ලංකාවේ පළමු වතාවට සිදු කළ පාදයක් බද්ධ කිරීමේ සැත්කම සාර්ථකව සිදු කළ  බව අනුරාධපුර ශික්ෂණ රෝහලේ අධ්‍යක්ෂ ලයනල් මුහන්දිරම්ගේ මහතා අද (26දා) පැවසීය.

රාජාංගණයේ පදිංචි 32 හැවිරිදි අයෙකුට මෙම සැත්කම සිදු කර තිබේ.

මෙම සැත්කම සිදු කළ අනුරාධපුර ශික්ෂණ රෝහලේ රුධිරවාහිනී හා අවයව බද්ධ කිරීමේ විශේෂඥ වෛද්‍ය ජොයෙල් අරුඩ්ච්චෙල්වම් මහතා අදහස් දක්වමින් මෙසේ පවසා සිටියේය.

“එක් අයෙකුගේ පාදයක් තවත් අයෙකුට බද්ධ කිරීම සිදු කළ ලංකාවේ ප්‍රථම අවස්ථාව මෙය වන  වන අතර ලෝකයේ හතරවැනි වතාවට තමයි මෙය සිදු කර තිබෙන්නේ.

මීට වසර එක හාමාරකට පෙර හදිසි අනතුරකට ලක් ව පාදය අහිමි වු 32 හැවිරිදි රෝගියෙකුට මෙම සැත්කම සිදුකරනු ලැබූ අතර පාදය ලබා දුන් මොළය මිය ගිය පුද්ගලයාගේ වයස අවුරුදු 52 ක් වනවා. මෙම සැත්කමට පැය 11 ක් පමණ දීර්ඝ කාලයක් ගත වූවා. සියලු දෙනාගේ සහයෝගය ලැබුණු නිසා සැත්කම සාර්ථකව සිදු කිරීමට හැකියාව ලැබුණා.  සැත්කමට භාජන කළ රෝගීයා යහපත් ශරීර සෞඛ්‍ය තත්ත්වයෙන් අනුරාධපුර ශික්ෂණ රෝහලේ ප්‍රතිකාර ලබනවා.” 

අනුරාධපුර ශික්ෂණ රෝහලේ ප්ලාස්ටික් විශේෂඥ ශෛල්‍ය වෛද්‍ය අමිල සුසන්ත රත්නායක, වකුගඩු රෝග විශේෂඥ වෛද්‍ය ප්‍රමිල් රාධක්‍රිෂ්ණා, නිර්වින්දන විශේෂඥ වෛද්‍ය ඉලවන් කාරියවසම් යන වෛද්‍යවරු හෙද කාර්ය මණ්ඩලය ඇතුළු සියලු දෙනාගේ සහාය මේ සඳහා ලැබුණු බව අනුරාධපුර ශික්ෂණ රෝහල් අධ්‍යක්ෂ ලයනල් මුහන්දිරම්ගේ මහතා පැවසීය.

කොළොන්නාව තෙල් ගබඩා සංකීර්ණයෙන් මේ වනවිට ඉන්ධන බවුසර් 15 ක් පිටත් කළ බවත්, මෙම බවුසර් වල ඉන්ධන කොළඹ අවට ප්‍ර‘දේශවල ඉන්ධන පිරවුම් හල්වලට ඉන්ධන සැපයීම සිදුකරන බවද හමුදා මාධ්‍ය ප්‍රකාශක බ්‍රිගේඩියර් රොෂාන් සෙනෙවිරත්න මහතා සඳහන් කළේය.

මීට අමතරව මුතුරාජවෙල හා ලංකාව පුරා පිහිටි බෙදාහැරීමේ ගබඩා සංකීර්ණ වලට හමුදාව ඇතුළු වී සිටින බවත්, ඉදිරි පැය කිහිපිය තුළ වර්ජනය අවසන් නොකළහොත් එම ස්ථානවලින් හමුදාව මැදිහත් වී ඉන්ධන ලබාදීමක් සිදුකරන බවද පවසා සිටියේය.

කොළොන්නාව ගබඩාවෙන් ඉන්ධන නිකුත් කිරීම අඛණ්ඩව සිදුවන බවද ඒ මහතා සඳහන් කළේය.

අග්‍රාමාත්‍ය රනිල් වික්‍රමසිංහ මහතාගේ පාර්ලිමේන්තු දිවියට 40 වසරක් සපිරීම නිමිත්තෙන් අද (25දා) කැබිනට් මණ්ඩල රැස්වීමේදී ඒ මහතාට සුබපැතුම් පිරිනැමිණි.

මේ අවස්ථාව සඳහා ජනපති මෛත්‍රීපාල සිරිසේන මහතාද සහභාගි විය.

අධිකරණ දෙකකින් අත්අඩංගුවට ගැනීම සඳහා වරෙන්තු නිකුත් කර ඇති එසේම අත්ඩංගුවට ගැනීම සඳහා පොලීසිය විසින් පරීක්ෂණ පවත්වන වෛද්‍ය පීඨ ශිෂ්‍ය ක්‍රියාකාරී කමිටුවේ කැඳවුම්කරු රයන් ජයලත් සිසුවා මේ වන විට විහාරමහාදේවි එළිමහන් රංග පීඨයේ රැළියක් අමතමින් සිටියි.

සයිටම් පෞද්ගලික වෛද්‍ය විද්‍යාලය අහෝසි කරන ලෙස ඉල්ලමින් සයිටම් විරෝධී සිවිල් සංවිධාන එකමුතුව මෙම රැළිය විහාරමහාදේවි උද්‍යානයේ සංවිධානය කර තිබේ.

සයිටම් පෞද්ගලික විශ්වවිද්‍යාලයට එරෙහිව වෛද්‍ය පීඨ ශිෂ්‍ය ක්‍රියාකාරී කමිටුව පැවැත්වූ විරෝධතාව පොලිසිය ජල ප්‍රහාර එල්ල කිරීමට විරෝධය දක්වමින් රජයේ වෛද්‍ය නිලධාරීන්ගේ සංගමය අද (25දා) එක් දිනක සංඛේත වැඩ වර්ජනයක් ආරම්භ කර තිබේ. මේ හේතුවෙන් රෝහල්වල බාහිර රෝගී අංශයේ ප්‍රතිකාර කටයුතු අඩාල වී තිබේ.

කොළඹ ජාතික රෝහල

මධ්‍යම කඳුකරයට මේ දිනවල පවතින වියළි කාලගුණික තත්ත්වය හේතුවෙන් වික්ටෝරියා ජලාශයේ ජල මට්ටම පහළ බැසීමත් සමග එම ජලාශයට යටවී තිබුණු ඉපැරණි තෙල්දෙණිය නගරය යළිත් මතුවී ඇත.

මෙම වර්ෂය තුළ පැරණි පාලම හා චෛත්‍ය නටබුන් මතු වූ දෙවන අවස්ථාව මේ වන බවත් ජලාශයේ ජල මට්ටමශීඝ්‍රයෙන් පහත බසිමින් පවතින බවත් ප්‍රදේශවාසීහු පවසති.

කඩිනම් මහවැලි යෝජනා ක්‍රමය අනුව ඉදි කළ වික්ටෝරියා ජලාශය හේතුවෙන් ජලයට යටවූ විශාලම නගරය තෙල්දෙණිය නගරයයි.

දුම්බර- එම්.ආර්. ප්‍රදීප්

කොළඹ ලිප්ටන් වට රවුමේ පැවැති සයිටම් විරෝධී සත්‍යග්‍රහයට පොලීසිය ජලප්‍රහාර එල්ල කිරීමට විරෝධය පෑමේ උද්ඝෝෂණයක් සයිටම් විරෝධී සිසු ජන ව්‍යාපාරය ඊයේ (24දා) කොළඹ ලිප්ටන් වටරවුමේදී පැවැත්විණි.

මාලඹේ සයිටම් පෞද්ගලික වෛද්‍ය විද්‍යාලය අහෝසි කරන තුරු සිය සටන නොනවත්වන බව විරෝධතාකරුවෝ පවසා සිටියහ.

ජනතා විමුක්ති පෙරමුණ, පෙරටුගාමී සමාජවාදී පක්ෂය, අන්තර් විශ්වවිද්‍යාල ශිෂ්‍ය බලමණ්ඩලය නියෝජනය කරමින් පිරිසක් මෙම අවස්ථාවට සහභාගි වූහ. 

නැගෙනහිර නාවික විධානයට අනුයුක්ත නාවිකයින් පිරිසක් අද (23දා) උදෑසන ත්‍රිකුණාමලය, රවුන්ඩ් දුපතට සහ කෙවුලියා තුඩුව අතර වු මුහුදු ප්‍රදේශයේ සැඩ පහරකට හසුව මුහුදේ ගසාගෙන යමින් සිටි අලි දෙදෙනෙකු  බේරා ගෙන ඇත. 

මුර සංචාරයේ නියුතු වෙරළබඩ යාත්‍රාවක් (IPC) මගින් මෙම අලි දෙදෙනා ගසාගෙන යන බව පළමුවෙන්ම නිරීක්ෂණය කර ඇත. මේ සම්බන්ධයෙන් ත්‍රිකුණාමලය වන ජීවී දෙපාර්තමේන්තුවේ නිලධාරීන් වෙත දැනුම් දී ඔහුන්ගේද සහය ඇතිව නාවික හමුදා පුද්ගලයින් විසින් අලි දෙදෙනා බේරා ගැනීමේ මෙහෙයුම දියත් කරන ලදි. 

පසුව ඒ සඳහා මුර සංචාරයේ නියුතු තවත් වේග ප්‍රහාරක යාත්‍රා තුනක් (03) සහ නාවික හමුදා කිමිදුම් අංශයේ නාවිකයන් කණ්ඩායමක් ද කඩිනමින් පිටත් කර යැවීමට නාවික හමුදාව කටයුතු කරන ලදී. 

ඒ අනුව ඔවුන් දැඩි පරිශ්‍රමයක් දරමින් අලි දෙදෙනාට උපද්‍රවයක් සිදු නොවන ලෙස මුහුදේ සිට නිරුපද්‍රිතව ගොඩබිම දෙසට රැගෙන ඒමට නාවික පුද්ගලයින් කටයුතු කළ අතර, අලි දෙදෙනා කෙවුලියා තුඩුව (ෆවුල් තුඩුව) ප්‍රදේශයට මුදා හැරිමට කටයුතු කෙ‍රිණි.

මේ අයුරින්ම එම විධානයට අනුයුක්ත නාවිකයන් පිරිසක් විසින් පසුගිය ජුලි 11 වන දින කෝක්කුතුඩුවායි සිට නාවික සැතපුම් 8 ක් පමණ දුරකදී සැඩ පහරට හසුව මුහුදේ ගසාගෙන යමින් සිටි අලියෙකු බේරා ගැනීමට කටයුතු කරන ලදි. එය ජාත්‍යන්තර මාධ්‍ය ඔස්සේද දැඩි අවධානයක් දිනාගත් මාතෘකාවක් බවට පත්විය.

යාපනය මහාධිකරණ විනිසුරු මානික්කවාසකර් ඉල්ංචේලියන් මහතාගේ ජීවිතය බේරාගැනීමට දිවිදුන් පොලිස් නිලධාරියාගේ පශ්චාත් මරණ පරීක්ෂණය සිදුවූ අවස්ථාවේදී එම ස්ථානයට පැමිණි මහාධිකරණ විනිසුරු මියගිය පොලිස් නිලධාරියාගේ බිරිඳට වැඳ හඬා වැළපෙන ඉතා සංවේදී අවස්ථාවක් සිදුවිය.

මිය ගිය 57 හැවිරිදි පොලිස් සැරයන් ගනේවත්තගේ සරත් හේමචන්ද්‍ර නමැති නිලධාරියාගේ බිරිඳ අද උදෑසන පශ්චාත් මරණ පරීක්ෂණය සිදුවූ ස්ථානයට පැමිණි අතර, එම අවස්ථාවේදී මහාධිකරණ විනිසුරු ඉතා සංවේදී විය.

ඊට පෙර මහාධිකරණ විනිසුරු තුවාල ලැබූ පොලිස් නිලධාරීයාද හමුවීමට ගිය අවස්ථාවේදී එම පොලිස් නිලධාරියා වැලඳගනිමින් හඬා වැළපී තිබේ.

මිය ගිය පොලිස් සැරයන් ගනේවත්තගේ සරත් හේමචන්ද්‍ර නමැත්තාගේ උදර ප්‍රදේශයට වෙඩි ප්‍රහාරය වැදීමෙන් අභ්‍යන්තර රුධිර වහනයක් සිදුවීම නිසා එම මරණය සිදුව ඇතැයිපශ්චාත් මරණ පරික්ෂණයේදී අනාවරණයවිය.