Category Archives: opinion

ශ්‍රී ලංකාව යම් දේශපාලනික අස්ථාවරභාවයකට පත්ව තිබෙනවා

අද වන විට මෙරට දේශපාලනයේ සිදුවන සිදුවීම් නිරීක්ෂණය කරනවිට පැහැදිලිවම පෙනී යන කාරණයක් වන්නේ ශ්‍රී ලංකාව යම් දේශපාලනික අස්ථාවරභාවයකට පත්ව සිටින ආකාරයයි. එක් පසෙකින් ජනාධිපතිවරයා සිය පක්ෂයත්, බලයත් රැකගන්නට ප්‍රයත්න දරයි. අනෙක් පසින් අග්‍රාමාත්‍යවරයා සිය පක්ෂ නායකත්වයත්, අගමැති ධුරයත් රැකගැනීමට සටනක නියැළී සිටියි. තවද පොදු විපක්ෂය සිය අහිමි වූ බලය නැවත ලබාගැනීමට දැඩි උත්සාහයක නිරතව සිටියි. අප ඉදිරියේ ඇති අධික ණයබර පියවමින් රටේ ප්‍රගමනය සඳහා වන වැඩපිළිවෙළක් සම්බන්ධයෙන් එකදු දේශපාලඥයෙකුවත් වචනයක් හෝ කතා කරන්නේ නැත. මේ සියල්ල අතරවාරයේ ජනතාවගේ සැබෑ අපේක්ෂා යටපත්ව දේශපාලඥයන්ගේ සියලු ආශාවන් සහ බලාපොරොත්තු දිනෙන් දින සඵල වෙයි. 


mayura

අග්‍රාමාත්‍ය රනිල් වික්‍රමසිංහ පෙරේදා මහනුවරට පැමිණ මල්වතු මහ නාහිමියන් ඉදිරියේ පැවසුවේ ජනපති නැවත දිවයිනට පැමිණි පසු රට ඉදිරියට ගෙනයාමේ වැඩපිළිවෙළක් සකසන බවය. එසේ නම් 2015 වසරේ සිට මේ දක්වා ගෙන ගියේ කුමනාකාරයේ වැඩපිළිවෙළක්ද යන්න ගැටලුවකි. එමෙන්ම පත් වූ දා සිට මේ දක්වාමත් අගමැතිවරයා සහ ජනාධිපතිවරයා රට ඉදිරියට ගෙන යාමට බාලගිරිදෝෂයට ලක්වූ වැඩපිළිවෙළ ගණනාවක්ම ප්‍රසිද්ධ වේදිකාවේදී ඉදිරිපත්කොට තිබේ. ඒවා ක්‍රියාත්මක වූවා නම් රට ඉදිරියට ගොස් ඉන්දියාවේ ගැටීමටද ඉඩ තිබූ බව පවසමින් ජනතාව මෙම ප්‍රකාශ හුදෙක් විහිළුවක් පමණක් බව පෙන්වා දෙති. කෙසේ නමුත් ආණ්ඩුව මේ ආකාරයෙන් දිනෙන් දින ජනතාවට හාස්‍ය සපයන තත්ත්වයට පත්වීම ඉතාමත්ම කනගාටුදායකය. ශ්‍රී ජයවර්ධනපුර විශ්වවිද්‍යාලයේ මහාචාර්ය මයුර සමරකෝන් මහතා සමගින් මෙම විග්‍රහය ගෙන එන්නේ වත්මන් දේශපාලන අස්ථාවරභාවය හමුවේ රටේ අනාගතය කොයිබටද යන්න පිළිබඳවයි.

නොගැළපෙන දීගය

පසුගිය 2015 වසරේ ජනවාරි 08 වැනිදා මහා විප්ලවයක් සිදුවුණු බව කියමින් ඇතැම් පිරිස් උදම් ඇනූවත් අවසාන වශයෙන් සිදුවී තිබෙන්නේ එකිනෙකට නොගැළපෙන ආර්ථික, සමාජීය සහ දේශපාලනික ප්‍රතිපත්ති සහ දැක්මක් සහිත දේශපාලනික පක්ෂ දෙකක එකතුවීමක් පමණයි. එස්.බඩ්ලිව්.ආර්.ඩී බණ්ඩාරනායක මහත්මයා එක්සත් ජාතික පක්ෂයෙන් ඉවත් වෙලා ශ්‍රී ලංකා නිදහස් පක්ෂය නිර්මාණය කරගන්නේ එම පක්ෂයත් සමග තිබුණු මතවාදී අරගලයක ප්‍රතිඵලයක් ලෙසයි. එක්සත් ජාතික පක්ෂයේ පවතින ධනවාදී චින්තනය ශ්‍රී ලංකා නිදහස් පක්ෂයට කිසිදු ලෙසකින් බණ්ඩාරනායක මහත්මයා ඇඳා ගත්තේ නැහැ. 
නමුත් ඓතිහාසික ලෙස 2015 වසරේදී මේ එකිනෙකට නොගැළපෙන පක්ෂ දෙක එක්වෙලා ආණ්ඩුවක් පිහිටුවන්නේ ජනාධිපතිවරයා 
ශ්‍රී ලංකා නිදහස් පක්ෂය නියෝජනය කරමිනුත්, අගමැතිවරයා එක්සත් ජාතික පක්ෂය නියෝජනය කරමිනුයි. මේ පක්ෂ දෙකටම ප්‍රමාණවත් මන්ත්‍රී ආසන ප්‍රමාණයක් තිබුණෙ නැහැ වගේම විශේෂිතම කාරණය තමයි 
ශ්‍රී ලංකා නිදහස් පක්ෂය පිල් දෙකකට බෙදී යනවා. එක් පිලක් මෛත්‍රීපාල සිරිසේන ජනාධිපතිවරයා වටාත්, තවත් පිරිසක් හිටපු ජනාධිපති මහින්ද රාජපක්ෂ වටාත් ඒකරාශී වෙනවා. එතැනදි අවසානයේදී මෛත්‍රී පිල ශ්‍රී ලංකා නිදහස් පක්ෂය නියෝජනය කරද්දී මහින්ද පිල ඒකාබද්ධ විපක්ෂය නමින් නව පෙරමුණක් පිහිටුවා ගන්නවා. මේ කාරණා ඔස්සේ පැහැදිලිවම දැඩි බල අරගලයක් මේ තුළ තිබෙන බව පෙනී යනවා.

මෛත්‍රීගේ ස්වාධීනත්වය නැති කළේ කවුද?

මෛත්‍රීපාල සිරිසේන ජනාධිපතිවරයා ජනාධිපති ධුරයට පත්වෙන්නේ එක්සත් ජාතික පක්ෂයේ පූර්ණ ආශිර්වාදය සහිතවයි. ඔහු මහින්ද රාජපක්ෂ යටතේ තිබූ ශ්‍රී ලංකා නිදහස් පක්ෂයෙන් ඉවත් වෙලා ඇවිල්ලා කරපු පළමු කතාවේදීම ඉතා හැඟීම්බර කතාවක් කරමින් රනිල් වික්‍රමසිංහ වෙත දැඩි සේ ස්තුතිවන්ත වෙනවා රනිල් වික්‍රමසිංහ වෙත ලැබීමට ගිය අවස්ථාවක් තමයි මට මේ ලැබුණේ යැයි කියමින්. ශ්‍රී ලංකාවේ දේශපාලන යාන්ත්‍රණය පැහැදිලිවම අද වෙනකොට තිබෙන්නේ බොහොම බලලෝභී බල අරගලයකයි. 
මෛත්‍රීපාල සිරිසේන ජනාධිපතිවරයා එක්තරා අවස්ථාවක බොහොම පැහැදිලිව සඳහන් කරනවා නැවත ජනාධිපති ධුරයට පත්වීමට තියා අපේක්ෂකයෙක් වීමටවත් බලාපොරොත්තුවක් නැති බව. එහෙමනම් ඔහුට ඉතාම පහසුවෙන් හැකියාව තිබුණා ස්වාධීන ජනාධිපතිවරයෙක් ලෙස නිවැරදි ගමනක් යන්න. නමුත් මෛත්‍රීපාල සිරිසේන ජනාධිපතිවරයා වටා සිටි කණ්ඩායමේ සහ මහින්ද රාජපක්ෂ හිටපු ජනාධිපතිවරයා වටා සිටි කණ්ඩායම අතර තිබෙන බලඅරගලය හමුවේ මෛත්‍රී පිලේ සිටි ශ්‍රී ලංකා නිදහස් පක්ෂ මන්ත්‍රීවරුන්ට අවශ්‍ය වුණා ඔහුව ඒ ස්වාධීනත්වයෙන් මුදවලා මහින්ද රාජපක්ෂ හිටපු ජනාධිපතිවරයා සමග සෘජුවම සටනකට යොමු කරන්න. ඒ කටයුත්තට අද ස්වාධීනවෙලා සිටින 16 දෙනාත් ඇතුළත්. 

ආණ්ඩු ගිනියම් වෙද්දී රට ගිනි ගැනීම

මේ බල අරගලය තුළදී පෙනෙන දෙයක් තමයි තමන්ට පක්ෂපාතී ශ්‍රී ලංකා නිදහස් පක්ෂ මන්ත්‍රීවරුන් සතුටු කරන්න මෛත්‍රීපාල සිරිසේන ජනාධිපතිවරයාට සිදුවී ඇති බව. ඒ නිසා ඔහුට සිදුවුණා යම්කිසි සම්මුතියක් තිබුණු එක්සත් ජාතික පක්ෂයට වඩා ශ්‍රී ලංකා නිදහස් පක්ෂයට ළැදිව කටයුතු කරන්න. ඒ වගේම ඔහු විශාල වරදකුත් එතැනදි කළා. ඒ තමයි තමන්ට බලයට පත්වීමට කැපවුණු එක්සත් ජාතික පක්ෂයට දැඩි සේ පහර ගහන්න කටයුතු කිරීම. ඒ සඳහා හොඳම උදාහරණය තමයි පසුගිය ප්‍රාදේශීය සභා මැතිවරණ වේදිකාවලදී ජනාධිපතිවරයා එක්සත් ජාතික පක්ෂයට එල්ල කළ වාග් ප්‍රහාරයන්. ඒ ඔස්සේ  තමන් මේ ආණ්ඩු කරන්නේ තමන්ගේ විරුද්ධවාදීන් සමගයි කියන හැඟීම දෙපාර්ශ්වයේම මන්ත්‍රීවරුන් අතරත්, පාක්ෂිකයන් අතරත් ඇති වුණා. මේ බල අරගලය තුළ සිදුවුණේ රටේ කිසිදු ආකාරයක සක්‍රීය මට්ටමේ ප්‍රතිපත්ති ක්‍රියාත්මක කිරීමක් හෝ රටේ ප්‍රගමනය සඳහා වූ ව්‍යාපෘතියක් සිදු නොවීමයි. පහුගිය කාලයේ අපට හොඳින්ම දකින්නට ලැබුණු හාස්‍යජනක කාරණයක් තමයි එක්සත් ජාතික පක්ෂය ගෙන එන ඇතැම් තීන්දු සහ තීරණ පැය කිහිපයක් තුළ ජනාධිපතිවරයා විසින් තමා ඒ පිළිබඳව දැනුවත් නැහැ කියමින් නිශේධනය කර දැමීම. 
මේ බල අරගලය තුළ සිදුවුණේ රටේ කිසිදු ආකාරයක සක්‍රීය මට්ටමේ ප්‍රතිපත්ති ක්‍රියාත්මක කිරීමක් හෝ රටේ ප්‍රගමනය සඳහා වූ ව්‍යාපෘතියක් සිදුනොවීමයි. අද රටේ සමස්ත ක්‍රියාවලියම බිඳ වැටිලා තිබෙනවා. තවත් පැත්තකින් නිලධාරීන් අසරණ වෙලා තිබෙනවා තමන් ක්‍රියාත්මක කරන්නේ විධායකයේ නියෝගද, එසේත් නැත්නම් ව්‍යවස්ථාදායකයේ නියෝගද කියලා සිතාගන්නට නොහැකිව. ආණ්ඩුව සංවර්ධනය තුන් ගුණයකින් වෙනවා කියනවා, නීතිය ස්ථාපිත වෙලා තියෙනවා කියනවා, සෘජු ප්‍රතිපත්ති ක්‍රියාත්මක කරනවා කියනවා නමුත් මේ කිසිවක් ජනතාවට දැනෙන්නේ නැහැ. දවසින් දෙකකින් තීරණයක් ගෙන විසඳිය යුතු වැඩවර්ජන වැනි දේවල් මාස ගණන් ඇදී යනවා. රටේ විශ්වවිද්‍යාල මාසයකට වැඩි කාලයක් වසා දැම්මා. ජාතිවාදී කෝලාහල දරුණු මට්ටමකට ඇවිත් තිබෙනවා. නීතිය සහ සාමය බිඳවැටිලා. පාතාලය රාජ්‍ය බුද්ධි අංශ නිලධාරීන්ට වෙඩි තබන තත්ත්වයට පත්වෙලා තිබෙනවා. මේ සියල්ල ඔස්සේ රටක තිබිය හැකි නරකම තත්ත්වය තමයි අද අපි අත්විඳිමින් ඉන්නේ. ඒ වගේම මෙය තමයි ශ්‍රී ලංකා දේශපාලන ඉතිහාසයේ ඇතිවුණු දැවැන්තම අස්ථාවරභාවය. 

රටට නොගැළපෙන සම්මුතිවාදී ආණ්ඩුව

අද වෙද්දි මනාවට ඔප්පු වෙලා ඉවරයි සම්මුතිවාදී ආණ්ඩු එහෙමත් නැත්නම් ජාතික ආණ්ඩු කියන සංකල්පය කිසිදු ආකාරයකින් මේ රටට නොගැළපෙන බව. ඒ හරහා රට තුළ ඇතිවෙලා තිබෙන්නේ විශාල ව්‍යාකූල තත්ත්වයක් සහ ව්‍යවසනයක් පමණයි. කවුරුන් හෝ එක ශක්තිමත් පක්ෂයක් රටේ පාලනය ගත යුතුයි. විශේෂයේම සන්ධානගතව හෝ සම්මුති ඔස්සේ එකඟතාවලට පැමිණීම වැනි දේශපාලන ක්‍රියාකාරකම් බලය ලබාගැනීම සඳහා සිදුකරන හුදු ව්‍යාජයක් පමණයි කියන දේ හොඳින්ම පැහැදිලි වෙලා තිබෙනවා. 
පසුගිය කාලය පුරාම මේ රටේ සිද්ධ වුණේ, අහන්න ලැබුණේ පක්ෂ ප්‍රතිසංවිධාන, පක්ෂ නායකත්වයන් වෙනස්වීම් එහෙමත් නැත්නම් විශ්වාසභංග පිළිබඳව පමණයි. ඒ හැර රටට හෝ ජනතාවට ඵලක් ඇති කිසිදු දෙයක් දේශපාලඥයන් අතින් සිදුවුණේ නැහැ. රටේ දැවැන්ත සමාජ ප්‍රශ්න විතරක් නෙවෙයි මන්දපෝෂණය දෙවැනි ස්ථානයට වැඩිම රට බවටත් අපේ රට පත්වෙලා තිබෙන බව කියවෙනවා. 

ආණ්ඩුවෙන් ආණ්ඩුවට වෙනස් වන රටේ ප්‍රතිපත්ති

ඇත්තටම සංවර්ධිත රාජ්‍යයන්වලින් ශ්‍රී ලංකාව වැනි ඌන සංවර්ධිත රටක් වෙනස් වෙන්නේ මෙතැනදී. අපි හොඳින්ම දන්නවා සංවර්ධිත රාජ්‍යවල සෞඛ්‍ය ප්‍රතිපත්ති, අධ්‍යාපන ප්‍රතිපත්ති, සංවර්ධන ප්‍රතිපත්ති සහ ආර්ථික ප්‍රතිපත්ති සකස් කරන්නේ අඩුම තරමින් දශකයක් හෝ ඉදිරිය ගැන හිතලා. රටේ විශ්වවිද්‍යාල පද්ධතියෙන් සහ විද්වතුන්ගෙන් ඔවුන් නියම ප්‍රයෝජන ගන්නවා. නමුත් අපේ රටේ ප්‍රතිපත්ති සකස් වෙලා තිබෙන්නේ එවැනි විද්‍යාත්මක පදනමකින් නොවෙයි. අමාත්‍යවරයාගේ හිතුමතයට හෝ ඔහුගේ හිතවතුන්ගේ හිතුමතයට, එහෙමත් නැත්නම් අමාත්‍යවරයාට ලැබෙන කොමිස් මුදල අනුවයි.
පාර්ලිමේන්තුව නියෝජනය කරන දේශපාලඥයෙක්ට කිසිම ආකාරයකින් තමන්ගේ ප්‍රදේශය කියලා එක් ප්‍රදේශයක් තිබෙන්න විදිහක් නැහැ. ඔහුට සමස්ත රටේම දියුණුව අදාළ විය යුතුයි. රටේ ජනතාවගේ සැබෑ අවශ්‍යතාවන් සහ අපේක්ෂාවන් වටහාගත යුතුයි. නමුත් අපේ රටේ දේශපාලනය තවමත් සිටින්නේ ඉතාමත්ම ගෝත්‍රික මානසිකත්වයක. පසුගිය ආණ්ඩු කරපු වැරදි මේ ආණ්ඩුත් ඒ ආකාරයෙන්ම ක්‍රියාත්මක කරමින් ඉන්නවා.

එයාලගේ වැරදි නිසා අපිට මුකුත් කරන්න බැහැ

පසුගිය කාලය පුරාම වගේම අදටත් දැකගන්න ලැබෙන දෙයක් තමයි කලින් රජයේ දූෂණ අක්‍රමිකතා නිසා තමන්ට හරිහැටි ප්‍රතිපත්ති ක්‍රියාත්මක කරන්න බැහැයි කියමින් චෝදනා කරමින් සිටීම. මෙය මේ ආණ්ඩුවේ වගේම පසුගිය ආණ්ඩුවෙත් දකින්න ලැබුණ කාරණයක්. මැතිවරණ සමයේදී ඔවුන් දේශපාලන වේදිකාවලදී කරපු කතා නැවතත් ශ්‍රවණය කරනවා නම් ඔවුන් කියනවා මේ රජය මේ තරමට දූෂිතයි, ජනතා මුදල් ගසා කනවා, අපි මේවා නවත්තලා විශාල වෙනසක් කරනවා කියලා. උදාහරණයක් විදිහට 2015 ජනවාරි 08 වැනිදා බලය පත්වුණාට පස්සේ ජනාධිපතිවරයා කිව්ව දෙයක් තමයි පසුගිය රජය කරපු දූෂණය වැළැක්වූවාට පස්සේ ඒ කාලේ සිදුවුණා වගේ තුන් ගුණයක සංවර්ධනයක් තමන්ට කරන්න පුළුවන් කියලා. ජනතාව පවා හිතුවා විශාල සුබදායී වෙනසක් සිදුවෙයි කියලා. නමුත් බලය ලබාගත්තාට පස්සෙ කියනවා නම් එයාලා ගත්ත ණය වැඩියි, එයාලා අපේ කකුලෙන් අදිනවා, අපිට මුකුත් කරන්න දෙන්නේ නැහැ කියලා. ඒ ප්‍රකාශ ඉතාමත් හාස්‍යජනකයි. බලය ලබාගන්න පෙර මේ පිළිබඳව හරි ආකාරයේ තක්සේරුවක් තිබුණේ නැද්ද? තුන්ගුණයක් විශාල සංවර්ධනයක් කරනවා කිව්වේ හුදු සිහිනයක් පමණද කියලා ජනතාව පෙරළා ප්‍රශ්න කළ යුතුයි. ඒ නිසා අතීතය කියන මුව හමට තළමින් නිදහසට කරුණු කීම කිසිදු ආකාරයකින් අනුමත කළ හැකි දෙයක් නොවෙයි. 

රට පස්සට-හොරු ඉදිරියට

රට පිළිබඳ ප්‍රශ්න රැසක් ඇතැයි ජනතාව පවසති. බඩුමිල මෙන්ම රට යන අත පිළිබඳ මගතොටදී ඇසුණු කතාබහද අපමණය. හැමතැනම ඇසුණේ අවුරුදු කන හැටි නොව රටට හෙට සිදුවන්නේ කුමක්ද යන දේශපාලන කතාබහකි. නැතහොත් මෙහෙම ගියොත් තව අවුරුදු කීපයකින් අපේ රටට සිදුවන්නේ කුමක්ද යන තවත් කතාබහකි. මේ හැම කතාබහක්ම දේශපාලනය සම්බන්ධ වූ සමාජ ආර්ථික අර්බුදයකි. එය මෙරට ජනසමාජය නොමග යවමින් දේශපාලකයන් බලය සහ ප්‍රචණ්ඩත්වය වෙනුවෙන් ගෙන යන නිවට උත්සාහයක් ලෙස සමාජ විද්වත්හු අවධාරණය කරති.


Parlyment

  යුද්ධයෙන් පසු රට ගොඩනංවනවා යැයි කී මහින්ද රාජපක්ෂ සන්ධාන ආණ්ඩුව යුද්ධයෙන් පසු හොරකම මිස රට සංවර්ධනය කිරීමේ අවශ්‍යතාව හිතාමතා මගහැරියේ යැයි ජනතාව චෝදනා කළහ. ලෝකයේ බොරතෙල් මිල අන්තයටම පහළ බසිනවිටත් රට හදා සහන දිය යුතු යැයි කී මහින්ද සන්ධාන ආණ්ඩුව එම සහනය ජනතාවට නොදී ඒ මුදල් තමන්ගේ හොරකම් සඳහා අනුබලයක් කරගත්තේ යැයි එදා විපක්ෂය චෝදනා කළේය.

  පශ්චාත් යුද සමයේදීද යුද්ධයට පෙර පැවති සමය මෙන්ම හොරුන් තක්කඩියන්ට තවදුරටත් හොරකම් කිරීමට අවස්ථාව දුන් අයුරු 2015 ජනවාරි8 ඉලක්ක කරගත් 
මෛත්‍රී – රනිල් එක්සත් ජාතික පෙරමුණ අවධාරණය කළෝය. නමුත් ඒවාද මහින්ද ආණ්ඩුවේ කයිවාරු මෙන්ම කඩදාසි තුළ සිරකළ තවත් පොරොන්දු පත්‍රිකාවක් බවට වසර තුනකට පසු ජනතාව සිහිපත් කරති. 
  තමන්ට තව වැඩිමනත් කාලයක් රජ පුටුවේ රැඳී සිටිය යුතු යැයි සිතූ මහින්ද රාජපක්ෂ රාජකීය ජ්‍යෝතීර්වේදීන්ගේ උපදෙස් සහ තමන් වටා සිටි දේශපාලන පුරෝහිතයන් දුන් උපදෙස් අනුව 2014 ඔක්තෝබර් මාසයේ ජනාධිපතිවරණයක් වෙනුවෙන් එම තනතුරෙන් ඉල්ලා අස්විය. එතැන් සිට 2015 ජනවාරි 08 දින දක්වා ගෙවී ගිය මාස දෙකහමාරක කාලය තුළ රටේ සිදුවූ සංවර්ධනයක් හෝ වෙනත් ජාතික අවශ්‍යතා සඳහා අවස්ථානුකූල මැදිහත්වීමක් නොවීය. සිදුවූ එකම දේ නැවත බලය වෙනුවෙන් මහින්දලා පොදු දේපළ සිත්සේ විනාශ කිරීම පමණකැයි මේ වන විට දූෂණ විරෝධීහු පෙන්වා දී තිබේ.

  මැතිවරණයක් ප්‍රකාශයට පත්කළ පසු සිදුනොකළ යුතු යැයි පැවසෙන උත්සව පැවැත්වීම, නව ඉදිකිරීම් හෝ විවෘත කිරීම් පැවැත්වීම, පුරප්පාඩු පිරවීම වැනි දේ හේතුවෙන් රටේ ගමන තවත් පසෙකින් අඩපණ විය.
  එසේම මහපුටු පෙරළෙන අත දෙස බලා සිටින මහතැන් සහ සුපිරි රාජ්‍ය සේවකයන් තුළ ක්‍රමවත් සැලසුම් සහ විධිමත් සංවර්ධන ක්‍රමවේදයන් වෙනුවෙන් පැවති උනන්දුව දියවී යෑම ස්වාභාවික කරුණක් බවට පත්වීමෙන් රටේ සංවර්ධනය නතරවීමට එයද විශාල අනුබලයක් බව සමාජ විද්වත්හු අවධාරණය කරති.  

 එයින් පසු ඉහත කී මෛත්‍රී-රනිල් ආණ්ඩුව දින සියයේ ව්‍යාපෘතිය නමින් සංවර්ධන ව්‍යාපෘතියක් දියත් කළ ආකාරය ජනතාව පෙන්වා දෙති. එහිදී මහින්ද හැදූ සන්ධාන ආණ්ඩුවේ අගමැතිකමට රනිල් බලහත්කාරයෙන් පත්වී යැයි නැඟුණු චෝදනාව තුළ මහින්ද-මෛත්‍රී දෙපාර්ශ්වය රනිල්ගේ සංවර්ධන වැඩපිළිවෙළට අකුල් හෙළුෑ බවට ජනතාව චෝදනා කළහ. ‍කෙසේ හෝ අවසානයේදී එකී යෝජනා අතරින් තුනෙන් එකක් පමණක් ක්‍රියාත්මක කිරීමට හැකිවූ බවද ආණ්ඩුව පැත්තෙන් වාර්තා විය‍. ජනතා මනාපයෙන් ගොස් ආණ්ඩුවේ උරුමකම් පිළිබඳ කතාකරන ඇත්තන්ට  ජනතාව තමන් එතැනට යැවුවේ ඇයිද යන කරුණ අමතක වීම පිළිබඳ ඇත්තේ විමතියකි.
  අපි කෙසේ හෝ ආණ්ඩුව පෙරළනවා යැයි තර්ජනය කරමින් හැමදාමත් ඇසුණේ ඒකාබද්ධ විපක්ෂය ගම්මාන මටටමේ සිට දියත් කළ වර්ජන, අරගල, උද්ඝෝෂණ පිළිබඳ පුවත් රැසකි. ජනතාව වීදි බසින තැනට සහ මාර්ග අවහිරතා ඇති කරමින් ගමනාගමන අඩපණ කිරීමේ පුවත්ද ඒ අතර බහුලය. පොදුවේ ජනජීවිතය පවත්වාගෙන යාමට ඇති යහපත් ක්‍රමෝපායන් සියල්ල නිරතුරු අඩපණ කරමින් තම බලය වෙනුවෙන් කළ හැකි හැම පහත් වැඩක්ම කිරීමට ඒකාබද්ධ විපක්ෂය ගෙවුණු තුන්වසර තුළ කටයුතු කළ බවට කඩාකප්පල් කිරීම්වලට එරෙහි ජනතාව පවසති. මෙහෙම ගියොත් රට පස්සට යන එක වැළැක්විය හැකිදැයි ජනතාව ප්‍රශ්න කළහ.

    2015 ජනවාරි 08 ජනාධිපතිවරණය පැවැත්විණි. එයින් පත්වූ ජනාධිපතිවරයා සහ අගමැතිවරයාට මාස දෙක තුනක කාලයක් හැර රටේ ජාතික සංවර්ධනය වෙනුවෙන් යොමු වීමට තිබූ කාලය අසීමිත පරිදි සීමිත විය. එහිදී  2015 අගෝස්තු මැතිවරණය ප්‍රකාශයට පත් කළ තැන් සිට නැවතත්  මාස තුනහතරක් රට පස්සට ගියේය. නැවත පළාත් පාලන මැතිවරණය සඳහා ගතවූ 2017 අවසාන කාලයේ සිට 2018 මුල් භාගය දක්වා රට තුළ දේශපාලන වශයෙන් අවුල් සහගත තතත්වයක් නිර්මාණය කළේය.
  රටේ ප්‍රතිපත්ති තුළ රැ‍ෙඳමින් ඒවා නිරීක්ෂණය කර රට මෙහෙයවිය යුතු ජනාධිපතිවරයා මැතිවරණ ඉලක්ක කර පක්ෂ දේශපාලනය කරපින්නා ගත් දේශපාලන ඉත්තෙකු බවට පත්වීම රට ආපස්සට යාමට ප්‍රබල අනුබලයක් වී යැයි නිරීක්ෂකයෝ පෙන්වා දෙති.
  එවැනි තැනක පොදු අපේක්ෂකයා නිල්පාට හෝ අත ලකුණ වීම හෝ ශ්‍රීලංනි පාක්ෂිකයෙකු වන්නේ කෙසේදැයි ජනතාව අසති. ජාතික නායකයා එක් දේශපාලන පක්ෂයක වේදිකාව නියෝජනය කරන්නේ කෙසේදැයි ජනතාව විමතිය පළ කරති. ඒ අනුව රටේ ප්‍රධාන පුරවැසියා වන ජනාධිපතිවරයාත්, ඒකපාක්ෂික නම් රට ආපස්සට යාම පුදුමයක්දැයි ජනතාව විමසති. නිර්දේශපාලනීකරණය වූ ජනාධිපතිවරයෙකු බිහිවනතුරු රට ඉදිරියට ගෙන යාහැකි දැයි ජනතාව අසන්නේද එහෙයිනි.
  හොරු ඇල්ලීමට පත් කළ එෆ්සීඅයිඩිය වි‍ශේෂ ජනාධිපති කොමිසම අල්ලස් කොමිසමේ මහ පුටු වෙනස තුළ හෝ ජනාධිපතිවරයා අපේක්ෂා කළ පරිදි එක හොරෙකුටවත් දඬුවම් දීමට නොහැකි වූ ආකාරය ජනතාව සිහිපත් කළහ. පුළුවන්නම් අපි අල්ලපියව් හොරුන්ද ආණ්ඩුවට අභියෝග කරන විට මෛත්‍රීට කළ හැකි වූයේ කඩුව වැනීම පමණකැයිද හොරු අවලාද නැගූහ.

  අවුරුදු පතා කැබිනට් මණ්ඩලය පුරවමින් හිතවතුන් සතුටු කිරීම තුළ මෛත්‍රී-රනිල් ආණ්ඩුව තමන්ගේ නොහැකියාව තවදුරටත් විදහා දැක්වූ බවට ජනතාව චෝදනා කළහ. විද්‍යාත්මක පදනමක් යටතේ කැබිනට් සංශෝධනය කරනවා යැයි කී මෛත්‍රීට අද දක්වා තම කැබිනට්ටුව පත්කර ගැනීමට නොහැකි රාජ්‍යයක නායකකම දැරීමට සිදුව ඇතැයි එජාප පාක්ෂිකයෝද පෙන්වා දෙති.
  ජනතාව එක් ආණ්ඩුවක් වසර පහක කාලයක් සඳහා බලයට පත්කර ගන්නේ නම් බලය ලද ආණ්ඩුවේ වගකීම ගතවූ ආණ්ඩු විසින් කළ වැරදි නොකිරීමය. යළිත් එවැනි වැරදි සිදු නොවන තැනට කටයුතු සකස් කිරීමය. තමන්ද ඒ වැරදිවලින් අත් මිදී ජනතාවගේ අභිලාෂයන්ට ඇහුම්කන් දීමය. 

  ඒ වෙනුවට මෛත්‍රී-රනිල් ආණ්ඩුව තුළ සිදුවූයේ මහින්ද ආණ්ඩුවෙන් පන්නා දැමූ හොරුන් දූෂිතයන් ළංකර ගනිමින් හැට දෙලක්ෂයක් ජනතාව දිනා දුන් ජනවරම වෙනත් පටු දේශපාලන වාසි වෙනුවෙන් පාවා දීම බව එජාප පාක්ෂිකයෝ චෝදනා කරති.  මහින්ද පන්නා දැමූ හොරුන්ට මහපුටු ලබාදී නැති මරාලයන් තම හිසට දමාගෙන ජනතා විශ්වාසය පලුදු කරගන්නා තැනට ජාතික ආණ්ඩුවේ අගමැතිවරයාද  දූෂණයට අනුබල දුන් දූෂිතයෙකු බවට මෛත්‍රී නම් කිරීමෙන් ඔහුගේ දේශපාලන ගමනේ අවසානය සනාථ වූ බවට දේශපාලන නිරීක්ෂකයෝ සටහන් තබා අවසානය.

  රටේ නායකත්වය පිළිබඳ එවැනි සැකසංකා සහ ප්‍රබල චෝදනා තිබේ නම් ඒ නායකත්වය වෙනුවෙන් කිසිදු පක්ෂයකින් සුදුස්සෙකු මෙතෙක් නිර්මාණය නොවීම  හෙට දිනයේ රට මුහුණදී ඇති තවත් ප්‍රබල අභියෝගයකි. 
  ගෙවුණු වසර තුන තුළ රට අත්වින්දේ මැතිවරණ තුනක් වෙනුවෙන් වසරේ වැඩි කාලයක් වුවද, ජනතාව එයින් දිනාගත් දේශපාලන අයිතියක් නැත.  එසේම ඉදිරි මාස කීපය තුළ නැවත පළාත් සභා මැතිවරණ සඳහා නාමයෝජනා කැඳවනු ඇතැයි ආරංචි මාර්ග දක්වයි. එවිට එතැන් පටන් තවත් මාස හතරක කාලයක් රට අරාජිකත්වයට පත්වනු ඇත. දේශපාලකයන් පිල් මාරු කරනු ඇත. විපක්ෂයේ බහුතරය රට ගිනි තබනු ඇත. ඒ ජරමර අස්සේ ආණ්ඩුවේ ඇත්තන්ද තමන්ට ඇති හැකි පරිදි අතයට ගනුදෙනු කරමින් තමන්ගේ ගිණුම් තරකර කර ගනු ඇතැයිද  ජනතාව සිහිපත් කරති.

කෙසේ හෝ වසර හතරකට ආසන්න කාලයක් තුළ මෛත්‍රී-රනිල් ආණ්ඩුව මැතිවරණ  වෙනුවෙන් වසර දෙකකට වැඩි කාලයක් කා දැමුවේ යැයි ජනතාව පවසති. පක්ෂ ප්‍රතිශෝධනය වෙනුවෙන් වසර පුරාවට බල අගරල කරමින් රට දිනපතා අගාධයට ගෙන ගිය ආකාරය දක්වති. මහින්දාලාගේ පාර්ශ්වය ගිනි නොගත් තැන් සොයා යමින්  සහ ගිනි තැබීමට අවශ්‍ය දෑ නිර්මාණය කරමින් යුද්ධයෙන් දිනා දුන් රට නැවත ගිනි ගන්නා රාජ්‍යයක් බවට පත් කරවීමට පෙට්‍රල් භූමිතෙල් සපයමින් සිටින්නේ යැයි හැටදෙලක්ෂයක් ජනතාවගෙන් ප්‍රබල චෝදනාවකි. එවැනි පසුබිමක රට ආපස්සට යාම පුදුමයක් නොවේ.

  මේ වන විටිත් හැම දේශපාලන පක්ෂයකින්ම පන්නා දමන දූෂිතයන්, වංචනිකයන් මහින්දගේ පොහොට්ටුව පැත්තට එකතු කර ගනිමින් සිටින බවට චෝදනාවකි. වැඩි කලක් නොගොස් අපතයන්ගෙන් පිරි ආණ්ඩුවක් නිර්මාණය කර රට මහා අගාධයකට පත් කරවීමට මහින්ද කැසකවන්නේ යැයි ජනවාරි අට විජයග්‍රහණයේ හවුල්කාරයෝ පෙන්වා දෙන්නේද එහෙයිනි.

  අවස්ථා දෙක තුනකදී සිදුවූ කැබිනට් සංශෝධන තුළ අඩුම තරමින් තමන්ගේ අමාත්‍යාංශයට දෙතුන් වරකට වඩා ගොඩවූ මැති ඇමැත්තෝ විරලය. ඔවුහු අද එකතැනකය. හෙට කොතැනකට යා යුතුදැයි සිතන ඔවුන්ට තම අමාත්‍යංශය යටතේ යමක් කිරීමට අවස්ථාවක් නැත. ලෝකයේ උගතුන් බුද්ධිමතුන් සහ රට ගැන හිතන අවංක දේශපාලකයන් විපක්ෂය හොබවන රාජ්‍යයන්හි ආණ්ඩු පක්ෂය නිවැරදි මගට ගැනීමට එම රටවල විපක්ෂය ගන්නා කාර්යභාරය ජනතාවගේ ඇගයමුට ලක්වෙති.
  එහෙත් ලංකාව තුළ සිදුවන්නේ අපි වෙසක් පොහොය දෙකකින් හෝ ලබන වෙසක් පොහොයට හෝ 2020 ආණ්ඩු බලය අල්ලනවා යැයි ජනතාව විසින් නම් කළ දූෂිතයන් විසින් රට අවුල් කිරීම නම් හෙට දිනයේ රට යන අත ගැන ජනතාවට ඇත්තේ අර්බුදයකි. රට තුළ පවතින හැම අර්බුදයක්ම නිර්මාණය කළේ ඒකාබද්ධ විපක්ෂය යැයි එජාප පාක්ෂියන් මෙන්ම සියල්ල දෙස මධ්‍යස්ථ මතධාරීන් බලා සිටින්නේද එහෙයිනි.

  එපමණක් නොවේ. මේ වන විටත් ශ්‍රීලංනිපය තුළද නැවත ලිහිය නොහැකි අවුල් ජාලයක් යැයි එම පාක්ෂිකයෝ පෙන්වා දෙති. බලය ලබාගත්තද පවුල් ගස සමග සහ අපතයන් බැහැර කළ නොහැකි වීමේ ගැටුම් මත දිවෙන පක්ෂයේ ප්‍රතිපත්ති එහිලා මේ වන විටත් අනුබල සපයමින් සිටින ආකාරය ජනතාව මෙනෙහි කරති. 

 දැනටමත් එය කැබලි තුනකට කැඩී ඇත. මහින්දට එක පැත්තකි. මෛත්‍රීට තවත් පිලකි. ඒ දෙදෙනාටම නැති බණ්ඩාරනායක ප්‍රතිපත්ති අගයන තවත් පාර්ශ්වයකි. ඒ අනුව මහින්ද කඩාකප්පල්කාරයෙකි. මෛත්‍රී නිකමෙකි. රනිල් බටහිර ගැත්තෙකි. ජවිපෙ යනු කතාවේ තරමට වැඩ නැති න්‍යායවාදීන් පිරිසකි. එයින් ජනතාව අඟවන්නේ  හෙට රට භාරදීමට සුදුසු නායකත්වයක් විපක්ෂය තුළ මෙතෙක් බිහිවී නැති බවට චෝදනාවකි.
 ආණ්ඩු පක්ෂය තුළද නිසි නායකයෙකු නොමැතිනම් විපක්ෂය තුළද එවැන්නෝ දැකිය නොහැකි නම් පාර්ලිමේන්තුව හැමදාමත් දේශපාලන අවලාද සංශෝධන ප්‍රතිශෝධන සහ පුද්ගල චරිත ඝාතන වෙනුවෙන් දිනකට ලක්ෂ හතඅටක් මුදලක් කාදමන ආයතනයක් ලෙස පවත්වාගත යුතුද යන තර්කය ජනතාව විමසති.

 රට තුළ අර්බුද නිර්මාණය කරමින් ජනජීවිතය අඩාළ කරමින් නායකත්වය උදෙසා මරාගෙන මැරෙන්නට හෝ තමන්ගේ දූෂණ වංචා සැඟවීමට ජනතා අයිතිය  උදුරා ගන්නා දේශපාලකයන් කෙරෙහි ජනතාවට ඇත්තේ පිළිකුලකි. තවදුරටත් වංචාව, දූෂණය සඳහා අවකාශය සොයා යමින් දූෂිත චර්යාවන් ඇති නායකයන්  බලය උදෙසා පොරකන රටක හෙට දවස කෙරෙහි ජනතාවට ඇත්තේ සැකයකි. අවදානමකි. හෙට දවසේ රට පත්ව ඇත්තේ මෙම දූෂිතයන් සහ සැබෑ දේශපාලකයන් කවුද යනුවෙන් වටහා ගැනීමේ අර්බුදයකට බව පැහැදිලිය. එ‍හෙත් එහිලා පූර්වාදර්ශ නොමැති දේශපාලන ව්‍යුහයක් තුළ ජනතාවට සිදුවන්නේ 2020 මැතිවරණයේදීද හොරුන්, දූෂිතයන් තක්කඩියන් වෙනුවෙන් නැවත කතිරය ගැසීම බවද දේශපාලන නිරීක්ෂකයෝ පෙන්වා දෙති.

ලැබුවා වූ නව වසරේ ඇසෙන්නේද මෛත්‍රීගේ කුණු කතා මෙන්ම මහින්දගේ මැර කතාබහක් සහ රනිල්ගේ ගුප්ත දේශපාලන හැසිරීම පිළිබඳ ජනතා අප්‍රසාදයක් නම් ජනතාව පවසන පරිදි හෙට දවසේ රටේ සිදුවන්නේ කුමක්ද? අනේ කූඹියනේ. තොපට ර‍ජෙක් හිටියට අපට එහෙම කෙනෙක් නැතැයි කුංකුනාවේ හාමුදුරුවෝ එදා කී දේ ජනතාව නැවත සිහිපත් කරති.
   දිනාගත් එකසිය හයෙන‍් ආණ්ඩු නොකර රනිල් මෛත්‍රී ද්විත්වය හොරුන් සමග ජාතික ආණ්ඩු හැදීමට යාමෙන් තමන්ගේ දේශපාලන නොහැකියාව ජනතාවට පෙන්වා දුන් අයුරු හෙට දවසේ ලියවෙන වංශකතාවකද එසේම සනිටුහන් වනු ඇත.

අපිව හිරේ දැම්මත්, මොන චෝදනා නැගුවත් ඉදිරියට තැබූ පය පසුපසට ගන්න අපි සූදානම් නැහැ

වරින්වර විශ්වාසභංග ගෙන ඒම, ශ්‍රී ලංකා නිදහස් පක්‍ෂය දෙකඩ වීම සහ දේශපාලඥයන් අත්අඩංගුවට ගැනීම යන කරුණු හේතුවෙන් මෙරට දේශපාලනය දිනෙන් දින උණුසුම් වෙමින් පවතී. එහි නවතම සිදුවීම ලෙස මහින්දානන්ද අලුත්ගමගේ මහතා අත්අඩංගුවට ගැනීම හැඳින්විය හැකිය. මේ සියලු කාරණා පිළිබඳ මාතර දිස්ත්‍රික් පාර්ලිමේන්තු මන්ත්‍රී හිටපු කෘෂිකර්ම අමාත්‍ය මහින්ද යාපා අබේවර්ධන මහතා සමග කළ සංවාද සටහනකි මේ.


වත්මන් දේශපාලන වාතාවරණය සමිබන්ධව ඔබේ අදහස

කෙටියෙන්ම කියනවා නම් රට අරාජික වෙලා, රටේ නායකයෙක් නැහැ, රටේ අනාගතය වෙනුවෙන් මේ ආණ්ඩුව ගත්ත ක්‍රියාමාර්ගයකුත් නැහැ, කොටසක් කැබිනට් වර්ජනය කරනවා, කොටසක් කැබිනට් යනවා, ගිය අය කරපු දෙයක් නැහැ. ඒ වගේම විවිධ දේශපාලන වුවමනාව මත පුද්ගලයන්ට චෝදනා කරනවා, නඩු දානවා අවසානයේ අත්අඩංගුවට ගන්නවා. ඒ නිසයි රටේ අරාජික තත්ත්වයක් නිර්මාණය වෙලා තියෙන්නෙ.

මහින්දානන්ද අලුත්ගමගේ මහතා අත්අඩංගුවට ගැනීම සම්බන්ධව ඔබේ අදහස 

එය කල් ඇතුව සැලසුම් සහගතව කරපු දෙයක්. පසුගිය විශ්වාසභංගයට ක්‍රියාකාරීව කටයුතු කළ නිසා එතුමාගෙන් පළිගැනීම සඳහා තමයි කිසිම පදනමක් නැති අභූත චෝදනා නගලා අත්අඩංගුවට ගැනීම සිදු කළේ. මෙය තනිකරම දේශපාලන පළිගැනීමක් විදියටයි අප නම් කරන්නේ. 

පොදුජන පෙරමුණ විසින් ගෙන එන ලද විශ්වාසභංගය පරාජය වුණා නේද

අපි ඒ පරාජය බලාපොරොත්තු වූ දෙයක්. මොකද අපට විශ්වාසය තියන්න පුළුවන් 54 දෙනයි හිටියේ. අනෙක් සියලු දෙනා විවිධ කාරණාවලට නැමෙන උදවිය. ඒ නිසා මේ විශ්වාසභංගය දිනන්න කරපු දෙයක් නෙමෙයි. මෙය කළේ මේ දුර්ධාන්ත ආණ්ඩුවේ ක්‍රියාකලාපය හැකිතාක් දුරට ජනතාවට විවෘත කිරීමයි. 

නමුත් විශ්වාසභංගය හරහා පක්‍ෂය සමගි වීම තුළින් එ.ජා.ප.යට මෙහි වාසිය අත්වුණා නේද

නැහැ එය වැරදි තර්කයක්. එ.ජා.ප.යට වාසියක් අත්වුණේ නැහැ. අප ගෙන ආ විශ්වාසභංගය නිසා අද එ.ජා.ප.ය ඇතුළෙ විශාල ගැටලුවක් තියෙනවා. කොටසක් නායකත්වයේ වෙනසක් ඕන කියනවා. කොටසක් ඉන්න නායකයා හොඳයි කියනවා. ඒ නිසා පක්‍ෂයේ හරි නායකයෙක් නැහැ. නායකත්වයට කුලල්කාගන්න තත්ත්වයක් තමයි මම දකින්නෙ.

විශ්වාසභංගයට සහාය පළකිරීමට ටී.එන්.ඒ. සංවිධානයට අග්‍රාමාත්‍යවරයා කොන්දේසි 10කට එකඟත්වය පළකර තිබෙනවාmahinda yapa 001

පැහැදිලිවම ටී.එන්.ඒ. සංවිධානය මේ රට වෙනුවෙන් පෙනී සිටින සංවිධානයක් නෙමෙයි. මේ රට කැඩීම සඳහා, මේ රට බෙදීම සඳහා පෙනී සිටින සංවිධානයක්. එතකොට මේ අය එක්ක එකතු වෙලා වික්‍රමසිංහ මහත්තයා බලය රැකගන්න කටයුතු කරනවා කියන්නේ රට පාවාදීම සඳහා, රට දැවැන්ත අගාධයකට දැමීම සඳහා කටයුතු කරනවා කියන එකයි. එකඟ වූ කොන්දේසි දිහා බැලුවම එය හොඳට පේනවා.

ප්‍රථමයෙන් විශ්වාසභංගයක් ගෙන එන බව පැවසූ රංගේ බණ්ඩාර මහතා පසුව නිහඬ පිළිවෙතක් අනුගමනය කළා නේද

ඔව්. විශාල වශයෙන් මුදල් සහ වරදාන හුවමාරු වූ නිසා තමයි මුලින් විශ්වාසභංගය ගේන්න කටයුතු කළ උදවිය පූසො වගේ නිශ්ශබ්ද වුණේ. වික්‍රමසිංහ මහතා ජයග්‍රහණය කරන්න දායක වූ සියලු දෙනාට විවිධ වරප්‍රසාද හා වරදාන ලැබුණා කියන එක දැන් රහසක් නෙමෙයි. 

පසුව එ.ජා.ප. පසුපෙළ මන්ත්‍රීවරුන් ගෙන එන්න හැදූ විශ්වාසභංග 16ත් අතරමගදී නතර වුණේ ඇයි

ඒක තමයි එ.ජා.ප.යට අද වෙලා තියෙන විනාශය. මං මුලිනුත් කිවුවනේ එ.ජා.ප.ය අන්ත අගාධයකට වැටිලා තියෙන්නෙ. එයට සාක්‍ෂි තමයි විශ්වාසභංගය හකුළා ගැනීමට සිදුවීම. මහලොකුවට 16ක් ගේන්න කතා කළේ, පැය 24ක් යන්න කලින් ඒ සියල්ල අවසන් වුණා. අද ඒ පසුපෙළ මන්ත්‍රීවරුන්ට ජනතාවට මුහුණ දෙන්න බැරි තත්ත්වයක් තමයි තියෙන්නේ.

අද විපක්‍ෂ නායකවරයට එරෙහිව විශ්වාසභංගයක් ගෙන එමින් තිබෙනවා නේද

එතුමාට එරෙහිව අමුතුවෙන් විශ්වාසභංගයක් ගේන්න ඕන නැහැ. මේ රටේ සිංහල, දෙමළ ජනතාවගේ විශ්වාසය නැති කෙනෙක් තමයි විපක්‍ෂ නායකතුමා. එතුමා ආණ්ඩුවේ පන්දම්කාරයෙක් බවට පත්වෙලා තියෙනවා. දෙමළ ජනතාවට යමක් දිනාදෙන්න තියෙන අවස්ථාව එතුමා සීමා සහිතව ප්‍රතික්‍ෂේප කර තියෙනවා, මේ රජයට නිර්ලජ්ජිතව පන්දම් ඇල්ලීම නිසා.

ශ්‍රී ලංකා නිදහස් පක්‍ෂය තුළ දෙවැනි වතාවටත් දෙකඩ වීමක් සිදු වෙලා තියෙනවා නේද 

ශ්‍රී ලංකා නිදහස් පක්‍ෂයේ කොටසක් මේ ආණ්ඩුව එක්ක එකතු වුණා. ඒ උදවිය සියලු දෙනාම මේ අර්බුදයට දායක වුණා. ඒ වගේම මේ ආණ්ඩුවේ අර්බුදයට මැදිවුණා. ඒ අර්බුදය තුළින් ඔවුන් තවත් අර්බුදයටකට මුහුණ දීලා තියෙනවා. ඒ අයට අද ඉදිරියට යන්න බැරි තත්ත්වයක් තියෙන්නෙ. පක්‍ෂයෙන් පිරිස් ඉවත් වෙනවා. දේශපාලන අනාගතය ගැන හිතන්නවත් බැහැ. ඒ නිසා ශ්‍රී ලංකා නිදහස් පක්‍ෂයේ අයට අද යන එන මං නැති වෙලා තියෙන්නෙ. 

මේ තත්ත්වය මතද ශ්‍රී ලංකා නිදහස් පක්‍ෂයේ අමාත්‍යවරුන් 16 දෙනෙකු එම තනතුරුවලින් ඉවත් වුණේ සහ විපක්‍ෂයේ අසුන් ගැනීමට තීරණය කර තිබෙන්නෙ

ඔව්. ඒ අයට ශ්‍රී ලංකා නිදහස් පක්‍ෂයේ අනාගතයක් නැහැ. පක්‍ෂය දෙකඩ වෙලා ඉවරයි. දැන් ඒ අය වටපිට බලනවා කොයි පැත්තට එකතු වෙන්නද කියලා. ඒ අයට අපි මීට කලින් තමයි කතා කළේ විපක්‍ෂයට එකතු වෙන්න කියලා. දැන් හරි නුවණ පෑදුණු එක ගැන සතුටුයි. සියලු දෙනා එකමුතුව ඉදිරියේදී දැවැන්ත බලවේගයක් විදියට මේ රජයට විරුද්ධව කටයුතු කරන්න අපි බලාපොරොත්තු වෙනවා.

එම මන්ත්‍රීවරුන් 16 දෙනා ඉදිරියේදී පොදුජන පෙරමුණට එකතු වෙයිද 

එකතු වෙනවද, නැද්ද කියන එක ඒ අයගේ වැඩක්. පොදුජන පෙරමුණට ඕන කෙනෙකුට එකතු වෙන්න පුළුවන්. හැබැයි දේශපාලන වශයෙන් බලයට ආවාම ඒ අයට තනතුරු, නිලතලවලට පත්වීම ගැටලුවක් තිබෙනවා. මොකද අපි සූදානම් නැහැ අපේ පක්‍ෂයේ හිටපු උදවිය ඇරෙන්න වෙන උදවියට තනතුරු, නිලතල ලබාදෙන්න. මොකද අපට ඒ උදවිය විශ්වාස කරන්න අමාරුයි.

එක්සත් ජාතික පක්‍ෂයේ ප්‍රතිසංවිධානයක් සිදුවෙමින් පවතිනවා. මෙය ඔබ දකින්නෙ කොයි ආකාරයෙන්ද

අද එ.ජා.ප.යට වෙලා තියෙන්නෙ බල්ලා පොළේ ගියා වගේ වැඩක්. පොළට ගිය බල්ලා ගන්න දෙයකුත් නැහැ, අරගෙන යන දෙයකුත් නැහැ. හැබැයි ලොකුවට බුරාගෙන සද්ද දාගෙන යන්නේ. ඒ වගේ තමයි එ.ජා.ප.යේ ප්‍රතිසංවිධානය කිසි වැඩක් නැහැ. ඔය සිදුවෙන්නෙ රඟපෑමක් පමණයි.

පළාත් සභා මැතිවරණය කල්යන බවට විවිධ මත ඉදිරිපත් වෙනවා නේද

සහතිකවම මේ අය මැතිවරණය කල්දැමීමේ උපායක් යොදමින් ඉන්නවා. මොකද මේ වෙලාවේ මැතිවරණයකට ගියොත් පළාත් පාලන ආයතන ඡන්දයට වඩා වැඩි පරාජයක් අත්වෙන්නෙ කියලා මේ අය දන්නවා. ඇයි මේ රටේ ජනතාව මෝඩයෝ නෙමෙයි, මේ රට ගැන කැක්කුමක් තියෙන ජනතාවක් සිටින්නෙ. ඒ අයට බොරු කියලා බලය ගත්ත එක ඒ අයට දැන් තේරිලා ඉන්නෙ. ඒ නිසා ආණ්ඩුව කියන බොරුවලට ජනතාව රැවටෙන්නෙ නැහැ කියලා ආණ්ඩුව කරවන උදවියම දැන් දන්නවා. 

පොදුජන පෙරමුණෙහි ඉදිරි දේශපාලන වැඩකටයුතු පිළිබඳ මතක් කළොත්

අපි සියල්ලන්ම මේ රජය පළවා හැරීම සඳහා දේශපාලන ක්‍රියාමාර්ගයකට ඉදිරියට යනවා. ජනතාව අපෙන් බලාපොරොත්තු වෙන්නෙ එවැනි දෙයක්. එය ඉටුකිරීම අපගේ වගකීමක්. අපිව හිරේ දැම්මත්, මොන චෝදනා නැගුවත් ඉදිරියට තැබූ පය පසුපසට ගන්න අපි සූදානම් නැහැ කියලා වගකීමෙන් මතක් කරනවා

නව මැතිවරණ ක්‍රම රටට ගැළපෙනවාද යන්න තවදුරටත් සොයා බැලිය යුතුය

540524-election-poll-vote-sudhir-shetty1

මේ වසර වනතෙක් පැවැති සැම මැතිවරණයකදීම තේරී පත්වන සභිකයන් සතියක් දෙකක් තුළ රාජකාරී කටයුතු ආරම්භ කිරීම සිදු විය. මේ නිසා මැතිවරණවලදී ජනතාව හමුවේ ලබාදුන් පොරොන්දු ඉටු කිරීමද, මැතිවරණය පවත්වා කෙටි කාලයක් තුළ ආරම්භ කිරීමට මහජන නියෝජිතයන්ට හැකි විය.

එහෙත් මේ වසරේ පෙබරවාරි 10 වැනිදා පැවැති පළාත් පාලන මැතිවරණයේ ප්‍රතිඵල නිවැරදි ලෙස නිකුත් කිරීමක් හෝ මෙතෙක් සිදු වී නොමැත.
නව මැතිවරණ ක්‍රමයක් යටතේ පැවැති මෙම මැතිවරණය තුළින් ජනතාවට වගකියන මන්ත්‍රීවරයෙකු ගමට, ප්‍ර‘දේශයට පත් වන නිසා මෙම මැතිවරණ ක්‍රමය ඉතාමත් හොඳ මැතිවරණ ක්‍රමයක් ලෙසට නිරීක්ෂණ සංවිධාන සහ සමහර දේශපාලඥයන් විසින් පෙන්වා දෙනු ලැබිණි.

මෙම පිරිසට අමතරව රටේ ජනාධිපතිවරයාද මෙම ක්‍රමය ඉතාමත් හොඳ ක්‍රමයක් ලෙසට පෙන්වා දීමට කටයුතු කළේය.
ගමට මන්ත්‍රීවරයෙකු තේරී පත්වන නිසා රටේ ජනතාවගෙන් බොහෝ දෙනෙක්ද මෙම ක්‍රමය ඉතාමත් හොඳ ක්‍රමයක් ලෙසට සිතුවා විය හැකිය.
එහෙත් මෙම මැතිවරණ ක්‍රමය ඉතාමත් අවුල් ජාලාවක් ඇති කරන මැතිවරණ ක්‍රමයක් බවට තහවුරු වෙමින් තිබේ.

බහුතර දේශපාලන පක්ෂවල එකඟතා මත සකස් වූ මැතිවරණ ක්‍රමයට අනුව ජනතාවගේ ඡන්දයෙන් මන්ත්‍රී ධුර 60%කුත්, ඉදිරිපත් කරන ලයිස්තුවෙන් 40෴කුත් තෝරා ගැනීම සිදු විය. 
මීට අමතරව සමස්ත සභික ප්‍රමාණයෙන් 25෴ක් කාන්තාවන් විය යුතු බවටද නීතියක් පනවා තිබිණි. මේ ආකාරයට පෙබරවාරි 10 වැනිදා මැතිවරණය පැවැත්වුවද තේරී පත්වන සභික ප්‍රමාණය කොතරම්ද යන්න ප්‍රකාශ වී නොමැති නිසා 25෴ කාන්තා නියෝජනයෙන් තේරී පත් වී සිටින කාන්තා සභිකයන්ගේ ප්‍රමාණය හෝ මෙතෙක් රටට දැනගැනීමට නොහැකි වී තිබේ.

මේ නිසා ආයතන 340ක් වෙනුවෙන් පැවැති මැතිවරණයට අදාළව සභා ස්ථාපිත කිරීමද අවසන් කිරීමට මෙතෙක් නොහැකි වී තිබේ.
නව මැතිවරණ ක්‍රමයක් යටතේ මැතිවරණය පැවැත්වීමට යෑම නිසා පළාත් පාලන ආයතනවල නිල කාලය අවසන් වී වසර දෙකක් තුනක් යන තෙක් එම ආයතනවලට නියෝජිතයන් පත්වීමක් සිදු වූයේද නැත.
මේ නිසා තම බලප්‍ර‘දේශවල ජනතාවට උපතේ සිට මරණය දක්වා පළාත් පාලන ආයතනවලින් සිදුවිය යුතු සේවා ඉටු කිරීමද බොහෝ දුරට එම කාලය තුළ අඩපණ වී තිබිණි.
මේ නිසා පළාත් පාලන මැතිවරණය කඩිනමින් පැවැත්විය යුතු බවට 2017 වසරේ මාර්තු මාසයෙන් පසු සිවිල් සංවිධාන, සමහර දේශපාලන පක්ෂ සහ නිරීක්ෂණ සංවිධාන අරගලවල නිරත විය.
මේ නිසා මැතිවරණය කඩිනමින් පැවැත්වීම සඳහා අවශ්‍ය කටයුතු කිරීමට පළාත් සභා සහ පළාත් පාලන අමාත්‍යාංශයට සිදු විය.
මේ අනුව අදියර දෙකක් යටතේ නාමයෝජනා කැඳවා පෙබරවාරි 10 වැනිදා මැතිවරණය පැවැත්වීමට බලධාරීහු තීරණය කළහ.

කල්ගත වී හෝ මැතිවරණය පැවැත්වුවද ඒ හරහා පළාත් පාලන ආයතනවලට මහජන නියෝජිතයන් පත්වීම සිදු වූ නිසා, එතෙක් අතපසු වූ වැඩ කොටස් කඩිනමින් සිදු කරගත හැකි බවට ජනතාව බලාපොරොත්තු තබාගෙන කටයුතු කළහ.
එහෙත් අද දවස වනවිටත් බොහෝ පිරිසකගේ බලාපොරොත්තු ඉෂ්ට වී නැත. මීට අමතරව ගමට, නගරයට වැඩක් කිරීමට පැමිණ මහජන නියෝජිතයන්ගෙන් සැලකිය යුතු පිරිසකටද එම බලාපොරොත්තු ඉටුකර ගැනීමට නොහැකි වී ඇත.
1977 වසරින් පසු පැවැති සාමකාමීම මැතිවරණය ලෙස සැලකූ මෙම මැතිවරණය ප්‍රතිඵල නිකුත් කිරීමේ සිට විවිධ ගැටලු නිර්මාණය කළේය.

ප්‍රතිඵල ජනමාධ්‍ය වෙත නිකුත් කිරීම ප්‍රමාද වූයේ තාක්ෂණික ගැටලු නිසා බවට මැතිවරණ කොමිෂන් සභාව ප්‍රකාශ කළද, අදටත් ආයතන 340ක ප්‍රමාණයකට තේරී පත්වන සභික ප්‍රමාණය ගැන සඳහනක් නැත.
මීට අමතරව සමහර පළාත් පාලන ආයතනවල 50෴ක බලයක් හිමි කරගත් පක්ෂවලට සභාවල බලය පිහිටුවාගැනීමට නොහැකි තත්ත්වයක්ද උදා විය.
බහුතර බලයක් නොමැති ආයතනවල නගරාධිපති, සභාපති පත් කිරීම සඳහා පළාත් පාලන ආයතනවල පැවැති ඡන්ද විමසීම්වලදී සමාන ඡන්ද ලබාගැනීම නිසා තුණ්ඩු උඩ දමා තනතුරුවලට පත් කර ගැනීමද සිදු විය.
මීට අමතරව අදාළ මැතිවරණයේදී සමාන ඡන්ද ප්‍රමාණයක් ලබාගැනීම නිසා තුණ්ඩු කැබලි උඩ දමා මන්ත්‍රීවරයා තෝරාගැනීමක්ද සිදු විය

වසර ගණනාවක් තිස්සේ සකස් කර රුපියල් කෝටි 400කට අධික මුදලක් වියදම් කර මැතිවරණය පවත්වා මන්ත්‍රීවරුන් තෝරාගැනීම සහ තනතුරුවලට තෝරාගැනීම තුණ්ඩු කැබලි උඩ දමා සිදු කරනවා නම් ඒ පිළිබඳ දෙවරක් සිතිය යුතුය.
මෙම මැතිවරණ ක්‍රමය ඉතාමත් හොඳ එකක් බවට සමහර දේශපාලනඥයන් සඳහන් කළද මේ ක්‍රමය හරහා තේරිපත් වන සභිකයෙකු ඉවත් කර පරාජයට පත් සභිකයෙකු සභාවට ගෙන ඒමේ බලයක් ඇති කර තිබේ.
මීට අමතරව ජනතාවගේ ඡන්දයෙන් මන්ත්‍රීවරුන් 60෴ක් පත්වන විට ඉතිරි 40෴ පත් කිරීමේ බලය පක්ෂ නායකයා හෝ ආසන සංවිධායකවරුන්ට හිමි වේ. මේ නිසා අදාළ ලැයිස්තුවට කුමන පුද්ගලයෙකු ඇතුළත් කර තිබෙනවාද යන්න ඡන්ද දායකයන්ගෙන් අති බහුතරයක් දන්නේ නැත.

මේ නිසා ලැයිස්තුවෙන් ඉදිරිපත් කරන ඕනෑම පුද්ගලයෙකු මහජන නියෝජිතයෙකු බවට පත් කිරීමටද පක්ෂවලට බලය හිමි වී ඇත.
ඒ සඳහා ජනතාවට සිදු කිරීමට තිබෙන්නේ කොට්ඨාසයට ඉදිරිපත් කර තිබෙන අපේක්ෂකයා ජයග්‍රහණය කිරීමට ඡන්ද ලබාදීම පමණි.
මෙම ක්‍රමය හොඳ ක්‍රමයක් නිසා පළාත් සභා මැතිවරණයටද කොට්ඨාස හා සමානුපාතික මිශ්‍ර ක්‍රමය හඳුන්වාදීමට සැලසුම් කර තිබේ.
මෙම ක්‍රමය හඳුන්වාදීමේදී කොට්ඨාස ක්‍රමයෙන් 50%කුත්, අනුපාත ක්‍රමයෙන් හෙවත් ලැයිස්තුවෙන් 50%කුත් වශයෙන් සභිකයන් තෝරා පත් කර ගැනීමට සැලසුම් කර තිබේ.
60෴ – 40෴ ක්‍රමය යටතේ පළාත් පාලන ආයතනවල මේ තරම් ගැටලු නිර්මාණය වී තිබෙනවා නම් 50% – 50% ක්‍රමය යටතේ පළාත් සභා දැඩි අර්බුදයකට ලක්වීම වළක්වාගත නොහැකි වනු ඇත.
මෙම අර්බුදය හරහා පළාත් සභාවලින් ජනතාවට ඉටුවිය යුතු සේවා පවා නිසි ලෙස ඉටුවිය නොහැක. මන්දයත් යම් පක්ෂයක් 50%ක බලයක් අත්කර ගතහොත් එම ආයතනය ඉදිරියට ගෙන යෑමට නොහැකි තත්ත්වයක් නිර්මාණය වන හෙයිනි. මේ නිසා අවසානයට සිදු වන්නේ සමස්ත කාලය පුරාම වාද විවාද පවත්වමින් කාලය කා දැමීම පමණි.

මේ නිසා කොට්ඨාස ක්‍රමය තවදුරටත් අවශ්‍ය නම් අඩුම වශයෙන් කොට්ඨාස ක්‍රමය යටතේ සභිකයන් 70%කුත්, ලැයිස්තු ක්‍රමය යටතේ 30%කුත් වශයෙන් තෝරාපත් කරගැනීමේ ක්‍රමය හෝ හඳුන්වා දිය යුතුව තිබේ.
එසේ සිදුකළහොත් යම් තරමක හෝ ශක්තිමත් පළාත් සභාවක් නිර්මාණය කරගැනීමට හැකිවනු ඇත.

එසේ නොමැතිව යම් යම් දේශපාලනඥයන්ගේ උවමනා එපාකම් මත 50%ක් කොට්ඨාස ක්‍රමය යටතේ තෝරාපත් කර ගැනීමට කටයුතු කළහොත් ජනතාවට සේවය සපයන ළඟම ආයතන දෙකම අර්බුදයට ලක්වීම වළක්වාගත නොහැකි වනු ඇත.
මෙම ක්‍රමය කොතරම් හොඳ ක්‍රමයක් බව සඳහන් කළද මන්ත්‍රීවරුන් මුදලට අලෙවි වීමද සිදු වේ. මේ නිසා සැබෑ ජනමතය තහවුරු නොවන ආකාරයක්ද පෙන්නුම් කරමින් තිබේ. මෙම තත්ත්වය පළාත් සභා තුළ සිදු නොවීමට අවශ්‍ය කටයුතු සම්පාදකය කළ යුතුව තිබේ. 
මීට අමතරව පළාත් පාලන ආයතන සීමා නිර්ණයට අනුව එතෙක් පැවැති මන්ත්‍රී ධුර ප්‍රමාණය දෙගුණයක් බවට පත් වී තිබේ. ජනතා සේවයක් කරන බව කියමින් බලයට පත් වුවත් අතිබහුතරයක් තමන් සිදුකරන සේවාව වෙනුවෙන් වැටුප් හා දීමනා ලබාගනිති.
දැනට ජනතා විමුක්ති පෙරමුණ ඔවුන්ගේ සභිකයන්ට ලබාදෙන වැටුප් හා දීමනා නැවත ජනතා සේවය වෙනුවෙන් යොදවන බවට පොරොන්දු ලබා දී ඇත. එහෙත් පළාත් පාලන ආයතනවලට පත් වූ කිසිවෙකුත් ගරු සේවයක් කරන බවට පොරොන්දු ලබා දී නැත.
මේ නිසා සියලු දෙනාට වැටුප් හා දීමනා ලබාදීමට මහජනතාවට විශාල මුදලක් දැරීමට සිදු වේ. පළාත් සභා මැතිවරණයේදීත් මන්ත්‍රී ධුර ප්‍රමාණය ඉහළ ගියහොත් ඔවුන් නඩත්තු කිරීමේ කටයුත්තද ජනතාව මත පැටවේ. මේ නිසා මෙම ක්‍රමය පළාත් සභාවලට හඳුන්වා දීමේදී ඒ පිළිබඳවද අවධානය යොමු කිරීම වගකිවයුත්තන්ගේ යුතුකමකි.

මීට අමතරව පළාත් පාලන මැතිවරණයට 25% කාන්තා නියෝජනය හඳුන්වා දුන්නද, එහි ඇති ගැටලු නිසා සමහර පළාත් පාලන ආයතනවල 25෴ කාන්තා නියෝජනය තහවුරු කිරීමට යෑමේදී අතිරේක ලයිස්තුවෙන් විශාල කොටසක් කාන්තා සභිකයන් වෙනුවෙන් වෙන් කිරීමට සිදු විය.

මේ නිසා පළාත් සභාවලට කාන්තා නියෝජනයක් හඳුන්වා දෙනවා නම් අදාළ සැලසුම් සකස් කරන අවස්ථාවේදීම කිසිවෙකුටත් අසාධාරණයක් සිදුනොවන ආකාරයේ ක්‍රමවේදයක් සකස් කළ යුතුය.
එසේ නොමැති නම් සිදුකළ යුතුව තිබෙන්නේ මැතිවරණයකදී අපෙක්ෂකයෙකුට වියදම් කළහැකි මුදල සීමා කිරීමට නීති සකස් කර මනාප ක්‍රමය යටතේ මැතිවරණය පැවැත්වීමය. ගමට නගරයට මන්ත්‍රීවරයෙකු පත් නොවුණද ජනතාවට තමන් කැමති පුද්ගලයාට ඡන්දය ලබා දී ඔහු පත් කරගැනීමට එම ක්‍රමය යටතේ අවස්ථාව හිමි වේ. එහෙත් කොට්ඨාස හා සමානුපාතික ක්‍රමය යටතේ සිදුවන්නේ කොට්ඨාසයට පක්ෂය විසින් නම් කරන පුද්ගලයා තේරී පත් වීමය. එනම් මෙම ක්‍රමය යටතේ තමන් කැමති පක්ෂයට ඡන්දය ලබාදුන් පසු පක්ෂය විසින් කොට්ඨාසයට ඉදිරිපත් කර සිටින පුද්ගලයා තේරී පත් වීමය. 

මීට අමතරව මෙම නියෝජිතයා පත්වීම හරහා පක්ෂයේ කැමැත්ත මත ලැයිස්තුවෙන් ඉදිරිපත් කර සිටින පුද්ගලයාද තේරී පත් වීමය. මෙය ඉතාමත් හොඳ ප්‍රජාතන්ත්‍රවාදී ක්‍රමයක් යැයි කිසිවෙකුටත් පැවසිය නොහැකිය.
ප්‍රජාතන්ත්‍රවාදී ක්‍රමය වන්නේ තමන් කැමැති පුද්ගලයාට ඡන්දය ලබා දී තෝරා පත් කර ගැනීමය. මේ නිසා සිදුවිය යුත්තේ වඩාත්ම ප්‍රජාතන්ත්‍රවාදී ක්‍රමයක් රට තුළ ක්‍රියාත්මක කිරීමය.
මීට අමතරව කොට්ඨාසයට මන්ත්‍රීවරයෙකු පත් වූ පසු ඔහු ජනතාව වෙනුවෙන් සේවය කරනු ඇතැයි සිතිය නොහැකිය. මේ නිසා දැනට තේරී පත් වී සිටින මහජන නියෝජිතයන් සැබෑ මහජන නියෝජිතයන් බවට පත් කිරීමටද රට තුළ වැඩපිළිවෙළක් සකස් කළ යුතුය.
මෙතෙක් පැවැත ආ ක්‍රමයට අනුව පළාත් පාලන ආයතන යනු හොරකමට, වංචාවට, දූෂණයට පළමු පාඩම් කියාදෙන ස්ථානයක් ලෙස බොහෝ පිරිසක් විසින් හඳුනාගෙන ඇත. මේ නිසා සැලකිය යුතු පිරිසක් පළාත් පාලන ආයතන තුළින් දේශපාලන ගමන ආරම්භ කරන්නේ ජනතාව ගැන පමණක්ම සිතා නොවේ.

පළාත් පාලන ආයතනයට තේරී පත්වන අති බහුතර සභිකයන්ගේ බලාපොරොත්තුව වී තිබෙන්නේ කෙසේ හෝ පළාත් සභාවට පැන ගැනීමය. පළාත් සභාවට තේරී පත්වන සභිකයා සැම විටම උත්සාහ කරමින් සිටින්නේ පාර්ලිමේන්තුවට පැන ගැනීමටය. මෙවැනි ජවාරම් ක්‍රියා සිදුවන තත්ත්වයක් තුළ මැතිවරණ ක්‍රමය වෙනස් වූ පමණින් සැබෑ මහජන නියෝජිතයෙකු බිහි කරගැනීමට නොහැකිය.

එසේ සිදු කිරීමට අවශ්‍ය නම් සිදුවිය යුත්තේ දේශපාලනය ගරු සේවයක් බවට පත් කිරීමය. නිදහස ලැබීමෙන් පසු දශකයක් දෙකක් යනතුරු සමහර පුද්ගලයන් දේශපාලනයට පැමිණියේ තමන්ගේ පුද්ගලික දේපොළ පවා නැති කරගනිමින් දේශපාලනය කිරීමටය.
එහෙත් අද දවස වනවිට බොහෝ පිරිසක් දේශපාලනයට පැමිණෙන්නේ රැකියාවකට යොමුවන ආකාරයටය. එසේ නොමැති නම් නැති බලයක් ලබාගැනීම සඳහාය. පාර්ලිමේන්තුව ගතහොත් එයට පැමිණෙන සෑම මහජන නියෝජිතයෙකුටම වසර 05ක සේවා කාලයකින් පසු විශ්‍රාම වැටුපක්ද හිමි වේ. මේ ආකාරයට වැටුපක්, විශාල දීමනාවක් සහ විශ්‍රාම වැටුපක්ද ලැබුවද තවමත් ඔවුන් ආමන්ත්‍රණය කෙරෙන්නේ %ගරු^ වචනය ඉදිරියට දමාගෙනය. මේ නිසා ඔවුන් රටට, ගමට, නගරයට ගරු සේවයක් සිදු කරනවා යැයි පවසන්නට කිසිවෙකුටත් හැකියාවක් නැත.

 

හිසතෙල් ගෑමේ කතාව

හිසතෙල් ගෑම, සිංහල හා හින්දු අලුත් අවුරුදු චාරිත්‍ර අතර ප්‍රධානතම චාරිත්‍රයක් ලෙස සැලකේ. මේ මගින් සිදුකරනු ලබන්නේ ඊළඟ වසරට නිරෝගීකම ප්‍රාර්ථනා කිරීමයි. හිසතෙල් ගෑම, ඇතුළු අවුරුදු චාරිත්‍ර, එහි ඉතිහාසය ආයුර්වේදය හා හෙළ වෙදකමට අනුව විද්‍යාත්මකව විමසා බලමින් ආයුර්වේද දෙපාර්තමේන්තුවේ සංවර්ධන අංශයේ වෛද්‍ය නිලධාරී පරාක්‍රම විජයනාග මහතා සමග කරන ලද සාකච්ඡාවක් ඇසුරින් මෙම ලිපිය සකස් කෙරුණි.


Poto---01

ආයුර්වේදයේ මෙන්ම දේශීය වෙදකමේදී හිසේ සිට පාදාන්තය දක්වා නිරෝගීකම ප්‍රාර්ථනා කරනවා. හිස ශරීරයේ උත්තමාංගයයි. හිස තුළ මොළය පිහිටා තිබෙනවා. මොළයත් සමග ශරීරයේ සියලුම ස්නායු සම්බන්ධ වෙනවා. සිතිවිලිවලට ප්‍රධාන වන්නෙත් හිසයි. ඒ නිසා නිරන්තරයෙන් හිස රැකගැනීම නිරෝගීභාවයට ප්‍රධාන වෙනවා. සිංහල අලුත් අවුරුදු චාරිත්‍රවල ආරම්භය නිශ්චිතව සඳහන් කළ නොහැකියි. පැරණි බැබිලෝනියන්වරු %‘‘අවුරු’ යනුවෙන් සූර්යයා හඳුන්වා තිබෙනවා. සිංහලයන් එයට %‘‘ඉද්ද’ යනුවෙන් එක්කර‘‘ %අවුරුද්ද’ යනුවෙන් භාවිතකර තිබෙනවා. ඒ අනුව සූර්යයා සමග කටයුතු කිරීම, ඉර සමග පිබිදීම ආදිය අවුරුද්ද ලෙස හැඳින්විය හැකියි. අවුරුද්ද නැකැත් චාරිත්‍ර අනුව ප්‍රධාන කොටස් 12කට බෙදා තිබෙනවා. රාශි (ලග්න) යනුවෙන් හඳුන්වන්නේ එයයි. වසරකට මාස 12ක් නිර්මාණය වීම මේ අනුව සිදුවී තිබෙනවා. පැරණි සුමේරියන්වරු අහස කොටස් 08කට බෙදා හඳුනාගෙන තිබුණා. මොහෙන්ජදාරෝවරු එම කොටස් 08ට අලුත් රාශි 04කුත් එකතුකර අද තිබෙන සූර්ය මාස ක්‍රමය සකස් කළා. මේ අනුව බලන කල අලුත් අවුරුද්ද සිංහල, දෙමළ, මුස්ලිම් යන සියලු දෙනාගේම ශ්‍රී ලාංකික ජාතික උත්සව මංගල්‍යයක් ලෙස සැමරිය හැකියි.

හින්දු අලුත් අවුරුදු උත්සවය ලංකාවට රැගෙන එන්නේ ඉන්දියානු ද්‍රවිඩ ජාතිකයන්. එය සිංහල අවුරුදු උත්සවය සමග එකට ඈදී වත්මන් අවුරුදු උත්සවය නිර්මාණය වී තිබෙනවා. එය ශත වර්ෂ ක්‍රමය ඉන්දියාවේ ප්‍රබලව පැවති ක්‍රිස්තු වර්ෂ 70 යුගයේදී පමණ සිදුව තිබෙනවා. ඒ අනුව අවුරුදු චාරිත්‍ර ලංකාවේ කෝට්ටේ යුගයෙන් පසු සීතාවක යුගයේ ආරම්භ වූ බවට විශ්වාස කළ හැකි සාක්ෂි තිබෙනවා.ක්‍රි.ව 1521 – 1592 සීතාවක යුගයයි. නමුත් ඊට පෙර සිටත් අවුරුදු චාරිත්‍ර තිබී තිබෙනවා.

ශ්‍රී ලංකාවේ ලිඛිත ඉතිහාසය ලෙස සලකන්නේ වසර 2560ක පමණ ඉතිහාසයක්. ඒ බව අප තහවුරු කරගෙන තිබෙන්නේ මහාවංශය ඇසුරු කරගෙනයි. යටත්විජිත යුගයේදී ශ්‍රී ලංකාවේ සිටි සිවිල් නිලධාරියෙකු වූ එච්. ඩබ්ලිව් කොඩ්රින්ටන් ශ්‍රී ලංකාවේ ඉතිහාසය සම්බන්ධයෙන් ක්‍රි.ව 1912 දී ආරම්භ කොට 1926 දී පොතක් ලියා පළ කළා. එම පොත සංක්ෂිප්ත ලංකා ඉතිහාසය (A Short History of Ceylon) ලෙස නම්කර තිබුණා. ඔහු ඉතිහාසය පිළිබඳව ගැඹුරින් හැදෑරූවකු නොවෙයි. එංගලන්ත ජාතිකයෙකු වූ ඔහු ශ්‍රී ලංකාවේ සිටියේ වසර 14ක කාලයක් පමණයි. ඔහු ලියන ලද පොතපත ඇසුරින් අපේ ඉතිහාසය සකස්කර ගත් බවක්ද පෙනෙන්නට තිබෙනවා. සත්‍ය ලෙසම ඔහු කර ඇත්තේ මහාවංශයේ කොටස් ඔවුන්ට ගැළපෙන සේ ලියා පළකර ගැනීමයි. මහාවංශයේ ඔවුන්ට ගැළපෙන කොටස් පමණක් ඔහු ඔහුගේ පොතට යොදාගෙන තිබුණා.

කොඩ්රින්ටන්, එංගලන්තයේ කේම්බ්‍රිජ් විශ්වවිද්‍යාලයේ ඉගෙන ගත් අයෙක්. එකල කේම්බ්‍රිජ් විශ්වවිද්‍යාලයේ යටත්විජිත පිළිබඳව අධ්‍යයනය කරන විෂයක් තිබුණා. යටත් විජිතවල භාෂාව, ඉතිහාසය, සාහිත්‍යය, ආගම, කලා ශිල්ප ආදිය පිළිබඳව අධ්‍යයනය කිරීමයි එම විෂය යටතේ හදාරන්නට තිබුණේ. එංගලන්තයේ සිවිල් සේවයට ඇතුළත් කර ගත්තේ මේ විෂය හැදෑරූවන්. එංගලන්තයේ රාජකීය සංගමය ආරම්භ කරන්නේ 1821දී. 1845 දී එහි 
ශ්‍රී ලාංකේය ශාඛාව පිහිටුවනවා. රාජකීය ආසියාතික සංගමය මගින් කරන්නේ යටත් විජිතවල ඉතිහාසය අධ්‍යයනය කර එය ඔවුන්ට අවශ්‍ය පරිදි නිර්මාණය කිරීමයි.

මහාවංශය තුළ ඉතිහාසය සඳහන් වන්නේ බුදුන් වහන්සේ ලොව පහළ වූ ක්‍රි.පූ 06 වැනි සියවසේ සිටයි. බුදුන් වහන්සේ පිරිනිවන් පෑ දින විජය 700ක් සමග පැමිණ ශ්‍රී ලංකාව ජනාවාස කළ බව එහි සඳහන් වෙනවා.
නමුත් මහාවංශයට එහා ගිය ඉතිහාසයක් අපේ රටට තිබෙනවා. කොඩ්රින්ටන් පවා ඒ ඉතිහාසය වසාදමා තිබෙනවා. ශ්‍රී ලාංකේය ඉතිහාසඥයන් පවා මහාවංශයට එහාගිය ඉතිහාසය ගැඹුරින් සොයාබැලීමක් කර නැහැ.
ශ්‍රී ලංකාව පිළිබඳ ලිඛිත ඉතිහාසයේ පැරණි බව පිළිබඳව සැලකීමේදී මහාවංශයට එහාගිය ඉතිහාසයක් තිබෙන බව පුරාවිද්‍යා හා භාෂා සංකලනයන් පිළිබඳ සාක්ෂි අනුව තහවුරු වෙනවා. හොමෝ ඉරෙක්ටස් මානවයන් ලංකාවේ වාසය කළ බවට සාක්ෂි තිබෙනවා. නූතන මානවයාගේ පැරණි මානව පොසිල ලංකාවෙන් හමුවෙලා තිබෙනවා.

ඉරණමඩු පස් ස්ථරවලින් වසර ලක්ෂ 06කට වඩා පැරණි ගල් මෙවලම්වල සාක්ෂි හමුවෙලා තිබෙනවා. මෙයින් ගම්‍ය වන්නේ එම ප්‍රදේශවල ජීවත් වූවන් උපකරණ, මෙවලම් භාවිත කර තිබෙන බවයි. ඒ බව පතිරාජවෙල ප්‍රදේශයෙන් හමුවූ සාක්ෂිවලත් තිබෙනවා.
පතිරාජවෙලින් වසර 1,25,000කට වඩා පැරණි පොසිල හමුවී තිබෙනවා. ශ්‍රී ලංකාවේ ඉතිහාසය වසර 1,25,000කට වඩා පැරණි බව පුරාවිද්‍යාඥයන් වර්තමානයේ ප්‍රකාශ කරනවා.

අපේ ජන සමාජයේ නහුතය යනු පාරිභාෂිත වචනයක්. නහුත යනු ශ්‍රී ලංකාවේ රජ කළ රජ කෙනෙක්. ඔහුට ගණිත සංඛ්‍යානය පිළිබඳ විශේෂඥ දැනුමක් තිබී තිබෙනවා. 1යි බින්දු 27ක වැඩි කිරීමක් පිළිබඳව ඔහු දැන සිට තිබෙනවා. සංඛ්‍යානයේ නහුතය යනුවෙන් අදහස් කරන්නේ 1යි බින්දු 27ටයි. නමුත් වත්මන් සංඛ්‍යානයේ 1යි බින්දු 27ක සංඛ්‍යාවකින් යුත් ගණනය කිරීමක් නැහැ. 2002 වර්ෂයේදී ඉන්දියානු සාගර දූෂණ කොමිෂන් සභාව ඉන්දියානු බටහිර වෙරළ පරීක්ෂා කර අඩි 4000ක් යට මුහුදු පතුලේ නගරයක පාදම සොයාගෙන තිබෙනවා. මෙය කාබන් 14 පරීක්ෂණයෙන් අවුරුදු දසදහසකට (10000) වඩා පැරණි පුරාවිද්‍යාත්මක වටිනාකමක් සහිත බව තහවුරු වෙලා තිබෙනවා.

මෙම පාදම, ඉන්දියානු පුරාවිද්‍යා ගවේෂකයන් විසින් රාවණා රජුගේ දණ්ඩක වනයේ අගනුවර ජනස්ථානය බව තහවුරු කරනවා. රාවණා මන්ත්‍රවල සූර්යයා, ඒ හා බැඳුණ වචන පවා ගැබ්වෙලා තිබෙනවා. ඒ අනුව රාවණා රජුගේ කාලයේත් සූර්යයා හා සම්බන්ධ විවිධ චාරිත්‍ර වතාවත් තිබී තිබෙනවා. රාවණා, සූර්ය වංශිකයෙක්. ඔහු පෘථිවියට එහා ගිය විශ්වය හා සම්බන්ධකම් පැවැත්වූ ආධ්‍යාත්මික බලයෙන් හෙබි ශ්‍රේෂ්ඨ නරපතියෙක්.
රාවණා සංහිතාව, අර්ක ප්‍රකාශය ඔහු ලියන ලද අදටත් ඉතිරිව තිබෙන ග්‍රන්ථ වේ. මේවා කියවා බැලීමේදී ඔහුට අහස කොටස්වලට බෙදීම සම්බන්ධයෙන් සහ සූර්යයා, තාරකා, ග්‍රහවස්තුවල චලනයන් ආදිය මෙන්ම සෞඛ්‍ය, වෛද්‍ය කරුණු පිළිබඳව ඉහළ මට්ටමේ දැනුමක් තිබූ බව දක්නට තිබෙනවා. අදට වඩා විද්‍යාව එදා බොහෝසෙයින් වෙනස්.

වත්මන් ජනතාව මෙන් හෝ ඊට වඩා එදා ජනතාව සෞඛ්‍යමය පහසුකම් භුක්ති විඳි බව පෙනෙන්නට තිබෙනවා. ලොව පැරණිම ශිෂ්ටාචාරයක් වූ බැබිලෝනියා ශිෂ්ටාචාරයට අයත් කැටයම් අතර අහසින් ගිය සිංහ මුහුණු සහිත මිනිසුන්ගේ කැටයම් හා චිත්‍රවල දැක්වෙනවා. එම මුහුණු පොළොන්නරුවේ පරාක්‍රම සමුද්‍රය අසල පිහිටි පුලතිස සෘෂිවරයාගේ ශෛලමය ප්‍රතිමාවේ මුහුණට සමාන බවක් තිබෙනවා. ඒ අනුව සූර්ය මංගල්‍යය විශ්වයේ සැකැස්මට අනුව සකස් කර තිබෙන බව හඳුන්වන්න පුළුවන්.
මෙය සිංහල හා හින්දු අලුත් අවුරුද්ද වුවත් හිසතෙල් ගෑමේ චාරිත්‍රය හින්දු භක්තිකයන් කරන්නේ නැහැ. හිසතෙල් ගෑම අලුත් අවුරුදු චාරිත්‍රයක් ලෙස සිදුකරන්නේ සිංහලයන් පමණයි. අලුත් අවුරුද්ද රැගෙන ඉන්දියානු ද්‍රවිඩ ජාතිකයන් ලංකාවට එන්නේ මදුරාසියේ සිටයි.
මදුරාසියේ බලපෑම, හිසතෙල් ගෑම අවුරුදු චාරිත්‍රයක් ලෙස හින්දු භක්තිකයන් නොකිරීමට හේතු වූවා විය හැකියි. අවුරුදු චාරිත්‍රයක් ලෙස හින්දු භක්තිකයන් හිසතෙල් ගෑම නොකළත් හිසේ තෙල් ගැල්වීම සිදුකරනවා. කෙසේ වෙතත් හිසේ තෙල් ගැල්වීම නිතර නිතර කළයුතු බව ආයුර්වේදයේ චරකසංහිතා ග්‍රන්ථයේත්, අෂ්ඨාංග හෘදය ග්‍රන්ථයේත් සඳහන් වෙනවා. පරණ අවුරුද්දේ කළ කී දෑ චාරිත්‍ර ලෙස නැවත ආරම්භ කිරීම සිංහල හා හින්දු අලුත් අවුරුද්දේදී සිදුකරනවා. එය පරණ දේ නැවත අලුත් කර ආරම්භ කිරීමක් ලෙස හැඳින්විය හැකියි.
අවුරුදු චාරිත්‍ර ලෙස සිදුකරන සියල්ල සමස්තයක් ලෙස ගතහොත් එහි තිබෙන්නේ වැඩිහිටියන්ට සැලකීම හා ආගමික වතාවත් බව පෙනී යනවා. ශරීර සුවතාවත් අවුරුදු චාරිත්‍රවල ප්‍රධාන අංගයක්. අලුත් අවුරුදු චාරිත්‍ර ආරම්භ වන්නේ නව සඳ බැලීමෙන්. චාරිත්‍ර, ස්නානයෙන් අවසන් වෙනවා. ස්නානයට ප්‍රථම නානු ගා හිසතෙල් ගෑම සිදුකරනවා.

අෂ්ඨාංග හෘදය සහ චරකසංහිතා නමින් වෙදකම පිළිබඳව ලියවුණ ග්‍රන්ථයන් දෙකක් තිබෙනවා. හිසේ නිතර නිතර තෙල් ගැල්වීමෙන් හිසේ ඇතිවන රෝග රැසක් වළක්වාගත හැකි බව ඒවායේ සඳහන් වෙනවා. අකලට හිසකෙස් ඉඳීම, කෙස් හැළීම වළක්වාගත හැකියි. ඒ වගේම ඇස් පෙනීම, බුද්ධි වර්ධනය, පැහැපත් සමක් ඇතිකර ගැනීමට හිසේ තෙල් ගැල්වීම වැදගත් වෙනවා.

හිසතෙල් ගෑමට ප්‍රථම නානු ගෑම සිදුකරනවා. අවුරුදු නැකැත් චාරිත්‍ර අනුව මෙවර නානු ලෙස දිවුල්පත් යුෂ මිශ්‍රණය යොදාගෙන තිබෙනවා. කලාඳුරු අල, කුංකුමප්පු, සුදුහඳුන්, විෂ්ණුකාන්ති, ගෝරෝචන, සස්සඳ මුල්, ඉරිවේරිය, නස්නාරන් මුල්, සැවැන්දරා මුල්, නෙළුම් දඩු, ගොඩමානෙල් අල, බෙලිමුල්, වෙනිවැල්ගැට, ඊතණ යන ඖෂධ වර්ග 14 තළා අලුත් මුට්ටියක පතඅට එකට සිදුවාගෙන එයට දිවුල්පත් ඉස්ම සහ දෙහි යුෂ කවලම් කර පෙරා ගන්නා දියරය නානු ලෙස හඳුන්වනවා. මෙයින් හිස පිරිසුදුවීමක්ද සිදුකෙරෙනවා. නානු ඉතා ඖෂධීය ගුණයෙන් යුත් සංයෝගයක්. ඖෂධවලින් ශරීරයේ පිත නියමාකාරයෙන් පවත්වාගෙන යෑම සිදුකරනවා. ලෝකයට හිරු වගේ ශරීරයට පිත අවශ්‍යයි. දෝෂයන් සමතාවයෙන් පවත්වාගෙන යෑමට නානු වැදගත් වෙනවා.
අපේ රට සමකය ආසන්නයේ පිහිටි රටක්. සමකයට ආසන්න රටවලට වසර මුළුල්ලේම ඉර මුදුන් වීම සිදුවන නිසා එම රටවල දිවා කාලය වැඩියි. ඒ නිසාම එවන් රටවල මිනිසුන් වැඩි වශයෙන් ජීවත් වෙන්නේ නිවාසවලින් පිටතයි. දීර්ඝ වශයෙන් ශීත කාලය පවතින රටවල මිනිසුන් වැඩි වශයෙන් නිවාස තුළට වී ජීවත් වෙනවා. මේ නිසාම නිවාසවලින් පිටත වැඩි වශයෙන් ජීවත්වන ජනතාව පරිසරය සමග නිරන්තරයෙන් ගැටෙනවා. ඒ නිසා ඔවුන් මැවුම්වාදී, දේවවාදී සංකල්පවලින් ඈත්ව වැඩි වශයෙන් ස්වභාව ධර්මය සමග ජීවත් වෙනවා. ලංකාව, ඉන්දියාව වැනි රටවල මිනිසුන් වැඩි වශයෙන් පරිසරය කියවා ගැනීම සිදුකරනවා. ඒ නිසාම ස්වභාව ධර්මයේ හැසිරීම ඔවුන් නියමාකාරයෙන් දැන සිටිනවා. මොවුන් හිරු, සඳු, තාරකා, ග්‍රහවස්තු පිළිබඳව මෙන්ම ගස්වැල්, ඒවායේ මල්ඵල හටගැනීම, වර්ෂාව, අව්ව, වැස්ස ඇතිවීම ආදී දේශගුණික, කාලගුණික විපර්යාසයන් සම්බන්ධයෙන්ද මනා අවබෝධයකින් යුක්තයි. ඒ අනුව ලංකාවේ ජීවත් වූ මිනිසුන්ගේ ප්‍රධාන ජීවනෝපායන් සැකසී තිබුණේ වාරි ශිෂ්ටාචාරයට අනුව සැකසුණ කෘෂිකර්මාන්තය පදනම් කරගෙනයි. මඩ ගොවිතැන මෙන්ම හේන් ගොවිතැනත් විශිෂ්ට ලෙස අපේ රටේ පැවතුණා. අන්තර්ජාතික අධිකරණයේ උපසභාපතිවරයා ලෙස 1977දී පත් වූ සී.ජේ වීරමන්ත්‍රී පවා ශ්‍රී ලංකාව පරිසර සංවර්ධනය පිළිබඳව මනා කළමනාකරණයක් ඇති රටක් ලෙස තිබූ බව ප්‍රකාශකර තිබෙනවා. ආතර් සී. ක්ලාක් ප්‍රකාශ කර තිබුණේද ශ්‍රී ලංකාවේ වාරි උරුමය මහානර්ඝතම වස්තුව බවයි.

එකම වර්ෂයක දෙවරක් මෝසම් සුළං ලැබෙන ලෝකයේ එකම රට ලංකාවයි. එබැවින් එක් වර්ෂයක් තුළ දෙවරක් අස්වැන්න ලබාගන්න පුළුවන්. මේ නිසාම කෘෂිකර්මාන්තය හා බැඳුන සූර්ය මංගල්‍යය ලංකාවේ ජන ජීවිතයත් සමග බද්ධ වී තිබෙනවා.
ශ්‍රී ලංකාවට ආවේණික දේශීය සහල් ප්‍රභේද 108ක් හෝ ඊට වැඩි ප්‍රමාණයක් පුරාණයේ භාවිතකර ඇති බවට දැනට සොයාගෙන තිබෙනවා. පැරණි ජනතාව එම සහල් වර්ග බෝවන හා බෝනොවන විවිධ රෝගාබාධ සඳහා භාවිතකර තිබෙනවා. ඔවුන් සිය ආහාර සකසාගෙන තිබුණේද සමබල ආහාරයක් ලෙසයි. ආහාර උෂ්ණ, ශීත මෙන්ම සැරගුණ, අඩුවැඩි ආහාර ලෙසද ඔවුන් සකස් කරගෙන තිබුණා. සාම්ප්‍රදායික ආහාරවලත් විවිධත්වයක් පැවතුණා. මෙම විවිධත්වය රස ගුණ පමණක් නොව රුචියද වැඩි කළා. ඒ නිසාම පුරාණයේ මිනිසුන් නිරෝගීමත්ව සිටියා පමණක් නොව ආහාර පාලනය තුළින් වෛද්‍යවරයෙකු වෙත නොගොස්ම රෝග සුවකර ගත්තා. මේ ආහාර රටාව අනුගමනය කිරීමයි, සිංහල අලුත් අවුරුදු චාරිත්‍රවල දැක්වෙන්නේ.
අප්‍රේල් මාසයේ මැද සති දෙක තුළ ලංකාවට ඉර මුදුන් වෙනවා. ඒ නිසා අප්‍රේල් මාසයේ අධික උෂ්ණත්වයක් පවතිනවා. අධික උෂ්ණත්වය නිසා ශරීරයේ පිත වැඩි වෙනවා. නානු ගෑම මගින් අධික අව් රශ්මියෙන් ඇතිවන ශාරීරික පීඩා අවම කරගන්න පුළුවන්. තෙල් ගෑම, ආයුර්වේද වෙදකමේ හඳුන්වනු ලබන්නේ තෛල අභ්‍යන්ගය නමින්. අභ්‍යන්ගය යනු ගෑමයි. එම නිසා ශීර්ෂ තෛල අභ්‍යන්ගය, හිසතෙල් ගෑම ලෙසද හඳුන්වනවා. සිංහල හා හින්දු අලුත් අවුරුදු චාරිත්‍රයක් ලෙස හිසතෙල් ගෑම, කිසිදු තැනක ලිඛිතව සඳහන්ව නැහැ. මෙය වඩාත් පැරණි චාරිත්‍රයක් වීම එයට ප්‍රධානතම හේතුවයි. ආයුර්වේද වෙදකමේ ආරම්භය පිළිබඳව ඉතිහාසයේ හා ජනප්‍රවාදයේ විවිධාකාරයෙන් සඳහන් වෙනවා. හෙළ වෙදකම හා ආයුර්වේදය එකිනෙකට වෙනස් කාරණා දෙකක්. ලංකාවේ රාවණා යුගයේ හෙළ වෙදකම වඩාත් දියුණු තත්ත්වයට පත්ව ප්‍රචලිත වී තිබූ බවට ඓතිහාසික සාක්ෂි තිබෙනවා.

පුලස්ති සෘෂිවරයා ලෙස හඳුන්වන්නේ රාවණා රජුගේ මුත්තායි. පුලස්ති සෘෂිවරයා ඉන්දියාවේ හිමාලයේ තිබූ සෘෂිවරුන්ගේ සම්මේලනයකට ගොස් තිබෙනවා. සෘෂිවරුන් රාග, ද්වේෂ, මෝහවලින් තොර අතීතය, වර්තමානය හා අනාගතය යන තුන්කල් දැකිය හැකි ආධ්‍යාත්මික වශයෙන් ඉහළම තත්ත්වයට පත් වූ මනුෂ්‍ය කොට්ඨාසයක්. සෘෂිවරුන් ධ්‍යානවලට සමවැදී විශ්වය දෙස නෙත් යොමා සාමාන්‍ය මිනිසුන්ට දැකිය නොහැකි, තේරුම්ගත නොහැකි කාරණා අවබෝධ කරගන්නවා. පුලස්ති සෘෂිවරයා එයට සහභාගි වී තිබෙන්නේ ලංකාව නියෝජනය කරමින්.

මිනිසුන්ට ඇතිවෙන ලෙඩ රෝග පිළිබඳව මෙන්ම ඒවා වළක්වා ගැනීම සහ සුවකර ගැනීම සම්බන්ධයෙන් මෙම සම්මේලනයේදී සාකච්ඡා කර තිබෙනවා. ඔහු සම්මේලනයෙන් පසුව ලංකාවට ඇවිත් හෙළ වෙදකම විශිෂ්ට ආකාරයෙන් ආරම්භ කළ බව සඳහන් වෙනවා. නමුත් ඊට පෙරත් සාමාන්‍ය ආකාරයෙන් හෙළ වෙදකම තිබූ බවට සාක්ෂි තිබෙනවා.

ආයුර්වේද වෙදකම ලංකාවට පැමිණ තිබෙන්නේ ඉන්දියාවෙන්. එය ලංකාවට පැමිණීමෙන් පසු එකිනෙකට වෙන් කර ගැනීමට නොහැකි පරිද්දෙන් හෙළ වෙදකම සමග බද්ධ වී තිබෙනවා. නමුත් ආයුර්වේදය හා දේශීය වෙදකම යනු එකිනෙකට වෙනස් වූ කාරණා දෙකක්. එය අප රටේදී එකිනෙකට බැඳී තිබෙනවා. කැඩුම්බිඳුම් වෙදකම, ඇස් වෙදකම, සර්ප විෂ වෙදකම ආදිය දේශීය අපේ හෙළ වෙදකමට උදාහරණ ලෙස දැක්විය හැකියි. නමුත් ආයුර්වේද වෙදකම අපට සෘජුවම ලැබෙන්නේ ඉන්දියාවෙන්.
මිනිසා සෘජු කාය විලාසය ඇති සත්ත්වයෙක්. මිනිසාගේ හිස පිහිටා තිබෙන්නේ පොළොවට ලම්බක වන ආකාරයෙන් සිරස්වයි. මිනිසාගේ හිස ප්‍රධානයි. අනෙක් සතුන් බොහොමයකගේ හිස පොළොවට සමාන්තර ලෙස තිරස්ව පිහිටා තිබෙනවා. ඔවුන්ට තිරිසනා යන නමක් පටබැෙඳන්නේත් ඒ නිසයි. මිනිසාගේ ඔළුව සිරස්ව පිහිටන නිසා තිරිසනාගෙන් වෙන් වෙන්න ඕනෑ. ආයුර්වේද වෙදකම සම්බන්ධයෙන් සුස්කෘතසංහිතා ග්‍රන්ථයේ සඳහන් වන ආකාරයට පැතිරීම, ආකර්ෂණය සහ චලනයන්වලට සඳු, හිරු සහ වාතයේ ක්‍රියාවන් පදනම් වන සේම මනුෂ්‍ය ශරීරයේ කප (ජලය), පිත (අග්නිය), වාත (වාතය) ප්‍රධාන වෙනවා. එයට අමතරව ධාතු සහ මල, දේහය දරා සිටීමට උදව් වෙනවා. ශරීරයෙන් ඉවත් කළයුතු කොටස් මල ලෙස හඳුන්වනවා.
ආයුර්වේදයට අනුව නිරෝගී පුද්ගලයෙක් යනු ප්‍රසන්න වූ ආත්මය ඉන්ද්‍රියන් හා මනස නිසි ක්‍රියාකාරීත්වයෙන් යුත් අයයි. ආයුර්වේදයේ ඌර්දව ඡත්ත්‍ර රෝග ලෙස හඳුන්වන්නේ හිස ප්‍රධාන වූ රෝගයි.
සූර්යයා මේෂ රාශියෙන් ගමන් ආරම්භ කර එක් එක් රාශියේ මාසය බැගින් ගතකර 12 වන රාශිය වන මීන රාශියට පැමිණීම අලුත් අවුරුද්ද ලෙස හඳුන්වනවා. මේ සිදුවීම පරණ අවුරුද්ද, නොනගතය හා අලුත් අවුරුද්ද ලෙස වෙන්කර තිබෙනවා. අලුත් අවුරුදු උදාව ලෙස හඳුන්වන්නේ සූර්යයා මේෂ රාශියට පැමිණීමයි. මෙය සිදු වන්නේ අප්‍රේල් 13 දිනයි. එම දිනය සහ ඊට පසු දිනය අලුත් අවුරුද්ද ලෙස සමරනවා. නානු ගෑම සිදුකරන්නේ හිසතෙල් ගෑමට පෙරයි. ඒ චාරිත්‍රයක් ලෙසයි. නමුත් අධික අව් රශ්මියෙන් ඇතිවන පීඩාවන් අවම කරගන්න අප්‍රේල් මාසය පුරාම නානු ගා ස්නානය කරන්න පුළුවන් නම් වැදගත්. එයට අමතරව සෘතු කාල අනුව ඖෂධ වර්ගවලින් සකසාගත් නානු ගා ස්නානය කිරීමෙන් ලෙඩ රෝග බොහොමයක් වැලඳීම වළක්වා ගත හැකියි. ඒ වගේම ශරීරයේ සිසිල් බවකුත් ඇති වෙනවා. නානුවලින් හිස පිරිසුදු වීමක්ද සිදුවෙනවා. 

පරණ අවුරුද්දට ස්නානය කිරීමත් අවුරුදු චාරිත්‍රවල තිබෙනවා. එම අවස්ථාවේදීත් නානු ගාන්න පුළුවන්. ජ්‍යෝතිෂය හා ආයුර්වේදය අතරත් බැඳීමක් තිබෙනවා. නමුත් ජ්‍යෝතිෂය හා නවීන විද්‍යාව යනු එකිනෙකට වෙනස් කාරණා දෙකක්. මෙයින් ජ්‍යෝතිෂය විද්‍යාත්මක නොමැති බවක් අදහස් කරන්නේ නැහැ. නානු ගෑමේදී මෙවර හිසට දිවුල්පත්ද, පයට ඉඹුල්පත්ද තබන ලෙස උපදෙස් ලබා දී තිබෙනවා. මේවා ඖෂධීය ගුණයෙන් යුත් ශාක. මේ මගින්ද ශරීරයට සිසිලසක් ඇති කරනවා. තෙල් වශයෙන් බොහෝ අය පොල්තෙල් භාවිත කරනවා. පොල් තෙල්වලත් ඖෂධීය ගුණයක් තිබෙන බව ඇත්ත. නමුත් සිංහල අවුරුදු චාරිත්‍ර ලෙස හිස තෙල් ගෑමට තෝරාගන්නේ තල, මී, අබ, කොහොඹ, එඬරු, තෙල් වර්ගවලින් සකසා ගන්නා ලද පස්තෙල් වර්ගයක්. මෙයිනුත් හිසට ඖෂධීය ගුණයක් ලැබෙනවා. කෙසේ වෙතත් හිසතෙල් ගෑම යනු ශරීරයේ උත්තම අංගය වන හිසේ නිරෝගීභාවය සඳහා වන වැදගත්ම කාර්යය ලෙස පැරණි සෘෂිවරුන් උගන්වා තිබෙන ශීර්ෂ තෛල අභ්‍යන්ගය අලුත් අවුරුද්දට නැවත ආරම්භ කිරීමක් ලෙස පෙන්වාදිය හැකියි. අනෙක් චාරිත්‍රවලින් සිදුකරන්නේද ඒවා නැවත ආරම්භ කිරීමකුයි. ආහාර පිසීම, ආහාර අනුභවය, රැකී රක්ෂා කිරීම, ඒ සඳහා පිටත්ව යෑම, වැඩ ඇල්ලීම ජීවිතය පවත්වා ගැනීමට කෙතරම් වැදගත්ද යන්න අපි දන්නවා. ඒ තරමටම හිසේ තෙල් ගැල්වීමත් ඉතා වැදගත් බව පැරැන්නන් කෙතරම් විශ්වාස කළේද යන්න හිසතෙල් ගෑමේ චාරිත්‍රය තුළින් තහවුරු වන බවත් පෙන්වාදිය හැකියි.

වෛද්‍ය පරාක්‍රම විජයනාග (බී.ඒ, එම්.එස් – කැලණිය විශ්වවිද්‍යාලය, එල්.එල්.බී – විවෘත විශ්වවිද්‍යාලය, එම්.බී.එම් – කොළඹ විශ්වවිද්‍යාලය, ශ්‍රේෂ්ඨාධිකරණයේ නීතිඥ)  

සටහන – තමිඳු මධුසර ලියනගේ – අහුන්ගල්ල

බක් මහේ සැබෑ අරුත දැනගන්න

කෘෂිකාර්මික දිවිපෙවතක් තිබූ අපේ දේශීය සංස්කෘතිය තුළ බොහෝ දේ සකස් වී ඇත්තේ ඒ මත පදනම්වය. ‘බක් මාසය’ හෙවත් ‘මහා මාසයේ’ උදාව අපි සමරන්නේ උත්සවශ්‍රීයෙනි. මේ හා බැඳුණු බොහෝ සංස්කෘතිකාංග මෙන්ම අපෙන් ගිලිහී යන සංස්කෘතිකාංගද නැවත ඉස්මතු කර ආරක්ෂා කරන මාසයක් ලෙසද මෙය හඳුනාගත හැකිය. එකී බක් මාසයේ සැබෑ අරුත හා ඒ හා බැඳි සමාජ විද්‍යාත්මක පැතිකඩ පිළිබඳ විග්‍රහයක් ඉදිරිපත් කිරීම සඳහා ශාස්ත්‍රපති ගලගොඩගම සෝභිත හිමියන් ‘අද’ හා සම්බන්ධ කර ගත්තෙමු.


sobhitha himi

ඕනෑම සංස්කෘතියක් තුළ තිබෙන සිරිත් විරිත්, සම්ප්‍රදායන්, ඇදහිලි හා විශ්වාසයන්, හැඟීම් ඒ ඒ සංස්කෘතීන් නිර්මාණය කරනවා සේම ඊට ආවේණික වටිනාකමක්ද ලබා දෙනවා. සංස්කෘතියෙන් පරිබාහිරව කිසිම කෙනෙකුගේ පැවැත්ම පිළිබඳ සහතිකයක් දීමේ හැකියාවක් අපිට නැහැ. එය හරියට මාළුවයි, ජලයයි අතර පවතින්නා වූ සම්බන්ධය සේ ශක්තිමත් සම්බන්ධයක්. මානව පැවැත්ම කෙරෙහිද සංස්කෘතිය ප්‍රබල ලෙස බලපාන අතර, සිංහල අලුත් අවුරුද්ද කියා කියන්නේ අපේ එකමුතු බව, සහජීවනය යන කරුණු කාරණා එකට එකතු කරන්න පුළුවන් හොඳම මංගල්‍යයි. 

අපි සාමාන්‍යයෙන් අලුත් අවුරුද්දේ එකමුතුකම, සහජීවනය  යනුවෙන් හඳුන්වන්නේ දෙමවුපියන්, වැඩිහිටියන් සමග හිතෛෂී බව බෙදාහදා ගැනීමයි. භික්ෂූන් වහන්සේලා තුළ වුවත් වැඩිහිටි භික්ෂූන් වහන්සේලාට කතා කරන එක පෙර සිට පැවත එන පැරණි  අවුරුදු චාරිත්‍රයක්. එතැනදී නැකත්වල විශ්වසනීය බවක් තිබෙනවාද නැද්ද යන කාරණය අදාළ වන්නේ නැහැ. නමුත් එකමුතු බව, සහජීවනය, හිතෛෂී බව කියන දෙය හදන්න මෙය හේතු වෙනවා නම් අවුරුදු සිරිත්වල සැබෑ වටිනාකමක් ඇත්තෙන්ම ගැබ්ව තිබෙනවා. අපි අලුත් කියන අරුතෙන් හඳුන්වන්නේ එළිය හා ආලෝකය යන්නයි. ජීවිත කාලයේදී වර්ෂයට එක්වරක් හෝ සහජීවනය ගැන හිතන්න, එකමුතුකමින් වැඩකරන්න අවස්ථාවක් ලැබෙනවා නම් එය ඇත්තෙන්ම ජීවිතයට ආලෝකයක්.

අපි සාමාන්‍ය අලුත් අවුරුද්ද ලබන මාසය හඳුන්වන්නේ බක් මාසය නමින්. ‘බක් මාසය’ යනුවෙන් අදහස් කරනු ලබන්නේ ‘භාග්‍යවත් මාසය’ කියන අරුත නෙමෙයි. ‘බක්’ යනුවෙන් අදහස් කරන්නේ විශාල යන අර්ථයයි. අපි බකමුණා යනුවෙන් හඳුවන්වන්නේ ඒ පක්ෂියාගේ මුහුණ විශාල නිසයි. ප්‍රාදේශීය ව්‍යවහාරය තුළත් මෙවැනි වචන භාවිතයන් දැකගන්න පුළුවන්. ඌව පළාත තුළ ‘බක් අප්පා’ යනුවෙන් හඳුන්වන්නේ ‘ලොකු තාත්තටයි’. ‘බක් අයියා’ නමින් හඳුන්වන්නේ ‘ලොකු අයියා’ කියන අරුතින්. සාමාන්‍යයෙන් බක බකගා සිනාසීම ලෙස අපි හඳුන්වන්නේ හයියෙන් සීනාසිමටයි. ඒ සියල්ලන්ගෙන්ම ගත්විට අපි ‘බක’ යන්න විශාල, ලොකු යන අර්ථයෙන් හැඳින්වීම නිවැරදියි. අනෙක් අතින් මෙසේ හඳුන්වන බක් මාසය, ලොකු මාසය යනුවෙන් හඳුන්වන්නේ සාමාන්‍යයෙන් කෘෂිකාර්මික ජීවන රටාවක් ඇති රටවලට මෙය දීර්ඝ කාලපරාසයක් තිබෙන මාසයක් වන නිසයි. අස්වනු නෙළන්නේ මේ කාලයට. එකී කෘෂිකර්මාන්තය හා බැඳි සියලු දේවල් ඈත අතීතයේ සිටම අපි නැකතකට අනුවයි සිදුකරනු ලබන්නේ. අටුවෙන් වී ටික පවා ගන්නේ නැකතට. ජලය ලබාගන්නා එක පවා නැකතට අනුවයි සිදුකරන්නේ. ඒ අනුව ගත් කල ලාංකේය සංස්කෘතියේ ජීවය ලබාදෙන මාසය අපි ‘බක් මාසය’  ලෙස සලකන්නේ ඒ නිසයි. විශේෂයෙන්ම ආසියානු කලාපය කෘෂි ආර්ථිකයක් හා බද්ධ වී තිබීම හඳුනාගන්න පුළුවන්. තාක්ෂණයත් සමග ගමන් කිරීමටත් වඩා අපේ තිබෙන්නේ කෘෂි ආර්ථිකයක්. ඒ කෘෂි ආර්ථිකයේ වැදගත්ම සාධකය වන්නේ ජලයයි. අපේ අලුත් අවුරුදු චාරිත්‍ර ගත්විට ජලය හා බැඳි චාරිත්‍ර තිබෙනවා. ඉස්සර අපේ මිනිස්සු ළිඳත් එක්ක ගනුදෙනු කළා.

තමන් දෛනිකව ජලය ලබාගන්නා ළිඳට පඬුරක් දමා ජලයත් එක්ක තමයි මුලින්ම ගනුදෙනුව කරන්නේ. එක්තරා ලෙසකින් කෘෂි ආර්ථිකයේ වැදගත්කම කියාපාන්නට මේ චාරිත්‍ර වාරිත්‍ර සකස් වී තිබෙන්නේ යැයි අපිට කියන්න පුළුවන්. මෙහිදී අපි මූලික කරගන්නෙත් ධාන්‍යයි. අවුරුදු මාසයේ අපි කැවිලිපෙවිලි පිළියෙල කරනවා කියන්නෙත් අපේ තිබෙන මුං ඇට, හාල් පිටි කොටා තල ආදිය යොදාගනිමින් රසකැවිලි සකස් කරගැනීමට. ඒ වගේම ඒ ආශ්‍රිත පුදපූජාවන් පැවැත්වීම. ළිපගිනි මෙලවීමේ චාරිත්‍රය වැදගත් වන්නේ දින තුන්සිය හැටපහක් පුරාම ආහාර පිළියෙල කිරීමට උපකාරී වූ ළිපට ගෞරව දැක්වීම වගේම කළගුණ සැලකීමක් ලෙසද අර්ථ ගන්වන්න පුළුවන්. මේ නිසා සිංහල ගෘහණියන් එය ඉතා සැලකිල්ලකින් ඉටුකරනු ලබයි. ගොම, මැටිගා අලුතින්ම ළිප පිළියෙල කර ගන්නේද අවුරුදු නැකතට ආහාර පිස ගන්නයි. නැවුම් ළිපක නැවුම් හට්ටි මුට්ටිවල නැවුම් කිරිබතක් පිළියෙල කර ගැනීම තුළින් ලැබෙන ආලෝකය වර්ෂයක් පුරා පවතින්නේය යන විශ්වාසය ඒ අතර ඉතා වැදගත් දෙයක්. ‘තබ්බ භූත හිතානු කම්පි’ ගුණය ලෙස සලකන්නේ සතුන්ට පමණක් මෛත්‍රී කිරීම නොව තමන් පරිහරණය කරන බඩුභාණ්ඩ,  නිවාස, උපකරණ, ගහකොළ හා මහපොළොව ආදී සියලු වස්තූන් කෙරෙහි හිතෛෂී බව ඇතිකර ගැනීමක්. තමන්ට උපකාරී වන බඩුභාණ්ඩ, උපකරණ ආදිය කෙරෙහිද ළෙන්ගතු වීම පිළිබඳව කදිම පණිවුඩයක්ද අලුත් අවුරුද්දේ අප සැමටම ලබාදෙයි. මෙනිසා අපේ සංස්කෘතිය තුළ ඇත්තාවූ අංග ලක්ෂණ පිළිබඳ කියාපෑ හැකි එක් වර්ෂයක් ලෙස බක් මාසයේ අලුත් අවුරුද්ද හඳුනාගන්න පුළුවන්.

අතීතයේ සිට පැවත එන ජන කවි, ඔන්චිලි වාරම්, පංච දැමීම හා බැඳී පවතින සාහිත්‍යයක් තිබෙනවා. මේ ආදී ජන ගායනා හා ජන ක්‍රීඩා අද වන විට පවතින කාර්මික වටපිටාවත් සමග යම් තරමකින් අඩු වී ගොසින් තිබෙනවා. නමුත් මේ අලුත් අවුරුද්දේ ඒවා යම්කිසි ආකාරයකට නැවත ඉස්මතු වීම තුළින් ඒවා ආරක්ෂා වීමක්ද සිදුවෙනවා. ඒ වගේම මේ කාලයේ පවත්වන අවුරුදු උත්සව හරහා සමාදානය, එකමුතුබව, හාස්‍ය වැනි ගුණාංගත් ඉස්මතු වෙනවා. එය සමාජයේ පැවැත්ම සඳහා අනිවාර්යය අංග බවට පත්වෙලා තිබෙනවා. මේ කාරණාව නිසා අවුරුදු නැකැත් පිළිබඳව වුවත් අනවශ්‍ය අයුරින් තර්ක කිරීමේ හැකියාවක් අපට නැහැ. සමාජ විද්‍යාත්මක අර්ථයෙන් බැලුවත් අලුත් අවුරුදු චාරිත්‍ර ඉතා වැදගත්කොට සැලකීමේ හැකියාවක් තිබෙනවා. ඒවා නොසලකා හැරීම, අගය නොකිරීම සංස්කෘතිය විනාශ කර ගැනීමක්. සමාජ සම්බන්ධතා විනාශ කර ගැනීමක්. මේ නිසා සංස්කෘතියත් ආරක්ෂා කර ගනිමින් ජාතියක් ලෙසින් ඉදිරියට යාමේදී අලුත් අවුරුදු චාරිත්‍ර වැදගත් භූමිකාවක් නිරූපණය කරනවා.

හිස තෙල් ගෑමේ අවුරුද්ද ඉතා වැදගත් වන්නේ නිරෝගීමත් ජනතාවක් ගොඩනැගීම සදහා වූ ප්‍රවේශයක් නිසයි. නිරෝගී බව උතුම් සතුටක් කොට සලකන (ආරෝග්‍යා පරමා ලාභ) විශේෂයෙන් සිංහල බෞද්ධයා ස්වභාව ධර්මය හා ඇති සබැඳියාව ඉන් පිළිබිඹු කරනවා. ගහකොළ, හිරුරැස්, ජලය ස්වභාව ධර්මයේ ආශීර්වාද වන්නා සේම ඒවා ජීවිතයට බලපාන බව එම සිරිත විසින් කියාපානු ලබනවා. රෝග සෑදීමට පෙර රෝගයන්ගෙන් වැළකීම පිළිබඳ අාචාරධර්ම ආයුර්වේදය තුළින්ද ප්‍රකාශ වෙන දෙයක්. මේ නිසා මානවයාගේ නිරෝගී බව පිළිබඳවද අලුත් අවුරුදු සිරිත් වැදගත්කමක් උසුලනවා.

නැකතට රැකීරක්ෂාවන් බලා පිටත්වීම තුළ තම තමන්ගේ රැකියා අවස්ථාවන් වැඩිදියුණු කරගැනීම පිළිබඳ අඩුපාඩු සකස් කර ගැනීම, වඩාත් කාර්යක්ෂම සේවාවක් ඇති කිරීම, වැරදි නිවැරදි කර ගැනීම, තම සේවා ආයතනය තුළ එකමුතු බව, සහජීවනය ගොඩනගා ගැනීම ආදී පුළුල් පරමාර්ථයන් ඉටුකර ගැනීම පිළිබඳ පැහැදිලි අධිෂ්ඨානයක් ඇතිකර ගැනීමට  අවස්ථාව සලසනවා. එපමණක් නොව තම ජීවිකාව රැකදෙන රැකියාව පිළිබද ගෞරවයක්, අභිමානයක් ඇතිකරලීමටද එම චාරිත්‍රය මගින් ඉඩ සලසනවා. පොදුවේ සලකන විට කිසියම් කෙනෙකු තුළින් වරදක් සිදුවූ විට බොහෝවිට සිදුවන්නේ පුද්ගලයා විනාශ කිරීම. එහෙත් වරදක් සිදුවූ විට සිදුවිය යුත්තේ එසේ විනාශ කිරීම නොව වරද විනාශ කිරීමයි. එකී වරද නැතිකර පුද්ගලයා ආරක්ෂා කිරීම යහපත් ක්‍රමවේදයයි. අලුත් අවුරුදු සිරිත්වලින් වරදට සමාව ගැනීම, නැවත වැරදි නොකිරීමට සිතා ගැනීම, විශේෂයෙන් විරුද්ධ අය අතර පවා විරද්ධවාදීකම් යටපත් කර ගනිමින් සහජීවනය සඳහා මගපෙන්වීමටද අවුරුදු සිරිත් ඉවහල් කරගන්න පුළුවන්. මේ අනුව මහා මාසයේ මහා මංගල්‍යය ලෙස අලුත් අවුරුදු උදාව සැලකීමේ වරදක් නැහැ. ඒ නිසා ජාතික අනන්‍යතාව තහවුරු කරන උත්සවය, සැණකෙළිය ලෙස අලුත් අවුරුද්ද වටහා ගැනීම ඉතා වැදගත් දෙයක්.

අසූහය වැනි ජන්මදිනය පසු කළ ගැටඹේ නායක හාමුදුරුවෝ

ක්‍රි.ව. 1931 අ‍ෙප්‍ර්ල් 04 දා උපත ලද ශ්‍රී ලංකා රාමඤ්ඤ මහා නිකායේ ජ්‍යෙෂ්ඨ කාරක සංඝ සභික, චන්ද්‍රකීර්ති ශ්‍රී අමරවංශ සද්ධර්ම වාගීශ්වර, කැප්පෙටියාගොඩ සිරිවිමල නායක ස්වාමීන් වහන්සේගේ 86 වැනි ඡන්මදිනය පසුගිය 04 දිනට යෙදී තිබුණි. මේ ඒ වෙනුවෙන් කෙරෙන කෘතවේදී පුණ්‍යානුමෝදනාවකි.


s copy

කන්ද උඩරට දෙවැනි රාජසිංහ රජු ප්‍රතිකාල් සේනාවට එරෙහිව කළ සටන ජයගත් පසු එය සංකේතවත් කිරීමට පිහිට වූ කුමාරසිංහ බෝධිය හෙවත් ‘ජය බෝධිය‘ අද වන විට සකල ලංකාවාසීන්ගේ පුදපූජා ලබමින් රට රැකුනොත් ජාතියත් සම්බුද්ධ ශාසනයත් රැකෙන බව සංකේතවත් කරමින් සිටී.     

පුදබිමක් වටා කටුකම්බි ගැසූ පමණින් බෞද්ධ භික්ෂුවකගේ ජාතික ශාසනික මෙහෙවර කිසිදිනෙක නැවැත්විය නොහැකි බව එදා පේරා‍ෙදණිය නුවර මහාමාර්ගයට යාබද ගැටඹේ රාජෝපවනාරාම විහාරාධිපතිව වැඩ විසු පූජ්‍ය ලබුදූවේ සිරිධම්ම නායක හිමියෝ නිතර සිහිපත් කළහ. එතකින් නිමා වූ ඒ උත්තුංග ජාතික මෙහවරට නැවත අතපොවන්නේ එහි වත්මන් නායක ධුරය දරන සිරිවිමල නායක හිමියන්ය. 
ලාංකේය ඉතිහාසය භික්ෂුවකට උරුම කළේ බණ කීම හා පාංශුකූලය දීම පමණක් නොවේ. බණ කීම සඳහාත් ශාසනයක් තිබිය යුතු බවත්, ශාසනය යනු සිවුවනක් පිරිස වන අතර, සිංහල බෞද්ධයන් නොමැති කල ආගමත් ශාසනයත් නොපවතින බවත් වටහාගත් මහාවිහාරය වූයේද ගැටඹේ රාජෝපවනාරාම විහාරස්ථානයයි.

පාලකයා දැහැමි කළ හැක්කේ භික්ෂූන් වහන්සේටය. රට බවභෝගයෙන් සශ්‍රීක වන්නේ පාලකයා දැහැමි වූ කලය. එයට මගපෙන්වීමට ගැටඹේ රාජෝපවනාරාම භික්ෂූන් වහන්සේලා එදාමෙදා ගන්නා උත්සාහය සුළුපටු නොවේ. 
බම්බලපිටියේ වජිරාරාමයට පමණක් දෙවැනි වන ලංකාවේ ඇති විශාලතම ඉරුදින දහම්පාසල වශයෙන් මෙම පිංබිමේ ස්ථාපනය කර ඇති %ශ්‍රී විමලවංශ දහම්පාසල^ හැඳින්විය හැකිය. එය මේ තත්ත්වයට ගෙන ඒමට පූජ්‍ය සිරිවිමල නායක හිමියන් ගන්නා උත්සාහය මිල කළ නොහැකිය.

එසේම ධර්මචක්‍ර විද්‍යාපීඨද, සිවු දෙසින් වඩිනා භික්ෂූන් වහන්සේලා වෙනුවෙන් වූ %මහා නේවාසික භික්ෂු මධ්‍යස්ථානය^ද උන්වහන්සේගේ උත්සාහයන්ගේ තවත් ප්‍රතිඵලයකි. මේ පුදබිමට ලැබෙන සෑම පිං පඬුරක්ම නේවාසික හිමිවරුන් සහ සිවුදිගින් වඩිනා මහ සඟරුවනේත් සිවු පසය වෙනුවෙන්ම වැයකළ උන්වහන්සේ කිසිදිනෙක දේශපාලන වරදාන සහ වරප්‍රසාදයන්ට යටත් වූයේද නැති එඩිතර බුද්ධ පුත්‍රයන් වහන්සේ නමකි.

අසාර්ථකවූ රජයන්ට සහාය පතා ප්‍රකාශයන් ලබාගැනීමට පැමිණෙන දේශපාලකයන්ගෙන් මෙම විහාරස්ථානය කිසිදිනෙක හිස් වූයේ නැත. ජේ.ආර්. ජයවර්ධන ජනාධිපතිවරයා විසින් මෙහි කටුකම්බි ගැසූවද එයද මෙම ස්ථානය ජාත්‍යන්තර ස්ථානයක් බවට පත්කිරීමට හේතු විය. බලයට පත්වන සෑම රාජ්‍ය නායකයෙකුම මෙම ස්ථානයට පැමිණ ආශීර්වාද ලබාගැනීම සිරිතකි. මෙම ස්ථානයට අවශ්‍ය වන්නේ මොනවාදැයි ඔවුහු ගරු නාහිමියන්ගෙන් විමසා සිටින අවස්ථාවලදී “ මට දෙන යමක් වෙන්නේ නම් එය රටට ලබාදෙන්න* යැයි උන්වහන්සේ දන්වා සිටියේය.

වරක් හිටපු ජනාධිපති ප්‍රේමදාස මහතා මෙම විහාරස්ථානයට පැමිණි අවස්ථාවේදී තමන්ට මෙම ස්ථානය දිව්‍යලෝකයක් ලෙස බැබළවිය හැකි යයි පවසා සිටියේය. උන්වහන්සේ එහිදී පවසා සිටියේ මෙය දිව්‍යලෝකයක් වෙනවාට වඩා රාජෝපවනාරාමය ලෙසින්ම පැවැතීම  තම අපේක්ෂාව බවයි.

මෙම නායක හිමියන් ස්ථිර වචන ඇති මහා යතිවරයාණන් වහන්සේ නමකි. යමක් කීමට ඇතොත් ඒ තැනැත්තාගේ තරාතිරම උන්වහන්සේට වැදගත්  නැත. පිරිත් නූල ගැට ගසන්නේද කීමට ඇති දේ කීමෙන් පසුය. නාහිමියන් කුමක් පැවසුවද එයට කාරුණිකව සවන් දීමට හිටපු ජනාධිපතිනි චන්ද්‍රිකා බණ්ඩාරනායක මහත්මියත්, මහින්ද රාජපක්ෂ මහතාත් නිහතමානී වූහ. හැම පාලකයෙකුටම උන්වහන්සේ දුන් ඔවදන වූයේ &රටත් ජාතියත් රැකෙන පරිදි රට පාලනය කරන්න* යනුවෙනි.
වත්මන් ජනාධිපතිවරයාගේ ඇල් මැරුණු පාලනයේ ස්වභාවය දුටු උන්වහන්සේ වරක් එතුමා හමුවූ විට “ බණකීම හාමුදුරුවන්ට ඉතිරි කර මීට වඩා රට හොඳින් පාලනය කරන්නේ නම් යහපත්* යැයි පවසා සිටියේය. උන්වහන්සේගේ කෙඳිරිල්ලක් නැති උජුපටිපන්න ගුණයට පාලකයන් කැමති වූයේ නැත. ඒ ඔවුන්ගේ නොව රටේ අවාසනාව විය.

ත්‍රස්තවාදයෙන් නිදහස් කර ගත් රට නැවත බෙදුම්වාදීන්ට පවරාදීමට යන නව ආණ්ඩුක්‍රම ව්‍යවස්ථාවත්, ඵෙතිහාසික සම්මතයට පිටුපා භික්ෂුව පාලනය කිරීම සඳහා වූ ගිහියන්ට පැවරූ භික්ෂු කථිකාවතත් උන්වහන්සේගේ දැඩි දෝෂ දර්ශනයට ලක් විය. සිරුරෙන් සිහින් වුවද හඬින් උත්තුංග වූ එදා උන්වහන්සේ එසේ ආරම්භ කළ සටන බොදු ලොව අවදි කළ ත්‍රෛනිකායික මහා භික්ෂු කතිකාවන්ගේ සමාරම්භයද විය.

එය කො‍ෙතක් අභියෝගයක් වීද යත් වත්මන් ආණ්ඩුව විසින් අතරමග ඉදිකිරීම් නතර කළ මහවැලි නදියට සේදී යන විහාර භූමියේ බැම්ම නැවත ඉදිකර දීමට ඉදිරිපත් විය. &බැම්ම තිබුණොත් පන්සල රැකෙයි. එහෙත් ඒ සියල්ල රැකෙන්නේ රට රැකුණොත් පමණි* යැයි උන්වහන්සේ පෙන්වා දුන්හ.

වරක් විදුලි බලශක්ති අමාත්‍යාංශයේ නිලධාරීන් පැමිණ විහාරස්ථානයේ පාවිච්චිය වෙනුවෙන් සූර්ය බලශක්තිය සැපයීමට කැමැත්ත විමසා සිටියේය. කමක් නැතැයි උන්වහන්සේ පැවසූහ. එයින් පසු එතැන ඒ වෙනුවෙන් පුවරුවක් සවිකළ යුතු නිසා ඒ සඳහා සුදුසු තැනක් පෙන්වන ලෙස නායක හිමියන්ගෙන් ඔවුන් ඉල්ලා සිටියේය. තම නම ප්‍රසිද්ධ කර ගැනීමට අවශ්‍ය නම් සූර්ය කෝෂද රැගෙන ආපසු යන ලෙස උන්වහන්සේ පිළිතුරු දුන්නේය. වැඩ මිස නම ප්‍රචාරය කර ගැනීමට උන්වහන්සේ කවදත් විරුද්ධ විය.
‘බුලතා සොරබොර වැව තනිවම බැන්ඳ බවත්, ඔහුගේ බිරිඳ වැවට යන පාර තැනූ අතර, එහෙත් ඔවුන් දෙදෙනා ඒ සඳහා නාමපුවරුවක් සවි කළේ නැති බවත්, යමක් කළ පසු දැවැන්ත පුවරු සවි කරන තමිල්නාඩු දේශපාලනය මෙරටට නොගැළපෙන බවත් උන්වහන්සේ එහිදී සිහිපත් කර දුන්නේය. 

ගැටඹේ නායක හාමුදුරුවෝ සිවුපසයට ගිජු වන්නේ  නැත. ධනය බෙදුවා මිස එය සඟවා තබා යතුරු කැරැල්ල අඳනකඩේ සඟවා ගත්තේද නැත. අසරණ දුගී මගී යාචකයන් අතර ඒවා උන්වහන්සේ බෙදා දුන්හ. ලැබෙන බොහෝ දේ උතුරු නැගෙනහිර දිළිඳු බවෙන් පිරි විහාරස්ථාන වෙත රැගෙන යාම උන්වහන්සේගේ පුරුද්දකි. නාහිමියන් භික්ෂු ගුණයෙන් පෝෂිතය.

තාන්න – මාන්න අපේක්ෂාවෙන් පිරිත් නූල් බැන්දේ නැත.කීමට ඇති දේ කෙටියෙන් නමුත්  ඇඟටපතට දැනෙන්නට උන්වහන්සේ කීහ. 

උන්වහන්සේට දිවා කල කටයුතු කිරීමට වෙනම කුටියක් නැත. විහාරස්ථානයට ඇතුළු වන විට පෙනෙනුයේ සිහින් සිරුරකින් සහ මඳ සිනහවකින් වැඩ හිඳිනා නායක හිමියන්ගේ රුවය. දන් ඇබිත්තක් වළඳන නිසා දානයෙන් පසු සැතපීමටද උන්වහන්සේට වුවමනාවක් නැත.හමුවීමට කලින් අවසර ගැනීමක්ද නැත. එනිසාම  සෑම විටකදීම උන්වහන්සේ හමුවීමද අපහසු නැත.

එනිසාම දිනකට වැඩි දෙනකු උන්වහන්සේ හමුවී උපදෙස් අවවාද අනුශාසනා ලබයි. ඒ උන්වහන්සේගේ දින චර්යාවේ කොටසකි. 
මෙවන් වූ බුද්ධ පුත්‍රයන් වහන්සේලා රටට දැයට සමයට මහා සම්පතකි. මහණකමත්, බණදහමත් සමග යුග මෙහෙවරක් ඉටු කරන උන්වහන්සේට තවදුරටත් චිරාත් කාලයක් ඒ කටයුතු පවත්වාගෙන යෑමට නමස්කාර පූර්වකව අප දිගාසිරි පතමු.
(පේරාදෙණිය විශ්වවිද්‍යාලයේ දේශපාලන විද්‍යා අංශයේ හිටපු මහාචාර්ය විජේතුංග රණසිංහ මහතාගේ ලිපියක් ඇසුරෙනි.)

විශ්වාසභංගය දා පාර්ලිමේන්තුවේ කතා

අගමැති රනිල් වික්‍රමසිංහට එරෙහිව ඒකාබද්ධ විපක්‍ෂය ගෙන ආ විශ්වාසභංග යෝජනාව විවාදයට ගනු ලැබූයේ පසුගිය බදාදාය. උදෑසන 9.30 සිට රාත්‍රී 10.10 දක්වා එදින පාර්ලිමේන්තුව පැවැත්වුණු අතර, මෑත ඉතිහාසයේ පැවැත්වූ දීර්ඝතම පාර්ලිමේන්තු සැසිවාරය වූයේද මෙයයි. විවාදය ආරම්භයේදී කථානායක කරු ජයසූරිය පක්‍ෂ විපක්‍ෂ මන්ත්‍රීවරුන්ට උපදෙස් ලබාදෙමින් පැවසුවේ ආදර්ශවත් පාර්ලිමේන්තුවක් ලෙස විවාදය පවත්වාගෙන යන ලෙසයි. විනීතව හැසිරෙන ලෙසද කථානායකවරයා මන්ත්‍රීවරුන්ගෙන් ඉල්ලීමක් කළේය. නමුත් විවාදය අවසන් වන විට එම ඉල්ලීම බොහෝ සැරයක් ඉල්ලා සිටීමට කථානායකවරයාට සිදුවිය. 



දිනේෂ්ගෙන් ආරම්භයක්

ඒකාබද්ධ විපක්‍ෂයේ කණ්ඩායම් නායක දිනේෂ් ගුණවර්ධන විශ්වාසභංග යෝජනාව පාර්ලිමේන්තුවට ඉදිරිපත් කළ අතර, ඩලස් අලහප්පෙරුම එය ස්ථිර කළේය. ඒ අවස්ථාවේදී අගමැති රනිල්ද පාර්ලිමේන්තුවට පැමිණ සිය අසුනේ සිටියේය. 
‘මෙම විශ්වාසභංග යෝජනාව ඉදිරිපත් කළේ අගමැතිවරයා සම්බන්ධව විශ්වාසය භංගත්වයට පත්වීම නිසයි. අගමැති ගැන විශ්වාසයක් නොමැති වීම බරපතළ කරුණක්’ කියමින් දිනේෂ් කතාව කරගෙන ගියේය. ආණ්ඩු පක්‍ෂයෙන් විවාදය ආරම්භ කරමින් විවාදයට එක්වූයේ සභානායක ලක්ෂ්මන් කිරිඇල්ලයි. පාසල් අවධියේ සිට මිතුරන් වූ අගමැති රනිල් හා මන්ත්‍රී දිනේෂ් පිළිබඳව සඳහන් කරමින් කිරිඇල්ල විවාදය ආරම්භ කළේය.
‘දිනේෂ් ගුණවර්ධන මන්ත්‍රීවරයා බොහොම අමාරුවෙන් යාළුවට විරුද්ධව කතා කළා. විවාදය පටන් ගනිද්දිම ඒ අයගේ හුළං බැහැලා’ 

දිනේෂ් ගුණවර්ධන විවාදය ආරම්භ කළ අතර, අවසන් කථිකයා වූයේ රාජිත සේනාරත්නය. මෙම කාලය තුළදී සභාව තුළ අපහාස, උපහාස, චෝදනා, මඩ ප්‍රහාර එල්ල කරගැනීම් අනන්තවත් සිදු විය. පෞද්ගලික චරිත ඝාතනද එයට එක්විය.
“පර්පචුවෙල් ‍ෙට්‍රෂරීස් එකෙන් බොන්ඩ් සොරකම් කිරීම සඳහා ලංකා බැංකුව යොදා ගත්තා” යැයි දිනේෂ් ගුණවර්ධන යෝජනාව පාර්ලිමේන්තුවට ඉදිරිපත් කරමින් කතා කරමින් සිටියදී, ආණ්ඩුව දෙසින් කෑගසමින් ඝෝෂාවක් ආරම්භ විය. ‘කෝ අත්සන් කරපු කට්ටිය” යැයි අජිත් මාන්නප්පෙරුම කීවේය. ‘ඔය කෑගහන්නේ පුට්නෝට් කල්ලිය තමයි” දිනේෂ් උස්හඬින් පැවසීය. එවිට නලීන් බණ්ඩාර “2008 සිට බොන්ඩ් ටික අපි ගේනවා. ඊට කලින් ඔබතුමාලගේ මන්ත්‍රීවරු ටික පාර්ලිමේන්තුවට ගෙනැල්ලා පෙන්වන්න” යැයි කීවේය. ‘ඔය විශ්වාසභංගයට නැකැත හදලා දුන්නේ සුමනදාස අබේගුණවර්ධන මහත්තයාද” අජිත් මාන්නප්පෙරුම යළි විමසීය.
අනතුරුව කතා කළේ, මංගල සමරවීරය. %රනිල්ට බෑ^ යනුවෙන් සඳහන් පෝස්ටරයක් සකස් කර රට පුරා ඇලවූ අයුරු මංගල සිය කතාවේදී සිහිපත් කළේය. ‘1999 ජනාධිපතිවරණය තිබුණේ දෙසැම්බර් 18 වැනිදා. ඊට මාස 10කට විතර ඉස්සෙල්ලා අපේ මාධ්‍ය ප්‍රචාරක කමිටුව මුළු රටේම ගමක් ගමක් ගාණෙ අස්සක් මුල්ලක් නෑර %රනිල්ට බෑ^ කියලා පෝස්ටරක් ගැහුවා. යූ.එන්.පී. අයටත් මතකයි. අපටත් මතකයි. ඒ වෙලාවේ අපි %රනිල්ට බෑ^ කියලා පෝස්ටරයක් ගැහුවේ අපි හොඳටම දැනගෙන හිටියා චන්ද්‍රිකා බණ්ඩාරනායකගේ පත්වීමට විශාලම බාධකය තියෙන්නේ රනිල් වික්‍රමසිංහගෙන් කියලා. මොකද කවදාවත් බැරි මිනිහෙකුට කෝටි ගාණක් වියදම් කරලා පෝස්ටර ගහන්න වුවමනා නැහැ. රනිල්ට පුළුවන් නිසා තමයි එදා අපි පෝස්ටර් ගහලා ඒ මැතිවරණ ව්‍යාපාරය ආරම්භ කළේ” යැයි මංගල පැවසීය.

විමල් වීරවංශ කතා කරන අවස්ථාවේදී ආණ්ඩු පක්‍ෂයෙන් දිගින් දිගටම බාධා එල්ල විය. ‘පසුගිය කාලයේ අගමැතිතුමා මූණවත් නොබලපු මන්ත්‍රීවරුන්ගේ මූණ බලන සති දෙකක් අපි නිර්මාණය කර දුන්නා. මොනර කොළ තොග පිටින් තමුන්නාන්සේලාගේ සාක්කුවලට වැටෙන සති දෙකක් අපි නිර්මාණය කර දුන්නා. ආනන්ද අලුත්ගමගේ මන්ත්‍රීතුමා ඒක දන්නවා” විමල් කීවේය. මේ අවස්ථාවේදී රීති ප්‍රශ්නයක් මතුකළ එස්.එම්. මරික්කාර් “විමල් වීරවංශ කියනවා අපි සල්ලි ගත්තා කියලා. ඒක බොරුවක්. ඒක බොරුවක්. ඒක සුපුරුදු උස්හඬින් පැවසීය. “කථානායකතුමනි ඔය මොනර කොළ තමයි කතා කරන්නේ. සල්ලි නොලැබුණා නම් කෑකෝ ගහන්න දෙයක් නැහැ අහගෙන ඉන්න” විමල් ඊට උත්තර දුන්නේය.
අනුර කුමාර කතා කරන අවස්ථාවේදී එක්සත් ජාතික පක්‍ෂයේ හෙක්ටර් අප්පුහාමි මැදිවුණි.

“දැන් ගෝඨාභය කල්ලිය හා බැසිල් කල්ලිය කියලා කඳවුරු දෙකක් තියෙනවා. දැන් බැසිල් කල්ලිය යම් තරමකට නිහඬ වී සිටිනවා” අනුර පැවසීය. මෙහිදී නැගී සිටි හෙක්ටර් අප්පුහාමි “ඔබතුමා නම් කියනවා නම් හොඳයි නැත්නම් වැරදි වැටහීම් ඇතිවෙන්න පුළුවන්” යැයි කීවේය. “මම දැක්කා අර්ජුන් ඇලෝසියස්ගේ දුරකථන නාමාවලියේ හෙක්ටර් අප්පුහාමි කියලා නමක් තිබුණා. මට්ටක්කුලියේ ගුදමක් දුන්නා කියලා හෙක්ටර් අප්පුහාමි නමට තිබුණා. ඇද්ද? තව ඕනද?” අනුර එයට පිළිතුරු දුන්නේය.
අපේම ආණ්ඩුවකට මම එකඟ වෙනවා

පාර්ලිමේන්තුව ආරම්භයට ප්‍රථම ආණ්ඩු පක්‍ෂයේ අවසන් කණ්ඩායම් රැස්වීම පාර්ලිමේන්තුවේ කමිටු කාමර 01දී පැවැත්වුණු අතර, එයට එක්සත් ජාතික පෙරමුණේ සියලු දෙනා පැමිණ සිටියහ.
මෙහිදී ඇමති ජෝන් අමරතුංග විශේෂ ඉල්ලීමක් කළේය. 

‘මේ වෙලාවේදී අපි හැමෝම ඔබතුමා සමග ඉන්නවා. හැබැයි මේ වෙලාවේ අපිත් එක්ක ඉන්නෙ නැති ආණ්ඩුවේ මන්ත්‍රීවරු හරි ඇමතිවරු හරි ඉන්නවා නම් ඒ අය අයින් කරන්න ඔබතුමා අපට පොරොන්දු වෙන්න ඕන. ආණ්ඩුව මෙච්චර අවුල් වුණේ ගැළපෙන්නේ නැති අය ආණ්ඩුවට දාගත්ත නිසා. මේකෙන් පස්සෙ අපේ ආණ්ඩුවක් හදන්න ඕන.’
ජෝන්ගේ  කතාව සියල්ලෝම අනුමත කළ අතර, එය අසා සිටි අගමැති රනිල් පැවසුවේ මේ විවාදේ ප්‍රතිඵලයත් එක්ක ගැළපෙන ආණ්ඩුවක් හදන්න පොරොන්දු වෙන බවයි.

සභා ගැබේ  කණ්ඩායම් සාකච්ඡා

පාර්ලිමේන්තුව ආරම්භ වූ අවස්ථාවේ සිටම සභා ගැබ තුළ ආණ්ඩු පක්‍ෂයේ මන්ත්‍රීවරුන් විවිධ කණ්ඩායම් ලෙස සාකච්ඡා කරන ආකාරයක් දක්නට ලැබුණු අතර, විපක්‍ෂයේද එවැනි සාකච්ඡා සිදුවිය. රවි කරුණානායක , ලකී ජයවර්ධන, නලීන් බණ්ඩාර, හෙක්ටර් අප්පුහාමි එක් මුල්ලක මහ හඬින් සිනහසෙමින්, කතා කරමින් සිටි අතර සුජීව සේනසිංහ, ආනන්ද අලුත්ගමගේ, බුද්ධික පතිරණ එක් කොනක කතා කරමින් සිටියහ.

අගමැතිට ආ දුරකථන පණිවුඩය

ශ්‍රී ලංකා නිදහස් පක්‍ෂයේ මැති ඇමතිවරුන් කිසිවෙක් උදෑසන සභා ගැබ තුළ නොසිටීමද විශේෂත්වයක් විය. ඒ ඔවුන් ඒ වන විටද පාර්ලිමේන්තුවෙන් පිටත රැස්වී සාකච්ඡා කරමින් සිටි බැවිනි.
එලෙස සාකච්ඡා කර විශ්වාසභංගයට ඡන්දය දීමෙන් වැළකී සිටීමට ඔවුන් මුලින්ම තීරණය කළ අතර, එසැණින් ඇමති ෆවුසි අගමැති රනිල්ට දුරකථන ඇමතුමක් ලබාගත්තේ ඒ බව දැන්වීමටය.
පාර්ලිමේන්තුවේ අගමැතිවරයාට වෙන්වූ කාමරයේ එවිට රනිල් වික්‍රමසිංහ රැඳී සිටි අතර, අගමැති ආරක්‍ෂකයෙකු දුරකථනය රනිල්ට ලබා දුන්නේය.
‘අපේ කණ්ඩායම ඡන්දය දීමෙන් වැළකී ඉන්න තීරණය කළා’  
ෆවුසි එසේ පැවසූ අතර, ඉන් පසුව රනිල් තම කාමරයේ දොර වසා ගනිමින් ෆවුසි සමග මඳ වේලාවක් කතාකර පිටතට පැමිණ යළි ආරක්‍ෂක නිලධාරියා අතට දුරකථනය දුන්නේය.
ඒ අවස්ථාවේදී අගමැති රනිල්ගේ කාර්යමණ්ඩලය අවට රැඳී සිටි අතර, ඔවුන්ට ඇසෙන සේ රනිල් පැවසුවේ,‘නිදහස් පක්ෂෙ අය ඡන්දෙට එන්නෙ නැහැලු’ කියාය.

එසේ කියමින් රනිල් සභා ගැබට යාමට පැමිණියේය. එවිට රනිල්ට මුහුණුට මුහුණ මුණගැසුණේ සජිත් ප්‍රේමදාසයි. නිදහස් පක්‍ෂය ඡන්දෙට නොඑන බව කී කතාව සජිත්ටද ඇසුණ නමුත් එය නෑසුණාක් මෙන් ඔහු ඉදිරියට ගමන් කළේය.
සභා ගැබට පැමිණෙන විට අසලම සිටි නවීන්ට රනිල් මේ බව කී අතර, නවීන් සතුටින් සිනාසුණේය. සුජීව සේනසිංහ අසලටද පැමිණෙමින් මේ බව පැවසූ රනිල් යළි සිය අසුනේ සිට විවාදයට සවන් දුන්නේය.
ෆවුසි ඔව් කියයි – අබේවර්ධන නැහැ කියයි
ඒ සමගම ෆවුසි ඒ පිළිබඳ මාධ්‍යයට පවසා තිබූ අතර, කෙටි පණිඩුව මගින් මේ පිළිබඳ සියල්ලෝම දැනගත්තේය. නමුත් ලක්ෂ්මන් යාපා ඇතුළු කිහිපදෙනකු එයට අකමැති වූ අතර, ඒ සැණින් ලක්ෂ්මන් යාපා පැවසුවේ එලෙස තීරණයක් නොගත් බවයි.

ඔක්කොම හරි නේද?

මේ අතර මන්ත්‍රී පිවිසුමෙන් පාර්ලිමේන්තුවට පැමිණෙමින් සිටි ඇමති ලක්ෂ්මන් සෙනෙවිරත්නට ඒ අසල සිටි ඇමති රුවන් විජේවර්ධන මුණගැසිණි.
‘ආ කොහොමද? ඔක්කොම හරි නේද?’ කියා රුවන්, සෙනෙවිරත්නගෙන් ඇසූ විට සෙනෙවිරත්නගේ පිළිතුර වූයේ,
‘ඔව්.. ඔව්  අනිවාර්යයෙන්ම’ යනුවෙනි.

තාම විශ්වාස නැද්ද

පාර්ලිමේන්තු භෝජනාගාරයේ සිට ජවිපෙ නායක අනුර කුමාර සහ මන්ත්‍රී බිමල් රත්නායක පැමිණෙමින් සිටි අතර, ඔවුන්ට හමුවූ පාර්ලිමේන්තුවේ හිතවතුන් පිරිසක් සමග කතා කිරීමට නැවතිණි.
‘මන්ත්‍රීතුමා ඇත්තටම ඔබතුමාලා මොකද කරන්නේ අද? ඡන්දෙ දෙනවද නැද්ද?’
ඔවුන් එසේ විමසුවේ බිමල්ගෙනි. අනුර දෙසට හැරෙමින් බිමල් එවිට පැවසුවේ,
‘මේ බලන්නකෝ මෙයාලට තාම අපිව විශ්වාස නැහැනේ.. බලන්නකෝ හවස් වෙද්දි’ යැයි බිමල් ඔවුන්ට පවසන විට අනුරද සිනහසුණි.
හෙට ඉඳලා කොන්ද කෙළින් තියාගෙන වැඩ කරන්න කියලා මම කිව්වා
විශ්වාසභංගය පිළිබඳ විවාදය පාර්ලිමේන්තුවේ පැවැත්වෙන අවස්ථාවේ කැබිනට් තීරණ දැනුම් දීමේ මාධ්‍ය හමුව පැවැත්වුණේ පාර්ලිමේන්තු කමිටු කාමර 01දීය.  මාධ්‍ය හමුව ආරම්භ වීමට ප්‍රථම ඇමති රාජිත සහ ගයන්ත ඒ අසල සුහද කතාබහක නිරතව සිටියේය. නමුත් ඔවුන් දෙදෙනා කතාබහ කරන සියලු දේ කැමරා තුළ පටිගත වන බව ඔවුන්ට අමතක වී තිබිණි.
ලක්ෂ්මන් යාපා සහ ඩිලාන් පෙරේරා විශ්වාසභංග යෝජනාවට පක්‍ෂව ඡන්දෙ දෙන බව කියා ඇතැයි රාජිත ගයන්තට පවසමින් සිටි අතර, රාජිත මෙසේ පැවසීය.
‘දැන් අරුන් දෙන්නා කියලා උන් දෙන්නා වෝට් කරනවා කියලා’ 
‘කවුද?’
‘ඩිලානුයි, ලක්ෂ්මන් යාපායි’
‘ලක්ෂ්මන් යාපාට ඉහළින් කියන එක තමයි ඌ කරන්නේ..’
‘දැං ඩිලාන්ලට එහෙම මුන් බණිනවා ඇති. උඹලා කියපු නිසා අපි මේක ගෙනාවේ. දැන් උඹලා දෙන්නෙ නැද්ද කියලා. උන් කැට තියලනේ කිව්වේ’
‘රතන හාමුදුරුවොත් කතා කරන්න ඕන කිව්වා. ඒ පාර දුන්නා විනාඩි 10ක්’ ගයන්ත එසේ රාජිතට කීවේය.
‘ආ මොනවද කතා කරන්න ඕන’ 
‘දන්නෙ නැහැ. ඕනෙමයි කිව්වා. ඒ පාර කතාවක් දුන්නා’
‘දෙන්න එපා ඉතින්. මොකටද දෙන්නේ’
‘ප්‍රයිමිනිස්ටර් (අගමැති) කිව්වා දෙන්න කියලා’
‘මේ මේ අපේ ප්‍රයිමිනිස්ටර්ගේ (අගමැතිගේ) ඔය මඟුලනේ තියෙන්නේ.. මම අද කිව්වා හෙට ඉඳලා කෙළින් ඉන්න කියලා. ඊයේ රෑ හම්බ වුණාම මම කිව්වා කොන්ද කෙළින් තියාගෙන වැඩ කරන්න කියලා. එක්කෙනෙකුටවත් නැමෙන්න එපා කියලා කිව්වා. ඒ විදියට ආණ්ඩුව ගෙනියන්න කිව්වා. මොනවහරි ප්‍රශ්නයක් ආවොත් මම කතා කරන්නම් කිව්වා. මොකද තීන්දු අරගන්නේ නැතුව සද්ද නැතුව ඉන්නේ’
‘එහෙම වුණොත් එකක්වත් කෙරෙන්නෙ නැහැනේ’
‘චතුරත් හරි නේද?’  ගයන්ත යළි රාජිතගෙන් විමසීය.
‘හරි ඇති’ 
‘මම ඇහැව්වා’
‘ආ.. ඉතින් මොකද කිව්වේ’
‘මම කිව්වා මේ පිස්සු කෙළින්න එපා.. තාත්තා එක්ක කෙළින් ඉන්න.. නැත්නම් තාත්තා මේ දෙන ෆයිට් එකත් අපරාදෙනේ කියලා’
‘ඊට පස්සේ’
‘හිනා වෙවී හිටියා බලමු බලමු කියලා’
‘අපි පාර්ලිමේන්තුවට ඇවිත් 1994 ඉඳන් මොකද කළේ. මම රන් කළා. යූ.ඇන්.පී. එක එහෙම තමයි නැග්ගේ’
‘ඊට පස්සේ ස්ටේජ් එකට ජනාධිපතිතුමාට විරුද්ධව වගේ අපි පක්ෂෙ අරගෙන ගියානේ. එහෙමනේ වුණේ ඉස්සර ඉඳලම… නැද්ද?’
‘ඒක හරි’ 
‘එහෙම කරලා පක්ෂෙ වෙනුවෙන් මැරීගෙන වැඩ කළා’
‘94 පැරදුණාට පස්සෙ මගේ ජීප් එක කිලෝමීටර් 61,000ක් කරනකොට ලොක්කගේ එක තිබුණේ 27,000යි’ 
සිනහසෙමින් රාජිත යළි විස්තර කළේය.
ඔවුන් එසේ කතා කරමින් සිටින විට මාධ්‍ය හමුව ආරම්භ විය. මාධ්‍ය හමුව අමතමින් රාජිත පැවසුවේ ආණ්ඩුවේ සිටිමින් විශ්වාසභංගයට පක්‍ෂ වන කිසිවෙකුට අමාත්‍ය ධුරවල සිටිය නොහැකි බවයි.
මාධ්‍ය හමුව අවසන් වූ පසුව රාජිත ජනාධිපති මෛත්‍රීට දුරකථන ඇමතුමක් ලබාගත් අතර, එවිට ජනාධිපති මෛත්‍රී සිටියේ ජනාධිපති මන්දිරයේය. විනාඩි කිහිපයක් රාජිත ජනාධිපති මෛත්‍රී සමග කතා කරමින් සිට යළි සභා ගැබට යෑමට පැමිණියේය.
මංගලගේ සාකච්ඡාව
විශ්වාසභංග විවාදය පැවැත්වෙන අතරතුර දහවල් හදිසියේම මංගල සමරවීර, කබීර් හෂීම්, ඉරාන් වික්‍රමරත්න, තලතා අතුකෝරල, රංජිත් මද්දුම බණ්ඩාර යන ඇමතිවරුන් පාර්ලිමේන්තුවෙන් පිටතට පැමිණි අතර, වාහන දෙකක නැගී මේ සියල්ලෝම හිතවතෙකුගේ නිවසට පැමිණ රහස් සාකච්ඡාවක් පැවැත්විය.
ඡන්ද විමසීමේදී ඡන්දය ලබාගන්නා ආකාරය සහ පක්ෂයේ ඉදිරි වැඩපිළිවෙළ පිළිබඳව මෙහිදී විශේෂයෙන්ම සාකච්ඡා කර තිබූ අතර, විශ්වාසභංග යෝජනාව ජයග්‍රහණය කරවීමට තවත් කළයුතු යමක් ඇත්දැයි සොයාබැලීමට ඔවුන් එහිදී කාලය ගතකළහ.

පාර්ලිමේන්තුව උණුසුම් කළ සුසිල්ගේ කතාව

ආණ්ඩු පක්ෂය නියෝජනය කළ ශ්‍රී ලංකා නිදහස් පක්ෂයේ ඇමතිවරුන් පිරිසක් විශ්වාසභංගයට පක්ෂව ඡන්දය ප්‍රකාශ කිරීමට තීරණය කර තිබූ අතර, ඒ බව මුලින්ම සභාවට පැවසුවේ ඇමති සුසිල් ප්‍රේම්ජයන්ත විසිනි.
සුසිල් සිය කතාව ආරම්භ කිරීමට සූදානම් වන අවස්ථාවේදී ආණ්ඩු පක්ෂයෙන් දැඩි විරෝධයක් එල්ල වූ අතර ඒකාබද්ධ විපක්ෂයෙන් සහයෝගය ලැබුණි.
සුසිල් කතාව කරගෙන යන විට ඔහුගේ සහායට සුසන්ත පුංචිනිළමේ සහ ඩිලාන් අසල අසුන්වල සිටිමින් සුසිල්ව දිරිමත් කළේය.
සුසිල් අදහස් දක්වන සියලු දේට ආණ්ඩු පක්ෂයේ ඇතැම් මන්ත්‍රීවරුන් බාධා කළ අතර, සුසිල්ද ආවේගයෙන් කතා කරන්නට විය.
‘ශ්‍රී ලංකා නිදහස් පක්‍ෂය සම්මුතිවාදී ආණ්ඩුවකට එන්නයි ජනාධිපතිතුමා තීරණය කළේ. එදා තනි පක්‍ෂයකට ආණ්ඩුවක් හදන්න බැරිවුණා. පුළුවන් නම් එක්සත් ජාතික පක්‍ෂය තනි ආණ්ඩුවක් හදලා පෙන්වන්න. පුළුවන් නම් හදලා බලමු. 32෴ක් ගත් අය ජනවරම හඳුනන්නෙ නෑ. ජනවරම තියෙන්නේ ජනතාව ගාව. ඒක ඕන වෙලාවට දෙනවා. ඕන වෙලාවට නවත්වා ගන්නවා. පසුගිය මහ මැතිවරණයෙන් ලේකම්වරු දෙන්නා අයින් නොකළා නම් අද එක්සත් ජාතික පක්‍ෂයේ අය ආණ්ඩුවේ නෙමෙයි ඉන්නේ. ඒක මම නෙමෙයි කියන්නේ ඒ අය පත්කරපු ජනාධිපතිතුමා. අහගන්න ගිහින් ජනාධිපතිතුමාගෙන්’ යැයි සුසිල් ආවේගයෙන් කතාව පවත්වා අවසන් කළ වහාම සභාවෙන් පිට විය.
ඒ සමග ඒකාබද්ධ විපක්ෂයේ මන්ත්‍රීවරුන්ද සභා ගැබෙන් පිටවූ අතර, මන්ත්‍රීවරුන්ගේ කොරිඩෝවේදී සුසිල් හා ඒකාබද්ධ විපක්ෂ මන්ත්‍රීවරුන් මුණගැසුණි.
‘සුපිරි කතාවක්නේ කළේ. මරු ආ’ කියමින් ඒකාබද්ධයේ මන්ත්‍රීවරුන් සුසිල් සමග සිනහසෙමින් තවත් දේ සාකච්ඡා කළහ.

අමුතු සාකච්ඡාවක්

සියලු දේ මේ ආකාරයට සිදුවෙමින් පවතින අවස්ථාවේ පාර්ලිමේන්තුවේ පළමු මහලේ පුස්තකාලය තුළ තවත් විශේෂ සාකච්ඡාවක් සිදුවෙමින් පැවතිණ.
ඇමති මලික් සමරවීර, මන්ත්‍රී චමල් රාජපක්ෂ, ඇමති අනුර ප්‍රියදර්ශන, මන්ත්‍රී උදය ගම්මන්පිල එම සාකච්ඡාවට එක්වී සිටි අතර, තරමක් රහස් සාකච්ඡාවක් ලෙස එය සිදුවිය.
අනුර ප්‍රියදර්ශන තරමක් උදාසීනව කතා කරමින් සිටි අතර, චමල් සහ උදය පවසන දේ පිළිබඳවද මලික් අවධානය යොමු කරමින් සිටියේය.
තරමක් දිගු වේලාවක් සාකච්ඡාව පැවති අතර, ඉන්පසු පිටතට පැමිණි මේ කණ්ඩායම වෙන වෙනම එතැනින් ඉවත්ව ගියේ සාකච්ඡාවක් සිදුනොවූ පරිද්දෙනි.

විශ්වාසභංගය දිනවන්න තිලංගගේ මෙහෙයුම

විශ්වාසභංග විවාදය පැවැත්වෙමින් තිබුණද, පාර්ලිමේන්තු මූලාසනයට කථානායක සහ කාරකසභා සභාපති හැරෙන්නට නියෝජ්‍ය කථානායක තිලංග සුමතිපාල නොපැමිණීම පිළිබඳව කාගේත් අවධානයට ලක්ව තිබුණි.
තිලංග නියෝජ්‍ය කථානායක කාර්යාලයේ සිටි අතර, රූපවාහිනියෙන් විවාදය සිදුවන ආකාරය බලා සිටියේය.
මේ අතර ඒකාබද්ධ විපක්ෂයේ මන්ත්‍රීවරුන්ද බොහොමයක් වරින් වර නියෝජ්‍ය කථානායක කාර්යාලයට පැමිණ තිලංග හමුවී සාකච්ඡා කළ අතර, සුසිල්, දයාසිරි, ඩිලාන් ඇතුළු පිරිසද වරින් වර  එහි පැමිණියහ. කෙසේ හෝ විශ්වාසභංග යෝජනාව ජයග්‍රහණය කිරීමට තිලංග සැලසුම් සකසමින් සිටියේය. මේ අතර නිදහස් පක්ෂයේ ඇමතිවරුන් පිරිසක් විශ්වාසභංග යෝජනාවට පක්ෂව ඡන්දය දීමට තීරණය කළ බව මාධ්‍ය හමුවක් පවත්වා ප්‍රකාශ කිරීමට තිලංග ඇතුළු පිරිස තීරණය කළේය.
පාර්ලිමේන්තුවේ කාමර අංක 08දී එම මාධ්‍ය හමුව පැවැත්වුණ අතර, ඩබ්ලිව්.ඩී.ජේ සෙ‍ෙනවිරත්න, සුසිල් ප්‍රේම්ජයන්ත, එස්.බී දිසානායක, ඩිලාන් පෙරේරා, දයාසිරි ජයසේකර, චන්දිම වීරක්කොඩි, ලක්ෂ්මන් යාපා අබේවර්ධන, සුසන්ත පුංචිනිළමේ, තාරනාත් බස්නායක, සුදර්ශනී ප්‍රනාන්දුපුල්ලේ, සුමේධා ජී ජයසේන යන පිරිස පක්ෂව ඡන්දය දෙන බව එහිදී ඔවුහු ප්‍රකාශ කළහ.

සල්ලි විතරක් නෙමෙයි ඡන්දය දෙන අයට තනතුරු

පසුගිය අඟහරුවාදා මහින්දගේ විජේරාම පෙදෙසේ පිහිටි නිල නිවසේදී පැවැති ඒකාබද්ධ වික්‍ෂයේ පාර්ලිමේන්තු මන්ත්‍රී කණ්ඩායමේ රැස්වීමකදී මහින්දානන්ද විශ්වාසභංගය සම්බන්ධයෙන් මන්ත්‍රීවරුන්ට කරුණු පැහැදිලි කළේය. 
‘අපි මේ විශ්වාසභංග යෝජනාව ගෙනාවේ හොඳ වෙලාවට. දැන් රනිල් නන්නත්තාර වෙලා ඉන්නේ. හරියට බැලුවොත් අපි බෝම්බයක් ගැහුවා. දැන් ‍කට්ටිය ඒකට තුවාල වෙලා ඉන්නවා. තවම අපට තුවාල නැහැ. දැන් පේන්න තියෙන තත්ත්වයේ හැටියට අපි ඡන්ද 20ක්, 30ක් විතර ප්‍රමාණයකින් දිනන්න පුළුවන්’ මහින්දානන්ද පැවසීය.
‘ඒ තරම් සුළුවෙන් තකන්න එපා. ආණ්ඩුව මේ ජයග්‍රහණය ආපහු හරවන්න කරන්න පුළුවන් සේරම දේවල් කරයි. අපට ලොකු විශ්වාසයක් තියාගන්න බැහැ. ඒ හින්දයි මම කිව්වේ විශ්වාසභංග යෝජනාව ‍ගේන කොටම එක්සත් ජාතික පක්‍ෂයෙයි, නිදහස් පක්‍ෂයෙයි කට්ටියගේ අත්සන් ගමු කියලා’ ප්‍රසන්න පෙන්වා දුන්නේය.
‘ඒක ඇත්ත. අපට ආරංචියි මන්ත්‍රීවරුන්ට විවිධ බලපෑම් එනවා කියලා’ මහින්දද පැවසීය. 
‘සල්ලි මිටි ගණන් විසිවෙනවා කියලා දැනගන්න ලැබිලා තියෙනවා. මේ පාර රනිල් දිනුවොත් දිනන්නේ මොනර කොළ නිසයි’ විමල් කීවේය.
‘ආණ්ඩුව මේකට ලොකු මුදලක් ආයෝජනය කරනවා කියලයි දැනගන්න තියෙන්නේ. මන්ත්‍රීවරුන්ට ලක්‍ෂ අටසීය, නවසීය දෙන්න පවා ලැහැස්තිලු’ ප්‍රසන්න පැවසීය. 
“සල්ලි විතරක් නෙමෙයි විරුද්ධව ඡන්දය දෙන කෙනෙකුට ඕනෙම තනතුරක් දෙන්නත් සූදානම් වෙලයි ආණ්ඩුව වැඩේට බැහැලා තියෙන්නේ’ විමල් පැවසීය. 

දෙන්නගේ ඩීල් එකට අපි අහුවුණා

විශ්වාසභංග යෝජනාවට ඡන්දය ප්‍රකාශ කිරීම සම්බන්ධයෙන් ශ්‍රී ලංකා නිදහස් පක්‍ෂය තුළ බෙදීමක් හටගෙන ඇති බව ප්‍රසන්නට දැනගන්නට ලැබී තිබිණි. ඒ අනුව ප්‍රසන්න විජේරාම පෙදෙසට ගියේ මහින්ද මුණගැසීමටය.
ප්‍රසන්න එනු දුටු මහින්ද එක්වරම “ආ මේ එන්නේ අපේ තරගයේ වීරයා’ යැයි කීවේය. “මොකද සර් එහෙම කිව්වේ? ඇත්තටම දැන් මොකක්ද වෙලා තියෙන්නේ?’ ප්‍රසන්න ඇසුවේය. 
“නෑ ඉතින් ඔයා කිව්ව එක හරි’ මහින්ද පැවසීය.
“මොකක්ද මං කියපු එක?’ ප්‍රසන්න යළි ඇසුවේය.
‘‘ශ්‍රී ලංකා නිදහස් පක්‍ෂයේ බෙදීමක් ඇතිවෙලා තියෙනවා විශ්වාසභංගයට ඡන්දය දෙන එක ගැන. පක්‍ෂයේ නියෝජිතයෝ දෙන්නෙක් උදේ මාව හම්බ වෙන්න ඇවිත් කියනවා පක්‍ෂයේ බෙදීමක් ඇතිවෙලා තියෙනවා කියලා. සමහරු කියනවලු විශ්වාසභංගයට පක්‍ෂ වෙමු කියලා. තව පිරිසක් කියනවලු ඡන්දය ප්‍රකාශ කිරීමෙන් වළකිමු කියලා. ඒ අය යෝජනා කරනවා විශ්වාසභංග යෝජනාව කල්දාමු කියලා. මම ඒක ප්‍රතික්ෂේප කළා. මම කිව්වා දැන් කොහොමටවත් කල්දාන්න බැහැ. කැමැති අය දෙන්න. අකැමැති අය නිකම් ඉන්න. හැබැයි කවුරු දුන්නත් නැතත් අපි විවාදයට යනවා කියලා’ මහින්ද පැහැදිලි කළේය. 
“ඒකනේ මම කිව්වේ කොළේට අත්සන් ගමු කියලා. අපේ සමහරු කිව්වානේ එහෙම ගත්තොත් ඒ අයට ප්‍රශ්නයක් වෙයි කියලා. මම දැනගෙන හිටියා මෛත්‍රී මේ හදන්නේ තුන්වැනි පාරටත් රනිල්ව ආරක්ෂා කරන්නයි කියලා’ ප්‍රසන්න පැවසීය.
“ප්‍රසන්නගේ කතාව හරි. මමත් කිව්වේ අඩුම ගාණේ මේ අය ලවා යෝජනාවටවත් අත්සන් කරවා ගන්න කියලයි. දැන් පේනවානේ වෙලා තියෙන වැඩේ’ මහින්ද පැවසීය. 

විවාදය දා ඒකාබද්ධයේ මන්ත්‍රීවරුන්ගේ අත්දැකීම්

විශ්වාසභංග යෝජනාව සම්බන්ධ විවාදයට සහභාගි වීම සඳහා ඒකාබද්ධ විපක්‍ෂයේ මන්ත්‍රීවරු පාර්ලිමේන්තුව බලා ගියහ. මහින්දට පාර්ලිමේන්තුවේදී සුසිල් හමුවිය. “පක්‍ෂයේ බෙදීමක් ඇතිවෙලා තියෙනවා සර්. හැබැයි මම නම් අනිවාර්යයෙන්ම විශ්වාසභංගය යෝජනාවට සහාය පළ කරලා ඡන්දෙ දෙනවා’ සුසිල් මහින්දට සපථ කළේය. 
මේ අතර, ඒකාබද්ධ විපක්‍ෂයේ මන්ත්‍රීවරුන් කණ්ඩායමක් සමග ලොබියේ කතා කරමින් සිටි මහින්දානන්දට නියෝජ්‍ය අමාත්‍ය වසන්ත සේනානායක මුණගැසුණේය. “මාර වැඩේනේ අපට වුණේ. මෛත්‍රීපාල ජනාධිපතිතුමා අපට කිව්වේ එක්සත් ජාතික පක්‍ෂයේ මන්ත්‍රීවරුන්ගේ සහයෝගය අරගෙන දෙනවා කියලා. දැන් ඒ අයම තීන්දු කරලා තියෙනවා ඡන්දෙ නොදී ඉන්න. මේක ලොකු පටලැවිල්ලක්. අපට කරන්න දෙයක් නැහැ’ වසන්ත පැවසීය. 
දිවා ආහාරය ගන්නා අවස්ථාවේදී ප්‍රසන්න වරක් මහින්දගෙන් ඇසුවේ “සර් මෛත්‍රීපාල මහත්තයා අපට තුන්වැනි පාරටත් ආප්ප කවයි වගේ නේද?’ කියාය. 
විශ්වාසභංග යෝජනාව සම්බන්ධයෙන් ඡන්ද විමසීම බදාදා රාත්‍රී 9.30ට පැවැති අතර, ඉන් අගමැතිවරයා ජයග්‍රහණය කර තිබිණි. විශ්වාසභංගයෙන් පසුව ඒකාබද්ධ විපක්‍ෂයේ මන්ත්‍රීවරුන් විවිධ ස්ථානවල එකතු වී කතාබහ කරමින් සිටියහ. ප්‍රසන්න සභාගැබෙන් එළියට ආවේම “මම කිව්වා හරි නේද? මෛත්‍රී අපට තුන්වැනි පාරටත් ආප්ප කැව්වා නේද?’ යැයි අසමිනි. 

නවීන් – තිලංග ආරවුල

විවාදය අවසන් වීමෙන් පසුව සභා ගැබෙන් එළියට එමින් සිටි තිලංග සුමතිපාල නියෝජ්‍ය කථානායකවරයාට නොසිතූ අකරතැබ්බකට මුහුණ දෙන්නට සිදු විය. අකරතැබ්බයට මුල්වූයේ නවීන්, තිලංග සමග ආරවුලකට පැටලීම නිසාය. විවාදයෙන් පසු නවීන් එළියට ආවේම තිලංගට දෝෂාරෝපණය කරමිනි. 
“ඔයාට මේ පැත්තේ ඉන්න බැරි නම් ගිහින් අනික් පැත්තේ වාඩි වෙන එකනේ ඇත්තේ?’ නවීන් තිලංගට බැණ වැදුණේය.
“ඔයා එහෙම කතා කරන්න එපා. මම අනුගමනය කළේ පක්‍ෂය ගත්ත තීන්දුව’ තිංලග කීවේය.
තිලංගගේ හඬට කන් නොදුන් නවීන් තවත් දේ කියමින් බැණවදිමින් සිට එක්වරම තිංලග දෙසට හැරුණේය. වහා මැදිහත් වූ පියල් නිශාන්ත නවීන් අල්ලා ගත්තේය.
“ඇමතිතුමා විවාදය තිබ්බේ සභාව ඇතුළේ. එළියට ඇවිත් බොරු චණ්ඩි පාට් දාන්න හදන්න එපා. ඒ චණ්ඩි පාට් අපි එක්ක හරියන්නේ නැහැ’ පියල් නවීන්ට අවවාද කළ අතර, නවීන් කිසිවක් නොකියා යන්න ගියේය. පසුව තිලංග තමන්ට පහරදීමට උත්සාහ ගත් බව කියමින් පොලීසියේ පැමිණිල්ලක්ද කළේය. 
මේ අතර, මහින්දට ලොබියේදී සුසිල් සහ සුසන්ත පුංචිනිළමේ මුණගැසුණේය. “දැන් ඉතින් ආණ්ඩුවේ හිටියා ඇති. දැන්වත් ඇවිත් ඒකාබද්ධ විපක්‍ෂයට එකතු වෙන්න’ මහින්ද සුසිල්ට කීවේය.
 “ඒක තමයි සර්. අපි හෙට ජනාධිපතිතුමත් මුණගැහෙනවා. පක්‍ෂයක් විදියට එකතු වෙලා ගත්තු තීන්දුව එක කට්ටියක් එකතු වෙලා වෙනස් කළේ කොහොමද කියලා අපි එතුමාගෙන් අහනවා’ සුසිල් පිළිතුරු දුන්නේය. 
විවාදය නිමවා පාර්ලිමේන්තුවෙන් පිටතට එමින් සිටි පියල් නිශාන්තට ආනන්ද අලුත්ගමගේ මුණගැසුණේය. ආනන්ද පසුගිය දිනවල සිටියේ රනිල් විවේචනය කරමින් විශ්වාසභංග යෝජනාවට සහාය දිය යුතුය යන මතයේය. එහෙත් ඔහු අවසාන මොහොතේ රනිල්ට පක්‍ෂව ඡන්දය පාව්චිච කළේය. සාක්කුවෙන් පන්දහසේ කොළයක් අතට ගත් පියල් “මන්ත්‍රීතුමා මේවටද  ඡන්දෙ දුන්නේ?’ ඇසුවද ආනන්ද කිසිවක් කීවේ නැත.
විශ්වාසභංග යෝජනාවෙන් අනතුරුව ඒකාබද්ධ විපක්‍ෂයේ මන්ත්‍රීවරුන් පිරිස මහින්දානන්දගේ නිවසෙහි රැස්ව ඉදිරි කටයුතු සම්බන්ධයෙන් විශේෂ සාකච්ඡාවක් පැවැත්වූහ. විශ්වාසභංග යෝජනාව පරාජයට පත්වුවද, ආණ්ඩුවට මෙතෙක් කලක් පාර්ලිමේන්තුවේ තිබූ තුනෙන් දෙකක බලය අහිමි වීමේ වාසිය සම්බන්ධයෙන් මෙහිදී විශේෂයෙන් අදහස් දැක්විණි.

මහින්දගෙන් රනිල්ට සුබපැතුම් 

විශ්වාසභංග යෝජනාවේ ඡන්ද විමසීම රාත්‍රී 9.30ට පැවැත්වුණ අතර, විශ්වාසභංග යෝජනාවට පක්ෂව ඡන්ද 76ක් ලැබුණි. විපක්ෂව ඡන්ද 122ක් ලැබුණු අතර, නොපැමිණි ගණන 26කි. පාර්ලිමේන්තුවේ ඡන්ද විමසීම සඳහා සාමාන්‍යයෙන් නොපැමිණෙන හිටපු ජනාධිපති මහින්ද රාජපක්ෂ මෙවර පැමිණ සිටීම විශේෂ වූ අතර, ඔහු විශ්වාසභංග යෝජනාවට පක්ෂව ඡන්දය ලබාදුනි.
ප්‍රතිඵල නිකුත් වූ වහාම මන්ත්‍රී රවී කරුණානායක අගමැති රනිල් අසලට පැමිණ මුලින්ම සුබපැතීය. දෙවනුව නවීන් දිසානායකද පසුව ලක්ෂ්මන් කිරිඇල්ල, සරත් ෆොන්සේකා ආදීන් රනිල්ට සුබපතන්නට පැමිණියහ. මහින්ද රාජපක්ෂද විරුද්ධ පක්ෂයේ සිට රනිල්ට සුබපතමින් පිටව යන ආකාරය දක්නට ලැබුණි.
සභා ගැබෙන් පිටතට පැමිණි අගමැති රනිල්ට පක්ෂ විපක්ෂ බොහෝදෙනා සුබපැතූ අතර, ඒකාබද්ධ විපක්ෂයේ මන්ත්‍රීවරුන් මෙන්ම ආණ්ඩු පක්ෂයේ සිට විශ්වාසභංග යෝජනාවට පක්ෂ වූ මන්ත්‍රීවරුන්ද ඒ අතර සිටීම විශේෂත්වයක් විය.  

 

අග්‍රාමාත්‍ය රනිල් වික්‍රමසිංහ මහතාට එරෙහි විශ්වාසභංග විවාදයේදී දැක්වූ අදහස්

අග්‍රාමාත්‍ය රනිල් වික්‍රමසිංහ මහතාට  විරුද්ධව ඒකාබද්ධ විපක්ෂය විසින් ගෙන ආ විශ්වාසභංග යෝජනාව පිළිබඳ විවාදය පාර්ලිමේන්තුවේදී ඊයේ (04දා) පැවැත්විණි. එහිදී  පක්ෂ – විපක්ෂ මන්ත්‍රීවරුන් දැක්වූ අදහස් පහතින් දැක්වේ.


SL-Parlyment-01

අගමැති ගැන විශ්වාසයක් නොමැති වීම බරපතළ කරුණක්  ඒකාබද්ධ විපක්ෂයේ නායක දිනේෂ් ගුණවර්ධන

‘මෙම විශ්වාසභංග යෝජනාව ඉදිරිපත් කළේ අගමැතිවරයා සම්බන්ධව විශ්වාසය භංගත්වයට පත්වීම නිසයි. අගමැති ගැන විශ්වාසයක් නොමැති වීම බරපතළ කරුණක්. මුදල් අමාත්‍යාංශය යටතේ තිබුණු මධ්‍යම බැංකුව අගමැතිවරයා යටතට පත් කළා. එම ආයතනයට සිංගප්පූරු පුරවැසියෙකු වන අර්ජුන් මහේන්ද්‍රන් පත් කළා. මේ හේතුවෙන් මූල්‍ය ක්‍රමය ගැන ඇති ජනතා විශ්වාසය උල්ලංඝනය වුණා. අගමැතිවරයා මීට පෙර පාර්ලිමේන්තුවේදී පිළිගෙන තිබෙනවා ඔහු විසින් අර්ජුන් මහේන්ද්‍රන් මහ බැංකුවේ අධිපති ධුරයට පත් කළ බව.’

මේ විශ්වාසභංගය පුස්සක් සභානායක ලක්ෂ්මන් කිරිඇල්ල

‘දිනේෂ් ගුණවර්ධන මන්ත්‍රීවරයා බොහොම අමාරුවෙන් යාළුවට විරුද්ධව කතා කළා. විවාදය පටන් ගනිද්දිම ඒ අයගේ හුළං බැහැලා. රනිල් වික්‍රමසිංහ අගමැතිවරයා ආදර්ශයක් ලබාදෙමින් කෝප් කමිටුවේ සභාපති ධුරයට විපක්ෂයේ මන්ත්‍රීවරයෙක් පත් කළා. මීට පෙර අගමැති ධුරයේ සිටියදීත් ඒම ආදර්ශය ලබාදී තිබෙනවා. කෝප් කමිටු වාර්තාවේ රනිල් වික්‍රමසිංහ මහතාගේ නම සඳහන් වෙන්නෙ නෑ. එහෙම නම් කොහොමද විශ්වාසභංග යෝජනා ගේන්නෙ. බැඳුම්කර සිද්ධිය පිළිබඳ ජනාධිපති කොමිෂන් සභා වාර්තාවේ කිසිම තැනක රනිල් වික්‍රමසිංහ මහතාගේ නම සඳහන් වෙන්නෑ. ඒ නිසා මේ විශ්වාසභංගය පුස්සක්. අගමැතිතුමා ජනාධිපති කොමිසමට ස්වේච්ඡාවෙන් සාක්ෂි දෙන්න ගියා. කොහෙද එතුමා වැරදි කරලා තියෙන්නෙ. රනිල් වික්‍රමසිංහ මහතා දිවුරුම් ප්‍රකාශයක් මගින් ප්‍රශ්න 48කට උත්තර දී තිබෙනවා. පසුගිය රජය ඇමතිවරයෙක්ගෙන්වත් ප්‍රශ්න කළාද? ඒ නිසා අගමැතිවරයා ආදර්ශයක් ලබාදී තිබෙනවා. දැන් ඒකාබද්ධ විපක්ෂය ලෙවකකා ඉන්නෙ. දිගන සිද්ධිය ගැන විශ්වාසභංග යෝජනාවේ සඳහන් වෙනවා. දිගන සිද්ධියට පොහොට්ටුවේ මන්ත්‍රීවරු හයක් සම්බන්ධයි. ඒ අයට පාර්ලිමේන්තුවේ ඉන්න මන්ත්‍රීවරු යටින් උදව් කළා.’

විශ්වාසභංග යෝජනාව ලියා තියෙන්නේ දියාරු වචන යොදාගෙන විපක්ෂ නායක ආර්. සම්බන්ධන්

‘දූෂණය රට වෙළාගෙන තිබෙනවා. එය මුලිනුපුටා දැමිය යුතුයි. දේශපාලඥයන් දූෂණයේ මූලාශ්‍රයක් වෙලා. ඒ නිසා දූෂිතයන්ට දැඩි දඬුවම් පැමිණවිය යුතුයි.

ඉන් මෙහා කිසිම විසඳුමක් නැහැ. මහ බැංකු වංචාව සම්බන්ධයෙන් මේ වන විට දෙදෙ‍නෙකු අත්අඩංගුවට අරන් තිබෙනවා. මොන බලවතා වැරැද්දක් කළත් දැඩි දඬුවම් ලබාදිය යුතුයි. නීතියේ  ආධිපත්‍ය තනතුරු හමුවේ විචල්‍ය නොවිය යුතුයි.

රනිල් වික්‍රමසිංහ මහතාට විරුද්ධව විශ්වාසභංග යෝජනාවෙන් බැඳුම්කර වංචාවට වරදකරු ලෙස පොදු කරුණු දක්වා තිබෙනවා. අගමැතිවරයා බැඳුම්කර වංචාවට සම්බන්ධ බවට පෙන්වීමට එමගින් උත්සාහ දරා තිබෙනවා.

මෙය සකස්කර තිබෙන්නේ යම් දේශපාලන අරමුණක් සමාජගත කිරීම සඳහායි. විශ්වාසභංග යෝජනාව ලියා තියෙන්නේ දියාරු වචන යොදාගෙන. අගමැතිවරයාට විරුද්ධව එයින් නිශ්චිත චෝදනා එල්ල කර නැහැ.

අගමැතිවරයාට විරුද්ධව ඇයි දැන් මෙවැනි චෝදනා ගේන්නේ? ආණ්ඩුව බලයට පැමිණ වසර තුනක් ගතවෙනවා.

මෙම විශ්වාසභංගයේ කරුණු ඉදිරිපත් කර තියෙන්නේ ඉතා සරල ආකාරෙයන්. අගමැතිවරයා යම් පුද්ගලයෙකු මහ බැංකුවට පත් කළ බවත්, එම පුද්ගලයා අගමැතිවරයා පාවා දී තිබෙන බවත් එයින් දක්වා තිබෙනවා.

නමුත් අගමැතිවරයාට විරුද්ධව නිශ්චිත කරුණු මෙහි දක්වා නැහැ. අගමැතිවරයාට විරුද්ධව බැඳුම්කර වංචාව සම්බන්ධව කරුණු හොයාගන්න බැරිවෙලා බව පේනවා.

ඒ  නිසා මෙම යෝජනාවේ විශ්වාසනීයත්වය නැතිවෙලා. බැඳුම්කර සිද්ධිය වසර තුනක් තිස්සේ කතා වෙනවා. ඇයි විශ්වාසභංගයක් ගේන්න මෙච්චර කල් ගියේ? මෙය අගමැතිවරයාට විරුද්ධව ගෙන එන යෝජනාවක් වශයෙන් සමස්ත ආණ්ඩුව පළවා හැරීම සඳහා ගෙන එන යෝජනාවක් බව පැහැදිලියි. ඒ නිසා මෙයට අපගේ සහාය ලබාදෙන්න බැහැ.’

මේක ජනතාව නොමග යැවීමේ අසාර්ථක උත්සාහයක් මුදල් හා ජනමාධ්‍ය අමාත්‍ය මංගල සමරවීර

‘අපිටත් තිබුණා අවුරුදු 10ම ආණ්ඩු පක්ෂයේ ගෝලබාලයන් දාගෙන යන්න. අපි ආවේ හොරකම් වංචා වළක්වන්න. මහින්ද රාජපක්ෂ මුදල් ඇමති කාලේ අතුරුදන් වූ ත්‍රිලියන ගණන් මුදල් ගැන මේ අය කතා කරන්නෙ නෑ. මේක ජනතාව නොමග යැවීමේ අසාර්ථක උත්සාහයක්. අපි බාරගත්තේ කැඩුණු පොඩි වුණු රටක්.

අපි පසුගිය වසර තුනේදී  ලබාගත් ආර්ථික ජයග්‍රහණවලට නායකත්වය දුන්නේ අගමැතිතුමා බව කිවයුතුයි. පසුගිය අවුරුදු දෙකේදී ජීඑස්පී ප්ල්ස් සහනය ලබාගත්තා.

ඒ නිසා පසුගිය අවුරුද්දේදි මේ රටෙන් පිටරට යවන අංශයෙන් වාර්තාවක් තැබීමට හැකි වුණා. අධ්‍යාපනයට, නිපුණතා සංවර්ධනයට වැඩි මුදලක් යෙදවූවා.’

මේ විශ්වාසභංය ජූදාස්ලා තුන්දෙනෙක් පිළිබඳ කතාවක් ජනතා විමුක්ති පෙරමුණේ මන්ත්‍රී බිමල් රත්නායක

‘මේ විශ්වාසභංගය පිළිබඳ සාකච්ඡාව ඇරඹීමට පෙර සිටම ජනතා විමුක්ති පෙරමුණ ස්ථාවරය පෙන්ව දුන්නා. අපි කිව්වා ජනතාවගේ විශ්වාසය ආණ්ඩුව කෙ‍ෙරහි පලුදු වී තිබෙන බව. අපි කිව්වා විශ්වාසභංගයට සහාය දෙනවා කියලා. මේ විශ්වාසභංය ජූදාස්ලා තුන්දෙනෙක් පිළිබඳ කතාවක්.

රනිල් වික්‍රමසිංහ එතුමාගේ ජනවරම පාවා දී තිබෙන නිසා විශ්වාසය කඩ වී තිබෙනවා. 77 වගේ මේක යූඑන්පී ඡන්දවලින් පත්වූ ආණ්ඩුවක් නෙමෙයි. ඇලෝසියස් අධිරාජ්‍යයක් හදන්න ගිය එකෙන් පැහැදිලියි ආණ්ඩුවට දැක්වූ සහාය ගැන. රනිල් වික්‍රමසිංහ මේකෙන් පෞද්ගලිකව මුදල් ගත්තාට වඩා ඇලෝසියස්ලා උදව් කළා.

එක්සත් ජාතික පක්ෂයේ මන්ත්‍රීවරුන් හොරුන් ආරක්ෂා කිරීමට හැකි සෑම උත්සාහයක්ම ගත්තා. යූඑන්පී තරුණ මන්ත්‍රීවරුන්ට දූෂණයෙන් තොරව ගමනක් යෑමට සිටියත් ඔවුන් පාවා දුන්නා.

මේ විශ්වාසභංගයේ  තියෙන්නේ බාගයයි. රනිල් වික්‍රමසිංහ අගමැතිවරයා මහින්ද රාජපක්ෂ ආණ්ඩුවේ දූෂිතයන් ආරක්ෂා කළා. මේ විශ්වාසභංගයට තව එකතුවෙන්න කරුණු තිබෙනවා.

ජනවරම පාවා දුන්නු නිසා මේ විශ්වාසභංගය ඔහුට හිමියි. අමු ජාතිවාදය වපුරන්න ඉඩ දීලා ජොලි කර කර සිටියා. දෙවැනි පාවා දීම කළේ මෛත්‍රීපාල සිරිසේන මහතා.

මේ විශ්වාසභංගයේ පළමු අත්සන කළේ ජනාධිපතිවරයා. විශ්වාසභංගයේ අත්සන් 56ක් තිබෙනවා. නිමල් සිරිපාල අගමැති කරන්න බැරි නිසා විශ්වාසභංගය ආවා. මෛත්‍රීපාල කණ්ඩායමේ ඉන්නවා ගෝඨාභයවාදීන් පිරිසක්. නඩු පමා කරගන්න පිරිසක් එම කණ්ඩායමේ ඉන්නවා. මේ විශ්වාසභංගයේදී මේ රටේ විශාලම පාවා දීම කළේ මෛත්‍රීපාල සිරිසේන මහතා.

අපි මෛත්‍රීපාල සිරිසේනට දේශපාලනික වශයෙන් බයත් නෑ, ණයත් නෑ. රනිල්ට වඩා මෛත්‍රීපාල සිරිසේන මහතා හොරුන් ආරක්ෂා කළා. බොන්ඩ් කොමිෂන් වාර්තාව එනකම් බරපතළ වංචා, දූෂණ වාර්තා 34 එළියට දැම්මේ නැහැ. ජනාධිපතිවරයා ජනවරමට පයින් ගහලා තිබෙනවා.

එතුමා බලයට පත් කළ එක්සත් ජාතික පක්ෂයේ පාක්ෂිකයන් පාවා දී තිබෙනවා. මේ විශ්වාසභංගයෙන් රනිල් වික්‍රමසිංහ පැරදුනොත් මෛත්‍රීපාල සිරිසේන මහතාත් පරාදයි. තුන්වැනියා මහින්ද රාජපක්ෂ මහතා. මේ ආණ්ඩුව තබාගත යුතු නැහැ කියලා එතුමාලා කියනවා. නාවලපිටිය ප්‍රාදේශීය සභාවේ බලය පිහිටුවන්න දරන උත්සාහය මෙම විශ්වාසභංගය ජයග්‍රහණය කරන්න උත්සාහ කළේ නැහැ.

ලංකාවේ තියෙන ලොකුම ඩීල් එක තියෙන්නේ රනිල් වික්‍රමසිංහ හා මහින්ද රාජපක්ෂ අතරේ. මහන්සි වුණු කට්ටිය ගෝඨාභය කල්ලිය. ඒ අය එළියෙ බැණුම් අහනවා. මහින්ද රාජපක්ෂ මේ විශ්වාසභංගය ජයගන්න උත්සාහ කළේ නැහැ. බැසිල් රාජපක්ෂ විද්‍යාත්මකව දේශපාලනය කරන කෙනෙක්.

මෛත්‍රීපාල ළඟට රිංගපු හොරු සහ ගෝඨාභය කල්ලිය පමණයි මේකට මහන්සි වුණේ. මහින්ද රාජපක්ෂ මේකට මහන්සි වුණේ නැහැ. රනිල් වික්‍රමසිංහ හොරු අල්ලන්න දෙන්නෑ. සමහර අය ලෑස්ති වෙනවා අපි හරහා කොළපාට හොරුන්ට ගස්සන්න. අපි විශ්වාසංභයට සහාය දෙනවා.’

මෙය අග්‍රාමාත්‍යවරයාට විශ්වාසය පළ කිරීමේ අවස්ථාවක් ශ්‍රී ලංකා මුස්ලිම් කොංග්‍රසයේ නායක අමාත්‍ය රවුෆ් හකීම්

‘එක්සත් ජාතික පක්ෂයේ පසු පෙළ මන්ත්‍රීවරුන්ගේ හිත් වේදනාවලට මෙවර විසඳුම් ලැබිලා තියෙනවා. එය විශ්වාසභංගයේ ජයග්‍රහණයක්. මම අග්‍රාමාත්‍යතුමාගේ හිතවතෙක්. කමිටු වාර්තාවේ  යම් යම් ප්‍රශ්න තිබෙනවා. වැරදි වෙලා තිබෙනවා නම් දඬුවම් කළ යුතුයි. නමුත් එකහෙළාම අගමැතිවරයා හිර කිරීම කළයුතු නැහැ. මුස්ලිම් කොංග්‍රසය ගන්නා තීරණය ගැන මාධ්‍ය විවිධ වාර්තා පළ කර තිබුණා.

අපිට වෙනම මිනුම්දණ්ඩක් නැහැ. අපිටත් දර්ශනයක් තිබෙනවා. මෙය රජය ඉලක්ක කරගෙන ගෙනාපු විශ්වාසභංගයක්. රනිල් වික්‍රමසිංහ සංකේතයක් පමණයි. මහින්ද රාජපක්ෂ විශ්වාසභංගයට අත්සන් නොකිරීමෙන් ආතල්වලට එහා ගිය සිද්ධියක් වෙන්න පුළුවන්.

රාජපක්ෂ පරපුර දුරදිග නොබලා කටයුතු කරනවා. මන්ත්‍රීවරුන් බිලි බාගන්න දැරූ උත්සාහය නිසා ආණ්ඩුව තවත් ශක්තිමත් වුණා. ආණ්ඩුව රැකගැනීමට අපි ඉදිරිපත් වෙනවා.

රනිල් වික්‍රමසිංහ මහතා ඉවත් කර වෙනත් අය පත්කරන්න ඇතැම් අය උත්සාහ කළා. මෙය අග්‍රාමාත්‍යවරයාට විශ්වාසය පළ කිරීමේ අවස්ථාවක්.’

මේ විශ්වාසභංගය නිසා ආණ්ඩුවේ දෙදරීම නිර්මාණය වුණා ජාතික නිදහස් පෙරමුණේ නායක විමල් වීරවංශ

‘මුදල් කතා කරන විට සත්‍ය නිහඬ වන්නේ කියලා කියමනක් තිබෙනවා. මේ විශ්වාසභංග යෝජනාව හරහා ආණ්ඩුව නිර්වස්ත්‍ර කරමින් තිබෙනවා. දිගන සිද්ධියේදී ආණ්ඩුවේ ඉන්න ලැජ්ජයි කියපු හකීම් වැනි ඇමතිවරු නිර්වස්ත්‍ර වෙලා තිබෙනවා. ආණ්ඩුව දෙදරුම් කාලා තියෙනවා. අගමැතිතුමා ගණන් නොගන්නා මන්ත්‍රීවරුන්ට මුහුණ බලන්න සති දෙකක් අපි නිර්මාණය කර දුන්නා. මොනර කොළ සාක්කුවලට වැටෙන්න සති දෙකක් නිර්මාණය කර දුන්නා. ශ්‍රී ලංකා නිදහස් පක්ෂය දෙදරුම් කාලා තියෙනවා. පාලනය දෙදරුම් කාලා තිබෙනවා. දූෂණ විරෝධී රංජන් රාමනායකලා, ව්‍යාජ දූෂණ විරෝධීන්, පාඨලී රණවකලාගේ දූෂණ විරෝධීන්ගේ හෙළුව එළිවෙනවා. තුනෙන් දෙක තියාගෙන බෙදුම්වාදී ව්‍යවස්ථාව ගෙන එනවා කියමින් දෙමළ සන්ධානයේ සහාය ලබා ගත්තා. අද ඉන්න රනිල් නෙමෙයි අද රෑ 12න් පස්සේ මුණ ගැහෙන්නේ. ඒ රනිල් කර තියාගෙන යන එකට අපි කැමතියි. යන්න තියෙන්නේ දේශපාලන කනත්තට මිසක් වෙන කොහේටවත් නෙමෙයි.

ගමේ එක්සත් ජාතික පාක්ෂිකයා දැනගන්න ඕන රනිල් කරේ තියගෙන යන මන්ත්‍රීවරු කවුද කියලා. ලක්ෂ 800ට ලක්ෂ 1500ට විකිණුනු මන්ත්‍රීවරු කවුද කියලා ජනතාවට බලාගන්න පුළුවන්. ඒක බලාගන්න පුළුවන් වීමම මේ විශ්වාසභංගයේ ජයග්‍රහණයක්. මේ යෝජනාවත් එක්ක පක්ෂවල විසංවාද ඇතිවුණා. මේ විශ්වාසභංගය නිසා ආණ්ඩුවේ දෙදරීම නිර්මාණය වුණා. සජිත් ප්‍රේමදාස මහතා අලුත් ඇඳුම් මැහුවා.

අපි බෝම්බයක් ගැහුවා. මොනර කොළවලට කරන්න පුළුවන් දේවල් තිබෙනවා. මොනර කොළවලට මළ මිනීවලටත් පණ දෙන්න පුළුවන්. පුළුවන් නම් පාර්ලිමේන්තු මැතිවරණය පවත්වන්න. තමුන්නාන්සේලාට ඒකට මුහුණ දෙන්න බැහැ. ආණ්ඩුවේ ඉන්න එක ලැජ්ජයි කියලා අගමැතිවරයා ආරක්ෂා කිරීම පට්ටම ලැජ්ජයි. අපිට ඕන ප්‍රයෝජනය අපි අරගෙන ඉවරයි. දේශපාලන රසායනික වෙනස සිදුවුණා. අපි දින්නත් දිනුම්, පැරදුනත් දිනුම්.’

කාලය නාස්ති නොකර ආණ්ඩුවට එන්න අමාත්‍ය ජෝන් අමරතුංග

‘මේ විශ්වාසභංග යෝජනාවෙන් ආණ්ඩුව පිරිසුදු වුණා. දිනේෂ් ගුණවර්ධනට මම කියනවා කාලය නාස්ති නොකර ආණ්ඩුවට එන්න. අපිට ඡන්ද 122ක් තිබෙනවා. වැඩි ඡන්ද 40කින් මේක පරාද වෙනවා. ශ්‍රී ලංකා නිදහස් පක්ෂයේ පොඩි පොල්ලක් තියල තියෙනවා. මේක මෙතැනින් නවත්වලා දවල්ට කාලා ගෙදර යමු කියලා මම යෝජනා කරනවා.’

දේශපාලනයේ කොට්ටයයි, මෙට්ටයයි මාරු කළාට ඇඳේ රාමුවේ හිටපු මකුණො ටික සුද්ද කරන්න බැරි වුණා එක්සත් ජාතික පක්‍ෂ මහලේකම් අමාත්‍ය කබීර් හෂීම්

‘අපි ආණ්ඩුවක් හැටියට ජනාධිපතිවරයා වෙන්න පුළුවන්, අගමැතිවරයා වෙන්න පුළුවන්, කැබිනට් මණ්ඩලයේ ඇමතිවරු වෙන්න පුළුවන්, රජයට අයිති මන්ත්‍රීවරු වෙන්න පුළුවන් සියලු දෙනාට සාමූහික වගකීමක් තිබෙනවා.

මේ විශ්වාසභංග යෝජනාව ගෙනැවිත් තියෙන්නේ අපි සියලු දෙනාට විරුද්ධව.

මේ විශ්වාසභංග යෝජනවට අත්සන් කර තියෙන්නේ හිඟන්නන්ගෙනුත් පොකට් ගැසූ අය, ලසන්තලා, එක්නැළිගොඩලා වැනි මාධ්‍යවේදීන් මරා දාපු, ඒවාට අනුබල දීපු අය, මහදවල් සතොස මංකොල්ලකාපු, විවිධ ජඩකම් හොරකම් කරපු අය, ඩේසි ආච්චිගේ මැණික් මල්ල ගැන කතා කරපු අය, නැගෙනහිර පොලිස් ස්ථානවල නිරායුධව සිටි පොලිස් නිලධාරීන් සිය ගණනක් ඝාතනය කළ, අරන්තලාවේ භික්ෂූන් වහන්සේලා සිය ගණනක් ඝාතනය කළ පිල්ලෙයාන්ලා, විනයාගමූර්ති මුරලිදරන්ලා ආරක්‍ෂා කරපු අය.

තාජුඩීන් ඝාතනය කරපු අය තමයි මේකට අත්සන් කරලා තියෙන්නේ. ඒ  නිසා මේ විශ්වාසභංග යෝජනාවේ වටිනාකමක් තියෙනවද? සදාචාරභාවයක් තියෙනවද? සුනිල් හඳුන්නෙත්ති සභාපතිවරයා වන කෝප් කමිටුව බැඳුම්කර සිද්ධියට අදාළ වාර්තාව නීතිපතිවරයාට යොමු කරන්න කියලා අගමැතිවරයාම කිව්වා.

මේ රටේ පළමු වතාවට ජනාධිපති කොමිසමක් ස්වාධීනව හරියට ක්‍රියාත්මක කරලා අපක්‍ෂපාතී තීන්දුවක් දුන්නා.

 එම කොමිසමට පළමු වතාවට ඇමතිවරු තුන්දෙනෙක් සාක්‍ෂි දෙන්න ගියා. අගමැතිවරයා ස්වේච්ඡාවෙන් සාක්‍ෂි දෙන්න ගියා. නමුත් අද මන්ත්‍රීවරු වෙලා ඉන්න හිටපු ඇමතිවරුන්ට උසාවියට එන්න කිව්වාම සර්පයෙක් කෑවා කිව්වා.

ඊළඟට බල්ලෙක් කෑවා කිව්වා. ඔවුන්ට ගිහින් සාක්‍ෂි කියන්න කොන්දක් නැහැ. ඔවුන්ට හංගන්න ගොඩක් දේවල් තිබුණා. ඒත් මේ රටේ දේශපාලන සංස්කෘතියේ වෙනසක් ඇතිකරලා අපි සාක්‍ෂි දුන්නා. අගමැතිවරයා සාක්‍ෂි දුන්නා.

වාර්තාවේ පිටු නමසිය ගාණක් තිබෙනවා. එම වාර්තාවේ එකතැනකවත් අගමැතිවරයාට එරෙහිව චෝදනාවක් නැහැ.

අර්ජුන් මහේන්ද්‍රන් පත් කරපු පළියට විශ්වාසභංග යෝජනවක් ගෙනාවා නම් මහින්ද රාජපක්‍ෂ මහතාට විරුද්ධව විශ්වාසභංග යෝජනා සීයක් ගේන්න තිබුණා.

ඔහු පත්කරපු ලලිත් වීරතුංගට වැරදිකාරයෙක්  හැටියට උසාවියකින් දඬුවම් දුන්නා. පී.බී. ජයසුන්දරට චෝදනා තිබුණා. එතකොට එයාව පත්කළේ කවුද? ඒකාබද්ධ විපක්‍ෂයේ අය ඇයි ඒ කාලයේ විශ්වාසභංග ගෙනාවේ නැත්තේ.

මහින්ද රාජපක්‍ෂ මහතා පසුගිය ජනාධිපතිවරණයේදී බෙරිහන් දුන්නා විදුලි පුටුවට ගෙනයන බව කියමින්. එහෙනම් හිටපු ජනාධිපතිවරයා විදුලි පුටුවෙන් බේරාගත්තේ අග්‍රාමාත්‍ය රනිල් වික්‍රමසිංහ මහතා විසින්. එහෙනම් ඇයි එතුමා අගමැතිවරයාට විරුද්ධව විශ්වාසභංග යෝජනාවක් ගෙනාවේ.

අපට දේශපාලනයේ කොට්ටයයි, මෙට්ටයයි මාරු කළාට ඇඳේ රාමුවේ හිටපු මකුණො ටික සුද්ද කරන්න බැරි වුණා. ඒ මකුණො ටික සුද්ධ කළා නම් හරි. දැන් ඒ මකුණො ටික වසංගතයක් වෙලා. විශේෂ අධිකරණයක් ගෙනැල්ලා ඔය ටිකත් සුද්ධ කළාට පසුව මේ වසංගතය අපට සුද්ධ කරන්න පුළුවන්.’

තමුන්නාන්සේලාගේ උගුල අද තමුන්නාන්සේලාටම උගුලක් වෙලා ප්‍රජාතන්ත්‍රවාදී වාමාංශික පෙරමුණේ නායක වාසුදේව නානායක්කාර

‘තමුන්නාන්්සේට මකුණො කියලා බේරෙන්න බැහැ. තමුන්නාන්සේ සම්මුතිවාදී ආණ්ඩු ගැහුවේ ඒගොල්ලෝ එක්ක. ඒ කට්ටිය මේ විශ්වාසභංග යෝජනාවට පක්‍ෂව කතා කළා. ආණ්ඩු පක්‍ෂයේ ඇමතිවරු මේ විශ්වාසභංග යෝජනාවට පක්‍ෂව කතා කරනවා. ඒකෙන් විශ්වාසභංග යෝජනාවේ වටිනාකම වැඩි වෙනවා. මංගල සමරවීර ඇමතිවරයා උත්සාහ කළා විශ්වාසභංගය ජනාධිපතිවරයාගේ බෙල්ලේ පටලවන්න. ජනාධිපතිතුමා විශ්වාසභංග යෝජනාවට විරුද්ධව මෙහෙයවන්න ඔහු උත්සාහ කළා. එතුමා කිව්වා රනිල් වික්‍රමසිංහ මහතා පරාද කරලා ජනාධිපතිවරයා තනි කරන්න කියලා. අන්තිමට මේ කතාව තමුන්නාසේලාගේ අතේම පිපිරුවා. ජනාධිපතිතුමා ඒ කතාව පිළිගත්තේ නැහැ. ජනාධිපතිතුමා ඒක පිළිගත්තේ නැති බව අපි දන්නේ ජනාධිපතිතුමාගේ පක්‍ෂයේ මැති ඇමතිවරු විශ්වාසභංග යෝජනාවට පක්‍ෂව පාර්ලිමේන්තුවේ පෙනී සිටින නිසයි. ඒ නිසා තමුන්නාන්සේලාගේ උගුල අද තමුන්නාන්සේලාටම උගුලක් වෙලා. අපි අගමැතුමා ගැන පෞද්ගලිකව කිසි ද්වේෂයක් නැහැ. නමුත් අගමැතිතුමා කර තිබෙන මේ දේවල්වලට වගකිව යුතුයි.

දැන් හදිස්සියේ මේ ආණ්ඩුවේ බලය වෙනස් වුණොත්, හෙට අනිද්දා වන විට වෙන්න ඉඩ තියෙනවා. එහිදී පොලීසියේ පරීක්‍ෂණ ආරම්භ කරන කොට ඒවා කෙළින්ම අගමැතිවරයා පිළිබඳ පරීක්‍ෂණයක් වීම වළක්වන්න පුළුවන්ද? අගමැතිවරයා අර්ජුන් මහේන්ද්‍රන් ගැන දන්නා තොරතුරු අනුව ඔහු ඉන්නෙ කොහේදැයි කීමට අපේ නීතිය අනුව අගමැතිවරයාට වගකීමක් තියෙනවා. ඒ අපරාධකාරයා සැඟවීමට තමන් දන්නා තොරතුරු අධීකරණයට හා පොලීසියට නොදීමේ වරද පිළිබඳ අගමැතිතුමාට විත්ති කූඩුවට නගින්න වෙනවා. ඔහු දැන් බේරිලා ඉන්නේ අගමැතිකමේ බලයෙන්. ඒ නිසා අගමැති ධුරය ආරක්‍ෂා කරගැනීම සඳහා මේ දක්වා කළ හැකි සෑම උත්සාහයක්ම ඔහු දරා තිබෙනවා.’

විශ්වාසභංගය තුළ අගමැතිතුමාට අපගේ විශ්වාසය ගොඩනැගී අවසන් එක්සත් ජාතික පක්‍ෂයේ මන්ත්‍රී ආනන්ද අලුත්ගමගේ

‘එක්සත් ජාතික පක්‍ෂය යම් වැරදි මාර්ගයක ගියා නම් මේ විශ්වාසභංගය නිසා ඒක නිවැරදි කර ගැනීම් හැකියාව ලැබී තිබෙනවා. ශුද්ධ වූ එක්සත් ජාතික පක්‍ෂයක් හදා ගැනී‍ම සඳහා තරුණ මන්ත්‍රීවරු හැටියට අපි කටයුතු කරගෙන යනවා. ඒකාබද්ධය ගෙනා විශ්වාසභංගය තුළ අගමැතිතුමාට අපගේ විශ්වාසය ගොඩනැගී අවසන්. අගමැතිතුමා පරම්පරාවෙන් සල්ලි තිබුණු බොහොම වැදගත් පවුලක කෙනෙක්. කවදාවත් හොරකමකට ලක්වුණු කෙනෙක් නෙමෙයි.’

දේශපාලන නායකයන් අතින් වැරදීම් ඇති වෙනවා වැවිලි කර්මාන්ත අමාත්‍ය නවීන් දිසානායක

‘විමල් වීරවංශ මහතාගේ අද කතාව නිසා වැටඋඩ තිබුණු ඡන්ද අපට හදා දුන්නා. මෙම විශ්වාසභංගය දීප ව්‍යාප්ත දේශපාලන කුමන්ත්‍රණයක්. මම පෞද්ගලිකව දන්නවා ශ්‍රී ලංකා නිදහස් පක්‍ෂයේ මධ්‍යම පළාතේ එක ඇමතිවරයෙක් ප්‍රකාශ කර තිබෙනවා අගමැතිවරයා අයින් කරලා රූකඩයක් දාලා, ඊට පස්සේ ෆුට්බෝලයක් වගේ මේ රූකඩයට ගහලා අයින් කරලා අපි කැමැති එක්කෙනා දානවා කියලා. මේ වගේ දේශපාලන කුමන්ත්‍රණ අපි දන්නවා.

එක්සත් ජාතික පක්‍ෂයේ ගැටලුවක් තිබෙනවා නම් අපට අවකාශය තියෙනවා එය නිවැරදි කර ගැනීමට. අපගේ පක්‍ෂයේ නායකයා අයින් කරන්න උත්සාහ කරන එක ප්‍රජාතන්ත්‍ර විරෝධී වැඩපිළිවෙළක් ලෙස මම දකිනවා. උදේ තිබුණු භීතිකාව හවස් වන විට නැහැ. ලොකු චැලේන්ජ් එකක් අපට පේන්න නැහැ.

මේ විශ්වාසභංගයට නායකත්වය දෙන්නේ නඩුහබවලට සම්බන්ධ වෙලා ඉන්න, චෝදනා එල්ලවෙලා සිටින පිරිසක්. අර්ජුන් මහේන්ද්‍රන් පත්කිරීම ගැන අගමැතිවරයා අතින් වැරැද්දක් වෙලා ඇති. එවැනි වැරදීම් නායකයන් අතින් සිදු වෙනවා. ඒකට කරන්න දෙයක් නැහැ. අපි ඒක අගමැතිවරයාට ප්‍රකාශ කර තිබෙනවා. පත්වීම් සම්බන්ධයෙන් දේශපාලන නායකයන් අතින් වැරදීම් ඇති වෙනවා.’

මමත් බදු වංචා කර තිබෙනවානියෝජ්‍ය අමාත්‍ය රන්ජන් රාමනායක

‘චිත්‍රපටයකින් රුපියල් ලක්‍ෂ 15ක් ලැබෙන අවස්ථාවලදී රුපියල් 50,000ක් හෝ ලක්‍ෂයක් ලැබෙනවා කියල බදු නිලධාරීන් පෙන්වනවා.

ආදායම් බදු දෙපාර්තමේන්තුවේ නිලධාරීන් එවැනි බදු වංචා සිදු කරන ආකාරය කියා දෙනවා. ඒ අය ගෙදරට පැමිණ ඇත්ත ගාණ පෙන්වන්න එපා කියලා කියනවා. මමත් බදු වංචා කර තිබෙනවා. ඒ ආකාරයට ලංකාවේ බොහෝ දෙනෙකු බදු වංචා කරනවා.’

විශ්වාසභංග යෝජනාවක් නිසා සමාජ හා ආර්ථිකමය වශයෙන් ඇතිවන බලපෑම විහිළුවට ලක්කිරීම කිසිසේත් ප්‍රඥාගෝචර නැහැ එක්සත් ජනතා නිදහස් සන්ධානයේ මන්ත්‍රී ආචාර්ය බන්දුල ගුණවර්ධන

‘අපේ රටේ පාර්ලිමේන්තුවට විශ්වාසභංග යෝජනා 46ක් ඉදිරිපත්ව තිබෙනවා. ඉන් අග්‍රාමාත්‍යවරු තිදෙනෙකුට විරුද්ධව විශ්වාසභංග යෝජනා ඉදිරිපත් වී තිබෙනවා. එස්. ඩබ්ලිව්.ආර්.ඩී. බණ්ඩාරනායක, සිරිමාවෝ බණ්ඩාරනායක මැතිනිය හා රනිල් වික්‍රමසිංහ මහතා ඔවුන් තිදෙනා. මේ පාර්ලිමේන්තුවේ විවාදයට භාජනය වූ විශ්වාසභංග යෝජනා දිනලා තියෙන්නේ එකයි. ඒ අමීර්තලිංගම් මහතාට විරුද්ධව ඉදිරිපත් වූ විශ්වාසභංග යෝජනාව පමණයි. නමුත් විශ්වාසභංග යෝජනාවක් නිසා සමාජ හා ආර්ථිකමය වශයෙන් ඇතිවන බලපෑම විහිළුවට ලක්කිරීම කිසිසේත් ප්‍රඥාගෝචර නැහැ.’

ජනතාවගේ බලාපොරොත්තුව අනුවයි විශ්වාසභංගය ඉදිරිපත් කළේ එක්සත් ජනතා නිදහස් සන්ධාන මන්ත්‍රී චමල් රාජපක්‍ෂ

‘දැන් අවුරුදු තුනක් ගිහින් බැඳුම්කර සිද්ධිය ගැනමයි සාකච්ඡා වෙන්නේ. ඒ නිසා මේ ප්‍රශ්නය ගැන කතා කරමින් ඉඳලා වැඩක් නැහැ. බැඳුම්කර කොමිෂන් සභාවේ නිර්දේශ ගැන සැකයක් ඇතිවෙනවා. මේක අවසන් කළ යුතුයි. ජනතාව බලාපොරොත්තු වූ දෙය අනුව තමයි විශ්වාසභංග යෝජනාව පාර්ලිමේන්තුවට ඉදිරිපත් කළේ.’

ශ්‍රී ලංකා නිදහස් පක්‍ෂය සීසීකඩ කරලා ජනාධිපතිතුමා තනි කරන්න මේ උගුල ඇටෙව්වේ තුෂාර ඉඳුනිල් (එ.ජා.ප.)

‘පසුගිය දවස් ටිකේ කිලෝ ටෝක්, පුරසාරම්, වහසිබස් කියමින් ඒකාබද්ධ විපක්‍ෂයේ කට්ටිය ලොකු සද්දයක් දැම්මා. ඒ අය සද්ද දැම්මේ ආණ්ඩුව අතට ගත්තා වගේ. එක්සත් ජාතික පක්‍ෂය සුනේසුන් වෙන්න අටවපු බෝම්බයක් මේ විශ්වාසභංගය. දැන් අපේ පක්‍ෂයේ කවදාවත් නොතිබුණු එකමුතුකමක්, කවදාවත් නැති බැඳීමක් මේ බෝම්බය නිසා ඇතිවෙලා තිබෙනවා.

ශ්‍රී ලංකා නිදහස් පක්‍ෂය සීසීකඩ කරලා ජනාධිපතිතුමා තනි කරන්න මේ උගුල ඇටෙව්වේ. රුපියල් දෙකේ කොළවලට, දහයේ කොළවලට අපේ ආත්මය අපි පාවාදෙන්නෙ නෑ. අපට සති ගාණකට කලින් ලොකු ලොකු ගණන්වලට කතා කළා. නමුත් අපි ආත්මය පාවා දුන්නෑ. ඒකාබද්ධ විපක්‍ෂය අපට අටවපු උගුලට ශ්‍රී ලංකා නිදහස් පක්‍ෂය ගොදුරු වුණා. ඒ පක්‍ෂය නන්නත්තාර කරලා දැම්මා.’

අගමැතිතුමා තවදුරටත් ජනාධිපති වෙන්න සිහින දකින්නෑ පිවිතුරු හෙළ උරුමයේ නායක උදය ගම්මන්පිල

‘අවුරුදු විසිගාණක් තිස්සේ අගමැතිතුමා ජනාධිපති සිහිනයක සිටියා. ඒ නිසා එතුමා ජනතා මතය ගැන සංවේදීව හිටියා. ජනතා විරෝධය මතුව එද්දී සිය ව්‍යාපෘති හකුළා ගැනීමේ තත්ත්වයක හිටියා. ඒ නිසා රට බෙදීම, රට පාවාදීම, රට විකිණීම ඉදිරියට ගියේ හෙමින් හෙමින්. වැඩේ පටන් ගන්නවා. ජනතා විරෝධය එද්දී හකුළා ගන්නවා. හැබැයි පුංචි ඡන්දයේ ප්‍රතිඵලයෙන් ජනාධිපති සිහිනය කුඩුපට්ටම් වුණා. අගමැතිතුමා තවදුරටත් ජනාධිපති වෙන්න සිහින දකින්නෑ. එතුමාගේ දැන් අදහස වී තිබෙන්නේ වසර එකහමාරක් අගමැති ධුරයේ සිටීම පමණයි.

ජනාධිපති සිහිනය නැතිනම් ජනතා ප්‍රශ්න ගැනත් එතුමා සංවේදීත් නැහැ. ඇමෙරිකාවේ ජනාධිපතිවරයෙක් පළමු ධුර කාලය කටයුතු කරන්නේ ජනතාවට ඕන විදියට. දෙවැනි ධුර කාලය කටයුතු කරන්නේ තමන්ට ඕන විදියට. දෙවැනි ධුර කාලයෙන් පස්සේ ගෙදර යන්න තියෙන නිසා එලෙස ජනතා ප්‍රශ්න ගැන සංවේදී නැහැ.

දැන් අපට අගමැති කෙනෙක් ඉන්නවා අනාගතයේ මැතිවරණවලට තරග කිරීමේ සූදානකමක් නැති. ජනතා ප්‍රශ්න ගැන සංවේදී නැති. තමන්ගේ සිහිනය පුංචි ඡන්දයකින් කුඩුපට්ටම් කිරීම පිළිබඳ ජනතාව සමග අගමැතිවරයා කේන්තියෙන් ඉන්නේ. එවැනි අගමැතිවරයෙකුට තවත් වසර එකහමාරක් බලයේ ඉන්න දීම භයානකයි. විශ්වාසභංග යෝජනාව සම්මත වෙනවා කියන්නේ පාර්ලිමේන්තුව තුළ ජනමතය පිළිබිඹු වෙන්නෑ කියන එක. පසුගිය ජන මතයට ගරු කරන්නෙ නැත්නම් මේක විසුරුවා හැරිය යුතු පිළුණු වූ පාර්ලිමේන්තුවක්.

අපට මේ විශ්වාසභංග යෝජනාව ජාතියේ අවාසනාවට සම්මත කර ගන්න බැරි වුණොත් අනිවාර්යයෙන්ම හිරු නොපායන අඳුරු යුගයක් ඉදිරි අවුරුදු එකහමාර තුළ මේ රටට උදා වෙනවා.’

වකුගඩු රෝගයට නව විසඳුම්

කිසියම් රටක පැවැත්ම රඳා පවතින්නේ ධනය හා බලයෙන්ම පමණක් නොව, රටේ මිනිසුන්ගේ සුභදායී සෞඛ්‍ය තත්ත්වයද ඒ සඳහා තීරණාත්මක බලපෑමක් සිදුකරයි. ලෝකයේ බොහෝ රටවලට බලපාන පානීය ජල හිඟය ශ්‍රී ලාංකිකයන්ට විශාල වශයෙන් බලපාන ගැටලුවක් නොවූවද, අපගේ පානීය ජල සම්පත කෘෂි රසායන, බැරලෝහ සහ මල අපද්‍රව්‍ය යනාදියෙන් දූෂණයට බඳුන් වීම අද වන විට විශාල ගැටලුවක් බවට පත්ව තිබේ. 


DSC_0035

මෙම කරුණු කාරණා මෙන්ම ඒ සඳහා විසඳුම් සෙවීමට ආරම්භ කර ඇති පරීක්ෂණ පිළිබඳ පසුගියදා ලෝක ජල දිනය වෙනුවෙන් ජාතික විද්‍යා පර්යේෂණ සභාවේදී පැවති මාධ්‍ය හමුවේදී පර්යේෂණ කණ්ඩායම් දැක්වූවේ මෙවන් අදහසකි.  
භූජනන සම්භවයක් ඇති ෆ්ලෝරයිඩ්, නයිට්‍රේට්, මැන්ගනීස්, ආසනික් සහ කැල්සියම් මගින් ජල මූලාශ්‍ර දූෂිත වූ ප්‍රදේශයන් කිහිපයක්ද මේ වන විට අප රට තුළ හඳුනාගෙන තිබේ. මෙකී පසුබිම තුළ නාගරික ජනගහනයෙන් 90%කට ආරක්ෂිත නළ ජලය නොලැබෙන අතර, ග්‍රාමීය ජනගහනයෙන් 60%ක් පිරිසුදු ළිං ජලය මගින් තමන්ගේ ජල අවශ්‍යතා සපුරා ගනියි. නමුත් මෙසේ ජලය ලබා නොගන්නා ජනතාව කිසිදු ආරක්ෂක පියවරක් හෝ අධීක්ෂණයකින් තොරව නළ ළිං හෝ වෙනත් භූගත ජල මූලාශ්‍රයන්ගෙන් තමන්ගේ ජල අවශ්‍යතාව සම්පූර්ණ කර ගනියි. මේ හේතුවෙන් භූගත සම්භවයක් ඇති ඇතැම් අමුද්‍රව්‍ය මගින් අහිතකර සෞඛ්‍ය බලපෑම් ඇතිවීම විශාල වශයෙන් ගැටලුකාරී ස්වභාවයක් ගෙන තිබේ. 

දිවයිනේ දිස්ත්‍රික්ක 25න් 15කම ජල දූෂණය ප්‍රාමාණික මට්ටමින් සිදුවන බව අධ්‍යයනවලින් නිර්ණය කර ඇත. මෙයින් අහිතකර තත්ත්වයන් පෙන්නුම් කිරීම ඒ හා බැඳි භයානක තත්ත්වයකි. ශ්‍රී ලාංකිකයන් තුළ වැඩි වැඩියෙන් දක්නට ලැබෙන වකුගඩු රෝග සහ පිළිකාවන්වලට හේතුවක් ලෙස මෙම විෂවලට දීර්ඝ කාලයක් තිස්සේ නිරාවරණය වීම පෙන්වාදිය හැකිය. පසුගිය දශක දෙක මුළුල්ලේ මේ හේතුවෙන් උතුරු මැද පළාතේ මරණ 22,000ක් වාර්තා වූ බව තක්සේරු කර තිබේ. දැනට එම පළාතේ ජනගහනයෙන් 5෴- 6෴ අතර ප්‍රමාණයක් මෙම රෝගයෙන් පෙළෙන බව දත්ත අනුව වාර්තා කර තිබේ.  මේ සඳහා හේතුකාරකයන් රැසක් බලපෑ හැකි අතර, තවම නිශ්චිත හේතුකාරකයක් මේ යැයි අනාවරණය වී නොමැත. මේ නිසා මේ රෝගය හඳුන්වන්නේ හඳුනානොගත් කාලික වකුගඩු රෝගය නමිනි. මෙම රෝගය ශ්‍රී ලංකාවේ පමණක් නොව අසල්වැසි ඉන්දියාව තුළින්ද, ඊට අමතරව ඊජිප්තුව සහ ලතින් ඇමරිකාවේ එල් සැල්වදෝරයෙන්ද මේ වන විට හඳුනාගෙන තිබේ. 
ග්ලයිෆෝසේට් පිළිබඳවද මේ දිනවල ප්‍රබල ලෙස කතාබහ වන්නකි. වකුගඩු රෝගයට මෙයද හේතුකාරකයක් වන බව බොහෝදෙනාගේ අදහසයි. නමුත් මෙය තවමත් විද්‍යාත්මකව පරීක්ෂණ මගින් ඔප්පු වී නොමැත. 

මහාචාර්ය රෝහණ චන්ද්‍රජිත්  භූ ගර්භ විද්‍යා අංශය පේරාදෙණිය විශ්වවිද්‍යාලය 

මෙම පර්යේෂණය  යටතේ, වකුගඩු රෝගීන්ගේ ස්වාභාවික ඉතිහාසය, රෝගය උත්සන්න වීමට හේතුසාධක, වකුගඩු අකර්මණ්‍ය වූ රෝගීන් මියයන්නේ කුමන හේතුවක් නිසාද, රෝගය සහිත ප්‍රදේශයන්හි පිහිටි ජලය, පස් ඇතුළු පාරිසරික තත්ත්වයන් පිළිබඳව මේ යටතේ අප පුළුල් ලෙස අධ්‍යයනය කරනවා.  ඒ තුළින් අපි වකුගඩු 
සෛල වලට බලපෑම් ඇති කරන්නේ කෙසේද යන්නත් අධ්‍යයනය කරනවා. මෙහි ඇතැම් පරීක්ෂණයන් සිදුකරන්නේ පරීක්ෂණාගාර තුළ. මෙම පර්යේෂණය වැඩි වශයෙන් සිදුකරන්නේ ගිරාඳුරුකෝට්ටේ සහ විල්ගමුව යන ප්‍රදේශවල. මෙම ප්‍රදේශ දෙක තුළ වකුගඩු රෝගීන් බහුලව වාර්තා වෙනවා. 
එමෙන්ම රෝගය මූලික අවස්ථාවේ හඳුනාගත හැකි ජීවසටහනක් හඳුනාගැනීම මෙම අධ්‍යයනයේ තවත් අරමුණක්. දැනට වසර තුනක පටන් මෙම පර්යේෂණය පවත්වාගෙන යනු ලබනවා. මෙම පර්යේෂණයේ සහාය සඳහා විශේෂයෙන් ලංකාව තුළ සිදුකළ නොහැකි අධ්‍යයනයන් සිදුකිරීම සඳහා විදේශීය විද්‍යාඥයන්ගේ සහයෝගයද අපට මේ වන විට ලැබී තිබෙනවා.

වකුගඩු රෝග සම්බන්ධ විශේෂඥ වෛද්‍ය නිශාන්ත නානායක්කාර 

ඇත්තෙන්ම කෘෂි රසායන බහුලව වකුගඩු රෝගය සම්බන්ධ කරගෙන සාකච්ඡා කරන දෙයක්. ලංකාවේ කෘෂි රසායන සඳහා විෂ සහිත දේවල් බහුලව භාවිත කරනවා. ඊට අමතරව මේ කෘෂි රසායනවල තිබෙන අහිතකර ඵලවිපාක නිසා අප එක් එක් කාලවලට ඒවා භාවිතයෙන් ඉවත් කරනවා. ඒ නිසා ඇත්තෙන්ම විශේෂ සැකයකින් තමයි මේ කෘෂි රසායන දෙස බලන්නේ. අැතැම්විට වකුගඩු රෝග වැලඳීමටත් මෙය හේතුවක් වෙන්න පුළුවන්. ග්ලයිෆොසේට් රසායනික ද්‍රව්‍ය ලංකාවේ බහුලව භාවිත කරන්න ගත්තේ වී ගොවිතැන සඳහායි. ඒ 2009 වර්ෂයේදී. මගේ අදහසට අනුව කෘෂි රසායන කියන දෙය වකුගඩු රෝගය සෑදෙන්න බලපාන බව කවුරුන් හෝ යෝජනා කරනවා නම් එය ඇත්තෙන්ම හොඳ යෝජනාවක්. නමුත් පැහැදිලිව එසේ සිදුවන්නේ කෙසේද යන්න ඔප්පු කර පෙන්විය යුතුයි.  1930 වර්ෂයේදී පමණ ලංකාවේ පිළිකා නැහැ, වකුගඩු රෝග නැහැ, හෘදයාබාධ නැහැ, දියවැඩියාව නැහැ, රුධිර පීඩනය නැහැ. ඒ කාලයේ තිබුණ ලොකුම ප්‍රශ්නය තමයි මිනිස්සුන්ව වසංගත රෝගවලින් කොහොමද බේරා ගන්නේ. ඒ වගේම මිනිස්සුන්ට කොහොමද කෑමබීම දෙන්නේ කියලා. අද වන විට මිනිස්සුන්ගේ ආහාර ප්‍රශ්නය විසඳිලා තිබෙනවා. ඒ වගේම බෝවන රෝග සම්පූර්ණයෙන්ම වාගේ පාලනය කර තිබෙනවා. ඒ නිසා මේ කෘෂි රසායන පුද්ගලයාගේ ජීවිතයට අහිතකරයි කියා ඔප්පු වූ විට ඒවා තහනම් කරන්න කිසිම කෙනෙක් පැකිළෙන්නේ නැහැ. මීට පෙරත් විෂ සහිත කෘෂි රසායන ඕනෑතරම් තහනම් කර තිබෙනවා. 

රෝහාන් වීරසූරිය ජාතික මෞලික අධ්‍යයන ආයතනය

ඇත්තෙන්ම අප ඉදිරිපිට තිබෙන ජලය බීමට නුසුදුසු ඒවා. ප්‍රායෝගිකව පිරික්සීමේදී මිනිසුන් ජලය පානය කරන්නේ ඉතා අඩුවෙන්. එයයි මූලික ගැටලුව. ඒ නිසා මේ ජලය පානය කිරීමට සුදුසු තත්ත්වයට ගැනීම මෙම පරීක්ෂණයේ මූලික අරමුණයි. රටක් වශයෙන් අපි සියලුදෙනා එක්සත් ජාතීන්ගේ ජල ප්‍රඥප්තියට අනුකූලවයි කටයුතු කරන්නේ. 
ගමක ජීවත් වන මුළුමහත් ජනතාවම යොදා ගනිමින් පරීක්ෂණ කටයුතු කිරීම එතරම් ප්‍රායෝගික දෙයක් නෙවෙයි. එහිදී ප්‍රථමයෙන් ගමේ ජනයාට එය බීමට සුදුසු මට්ටමක තිබේදැයි පරීක්ෂා කළ බැලිය යුතුයි. එනිසා මේ ආදර්ශ ව්‍යාපෘතිය රජරට විශ්වවිද්‍යාලය තුළ ස්ථාපිත කර තිබෙනවා. මෙය නවීන විද්‍යාත්මක ක්‍රම මගින් සොයා බැලීමක් සිදුකරනවා. ඒ අනුව ගමට භාවිත කළයුතු තාක්ෂණය පිළිබඳ මේ තුළින් අවබෝධයක් ලබාගන්න අපිට පුළුවන්. එනිසා විදේශ විද්‍යාඥයන්ගේ දැනුමත් සමගින් මේ වන විට ගමට ගැළපෙන ජල පිරිපහදු යන්ත්‍රයක් සකස් කරමින් පවතිනවා. ඇත්තෙන්ම ගුණදායී ජලය ලෙසින් හඳුනා ගන්නේ අවම වශයෙන් පිරිසුදු කළ ජලයයි. එනිසා ජලය පිරිසුදුව තබා ගන්න භාවිත කළ හැකි උපක්‍රම පිළිබඳ දැනුවත් කරන්න අපි අපේක්ෂා කරනවා.

ජ්‍යෙෂ්ඨ මහාචාර්ය කේ. එම් නලීන්ද සිල්වා කොළඹ විශ්වවිද්‍යාලය ශ්‍රී ලංකා නැනෝ තාක්ෂණ අංශයේ උපදේශක

විශේෂයෙන්ම අධිතාක්ෂණික උපකරණ භාවිත කරමින් මෙය සකස් කිරීමේදී අවම හානියක් සිදුවන ආකාරයට පෞද්ගලිකව හෝ ගෘහස්ථ වශයෙන් සකස් කළ හැකි ජල පෙරණයක් අප සකස් කළ යුතුයි. පසුගිය කාලයේ මේ ජලයෙන් ඉවත් කළයුතු යැයි අවශ්‍ය ද්‍රව්‍ය පිළිබඳ නොයෙක් මතයන් ඉදිරිපත් වූවා. ෆ්ලෝරයිඩ්, කැල්සියම්, මැග්නිසීයම්, කැට්මියම් හා ලේඩ් වැනි ද්‍රව්‍ය හැකි ඉක්මනින්ම ජලයෙන් ඉවත් කරන්න අපි අපේක්ෂා කරනවා. ඒක හේතුවක් නිසා සිදුවන දෙයක් නොවන බවයි මෙම පර්යේෂණයේ මතය. ඇතැම් විට පවත්වාගෙන යන සමාජ රටාව නිසාත් මෙවැනි දෙයක් ඇති වෙන්න පුළුවන්. අපි ජල දූෂක හඳුනාගැනීම සඳහා පරීක්ෂණයට මත්ස්‍ය විශේෂයක්ද භාවිතයට ගැනීමට අපේක්ෂා කරනවා. 

ආචාර්ය එස්. කේ. වේරගොඩ ප්‍රධාන ඉංජිනේරු ජාතික ජලසම්පාදන හා ජලාපවහන

ජල ආරක්ෂක සැලසුම් ක්‍රමය ලෝකයේ රටවල් 90කට වඩා වැඩි ප්‍රමාණයක දැනට ක්‍රියාත්මක වෙනවා. ලංකාවේ වර්තමානයේ ජල නළ හා සම්බන්ධ වී ජලය ලබාගන්නා ප්‍රතිශතය 47%ක් හෝ 48%ක් වගේ ප්‍රමාණයක් වෙනවා. මේ ආකාරයට ජලය ලබාදීමේ පහසුකම තිබෙන්නේ තෙත් කලාපය තුළදී. ඒ කලාපයේ එක් නිවසකට ජලය ලබාදීමට යන වියදම ලක්ෂ 4ක් හෝ 5ක් වෙනවා. මේ ක්‍රමය වියළි කලාපයේ ක්‍රියාත්මක කිරීමේදී එය මිලියනයක් දක්වා වැඩි වෙනවා. මොකද ජන ගණත්වය මේ කලාපවල අඩු නිසා. මේ ඉතිරි 53෴ක පිරිසට කොහොමද ජලය ලබා දෙන්නේ යන්න අපට විශාල අභියෝගයක්. සංවර්ධනය වෙමින් පවතින රටක් වශයෙන් මේ යන ප්‍රාග්ධනය අපට දරාගැනීමට අපහසුයි.
ඒ වගේම කාලයෙන් කාලයට එන රසායනික ද්‍රව්‍යවලින් ජලය පිරිපහදු කර ගැනීමත් ඇත්තෙන්ම අපහසු කාර්යයක්. අපි අපේක්ෂා කරනවා ඉදිරියේදී ලංකාවට පැමිණෙන ජල පෙරණ සම්බන්ධයෙන් ප්‍රමිතිය සහතික කිරීමක් සිදුකරන්න. ඊටත් වඩා අපේම රටේ ප්‍රමිතියකින් යුත් ජල පෙරණයක් නිපදවන්න මෙම පර්යේෂණය ඉතාම වැදගත් දෙයක් ලෙස මෙම දකිනවා.