Category Archives: international

ඇමෙරිකාවේ වෙඩි තැබීමක් හේතුවෙන් 22නෙක් තුවාලයි

ඇමෙරිකාවේ නිව්ජර්සි ප්‍රාන්තයේ ට්‍රෙන්ටොන් නගරයේ පැවති කලා උළෙලක් අතර සිදුවූ වෙඩි තැබීමකින් පුද්ගලයන් 22 දෙනෙකු තුවාල ලබා තිබේ.

ප්‍රහාරය එල්ල කළ සැකකරු 33 හැවිරිදි තහායිජ් වෙල්ස් ලෙස හඳුනාගෙන ඇති අතර, ඔහු පොලිස් වෙඩි පහරින් ජීවිතක්ෂයට පත්ව තිබේ.

මනුෂ්‍ය ඝාතන චෝදනා යටතේ සිරගතව සිට ඇති මොහු හිරෙන් නිදහස් වූ අවස්ථාවේ මෙම ප්‍රහාරය එල්ල කර ඇති බව අභිචෝදකයන් පෙන්වා දෙයි.

මේ අතර. ඔහුට ආයුද සැපයීමේ චෝදනා යටතේ 23 හැවිරිදි අමීර් ආම්ස්ට්‍රෝන්ග් ද අත්අඩංගුවට ගෙන තිබේ.

වෙඩි ප්‍රහාරයෙන් පුද්ගලයන් සිව්දෙනෙකුගේ තත්ත්වය බරපතල බවත්, ඒ අතර වයස අවුරුදු 13ක දරුවෙකු සිටින බවත් රෝහල් ආරංචි මාර්ග පවසයි. එමෙන්ම, අසාධ්‍ය තත්ත්වයේ පසුවන එක් අයෙකු ප්‍රහාරය දියත් කිරීමට පැමිණි සැකකරුවෙකු බව පවසන පොලීසිය ඔහුගෙන් මෙතෙක් කටඋත්තර ලබාගෙන නොමැති බවද පේනවා දෙයි.

මෙම ප්‍රහාරය සිදුවන අවස්ථාවේදී පුද්ගලයන් 1,000ක් පමණ ප්‍රදේශයේ ගැවසී ඇති අතර, උළෙල පැවැත්වෙන භූමියට ඇතුළුවන ස්ථානයේ ගිනි අවි පරීක්ෂණ උපකරණ තිබී නොමැති බවද සඳහන් වෙයි.

1_Shooting 2 3

හාවඩ් විශ්වවිද්‍යාල ප්‍රවේශයේදී ආසියා සම්භවයට කැපිල්ලක්?

ඇමෙරිකා එක්සත් ජනපදයේ හාවඩ් විශ්වවිද්‍යාලය හිතාමතාම ආසියානු-ඇමෙරිකා සම්භවයක් ඇති ශිෂ්‍ය ශිෂ්‍යාවන්ගේ අයදුම්පත් නොසළකාහරින බවට චෝදනාවක් එල්ල වී තිබේ.

එහිදී, ආසියානු-ඇමෙරිකානු සිසු සිසුවියන්ට වඩා අඩු ලකුණු ලබාගන්නා සුදු ජාතිකයන්, කළු ජාතිකයන් මෙන්ම, ඉංග්‍රීසි භාෂාව කතා කරන රටවල සිසු සිසුවියන්ට විශ්වවිද්‍යාලයේ දොරටු විවෘත කිරීමට වැඩි අවස්ථාවක් ලැබෙන බවද සඳහන් වෙයි.

එහිදී, හාවඩ් විශ්වවිද්‍යාලය ඔවුන්ගේ පෞද්ගලික අභිමතාර්ථ හා කැමැත්ත පරිදි ආසියානු-ඇමෙරිකානු සම්භවයක් ඇති සිසු සිසුවියන් පහළම ශ්‍රේණියේ පිරිසක් ලෙස කටයුතු කරන බවට එම චෝදනාවෙන් කියැවෙයි.

කෙසේ වෙතත්, හාවඩ් විශ්වවිද්‍යාලය මෙම චෝදනාව තරයේ ප්‍රතික්ෂේප කරන අතර, ඔවුන් පවසන්නේ පසුගිය කාලයේදී ආසියානු-ඇමෙරිකානු සම්භවයක් සහිත පිරිස්වල ප්‍රවේශය වැඩිවී ඇති බවයි.

දැනට හාවඩ් විශ්වවිද්‍යාලයට ඇතුළු වන ආසියානු-ඇමෙරිකානු සම්භවයක් සහිත සිසු පිරිස 22.2%ක් බවද ඔවුන්ගේ වෙබ් අඩවිය අවධාරණය කරයි.

එමෙන්ම, සමස්තයක් ලෙස විශ්වවිද්‍යාලයේ ඉගෙනුම ලබන සුදු ජාතික සිසු පිරිස 50%ට අඩු බවද ඔවුන් පෙන්වා දී තිබේ.

1_harvard3

නිකරගුවා ප්‍රචණ්ඩක්‍රියා යළිත් එකම පවුලේ 6ක් ගිනි තබලා

නිකරගුවා රාජ්‍යයේ මාස දෙකකට අධික කාලයක් රජයේ හා විරුද්ධ පක්ෂ කණ්ඩායම් අතර පවතින ගැටුම් නැවැත්වීමට එකඟ වීමෙන් දිනකට පසුව යළිත් ප්‍රචණ්ඩක්‍රියා ඇවිලී තිබේ.

මෙහි දරුණුතම සිදුවීම ලෙස එකම පවුලේ 6 දෙනෙකු ඔවුන්ගේ නිවසට ගිනි තැබීමෙන් ඝාතනය කිරීමේ සිදුවීම වාර්තා කරයි.

රජයට පක්ෂපාතී කණ්ඩායම් විසින් මෙම ගින්න නිවා දැමීමට උත්සාහ කරන ආකාරය පෙන්වමින් හැසිරී ඇතත් එය ඔවුන් විසින්ම ඇති කර තිබූ ගිනි තැබීමක් බව විරුද්ධ කණ්ඩායම් පවසයි.

නිකරගුවා ජනපති ඩැනියෙල් ඔර්ටේගාට එරෙහිව පසුගිය අප්‍රේල් මාසයේ ඇරඹි ප්‍රචණ්ඩක්‍රියා නිසා මේ වනවිට පුද්ගලයන් 170කට අධික පිරිසක් ජීවිතක්ෂයට පත්ව තිබේ.

කෙසේ වෙතත්, මේ අපරාධයට තමන්ගේ කිසිදු සම්බන්ධයක් නොමැති බව නිකරගුවා රජය පවසයි.

මියගිය පිරිස මෙට්ට වෙළෙඳ සැලක් පවත්වාගෙන ගොස් ඇති අතර, ඔවුන් එම වෙළෙඳ සැල ඉහළ මහලේ ජීවත්ව ඇති බවද අනාවරණය වී තිබේ.

1_Nicargua 2 3 4

පාපන්දු ලෝක කුසලානයේ අනාවැකි කියන අකිලිස් පූසා ප්‍රථම අනාවැකියම සාර්ථකයි

මෙවර ෆිෆා පාපන්දු ලෝක කුසලාන තරගාවලියේ අනාවැකි කියන අකිලිස් බළලා තරගාවලියේ පළමු තරගයේදීම රුසියාව ජයග්‍රහණය කරන බවට පෙන්නුම් කළ අනාවැකියත් සමග ලොව පුරා ඉමහත් ජනප්‍රියත්වයක් දිනාගෙන සිටී.

රුසියාවේ ශාන්ත පීටර්ස්බර්ග් හි හර්මිටේජ් කලා කෞතුකාගාරයේ හැදී වැඩෙන මෙම බළලා තරගාවලිය ආරම්භ කරමින් රුසියාව සහ සෞදි අරාබිය අතර පැවති තරගයේ නිවැරදි අනාවැකිය පළ කරමින් මෙම කීර්තිය දිනාගන්නා ලදී.

එහිදී, අකිලිස් සිය පළමු වැනි අනාවැකිය පළ කරන ආකාරය වාර්තා කිරීම සඳහා මාධ්‍යවේදීන් විශාල පිරිසක් එක්වූ බව සඳහන් වෙයි.

තරගයට මුහුණදෙන පාපන්දු කණ්ඩායම් දෙකේ ධජයන් දෙපසින් සවිකර, ඒ ධජ අසල කෑම දැමූ කුඩා පිඟන් දෙකක් තබා ඒ මැදින් අකිලිස් තැබූ විට ඌ රුසියානු ධජය අසල වූ කෑම පිඟාන තෝරාගෙන කෑම ගැනීමත් සමග රුසියාව ජයග්‍රහණය ලබන අනාවැකිය දක්වන්නට අකිලිස් සමත් වී ඇත.

2017 වසරේ රුසියාවේදීම පැවති 'කනෆෙඩරේෂන්ස් කප්' හෙවත් මිනි ෆිෆා ලෝක කුසලානය ලෙස සැලකෙන පාපන්දු තරගාවලියේදී අනාවැකි පළ කරමින් අකිලිස් මුල් වරට සිය අනාවැකි හැකියාවන් සම්බන්ධයෙන් ප්‍රසිද්ධියක් දිනාගෙන තිබුණි.

කෙසේ වෙතත්, අකිලිස් මෙවැනි සුවිශේෂී හැකියාවක් දැක්වූවත්, ඌ බිහිරි තත්ත්වයකින් පසුවන බළලෙකු බවද සඳහන් වෙයි.

1_Akilis 2  5 36

මේ ආකාරයෙන්ම අනාවැකි කරන පෝල් බූවල්ලා 2010 ලෝක කුසලාන පාපන්දු තරගාවලියේ කැපී පෙනෙන චරිතයක් විය.  

තලේබාන් සමග සටන් විරාමය ඇෆ්ගන් රජය දීර්ඝ කරයි – විරාමය අතරතුර සෙල්ෆි දසුන්

ඇෆ්ගනිස්තානයේ තලේබාන් ත්‍රස්තයන් සමග එරට රජය විසින් රාමසාන් උත්සව සමය වෙනුවෙන් ඇති කරගත් සටන් විරාමය දීර්ඝ කිරීමට ඇෆ්ගන් රජය කටයුතු කර තිබේ.

ඇෆ්ගන් ජනාධිපති අෂ්රෆ් ඝානි සටන්කාමීන්ගෙන්ද ඉල්ලා සිටියේ රජයේ මෙම වැඩපිළිවෙළ අනුව යමින් දීර්ඝ කාලීන සාම සාකච්ඡාවකට එක්වීමට මෙය හොඳ අවස්ථාවක් බවයි.

මේ අතර, පැවති සටන් විරාමය අතරතුර මින්පෙර නොවූවිරූ අයුරින් රජයේ හමුදා සාමාජිකයන් සහ තලේබාන් සටන්කාමීන් එකිනෙකා වැළඳ ගනිමින් ආචාර කරගන්නා ආකාරය මෙන්ම, ජනතාව සමග තලේබාන් සාමාජිකයන් සෙල්ෆි ඡායාරූප ගන්නා දසුන්ද දැකගත හැකිවී තිබේ.

කෙසේ වෙතත්, මෙම සටන් විරාමය අතරතුර නන්ගාර්හාර් ප්‍රදේශයේ සිදුවූ මරාගෙන මැරෙන ප්‍රහාරයකින් තලේබාන් සටන්කාමීන් මෙන්ම රජයේ නිලධාරීන් පිරිසක් හා සාමාන්‍ය වැසියන්ද ඇතුළුව 25 දෙනෙකු ජීවිතක්ෂයට පත්වූහ.

මෙම ප්‍රහාරයෙන් තවත් 54 දෙනෙකු තුවාල ලැබූ අතර, එය IS ඉස්ලාම් රාජ්‍ය ත්‍රස්තයන්ගේ ක්‍රියාවක් බව ඔවුන් භාරගනු ලැබීය.

1_Afgan 2

සරණාගතයන් 630ක් රැගත් ඇක්වේරියස් ස්පාඤ්ඤයට

ඇක්වේරියස් නෞකාවෙන් බේරාගෙන පැමිණි සරණාගතයන් 630 දෙනා අවසානයේදී ස්පාඤ්ඤය භාරගැනීමට කැමැත්ත පළ කිරීමත් සමග එම නෞකාව වැලන්සියා වෙරළ කරා ඇදෙමින් පවතියි.

මධ්‍යධරණී මුහුදේදී මෙම සරණාගතයන් පැමිණි යාත්‍රාවලින් ඔවුන් බේරාගැනීමට ඇක්වේරියස් නෞකාව කටයුතු කළ අතර, පසුව ඔවුන් ඉතාලිය වෙත ඔවුන් රැගෙන යාමට උත්සාහ කළත් ඉතාලියේ සියලුම වරායන් එම නෞකාවට වසා දමමින් සරණාගතයන් භාරගැනීම ප්‍රතික්ෂේප කළේය.

යුරෝපා සංගමයේ රාජ්‍යයක් ලෙස තමන්ට තනිව මීට මුහුණදිය නොහැකි බවත්, සෙසු රාජ්‍යයන්ද මේ සඳහා කැපවිය යුතු බවත් පවසමින් ඉතාලිය මෝල්ටාව වෙත මොවුන් රැගෙන යන ලෙස පැවසීය.

නමුත්, මෝල්ටාවද ඔවුන් භාරගැනීම ප්‍රතික්ෂේප කිරීම නිසා සතියකට ආසන්න කාලයක් නෞකාව තුළ රැඳී සිටීමට සරණාගතයන්ට සිදුවිය.

අවසානයේදී මෙම මතභේදකාරී වාතාවරණය හමුවේ ප්‍රංශය ජනපතිවරයාගේද මැදිහත්වීම මත ඔවුන් ස්පාඤ්ඤය වෙත රැගෙන ඒමට තීරණය කළ අතර, සරණාගතභාවය ලැබීම සඳහා අවශ්‍ය සුදුසුකම් සපුරන පිරිස් ප්‍රංශය වෙත ගෙන්වා ගන්නා බවද ජනපති මැක්රෝන් පවසා තිබුණි.

එමෙන්ම, ස්පාඤ්ඤයේ නව සමාජවාදී පක්ෂයද මෙහිදී මානුෂීය මුහුණුවරකින් ඔවුන් දෙස බලමින් සරණාගතයන්ට අවශ්‍ය සෞඛ්‍ය පහසුකම් සැපිරීමට සූදානමින් සිටින බව කියයි.

මෙම නෞකාවේ වයස 18 නොඉක්මවූ 123ක්, වයස 13ට අඩු දරුවන් 11ක් සහ සහ ගැබිණි මවුවරු 7 දෙනෙකුද සිටින බව විදෙස් වාර්තා පවසයි.

1_Migrent 2 3

මැසිඩෝනියා නමේ ප්‍රශ්නය මත වැටුණු විශ්වාසභංගයෙන් ග්‍රීක අගමැතිවරයා ජයග්‍රහණය කරයි

මැසිඩෝනියාවේ නම වෙනස් කිරීම සම්බන්ධයෙන් ග්‍රීසිය ඇති කරගත් එකඟතාව හේතුවෙන් එරට අගමැති ඇලෙක්සි ස්ප්රාස්ට එරෙහිව විරුද්ධ පක්ෂය ගෙනා විශ්වාසභංගය පරාජයට පත්ව තිබේ.

නව ප්‍රජාතන්ත්‍රවාදී පක්ෂය ලෙස සැලකෙන එරට ප්‍රධාන විරුද්ධ පක්ෂය විසින් ගෙනා විශ්වාසභංග යෝජනාවට පක්ෂය ඡන්ද 127ක් ලැබෙන විට එයට විරුද්ධව ඡන්ද 153ක් ලැබුණු බව විදෙස් වාර්තා පවසයි.

ඒ අනුව, මෙම ඡන්ද ප්‍රතිඵලයත් සමග ග්‍රීසියත් මැසිඩෝනියාවත් අතර වසර 25කට අධික කාලයක් පැවති මතභේදකාරී තත්ත්වය නිමා කරමින් උතුරුදිග මැසිඩෝනියාව ජනරජය ලෙස මැසිඩෝනියාවේ නම වෙනස් කිරීමේ ලියවිල්ලට අත්සන් කිරීම සිදුවනු ඇත.

සිප්රාස් සහ මැසිඩෝනියා නායක සොරාන් සඒව් මීට අදාළ එකඟතාවක සිටියත් ග්‍රීසියේ විරුද්ධ පක්ෂ එයට එරෙහිව සිටියේය.

1_Greece 2 3

අයිෆල් කුලුණේ ආරක්ෂාවට විශේෂ ප්‍රාකාරයක් ඉදිකරලා

ප්‍රංශයේ පැරිස් නුවර ලෝක උරුමයක් බඳු වූ අයිෆල් කුලුණ ත්‍රස්ත ප්‍රහාරයකින් ආරක්ෂා කරගැනීම සඳහා ඒ වටා විශේෂ ප්‍රාකාරයක් ඉදිකිරීමට කටයුතු කර තිබේ.

2016 ජූනි මාසයේ සිට අයිෆල් කුලුණ වටා පැවති තාවකාලික බාධක ඉවත් කරමින් මෙම ස්ථිර ප්‍රාකාරය එලැඹෙන ජූලි මාසයේදී විවෘත කෙරෙනු ඇති බව කියයි.

2015 සැප්තැම්බර් මාසයේ සිට ප්‍රංශය තුළ ජිහාඩ් ත්‍රස්ත ප්‍රහාර හේතුවෙන් මේ දක්වා මියගොස් ඇති පිරිස 240කි.

ඇ.ඩො.මිලියන 40.1ක වියදමින් ඉදිකෙරුණු මෙම ප්‍රාකාරයේ පැති දෙකක් සෙ.මී.6.5ක ඝනකමකින් යුතු වීදුරු බිත්තිවලින් ආවරණය වන අතර, අනෙක් පැති දෙක අඩි 10කට වඩා උස වානේ වැටක් ලෙස ඉදිකරමින් පවතී.

කෙසේ වෙතත්, වීදුරු බිත්ති සහිත ප්‍රදේශයෙන් වාහනයක් යොදාගෙන සිදුකළ හැකි ප්‍රහාර වැළැක්වීම සඳහා කොන්ක්‍රීට් බාධක 420ක් තැන්පත් කරමින් සිටියි.

අයිෆල් කුලුණ පහළ කොටස පසුගිය 2016 වසරේ ජූනි මාසයේ සිට මහජනතාවට විවෘත නොවුණු අතර, නිරන්තරයෙන් ආරක්ෂක අංශ ඒ ආශ්‍රිත සෝදිසි මෙහෙයුම්වල නිරතව සිටියහ.

කෙසේ වෙතත්, නිරන්තර සංචාරක ආකර්ෂණයක් සහිත අයිෆල් වෙත පැමිණෙන ජනතාවට අපහසුවක් නොමැති ආකාරයෙන් එය නැරඹීමට අවස්ථාව සැලසීමටත්, එහි ආරක්ෂාව තහවුරු කිරීමටත් මෙම පියවර ගත් බව එහි භාරකාරීත්වය පවසයි.

2018 වසරේදී පමණක් මිලියන 7ක සංචාරක පිරිසක් අයිෆල් නරඹනු ඇතැයි පුරෝකථනය කර තිබේ.

3 1_Eifel 2 4 5

 

 

ග්ලැස්ගොව් කලා විද්‍යායතනය දෙවැනි වරටත් ගින්නට හසුවෙයි

ස්කොට්ලන්තයේ ග්ලැස්ගොව් නගරයේ පිහිටි ලෝක ප්‍රකට කලා විද්‍යායතනය ගින්නකට හසුව ඇති බව විදෙස් වාර්තා පවසයි.

මීට වසරකට පෙර මෙම කලා විද්‍යායතනයේ කොටසක් ගින්නකට හසුවීමෙන් පසුව දෙවැනි වරට මෙසේ එම මැකින්ටොෂ් ගොඩනැගිල්ල නැවතත් ගින්නට හසුව තිබේ.

එම ගොඩනැගිල්ලේ ඊයේ රාත්‍රී 11.20ට පමණ මෙම ගින්න හටගෙන ඇති අතර, ගොඩනැගිල්ලේ විශාල ප්‍රමාණයකට ගින්නට නතුව ඇති බව වාර්තා වෙයි.

එමෙන්ම, මෙම ගින්න ඊට ආසන්න කැම්පස් රාත්‍රී සමාජශාලාවට, ඕ2 ඒ.බී.සී. සංගීත ප්‍රසංග ශාලාවට පැතිර ගොස් ඇති බව සඳහන් වෙයි.

කෙසේ වෙතත්, ගින්න හේතුවෙන් කිසිවෙකුටත් හානියක් සිදුවූ බව වාර්තා නොවෙයි.

1_Scot Fire 2 3

අසාමාන්‍ය දූලි වළාවකින් දිල්ලි නගරය වැසී ගිහින්

ඉන්දියාවේ දිල්ලි අගනගරයේ වායු දූෂණය අතිශය දරුණු මට්ටමකට ළඟාවී ඇති අතර, පවතින දැඩි උණුසුම්කාරී තත්ත්වය හේතුවෙන් අසාමාන්‍ය දූලි වළාවකින්ද නගරය වැසී ඇති බව වාර්තා වෙයි.

බොහෝ නගරවාසීන් චෝදනා කරන්නේ තමන්ට නිදහසේ හුස්ම ගැනීමටවත් නොහැකි පරිසරයක් මේ වනවිට ඇතිව තිබෙන බවයි.

එමෙන්ම, තවත් අය පවසන්නේ මේ වනවිට නගරය අත්හැර දැමීමට වන තරමටම තත්ත්වය බරපතළ වී ඇති බවයි.

මේ වනවිට නගරය තුළ සිදුවන සියලු ඉදිකිරීම් නතර කිරීමට දිල්ලියේ ප්‍රාන්ත රජය පියවර ගෙන ඇති අතර, ගිනි නිවන හමුදාව යොදා ගනිමින් නගරය පුරා ජල බිංඳු ඉසීමක්ද සිදුකරමින් සිටියි.

මේ අතර, ජනතාවට හැකි තරම් නිවාස හෝ කාර්යාල අභ්‍යන්තරයට වී සිටින ලෙසට උපදෙස් ලැබී තිබේ.

ලෝකයේ පරිසර දූෂණය අතින් ඉහළම තැනක දැනටමත් පසුවන දිල්ලිය, මෑතකාලීන කාලගුණික වෙනස්කම් හේතුවෙත් තවදුරටත් දරුණු පාරිසරික පද්ධතියක් ඇති කර තිබෙන බව නොරහසකි.

1_dust-delhi-13june 2