Category Archives: opinion

රාජපක්ෂත් වැඩියෙන් ඉන්න හදලා දෙකක් නැති කර ගත්තා මෛත්‍රීත් හයක් ඉන්න හදලා එකක් නැති කර ගත්තා


ගෝත්‍රික තීන්දුවක් – ඒත් හිස නමනවා

 මෙම සතියේ වැඩි කතාබහට ලක්වූයේ කැබිනට් රැස්වීම පිළිබඳවය. ජනාධිපති මෛත්‍රීපාල සිරිසේනගේ ප්‍රධානත්වයෙන් කැබිනට් රැස්වීම  අඟහරුවාදා පැවැත්විණි.කාන්තාවන්ට මත්පැන් සම්බන්ධ කටයුතුවලට අවසර දීමට අමාත්‍ය මංගල සමරවීර විසින් නිකුත් කරන ලද ගැසට් නිවේදනයක් පිළිබඳ මෙහිදී අමාත්‍යවරු විවිධ අදහස් දැක්වූහ.

මත්පැන් අලෙවි සැල් රාත්‍රී 10.00 වනතුරු විවෘත කර තැබීම සහ කන්තාවන්ට මත්පැන් මිලදී ගැනීමට ඇති හැකියාව ලබාදෙමින් මෙම ගැසට් පත්‍රය නිකුත් කර තිබිණි. මංගල සමරවීර අමාත්‍යවරයා විසින් මේ පිළිබඳ අමාත්‍ය මණ්ඩලය දැනුවත් කරන ලද අතර, එහිදී අමාත්‍යවරයා ප්‍රකාශ කළේ කාන්තාවන්ට සමඅයිතිය ලබාදීමේ අරමුණින් මෙම ගැසට් පත්‍රය නිකුත් කළ බවයි.

ඊට එරෙහිව අදහස් දක්වමින් සෞඛ්‍ය ඇමති රාජිත කීවේ මෙවැන්නකි. “කරුණු දෙකක් මත මම මෙම යෝජනාවට විරුද්ධයි. ශ්‍රී ලංකාවේ සංස්කෘතිය සහ සභ්‍යත්වය මත තීන්දු තීරණ ගත යුතුයි. යුරෝපයේ ගනු ලබන තීන්දු තීරණ ශ්‍රී ලංකාවට ගැළපෙන්නේ නැහැ. කොළඹ කාන්තාවන්ට වඩා ගමේ සිටින කාන්තාවන් සියයට 90ක්ම මීට විරුද්ධයි. ගමේ සිටින කාන්තාවන්ගේ විවිධ අයිතිවාසිකම් ආරක්ෂා වී තිබෙනවා. නමුත් ගමේ සිටින කාන්තාවකට මත්පැන් අලෙවි සැලකට ගොස් මත්පැන් බෝතලයක් ගන්න බැහැ. එය ගැටලුවක්. කොළඹ නම් සුපිරි වෙළෙඳ සැල්වලින් මත්පැන් මිලදී ගන්නා කාන්තාවන් ඉන්නවා. පළාත් පාලන මැතිවරණය පැවැත්වෙන මොහොතේ මෙවැනි ගැසට් නිවේදනයක් නිකුත් කිරීම අනවශ්‍ය දෙයක්. යහපාලන රජය බිහිවුණේ මතින් තොර රටක් නිර්මාණය කිරීමටයි. එය මේ වනවිට නිවැරදි ආකාරයෙන් සිදු වෙනවා. ලෝක සෞඛ්‍ය සංවිධානය සහ එක්සත් ජාතීන්ගේ සංවිධානය අපේ රටේ මත්පැන් භාවිතය සහ දුම්බීම අවම කිරීම සඳහා ගෙන ඇති ක්‍රියාමාර්ග අගය කරනවා. එම නිසා සෞඛ්‍ය අමාත්‍යවරයා ලෙස මම මෙම තීරණයට සම්පූර්ණයෙන් විරුද්ධයි.”

එවිට අදහස් දැක්වූ අමාත්‍ය දයාසිරි ජයසේකර පැවසුවේ රාජිතගේ ප්‍රකාශයට තමන්ද එකඟ බවයි. ‘එම නිසා මෙම තීරණයට මමත් විරුද්ධත්වය ප්‍රකාශ කරනවා” යැයි හෙතෙම පැවසීය.

අමාත්‍ය චම්පික රණවකද පැවසුවේ, “මතින් හා දුම්පානයෙන් තොර රටක් බිහිකළ යුතුයි යන සංකල්පයේ අපි ඉන්නේ. තීන්දු තීරණ ගැනීමේදී ප්‍රවේසම් විය යුතුයි. ඇතැම් තීන්දු තීරණවලදී සිදුවෙන්නේ විනාශයක්. අනවශ්‍ය ප්‍රචාරයක් ලැබෙනවා” යනුවෙන්ය.

එවිට අදහස් දැක්වූ ජනාධිපති මෛත්‍රීපාල සිරිසේන සඳහන් කළේ මෙම තීන්දුව නතර කිරීමට පියවර ගත යුතු බවයි.

තමන් හා රාජිත අමාත්‍යවරයා ප්‍රකාශ කළ පරිදි සෞඛ්‍ය වශයෙන් මෙය ගැටලුවක් වන බැවින් මෙම තීරණයට විරුද්ධත්වය පළකරන බවද ජනාධිපතිවරයා පවසා සිටියේය.

එවිට අමාත්‍ය මංගල සමරවීර මහතා පැවැසුවේ මෙය ගෝත්‍රික තීන්දුවක් බවත්, නමුත් එයට හිස නමන බවත්ය.

එ.ජා.ප. මන්ත්‍රීවරුන් ජනාධිපතිවරයා විවේචනය කරන සිදුවීමද මෙහිදී සාකච්ඡා විය.

සුජීව, මරික්කාර්, හරීන්, නලීන්, චමින්ද යන මන්ත්‍රීවරුන් තමන්ව දැඩි ලෙස විචේනය කරන බව පවසමින් දෝෂාරෝපණය කළ ජනාධිපති මෛත්‍රී හදිසියේම කැබිනට් මණ්ඩලයෙන් නැගිට ගියේ ‘මම ජනාධිපතිකමෙන් අස්වෙනවා’ යැයි කියමින්ය.

අගමැති රනිල් සහ ඇමතිවරු කිහිපදෙනෙක් ජනාධිපතිවරයා අසලට ගොස් සාකච්ඡා කර යළි ජනාධිපති මෛත්‍රී කැබිනට් මණ්ඩලයට කැඳවාගෙන ආහ.

එදත් අපි එක්කගෙන ආවා – අදත් අපි එක්කගෙන ආවා

කැබිනට් හමුව අතරතුර ජනාධිපති මෛත්‍රීපාල සිරිසේන ආවේගයෙන් එජාප මන්ත්‍රීවරුන්ට බැන වැදී නැගිට යාම පිළිබඳ පක්ෂ විපක්ෂ සියලු දෙනාගේ කතාබහට ලක්විය. එජාප කෘත්‍යාධිකාරී මණ්ඩල රැස්වීම යෙදී තිබුණේ බදාදා පෙරවරුවේය. රැස්වීම ආරම්භ කිරීමට අගමැති රනිල්ගේ පැමිණීම බලාපොරොත්තුවෙන් සිටි මැති ඇමතිවරු කතාබහ කරමින් සිටියහ.

මේ අතර කැබිනට් අමාත්‍යවරුන් දෙදෙනෙකු වටකරගෙන පසුපෙළ මන්ත්‍රීවරුන් විමසමින් සිටියේ කලින් දින කැබිනට් මණ්ඩලයේදී සිදු වූ සිදුවීම පිළිබඳවයි. ඇමතිවරුන් දෙදෙනාද එය විස්තර කරමින් සිටියහ.

‘ජනාධිපතිතුමා අපේ සෙට් එකක නම් කියලම බැන්නා. මේ විදිහට එක ගමනක් යන්න බැහැ කිව්වා. පැය භාගයක් විතර මෙහෙම බැනලා බැනලා මෙන්න එකපාරටම නැගිටලා ගියා’

එසේ එක ඇමතිවරයෙක් පවසන විට, අනිත් අමාත්‍යවරයාද එයට යමක් එක් කළේය.

‘ජනාධිපතිතුමා නැගිටලා ගියපු එකෙන් නිදහස් පක්ෂෙ ඇමතිලා මාර විදිහට වැටුණා. එයාලට කරගන්න දෙයක් නැතිවුණා. ඊට පස්සේ අගමැතිතුමාට කිව්වා ගිහින් කතා කරන්න කියලා’

‘අගමැතිතුමා එක්ක මලික්, අකිල, රාජිත, දුමින්ද, සිරිපාල සෙට් එකම ගිහිල්ලා කතා කරලයි ආපහු එක්කගෙන ආවේ’ යැයි ඒ අමාත්‍යවරයා පවසන විට අසල සිටි මන්ත්‍රීවරයෙක් පැවසුවේ,

‘ඒ කියන්නේ එදත් අපි එයාව ආරගෙන ආවා… අදත් අපි එයාව එක්කගෙන ආවා’

පසුපෙළ මන්ත්‍රී එසේ කියන විට එතැන සිටි සියල්ලෝම මහ හඬින් සිනහසෙන්නට විය.

මොනවද අයිසේ තමුසෙලා මේ කරගන්න වැඩ

අගමැති රනිල් සිරිකොතට පැමිණීමෙන් පසු කෘත්‍යාධිකාරී මණ්ඩල රැස්වීම ආරම්භ විය. පළාත් පාලන මැතිවරණය පිළිබඳ සාකච්ඡා කිරීමට මෙය කැඳවා තිබුණද, ඒ තුළ මුලින්ම කතාබහට ලක්වූයේ කැබිනට් මණ්ඩලයේ සිදුවීම පිළිබඳවයි.

‘මොනවද අයිසේ මේ තමුසෙලා කරගන්න වැඩ. ජනාධිපතිතුමා විචේනය කරන්න එපා. අපි පත් කරපු ජනාධිපතිනේ. ඒ ගැනත් හිතන්න. ජනාධිපතිතුමා හොඳටම කලකිරිලා දොස් කියාගෙන ගියා. ජනාධිපතිතුමාව විචේනය කරන්න එපා’

අගමැති රනිල් මන්ත්‍රීවරුන්ට එසේ කියන විට කුරුණෑගල දිස්ත්‍රික්කයේ පසුපෙළ මන්ත්‍රීවරයකු නැගී සිටිමින් විමසුවේ,

‘එතකොට සර් මේ අවුරුදු තුනේම නිදහස් පක්ෂෙ ඇමතිවරු සර්ව විචේනය කළා. ජනාධිපතිතුමා ඒවා නතර කළේ නැහැනේ’

අතින් සංඥා කරමින් එම මන්ත්‍රීවරයාට අසුන්ගන්නා ලෙස පැවසූ අගමැතිවරයා පැවසුවේ,

‘ඒක ජනාධිපතිතුමා බලා ගනීවි. අපේ පැත්තෙන් ජනාධිපතිතුමා විවේචනය නොකර ඉඳිමු. නිදහස් පක්ෂෙ ඇමතිවරුන්ගේ වැරදි තියෙනවා නම් ඒවා විචේනය කළාට කමක් නැහැ. ප්‍රතිපත්තිවල වැරැද්දක් තියෙනවා නම් ඒවා විචේනය කළාට වැරැද්දකුත් නැහැ. හැබැයි ජනාධිපතිතුමාව විචේචනය කරන්න එපා’

එසේ පැවසූ අගමැතිවරයා එම කතාබහ එතැනින් අවසන් කළේය.

මම ගියේ තේ එකක් බීලා එන්න

බදාදා පැවති කැබිනට් හමුවේදී ඇමති රාජිත පැවසුවේ කැබිනට් මණ්ඩලය තුළ අර්බුදයක් හට නොගත් බවය. ජනාධිපතිවරයා නැගිට ගියේ ස්වාභාවික අවශ්‍යතාවක් සඳහා බවත්, සැනකින් ආපසු පැමිණි බවත් එහිදී ඇමති රාජිත කීවේය.

එක්සත් ජනතා නිදහස් සන්ධානයේ රැළියක් ඇල්පිටිය නගරයේදී බදාදා සවස පැවති අතර, එම වේදිකාවේදී ජනාධිපතිවරයා පැවසුවේ පරස්පර අදහසකි.

‘හාමුදුරුවනේ මම ඊයේ  ධම්මපදයෙන් තමයි කැබිනට් මණ්ඩලයේ දේශනයක් පැවැත්වුවේ. අකුසල් කරලා කාටවත් කොහේවත් හැංගෙන්න බැහැ. ඒ පව් පලදෙනවා කියලා මම කිව්වා. මහජන දේපළ හොරකම් කළොත් අකුසල්, ආණ්ඩුවේ බැංකුවල සල්ලි හොරකම් කළොත් අකුසල්, රජයේ දේපළ අවභාවිත කළොත් අකුසල්. මේ විදිහට මම විනාඩි 30ක් 35ක් විතර දේශනයක් කරල කිව්වා මේ අකුසල් නොකරන විදිහට ආණ්ඩුව ඉස්සරහට යන්න අවශ්‍යයි කියලා. ඒ නිසා ඒකට කවුරුත් සූදානම් වෙන්න කියලා. ඒ ගැන පොඩ්ඩක් හිතන්න මම තව පොඩ්ඩකින් එන්නම් කියලා මම ගිහින් තේ එකක් බීලා ඇවිත් ආපසු කැබිනට් එකේ වාඩිවෙලා ආපහු කැබිනට් රැස්වීම කරගෙන ගියා’ යැයි පැවසීය.

මෛත්‍රීත් හයක් ඉන්න හදලා එකක් නැතිකර ගත්තා

  ජනාධිපතිවරයාගේ ධුර කාලය පිළිබඳව අධිකරණයෙන් විමසූ සාකච්ඡාව මෙවර ජනතා විමුක්ති පෙරමුණේ දේශපාලන මණ්ඩල රැස්වීමේදී වැඩි වශයෙන් සාකච්ඡා විය.

ආරම්භයේදී විජිත හේරත් පැවසුවේ මෙවැන්නකි.  ‘රාජපක්ෂත් වැඩියෙන් ඉන්න හදලා දෙකක් නැති කර ගත්තා. මෛත්‍රීත් හයක් ඉන්න හදලා එකක් නැති කර ගත්තා. දෙන්නම විධායක ජනාධිපති ධුරය අහෝසි කරන්න ඇවිත් කාලය දික් කරගන්න තමයි හැදුවේ” 

ටිල්වින් සිල්වාද එයට එක්විය .

‘එක්සත් ජාතික පක්ෂයත් කලබල වෙලා. ධුර කාලය 06ක් වුණා නම් එජාපයටත් ලොකු බලපෑමක් වෙනවා. ඒ නිසා තමයි කට්ටිය මෛත්‍රීට ගහන්න පටන් ගත්තේ. බැඳුම්කරෙන් වැටිලා ඉන්න එජාපයට තවත් මරු පහරක් වෙනවා මෛත්‍රී 06ක්ම හිටිය නම්. කොහොම වුණත් මෛත්‍රීපාල සිරිසේන බැලුවෙත් ධුර කාලය හයක් වුණා නම් ඡන්දෙදි ඒ වාසියත් ගන්න. කතාව නම් බලය අත්හරින්න, පුටුව අත්හරින්න. ඒත් ක්‍රියාව තියෙන්නේ බලය වැඩි කර ගන්න. හොරු අල්ලනවා කියලා ඇවිත් දැන් හොරු ටික ආරක්ෂා කර ගනිමින් පක්ෂෙ බලය අල්ලගන්න තමයි කල්පනාව” 

එය අනුමත කරමින් ලාල්කාන්ත පැවසුවේ මෙවැන්නකි.

 ‘ඔව්, ජනාධිපතිතුමා බැඳුම්කර වාර්තාව ආවට පස්සේ ඒක අල්ලගෙන දැන් මාධ්‍ය සන්දර්ශන දානවා. මහා පරිමාණ වංචා දූෂණ ගැන ජනාධිපති කොමිෂන් වාර්තා 34ට මොකද වුණේ කියල දන්නෙ නැහැ. බැඳුම්කර වාර්තාවෙන් ඒවා යට වෙලා. මෛත්‍රී ඒවා හංගන්නේ ඒ වාර්තාවල තමන් ළඟ ඉන්න හොරු ටිකේ නම් තියෙන නිසා. අපි මේ වාර්තාත් එළියට අදින්න  ඕනෑ. මොකද දෙපැත්තෙම හොරු එළියට දාන්න  ඕනෑ” 

එයට එක්වෙමින් පාර්ලිමේන්තුවේදී සිදු වූ සිදුවීමද සුනිල් හඳුන්නෙත්ති මතක් කළේය.

‘පාර්ලිමේන්තුවේදී රනිල්ගේ ගෝලයෝ මහින්දට හොරා කිව්වා. මහින්දගේ ගෝලයෝ රනිල්ට හොරා කිව්වා. තව කට්ටියක් රනිල්ට බැඳුම්කර හොරා කිව්වා. තව කට්ටියක් මහින්දට සුනාමි හොරා කිව්වා. අපි මේ පැත්තේ ඉඳලා දෙගොල්ලම හොරු කියල කිව්වා. නමුත් ඒවා මාධ්‍යවල නම් ගියේ නැහැ. කොහොමත් ඇත්ත එළියට එන්නෙ නෑනේ. ඒත් ජනතාව නම් දැනගත්තා දෙගොල්ෙලාම හොරු කියලා”  

අපි ඡන්දෙ ඉල්ලන්නේ මන්ත්‍රීවරු හදන්න නෙවෙයි

මැතිවරණ ප්‍රචාරක කටයුතු අතරතුරදී ජනතා විමුක්ති පෙරමුණේ ප්‍රධාන ලේකම් ටිල්වින් සිල්වා කොස්ගම සාලාව ප්‍රදේශයේ ජනහමුවක් සඳහා සහභාගි විය.  එහිදී ප්‍රදේශයේ ගුරුවරියක් පැවසුවේ මෙවැන්නකි.

‘ලේකම්තුමා ආණ්ඩුවේ අය ගමේ බලයත් ආණ්ඩුව තියෙන එයාලටම දෙන්න කියනවා. මේ අය කොහොමද ගම හදන්නේ? සාලාව අවි ගබඩාව පිපිරුණාට පස්සේ හරියට වන්දි ටික ගෙවාගන්න බැරි වුණා. විපතට පත්වුණු අයගේ සංගණනයක් කරගන්න බැරි වුණා. දැන් ගමේ බලයත් ආණ්ඩුවට දෙන්න කියනවා” 

එය අනුමත කරමින් පිළිතුරු සැපයූ ටිල්වින් සිල්වා මෙසේ කීවේය.

 ‘අවුරුදු 03ක් රට පාලනය කරලා රට තිබුණ තැනින් තවත් පහළට ඇදලා දැම්මා. මේ ආණ්ඩුව කොහොමද ගමක් හදන්නේ. හොරකම නැති කරන්න ඇවිත් බැංකු කැඩුවා. දැන් දෙපැත්තේ ඉඳගෙන හොරු කියලා දෙපැත්තට චෝදනා කරගන්නවා. බලන් ගියාම ඔක්කොම හොරු. ඒවට දැන් ජනතාව රැවටෙන්නේ නෑ. ජනතාව දැන් දැන් අපි කියන දේවල්වලට ඇහුම්කන් දෙමින් තේරුම් ගනිමින් ඉන්නවා. රටේ ලොකු වෙනසක් අපිට දැනෙනවා” 

‘ලේකම්තුමා අපිත් රුසියානු පොත්පත් කියවලා තියෙනවා. සාහිත්‍ය කෘති පරිශීලනය කරලා තියෙනවා. ඒත් හැබෑ ජීවිතේ ඒ පොත්වල ඉන්න චරිත දැකලා තිබුණෙ නැහැ. නමුත් ඔබතුමාලගේ පක්ෂයේ චන්දන සූරියආරච්චිලා වගේ අයගේ කැපවීම දැක්කම අපි සැබෑ ජීවිතේදී සෝවියට් රුසියන් පොත්වල චරිත දැක්කා. සාලාව ප්‍රශ්නෙදි රෑ දවල් නැතිව ජනතාව වෙනුවෙන් චන්දනලා වැඩ කරපු විදිය අපි දැක්කා. ඒ නිසා අපි ජවිපෙ එක්ක වැඩ කරන්න තීරණය කළා” සාලාව වෙළෙඳ සංගමයේ නිලධාරියෙක් කියා සිටියේය. ‘ඔබතුමා කියන කතාව හරි. අපි ඡන්දෙ ඉල්ලන්නේ මන්ත්‍රීවරු හදන්න නෙවෙයි. අපි හදන්නේ ජනතා සේවකයෝ. ඒකයි අපේ වෙනස. අපි තිස්සදී ගම හදලා පෙන්නුවා. ජනතාවට තීරණය කරන්න පුළුවන් තමන්ගේ ගම හදා ගන්නවද නැත්නම් හොරුන්ටම දීලා පරණ විදියට දුක් විඳිනවද කියලා” ටිල්වින් සිල්වා කියා සිටියේය.

  ගම අලියට කන්න දීලා

කාත්තන්කුඩි, එරාවුර් ප්‍රදේශයේ ජනහමු ගණනාවකට සුනිල් හඳුන්නෙත්ති මන්ත්‍රීවරයා සම්බන්ධ වූයේ පසුගිය සතියේය. මේ රැස්වීම් සඳහා ජවිපෙ යාපනය දිස්ත්‍රික් සංවිධායක රාමලිංගම් චන්ද්‍රසේකර් සහ ජවිපෙ මෙවර මැතිවරණයේ අපේක්ෂිකාවක් වන සරෝජා සාවිත්‍රී පෝල්රාජ්ද සහභාගි විය. රැස්වීම්වලින් අනතුරුව ජනතාව කතාබහක නිරත වෙමින් තමන්ගේ ගැටලු පිළිබඳව ජවිපෙ නායකයන්ගේ අවධානය යොමු කිරීමට පෙළඹී සිටියි.

‘මන්ත්‍රීතුමා, මුස්ලිම් පක්ෂ නායකයන් හිටියට කවදාවත් අපේ ප්‍රශ්න ගැන අවධානයක් නැහැ. ඡන්දෙට විතරක් මෙහෙ එනවා. මේ පාර රවුෆ් හකීම්ලා ගම අලියට කන්න දීලා” ප්‍රදේශවාසියෙක් හඳුන්නෙත්තිට කියා සිටියේය.

‘ගම අලියට කන්න දීපු කතාව මොකක්ද?” හඳුන්නෙත්ති විමසා සිටියේය.

‘ඇයි මන්ත්‍රීතුමා හකීම්ලා මේ පාර ඡන්දෙ ඉල්ලන්නේ අලියගෙන්.. එයාලගෙ ලකුණ මේ පාර ඡන්දෙදි මේ පැත්තට නැහැ” ඔහු පිළිතුරු දුන්නේය.

බැසිල්ට ඩඩ්ලි පොළොන්නරුවේදී හමුවෙලා

%නිපුන^ සහල් ව්‍යාපාරයේ අධිපති සිරිපාල ගම්ලත් මහතාගේ දියණියගේ හදිසි අභාවය සැල වූ විට පක්ෂ විපක්ෂ දේශපාලඥයෝ පොළොන්නරුවේ ඔහුගේ නිවසට පැමිණෙන්නට වූහ.

සිරිපාල ගම්ලත් මහතා පක්ෂ විපක්ෂ කාගේත් හිතවතෙක් වූ බැවින් බෙහෝ පිරිසක් මේ සඳහා පැමිණ සිටියහ. මෙම අභාවය සැල වූ විට හිටපු අමාත්‍ය බැසිල් රාජපක්ෂ ද එම නිවසට ගියේය. ඒ වනවිට ලක්ෂ්මන් වසන්ත, පේෂල ජයරත්න, ඩඩ්ලි සිරිසේන ඇතුළු පිරිසක් කතාබහ කරමින් සිටියහ.

පොළොන්නරුව දිස්ත්‍රික්කයේ පළාත් පාලන ආයතනවල සිටි සභාපතිවරුන් හත් දෙනෙකු විවිධ දූෂණවලට සම්බන්ධ බවට චෝදනා කරමින් ශ්‍රී ලංකා නිදහස් පක්ෂයෙන් නාමයෝජනා නොලැබී තිබුණු අතර, ජනාධිපති මෛත්‍රීපාල සිරිසේන වේදිකාවලදීද මේ පිළිබඳව කියන්නට විය. ගම්ලත් මහතාගේ නිවසට පැමිණ සිටි එම සභාපතිවරුන් පේෂල ජයරත්නට චෝදනා කළේ නාමයෝජනා ලබානොදීම පිටුපස ඔහු සිටින බවට පවසමිනි. බැසිල් ඇතුළු ඒකාබද්ධයේ පිරිස  එම අවස්ථාව බලා සිටියහ. එවිට පේෂල කීවේ තමාට අකමැත්තෙන් වුවද එම තීරණයට එකඟවීමට සිදු වූ බවයි. “ඔන්න 25 වැනිදා රනිල් පොළොන්නරුවට එනවලු. ගිහින් ඒ වේදිකාවට ගොඩ වුණා නම් හරිනේද’ බැසිල්  එම සංවාදයට එක්වෙමින් කී විට “දෙකම එකතුවෙලා යනවට අපි කැමතියි’ යනුවෙන් පේෂල පැවසීය. “විසඳුම තියෙන්නේ අපිත් එක්ක ආවොත් තමයි. මොකද කියන්නේ’ අනතුරුව බැසිල් පැවසුවේ සියලු දෙනා දෙස බලාය.“මම හිටපු ජනාධිපතිතුමාට ආදරෙයි. මගේ වෙනසක් වෙලා නැහැ’ යැයි ලක්ෂමන් වසන්ත කීවේය. එම සංවාදයට එක් වූ ජනපති සොයුරු ඩඩ්ලි සිරිසේන “මට තාම මතකයි හිටපු ජනාධිපතිතුමා 2006දී විතර වී මෝල් හිමියන්ගේ බදු අඩු කරලා ලබාදුන්නු සහනය ගැන. ඒක අපිට ලොකු උදව්වක් වුණා. ඒ වෙලාවේ ගෙනාව යන්ත්‍ර සූත්‍ර තමයි අපි ගාව තියෙන්නේ’ යනුවෙන් පවසා සිටියේය.

හෝමාගම රැස්වීම ගැන මෛත්‍රී කනගාටුවෙන්

මෛත්‍රීපාල සිරිසේන අගලවත්තේ ශ්‍රී ලංකා නිදහස් පක්ෂයේ රැලියට සහභාගි වී හෝමාගම රැලියට සහභාගි වීමට ගියේය. එම රැලියට එතරම් ජනතාවක් පැමිණ නැතැයි දැනගත් මෛත්‍රීට කේන්ති ගොස් හෝමාගම සංවිධායක ගාමිණී තිලකසිරිට ඒ පිළිබඳ චෝදනා කළේය.

අගලවත්තේ රැලියට වැඩි ජනතා සහභාගිත්වයක් ලැබීම ගැන සතුටින් සිටි මෛත්‍රීට හෝමාගම රැලිය දුටු විට කනගාටුවක් ඇති විය. මෛත්‍රී පමා වී හෝමාගම රැලියට පැමිණියේද මෙම හේතුව නිසාය.

මෛත්‍රී සමග මෙම රැලි දෙකටම සහභාගි වූ හිතවතෙකු ඊට පසුදින කොළඹ පැවැති විවාහ උත්සවයකදී හිටපු අමාත්‍ය බැසිල්ට හමුවිය. ‘ඉතිං කොහොමද දේශපාලන තත්ත්වය ?’ බැසිල් කතාව ආරම්භ කරමින් පැවසීය. “වරදක් නැහැ සර් අපේ දේශපාලනය අපි  කරනවා. හෝමාගම රැස්වීම ගැන ජනාධිපතිතුමා ලොකු කේන්තියකින් ඉන්නේ. මුළු ගමනම ගියේ මාත් එක්ක. හැබැයි අගලවත්තේ රැස්වීම ගැන ලොක්කා සතුටින් හිටියේ. ඒත් හෝමාගම රැස්වීම හින්දා ඒ ඔක්කොම හේදිලා ගියා” යැයි හිතවතා පිළිතුරු දුන්නේය.

ප්‍රසන්නගේ හඬ එකවරම නැතිව යයි

ඒකාබද්ධ විපක්ෂයේ කැඳවුම්කරු මෙන්ම එහි කැපී පෙනෙන කථිකයකුද වන ප්‍රසන්න රණතුංග පසුගිය සතියේ අකරතැබ්බයකට මුහුණදුන්නේය. අකරතැබ්බයට මුල වූයේ ප්‍රසන්නගේ හඬ එකවරම නැතිව යාමයි. කතා කරගන්නට නොහැකි වූ ප්‍රසන්න හදිසියේම කොළඹ පෞද්ගලික රෝහලකට ඇතුළත් කෙරුණේ පසුගිය ඉරිදාය.

ප්‍රතිකාර ලබන්නට ආ ප්‍රසන්න පරීක්ෂා කරන්නට පැමිණි වෛද්‍යවරුන් කීවේ ප්‍රසන්නට හඬ නැතිව ගියේ අත්‍යවශ්‍යම වේලාවක බවය. “මන්ත්‍රීතුමාට කතා කරන්න බැරිව ගියේ කතා කරන්න ඕනේම වෙලාවෙනේ” කී වෛද්‍යවරු නියමිත ප්‍රතිකාර ලබාදී වැඩිදුරටත් උපදෙස් දුන්නේ දින කිහිපයක් විවේකීව සිටින ලෙසයි.

ප්‍රසන්න රෝගී වී ඇති බව දැනගන්නට ලැබුණු ඒකාබද්ධ විපක්ෂයේ මන්ත්‍රීවරු වැල නොකැඩී රෝහලට එන්නට පටන්ගත්හ. එහෙත් එසේ ආ බොහෝ මන්ත්‍රීවරුන්ට ප්‍රසන්න මුණගැසෙන්නට ඉඩක් නොලැබුණේ කතා කරන්නට බැරිව ගොස් සිටි ප්‍රසන්න බැලීමට ඉඩදීම වෛද්‍ය නියමයෙන් සීමා කර තිබුණු නිසාවෙනි.

මේ අතර ප්‍රසන්නගේ රෝගය ගැන දැනගන්නට ලැබුණු වහාම මහින්ද දුරකථන ඇමතුමක් ගත්තද ප්‍රසන්නට කතාකරන්නට පුළුවන්කමක් තිබුණේ නැත. අන්තිමට ප්‍රසන්න සහ මහින්ද අතර කතාබහට අතරමැදියෙකු ලෙස සහභාගි වන්නට සිදුවුණේ ප්‍රසන්නගේ දියණියටය.

“ සර් මට මෙහෙම ඉන්න බැහැ. මම මිනුවන්ගොඩ ආසනයේ භාර ගත්ත රැස්වීම් තියෙනවා. ඒවට කොහොම හරි සහභාගි වෙන්න ඕනේ ‘ ප්‍රසන්න දියණියගේ මාර්ගයෙන් කීවේය.

“ පිස්සුද ප්‍රසන්න, කොහොම හරි ඔය ලෙඩේ හොඳ කරගන්න. ඒක තමයි වැදගත්ම දේ ‘ මහින්ද ප්‍රසන්නට උපදෙස් දුන්නේය.

“ මේ වෙලාවෙම මට මේ ලෙඩේ හැදිච්ච එකනේ වැඩේ. මට දුක රැස්වීම්වලට යන්න බැරිවෙන එක තමයි ‘ ප්‍රසන්න පැවසුවේය.

“ ඕවා ‍ඔහොම තමයි. අපි කොහොම හරි වැඩටික කරමු. ඉස්සෙල්ලා ඔයා සනීප වෙන්නකෝ ‘ කී ම?හින්ද ප්‍රසන්නව අස්වැසුවේය. අවසානයේදී ප්‍රසන්න රෝගය සුවපත් කරගන්නා විට දින ගණනාවක් ගතවී තිබුණි. රෝගය සුව වූ වහාම ප්‍රසන්න යළිත් මිනුවන්ගොඩ ගියේ භාරගත් රැස්වීම්වලට සහභාගි වන්නටය.

දෙගොලෝලෝ බොරු විරසකයක් පෙන්නලා ඡන්ද ටික කඩා ගන්න හදනවා

ඒකාබද්ධ විපක්ෂයේ පක්ෂ නායකයන්ගේ රැස්වීම පසුගිය අඟහරුවාදා පැවැත්වුණේ මහින්දගේ විජේරාම පෙදෙසේ නිල නිවසේදීය. ඒ මහින්දගේ ප්‍රධානත්වයෙනි. එහිදී ප්‍රධාන වශයෙන් අවධානය යොමු කෙරුණේ බැඳුම්කර වාර්තාව සම්බන්ධයෙනි. එහිදී මන්ත්‍රීවරුන් කීවේ බැඳුම්කර වාර්තාව යට ගැසීම ආණ්ඩුවේ අරමුණ වී ඇති බවයි.

“ ආණ්ඩුවට දැන් ඕනේ වෙලා තියෙන්නේ බැඳුම්කර කොමිසමේ වාර්තාවෙන් එන චෝදනා ටික යට ගහන්නයි. වාර්තාවේ තියෙන කරුණු ගැන නීතිය ක්‍රියාත්මක කරන්නේ නැතුව දැන් එනවා 2015ට ‍ඉස්සර වෙච්ච ඒවා ගැන කියන්න ‘ යැයි මහින්දානන්ද පැවසීය.

“ මම වගකීමෙන් කියනවා 2008- 2015 කාලයේ ඔය කියන විදිහේ කිසිම බැඳුම්කර වංචාවක් සිද්ධ වෙලා නැති බව. පුළුවන් නම් කොමිසම් එකක් නෙමේ හතක් දාන්න කියන්න. එතකොට අපිටත් පුළුවන්නේ ගිහින් සාක්කි දෙන්න. ඔය හදන්නේ තමන්ට එල්ල වෙලා තියෙන චෝදනා අපේ පැත්තට දාලා ඇඟ බේරගන්නයි ‘ මහින්ද අවධාරණය කළේය.

“ ජනාධිපතිවරයාට තියෙන්නේ තැන් තැන්වල රැස්වීම් තියලා යටිගිරියෙන් කෑගහන්නේ නැතුව නීතිය ක්‍රියාත්මක කරලා පෙන්නන එකයි ‘ ප්‍රසන්න අපහසුවෙන් මෙන් කීවේ උගුරේ අමාරුවද තිබියදීය.

“ බැඳුම්කර වාර්තාව පාර්ලිමේන්තුවට ඉදිරිපත් නොකළාට වෙන වෙන අයගේ අත්වලට නම් ලැබිලා තියෙනවා කියලයි ආරංචිය. රවි කරුණානායක හැම තැනම කිය කියා යනවා එයාට වාර්තාව ලැබුණා කියලා. එහෙම ලැබෙන්නේ කොහොමද?’ බන්දුල ඇසුවේය.

“ මෙයාලා දැනගෙන හිටියා වාර්තාව පාර්ලිමේන්තුවට දැම්මොත් වැඩේ වරදිනවා කියලා. ඒක තමයි අගමැතිගේ විශේෂ ප්‍රකාශයක් දාලා හෙමිහිට ලෙස්සලා ගියේ ‘ යැයි රෝහිත පැවසීය.

“ මේ ආණ්ඩුවේ විශේෂ ප්‍රකාශ දැන් විහිළුවක් වෙලා. එක පැත්තකින් ජනාධිපති විශේෂ ප්‍රකාශයක් කරනකොට අනෙක් පැත්තෙන් අගමැති විශේෂ ප්‍රකාශ තුනක් කරනවා” නාමල් කීවේය.

“එක්සත් ජාතික පක්ෂයේ මන්ත්‍රීවරුන් ජනාධිපතිවරයාට තැන තැන බොරුවට බැන බැන යනවා. මේකත් මේ දෙගොල්ලෝ කතා වෙලා කරන දෙයක්. නිදහස් පක්ෂයේ අය බොරුවට අගමැතිව විවේචනය කරනවා වගේ යූ.ඇන්.පී. ය. ජනාධිපතිවරයාව විවේචනය කරනවා” යැයි මහින්දානන්ද පැවසීය.

“මේ ගොල්ලෝ හිතන් ඉන්නේ මේ වගේ බොරුවලට ජනතාව රැවටෙයි කියලා. මිනිස්සු දැන් ජනාධිපතිව වගේම අගමැතිවත් හොඳට අඳුනනවා. ජනාධිපතිවරයා පසුගිය මහ මැතිවරණයේදීත් අපේ ජයග්‍රහණය වළක්වන්න මේ වගේ උපක්‍රම පාවිච්චි කළා. මේ පාර ආණ්ඩුවට ඡන්දෙ ලැබෙන්නේ නැහැ කියලා දැනගත්තම දෙගොලෝලෝ බොරු විරසකයක් පෙන්නලා ඡන්ද ටික කඩා ගන්න හදනවා” ප්‍රසන්න පෙන්වා දුන්නේය.

“බොරුකාරයන්ට මේ පාර ඡන්දෙන් හොඳ උත්තරයක් හම්බ වෙයි” නාමල් පැසවුවේ සිනාසෙමිනි.

මෛත්‍රීගේ රැලියට ගිය ඒකාබද්ධයේ මන්ත්‍රී

ශ්‍රී ලංකා නිදහස් පක්ෂයේ පළමු ජනරැලිය පසුගියදා පැවැත්වුණේ අනුරාධපුරයේදීය.  රැස්වීම පැවැත්වෙන අතරතුර ඒකාබද්ධ විපක්ෂයේ ෂෙහාන් සේමසිංහ සල්ගාදු ක්‍රීඩාංගණය අසලට ගියේය. වාහනයෙන් නොබැස සල්ගාදු ක්‍රීඩාංගණය අසලට වී ෂෙහාන් රැස්වීම නිරීක්ෂණය කරමින් සිටින අතරතුර දුමින්ද දිසානායකගේ ලේකම්වරයෙකු ෂෙහාන් අසලට ආවේය.

“මොකද සර් මේ වාහනේට වෙලා. අපේ පැත්තට එන්නවත් හිතුවාද?” ලේකම්වරයා සිනාසෙමින් ඇසුවේය.

“අපෝ පිස්සුද? මම මේ නිකන් ආවේ. ඒක නෙමේ කෝ සෙනඟ?’ ෂෙහාන් ඇසුවේ රැස්වීම පටන් ගෙන තිබුණද සැලකිය යුතු ජන සහභාගිත්වයක් දකින්නට නොතිබුණු නිසාය.

“වැඩක් නෑ සර් කියලා. අපි කොච්චර කියනවාද මේ මහ අයට. අපි කියන දෙයක් කනකටවත් ගන්නේ නැහැනේ” ලේකම්වරයා පැවසීය.

“ඒක තමයි. දැන්වත් ඔයාලා හරි පැත්ත තෝර ගන්න. මේකෙන්ම තේරෙනවානේ රටේ තියෙන තත්ත්වය මොකක්ද කියලා. දැන් තීන්දුවක් ගන්න කාලේ හරි” යැයි ෂොහාන් පැවසීය.

“අපි කිව්වට අහන්නේ නැහැනේ සර්. මං යන්නම්. ඔබතුමා එක්ක මං කතා කළා කියලා දැනගත්තොත් මගේ රස්සාවත් ඉවරයි” යැයි කී ලේකම්වරයා යන්නට ගියේය.

අති බ්හිසුණු අහුන්ගල්ල දුම්රිය-බස් රථ අනතුරට අදට වසර 29ක්

අහුන්ගල්ල ප්‍රදේශයේදී සිදු වූ අතිබිහිසුණු දුම්රිය – බස් රථ අනතුරට අද (17දා) දිනයට වසර 29ක් සපිරේ. මෙම ලිපිය පළවනුයේ ඒ නිමිත්තෙනි.


Poto - 30

ශ්‍රී ලාංකේය ඉතිහාසය තුළ බිහිසුණුම බස් රථ – දුම්රිය අනතුර සිදු වූයේ 1989 ජනවාරි 17 වැනිදා අහුන්ගල්ලේදීය. එහිදී පාසල් සිසු සිසුවියන් 38 දෙනෙකු ඇතුළු 40 දෙනෙක් ජීවිතක්‍ෂයට පත්වූහ. ඉතිහාසයේ කුමන හෝ වර්ගයක වාහනයක් දුම්රියක ගැටීම තුළ වැඩිම පිරිසක් මියගියේ මෙම අනතුරින්ය.

අම්බලන්ගොඩ සිට ඌරගහ දක්වා ධාවනය වූ ලංකා ගමනාගමන මණ්ඩලයට අයත් බස් රථයක් අහුන්ගල්ල දුම්රිය හරස් මාර්ගයේදී අලුත්ගම සිට ගාල්ල දක්වා ධාවනය වූ මන්දගාමී දුම්රියේ ගැටීමෙන් මෙම අනතුර සිදුවිය. එකල අහුන්ගල්ල – ඌරගහ මාර්ගයේ ධාවනය වූයේ මෙම බස් රථය පමණි. වර්තමානයේ මෙන් එදා පෞද්ගලික බස් රථ මෙම මාර්ගයේ ධාවනය නොවීය. පොල්අතුපළාත, ලෑලිහේත්තුව, කටුවිල, නෙල්ලිගොඩ, ගල්වෙහෙර, වැලිකන්ද, බෝගහපිටිය, මරදාන ආදී ප්‍රදේශ රැසක පාසල් සිසුසිසුවියන් අම්බලන්ගොඩ, බළපිටිය, අහුන්ගල්ල ප්‍රදේශවල පාසල් වෙත ආවේ, ගියේද මෙම බස් රථයෙනි. පාසල නිමවී පොත්මිටි තුරුලු කරන් කුසගින්නේ නිවෙස් බලා එමින් සිටි පාසල් සිසු සිසුවියෝ 38 දෙනෙක් මෙම අනතුරින් මරණයට පත්වූහ. එදා අහුන්ගල්ල හා අවට ගම්මාන එකම මළගෙයක් බවට පත්ව තිබිණි. දෙන්නා තුන්දෙනා මෙන්ම සිවුදෙනා ආදී වශයෙන් එකට භූමදානය කිරීමට සිදුවිය.

එකල අහුන්ගල්ල මෙන්ම දිවයිනේ බොහෝ දුම්රිය හරස් මාර්ග අනාරක්ෂිත තත්ත්වයේ පැවැතිණි. ඒවා කිසිවකට ගේට්ටු සවිකර තිබුණේ නැත. අහුන්ගල්ල දුම්රිය හරස් මාර්ගය අසල දුම්ර්ය මාර්ගය ආසන්නයට වන්නම ගොඩනැගිලි ඉදිකර තිබීම හේතුවෙන් දුම්රියේ පැමිණීම දැකගන්නට ලැබුණේ දුම්රිය මාර්ගය අසලටම පැමිණි පසුවය. දුම්රියක් පැමිණෙන බවට අහුන්ගල්ලේදී බොහෝ වාහන හිමියන්ට එකල දැනුම් දුන්නේ අසල්වැසි කාන්තාවකි. ඇය මේ වන විට මියගොසිනි. මෙදිනද එම කාන්තාව අත් ඔසවා කෑගසමින් ඒ බව දැනුම් දුන්නද, බස්රථයේ රියදුරා බස්රථය නතර කළේ දුම්රිය මාර්ගය මතටම බස්රථය ගෙන ඒමෙන් පසුවය. දුම්රිය දැකීමෙන් රියදුරු බියට පත්වීම මත බස් රථය දුම්රිය මාර්ගය මත තිබියදීම එහි එන්ජිම නතර වී තිබිණි.

Poto - 27

1980 පෙබරවාරි 08 වැනිදා පුහුණු වන දුම්රිය රියදුරෙකු ලෙස දුම්රිය දෙපාර්තමේන්තුවට එක්වූ බළපිටියේ ඒ.ආර්. ද සිල්වා මහතා මෙම දුම්රියේ රියදුරු ලෙස කටයුතු කරමින් සිටියේය. ඔහු 1985 වසරේ බලවේග කට්ටල දුම්රිය රියදුරෙකු ලෙස පත්වීම් ලැබ වසර 02ක් කොළඹ බලවේග ධාවනාගාරයේ සේවය කර 1987 දී ස්ථාන මාරුවක් ලබා ගාල්ල ධාවනාගාරයට අනුයුක්තව සේවය කරමින් සිට තිබිණි. ඔහුට නියමිතව තිබුණේ ගාල්ල – අලුත්ගම මන්දගාමී දුම්රිය ධාවනය කිරීමය. මෙදින ගාල්ල – අලුත්ගම බලවේග කට්ටල දුම්රියේ යම් දෝෂයක් හේතුවෙන් %උ-2^ වර්ගයේ ජර්මන් එන්ජිමක් සහිත අංක 704 දරන දුම්රිය ධාවනය කිරීම මොහුට භාරවිය. අලුත්ගමින් ගාල්ල දක්වා ගමන් ආරම්භ කළ දුම්රිය ප.ව. 2.25ට කොස්ගොඩ දුම්රිය නැවතුම්පළේ නවතා 2.30 වන විට අහුන්ගල්ල දුම්රිය නැවතුම්පළට ළඟාවෙමින් තිබූ බවත්, එක්වරම දුම්රිය මාර්ගයට ප්‍රවිෂ්ට වූ බස් රථය හා දුම්රිය අතර දුර, ඉතා අඩු වූ හෙයින් කිසිවක් කරකියාගත නොහැකි වූ බවත් ඒ.ආර්. ද සිල්වා මහතා සිද්ධිය විමර්ශනය කළ ඒක පුද්ගල කොමිසම හමුවේ පසුව ප්‍රකාශ කර තිබිණි. දුම්රියේ මධ්‍යයේ වැදුණු බස් රථය කොටස් දෙකකට කැඩීගිය බවත්, සිසුන් දුම්රිය මාර්ගය මැදට වැටීමෙන් දුම්රියට හසු වූ බවත් ඔහු එහිදී ප්‍රකාශ කර තිබිණි. එවකට ජනාධිපති රණසිංහ ප්‍රේමදාස මහතා සිද්ධිය සම්බන්ධයෙන් සොයා බැලීමට ඒක පුද්ගල ජනාධිපති කොමිසමක් පත්කළේය. ඒ හිටපු අභියාචනාධිකරණ විනිසුරු ඩී.ජේ. ජයලත් මහතාගේ ප්‍රධානත්වයෙනි. දුම්රිය රියදුරුවරයා ඉහත සාක්ෂිය ලබා දුන්නේ මෙම කොමිසම හමුවේය. එයට අමතරව ජනපති ආර්යා හේමා ප්‍රේමදාස මහත්මිය අහුන්ගල්ලට එවා අනතුර පිළිබඳ සොයා බලා එයින් විපතට පත්වූවන්ට සහන සැලසීම සම්බන්ධයෙන් කටයුතු කිරීමටද උපදෙස් ලබාදී තිබිණි. එයින් පසුව රුපියල් දහසක (1,000) මාසික දීමනාවක් මත ජනසවිලාභීන් යොදවා අනාරක්ෂිත දුම්රිය හරස් මාර්ගවලට උණබම්බු ගේට්ටු සවි කිරීමටද ජනාධිපති ප්‍රේමදාස මහතා පියවර ගත්තේය. දුම්රිය හරස් මාර්ගවලට උණබම්බු ගේට්ටු වැටුණේ මෙම අනතුර නිසාය. ලංකා ගමනාගමන මණ්ඩලය අනතුරෙන් මිය ගිය පුද්ගලයන්ට හා තුවාල ලැබූවන්ට වන්දි ගෙවීය. ඒ මිය ගිය අයෙකුට රුපියල් 25,000ක් වශයෙන් හා තුවාල ලැබූවන්ට රුපියල් 50,000 සිට 1,00,000 දක්වා ආදී වශයෙනි. නමුත් ජීවිත අහිමි වූවන්ගේ හා තුවාල ලබා ආබාධිත වූවන්ගේ පවුල් ජීවිත ගොඩ ගැනීමට එම මුදල් කිසිසේත් ප්‍රමාණවත් නොවීය. අනතුර සම්බන්ධයෙන් බස් රථයේ රියදුරුට එරෙහිව අහුන්ගල්ල පොලීසිය බළපිටිය මහේස්ත්‍රාත් අධිකරණයේ නඩු පැවරීමටද පියවර ගෙන තිබිණි. නඩුව අවසානයේ එහි රියදුරුට වසර 190ක සිරදඬුවම් නියම කිරීමටත්, රියදුරු බලපත්‍රය අත්හිටුවීමටත් මහේස්ත්‍රාත්වරයා නියෝග කර තිබිණි. අනතුරින් මිය ගිය අය සිහිපත් කිරීම සඳහා ස්මාරකයක් ඉදිකිරීමටද එකල කිසියම් වූ සංවිධානයක් මුදල් ලබා දුන්නේය. විපතට පත් පවුල් යළි ගොඩනැගීමටද ඒ අතර මුදල් විය. නමුත් එම මුදලින් ගොඩනැගූ පවුලක්ද නැත. එම මුදල්වලට සිදුවූයේ කුමක්ද යන්නද අදටත් කිසිවෙකු නොදනී. අවසානයේ ආසන්න විහාරස්ථානයකට ප්‍රවිෂ්ට වීමේ තොරණක් එම මුදලින් ඉදිකිරීමට යම් කණ්ඩායමක් පියවර ගෙන තිබිණි. එම තොරණේ පාමුල අනතුරින් මිය ගිය පිරිස් සිහිපත් කිරීමට එය ඉදිකළ බවද සඳහන් කර තිබේ.

Poto - 28

අනතුරින් බරපතළ තුවාල ලබා තවමත් ආබාධිත තත්ත්වයේ පසුවන කිහිප දෙනෙකුගේ තොරතුරු සෙවීමට පසුගියදා අපි අහුන්ගල්ල, කටුවිල, නෙල්ලිගොඩ, මරදාන ප්‍රදේශයේ සංචාරය කළෙමු. එහිදී හමුවූ කිහිපදෙනෙක් හා ඔවුන් මෙන්ම ඔවුන්ගේ පවුල්වල ඥාතින් පළකළ අදහස් පහත දැක්වේ.
අහුන්ගල්ල, සී.පී. ද සිල්වා මාවතේ පදිංචි 
ඩී. සමන් මෙන්ඩිස් (අවු.48) මහතා,
&මම හෑගල්ල මහා විද්‍යාලයෙන් සාමාන්‍ය පෙළ සමත් වෙලා උසස් පෙළ කරන්න බළපිටිය රේවත විද්‍යාලයට ගියා. 1986 අගෝස්තුවල පන්ති පටන් ගත්තේ. මාස කිහිපයයි ඉස්කෝලෙට ගිහින් වෙන්නේ. මම අදටත් බෙහෙත් බොනවා. අත් කකුල් කඩල ගියා. බඩේ, පපුවේ සැත්කම් කරල තිබෙනවා. ඒ කාලයේ මාස 02ක් විතර සිහිය නැතුව ඉඳල තියෙනවලු. දැන් ස්නායු ආබාධයක් තියෙනවා. මාසෙකට රුපියල් 1,800ක් විතර යනවා. අක්කයි, නංගියි, මමයි, අම්මයි ඉන්නේ. මම ලෙඩෙක්. අක්කයි, නංගියි මම ගැන වෙහෙසෙනවා. ඒ නිසා කවුරුවත් විවාහ වෙලා නැහැ. තාත්තාගේ විශ්‍රාම වැටුපෙන් ජීවත් වෙන්නේ. අනතුර නිසා අපේ පවුලම විනාශ වුණා. දැන් කවුරුවත් අපි ගැන හොයලා බලන්නෙත් නැහැ.* 
මෙම අනතුරින් දැඩි ලෙස ආබාධිත තත්ත්වයට පත් වූ තවත් අයෙකු වන්නේ එවකට අහුන්ගල්ල, පොල්අතුපළාත ප්‍රදේශයේ පදිංචිව සිටි ඩී. උෂානි ඉමල්කා ද සිල්වා (අවු.46) මෙනෙවියයි. 
ඇය මේ වන විට සිය නැගණියගේ අහුන්ගල්ල, ගල්වෙහෙර නිවසේ ජීවත් වෙයි. ඇය සම්බන්ධයෙන් නැගණිය පැවසුවේ මෙවැන්නකි.
&පොඩි අක්කා, බළපිටිය රේවත ජාතික පාසලේ ඉගෙන ගත්තේ. අනතුර සිදුවන විට 10 වැනි ශ්‍රේණියේ හිටියේ. අනතුරෙන් පොඩි අක්කාගේ ඔළුව මොකක හරි වැදිලා. දැන් හරියට සිහියක් නැහැ. පොඩි එකෙක් වගෙයි හැසිරෙන්නේ. කන්න දුන්නොත් කනවා. නැත්නම් ඔහේ ඉන්නවා. කොහේවත් එක්ක යන්න බැහැ. බස් දකින විට බයයි. කෑගහනවා. තාත්ත මැරෙන විටත් කිව්වේ පොඩි අක්කා හොඳින් බලා ගන්න කියලා. අපිත් දුප්පත්. පුළුවන් විදියට උදව් කරනවා. අනතුර නිසා අක්කාගේ ජීවිතයම විනාශ වුණා. අපි ඉතින් පින් දහම් කරනවා ඊළඟ ආත්මයේ මනුෂ්‍ය ආත්මයක් ලබාගන්න කියලා. මේ ආත්මයේ අක්කාගේ ජීවිතේ ඉවරයි. හොඳට ඉගෙන ගත්තා. අනතුර නොවුණා නම් අක්කා අද කොහොම ඉඳීවිද?'

Poto - 31
අහුන්ගල්ල, කටුවිල පදිංචි අගම්පොඩි භද්‍රාණි ද සොයිසා (අවු.49) හා අගම්පොඩි ස්වර්ණපාලි ද සොයිසා (අවු.43) සහෝදරියන්ය. ස්වර්ණපාලි ඒ වන විට බළපිටිය රේවත ජාතික පාසලේ 09 වැනි ශ්‍රේණියේ ඉගෙනුම ලබමින් සිටි අතර, ඇය අනතුර සිදු වූ බස්රථයේ පාසල ඇරී නිවසට පැමිණෙමින් සිටියාය. ඇයගේ මව වන ගීමුණි ලීලාවතී කවිරත්න මහත්මිය හා වැඩිමහල් සහෝදරිය වන භද්‍රාණි වෙනත් අවශ්‍යතාවකට අම්බලන්ගොඩ ගොස් ආපසු පැමිණෙමින් සිටියාය. අනතුරෙන් මව මිය ගිය අතර, ස්වර්ණපාලි හා භද්‍රාණි බරපතළ තුවාල ලැබූහ. ස්වර්ණපාලිගේ වම් පාදයේ දණහිසින් පහළ කොටස ඉවත් කර තිබේ. ඇය අදටද ගත කරනුයේ දුක්ඛිත ජීවිතයකි. සිය දුක්ඛිත ජීවිතය පිළිබඳ ඇය මෙලෙස විස්තර කළාය.
&මට වන්දි හැටියට රුපියල් 75,000ක් දුන්නා. අනතුරින් පස්සේ අපේ ජීවිත සම්පූර්ණයෙන්ම වැටුණා. ඉස්සර දැන් වගේ මේ පාරේ බස් තිබුණේ නැහැ. කිහිලිකරුවෙන් හෝ රෝද පුටුවකින් පාසල් යන්න බැරි නිසා පාසල් ගමන නැවතුණා. අනතුරින් පස්සේ පාසල් ගියේ නැහැ. ඒ කාලේ ඒ ගැන තේරුමක් තිබුණෙත් නැහැ. ඉගෙන නොගත් එකේ පාඩුව දැන් තේරෙනවා. මම ඒ කාලේ හොඳට ඉගෙන ගත්තා. දැන් ඉතින් අපි ගැන කවුරුවත් හොයලා බලන්නේ නැහැ. පත්තරවලට විතරයි මෙහෙමවත් අපිව මතක් වෙන්නේ. අපට ඒ කාලේ ගොඩක් උදව් කළේ මඩිහේ පඤ්ඤාසීහ හාමුදුරුවෝ. වලගෙදර අමරවංශ හාමුදුරුවෝත් ගොඩාක් උදව් කළා. අර කෝච්චියේ පැටලිලා තිබෙන්නේ අපේ අම්මාගේ සාරියයි. අම්මා මතක් වෙන විට අදටත් විශාල කනගාටුවක් දැනෙනවා.* 
ලියනගේ ජානක පුෂ්ප කුමාර (අවු.42) මෙම අනතුරින් බරපතළ තුවාල ලැබූ තවත් අයෙකි. අහුන්ගල්ල, මරදාන පදිංචිව සිටින ඔහු මෙලෙස පැවසීය.
&මම රේවත ජාතික පාසලේ 08 වැනි ශ්‍රේණියේ ඉගෙන ගත්තේ. මම සාමාන්‍යයෙන් මේ බස් එකේ එන්නේ නැහැ. කොස්ගොඩ බස් එකේ ඇවිත් අහුන්ගල්ල හන්දියෙන් බැහැල පයින් ගෙදර එන්නේ. එදාත් මම කොස්ගොඩ බස් එකේ ඇවිත් අහුන්ගල්ලෙන් බැස්සා. හොඳටම වහිනවා. වැස්ස පායනකම් බස් හෝල්ට් එකේ ඉන්න විට ඌරගහ බස් එක ආවා. ඉතිරි ටික දුර යන්නයි මේ බස් එකට නැග්ගේ. මට බරපතළ තුවාල වුණා. ශරීරයේ වම් පැත්තට ගොඩක් තුවාල වෙලා තිබුණා. වම් අත, වම් කකුල කිහිප තැනකින් කැඩිලා තිබුණා. වම් ඇහැටත් තුවාල වෙලා තිබුණා. දැනටත් වම් අත නවන්න දිග අරින්න බැහැ. බඩේ, පපුවේ ලොකු සැත්කම් දෙකක් කරලා තිබෙනවා. පාසල් අධ්‍යාපනය කඩාකප්පල් වුණා. මාස 04ක් විතර ගාල්ලේත්, කොළඹත් රෝහල්වල හිටියා. දැන් ඉතින් වෙල්ඩින් වැඩ කරනවා. වැඩිම තුවාල වුණේ මටයි කියලයි කියන්නෙ. අපි ගැන රජය සැලකිල්ලක් දක්වන්න ඕන.* මෙම අනතුරින් විපතට පත්වූවන් බොහෝය. මිය ගිය අයද බොහෝය. දරුවන් අහිමි වීමෙන් අසරණ වූ දෙමවුපියෝද බොහෝ සිටිති. ගල්වෙහෙර උපුල්, නෙල්ලිගොඩ දුලීකා, චම්පා ද සොයිසා සහ නන්දනී ද සොයිසා දෙසොහොරියන්, සුනන්දලතා ද සිල්වා, සම්පත් සංජීව, නිරෝෂා කුමාරී, ප්‍රදීපා ද සිල්වා, රසිකලතා ද සිල්වා, මෙන්ම ආදම්බාවා අසානි උම්මා ගුරුවරියද මිය ගිය අය අතර සිටිති. 

Poto - 32
අසානි උම්මා, සමන්තුරේ තරුණියකි. ඇය බළපිටියේ අසාහිර් මොහොමඩ් ලෙබ්බේ හා ප්‍රේම සම්බන්ධයක් ගොඩනගා ගන්නේ ඔවුන් 1974 දී ලංකා විශ්වවිද්‍යාලයේ විද්‍යාලංකාර මණ්ඩපයේ ඉගෙනුම ලබමින් සිටියදීය. බළපිටිය මුස්ලිම් විද්‍යාලයේ ඉගැන්වීමේ නිරතව සිටි ඇය පාසල නිමවී නිවසට පැමිණෙමින් සිටියදී අනතුරට ලක්විය. 
මියගිය උපුල්ගේ මව එම්.බී. යසවතී (අවු.76) මහත්මිය අදටත් සිටින්නේ හැඬූ කඳුළින්ය. එම අනතුරින් උපුල්ගේ ඥාති නැගණියක වන චින්තා ප්‍රියදර්ශනීද (එවකට අවු.12) බරපතළ තුවාල ලැබුවාය. මෙම අනතුරින් තුවාල ලැබූවන් රෝහල් වෙත ගෙන යෑමට උපකාර කළ අහුන්ගල්ල මිද්දරමුල්ලේ බන්දුසිරි (අවු.65) මෙන්ම බෝගහපිටියේ උපාලි ද සිල්වාගේ මතකයන්ද අතිබිහිසුණුය. ඔවුන් ප්‍රකාශ කරන්නේ මිය ගිය හා තුවාල ලැබූවන් රෝහල් කරා ගෙන යන්නට මහත් කැපවීමකින් කටයුතු කළ බවයි. මොවුන් පිළිබඳ මතකය අවදි කරනුයේ අනතුරට වසර 29ක් පිරෙන මොහොතේ අසරණ වූ පවුල්වලට යම් සාධාරණයක් ඉටුකිරීම සඳහා බලධාරීන්ගේ අවධානය
 යොමු කරවීමටය.

අහුන්ගල්ල – තමිඳු මධුසර ලියනගේ 

ලංකාවේ දේශපාලන සංස්කෘතිය තුළ කල්මැරීම නිසා බොහෝ දේවල් හමස් පෙට්ටියට යනවා

වත්මන් ජනාධිපතිවරයාත් අගමැතිවරයා ඇතුළු ආණ්ඩුවත් බලයට පත්කිරීමට සිවිල් සංවිධානයක් ලෙස සාධාරණ සමාජයක් සඳහා වූ ජනතා ව්‍යාපාරය ආරම්භයේ සිටම පෙනී සිටියේය. දේශපාලන ප්‍රතිසංස්කරණ සිදුකිරීමේ අවශ්‍යතාව මත වත්මන් ආණ්ඩුව බලයට ගෙන ආ බව ඔවුන් පැවසූ අතර ආණ්ඩුව බලයට පත්වී වසර තුනක් ගතවී හමාරය. මේ තත්ත්වය මත සිවිල් සංවිධානවලට පොරොන්දු වූ කරුණු ආණ්ඩුව ඉටුකර තිබේ ද යන්න පිළිබඳව සාධාරණ සමාජයක් සඳහා වූ ජනතා ව්‍යාපාරයේ කැඳවුම්කරු මහාචාරය සරත් විජේසූරිය මහතා සමග සංවාදයේ යෙදුණෙමු.


sarath wijesooriya2

Q සාධාරණ සමාජයක් සඳහා වු ජනතා ව්‍යාපාරය මැතිවරණයට පෙර ඉදිරිපත් කළ අරමුණු වසර තුනත් ගතවීමෙන් පසුවත් ආණ්ඩුව ඉටුකර තිබෙන්නේ කෙසේද

2015 ජනාධිපතිවරණයට පොදු අපේක්ෂකයෙකු සොයාගෙන ඔහුව ජනාධිපති කරන්නට සෝභිත හාමුදුරුවෝ නායකත්වය ලබාදුන්නේ විධායක ජනාධිපති ක්‍රමය අහෝසි කිරීම සහ අලුත් ආණ්ඩුක්‍රම ව්‍යවස්ථාවක් සම්මත කිරීම කියන ප්‍රධාන කාර්යයන් ඉටු කරගැනීමටයි. එහිදී ප්‍රධාන තේමාව වුණේ විධායක ජනාධිපති ක්‍රමය අහෝසි කිරීම බව පොදු අපේක්ෂකයාට ඡන්දය දුන්නු නුදුන්නු මේ රටේ කවුරුත් දන්නවා. පාර්ලිමේන්තුවෙන් රට පාලනය කරන පාලන ක්‍රමයක් ප්‍රතිස්ථාපනය කිරීමයි එහි අරමුණ වී තිබුණේ.නමුත් ගතවූ වසර තුන තුළ එය ඉටුකිරීමට ආණ්ඩුව අසමත් වී තිබෙනවා. 

තත්ත්වය මෙසේ තිබියදීත් මේ සම්බන්ධයෙන් ඔබතුමාලා හඬ නගන්නේ නැත්තේ ඇයි

අපි මේ සම්බන්ධයෙන් නිරන්තරයෙන්ම හඬ නගනවා. හැට දෙලක්ෂයේ සම්මුතිය හැටියට අපි දීපව්‍යාප්ත මට්ටමෙන් සම්මන්ත්‍රණ පැවැත්වීමක් සිදුකරගෙන යනවා. ඒ වගේම සම්මන්ත්‍රණ පවත්වා තිබෙනවා. මේ පිළිබඳ නායකයන්ට කතා කර තිබෙනවා. මාධ්‍යයන්ට අදහස් පළ කරනවා. සිවිල් පුරවැසියන් විදිහට කරන්න පුළුවන් දේවල් අපි සිදුකර තිබෙනවා.

විධායක ජනාධිපති ධුරය අහෝසි කළ යුතු බවට සිවිල් සංවිධාන ප්‍රකාශ කළත් ජනාධිපතිවරයා සිය ධුර කාලය වසර පහක්ද හයක්ද කියා ශ්‍රේෂ්ඨාධිකරණයෙන් මතය විමසනවා. මේ තත්ත්වය තුළ මුලින් පැවසූ දේ වෙනස් වෙලාද

19 වැනි ආණ්ඩුක්‍රම ව්‍යවස්ථා සංශෝධනයට අනුව ධුර කාලය වසර පහක් ලෙසයි සඳහන්ව තිබෙන්නේ. ජනාධිපතිවරයා මුල් කාලයේදී ප්‍රකාශ කළේ තමන්ට අවුරුදු හතරක් ඇති කියලයි. පනත සම්මත කරන අවස්ථාවේ නීතිඥ කණ්ඩායමේ ඉල්ලීම මතයි එය පහක් දක්වා වැඩි කළේ කියා ජනාධිපතිවරයාම ප්‍රකාශ කර තිබුණා.
ජනාධිපතිවරයා පත්වන විට පැවති ව්‍යවස්ථාවේ නෛතිකභාවය තිබෙනවාද කියනක දේ වෙනම ප්‍රශ්නයක්. නමුත් මෙතැන තිබෙන්නේ දේශපාලන සදාචාරය පිළිබඳ ප්‍රශ්නයක්.
මේ ජනාධිපති පදවිය අහෝසි කිරීමට පැමිණි පුද්ගලයා වසරකින් එය දීර්ඝ කරගැනීමට කල්පනා කරනවා නම් එය හැට දෙලක්ෂයක ජනාතාවට ලබාදුන් පොරොන්දුවට කිසියම් ආකාරයක පටහැනි කටයුත්තක්.

ජනාධිපතිවරණයේදී සහ මහ මැතිවරණයේදී වත්මන් ආණ්ඩුව පාර්ශ්වය වෙනුවෙන් සාධාරණ සමාජයක් සංවිධානය විශාල වශයෙන් පෙනී සිටියා. මෙම ශ්‍රේෂ්ඨාධිකරණ මත විමසුමට ප්‍රථම සිවිල් සංවිධාන කැඳවා ජනාධිපතිවරයා මේ පිළිබඳව විමසා සිටියාද

නැහැ. අපෙන් කිසිම විමසීමක් සිදු කළේ නැහැ. එහෙම විමසීමක් සිදු කළා නම් ආණ්ඩුක්‍රම ව්‍යවස්ථාව සම්මත කිරීමේ ක්‍රියාවලිය සිදුකර ඔහු රටට වුණ පොරොන්දුව ඉටු කළා කියලා රටට කියන්න කියලා අපි ජනාධිපතිවරයාට පැහැදිලිව  කියා සිටිනවා. මෙතෙක් කිසිම ජනාධිපතිවරයෙකු ඉටු නොකළ දෙයක් තමා ඉටුකළා කියලා ජනාධිපතිවරයාට ආඩම්බරයෙන් කියන්නට පුළුවන්.
එහෙම කරලා ජනාධිපතිවරයාට තිබුණා පාර්ලිමේන්තු මැතිවරණයට ඉදිරිපත්වෙලා අග්‍රාමාත්‍යවරයා බවට වරමක් ලබාගෙන රට පාලනය කරන්න. ඇත්ත වශයෙන්ම මේ කාරණය අපි ජනාධිපතිවරයාට යෝජනා කර තිබුණා. සිවිල් සංවිධාන නියෝජිතයෝ ජනාධිපතිවරයා සමග පැවති සාකච්ඡාවලදී අපි ජනාධිපතිවරයාට පැවසුවේ විධායක ජනාධිපති ක්‍රමය අහෝසි කරලා පාර්ලිමේන්තුවෙන් රට පාලනය කිරීමට මහජන වරමක් ඉල්ලා සිටින්න කියලයි. රටට වූ පොරොන්දු ඉටුකිරීමට කැපවුණ නායකයා කවුද කියලා එවිට ජනතාව තීන්දු කරයි. ඒ අනුව ජනාධිපතිවරයාට තිබුණු වැදගත්ම දේ තමයි අග්‍රාමාත්‍යවරයා බවට පත්වෙලා පාර්ලිමේන්තුවෙන් රට පාලනය කරන ක්‍රියාදාමයට අවතීර්ණ වීම. 

රාජගිරිය ගුවන් පාලම සෝභිත නාහිමියන්ගේ නමින් නම් කිරීමට යෝජනා කිරීම පිළිබඳ සාධාරණ සමාජයක් සංවිධානයේ කැඳවුම්කරු ලෙස ඔබ සිටින්නේ කුමන මතයේද

එම ප්‍රකාශය ගැන අපි කනගාටු වෙනවා. සෝභිත නාහිමියන්ගේ නාමයට අපහාස වන ක්‍රියාවලියක් හැටියටයි අපි ඒක දකින්නේ. මේ කටයුත්ත සිදුකරන්න එපා කියලා මම ප්‍රසිද්ධ ප්‍රකාශයකුත් සිදු කළා.

ඉදිරියේදී පළාත් පාලන මැතිවරණය පැවැත්වෙනවා. වත්මන් දේශපාලන තත්ත්වය තුළ ජනතාව ඡන්දය භාවිත කළ යුත්තේ කෙසේද

මැතිවරණ ක්‍රමයේ වෙනසක් අපි අපේක්ෂා කළා. සෝභිත හාමුදුරුවනුත් ප්‍රකාශ කළේ කොට්ඨාස ක්‍රමයට නියෝජිතයෝ තෝරාගැනීමක් අවශ්‍ය බවයි. තමන්ගේ කොට්ඨාසයට තරග වදින පුද්ගලයාගේ පක්ෂය පාට සලකන්නට එපා. මේ ඉදිරිපත්වෙලා ඉන්න පුද්ගලයලන්ගෙන් තමන්ගේ බලප්‍රදේශයට නායකත්වය දෙන්න සුදුසුකම් තිබෙන පුද්ගලයා කවුද කියා තෝරාගන්න. ඔහු සීලාචාර පුද්ගලයෙක්ද, දූෂිත පුද්ගලයෙක්ද , රාජ්‍ය මුදල් අවභාවිත කළ පුද්ගලයෙක්ද, සාපරාධී ලෙස ධනය උපයාගත් පුද්ගලයෙකුද, නීතිගරුක පුද්ගලයෙක්ද කියා හොඳින් සොයා බලා තෝරා ගන්න. මේ කාරණා කල්පනා කරලා නායකා බවට පත්කර ගැනීමට සුදුසු පුද්ගලයා තමන්ගේ නායකයා බවට පත්කර ගන්න. මෙතනදී පුද්ගලයාගේ පක්ෂය කුමක්ද කියනදේ නෙවෙයි වැදගත් වෙන්නේ. තමන්ගේ කොට්ඨාසයට නායකත්වය දෙන්න පුළුවන් පුද්ගලයා තෝරා ගැනීමයි වැදගත්. ඕනෑම තලයක මහජන නියෝජිතයෝ පත්කර ගැනීමේදී ශිෂ්ට සම්පන්න නියෝජිතයන් පත්කර ගැනීමේ වගකීම තිබෙන්නේ ජනතාවට. ජනතාව බුද්ධිමත්ව ඒ කටයුත්ත ඉටුකිරීම තමයි වැදගත් වෙන්නේ.

බැඳුම්කර කොමිෂන් සභාවේ වාර්තාවත්, මහා පරිමාණ දූෂණ වංචා විමර්ශන කොමිෂන් සභාවේ වාර්තා 34 ත් මේ වනතුරු පාර්ලිමේන්තුවට ඉදිරිපත් කර නැහැ. හොරු අල්ලා දඬුවම් දීමට පැමිණි ආණ්ඩුව වසර තුනක් ගතවීමෙන් පසුවත් මේ ආකාරයට කටයුතු කිරීම ගැන ඔබේ අදහස කුමක්ද

බැඳුම්කර කොමිෂන් සභාවේ නිර්දේශ ක්‍රියාත්මක කරන තුරු රටම බලා සිටිනවා. වැරදි කළ පුද්ගලයන් අධිකරණයට ඉදිරිපත් කරලා දඬුවම් ලබාදීම කළ යුතුයි. ඒ නිසා තමා විසින් පත්කළ කොමිෂන් සභාවල නිර්දේශ කඩිනමින් ක්‍රියාත්මක කිරීම ජනාධිපතිවරයාගේ පරම වගකීමයි. මේවා කල්මරන එක ඒතරම් සුදුසු නැහැ. ලංකාවේ දේශපාලන සංස්කෘතිය තුළ කල්මැරීම නිසා බොහෝ දේවල් හමස් පෙට්ටියට යනවා. මේ නිර්දේශ ක්‍රියාත්මක නොකළොත් ජනතාවට මාධ්‍ය සන්දර්ශනයක් පැවැත්වූවා කියායි ගම්‍ය වෙන්නේ.
බැඳුම්කර කොමිසමේ නිර්දේශ ගැන ජනාධිපතිවරයා මාධ්‍යයට නිල ප්‍රකාශයයක් කළා වගේම අනෙක් වාර්තා 34 පිළිබඳවත් ඒ විදිහට කරුණු දැක්වීම කළ යුතුමයි.

ජාතික ආණ්ඩුව අවසන් කිරීමේ ඉල්ලීම් මේ වනවිට ප්‍රධාන පක්ෂ දෙකෙන්ම මතුවී තිබෙනවා. පළාත් පාලන මැතිවරණයෙන් පසුව බලහුවමාරුවක් සිදුවුවහොත් සිවිල් සංවිධාන ලෙස ඔබලා ගන්නා පියවර කුමක්ද
සිවිල් සංවිධාන ලෙස අපි හැමවිටම නායකයන්ට කියන්නේ නීතිය මත පාලන වන රටක් බිහිකිරීමට කැපවෙන්න කියලයි. එක්සත් ජාතික පක්ෂයයි, ශ්‍රී ලංකා නිදහස් පක්ෂයයි එකතු වුණේ මේ රට නීතියෙන් පලනය වන රටක් බවට පත් කරන්නට අවශ්‍ය දේශපාලන ප්‍රතිසංස්කරණ සිදු කිරීමටයි. කොහොම වුණත් බලහුවමාරුවක් වෙන්නට පළාත් පාලන මැතිවරණය හේතුවෙයි කියලා අපි කල්පනා කරන්නේ නැහැ. නෛතික වශයෙක් එහෙම කරන්න පුළුවන්ද කියන එක වෙනම කාරණාවක්. සම්මුතිවාදී ආණ්ඩුව පිහිටුවීමට නායකත්වය දෙන්නේ ජනාධිපතිවරයා සහ අගමැතිවරයා අතර ඇතිවන එකඟතාවක්. මේ සම්මුතිවාදී ආණ්ඩුව පිහිටුවීමේ අරමුණ වුණේ නව ආණ්ඩුක්‍රම ව්‍යවස්ථාවක් ඇති කරගැනීමයි. සම්මුතිවාදී ආණ්ඩුව අත්හැරියා කියන්නේ ඒ කාරණයත් අත්හැරියා කියන දෙයයි. එහෙම වුණොත් සිවිල් සංවිධාන විදිහට මේ රටේ දේශපාලන ප්‍රතිසංස්කරණ වෙනුවෙන් නැවත ක්‍රියාමාර්ගයකට අවතීර්ණ වීමට අපිට සිදුවෙනවා.

ව්‍යවස්ථාදායක සභාවේ ක්‍රියාකලාපය සම්බන්ධයෙන් ඔබේ අදහස කුමක්ද

ව්‍යවස්ථාදායක සභාවක් පත්කරන්න කියන ඉල්ලීම සෝභිත හාමුදුරුවෝ තදින්ම කළ ඉල්ලීමක්. එමගින් අපේක්ෂා කළේ රාජ්‍ය යාන්ත්‍රණය ක්‍රියාත්මක කිරීමට ආදාළ ආයතනවලට පත්කරන පුද්ගලයන්ට ස්වාධීනව තමන්ගේ වගවීම සිදුකිරීමටයි.
පොලිස්පතිවරයා, නීතිපතිවරයා, අගවිනිසුරුවරයා දේශපාලනීකරණය වීම තුළ සිදුවුණ දේවල් රටට යහපතක් වූයේ නැහැ. මේ නිසා තමයි ව්‍යවස්ථා සභාවෙන් මෙම පුද්ගලයන්ට නීතිගරුකව සේවය කිරීමේ නෛතික අවස්ථාව ලබාදුන්නේ. නමුත් වත්මන් පොලිස්පතිවරයාගේ ක්‍රියාදාමයත් සමග ව්‍යවස්ථා දායක සභාව පුද්ගලයන් පත්කළත් ඒ තුළ කිසියම් ආකාරයේ බරපතළ අඩුලුහුඬුකම් තිබෙන බව පෙනෙනෙවා. මොකද මේ පත්කරන පුද්ගලයන් සම්බන්ධයෙන් පසුවිපරමක් ව්‍යවස්ථාදායක සභාවෙන් සිදුවන්නේ නැහැ. මේක විශාල අඩුපාඩුවක්. ව්‍යවස්ථා සභාව අවශ්‍යයි නමුත් එය තවදුරටත් ප්‍රතිසංවිධානය විය යුතුයි. මේ වනවිට පොලිස්පතිවරයාට ස්වාධීනව කටයුතු කිරීමේ අවකාශය ලබාදී තිබෙනවා. එතුමාට දේශපාලනීකරණය වන්නට අවශ්‍ය නැහැ. මේ සම්බන්ධයෙන් ව්‍යවස්ථා සභාව අවශ්‍ය පියවර ගත යුතුයි.

2020 හෝ 2021 ජනාධිපතිවරණයක් පැවැත්වීමට බොහෝ දෙනා උනන්දු වෙනවා. මේ වනවිටම ඇතැම් පක්ෂ ඒ සඳහා අපේක්ෂකයන් පවා ප්‍රකාශ කර තිබෙනවා. නමුත් ජනාධිපති ධුරය අහෝසි කිරීමට ඔබලා වෙහෙසෙනවා. මේ තත්ත්වය මත 2020 හෝ 2021 ජනාධිපතිවරණයක් පැවැත්වුණොත්

විධායක ජනාධිපති ධුරය අහෝසි නොකර ජනාධිපතිවරණයක් පැවැත්වීමේ තැනට කටයටුතු සිදුවුණොත් අපිට ඒ අවස්ථාවේ දේශපාලනික තීන්දුවක් ගන්නට වෙන්නේ ඒ වනවිට පවතින දේශපාලන යථාර්ථය මත. දූෂිතයන්ට දඬුවම් ලබාදීම, අපරාධකරුවන් අධිකරණයට ඉදිරිපත් කිරීම, කොමිෂන් සභා වාර්තා අනුව නිර්දේශ ක්‍රියාත්මක කිරීම ආදී දේවල් සිදුකිරීමට අවංකව කැපවුණේ කුමන පාර්ශ්වයද ඒ පාර්ශ්වය වෙනුවෙන් තමයි අපි එදාට පෙනී සිටින්නේ.
සිවිල් සංවිධානයක් වැඩ කරන්නේ දේශපාලන සංවිධානයක වැඩකරන ආකාරයට නෙවෙයි. දේශපාලන පක්ෂයකට තිබෙන්නේ තමන්ට බලය ලබාගැනීමේ න්‍යාය පත්‍රයක්. සිවිල් සංවිධානයේ න්‍යාය පත්‍රය සකස්වන්නේ මහජනතාවගේ අභිවෘද්ධියට අනුරූපව කටයුතු සිදුකර ගැනීම. එම කාරණය මතයි සිවිල් සංවිධානයක අරමුණු ප්‍රකාශ කිරීමට හැකියාව ඇතිවන්නේ.

ලැජ්ජා නැතිව කියන්න පුළුවන්ද අපි ගුටි කෑවා කියලා

පසුගිය සතියේ දේශපාලන කරළියේ කතාබහට ලක්වූ මාතෘකාව වූයේ පාර්ලිමේන්තුවේ ගැටුමයි. නව වසරේ පළමු හමුවම ගුටිකෙළියකින් නිමා වීම රටම හිනැස්සූ කරුණක් විය.

බැඳුම්කර ගනුදෙනුව පිළිබඳව විවාදයක් පැවැත්වීමට පාර්ලිමේන්තුව කැඳවන බව දැනුම් දුන්නද පසුව කියවුණේ විවාදය නොපැවැත්වෙන බවයි. එහෙත් පාර්ලිමේන්තුව රැස් වූ අතර මෙහිදී අගමැතිවරයා විශේෂ ප්‍රකාශයක් කරන්නට පටන් ගත්තේය. එයට විපක්ෂ මන්ත්‍රීවරු විරෝධය පළ කරන්නට වූයේ සභාවේ ඒවනවිට සගවා තිබූ බැනර් සහ පුවරු අල්ලාගෙනය. එයින් පසු අගමැතිවරයාගේ ප්‍රකාශයට විපක්ෂයේ මන්ත්‍රීවරුන් බාධා කරන්නට වූ අතර එය ගැටුමක් දක්වා වර්ධනය විය.

ලොකුගේ සහ මරික්කාර්

පාර්ලිමේන්තුවේ උද්ඝෝෂණය ගැටුමක් වූයේ මරික්කාර් සහ ගාමිණී ලොකුගේ මන්ත්‍රීවරුන් අතර වූ ආරවුලය. ගාමිණී ලොකුගේ ප්‍රදර්ශනය කළ බැනරයක් මරික්කාර් ඉරා දැමීමට උත්සාහ කළ අතර ලොකුගේ  මරික්කාර්ගේ කම්මුලට වැරෙන් පහරවල් දෙකක් එල්ල කළේය.මරික්කාර්ද එයට ප්‍රති පහර ගැසීමට උත්සාහ කළද, සභා ගැබේ සේවකයෝ ඔහුව වළක්වා ගත්හ. කාටත් හොරා සභා ගැබේ ආණ්ඩු පක්‍ෂයේ දොරකින් පිටතට පැමිණි මරික්කාර් නැවත විපක්‍ෂයේ දොරකින් ඇතුළට පැමිණියේය.එවිට ගාමිණී ලොකුගේ සිටියේ ආණ්ඩු පක්‍ෂය දෙසට හැරීය. සෙමින් සෙමින් ගාමිණී ලොකුගේ සිටින දෙසට පැමිණි මරික්කාර්, ගාමිණී ලොකුගේට වැරෙන් පහර දෙකක් එල්ල කළ වේගයෙන් දිව ගියේය. සභා ගැබෙන් පිටතට දිවගිය මරික්කාර් අතුරුදන් විය.මරික්කාර්ගේ පහරින් ඇදවැටුණු ගාමිණී දෙසට එය දුටු ප්‍රසන්න රණතුංග පැමිණියේය. එහිදී එතැන ආණ්ඩු පක්‍ෂයේ චමින්ද විජේසිරිද සිටියේය. චමින්දට වැරෙන් පහරක් එල්ල කළ ප්‍රසන්න ද මරික්කාර් පැන දිවූ දොරෙන්ම එළියට දිව ගියේය.මේ නිසා ගාමිණී ලොකුගේ සහ චමින්ද ඔවුන් දෙදෙනාගෙන් තරහ පිරිමහ ගැනීමට කටයුතු කිරීමත් සමග ගැටුම දුරදිග ගියේය. එතැනට පැමිණි ප්‍රසන්න රණවීර මන්ත්‍රීවරුන් අතරට මැදි විය. ඒ නිසා බොහෝ දෙනෙකුගේ ප්‍රහාරයන්ට ඔහු යටත් විය.

තුවාල නොවූ මන්ත්‍රීවරුත් ප්ලාස්ටර් ගහගෙන

ගැටුමට මැදි වූ ආණ්ඩු පක්‍ෂ හා විපක්‍ෂ මන්ත්‍රීවරුන් අතරින් බොහෝ දෙනෙකුට පහරකෑම් නිසා ඉදිමීම් ඇතිව තිබිණි. තවත් කිහිපදෙනෙකුට සුළු තුවාල සිදුව තිබූ අතර, බොහෝ දෙනෙක් ඒවා සඟවා සිටීමට උත්සාහ කළහ.

සභා ගැබ තුළ ගැටුම සිදුවන අවස්ථාවේ ඈතින් සිටි මන්ත්‍රීවරයෙකු ගැටුමෙන් පසුව මුහුණේ ප්ලාස්ටර් අලවාගෙන සිටිනු දකින්නට ලැබිණි. අනෙකුත් මන්ත්‍රීවරුද ඔහු දුටු විට උස් හඬින් සිනාසුණාහ.

අතින් පයින් ගහගන්න වැඩවලට අපි නැහැනේ

පාර්ලිමේන්තු සැසිවාරයට ජනතා විමුක්ති පෙරමුණින් සහභාගිව සිටියේ අනුර කුමාර දිසානායක සහ විජිත හේරත් පමණි. එසේ වුවද මන්ත්‍රී සුනිල් හඳුන්නෙත්තිද පාර්ලිමේන්තු සංකීර්ණයේ සිටියේය.පාර්ලිමේන්තුවේ සභා ගැබ තුළ එකිනෙකා පහර දී ගැනීමෙන් පසුව පාර්ලිමේන්තුව කල් තැබුණු අතර, මන්ත්‍රීවරු පිටතට පැමිණියහ. පාර්ලිමේන්තුවේ පළමු මහලේ පුස්තකාලයට සුනිල් හඳුන්නෙත්ති යමින් සිටියේ ඒ වෙලාවේය.ඒකාබද්ධ විපක්‍ෂයේ මන්ත්‍රී රෝහිත අබේගුණවර්ධන සහ ඉන්දික අනුරුද්ධද ඒ දෙසට එමින් සිටියහ. සුනිල් හඳුන්නෙත්ති දැක රෝහිත අබේගුණවර්ධන එකවරම ඇසුවේ, ‘හඳුන්නෙත්ති ඇයි සභාවට ආවේ නැත්තේ?’ කියාය.සුනිල් හඳුන්නෙත්ති එවිට පැවසුවේ, ‘අපි ඔය අතින් පයින් වැඩවලට නැහැ. අපේ වැඩ තියෙන්නේ සංවාදය පැත්තෙන් විතරයි’ කියාය.එය පවසන විට රෝහිත, සුනිල් හඳුන්නෙත්තිව විහිළුවට මෙන් තල්ලු කළේ  ‘ආ ඇත්තද?’ කියා අසමිනි.

ගුටි කෑවත් නෑ කියලා කියන්න

පාර්ලිමේන්තුව තුළ පහර කෑමට ලක්වූ මන්ත්‍රීවරුන් දෙදෙනෙක් අනෙකුත් මන්ත්‍රීවරුන් කිහිපදෙනෙකුද සමග මන්ත්‍රීවරුන්ගේ භෝජන ශාලාවට යමින් සිටියහ. මේ අතර ඉදිරියට හමු වූ වෙනත් පක්‍ෂයක මන්ත්‍රීවරයෙකු ඔවුන්ගෙන් ඇසුවේ, ‘දැන් කාටද මාරාන්තික තුවාල වුණේ? ලේ හැළීම් වුණේ කාටද මන්ත්‍රීතුමා?’ කියාය.එවිට එතැන සිටි අමාත්‍යවරයෙකු පැවසුවේ, ‘මේ වෙලාවේ ගුටි කෑවත්, කෑවෙ නෑ වගේ ඉන්න ඕන. ලැජ්ජා නැතිව කියන්න පුළුවන්ද අපි ගුටි කෑවා කියලා. සද්ද නැතිව ඉන්න එකයි කරන්න ඕන’ කියාය.

බල්ලා නිසා මඩ ගාගත් මන්ත්‍රී

නව වසරේ පළමු පාර්ලිමේන්තු සැසිවාරය වුවද, මෙවර මන්ත්‍රීවරුන්ගේ පැමිණීමේ අඩුවක් තිබිණි. මේ අතර, පාර්ලිමේන්තුවට පැමිණි පුත්තලම ප්‍රදේශයේ මන්ත්‍රීවරයෙකු සුදු සරමේ මඩපැල්ලම් සහිතව පැමිණ තිබෙන දුටු අනිකුත් අය ඒ පිළිබඳ මන්ත්‍රීවරයාගෙන් විමසා සිටියහ.

‘මන්ත්‍රීතුමා මොකද මේ මඩ ගෑවිලා?’

‘නෑ මේකයි. අපේ ගෙදර හුරතලේට හදන බල්ලෙක් ඉන්නවා. ඌ කොයි වෙලාවෙත් අපේ ඇඟට නගිනවා.’

‘පාර්ලිමේන්තු එන්න ලෑස්ති වෙලා මම එළියට ආවා විතරයි. මේ බල්ලා කොහෙද ඉඳන් දුවගෙන ඇවිත් සරමේ එල්ලුණා. මට පරක්කු වෙලා තිබුණේ ඉක්මනට පාර්ලිමේන්තු එන්න ඕන වුණා. කවුද හිතුවේ මෙහෙම වෙයි කියා. දැන් ඉතින් අයේ සරම මාරු කරන්නත් බෑනේ මෙහෙමම ඉන්නවා. වැඩිය පේන්නෙ නෑ නේද?’

‘නැහැ මන්ත්‍රීතුමා වැඩි පෙන්නේ නැහැ’

මහ බයිලා නැටුම් තරගයක් පවත්වමුද?

අගමැති රනිල් වික්‍රමසිංහ ප්‍රවීණ රංගන ශිල්පී අයිරාංගනී සේරසිංහ සමග නර්තනයක යෙදෙන ආකාරයේ වීඩියෝවක් සමාජ මාධ්‍ය ජාලා හරහා වේගයෙන් පැතිර ගියේය.

ගල්කිස්ස ප්‍රදේශයේ හෝටලයක පැවැති ඥාතියෙකුගේ මංගල උත්සවයකදී වූ මෙම සිදුවීම පිළිබඳ විවිධ තැන්වල විවිධ කතාබහ ඇති විය.

සඳුදා යොවුන් පාර්ලිමේන්තු මන්ත්‍රීවරු අගමැති රනිල්ව අරලියගහ මන්දිරයේදීද හමුවූහ. එම අවස්ථාවට ඇමති සාගලද එක්ව සිටියේය.

එහිදී අගමැතිවරයාගෙන් ප්‍රශ්න ඇසීමට යොවුන් පාර්ලිමේන්තු මන්ත්‍රීවරුන්ට හැකියාව ලැබුණු අතර, එහිදී එක් අයෙක් අගමැතිවරයාගේ නර්තනය පිළිබඳවද ප්‍රශ්නයක් ඇසීය.

‘බයිලා කලාවට හුරු නර්තනයක ඔබතුමා යෙදී සිටිනවා අපි දැක්කා සමාජ ජාලා මාධ්‍යවල. අපට ගොඩක් සතුටුයි ඔබතුමා වාගේ විනෝදකාමී නායකයෙක් හමුවීම ගැන. අපි වගේම අනෙකුත් තරුණයෝත් හිතනවා ඔබ වැනි නායකයන් සමග මීට වඩා මුසුවෙන්න අවස්ථාව ලැබුණොත් හොඳයි කියලා.’

එවිට අගමැති රනිල් මෙසේ පැවසීය.

‘ඔබතුමත් හොඳට බයිලා නටනවා වගේ. තරුණයන්ගේ ඒ දක්‍ෂකමට ත්‍යාගයක් ඇති කරමුද? ලොකු තරගයක් තියලා අපි මේ අවුරුද්දේ අවස්ථාව දෙමු. හරිද?’

මම ඩීලර් නෙමෙයි, ලීඩර් කෙනෙක්

එක්සත් ජාතික පෙරමුණේ පක්‍ෂ සම්මේලනයට එහි පක්‍ෂ නායකයෙකු වන ඇමති මනෝ ගනේෂන් සහභාගි නොවීය. එමෙන්ම ඔහු මෙවර පළාත් පාලන මැතිවරණයට තරග වදිනුයේද එජාපය සමග නොව වෙනම තනි පක්ෂයක් ලෙසය. මේ පිළිබඳ ඇමති මනෝගේ සමීපතමයන්ට වරෙක මෙසේ පවසා තිබිණි.

‘එක්සත් ජාතික පක්‍ෂයේ සම්මේලනය තිබුණා. අගමැතිතුමාගෙන් හා පක්‍ෂ මහලේකම් කබීර් හෂීම්ගෙන් මට ආරාධනා ලැබුණා. මාත් එක්සත් ජාතික පක්‍ෂයට සුබ පතනවා. ඒ පක්‍ෂය එක්ක මම අමනාප නැහැ. ඒ පක්‍ෂය තමන්ගේ වුවමනාවට පමණක් පාවිච්චි කරන පුද්ගලයන් නිසා මම ඒ පක්‍ෂය සමග තරහා නැහැ. මොකද මම මුහුණ එක්ක තරහා වෙලා නහය කපා ගන්නේ නැහැ. පරිණත හා ඉගෙනගත් කෙනෙක් මම. ඒ නිසා මම පොඩි අයට අමතක නොවන පාඩම් උගන්වනවා. 

කොළඹ ඉන්න මන්ත්‍රීවරයෙක් මට චෝදනා කරනවා අපිත් එක්ක සුහදව ඉඳලා, තරග කරලා පාර්ලිමේන්තු ගිය මනෝ ගනේෂන්ලා දැන් වෙනම තරග කරනවා කියලා. මනෝ ගනේෂන්ගේ පක්‍ෂය කොළඹින් අතුගාලා දාමු කිව්වා. අභියෝගය බාරගන්න ලෑස්තියි. පුළුවන් නම් කරන්න. දැන් කොළඹින් අයින් වෙලා ඉන්නේ එතුමායි. එතුමාට අමතක වෙලා පසුගිය වකවානුවේ කොළඹ මහ නගර සභාවේ විපක්‍ෂයට ලැබුණු ආසන සංඛ්‍යාව 23යි. එක්සත් ජාතික පක්‍ෂයට 24යි, ඒ අවස්ථාවේදීත් අපි තනිවමයි ගියේ. අපේ 06 දෙනෙක් හිටියා. ඒ 06 දෙනා එක්සත් ජාතික පක්‍ෂයට දීලා ආසන 30. ඒ පක්‍ෂයට බහුතරය ලබා දුන්නා. මේ ඡන්දයෙන් පසුව කරන්නෙත් ඒකමයි. ඒක රවි කරුණානායක මන්ත්‍රීවරයාට අමතක වෙලා. ඒක පුදුම වෙන්න දෙයක් නැහැ. කොමිසමටත් ගිහිල්ලා එතුමාට අමතක වුණා නේ. මං දන්නෑ, මට මතක නෑ කියලා ලිස්සලා ගියා.

මනෝ ගනේෂන් ජනාධිපතිතුමා සමග ඩීල් දාලා කියලා කතාවක් යනවා.“මනෝ ගනේෂන් ඩීලර් නෙමෙයි, ලීඩර් කෙනෙක්’ යැයි ආවේගයෙන් මෙන් ඔවුන්ට කියා ගෙන ගියේය.

මෛත්‍රීට එකතු වෙන එජාප ඇමතිවරු කවුද?

සමාජ සුභසාධන අමාත්‍ය එස්.බී. දිසානායක මධ්‍යවේදීන් සඳහා වාර්ෂික සුහද හමුවක් පසුගියදා සංවිධානය කර තිබිණි. අණ්ඩුව ගැනත්, එක්සත් ජාතික පක්‍ෂය ගැනත් කතා කරමින් සිටියදී මෛත්‍රීපාල සිරිසේන ජනාධිපතිවරයා සමග සිට ගැනීමට බලාපොරොත්තුවෙන් සිටින අය ගැනද ඔහු පැවසීය. යහපාලන ආණ්ඩුව පිහිටු වූ අවස්ථාවේදී එක්වීමට සූදානම්ව පසුව ඒකාබද්ධ විපක්‍ෂයට ගිය මන්ත්‍රීවරු ගැනද එස්.බී. කීවේ සියලු දෙනා සිනහ ගන්වමිනි. බැඳුම්කර සිද්ධිය ගැන කතා කළ එස්.බී. “ජනාධිපතිතුමයි, අපියි වගකීම ඉෂ්ට කරලා තියෙන්නේ. කොමිසම දාලා වාර්තාවක් හැදුවා. දැන් අපි නිදහස්. ජනාධිපතිතුමා පිට්ටනිය හදලා තියෙනවා. දැන් ඒකෙ කෙනෙක්ට ක්‍රිකට් ගහන්න පුළුවන්. තව කෙනෙක්ට ෆුට්බෝල් ගහන්න පුළුවන්. රගර් ගහන්න පුළුවන්. අපි නරඹන්නෝ වෙලා බලාගෙන ඉන්නවා’ යැයි කීවේය.

එක්සත් ජාතික පක්‍ෂය අර්බුදයක සිටින බවද විවිධ උදාහරණ සපයමින් ඔහු පැවසීය. “මට මේ ළඟදී එක්සත් ජාතික පක්‍ෂයේ කැබිනට් ඇමතිවරු තුන්දෙනෙක් කතා කළා. ඔය රාජිත වගේ නෙමෙයි නියම යූ.එන්.පී.කාරයෝ තුන්දෙනෙක්. ඒ අය ලෑස්තියි මෛත්‍රීට එකතු වෙලා ගමනක් යන්න. ඉස්සරහට බලාගන්න පුළුවන් මොනවද වෙන්නෙ කියලා. ඒ විදියට තව කට්ටිය ඉන්නවා එකතු වෙන්න’ එස්.බී. කීවේය.

එහෙත් එම ඇමතිවරුන් තිදෙනා කවුරුන් දැයි පැවසීමට තරම් එස්.බී. ඉක්මන් නොවිණි.

උපන්දින තෑග්ග – මැතිවරණ නීතියයි

ජනවාරි 12 වැනිදාට යෙදෙන සිය උපන් දිනය වෙනුවෙන් සාදයක් පවත්වන්නේ කොහේද කියමින් සජිත් ප්‍රේමදාස ඇමතිවරයාගේ දුරකථනයට ඉකුත් දින කීපයේ සිය මිතුරන්ගෙන් ඇමතුම් ගලා එද්දී ඔවුන් වෙත ලැබුණේ එකම පිළිතුරකි. ‘පාටි දාන්නෙ නෑ, ඒ වෙනුවට කරන සුභසාධක වැඩසටහනකට පුළුවන් නම් පොඩි තල්ලුවක් දෙන්න’ සජිත් කියද්දී මිතුරන් ඇසුවේ, ‘ඒ මොකක්ද?’ කියායි.

සජිත් කීවේ, ‘මම කලින් දෙබරවැවටයි, සූරියවැවටයි දුන්නා වගේ මගේ උපන්දිනය වෙනුවෙන් තවත් පාසල් 8කට බස් රථ ලබාදෙනවා. ඒකට උදව් කරන්න’ කියලයි. හම්බන්තොට සූචි ජාතික පාසල, හම්බන්තොට සහිරා ජාතික පාසල, දෙබරවැව ජනාධිපති කනිෂ්ඨ විද්‍යාලය, හම්බන්තොට ප්‍රාථමික විද්‍යාලය, අම්බලන්තොට ථේරපුත්ත ජාතික පාසල සහ තිස්සමහාරාම, පන්නෙගමුව රාජකීය විද්‍යාලය මෙවර බස් රථ ලබාදීම සඳහා තෝරාගෙන ඇති පාසල්ය.

සිය උපන් දිනය වෙනුවෙන් සංවිධානය කරන මෙම බස් රථ ප්‍රදානෝත්සවයට මැතිවරණ කොමිෂන් සභාවේ සභාපතිවරයාගෙන් ලිඛිතව අවසර ඉල්ලා යැවූ සජිත්, අනතුරුව කළේ මැතිවරණ කොමිෂන් සභාව වෙත යාමය. මැතිවරණ කොමිෂන් සභාපතිවරයා මෙන්ම සෙසු සාමාජිකයන්ද ඉදිරියේ සජිත් ඉල්ලා සිටියේ, තමන් 1994දී ක්‍රියාකාරී දේශපාලනයට පිවිසි දින සිටම උපන් දිනය වෙනුවෙන් වාර්ෂිකව ජනවාරි 12 වැනිදා සිට සති දෙකක් පුරා අඛණ්ඩව කරන සුභසාධක මෙහෙවරේ මෙවර වැඩසටහන් සඳහාද අවසර ලබාදෙන ලෙසයි.

සභාපතිවරයා සෙසු සාමාජිකයන් සමගද සාකච්ඡා කර කීවේ, ‘සංකේතාත්මකව එක උත්සවයකට විතරක් සීමා කරන්න. අනෙත් ඒවා පෙබරවාරි 10ට පස්සේ බෙදා දීමට කටයුතු කරන්න’ කියායි. ‘එහෙම කරන්නේ කොහොමද සභාපතිතුමා, මම මේ තෑගි දෙන බව ඉස්කෝල අටේම ළමයින්ටත් පොරොන්දු වෙලයි ඉන්නේ. මේක ඡන්දයක් ඉලක්ක කරගෙන කරන දෙයක් නෙවෙයි’ සජිත් කියද්දී සභාපතිවරයා කීවේ ‘කරන්න දෙයක් නෑ.. මට වචනයෙනුත්, ලිඛිතවත් දෙන්න තියෙන එකම උත්තරේ මේ වැඩසටහන නවත්වන්න කියල විතරයි’ යනුවෙනි. පසුව හමුවුණු උපන්දින සංවර්ධන සුභසාධන සංගමයේ නිලධාරීන්ට සජිත් කීවේ, ‘සංකේතයක් හැටියට උත්සවයක් පවත්වලා වැඩක් නෑ.. එහෙනම ඡන්දෙන් පස්සෙ එක දවසක ඔක්කොම බෙදා දෙනවා. එතකං මේ බස් ටික මගේ වීරවිල ගෙදර ළඟ ගාල් කරලා තියේවි’ කියාය.

අගමැතිතුමා නුවර එන නිසා මම කෑම ටිකක් හැදුවා

ජනාධිපති මෛත්‍රීපාල සිරිසේනගේ පදවි ප්‍රාප්තියදා  මොරගහකන්ද ජලාශය විවෘත කිරීම යොදාගෙන තිබිණි. ජනාධිපතිවරයා, අගමැතිවරයා මෙන්ම රාජිත සේනාරත්න, මහින්ද අමරවීර, දයා ගමගේ යන අමාත්‍යවරුන් රැගත් හෙලිකොප්ටර් යානය මොරගහකන්ද ප්‍රදේශයට ළඟා වීමෙන් පසු කඩිනමින් විවෘත කිරීමේ අවස්ථාවට මෙම පිරිස එක්වූහ.

හෙලිකොප්ටරයේ ගමන් කරන අවස්ථාවේදී ජනාධිපති මෛත්‍රී මොරගහකන්ද ජලාශය ඉදිකිරීම සඳහා කළ කැපවීම් පිළිබඳ සවිස්තරාත්මකව ඇමතිවරුන්ට කරුණු පැහැදිලි කළේය. මොරගහකන්ද ජලාශයේ මංගල දියවර නිකුත් කිරීමෙන් පසු ජලවිදුලි බලාගාරයද නිරීක්‍ෂණය කළ ජනාධිපතිවරයා සහ අග්‍රාමාත්‍යවරයා ඇතුළු අමාත්‍යවරු ජනතාව සමග සුහද පිළිසඳරක නිරත වූහ. ඉන්පසු දිවා භෝජන සංග්‍රහය සූදානම් කර තිබූ ස්ථානයට පැමිණි මෙම පිරිස එකම මේසයක අසුන් ගත්හ. එම මේසයේ චීනයේ ශ්‍රී ලංකා තානාපතිවරියද සිටියාය. ඉන් පසු ස්වල්ප වේලාවකින් අගමැති රනිල් ප්‍රකාශ කළේ, “මම යනවා මලික්ලාගේ ගෙදර කෑමට. ඔබතුමාලා කෑම කාලා නුවර එන්න” කියාය. එම අවස්ථාවේ යාබද මේසයේ සිටි මලික් සමරවික්‍රම අමාත්‍යවරයාද එතැනට පැමිණියේය. එවිට ජනාධිපති මෛත්‍රී විමසුවේ “මලික් අපට කෑම සඳහා ආරාධනා නැද්ද? ඒක යූ.ඇන්.පී. කෑම මේසයක් ද?” යනුවෙනි.

එවිට රාජිත පවසා සිටියේ, “ජනාධිපතිතුමනි මටත් ආරාධනා නැහැ. එක්සත් ජාතික පෙරමුණටත් එම කෑම මේසයට ආරාධනා නැහැ. එය එක්සත් ජාතික පක්‍ෂ කෑම මේසයක්” යනුවෙන්ය.

එවිට මලික් සමරවික්‍රම පැවසුවේ, “නැහැ අගමැතිතුමා නුවර එන නිසා මම කෑම ටිකක් හැදුවා” කියාය. ඉන්පසු අගමැති රනිල් සහ මලික් සමරවික්‍රම අමාත්‍යවරයා එම ස්ථානයෙන් නික්ම ගියහ. මෙම ස්ථානයේ ගමේ ආහාර වේලක් සූදානම් කර තිබූ අතර, එය භුක්තිවිඳි ජනාධිපතිවරයා ඇතුළු අමාත්‍යවරු හෙලිකොප්ටර් යානයෙන් මහනුවර බලා පිටත් වූහ. සියලු දෙනා මහනුවර ජනාධිපති මන්දිරයට පැමිණි අතර, අමාත්‍යවරුද සමග ජනාධිපතිවරයා එහි ඉහළ මහලට ගොස් විවේක ගත්තේය. එම අවස්ථාවේදී ජනාධිපති දියණිය චතුරිකා සිරිසේන ඇතුළු පවුලේ ඥාතීහු එම ස්ථානයට පැමිණ පෙරවරුවේ පැවැත්වූ දානමය පිංකම පිළිබඳවද කරුණු පැහැදිලි කළහ. ඉන්පසු ජනාධිපතිවරයා ඇතුළු පිරිස පොල්ගොල්ල ජලාශ වේල්ල මත පැවැති ජනහමුවට සහභාගිව හෙලිකොප්ටර් යානයෙන්ම කොළඹ බලා පිටත් වූහ.

කඩවත රැලියේදී මහින්දගේ අසුන ගැන ගැටලුවක්

පළාත් පාලන මැතිවරණය වෙනුවෙන් ශ්‍රී ලංකා පොදුජන පෙරමුණ හිටපු ජනාධිපතිවරයාගේ ප්‍රධානත්වයෙන් රට පුරා පැවැත්වෙන ජන රැලි මාලාවේ පළමුවැන්න පසුගිය 06 වැනිදා පැවැත්වුණේ කඩවතදීය. එම රැස්වීමේ සංවිධාන කටයුතු භාරව තිබුණේ ප්‍රසන්න රණතුංගටය. ප්‍රසන්න දිස්ත්‍රික්කයේ අනෙකුත් මන්ත්‍රීවරුන්ද එකතුකොට ගෙන රැලිය සාර්ථක කරගන්නට වෙහෙ‍සුණේය.

ඒ අනුව කඩවත රැලිය ආරම්භ වන මොහොත වන විටත් හතරවටින් පැමිණි ජනකායෙන් පිට්ටනිය පිරී ගොස් තිබුණි. රැලියේ ප්‍රධාන වේදිකාවෙහි මහින්දට අසුන් පැනවීම සම්බන්ධයෙන් කතාබහක් පැවති අතර, ඇතැමුන්ගේ අදහස වූයේ මහින්දට විශේෂ අසුනක් පැනවිය යුතු බවය.

‘මහින්ද ඔය වගේ වැඩවලට කැමති නැහැ. ඒ හින්දා අපි එතුමාට වෙනම විශේෂ පුටු තියන්න ඕන නැහැ. තියෙන තැන විතරක් විශේෂ කරමු’ ප්‍රසන්න යෝජනා කළේය. ඒ අනුව එම ගැටලුව විසඳා ගැනිණි.

දුවගේ එන්ගේජ්මන්ට් එක තියාගෙන මෙතැනට වෙලා හිටියම හරියනවයැ

කඩවත රැලිය පැවැත්වෙන අතරතුර පවිත්‍රා සිය කතාවේදී සඳහන් කළේ දැන් පොල් ගෙඩිය රුපියල් අසූවට ගොස් ඇති බවය. කතාව නිමවා අසුන වෙතට පැමිණෙමින් සිටි පවිත්‍රාගෙන් ප්‍රසන්න ඇසුවේ ‘කොහෙද මන්ත්‍රීතුමිය රුපියල් අසූවට පොල් තියෙන්නේ? අපිටත් කියන්නකො තැන’ කියාය.

‘අනේ නෑ මන්ත්‍රීතුමා මං කිව්වේ ආණ්ඩුව දැන් දාල තියෙන පාලන මිල ගැනනේ’ පවිත්‍රා කීවාය.

‘ඒක තමයි මාත් බැලුවේ. අපේ පැතිවල නම් දැන් රුපියල් සීයටවත් ගන්න පොල් නැහැ. මිනිස්සුන්ට එලොව පොල් පෙනිල ඉන්නේ’ ප්‍රසන්න පැවසීය.

කඩවත රැලිය පැවති 06 වැනිදා ප්‍රසන්නගේ නිවසෙහි තවත් සුබ කටයුත්තතක් සිදුවෙමින් පැවතුණි. එම සුබ කටයුත්ත නම් ප්‍රසන්නගේ දෙවැනි දියණියගේ විවාහ ගිවිස ගැනීමයි. ප්‍රසන්න එදින උදෑසන සිටම කඩවත රැලියේ සංවිධාන කටයුතු ගැන සොයා බලමින් සිටි නිසා විවාහ ගිවිස ගැනීමේ උත්සවයට යාමට නොහැකි විය.

රැස්වීම පැවැත්වෙමින් තිබෙන අතරතුර මේ කාරණය මහින්දගේ කනේ තැබුවේ සහන් ප්‍රදීප්ය.

‘බලන්නකෝ සර් අද ප්‍රසන්න මන්ත්‍රීතුමාගේ දෙවැනි දුවගේ එන්ගේජ්මන්ට එක. එතුමා ඒකටවත් යන්නෙ නැතුව මෙතැනට වෙලා ඉන්නවානේ’ සහන් මහින්දට කීවේය.

‘ඔය මනුස්සයට කියල වැඩක් නැහැ. අපි කියන දෙයක් අහනවයැ. එකපාරකුත් දුවගේ උපාධි පිරිනැමීමක් තියෙනකොට ඒකට නොගිහින් නාමයෝජනා හද හද මෙහෙට වෙලා හිටියා. අන්තිමට මම තේරුම් කරල දීලයි දුවගෙ උත්සවේට සහභාගි වෙන්න ඔස්ට්‍රේලියාවට යැව්වේ’ මහින්ද පැවසීය.

කඩවත රැලිය නිමා වූ පසු සිය රථයට ගොඩ වීමට ගිය මහින්ද අසලට ප්‍රසන්න ගියේය.

‘ආ අද ගෙදර උත්සවයකුත් තියෙනවලු නේද?’ මහින්ද ඇසුවේය.

‘අනේ ඔව් සර් මේ පොඩි එන්ගේජ්මන්ට එකක්. මම ඉතින් කාටවත් කිව්වෙ නැහැ’ ප්‍රසන්න උත්තර දුන්නේය.

‘දුවගේ එන්ගේජ්මන්ට් එක තියාගෙන මෙතැනට වෙලා හිටියම හරියනවයැ. දැන්වත් එතැනට යන්න’ යැයි උපදෙස් දුන් මහින්ද උත්සව භූමියෙන් නික්ම ගියේය. ප්‍රසන්න නිවස බලා ගියේ ඉන් පසුවය.

විවාද දිනයේ ඒකාබද්ධයේ සැලසුම

බැඳුම්කර කොමිසමේ වාර්තාව සම්බන්ධයෙන් පාර්ලිමේන්තුවේ පැවති විවාදය ගුටි කෙළියක් බවට පත් වූයේ 10 වැනිදාය. වාර්තාව ජනාධිපතිවරයා වෙත භාර දුන් දිනයේ පටන්ම ඒකාබද්ධ විපක්ෂය එකහෙළාම විවාදයක් ඉල්ලා සිටියේය. ඒ අනුව විවාදය සඳහා 10 වැනිදා පර්ලිමේන්තුව රැස් කෙරිණි.

එදින ඒකාබද්ධ විපක්ෂයේ මන්ත්‍රී කණ්ඩායම රැස් වූයේ දිනේෂ්ගේ ප්‍රධානත්වයෙනි. එහිදී විශේෂ අවධානයක් යොමු වුණේ බැඳුම්කර කොමිසමේ වාර්තාව ගැනය. බොහෝ දෙනාගේ අදහස වූයේ වාර්තාව ජනාධිපතිවරයා විසින් ප්‍රසිද්ධියට පත් නොකරන්නට හේතු තිබෙන බවය.

‘මේ හදන්නේ ඡන්දය ඉවර වෙනකම් වාර්තාව යටගහගෙන ඉන්නයි’ ප්‍රසන්න පැවසීය.

‘ඔව් ජනාධිපති කොමිසම පත් ‍කළේ ජනාධිපතිවරයා වුණාට ඒකෙ වාර්තාව එයාට අයිති නැහැ. ඒක රටේ ජනතාවගේ බදු මුදලින් නඩත්තු වෙච්ච කොමිසමක්. ඒ හින්දා ඒ වාර්තාව රටටම අයිතියි’ වාසු පෙන්වා දුන්නේය.

‘කොමිසමේ වාර්තාව පාර්ලිමේන්තුවට ඉදිරිපත් කරන්නේ නැත්නම් ඒ ගැන විවාදයක් තියල වැඩක් නැහැ. වාර්තාවක් නැතුව අපි මොකක් ගැනද විවාද කරන්නේ?’ දිනේෂ් ඇසුවේය.

‘ජනාධිපතිවරයාට ඕන නම් එදා විශේෂ ප්‍රකාශය කරපු දවසෙම වාර්තාව එළිදක්වන්න තිබුණා. එතුමාට ඕනෙ ටික විතරක් මාධ්‍යයට නිකුත් කළාම කොමිසම ගැනත් විශ්වාසයක් නැතුව යන‍වනේ’ රෝහිත පැවසීය.

‘අපිට නම් පේන්න තියෙන්නෙම මේ වාර්තාවේ තියෙන සමහර කරුණු හංගන්න සමහරුන්ට ඕන වෙලා තියෙන බවයි. එහෙම නැත්නම් වාර්තාව මිනිස්සු අතට ගියා කියලා කාටවත් ප්‍රශ්නයක් නැහැනේ. සමහරවිට හොඳ හොඳ විස්තර තියෙන්නේ එළිදරව් නොකරපු කොටසෙද දන්නේ නැහැ’ ප්‍රසන්න කීවේය.

අනතුරුව පාර්ලිමේන්තු රැස් වූ අතර, ඒකාබද්ධ විපක්ෂය මුල සිටම සිටියේ බැඳුම්කර කොමිසමේ වාර්තාව නොමැතිව විවාද කර ඵලක් නැතැයි යන මතයේය. ජනතා විමුක්ති පෙරමුණද, රවුෆ් හකීම්ද එම මතයම නියෝජනය කරමින් වාර්තාව වහාම පාර්ලිමේන්තුවට ගෙන්වා ගත යුතු බවට කීහ.

බන්දුල පෝස්ටර් අරන් පාර්ලිමේන්තුවට

ඒ අතරතුර අගමැතිවරයා විශේෂ ප්‍රකාශයක් කිරීමට නැගී සිටීමත් සමග තත්ත්වය උණුසුම් විය. ඊට විරෝධය පළකරමින් ඒකාබද්ධ විපක්ෂයේ මන්ත්‍රීවරු පෝස්ටර් ඔසවා විරෝධය පළ කරන්නට වූහ. එම පෝස්ටර් රහසිගතව සභා ගැබ තුළට ගෙන ඒම භාරව තිබුණේ බන්දුල ගුණවර්ධනයට. ඔහු එය සාර්ථකව ඉටුකර තිබුණි.

පවිත්‍රා මහින්දට එන්න එපා කියයි

ගැටුම යන අතරතුර පවිත්‍රා මහින්දට දුරකථන ඇමතුමක් ගෙන කියන්නේ ‘සර් නම් මේ පැත්තෙ එන්න එපා’ කියාය. ‘ඒ මොකද?’ මහින්ද ඇසුවේය. ‘මෙතැන ලොකු ගැටුමක් යනවා. සර් එන්න එපා’ පවිත්‍රා යළි කීවාය. ‘එහෙම නම් මම නෑවිත් කොහොමද? මම ඇවිත් ඕක විසඳන්නම්’ කී මහින්ද වහාම පාර්ලිමේන්තුවට ආවද ඒ වන විටත් ගැටුම නිමා වී තිබුණි.

‘මොකද ප්‍රසන්න වුණේ?’ මහින්ද ඇසුවේ ප්‍රසන්නගෙනි.

‘නෑ සර් මේ මර්ක්කාර් ඇවිත් ලොකුගේ මන්ත්‍රීතුමාට ගැහුවා. පස්සෙ පැනල යන්න යනකොට අපේ අයට අහුවුණා’ කියා ප්‍රසන්න පිළිතුරු දුන්නේය.

විලවුන් උපකරණ හා ඖෂධ නියාමනය දැන් නැවතත් බලාත්මකයි

අපේ රටේ අලෙවි වෙන විලවුන් සහ ආලේපන සම්බන්ධයෙන් වගකිවයුතු සහතිකයක් නැතිනම් අලෙවිය සඳහා අවසරයක් පවතිනවාද නැද්ද යන්න දැනගැනීමට  පාරිභෝගිකයාට ක්‍රමයක් තිබෙනවාද? යන්න පිළිබඳ ඔබටත් යම් උනන්දුවක් පවතිනවා ඇති. නමුත් කලකට ඉහත ඖෂධ සහ විලවුන් උපකරණ පිළිබඳ පාලනාධිකාරිය විසින් රටතොට විසිර පවතින මෙවන් අනවසර විලවුන්, ආලේපන හා උපකරණ මෙන්ම ඖෂධ සොයා වැටලීම් සිදුකළද, මීට දෙවසරකට ප්‍රථම එය ඖෂධ හා විලවුන් උපකරණ අධිකාරියේ පාලනයෙන් ඉවත් කිරීම නිසා වසර දෙකකට පමණ ආසන්න කාලයක් මෙවැනි වැටලීම් සිදුකළ බවක් වාර්තා වන්නේ නැහැ. නමුත් සෞඛ්‍ය අමාත්‍යවරයාගේ මැදිහත් වීම මත නැවතත් එම කාර්යය සඳහා ජාතික ඖෂධ නියාමන අධිකාරියට කැබිනට් පත්‍රිකාවක් හරහා බලය පවරා ඇති අතර, දැන් නැවතත් මෙරටට පැමිණෙන ආනයනික හා මෙරට නිෂ්පාදිත ආලේප සහ විලවුන් ආදිය එසේ පරීක්ෂාවට ලක්කර අනුමැතිය ලැබීමෙන් තොරව වෙළෙඳ පොළ වෙත නිකුත් කිරීමේ තහනම බලාත්මක වෙන්නට පටන් ගෙන තිබෙනවා. අප මේ සම්බන්ධයෙන් ජාතික ඖෂධ නියාමන අධිකාරියේ අධ්‍යක්ෂ ජනරාල් – ප්‍රධාන විධායක නිලධාරි වෛද්‍ය කමල් ජයසිංහ මහතා සමග සංවාදයක යෙදෙන්නට අදහස් කළා. ඔබගේ අයිතිවාසිකම් සම්බන්ධයෙන් ඔබට පවතින ගැටලු සමහරක් පිළිබඳ ඔහු 'අද' පුවත්පතට සිදු කළ අදහස් පෙළගැස්මකි මේ.


IMG_2059

Q විලවුන් උපකරණ හා ඖෂධ පාලන අධිකාරියට නියාමන කටයුතු සඳහා බලය පැවරෙමින් ක්‍රියාත්මක වූ 1980 අංක 27 දරණ පනත 5015දී බලරහිත වුණා. එයින් පසු වෙළඳ පොළ තුළ අලෙවි වූ විලවුන් සහ විලවුන් උපකරණවල තත්ත්වය නියාමනය කළේ කුමන ආයතනයක්  විසින්ද

2015දී අලුත් ඖෂධ පනත ක්‍රියාත්මක වෙන්න පටන්ගත්තාට පසු එතෙක් පැවැති 1980 පරණ පනතින් අපේ අධිකාරියට පනවා තිබූ විලවුන් උපකරණ සම්බන්ධ  නියාමනය අපෙන් ඉවත්කර තිබුණා. ඒ අනුව අපි ජාතික ඖෂධ නියාමන අධිකාරිය යනුවෙන් නව ආයතනයක් ලෙස බිහිවුණා. නමුත් පරණ පනත සම්පූර්ණයෙන්ම බලරහිත වූ නිසා අපට ඒ සම්බන්ධයෙන් ක්‍රියා කරන්න ක්‍රමයක් තිබුණේ නැහැ. ඒ කාලයේ, ඒ කියන්නෙ වසර දෙකක පමණ කාලයක් මේ නිසා වෙළෙඳ පොළේ අනුමත නැති විලවුන් හා උපකරණ සංසරණය වීම ඇරඹුණා. නමුත් මේ ගැන වහා ක්‍රියාත්මක වුණු සෞඛ්‍ය අමාත්‍යවරයා කැබිනට් පත්‍රිකාවක් සකසමින් ඊට පාර්ලිමේන්තුවේ අනුමැතිය ලබාගනිමින් 1980 පනතේ  විලවුන් හා විලවුන් උපකරණ සම්බන්ධයෙන් තිබූ බලතල නැවත මෙම අධිකාරියට පැවරුවා. ඒ පසුගිය වසරේ ඔක්තෝබර් මාසෙ 27 වැනිදා. එතැන් සිට දැන් නැවතත් ඒ කටයුතු වඩාත් කාර්යක්ෂ්මව සිදු කෙරෙමින් පවතිනවා. දන්නා තරමින් විලවුන් උපකරණ සම්බන්ධ වසර දෙකක පමණ කාලයක් රජයේ මැදිහත්වීමක් සහිත නියාමනයක් සිදුවුණේ නැහැ. නමුත් සුපුරුදු පරිදි පාරිභෝගික සේවා අධිකාරියෙන් වෙළෙඳ පොළ තත්ත්වය සම්බන්ධ යම් යම් කටයුතු සිදුවෙන්න ඇති. නමුත් රජයේ අවසරයක් ලබා අලෙවි කටයුතු සිදු කළයුතු අන්දමේ බලපෑමක් තිබුණේ නැහැ.
?මේ වනවිටත් අනවසර විලවුන් සහ විලවුන් උපකරණ රට තුළ සංසරණය වීම සහ ගෙන්වීම සිදු කෙරෙනවා. මොන ආකාරයෙන්ද දැන් මේවා නියාමනය සඳහා ඔබ ආයතනය ක්‍රියාත්මක වෙන්නේ
මේ වනවිට අවසර ලබා අලෙවි කළ ආලේපන සහ විලවුන්වල අවසර පත් බොහෝමයක්ද කල් ඉකුත් වී තිබෙනවා. ඒවා නැවත හය මසකින් කාලය දීර්ඝ කිරීම සිදු කරන්නට තීරණය කළේ ඒවා ඉහතදී අවසර ලබාගැනීමේ ක්‍රමවේදය අනුව අවසර ලබා තිබූ ඒවා නිසයි. නමුත් දැන් යම් ආලේපන රේගුවෙන් නිදහස් කරන්නට පළමු අපි ඔවුන්ට අපෙන් අනුමැතිය ලබාගත යුතු බව දන්වා තිබෙනවා. රේගුවෙන් නිදහස් කර අපේ අධීක්ෂණය යටතේ ඔවුන් අවසර ගන්නාතුරු ඔවුන්ගේ පරිශ්‍ර තුළ නිසි අයුරින් ඒවා තබාගන්න අපි අවසර දුන්නත් වෙළෙඳ පොළට නිකුත් කරන්නට නම් අනිවාර්යයෙන් අපේ අවසර  පත අවශ්‍යමයි.

ඒ සඳහා පවතින ක්‍රමවේදය ගැන සඳහන් කළොත් 

මේ ගෙන්වා ඇති දේ මොන තරම් උසස් මට්ටමක පවතිනවා යැයි කීවත් ඒවා වරලත් ආයතනයකට සාම්පල් ලබා දී, සිරුරට අහිතකර කිසිවක් නොමැති බව තහවුරු කර ලබාගත්  වාර්තාවක් සමග ලියාපදිංචිය සඳහා අපට අයදුම් කළ යුතුයි. අයි.ටී.අයි. වැනි රාජ්‍ය සහ බියුරෝ වෙරිටාස් වැනි පෞද්ගලික හොඳම මටිටමේ පිළිගත් පරීක්ෂණාගාරයක වාර්තාවක් තමයි අපි සලකා බලන්නේ. අනිවාර්යයෙන්ම ඇක්රෙඩිටඩ් ලැබ් එකක වාර්තාවක් තිබුණත්, අපේ ඒ සඳහා පනවා ඇති විශේෂඥවරුන්ගෙන් සමන්විත කමිටුවේ පොදු අනුමැතිය ලැබිය යුතුමයි.

මෙවැනි වාර්තා මුදල්වලට ලබාගන්න පුළුවන්කමක් තිබිය හැකියි නේද?  එවිට කොහොමද එය එසේ නොවේ යැයි තහවුරු කරන්නේ

මා දන්නා තරමින් වගකිවයුතු පරීක්ෂණාගාරයක් එවැනි හොර පරීක්ෂණ වාර්තා නිකුත් කරන්නේ නැහැ.  ඒ ගැන තවමත් අපට විශ්වාසය තැබිය හැකියි. කෙසේ නමුත් මේවා සමග එක එල්ලේ සම්බන්ධයක් ඇති නිසා තමයි අපි චර්ම විශේෂඥයන්ගෙන් සැදුම්ලත් කමිටුවක් හරහා අනුමැතිය ලබාදෙන්නේ. මෙය තනි පුද්ගලයෙකුගේ මතය අනුව සිදුවෙන්නක් නෙවෙයි, පිරිසක් එක්ව ගන්නා තීරණයක්. ඒ නිසා මුදල් මත ඒ අනුමැතිය දිනාගැනීම ගැන කිසිවෙක් සැක කරනවා නම් එහි පදනමක් නැහැ. මුළුමනින්ම එය විය නොහැකි දෙයක්.

ග්ලූටතයොන් යන නමින් හඳුන්වන පිළිකා සඳහා යොදන කීමෝ තෙරපිවලට ඇතිවෙන අතුරු ආබාධ වෙනුවෙන් පමණක් කෙටිකාලීනව නිර්දේශ කරන රසායනික සංයෝගය , එන්නත් වශයෙන් හෝ කැප්සියුල වශයෙන්, ආලේපන වශයෙන් විකිණීම ලංකාවේ අවසරය ලබා සිදු කරන දෙයක්ද? මෙය ඖෂධයක් විදිහට අනුමතද

කොහෙත්ම නැහැ. මෙය ගෙන්වීමට හෝ විකිණීමට කිසිවෙකුට අවසර ලබා දී නැහැ.
ශ්‍රී ලංකාව තුළ මේ ඖෂධය යොදාගැනීමට බලය පවරලත් නැහැ.

නමුත් අන්තර්ජාලය තුළ විශේෂයෙන් දැන්වීම් පළ කරමින් මේ දැනුත් ග්ලුටතියොන් විකුණන ආයතන සහ පුද්ගලයන් සිටිනවා. අනුමත නැති ඖෂධයක් හෝ කිසියම් සංයෝගයක් එසේ ප්‍රසිද්ධියේ විකුණන්නට දැන්වීම් පළ කරද්දි ඖෂධ නියාමන අධිකාරිය නිහඬ ඇයි? මේ වෙනුවෙන් මෙතෙක් කිසිම ක්‍රියාමාර්ගයක් ගෙන නැහැ. ඒ සම්බන්ධයෙන් ඔබ මොකද කියන්නේ.

ඒ සම්බන්ධයෙන් ඉදිරියේදී ගත හැකි ඉතාම දැඩි පියවර සම්බන්ධයෙන් අපි මේ වනවිටත් සැලසුම් ක්‍රියාත්මක කරමින් ඉන්නේ. අපි නිහඬ නැහැ. අපට මේ සඳහා අවශ්‍ය බලතල ලැබුණේ මාස දෙකකට උඩදියි. ඒ නිසා අන්තර්ජාලය හරහා රටට අලෙවි කරන මෙවැනි දේවල් සම්බන්ධයෙන් අධ්‍යයනය කරමින් වහා යෙදිය හැකි පියවර සම්බන්ධව අපි කඩිනම් තීරණ ගැනීමට කටයුතු යොදා තිබෙනවා.  අපි මේ සඳහා නව වෙබ් අඩවියක් සකසමින් සිටිනවා. ඒ  අනුව අනුමත ඖෂධවල සිට අනුමත නැති ඒවා මොනවාද යන්න පාරිභෝගිකයාටම බලාගත හැකියි. ඒ වගේමයි විලවුන් හා විලවුන් උපකරණ සම්බන්ධයෙනුත් කටයුතු කරන්නේ. ඒ නිසා මේ ගැන අපි නිහඬයි යන්න සිතීම පදනම් විරහිතයි.

දේශීය වශයෙන් නිපදවෙන එවන් ආලේපන සහ ඔසු සම්බන්ධයෙන් අධිකාරියේ මැදිහත් වීම කොහොමද

ලාංකික නිෂ්පාදකයෙක් අපට ඒ සම්බන්ධ දැනුම්වත් කිරීමක් කළොත් අපි වහාම ඉදිරිපත් වෙලා අවශ්‍ය උපදෙස් ආදියත් ලබා දීලා ඒ නිෂ්පාදනාගාරයට ගිහින් අදාළ කටයුතු සොයා බලා නියම ප්‍රමිතියකට අනුව සිදුවනවාද යන්න තහවුරු කර සියල්ලම හොඳම තත්ත්වයේ පවතිනවා නම් කඩිනමින් අවසරය ලබාදෙනවා. ඒ දේශීය කර්මාන්තයක් නගාසිටුවන්නට අතදීමකුත් විදිහට. නමුත් එය නිසි ප්‍රමිතියකට නැතිනම් අපි ඒවා ප්‍රමිතියකට පත් කරගන්නට අවශ්‍ය මගපෙන්වීම ලබා දී එයට ආධාරයක් වෙනවා මිස ඒවා කඩාකප්පල් කරවන්නේ නැහැ. කෙසේ නමුත් මේ නිෂ්පාදන අප යොදන්නේ මිනිස් සිරුරුවලට නිසා ඉතාම ප්‍රවේශම් වීමට තමයි මේ නීති සියල්ල අකුරට ක්‍රියාත්මක කරන්නේ.

බොහෝ විට ආලේපන සම්බන්ධයෙන් අනතුරු ඇඟවෙන්නේ සම පැහැපත් කිරීමට නිපදවා ඇති ආලේපනයන් සම්බන්ධවයි. ඒවායේ ස්ටීරොයිඩ ගණයේ සංයෝග සහ රසදිය මට්ටම, විරංජක (බ්ලීචිං) ගැන සුවිශාල අනතුරු ඇඟවීමක් තිබෙනවා.  විශේෂයෙන් මර්කරි යනුවෙන් හඳුන්වන ලබන රසදිය සම්බන්ධව. නමුත් ස්ටීරොයිඩ සම්බන්ධව වැඩි කතාබහක් නැහැ. අනුමත රසදිය මට්ටම සම්බන්ධ අගයක් දැක්විය හැකිද

ඔව්, මර්කරි ලෙවල් එක තිබෙන්නට හැකි උපරිම සීමාව දසලක්ෂයකට කොටස් එකයි. ප්‍රශ්නය තිබෙන්නේ මෙහි සීමාව ඉක්මවා පැවතීමයි. බොහෝ දෙනෙක් මේ ස්ටීරොයිඩ ගණයේ සංයෝග ඇතුළත් ආලේපන භාවිත කරලා දවසෙන් දෙකෙන් සුදු වෙනවා. නමුත් මෙවැනි ගණයේ සංයෝග සමට ඉතාම අහිතකර බව චර්ම රෝග පිළිබඳ විශේෂඥ වෛද්‍යවරුන් පවසනවා. මේ නිසා සම විනාශ වී විකෘතිතා පවා ඇති වෙනවා. නමුත් එවිට ප්‍රමාද වැඩියි. යුරෝපීයයන් නොවන අපේ සමේ වර්ණක මෙලනින් මත තීරණය වෙන්නක්. එය මතුපිටින් සම බ්ලීච් කර ලබාගන්නට බැහැ. ඇත්තෙන්ම මෙතනදි ඒවා භාවිත කරන්නන් සිතිය යුතු යමක් තිබෙනවා. සුදු වෙන්න අවශ්‍ය ඇයිද යන්නයි. එය සිරුරේ ක්‍රියාකාරීත්වයට සම්බන්ධ දෙයක් නෙවෙයිනේ. ඒ නිසා සම දුඹුරු පැහැ වීමෙන් පුද්ගලයෙකුට කිසිම කරදරයක් ඇති වෙන්නෙත් නැහැනේ. එහෙම නම් තමන්ට සුදු පාට වෙන්න ඕන ඇයි? විරුද්ධ පාර්ශ්වයේ අය කැමති පාට සුදු කියලා ඒ අය තීරණය කරන්නේ කොහොමද? වහාම සමාජීය වශයෙන් මේ ගැන ආකල්පමය වෙනසක් ඇති විය යුතුයි.

ආලේපන පමණක් නෙවෙයි. ෆුඩ් සප්ලිමන්ට් ලේබලය යටතේත් බොහෝ දෑ වෙළෙඳ පොළට එනවා. සමහර දේවල් විවිධ රෝග සුව වන බවට දැන්වීම් පළකරමින් තමයි පාරිභෝගිකයා රවටන්නේ. මේ සම්බන්ධව ඔබේ ආයතනයට ක්‍රියාත්මක විය හැකි සීමාව මොකක්ද

 එවැනි දෙයක් කරන්න අවසර ඇත්තේ කිසියම් පිළිගත් පර්යේෂණයක් හරහා කුමන හෝ රෝගයකට එය භාවිතයෙන් සහනයක් හෝ සුවයක් ලැබෙනවා යැයි තහවුරු කළ සහතිකයක් අපට ඉදිරිපත් කර අපේ අවසරයක් ලැබූ නිෂ්පාදනයකට නම් පමණයි. ඒ හැරෙන්නට එවැනි දෑ සඳහා කිසිම මාධ්‍යයක දැන්වීමක් පළ කරන්නවත් බෑ. එය නීතිවිරෝධියි.  මේ වනවිට අපි නව නීති සම්පාදනය කරමින් සිටිනවා. අපේ අනුමැතිය සහිත සහතිකයක් නොමැතිව කිසියම් ඖෂධ හෝ විලවුන් හා විලවුන් උපකරණ සම්බන්ධ දැන්වීමක් පළ කිරීමත් මාධ්‍ය ආයතනවලට තහනම්. අපේ අනුමැතිය නැති එවැන්නක් මාධ්‍යයක් විසින් ප්‍රචාරය කළහොත් එම ආයතනයද ඊට වගකිවයුතු අයෙකු බවට පත්වෙනවා. ඉදිරියේදී දැනට අප රටේ පවතින තත්ත්වය පාලනය කිරීමට එවන් දැඩි නීති යොදාගන්නට සිදුවෙනවා. ආහාර සංයෝගයක් යැයි කියමින් හෝ කිසිවෙකු දැන්වීම් ලෙස පළ කරවා ප්‍රචාරයක් දෙනවා නම් එය සෞඛ්‍ය අමාත්‍යාංශයේ ආහාර පාලන ඒකකය මගින් හෝ අප ආයතනය මගින්  අනුමැතිය ලබා සිටිය යුතුමයි.

අප රටේත් මේ වනවිට ඖෂධ නිෂ්පාදනය කරනවා. ඒ වගේම තවම අපේ රටේ මව් භාෂාව ලෙස පවතින්නේ සිංහල. නමුත් එසේ නිෂ්පාදනය කරන ඖෂධවල විස්තර පත්‍රිකා තවම ඇතුළත් වෙන්නේ ඉංග්‍රීසි බසින්. මුළු රටේම ඉංග්‍රීසි බාෂාව දන්නා අය නැති බව දැන දැනත් මෙවැනි තැනක පසුවන්නේ ඖෂධ පරිහරණය කිරීමේ අයිතිය ඉංග්‍රීසි නොදත් අයට අහිමි බව දැනුම් දීමටද? නැතිනම් ඉංග්‍රීසි නොදන්නා අයෙකු ලෙඩ වූවොත් ඖෂධ පරිහරණය කරන්නට බැරි යැයි පවසන්නටද

මේ විස්තර පත්‍රිකාවල අඩංගු විස්තර ඇත්තෙන්ම පරිභෝජනය කරන්නා වෙනුවෙන් නෙවෙයි ඇතුළත් කර ඇත්තේ, වෛද්‍යවරයාට හා ඖෂධවේදියාගේ පරිහරණය පිණිසයි. නමුත් ඔය කියන කාරණය සම්බන්ධයෙන් මේ වනවිට අපේ අවධානය යොමු වී තිබෙනවා. දැනටමත් අපි විස්තර පත්‍රිකාවේ සිංහල සහ දෙමළ යන භාෂා දෙකෙනුත් විස්තර ඇතුළත් විය යුතු යැයි තීරණය කර ක්‍රියා කරන ඖෂධ දහයක් හඳුනාගෙන තිබෙනවා. 
ත්‍රෛභාෂා පනත යටතේ අපි මේ තීරණය ගත්තේ.  විශේෂයෙන් බොහෝ ඖෂධ තෝරාගැනීමේදී සමහරුන් විසින් ඇසුරුම ගැටලුවක් කරගෙන තිබෙනවා.  ආකල්පමය වශයෙන් අපි බොහෝ දුරට වෙනස් විය යුතුයි. එසේ නොමැතිව අපට ඖෂධ, විලවුන් සහ විලවුන් උපකරණ පරිහරණය කරන්නන් වෙනුවෙන් අපි සැලසුම් කර ඇති සාධනීයම පිළිවෙත් වෙත යොමු වෙන්න අමාරු වෙයි.
සමහරු රෝහල්වලට පැමිණ නිදහස් සෞඛ්‍ය සේවය යටතේ නිකුත් කළ ඖෂධ විසිකර දමා ගිහින් ඔසුසල්වලින් ඇසුරුම සහිතව එම ඖෂධයම මිලට ගන්නවා. නමුත් ඒ ඔවුන් මිලදී ලබාගන්නා ඖෂධයේත්, නොමිලයේ ලැබුණු ඖෂධයේත් ඖෂධීය ගුණ එක සමානයි. එතැන ගැටලුව වුණේ ඇසුරුම නැතිනම් පොත්ත. 
පෙත්ත එකම නම් පොත්ත ගැන හිතන්න එපා කියලා අපි කලකට ඉහත සිටම ජනතාව දැනුම්වත් කළාට ඒක තවමත් හරිහැටි ජනගත නොවීම නිසා පැන නැගුනු ගැටලු තවමත් පවතිනවා.
සියල්ලන්ටම පළමුව අපි ඔවුන්ට තමන් භාවිත කළ යුත්තේ කුමක්ද යන්න තෝරාගැනීමේ නිදහස ලබාදෙන්නට, ඔවුන්ගේ පරිහරණයට එක්වන දේ හැම අතින්ම ආරක්ෂිත බව තහවුරු කරන්නට වුවමනායි. ඒ සඳහා තමයි මේ සූදානම.

යෝජිත ප්‍ර‍වෘත්ති මාධ්‍ය තත්ත්ව පිළිබඳ ස්වාධීන මණ්ඩලය ශ්‍රී ලංකාවේ මාධ්‍ය නිදහස සැබෑවටම ආරක්‍ෂා කරන්නක්ද?

ගුණාත්මක මාධ්‍ය සම්ප්‍ර‍දායන් පවත්වාගෙන යන සෑම රටක්ම පාහේ තම රටවල ප්‍රවෘත්ති මාධ්‍ය පාලනය පිණිස විවිධ ක්‍රමවේද යොදා ගනී. ඒ අතරින් වඩාත් ජනප්‍රිය ක්‍රමවේදයක් වන්නේ මාධ්‍ය ආයතනවල ස්වාධීනත්වය ආරක්‍ෂා කරන අතර තමන් විසින්ම සකස් කර ගත් නීති රාමුවකට අනුව පාලනය වීමට එම ආයතනවලට නිදහස ලබා දීමය. මෑතක සිට මෙරට %‘ප්‍රවෘත්ති මාධ්‍ය තත්ත්ව පිළිබඳ ස්වාධීන මණ්ඩල පනත් කෙටුම්පත’ නම් ලියවිල්ලක් සංසරණය වෙමින් පවතී. එම කෙටුම්පතේ දක්වන ආකාරයට එහි අරමුණ වන්නේ ප්‍රවෘත්ති මාධ්‍ය අධීක්‍ෂණය කෙරෙන ස්වාධීන මණ්ඩලයක් ස්ථාපනය කිරීමත්, ඒ හරහා මාධ්‍ය ආයතනවල ස්වාධීනත්වය ආරක්‍ෂා කර ඒවා ප්‍ර‍මිතිගත කිරීමත්ය. කෙටුම්පතෙහි දැක්වෙන ස්වාධීන මණ්ඩලය ස්ථාපිත කිරීමෙන් සැබෑ ලෙසම  ශ්‍රී ලංකාවේ ප්‍රවෘත්ති මාධ්‍ය ප්‍ර‍මිතිගත කිරීමක් සිදුවේද? නැත්නම්, ඒ වෙනුවට ආණ්ඩුවේ පාලනයට සියලු ප්‍රවෘත්ති මාධ්‍ය සූක්‍ෂම ලෙස යටත් කෙරෙන පරිසරයක් නිර්මාණය වේද? යන්න බුද්ධිමය ඇසකින් විමසා බැලීම මෙම ලිපියේ අරමුණයි.


කෙටුම්පතෙහි තුන්වැනි වගන්තිය අනුව, පනත මගින් සියලුම ආකාරයේ ප්‍රවෘත්ති මාධ්‍ය ආවරණය වේ. ඊට මුද්‍රිත මාධ්‍ය, විකාශන මාධ්‍ය මෙන්ම අන්තර්ජාල මාධ්‍යද අයත් වන අතර, අන්තර්ජාල මාධ්‍ය ආවරණය වනුයේ අදාළ මාධ්‍යය ආයතනය ශ්‍රී ලංකාවේ සිට ක්‍රියාත්මක වේ නම් හෝ මණ්ඩලය නිකුත් කරන ව්‍යවහාර සංග්‍රහ (රීතින් සහ උපදෙස් මාලාවන් අඩංගු ලියවිලි) පිළිපැදීමට එකඟ වේ නම් පමණි. එම ව්‍යවහාර සංග්‍රහයන් නොපිළිපදින ලංකාව මුල්කර ගත් අන්තර්ජාල ප්‍රවෘත්ති මාධ්‍ය තහනම් වන බවක් මෙහි දක්වන්නේ නැත.
ස්වාධීන මණ්ඩලය දේශපාලන සංස්කෘතියට යටත් වේද?

කෙටුම්පතේ 29 වැනි වගන්තිය අනුව මෙම මණ්ඩලය ආණ්ඩුක්‍රම ව්‍යවස්ථා සභාවේ නිර්දේශ මත ජනාධිපතිවරයා විසින් පත් කරන සාමාජිකයන් දහතුන් දෙන‍කුගෙන් සමන්විත වේ. 35 වගන්තිය තවදුරටත් දක්වා සිටින්නේ තම කාර්යයන් සහ වගකීම් ඉටු කිරීමේදී මණ්ඩලය මෙන්ම එහි සාමාජිකයන්ද බාහිර පාර්ශ්වයන්ගේ මැදිහත්වීම්වලින් මුළුමනින්ම ස්වාධීන වන බවයි. කෙසේ වුවද ආණ්ඩුක්‍රම ව්‍යවස්ථා සභාවේ සාමාජිකයන් 10 දෙනාගෙන් 07 දෙනෙකුම පාර්ලිමේන්තු නියෝජිතයන් වන හෙයින් ඔවුන්ගේ නිර්දේශ මත පත් කරන මණ්ඩලයක සාමාජිකයන් මුළුමනින් දේශපාලනික අරමුණු අත්හැර කටයුතු කරනු ඇතැයි සිතීම ප්‍රායෝගික නොවේ. එබැවින් දේශපාලනික පත් කිරීම‍ හරහා මෙකී මණ්ඩලයද යම් අවස්ථාවක දේශපාලන දහරාවක් දෙසට හරවා ගැනීමේ අවදානමක් පවතී.

අධිකරණ බලය‍ සහිත ආයතනයක්

කෙටුම්පතේ 35(2) වගන්තිය අනුව මණ්ඩලය තම කාර්යයන් ඉටුකිරීමේදී පළමු තැන දිය යුත්තේ භාෂණයේ සහ ප්‍ර‍කාශනයේ නිදහස ආරක්‍ෂා කිරීමත්, මහජන යහපත ඉටුකිරීමත් වෙනුවෙනි. ප්‍ර‍නාන්දු එදිරිව ශ්‍රී ලංකා ගුවන්විදුලි සංස්ථා නඩුවේදී අධිකරණය කියා සිටියේ භාෂණයේ සහ ප්‍ර‍කාශනයේ නිදහස සත්‍යය වශයෙන්ම පැවැතීමට නම්, අසාධාරණ සීමා නොමැතිව තොරතුරු දැන ගැනීමේ අයිතිය ආරක්‍ෂා විය යුතු බවත්, ඊට තොරතුරු වාර්තා කිරීමට ඇති අයිතියද ඇතුළත් වන බවත්ය. 
වික්ටර් අයිවන් එදිරිව සරත් නන්ද සිල්වා නඩුවේදී ප්‍ර‍කාශ වූයේ සාමාන්‍ය පුරවැසියෙකුට හිමිවන මට්ටමට එහා ගිය ප්‍රකාශන නිදහසක් මාධ්‍යවේදීන්ට ආණ්ඩුක්‍රම ව්‍යවස්ථාවෙන් ලබාදී නොමැති බවයි. ඒ අනුව භාෂණයේ සහ ප්‍රකාශනයේ නිදහස ආරක්‍ෂා කරන අතර මහජන යහපත ඉටු කිරීමේදී මණ්ඩලයට කෙතරම් දුරට ප්‍රවේ‍සම්කාරී වීමට සිදුවන්නේද යන්න පැහැදිලි වේ.

මීට අමතරව ප්‍රවෘත්ති මාධ්‍ය සම්බන්ධව උපදෙස් දීම සහ මහජන උපදෙස් ලබා ගැනීම;
අන්තර්ජාතික ප්‍රමිතීන් සහ සාර්ථක උදාහරණ සහිත රටවල් ඇසුරින් ව්‍යවහාර සංග්‍රහ පැනවීම සහ කාලීනව ඒවාට වෙනස්කම් සිදුකිරීම;
එකී සංග්‍රහයන් අනුව ප්‍රවෘත්ති මාධ්‍ය ආයතන කටයුතු කරන්නේද යන්න සොයා බැලීම;
මණ්ඩලයේ කාර්යයන් ලෙස දක්වා තිබේ.
ආකාර හතරක කරුණු විමර්ශනය කිරීමේ බලතලද මණ්ඩලය සතුය. එනම්,
ව්‍යවහාර සංග්‍රහයන් කඩකිරීම පිළිබඳ පැමිණිලි,
පළකරන ලද වැරදි තොරතුරක් නිවැරදි කිරීමට අපොහොසත් වීම හෝ ප්‍රතික්‍ෂේප කිරීම පිළිබඳ පැමිණිලි,
මාධ්‍යවේදියෙකු හෝ මාධ්‍ය ආයතනයක සේවකයෙකුට ව්‍යවහාර සංග්‍රහයන් කඩකිරීමට අකමැති වීම හේතු කරගෙන පීඩා කිරීම පිළිබඳ පැමිණිලි ආදියයි.

මීට අමතරව ප්‍රවෘත්ති මාධ්‍ය සම්බන්ධව තමන්ට අවශ්‍ය යැයි හැ‍ඟෙන ඕනෑම කරුණක් විමර්ශනය කිරීමට මණ්ඩලයට හැකියාව පවතී. විමර්ශනය කරන්නේ හෝ නොකරන්නේ කුමක්ද යන්න සාමාජිකයන්ගේ තනි තීරණය මත රඳා පවතින නිසා මෙය පෙන්වා දිය හැක්කේ අත්තනෝමතිකව කටයුතු කිරීමට මාවත නිර්මාණය කරන්නක් වශයෙනි.
තවද, ඉහත විමර්ශන සඳහා ඕනෑම අයෙකු කැඳවීමටත්, එසේ කැඳවන කෙනෙකුගෙන් දිවුරුම් ප්‍ර‍කාශ මත තොරතුරු ලබා ගැනීමටත්, ඕනෑම තොරතුරක් ප්‍රවෘත්ති මාධ්‍ය ආයතනයකින් ඉල්ලා සිටීමටත් යෝජිත මණ්ඩලයට බලය පවතී. තවද, ව්‍යව‍හාර සංග්‍රහයන් ක්‍රියාත්මක කිරීමේදී මාධ්‍ය ආයතන ප්‍ර‍ධානීන් සහ සේවකයන් අතර ඉස්මතු වන ගැටලු විසඳීම මෙන්ම අවශ්‍ය අවස්ථාවලදී කරුණු සොයා බැලීමට කමිටු පත්කිරීමේ බලයද මණ්ඩලය සතුය.
ඉහත අවස්ථාවලදී මණ්ඩලය ඉදිරියට පැමිණීමට අපොහොසත් වීම, මණ්ඩලයේ කටයුතුවලට අනවශ්‍ය බලපෑම් කිරීම, හිතාමතාම වැරදි තොරතුරක් ලබාදීම, ඉල්ලා සිටි තොරතුරක් විනාශ කිරීම හෝ සැඟවීම යන කරුණු සඳහා වරදකරු වුවහොත් මාස තුනක සිරදඬුවමක් හෝ රුපියල් ලක්‍ෂයට වැඩි නොවන දඩයකට ඕනෑම අයෙකු යටත් කිරීමට ප්‍ර‍තිපාදන සපයා තිබේ. මෙසේ දඬුවම් මගින් පුරවැසියන්  සහ මාධ්‍ය ආයතන තවත් මණ්ඩලයක් වෙත බැඳ තැබීම ඊට අසීමිත බලයක්ද, අධිකරණමය තත්ත්වයක්ද ආරෝපණය කරන්නකි.

යුක්තියේ මාවත හරස් කරන බාධකයක්

කෙටුම්පතේ 39(1) වගන්තිය අනුව යම් මාධ්‍යය ආයතනයකට එරෙහිව අධිකරණයේ අපහාස නඩුවක් ගොනු කිරීමට නම් පළමුවෙන්ම යෝජිත මණ්ඩලය වෙත පැමිණිලි කිරීම‍ අනිවාර්යය වේ. එමෙන්ම 40 වගන්තිය දක්වන්නේ එවැනි පැමිණිල්ලක් විභාග කර මණ්ඩලය විසින් තීන්දුවක් දී ඇති අවස්ථාවක ඊට එරෙහිව ඉහළ අධිකරණයට අභියාචනා කරන්නේ නම් ඉල්ලා සිටින මුළු වන්දි මුදලෙන් සියයට දහයක් අධිකරණයේ තැන්පත් කිරීමට අභියාචනය කරන්නාට සිදුවන බවයි. මෙය %‘කිසිදු නඩුවක් බලහත්කාරයෙන් නොවිසඳිය යුතුය’ යන නීතියේ මූලික අදහසට විරුද්ධ වන අතර, අධිකරණයේ ආරක්‍ෂාව ලැබීමට පුරවැසියන්ට ආණ්ඩුක්‍රම ව්‍යවස්ථාවෙන්ම සපයා ඇති මූලික අයිතිවාසිකම් උල්ලංඝනය කිරීමකි.

රටට වග කියන මාධ්‍ය සම්ප්‍ර‍දායක් බිහි කිරීමට නම්

ප්‍රවෘත්ති මාධ්‍ය තත්ත්ව පිළිබඳ ස්වාධීන මණ්ඩලය පිහිටුවීමේ අපේක්‍ෂාව වන්නේ ප්‍රවෘත්ති මාධ්‍ය ස්වාධීන කර ඒවා ප්‍ර‍මිතිගත කිරීමය. කෙටුම්පත මගින් යෝජිත ආයතනය පිහිටුවීම එම අරමුණ ඉටුකර ගැනීමට සුදුසු මාවත නොවන බව අපට හොඳින්ම පැහැදිලි වන්නකි. මාධ්‍ය ආයතනවලට තමන් විසින්ම සකසා ගත් නීති රාමුවක් තුළ ක්‍රියාත්මක වීමට ඉඩ ලබාදීමත්, එම නීතිරීතිවල ගුණාත්මකභාවය නැංවීම පිණිස පමණක් රාජ්‍ය මැදිහත් වීමත් ශ්‍රී ලංකාවේ යහපත් මාධ්‍ය සම්ප්‍ර‍දායක් නිර්මාණය කිරීමට හොඳම ක්‍රමවේදය බව ඒ අනුව කිව හැකිය.

ලංකා ඉතිහාසයේ දරුණුම ණය අර්බුදය ඇති කළ වැඩ බැරි ආණ්ඩුවේ තුන්වැනි සංවත්සරය

යහපාලන ආණ්ඩුව බලයට පත් වී වසර තුනක් සැපිරීම ඊයේ (08දා) දිනයට යෙදී තිබිණි. ඊට සමගාමීව යහපාලන ආණ්ඩුවේ වසර තුනක පාලන කාලය පිළිබඳ කරුණු දක්වමින් හිටපු ජනාධිපති මහින්ද රාජපක්ෂ මහතා විසින් මාධ්‍ය නිවේදනයක් නිකුත් කර තිබේ. පහතින් දැක්වෙන්නේ අදාළ මාධ්‍ය නිවේදනයයි.


SRI LANKA-POLITICS-CHOGM

'2018 ජනවාරි 9 වෙනිදා, ඊනියා යහපාලන ආණ්ඩුව බලයට පත්වී අවුරුදු තුනක් සම්පූර්ණ වේ. මේ කෙටි කාලය තුළ මොවුන් ලංකාවේ සෑම ක්‍ෂේත්‍රයක් පුරාම දිවයන දැවැන්ත අර්බුද ගණනාවක්ම නිර්මාණය කර ඇත. මේ මොහොතේ සාකච්ඡා වෙන ප්‍රධානම මාතෘකාව වන්නේ මහ බැංකු මංකොල්ලය හා එය යටගැසීමට ආණ්ඩුවේ නායකයන් ගන්නා උත්සාහයයි. බැඳුම්කර කොමිසමේ සම්පූර්ණ වාර්තාව එළිදක්වන තුරු අපි බලා සිටිමු. මහ බැංකු මංකොල්ලය මේ ආණ්ඩුව විසින් කරන ලද එක් විනාශයක් පමණි. යහපාලන ආණ්ඩුවේ තුන්වැනි සංවත්සරය නිමිත්තෙන් ඔවුන් මේ රටට කර ඇති තවත් භයානක වින්නැහියක් ගැන ජනතාවගේ අවධානය යොමු කිරීමට කැමැත්තෙමි. 
මේ ආණ්ඩුව බලය හොබවා ඇති මාස 36ක කෙටි කාලය ඇතුළත ඔවුන් ඇමරිකානු ඩොලර් බිලියන 14.6ක් විදෙස් විනිමය ණය වලින් පමණක් ලබාගෙන ඇත. මෙය, ගතවූ අවුරුදු තුන පුරාම නිකුත් කරන ලද ශ්‍රී ලංකා සංවර්ධන බැඳුම්කර වලින් ලබාගත් ඇ.ඩො. බිලියන 7.2ක මුදල, 2015 හා 2017 නිකුත් කරන ලද සවරින් බොන්ඩ්වලින් ලබාගත් ඇ.ඩො. බිලියන 3.6ක මුදල, 2016 හා 2017 ජාත්‍යන්තර බැංකු ගණනාවක මැදිහත් වීමෙන් ලබාගත් ඇ.ඩො. බිලියන 1.7ක සින්ඩිකේටඩ් ලෝන් මුදල, 2015 හා 2016 ඉන්දියාවෙන් ලබාගත් ඇ.ඩො. බිලියන 2.2ක කරන්සි ස්වප් ණය හා ජාත්‍යන්තර මූල්‍ය අරමුදලෙන් 2016දී ලබාගත් ඇ.ඩො. බිලියන1.5ක ණය වශයෙන් වෙන්කොට පෙන්විය හැක. මෙවැනි කෙටි කාලයක් තුළ වෙනත් කිසිම ආණ්ඩුවක් මේ තරම් විශාල විදෙස් විනිමය ණය ප්‍රමාණයක් ලබාගෙන නැත. 

ඇමරිකානු ඩොලර් බිලියන 14.6ක් වැනි මුදල් කන්දරාවකින් නොරොච්චෝලේ ගල් අඟුරු බලාගාර පහක් හා හම්බන්තොට වරායවල් පහක් ඉදිකොට තවත් දක්‍ෂිණ අධිවේගී මාර්ග දෙකක් ඉදිකිරීමට මුදල් ඉතුරු කරගත හැකි වුවත්, යහපාලකයන් එම මුදලෙන් බෝක්කුවක්වත් ඉදිකර නැත. මා ඉහත සඳහන් කළේ, විදෙස් විනිමයෙන් ලබාගත් ණය පමණි. 2015 ජනවාරියේ සිට මේ දක්වා ආණ්ඩුව භාණ්ඩාගාර බිල්පත් හා භාණ්ඩාගාර බැඳුම්කර නිකුත් කිරීමෙන් රුපියල් බිලියන 5,706ක්ද ණය ලබාගෙන ඇත.
මහා පරිමාණයෙන් විදෙස් ණය ලබාගත්තද, එයින් බෝක්කුවක්වත් ඉදිකර නැතැයි යන චෝදනාවෙන් බේරීමට, යහපාලන ආණ්ඩුවේ තුන්වැනි සංවත්සරයට සමගාමීව  මොරගහකන්ද ජලාශයත්, රාජගිරියේ ගුවන් පාලමත් විවෘත කිරීමට යොදා ගත්තද, 2005 මහින්ද චින්තන වැඩපිළිවෙළට අනුව යමින් මොරගහකන්ද ජලාශය ඉදිකිරීමට පටන් ගත්තේ මගේ ආණ්ඩුව සමයේය. එහි සැලසුම්, මුදල් වෙන් කිරීම යනාදිය නිමකොට ඉදිකිරීම් ආරම්භ කරනු ලැබුවේ 2007 වසර සිටය. රාජගිරියේ ගුවන් පාලම සඳහාද සැලසුම් හා මුදල් වෙන් කිරීම සිදුකරනු ලැබුවේ මගේ ආණ්ඩුව කාලයේය. රාජගිරියේ ගුවන් පාලමත්, පොල්ගහවෙල හා ගණේමුල්ල ගුවන් පාලම් දෙකත්, ඉදිකිරීමට ලන්සු කැඳවා කොන්ත්‍රාත්කරුවන් තේරීම ආරම්භ කිරීමට කැබිනට් අනුමැතිය ලැබුණේ 2014 දෙසැම්බර් 4 වෙනිදා කැබිනට් රැස්වීමේදීය. මේ ආණ්ඩුව තම තුන්වෙනි සංවත්සරය සමරන්නේද අනුන්ගේ ව්‍යාපෘතිවලට තමන්ගේ නම දා ගැනීමෙන් බව මෙහිදී කිව යුතුය.

යහපාලකයන් බලයට පැමිණියේ, මගේ ආණ්ඩුව විසින් ඉදිකරන ලද විදුලි බලාගාර, වරායවල්, ගුවන් තොටුපොළවල්, අධිවේගී මාර්ග යනාදිය සඳහා ගන්නා ලද ණය නිසා රටේ ණය අර්බුදයක් පවතින බව කියමිනි. නමුත් මේ විශාල ව්‍යාපෘති සඳහා සැබවින්ම වැය වූ මුළු මුදල වූයේ නොරොච්චෝලේ විදුලි බලාගාරයේ සියලුම අදියර සඳහා – ඇමරිකානු ඩොලර් මිලියන 1,350; කොට්ටාව සිට මාතර දක්වා දක්‍ෂිණ අධිවේගී මාර්ගය සඳහා -ඇ.ඩො. මිලියන 740; හම්බන්තොට වරායේ අදියර දෙක හා තෙල් ටැංකි සංකීර්ණය සඳහා – ඇ.ඩො. මිලියන 1,300; කොළඹ – කටුනායක අධිවේගී මාර්ගය සඳහා- ඇ.ඩො.මිලියන 292 හා මත්තල ගුවන් තොටුපොළ සඳහා- ඇ.ඩො මිලියන 209 වශයෙනි.

ඉහත සඳහන් සියලුම මහා පරිමාණ ව්‍යාපෘති සඳහා වැයවූ සමස්ත වියදම ඇමරිකානු ඩොලර් මිලියන 3,900කටත් අඩුය. මගේ ආණ්ඩුව විසින් ලබාගත් ව්‍යාපෘති ණය ගෙවීම සඳහා යහපාලන ආණ්ඩුව ණය ගනිමින් සිටින බව කීම අමූලික බොරුවකි. යහපාලන ආණ්ඩුව මෙතෙක් ලබාගෙන ඇති ඩොලර් බිලියන 14.6න්, මම ඉහත නම්කරන ලද සියලුම ව්‍යාපෘති සඳහා ගිය මුළු වියදම සිවු වතාවක් ගෙවා නිම කළ හැක. යහපාලන ආණ්ඩුව ගන්නා ණය වලින් කරන්නේ මගේ ආණ්ඩුවේ ව්‍යාපෘති ණය ගෙවීම නොව ආණ්ඩුවේ එදිනෙදා වියදම් පියවා ගැනීමයි. 2015 ජනවාරියේ සිට රජයේ මුදල් දේශපාලන අරමුණු ඉටුකර ගැනීමට පාවිච්චි කිරීම නිසා කිසිදු සැලසුම් කිරීමකින් තොරව එක්වරම රජයේ වියදම් විශාල වශයෙන් වැඩි විය. මේ අමතර වියදම පියවා ගැනීම සඳහා යහපාලන ආණ්ඩුව රුපියල් වලින් මෙන්ම විදෙස් විනිමයෙන්ද දිගට හරහට වාණිජ ණය ලබාගැනීම නිසා වර්තමාන ණය අර්බුදය නිර්මාණය විය. 

විදෙස් ණය ලබාගත යුත්තේ ඉතාමත්ම ප්‍රවේශමෙනි. මේ ණය ගෙවීම සඳහා විදෙස් විනිමය මිලදී ගැනීමට සිදුවන නිසා විනිමය අනුපාතයේ සුළු වෙනසකින් වුවද ණය බර විශාල වශයෙන් වෙනස් විය හැක. 2015 හා 2016 මහ බැංකු වාර්තාවලට අනුව යහපාලන ආණ්ඩුව බලය ගැනීමෙන් පසු ඇති වූ ආර්ථික බිඳවැටීම නිසා රුපියල බාල්දු වීම හේතුවෙන් පමණක් ලංකාවේ ණය බරට තවත් රුපියල් බිලියන 478ක් එකතු වී ඇත. බැඳුම්කර මගඩිය හේතුවෙන් 2015 මුල සිට ලංකාවේ පොලී අනුපාතය 50෴කින් පමණ වැඩි වීම නිසාද ආණ්ඩුවේ ණය බර තවත් වැඩි වූ බවද මෙහිදී අප මතක තබාගත යුතුය. මගේ ආණ්ඩුව විදෙස් ණය ලබාගත්තේ ඉතාමත්ම ප්‍රවේශමෙනි. මුදල් අමාත්‍යාංශයේ වාර්තාවලට අනුව 2008 සිට 2014 දක්වා විදෙස් ණය වාරික හා පොලී ආපසු ගෙවීම් පහත සඳහන් ආකාරයට විය.

2008 – ඇ.ඩො. මිලියන  881
2009 – ඇ.ඩො. මිලියන 1,041
2010 – ඇ.ඩො. මිලියන 826
2011 – ඇ.ඩො. මිලියන 971
2012 – ඇ.ඩො. මිලියන 1,620
2013 – ඇ.ඩො. මිලියන 1,160
2014 – ඇ.ඩො. මිලියන 1,306

මේවා ගෙවා ගැනීමට නොහැකි තරම් විශාල ගණන් නොවන නිසා ආපසු ගෙවීම් පිළිබඳ කිසිදු ප්‍රශ්නයක් මගේ ආණ්ඩුවට තිබුණේ නැත. වර්තමාන ණය අර්බුදය සහමුලින්ම යහපාලන ආණ්ඩුවේ නිර්මාණයකි. 2015 සිට ඉදිරියට අපට ගෙවීමට සිදුවන විදෙස් ණය හා පොලිය පහත දැක්වෙන ආකාරයට වෙයි. 

2015 -  ඇ.ඩො. මිලියන 1,828 
2016 – ඇ.ඩො.මිලියන 1,604
2017 -  ඇ.ඩො.මිලියන 2,132
2018 -  ඇ.ඩො.මිලියන 2,891
2019 -  ඇ.ඩො.මිලියන 4,217
2020 -  ඇ.ඩො.මිලියන 3,699
2021 -  ඇ.ඩො.මිලියන 3,344
2022 -  ඇ.ඩො.මිලියන 3,743
2023 -  ඇ.ඩො.මිලියන 2,120
2024 -  ඇ.ඩො.මිලියන 2,067
2025 – ඇ.ඩො.මිලියන4,155
2026 – ඇ.ඩො.මිලියන 2,758
2027 – ඇ.ඩො.මිලියන 3,448

ආණ්ඩු වෙනසට පෙර තිබූ තත්ත්වයත් ඊට පසුව ඇති වූ තත්ත්වයත් ඉහත දක්වන ලද සංඛ්‍යා දත්තවලින් පැහැදිලි වනු ඇත. 2015 සිටම ණය ගෙවීම් වැඩි වන්නේ මාස කිහිපයකින් මෙන්ම අවුරුද්දකින් දෙකකින් ආපසු ගෙවීමට සිදුවෙන කෙටිකාලීන විදෙස් විනිමය වාණිජ ණය විශාල වශයෙන් ලබාගැනීම නිසාය. 

2015දී ශ්‍රී ලංකාව අත්දුටුවේ ණය ගැනීමේ වියරුවකි. මහ බැංකුවේ නිල වාර්තාවලින් පෙන්වා දෙන පරිදි යහපාලන ආණ්ඩුව බලයට පැමිණීමට පෙර ශ්‍රී ලංකා සංවර්ධන බැඳුම්කර නිකුත් කරනු ලැබුවේ වසරකට දෙවතාවක් පමණි. එලෙස සිදුකරන ලද නිකුත් කිරීම්වලින්ද 2010 – 2014 යන කාලපරිච්ඡේදය ඇතුළත වසරකට ඩොලර් මිලියන 350ක්වත් මගේ ආණ්ඩුව ලබාගෙන නැත. ඒ මෑත ඉතිහාසයේ ආණ්ඩුවක් විසින් සිදුකරන ලද දැවැන්තම ඉදිකිරීම් වැඩසටහනක් ක්‍රියාත්මකව තිබියදී බවත් මතක තබාගත යුතුය. 
නමුත් 2015 වසරේදී කිසිදු නව ඉදිකිරීම් ව්‍යාපෘතියක් ආරම්භ නොකර වුවද යහපාලන ආණ්ඩුව අවස්ථා 9කදී ශ්‍රී ලංකා සංවර්ධන බැඳුම්කර නිකුත්කොට ඇත. 2016දී හය වතාවකදීද, 2017දී සිව් වතාවකදීද ශ්‍රී ලංකා සංවර්ධන බැඳුම්කර නිකුත්කොට ඇත.   තත්ත්වය මෙසේ තිබියදී 2018 වසර සඳහාද වත්මන් ආණ්ඩුව තවත් ඩොලර් මිලියන 5,000ක විදෙස් විනිමය වාණිජ ණය ගැනීමට කැබිනට් අනුමැතිය ලබාගෙන ඇත. පරිභෝජනයට පමණක් ලබාගෙන තිබෙන මේ ණය ගෙවීමට ආණ්ඩුව  ජනතාවට දරාගත නොහැකි ආකාරයට වැට් බදු, වාහන බදු, භාණ්ඩ ආනයන බදු, දඩ මුදල්, රජයේ මුද්දර ගාස්තු යනාදිය වැඩිකර තිබෙන අතර, 2018 අප්‍රේල් මාසයේ සිට, මුළු ජනගහනයම ආදායම් බදු දැල තුළට ගැනීමටද සැලසුම් කර ඇත. 

රටේ ජනතාව මත බදු අය කිරීමෙන් පමණක් යහපාලන ආණ්ඩුව ලබාගෙන තිබෙන ණය කන්දරාව ගෙවීමට නොහැකි නිසා ඔවුන් රජයට අයත් හෝටල් ව්‍යාපෘතිවල සිට, වරායවල්, අධිවේගී මාර්ග, විදුලි බලාගාර ඇතුළු සියලුම ජාතික සම්පත් විකුණා දැමීමේ ක්‍රියාමාර්ගයකට අවතීර්ණ වී ඇත. හම්බන්තොට වරාය විකුණා දැමුවේ එය තැනීමට ගත් ණය ගෙවීමට නොහැකි නිසා යැයි ආණ්ඩුව කීවද, වරාය විකිණීමෙන් ලැබුණු මුදල් අදාළ ණය ගෙවීමට නොව පරිභෝජනය සඳහා වැය කිරීමට මහා භාණ්ඩාගාරයට යොමුකර තිබීමෙන් ආණ්ඩුවේ සැබෑ අරමුණ පැහැදිලි වේ. හම්බන්තොට වරාය ඉදිකිරීමට ගනු ලැබුවේ සහනදායී පොලියට දිගුකාලීන ණය නිසා එය ගෙවා දැමීමට ආණ්ඩුවට කිසිදු හදිස්සියක් නැත. 

නමුත් වත්මන් ආණ්ඩුව ගිනි පොලියට ගත් කෙටිකාලීන වාණිජ ණය ජනතා දේපළ විකුණා ලබාගන්නා මුදල්වලින් හෝ ගෙවීමට පැහැදිලි හදිසියක් ඇත. ඒවා නොගෙව්වොත් සිදුවන්නේ ලංකාවට ලෝක මූල්‍ය වෙළෙඳ පොළේ දොර වැසී යාමයි. අන්ත දූෂිත, වැඩ බැරි ආණ්ඩුව රටේ මූල්‍ය කළමනාකරණයට කළ මේ විනාශයට විරෝධය පෑමට අවස්ථාව උදාකර ගන්නා ලෙස ඉල්ලමි.'

දූෂණයෙන් තොර ගමක් බ්හි කළ හැකිද?

1948 වර්ෂයේ සිට මේ දක්වා අප ලැබූ නිදහසට වසර 70ක් ගතවී හමාරය. එකී කාලය තුළ මෙරට සමාජ, දේශපාලන, ආර්ථික ආදී නොයෙක් දිශාවන්ගෙන් අගතියට පත් වූ බවක් නම් නිසැකයෙන් මේ වනවිට පෙනෙන්නට තිබේ. අද වනවිට අපේ රට විශාල ණය බරකින් පෙළීම එයට කදිම උදාහරණයකි. දූෂණය, වංචාව සෑම තැනකම රජකර වන්නේය. මෙනිසා %දූෂණයෙන් තොර ගමක්^ යන තේමාව යටතේ වෙනසක ඇරඹුම පළාත් පාලන මැතිවරණයෙන් අරඹීම සඳහා පැවති මාධ්‍ය හමුවක් පසුගියදා තැපැල් අමාත්‍යාංශ ශ්‍රවණාගාරයේදී පැවැත්වුණි. පවත්නා පක්ෂ පිළිබඳවත් මෙවර පැවැත්වෙන මැතිවරණය පිළිබඳවත් ඒ හා සමගාමීව තමන්ගේ මතය කුමක්ද යන්නත් සමාජයේ නොයෙක් ක්ෂේත්‍රවල නියුතුවන්නන්  සහභාගී වූ මෙහි ආරාධිත දේශකයන් ස්වකීය පෞද්ගලික අදහස් හුවමාරු කර ගත්තේ මෙලෙසිනි. 


'හොරකම් කරන මොන්ටිසෝරිය කියන්නේ ප්‍රාදේශීය සභාව' ප්‍රවීණ ගායක සුනිල් පෙරේරා

sunil perera copy' පුංචි ඡන්දය කියන්නේ මහා විශාල පරිවර්තනයක් සිදු කරන ආණ්ඩු පෙරළන ඡන්දයක් නෙමෙයි. මෙතෙක් කලක් ක්‍රියා කළ ආකාරය වෙනස් කරමින් වෙනසක් ඇති කරන්න සමාන්‍ය මිනිස්සුන්ට පුළුවන් ඡන්දයක් දෙන්න පුළුවන්.
අපි හැමෝටම අවශ්‍ය මේ රටට හොඳක් වෙනවා දකින්න.  නමුත් පක්ෂ දෙකක් 1948 වර්ෂයේ ඉඳන් අවුරුදු 70ක් මේ වෙනකම් රට පාලනය කරලා තවත් ඒ සඳහා අවස්ථාව දෙන්න කියලා ඉල්ලනවා. මම නම් කියන්නේ මේ පක්ෂ දෙකට නම් මෙවර ඡන්දය දෙන්න එපා කියලයි. අවුරුදු 70ක්ම ඡන්දය දීපු අයට නොදී අඩුම ගානේ ගම රැකෙන්නවත් ජනතා විමුක්ති පෙරමුණට ඡන්දය දුන්නොත් මම විශ්වාස කරන අයුරින් නම් හොරකම් කියන ඒවා යම්කිසි ලෙසකට නැති කරන්න පුළුවන්. ප්‍රාදේශීය සභා සඳහා පත්වන අය තනිකර එන්නේම හොරකමයි. මොන ජනාධිපති කෙනෙකුගෙන් හරි, ඉහළ පැලැන්තියෙ කෙනෙකුගෙන් හරි තමා ශක්තියක් ලබනවා නම් ඇත්තෙන්ම තමා ඒ පිළිබඳව ලැජ්ජා වෙන්න ඕන. ප්‍රාදේශීය සභා මන්ත්‍රීවරයෙකු වුණත් තමන්ට ලබා ගන්න අවශ්‍ය හැමදේම ඔහු  ලබා ගන්නවා. නමුත් මිනිස්සුන්ට කිසිම සේවයක් කරන්නේ නැහැ. මෙයද රටේ සැබෑ තත්ත්වය. රටේ අසරණ මිනිස්සුන්ට තමයි මේ සියලුදේ සිදුවන්නේ. 
මේ ළඟකදී ඔස්ට්‍රේලියාවේ අගමැතිවරයාට දඩයක් නියම කර තිබෙනවා බෝට්ටුවකට නැග ජීවිත ආරක්ෂක ජැකැට්ටුව පැලඳි නැති නිසා. ඒ රටේ ක්‍රියාත්මක වෙන වෙනම ක්‍රියාපටිපාටියක් තිබෙනවා. හැම කෙනාම ඒ ක්‍රමය අනුගමනය කළ යුතුයි. අගමැතිවරයා වුවත් ඔහු වැරැද්දක් කර තිබේ නම් ඒ දේට දඬුවම් හිමිවෙනවා. 
අපේ රටේ ඉන්නේ පට්ටපල් හොරු. නමුත් මම නම් ප්‍රකාශ කරන්නේ දඬුවම නියමිත අයුරින් ක්‍රියාත්මක කිරීමට හැකිවන පරිදි මේ රටේ නීති පද්ධතියක් ස්ථාපිත විය යුතුයි. දූෂණය නැති කරන්න නම් නීතිය නිවැරදි ලෙස ස්ථාපනය කළ යුතුයි. ඒ අනුව  ඉහළ සිට පහළට දඬුවම් කරන්න ඕන. නැතිව පහළ සිට ඉහළට දඬුවම් කරන්න කවදාවත් බැහැ. 
තමාට වාසි දායක නම් වැරදි ක්‍රමවේදයක් තම ආයතනය අනුගමනය කළත් ඒ වැරදි ක්‍රමය වෙනස් කරන්න දෙන්නේ නැහැ. නිලධාරීවාදී පාලනය කියන්නේ ඒකට. තමා වැඩකරන ආයතනයට අවංක වෙන්න. වැඩකරන ආයතනය පාඩුවට දුවනවා නම් ඒ ගැන දුක්වෙන්න. ආයතනයෙන් ලැබෙන්න ඕන වරප්‍රසාද ගැන ඉහළින්ම කතා කරන නමුත් තමාගෙන් ආයතනයට සිදුවිය යුතු සේවය නිසිආකාරව ලබා දෙන්නේ නැහැ. රාජ්‍ය ආයතන සෑදී තිබෙන්නේ මිනිස්සුන්ට කරදර කරන්නද? මිනිස්සුන්ට සේවය කරන්නද? හොරකම් කරන මොන්ටිසෝරිය කියන්නේ ප්‍රාදේශීය සභාව. ඉන් පසුව තමයි පාර්ලිමේන්තුවට එන්නේ. උගත්කමක් දැනුමක් තියෙන පුද්ගලයන් නෙමෙයි පාර්ලිමේන්තුවේ ඉන්නේ. නමුත් පාර්ලිමේන්තුව තුළත් යම්කිසි උගත් මට්ටමක් ඇති කළ යුතුයි. ඉදිරියේදී දැක්මක් තියෙන උගත්කමක් තිබෙන අයයි බිහි විය යුත්තේ. ඉස්සර හොරකම් මෙච්චර තිබුණෙ නැහැ.
අපේ රටේ වෙනසක් කරන්න අපේක්ෂා කරන අයම ඡන්දේ දවසේ අර පක්ෂ දෙකටම කතිරේ ගහනවා. ඉතින් කොහොමද වෙනසක් ඇති වෙන්නේ. වෙනසක් ඇති වෙන්න නම් වෙනසක් සිදුකරන්න ඕන. මම කියන්නේ මේ පුංචි ඡන්දයෙන් ශක්තියක් පෙන්වන්න මේ දෙගොල්වන්ව පොඩ්ඩක් හොල්ලන්න ඕන. ඒ වුණා කියලා ජනතා විමුක්ති පෙරමුණට මැජික් සංදර්ශනයක් ඉදිරිපත් කරන්න බැහැ. ජනතා විමුක්ති පෙරමුණ  කියනකොට ජනතාව අතර ඇති කරලා තිබෙන්නේ වෙනස්ම මතයක්. නමුත් එයින් මිදී තමුන්නාන්සේලාගේ දායකත්වය මෙවර අනිවාර්යයෙන් අපි අපේක්ෂා කරනවා. තරුණ ජවය උඩට ගේන්න මෙතක් කල් මේ රජයන් දෙකම අපොහොසත් වී තිබෙනවා.'

'පැරණි දේශපාලනය තුළ දේශපාලනයෙන් හම්බකර ගන්නවා කියන අදහස තිබුණේ නැහැ' ආචාර්ය නිර්මාල් රංජිත් දේවසිරි

'ග්‍රාමීය පමණක් නොව මුළුමහත් සමාජයම වෙළී පවතින දූෂණය විවිධ මට්ටම්වලින් සමාජය තුළ සාකච්ඡා කළ හැකියි. දේශපාලන තන්ත්‍රයේ සිටින කණ්ඩායම අතිශයින්ම දූෂිතයි. පක්ෂ මාරු කරන එක කලින් කලාතුරකින් තමයි සිදු වූයේ. නමුත් දැන් සමහර පුද්ගලයන් DSC_4837සිටින පක්ෂය පවා දැනගන්න අපහසුයි. දැන් පක්ෂයේ ලේකම්වරුන්ට පවා මාරු වෙන්න පුළුවන්. මොවුන්ට තිබෙන අභිලාෂ එකයි. 1970 ගණන්වල දේශපාලන පන්තිය සමන්විත වී තිබුණේ ප්‍රභූ යැයි කියන පැලැන්තියකට. ඒ අය ඉහළ සමාජ පංතියක් නිරූපණය කළ ධනඋපායක් තිබුණ පිරිස්. ඔවුන්ට දේශපාලනය භාවිත කළේ ධනෝ පායන මාර්ගයක් ලෙසට නොවේ. ඔවුන් ස්වකීය ධනය වැය කරමින් දේශපාලන ප්‍රභූත්වයක් ලැබු අයයි. 
නමුත් නිදහස් අධ්‍යාපනය හරහා, 56 දේශපාලන ක්‍රමය හරහා අපේ සමාජයේ පහළ පිරිස්වලට ඒ සඳහා ඉදිරියට ඒමේ උනන්දුවක්, තරගකාරීත්වයක් ඇති වුණා.මේ නිසා ආර්ථික වශයෙන් පහළ මට්ටම්වල සිටින අය පවා දේශපාලන බලය සඳහා තරග කරන්න පටන් ගත්තා. ඔවුන් දේශපාලන තන්ත්‍රය තුළට පැමිණි විට යම්කිසි ලෙසකින් ජීවත්වීමට අවශ්‍යයි. ඔවුන්ට පවුලෙන් හිමි වූ ධනෝපායන මාර්ග නැහැ. ඔවුන්ට තනතුර නිසා හිමිවන වැටුපෙන් ද මෙය සිදුකිරීම අපහසුයි. මේ නිසා නිතරම ස්ථාවර හිඟයක් තිබෙනවා. මෙය පියවන්න නම්, ඍජුව හෝ වක්‍රව මුදල් දේශපාලන ප්‍රවාහයෙන් උපයා ගත යුතුයි. ඒවගේම ඒ සදහා උදව් කරන අයටත් උදව් කරන්න ඔහුට සිදු වෙනවා. මෙය දේශපාලන ප්‍රභූ තන්ත්‍රයේ ස්ථාවර තත්ත්වයක්. දැන් තිබෙන දේශපාන පක්ෂ නියෝජිතයන් වෙන දේවල් සඳහා නොව දේශපාලනයට සහාභාගී වන්නේම මේ සඳහා. පැරණි දේශපාලනය තුළ දේශපාලනයෙන් හම්බකර ගන්නවා කියන අදහස තිබුණේ නැහැ. 
දැන් තිබෙන දේශපාලන තත්ත්වයක් කාලයක් එකලෙසින් පැවතුණ නිසා මෙහි වැඩ කරන ආයතනික පිරිස් තමන්ට අවශ්‍ය ලෙස ආයතනය හදාගන්නවා. 
අපි මේ පිරිස අයින් කරන්න ඕන. අපිට මෙයින් එළියට යා හැකිව තිබන එකම විකල්පය එයයි. එය ඉතා සරල එකක්. මම ඒ නිසා මේ පාර සහයෝගය දක්වන්නේ ජනතා විමුක්ති පෙරමුණටයි. සමහර පුද්ගලයන් අසන දෙයක් තමයි, ජනතා විමුක්ති පෙරමුණට ආර්ථික ප්‍රතිපත්තියක් තිබෙනවාද යන්න කාරණය. ඉතින් මම අහන්න කැමතියි එක්සත් ජාතික පක්ෂයේ හෝ පොදුජන එක්සත් පෙරමුණේ තිබෙන ආර්ථික ප්‍රතිපත්තිය මොකක්ද කියලා. එහෙම තිබෙනවා නම් මට කියන්න පුළුවන් ජවිපෙ එකට එහෙම එකක් නැති එක ප්‍රශ්නයක් කියලා. එක එතරම්ම අවශ්‍ය දෙයකුත් නෙමෙයි. ගම්වලට පහළ මට්ටමේ කටයුතු කරන්න ලොකු ප්‍රතිපත්ති අවශ්‍ය නැහැ. 
මෙහි ඇති විශේෂත්වය නම් ජනතා විමුක්ති පෙරමුණෙන් පත්වන පුද්ගලයන් දූෂිතයන් බවට පත්වීමට කල් ගත වීමයි. ඔවුන් ක්‍රියාත්මක වෙන්නේ ජනතා විමුක්ති පෙරමුණ කියන පක්ෂයේ අධීක්ෂණය යටතේ. ඒනිසා එවැනි දූෂිත ක්‍රියා කිරීමට ලැබෙන ඉඩකඩද අඩුයි. අනික් ප්‍රධාන පක්ෂ තුනේම එලෙස සිදුවන්නේ නැහැ. දැන් ඔය ප්‍රතිඥා දුන්නට ඡන්දය ඉවර වුණාම ඔවුන්ට කිසිම පාලනයක් හිමිවන්නේ නැහැ. ඔවුන්ගේ තිබෙන අරමුණුවල පරස්පරතාව නිසා එහෙම කරන්නත් බැහැ. නමුත් ජනතා විමුක්ති පෙරමුණ නිර්මාණය වී ඇති ආකාරය තුළ තිබෙනවා තමන්ගේ පක්ෂය තුළින් පත්වන මහජන නියෝජිතයා කෙරේ යම් කිසි පාලනයක්. ඇමෙරිකාවේ වුවත් මහජනයා හා ඒ කොමියුනිටි එකත් අතර තිබෙන සම්බන්ධය ඉතාම වැඩියි. නමුත් එරට වගේ ලංකාවේ ජනයාගෙන් මොවුන් පාලනය වන්නේ නැහැ. මොවුන් ජනයාගෙන් පාලනය වන්නේ නැතිනම් වෙනම යාන්ත්‍රණයක් තිබෙන්න අවශ්‍යයි මොවුන් පාලනය වන්න. ජනතා විමුක්ති පෙරමුණේ තිබෙන වැදගත් දෙය වන්නේ එහි සිටින පාලකයන් පක්ෂයෙන් පාලනය වන එක. අනික් පක්ෂ තුනේම එහෙම පක්ෂයෙන් පාලනයක් සිදුවන්නේ නැහැ. ගම් මට්ටමේ දූෂිත ක්‍රමය නැති කරන්න දැන් තිබෙන එකම ක්‍රමය තමයි මේ ඉන්න ප්‍රභූ පිරිස වෙනුවට වෙනත් ප්‍රභූ පිරිසක් ගෙන ඒම. එයට ඉන්න සුදුසුම අපේක්ෂකයන් තමයි ජනතා විමුක්ති පෙරමුණේ අපේක්ෂකයන්.*

'අපේ ළමයින්ට පාසලක්, අපේ ගමට පාරක් කියලා හිතන්න පුළුවන් නායකයෙක් පත් කර ගන්න අවශ්‍යයි' නීතිඥ හර්ෂණ නානායක්කාර

DSC_4828'මම අද පැහැදිලිව කියනවා 1957ට වඩා අද වනවිට දූෂණය, අල්ලස් ක්‍රියාවල අඩුවක් පාඩුවක් නැති බව. අපට දූෂණයක් අල්ලසක් කියන දේ ඇසෙත්ම මතකට නැගෙන්නේ බැඳුම්කර වංචාව ගැනයි. ඒවා වැරදි වගේම එවැනි දේ වැළක්විය යුතු බවට මා පිළිගන්නවා. නමුත් ඊට වඩා අපට නොපෙනෙන අපේ මතකයේ අනුමත වන දූෂිතයන් තිබෙනවා. අපි රජයේ යම් කාර්යාලයකට ගිය විට තමන්ගේ වැඩේ ඉක්මන් කර ගන්න කීයක් හරි දෙන්න පෙළඹෙනවා. අපි ඒ දේ කරනවා පමණක් නොව තමා හිතවත් වෙනත් පුද්ගලයන්ටත් එය ඉක්මනින් සිදු කරගන්නා ආකාරය පිළිබඳ පවසනවා. එයින් සිදුවන්නේ අප විසින් නොසිතාම අල්ලස් ගැනීම සඳහා මාර්කට් එකක් සකස් කර දීමයි. 
මේවැනි දූෂණ ක්‍රියා මගින් ඔවුන් දෙන සේවාවේ ගුණාත්මක බව අඩු වීම සමාජයට ලැබෙන එක් අහිතකර ප්‍රතිඵලයක්. එය නගර සභාව, අධිකරණ පද්ධතියේ, රෝහල්වල, විදුලිබල මණ්ඩලයේ , නගර සභාවේ ආදී සෑම තැනකම සුළු කාර්යමණ්ඩලයේ සිට මෙවැනි දේ දැකගන්න පුළුවන්. ඇත්තෙන්ම මිලියන 500 දුෂණ ක්‍රියාවලට වඩා බරපතළයි මේ කියන තත්ත්වය. දූෂණය නිසා රැකියා අවස්ථාවන් පවා නැති වෙනවා. අනෙක් කාරණය තමයි දූෂණය වංචාවෙන් පිරි රටවල්වල මිනිසුන්ගේ සෞඛ්‍ය තත්ත්වය ඉතා ඉක්මනින් පිරිහෙනවා. එයට හේතුව නම් පිරිසුදු වතුර ටිකක් බීමට හැකියාවක් නොතිබීම, හරි පාරක් හෝ ප්‍රමිතියකින් යුතු වාහන නොතිබීම. මම එසේ පැවසීමට කාරණා කිහිපයක්ම තිබෙනවා. යම් කර්මාන්ත ශාලාවක් විසින් අපද්‍රව්‍ය පරිසරයට මුදා හරිනවා නම් ඒ අපද්‍රව්‍යවලින් පරිසරයට වන හානිය වළක්වන්න කටයුතු කරලයි මුදා හැරිය යුත්තේ. යම් කර්මාන්ත ශාලාවකින් දුමක් හෝ ශබ්දයක් පිටවෙනවා නම් එය තත්ත්ව පාලනයකට යටත්ව සිදුවිය යුතුයි. ඒවා පාලනය කරන නිලධාරීන් විසින් එවැනි ක්‍රියා සඳහා යම් මුදලක් අය කරගත් විට ඒවා වළකන්න කවුරුත් නැහැ. අපේ භාවිතයට එන්නේ අපිරිසුදු ජලය, විෂ දුම ආදියයි. අපි ලොකු ලොකු මන්ත්‍රීවරුන්ට ඇමතිවරුන්ට බැණ බැණ හිටියට අපි මේ මට්ටම ගැන බලනවා අඩුයි. නමුත් අපි එතැනයි බැලිය යුත්තේ. මෙවන් තත්ත්වයක් යටතේ රටක නීතියක් පමණක් තිබීම ප්‍රමාණවත් වන්නේ නැහැ. අල්ලස, දූෂණය නැවැත්වීමට නම් අපිටත් උනන්දුවක් අවශ්‍යතාවක් තිබිය යුතුයි. අපි අපේ මනස තුළ මෙවන් වංචනික ක්‍රියා අනුමත කරන තාක්කල් අල්ලස දූෂණය නවතින්නේ නැහැ. වර්තමාන ආණ්ඩුව බහුලව කතා කරනවා අයෝජන ගැන. නමුත් කිසිම කෙනෙක් අයෝජන ගැන කතා කරන්නේ නැහැ දූෂණය තියෙන තැන. කිසිම විශ්වාසනීයත්වයකුත් නැහැ. එනිසා මෙවන් රටවලට විදේශීය විනිමය අයෝජනය කිරීමක් හෝ රැකියා අවස්ථාවන් සඳහා ඉඩකඩ විවරවීමක් සිදුවන්නේ නැහැ. ඒවගේම පසුගිය දිනවල්වල පුවත්පත්වල ප්‍රකාශයට පත් වූ දෙයක් තමයි එක් එක් අමාත්‍යාංශවල මුදල් භාවිත නොකර නැවත ඒවා භාණ්ඩාගාරයට ලබා දීම පිළබඳව. රෝහලට ගිය මිනිසුන්ට බෙහෙත් නැත්නම්, මිනිස්සු ඇඳන් යට නිදියන්න වෙනව නම්, පාසල්වල ඩෙස් පුටු නැතිනම්, ගුරුවරු හිඟනම් කෙහොමද භාණ්ඩාගාරයට මේ ලෙසින් මුදල් ඉතිරි වන්නේ. දූෂණය නිසා සමාජයට සිදුවන බරපතළ ප්‍රශ්නයක් මෙය. දූෂණයට පුරුදු වුණාට පසුව වංචාවට හුරු වුණ කෙනෙකුගේ එය නොමැති විට අතපය දුවන්නේ නැහැ. හැබැයි මේ තත්ත්වය ඇති වන්නේ රුපියල් 100 ගන්න කම්කරුවගේ ඉඳලයි. මේ විදිහට රටක් සංවර්ධනය වේවිද? ඒ නිසා මතක තබාගත යුතු දෙයක් වන්නේ මහා පරිමාණ වංචාවන් ඇතුළේම අපගේ සිත තුළ අනුමත වන දේවල්වලින් පවා වංචා දූෂණ සිදුවන බව. 
මේ කියන සියලු ප්‍රශ්න විසඳීමට නම් ගම් මට්ටමේ සිට අවංක නායකත්වයක් අවශ්‍යයි. අවුරුදු 70ක සිට තිබූ පක්ෂවලින් ප්‍රශ්න විසඳීමට වඩා තිබූ ප්‍රශ්න වැඩි වූ බව අපි දන්නවා. ඒ නිසා අපේ ජීවිත සමෘද්ධිමත් කර ගැනීමට අපට විශාල වගකීමක් තිබෙනවා. මෙය කිරීම එතරම් අපහසු නැහැ. ආත්මාර්ථකාමී නොවී සමාන්‍ය බුද්ධියකින් තොරව තමන්ගේ ඡන්ද අපේක්ෂකයා තෝරා ගත යුතුයි. මගේ ළමයාට පාසලක්, මගේ ගෙදරට පාරක් වෙනුවට අපේ ළමයින්ට පාසලක්, අපේ ගමට පාරක් කියලා හිතන්න පුළුවන් නායකයෙකු පත් කර ගන්න අවශ්‍යයි. ඒ නිසා අවංක, වැදගත් පුද්ගලයන්ට පමණයි අප ඡන්දය දිය යුත්තේ. 

නිලධාරීන්, දේශපාලඥයන්ගේ රූකඩ තත්ත්වයට පත් කර ගෙන ගම සංවර්ධනය කරන්න බැහැ' හිටපු අමාත්‍යාංශ ලේකම් ඒ.පී.ඒ. ගුණසේකර

'දූෂණයෙන් තොර ගමක් යන තේමාව යටතේ නිලධාරීන්ගේ කාර්යභාරය පිළිබඳව මා කතා කිරීමට කැමතියි.එයට හේතුව මමත් වසර 40කට ආසන්න කාලයක් නිලධාරියෙකු වශයෙන් කටයුතු කළ නිසයි. DSC_4833
රටක නීතිරිතී පද්ධතියක් සකස් කර තිබෙනවා කිසියම් රාමුවක් ඇතුළත. මේ තුළ නිලධාරීන්ට තිබෙන රාජකාරිය ස්වාධීනව කරගෙන යාමට ඉඩදෙනවා නම් දූෂණය කියන දෙය ගොඩක් අඩුකර ගන්න පුළුවන්. දීර්ඝ කාලයක් කැපවීමෙන් ජනතාවට සේවය කළ නිසා ඒ අත්දැකීම මට තියෙනවා. යම් නීනියක් අවශ්‍ය වූ විට වෙනස් කිරීමට මෙන්ම ඇතැම් විට එය ඉක්මවා ගොස් කටයුතු කිරීමට සිදුවන අවස්ථා ද තිබෙනවා. නමුත් දශක කිහිපයක් තිස්සේ සිදු වී තිබෙන්නේ ජාතික මට්ටමේ හෝ වේවා දිස්ත්‍රික් පළාත් මට්ටමේ හෝ වේවා ග්‍රාමීය මට්ටමේ හෝ වේවා නිලධාරීන්ට ඔහුගේ රාජකාරිය නිසි ආකාරව ඉෂ්ට කරන්න හරි ආකාරව ඉඩ ප්‍රස්ථා හිමි නොවීමයි. අපි කුඩා කාලයේ ජීවත් වූ ගම බැලුවහොත් නොයෙක් මලින් පිරි ජලාශ තිබුණා. නමුත් අද වනවිට ඒවා ජපන් ජබර, සැල්වීනියා පැතිරුණු  හබරල, වල් ආදියෙන් ගහන වූ ජලාශ බවට පත්ව තිබෙනවා. මෙතෙනට කවුද ගම ගෙනගියේ. 
නමුත් නැවතත් අපට ඒ ජලාශය තිබූ තැනටම ගෙනියන්න පුළුවන් නම් මම හිතනවා අපි සාර්ථකයි කියලා. ඒසේ වීමට නම් දේශපාලඥයා දේශපාලඥයාගේ වැඩ කොටස නිසි අයුරින් සිදුකරන්න අවශ්‍යයි. දේශපාලඥයා රාජ්‍ය තන්ත්‍රයේ සිට රාජ්‍ය යන්ත්‍රයේ සිටින නිලධාරියාට ඒ වැඩ කොටස කිරීමට දෙනවා නම් එතැන ගැටලුවක් ඇති වන්නේ නැහැ. ග්‍රාම නිලධාරිවරයා ගම් මට්ටමේ සිටින වැදගත්ම නිලධාරියයි. අද ඔහුගේ ස්වාධීනත්වය ද නැහැ. එකල මිනිසුන් විසින් ඇති කරගත් ග්‍රාම සමිති තිබෙනවා. ඒවා නගා සිටුවීමට පවා ග්‍රාමෝදය මගින් පියවර ගත්ත ද එයටත් දේශපාලය ඇතුළු වීමෙන් මිහිපිට නොමැති සමිති සමාගම් පවා පිහිටුවා ගන්නට යෙදුණා වාසි අපේක්ෂාවෙන්. 
මෙය විනාශයක්. හැමතැනම දේශපාලනය. ඉතාම යහපත් චේනතාවෙන් සකස් කළ ග්‍රාමෝදය මණ්ඩලයට ටෙන්ඩර් කැඳවන්නේ නැතිව කොන්ත්‍රාක් කරන්න දුන්නා. ඔවුන් දේශපාලඥයන්ගේ කොන්ත්‍රාත් කටයුතු කරන දේශපාලන අතකොලු බවට පත් වුණා. මෙයින් සිදුකරන වැඩ සඳහා මුදල් වෙන් කරාම එහෙම් පිටින්ම කුට්ටියක් යනවා දේශපාලඥයන්ට. මේක තමයි යථාර්ථය. ඒ නිසා මම කියන්නේ දූෂණයෙන් තොර රටක් හදන්න නම් ගම් මට්ටමේ හෝ ජාතික මට්ටමේ සේවය නියුතු සෑම නිලධාරියෙකුගේම ස්වාධීනතාව තහවුරු කළ යුතුයි. එසේ නොමැතිව දේශපාලඥයන් අතට මේ සියල්ලම රැගෙන නිලධාරීන් ඔවුන්ගේ රූකඩ තත්ත්වයට පත් කර ගෙන ගම සංවර්ධනය කරන්නත් බැහැ. ගම දියුණු කරන්නත් බැහැ. අපි ඉහළ තලයේ නිලධාරීන් සිටි අවධියේදී අපට කෙතරම් බලපෑම් ඇවිත් තිබෙනවාද? නමුත් මම නම් ඒ එකකටවත් ඔළුව නමලා නැහැ. මේ දූෂණය කියන දෙය උඩ ඉඳලයි පහතට ගලාගෙන යන්නේ. පහත ඉඳලා ගලාගෙන එන එකක් නෙමෙයි. ඒනිසා මගේ මතය නම් නිලධාරීන්ට ස්වාධීනව කටයුතු කළ හැකි ඔවුන්ගේ වැරදිවලට දඬුවම් දෙන ලෙස රටේ පාලන තන්ත්‍රයත් යාන්ත්‍රයත් හැඩගැසී නිවැරදිව පාලනය කරන දේශපාලඥයන් සෑම මට්ටමකටම පත් කරන්න අවශ්‍යයි යන්නයි.* 

'ප්‍රධාන පක්ෂ සියල්ලම වාගේ ස්ත්‍රීන් පාචිච්චි කරන්නේ තමන්ගේ ලැයිස්තුව ලස්සන කරන සැරසිල්ලක් වගේ' මහාචාර්ය ලියනගේ අමරකීර්ති

'මම ජනතා විමුක්ති පෙරමුණේ පාක්ෂිකයෙක් නෙවේ. නමුත් ඔවුන් සමග නිරන්තර විචාරත්මකව සිටින කෙනෙක්. ප්‍රධාන දේශපාලන පක්ෂ දෙක තුනකට කැඩී තිබුණත් රනිල්, මෛත්‍රී, බැසිල් යන දේශපාලන ප්‍රභූන් අත්‍යන්තයෙන්ම දූෂිතයන් බව අපි කවුරුත් දන්නවා. ඒ දේශපාලනික දූෂිත භාවය පෙන්වන ආචාර ධාර්මික ධර්මනය තමයි ජනතා විමුක්ති පෙරමුණ. අපි හොරෙක් නොවේ කියා මහජන ඇසකින් පිළිඹිබු වේ නම් අපි හරි බයයි ඒ මහජන දර්පණයට. ඒ දර්පණයට අසුවන ආචාර ධර්මනය වන ජනතා විමුක්ති පෙරමුණ බව මෙවර මැතිවරණයේදී අපි පෙන්විය යුතුයි. අපි ගමින් ගමට ගොස් මිනිසුන්ට මේ පණිවුඩය කියන්න අවශ්‍යයි. 
මහජන දේපොළ, මුදල් හොරකම් කරන එකට වඩා අපිට නොහැකිද මේ දූෂණය කියන වචනය මේ මැතිවරණ සටනේ වැදගත්, අර්ථවත් විභවතාවක් ලෙස ගෙන බලන්න. මම හිතන්නේ පුළුවන්. මේ මැතිවරණ සටන ඇතුළේ දූෂණ ක්‍රියා ප්‍රධාන පක්ෂ සියල්ලම වගේ සිදුකරනවා. ස්ත්‍රී නියෝජනය වැඩි වී තිබෙනවා මෙවර මැතිවරණයේදී. නමුත් ප්‍රධාන පක්ෂ සියල්ලම වාගේ ස්ත්‍රීන් පාචිච්චි කරන්නේ තමන්ගේ ලැයිස්තුව ලස්සන කරන සැරසිල්ලක් වගේ. ස්ත්‍රීන් කියන්නේ අපේ දේශපාලනය සරසන සැරසිල්ලක් නෙමෙයි. 
ජනතා විමුක්ති පෙරමුණට පුළුවන් මෙවැනි මැතිවරණයකදී ස්ත්‍රීන්ගේ කාර්යය ශක්තිය, තර්ක කිරීමේ ශක්තිය, සහාභාගීවීමේ ශක්තිය, ප්‍රශ්න කිරීමේ ශක්තිය සහ මේ රටේ ආර්ථිකයට ස්ත්‍රීන් දෙන දායකත්වයේ ශක්තිය සමරන්න. එවැනි ස්ත්‍රී ක්‍රියාධාරිනියක් නිර්මාණය කරගන්න පුළුවන් මේ මැතිවරණයේදී, එය දූෂණයෙන් තොර ගමක් යන අර්ථකථනය පළල් කිරීමේ එක අංගයක්. 
මේ පළාත් පාලනය යන සිංහල යෙදුම ඇත්තෙන්ම දූෂිතයන්ටම ගැළපෙන යෙදුමක්. ඉංග්‍රීසි යෙදුම මම හිතන්නේ ඊට වඩා ප්‍රබලයි. පළාත් පාලන කිව්වහම එහි අර්ථය වැසෙනවා කියලයි මම හිතන්නේ. එදා ඉඳලා කොළඹ ඉන්න ලොකු දූෂිත හෙංචයියන්ගේ පොඩි දූෂිත හෙංචයියන් සිටින තැන තමයි පළාත් පාලන ආයතන කියලා කියන්නේ. ජනතා විමුක්ති පෙරමුණේ අය මෙයින් හම්බකරගන්න හදන පිරිසක් නොවන නිසාම, අර කියන ආචාර දර්පණයෙන් යුක්ත නිසාම ඔවුන්ට පුළුවන් කොළඹ ඉන්න ලොකු හොරුන්ට අභියෝග කරන්න ගමේ ඉඳලා. අන්න ඒක තමයි අපි නියම ලෝකල් ගවර්මන්ට් කියලා කියන්නේ. මේ හැමදෙයක් ගැනම වගකීමක් පාලනයක් තියනවා මේ ජනතා විමුක්ති පෙරමුණට. ඔවුන්ට තිබෙනවා ක්‍රියාධර සංස්කෘතියක්. ඒ නිසා මම සිතනවා හුදෙක් ආර්ථික මෙන්ම මහජන දේපොළ හොරාකෑම වගේ දේවල් වැළැක්වීමට වඩා දේශපාලන සංස්කෘතියක් අලුතින් ගොඩනැගීම ප්‍රජාතන්ත්‍රවාදයට අර්ථයක් දීම සම්බන්ධයෙන් මේ මැතිවරණය භාවිත කරන්න පුළුවන් කියලා.'

සටහන- ෂෙහානි දිල්රුක්ෂිකා/ඡායාරූප – ශාන්ත රත්නායක

මේ ආණ්ඩුව ගේන්න මහන්සි වෙච්ච අයට පවා අද ආණ්ඩුව වහකදුරු වෙලා

 


සුවිශේෂී වර්ෂයක් – නිවාඩු වැඩි වර්ෂයක්

පක්ෂ විපක්ෂ සියලුම මැති ඇමතිවරුන් පළාත් පාලන මැතිවරණයේදී වැඩි ජයග්‍රහණයක් ලබාගැනීමට වෙහෙසී කටයුතු කරමින් සිටියි.

ඇමති වජිර අබේවර්ධනද  එක්සත් ජාතික පක්ෂයට ගාල්ල දිස්ත්‍රික්කයේදී අතිවිශිෂ්ට ජයග්‍රහණයක් අත්පත් කරදීම සඳහා වෙහෙසී කටයුතු කරමින් සිටියි.

ඒ අනුව ඉකුත් සති අන්තයේදී ගාල්ල දිස්ත්‍රික්කයේ ආසන බලමණ්ඩල 10ම කැඳවීමට වජිර පියවර ගෙන තිබුණි. මෙම ආසන බලමණ්ඩල රැස්වීම් සඳහා විදේශ කටයුතු ඇමති තිලක් මාරපන, ඉඩම් හා පාර්ලිමේන්තු ප්‍රතිසංස්කරණ ඇමති ගයන්ත කරුණාතිලකද  එක්ව සිටියහ. මෙම ආසන බලමණ්ඩල රැස්වීම්වලදී ඡන්ද පොත් බෙදා දී මැතිවරණ ව්‍යාපාරය  ආරම්භ කිරීමට අවශ්‍ය උපදෙස් හා මගපෙන්වීම් අදාළ අමාත්‍යවරු විසින් සිදුකළහ.

බදාදා සිරිකොත පක්ෂ මූලස්ථානයේදී පැවති එජාප ආසන සංවිධායකවරුන්ගේ රැස්වීමේදී පක්ෂ මහලේකම් කබීර් හෂීම්  ඇමති වජිරට විශේෂ ස්තුතියක් පළ කළේය. ඒ ඉකුත් සති අන්තයේදී ගාල්ල ආසන බලමණ්ඩල 10 අතිසාර්ථක ලෙස පැවැත්වීම පිළිබඳවය.

නව වසරේ වැඩ ආරම්භ කිරීම වෙනුවෙන් ස්වදේශ කටයුතු හා රාජ්‍ය පරිපාලන අමාත්‍යාංශ දෙක මගින් සංවිධානය කර තිබූ උත්සව අවස්ථාවට එක්වීමට ඇමති වජිර සහ ඇමති රංජිත් මද්දුමබණ්ඩාර පැමිණියහ. මෙහිදී ඇමති වජිර සේවකයන්ට විශේෂ යමක් කියා සිටියේය.

 ‘2018 වසර සුවිශේෂී වර්ෂයක්.  ඒ මොකද මේ අවුරුද්දට නිවාඩු දින 124ක් තියෙනවා. ඒ වගේම පෝය 13ක් යෙදී තිබෙන   නිසාත් වෙසක් පෝය අප්‍රේල් 29 වැනි දිනට යෙදී ඇති නිසාත්  නිවාඩු දින නොතකා රට සහ ජනතාව වෙනුවෙන් රාජ්‍ය නිලධාරීන් ලෙස සේවය කිරීම තමයි වැදගත්. ඔබ සියලුම දෙනා මේ සම්බන්ධයෙන් අවධානය යොමුකරයි කියලත් මම හිතනවා’ යැයි කීවේය.

ඇමතිවරුන්ගේ යෝජනාව හා මන්ත්‍රීවරුන්ගේ යෝජනාව

2018 වසරේ ආරම්භ වීම නිමිත්තෙන් ජනවාරි 02 වැනි දින අරලියගහ මන්දිරයේ රාජකාරි කටයුතු ඇරඹීමේ අවස්ථාවට අගමැති රනිල් වික්‍රමසිංහ සමග මැති ඇමතිවරු එක්වූහ.

  මැතිවරණ කොමිසම විසින් ගැසට් මගින් ප්‍රකාශයට පත් කළ මාධ්‍ය උපමාන පාර්ලිමේන්තුවට ඉදිරිපත් කිරීමේ යෝජනා සම්මතයට මෙම අවස්ථාවේදී අගමැතිවරයා අත්සන් කළ අතර, එම අවස්ථාවටද ඇමතිවරු කිහිපදෙනෙක්ම එක්වූහ. තේපැන් සංග්‍රහයෙන් පසුව අගමැතිවරයාට පෞද්ගලිකව හමුවූ ඇමතිවරුන් කිහිපදෙනෙක් අගමැති රනිල්ට යෝජනාවක් කළේය.

‘අලුතින් පිහිටුවන දුෂණ වංචා අධිකරණයේ පළමු නඩුව විදිහට බැඳුම්කර කොමිසමේ නඩුව අහන්න කියලා අපි යෝජනා කරනවා සර්’ යැයි ඔවුන් කියා සිටියහ.

බැඳුම්කර කොමිසමේ වාර්තාව සහ එහි නිර්දේශ පිළිබඳව  විවිධ අදහස් මෙහිදී පල කළ අතර, ඊට පසු දිනයේදී ජනාධිපතිවරයාගේ විශේෂ ප්‍රකාශයක් කරන බවට මාධ්‍ය වාර්තා පළවී තිබූ බැවින් ඒ පිළිබඳවද මෙහිදී විවිධ අදහස් පළ විය.

අගමැතිවරයා සමග සාකච්ඡා කොට ඇමතිවරුන් ඉවත්ව ගිය පසු පසුපෙළ මන්ත්‍රීවරුන්ද අගමැතිවරයා හමු විය. ඔවුන් තවත් යෝජනාවක් අගමැතිවරයාට ඉදිරිපත් කළහ.

‘බරපතළ දූෂණ වංචා විමර්ශන කොමිසමේ වාර්තා 17ක් ජනාධිපතිතුමාට බාරදීල තියෙනවා සර්. මේ වාර්තාවල නිර්දේශ ඉක්මනින් ක්‍රියාත්මක කරන්න කියල අපි ඉල්ලන්න කැමතියි සර්’ 

ඔවුන්ගේ යෝජනාවටද අගමැති රනිල් ඇහුම්කන් දුන් අතර, මේ වර්ෂයේ සැලසුම් පිළිබඳවද, පුංචි ඡන්දය පිළිබඳවද ඔවුන් දීර්ඝව කතා කළේය.

නවීන්ගෙන් අලුත් යුනිට් එකක්

අලුත් අවුරුද්ද වෙනුවෙන් අමාත්‍යාංශවල වැඩකටයුතු ආරම්භ කෙරුණේ අඟහරුවාදා උදෑසනය. අඟහරුවාදා උදෑසන කැබිනට් මණ්ඩල රැස්වීමත් පැවැත්වෙන නිසා අලුත් අවුරුද්දේ වැඩ කැබිනට් රැස්වීමෙන් ආරම්භ කරනවාද නැතිනම්, අමාත්‍යාංශයට ගොස් ආරම්භ කරනවා දැයි ඇමතිවරුන් සිටියේ දෙගිඩියාවෙනි.

මේ අතර සඳුදා රාත්‍රියේදී කැබිනට් ලේකම් කාර්යාලයෙන් ඇමතිවරුන්ට දුරකථන ඇමතුම් ලබාදී පැවසුවේ අමාත්‍යාංශවල රාජකාරි ආරම්භ කිරීමෙන් පසුව දහවල් එකොළහට කැබිනට් රැස්වීම පවත්වන බවයි.

නවීන් දිසානායක ඇමතිවරයාත් උදෑසන අටයිතිහ වනවිට අමාත්‍යාංශයට පැමිණ අලුත් අවුරුද්දේ වැඩකටයුතු ආරම්භ කළේය.

“අපි කැබිනට් පත්‍රිකා ඉදිරිපත් කරලා අවශ්‍ය ක්‍ෂේත්‍ර සම්බන්ධයෙන් තීරණ ගන්නවා. ඒත් සමහර තීරණ ක්‍රියාත්මක වෙන්නේ නැහැ. තීරණ ක්‍රියාත්මක කිරීමට විධිමත් ක්‍රමයක් අවශ්‍යයි” යැයි නවීන් අමාත්‍යාංශ ලේකම්වරයාට කීවේය. ලේකම්වරයාද එය අනුමත කළේය.

“ඉතාමත් ඉක්මනින් කැබිනට් තීරණ ක්‍රියාත්මක කරන යුනිට් එකක් හදන්න” යැයි නවීන් ලේකම්වරයාට උපදෙස් දුන්නේය.

අමාත්‍යාංශ නිලධාරීන්ද නවීන්ගේ අලුත් යෝජනාව ගැන කතා කළේ ප්‍රසාදයෙනි.

කෙහෙල්මලකටද මේ ජනාධිපති වෙන්නේ

ලංකා ඛනිජ තෙල් නීතිගත සංස්ථාවේ සපුගස්කන්ද පිරිපහදුවේ සේවක හමුවකට අමාත්‍ය අර්ජුන රණතුංග පසුගිය බ්‍රහස්පතින්දා එක්විය. විවිධ දේ පවසමින් සිටි ඔහු එහිදී මෙසේද කීවේය.

“මේ ජාතික ආණ්ඩුව මගේ ජීවිතේ තිබුණු ලොකුම ආසාවක්. අපි හැමදාම පක්ෂ බදාගෙන මරා ගන්නවා . නමුත් අද අපි ඒ සංස්කෘතිය වෙනස් කරලා තියෙනවා. අද අපේ රට අභි‍යෝග මැද අලුත් ගමනක් යමින් තිබෙන්නේ. තමුන්නාන්සේලාට කියන්න ඕන, මේ අවුරුද්ද අපේ ඉතිහාසේ වැඩියෙන්ම ණය වාරික ගෙවන්න තියෙන අවුරුද්දක්. හැබැයි අපි පුළුවන් තරම් මේ ණය ප්‍රශ්නය කළමනාකරණය කිරීමට උත්සාහ ගන්නවා. රටේ ජනතාවට ණය බර නොදී මේ ණය ගෙවන්න කටයුතු කරනවා.

පසුගිය අවුරුදු දෙකේදී මේ ණය ප්‍රශ්නය විසඳීමට අපේ ආණ්ඩුව, කැබිනට් මණ්ඩලය පුදුම කැපවීමකින් කටයුතු කළා. කැබිනට් මණ්ඩලය විතරක් නෙමෙයි ජනාධිපතිතුමාත්, අගමැතිතුමාත් රටේ දියුණුවට විශාල කැපවීමක් කළා. මට එක වෙලාවකට හිතෙනවා මොන කෙහෙල්මලකටද මේ ජනාධිපති වෙන්නේ. මොන කෙහෙල්මලකටද මේ අගමැති වෙන්නේ කියලා. මේ අමාත්‍යාංශයක් අරගෙන මට තියෙන හිසරදය කොච්චරද ? නමුත් අපේ මේ නායක‍යන් දෙදෙනා ප්‍රධාන පක්ෂ දෙක එකතු කරගෙන, තුන්වැනි ප්‍රධාන පක්ෂයත් එකතු කරගෙන, විශේෂයෙන්ම උතුරේ පක්ෂද දකුණේ පක්ෂද කියන්නේ නැතුව සිංහලද, දෙමළද, මුස්ලිම්ද කියන්නේ නැතුව සියලුම පක්ෂ එකතු කරගෙන අද මේ රට වෙනස් තත්ත්වයකට ගෙනිහිල්ල තියෙනවා.

අඩුපාඩු තියෙනවා. මමත් සමහර වෙලාවට කලකිරිලා ඉන්නවා හොරු අල්ලලා නෑ කියලා. ඒක මට තියන ලොකුම ප්‍රශ්නයක්. නමුත් අපේ ආණ්ඩුවේ වුණත් වැරැද්දක් කළා නම් ඊට දඬුවම් දෙන්න අපේ ජනාධිපතිතුමයි අගමැතිතුමයි අද තීරණ අරගෙන තියෙනවා’.

ගම්පහ අලවා තිබූ පෝස්ටරය

ඒකාබද්ධ විපක්‍ෂයේ කැඳවුම්කරු, ගම්පහ දිස්ත්‍රික් පාර්ලිමේන්තු මන්ත්‍රී ප්‍රසන්න රණතුංගගේ ඡන්ම දිනය යෙදී තිබුණේ ජනවාරි 01 වැනිදාටය. එදින විශාල පිරිසක් උඩුගම්පොළ පිහිටි ප්‍රසන්නගේ නිවසට රැස්ව සිටියේ ප්‍රසන්නට සුබ පැතීමටය. ප්‍රසන්නට එදින උදෑසන මහින්දගෙන් ඇමතුමක් ලැබිණි. උපන් දිනයට සුබ පැතූ මහින්ද ප්‍රසන්න සමග මැතිවරණය සම්බන්ධයෙන්ද කතාබහක නියැළුණේය.

පසුගිය සතියේ දේශපාලන ලෝකයේ කතාබහට ලක්වූ ප්‍රධාන මාතෘකාවක් වූයේ ‘ජනතාවගේ නායකයා අගමැති කරන ගම්පහ දිස්ත්‍රික් සටන^ ලෙසින් අලවා තිබූ පෝස්ටරයක් සම්බන්ධයෙනි. මහින්දගේත් නෙළුම් පොහොට්ටුවේත් ඡායාරූප යොදා පෝස්ටරය අලවා තිබුණේ ප්‍රසන්නය. ගම්පහ දිස්ත්‍රික්කය පුරා අලවා තිබූ පෝස්ටරය පක්‍ෂ විපක්‍ෂ කාගෙත් කතාබහට ලක්විය.

එක්සත් ජාතික පක්‍ෂය කල්පනා කළේ මෙම පෝස්ටරය මහින්දගේ ප්‍රධානත්වයෙන් 06 වැනිදා කඩවත දී පැවැත්වීමට නියමිත ජනරැලිය අරමුණු කරගෙන නිර්මාණය කරන ලද්දක් බවටය. පෝස්ටර් ලක්‍ෂ 03ක් මුද්‍රණය කර ඇති බවද ඔවුන් සොයාගෙන තිබිණි. එක්සත් ජාතික පක්‍ෂය, ශ්‍රී ලංකා නිදහස් පක්‍ෂය මෙන්ම මහින්දගේ පාර්ශ්වයේ අයද මෙම පෝස්ටරය ගැන කතාබහ කළහ.

පෝස්ටරය ගැන දැනගන්නට ලැබුණු වහාම මහින්ද ප්‍රසන්නට කතා කළේය. ‘මොකක්ද ප්‍රසන්න මේ පෝස්ටරයක් ගහලා තියෙනවා කියන්නේ?’ මහින්ද ඇසුවේය.

‘ඔව් සර් මම එහෙම පෝස්ටරයක් ගැහුවා තමයි. මේක තමයි මේ පාර මැතිවරණයේදී අපේ ගම්පහ දිස්ත්‍රික්කයේ තේමාව. අපේ ජනතාවගේ නායකයා වන්නේ ඔබතුමායි. මේ මැතිවරණයෙන් ලබන ජයග්‍රහණයත් එක්ක අපි මේ ආණ්ඩුව ගෙදර යවලා අපේ ආණ්ඩුවක් පිහිටුවනවා කියන එක තමයි අපි මේ පෝස්ටර් එකෙන් අදහස් කළේ. අපි 2015 ජනවාරි 09 වැනිදා ඉඳලම පාරට බැහැලා ඉන්නේ ඔබතුමා මේ රටේ නායකත්වයට පත්කරන්නයි. මේ මැතිවරණය තමයි අපි ඒකට තියන මුල්ම පියවර’ ප්‍රසන්න පැහැදිලි කළේය.

ඔය විදියටම ගියොත් රටම හොල්ලන ප්‍රතිඵලයක් ගන්න පුළුවන්

ශ්‍රී ලංකා පොදුජන පෙරමුණ හෙවත් පොහොට්ටුවෙන් මෙවර පළාත් පාලන මැතිවරණයට තරග කරන අපේක්‍ෂකයන්ගේ සමුළුවක් අඟහරුවාදා සුගතදාස ගෘහස්ථ ක්‍රීඩාංගණයේදී පැවැත්වුණේ මහින්දගේ ප්‍රධානත්වයෙනි. අතිසාර්ථකව පැවැත්වුණු සමුළුවේ සංවිධාන කටයුතුවලට කරගසා තිබුණේ රෝහිත අබේගුණවර්ධන සහ මහින්දානන්ද අලුත්ගමගේය.

විශේෂයෙන් රෝහිත සමුළුවට ආරාධිතයෙකු වශයෙන් එක්වීමටවත් උත්සුක නොවී ‘වෝකිටෝකි^ යන්ත්‍රයක්ද අතැතිව සමුළුව අවසන් වන තුරුම සංවිධාන කටයුතු මෙහෙයවනු දකින්නට ලැබිණි. සමුළුව අවසන් වීමෙන් පසුව මහින්දගේ නිල නිවසට ඒකාබද්ධ විපක්‍ෂයේ මන්ත්‍රීවරු ගිය අවස්ථාවේදී මහින්ද පෞද්ගලිකවම රෝහිතට සහ මහින්දානන්දට ස්තුති කළේ සාර්ථක සමුළුවක් පැවැත්වීමට දැක්වූ වෙහෙස අගය කරමිනි.

‘ඔයාලා ගොඩක් මහන්සි වෙලා සමුළුව සංවිධාන කරලා තිබුණා. අනෙක් පක්‍ෂ එක්ක බලනකොට සාර්ථක සමුළුවක් පවත්වන්න ලැබුණේ ඒ මහන්සිය හින්දයි. ඔය විදියටම මහන්සි වෙලා මේ ගමන ගියොත් අපට මේ මැතිවරණයේදී රටම හොල්ලන ප්‍රතිඵලයක් ලබන්න පුළුවන්’ යැයි මහින්ද පැවසීය.

‘අද රටම කතා වෙන්නේ පොහොට්ටුව ගැනයි. යන යන තැන මිනිස්සු කියන්නේ ආණ්ඩුව ගෙදර යවන්න පුළුවන් එකම කණ්ඩායම ඒකාබද්ධ විපක්‍ෂය කියලයි’ පවිත්‍රා පෙන්වා දුන්නාය.

‘අපේ ජයග්‍රහණය ස්ථිරයි. ඒ හින්දා තමයි එක්සත් ජාතික පක්‍ෂයත්, ශ්‍රී ලංකා නිදහස් පක්‍ෂයත් අපට කකුල් මාට්ටු දාන්න පටන් අරගෙන තියෙන්නේ. එයාලා පරාජයෙන් බේරෙන්න හදන්නේ අපට කකුල් මාට්ටු දාලයි’ ප්‍රසන්න පැවසීය.

‘ඒක නම් ඇත්ත. අප‍ට මැතිවරණ නීතියට අනුකූලවවත් පක්‍ෂ කාර්යාලයක් පිහිටුවන්න, පත්‍රිකා බෙදන්න පොලීසිය ඉඩ දෙන්නේ නැහැ. අපේ අපේක්‍ෂකයන්ට ලොකු අසාධාරණකම් වෙනවා මේ ආණ්ඩුවේ නීතිය නැමිල්ල හින්දා’ නාමල් කීවේය.

‘ආණ්ඩුව මොනවා කළත් මහජනතාවගේ මතය වෙනස් කරන්න පුළුවන්කමක් නැහැ. මේ ආණ්ඩුව ගේන්න මහන්සි වෙච්ච අයට පවා අද ආණ්ඩුව වහකදුරු වෙලා තියෙන්නේ’ මහින්ද පැවසීය.

‘සර්ගේ මූණට තමයි දැන් රටේ ලොකුම ඉල්ලුම තියෙන්නේ. පුළුවන් නම් යූ.ඇන්.පීකාරයොත් සර්ගේ මූණ දාලා පෝස්ටර් ගහයි. ඒ තරමට සර්ගේ මූණ ජයග්‍රහණයේ ලකුණ වෙලා ඉවරයි’ ප්‍රසන්න පැවසීය.

‘ඒක තමයි මම කිව්වේ ඕනේ කෙ‍ෙනකුට මගේ මූණ දාලා පෝස්ටර් ගහන්න පුළුවන්. හැබැයි අයිතිය නිල වශයෙන් තියෙන්නේ පො‍හොට්ටුවේ අපේක්‍ෂකයන්ට විතරයි කියලා’ මහින්ද සිනාසෙමින් පැවසීය.

මෛත්‍රී ප්‍රකාශය කරද්දි මහින්දගේ ගෙදර කතාවුණු දේවල්

බැඳුම්කර කොමිසමේ වාර්තාව සම්බන්ධයෙන් ජනාධිපතිවරයා විශේෂ ප්‍රකාශයක් සිදුකළ බදාදා සවස ඒකාබද්ධ විපක්‍ෂයේ මන්ත්‍රීවරුන් කණ්ඩායමක් සිටියේ මහින්දගේ විජේරාම පෙදෙසේ පිහිටි නිල නිවසේය. ප්‍රසන්න, නාමල්, ජොන්ස්ටන්, පවිත්‍රා ඇතුළු ඒකාබද්ධයේ මන්ත්‍රීවරු පිරිසක් එහි සිටියහ.

‘ජනාධිපතිවරයාගේ කතාවත් හරියට පුස්ස බින්දා වගේ තමයි. ජනතාව බලන් හිටියේ බැඳුම්කර කොමිසම් වාර්තාවෙන් මීට වඩා දෙයක් එළිවෙයි කියලා’ ප්‍රසන්න පැවසීය.

‘ඒක නම් ඇත්ත. බැඳුම්කර මගඩියේ ලොකු මොළකාරයෝ බේරලා තමයි වාර්තාව ලියලා තියෙන්නේ. හරිනම් අර්ජුන් මහේන්ද්‍රන්ව සිංගප්පූරුවේ ඉඳලා මෙහේ ගෙනාව අගමැති වගේම එයාට
මහ බැංකු අධිපතිකම දීපු ජනාධිපතිවරයාත් මේවාට වගකියන්න ඕන’ ජොන්ස්ටන් පෙන්වා දුන්නේය.

‘ජනාධිපතිවරයා කියනවා කොමිසම් වාර්තාව නීතිපතිට යැව්වා කියලා. අපි දැක්කානේ කොමිසම ඉස්සරහා අගමැතිවරයාගෙන් සාක්ෂි ගන්නකොට නීතිපතිවරයා දක්වපු ලිහිල. ඉතින් අධිකරණ ක්‍රියාමාර්ග ගන්නවයි කිව්වට ගන්නකම් විශ්වාස කරන්න බැහැ’ නාමල් පැවසීය.

‘කොහොම හරි මෙයාලා 2020 පහුවෙනකම් මේ නඩුව ඇදගෙන යන්න බලයි’ මහින්දානන්ද කීවේය.

‘ඔය කොමිසම් වාර්තාවේ කොනක හරි මහින්ද මහත්තයාගේ නම ගෑවිලාවත් තිබුණා නම් බලන්න තිබුණා. එහෙම නම් දැන් නඩුත් අහලා දඬුවමුත් දීලා ඉවරයි. ජනාධිපතිවරයාගේ දෙපැත්ත කැපෙන කඩුවත් හරියට මඩු වලිගේ වගේම තමයි. නිකම් වන වන ඉන්නවා විතරයි’ ප්‍රසන්න පැවසීය.

‘ජනාධිපතිවරයා කොමිසම පත්කළේ ඒකාබද්ධ විපක්‍ෂය මුල්කර ගෙන රටෙන් නැගුණු විරෝධය අහක දාන්න බැරි නිසයි. දැන් නම් පෙන්වන්න හදන්නේ තමන්ම හිතලා කොමිසම පත්කළයි කියලයි. හැබැයි අපට මතකයි බැඳුම්කර ගනුදෙනු ගැන මුලින්ම හොයපු ඩීව් ගුණසේකර මහත්තයාගේ කෝප් කමිටු වාර්තාව පාර්ලිමේන්තුවට එන්න කලින් දවසේ පාර්ලිමේන්තුව විසුරුවා හැරලා අගමැතිවරයා බේරගත්ත හැටි. අන්තිමට ඩීව් ගුණසේකර මහත්තයාට හැමදාම ලැබුණු ජාතික ලැයිස්තු මන්ත්‍රීකමත් නැති කරලා දැම්මා’ මහින්දානන්ද කීවේය.

‘කෘෂිකර්ම අමාත්‍යාංශයට කෝටි ගණන් කුලී ගෙවන් නිළියන්ගේ ගොඩනැගිලි ගන්න පුළුවන් වුණාට ගොවියට පොහොර ටිකවත් දීගන්න බැහැ’ ජොන්ස්ටන් පැවසීය.

‘අද මේ පොහොර ප්‍රශ්නය ලොකු ගැටලුවක් වෙලා තියෙනවා. අපි එදා යුද්ධය තියෙනකොටත් රුපියල් තුන්සිය පනහට පොහොර සහනාධාරය දුන්නා. 2005දී ම? ම පොරොන්දු වුණේ වීවලට විතරක් සහනාධාරයක් දෙන්නයි. හැබැයි මම 2015 අයින් වෙන කොට වී විතරක් නෙමෙයි එළවළු, තේ, රබර්, පලතුරු වගාවලටත් පොහොර සහනාධාරය දෙමින් තිබුණා. මේ ආණ්ඩුව ආවා විතරයි එක පෑන් පාරෙන් පොහොර සහනාධාරය නතර කළා. අද සහන මිලට තියා වැඩි මිලටවත් පොහොර ගන්න නැතුව ගොවියෝ අනාථ වෙලා ඉවරයි’ මහින්ද පැහැදිලි කළේය.

‘මේකෙන් පේන්නේ ආණ්ඩුවේ අසාර්ථකමයි. තෙල් හිඟයක් ඇවිත් රට පුරාම මිනිස්සු තෙල් පෝලිම්වල ලැගලා මාස දෙකක් ගියේ නැහැ. දැන් පොහොර හිඟයක් ඇවිත්. එහෙන් හාල් පෝලිම්. මෙහෙන් පොහොර පෝලිම්. මේවා ආණ්ඩුවට සැලැස්මක් නැති නිසා ඇති වෙන අර්බුද’ ප්‍රසන්න පැවසීය.

‘දුමින්ද දිසානායකට සබීතාගේ බිල්ඩිම කුලියට ගන්න තිබුණු හදිසිය ගොවියාට පොහොර දෙන්න නැහැ’ නාමල් පැවසීය.

කථානායකට මාධ්‍යවේදියෙකුගෙන් කවියක්

නව වසර උදාවීමට ආසන්යේ තිබියදී මහා බ්‍රිත්‍යානයේ සිට මින් වසරකට පෙර ජීවිතයෙන් සමුගත් ඉන්දිරා ජයසූරිය ඩිකර් මහත්මියගේ (කරු ජයසූරිය මහතාගේ කනිටු දියණිය) දරු දෙදෙනා,  මුත්තණුවන්, මිත්තණිය හා ඥාතීන් දැකීමට පැමිණ සිටියහ.

තම පියා සමග ඔවුන් පැමිණ සිටියේ  කුසෙහි හොවා සිටි  සිය පුතුට නිරෝගී උපතත් ල??බා දෙනුවස් පිළිකා රෝගයට ලබා දෙන වෛද්‍ය ප්‍රතිකාර ගැනීමෙන් වැළැකී සිට  ස?ිය මව සිදුකළ ශ්‍රේෂ්ඨ ආත්ම පරිත්‍යාගය සිහි කරමින් බිහිකළ ‘පිළිකා සරණ^ භාරයේ පළමු වසර සම්පූර්ණ වීම නිමිත්තෙන් පැවැති වැඩසටහනටද එක්වීමේ  අරමුණෙනි.

ස්වකීය කුස පිළිසිඳ ගත් පුත්‍ර සම්පත්තිය නිරුපද්‍රිතව  ලෝකයට දායද කළ ඇයගේ අසිරිමත්  මවු සෙනෙහසේ  සකේතය සිඟිති  ‘ඩීලාන්’ පුතුය.

ඔහු සිය මුත්තණුවන් වන කථානායක කරු ජයසූරිය මහතා සමග හුරතල් වෙමින් සිටි අතර, එහිදී ගත් ඡායාරූප බොහෝමයක් මාධ්‍යයේදී පළවිය.

එය දුටු මාධ්‍යවේදියෙකු කවි පද කිහිපයක්  ලියා කථානායකවරයාට එවා තිබිණි.

එහි මෙලෙස සටහන් විය.

“නැළවිලි ගී අසන්නට නොසොයන් අම්මා

දරු දුක මමත් කඳුළැලි සයුරක දැම්මා

මගේ දෑතේ උඹට උණුසුම නැත නිම්මා

බඩ බැද රකිමි නුඹ තනි නැත  මයෙඅම්මා”

ජීවිතයේ කෙතරම් අමිහිරි අත්දැකීම්වලට මුහුණ දුන් පරිණත පුද්ගලයෙකු  වවද,  මෙම කවි පද කිහිපය කෙරෙහි කරු ජයසූරිය මහතා බෙහෙවින් සංවේදී  විය.

එය ලියා එවා තිබූ ප්‍රියන්ත කොඩිප්පිලි නම් මාධ්‍යවේදියා  අමතා බෙහෙවින්  ස

්තුති  කිරීමටද ඔහු  අමතක  නොකළේය.

පොහොර ප්‍රශ්නෙ ගැන කවුරු හරි ඇහුවාද?

බදාදා දින පෙරවරුවේ සෞඛ්‍ය අමාත්‍ය රාජිත රැඳී සිටියේ නාරාහේන්පිට රජයේ ප්‍රවෘත්ති දෙපාර්තමේන්තුවේය. ඒ අමාත්‍ය මණ්ඩල තීරණ දැනුම් දීමේ මාධ්‍ය හමුවට එක්වෙමිනි. එම මාධ්‍ය හමුව අවසන් වූ විගසම සෞඛ්‍ය අමාත්‍යවරයාට ජනාධිපතිවරයාගෙන් දුරකථන ඇමතුමක් ලැබිණි. එහිදී මාධ්‍ය හමුවේදී පොහොර ප්‍රශ්නය ගැන මාධ්‍යවේදීන් විමසුවේ දැයි ජනාධිපතිවරයා සෞඛ්‍ය අමාත්‍යාංශයෙන් විමසීය. එවිට සෞඛ්‍ය අමාත්‍යවරයා පැවැසුවේ, “ජනාධිපතිතුමනි, දයාසිරි ඇමතිතුමා ඒ ප්‍රශ්නයට සාර්ථකව පිළිතුරු ලබා දුන්නා. ඒක නිසා ප්‍රශ්නයක් වුණේ නැහැ” කියාය.

ඉන් පසු ජනාධිපතිවරයා සෞඛ්‍ය අමාත්‍යවරයාට ආරාධනාවක් කළේය. ’ඩොක්ටර් මම 08 වැනිදා මොරගහකන්දේ සහ පොල්ගොල්ලේ උත්සව දෙකකට යනවා. මගෙත් එක්ක හෙලිකොප්ටරයෙන් යන්න එන්න. පොල්ගොල්ලේ තිබෙන උත්සවයේදී ඩොක්ටර් කතාවකුත් කරන්න. අගමැතිතුමා එන්න වෙන්නේ නැහැ කිව්වා. එම නිසා අගමැතිතුමා වෙනුවෙන් ඔබතුමා කතා කරන්න” යැයි ජනාධිපතිවරයා සඳහන් කළේය.  සිනහවෙමින් එය සතුටින් බාරගත් රාජිත “හරි ජනාධිපතිතුමනි, මම එන්නම්” යැයි පැවසීය.

දොස්තර රාජිත – ‘ඩොක්ටර් නවරියන්’  බලන්න යයි

සෞඛ්‍ය අමාත්‍ය රාජිත සේනාරත්න සහ ඔහුගේ බිරිඳගේ  ආරාධනාව මත සෞඛ්‍ය අමාත්‍යාංශයේ නිලධාරීන්ට සහ මාධ්‍යවේදී හිතවතුන්ට පසුගියදා සුහද හමුවක් පැවැත්විණි. මෙහිදී මාධ්‍යවේදීන් බහුතරය විමසා සිටියේ බැඳුම්කර කොමිසමේ වාර්තාව පිළිබඳවය. “එම වාර්තාව පිළිබඳ ජනාධිපතිතුමා බදාදා හැන්දෑවේ ප්‍රකාශයක් කරනවා. ඒකෙදී මොකද වෙන්නේ කියලා බලාගන්න පුළුවන්” යැයි රාජිත පැවසීය. ඉන් පසු එම අවස්ථාවට එක්ව සිටි මාධ්‍යවේදියෙකු විසින් සෞඛ්‍ය අමාත්‍යවරයාගෙන් විමසා සිටියේ “ ‘ඩොක්ටර් නවරියන්^ චිත්‍රපටය බැලුවාද?” යන්නයි.

එවිට රාජිත කියා සිටියේ “මට නම් තාම බලන්න බැරිවුණා. ඒත් වෛද්‍යවරුන් සිදුකරන විවිධ විෂමාචාර ක්‍රියා පිළිබඳ එහි සඳහන් වෙනවා යැයි මට ආරංචි වුණා. හොඳ සින්දුවකුත් තියෙනවාලු නේද?” යැයි අමාත්‍යවරයා විමසීය.

එවිට මාධ්‍යවේදියෙකු විසින් රාජිතට ‘ඩොක්ටර් නවරියන්^ චිත්‍රපටයේ දර්ශන තම ජංගම දුරකථන සහ ටැබ් උපකරණ මගින් පෙන්වූ අතර, එය බලා රාජිත හඬනගා සිනහ විය.

මම ඉදිරියේදී ඒ ගැන කියන්නම්

බැඳුම්කර කොමිෂන් සභාවේ වාර්තාව පිළිබඳ ජනාධිපතිවරයා විශේෂ ප්‍රකාශයක් සිදුකරන ලද්දේ බදාදා දින පස්වරුවේය. ඊට පෙර සෞඛ්‍ය අමාත්‍යවරයා ‘සුව සැරිය^ ගිලන් රථ සේවාව දිවයින පුරා ව්‍යාප්ත කිරීමේ උත්සවයට අග්‍රාමාත්‍යවරයා සමග එක්වූයේ අරලියගහ මන්දිරයේදීය. එහිදී අග්‍රාමාත්‍යවරයා සමගද සුහද සාකච්ඡාවක නිරත වූ සෞඛ්‍ය අමාත්‍යවරයා පැමිණ සිටින නිලධාරීන්ට ප්‍රකාශ කළේ “මට ඉක්මනට යන්න තිබෙනවා ජනාධිපතිවරයාගේ කතාව අහන්න” යනුවෙනි.

එවිට එම නිලධාරීන් පැවසුවේ “ඔබතුමා කතාව අහන එක හොඳයි මොකද මාධ්‍ය හමුවලදී පිළිතුරු දෙන්නත් තිබෙනවා නේද?” යනුවෙනි.

“ඔව්. එය ඇත්ත” යනුවෙන් සෞඛ්‍ය අමාත්‍යවරයා ප්‍රකාශ කළ අතර, කඩිනමින් තම නිවස වෙත පැමිණි සෞඛ්‍ය අමාත්‍යවරයා ජනාධිපතිවරයාගේ කතාව රූපවාහිනියෙන් නරඹන ලදී.  ඉන් පසු සෞඛ්‍ය අමාත්‍යවරයාට විවිධ දේශපාලන හිතවතුන්ගෙන් දුරකථ ඇමතුම් ගලාගෙන එන්නට පටන් ගත්තේය. එවිට සෞඛ්‍ය අමාත්‍යවරයා ප්‍රකාශ කළේ “මේ ගැන මම ඉදිරියේදී ඔබලා සමග කතා කරන්නම්” යනුවෙනි

‍දේශපාලනයෙන් තොර අධ්‍යාපන ප්‍රතිසංස්කරණයක් දැන් අත්‍යවශ්‍යයි

සැබෑ අධ්‍යාපනයක මුඛ්‍ය පරමාර්ථය විය යුත්තේ නිර්මාණශීලී, ස්වාධීන සහ රටට වැඩදායී මිනිසුන් දායාද කිරීමය. ඒ වෙනුවෙන් නිසි ප්‍රායෝගික අධ්‍යාපන ක්‍රමයක් රට තුළ පැවැතිය යුතු අතර, එය රටට හිතසුව පිණිස මිස පුද්ගල කණ්ඩායමක අභිමතාර්ථ සපුරන ක්‍රමයක් නොවිය යුතුය. ශ්‍රී ලංකාවේ පවතින අධ්‍යාපන ක්‍රමය පිළිබඳ නැවත සිතන්න කාලය එළැඹ ඇත්තේ ඉහත හිතකර තත්ත්ව කිසිවක් ප්‍රශස්ථ ලෙස සමාජයට තවමත් නොලැබෙන බැවින්ය. පැහැදිලි ලෙස දේශපලනික අභිමතාර්ථවලින් තොර වූ අධ්‍යාපන ප්‍රතිසංස්කරණයක අවශ්‍යතාව අද රටට තිබෙන අතර, මේ ගෙන එනුයේ ඒ පිළිබඳ විද්වතුන්ගේ විග්‍රහයකි. 


ජීවිතයෙන් වැඩි කාලයක් ප්‍රායෝගික නොවූ අධ්‍යාපනයකට කැපකළ යුතු නැහැ මහාචාර්ය පූජ්‍ය පාතේගම ඤාණිස්සර හිමි  (ශ්‍රී ලංකා භික්‍ෂු විශ්වවිද්‍යාලය)

IMG_5843

ශ්‍රී ලංකාවේ දැනට පවතින පාසල් අධ්‍යාපන ක්‍රමය අසාර්ථක, අවිධිමත්, අසම්පූර්ණ, ජාතිකත්වය සහ දේශීයත්වය පිළිබඳ කිසිම හැඟීමක් නැති අධ්‍යාපන ක්‍රමයක්. මේ ක්‍රමය අධ්‍යාපන විද්‍යාවේදී හඳුන්වන්නේ %ශිෂ්‍ය කේන්ද්‍රීය විධිමත් අධ්‍යාපන ක්‍රමය^ කියලා. නමුත් මේ අධ්‍යාපන ක්‍රමය ඒ රටට, ජාතියට හිතකර වෙන්නේ නැත්නම් එය සම්පූර්ණයෙන් අසාර්ථකයි. පාසල් අධ්‍යාපනය සකස් විය යුත්තේ දරුවෙකුගේ මේරීමේ ස්වභාවය අනුවයි. අද අපේ තියෙන්නේ දරුවෙකුට අවුරුදු 11ක් උගන්වලා සාමාන්‍ය පෙළ විභාගයේදී ගණිත විෂය අසමත් වුණොත් සියල්ල අසමත් ලෙස සලකා එම දරුවාව පැත්තකට විසිකිරීමේ අධ්‍යාපන ක්‍රමයක්. මේ විදියට ප්‍රතික්‍ෂේප වන දරුවන් ප්‍රමාණය වසරින් වසර වැඩි වෙනවා. අද ගණිතය අත්‍යවශ්‍ය නොවන රැකියාවකට පුද්ගලයෙක් බඳවා ගන්න ගියත් සාමාන්‍ය පෙළ ගණිතය සමත්ද කියලා බලනවා. ඒ නිසා තවමත් රැකියා අවස්ථා ගණනාවක පුරප්පාඩු රාශියක් තියාගෙන ඉන්න රටක් බවට මේ රට පත්වෙලා තියෙනවා. දරුවෙකුගේ දක්‍ෂතාව එක් විෂයකින් මනින තත්ත්වයක් උදාවෙලා තියෙනවා.

විය යුත්තේ මේ අසාර්ථක අධ්‍යාපන ක්‍රමය වෙනුවට %ශිල්ප කේන්ද්‍රීය අධ්‍යාපන ක්‍රමවේදයක්^ ඇති කිරීමයි. මනෝ විද්‍යාවට අනුව දරුවෙකුගේ මොළය මේරීම හොඳින් සිදුවෙන්නේ වයස අවුරුදු 11ත්, 19ත් අතර කාලයේදීයි. ඒ වයස් සීමාව මනෝවිද්‍යාවේදී හඳුන්වන්නේ %කුණාටු අවධිය^ කියලා. අද බොහෝ පාසල් දරුවන් විවිධ අකටයුතුකම්වලට යොමුවෙන්නෙත් මේ වයස් සීමාවේදීයි. ඒකට හේතුවෙලා තිබෙන්නේ මේ අධ්‍යාපන ක්‍රමවේදයේ තිබෙන අසාර්ථකභාවය සහ අවිධිමත්භාවය. දරුවන්ගේ අධ්‍යාපනය වෙනුවෙන් දෙමවුපියන් වියදම් කරන මුදල්වලට වටිනාකමක් ලැබිලා නැහැ. ගුරුවරුන්ට ලබාදෙන වැටුපට වටිනාකමක් ලැබිලා නැහැ. අවුරුදු 11ක් අධ්‍යාපනය ලැබුවාට වැඩක් නැහැ, එය ජීවිතයට බද්ධ නොවෙනවා නම්. අධ්‍යාපනය ලැබිය යුතු කාලය තීරණය වෙන්න ඕන මිනිසුන්ගේ ආයු කාලයත් එක්කයි. ජීවිතයෙන් වැඩි කාලයක් ප්‍රායෝගික නොවූ අධ්‍යාපනයකට කැපකළ යුතු නැහැ. 

පාසල් අධ්‍යාපනය ශිල්ප කේන්ද්‍රීය අධ්‍යාපන ක්‍රමයකට සකස් කරලා 08 හෝ 09 වසරේදී සාමාන්‍ය පෙළ විභාගය පවත්වලා ඉදිරි අධ්‍යාපනය ලබන්නේ කලා විෂය ධාරාවෙන්ද, වෘත්තීය ශිල්පයක් ඔස්සේද, එහෙමත් නැත්නම් වෙනත් විෂය ධාරාවකින්ද කියලා දරුවාට තෝරාගත හැකි ආකාරයට ජාතික අධ්‍යාපනය සකස් විය යුතුයි. ඒ වගේම වෘත්තීය පුහුණු ආයතන, පෞද්ගලික අධ්‍යාපන ආයතන මීටත් වඩා වැඩි දියුණු කරලා ව්‍යාප්ත කළ යුතුයි. මේ අධ්‍යාපන අර්බුදය විසඳීමේ වගකීම රජය වගේම ජාතික අධ්‍යාපන ආයතනය බාරගත යුතුයි.

අද දරුවන් අධ්‍යාපනය ලබන්නේ දෙමවුපියන්ගේ ඉහළ අභිමතාර්ථ ඉටු කරන්න මිසක තමන්ගේ ගමන මොකක්ද කියලා හඳුනා ගෙන නොවෙයි ආචාර්ය එම්.ජී. කුලරත්න (කැලණිය විශ්වවිද්‍යාලය)

යමෙක් අධ්‍යාපනය ලැබිය යුත්තේ යහපත් මිනිසෙක් වෙන්නයි. අධ්‍යාපනයෙන් සකස් කළ ආකෘතියක් නොදී නිදහස් පරිසරයක් ලබාදුන්නොත් ඒ නිදහස් පරිසරය තුළින් දරුවාගේ නිර්මාණශීලීත්වය සහ ස්වාධීනත්වය මතුකර ගන්න පුළුවන් වෙනවා. මේ දෙක අධ්‍යාපනයෙන් kularathnaනොලැබෙන නිසයි අද අපේ රට විවිධ ප්‍රශ්නවලට මුහුණ දී තියෙන්නෙ. අද අධ්‍යාපනයට දරන පිරිවැය සහ ලැබෙන ප්‍රතිඵල සම්බන්ධයෙන් ප්‍රශ්න තිබෙනවා. පාසල් දරුවන්ගේ සෞඛ්‍යය සම්බන්ධයෙන් ප්‍රශ්න තිබෙනවා. දරුවෙක් පාසලට ඇතුළත් කිරීම විශාල ප්‍රශ්නයක් වෙලා තියෙනවා. වක්‍රව බැලුවොත් පාසල් නිසා මාර්ග තදබද ප්‍රශ්න මතුවෙලා තිබෙනවා. මේ විදියේ තවත් ප්‍රශ්න ගණනාවක් එක්ක නිර්මාණශීලීත්වයක් නැතිව, ආචාරශීලීත්වයක් නැතිව, සමාජශීලීත්වයක් නැතිව, සාහිත්‍ය සහ කලාව නොහඳුනන, ඉතිහාසයක් නොහඳුනන පිරිස් මේ අධ්‍යාපන ක්‍රමයෙන් බිහිවීම රටට විශාල පිරිවැයක් වන නිසයි මේ අධ්‍යාපන ක්‍රමය අපි වෙනසකට ලක්කළ යුතු වෙන්නේ.

තමන් අධ්‍යාපනය ලබන්නේ රටේ ජනතාව ගෙවන බදු මුදල්වලින්. ඒවාට සාධාරණයක් ඉටු කරන්න තමන්ට වගකීමක් සහ යුතුකමක් තිබෙන බව දෙමවුපියන් දරුවන්ට උගන්වන්න ඕන. අද දරුවන් අධ්‍යාපනය ලබන්නේ දෙමවුපියන්ගේ ඉහළ අභිමතාර්ථ ඉටු කරන්න මිසක තමන්ගේ ගමන මොකක්ද කියලා හඳුනා ගෙන නොවෙයි. ඒ වගේම දෙමවුපියන් ප්‍රසිද්ධ පාසල්වලට දරුවන් ඇතුළත් කරන්න ලොකු උණක් එක්ක හොර බොරු, වංචා පවා කරන්න යොමු වෙනවා. එය නම් සැබෑ මිනිසුන් බිහිකරන අධ්‍යාපනය, සමාජයේ පහළ වූ සියලු දාර්ශනිකයන් ඉගෙනුම ලැබුවේ ඒ පාසල්වල වෙන්න ඕන. මේ වගේ අර්බුද නිසයි අපි අලුත් අධ්‍යාපන ප්‍රතිසංස්කරණ ගැන සිතිය යුත්තේ.

මේ රටේ අධ්‍යාපන ක්‍ෂේත්‍රය නිර්දේශපාලනික කළ යුතුමයි මහාචාර්ය රංගික උමේෂ් හල්වතුර (මොරටුව විශ්වවිද්‍යාලය)

halwaturaදැනට මේ රටේ තිබෙන්නේ දේශපාලඥයන්ගේ අවශ්‍යතාව අනුව උදේ, හවස වෙනස් වෙන අධ්‍යාපන ක්‍රමයක්. ඒ නිසා මුලින්ම කරන්න ඕන දේ තමයි මේ රටේ අධ්‍යාපන ක්‍ෂේත්‍රය නිර්දේශපාලනික කරන එක. නමුත් ආසියාවේ අනෙකුත් දියුණු වෙමින් පවතින රටවල් මැලේසියාව, සිංගප්පූරුව, කොරියාව වැනි රටවලුත් දියුණු රටක් විදියට ජපානයත් ගත්තාම ඒ සෑම රටක්ම තමන්ගේ අධ්‍යාපන ප්‍රතිසංස්කරණ ඇති කරන්නේ හෙට දවස වෙනුවෙන්වත්, අවුරුදු දෙකතුනක් වෙනුවෙන්වත් නොවෙයි. වසර 20ක් පමණ ඉලක්ක කරගෙන. ඒවා අතරමැදදි කාටවත් ඕන විදියකට වෙනස් වෙන්නේ නැහැ.

අද ලෝකයට අවශ්‍ය වෙලා තියෙන්නේ සහ ලෝකය ඉල්ලන්නේ එක රාමුවකට කොටුවෙලා දැනුමෙන් ඔළු පුරවාගත් මිනිස්සු නොවෙයි. හිතන්න පුළුවන් ඔළුව නිදහස් මිනිස්සු. ඒක මේ අධ්‍යාපන ක්‍රමයෙන් කරන්නේ නැහැ. එතැනින් විශ්වවිද්‍යාලයට ආවාමත් ඒ දරුවන්ව 80෴ක් දාලා දේශන ශාලාවලට හිරකර ගෙන ඔවුන්ට අලුතින් හිතන්න කියනවා. ඒක කකුළුවා පැටියාට කෙළින් යන්න කියනවා වගේ වැඩක්.
මේ ඛේදවාචකයේ ඵලවිපාක අපි එළිපිටම විඳිමින් ඉන්නවා. රටේ දේශපාලනය පවා අශිෂ්ට තත්ත්වයකට පත්වෙලා තියෙන්නේ අධ්‍යාපන ක්‍රමයේ ප්‍රශ්න නිසයි. මේ විදියට රට ක්‍රමයෙන් අගාධයට යනවා මිසක දියණුවක් සිදුවෙන්නේ නැහැ. ඒ නිසා මේ අධ්‍යාපන ක්‍රමය වහාම වෙනස් කළ යුතුමයි. නමුත් ඒක කරන්න ඕන ඒ පිළිබඳ දැනුම ඇති අය මිසක දේශපාලඥයන් නොවෙයි. මේකට එකම විසඳුම පින්ලන්ත අධ්‍යාපන ක්‍රමය එහෙම් පිටින්ම මේ රටේ ස්ථාපනය කරන එක නොවෙයි. අපේ තිබෙන දූපත් මානසිකත්වය ඉවත් කරලා බටහිර රටවල අධ්‍යාපන ක්‍රම දිහා බලලා ඒවායේ තියෙන හොඳ දේවල් අරගෙන අපට සුදුසු අධ්‍යාපන ක්‍රමයක් නිර්මාණය කරගත යුතුයි. 

ඒ වගේම මේ කිසිම දෙයක් කරන්න බැහැ ගුරුවරයා තෘප්තිමත් නොකර. ඒ නිසා පාසලට යන ගුරුවරයාව මීටත් වඩා දැනුමෙන්, සමාජ අවබෝධයෙන් සහ ළමා මනෝවිද්‍යාව වැනි විෂයන්ගේ දැනුමෙන් සන්නද්ධ කිරීම අත්‍යවශ්‍යයි. කෙතරම් වැදගත් සමාජ වගකීමක් ඉටු කරන ගුරුවරුන්ගේ ජීවන තත්ත්වය මීටත් වඩා උසස් කළ යුතුයි වගේම ගුරුවරුන් පෙන්වන දක්‍ෂතා අනුව ඔවුන්ට ඇගයීමක්, වටිනාකමක් ලැබෙන ක්‍රමවේදයක් ඇති කළ යුතුයි. පාසල් අතර පහසුකම් අතින් තිබෙන විෂමතාව හැකිතාක් අවම කිරීමත් වැදගත් කාරණයක් වෙනවා.
මේ අධ්‍යාපනය දරුවන්ට ලැබෙන්නේ නොමිලේ කියලා කියන එකම අධ්‍යාපනයේ පරිහානිය පෙන්නුම් කරනවා. එහෙම කියන නිසයි තමන්ගේ රට ගැන කිසිම කෙනෙක්ට හැඟීමක් නැත්තේ. සෑම දෙමවුපියෙකුටම පැහැදිලි වගකීමක් තියෙනවා මේ රටේ අහිංසක දුප්පත් මිනිස්සු කුසගින්නට කන්න නැතුව ගෙවන බදුවලිනුයි තමන් ඉගෙන ගන්නේ කියලා දරුවන්ට අවබෝධ කරලා දෙන්න. 

සහතික පත්‍ර ලාභීන් වෙනුවට දක්‍ෂයන් බිහිකරන අධ්‍යාපන පද්ධතියක් සකස් වීම ඉතා වැදගත් වෙනවාමහාචාර්ය මයුර සමරකෝන් (ශ්‍රී ජයවර්ධනපුර විශ්වවිද්‍යාලය)

අපේ තිබෙන්නේ විෂය දැනුම පමණක් මූලික කරගත්, විභාග කේන්ද්‍රීය අධ්‍යාපන ක්‍රමයක්. මෙතැන බරපතළම ගැටලුව තිබෙන්නේ උසස් අධ්‍යාපනය ලබන දරුවන් සම්බන්ධයෙනුයි. සීමිත දරුවන් ප්‍රමාණයකටයි අද විශ්වවිද්‍යාල අධ්‍යාපනය ලබන්න අවස්ථාව ලැබෙන්නේ. Manura samarakoon 2 (2)මේ නිසාම අද පවතින අධ්‍යාපන ක්‍රමයේ විශාල තරගකාරීත්වයක් දකින්න ලැබෙනවා. ඒ නිසා මෙතැන අපට දකින්න ලැබෙන්නේ අධ්‍යාපනය ලැබීමකට වඩා අධ්‍යාපනය සමග සටන් වදින තත්ත්වයක්. මේ අවාසනාවන්ත තත්ත්වය අද විශ්වවිද්‍යාල පද්ධතියත් ගිලගනිමින් පවතිනවා. 

ඒ වගේම ඉදිරි වසර කිහිපයට ඒ ඒ ක්‍ෂේත්‍ර සඳහා වෘත්තිකයන් කොපමණ ප්‍රමාණයක් අවශ්‍යද කියලාවත් අපේ රටට නිසි තක්සේරුවක් නැහැ. රට දියුණුවට පත් කරන්නේ කුමන ආකාරයක ආර්ථික ප්‍රතිපත්තියක් ඔස්සේද කියලා පැහැදිලි දැක්මක් දකින්න නැහැ. එහෙම වෙනවා නම් ඊට සාපේක්‍ෂව ශ්‍රම බළකාය හදන්නයි අධ්‍යාපන ප්‍රතිපත්ති සකස් විය යුත්තේ. ඒ නිසා මේ ගැටලුවේදී අධ්‍යාපන ප්‍රතිපත්ති පමණක් නොවෙයි සමාජ ප්‍රතිපත්තිත් නිසි ආකාරයෙන් වෙනස් කළ යුතුයි. මේ ඛේදවාචකයේ තිබෙන භයානකම සිදුවීම තමයි උපාධිධාරියෙකුට ලැබිය යුතු රැකියාව පිළිබඳ තීරණය කරන්නේ ඇතැම් විට නිසි අධ්‍යාපනයක් හෝ නොලබපු පළාතේ අදාළ මන්ත්‍රීවරයාගේ ලැයිස්තුව වීම.

මම දකින්නේ සමහර තනතුරු සඳහා උපධිධාරීන් සමග උසස් පෙළ සමතුන්ටත් තරග වැදීමට ඉඩකඩ ලබාදිය යුතුයි. මෙතැනදී තෝරාගත යුත්තේ උපාධි සහතිකය මත නොවෙයි, දක්‍ෂතාව මතයි. ඒ ආකාරයෙන් සහතික පත්‍ර ලාභීන් වෙනුවට දක්‍ෂයන් බිහිකරන අධ්‍යාපන පද්ධතියක් සකස් වීම ඉතා වැදගත් වෙනවා. අද තිබෙන පාසල් අධ්‍යාපනයෙන් පටන් ගත්තොත් මේ කුසලතා සහ දරුවන්ගේ නිර්මාණශීලීත්වය යටපත් කරනවා මිසක් මතුවීමක් සිදුනොවන තරම්. ඒ වගේම සමහර විෂය නිර්දේශයන් ගත්තොත් වැඩිහිටියන්ට පවා ඔරොත්තු දෙන්නේ නැහැ. ඒ නිසා ඒවා නැවත දරුවන්ගේ පැත්තෙන් හිතලා සමාලෝචනයට ලක්කළ යුතුයි. ඒ තත්ත්වය හමුවේ ගුරුවරුත් විෂයය නිර්දේශවලට හිරවෙලා ඔවුන්ට තමන්ගේ සැබෑ වගකීම ඉටු කරන්න නොහැකි වෙලා තිබෙනවා. ඒ වගේම අධ්‍යාපන ප්‍රතිපත්ති රටේ පාලනය වෙනස් වෙන වාරයක් පාසා වෙනස් නොවිය යුතුයි. නමුත් මේ රටේ ඒ තත්ත්වය තදින් දකින්න ලැබෙනවා.

මේ දේශපාලනය අධ්‍යාපනය අර්බුදයට ලක්කරලා තිබෙන්නේ, හිතන්න පුළුවන් මිනිසුන් බිහිවුණොත් වර්තමාන අශිෂ්ට, දූෂිත දේශපාලනය නැතිවී යන නිසයි ආචාර්ය හිනිදුම සුනිල් සෙනෙවි (සබරගමුව විශ්වවිද්‍යාලය)

sunilශ්‍රී ලංකාවේ පවතින අධ්‍යාපන ක්‍රමය තවදුරටත් මේ ආකාරයෙන් පැවතුණොත් ශ්‍රී ලාංකික දරුවාට කුමක් සිදුවෙයිද, එබඳු දරුවෙකු සමාජගත වීම මගින් තිබෙන අර්බුදය කොතරම් දුරට තවත් ව්‍යසනයක් බවට පත්වනවාද කියන ප්‍රශ්නයට අද මුළු රටේම අවධානය යොමුවිය යුතුයි. මේ ප්‍රශ්නය ඇත්තටම නිරන්තරයෙන්ම නැගිය යුතු ප්‍රශ්නයක්. නමුත් මේ ප්‍රශ්නය නැගීම අමතක කිරීමත් මේ ක්‍රමයේම කොටසක්. දෙමවුපියන්ට, පාසල් ශිෂ්‍යයාගේ සිට පශ්චාත් උපාධි ශිෂ්‍යයාට, විශ්වවිද්‍යාල ආචාර්යවරුන්ට, විශ්වවිද්‍යාල පරිපාලනයට මේ ප්‍රශ්නය අමතක කරවලා තියෙනවා. කොටින්ම ශිෂ්‍ය අයිතිවාසිකම් පතා පාරට බැහැලා අරගල කරන්නන්ට පවා තමන්ගේ අරගලය ගමන් කළ යුතු සැබෑ දිශානතිය අමතක කරවා තිබෙනවා. ඒ වගේම අපි හොඳින්ම දන්නවා මේ ක්‍රමය ඇතුළේදී %පාසලේ තිබෙන ගැටලු දෙමවුපියන් මත පැටවෙන හැටි. පාසලේ යටිතල පහසුකම් දියුණු කිරීම, නඩත්තු කටයුතු, නව පහසුකම් ඇති කිරීම තනිව රජයට කරන්න බැහැ. ඒ සඳහා දෙමවුපියොත් මුදල් ගෙවිය යුතුයි^ කියලා බොරු මතයක් ඇති කරලා තියෙනවා. අධ්‍යාපනයට වෙන්කරන මුදල් සම්භාරය ඇතුළේ ඉහත ඒ කටයුතුවලට අවශ්‍ය මුදල් තිබෙන බව මේ පාලකයන් දෙමවුපියන්ට අමතක කරවා තියෙනවා. ඒ නිසා ඔවුන් මේ කාරණය පිළිබඳ හොඳින් සිතා බැලිය යුතුයි. අධ්‍යාපනය වෙනුවෙන් 06%ක් වෙන්කළ යුතුයි කියා අපි නිරන්තරයෙන් අවධාරණය කරන්නේ ඒ නිසයි.
මේ තිබෙන අධ්‍යාපන ක්‍රමය මේ ආකාරයෙන්ම දිගටම ක්‍රියාත්මක වුණොත් අපට පැහැදිලිවම නිර්මාණශීලී, පරාර්ථකාමී, අනෙකාගේ නිදහස තකන, තරගකාරීත්වයෙන් මිදුණු දරුවෙකු බිහිකර ගන්න හැකියාව ලැබෙන්නේ නැහැ. ඒ වගේම නිර්මාණශීලීත්වය, නිදහස සහිත අධ්‍යාපන ක්‍රමයක් අවශ්‍යයි කියලා අපි කොතෙකුත් අවධාරණය කළත් එසේ නිර්මාණශීලීත්වයකට පාර නොකැපෙන අධ්‍යාපන ක්‍රමයකුයි අප දෛනිකව අත්විඳිමින් සිටින්නේ. මෙතැනදී පැහැදිලිවම ඇඟිල්ල දිගුකළ යුතු ආයතන කිහිපයක් තිබෙනවා. ඒ තමයි ජාතික අධ්‍යාපන ආයතනය, ජාතික අධ්‍යාපන කොමිසම, උසස් අධ්‍යාපන අමාත්‍යාංශය, අධ්‍යාපන අමාත්‍යාංශය, අධ්‍යාපන දෙපාර්තමේන්තුව, පිරිවෙන් හා ආගමික අංශ භාර අමාත්‍යාංශ, විශ්වවිද්‍යාල ප්‍රතිපාදන කොමිෂන් සභාව, වෘත්තීය පුහුණු කටයුතු සම්බන්ධ අමාත්‍යාංශය සහ අදාළ ආයතන. මේ සියල්ලම ජාතික අධ්‍යාපනය පිළිබඳ ප්‍රතිපත්ති තීරණය කළ හැකි ආයතන වෙනවා. මා යෝජනා කරන්නේ මේ සියලු ආයතන එක් තැනකට ගෙනැවිත් අසීමිත ලෙස බලය පවරා මාස කිහිපයක් හෝ සාකච්ඡා කර ව්‍යසනයේ හානිය තවත් වැඩි වෙන්න කලින් මේ අධ්‍යාපන අර්බුදය විසඳිය යුතුයි. 

මේ ව්‍යසනය විශ්වවිද්‍යාල පද්ධතියටත් කොයිතරම් හානි කරලාද කියනවා නම් අද විශ්වවිද්‍යාලයක නාට්‍යයක්, සංවාදයක් පැවැත්වීමත් යම් ආකාරයක අභියෝගයක් වෙලා තිබෙනවා. ඉස්සර වගේ කවි පොතක්, නවකතාවක් හෝ කෙටි කතාවක්, නව නිර්මාණයක් දරුවන්ගේ අතින් බිහි වෙන්නේ නැහැ. ශිෂ්‍යයෝ කරන සඟරාවක් ශිෂ්‍යයෝවත් අරන් බලන්නේ නැහැ. මේ සෑම ව්‍යසනයක්ම සිදුකරලා තිබෙන්නේ මිනිස්සු නිර්මාණශීලී වනවාට අකමැති, මිනිස්සු අලුතින් හිතන්න පෙළඹෙනවාට අකමැති ධනේෂ්වර සමාජ ක්‍රමය විසිනුයි. මේ දේශපාලනනය අධ්‍යාපනය අර්බුදයට ලක්කරලා තිබෙන්නේ හිතන්න පුළුවන් මිනිසුන් බිහිවුණොත් වර්තමාන අශිෂ්ට, දූෂිත දේශපාලනය නැතිවී යන නිසයි.
මේ රටට අවශ්‍යයි සිතන්නට පුළුවන් මිනිස්සු හදන අධ්‍යාපන ක්‍රමයක්. අද තිබෙන පන්ති කාමරයට පමණක් සීමා වූ ක්‍රමයකින් එය කිසිම විදියකට කරන්න බැහැ. අපි අවධානය යොමුකළ යුතුයි. ආත්මාර්ථකාමී සහ තරගකාරීත්වයෙන් මිදුණු, සොබාදහම අගය කරන, ප්‍රකෘතිය අගය කරන, විභාග සමත් වීම පමණක් ඉලක්ක කර නොගත් පරමාදර්ශී අධ්‍යාපන ක්‍රමයකට. නමුත් එය සම්පූර්ණයෙන්ම එක රැයකින් ඇති කරන්න අපට හැකියාවක් නැහැ. මේ සඳහා අවංකව දායක වන බලවත් දේශපාලන නායකත්වයක් ලැබිය යුතුයි.

අපි දකින්නේ මේ අධ්‍යාපන ක්‍රමය අනාගත ව්‍යවසායකයන් බිහිකළ හැකි තත්ත්වයක් දක්වා දියුණු කළ යුතු බවයි ආචාර්ය රුක්මාල් වීරසිංහ  (ශ්‍රී ජයවර්ධනපුර විශ්වවිද්‍යාලය)

ලෝකයේ හොඳම අධ්‍යාපන ක්‍රමවේද අතීතයේ තිබුණේ ලංකාවේ.  අද තත්ත්වය ගත්තොත් පෙර පාසලේ ඉඳලාම දරුවන්ව තරගයට විතරක් නොවෙයි මේ වෙද්දි විභාගවලට පවා හුරු කරවනවා. මේ විභාග ක්‍රමය ඉතාමත් අසාර්ථකයි. අපි දරුවන්ට දේශාභිමානය ඇතිවන rykmalකතාන්දර කියලා දීලා දේශාභිමානයක් ඇති කරන්න උත්සාහ කළාට එය ඉදිරියට ගෙනියන්න හෝ ඒ ඔස්සේ රටට යහපතක් කරන්න සිදුකළ යුත්තේ මොකක්ද කියන කාරණය සම්බන්ධයෙන් කියලා දීලා නැහැ. සෑම දෙමවුපියෙකුම තමන්ගේ දරුවාව වෛද්‍යවරයෙකු, ගණකාධිකාරිවරයෙකු, ඉංජිනේරුවෙකු වගේ සමාජයේ ඉහළයි කියලා සම්මත කරගත් වෘත්තියකට යොමු කරනවා මිසක රටට, සමාජයට වැඩක් ඇති පුද්ගලයෙකු හෝ රට අද පත්ව ඇති ආර්ථික අර්බුදයෙන් මුදවාගත හැකි අලුතින් හිතන හොඳ ව්‍යවසායකයෙකු කරන්න කවුරුත් උත්සාහ කරන්නේ නැහැ. ඒක සමාජ වගකීමක් කියලා හිතන්නේ නැහැ. ඒ වගකීම ඉටු කරන්න අඩුම තරමේ දරුවාවවත් යොමු කරන්නේ නැහැ. මේවා තමයි පවතින අධ්‍යාපන ක්‍රමයේ ඇති අහිතකර තත්ත්ව. 

අපි දකින්නේ මේ අධ්‍යාපන ක්‍රමය අනාගත ව්‍යවසායකයන් බිහිකළ හැකි තත්ත්වයක් දක්වා දියුණු කළ යුතු බවයි. ඒ වගේම අවදානමක් දරන්න හැකියාව තිබෙන, ඕනෑම පරිසරයකට හැඩගැසෙන්න පුළුවන්, නිර්මාණශීලී පිරිසක් බිහි කරන්නත් මේ අධ්‍යාපන ප්‍රතිසංස්කරණ සිදුවිය යුතුයි. එය දැනට යම් ප්‍රමාණයකට හෝ සිදුවෙන්නේ විශ්වවිද්‍යාල අධ්‍යාපනය මගින් පමණයි. නමුත් එය කිසිම ආකාරයකින් ප්‍රමාණවත් නැහැ. මොකද අවුරුදු ගණනාවක් එක ආකෘතියකට කොටුවෙලා සිතීමේ හැකියාව සහ නිර්මාණශීලීත්වය මොට වූ පිරිසක් නැවත නිවැරදි මාවතකට ගැනීම පහසු කාර්යයක් නොවන නිසා. මෙය මුලින්ම නිවසේ සිටම ආරම්භ විය යුතුයි. දරුවාගේ අධ්‍යාපනයේ මූලික අඩිතාලම සකස් කරලා හිතන්න දරුවාට පුරුදු කරන්නේ දෙමවුපියන් වන නිසා.

පාසල් අධ්‍යාපනයේ තිබෙන්නේ විෂය නිර්දේශයකට පමණක් රාමු වූ රස්සාවල් පමණක් හොයන පිරිසක් හදන, ටියුෂන් ටික පොහොසත් කරන, දේවාල පොහොසත් කරන ක්‍රමවේදයක්. විශ්වවිද්‍යාලය වෙනකම් මේ දරුවන් අධ්‍යාපනය ලබන්නේ රැකියා සෙවීමේ මානසිකත්වයෙන්. ඒ විදියට අධ්‍යාපනය ලබලා අවසානයේ උපාධියක් ලබාගන්න ළමයින්ට 'රස්සාවක් දියව්, දියව්' කියලා පාරට බහින්න වෙන එක පුදුමයක් නොවෙයි. මේක දේශපාලඥයන්ට හොඳ අවස්ථාවක් වෙනවා තමන්ගේ බලය තව තවත් වැඩි කරගන්න. දරුවෙකුගේ හැකියාව මනින්නේ මුහුණ දෙන විභාග ප්‍රමාණය අනුව. හැකියාවන් සහ කුසලතා එළියට නොගෙන සහතික පත්‍ර ලාභීන් විතරක් බිහිකරලා වැඩක් නැහැ. අඩුම තරමේ පෞද්ගලික පාසල්වත් මේ තත්ත්වය තේරුම් අරන් කටයුතු කරලා නැහැ. ඒ වගේම අධ්‍යාපනය මගින්ම මේ සමාජයේ රැකියා සම්බන්ධයෙන් පවතින ඉහළ හෝ පහළ කියලා හදාගෙන ඉන්න පුහු මතවාද ඉවත් කරන්න අවශ්‍යයි. වෙනත් රටවල් ගත්තොත් ඔවුන්ගේ අධ්‍යාපනය සහ පර්යේෂණ කටයුතුවලට විශාල මුදලක් වෙන් කරනවා. නමුත් අපේ රට දියුණුව කරා යන රටක් වෙලත් සමස්ත අධ්‍යාපනයටම වෙන් කරන්නේ 02%ක වගේ ප්‍රමාණයක්. එතැනදී පර්යේෂණවලට මුදල් නොලැබෙන තරම්.