වෙනුවෙන් ඉටුකෙරුණු අධ්‍යාපනික සත්කාරයක් වෙනුවෙනි. හෙට වෙනුවෙන් 'අද' ලෙස නම් කරන මෙම වැඩසටහනේ  අරමුණ වූයේ රටේ අනාගතය බාර ගැනීමට සිටින දරු පරපුර ශක්තිමත් කිරීමයි. 

මහියංගණය – බදුල්ල පාරේ ආඳාඋල්පත පසුකර යන විට දික්යාය, අරාව ගම්මානය හමු වෙයි. කෘෂිකර්මාන්තයෙන් දිවි ගෙවන බොහෝ පිරිසක් වෙසෙන මේ ගම්මානයේ දුවා දරුවන්ගේ හෙට දවසේ අධ්‍යාපන කටයුතු උදෙසා මේ සත්කාරය දියත් කෙරිණි. 

විජය පුවත්පත් සමාගමේ 'අද' පුවත්පත ආරම්භ කොට වසර 06 ක් සපිරෙන්නට ආසන්න සමයක, විජය පුවත්පත් සමාගමේ බෙදාහැරීම් අංශයෙන් ඉදිරිපත් කෙරුණු යෝජනාවක් අනුව ක්‍රියාත්මක කෙරුණු මෙම වැඩසටහනට,  'අද' පුවත්පතෙහි කර්තෘ මණ්ඩල සාමාජිකයන්, බෙදාහැරීම් අංශයේ සමාජිකයන් සහ රත්නපුර ප්‍රා‘දේශීය කාර්යාලයේ සාමාජිකයන් පිරිසක් සහභාගි වූහ.

විජය පුවත්පත් සමාගමේ සභාපතිතුමා ඇතුළු ඉහළ කළමනාකාරීත්වයේ අනුදැනුම හා මගපෙන්වීම මත දියත් කෙරුණු මේ ව්‍යාපෘතිය මගින්, දික්යාය විද්‍යාලයේ ඉගෙනුම ලබන දරු දැරියන් 86 දෙනෙකු වෙනුවෙන් සියලුම පාසල් උපකරණ ලබාදීම, ඩෙස්පුටු ආදිය පිළිසකර කිරීම, පුස්තකාලය සංවර්ධනය කර පුස්තකාලයට අවශ්‍ය පොත් හා ප්‍රථමාධාර ඒකකයට අවශ්‍ය බෙහෙත් ද්‍රව්‍ය ප්‍රදානය කිරීම සිදු කෙරිණි.   

දික්යාය කනිටු විදුහලේ දරු දැරියන් විසින් මෙම වැඩසටහනට සමගාමීව සිය නිර්මාණ හැකියාව ඉදිරිපත් කිරීම සඳහා ප්‍රදර්ශනයක් හා සංස්කෘතික සන්දර්ශනයක් සංවිධානය කර තිබූ අතර, එහිදී එම දරුවන් භාෂා ත්‍රිත්වයෙන්ම නිවේදන කටයුතු සිදු කිරීමද කැපී පෙනෙන අංගයක් විය. 

එම විද්‍යාලයේ විදුහල්පතිවරයා, නියෝජ්‍ය විදුහල්පතිවරයා ඇතුළු ආචාර්ය මණ්ඩලය ඇගයීමද මෙහිදී සිදු කෙරිණි. 'රටේ අනාගතය සුරක්ෂිත කිරීමේ ව්‍යාපාරය' යන තේමාව යටතේ මෙම වැඩසටහන ක්‍රියාත්මක කෙරුණු අතර, ඒ යටතේ රටේ හෙට දවස භාරගැනීමට සිටින දරු පරපුර සුරක්ෂිත කිරීම වෙනුවෙන් ඉදිරියේදී ද මෙවැනි සමාජ සත්කාර රැසක් සිදු කිරීමට නියමිතය.

_KSR5798 _KSR5799 _KSR5819 _KSR5822 _KSR5840   _KSR5906 _KSR5912 _KSR5921  _KSR5987 _KSR5990 _KSR6016  _KSR6037   _KSR6063  _KSR6094   _KSR6117 _KSR6121 _KSR6128 _KSR6141 _KSR6163  _KSR6175 _KSR6179 _KSR6186 _KSR6198 _KSR6209 _KSR6235 _KSR6238 _KSR6244 _KSR6246 _KSR6253 _KSR6280  _KSR6313 _KSR6322 _KSR6339 _KSR6366 _KSR6375 _KSR6421  _KSR6471   _KSR6520 _KSR6532 _KSR6549 _KSR6554 _KSR6572 _KSR6575 _KSR6581 _KSR6589

සටහන /ඡයාරූප – ක්‍රිශන් රණසිංහ / පාලිත ආරියවංශ

අවුරුදු 5 බර කිලෝ 80යි අමායා සුවකරන්න උපකාර කරන්න

අසාමාන්‍ය බර වැඩිවීමේ තත්ත්වයට පත්ව සිටින කඩුගන්නාව පදිංචි අමායා ෂාවින්දි තෙන්නකෝන් (05) දියණියගේ ඉදිරි කටයුතු සිදු කර ගැනීමට ඇයගේ දෙමාපියෝ පරිත්‍යාගශීලීන්ගේ ආධාර උපකාර බලාපොරොත්තු වෙති.

මේ වන විට  කිලෝග්‍රෑම් 80 ක් පමණ අසාමාන්‍යව වැඩී ඇති  තම දියණියට ප්‍රතිකාර කිරීමට ‍හෝ  නිසි පරිදි  ආහාර පානවත් ලබාදීමට හරිහැටි රැකියාවක්  නොමැති  අමායාගේ පියාට නොහැකි තිබේ. තමන් පත්ව ඇති අපහසුතාව පිළිබඳ අදහස් දැක්වූ අමායා ෂාවින්දිගේ මව වන මධුකා කුමාරි මහත්මිය මෙසේ පවසා සිටියාය.

“ 2012-02-28 පේරාදෙණිය මහ රෝහලේදි තමා මගේ දුව ඉපදුනේ. දවස් දෙකෙන් ටිකට් කැපුවම අපි දරුවව අරගෙන සතුටින් ගෙදර ආවා. ඊට පස්සෙ දවස් 8 කින් දුවට උණ හැදුනා.  ඊට පස්සෙ මාස 3ක් පේරාදෙණිය මහ රෝහලේ නැවතී බේත් ගත්ත. එහිදී වෛද්‍යවරු පරීක්ෂණ වගයක් කරල කිවුව දරුවට විෂබීජයක් ගිහිල්ල කියල. බෙහෙත් මාස 3ක් විතර විද්ද ඒත් අඩුවක් වුණේ නැහැ.

මාස 6 ක්  පහු වුණ ගමන් දුවගෙ බර වැඩි වෙන්න පටන් ගත්ත. දුව හම්බ වෙද්දි තිබ්බෙ බර කිලෝග්‍රෑම් 2.380 යි. ඉන් පස්සෙ මාසෙට කිලෝග්‍රෑම් 1  ගානෙ වැඩි වෙන්න පටන් ගත්තා.  

දැන් දරුවගෙ ඇස් දෙක පේන්නෙත් නැ.ඇවිදින්නත් බැහැ. දරුව ඉන්නෙ ඇඳේ විතරයි. මහත්තය නිවසේ ඉන්න වෙලාවට රෝද පුටුවට ගිහින් තියනව.

වෛද්‍යවරු කියනව පලතුරු, එළවළු වැඩියෙන් දෙන්න කියල. නමුත් අපිට ඒකටවත් හරියට මුදලක් නැහැ.

අපි අනුරාධපුරයෙ වෙද මහත්තයෙක්ගෙන් සිංහල වෙදකම් කළා. එතකොට බර අඩු වුණා.  ඒ නිසා විශ්වාසයක් තියෙනව දරුවව අපිට හොඳ කරගන්න පුළුවන් කියල. ඒත් ඒකටත් අපිට මුදල් නැහැ.’’

 මෙම දැරියට උපකාරයක් කිරීමට කැමැති අය වෙතොත් කඩුගන්නාව මහජන බැංකුවේ  මධුකා කුමාරි වන  දරියගේ මවගේ නමින් ගිණුම් අංක 159-2-002-6-0036682 යටතේ විවෘත කර ඇති ගිණුමට ඒ සඳහා වන ආධාර පරිත්‍යාග කළ හැකිය.

 2 (2) 3 (2) 4 (2) 5 (2) 6 (2) 7 (2)

ඔත්පලව සිටින මවට උපස්ථාන කරන පුතා

හඳුනා නොගත් රෝගයකින් ඔත්පලව සිටින සිය මවට උපස්ථාන කරන පුත්‍රයෙකු පිළිබඳ පුවතක් බුල්නෑව ප්‍රදේශයෙන් වාර්තා වෙයි.
ගල්නෑව, බුල්නෑව නව ගම්මානය, අංක 32 පදිංචි සඳුන් දිසානායක (අවු.22) නමැති තරුණයෙකු මෙලෙස සිය මවට ඇපඋපස්ථාන කරමින් ඇයව ජීවත් කරවීම සඳහා දැඩි වෙහෙසක් දරමින් සිටියි.

ඔහුගේ මව වන එරන්දි මනමේන්ද්‍ර (අවු.52) නමැත්තිය හඳුනා නොගත් රෝගයකින් ඔත්පලව සිටින්නීය. ඇයගේ එකම දරුවා වූ සඳුන්, සිය මවගේ සියලු කටයුතු සිදුකරමින් ඇයට උපස්ථාන සිදුකරමින් කටයුතු කරන අයුරු එහි ගිය අපට දැකගත හැකි විය.මීට වසර දෙකකට ඉහත දී සඳුන්ගේ පියා හදිසි හෘදයාබාධයකින් ජීවිතක්ෂයට පත්ව තිබේ. අසල්වැසියන්ගේ උදව් උපකාරයෙන් ජීවත් වීමට ඔවුන්ට සිදුව ඇත.

උසස් පෙළ කලා අංශයෙන් අධ්‍යාපනය ලැබූ සඳුන්ට රැකියාවක් කිරීමට අවස්ථාවක් නොමැති වී ඇත්තේ සිය මවට උවටැන් කිරීමට සිදුවීම හේතුවෙනි. ඔහුගේ මවට අස්ථි දිරායෑමේ රෝගයක් වැලඳී මේ වනවිට කොඳුඇට පෙළෙහි අස්ථි බිඳී ඇත. එක් අතක අස්ථි සම්පූර්ණයෙන්ම බිඳීගොස් තිබේ. 

ඇය අනුරාධපුර මහ රෝහලේ ප්‍රතිකාර ලබා මේ වනවිට සිය නිවසට වී සිටින්නීය. සඳුන්ගේ එකම බලාපොරොත්තුව හා ප්‍රාර්ථනාව තම මව සුවපත් කරගැනීමය.මෙම අසරණ පවුලට උපකාර කළ හැකි අ‍යෙකු වෙතොත් සඳුන් දිසානායක නමින් ලංකා බැංකුව, ගල්නෑව ශාඛාවේ පවතින 81701829 දරන ගිණුමට ආධාර මුදල් බැර කළ හැකිය. මේ පිළිබඳ වැඩි විස්තර 071-3808958 යන දුරකථන අංකය ඇමතීමෙන් ලබාගත හැකිය.

DSC03193 copy DSC03198 copy DSC03201 copy DSC03215 copy