Category Archives: health

කස්තුරිවලින් ඩෙංගුවලට පිළියම්

බටහිර වෛද්‍ය ක්‍රමය සමගම අනෙකුත් වෛල්පිත වෛද්‍ය ක්‍රම ද මේ වන විට සිය ප්‍රතිකාර ක්‍රමවේද තුළින් ඩෙංගු රෝගයට ප්‍රතිකාර සලසමින් සිටී. මේ වන විට වෙනස් වෙනස් රෝග ලක්ෂණ මතුකරමින් ඩෙංගු රෝගයමද  නැද්ද යන්න පවා හඳුනාගත නොහැකි අන්දමට වෙනස් ගති පාන ඩෙංගු රෝගය සඳහා විවිධ අත් බෙහෙත්ද මේ වන විට සමාජයේ විවිධ කතාබහට ලක් වී තිබේ.

සැබවින්ම ගස්ලබු කොළ යුෂ, පොලොස් ගැට මෙන්ම සමහර ස්වභාවික අත්බෙහෙත් රුධිර පට්ටිකා යම් ප්‍රමාණයකට වර්ධනය කරයි. නමුත් රුධිර පට්ටිකා වැඩි වීම රෝගය මුලුමණින්ම සුව වී යාමක් නොවෙන බව ඉන්දියානු සාම්ප්‍රධායික වෛද්‍ය පී බාල සුබ්‍රමනියම් මහතා පවසයි. මේ ඔහු ඩෙංගු රෝගය සම්බන්ධයෙන් කස්තුරි යොදාගත හැක්කේ කෙසේද එයින් ලැබෙන ප්‍රතිඵල කෙබදුද  යන්න අද පුවත්පතට පැවසූ කරුණු රැසකි.

කස්තුරි කියන්නේ හිමාලයේ වෙසෙන විශේෂ මුව වර්ගයකින් ලබාගන්නා ඖෂධයක්. ලෝකයෝ වෙනත් රටවලද මෙවැනි වර්ගයේ මුවන් ගොවිපලවල් වල ඇතිකර එමගින් කස්තුරි ලබාගන්නේ කස්තුරි රුධිරගත ශක්තිය ඉතා දැඩිව  ඉහළ නංවන නිසයි. මෙමගින් ඇතිකරන සංයුතිය මුලුමණින්ම රසායණිකයක් වශයෙන් ආයුර්වේදය තුළ හඳුන්වන තත්ත්වයකට සමානයි.

මෙහි විවිධ පෝෂණ සංඝටක මෙන්ම රුධිරයේ පෝෂණ තත්ත්වය ඉහළ නැංවිය හැකි  ක්ෂුද්‍ර පෝෂක නැතිනම් මිනරල් වර්ග වලින් පොහොසත් දිව්‍ය ඖෂධයක්. මෙය ඩෙංගු රෝගයේදී අඩු වී යන රුධිර පට්ටිකා වහා ඉහළ දමන සහ රුධිරය තුළ හීන වීයන ක්ෂුද්‍ර පෝෂක වර්ධනය කර හිමෝග්ලොබින් ප්‍රමාණය ඉහළ නංවා ක්ෂණිකව ශරීරයේ ඇතිවන දුබලතාවයන්ට එරෙහිව ක්‍රියාකාරීවෙන වටිනා ඖෂධයක්. 

ඩෙංගු රෝගයේදී බොහෝ දෙනෙකුට උණ තත්ත්වය හේතුවෙන් ඇතිවන ඇඟපත වේදනා මෙන්ම අප්‍රාණික බව ඉතාම සුලභ තත්ත්වයක්. ඩෙංගු වෛරසය නිසා අඩාල වී යන ශරීරයේ අනෙකුත් අවයව වහා ශක්තිමත් කර ප්‍රකෘති තත්ත්වයට පත්කිරීමට කස්තුරිවලට හැකියාව තිබෙනවා. එමෙන්ම මෙය කිසිම අවස්ථාවක අසාත්මික නොවන සහ  අතුරු ආබාධ ඇතිනොකරන ඖෂධයක්.

මේ සම්බන්ධයෙන් ඕනෑම කෙනෙකුට අන්තර්ජාලය තුළින් වැඩි විස්තර සොයාබලන්නට පුලුවන්. ඉන්දියාව තුළත් ඩෙංගු වසංගත ආකාරයට පැතිර ගිය අවස්තා තිබෙනවා. එමෙන්ම ඇතැම් ප්‍රාන්තවල සිට ප්‍රතිකාර සඳහා ගෙන ඒම ලංකාවේ මෙන් පහසුවක් නැහැ.

එවන් අවස්ථාවල ඒ රෝගීන් සඳහා සංකූලතා ඇතිවීම වැලැක්වීම පිණිස ඉන්දියානු සම්ප්‍රධායික වෙදකමේ කස්තුරිවලට ලැබෙන්නේ මුල් තැනක්. කස්තුරි මුවාගේ නාභියේ එක් රැස්වෙන මුවාගේ ජීවාණු කලක් යන විට ඇතිකරන කැටි මෙම කස්තුරි ලෙස හමුවෙනවා. එය දුලබ නිසා තරමක් මිල නමුත් කස්තුරිවලින් ඩෙංගු නිසා කෙනෙකු මරණයට පත්වීමට තුඩු දෙන හේතු බොහෝ දුරට අවම කරනවා. එය නොනැසෙන සත්‍යයක්. නමුත් නිවැරදි කස්තුරි මේ සඳහා සොයාගත යුතුයි.

සමහරු සිවෙටි බළලුන්ගේ නැටිට අග පිහිටා ඇති පැසෙහි තිබෙන ද්‍රව්‍ය කස්තුරි ලෙස සලකන තත්ත්වක් පෙනෙන්නට තිබෙනවා. නමුත් ඒවා කස්තුරි නෙවෙයි. ඩෙංගු රෝගියා අවදානම් තත්ත්වයකට පත්වෙන්නට කළින් ඔහු හෝ ඇය පානය කරන කුමන හෝ පානයකට මෙය ස්වල්ප වශයෙන් එක්කර පානයට සැලැස්වූ පසු විනාඩි විස්සක් වැනි කාලයකදී එය රෝගියාගේ රුධිර පද්ධතියට එක්වීමෙන් රුධිරය ශක්තිමත් කෙරෙනවා. මෙය රුධිර ගත ආබාධ ඇති සියලු දෙනාටම ප්‍රත්‍යක්ෂ වශයෙන් ගුණ සලසන ඖෂධයක්.

රුධිරගතව ඇතිවන අනෙකුත් ආබාධ සලකා බැලූ විට කියුකේමියා වැනි තත්ත්වයන් වලදී ක්‍රමයෙන් අඩුවන රුධිරයේ රක්තානු යළිත් වර්ධනය කිරීමටත් බිඳ වැටීම පාලනයටත් කස්තුරිවලින් අමිල සහනයක් සලසනවා. කස්තුරි දිව්‍ය ඖෂධයක් යැයි සලකන්නේ එහි ඇති මේ අපූර්ව ජීවි ස්වභාවය නිසයි. සැබෑ කස්තුරි සුවඳවත් නැහැ. එය දියවෙන්නට දැමූ විට එකවර දියවූ වීදුරුවේ හෝ භාජනයේ පතුලට වැටෙන්නේ නැහැ.

එය රන් පැහැයෙන් ඉතාම සීරුවෙන් නූලක් වැනි ආකාරයට දියවෙමින් බඳුනේ පතුලට වැටෙන අතර එය රසයෙන් කිසිම ආකාරයක අපූලක් දනවන්නේ නැහැ. ඩෙංගු රෝගී අවස්ථාවේ ඇතිවන රුධිරයේ ශක්තිය හීනවිම වළක්වන්නටත්  ඩෙංගු රෝගය සුවවීමෙන් පසු ගතට ඇතිවන අප්‍රාණිකත්වය සහ අධික වේදනාවන් සමනය සඳහාත් ශක්තිජනක ඖෂධයක් ලෙස කස්තුරි යොදන්නට හැකියි.

ඩෙංගු සමාජය තුළ වසංගතයක්ව පැතිර යමින් ජීවිත බොහෝ ගණනක් අහිමිකරන  අවස්ථාවේ අප මදුරුවන් ඉවත්කර අපේ ගෙවල් වතු පිටි පවත්වා ගන්නවාක් මෙන්ම රෝගය නිසා නැති වී යන කායික ශක්තිය ඉක්මණින් නැවත නගා සිටවන්නට උත්සහ ගැනීම වැදගත් . කාය ශක්තිය නැවත ඇතිකරන්නටත් මරණය ඇතිකරවන්නට සමත් ඩෙංගු සංකූලතාවලට ඉක්මණින්  සහනය සැලසීමටත් කස්තුරිවලට පුලුවන්.

මේ සම්බන්ධයෙන් තවත් තොරතුරු දැනගැනීමට අවශ්‍ය නම්  අද පාඨක ඔබට 077 7 404 295 දුරකථන අංකයෙන් වෛද්‍යවරයාගෙන්ම විමසිය හැකියි.

හෙළ වෙදකමට ඩෙංගු ආගන්තුක ලෙඩක් නෙවෙයි

මේවන විට ඩෙංගු රෝගය ඉතාම භයානක ලෙස රට පුරාම පැතිර යමින් ජීවිත විශාල සංඛ්‍යාවක් විනාශ කරමින් පවතියි.

රෝහල් පිරී ඉතිරී යන මේ වසංගත රෝගය සඳහා ප්‍රතිකාර පිණිස ඇත්තේ බටහිර වෙදකම ම යන මතය මුල් බැසගෙන ඇති බැවින් අප මේ සම්බන්ධව වෛකල්පිත වෛද්‍ය ක්‍රම වල සහ සිංහල, ආයුර්වේද ප්‍රතිකාර වල තත්ත්වය සම්බන්ධයෙනුත් තොරතුරු ඔබ වෙත ඉදිරිපත් කරන්නට උත්සහ කළා. අද සෞඛ්‍ය පිටුව තුළින් අප උත්සහ දරන්නේ ඩෙංගු රෝගයට ඇති විකල්ප වෛද්‍ය ක්‍රම පිළිබඳ විමසීමටයි.

ඩෙංගු රෝගය සම්බන්ධයෙන් සිංහල වෙදකම ආශ්‍රිතව ප්‍රතිකාර ක්‍රමවේදයක් නැතැයි බොහෝ දෙනා සිතා සිටින කරුණකි. නමුත් ඩෙංගු යනු අපේ රටට ආගන්තුක රෝගයක් නොවේ. ඉපැරණි  හෙළ වෙදකම තුළ මෙම රෝගය හැඳින්වීමට යොදා ඇත්තේ දණ්ඩක ජ්වර  යන නාමයයි. මෙම රෝගය හැඳින්වීම සඳහා සහ එහි ලක්ෂණ සම්බන්ධයෙන් හැඳින්වීමට යොදා ඇති මේ ශ්ලෝකයද එය සනාත කරයි. 

අස්ථි සන්ධි රුජාස්තීව්‍රා දණ්ඩාහතීකෘතාඉව
ක්ව්විද්ක්ෂිප්‍රොදය  ලයොවිසර්ප:  සර්‍වගාත්‍රග:
ජවරශ්ච කණ්ඨරුග්යුක්ත: පුනාවර්තතෙගත:
සඤ්චාරිණ සශොථෙන සන්ධිශූලෙන ලක්ෂිත:
ප්‍රතිශ්‍යා- කාස්වාන් ප්‍රායෙණාෂ්ටාහෙන ප්‍රමුව්‍යතෙ
විරං සන්ධි රුජා: සන්ති සඥෙයො දණ්ඩක ජ්වර:
ප්‍රායොසෞ ජානපදිකෝ වාත ශ්ලේෂ්ම ප්‍රකොපන:
බාලානං ජරතාඤ්චාති දාරුණ: පරිලක්ෂ්‍යතේ

මෙම ශ්ලෝකය අනුව කියවෙනුයේ. දණ්ඩකින් පහර දුන් විට ඇතිවෙන වේදනාවක් මෙන් අස්ථි සන්ධිවල විශේෂයෙන් පිටකොන්දේ තියුණු  වේදනාවක් ඇතිව  ඇතැම් විට සිරුරේ විසර්පවලට සමාන මදක් රතුවූ කොඨ ඇතිවේද, කොඨ සීඝ්‍රව වියැකීමට පත්වේද එය දණ්ඩ ජ්වර නම් වේ.  

ශ්‍යාම ශරීර ඇති අයගේ මේ පිඩකා දකින්නට අපහසු වේ. මෙහිදී කණ්ඨයෙහි වේදනා ඇතිවේ. ඇතැම් විට සන්ධි ශෝථයද ඇතිවේ. ශොථය තැනින් තැනට ඇදෙන සුලු වේ.  

ජ්වරය පුනරාවර්ථ ගතියෙන් සහ  සන්ධි වේදනාවෙන්ද යුතුවේ. විෂම වේගී ගතියෙන් යුක්ත වේ. සන්ධි රුජාව බොහෝකල් පවතී. බොහෝ සෙයින්ම රෝගියා ප්‍රතිෂ්‍යා කාසයන්ගෙන් පෙළේ. මෙය බොහෝ සෙයින්ම ජානපදික වශයෙන් ඇති වේ. වා සෙම් ප්‍රකෝපයෙන් ඇති වේ. අට වැනි දින රෝගය සුව වේ. ළමයින්ට සහ මහලු අයට ඇති වුවහොත් එය අමාරු වේ. යනුවෙන්  ග්‍රන්ථයෙහි සඳහන්ව ඇත.

ඩෙංගු යනු විෂාණුවෙකුගෙන් බෝ වන්නා වූ රෝගයක් බව හෙළ වෙදකමද පිළිගතී. මදුරුවාගෙන් බෝ වෙන රෝග අතර බරවා, මැලේරියා, ඩෙංගු ,විකන් ගුන්යා මෙන්ම ජැපනීස් එන්සෙපලයිටීස් ද අපට වඩා පීඩාකාරී තත්ත්වයන් සලසන බැවින් රෝගවලට ප්‍රතිකාර සලසන්නාටත් වඩා වැඩි අවධානයකින් මෙම රෝග බෝ කරන විෂාණුවන් මර්දනය සම්බන්ධයෙන් අවධානය දැක්වීම වැදගත්ය.

දණ්ඩක ජ්වර නැතිනම් ඩෙංගු රෝගය දින අටක් පුරා පැවතී රෝගයේ දරුණු අවස්ථා හෝ රෝගය සුව වී යාමට ඉඩ සලසන බව පිළිගත හැකිය. විශේෂයෙන් ගර්භිණියකට ඇතිවුවහොත් එය වඩාත් සංකූලතා මතුකරන්නක් විය හැකි අතර , ළදරු සහ මහලු අයටද මෙවැනිම අවදානමක් පවතී.

මෙහිදී රුධිරය සම්බන්ධ සංකූලතා මතුවෙන බව සත්‍යයක් වන අතර රෝගියා දණ්ඩක ජ්වරයට ලක්ව ඇති බව හඳුනාගත් වහාම යෙදිය යුතු දේශීය ප්‍රතිකාර ක්‍රම හරහා රෝගියාට ඇතිවන සංකූලතා අවම කළ හැකි අතර එයින් රෝගියාගේ රැධිරය ඇතිවන තර්ජනය සාර්ථකව මැඩ පැවැත්විය .මෙය අලුත් රෝගයක්ය, මෙයට සිංහල වෙදකමේ ප්‍රතිකාර නැතය යන සාවද්‍ය මතය සමාජ ගතව ඇති හෙයින් අදටත් ඩෙංගු රෝගය සඳහා පිළියමක් නැතය.

ඇත්තේ ඇඳ විවේකය ලබා දෙමින් උණ පාලනය කිරීමය යන්න සිතන්නෝ බොහෝය. නමුත් උණ ඇතිව ඇත්තේ කුමන හේතුවක් මත වුවත් එය පාලනය කිරීමට සමත් ශාක සාර ඖෂධ බොහෝ සංඛ්‍යාවක් හෙළ වෙදකම සතුව පවතින අතර එය මේ වන විටත් අවදානම දක්වා ගමන් කළ ඩෙංගු රෝගීන් විශාල සංඛ්‍යාවක්  සුවපත් කර ඇත.

දණ්ඩක ජ්වර රෝගියාට ලබා දිය යුත්තේ පහසුවෙන් දිරවිය හැකි දියරමය ආහාර පමණකි. එයට හේතුව දණ්ඩක ජ්වරය විසින් රෝගියාට බර ආහාර ලබා දුන හොත් එම ආහාර දිරවීම සඳහා ශක්තිය වැය කරනු මිස රෝගයට විරුද්ධව කාය ශක්තිය යොදවා ශරීරය තුළ ඒ වන විටත් පවතින විෂාණුව හා සිදුකරන සටනින් ජය ලබා ගැනීමට ශක්තිය වැය කිරීමේ අවස්ථාව අහිමි කරගනු ඇත.

විෂාණුවා පරිසරය අනුව විවිධ අනුවර්ථනයන්ට නතුවන බැවින් එහි ක්‍රියාකාරිත්වය මෙසේ යැයි  පොදුවේ හැඳින්වීම යුතු නොවන්නේ. එම කරුණු කාරනා අනුව ඩෙංගු රෝගය එතරම් ගණන් නොගන්නා පිරිස් එයින් දරුණු සංකූලතා මෙන්ම මරණයද ලංකරගන්නා බැවිනි.

දණ්ඩක ජ්වර රෝගියා ප්‍රවේශම් කිරීම ඉතාම උවමනාවෙන් කළ යුත්තකි. රෝගියා සමහර අවස්ථාවක දැඩි උණ තත්ත්වයක් පෙන්නුම් කරන අතර තවත් විටක මද උණ ගතියක් පෙන්නුම් කරයි. ඇතැම් අවස්ථාවක දින තුනක පමණ කාලයකින් අනතුරුව උණ මුලුමණින්ම බැස ගොස් ඇති බවක් ද පෙන්නුම් කිරීමට ඉඩ තිබේ . නමුත් මෙය භයානක අවස්ථාවකට පිවිසුමක් ද විය හැකි බැවින් තව දුරටත් රෝගියා සංරක්ෂණය කළ යුතුය.

රෝගියා මේ පිවිසෙන්නේ රෝගයේ වඩාත් තීව්‍ර අවස්ථාවකට විය හැකිය. වෙදකම කුමක් වුවත් මෙවන් අවස්ථාවකදී රෝගියා පසුවිය යුත්තේ වෛද්‍යවරයාගේ දැඩි සුපරික්ෂාව යටතේය. රෝගියා වඩාත් මලානික බවක් පෙන්වන්නේ නම් සහ සිරුර  පුරා රත් පැහැයක් මතුකරමින් සිටින්නේ නම් වහාම රෝගියා දැඩි සත්කාරයට ලක් විය යුතුය.

නමුත් රෝගය ආරම්භයේ සිටම සිංහල බෙහෙත් මගින් රෝගයේ සංකූලතා පාලනය කරමින් විවේකය ගනිමින් දණ්ඩක ජ්වරයට නියමිත කසාය වර්ග හා වත් පිළිවෙත් සපුරන්නේ නම් රෝගය තීව්‍ර තත්ත්වයට පත්නොවේ.

එමෙන්ම සිංහල බෙහෙත් ලබාගත් කිසිවෙකුත් ඩෙංගු රෝගයෙන් මිය ගිය බව අපට අසන්නට නොලැබෙන්නේ වෙදකම මෙන්ම හෙද කම මෙම ජ්වර රෝගයේදී වඩාත් දැඩි තත්ත්වයක පවතින බැවිණි. මේ සඳහා සකස් කළ විශේෂ ප්‍රතිකාර ක්‍රමවේදයක් හෙළ වෙදකම තුළද පවතී.

උණ ඇති වූ දවසේම ඔබ ඒ සඳහා යොමුවන්නේ නම් එයින් කිසිම අපහසුතාවයක් ඇති නොවී සාමාන්‍ය උණක් සුවවෙන්නා ආකාරයටම සුවය ලබන්නට අවස්ථාව ඇත. නමුත් ඇතමුන් සිංහල බෙහෙතින් සුවය ලද නොහැකි බව සිතා ඒ සඳහා යොමුවීම ප්‍රමාද කරනුයේ නමුදු රෝගයේ ද්වීතියික අවදියේ ප්‍රතිකාර සඳහා යොමුවුවත් සුවකිරීම අභියෝගයක් නොවේ.

මේවන විටත් රෝගයේ තීව්‍ර අවදියට පත් රෝගීන් විශාල ප්‍රමාණයක් සංකූලතාවලින් තොරව හෙළ වෙදකම ඇසුරින් සුවපත්ව සිටී. වඩා වැදගත්වනුයේ හැකි ඉක්මණින් ප්‍රතිකාර සඳහා යොමුවීමයි. මේ සම්බන්ධයෙන් පාඨක ඔබට  වැඩි තොරතුරු ගම්පහ උඩුගම්පල දොඹවල ජයවීර හෙළ වෙද මැදුරේ ජයවීර වෙදමහතා ගෙන් දුරකතන අංක 077 7 248 128 තුළින් විමසිය හැකියි.

ශ්‍රී ලංකාවේ දෙවැනි ජාතික මහනුවර මහ රෝහල

මහනුවර මහ රෝහල සංවර්ධනය කිරීමෙන් පසු ශ්‍රී ලංකාවේ දෙවැනි ජාතික රෝහල ලෙස ප්‍රකාශයට පත් කරන බව සෞඛ්‍ය අමාත්‍ය රාජිත සේනාරත්න මහතා පැවසීය.

එම රෝහලේ සංචාරයකට එක්වීමෙන් පසුව අමාත්‍යවරයා මේ බව සඳහන් කළේය. දිවයින පුරා විසිරී සිටින 3000 කට ආසන්න තැලසීමියා රෝගීන්ගේ ඇටමිදුලු බද්ධ කිරීමට මහනුවර ඉදිකරන රෝහල් සංකීර්ණයද මෙහිදී අමාත්‍යවරයාගේ නිරීක්ෂණයට ලක්විය.

2020 වසරට ප්‍රථම ඉදිකිරීම් අවසන් කිරීමට නියමිත මෙම රෝහල් සංකීර්ණය ඉදිකිරීමට  නාවික හමුදාව ශ්‍රම දායකත්වය ලබාදෙයි.

 

අසාත්මිකතා නිසා ඔබත් පීඩාවට පත්වෙලාද?

සමහරුන්ට ඇලර්ජි ඇතිවීම නැතිනම් අසාත්මිකතා ඇතිවීම සම්බන්ධයෙන් පවතින භීතිකාව නිසා මහත් අකරතැබ්බවලට මුහුණ දෙන්නට වෙන අවස්ථා බොහෝයි. කිසියම් අයෙක්ට අසාත්මිකතා ඇති නොකරන ආහාර හා ඖෂධ සමහරෙකුට අසාත්මිකතා ඇති කරන්නේ ඇයි. අසාත්මිකතා ඇතිවෙන්නේ කොහොමද? මෙ වැනි ගැටලු ඔබටත් යම් යම් අවස්ථාවල මතුවී ඇති.

මේ වන විට අසාත්මිකතා වෙනුවෙන් පරීක්ෂණ පවා බිහිවී තිබෙනවා. සියල්ලන්ටම පළමු මනසට වද දෙන මේ අසාත්මිකතා ඇතිවෙන්නේ මන්දැයි විමසා බලමු. මිනිස් සිරුරට යම් යම් බැක්ටීරියා වලින් ඇතිකරන බලපෑම්, ලෙඩ රෝගවලින් ඇතිවන ආපදාවන්ට මුහුණ දීම සඳහා ප්‍රතිශක්තිකරණ පද්ධතියක් පිහිටා තිබෙයි.

කිසියම් ආගන්තුක අහිතකර ද්‍රව්‍යයක් ශරීරයට පිවිසියා යැයි දැනගත්වහාම එම ප්‍රතිශක්තිකරණය ඊට එරෙහිව ක්‍රියාත්මක වී  ඒ සමග සටන් කොට ඒවා මර්දනය කරයි. නමුත් එම ප්‍රතිශක්තිකරණ ක්‍රියාදාමයන් හැම සිරුරකම එකම ආකාරයෙන් ක්‍රියාත්මක නොවන අතර පරිසරය හරහා අප අත්දකින අත්විදින අපට හානියක් නොමැති හානියක් නොකරන දෑද  ඇතැම්විට අපට යම් හානියක් ඇතිකරන්නට සමත්වේ යැයි හඳුනාගැනීමක් කළ හොත් ඒවාට පහර දෙයි. 

එවිට අපට ඒ හරහා යම් යම් අපහසුතා මතුකරන්නට පවතින ඉඩ කඩ අනුව ඇතිවන ළකුණු අප අසාත්මිකතා වශයෙන් සලකනු ලබයි.මෙය කිසියම් ආහාරයක් අරබයා සිදු වූ අවස්ථාවක අපට ආහාර අසාත්මිකතා ඇතිවෙයි. සමහරුන්ට පලු මතුවීම වමනය හිසරදය වැනි ලක්ෂණ සමේ ඇතිවන කැසීම් රතු වීම් පැවතිය හැකිය.

පරිසරයේ පවතින මල් පරාග දූවිලි සහ සියුම් දව්‍ය නාසයෙන් ඇතුලු වූ විට නාසයෙන් සොටු ගැලීම මෙන්ම ඇදුම රෝගය වැනි රෝග පීනස ආදී තත්ත්වයන් මතුකරයි. සමහරුන්ට සුවඳ වර්ග මෙන්ම සමහර මල් සුවඳ ආදී දෙයින්ද මෙය සිදුවෙයි. කෘමි සතුන් දෂ්ට කළ විට කැසිම පලු මතුවීම සහ තුවාල ඇතිවීමද අසාත්මිකතා සම්බන්ධයෙන් ඉඟිකරන ලක්ෂණ ලෙස සැලකිය හැකිය.

අපේ රටේ බහුලම අසාත්මිකතාවනුයේ සොටු දියර ගැලීම අධිකව කිවිසුම් යෑම  ට තුඩු දෙන දූවිලි මයිටාවන් පිළිබඳ ගැටලුවයි. මේ දූවිලි මැක්කන් ගෙදර දොරේ බැඳී පවතින සියුම් දූවිලි අතර ජීවත්වී නාස් මාර්ගයෙන් පෙණහලු තුළට ගමන් කිරීම  රෝග ලක්ෂණ උග්‍ර කරමින් මහත් පීඩා ඇතිකරවන්නට සමත්ය. මෙවන් අවස්ථාවලදී වෛද්‍ය උපදෙස් මත ක්‍රියාකිරීමෙන් ඉක්මණ් සහනය සලසා ගත හැකිය.

ඔබේ පවුලේ වෛද්‍යවරයා මේ සඳහා පවතින පරීක්ෂණ ඔබට නිර්දේශ කළ හොත් ඒ සම්බන්ධව  යොමු වෙන්න.  එහිදී ඇතිවී තිබෙන තත්ත්වය සමනය කරගැනීම සඳහා කඩිනම් ප්‍රතිකාර නියම කෙරෙනු ඇත. 

 

 

පිටගැස්ම හැදෙන්නේ කොහොමද?

තුවාලයක් වූ විට,එය වඩාත් බරපතලවු වත්,  සරල එකක් වුවත් එක්වරම බොහෝ දෙනෙක් විමසන්නේ පිටගැස්මට බෙහෙත් ගත්තාද යන්නෙන් විය හැකිය. පිටගැස්ම යනු කෙනෙකුගෙන් කෙනෙකුට බෝවන රෝගයක් නොවේ.

එමෙන්ම  බැක්ටීරියාවක් ලෙසින් සිරුරට ඇතුලු වන පිටගැස්ම රෝග බීජ ඇතමුන්ට මරණය පවා කැඳවන බැවින් අතීතයේ පටන්ම පිටගැස්ම යන රෝගය සම්බන්ධයෙන් බොහෝ දෙනෙක් තුළ තැතිගැන්මක් පවතී. විශේෂයෙන්ම කිසියම් අයෙකුගේ සමේ ඇතිවන තුවාල තුළින් පස් හෝ සතුන්ගේ මළ කොටස්  ඇතුලු වීම හරහා පිටගැස්ම රෝගලේ බැක්ටීරියාව ඇතුලු වන බව ඔබ දැනටමත් දන්නවා ඇත. 

කෙසේ නමුත් මළකඩ සහිත යකඩ ඇණයක් ඇනුණ විට බෙලෙක් තහඩුවකට කැපුණු විට වැනි යම් යම් අනතුරුදායක සිද්ධින් සමගද පිටගැස්ම යන රෝග තත්ත්වය බැඳෙන්නේ  කෙසේදැයි යන්න අප වඩාත් හොඳින් විමසා දැනගත යුතු කාරණයකි.

මේ හේතුවෙන් ලොව පුරාම  ඇතිවූ මරණ සංඛ්‍යාවද සැලකිල්ලට ගත් කළ පිටගැස්ම යනු එසේ නොසලකා හැරිය හැකි එකක් නොවේ. අද සෞඛ්‍ය පිටුව තුළින් අප ඔබේ දැනුම සම්පූර්ණ කරන්නේ එම රෝග තත්ත්වය සම්බන්ධවයි.

පිටගැස්ම සෑදීමට මුල්වනුයේ බැක්ටීරියාවක් බව අප මුලින්ම දැන සිටිය යුතු කරුණ සේ සලකමු. බැක්ටීරියාවන් සම්බන්ධව අවධානය යොමු කළ විට අප ජීවත්වන පරිසරයේ පවතින බැක්ටීරියා ප්‍රමාණය අතිවිශාලය. එයින් එක බැක්ටීරියාවක් ඔබට මෙම රෝගය කැඳවන්නේ නොදැනුවත්වම වීමද විශේෂයකි.

ඔබේ සමේ කිසියම් තුවාලයක් පවතී නම් එයින් ඇතුලුවන බැක්ටීරියාවන්ට ඔබට මෙම රෝගය ඇතිකරන්නට හේතු සැපයිය හැකි වෙයි. පිටගැස්ම බැක්ටීරියාවටද නමක් තිබේ. ක්ලොස්ට්‍රීඩියම් ටෙටනි  නැමති බැක්ටීරියාව ආසාදනයවීමෙන් පිටගැස්ම නැතහොත් ටෙටනස් යන තත්ත්වය ඇතිවීමට මග සෑදෙයි.

සාමාන්‍යයෙන් මෙම බැක්ටීරියාව වර්ධනය වෙනුයේ ඔක්සිජන් සාන්ද්‍රණය අඩු තත්ත්වයක් යටතේය. අපවිත්‍ර තුවාලවල මෙම බැක්ටීරියාව වර්ධන වීමට  හිතකර තත්ත්වයන් පවතින නිසා ඒවා තුළ වර්ධනය වී  ස්නායුවලට අහිතකර විෂ වර්ගයක් නිපදවයි.

එමෙන්ම පිටගැස්මට ජාති ,කුල හෝ ආගම් භේදයක් මෙන්ම ලොකු කුඩා තරුණ මහලු බේධයක් නැත. ඕනෑම වයස් කාණ්ඩයක පසුවෙන පුද්ගලයෙක්ට මෙම තත්ත්වය ඇතිවිය හැකිය. එමෙන්ම මෙම රෝගය නිසා ඇතිවෙන මරණ අනුපාතය ඉතාම ඉහළ අගයන් ගනී.  

නව ජන්ම පිටගැස්ම රෝගයත්  දරු ප්‍රසූතියට පසු  මවුවරුන්ට සෑදෙන  පිටගැස්ම රෝගයත් දියුණුවන රටවලද ප්‍රධාන තැනක් ගනී. කෙසේවෙතත් අප රටේ සාර්ථක ප්‍රතිශක්ති වැඩසටහන නිසා  නව ජන්ම පිටගැස්ම හා පිටගැස්ම යන රෝගයන් මේවන විට ශ්‍රී ලංකාවෙන්  දුරස්වෙමින් පවතියි.

පිටගැස්ම බැක්ටීරියාව ශරීරගත වන ආකාරය සහ බීජෞෂණ සමය

බීජෞෂණ සමය යනුවෙන් අප අදහස් කරන්නේ රෝග බීජයක් ඇතුලු වී එය සිරුර තුළ පැතිරෙමින් රෝග ලක්ෂණ පහළ කරවීමට ගතකරන කාලයයි.මෙම බැක්ටීරියාවට මිනිස් සිරුර ආක්‍රමණය කිරීමට ශරීරය තුළට ඇතුල්වීමට මග සලසන්නේ සිරුරේ කුමන ස්ථානයක හෝ ඇතිවුණ තුවාලයක්  තුළට පස් හෝ සතුන්ගේ හෝ මිනිසුන්ගේ මළපහ ඇතුළු වීම මගිණි.

එසේ ශරීරයට ඇතුලුවන බැක්ටීරියාව සිරුර තුළ වැඩෙමින් රෝග ලක්ෂණ මතුකිරීමට ගතකරනා කාලය දින තුන සිට විසි එක දක්වා  සාමාන්‍යයෙන් දින හතක් පමණ යැයි පැවසිය හැකිය. නමුත්  නව ජන්ම පිටගැස්ම රෝගය ඇතිවන්නේ පෙකණි වැල ජීවාණුහරණය නොකළ උපකරණ මගින් කැපීම නිසා හෝ පෙකණි වැල ටෙටනස් බැක්ටීරියා ආසාදිත ද්‍රව්‍යවලින්  ආවරණය කිරීමෙනි.  

නවජන්ම පිටගැස්ම රෝගයේ බීජෞෂණ සමය සාමාන්‍යයෙන් දින හයක් හෝ දින තුන සිට විස්ස දක්වා  පමණවන අතර මරණ අනුපාතිකය සියයට අසූව පමණ දක්වා ඉහළ අගයක පවතියි.

පිටගැස්ම රෝගයේ රෝග ලක්ෂණ

මෙම රෝගය වැලඳුන විට පළමුවෙන්ම මුහුණ සහ බෙල්ල ආශ්‍රිත මස්පිඬුවල වේදනාකාරී  දරදඩුවීම්  ඇතිවේ.  උදරයේ මාංශ පේශීන්ගේ ඇතිවන දරදඬුවීම් ළමයින්ගේත් වැඩිහිටියන්ගේත්  දකින්නට ලැබෙන පොදු ලක්ෂණයකි.  

බොහෝ ව්ට නව ජන්ම පිටගැස්ම රෝගයේ ලක්ෂණ දරුවා ඉපදී දින තුනත් දින දාහතරත්  අතර කාලයේදී දකින්නට ලැබේ. ඒ අතරින් කිරි උරා බීම අපහසු  අතපය හා මුහුණේ මාංශ පේෂීන් දරදඬුවීම  අධික ලෙස හැඬීම  වලිප්පුව හා මාංශපේශීන් ගැස්ම  යන රෝග ලක්ෂණ වැදගත්ය.

පිටගැස්ම සඳහා ප්‍රතිකාර

පිටගැස්ම රෝගීන්ට ප්‍රතිදේහ ප්‍රතිදූලක අන්තහ් පේශී රූප ප්‍රතිශක්තිකරණයට  අනුව පිටගැස්ම එන්නත  නිසි පරිදි ලබානොගෙන සිටින පුද්ගලයින්ට  පිටගැස්ම එන්නතද,  පිටගැස්ම ප්‍රතිදේහධූලකාභ සමග ම ලබාදිය යුතුය. පිටගැස්ම එන්නත ලබාදීම සඳහා වෙනම සිරින්ජරයක් භාවිතා කළ යුතු අතර එය ශරීරයේ වෙනත් ස්ථානයකට ලබාදිය යුතුය. 

පිටගැස්ම එන්නත ලබාදෙන අවස්ථා

සාමාන්‍යයෙන් පිටගැස්ම රෝගය අතිවීම වැළැක්වීම සඳහා පිටගැස්ම එන්නත ලබාදෙනු ඇති අතර මෙය තනිව හෝ ගලපටල එන්නත සමග, වැඩිහිටි ගලපටල එන්නත සමග ගල පටලය කක්කල් කැස්ස එන්නත සමග ත්‍රිත්ව එන්නත ලෙස, ගලපටලය, කක්කල් කැස්ස. හෙපටයිටිස් බී, හිමෝෆිලස් ඉන්ෆ්ලුවෙන්සා එන්නත් සමග පංච සංයුජ එන්නත ලෙස හෝ ලබාදෙනු ලැබේ.සාමාන්‍යයෙන් පිටගැස්ම එන්නත ලබාදෙන වයස් කාණ්ඩ සැලකු විට  එය මෙසේ දැක්විය හැකිය.

- අවුරුදු එකක් හෝ ඊට අඩු ළමයින්ට ත්‍රිත්ව එන්නත හෝ පංච සංයුජ එන්නත ලෙස හා අවුරුදු එකක් එකහාමාරක්  වයස ළමයින්ට ත්‍රිත්ව එන්නත ලෙස

- අවුරුදු පහ දී ද්විත්ව එන්නත ලෙස

- අවුරුදු දොළහා දී, ඒ ටී ඩී ලෙස 

- මීට පෙර ප්‍රතිශක්ති එන්නත ලබා නොදුන් පුද්ගලයින්ට

- ගර්භිණී මවුවරුන්ට (නව ජන්ම පිගැස්ම  හා මාතෘ පිටගැස්ම වැළැක්වීම සදහා.

- පිටගැස්ම සෑදීම සඳහා අවදානමක් ඇති රෝගීන්ට (මීට පෙර පිටගැස්ම එන්නත  අවශ්‍ය මාත්‍රා ප්‍රමාණ ලබා නොගෙන සිටින)

- යම් කිසි අවස්ථාවක පිටගැස්ම එන්නත ලබා නොමැති පුද්ගලයන්ට

මොවුන්ට පිටගැස්ම රෝගයෙන් වැලකීම සඳහා  එන්නත් ලබාදිය යුතු අතර පළවන සහ දෙවැනි එන්නත් මාත්‍රා අතර සති හතරක  කාල පරතරයක් තිබිය යුතුය. තුන්වැනි මාත්‍රාව දෙවැනි එන්නත ලබාදි  මාස හයකට පසුව ලබාදිය යුතුය .

තුන්වැනි මාත්‍රාවෙන් අවුරුදු පහකට පසුව හතරවැනි මාත්‍රාව ලබාදිය යුතු වෙයි. හතරවැනි මාත්‍රාවෙන් අවුරුදු දහයකට පසුව  පස්වැනි මාත්‍රාව ලබාදිය යුතුය. ඉහත සඳහන් පරිදි නියමි කාලසීමාවේදී පිටගැස්ම එන්නත ලබාගැනීමෙන්  බොහෝ කල් හෝ සමහර විට ජීවිතාන්තය දක්වා  පිටගැස්ම රෝගයෙන් ආරක්ෂාවීම සිදුවෙයි.

පිටගැස්ම එන්නත ජාතික ප්‍රතිශක්තිකරණ වැඩසටහන අනුව ලබාගෙන ඇති පුද්ගලයින්ට

ළදරු හා ළමා අවදියේදී පිටගැස්ම සඳහා එන්නත් මාත්‍රා හයම ලබාගත් පුද්ගලයන්ට අවසන් පිටගැස්ම මාත්‍රාවේ සිට අවුරුදු 10 ක් කාලසීමාවකදී තුවාලයක් සිදුවූ විට නැවත පිටගැස්ම එන්නත ලබාදීම අවශ්‍ය නොවූවත් පිටගැස්ම සෑදීම සඳහා වැඩි ප්‍රවණතාවයක් සහිත තුවාලයක් ඇති වූ විට පසුගිය අවුරුදු 05 තුළ අවසාන මාත්‍රාව ලබානොගෙන ඇත්නම් පිටගැස්ම එන්නත එක් මාත්‍රාවක් ලබාදීම සුදුසුය.

කෙසේ නමුත් කුඩා දරුවන් නිතර තුවාල සිදුකරගන්නා මෙන්ම එම තුවාලවලට විෂබීජ එක් විය හැකි පරිසරවල ගැවසෙන්නේ නම් දරුවාගේ ප්‍රතිශක්ති එන්නත් නියමාකාරයෙන් ලබා දී නැත්නම් ඒ පිළිබඳ සැළකිල්ලක් දක්වන්න.

වැඩිහිටි අය වුවත් තුවාලයක් සිදු වූ විට එය තුවාලය තුළට මඩ හෝ පසු ඇතුළුවිය හැකි නම් එය වළක්වා ගන්නා අතර ප්‍රතිශක්තිය සම්බන්ධයෙන් සැලකිල්ලක් දක්වන්න.

කෙසේ හෝ නිසි පරිදි රෝග පිළිබඳව දැනුම්වත්ව සිටීමෙන් කිසියම් තුවාලයක් ඇති වූ විට ඔබේ වෛද්‍යවරයා හමුවී නිසි ආරක්ෂාව පිළිබඳ සැකිල්ලක් දැක්වීම එම තුවාලය හොඳින් පිරිසුදුව තබා ගැනීමට වැඩිහිටි අයද වග බලාගත යුතුය. 

පිටගැස්ම යනු හැදුණු පසු කලබල විය යුතු හෝ ප්‍රතිකාර සැලසිය යුත්තේ හැදුණු පසුය යන ආකල්ප වහා බැහැර කරන්න. කිසියම් ආකාරයකට ඔබ රෝග ඇතිවීම වළක්වාගන්නටත් ප්‍රතිශක්තිය ලබාසිටීමටත් යම් ආකාරයක අවදානයක් සැලකිල්ලක් දක්වා ඇතිනම් ඔබට මෙවැනි රෝග වලින් යම් සහනයක් ලැබීම උගහට නොවේ.  

බොහෝ පුද්ගලයින් කිසියම් තුවාලයක් ඇතිවී පිටගැස්ම එන්නත ලබාදී ඊළඟ එන්නතට දින ලබාදුන් විට එය අමතක කර දමන බවක් පෙනෙන්නට තිබේ. නොකළ යුත්තේද එයයි. වෛද්‍යවරයා ඔබට එන්නත විදින්නට ලබා දී තිබෙන දිනයට එහි ගොස් අදාල වන්නත ලබාගැනීම පිටගැස්ම රෝගරෙන් නිරන්තර ආරක්ෂාවක් සලසන්නට ඉදිරිපත් වෙයි.

මේ නිසා ඔබට නියම කළ දිනය අතපසු නොකර ගොස් එන්නත විදවා ගන්න. එයින් පිටගැස්ම මාරාන්තික අනතුරක් ඔබවෙත කැඳවීම නවතා දමන්නට හේතු සාධක සපයනු ඇත.

හෙඩ් සෙට්වලින් අධික සද්දය සුදුසු නැහැ

සියලුම වයස්වලදී ඇතිවන ශ්‍රවණ ඌණතා අතරින් සියයට පනහක්ම කළින් හඳුනාගැනිමෙන් වැළැක්විය හැකි ඒවාය .එහෙයින් වැදගත්ම සංවේදනයක් වන ඇසීම සම්බන්ධයෙන් මතු විය හැකි ගැටලු කීපයක් සම්බන්ධ ඔබේ අවධානය හොඳින් යොමුකළ යුතුය.  

ක්‍රියාශීලී ඔබ ඇතැම් විට කෙළි සෙල්ලමකදී නැතිනම් කවට කමකදී තවත් කෙනෙකුට සෙල්ලමට හෝ පහරක් එල්ලකරනවා නම් එය කිසිම විටෙක කන දෙසට එල්ල කරන්නට එපා. දරුවෙකුට කිසියම් දඬුවමක් දෙන විටත් බොහෝ දෙනෙකු ඊට යොදා ගන්නේ කන දෙසට පහරක් එල්ල කිරීම වුණත් සෙල්ලම ලෙල්ලම කරමින් හෝ කේන්තිය සදාකාලික දුකක්  හා පසුතැවීමක් බවට පත්කරන කනට ගැසීම හැම විටම දුරස් කළ යුතු පිළිවෙතක් සේ සලකන්න.

මන්ද එයින් කෙනෙකුගේ ශ්‍රවණ හැකියාවට සම්පූර්ණයෙන්ම බලපෑමක් එල්ලකළ හැකි බැවිණි. දැන් අපි සිංදු අහන්න හොඳම වේගය කුමක්දැයි සොයා බලමු. ඇතමුන් අධි වේගය ප්‍රියකරන්නන් වෙන්න පුලුවන්. ශබ්දය දරා සිටිය හැකි වේගයක් අපේ කනට තිබෙන බව වත් ඇතැම් විට ඔබ නොදන්නවා වෙන්නට හැකියි.

අධික ශබ්දයෙන් සංගීතය රසවිඳින්න ගෙදර අයගෙන් බාධාවක් එල්ලවෙනවා නම් ඔබ කරන්නේ ඒ සඳහා හෙඩ් සෙට් එකක් භාවිතා කර තමන්ට පමණක් ඇහෙන සේ අධි ශබ්දයක් ක්‍රියාත්මක කර ගැනීමයි. නමුත් මෙයින් සිදුවන්නේ දැඩි හානියක් එයින් ඔබට ඔබේ කන් ඇසීම නැතිවී යන තත්ත්වයක් ඇතිවෙන්නට පුලුවන්.

අධික ශබ්දය කර්ණ ශංකයේ ඇති ස්නායු සෛල විනාශ කරන නිසා මේ කන් නෑසට මග පාදගන්නේ ඔබම වීම කනගාටුවට කාරණයක්.  ඕනෑම දෙයක් සඳහා පිළිගත් ක්‍රමවේදයක් පවතිනවා. හෙඩ් සෙට් භාවිතකර ඔබ සංගීතය අසනවා නම් හඬේ තීව්‍රතාවය  4 ට අඩුවෙන් තබාගන්න අවශ්‍යයි.

එය ඔබේ ශ්‍රවණයට දරාගත හැකි සීමාව ලෙස වෛද්‍යවරුන් විසින් සහතික කරනවා. නමුත් මීට වඩා තීව්‍රතාවයක් අනුගමනය කරන ඕනෑම අයෙකුගේ කර්ණ ශංඛයේ  ඇති ස්නායු සෛල විනාශ වීම ස්ථීරයි. සාමාන්‍යයෙන් ශබ්දයේ තීව්‍රතාවය මනිනුයේ ඩෙසිබල් වලිනි. ඒ අනුව පරිසරයේ පවතින ශබ්ද පහත දැක්වෙයි.

පුද්ගලික නිවාස – 30-50db
කාර්යාල – 50 -60db
මිනිස් කටහඬ – 60-70db
මාර්ග වාහන ශබ්ද 70- 90db
උස්හඬින් කෑ ගැසීම -90db
බලවේග පේෂකර්ම කම්හල්
ගුවන් යානයක හඬ 110 db
කනට වේදනා ගෙන දෙන ඝෝෂාව  >120db 

මේ සෛල විනාශ වෙන ශබ්ද මට්ටම පුද්ගලයා අනුව වෙනස්වෙයි. බොහෝ අයට  85 dbට වඩා වැඩි ඝෝෂාව නිසා හානි පැමිණේ. මෙය නැවත සකස්කරවන්නට වෙහෙසවනවාට වඩා පරෙස්සම්වීම තුළින් ඔබේ ශ්‍රවණයේ තියුණු බව රැකගන්නට හැකියි.

ඇතැම් අවස්ථාවල ඔබට අධික ශබ්දය ඇති ස්ථානයක් ආශ්‍රිතව රැකියා කරන්නට සිදුවෙන්නට පුලුවන්. එවන් අවස්ථාවක ඔබේ රැකියාව වෙනස් කළ නොහැකි බැවින් ඔබේ ශ්‍රවණ හැකියාව ආරක්ෂා කරගන්න ඔබට යම් කිසි විකල්පයක් අවශ්‍යයි. ඒ සඳහා සාර්ථක ක්‍රමයක් පවතිනවා.  ඒ කන් ආවරණ පැලඳීමයි. ස්නා

නය සම්බන්ධයෙන්ද යම් බලපෑමක් තිබෙන බව ඔබ දන්නවාද?  නමුත් මේ පවසන්නේ පිරිසුදු ජලය ස්නානය සම්බන්ධයෙන් නෙවෙයි. ඇතැමුන් විනෝද චාරිකා ආදියේදී ඇතැම් දියකඩිති . ආදියෙහි බැස ස්නානය කිරීමට කැමැත්තක් දක්වති. නමුත් ඇතැම් ජලය ඔබ නොදන්නා නමුත් ඉතා අපිරිසුදු තත්ත්වයෙන් පැවතිය හැකිය.

ඇතැම් අපද්‍රව්‍යද සමහරුන් විසින් එවන් දියකඩිති වලට හරවන බැවින් දියකඩිත්තකින් ස්නානය කරන්නේ නම් ජලයේ පිරිසුදුභාවය සම්බන්ධයෙන් ඉතාමත් සැලකිළිමත් වෙන්න. අපිරිසුදු ජලයක ස්නානය කිරීමෙන් කණට යම් යම් යම් බැක්ටිරියා වෛරස් ආදියට ඇතුළුවෙන්නට හැකියාව පවතින්නට  ඉඩ තිබෙන බැවින් වඩාත් සැලකිලිමත් වෙන්න.

කණ ඇතුළත කැසිම් සහ සැරව ගැලීම් ඇතිවෙන්නට බොහෝ විට හේතු වෙනුයේ  ආසාදනයන්ය. එම නිසා  ඔබ නොද‍න්නා ඇල දොල දියකඩිති ආදියේ ස්නානය කරන්නට පෙර එය පිරිසුදු ජලය සහිත එකක්දැයි විමසිලිමත් වෙන්න. සාමාන්‍යයෙන් නිසි පුහුණුවක් නැති අයෙකු කිමිදුම් කටයුතු කරන්නට උත්සහ දැරීමේදීද කණට වතුර ඇතුළුවීම අහිතකර අයුරින් ශ්‍රවණයට බලපෑ හැකිය.

මෙවැනි වැරදි සිදුවීමට ඉඩ නොතබා ඔබ සැලකිලිමත් වෙන්නේ නම් ඔබේ ශ්‍රවණයට ඇතිවිය හැකි බලපෑම් නවත්වා ගන්නට පුලුවන. කන හෝ ඇසීම සම්බන්ධ ගැටලුවකදී ඔබ යා යුතු වනුයේ උගුර කන නාසය පිළිබඳ සායනයකට හෝ වෛද්‍යවරයෙකු වෙතයි. එයින් ඔබට ඇතිවි තිබෙන තත්ත්වය නිවැරදිව තක්සේරු කිරීම හා හඳුනාගැනීම සිදුවන බැවින් ඉක්මන් සුවයද නොපමාව ලඟා කර ගත හැකිය.

රෝගවලට අතවනන සුපිරි කෑම

විදේශයන්ගෙන් අප රටට ගෙනෙන ඕනෑම දෙයක් අගෙයි කියා බාරගන්නට හුරුවී සිටින අපි විදේශ ආහාරවලටත් හුරුව සිටින්නේ සමාජයේ ඉහළ පෙළැන්තියේ අය අනුගමනය කරන ආහාර රටාවල වටිනාකම්ද එක් කරමිණි. එලෙස සමාජ තත්ත්වය පෙන්නුම් කිරීමට එක්කරගත්  ආහාරයක් ලෙස බර්ගර් හඳුන්වාදිය හැකිය.  

මේ නිසාම නගරය ආශ්‍රිත බර්ගර් අවන්හල් හතු පිපපෙන්නාක් මෙන්  ඉදිවෙමින් පවතී. සති අන්තයේ බර්ගර් කඩවලට පවුල්පිටින් ගොඩ වෙන්නත්  විශේෂ අවස්ථාවලදී  බර්ගර් මිලදී ගෙන ආහාරවේලට එකතුකර ගන්නත් මේ වන විට බොහෝ දෙනෙක් හුරුවී අවසන්ය.

පාන් පිටිවලින් සාදනු ලබන බනිස් නැතිනම් බන් එකක් මැදට තක්කාලි පෙත්තක්, සළාද කොළයක්, ලූණු පෙත්තක්, චීස් පෙත්තක් සමග ගැඹුරු තෙලේ බැදගත් මස් හෝ මස් අඹරා සෑදූ මස් පෙත්තක් තබා සැකසූ බර්ගර් මේවන විට මෙරට පුද්ගලයන්ගේ පෝෂණය සම්බන්ධයෙන් ගැටලුකාරී තත්ත්වයක් ඇතිකරමින් සිටියි. ඒ අතර බෝ නොවෙන රෝග ඉදිරියෙන්ම පවතියි.

බටහිර ආහාර රටාවන්හි ජනප්‍රිය බර්ගර් අපේ ආහාරයට නුසුදුසු වෙන්නේ කෙසේදැයි  බර්ගර් ආහාරයට ගැනීමට පෙර සොයාබැලීම වටී. බටහිර රටවල වෙසෙන පුද්ගලයන්ගේ දේහ ලක්ෂණ ගැන සැලකිලිමත් වුවහොත් ඔවුන් ආසියාකරයේ වෙසෙන පුද්ගලයන්ට වඩා උසින් මහතින් වැඩි බව පෙනේ.  

එසේම කාලගුණික හා දේශගුණික වශයෙන්ද  පෙරදිග හා අපර දිග රටවල් වෙනස් වෙයි.  ඒ නිසා ඒ ඒ දේශගුණයන්ට සුදුසුවෙන අයුරින් ස්වභාව ධර්මයෙන්ම ආහාරයට ගැනීමට සුදුසු දෑ හට ගනී. නමුත් වර්ථමානය වන විට ගෝලියකරණය හමුවේ රට රටවල් අතර වෙළඳම මගින්  ඒ ඒ රටවල් වලට ආවේනික නොවන ආහාරද  ආහාරයට ගැනීමට හැකිවන අයුරින්  වෙළඳ පොලට එක් වී ඇත.

කෙසේ නමුත් ඒ ඒ දේශගුණයට අනුව  ස්වභාව ධර්මයෙන් ලැබෙන ආහාර  ඒ ඒ ප්‍රෙදේශවල පුද්ගලයන්ගේ ආහාරවලට සුදුසු වන බවද මතක තබා ගත යුතුයි. බර්ගර් සෑදීමට ගන්නා පාන් අපේ රටට ආවේණික දෙයක් නොවන සේම ඒවායේ ගුණාත්මක භාවය පිළිබඳ ගැටලුවක් පවතී.  විදේශයන්හි මේ සඳහා නිඩුඩ්ඩ සහිත තිරිඟු පිටි  භාවිත කලද  අපේ රටේ භාවිතවෙන්නේ  තන්තු අඩු තිරිඟු පිටි වේ.

එමෙන්ම මෙයට එක් කරන මස් වර්ග බොහෝ විට අඹරාගත් මස්වලින් සැකසූ මස් පේත්තක් වෙයි. එම මස් පෙත්තේ අඩංගුවන මස් ඇතැම් විට ආහාරයට ගත නොහැකි කොටස්වලින් යුක්තවන බව ඔබ නොදන්නවා විය හැකිය. එලෙසම මෙම මස් පෙත්ත සෑදීමේදී එයට රස කාරක කල්තබාගන්නා ද්‍රව්‍ය අඩු වැඩි වශයෙන් එක්කරන බව ද අමතක නොකල යුතුය.

බර්ගර් එකක් තුළ පවතින සලාද කොළ , තක්කාලි අමුවේන් ආහාරයට එකතුවෙයි. සලාද කොළ වගාකරන්නේ  කෟෂි රසයන බහුල පරිසරයක බවත් තක්කාලිද එවැනි පරිසරයක් තුළ වගා කෙරෙන බවත් සිහියේ තබාගැනීම  උචිතය. බර්ගර් මිලදී ගැනීමේදී බර්ගර් එකක් සමග බැදපු අල පෙති  හා පැණි බීම වීදුරුවක් ද ලැබෙන පැකේජ හඳුන්වා දී තිබේ.

මෙම සියල්ලේම වැඩි වශයෙන් අඩංගු වන්නේ කැලරිය  එනම් ශක්තියයි. පෝෂ්‍යදාහී ආහාරවේලක ශක්තිජනක ආහාර වර්ධක ආහාර හා ආරක්ෂිත ආහාර ඇතුළත් විය යුතුය. නමුත් බර්ගර් ආහාරයට ගැනීමෙන් ශක්තිජනක ආහාර පමණක් ලැබෙන අතර වර්ධක ආහාර ලෙස මස් එකතුවුවත් ඒවා බොහෝ විට ගැඹුරු තෙලින් බැදගත් ඒවා  වෙයි.

මේ නිසා ශරීරයට අධික ලෙස  කැලරි හා මේදය  එකතු වී බෝ නෙවෙන රෝග දියවැඩියාව  කොලෙස්ටරෝල්  අධි රුධිර පීඩනය හෘදයාබාධ වැනි තත්ත්වයන් මතුකරන්නට වැඩි ඉඩක් පවතියි. වර්ථමානයේ අප රටේ කුඩා දරුවන් අතර මන්ද පෝෂණය මෙන්ම අධි පෝෂණ තත්ත්වයක්ද මතුවී තිබේ.  

අධි පෝෂණ තත්ත්වය ඇතිවීමට බර්ගර් වැනි අධික ශක්තිය පමණක්  අඩංගු ආහාර හේතු වී තිබේ. දිගින් දිගටම මෙවැනි  ආහාර ශරිරයට එක් කර ගැනීම මගින් වර්ධක පෝෂක හා විටමින් ඛනිජ ලබණ වැනි ආරක්ෂක පෝෂණද අහිමි වී ගොස් පෝෂණ ඌණතා  ඇතිවීමට ඉඩක් පවතී. 

තරුණ තරුණියන් අතර  මෙන්ම ළමුන් අතරත් ජනප්‍රියම  ආහාරයක් වන පිට්සා සමහර විට ඔවුන්ගේ ප්‍රධාන ආහාරයක් විය හැකිය. නැතිනම් එය අමතර කෙටි කෑමක වනු නොඅනුමානය. මෙයද පිටි ආශ්‍රිතව සකස් කළ  ආහාරයක් මෙන්ම මේ සඳහා යොදාගනු ලබන්නේ හොඳින් පිරිපහදු කළ තිරිඟු පිටි නිසාම  එහි අන්තර්ගත තන්තු විටමින්  සහ ඛනිජ ලවණ ප්‍රමාණය අල්පය පිට්සා පිළියෙල කිරීමේදී  එයට මස්, චීස් ඉතාම අල්ප වශයෙන් එළවලු  ස්වල්පයක්ද එක්කරයි.

තිරිඟු පිටි මෙන්ම මේදය මගින්  වැඩි ශක්ති ප්‍රමාණයක්  ශරීරයට එක් වෙයි. බත් අඬු කෝප්පයක් සමග පිට්සා කෑල්ලක් සලකා බැලීමේදී වැඩි ශක්ති ප්‍රමාණයක්  පිට්සා කෑල්ල ආහාරයට ගැනීමෙන්  ලැබේ. මීට බලපාන  ප්‍රධානතම හේතුව නම්  අධික චීස් ප්‍රමාණයක්  එහි අන්තර්ගතවීමයි. මෙයට අමතරව  මේදය මගින්ද  ,මස් නිසාද ශරීරගත වෙන  සංතෘප්ත මේද ප්‍රමාණය  ඉහළ යයි.  

එනිසාම රුධිරගත  කොලෙස්ටරෝල්  මට්ටම ඉහළ යාමත්  හෘදයාබාධ  තත්ත්වයන්  ඇතිවීම කෙරෙහිත්  වැඩි අවදානමක් පවතී. එලෙසින්ම අධික ශක්ති ප්‍රමාණයක්  නිරන්තරයෙන් ආහාරයට ගැනීමෙන්  තරබාරු බව මෙන්ම  ස්ථූලතාවය ඇතිවීම කෙරෙහිද  වැඩි නැඹුරුතාවයක් පවතී මෙකී ආහාරයේ අධික ලුණු ප්‍රමාණයක් අන්තර්ගතවීම නිසා අධි රුධිර පීඩනයට සඳහා ඔබගේ අවදානම වැඩි කරයි.

අධි රුධිර පීඩනය සහ වකුගඩු රෝග

අධි රුධිර පීඩනය නැතිනම් කාටත් හුරු පුරුදු වචනයෙන් කිවහොත්  ප්‍රෙෂර් එක නිසා වකුගඩු රෝගී විය හැකි බව හෝ වකුගඩු රෝග නිසා කෙනෙකුට ප්‍රෙෂර් එක ඇති විය හැකි බව බොහෝ දෙනෙකු නොදන්නා කාරණයකි.

නමුත් සත්‍ය කතාව නම් වකුගඩු රෝගයක් ඇති අයෙකු පහසුවෙන්ම අධිරුධිර පීඩනයට ලක් විය හැකි බවත් අධි රුධිර පීඩනය ඇති වී තිබෙන රෝගීන් වකුගඩු රෝගීන් බවටද පත් විය හැකි බවත්ය. අධි රුධිර පීඩනය ඇතිවෙන්නේ ඇයිද යන්න එවන් අවස්ථාවකදි ඔබට සිතෙනු ඇත.

අධි රුධිර පීඩනය ඇතිවන්නේ කිනම් හේතුවක් නිසාද යන්න නිශ්චිතව පැවසිය නොහැකි අතර රෝග ලක්ෂණ නොපෙන්වාම කෙනෙකුට එම තත්ත්වය පැවතිය හැකි නිසා, තමන්ට කිසියම් ආකාරයක අවදාමක් පවතින්නේ යැයි සැකයක් පවතී නම් හා වෙනත් බෝ නොවන රෝගවලට ගොදුරුව සිටී නම් එවැනි අවස්ථාවලද මේ සම්බන්ධයෙන් අවදානයක් දක්වා පරික්ෂා කරගත යුතු තත්ත්වයකි, අධි රුධිර පීඩනය. මේ හේතුවේ පවතින බහුලතාවය නිසා අප මෙවර සෞඛ්‍ය පිටුව ඒ වෙනුවෙන් යොමු කරන්නට අදහස් කරමු.

අධි රුධිර පීඩනය යනු ඇතැම් විට ඔබට කිසිදු රෝග ලක්ෂණයක් නොපෙන්වා සිරුර තුළ සැඟවී සිටිය හැකි රෝග තත්ත්වයකි. එමෙන්ම වකුගඩු රෝගද මුල් අවස්ථාව් රෝග ලක්ෂණ නොපෙන්වා පැවතිය හැකි බැවින්  කල් ගතවන තුරුම සැඟවී සිටිය හැකිය.

මේ නිසා නිරන්තරයෙන් තම රුධිර පීඩනය සම්බන්ධයෙන් අවධානයක් දක්වන්නෙකුට කළින්ම එවන් රෝග හඳුනාගෙන ප්‍රතිකාර වෙත යොමුවන්නට අවස්ථාවද ලැබෙයි.

කිසිවෙකු නොදන්නා නමුත්  අධි රුධිර පීඩනය සහ වකුගඩු රෝග අතර පවතින සම්බන්ධය ඉතාමත් ප්‍රභලය. සමහරෙකු අධි රුධිර පීඩනය නිසා වකුගඩු රෝගවලට ගොදුරු වෙන අතර තවත් සමහරු වකුගඩු රෝග නිසා අධි රුධිර පීඩනය ගොදුරු වෙයි. අධි රුධිර පීඩනය නිසා යම් අයෙකු වකුගඩු රෝගවලට ගොදුරු වූවාද නැතහොත් වකුගඩු රෝග නිසා කෙනෙකු අධි රුධිර පීඩනයට ගොදුරු වූවාද යන්න රෝගියෙකු පරීක්ෂා කිරිමෙන් පමණක් තහවුරු කර ගත නොහැකිය.

මේ සඳහා වෛද්‍යවරයා විසින් විවිධ පරික්ෂණ රෝගියාට නිර්දේශ කරනුයේ එය සියුම්ව හඳුනාගන්නටය.  නමුත් දැනට ඉතාම බහුලව පවතින්නේ කිසිම හේතුවක් නැතිව නිකම්ම වාගේ මතුවන අධි රුධිර පීඩනයයි. බොහෝ විට මෙම වර්ගයේ අධි රුධිර පීඩනය අවුරුදු හතළිහෙන් පසු ඇතිවන අතර සමහරුන් ඊට අඩු වයස්වලදී පවා මෙම තත්ත්වයට ගොදුරු වූ බව අසන්නට ලැබේ.  

පරීක්ෂණ අනුව බොහෝ විට වකුගඩු ආශ්‍රිතව පවතින රුධිර නාල වෙනස්කම් අධි රුධිර පිඩනය සහිත රෝගීන්ගෙන් දකින්නට ලැබේ.  විශේෂයෙන්ම රුධිර නාලවල ආස්තරණයන්ගේ තිබෙන ඉතාමත් තුනී පටලයන් ගේ ඇතිවන ඝන වීම් මෙන්ම ගුච්චිකා වල ඇතිවන ඝනවීම්ද මේ අතරින් ප්‍රධානතම ස්ථානයක් ගනී.  

මේ ආකාරයෙන් කිසියම් අයෙකුගේ රුධිර නාලවල ඇතිවෙන වෙනස්කම් නිසාත්, ගුච්චික පෙරණවල ඇතිවන වෙනස්කම් නිසාත් ඒකාන්තයෙන්ම වකුගඩුවල මූලික කාර්යය වන මුත්‍රා පෙරීම සහ ලවණ නිසි ලෙස සමායෝජනය කිරීම දුර්වලවීමට පුලුවන. තවත් සමහර අවස්ථාවලදී  රෝගියාගේ අධි රුධිර පීඩනය වේගයෙන් වැඩි වෙමින් යන විට අප වකුගඩුවල ගුච්චිකා ආශ්‍රිතව තිබෙන කුඩා රුධිර නාලිකාව විවිධාකාරයේ වෙනස්වීම් සහ විවිධ ආකාරයේ තන්තු තැන්පත් වීම්  බහුලව දකින්නට ලැබිය හැකිය.

යම් ආකාරයකින් රුධිර පීඩනය වැඩි වීම නිසා වකුගඩු බරපතල ලෙස හානීවීමත් සමගම  එම හානිවීම නිසාත් එවැන්නෙකුගේ රුධිර පීඩනය වැඩි විය හැකිය. මෙම කරුණු දෙක විෂම චක්‍රයක් ලෙස ක්‍රියාත්මක වෙමින්  රෝගියාගේ අධි රුධිර පීඩනය වැඩි වීම, එක් පසෙකින්ද, රෝගියාගේ වකුගඩු දෙක හානි වීම තවත් පැත්තකින්ද සිදුවෙන්නට පටන් ගනියි.

එම නිසා මේ කියන විෂම තත්ත්වයන් කෙසේ හෝ  බිඳ දැමීම අනිවාර්යෙන් කළ යුත්තකි. අධි රුධිර පීඩනය ආශ්‍රිතව වකුගඩු රෝගී වී ඇති විට සිදුකරන ප්‍රධානම කාරිය වනුයේ මෙම සම්බන්ධතාවය බිඳලීම සහා අවශ්‍ය කරන පසුබිම සකසා ගැනීමයි. වකුගඩු රෝග නිසා අධි රුධිර පීඩනය ඇතිවීම සැබවින්ම යම් පමණක සංකීර්ණ අවස්ථාවකි.  

වකුගඩු දෙකේම ගැටලු නිසා මෙන්ම එක් වකුගඩුවක ඇතිවී තිබෙන ගැටලු නිසා  වුවත් අධි රුධිර පීඩනය ඇතිවිය හැකිය.  මෙහිදී විවිධ ආකාරයෙන් වකුගඩුවලට ඇතිවෙන හානි නිසා අධි රුධිර පීඩනය ඇතිවිය හැකියි. විශේෂයෙන්ම වකුගඩුවල පවතින එක්තරා හෝර්මෝන පද්ධතියක් උත්තේජනය වීම නිසා මෙම තත්ත්වය අපට බහුලව දැකිය හැකිය.

එහිදී රෙනින් ඇන්ජියෝටෙන්සින්  ඇල්ඩොස්ටෙරෝන්  පද්ධතිය ලෙස හඳුන්වන  හෝමෝන පද්ධතිය ක්‍රියාකාරීවීම නිසා එමගින් අධි රුධිර පීඩනය ඇතිවෙයි. මේ සමගම ලුණු සහ දියර ශරීරයේ එකතුවීම වැඩි වෙන නිසා රුධිර පරිමාව ඉහළ යෑම ද අධි රුධිර පීඩනය ඇතිවීමට බලපෑම් කරයි.  

මේ අනුව සිතා බැලූ විට වකුගඩු දෙකේම ඇතිවෙන රෝගවලදී මෙලෙස අධි රුධිර පීඩනය ඇතිවීම යම් ප්‍රමාණයකට සංකීර්ණ තත්ත්වයක් නිර්මාණය කර අතර මෙහිදී රුධිර පීඩනය පාලනය කිරීම සඳහා ඉහත සඳහන් කළ පද්ධතිය පාලනය කරන්නා වූ බෙහෙත් වර්ග ලබාදීම සාමාන්‍යයෙන් සිදු කෙරෙයි.

කෙසේ නමුත් මෙයට අමතරව තනි වකුගඩුවක ගැටලුවක් හේතුවෙන්ද අධි රුධිර පීඩනය ඇති විය හැකිය. විශේෂයෙන්ම වකුගඩුවලට රුධිරය සපයන ප්‍රධාන රුධිර වාහිනියක හෝ වාහිනීවල හෝ ඇතිවෙන්නාවූ සිහින්වීමක් නිසා මෙය ඇතිවිය හැකිය. මේ වැනි තත්ත්වයක් කාන්තාවන්ගේ රුධිර නාලවල ඇතිවෙන යම් ආකාරයක අධි වර්ධනයක් නිසාද  වැඩිහිටි අයගේ ඇතිවෙන ලේ නහරයන් කොලෙස්ටරෝල්වලින් ඇහිරීම  නිසාද ඇතිවිය හැකිය.  

මේ ආකාරයෙන් අධි රුධිර පීඩනය ඇතිවිට අප ඉහතදී සඳහන් කළ රෙනින් ඇනිජියෝ ටෙන්සින් ඇල්ඩොස්ටෙරෝන් පද්ධතිය අකර්මණ්‍ය කරන්නාවූ  ඖෂධ වර්ග ලබාදීම සාමාන්‍යයෙන් සිදු කරන්නේ නැත. ඒ වෙනුවට වෙනත් බෙහෙත්වර්ග වලින් සහ සමහර අවස්ථාවලදී  අවශ්‍යතාව පරිදි රුධිර නාලවල සිහින්වීම සැත්කම් මගින් සකස් කිරීම හෝ ඇන්ජියෝ ප්ලාස්ට් මගින් සකස් කිරීම වැනිදෑ මගින්  මෙම රුධිර පීඩනය සමග සටන්කිරීම සිදුකරනු ලබයි.

කුමන හේතුවක් මත අධි රුධිර පීඩනය ඇතිවුවත් එය පාලනය කළ යුතු තත්ත්වයක් බව සිහි තබාගත යුතුය. මන්ද රුධිර පීඩනය වැඩි වීම මනුෂ්‍ය ශරීරයේ සාමාන්‍ය තත්ත්වයක් නොවේ. අධිරුධිර පීඩන තත්ත්වයකදී වඩා වැදගත්වනුයේ එය රෝග විනිශ්චයකට ලක්කිරීමය.

එනම් රුධිර පීඩනය වැඩිවී තිබෙන විට එම රුධිර පීඩන තත්ත්වයේ වැඩිවීමට හේතුවන වකුගඩු රෝගයක් තිබේද යන්න අවබෝධයක් ලබා ගැනීමය. එළෙස අවබෝධය ලබාගැනීමෙන් අනතුරුව එම වකුගඩුවල ගැටලුකාරී ස්වභාවය හඳුනාගැනීම සහ විවිධ ආකාරයේ පරීක්ෂණ සිදු කිරීම වැදගත්වේ.

මෙහිදී සමහර අවස්ථාවලදී වකුගඩුවලින් කොටස් රැගෙන පරීක්ෂා කිරීමද  තවත් සමහර අවස්ථාලදී වකුගඩුවල තිබෙන අවහිරතා  සහ ආපස්සට මුත්‍රා ගමන් කිරීඹ පිළිබඳව සොයා බැලීම ආදී විවිධ අවස්ථාවන් අනුව  මෙම පරීක්ෂණ සිදුකිරීම කෙරෙනු ඇත. ඒ අනුව විවිධ සුවිශේෂ ස්කෑන් වර්ගද නියම කෙරෙනු ඇති අතර  ඩී ටී පී ඒ  ස්කෑන් නම් ස්කෑන් වර්ගයද  මේ කාලයේ බහුල ලෙස මෙම තත්ත්වයන් නිර්ණය කිරීම සඳහා නියම වන ස්කෑන් පරික්ෂණ විශේෂයකි.  

මෙවන් විශේෂ පරීක්ෂණ මගින් වකුගඩුවල ක්‍රියාකාර්ත්වයන් පිළිබඳව වඩා නිවැරදි ලෙස අවබෝධ කර ගැනීමෙන් අනතුරුව රෝග විනිශ්චය කිරීමත් එයින් පසු ප්‍රතිකාර සැලසුම් කිරීමත් සිදු කෙරෙනු ඇත.

වකුගඩු සඳහා ප්‍රතිකාර කිරීමත් අධි රුධිර පීඩනය සඳහා ප්‍රතිකාර කිරීමත් මෙහිදී සිදුවෙයි. ඇතමුන් අධි රුධිර පීඩනය සඳහා ලබාදෙන ඖෂධ අතපසු කරන අවස්ථා පැවතිය හැකිය. නමුත් එය ප්‍රතිකාර ක්‍රමවේදය තුලින් නිසි සුවය ලැබීමට බාධාවක් විය හැකිය. නියමිත මාත්‍රාව නියමිත කාල පරාසය තුළ නොකඩවා ලබාගන්නට රෝගියා උත්සහ දැරිය යුතු අතර වෛද්‍ය උපදෙස් පරිදි ආහාරයට ලබාගත යුතු නොයුතු දෑ සම්බන්ධයෙන් අවදානය දැක්විය යුතුය.  

එමෙන්ම හිතුමතයේ ඖෂධ භාවිතය මෙවැනි අයෙකු විසින් කිසිසේත්ම නොකල යුත්තකි. අපහසුතාවයක් ඇතිවෙන විට පමණක් ඖෂධය ලබාගැනිමටත් අපහසුතාවය සමනය වන විට බොහෙත් නැවැත්වීම තම අභිමතය පරිදි කරන්නට යෑම වහාම නැවතිය යුතු බවට වග බලා ගන්න. එමෙන්ම ඉක්මණින් සුවයක් ලැබේයැයි සිතු ඖෂධ මාත්‍රාවන් වැඩි ප්‍රමාණයක් ලබා ගැනීම ද මේ ආකාරයෙන්ම  අත්හල යුතු පුරුද්දක් බව අමතක නොකළ යුතුය.

ස්වභාවික මුතුවලින් රෝගවලට සුවයක්

මුතු යනු මැණික් මෙන්ම වටිනාකමක් ඇති ස්වභාවික පාෂාණ අතර ට එක්වන ද්‍රව්‍යයක් නමුත්  මුතු බිහිවනුයේ මුහුදු බෙල්ලකුගේ සිරර තුළ බව අප දන්නා ඇත්තයි. නමුත් දැන් දැන් ලෝකයේ සමහර ධනවත් රටවල් මේ බෙල්ලන් වගා කිරීම ආරම්භ කර ඇති අතර ඔවුන් එසේ නිර්මාණය කරගන්නා ස්වභාවික මුතු කල්චර්ඩ් ප්‍රෙෂ් වෝටර් පර්ල් නමින් හඳුන්වති.

මෙම මුතු බෙල්ලන් ගේ සිරුරේ පටක තුළට මුතු නිර්මාණය වීමට අවශ්‍ය කරන සංයෝගය එන්නත් කිරීමට සලස්වා එමගින් මුතු නිර්මාණය වෙන්නට සැලැස්වීම  තුළින් දුර්ලභ මුතු, සුලභ ලෙස නිර්මාණයට දැන් සමත්ව තිබෙනවා. මේ ආකාරයෙන් මුතු නිෂ්පාදනය විම අරඹන්නට හේතු වී ඇත්තේ කුමන හේතුවක්ද යන්න විමසීමේදී ලොව පවතින මිල අධිකම හා සාර්ථකම රූපලාවණ්‍ය ආලේපන සඳහා මුතුවලින් ලබාගන්නා කුඩු යොදාගැනීම එයට හේතුවයි.

මුතු සහිත ආලේපන ඉතාම උසස් ප්‍රතිඵල ලබාදෙන අතර ඉතාම අලංකාරවත් රුවක් ඉස්මතුකරවන්නට සමත් බව ඇමෙරිකාව ජපානය ආදී රටවල් මෙන්ම කල්චර්ඩ් ප්‍රෙෂ්වෝටර් පර්ල් නිෂ්පාදනය කරන්නට අලුතින්ම එක්වී සිටින මහා පරිමාණ නිෂ්පාදකවරයා වන චීනය සාක්ෂි දරනවා. පෙරදිග රටවල අප මේ අගනා මුතු රෝග සුවය සඳහා යොදා ගන්නේ කෙසේදැයි දැන් විමසා බලමු. 

මුතු මැණික් ආදිය යම් යම් රෝග සඳහා සාදනු ලබන ඖෂධවලට යොදාගන්නවා මෙන්ම රන් රිදී ලෝහ ආදියත් යොදාගන්නා බව ඔබ අසා ඇති. ජ්‍යෙතිෂය අනුවත් සමහර ලෙඩ රෝග සමනය සඳහා මුතු යොදාගන්නට උපදෙස් ලබාදී තිබෙන බව නොරහසක්. 

ස්වභාවික මුතු මෙන්ම ව්‍යාජ මුතු ද ව්‍යාපාරික ලෝකයේ පවතින අතර. ස්වභාවික මුතු වල හැඩය හා පොතු නොගැලවීම ආදී ලක්ෂණ හේතුකොටගෙන ඒවා හැඳිනිය හැකිය.  අප අසා ඇත්තේ සුදු පැහැ මුතු පමණක් වුවත් ස්වභාවික මුතුවල කලු පැහැති, රෝස පැහැති කොළ පැහැති හා රතු පැහැති ආදී වශයෙන්ද මුතු පවතින බව සත්‍යයක්.

ඒ ඒ මුතුවලින්  ඇතැම් විට සුව කළ නොහැකි සමහර රෝගවලට විශාල සුවයක් ලබාගත හැකි බව ඉන්දියානු පාර්ම්පරික ආයුර්වේද වෛද්‍ය පී බාලසුබ්‍රමනියම් මහතා පවසනවා.

වයසට වඩා වැඩි වියපත් බව සමහර අයට ලොකු කනස්සල්ලක්. නමුත් ස්වභාවික මුතු වතුර වීදුරුවක බහා රැයක් තබා උදෑසන මී පැණි ස්වල්පයක් සමග පානය කිරීමෙන් ඒ වියපත් පෙනුම පහවයනවා. එයට හේතුව ස්වභාවික මුතු නියෝජනය කරන්නේ චන්ද්‍රයා යන ග්‍රහ තරුව වීමයි. එයට චන්ද්‍රයාගේ බලය තදින් ආකර්ෂණය වෙනවා. සඳ ඉතාම ලස්සනයි.

චන්ද්‍රයාගෙන් බලවත්වෙන නිසා තමයි එය රූපය වැඩි දියුණු කරන්න බලපාන්නේ.  එමෙන්ම මෙම ස්වභාවික මුතු මානසික වශයෙන් රෝගී බවට පත්ව සිටින බොහෝ දෙනෙකුට ප්‍රත්‍යක්ෂ ඖෂධයක්. චන්ද්‍රයාගේ බලපෑම මානසික රෝගවලට සම්බන්ධයක් පවතිනවා. සඳ පායන දිනවලට උමතු රෝගීන්ගේ චර්යාවන් අඩු වැඩි වෙන බව ඉස්සර මිනිසුන් අතර විශ්වාසයක් තිබුණා.

මෙවැනි අයෙක් බරින් වැඩි තරමක් ලොකු ස්වභාවික මුතු ඇටයක් රිදී ලෝහයෙන් මුදුවක් තනා පළඳිනවා නම් එයින් ඔහුගේ සමට ඇතිකරන බලපෑම හේතුවෙන් මානසික රෝග සමනය වී යනවා. එය ස්ථීරයි. ඩිමෙන්ෂියාව වැනි අමතකවීම් වැඩි මනෝ රෝගවලට ප්‍රත්‍යක්ෂ ලෙසම මෙය  බලපානවා. 

ස්වභාවික මුතුඇටයක් හෝ මුතු ඇට කිපයක් සහිත මාලයක් පළඳින්නට ,බ්‍රේස්ලට් එකක් පලඳින්නට ඔබ හුරු පුරුදුව ඇත්නම් මතක ශක්තිය වැඩි දියුණු කරගන්නට එය මනා පිටුවහලක් වනු ඇති  මතක ශක්තිය ධාරණ ශක්තිය දුර්වල අයට ස්වභාවික මුතුවලින් කළ හැකි ප්‍රතිකාර රැසකි. මුතු පැළඳීමේදී එය කැරටි හතක තරම්වත් ප්‍රමාණයක් වීම රෝග සුවය සඳහා සහය ලබන්නට අවශ්‍ය වෙයි. 

හිස සිට දෙපතුළ දක්වාම වූ රෝග සමනය සඳහා ස්වභාවික මුතු ඖෂධ හා එක්කොට ප්‍රතිකාර සැලසිය හැකි අතර එම ප්‍රතිකාරයේදී මුතු වලට හානියක් නොවී නැවත භාවිතයට ගත හැකිවීමද විශේෂයකි.

අංශභාග, හිස්ටීරියා, එපිලෙප්සි. (අපස්මාරය) සෙම්ප්‍රතිශ්‍යාව, කැස්ස, උගුර ආබාධ, බ්‍රොන්කයිටීස්, වෙරිකෝසිස්වේන් සහ ස්නායු ආබාධ, මෙන්ම පිළිකා තත්ත්වයන් ටයිපොයිඩ්, සන්ධි ආබාධ, ටියුමර්, කාන්සාව ආදී රෝගවලට මෙන්ම කාන්තා රෝගවලටත් මෙය ඉතාම සාර්ථක ප්‍රතිඵල ලබාදෙන්නක්. 

මුතු පැලඳීමේදි කඩතොලු වූ ඒවා පැලදීම බලාපොරොත්තු වූ ප්‍රතිඵල ලැබිම නවතා දමන්නක්. මේ නිසා මුතු පැලඳීමේදී ඒවා පලුදු නොවි ඇති වගට වගබලා ගන්න. එමෙන්ම ස්වභාවික මුතු බවට තහවුරු කළ නොහැකි මුතු නොපලඳින්න. ඒවායින් ඔබ බලාපොරොත්තු වෙන ප්‍රතිඵල ලැබීම සිදු නොවිය හැකි බැවිණි.

ස්වභාවික මුතු ඇට සිමෙන්ති පොළව මත තදින් ඇතිල්ලූ විට සුදු පැහැ කුඩු විශේෂයක් මතුවුවත් මුතු ඇටයේ පවතින දිලිසෙන සුළු මතුපිට නැති වී නොයයි. එමෙන්ම ඒවායේ පිට පොත්ත ගැලවී යාමක් නැත. බිම තැවරුණ මුතු ඇටයේ කුඩු අතැඟිල්ලෙන් ගත් විට එහිද දිලිසෙන සුලු බවක් පවතියි. නමුත් ව්‍යාජ මුතුවල එසේ නොවේ.  

රෝග සුවය සඳහා මුතු පලඳින විට කැරට් පහ සිට දහය දක්වා බරින් යුතු මුතු තෝරා ගැනීම වැදගත් වන අතර ඇතැම් ආභරණ තනන්නන් මුතු යොදන්නට යැයි කී විට ඉතාම කුඩා මුතු යොදන අතර ඒවා ඇතැම් විට පලුදු වු ඒවායින් වෙන් කර ගත් සියුම් කැබලි වීමට ඉඩ තිබේ. 

කාන්තා වන්ගේ මුහුණේ මතුවන ලප කැළලිද මුතු මගින් සෑහෙන දුරට මකාගන්නට ක්‍රමයක් පවතී .ඒ මුතු යොදා රැයක් තිබෙන්නට හැරි ජලයෙන් එක දිගට මුහුණ සේදීම තුළිනුයි. එවිට ලප කැලැල් ක්‍රමයෙන් ඉවත්වී මුහුණ ප්‍රභාමත්වන බව ආලේපවලින් තොරව දිදුලන සමක් ඇති වී තිබෙන බව අත්විඳින්න පුලුවන්.

මුතු තෝරාගැනීම සහ මුතු වලින් රෝග සුවයට අනුගමනය කළ යුතු වත් පිළිවෙත් ද රාශියක් පවතිනවා. මුතු සම්බන්ධ තොරතුරු ඔබට අන්තර්ජාලයෙන්ද ලබාගත හැකියි. එසේ නැතිනම් 077 7 404 295 අංකයෙන් වෛද්‍ය පී බාලසුබ්‍රමනියම් මහතාගෙන්ම විමසීමේ අවස්ථාව පවතින අතර  ඔබේ ජන්ම පත්‍රයේ සඳු ග්‍රහයාගේ දුර්වලතා පවතින්නේ නම්  අපල වෙනුවෙන් මුතු පැලඳීම සම්බන්ධයෙන් ඔබේ ජෝතිෂ්‍යවේදීයාගේ උපදෙස්ද වැදගත් විය හැකියි.

ආයුර්වේදයෙන් ගර්භීණී සමයේ උපද්‍රවවලට පිළියම්

දරු ගැබක් පිහිටීම  රෝගයක් සේ නොසැලකූ අතීතයක් අපට තිබුණත් ගර්භීණී සමයේ ඇතිවූ යම් යම් උපද්‍රවයන් එකළත් පැවති අතර ඒවාට සාර්ථක ප්‍රතිකර්මද ආයුර්වේදයේ කොතෙකුත් පැවතිණි. මේ වන විට ඇතැම් ගැබිනියන් ගර්භය හටගත් අවදියේ සිට ප්‍රසූතය දක්වාම යම් යම් අවස්ථාවල රෝහල් ගත කර ප්‍රතිකාර ලබාදෙන අවස්ථා ඔබ කොතෙකුත් දැක තිබෙනවාට සැකයක් නැත.

ගැබිනි සමයේ හට ගන්නා උපද්‍රවයන් සම්බන්ධයෙන් පැරැන්නන්  අනුගමනය කළ වත් පිළිවෙත් සහ ඇවතුම් පැවතුම් සම්බන්ධයෙන් මෙවර අද සෞඛ්‍ය පිටුව තුළින් සාකච්චාවට බඳුන් කරනුයේ ඇතැම් සුළු තත්ත්වයන් සම්බන්ධයෙන් නිවසේ සිටම ප්‍රතිකාර සලසාගැනීමේ අවස්ථාවද ඔබට සලසා දෙමිනි.

ගර්භයක් ඇතිවීම මවගේ රුධිරය හා බැඳුණු කාරණයකි. එතෙක් ඇයට සිදුවූ මාසික ආර්ථව ක්‍රියාවලිය ඇනහිටීම ගර්භයක පිහිටීම වශයෙන් සලකා දරුවා නිසි කාලය සම්පූර්ණ වී ප්‍රසූත අවස්ථාව එළැඹෙන තෙක් රුධිරය සිරුරෙන් පිටවීමක් නොවිය යුතුය යන්න බොහෝ දෙනා දන්නා කාරණයකි.

නමුත් දැන් දැන් ගැබිණි සමය තුළ බහුතර පිරිසක් අපහසුතාවයට පත්වන කරුණක් ව පවතින්නේ ගැබ දරන කාලය තුළ රුධිරය පහවීමයි. එසේ වනුයේ කිමද යන්න සලකා බලන විට විවිධ හේතු හමුවුවත් වඩාත් බහුලව දැකිය හැකි හේතුවක් සම්බන්ධයෙන් අප මුලින්ම අවදානය යොමු කරමු. ගැබිනියගේ ආහාර පාන එසේ අවදානයට ලක්විය යුතු ප්‍රධානතම කරුණක් බව ඇතැම් විට ඔබ එතරම් නොසිතූ කරුණක් වන්නට පුලුවනි.

ගැබක් හටගත්විට එතෙක් සිරුරේ පැවති සාමාන්‍ය හෝර්මෝන ක්‍රියාවලිය වෙනස් වන බැවින් වෙනදා පත්‍ය,ව්ද අපත්‍ය ,ව්ද යන්න සොයා නොබලා කල ආහාර විහරණ සම්බන්ධයෙන් යම් සැලකිල්ලක් දැක්වීම වැදගත්ය. එසේ ආහාර හා විහරණ යනාදිය සම්බන්ධයෙන් සැලකිල්ලක් නොදැක්වූ කළ ඇතිවිය හැකි එක් උපද්‍රවයකි රුධිරය පිටවීම. එසේ රුධිර වහනයක් සම්බන්ධයෙන් දැනගත් වහාම ගැබිනිය ශීත ප්‍රතිකාර වෙත යොමු කිරීම වැදගත්ය.

එහිදී ගැබිනියට සිරුර වෙහෙසෙන ක්‍රියාවලින් ඈත් කර ඇඳ විවේකය ලබාදීමට කටයුතු කළ යුතුය. එසේ ගැබිනිය නිශ්චලව සිටින්නට සලස්වා  ඇයට සැවැන්දරා. නෙළුම් අල, සුදුහඳුන්, ආදී කෂාය, නුග රැහැන් කිරි කෂාය  ලබා දිය යුතුය. එමෙන්ම වැල් මී මහනෙල්, නෙළුම් ආදී ඖෂධ, යෙදූ කෂාය, තැම්බුම් වර්ග ලබා දිය යුතුය.  

සුදු නෙළුම් රතු නෙළුම්, මානෙල්, කුමුදු, හෙල් මැලි, කෙකටිය, මේවායේ අල දඩු කෂාය හෝ මේවායේ අල, කෙසෙල් ,තැඹිලි පොල් මල් කෂාය ලබාදීම, රතඹලා ගසේ පංචාංගය ලබාදීම, ගර්භ චින්තාමණී රස චන්දනාසවය, උශීරාවය දිය යුතුය. මෙවැනි ප්‍රතිකාර හරි හැටි වෙද උපදෙස් මත ලබාදීමෙන් ගැබිණියට ඇතිවන රුධිර වහනයන් උපද්‍රවයක් ඇතිවීමෙන් තොරව නවතා ගත හැකිය.

බොහෝ විට පළමු ගැබ එසේ රුධිර වහනයකින් අනතුරුව ගබ්සා වූ කාන්තාවකට දෙවැනි අවස්ථාවලදිත් එයම සිදු විය හැකිබවට මතයක් පවතී. එවන් සැකයක් තබාගනිමින් අවදානමක් වෙත ගමන් කරනවාට වඩා එක් ගැබක් එසේ ගබ්සා වී නම් දෙවැනි ගැබ ප්‍රවේශම් සහගතව රැකගත යුතු බැවින් ඒ කෙරෙහි නිසි අවදානය යොමු කිරීම වැදගත්ය.

විවිධ ආහාර නිසා ගැබිනි සමයේ ඇතිවන අජීර්ණයටද ප්‍රතිකාර යෙදිය යුතු වෙයි. ගැබිනියට ඇතිවන අජීර්ණයේදී ඇයට ඒ සඳහා ප්‍රතිකාර සැලසිය යුත්තේ සීරුවෙනි. අජීර්ණ අවස්ථාවේදී ලබාදිය යුත්තේ ලඝු ආහාර වන අතර වර්තිකාව නවරත්න ආදි ගුලි, බැබිල, ඉඟුරු කෂාය ලබාදිය යුතුය.

ගැබිනි සමයේ ඇතිවන සුලභ උපදුවයකි වමනය. ගර්භිණී අවස්ථාවේ කාන්තාවකට ඇතිවන වමනය  වෙනුවෙන් උක්ගැට, සුදු හඳුන් සැවැන්දරා, තම්බා පානයට දීම, මෙන්ම ගර්භයට හානි නොවන මෘදු ඖෂධ ප්‍රතිකාර ලබා දිය යුතුය. බැබිල සැවැන්දරා විලඳ කසාය, කළු උක් මුල් සැවැන්දරා කෂාය, සුළු පහ කෂාය, කොත්තමල්ලි බැද තම්බා පානයට දීම මෙවන් අවස්ථාවක කළ හැකි ප්‍රතිකාර ලෙස හැඳින්විය හැකිය.

අප මෙතෙක් කතාකලේ සුළු සුළු අවස්ථා පිළිබඳ වුවත් වැඩි අවදානයක් යොමු කළ යුතු උපද්‍රව අවස්ථාද ගැබිනි සමය තුළ පැවතිය හැකිය. එයින් එකකි. ගර්භිණී අතිසාරය. මෙය කිසිසේත්ම සුළු කොට තැකිය හැකි අවස්ථාවක් නොවන අතර භයානක අවස්ථාවක් ලෙස සැලකීම සුදුසුය. උණ වමන යන අවස්ථාවන්ට වඩා අතීසාර උපද්‍රකාරකය.

විශේෂයෙන් ජල කොටස් පිටවිම නිසා මවට උපද්‍රා ඇතිවන අතර ගැබිනියකගේ අතිසාරය අසාධ්‍යය. මෙසේ අතිසාරය ඇතිවන්නේ ගර්භයේ අටවැනි මාසයේ නම් එය මවට මෙන්ම දරුවාටද හොඳ නැත. මෙහිදී බඩ එළියේ යෑම ඉක්මණින්ම නතර කළ යුතුය. පෝෂ්‍යදායක ලඝු ආහාර ලබාදිය යුතුය. ගර්භිණීන්ගේ උණ අවස්ථාවත් උපද්‍රවකර අවස්ථාවක් බව දැන සිටිය යුතුය.

සාමාන්‍ය ජ්වර චිකිත්සාව කළ යුතු අතර මූලික චිකිත්සාව අතුරින් ලංඝනය කළ යුතුය. ගැබිනියකගේ තුන්මස පසුවන තුරු උණක් ඇතිවුවහොත් පළමුව කැඳ වතුරත්, යුෂ වර්ග, මාංස රස. ක්ෂීර ආහාර දිය යුතුය.පසුව ලඝු ආහාර දිය යුතුය. හතරවැනි මාසයේ නම් ප්‍රතිකාර කළ යුතුමය, තීක්ෂණ නොවන ඖෂධ වලින් ප්‍රතිකාර කළ යුතුය. රෝගියාගේ සෞඛ්‍ය තත්ත්වය සත්ව ගුණය බලා සාමාන්‍ය ජ්වර චිකිස්තාව කළ යුතුය.

මේ හැරුණු විට ගැබිනි සමයේ නිතර කතාබහට ලක්වෙන තවත් උපද්‍රවයකි ගර්භිණි ශෝථය. මෙසේ හඳුන්වන්නේ ගැබිනියගේ සිරුරේ ඉදිමුමයි. සමහර ගැබිනි කාන්තාවන්ට ශිරා අවරෝධී වී හෝ ශෝථ අවස්ථාවක් ඇති විය හැකිය. රුධිරය හිඟවිමෙන්ද ශෝථ අවස්ථා ඇතිවෙයි. එසේම යම් යම් රෝග මෙන්ම වකුගඩු ආබාධ, යාකෘත ආබාධ, නිසාද ශෝථය ඇතිවිය හැකිය.

බොහෝ දෙනෙකු සිතා සිටින්නේ ගර්භිණි සමයේ ඉදිමුම එතරම් භයානක නොවන්නක් බව වුවත් එය ගර්භ වලිප්පුවේ පූර්ව රූපයක් නිසා ඇතිවන ඉදිමුමක් නම් එය නොසලකා හැරිය හැකි නොවේ. බොහෝ විට මේ ඉදිමුම 7, 8, 9 මාසවල දී ඇති වෙයි. සෑම ඉදිමීමකදීම, ඇල්බියුමින් යම් තරමක් පිටවිය හැකිය. එසේම එය හානිකර තත්ත්වයක්ද සාමාන්‍ය එකක්ද යන්න අවධානයෙන් සොයා බැලීම වැදගත්ය. නමුත් එය එතරම් හානිකර තත්ත්වයක් නොවන්නේ යැයි තහවුරු වුවහොත් එයට බිය විය යුතු නැත.  හිසරදය රුධිර පීඩනය , ආදිය බලා පාද ඉදිමුමට බෙහෙත් කළ යුතුය.

මෙම ඉදිමුම ගර්භ වලිප්පුවට හේතුවේද නැති නම් වෙනත් රෝගයන් නිසා ඇතිවෙන්නේද යන්න සොයා බැලිය යුතුය.  ලුණු අඩු ආහාර ලබා දිය යුතු අතර මුත්‍රා කාරක  රක්ත ශෝධන ප්‍රතිකාර විධි යෙදිය යුතුය. සාරණ අමු ඉඟුරු කෂාය හෝ කිරි කෂාය ලෙස මෙය දිය යුතුය. චන්ද්‍රප්‍රභාවටී, ගුග්ගුලු දිය හැකිය.

අප ගර්භ වලිප්පුව යනු කුමක්දැයි තවත් කරුණු කීපයක් වෙත අවධානය යොමු කරමු.  ගර්භ වලිප්පුව සඳහා ප්‍රතිකාර සොයනවාට වඩා කළ යුත්තේ වළක්වා ගැනිමයි. ගර්භ වලප්පුව අවස්ථාවේ ගැබිණිය වෛදවරයා යටතේ පසු විය යුතුයි. ගැබ් ගැබීම යනු ස්වභාවික තත්ත්වයක් නමුත් වලිප්පුව සාමාන්‍ය තත්ත්වයක් නොවන නිසා වෛද්‍යවරයාගේ යටතේ සංරක්ෂනයට ලක් විය යුතුය.

මළ මුත්‍රා පිටකිරීමේ තත්ත්වය සහ පාණ්ඩු රෝග ආදිය සම්බන්ධයෙන්  පරීක්ෂාවෙන් සිටිය යුතුය. පෝෂ්‍ය ආහාර පාන නිසි පරිදි ලැබිය යුතුය. පළමු වැනි මාසයේ පටන් හතර වැනි මාසය දක්වා ගර්භ උපද්‍රාවන් වළක්වා ගැනීමට  ගැබිණිය විශේෂ අවධානයක් දැක්විය යුතුය.

කිසියම් අයෙකුට ගැබි නොගැනීම, ගබිසා ඇති වීම දරුඵල රහිතවීම හා මෙම ලිපියෙන් සාකච්ඡා කළ ගැබිනි සමය ආශ්‍රිත යම් කරුණක් පිළිබඳ මෙහි සඳහන් නොවූ යම් තොරතුරක් දැන ගැනීමට අවශ්‍ය නම්  මෙම ලිපිය සහිත පුවත් පත රැඟෙන මොරටුව බෝධිරුක්කාරාම පාරේ අංක 26 වෙත  ගොස් විමසිම හෝ  011 2 652 045 යන අංකයෙන් විමසීමෙන් අද පාඨක ඔබට තොරතුරු ලබා ගැනීමේ පහසුකමක් ද පවතී.

ගැබිනි සමය තුළ පමණක් නොව දරු ප්‍රසූතියෙන් පසුවද මවක් ප්‍රවේශම් විය යුතු ආබාධ රැසක් ආයුර්වේදයේ සාකච්චාවට බඳුන් වී ඇති අතර මේවා පැරැන්නන්ගේ ජන ජීවිත හා තදින් ඇලී ගැලී පැවතෙන්නට හේතුව ආයුර්වේද යනු ස්වභාවික ඖෂධ හා බොහෝ සමීප ප්‍රතිකාර ක්‍රමයක් බව අතීතයේ සිටම  මිනිස් වර්ගයා තුළ විශ්වාසය තහවුරු කරගෙන සිටින බැවිනි.