Category Archives: opinion

තවමත් මර්දනය කළ නොහැකි වූ හොර ග්ලයිෆොසේට් මාෆියාව

ග්ලයිෆොසේට් තහනම යළිත් වගාකරුවන් සහ පරිසරවේදීන් අතර අර්බුදයක් නිර්මාණය කර තිබේ. රජයේ පාර්ශ්වයන් පවසන්නේ වගා කටයුතු පවත්වා ගෙන යෑම වෙනුවෙන් ග්ලයිෆොසේට් අවශ්‍යතාව යළිත් වරක් ඉඩම් හිමියන් හා බෝග වගාකරුවන් පෙන්වා දෙන බවට පුවතකි.

එහෙත් පරිසරවේදීන් සහ වකුගඩු රෝගයට එරෙහි පාර්ශ්වයන් පවසන්නේ ග්ලයිපෝසේට් යනු ජනතාවගේ ආයුෂ කෙටි කරන, ජනතාව අකාලයේ මරා දමන ව්‍යවසනයක් බවට චෝදනාවකි.

වගාකරුවන්ට ඇත්තේද එවැනිම මැසිවිල්ලකි. තේ වගාව කෙරෙන ප්‍රදේශයන්හි සහ වැවිලි ක්‍ෂේත්‍රයන්හි නිරත වැවිලිකරුවන් පවසන්නේ මේ වනවිට තමන් කම්කරුවන් සපයා ගැනීමේ අර්බුදයකට පත්වීමෙන් වගා කටයුතු පවත්වා ගෙන යෑමට නොහැකි අවදානමක් පිළිබඳ අනතුරකි. එසේම මිනිස් ශ්‍රමය යටතේ දැරීමට සිදුවන වියදම් සමග විමසීමේදී නිෂ්පාදන වියදම් ඉහළ යෑමේ අවදානමද ජනතාව පිට පැවරෙන බවට ඔවුහු තර්ක කරති.

එහෙත් වකුගඩු අර්බුදය සම්බන්ධයෙන් මතුවන තර්ක, විතර්ක තුළ රජය විසින් ග්ලයිෆොසේට් තහනම් කළද, එයින් පසුද ඒවා වෙළෙඳ පොළේ රහසිගතව අලෙවි වන බවට ජනතාවගෙන් නැගුණු මැසිවිලි ගණනාවකි.

සියල්ලට සවන් දෙන ජනතාව පවසන්නේ මහින්දගේ අන්තිම අවුරුද්දේ ග්ලයිෆොසේට් කන්ටේනර් 15ක් ගෙනාවේ නම්, ඒවා තවත් අවුරුදු විස්සකට ප්‍රමාණවත් යැයි අතීතය සිහිපත් කරවීමකි. ඒ ග්ලයිෆොසේට් දැන් එළියට එනවා දැයි ජනතාව ප්‍රශ්න කරති.

එහිලා ප්‍රධාන තර්කයක් ලෙස ජනතාව ඇසුවේ, 'තහනම් නම් වෙළෙඳ පොළට කොහෙන්ද?' යන තර්කයකි. පළිබෝධනාශක රෙජිස්ටාර්වරයා පෙන්වා දෙන්නේ, තහනම් කළද කූට ව්‍යාපාරිකයන් හොර රහසේ සඟවා ගෙන තිබූ හෝ වෙනත් ආකාරයෙන් ගෙන්වා එවැනි දේ අලෙවි කරන සිද්ධියකි. 

ගත වූ කාලය තුළ දඹුල්ල, පතන හා යාපනය වැනි ප්‍රදේශ ගණනාවක තිබී මෙවැනි තහනම් රසායනිකයන් අත්අඩංගුවට ගැනීමට හැකිවූ බවත්, අධිකරණයේ නඩු පැවරූ බවත් ඔහු අවධාරණය කළේය.

තහනම් නීතිය පැනවීම සමග වෙළෙඳ පොළ තුළ අදාළ රසායනිකයන් සඟවා සහ වැඩි මිලට අලෙවි කිරීමේ කූට වෙළෙඳ මාෆියාවක් පවතින අතර, තහනමේ වාසිය කූට වෙළෙඳුන් අත්පත් කර ගනිමින් අදටත්  තහනම් ග්ලයිෆොසේට් වගා බිමට පැමිණීම නතර කළ නොහැකි අර්බුදයක් වී ඇති බව පරිසරවේදීහු පෙන්වා දෙති.

එසේ නම් විසඳුම කුමක් විය යුතුද? ආසන්නතම සිදුවීම විමසමු.

රට පුරා ඇතිවූ විරෝධතාව රජයේ අවධානයට යොමු කිරීමේ ප්‍රතිඵලයක් ලෙස ජනාධිපතිවරයාගේ නියමයෙන් 2015 ඔක්තෝබර් මස 23 වැනිදා අංක 1937/35 දරන අතිවිශේෂ ගැසට් පත්‍රය මගින් ග්ලයිෆොසේට් තහනම් කෙරිණි.

එසේ තිබියදී සහ කලින්කල ඇසුණු තහනම් නියෝග වැටලීම් අධිකරණ තීන්දු නොසලකා ග්ලයිෆොසේට් විකිණූ සිරිපුර ව්‍යාපාරිකයෙකුට දෙහිඅත්තකණ්ඩිය මහේස්ත්‍රාත් වාසනා නවරත්න මහත්මිය විසින් 2017 ජූලි 20 වැනිදා රුපියල් 50,000ක දඩ මුදලක් නියම කරන ලදී.

1980 අංක 33 දරන පළිබෝධනාශක පාලනය කිරීමේ පනත 19 වන වගන්තිය උල්ලංඝනය කරමින් විශේෂ ස්ථානයක පළිබෝධනාශක ගබඩා කිරීම හේතුවෙන් මේ පිරිසට විරුද්ධව නඩු පවරා තිබිණි. මෙම භාණ්ඩ තොගය අදාළ පුද්ගලයාගේ නිවසේ නිදන කාමරයක් තුළ සඟවා තිබියදී පළිබෝධනාශක රෙජිස්ටාර් ආචාර්ය සුමිත් ජයකොඩි මහතාගේ මගපෙන්වීමෙන් එම කාර්යාලයේ නිලධාරීන් හා අරලගංවිල පොලිස් විශේෂ කාර්ය බළකාය විසින් කරන ලද ඒකාබද්ධ මෙහෙයුමකදී අත්අඩංගුවට ගැනිණි.

රජයේ නීතිඥ කසුන් ගුණවර්ධන මහතා විසින් පැමිණිල්ල මෙහෙය වූ අතර, පළිබෝධනාශක රෙජිස්ටාර් කාර්යාංශයේ ලසන්ත රණවීර, ආර්.ඒ. ජයන්ත, එම්.එච්. විජයසිරි ගුණවර්ධන හා අරලගංවිල පොලිස් විශේෂ කාර්ය බළකායේ පොලිස් පරීක්‍ෂක ඩබ්ලිව්.ඩී.එම්. සමරසිංහ, පොලිස් සැරයන් එම්.එන්.කේ. මෙන්ඩිස් යන මහත්වරුන් විසින් විමර්ශන කටයුතු කරන ලදී.

ගත වූ කාලයේ කරන ලද වැටලීම්වලදී ලේබල් ගලවා හොර රහසේ අලෙවි කළ බෝතල් අත්අඩංගුවට ගැනීමට හැකිවිය. පසුගිය වසරේ මැයි මාසයේදී ඉන්දියාවෙන් ගෙන්වන ලද 'ඩීඒරා' නම් ග්‍රෑම් 100ක පැකට් විශාල ප්‍රමාණයක් අත්අඩංගුවට පත්විය.

රේගුව හරහා මෙවැනි ද්‍රව්‍ය රට තුළට පිවිසෙන්නේ නම් ඒ පිළිබඳ සොයාබැලීම රේගුවේ වගකීමක් බව පරිසර සංවිධාන පෙන්වා දෙයි. එය නිවැරදි විය යුත්තේ රේගු බලාධිකාරිය පැත්තෙනි. පළිබෝධනාශක රෙජිස්ටාර් කාර්යාලය පවසන්නේ වැටලීම් සඳහා ප්‍රමාණවත් කාර්යමණ්ඩලයක් දීප ව්‍යාප්තව නොමැති බවට මැසිවිල්ලකි. එවැනි පසුබිමක් තුළ ගල්යිෆොසේට් මර්දනය කළ හැකිද යන්න පාලකයන්ගේ අවධානයට යොමුකළ යුතු කරුණකි.

ඒ අතර වැටලීම්වලට අදාළ නිලධාරීන් පළාත් සභා කෘෂිකර්ම සේවය යටතේ ක්‍රියාත්මක වන හෙයින් පළිබෝධනාශක රෙජිස්ටාර්වරයා යටතේ නියාමනය කළ හැකි වැටලීම් කණ්ඩායමක අවශ්‍යතාවද නීති ක්‍ෂේත්‍රයේ ඇතැම් පිරිස් පෙන්වා දෙති. ගතවූ කාලයේ එකී හිඩැස තුළ එම වාසිය කූට ව්‍යාපාරිකයන් අත්පත්  කර ගනිමින් නීතිවිරෝධී භාණ්ඩ රට තුළ ව්‍යාප්ත වූ බවද බහුතරයකගේ මතය වී තිබේ.

එනිසා අඩුම තරමින් 10 දෙනකුගෙන්වත් සමන්චිත කණ්ඩායමක් පළිබෝධනාශක රෙජිස්ටාර්වරයා යටතේද සේවයට යොදවන්නේ නම්, මේ අර්බුදයට යම් ක්‍ෂණික විසඳුම් ලබාදිය හැකි බවට ඇසෙන යෝජනාව පාලකයන්ටද ඇසිය යුතුය.

නඩු පැවරීමේදී පාරිභෝගික අධිකාරිය පැත්තෙන් ප්‍රතිපාදන නොමැති අතර, පොලීසියටද එහිලා මැදිහත්විය නොහැක්කේ පොලිස් නිලධාරීන්ටද මේ පිළිබඳ පවතින දැනුම අවබෝධය අල්ප හෙයිනි. තහනම් හෝ භාවිත වන රසායනිකයන් පිළිබඳ මෙන්ම ඒවා අත්අඩංගුවට ගැනීමේදී අනුගමනය කළ යුතු ක්‍රමවේදයන් පිළිබඳ පොලිස් නිලධාරීන්ට දැනුම නොමැතිවීම විශාල අඩුපාඩුවකි.

එහෙත් මෙයට දෙවසරකට පෙර දකුණ සහ වයඹ ප්‍රදේශයන්හි තෝරාගත් පොලිස් නිලධාරීන් සඳහා පළිබෝධනාශක සම්බන්ධයෙන් පවතින නෛතික අණපනත් පිළිබඳ වැඩමුළු රෙජිස්ට්‍රාර් කාර්යලය විසින් සංවිධානය කළද ඒවා හිටිහැටියේ අත්හිටුවීමේ වාසියද කූට ව්‍යාපාරිකයන් අත්පත් කර ගෙන ඇතැයි තතු දන්නා පොලිස් නිලධාරීහු පෙන්වා දෙති.

පොලීසියට පළිබෝධනාශක වැටලීමට අදාළ නෛතික ක්‍රියාවලිය පිළිබඳ පවතින නොදැනුවත්කම රජය විසින් සම්පූර්ණ කළ යුතු අඩුපාඩුවකි. ගතවූ කෙටි කාලයක් තුළ දිඹුල පතන පොලිස් වසමේදීද අවස්ථා කිහිපයකදීම මෙවැනි තහනම් ග්ලයිෆොසේට් අත්අඩංගුවට පත් වන්නේ නීතියේ කොතැනින් හෝ රිංගා යෑමට ඔවුන්ට හැකි යැයි කඳුකරයට නීතිවිරෝධී භාණ්ඩ සපයන වෙළෙඳුන් මැනවින් දන්නා හෙයිනි. පොලීසිය දැනුවත් කළ යුත්තේ එහෙයිනි.

ඇතැම් විට විනිසුරුවරුන්ද මෙම අලුත් ක්‍ෂේත්‍රය පිළිබඳ දැනුවත් කරන්නේ නම් එයද අධිකරණ ක්‍රියාමාර්ගවලදී එතුමන්ලාට මගපෙන්වීමට අනුබලයක් වනු ඇතැයි ජනතාව වෙනුවෙන් පෙනීසිටින නීතිවේදීන් විසින් පෙන්වා දෙනු ලබන යථාර්ථය කෘෂිකර්ම අමාත්‍යවරයාට සහ අධිකරණ අමාත්‍යවරයාට ඇසිය යුතුය.

ඒ අතර ගතවූ මාස කිහිපයේ පළිබෝධනාශක රෙජිස්ටාර් කාර්යාලයට ලැබුණු එක් පැමිණිල්ලකින් කියැවුණේ එක් ව්‍යාපාරිකයෙකු සතුව නීතිවිරෝධී ග්ලයිපෝසේට් අලෙවි ව්‍යාපාරයක් පවතින බවට චෝදනාවකි.

ඒ අනුව එම ස්ථානය වැටලීම කළ පසු එවැනි කිසිවක් සොයා ගැනීමට නොහැකිව තිබේ. අනාවරණය වී ඇත්තේ එහි සේවකයෙකු සේවයෙන් ඉවත් කළ පසු වෙළෙඳ සැල හිමියාගෙන් පළිගැනීමේ අරමුණෙන් ව්‍යාජ පැමිණිල්ලක් ඉදිරිපත් කර ඇති බව සනාථ වී යැයි පළිබෝධනාශක රෙජිස්ටාර් ආචාර්ය සුමිත් ජයකොඩි මහතා පවසයි.

මෙහිදී ජනතාවගේ පැත්තෙන්ද වෙළෙඳ පොළේ තිබෙනවා යැයි පැවසීම මෙන්ම අලෙවි කරන ස්ථාන හෝ පුද්ගලයන් පිළිබඳවද නිරවද්‍ය තොරතුරු සපයන්නේ නම් එයද මෙවැනි තහනම් දේ රට පුරා සංසරණය වීම වැළැක්වීමට අනුබලයක් වනු ඇත. මන්ද මෙය අර්බුදයකටත් වඩා ජාතික ඛේදවාචකයක් නම් එයට හැම පුරවැසියෙකුම වගකීමෙන් බැඳිය යුතු හෙයිනි.

කිහිපදෙනෙක් කළ වැරදි නිසා ත්‍රිවිධ හමුදාවට අගෞරවයක් වීමට ඉඩ දෙන්න බැහැ

රණවිරුවන් අත්අඩංගුවට ගනිමින් ආණ්ඩුව  ත්‍රිවිධ හමුදාව දඩයම් කිරීමට සැරසෙන බව විපක්ෂය විසින් ආණ්ඩුවට එල්ල කරන චෝදනාවකි.

මේ සම්බන්ධයෙන් මෙන්ම වත්මන් ආණ්ඩුව රණවිරුවන් වෙනුවෙන් සිදුකර ඇති කාර්යයන් සම්බන්ධයෙන්ද ආරක්ෂක රාජ්‍ය අමාත්‍ය රුවන් විජයවර්ධන මහතා සිරිකොත එක්සත් ජාතික පක්ෂ මූලස්ථානයේදී පුවත්පත් සාකච්ඡාවක් පවත්වමින් පිළිතුරු ලබාදුණි. අමාත්‍යවරයාගේ අදහස් පහතින් දැක්වේ.

ආණ්ඩුවේ ස්ථාවරත්වය

ආණ්ඩුව අස්ථාවර බව කියමින් විවිධ පුද්ගලයන් විවිධාකාර කටකතා පතුරුවනවා. මේ කටකතා පිටුපස ඒකාබද්ධ විපක්ෂයේ දේශපාලන බලලෝබය තිබෙන්නේ. රජයට විවිධාකාර චෝදනා එල්ල කරනවා. මේ සියලු චෝදනා අපි තරයේ හෙළා දකිනවා. ඒවායේ මේවායේ කිසිම ඇත්තක් නැහැ. ආණ්ඩුවේ කිසිම අස්ථාවර භාවයක් නැහැ. ජාතික ආණ්ඩුවක් තුළයි අපි කටයුතු කරන්නේ.

මේ තුළ පක්ෂ ගණනාවක් එකතුවෙලා තිබෙනවා. විශේෂයෙන්ම ආණ්ඩුවේ ප්‍රධාන පක්ෂ දෙක වන එක්සත් ජාතික පක්ෂය සහ ශ්‍රී ලංකා නිදහස් පක්ෂයේ දේශපාලන යුද පිටියේ විරුද්ධව සටන් කරපු පක්ෂ දෙක දැන් එකට එකතුවෙලා සිටින්නේ. ඒ නිසා විවිධ මතවාද තිබෙනවා.

මතවාද තිබුණත් අපි රජයේ දිගු ජයග්‍රහණ වෙනුවෙන් මේ ආණ්ඩුව ඉදිරියට ගෙනියනවා. ඒකාබද්ධ විපක්ෂය කුමන චෝදනා කළත් ආණ්ඩුව අපි ආරක්ෂා කරනවා. ජනාධිපතිවරයාත් අග්‍රාමාත්‍යවරයාත් හොඳ අවබෝධයකින් කටයුතු කරනවා. අපි එකතු වුණේ මේ රටේ මූලික ප්‍රශ්නවලට විසඳුම් සොයන්නයි. එසේ විසඳුම් සොයාගෙන රට ශක්තිමතක් කිරීමයි ආපේ අරමුණ වී තියෙන්නේ.

රණවිරුවන් සම්බන්ධයෙන් රජයේ ප්‍රතිපත්තිය 

කිසිම රණවිරුවෙකු අත්අඩංගුවට ගන්න ආණ්ඩුවට කිසිම අවශ්‍යතාවක් නැහැ. ඒක රජයේ ප්‍රතිපත්තිය නොවෙයි. කොමදෝරු දසනායක සම්බන්ධ ප්‍රශ්නය ඇතිවෙලා තිබුණේ 2009 දී. හිටපු නාවික හමුදාපති අද්මිරාල් කරන්නාගොඩ මහත්මයාගේ කාලයේ නාවික හමුදාවේ සම්පත් කියන පුද්ගලයාට විරුද්ධව ගොනු කළ පැමිණිල්ලකට දීර්ඝ කාලීන විමර්ශනයක ප්‍රතිඵලයක් හැටියටයි මේ කාලයේදී කොමදෝරු දසනායක අත්අඩංගුවට පත්ව සිටින්නේ.  

මේ තුළ කිසිම දේශපාලන පළිගැනීමක් හෝ දේශපාලන ඇඟිලි ගැසීමක් හෝ කිසිම දෙයක් සිදුවී නැහැ. දීර්ඝ කාලීන විමර්ශනයක ප්‍රතිඵලයක් හැටියටයි මේ අත්අඩංගුවට ගැනීම සිදුවී තිබෙන්නේ.  ඔහු අත්අඩංගුවට ගැනීම පිළිබඳව මමත් කනගාටු වෙනවා. කොමදෝරු දසනායක දක්ෂ නිලධාරියෙක්. නමුත් ඔහුට එරෙහිව තවත් චෝදනවාක් තිබෙනවා. ඒ ගැන කනගාටු වෙනවා.

අධිකරණයේ මේ නඩුව විභාග වෙනවා. ඔහු නිවැරදිකරුවෙකු නම් අධිකරණයෙන් නිදහස් වෙයි. වැරද්දක් කරලා ඇත්නම් ඔහුට එයට මුහුණ දීමට සිදු වෙයි. මම පැහැදිලිව කියන්නනට අවශ්‍යයි අපි රණවිරුවන් වෙනුවෙන් සිටින නමුත් මිනීමරුවන් වෙනුවෙන් පෙනී නොසිටින බව. යුද සමයේදී යම් අපරාධ සිදු කළ බවට චෝදනා තිබෙනවා නම් ඒවාට මුහුණදීමට ඔවුන්ට සිදුවෙනවා.

රණවිරු දඩයම් කළේ පසුගිය ආණ්ඩුව

ෆීල්ඩ් මාර්ෂල් සරත් ෆොන්සේකා මහතා අත්අඩංගුවට ගැනීමෙන් පසුව ඔවුන් තමයි මුලින්ම රණවිරු දඩයම ආරම්භ කළේ. මහේෂ් සේනානායක මහත්මයාට පවා ඒවගේ දේවල් සිදුවුණා. ගෝඨාභය රාජපක්ෂ ඇතුළු ඒ ආණ්ඩු දේශපාලන පළිගැනීම් සිදුකළ සියලුම රණවිරුවන් අපි නැවත හමුදාවට සම්බන්ධ කරගෙන තිබෙනවා. හමුදාවේ ගෞරවය ආරක්ෂා කරන්න කටයුතු කර තිබෙන්නේ අපි. කවුරුන් හෝ හමුදාව තුළ ඉඳිමින් අපරාධ සිදුකර තිබෙනවා නම් ඒවා සම්බන්ධයෙන් අපිට කිසිසේත්ම මැදිහත් වෙන්නට බැහැ.

කිහිපදෙනෙක් කරපු වැරදි නිසා ත්‍රිවිධ හමුදාවට අගෞරවයක් වීමට ඉඩදෙන්න බැහැ. ත්‍රිවිධ හමුදාවේ ගෞරවය ආරක්ෂා කළ යුතුයි. ඉදිරියේදී  සාම සාධක හමුදාවට අපේ හමුදාවන් යන්නට අපි බලාපොරොත්තු වෙනවා. ඒ නිසා හමුදාවේ කීර්ති නාමය අපි ආරක්ෂා කළ යුතු වෙනවා. කිහිප දෙනෙක් කරපු දේවල් නිසා හමුදාවට විවිධ පාර්ශ්වලින් චෝදනා එනවා. එවිට ත්‍රිවිධ හුමුදාවට කළු පැල්ලමක්. මේ කළු පැල්ලම් ඉවත්කර ත්‍රිවිධ හමුදාවේ ගෞරවය ආරක්ෂා කිරීමයි අපේ අරමුණ.

රණවිරු ගැටලු විසඳීම

රජය රණවිරුවන් වෙනුවෙන් විශාල වැඩ ප්‍රමාණයක් සිදුකර තිබෙනවා. ජාතික ආණ්ඩුවේ අවුරුදු දෙක හමාරක කාලය තුළදී  ජනාධිපති අගමැති ඇතුළු ආණ්ඩුව රණවිරුවන්ගේ ප්‍රශ්නවලට මැදිහත්වෙලා විශාල වශයෙන් විසඳුම් ලබාදී තිබෙනවා. රණවිරුවන්ගේ සැම ප්‍රශ්නයක්ම විසඳා තිබෙනවා කියලා මම කියන්නේ නැහැ. ඔවුන්ට ප්‍රශ්න ගණනාවක් තිබෙනවා.

නමුත් මූලික ප්‍රශ්නවලට අපි මැදිහත් වුණා. මේ වසර දෙකහමාරක කාලය තුළදී විසඳුම් ලබාදිය හැකි ප්‍රශ්නවලට විසඳුම් ලබා දුන්නා. රණවිරුවන්ගේ විශ්‍රාම වැටුප් පිළිබඳ තිබෙන ප්‍රශ්නයට විසඳුම් ලබා දුන්නා. රණවිරුවන්ගේ වයස අවුරුදු 55 න් පසුවත් වැටුපට අනුව සේවා විශ්‍රාම වැටුප 85%න් වැඩි කර ලබා දුන්නා. ආබාධිත රණවිරුවන්ගේ දුබලතා හේතුවෙන් මියගිය හොත් ඔවුන් යුද්ධයේදී මියගිය රණවිරු‍ෙවකු සේ සලකා ඔවුන්ගේ යැපෙන්නන්ට ඔහුට හිමි සියලුම හිමිකම් ලබාදීමට කටයුතු සලසා තිබෙනවා.

ඒවගේම හමුදා සේවයේ වසර 10 ක හෝ 12 ට අඩු සේවා කාලයක් නිරතවී ආබාධිත තත්ත්වයට පත්වූ රණවිරුවටන්  විශ්‍රාම වැටුප ලබාදීමට සැලසුම්කර තිබෙනවා. ඒ වාගේම සිවිල් ආරක්ෂක බළකාය දෙපාර්තමේන්තුවක් බවට පත්කර සිවිල් ආරක්ෂක බළකායේ හතළිස් දාහක් රජයේ සේවයට බඳවාගෙන දෙපාර්තමේන්තුවක් ලෙස පවත්වාගෙන යනවා.

ඔවුන්ටත් වයස 55න් පසුව විශ්‍රාම වැටුපක් ලබාදීමට සලස්වා තිබෙනවා. මේ සියල්ලම අවුරුදු දෙක හමාරක් තුළ කරපු දේවල්. මීටත් වඩා තව බොහෝ දේ සිදුකරන්නට තිබෙනවා. නිවාස අමාත්‍යාංශය සමග එක්ව ආබාධිත රණවිරුවන්ට නිවාස ලබාදෙන්න 'විරු සුමිතුරු' වැඩසටහන ආරම්භ කර තිබෙනවා. මේ සියලු දේ සිදුකළත් රණවිරුන් වෙනුවෙන් මැදිහත් වෙන්නේ නැහැ කියලා අපිට හැමදාම චෝදනා කරනවා.

යුද්ධය අවසන් වුණේ 2009 වසරේදී. පහුගිය ආණ්ඩුවට බලය අහිමිවුණේ 2015. මේ කාලය තුළ රණවිරුවන්ගේ ප්‍රශ්න විසඳන්න මැදිහත් වෙන්න බැරිවුණේ ඇයි කියලයි මම මේ චෝදනා කරන අයගෙන් අහන්නේ. අද මේ කෑගහන අය එදා මේ ගැන පාර්ලිමේන්තුවේ හඬක් නැගුවේ නැත්තේ ඇයි? ඒ නිසාම පැහැදිලියි මොවුන් මේ කෑගහන්නේ රණවිරුවන්ට ආදරේකට නෙවෙයි ඔවුන්ගේ බලය වෙනුවෙන් මේ ප්‍රශ්න පාවිච්චි කරන්නේ. මේ විදිහට දේශපාලනය කිරීම ගැන අපි කනගාටු වෙනවා.

මුහුද ආරක්ෂා කිරීම

යුද්ධය අවසන් වෙලා තිබෙන නිසා අපි දැන් අවධානය යොමුකරන්නේ අපේ මුහුද ආරක්ෂා කරන්න. ලංකාවේ මුහුදු මාර්ගයේ නැගෙනහිර බටහිර ගමන් මාර්ගය තුළ බොහෝ ගමනා ගමනයන් සිදුවෙනවා. මේ පද්ධතිය ආරක්ෂා කරගැනීමට හොඳ නැව් අවශ්‍යයි. ඒ වගේම වර්තමානනයට ගැළපෙන නාවික හමුදාවක් අපිට අවශ්‍යයි. අපි තවත් හොඳ නැවක් ලබන වසරේ අරගන්නවා.

නූතන නාවික හමුදාවක් ඇති කරන්න අපි රජය විදිහට විශේෂ අවධානයක් යොමු කරනවා. මේ වනවිට ලෝකයේ බොහෝ රටවල යුද නෞකා ලංකාවට එනවා. එය විශේෂ හොඳ තත්ත්වයක්.

මේ නිසාම අපේ සම්බන්ධතා වැඩිවී තිබෙනවා. නාවික හමුදාවට අවශ්‍ය සියලු පහසුකම් ලබාදී අපේ මුහුද ආරක්ෂා කිරීමයි අපේ අරමුණ වී තිබෙන්නේ. මත්ද්‍රව්‍ය සම්බන්ධයෙන් , මත්ස්‍ය ජාවාරම් සම්බන්ධයෙන් රටට විවිධ බලපෑම් තිබෙනවා. මේ නිසා හොඳ නාවික හමුදාවක් අපට අවශ්‍යයි.

සුදු වෑන් සංස්කෘතියක් නැහැ

අන්තර් විශ්වවිද්‍යාල බලමණ්ඩලයේ ශිෂ්‍යයෙකු අත්අඩංගුවට ගැනීමට කටයුතු කරපු ආකාරය පිළිබඳ මමත් කනගාටු වෙනවා. එය හෙළා දකිනවා. ඒ අවස්ථාවේ පොලිස් නිලධාරීන් නිල ඇඳුමෙන් සැරසී වරෙන්තුව රැගෙන ගියා නම් උචිතයි. මේ ගැන සාගල ඇමතිවරයා පරීක්ෂණයක් පවත්වනවා. ඒ ගැන ප්‍රකාශයක් කරයි. අපේ ආණ්ඩුවට සුදු වෑන් සංස්කෘතියක් නැහැ.

එවැනි යුගයකට යාමට කිසිම අවශ්‍යතාවක් නැහැ. ඒවගේම යාපනයේ විනිසුරුවරයකුගේ වාහනයකට වෙඩි තැබීම සම්බන්ධයෙන් පරීක්ෂණ සිදුකරමින් පවතිනවා. එහිදී එක් පොලිස් නිලධාරියෙක් වෙඩි වැදී ජීවිතක්ෂයට පත්ව තිබෙනවා.

ඒ ගැන මම කනගාටුවට පත් වෙනවා. මගේ දැනුවත්වීම අනුව යාපනගේ අවිගත් කණ්ඩායම් ඇත්තේ නැහැ. නගරවල ආරක්ෂාව සම්බන්ධයෙන් සීසීටීවී පද්ධති ක්‍රියාත්මක කර තිබෙන්නේ නීතිය හා සාමය අමාත්‍යාංශය මගින් මේ වනතුරු යාපනයට සීසීටීවී පද්ධතියක් සවිකර නැහැ. ඉදිරියේදී එය ක්‍රියාත්මක කරයි කියලා මම හිතනවා.

කතා කිරීමේ නිදහස තිබෙනවා

එක්සත් ජාතික පක්ෂයේ පිරිසක් වෙන් වෙනවා කියන චෝදනා පිළිගන්න බැහැ. දැනට පෙනෙන්න තිබෙන විදිහට නම් ඒකාබද්ධයේ පිරිසක් මේ පැත්තට එන ආරංචියකුයි තිබෙන්නේ. අස්ථාවරභාවය තිබෙන්නේ ආණ්ඩුවේ නෙවෙයි ඒකාබද්ධ විපක්ෂයේයි. පුංචි පුංචි ප්‍රශ්න ගැටලු එනවා. නමුත් ඒවා විසඳාගෙන යනවා. ජාතික ආණ්ඩුව තුළ ප්‍රජාත්‍රන්තවාදය තිබෙනවා.

ඕනෑම කෙනෙකුම ඕනෑම දෙයක් කියන්න පුළුවන්. රංජන් රාමනායක ඇමතිවරයා කියපු දේවල් අපි දැක්කනේ . බොහෝදෙනා කියනවා ඔහු පක්ෂයෙන් එළියට දානවා කියලා. එහෙම දෙයක් නැහැ. දැන් අපිට කතා කරන්න නිදහස තිබෙනවා. එහෙම කතා කළා කියන්නේ අස්ථාවරයි කියලා නෙවෙයි.

77 ජය සැමරීම

ජේ.ආර්. ජනාධිපතිවරයාගේ නායකත්වයෙන් 77දී සිදු කළ පරිවර්තනය තුළින් මේ රටේ විශාල සංවර්ධනයක් සිදුවුණා. මේ ගැන අද කාලයේ තරුණ තරුණියන්ට අදහසක් නැහැ. විවෘත ආර්ථිකය නිසා තමයි අපේ රටට හැමදේම ලැබුණේ. නමුත් බොහෝදෙනා චෝදනා එල්ල කරන්නෙත් විවෘත ආර්ථිකයටමයි.  77 ජයග්‍රහණය සැමරීමේ චේතනාව මේ පිළිබඳ දැනුමක් ලබාදීමයි.

වැසි ජලයෙන් ආපදාවට පත් වූවන්ට තාම සහන නෑ

පසුගිය මැයි 25 හා 26 දිනවල දිවයිනේ දිස්ත්‍රික්ක කිහිපයක ජනතාවට මුහුණ දීමට සිදුවූ කනගාටුදායක තත්ත්වය පිළිබඳ සමාජ සාකච්ඡාව තවමත් අවසන් වී නොමැත. ගංවතුරෙන් හා නාය යෑම්වලින් සිය ගණනක් මියගිය අතර, අතුරුදන් වූ පිරිස පිළිබඳව මෙතෙක් නිවැරදි සංඛ්‍යාවක් ඉදිරිපත් වී නොමැති අතර, දේපොළ හානිය කොතෙක්දැයි නිසි තක්සේරුවක් මේ දක්වා සිදුකර නැත.

ඇතැම් දේශපාලඥයන් ලකුණු දමා ගැනීමේ උවමනාවෙන් එම අවස්ථාවේදී කටයුතු කළ බව විපතට පත්වූ ජනතාව නිතර පවසන දෙයකි. මේ වනවිට රජයේ බලධාරීන් එම ආපදාව අමතක කර වෙනත් කරුණු දෙස යොමුවී ඇති ආකාරයක් දැකිය හැකිය.

ආපදාවන්ට ලක්වූ පවුල්වල ජනතාවගෙන් ඇතැම් පිරිසක් තවමත් තාවකාලික නවාතැන්වල සිටිති. මෙම පසුබිම එහි වර්තමාන තත්ත්වය දැන ගැනීමට ගාල්ල, මාතර හා කළුතර දිස්ත්‍රික්ක නියෝජනය කරන මහජන නියෝජිතයෝ කිහිප දෙනෙක් 'අද'ට සම්බන්ධ කර ගතිමු.

ආණ්ඩුව සාකච්ඡා කළා විතරයි, එතැනින් එහාට කිසිවක් කළේ නැහැ

එක්සත් ජනතා නිදහස් සන්ධානයේ මාතර දිස්ත්‍රික් පාර්ලිමේන්තු මන්ත්‍රී මහින්ද යාපා අබේවර්ධන

ආපදාවට ලක්වූ මාතර ජනතාවට මේ දක්වා සැලකිය යුතු අයුරින් කිසිම දෙයක් ලබාදීලා නැහැ. වගා හානි තවම ගෙවලා නැහැ. ගෙවල්වලට ගෙව්වෙත් නැහැ. ගෙවල් හදාගන්න ගෙවනවා කිව්වට ඒක දුන්නෙත් නෑ. ආණ්ඩුව සාකච්ඡා කළා විතරයි, එතැනින් එහාට කිසිවක් කළේ නැහැ. පිටරටින් නැව් ආවා කිව්වට ඒවා ලැබුණෙ නැහැ.

රටේ අනෙකුත් ජනතාව එකතු කරපු ද්‍රව්‍ය තමයි ආපදාවට ලක්වූ ජනතාවට ලැබුණෙ. හානිවූ කුඹුරුවලින් සියයට පහකට පමණක් බිත්තර වී  වගයක් දුන්නා. නමුත් දැන් කුඹුරු වපුරන වෙලාව ඉක්මවා ගොස් තිබෙන නිසා එම වී වපුරන්න බැහැ. වෙන කිසිම දෙයක් ලැබුණෙ නැහැ. යටවුණු කුඹුරු මේ කන්නයේ හදන්න බැහැ. ඊළඟ කන්නයේ වගා කරන්න වෙන්නෙ. තේ නැවත වගා කරන්න ඕන.

රුපියල් 10,000ක් දෙනවා කිව්වට ප්‍රාදේශීය ලේකම් කාර්යාලවලින් ගෙවලා තිබෙන්නෙ දහයකට, පහළොවකට වගේ තෝරාගත් පිරිසකට පමණයි. සති දෙකෙන් ගෙවන්නම්, හෙට ගෙවන්නම්, අනිද්දා ගෙවන්නම් කියනවා විතරයි තාම නැහැ. වැඩිහිටි ආධාර ලබාදුන් වැඩිහිටියන් සිටින ගෙදරක රජයේ සේවකයෙක් ඉන්නවා නම්, එම දීමනාව  කපාදමා තිබෙනවා.

මේ හේතුව නිසා ගංවතුරෙන් විපතට පත්වූ අය තවත් අසරණ වෙලා. නිවාස තක්සේරු කරනවා කිව්වට මේ දක්වා නියමිත පරිදි සොයා බලා වාර්තා ලබාගෙන  නැහැ. මේ නිසා රජයෙන් ආධාර ලබාගැනීමට සිතාගෙන සිටි ජනතාව එම අදහස දැන් අත්ඇරලා තියෙනවා. ඔවුන් දැන් කිසිම දෙයකට නිලධාරියෙකුටවත් කතා කරන්නෙ නැහැ.

සෑම වන්දි මුදල් ගෙවීමකදීම ආණ්ඩුව වසරකට වඩා පමා කළා

එක්සත් ජනතා නිදහස් සන්ධානයේ ගාල්ල දිස්ත්‍රික් පාර්ලිමේන්තු මන්ත්‍රී රමේෂ් පතිරණ

ගාල්ල දිස්ත්‍රික්කයේ දැනට ලබාදී තිබෙන්නෙ ආපදාවට ලක්වූ පිරිසට ලබාදෙන රුපියල් 10,000ක අත්තිකාරම් මුදල පමණයි. අනෙකුත් වාර්තා සඳහා ඇස්තමේන්තු සකස් කරන බව නිලධාරීන් ප්‍රකාශ කරනවා. ඊට අමතරව දැඩි හානියට ලක්වූ පවුල්වලට රුපියල් 1,750ක ආහාර සලාකයක් මාසයක් දෙකක් පමණ ලබාදී තිබෙනවා.

ආපදාවට ලක්වූ අවස්ථාවේදී ස්වේච්ඡා සංවිධාන, මාධ්‍ය ආයතන, බහුජන සංවිධාන ඇතුළුව ක්‍ෂණික මෙහෙයුමේදී විශාල කාර්යභාරයක් කළා. ඊට පසුව ගතවූ මාස තුනක කාලය තුළ වාර්තා සැකසීම තමයි සිදුකර තිබෙන්නෙ. ඊට එහා ගිය ප්‍රමාණාත්මක සහන සැලසීමක් සිදුවෙලා නැහැ. ආණ්ඩුව මගින් මේ වෙනුවෙන් විශාල මුදල් ප්‍රමාණයක් නිදහස් කර තිබෙන බව කිව්වට තවම සාධාරණ වන්දි ගෙවීමක්වත්, වගාහානි වෙනුවෙන් පිළියම් යෙදීමක්වත්, දේපොළ හානි වෙනුවෙන් වන්දි ගෙවීමක්වත් සිදුකර නැහැ.

අපි විශ්වාස කරනවා ප්‍රමාද නොවී සාධාරණ වන්දියක් ලබාදෙන්න ආණ්ඩුව කටයුතු කරාවි කියලා. ආපදාවට ලක්වූ ප්‍රදේශවල තේ, වී වැනි වගාවන් යටවී සම්පූර්ණයෙන්ම විනාශ වෙලා තිබෙනවා. විනාශ වූ තේ ගස් ගලවලා අලුතින් සිටුවන්න වෙලා තිබෙනවා. අවුරුදු දෙකක් යනතෙක්, නැවත වගා කරන තෙක් ඒ අයට ආදායමක් ගන්න බැහැ. ඒ නිසා එම පවුල්වලට ජීවත්වීම සඳහා දීර්ඝ කාලීන වශයෙන් සාධාරණ වන්දියක් ලබාදෙන්න අවශ්‍යයි. ඒ සඳහා තවම පිළියමක් යොදා නැහැ.

පසුගිය වර නැවත වගාකිරීමට සහ ජීවන වියදම් ආධාරයක් ලබාදුන්නත්, මේ අවස්ථාවේදී ඒක තවම ලබාදීලා නැහැ. සාමසර කන්ද හා අරණායක නාය යෑමෙන් පස්සේ සහනාධාර ගෙවීමේදීත්, මීතොටමුල්ල වන්දි ගෙවීම වැනි සෑම අවස්ථාවකදීම ආණ්ඩුව වන්දි ගෙවීමට  වසරකට වඩා ප්‍රමාද කළා. තවම එම ජනතාව කූඩාරම්වල සිටින බව අපි දන්නවා.

මුදල් වෙනකළ බවට ආණ්ඩුව ප්‍රකාශ කළාට එම මුදල් ජනතාව අතරට ගලාගෙන යෑමේ පැහැදිලි බාධාවක්, අඩුපාඩුවක් තිබෙන බව අපට පේනවා. රාජ්‍ය යාන්ත්‍රණය අසාර්ථක වෙලා තිබීම ඊට හේතු වෙලා තිබෙනවා.

මහාභාණ්ඩාගාරය මුදල් වෙන්කළා කිව්වට ප්‍රායෝගිකව දිස්ත්‍රික් හා ප්‍රාදේශීය ලේකම් කාර්යාලවලට එම මුදල් ලැබෙනවද කියන ගැටලුව තිබෙනවා. මුදල් අමාත්‍යාංශයෙන් දිස්ත්‍රික් ලේකම් කාර්යාලවලට නියමිත පරිදි මුදල් ලැබෙන්නෙ නැහැ. ඒ නිසා ආණ්ඩුව කියන තරම් කඩිනමින් කටයුතු කරන එකක් නැහැ කියලා අපට පෙනීගොස් තිබෙනවා.

ආපදාවට ලක්වූ වෙලාවේ කිව්වට පටන් ගෙන නැහැ වගේ තමයි පේන්න තියෙන්නෙ

ජනතා විමුක්ති පෙරමුණේ කළුතර දිස්ත්‍රික් පාර්ලිමේන්තු මන්ත්‍රී නලින්ද ජයතිස්ස

ගංවතුර වෙලාවේ කවරු කවුරුත් මැදිහත් වෙලා ආහාර ද්‍රව්‍ය ටික දුන්නා. එම බඩු බෙදා අවසන් කළ පසුව එම ජනතාව ගැන අවධානයක් යොමුකර නැහැ. මේ අය කූඩාරම්වල ඉන්න නිසා ලොකු සද්දයකුත්  නැහැ. ගොඩනැගිලි පර්යේෂණ ආයතනයෙන් අයින් වෙන්න කියපු ආපදාවට ලක්වූ ගෙවල්වල අය රුපියල් 7,500 අරගෙන එක එක තැන්වල පදිංචි වෙලා ඉන්නවා. උදාහරණයක් විදියට පිඹුර නාය යෑම් අවදානමක් තියෙන පවුල් හතරක් ගෙවල් දොරවල් අතහැරලා ආවා.

එක තැනක ගෙයක් අරන් දීලා එම පවුල් හතරම පදිංචි කරලා තිබෙනවා. එහෙම හැමදාම ඉන්න බැහැ. ඉඩම් බෙදලා දෙනවා කියලා ආපදාවට ලක්වූ වෙලාවේ කිව්වට එම වැඩපිළිවෙළ ප්‍රමාදයි. පටන් ගෙන නැහැ වගේ තමයි පේන්න තියෙන්නෙ. මීට කලින් නායයෑම් සිදුවුණු අවස්ථාවලදීත් ඉඩම් බෙදනවා, කිව්වට එහෙම බෙදුවේ නැහැ.

දැන් ආණ්ඩුව පැත්තෙන් කරන්න ඕන වැඩටික ඉතුරු වෙලා තිබෙනවා. ගෙයක් කුලියට ගන්න 7,500ක් දුන්නා. ඒක ගන්න ගියාම මිනිස්සුන්ට නොවිඳිනා දුක් විඳින්න වෙලා තිබෙනවා. මීට කලින් නායයෑම් අවදානමක් තිබුණු බවට අනතුරු ඇඟවීම් කළ තැන්වලට මුදල් දෙන්න ප්‍රමාද කරනවා. සමහර අය මෙම මුදල බලා ඉන්නෙ නැතිව වෙන නෑදෑයන්ගේ ගෙවල්වල ගිහින් පදිංචි වෙලා තිබෙනවා. රුපියල් 7,500ක් දීලා පදිංචි කරනවා කිව්වට එම මුදලට ගෙවල් හොයාගන්න බැහැ.

පවුල් 04කට රුපියල් 7,500 ගාණෙ දීලා කාමර හතරක් තියෙන ගෙයක් දීලා තියෙනවා. එහෙම මිනිස්සුන්ට ජීවත් වෙන්න බැහැ. ප්‍රධානම දෙය තමයි රජයේ අකාර්යක්‍ෂමතාව සහ ප්‍රමාදය. නිලධාරීන් කියනවා සල්ලි ලැබිලා නැහැ කියලා. සමහර තැන්වල තක්සේරු කිරීමට නිලධාරීන් ප්‍රමාණවත් නැහැ. එවැනි ප්‍රශ්න තිබෙනවා.

මේ මිනිස්සු නැවත නැගීසිටුවන්න, අපේ රටේ ආර්ථිකයට සම්බන්ධ කරගන්න මීට වඩා ලොකු වැඩපිළිවෙළක් තිබිය යුතුයි.

සංස්කෘතික හා වයඹ සංවර්ධන නියෝජ්‍ය අමාත්‍ය පාලිත තෙවරප්පෙරුම

දීලා තියෙන රුපියල් 10,000න් මිනිස්සුන්ට හැරෙන්නවත් බැහැ. හතර පස්දෙනෙක් එක්ක තේ බිව්වාම 10,000 ඉවරයි. වගකිව යුතු රජයක් හැටියට දරාගන්න පුළුවන් ප්‍රමාණයකුත් තිබෙනවා. රජයට ලැබෙන ආදායමත් එක්ක, ගෙවන්න තියෙන පඩිත් එක්ක, පඩි රුපියල් 10,000කින් වැඩි කිරීමත් එක්ක, තියෙන හොරකම දූෂණය වංචාවත් එක්ක ටිකක් දරාගන්න අමාරුයි තමයි.

රටේ හැමතැනම රජකරලා තියෙන්නෙ හොරකමයි දූෂණයයි. මිනිස්සු බලාපොරොත්තු නොවුණු ලොකු ව්‍යවසනයක් වුණා. ඒක ගණනය කරන්න බැහැ. සමහර ගෙවල්වල බ්ලොක් ගලක්වත් නැහැ. මිනිස්සුන්ගේ හැඳුනුම්පත්, පාස්පෝට්, ඇඳුම් පැලඳුම් ගහගෙන ගියා. දරුවෝ අරගෙන කඳවුරකට ගිහින් බේරුණා. කොස්ගුලනේ කන්ද ඇවිත් ගඟට වැටුණා. සුනාමිය ආවා වගේ ගඟේ වතුර ඉස්සිලා ගෙවල් ටික ඔක්කොම කඩාගෙන ගියා.

ඒ ගමේ ස්වයං රැකියා කරපු මිනිස්සුන්ට දැන් කරන්න දෙයක් නැහැ. ඒ මිනිස්සුන්ට ඇඳිවතවත් නැහැ. ස්වයං රැකියා කළ උපකරණ සියලුම දේ ගහගෙන ගියා. දැන් ඒ මිනිස්සු කූඩාරමක ඉන්නෙ. රුපියල් 10,000ක් දීලා හිත සන්තෝෂ කිරීමක් කළාට ඒක තේරුමක් නැහැ. අර්ධ හානි පූර්ණ හානි කියලා ගණනය කරලා ඒක දෙන්නෙ. එදා ඉඳන්ම රජය කළේ ඔය වගේ දේවල් තමයි. හැබැයි ඊට වඩා වැඩි දේවල්වලට නිරාපරාදේ මේ රටේ සල්ලි වියදම් කරනවා.

මේ මිනිස්සු නැවත නැගීසිටුවන්න, අපේ රටේ ආර්ථිකයට සම්බන්ධ කරගන්න මීට වඩා ලොකු වැඩපිළිවෙළක් තිබිය යුතුයි. ඒක ජාත්‍යන්තර වශයෙන් හරි තියෙන්න ඕන. ඒකට ජාත්‍යන්තර උදව් ගන්න ඕන. පිටරටින් ආවයි කියන භාණ්ඩ කොහේට ආවද කොහාට ගියාද කියලා අපි දන්නෙ නැහැ. ඒක වුණේ ආපදා කළමනාකරණ එකෙන්.

විදෙස් රටවලින් මිනිස්සු ආධාර ද්‍රව්‍ය එව්වා. මට ඊයේ කතා කළා එංගලන්තයේ මහත්වරු ටිකක්. ඒ අය ලක්‍ෂ තිහක විතර බඩු එකතු කරලා. වැඩිපුර එකතු කරලා තියෙන්නෙ කිරිපිටි. එක පිටි පැකට් එකක් රුපියල් තුන්දාස් ගාණක් වෙනවලු. ඒවා රේගුවෙන් නිදහස් කරන්නෙ නැහැ. මට කුවේට්වලින් බඩු වගයක් එව්වා. ඒ ටික නිදහස් කරගන්න මට ලක්‍ෂ 09ක මුදලක් ගෙවන්න කිව්වා.

පස්සෙ මගේ කැපකිරීම නිසා ලක්‍ෂ තුනක් විතර ගෙවලා ඒ ටික අරගෙන ආවා. ඒ වගේ කෝටි ගාණක බඩු රේගුවේ තවමත් දිරනවා. නැවක වුණත් බඩු එවන්නම් කියලා මට හිතවතුන් දැන්වුවා. නමුත් මෙහෙට ආවාම නිදහස් කරන්නෙ නැහැ. මේක අපරාධයක්. රජය අන්ධයෝ විදියට වැඩ කරන්නෙ. මේ සඳහා ස්වේච්ඡාවෙන් හරි කණ්ඩායමක් දාලා මේවා එකින් එක පරීක්ෂා කරලා රජයේ ගාණෙ හරි බෙදලා දුන්නම් ඉවරයි.

කෝටි ගාණක හාල්, ලුණු, සීනි, තේ කොළ පල්වෙලා කුණු වෙලා යනවා. ලැබෙන දෙයවත් මිනිස්සුන්ට දෙන්නැති ක්‍රමයක්, පාලනයක් දැන් රටේ තියෙන්නෙ. මෙතැන නිලධාරිවාදය තියෙන්නේ. මට කතාකරපු එංගලන්තයේ මහත්තයා එවපු ලක්‍ෂ ගාණක බඩු තොගය එළියට ගන්න විදියක් නැහැ. ඒ අය දෙරණට එවලා තියෙන්නෙ. දෙරණටත් ඒවා ගන්න බැහැ.

මට එවපු විශාල පාර්සල් 15කට වැඩිය තියෙනවා ගන්න බැරුව. අපි ඒක අතහැරලා දැම්මා. අරයගේ ලියුම් අරන්, මෙයාගේ ලියුම් අරන් යනවට වඩා හොඳයි ගමේ මිනිස්සුන්ගේන් බැනුම් අහන් ඉන්න එක.

ඒ විදියට ආපුවා තමයි ප්‍රාදේශීය ලේකම් කාර්යාලවලින් මිනිස්සුන්ට දුන්නෙ. වියළි ආහාර බෙදද්දිත් පක්‍ෂ දේශපලනය තියෙනවා. නිලධාරීන් අතරේ මහින්ද රාජපක්‍ෂට පක්‍ෂ කට්ටියක් ඉන්නවා. ඒ අය මහින්ද රාජපක්‍ෂගේ අයට විතරයි බඩු බෙදන්නේ. මේ නිලධාරීන් අතරේ මෛත්‍රීපාල මහත්තයාට හිතවත් කට්ටියක් ඉන්නවා.

ඒ අය විශේෂයක් කරන්නේ තමන්ගේ අයට විතරයි. මෛත්‍රීපාල මහත්තයාට හිතවත් අය එක එක පැති බාරගෙන චොපර්වලින් එන බඩු බාගෙන ඒ අයට ඕන කට්ටියට විතරයි දුන්නෙ. ඒ මිනිස්සු මම ගියාම චෝදනා කළා යටවුණු මිනිස්සුන්ට නොදී වතුර නොදැක්ක මිනිස්සුන්ට ඒ අය බඩු බෙදුවා කියලා. සාධාරණව මනුස්සකමට, ගුණවත්කමට බඩු බෙදුවේ නැහැ.

පිඹුරේ තියෙන අවතැන් කඳවුරට මම ඊයේ ගියා. ඒ අයගේ ගෙවල් නාය යනවා කියලා මම තමයි රුපියල් හත්අටදාහක ලයිට් අරන් දීලා, වියළි ආහාර ලබාදීලා, ඩෙංගුවලට වටේ තියෙන කානු ටික කපලා ඉන්න දුන්නෙ. ඒ මිනිස්සු සිටියදී ගෙවල්වල සිටින අයට රුපියල් 10,000ක් දීලා.

මේක තනිකරම හොරාගේ අම්මාගෙන් පේන අහනවා වගේ වැඩක්. දැන් මිනිස්සුන්ට දුක කියාගන්න කෙනෙක් නැහැ. මිනිස්සු ගිහිල්ලා ප්‍රාදේශීය ලේකම්ට කියනවා. ප්‍රාදේශීය ලේකම් ග්‍රාම නිලධාරීන්ට කියනවා. ග්‍රාම නිලධාරී ඒ කියන දේ පිළිගන්නවා. නැත්නම් නිශ්ශබ්දව ඉන්නවා. මේකෙ ඉන් එහාට යන්න තැනක් නැහැ.

මෙතැනදී රජය, දිස්ත්‍රික් ලේකම්වරුන් මැදිහත්විය යුතුයි. පසුගිය ප්‍රාදේශීය සම්බන්ධීකරණ රැස්වීමේදී මම කිව්වා මේකට කමිටුවක් දාන්න කියලා. මේ මිනිස්සු උදේ ඉඳන් අපිව හොයාගෙන ඇවිත් දුක්ගැනවිලි කියනවා. ඉතිං අපට වෙන වැඩක් කරන්න වෙලාවක් නැහැ. කමිටුවක් දැම්මාම නැවත පරීක්‍ෂණයක් කරන්න ඕන. එහෙම තැන් ගොඩක් තියෙනවා. හැම තැනම ගැටලු තියෙනවා.

ඒ නිසා රුපියල් 10,000න් ගොඩ එන්න බැහැ. මිනිස්සුන්ට ඉඩම් දෙන්න ඉඩම් පවරා ගන්න ඕන. දැන් ඉඩම් පවරා ගන්න ගියාම වතු අධිකාරීවරු ඉඩම් දෙන්නෑ. ඒ අය පෙන්වන්නෙ දැන් ඉඩම්වලටත් වඩා වැඩක් නැති ඉඩම්. කැලේ වැවුණු, හෙල් තියෙන ඒවා ඒ අය පෙන්වන්නේ. මදුරාවල ප්‍රාදේශීය ලේකම්තුමිය ඉඩම් ටික මනින්න ගියාම වතු අධිකාරීවරයෙක් ඉඩම් මනින්න දුන්නේම නැහැ. එයා පෙන්වන්නේ තනිකර වළක්. ඒකේ මිනිස්සු පදිංචි කරන්න බැහැ.

කඳු නාය යන ඒවා, නොයන ඒවා ගැන එම්.බී.ආර්. වාර්තා දෙනවා. ඒ කණ්ඩායමේ ඉන්නෙ නිලධාරීන් තුන්දෙනයි. බුලත්සිංහල මොන්ටිසෝරියකින් මට කතා කළා. එන්.ජී.ඕ. එකකින් එම මොන්ටිසෝරිය හදලා දෙන්න පොරාන්දු වෙලා. එම්.බී.ආර්. එකේ වාර්තාව ඉල්ලනවා මේක හදන්න. ප්‍රාදේශීය ලේකම් ඇතුළු නිලධාරීන්ට මේක කියලා තියෙනවා.

නමුත් මෙම ඉඩම සුදුසුද නැද්ද කියලා පරීක්‍ෂණයක් කරන්න නිලධාරීන් නැති නිසා එම්.බී.ආර්.එක මෙතැනට එන්නෙ නැහැ. මේ වගේ හැම ගැටලුවකින්ම පීඩා විඳින්නේ, දුක් විඳින්නේ, අපහසුතාවට පත්වෙන්නෙ අහිංසක අසරණ දෙමව්පියො, දරුවො පමණයි. නිලධාරීන්ට මේ ගැන ගාණක්වත් නැහැ. එක එක්කෙනාට පාස් කරන එක විතරයි ඒ අය කරන්නෙ.

ජනාධිපතිතුමා හා අගමැතිතුමා කල්මරන්නෙ නැතිව මේකට මැදිහත් වෙලා ක්‍ෂණිකව ඉඩම් ටික පවරා ගන්න ඕන. විපතට පත්වූ ප්‍රදේශවල ප්‍රාදේශීය ලේකම්, වතු සමාගම්, එල්.ආර්.සී. එකේ ඇමති, සභාපති, වැවිලි කර්මාන්ත ඇමති, නිවාස අධිකාරිය, ආරක්‍ෂක අංශය ඇතුළු වගකිව යුතු බලධාරීන් ටික ගෙන්වලා මේ ගැන සාකච්ඡා කරලා විසඳුමක් දෙන්න ඕන. තනි තීන්දුවක් අරන් දිනයක් දෙන්න ඕන වැඩ ඉවර කරන්න ඕන කියලා. ප්‍රේමදාස මහත්තයා ඉස්සර වැඩකළේ ඒ විදියට. නමුත් එහෙම ක්‍රමවේදයක් දැන් පේන්න නැහැ.

සාකච්ඡා කරනවා, සාකච්ඡාවලට යනවා, ඒවාට කෝටි ගණන් සල්ලි වියදම් කරනවා. ඊට වඩා දෙයක් මේ රටේ නැහැ. ජනාධිපතිතුමා කෝටි ගාණක් වියදම් කරලා පාහියන්ගලට ගියා. සපත්තු දාලා, ග්ලව්ස් දාලා, ලෑලිකෑලි ටිකක් විසිකරලා ආවා. දේශලපාලන බලය පෙන්වන්න එතැනට ආවේ.

බදුරලියට අගමැතිතුමා ආවා, ප්‍රාදේශීය ලේකම් එක්ක කතාකරලා ගියා. අගමැතිතුමා ඒවි කියලා බලාපොරොත්තුවෙන් මිනිස්සු ලෑස්ති වෙලා හිටියා පන්සලක. එතැනට එන්න අවදානම් කියලා අගමැතිවරයා එතැනට ගියේ නැහැ. මිනිස්සුන්ට අවදානමක් නැහැ, නමුත් අපේ නායකතුමාට අවදානම්. එයා එතැනින් හැරිලා ගියා. මේවා අපට කියන්න කෙනෙක් නැහැ. මේවා කියන්න ගිහින් අපි නිකන් පිස්සෝ ගාණට වැටිලා තියෙන්නෙ.

දැනට බුලත්සිංහල ආසනයේ ආපදාවට හසුව යනඑනමං නැතිව 1004ක් ඉන්නවා. ඒ ජනතාව පදිංචි කරන්න ඉඩම් අක්කර 120ක් ඕන. තාම තික්බොක්කාවල කන්ද පාමුල පවුල් 26ක් ඉන්නවා. ඒ කන්ද පුපුරලා තියෙන්නෙ. ඒ මිනිස්සුන්ට ස්ථිර තැනක් දෙනකම් ඒ මිනිස්සු යන්නෙ නැහැ. ඒ අයගේ ළමයි පාසල් යනවා. ඒ අයට පහසුකම් දෙන්න ඕන. පාසලක්, පාරවල් ටික ඒ අයට හදලා දෙන්න ඕන. මේක විහිළුක් නෙමෙයි.

ඒ මිනිස්සුන්ගේ ගැටලුව තේරුම් අරන් මහාමාර්ග ඇමතිතුමා ගෙන්වලා විසඳුම් ටික දෙන්න ඕන. ඒක බොරුවට අරයට මෙයාට බාරදීලා හරියන්නෙ නැහැ. අපි හිටියනම් ඔය තැන්වල අපි දන්නවා කරන විදිය. ජනතාව අපට කිව්වට වැඩක් නැහැ. අපි කෑගහනවා. අපි උදව් කරනවා. උදේ ඉඳන් මිනිස්සු මං හොයාගෙන එනවා දුක කියාගෙන. එම්.බී.ආර්. වාර්තා දෙන්නෙ නැහැ කියනවා.

මියගිය අයට මරණ සහතික දෙන්නෙ නැහැ කියනවා. 10,000 දීමනාව දෙන්නෙ නැහැ කියනවා. මියගිය අයට අධිකරණ නියෝගයක් අරන් මරණ සහතික ටික අරන් දෙන්න ඕන. ඒවා අවුරුදු ගණන් පරක්කු කරන්න බැහැ. රස්සාවල් කරපු කට්ටිය ඉන්නවා.

ඒ අයගේ ලියකියවිලි හදන්න තියෙනවා. මරණ සහතිකය නැතිව වන්දි ගෙවන්නෙ නෑ. අතුරුදන් සහතිකය විතරයි මේ අයට දෙන්නෙ. බුලත්සිංහල ආසනයේ මියගිය 38ක් හා අතුරුදන් වූ 39ක් ඉන්නවා. ඊට අමතරව අවතැන් වූ කට්ටිය විශාල ගණනක් ඉන්නවා.

මේ මිනිස්සුන්ට විකල්පයක් හොයන්න ඕන. පිඹුර අවතැන් කඳවුරේ 15ක් විතර එකට‍ නිදා ගන්නවා. එතැන තරුණ ගැහැනු ළමයි, පොඩි ළමයි, තරුණ අම්මලා ඉන්නවා. ඒ අය එක්ක කුලීකාරයෝ, හවසට බීලා එන අයත් ඉන්නවා.

මට මේවා තනියම හොයන්න බැහැ. ඇමතිවරු, ආයතන ප්‍රධානීන්, වැඩට බැහැලා, ගෙයක් ගෙයක් ගාණෙ ගිහින් මේ ප්‍රශ්නවලට විසඳුමක් දෙන්න ඕන. අපේ රටේම මිනිස්සු තමයි මේ දුක්විඳින්නෙ. ඒ දුක තේරුම් ගන්න ඕන. මේකෙන්ම හැදෙන බඩු ටිකක් තමයි දැන් ඉන්නෙ. මේකෙන්ම හොරකම් කරන ටිකක් තමයි දැන් ඉන්නෙ.

කට්ටියක් එක ගෙයක් හදලා දීලා ඒක ජාත්‍යන්තරයට පෙන්වලා ගෙවල් දහයක විතර සල්ලි ගන්න හදනවා. මේවා වැරදි වැඩ. මේවා ගැන ජනාධිපතිතුමාටයි, අගමැතිතුමාටයි මම ගිහින් කියන්න ඕන නැහැ. ජනාධිපතිතුමයි අගමැතිතුමයි අන්ධ, ගොළු බීරෝ නෙමෙයි. ප්‍රේමදාස මහත්තයා ඉන්න කාලෙ එයාට කවුරුවත් ගිහින් කියන්නෙ නැහැ.

ප්‍රේමදාස මහත්තයා උදේ පාන්දර ඇවිල්ලා ඔක්කොටම කෝල් කරලා ගෙන්වලා ගන්නවා. ආයතන ප්‍රධානීන්, ඇමතිවරු ගෙන්වලා අහනවා මොනවද වෙලා තියෙන්නෙ කියලා. මාධ්‍යවලින් ප්‍රශ්න පෙන්වා දෙනවා. ඒක දිහාවත් බලලා විසඳුමක් දෙන්න මේ අය උත්සාහ කළ යුතුයි. මම පුළුවන් හැම වෙලාවේදීම ජනතාවගේ ප්‍රශ්න ගැන ඒ අයට කියනවා.

ප්‍රශ්න කියන්න ඕන, අහන්න පුළුවන් අයට විතරයි. අන්ධයන්ට, බීරන්ට ප්‍රශ්න කියලා වැඩක් නැහැ. ග්‍රාම නිලධාරීන්ට, සමෘද්ධි නියාමකට, එල්.ආර්.සී. එකට ඕන විදියට දැන් වැඩ යන්නෙ. මේ අය පාලනය කරන්න නායකයන්ට හයියක් තියෙන්න ඕන. කැඳ අච්චාරුවක් වුණු ආණ්ඩුවකට මේවා කරන්න බැහැ.

පුංචි ඡන්දයට ගම සුදානම් කරන්න මංගල එජාප පසුපෙළ මන්ත්‍රීන්ගෙන් ඉල්ලයි

එක්සත් ජාතික පක්ෂය හා ශ්‍රී ලංකා නිදහස් පක්ෂය අතර ක්‍රමයෙන් සබඳතා බිඳවැටෙමින් පවතින ආකාරයන්ම, ශ්‍රී ලංකා නිදහස් පක්ෂය හා එක්සත් ජාතික පක්ෂය අතර ද සබඳතා බිඳවැටෙමින් පවතින බව දෙපාර්ශ්වයෙන්ම තහවුරු වෙමන් පවතී. නමුත් එය අසත්‍යයක් බවට පත් වූයේ උතුරු මැද  පළාත් සභාවේ සභාපති තනතුරේ ඇතිවූ වෙනස්වීමත් සමගය.

සභාපති වෙනස්වීම

උතුරු මැද පළාත් සභවේ හිටපු සභාපති ටී.එම්.ආර්. සිරිපාල වෙනස් කරගැනීමේ උවමනාව දැඩිව පැවතියේ ප්‍රධාන අමාත්‍ය පේෂල ජයරත්නටයි. සිරිපාල ඒකාබද්ධ විපක්ෂය නියෝජනය කළ මන්ත්‍රීවරයෙකු වීම එයට බලපෑ ප්‍රබලම කාරණය බවට පත්විය.

නමුත් ඔහුට විරුද්ධව ගෙන ආ විශ්වාසභංග යෝජනාවේද පිළිගතහැකි කාරණා බොහොමයක් ඇතුළත් වී තිබීම නිසාවෙන් සිරිපාල සිටියේද චකිතයෙනි. විශ්වාසභංගය ගෙනඒමට පේෂල එක්සත් ජාතික පක්ෂයේ සහයෝගය පැතුවේය. එහි ප්‍රතිඵලයක් ලෙස කරුණු අටකින් යුත් විශ්වාසභංගය සභාවට ඉදිරිපත් කරන ලද්දේ පළාත් විපක්ෂ නායක අනිල් රත්නායක විසිනි. 

පළාත් සභා සැසිවාරයට පෙර දිනයේ  සභා කටයුතු කාරක සභාව තුළත් මෙය විවාද කිරීමට සියල්ලෝම එකඟ වූ  අතර නමුත් පසුදා විශ්වාසභංගයෙන් තමාව  පැරදීවීමේ උත්සාහයක් අති බව දැනගත් සිරිපාල එය විවාද කිරීමට ඉඩ ලබා නොදුන්නේය.

මේ හේතුවෙන් සභාවේ උණුසුම් තත්ත්වයක් ඇතිවූ අතර මෙහිදී ඇතිවූ පොරබැදීම් හේතුවෙන් සෙංකෝලයද දෙකඩ විය.
සභාගැබේ මෙතරම් අරගලයක් ඇති වුවද වුවද මහ ඇමති පේෂල සහ ඇමතිවරු නිශ්ශබ්දව බලා සිටියා එය නැවැත්වීමට කිසිදු උත්සාහයක් නොදැරූහ. ඉන් අනතුරුව ඒකාබද්ධයේ විරෝධය මධ්‍යයේ නව සිරිපාල ඉවත්කර නව සභාපති ලෙස ඩී.එම්.අමරතුංග පත්කර ගත්තේය.

ඔහු පත්වූ විගසම දිවුරුම් දීමේ කටයුත්ත සිදුකරන ලෙසත් එවිට කිසිදු ප්‍රශ්නයක් ඇති නොවන බවත් යෝජනා කළේ මහඇමති පේශලමය. ආණ්ඩුකරවරයා ඉදිරියේ සභාපතිවරයා දිවුරුම් දීමෙන් පසුව මහ ඇමති පේශල පැවසුයේ සිරිපාලගේ සභාපතිකම නැතිවීමට බොහෝ හේතු බලපෑ බවත් නව සභාපතිවරයා සමග අලුත් ගමනක් යන බවත්ය.

මෛත්‍රී පිල හා එජාපය අතර තිබෙන මෙවැනි සම්බන්ධතා හරහා ඒකාබද්ධය පැරදවීමට අවශ්‍ය මොහොතේ එක්වන බවට ඉඟි සැපයෙන බව ඇතැමුන්ගේ අදහස වී ඇත. 

බංග්ලාදේශ සංචාරයට පෙර ජනපති සිරිසේනගේ ප්‍රධානත්වයෙන් පැවැති නිදහස්  පක්ෂයේ පාර්ලිමේන්තු මන්ත්‍රී කණ්ඩායම් හමුවේදී මෙයට ප්‍රතිවිරුද්ධ සිදුවීමක් වාර්තා විය.

මැති ඇමැතිවරුන් අතර හුවමාරුවු කෙටිපණිඩුඩය

තමන්ට එක්සත් ජාතික පක්ෂය හා කටයුතු කිරීමට නොහැකි බව කියා සිටි ශ්‍රී ලංකා නිදහස් පක්ෂ පාර්ලිමේන්තු කණ්ඩායම එතැනිදු නොනැවතී එක්සත් ජාතික පක්ෂ නායකත්වය දැඩිව විවේචනය කළේ ය. ගමන යා යුත්තේ තනිව යැයි ඔවුන්ගේ අදහස විය.

රජයේ ක්‍රියාකාරීත්වය තවදුරටත් බලා සිටිය නොහැකි බැවින්, ඉන් ඉවත්ව විපක්ෂයේ ස්වාධීන කණ්ඩායමක් ලෙස පෙනී සිටීමට සාකච්ඡා කැරුණු බවත් නමුත් ගැටලුව වූයේ රජයෙන් ඉවත්වුවහොත් ජනපති සිරිසේනට මුහුණදෙන්නේ කෙසේද යන්න බවත් මෙහිදී අදහස් දැක්වූ සෙනෙවිරත්න අනාවරණය කළේ ය. 

ජනපතිවරයා සමග ඇති සම්බන්ධතාව එලෙසම පවත්වාගැනීමට ඔවුන්ට අවශ්‍යව තිබුණි. අදහස් දැක්වූ බොහෝ දෙනා එක්සත් ජාතික පක්ෂය හා ශ්‍රී ලංකා නිදහස් පක්ෂය අතර අර්බුදයක් ඇති බව පිළිගත්හ.

බොහෝ දේ සිදුවෙමින් තිබෙන බවත්, ඒ සියල්ල දැන් අනාවරණය කළ නොහැකි බවත්, ජනපතිවරයා කියා සිටීම හමුවේ සියලුම දෙනා නිශ්ශබ්ද වූහ. ශ්‍රී ලංකා නිදහස් පක්ෂයේ සියලුම අමාත්‍යවරුන් සහ පාර්ලිමේන්තු මන්ත්‍රීවරුන් එක්සත්ව සිටිමින්, මෙම වසරේ දෙසැම්බර් 31 වැනිදා වන විට තීරණයක් ගත යුතුව තිබෙන බවද ඔහු පැවසුවේ ය.

කිසිදු ශ්‍රී ලංකා නිදහස් පක්ෂ සාමාජිකයෙකු රජයෙන් ඉවත්ව නොයනු ඇති බවට විශ්වාස යැයි ජනපතිවරයා මෙහිදී ප්‍රකාශ කළ ද, බංග්ලාදේශ සංචාරයේ යෙදී සිටින අතරතුර දී සාමාජිකයන් පිරිසක් පක්ෂයෙන් ඉවත්වීමට යන්නේ යැයි පළ වූ වාර්තා ඔහුගේ අවධානයට යොමු විය.

මෙම වාර්තා පළවීමට ප්‍රධානම හේතුව වූයේ එක්සත් ජාතික පක්ෂ අමාත්‍යවරයකු කර තිබූ ප්‍රකාශයකි. ශ්‍රී ලංකා නිදහස් පක්ෂ සාමාජිකයන්ට අවශ්‍ය නම් රජය හැර යා හැකි බවත්, එවන් අවස්ථාවක එක්සත් ජාතික පක්ෂ රජයක් පිහිටුවන බවත්, ඔහු පවසා තිබුණි.

මෙම අමාත්‍යවරයා හා සම්බන්ධවීමට ජනපතිවරයා උත්සාහ කළ ද එය සාර්ථක වූයේ නැත. අනතුරුව වෙනත් අමාත්‍යවරයකු ඇමතූ ඔහු, මෙවැනි ප්‍රකාශ සිදුකිරීමෙන් වළකින ලෙස එක්සත් ජාතික පක්ෂයට දැනුම්දෙන ලෙස උපදෙස් දුන්නේ ය.

තමන් නැවත පැමිණි පසු මේ සම්බන්ධයෙන් අවශ්‍ය පියවර ගන්නා බවද ඔහු කීවේ ය. එහි ප්‍රතිඵලය වූයේ ශ්‍රී ලංකා නිදහස් පක්ෂය සම්බන්ධ කිසිදු අදහස් දැක්වීමකින් වළකින ලෙසට සඳහන් වූ කෙටි පණිවුඩයක් එක්සත් ජාතික පක්ෂ පාර්ලිමේන්තු මන්ත්‍රීන් අතර හුවමාරු වීමය.

ඩුබායි බැංකු ගිණුම

දූෂණ වංචා සම්බන්ධයෙන් දැඩි කතාබහක් ඇතිව තිබෙන මෙරට පුද්ගලයන්ගේ කිහිපදෙනෙකු සතුව ඇති බව කියැවෙන ඩුබායි බැංකු ගිණුම් සම්බන්ධයෙන්ද පසුගිය කාලය තුළ දැඩි කතාබහක් ඇතිවිය.

ගිං, නිල්වලා ජල ව්‍යාපෘතියේද අක්‍රමිකතාවක් සිදුව ඇති බවට කරුණු අනාවරණය වූ බව මීට පෙර රජය පැවසූ අතර, එම පරීක්ෂණ ආරම්භවීමත් සමග රජයේ ඉහළ පෙළේ අමාත්‍යාංශ ලේකම්වරයෙකුද ඉල්ලා අස්විය. මෙම අක්‍රමිකතාවට ඔහුගේද සම්බන්ධයක් ඇති බවට කතා පැතිරෙමින් පවතී.

ගිං, නිල්වලා ව්‍යාපෘතියේ කොන්ත්‍රාත් බාරගත් සමාගම විසින් ඩුබායි බැංකු ගිණුමකට ජනවාරි 09 වැනිදා විශාල මුදලක් තැන්පත් කර ඇති බවට මේ වනවිට කරුණු අනාවරණය කරගෙන තිබේ. වංවා දූෂණ සම්බන්ධයෙන් විමර්ශනය සඳහා රජය යෙදවූ විදෙස් කණ්ඩායමක් මාර්ගයෙන් මෙම කරුණු සියල්ල මේ වනවිට අනාවරණය කරගෙන තිබේ. මෙම ඩුබායි බැංකු ගිණුම මෙරට පුද්ගලයකුගේ බැංකු ගිණුමක් වීමද විශේෂත්වයකි.

ඉන්දියානු ජාතිකයන් පස් දෙනෙකුගේ සහ මෙරට දමිළ පුද්ගලයකුගේ සහාය ඇතිව මෙම කටයුතු සිදුකර ඇති බවද අනාවරණය කරගෙන ඇති අතර, මේ සම්බන්ධයෙන් තවත් කරුණු කිහිපයක් සනාථ කරගැනීමෙන් පසුව අදාළ නීතිමය ක්‍රියාමාර්ග ගැනීමට නියමිතව ඇති බවද විශ්වාස දායක ආරංචිමාර්ග 'දියවන්නාරාළට' ප්‍රකාශ කළේය.

බොරු කළා කියලා දැනගෙන තියෙන්නෙ 

පසුගිය රජයේ කටයුතු කළ අමාත්‍යාංශ ලේකම්වරයෙකුද මේ දිනවල තරමක් කලබල වී සිටින්නේ ඔහු සම්බන්ධයෙන් සිදුවන විමර්ශන මේ වනවිට අවසන් මට්ටමේ පවතින බැවිනි.

මෙම විමර්ශන තුළින් වැදගත් කාරණා බොහොමයක් සනාථ වී ඇති බැවින් මේ දිනවල ඔහු විවිධ ස්ථානවලට යමින් ජනතා ආකාර්ෂණය ඇතිකර ගනිමින් තමාව දඩයම් කිරීමට සැරසෙන බව ප්‍රකාශ කරමින් සිටියි. මේ අතර ඔහුගේ පාර්ශ්වයේ පුද්ගලයෙකු ලවා රජයේ අමාත්‍යවරයෙකුට දුරකථන ඇමතුමක් ලබාදී ''ඇයි ඔයාලා මෙහෙම කරන්නෙ. මේවා නවත්තලා දාන්න.'' යැයි පවසා ඇත.

එහිදී ඔහු පවසා ඇත්තේ, ''ඔයාගේ ලොක්කා දන්නවා මේවා අහුවෙනවා කියලා. එයා බොරු එම්.ඕ.යූ එකක් (අවබෝධතා ගිවිසුමක්) හදලා උසාවියට දුන්නා. උසාවියට බොරු කිව්වා කියලා අහුවෙලා තියෙන්නෙ. අපට කරන්න දෙයක් නැහැ.'' යැයි අමාත්‍යවරයාගේ පිළිතුර විය.

ආවාත් හිරු පායයි තරු

පාර්ලිමේන්තු කාර්යමණ්ඩලයේ නිලධාරීන් බොහෝ දෙනෙකු සහභාගි වූ මෙම වැඩසටහනේ නිවේදන කටයුතු සිදුකළේද පාර්මේන්තුවේ නිලධාරියෙකි.

වැඩසටහන මෙහෙයවමින් පාර්ලිමේන්තුවේ නිලධාරියා මීළඟ කතාවට කථානායක කරු ජයසූරියට ආරාධනා කිරීමට සූදානම් විය. ඔහු ආරම්භය ගත්තේ මෙසේය.

''කථානායකතුමනි, ඔබතුමා කොළඹ මහනගර සභාවේ නගරාධිපති ධුරයට තරග කරන විටත් අපි පාර්ලිමේන්තුවේ සේවකයෝ. අපි දුම්රියෙන් ඇවිත් බස් එකෙන් මරදාන බොරැල්ල හරහා පාර්ලිමේන්තුවට එද්දි ඒකාලෙ ඔබතුමා ගැන තිබුණු පොස්ටරයක් දැක්කා මතකයි.

ඒකෙ තිබුණෙ 'ආවොත් හිරු පායයි තරු' කියලා යැයි ඔහු පවසනවාත් සමගම සියල්ලෝම එක හඬින් සිනහවන්නට විය. සිනහ නොවී සිටියේ එයට සභභාගි වූ විදෙස් ජාතිකයන් දෙදෙනා පමණි.

ඔහු සිදුවූ අතපසුවීමට සමාව ඉල්ලා නැවත එය නිවැරදි කිරීමට උත්සාහ කළද තුන් වතාවක් පමණ ඔහුට එය වැරදුණි. සැබැවින්ම එකල එම පොස්ටරයේ සඳහන්ව තිබුණේ 'ආවාත් කරු පායයි හිරු' ලෙසිනි.

විරුද්ධ පක්ෂය විසින් එම පෝස්ටර්යට පිළිතුරු ලෙස ඇලවූ පොස්ටරයේ සඳහන් වූයේ 'ආවොත් කරු පෙනෙයි තරු' ලෙසය.

අපිට ගල් ගැහුවා – අපි සැලුණෙ නෑ

පාර්ලිමේන්තු කාර්යමණ්ඩලය වෙනුවෙන් කළුතරදී පැවැත්වූ වැඩමුළුවකදී රජය ඉදිරිපත් කිරීමට බලාපොරොත්තු වන ස්වාධීන මාධ්‍ය නියාමන පනත සම්බන්ධයෙන් කථානායකවරයා අදහස් දැක්වීය. ඔහු මෙලෙස අදහස් දක්වන විට නියෝජ්‍ය කථානායක තිලංග සුමතිපාලද මූලාසනයේ අසුන්ගෙන සිටියේය.

''අපි මාධ්‍යවේදීන් වෙනුවෙන් පෙනී හිටපු මිනිස්සු. මාධ්‍ය ආයතන ගිනිතියපු වෙලාවේ, මාධ්‍යවේදීන්ට හිරිහැර කරපු වෙලාවේදී අපි ඒ වෙනුවෙන් පෙනී සිටියා. අපි ඒ තැන්වලට ගියා. සමහර වෙලාවලදී අපි ඒ වෙනුවෙන් පෙනී සිටිද්දි අපේ වාහන කුඩුකළා. අපට ගල් ගැහුවා, නමුත් අපි ඔවුන් වෙනුවෙන් පෙනීසිටීම නතර කළේ නැහැ.'' යැයි කථානායකවරයා අදහස් දක්වමින් පවසා සිටියේය.

ඔහු මෙලෙස අදහස් දැක්වූයේ, 2012 මුල් වකවානුවේදී එවකට ජනාධිපති අපේක්ෂකවරයා වූ සරත් ෆොන්සේකා සිරගත කර සිටින අවස්ථාවේ ඔහු නිදහස් කරන ලෙස ඉල්ලා වැලිකඩ බන්ධනාගරයේ සිට බොරුල්ල බෝධිය අසලට පැමිණි පාගමන පිළිබඳවය.

පන්දම් රැගෙන පැමිණි මෙම පාගමනට කරු ජයසූරිය, දයාසිරි ජයසේකර, රෝසි සේනානායක ආදී එජාපයේ පිරිසක් එක්ව සිටි අතර, එම පාගමනට බොරැල්ලේදී මැර කණ්ඩායමක් ගල්මුල්වලින් පහරදී තිබිණි.

එවකට ශ්‍රී ලංකා නිදහස් පක්ෂය නියෝජනය කරමින් ආණ්ඩු පක්ෂයේ කටයුතු කළ මන්ත්‍රීවරයෙකු එය සිදුකළ බව ඒ දිනවල කියැවිණි.

අපට අලි හිංසා කරන්නෙ නැහැ 

රාජ්‍ය අමාත්‍ය පාලිත රංගේ බණ්ඩාර තවත් නිලධාරීන් පිරිසක්ද සමග තන්තිරිමලේ බලා පිටත්ව ගියේ පහළ මල්වතුඔය ජලාශ ව්‍යාපෘතිය ඉදිකිරීමට අදාළ නිරීක්ෂණයක් සිදුකිරීම සඳහාය.

දෙදින චාරිකාවක් ලෙස එය සංවිධානය කර තිබුණේ වාරිමාර්ග හා ජලසම්පත් කළමනාකරණ අමත්‍යාංශය විසිනි. යෝජිත ව්‍යාපෘතිය කඩිනමින් ඉදිකිරීමටත්, ඒ සඳහා වූ මූලික ඉදිකිරීම් සඳහා මුල්ගල් තැබීම අගෝස්තු අගදී සිදුකිරීමටත් තීරණය කෙරුණේ නිරීක්ෂණ චාරිකාව අතරතුරදීමය. 

කාලයක් පුරා සැලසුම් කළ මේ ව්‍යාපෘතිය කඩිනම් වීම පිළිබඳව අමාත්‍යාංශ නිලධාරීන් මෙන්ම ව්‍යාපෘති භාර ඉංජිනේරුවන්ද මහත් සතුටට පත්ව සිටින අයුරු දැකගත හැකිවිය.

සියලු කාරණා මැද නිරීක්ෂණ චාරිකාව නිමාවූයේ මන්නාරම මුරුක්කන් යෝධ වැවද නිරීක්ෂණය කිරීමෙන් අනතුරුවය.  එහි වැව් බැම්ම ඉදිකිරීම පිළිබඳවද නිරීක්ෂණය කළ අමාත්‍ය පාලිත රංගෙ බණ්ඩාර බලවත් කනගාටුවට පත්විය. බොරලු දමා සකස් කළ යුතු එම ව්‍යාපෘතිය මේ වනවිට සිදුවන්නේ කසළ සහිත හා මඩ සහිත පස් පුරවමිනි.

එය නිසි ප්‍රමිතියෙන් හා කොන්දේසි උල්ලංඝනය කරමින් සිදුවන්නකි. රුපියල් ලක්ෂ 80ක කොන්ත්‍රාත්තුවක් මත සිදුවන මෙම අක්‍රමිකතාව පිළිබඳ සොයාබලා වහාම වාර්තාවක් ලබාදෙන්නැයිද රංගෙ බණ්ඩාර අමාත්‍යවරයා වාරිමාර්ග රාජ්‍ය අමාත්‍යාංශයේ ලේකම් කපිල ජයසේකරටත්, අනෙකුත් වගකිව යුතු නිලධාරීන්ටත් මෙහිදී උපදෙස් ලබාදුන්නේය.

එමෙන්ම කොන්ත්‍රාත්කරුගේ කොන්ත‍්‍රාත්තුව අහෝසි කිරීමටත්, මීට වගකිව යුතු නිලධාරීන් සම්බන්ධයෙන් සොයා බැලීමටත් ඔහු විසින් උපදෙස් ලබා දෙන ලදී.

මේ සමගම සියලු දෙනා ආපසු පිටත් වීමට සූදානම් විය. සියලු දෙනාගේම යෝජනාව වූයේ විල්පත්තු කැලේ මැදින් ආපසු ගමන සැලසුම් කරගත යුතුය යන්නයි. අමාත්‍ය පාලිත රංගේ බණ්ඩාරද ඊට එක පයින් කැමැති විය.

ගමන ඇරඹිණි. වාහන 04ක්  එක පෙළට ගමන් කරයි. ඉදිරියෙන් යන්නේ අමාත්‍ය පාලිත රංගෙ බණ්ඩාර මහතා ඇතුළු පිරිසක් රැගත් ජීප් රථයයි. ඊට පිටුපසින් රාජ්‍ය අමාත්‍යාංශයේ ලේකම් කපිල ජයසේකර මහතා ගමන් කරයි. එක්වරම වාහන පෙළ නතර විය. මහා පර්වතයක් මෙන් වූ සද්දන්ත අලියෙකු මාර්ගය මැදට වී බලා සිටියි. එක්වරම අමාත්‍ය රංගෙ බණ්ඩාර මහතාට දුරකථන ඇමතුමක් ලැබිණි. ඒ රාජ්‍ය අමාත්‍යාංශයේ ලේකම්වරයාගෙනි. 

''අපි දැන් මොකද කරන්නෙ?'' යැයි ඔහු එක්වරම විමසීය. ''මමත් හොඳ අලියෙක් තමයි. අපට අලි හිංසා කරන්නේ නෑ. ඔහොම පොඩ්ඩක් ඉන්න'' යැයි පැවසූ අමාත්‍යවරයා ජීප් රථයෙන් බැස කුමක්දෝ දෙයක් අලියාට ඇසෙන පරිදි පැවසීය. 

ගතවූයේ ස්වල්ප වේලාවකි. සද්දන්ත අලියා හොඬය හකුළමින් වනයට පියවර මැන්නේය. විනාඩි කිහිපයක් තුළ බොහෝ දෙනෙකුගේ රත් වූ ලේ සීතල වූයේ ඉන් පසුවයි. 

ජානිපෙ ව්‍යවස්ථා සම්පාදනයෙන් ඉවත්වීම

ජාතික නිදහස් පෙරමුණේ මන්ත්‍රී කණ්ඩායම ව්‍යවස්ථා සම්පාදක මණ්ඩලයෙන් ඉවත් වීමට තීරණය කිරීමෙන් පසුව බදාදා පෙරවරුවේ පාර්ලිමේන්තුවට පැමිණියහ.

කථානායක කරු ජයසූරියට බාරදීම සඳහා කරුණු 10ක් ඇතුළත් කර සකස් කරන ලද ලිපියක්ද ඔවුන් සතුව තිබිණි. මන්ත්‍රී කණ්ඩායමේ සියලු දෙනා එම ලිපියට අත්සන් කර තිබූ අතර පද්ම උදය ශාන්ත ගුණසේකර ලිපියට අත්සන් තබා උමාඔය ව්‍යපෘතිය සම්බන්ධ සාකච්ඡාවට පිටව ගියේය.

කථානායකවරයා හමුවීමට පෙර විමල් වීරවංශ, වීරකුමාර දිසානායක, ජයන්ත සමරවීර, නිරෝෂන් ප්‍රේමරත්න පාර්ලිමේන්තු පුස්තකාලයට ගියේ කරු මුණගැසීමට තවත් වෙලාව තිබූ බැවිනි. ඔවුන් පුස්තකාලයට යන විට බන්දුල ගුණවර්ධන, මහින්දානන්ද අලුත්ගමගේ පැමිණ කතාකරමින් සිටියහ. ''අන්න විමල්ලා එනවා, අද කථානායකට ලියුමක් බාර දෙන්න තියෙනවා කිව්වනේ'' මහින්දාන්ද බන්දුලට කීවේය.

ආ විමල් කථානායක හමුවුණාද බන්දුල ඇසූ විට ''ඔය ගොල්ලොත් මේ ලියුමට අත්සන් කරන්නකෝ. මේක හොඳ වැඩක්නේ'' විමල් එහිදී කීවේය. ''මාත් ඕකට අත්සන් කරන්න කැමතියි. ඒත් ඒකාබද්ධ විපක්ෂයේ අනිත් කට්ටිය තාම තීරණයක් අරන් නැහැනේ. ඒ අය හරි තීරණයක නැහැ.'' මහින්දානන්ද කීවේ සිනහවෙමිනි.

''රටේ තියෙන  දේශපාලනයත් එක්ක අපි ගත්ත තීරණය ඉතාම නිවැරදියි. මේක මේ වෙලාවේ අනිවාර්යයෙන්ම කළ යුතු දෙයක්. ව්‍යවස්ථාවක් හදනවානම් හදන්න ඕන රටේ ප්‍රශ්න ටික හරියට තේරුම් අරගෙන. මේ ව්‍යවස්ථාව හදන්නේ වරදාන, වරප්‍රසාද දෙන්න. ඒකට කොහෙත්ම අපට එකඟවෙන්න බැහැ.

ඒකාබද්ධ විපක්ෂයටත් එකඟවෙන්න පුළුවන් කරුණු ඇතුළත් කරලයි අපි ලියුම සකස් කළේ ''විමල් කියූ විට බන්දුල හා මහින්දානන්ද කීවේ ''ඔව්, ඔව් කාරණය ඇත්ත'' කියාය. අනතුරුව ජානිපෙ මන්ත්‍රීවරු පිරිස කථානායක කාමරය වෙත ගියහ. කරු ජයසූරිය සුහදශීලීව සිනහවෙමින් මන්ත්‍රී පිරිසට වාඩිවෙන්නැයි කියා ''මොකද මන්ත්‍රීතුමාලා කරන්න හදන්නේ'' යනුවෙන් විමසීය.

එහිදී විමල් කතාව ආරම්භ කරමින් “ඇත්තටම කථානායකතුමනි අලුතින් හදන ව්‍යවස්ථාවට රට වටෙන්ම ලොකු විරෝධයක් තිබෙනවා. ඒ නිසා ව්‍යවස්ථා සම්පාදක මණ්ඩලයෙන් ඉවත් වෙන්න අපි තීරණය කළා. කොහොමත් මීට බොහෝ කලකට පෙර තමයි අපි ඉවත් වෙන්න තීරණය ගත්තේ'' යැයි කීවේය.

''ඔබතුමාලගේ පක්ෂයේ තීරණයට මට මොකුත් කියන්න බැහැ. වෙනස් විදියට මේ ගැන කල්පනා කරලා තීරණයක් ගත්තොත් නරකද?* කරු පැවසූ විට, “නෑ නෑ මේ තීරණය අපි ගත්තේ කල්පනා කරලා තමයි කථානායකතුමනි. මේ ව්‍යවස්ථාව ප්‍රායෝගිකව වැරදියි'' විමල්ගේ අදහස විය. &අපිත් ඉන්නේ රට පැත්තේ තමයි මන්ත්‍රීතුමා. රටට හානියක් වෙන පැත්තක මමත් හිටගන්නේ නැහැ.

මේක ඇතුළෙ වාදවිවාද කරලා, සාකච්ඡා කරලා තීරණයකට එන්න පුළුවන් අවස්ථා පාර්ලිමේන්තුවේ තියෙනවා නේද?'' කථානායකවරයා කීවේය. ''දැන් එන විදිය, එන පිළිවෙළ දැක්කාම කතා කරන්න දෙයක් නැහැ. දැන් තියෙන්නෙ නොගැළපෙන තත්ත්වයක්. ඒ නිසා අපේ ලිපිය බාරගන්න කථානායකතුමනි'' කියා විමල් ලිපිය කරුට බාර දුන්නේය.

පාර්ලිමේන්තුවේ මන්ත්‍රීවරුන් 225 ව්‍යවස්ථා සම්පාදන මණ්ඩලයට අයත් වන බවට දැක්වෙන වගන්තිය මින් ඉදිරියට වලංගු නොවන බව ජනිපෙ මන්ත්‍රීවරුන් පෙන්වා දුන් අවස්ථාවේදී ඒ පිළිබඳ නීතිමය තත්ත්වය සොයබලන බව කථානාකවරයා සඳහන් කළේය.

මංගල දුරකථන අංක එකතු කරයි

ආණ්ඩු පක්ෂයේ පසුපෙළ මන්ත්‍රීවරුන් මුදල් හා ජනමාධ්‍ය ඇමති මංගල සමරවීර හමුවූයේ ඔවුන්ගේ ගැටලු නිරාකරණය කර ගැනීමේ අරමුණෙනි.

තම ප්‍රදේශයේ සංවර්ධන කටයුතු වෙනුවෙන් මන්ත්‍රීවරුන්ට ලබාදෙන මිලියන 60ක ප්‍රතිපාදන මෙන්ම ආණ්ඩුවේ අර්බුද සම්බන්ධයෙන්ද කතා කිරීමට මෙහිදී සැලසුම් කරගෙන තිබිණි.

''ඇමතිතුමා අපේ ගම්වල සංවර්ධන වැඩ පටන් අරගෙන තියෙන්නෙ. ඒත් අපට මුදල් ලැබුණේ නැහැ තවම. මේ නිසා අපි හරිම කරදරේක වැටිලා ඉන්නේ ඇමතිතුමා.'' මන්ත්‍රීවරුන්ගේ මෙම යෝජනාව පිළිබඳ සියලු කරුණු සොයා බලා ඉක්මන් විසඳුමක් දෙන බවට මංගල පොරොන්දු විය. ඇමතිවරයා පැවසූ පරිදිම බ්‍රහස්පතින්දා වනවිට මන්ත්‍රීවරුන්ගේ සංවර්ධන කටයුතු සඳහා අවශ්‍ය මුදල් රුපියල් බිලියනයනක් නිදහස් කර තිබිණි.

ඇමතිවරයා එම මුදල් නිදහස් කළද මන්ත්‍රීවරුන්ට මුදල් ලබාගැනීම තවදුරටත් අපහසු කාරණයන් වී ඇත.

ආණ්ඩුවේ ඉදිරි ගමන්මග මෙන්ම මන්ත්‍රීවරුන්ගේ ප්‍රශ්න පිළිබඳවද විවිධ මන්ත්‍රීවරුන් ඇමති මංගලට කරුණූ පැවසූ අතර, ඒ සඳහා විසඳුම් සෙවීමටත් විසඳුම් ඉදිරිපත් කිරීමටත් මංගල කටයුතු කළේය.

පසුපෙළ මන්ත්‍රීවරුන්ගේ දුරකථන අංක මංගල ඇමතිවරයා සතුව නොතිබිණි. නොදන්නා අංකයකින් තමාගේ දුරකථනයට පැමිණෙන ඇමතුම් නොගන්නා බැවින් මංගල දැන් සියලු පසුපෙළ මන්ත්‍රීවරුන්ගේ දුරකථන අංකයන් තම දුරකථනයට ඇතුළු කරමින් සිටියි.
එමෙන්ම පුංචි ඡන්දයට ගම සූදානම් කරන ලෙසද ඇමති මංගල ඔවුන්ගෙන් ඉල්ලා සිටියේය.

මෙම කරුණු කතාබහ කරගෙන යන අතර, අගමැති රනිල් එම ස්ථානයට පැමිණි අතර, ඉන්පසු මන්ත්‍රීවරන්ගේ අදහස් සඳහා අගමැතිවරයාද පිළිතුරු දෙන්නට විය. පසුව ප්‍රියසම්භාෂණය ආරම්භ විය. මංගලගේ හමුව අවසන් වී අවසානයටම නිවසින් පිටව ගොස් ඇත්තේ මන්ත්‍රී එස්.එම්. මරික්කාර්ය.

සුසිල්ට පුටුව දීලා එහා පුටුවට යනවද?

සුනිල් පෙරුම්පුරගේ හෝමාගම නෙළුම් මාවතේ නිවසේ පැවැති අවමංගල්‍ය අවස්ථාවට සහභාගි වීමට හිටපු ජනාධිපති මහින්ද රාජපක්ෂ පසුගියදා ගියේය.

ඩිකසන් පෙරේරා සමග මහින්ද කතාබහ කරමින් සිටියදී සුසිල් ප්‍රේම්ජයන්ත් එම ස්ථානයට පැමිණියේය. ඩික්සන් මට සුසිල් ඇමතිතුමා එක්ක ටිකක් කතාකරන්න ඕන. සුසිල්ට පුටුව දීලා එහා පුටුවට යනවද? මහින්ද පැවසූ විට ඩික්සන් සුසිල්ට අසුනදී වෙනත් අසුනක වාඩිවිය.

‘ඉතිං කොහොමද සුසිල් මොකද මේ දවස්වල වෙන්නෙ, මහින්ද දිගු කතාබහකට මුල පිරූ අතර, ''ඉන්නවා සර්. වරදක් නෑ'' සුසිල්ගේ පිළිතුර විය. මෙහිදී මහින්ද සහ සුසිල් විනාඩි 45ක් පමණ වර්තමාන දේශපාලන තත්ත්වය සම්බන්ධව සාකච්ඡා කළහ. එම සාකච්ඡාවේදී කතාකළේ මොනවාදැයි පිටතට ලබා නොදීමට දෙදෙනාම වගබලා ගත්තේය.

ප්‍රසන්න මාව දාලා ගිහින්

මේ අතර පසුගියදා පැවැති ශ්‍රී ලංකා පොදුජන පෙරමුණේ කාන්තා සංවිධානයේ රැස්වීමට බලාපොරොත්තු නොවුණු පරිදි වැඩි කාන්තා සහභාගිත්වයක් නියෝජනය වූහ. මෙම හමුවේදී බැසිල් රාජපක්ෂ අදහස් දක්වමින් පවසා සිටියේ, ''එන අයට දැන්ම එන්න කියන්න, පස්සේනම් එන්න එපා කියන්න'' කියාය.

මෙම උත්සවයේ සංවිධාන කටයුතුවලට පැමිණ සිටි ප්‍රසන්න රණවීර අකරතැබ්බකට මුහණ දී තිබිණි. ප්‍රසන්න එම රැස්වීමට පැමිණ සිටියේ සිය බිරිඳ සමගය. රැස්වීම අවසන් වූ පසුව ප්‍රසන්නගේ බිරිඳ එහාමෙහා දුවද්දී අසල සිටි අයෙකු ඇසුවේ 'මොකක් හරි කරදයක්ද' කියාය. ''බලන්නකො ප්‍රසන්න මාව දාලා ගිහින්නේ'' ඇය කීවාය. රැස්වීම අවසන් වූ පසුව කැලණිය ප්‍රදේශයේ කාන්තාවන් පිරිසක් සමග ප්‍රසන්න ගොස් ඇතැයි ඔහුගේ බිරිඳට පසුව දැනගන්නට ලැබිණි.

රොෂාන් යළි එක්වෙයිද?

පොළොන්නරුව දිස්ත්‍රික් මන්ත්‍රී රොෂාන් රණසිංහ මත ගැටුමක් හේතුවෙන් ඒකාබද්ධ විපක්ෂයෙන් ඉවත් වී ඇතැයි බ්‍රහස්පතින්දා වනවිට ප්‍රචාරයක් ගියේය. මේ දිනවල රොෂාන් ජපානයේ සංචාරයක යෙදෙන අතර, එහිදී ඔහුට ආරංචි වී තිබුණේ පොළොන්නරුවට ශ්‍රී ලංකා පොදුජන පෙරමුණේ සංවිධායකයන් තිදෙනෙකු පත්කර ඇති බවයි.

ශ්‍රී ලංකා පොදුජන පෙරමුණ විසින් ජූලි 22 වැනිදා සිට පැවැත්වීමට නියමිත රැස්වීම් මාලාවට අදාළව මෙම සංවිධායකයන් තිදෙනා පත්කර තිබිණි. පොළොන්නරුව නියෝජනය කරමින් ඒකාබද්ධ විපක්ෂයෙ සියලු කටයුතුවලට දායක වන තමන්ට නොදන්වා සංවිධායකයන් පත්කර ඇතැයි දැනගැනීම හේතුවෙන් කලකිරීමට පත් ඔහු ජපානයේ සිට ලිපියක් ලියා එව්වේ ඒකාබද්ධ විපක්ෂයේ ඉදිරි රැස්වීම්වලට තාවකාලිකව සහභාගි නොවීමට තීරණය කළ බවයි.

රොෂාන් ඒකබද්ධ විපක්ෂයේ  නායකයන්ට නොදන්නවා තීරණයක් ගෙන තිබුණු නිසා මෙම අර්බුදය පැනනැගී තිබිණි. රොෂාන්ගේ තීරණය සම්බන්ධව ඒකාබද්ධ විපක්ෂයේ සියලුම මන්ත්‍රීවරු සාකච්ඡා කළහ. රොෂාන් අයින් වී ඇතැයි ආරංචිය දැනගන්නා විට නාමල් සිටියේ කෑගල්ලේය. ඩී.වී. චානක එම තොරතුරු දුරකථනයෙන් ඔහුට දැනුම් දුන්නේය.

එවේලේම රොෂාන්ට සහ මහින්ද රාජපක්ෂට කතාකළ නාමල් තොරතුරු විමසා  කෑගල්ලේ ගමන අවංලගු කර යළි කොළඹ බලා  පැමිණියේය. රොෂාන්ට ඒකාබද්ධ විපක්ෂයේ බොහෝ පිරිසක් දුරකථන ඇමතුම් දෙමින් තොරතුරු විමසන්නට වූහ. ''රොෂාන් කිසි දෙයකට කලබල වෙන්න එපා, හිත් රිදවීම් වෙනවා තමයි.

අපි මේවා විසඳ ගමු. ඔයාගේ වැඩටික කරගෙන එන්න'' මහින්ද ඇමතුමක් ගෙන රොෂාන්ට කීවේය. ඉන් පසුව එම ගැටලුව  සමථයකට පත්කිරීමට ඩලස්, බන්දුල ඇතුළු ඒකාබද්ධ විපක්ෂයේ නායකයන්ට හැකිවිය.

40 වැනි සැමරුමට උදාගම්මාන 40ක්

එක්සත් ජාතික පක්ෂය වසර 1977දී ලැබූ සුවිශේෂ ජයග්‍රහණයට හා රනිල් වික්‍රමසිංහ අග්‍රාමාත්‍යවරයාගේ දේශපාලන දිවියට වසර 40ක් සපිරීම නිමිත්තෙන් පැවැත්වෙන විශේෂ වැඩසටහන් මාලාව සාර්ථක කරගැනීමට එජාපය මේ දිනවල වැඩකටයුතු සිදුකරමින් පවතී.
මේ පිළිබඳව සාකච්ඡා කිරීමට අඟහරුවාදා රාත්‍රියේ මැති ඇමතිවරුන්ගේ විශේෂ රැස්වීමක් කොළඹදී පැවැත්විණි.

අගමැතිවරයාගේ ප්‍රධානත්වයෙන් පැවැති මෙම රැස්වීමේදී ඊට අදාළ සිය මෙහෙයුම් පිළිබඳ කරුණු දක්වමින් සජිත්, ''අපි ඇඟට පතට දැනෙන වැඩක් කරන්නයි සූදානම් වෙන්නේ. අපි මේ සංවත්සරය නිමිත්තෙන්ම අලුත් උදාගම්මාන 40ක වැඩ ආරම්භ කරනවා. දින වකවානු ඇතිව ඒවා ජනතා අයිතියට පත්කරනවා. ඔබතුමාගේ ආශීර්වාදය විතරයි ඕන'' කියා කියද්දී අගමැතිවරයා පැවසුවේ, ''නියමයි වැඩේ'' කියාය.

මේ පිළිබඳ අරලියගහ මන්දිරයේදී පැවැති සාකච්ඡාවට අනෝමා ගමගේ, හර්ෂණ රාජකරුණා, සජිත් ප්‍රේමදාස, දායා ගමගේ, ඉරාන් වික්‍රමරත්න, කබීර් හසීම්, අශෝක අබේසිංහ, කාවින්ද ජයවර්ධන ආදී පිරිසක් එක්ව සිටියහ.

හරීන් ප්‍රනාන්දු පැමිණියේ තරමක් ප්‍රමාද වෙමිනි. ඔහු එවනවිටම ඇමති අනෝමා විමසුවේ,

''අපේ ඩිජිටල් ඇමතිතුමා ඩිජිටල් කලාපයේ මොකද කරන්නේ කියලා කියන්න'' යනුවෙනි.

එය තමාට කළ උපහාසයක් යැයි සැලකූ හරීන්, ජංගම දුරකථනය දෙස බලා සිටියා මිස කතාකළේ නැත. ඔහුගේ වෙනත් නිලධාරියෙකු ඔහු වෙනුවෙන් අදහස් දැක්වීය.

මෙම සමරු උත්සවයට තැබිය යුතු ගැළපෙන නමක් එහිදී සාකච්ඡා වූ අතර, සාකච්ඡාවේදී එක් නමක් ඉදිරිපත් කෙරිණි. 40 වසර සම්බන්ධයෙන් ඉදිරිපත් වූ නම පිළිබඳ එතරම් ප්‍රසාදයක් නොතිබූ අතර පසුපෙළ පිරිස් මේ කාරණය පැහැදිලි කර පෙන්වා දුන්නේය.
එහිදී එම කැරුණු සැලකිල්ලට ගත් ඇමති සජිත්, කබීර් ඇතුළු පිරිස එයට එකඟ වී එය වෙනස් කිරීමට එකඟ වූ අතර දිනක් ඇතුළත නව තේමාවක්ද සකසා තිබිණි.

දියවන්නාරාළ විසිනි
diyawannarala@gmail.com

අපද්‍රව්‍ය කළමනාකරණය කියන කාරණය තනි අතින් අත්පුඩි ගහනවා වගේ වැඩක් නෙවෙයි

කුණු ප්‍රශ්නය හිඟන්නාගේ තුවාලය බඳු ගැටලුවක් බවට පත්ව තිබේ. කසළ වර්ගීකරණය කොට බාරදෙන ලෙස කෙතරම් ජනතාව දැනුවත් කළද, ඊට නිසි සහයක් නොලැබෙන බව රජයෙන් කෙරෙන චෝදනාවකි.

වර්ගීකරණය කළද නිසි වේලාවට සහ නිසි ආකාරයෙන් කසළ එක්රැස් කිරීම සිදුනොවන බවට ජනතාව රජයට චෝදනා කරති. කෙසේ වෙතත් අපද්‍රව්‍ය කළමනාකරණය සම්බන්ධ වර්තමාන තත්ත්වය පිළිබඳ දැනගැනීමට අප බස්නාහිර පළාත් අපද්‍රව්‍ය කළමනාකරණ අධිකාරියේ අධ්‍යක්‍ෂ නලීන් මාන්නප්පෙරුම මහතා 'අද'ට සම්බන්ධ කර ගතිමු.

Q කසළ බැහැර කිරීම සම්බන්ධයෙන් මේ වනවිට යම් ගැටලුකාරී තත්ත්වයක් පවතිනවා නේද?

ඇත්තටම මේ ගැටලුවේදී තිබුණේ කසළ අවසාන වශයෙන් බැහැර කිරීමට නිසි ස්ථානයක් නොමැති වීම. තෝරාගත් පහත් බිම්වලට කසළ බැහැර කිරීම තහනම් කිරීමත් එක්ක, එක්රැස් කරන කසළ බැහැර කරන්න නිසි ස්ථානයක් නැති වුණා.

අවසානයේදී ඊට විරුද්ධ වුණු පාර්ශ්වයන්ම පහත් බිම්වලට කසළ බැහැර කරන්න තීරණය කළා. ඒ තීරණයත් එක්ක මේ වනවිට මෙම ගැටලුව නිරාකරණය වෙමින් පවතිනවා. ඒ නිසා දැනට කුණු කසළ බැහැර කිරීම සම්බන්ධයෙන් ගැටලුවක් නැහැ. 

Q නමුත් කුණු එක්රැස් කිරීමේ කටයුතු නිසි ආකාරයෙන් සිදු නොවන බවට ජනතාවගේ පැත්තෙන් චෝදනාවක් තිබෙනවා?

අපි ජනතාවට පැහැදිලිවම දන්වා තිබෙනවා කසළ බැහැර කිරීමේදී දිරන අපද්‍රව්‍ය, ප්‍රතිචක්‍රීකරණය කළ හැකි අපද්‍රව්‍ය සහ අවශේෂ අපද්‍රව්‍ය ලෙස ප්‍රධාන වශයෙන් කාණ්ඩ තුනකට වෙන් කළ යුතුයි කියලා. වරින් වර අපි මේ ගැන ජනතාව දැනුවත් කළා. මිනිස්සු ඒ විදියට කසළ වර්ග කරන්නේ නැත්නම් අදාළ පළාත් පාලන ආයතන ඒ කසළ බාරගන්නේ නැහැ.

අපි ඒ අදාළ සේවකයන් දැනුවත් කරලා තියෙනවා වර්ග නොකළ කසළ බාරගන්න එපා කියලා. ඒ නිසා ජනතාවගේ පැත්තෙන් මීටත් වඩා අපට සහයෝගය අවශ්‍ය කරනවා.

ඒ වගේම ජනතාවට අයිතියක් තිබෙනවා තමන්ගෙන් බදු ලබාගන්න අදාළ පළාත් පාලන ආයතනවලින් මේ සේවාවන් නිසි ආකාරයෙන් සිදුනොවනවා නම් ඒ පිළිබඳ පළාත් පාලන ආයතනවලින් ප්‍රශ්න කරන්න.  අපද්‍රව්‍ය කළමනාකරණය කියන කාරණය තනි අතින් අත්පුඩි ගහනවා වගේ වැඩක් නෙවෙයි.

Q මහල් නිවාස සංකීර්ණ සහ පැල්පත් නිවාසවල කසළ කළමනාකරණයට වෙනම වැඩපිළිවෙළක් ක්‍රියාත්මක වෙනවාද?

ඇත්තටම පැල්පත් සහ මහල් නිවාස කියන්නේ අපි වෙනම ගතයුතු කාරණයක්. මොකද එතන තියෙන්නේ විශේෂිත වගේම මඳක් සංකීර්ණ තත්ත්වයක්. ඒ නිසා මේ වනවිට කොළඹ නගර සභාවත් සමග එක්වෙලා අපි  පැල්පත් නිවාසවල ජනතාව දැනුවත් කරමින් යනවා කුමන ආකාරයෙන්ද තමන්ගේ කසළ කළමනාකරණය කරගත යුත්තේ යනුවෙන්.

ඊට අමතරව මහල් නිවාසවලටත් ඒ ඒ මහල් නිවාසවල තිබෙන ස්වභාවය අනුව විවිධ වැඩසටහන් ක්‍රියාත්මක කරන්න සූදානම් වෙලා සිටිනවා. එහි ප්‍රතිඵලයක් විදියට අපි තීරණය කරලා තිබෙනවා මහල් නිවාසවල කුණු දැමීමට භාවිත කරන 'කසළ දොරු' (Garbage chutes) සීල් තබා ඒ ජනතාවටත් කසළ වර්ග කරලා බාරදෙන්න කියලා දැනුවත් කිරීමට.

Q මෑතකදී කසළ කළමනාකරණය කරගන්න කොළඹ මහ නගර සභාවට ඉදිරිපත් කරපු සැලැස්මට මොකද වුණේ?

ඇත්තටම ඒ සැලැස්ම ප්‍රායෝගිකව ක්‍රියාවට නැංවිය හැකියි කියලා ඉංජිනේරුවරුන් පවා පිළිගත්තත් අපි බලාපොරොත්තු වුණු විදියටම එය ක්‍රියාත්මක නොවීම යම් ගැටලුවක්. නමුත් සැලැස්මේ තිබූ ක්‍රමවේද තමයි දැන් අපි පියවරින් පියවර ක්‍රියාත්මක කරමින් ඉන්නේ. 

Q මුතුරාජවෙලට කසළ බැහැර කරන්නේ නිසි ක්‍රමවේද භාවිත කරලද?

පහත් බිම්වලට කසළ බැහැර කිරීමේදී ඊට ක්‍රමවත් වැඩපිළිවෙළක් යොදාගන්න බැහැ. තෙත් බිමක් කියන්නේ ස්වභාවයෙන්ම ජරාවට පත්වෙලා තිබෙන තැනක්. මෙතනදි අපට තීරණය කරන්න වෙලා තියෙනවා පරිසරය ආරක්ෂා කරනවාද, එහෙමත් නැත්නම් ජනතාව ආරක්ෂා කරනවාද යනුවෙන්. ඒ නිසා මේ වෙලාවේ ගන්න තිබෙන සුදුසුම තීරණය තමයි අපි ගත්තේ.

මොකද මේ වෙද්දි ඩෙංගු වසංගතය දරුණු තත්ත්වයකට පත් වෙලා තිබෙනවා. ඒ වගේම සංචාරක ව්‍යාපාරය බිඳ වැටෙමින් යනවා මේ කුණු ප්‍රශ්නය හේතුවෙන්. මේ වෙද්දී කොළඹ නගරයේ සංචාරය කරන්න එපා කියලා යුරෝපා රටවල් තමන්ගේ ජනතාව දැනුවත් කරමින් සිටිනවා. මේ තත්ත්වය ගැන අපි දෙවරක් සිතීමට අවශ්‍යයි.

Q බලශක්ති උත්පාදන ව්‍යාපෘතිවල වර්තමාන තත්ත්වය කොයි වගේද?

කරදියාන විදුලි උත්පාදන ව්‍යාපෘතිය වෙනුවෙන් අපි ෆෙයා වේස්ට් පෞද්ගලික සමාගමත් එක්ක පසුගියදා ගිවිසුම්ගත වුණා. එහි මුල්ගල තැබීමේ කටයුතු අගෝස්තු 02 වැනිදා සිදු කිරීමට බලාපොරොත්තු වෙනවා.

ඊට අමතරව මුතුරාජවෙල විදුලි උත්පාදන ව්‍යාපෘතියට අගෝස්තු 10 වැනිදා මුල්ගල තැබීමට නියමිතයි. දඹුවත්ත විදුලි උත්පාදන ව්‍යාපෘතියේ කටයුතු මඳක් ප්‍රමාද වෙනවා පරිසර වාර්තා තවම නොලැබීම නිසා.

Q සමහර අවස්ථාවල පැන නගින විරෝධතා මේ කටයුතුවලට බලපාන්නේ කුමන ආකාරයටද?

මේ කසළ කළමනාකරණය සම්බන්ධයෙන් පවතින ගැටලුව මෙතරම් දුරදිග යන්න එක් හේතුවක් තමයි මේ අයුතු විරෝධය. 1996 වසරේ ඉඳලා අවිස්සාවේල්ල අපද්‍රව්‍ය කළමනාකරණ ව්‍යාපෘතිය ක්‍රියාත්මක කරන්න යද්දි ඒකට විශාල ජනතා විරෝධයක් ආවා. ඊට පස්සේ පාදුක්ක ව්‍යාපෘතියටත් විරෝධතා ආවා.

2011 වසරේදී ගෙන ආපු කඩුවෙල බලශක්ති උත්පාදන ව්‍යාපෘතියටත් මේ ආකාරයෙන් විරෝධතා මතු වුණා. මේ දුරදිග නොබලා ආපු විරෝධතා හේතුවෙන් තමයි මෙවැනි තත්ත්වයක් උදා වුණේ. කුණු කියන්නේ මුළු සමාජයම වගකිවයුතු ගැටලුවක්. ඒ නිසා මේකට කොළඹ කුණු, කොළොන්නාවේ කුණු කියලා විශේෂණ යොදන එක සුදුසු දෙයක් නෙවෙයි. මහජනතාව තේරුම්ගත යුතුයි මේ ගැටලුවේ පවතින සැබෑ පැතිකඩ ගැන.

Q මේ කෙරෙන වැඩසටහනුත් අනිත් ඒවා වගේම අතරමග අඩපණ වෙයිද?

දැනට නම් මේ සඳහා වගකීම තිබෙන සියලු ආයතන මනා සහසම්බන්ධයකින් කටයුතු කරමින් ඉන්නේ. විය යුත්තෙත් ඒකමයි. මම හිතන්නේ මේ වෙලාවේ මෙම ගැටලුවට නිසි පිළියමක් යොදන්න අපට බැරි වුණොත් ආයෙත් අපට විසඳුමක් ලබාදෙන්න බැරිවෙයි. අපිට තිබෙන අවසාන අවස්ථාව මේක. දැනට ක්‍රියාත්මක කරන වැඩසටහන්වලට යම් කාලයක් ගත වෙනවා. ඒ නිසා අපි ඉතා ඉවසීමෙන් මේ අවස්ථාවේදී කටයුතු කළ යුතුයි.

ණය මුදල ගෙවලා අවසන් වුණාම තමයි රජයට මෙහි පූර්ණ අයිතිය ලැබෙන්නේ මේක සම්පූර්ණයෙන්ම වංචනික ගිවිසුමක්

මාලඹේ පෞද්ගලික වෛද්‍ය විද්‍යාලය අහෝසි කරන ලෙසත්, එසේ නැතහොත්  එම ආයතනය රජයට පවරාගන්නා ලෙසටත් බල කරමින් ආරම්භ කොට ඇති විරෝධතා උච්චස්ථානයකට පැමිණ තිබේ.

රජයේ පාර්ශ්වයෙන් විවිධ විසඳුම් යෝජනා ඉදිරිපත් කළද විරෝධතාවල නියැළෙන වෛද්‍යවරුන්, ශිෂ්‍ය සංවිධාන, දේශපාලන පක්ෂ ඇතුළු සියලු දෙනා එම යෝජනා පිළිගැනීමට සූදානම් නැති බව පැහැදිලිය.

මේ අතර සයිටම් ආයතනයේ අධිපති නෙවිල් ප්‍රනාන්දු මහතාට අයත් නෙවිල් ප්‍රනාන්දු පෞද්ගලික රෝහල රජයට පවරාගත් බවට පසුගියදා (17දා) රජය ප්‍රකාශයට පත් කළේය. 

ඒ සඳහා පැවැති උත්සවයට ජනාධිපති මෛත්‍රීපාල සිරිසේන මහතාද එක්ව සිටියේය. සයිටම් සටන තව තවත් ඇවිළී යන්නට මෙම තීරණය බලපා තිබෙන අතර, සයිටම් විරෝධීන් පවසන්නේ එම තීරණය සයිටම් ගැටලුවට විසඳුමක් නොවන බවයි. මෙම පසුබිම තුළ වැඩිදුර තොරතුරු දැනගැනීමට පෙරටුගාමී සමාජවාදී පක්ෂයේ අධ්‍යාපන ලේකම් පුබුදු ජයගොඩ මහතා සම්බන්ධ කරගතිමු.

Q නෙවිල් ප්‍රනාන්දු රෝහල රජයට පවරාදීමේ උත්සවයේදී ජනාධිපතිවරයා සහ නෙවිල් ප්‍රනාන්දු මහතා සුහදශීලීව  කතාබහ කරමින් සිටින ආකාරය අපි දුටුවා. මෙම දසුන දකින විට ඔබට මොකද හිතෙන්නේ?

අපට එම දසුනේ අලුතෙන් හිතෙන්න දෙයක් නැහැ. ඡායාරූපවල ඔවුන් දෙදෙනා එකට කතා කරනවා දුටුවේ එදින වුණාට මතවාදීමය වශයෙන්, ප්‍රතිපත්තිමය වශයෙන් ඒ අය අතරේ බරපතළ එකඟතාවක් තිබෙනවා කියන එක අපට රහසක් නෙමෙයි. අපි ඒක දන්නවා. දෙදෙනා එකට වාඩිවෙලා ඉන්නවා දකිද්දි අපට පුදුම හිතෙන්නවත්, අමුතු හැඟීමක් ඇති වෙන්නෙවත් නැහැ.

අපි හිතන්නේ රටේ ජනතාවට අපි මෙතෙක් කල් ප්‍රතිපත්තිමය වශයෙන් කියපු දෙය ඇස්වලින් භෞතිකමය වශයෙන් දකින්න ලැබුණා. ඇත්තටම පාලකයො වාඩි වෙලා ඉන්නෙ ජනතාවගේ පැත්තෙද, නැත්නම් වෙනත් කෙනෙකුගේ පැත්තෙද කියන එක රටේ ජනතාව තේරුම්  ගන්නවා ඇතැයි අපි සිතනවා.

Q සයිටම් ප්‍රශ්නය සම්බන්ධයෙන් රජය ලබා දී තිබෙන මෙම විසඳුම පිළිගන්න සූදානම්ද?

මේක විසඳුමක් විදියට අපි දකින්නෑ. ප්‍රශ්නය පෞද්ගලික රෝහල් පැවතීම නෙමෙයි. පෞද්ගලික වෛද්‍ය විද්‍යාලයක් ආරම්භ කර තිබුණා. ඒ වෛද්‍ය විද්‍යාලය සම්බන්ධව බරපතළ විරෝධයක් ගොඩනැගී තිබුණා. ඒ විරෝධය සමහර අයගෙන් ගොඩනැගුණේ සයිටම් ආයතනය නීත්‍යනුකූල නැහැ, ඒකේ ප්‍රමිතිය දුර්වලයි කියන තැනින්.

නමුත් අපි ඇතුළු තවත් පාර්ශ්ව මේකට සම්බන්ධ වුණේ අධ්‍යාපනය සහ සෞඛ්‍ය සේවය වෙළෙඳ භාණ්ඩයක් කිරීමට විරුද්ධ තැනින්. ප්‍රශ්නය පැන නැගී තිබුණේ සයිටම් ආයතනයට අදාළව. ඒකට උත්තරය විදියට රෝහලක් රජය සතු කරනවා කියලා ප්‍රකාශ කර තිබෙනවා. මේ ප්‍රශ්නය ඇතුළෙ රෝහලකට අදාළව  කිසිම කෙනෙකුගේ සටන් පාඨයක්  තිබුණෙ නැහැ.

Q ඒ කියන්නෙ නෙවිල් ප්‍රනාන්දු රෝහල සම්බන්ධව ඔබලාට ගැටලුවක් නැහැ කියන එකද?

අපට විශාල ගැටලුවක් තිබෙනවා. ආණ්ඩුව විශාල ප්‍රචාරයක් ගෙනගියා රෝහල අණ්ඩුව සතු කළා කියලා. නමුත් ඒකට අදාළව තියෙන කැබිනට් පත්‍රිකාවේ තුන්වැනි පිටුවේ ඉතාම පැහැදිලිව සඳහන් වෙනවා මේ රෝහල වසර දහයක කාලයක් සඳහා නාමික බදු කුලියකට රජය විසින් බදුගන්නවා කියලා.

සෞඛ්‍ය අමාත්‍යාංශය, ලංකා බැංකුව සහ නෙවිල් ප්‍රනාන්දු රෝහල කියන පාර්ශ්ව තුන ඒකාබද්ධව ගිවිසුමක් අත්සන් කරලා වසර 10 ක කාලයක් සඳහා මේ රෝහල රජයට බද්දට දෙන බව එහි සඳහන් වෙනවා. බදු ගනු ලැබූ වසර 10ක කාලය ඇතුළෙ මේ රෝහලේ ගොඩනැගිලි, උපකරණ ඇතුළු සියලු ප්‍රාග්ධන සම්පත්වල අයිතිය තියෙන්නේ නෙවිල් ප්‍රනාන්දු යටතේ බව එහි සඳහන් වෙනවා.

එහි පරිපාලනමය හා පුනරාවර්තන වියදම් පාර්ශ්වය රජයට පැවරෙනවා. මේ රෝහල තිබුණෙ පාඩු ලබමින්. එය පාඩු ලැබුවේ විශාල ප්‍රාග්ධන වියදම් වැය කිරීමට සිදුවුනු නිසා නෙමෙයි. පඩි නඩි ගෙවීම, වෙනත් බිල් ගෙවීම, උපකරණ නඩත්තුව වැනි පුනරාවර්තන වියදම් නිසා තමයි  පාඩු ලබලා තිබුණෙ. එම පාඩු ලබන කොටස පමණක් රජය අරගෙන තිබෙනවා.

ප්‍රශ්නය තිබෙන්නේ එම කොටස අරගත්තට පස්සෙ කැබිනට් පත්‍රිකාවේ හයවැනි පිටුවේ සඳහන් වන විදියට ඒ සඳහා පාලක මණ්ඩලයක් පත් කරනවා. එහි පාලක මණ්ඩලයේ සභාපති වශයෙන් පත්කරන්නේ නෙවිල් ප්‍රනාන්දු. ඇත්තටම වෙලා තියෙන්නේ රජය විසින් මුදල් දෙනවා, නමුත් මුදල් භාවිත කිරීමේ, තීන්දු ගැනීමේ ප්‍රධානියා වෙන්නෙ නෙවිල් ප්‍රනාන්දුමයි.

ඒ නිසා මේ රෝහල කිසිසේත්ම රජය සතු වීමක් වෙලා නැහැ. ගිවිසුමේ කිසිම තැනක සඳහන් වෙලා නැහැ නෙවිල් ප්‍රනාන්දු රුපියල් මිලියන 2000 ක ණය මුදල ගෙවන්න තියෙන අවසාන දිනය කවදද කියලා. ඒ සඳහා වසර සංඛ්‍යාවක් තීරණය කරලා නැහැ.

නමුත් ගිවිසුමේ වගන්තියක් තිබෙනවා ඔහු ණය මුදල ගෙවලා අවසන් වුණාට පසුව තමයි රජයට මෙහි පූර්ණ අයිතිය ලැබෙන්නේ කියලා. ඒ නිසා රෝහල රජය සතු කළා කියලා ගෙනයන ප්‍රචාරය සම්පූර්ණයෙන්ම අසත්‍යයක් බව රටවැසියා තේරුම්ගත යුතුයි. කැබිනට් පත්‍රිකාව දිහා බැලුවාම ඒක පැහැදිලි වෙනවා.

Q නෙවිල් ප්‍රනාන්දු රෝහල රජයට පවරාගැනීම නිසා සෞඛ්‍ය කේෂ්ත්‍රයේ ගැටලුවලට විසඳුමක් ලබා දී තිබෙන බව රජයේ පාර්ශ්වයෙන් පැවසෙනවා. ඒ සම්බන්ධව ඔබගේ අදහස?

සෞඛ්‍ය ක්ෂේත්‍රයේ ප්‍රධානම ප්‍රශ්නය තියෙන්නේ කොළඹට තියෙන රෝහල් සංඛ්‍යාව ප්‍රමාණවත් නොවීම නෙමෙයි. කොළඹට තවත් රෝහල් එකතු වුණාට පස්සෙ සෞඛ්‍ය සේවය දියුණු වෙනවා කියන්න පුළුවන් විකාරකාරයන්ට විතරයි. සෞඛ්‍ය අමාත්‍යාංශය ඒක කියමින් ඉන්නවා. පහසුකම් නැතිකම නිසා ලංකාවේ රෝහල්වල විශාල ප්‍රශ්නයක් තිබෙනවා.

රෝහල් අතර බරපතළ විෂමතාවක් පවතිනවා. විසඳිය යුතුව තිබෙන්නේ එම ප්‍රශ්න. කොළඹ රිජ්වේ ආර්යා ළමා රෝහලට හදවත් සැත්කම් සඳහා හෘද රෝග ඒකකයක් නැහැ. එවැනි ඒකකයක් පිහිටුවීමට රුපියල් මිලියන 200 ක මුදලක් අව්‍යශ වෙලා තිබෙනවා. වසර ගණනාවක් ගිහිල්ලා එම මුදල වෙන් නොකරන නිසා දැන් වෛද්‍යවරු ඇතුළු සෞඛ්‍ය සේවකයො මහජනතාවගෙන් ආධාර එකතු කරනවා මිලියන 200 එකතු කරගන්න.

නෙවිල් ප්‍රනාන්දු රෝහල රජය සතු කළා කියලා බොරු කියලා දැන්වීම් දාන්න. ඊට ආසන්න මුදලක් වැය කළා කියලා තමයි අපට වාර්තා වෙලා තියෙන්නේ. සෞඛ්‍ය අමාත්‍යාංශය හරියට කියන්න ඕන පුවත්පත් දැන්වීම් සහ රූපවාහිනී දැන්වීම්, පෝස්ටර්, කටවුට් සඳහා කොච්චර වියදමක් කළාද කියලා. හෘද රෝග ඒකකය හදන්න යන වියදමට ආසන්න වියදමක් ගිහින්  තිබෙනවා.

මහරගම පිළිකා රෝහල සඳහා පෙට් ස්කෑන් යන්ත්‍රයක්  ආණ්ඩුව ලබානොදීම නිසා ඒක අරගන්න මිනිස්සු සල්ලි එකතු කරලා දුන්නා. නමුත් මෑතක් වනතුරු ඒක මිලදී ගත්තේ නැහැ. මිලදී ගැනීමට අවශ්‍ය පරිපාලන කටයුතු ටික රජය කළේ නැහැ. රෝහල්වල පහසුකම්  සම්බන්ධව රජය එවැනි ප්‍රතිපත්තියකුයි අනුගමනය කරන්නේ.

සාමාන්‍යයෙන් ජනගහනයෙන් ලක්ෂයකට වෛද්‍යවරුන්  300 ක් පමණ කොළඹ දිස්ත්‍රික්කයේ ඉන්නවා. නමුත් නුවරඑළිය දිස්ත්‍රික්කයේ ඉන්නෙ ලක්ෂයකට වෛද්‍යවරුන්  තිහක් පමණයි. පළාත්  අතර, දිස්ත්‍රික්ක අතර විශාල විෂමතාවක් තිබෙනවා. රටේ සෞඛ්‍ය ප්‍රශ්නය විසඳනවා කියන්නේ ඇඳන් 200 ක් තිබෙන රෝහල් කොළඹ පටන්ගන්න එක නෙමෙයි.

දැනට තියෙන රෝහල්වල පහසුකම් වැඩි කරන්නේ කොහොමද? ඈත පළාත්වල සෞඛ්‍ය ප්‍රශ්නවලට පිළිතුරු හොයන්නේ කොහාමද කියන එක තමයි ප්‍රශ්නය විය යුත්තේ. නමුත් එවැනි ඇත්ත ප්‍රශ්නවලට කිසිම පිළිතුරක් නොදී පාලකයෝ කරලා තියෙන්නේ ප්‍රශ්න වවාගෙන කාපු එක විතරයි. මේ විදියට සෞඛ්‍ය සේවයේ ප්‍රශ්නයට කිසිදු පිළිතුරක් ලැබේවි කියලා අපේ බලාපොරොත්තුවක් නැහැ.

Q සයිටම් ආයතයනයට ශික්ෂණ රෝහලක අඩුව තමයි තිබුණේ, එම ප්‍රශ්නය විසඳුවා කියලා සෞඛ්‍ය ඇමතිවරයා නෙවිල් ප්‍රනාන්දු රෝහල බාරගැනීමේ උත්සවයෙදි ප්‍රකාශ කළා. එම ප්‍රකාශය සම්බන්ධව ඔබේ අදහස කුමක්ද?

බළලා මල්ලෙන් එළියට පැන්නා කියන්නේ ඒක තමයි. මේ අයට උවමනා වුණේ සෞඛ්‍ය ක්ෂේත්‍රය දියුණු කිරීම සඳහා රෝහලක් පවරාගන්න නෙමෙයි. එහෙම නම් සෞඛ්‍ය සේවය දියුණු කරන්න තව ඕන තරම් විකල්ප ක්‍රම තිබුණා. ඒ අයට ඕන වුණේ සයිටම් ආයතනයට, එහි උපාධියට නීත්‍යනුකූලභාවය ලබාගැනීම සඳහා පියවරක් ගන්න.

මේ ආයතනයට අධීක්ෂණ සභාවක් පිහිටුවනවා කියලා එම කැබිනට් පත්‍රිකාවෙත් සඳහන් වෙනවා. එහි සාමාජිකයන් අතරට විශ්වවිද්‍යාල ප්‍රතිපාදන කොමිසමේ සභාපතිවරයා හෝ ඔහුගේ නියෝජිතයෙක් සහ උසස් අධ්‍යපන අමාත්‍යාංශයේ ලේකම්වරයා හෝ ඔහුගේ නියෝජිතයෙක් පත් කරනවා කියලා සඳහන් කරල තිබෙනවා.

අරමුණ තියෙන්නේ සෞඛ්‍ය ක්ෂේත්‍රය දියුණු කිරීම සඳහා රෝහලක් පවත්වාගෙන යෑම නම් එහි  අධීක්ෂණ කටයුතුවලට විශ්වවිද්‍යල ප්‍රතිපාදන කොමිෂන් සභාවයි, උසස් අධ්‍යාපන අමාත්‍යාංශයයි සම්බන්ධ කරගන්නේ මොකටද කියන ප්‍රශ්නය තිබෙනවා. ඇත්තටම ඕන වෙලා තියෙන්නේ උපාධියට පිළිගැනීමක් ලබාදීම සඳහා මේ රෝහල රජයට ගත්තා කියලා පාවිච්චි කරන්න.

නෙවිල් ප්‍රනාන්දුට කරගන්න බැරි වුණු දේ මහජන අරමුදල්වලින් කරලා, නෙවිල් ප්‍රනාන්දුට ලාභ අරන් දෙන්න. නෙවිල් ප්‍රනාන්දු සතු ආයතන දෙකෙන් එකක් වන සයිටම් ආයතනය අධික ලාභ ලබනවා. 2014 සංඛ්‍යාලේඛන අනුව රුපියල් මිලියන  1265 ක වාර්ෂික ශුද්ධ ලාභයක් ලැබිලා තිබෙනවා. 2015 දී රුපියල් මිලියන 1300 ක ශුද්ධ ලාභයක් ලැබිලා තිබෙනවා.

නමුත් නෙවිල් ප්‍රනාන්දු රෝහල දිගටම පාඩු ලබනවා. පාඩු ලබන රෝහල අරගෙන, පාඩුව මිලියන 20 ක් වන රටේ ජනතාව අතරේ බෙදලා දීලා නෙවිල් ප්‍රනාන්දුට සයිටම් නීත්‍යනුකූල කිරීම සඳහා මහජන අරමුදලින් එය  හදන එක තමයි රජය කරලා තියෙන්නේ. ලාභ ලබන ආයතනයේ ලාභය නෙවිල් ප්‍රනාන්දුට. පාඩු ලබන රෝහලේ පාඩුව රටේ මුළු ජනතාවටම.

ආණ්ඩුවේ ප්‍රතිපත්තිය වෙලා තියෙන්නේ ඕක තමයි. එම කාරණයට තමයි රෝහල රජයට පවරාගත්තා කියන නාට්‍යය රඟදක්වන්නේ. මේකේ අවසන් ප්‍රතිඵලය වන්නේ මේක ශික්ෂණ රෝහලක් කියලා රජය නම් කරන එක. තවමත් මේක ශික්ෂණ රෝහලක් කියලා පිළිගන්නෙ නෑ.

වර්තමාන ජනාධිපතිවරයා සෞඛ්‍ය අමාත්‍යවරයාව සිටියදී 2012 ජුනි 20 වැනිදා පාර්ලිමේන්තුවට ප්‍රකාශයක් කළා නෙවිල් ප්‍රනාන්දු රෝහල ශික්ෂණ රෝහලක් ලෙස සෞඛ්‍ය අමාත්‍යාංශය පිළිගන්නෙ නෑ, කිසිදු පෞද්ගලික රෝහලකට ශික්ෂණ රෝහලක තත්ත්වය ලබාදීලා නැහැ කියලා. ඒකට පිළිතුරක් විදියට තමයි වර්තමාන සෞඛ්‍ය ඇමතිවරයා පිළිතුරක් ලබා දීලා තියෙන්නේ.

Q ජනාධිපතිවරයා සිටියදීම එම උත්සවයේදී සෞඛ්‍ය ඇමතිවරයා කියනවා සයිටම් සිසුන් ප්‍රමාණය 100 සිට 500 දක්වා වැඩි කිරීමට රජයෙන් අවශ්‍ය සහාය ලබාදෙනවා කියලා. මේ තත්ත්වය තුළ සයිටම් විරෝධී සටනට මොකද වෙන්නේ?

සටන නිශ්චිතව පටන්ගත්තට පස්සේ  මේ ප්‍රතිපත්තියට එරෙහිව දැවන්ත ජනතා බලයක් ගොඩනගලා තිබෙනවා. එම ජනතා බලය ඉදිරිපිට හිස නොනවා සිටිය නොහැකි තත්ත්වයට ආණ්ඩුවේ නායකයන් සහ ඇමතිවරුන්  පත්වෙලා තිබෙනවා. රෝහල රජයට පවරාගන්නවා කියන ප්‍රකාශය පවා කරන්න සිද්ධ වුණේ අපි සටන් කරපු නිසයි.

සිසුන් සිරගත වෙලා, වෛද්‍යවරු වැඩ වර්ජනය කරලා, කරපු සටන නිසා තමයි මෙම පියවරට හරි ආවේ. ඉදිරි පියවරයන් සඳහා සටන වඩා වර්ධනය කිරීම අපි ඉදිරියේ තිබෙනවා. ඒ සඳහා අපි මැදිහත් වෙනවා. ආණ්ඩුවේ ඇමතිවරු මාධ්‍යවලට මොන කතා කිව්වත්, ජනතා හඬ නොසලකා දිගටම ඒ අයට යන්න නොහැකියි කියලා අපට විශ්වාසයක් තිබෙනවා.

Q ඒ කියන්නේ සටන ජයග්‍රහණයකින් කෙළවර වෙයි කියන විශ්වාසය තිබෙනවා?

ස්ථිරවම  සටන ජයග්‍රහණයකින් කෙළවර කළ යුතුයි. මේක අඩපණ වෙනවා කියන්නේ ඉදිරියේදී ජනතාවට එන ප්‍රහාර වඩා වේගවත් වෙනවා කියන එකයි. කම්කරුවන්ගේ, ගොවියන්ගේ, ධීවරයන්ගේ  ඇතුළු සියලුම ජනතාවගේ අයිතීන්වලට මොකද වෙන්නේ කියලා තීරණය වෙන්නේ මෙම සටනේ ජයග්‍රහණය මතයි.

ඒ නිසා දේෙපාලන පක්ෂයක් විදියට අපේ උපරිම බර තබනවා සටන ජයග්‍රහණය කිරීම සඳහා. ඒ පිළිබඳ අපට විශ්වාසයක් තිබෙනවා. අපි ජනතාවට කියනවා මේක ජයග්‍රහණය කරවීම සඳහා උපරිම සහාය ලබාදෙන්න කියලා.

Q රාජිත සේනාරත්න, ලක්ෂ්මන්  කිරිඇල්ල, එස්.බී. දිසානායක යන ඇමතිවරුන් ඇතුළුව ආණ්ඩුවේ මැති ඇමතිවරුන් සයිටම් ආයතනය සම්බන්ධව සිය ස්ථාවරය වෙනස් නොකරන තත්ත්වයක් තුළ ආණ්ඩුවෙන් මීට වඩා වෙනසක් බලාපොරොත්තු වෙන්න පුළුවන්ද?

ජනතාවගේ මතයට හිස නොනමා ඒ අයට යන්න පුළුවන්ද කියන එක දැන් පැහැදිලි වෙලා තිබෙනවා. අපට ඒක හොඳින්ම බලාගන්න පුළුවන්. දැන් මේ ආණ්ඩුව ගමන් කරමින් ඉන්නේ මැතිවරණ කල්දාලා බලහත්කාරී පාලනයකට. නමුත් දිගටම එහෙම යන්න ලැබෙන එකක් නැහැ.

ඒ අයට නැවත ජනතාව මත තීරණ ගන්න තත්ත්වයකට ඉතාම නුදුරේදීම පත්වීමට සිදුවෙනවා. එවැනි තත්ත්වයක් ඇතුළෙ අපි හිතනවා ඔවුන්ට ජනතාවගේ හඬට කන් දෙන්න වෙනවා කියලා. ජනතාවගේ සෞඛ්‍යය ආරක්ෂා කරන පැත්තෙන් තීරණ ගන්න බව ඔවුන් කියා තිබුණා.

ජනතාවගේ සෞඛ්‍ය විනාශ කරන පැත්තෙන් තීරණ ගන්නා මේ  ආණ්ඩුවේ සෞඛ්‍යය ආරක්ෂා කර ගන්න නම් ආණ්ඩුව ජනතා මතයට හිස නැමිය යුතුයි. එහෙම නොවුණොත් ආණ්ඩුවේ සෞඛ්‍ය තත්ත්වය වඩා බරපතළ වේවි. ඒක දැඩි සත්කාර ඒකකවල දාලා නැවත ආණ්ඩුවේ පණ නළ ගැටගහගන්න බැරි තත්ත්වයට පත් වේවි.

ඒ නිසා ජනතා මතයට හිස නමලා ආණ්ඩුව යම් විදියකට නම්‍යශීලී වෙලා මේ ප්‍රශ්නය විසඳනවාද, නැත්නම් නෙවිල් ප්‍රනාන්දුට ලාභ උපයා දීම වෙනුවෙන් හා තමන්ගේ නව ලිබරල් ප්‍රතිපත්තිය වෙනුවෙන් විනාශය කරා, පරාජය කරා යනවාද කියන තීරණය තියෙන්නේ ආණ්ඩුව අතේ.

Q රජයේ වෛද්‍ය නිලධාරීන්ගේ සංගමය සමග ඇතුළු පාර්ශ්ව කිහිපයක් සමග සයිටම් ගැටලුව සම්බන්ධව ඊයේ (18දා) පැවැති සාකච්ඡාවේදී ගත් තීන්දු තීරණ මොනවාද?

ලබන 25 වැනිදා පැවැත්වෙන සයිටම් විරෝධී සමුළුවේ සංවිධාන කටයුතු සම්බන්ධව රජයේ වෛද්‍ය නිලධාරීන්ගේ සංගමය සහ අනෙකුත් වෘත්තීය සමිති සමග මූලික සාකච්ඡාවක් අපි පැවැත්වූවා. ආණ්ඩුවේ ප්‍රෝඩාවට එරෙහිව විරෝධතා දැක්වීම සඳහා විරෝධතා ප්‍රමාණයක් සමුළු යෝජනා විදියට සම්මත කරගන්න නියමිතව තිබෙනවා. මෙම සමුළුව කැඳවන්නේ සියලුම දේශපාලන පක්ෂ, වෘත්තීය සමිති, බහුජන ව්‍යාපාර, ශිෂ්‍ය සංවිධාන සම්බන්ධ වුණු 'සයිටම් විරෝධී ජන පවුර' සංවිධානයෙන්.

මම පක්ෂ මාරු කරන්නේ නෑ ඉවත් වුණොත් මට සිනමාවේ ජොබි එක තාම තියෙනවා

දූෂණ, වංචා විමර්ශන කටයුතු සම්බන්ධයෙන් එක්සත් ජාතික පක්‍ෂ පාර්ලිමේන්තු මන්ත්‍රී, සමාජ සවිබල ගැන්වීම් හා සුභසාධන නියෝජ්‍ය අමාත්‍ය රන්ජන් රාමනායක මහතා විසින් සිය පක්‍ෂය හා ආණ්ඩු පාර්ශ්වය විවේචනය කරන්නේ යැයි හේතු කරගෙන ඔහුට සිය පක්‍ෂයෙන් ඉවත් වන ලෙස එක්සත් ජාතික පක්‍ෂ නායක, අග්‍රාමාත්‍ය රනිල් වික්‍රමසිංහ මහතා පක්‍ෂයේ කෘත්‍යාධිකාරී මණ්ඩලයේදී පසුගියදා ප්‍රකාශ කර තිබිණි.

ඒ සම්බන්ධව සිය පාර්ශ්වයෙන් අදහස් විමසීම සඳහා නියෝජ්‍ය අමාත්‍ය රන්ජන් රාමනායක මහතා මෙලෙස 'අද'ට සම්බන්ධ කර ගතිමු. 

Q නියෝජ්‍ය අමාත්‍යතුමා, ඇත්තටම එක්සත් ජාතික පක්‍ෂයෙන් ඉවත් වෙන්න කියලා අග්‍රාමාත්‍යවරයා ඍජුවම ඔබට ප්‍රකාශ කළාද?

ඔව්. පසුගිය සිකුරාදා කෘත්‍යාධිකාරී මණ්ඩලයේදී කිව්වා. ඊට පෙර දින හිල්ටන් හෝටලයේදී එක්සත් ජාතික පක්‍ෂයේ වැඩමුළු කිහිපයක් තිබුණා. මට ඒකට යන්න බැරි වුණා. එතකොට පාලිත තෙවරප්පෙරුම මන්ත්‍රීතුමා මට කතා කරලා කිව්වා, ''අන්න ඔයාගේ නම කියලම කිව්වා, ආණ්ඩුවේ ඉන්න හොරු අල්ලන්නෙ නෑ කියලා විවේචනයක් කරනවා රන්ජන් රාමනායක ඇමතිවරයා, ඒ හින්දා එයාට අස්වෙලා යන්න කියලා මම නියෝග කරනවා කියලා කිව්වා.'' කියලා.

''ඊට පස්සෙ කට්ටියම ඒකට අත්පුඩි ගැහුවා, ඔයාගෙ යාළුවො සේරම අත්පුඩි ගැහුවා, මම නම් අත්පුඩි ගැහුවෙ නෑ.'' කියලා පාලිත මට කතා කරලා කිව්වා. ඒක මට තුන්වැනි පාර්ශ්වයකින් කියූ දෙයක්. කෘත්‍යාධිකාරියේදී නම් මං ඉද්දිම මගේ මූණටමයි කිව්වෙ. සිරිකොත ඇතුළෙදි සුජීව සේනසිංහ පටන් ගත්තා කතාව. ඔහු තමයි ප්‍රශ්නය මුලින්ම ඇද්දෙ‍. ඔහු කිව්වා 'බැඳුම්කර වංචාව නැත්ත වෙනුවට ඇත්ත' කියලා පොතකුත් ලිව්වා පක්‍ෂය රැකගන්න.

නමුත් පක්‍ෂයේ ඉන්න ඇතැම් අය බැඳුම්කර වංචාව ගැනයි, හොරු අල්ලන්නෙ නැති එක ගැනයි විවිධ අර්ථකථන දෙනවා කියලා. ඊට පස්සෙ තමයි නායකතුමා තද වෙලා කතා කළේ. නායකතුමා කිව්වා, “ආ ඔව්, මේ ප්‍රශ්නය ගත් එක හොඳයි.  

බැඳුම්කර එකේ ජනාධිපති කොමිසමක් දාලා තියෙනවා. ඒක හරියට වෙනවා. රන්ජන් ඇමතිතුමා ප්‍රකාශ කරලා තියෙනවා ආණ්ඩුවේම ඉඳගෙන ආණ්ඩුවේ අපි හොරු රකිනවා කියලා. ආණ්ඩුවේ ඉඳගෙනම මෙහෙම කරන්න බෑ. ඒ හින්දා ආණ්ඩුවෙන් එළියට ගිහිල්ලා මේක කරන්න. ආණ්ඩුවෙන් යන්න.'' කියලා කිව්වා.

ගයන්ත ඇමතිතුමා මට කිව්වා නැගිටලා උත්තරයක් දෙන්න කියලා. එහා පැත්තෙ හිටපු ඉම්තියාස් මහත්තයා කිව්වා නායකතුමා කියන ප්‍රකාශය අහන් ඉන්න කියලා. එතකොට මම වචනයක්වත් නොකියා නායකතුමා කියන දේ අහගෙන හිටියා. පසුගිය ටිකේම මේ හොරු අල්ලන ප්‍රශ්නය නිසා පක්‍ෂයේ අයව විවේචනය කරනවා කියලා දිගටම ප්‍රශ්නය මට ආවා.

ජෝන් අමරතුංග මහත්මයාගේ ඇවිදින මංතීරු ප්‍රශ්නයට, ඇවන්ගාඩ් ප්‍රශ්නයට, තව අපේ පක්‍ෂයේ වෙන වැරදි ගැන ස්වයං විවේචනයකනෙ මම හැමදාම හිටියෙ. මම ඒ දේවල් කළේ පක්‍ෂය රැක ගන්න මිසක් පක්‍ෂය අමාරුවේ දාන්න නොවේ. අපේ පක්‍ෂය ප්‍රජාතන්ත්‍රවාදී පක්‍ෂයක් කියලා කියනවා.

එතකොට පක්‍ෂය ඇතුළෙ ඉඳගෙන ඒක කියන එක මට හිතෙනවා පිට කට්ටියව පෙන්වනවාට වඩා හොඳයි කියලා. ඉතිං මගේ ව්‍යායාමය කොහොමහරි ආණ්ඩුවට පෙෂර් එක දීලා මේ හොරු අල්ලන වැඩේ සක්‍රීයව කරන්න. මම එදා පාර්ලිමේන්තුවේ කළ කතාවට තමයි මේ දේ වුණේ. 

Q ඔබතුමා පාර්ලිමේන්තුවේදී ප්‍රකාශ කළා අග්‍රාමාත්‍යවරයා එක්සත් ජාතික පක්‍ෂයේ නායකයා වීම තුළ හා ජනාධිපතිවරයා ශ්‍රී ලංකා නිදහස් පක්‍ෂයේ නායකයා වීම තුළ දෙපැත්තේම හොරු ආරක්ෂා වෙනවා කියලා? 

ඒක ඉතිං ජනතාව දරන මතයක්. මම කියන දෙයක් නොවේ. අපේ පක්‍ෂයේ මම තමයි වැඩිපුරම අල්ලස් හා දූෂණ වංචා කොමිසමට ෆයිල් අරගෙන ගියේ. ඉතිං ගමට ගියාම ජනතාව මගෙන් අහනවා කෝ හොරු ඇල්ලුවාද කියලා.

Q ඇත්තටම ආණ්ඩුව ඇතුළෙන් හොරු ආරක්ෂා වෙනවාද?

මෙහෙමයි පසුගිය ආණ්ඩුව එක්ක ගත්තාම අපි හොඳ තැනක ඉන්නවා. 'වෝල්ටර් තල්ගොඩපිටිය' කියලා 1956 දී කොමිසමක් දැම්මා. 1956නෙ බණ්ඩාරනායක මහත්මයා බලයට ආවෙ. එතුමාගේ කැබිනට් මණ්ඩලයේ හිටියා 12 දෙනෙක්. එතකොට එදාත් මේ අපේ ආණ්ඩුවල, ගිය ආණ්ඩුවල හිටියා වගේ වංචා දූෂණවලට අහුවුණා කැබිනට් ඇමතිවරු.

මේ රජය හැමවිටම බෝලේ පාස් කරනවනෙ අපි උසාවියට දානවා, අපි නීතිපතිට දාලා තියෙන්නෙ, නීතිපති දෙපාර්තමේන්තුවේ තමයි ප්‍රමාදය තියෙන්නෙ කියලා. එතකොට නීතිපති එකෙන් කියනවා හරියට නඩුව දැම්මේ නෑ, බ්‍රයිබරි එකෙන් කියනවා අපි නඩුව දැම්මා, අපට පරීක්ෂණ පවත්වන්න තව කල් යනවා කියලා. බරපතළ වංචා විමර්ශන දූෂණ කොමිසම කියනවා අපට ප්‍රතිපාදන නෑ කියලා.

සමහරු කියනවා කාමර නෑ කියලා. සමහරු කියනවා පොලීසියේ නිලධාරීන් නෑ කියලා. තව සමහරු කියනවා බැඳුම්කර විෂයය අලුත් එකක්. ඒ නිසා අලුතෙන් පටන් ගන්න ඕන කියලා. එතකොට දිල්රුක්ෂි වික්‍රමසිංහ මහත්මියයි, වැලිඅමුණ මහත්මයි කියනවා ඩුබායි ගියා, ඒක හරියට හදාගෙන නැහැ, ඩුබායි රජයෙන් ප්‍රතික්‍ෂේප කළා කියලා.

පැනමා සිදුවීම් ගැන, මොරිසස් දූපත්වල බැංකු ගැන, ඩුබායිවල ගිණුම් ගැන මේ සේරම කියනවා විතරයිනෙ. එතකොට බණ්ඩාරනායක මහත්තයලට මේ තාක්‍ෂණය තිබුණෙ නෑනෙ, ඒ කාලෙ. ඒත් මං හිතන්නෙ ඒ අයට උවමනාව තිබුණා. 

පාර්ලිමේන්තුවේදී මම කිව්වේ අපට අවශ්‍ය රොඩ්‍රිගො දුතාර්තෙ වගේ මැතිවරණ පොරොන්දු ඉෂ්ට කරන නායකයෙක් කියලා. ඒක මේ අගමැතිතුමාටවත්, ජනාධිපතිතුමාටවත් අපහාසයක් නොවේ.

පසුගිය ටිකේ රටවල්වල රොඩ්‍රිගො දුතාර්තෙලා, අන්නා හසාරෙලා එතකොට හොඳම උදාහරණය මම කිවුවෙ එදා ආනෝල්ඩ් ඩී. රෝසා කියන කෙනා ඒ කියන්නෙ කියුබානු නිදහස් සටනේ අන්තිමට ඉතුරු වුණු හයදෙනා. ඒගොල්ලො තමන්ගෙ ජනරාල්වරයාට පවා දඬුවම් දුන්නා. 

Q ඒ කියන්නෙ ආණ්ඩුවට අවශ්‍යතාව තියෙනවා නම්, සොරුන් ඇල්ලීම මේතරම් ප්‍රමාද වන්නේ නෑ?

නෑ. කිසිම හේතුවක් නෑ. මේ ජරාජීර්ණ වුණු දේශපාලන ක්‍රමයේ ජ්‍යෙෂ්ඨ නායකයන්ගේ යාළු මිත්‍රකම් තියෙනවා කියලායි ජනතාව කියන්නෙ. අපි හිතමු දේශපාලන ක්‍ෂේත්‍ර‘යේ සහ පාර්ලිමේන්තුවේ අවුරුදු 30ක්, 40ක් හි‍ටියම යාළු මිත්‍රකම් ඇති වෙනවානෙ පක්‍ෂවල. 
මගේ ප්‍රධාන තර්කය වුණේ දැන් කුකුළන් හොරකම් කරපු අහිංසක මිනිහෙකුට අවුරුදු 02කට නඩු තීන්දුවක් දීලා තිබුණනෙ.

පොල් ගෙඩි 06ක් හොරකම් කළාට අවුරුදු එකහමාරක්. නමුත් අපි දන්නවා පසුගිය ටිකේ දේශපාලන පක්‍ෂවල නායකයන්ට ආව චෝදනා කුකුළෙක්, පොල් ගෙඩියක් නොවේ බිලියන ගාණක චෝදනා. ඒවා ඇත්තටම කොමිසමක් දාලා කරන්න පුළුවන් වාර්තාවලින්. හොඳම උදාහරණය තමයි 'වෝල්ටර් තල්ගොඩපිටිය වාර්තාව.'

නාමල් රාජපක්‍ෂ මන්ත්‍රීවරයා වැනි අය දිගින් දිගටම පාර්ලිමේන්තුවේදී පවා ඔබතුමාගෙන් ප්‍රශ්න කළා, චෝදනා කළා රාජපක්‍ෂ ආණ්ඩුවේ ‍හොරු අල්ලන්න උනන්දු වෙනවා වගේම වත්මන් ආණ්ඩුවෙ හොරු ගැනත් සොයා බලන්න කියා. දූෂණ වංචා චෝදනා ඇති විපක්‍ෂයේ ඇතැම් මන්ත්‍රීවරු පවා ඔබතුමා හාස්‍යයට ලක්කළා. දැන් ඔබතුමාගේ පක්‍ෂය ඇතුළෙන්ම විරෝධයක් ඇතිවීමෙන් ජනතාවට හිතෙන්න පුළුවන් නේද යහපාලන රජය සොරුන්ට පක්‍ෂපාතියිද කියලා?

ඔයා ‍ඔහොම කියද්දි මට ඒකට එකඟ නොවී ඉන්න බැහැ. ඒ කියන්නේ මම එක උදාහරණයක් කියන්නම්. මාව හම්බ වෙන්න ආවා කෙනෙක් ගාමිණී සෙනරත්ගෙ හොඳම මිත්‍රයෙක්. එයා ජනවාරි 08ට ඉස්සෙල්ලා බැංකු 04කින් කෝටි 1,200ක් ආපසු අරගෙන තිබුණා.

දවස් දෙකක් ඇතුළත මේ පුද්ගලයාව මම ජනාධිපතිතුමා ගාවටම ගෙනිච්චා. 2015 අගෝස්තු, සැප්තැම්බර් වගේ කාලයේදී . CCTV කැමරාවලින්, ඩිපොසිට්ස් ක්ලිප්ස්වලින් සේරම ඔප්පු වුණා. නමුත් ඒක එහෙම් පිටින්ම යටගියා. 

Q එවැනි අවස්ථාවකදී ඒ සම්බන්ධයෙන් වැඩිදුර විමර්ශනයක් සිදුකරන්න ජනාධිපතිවරයාගේ මැදිහත්වීමක් සිදුවුණේ නැද්ද? 

දැන් ජනාධිපතිතුමත් කියනවානෙ මට නීතිය හා සාමය අමාත්‍යාංශය දෙන්න මාස 03කින් මං අල්ලනවා කියලා. ඉතිං එතැනම තියෙනවානෙ අවුලක්. දැන් එතුමාට කතා කරද්දී එතුමා කියනවා මට ඒ අමාත්‍යාංශය දුන්නොත් මම හොරු අල්ලලා පෙන්වනවා කියලා. මම නොවෙයි මේ කියන්නෙ ජනාධිපතිතුමා කියන්නෙ. රටේ ජනාධිපතිතුමා කියන්නෙ මට දෙන්න අමාත්‍යාංශය මං අල්ලලා පෙන්වන්නම් කියලා.

Q ඔබතුමා පක්‍ෂයෙන් ඉවත් වෙනවාද?

පක්‍ෂ නායකතුමාට අපි යටත්. එතුමාගේ තීරණය අවසාන තීරණය. එතුමාට අභියෝග කරන්න මට බෑ. මම සාමාන්‍ය නියෝජ්‍ය ඇමතිවරයෙක්. අගමැතිවරයාගේ නියෝගයට පිටුපාන්න මට බලයක් නෑ.

Q එතකොට ඔබතුමා ආණ්ඩු පක්‍ෂයෙනුත් ඉවත් වීමක් සිදු වෙනවාද? 

නෑ. මට තනතුර දීලා තියෙන්නෙ ආණ්ඩු පක්‍ෂයෙන්, මම දිවුරුම් දීලා තියෙන්නෙ ජනාධිපතිතුමා ඉදිරිපිට. මම දන්නෙ නෑ එතැනදි නීතිය කොහොමද කියලා. මට මන්ත්‍රී ධුරය දීලා තියෙන්නෙ දෙලක්‍ෂ දහසයදහසක ජනතාව. අංක එකට මනාප ලැබුණෙ මට.

නමුත් පක්‍ෂයේ සාමාජිකත්වය දීලා තියෙන්නෙ අගමැතිතුමා. මන්ත්‍රී ධුරය මට තියෙනවා. මන්ත්‍රී ධුරය දීල තියෙන්නෙ ජනතාව. නමුත් මට නාම යෝජනා දීලා තියෙන්නෙ අගමැතිතුමා.

එතුමා මට තවම ඇමතුමක් දුන්නේ නෑ. සමහර විට විනය කමිටුව මාව කැඳවයි. හැබැයි ඉතිං ඒ කැඳවුවත් පක්‍ෂ දෙකේම අයගේ ෆයිල්ස් ටික මගේ ළඟ තියෙනවා. ඔප්පු කරන්න පුළුවන්. මම නිකන් මේ කියන්නන්වාලේ කියපු දෙයක් නොවෙයි.

ෆයිල්ස් එක්ක සියලුම තොරතුරු මා ළඟ තියෙනවා. ඒ වගේම අවුරුදු දෙකහමාරක් කිට්ටු වෙන්න ආවනේ ආණ්ඩුව බලයට ඇවිල්ලා. ඉතිං ජනතාව බලන් ඉන්නවා, ජනවාරි 08 පොරොන්දු වුණු දේවල්. මම කියපු දේවල්  ඉල්ලා අස්කර ගන්නෙ නෑ, ඒවායේ තොරතුරු මා ළඟ තියෙනවා. 

Q මේ තත්ත්වයත් එක්ක වෙනත් පක්‍ෂයකට සම්බන්ධ වෙන්න ඔබතුමාට ඉල්ලීම් ලැබිල තියෙනවාද මේ වෙනකොට?

අනේ නෑ. පක්‍ෂ මාරුව මම ප්‍රතික්‍ෂේප කරන දෙයක්. නරේන්ද්‍ර මෝදි මහත්මයා කිව්ව දේ තමයි මට කියන්න වෙන්නේ. එතුමාගෙන් ඇහුවනෙ ''ඔබතුමා මේ  ඡන්දෙදි පැරදුණොත් මොකද කරන්නෙ?'' කියලා. එතකොට කිව්වනෙ ''මට තේ කඩේ ජොබ් එක තවම තියෙනවා.'' කියලා. 

Q ඒ කියන්නෙ ඔබතුමා එක්සත් ජාතික පක්‍ෂයේ ඉවත් වුණොත් රඟපෑම කරගෙන ඉන්නවා?

නෑ, නෑ. මම පක්‍ෂ මාරු කරන්නෙ නෑ, ඒය මගේ ප්‍රතිපත්තිය. මට සිනමාවේ ජොබ් එක තවම තියෙනවා. ජනප්‍රියම නළුවා 11 වතාවක් ලැබිලා තියෙනවා. මගේ මේ හැම ව්‍යායාමයක්ම රජය ආරක්ෂා කිරීමට මිසක් රජය විනාශ කිරීමට නොවෙයි. මේ හැම ප්‍රෙෂර් එකක්ම දෙන්නෙ හොරු අල්ලන ක්‍රියාදාමය 'ෆාස්ට් ට්‍රැක්' එකේ යන්නයි. 

Q ඔබතුමා ඔය කතාව අග්‍රාමාත්‍යවරයාට පැහැදිලි කළේ නැද්ද?

එතුමාට පැහැදිලි කරන්න අවස්ථාවක් ලැබුණෙ නෑ. ඒ කියන්නේ මට ප්‍රසිද්ධියේ බැනවැදීමක් විතරයි ලැබුණෙ.(සිනහසෙමින්) මට කරුණු කියන්න අවස්ථාවක් ලැබුණොත් එතුමාට ඒක කියන්න මම මේ ෆයිල්ස් සූදානම් කරගෙන හදාගෙන ඉන්නවා. 

2500ක අපේ ඉතිහාසයේ ජනතාව පාලනය කරන නීතියක් ජනතාව අනුමත කරලා නැහැ

බලහත්කාරයෙන් අතුරුදන් කිරීම්වලින් සියලු තැනැත්තන් ආරක්ෂා කිරීම සඳහා වූ සම්මුති පනත් කෙටුම්පත, අතුරුදන් වූවන් පිළිබඳ කාර්යාලය පිහිටුවීමේ පනත් කෙටුම්පත සහ යෝජිත නව ව්‍යවස්ථාව මගින් රට පවාදීමක් සිදුකරන බවත් මේ හරහා රටේ ආරක්ෂාව දැඩි ලෙස තර්ජනයකට ලක්වී ඇති බවට විවිධ මතවාද ඉදිරිපත්වෙමින් පවතී.

පාර්ලිමේන්තුවේද සංවාදයට ලක්වන මෙම කරුණු පිළිබඳ නිශ්චිත අවබෝධයක් ලබාගැනීමට ජනතා විමුක්ති පෙරමුණේ පාර්ලිමේන්තු මන්ත්‍රී බිමල් රත්නායක මහතා සමග 'අද' සාකච්ඡා කළෙමු.

Q බලහත්කාරයෙන් අතුරුදන් කිරීම වැළැක්වීම සමබන්ධනේ ජවිපෙ අදහස කෙබදුද?

මෙවැනි නීතියක් රටට අවශ්‍යයි කියා ජවිපෙ දකිනවා. මොකද  පසුගිය අවුරුදු හතළිහ ඇතුළත අඩුම වශයෙන් මිනිසුන් ලක්ෂ එක හමාරක්වත් අතුරුදන්වීමට ලක්වී තිබෙනවා. වැඩිම ප්‍රමාණය ශ්‍රී ලංකා රජය මට්ටමින් සිදුවූ අතුරුදන්වීම්.

1971 ,1989 වගේම අවුරුදු තිහක යුද්ධය නිසා ඊට අමතරව යුද්ධය කාලයේ එල්.ටී.ටී.ඊ මැදිහත්වීමෙන් සිදුකළ අතුරුදන්වීම් තිබෙනවා. මේවා සම්බන්ධයෙන් දඬුවම් දෙන්න ලංකාවේ හරියාකාර නීතියක් නැහැ. ඒ නිසා එවැනි නීතියක් අවශ්‍යයි.

එහෙම වුණත් මේ ගෙනවිත් තිබෙන පනත් කෙටුම්පත අතීතයට බලපාන පනතක් නෙවෙයි. අනාගතයට බලපාන පනතක්. අවම වශයෙන් ඒ මට්ටමින් හෝ නීතියක් රටට අවශ්‍යයි.

Q ඔබේ දැක්මට අනුව මේ පනත් කෙටුම්පත තුළ රටට අහිකරදේ ඇතුළත් කර තිබෙනවාද?

පාර්ලිමේන්තුවට ඉදිරිපත් කළ පනත් කෙටුම්පතෙහි කිසිම රටට අහිතකර දෙයක් නැහැ. රටේ ජනතාව අතුරුදන් කරපු පුද්ගලයෝ මිනීමරුවෝ. ඒ මිනීමරුවන්ට දඬුවම් දිය යුතුයි. මිනීමරුවන්ට දඬුවම් දීම රටට අහිතකර වෙන්නේ කොහොමද?.

ඊළඟ දේ තමයි මේ පනත නිසා ලංකා විදේශ රාජ්‍යයක බලපෑමකට ලක්වෙන්නේ නැහැ. යම් කිසි නීතියක් විදේශයන්හිදී වලංගු වෙනවාද නැතිද කියන කාරණය සම්බන්ධයෙන් වන උදර්පණ නීති සම්මුතියක් තිබෙනවා.

වෙනත් රටක අපරාධකරුවෙකු තමන්ගේ රටක සංචාරය කරද්දී අත්අඩංගුවට ගන්න පුළුවන් කියලා යම්කිසි රටක් නීතියක් සම්මත කළොත් එයට විරුද්ධවෙන්න කාටවත් බැහැ. වෙන රටකින් එන ඕනෑම අපරාධකාරයෙක් ලංකාවේදී අත්අඩංගුවට ගන්න පුළුවන් කියලා නීතියක් හදාගත්තොත් ඒක නැහැ කියන්නත් වෙන රටවලට බැහැනේ.

ඒ වගේ මේ පනත නිසා නෙවෙයි දැනටත් සමහර රටවල එවැනි නීති සකස්කර තිබෙනවා. නමුත් මේ පනත නිසා ලංකාවේ චෝදනා ලැබ තිබෙන හමුදා නිලධාරියෙකු හෝ දේශපාලඥයකුට හරි විදේශ රටකදී අත්අඩංගුවට පත්වෙන්න කිසිම අවස්ථාවක් නැහැ. රාජපක්ෂලා හමුදාවට කරපු අපරාධ වහගන්න මේක පාවිච්චි කරනවා.

Q මෙම පනතේ සංශෝධනය විය යුතු කරුණු තිබෙනවාද?

මෙම පනත පාර්ලිමේන්තුව තුළ තවම විවාදයට ගත්තේ නැති නිසා අපි විශේෂයෙන් සංශෝධන සකස් කළේ නැහැ. නමුත් මේ පනතට සංශෝධන ඉදිරිපත් කරන්නට අපි බලාපොරොත්තු වෙනවා . මොකද අතුරුදන් වෙනවා කියන්නේ මැරුවා හා සමානයි. නමුත් ඒ වෙනුවෙන් උපරිම දඬුවම ලෙස මේ පනතේ තිබෙන්නේ අවුරුදු විස්සක සිර දඬුවමක්.

මීනීමැරුම හා සමාන දඬුවමක් එයට ලබාදිය යුතුයි. ඒ වගේම මේ පනතේ දඩය නියම කර තිබෙන්නේ රුපියල් ලක්ෂ පහක් පමණයි. ගංවතුර නිසා ජීවිත හානි වූ විටත් ලක්ෂ විසි පහක් දිය යුතුයි කියා ආණ්ඩුව කියනවා. ඒ නිසා මෙය වැඩිවිය යුතුයි. මේ ආකාරයට  සාධාරණ සං‍ශෝධන ඉදිරිපත් කිරීමට කටයුතු කරනවා.

Q අතුරුදන්වුවන් පිළිබඳ කාර්යාලය පිහිටුවීම සම්බන්ධ පනත් කෙටුම්පත ආණ්ඩුව මුලින්ම ඉදිරිපත් කළේ 2016 වසරේ අගෝස්තු මාසයේදී. වසරකට ආසන්න කාලයක් ගතවුවත් එය ස්ථාපිත කිරීමට නොහැකිවී තිබෙනවා?

මේ පනත සම්මත කළත් එයට ඉදිරිපත් කිරීමට අතවශ්‍ය සංශෝධනයක් තිබුණා. අතුරුදන් වූවන්ගේ කාර්යාලයට දේශීය හෝ විදේශීය ආයතන සමග ගිවිසුම් එළැඹීමට හැකි බව දක්වමින්  පනතේ එක වගන්තියක් තිබුණා. අතුරුදන්වූවන්ගේ ප්‍රශ්නයෙන් දෙපැත්තකින් ගසා කනවා.

මිනිස්සු අතුරුදන් කරපු මිනීමරුවෝ බොරු දේශප්‍රේමී වෙස් අරගෙන මේකට විරුද්ධව කතා කරනවා. ඒවගේම යුද්දෙයි සාමයයි දෙකම විකුණගන කාපු ඇතැම් රාජ්‍ය නොවන සංවිධාක රොත්තක් ලංකාවේ වගේම විදෙස් රටවලත් තිබෙනවා. අතුරුදන් වීම ඔවුන්ට සල්ලි හොයන ව්‍යාපාරයක්. මේ ප්‍රශ්නය පාවිච්චිකරලා කෝටි ප්‍රකෝටි ගණනින් මුදල් හොයන්න ඔවුන් උත්සාහකරනවා.

මේගිවිසුම්වලට එළැඹීමෙන් වෙන්නෙත් එහෙම එකක්. පනත සම්මත කරපු මුල් අවස්ථාවේදී අපි ඒ සංශෝධනය ඉදිරිපත් කළා. එදා රාජපක්ෂ කල්ලිය පාර්ලිමේන්තුව කඩාකප්පල් කරපු නිසා මේ සංශෝධනය සම්මත කරගන්න බැරිවුණා.

පනත සම්මත වුණත් සංශෝධන ඉදිරිපත් කරගන්න නොහැකි වූ නිසා නැවත මෙම සංශෝධන ඉදිරිපත් කිරීමට මාස හයක පමණ කාලයක් ආණ්ඩුව ලබාගත්තා. ආණ්ඩුව කාර්යක්ෂමව කටයුතු කළානම් මාස හතරකින් විතර මේ කටයුත්ක කරන්න තිබුණා.

ඒනිසා තමයි මේ ප්‍රමාදය සිදුවී තිබෙන්නේ. මේ සංශෝධනය ඉදිරිපත් කරන්නට පෙර වුණත් ඒ ආයතනය පිහිටුවීමේ හැකියාව තිබුණා. නමුත් ආණ්ඩුව ඒ දේවල් කළේ නැහැ.  මේ ආණ්ඩුව අලස ආණ්ඩුවක් නිසා තමයි පනත සම්මත වෙලත් කාර්යාලය පිහිටුවීම තවත් කල්දාන්නේ.

Q අතුරුදන්වුවන් පිළිබඳ කාර්යාලයක් පිහිටුවීම ලංකාව වශයෙන් ගත්කල කොපමණ වැදගත්ද?

අපි මේදේවල් කළ යුත්තේ ජිනීවා මානව හිමිකම් කාර්යාලය නිසා නොවෙයි. ජිනීවා මානව හිමිකම් කාර්යාලයට මෙවැනි කරුණු කොන්දේසි වශයෙන් පනවන්නට හැකි වූයේ අපි කළ යුතුව තිබුණු දේවල් නොකරපු නිසයි. අපේ රටේ මිනිස්සු අතුරුදන් වීම ගැන හොයන්න වුවමනාවත් තිබිය යුත්තේ අපේ රටේ මිනිස්සුන්ටද ජිනීවා කාර්යාලයටද.

අපේ පාලකයෝ නොකළවිට තමයි ලෝකෙ පුරාම මිනිස්සු මරණ ඇමෙරිකන් නායකයොයි යුරෝපයේ යුදවාදී නායකයොයි අපිට බලපෑම් කරන්න අවස්ථාව උදාකරගෙන තිබෙන්නේ.

ඒනිසා අපි දකින්නේ රටක ජනතාවගේ අයිතිවාසිකම් කඩවීම සම්බන්ධයෙන් හොයා බලන්න වගවීම තිබෙන්නේ ආණ්ඩුවට. 2009 මැයි 27 යුද්දෙ අවසන් වෙලා සතියකට පසුව ජනතා විමුක්ති පෙරමුණ විදිහට අපි මේ සියලුම කරුණු ලිඛිතව ඉදිරිපත් කළා.

ඒවිදිහට දුරදක්නා නුවණින් කටයුතු කළානම් ජිනීවා කාර්යාලයෙන් අපිට කියන්න දෙයක් නැහැ. කාලයක් ගතවී හෝ මේ කාර්යාලය පිහිටුවීම වැදගත්. 

Q රටට නව ව්‍යවස්ථාවක් අවශ්‍යද?

විශේෂයෙන්ම අපේ රටේ ව්‍යවස්ථාවේ සහ ආණ්ඩුකරණයේ ප්‍රධානම ලක්ෂණය තමයි විධායක ජනාධිපති ක්‍රමය. අපේ මුළු දේශපාලන සංස්කෘතියම සහමුලින්ම වෙනස් කර තිබෙන්නේ මේ විධායක ජනාධිපති ක්‍රමය මත. මේනිසා විධායක ජනාධිපති ක්‍රමය අහෝසි කළ යුතුයි කියා අපේ රටේ පහුගිය අවුරුදු 25 ඇතුළේ ජනවරම් බොහොමයක් ලැබී තියෙනවා.

1994 , 2000 , 2005 , 2010 , 2015 මේ අවුරුදු වල දිගටම ලැබිලා තිබෙනවා. අවුරුදු 25 ක් තිස්සේ ලැබුණු ජනවරම් පහක් නොසලකා හැර ගිහින් තිබෙනවා. රටට ව්‍යවස්ථා සංශෝධනයක් අවශ්‍ය වන පළමුවැනි කරුණු තමයි ඒ කාරණය.

විධායක ජනාධිපති ධුරය අහෝසි කරන රටේ ප්‍රජාත්‍රන්තවාදය මීට වඩා ශක්තිමත් කරන නව ව්‍යවස්ථාවක් අත්‍යවශ්‍යයි කියන මතයේ තමයි ජනතා විමුක්ති පෙරමුණ සිටින්නේ. මැතිවරණ ක්‍රමයේ ආදී සෙසු කරුණුත් එයට ඇතුළත් කළ යුතු වෙනවා. 

Q විධායක ජනාධිපති ක්‍රමය අහෝසි නොකළ යුතු බවට ඇතැම් පාර්ශ්ව කරුණු ඉදිරිපත් කරනවා. විධායක ජනාධිපති ක්‍රමය අහෝසි කළ යුතුයි කියා ඔබ පවසන්නේ ඇයි?

කිසිම සැකයකින් තොරව අපේ රටේ බිහිවූ සෑම විධායක ජනාධිපතිවරයෙකුම ඒකාධිපතියෙකු වුණා. ජේ ආර් ජයවර්ධන, ප්‍රේමදාස, චන්ද්‍රිකා මේ අය ඒකාධිපතියෝ බවට පත් වුණා. මහින්ද රාජපක්ෂ ඒකාධිපතීත්වයෙන් රජ වුණා.

මේ විදිහට ගියොත් මෛත්‍රීපාල සිරිසේන මහත්තයාටත් ඒ යකාට අඳින්න සිදුවෙනවා. අපිට තවත් යක්කු අවශ්‍ය නැහැ. අනිවාර්යෙන්ම ලංකාවේ අස්ථාවරභාවය තමයි විධායක ජනාධිපති ක්‍රමය. මේනිසා නව ව්‍යවස්ථාවක් අත්‍යවශ්‍යයි.

Q විධායක ජනාධිපති ක්‍රමය අහෝසි වුවහොත් රට තුළ ආරක්ෂාව අනතුරට ලක්වීමේ හැකියාවක් තිබෙනවාද?

එහෙම මතයක් එක්කෙනෙක් දෙන්නෙක් කිව්වට මිනිස්සු කෝටි ගණනක් මේ වෙනුවෙන් ඡන්දෙ දීලා තියෙනවානේ. විධායක ජනාධිපති ක්‍රමය එපා කියලා එක්සත් ජාතික පක්ෂය, ශ්‍රී ලංකා නිදහස් පක්ෂය, ජනතා විමුක්ති පෙරමුණ, ටී එන් ඒ සංවිධානය ආදී මේ රටේ සියයට අනූනවයක්ම ඡන්ද දායකයෝ ඇවුරුදු විසි පහක් තිස්සේ මේ කාරණය අනුමත කර තිබෙනවා.

ඕනෑම මතයකට විරුද්ධව දෙන්නෙක් තුන්දෙනෙක් ඉන්නවා. නමුත් ඒකේ ඇති පදනමක් නැහැ. ලෝකයේ රටවල් ආරක්ෂා වෙලා තියෙන්නේ විධායක ජනාධිපති ක්‍රමය නිසා නෙවෙයිනේ. මැදපෙරදිග යුද්ධ කරන ඊශ්‍රායලයේ අගමැති ධුරයක් තිබෙන්නේ. ලංකාවේ උදාරණයක් ගත්තොත් 71 අපේ අරගලය මැඬ පැවැත්වූයේ විධායක ජනාධිපති ක්‍රමයක් තිබිලා නෙවෙයිනේ.

අතිදැවැන්ත රටක් වුණ ඉන්දියාවෙ තියෙන්නෙත් අගමැතිකම යටතෙනෙ. ජනාධිපති ධුරයක් නැතිවුණා කියලා රටේ ආරක්ෂාව නැතිවෙන්නේ නැහැ. ඒක තීරණය වෙන්නේ ආණ්ඩුවෙ දේශපාලන පිළිවෙත මත. ආරක්ෂාව ගැන කතාකරද්දී ලංකාවේ හිටපු විධායක ජනාධිපතිවරු මොනවද කළේ. ජේ.ආර් ජනාධිපතිතුමා ඉන්දියාවට බයවෙලා එල්ටීටීයට උදව් කළා.

ප්‍රේමදාස ජනාධිපතිතුමා එල්ටීටීයට තුවක්කු හා සිමෙන්ති දුන්නා. චන්ද්‍රිකා ජනාධිපතිනිය එල්ටීටීයට සුනාමි සහන මණ්ඩල දුන්නා. මහින්ද රජපක්ෂ ජනාධිපතිවරයා ඡන්දෙ දිනන්න එල්ටීටීයට කෝටි 72 වැඩියෙන් සල්ලි දුන්නා. එහෙම කළෙත් විධායක ජනාධිපතිවරුමනේ.

තමන්ගේ දේශපාලන බලය වෙනුවෙන් විධායක ජනාධිපති ධුරය යොදාගෙන රට පාවාදෙන විදිහෙ වැඩගන්න පුළුවවන් නිසා , එහෙම රට පාවා දෙනකොට ඒක පාලනය කරනන් බැරිනිසාත් තමයි ඊට වඩා අඩු බලයක් සමග පාර්ලිමේන්තුට වගකියන අගමැති ක්‍රමයක් ඇති කළ යුත්තේ.

Q නමුත් මහානායක හිමිවරුන් නව ව්‍යවස්ථාවකට විරුද්ධයි?

ජනාධිපතිවරයා සහ අගමැතිවරයා මේ රටේ සංඝ පරපුරට ව්‍යවස්ථා සම්පාදනයේ තොරතුරු හරි හැටි දැනුම් නොදීම නිසායි ඒ තත්ත්වය ඇතිවෙලා තිබෙන්නේ.

ඒ වගේම රාජපක්ෂ කල්ලිය ඇතුළු ජාතිවාදීන් තමන් දේශපාලන වශයෙන් අනාථ වී තිබෙන නිසා කුමක් හෝ බොරුවක් කියලා රටේ මතයක් ඇතිකරලා තිබීමත් මීට එක් හේතුවක්. ඒවගේම මේ ආණ්ඩුව නංගි පෙන්වලා අක්කා දෙන ආණ්ඩුවක් නිසා උන්නවහන්සේලාට එහෙම හිතෙන එකත් සාධාරණයි.

Q නව ව්‍යවස්ථාවක් සම්පාදනය කරගැනීමට සුදුසුම අවස්ථාව මෙය බව ඔබ පවසන්නේ කුමන කරුණු මතද?

ව්‍යවස්ථා සම්පාදනය සඳහා වර්තමාන ආණ්ඩුවට අවශ්‍ය කරන සම්පුර්ණ පාර්ලිමේන්තු බලය නැහැ. ඒ නිසා පාර්ලිමේන්තුවේ ඉන්න හැම කෙනාටම ඇහුම්කන්දෙන්න මේ පාලනයට සිදුවෙලා තිබෙනවා. ලංකාවේ ව්‍යවස්ථා හදලා තියෙන්නේ 1972 ,1978 විතරයි. ඒ අවස්ථා දෙකෙදීම තුනෙන් දෙක් බලය තිබුණ නිසා කාගෙන්වත් අහන්නේ නැතුව එයාලට අනවශ්‍ය විදිහට ව්‍යවස්ථාව හැදුවා.

නමුත් මේ වෙලාවේ මෛත්‍රීපාල මහත්තයට හෝ රනිල් මහත්තයට අවශ්‍ය විදිහේ ව්‍යවස්ථාවක් හදාගන්න බැහැ. ඒ වෙනෙස ආගමික නායකයෝ තක්සේරු කළ යුතුයි කියලා මම හිතනවා. හොඳම අවස්ථාව තමයි මේ අවස්ථාව.

මේ ව්‍යවස්ථා සම්පාදනය පාර්ලිමේන්තුවේ සියලුම පක්ෂ හවුල්වෙලා සිදුකරගෙන යන දෙයක්. රටේ ජනතාවට සාධාරණ ව්‍යවස්ථාවක්  හදාගන්න තිබෙන අවස්තාව තමයි මේ අවස්ථාව. විධායක ජනාධිපති කියන පිළිකාවෙන් රට ගලවාගන්න තිබෙන අවස්ථාවක්. 

Q නව ව්‍යවස්ථාවෙන් රට දෙකඩවීමක් සිදුවන ලකුණු තිබෙනවාද?

බුදුදහමට තිබෙන තැන අහිමිකරනවා ,රට බෙදන්න යනවා වගේ අමු පට්ටපල් බොරු තක්කඩි ප්‍රකාශ කරනවා වෙනුවට මේ ව්‍යවස්ථා සම්පාදනයේ තිබෙන ඇත්ත අඩුපාඩුකම් විවේචනය කරනවා නම් හොදයි. විය යුත්තේත් එයයි. මහජනතාවට අයිතියක් තිබෙනවා ඒගැන දැනගන්න. ඒවගේම අපේ අවුරුදු 2500ක ඉතිහාසයේ තමුන් පාලනය කරන නීතියක් ජනතාව අනුමත කරලා නැහැ.

ජනතාවගෙන් අනුමත වුණ එකම ව්‍යවස්ථාවක්වත් අපේ රටේ නැහැ. ඒ නිසා මේ ව්‍යවස්ථාවවත් සකසා ගැනීමේ අරමුණු තියාගත යුතුයි. ඒ වගේම මම අභියෝග කරනවා මේ රටේ වගකිවයුතු දේශපාලන පක්ෂයක නායකයෙක්, වගකිවයුතු ආගමික නායකයෙක්, වගකිවයුතු සිවිල් සංවිධාන නායකයෙක් කවුරුන් හෝ ලංකාවේ බුද්ධාගමට හිමි ප්‍රමුඛස්ථානය ඉවත් කළ යුතුය කියා  කතාවක් කරලා තිබෙනවානම් එය පෙන්වලා දෙන්න කියලා මම අභියෝග කරනවා.

එහෙම ප්‍රකාශ කරපු කවුරුත් නැහැ. මේවා දේශපාලන වශයෙන් අනාථ වූ පිරිස් රට තුළ ජාතිවාදය අවුළුවන්න කරන ප්‍රකාශයි.

බලපන්කො මචං දූෂණ මර්දන විමර්ශන කාර්යාලය වහන්න හදනවා

ඩෙංගු රෝගය ශීඝ්‍රයෙන් උත්සන්න වෙමින් පවතින අතර, දසදෙසින් ඩෙංගු රෝගීන් වාර්තා වේ. මේ හේතුවෙන් රජයේ රෝහල් තුළ රෝගීන් බාරගැනීම පවා සීමා කර ඇති අතර, පෞද්ගලික රෝහල් තුළද දැඩි තදබදයක් පවතී.

මේ වනවිට ඩෙංගු රෝගය වසංගත තත්ත්වයක් දක්වා වර්ධනය වී ඇති අතර, ජාතික ව්‍යසනයක් ලෙස සැවොම පිළිගෙන තිබේ. එමෙන්ම ඇතැම් විදෙස් රටවල් සිය රටවැසියන්ට නිවේදනය කර ඇත්තේ ශ්‍රී ලංකාවේ ඩෙංගු රෝගය උත්සන්නව ඇති අතර, සංචාරය කරන්නේනම් සැලකිලිමත් වන ලෙසයි. 

ඩෙංගු රෝගය මර්දනය කිරීමේ යාන්ත්‍රණය ශක්තිමත් කිරීමට රජය තීරණය කර ඇති අතර, ඒ සඳහා රාජ්‍ය ආයතන පෞද්ගලික ආයතන ආරක්ෂක අංශ සහ සියලුම මාධ්‍ය එකම වේදිකාවකට පැමිණ ඩෙංගු මර්දනය කිරීමේ ජාතික යාන්ත්‍රණය ඇරඹීම පැසසිය යුතුය.

ඒ අනුව හෙට (15දා) දිනයේදී රටම පිරිසුදු කරන ජාතික සත්කාරය දියත් කෙරෙන අතර, මේ සඳහා පෞද්ගලික වශයෙන් තම තමන් දායක වීම වැදගත්ය.

පිං පෙට්ටියට සීල් තිබ්බේ අද ඊයේ නොවෙයි

නව ව්‍යවස්ථාව සැකසීම සම්බන්ධ කතාබහ මෙන්ම රංගිරි දඹුල්ල ප්‍රශ්නයද දිග්ගැස්සෙමින් පවතී. සංරක්ෂණ කටයුතු ඉතා ඉක්මනින් සිදුකිරීමට තාවකාලිකව දඹුල්ල විහාරය වසා දැමීමට පුරාවිද්‍යා උපදේශක සභාව තීරණය කළද, කිසිසේත් දඹුල්ල වසා දැමීමට නොදෙන බව එම විහාරාධිපති ඇතුළු සඟ පිරිස දැඩි ලෙස පවසා සිටිති. මේ අතර අගමැති රනිල් පවසන්නේ, දඹුල්ලට ලෝක උරුම තත්ත්වයෙන් ඉවත් වීමට අවශ්‍ය නම්, අස්ගිරි මහානායක හිමියන් සමග සාකාච්ඡා කර තීරණයක් ගන්නා ලෙසයි.

ආණ්ඩුව පන්සලේ පිංකැට සීල් තබන බවට වන කතාවට අටමස්ථානාධිපති පල්ලේගම සිරිනිවාස හිමියන් පිළිතුරක් ලබාදුන්නේ අගමැති රනිල් රුවන්වැලි සෑය වන්දනා කිරීමට ගිය අවස්ථාවේදීය.

''පිං පෙට්ට්වලට සීල් තියෙන කතාවක් ඇහෙනවා. අපේ නම් පිං පෙට්ටිවලට සීල් තිබ්බේ අද ඊයේ නොවෙයි. සිරිමාවෝ බණ්ඩාරනායක මැතිනියගේ කාලේ ෆීලික්ස් ඩයස් බණ්ඩාරනායක මහත්මයා තමයි ඒ කාලෙ පිං පෙට්ටිවලට ඉබ්බො දාලා සීල් තිබ්බේ. එදා ඉඳන් ඉතින් මාස තුනෙන් තුනට මුදල් ගණන් බලලා බෞද්ධ කටයුතු කොමසාරිස්වරයා හරහා බැංකුවේ දාලා ඒවායේ කටයුතු කරගෙන ගියා. මේක අලුත් දෙයක් නොවෙයි.''

සමාව ගන්න නම්, මාසයක් වෙහෙර ශුද්ධ කරන්න

රුවන්වැලි මහා සෑයේ වැලි මළුව ප්‍රතිසංස්කරණය කර සඟසතු කර බාරදෙන අවස්ථාවේ අගමැති රනිල් මල්වතු පාර්ශ්වය දෙකඩ කිරීමේ සිදුවීමක් ගැන පැවසුවේ ඉතිහාස කරුණුද උපයෝගී කරගනිමිනි.

''72 ව්‍යවස්ථාවෙන් බෞද්ධාගමට ප්‍රමුඛ ස්ථානයක් ලබාදෙනවා කියා සඳහන් වුණා. එම ප්‍රමුඛ ස්ථානය ලබාදුන්නාට, බෞද්ධයෝ රට පාලන කළාට ඒ ආරක්ෂාව මීට අවුරුදු පහ හයකට කලින් ලැබුණේ නෑ. තමන්ගේ විරුද්ධවාදියෙකුට දළදා මාළිගාවේ පූජාවක් දෙන්න ඉඩ දුන්න නිසා අපේ මල්වත්තේ මහනායක ස්වාමීන් වහන්සේට තර්ජනය කළා.

මල්වතු පාර්ශ්වය කඩලා අලුත් පාර්ශ්වයක් හදනවා කිව්වා. එදා සන්ධ්‍යාවක මල්වතු විහාරයේ තිබුණු සාකච්ඡාව ගැන මම මේ වෙලාවේ කියන්න යන්නේ නෑ. එය කඩා දමනවා කිව්වා. හරියට මහසෙන් රජ්ජුරුවො වගේ. 

ඒ විතරක් නොවේ. මේ පූජා භූමිය දැන් තියෙන්නේ අටමස්ථානයේ. අපට තියෙන එකම මහා සෑය මේ රුවන්වැලි සෑය. ජේ.ආර්. ජයවර්ධන ජනාධිපතිවරයා එවකට කියා සිටියේ ජේතවනාරාමය, අභයගිරිය මේ තත්ත්වයට ගෙන එන්න එපා. අපි සංරක්ෂණය කරමුයි කියා.

පුරාවිද්‍යාවේ හැටියට විශාල සෑයවල් තුනයි, දෙකක් සංරක්ෂණය කරලා, වන්දනාමාන කටයුතුවලට මහාසෑය වෙන්කළා. අපේ අටමස්ථානේ නායක හාමුදුරුවන්ට කියන්නේ නැතිව මොකද කළේ? තවත් මහා සෑයක් දාන්න ගියා, රුවන්වැලි සෑයටත් වඩා උසින්. ලංකාවේ කොහේවත් බෑ රුවන්වැලි සෑයටත් වඩා උස සෑයක් හදන්න.

ඒක හදලා මොකක්ද කරන්න හිටියේ. අර අලුත් පාර්ශ්වය එතැන්ට දාන්න තමයි හැදුවේ. උසම ස්ථූපය මේකයි කියා ජනතාව ඇවිත් සාධුසාධු කියයි කියලා මේ අය හිතුවා. මේ වගේ දේවල් ලංකාවේ කරන්න බෑ. අන්තිමට මහසෙන් රජ්ජුරුවොන්ට වුණාට වඩා දෙයක් වුණා. සම්පූර්ණයෙන් බලය නැති වුණා. මහසෙන් රජු අවසානයේ කලබල දැකලා එතැනින් අවසන් කර ගත්තා. ගිහින් සංඝයා වහන්සේ මුණ ගැහුණා.

එහෙනම් දැන් අපේ මල්වත්තේ නායක ස්වාමීන් වහන්සේ හමුවෙලා, බැගෑපත්ව බිම වැතිරිලා, ඊට පස්සේ මාසයක් ඉරටු තියෙන කොස්සක් අරගෙන උදේ සවස මල්වතු විහාර භූමිය ශුද්ධ පවිත්‍ර කරන්න ඕනෙ.

ඊට පස්සේ මෙහාට ඇවිත් අටමස්ථාන නායක හාමුදුරුවන් හමුවෙලා, ඒ වගේම වැඳලා මාසයක් තිස්සේ ජය ශ්‍රී මහා බෝධිය වටේ ශුද්ධ කළ යුතුයි. ඊටත් පස්සේ, පල්ලේගම හේමරතන නායක හාමුදුරුවෝ ළඟට ඇවිත් වැඳලා, මාසයක් රුවන්වැලි සෑ මළුව වටේ ශුද්ධ කළ යුතුයි. අන්න එතකොට සමාව දෙන්න පුළුවන්. මෙහෙම තර්ජනය කරලා වැඩකටයුතු කරන්න බෑ.''

ගෝඨා පන්සල්වල

තමන්ව අත්අඩංගුවට ගැනීමේ සූදානම්ක් ඇති බව කියමින් හිටපු ආරක්ෂක ලේකම් ගෝඨාභය රාජපක්ෂ මීට පෙර පිහිට පැතුවේ ශ්‍රේෂ්ඨාධිකරණයෙනි. නමුත් මෙවර එය වෙනස් වී ඇත. තමන්ව ළඟදීම අත්අඩංගුවට ගන්නවා යැයි පවසමින් ගෝඨාභය රාජපක්ෂ නායක හිමිවරුන් දැනුවත් කරමින් විහාරස්ථානවලට යමින් සිටියි.

ඇමති මහින්ද අමරවීර මන්ත්‍රී කණ්ඩායමකට එසේ පැවසූ බව ඔහු පවසයි. මේ අතර මහින්ද අමරවීර පවසන්නේ තමන් එසේ නොකියූ බවය. මන්ත්‍රී කණ්ඩායමට පැවසූ බව පවසමින් ගෝඨාභය මේ පවසන්නේ දේශපාලන උපක්‍රමයක් බවත්, ඔහු කියා තිබිණි.

ඇමති මහින්ද අමරවීරද මෙම ක්‍රියාවෙන් තරමක් තිගැස්සී ඇති හැඩයි. ඒ නිසාම ඔහු පවසන්නේ රාජපක්ෂවරුන්ට සමාව දිය යුතු බවයි. සමාව දිය යුතු බව පවසන ඔහු නොකියා කියන්නේ ඔවුන් වැරැද්දක් කර ඇති බවද?

සමාව දෙන එක කැබිනෙට්ටුවේ වැඩක් නොවෙයි

මේ පිළිබඳ අදහස් දක්වමින් ඇමති රාජිත පවසන්නේ හොරුන්ට සමාව නොදිය යුතු බවයි. සමාව දෙනවා නම් එය උසාවියේ කාරණයක් මිස කැබිනෙට්ටුවේ කාරණයක් නොවන බවද ඔහු පැවසුවේ මෙවර කැබිනට් මාධ්‍ය හමුවට සහභාගි වෙමිනි. වැරදිකරුවන් නිදහස් කරන කැබිනෙට්ටුවක් ලෝකයේ කොහේවත් නැති බවද ඔහු පැවසුවේ ආවේගයෙනි.

දූෂණ මර්දන කමිටු කාර්යාලය පිළිබඳ කතා කරන්නට වෙන නිසාදෝ දයාසිරි ජයසේකර මෙවර කැබිනට් මාධ්‍ය හමුවට සහභාගි නොවුණි. කැබිනට් මාධ්‍ය හමුවට එක්වෙමින් ඇමති රාජිත පැවසුවේ දූෂණ මර්දන කාර්යාලය වසා දමා නොමැති අතර, ජුනි මස 30 වැනිදායින් පසු දීර්ඝ නොකරන බවයි. පැමිණිලි දැමීමට අවශ්‍ය නම්, තවත් ආයතන 14ක්ම තිබෙන බවද ඔහු පැවසීය.

වැහුවට කමක් නැහැ හැබැයි පරීක්ෂණ ටික නවත්වන්න බැහැ

පළාත් පාලන මැතිවරණය සහ මැතිවරණ ක්‍රමය වෙනස් කිරීම සම්බන්ධයෙන් පක්ෂ නායකවරුන්ගේ රැස්වීම පැවැත්වුණේ පාර්ලිමේන්තු සංකීර්ණයේදීය. එම සාකච්ඡාවෙන් පසු එයට සහභාගි වූ ඇමති රිසාද් බදියුදීන් සහ මන්ත්‍රීවරුන් වන දිනේෂ් ගුණවර්ධන, අනුර දිසානායක කතාබහ කරමින් පිටතට පැමිණි අතර අනුර දිසානායක රිසාද්ගේ පිටත තට්ටු කර පැවසුවේ,

''බලපන්කො මචං, දූෂණ මර්දන විමර්ශන කාර්යාලය වහන්න හදනවා. ඒක වැහුවට අවුලක් නැහැ. ඒ වුණාට පරීක්ෂණ ටික නතර කරන්නෙ නැතුව යන්න ඕන.'' යනුවෙනි. අනුර එසේ කියන විට දිනේෂ්, අනුර සහ රිසාද්ට මුවාවී රහසක් පැවසූ අතර, ඔවුන් දෙදෙනාම එය අසා මද සිනහ පළ කළේය. රිසාද් බදියුදීන්ට විරුද්ධවද මෙම කාර්යාලය මගින් විමර්ශනයක් කිරීම විශේෂත්වයකි.

හැමෝම එකට

'සත්හඬ' පුවත්පතේ සමකර්තෘව සිටි අභාවප්‍රාප්ත ප්‍රභාත් වීරරත්නගේ අවසන් කටයුතු සඳුදා දිනයේදී සිදුකෙරුණු අතර, මේ සඳහා දේශපාලන ක්‍ෂේත්‍රයේ කතාබහට ලක්වන චරිත බොහොමයක් සහභාගි වී තිබිණි.

ඇමති දුමින්ද දිසානායක, ශිරාල් ලක්තිලක, අශෝක අබේගුණවර්ධන, දීප්ති කුමාර ගුණරත්න, ඩිලන්ත කුමාර විතානගේ, නිශාන්ත වර්ණසිංහ, ගාමිණී වියන්ගොඩ, මන්දනා ස්මයිල් ආදී වත්මන් රජය බලයට පත්කිරීමට දායක වූ අය මෙන්ම රජයයට විරුද්ධ පිරිස් මෙහිදී එක්ව සිටීම විශේෂත්වයක් විය. තම දේශපාලන මතවාද වෙනුවෙන් දිවිපුදා කටයුතු කරන මොවුන් පෞද්ගලික ජීවිතයේදී කොතරම් සමීපද යන්න මෙහිදී බොහෝ දෙනාගේ සාකච්ඡාවට ලක්විය.

අපි බලමු තව කොච්චර කල් මේ විදියට ආණ්ඩු කරාවිද කියලා 

ඒකාබද්ධ විපක්ෂය විසින් ආණ්ඩුවට එරෙහිව ගොවීන් සංවිධානය කිරීමටද අවධානය යොමුකර තිබේ. ඒ අනුව  විමලවීර දිසානායක අම්පාර දිස්ත්‍රික්කය පුරා සිටින ගොවීන් එකතු කරගනිමින් ගොවි සංවිධාන පිහිටුවීම ආරම්භ කර කළේය. හිටපු ඇමති බැසිල් රාජපක්ෂගේ ආශීර්වාදයද මේ සඳහා ලැබී තිබේ.

මේ සතිය මුලදී දෙහිඅත්තකණ්ඩියේ ගොවීන් පිරිසක් හමුවී ගොවි සංවිධානයක් පිහිටවූයේ ඒ අනුවය. වී ඇතුළු බෝග වර්ගවල නිරත ගොවීන් 300ක් පමණ මෙම ගොවි සංවිධානයට සම්බන්ධ වූහ.

පොහොර මිල ඉහළ යෑම, අස්වනු විකුණාගත නොහැකිවීම, ජල ප්‍රශ්නය, පොහොර සහනාධාරය නොලැබීම, ඉදිරියේදී ඉදිකිරීමට යන සීනි කර්මාන්ත ශාලාවට විරුද්ධ වීම යන කරුණු ඔස්සේ උද්ඝෝෂණ මාලාවක් සංවිධානය කිරීමද මෙම ගොවි සංවිධාන පිහිටුවීමේ අරමුණු අතර වෙයි. දෙහිඅත්තකණ්ඩියේ ගොවි සංවිධානය පිහිටුවීමට පැමිණි අවස්ථාවේදී ගොවීන් පිරිස සඳහන් කළේ,

''සර් මේ ආණ්ඩුවෙන් කිසිම ගොවි සංවිධානයකට සැලකිල්ලක් නෑ. ගොවියන්ට සැලකිල්ලක් නැහැ. අපිට ජීවත් වෙන්න විදියක් නැහැ.'' යනුවෙනි. 

මේ අතර පසුගිය යුද සමයේදී ඉඩම් අතහැර ගොස් සිටි ගොවීන් පිරිසක් නැවත වගාකිරීම් කරන්න යාමේදී මතුව ඇති ගැටලු කිහිපයක්ද මන්ත්‍රිවරයාට ඉදිරිපත් කළහ.

''අපිට පසුගිය ආණ්ඩුව කාලයේදී වගාවක් කරගෙන ඉන්න ලැබුණා. ඒත් මේ ආණ්ඩුව කාලයේදී අපි එළවලා දැම්මා. මඩකලපුව දිස්ත්‍රික්කයේ සිටින දේශපාලන නායකයන්ගේ හරක් දහස් ගාණක් අපේ ඉඩම්වලට ගෙනල්ලා දාලා තිබෙනවා. මේ නිසා අපේ වගා සේරම විනාශ වෙලා ගිහින්'' යනුවෙන් ගොවීහු පෙන්වා දුන්හ.

''අපි සියලුම දෙනා එකතුවී විරෝධය පළ කරලා මේ ප්‍රශ්නය ඉහළට අරන් යන්න ඕන. අපි එකාවන්ව හිටියොත් එයාලට මුකුත් කරන්න බැහැ. අපි බලමු තව කොච්චර කල් මේ විදියට ආණ්ඩු කරාවිද කියලා.'' යනුවෙන් විමලවීර මන්ත්‍රීවරයා ගොවින් හමුවේ සඳහන් කළේය.

ජනතා මුදල් කොල්ලකාපු අය පැත්තක

දූෂණ මර්දන කමිටු ලේකම් කාර්යාලයේ නිල කාලය පසුගිය ජුනි 30 වැනිදා සිට අවසන්වීමත් සමග කාලය දිගු නොකළ ආණ්ඩුව එය වැසී යන තත්ත්වයට පත්කිරීමට කටයුතු කළේය. මේ සම්බන්ධයෙන් ජවිපෙ නායකයන්ද විශේෂ අවධානයක් යොමු කළේය. 

“මෛත්‍රීපාල සිරිසේන පොදු අපේක්ෂකයා වෙනකොට රටේ ප්‍රධාන මාතෘකාව වෙලා තිබුණෙ වංචා දූෂණ. වංචා දූෂණවලට තිබුණු ජනතා විරෝධය තමයි එතුමා ජනාධිපති බවට පත්කළේ. ජනතා ඉල්ලීමට අනුවම තමයි දූෂණ මර්දන කමිටු ලේකම් කාර්යාලයත්, එෆ්.සී.අයි.ඩී.යත් හැදුවේ. අද ජනාධිපතිතුමාටත් ඒක අමතක වෙලා, කනගාටුවට කරුණ ඒකයි” විජිත හේරත් කීවේය. 

“රාජපක්ෂලාගේ වංචා දූෂණ ගැන කතාකරන කොට මේ ආණ්ඩුවේ ඇමතිවරුත් ලොකු තල්ලුවක් ඒකට දුන්නා. ඒත් පසුගිය ආණ්ඩුවේ හොරු ටිකත් ජනාධිපතිතුමා තමන්ගේ ඔඩොක්කුවේ දාගත්තට පස්සේ එයාලගේ කටවල් හිරවුණා” සුනිල් හඳුන්නෙත්ති කීවේය. 

“මේ ආණ්ඩුවේ රාජිතට, රවිට, අනුර යාපාට, නිමල් සිරිපාලට, හැරිසන්ට, බෝගොල්ලාගමට, අකිලට, එස්.බී.ට එරෙහිව මේ කාර්යාලයට පැමිණිලි ආවා. ඒවා විමර්ශනය පටන් ගන්න නිසා කට්ටියම එකතු වෙලා මේක වහන්න තීරණයක් ගත්තා. එකයි ඇත්ත” වසන්ත සමරසිංහ පවසා සිටියේය.

“ආණ්ඩුව මේකට ගොතන කතාව තමයි මිලියන ගාණක් මේ කාර්යාලයට වියදම් කළත් වැඩක් වුණේ නැහැ කියන එක. ඒක රාජිතලගේ මෛත්‍රීපාල සිරිසේනලගේ නොදන්නාකම. කොහොමත් ජනාධිපතිතුමා රාජිතගේ ලණු කාලා වැඩ අනාගන්නවා.

මේ කාර්යාලයට මේ වෙනකොට වියදම් කරලා තියෙන්නේ මිලියන 32ක් විතරයි. ඒත් දැනටත් මිලියන ගාණක් හොරුන්ගෙන් අයකර ගෙන තියෙනවා. සී.එස්.එන්. එකෙන් විතරක් මිලියන 159ක්. බැසිල්ගේ මල්වානේ නිවස මිලියන 300ක්. ඩී.ඒ. රාජපක්ෂ පදනමට ආණ්ඩුවෙන් වියදම් කරපුවා මිලියන 25ක් අයකර ගත්තා. නාමල්ලා, බැසිල්ලා, වීරවංශලා ගුවන්ගමන් වෙනුවෙන් කළ වියදමෙන් මිලියන 16ක් අයකර ගත්තා.

මේ ටික විතරක් මිලියන පන්සියයක් විතර. තව අයකර ගන්න තියෙනවා. එතකොට මේ ආණ්ඩුවේ ඇමතිවරු ගසාකාපු ඒවා තවත් මිලියන ගාණක්. වියදම ගැන කතා කරන රාජිත ඒවා ගැන දන්නේ නැද්ද?” විජිත හේරත් පවසා සිටියේය. 

“දූෂණ මර්දන ලේකම් කමිටුවට පැමිණිලි 1100කට වඩා ලැබිලා තියෙනවා. මේවා විමර්ශනය කරන්න තියෙද්දි කාර්යාලය වහනවා. මේක වහලා දැම්මා කියන්නේ එෆ්.සී.අයි.ඩී.යත් වහලා දැම්මා වගේ. මොකද පැමිණිලි බාරගන්න තැනක් නැහැ. ජනතා මුදල් කොල්ල කාපු අය පැත්තක. අද දූෂණ ගැන හොයපු නිලධාරීන් වැරදිකරුවන් කරන්න මේ ආණ්ඩුව හදන්නේ” සුනිල් හඳුන්නෙත්ති කියා සිටියේය.

සදා කෝකිල ජෝතිගම

එච්.ආර්. ජෝතිපාල ප්‍රවීණ ගායන ශිල්පියාගේ අභාවයට තිස් වසරක් සපිරීම නිමිත්තෙන් නිවාස 39කින් සමන්විත 'සදා කෝකිල ජෝතිගම' සඳහා සජිත් අතින් මුල්ගල් තැබුණේ හම්බන්තොට 'සිරිබෝපුර'දීය. මෙය ජනාධිපතිවරයාගේ සංකල්පයක් මත ඉදිකෙරන 'ග්‍රාම ශක්ති' වැඩපිළිවෙළේ ප්‍රථම ගම්මානයද වෙයි. 

මෙම ගම්මානය ජෝතිපාල කලාකරුවා නමින් නම් කිරීමට උත්සවයට පැමිණ සිටි රජයේ නිලධාරීන්ගේ විශේෂ ප්‍රශංසාවට ලක්විය.

''අවසන් වරට කතරගම ගම්උදාවට ඇවිත් ජෝති සින්දු කිව්වා අපි කාටත් මතකයි. එතුමා අපේ තාත්තා ඉතා ආදාරය කළ කලාකරුවෙක් වගේම ගම්උදාව වැඩසටහන්වලට ලොකු ශක්තියක් ලබාදුන් කෙනෙක්. මගේ තාත්තා 'කලා පුරය' නිර්මාණය කළෙත් ජෝතිගේ යෝජනාවකට අනුවයි.

'ජගත් නිවාස වසර' නිල වැඩසටහනටත්, ජෝතිගේ අකල් මරණයටත් වසර 30ක් සපිරෙනවා. සැඟවුණු හැකියාවන් ඇතිව සිටින ප්‍රාදේශීය කලාකරුවන් වෙනුවෙන් සෑම දිස්ත්‍රික්කයකම කලා ගම්මාන පිහිටුවා එම වැඩපිළිවෙළ තවදුරටත් ව්‍යාප්ත කිරීමටයි අපේ බලාපොරොත්තුව'' සජිත් කීවේ සිය මතකයද අවදි කරමිනි.

සමන්ත කපලා

බදුල්ල දිස්ත්‍රික්කයේ ජනතාව උමා ඔය ව්‍යාපෘතිය දැන් හඳුන්වන්නේ 'බහු විනාශකාරී ව්‍යාපෘතිය' ලෙසය. එම ව්‍යාපෘතිය හේතුවෙන් මේ වනවිට ඒ අවට ප්‍රාදේශීය ලේකම් කොට්ඨාස ගණනාවක ජනතාව විශාල පීඩාවකට පත්ව සිටිති. සිය එදිනෙදා ජීවිතය පවත්වා ගෙන යෑම සඳහා අවශ්‍ය වතුරද, සිය ගෙවල් දොරවල්ද පාසල් ඇතුළු පොදු ස්ථානද එම ප්‍රදේශවල ජනතාවට අහිමි වෙමින් තිබේ.

මේ පීඩනය හේතුවෙන්ම පසුගියදා දසදහස් ගණනින් බණ්ඩාරවෙලට පැමිණි ජනතාව හර්තාල් ව්‍යාපාරයක්ද දියත් කළහ. මේ නිසා ජනාධිපතිවරයාට ඇමති අනුකමිටුවක් පත්කිරීමට සිදුවුවද, කමිටුවෙන් මේ වනවිට සිදුවෙමින් තිබෙන්නේ කළ යුතු දේ වෙනුවට ජනතා අයිතීන් වෙනුවෙන් මුලසිටම පෙනී සිටි ජනතා සංවිධානය නොසලකා ආණ්ඩුවට හිතවාදී සංවිධාන සමග සාකච්ඡා පැවැත්වීම බව උමා ඔය බහු විනාශකාරී ව්‍යාපෘතියට එරෙහි ජනතා පෙරමුණේ නායකයන්ට දැනගන්නට ලැබී ඇත. 

ඇමති කමිටුවේ සාමාජිකයෙකු වන මහින්ද අමරවීර  අමාත්‍යවරයා පසුගියදා බණ්ඩාරවෙලට ගිය අවස්ථාවේ උණුසුම් තත්ත්වයක් ඇතිවූ අතර ජනතාවගෙන්ද විරෝධයක් එල්ල විය. පසුව අමාත්‍යවරයා මාධ්‍ය ඔස්සේ කියා සිටියේ ජවිපෙ සමන්ත විද්‍යාරත්න නිසා තමන් ජනතාව වෙනුවෙන් ලබාදීමට ගිය සහන සියල්ල ලබාදෙන්නට නොහැකි වූ බවයි.

මේ අතර මහින්ද අමරවීර ඇමතිවරයා බ්‍රහස්පතින්දා උමා ඔය සම්බන්ධයෙන් සාකච්ඡා කිරීමට විශේෂ රැස්වීමක් කොළඹදී සංවිධානය කළේය. නමුත් එම රැස්වීමට උමා ඔය බහු විනාශකාරී ව්‍යාපෘතියට එරෙහි ජනතා පෙරමුණට ආරාධනා කර නොමැත. ඒ වෙනුවට ස්වාමීන් වහන්සේ කිහිප නමකට ආරාධනා කර තිබේ. 

“අපේ සංවිධානයට කතා කරන්නේ නැතිව ඇමතිතුමා අපි ටික දෙනෙක්ට කතා කරලා තියෙන්නේ මන්ත්‍රීතුමා මේකෙන් කපන්න. අපිට පෞද්ගලිකව ආරාධනා කරලා වැඩක් නැහැ. අපි ජනතාව වෙනුවෙන් සංවිධානයක් නියෝජනය කරන්නේ. අපේ සංවිධානයට ආරාධනා නැති නිසා අපි යන්න ඕන නෑ” ස්වාමීන් වහන්සේලා සමන්ත විද්‍යාරත්නට මේ බව සැලකරමින් කියා සිටියහ. ඒ අනුව ඇමතිවරයාට හිතවත් සංවිධාන කිහිපයක් සමග සාකච්ඡාව සිදුකිරීමට සැලසුම් කර තිබූ බව වාර්තා වේ.

මංගල්ලෙට වඩා දිනේෂ්ගේ වැඩේ ලොකුයි

ඒකාබද්ධ විපක්ෂයේ නායක දිනේෂ් ගුණවර්ධන බරපතළ දූෂණ සෙවීමේ ජනාධිපති විශේෂ විමර්ශන කොමිෂන් සභාවට සඳුදා කැඳවා තිබුණේ පසුගිය රජය සමයේදී අම්පාර ජල ව්‍යාපෘතියක් සිදුකිරීමේදී සිදුව ඇතැයි කියන මූල්‍ය වංචාවක් සම්බන්ධයෙන් ප්‍රකාශයක් ලබාගැනීමටය.

එම අවස්ථාවට සහභාගි වීමට පෙර දිනේෂ් කොළඹ 07, බණ්ඩාරනායක සම්මන්ත්‍රණ ශාලාව ඉදිරිපිට පිහිටි ඇල්ලේ ගුණවංශ හිමියන්ගේ විහාරස්ථානයට පැමිණියේය. දිනේෂ් පැමිණෙන විට බන්දුල ගුණවර්ධන, සිසිර ජයකොඩි, ගාමිණී ලොකුගේ බැසිල් රාජපක්ෂ, ජී.එල්. පීරිස්, ගීතාංජන ගුණවර්ධන සමග නීතිඥ කණ්ඩායමක් විහාරස්ථානයට පැමිණ සිටියහ.

''පුදුම විදියේ බියගුළු වැඩපිළිවළක් රටේ තියෙන්නේ. මේවා තනිකරම පළිගන්න කරන දේවල්. රටේ කිසි ප්‍රශ්නයක් විසඳන්නේ නැහැ. මේවාට විරුද්ධව ඕනෑම වේදිකාවක නගින්න මම සූදානම්*‘ ඇල්ලේ ගුණවංශ හිමියෝ දිනේෂ් සමග කතාකරමින් සිටියදී පැවසූහ. අනතුරුව බණ්ඩාරනායක සම්මන්ත්‍රණ ශාලාවේ පිහිටුවා ඇති ජනාධිපති විශේෂ විමර්ශන කොමිෂන් සභාවට දිනේෂ් ගියේය.

ඔහු සමග මන්ත්‍රී පිරිස සහ නීතිඥ කණ්ඩායමද ගියහ.  ඒ වනවිත් හිටපු ජනාධිපති මහින්ද රාජපක්ෂ එම ස්ථානයට පැමිණ සිටියේය. ''විශේෂ මංගල උත්සවයකට සහභාගි වෙලා අත්සන් කරන්න තියෙද්දි තමයි දිනේෂ් වෙනුවෙන් මං මෙතැනට ආවේ. මඟුල් ගෙදර අත්සන් කරන්නෙ නැතිව කලින්ම ආවේ දිනේෂ්ගෙ වැඩේ ඊට වඩා ලොකු නිසා'' සිනාසෙමින් මහින්ද කීවේය.

''මේ අයට දැන් මේවා තමයි හොයන්න තියෙන්නේ. බලන්න නියඟයෙන් මිනිස්සු දහස් ගාණක් අනාථ වෙලා. ගංවතුරෙන් අනාථ වුණු මිනිස්සුන්ට තාම සහන නැහැ. ඩෙංගු ලෙඩ්ඩුන්ගෙන් ඉස්පිරිතාල පිරිලා. කිසිම ප්‍රශ්නකට විසඳුම් නැහැ.

ආර්ථිකය හරිම අමාරුවෙන් මිනිස්සු ගෙනියන්නේ.'' දිනේෂ් සමග කතාකරමින් සිටියදී මහින්ද වැඩිදුරටත් කීවේය. කොමිසමේ නිලධාරීන් විසින් දිනේෂ්ගෙන් පැය දෙකක ප්‍රකාශයක් සටහන් කර ගත්තේය. අම්පාර ජල ව්‍යාපෘතියට අනුමැතිය දුන්නේද නැද්ද කියා දිනේෂ්ගෙන් විමසා තිබිණි. ‍

මේ අතර හිටපු ආරක්ෂක ලේකම් ගෝඨාභය රාජපක්ෂ මහතාද ප්‍රකාශයක් ලබාදීම සඳහා එම අවස්ථාවේම ජනාධිපති විශේෂ විමර්ශන කොමිෂන් සභාවට පැමිණ සිටියේය. කන්කසන්තුරේ සිමෙන්ති කම්හලේ අබලි ද්‍රව්‍ය විකිණිමේදී සිදුව ඇතැයි කියන වංචාවක් සම්බන්ධ ගෝඨාභය කැඳවා තිබිණි.

දිනේෂ් ප්‍රකාශය දෙන අවස්ථාවේදී ඊට යාබද කාමරයක ගෝඨාභය සිටි අතර, ඔහු කලින් ලබාදී තිබූ ප්‍රකාශයක් සත්‍ය බවට සාමාන විනිශ්චයකාරවරයෙකු ඉදිරියේ තහවුරු කර විනාඩි 10කින් පමණ පිටව ගියේය. දිනේෂ්ගේ සහායට පැමිණි මන්ත්‍රීවරුන් ගෝඨාභය ප්‍රකාශයක් ලබාදීමට පැමිණෙන බව නොදැන සිටියහ.

මේ අවස්ථාවේදී ගෝඨාභය පැමිණි කාරණය කුමක්දැයි විමසීමට දිනේෂ් සමග පැමිණි මන්ත්‍රී පිරිසට වුවමනා වූ අතර, ඔවුහු ගෝඨාභය සිටි කාමරය දෙසට ගියහ. ගෝඨාභය එළියට පැමිණ මන්ත්‍රීවරුන් සමග සුහදව කතාකර මාධ්‍යයටද ප්‍රකාශයක් ලබාදී පිටත්ව ගියේය.

මැතිවරණය ඉක්මනින්ම

පළාත් පාලන මැතිවරණය සඳහා සූදානම් වන ලෙස අගමැති රනිල් සිය පක්ෂයට උපදෙස් ලබාදී තිබේ. මැතිවරණය සම්බන්ධයෙන් අරලියගහ මන්දිරයේ සඳුදා පැයක සාකච්ඡාවක් පැවැති අතර, ඇමතිවරුන් වන මනෝ ගනේෂන්, ෆයිසර් මුස්තාෆා, ලසන්ත අලගියවන්න, අජිත් පී. පෙරේරා, මන්ත්‍රීවරුන් වන අනුර කුමාර දිසානායක, සුමන්දිරන් එහිදී අග්‍රාමාත්‍යවරයා හමුවූහ. මැතිවරණය කඩිනමින් පැවැත්විය යුතු බව ඔවුන්ගේ දැඩි ස්ථාවරය විය.

තීරණාත්මක හමුවක් 

එක්සත් ජාතික පක්ෂයේ කෘත්‍යාධිකාරී මණ්ඩලයේ තීරණාත්මක රැස්වීමක් අද (14දා) සිරිකො‍ෙතදී පැවැත්වීමට නියමිතය. පළාත් පාලන මැතිවරණය පැවැත්වීම සම්බන්ධයෙන් මෙන්ම 77 ජයග්‍රහණයට වසර 40ක් පිරීම, අගමැති රනිල්ගේ පාර්ලිමේන්තු ගමනේ වසර 40ක් සැමරීම, යහපාලන ආණ්ඩුවට වසර 02ක් සපිරීම සම්බන්ධයෙන් මෙහිදී සාකච්ඡා කිරීමට නියමිතය. මෙම සියලු ජයග්‍රහණ සමරා දිස්ත්‍රික්ක සියල්ල නියෝජනය වන පරිදි ජාතික සංවර්ධන ප්‍රදර්ශනයක් පැවැත්වීමට එජාපය තීරණය කර ඇත.

මෙහෙයුම් කමිටුවෙන් ඉවත් නොවන ඒකාබද්ධය 

ආණ්ඩුක්‍රම ව්‍යස්ථා සම්පාදන මෙහෙයුම් කමිටුවෙන් ඉවත්විය යුතු බවට ඒකාබද්ධ විපක්ෂයේ පසුගිය කණ්ඩායම් රැස්වීමේදී  තීරණයක් ගෙන තිබුණද මේ දක්වා ඔවුන්ගේ නියෝජනය ඉවත්  කර නොගැනීම සම්බන්ධව ඒකාබද්ධ විපක්ෂයේ දේශපාලන පක්ෂ එකිනෙකාට චෝදනා කරගන්නා තත්ත්වයක් නිර්මාණය වී තිබේ.

හිටපු ජනාධිපති මහින්ද රාජපක්ෂ විසින් මන්ත්‍රී කණ්ඩායමට යෝජනා කර තිබුණේ මෙහෙයුම් කමිටුවෙන් ඉවත් වීමට  ඒකමතික තීරණයක් ගතයුතු බවයි. ජාතික නිදහස් පෙරමුණේ මන්ත්‍රීවරුන් පස්දෙනා කලින්ම මෙම ක්‍රියාවලියෙන් ඉවත් වී තිබුණි. එහෙත් දිනේෂ් ගුණවර්ධන, ප්‍රසන්න රණතුංග යන මන්ත්‍රීවරු තවමත් එම කමිටුව නියෝජනය කරති.

ආණ්ඩුක්‍රම ව්‍යවස්ථාව කෙසේ සකස් කරන්නේදැයි දැනගැනීමට අවශ්‍ය බැවින් මේ දක්වා ඉවත් නොවුණු බව පැවසේ. ඒකාබද්ධ විපක්ෂයට අයත් පක්ෂ නායකයන් වන  මහජන එක්සත් පෙරමුණේ දිනේෂ් ගුණවර්ධන,පිවිතුරු හෙළ උරුමයේ උදය ගම්මන්පිල, ලංකා සම සමාජ පක්ෂයේ තිස්ස විතාරණ යන මහත්වරුන් ආණ්ඩුක්‍රම ව්‍යවස්ථා සම්පාදන ක්‍රියාවලියෙන් ඉවත් නොවීමට තීරණය කර ඇතැයි වාර්තා වෙයි.

මේ හේතුවෙන් ඒකාබද්ධ විපක්ෂයට එක් ස්ථාවරයක සිට ආණ්ඩුක්‍රම ව්‍යවස්ථා සම්පාදන ක්‍රියාවලියෙන් ඉවත්වීමට නොහැකි වී තිබේ. නව ආණ්ඩුක්‍රම ව්‍යවස්ථාවට විරුද්ධව ප්‍රසිද්ධියේ අදහස් පළ කළද දිනේෂ්, ගම්මන්පිල, තිස්ස එම ක්‍රියාවලියෙන් ඉවත් නොවී සිටීම පිළිබඳව ජාතික නිදහස් පෙරමුණේ මන්ත්‍රීවරුන්ගේ නොසතුට පළවී ඇතැයිද වාර්තා වෙයි.

එම පක්ෂයේ මන්ත්‍රීවරුන් විසින් පැවැත්වූ සාකච්ඡාකදී විමල් වීරවංශ මහතා සඳහන් කර ඇත්තේ මුල් අවස්ථාවේදීම තම පක්ෂයේ මන්ත්‍රීවරුන් පස්දෙනා ඉවත් වුවද ඒකාබද්ධ විපක්ෂයේ අනෙකුත් මන්ත්‍රීවරුන්ට එම කැපකිරීම කළ නොහැකිවීම ප්‍රශ්නකාරී බවයි.

මලික් ගැන එජාපයේ කසු කුසුවක්

එක්සත් ජාතික පක්ෂ සභාපති, ඇමති මලික් සමරවික්‍රමගේ ක්‍රියාකලාපයන් පිළිබඳ පක්ෂයේ සමාජිකයන් මෙන්ම බොහෝ දෙනෙක් කලකිරී සිටිති. ආණ්ඩුවේද බොහෝ දෙනා ප්‍රසිද්ධියේ නොකියුවද, ඔවුහු කලකිරුණු ස්වභාවයෙන් කතා කරති.

ජන පදනම හෝ දේශපාලන පක්ෂයක ඉදිරිය පිළිබඳ කිසිවක් තේරුම් නොගෙන ඔහු කටයුකු කිරීම තුළ පක්ෂ අභ්‍යන්තරයේද පිටතද දැවැන්ත අර්බුද නිර්මාණය වී ඇත. එක්සත් ජාතික පක්ෂයෙ නිලධාරීන් පිරිසක් හමුවූ ආණ්ඩුවට හිතවාදී පිරිසක් පසුගියදා පවසා සිටියේ, 
''මලික් සමරවික්‍රම ගැන තීරණයක් ගත්තෙ නැතිනම් යූ.ඇන්.පී.යට ඉදිරි ගමනක් නැහැ. දැන් එයා සම්පූර්ණයෙන්ම අගමැති පාලනය කරනවා. මෙහෙම ගියොත් ආණ්ඩුවටයි, පක්ෂයටයි දෙකටම ඉදිරි ගමනක් නැතිවෙවි. එයා සභාපති නේද?'' යනුවෙනි.

දියවන්නාරාළ විසිනි
diyawannarala@gmail.com

චාලි ඔස්ටින් වැඩ කරන්නේ මට

දිනෙන් දින පුවත් මවමින් ශ්‍රී ලංකා ක්‍රිකට් මේ දිනවල ගතකරන්නේ සංක්‍රාන්ති කාලසීමාවකි. ක්‍රීඩක කළමනාකරුවෙකු වන 'චාලි ඔස්ටින්' මෙරට ක්‍රිකට් ක්‍රීඩාවට බලපෑම් කරන බවට සමාජ මාධ්‍ය හෙළිදරව් කිරීම ඒ අතරින් ප්‍රධාන තැනක් ගත්තේය. කෙසේ නමුත් මෙම හෙළිදරව් අතර කවුරුත් පුදුමයට පත්වූ කරුණක් වූයේ, හිටපු ශ්‍රී ලංකා ක්‍රිකට් නායක කුමාර් සංගක්කාරගේ නමද ඇඳා මෙම පුවත් නිර්මාණය වීමයි. මෙම සියලු කරුණු මුල්කරගනිමින් කුමාර් සංගක්කාර විසින් කරුණු පැහැදිලි කිරීමක් හා ශ්‍රී ලංකා ක්‍රිකට් කණ්ඩායම සම්බන්ධයෙන් අදහස් දැක්වීමක් ස්කයිප් තාක්‍ෂණය ඔස්සේ එංගලන්තයේ සිට ඊයේ (12දා) සිදුකළේය.

Q කුමාර් ඔබ කොහොමද දකින්නේ ශ්‍රී ලංකා ක්‍රිකට් කණ්ඩායමේ වර්තමාන තත්ත්වය?

මම හිතන්නේ අපේ ක්‍රීඩකයන් දක්‍ෂතා අතින් ඉහළින් ඉන්නවා. කණ්ඩායම තුළ ඉතා හොඳ ජ්‍යෙෂ්ඨ ක්‍රීඩකයන් ඉන්නවා. ඒ වගේම කණ්ඩායමට උසස් ගණයේ තරුණ ක්‍රීඩකයන් පැමිණෙමින් තිබෙනවා. අවාසනාවකට අපි සිම්බාබ්වේට පැරදුණා. එය අපි බලාපොරොත්තු නොවුණ ප්‍රතිඵලයක්. වඩාත් වැදග්ම දේ තමයි මහා ලොකු විදිහට බිය විය යුතු නැහැ.

අපි තේරුම්ගත යුතුයි අපිට අවුරුදු 02ක් තිබෙනවා ලෝක කුසලානයට. අපි කණ්ඩායම ගොඩනැගීම ආරම්භ කළ යුතුයි. එහි වගකීම් අලුතින් පත් වූ නායකයන් දෙදෙනාම ගත යුතුයි. ඒ වගේම තේරීම් කමිටුව හා පාලක මණ්ඩලයත් එය ගත යුතුයි. මේ වේලාවේ බය වෙලා ලොකු වෙනස්කම්වලට නොයා යුතුයි. ක්‍රීඩකයන්ව විශ්වාස කළ යුතුයි. ඔවුනට නන් අයුරින් සහය දැක්විය යුතුයි. ඒ වගේම ඔවුන්ව විශ්වාස කළ යුතුයි තම රාජකාරිය හරියට කරාවි කියලා.

Q කණ්ඩායමේ ඔබ දකින පසුබෑම කුමක්ද? එය මානසික ප්‍රශ්නයක්ද, නැතිනම් කුසලතාවල අඩුවක්ද?

මම හිතන්නේ ක්‍රීඩකයන්ට හැකි විය යුතුයි පීඩනය යටතේ සෙල්ලම් කරන්න. ජාත්‍යන්තර තරගවලදී එය අතිශය වැදගත්. ඒ සඳහා මානසික තත්ත්වය හදා ගැනීම අත්‍යවශ්‍යයි. ලෝකයේ බොහෝ රටවල් ක්‍රීඩකයන්ගේ මනස හදන්න ආයෝජනය කරනවා. විශේෂයෙන් පූර්ණ කාලීනව මානසික විශේෂඥයන් (Sport Psychologist) ක්‍රීඩකයන් සමග සිටිය යුතුයි.

ඒ පිළිබඳව අපි අවධානය යොමු කළ යුතුයි. අපේ ක්‍රීඩකයන් පැමිණෙන්නේ පළමු පෙළ තරගවලින්. අපේ පළමු පෙළ තරග හොඳ මට්ටමක නැහැ. ක්‍රීඩකයන්ට ජාත්‍යන්තර තරගවලට ප්‍රවිශ්ට වීමේදී ක්‍රීඩකයන් වශයෙන් ඔවුන්ගේ කුසලතා වර්ධනය කරගත යුතුයි. තරග දිනවීමේ හැකියාව සහිතව. මං හිතන්නේ නැහැ මේ කණ්ඩායම නරකම කණ්ඩායමක් කියලා. මොකද අපි පසුගිය වසරේ ඔස්ට්‍රේලියාව මෙරටදී තරග 3-0ක් ලෙස පරාජය කළා. අවශ්‍ය වෙන්නේ ක්‍රීඩකයන්ට ගැලපෙන මග පෙන්වීමක් හා ඒ සඳහා සැලසුම් ලබාදීමයි. 

Q වත්මන් පරිපාලනය ආරම්භයේදී, ඔබත් පරිපාලකයෙක් වශයෙන් සහාය දැක්වූවා?

ලෝක කුසලානයට කණ්ඩායම නම් කිරීමේදී පරක්කු වී හෝ මටත් කතා කළා. අරවින්ද මට කතා කළේ. මම ඊට එකඟ වුණා. ඒ අවස්ථාවේදී මගේ රාජකාරිය වුණේ කණ්ඩායමට උදව් කිරීමයි. ග්‍රැහැම් ෆෝඩ් මම දකින්නේ විශිෂ්ට පුහුණුකරුවෙක් හැටියටයි. 
එහෙත් සමහර වෙලාවට බොහෝ පුද්ගලයන් ඇවිත් කණ්ඩායමට උපදෙස් දෙන්න ගත්තා. ඒක ප්‍රශ්නයක් වෙන්න පුළුවන්. මොකද පසුගිය ක්‍රීඩකයන් හෝ නැතිනම් වෙනත් පුද්ගලයන් කණ්ඩායමට යම් විදිහකින් සහය දක්වනවා නම්, එය පරිපාලනයෙන් පුහුණුකරුවන්ගෙන් හා කණ්ඩායමෙන් අසා සහයක් දැක්විය යුතුයි.

Q මේ වනවිට කණ්ඩායමේ දක්‍ෂතා පහළ මට්ටමක තිබෙන්නේ. නායකත්වයක් සමග කණ්ඩායමේ අනාගතය කෙසේ වේවිද?

අපේ ක්‍රීඩකයන්ගේ දක්‍ෂතා අඩු නැහැ. සහජ හැකියා ගත්තාම ඔවුන් ඉතාම ඉහළින් ඉන්නවා. අවාසනාවකට ඒ හැකියා තුළින් තරග ජයගන්න අපිට මේ අවස්ථාවේ බැරිවෙලා තිබෙනවා. සිම්බාබ්වේ වගේ රටකට පැරදුණාම ඔක්කෝම කියනවා දැන් අපේ ක්‍රිකට් ඉවරයි., මේක හරි ලැජ්ජාවක් කියලා. ඒ දේ ඇත්ත වුණත්, මම කවදාවත් දකින්නේ නැහැ අපේ ක්‍රිකට් මෙතැනින් ඉවරයි කියලා. එහෙම තිතක් දාන්න බැහැ. සමහර ක්‍රීඩකයන් ඉන්නවා ලෝකේ හොඳම ක්‍රීඩකයන් අතරට දාන්න පුළුවන්. කුසල් මෙන්ඩිස් ගත්තාම ඔහු ස්ටීවන් ස්මිත්, විරාට් කෝලිලා සමග කරට කර අවුරුදු ගාණක් ක්‍රීඩා කරන්න පුළුවන් ක්‍රීඩකයෙක්. 

යම් විදියකින් මාධ්‍ය‘වේදීන්, ප්‍රේක්‍ෂකයින්, රසිකයන් විදිහට දැන් තිබෙන තත්ත්වය ගැන අපට බයක් හිතෙන්න පුළුවන්. මේ අවස්ථාවේ තමයි අපි අපේ කණ්ඩායමට අවශ්‍ය සියලු සහය ලබාදිය යුත්තේ. නායකත්වයේ වෙනස් වීම දිගින් දිගටම හැමවෙලාවෙම වෙන දෙයක්. ඉතින් නායකයාට හිතුණාම දැන් මේක වෙන කෙනෙක්ට දෙන්න ඕන කියලා එය විය යුතු දෙයක්.

මේ වනවට දිනේෂ් චන්දිමාල් හා උපුල් තරංග නායකත්වයට පත්වෙලා තියෙනවා. ඔවුන් ඔවුන්ගේ ආවේණික වූ නායකත්වය තුළින් ශ්‍රී ලංකාව ඉදිරියට ගෙනියන්න කැපවෙලා ඉන්නේ. ඒකට අවස්ථාව ලබාදිය යුතුයි. හරි අඩිතාලමක් ක්‍රිකට් පාලක මණ්ඩලයෙනුත් තේරීම් කමිටුවෙනුත් දාලා දේවි කියලා මම විශ්වාස කරනවා. 

Q බොහෝ අය පවසනවා චාලි ඔස්ටින්ගේ ක්‍රීඩක කළමනාකරණ මාෆියාවක් ගැන. එය වර්තමාන කණ්ඩායමට බලපෑම් කරනවා කියලත් කියනවා. මේ ගැන ඔබේ අදහස?

මට කිසිම බලයක් නැහැ කාවවත් රටට ගේන්න හෝ රටින් එළියට දාන්න. මං හිතන්නේ චාලි ඔස්ටින්ව 2004 වගේ කාලේ ඉඳලා මම මගේ කළමනාකරු හැටියට ගත්තේ. ඊට පෙර ඔහු මහේල ජයවර්ධනගේ කළමනාකරු හැටියට හිටියා. මම චාලි ඔස්ටින්ව බඳවා ගත්තේ මගේ ක්‍රිකට් ක්‍රීඩාව ඉදිරියට යන්න, දක්‍ෂතා දක්වන්න, එතැනින් එහාට යම් කිසි රාජකාරි හා අවස්ථා කළමනාකරණය කරගන්නයි. චාලි ඔස්ටින් මාව බඳවා ගත්තේ නැහැ. මොකද චාලි ඔස්ටින් වැඩ කරන්නේ මට. මම චාලි ඔස්ටින්ට වැඩ කරන්නේ නැහැ.

ක්‍රීඩක කළමනාකරණය ලෝකයේ ක්‍රිකට්වලට අලුත්දෙයක් නොවෙයි. සියලුම රටවල හැම ක්‍රීඩකයෙක්ම තමන්ගේ පෞද්ගලික කළමනාකරුවෙක් හෝ කළමනාකරුවන්ගේ සමාගමකින් තමයි වැඩ කරන්නේ. ජාතික ක්‍රිකට් වලට ඔබ්බෙන් තිබෙන වැඩ රාජකාරිවලට පමණයි ඔවුන් ඉන්නේ. ජාතික ක්‍රිකට්වලට කළමනාකරු එක්ක කිසිම සම්බන්ධතාවක් නැහැ. ක්‍රිකට් පාලක මණ්ඩලයෙන් අපිට ලබාදෙන කොන්ත්‍රාත්තුවද, අයි.සී.සී. ක්‍රිකට්වල කොන්ත්‍රාත්තුවද අපේ වේතනද මේ කිසිම දේකට පෞද්ගලික කළමනාකරු සහභාගි වෙන්නේ නැහැ. ඔවුන්ට ඒකෙන් කොටසක් යන්නෙත් නැහැ.

ඔවුන්ට කිසිම බලපෑමක් කරන්නත් බැහැ. අනිත් එක මට හිනායන කරුණ චාලි ඔස්ටින් අපිව ලවා බලපෑම් කරනවා, අපි නායකත්වයේ ඉද්දි හෝ දැන් හෝ දැන් ඉන්න නායකයෙක් ලවා කියන දේ. චාලි ඔස්ටින්ටත් වාසියක් නැහැ එහෙම කළා කියලා. ඔහුට ඒකෙන් මුදලක් ලැබෙන්නෙත් නැහැ. 

මම නායකයෙක් නම් මගේ නායකත්වය රඳා පවතින්නේ තරග ජයග්‍රහණය මත. තරග පැරදුණොත් මගේ නායකත්වය ඉවරයි. මම දස්කම් දැක්වූවේ නැති වුණොත් මගේ ක්‍රිකට් දිවියත් ඉවරයි. මගේ රාජකාරිය තිබෙන්නේ කළමනාකරුවෙක්ගේ වුවමනාවට හෝ වෙන කෙනෙක්ගේ වුවමනාවට හෝ මම ආස කරන ක්‍රීඩකයා ගස්සන්න නෙමෙයි. ජයග්‍රහණය කරන්න පුළුවන් ක්‍රීඩකයන් කවුද කියලා මගේ අදහස ලබාදෙන්න තේරීම් කමිටුවට.

ඔබ ඔහොම කියනවා නම් මම වැඩ කරලා තිබෙනවා අසන්ත ද මෙල්, අරවින්ද ද සිල්වා වැනි තේරීම් කමිටු සභාපතිවරු එක්ක. ඒගොල්ලන්ටත් කරන නින්දාවක් ඒක. මෙහෙම එළියේ ඉඳන් කවුරු හරි මෙහෙම කියන එක. මේක ඇත්තටම ගත්තොත් වෙන වෙන අයගේ වුවමනාවට අවශ්‍ය දෙය ගැන කතා නොකර කුමන්ත්‍රණයක් පිළිබඳව අපේ මනස යොමු කරලා ඇත්ත දේ කතා නොකර ඉන්න කරන ප්‍රයන්තයක්. මගේ වෙන්නත් පුළුවන් මහේලගේ වෙන්නත් පුළුවන් අපේ චරිතයට හානි කරන්න මේ දේ කරන්න පුළුවන්. ඇත්ත නැත්ත හරියට කතා කරලා හරි අවබෝධයෙන් මේක බැලුවාම මේකේ කිසිම ඇත්තක් නැති බව ඉබේටම තේරෙනවා. 

Q වත්මන් තේරීම් කමිටු සභාපතිවරයා පැවසූවා පසුගිය කාලේ හිටපු ජ්‍යෙෂ්ඨ ක්‍රීඩකයන් තම ස්ථානයෙන් පහළට යාමට අකැමැති වූ බවත්, එහෙත් උපුල් තරංග හැමවිටම ඕනෑම ස්ථානයක ක්‍රීඩා කිරීමට එකඟ වූ බවත්?

උපුල් තරංග ජ්‍යෙෂ්ඨ විශිෂ්ට, ක්‍රීඩකයෙක්. ඔහුගේ නියම ස්ථානය ආරම්භක පිතිකරු ස්ථානයයි. ඔහු ආරම්භක පිතිකරුවෙක් ලෙස ශතක 15කට වැඩි ප්‍රමාණයක් ලබාගෙන තිබෙනවා. නමුත් විවිධ අවස්ථාවල ඔහුට කණ්ඩායමේ ඉහළට පහළට යන්න වුණා. කණ්ඩායමෙන් එළියට යන්නත් වුණා. නමුත් වාසනාවකට ඔහු යළිත් කණ්ඩායම හා එක්වෙලා තිබෙනවා. මං හිතන්නේ ඔය ප්‍රශ්නය උපුල්ගෙනුත් ඇසිය යුතුයි. 

මම ගත්තාම මගේ පිතිකරණ ඉතිහාසයේ මම ආරම්භක පිතිකරුවාගේ ඉඳලා අංක 09 වෙනකන් ශ්‍රී ලංකා එක්දින කණ්ඩායමේ ක්‍රීඩා කරලා තිබෙනවා. 2007 ලෝක කුසලානයේදී මම අංක 04 ක්‍රීඩා කළා. දිනේෂ් චන්දිමාල් හොඳට ක්‍රීඩා කරද්දී මම ඔහුට අංක 03 දීලා මම අංක 04 ක්‍රීඩා කළා. සමහර වේලාවට මම අංක 05 ත් ක්‍රීඩා කළා. ඒ දවස් වල එක් පුහුණුකරුවෙක් මට කිව්වා පන්දුව දෝලනය වනවා නම් ඔයා අංක 03 ගහන්න. තණතීරුව ක්‍රීඩා කරන්න පහසු නම් ඔයා අංක 04ට ගිහින් අපි පොඩි කෙනෙක්ව අංක 03 දාමු කියලා. එහෙමත් කරලා තියෙනවා. අපි මේ සියලු චෝදනා බැලුවාම තේරුම් ගන්න ඕන තමන්ගේ පිතිකරණ ස්ථානය කුමක්ද කියලා. ඒ වගේම එතැන ඔබට වඩා දස්කම් දක්වන කෙනෙක් ඉන්නවාද කියලත් බලන්න ඕන. 

මම මේ බලෙන් අංක තුනේ බැට් කරන කෙනෙක් නෙමෙයි. අංක 03ත් 04ත් මම පෙන්වලා තිබෙනවා මට ලකුණු ගහන්න පුළුවන් කියලා. ක්‍රීඩකයෙක් කණ්ඩායමට ආවාම තමන්ගේ ස්ථානය තහවුරු කරගන්න ඔවුන් දැනගත යුතුයි. කාලයත් සමග ඔවුන්ට උඩට යන්න ලැබේවි.  රිකී පොන්ටින් අංක තුන ක්‍රීඩා කළේ. සචින් ටෙන්ඩුල්කාර් අංක 04. අන්තිමට ආරම්භක පිතිකරු හැටියට දිගටම ක්‍රීඩා කළේ. 

Q පුහුණුකරුවන් තෝරා ගැනීමේදී ශ්‍රී ලංකාවට තිබෙන ප්‍රශ්නය කුමක්ද?

මං හිතන්නේ යම් කිසි පුහුණුකරුවෙක්ව ගත්තාම දිගුකාලීන සැලැස්මක් තිබිය යුතුයි. විශේෂයෙන් ශ්‍රී ලංකාව වගේ ළාබාල කණ්ඩායමකට මාස 03කින්, 05කින්, 06කින් අවුරුද්දකින් වුණත් අවශ්‍ය තත්ත්වයට එන්න බැරි වෙනවා. ඔවුන්ට දිගුකාලීන සැලැස්මක් එක්ක වැඩ කළ යුතුයි. පුහුණුකරුවෙක් තෝරද්දී බැලිය යුතුයි මේ පුහුණුකරුවාද අපිට සුදුසුම කියලා. එංගලන්තය ගත්තාම ඇන්ඩෘ ස්ට්‍රාව්ස්ව ක්‍රිකට් අධ්‍යක්‍ෂ කරලා ක්‍රිකට් පාලක මණ්ඩලය එක්ක කතා කරලා ට්‍රෙවර් බේලිස්ව බඳවා ගත්තා. ඔවුන් අවුරුදු ගාණක සැලැස්මක් හදලා ඉදිරියට ගියා. දැන් ලංකාවටත් එහෙම කරන්න ඕන. 

Q පසුගිය දවස්වල දැඩි කතාබහකට ලක් වුණා සිම්බාබ්වේ තරගාවලියේදී එක් ක්‍රීඩකයෙක් ඇතුළත් කිරීමේදී චාලි ඔස්ටින්ගෙන් බලපෑම් වුණා කියලා. ඔබ නායකත්වය දරද්දීත් මෙවැනි සිදුවීම් තිබුණාද?

චාලි ඔස්ටින් තාම මගේ කළමනාකරු. මම හිතන්නේ මෙතැන මේ බලපෑම් කරනවා කියන එක මට තේරෙන්නේ නැහැ. කොහොමද? මොකටද මේ බලපෑම් කරන්නේ කියලා. ක්‍රීඩකයෙක් ලංකාවට ක්‍රීඩා කළා කියලා එතැනින් ඔහුගේ තරග ගාස්තුවෙන්වත්, කොන්ත්‍රාත්තුවෙන්වත් තරගයේ වීරයා වුණා කියලා ලැබෙන මුදලෙන්වත් ඉන් කොටසක්වත් තමන්ගේ කළමනාකරුට යන්නේ නැහැ.
මම නායකයා කාලෙත් මහේල ජයවර්ධන නායකත්වය ලබද්දීත් අපි විශාල වශයෙන් රටට ජයග්‍රහණ ගෙනාවා.

අපි ක්‍රීඩා කරද්දී ලෝක කුසලාන 05ක අවසන් තරගයට ආවා. එක් ලෝක කුසලානයක් ගෙනාවා. එක පුද්ගලයෙක්ට බලපෑම් කරන්න පුළුවන්නම් එහෙනම් ඔහුට මේ රටේ මොනවද කරන්න බැරි. කවදාවක්වත් කළමනාකරුවෙක්ට එහෙම බලපෑමක් කරන්න බැහැ. එහෙම චෝදනාවක් තිබෙනවා නම් ඒ පිළිබඳව හරියට හොයන්න ඕන. අවුරුදු 08කට 09කට 10කට පෙරත් මම අයි.සී.සී.යට, අපේ පාලක මණ්ඩලයට කිව්වා ඕනෑම කළමනාකරුවෙක් ඉන්නවා නම් ඔහුව ලියාපදිංචි කරන්න කියලා. ඔහුගේ පසුබිම මොකක්ද කියලා හොයලා බලන්න කියලා.

අයි.සී.සී. ඇන්ටි-කරප්ෂන් කියලා කෝඩ් එකක් තිබෙනවා. හැමෝම ඊට අත්සන් තබන්න ඕන. මේක කළමනාකරුවන්ටත් බලපෑ යුතුයි. ඒ වගේම තේරීම් කමිටුවටත්, ක්‍රිකට් කමිටුවට මෙන්ම ක්‍රිකට් පිළිබඳව ඕනෑම කෙනෙක්ට එය පොදු වෙන්න ඕන. මේක ගැන චෝදනා නොකර හරි පරීක්‍ෂණයක් කරන්න. ඒකට අපි කවදාවත් විරුද්ධ වෙන්නේ නැහැ. මම කවදාවත් එහෙම ක්‍රීඩකයන් සම්බන්ධව බලපෑම් කරලා නැහැ. අංක එක කළමනාකරුට මම වැඩ කරන්නේ නැහැ.

ඔහු වැඩ කරන්නේ මට. මම නායකයෙක් විදිහට බලන්නේ දිනන්නයි. එතැනින් එහාට හදන කතා කියන කතා වෙනම අර්ථයකින් වෙනම සැලස්මකින් කියන දේවල්. මේවා පිටිපස්සේ ඉන්නේ කවුද කියන එක ගැන මට අදහසක් තිබුණත්, මම දවසේ තිස්සේ ඕවා ගැන හොයන්න ගියොත් මගේ වැඩ කටයුතු කරන්න බැරි වෙනවා. එක චෝදනාවක් තිබෙනවා අපි බැට් කරන තැන්වලින් පල්ලෙහාට ගිහිල්ලා පොඩි අයට අවස්ථාව නොදුන්න නිසා ශ්‍රී ලංකාවේ ක්‍රිකට් විනාශ වුණා කියලා. තවත් කට්ටියක් කියනවා චාලි ඔස්ටින් මේක විනාශ කරනවා කියලා. තවත් අය කියනවා අපි චාලි ඔස්ටින් එක්ක එකතු වෙලා මේක විනාශ කරනවා කියලා.

තවත් අය කියනවා පාලක මණ්ඩලය මේක විනාශ කළා කියලා. මේ මත එනවා යනවා පුදුම විදිහට. හැබැයි කණ්ඩායම පරදිද්දී විතරයි මේ මත ගොඩ නැගෙන්නේ. දිනද්දී ඒවා අඩුයි. මේක මට වෙන්න පුළුවන් මහේල ජයවර්ධනට වෙන්න පුළුවන්.  අපේ චරිතයට යම් කිසි හානියක් කරන්න සැකයක් අපි ගැන ඇති කරන්න කියන දෙයක් වෙන්න පුළුවන්. අනිත් අතට කාටහරි කියන්න පුළුවන් මේකේ ඇත්තක් තියෙනවා කියලත්. මේ දේවල්වලට අපක්‍ෂපාතී ලෙස ක්‍රීඩා ඇමතිතුමෙක් ඉන්නවා පාලක මණ්ඩලයක් තිබෙනවා ලෙහෙසියෙන්ම හොයලා බලන්න පුළුවන්. 

Q ඔබ කියනවා චාලි ඔස්ටින්ට ක්‍රිකට්වලට බලපෑමක් කරන්න බැහැ කියලා. නමුත් ඔබ හා ක්‍රීඩා කළ තිලකරත්න ඩිල්ෂාන් සමුගැනීමේ මාධ්‍ය හමුවේදීත් පසුව විද්‍යුත් මාධ්‍ය සාකච්ඡාවකත් පැවසුවා ක්‍රීඩක කළමනාකරුවන්ගේ ගැටලුව සම්බන්ධයෙන්?

මම පෞද්ගලිකව එහෙම දෙයක් අහලා නැහැ ඩිල්ෂාන් එහෙම කිව්වා කියලා. නමුත් ඩිල්ෂාන් චාලි ඔස්ටින්ට කරන චෝදනාවක් තිබෙනවා නම් මට එක දෙයක් ඇහුණා කොන්ත්‍රාත්තුවක් සම්බන්ධව. ඒ කාලේ එහෙම චාලි ඔස්ටින්ගෙන් එහෙම බලපෑමක් වුණා කියලා ටී.එම්. ඩිල්ෂාන් කියනවා නම් කණ්ඩායමට, ඔහුට කරන්න තිබුණේ ක්‍රිකට් පාලක මණ්ඩලයටත් තේරීම් කමිටුවත් එක්ක කතා කරන්න.

මං හිතන්නේ පෞද්ගලික අමනාපකම් සහ තරහා එද්දී තවත් විශේෂ වේලාවට එක එක විදිහට අවස්ථාවෙන් ප්‍ර‘යෝජන ගන්න හදනවා. ටී.එම්. ඩිල්ෂාන් කියන්නේ ලංකාවේ ක්‍රිකට් ක්‍රීඩකයන් අතර විශිෂ්ට තැනක ඉන්න ක්‍රීඩකයෙක්. දැන් එහෙම ඔහු කියනවා නම් 2009, 2010, 2011, 2012 ඩිල්ෂාන් ඒ ක්‍රීඩා කරපු වකවානුවේ ඔහුට ලේසියෙන්ම ක්‍රීඩා ඇමති ළඟට ගිහින් පාලක මණ්ඩලයත් සමග හරි කොමිසමක් පත් කරලා මේක ඇත්ත නැත්ත හොයලා බලන්න පුළුවන්. මෙහෙම ඇඟිල්ල දික්කරනවාට වඩා කළ යුත්තේ එයයි. ක්‍රීඩා ඇමතිතුමා කියලා තිබෙනවා මේකට පරීක්‍ෂණයක් කරනවා කියලා. ඒක හොඳ දෙයක්. හරි දත්ත එක්ක හරි ලියකියවිලි එක්ක බලන්න ඕන.

Q ගංවතුර ඇති වුණ වෙලාවේ ඔබයි මහේලයි විදෙස් රටකට ආධාර කළා ලංකාවට ආධාර කළේ නැහැ කියලා වාර්තා වුණා. ඒ ගැන කියන්නේ කුමක්ද?

ශ්‍රී ලංකාවේ විශාල වූ ආපදා සෑහෙන ප්‍රමාණයක් වෙලා තිබෙනවා. හුඟාක් අය දැන් ආපදාවලදී එක එක්කෙනාට උදව් කරනවා. මම කාටහරි උදව් කළොත් ඒක සෙල්ෆියක් අරන් ෆේස්බුක් දාන්නේ නැහැ. ට්විටර්, ඉන්ස්ටග්‍රෑම් දාන්නේ නැහැ මං මෙහෙම උදව් කළා කියලා. ලංකාවේ සිදු වූ සියලුම ආපදාවලදී පෞද්ගලිකවත්, අපේ ගුණ ජය සතුට පදනම තුළිනුත්, යහළු මිත්‍රාදීන් සම්බන්ධ කරගෙන විශාල ලෙස උදව් කරලා තියෙනවා.

අපි ලංකාවේ මිනිස්සු වෙනුවෙන් කළේ මොනවාද කියලා බලන්න ඕන නම් ගුණ ජය සතුට පදනමේ සීනිගමට ගිහින් නැත්නම් උතුරු නැගෙනහිරට ගිහින් අපේ මුරලි හාමනි කප් එකට ඇවිත් බලන්න පුළුවන්. ඒ වගේම සී.සී.සී. ලයින්, සී.සී.සී. ෆවුන්ඩේෂන් එකෙන් උදව් කරන මානසික පීඩාවට ලක් වූ ශ්‍රී ලාංකිකයන්ට කරපු දේවලුත් අයි.සී.සී. ය සමග තින්ක්ට්වයිස් කියලා ඒඩ්ස් රෝගීන්ට කළ දේවලුත්, ශ්‍රී ලංකාවේ විශේෂ අවශ්‍යතා ඇති දරුවන්ට කළ දේවලුත් ඔබලාට බලාගන්න පුළුවන්. 

Q ඔබ හා චාලි ඔස්ටින් සම්බන්ධ ව්‍යාපාර මොනවාද?

ඔස්ටින් මැනේජ්මන්ට් ලිමිටඩ් කියන ඒ ක්‍රීඩකයන් කළමනාකරණ සමාගමේ කොටස් හෝ වෙනත් දෙයක් අපිට කවදාවත් තිබිලත් නැහැ. අපි ගන්නෙත් නැහැ. අපි අරගන්නෙත් නැහැ. චාලි ඔස්ටින් අපිට ගෙවීමක් කරන්නෙත් නැහැ ඒ ක්‍රීඩක කළමනාකරණය තුළින්.
ඒ වගේම අපේ මිනිස්ට්‍රි ඔෆ් ක්‍රැබ් කියන ඒ කෑම බිස්නස් එකෙත් චාලි ඔස්ටින්ට කිසිම අයිතියක් නැහැ. නමුත් කෘෂිකර්මය පිළිබඳව අපේ ව්‍යාපාරයක් තිබෙනවා. එකේ චාලි ඔස්ටින්, මහේල ජයවර්ධන හා අපේ දන්න හඳුනන දෙන්නෙක් බැඳිලා ඉන්නවා.

ඒ වගේම කිමින් කියලා තවත් එක කම්පැනියක ඉන්නවා. නමුත් ක්‍රිකට් සම්බන්ධ කිසිම දෙයක් නෙමෙයි. සමහර වෙලාවට කට්ටිය කියන්න පුළුවන් මේ සියල්ලටම ක්‍රිකට් සම්බන්ධයි කියලා. කිසිම සම්බන්ධයක් නැහැ ක්‍රිකට්වලට. ඒ දේවල් සම්බන්ධයෙන් ඕනෑම අවස්ථාවක වගකීමකින් යුතුව ලියකියවිලි එක්ක පෙන්වන්න පුළුවන්.