Category Archives: entertainment

මම තීරණය කළා මෙය මගේ අවසන් නිර්මාණය කියලා

පනස් වසරක කාලය තුළ නිර්මාණ කිහිපයකටම හඬ දායකත්වය ලබාදුන් ඇය ප්‍රවීණ ගායිකා දමයන්ති ජයසූරියයි. ඇය විසින් ගායනා කරන ලද බෞද්ධ ගීත ඇතුළත් %සිත නිවන ගී^ නම් සංයුක්ත තැටිය ජනගත කිරීම මෙම මස 23 වැනිදා සවස  5.30ට බෞද්ධ සංස්කෘතික මධ්‍යස්ථානයේදී සිදුවෙයි. ඇය හා මේ කතා බහ ඒ ගැනය.


66B7CAEB

Q කාලෙකට පසුව තමයි ඔබ සංයුක්ත තැටියක් එළිදැක්වීම සිදුකරන්නේ. මේ සංයුක්ත තැටිය එළිදැක්වීම පිළිබඳව මුලින්ම කතා කරමු

මේ සංයුක්ත තැටියේ අන්තර්ගත වෙන්නේ බෞද්ධ ගීත. වෙසක් පොහොය නිමිති කරගෙන තමයි මේ සංයුක්ත තැටිය එළිදක්වන්නේ. මම මේ සංයුක්ත තැටිය නම්කර තිබෙන්නේ ‘සිත නිවන ගී’ ලෙස. සියඹලාපේ සිතුම් පියස බෞද්ධ මධ්‍යස්ථානයේ පූජ්‍ය හන්තානේ ධම්මගවේෂී ස්වාමීන් වහන්සේ තමයි මෙයට මූලිකත්වය ගෙන කටයුතු කළේ. ඒ වගේම මගේ කල්‍යාණ මිතුරියන් පිරිසක් ඉන්නවා, ඔවුන්ගේ මූල්‍ය දායකත්වයෙන් තමයි මේ නිර්මාණ සිදුවුණේ. මේ සංයුත්ක තැටිය එළිදක්වන දින පූජ්‍ය මහාචාර්ය පාතේගම ඥාණිස්සර ස්වාමීන් වහන්සේත්, කථිකාචාර්ය අනුරාධා සුදම්මිකා මෙහෙණින් වහන්සේත් මෙහි දේශන දෙකක් පවත්වනවා. සංස්කෘතික දෙපාර්තමේන්තුවේ අනූෂා ගෝකුල මැතිනිය මට ගොඩක් උදව් කළා. එදින ජානක ෆොන්සේකා ප්‍රමුඛ වාද්‍ය වෘන්දය සංගීතය සපයනවා. සඳමාලි හේවානායක මෙහි නිවේදන කටයුතු සිදුකරනවා.

Q මේ සංයුත්ක තැටියේ අන්තර්ගත ගී නිර්මාණ ගැන කතා කළොත් මේ ගීත මෑත කාලයේ නිර්මාණය වූ ගීතද

මම එකතු කරගත් බෞද්ධ ගී නිර්මාණ කිහිපයක්ම තිබුණා. නමුත් සංයුක්ත තැටියක් ලෙස එළිදැක්වුණේ නැහැ. ඒ ගීතත් එක්ක නව ගී නිර්මාණ කිහිපයකුත් මේ සංයුක්ත තැටියට අන්තර්ගත වෙනවා. පූජ්‍ය රඹුක්කන සිද්ධාර්ථ ස්වාමීන් වහන්සේ, මහාචාර්ය සුනිල් ආරියරත්න, ආචාර්ය ප්‍රනීත් අබේසුන්දරයන්, පුජ්‍ය මඩපාත දම්මසාර හිමි, පූජ්‍ය වෙන්නප්පුවේ චන්දානන්ද හිමි, ත්‍රිකුණාමලේ ආනන්ද අනුනායක ස්වාමීන් වහන්සේ, ජයම්පතී අල්ගම, කුලරත්න ආරියවංශ  තමයි මෙහි ගීත රචනා කර තිබෙන්නේ. ආචාර්ය රෝහණ වීරසිංහ, එච්.එම්. ජයවර්ධන, ආචාර්ය ලයනල් අල්ගම, ආචාර්ය නන්දා මාලනී, ඉන්ද්‍රජිත් මිරිහාන, එම්.ආර්. චූලසිංහ මෙහි සංගීතය නිර්මාණය කළා.

Q ‘සිත නිවන ගී’ සංයුක්ත තැටියේ ගීතවල අන්තර්ගතය කෙබඳුද  

බෞද්ධ කාන්තාව ගැන, ස‘ඝමිත් මෙහෙණින් වහන්සේ ගැන, ශ්‍රී මහා බෝධීන් වහන්සේ, සිදුහත් කුමරු ඇතිදැඩි කළ ගෝතමී දේවිය ගැන ගීතයක් වගේම සියලු දේ අත්හැර ගිය මෙහෙණින් වහන්සේලා ගැන ගීතයක්, සෝමාවතී චෛත්‍යය ගැන, දන්ත ධාතූන් වහන්සේ ගැන වගේම මවු ගුණ ගැන ගීතයක් තිබෙනවා. මේ ගීත එකිනෙකට වෙනස් ගීත.

Q මේ ගීත සංයුක්ත තැටියක් හරහා සමාජගත කරන්න උත්සාහ කරන්නේ මාධ්‍ය මගින් මේ ගීතවලට ඉඩ නොලැබීම නිසාදB5D45315

මේ තුළ මූල්‍යමය අරමුණක් නැහැ. මුදල් නෙවෙයි පළමුවැනි අරමුණ. මේ ගීත අහලා මිනිසුන් නිවී පහන් වේවා කියන අරමුණ පමණයි අපිට තිබෙන්නේ. අපි මේ දෙය සිදුකළේ ඒ හැඟීමෙන්. මෙය අපෙන් සිදුවිය යුතු පිං කටයුත්තක් කියලා මම හිතුවා. මම මේ ගීත මාධ්‍යයට ලබා දුන්නා. එහෙත් අපේ රටේ ඇතිව තිබෙන තත්ත්වය දෙස බලන්න. වෙසක් එකට පොසොන් එකට පමණයි බෞද්ධ ගීත, බුදුගුණ ගීත ඇහෙන්නේ. එහෙම නෙමෙයි සිදුවිය යුත්තේ. උදේ හවස එවැනි ගීත වාදනය කළොත් මිනිසුන් නිවෙයි. හන්දියක් හන්දියක් ගානේ වෙසක් එකට විතරද බුදුගුණ ගීත ඇහෙන්න ඕන. මේක බෞද්ධ රටක්නේ. දේශාභිමාන ගීත වගේම බුදුගුණ ගීත වාදනය කරනවා නම් හොඳයි. ‘බෞද්ධයා’ හා ‘ශ්‍රද්ධා’ වැනි නාළිකාවල නම් මේ ගීත විකාශය වෙනවා. මාධ්‍යවල ගීත වාදනය කළයුතු ප්‍රමිතියක් නැහැ. අපිට හිතෙන හිතෙන විදිහට මාධ්‍ය තුළ විකාශය කරන්නත් බැහැනේ. අපි නිර්මාණයක් කළාම, ඒ නිර්මාණය හොඳ නම් ප්‍රචාරය කිරීම මාධ්‍යයේ වගකීම. හැමවිටම අපිට ඇහෙන්නේ ඝෝෂාකාරී සංගීතයක්. මිනිසුන් හරිම කලබලයි. ඒ නිසා මිනිසුන් සන්සුන් විය යුතුයි කියලා මම හිතනවා. මනස සන්සුන් කරගත යුතුයි කියලා මම හිතනවා. මම හිතුවා මගේ හඬින් යම් දෙයක් කරන්න පුළුවන් කියලා. එය තමයි මම සිදුකළේ.

Q වසර පනහක පමණ කාලයක් සංගීත ක්ෂේත්‍රය තුළ නිර්මාණ කටයුතු සිදුකළත් ඒ නිර්මාණවලට අද ඉඩක් නැද්ද

මම හැටේ දශකයේ අගභාගයේ තමයි සංගීතය ආරම්භ කළේ. එහිදී ස්වදේශීය සේවය හා වෙළෙඳ සේවය පමණයි තිබුණේ. නමුත් මාධ්‍ය වැඩි වෙන්න වැඩි වෙන්න ඒ අවස්ථාවන් ක්‍රමයෙන් අඩුවෙලා ගියා කියලා තමයි මට හිතෙන්නේ. මිනිසුන්ගේ රසවින්දනය සඳහා ගීත ඉදිරිපත් කරන මාධ්‍යවල පමණක් මේ ගීත ඉඳහිට ඇහෙනවා. එවන් තත්ත්වයක් තමයි අද ඇතිව තිබෙන්නේ.

Q මෙවැනි වාතාවරණයක් පවතින නිසාද අද වන විට සක්‍රීයව නිර්මාණ කටයුතු සිදු නොකරන්නේ

මම හිතන්නේ මේ ක්ෂේත්‍රයේ ඉන්න බොහෝ ප්‍රවීණ නිර්මාණකරුවන්ට ඒ කලකිරීම තියෙනවා ඇති. අපි නිර්මාණ කළාට එය ප්‍රේක්ෂකයන්ට අහන්න ලැබෙන්නේ නැහැ කියන හැඟීම හැම කෙනෙක් තුළම ඇති වෙනවානේ. නිර්මාණකරුවා නිර්මාණයක් කරන්නේ ප්‍රේක්ෂකයාට හෝ ශ්‍රාවකයාට. එහෙත් එය සිදුකරන්න බැරිනම් අපිට මාධ්‍යවලට ගිහින් දිගින් දිගටම ඉල්ලීම් කරන්න බෑනේ. ඒ වගේම ගීත ප්‍රචාරය කරන්න වෙන වෙන ක්‍රම විධි අනුගමනය කරනවානේ. අපිට එහෙම කරන්න බැහැ. අපි නිර්මාණ කරනවා, එය ප්‍රචාරය කිරීමේ වගකීම තිබෙන්නේ ආයතනවලට.

Q ඒ වගකීම ඉටුනොවනවා කියා සිතන  නිසාද  නිර්මාණ සිදුකරන්නේ නැත්තේ

ඇත්තටම මම දැන් නිර්මාණ කරන්නේ නැහැ. මම තීරණය කළා මෙය මගේ අවසාන නිර්මාණය කියලා. මෙතනින් පසු නිර්මාණ කිරීමේ බලාපොරොත්තුවක් නැහැ.

Q ඔබ එසේ සඳහන් කළත් ඔබ සිදුකළ නිර්මාණ කිහිපයකටම ඇගයුම් ලැබුණා

ක්ෂේත්‍රයේ හිටියා ඇති කියන හැඟීමෙන් තමයි මම නිර්මාණ කරන්නේ නැත්තේ. අලුත් නිර්මාණකරුවන් දැන් ඉන්නවා. මම ගීත අහනවා, රසවිඳිනවා, හොඳ දේවල් අගය කරනවා. එච්චරයි. මම මේ කිසිදෙයක් තදින් අල්ලාගෙන නැහැ. ඒ නිසා මට ඉන් ඉවත්වෙන්න පුළුවන්. මම තෘප්තිමත්. ගොඩක් නිර්මාණ මම සිදුකළේ නැහැ තමයි. නමුත් මම ළමා මණ්ඩපයේ සිට සරල ගීත, චිත්‍රපට ගීත, ටෙලිනාට්‍ය ගීත, වේදිකා නාට්‍ය ගීත යන හැම ක්ෂේත්‍රයකම කටයුතු කරලා තිබෙනවා. ඔබ කිව්වා වගේ මම සම්මාන ලබා තිබෙනවා. ඒ නිසා තවත් ඕන කියන හැඟීම මට නැහැ. මම කළ නිර්මාණවල හොඳ නරක විචේචන සතුටින් බාරගත්තා. මගේ ආගම සඳහා මගෙන් කළයුතු දේත් කළා. එය පිළිගැනීම හෝ ප්‍රතික්ෂේප කිරීම රසික රසිකාවියන්ට භාරයි.

නුවර එළිය අයිස් නිර්මාණ දැක්ම

පිරිසුදු ජලයෙන් ලබා ගත් අයිස් කැටවලින් සකස් කරන ලද නිර්මාණ දැක්මක් නුවරඑළිය ග්‍රෑන්ඩ් හෝටලය ඉදිරිපිටදී පැවැත්විණි.

නුවරඑළිය වසන්ත සමය වෙනුවෙන් මෙය සංවිධානය කර තිබූ අතර, දිවයිනේ ප්‍රධාන පෙළේ හෝටල් 10ක සූපවේදීහුඊට එක්ව සිටියහ.

කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලා පරිශ්‍රයේදී පිහිටිචෙඑමිගිල් ආයතනයේ වසර දෙකකට වරක් මෙම තරගය පැවැත්වෙන අතර, එය මින් ඉදිරියට සෑම අවුරුද්දකම නුවරඑළිය වසන්ත සමය තුළග්‍රෑන්ඩ් හෝටලයේදී පැවැත්වීමට තීරණය කර ඇත.

මෙම තරගය දැකබලා ගැනීමට දෙස්විදෙස් සංචාරකයන් ඇතුළු විශාල පිරිසක් එක්ව සිටියහ.

SAM_0506 SAM_0510 SAM_0513 SAM_0516 SAM_0517

නුවරඑළිය – ඔස්ටින් නානායක්කාර

මේ ක්‍රමය කණපිට පෙරළන්න පුළුවන්

වසර 26ක් තිස්සේ වේදිකාවේ මෙන්ම ටෙලිනාට්‍ය සහ සිනමා මාධ්‍යයේද කටයුතු කරන චමිලා පීරිස්, මේ දිනවල වේදිකාගත වන ‘හැම්ලට්’, ‘සාදය මාරයි සල්ලි හමාරයි’ ආදී වේදිකා නාට්‍යවල මෙන්ම ‘සහෝදරයා’ ටෙලිනාට්‍යයේද කැපී පෙනෙන චරිතයක් නිරූපණය කළ ප්‍රවීණ ශිල්පිනියකි. ඇය තවමත් සමාජ මාධ්‍ය ඔස්සේ කතාබහට ලක්වන ‘සහෝදරයා’ ටෙලිනාට්‍යයේ අධ්‍යක්ෂවරයා වන සම්මානනීය තිර රචක නාමල් ජයසිංහගේ බිරිඳයි. මේ ඇය සමගින් කළ කෙටි කතාබහක සටහනකි.   


_MG_2149

Q කලාවම ජීවන විලාසය කරගත් ස්වාමිපුරුෂයකු සමගින් ජීවත් වීමේ අත්දැකීම කොහොමද දකින්නේ

මම ඒකට කැමති කෙනෙක්. ඒක මම ඔහුව දැක්ක කාලෙ ඉඳන්ම තිබුණු දෙයක්. අනික මගේ ජීවිතෙත් ඒ වගේ. කලාවයි, පෞද්ගලික ජීවිතෙයි කියල දෙකක් මට නැහැ. ඒත් නිර්මාණකරණය තුළ යෙදෙන දර්ශනයට වඩා පරස්පර දර්ශනයක තමන්ගේ ජීවිතය ගෙන යන කෙනෙකුට නම් හිතෙන්න පුළුවන් මේක ඉතා අමාරු කටයුත්තක් කියලා. හැබැයි මට එහෙම නැහැ. මම ඔහුගේ ඒ ගතියට ආදරය කරපු කෙනෙක්.

Q ඒ කියන්නේ රූපණ ශිල්පිනියක් විදිහට ඔබ මෙතෙක් ආ ගමන ගැන සතුටුයි

ඔව්. මම දන්නවා මට යමක් කරන්න පුළුවන් කියලා. මගේ පරාසය ගැන අනික් අය කියනවා වගේම මමත් අඳුනගෙන තියෙනවා. විශේෂයෙන් මට වේදිකාව තුළ හොඳ චරිත ලැබිලා තියෙනවා. මම දන්නවා ඒ නිසා මට තවදුරටත් වැඩ කරන්න පුළුවන් කියලා. ආපසු හැරිල බැලුවත් මම යෙදුණු කටයුතු ගැන මට හුඟක් සතුටුයි.

Q ’කලාව’ වෙනුවෙන් පාලනතන්ත්‍ර තුළ ලබාදුන් ස්ථානය ගැන සෑහීමකට පත්වෙන්න පුළුවන්ද

බැහැ. ඉතාම පහළ ස්ථානයක් තමයි එදා සිටම ඔවුන් කලාව වෙනුවෙන් ලබාදුන්නේ. එවැනි පිරිසකට තමයි අපි එදා සිටම බලය දුන්නෙත්. අනික තාමත් අපට රූපණය හැදෑරීමට පවා නිශ්චිත ස්ථානයක් නැහැ. වේදිකා රූපණයේ අභ්‍යාස සඳහා වේදිකාවක් හෝ පැවතුණත් තිර රූපණය සඳහා තාමත් එවැනි නිශ්චිත අභ්‍යාසගත අවකාශයක් නැහැ. ඒ නිසා උගන්වන්න දන්න මිනිස්සුත් අඩුයි.

Q ඒත් ගෝලීය සමාජයක ජීවත් වන අපට එදාට වඩා තාක්ෂණයෙන් අනූන විශ්වවිද්‍යාල පද්ධතියක් අද තියෙනවා

මං හිතන්නේ නැහැ ඒ තුළ දියුණු සාර්ථක වැඩපිළිවෙළක් තියෙනවා කියල. මම කිව්වේ නාට්‍ය කලාවට සාපේක්ෂව. මං හිතන්නේ නැහැ විශ්වවිද්‍යාලවල සාර්ථක විෂය පද්ධතියක්, සාර්ථක අධ්‍යාපන ක්‍රමයක් තියෙනවා කියලා. අනික කොතරම් හොඳ ගුරුවරුන් ඒ ස්ථානවලට ගියත්, ‍කොයිතරම් උත්සාහ කළත් වැඩක් වෙන්නේ නැහැ. මොකද මේ සියල්ලම පාලනය වෙන්නේ රාජ්‍ය පාලන පද්ධතියක් ඇතු‍ළේ. අනික සමහරු නාට්‍ය හා රංග කලාව වගේ කලා උපාධි කරන්නේ වෙන මුකුත් බැරි හින්දා. සමහරු ප්‍රසිද්ධ වෙන්න පුළුවන් කියල හිතාගෙන කරනවා. ඒත් හුඟක් දෙනෙක් නාට්‍ය හා රංග කලාව විෂය හදාරන්නේ රැකියාවක් විදිහට ගුරු වෘත්තියේ යෙදෙන්න බලාගෙන. සියයට 95කට වඩා ඉන්නේ එහෙම පිරිසක්. සරච්චන්ද්‍ර යුගයේදී විශ්වවිද්‍යාලයට විද්‍යාර්ථීන් ආවේ ඔවැනි අරමුණු ඇතුව නෙමෙයි. ඔවුන්ට ඒ වෙද්දිත් ලෝක සාහිත්‍යයේ ඇසුර ලැබුණා. නාට්‍යකරණයේ ඔවුන් යෙ‍දිලා හිටියා.‍ හොඳ ඉංග්‍රීසි දැනුමක් තිබුණා. දියුණු වාමාංශික අදහස් දැරුවා. ඒ නිසයි දියුණු විශ්වවිද්‍යාල සංස්කෘතියක් ඒ කාලේ නිර්මාණය වෙලා තිබුණේ. 

Q කලාවට අවශ්‍ය කරන්නේ රාජ්‍ය මැදිහත් වීමක්දQ  නිදහසේ ගලා යාමක්ද

මැදිහත් වීමක් අවශ්‍යයි. මොකද ලබාදුන් නිදහස වල්බූරු නිදහසක් විදිහට භාවිත කරන්න ඉඩ දෙන්න බැහැ. උදාහරණයක් විදිහට විදෙස් ටෙලිනාට්‍ය ආනයනය කිරීම සීමා කිරීමට රාජ්‍ය මැදිහත් විය යුතුයි. හැබැයි එතැනදි ඊට දායක වන දේශීය කලාකරුවන් අසාධාරණයකට ලක් කළ යුතුයි කියල මම කියන්නේ නැහැ. එක් නාළිකාවකට එක් විදෙස් ටෙලිනාට්‍යයක් පමණක් ආනයනය කළ හැකි ආකාරයේ මැදිහත් වීමක් රාජ්‍ය මට්ටමෙන් සිදුවිය යුතුයි. එතැනදි ඒවායේ තේමාවලින් ප්‍රේක්ෂකයාට වෙන හානිය ගැනත් සොයා බලා ආනයනය කිරීමට අවසර ලබාදෙන්න පුළුවන් නම් තමයි එය වඩාත් වටින්නේ. එවිටයි ඒ මැදිහත් වීම සාධාරණ වෙන්නේ. 

_MG_2136

Q කෙසේනමුත් දියුණු සන්නිවේදන ලෝකයක ජීවත්වන අපට කුඩා දරුවෙක් නැරඹීම නිල් චිත්‍රපටයක් පවා වාරණය කිරීම අසීරුයි

නිරුවත කියන්නේ අපි නිරුවත් වුණාම දකින ශරීරයට. මම නම් මගේ දරුවට කියලා දීලා තියෙන්නේ එහෙමයි. ඒකෙ වෙනම ආශ්චර්යයක් නැහැ. සොබාදහම මනුෂ්‍යයා නිර්මාණය කිරීමේදී ගොඩනගන ලද අවයව තමයි එතැන තියෙන්නේ. ඒ නිසා මෙතැන තියෙන්නේ ලංකාවේ දියුණු ලිංගික අධ්‍යාපනයක් නොමැතිකමේ ගැටලුවක්. ඒ නිසා මම නම් ඒ අධ්‍යාපනය මගේ දරුවට දීලයි තියෙන්නේ. අනික මිනිස්සු කොහොමත් සාමාන්‍ය ජීවිතේ තමන් කරන දේම ‍අනෙකා කරනවා දකින්න ආසයි. ඒක සාමාන්‍ය මනුෂ්‍ය ස්වභාවය. ඒ රූපගත කරන මැජික් එකට අපි කැමැති ඒකයි. සිනමාවට අපි එච්චර ආදරය කරන්නෙත් ඒ මැජික් එක නිසා. අනික මම හිතන්නේ නැහැ නිල් චිත්‍රපට බැලීම වාරණය කළ යුතුයි කියලා. මොකද ඒක වෙන රසයක්. වෙන ඇබ්බැහියක්. ඔවුන් හොඳ නිර්මාණ රසවිඳින්නේ නැහැ කියල ඒකෙන් කියන්න බැහැ. ඒ නිසා ලිංගිකත්වයට වඩා වෛරය, ක්‍රෝධය, සියදිවි නසා ගැනීම වැනි දේ එන්නත් කරන නිර්මාණ සමාජගත කිරීම තමයි අතිශයින් භයානක. ඒ නිසයි පසුගිය කාලයේ සියදිවි නසා ගැනීම් වැනි සිදුවීම් ඉහළ ගියේ. ඒ නිසයි මම කියූ වාරණය අවශ්‍ය වෙන්නෙත්.

Q ඒ කියන්නේ දියුණු සංස්කෘතික මිනිසෙක් නිර්මාණය කිරීමේ වගකීම කරපිට පැටවෙන්නේත් කලාකරුවාගේද

අනිවාර්යයෙන්. කලාව නැතුව කිසිම රටක් දියුණු වෙන්නේ නැහැ කියන්නේ ඒකයි. සංස්කෘතිකමය වශයෙන්, ආර්ථිකමය වශයෙන් රටක් දියුණු කරන්න නම් පළමුව මනුෂ්‍යයාගේ පරිකල්පනය දියුණු කළ යුත්තේ ඒ නිසයි. මොකද සංස්කෘතික මිනිසෙක් කියල කියන්නේ අනෙකා ගැන හිතන, හොඳ පරිශීලනයක් තියෙන, බුද්ධිමත්ව හිතන, ඉදිරි අනාගතයක් ගැන හිතන, පරිසරය ගැන හිතන, ඉදිරි පරම්පරාව ගැන හිතන කෙනෙක්ට. ඒ හින්දයි රටක අවධානය ඒ කරා යොමු විය යුත්තේ. ඒ නිසා අවුරුදු 25කට එහා සංවර්ධනයක් ගැන හිතලා දැන් නිශ්චිත ක්‍රමයකට දරුවෝ ටික හැදුවොත්, තව අවුරුදු 25කින්, 50කින් අපට හොඳ පරම්පරාවක් නිර්මාණය කරගන්න පුළුවන්. මේ ක්‍රමය කණපිට පෙරළන්න පුළුවන්.  

Q ’සහෝදරයා’ ටෙලිනාට්‍යය තුළින් ටෙලිනාට්‍ය කලාව සිනමාත්මක කිරීමේ උත්සාහයක් නේද දැරුවේ

මීට කලින් අපිට එවැනි දියුණු ටෙලිනාට්‍ය සංස්කෘතියක් තිබුණා. එවැනි ටෙලිනාට්‍ය නැරඹීමේ පුරුද්දක් බොහෝ දෙනෙකුට නොතිබීම නිසයි බොහෝ දෙනෙක්ට මේ පිළිවෙළ අලුත් අත්දැකීමක් වෙන්නේ. මොකද සිනමාවෙත් දැන් එවැනි සිනමාත්මක පිළිවෙළක් බො‍හෝ වෙලාවට නැහැ. ඒ නිසා මෙවැනි සිනමාත්මක ටෙලිනාට්‍ය නිර්මාණය කිරීමේ වරදක් තියෙනවා කියලා මම නම් හිතන්නේ නැහැ.

Q ඒ කියන්නේ වත්මන් ටෙලිනාට්‍ය සංස්කෘතිය තුළ රූපණ ශිල්පීන්ට සිදුවෙලා තියෙන්නේ ඉඩ පිරවීමක්ද

ඔව්. එහෙම තත්ත්වයක් තියෙනවා. ඒත් මම ඒකට දෝෂාරෝපණ නගන්නේ නැහැ. මොකද මම පවතින ක්‍රමය තේරුම් අරන් ඉන්න කෙනෙක්. ඒ නිසා මම දන්නවා මේක තනි පුද්ගලයෙකුට වෙනස් කරන්න බැහැ කියලා. අනික හොඳම නිර්මාණයක් එනකම් මම රූපණයේ නොයෙදී හිටියොත් සමහරවිට මට කවදාවත් නිර්මාණයක් නොලැබෙන්න වුණත් පුළුවන්. ඒ නිසා මට ලැබෙන චරිතය වඩා හොඳින් කිරීමෙන් තමයි මම සතුටු වෙන්නේ. ඒකෙන් තමයි මම මාව පරීක්ෂා කර ගන්නේ. මොකද 
මට කාත් එක්කවත් තරගයක් නැහැ. අරගලය තියෙන්නේ මං එක්ක විතරයි.

_MG_2196

 

අද හැදෙන මියුසික් වීඩියෝ ගැන කතාබහක්

ලාංකේය ගීත සාහිත්‍යය සහ සංගීත ක්ෂේත්‍රය තුළ විවිධ කාලයන් තුළදී විවිධ වෙනස්කම් සහ විවිධ පෙරළීන් සිදුව තිබේ. සංගීතය සහ තාක්ෂණය එකිනෙක සංයෝජනය වීමේ වේගය වැඩිවීමට සාපේක්ෂව පසුගිය දශක දෙක තුළ සංගීත ක්ෂේත්‍රයේ සිදු වූ නිරන්තර වෙනස්කම් හේතුවෙන්ම මේ වනවිට ඒ පිළිබඳ පුළුල් සංවාදයක් ගොඩනැගී තිබේ. විශේෂයෙන්ම ගීත රූප රචනා කලාවේ මෑතකදී සිදු වූ වෙනස්කම් සහ ඒ හරහා ගොඩනැගුණු නව ප්‍රවණතා ඒ අතර ප්‍රධාන වෙයි. එනිසාම අපි වර්තමානයේ නිර්මාණය වන ගීත රූප රචනා සම්බන්ධයෙන්, මෙරට සංගීත ක්ෂේත්‍රයේ නියුතු විවිධ පාර්ශ්ව කිහිපයක අදහස්  විමසා සිටියෙමු. 



කලාව අවතැන් වෙච්ච තැන හැමදේම විනාශ වෙනවා  - අමරසිරි පීරිස්

අපේ කාලේ ගීතවල සංවරකමක් තිබුණා. ඉතිහාසයේ ඉඳන්ම එහෙමයි. තාක්ෂණේ දියුණුවත් සමග උදාවෙච්ච තත්ත්වයක්නේ මේක. ශ්‍රව්‍ය මාධ්‍ය පාවිච්චි කරපු අපිට ඔය කිසිම ප්‍රශ්නයක් තිබුණේ නැහැ. ඒ ගීත හොඳට වින්දා, ඒ ගීත අහපු අය හොඳ පරිකල්පනයක් ඇතිකර ගත්තා. ඒ 
ගීත වලට තමා තුළින් කිසියම් රූපයක් මවාගෙන රසවින්දා. ඉතිං ඒවාට බොහෝ සංවරකමින් යුතු විශාල ආධ්‍යාත්මික පසුබිමක් තිබ්බා. තාක්ෂණයේ දියුණුවත් සමග නොයෙක් නොයෙක් ආකාරයේ වෙනස්කම් වෙන්න ගත්තා. මම පෞද්ගලිකව හිතනවා ලෝකයේ හැමදෙයක්ම වෙනස් වෙනවා, දියුණු වෙනවා. ඉතිං කලාවත් එහෙමයි. තමන්ගේ හිත තමයි මෙතන ප්‍රධාන දේ. මේ ක්ෂේත්‍රයේ ඉන්න අය කල්පනා කරන්න ඕන වර්තමානේ දෙයක් ඉදිරිපත් කරනවා නම් එය කෙසේද ඉදිරිපත් කරන්න ඕනේ කියලා.

අද ඒක සෙල්ලමක් වෙලා තියෙන්නේ. කිසිම දෙයක් ගණන් ගන්නේ නැහැ. ඔය මොන දේ දැම්මත් විඳින කෙනෙක් ඒක විඳියි. ඒක තුළින් විශාල අසාධාරණයක් සමාජයට වෙනවා. කෘතඥ රසික පිරිසගේ අධ්‍යාත්මය වෙනත් පැත්තකට යන්න පුළුවන්. ඒවා තුළින් ලොකු සමාජ පරිහානියක් වෙන්නත් පුළුවන්. අපි මේ අත්දකින හැමදෙයක්ම වෙන්නේ ඒ තුළින් තමයි. කලාව අවතැන් වෙච්ච තැන හැමදේම විනාශ වෙනවා. තමන්ගේ ජාතිය ගැන, රට ගැන මිනිස්සුන්ට හිතන්න පතන්න බැරිවෙනවා. උන්හිටි තැන අමතක වෙන කාලයක් උදා වෙනවා. ඔය වගේ විකාර දේවල් නිසා තමයි අද මේ දේවල් රටට වෙලා තියෙන්නේ. මම නම් දකින්නේ ඒ දේවල යම්කිසි පාලනයක් තියෙන්න ඕන කියන එකයි. ඒක වෙන්නෙ නැහැ. එහෙම වෙයි කියල හිතාගන්නත් අමාරුයි. කවුරු මොනවා කිව්වත් සමාජ පරිහානියක් විශාල වශයෙන් වෙනවා. මම කියන්නේ නැහැ පැරණි දේවල් මත්තෙම ඉන්න ඕන කියලා. කිහිපදෙනෙක් කරන මේ දේ නිසා සිදුවෙන දේ හිතාගන්න බැහැ. හොඳ සංස්කෘතියක් තිබ්බ රටක් මේක. එහෙම දේවල් විනාශ වෙන්න දෙනවද නැද්ද කියලා තීරණය කරන්න ඕන වර්තමාන පරම්පරාව. 

මේ අඩනිරුවත් දර්ශන දාන එක නම් ක්ෂේත්‍රය  විනාශ කිරීමක් -  ශෂිකා නිසංසලා

ගීතයකට මියුසික් වීඩියෝවක් කරන එක එක පැත්තකින් අසාධාරණයක්. සින්දුවක් අපි රසවිඳින්නේ තම තමන්ගේ අත්දැකීම් එක්කනේ. ඉතිං ඒක නිසා පුළුවන් නම් සිංදුවේ තේරුමට ගැළපෙන්න, සිංදුවේ තේරුම අපිට තව ටිකක් තේරෙන විදිහට කරන විෂුවල්වලට තමයි මම කැමති. ඇත්තටම කියනවා නම් මේ අඩනිරුවත් දර්ශන දාන එක නම් ක්ෂේත්‍රය විනාශ කිරීමක්. සින්දුවේ තේරුමටවත්, සින්දුව ජනප්‍රිය කරගන්නවත් නෙමෙයිනේ අරමුණ වෙලා තියෙන්නේ. යූටියුබ් එකේ විව්ස් වැඩිකරගෙන සල්ලි හම්බ කරගන්න එක තමයි ඒ අයගේ පරමාර්ථය වෙලා තියෙන්නේ. මිනිස්සුන්ට හොඳ දෙයක් දෙන්නවත්, රසවිඳින්න පුළුවන් නිර්මාණයක් කරන්නවත් නෙමෙයි ඒ අයගේ අදහස වෙන්නේ. ඒ වගේ වෙන අරමුණක් තියෙන අය තමයි අඩනිරුවත් දර්ශන දලා වීඩියෝ නිර්මාණය කරන්නේ. ගීතයක විෂුවල් එකක් නැතිව තමන්ගේ හිතේ තියෙන දෙයත් එක්ක රසවිඳින්න පුළුවන් නම් හොඳයි. අපේ අත්දැකීම් එක්ක මැවෙන දේ තමයි හොඳම රූප රචනය වෙන්නේ. රූපවාහිනී මාධ්‍ය තුළ ගීතයක් ප්‍රචාරය කරගන්න අපටත් විෂුවල් එකක් කරන්න වෙනවා. ඒක නිසා තමයි මියුසික් වීඩියෝ කියන දෙයට මෙච්චර ඉල්ලුමක් හැදිලා තියෙන්නේ. 

ගායකයා, තනු නිර්මාණකරුවා, පදරචකයා අදක්ෂ නම් තමයි නිරුවත යොදලා මියුසික් වීඩියෝ කරන්නේ  - නොයෙල් රාජ්

මේ කාරණාවට නම් මම තදින්ම විරුද්ධයි. සිංදුවක් ජනප්‍රිය කරන්න නිරුවත පෙන්වන්න ඕනේ නැහැ. ඒ අධ්‍යක්ෂකවරයාගේ හරි, නිෂ්පාදකයාගේ හරි තියෙන නිරුවත වහගන්න තමයි වෙනත් කාගේ හරි නිරුවත පෙන්වන්නේ. ගායකයෙක්ගේ හෝ එම සංගීත නිර්මාණකරුවාගේ හැකියාව පෙන්වන්න මියුසික් වීඩියෝවකට නිරුවත අවශ්‍ය වෙන්නේ නැහැ. ඔවුන්ගේ දක්ෂකම තමයි එම ගීතය තුළින් එළියට එන්න ඕනේ. නැතුව නිර්මාණ කරන අඩනිරුවත් මියුසික් වීඩියෝව මගින් නෙමෙයි. ඒ ආකාරයේ මියුසික් වීඩියෝ කරන්න ඕනේ ගායකයා, තනු නිර්මාණකරුවා, පදරචකයා අදක්ෂ නම් තමයි. 

මේ දේවල් කරන අයට පවුල් පසුබිමක් නැහැ, පවුලක තියෙන ගෞරවය පිළිබඳව අවබෝධයක් නැහැ - ජගත් වික්‍රමසිංහ

මියුසික් කියන්නේ විෂුවල් නෙවෙයි. මියුසික් කියන්නේ හඬ පිළිබඳව තියෙන දෙයක්. ඒකට එක එක දේවල් දවටලා දවටලා පාවිච්චි කරන එක ගැන නම් මගේ ප්‍රසාදයක් නැහැ. අනිත් එක නිරුවත ඉස්මතු කරන්න එක එක විදිහට උත්සාහ කරනවා. ලිංගිකත්වය, නිරුවත කියන දේවල් එක්තරා වයස් සීමාවකට අයත් දේවල්. ශිෂ්ටසම්පන්න විනීත බවක් අවශ්‍ය දෙයක් මිසක් පොදු දේවල් නෙමෙයි ඒවා. නිරුවත ඉස්මතු කරලා වාසි ගන්න හදනවා කියන එක තමයි මම හිතන්නේ. ඒක අනවශ්‍ය විදිහේ වාසියක් ලබාගැනීමක් මිසක් ශිෂ්ටසම්පන්න දෙයක් නෙවෙයි. පවුල් වාසය කරන සමාජය තුළට ඒක ගැළපෙන්නේ නැහැ. එකේ තියෙන්නේ යටිකූට පරමාර්ථ. මේ දේවල් කරන අයට පවුල් පසුබිමක් නැහැ.

පවුලක තියෙන ගෞරවය පිළිබඳව අවබෝධයක් නැහැ. පවුල් වල තියෙන ගෞරවනීය බවට සමච්චලයක් තමයි කරන්නේ. ඉතිං එහෙම කරලත් ඒ දේවල් වලට සාධාරණ හේතු ඉදිරිපත් කරන්න උත්සාහ කරනවා. ඒ දේවල සාධාරණීය කරගන්න තවත් පිරිසකුත් එකතුකර ගන්නවා. ඒ අයට මතක නැහැ එයාලට අම්මලා, අක්කලා, නංගිලා ඉන්නවා කියලා. සංගීතය කියන දේ දූෂණය කරන්න ඕන විෂයයක් නෙමෙයි. සංගීතය කියන්නේ බෙහෝම සෞන්දර්යාත්මක දෙයක්. සීගිරි බිතුසිතුවම් තියෙනවානේ. ඒවා චිත්‍ර කර්මාන්තයට අයත් දේවල්. මේ කරන හදන 
දේවල් වල යටි පරමාර්ථ තියෙන්නේ වෙන පැත්තකට. එය හුදෙක් පුහු ප්‍රසිද්ධිය ලබාගැනීමට කරන පුහු ක්‍රියදාමයක්. ජනප්‍රියත්වය කියන්නේ වෙනස් දෙයක්. ජනයාගේ තියෙන රාගික පහත් ආසාවල් තුළින් තමන්ගේ නිර්මාණ සමාජගත කරන්න උත්සාහ කරන කූඨ ව්‍යාපෘතියක් විදිහට තමයි මම මෙය දකින්නේ. අපිට පරමාදර්ශ තියෙනවා. පණ්ඩිත් අමරදේවයන්  නිරුවතින් රඟපෑවේ නැහැ. ලෝක ප්‍රකට ගායන ශිල්පීන් වන ලතා මන්ගේෂ්කාර් මහත්මියගේ, මොහොමඩ් රාෆින් මහත්මාගේ, නැට් කින් කෝල්ගේ ගීත අරන් බලන්න. ලෝකේ ඉන්න විශිෂ්ට නිර්මාණශිල්පීන් ඔය වගේ පහත් පරමාර්ථ තුළින් තමන්ගේ නිර්මාණ අලෙවි කරන්න ගියේ නැහැ.

ඒවායින් තමන්ට ලාභ උපයන්න ගියේ නැහැ. අපි ගන්න ඕනේ ලෝකයේ තියෙන හොඳ දේවල්. එක මිනිහෙක් හෙළුවෙන් ගියොත් මිනිස්සු 100ක් ඇඳලා ගියාට වඩා ඒක පේනවා. ඒ මනුස්සයා ජනප්‍රිය වෙන්නේ නැහැ, ප්‍රසිද්ධ වෙනවා විතරයි. පිස්සෙක් විදිහට හරි, එහෙම නැතිනම් නිරුවත පෙන්වන, ඒකෙන් මොකක් හරි දෙයක් කරන්න බලාපොරොත්තු වෙන, තව කෙනෙක්ගේ අවධානය වැරදි දේවල් වලට යොමු කරන, සමාජ සාරධර්ම විනාශ කරන කෙනෙක් හැටියට ප්‍රසිද්ධියට පත්වෙනවා. බෝම්බයක් ගහන කෙනත් ප්‍රසිද්ධ වෙනවා. සියදිවි හානි කරගන්න කෙනත් ප්‍රසිද්ධ වෙනවා. නමුත් ජනප්‍රිය වෙන්නේ නැහැ. මේක තේරුම් කර ගත්තේ නැති මිනිස්සු වැදගත් කලාවක් වැරදි දේවල් වලට යොමු කරනවා. මම නම් 100% හෙලා දකින කාරණයක් තමයි ඒක. අනික ගීතය කියන්නේ කර්ණරසායන දෙයක් මිසක් දෘෂ්‍යරසායන දෙයක් නෙමෙයි. ඒකට අධ්‍යක්ෂකගේ හිතේ තියෙන යම් යම් දේවල් එකතු කළාට කමක් නැහැ. හැබැයි ඒකට වැඩි බරක් යෙදීම සඳහා මිනිස්සුන්ගේ තියෙන පහත් අාශාවන් ඉස්මතු කරලා ඒ තුළින් වාසියක් ලබාගැනීම වැරදියි. 

අප රටේ හොඳ කියන්න ගියත් නරක කියන්න ගියත් බැණුම් අහන්නේ අපිමනේ – රොමේෂ් සුගතපාල

මට අනිත් අයව පාලනය කරන්න බැහැ. මම කරන දේ ගැන ගොඩක් සැලකිලිමත් වෙලා තමයි මගේ ගීතයට වීඩියෝව නිර්මාණ කරන්නේ. අලුතෙන්ම මම මියුසික් වීඩියෝ දෙකක්ම කළා. %මන්දාකිණි^ සහ %මන්දාරමේ^ කියන මියුසික් වීඩියෝ දෙක. ඒ දේවල් රූපවාහිනී මාධ්‍ය තුළ ප්‍රචාරය වෙන්න තරම් සුදුසුයි කියන කාරණාව මම දන්නවා. අද බොහෝ දෙනා මියුසික් වීඩියෝ නිර්මාණය කරන්නේ විව්ස් ගන්න බලාගෙනයි. මට මේක හරි නැහැ, අරක හරි නැහැ කියන්න අයිතියක් නැහැ. අප රටේ හොඳ කියන්න ගියත් නරක කියන්න ගියත් බැණුම් අහන්නේ අපිමනේ. අද නිර්මාණය වන ඇතැම් නිර්මාණ හොඳ ප්‍රමිතියකට නිර්මාණය කරලා තියෙනවා. කට්ටිය ඒ සඳහා මහන්සි වෙනවා. නිරුවත මූලික කරගන්නේ නැතිව කරනවා නම් හොඳයි කියලා තමයි මගේ අදහස. මොකද ඉස්සරත් මියුසික් වීඩියෝ තිබ්බනේ. ඒවල මේ අඩනිරුවත නැතිව තිබ්බ දේවල් ගොඩක් ජනප්‍රිය වුණා. අපි සංස්කෘතියක් එක්ක යන රටක්නේ. බෞද්ධ රටක්. ඒ දේවල් කරනකොට කල්පනාකාරී වෙලා ලස්සන දෙයක් සමාජගත කරන්න පුළුවන් නම්, යම්කිසි පණිවුඩයක් දෙන්න පුළුවන් නම් හොඳයි කියලා තමයි මගේ අදහස. 

මම හිතන්නේ නැහැ ඒක ඇත්තටම ලොකු පැවැත්මක් තියෙන වැඩක් කියලා – දිමන්ක වෙල්ලාලගේ

ලංකාවේ මියුසික් වීඩියෝවලට නිරුවත් දර්ශන භාවිත කරන්නේ සින්දුව මාර්කට් කර ගැනීමේ පරමාර්ථයෙන් මිසක් කලාවට කරන ආදරයෙන් නෙවෙයි. ලෝක ප්‍රසිද්ධ ගායකයෝ නිරුවත කියන දේවල් එම දර්ශනවලට කලාත්මකව යොදාගෙන තියෙන අවස්ථාවන් අපි ඕනතරම් දැකලා තියෙනවා. ලංකාවේ ගොඩක් වෙලාවට අඩු මානසිකත්වයක් තියෙන අය තමයි මේ හැඟීම් අවුස්සලා, තමන්ගේ යූටියුබ් චැනල් එකේ විව්ස් ටික වැඩි කරගන්න උත්සාහ කරන්නේ. මම හිතන්නේ නැහැ ඒක ඇත්තටම ලොකු පැවැත්මක් තියෙන වැඩක් කියලා. මොකද අපි බටහිර රටක් නෙවෙයි. කොච්චර මොන දේ කිව්වත් අපේ රටේ තියෙන සංස්කෘතිය අපිට එකපාර වෙනස් කරන්න අමාරුයි. මිනිස්සුන්ගේ සිතිවිලි සෑහෙන්න කාලයක් ඇවිල්ලා ඇවිල්ලා තමයි එක තැනක නතර වෙන්නේ. අපේ රටකට ලිංගික දර්ශන සීමාවකින් තොරව යොදා ගැනීමෙන් වෙන්නේ එම කලාකරුවෝ සහ නිර්මාණකරුවෝ අපකීර්තියට පත්වෙන එක පමණයි. 

මිලියන ගණන් බලල තියෙන ඒවා කියන්නේ මිනිස්සු වැඩි වැඩියෙන් ඉල්ලනවා කියන එකනේ – ඉරාජ් වීරරත්න

මිනිස්සු තමන්ට කැමති ඒවා බලයි, නැති ඒවා බලන්නේ නැතිව ඉඳියි. යූටියුබ් එකේ පේනවානේ කීයක් බැලුවද කියලා. සමහර වීඩියෝ පන්සීයක්, සමහර වීඩියෝ මිලියන හය හතක් බලලා තියෙනවා. මිලියන ගණන් බලල තියෙන ඒවා කියන්නේ මිනිස්සු වැඩි වැඩියෙන් ඉල්ලනවා කියන එකනේ. මියුසික් වීඩියෝ එකක් කිව්වාම සමාජයට පණිවුඩයක් දෙන්න පුළුවන් දෙයකට පාවිච්චි කරන්න කියල තමයි මම කියන්නේ. නිරුවත කියන දේ ගත්තොත් මගේ මියුසික් වීඩියෝවල පාවිච්චි කරන පැටර්න් එකක් තියෙනවා. අවුරුදු දෙකකට කලින් මගේ මියුසික් වීඩියෝවක තොල් සිපගැනීමක් තිබ්බා කියලා ලංකාවේ අය යකා නැටුවනේ. සිල් බිඳ ගත්තේ කියන මියුසික් වීඩියෝවේ තොල් සිප ගැනීම් තිබ්බා කියලා සමහරක් පිරිස් මාධ්‍ය හමු තියලා මාව තහනම් කරන්න ඕන කියලා කිව්වා. ලෝකයේ වෙන රටවල මිනිස්සුන්ට ගිහිල්ලා කිව්වාම උන් හිනා වෙනවා. උඹලගේ රටේ තාම වහල්ලුද ඉන්නේ කියලා අහනවා. ඉතිං දැන් ඒ දේවල් සාමාන්‍ය දේවල් වෙලා. මම කළේ ඒ ෆ්‍රේම් එක කඩන එක විතරයි. මට පස්සේ ආපු අය ඒක ජරා විදිහට කරනවා. තේරුමක් නැතිව සල්ලි හම්බ කිරීමේ පරමාර්ථයෙන් කරනවා. බලන අයත් ඒවා හරි නැත්නම් බලන්නේ නැතිව ඉන්න ඕන. මේක ජනමාධ්‍ය තුළ නෙමෙයිනේ ප්‍රචාරය වෙන්නේ. සමාජ මාධ්‍ය තුළනේ. යූටියුබ් ගිහිල්ලා, සර්ච් කරලා තමාගේ ඩේටා කපාගෙනනේ බලන්නේ. මේක බලෙන් පෙන්නන එකක් නෙවෙයි. ඒ දේවල් මිනිස්සු තීරණය කරන්න ඕන.

සෞන්දර්යාත්මක විදිහට නිරුවත පාවිච්චි කළාට මම නම් වැරැද්දක් දකින්නේ නැහැ – අභිෂේකා විමලවීර

මම හිතන්නේ නිරුවත කියන දේ හෝ සරාගී දර්ශන කියන කාරණාව හෝ ලිංගිකත්වය කියන එක මේ මහා ලොකු කරගෙන කියන්න ඕන දෙයක් නෙවෙයි. ඒක හරියට අපේ දෛනික අවශ්‍යතාවක් කියලා කියන්න පුළුවන්. කෑම බීම වගේ, ඇඳුම් අඳිනවා වගේ, ගෙවල් දොරවල් වල ඉන්නවා වගේ ලිංගිකත්වය කියන්නෙත් මිනිසුන්ගේ අවශ්‍යතාවක්. ඒකෙන්නේ වර්ගයා බෝ වෙන්නේ. හැබැයි ලිංගිකත්වය කියන දේ තුළින් හැම වීඩියෝවකින්ම පෙන්වන්නේ එකම දේ නම් සහ ඒක පිළිකුල් සහගතයි නම් එතන ගැටලුවක් තියෙනවා. ක්ලැසිකල්, සෙමි ක්ලැසිකල්, පොප්, රැප්, 18+ කියන හැමදේටම ඉල්ලුමක් තියෙනවා. ඒකට වෙන්වූ ෆෑන්බේස් එකක් ඉන්නවා.

ඒක නිසානේ සැපයුමක් තියෙන්නේ. ඒක සප්ලයි කරන කෙනා වෙළෙන්දෙක් නොවී කලාකාරයෙක් වෙලා මිනිස්සුන්ගේ තියෙන මොකක් හරි දෙයට මොකක් හරි දෙයක් එකතු කරන්න පුළුවන් විදිහට ඒ දේ කරනවා නම් හොඳයි.මගේ නිස්සාර වීඩියෝව ඇතුළෙත් ලිංගිකත්වය කියන දේ පෙන්වලා තියෙනවා. පිටරට මේ විෂය සම්මානවලට නොමිනේට් කරන්න පවා සුදුසුකමක් වෙනවා. අපිට ඒක ප්‍රතික්ෂේප කරන්නේ බැහැ. කාමසූත්‍ර වගේ ෆිල්ම් එකක් ගත්තාම එකේ තනිකරම තියෙන්නේ නිරුවත. හැබැයි ඒක බොහෝම සෞන්දර්යාත්මකයි. නිර්මාණකාරයෝ විදිහට අමුවෙන් ඒ දේවල් පාවිච්චි කරන්නේ නැතිව හදවතට දැනෙන විදිහට, සෞන්දර්යාත්මක විදිහට නිරුවත පාවිච්චි කළාට මම නම් වැරැද්දක් දකින්නේ නැහැ. 

ඩිලාන් ක්‍රිෂාන්ත / කැලුම් දේවින්ද 

දියේ ගිලී ටෙලි නාට්‍ය සහය නිළියක් ජීවිතක්ෂයට

කැලණි ගඟේ දිය නෑමට ගිය අවුරුදු 27ක එක් දරු මවක් එහි ගිලීමෙන් ජීවිතක්ෂයට පත්ව ඇති බව ගිනිගත්හේන පොලීසිය පවසයි.

මෙසේ ජීවිතක්ෂයට පත්ව ඇත්තේ මහනුවර උගුරැස්ස ප්‍රදේශයේ පදිංචි තුෂානි ද සිල්වා නැමති ටෙලි නාට්‍යය සහය නිළියකි.

පවුලේ සමාජිකයන් සමග කිතුල්ගල ප්‍රදේශයේ සංචාරයකට පැමිණ ඇති මෙම කාන්තාව ගිනිගත්හේන කළුගල යටිබේරිය ප්‍රදේශයේදී කැලණි ගඟේ අද (17දා) පස්වරු 1.30 පමණ දිය නාමින් සිටියදී සැඩ පහරකට හසුව ගඟේ ගසාගෙන ගොස් ඇති බව පොලීසිය ප්‍රකාශ කළේය.

 

Untitled-1

සශ්‍රීකත්වය, සෞභාග්‍ය විදහාපාන බක්මහේ සැමරුම් රැගත් ආසියානු රටවල්

නව වසරක්, නව කාලයක් තුළ නැවුම් ජීවිතයක් ආරම්භ කිරීමේ අරමුණින් පවත්වනු ලබන අලුත් අවුරුදු මංගල්‍යය ආසියානු කලාපය තුළ එක් එක් රටවලට, ජන වර්ගවලට සුවිශේෂීව ඔවුන්ගේ සංස්කෘතික රටාවන් ආරක්ෂා කරගනිමින් පවත්වනු ලබයි. කෙසේ නමුත් පෙරදිග සංස්කෘතිය හා බැඳි චාරිත්‍ර – වාරිත්‍රවල යම් සමානකමක් දැකිය හැක්කේ විශේෂයෙන් කෘෂිකාර්මික ජීවන රටාවක් තුළ ගොඩනැගුණු බැවිනි. එම නිසා වර්ෂයේ පළමු අස්වැන්න නෙළා ගන්නා මෙම මාසය ඒ ඒ රටවල පාරම්පරික දින දර්ශනයන්ට අනුව සංස්කෘතික හා ආගමික මුහුණුවරකින් යුතුව පවත්වනු ලබයි.  ලාංකික වැසියන් අප්‍රේල් හෙවත් බක් මාසයේ පවත්වනු ලබන සිංහල හා හින්දු අලුත් අවුරුද්ද වෙනත් රටවලද සමරනුයේ සශ්‍රීකත්වය, සෞභාග්‍යය හා වාසනාව උදාකර ගැනීමේ අරමුණිනි. ඒ ඒ ජාතීන්ට අනුව නොයෙක් නම්වලින් හඳුන්වන අප්‍රේල් මාසයේ අවුරුදු සැමරුම් උත්වශ්‍රීයෙන් අරඹන්නේ මෙලෙසිනි.


Bohag-Bihu

දකුණු ආසියාවේ අවුරුදු සැමරුම්  බොහාල් බයිහු (Bohag Bihu)

ඇසෑම් ප්‍රදේශයේ හා උතුරු, නැගෙනහිර ඉන්දියාවේ ප්‍රාන්ත කිහිපයක මෙය සමරනු ලබන්නේ අලුත් අවුරුද්දේ ආරම්භයක් ලෙසිනි. සාමාන්‍යයෙන් ඔවුන් අස්වැන්න නෙළා ගන්නා කාලය හෙවත් අප්‍රේල් මාසයේ දෙවැනි සතියේදී එනම් 14වැනිදා සිට එය පවත්වනු ලබයි. මෙය ආගමික පදනමින් ඔවුන් සමරන සංස්කෘතික උත්සවයකි. ඇසෑම්වල ජනතාව තමන්ගේ ආගම කුමක් වුවත් එකිනෙකා හා සුහදත්වයෙන් සාමූහිකව මෙය සැමරීමද සුවිශේෂී වේ. මෙය රංගාලි බයිහු, කොන්ගාලි බයිහු හා භෝගාලි බයිහු ආදී වශයෙන්ද ව්‍යවහාර කරනු ලැබේ. 
විවිධ නම්වලින් මෙම උත්සවය හැඳින්වුවත් පොදුවේ කුඹුර මත පදනම් වූ කෘෂිකාර්මික චක්‍රයක් තුළින් මෙය පවත්වාගෙන යනු ලබයි. මෙහි දෙවැනි නාමයෙන් හඳුන්වන රංගාලි බයිහු කොටස් 7කින් යුක්තය. රාටි බයිහු, චොටු බයිහු, ගොරු බයිහු, මනු බයිහු, කුටුම් බයිහු, මෙලා බයිහු හා චෙරා බයිහු ලෙසිනි. විශේෂයන්ම මෙය ගම්බදව පවත්වනු ලබන උත්සවයකි. ඔවුන් දෙවියන් සේ අදහන ගවයා පළමු දිනයේ ගඟට හෝ පොකුණට රැගෙන ගොස් දෝවනය කරයි. දෙවැනි දිනයේදී කුඹුරෙන් ලබාගත් අස්වැන්නෙන් බත් උයා රසකැවිලි පිළියෙල කිරීම සුවිශේෂී වේ. තෙවැනි දිනය හෙවත් අවසන් දිනයේ සෑම නිවසකම පිරිස් එක්රැස් වී බයිහු නර්තනයේ යෙදෙන්නේ උත්සවයේ සමාප්තිය සනිටුහන් කරමිනි.

 පානා සංක්‍රාන්ති (Pana Sankranti)

හින්දු බැතිමතුන් හනුමාන්ගේ උපන් දිනය වශයෙන්ද විශ්වාස කරන මෙදින දේවි නම් හින්දු කෝවිල වැඳ පුදා ගැනීමට යයි. මෙය බෞද්ධ හින්දු බැතිමතුන් විසින් මහා බිසුබ සංක්‍රාන්ති යන නමින් හඳුන්වනු ලබයි. ඒ වැසියන් %ඕදියා^ (Odhiya) යන නමින්ද හඳුන්වනු ලැබේ. මෙම උත්සවයේදී බෙලා නමැති  සුවිශේෂී පානයක් සකස් කරනු ලබයි. මෙම උත්සවය අප්‍රේල් මස 14 වැනි දිනෙන් ආරම්භ වන අතර, 21 වැනිදා දක්වා පුරා සතියක් පැවැත්වේ. ඒ ප්‍රදේශයේ වැසියන් විසින් මෙය මහත් උත්සවශ්‍රීයෙන් සමරනු ලබයි. 

 සැන්කෙන් (Sangken)

සංස්කෘතික උත්සවයක් වූ මෙය අරුනාචල් ප්‍රදේශයේ සහ ඉන්දියාවේ ඇසෑම්හි ඇතැම් ප්‍රදේශවල සමරනු ලබයි. අප්‍රේල් 13 වැනිදා සිට 15 වැනිදා දක්වා පවත්වන මෙම සංස්කෘතික උත්සවය ථේරවාදී බෞද්ධ ජනතාව විසින් පවත්වාගෙන යනු ලබයි. ලූනාර් නව අවුරුදු උත්සවය නමින් හඳුන්වන්නේ මෙයයි. මෙය සංපෝ, ටැන්සා, තායි, ඊසානදිග ඉන්දියාවේ ඉතා උත්සවශ්‍රීයෙන් සමරනු ලබයි. සාමය සහ පාරිශුද්ධතාව පිළිබිඹු කරන මෙය ජලය මුල්කරගෙන පැවැත්වේ. මෙම උත්සවය තායිලන්තයේ සොන්ක්‍රාන් (Songkran) උත්සවයට හා හෝලි උත්සවයට සමානකමක් දක්වයි. මෙහිදී බුදු පිළිම වහන්සේ ප්‍රථමයෙන්ම දෝවනය කරන අතර, විනෝදයටත් මූලිකත්වය දෙනු ලැබේ. මෙම උත්සවයේ එකිනෙකා හා ජල ප්‍රහාර එල්ල කරමින් විනෝද වීමක්ද දැකගත හැකි අතර, තෑගි හුවමාරුවද පොදු ලක්ෂණයකි. 
පාරිශුද්ධත්වය පිළිඹිඹු කරන මෙම උත්සවය ආරම්භයට ප්‍රථම සෑම නිවෙසක්ම පිරිසුදු කරන අතර, රසකැවිලි සකස් කරයි. එසේ සකස් කළ රසකැවිලි උත්සවය අතර වාරයේ නිවෙස්වල බෙදා ගැනීමක් ප්‍රදේශවාසීන් විසින් සිදුකරනු ලබයි. උත්සවය අවසානයේ නැවතත් පිළිම වහන්සේ දෝවනයෙන් අනතුරුව තිබූ ස්ථානයේම තැන්පත් කරනු ලැබේ. 
අතීතයේ සිට ආගමික උත්සවයක්ව පැවතුණත් එය අද වන විට විනෝදය හා ආගම මුසු සංස්කෘතික උත්සවයක් බවට පරිවර්තනය වී තිබේ. ඔවුන් මෙම උත්සවයේදී ස්වකීය ආත්මය පවිත්‍ර වේ යැයි විශ්වාස කරන අතර, ඒ තුළින් ඉදිරියේදී නැවුම් දර්ශනයකින් ජීවිතය ආරම්භ කළ හැකිය යන්න තරයේ විශ්වාස කරයි. 

Cambodian-New-Year

විෂු උත්සවය (Vishu Festival)

සංස්කෘත භාෂාවෙන් %විෂු^ යන්න %සමාන^ යන අරුත් ගෙන දෙයි. මෙම උත්සවය මලයාලම් ජනතාව අති උත්සවශ්‍රීයෙන් සමරන අතර, මෙය මලයාලම් ජනතාවට පමණක් ආවේණික උත්සවයක් නොවේ. මෙම උත්සවය ඉන්දියාවේ නොයෙක් ප්‍රදේශවල වාසය කරන ජනයා විවිධාකර නම්වලින් හඳුන්වනු ලබයි. පන්ජාබයේ බයිසාකි (Baisakhi) නමින් සමරනු ලබයි. අප්‍රේල් 14 වැනිදාට සමරන මෙහි චාරිත්‍ර – වාරිත්‍රද එකිනෙකින් වෙනස් වේ. සාමකාමී සෞභාග්‍යමත් වසරක් උදාකර ගැනීම නිමිත්තෙන් දෙවියන්ට පූජා පැවැත්වීම මෙහි ප්‍රධාන චාරිත්‍රයකි. මෙහිදී උදා වූ නව වසර එකිනෙකා හා සුභපැතුම් එකතු කර ගනිමින් සමරන අතර, විනෝදය උදෙසා ඔවුන් විසින් ගිනිකෙළි සන්දර්ශනද පවත්වනු ලබයි. කේරළයේ ජනතාව තමන් මහන්සියෙන් වගා කළ අස්වැන්න නෙළා ගැනීමෙන් පසුව මෙය සමරන අතර, මෙම උත්සවය සැමරීමේ ප්‍රධාන හේතුව වන්නේ ශ්‍රී විෂ්ණු විසින් නරකසුරා මරා දැමීම නිමිත්තෙනි. මෙම උත්සවයේ තවත් වැදගත්කමක් වන්නේ පවුල් බන්ධනය මේ තුළින් තවත් ශක්තිමත් කිරීමයි. එක්ව සිට ආහාර අනුභවය සිදුකරන ඔවුන් එකී මංගල්‍යයේ ප්‍රධාන අංගයක් වන විෂුකෛයිනීට්ටම් ලෙස හඳුන්වන වැඩිහිටියන් විසින් බාල ළමයින්ට මුදල් දී ගනුදෙනු කිරීමද සිදුකරනු ලබයි. එමෙන්ම කෘෂිකාර්මික දිවිපෙවතක් තුළින් ජීවත්වන ගොවීන්ගේ අතමිට යහමින් සරු වන්නේ මේ කාලය තුළයි. ඔවුන්ට අලුත් ඇඳුම් පැලඳුම් මිලදී ගන්නේද මේ කාලයටයි. එබැවින් සෑම කෙනෙකුම අලුත් ඇඳුමකින් සැරසී අලංකාරවත්ව සිටීම මෙම උත්සවය දිනයේ සිදුකරන තවත් සුවිශේෂී දෙයකි.

පුත්තාන්ඩු (puthandu)

දෙමළ ජනයා විසින් සමරනු ලබන අලුත් අවුරුද්ද පුත්තාන්ඩු වශයෙන් හඳුන්වනු ලැබේ. අප්‍රේල් 14 වැනිදා සමරන මෙම උත්සවය ඉන්දියාව, ශ්‍රී ලංකාව, මැලේසියාව, සිංගප්පූරුව යන රටවල්වල වාසය කරන දමිළ ජනයා විසින් උත්වශ්‍රීයෙන් සමරනු ලබයි. ඉන්දියාවේ හා ශ්‍රී ලංකාවේ සංස්කෘත දින දර්ශනය තුළ වසරේ පැවැත්වෙන පළමු උත්සවය වශයෙන් මෙය හැඳින්වේ. මෙම උත්සවයේදී තෑගී හුවමාරු කරගනිමින් එකිනෙකා හා සුහදත්වයෙන් නෑදෑ නිවෙස්වල සංචාරය කරමින් උත්සවය සමරයි. 
ශ්‍රී ලංකා දෙමළ ජනයා මෙහිදී දරුවන්ට හා තරුණයන්ට ඉදිරි කාලය යහපත් වීම සඳහා %කෛයි විශේෂම්^ යන නමින් හඳුන්වන වර්ෂයේ පළමු මුදල් ගනුදෙනුව සුබ මොහොතින් සිදුකරනු ලබයි. කෘෂිකාර්මික චක්‍රයක් තුළ ජීවිකාව ගෙන යන මොවුන්ගේ වසරේ පළමු අස්වැන්න මෙම කාලයේදී නෙළා ගැනීම සිදුකරයි. එකී පළමු අස්වැන්න ඔවුන් හඳුන්වන්නේ %ආර්පුඩු^ නමිනි. 
 මැලේසියාවේ හා සිංගප්පූරුවේ වෙසෙන දමිළ ජනයා මෙම පුත්තාන්ඩු නමින් හඳුන්වන අලුත් අවුරුද්දේ හින්දු කෝවිල්වලට ගොස් දෙවියන් වැඳපුදා ගනිමින් උත්සවශ්‍රීයෙන් මෙය ඇරඹීම සිදුකරයි. 

Sangken-1

සිංහල හා දෙමළ අලුත් අවුරුදු උත්සවය

ශ්‍රී ලංකාව තුළ වාසය කරන දමිළ ජනයා හා අන්‍යෝන්‍ය සුහදත්වයෙන් හා සංහිඳියාව තුළින් සිංහලයන් මෙය සමරන නිසා සිංහල හා දෙමළ අලුත් අවුරුදු උත්සවය නමින් මෙය හඳුන්වනු ලබයි. ජ්‍යෝතිෂයට අනුව සූර්යා මීන රාශියේ සිට මේෂ රාශියට ගමන් කිරීමක් ලෙස හඳුන්වන මෙය සුර්ය මංගල්‍යය යන නමින්ද හැඳින්වේ. බක් මාසය හෙවත් මහා මාසයේ එරබදු මල් පිපෙන පරිසරයෙන් පවා ආශීර්වාදය එක්කරන බව සිංහලයන් විශ්වාස කෙරේ. අප්‍රේල් 14 වැනිදා සමරන මෙය සෑම දෙනාටම සෞභාග්‍යය, සතුට හා සාමය සපිරි සමෘද්ධිමත් වසරක් අපේක්ෂා කෙරේ. සිංහල අලුත් අවුරුද්ද චාරිත්‍ර – වාරිත්‍ර රැසකින් සැදුම්ලත් අතර, එයට ජ්‍යෝතිෂ ශාස්ත්‍රයට අනුව නැකැත් පත්‍රයක් සකස් වේ.
අවුරුදු උදාව, පුණ්‍ය කාලය, ළිප ගිනි මෙලවීම, ආහාර අනුභවය, ගනුදෙනු කිරීම, වැඩ ඇල්ලීම, හිසතෙල් ගෑම හා රැකීරක්ෂා සඳහා පිටත්ව යෑම වැනි සෑමදෙයක්ම එකී නැකැත් පත්‍රයට අනුව නියමිත වේලාවට ඒ වෙනුවෙන් කැප වී සිදුකරනු ලබයි. මේ හා බැඳි හෙළ සංස්කෘතියක් පවා බිහිවී ඇති අතර, සංස්කෘතිකාංග රාශියකින් සැදුම්ලත්ය. එමෙන්ම කිරිබත්, කැවුම්, කොකිස්, අලුවා, ආස්මි වැනි රසකැවිලි රැසකින් අලුත් අවුරුදු කෑම මේසය හැඩ කිරීමට සිංහල ජනයා අමතක නොකරයි. 
දෙමළ ජනයාද අවුරුදු සැමරීම උත්සවශ්‍රීයෙන් සිදුකරන අතර, රන්දෝලි ඇඳ, උළුදු වඩේ, අග්ගලා, පැණි වළලු, පායාසම් වැනි රසවත් කෑමවලින් රස ගන්වයි. 
අග්නිදිග ආසියාවේ අවුරුදු සැමරුම

කාම්බෝජයේ අලුත් අවුරුද්ද

ග්‍රේගරියන් ( Gregorian) දින දර්ශනය අනුගමනය කරන කාම්බෝජ වැසියන් ඔවුන්ගේ අලුත් අවුරුද්ද සමරනු ලබන්නේ අප්‍රේල් 13 වැනිදා සිට අප්‍රේල් 15 දක්වා කාලය තුළයි. මියන්මාර්, තායිලන්තය, ලාඕසය වැනි බෞද්ධ රටවල ඒ දිනයන්වලට පවත්වන උත්සවයට සමාන මුහුණුවරකින් කාම්බෝජ වැසියන් මෙය සමරනු ලබයි. අස්වැන්න නෙළන ගොවීන් ඒ ධාන්‍ය නිවසට ගෙනැවිත් සතුටෙන් ගත කරන කාලයක් ලෙස මෙම කාලය හඳුනාගත හැකිය. 13 වැනි ශතවර්ෂය වන තෙක් කාම්බෝජයේ වැසියන් නව අවුරුදු සැමරීම සිදුකර ඇත්තේ නොවැම්බර් හා දෙසැම්බර් මාසවලදීය. පසුකාලයේදී මෙම උත්සවය අස්වැන්න කපන කාලය ලෙස වෙනස් කර තිබේ.


ලාඕසයේ අලුත් අවුරුදු උත්සවය

බෞද්ධ දින දර්ශනයයට අනුව 5 වැනි චන්ද්‍ර මාසය වන අප්‍රේල් මාසයේ 13 වැනිදා සිට 16 වැනිදා දක්වා මෙම උත්සවය එරට වැසියන් විසින් සමරනු ලබයි. ලාඕසය තුළ මල් පිපෙන මෙම කාලයේදී ඕකිඩ්වලට සුවිශේෂී ස්ථානයක් හිමිවේ. තෙදිනක් පුරා පැවැත්වෙන මෙම උත්සවයේදී එකිනෙකා හා වතුර ගසා ගනිමින් විනෝදාත්මකව ගතකරයි. ඔවුන් පළමු දිනයේ බුද්ධ රූපය ජලයෙන් පවිත්‍ර කරයි. දෙවැනි දිනයේදී බෞද්ධ විහාරස්ථානවලට ගොසින් වැඳුම් – පිදුම් කටයුතු කර භික්ෂූන් වහන්සේලාගේ අවවාද අනුශාසනා ලබාගැනීම මූලික දෙයකි. තෙවැනි දිනයේදී උත්සවාකාරයෙන් පෙරහර ආදිය පැවැත්වීමෙන් අවසන් කරනු ලැබේ. මේ ආකාරයට ආගමික හා සංස්කෘතික පසුබිම තුළින් අග්නිදිග ආසියාවේ මියන්මාරය හා තායිලන්තය තුළද මේ හා සමාන උත්සව පැවැත්වේ. 

නැගෙනහිර ආසියාවේ නව අවුරුදු සැමරීම  චීනයේ අලුත් අවුරුදු සැමරීම

චීනයේ ජනතාව එකිනෙකා හා වතුර ගසා ගනිමින් තරගකාරී ලෙස පවත්වන උත්සවයකින් නව වසර සමරනු ලැබේ. සිෂුආන්ග්බෙනා (Xishuangbanna) නම් ප්‍රාන්ත වැසියන් %දායි^ නමින් හඳුන්වන ඔවුන්ගේ සාම්ප්‍රදායික දින දර්ශනයට අනුව මෙසේ සිදුකරනු ලබයි. ජලය මූලික කරගනිමින් පැවැත්වෙන මෙම උත්සවය ආගමික මුහුණුවරක් ගැනීමද දැකගත හැකිය. අප්‍රේල් මස 16 වැනිදායින් ආරම්භ වන මෙම උත්සවය අවම වශයෙන් තෙදිනක් පැවැත්වේ. පළමු දිනය උත්සවශ්‍රීයෙන් ආරම්භ කරන ඔවුන් දේශීය ආහාරවලට මෙන්ම සෝස් වර්ගවලටද මූලිකත්වයක් දේ. සවස් කාලයේදී ලැන්කැන් (Lancang) නදියෙහි පවත්වන බෝට්ටු  තරගය බොහෝ දෙනා උනන්දුවෙන් නරඹන්නකි. තෙවැනි දිනයේ ආගමික වතාවත්වලින් පසුව ජල ක්‍රීඩාවල මොවුන් නිරත වේ. නව වසරේ පවිත්‍ර වීම මෙයින් අදහස් කෙරේ. ඒ තුළින් සෞභාග්‍යය හා වාසනාව පුද්ගල ජීවිතයට ළඟා වේ යැයි බොහෝ දෙනාගේ මතයයි.

වෛෂ්ණාවී චිත්‍රපටයට තේමාවී තිබෙන්නේ සංවේදී කලාකරුවෙක් සහ ආදරය කියන මාතෘකා දෙකයි

මේ දිනවල රූපවාහිනී මාධ්‍ය මෙන්ම සමාජ මාධ්‍ය ඔස්සේ බොහෝ කතාබහට ලක්වන චරිතයක් ලෙස තුමිඳු දොඩන්තැන්න හැඳින්විය හැකිය. පසුගියදා පැවැති රයිගම් සම්මාන රාත්‍රියේ ජනප්‍රියම නළුවාට හිමි සම්මානයෙන් පිදුම් ලැබූ ඔහු මේ දිනවල තිරගත වන %වෛෂ්ණාවී^ චිත්‍රපටයේද ප්‍රධාන චරිතයට පණ පොවයි. සිය කලා කටයුතු සහ ජනතා විරෝධී සම්මාන පිළිබඳ කතාබහ කිරීමට ඔහු මෙලෙස අදට සම්බන්ධ විය.


Q වෛෂ්ණාවී චිත්‍රපටය ගැන කතා කළොත් 

වෛෂ්ණාවී’ කියන්නේ සුමිත්‍රා පීරිස් මහත්මිය අවසානයට අධ්‍යක්‍ෂණය කරපු චිත්‍රපටය. මම ඒකෙ ප්‍රධාන චරිතය රඟපානවා. මට හොඳ අවස්ථාවක් ලැබුණෙ මේ වගේ ප්‍රවීණ චිත්‍රපට අධ්‍යක්‍ෂවරියකගේ චිත්‍රපටයකට සම්බන්ධ වෙන්න. ඒ වගේම ලංකාවේ ඉන්න ප්‍රවීණ රංගන ශිල්පීන් සම්භාරයක් මේ චිත්‍රපටයේ රඟපානවා. ඉතින් එයාලත් සමග වැඩ කරන්න ලැබුණු එක ඉතා හොඳ අවස්ථාවක්. අපි 2012දී තමයි ෆිල්ම් එක රූගත කරලා ඉවර කළේ. එකම කනගාටුව චිත්‍රපටය එළිදක්වන්න මෙච්චර ප්‍රමාද වුණු එක. නමුත් ප්‍රමාද වෙලා හරි එළිදක්වන්න ලැබුණු එක ගැන සතුටුයි. 

Q 2012 නිෂ්පාදනයක් 2018ට ගැළපීම කොහොමද

ෆිල්ම් එකේ කතා කරන්නේ ප්‍රේමය, ආදරය ගැන. ඉතින් ආදරය කියන්නේ ලෝකයේ කොයි යුගයකට වුණත් පොදු මාතෘකාවක්. ඇත්තටම ඒකෙ තියෙන්නේ සංවේදී කලාකරුවෙක් සහ ආදරය කියන මාතෘකා දෙක. ඒක ඇත්තටම වර්තමාන කන්ටෙස්ට් එකත් එක්ක ඒ විදියටම සම්බන්ධ වෙනවා. ගැටලුවක් ඇති වෙන්නේ නැහැ. ෆිල්ම් එක අද කාලෙට වෙනසක් නැහැ. නමුත් එකම කාරණය තමයි අපි 2012දී හිටපු විදිය. 2012දී අපේ තාක්‍ෂණය, අපේ රඟපෑම සහ අපේ පෙනුම බොහෝ දුරට වෙනස් වෙලා තියෙනවා. තාක්‍ෂණික වශයෙන් අපි ගෙනාපු දේවල් අද වෙනකොට සමහර විට පරණ වෙන්න පුළුවන්. ඒ වගේ ගැටලු හැර ෆිල්ම් එකේ ප්‍රකාශනයේ ගැටලුවක් නැහැ. මේ ෆිල්ම් එකේ ප්‍රකාශනය තියෙන්නේ ප්‍රේමය ගැන. ඉතින් ප්‍රේමය කවදාටත් පොදුයි. 

Q පසුගිය දිනයක රයිගම් සම්මාන උළෙලේදී ඔබට ජනප්‍රියතම නළුවා සම්මානය ලැබුණා. එතැනදී ඔබ කිව්වා මේ සම්මානය පවතින ක්‍රමයට විරෝධීව ලැබුණු සම්මානයක් කියලා. ඒ කාරණාව පිළිබඳ පැහැදිලි කළොත්

ඔව්. මම කියන්නේ අපි මේ ජීවත් වෙන ක්‍රමය පිළිබඳ විරෝධයක් තියෙනවා. ඒ විරෝධය විවිධ ආකාරයෙන් ප්‍රකාශ කරනවා. මම හිතන්නේ ‘කූඹියෝ’ නාට්‍යයට වෝට් කරපු අය කළෙත් එක්තරා විදියකට විරෝධයක් තමයි. මම මේක උදාහරණයකින් පැහැදිලි කරන්නම්. අපි සාමාන්‍යයෙන් දිනපතා පත්තරවල තියෙන දේශපාලන කාටූන් බලනවා. මේ දේශපාලන කාටූන් බලන අපි තුළ ඇති වෙනවා හොරා කාපු, මගඩි ගහපු නැත්නම් අපිරිසුදු විදියට දේශපාලනය කරන දේශපාලඥයාට වැදෙන්න රිදෙන්න දීලා තියෙනවා කියලා කාටූන් ශිල්පියා. ඒ වගේ හැඟීමක් අපි කාටූන් එක බලද්දි ඇතිවෙනවා. ඒ හැඟීමෙන්, ඒ කාටූන් එක බලන එකෙන් අපට ප්‍රීතියක් ඇතිවෙනවා. අපට මාර ආතල් එකක් කාටූන් එකෙන් එනවා. ඒ මාර ආතල් එක කියන්නේ අපේ විරෝධය. මම ඕක තව පැහැදිලි කරන්නම්. අපි බලනවා උදේට පුවත්පත් කියවන රූපවාහිනී මාධ්‍යවේදීන්. ඒ මාධ්‍යවේදීන් අනෙක් පුවත් කියවනවාට වඩා උද්යෝගයකින්, කැමැත්තකින් තමයි දේශපාලන කාටූන් කියවන්නේ. ඒ කාටූන් කියවන මාධ්‍යවේදියා තුළත් උද්යෝගයක්  ඇතිවන්නේ ඒ මාධ්‍යවේදියා තුළ තියෙන විරෝධය. කාටූන් ශිල්පියා විසින් දේශපාලඥයාට රිදෙන්න ගහලා තියෙන හැඟීම කාටූන් එක කියවන මනුස්සයා තුළත්, ඒක බලාගෙන ඉන්න මනුස්සයා තුළත් ඇතිවෙනවා. මේක තමයි අප තුළ තියෙන විරෝධය. මේ විරෝධය සතුටක් විදියට තමයි අපි දේශපාලන කාටූන් එකත් එක්ක ප්‍රකාශ කරන්නේ. ඒක තමයි ‘කූඹියෝ’ නාට්‍යය බලපු මිනිස්සුත් ප්‍රකාශ කළේ. උදාහරණයක් ගත්තොත් ‘කොළඹ ඉන්න කඩේ යන්න වෙලාවක් නැති පොෂ් නෝනලාට’ කූඹියෝ නාට්‍ය ඇතුළේ හිනා වුණා. පොළේ, මාකට් එකේ තියෙන එළවළු ටික ෆුඩ්සිටි ලේබල් එක ගහලා ගෙනිහින් දුන්නාම ඒක මාර බඩුවක් විදියට ගන්නකොට ඒ සිස්ටම් එකට හිනා වුණු එක තමයි නාට්‍ය ඇතුළෙ සිදු වුණේ. එක එක තැන්වලින් ධනාත්මක චින්තනය ගැන කෑලි අරගෙන ධනාත්මක චින්තනය ගැන පොත් ලියලා විකුණුවාම ඒකට හිනා වුණා. ඒ සිස්ටම් එකටයි ඒ හිනා වුණේ. ලංකාවේ දේශපාලනය කියන්නේ නම්බර්ස් ගේම් එකක්. ඒ නම්බර්ස් ගේම් එක හරියට ප්ලේ කළොත් තමයි දේශපාලන බලය ගන්න පුළුවන් කියලා නාට්‍යය ඇතුළෙ පෙන්නුවා. ඒ පෙන්නුවේ ඒ සිස්ටම් එකට හිනා වුණු එක. ඉතින් ප්‍රේක්‍ෂකයො ඒ නාට්‍යයට කැමැති වුණේ ඒ නාට්‍යයේ පෙන්නපු විරෝධය දැකලා. ඒ කියන්නේ ඒ සිස්ටම් එකට ගහන විදිය දැකලා. ඒක තමයි මිනිස්සු විරෝධය විදියට දැක්කේ. දේශපාලන කාටූන් එක ඇතුළෙ වෙන වැඩේමයි නාට්‍යය ඇතුළෙ වුණෙත්. ඒකට තමයි මිනිස්සු වෝට් කළේ. ඒකට තමයි ජනප්‍රියතම සම්මානය ලැබුණේ. ඒක තමයි මම කිව්වේ මේ ජනප්‍රිය සම්මානය දකින්නේ විරෝධී සම්මානයක් විදියට කියලා. 

IMG_1555

Q ’කූඹියෝ’, ‘සහෝදරයා’ වගේ නිර්මාණ අඩුවෙන් බිහිවෙන්නේ එවැනි නිර්මාණවලට ගෙවන ගෙවීම් අඩු නිසා. මේකද මේ සිස්ටම් එක

සිස්ටම් එක කිව්වාම මේ හැමදේම සිස්ටම් එකේනේ. මේ සිස්ටම් එකේ පුනරුප්පත්තිය, තෘප්තිය, වාණිජකරණය, දේශපාලනය මේ හැමදේම මේ සිස්ටම් එකට අයිති දේවල්නේ. එතකොට ටෙලිනාට්‍ය නිර්මාණය කිරීම, ටෙලිනාට්‍ය විකාශය කිරීම, ටෙලිනාට්‍ය පාලනය කිරීම වැනි දේවල්වලට ක්‍රමවේදයක් අපේ ජනමාධ්‍ය අමාත්‍යාංශයටවත් නැහැ. එතකොට මොනවද හොඳ ටෙලිනාට්‍ය. මේ හොඳ ටෙලිනාට්‍ය තීරණය කරන්නේ චැනල් එක විසින්. චැනල් එක කියන්නේ ව්‍යාපාරයක්. එතකොට ව්‍යාපාරිකයා තීරණය කරනවා මේ රටේ මිනිස්සු බලන හොඳ දේ මොකද්ද කියලා. රටක ආණ්ඩුවක් තියෙනවා නම්, ආණ්ඩුවට ජනමාධ්‍ය අමාත්‍යාංශයක් තියෙනවා නම්, ඒ අමාත්‍යාංශයට පුළුවන් ජනමාධ්‍යය තුළ පෙන්වන හොඳ දේවල් සහ නරක දේවල් හඳුනාගන්න, රූපවාහිනී ටෙලිනාට්‍ය නියාමන මණ්ඩලයක් හදන්න. හොඳ ටෙලිනාට්‍ය හඳුනා ගන්න, නරක ටෙලිනාට්‍ය අයින් කරන්න, ඉන්දියාවෙන් ගෙන්වන නාට්‍යයවලත් හොඳ මොනවාද, නරක මොනවාද කියලා හඳුනා ගන්න. එතකොට ටෙලිනාට්‍ය රසවින්දනය හැදෙනවා. එතකොට හොඳ ටෙලිනාට්‍යවලට තැන හැදෙනවා. ඊට පස්සේ ජනමාධ්‍ය අමාත්‍යාංශයට පුළුවන් තීරණය කරන්න හොඳ ටෙලිනාට්‍යයකට මෙච්චර ගෙවන්න ඕන, ඒ හොඳ කියලා කියන්නේ කොයිකද, හොඳ නැහැ කියන්නේ කොයිකද කියලා කැටකරයිස් කරන්න. මේකත් සිස්ටම් එකක්. මේක තමයි වෙන්න ඕනේ. එහෙම වුණාම තමයි ‘සහෝදරයා’, ‘කූඹියො’ සහ ඉස්සරහට හැදෙන හොඳ නිර්මාණවලට හොඳ මිලක්, හොඳ විකාශන කාලයක් ලැබෙන්නේ. එහෙම නැත්නම් මේකත් සිස්ටම් එකේ ප්‍රශ්නයක් තමයි. 

Q වර්තමානයේ තරුණ පරම්පරාව රංගනයට එකතු වීමේ ප්‍රවණතාවක් තියෙනවා. ඔබ හිතනවාද ඉදිරියේදී රංගනය වෘත්තියක් විදියට කරන්න පුළුවන් කියලා

මේ යන විදියට ගියොත් ලංකාවේ ඉදිරියේදී මෙගා ස්ටාර් තුළින් වුණත් දකින්න ලැබෙන්නේ ඉන්දියානු, කොරියානු නළු නිළියෝ. මේ විදියට ගියොත් ටෙලිවිෂන් එකේ ජනප්‍රියම නළු නිළි සම්මාන ගන්නේ ඉන්දියානු හෝ කොරියන් නළු නිළියන්. වැඩසටහනකට ගෙන්නන්න වෙන්නේ ඉන්දියන්, කොරියන් නළු නිළියන්ව. ඒ තර්කයෙන් බැලුවොත් අපේ වෘත්තීය රංගන ශිල්පීන්ට වෘත්තීමය වශයෙන් වැඩ කරන්න පුළුවන්ද කියලා සැකයක් තියෙනවා. ඒ නිසා තමයි මම කිව්වේ මේ ක්‍රමය වෙනස් වෙන්න ඕන කියලා. ලංකාවේ නළු නිළියන්ට වැඩ කරන්න තියෙන ඉඩ තමයි මේ නැතිවෙමින් යන්නේ. විකාශන කාල ඉන්දියානු ටෙලිනාට්‍ය දෙන එකෙන් වෙන්නේ අපට වැඩ කරන්න තියෙන කාලය නැති වෙන එක. අපේ අධ්‍යක්‍ෂවරුන්ට, පිටපත් රචකයන්ට, කාර්මික ශිල්පීන්ට වැඩ කරන්න තියෙන ඉඩ නැතිවෙන එක. එතකොට කොච්චර විශාල පිරිසක් මේකෙන් යැපෙනවාද. කාර්මික ශිල්පීන්, අධ්‍යක්‍ෂවරුන්, පිටපත් රචකයන්, නළු නිළියන්, අනුශාංගික ශිල්පීන් වගේ විශාල වෘත්තිකයන් පිරිසක් මේ ක්‍ෂේත්‍රය පිටුපස ඉන්නවා. ඒ සියලු දෙනාටම වෘත්තීය නැතිවෙන එක තමයි මේකෙන් සිදු‍ වෙන්නේ. මේක වෙනස් වෙන්නම ඕන. 

Q බොහෝ රියැලිටි හෝ වෙනත් වැඩසටහන්වලින් අලුතෙන් මේ ක්‍ෂේත්‍රයට එන පිරිස වැඩියි. මේ ක්‍රමයත් වෙනස් වෙන්න ඕන නේද

මම කියන්නේ ඒකත් රාජ්‍ය මැදිහත්වීමෙන් සිදු වෙන්න ඕන වැඩක්. නළු නිළියන්ට ප්‍රමිතියක් ඇති කරන එක ගැන අපි මේ වන විට සාකච්ඡාවක් ඇති කරමින් යනවා. මම මේ වන විට ලංකාවේ වෘත්තීය නළු නිළියන්ගේ සංගමයේ සභාපති විදියට කටයුතු කරමින් ඉන්නවා. බිමල් ජයකොඩි එහි ලේකම් විදියට කටයුතු කරනවා. අපි මේ වෙද්දි සාකච්ඡා කරමින් යනවා රංගන ශිල්පීන්ගේ වෘත්තීය සහ ගරුත්වය ආරක්ෂා වන විදියේ ක්‍රමවේදයක් සකස් කිරීම ගැන. ඉතින් ඒක ගැන ජනමාධ්‍ය අමාත්‍යාංශය සමගත් අපට මේ වෙද්දි සාකච්ඡාවක් සූදානම් කරලා තියෙනවා. ඉතින් ඒක පහසු ක්‍රියාවලියක් නෙවෙයි. දීර්ඝ කාලීන ක්‍රියාවලියක්. නමුත් අපි උත්සාහයක් ගනිමින් ඉන්නවා. 

Q අපි කතා කරමු ඉදිරි නිර්මාණ සහ ඉදිරි වැඩකටයුතු ගැන

මේ දවස්වල මගේ ‘වෛෂ්ණාවී’ ෆිල්ම් එක රිලීස් වෙලා තියෙනවා. ඉදිරියේදී සුනිල් ආරියරත්න මහත්මයාගේ ‘යශෝදරා’ එන්න තියෙනවා. ඊට පස්සේ සුනෙත් මාලිංග ලොකුහේවාගේ ‘නිදහසේ පියා ඩී.එස්.’ එන්න තියෙනවා. එතකොට මේ දවස්වල ප්‍රියංකර රත්නායකගේ ‘ඇන්ටිගනී’ නාට්‍යය සහ රාජිත දිසානයකගේ ‘ආදර වස්තුව’ කියන නාට්‍යය දෙකේ වැඩ කරනවා. 

Q අවසාන වශයෙන් ඔබේ රසිකයන්ට මොනවද කියන්න තියෙන්නේ

‘කූඹියෝ’ සහ ‘සහෝදරයා’ නාට්‍යවලදී මට වෝට් කරපු හැමදෙනාටම මම මගේ ස්තුතිය පුද කරනවා. සමාජ ජාල මාධ්‍ය තුළ විශේෂයෙන් ‘කූඹිගුල’ වගේ ග_ප් නිර්මාණය කළ, කණ්ඩායම් වශයෙන් වැඩ කළ සහෝදර සහෝදරියන්ට මම ස්තුතිවන්ත වෙනවා. එයාලා ලොකු මහන්සියක් ගත්තා මටත්, ‘කූඹියෝ’ නාට්‍යයටත් මේ ජනප්‍රිය සම්මානය අරගෙන දෙන්න. මේ සමාජය පිළිගන්නවා හරවත් හොඳ නිර්මාණයකට තැන දෙන්න ඕන කියන දේ. ඒකට මම ස්තුති කරනවා හරවත් හොඳ නිර්මාණයකට මේ විදියට ජනප්‍රිය තලයේ සම්මානයක් ලබාදීමට කටයුතු කරපු එකට.

IMG_1525

 

 

Parmanu The Story of Pokhran තුළින් ඩයනා පෙන්ටි යළිත් කරළියට

වසර දෙකක නිහඬතාවක් බිඳ දමමින් නැවත බොලිවුඩ් සිනමාවට පැමිණෙන ජෝන් ඒබ්‍රහම්ගේ නවතම චිත්‍රපටය වන %Parmanu: The Story of Pokhran^ එළැඹෙන මැයි මස 08 වැනිදා එළිදැක්වීමට නියමිතව තිබේ. වසර දෙකක් තුළ සිනමා නිර්මාණයකට සම්බන්ධ නොවූ ජෝන් නැවත සිනමාවට පිවිසෙනු ලබන්නේ ඉන්දියානු සිනමාව උඩුයටිකුරු කරමිනි. ඉන්දියාවේ සිදුවූ ඛේදවාචකයක් තේමා කරගනිමින් මෙම චිත්‍රපටය නිර්මාණය වීමද විශේෂ කාරණාවකි. එනම් 1998 වසරේ මැයි මාසයේදී පරමාණු බෝම්බ අත්හදා බැලීමකින් පොක්රන් නගරයේ සිදුවූ විනාශය අලළා මෙම චිත්‍රපටය නිෂ්පාදනය කර තිබේ.


මේ කාරණාව හේතුවෙන් මෙම චිත්‍රපටයට බොහෝ මතභේදයන්ද ඉදිරිපත්ව තිබුණු බව ඉන්දියානු මාධ්‍ය  සඳහන් කරයි. කෙසේ වෙතත් පසුගියදා එළිදැක්වූ ප්‍රචාරක පටයත් සමගින් මෙම චිත්‍රපටයට ඇති අවධානය වඩා වැඩි වූ බවයි සඳහන් වන්නේ. කෙසේ වුවත් මෙම චිත්‍රපටයේ ජෝන් ඒබ්‍රහම් සමග ප්‍රධාන චරිතයට පණ පොවනු ලබන්නේ ඉන්දියානු සිනමාවට නවකයෙකු වීමත් සුවිශේෂී කාරණාවකි. 

ඇය පිළිබඳව කතාබහ කිරීමේදී ඇයව මතකයට නැගෙන්නේ 2012 වසරේ තිරගතවූ චිත්‍රපටයක් ඔස්සේය. 2012 වසරේ තිරගත වෙමින් ආදායම් වාර්තා අතරට පත්වූ Cocktail චිත්‍රපටයේ සයිෆ් අලිඛාන් සහ දීපිකා පදුකෝන් සමග තවත් ප්‍රධාන චරිතයක් වූ ඩයනා පෙන්ටි බොහෝ දෙනාගේ අවධානය දින ගත් රංගන ශිල්පිනියකි. 2012 වර්ෂයේදී එළිදැක්වූ Cocktail චිත්‍රපටයෙන් පසුව ඇය රංගන ක්ෂේත්‍රයෙන් ඉවත්වූ බව ඉන්දියානු මාධ්‍ය වාර්තා කරනු ලැබීය. එයට බොහෝ කරුණු සඳහන් කර තිබුණත්, ඇය ඒ පිළිබඳව කිසිදු අදහසක් දක්වා නොතිබුණි. කෙසේ නමුත් ඇය නැවත සිනමාවට පිවිසෙනු ලැබුවේ 2016 වසරේ තිරගත වූ Happy Bhag Jayegi නම් චිත්‍රපටයෙනි. මුදස්සාර් අසීස් විසින් අධ්‍යක්ෂණ කරනු ලැබූ මෙම චිත්‍රපටයේ ආදායම ඉන්දියානු මිලියන 399කි. මිලියන 180ක වියදමක් දරා නිෂ්පාදනය කර ඇති මෙම චිත්‍රපටය ආදායම් වාර්තා තැබූ චිත්‍රපටයක් විය.

diana-penty-eyes_500x684_71511848315

ඩයනා පෙන්ටි ක්ෂේත්‍රය හැඳිනගනු ලබන්නේ නිරූපිකාවක් ලෙසයි. ඇය නිරූපණ ක්ෂේත්‍රයට පිවිසෙනු ලබන්නේ 2005 වර්ෂයේදී වන අතර, ඇය මාධ්‍ය ක්ෂේත්‍රය පිළිබඳව උපාධිධාරිනියකි. Elite Models India නම් විලාසිතා දැක්මෙන් ක්ෂේත්‍රයට අවතීර්ණ වූ ඇය ඉතාලි විලාසිතා දැක්මක් සඳහා 2006 වර්ෂයේදී ඉදිරිපත් වූවාය. ඒ Nicola Trussardi සහ Gianfranco Ferré නම් විලාසිතා නිර්මාණකරුවන්ගේ විලාසිතා එළිදැක්වීම සඳහාය. කෙසේ වෙතත් 2011 වර්ෂයේදී ඇය නිරූපණ ක්ෂේත්‍රයෙන් ඉවත් විය.
2011 වර්ෂයේදී රන්බීර් කපූර් ප්‍රධාන චරිතයෙන් දායක වූ Rockstar චිත්‍රපටය සඳහා ඩයනාට ආරාධනා කර තිබුණත්, එම ආරාධනාව ඇය ප්‍රතික්ෂේප කර තිබුණි. 2017 වසරේදී ඇය නැවත Lucknow Central නම් චිත්‍රපටය ඔස්සේ රසිකයන්ට දැකබලා ගැනීමට හැකියාව ලැබුණි.  

Diana-Penty

ඇය දායක වූ පළමු චිත්‍රපටය වන Cocktail චිත්‍රපටය ඔස්සේ සම්මානයන් දෙකක් සඳහා හිමිකම් කීමට අවස්ථාව හිමි විය. ඒ 2012 වර්ෂයේදී පැවැත් වූ Vogue Beauty Awards සම්මාන රාත්‍රියේදී සහ UK Bollywood Cosmopolitan Awards සම්මානය රාත්‍රියන් දෙකෙහිදීය. එහිදී Best Debut සම්මානය සහ Female Debut සම්මානය ඇයට හිමි විය. මෙම වසරේ මතභේදාත්මක චිත්‍රපටයක් ලෙසින් තිරගත වන Parmanu: The Story of Pokhran චිත්‍රපටය තමාගේ සිනමා දිවියට නවමු මගක් විවර කරනු ඇති බවයි ඇයගේ  මතය වන්නේ. කෙසේ වුවත් මෙම චිත්‍රපටය දෙස ඉන්දියානු මාධ්‍ය මෙන්ම විදෙස් මාධ්‍යවලද අවධානය යොමුවී ඇති බව සඳහන් වෙයි.

කූඹියෝ සඳහා ලැබුණු සම්මානය කූඹියෝ කණ්ඩායමට වැඩිය ප්‍රේක්‍ෂකයන්ට අයිති සම්මානයක්

‘කූඹියෝ’ යනු ප්‍රේක්‍ෂකයන් අතර ඉහළ ජනප්‍රියත්වයක් හිමිකර ගත් ටෙලිනාට්‍යකි. එය තවදුරටත් තහවුරු කරමින් පසුගියදා පැවැති රයිගම් සම්මාන උළෙලේදී ජනප්‍රියම නාට්‍යයට හිමි සම්මානය ‘කූඹියෝ’ ටෙලිනාට්‍යට හිමිවිය. මේ වන විට විකාශය අවසන්ව තිබෙන ‘කූඹියෝ’ ටෙලිනාට්‍ය ගැන එහි අධ්‍යක්‍ෂ ලක්මාල් ධර්මරත්න සමග මෙලෙස කතා කළෙමු.


24775031_10208299784087196_2851773858555010080_n

කාලයක් සමාජගත කරන්න විදියක් නැතිව තිබුණු ටෙලිනාට්‍යක්  මේ මොහොතේදී ජනප්‍රියම ටෙලිනාට්‍ය  බවට පත්වෙලා තියෙනවා. ඒ ගැන තිබෙන අදහස මොකක්ද

සම්මානය කෙසේ වෙතත් පසුගිය කාලය තුළ ලංකාවේ සමාජ මාධ්‍යය හැසිරීම සහ අනෙකුත් දේශපාලනික කාරණා එක්ක එක්තරා කුලකයක් තුළ කූඹියෝ ඉතා ජනප්‍රිය නාට්‍යයක් බවට පත්වෙලා තිබෙනවා. එස්.එම්.එස්. ලැබුණේ නැතත් පසුගිය කාලය තුළ බලද්දි ෆේස්බුක් මාධ්‍යයන්හි පවා ජනප්‍රිය නාට්‍යයක් බවට පත්ව තිබුණා. සම්මානයක් ලැබීම ගැන ලොකු හැඟීමක් නැත්තේ අපේ නිර්මාණ කණ්ඩායමට තේරුණ දෙයක් තිබුණා, ඒ අපි ලංකාවේ ප්‍රේක්‍ෂකයන් බොහෝ  පිරිසක් අතරට ගිහින් කියන දේ.

එහෙම බොහෝ ප්‍රේක්‍ෂක පිරිසක් වැලඳ ගත් නිර්මාණයට මාධ්‍යවල ඉඩක් හැදුණේ නැති හේතුව ලෙස දකින්නේ මොකක්ද

සරලව ඒ ගැන කතා කළොත් අපි සපත්තු වෙළෙඳ පොළ ගමු. එහි සපත්තුවල නිශ්චිත හැඩයක් තිබෙනවා. වම් කකුලේ සපත්තුවේ හැඩය හා දකුණු කකුලේ සපත්තුවේ හැඩය නිශ්චිතයි. මේ හැඩයට පරිබාහිරව යම්කිසි දෙයක් වෙළෙඳ පොළට එනවා නම් අනිවාර්යයෙන් එයට චැලේන්ජ් එකක් එනවා. කාටවත් වරදක් කියන අදහසක් නෙමෙයි මා තුළ තිබෙන්නේ. ඒ මොහොතේ වෙළෙඳ පොළේ අලෙවි වන දේ හා වෙළෙඳ පොළට අලුතින් එන දෙයක හැඩය කියන දේ ඇතුළේ චැලේන්ජ් එකක් තියෙනවා. ලංකාවේ රූපවාහිනී නාළිකාවලට රිසච් එකක් නැහැ. ඔවුන් ඔවුන්ගේ ප්‍රේක්‍ෂකාගාරය හඳුනන්නේ නැහැ. මේ වන විට වෙනස් වෙමින් තිබෙන ප්‍රේක්‍ෂකාගාරයේ හැඩය ඔවුන් හඳුනන්නේ නැහැ. එහෙම වුණාම ඔවුන් එකම ෆෝමියුලා එකක දේවල් තමයි ටෙලිකාස්ට් කරන්නේ. ඒ ෆෝමියුලා එකට පිටින් ආවම ඔවුන් වෙල්කම් කරන්නේ නැහැ. කූඹියෝ කියන්නේ ඒ ෆෝමියුලා එකෙන් පිට දෙයක්. නමුත් අපි ඉතා විශ්වාසයෙන් කිව්වා මෙය ලංකාවේ මාකට් එකට වැඩ කරනවා කියලා. දමිතට හා මට ඒ ගැන රිසච් එකක් තිබුණා. නමුත් රූපවාහිනී නාළිකා අපේ රිසච් එක විශ්වාස කරන්න ලෑස්ති වෙලා හිටියේ නැහැ. ඒක තමයි සිදු වුණේ.

ස්වාධීන රූපවාහිනිය මෙය ලබා ගැනීමේදී අනුගමනය කළ ක්‍රමවේදය කෙබඳුද? නාට්‍යය විකාශය වන අතරතුර ඒ ක්‍රමවේදය වෙනසක් වුණාද

ස්වාධීන රූපවාහිනිය කියන්නේ රාජ්‍ය නාළිකාවක්. රාජ්‍ය නාළිකාවක මෙවැනි නාට්‍යයක් විකාශය වීමේ ඉඩකඩ සීමිතයිනේ. නමුත් ස්වාධීන රූපවාහිනියේ අපි නාට්‍යයක් බාරදීමේදී මට රිසිට් එකක් ලැබුණු එකම චැනල් එක. මම මේ කියන්නේ කිසි අර්ථයක් නැතුව. මේ නාට්‍යය මේ දිනයේදී බාර ගත්තා කියලා ඔවුන් රිසිට් එකක් මට ලබා දුන්නා. මොනිටරින් පැනල් එකක් හරහා ගිහින් ඔවුන් අපට නිර්දේශයක් ලබා දෙනවා. එහි පරිදි නාට්‍යයට ලැබෙන සාමර්ථය අනුව විකාශය කිරීම සිදු කරනවා. එයට ලැබෙන මුදල සහ විකාශය වන වේලාව කියනවා. ‘කූඹියෝ’ නාට්‍යය ඉතා ඉහළ සාමර්ථයකින් ඉන් සමත් වුණා. සමත් වූ පසු තමයි ඔවුන් අපි සමග වැඩිදුරටත් කතා කළේ. ඔබ බැලුවොත් කූඹියෝ නාට්‍යයේ අවසානයේදී නාට්‍යය හරහා මතු කරන දේශපාලන අදහස සහ රටේ පවතින දේශපාලනය ‘කූඹියෝ’ තුළින් විවේචනය කරන විදිහත් සමග රාජ්‍ය නාළිකාවක ‘කූඹියෝ’ විකාශය කරන්න බෑ. අපි සමහර දේවල් නිර්මාණශීලී ලෙස ඇඟිල්ල දිගුකළා. එවන් නාට්‍යයකට ඉඩක් ලැබුණේ ඒ ක්‍රමවේදය පැහැදිලිව පැවතුණු නිසා. එය තෝරා පත්කර ගත් මණ්ඩලය ඉතා මධ්‍යස්ථව ගත්ත තීරණයක් කියලා තමයි මට හිතෙන්නේ. එහෙම නැත්තම් මේ නාට්‍යය විකාශය කරන්නේ නැහැ.

29683241_1630991146948678_5345611848049083650_n

මේ විකාශන කාලය මිලදී ගෙන නාට්‍යය විකාශය කරා කියන කතාවත් ඇතිව තිබුණා

එහෙම දෙයක් සිදු වුණේ නැහැ. නාළිකාව විසින් ගෙවනු ලැබූ මුදල අපි හිතපු මුදලට වඩා අඩුයි. නමුත් අපට ස්වාධීන රූපවාහිනියෙන් අවස්ථාව ලැබුණු නිසා මමත්, නිෂ්පාදකවරයාත් කතා කරලා ගත්ත තීරණයක්. මේ මොහොතෙත් ‘කූඹියෝ’ පාඩුයි. මම හිතන්නේ මූල්‍යමය පාඩුවට වඩා නිෂ්පාදක අසංක දොඩන්තැන්න හිතන්නේ මිනිසුන්ගේ දැක්ම, ප්‍රේක්‍ෂක ආදරය ගැන. ස්වාධීන රූපවාහිනියේ බෙල්ට් එකක් සල්ලි දීලා ගන්න තියා නාට්‍යය අලෙවි කරන්න යන විට මගේ හා දමිතගේ අතේ ත්‍රිරෝද රථයක යන්නවත්, ඩී.වී.ඩී. ගහගන්නවත් සල්ලි තිබුණේ නැහැ.

මේ ප්‍රේක්‍ෂකාගාරය වෙනුවෙන් එවන් අභියෝගයක් නැවත ගන්න සූදානම්ද

අනිවාර්යයෙන්ම. ‘කූඹියෝ’ දෙක නොවුණත්, වුණත් මේ ප්‍රේක්‍ෂකාගාරයට අප තුළ ලොකු ගරුත්වයක් තිබෙනවා. අපිව ප්‍රශ්න කරපු හැටි, අපිව විවේචනය කළ හැටි, නිර්මාණයට ආදරය කළ හැටි විශේෂයි. අපේ ඊළඟ නිර්මාණයේදී සමහර විට ඔවුන් බණියි. අපි එයට පවා ලෑස්තියෙන් තමයි නිර්මාණය කරන්නේ. අපි ‘කූඹියෝ’ ලිව්වෙම ලංකාවේ මෙවන් ප්‍රේක්‍ෂකාගාරයක් සිටින බව උපකල්පනය කරලා. අපේ උපකල්පනය සියයට සියයක් සාර්ථක වුණා. අපි ඒ කියපු දේ නාළිකාවත් ලංකාවේ හිටපු බොහෝ අය පිළිගත්තේවත් නෑ. දමිතයි, මමයි දිගටම වැඩ කරන්නේ ඕඩියන්ස් එකට ආතල් එකක් දෙන්න. අපි සම්මාන බලාපොරොත්තු වෙන්නෑ. අපේ ආතල් එක මිනිස්සු ඒක බලලා එකෙන් ආතල් වෙන එක.

මේ වන විට නාට්‍යය අවසන්. මේ ආතල් එක විඳින ගමන් එහි යටිපෙළ ප්‍රේක්‍ෂකාගාරය කියවූ ආකාරය ගැන ඔබේ අදහසක් ඇති

ආතල් එකේ ලේයර්ස් තියෙනවා. අපි හැමවිටම හිතන්නේ බහුතර ප්‍රේක්‍ෂකයන්ට ළංවිය හැකි මූලික මතුපිටක් ඒ තුළ නිර්මාණය කරන්න. හැබැයි ඒ තුළ තවත් ලේයර්ස් බොහෝ ප්‍රමාණයක් එකතු කරනවා. මේ ලේයර් තුළින් ඇතුළට යන්න ප්‍රේක්‍ෂකයෙකුට හැකි නම් එයට අවශ්‍ය ප්‍රතිපාදන නිර්මාණය ඇතුළෙ සපයන්න අපි බලාපොරොත්තු වෙනවා. ‘කූඹියෝ’ තුළත් අපි එය කළා. එහි අරුත මහා ප්‍රේක්‍ෂකාගාරයට රස විඳින්න බැරි තැනක නෙමෙයි ඊළඟ ලේයර්ස් තියෙන්නේ කියන එක. ඒ රසය එහෙම තියෙද්දිම නිර්මාණයේ ගැඹුර අධ්‍යයනය කරමින් ආතල් ගන්න ප්‍රේක්‍ෂකයෙකුට ඒ ස්පේස් එක අපි තියලා තියෙනවා. ඒ නිසා තමයි ‘කූඹියෝ’ ගැන දෙවැනි, තුන්වැනි, හතරවැනි කියවීම් ආවේ. එහෙත් අපේ මූලික පර්පස් එක තමයි මහා ප්‍රේක්‍ෂකාගාරයට මේ තුළ ආතල් එක දීම

එහි ඇරඹුම මේ ‘කුඹියෝ’ නාට්‍යය අවසන් කළ තැනද? එහෙම නැත්නම් වෙනත් නිර්මාණයක්ද

ගොඩක් අය හිතනවා අපි ‘කූඹියෝ’ ඉවර කර තැනත් එක්ක සීසන් ටූ එකකට ගේට් එකක් ඕපන් කරගත්තා කියලා. එහෙම එකක් නැහැ. ලංකාවේ කවුරුත් මීට කලින් ‘කූඹියෝ’ වගේ කතාවක් අත්විඳලා තිබුණේ නැහැ. අපි ඒක ගෙනාව. ජෙහාන් ප්‍රනාන්දු චරිතය නැතුව පවා අපට ‘කූඹියෝ’ දෙක කරන්න පුළුවන්. ඒ විශ්වාසය ඉතා ඉහළින් තියෙනවා. ‘කූඹියෝ’ දෙකද එහෙම නැත්තම් වෙනත් නිර්මාණයක්ද කියන්න අපි තවම තීරණය කරලා නැහැ. එහෙත් අපි නැවත ප්‍රේක්‍ෂකයා අතරට එනවා.

වෙළෙඳ පොළකට නිෂ්පාදනයක් යොමු කළාම එය සාර්ථක නම් ඇයි ඒ සාර්ථක නිෂ්පාදනය නැවත මේ වෙළෙඳ පොළට යොමු නොකරන්නේ

‘කූඹියෝ’ දෙකද කියන එකට වඩා එහි නිර්මාණශීලීත්වය තමයි අපි විශ්වාස කරන්නේ. දමිතයි, මමයි හැම විටම උත්සාහ කළේ ‘කූඹියෝ’ නාට්‍යය පුරාම ඉතා නිර්මාණශීලීව දෙන්න. ඕනෑම චරිතයක් ගෙනාවත් එහෙමයි. අපි හැමවිටම උත්සාහ කරන්නේ ඉතා නිර්මාණශීලීව දෙන්න. අපි ඉදිරියට ගෙන යන්නේ අපේ නිර්මාණශීලීත්වය. ඒ වගේම තව විශේෂ දෙයක් කියන්න ඕන. මේ නාට්‍යයට ලැබුණ සම්මානය ලක්මාල් ධර්මරත්නට, දමිත චන්ද්‍රසිරිට, අසංක දොඩන්තැන්නට හෝ ‘කූඹියෝ’ කණ්ඩායමට වැඩිය ප්‍රේක්‍ෂකයන්ට අයිති සම්මානයක්. ඒක ඔවුන්ට ලැබුණා කියලා අපි හිතන්නේ. ඒ ප්‍රේක්‍ෂකාගාරයට කණ්ඩායම ස්තුති කරනවා. ඒ ජයග්‍රහණයට ප්‍රේක්‍ෂකාගාරය ගෙන යන්න අපේ කණ්ඩායමේ මහන්සිය කැපවීම හේතු වුණා. ඒ සියලු දෙනා මතක් කිරීම තමයි කළ යුත්තේ. 

25995005_231365770736651_6421727666457125041_n

 

රූපවාහිනිය ජංගම දුරකථනයට රැගෙන ආ රස ටීවී

COFFEE-WITH-ANU-(2)

ලෝකය අලුත් වීම, නව තාක්ෂණය සමාජයට එක්වීම සේම තරුණ පරපුර ඒ වටා රොක් වීමත් ඊයේ, අද මෙන්ම හෙටටත් පොදු කාරණාවකි. ඇතැමුන් මේ පිළිබඳ මැසිවිලි නැගුවද මෙය කිසිසේත්ම වළකාලනු හැක්කක් නොවේ. කළ යුත්තේ ඒ වෙනස හඳුනාගෙන යහපත් අයුරින් ඊට අනුගත වීමය.

අසූව දශකයේ සිනමාව සහ ගුවන්විදුලියට පවා තර්ජනයක් වෙමින් රූපවාහිනිය මේ රටේ ප්‍රබලම මාධ්‍යය බවට පත්වෙද්දී එකල සිටි තරුණ පිරිස් ඒ වටා එක්රොක් වූහ. අද තත්ත්වය ඊට හාත්පසින්ම වෙනස් වී තිබේ. නිරතුරුව ජංගම දුරකථනය සමග ගනුදෙනු කරමින් සිටින වර්තමාන තරුණ පිරිස මේ වන විට රූපවාහිනියෙන් දුරස් වී හමාරය. කාර්යබහුල ජීවන රටාවත් සමග තරුණ පරපුරට පමණක් නොව වැඩිහිටියන්ට පවා නිරතුරුව රූපවාහිනිය හා එක්වීමට කාලයක් නොමැති තත්ත්වයක් මේ වනවිට ගොඩනැගී තිබේ.
ජංගම දුරකථනය වටා සිටින පිරිස ඉන් මුදවා ආලින්දයේ රූපපෙට්ටිය අසල වාඩි කරවීමට ඇතැමුන් තැත් කරද්දී කාලයේ වෙනස වටහාගෙන නිරතුරුව ඊට අනුගත වන ‘Wide Angle’ ආයතනය ‘Dialog TV’ හා එක්වෙමින් රූපවාහිනිය ජංගම දුරකථනයට ගෙන ඒමට කටයුතු සූදානම් කර තිබේ. ඒ ‘රස TV’ ඉදිරිපත් කිරීම මගිනි.

‘රස TV’  තම ජංගම දුරකථනය හරහා නැරඹිය හැකි නාළිකාවකි. පසුගිය 6 වැනිදා එළිදැක්වූ ‘රස TV’ සතියේ දින 7ම පැය 24 පුරා විකාශය වන නාළිකාවක් වීමද විශේෂත්වයකි. ඕනෑම අයෙකුට තමන්ගේ ජංගම දුරකථනය හරහා රස TV නැරඹිය හැකි අතර ඔබ කළ යුත්තේ ‘DIALOG MY TV’ නමැති ඇප් එක තම ජංගම දුරකථනයට බාගත (Download) කොට ඒ හරහා රස TV Search කිරීමය. ඉන්පසු නාළිකාවේ ඕනෑම වැඩසටහනක් Search කර නැරඹීමේ හැකියාව ලැබේ.
මෙය සම්පූර්ණයෙන්ම විනෝදාස්වාදය මුල්කරගෙන බිහි වූ නාළිකාවක් වන අතර නළු නිළි Gossip, නිරූපණ ශිලිපීන් සම්බන්ධ වැඩසටහන්, සංගීතමය වැඩසටහන් මෙහි විකාශය කෙරේ. ටෙලිනාට්‍යය චිත්‍රපට මුහුරත් උළෙල, මංගල දර්ශන, ජනප්‍රිය පුද්ගලයන්ගේ විවිධ උත්සව අවස්ථා ආවරණය කිරීමද මෙමගින් සිදුවේ. 

HERDA-SAAKSHIYA-2

ඊට අමතරව යම් ආන්දෝලනාත්මක වැඩසටහන් සඳහාත් ‘රස TV’ වෙන් වී තිබේ. ‘හෘද සාක්ෂිය’ ඉන් එකකි. කලාව, දේශපාලනය ඇතුළුව සමාජයේ විවිධ ඉසව් තුළින් කතාබහට ලක් වූ, සමාජයට යම් බලපෑම් කළ ආන්දෝලනාත්මක චරිත සම්බන්ධ කරගන්නා ‘හෘද සාක්ෂිය’ උසාවියක පසුතලයෙන් යුතු දර්ශන තලයක ඉදිරිපත් කෙරේ. සුදු හැඳගත් ආරාධිතයා සාක්ෂි කූඩුවක සිටියදී වැඩසටහන ඉදිරිපත් කරන කළු කෝට් හැඳි නිවේදකයා ප්‍රශ්න කරන්නේ නීතිඥයෙකුගේ ස්වරූපයෙනි. 
එසේම අංක එකේ නිරූපණ ශිල්පිනියන් සහභාගි කරගන්නා ‘Hot Chat’ තවත් එවැනි සුවිශේෂ වැඩසටහනක් ලෙස හැඳින්විය හැකිය. එහිදී ආරාධිතයාගෙන් අතිශය පෞද්ගලික ප්‍රශ්න පවා අසනු ලබන අතර මේ වන විට මෙම වැඩසටහන් සඳහා ජනප්‍රිය චරිත කිහිපයක්ම සහභාගි වී ඇති අතර, ඉදිරියේදීද එබඳු සුවිශේෂී පුද්ගලයන් ඊට එක්වීමට නියමිතය.

රූපවාහිනිය පොදු මාධ්‍යයක් වුවද සිය පෞද්ගලික ජංගම දුරකථනයෙන් නරඹන  හෙයින් ‘රස TV’ පෞද්ගලික මාධ්‍යයක් නිසා මෙවැනි වැඩසටහන්වලදී නිවේදක නිවේදිකාවන් ආරාධිතයාගෙන් සෘජුව සහ විවෘතව ප්‍රශ්න ඇසීමක් සිදු කෙරේ.
සාමාන්‍යයෙන් රූපවාහිනී වැඩසටහනක කාලය පැය භාගය හෝ ඊට වැඩි වුවද ‘රස TV’ වැඩසටහන් විනාඩි 10කට සීමාවේ. ‘හෘද සාක්ෂිය’ ‘Hot Chat’ වැනි වැඩසටහන් විනාඩි 10 කොටස් තුනකින් යුක්තය.
නරඹන්නන්ට නැවුම් අත්දැකීමක් ලබාදෙන්නට ප්‍රසංග ගුණසිංහ සහ තුසිත විමලසිරි ඇතුළු ‘රස TV’ කාර්යමණ්ඩලය නිබඳවම කැප වී සිටිති. සෑම දිනකම විකාශය වන සියලුම වැඩසටහන් ඊට පෙරදින උඩුගත (Upload) කරනු ලබන අතර දැනට ජංගම දුරකථනයට සීමා වී ඇති ‘රස TV’ ඉදිරියේදී රූපවාහිනී නාළිකාවක් ලෙස රැගෙන එන්නටද මේ දිනවල කටයුතු සැකසෙමින් පවතී.

ME-AND-MY-LIFE-STYLE PEAK-TIME prasanga-gunasinghe