Category Archives: features

සාකච්ඡාවෙන් සම්මුතියෙන් ප්‍රශ්න විසඳා නොගැනීමෙන් ලැබෙන ඵල විපාක

රටට යහපාලනය උදා වී තිබෙන හෙයින් ජනතාව වැඩි වැඩියෙන් උද්ඝෝෂණ, වැඩ වර්ජන, විරෝධතා ව්‍යාපාර පවත්වන බවට ආණ්ඩුව නියෝජනය කරන මැති ඇමැතිවරු සඳහන් කරන කාරණයකි. ලෝකයේ කිසිදු පුද්ගලයෙකු හෝ කණ්ඩායමක් ආසාවට, විනෝදයට හෝ කරන්නට දෙයක් නැතිකමට උද්ඝෝෂණ වැඩ වර්ජන හෝ විරෝධතා ව්‍යාපාර පවත්වන්නේ නැත. වර්තමාන ආණ්ඩුවේ ගෙවීගිය පාලන කාලය සලකා බැලීමේදී වැඩ වර්ජනයක්, උද්ඝෝෂණයක්, විරෝධතාවක් හෝ විරෝධතා පෙළපාළියක් යන කාරණාවලින් එකක් හෝ නොතිබූ දවස් ප්‍රමාණය ඉතාමත් අල්පය. ඒ තරමටම මෙරට තුළ වැඩ වර්ජන, උද්ඝෝෂණ, විරෝධතා හෝ විරෝධතා පෙළපාලි පැවැත්වී තිබේ. කුමන හෝ කරුණක් මූලික කරගනිමින් සිදුකරන මෙවැනි ක්‍රියා  නිසා සාමාන්‍ය ජනතාවගෙන් සැලකිය යුතු පිරිසක් අපහසුතාවට පත්වීම අනිවාර්යයෙන්ම සිදුවන්නකි. 


Capture

මේ හරහා රටේ ආර්ථිකයට බලපෑම් එල්ල වන අතර, මීට අමතරව මහා මාර්ගවල ගමන්ගන්නා ජනතාවට දවසේ විශාල පැය ගණනක් අපතේ හැරීමටද සිදු වෙයි. මෙවැනි තත්ත්වයක් උදාවුවද සාමාන්‍ය ජනතාවට හා වැඩ කරන ජනතාවට යම් ගැටලුවක් ඇති වූ විට එය විසඳීමට වර්තමාන දේශපාලඥයන් හෝ බහුතර රාජ්‍ය නිලධාරීන් කටයුතු කරන ආකාරයක් දක්නට නැත. 

මේ අනුව අසාධාරණයට පත් කණ්ඩායම් කිහිපයක් එකතුව රට අස්ථාවර වන ආකාරයට වෘත්තීය ක්‍රියාමාර්ග දියත් කිරීමටද සැලසුම් කර තිබේ. සමහර වෘත්තීය ක්‍රියාමාර්ග මේ වනවිටද ක්‍රියාත්මක අතර මෙම ගැටලු පිළිබඳ අදාළ පාර්ශ්ව සමග සාකච්ඡා කර විසදුමක් සොයාගැනීමට හෝ මෙරටේ මැති ඇමැතිවරුන් හෝ වගකිවයුතු රාජ්‍ය නිලධාරීන් උත්සාහ කරන්නේ නැත. මේ නිසා අද වනවිට රට අස්ථාවර වන තත්ත්වයක්ද නිර්මාණය වෙමින් තිබේ.රටේ සමස්ත ජනතාවගේත්, රටේ සමස්ත කර්මාන්තවලත් රඳා පැවැත්වීමේ ප්‍රධාන සාධක වී තිබෙන්නේ ජලය සහ විදුලියයි. මීට අමතරව සෞඛ්‍යය, අධ්‍යාපනය, රාජ්‍ය ප්‍රවාහන සේවය, ඉන්ධන සහ තැපැල් සේවාව රටේ පැවැත්මට අවශ්‍ය සාධක වේ. 

එහෙත් අද දවස වනවිට මේ බොහෝ ක්ෂේත්‍රවල වෘත්තීය ක්‍රියාමර්ග ආරම්භ වී තිබෙන අතර, සමහර වෘත්තීය ක්‍රියාමාර්ග ඉදිරි දිනවල ආරම්භ වීමට නියමිතය. මීට අමතරව ඉල්ලීම් කිහිපයක් මුල් කරගනිමින් මැයි 30 වැනිදා සිට අකුරට වැඩ කිරීමේ වෘත්තීය ක්‍රියාමාර්ගවල නිරත වූ ජල සම්පාදන සේවකයන්ට වැටුප් වැඩිවීම් ලබා දී වෘත්තීය ක්‍රියාමාර්ගය නතර කිරීමට අවශ්‍ය කටයුතු කර තිබේ. වෘත්තීය සමිති සඳහන් කරන ආකාරයට සෑම වසර තුනකට වරක්ම වසර තුනකට ගැළපෙන ආකාරයට වැටුප් සංශෝධනයක් සිදුවිය යුතුය.
මේ අනුව 2015 දී ඇතිකළ වැටුප් ගිවිසුම මේ වසරේ ජනවාරි පළමු වැනිදා වනවිට අවලංගු වී ගොස් තිබේ. මෙම අවලංගු වීමත් සමග නව වැටුප් ගිවිසුමක් ක්‍රියාත්මක කළ යුතු වේ. එසේ තිබියදී ජල සම්පාදන සේවකයන්ට වෘත්තීය ක්‍රියාමාර්ගවල නිරතවීමට ඉඩ ලබා දී ජල සම්පාදන මණ්ඩලයේ වැඩ කටයුතු අඩපණ වනතෙක් අදාළ ගැටලුවට විසඳුම් ලබාදීමට පාලකයන් කටයුතු කළේ නැත. 

මේ ආකාරයට ආණ්ඩුව හැසිරීම නිසා යම් දෙයක් ලබාගැනීමට නම්, උද්ඝෝෂණ, වැඩ වර්ජන සහ විරෝධතා ව්‍යාපාර පැවැත්විය යුතු බවටද ජනතාව තුළ මතයක් ඇති වී තිබේ. 

ජල සම්පාදන සේවකයන්ට සැබෑ ලෙසම 25෴ක වැටුප් වැඩිවීමක් තිබුණා නම් එය ලබාදීම රජයේ වගකීමකි. එහෙත් වෘත්තීය සමිති විසින් ආණ්ඩුවට ඔවුන්ගේ බලය පෙන්වා මෙම ක්‍රියාව සිදුකර ගත්තා නම් ආණ්ඩුවට තවදුරටත් රට පාලනය කළ හැකිද යන ප්‍රශ්නය ඇති වී ඇත. කෙසේ නමුත් අදාළ ගැටලුව පිළිබඳ විධිමත් සාකච්ඡාවක් පැවැත්වීමට හෝ කටයුතු නොකළ අතර, පසුව ජුනි 06 වැනිදා සවස ඔවුන් ඉල්ලා සිටි වැටුප් වැඩිවීම ලබාදීමට ආණ්ඩුව තීරණයක් ගෙන තිබේ.

මීට අමතරව ඉදිරි විසි අවුරුද්ද තුළ අඩු වියදමකින් සිදුකළ හැකි 20 අවුරුදු ජනතා සැලැස්ම ක්‍රියාත්මක කරන ලෙස ඉල්ලා විදුලිබල මණ්ඩල ඉංජිනේරු සංගමය මැයි 08 වැනිදා සිට අකුරට වැඩ කිරීමේ වෘත්තීය ක්‍රියාමාර්ගයක් ආරම්භ කර තිබේ. 

විදුලි ඉංජිනේරුවෝ නඩත්තු සේවාවලින්ද ඉවත් වූහ. මේ අනුව මැයි 08 වැනිදා සිට ජුනි 11 දක්වා කාලය තුළදී රාත්‍රී කාලයේදී හා සති අන්තයේදී විදුලිය බිඳ වැටුණු පසු එය යථා තත්ත්වයට පත් කිරීමට පැය ගණනක්, දින ගණනක් ගත විය. මේ හරහා විදුලි පාරිභෝගිකයෝ දැඩි දුෂ්කරතාවට පත් වූහ. අවසානයේ නොරොච්චෝලේ බලාගාරය 12 වැනිදා සිට අක්‍රිය කරන බවට විදුලි ඉංජිනේරුවන් තර්ජනය කිරීම නිසා විසි අවුරුදු සැලැස්ම අනුමත කරන බවට රජයේ පාර්ශ්ව ජුනි 11 වැනිදා ප්‍රකාශයට පත් කළේය. එම පොරොන්දු සැලකිල්ලට ගනිමින් විදුලි ඉංජිනේරු වැඩ වර්ජනය අවසන් විය. එහෙත් වැඩ තහනම් කළ වෘත්තීය සමිති නියෝජිතයන් සේවයේ පිහිටුවන ලෙස සහ වැටුප් කෙටුම්පතක් එළිදක්වන ලෙස ඉල්ලා විදුලි බලමණ්ඩල විධායක නොවන පිරිස් මේ මස 20 වැනිදා සිට වෘත්තීය ක්‍රියාමාර්ග දියත් කිරීමටද සැලසුම් කර තිබේ. එහි පළමු ක්‍රියාමාර්ගය ලෙස විදුලි බල මණ්ඩල ප්‍රධාන කාර්යාලය ඉදිරිපිට මේ මස 20 වැනිදා උද්ඝෝෂණ ව්‍යාපාරයක් පැවැත්වීමටද සැලසුම් කර ඇත. මීට අමතරව විශේෂ දීමනා ලබාදෙන ලෙස ඉල්ලා ශ්‍රී ලංකා පරිපාලන සේවාවේ නිලධාරීහු 14 වැනිදා ලෙඩ නිවාඩු වාර්තා කර වැඩ වර්ජනයක නිරත වූහ. මෙම වැඩ වර්ජනය එක් දිනෙන් අවසන් වුවත් කොයි මොහොතක හෝ නැවත වතාවක් මෙම පිරිස් වෘත්තීය ක්‍රියාමාර්ග දියත් කිරීම අනිවාර්යයෙන්ම සිදුවන ක්‍රියාවකි.

මේ අනුව මෙම පිරිස්වල ඉල්ලීම් ඉටු කිරීමට ආණ්ඩුව කටයුතු කරනු ඇත. පරිපාලන සේවාවට දීමනාවක් ලබාදීමට කටයුතු කළහොත් විධායක ශ්‍රේණිවල සේවය කරන පිරිස්වලටද දීමනාවක් අවශ්‍ය බවට 14 වැනිදා සවස විධායක සේවාවල නිලධාරීහු ප්‍රකාශයට පත් කළහ.
මේ අනුව මෙම මස 24 වැනිදා සිට තවත් වැඩ වර්ජන, උද්ඝෝෂණ ව්‍යාපාර අලුතින් ආරම්භ වීමට නියමිතය. සේවා ව්‍යවස්ථාවක් සකස් කර ස්ථිර සේවයට ඇතුළත් කර නොගෙන සිටින තැපැල් ස්ථානාධිපතිවරුන්ගේ සේවය ස්ථිර කරන ලෙස හා තවත් ගැටලු කිහිපයක් මුල් කරගනිමින් 11 වැනිදා තැපැල් සේවක වර්ජනයක් ආරම්භ කර තිබේ. මෙම වැඩ වර්ජනය නිසා සමස්ත තැපැල් සේවාවම අඩපණ වී ඇත. එහෙත් බලධාරීන්ගේ අවධානය මේ සඳහා තවමත් යොමු වී නැත. 

මීට අමතරව වෘත්තීයවේදීන් මත පටවා තිබෙන අධික බදු මුදල් ඉවත් කරන ලෙස ඉල්ලා ඉදිරියේදී වෛද්‍ය වැඩ වර්ජනයක් දියත් කිරීමටද සැලසුම් කර තිබේ. 
ගෙවීගිය වසර දෙකක කාලය සලකා බැලුවහොත් සයිටම් ආයතනය අහෝසි කරන ලෙස ඉල්ලා වෛද්‍ය වැඩ වර්ජන සිදුකර ඇත. වෛද්‍ය වැඩ වර්ජන නිසා රටේ නායකයාට හෝ දේශපාලනඥයන්ට කිසිදු ප්‍රශ්නයක් ඇති නොවුණත් මේ රටේ අහිංසක ජනතාවට මෙම වර්ජන නිසා විශාල ලෙස පීඩාවට පත්වීමට සිදු විය. 

මීට අමතරව කලා, වාණිජ විෂය ධාරාව යටතේ හෙද සේවාවට පිරිස් බඳවාගැනීමට සිදුකරන සැලසුම් අවලංගු කරන ලෙස ඉල්ලා මේ මස අවසන් සතියේ සිට හෙද වැඩ වර්ජනයක් සිදු කිරීමට හෙද වෘත්තීය සමිති සැලසුම් කර තිබේ. සෞඛ්‍ය සේවාව තුළ ඇති තරම් ප්‍රශ්න නිර්මාණය වී තිබියදී මෙරටේ මොළයක් නැති දේශපාලඥයන්ගේ ක්‍රියාකාරකම් නිසා හෙද සේවාව තුළ අලුත් ප්‍රශ්නයක්ද නිර්මාණය වී තිබේ. මේ අනුව හෙද සංගම් මෙම ප්‍රශ්නය විසඳාගන්නේද මෙරටේ අහිංසක රෝගීන් බිල්ලට ලබා දෙමිනි. මේ නිසා වෘත්තීය ක්‍රියාමාර්ග දියත් කිරීමෙන් පසු අදාළ තීරණය වෙනස් කරන තෙක් නොසිට ආණ්ඩුව ජනතාව ගැන සිතා වහාම මෙම ගැටලුව විසඳිය යුතුය. සයිටම් අහෝසි කරන ලෙස ඉල්ලා වෛද්‍යවරුන්ට අමතරව විශ්වවිද්‍යාල ශිෂ්‍යයන් වෛද්‍ය පීඨ ශිෂ්‍යයෝ ගෙවීගිය කාලය පුරාම මහ පාරේ සටන් කළහ.
මීට අමතරව මාස 10කට වැඩි කාලයක් පන්ති වර්ජනයක් සිදු කිරීමටත් වෛද්‍ය ශිෂ්‍යයෝ කටයුතු කළහ. අවසානයේදී වෛද්‍ය ශිෂ්‍ය දෙමවුපියන් ආරම්භ කළ මාරාන්තික උපවාසයක ප්‍රතිඵලයක් ලෙස පසුගිය දෙසැම්බර් 31 වැනිදා වනවිට සයිටම් අහෝසි කරන බවට ආණ්ඩුව රට හමුවේ පොරොන්දුවක් ලබා දුන්නේය. මෙම පොරොන්දුවට අනුව මාරාන්තික උපවාසය අවසන් වූ අතර, මීට අමතරව ශිෂ්‍ය සටන් නවතා දැමීමටද කටයුතු කෙරිණි. එහෙත් ලබාදුන් පොරොන්දුව මෙතෙක් ඉටුකර නොමැති අතර, මේ අනුව නැවත වතාවක් ශිෂ්‍ය ව්‍යාපාර උද්ඝෝෂණ ව්‍යාපාර ආරම්භ කර තිබේ. මීට අමතරව කොතලාවල ආරක්ෂක විශ්වවිද්‍යාල  පනත සංශෝධනය කර සයිටම් හා කොතලාවල වෛද්‍ය පීඨය ඒකාබද්ධ කර උපාධි පිරිනැමීමේ වැඩපිළිවෙළක්ද මේ වනවිට කරළියට පැමිණ ඇත.
මෙම සංශෝධනය තව තවත් වෛද්‍ය විද්‍යාල ඇති කිරීමට හැකි ආකාරයට සකස් කර තිබෙන අතර, මේ අනුව මෙම සංශෝධනයට එරෙහිව වෛද්‍ය සංගම්, වෙනත් වෘත්තීය සමිති සහ ශිෂ්‍ය සංගම් පෙළ ගැසෙමින් තිබේ. මේ අනුව රට තුළ යම් කටයුත්තක් සිදුවුවහොත් එහි වගකීම ආණ්ඩුව බාරගත යුතු අතර, එයට හේතු වී තිබෙන්නේ ආණ්ඩුව විසින්ම රට තුළ ප්‍රශ්න නිර්මාණය කිරීම නිසාය.

දුම්රිය සේවා ශ්‍රේණි 05කට ඉහළ දැමූ වැටුපට සමානව වැටුප් ඉල්ලා දුම්රිය තාක්ෂණ සේවා වෘත්තීය සමිති අරගලයක් ආරම්භ කර තිබේ. මෙම අරගලයේ එක් ක්‍රියාකාරකමක් ලෙස පසුගිය 29 වැනිදා සවස 4.00 සිට පැය 48ක වැඩ වර්ජනයක් දියත් කිරීමටද වෘත්තීය සමිති කටයුතු කළේය.

අදාළ ගැටලු පිළිබඳ ජුනි 01 වැනිදා ආණ්ඩුවේ පාර්ශ්ව සහ වෘත්තීය සමිති අතර විශේෂ සාකච්ඡාවක් පැවැත්වූ අතර, මෙම සාකච්ඡාවේදී මේ මස 03 වැනිදා වනවිට ගැටලු විසඳන බවට බලධාරීන් පොරොන්දු වූ බවද වෘත්තීය සමිති සඳහන් කරයි. එහෙත් මේ වනවිට එම පොරොන්දු කඩකර තිබෙන හෙයින් ඉදිරි දින 10න් පසු අඛණ්ඩ දුම්රිය වැඩවර්ජනයක් දියත් කිරීමටද වෘත්තීය සමිති සැලසුම් කර තිබේ. මීට පෙර දුම්රිය වෘත්තීය සමිති 05ක් වැටුප් වැඩි කරන ලෙස ඉල්ලා වැඩ වර්ජනයක්  ආරම්භ කළ අතර, වැඩවර්ජනයෙන් පසු ඔවුන්ගේ වැටුප් ඉහළ දැමීමට ආණ්ඩුව කටයුතු කළේය.

ආණ්ඩුවේ පිරිස් යහපාලනයක් ගැන කතා කළද, වෘත්තීය  අයිතිවාසිකම් ලබාදීම සිදුකර තිබෙන්නේ මේ රටේ පොදු ජනතාව දැඩි පීඩාවකට ලක් කරන තෙක් වෘත්තීය සමිතිවලට අවස්ථාව ලබාදීමෙන් පසුවය. මීට අමතරව ගුරු විදුහල්පති ගැටලු විසඳීමට කටයුතු නොකළ බව පවසමින් ඉදිරියේදී පැවැත්වීමට නියමිත උසස් පෙළ විභාගයේ විභාග රාජකාරි කටයුතුවලින් සමස්ත ලංකා උපාධිධාරී සංගමයේ සාමාජිකයන් ඉවත් වීමට තීරණය කර තිබේ. 2008 වසරේදීද මේ ආකාරයේ ක්‍රියාවක් සිදුවීම නිසා විභාග කටයුතුවලට බාධා එල්ල විය. 
මීට අමතරව විදුහල්පති සේවයට සහ අධ්‍යාපන පරිපාලන සේවයට දේශපාලන හිතවත්කම් මත ගුරුවරුන් පත් කරන බව පවසමින් ගුරු විදුහල්පති සංගමය හා අධ්‍යාපන පරිපාලන සේවා සංගම් විවිධ වෘත්තීය ක්‍රියාමාර්ග ආරම්භ කර තිබේ. 
මෙම ක්‍රියාමාර්ගවලට අමතරව විදුහල්පති වෘත්තීය සමිති හා අධ්‍යාපන පරිපාලන සේවාවේ නිලධාරීන් එක්දින වැඩ වර්ජනයක්ද සිදුකර තිබේ.

මීට අමතරව මේ මස ගුරු විදුහල්පති හා අධ්‍යාපන පරිපාලන සේවාවේ නිලධාරීන් එක්ව ඉදිරි ක්‍රියාමාර්ග තීරණය කිරීමට මහා සමුළුවක් කැඳවීමට තීරණය කර තිබේ. පොරොන්දු වූ පරිදි රැකියා ලබාදෙන ලෙස ඉල්ලා රැකියා විරහිත උපාධිධාරීන්ද රට පුරා උද්ඝෝෂණ ආරම්භ කර තිබේ. මීට පෙර අවස්ථා කිහිපයකදීම කොළඹ නගරය අවහිර වන ආකාරයට පා ගමන් පැවැත්වීමට හා උද්ඝෝෂණ සිදු කිරීමටද ඔවුහු කටයුතු කළහ. මීට අමතරව එට්කා ගිවිසුම පිළිබඳ සිදුකරන සාකච්ඡා නවතා දමන ලෙසට සහ අත්සන් කර තිබෙන සිංගප්පූරු වෙළෙඳ ගිවිසුම අහෝසි කරන ලෙස ඉල්ලා විධායක ශ්‍රේණිවල වෘත්තීය සමිති විවිධ විරෝධතාවල නිරත වෙමින් සිටියි. 

මෙම ක්‍රියාමාර්ගවලට අමතරව වෘත්තීය සමිති ඒකාබද්ධ වී වැඩ වර්ජනයක් සිදුකිරීමටද සැලසුම් කර තිබේ. මීට අමතරව පානීය ජල ගැටලු මුල් කරගනිමින් පාසල්වලට ගුරුවරුන් ඉල්ලා සහ අලි ගම්වැදීම නවතා දමන ලෙස ඉල්ලා රටේ විවිධ ප්‍ර‘දේශවල ජනතාව විරෝධතා ව්‍යාපාර පවත්වමින් සිටින අතර, සමහර විරෝධතා මාර්ග අවහිර කරමින් සිදුකරන ආකාරයක්ද දක්නට ලැබේ.

එහෙත් ආණ්ඩුව මැදිහත් වී එම ගැටලුවලට විසඳුම් ලබාදෙන ආකාරයක් දක්නට නොලැබෙන අතර, මේ අනුව යම් යම් ක්‍රියාමාර්ග දිගින් දිගටම සිදුවෙමින් ඇත.
මීට අමතරව විවිධ ගැටලු මුල්කර ගනිමින් තක්සේරු නිලධාරීන් සහ මිනින්දෝරුවන් පසුගිය කාලයේදී විවිධ වෘත්තීය ක්‍රියාමාර්ග දියත් කළ අතර, යම් යම් පොරොන්දු මත එම ක්‍රියාමාර්ග තාවකාලිකව නැවතී ගොස් තිබේ. එහෙත් ලබාදුන් පොරොන්දු මෙතෙක් ඉටුකර නොමැති බවද මිනින්දෝරු සහ තක්සේරු නිලධාරීහු සඳහන් කරති.

මීට අමතරව පොරොන්දු වූ ආකාරයට පොහොර සහනාධාරය නොලැබෙන බව පවසමින් ගොවි උද්ඝෝෂණයක් ආරම්භ වී තිබෙන අතර, ඉන්ධන සහනාධාරය කපා දැමූ බව පවසමින් ධීවර ජනතාවද විවිධ උද්ඝෝෂණ ව්‍යාපාරවල නිරතව සිටිති.
ආගමන විගමන සේවාවට ඇති වී තිබෙන ගැටලුවලට විසඳුම් නොලැබුණු බව පවසමින් විවිධ වෘත්තීය ක්‍රියාමාර්ග දියත් වූ අතර, එම ක්‍රියාමාර්ග ඉදිරි දෙසතිය තෙක් නවතා දැමීමටද කටයුතු කර තිබේ. 
පළිගැනීමට ලක්වූ දුම්රිය සේවකයන්ට මෙතෙක් සාධාරණයක් ඉටු වී නොමැති බවට එම පිරිස් සඳහන් කරන අතර, මේ අනුව ගැටලු විසඳාගැනීම සඳහා එක්සත් ජාතික පක්ෂ මූලස්ථානය වන සිරිකොත ඉදිරිපිට හෝ අග්‍රාමාත්‍ය කාර්යාලය ඉදිරිපිට මාරාන්තික උපවාස ආරම්භ කිරීමටද සැලසුම් කර තිබේ.

අබාධිත රණවිරුවන්ගේ ගැටලු විසඳීමට කටයුතු නොකළ බව සඳහන් කරමින් වරින් වර එම පිරිස් උද්ඝෝෂණ ව්‍යාපාරවල නිරත වෙමින් සිටිති. මේ අනුව රාජ්‍ය අංශය, ධීවර, ගොවි, විශ්වවිද්‍යාල සහ වෛද්‍ය විද්‍යාල ආදී ක්ෂේත්‍රවල කටයුතු අඩපණ වෙමින් තිබෙන අතර, මෙම කණ්ඩායම සිදුකරන උද්ඝෝෂණ ව්‍යාපාර හා පෙළපාළි නිසා සාමාන්‍ය ජන ජීවිතයටද බලපෑම් ඇති වී තිබේ. 

එහෙත් මෙම ගැටලුවලට විසඳුම් ලබා‍දෙන ආකාරයක් දක්නට නොලැබෙන අතර, මේ අනුව ඉදිරියේදී රාජ්‍ය අංශය, විශ්වවිද්‍යාල, වෛද්‍ය විද්‍යාල, ගොවි, ධීවර ක්ෂේත්‍රවල කටයුතු අඩාළ වීම වළක්වාගත නොහැකි වනු ඇත. සමහර ප්‍රශ්න සුළුවෙන් විසඳාගැනීමට හැකිව තිබුණද මැති ඇමතිවරුන්ගේ හා තීන්දු තීරණ ගැනීමට සිටින නිලධාරීන්ගේ පණ්ඩිතකම නිසා සුළු ප්‍රශ්න මහා විශාල ප්‍රශ්න බවට පත් වී තිබේ.

වෘත්තීය ගැටලුවක් ඇති වූ විට එය විසඳා ගැනීමට උද්ඝෝෂණ, වැඩ වර්ජන සිදු කිරීම වෘත්තීය සමිතිවල වගකීමකි. එහෙත් ගැටලුවලට විසඳුම් ලබා දී එය විසඳීම පවතින ආණ්ඩුවේ වගකීමකි. 
මෙහිදී ආණ්ඩුව තීන්දු තීරණ ගත යුත්තේ පොදුවේ මහජනතාව ගැන සිතාය. මේ අනුව ගැටලුවක් පැන නැගුණු අවස්ථාවේදී වෘත්තීය සමිති සමග සාකච්ඡා කර ගැටලුවලට විසඳුම් ලබාදීම රටට වග කියන ආණ්ඩුවක ප්‍රධානම වගකීම වේ. 
එහෙත් වර්තමාන ආණ්ඩුව ප්‍රශ්නය දුරදිග යෑමට ඉඩහැර, වෘත්තීය සමිතිවලට මස් රාත්තලම ලබාදීමේ ක්‍රමවේදයක් දියත් කරමින් තිබේ. ආණ්ඩුව මෙම ක්‍රමවේදය නිසා මේ වනවිට රාජ්‍ය සේවයේ වැටුප් හැකිළීමකට ලක්ව තිබෙන අතර, මේ අනුව රටට බලපෑමක් ඇති කරමින් වැඩ වර්ජන සිදුකළ හැකි කණ්ඩායම් තම බලය පෙන්වා වැටුප් වැඩි කරගැනීමේ ක්‍රියාවක නිරත වෙමින් තිබේ.

මේ නිසා සෑම සේවාවක් තුළම වැටුප් විෂමතා ඇති වී තිබෙන අතර, මෙම ගැටලු විසඳාගැනීම සඳහා අනෙකුත් වෘත්තීය සමිතිද වෘත්තිය ක්‍රියාමාර්ග දියත් කරන දිනය වැඩි ඈතක නොවේ. 
මේ සෑම ක්‍රියාවක්ම රටේ ආර්ථිකයට බලපාන අතර, රටේ ආර්ථිකයට මෙම ගැටලු බලපෑම හරහා සිදුවන්නේ ඉදිරි අයවැයේදී ජනතාව මත අධික බදු බරක් පටවා ආණ්ඩුව අත පිසාදමාගැනීමය.   

සරල දිවිපෙවෙතක් ගතකරන ගලමුදුන ගම්වාසීහු

දශක කිහිපයකට පෙර මේ රටේ ඈත දුෂ්කර යැයි හැඳින් වූ ප්‍රදේශයන්හි ගම්බිම් වෙත මේ වන විට මාර්ග ඉදිවී ඇත. විදුලිය ලැබී ඇත. රජයේ බස් එකක් නැතත් අඩුම තරමේ ත්‍රිරෝද රථයකින් හෝ ඔවුහු සිය ප්‍රවාහන සේවා ඉටුකර ගනිති. ගොවිතැන මෙන්ම දෛනික ජනජීවිතයේ වැඩි කොටසක් වෙනුවෙන් ඔවුහු නවීන තාක්ෂණය ඈඳාගෙන හැල්මේ දුවන කාර්යබහුල ජනජීවිතයකට හුරු වී සිටිති.


5

එසේවුවද තවමත් ඉපැරණි ගැමි සුවඳ රැඳී ඇති, පැරණි ගම්බද සිරියාව අදටත් කියාපාන අපූරු හුදකලා ගම් පියසක් නකල්ස් වන මැද පිහිටා ඇතැයි කිවහොත් ඔබ සමහර විට පුදුම වනු ඇති. එහෙත් එය සැබෑවකි. මිනිපේ ප්‍රාදේශීය ලේකම් කොට්ඨාසයට අයත් ගලමුදුන ගම්මානය තවමත් පවතින්නේ එබඳු අයුරිනි. මිනිපේ ප්‍රාදේශීය ලේකම් කොට්ඨාසයට අයත් හුදකලා ගම්මානයක් වන ගලමුදුන ගම්මානයේ මේ වන විට පවුල් 40ක් පමණ පදිංචිව සිටිති.
ප්‍රධාන මාර්ගයේ සිට සැතපුම් හත අටක් මහ වන මැදට වන්නට පිහිටි මෙම ගම්මානයට යාමට ඇත්තේ රූස්ස කැලෑවක් මැදින් වැටුණු අඩි පාරකි. මේ වන විට ගමට මාර්ගයක් ඉදිකිරීමේ කටයුතු ආරම්භ කර තිබුණද, අදටත් මේ ගමේ බහුතරය සිය ගමන්බිමන් ඉටුකර ගන්නේ වනඅලින්, වලසුන් ඇතුළු වනසතුන්ගෙන් ගහන වූ රූස්ස වනපෙත මැදින් වැටුණු අඩි පාර ඔස්සේය.
ගස් ගල් මැදින් වැටුණු අඩි පාරේ ඇතැම් තැනෙක කුඩා හා විශාල ප්‍රමාණයේ දොළ පාරවල්ය. මහ වැසි සමයේදී බෙහෙවින් සක්‍රීය වන මෙම දොළ පාරවල් නිසා ඇතැම් අවස්ථාවල මේ ගමේ මිනිසුන්ට තම ගමටම කොටු වී සිටින්නට සිදුවූ අවස්ථාවන් ගැනද අපට අසන්නට ලැබිණි.

නගරයේ සංකර සමාජයෙන් ඈත්ව පිහිටීම නිසාදෝ මේ ගම්මුන් තුළ ඇති අව්‍යාජ සිනහව ගම තවත් සුන්දර කරවයි. ගමේ බොහෝමයක් නිවෙස් තවමත් කටුමැට්ටෙන් ඉදිකර ඉලුක් මානා හෝ පිදුරු හෙවිල්ලූ නිවාසයන්ය. 
මේ එකුදු නිවෙසකවත් ගෑස් හෝ විදුලි උදුන් භාවිත නොවන අතර, සියලු ඉවුම්පිහුම් කටයුතු සිදුවන්නේ දර ආධාරයෙනි. බොහෝ දෙනෙකු කුප්පි ලාම්පු එළියෙන් තවමත් අඳුර දුරු කරගන්නා අතර, නිවෙස් කිහිපයක පමණක් සූර්ය පැනල භාවිත කරන බව අපට අසන්නට ලැබිණි.

මෙම නිවෙස්වල ඇති මුළුතැන්ගෙයද අපූරු ස්ථානයකි. මෙම මුළුතැන්ගෙයි එක් පසෙක විශාල ප්‍රමාණයේ බඩඉරිඟු අටුවකි. ප්‍රධාන ජීවන මාර්ගය වන හේන් ගොවිතැනින් ලබාගන්නා බඩඉරිඟු, කුරහන් ආදිය අපූරු ක්‍රමයකට ඔවුහු මෙම අටුවල අසුරා තබා ඇති අයුරු අපට දැක ගන්නට ලැබිණි. ඊට යටින් පිහිටි දර ළිපෙන් නිකුත්වන දුම්වලින් නිරතුරුව පදම් වීම නිසා මෙම ධාන්‍ය වර්ගවලට ආවේණික රසයක් ලැබෙන බවද, ඊළඟ කන්නය උදාවන තෙක් ඒවා කල් තබා ගත හැකි බවද මේ ගම්මු පවසති.
  බත් සහ ඉරිඟු තලප මොවුන්ගේ ප්‍රධානතම ආහාරය වන අතර, වී මෝල් හෝ ඇඹරුම් යන්ත්‍ර නැති මේ ගමේ ඒ සියල්ල සිදුවන්නේ වංගෙඩිය, මෝල් ගස හා මිරිස් ගල් ආධාරයෙනි. ගොවිතැන් සඳහා මොවුහු බොහෝ විට ස්වාභාවික ක්‍රම භවිත කරන අතර, කෘෂි රසායන පොහොර ආදිය භාවිත වන්නේ ඉතා සුළු වශයෙනි.

2

ප්ලාස්ටික් ඇතුළු කෘත්‍රිම ද්‍රව්‍ය භාවිතය ඉතා පහළ මට්ටමක පවතින අතර, නිවෙස්වල බොහෝ කටයුතු සඳහා යොදාගන්නේ රූස්ස කැලෑවේ ගහකොළ ආදියෙන් ලබාගන්නා කොළ, පොතු, වැල් ආදියයි.
නිවෙස් සඳහා සිමෙන්ති භාවිතයක් නොමැති අතර, බිත්තිවල මෙන්ම පොළොවේ ආලේප කර ඇත්තේද ගවයන්ගේ ගොම සමග මිශ්‍ර කළ මැටි වර්ගයන් හෝ මකුල්ල ආදී පස් වර්ගයන්ය.
නිවෙස් හා මිදුල් ඇමදීම සඳහා කැලෑවේ වැවෙන විවිධ පඳුරු වර්ග කපා එකට බැඳ මිටියක් සේ සාදාගෙන ඇති අතර, ජලය රැගෙන ඒම ආදී කටයුතු සඳහා පුවක් කොළවලින් තනාගත් ගොට්ට නමැති පැසක් උපයෝගී කර ගනී.
නිවෙස්වල රෙදි වැනීම සඳහා රෙදි වැල් තැනීමට යොදාගෙන ඇත්තේද වනයේ පොෙළාව මත පැතිර ගිය විවිධ වැල් වර්ගයන් හා ඒවා එක්කර ගොතා ගත් තේඩාවන්ය. ගවයන් දිගේලි කරනු ලබන්නේද කලවැල් නම් වූ වැල් වර්ගයක් උපයෝගී කර ගනිමිනි.
නිවසේ පරිහරණය සඳහා පොල් කොළ හා පන් වර්ග යොදා ගනිමින් සැකසූ වට්ටි, පෙට්ටි මෙන්ම පැදුරු හා මාගල් බහුලව භාවිත කරයි. 

මේ ගමේ දරුවන්ට සෙල්ලම් කරන්නට ක්‍රීඩාපිටි හෝ වෙනත් පහසුකම් නැති අතර, ඔවුන්ගේ ක්‍රීඩාපිටිය බවට පත්ව ඇත්තේ අස්වනු කපා අවසන් කළ ගමේ වෙල් යායන්ය.
ඔරලෝසු, රූපවාහිනී යන්ත්‍ර, ගුවන්විදුලි යන්ත්‍ර ආදිය මේ ගමට ආගන්තුකය. ඉර නැගෙන්නට මොහොතකට පෙර දවස ඇරඹෙන බවත්, ඉර මුදුන් වන විට දවසේ අඩක් අවසන් බවත්, ඉර බැස යද්දී රාත්‍රිය උදාවන බවත් හැර මේ මිනිසුන්ට ඉන් එහා දෙයක් සිතා කටයුතු කරන්නට තරම් කාර්යබහුලත්වයක්ද නොමැත.

7

උදෑසන සිට සවස් වනතුරු මහපොෙළාවත් සමග උරෙන්උර ගැටී වැඩකරන මේ ගම්මු ගමේ තැන තැන ඇති සිහිල් දිය පිරි වතුර වළකින් හෝ පිහිල්ලකින් වතුර ටිකක් නාගෙන කුමක් හෝ කාබී වටෙන් ගොඩෙන් අඳුර වැටෙද්දී නින්දට යාම ඔවුන්ගේ දින චර්යාවේ ප්‍රධාන අංගයකි. 

ගමේ කිහිපදෙනෙකු නිවසකට එක්වී ආගිය තොරතුරු කතා කිරීම, එකට එක්වී බුලත්විටක් කෑම ආදිය හැරුණු විට මේ ගම්මුන්ට පැවැරුණු වෙනත් විශේෂ රාජකාරි කිසිවක් නැති අතර, ඔවුන්ට ඇත්තේ ඉතා සීමිත වැඩ කොටසකි. ඒ නිසාම එකිනෙකා අතර රණ්ඩුසරුවල්, කෝන්තර පිරිමහගැනිලි වෙනුවට ඇත්තේ සාමූහිකත්වය, එකිනෙකාට උදව්කර ගැනීම, ගමම එක පවුලක් සේ ජීවත් වීම, අනෙකාගේ දුක සැප සොයා බැලීම ආදී ගුණාංගයන්ය.
රෙදිපිළි, දුරකථන, නවීන විලාසිතා, පාවහන්, ප්‍රවාහන සේවා, රැකීරක්ෂා, නවීන පහසුකම්, අන්තර්ජාල, මුහුණුපොත ආදී බොහෝ දේ ආගන්තුක වූ මේ ගම්මුන්ගෙන් අතිබහුතරය ඉඳහිට හෝ ප්‍රධාන මාර්ගයක් වෙත එන්නේ නම් ඒ ඉතා කලාතුරකිනි. ඒ බොහෝවිට ගමේ වෙද මහතාට සනීප කළ නොහැකි රෝගයක් සුවපත් කරගන්නට හෝ ලුණුමිරිස් ටිකක් රැගෙන යන්නටය.

මේ ගමට යන මාර්ගය දුෂ්කරය. බැලූ බැල්මට ඒකාකාරී දුෂ්කර ජනජීවිතයද නගරයේ අපට නීරසය. එහෙත් ගලමුදුන ගම්වාසීහු ලෝකයාගෙන් හුදකලා වී අදටත් මේ මහ වන මැද ගෙවන්නේ ඉතා චාම් සරල දිවිපෙවතකි.

මීගහකිවුල – එන්.කේ නිශ්ශංක 

6

පොලිතින් සහ ප්ලාස්ටික් අලුත් කතාව

ජනවාරි පළමු වැනිදා තෝරාගත් පොලිතින් නිෂ්පාදන කිහිපයක් සම්බන්ධයෙන් වන තහනම ක්‍රියාත්මක වී මේ වනවිට මාස හයක පමණ කාලයක් ගතව තිබේ. මුල් කාලසීමාව තුළ එහි යම් ප්‍රගතියක් පෙන්නුම් කළද, මේ වනවිට විවිධ ප්‍රදේශවල තහනමට ලක්වූ පොලිතින් නිෂ්පාදන අලෙවි වනු දක්නට ලැබේ. කොළඹ, ගම්පහ, කුරුණෑගල, ගාල්ල සහ මාතර ප්‍රදේශවල %අද^ අප සිදුකළ ගවේෂණයකදීද තවමත් තහනමට ලක්වූ පොලිතින් නිෂ්පාදන හඳුනාගැනීමට හැකි විය. පොලිතින් තහනමේ වත්මන් තත්ත්වය පිළිබඳ වගකිවයුතු පාර්ශ්ව දෙකකින් අප කළ මත විමසුම මෙසේ ඔබ වෙත ගෙන එමු. 


mu

සුළු සිදුවීම් වාර්තා වුණත් පොලිතින් සහ ප්ලාස්ටික් තහනම සාර්ථක ලෙස  ක්‍රියාත්මක වෙනවා – අජිත් වීරසුන්දර මහතා (අධ්‍යක්ෂ – අපද්‍රව්‍ය කළමනාකරණ අංශය, මධ්‍යම පරිසර අධිකාරිය)

දශක දෙකකට ආසන්න කාලයක සිටම ශ්‍රී ලංකාව ඝන අපද්‍රව්‍ය කළමනාකරණය සම්බන්ධයෙන් විශාල අර්බුදකාරී තත්ත්වයකට මුහුණපාමින් සිටිනවා. එවැනි තත්ත්වයක් තුළදී අපට පොලිතින් සහ ප්ලාස්ටික් තහනමක් දක්වා යන්න සිදුවුණේ පොලිතින් සම්බන්ධයෙන් අපේ රටේ විශාල ලෙස අවභාවිතාවන් සිදුවන නිසයි. ajith

පොලිතින් සහ ප්ලාස්ටික් මේ ආකාරයෙන් විශාල වශයෙන් අවිධිමත්ව විවෘත පරිසරයට බැහැර කිරීම මානව සෞඛ්‍යයට සැලකිය යුතු බලපෑමක් එල්ල කරන්න සමත් වුණා. ඩෙංගු රෝගයේ වුණත් ශීඝ්‍ර ව්‍යාප්තියක් පෙන්නුම් කරන්න මේ විවෘත පරිසරයට මුදාහැර ඇති පොලිතින් සහ ප්ලාස්ටික් උපකාරී වුණා. ඒ වගේම ශ්‍රී ලංකාවේ පළාත් පාලන ආයතන තම බලප්‍රදේශවල අපද්‍රව්‍ය නිසි ලෙස කළමනාකරණය කරගැනීමට අසමත් වීම නිසා කුණුකඳු නිර්මාණය වෙලා පසුගිය කාලයේදී අවාසනාවත්ත සිදුවීමකටත් මුහුණ දෙන්න අපට සිදුවුණා.
නමුත් මේ පොලිතින් සහ ප්ලාස්ටික් නියාමනය සම්බන්ධ කටයුතු අපි සූදානම් කර තිබුණේ මීතොටමුල්ලේ ඒ අවාසනාවන්ත සිදුවීමට පෙරයි. ඒ කියන්නේ 2015 වසරේදියි මේ නියාමනයන් ගෙන එන්න කටයුතු සූදානම් කළේ. නමුත් නීති සම්මත කරගනිමින් කැබිනට් අනුමැතිය ලබාගෙන ගැසට් පත්‍රය නිකුත් කරන්න සිදුවුණේ 2017 වසරේ සැප්තැම්බර් මාසයේදියි. එහිදී මානව සෞඛ්‍යයට සහ පරිසරයට වැඩි හානියක් සිදුකළ හැකි තෝරාගත් භාණ්ඩ කිහිපයක්ම තහනමට ලක්වුණා. 

මෙම ගැසට් නිවේදනය යටතේ 2017 වසරේ සැප්තැම්බර් මාසයේ සිට ක්‍රියාත්මක වන පරිදි විශේෂ රෙගුලාසි හයක් පැනවීම සිදුකළා. ඒ අනුව ආහාර දැවටීම සඳහා බහුලව භාවිතයට ගන්න ලන්ච් ෂීට් එක පොලිතින් හෙවත් ඝනත්වයෙන් වැඩි පොලිඑතිලින්වලින් හා ඝනත්වයෙන් අඩු පොලිඑතිලින්වලින් නිෂ්පාදනය කිරීම සහ පොලිපොපිලීන්වලින් නිෂ්පාදනය කිරීම තහනමට ලක්කෙරුණා. ඒ වගේම ආහාර රැගෙන යෑමට භාවිත කරපු එක්ස්ටයිරි ෆෝම්වලින් නිෂ්පාදනය කළ රෙජිෆෝම් පෙට්ටියත් තහනමට ලක්කෙරුණා. ඊට අමතරව වැඩි ඝනත්වයෙන් යුතු සාමාන්‍ය පොලිතින් බෑගයත් තහනම් කළා.

2017 වසරේ සැප්තැම්බර් මාසයේදී ගැසට් නිවේදනය නිකුත් කරමින් තහනම ප්‍රකාශයට පත්වුණත් වෙළෙඳ ප්‍රජාව අපගෙන් විශේෂ ඉල්ලීමක් සිදුකළා පවතින නිෂ්පාදන ඉවත් කරගන්න යම් කාලයක් ලබාදෙන ලෙසට. ඒ අනුව අපි වැටලීම් සිදුනොකර ඔවුන්ට 2018 ජනවාරි පළමුවැනිදා වනතෙක් කාලය ලබාදුන්නා. එතනින් පසුව පසුගිය ජනවාරි පළමුවැනිදා සිට නීතිය බලාත්මක කෙරුණා. ඒ අනුව මුළු දිවයිනම ආවරණය වන පරිදි තහනමට ලක්වූ පොලිතින් වැටලීම සිදුවුණා. 

සැප්තැම්බර් මාසයේ සිට ජනවාරිය දක්වාත්, ඉන් අනතුරුව මුල් මාස කිහිපය දක්වාත් මේ තහනමේ යහපත් ප්‍රගතියක් දකින්නට ලැබුණා. වැටලීම් පවා නොකඩවා සිදුවුණා. නමුත් මේ වෙද්දි නැවතත් තහනමට ලක්වූ භාණ්ඩ අතරින් පතර විවිධාකාරයෙන් වෙළෙඳ පොළ වෙත පැමිණෙමින් තිබෙන බව අපි පිළිගන්නවා. ජෛව හානියට ලක්වන පොලිතින් බෑගයක සහ ආහාර දවටනයක මිල සාමාන්‍ය බෑගයක හා දවටනයකට වඩා දෙගුණයක් සහ තුන් ගුණයක් මිල අධිකයි. ඒ නිසා සමහර නිෂ්පාදකයන් තහනමට ලක්ව තිබෙන අමුද්‍රව්‍ය යොදාගනිමින් අඩු ඝනත්වයෙන් යුත් පොලිතින් නිෂ්පාදන වෙළෙඳ පොළට නිකුත් කරනවා අඩු මිල ගණන්වලට, ජෛව හානියට පත්වන ප්ලාස්ටික් සහ පොලිතින් මුවාවෙන්. වෙළෙඳ මහතුන් ඒ පිළිබඳ දැනුවත්ව හෝ නොදැනුවත්ව අඩු මිල නිසා ඒ නිෂ්පාදන මිලදී ගන්නවා. ඒ පිළිබඳ විශාල වශයෙන් අපට තොරතුරු වාර්තා වෙමින් පවතිනවා.

අපි මේ වෙද්දිත් නිරන්තරයෙන් වැටලීම් සිදුකරනවා. පසුගිය දිනකත් අපි ප්‍රධාන කර්මාන්ත ශාලාවක් වටලන අවස්ථාවේ එහි තහනමට ලක්වූ පොලිතින් නිෂ්පාදනය කරමින් සිටියා. ඊට අපි දැඩි පියවර ගන්න කටයුතු කළා. නිෂ්පාදකයන්ට, අතරමැදි වෙළෙඳුන්ට සහ භාවිත කරන්නන් කියන පාර්ශ්ව තුනටම අපි නීතිය ක්‍රියාත්මක කරනවා. මෙතනදි %භාවිත කරන්නන්^ කියලා අදහස් වෙන්නේ සාමාන්‍ය පාරිභෝගික ජනතාව නෙවෙයි ආයතන, හෝටල්, වෙළෙඳ සැල් වැනි මහා පරිමාණයෙන් භාවිත වන අවස්ථා තමයි මීට අයත් වෙන්නේ. ජනවාරියේ සිට මේ දක්වා අපි ආයතන 2093කටත් වැඩි ප්‍රමාණයක් පරීක්ෂාවට ලක්කරලා තිබෙනවා. බොහෝමයකට නීතිමය පියවර අරගෙනත් තිබෙනවා.

ඇත්තටම මෙවැනි සුළු සිදුවීම් වාර්තා වුණත් මේ පනවන ලද පොලිතින් සහ ප්ලාස්ටික් තහනම සාර්ථක ලෙස ක්‍රියාත්මක වෙමින් පවතිනවා. ගැසට් නිවේදනය යටතේ අපි සැරසිලි කටයුතු සඳහා පොලිතින් භාවිත කිරීමත් තහනමට ලක්කළා. පසුගිය මැතිවරණ සමයේදී එහි සාර්ථකත්වය අපට හොඳින්ම දකින්න ලැබුණා. ඒ වගේම විවෘත පරිසරයේ පොලිතින් සහ ප්ලාස්ටික් දහනය අපි තහනමට ලක්කළා එය මානව සෞඛ්‍යයට දැඩි අහිතකර බලපෑමක් එල්ල කරන නිසා. ඒ පිළිබඳවත් ජනතාව හොඳින් දැනුවත් වෙලා තිබෙනවා.

නීතිය හරිහැටි ක්‍රියාත්මක නොවන නිසා තහනම් පොලිතින් හැමතැනම තියෙනවා – අනුර හේරත් මහතා (ලේකම් – සමස්ත ලංකා පොලිතින් නිෂ්පාදකයන්ගේ සහ ප්‍රතිචක්‍රියකරන්නන්ගේ සංගමය)

පරිසර දිනයේදි ජනාධිපතිතුමා ප්‍රකාශයක් කළා පොලිතින් තහනමේදී කැබිනට් මණ්ඩලය පවා විරුද්ධ වුණා, පොලිතින් නිෂ්පාදකයෝ ඊට විරුද්ධව පෙළපාළි ගියා, නමුත් තමන් ජයග්‍රහණය කළා කියලා. නමුත් අපි එතුමාට මතක් කරන්න කැමැතියි අපි පෙළපාළි හෝ උද්ඝෝෂණ කළේ එතුමාගේ පොලිතින් තහනම් කිරීමේ නියෝගයට විරුද්ධව නොවෙයි. රජය අපි ගැන පොඩ්ඩක්වත් හිතලා බලන්නේ නැතිව එකපාරටම කිව්වා සති 06ක් ඇතුළත කර්මාන්ත ශාලා ටික වහන්න කියලා. ඒ විදිහට එම තීරණයේ නිසි සැලැස්මක් නැති එකට විරුද්ධවයි අපි විරෝධතා දැක්වුවේ. මේ වනතෙක් ජනාධිපතිවරයා අපට සාකච්ඡාවක් සඳහාවත් අවස්ථාවක් ලබාදීලා නැහැ. දිගින් දිගටම අපිව මගහැරියා.anura

පොලිතින් තහනම් කරනවා කියමින් සැප්තැම්බර් පළමු වැනිදා ගැසට් නිවේදන හයක් නිකුත් කළත්, තහනම ක්‍රියාත්මක වෙනවා කිව්වත් තවමත් කිසිම පුද්ගලයෙකුට තහනම් පොලිතින් යටතේ නඩුවක් දාන්න මේ රජය අසමත් වෙලා තිබෙනවා. මේ තහනමේදි වුණේ ලන්ච් ෂීට් එක ජෛව හායනයට ලක්වන අමුද්‍රව්‍ය මගින් නිෂ්පාදනය කිරීමට යොමු කිරීම සහ පොලිතින් බෑග් නිෂ්පාදනය පොලිතින් එකකින් තවත් පොලිතින් එකකට මාරු කිරීම පමණයි. කොහොම වුණත් විශාල වශයෙන් ප්‍රශ්නවලට තුඩු දුන්න ලන්ච් ෂීට් එක ස්වාභාවික ජෛව හායනයට පත්වන ද්‍රව්‍යයවලින් නිෂ්පාදනය කිරීමට යොමු කිරීම මේ රජය ගත්ත හොඳ තීරණයක් කියලා පෙන්වා දෙන්න පුළුවන්. නමුත් මේ රජය මේ නිෂ්පාදන ජනතාව අතර ප්‍රචලිත කරන්න හෝ වැටලීම් නිසි ලෙස සිදු කරන්න තවමත් අසමත් වෙලා තිබෙනවා.
අපට විශාල වියදමක් දරන්න වුණා මේ නිෂ්පාදන සිදුකළ හැකි යන්ත්‍ර සූත්‍ර ගෙන්වන්න. නමුත් ඒ පාඩුව අපේ කර්මාන්තකරුවන් විසින්ම දරාගත්තා. මේ සඳහා රජය දෙන්නම් කියලා පොරොන්දු වුණු බදු සහන කිසිවක් මේ වෙනකම් අපට ලැබිලා නැහැ. ස්වාභාවික ජෛවහායනයට පත්වන ආහාර දවටනය හදන්න භාවිත කරන්නේ ස්වාභාවික බඩඉරිඟු පිටි. එවැනි අමුද්‍රව්‍යයකින් පොලිතින් එකක් හදන්න විශාල දැනුමක් වගේම අධික වියදමක් දරන්න අපට සිදුවෙලා තිබෙනවා. එක බහලුමකට අපට ලක්ෂ 18ක බදු ගෙවන්න සිදුවෙලා තිබෙනවා. ඒ ආකාරයෙන් අධික වියදම් සහ පාඩුවක් දරාගෙන අපේ කර්මාන්තකරුවො මේ නිෂ්පාදන සිදුකළත් වංචනික නිෂ්පාදකයන්ගේ තහනම් නිෂ්පාදන නිසි ලෙස වටලන්නේ හෝ ඊට නීතිය ක්‍රියාත්මක නොවන නිසා අපට විශාල අසාධාරණයක් වෙලා තිබෙනවා. අදටත් හැමතැනකම තියෙනවා තහනම් පොලිතින් නිෂ්පාදන.

අපට දැන් තියෙන ලොකුම ප්‍රශ්නය වෙලා තිබෙන්නේ මේ අමුද්‍රව්‍ය ස්වාභාවික නිසා මේ වෙද්දි ගබඩා කර තිබෙන අමුද්‍රව්‍ය සහ නිෂ්පාදන දිරාපත් වෙමින් යනවා අලෙවි වෙන්නත් පෙරම. අපේ නිෂ්පාදක මහත්මයෙක් මේ ළඟදී අපිව දැනුවත් කළා ටොන් 400ක පමණ අමුද්‍රව්‍ය දැන් කරගන්න දෙයක් නැතිව දිරායනවා, එතුමා විශාල ප්‍රශ්නයකට මැදිවෙලා ඉන්නේ කියලා. මේකට හේතුවෙලා තිබෙන්නේ නිෂ්පාදකයා සැලැස්මක් ඇතිව ක්‍රියා කළත් රජයට සැලැස්මක් නැති නිසා නිෂ්පාදකයන් අසරණ වීම. මේ ප්‍රශ්න ගැන සහ තහනමේ අවිධිමත් තැන් පිළිබඳ කතා කරන්නයි අපි ජනාධිපතිවරයාගෙන් සාකච්ඡාවක් ඉල්ලන්නේ.

 

 

අලි මදිවට වලස්සු

006

ත්‍රිකුණාමලය දිස්ත්‍රික්කයට අයත්  තඹලගමුව හා මොරවැව ප්‍රාදේශීය ලේකම් කොට්ඨාසවල කලක සිට පවතින අලි-මිනිස් ගැටුමට අමතරව මෑතක සිට වලස් හා මිනිස් ගැටුම් ඇතිවීමේ ප්‍රවණතාවක් හටගෙන තිබේ. තඹලගමුව ප්‍රාදේශීය ලේකම් කොට්ඨාසයට අයත් මොල්ලිපොතාන ප්‍රදේශයේදී අලුයම් කාලයේදී ගම්වැදුණු වලසෙකු  එහි වැසියන් තුන්දෙනෙකු සපා කෑ අතර, එම වලසා අල්ලා ගැනීමට වනජීවී නිලධාරීන් උත්සාහ ගැනීමේදී එම වලසාට වෙඩි වැදී මියගොස් තිබුණි. ඊට දින කිහිපයකට පසු යළිත් මොල්ලිපොතානට වැදුණු වලසෙකු  නිවස ඉදිරිපිට දිගේලි කර තිබූ ගවයෙකු සපා කා තිබූ අතර, එම වලසා දුම්රිය  මාර්ගය අසල මියගොස් සිටියදී වන සංරක්ෂණ දෙපාර්තමේන්තුවේ  කන්තලේ අලි පාලන ඒකකයේ අඩවි ආරක්ෂක ඩී.එම්. සිරිවර්ධන මහතා ඇතුළු වනජීවී කණ්ඩායම සොයාගනු ලැබීය.

එම වලසා දුම්රියේ වැදී මියගියාද නැතිනම් පහරදීමකින් මියගියාද සෙවීම සඳහා වලස් මළසිරුර ගිරිතලේ පිහිටි පශු වෛද්‍ය ඒකකයට යවනු ලැබීය.
එසේ තිබියදී මොරවැව ප්‍රාදේශීය ලේකම් කොට්ඨාසයට අයත් නාමල්වත්ත අව්වේනගර් හිදී තවත් වලස් ප්‍රහාරයකින් ගොවියෙකු  තුවාල ලැබීය. ජීවිතයත්, මරණයත් අතර සටන් කර දිවි බේරාගත් අව්වේනගර් පදිංචි ටිකිරි බණ්ඩා (56) ගොවි මහතාගේ එදා දිවි බේරුණේ පූරුවේ පිනකට බව බිහිසුණු  අත්දැකීම  විස්තර කළේය. 

&මම කුඹුරේ ඉන්නකොට කැලෑ ප්‍රදේශයේ ඉඳලා  එකපාරටම මම ඉන්න ඉසව්වට  වලසෙක් කඩා පැන්නා. මම පොල්ලක් අරන් පහර දුන්නා. කැලේට ගිය වලසා  ආයෙත් ටික වේලාවකින් ආවා. මම පොල්ලෙන් පහර දෙනකොට එතනට ආපු ළමයෙක් වලසාට පහර දුන්නා. ඒ පහර දෙනකොට මගේ අත වලසා හැපුවා. ත්‍රිකුණාමලය රෝහලට ඇතුළත් කර දින කිහිපයක ප්‍රතිකාරවලින් පසු නැවත ආවා.
මෙම වලසුන් ගම් වදින්නේ  වනජීවී සංරක්ෂණ දෙපාර්තමේන්තුවට අයත් 1963දී ගැසට් මගින් ප්‍රකාශයට පත්කළ නාවික වැඩබිම අභය භූමිය  තුළ සිටය. මෙම අභය භූමිය තඹලගමුව ප්‍රාදේශීය ලේකම් කොට්ඨාසයටත්, අනෙක් කොටස මොරවැව ප්‍රාදේශීය ලේකම් කොට්ඨාසයටත් සිමා වී පවතී. ටිකිරි බණ්ඩා මහතාට පහර දුන් වලසා ජීවග්‍රහයෙන් අල්ලාගත්  වනජීවී සංරක්ෂණ දෙපාර්තමේන්තුවේ ත්‍රිකුණාමලය අඩවි ආරක්ෂක ප්‍රේමසිරි  විතානගේ මහතා ඇතුළු කණ්ඩායම යළිත් නාවික වැඩබිම අභය භූමියට මුදාහරිනු ලැබ තිබේ. මේ අතර නිලාවේලි කලපුවක්  අසල පහරදීමකට ලක්ව හිසේ තුවාල සහිතව වැටී සිටි තවත් වලසෙකු ප්‍රතිකාර සඳහා ගිරිතලේ  පිහිටි වනජීවී පශු වෛද්‍ය ඒකකයට භාරදී තිබේ.

008
වලස් මිනිස් ගැටමුට මුල්වූ වලසුන් ගම්වැදීම ප්‍රශ්නයක් බව කියන ත්‍රිකුණාමලය, ගෝනතොට පරිසර සංවිධානයේ සභාපති  ආර්.එම් අනුර බණ්ඩාර මහතා, නාවික  වැඩබිම අභය භූමිය තුළ මිනිස් ක්‍රියාකාරකම් මෙයට හේතුවක්යැයි අනුමාන කළේය.
&වලසුන් මෙලෙස දිගින් දිගටම  ගම් වදින්න විදිහක් නැහැ. නාවික වැඩ බිම අභය භූමිය තුළ වලසුන් කොහොමත් ගල් ගුහාවල ඉන්නවා. මේ පරිසර පද්ධතීන්වල වෙනස්කම් නිසා ඒ සතුන්ගේ නිජබිම් අහිමි වෙලාද කියලා ප්‍රශ්නයක් තියෙනවා. කොහොම වුණත් මේ පිළිබඳව නිසි අධ්‍යයනයක් නොකර කිසිවක්  කියන්න බැහැ. මේ තත්ත්වය දිගටම ගියොත් හරි ප්‍රශ්නයක් තමයි වෙන්නේ.

වෘත්තීය ගොවියන් මෙම වලස් ප්‍රහාර නිසා  බියට පත්ව සිටින බව පැවසූ මොල්ලිපොතාන ගල්මැටියාව දකුණු ගොවි සංවිධානයේ  සභාපති ඒ.ඩබ්. විල්සන් මහතා මේ වලසුන් පිට ප්‍රදේශයකින් තම ගම් ආශ්‍රිත අභයභූමියට ගෙනැවිත් දමන්නට ඇතැයිද පැවසීය. 
&ගල්මැටියාව  ගමට ඈතින්  නාවික වැඩබිම අභය භූමිය තිබුණත් අලි මිනිස් ගැටුමක් ඇරෙන්න වලස් ගැටුම් කවදාවත් අපේ ගම්වලට තිබිල නැහැ. කොහෙන් හරි මේ වලස්සු ගෙනත් දමන්න ඇති. මිනිස් කටහඬක් නැති ඝන වනාන්තරවල ජීවත්වන වලසුන් එහෙම ලේසියෙන් ගම් වදින්නේ නැහැ. ඒ සතුන්ගේ නිජ භූමි වෙනස් වූ නිසා ඒ මේ අත ඇවිදිනවා. කුඹුරක, මගතොටේ, නැතිනම්  ගෙදරක ඉන්න වෙලා තියෙන්නේ වලස් බියෙන්. අපේ ගමට අල්ලපු ගමට වලස්සු පැනලා ඒ ගමේ දෙතුන් දෙනෙක්  කාල තිබුණා. අලිත් ඉස්සරට වැඩිය ගම් වදිනවා. ඒ මදිවට මේ වලසුන්ගෙන් එල්ල වන ප්‍රහාරත් නිසා අපි බියෙන් ඉන්නේ

 වලස් මිනිස් ගැටුම තුළ වලසෙකු වෙඩි ප්‍රහාරයකට ගොදුරු වී මිය යෑම  පිළිබඳව පරිසර සංවිධාන ගණනාවක් නැගෙනහිර ආණ්ඩුකාර නීතීඥ රෝහිත බෝගොල්ලාගම මහතාට පැමිණිලි කර තිබුණි. ඒ අනුව ත්‍රිකුණාමලය දිස්ත්‍රික්කයේ ක්‍රියාත්මක පරිසර සංවිධාන කැඳවා සාකච්ඡාවක්ද කළේය. මෙම හමුවෙන් පසු මාධ්‍යයට අදහස් දැක්වූ නැගෙනහිර ආණ්ඩුකාර නීතීඥ රෝහිත බෝගොල්ලාගම මහතා පැවසුවේ වලසුන් ගම් වැදීම පිළිබඳව සෙවීමත්,  වනසතුන් පිළිබඳව සංගණනයක් කිරීමටත් තමන් අදහස් කරන බවයි. 
&මේ සඳහා කොළඹ ක්‍රියාත්මක වන පරිසර හා වන ජීවී සංගම්වලට මම ආරාධනා කරනවා. විශේෂයෙන්ම වලසුන් ගම්වැදීම පිළිබඳ සොයන්න මේ සංවිධානවලට භාර දෙනවා. වලසුන් කියන්නේ ලංකාවේ වනාන්තර වලින් නැතිවී යන සත්ත්ව විශේෂයක් නිසා ඒ සතුන් ආරක්ෂා කරගැනීමේ ක්‍රමවේදයක් ඇති කළ යුතුයි. අපට මෙතන තියෙන බාධාවක් තමයි වනජීවී කියන විෂය මධ්‍යම රජයට අයිති වීම. පළාත් සභා විෂයපථයට වනජීවී විෂය අයිති නැහැ. නමුත් නැගෙනහිර පළාතේ සතුන් ආරක්ෂා කරගන්න ඕන නිසා වනජීවී විෂය අපේ පළාත් සභාවට පවරන්න කියලා මධ්‍යම රජයට, විශේෂයෙන්ම ජනාධිපතිතුමාට යෝජනා කර යවන්න බලාපොරොත්තු වෙනවා.

010


මෙම වලස් උවදුර පිළිබඳව කළ විමසුමකට පිළිතුර දුන්  වනජීවී සංරක්ෂණ දෙපාර්තමේන්තුවේ ත්‍රිකුණාමලය දිස්ත්‍රික් සහකාර අධ්‍යක්ෂ නීතීඥ ඩබ්.ඒ ලලිත් කුමාර මහතා, 


&මේ වලසුන් සිටින්නේ තඹලගමුව හා මොරවැව ප්‍රාදේශීය ලේකම් කොට්ඨාස දෙකකට සීමා වූ %නාවික වැඩබිම අභයභූමිය^ තුළයි. එහි සිටින වලසුන් ගම් වැදීමට තිබෙන ප්‍රශ්න අතර එකක් තමයි අභය භූමිය තුළ තිබෙන නාවික හමුදා ගොවිපොළ. මෙහි ක්‍රියාකාරකම් කිහිපයක් සිදුවෙනවා. එකක් තමයි ජලය පොම්ප කිරීම. දෙවැනි කාරණාව තමයි ගොවිපොළ. මෙවැනි මිනිස් ක්‍රියාකාරකම් නිසා වලසුන් ගම් වදිනවා. සතුන්ගේ නිජභූමි මිනිසුන් ආක්‍රමණය කිරීම නිසා මේ ගැටලුව උද්ගත වෙලා තියෙනවා. තව දෙයක් තමයි මෙහි නාවික වෙඩි පුහුණු පිටියක් තිබීම. මෑත කාලයේ එහි පුහුණුවීම් වුණා කියලා හරියට කියන්න බැහැ. තව දෙයක් තමයි, මේ නාවික ගොවිපොළට යන මාර්ගය තියෙන්නේ අපේ අභයභූමිය මැදින්. ඒ නිසා වනජීව අධ්‍යක්ෂ ජනරාල් ලිඛිතව දන්වලා තියෙනවා මේ අභයභූමිය තුළින් මේ ගොවිපොළ ඉවත් කරගන්න කියලා. මේක සතුන්ට බාධාවක්. පසුගිය දිනෙක අභය භූමිය මැදින් ගමන් කළ වාහනයක වැදුණු වලසෙකු ප්‍රතිකාර සඳහා ගිරිතලේ පශු වෛද්‍ය ඒකකයට රැගෙන ගියාට පසු මිය ගියා. මෙහි ගමන් කරන්නේ නාවික හමුදා වාහන විතරයි. අධික ශබ්දය දූවිලි ආදී මිනිස් ක්‍රියාකාරකම් සතුන්ට බලපානවා. මේ කඳවුර ඉවත් කිරීම සම්බන්ධයෙන් පසුගිය කාලයේ දිස්ත්‍රික් සම්බන්ධීකරණ කමිටු රැස්වීම්වලදීත් කතා කරලා තියෙනවා. අපේ අභයභූමියේ අක්කර 70ක් පුරා විහිදී ඇති ගොවිපොළ සතුන්ට බලපෑම් කරන්නේ නැහැයි කියන්න බැහැ. මොකද අපි නාවික හමුදාවත් සමග සහයෝගයෙන් කටයුතු කරන්න ඕන. පසුගිය කාලයේ අලි මුහුදේ ගසාගෙන  ගිය අවස්ථාවල ඒ සතුන් බේරාගන්න විශාල සහායක් නාවික හමුදාව දුන්නා. අනිත් එක තමයි වලසුන්ගේ වාසභූමි තියෙන්නේ ගල්ගුහා කේන්ද්‍ර කරගෙන. ඒ ආශ්‍රිත පරිසර පද්ධතිවල වෙනස්කම් වලසුන්ට බලපෑම් කරනවා. කෙසේවෙතත් වලසුන් ගම් වැදීම විශේෂ දෙයක් නිසා විධිමත් ක්‍රමවේදයක් තුළ සොයාබැලීම් කර පිළියම් යෙදිය යුතුයි යැයි කීය.

ත්‍රිකුණාමලය – චමෝද්‍යා නේත්‍රාංජලී අමරජීව 

නීතිරීතිවලින් පමණක් සීමා කළ නොහැකි ළමා ශ්‍රම සූරාකෑම

3

මතු බිහිවන දරුවා නීරෝගිමත්, බුද්ධිමත්, රූමත් මෙන්ම ගුණවත් දරුවෙකු වීම සෑම දෙමවුපියෙකුගේම ප්‍රාර්ථනාවක් වුවද සමාජයේ ඇති නැති පරතරය විසින් මෙය ඇතැම් විට ඔවුනට කිසිදිනක සිදුනොවෙනවා සිහිනයක් පමණක් වී තිබේ. දරිද්‍රතාව මුල් වූ පවුලක් හා රටක් තුළ බිහිවන දරුවන්ට නිරායාසයෙන්ම තමන්ගේ අයිතීන් ගිලිහී යයි. ළමා කාලයේ කෙළිදෙ‍ෙළන් ගත කරනවා වෙනුවට ඔවුන්ට සිදුකරන්නට සිදුවනුයේ තම කුස පුරවා ගැනීමට කෙසේ හෝ යමක් කිරීමටය. එයින් ආරම්භ වන්නේ ළමා ශ්‍රමයේ සූරා කෑමයි.  
සමාජයේ නොයෙක් ක්ෂේත්‍රවල ප්‍රබල ලෙස සාකච්ඡාවට භාජන වන ළමුන්ගේ අයිතීන් පිළිබඳව අපි නොයෙක් අවස්ථාවන්හි පුළුල්ව සාකච්ඡා කර ඇත්තෙමු. එමෙන්ම අද වන විට සංවර්ධනය වෙමින් පවතින අනෙක් රටවලට සාපේක්ෂව අපේ රටේ ළමා ශ්‍රමික ප්‍රමාණය අවම මට්ටමක පවතී. නමුත් ලෝකයේ තත්ත්වය දෙස බැලු විට ළමා ශ්‍රමිකයන් වැඩියෙන් සිටිනුයේ සංවර්ධනය මන්දගාමී රටවලය. ඒ නිසා ඒ රටවල වෙසෙන දරු‍වෝ නොයෙක් පීඩාකාරී දරුණු තත්ත්ව යටතේ වුවද තම ශ්‍රමය විකුණා කුසට අහරක් ලබා ගැනීමට වෙහෙසෙති. 
යුනෙස්කෝ සංවිධානය ස්වකීය සමීක්ෂණ වාර්තා මගින් දක්වන ආකාරයට මේ වන විට ලෝකයේ සිටින දරුවන්ගෙන් මිලියන 246ක් ශ්‍රමිකයන් ලෙස සේවයේ යෙදෙන බව දක්වා තිබේ.

1_FtG4Z7H5zyFQrdb6Ns5iHw

කෘෂිකර්මාන්තය, රසායානාගාර ආශ්‍රිත හා අනතුරුදායක යන්ත්‍ර සූත්‍ර ආශ්‍රිත භයානක රැකියාවල මිලියන 170ක් පමණ දරුවන් නියුතු වන බව එක්සත් ජාතීන්ගේ ළමා අරමුදල සිය වාර්තාවක් මගින් ප්‍රකාශ කර තිබේ. අවම වශයෙන් වර්ෂයක් තුළ මිලියනයක පමණ ප්‍රමාණයක් නොයෙක් මිනිස් ජාවාරම්වලට ගොදුරු වන බවට එහි වැඩිදුටත් සඳහන් වෙයි. එමෙන්ම ගණිකා වෘත්තිය සහ බලහත්කාර කාමුක ක්‍රියා සඳහා මිලියන 1.8ක් පමණ දරුවන් ගොදුරු වීම ඉතා ඛේදජනක තත්ත්වයකි. 

ජාත්‍යන්තර කම්කරු සංවිධානයේ (ILO) දත්ත වාර්තා අනුව ලෝකයේ ළමා ශ්‍රමිකයන්ගෙන් අඩකට ආසන්න ප්‍රමාණයක් සිටිනුයේ අප්‍රිකානු කලාපයේය. එය සංඛ්‍යාත්මකව මිලියන 72.1කට ආසන්නය. එමෙන්ම ආසියා හා පැසිෆික් කලාපයේ ළමා ශ්‍රමිකයෝ 62.1ක් වාසය කරති. ඇ‍ෙමරිකාවේ මිලියන 10.7ක්ද, අරාබි රාජ්‍යය් මිලියන 1.2ක්ද, යුරෝපය හා මධ්‍යම ආසියාව තුළ මිලියන 5.5ක්ද තම ශ්‍රමය වගුරති. එමෙන්ම ඔවුන්ගේ දත්ත වාර්තා අනුව පෙන්වා දෙන්නේ වයස අවුරුදු 5-11ත් අතර ළමා ශ්‍රමිකයන් ලෝකය පුරා මිලියන 152ක් සිටින බවයි. එමෙන්ම වයස අවුරුදු 12- 14ත් අතර මිලියන 43ක්, අවුරුදු 15-17ත් අතර මිලියන 37ක් ළමා ශ්‍රමිකයන් සිටින බවට එමගින් වැඩිදුරටත් පෙන්වා දෙයි.

ලෝකය පුරාම ළමා ශ්‍රමය සුරාකෑම සිදුවන අතර, එය එක් එක් රටවල සම්ප්‍රදායන් හා සංස්කෘතීන් අනුව විවිධාකාර ස්වරූප ගනියි. ගිනිකොනදිග ආසියාවේ හා පැසිෆික් කලාපයේ ගණිකා වෘත්තිය, ඇඟලුම් කම්හල් හා ගෘහ සේවිකාවන් ලෙස බොහෝ විට ළමා ශ්‍රමිකයන් සේවයේ නිරතව සිටින බව දැකගත හැකිය. 

අප්‍රිකානු රටවල බොහෝ දෙමවුපියන් තම දරුවන් පශු කර්මාන්තය සඳහා තම දරුවන් ශ්‍රමිකයන් ලෙස යොදා ගැනීම බොහෝ විට දක්නට ලැබෙයි. එම රටවල සිටින ඇතැම් දෙමවුපියන් එළදෙනෙකු ලබා ගැනීම සඳහා ද දරුවෙකු විකුණනු ලබන අවස්ථා ඒ අතරින් වාර්තා වෙයි. මේ අතර එම රටවල ඇතැම් දරුවෝ වතුකරයේ මෙන්ම ගැඹුරු පතල්වල හා ගෘහ සෙවිකාවන් ලෙසද ඔවුන්ගේ ශ්‍රමය වගුරවති. උතුරු ඇමෙරිකාවේ සහ ලතින් ඇමෙරිකාවේ දරුවන් මත්ද්‍රව්‍ය ජාවාරම්කරුවන් විසින් වැඩි වශයෙන් සූරාකනු ලබයි.
ලෝකයේ බොහෝ දරුවන් උදෑසනින්ම අවදි වී එදා වේල සරි කර ගන්නට කර්මාන්ත ශාලාවක, ගොවි‍ෙපාළක එසේත් නොමැතිනම් මෙහෙකරුවන් හෝ ලිංගික ශ්‍රමිකයන් ලෙස වෙහෙස මහන්සි විය යුතුය. එක්සත් ජාතීන්ගේ ස්වකීය ප්‍රකාශනය තුළින් ළමා අයිතිවාසිකම් ආර්ථික සූරාකෑමෙන් ආරක්ෂා කළ යුතු බව අවධාරණයෙන් දක්වා තිබේ. නමුත් නීති සම්පාදනයේ ඇති අඩුපාඩු හා නොපැහැදිලිකම් මත ලක්ෂ සංඛ්‍යාත දරුවෝ අධ්‍යාපනය ලබනවා වෙනුවට ශ්‍රමය වගුරවමින් අනතුරුදායක තත්ත්ව යටතේ නුපුහුණු ශ්‍රමිකයන් ලෙස වහල් සේවයේ නියුතු වෙති. 

child_labour_1_by_gmbakash

සැබැවින්ම දරුවන් කම්කරුවන් ලෙසින් යෙදවීම නීතිය උල්ලංඝනය කිරීමේ ක්‍රියාවකි. කිසියම් හෝ පුද්ගලයෙකු විසින් දරුවන් කම්කරු සේවයේ යෙදවීම සිදුවන්නේ බහුල වශයෙන් දිළිඳු බව නිසාය. විනෝදයෙන් කෙළිදෙ‍ෙළන් ගත කිරීමට තිබෙන්නා වූ සැහැල්ලු අවධියක් ලෙස ළමා කාලය හැඳින්වුවත් මොවුන්ට දිළිඳුකම නිසා දෙමවුපියන්ගේ ආදරය, අනෙක් දරුවන් සමග කෙළිදෙ‍ෙළන් ගත කිරීමට ඇති කාලය, අධ්‍යාපනය ලැබීමේ අවස්ථාව යන සියල්ලම අහිමි වෙයි. දරුවෙකුගේ ළමා කාලය අහිමි කිරීම ළමා මනසට සිදුකරන්නා වූ විශාල අපරාධයකි. ළමා වියේ ඒ සියුමැලි දෑත්වලින් මේ ලෝකය තැනීමට හා ආර්ථිකය ගොඩනැංවීමට ඔවුන්ට කිසිසේත් නොහැකිය.

නීත්‍යනුකූල වයසට පැමිණීමට ප්‍රථම ළමා ශ්‍රමය යොදා ගැනීම

දරුවෙකු ශ්‍රමිකයෙකු වශයෙන් යෙදවීමට අවසර ලබාදී ඇති අවම නීත්‍යනූකූල වයස අවුරුදු 15කි. එය සංවර්ධනය වෙමින් පවතින රටක නම් වසර 14කි. පැය කිහිපයක් පමණක් සීමා වූ සැහැල්ලු වැඩ කිරීමට අවසර ලබා දී ඇති වයස් සීමාව 13 සිට 15 දක්වා වන අතර, එය සංවර්ධනය වෙමින් පවතින රටවල 12 සිට 14 දක්වා වේ. නමුත් අන්තරායකාර වැඩ සඳහා යොදා ගැනීමට නම් ඔහු හෝ ඇය අවුරුදු 18ට ඉක්මවා තිබිය යුතුය. මෙය සංවර්ධනය වෙමින් පවත්නා රටවල අවුරුදු 16කි. නමුත් ඇතැම් අවස්ථාවන්හි තමන්ගේ රටේ පවත්නා නීතියට අනුව මෙහි වෙනස්වීම් දැකගත හැකිය. 

ළමා ශ්‍රමය යොදවන දරුණු ආකාර 

දරුවන් වහල් ශ්‍රමය, වෙළෙඳ ජවාරම්වලට මෙන්ම සන්නද්ධ ගැටුම්කාරී අවස්ථාවන්හිදී හා මත්ද්‍රව්‍ය ජවාරම, ගණිකා වෘත්තිය වැනිදෑ සඳහා බලහත්කාරයෙන් බඳවා ගැනීම නිසා ඔවුන්ගේ ආරක්ෂාව, සෞඛ්‍ය හා සදාචාරය පිළිබඳ ප්‍රබල ගැටලු මේ වනවිට මතුව තිබේ.

අන්තරායකාරී කාර්යය 

 අනතුරුදායක ආයුධ, ද්‍රව්‍ය මෙන්ම ගෘහස්ථ කර්යයන් තුළ දරුවාගේ සෞඛ්‍ය සම්පන්නභාවය විනාශ කිරීම හා දිර්ඝ වේලාවක් එම කාර්ය දරුවාට සිදුකිරීමට නියම කිරීම මෙම කාණ්ඩයට අයත් වේ. එය එක් අතකින් ළමා ශ්‍රමය සුරාකෑමක් ලෙසද හැඳින්විය හැකිය. 

ළමා ශ්‍රමයේ ඇති අහිතකර බලපෑම් 

මේ අයුරින් හිංසාකාරී ලෙස දීර්ඝ කාලයක් තිස්සේ දරුවන්ගේ ශ්‍රමය සූරා කෑමෙන් ඔවුන්ට විශාල බලපෑමක් සිදුවේ. මානසික අවපීඩනය, මත්ද්‍රව්‍යවලට ඇබ්බැහි වීම, මන්දපෝෂණය වැනි ගැටලු ගණනාවක් ඒ ඔස්සේ නිර්මාණය වෙයි. මෙලෙස තම ශ්‍රමය වැය කරන දරුවෙකු බොහෝ අවස්ථාවල කායික, මානසික වශයෙන් හා ලිංගික ප්‍රචණ්ඩත්වයට ගොදුරු වන අවස්ථාද එමටය. 

අංක 182 දරන ජාත්‍යන්තර කම්කරු සංවිධාන සම්මුතියට අනුව ළමා ශ්‍රමයේ වඩාත් අනර්තකාරී ස්වරූප 

ශ්‍රී ලංකාව විසින් පිළිගනු ලැබූ 1999 අංක 182 දරන ළමා ශ්‍රමයේ වඩාත් අනර්ථකාරී ස්වරූප පිළිබඳ ජාත්‍යන්තර කම්කරු සංවිධාන සම්මුතියෙහි 3වැනි ව්‍යවස්ථාවෙහි වඩාත් අනර්තකාරී ස්වරූප වර්ග කර ඇත්තේ මෙලෙසිනි. 
සන්නද්ධ අරගලවලදී යොදා ගැනීම පිණිස දරුවන් බලහත්කාරයෙන් හෝ අනිවාර්ය බඳවා ගැනීම ඇතුළු (සියලු ආකාරයේ) වහල්භාවයන් හෝ දරුවන් විකිණීම හෝ නීති විරෝධී කටයුතුවලට යොදා ගැනීම, ණය හිලවු පිණිස දරුවන් දාසභාවයට ගැනීම සහ බලහත්කාරයෙන්

වැඩ ගැනීම හෝ අනිවාර්ය ශ්‍රමය වැනි වහල්භාවයට සමාන පරිචයන්

ගණිකා වෘත්තිය, අසභ්‍ය නිෂ්පාදන හෝ අසභ්‍ය රංගනය සඳහා දරුවෙකු යොදා ගැනීම, මුදලට ගැනීම හෝ ලබාදීම
තහනම් ක්‍රියාකාරකම් විශේෂයෙන්ම, මත්ද්‍රව්‍ය නිෂ්පාදන හා නීති විරෝධී ලෙස මිලට ගැනීම හෝ විකිණීමට දරුවෙකු යොදා ගැනීම, මුදලට ගැනීම හෝ ලබාදීම.
වැඩෙහි ස්වභාවය හෝ එය සිදු කරගෙන යනු ලබන තත්ත්ව අනුව දරුවන්ගේ සෞඛ්‍යයට, සුරක්ෂිතභාවයට හෝ සදාචාරයට හානිවිය හැකි වැඩ.
ඇතැම් ආර්ථික අංශ මගින් ළමා ශ්‍රමය විශාල වශයෙන් පොළඹවාගෙන යොදා ගනු ලබයි. මේවා අතර, ශ්‍රී ලංකාවේ ධීවර, සංචාරක, කුඩා හා පෞද්ගලික වතු සහ ගෘහස්ථ ශ්‍රමය දක්නට ලැබේ. 2010 වර්ෂයේදී ළමා ශ්‍රමයේ අනර්ථකාරී ස්වරූපයන්හි ලැයිස්තුව මගින් මසුන් ඇල්ලීම හෙවත් ධීවර කටයුතුවලට දරුවන් යෙදවීම දරුවන් අවදානමට ලක් කරනු ලබන ක්‍රියාකාරකම් ලෙස හඳුනාගෙන ඇති බැවින් ඒවා තහනම් කර තිබේ. සංචාරක කර්මාන්තය තුළ විශේෂයෙන්ම තරුණ පිරිමි දරුවන් ලිංගික සූරාකෑමට ලක්වීමද අප රට මුහුණදී ඇති ප්‍රධාන ප්‍රශ්නයකි. 

ශ්‍රී ලංකාවේ ළමා ශ්‍රමය තුරන් කිරීම සඳහා වූ ජාතික ප්‍රතිපත්තියේ සඳහන් වන පරිදි ප්‍රාදේශීය වැවිලි සමාගම් විසින් ළමා ශ්‍රමය ශුන්‍ය කිරීම සඳහා  වූ ප්‍රතිපත්තියක් (Zero tolerance policy) අනුගමනය කර ඇති අතර, එමගින් සේවා නියුක්තියේ අවම වයස අවුරුදු 16 හෝ 18 දක්වා වැඩි කර තිබේ. නමුත් කුඩා හා පෞද්ගලික වතුවල ළමා ශ්‍රමය යොදා ගැනීමට ගැටලුවක්ව පවතී. 

ඉහළ දරිද්‍රතා අනුපාතය, වැඩිහිටි කම්කරුවන් අතර පවතින මත්ද්‍රව්‍යවලට ඇබ්බැහි වීම හා ගෘහස්ථ ප්‍රචණ්ඩත්වය යන කරුණු ළමා ශ්‍රමිකයන් වැඩි වශයෙන් බිහිවීමට බලපා තිබේ. 
මෙම සාධක මත පාසල් හැරයෑමේ අනුපාතිකය ඉහළ නැංවීම, දරුවන් නීතිවිරෝධී කටයුතු සඳහා යොදා ගැනීම, නාගරික ප්‍රදේශවල සිටින දරුවන් ගෘහ මෙහෙකාර සේවයේ යෙදවීම, දෙමවුපියන් රැකියා සඳහා පිටත්ව යෑම හේතුවෙන් සහෝදර සහෝදරින් බලා ගැනීමට දායක වීම ආදිය ප්‍රබල ලෙස දැකගත හැකිය. 

සරණාගත දරුවෝ වැඩි වශයෙන් ලිංගික හිංසනයට හා ක_ර ක්‍රියාවලට ලක් වෙති. අප රටේ සරණාගතයන් නැතත් රොහින්ග්‍යා සරණාගත කඳවුරුවල වෙසෙන බොහෝමයක් ළාබාල ගැහැනු දරුවෝ එසේ ලිංගික හිංසනයට ලක් වෙති. %රොහින්ග්‍යා^ ගැහැනු දරුවන් ඉතා අඩු මිලට ලිංගික කටයුතු සඳහා යොදා ගන්නා බව බී.බී.සී. විදෙස් මාධ්‍ය විසින් පසුගියදා අනාවරණය කෙරිණි.  
මේ ආකාරයට නොයෙක් සමාජ තත්ත්ව නිසා දරුවන්ගේ ළමා කාලය සුන්දරව, විනෝදයෙන් ගත කිරීම ඔවුන්ට අහිමි වෙති. එයින් ඔවුන්ගේ අනාගතය පමණක් නොව මුළු මහත් ලෝකයේම අනාගතය ඉතා බරපතළ අගාධයකට ඇදවැටීමේ ප්‍රවණතාවක් මතුව තිබේ. ලාභදායී සේවය ළමා ශ්‍රමය වුවත් ඔවුන්ගේ අයිතීන් උදුරා ගැනීම සාදාචාරාත්මක ක්‍රියාවක් නොවේ. එම නිසා නීතිය මගින් පමණක් පාලනය කළ නොහැකි මෙය සීමා කිරීම හා අවම කිරිමට කටයුතු කිරීම අපගේ ද යුතුකමකි. 

දූෂණයට, වංචාවට එරෙහි වන බව පෙන්නමින් ජාතික විගණන පනත කුණු කූඩයට දැමීම සාධාරණද?

රාජ්‍ය දේපළ ආරක්ෂා කිරීම, අවභාවිතය වැළැක්වීම, නාස්තිය පිටුදැකීම, වර්තමාන ආණ්ඩුව බලයට පත්වීමට පෙර ජනතාවට ලබාදුන් ප්‍රධානම පොරොන්දුය. බලයට පත්වූ පසු මෙම පොරොන්දුව ඉටුකිරීම සඳහා ජාතික විගණන පනත සම්මත කර විගණකාධිපති දෙපාර්තමේන්තුව ශක්තිමත් කරන බවටත් ජනතාව හමුවේ පොරොන්දු ලබා දුන්නේය.


Auditor-Generals-Dept

දේශීය හා විදේශීය විද්වතුන්ගේ මැදිහත්වීම මත ජාතික විගණන කෙටුම්පත 2003 වසරේදී සකස් කර තිබේ. මෙම පනත නීත්‍යනුකූල පනතක් බවට පත්වීමට නම් ඒ සඳහා කැබිනට් මණ්ඩල අනුමැතිය සේම, පාර්ලිමේන්තු අනුමැතියද හිමිවිය යුතුය. එහෙත් 2003 වසරේ සිට අද දක්වා බලය හෙබවූ ආණ්ඩු මෙන්ම වර්තමාන ආණ්ඩුවද මෙම පනත පාර්ලිමේන්තුවට ඉදිරිපත් කර සම්මත කිරීමට නොහැකිවී තිබේ.

අවුරුදු 10කට ආසන්න කාලයක් රට පාලනය කළ රාජපක්ෂ ආණ්ඩුවට මෙම පනත සම්මත කිරීමට නොහැකිවිය. මේ නිසා 2003 වසරේ සකස් කළ ජාතික විගණන පනත සම්මත කර රට තුළ ක්‍රියාත්මක කරන බවට වර්තමාන ආණ්ඩුව බලයට පත්වීමට පෙර ජනතාවට පොරොන්දු ලබාදුන්නද තවමත් එම පොරොන්දු ජනතාව මුලාකරන ඡන්ද පොරොන්දුවක් බවට පත්වෙමින් තිබේ. මෙම කෙටුම්පත සම්බන්ධයෙන් ලොකුම බොරුව කළ ආණ්ඩුව ලෙසත් වර්තමාන ආණ්ඩුව පත්වී තිබේ.
එනම් වර්තමාන ආණ්ඩුව බලයට පත්වූ පසු ක්‍රියාත්මක කිරීමට එළිදැක්වූ දින 100 වැඩසටහනට අනුව 2015 පෙබරවාරි 19 වැනි දින විගණන කෙටුම්පත පාර්ලිමේන්තුවට ඉදිරිපත් කර එම වසරේ මාර්තු 19 සම්මත කරදෙන බවට පොරොන්දු ලබාදී තිබුණද එම පොරොන්දුව ඉටු නොවූ අතර, 2015 වසරේ අප්‍රේල් 20 වැනිදා වර්තමාන අගමැතිවරයා විසින් විගණන කෙටුම්පත මුල්වරට කැබිනට් මණ්ඩලයට ඉදිරිපත් කෙරිණ.

අප්‍රේල් 20 වැනිදා ඉදිරිපත් කළ කැබිනට් පත්‍රිකාවට අනුමැතිය හිමිවී තිබූ අතර කෙටුම්පත ගැසට් කරන ලෙසට අග්‍රාමාත්‍ය ලේකම්වරයාට උපදෙස් ලබාදී තිබෙන බවට එකල වාර්තා විය. එහෙත් මේ වසරේ මාර්තු 16 වනතෙක් අදාළ කෙටුම්පත ගැසට් කිරීමට බලධාරීන්ට නොහැකිවිය. 

කෙටුම්පත මුල්වරට කැබිනට් මණ්ඩලයට ඉදිරිපත් කළ 2015 වසරේ අප්‍රේල් 20 වැනිදා සිට මේ වසරේ මාර්තු 16 වැනිදා දක්වා කාලය තුළදී වගන්ති 57කින් යුත් ජාතික විගණන පනත 24 වතාවක් සංශෝධනයට ලක්කර තිබේ.
24 වතාවක් සංශෝධනය කිරීමෙන් පසු වගන්ති 57කින් යුත් ජාතික විගණන පනතේ වගන්ති දෙකක් ඉවත් කිරීමටත් කැබිනට් මණ්ඩලය කටයුතු කර තිබේ. මෙම සංශෝධන සිදුකිරීමේදී රටට වැදගත් රටේ මුදල් ආරක්ෂා කිරීම තිබූ ප්‍රධාන වගන්තියක තටු කපා දැමීමටත් කටයුතු කර තිබේ.

එනම් 2003 වසරේ සකස් කළ ජාතික විගණන කෙටුම්පතට අනුව යම් රාජ්‍ය ආයතනයක මූල්‍ය වංචාවක් සිදුවුවහොත් එම මුදල් රජයට නැවත අයකර දීම සඳහා අධිභාර පැනවීමට විගණකාධිපතිවරයාට බලය පැවරෙන වගන්තියක් ඇතුළත් කර තිබුණි. මෙම වගන්තිය තවත් ශක්තිමත් කර රාජ්‍ය මුදල් සුරක්ෂිත කිරීම ඉවත දමා වර්තමාන ආණ්ඩුව විසින් අධිභාර පැනවීම විගණන සේවා කොමිසමට හා අමාත්‍යාංශ ලේකම්වරුන්ට පවරා තිබේ.

එහෙත් මීට පෙර තිබූ වගන්තියට අනුව රාජ්‍ය සේවයේ ස්වාධීන පුද්ගලයෙකු වන විගණකාධිපතිට අදාළ පරීක්ෂණ සිදුකර අධිභාර පැනවීමේ බලය හිමිවූ අතර, ඒ පිළිබඳව අභියාචනා විගණන සේවා කොමිසමට සිදුකිරීමට අවශ්‍ය නීති සකස් කර තිබුණි. ජාතික විගණන පනත සකස්කිරීමට පෙර අධිභාර පැනවීමේ බලය අමාත්‍යාංශ ලේකම්වරුන් සතුවූ අතර, රාජ්‍ය අමාත්‍යාංශවල මුදල් වියදම් කිරීමේ නිලධාරියාත් බොහෝ විට අමාත්‍යාංශ ලේකම්ය. 

මේ අනුව මුදල් භාවිත කිරීමේදී X නමැති අමාත්‍යාංශ ලේකම් අතින් වරදක් සිදුවුවහොත් ඒ පිළිබඳව පරීක්ෂා කර අධිභාර පැනවීම නොහොත් අලාභය අය කරගැනීමේ කටයුත්තත් X නමැත්තාට පැවරීම හොරාගේ අම්මාගෙන් පේන අහනවා නොව, හොරාගෙන්ම පේන ඇසීමක්^ වැන්නය. පොදුවේ සමස්ත අමාත්‍යාංශ ලේකම්වරුන් %හොරුන්^ යැයි අප කිසි විටෙකත් පවසන්නේ නැත. එහෙත් පසුගිය ආණ්ඩු සමයේදී හිටපු ජනාධිපති ලේකම්වරයාගේ සිට අමාත්‍යාංශ ලේකම්වරුන් කිහිප දෙනෙකුටම මූල්‍ය චෝදනා එල්ල විය.
විගණන සේවා කොමිසම ගැන කතා කරන විට, වර්තමාන ආණ්ඩුව ජනතාවට ලබාදුන් පොරොන්දුවකට අනුව ස්වාධීන කොමිෂන් සභා පිහිටුවීම යටතේ පිහිටුවූ ආයතනයකි. මේ අනුව 2015 වසරේ දෙසැම්බර් 11 වැනිදා සිට විගණන සේවා කොමිසම ක්‍රියාත්මක වේ. විගණන සේවා කොමිසම බලාත්මක ආයතනයක් බවට පත්කිරීමට නම් ජාතික විගණන පනත රට තුළ ක්‍රියාත්මක විය යුතුය.

එහෙත් අද දක්වා ජාතික විගණන පනත සම්මත කරගැනීමට නොහැකිවී තිබෙන අතර, මේ අනුව විගණන සේවා කොමිසම ආරම්භ වූ දා සිටම කිසිදු වැඩක් නොකරන ආයතනයක් බවට පත්වී ඇත. විගණන සේවා කොමිසම සක්‍රීය ආයතනයක් නොවුනද කොමිසම පවත්වාගෙන යන ගොඩනැගිල්ලට ආණ්ඩුව මාසිකව රුපියල් 562,000ක මුදලක් ගෙවන අතර, සේවක වැටුප් හා දීමනා ලබාදීම සඳහා මාසිකව රුපියල් 821,000ක් වැයකිරීමට සිදුව තිබේ. 

කොමිසමේ සාමාජිකයන්ට දීමනා ගෙවීමට මාසිකව රුපියල් 482,000ක් වැයවන අතර,  වාහනවලට ඉන්ධන සඳහා රුපියල් 7000ක්, විදුලිය සඳහා රුපියල් 27,000ක් දුරකථන සඳහා රුපියල් 17,000ක් ආරක්ෂක සේවා සඳහා රුපියල් 64,000ක් පිරිසුදු කිරීමේ කටයුතු සඳහා රුපියල් 93,000ක් මාසිකව රජය විසින් දැරිය යුතු වේ. මේ අනුව කොමිසම නඩත්තු කිරීම සහා මාසිකව රුපියල් 2,073,000ක් වැයකරනු ලබයි.

2015 වසරේ දෙසැම්බර් මාසයේ සිට මේ දක්වාම මෙම මුදල වියදම් වුවද අයථා මුදල් ගනුදෙනු සම්බන්ධයෙන් විගණනය කිරීමට කිසිදු අධිකාරි බලයක් නොමැත. යම් ලෙසකින් මෙම ආයතනයේ කටයුතු විගණකාධිපතිවරයා විසින් පරීක්ෂා කිරීමකට ලක් කළහොත් ඔහුගේ නිර්දේශවල ලිවීමට සිදුවන්නේ විගණන සේවා කොමිසම රාජ්‍ය මුදල් විනාශ කර දමන ආයතනයක් ලෙසටය. එහෙත් මේ සඳහා වගකිව යුත්තේ කවුරුන්ද යන්න විගණකාධිපතිවරයාට සටහන් දැමීමටද නොහැකිවනු ඇත.
මන්දයත් විගණන කොමිසම නිෂ්ක්‍රීය ආයතනක් බවට පත්ව තිබීමේ හා මුදල් විනාශ කරන ආයතනයක් බවට පත්කිරීමේ කණ්ඩායම් තුළ ජනාධිපතිවරයාත්, අගමැතිවරයාත් හා කැබිනට් මණ්ඩලයත් සිටින බැවිනි. රටේ දේශපාලඥයන්ගේ වරදින් මෙවන් තත්ත්වයක් උදාවී තිබුණත් විගණකාධිපති දෙපාර්තමේන්තුවේ දැක්ම වී ඇත්තේ රාජ්‍ය ගණන්දීමේ වගකීම සහ යහපාලනය පෙරදැරි කරගත් රාජ්‍ය අංශයේ මග පෙන්වන්නා වීමය. 

ආයතනයේ මෙහෙවරවී තිබෙන්නේ තිරසාර සංවර්ධනයක් උදෙසා මනා මූල්‍ය කළමනාකරණය සහ රාජ්‍ය සම්පත් ප්‍රශස්ත ලෙස උපයෝජනය කිරීම තහවුරු කරනු වස් විගණනය මෙහෙයවීම මගින් යහපාලනය සහ රාජ්‍ය ගණන්දීමේ වගකීම ප්‍රවර්ධනය කිරීමය. එහෙත් දේශපාලඥයන් සිදුකරන වගකීම් විරහිත ක්‍රියා නිසා රාජ්‍ය මුදල් අවභාවිත වූ ආයතනයක් ලෙසටත් නුදුරු දිනයකදී විගණන කොමිෂම නම් වුවහොත් ඒ ගැන කනගාටුවට පත්විය යුතුද නැත.
මන්දයත් හොරකම, දූෂණය, වංචාව පිටුදකින බවට බොහෝ දේශපාලඥයන් පම්පෝරි ගැසුවත් බොහෝ දේශපාලඥයන්ගේ කැමැත්තවී තිබෙනුයේ, ජාතික විගණන පනත කඩාකප්පල් කර දැමීමටය. ජාතික විගණන පනත සම්මත වී විගණන සේවා කොමිසම සක්‍රිය වුවහොත් මෙරටේ වංචා, දූෂණ සිදුකරන දේශපාලඥයන්ට, දූෂණ, වංචා ක්‍රියාවල නිරත වීමට හැකියාව නොලැබේ. මීට අමතරව වංචා, දූෂණ සිදුකරන රාජ්‍ය නිලධාරීන්ට වංචා, දූෂණ මගින් මහජන මුදල් අවභාවිත කිරීමටත් අවස්ථාවක් නැත. එනිසා ජාවාරම්කාර දේශපාලඥයන් කිහිපදෙනෙකු හා රාජ්‍ය නිලධාරීන් කණ්ඩායමක් මෙම පනත සම්මත වීම වැළැක්වීම සඳහා විශාල උත්සාහයක් නිරත වන බව නොරහසකි.

එසේ නොමැති වුවානම් අඩුම තරමින් මේ වසරේ මාර්තු මාසයේදී ගැසට් කර පාර්ලිමේන්තුවට ඉදිරිපත් කිරීමෙන් පසු අප්‍රේල් 03 වැනිදා පාර්ලිමේන්තු න්‍යාය පුස්තකයටද ඇතුළත් කළ කෙටුම්පත අද වනවිට පාර්ලිමේන්තුවේ සම්මත වී හමාරය.
පාර්ලිමේන්තුව තුළ මේ පිළිබඳව විවාදයක් ඇති කර සම්මත කිරීමට නොහැකි වීමට ප්‍රධාන හේතුව වී තිබෙන්නේ ගැසට් කර පාර්ලිමේන්තුවේ න්‍යාය පුස්තකයට ඇතුළත් කළ තිබෙන ජාතික විගණන පනතට තවත් සංශෝධන දෙකක් ගෙන ඒමට සැලසුම් කර තිබීමය.
අමාත්‍ය මණ්ඩල පත්‍රිකා දෙකක් හරහා මෙම සංශෝධන සිදුකිරීමට සැලසුම් කර තිබෙන අතර, මීට අදාළ මූලික කටයුතු මේ වනවිට සිදුකර තිබෙන බවද වාර්තාවේ. 

මෑතකාලීනව කැබිනට් මණ්ඩල පත්‍රිකා සම්මත කිරීමේ ක්‍රමවේදය තුළ එකම කැබිනට් පත්‍රිකාවට අවස්ථා දෙකකදී කැබිනට් අනුමැතිය හිමි වී නැත. එහෙත් ජාතික විගණන පනතට 2015 අප්‍රේල් 20 වැනිදාත් 2018 වසරේ මාර්තු 06 වැනි දිනත් කැබිනට් අනුමැතිය හිමිවී ඇත. මීට අමතරව රටේ ආණ්ඩුක්‍රම ව්‍යවස්ථා මේ වනවිට සංශෝධනයවී තිබෙන්නේ 19 වතාවක් පමණි. එහෙත් ජාතික විගණන පනත මේ වනවිට 24 වතාවක් සංශෝධනය වී තිබෙන අතර, ඉදිරියේදී සිදුකිරීමට නියමිත සංශෝධන දෙකත් සමග ජාතික විගණන පනත 26 වතාවක් සංශෝධනය වූ පනතක් ලෙස ඉතිහාසයගත වනු ඇත.

ජාතික විගණන පනතට මේ වසරේ මාර්තු 06 වැනිදා කැබිනට් අනුමැතිය ලැබීමෙන් පසු මහජන විරෝධතා ලබාගැනීමට සති දෙකක කාලයක් වෙන්කර තිබුණද එම සතිදෙක තුළ හෝ අද වනතෙක් පනතට එරෙහිව ජනතා විරෝධයක් එල්ලවී නොමැත. පනතට විරෝධය එල්ලවී තිබෙන්නේ වංචාව, දූෂණය, පිටුදැකීමට පොරොන්දුවූ දේශපාඥයන්ගෙනි.

ලංකාවේ මානව හිමිකම් කොමිසම ජාත්‍යන්තර වශයෙන් පිළිගැනීමකට ලක්වූ අතර තොරතුරු දැනගැනීමේ ලෝකයේ තුන්වැනියට හොඳම පනත ලෙසට ලංකාවේ  තොරතුරු දැනගැනීමේ පනත නම්වී ඇත.
මීට අමතරව උසස් විගණනයන් පිළිබඳ ජාත්‍යන්තර ආයතනය විසින් ලෝකයාට විගණන මූලධර්ම  10ක් හඳුන්වාදී තිබෙන අතර, ලෝකයේ රටවල් 192ක් සකස් කර ඇති විගණන කෙටුම්පත් සලකා බැලීමේදී කරුණු 10 සම්පූර්ණ කරන එකම පනත ලෙසට ශ්‍රී ලංකාවේ ජාතික විගණන පනත හඳුන්වාදී තිබේ.

මේ පිළිබඳව ලෝක බැංකුව විසින් මෙරටට ලිපියක් මගින් දන්වා තිබෙන අතර, එම පිළිගැනීමවත් නොසලකා හැර තවමත් දේශපාලඥයන් කිහිපදෙනෙකු උත්සාහ කරමින් සිටින්නේ විගණන පනත කුණු කූඩයට දැමීමටය.
වංචාව, දූෂණය දුරලීමට කටයුතු නොකිරීම නිසා රාජ්‍ය මුදල්, රාජ්‍ය සම්පත් අවභාවිතය දිනෙන් දිනම ඉහළ යමින් තිබෙන අතර, මේ නිසා රට ආර්ථික වශයෙන්ද අර්බුදයකට යමි‘න් තිබේ.මෙම අර්බුදයෙනන් ගොඩ එම සඳහා පාලකයන් විදේශ ණය දේශීය ණය අතිවිශාල ලෙස ලබාගනිමින් තිබේ. 

2005 වසර ගතහොත් ලංකාවේ සමස්ත ණය ප්‍රමාණය රුපියල් බිලියන දෙදහස් දෙසිය හතළිස් දෙකකි. මේ අනුව ඒකපුද්ගල ණය ප්‍රමාණය රුපියල් එක් ලක්ෂ අටදහසකට ආසන්නය. 2017 වසර වනවිට ණය ප්‍රමාණය රුපියල් බිලියන දස දහසකට ආසන්නය. 
මේ අනුව ඒකපුද්ගල ණය ප්‍රමාණය ලක්ෂ 05 ඉක්මවා ඇත. රටේ වංචාවේ දූෂණයේ තරම කොතරම්ද යන්න 2012 වසරේදී පමණක් රුපියල් බිලියන දෙදහස් හයසිය විසි දෙකක් ණය වශයෙන් ලබාගෙන තිබෙන අතර, එම වසරේදී ණය සහ පොලී වාරික ලෙස රුපියල් බිලියන 2,637ක මුදලක් ගෙවූවද එම වාරික ගෙවීම සඳහා රුපියල් බිලියන 15ක යළිත් වතාවක් ණයවී තිබේ. 

2017 වසරේදී දේශීය හා විදේශීය ණය ලෙස රුපියල් බිලියන තුන් දහස් එකසිය පනහක මුදලක් ලබාගෙන තිබෙන අතර, ණය වාරිකය හා පොලී මුදල් ලෙස රුපියල් බිලියන තුන්දහස් දෙසිය අනූහතරක් ගෙවා තිබෙන බවට වාර්තා වේ. මේ අනුව තවත් රුපියල් බිලියන 144ක හිඟයක් ඇතිවී ඇත. මෙහි සියලුම පව් මේ රටේ ජනතාවට ගෙවීමට සිදුව තිබෙන අතර, රට ගන්නා ණයවලින් ඊට පෙර ලබාගත් ණයවල වාරිකය හා පොලී වාරිකයවත් ගෙවීමට නොහැකි වීම ජාතියේ අවාසනාවකි.

මෙම තත්ත්වයෙන් ගොඩ ඒමට තිබෙනා ප්‍රධානම ක්‍රියාමාර්ගය නම් රට තුළ සිදුවන වංචා, දූෂණ නවතා දැමීමය. වංචාවෙන්, දූෂණයෙන් තොර රටක් ඇති කිරීමට නම් ජාතියේ මුරබල්ලා ලෙස හඳුන්වන විගණකාධිපති දෙපාර්තමේන්තුව ශක්තිමත් කළ යුතු වුවත්, අද දවස වනවිට මෙරටේ ජාවාරම්කාර දේශපාලඥයන් එක්ව ජාතියේ මුරබල්ලාගේ දත් එකින් එක ගලවමින් තිබේ. ජාතියේ මුරබල්ලාගේ දත් ගලවා දමන වාරයක් පාසා සිදුවෙමින් තිබෙන්නේ ශ්‍රී ලංකාව තවත් සෝමාලියානු රාජ්‍යක් බවට ක්‍රමක් ක්‍රමයෙන් ගමන් කිරීමය.
මේ නිසා වගකිවයුතු දේශපාලඥයන් සැබෑ ලෙසම වංචාව, දූෂණයට විරුද්ධතම අමාත්‍යාංශ 51ක් දෙපාර්තමේන්තු 95ක්, දිස්ත්‍රික් ලේකම් කාර්යාල 25ක් සංස්ථා 211ක්, රාජ්‍ය සමාගම් 128ක්, විශ්වවිද්‍යාල උසස් අධ්‍යාපන ආයතන පුහුණු කිරීම පර්යේෂණ ආයතන 75ක්, රාජ්‍ය බැංකු 08ක්, ව්‍යවස්ථාපිත අරමුදල් 69ක් විදේශ අරමුදල් ව්‍යාපෘති 127ක් (වෙනස් විය හැකිය) පළාත් සභා 09ක්, පළාත් පාලන ආයතන 341ක්, ගොවිජන සේවා මධ්‍යස්ථාන 559ක්, ක්‍රීඩා සංගම් 59ක් විගණනය කරන විගණකාධිපති දෙපාර්තමේන්තුව ශක්තිමත් කිරීමට කටයුතු කළ යුතුය.

බ්‍රිතාන්‍යයන් විසින් රාජ්‍ය මුදල් පාලනය පිළිබඳව සොයා බැලීමට 1779 වසරේදී විගණකාධිපතිවරයෙක් හා ගණකාධිකාරවරයෙකු පත්කිරීමෙන් ආරම්භ වූ විගණකාධිපති සේවයට මේ වනවිට වසර 217ක් ගතවී තිබේ. 
රටට ජාතික විගණන පනතක් අවශ්‍ය නොවන තැනට කටයුතු කරන්නේ වංචාව, දූෂණය සිදුකරන පුද්ගලයන්ය. එහෙත් රටට ආදරය කරන මිනිසුන් ජාතික විගණන පනත සම්මත කරගැනීම වෙනුවෙන් පෙනී සිට තිබේ. පනත 2003 වසරේදී සකස් කර තිබෙන්නෙත් මේ රටට ආදරය කරන පිරිසක් විසිනි. 

වර්තමාන පාලකයන්ට කිරීමට තිබෙන්නේ 2003 වසරේදී සකස් කළ පනතට නීත්‍යනුකූලභාවය ලබාදී යහපාලන ආණ්ඩුව විසින්ම ස්ථාපිත කළ විගණන සේවා කොමිසම ශක්තිමත් කිරීම පමණි. රට තුළ යහපාලනය ඇති කරන බවට පොරොන්දු ලබාදෙමින් වර්තමාන බලයට පත්වූ ආණ්ඩුව වැඩි වශයෙන්ම සිදුකර තිබෙනුයේ, රට අරාජිකත්වයට පත්කරන ක්‍රියාවන්ය. 
මේ නිසා පොදු අපේක්ෂකයා ලෙස රටට ලබාදුන් පොරොන්දුව ඉටුකිරීමට ජනාධිපතිවරයා පෙරමුණ ගත යුතුය. එසේ නොමැති වුවහොත් ජාතික විගණන පනත විනාශකර දමා විගණන සේවා කොමිසම සුදු අලියෙකු බවට පත්කළ පිරිස අතරට ජනාධිපතිවරයා එක්වීම වළක්වා ගත නොහැකිය. මේ නිසා ජනාධිපතිවරයාට කඩිනමින් සිදුකිරීමට තිබෙන්නේ, පවතින බලය භාවිත කර විගණන පනත පාර්ලිමේන්තුවට ඉදිරිපත් කර සම්මත කිරීමට අවශ්‍ය කටයුතු කිරීම හා විගණකාධිපතිවරයාට ස්වාධීනව කටයුතු කිරීමේ පරිසරය සකස් කර දීමය.

කැන්ගරු දේශයේ සුන්දරම නගරය සිඩ්නි

සුන්දර ඔස්ට්‍රේලියාවේ සංචාරයක් කිරීමට ඔබට අවස්ථාවක් ලැබුණොත් සිඩ්නි නගරයේ ඇති සුන්දරත්වය විඳ ගැනීමට අමතක නොකරන්න. සංචාරකයන් සඳහාම වෙන් වූ සුන්දර ස්ථාන බොහෝමයක් සිඩ්නි නගරයේ පිහිටා තිබේ. සිඩ්නි නිල් කඳු පෙළ, සිඩ්නි ඔපෙරා කලාගාරය, සිඩ්නි පාලම සංචාරකයන් වැඩි වශයෙන්ම පැමිණෙන ස්ථාන අතරින් ප්‍රධාන තැනක් ගනී. මේ එම ස්ථාන ත්‍රිත්වය පිළිබඳ තැබෙන සටහනකි.


IMG20171214162007

බ්ලූ මවුන්ටන් කඳු පන්තිය (Blue Mountain)

සිඩ්නි නගරයේ සිට පැය දෙකක පමණ ගමනකින් අනතුරුව නිල් කඳු පෙළ පිහිටි නිව් සවුත් වෙල්ස්හි Katoomba නගරයට පිවිසිය හැකිය. බොහෝ විට සංචාරකයන් මෙම ගමනට පිටත් වනුයේ දුම්රියෙනි. %Blue Mountain^ යන්නෙන් මෙයට නම ලැබී ඇත්තේ එහි ඇති ස්වාභාවික නීල වර්ණයට හුරු පරිසරය හේතුවෙන් විය හැකිය. මධ්‍යහ්න කාලය වන විට හිරු එළිය මෙම කඳු පෙළට වැටුණු පසු එම පරිසරයේ ඇති සුන්දරත්වය දෙගුණ, තෙගුණ වේ.
හෝක්ස්බරි, ලිතගොව් සහ ඌර්බන් නගර යා කෙරෙන මෙම භූමිය 1959 දී හෙක්ටයාර 6,300ක් වටා විහිදී තිබිණි. දියඇලි, නිම්න, ස්වාභාවික උද්‍යාන ආදියෙන් මෙම වනාන්තරය සමන්විතය. වික්ටෝරියා ඇල්ල, Katoomba ඇල්ල, ලීරා ඇල්ල ඇතුළු දිය දහරා රැසක් Blue Mountain භූමිය හරහා ගමන් කරයි.

VI3A2047
මෙය විශාල වශයෙන් ප්‍රසිද්ධ වී ඇත්තේ මෙහි ස්වාභාවිකව පිහිටා ඇති අසාමාන්‍ය පාෂාණයකින් සෑදුණු කඳු ත්‍රිත්වයක් හේතුවෙනි. මෙම අසාමාන්‍ය කඳු ත්‍රිත්වයට නම් ලබාදී ඇත්තේ සංචාරකයන් විසිනි. මිනී, විම්ලා සහ ගුනේනෝ යන නමින් මෙම කඳු ත්‍රිත්වය හඳුන්වනු ලබන අතර, මීනි කඳුවැටිය මීටර් 922ක්, විම්ලා මීටර් 918ක් සහ ගුනේනෝ මීටර් 908ක් විශාලය. 
පරිසර සංරක්‍ෂකයෙකු වන Myles Dunphy විසින් 1932 දී වනෝද්‍යානයක් ලෙස මෙම භූමිය පවත්වාගෙන යෑමට යෝජනා කර ඇති අතර, 2000 වර්ෂයේදී මෙය ලෝක උරුම භූමියක් ලෙස යුනෙස්කෝ සංවිධානය විසින් නම් කරන ලදී.  

සිඩ්නි වරාය පාලම (Sydney Harbour Bridge)

සිඩ්නි පාලම සිඩ්නි නගරයේ සුන්දරත්වය කියාපාන තවත් එක් ස්ථානයකි. සිඩ්නි නගරයේ සලකුණක් ලෙස සංචාරකයන් %Sydney Bridge^ හඳුන්වයි. Sydney Bridgeහි අලංකාරය වඩාත් දැකගත හැකි වනුයේ රාත්‍රී කාලයේදීය. 
1914 දී නිව් සවුත් වේල්ස්හි පොදු සේවා දෙපාර්තමේන්තුවේ සිවිල් ඉංජිනේරුවෙකු වන ජෝන් බ්‍රැඩ්ෆීල්ඩ් සිඩ්නි වරාය හරහා පාලමක් ඉදිකිරීම සඳහා ඔස්ට්‍රේලියානු පාර්ලිමේන්තුවට සැලසුම් ඉදිරිපත් කර ඇත. ඉන් අනතුරුව මේ සඳහා අනුමැතිය හිමි වූ නමුත්, පළමු ලෝක සංග්‍රාමය හේතුවෙන් එහි වැඩකටයුතු මඳක් ප්‍රමාද වී ඇත. 1922 වසර වන විට සිඩ්නි වරාය පාලම වෙනුවෙන් මුදල් ප්‍රතිපාදන ලබාගත හැකිව තිබේ. මෙම ව්‍යාපෘතියේ වැඩකටයුතු Dorman Long & Co Ltd^ ​සමාගමට හිමි වූ අතර, 1932 මාර්තු 19 වැනිදා පාලමේ වැඩකටයුකු  නිමවීමෙන් පසු විවෘත කර ඇත.

VI3A2001 

ඔස්ට්‍රේලියාවට පැමිණෙන විදේශ සංචාරකයෝ Sydney Bridge නැරඹීමට අමතක නොකරති. මෙම පාලමේ ප්‍රධාන මංතීරු හයක් ඇත. තවද මෙම පාලමෙහි ඇති විශේෂත්වය වනුයේ රථවාහන මංතීරුවලට අමතරව දුම්රිය මංතීරු දෙකක්ද පැවතීමය. මෙම පාලම් මාර්ගයේ ඇති බ්‍රැඩ්ෆීල්ඩ් නම් මාර්ගය ඔස්ට්‍රේලියාවේ ඇති කෙටිම අධිවේගී මාර්ගය ලෙස හඳුන්වයි. 1982 දී Sydney Bridge විවෘත කර 50 වැනි සැමරුම සැමරීමේදී ප්‍රථම වතාවට පදිකයන් සඳහා දිනක්ම මෙය විවෘත කර තිබිණි.

%Sydney Bridge^ සැලැස්ම නිර්මාණය කිරීමේදී නිව් යොර්ක්හි පිහිටි %හෙල් ගේට්^ පාලමේ ආකෘතිය බලපා ඇති බව පැහැදිලිය. Sydney Bridgeහි සම්පූර්ණ දිග මීටර් 1,149කි. 
පළල මීටර් 48.8ක් වන අතර, උස මීටර් 134ක් වෙයි. පාලමේ ආරුක්කු අලංකරණය දිග අඩි 59ක් වන අතර, එහි විශ්කම්භය අඩි 187ක් පමණ වේ. 
2000 වසරේදී සිඩ්නි ඔලිම්පික් උළෙල වෙනුවෙන් Sydney Bridge ඔලිම්පික් වළල්ලෙන් අලංකාර විය. ඔලිම්පික් උළෙලේ පැවැති මැරතන් ධාවන තරගයේ ගමන් මාර්ගයේ කොටසක් Sydney Bridge මතින් වැටී තිබිණි. ඔලිම්පික් උළෙලේ සමාප්ති උළෙලේදී ගිනිකෙළි සන්දර්ශනයකින්ද පාලම අලංකාර විය. 

VI3A2002

සිඩ්නි ඔපෙරා රඟහල (Sydney Opera House)

සිඩ්නි නගරයේ සංචාරයක යෙදෙන සංචාරකයන් නැරඹීමට අමතක නොකරන ස්ථානයක් ලෙස Sydney Opera House හැඳින්විය හැකිය. Sydney Opera House පිහිටා ඇත්තේ සිඩ්නි පාලමට නුදුරිනි. අද වන විට ලෝකයේ කාර්යබහුලම කලාගාරවලින් එකක් වන මෙය නැරඹීමට පැමිණෙන සංචාරකයන් වසරකට මිලියන 8.2ක් පමණ වේ
Sydney Opera House නිර්මාණය කිරීමේ ගෞරවය හිමි වනුයේ ඩෙන්මාර්ක් ජාතික ගෘහ නිර්මාණ ශිල්පී ජෝර්න් උට්සොන් වෙතය. මෙම ගොඩනැගිල්ල 1973 ඔක්තෝබර් 20 වැනිදා නිල වශයෙන් විවෘත කර ඇති අතර, 2007 වසරේදී යුනෙස්කෝ කමිටුව විසින් ජාතික උරුමයක් ලෙස නම් කෙරිණි. මෙම කලාගාරය විවෘත කිරීම සඳහා එවකට ඔස්ට්‍රේලියාවේ දෙවැනි එලිසබෙත් රැජිනද සහභාගි වී තිබේ. 

VI3A1986

මෙම කලාගාරය නිර්මාණය කරන අවධියෙහි මෙහි ප්‍රථම ඉදිරිපත් කිරීම සිදු කර ඇත්තේ Paul Robeson විසිනි. ඔහු 1960 වසරේදී මෙහි ඉදිකිරීම් සිදු කළ සේවකයන් සඳහා Ol Men River ගීතය ගායනා කර තිබේ. 1973 දී Sergei Prokofiev විසින් %War   Peace^ හා 1974 දී Joan Sutherland විසින් ඔපෙරා නාට්‍යයක් මෙහි ඉදිරිපත් කර ඇති අතර, එම නිර්මාණ සිඩ්නි ඔපෙරා හවුස් තුළ බිහි කළ විශිෂ්ට නිර්මාණ ලෙස සලකයි. 
1974 දී RAIA කුසලතා සම්මානය, 1974 ඔස්ට්‍රේලියාවේ Illuminating Engineering Societyහි Civic Design Award, 1980 RAIA Civic Design Award, 1992 RAIA අනුස්මරණ සම්මානය ජෝර්න් උට්සොන් වෙනුවෙන් සිඩ්නි ඔපෙරා හවුස් දිනාගෙන ඇත. 
සිඩ්නි ඔපෙරා කලාගාරයේ ජෝඈන් ස්ටර්ලන්ඩ් රඟහල, උට්සොන් අනුස්මරණ ශාලාව ඇතුළුව නාට්‍ය රංග ශාලා දෙකක්, චිත්‍රාගාර දෙකක් සහ අතිනවීන පහසුකම් සහිත ශබ්දාගාරයක් පවතියි. මෙහි ඇති ප්‍රසංග ශාලව සඳහා ආසන 2679ක්, ජෝ ඈන් සටර්ලන්ඩ් රඟහල සඳහා ආසන 1507ක්, නාට්‍ය සඳහා වෙන් වූ එක් රඟහලක ආසන 544ක්, අනෙක් රඟහල සඳහා ආසන 398ක්, චිත්‍රාගාරයෙහි ආසන 400ක් සහ උට්සොන් කලාගාරයෙහි ආසන 210ක් පිහිටුවා ඇත. 

VI3A2031

සටහන – කැළුම් දේවින්ද / ඡායාරූප – කවීත් මිලින්ද

ළමා අපයෝජනය හා ළමා අපචාර සමග වර්ධිත ලාංකේය නීතිය

ළමා අපචාර සහ අපයෝජන වැළැක්වීම සඳහා ශ්‍රී ලංකාව තුළ ව්‍යවස්ථාපිත නීතිය සම්බන්ධයෙනුත් එබඳු නඩු විභාගයන්වලදී අපයෝජනයට පත් දරුවන්ගේ සුභසිද්ධිය හා පෞද්ගලිකත්වය ආරක්ෂා කිරීම සඳහා අධිකරණ පද්ධතිය තුළ ක්‍රියාත්මක වන ක්‍රමවේදයන් පිළිබඳවත් විග්‍රහයක් ගෙන ඒමට අප නීතිඥ අරුණ පතිරණ ආරච්චි මහතා අද ට සම්බන්ධකර ගතිමු.


 
ශ්‍රී ලංකාවේ අපරාධ නීති ක්ෂේත්‍රය තුළ ළමයා පිළිබඳ නීතියට දැඩි රැකවල් යොදා ඇති අතර, ළමයාට සිදුවන බොහෝ අකටයුතුකම්වලට සහ එරෙහිව විවිධ පනත් මෙන්ම ආණ්ඩුක්‍රම ව්‍යවස්ථාව /අපරාධ නඩු විධාන සංග්‍රහය දණ්ඩ නීති සංග්‍රහයේ ප්‍රතිපාදන දැඩිව ක්‍රියාත්මක වන බව පෙනේ.
 
ලොව සියලු ළමයි අයිතිවාසිකම් අන්තර්ගතකොට ඇති එක්සත් ජාතීන්ගේ ළමා අයිතිවාසිකම් පිළිබඳ ප්‍රඥප්තියේ ළමයා යන්නට නියමිත වයස් සීමාවක් දක්වමින් ඉතාමත්ම පැහැදිලි නිර්වචනයක් අන්තර්ගතකොට ඇත්තේ ළමයා එතරම්ම වටිනා බැවිනි. එකී නිර්වචනය අනුව ළමයා යනු නීතිය මගින් අඩු වයසකදී පූර්ණත්වය ලබන්නේ නම් මිස වයස අවුරුදු 18ට අඩු සියලු මනුෂ්‍යයන් වේ. එනමුත් අප රටේ ළමයා යන්න හැඳින්වීමට නීතිය මගින් නියමිත වයසක් දක්වා නොමැති වීම ප්‍රහේලිකාවක් බඳුය.
බොහෝ අවස්ථාවලදී දක්වා ඇති පරිදි ළමයා යනු කායිකව හා මානසිකව නොමේරූ සත්ත්වයෙකි. එබැවින් එකී සත්ත්වයා වරදට හසුවීමට හෝ පෙළඹවීමට ඇති හැකියාව වැඩිය. ළමයා අපරාධ කටයුතුවලින් ආරක්ෂා කළ යුත්තේ මන්දැයි යමෙක් පැනයක් මතුකරන්නේ නම් එයට දිය හැකි පැහැදිලි පිළිතුර වනුයේ මෙයයි. එසේ ළමයා හට රැකවරණය හා ආරක්ෂාව ලබාදිය යුතු බව අයිතිවාසිකම් ප්‍රඥප්තියේ හා ශ්‍රී ලංකාවේ ආණ්ඩුක්‍රම ව්‍යවස්ථාවේ 12(4) වගන්තියෙන් සුවිශේෂීව සඳහන්කොට ඇත්තේ එබැවිනි.
2004 වර්ෂයේ ලොව සිදුකළ ගවේෂණයට අනුව සරණාගතයන් අතරින් 48%ක පමණ ප්‍රතිශතයක් ළමුයි. 2004 වර්ෂයේ ලංකාවේ ඇති වූ සුනාමි ව්‍යසන තත්ත්වයන් හමුවේ අපයෝජනයට හා අපචාරයට ලක්වූ ළමුන් ගණන අතිමහත්ය. එහිදී බලධාරීන්ගේ හෝ අවධානය යොමු නොවූ අපයෝජනයට හා අපචාරයට ලක්වූ ළමයි විශාල පිරිසක් ලංකාව තුළ ජීවත් වෙති.
 
විශේෂයෙන්ම ලංකාවේ අපරාධ නීතියෙන් සුවිශේෂීව දක්වා ඇති පරිදි ළමයාගේ අයිතීන් උල්ලංඝනය විය හැකි ප්‍රධාන ආකාර 02ක් ලෙස අපචාරය හා අපයෝජනය පෙන්වාදිය හැකිය. අපයෝජනය යනු ළමයෙකු වෙනත් පාර්ශ්වයක් විසින් නීත්‍යනුකූල නොවන ක්‍රියාවක් සඳහා යොදා ගැනීම වන අතර, අපචාරය යනු ළමයෙකු විසින්ම කරනු ලබන නීත්‍යනුකූල නොවන ක්‍රියාවකි.
 
15977449_631262213727316_624316135444539249_nවර්තමාන ගෝලීයකරණය වූ වටපිටාවක් තුළ දරුවා අහිතකර සමාජ බලපෑම් වලට ලක්වීම නිරන්තරයෙන් සිදුවේ. මෙම අහිතකර බලපෑම් සියල්ලෙන්ම නොහැකි වුවද වැඩි ප්‍රමාණයකින් දරුවා ආරක්ෂාකර ගැනීමට නීතියට විශාල කාර්යභාරයක් පැවරී ඇත.
ඒ සඳහා නීතිය පිළිබදව දැනුවත් බව ලබා පවතින නීතින් ක්‍රියාත්මක කරලීමට සහාය වීම 
සියලු දෙනාගේ නෛතික යුතුකමකි.
 
1995 අංක 22 දරන දණ්ඩ නීති සංග්‍රහ (සංශෝධන) පනත ඇතුළුව වෙනත් නීතීන් කිහිපයක්ද සංශෝධනය කර ළමා නීතියේ නව සංවර්ධනයක් ඇති කරලමින්, මෙතෙක් කල් නොතිබූ නව පැතිකඩ කීපයක්ද ඇතුළු කර ව්‍යවස්ථාදායකය විසින් ළමා අයිතිවාසිකම් නීති ක්ෂේත්‍රය තවදුරටත් පුළුල් කරමින් එක්සත් ජාතින්ගේ ළමා අයිතිවාසිකම් ප්‍රඥප්තිය අප රටේ බලාත්මක කිරීමට උත්සාහ දරා ඇත.
 
වර්තමාන සංකීර්ණ සමාජය තුළ දරුවා  ඕනෑම ස්ථානයකදී අපයෝජනයටත්, අපචාරයටත් ලක්විය හැකිය. සන්නිවේදන තාක්ෂණය හා පරිගණක තාක්ෂණයේ දියුණුවත්, පවතින උග්‍ර ආර්ථික විෂමතාවනුත් අපරාධ සඳහා පහසු වටපිටාවක් සපයනු ඇත. එනිසාම ළමා අයිතිවාසිකම් ආරක්ෂා කිරීමට අපරාධ නීතිය වෙත පැවරී ඇති වගකීම අතිමහත්ය.1833 සම්පාදිත දණ්ඩ නීති සංග්‍රහය මගින් ප්‍රථම වරට ළමයින්ට සිදුවන හිරිහැර මගින් ළමයින් ආරක්ෂාකර ගැනීමට විධිවිධාන සැලසිණ. දණ්ඩ නීති සංග්‍රහය වරින් වර සංශෝධනයන්ට ලක් කරමින් කාලීනව නෛතික ප්‍රතිපාදන පුළුල් විය යුතු අවස්ථා සඳහා ප්‍රතිකර්ම යොදන ලදී.
වැදගත්ම සංශෝධනයක් ලෙස 1995 අංක 22 දරන සංශෝධනය දැක්විය හැකිය.
 
1995 අංක 22 දරන දණ්ඩ නීති සංග්‍රහ සංශෝධන පනත මගින් හඳුන්වාදෙන නව අපරාධමය තත්ත්වයන්,
ළමයින්ට අදාළව කරනු ලබන අසභ්‍ය පළකිරීම්
ළමයින් ක_රත්වයට භාජනය කිරීම
ලිංගික අතවර කිරීම
කුට්ටනය
ළමයින්ගෙන් අයුතු ලිංගික ප්‍රයෝජන ගැනීම
ව්‍යභිචාරය
බාලවයස්කාර ගැහැනු ළමයින් සමග ලිංගික සංසර්ගය 
පෙන්වාදිය හැකිය.  
 
ශ්‍රී ලංකාවේ නීතිය යටතේ ළමා අපචාර වැරදි සම්බන්ධව පැනවිය හැකි උපරිම මෙන්ම අවම දඬුවම්ද නියම කර ඇති අතර, විවිධාකාරයේ ලිංගික අපයෝජනයන්ගෙන් ආරක්ෂා වීම සඳහා වූ පුළුල් රැකවරණයක්ද ලබා දී ඇත.
දණ්ඩ නීති සංග්‍රහ (සංශෝධන) 363(අ) වගන්තියේ දක්වා ඇත්තේ අවුරුදු 16ට අඩු ගැහැනු ළමයෙකු සමග ලිංගික සංසර්ගයේ යෙදීම 
 
ශ්‍රී ලංකාවේ නීතිය ඉදිරියේ ව්‍යවස්ථාපිත ස්ත්‍රී දූෂණය නම් වූ වරද නිර්මාණය කරන බවයි. එම වරද හටගන්නා අවස්ථාවලදී ස්ත්‍රිය වයස අවුරුදු 12ට වැඩිවන්නා වූද එම පුරුෂයාගේ භාර්යාව වන්නා වූද සහ ඇය එම පුරුෂයාගෙන් නීතියෙන් වෙන්වී නොමැති නම් මිස ස්ත්‍රිය වයස අවුරුදු 16ට අඩු වන විට ඇයගේ කැමැත්ත ඇතිව හෝ නැතිව ලිංගික කාර්යයේ යෙදෙන්නේ නම් එය නීතිය ඉදිරියේ දැඩි දඬුවම් ලැබිය හැකි වරදකි.
 
මෙවැනි චෝදනාවකට ගරු මහාධිකරණයේ නීතිපතිවරයා විසින් චූදිතයාට එසේත් නැතිනම් වරදකරුට එරෙහිව අධිචෝදනා ගොනුකරන අතර, නීතිය ඉදිරියේ වරදකරු වීමෙන් අනතුරුව ඔහුට අවුරුදු 07ට නොඅඩු වූද, අවුරුදු 20ට නොවැඩි වූද කාලයකට බරපතළ වැඩ ඇතිව බන්ධනාගාරගත කිරීමත් සිදුකරනු ලබයි. ගරු අධිකරණය විසින් නියම කරනු ලබන්නේ නම් සුදුසු දඩයක් ගරු අධිකරණයට ගෙවිය යුතු වන අතර, අපයෝජනයට ලක්වූ පාර්ශ්වයට සුදුසු වන්දි මුදලක්ද ගෙවිය යුතු වනු ඇත.
 
මෙවැනි චෝදනාවන්ට ලක්වූ විට ඇතැම් විට වර්තමාන තත්ත්වය තුළ චූදිතයන් මුල් අවස්ථාවේදීම ගරු අධිකරණයේදී එකී චෝදනාවන්ට වරද පිළිගැනීමක් සිදුකරනු ලබන අතර, එකී වරද සිදුකරනු ලබන්නාගේ පෙර ලත් දඬුවම් පිළිබඳ වාර්තාව සලකා බැලීමෙන් අනතුරුව ගරු අධිකරණය විසින් සුදුසු දඬුවමක් නියම කරනු ලබන්නේ ඇතැම් විට අත්හිටවූ සිරදඬුවම්ද නියම කරමිනි. මෙහිදී අත්හිටවූ සිරදඬුවම් ලබාදීම යනු ගම්බද ජනතාව අතර ප්‍රචලිත වචනයක් වන ඇඟ බැඳීම යන දඬුවම් විශේෂයයි.
මෙවැනි තත්ත්වයන්වලදී ගරු අධිකරණය අපයෝජනයට ලක්වූ පාර්ශ්වයට අසාධාරණයක් සිදුනොකරනු ලබන අතර, දඬුවම සුදුසු වන පරිදි විශාල වන්දි මුදලක් ගෙවීමට වරදකරන තැනැත්තාට නියම කෙරේ.
 
තවද සමස්ත සමාජය තුළම දැකිය හැකි මූලික අඩුපාඩුවක් වන්නේ නීතිය පිළිබඳව නිසි අවබෝධයක් නොමැති වීමයි. එමගින් තමන් කරනු ලබන ක්‍රියාව නීතිය ඉදිරියේ දෝෂ සහිත වන්නේද නොවේද යන්න අවබෝධ කර ගැනීමට තරම් සමාජය නීතිය ඉදිරියේ පොහොසත් වන්නේ නැත. කුඩා කලම ප්‍රේම සබඳතාවලට යොමු වන දරුවන් නීතියේ වරදවල් පිළිබඳව දන්නේ නැත. තම හැඟීම් උද්දීපනය වන කාලවකවානුවේදී ඔවුනට නීතියෙන්ද වැඩක් නැත. ඔවුන්ගේ මනස ක්‍රියාත්මක වන්නේ ඔවුනට රිසි පරිදි මිස නීතියට රිසි පරිදි නොවේ. 
එබැවින් ඔවුන් විවිධ අපචාරයන්ට ගොදුරු වේ. ප්‍රේමය රාගයට යොමු වීමත් සමග තම පෙම්වතිය සමග ලැගුම්හලකට ගොඩවන පෙම්වතා පෙම්වතියගේ ලෝකයම තම සුරතට ගන්නේ නොයෙකුත් බලාපොරොත්තුද ඇයට ලබාදෙමිනි. 
නමුත් නීතියට එය අදාළ නැත. පෙම්වතිය වයස අවුරුදු 16ට අඩු වී යම් හෙයකින්  අපයෝජනයක් සිදුවූ බවට කරුණු අනාවරණය වන්නේ නම් වරදකරු පෙම්වතා වුවද ඔහු නීතිය ඉදිරියේ වරදකරුවෙකු වන්නේය. නමුත් නිසි වයස සම්පූර්ණ වීමත් සමග අපයෝජනයට ලක්වූ දැරිය විවාහ කර ගැනීමෙන් අනතුරුව අදාළ විවාහ සහතික ආදී නිසි සහතික ඉදිරිපත් කිරීමෙන් නඩු කටයුතු අවසන් කර ගැනීමට වරදකරුවන් අද වන විට යොමුවීමක් දක්නට ලැබේ.
 
නමුත් ගරු අධිකරණය නියම කරන දඬුවමකට වරදකරු ලක්වීම නතර කළ නොහැකිය. ළමා අපයෝජනය හා අපචාරයට ලක්වන අවස්ථාවලදී දරුවා ගරු අධිකරණය ඉදිරියට ගෙන්වා ගැනීම එක් පැත්තකින් ඔහුට හෝ ඇයට සිදුවන තවත් හිරිහැරයකි. සමාජයේ ආවරණයට ලක්විය යුතු ඔවුන් සමාජයට අනාවරණය වීම වළක්වා ගැනීම සමාජයේම යුතුකමකි.
 
ළමයින් මල් වැනිය. ඔවුන් රැකගැනීම අපගේ යුතුකම වන්නේ එබැවිනි. මෙවැනි අපයෝජනයන්ට හා අපචාරයන්ට ලක්වූ දරුවා ගරු අධිකරණය ඉදිරියේ සාක්ෂි ලබාදීම වළක්වාලමින් ඔහුගේ හෝ ඇයගේ සාක්ෂිය දිවුරුම් පෙත්සමක් මගින් ගරු අධිකරණයට ඉදිරිපත් කිරීම සුදුසු ක්‍රියාමාර්ගයකි. මෙමගින් දරුවාගේ උපරිම යහපත ගරු අධිකරණය ඉදිරියේ සුරක්ෂිත වනු ඇත. බොහෝ විට මෙවැනි අපයෝජනයන්ට ලක්වූ දරුවන් පරිවාස නිලධාරීන්ගේ භාරයට ගරු අධිකරණය යොමු කරනු ලබන අතර, දරුවාගේ උපරිම සුභසාධනය ගැන සැලකිලිමත් වෙමින් ළමයා සුදුසු ළමා නිවාසයකට යොමු කිරීම ගරු අධිකරණය මගින් සිදුකරන්නේ එබැවිනි. එමගින් දරුවා වෙනුවෙන් ගරු අධිකරණයට පරිවාස නිලධාරියෙකු යොමු වන අතර, එකී නිලධාරියා දරුවා වෙනුවෙන් ගරු අධිකරණයට කරුණු දැක්වීම කරනු ලබයි.  යම් හෙයකින් දරුවා අධිකරණයට කැඳවීමක් කරනු ලබන්නේ නම් ගරු අධිකරණය විසින් එම නඩුව සුවිශේෂී තත්ත්වයක් සේ සලකා විවෘත අධිකරණයෙන් පිටත ගරු විනිසුරුතුමාගේ නිලමැදිරිය තුළ කැඳවනුයේ දරුවන්ගේ උපරිම සුබසෙත පිළිබඳව අවධානය යොමු කරමිනි. තවද ගරු අධිකරණයේ මෙවැනි නඩු සුවිශේෂී 
 
වේලාවන්වලදීද කැඳවනුයේ දරුවා සමාජයේ අවධානයෙන් වෙන්කොට තැබිය යුතු හෙයිනි. මෙලෙස ළමා අපයෝජනයට හා ළමා අපචාරයට ලක්වූ දරුවන් ආරක්ෂාකර ගැනීමට නීතිය තුළ ප්‍රතිපාදන දක්නට ලැබුණද තවත් සුවිශේෂී අවස්ථා රැකගැනීමට සුදුසු වැඩපිළිවෙළක අවශ්‍යතාව උද්ගත වී ඇත. 
 
දරුවන්ගේ නඩු විභාගයට ගත හැකි ළමා අධිකරණ තවත් බිහිවීමේ අවශ්‍යතාව සමාජයේ දැඩි අවධානයට යොමු වූ කරුණක් වන්නේ එබැවිනි. අපයෝජනයට හෝ අපචාරයට ලක්වූ දරුවා පරිවාස නිලධාරීන්ගේ භාරයට පත්වුවද ළමා නිවාසවලදී දරුවා නිසි ආරක්ෂාව යටතේ රැදීමට සුදුසු ආරක්ෂණ වැඩපිළිවෙළක අවශ්‍යතාවද වත්මන වන විට මතුවන ගැටලුවකි. වත්මන් නීතිය තුළ පනවා ඇති පහත ප්‍රතිපාදන යටතේ දරුවාගේ යහපත යම් මට්ටමකට ගොඩනැගීමට නීතිය පියවර ගෙන ඇති බව පෙනේ. 
 
1.1999 අංක 27 දරන අධිකරණ සංවිධාන (සංශෝධන) පනත 
2.1998 අංක 28 දරන අපරාධ නඩු විධාන සංග්‍රහය (සංශෝධන) පනත
3.1989 අංක 05 දරන ගණිකා නිවාස ආඥා පනත
4.1956 අංක 47 දරන කාන්තාවන්, ළමයින් සහ යෞවනයන් සේවය යෙදවීම සදහා වන පනත
5.1999 අංක 37 දරන නඩත්තු පනත
6.ළමයින් හා බාලක පුද්ගලයන් පිළිබද ආඥා පනත
 
කොතෙක් නීතිමය ප්‍රතිපාදන පැවතියද අද  වන විට අපරාධ රැල්ල වැඩි වී ඇත. ළමයින් කොතෙකුත් ආරක්ෂා කළද ඔවුන්ගේ ජීවිත විනාශ වීමට ගතවනුයේ නිමේෂයකි. පාතාලය රට පුරාම හිස ඔසවා ඇත. පාතාලයේ රජවරු යැයි කියන පිරිසකගේ ජීවිත දෙස බැලීමේදී ඔවුන් මෙම අපරාධ වලට යොමුවීමට අවශ්‍ය පරිසරය සකස් වී ඇත්තේ කුඩා කලදී ඔවුනට සිදුවූ අපයෝජන හෝ අපචාර විය හැකිය. එබැවින් එවන් පිරිසක් තව තවත් බිහිවීම වළක්වාලීම මුළු මහත් සමාජයේම යුතුකමකි. 

ලෝක සාගත දුරලන්න උරදුන් අපේ සහල් ප්‍රභේද

DSC_0003

වර්ෂ 1930 වන විට රටේ සමස්ත සහල් අවශ්‍යතා‍ෙවන් රට තුළින්ම සපයා ගැනීමට හැකිවූයේ 25%ක සහල් ප්‍රමාණයක් පමණි. ඉතිරි 75%ක සහල් අවශ්‍යතාව ආනයනික සහල් මත යැපෙන්නට සිදුවිය. එතෙක් වගා කළ සාම්ප්‍රදායික වී ප්‍රභේදවලින් වැඩි අස්වනු ප්‍රමාණයක් ලබාගැනීමද ඉතාමත් අසීරු වූයේ එම ප්‍රභේදයන්හි පොහොර ප්‍රතිචාරයද යහපත් නොවුණු නිසාවෙනි. තවද ඒවායේ පඳුරු දිගින් වැඩි වීම හේතුවෙන් ඇදවැටීමට ලක්වීම නිසා කොළ පාළු රෝගයට ලක්වීමේ වැඩි ඉඩකඩක් දක්නට ලැබිණි. 
එවකට රට තුළ 50%ක්ම වගා කෙරී ඇත්තේ මාස 5-6 වයසැති පොඩි වී, මුතු සම්බා, පඳුරු වී වැනි දිගුකාලීන වී ප්‍රභේදයන්ය. 31%ක ප්‍රමාණයක් මාස 4 වයස් කාණ්ඩයට අයත් වෙල්ලෙයි ඉලංගකායන්, මුරුංගකායන් වැනි වී ප්‍රභේද වගා වූ අතර, තවත් 10%ක ප්‍රමාණයක් මාස 3 වයස් කාණ්ඩයේ වෙල්ලෙයි පෙරුමාල්, හීනටි, පච්චපෙරුමාල් වැනි වී ප්‍රභේද වගා කෙරිණි.

නුමුහුම් වී ප්‍රභේදවල මතු වූ ගැටලු

දේශීය සහල් නිෂ්පාදනය නැවත බලගැන්වීමේ අභියෝගය සිය වගකීමක් කොටගත් කෘෂිකර්ම දෙපාර්තමේන්තුව 1940 වසරේදී වගා දර්ශ පවිත්‍ර කිරීමේ ක්‍රියාවලිය යටතේ වී වගා කටයුතු සඳහා විවිධ වයස් කාණ්ඩයන්ට අයත් නුමුහුම් පෙළ වී වර්ග 21ක් නිර්දේශ කරන ලදී. ඒවායේ අස්වනු වැඩි කිරීම සඳහා නයිට්‍රජන් පොහොර භාවිතය සුලභ කළ අතර, බොහෝමයක් වර්ග පඳුරු ඇදවැටීමට සහ කොළ පාළු රෝගයට ලක්විය. එම නිසා නයිට්‍රජන් පොහොර සඳහා සාධනීය ප්‍රතිචාරයක් දක්වන, කොළ පාළු රෝගී තත්ත්වයට හා පඳුරු ඇද වැටීමට ලක් නොවන වී වර්ග අභිජනනය සඳහා පර්යේෂකයන්ගේ අවධානය යොමු විය.

පිටරටින් හඳුන්වා දුන් වී වර්ගවල අසාර්ථකත්වය

1950 වසර පමණ වන විට ආසියාතික රටවල් බොහෝමයක වැඩි අස්වැන්නක් ලබාගත හැකි වී ප්‍රභේදයන් ක්‍රම ක්‍රමයෙන් ප්‍රචලිත වූ අතර, ඒ අනුව Ptb 16 ප්‍රභේදය ඉන්දියාවෙන්ද, %මාස්^ හා %සිගාඩ්ස්^ යන ප්‍රභේදයන් ඉන්දුනීසියාවෙන්ද මෙරටට හඳුන්වාදෙනු ලැබිණි. නමුත් එය අතිශයින්ම අසාර්ථක වූයේ Ptb 16, මාස් යන වර්ග කොළ පාළු රෝගී තත්ත්වයට පහසුවෙන් ගොදුරු වීම නිසාත් සිගාඩ්ස් ප්‍රභේදය මෙරට කාලගුණික හා දේශගුණික තත්ත්වයන් යටතේ අස්වනු ලබාදීමට වැඩි කාලයක් ගත වූ නිසා මෙන්ම බලාපොරොත්තු වූ මට්ටමේ අස්වනු ප්‍රමාණයක් ලබාදීමට අසමත් වූ නිසාවෙනි.

01

මෙරටදී පැරණි වී වැඩිදියුණු කිරීම ඇරඹෙයි 

ඉහත ගැටලුකාරී තත්ත්වයන් නිසා සාර්ථක වී ප්‍රභේදයක් නිපදවීම මෙරටදීම පැරණි වී භාවිතයෙන් සිදුකිරීමට පර්යේෂකයන්ගේ අවධානය යොමු විණි. ඒ අනුව 1950 දශකයේ එවකට වී වැඩිදියුණු කිරීමේ පර්යේෂණ සිදුකළ මහඉලුප්පල්ලම කෘෂිකර්ම පර්යේෂණ මධ්‍යස්ථානය මගින් විවිධ හිතකර ලක්ෂණ සංකලනය කිරීම සඳහා දෙමුහුම්කරණ තාක්ෂණය හඳුන්වා දුන් අතර, 1952 වසරේදී එම පර්යේෂණ කටයුතු බතලගොඩ මධ්‍යම වී අභිජනන මධ්‍යස්ථානය වෙත ගෙනයන ලදී. මෙහිදී නයිට්‍රජන් පොහොර සඳහා වැඩි ප්‍රතිචාරයක් දැක්වීම, කොළ පාළු රෝගය සඳහා ඔරොත්තු දීම, වගා කාලය අඩුකර ගැනීම හා සම්මත ගුණාත්මක ප්‍රමිතීන් පිළිබඳ වැඩි අවධානයක් යොමු විය.
ඒ අනුව 1958 වසරේදී දෙමුහුම්කරණ තාක්ෂණය ඔස්සේ නිපදවා නිර්දේශ කළ ප්‍රථම වී ප්‍රභේදය වූ H4 වී වර්ගය එළිදැක්විණි. පසුකාලීනව බෙහෙවින් ජනප්‍රිය වූ H4 වී ප්‍රභේදය පර්යේෂණ තත්ත්වයන් යටතේ හෙක්ටයාරයකට ටොන් 7ක පමණ අස්වැන්නක් ලබාදීමට සමත්ව තිබේ. 1969 දක්වාම නිපදවුණු H කාණ්ඩයේ ප්‍රභේදයන් මධ්‍යස්ථ වශයෙන් පොහොර සඳහා ප්‍රතිචාර දැක්වූ අතර, කොළ පාළු රෝගය සඳහාද සාර්ථකව ප්‍රතිරෝධය දැක්වීය. නමුත් පසුකාලීනව ඇදවැටීමට පාත්‍ර වීම හා අස්වනු විභය අඩුවීම මෙහි දුර්වලතා ලෙස හඳුනාගැනීමත් සමග H කාණ්ඩයේ ප්‍රභේදයන් භාවිතය සීමා විය.

නව වැඩිදියුණු කළ වී ප්‍රභේද

වැඩිදියුණු කළ පැරණි වී ප්‍රභේදයන්ගේ දුර්වලතා හඳුනා ගනිමින් පොහොර ප්‍රතිචාරය සාධනීය වූ, රෝගයන්ට ඔරොත්තු දෙන, පඳුරු කෙටි වී ප්‍රභේද නිෂ්පාදනය කිරීම සඳහා බතලගොඩ වී පර්යේෂණ හා සංවර්ධන මධ්‍යස්ථානය නව අභිජනන ව්‍යාපෘතියක් ආරම්භ කළ අතර, එහි ප්‍රතිඵලයක් ලෙස හෙක්ටයාරයකට ටොන් 7ක අස්වනු විභවයක් සහිත Bg 11-11 (මාස 4) , Bg 34-6 (මාස 3) සහ Bg 34-8 (මාස 3) වැනි වී ප්‍රභේදයන් හඳුන්වාදෙනු ලැබීය. මේ අතරින් Bg 34-8 වී වර්ගය අඩු අස්වැන්නක් ලබාදෙන තුන්මසක වයස් කාණ්ඩයට අයත් පච්චපෙරුමාල් වී ප්‍රභේදයට වඩා ජනප්‍රිය විය.  Bg 34-8 ප්‍රභේදය 1974 වසර වන විට ජාතික වී වගා වපසරියෙන් 55෴ ඉක්මවා යාමට සමත් වූයේ එහි තිබූ සාර්ථකත්වය හේතුවෙනි. පසුකාලීනව නිපද වූ Bg 94-1 (මාස 3) ප්‍රභේදයේ වැඩි අස්වනු විභවයක් දක්නට ලැබුණු අතර, යල මහ කන්න දෙකෙහිදීම සාර්ථක ලෙස වගා කිරීමට හැකි විය.

02

අරමුණු රැසක් මුදුන්පත් කරගැනීම 

වර්ෂ 1990 පමණ වන විට වී අභිජනනය පිළිබඳ මෙරට පර්යේෂකයන්ගේ ප්‍රධාන අරමුණ වූයේ රට සහලින් ස්වයංපෝෂිත කිරීම, ප්‍රධාන රෝග හා පළිබෝධ කෙරෙහි වැඩි අවධානයක් යොමු කිරීමත්ය. 1990 වන විට පරිභෝජනය වන සහල්වල ගුණාත්මකභාවය පිළිබඳ විශේෂ අවධානයක් යොමු විය. වී පර්යේෂණායතනයන් 2000 වසර වන විට සහල්වල පෝෂණීය ගුණයන් තව තවත් වැඩිදියුණු කිරීමට සිය පර්යේෂණ ඔස්සේ සමත් විය. ඒ අනුව 2014 වසරේදී පාරම්පරික ප්‍රභේදයක් වන සුවඳ සහිත සූදුරු සම්බාවල සුවඳ එලෙසම පවත්වා ගනිමින් ඊට වඩා වැඩි අස්වනු ප්‍රමාණයක් ලබාදෙන නව ප්‍රභේදයක් හඳුන්වා දීමට අම්බලන්තොට වී පර්යේෂණායතනය සමත් වූ අතර, එය At 373 නමින් හැඳින්විය. 2010 වසර වන විට අජෛවී ආතති තත්ත්වයන්ට ඔරොත්තු දෙන, වල්පැළ නිසා වර්ධනය අඩාළ නොවන වී වර්ග නිපදවීමට පර්යේෂකයන් කටයුතු කර තිබේ.

කාලීන පරිසර තත්ත්වවලට ඔරොත්තු දෙන ප්‍රභේද

වර්තමානය වන විට අප විවිධාකාරයේ කාලගුණික හා දේශගුණික විපර්යාසයන්ට මුහුණ දෙමින් සිටිති. ඒ ඔස්සේ ගංවතුර හා නියඟ වැනි ආන්තික පරිසර තත්ත්ව වී වගාව කෙරෙහි ඍජු බලපෑමක් එල්ලකොට තිබේ. එමෙන්ම ඒ ඒ පරිසර තත්ත්වවලට ඔරොත්තු දෙමින් සාධනීය අස්වනු විභවයන් ලබාදෙන සහ පළිබෝධක උවදුරු සඳහා ඔරොත්තු දෙන වී ප්‍රභේද නිපදවීම කෙරෙහි අභිජනකයන් 2010 වසරේදී සිය අවධානය යොමු කළහ. ඒ අනුව පසේ ලවණතාව අධික මුහුදට ආසන්න කුඹුරු ඉඩම්වල හා වර්තමානයේ ලවණතාව වැඩි වීමේ අවදානමකට ලක්ව තිබෙන රට අභ්‍යන්තරයේ පිහිටි කුඹුරුවල වගා කළ හැකි ලවණතාවට ඔරොත්තු දෙන වී ප්‍රභේද බිහිවී ඇත. උදාහරණ ලෙස At 354, Bg 369 හා Bg 310 හැඳින්විය හැකිය. එමෙන්ම පහතරට තෙත් කලාපයේත් එය අතරමැදි හා වියළි කලාපයේ වැලි සහිත කුඹුරුවල යකඩ විෂ වීම වැඩි වශයෙන් වාර්තා වීම නිසා Bw267-3, Bw361, Bw363, Bw367, Bw364 හා Bw372 යන යකඩ විෂ වීමට ඔරොත්තු දෙන වී ප්‍රභේද නිපදවනු ලැබීය.     

ආපදාවලින් තොර රටක් නිර්මාණය කිරීමට නම්

තද වැසි, වියළි කාලගුණය, නියඟය, නාය යෑම, ගංවතුර මේ පුංචි දිවයිනට මේ වන විට අඩුවක් නැතිව ඇතිවෙමින් තිබෙනා ආපදාවන්ය. දවසේ පැය 24 පුරාත් වසරේ  දින 365 පුරාත් කිසිදු ප්‍රශ්නයක් නොමැතිව රටේ ජනතාවට ජීවත් විය හැකි රටක් ලෙසට අතීතයේදී ශ්‍රී ලංකාව නම් වී තිබුණි. එහෙත් ගෙවී ගිය දශක දෙක තුන සලකා බැලීමේදී වර්ග කිලෝමීටර් 65,525ක විශාලත්වයකින් යුත් මේ පුංචි දිවයිනට වසරේ එක් කාලයකදී වියළි කාලගුණයත්, තවත් මාස කිහිපයක් තද වැසිත්, දින හය හතක් රටේ කුමන හෝ ප්‍ර‘දේශයක් ජලයෙන් යටවීම, කඳු නාය යෑම හෝ පස් කඳු කඩාවැටීම් වැනි ව්‍යසනයන්ට මුහුණදීමට සිදුව තිබේ. මේ නිසා මෙරටේ ජනතාවගෙන් සැලකිය යුතු ප්‍රමාණයකට සෑම වසරකදීම ආරක්ෂිත කඳවුරුවල රැඳී සිටීමට සිදුව තිබෙන අතර, තවත් කණ්ඩායමකට ජල ගැටලුවකට මුහුණදීමට හා තවත් සුළු පිරිසකට ජීවිතයෙන් වන්දි ගෙවීමටත් සිදුව ඇත.


DSC00287

මෙම සියලුම ආපදාවන් ස්වාභාවික විපත් ලෙස සලකා මේ රටේ පාලකයන් හා ජනතාව සිත සනසා ගැනීමද පසුගිය කාලයේදී දැකගත හැකි විය. එහෙත් විද්‍යාත්මකව මේ පිළිබඳව සොයා බැලීමේදී පෙනී යන කාරණය වන්නේ සොබාදහම අපට විරුද්ධ වී තිබෙන්නේ සොබාදහමට අප විරුද්ධ වීම නිසාය. යම් රටක පැවැත්ම රඳා පවතින්නේ රටේ පවතින පරිසර පද්ධතියේ ශක්තිමත්භාවය මතය. මේ පිළිබඳව නොදැනුවත්ව පරිසරය විනාශ කළ රටවල් අද වන විට සකස්කරන ගොඩනැගිලි, නිවාස තුළ පවා ශාක පැළෑටි රෝපණය කිරීමට පෙළඹී තිබේ. විදේශ රටවල සියලුම වැරදි ක්‍රියා ආදර්ශයට ගන්නා ශ්‍රී ලංකාවාසීන් පරිසරය රැකගැනීම පිළිබඳව ආදර්ශය වැළඳ ගන්නා ආකාරයක් දක්නට නැත. මේ නිසා ශ්‍රී ලංකාව ආපදාවන්ට ලක්වන රටවල් අතරට ඇතුළත් වෙමින් තිබේ. 

ශ්‍රී ලංකාවේ වන ආවරණය ගැන සලකා බැලීමේදී 1920 වසරේදී සමස්ත භූමියෙන් 49%ක වන ආවරණයක් පැවති අතර, 2005 වසර වන විට වන වැස්ම සමස්ත භූමියෙන් 20%ක් දක්වා පහළ වැටී තිබේ. මේ වන විට සමස්ත වන වැස්ම 16% දක්වා අඩු වී තිබෙන බවට පරිසරවේදීහු පෙන්වා දෙති.  1990 සිට 2000 වසර දක්වා කාලය තුළ ලංකාවට දළ වශයෙන් හෙක්ටයාර 26,800ක වන භූමි ප්‍රමාණයක් අහිමි වී තිබෙන අතර, එතැන් පටන් මේ දක්වා කාලය තුළත් හෙක්ටයාර 20,000කට වැඩි වනාන්තර ප්‍රමාණයක් රටට අහිමි වී තිබෙන බවට පරිසර සංවිධාන පෙන්වා දෙයි. ගස්කොළං විනාශකර දැමීමට අමතරව වගුරු භූමි ගොඩ කිරීම, කඩොලාන පරිසර පද්ධති විනාශ කිරීම, කුඩා කුඩා කඳු විනාශකර දැමීම, ඇළවේළි අවහිර කර ගොඩනැගිලි ඉදිකිරීම  වැනි විනාශකාරී ක්‍රියාවන්ද බහුලව සිදුවේ.
මීට අමතරව රට තුළ ඉදිකර තිබූ වැව් අමුණු විශාල ප්‍රමාණයක් විනාශකර දැමීම හා ජල මූලාශ්‍ර ඉහළ ප්‍ර‘දේශවල පැවතිය යුතු පරිසර පද්ධතිය විනාශකර දැමීම වැනි ක්‍රියා නිසා ජල මූලාශ්‍ර රොන්මඩවලින් පිරී පැවතීමත් රට තුළ ආපදාවන් ඇතිවීමට බලපා තිබෙන කරුනුය. ගංගා ඇළදොළවල් ආශ්‍රිතව පැවතිය යුතු රක්ෂිත ප්‍රදේශ විනාශකර දැමීම, අධික ලෙස වැලි ගොඩදැමීම හා ගංඟා ඇළදොළ අවට අනවසර ගොඩකිරීම් සිදුකර නිවාස ගොඩනැගිලි ඉදිකිරීමද ආපදාවන් ඇතිවීමට බලපාන කාරණය. සිදුකරන මිනිස් ක්‍රියාකාරකම් වලට සොබාදහම කොතරම් දඬුවම් ලබාදුන්නත් මෙරටේ පාලකයන්, ජනතාව, වැලි, පස්, ගල්, දැව ජාවාරම්කරුවන් පාඩම් ඉගෙන ගන්නා ආකාරයක් දක්නට නැත.

පරිසරය රැක ගැනීම පිළිබඳව මෑතකාලීනව බලයට පත්වූ සෑම පාලකයෙක්ම ජනතාවට පොරොන්දු කන්දරාවක් ලබාදුන්නත්, මේ දක්වා  බිහිවූ කිසිදු පාලකයෙකුට රට තුළ සිදුකරන පරිසර විනාශය නවතා දැමීමට නොහැකි වී ඇත. රටේ ජනතාවගේ යහපත වෙනුවෙන් වැඩිම පොරොන්දු ලබාදුන් නායකයා වන්නේ ජනාධිපති මෛත්‍රීපාල සිරිසේන මහතාය. එමෙන්ම පරිසරය රැකගැනීම පිළිබඳව මහ ඉහළින් කතා කළ නායකයන් අතර ජනාධිපති මෛත්‍රිපාල සිරිසේන මහතාට ප්‍රමුඛස්ථානය හිමි වේ. ජනාධිපති මෛත්‍රිපාල සිරිසේන මහතා පවසන ආකාරයට පරිසරය රැක ගැනීමට තිබෙන උනන්දුව, උත්සාහය සපථ කර ගැනීම සඳහා අමාත්‍යාංශ බෙදා දීමේදී පරිසර අමාත්‍යාංශය ජනාධිපතිවරයා යටතටද ගනු ලැබිණි. එහෙත් වනාන්තර විනාශකර දැමීම, සංවර්ධනයේ නාමයෙන් සිදුකරන කඳු විනාශකර දැමීම්, වගුරු භූමි ගොඩ කිරීම් අඩුවක් නැතිව සිදුවෙමින් පවතී.

flood-03

ඉදිකරමින් තිබෙනා අධිවේගී මාර්ග පස් මත සකස් කිරීම නිසා කුඩා කුඩා ජල පාරවල් අවහිර වී ඇති අතර, කුඹුරු හා වගුරු භූමි දෙකඩ වීමද සිදුවෙමින් තිබේ. ගස්කොළං සහිත කඳු පන්ති සමතලා භූමි බවට පත්වී ඇති අතර, මෙම තත්ත්වය නිසා පරිසර ඛණ්ඩනය වීමද සිදුවී තිබේ. මේ නිසා ලංකාවේ බොහෝ ප්‍රදේශ කුඩා වැස්සකටත් ජලයෙන් යටවන අතර, සතියක් දෙකක් වර්ෂාව නොලැබී ගියහොත් එම ප්‍ර‘දේශවල ජනතාවට ජල හිඟයකට මුහුණදීමට සිදුව තිබේ. 

ආපදාවක් සිදුවුවහොත් ඊට අවශ්‍ය කටයුතු  කිරීම සඳහා ආපදා කළමනාකරණ අමාත්‍යාංශයක්ද රට තුළ ඇතිකර තිබේ. මේ අනුව යම් ආපදාවක් සිදුවූ පසු ආපදා කළමනාකරණ අමාත්‍යාංශය හා ඒ යටතේ පවතින ආයතනත්, ජනතාව වෙනුවෙන්  කටයුතු කරන අනෙකුත් රාජ්‍ය ආයතනත් සහන සැපයීම සිදුකරනු ලබයි. රජයේ සංඛ්‍යාලේඛන පෙන්වා දෙන ආකාරයට පසුගිය වසර දෙක තුළ සිදුවූ නාය යෑම්, ගංවතුර හා වියළි කාලගුණ තත්ත්වය නිසා ආපදාවන්ට ලක්වූ ජනතාවගේ කටයුතු සඳහා රුපියල් මිලියන තිස්අටදහසකට වැඩි ප්‍රමාණයක් වැයකර තිබේ. මෙම වසර දෙක තුළදී ජීවිත 400කට අධික ප්‍රමාණයක් අහිමි වී තිබෙන අතර, කැඩී බිඳී ගිය නිවාස සංඛ්‍යාව දහස් ගණනකි.

ආපදාවන්ට ලක්වූවන්ට ප්‍රතිචාර දැක්වීමට රට තුළ වැඩපිළිවෙළක් තිබුණද, ආපදා අවම කිරීමට අදටත් රට තුළ නිසි වැඩපිළිවෙළක් සැලසුම් කර නැත. ආපදා කළමනාකරණ මධ්‍යස්ථානය මැදිහත් වී ආපදාවන්ට මුහුණ දෙන ආකාරය පිළිබඳව දැනුවත්කිරීම් සිදුකළද, ආපදාවක් ඇතිවීමට බලපාන සොබාදහම රැකගැනීමේ වැදගත්කම පිළිබඳව කිසිදු ආයතනයක් ජනතාව දැනුවත් කරන්නේද  නැත. සොබාදහමට විරුද්ධව කටයුතු කළහොත් එහි ඵලවිපාක විඳින්නට සිදුවන බව දැන දැනත් බොහෝ මිනිසුන් සොබාදහමදහම රැකගැනීමට කටයුතු කරන්නේද නැත. සොබාදහම රැක ගැනීමේ වැදගත්කම  පිළිබඳව මෙරටේ සමහර ජනතාවට වැටහී ගියද, රටේ ජාවාරම්කාර දේශපාලඥයන්ට ඒ පිළිබඳව වැටහීමක්  ඇති ආකාරයක් දක්නට නැත.

අඩුම තරමින් වනය, වනජීවීන්, වගුරු බිම්, ඇළදොළ ගංගා ආරක්ෂා කිරීම සඳහා සිටින දේශපාලඥයන් සහ සමහර නිලධාරීන්ටත්  සොබාදහම රැක ගැනීමේ වැදගත්කම පිළිබඳ දැනුමක් නැති තරම්ය. මේ නිසා වනසතුන්ගේ ආරක්ෂාව වෙනුවෙන් වෙන්කර තිබෙනා ජාතික වනඋද්‍යාන, රක්ෂිත භූමි පවා සමහර දේශපාලඥයන්, දේශපාලන හිතවතුන් ඉවක්බවක් නොමැතිව විනාශකර දමමින් තිබේ. එමෙන්ම වගුරු බිම් ගොඩකිරීම, ජල මූලාශ්‍ර විනාශකර දැමීම, කාණු හා ජලය බැස යන මාර්ග හරස්කර නිවාස ඉදිකිරීම, ගොඩනැගිලි ඉදිකිරීමද දේශපාලඥයන්ගේ මැදිහත් වීම මත සිදුවෙමින් තිබේ.

ඡන්ද ගොඩ වැඩිකර ගැනීමට හා මැතිවරණයට මුහුණ දීම සඳහා අවශ්‍ය වන මුදල් සොයා ගැනීමට දේශපාලඥයන් මැදිහත්ව සිදුකරන මෙවැනි ක්‍රියාවන්ගේ ඵලවිපාක විඳීමට සිදුවන්නේ දේශපාලඥයන් පසුපස යන පිරිසටය. සමහර අවස්ථාවල පරිසර විනාශයට කිසිදු සම්බන්ධයක් නොමැති පිරිස්වලට පවා සොබාදහම ලබාදෙන දඬුවම් විඳීමට සිදුව ඇත. මේ අනුව මේ වසරේ ගෙවී ගිය මාස 05ක කාලය තුළදී ලංකාවේ සෑම දිස්ත්‍රික්කයක්ම කුමන හෝ ආපදාවකට ලක්වී ඇත. ආපදා කළමනාකරණ මධ්‍යස්ථානය මේ වසරේ ජනවාරි පළමු වන දින නිකුත් කළ දෛනික වාර්තාවට අනුව දිස්ත්‍රික්ක 05කට ඇතිවී තිබූ වියළි කාලගුණ තත්ත්වය නිසා පවුල් 85,500කට අයත් පුද්ගලයන් 273,224ක් පානීය ජල හිඟයකට මුහුණදී සිටියහ. වියළි කාලගුණයක් ඇතිවී තිබූ පුත්තලම, කුරුණෑගල, අනුරාධපුරය, මන්නාරම, වවුනියාව දිස්ත්‍රික්කවල වගා කටයුතුවලටද බලපෑම් එල්ල වී තිබූ අතර, මේ නිසා ජනජීවිතයටත් විශාල බලපෑමක් ඇතිවිය. 

මාර්තු පළමු වන දින වන විට පුත්තලම, කුරුණෑගල, මහනුවර, අනුරාධපුරය, පොළොන්නරුව, මන්නාරම යන දිස්ත්‍රික්ක 06 තුළ පවුල් 110,481කට අයත් පුද්ගලයන් 357,144ක් වියළි කාලගුණ තත්ත්වය නිසා පීඩාවට පත්ව සිටියහ. අප්‍රේල් පළමුවන දින වන විට මෙම දිස්ත්‍රික්ක 06ට අමතරව රත්නපුර, මුලතිව්, වවුනියා යන දිස්ත්‍රික්කවලටත් වියළි කාලගුණ තත්ත්වයේ බලපෑම් ඇතිවී තිබූ අතර, මේ අනුව දිස්ත්‍රික්ක 09ක පවුල් 134,165 කට අයත් පුද්ගලයන් 436,458ක් පීඩාවට පත්විය. 
මැයි පළමුවන දින වන විට අනුරාධපුර, කුරුණෑගල, පුත්තලම, අම්පාර, පොළොන්නරුව, මන්නාරම, මුලතිව්, වවුනියා, කිලිනොච්චි, ත්‍රිකුණාමලය,  යාපනය  යන දිස්ත්‍රික්ක 11 තුළ පවුල් 184,154කට අයත් පුද්ගලයන් 613,326ක් වියළි කාලගුණය නිසා පීඩාවට පත්ව සිටියහ. ඉන් දින 25කට පසු එනම් මැයි 25 වන දින ආපදා කළමනාකරණ මධ්‍යස්ථානය නිකුත් කළ දෛනික වාර්තාවට අනුව දිස්ත්‍රික්ක 20කට ඇතිවී තිබූ තද වැසි හා ගංගා පිටාරගැලීම් නිසා පවුල් 35,129කට අයත් පුද්ගලයන් 138,292ක් පීඩාවට පත්ව සිටි අතර, මිය ගිය ප්‍රමාණය 16කි. අවතැන් කඳවුරු 241ක් තුළ පවුල් 13,199කට අයත් පුද්ගලයන් 53,616ක් රඳවා තැබීමටත් සිදුවිය.

මැයි 28 වන දින වන විට පුද්ගල මරණ 23ක් සිදුවී තිබූ අතර, ආරක්ෂිත කඳවුරු තුළ පුද්ගලයන් 75,013 ත් රඳවා තැබීමටත් සිදුවිය. විනාශයට පත් නිවාස ප්‍රමාණය 5191කි. ජුනි 01 වන දින නිකුත් කළ දෛනික වාර්තාවට අනුව පුද්ගල මරණ 
26දක්වා ඉහළගොස් තිබූ අතර, විනාශයට පත් නිවාස ප්‍රමාණය 6700 ඉක්මවා තිබුණි. 

වර්ෂාවක් දෙකක් ඇතිවූ පමණින් පැවති වියළි කාලගුණ තත්ත්වය අවසන් වූවා යැයි කිව නොහැක. මන්දයත් වියළි කාලගුණ තත්ත්වය නිසා කුරුණෑගල පුත්තලම දිස්ත්‍රික්කවල කන්න 05කින් වගා කටයුතු සිදුකර නැත. මේ නිසා ගොවිතැන් කටයුතුවලින් ජීවත් වූ ජනතාව තම බඩට යමක් දමාගැනීම සඳහා නොවිඳිනා දුක් විඳිමින් සිටිති. වියළි සලාක යම් යම් ප්‍රමාණයන්වලින් ලබාදීම සිදුකළත්, ඒ තුළින් ජනජීවිතය  ගොඩනැගීමට හැකිවන්නේ නැත. මීට අමතරව මාසයක දෙකක කාලයක් පුරා ඇදහැලිය යුතු වර්ෂාව පැයක් දෙකක් තුළ ඇදහැලීම නිසා ගංවතුරෙන්, වැසි වතුරෙන් පීඩාවට පත් වූ ජනතාවගෙන් අති බහුතරයකගේ නිවාස හා නිවාස තුළ තිබූ වටිනා දේපළවලටත්,  රථවාහනවලටත් හානි සිදුවිය. 

පැයකින් දෙකකින් වැසි වතුරෙන් ගංගා ජලයෙන් ජනතාවට පීඩාවක් ඇති කිරීමට හැකි වුවත්, යළිත් ජනජීවිතය ගොඩනගා ගැනීමට ජනතාවට වසර 10ක් 15ක් දුක්විඳීමට සිදුවනු ඇත. සමහර පිරිසට ජීවිතය අවසන් වනතුරුම අහිමි වී ගිය දේපළ නිවාස යළි සකස්කර ගත නොහැකි වනු ඇත.

මැයි 31 වන දින නිකුත් කළ දෛනික වාර්තාවට අනුව පැවති අයහපත් කාලගුණ තත්ත්වය නිසා කුඩා හා මධ්‍ය පරිමාණ ව්‍යාපාරික ස්ථාන 307කට අලාභහානි සිදුව තිබෙන බවට සඳහන් කර තිබේ. ආණ්ඩුව පවසන ආකාරයට මෙම සියලුදෙනාටම රක්ෂණභාර අරමුදල හරහා වන්දි මුදල් ලබාදීමට නියමිතය. ආපදාවන්ට ලක්වූ ජනතාවට වන්දි  මුදල් ලබාදීම, වියළි සලාක ලබාදීම රජය විසින් සිදුකළ යුතු යුතුකම්ය.

එහෙත් ජනතාවට වන්දි මුදල් හා වියළි සලාක ලබාදීමෙන් සමස්ත රටේම ජනතාවට සුරක්ෂිතභාවයක් ඇතිවන්නේ නැත. සමස්ත ජනතාවටම සුරක්ෂිතභාවයක් ඇතිකිරීමට නම් ආපදාවන් වළක්වා ගැනීමට අවශ්‍ය මූලික කටයුතු සිදුකළ යුතුය. එම කටයුතුවල ප්‍රධානම කාරණා වන්නේ පරිසරයේ සමතුලිතතාව රැක ගැනීමට අවශ්‍ය කටයුතු කිරීමය. ඒ සඳහා වනසම්පත රැකගැනීම, තව තවත් ගස්කොළං සිටුවා වනවැස්මේ ප්‍රමාණය ඉහළ දැමීම, මධ්‍යම කඳුකරය ඇතුළු කඳු ආශ්‍රිත ප්‍ර‘දේශවල සිදුකරන විනාශකාරී ක්‍රියාමාර්ග නවතා දැමීම, ජලය බැස යන මාර්ග අවහිර කරමින් සිදුකරන සංවර්ධන කටයුතු නවතා දැමීම, වගුරුභූමි කඩොලාන පරිසරය රැකගැනීම ප්‍රධාන වශයෙන් සිදුකළ යුතුව තිබේ.

මේ සඳහා ආපදා කළමනාකරණ අමාත්‍යාංශය පෙරමුණ ගතයුතු අතර, වර්තමානයේදී ආපදා අමාත්‍යාංශය වාරිමාර්ග ජල සම්පත් අමාත්‍යාංශ තුනම එක් ඇමතිවරයෙකු යටතට පත්ව තිබෙන නිසා මෙම කටයුත්ත සිදුකිරීම එතරම් අපහසු වන්නේද නැත. සමස්ත රටටම සුරක්ෂිතභාවයක් ඇති කිරීමට පාලකයන්ට අවශ්‍යතාවක් තිබෙනවා නම් මෙම අමාත්‍යාංශයට ඉඩම් කෘෂිකර්ම වනජීවී වන සංරක්ෂණ විෂයන්ද එකතු කළ යුතුය. එසේ කළහොත් රට තුළ විධිමත් වැඩපිළිවෙළක් කිසිදු බාධාවකින් තොරව සිදුකළ හැකිය.
එහෙත් වර්තමානයේදී ඇමති විෂයන් බෙදා දීම තුළ එකිනෙකට පරස්පරතාවන් ඇතිවී තිබෙන අතර, මේ නිසා එක් අමාත්‍යාංශයක් යම් හොඳ වැඩක් කරන විට තවත් අමාත්‍යාංශයකට එයට විරුද්ධව කටයුතු කළ හැකිය. කෙසේ හෝ වර්තමාන විෂයභාර අමාත්‍ය දුමින්ද දිසානායක මහතාට ආපදාවන්ට ලක්වූ ජනතාවට වියළි සලාක වන්දි ලබාදෙන අතරතුර රටේ පවතින වැව් ජලාශ ඇතුළු ජල මූලාශ්‍ර සුද්ධ පවිත්‍ර කිරීමට අවස්ථාව හිමිවී තිබේ. එමෙන්ම ජලසම්පත් කළමනාකරණය අමාත්‍යවරයා යටතේ පවතින නිසා ජල සම්පත සුරක්ෂිත කර ගැනීමට අවශ්‍ය කටයුතු කිරීම හා ජල මූලාශ්‍ර ආශ්‍රිතව සිදුවන නීතිවිරෝධී ක්‍රියා නවතා දැමීමටත් අවස්ථාව හිමිව ඇත. 

වර්තමාන විෂයභාර අමාත්‍යවරයා බලයට පත්වූ වහාම %ආපදාවට පෙර සූදානම^ වැඩසටහන දිස්ත්‍රික්ක 12ක ක්‍රියාත්මක කළ අතර, මේ නිසා පසුගිය දිනවල සිදුවූ අයහපත් කාලගුණ තත්ත්වයෙන් සිදුවීමට ගිය මහා විනාශය විශාල ලෙස අඩුකර ගැනීමටත් හැකි විය. පීඩාවට පත් ජනතාවගේ හා ආරක්ෂිත කඳවුරුවල සිටි ජනතාවගේ සුව දුක් විමසමින් අවශ්‍ය කටයුතු සිදුකළ අතර, ත්‍රිවිධ හමුදාව, පොලීසිය හා රාජ්‍ය නිලධාරීන්ගේ සහයද නිවැරදි ලෙස නිවැරදි අවස්ථාවේදී ලබා ගැනීමට කටයුතු කළේය. 
දැන් සිදුකළ යුතුව තිබෙන්නේ %ආපදාවට පෙර සූදනම^ වැඩපිළිවෙළ ක්‍රියාත්මක කරවන අතරතුර ආපදාවක් නොවීමට රට සුරක්ෂිත කිරීමේ වැඩපිළිවෙළක් ක්‍රියාත්මක කිරීමයි.

එසේ නොවුණහොත් ආපදා කළමනාකරණ අමාත්‍යාංශයට, ආපදා සහන මණ්ඩලයට හා ආණ්ඩුවලට සිදුවන්නේ හැමදාම ජනතාවට නියං සහනාධාර, ගංවතුර සහනාධාර, කඳු නායයාම්වලට ලක්වූවන්ට සහනාධාර ලබාදෙමින් සිටීමටය.