Category Archives: entertainment

දැන් ‘මතු රැකෙනා ශිල්පයමයි උගතමනා’ කියලා කියන්න සිදුවෙලා

තිර රචකයෙකු මෙන්ම වේදිකා නාට්‍යය රචකයෙකු ලෙසද බොහෝ කාලයක් කටයුතු කළ අජිත් මෙන්ඩිස් මහතා නාට්‍ය අධ්‍යක්‍ෂවරයෙකුද වෙයි. 'හදන්නම බෑ' වේදිකා නාට්‍ය ඔහුගේ නවතම නාට්‍ය නිර්මාණය වෙයි. එහි මංගල දර්ශනය මේ මස 20 වැනිදා සවස 6.30ට නව නගර ශාලාවේදී පැවැත්වෙන අතර, පසුදා (21දා) සවස 3.30ට සහ 6.30ට දර්ශන වාර දෙකක්ද නව නගර ශාලාවේදීම පැවැත්වීමට නියමිතය. මේ කතාබහ ඒ පිළිබඳවය.


Hadannama Baa DRAMA 001

Q 'හදන්නම බෑ'  නාට්‍යය හරහා ඔබ සමාජගත කරන්න උත්සාහ කරන කාරණාව මොකක්ද

මම මේ නාට්‍යය තුළින් කතා කරන්නේ ලංකාවේ අධ්‍යාපනයේ තිබෙන අවිධිමත්භාවය පිළිබඳව. මීට වසර ගණනකට පෙර පැවැති  අධ්‍යාපනය තුළ සිස්ටම් එකක් තිබුණා. දැන් ඒ තත්ත්වය වෙනස් වෙලා තියෙන්නේ. මීට පෙර අපි සඳහන් කළේ %උගතමනා ශිල්පයමයි මතු රැකෙනා^ කියලා. නමුත් දැන් 'මතු රැකෙනා ශිල්පයමයි උගතමනා' කියලා කියන්න සිදුවෙලා තියෙනවා. ඒ කියන්නේ දැන් ඉගෙන ගන්න සිදුව තිබෙන්නේ වෘත්තියක් ඉලක්ක කරගෙන. පරිබාහිර දැනීමක් ඔවුන් තුළ නැහැ. පෘථුල පරිබාහිර දැනීමක් ඇති පුද්ගලයා මේ සමාජයේ පිස්සෙක් බවට පත් වෙනවා. සමාජය හදන්න පුළුවන් මිනිස්සු අද සමාජයේ පිස්සන් බවට පත්ව තිබෙනවා. ඒ වගේම අප මුහුණ දෙන ඊළඟ ගැටලුව වන්නේ චීන ආක්‍රමණය. අපි සංස්කෘතිකමය හා ආර්ථික වශයෙන් චීනයට නතුවෙමින් පවතිනවා. ක්‍රමානුකූලව එය සිදුවනවා. අපට නොදැනීම චීන කොළනියක් බවට අපි පත්වෙනවා. චීන කොළනියක් බවට පත්වීම සහ අපේ අධ්‍යාපනය කුමන දිශානතියකටද යන්නේ කියලා හිතන්න සිදුව තිබෙනවා. මම මේ කාරණාව මේ නාට්‍යය හරහා කතා කරනවා. ලංකාවේ නාට්‍යයක් කරන කොට ප්‍රස්තුතය, අන්තර්ගතය වගේම එය ඉදිරිපත් කරන ආකාරය ගැන ගොඩක්  හිතන්න සිදු වෙනවා. නාට්‍යයක් වැඩි දර්ශන වාර සංඛ්‍යාවක් වේදිකාගත කරන්න නම් හාස්‍යය අවශ්‍යය වෙනවා. මීට පෙර නාට්‍ය රුචි සංවිධායකවරු වේදිකා නාට්‍යය ගමෙන් ගමට ගිහින් සංවිධානය කළා. නමුත් අද වන විට එවැනි සංවිධායකවරු ලංකාවේ නැහැ. අද ලංකාවේ නාට්‍ය සංවිධානය කරන්නෙ සුභසාධක සමිති සමාගම්. අදාළ දර්ශන වාර තමයි බොහෝ විට පවත්වන්නෙ. ඔවුන් නාට්‍යයක් ලබා‍‍‍ගද්දි අහන්නේ මේ නාට්‍යයේ කොමඩි තියෙනවද කියලා. දෙවැනියට අහන්නේ රූපවාහිනී නළු නිළියෝ ඉන්නවද කියලා. රූපවාහිනී නළු නිළියන්ගේ චරිතවලින් තමයි අද නාට්‍යය විකුණන්න වෙලා තියෙන්නෙ. එය කනගාටුවට කරුණක්. ඒ නිසා මේ පවතින රටාවටත් තරමක් අනුගත, සමාජ ඛේදවාචකයක් ගැන තමයි කතා කරන්නෙ.

Q සමාජ ඛේදවාචකයන් කතා කරන්න වේදිකාවම තෝර ගන්න සිදුව තිබෙන්නේ ඇයි. ජනප්‍රිය මාධ්‍යවල ඒ සංවාදයට ඉඩක් නැද්ද

මේක වෙනත් මාධ්‍යයක කතා කරන්න බෑ. ඒකට ඉඩක් නැහැ. මේ වන විට මම දීර්ඝ රූපවාහිනී ටෙලිනාට්‍ය පිටපත් දහයක් පමණ රචනා කර තිබෙනවා. ඒකාංගික ටෙලිනාට්‍ය අසූවක් පමණ රචනා කර තිබෙනවා. නමුත් අපිව මෙහෙයවීම සිදුකරනුනේ නාට්‍ය අධ්‍යක්‍ෂවරයා, එසේත් නැත්තම් ඊට  එහා ගිය නිෂ්පාදක හෝ මාධ්‍ය ආයතනවල ප්‍රධානීන්. එහෙම වුණාම අපට අවශ්‍ය දේ කරන්න හැකියාවක් නෑ. එය  රස්සාවට කරන දෙයක් විතරක් වෙලා තියෙන්නෙ. වේදිකාව තුළ එහෙම  සීමා දාන්න කවුරුත් නෑ. මම වේදිකා නාට්‍ය කරන්න තෝරාගත්තෙම මෙවැනි සමාජ ප්‍රශ්නයක් තියෙන කාරණාම තමයි. මම රචනා කළ සියලුම වේදිකා නාට්‍ය දර්ශන වාර සියය ඉක්මවා ගොස් තිබෙනවා. මම හිතනවා ඒ නිසා වේදිකාවේ කතා කරන මේ දේවල් සාර්ථකයි කියලා. එහෙත් වේදිකාව තුළත් මේ දේ ප්‍රේක්‍ෂකයාට ලබා දීමට විවිධ උපක්‍රම භාවිත කරන්න සිදුවෙනවා. මේ නාට්‍යය තුළත් ආලෝකකරණයෙන්, ඇඳුම් නිර්මාණයෙන් අපි යොදා ගත්තේ ෆැන්ටසියක්. තාරුණයේ ප්‍රශ්න කතා කරන කොට ෆැන්ටසියක් අවශ්‍ය වෙනවා. තාරුණ්‍යයට උචිත වර්ණය දෙන්න නම් ෆැන්ටසියක් අවශ්‍ය වෙනවා. නාට්‍යකරුවෙක් හැමවිටම පෙර ගමන්කරුවෙක් වෙන්න ඕන. මම හිතන්නේ එහෙමයි. රූපවාහිනියෙන් මේ දේ කරනවා නම් එය සිදුකළ යුත්තේ ටෙලිනාට්‍යයකින් පමණයි. ටෙලිනාට්‍ය තුළ මෙය සිදුකළාට පලක් නෑ. ටෙලිනාට්‍ය තුළ මේ දේ සිදුකළත් මාධ්‍යය ආයතනවල ප්‍රධානීන් බලලා ඒ නාට්‍යයම ප්‍රතික්‍ෂේප කරනවා. අද මිනිසුන්ගේ රසඥතාව තිබෙන්නේ වෙන තැනක. ඔවුන් නිතරම ඉන්නේ ෆැන්ටසිය එක්ක. ඉන්දියන් ටෙලිනාට්‍යයවලට මිනිසුන් නැඹුරු වී තිබෙන්නේ ඒ  ෆැන්ටසිය නිසා. රටක් ආර්ථික වශයෙන් හා බුද්ධිමය වශයෙන් දුප්පත් වන විට ඒ රට තුළ ෆැන්ටසිය විකුණන්න පුළුවන්. කලාව ෆැන්ටසියක් වෙනවා. මිනිස්සු ගැඹුරු ග්‍රහණයකට වඩා මතුපිට සරලින් ග්‍රහණය කරගන්න තමයි යොමු වෙන්නෙ. ඉන්දියානු සිනමාව ජනප්‍රිය වෙන්නත් ආර්ථිකමය හා මිනිසුන්ගේ බුද්ධිමය Ajith Mendisදුප්පත්භාවය තමයි බලපාන්නේ. අපිත් එවැනි තැනකට ගමන් කරමින් සිටිනවා.

Q මේ නාට්‍යය සඳහා අත්වැල් බැඳ‍ගත් ශිල්පීන් ගැන මතක් කළොත්

මේ නාට්‍යයේ නිරෝෂන් විජේසිංහ, මහින්ද පතිරගේ, රොෂාන් පිලපිටිය, සමන් හේමරත්න, කුමාරි සේනාරත්න, මිහිරි ප්‍රියංකර ආදීන් රංගනයෙන් දායක වෙනවා.

Q ඔබ බොහෝ කාලයක් වේදිකාවත් එක්ක ගනුදෙනු කරනවා. ඒ අතීතය දෙස හැරී බලද්දි තෘප්තිමත් විය හැකිද

1983 දී තමයි මම මුලින්ම නාට්‍යයක් රචනා කර අධ්‍යක්‍ෂණය කළේ. ඒ %දෙයියන්ගේ පුංචි අක්කරය^ කියන නාට්‍යය. එයට ජාතික තරුණ සේවා නාට්‍යය උලෙළේදී සම්මාන හතක් හිමිවෙනවා. පසුව %ජුදාස්ගේ රාත්‍රිය^, %කෑම ලෑස්තියි^, %අලුත් හොරෙක්^ වගේ නාට්‍යය මම අධ්‍යක්‍ෂණය කළා. ඒ වගේම මම වේදිකා නාට්‍ය කිහිපයක්ම රචනා කළා. මම හැමවිටම කතා කළේ සමාජ ප්‍රශ්නයක් ගැන. මම එක් පරිවර්තන නාට්‍යයයි සිදුකළේ. ඒ දාරියෝ ෆෝ ලියූ %ගැබ්බර මිනිසා^ නාට්‍යය. ඒ  මිනිත්තු 30ක කෙටි නාට්‍යයේ තේමාව අරගෙන මම නාට්‍යය රචනා කළා. එයත් දර්ශන වාර සියය ඉක්මවා වේදිකාගත වුණා. මම රචනා කළ, අධ්‍යක්‍ෂණය කළ හැම නාට්‍යයක්ම දර්ශන වාර සියය ඉක්මවා වේදිකාගතව තිබෙනවා. මම කාලයට අනුව සමාජ ප්‍රශ්නයක් තේමා කර ගෙන නිර්මාණ කරන්නේ. මම කතා කළේ යුගයට ගැළපෙන දේවල්. එය ප්‍රේක්‍ෂකයන් වැලඳ ගත්තා. ඒ ගැන තෘප්තිමත්.

සමාජ ජීවිතය සුරක්ෂිත කර ගැනීම උදෙසා ගුණාත්මක නාට්‍ය කලාවක් පැවැතීම ඉතා වැදගත්

රාජිත දිසානායකගේ ‘ආදර වස්තුව’ වේදිකා නාට්‍යයේ පස් වැනි වර්ෂ පූර්ණ දැක්ම ජනවාරි 21 වැනිදා සවස 7ට පැවැත්වෙන අතර, ඒ ලයනල් වෙන්ඩ්ට් රඟහලේදීය. 2014 වසරේ රාජ්‍ය නාට්‍ය උලෙළේදී හොඳම නාට්‍ය රචනය සහ හොඳම නළුවාට හිමි සම්මානය දිනාගත් මෙම නාට්‍ය පිළිබඳ මෙහි නිෂ්පාදක (අධ්‍යක්ෂක) රාජිත දිසානායක සමගින් කතාබහක යෙදීමට අපි සිතුවේ එබැවිනි.


Ragitha Desasakara

Q ’ආදර වස්තුව’ කොහොමද තත්කාලීන සමාජයට වැදගත් වෙන්නේ

මෙහි ඉසියුම් අර්ථ ඒ කාලේ එතරම් ප්‍රේක්ෂකයාට සමීප වුණේ නැහැ. ඒත් මේ වෙනකොට මේ නාට්‍ය නව අරුත් ප්‍රේක්ෂකයාට සන්නිවේදනය කරමින් පවතිනවා. මොකද ‘ජනවාරි 08’ වෙනස සිදුවීමට අවුරුද්දට කලින් ලංකාව තුළ තමයි මේ නාට්‍ය දිගහැරෙන්නේ. 
විශ්වවිද්‍යාල ආචාර්යවරයෙක් සහ විද්‍යාර්ථයෙක්ගේ ප්‍රේම සබඳතාවක් නිම වී වසර දහයකුත් පසුවූ පසු ආදරවන්තයන් දෙදෙනෙකු පාදක කර ගනිමින් විශ්වවිද්‍යාල ආචාර්යවරයා සිදුකරමින් සිටින දේශපාලන කුමන්ත්‍රණයක් හෙළිකර ගැනීමට නැවත විද්‍යාර්ථයා ඔහු සොයා ඒම වටා තමයි මෙහි පසුබිම ගොඩනැගෙන්නේ. එහිදී හැඟීම් සහ සිතිවිලි ගැටෙන ආකාරයත්, බලය වෙනස් වන ආකාරයත් ගැන අලුත් කතාබහක් ඇති කිරීමට අපි උත්සාහ කළා.

Q අනාගතය දැකිය හැකි ස්වතන්ත්‍ර නාට්‍ය රචකයන්ගේ රික්තයක් පවතිනවා නේද

රචකයෙක් විදිහට මමත් ඒ විවේචනය දිහා ඉතා කැමැත්තෙන් අවධානය යොමු කරනවා. උදාහරණයකට මගේ අවුරුදු දහ හතරක් පමණ වයසැති ‘සිහින හොරු අරන්’  නාට්‍ය තවමත් මේ සමාජයට අදාළයි කියලයි මට පේන්නේ. ඒ වගේම ‘වීරයා මැරිලා’ වේදිකා නාට්‍යයටත් අවුරුදු දොළහක්. 
‘ආපහු හැරෙන්න බෑ’ නාට්‍යයටත් අවුරුදු දහයක්. ඒ නිසා මේවායේ වලංගුභාවය තීරණය කරන්නේ කාලය විසින්මයි. කොහොම වුණත් මගේ ඒ පිටපත් සියල්ල එදාට වඩා අදට වලංගු බවයි පවතින සමාජය දිහා බලද්දි මට පේන්නේ.

Q නාට්‍ය පිටපතක් කියන්නේ තවදුරටත් සාහිත්‍යමය ලියවිල්ලක්ද

නාට්‍යයක් කියන්නේ රංගයකට උචිත ආකාරයෙන් කරනු ලබන ලිවීමක්. ඒත් එය කෘතියක් ලෙස අතට ගෙන සාහිත්‍යමය ලියවිල්ලක් ලෙසින් රසවිඳින සම්ප්‍රදායකුත් අපට තියෙනවා. හැබැයි නාට්‍යයක් කියන්නේ එහි පිටපත නෙමෙයි.

Q කොහොම වුණත් නාට්‍ය කලාව හරහා වත්මන් සමාජයට කළ හැකි බලපෑම එදාට වඩා පහළට ගිහින් නේද

නාට්‍ය කලාව තුළ පවතින ශක්‍යතාවේ අඩුවක් වෙලා නැහැ. මොකද වෙනත් මාධ්‍යයකින් ලබනවාට වඩා සුවි‍ශේෂී රංගයක් නාට්‍ය මාධ්‍ය හරහා සජීවීව අත්විඳින්න පුළුවන්. ඒ නිසා ඒ රසය දන්නා කෙනා ඒ රසය සොයාගෙන යනවා. ඒත් බහුතරයකට වෙලා තියෙන්නේ ඒ රසය හඳුනා ගැනීමට තරම් වාසනාව නැතිකම. අවස්ථාව නැතිකම. එයයි ගැටලුව. මොකද වීඩියෝ පටයකින් හෝ අන්තර්ජාලයෙන් හෝ මේ නාට්‍ය රසය අපට හරියාකාරව ලබන්න බැහැ. ඒ නිසා ඒ විඳීම පැහැදිලිවම කාරණා දෙකක්. කොහොම වුණත් නාට්‍ය කලාව මේ ආකාරයෙන් හෝ පවතින්නේ සජීවී රංගයක පවතින චමත්කාරය හඳුනන සීමිත ප්‍රේක්ෂකයන් පිරිස හින්දයි. එය වැඩිකර ගැනීමයි වඩා වැදගත් වෙන්නේ.

Q ඒත් සියල්ලම විකිණෙන සමාජයක ගුණාත්මක යමක් වෙනුවෙන් අලෙවි වීමේදී ඒ ජනප්‍රියත්වය ප්‍රයෝජනය ගත හැකියි නේද

ඔව්. හැබැයි වඩා වැදගත් වෙන්නේ අදාළ ජනප්‍රිය රූපණ ශිල්පීන් කලාව පිළිබඳ හිතන විදිහ, කලාව පිළිබඳ තියෙන ඇල්ම සහ සමාජය පිළිබඳ අදහස නොසිඳී පෝසත්ව පවත්වාගන්න පුළුවන්ද යන්නයි. එවැනි පිරිස් තමන්ගේ ප්‍රකාශනය සඳහා භාවිත කළාට කමක් නැහැ. මොකද නැත්නම් සිදුවෙන්නේ අදාළ ජනප්‍රියත්වය විසින්ම ඔවුන්ව හුදු වෙළෙඳ භාණ්ඩ බවට පත්කිරීම පමණයි. එයින් සමාජයට සැලසෙන සෙතක් නැහැ.

Q නිවෙස්වල සිටි ප්‍රේක්ෂකයාව රඟහලට රැගෙන ආ රැල්ල අපට එදා ගුණාත්මක රැල්ලක් බවට පත්කර ගැනීමට අවස්ථාවක් තිබුණා නේද

ඒක කවදාවත් සිදුවෙන දෙයක් නෙමෙයි. පුහු හාස්‍ය රැල්ලකට හසුවූ වේදිකා නාට්‍ය ප්‍රේක්ෂකයන්ට ගුණාත්මක රසිකත්වයක් තියෙනවා කියලා හිතන්න අමාරුයි. ඒ නිසා එතැනින් අපට ස්ථාවර රසිකයෙක් බලාපොරොත්තු වෙන්න බැහැ. මොකද ඒ නාට්‍ය බොහොමයකම කලාත්මක බවක් තිබුණා කියල හිතන්න අමාරුයි.

Q නාට්‍ය හා රංග කලාව අධ්‍යාපනික විෂයයක් වුණත් එවන් විෂයයක් නොතිබුණු කාලයේ තරම්වත් දියුණු නාට්‍ය කලාවක් බිහිකර ගැනීමට  තවමත් අපොහොසත් වී ඇති බවට චෝදනාවක් තියෙනවා

ඒ චෝදනාව සාධාරණයි. මොකද පොදුවේ විවිධ නාට්‍ය ධාරාවන් රසවිඳින රසිකයෙක් මේ හරහා බිහිවෙන්නේ නැහැ. කලාවට ගරු කරන නිදහස් රසිකයෙක් බිහිවෙන්නේ නැහැ. විශ්වවිද්‍යාල ආචාර්යවරු පවා සිදුකරන්නේ තමන් කැමති නාට්‍ය කෘති කිහිපයක් පමණක් හැදෑරීමට ලබාදීම පමණයි. එහෙම නැත්නම් තමන්ගේ වෙනත් දාර්ශනික දේවල් තමයි උගැන්වීම පමණයි. එහෙම නැතුව මේ මොහොතේ වේදිකාගත වන නාට්‍ය නැරඹීමට අවශ්‍ය පෙළඹවීම ඔවුන් ඇති කරන්නේ නැහැ. අනික තමන් අකමැති නාට්‍යකරුවන් ප්‍රතික්ෂේප කිරීම ඇරුණම විචාරශීලී රසිකයෙක් ඇති කරන්න ඔවුන් මහන්සි ගන්නේ නැහැ.

Q එදා සිදුවූ තරුණ කැරළි, තිස් අවුරුදු  යුද්ධය ආදී ලාංකේය තත්කාලීන සිදුවීම් නාට්‍යකරුවන්ට අහුවුණාද

සංඛ්‍යාත්මකව මදි. මොකද ප්‍රමාණවත් පරිද්දෙන් කලාත්මක ප්‍රකාශන ලෙස ඒවා තවමත් නිසියාකාරව එළියට ඇවිත් නැහැ. හැබැයි මමත් තිස් අවුරුදු යුද්ධයකට පස්සේ ජාතිවාදය, ආගම යනාදී සාධක බලය වෙනුවෙන් කොයිතරම් අවස්ථාවාදීව අපේ ආකල්පවලට නරක විදිහට බලපෑම් කරනවද යන්නයි ‘නැතුව බැරි මිනිහෙක්’ නාට්‍ය හරහා කතාබහකට ලක් කරන්න උත්සාහ කළේ.

Q ’රාජිත දිසානායක’ නාට්‍යකරුවාට ජාත්‍යන්තරයට යාමට අවශ්‍යතාවක් තියෙනවාද

මගේ වේදිකා නාට්‍ය කිහිපයක් ඉංග්‍රීසියට පරිවර්තනය වෙලයි තියෙන්නේ. ‘ආපහු හැරෙන්න බෑ’ නාට්‍යයේ ඉංග්‍රීසි පරිවර්තනය මේ වෙද්දි මුද්‍රණය වෙලත් තියෙනවා. ඒ වගේම ඉදිරියේදී මහාචාර්ය රංජනී ඔබේසේකර විසින් ‘මට වෙඩි තියන් නැද්ද’ නාට්‍ය ඉංග්‍රීසියෙන් ප්‍රකාශයට පත් කිරීමට නියමිතයි. හැබැයි අපේම නිෂ්පාදන ජාත්‍යන්තරයට ගෙන යාමේදී නම් ඊට යම් යම් සීමා තියෙනවා. මොකද එහිදී  අපට භාෂා ගැටලුවක් පැන නගිනවා. ඒ නිසා ඔවුන් සම්පූර්ණයෙන්ම නාට්‍යය වටහා ගනීවිද යන්න සැක සහිතයි.

Q ඇයි නාට්‍ය කලාවක් ජනතාවට වැදගත් වෙන්නේ

මේ රට පාලනය කරන පාලකයන්ගේ ක්‍රියාකලාපයන්ගේ පවතින අතිනාටකීය බව සැලකීමේදී මෙහෙමවත් නාට්‍ය කලාව ඉතිරි වී පැවතීම විශාල සතුටක්. ඒත් ඔවුන් තව තව හානි කරන්න නියමිතයි. සංස්කෘතියට හානි කිරීමට නියමිතයි. ඒ නිසා ලොකු අනතුරක් අපි ඉදිරියේ නැතුවා නෙමෙයි. අපේ ඒ සමාජ ජීවිතය සුරක්ෂිත කර ගැනීම උදෙසා ගුණාත්මක නාට්‍ය කලාවක් පැවතීම ඉතා වැදගත්. 

 

ළමයින්ගේ නැති වූ ළමා කාලය වගේම වියපත් වැඩිහිටියන් දෙසත් ආදරයෙන් බැලිය යුතුයි

'නේරංජනා' හා 'උඩුගම් බලා' වැනි ටෙලිනාට්‍ය අධ්‍යක්‍ෂණය කළ නිහාල් ප්‍රනාන්දුගේ නවතම ටෙලි නිර්මාණය ලෙස %අක් වැස්ස^ ටෙලිනාට්‍ය හැඳින්විය හැකිය. මීට අමතරව 'සුළඟ සැර වැඩියි' නමැති සිනමා නිර්මාණයක්ද අධ්‍යක්‍ෂණය කර ඇති ඔහු 'අද' කතාබහට මෙලෙස සම්බන්ධ විය.


007

Q ඔබ විසින් තිර පිටපත හා  අධ්‍යක්‍ෂණය සිදු කළ %අක් වැස්ස^ ටෙලි නිර්මාණය ගැන කතා කළොත්

'අක් වැස්ස' කියන නවකතාව ආශ්‍රයෙන් තමයි මේ ටෙලිනාට්‍ය නිර්මාණය වෙන්නේ. 'අක් වැස්ස' කියන නවකතාව හිටපු පොලිස්පති වික්ටර් පෙරේරා මහතා රචනා කළ නවකතාවක්. ඒ නවකතාවට පාදක වෙන්නේ එක්දහස් නවසිය හැත්තෑ ගණන්වලදී ඇඹිලිපිටිය ප්‍රදේශයේ සිදු වූ සිදුවීමක්. ඔහු එම කාලයේදී ඇඹිලිපිටිය ප්‍රදේශයේ 
එස්.එස්.පී. ලෙස කටයුතු කර තිබෙනවා. ඒ කාලයේදී ඒ පළාතේ ලැබූ අත්දැකීම් එක්ක රචනා කළ පොතක්. ඔහු දිනක් මගෙන් ඇහුවා මේ නවකතාව ටෙලිනාට්‍යයක් බවට පත්කළ හැකිද කියලා. පසුව අපි නිෂ්පාදකවරුන් දෙදෙනෙකුත් සොයාගෙන තිර රචනයක් ලියලා එය නිර්මාණය කළා.

මෙවැනි ටෙලිනාට්‍යයක් රූපවාහිනියට ගෙන ඒම කියන කාරණය අභියෝගාත්මක නැද්ද

ඉස්සර මම 'නේරංජනා', 'උඩුගම් බලා' වැනි ටෙලිනාට්‍ය සිදුකළා. මට හිතෙනවා මම 'උඩුගම් බලා' තමයි පිහිනුවේ කියලා. එක් කතාවක් ජනප්‍රිය වුණාම ඒ ආකාරයේ කතා බොහෝ ප්‍රමාණයක් නිර්මාණය වෙනවා. එලෙසම ඒ කතා ප්‍රතික්‍ෂේප වෙනවා. අපි නිතරම උත්සාහ කළ යුත්තේ වෙනසක් කරන්න. ඒ වෙනස කරන්න තමයි මම නිරන්තර පෙළඹෙන්නේ.

මේ ටෙලිනාට්‍යයට දායක වෙන පිරිස ගැන මතක් කළොත්

නිල්මිණි තෙන්නකෝන්, සුරාජ් මාපා, රෝහණ බැද්දගේ, විජේරත්න වරකාගොඩ, චිත්‍රා වරකාගොඩ, තාරුකා වන්නිආරච්චි, නිලන්ති විජේසිංහ, ලයනල් වික්‍රම, රනිල් ගුණතුංග වැනි පිරිසක් රංගනයෙන් දායක වෙනවා. එක්දහස් නවසිය හෑත්තෑව දශකය තුළ සිදු වූ සත්‍යය සිදුවීමකින් ගොඩ නැගුණු කතාවක්. එය ළඟදීම රූපවාහිනියෙන් බලන්න හැකියාව ලැබෙයි. මේ ටෙලිනාට්‍ය නිෂ්පාදනය කරනු ලැ‍බුවේ එම්.එච්. හෝල්ඩින්ස් ආයතනය හා සහන් ප්‍රනාන්දු විසින්.

01 ok

සුළඟ සැර වැඩියි කියන සිනමා නිර්මාණයට පාදක වන තේමාව ගැන කතා කළොත් 

මේ චිත්‍රපටය  ළමා චිත්‍රපටක් ලෙස නිර්මාණය කළේ. ටියුෂන් පන්තිත් එක්ක ළමයි විඳින පීඩාව අපි දැක්කා. අපේ ළමා කාලය දෙස බැලුවාම අපට මේ තරම් බරක් තිබුණේ නැහැ. පාසලේ වැඩ පාසලට සීමාවුණේ. පසුව පරිසරය එක්ක ඉන්න ලැබුණා. අඹ ගස්වලින් අඹ කඩන්න, ඇළෙන් දොළොන් නාන්න වෙලාව තිබුණා. හරි සන්තෝෂයෙන් පාසල් ගියෙත්. වර්තමාන පරම්පරාව දකින විට මේ දරුවන් විඳින්නේ පීඩාවක් කියලා හිතුණා. එකම දවසේ ටියුෂන් පන්ති දෙක තුනකට ළමයි යනවා. මේ ළමයින්ගේ සුන්දර ළමා කාලයට අසාධාරණයක් වෙලා තියෙනවා කියලා දැක්කා. ළමයින්ගේ නැති වූ ළමා කාලය වගේම වියපත් වැඩිහිටියන් දෙසත් ආදරයෙන් බැලිය යුතුයි කියන තේමාව මේ චිත්‍රපටයට පාදක වෙනවා. 

මේ තේමාව ටෙලිනාට්‍යයක් හරහා සමාජගත නොකර සිනමා නිර්මාණයක් තුළින් කතා කරන්න හිතුණේ ඇයි

මේක සිනමා නිර්මාණයක් හරහා කතා කිරීමේ අභියෝගයක් තිබෙනවා. ඒ සිනමා නිර්මාණය සිනමාහල්වලට පැමිණෙන තුරු හිතේ බයකුත් තියෙනවා. නමුත් මේ මොහොතේ සිනමා නිර්මාණ වගේම ඒකාකාරී ටෙලිනාට්‍ය රැල්ලක් පෝලිමක් තිබෙන්නේ. කුමන මාතෘකාව යටතේ කතා කළත් ඒක තවත් ටෙලිනාට්‍යයක් බවට පත්වෙනවා විතරයි. චිත්‍රපටයක් තුළට මේ තේමාව ගෙන එද්දි ඒ චිත්‍රපටය නැරඹීමට පැමිණෙන්නේ විශේෂිත පිරිසක්. එහෙම වුණාම අපි ගේන පණිවුඩය හොඳින් දැනෙයි කියලා හිතුණා. ඒක තමයි චිත්‍රපටයක් තුළින් මේ තේමාව කතා කළ යුතුයි කියලා හිතුණේ. අනිත් කාරණය අපි මේ නිර්මාණය සිදුකළේ පර්යේෂණයකින් අනතුරුව. එය සිනමා නිර්මාණයකට වඩාත් උචිතයි. මෙහිදී ගාල්ල මහින්ද විද්‍යාලයේ විදුහල්පති ගාමිණී ජයවර්ධන මහතාට, ප්‍රාථමික අංශයේ විදුහල්පති රේණුකා හා කළුආරච්චි කියන ගුරුවරුන් මතක් කළ යුතුයි. ඔවුන්ට විශේෂයෙන් ස්තුතිවන්ත විය යුතුයි. ඒ වගේම අතුල ජයසේකර, ශිරාන් තල්වතුර, නිමල් දන්තනාරායන, මංජුල, අචල, කොස්තා යන අයත් අපි සමග හිටියා ඒ ගැන සඳහන් කළ යුතුමයි.

මේ චිත්‍රපටයට දායක වෙන පිරිසකුත් ඇති. ඒ ගැන කතා කළොත්

මේ චිත්‍රපටයේ නම 'සුළඟ සැර වැඩියි'. සුළඟ කියන්නේ රැල්ල. මේ පවතින රැල්ල ගැන කතා කරන සිනමා නිර්මාණයක්. තිර රචනය හා අධ්‍යක්‍ෂණය මා විසින් සිදුකළේ. රවීන්ද්‍ර රන්දෙනිය මහතා විදුහල්පතිතුමාගේ චරිතය නිරූපණය කරන්න දායක වුණා. ඔහු නිහතමානීව ලබාදුන් දායකත්වය විශේෂයි. අනෙක් විශේෂම කාරණය ඔහු රූපගත කිරීමට නියමිත වේලාවට විනාඩි දහයකට පෙර දර්ශන තලයට පැමිණීම. එයම අනිත් අයට ආදර්ශයක් වුණා. ඒක අපට හරි ධෛර්යයක් වුණා. නිමන්ති පෝරගේ, රෝහණ බැද්දගේ, අනිල් කුලතුංග, මානෙල් වීරමුණි, නුවනි වලිමුණි, චන්ද්‍රසේන වලිමුණි, සමුදු ලංකිකා, නිලූ තෙන්නකෝන්, සඳලි ප්‍රනාන්දු, ධනුෂ්ක අධිකාරි, බිලි දිසානායක හා එයට අමතරව ළමයින් දහසක් පමණ මේ නිර්මාණයට සම්බන්ධ වුණා. සංගීතය දිනේෂ් සුභසිංහ සිදුකළා. අංග රචනය බුවනෙක රණවක, සංස්කරණය හිමාල් ධර්මරත්න, ගීත රචනය ගත්තාම රත්න ශ්‍රී විජේසිංහ මහතාගේ ගීත දෙකකුත්, බන්දුල නානායක්කාරවසම් මහතාගේ ගීතයකුත්, ප්‍රීති රන්දෙනිය මහත්මියගේ ගීතයකුත් තිබෙනවා. මෙහි සහාය අධ්‍යක්‍ෂණය සුභාෂ් වර්ණසිංහ, කැමරාකරණයෙන් නිරංග සංජීව දායක වුණා. ඒ හැම දෙනාගේම සහයෝගය නිසා තමයි මේ නිර්මාණය සාර්ථක කරගන්න පුළුවන් වුණේ

ඔබේ නිර්මාණ ජීවිතයේ ඉදිරි සැලසුම් ගැන කතා කළොත්

මම ලියපු සිනමා පිටපත් කිහිපයක් තිබෙනවා. පර්යේෂණ සිදුකරමින් රචනා කළ ඉතිහාස කතා කිහිපයක්. ඒ නිර්මාණ කරන්න නිෂ්පාදකවරයෙක් අවශ්‍යයි. එහි දිනකට එක සීන් එකට වඩා කරන්න අපහසුයි. රංගන ශිල්පීන්ගේ අඩු බවක් දැක්කා. ඒ නිසා මේ ක්‍ෂේත්‍රයට කැමැති පිරිසක් සිටිනවා. ඔවුන් වෙනුවෙන් ඇකඩමියක් නිර්මාණය කිරීමටත් මේ වන විට සැලසුම් සිදුකරමින් පවතිනවා. ඒ වගේම මම කාලයක් රෝගාතුරව සිටියා. රඹුකන සිද්ධාර්ථ හිමියන්, සෝභිත හිමියන්, ජයන්ත ධර්මදාස මහතා, ෆාදර් සිරිල් ගාමිණී, කරු ජයසූරිය, ගයන්ත ඇමතිතුමා මතක් කළ යුතුයි. නුවර ප්‍රදේශයේ සෞන්දර්යය ගුරුවරු මතක් කළ යුතුයි. ඔවුන් ඒ මොහොතේ මට ලොකු ශක්තියක් වුණා. ඒ වගේම ඉදිරියටත් මම මගේ නිර්මාණ නිදහසේ සිදු කරනවා.

අපි කොමඩි වේදිකාව තුළ කළ නිර්මාණ නැවත සමාජයට වෙනස් අයුරින් ගෙන එන්න බලාපොරොත්තු වෙනවා

වසන්ත දුක්ගන්නාරාළ කියන්නේ කලා ක්ෂේත්‍රය තුළ විවිධ වු භූමිකා නිරූපණය කළ ශිල්පියෙකි. හාස්‍යමය රංගනයට ඉඩකඩ විවර වූ දෙරණ කොමඩි ස්ටාර් රියලිටි වැඩසටහනේ හාස්‍යමය රංගනය ගැන ඔවුනට ඇති හැකියාව විදහා දක්වන්නටත්, එහි ජයග්‍රාහකයන් බවට පත්වන්ටත් දුක්ගන්නාරාලට සහ අජිත් ලොකුගේට හැකියාව ලැබුණි. මේ කතාබහ ඒ ගැනය.


unnamed (4)

Q දෙරණ කොමඩි ස්ටාර් රියලිටි තරගයේ කිරුළ දිනා ගැනීම දක්වා පැමිණි ගමන් මග ගැන මතක් කළොත්

දෙරණ නාළිකාවෙන් ජනප්‍රිය පිරිසකට මේ වැඩසටහනට ආරාධනා කරනවා. ඒ ආරාධනාවට තමයි අපි මේ රියලිටි තරගයට යොමු වුණේ. එහෙම ආරාධනා කරපු අය අතර වෘත්තීමය වශයෙන් ප්‍රහසන රංගනයේ යෙදෙන්නේ නැති දෙදෙනෙක් ලෙස තමයි මම සහ ගාමිණී ලොකුගේ දකින්නේ. අපි එය අභියෝගයක් ලෙස භාරගත්තා. කොමඩි නාට්‍ය කියලා අපි බලද්දි අපිට පෙනෙන්නේ දෙපිට කැපෙන කුණු හරුප සහ වෙනත් තලයක තිබෙන දේවල්. නමුත් කොමඩි කියන්නේ ඒකම නෙමෙයි. මම රංග විද්‍යාව ඉගෙන ගත්ත කෙනෙක්. මගේ ශාස්ත්‍රපති උපාධිය රංග කලාව ගැන ගත්ත උපාධියක්. ඒ උපාධිය කරද්දි මම ප්‍රහසන වර්ග ගණනාවක් ඉගෙන ගෙන තිබෙනවා. ඉන් අපි භාවිත කරන්නේ දශම ගණනක් පමණයි කියලා මට හිතුණා. 
යම් යම් අවස්ථාවල බැලැක් කමඩි, ට්‍රැජි කමඩි භාවිත කර තිබෙනවා. මම සහ අජිත් තීරණය කළා මේ සිටින දැවැන්තයින් එක්ක තරග වදින්න වෙනත් නිර්මාණයක් කරන්න ඕන කියන දේ. අපි පිටපතේ සිටම හිතුවේ වෙනස් නිර්මාණයක් කරන්න. එහෙම හිතලා බ්ලැක් කමඩි කරන්න හිතුවා. ඒ කියන්නේ ප්‍රේක්ෂකයෝ දන්නවා අපි දෙන්නට වැරදිලා කියලා. නමුත් අපි දෙන්නා ඒ දේ දන්නෑ. එවැනි කොමඩි පිටපත් තමයි අපි මේ තරගාවලියේදී කළේ. ඒ වගේම හරි දේශපාලනිකයි. මෙහි ටයිම් ඇන් ස්පේස් විශේෂයි. එය මගහැරුණොත් නාට්‍ය නිර්මාණයම අවුල් වෙනවා. අපි තරග වට අටක් මෙය සිදුකළා. අවසන් මහා තරගයට අපි තේරී පත්වුණා. එහිත් ලොකු අභියෝගයක් තිබුණා. මහින්ද පතිරගේ, ශාන්ත ගාල්ලගේ, ගයාන් මාපලගම, ධනුෂ්කා ඉරෝෂනී වගේ පිරිසක් තමයි අවසන් වටයට තේරී පත්වුණේ. අපි තුළ තිබූ උපක්‍රමශීලීත්වය නිසා මේ ජයග්‍රහණය ලබාගන්න හැකිවුණා කියලයි මම හිතන්නේ.

මෙවැනි කොමඩි නාට්‍ය නිර්මාණයකදිත් පිටපතට හිමිවෙන්නේ සුවිශේෂී තැනක්. මේ කොමඩි නිර්මාණවල පිටපත ගැන අවධානය යොමු කළේ කොහොමද

පිටපත ගැන අවධානය යොමු කරද්දි අපි දෙදෙනා කිහිපදෙනෙක් යෝජනා කළා. පසුව අපි දෙදෙනාම හිතුවා අපිට අවශ්‍ය ලෙස මේ පිටපත රචනා කළ හැක්කේ මිහිර සිරිතිලකට කියන දේ. මිහිර සමග සාකච්ඡාවෙන් පසුව තමයි පිටපත රචනා වුණේ. සමහර පිටපත් ප්‍රතික්ෂේප වුණා. සමහර පිටපත් අපි තෝරාගෙන රංගනය  සිදුකළා.

දුක්ගන්නාරාල සහ අජිත් ලොකුගේ කියන ශිල්පීන්ගේ රංගනයේදී ඇති  සුසංයෝගය කෙබඳුද? නිර්මාණයේ සාර්ථකත්යට එය වැදගත් සාධකයක්

අපි දෙන්නා දෙන්නෙක්. අපි දෙදෙනාගේ බාහිර පෙනුමත් වෙනස්. ඒ නිසා චරිත ද්විත්වයක් වුණා. හිට්ලරුයි චැප්ලිනුයි වගේ වෙනසක් තිබුණා. රංගනයේදිත් අපි දෙන්නා වෙනස්. මම රංගනයේ යෙදෙන්නේ රළු චරිත. අජිත් අයියා සැහැල්ලුවෙන් සිදුකරන සරල චරිත සිදුකළා. අපි දෙන්නා තුළ තිබූ නොගැළපීමම තමයි ගැළපීම බවට පත්වුණේ කියලයි මම හිතන්නේ. අජිත් අයියා මට වඩා වසර දහයක් පමණ වේදිකාවේ සිටි ප්‍රවීණයෙක්. මේ වන විටත් වේදිකා නාට්‍යවල නියැළෙනවා. මම වසර දහයක් පහළොවක් පමණ වේදිකා නාට්‍යවල රංගනය සිදුකර නැහැ. නමුත් අපි දෙන්නා හොඳම සුසංයෝගයක්.

unnamed

කොමඩි කියන දේ ප්‍රේක්ෂකාගාරය තුළ තිබෙන කියවීම සම්බන්ධයෙන් ඔබ තුළ තිබෙන අදහස කෙබඳුද

දෙබසකින් හෝ අගපසග වෙනස් වීම තුළින් සිනහව ගෙන ඒම තමයි ලංකාව තුළ කොමඩි ලෙස මිනිසුන් කියවන්නේ. මිස්ට බීන්, රෝවින්සන් හෝ චැප්ලින් වගේ අයව ඒ තරම් හදාරපු අය නෙමෙයි අපේ රටේ ඉන්නේ. නමුත් අපේ ජෝ අබේවික්‍රම වගේ රංගන ශිල්පීන් ගත්තම, ෆ්‍රෙඩී සිල්වාගේ යම් කාලයක් ගත්තම, බී.එස්, දොන් සිරිසේන, ඩී ආර් නානායක්කාර වගේ ශිල්පීන් ගත්තාම එවැනි ලක්ෂණ දැකගන්න තිබෙනවා. නමුත් පසුව සිනමාවට වේදිකා නාට්‍යවල වෙනත් ලක්ෂණ පැමිණෙන්න ගත්තා. ඒ ලක්ෂණම හාස්‍ය කියලා ප්‍රේක්ෂකාගාරය හිතන්න ගත්තා. අපි හාස්‍ය ගැන කියවන විදිහ ඒක නෙමෙයි. ටෙලිවිෂනයට වුණත් ඒ දේ කරන්න පුළුවන්. නමුත් එය
සිදුකරන්නේ නැහැ.

එවන් තත්ත්වයක් ඇති වීමට හේතුව ලෙස ඔබ දකින්නේ කුමක්ද

මේ වෙලාවේ විකිණෙන දේ තමයි හැමදෙනාම කරන්න බලන්නේ. අලුත් දෙයක් හොයා ගන්න බයයි. අපි දෙන්නත් මේ සිදුකළ දේ වැරදුණා නම් පළමු වටයෙන්ම අපි ඉවත් වෙනවා. දෙවැනි වටය, තෙවැනි වටය යන විට තමයි බොහෝ දෙනෙක් අපි ගැන අවධානය යොමු කරන්න පටන් ගත්තේ. වෙනස් වර්ගයේ ප්‍රහසනයන් ගෙන එන්නට උත්සාහ කළ ටෙලිනාට්‍ය ප්‍රේක්ෂකයන්ගෙන් හෝ නිෂ්පාදකයාගෙන් ප්‍රතික්ෂේප වී තිබෙනවා. පිටපත, රංගය, අධ්‍යක්ෂණය, ප්‍රේක්ෂකයා මේ සියල්ල එකතු විය යුතුයි. ඒ එකතු වීමේ  අඩුපාඩුව අපේ රටේ තිබෙන නිසා මෙවන් තත්ත්වයක් ඇතිවෙන්න ඇති කියලා මම හිතන්නේ. මීට පෙර %කොළඹ සන්නිය^ වගේ සිනමා නිර්මාණ ගත්තත්, %ඇර සොයිසා^ වගේ සිනමා නිර්මාණ ගත්තත් කිසියම් අවර ගණයේ ලක්ෂණ තිබුණත් උසස් ප්‍රහසන අන්තර්ගතව තිබුණා. අපි කොමඩි වේදිකාව තුළ කළ නිර්මාණ නැවත සමාජයට වෙනස් අයුරින් ගෙන එන්න බලාපොරොත්තු වෙනවා. ඒ තුළින් මිනිසුන් අතර වෙනස් මතයක් ගොඩනගන්න හැකිවෙයි කියලා අපි හිතනවා.

unnamed (1)

කොමිඩි ස්ටාර් තරගයෙන් පසු ඒ නිර්මාණ අන්තර්ගත කළ වේදිකා නාට්‍ය නිර්මාණයකටද සුදානම් වෙන්නේ

අපි අවසන් වටයට තරග කරද්දී සිදුකළ නිර්මාණය දිගු නාට්‍යයක් බවට පත්කළ හැකියි කියලා අපිට හිතුණා. ඒ ගණයේ සිනමාපට අපි ලෝකයේ දැක තිබෙනවා. එකම තැනක දෙන්නෙක් දෙතැනක තියා වැඩ කරනවා. එහි අන්තර්ගත වෙන්නේ එවැනි දෙයක්. එහි පිටපත රචනා කිරීමේ කටයුතු ආරම්භකර තිබෙනවා. මම එය නිෂ්පාදනය කරනවා. ප්‍රධානම කාරණය තමයි මේ මොහොතේ විදේශීය රටවල මෙයට තිබෙන ඉල්ලුම. ඒ නිසා අපි මේ වේදිකා නිර්මාණය සිදුකරනවා.

වසන්ත දුක්ගන්නාරාළ කියන්නේ කාලයෙන් කාලයට එක එක දේවල් කරන නිර්මාණකරුවෙක්. මේ වෙද්දි වේදිකාවට වැඩි ඉඩක් වෙන් කරලද

මේ නාට්‍යයේ සංවිධාන කටයුතු කරන්න අජිත් ලොකුගේට භාර දෙනවා. මම එහි රඟපෑමට හා අධ්‍යක්ෂණයට සහභාගී වෙනවා. මගේ චිත්‍රපටයේ කටයුතු හැමදිනම අතපසු වුණා. එය සිදුකරනවා. එහි මූලික කටයුතු නිමකර අවසන්. මේ වන විට මගේ නවකතාවක් රචනා කර තිබෙනවා. ඒ දේ සිදුකරනවා. මේ වසරේ සිනමා නිර්මාණයේ වැඩකටයුතු කරන්න බලාපොරොත්තු වෙනවා. මම කළමනාකරණය, ආර්ථික විද්‍යාව ගැන ඉගෙන ගත් කෙනෙක්. අපේ රටේ අර්බුදවලට හේතුසාධක මොනවද කියලා මම පසුගිය වසර දහයක් තිස්සේ  සමීක්ෂණය කළා. ඒ තුළින්  මම හඳුනාගත් හේතුසාධක 27ක් එකතු කර %රට වැටෙන හැටි^ නමින් ග්‍රන්ථයක් රචනා කරනවා. අපි අපිම ශ්‍රී ලාං‍ෙක්ය ජාතියක් ලෙස කළ වැරදි මම ඒ තුළ කතා කරනවා. මේ පෙබරවාරි 10 වනදා නැවත අපි පසුතැවෙන්න සිදුවෙන  තීන්දුවක් ගන්නවානේ. ඒ ආර්ථික කාරණය හඳුනාගත්තේ නැත්තම් සිදුවන්නේ එය. ඒ නිසා මම සැමට වැටහෙන පරිදි සරල භාෂාවක් උපයෝගී කර ගනිමින් මේ ග්‍රන්ථය රචනා කරන්න අදහස් කරනවා.

‘අයිවෝ ඩෙනිස්’ නම් වූ ඔහු

ඔහු සංගීත ක්ෂේත්‍රයේ ජ්‍යෙෂ්ඨතම ගායකයෙකු වූ අයිවෝ ඩෙනිස් නම් වෙයි. මේ වන විට පෞද්ගලික රෝහලක දැඩි සත්කාර ඒකකයේ ප්‍රතිකාර ලබමින් පසුවන අයිවෝ ඩෙනිස් මහතා වෙනුවෙන් යුතුකමක් ඉටු කරන්නට අවැසි මොහොතක් උදා වී තිබේ. මේ වෙනුවෙන් සුනිල් සාන්තයන්ගේ පුතු ලංකා සාන්ත මහතා ඇතුළු කලා ක්ෂේත්‍රයට ආදරය කරන සැබෑ කලාකරුවන් විසින් කටයුතු සම්පාදනය කරමින් පසුවන අවදියක අපි ඔහු පිළිබඳ මේ සටහන තබනුයේ අයිවෝ ඩෙනිස් නම් මේ ප්‍රතිභා පූර්ණ ගායකයා සම්බන්ධයෙන් වූ අප්‍රකට තොරතුරු රැසක් ඔහුගේ රසිකයන් වෙනුවෙන් පෙළගස්වමිනි.


 Ivo Dennis

මේ කතාන්දරය ඇරඹෙන්නේ අද ඊ‍ෙය්ක නොවේ. බොහෝ විට තමන්ගේ ගීත අනුන් විසින් ගැයීම සම්බන්ධයෙන් එතරම් කැමැත්තක් නොදක්වන ප්‍රවීණයන් අතීතයේද සිටි බව ඔබ අසා ඇති. නමුත් මේ කතාව ඇසීමෙන් පසු අතීතය හා අතීත කලාකරුවන් ගැන ඔබ සිතා සිටි බොහෝ දේවල් වෙනස් වනු ඇත. ඔබ අද වයසින් කුමන තරාතිරමක පසුවුවත්, එන්න අපි ආපසු නවසිය තිස්දෙක වසර තෙක් ආපස්සට යමු. 

දිනය, වකවානුව පිළිබඳ සැලකිලිමත් වුවහොත් එය මැයි මස විසි අට වැනිදා යෙදුණ ඉරිදා දිනය යැයි තීරණය කරමු. මේ කියන දවසේ ගුවන් විදුලියෙන් ආධුනික පැය නම් වූ වැඩසටහන ප්‍රචාරය වෙමින් පවතියි. නිවේදක ලැඩී රණසිංහ මේ අවස්ථාවේ අසන්නන් වෙත සමීප වෙමින් සිටි අතර, සුනිල් සාන්ත නම්  ඔහු ඒ වැඩසටහන කුමක්දැයි නොසොයා අහඹු ලෙස ගුවන් විදුලිය ශ්‍රවණය කරමින් සිටියි. ස්ථානය  අපේ සංගීත ක්ෂේත්‍රයේ ප්‍රවීණතමයෙකු වූ සුනිල් සාන්තයන්ගේ නිවසයි. 
ජා ඇල දෙහියාගාත පිහිටි සුනිල් සාන්තයන්ගේ නිවසේ ගුවන් විදුලි යන්ත්‍රයෙන් ඔහු ගැයූ, 'වරෙන් හීන් සැරේ' ගීය ප්‍රචාරය වෙමින් පැවතිණි. 
 හදිසියේම ගීය අතරමැදි කොටසකදී ඒ  ගැයුමෙහි යම් දොසක්  ඇසුණෙන් සුනිල් සාන්තයන් විපිළිසරවෙයි. එසේ වන්නට ඉඩක් වූයේ කෙසේද? සුනිල් සාන්තයන් ගැයූ ඒ ගීයේ කිසිදු අඩුවක් නොවූ බව හොඳින්ම දන්නා නමුත් ගුවන් විදුලියේ ප්‍රචාරය වූ තම හඬින්ම ගැයූ මේ ගීයේ  එවැනි අඩුවක් ඇසෙන්නේ කෙසේද? වාදනය වූ ගීතය අවසන් වූ අතර, නිවේදන ලැඩී රණසිංහ  එම ගීතය සීදුවේ අයිවෝ ඩෙනිස් නම් ආධුනිකයා විසින් ආධුනික පැය වැඩසටහන වෙනුවෙන් ගායනා කළ බව  පැවසීමෙන් සුනිල් සාන්තයන්ගේ විපිළිසර බවට පිළිතුර ලැබිණි.

සුනිල් සාන්තයන් ඒ කාර්යය එතැනින් අත්හැර දැමුවා යැයි  ඔබ සිතනවාද? නැත සියල්ල ඇරඹෙන්නේ එතැනිණි. 
 සුනිල් සාන්තයන් ඉතාම තුටු පහටු වූයේය. තමන්ටද හඳුනාගත නොහැකි තරමට තම හඬට සමාන හඬක් දරන මේ ආධුනිකයා පිළිබඳ තතු සොයන්නට සුනිල් සාන්තයන් පවරනුයේ තම සංගීත පංතියේ සිටින තවත් දක්ෂතම සිසුවෙකු වූ පැට්‍රික් දෙනිපිටියටය.  පැට්‍රික් විසින් සොයා දුන් තොරතුරු අනුව සුනිල් සාන්තයන් අයිවෝ ඩෙනිස් තරුණයාගේ නිවෙස සොයා ඔහුට තමන් හමුවන්නට පැමිණෙන ලෙස පණිවුඩයක් තැබුවේය.
සීදුව සාන්ත මරියා දෙව් මැදුරේ කන්තාරු මාස්ටර් හෙවත් ගායනා කණ්ඩායම මෙහෙය වූ ගුරුවරයා වූ දොන් ප්‍රැන්සිස් ඇලෝසියස් මහතා තමන්ගේ පුතු වූ අයිවෝ, මේ සිංදු කෙරුවාවෙන් අයහපතක් කර ගනී යැයි සිතා බියට පත්ව සුනිල් සාන්තයන්ගේ ඉල්ලීමට අනුබල නොදුන් නමුත් විතාරණගේ මරියා රොද්‍රිගු නම් වූ මවගේ අනුබලය මත සුනිල් සාන්තයන් වෙත යොමු විය. %රේඛාව^ චිත්‍රපටයේ  %අනුරාපුර පොළොන්නරුව සීගිරි මන බන්ධනීය^ යන සුනිල් සාන්තයන් විසින් සංගීතවත් කළ විරිදුව ගයමින් චිත්‍රපට පසුබිම් ගායනයට පිවිසි අයිවෝ ඩෙනිස් සුනිල් සාන්තයන් වෙනුවට ඉන්දියාවට ගොස් %රේඛාවේ^ සෙසු ගීත ගැයූ සිසිර සේනාරත්න, ඉන්ද්‍රානී විජය බණ්ඩාර, තිලකසිරි ප්‍රනාන්දු යන අයට ගී ගැයීම් පුහුණු කිරීමද සිදුකළේය. %රේඛාව^ චිත්‍රපටය තිරයේ දිගහැරෙන්නේද අයිවෝ ඩෙනිස්ගේ ගායනයෙන් බව ඔබට මතකද?

02

එපමණක් නොවේ සුනිල් සාන්තයන් විසින් තනු නිර්මාණය කළ ආර්. මුත්තුසාමි මහතා විසින්  සංගීතවත්  කළ 'සංදේශය' චිත්‍රපටයේ ගී පටිගත කිරීම් සඳහාද සුනිල් සාන්තයන් වෙනුවට කටයුතු කරන්නට තෝරා ගැනු‍ෙණ් අයිවෝ ඩෙනිස් නම් මේ කලාකරුවාය. එහිදී ලතා – ධර්මදාස වල්පොල යුවළට මෙන්ම එච්.ආර්. ජෝතිපාල, සිඩ්නි ආටිගල, මොහිදීන් බෙග් වැනි ශිල්පීන්ට ගායනා පුහුණු කරවන්නටද වූයේ ඔහුයි.

මේ අයුරින් සුනිල් සාන්තයන්ගේ මග ගිය අයිවෝ ඩෙනිස් නම් ඔහු සිය ප්‍රථම ගුවන් විදුලි ගායනයට එළඹෙන්නේ 1959 වසරේදීය. ඒ තිලක සුධර්මන් ද සිල්වා විසින් පබැඳු %කුරුළු පරාදීසයේ^ නම් ගීතය ගයමිනි.  ඔහුගේ දෙවැනි ගුවන් විදුලි ගීතය වනුයේ එච්.එම් කුඩලිගම කිවිඳුවිසින් පබැඳු %කේතකී පාටලී ගස් නටවා^ යනුවෙන් ගැයෙන ගංගා ගීතය වන අතර, මේ ගීත දෙකෙහිම තනු නිර්මාණය සුනිල් සාන්තයන්ගේ බවද සඳහන් කළ යුතුය. එම වසරේදීම රජයේ ගුරු සංගීත විභාගයෙන්  සමත්ව ගුරුපත්වීම් ලබන අයිවෝ ඩෙනිස් නම් ගායකයා 1974 රජයේ සංගීත විද්‍යාලයේ  ජන සංගීතය පිළිබඳ සංගීත ගුරු උපදේශක පත්වීම් ලබාගන්නා අතර, 1995 වසරේ රජයේ සංගීත ගුරු සේවයෙන් විශ්‍රාම ලබයි.  ඔහු සංගීත ලෝකයට දායාද කළ සිසු පරපුර වනුයේ එඩ්වඩ් ජයකොඩි, මාලනී බුලත්සිංහල, රෝහණ වීරසිංහ,  කෝලිත භානු දිසානායක සහ බන්දුල විජේවීරයන් ලෙස ජනප්‍රියත්වයට පත් ශිල්පීන්ය.

එහෙත් අප තවමත් කතාකරනුයේ ඔහුගේ සංගීත ජීවිතය පිළිඳවයි. නමුත් අයිවෝ ඩෙනිස් යනු ප්‍රතිභාපූර්ණ නළු‍ෙවකු බවත් සඳහන් කළ යුතුමය.  එමෙන්ම ඔහු රංගනයට පිවිසෙන්නේත් ජේසු ක්‍රිස්තුස් වහන්සේගේ චරිතය රඟපාමින් වීම විශේෂත්වයකි. ඒ රසාංජලී කලායතනය නිර්මාණය කළ , %එසේය අපි ඔහු මැරුවෙමු^ යන නාට්‍ය තුළිනි.  මකුලොළුව මහතාගේ 'දෙපානෝ' නාටකයේ ගායනය කරමින් ඔහු ප්‍රධාන චරිතයක් රඟපෑ අතර, සතිස්චන්ද්‍ර එදිරිසිංහයන්ගේ %තහංචි^ නාට්‍යයේ ප්‍රධාන චරිතය රඟපෑවේය.  'මහවැලි ගීතය' ගීත නාටකයේ මූලික හඬ වූයේද අයිවෝගේ හඬයි. සුනිල් සාන්තයන් විසින් ගුවන් විදුලියේ රිජ්වේ තිලකරත්න යුගයේදී 'මධුර මධු', 'රන් වළාව', 'සීගිරි ගී', 'පංච මධුර' ආදී වශයෙන් ගුවන් විදුලියට කළ සියලුම සංගීත වැඩසටහන්වලදී තම සහයට අයිවෝ ඩෙනිස් නම් වූ ඔහු කැඳවා ගත්තේය .
පණ්ඩිත් ආචාර්ය අමරදේවයන් රස මියුරු සහ විජය ගීතය නමින් කළ සංගීතාත්මක වැඩසටහන්වලද අයිවෝ ඩෙනිස්  ගායකයෙකු ලෙස එක් කරගෙන තිබිණි.  

රවීන්ද්‍රනාත් තාගෝර් තුමාණන්ගේ ගීතයක් වූ ප්‍රේමදාස අලවත්තයන් විසින් සිංහලට නගන ලද ටී.එම් ජයරත්නයන් විසින් ගයන %අඳුරු කුටිය^ තුළ ගීතය  සඳහා ටී.එම් ජයරත්න හඬ හා මුසු කරන්නට ප්‍රේමසිරි කේමදාසයන් විසින් යොදාගත් හඬ වූයේද අයිවෝගේ හඬයි.
 අරිසෙන් අහුබුදු සූරීන් විසින් පබැඳු %එම්බා ගංගා^, %දකුණ නැගෙනහිර^  ගීතයන් ගැයුම සඳහාද සුනිල් සාන්තයන් විසින් තම අතිජාත ගෝලයා වූ අයිවෝ ඩෙනිස් එක්කොට ගෙන තිබේ.

කිතු දන පුබුදුව වෙනුවෙන් ගී තුන්සියයකට ආසන්න තනු නිර්මාණ සකසා ඇති ඔහු  කේමදාසයන්ගේ 'මාගේ කාලේ මවුනි', 'මානස විල', 'පිරිනිවන් මංගල්‍යය' ආදී ඔපෙරා නිර්මාණයන් සඳහාද රජ වැඩ  ශ්‍රවණපටය සඳහාද  ගායනයෙන් දායක වුණි.  

1985 වසර ඔහුගේ කලා දිවියේ සුවිශේෂී සන්ධිස්ථානයක් විය. ඒ ‍ප්‍රේමසිරි කේමදාසයන්ගේ තනුවෙන් හා සංගීතයෙන් යුතුව ඔහු 'හිමකතර' චිත්‍රපටයට ගායනා කළ  'කන්ද එහා වැස්ස වහිනවා'  තේමා ගීතය වසරේ  හොඳම ගායනය වශයෙන් ජනාධිපති සම්මාන ලැබීමය.
'සුමියුරු' නමින් ඒකපුද්ගල සංගීත ප්‍රසංග දෙකක් පවත්වා ඇති නමුත් අයිවෝ ඩෙනිස් මහතා විසින්  තමන් සඳහා ශ්‍රවණ පටයක් හෝ  සංයුක්ත තැටියක් නිර්මාණය කර නොමැති වීමද විශේෂත්වයකි. 
අයිවෝ ඩෙනිස් නම් වූ මේ ජ්‍යෙෂ්ඨයා  1986 නවසීලන්තයේ පැවති  ජගත් ගීත ගායනා තරගයට චන්ද්‍ර කීර්ති කුලරත්නයන් විසින්  පබැඳු  'ඒ තමයි අපේ ආදරේ^ ගීතය වෙනුවෙන් 
ශ්‍රී ලංකාවෙන් ප්‍රථම ස්ථානය දිනාගැනීමෙන්  ජාත්‍යන්තර තරගයක් සඳහා අප රට නියෝජනය කළේය.

අයිවෝ ඩෙනිස් නම් වූ ඔහු කවරෙක්ද? අපේ සංගීත ක්ෂේත්‍රයට කර ඇති සේවාව කුමක්ද? යන්න මෙවන් කුඩා සටහනක් තුළින් ඇගයිය නොහැකි බව සැබෑය.  ඔහු අපේ සංගීත ක්ෂේත්‍රයට කොතරම් සේවයක් ඉටුකොට ඇත්තේද යන්න මත නොව ඔහු කොතරම් අගනා කලාකරුවෙක්ද යන තැන සිට අප අයිවෝ ඩෙනිස් නම් වූ ඔහු සුවපත්කර ගැනීම වෙනුවෙන් අපට දිය හැකි අත හිත ලබාදෙන්නට කටයුතු කළ යුතුය. එබැවින් සැමටම මේ සිහිපත් කිරීම කරනුයේ යුතුකමක් වශයෙන් පමණක් නොව වගකීමක් ලෙසද සලකමිනි. (P.D.H.T.P පැස්කුවල් නම්වූ ඔහුගේ පුතු නමින් ලංකා බැංකුව සීදූව ශාඛාවේ අංක 81780094 දරණ ගිණුමට ඔබේ මනුස්සකමේ අතහිත යෙදිය හැකිය.)

හතළිස් දෙවසරකට පෙර අහිමි වූ සිංහල සාහිත්‍ය‘යේ නොමැකෙන සලකුණ මහගම සේකර

එදා රාජ්‍ය චිත්‍රපට සංස්ථාවේ කෙටි චිත්‍රපට නිෂ්පාදන වැඩපිළිවෙළ යටතේ වාර්තා චිත්‍රපටයක් නිර්මාණය කිරීමට සැලසුම් කළ කුමුදු කුසුම් කුමාර කලාවේ අංශ කිහිපයක දස්කම් පළකළ මහගම සේකරයන් පිළිබඳ සිය නිර්මාණය සිදුකිරීමට සැලසුම් කළේය. ඒ අනුව 1976 ජනවාරි මස 14 වැනිදා රූපගත කිරීම සඳහා යොදාගෙන එදින සේකර කැඳවා ගෙන ඒමට වාහනයක් ඔහුගේ නිවසට යැවීමට සැරසිණි. එහෙත් මහගම සේකර පැවසුවේ වාහනයක් ගම්පහට එවිය යුතු නැති බවයි.


sekara

 ඔහු උදෑසන කොටුව දුම්රිය ස්ථානයට දුම්රියෙන් පැමිණීමට පොරොන්දු විය. ඒ අනුව අධ්‍යක්‍ෂවරයා ජනවාරි මස 14 වැනිදා උදෑසන කවදත් කියූ වේලාවට කටයුතු කරන මහගම සේකර පැමිණෙන දුම්රිය අපේක්‍ෂාවෙන් කොටුව දුම්රියපොළ ඉදිරිපිට වාහනයකට වී බලා සිටියේය. හැමදාම කියූ වේලාවට පැමිණෙන සේකර එදා එලෙස දුම්රියෙන් නොපැමිණීම ගැන මවිතයට පත් අධ්‍යක්‍ෂවරයා සිය සහායකයෙකු සේකරගේ නිවස වෙත යවනු ලැබුවේ අද මෙන් එදා (හැත්තෑව දශකයේ) දුරකථන පහසුකම් සුලභව නොපැවතුණු හෙයිනි. එහිදී ඔහුට දැනගැනීමට ලැබුණේ සේකර පෙරදා රාත්‍රියේ නිදා සිටියදී අලුයම් කාලයේ නිදි යහනේදීම දිවියෙන් සමුගෙන ඇති බවයි. ඒ වන විට ඔහුගේ වයස අවුරුදු හතළිස් හයකි.

පසුදා මෙරට පළ වූ දිනපතා පුවත්පත්වල පමණක් නොව එම සතියේ සතිපතා පළ වූ පුවත්පත්වලද පළමු පිටු සැරසුණේ සේකරගේ ඡායාරූපවලිනි. එතැන් සිට සේකර මියගොස් වසර හතළිස්දෙකක් ගෙවී යන තැන අද දවසේද ජනතාව සේකර පිළිබඳ කතා කරති. සැබැවින්ම ජීවත්ව සිටි සේකරයන්ට වඩා මළවුන් අතරට එක් වූ සේකර ජනප්‍රිය පුද්ගලයෙකු බවට පත්විය. අංකුර කවියන්ගේ පරමාදර්ශී කිවිඳාණන් බවට පත්විය. චිත්‍ර ශිල්පියෙකු, කවියෙකු, නවකතාකරුවෙකු සහ චිත්‍රපට අධ්‍යක්‍ෂවරයෙකු වූ සේකර අවසාන කාලයේ ජනප්‍රිය කෙටිකතාකරුවෙක්ද විය. ඒ එකල පළ වූ %නවයුගය^ පුවත්පතට කෙටිකතා රචනා කිරීමෙනි. සේකර කෙටිකතා රචනයට යොමු කළ 'නවයුගය' පුවත්පතේ එදා කතුවරයා වූ ප්‍රකට නවකතා රචක සහ ටෙලිනාට්‍ය සහ චිත්‍රපට තිරනාටක රචකයෙකු වූ සෝමවීර සේනානයක මහතා අප ඉදිරියේ කාලයේ වැලි තලාවෙන් වැසී නොගිය මහගම සේකර අතීතය ආවර්ජනය කළේ මෙලෙසින්ය.

A64231E8

&මහගම සේකර යනු මාධ්‍යවේදීන් වූ අපට එදත් ආගන්තුක චරිතයක් වූයේ නැහැ. ඒත් මගේ ජීවිතයේ ඔහු නිසා අපූරු සිදුවීමක් වුණා. සාමාන්‍යයෙන් එකල මෙන්ම අද දවසේද ගත්කරුවෙකු ග්‍රන්ථයක් රචනා කිරීමෙන් පසු එහි පිටපතක් මාධ්‍යකරුවන්ට ලබාදී විචාරයක් ලියවා ගැනීමේ සම්ප්‍රදායක් තිබෙනවා. මහගම සේකරගේ 'තුංමං හන්දිය' ප්‍රකාශයට පත්වූ සැණින් ඔහු අප කාර්යාලයට එහි පිටපතක් රැගෙන ඒමට ප්‍රථම මා එම පොත කියවා විචාරයක් ලියනු ලැබුවා. එම සම්ප්‍රදායි විරෝධී ක්‍රියාව පිළිබඳ එදා %සරසවිය^ පුවත්පතේ කර්තෘවරයාව සිටි විමලසිරි පෙරේරා මහතා මගෙන් ප්‍රශ්න කිරීමක්ද සිදු කළා. එහෙත් එම පොත ගැන සේකර මහත් සේ බලාපොරොත්තු තැබීමත්, වරින්වර එම පොත පිළිබඳ කළ ප්‍රකාශ කිරීම් නිසාද එය පොත්හලකින් මිලදී ගෙන කියැවීමේ කැමැත්තක් මා තුළ තිබූ බව මා විමලසිරි පෙරේරා මහතාට දැන්වුවා. සේකරගේ ජීවිත සිදුවීම් අළලා මා ලියූ එම පොතේ විචාරය මගේ සාහිත්‍ය විචාර දිවියේ අදටත් අමතක නොවන සිහිවටනයක් වෙනවා.

මේ වන විටත් සේකර විශාරද අමරදේවයන් සමග එක්ව ගීත රසවින්දනය ඉහළ දැමීම සඳහා ගුවන්විදුලයේ 'මධුවන්ති' නම් සංගීත වැඩසටහනක් සිදුකරමින් තිබුණා. එය මෙරට ප්‍රබුද්ධ රසිකයන් අතර නමක් දිනාගෙන තිබුණා. එකල යම් වසරක චිත්‍රපටයක් සඳහා සේකර ගීත රචනා කර තිබුණේ නම් එම වසරේ හොඳම ගීත රචනයට හිමි සරසවි සම්මානය දිනාගත්තේ මහගම සේකර විසින්. එකල සරසවි සම්මාන උලෙළ පමණයි අඛණ්ඩව සිනමා සම්මාන උලෙළක් ලෙස පවත්වාගෙන යනු ලැබුවේ. තවත් පුවත්පත් ආයතන කිහිපයක් සහ විචාරක සම්මාන ආදී සම්මාන උලෙළයන් සිනමාව වෙනුවෙන් පැවැත්වුවද, ඒවා අඛණ්ඩව පැවැත්වුණේ නැහැ.

 ඔහු පළමුව ගුරු වෘත්තියේ නියැළී සිට තිබෙනවා. කලක් රාජගිරියේ හේවාවිතාරණ මහා විද්‍යාලයේ ගුරුවරයෙකු ලෙස කටයුතු කර තිබෙනවා. හැබැයි ඔහු පළමුව සිය ගමේ චිත්‍ර ශිල්පියෙකු ලෙස නමක් ඇතිකර ගෙන තිබුණේ. එකල රට පුරා පැතිර ගිය %කක්කල් කැස්ස^ නම් රෝගය සුව කිරීම සඳහා එකල දේශීය වෙද මහතුන් සිදුකළ කෙම් ප්‍රතිකාරයන් වෙන්නෙ එකල භාවිතයේ තිබූ සතයේ තඹ කාසියක් මත සුනඛයෙකුගේ සිතුවමක් ඇඳ දීමෙන්. පසුව එම සුනඛ රුව සහිත තඹ කාසිය සිදුරු කර මාලයක් සේ බෙල්ලේ එල්ලා ගෙන 'කක්කල් කැස්ස' සුවකර ගැනීමට එකල සේකර පදිංදිව සිටි රදාවාන ප්‍රදේශයේ ගැමි ජනතාව පෙළඹී තිබෙනවා. ඒ සමගම සේකරගේ ලොකු මාමා වෙතින් චිත්‍ර සහ කලා නිර්මාණ කටයුතුවලට හුරුවක් ලද ඔහු කලා නිර්මාණ වෙත යොමුව තිබෙනවා. ඒ අතීතය තමයි ඔහු 'තුංමං හන්දිය' කෘතියට වස්තු බීජය කරගෙන තිබුණේ.

කලක් ඔහු එකල මැලේ වීදියේ පිහිටි අධ්‍යාපන අමාත්‍යාංශයේ සේවය කරනු ලැබුවා. එකල සේවය නිමවා පයින්ම කොටුව දුම්රිය ස්ථානයට යන ගමන් ලේක් හවුස් ආයතනයට ගොඩවී යෑමේ පුරුද්දක් ඔහුට තිබුණා. කාසමගත් කතාබහ කර ඩී.ආර්. විජයවර්ධන මාවතෙන් කොටුව දුම්රිය ස්ථානයට ඇති පිවිසුමෙන් ඔහු එහි යනවා. එසේ පැමිණි අවස්ථාවක එකල %නවයුගය^ පුවත්පතේ නව වෙනස්කමක් කරමින් සිටි මා සහ ඒ.ඩී. රන්ජිත් කුමාර අප රටේ වෙනත් කලා මාධ්‍යයන්හි නමක් හිමිකර ගෙන සිටි ආර්.ආර්. සමරකෝන්, සුගතපාල ද සිල්වා වැනි කලාකරුවන්ට කෙටිකතා ලිවීමේ අවස්ථා ලබා දී එහි පළකරනු ලැබුවා. %නවයුගය^ ස්වර්ණමය යුගයක් වූ එකල එය පාඨකයන් අතර අසීමිත ජනප්‍රියත්වයක් ලැබුවා. ඒ අනුව අප දෙදෙනා සේකරයන්ටද කෙටිකතාවක් ලිවීමට ඇරයුම් කළා. %අනේ මන්දා මට කෙටිකතා ලියන්න පුළුවන් වෙයිද කියලා' අපට ප්‍රතිචාර පළකළ සේකර පසුව කෙටිකතා කිහිපයක්ම ලියා අප පුවත්පතේ පළකළා. ඔහු චිත්‍රය, කවිය, නවකතාව සහ සිනමාව තුළ පළකළ ප්‍රතිභාවම කෙටිකතා රචනයේදීත් පළ කරනු ලැබුවා.
ඔහු එලෙස ලියූ එක් කෙටිකතාවක් 'මීයා' යන නමින් ඔහුගේ මරණයට සති කිහිපයකට පෙර %සිළුමිණ^ පුවත්පතේද පළවුණා. ජීවිතය දෙස ගැඹුරු දෘෂ්ටියකින් දුටු සේකරට හොඳ ජීවිත පරිඥානයක් තිබුණා. එය ඔහු විසින් පිවිසි සියලු කලාවන් අතික්‍රමණය කිරීමට හේතු පාදක වූවා යැයි අද මට හිතෙනවා.

DSC_0092

සේකර සිය අකල් මරණයට පෙර 'සරසවිය' පුවත්පතට ලබාදුන් මාධ්‍ය සාකච්ඡාවකදී කියා තිබුණා ජනප්‍රිය දහරාවේ සිටින ගායන ශිල්පීන් වන මිල්ටන් මල්ලවාරච්චි, එච්.ආර්. ජෝතිපාල, මිල්ටන් පෙරේරා, එම්.එස්. ප්‍රනාන්දු වැනි ගායන ශිල්පීන්ටත් ගීත රචනා කළ යුතු බව.
ඒ.ඩී. රන්ජිත් කුමාර සමග පැවැති එම මාධ්‍ය හමුවට දැක්වූ අදහස්වලට පාදක වන සිද්ධියකට මහගම සේකර මුහුණ දුන් අවස්ථාවක් මට මේ අවස්ථාවේ මතකයට නැගෙනවා. දිනක් රන්ජිත් කුමාර උගත් කොළඹ ආනන්ද විද්‍යාලයේ පැවැති උත්සවයකින් පසුව පිටතට පැමිණ අප මරදානේ පිහිටි කුඩා ලෑලි කඩයකට තේ කෝප්පයක් බීමට ගෙවැදුණා. එහිදී අප දුටුවා කම්කරුවෙක් වැනි තරුණයෙක් මහගම සේකරයන්ගේ කවි පොතක් බලමින් සිටිනවා. එය දුටු සේකරට අපූරු සතුටක් ලැබුණා. %මං කවි ලිව්වේ මෙන්න මේ පන්තියේ මිනිසුන්ගේ අවධානයටයි. මට හරි සතුටුයි මෙවන් කම්කරුවෙක් අත මගේ කවි පොතක් තියෙනවා දකින්න ලැබුණ එක^ කියා එදා ඔහු ආත්මීය සතුටක් ලබන ආකාරය මට පෙනුණා. සේකර හැමදාම සිතුවේ සාමාන්‍ය ජනතාව වෙනුවෙන් නිර්මාණ ඉදිරිපත් කිරීමටයි. පෙර කී ජනප්‍රිය ගායකයන්ට ගීත ලියා ඒවා මෙරට සාමාන්‍ය ජනතාවගේ අවධානයට යොමු කරන්න තියෙන ආශාව තමයි %සරසවිය^ පුවත්පතට සේකර හෙළිකරන්න ඇත්තේ. මේ ප්‍රවෘත්තිය දැකලා එච්.ආර්. ජෝතිපාල සතුටට පත්වෙලා අප පුවත්පතට කතා කරලා හරියට සතුටු වුණා. 'මං සේකර මහත්තයා ලියපු ගීතයක් ගායනා කළාට පස්සේවත් මේ ජෝතිපාල ප්‍රබුද්ධ ගායකයෙක් කියලා අපේ රටේ උගත්තු හිතයි නේද මහත්තයෝ?^ ජෝති සේකරයන්ගේ ගීතයක් ගැයීමේ මහත් ආශාවෙන් කතා කළා. එහෙත් ඊට කෙටි කලකට පසුව සේකර ජාතියෙන් සමුගත්තා.

මා ශාස්ත්‍රපති උපාධියට පෙනී සිටින විට මටත් අද ප්‍රංශයේ සිටින %හේ සිද්ධාර්ථ නමි විය^ ග්‍රන්ථය රචනා කළ කෝන්ගස්දෙනියේ ආනන්ද හාමුදුරුවන්ටත් දේශන පවත්වන්න එකල සේකර විද්‍යෝද්‍ය නමින් හැඳින්වූ වත්මන් ජයවර්ධනපුර විශ්වවිද්‍යාලයට ආවා. ඒ දිනවල ඔහු ලියා තිබූ ප්‍රබුද්ධ කවිපොත් ජනතාවට තේරුම්ගත හැකිවේ දෝයි මෙරට විද්වත් සමාජයේ අවධානයට යොමු කරමින් යමින් සිටි අවස්ථාවකදී මහාචාර්ය සුනන්ද මහේන්ද්‍ර මහතාට පෙන් වූ අවස්ථාවේදීද අප හමුවුණා.
කෙසේ හෝ සේකරගේ අවමංගල උත්සවයේදී රදාවාන ගම්වැසියන් අගනුවර සිට එහි ගිය ජනතාවට දැක්වූ අව්‍යාජ ආගන්තුක සංග්‍රහයන් සහ පිළිගැනීම් මට අදටත් හොඳින් මතකයි. එදා සේකරගේ චිතකය දැල්වෙන විට ඒ අවස්ථාවේ සේකර ලියූ ජනප්‍රිය ගීතයක් වන %මා මළ පසු සොහොන් කොතේ^ ගීතය විශාරද අමරදේවයන් ගායනා කළ අයුරු මට මතකයි. 
එහිදී සුසාන භූමියේ සිටි කාගෙත් නෙත් කඳුළෙන් පිරී යනු දකින්නට ලැබුණා. එදා සිට ජීවත්ව සිටි මහගම සේකරට වඩා මියගිය මහගම සේකර ජනතාවගේ හදවත් තුළ ලැගුම් ගත්තා කියා මා සිතනවා.'

ගාමිණී සරත් ගුණවර්ධන 

 

75 වැනි ගෝල්ඩන් ග්ලෝබ් සම්මාන උලෙළ

75 වැනි ගෝල්ඩන් ග්ලෝබ් සම්මාන උලෙළ පසුගිය 07 වැනිදා රාත්‍රියේ ඇමෙරිකාවේ The Beverly Hiltonහිදී නිමාවට පත් විය. Three Billboards Outside Ebbing, Missouri සහ Big Little Lies යන චිත්‍රපට ද්විත්වයට වැඩි සම්මාන ප්‍රමාණයක් බෙදී ගිය මෙම සම්මාන උලෙළ ඉදිරිපත් කළේ ජනප්‍රිය හාස්‍ය නළු සහ දේශපාලන විචාරක සෙත් මෙයර්ස්ය. සෙත් මෙයර්ස් මෙම සම්මාන උලෙළ ඉදිරිපත් කළ පළමු වතාව වීමද සුවිශේෂි විශේෂත්වයකි. එසේම ඔහු එදින මෙම සම්මාන උලෙළේ සිනමා තරු පිළිගනිමින් %දයාබර කාන්තාවන් සහ ඉතිරි වී සිටින පිරිමින් සාදරයෙන් පිළිගනිමි^ යැයි හාස්‍ය මුසු ස්වරයෙන් පැවසීමද බොහෝ දෙනාගේ අවධානය දිනාගත්තේ එදා හොලිවුඩයේ සිදුවන ලිංගික හිරිහැර හෙළා දකිනු වස් පළමු වතාවට ප්‍රධාන පෙළේ සිනමා සම්මාන උලෙළකදී කළු පැහැති ඇඳුමින් සැරසී සිනමා තරු පැමිණීම හේතුවෙනි. ඒ අනුව මෙම සම්මාන රාත්‍රිය නිමාව දුටුවේ ලිංගික හිරිහැර පිළිබඳ මාධ්‍යයට සන්නිවේදනය කළ ප්‍රබල වාග් මාලාවක් ලොවට මුදාහරිමිනි.   

හොලිවුඩ් විදෙස් මාධ්‍ය සංවිධානය සමග ඩික් ක්ලාස් සමාගම එකතුව නිපැයූ මෙම චිත්‍රපට උලෙළේදී ජීවිත කාලයටම එක් වතාවක් පිරිනැමෙන සිසිල් බී. ඩිමිලේ අනුස්මරණ ගෞරව සම්මානය හිමි වූයේ 63 හැවිරිදි ඔප්රා වින්ෆ්‍රේටය.   ඇය මෙම සම්මානය ලබාගනිමින් එදින පැවසුවේ නව දිනයක් පවතින්නේ ක්ෂිතිජයේ බවකි. කෙසේ වෙතත් එදින සෙත් මෙයර්ස් ඇයට හාස්‍යයෙන් ආරාධනා කළේ ජනාධිපති ඩොනල්ඩ් ට්‍රම්ප්ට එරෙහිව තරග කරන ලෙසත්, තමන් සහ හිටපු ජනාධිපති බරැක් ඔබාමා 2011 වසරේදී ධවල මන්දිර රාත්‍රිය භෝජන සංග්‍රහයකදී ට්‍රම්ප් ජනාධිපති වන බවට සමච්චල් කළ විහිළු සහගත ප්‍රකාශය අද වනවිට සත්‍යයක් වී ඇති බවත්ය.  සම්මාන හතකට නිර්දේශ වෙමින් වැඩිම සම්මාන ප්‍රමාණයකට නිර්දේශ වූ The Shape of Water මෙම චිත්‍රපට උලෙළේදී ගැරී ඕල්ඩ්මන් සම්මානයක් දිනාගැනීමද සුවිශේෂත්වයකි. ඒ වසර හතළිහක සිනමා දිවිය තුළ ඔහු දිනාගත් පළමු ගෝල්ඩන් ග්ලෝබ් සම්මානයයි. ඒ නාට්‍යමය අංශයෙන් වර්ගීකරණය කළ Darkest Hour චිත්‍රපටයේ රඟපෑ වින්ස්ටන් චර්චිල්ගේ චරිතය වෙනුවෙන් ලැබූ හොඳම නළුවා සම්මානයයි.        කෙසේ වෙතත් නාට්‍යමය අංශයෙන් හොඳම  චිත්‍රපටය බවට Three Billboards Outside Ebbing, Missouri පත් විය.
සංගීතමය හෝ හාස්‍යමය අංශයෙන් හොඳම චිත්‍රපටය බවට Lady Bird පත් විණි.

නාට්‍යමය අංශයෙන් මෙවර හොඳම නිළියට හිමි සම්මානය ෆ්‍රැන්සස් මැක්ඩෝර්මැන්ඩ් දිනාගත් අතර, ඒ මිඩ්රෙඩ් හයේස් ලෙසින් Three Billboards Outside Ebbing චිත්‍රපටයේ රඟපෑ චරිතය වෙනුවෙනි.  සංගීතමය හෝ හාස්‍ය අංශයෙන් හොඳම නළුවා සම්මානය The Disaster චිත්‍රපටයේ රඟපෑ ජේම්ස් ෆ්‍රැන්කෝට හිමි වූ අතර, ඒ ටොමී විසේයු ලෙසින් රඟපෑ චරිතය වෙනුවෙනි.  
මෙම අංශයේ හොඳම නිළියට හිමි සම්මානය දිනා ගත්තේ සාඕර්සේ රොනන්ය. ඒ Lady Bird චිත්‍රපටයේ ලේඩි බර්ඩ් හෙවත් ක්‍රිස්ටින් මැක්පියර්සන් ලෙසින් පෑ රංගනය වෙනුවෙනි.  
මෙවර හොඳම අධ්‍යක්ෂවරයාට හිමි සම්මානය ගුලෙයර්මෝ ඩෙල් ටෝරෝ දිනාගත් අතර, ඒ The Shape of Water චිත්‍රපටය වෙනුවෙනි. මේ ජයග්‍රහණය ප්‍රබල සිනමාකරුවන් වන ස්ටීවන් ස්පීල්බර්ග් (The Post), ක්‍රිස්ටෝපර් නෝලන් (Dunkirk) සහ රිඩ්ලේ ස්කොට් (All the Money in the World) පරයමින් ඩෙල් ටොරෝ දිනාගැනීම කැපී පෙනේ.
කෙසේ වෙතත් මෙවර හොඳම සජීවීකරණ චිත්‍රපටය බවට Coco පත් විය.

මෙවර හොඳම විදෙස් සිනමා කෘතිය වූයේ ජර්මානු-ප්‍රංශ සිනමා කෘතියක් වන In the Fade ය. ජර්මානු ජාතික ෆටි අකින් අධ්‍යක්ෂණය කළ මෙම චිත්‍රපටය කෑන්ස් චිත්‍රපට උලෙළේ ප්‍රධාන තරගකාරී අංශයෙන් තරග වැදීමටද තේරී පත් වූ, හොඳම නිළියට හිමි සම්මානය පසුගිය කෑන්ස් සම්මාන උලෙළේදී ඩයන් කෘගර් දිනාගත් සිනමා කෘතියක් වීම සුවිශේෂී විශේෂත්වයකි.
රූපවාහිනී අංශයෙන් මෙවර හොඳම කතා මාලාවට හිමි සම්මානය නාට්‍යමය අංශයෙන් The Handmaid’s Tale දිනාගත් අතර The Marvelous Mrs. Maisel දිනා ගත්තේ සංගීතමය හෝ හාස්‍ය අංශයේ සම්මානයයි. හොඳම කෙටි මාලා නාටක හෝ රූපවාහිනී චිත්‍රපටයට හිමි සම්මානය Big Little Lies දිනාගත් අතර, 
එය ඔවුන් හැඳින්වූයේ කාන්තාවන්ගේ ශක්තිය ලත් ජයග්‍රහණයක් ලෙසිනි.

_99503543_billboards3_afp _99503706_meyers1_reuters _99503709_dern1_reuters (1) _99503712_portman1_getty 08globes-list-kidman-master768 DS-1iweVMAApj1l dunkirk-watching-master495-v2

‘හම්බකරපුවා කෝ’ අහන්න එපා මට අංගරචනයට මෙතෙක් ගෙවා ඇති වැඩිම මුදල අටදාහයි

සැනට් දික්කුඹුර කියන්නේ හොඳ නළුවෙක් විතරක් නෙවෙයි හොඳ අංග රචනා ශිල්පියෙක්. සැනට් කීවාට වඩා බොහෝ දෙනා ඔහු හඳුනන්නේ පෝලෝ සීයා කීවාමයි. සැනට් ජීවත් වෙන දෙහිවල නිවසට ඔහු සොයා ගිය ගමනක මතක සටහන් පෙළගැස්මකි මේ.

මම මේ ඉන්න නිවස කලකට ඉස්සර තට්ටු දෙකේ ගෙයක්.  මගේ තාත්තා මාතර කෙනෙක්. කොළඹට ඇවිත් තාත්තා පින්තූර රාමු කිරීම වගේ පොඩි පොඩි වැඩ කරමින් තමයි ජීවත්වෙලා තියෙන්නේ. පොල්හේන ඉස්කෝලෙන් හතේ පන්තියට විතරක් ඉගෙන ගත්ත තාත්තා DSC_0873ගොඩාක් දුප්පත් පවුලක කෙනෙක්. සීයා වඩු කාර්මිකයෙක්. ඉතිං ඉස්කෝලෙ අත ඇරලා කොළඹ ආපු තාත්තා මේසන් වැඩ තමයි කරලා තියෙන්නේ. තාත්තා පොල් කඩේක වැඩ කරන අතර තමයි මේ වැඩ කරලා තියෙන්නේ. තාත්තාට උපකාර කළ මුදලාලිටත් අත්උදව් දීගෙන පිංතූර රාමු කඩයකුයි, ශ්‍රී ලංකා හෝටලය කියලා හෝටලයකුයි කරගෙන තාත්තා ජීවත්වෙන්න පටන් අරන් තියෙනවා. තාත්තා උත්සහවන්තයෙක් බව දැකපු පොල් කඩේ මුදලාලිත් එයාගෙ දුවක් කසාද බන්දලා දීලා තාත්තව පවුලේම කෙනෙක් කරගැනීමෙන් පස්සේ තාත්තා කොළඹම කෙනෙක් වුණා. තාත්තා කුලී ගෙවල්වල ඉන්නකොට තමයි ඇස් ද ඇස් ජයසිංහ මහත්තයා මේ ගෙවල් ලබාදීම ආරම්භ කරලා තියෙන්නේ. ඒ දවස්වල මම ලැබෙන්න ඉන්න කාලෙලු තාත්තා ගෙයක් ඉල්ලලා තියෙන්නේ. නමුත් ඒ වෙනකොට ගෙවල් ඔක්කොම දීලා ඉවරයිලු. ඒත්  කවුරුවත් නොගෙන ඒ  ගෙවල් සියයෙන් එකක් ඉතිරිවෙලා තිබිලා.  ඒ නොම්බර 99 ගෙදර. අනූ නවය අසුබයි කියලා හිතපු මිනිස්සු ඒ ගෙය අත ඇරියට එය ලබාගත්තු තාත්තට එයින් වාසනාව උදා වුණා. සැනට් දික්කුඹුර කියන මටත් වාසනාව උදා වුණේ මේ ගෙදරින්. ඉස්සර අපේ තාත්තා තමයි මුළු කොළඹටම වෙසක් සැරසිලි හැදුව ව්‍යාපාරිකයා. මේ ගෙදරම වෙසක් කූඩු, බකට්, වෙස්මූණු වැනි දෑ හදලා තාත්තා හොඳ ව්‍යාපාරිකයෙක් වුණා. නමුත් ඔහු හදිසි අනතුරකින් මිය ගියා. ඒ දවස්වල අද වගේ හදිසි අනතුරු බහුල නෑ. ඒ කාලේ ලොකුම අනතුරක් විදිහට සැලකුව ඒ අනතුරින් හතරදෙනෙක් මිය ගියා. එයින් තුන් වැනියාට මිය ගියේ මගේ තාත්තා. ඉතිං ඉස්සර තාත්තා හදන වෙස් මූණු පාට කළේ මම. මට හොඳට චිත්‍ර ඇඳීමේ හැකියාවක් තිබුණා. අපේ ගෙදර පිට පළාත්වලින් ආව හැටක් විතර කර්මාන්තයේ නියලුණා. මේ විදිහට ලයනල් වෙන්ඩ්ට් එකට සම්බන්ධ වුණා.

ඒ විදිහට තමයි මම කලාවට පය තිබ්බේ. අංග රචනා ඉගෙන ගත්තෙ පත්මකුමාරි එදිරිවීර කියන ගුරුන්නාන්සේගෙන්. මගෙත් එක්ක ලයනල් වෙන්ඩ්ට් එකේ තවත් බොහෝ පිරිසක් අංග රචනා ඉගෙන ගත්තට අවසානයේ එය කරන්න ඉතිරි වුණේ මං විතරයි. මම අංග රචනාවලින් අදටත් නොයෙකුත් අත්හදා බැලීම් කරනවා. ඇස් යට මෙරූන් පාට තවරන්නේ මම විතරයි. කිසිම කෙනෙක් එය නොකරන දෙයක්. නමුත් එයින් මම ඇස්වල ඉස්මතුවීම වඩාත් තීව්‍ර කරනවා. මගේ එම විශේෂත්වය නිසා බැලූ බැල්මටම එය මගේ අංග රචනයක් බව දැනගන්න හැකි ලකුණක් වෙලා තියෙනවා. නමුත් අපේ කලාවේ මේ කාරිය කොතරම් බැරෑරුම් දෙයක් වුණත් ගෙවන්නේ ඉතාම අඩුවෙන්. මේක්අප් බඩුත් මා විසින්ම සපයගන්නවා. මෙහෙම එක්තරා ජනප්‍රිය ප්‍රවීණ නිළියකගේ චිත්‍රපටයක මේක්අප් කරලා ඇය මට ගෙවුවේ රුපියල් තුන්දාහයි. ඒ විදිහට ශ්‍රමය සූරාකන අය තමයි මට වැඩිපුරම හමුවෙන්නේ. අසූ අටේ මට සම්මානය ලැබුණේ %මෝරා^ නාට්‍යයෙන්. මම එහි පසුතල නිර්මාණය කළා, අංග රචනය කළා, රඟපෑවා. ජයන්ත චන්ද්‍රසිරිගේ බලකිරීමටයි ඒක කළේ. ඒ මගේ පළවෙනි නාට්‍ය. එයින් සම්මාන ලැබුණා. ජයන්ත ඒ බඩු සමහරක් තවමත් අරන් ගියේ නැහැ. ඔය ගේ ඉදිරිපිට තියෙන ලෑලි තට්ටු තමයි ඒ. අද මමත් මගේ යාළුවෝ සහ අයිතිකාරයෝ වුණ බල්ලන් රෑනත් නිදාගන්නේ ඒ ලෑලි තට්ටු මත. ගෙය කඩාවැටුණා. මම විවාහ වුණෙත් නැහැ. මේ ගෙය අපි සහෝදර සහෝදරියන් හයදෙනෙකුට අයිතියි. එකමුතුකමක් නැති අපේ  කට්ටියගේ විවිධ මතිමතාන්තර නිසා මේවා මේ විදිහට ගරා වැටෙන්න කලින් හදාගන්න ක්‍රමයක් තිබුණෙ නැහැ. මගේ ලොකු අක්කත්, මමත් විවාහ වී නැහැ. මම විවාහ වෙන්න නොසිතුවෙත් මම ඉන්න මේ අවුල් ගොඩට තවත් කෙනෙක් ගෙනත් ජීවත් වෙන්න කියන්නේ කොහොමද කියන ගැටලුව තිබුණ නිසා. මම හරි හම්බු කරපු දේවල් කෝ කියල අහන්න එපා. වැඩ කළාට බොහෝ දෙනෙක් මට ඒවට හරියන ගෙවීමක් කරල නැහැ. මෙතෙක් කාලෙකට මම කරපු අංග රචනයකට, එහි රඟපෑමටත් එක්කම ගෙවා ඇති වැඩිම මුදල රුපියල් අටදාහයි. ඒ  'වෙලාවකට පිස්සු වගේ'  කියන වේදිකා නාට්‍යයට. ඒ වගේම තමයි මට මුදල් අයකිරීම සම්බන්ධයෙන් පන්නගෙන යන දැනුමක් නැහැ. මට ලැබුණු පෝලෝ ඇඩ් එකටත් ගෙවුවේ රුපියල් තිස්දාහයි. නමුත් එහි අංග රචනා ශිල්පියා රංජිත් මතගවීර මා එක්ක කිව්වා ඔහුගේ කාරිය වෙනුවෙන් ඔහුට හැත්තෑපන්දාහක්  ගෙවුවා කියලා.  දිලීප අබේසේකර මහත්තයට මම ලොකු ගරුත්වයක් තියෙනවා. ඒ ඔහු අපේ ප්‍රවීණ කලාකරුවෙකුගේ පුත්‍රයෙක් වගේම නිර්මාණශීලී තරුණයෙක් නිසා. ඔහු තමයි මේ ඇඩ් එකට මාව යෝජනා කර තිබෙන්නෙත්. මාව තුන් පාරක් විතර ඒකෙන් විකිණිලා තිබුණා. ඉතිං මේ වැඩේ කතා කරන්න ගියාම මම හිතුවෙ ඒ ගැන මා එක්ක කතා කළ කාන්තාව දිලීප මහත්තයගෙ නෝනා වෙන්න ඇති කියලා. අනේ ඉතිං මගෙන් ඇහුවා එයා කීයක් මේ වැඩේට ඕනෙද කියලා. මම කිව්වා ඒක එයාලටම තීරණය කරන්න කියලා. එහෙමනම් අපි තර්ටි තවුසන්ඩ් දෙන්නම් කිව්වා. මට ඔය ගණන් මිනුම් ඉංග්‍රීසියෙන් කිව්වට ඒ තරම් කල්පනාවක් වුණේ නැහැ. ඒ වෙලාවෙ මට හිතුනෙ ඒ කිවුවෙ දහතුන්දාහක් වෙන්න ඇති කියලා. මම මුකුත් කිව්වෙ නැහැ. දිලීප මහත්තයගෙ මූණට එහෙම ගණන් මිනුම් ගැන කතාකරන්න හරි නැහැනේ කියල හිතුණ නිසා. අන්තිමේ එයින් මට ලැබුණු ගණන අරන් නිකම් හිටියා.  

IMG20180104174943
මට ජීවත්වීමට ක්‍රමයක් දැන් මා සතුව හරියාකරව නැති නිසා මම මේ ළඟදි දවසක විශ්‍රාම වැටුපක් අයදුම් කරන්න ගියා. එහිදී මට වයස වැඩියි කියලා ඒ කියන්නේ හැට දෙකක් කියලා විශ්‍රාම වැටුපක් දෙන්න බැහැ කිව්වා. එයාලගේ වයස් සීමාව හැට විදිහටලු තීරණය කරල තියෙන්නේ. ඉතිං මම ඒ අදහස අත්ඇරියා. නමුත් පෞද්ගලිකව එක් තරුණ මහත්තයෙක් මට මසකට එයා ගානේ ඒ රුපියල් හාරදහසක් ගෙවන්න පොරොන්දු වුණා. ඒ විතරක් නෙවෙයි ඔහු ඒ මුදල දැන් මාස තුනක් තිස්සේම මට ලබාදීලා තියෙනවා. මේ ළඟදී දවසක එයාගෙ නෝනගේ උපන්දිනය දවසේ මට වාහනය ගෙදරටම එවලා මාව එක්කගෙන ගිහින් මට හොඳ වටින ඇඳුම් කට්ටල දෙකක්ම තෑගි කරලා, මුදලුත් දීලා මාව ගෙදරටම ගෙනත් ඇරලුවා. කලා කාරයන් සහ කලාකරුවන් කියන්නේ එක කොටසක් නෙවෙයි, කොටස් දෙකක්. අපේ රටේ සීයට අනූවක් ඉන්නේ කලා කාරයෝ. නමුත් කලාකරුවන් අඩුයි. කලාව වෙනුවෙන් අත හිත දීලා තව පරපුරකට එන්න මග සලසන අය, තවත් කලාකරුවෙකුට කලාව වෙනුවෙන් අතහිත දෙන අය තමයි කලාකරුවො වෙන්නේ. ලංකාවේ එහෙම තරු නෑ. දැන් බලන්න මාලනී ෆොන්සේකා නිළි රැජින. නමුත් කාටවත් උදව්වක් කරල නෑ. එයා කලාකාරිනියක් මිස කලාකරුවෙක් නෙවෙයි. මට වැඩ නැතිවෙන්න හේතුව ඕනම දෙයක දොසක් දැක්කොත් මම නම් ගම් පිටින්ම කියනවා. ඒක ගොඩක් දෙනෙකුට දිරවන්නෙ නෑ. ඒ නිසයි මට වැඩ අඩු. කලාකාරයො වෙන්නෙ කලාව තමන්ගේ බඩ වඩාගැනීම වෙනුවෙන් විතරක් පාවිච්චි කරන අය කියලා මම හිතනවා. එහෙම අය තමයි බහුතරයක් හමුවෙලා තියෙන්නේ. 

අද මම මේ කඩාවැටී අබලන් වුණ ගෙදර මගේ සුරතලුන් එක්ක ජීවත් වෙනවා. මම මගේ කෑම වේල ගෙදර උයාගන්නෙ නැහැ.  කඩෙනුයි ගෙනෙන්නේ. නමුත් මගේ හිතමිතුරන් විදිහට මගේ ළඟින් ඉඳගෙන මට තනියක් නොදැනෙන්න මාව ආරක්ෂා කරන, මට ඇත්තටම හිතවත් මේ බල්ලන් තුන්දෙනා වෙනුවෙන් මම ගෙදර උයනවා. උන්ට බඩ පිරෙන්න කන්න දෙන්න ඕන. මම නොකා හිටියත් මේ තුන්දෙනාට කන්න දෙනවා. බල්ලන් හත්දෙනෙක් හිටියා. වරින් වර මිය ගිහින් දැන් ඉන්නේ මේ කට්ටිය විතරයි. මම නාන වෙලාවට මට හදිසියේවත් දුරකථන ඇමතුමක් ඇවිත් ඒක නෑසෙන තැනක නම් මම ඉන්නේ, මේ එක යාළුවෙක් මට දුරකථන ඇමතුමක් ඇවිත් බව මහ හයියෙන් දැනුම් දෙනවා උඩු බුරලලා.  මෙයා උඩු බුරනකොට මං දන්නවා ඒ මට දුරකථන ඇමතුමක් ඇවිත් කියලා. මෙයාලා තුන්දෙනාම රෑට නිදාගන්නේ මා එක්ක අර ලී තට්ටු උඩ.

IMG20180104174804

ඇත්තටම මිනිසුන්ට වැඩිය පුදුම කෙළෙහිගුණයක් තියෙන්නේ. පොඩි අසනීපයක් හැදුණත් මම මෙයාලට බෙහෙත් අරන් දෙනවා. මේ ගෙදරට ඇතුළු වෙන තැනම ඔය එල්ලලා තියෙන්නේ එයාලගෙ බෙහෙත්හේත්. මම නාන්නේ සන්ලයිට් ගාලා. නමුත් මෙයාලට බේබි සබන් ගාලයි නාවන්නේ. එක සතෙක්වත් මෙයාලාගේ ඇඟේ නැහැ. ඒ තරම් එයාලව පිරිසුදුව තියාගන්න මං වෙහෙසෙනවා.

මං කලකට ඉහත කෑම ගත්තෙ සිංහල හෝටලයකින්. ණයට තමයි ඉතිං. මුදල් ලැබුණු ගමන් ණය ගෙවා දමනවා. ඒත් පස්සෙ මට එතැනින් කෑම අරගන්න එක නවතන්න වුණා. හේතුව වැඩ කරන ළමයි මට පල නොකියා පලා බෙදන්න පටන් ගත්තු නිසා. ඊට පස්සෙ මම මුස්ලිම් හෝටලයකින් තමයි කෑම ගන්න පටන් ගත්තේ. ඒ කෑම කඩේ ඉතාම සැලකිල්ලෙන් මට කෑම ටික දෙනවා. ඒ විතරක් නෙවෙයි. මේ විදිහට මගේ කෑම බිල අසූ හයදහසක් විතර වෙලා තිබුණා. 

නමුත් කවදාවත් සල්ලි ඉල්ලුවේ නැහැ. මට ළඟදී කොළඹ සන්නිය රඟපෑම් වෙනුවෙන් රුපියල් පනස් දහසක් ඇඩ්වාන්ස් ලැබුණා. මම එයින් ණයෙන් කොටසක් ගෙවන්න ගිය වෙලාවෙත් ඒ මුදලාලි ඇහුවා පනස්දාහක්ම දෙන්න සල්ලි අතේ තියෙනවද, නැතිනම් ඒක අපි හෙමින් බේරගමු කියලා. නමුත් මට ඔළුව නිදහස් වීම ඊට වඩා වටිනවා. ඒ නිසා මම එය ගෙවා දැම්මා. මං මේ කිව්වේ අපේ රටේ අපේ මිනිස්සු අපිට සලකන විදිහ මෙහෙමයි කියන්නයි. සමහරු අපිට නාට්‍යයකට මේක්අප් වෙනුවෙන් ගෙවන්නේ රුපියල් දෙදාහයි.  ඇත්තටම වේදිකාවේ මේක්අප් වෙනුවෙන් ගැළපෙන්නේ ග්‍රීස් පේන්ට්. නමුත් දැන් අය කැමති පෑන් කේක් මේක්අප් තමයි. ඉස්සර අපි මේක්අප්වලට කවලම් කළේ පොල් තෙල්. නමුත් දැන් බේබි ඔයිල්. කාලය වෙනස්වෙලා. තවමත් මට මගේ රසිකයින්ගේ ආදරේ තියෙනවා. ඒ මම මුදලට යට නොවුණ මිනිහෙක් නිසා. මට නාට්‍ය ලෝකයේ ලැබුණ සම්මාන වගේම කලාභූෂණ සම්මානයත් ලැබිලා තියෙනවා. මම ඉතිං මේ අබලන්ව කඩාවැටුණු  අංක 99,  ශ්‍රී ගුණාලංකාර පාර, කලුබෝවිල, දෙහිවල කියන ලිපිනයේ තමයි පදිංචිවෙලා ඉන්නෙ. 
දුරකථන අංකය 0779951851 

ගුත්තිල කාව්‍යය කියන්නේ දේශපාලනිකව ගැඹුරු අන්තර්ගතයක් ඇති නාට්‍ය නිර්මාණයක්

'හිනාවෙලා මිනිත්තුවක්', 'ගිරිකූඨ කාශ්‍යප', 'ඌ වීරයා' වැනි සම්මානනීය වේදිකා නාට්‍ය නිර්මාණය කළ අකිල සපුමල්ගේ නවතම වේදිකා නාට්‍ය නිර්මාණය වන්නේ 'ගුත්තිල කාව්‍යය' වේදිකා නාට්‍ය නිර්මාණයයි. එහි මංගල දර්ශනය මෙම මස 11 වැනිදා සවස 7ට ලයනල් වෙන්ට්ඩ් රඟහලේදී පැවැත්වෙයි. අනතුරුව මෙම මස 18 මීගමුවේදීත්, 19 බොරැල්ල නාමෙල් මාලනී රඟහලේදීත් වේදිකාගත කිරීමට නියමිතය. මේ කතාබහ එම නාට්‍යය ගැනය.


guththila 1

Q ගුත්තිල කාව්‍යය වේදිකා නාට්‍යය ගැන මුලින්ම අපි කතා කරමු

මේක සංගීතමය නාට්‍යයක්. සමාජයේ ඉතාමත්ම ජනප්‍රිය ගුත්තිල කාව්‍ය කෘතිය පදනම් කරගෙන තමයි මේ නාට්‍යය නිර්මාණය කළේ. මේ නාට්‍යයට ගුත්තිල කාව්‍ය කියන නමමයි යොදා ගත්තේ. %හිනාවෙලා මිනිත්තුවක්^, 'ඌ වීරයා', 'ගිරිකූඨ කාශ්‍යප', 'රාවණ' වැනි නිර්මාණවලට වඩා වෙනස් රංග ආකෘතියක් භාවිත කරන සංගීතමය නාට්‍යයක් තමයි ගුත්තිල කාව්‍යය කියන මෙම නාට්‍යය. වෑත්තෑවේ හිමියන්ගේ ගුත්තිල කාව්‍යයේ අන්තර්ගත ප්‍රශස්ත කාව්‍ය නිර්මාණ ඔස්සේ ගලාගෙන යන ගැඹුරු තේමාවකින් යුත් නාට්‍යයක් කියලා මේ නාට්‍යය නිර්මාණය හඳුන්වා දෙන්න පුළුවන්.

ගුත්තිල කාව්‍යය තුළ අන්තර්ගත බොහෝදෙනා දන්නා කතා තේමාවක් වේදිකා නාට්‍යයට යොදා ගත්තේ ඇයි

මම කැමතියි මිනිස්සු දන්න කතාවක් වස්තු විෂය කරගෙන වේදිකා නාට්‍ය නිර්මාණය කරන්න. ඒකට හේතුව ප්‍රේක්ෂකයා එන්නේ දන්න කතාවක් බලන්න. ප්‍රේක්ෂකයා වේදිකා නාට්‍ය නරඹා පිටවෙන්නේ දන්න කතාව ඇතුළේ ඇති නොදන්නා බොහෝ දේවල් එක්ක. එහෙම වුණාම කලා නිර්මාණය සිදුකරද්දි ප්‍රේක්ෂකයා දන්න දේවල් හරහා නොදන්න දේවල්වලට ඉතාම ගැඹුරින්, ඉතාම ප්‍රශස්තව නිර්මාණයට ගෙන එන්න හැකිවෙනවා. ගුත්තිල කාව්‍යය හැමදෙනෙක්ම වගේ දන්නවා. ගුත්තිල පඬිතුමා, මූසිල, බරණැස් රජුන්, ශක්‍රයා කියන චරිත මිනිසුන් හොඳින් දන්නවා. මූසිල පරාජයට පත්වෙනවා, ගුත්තිල පඬිතුමා ජයග්‍රහණය කරනවා කියලත් ඔවුන් දන්නවා. දන්න කතාව වේදිකාවට ගෙන ආවොතින් මම නාට්‍යකරුවෙක් වෙන්නෙ නැහැ. මම ගුත්තිල කාව්‍යය පදනම් කරගෙන නව අත්දැකීමක් වේදිකා නාට්‍ය ප්‍රේක්ෂකාගාරයට ලබා දෙනවා. මේ නාට්‍යයේ ප්‍රධාන චරිතය වෙන්නේ ගුත්තිල කාව්‍යය රචනා කළ වෑත්තෑවේ හිමියන්. වෑත්තෑවේ හිමියන් තමයි ප්‍රේක්ෂකයාට වේදිකාව තුළ වැඩි වේලාවක් දකින්න ලැබෙන්නේ. එහෙම වුණාම වැත්තෑවේ හිමියන් කියන්නේ කවුද? ඒ හිමියන්ගේ ආකල්ප සිතිවිලි කෙබඳුද? කුමන සමාජ පසුබිමක් ඔස්සේද ජීවත් වුණේ කියන කාරණා තුළින් තමයි මේ නාට්‍යය දිගහැරෙන්නේ. වෑත්තෑවේ හිමියන් ගුත්තිල කාව්‍යය ලියන ආකාරය නාට්‍යය තුළ අන්තර්ගත වෙනවා. වෑත්තෑවේ හිමියන්ට කවි සිතිවිලි පහළ වෙන්නේ කෙලෙසකද, හිමියන් මුහුණ පෑ සමකාලීන සිදුවීම් ඒ කාව්‍ය නිර්මාණවලට බලපෑවේ කොහොමද ආදී ලෙස ගුත්තිල කාව්‍යය නම් ප්‍රශස්ත කාව්‍යය අපිට තිළිණ වූ ආකාරය වේදිකාවේ දිගහැරෙනවා. මේ සියල්ල වෑත්තෑවේ හිමියන්ගේ දෘෂ්ටිකෝණයෙන් නිරූපණය වෙනවා. මෙය බාල ගණයේ නාට්‍යයක් නෙමෙයි. සාම්ප්‍රදායිකම කතාවකුත් නෙමෙයි. නව රංග ආකෘතියක් තුළ ගොඩනැගෙන  සියලු දෙනාටම නරඹන්න හැකි, රසවිඳිය හැකි ප්‍රමිතියක් ඇති නාට්‍යයක් බව වගකීමෙන් කියනවා.

IMG_91226 copy

ගුත්තිල කාව්‍ය වේදිකා නිර්මාණය කාව්‍යාත්මක නාට්‍යයක්. මෙවැනි නාට්‍යයක් වේදිකාවට ගෙන ඒමේදී මෙහි ආකෘතිය හා රංග ශෛලිය කොතරම් දුරට ප්‍රේක්ෂකයන්ට සමීප වෙයිද

මම ඒ ගැන අවධානය යොමුකරලා තමයි මෙ නාට්‍යය සිදුකළේ. මෙය ප්‍රේක්ෂකයන් වැලඳ ගන්නා නාට්‍යයක් බවට පත්වෙයි. මෙයට ගුත්තිල කාව්‍ය තුළ ඇති කාව්‍යයන් 55ක් පමණ මම යොදාගෙන තිබෙනවා. ඒ කාව්‍යයන්වල සංගීතය ඉතා මියුරුයි. දිල්ශාන් උමයංග නම් සංගීත අධ්‍යක්ෂකවරයා මෙම නාට්‍යයේ සංගීත අධ්‍යක්ෂකවරයා ලෙස කටයුතු කරනවා. නාට්‍යයේ රංග වින්‍යාසයත්, චලනය, රචනයත් මම සිදුකළා. රංග ශෛලිය ස්වාභාවිකයි. ගීතයත් එක්ක මුසුවන සංගීතයන්ට රිද්මයානුකූල චලනයන් භාවිත කරනවා. මනමේ, සිංහබාහු වැනි නාට්‍යවල ඇති රංග ශෛලිය නෙමෙයි මෙම නාට්‍යයට භාවිත වෙන්නේ. මෙම නාට්‍යයට භාවිත වෙන්නේ මිශ්‍ර රංග ශෛලියක් ස්වාභාවික සංවාද සහ ස්වාභාවික ඉරියව් සමග රිද්මයානුකූල චලනයන් භාවිත වෙනවා. සුත්‍රධාර නමින් වෑත්තෑවේ හිමියන් වාසය කළ ග්‍රාමයේ සිටි රූකඩ නටවන්නෙක්ට වෑත්තෑවේ හිමියන් මිත්‍ර නිසා වෑත්තෑවේ හිමියන් ලියන කවි ඔහුට ලබා දෙනවා. සූත්‍රධාර එම කවිවලට තනු නිර්මාණය කර ගම්වැසියන්ට රූකඩ ලෙස එය ප්‍රදර්ශනය කරනවා. වෑත්තෑවේ හිමියන් ලියන කවිවලට ජීවයක් සපයන කෙනෙකු ලෙස සුත්‍රධාර මම ගෙන එනවා. කරත්තෙක තැන් තැන්වලට ගිහින් ගමේ මිනිසුන්ට නාට්‍යය පෙන්නනවා. ගුත්තිල කාව්‍යය කියන්නේ දේශපාලනිකව ගැඹුරු අන්තර්ගතයක් ඇති නාට්‍ය නිර්මාණයක්. එය සුන්දර අත්දැකීමක් වෙයි.

'ගිරිකූඨ කාශ්‍යප^ ගත්තත්, 'හිනාවෙලා මිනිත්තුවක්' ගත්තත් ඒ වේදිකා නාට්‍ය වැඩි වාර සංඛ්‍යාවක් වේදිකාගත කරන්න ඔබට හැකියාව ලැබුණේ නැහැ.  ඒ අභියෝගයට උපක්‍රමශීලීව මුහුණ දීමක්ද මේ

'හිනාවෙලා මිනිත්තුවක්^ කියන නාට්‍යය යෞවන නාට්‍ය උලෙළේ හොඳම නාට්‍යය බවට පත්වුණා. හොඳම නළුවා, නිළිය සහය නළුවා, සංගීතය, පිටපත, අධ්‍යක්ෂණය ආදී ලෙස සම්මාන දිනපු නාට්‍යයක්. 'ගිරිකූඨ කාශ්‍යප' කියන නාට්‍යයත් එබඳු නාට්‍යයක්මයි. රාජ්‍ය නාට්‍ය උලෙළේ හා යෞවන නාට්‍ය උලෙළේ සම්මාන රැසක් දිනපු ප්‍රශස්ත නාට්‍යයක්. ඒ නිර්මාණ දෙකටම මේ රට තුළ සිටින වේදිකා නාට්‍ය ප්‍රේක්ෂකාගාරය තුළ ලොකු ඉඩක් තිබුණේ නෑ. නාට්‍ය නරඹන්න එන බොහෝ දෙනෙක් කැමැත්ත දක්වන්නේ වෙනත් නාට්‍යයවලට. බොහෝ දෙනෙක් මා කළ මේ නාට්‍ය දෙක අගය කළත්, ප්‍රශස්තයි කියලා සඳහන් කළත් එය දුවන රැල්ලේ නාට්‍ය බවට පත්වුණේ නැහැ. ඒකට හේතුව මම කියලා මම හිතන්නේ නැහැ. ඒකට හේතුව මේ සමාජයමයි. නමුත් දැන් මට සිදුව තිබෙන්නේ දුවන(වැඩි දර්ශන වාර සංඛ්‍යාවක් ප්‍රදර්ශනය කළ හැකි) නාට්‍යයක් හදාගන්න. එයට බාල ගණයේ සරල තේමාවක්, ටෙලිනාට්‍ය නළු නිළියන් කිහිපදෙනෙක් යොදා ගැනීම මම අනුගමනය කරන්නේ නැහැ. මේ වෙලාවේදී මම උපක්‍රමයක් තමයි යොදා ගත්තේ. ගුත්තිල කාව්‍ය පාසල් දරුවන්ගේ විෂය නිර්දේශයට අදාළ කෘතියක් බවට පත්ව තිබෙනවා. ඒ කාව්‍ය සංග්‍රහවල අන්තර්ගත කවි ශිෂ්‍යයන් කටපාඩම් කරගත යුතුයි. එහි වර්ණනා රසවින්දනය කළ යුතුයි. නව විෂය නිර්දේශය යටතේ උසස් පෙළ සඳහා ගුත්තිල කාව්‍ය නිර්දේශ වී තිබෙනවා. එවැනි තත්ත්වයක් යටතේ ගුත්තිල කාව්‍යය ඇසුරින් කළ මේ නිර්මාණය පාසල්වල, විශ්වවිද්‍යාලවල සහ සමාජයේම කතිකාවතක් ඇති කළ හැකි ඒ වේදිකාවට යන්න පුළුවන් නිර්මාණයක් බවට පත්වෙනවා. %මනමේ^, %සිංහබාහු^ වැනි නාට්‍යවල දර්ශන වාර වැඩි ගණනක් සංවිධානය වෙන්නේ එය විෂය නිර්දේශ තුළ අන්තර්ගත නිසා කියලා මම හිතනවා. නමුත් රාජ්‍ය නාට්‍ය උලෙළේ හෝ යෞවන නාට්‍ය උලෙළේ හොඳම නාට්‍යය ලෙස සම්මාන ගත් අපේ නාට්‍යයක් විෂය නිර්දේශයට එන්නේ නෑ. අන්න ඒ නිසා තමයි මම ගුත්තිල කාව්‍ය නාට්‍යය නිර්මාණය කරන්නේ. ඒ නිසා මේ නාට්‍ය නිර්මාණයට පාසල් මට්ටමෙන්, විශ්වවිද්‍යාල මට්ටමින් හොඳ ඉල්ලුමක් ඇති වෙයි. 

guththila 5

රංගන ශිල්පීන් තෝරා ගැනීමේ ක්‍රමවේදය පවා ඔබ සිදුකළ නිර්මාණවලට වඩා වෙනසක් දකින්න පුළුවන්

ඔව් ඒක ඇත්ත. %හිනාවෙලා මිනිත්තුවක්^ සහ %ගිරිකූඨ කාශ්‍යප^ නාට්‍යය නිර්මාණය කරද්දි මම අවධානය යොමු කළේ රංගන ශිල්පියාගේ උපරිම දක්ෂතාව පමණයි. ඔහුගේ ජනප්‍රියතාව ජනතා ආකර්ෂණය ගැන මම අවධානය යොමු කළේ නැහැ. මම පෙර අවධානය යොමු කළේ මම වේදිකාවේ සිදුකරන පර්යේෂණාත්මක රංගයට නර්තනයෙන්, ගායනයෙන්, රංගනයෙන් ආදී හැකියාවෙන් යුතු ශිල්පීන්  දායක කර ගැනීම පමණයි. නමුත් ගුත්තිල කාව්‍ය නාට්‍ය නිර්මාණය කිරීමේදී පෙරට වඩා වෙනස් ක්‍රමවේදයක් රංගන ශිල්පීන් තෝරා ගැනීමේදීත් සිදුකළා. ප්‍රේක්ෂකයන් දන්න රංගන ශිල්පීන් කීපදෙනෙක් යොදා ගන්නවා. ප්‍රතිභාපූර්ණ රංගන ශිල්පියෙක් වන චන්ද්‍රසෝම බින්දුහේවා ප්‍රධාන චරිතයකට යොදා ගන්නවා. ඒ වගේම සෞන්දර්ය විශ්වවිද්‍යාලයේ ජ්‍යෙෂ්ඨ කථිකාචාර්ය ප්‍රසන්නජිත් අබේසූරිය රංගන ශිල්පියෙක් ලෙස දායක වෙනවා. පසුගිය වසරේ රාජ්‍ය නාට්‍ය උලෙළේ හොඳම නිළිය බවට පත්වූ දිනුපා කෝදාගොඩ වගේම %සිංහබාහු^, %මනමේ^ නාට්‍යවල ප්‍රධාන චරිත නිරූපණය කරන ජයනාත් බණ්ඩාර වැනි ශිල්පීන් බොහෝදෙනෙක් මම යොදාගෙන තිබෙනවා. වේදිකා පරිපාලනය සමන් ලියනආරච්චි සහ ඔහුගේ කණ්ඩායමෙන්, අං‘ග රචනය චාමර අනුදත්, රංගන ශිල්පීන් ලෙස ටෝනි කෙවිටියාගල, ලකීෂා, ඉරේෂා ආදී පහළොස් දෙනෙකුගෙන් යුත් රංගන ශිල්පීන් පිරිසක් මෙයට දායක වෙනවා. සංගීතයත් සජීවීවයි පැවැත්වෙන්නේ. එම නිසා පෙර නාට්‍යවලට වඩා වැඩි ජනතා ඉල්ලුමක් ඇතිවෙයි කියලා හිතනවා.

දේශපාලනයේ වැරදි තීරණ තීන්දු හේතුවෙන් රසිකයාට ගීතයක් රස විදීමට මනස නිරවුල් නැහැ

දශක එකහමාරකට පමණ පෙර කර මත එල්ලාගත් බෑගයක බහා කැසට් පට අලෙවි කිරීමේ නියැළී සිටි අජිත් සුනිල් නම් තරුණයෙකුගේ හදවත් රෝගයක් සඳහා සිදු කරන ශල්‍යකර්මයකට රුපියල් ලක්ෂ දෙකක් පමණ අවශ්‍ය විය. ඒ සඳහා මුදල් සෙවීමේ අරමුණින් සියලුම ගායන ශිල්පීන් අය කිරීමකින් තොරව ගී ගයන ගී ප්‍රසංගයක් මෙම තරුණයා කැසට් පට නිෂ්පාදකයන්ගේද සහාය ඇතිව ලුමිබිණි රඟහලේ පැවැත්වීමට සංවිධානය කළේය. එහිදී නිර්මාණය කළ ප්‍රචාරක පෝස්ටරයේ එක්තරා විශාරද ගායන ශිල්පියෙකුගේ නම ඉදිරියෙන් 'විශාරද' යන්න  සඳහන් නොකර තිබීම හේතුවෙන් එම තරුණයාට එය නිවැරදි කර යළිත් වරක් පෝස්ටරයක් මුද්‍රණය කර ඇලවීමට සිදුවිය. දෙවැනි වර එකල තරුණ ගායකයෙකුගේ නමට ඉහළින් එකල නවක ගායකයෙකුගේ නම පළ වීම පිළිබඳ එම ගායකයා විරෝධය පළකළෙන් පෙර කී තරුණයාට එම පෝස්ටරය තෙවැනි වරටද සංශෝධනය කර මුද්‍රණය කර ඇලවීමට සිදුවිය.

පසු දිනෙක මෙම ලියුම්කරුට එම තරුණයා වූ අජිත් සුනිල් හමු වූ අවස්ථාවේ ඔහුට උපදෙස් දෙනු ලැබුවේ ජිප්සීස් කණ්ඩායම මෙම ප්‍රසංගයට ගෙන්වුවහොත් අතිවිශාල පිරිසක් ශාලාවට ගෙන්වාගත හැකි බවයි. ඒ අනුව ඔහු ජිප්සීස්හි සුනිල් පෙරේරා හමු වී ඔහුට ඇරයුම් කළද, එවන් දැවැන්තයන් තම ආධාර ප්‍රසංගයට එතැයි අපේක්ෂා නොකළෙන්, ඒ බව යළි පෝස්ටරයකින් ප්‍රචාරය කිරීමට තරම් ඔහු උනන්දු නොවූයේ මූල්‍ය වත්කමක් නොතිබීම හේතුවෙනි. එහෙත් ප්‍රසංගය පැවැත්වූ දින සවස පහ වනවිට ජීප්සීස් කණ්ඩායම එහි පැමිණ සිය සංගීත උපකරණද සවිකර ගී ගැයීමට වේදිකාව සූදානම් කර තිබිණි. එහෙත් එදින ඒ පිළිබඳ පූර්ව ප්‍රචාරයක් කර නොතිබුණෙන් අතිවිශාල රසික පිරිසක් පැමිණ නොතිබිණි. එසේ වුවද කිසිදු වෙනස්කමක් පළ නොකර ජිප්සීස් කණ්ඩායම සිය දායකත්වය එම ප්‍රසංගයට ඉහළින්ම ලබාදීමට සමත් විය.
එවන් සරල ගති පැවතුම් ඇති එහෙත් කිවයුත්ත ඒ ආකාරයෙන්ම පැවසීමට කශේරුකාවක් ඇති ප්‍රවීණ කලාකරුවෙකු වන ජිප්සීස් කණ්ඩායමේ නායක සුනිල් පෙරේරා 'අද' පුවත්පත සමග සංවාදයකට කැඳවා ගතිමු. මේ එම සාකච්ඡා සටහනයි.

Q ඉස්සර නත්තල් සමයක අසන්නට ලැබෙන ගායන ශිල්පීන්ගේ නව ගී නිර්මාණ කිසිවක් මෙවර රසික සමාජයට තිළිණ වන ආකාරයක් දක්නට ලැබුණෙ නැහැ නේද

”රටක පිබිදීමක් ඇති වන්නේ එහි පාලකයන්, එහි ජනතාව ප්‍රීති ප්‍රමෝදයෙන් තබන පාලනයක් රටක් තුළ ක්‍රියාත්මක කරන අවස්ථාවල පමණයි. එය ඈත ඉතිහාසයද, මෑත ඉතිහාසයද පිරික්සීමෙන් අවබෝධ කරගත හැකියි. රටේ ජනතාවට සැහැල්ලුවෙන් ගීතයක් රස විඳිය හැක්කේ එවිටයි. ලේඛකයෙකුට පොතක් ලිවිය හැක්කේ, කවියෙකුට නිර්මාණයක් කළ හැක්කේ, සිත්තරෙකුට හොඳ සිතුවමක් නිර්මාණය කළ හැක්කේද එවිටයි. එසේම හොඳ සිනමා නිර්මාණයක්, වේදිකා නාට්‍යයක් නිර්මාණය වීමටද එම පසුබිම බලපානවා. අද එවන් තත්ත්වයක් රට තුළ නැහැ.
හිටපු පාලකයන්ගේ හොර මැරකම් හෙළි වනවිටම, වත්මන් පාලකයන්ගේද මහා පරිමාණයේ මූල්‍ය වංචා හෙළි වෙනවා. එවිට ජනතාවගේ සිත් තුළ පහළ වන්නේ මුන් දෙගොල්ලොම හොරු නම් අපි කාවද විශ්වාස කරන්නේ යනුවෙන්. එවන් සමාජයක අසහනය වැඩි වනවිට මානසික පීඩනය වැඩි වනවිට මුලින්ම ඔවුන් වෙතින් දුරස් වන්නේ කලාවයි. සැහැල්ලුවෙන් කලා නිර්මාණයක් රස විඳීමේ මානසික තත්ත්වය ඔවුන් වෙතින් දුරස් වනවිට මෙම විසකුරු සමාජයේම සාමාජිකයෙක් වන කලා ශිල්පීන් වෙතින් නව නිර්මාණ බිහි වේවිද? මා ඔබව මෙයට වසර දෙකකට පමණ පෙර හමුවන විට පැවසූ උසාවියක විභාග වන ස්ත්‍රී දූෂණ නඩුවක් ඇසුරෙන් නිර්මාණය වූ ගීතය අපට තවම වෙළෙඳ පොළට නිකුත් කිරීමට නොහැකි වුණේ මේ සමාජය කය මිස සිත නොමැති මිනිසුන් ලෙස හැසිරෙන තත්ත්වය නිසයි.

IMG_0276

ඔබ කියන්නේ මේ සියල්ල සිදුවන්නේ පාලකයන්ගේ වරදින් කියලද

මට කනගාටුවෙන් වුවත් එය එසේය කියා කියන්න සිදු වෙනවා. දැන් බලන්න අපේ පාලකයන්ට පිරිත් කියා නිම කරන්නේ %රාජා භවතු ධම්මිකෝ^ කියලයි. පසුව අතේ පිරිත් නූල් බඳින්නේ මේ පාලකයන්ට රට යහතින් පාලනය කිරීමට හැකිවේවා කියා සිතමින්. එහෙත් පසුවදා අසන්නට ලැබෙන්නේ මොකක්ද අර පාලකයාගේ අනුග්‍රහය ලබන්නෙකු කළ දූෂණයක් ගැනයි. අර පාලකයා එම දූෂණය කළ අයෙකුට දුන් දඬුවමක් පිළිබඳ අපට අසන්න ලැබුණද? නැහැ? දැන් බලන්න ජාත්‍යන්තර නීතියක් තිබෙනවා. ලොව කිසිදු පුරවැසියෙකුට විදේශ ගමන් බලපත්‍ර දෙකක් තබාගැනීම තහනම් බවට. එහෙත් එම වරද කළ බව කියන කිසිදු දේශපාලකයෙකුට දඬුවම් දුන්නාද? නැහැ. එහෙත් කවුදෝ දුප්පත් කාන්තාවක් ආහාර පිසීමට යාබද ඉඩමකින් අඹ ගෙඩි තුනක් කඩාගත් වරදට නම් දඬුවම් කළා. එසේම ඔය කාලය පුරාම පාලකයෝ රටේ නීතිය ක්‍රියාත්මක කරන බව කියමින් ජනතාවගේ බදු මුදලින් ලක්ෂ ගණනින් දීමනා ලබාගත්තා නේද?
“එහෙනම් පාලකයො තම යුතුකම් සහ වගකීම් පැහැර හරින කොට, පාලකයන් තම දේශපාලන හෙංචයියන්ට විතරක් සලකන කොට රටේ ජනතාවට ගීතයක් රස විඳිමින්, සිනමාපටයක් රස විඳිමින් සිටිය හැකිද? බැහැ. නිදහස් අධ්‍යාපනයෙන් දැනුම වැඩි කරගත් ඒ තරුණයන් අන්තර්ජාලයෙන් දකිනවා ලෝකය පුරා යහපත් පාලකයන් සිටින රටවල ජනතාව නිතරම සතුටින් සිටින ආකාරය. එවිට තම පාලකයන් ජනතාවගේ සම්පත් විදේශයන්ට විකුණා රට කරවන හැටි දකින ඔවුන්ට ඇතිවන කෝපය තමයි විරෝධතා ව්‍යාපාර ලෙස පාර දිගේ අපට දකින්න ලැබෙන්නේ. මේ තරුණයන්ගෙන් අපට ගීතයක් රස විඳින ලෙස ඉල්ලා සිටිය හැකිද? බැහැ. අපි 1997 එළිදැක්වූ %සිඤ්ඤෝරේ^ ගීතය රස විඳි ජනතාව තුළ මෙම දේශපාලන ව්‍යාජයට සිනාසීමට අවශ්‍යව සිටියා. ඔවුන්ගේ මෙම ප්‍රෝඪාවට සිනාසෙන ගී නිර්මාණයක් එළිදක්වනු ඇසීමට ඔවුන්ගේ යටි සිත මහත් ආශාවෙන් සිටියා. තරුණයන් දැන් මෙම දේශපාලනයේ ව්‍යාජය දන්නවා. මේ රැවටිල්ල දන්නවා. මා සිතන්නේ සමහරවිට අපගේ රසිකයා ආදරය ගැන ලියැවෙන ගීතයකට වඩා මෙම ව්‍යාජ දේශපාලනයේ ඇති මායාව සහ රැවටිල්ල ගැන ලියැවෙන ගීත මහත් අභිරුචියෙන් වැලඳ ගැනීමට ඉඩ තිබෙනවා.

ඔබ ජිප්සීස් කණ්ඩායමේ නායකයා ලෙස උපහාස ගීත ගැයීමට රුචියක් දක්වනවාද

උපහාස ගීත කලාව ලෝකය පුරාම රැල්ලක් ලෙස පැතිර තිබෙනවා. එය වරදක් නොවේ. වරදක් වන්නේ අපහාස ගීත සමාජගත කිරීමයි. උපහාස රසය චාලි චැප්ලින්ද එයාගේ නිහඬ චිත්‍රපටවලින් පෙන්නුවා. බොබ් මාලේ වැනි ගායකයන්ද භාවිත කළා. ගායකයා සහ කලාකරුවාද මේ සමාජයේම සාමාජිකයෙක්. ඔහුටත් රටේ ජනතාව විඳින පීඩාව මෙන්ම පවතින දේශපාලනයේ ව්‍යාජ ස්වරූපය පෙනෙනවා. එවිට එම ජනතා කෝපය අපගේ ගීත නිර්මාණවලට භාවිත විය හැකියි. වෙනස තිබෙන්නේ අප එය සම්භාව්‍ය ගීතයක් ලෙස භාවිත නොකර විනෝද ගීතයක් ලෙස භාවිත කිරීමයි. මොකද අපි ගීත නිර්මාණය කරන්නේ විනෝද ගීත ඉල්ලන රසික සමාජය ඉලක්ක කරගෙනයි. අපි එම විනෝද ගීත සඳහා එවන් අරුත්බර අදහස් ඇතුළත් සරල පදවැල් එක්කරන කොට සමාජයට විනෝදය මෙන්ම සමාජයට පවතින සැබෑ යථාර්ථයද තවරා දෙනවා. එයත් හරියට නිකම් බටර් ගා පාන් පෙත්තක් දෙන්නේ නැතිව එය සැන්ඩ්විච් කරලා දෙනවා වගේ කාර්යයක් යැයි කීවොත් නිවැරදියි.
අපි ආරම්භයේදී ගැයූ %ළිඳ ළඟ සංගමය^ සහ %පහසුවටත් ලෙහෙසියටත්^ වැනි ගීතවල සිට අපි යම් තරමකට උපහාසය මිශ්‍ර කළා. කොහොමටත් එකල %විනෝද සමය^ ගුවන්විදුලි වැඩසටහනින් සැමුවෙල්, ඇනස්ලි, බර්ටි, ගැමුණු සමාජයේ දුර්වල තැන් උපහාසයට ලක්කරන ආකාරය ගැන මගේ විශාල පැහැදීමක් තිබුණා. ඒ නිසයි ඔවුන් සමග ගීතයක් නිර්මාණය කළේ. එය අපේ රසිකයන් මහත් ආදරයෙන් පිළිගත් බව පෙනුණු නිසා, ඒ ශෛලිය අපිත් මහත් විශ්වාසයකින් වටහාගත්තා. අපගේ %කුරුමිට්ටෝ^ ගීතයේද අපි එම උපහාස රසය ඇතුළත් කළා. කොහොමත් අද උපහාස රසය බලෙන් ඇතුළත් කරලා ගීත නිර්මාණය කරන්න ඕන වෙන්නෙ නැහැ. අපේ දේශපාලනයේ ඕන තරම් උපහාසය දනවන සිදුවීම් දැන් සිදු වෙනවනේ.

ඔබ වරක් මට කිව්වා ඔබ ඇමෙරිකාවට ගිය අවස්ථාවක එහි සිටි ශ්‍රී ලංකා තානාපතිවරයාට ඉංග්‍රීසි කතා කිරීමට හෝ දැනුමක් තිබුණේ නැහැ කියලා

ඔව්, එය එකල තිබූ දේශපාලන නායකත්වය විදේශ සේවය පිළිබඳ නිවැරදි දැක්මකින් තොරව කළ දෙයක්. ඇමෙරිකාවේ ශ්‍රී ලංකා තානාපතිට ඉංග්‍රීසි භාෂාව කතා කිරීමට නොහැකි වීම අපේ රටට විශාල කැළලක්. කොහොමත් දේශපාලකයන් කවුරුත් සුදුස්සාට සුදුසු තැන දෙන්නේ නැහැනේ. ඒකෙන් වෙන්නෙ මේ රටට දක්ෂයන්, බුද්ධිමතුන් අහිමිව යෑමයි. ඔවුන්ට පිටරටවල ඉහළ පිළිගැනීමක් තිබෙනවා. රට දවසින් දවස අගාධයට යනවා, එච්චරයි.

ගාමිණි සරත් ගුණවර්ධන