Category Archives: columns

ජනාධිපති අපේක්‍ෂිකාව ශිරන්ති

ලැබෙමින් පවතින ආරංචි අනුව රාජපක්‍ෂ පිලෙහි ජනාධිපති අපේක්‍ෂිකාව වීමට වැඩි ඉඩක් ඇත්තේ නාමල් රාජපක්‍ෂගේ මව හා මහින්ද රාජපක්‍ෂගේ බිරිඳ මෙන්ම ශ්‍රී ලංකන් ගුවන් සේවයේ හිටපු සභාපති වික්‍රමසිංහ මහතාගේ සහෝදරිය වන ශිරන්ති රාජපක්‍ෂය. ඇය ගෝඨාභය රාජපක්‍ෂට වඩා සිංහල බෞද්ධ නොවන ඡන්දවලට ආමන්ත්‍රණය කළ හැකි රාජපක්‍ෂ පවුලේ අපේක්‍ෂිකාවකි. නමුත් අප සලකා බැලිය යුත්තේ මෙතරම් ජනප්‍රිය රාජපක්‍ෂවරු සිටියදී, ශිරන්ති රාජපක්‍ෂ 2020 ජනාධිපතිවරණයට තෝර ගැනීමේ පදනම කුමක්ද යන්නය. මුලික වශයෙන් රාජපක්‍ෂවරුන්ගේ මුළු දේශපාලන වැඩසටහනම පදනම් වන්නේ නාමල් රාජපක්‍ෂගේ දේශපාලන අනාගතය මතය. හිටපු ජනාධිපති මහින්ද රාජපක්‍ෂ සිටිනුයේ නාමල් රාජපක්‍ෂගේ දේශපාලන අනාගතය වෙනුවෙන් ඕනෑම මිලක් ගෙවීමේ පදනමිනි. නමුත් බැසිල් රාජපක්‍ෂ හා ගෝඨාභය රාජපක්‍ෂ යන සහෝදරවරු නැවත බලය අත්පත් කර ගැනීම හා ඒ මත පදනම්ව ජීවිතයේ ඉතිරි කාලය ලංකාවේ ගත කිරීමත් සීමාන්තික වන නමුත් රට ගොඩනගා ඉතිහාසගත වීමට ඇති අධික ආශාවකිනුත් පසුවේ. එමෙන්ම රටේ ආණ්ඩුවට විරුද්ධ බලවේග අඩුවැඩි වශයෙන් මෙම රාජපක්‍ෂවරු වටා ගොඩනැගෙමින් පවතී. එම දෙදෙනාම ලංකාවේ ආණ්ඩු විරෝධී දේශපාලනයේ කේන්ද්‍රය බවට පත්ව තිබේ. එසේම රටේ එක්තරා කොටසක් 2020 දී ගෝඨාභය නිශ්චිත වශයෙන්ම බලයට පත්වන බව විශ්වාස කරන අතර, එම නිසාම දෙමළ හා මුස්ලිම් ජනතාව භීතියට පත්ව තිබේ.

‍එම කාරණාව පදනම් කරගෙන විපක්‍ෂයේ පාර්ලිමේන්තු කණ්ඩායම කොටස්වලට කැඩී තිබේ. කෙසේ නමුත් ලැබෙමින්  පවතින ආරංචි අනුව හිටපු ජනාධිපති මහින්ද රාජපක්‍ෂ සිටිනුයේ කිසිදු රාජපක්‍ෂවරයෙකු හා බලය බෙදා හදාගැනීමේ ස්ථාවරයක නොවන අතර, ඔහුගේ ස්ථාවරය වන්නේ රාජපක්‍ෂ කෙනෙකු හෝ තම පිලෙහි කෙනෙකු 2020 ජයග්‍රහණය කිරීම නාමල් රාජපක්‍ෂගේ දේශපාලන අනාගතයට මෙන්ම තමන් විසින්, තමන් වෙනුවෙන් රටේ ගොඩනැගී ඇති දේශපාලන බලවේගය අවසන් වීමක් ලෙසය. එබැවින් මහින්ද රාජපක්‍ෂ කල්පනා කරනුයේ එක්කෝ නාමල් රාජපක්‍ෂ නියමිත වයස හා පරිණත බව ලැබෙන තුරු විපක්‍ෂය තුළ ගතකළ යුතුය, නැතහොත් ජී.එල්. පීරිස් වැන්නෙකු යොදාගත යුතු බවය. කෙසේ නමුත් ගෝඨාභයගේ නැගීමත්, බැසිල්ගේ සංවිධාන ශක්තියත් මත දේශපාලන හැඩගැස්ම ගොඩනැගී ඇති මේ මොහොතේ මහින්ද රාජපක්‍ෂගේ සුරක්‍ෂිත තෝරා ගැනීම වන්නේ ශිරන්ති රාජපක්‍ෂය. එය නාමල්ගේ දේශපාලනයට මහින්දට දිය හැකි හොඳම සුරක්‍ෂිත කර ගැනීම වේ.

රාජපක්‍ෂවරුන්ගේ දේශපාලනයේ ඇති සුවිශේෂී තත්ත්වය වන්නේ මුළු දේශපාලන වැඩසටහනේම පදනමද වන්නේ ඔවුන්ගේ පවුල වටා වන අතර, එයිනුත් වඩාත් සාර්ථක හා විය යුතු ලෙස සලකනු ලබන්නේ රාජපක්‍ෂවරුන්ගෙනුත් ශ්‍රේෂ්ඨම විය යුත්තේ මහින්ද රාජපක්‍ෂගේ න්‍යෂ්ටික පවුල බවයි. එම පවුලේ මුළු විශ්වාසය ඇත්තේද, සම්පූර්ණ දේශපාලන පෙළගැස්ම ඇත්තේද මහින්ද රජපක්‍ෂ වෙනුවෙන් බවත්, එහි ප්‍රතිලාභ ලැබිය යුත්තේ එම පවුලට බවත්ය. ඉන් පසු අවශේෂ රාජපක්‍ෂවරුද, වීරතුංගලාද, අනෙකුත් ඒකාබද්ධ විපක්‍ෂයේ කණ්ඩායමද වේ. රාජපක්‍ෂවරුන්ගෙන් පිටත අයෙකුට දේශපාලන සාර්ථකත්වය කෙසේ වෙතත්, විජේරාම නිවසේ ආලින්දයේදී මහින්ද රාජපක්‍ෂ මුණගැසුණු විට වාඩි වීමට පුටුවක්වත් නොලැබේ. මුහුණුපොතේ පළවන රාජපක්‍ෂවරුන් හමුවන විපක්‍ෂයේ දේශපාලකයන්  සියල්ලෝම ඔහු සමග කතා කරනුයේ හිටගෙනය. අඩුම තරමින් අබාධිතයෙකුට (අනුගාමික) වුවද වාඩිවීමට පුටුවක් රාජපක්‍ෂවරුන්ගේ විජේරාම නිවසේදී නොලැබේ. එවැනි තත්ත්වයක් තුළ අපට කිව හැක්කේ අනිවාර්යයෙන්ම ශිරන්ති රාජපක්‍ෂගෙන් තොර විකල්පයක් පිළිබඳව ඔවුන් නොසිතන බවය. 

එහිදී 2020 ගොඩනැගෙනුයේ ඒකාබද්ධ විපක්‍ෂය විසින් ඉදිරිපත් කරනු ලබන ශිරන්ති රාජපක්‍ෂත්, බොහෝ විට ශ්‍රී ලංකා නිදහස් පක්‍ෂය විසින් ඉදිරිපත් කිරීමට යොදා ඇති අපේක්‍ෂකයාත්, එක්සත් ජාතික පක්‍ෂය විසින් ඉදිරිපත් කරනු ලබන අපේක්‍ෂකයාත් අතර තුන්කොන් තරගයකි. සුපුරුදු ලෙස සිංහල ඡන්ද තුනට බෙදී යන වාතාවරණයක් තුළ ජනාධිපතිවරණය ජය ගැනීමට නම් ඕනෑම අපේක්‍ෂකයෙකු උතුරු නැගෙනහිර දෙමළ ඡන්ද හා මුස්ලිම් ඡන්ද දිනාගත යුතු වේ. එසේ නොවන අපේක්‍ෂකයෙකුට 2020 ජය ගැනීමට ඇති ඉඩ ඉතා අඩුවේ.
ඒ අනුව එක්සත් ජාතික පක්‍ෂයේ දේශපාලන වැඩපිළිවෙළ මෙන්ම එම පක්‍ෂයේ නායකයන්ගේ පැවැත්ම තීරණය වන්නේ දකුණේ සිංහල ඡන්ද මෙන්ම උතරේ දෙමළ ඡන්දද, රටේ මුස්ලිම්වරුන්ගේ ඡන්දද දිනා ගැනීමේ හැකියාව මතයි. 2020  අපේක්‍ෂකයා තවම නම්කර නැති වුවද, එක්සත් ජාතික පක්‍ෂය එහි නායක රනිල් වික්‍රමසිංහ අගමැතිවරයා ඉදිරිපත් කිරීමට බොහෝ විට ඉඩ තිබේ. මන්ද ඔහු තරම් සුළු ජාතික ඡන්දවලට බලපෑමක් කළ හැකි දේශපාලන නායකයෙකු රටේ මේ මොහොතේ නොමැති බැවිනි. ඔහු තරගයට නොපැමිණෙන මොහොතක සජිත්, නවීන්, අකිල හෝ අජිත් පී. පෙරේරාට වුව එක්සත් ජාතික පක්‍ෂ අපේක්‍ෂකත්වය හිමිවීමට ඉඩ තිබේ. මන්ද එක්සත් ජාතික පක්‍ෂය යනු සංවිධිත පක්‍ෂයක් වන අතර, එහි ඕනෑම කෙනෙකුට එම මොහොතේ පවතින තත්ත්වය හා අවශ්‍යතාව අනුව අවස්ථාව ලැබිය හැකිය.

අවසාන වශයෙන් කිව හැක්කේ රටේ දේශපාලනයට ශිරන්ති රාජපක්‍ෂගේ ආගමනය කෙතරම් බලපෑමක් කරනු ඇත්දැයි කීමට තවමත් කල් වැඩි නමුත් රටේ ජන හදගැස්මෙහි තීරණය උරගා බැලීමට සියල්ලන්ටම අවස්ථාවක් ලැබෙනු ඇති බවයි.

මිරිකිල්ල

මිරිකිල්ල අපේ ජීවිතවලට බොහෝ සම්බන්ධය. එයට හේතුව අප වැඩිදෙනාට ප්‍රශ්නවලින් මිරිකි මිරිකී ජීවත් වන්නට සිදුවීමය. එහෙම මිරිකෙන අය ඒ ගැන වැඩිපුර ගණන් නොගෙන ඉන්න නිසා ජීවත්වෙලා ඉන්න පුළුවන් වෙලා තියෙනවාය. මිරිකෙන මිරිකිල්ලේ හැටියට ඒවා ගණන් ගන්න ගියොත් ජීවත්වෙලා හමාරය.

කොතරම් මිරිකන්න දස්ස කෙනෙකුට වුණත් තද දේවල් මිරිකන්න බැරිය. ගලක් කොච්චර මිරිකුවත් පට්ටයක් ගන්න තරමට මොලොක් කරන්න බැරිය. වැලි මිරිකලා වතුර ගැනිල්ලත් හිතාගන්නවත් බැරි දෙයක්ය. ඒත් රජ කාලයේදී නීල මහා යෝධයා වැලි මිරිකලා වතුර ගත්ත කතාවක් අහලා තියෙනවාය. එහෙම වුණාට අද වනතුරුම වැලි මිරිකලා වතුර ගත් කෙනෙක් ගැන ඊට පසුව අප අසා නැත්තේය.

පොල් මිරිකලා කිරි ගන්නේ හොදි හදන්නටය. ඉස්සර අපේ කාන්තාවන් පොල් මිරිකලා, කිරි ගොට්ටෙන් පෙරා, කිරි ගන්නවාය. ඒත් අද වෙන කොට පොල් මිරිකන්න පුරුදු වෙච්ච අය අඩුය. කිරිගොටු ගෙවල්වල නැති හින්දා ඒ ගොල්ලෝ පොල් මිරිකන්නේ නැතුව බ්ලෙන්ඩරයට දමලා කිරි ගන්නවාය. ඒ වගේම මේ වෙනකොට පොල් කිරි පැකට් සුපර් මාර්කට්වල තියෙන හින්දා පොල් මිරිකලා මහන්සි වෙන්න ඕනෑ නැත්තේය.

මිරිකලා මුලින්ම ගන්න පොල් කිරිවලට කියන්නේ මිටිකිරි කියලාය. දෙවනුව වතුර දමලා මිරිකලා ගන්නේ දියකිරිය. කිරි මිරිකලා ගත් විට ඉතුරු වෙන්නේ පොල් කුඩුය. ඉස්සර නම් &මිටි කිරි කිරි – දිය කිරි කිරි – ඉඳා බල්ලෝ පොල් කුඩු* යැයි කියමින් කිරි මිරිකලා බල්ලන්ට පොල් කුඩු දුන්නාට අද නම් එහෙම බල්ලන්ට ඒවා දෙන්න ඕනෑ නැත්තේ පොල් කුඩුවලටද හොඳ මිලක් තිබෙන හින්දාය. පොල්ගෙඩිය රුපියල් සීයට යන විට පොල් මිරිකලා ඉවත දමන කුඩුවලින් පොල් සම්බෝල හදනවාය. පොල් මිරිකලා කිරි ගන්න පුළුවන් සියයට හතළිහක්ය කියලා ආණ්ඩුව දැන්වීම් දමනවාය.

දුප්පතා මිරිකලා ශ්‍රමය සූරා ගන්නට ධනපතියා හරි දස්සය. පොහොසතා තව තවත් පොහාසත් වන්නේ නැති බැරි එකා මිරික මිරිකා අඩුමුදලට ලබාගන්නා ශ්‍රමය නිසාය. ඇති නැති පරතරය ඇතිවෙලා තියෙන්නේ මේ මිරිකිල්ල හින්දා යැයි කියනවාය.
බෙහෙත් නොකර රෝගියාගේ නිල මිරිකලා රෝග සුව කරන්න පුළුවන්ය. අද හතු පිපෙනවා වගේ බිහිවෙලා තියෙන සම්බාහන ආයතනවල නිරෝගී වන්නට ඇඟපත මිරිකනවා යැයි කිව්වාට ඒවායේ සිරුර පමණක් මිරිකලා නවතින්නේ නැතැයි කියනවාය. වයසට ගිය ආතා ආච්චිගේ අතපය කැක්කුම හැදෙන කොට මුණුබුරාලා ලව්වා අතපය මිරිකා ගන්නට හදනවාය. ඒත් සමහර මුණුබුරාලා වයසක අය දැක්ක විට පැනලා යන්නේ අතපය මිරිකන්න වෙයි කියන බයටය. අතපය කොහොම වුණත් බොටුව මිරිකන්නේ නම් මරා දමන්නටය. බෙල්ල මිරිකූ පසු මිය යන්නේ හුස්ම ගන්න බැරිවෙලාය.

ගුරුවරයා ඒ කාලේ සිසුවාගේ කන මිරිකුවේ දඬුවමක් ලෙසටය. එහෙම කන මිරිකලා වැරදෙන යමක් කියා දුන් විට හොඳට මතක හිටිනවා යැයි කියනවාය. ඒත් අද නම් ගුරුවරු ළමයින්ගේ කන් මිරිකන්නට බිය වන්නේ තමන්ට උසාවි ගානේ යන්නට වේ යැයි කියන බයටය. අනවශ්‍ය දේවල් මිරිකලා ඉවත් කරන්න පුළුවන්ය. වෙදරාළ තුවාලය මිරිකලා සැරව ඉවත් කරන්නේ ඉක්මනින් සුව කරන්නටය. රෙදි මිරිකලා වැලේ දමන්නේ ඉක්මනින් වේළෙන්නටය. ඒත් අද වොෂින් මැෂිමෙන් රෙදි හෝදන විට මැෂිමේ රෙදි මිරිකෙන හින්දා නැවත අමුතුවෙන් මිරිකන්නට දෙයක් නැත්තේය.

උක්දඬු මිරිකන්නේ පැණි ලබාගන්නටය. මෝල්වල මැෂිමේ මිරිකන උක්දඬු යුෂෙන් සීනි හදනවාය. ඒත් මේ වන විට උක් දඬු මිරිකලා සීනි හදනවාට වඩා අරක්කු පෙරළා වැඩි ආදායමක් ගැනීමට පටන් අරගෙන තියෙනවාය. මී මැස්සා අමාරුවෙන් පැණි හොයලා බඳින මීවදය කඩා මිරිකලා පැණි ගන්නට ආදිවාසීන් පුරුදු වෙලා තියෙනවාය.

වෙදරාළ කොළ, අතු, පොතු මිරිකලා බෙහෙත් හදනවාය. කැඩුණු තැන්වල පත්තු බඳින්න ගස්වල පස් පංගුව මිරිකලා පත්තු හදනවාය. ඉස්සර බෙහෙත් ගලේ අඹරලා, මිරිකලා බෙහෙත් හදන්න වෙද මහත්තුරු හරි දස්සය. මෙම බෙහෙත් පාවිච්චි කිරීමෙන් වේදනාවෙන් මිරිකි මිරිකී සිටින රෝගියාට සුවය ලැබෙනවාය. බොහෝ දෙනාට අද නොයෙක් ප්‍රශ්නවලින් මිරිකි මිරිකී ඉන්න සිද්ධ වෙලා තියෙනවාය. එහෙම මිරිකෙන ප්‍රශ්න ඔඩු දිවූ දවසට සමහරුන්ට තම ජීවිතයද එපා වෙනවාය.

සංසාරයේ ගමන් කරන සත්ත්වයා දුකෙන් මිරිකි මිරිකී සිටින වග බුදු දහමෙන් කියනවාය. එහෙම දුකෙන් මිරිකෙන සත්ත්වයා සිතන්නේ තමන් සැප විඳිනවා කියලාය. මෙලෙස අනන්ත සංසාරයේ මැරි මැරී මිරිකෙන සත්ත්වයාගේ දුක් අවසන් වන්නේ නිවන් දුටුවාම යැයි බුදුන් වහන්සේ දේශනා කර තිබෙනවාය.

කුඩා සතා, ලොකු සතා දුටු විට බියෙන් මිරිකෙනවාය. එහෙම බියෙන් මිරිකෙන්නේ තම ජීවිතයට අනතුරක් වේ යැයි බියෙන්ය. නිතරම දුර්වලයා බලවතා ඉදිරියේ බියෙන් මිරිකෙනවාය. හරියට පොලිස් නිලධාරීයා ඉදිරියේ සැකකාරයා මිරිකෙනවා වගේය. පුංචි වරදකට අල්ලාගෙන පොලිස් කූඩුවේ දමන එකා බයෙන් මිරිකෙන්නේ තමන්ට මිරිස් ගෝනියට බහින්න වේ යැයි යන බියටය. උසස් නිලයක් දරන පොලිස් නිලධාරීයා ඉදිරියේ පොලිස් පොඩ්ඩා බියෙන් මිරිකෙන්නේ තම රස්සාවට අනතුරක් වේ යැයි සිතලාය.
පුද්ගලික බස්වල කොට්ටපොල් වගේ ඇහිරී යන මගියා මිරිකෙන්නේ ඉඩ නැතිකම හින්දාය. රියදුරා වේගයෙන් ගිහින් වෙට්ටු දමලා බ්‍රේක් ගහන විට ඔහු තව තවත් මිරිකෙනවාය. බස්වල ගණන් ඉහළ දැම්මාට මිරිකෙන්නේ නැතුව යන්න ක්‍රමයක් මගියාට ලැබෙන්නේ නැත්තේය. දුප්පතා එසේ මිරිකි මිරිකී ගියත් සල්ලිකාරයාට සැප පහසුව ගමන් කරන්න මාලිගා වාහන දෙක තුන තියෙනවාය. 

බස්වල කොච්චර ඉඩ තිබුණත් මිරිකි මිරිකී යන්ඩ පෙම්වතුන් හරි කැමැතිය. ඔවුන් එසේ මිරිකෙන්න කැමැති පෙම් කිරිල්ලේ නියම ආශ්වාදය ලබා ගන්නටය. එහෙම බස්වල සීට් මුල්ලේ මිරිකෙන පෙම්වතුන්ට අනිත් අය ගැන වගේ වගක් නැත්තේය. පෙම්වතා පෙම්වතියට තම සිතැඟි මුල්වරට ප්‍රකාශ කරන්නේ අත මිරිකිල්ලෙන්ය. ප්‍රේමය දියුණු වූ පසු තවත් තැන් මිරිකාගෙන කසාද බඳින දෙන්නා ප්‍රශ්න නිසා විරසක වූ විට බෙල්ල මිරිකා ගන්න හදනවාය.
අද බඩු මිලේ හැටියට දුප්පතාට සිදුව ඇත්තේ ජීවන බරෙන් මිරිකි මිරිකී ජීවත් වන්නටය. එහෙම මිරිකෙන්නට සිදුව ඇත්තේ අතට ලැබෙන සොච්චම් මුදලෙන් එක වේලක්වත් කාලා ජීවත් වන්න බැරි හින්දාය. එහෙම වුණත් දුප්පතාගේ ඡන්දෙන් දියවන්නාවට යන දේශපාලුවන්ට නම් තමන්ට ඡන්ද දුන් දුප්පතා ජීවන බරෙන් මිරිකිල්ල ගැන හොයන්න වෙලාවක් නැත්තේ මිලියන ගණන් සල්ලි හොයන්න තිබෙන හින්දාය.

ජනතාව සූදානම් දේශපාලකයෝ සූදානම් නෑ

දිනක් ජේසුස් ක්‍රිස්තුස් වහන්සේට හා උන්වහන්සේගේ මව්තුමියට එනම් මරියතුමියට කානාහි සරණ මංගල්‍යයකට ආරාධනා ලැබිණි. එයට සහභාගි වූ උන්වහන්සේ මංගල්‍යයට උදව් කරමින් සිටියේය. මෙහිදී එක් සේවකයෙකු පැමිණ පැවසූයේ මිදි යුෂ අවසන්ව ඇති බවයි. ජේසුස් වහන්සේ එවිට ඔහුට පැවසුවේ භාජනවලට වතුර පුරවන ලෙසයි. අවසානයේ ජේසුස් වහන්සේ එම වතුර මිදියුෂ බවට පත් කළේය. විවාහ මංගලෝත්සවයට අවැසි මිදි යුෂ ලබා දුන්නේය.

මේ ජේසුස් වහන්සේ කළ ප්‍රාතිහාර්යකි. නමුත් ලංකාවේද මෙවැනි දෙයක් සිදු වී ඇත. ඒ රංග බණ්ඩාර ඇමතිවරයා විසින් වොඩ්කා වතුර බවට පත් කිරීමයි. එය මේ දිනවල දේශපාලන කරළියේ වැඩියෙන්ම කතාබහ කරන මාතෘකා දෙකින් එකකි. ඇත්තෙන්ම ලංකාවේ දේශපාලඥයන්ද ඒ වගේ ප්‍රාතිහාර්ය කළ හැකි අයය. ඇත්තෙන්ම ලංකාවේ සමහර දේශපාලඥයන් ඉන්නට ඕනෑ පාර්ලිමේන්තුවේ නොව දේව මණ්ඩලයේය. ඔවුන්ගේ ප්‍රාතිහාර්යයන් කාටත් නොදෙවෙනිය. වොඩ්කා වතුර කිරීමත් එවැනි ක්‍රියාවක්ය.
මේ දිනවල කතාබහට ලක්වෙන අනෙකුත් කාරණාව බැඳුම්කර මුදල් පිළිබඳවය. පාර්ලිමේන්තුවේ ප්‍රාතිහාර්ය කරන දේශපාලඥයන් බැඳුම්කර ආනුභාවයෙන් ලබාගත් චෙක්පත් ගැන කතාබහ කෙරේ. දේශපාලන කරළිය රත් කරන මෙම බැඳුම්කර කෙරුවාවේ රහස් එළිවෙමින් පවතින්නේ දැන්ය. මේ වන විට දේශපාලන රංග භූමියෙහි කතාවන තොරතුරු අතර එක්තරා සුවිශේෂී චරිතයක් මතුව ආවේය. ඒ මුලතිව් ප්‍ර‘දේශයෙනි. ඒ කර්නල් රත්නප්‍රිය බන්දුය.

මෑත කාලයේ සංහිඳියාව ගැන බොහෝ දෙනා කතා බහ කරති. වැඩියෙන්ම සංහිඳියාව ගැන කැක්කුමක් ඇත්තේ රාජ්‍ය නොවන සංවිධානවලට හා දේශපාලඥයන්ටය. හැබැයි දේශපාලඥයන් හා රාජ්‍ය නොවන සංවිධාන මගින් සංහිඳියාව වෙනුවෙන් කළ දෙයක් නැත. හැමදාම ඔවුන් කළේ ඔවුන්ගේ පැවැත්ම වෙනුවෙන් ජාතිවාදී කලබල ඇතිකර සංහිඳියාව ගැන කතා කරමින් මුදල් ගරා ගැනීමය.

ලංකාව අතීතයේ පටන් සංහිඳියාවෙන් කටයුතු කළ රටක් බව අමුතුවෙන් කිව යුතු නැත. එදා සිංහල බෞද්ධයන් වෙනුවෙන් පෙනී සිටි ද්‍රවිඩ නායකයෝද සිටියහ. බෞද්ධ ආගම වෙනුවෙන් ගත් හැරවුම් ලක්ෂ බඳු වූ තීන්දු තීරණ ගැනීමට ද්‍රවිඩ ජාතිකයෝ එකල කටයුතු කළහ. ඉන් එක් අයෙකු ලෙස සර් පොන්නම්බලම් රාමනාදන් හැඳින්විය හැකිය. ව්‍යවස්ථාදායක සභාවේ නිල නොලත් නියෝජිතවරයා ලෙස කටයුතු කළ ඒ මහතා %වෙසක් පෝය^ ප්‍රසිද්ධ නිවාඩු දිනයක් කළ යුතු බවට එකල බෞද්ධ ව්‍යාපාරය විසින් ඉදිරිපත් කරන ලද යෝජනාවට පහතරට සිංහල නියෝජිතයා විරුද්ධ වීම නිසා බෞද්ධයන් වෙනුවෙන් එම සංදේශය ව්‍යවස්ථාදායක සභාවට ඉදිරිපත් කළේය. ඒ වගේම සිංහල මුස්ලිම් කෝලහාලයේදී අත්අඩංගුවට පත් බෞද්ධ නායකයන් නිදහස් කර ගැනීමට පෙනී සිටියේද පොන්නම්බලම් රාමනාදන් මහතාය.

මේ ආකාරයටම සිංහල බෞද්ධයන් වෙනුවෙන් පෙනී සිටි තවත් නායකයෙකු වන්නේ හිටපු විදේශ අමාත්‍යවරයෙකු වූ ලක්ෂ්මන් කදිරගාමර් මහතාය. වෙසක් පොහොය දිනය ජාත්‍යන්තර වෙසක් දිනයක් ලෙස සැමරීමට කටයුතු සම්පාදනය කළේ 1999දී විදේශ අමාත්‍යවරයාව සිටි ඒ මහතාය. ඒ වගේම එල්.ටී.ටී.ඊ. සංවිධානය විමුක්ති සංවිධානයක් ලෙස නොව ත්‍රස්තවාදීන් බවට මතය ගෙන යෑමේ පුරෝගාමී දායකත්වයක් ලබා දුන්නේද ලක්ෂ්මන් කදිරගාමර් මහතාය.

එදා සිටම සංහිඳියාව ලංකාව ඇතුළේ තිබුණේය. ඉංග්‍රීසීන් විසින් විකෘති කළ පාලන තන්ත්‍රය මෙන්ම අවස්ථාවාදී දේශපාලඥයන් හා ප්‍රභාකරන් වැනි ත්‍රස්තවාදීන් හා සන්නද්ධ කණ්ඩායම්වලට අනුබලය දුන් විකෘති දේශපාලඥයන් නිසා මෙරටේ සංහිඳියාවට පහර වැදී තිබිණි.
නමුත් ලංකාවේ මිනිසුන් අතර සිංහලද, දෙමළද කියා වෙනසක් නැති බවට හොඳම නිදර්ශනය වූයේ කර්නල් රත්නප්‍රිය බන්ධුය. උතුරේ දේශපාලඥයන් උතුරේ දෙමළ ජනතාවට සිංහල හමුදාව පෙන්වාදී තිබුණේ යක්ෂයන් පිරිසක් ලෙසිනි. නමුත් මේ වන විට උතුරේ මිනිසුන් තුළින් ඒ මතය ක්‍රමයෙන් ගිලිහි යමින් තිබේ. ඔවුන් සංහිඳියාවට ලෑස්තිය. කර්නල් රත්නප්‍රිය බන්ධු 2012දී පුනරුත්ථාපන වැඩසටහන් ආරම්භ කළේය. එහිදී දෙමළ වැසියන් හා පුනරුත්ථාපනය කළ අය සිවිල් ආරක්ෂක බළකායට පවා බඳවා ගත්තේය. වෘත්තීය පුහුණුව ලබා දුන්නේය. අවියට හුරු කර තිබූ දෑත් ගොවිතැනට හා වෙනත් වෘත්තීන්ට හුරු කරවූවේය. ඒ වගේම උතුරේ දුවා දරුවන්ගේ අධ්‍යාපනය දියුණු කිරීම සඳහා ඔහු කටයුතු කළේය. නමුත් ඔහුට ස්ථාන මාරුවක් ලැබී එම ජනතාවගෙන් සමුගෙන යන විට උතුරේ ජනතාව සංවේගයට පත් වූ අයුරු ඔබ දකින්නට ඇත. &අපි සර් නැතිව කොහොමද ඉන්නේ, යන්න එපා සර්* &අපි ජනාධිපතිතුමාට කියනවා සර්ව මාරු කරන්න එපා කියලා*. මෙවැනි වදන් හමුදා නිලධාරියෙකු වෙනුවෙන් උතුරේ ජනතාව කියයි කියා ඔබ විශ්වාස නොකරන්නට පුළුවන. නමුත් වෛරී මානසිකත්වයෙන් මිදී සංහිඳියාවේ සැබෑ අරුත කියා දෙන්නට කර්නල් රත්නප්‍රිය බන්ධුට හැකි විය. ඒ වෙන මොනවා නිසාවත් නොව ඔහු ජනතාවට ආදරය කිරීමත්, ඔවුන්ට නායකත්වය සැපයීමත් නිසාය. මේ වගේම මෑත කාලයේදී සිංහල ජාතිකයන් ආදරයෙන් වැලඳගත් ද්‍රවිඩ පුද්ගලයෙකු වේ නම් ඒ වෙන කවුරුවත් නොව මානික්කවාසගර් ඉලන්චෙලියන්ය. ඔහු ආරක්ෂා කළ සිංහල පොලිස් නිලධාරීයා ඝාතනය වූ පසු ඔහු හදවතින්ම හැඬූ කඳුළින් තම සංවේගය පිට කරද්දී, ඒ වගේම පක්ෂග්‍රාහී නොවී දුන් නඩු තීන්දු හේතුවෙන් මානික්කවාසගර් ඉලන්චේලියන්ව සිංහල ජනතාව ආදරයෙන් වැලඳ ගත්තේය. ඇත්තම කාරණය නම් මිනිස්සු සංහිඳියාවට කැමතිය. සංහිඳියාව ඇති කළ හැක්කේ ජනතාවට ඇති ආදරය තුළින් සහ ඊට අවශ්‍ය නායකත්වය තුළින් පමණි. හැබැයි අද ඉන්නේ වවාගෙන කන දේශපාලන හිඟන්නන් මිස නායකයන් නොවේ. ජනතාවට ආදරය කරන නායකත්වය දිය හැකි නායකයන් අද නැත. ඛේදවාචකය ඇත්තේ එතැනය. ප්‍රාතිහාර්ය පෑ යුත්තේ වොඩ්කා වතුර කිරීමෙන් නොව ජනතා හදවත් සුවපත් කිරීමෙන් බව දේශපාලඥයන්ට මෙහිදී මතක් කර දිය යුතුය.

නිපුන් ඒකනායක

 

නගර සැලසුම

මානව ශිෂ්ටාචාරය විසින් ගොඩනගන ලද වඩාත් නවෝත්පාදක සහ සංකීර්ණම ප්‍රපංචය වන්නේ නගර යැයි එක් විචාරකයෙකු සඳහන් කර ඇත. නගර යනු ආර්ථික මර්මස්ථාන වෙයි. සෑම ශිෂ්ටාචාරයක්ම ගත් විට වැඩිම පුහුණුවක් ලැබූ ශ්‍රම බළකාය සිටින්නේ නගරවලයි. ජාතික ධනයෙන් වැඩිම කොටස ගොඩගැසී ඇත්තේද නගර තුළයි.

නගරයක් යනු වනාන්තරයක් මෙන් ඉබේ නිර්මාණය වන දෙයක් නොවේ.  එය මිනිසාගේ නිර්මාණයකි. නගරවැසියන්ට ආරක්ෂාවද සතුටද ලැබෙන පරිදි නගරයක් නිර්මාණය විය යුතු යැයි ඇරිස්ටෝටල් වරක් සඳහන් කළේ එබැවිනි. නගරයක් සැලසුම් කිරීම තාක්ෂණික කරුණක් මෙන්ම දේශපාලනික කරුණක්ද වෙයි.

බටහිර ලෝකයේ ඇතැම් නගර මෙලෙස ඉතා සැලසුම්සහගත ලෙස ගොඩනැගෙයි. වියනා එවැනි නගරයකට පරමාදර්ශයකි. කාර්ල් ක්‍රෝස් නම් විද්වතා වරක් පවසන්නේ ‍බොහෝ නගරවල මාර්ගවල අතුරා ඇත්තේ තාරය, එහෙත් වියනාවේ අතුරා ඇත්තේ සංස්කෘතියයි කියායි.  වියනාහි සෑමදෙයක්ම පිරිසුදුය. පිළිවෙළය. මනරම්ය. සංගීතය ජීවිතය විඳින මිනිසුන්ගෙන් පිරී ඇත. 

නගරයක් නිර්මාණය කිරීමේදී වෙනස් වන අවශ්‍යතා තේරුම් ගැනීම බොහෝ රටවල නගර සැලසුම්කරුවන්ද, දේශපාලඥයන්ද අතින් සිදුවන්නකි. උදාහරණයක් ලෙස ශීඝ්‍රයෙන් මධ්‍යම පන්තියක් නිර්මාණය වීම ශ්‍රී ලංකාව වැනි රටක සිදුවන්නකි. එය කල් තබා හඳුනාගැනීම සැලසුම්කරුවන් සිදුකළ යුත්තකි. 

පෝලන්තය වැනි රටවල් නගර තුළ වාහන තදබදය පාලනය කිරීම සඳහා මහාමාර්ග සහ වාහන ගාල් කිරීමේ ස්ථාන නිසි පරිදි සැලසුම් කිරීම පමණක් නොව ඒ සඳහා ජංගම දුරකථන ඇප් ආදී නවීනතම තාක්ෂණය භාවිත කරයි. පරිගණක කෘත්‍රිම බුද්ධිය භාවිත කරන වාහන ගාල් කිරීමේ ක්‍රම (intelligent parking systems) මෑතකදී හඳුන්වා දී ඇත. 

ශ්‍රී ලංකාවේ ආර්ථික මර්මස්ථාන වන කොළඹ අවට ප්‍රදේශවල වාහන ගාල් කිරීමට නොහැකිකමින් ඇති වන්නේ විශාල ආර්ථික සහ සාමාජීය අවුල්කාරී තත්ත්වයකි. මෙය නූතන ගැටලුවක් වන අතර, එය දිනෙන් දින වර්ධනය වීම වැළැක්විය නොහැකිය. නූතනත්වය සමගින් අලුතින් ඇතිවන තත්ත්වයන් හඳුනා ගැනීම සහ ඒවාට නවෝත්පාදක පිළිතුරු ලබාදීම දියුණුවේ ලකුණකි. මෙනයින්, නගර සැලසුම් යනු කලාවකි. 

මීට සියවසකට පමණ ඉහතදී නගර ආශ්‍රිතව ජීවත් වූයේ ලෝකයේ ජනගහනයෙන් සියයට 10ක් පමණි. මේ වන විට ලෝක ජනගහනයෙන් සියයට 50ක් පමණ නගර ආශ්‍රිතව ජීවත් වෙයි. 2030 වසර වන විට එය සියයට 60 දක්වා ඉහළ යනු ඇතැයි විශ්වාස කෙරේ. ආර්ථික ගෝලීයකරණයේ නවතම ස්වරූපය අනුව නගර යනු දිනෙන් දින පුළුල් වන ප්‍රපංචයකි.  නගර සැලසුම් මෙසපොතේනියාවේද, ඉන්දු නිම්න ශිෂ්ටාචාරයේද, ඊජිප්තුවේද තිබූ බව සත්‍යයකි. එහෙත් ඒ කිසිවකට වඩා වෙනස් වූ බොහෝ වර්ධනයන් නූතන නගර ඇසුරේ ඇත. 

දර්ශන අශෝක කුමාර 

මැතිවරණ සඳහා මුදල් ගැනීම නියාමනයට කාලය පැමිණ ඇත

පර්පචුවල් සමාගමට අනුබද්ධ සමාගම් විසින් දේශපාලකයන්ට ලබා දුන් මුදල් පිළිබඳ විවිධ හෙළි කිරීම් මේ වන විට අධිකරණය හරහා ජනතාවට දැන ගැනීමට ලැබී තිබේ. එම මුදල් ලබා ගැනීම් බොහෝ දෙනෙක් සාධාරණීකරණය කිරීමට උත්සාහ ගන්නේ ඒවා මැතිවරණ ව්‍යාපා සඳහා යෙද වූ බව සඳහන් කරමිනි. එසේ නොමැති නම්, මැතිවරණ ව්‍යාපාර සඳහා ලැබුණු බව සඳහන් කරමිනි.

මැතිවරණ සඳහා විශාල ලෙස මුදල් වියදම් වන බව සඟවා සිටීමේ අවශ්‍යතාවක් නොමැත. නමුත් ලෝකයේ අනෙකුත් රටවල පවතින ආකාරයට ශ්‍රී ලංකාවේද මෙම ක්‍ෂේත්‍රය දැන් නියාමනය කිරීමට කාලය පැමිණ තිබේ.

ඒකාබද්ධ විපක්‍ෂයට දිවා රෑ දෙකේදීම 'හොරා' යැයි පැවසූ පුද්ගලයන් දැන් බැඳුම්කර ගනුදෙනුවෙන් මුදල් ලබාගෙන ඇති බවට හෙළි වී අවසන්ය. ඔවුන් මැතිවරණයට මුදල් ගත් බව ප්‍රකාශ කළද, මැතිවරණයට කලින් මුදල් ලබාගත් අය මෙන්ම මැතිවරණයට පෙරාතුව මුදල් ලබාගත් අයත් සිටින බවට දැන් තොරතුරු වාර්තා වෙමින් තිබේ.

ජනතා විමුක්ති පෙරමුණ දූෂණයට විරුද්ධ බවට සඳහන් කළද, බැඳුම්කර ගනුදෙනුවේ මුදල් ලබා ගත් එක්සත් ජාතික පක්‍ෂ මන්ත්‍රීවරුන් පිළිබඳ කතා නොකරයි. නමුත් ඔවුන් මන්ත්‍රයක් ලෙස පවසන්නේ නාමල් රාජපක්‍ෂට ඇලෝසියස් දුරකථන ඇමතුම් 800ක් ලබාදී ඇති බවයි. අනෙක් අතින් ජනතා විමුක්ති පෙරමුණ ඇලෝසියස්ගේ මුදල් ලබා ගැනීම් පිළිබඳ කතා නොකරන්නේ ඔවුන් ඇලෝසියස්ගෙන් මුදල් ලබාගෙන ඇති නිසාදැයි යන්න පිළිබඳ සාධාරණ සැකයක් නිර්මාණය වී තිබේ.

මෙහිදී මා මිත්‍ර රන්ජන් රාමනායක අමාත්‍යවරයා පිළිබඳ කතා නොකර සිටීමට නොහැකිය. බැඳුම්කර සම්බන්ධයෙන් වරින්වර හෝ කතා කරන අමාත්‍යවරයාට පෞද්ගලික මූල්‍ය ආයතනයක තැන්පත්කරුවන් මුහුණ දී ඇති ගැටලුව පිළිබඳ කතා නොකිරීම ගැටලුවකි. සුද්දවන්තයෙකු ලෙස කතා කරන රන්ජන් රාමනායක මහතා තරමක නිහඬ ප්‍රතිපත්තියක් බැඳුම්කර වංචාව සම්බන්ධයෙන් අනුගමනය කරන අතර, මා කී පෞද්ගලික මූල්‍ය ආයතනය සම්බන්ධයෙන් ඔහු හුදෙක්ම නිහඬ ප්‍රතිපත්තියක් අනුගමනය කරන්නේ ඇයිදැයි යන්න පිළිබඳ ජනතාවට පැවසිය යුතුය.

රුසියාවෙන් ජපානයට

රුසියාවේ පැවැති ලෝක පාර්ලිමේන්තු සම්මේලනයට එක්වීමට ලැබීම තවදුරටත් මාගේ දේශපාලන දිවියේ අත්දැකීම් වැඩිකර ගැනීම  සඳහා ඉවහල් වූ සාධකයක් බවට පත්විය. ලෝකයේ රටවල ආරක්ෂාව, මූලිකමව රටවල පවතින සාමූහික හැඟීම වර්ධනය කර ගැනීම හා තරුණ පාර්ලිමේන්තු මන්ත්‍රීවරුන්ගේ භූමිකාව පිළිබඳ මෙහිදී වැඩි අවධානයක් යොමුකළ මාතෘකා අතර පැවැතිණි.

එම සම්මේලනයට එක්වීමෙන් අනතුරුව අප රුසියාවේ සිට ජපානය බලා පිටත් වූයේ මූලිකම ශ්‍රී ලංකා පොදුජන පෙරමුණේ ජපන් ශාඛාව පිහිටුවීමේ අරමුණ අනුවය. එය ප්‍රධාන අරමුණ වශයෙන් පවතින විට අප ජපානයේ විවිධ ප්‍රදේශයන්හි සංචාරය කරමින් ශ්‍රී ලංකා ජනතාව හමුවීමට අවස්ථාවක් කරගත් අතර, ෆූජි කන්ද තරණය කිරීම, ලෝකයේ විශාලම බෞද්ධ විශ්වවිද්‍යාලය වන නාලන්දා විශ්වවිද්‍යාලයට සංචාරය කිරීමට අවස්ථාව ලැබීම සුවිශේෂීය. නාලන්දා විශ්වවිද්‍යාලය තවත් නොබෝ දිනකින් විවෘත වීමට නියමිත අතර, එහි ගෘහ නිර්මාණ ශිල්පය මනස්කාන්තය.

විදේශ ප්‍රතිපත්තිය

ජපානයේ සිටිමින් මෙවර 'කුරහන් සුවඳ' තීරු ලිපිය සටහන් කරන අවස්ථාවේදී ශ්‍රී ලංකාවේ විදේශ විනිමය ප්‍රතිපත්තියේ පවතින දුර්වලතා පිළිබඳ කතා කිරීමටත් මෙය අවස්ථාවක් කර ගනිමි. වත්මන් ආණ්ඩුව පත්වීමේ පසුව ශ්‍රී ලංකාව ආර්ථික, සාමාජීය, ආගමික, දේශපාලනික ආදී සෑම අංශයකින්ම කඩා වැටෙමින් පවතින අවස්ථාවක ඒ හා සාපේක්‍ෂව විදේශ ප්‍රතිපත්තියද කඩා වැටී තිබේ.

නොබැඳි ප්‍රතිපත්තයක් අනුගමනය කළ ශ්‍රී ලංකාව මේ වන විට බටහිර ගැතිව කටයුතු කරන තත්ත්වයක් හොඳින්ම පෙනෙන්නට තිබේ. අනෙක් අතින් බටහිර ගැතිව කටයුතු කරන අතරම ඔවුහු සම්බාධක පනවා ඇති රටවල් හා සම්බන්ධතා පැවැත්වීමටත් කටයුතු කරමින් සිටිති. නොබැඳි විදේශ ප්‍රතිපත්තියක සිටිමින් එවැනි ආකාරයකට කටයුතු කිරීම ගැටලුවක් නොවේ.

කටාරය සම්බන්ධයෙන් ගැටලුවක් පවතින අවස්ථාවේදී ජනපති මෛත්‍රීපාල සිරිසේන මහතාත්, අග්‍රාමාත්‍ය රනිල් වික්‍රමසිංහ මහතාත් කටාරයේ සංචාරයක නිරත වෙති.  එසේම ජනපති මෛත්‍රීපාල සිරිසේන මහතා පසුගියදා ඉරානයේ සංචාරයක නිරත විය. බටහිර රටවල් විසින් ඉරානයට සම්බාධයක පනවා ඇති අවස්ථාවක ඔහු මෙම සංචාරය සිදු කළේය. කටාර් සමග හෝ ඉරානය සමග අපට ගැටලුවක් නොමැත.

නොබැඳි ප්‍රතිපත්තියක සිට මෙම රටවල් හා කටයුතු කිරීම ගැටලුවක් නොවන නමුත් ගැටලුව වන්නේ බටහිර ගැති ප්‍රතිපත්තියක සිට ඔවුන් සම්බාධක පනවා ඇති රටවල් සමග කටයුතු කිරීමය. මංගල සමරවීර ඇමතිවරයා වරක් පාර්ලිමේන්තුවේදී ප්‍රකාශ කළේ, බටහිර ගැති ප්‍රතිපත්තියක් අනුගමය කරන බවයි.

එසේම ශ්‍රී ලංකාවේ යුද අපරාධ සිදු වූ බව කියමින් ඇමෙරිකාව සමග ඒකාබද්ධ යෝජනා ඉදිරිපත් කරමින් ඇමෙරිකාව සම්බාධක පනවන රටවල් සමග ශ්‍රී ලංකාව කටයුතු කරමින් සිටියි. වඩාත් පැහැදිලිව පවසන්නේ නම්, ජනපති මෛත්‍රීපාල සිරිසේන මහතාගේ ප්‍රකාශ මෙන් සෑම විටම වෙනස් වෙන එනම්, අද කියන දේ හෙට වෙනස් වෙන  විදේශ ප්‍රතිපත්තියක් ශ්‍රී ලංකාවට දැන් නිර්මාණය වී තිබේ. මෙයින් සිදු වනුයේ රට ලෝකයා හමුවේ හෑල්ලුවට ලක්වීම මිස රටක් ලෙස ඉදිරියට යෑම නොව පසුපසට යෑමය.

නාලන්දා විශ්වවිද්‍යාලය

DfEycndVAAAeQPM DfEycneUwAAmVz_

 

 

විපක්‍ෂයේ බෙදීම්

ලංකාවේ දේශපාලනය තුළ පසුගිය සතියේ දැකගත හැකි වූ ප්‍රධානතම ලක්‍ෂණය වන්නේ විපක්‍ෂයේ කණ්ඩායම් අතර සිදුවෙමින් පවතින තීරණාත්මක බෙදීමය. මෙම බෙදීම වඩාත් ප්‍රදර්ශනාත්මක ලෙස කලඑළියට පැමිණියේ නියෝජ්‍ය කථානායකවරයෙකු තෝරා ගැනීම සඳහා පාර්ලිමේන්තුවේදී පවත්වන ලද රහස් ඡන්දයේදීය. මෙහිදී ප්‍රථමයෙන් එක්සත් ජාතික පක්‍ෂය විසින් ජනාධිපතිවරයාගෙන් හා ශ්‍රී ලංකා නිදහස් පක්‍ෂයෙන් විමසා සිටියේ ඔවුන් විසින් කවුරුන් හෝ නියෝජ්‍ය කථානායකවරයා ලෙස පත්කරන්නේද යන්නය. එහිදී ශ්‍රී ලංකා නිදහස් පක්‍ෂ ආණ්ඩුවේ කණ්ඩායම හා විපක්‍ෂය නියෝජනය කරන කණ්ඩායමේ පිළිතුර වී තිබුණේ ඔවුන් විසින් අපේක්‍ෂකයෙකු නියෝජ්‍ය කථානායක ධුරය සඳහා ඉදිරිපත් නොකරන බවයි. මේ අනුව එක්සත් ජාතික පක්‍ෂයෙන් මොනරාගල දිස්ත්‍රික් පාර්ලිමේන්තු මන්ත්‍රී කුමාරසිරි මහතා යෝජනා කරනු ලැබීය. ඉන් පසු ශ්‍රී ලංකා නිදහස් පක්‍ෂයේ ආණ්ඩුවෙන් ඉවත් වූ කණ්ඩායම මගින් ඉදිරිපත් කරනු ලැබුවේ විශේෂඥ වෛද්‍ය සුදර්ශනී ප්‍රනාන්දුපුල්ලේ මහත්මියයි. ශ්‍රී ලංකා නිදහස් පක්‍ෂ විපක්‍ෂයේ කණ්ඩායම හා ඒකාබද්ධ විපක්‍ෂ කණ්ඩායම එකතු වූ විට එම පිලට අඩුම තරමින් ඡන්ද 70ක් හෝ ලැබිය යුතුව තිබුණද, ඔවුන්ට ලබාගත හැකි වූයේ ඡන්ද 53ක් පමණි. මේ අනුව ඒකාබද්ධ විපක්‍ෂයේ හා ශ්‍රී ලංකා නිදහස් පක්‍ෂයෙන් වෙන් වූ පිලේ විශාල කණ්ඩායමක් ඡන්දය පාවිච්චි නොකර තිබිණි. එම සංඛ්‍යාව මන්ත්‍රීවරු 18ක් පමණ වේ.

ප්‍රධාන වශයෙන් රාජපක්‍ෂවරු සියලු දෙනාම පාහේ එම ඡන්දයෙන් වැලකී සිටියේය. ඒකාබද්ධ විපක්‍ෂය තීරණාත්මක ලෙස දෙකට බෙදී ඇත්තේ බැසිල් පිල හා ගෝඨාභය පිල ලෙසිනි. මෙහිදී බැසිල් පිල විසින් ගෝඨාභය පිල සිදු කරන පවතින දේශපාලනය තීරණාත්මක ලෙස විවේචනය කරනු ලබයි. ගෝඨාභය පිල විවේචන නොකරද, ඒකාබද්ධ විපක්‍ෂය විසින් ගොඩනගා ඇති ජන බලය ඔවුන් මතට යොමුකර ගැනීමේ විශේෂ ව්‍යාපෘති ගණනාවක් දියත් කර තිබේ. ගෝඨාභය පිල, සිංහල බෞද්ධ බලවේග මත විශේෂ නැඹුරුවකින් කටයුතු කරන ආකාරය දැකිය හැකි අතර, එමගින් සිංහල බෞද්ධ ඡන්දවලින් 70%කට වඩා ගනිමින් ජයග්‍රහණය කළ හැකි යැයි ඔවුන් තක්සේරු කර තිබේ. එම මතය කෙතරම් දුරට සමාජගතවී ඇත්තේද යත්, ගෝඨාභය රාජපක්‍ෂ වටා එක්තරා ආකාරයක දේශපාලන බල කේන්ද්‍රයක්ද ගොඩනැගී තිබේ. කෙසේ වුවද, සිංහල සමාජය තුළින් විශාල විරෝධයක් ගෝඨාභය කෙරෙහි එල්ල වී ඇති අතර, එයට බලපානු ලබන ප්‍රධානම ප්‍රශ්නය වන්නේ රාජපක්‍ෂ රෙජීමය පැවැති කාලයේ ගෝඨාභය රාජපක්‍ෂ විසින් ක්‍රියාත්මක කරන ලද ප්‍රජාතන්ත්‍ර විරෝධී හා සමාජ විරෝධී ක්‍රියා සම්බන්ධයෙන් මෙරට සිවිල් සමාජය තුළ පවතින විශාල විරෝධය හා භීතියයි. එම නිසා ඉදිරි ජනාධිපතිවරණයේදී අනිවාර්යයෙන්ම ගෝඨාභය රාජපක්‍ෂගේ මෙම ක්‍රියාකලාපය එළියට ඇදී එන අතර, ඒ වෙනුවෙන් විශාල සමාජ විරෝධයක් ගොඩනැගීමට ඔවුන්ට එරෙහිව ඇති බලවේග ක්‍රියාත්මක වනු ඇත. ඒකාබද්ධ විපක්‍ෂයේ මෙම බෙදී යෑම විශේෂයෙන්ම පෙනී යන්නේ විමල් වීරවංශගේ ක්‍රියාකලාපය තුළිනි. විමල් වීරවංශ කල්පනා කරනුයේ රාජපක්‍ෂවරු සතු වූ මෙම ජන බලවේගය ගොඩනගන ලද්දේ ඔහු හා උදය ගම්මන්පිල විසින් බවයි. ඔවුන් මෙම බලවේග ගොඩනගන අවස්ථාවේදී දැනට මෙම බලවේග සඳහා නායකත්වය දෙන බැසිල් රාජපක්‍ෂ මෙන්ම ගෝඨාභය රාජපක්‍ෂද, මහින්ද රාජපක්‍ෂද විවෘත දේශපාලනයෙන් මිදී හු‍ෙදකලාව සිටි අතර, විමල් වීරවංශ සහ උදය ගම්මන්පිල විසින් ආරම්භ කරන ලද මහින්ද සුළඟ වැඩසටහන මගින් නැවත මෙම දේශපාලන ව්‍යාපෘතිය ආරම්භ වූ බවත්, එමගින් ඔවුන්ගේ පක්‍ෂය ආරම්භ වූ බවත් විමල් වීරවංශගේ තක්සේරුවයි.

එම වැඩසටහන ආරම්භ කරමින් විමල් විරවංශ අපේක්‍ෂා කරන ලද්දේ ඔහුට මහින්ද රාජපක්‍ෂ සතුව පැවැති ජන ප්‍රසාදය නංවාගෙන ඔහුගේ පක්‍ෂයත්, ඔහු සතු බලවේගයත් ඉහළට ඔසවා ගැනීමය. නමුත් සූක්‍ෂම දේශපාලඥයන් වන රාජපක්‍ෂවරු විසින් ඉතා දක්‍ෂ ආකාරයෙන් ඔවුන් සතු ජන බලය ඔවුන්ගේ පවුල කේන්ද්‍ර කරගත් දේශපාලන වැඩසටහනකට ගොනුකර ගැනීමට සමත් විය. මෙම තත්ත්වය විමල් වීරවංශ ප්‍රමුඛ අවශේෂ ඒකාබද්ධ විපක්‍ෂයේ නායකයන්ට ගෝචර නොවන අතර, මොවුන් තුළින් බැසිල් විරෝධයක් උපදින්නේ එබැවිනි. එම විරෝධය කෙතරම්ද යත්, අඛණ්ඩව බැසිල් රාජපක්‍ෂ පිල ඒකාබද්ධ විපක්‍ෂයේම ගෝඨාභය පිලට දැවැන්ත ප්‍රහාරයක් එල්ල කරමින් තිබේ. බැසිල් රාජපක්‍ෂගෙන් හා ගෝඨාභය රාජපක්‍ෂගෙන් වියුක්ත වෙනම දේශපාලන වැඩසටහනක් විමල් වීරවංශ විසින් විපක්‍ෂ කණ්ඩායම් අතර ක්‍රියාත්මක කරමින් තිබේ. එම වැඩසටහන සඳහා වාසුදේව නානායක්කාරගේ හා දිනේෂ් ගුණවර්ධනගේ සහයෝගයද විමල් වීරවංශට ලැබී තිබේ. අනෙක් අතින් බැසිල් රාජපක්‍ෂ විසින් ක්‍රියාත්මක කරනු ලබන දේශපාලන වැඩසටහනේදී විමල් වීරවංශ ප්‍රමුඛ ඒකාබද්ධ විපක්‍ෂයේ එම නායකයන් හා මුළු මන්ත්‍රී කණ්ඩායම අවසානයේ නොතකා හරින තත්ත්වයකට පත්ව තිබේ. මෙය විපක්‍ෂ කණ්ඩායම්වල තිබෙන විශාලතම චෝදනාව හා අසහනයයි. විශේෂයෙන් ඒකාබද්ධ විපක්‍ෂය විසින් ජයග්‍රහණය කරන ලද පළාත් පාලන ආයතනවලට ප්‍රධානීන් පත්කිරීමේදී බැසිල් රාජපක්‍ෂ ක්‍රියාත්මක වන ලද්දේය. කිසිදු දේශපාලන නායකයෙකු පිළිබඳ අවධානයක් යොමු නොකර තමන් කැමැති කණ්ඩායම් හා පුද්ගලයන් පමණක් පළාත් පාලන ආයතනවල නායකත්වයට පත්කිරීමට බැසිල් රාජපක්‍ෂ වගබලා ගත්තේය. එමගින් ඔහු විපක්‍ෂ දේශපාලන බලවේගය ග්‍රාමීය මට්ටමෙන් සම්පූර්ණයෙන්ම පාහේ අත්පත් කර ගැනීමට සමත් විය.


එසේම ග්‍රාමීය මට්ටමේද පළාත් පාලන ආයතනවල බලය පවත්වාගෙන යෑමේ විශාල බෙදීමක් විපක්‍ෂයේ කණ්ඩායම් අතර දැකිය හැකිය. පෙබරවාරි 10 වැනිදා මැතිවරණයට පෙර නොතිබූ විශාල අවාසිසහගත තත්ත්වයක මෙම බෙදීම් හා කණ්ඩායම් කල්ලි ගැසීම් ඒකාබද්ධ විපක්‍ෂයේ දේශපාලන වැඩපිළිවෙළ තුළ දැන් ඇතිවී තිබේ. මෙම තත්ත්වය කළමනාකරණය කර ගැනීමට මහින්ද රාජපක්‍ෂ උත්සාහයක් දැරුවද ඔහුගේ පාලනයෙන් මිදී මෙම දේශපාලන ව්‍යාපාරය බොහෝ දුර ගොස් තිබේ. මෙම තත්ත්වය හොඳින් තේරුම්ගත හැකිවන්නේ ශ්‍රී ලංකා නිදහස් පක්‍ෂයෙන් බෙදී ආ දහසය දෙනාගේ කණ්ඩායමට ඉඩ සකසා දීමට ඒකාබද්ධ විපක්‍ෂයේ පාර්ලිමේන්තු මන්ත්‍රීවරුන්ටද, මහින්ද රාජපක්‍ෂටද ඉඩ නොලැබෙන තත්ත්වයක් උදාවී තිබීමෙනි. එම දහසය දෙනාගේ කණ්ඩායම පිළිබඳ බැසිල් රාජපක්‍ෂගේ මතය එතරම් සුබවාදී නොවන අතර, බැසිල් රාජපක්‍ෂ පෞද්ගලිකව විශ්වාස කරනුයේ විශාල දේශපාලන ව්‍යාපාරයක් ගොඩනැගීම තුළින් දැනට සිටින පාර්ලිමේන්තු මන්ත්‍රීවරුන් නොසලකා හැර තම දේශපාලන ව්‍යාපාරය ගොඩනගා ගත හැකි බවයි. මෙවැනි බිඳුණු, කුඩුවුණු, විසිවුණු තත්ත්වයක තිබෙන විපක්‍ෂයේ වැඩසටහනකට ඉදිරි ජාතික මැතිවරණයකදී ආණ්ඩුව පරාජය කිරීමට හැකියාවක් තිබේද යනුවෙන් කීමට තවමත් කල් වැඩිය. 

 

කැඩිල්ල

අපේ මිනිස්සු කොහොමත් හැදිල්ලට වඩා කැඩිල්ලට දස්සය. හදන ඒවාට වඩා කඩන ඒවා වැඩිය. අවුරුදු ගාණක් තිස්සේ මහන්සියෙන් හැදූ දෙයක් එක මොහොතින් කැඩිල්ලට ඔවුන් දස්සය. සමහර අය කඩ කඩා හදනවාය. ඒ අතරම හද හදා කැඩිල්ලට පුරුදු වෙලා සිටින අයද එමටය. පොදු ස්ථානවල තිබෙන දේවල් කාටවත් අයිති නැතැයි සිතලා කඩන අය ඉන්නවාය. සමහර අය පොදු දේවල් කඩන්නේ ඒවා ආණ්ඩුවේ දේවල්ය කියලා හිතලාය. හැබැයි ආණ්ඩුවත් කරන නරක වැඩය වන්නේ එහෙම කඩන කඩන දේවල් හදන එකය.
එහෙම කැඩිල්ල හොඳය කියන පිරිසක් ඉන්නවාය. ඔවුන්ට වැඩ තියෙන්නේ කඩන තරමටය. ආණ්ඩුවේ කොන්ත්‍රාත් කරන අයට නම් ආපහු කොන්ත්‍රාත් ලැබෙන්නේ එහෙම කැඩිල්ල වැඩිවෙන කොටය. කාටත් වැඩිය ආණ්ඩුවේ මැති ඇමැතිවරුන් සහ ලොකු ලොක්කන් එහෙම කඩ කඩා හැදිල්ලට දස්ස, ඒවා හදන විට ඒ අයගේ සාක්කු පිරෙන හින්දාය.

අටුව කඩා පුටුව හැදිල්ල බොහෝ දෙනාට පුරුදුය. ඒත් එහෙම අටුව කඩලා හදන පුටුවල වාඩි වුණාම සිද්ධ වෙන්නේ එය කඩා වැටිලා කොන්ද කඩා ගන්නටය. ඒත් සමහර අයට නම් එහෙම කඩා ගන්නට කොන්දක් ඉතුරු වෙලා නැත්තේ එය හැම දෙනාටම නමලා ඉලාස්ටික් වෙලා තිබෙන හින්දාය. කොයිදේත් හයිය වැඩි වුණාම කැඩිල්ලද වැඩිය. කඩන්න බැරි තරම් හයිය වුණත් කොහොම හරි කඩන්න පුළුවන් ක්‍රම තියෙනවාය.
සමහර අය නීති කැඩිල්ලට කප් ගහලා තියෙනවාය. කැඩිල්ලට වැඩිය නීතිය නැමිල්ලට දස්ස අයද ඉන්නවාය. ඒ අය නීතිය කඩන්නේ නැතුව නීතිය නමාගෙන රිංගලා ගිහිල්ලා ඕනෑම දහජරා වැඩක් කරන්න දස්සය. නීතිය කඩන අයට වැඩිය ඒ අයට නීතියෙන් බේරෙන්න ලෙහෙසිය.

සුටුස් ගාලා ඕනෑම කෙන්දක් කඩන්න පහසු වුණත් කෙඳි රැසක් එකතු කරලා අඹරන කඹය නම් කැඩිල්ල අමාරුය. කඹ ඇදීමේ තරගවලට හොඳ කඹයක් යොදාගත යුත්තේ එය දුර්වල කඹයක් වුණොත් අදින විට දෙකට කැඩිලා අදින අයගේ කොන්ද කඩා ගන්නට වෙන හින්දාය.

වක්කඩ කැඩිල්ලෙන් පහළ කුඹුරුවලට වතුර ගන්න පුළුවන්ය. සමහර ගොවිරාළලා තමන්ගේ කුඹුරට වතුර ගන්න ඕනෑ වුණාම කිසිම සෙවිල්ලක් බැලිල්ලක් නැතුව අනුන්ගේ වක්කඩවල් කඩනවාය. සමහරුන් වක්කඩ කැඩුවා වගේ එක දිගට හොඳ දේත්, නරක දේත් කතා කිරීමට පුරුදු වෙලා ඉන්නවාය. එහෙම අයට වැඩිකල් නොගොස් කාගෙන් හරි කට කඩා ගන්නට සිද්ධ වෙනවාය. කළයේ කට කැඩුණු විට එහි වටිනාකම පහළ බහිනවාය. අන්දරේ මල්මද බිසවුන්ට සමච්චල් කළේ &කට කැඩි කළේ දිය උකුලේ තබාගෙන* යැයි කියලාය. ඒත් අද නම් වැඩිපුර තියෙන්නේ ඇලුමිනියම් හා ප්ලාස්ටික් කළ හින්දා ඒවායේ කටවල් කැඩිල්ල නැත්තේය. 

අනුන්ගේ දේවල් කඩා වඩා ගැනිල්ලට අද බොහෝ දෙනා පුරුදු වෙලා තියෙනවාය. එහෙම අනුන්ගේ දේවල් කැඩිල්ලට යන අයගේ සමහර දේවල් වෙනත් අය කඩා ගන්නවා යැයි ඒ අය දන්නේ නැත්තේය. අනවසර කඩවල් කඩන්නේ නගර සභාවෙන් ඇවිල්ලාය. එහෙම කැඩිල්ලට බැකෝ යන්ත්‍ර යොදවා ගන්නවාය. ඒත් එහෙම කඩන සමහර කඩ පහුවදා උදේ වෙනකොට තිබුණාටත් වැඩිය හොඳට ඉදිකරලා තියෙනවාය. මැම්බර් කෙනෙකුගේ සපෝට් එකෙන් ඉදිවෙන ඒ කඩ කැඩිල්ලට දස්ස කෙනෙක් නැත්තේය.
අතපය කැඩෙන්නේ ගහකින්, ගලකින් වැටුණු විටය. එහෙමත් නැතිනම් කැඩෙන්නට පොලු පහරක් දිය යුතුය. ඒත් සමහර පුද්ගලික බස්වල පටෝන හැටියට මගීන්ගේ කොන්ද කැඩිල්ල සිද්ධ වෙන්නේ බස් එක ඇතුළේදීය. බස්වලට ආණ්ඩුවෙන් කොච්චර නීති දැම්මත් ඒවා කැඩිල්ලට බස්කාරයන් නම් දරා තිබෙනවාය. සමහර අබලන් බස් පාරේ දුවන විට කැඩිලා මගීන්ට අතරමං වෙන්න සිද්ද වෙනවාය. ඒත් එහෙම කැඩිච්ච ඒවා අටෝගෙන ධාවනය කිරීමට ඒ ගොල්ලන් හරිම දස්සය. එහෙම වැඩියෙන්ම කැඩෙන්නේ ලංගම බස්ය. බස් වාගේ නිතර කැඩෙන්නේ නැති වුණාට අනතුරක් සිදු වුණාම කෝච්චි පෙට්ටි කැඩිලා සීසීකඩ වෙනවාය. එහෙම කැඩුණාම මගීන් බොහෝ දෙනෙකු අනතුරට භාජනය වෙනවාය.  වර්ෂාවෙන් පාලම කැඩුණු විට රථවාහනවලට ධාවනය කරන්න බැරිය. එහෙම කැඩිච්ච ඒවා හදන්න බොහොම කල් ගන්නවාය. ඒ වුණාට පයින් යන පොල් කොට පාලම් නම් කැඩුණාම ඉක්මනින් හදාගන්න පුළුවන්ය. පාලම් විතරක් නොව වැස්සට පාරවල් කැඩෙනවාය. එහෙම කැඩිච්ච පාරවල් හදන්නට කොන්ත්‍රාත් දෙනවාය. කැඩිච්ච පාරවල් 
කොන්ත්‍රාත්කාරයන් හැදුවත් ඊළඟ වැස්සේදී ආපහු කැඩෙන්නේ ඒ හැදූ අයගේ දස්සකම් හින්දාය. පාරවල් කැඩෙන තරමට වාසි වන්නේ කොන්ත්‍රාත්කාරයන්ට විතරක් නොවේය. කැඩිච්ච පාරවල් හදන්න කොන්ත්‍රාත් දෙන මන්ත්‍රීලාටද යහමින් හොයා ගන්න පුළුවන්ය. ඒ හින්දා පාරවල් කැඩෙන තරමට කොන්ත්‍රාත්කාරයන් වගේම මන්ත්‍රීලාද කැමතිය. 

කට කැඩිච්ච කතා කියන්න එපා යැයි කියන්නේ ආතක් පාතක් නැතුව කතා කරන විටය. නහය කඩාගෙන යන සුවඳ හමන්නේ පාරේ කුණු ගොඩවල් ළඟින් යන කොටය. පසුගිය අලුත් අවුරුදු දවසක මීතොටමුල්ලේ කුණු කන්දක් කඩාගෙන වැටිලා ගෙවල් යටවී මිනිසුන්ද මැරුණේය. එහෙත් ඒ කැඩිච්ච ගෙවල්වලට හා මියගිය අයට තවම වන්දි ගෙවා නැත්තේය. &පරණ පිනක් මගෙ හිසේ කඩාගෙන වැටුණා* යැයි කියන්නේ බලාපොරොත්තු නොවූ වාසියක් ලැබුණු විටය. ඒත් එහෙම වාසි හැම දෙනාටම කඩාපාත් වෙන්නේ නැත්තේය.
ඉහළ ගිය සරුංගල් නූල කැඩුණු විට ඈතට පාවී ගොස් කොහේ හරි කඩාගෙන වැටෙනවාය. සරම ඇඳලා හරියට පටිය දමන්නට බැරි වුණොත් සරම කඩාගෙන වැටෙනවාය. යට ඇඳුමක් නැති කෙනෙකුගේ සරම කඩාගෙන වැටුණොත් අපට වෙන්නේ අහක බලන්නටය. ආණ්ඩු කැඩෙන්නේ ජනතාවගේ ඡන්ද බලයෙන්ය. දේශපාලුවන් ඡන්ද කැඩෙන එක වළක්වා ගැනීමට බොරු පොරොන්දු දෙනවාය. එහෙත් ඒවා ඉටු නොවෙන විට ඡන්ද දාසලාගේ ජීවිත කඩාගෙන වැටෙනවාය.

නව ලිබරල්වාදය පැමිණියේද?

ආර්ථික මොඩලයක් ලෙස නව ලිබරල්වාදය හඳුන්වා දුන් ආසියාවේ මුල්ම රටවල්  කිහිපය අතර ශ්‍රී ලංකාවද එකකි. නව ලිබරල්වාදය යනු ලිබරල්වාදයේම දිගුවක් වන අතර, එය නිදහස් වෙළෙඳ පොළ ධනවාදය දැඩි ලෙස ක්‍රියාත්මක කරන්නකි. 
මෙය ඇතැම් විචාරකයන්ට අනුව නිදහස් වෙළෙඳ පොළ පිළිබඳ අන්තවාදයකි (Fundamentalism). ශ්‍රී ලංකාවට හඳුන්වා දුන් නව ලිබරල්වාදය සම්බන්ධයෙන් මැසිවිලි නගන්නෝ බොහෝ වෙති. ඕනෑම ප්‍රපංචයක හොඳ සහ නරක යන දෙපාර්ශ්වයම පවතී. නව ලිබරල්වාදයද එසේය. එහිද හොඳ සහ නරක යන දෙවර්ගයම පවතී. 

ශ්‍රී ලංකාවට නව ලිබරල්වාදී ප්‍රතිපත්ති හඳුන්වා දෙනු ලැබුවේද, ඒවායේ ඇති හොඳ පැති අවශෝෂණය කර ගෙන ඇත්නම්, ඒ ප්‍රමාණවත් නොවන තරමින් බව පෙනී යයි. පෞද්ගලික ක්‍ෂේත්‍රයේ දායකත්වය උපරිම වශයෙන් ලබා ගැනීම නව ලිබරල්වාදයේ මූලික අදහසකි. එහිදී තනි පුද්ගලයාගේ නිදහස කෙරෙහි විශාල අවධානයක් යොමු වෙයි. 

නව ලිබරල්වාදය තුළදී අකාර්යක්‍ෂමතාව සඳහා ඉඩක් නැත. තනි පුද්ගලයා විසින් තමන්ගේ අසාර්ථකභාවය සම්බන්ධයෙන් වගකීම බාරගත යුතුය. නව ලිබරල්වාදයේ තවත් වැදගත් ගුණාංගයක් නම් හැකියාව කෙරෙහි තබන විශ්වාසයයි (meritocracy). එනම් දක්‍ෂයාට සමාජ ක්‍රමයේ හිණිමං නැගීමට ඉඩහසර සැලසීමය.

නව ලිබරල්වාදය අනුදත් බොහෝ බටහිර රටවල දක්‍ෂයාට සිය හැකියාව මත ඉහළට යෑමේ හැකියාව තහවුරු කර ඇත. මෙනයින්, නව ලිබරල්වාදයේ නිසඟ ගුණය වන තරගය තුළින් දක්‍ෂයා ජය ගන්නා අතර, රටේ සමස්ත ආර්ථික හා සමාජීය පසුබිම වර්ධනය වෙයි. නමුත් ශ්‍රී ලංකාවේ සමාජ ක්‍රමය තුළ ඥාති සංග්‍රහය, මිතුරු සංග්‍රහය සමාජ දේහය කාගෙන පිළිකාවක් මෙන් නැගී සිටී. 

මෙහිදී නියාමනය හිමි කරන්නේ තවත් විශේෂිත භූමිකාවකි. දක්‍ෂයාට උපරිම ආරක්‍ෂාව සහ වරප්‍රසාද දෙන අතරතුරදීම සමාජ ආයතන තුළ නියාමනය ඉහළින් පවත්වාගෙන යෑමට යුරෝපයේත්, බටහිරත් නව ලිබරල්වාදය මත පදනම් වූ රටවල් සමත්ව සිටියි. උදාහරණයක් ලෙස බස් රථ සේවා පෞද්ගලික අංශය මගින් පාලනය වන අතර, රජය විසින් ඒවායේ ගුණාත්මක බව විශාල වශයෙන් නියාමනය වෙයි. 

ශ්‍රී ලංකාව තුළ පෞද්ගලික ප්‍රාග්ධනයට සෑහෙන තරම් ඉඩක් නව ලිබරල්වාදී ප්‍රතිපත්ති යටතේ ලබාදී තිබුණද, නියාමනය සඳහා ලබාදී ඇත්තේ ඉතා අඩු ඉඩකි. උදාහරණයක් ලෙස ප්‍රවාහන සේවා ගත හොත් එමගින් ලැබෙන සේවාවල ගුණාත්මකභාවය හොඳින් සහතික වන්නේද යන්න තහවුරු කිරීම සඳහා ශක්තිමත් යාන්ත්‍රණයක් ශ්‍රී ලංකාව තුළ ක්‍රියාත්මක වන බවක් පෙනෙන්නට නැත. ශ්‍රී ලංකාවේ විශාලතම ප්‍රවාහන මාධ්‍යයක් වන ත්‍රිරෝද කර්මාන්තය නියාමනය කිරීම සඳහා තවමත් නියාමන ආයතනයක් හෝ නොමැත. එසේ නියාමනය නොවූ බොහෝ ආයතන පවතී. 

යහපත් නව ලිබරල්වාදී ක්‍රමයක මූලික ලක්‍ෂණ සැබෑ තරගයත්, දක්‍ෂයාට ප්‍රමුඛත්වය ලබා දීමත්, නියාමනයත් ශ්‍රී ලංකාව තුළ සිදු වන බවක් තවමත් පෙනෙන්නට නැත.

දර්ශන අශෝක කුමාර

දකුණේ උණ රෝගයෙන් පෙනෙන ආණ්ඩුවේ අසමත්කම

දකුණේ පවතින උණ රෝගයට හේතුව ඉන්ෆ්ලුවෙන්සා ඒ වෛරසය බව වෛද්‍ය පර්යේෂණ ආයතනය සොයාගත්තේය. මේ සටහන ලියන විට ඒ පිළිබඳ මාධ්‍ය වාර්තා පළවෙමින් තිබිණි. රෝගයෙන් දරුවන් 15 දෙනෙකුගේ ජීවිත අහිමි වූ විට හෝ අවසානයේදී රජය රෝගයට හේතුව සොයාගැනීමට සමත් විය.  ඒ සඳහා ගත වූ කාලය විශාල වන අතර, යම් හෙයියකින් මීට දින කිහිපයකට හෝ පෙර රෝගයට හේතුව සොයාගත්තා නම් අහිංසක ළමයින් දෙදෙනෙකුගේ ජීවිත බේරාගැනීමට අවස්ථාව තිබිණි.

මේ පිළිබඳ සොයා බැලීමට රටේ නායකයන් දෙපළවත්, සෞඛ්‍ය අමාත්‍යවරයාවත් දකුණට නොපැමිණීම ගැන දකුණේ ජනතාව කනගාටුවට පත්ව තිබේ. ඔවුහු කොළඹ සිට මාධ්‍ය නිවේදන නිකුත් කිරීම පමණක් සිදු කළහ. ආණ්ඩුව අනෙකුත් ප්‍රශ්නවලට විසඳුම් සොයන්නේද මේ ආකාරයෙනි. උණ රෝගය විසඳීමට ආණ්ඩුවට මෙවැනි කාලයක් ගතවෙමින් තිබෙන්නේ නම්, රටේ ආර්ථිකය නැංවීම සඳහා ආණ්ඩුවට කොපමණ කාලයක් ගතවෙනු ඇතිදැයි මෙයින්ම දැන් ජනතාවට තේරුම් ගැනීමට හැකියාව තිබේ.

මේ රෝගී තත්ත්වය හේතුවෙන් දෛනිකව හම්බන්තොට රෝහලේ ප්‍රතිකාර ලබන දරුවන් සංඛ්‍යාව 100ක් විය. ප්‍රතිකාර සඳහා දිනකට හම්බන්තොට රෝහලට පැමිණෙන දරුවන් සංඛ්‍යාව 50-60 අතර තත්ත්වයකට පත් විය. හම්බන්තොට තත්ත්වය මෙසේ නම් ගාල්ල හා මාතර තත්ත්ව කෙසේ වේ දැයි ඔබට අමුතුවෙන් සඳහන් කළ යුතු නොවේ.

මෙම රෝගී තත්ත්වය මාධ්‍ය විසින් හෙළි කරන විට ආණ්ඩුව මුලින්ම සිදුකළ යුතුව තිබුණේ එය පැතිරීම වැළැක්වීම සඳහා ක්‍රියාමාර්ග ගැනීමයි. නමුත් ඔවුහු එය සිදුනොකළ අතර, ජනතාවට බිය නොවැන්නයි දැනුම් දුන්හ. එසේම හිඟයකින් තොරව ඒ සඳහා අවශ්‍ය ඖෂධ දකුණේ රෝහල්වලට නිකුත් කළ යුතුව තිබුණද, එය සිදු නොවීය. වෛද්‍යවරුන්ම සඳහන් කළේ රෝගය පාලනය කිරීමට අවශ්‍ය එන්නත් ප්‍රමාණයේ හිඟයක් ඇතිව තිබෙන බවයි.

මේ වනවිට එන්නත නිර්දේශ කොට එය පෞද්ගලික ආයතනයකින් ලබාගන්නා ලෙස රෝහල්වලින් පවසන බව දෙමාපියෝ මා සමග පැවසූහ. රාජපක්ෂ ආණ්ඩුව නිදහස් සෞඛ්‍යය විනාශ කරන බව කියමින් පැමිණි ආණ්ඩුව රෝගයකට අවශ්‍ය එන්නත ලබාගැනීමට දුප්පත් ජනතාව ෆාමසි සඳහා යොමු කිරීමට කටයුතු කර තිබේ. කෙසේ වෙතත් ආණ්ඩුව ඉතාමත් ඉක්මනින්ම මේ ගැටලුව විසඳීම සඳහා තවදුරටත් කටයුතු නොකරන්නේ නම් එය රට පුරා පැතිරීම වැළැක්වීමට නොහැකි වනු ඇත.

118 ලැයිස්තුව 

අර්ජුන් ඇලෝසියස් මහතාට සම්බන්ධ සමාගමකින් පාර්ලිමේන්තු මන්ත්‍රී දයාසිරි ජයසේකර මහතාගේ මැතිවරණ ව්‍යාපාරය වෙනුවෙන් රුපියල් මිලියනයක මුදලක් ලබාදුන් බවට හෙළිවීමත් සමග බැඳුම්කර වංචාවෙන් මුදල් ලබාගත් 118 දෙනෙකු පිළිබඳ මේ වනවිට සමාජයේ දැඩි කතාබහක් ලක්ව තිබේ.  මේ හේතුවෙන් පාර්ලිමේන්තු මන්ත්‍රීවරුන් පිළිබඳ ජනතාව වපර ඇසකින් බලන තත්ත්වයට පත්ව ඇති අතර,  වහාම මෙම 118 දෙනාගේ ලැයිස්තුව ප්‍රසිද්ධ කිරීම අත්‍යවශ්‍ය කරුණකි.
එසේ නොවුවහොත් පාර්ලමේන්තු මන්ත්‍රීවරුන් වෙනුවෙන් ජනතාව තබා ඇති අවසන් විශ්වාසය හෝ නැති වී යනු ඇත. පාර්ලිමේන්තු ප්‍රජාතන්ත්‍රවාදය ආරක්ෂා කිරීමට බව කියමින් පැමිණි යහපාලන ආණ්ඩුව දැන් මන්ත්‍රීවරයෙකුට මාර්ගයේ පවා ගමන් කළ නොහැකි තත්ත්වයක් උදාකර තිබේ.

මැතිවරණයකදී ව්‍යාපාරිකයන් දේශපාලඥයන් වෙත මුදල් ලබාදීම අද ඊයේ සිදු වූ දෙයක් නොවේ. නමුත් ගැටලුව වන්නේ පර්පෙචුවල් සමාගම මහ බැංකුවෙන් විශාල මුදලක් කොල්ලකා ඇති අවස්ථාවක එම සමාගම දේශපලඥයන්ට හා අනෙකුත් පුද්ගලයන්ට මුදල් ලබාදීමයි. සොරාගත් බව දැන දැනම එම මුදල් ලබාගැනීමද ගැටලුකාරී තත්ත්වයකි.

මෙසේ මුදල් ලබාදීම් පිළිබඳ තොරතුරු වාර්තා වූයේ හිටපු අමාත්‍ය දයාසිරි ජයසේකර මහතාට චෝදනා එල්ල වීමත් සමගිනි. නමුත් දයාසිරි ජයසේකර මහතාට එම චෝදනාව එල්ල වූයේ ආණ්ඩුවෙන් ඉවත්ව ගිය විටය. මේ වනවිට රුපියල් බිලියන 12ක බැඳුම්කර සොරකම  දැන් රුපියල් මිලියනයකට ලඝු කිරීමට ආණ්ඩුව කටයුතු කරමින් තිබේ.

මේ වනවිටත් දැන් බොහෝ දෙනෙකුගේ අවධානය යොමුව ඇත්තේ පර්පෙචුවල් සමාගමෙන් මුදල් ලබාගත් 118 දෙනා පිළිබඳවය. නමුත් අපගේ අවධානය යොමුවිය යුත්තේ බැඳුම්කර වංචනිකයන්ට දඬුවම් දීම කෙරෙහිය. අනෙක් අතින් අලෝසියස්ගෙන් මුදල් ලබාගත් පුද්ගලයන් 118 දෙනා හෙළි කිරීමද අත්‍යවශ්‍ය කරුණකි.

ආණ්ඩුවේ සිට විපක්ෂයට එක්වන මන්ත්‍රීවරුන් භීතියට පත්කිරීම සඳහා ආණ්ඩුව මොන ක්‍රියාමාර්ග ගත්තද ඉදිරියේදීත් තවත් පිරිසක් ආණ්ඩුවෙන් ඉවත් වනු ඇත. එය වැළැක්වීමට කිසිවෙකුටත් නොහැකි වනු ඇත. හිටපු අමාත්‍ය ටී.බී. ඒකනායක මහතා පොලිස් මූල්‍ය අපරාධ ඒකකයට කැඳවූයේද මෙහි එක් පියවරක් ලෙසිනි.

යම් හෙයකින් අර්ජුන් ඇලෝසියස් මෙම ලියුම්කරු වන නාමල් රාජපක්ෂට මුදල් දී ඇති බවට බැඳුම්කර වාර්තාවේ සඳහන් වී තිබුණා නම් හෝ රාජපක්ෂ පවුලේ කිසිවෙකුටත් මුදල් ලබා දී තිබූ බවට සඳහනක් තිබුණා නම් ඇතිවන තත්ත්වය පිළිබඳ ඔබට අමුතුවෙන් සඳහන් කළ යුතු නොවේ.
මගේ නම තිබුණා නම් නාමල් රාජපක්ෂ විත්තිකාරයා වී අර්ජුන් ඇලෝසියස් සාක්ෂිකාරයා බවට පත්වීමටද ඉඩක් තිබිණි. ඇලෝසියස් සහ මා අතර මිත්‍රකමක් තිබුණ නමුත්, ඔහු සහ මා ව්‍යාපාර කටයුතු සිදුකර නොතිබුණු අතරම බැඳුම්කර වංචාව සම්බන්ධයෙන් ඔහු සිරගත කළ යුතු යැයි පාර්ලිමේන්තුවේ මුලින්ම හඬ නැගුවේද මමය.

ජනපතිගේ කතා

ජනාධිපති මෛත්‍රීපාල සිරිසේන මහතා මේ වනවිට මලකඩ බැඳී තිබූ කඩුව ඔහේ වනමින් තිබේ.  ඔහු රාජ්‍ය නිලධාරීන්ට මෙන්ම ඇතැම් දේශපාලඥයන්ටද විවිධ චෝදනා එල්ල කරමින් මේ වනවිට කතා පවත්වමින් තිබේ. මේ සියල්ලකින්ම හොඳින් පෙනෙන්නේ විධායක ජනපති ලෙස ජනපති මෛත්‍රීපාල සිරිසේන මහතා පෙන්වූ අසාර්ථකත්වයයි. ජනාධිපතිවරයාගේ කතාවට හිටපු ජනාධිපති මහින්ද රාජපක්ෂ මහතාත්, ඒකාබද්ධ විපක්ෂයේ පාර්ලිමේන්තු මන්ත්‍රී ඩලස් අලහප්පෙරුම මහතාත් මාධ්‍යයට අදහස් ප්‍රකාශ කළ හෙයින් ඒ පිළිබඳ වැඩිදුරටත් ප්‍රකාශ කිරීම අනවශ්‍ය දෙයකි.

ශ්‍රී ලංකා නිදහස් පක්ෂයේ ප්‍රතිසංවිධාන කටයුතු පිළිබඳ ලබන සතියේදී මෙම තීරු ලිපියෙන් සාකච්ඡා කිරිමට අදහස් කරමි.
 ලබන සතියේදී යළිත් හමුවෙමු!
ඔබට සුබ අනාගතයක්!

විධායකය අහෝසි කිරීම

ලංකාවේ දේශපාලනය තුළ පසුගිය සතිය ඉතා තීරණාත්මක වේ. එයට බලපෑ විශේෂම හේතුව වන්නේ ආණ්ඩුක්‍රම ව්‍යවස්ථාවේ විසි වැනි සංශෝධනය පාර්ලිමේන්තුවට ඉදිරිපත් වීමයි. එය ඉදිරිපත් කිරීමට මූලික වූයේ ජනතා විමුක්ති පෙරමුණයි. ජනවාරි අට වැනි දා ආණ්ඩු පෙරළියට පාදක වූ දින සියයේ වැඩසටහන මගින් යෝජනා කර තිබූ විධායක ජනාධිපති ක්‍රමය අහෝසි කිරීමේ යෝජනාව පදනම් කර ගෙන ජනතා විමුක්ති පෙරමුණ මගින් මෙම විසි වැනි සංශෝධනය ඉදිරිපත් කර තිබේ. නමුත් මාගේ පවතින එක තක්සේරුවක් නම් විධායක ජනාධිපති ක්‍රමය අහෝසි කිරීම පදනම් කොට ඉදිරිපත් කරන ලද මෙම විසි වැනි සංශෝධනය මගින් ඔවුන් විසින් රට අස්ථාවර කිරීමේ උපක්‍රමික යෝජනා ද ඉදිරිපත් කොට ඇති බවයි. විශේෂයෙන් ඔවුන් විසින් ඉදිරිපත් කොට ඇති විසි වැනි සංශෝධනය මගින් ඔවුන් ප්‍රධාන පක්ෂ දෙකෙහි නායකයන් අමතක කොට තිබේ. එසේම වර්තමාන අග්‍රාමාත්‍යවරයා ඉලක්ක කොට ගත් විශේෂ යෝජනා කිහිපයක්ද විසි වැනි සංශෝධනයට අන්තර්ගත වී තිබේ. එවැනි තත්ත්වයක් තුළ එක්සත් ජාතික පක්ෂයේ සහයෝගය නැතිව එය දිනාගැනීමේ විශාල බාධාවක් පවතින බව මාගේ තක්සේරුවයි. ජනවාරි 08 වෙනිදා පොරොන්දු වූ පරිදි විධායක ජනාධිපති ධුරය අහෝසි කිරීම අත්‍යවශ්‍ය කාරණයක් බවට තවදුරටත් අටුවා ටීකා අවශ්‍ය නැත. නමුත් එම සද්කාර්යය ඉටුකිරීමේදී දේශපාලන පක්ෂ හෝ පුද්ගලයන් විශේෂ කොට ගනිමින් යෝජනා ඉදිරිපත් කිරීම එතරම් ගෝචර නොවන බව මාගේ අදහසයි. එවැනි අවිද්‍යාත්මක ආණ්ඩුක්‍රම ව්‍යවස්ථා ප්‍රතිසංස්කරණ මගින් සිදුවිය හැකි බරපතළ වරද වන්නේ ආණ්ඩුක්‍රම ව්‍යවස්ථාවේ අර්බුද ඇති වීමයි. එමනිසා දේශපාලන පක්ෂවල උවමනා එපාකම් ඉටු කිරීමට ආණ්ඩුක්‍රම ව්‍යවස්ථා සංශෝධන සිදුකිරීම අවිද්‍යාත්මක යෝජනා වන අතර, එමගින් දීර්ඝකාලීනව රටට විශාල හානියක් සිදුවනු ඇත.

ජනතා විමුක්ති පෙරමුණ ඉතිහාසයේ සිටම සිදු කරන ලද දේශපාලන ක්‍රියාවලීන් නිසාවෙන් රටට තිබූ බොහෝ අවස්ථා අහිමි වූ බව මාගේ අදහසයි. විශේෂයෙන් විසි වැනි සංශෝධනය ඉදිරිපත් කිරීම තනි රටක් හැටියට නොව රටේ සියලුම දේශපාලන පක්ෂ ජනාධිපතිවරයාගේ කැමැත්ත ඇතිව සිදුකළ යුතු වුවද, ඔවුන් ඒ පිළිබඳ පුළුල් සාකච්ඡාවක් නොකොට තනි මතයට ඔවුන් විසින් මෙම සංශෝධන ඉදිරිපත් කොට තිබේ. ඒ සඳහා එක්සත් ජාතික පක්ෂය, ශ්‍රී ලංකා නිදහස් පක්ෂය දරන මතය කුමක්ද යන්න කීමට තවමත් කල් වැඩිය. නමුත් රාජ්‍යයක ජනාධිපති නොමැති අවස්ථාවක වැඩ බැලීම සඳහා කථානායකවරයා යෝජනා කර සිටීමෙන් ජනතා විමුක්ති පෙරමුණේ අරමුණ පැහැදිලි වේ. එවැනි තත්ත්වයක් තුළ එක්සත් ජාතික පක්ෂයේ සහයෝගය දිනාගැනීමට හැකියාවක් ඇත්දැයි සැකසහිතය.
අනෙක් ප්‍රධාන කාරණය වන්නේ මාදුළුවාවේ සෝභිත හිමියන්ට අවශ්‍ය කළ පරිදි තැටිය රත් වී තිබූ අවස්ථාව නොදැනීමේ ආදීනව රට මුහුණදෙමින් තිබේ. එමනිසා ප්‍රධාන දේශපාලන පක්ෂ සියල්ලටම මේ අවස්ථාවේ විධායක ජනාධිපති ධුරය අහෝසි කිරීම අවාසිදායක වන බවට මත පළවෙමින් තිබේ. එමනිසා විශේෂයෙන් එක්සත් ජාතික පක්ෂය එම පක්ෂයේ දේශපාලන අනාගතයට වඩාත් හොඳ බව එම පක්ෂ අභ්‍යන්තරයේ විශ්වාසයයි. එමනිසා එම පක්ෂය රටේ පවතින දේශපාලන තත්ත්වය සලකා බලා ජනාධිපතිවරණයකට මුහුණදීමට සූදානම් වේ. විශේෂයෙන් විධායක ජනාධිපති ධුරය ආරම්භ කළ එක්සත් ජාතික පක්ෂයේ ජනාධිපතිවරයෙකු විසින්ම විධායක ජනාධිපති ධූරය අහෝසි කරනු ඇතැයි මාගේ විශ්වාසයයි. විධායක ජනාධිපති ධුරය සම්බන්ධයෙන් එක්සත් ජාතික පක්ෂය සිටිනුයේ එය අහෝසි කළ යුතුය යන තත්ත්වයේ නමුත්, එය අහෝසි කිරීමේ ව්‍යවස්ථා සංශෝධන ඉදිරිපත් වීමේදී රට තුළ වෙනත් විශාල ප්‍රශ්න හා අර්බුද ඇතිවන්නේ නම් ඒ වෙනුවෙන් පාර්ලිමේන්තුවේ සහයෝගය ලබාදීමට උනන්දු නොවනු ඇත.  

ඒ අතරම කිවයුතු අනිත් විශේෂිත කාරණය වන්නේ රටේ දේශපාලන ප්‍රතිසංස්කරණ වෙනුවෙන් ඇති විශාලතම බාධාව වන ජනමාධ්‍යවල අවිද්‍යාත්මක හැසිරීමයි. විශේෂයෙන් විද්‍යුත් ජනමාධ්‍ය හා සාම්ප්‍රදායික මුද්‍රිත මාධ්‍ය රටේ දේශපාලනය සම්බන්ධයෙන් හැසිරෙනුයේ ඉතා අවිද්‍යාත්මක හා මුග්ධ ආකාරයටය. එමගින් රටට හා රටේ ආර්ථික, දේශපාලන, සමාජීය ප්‍රතිසංස්කරණවලට සිදුවන හානිය මෙතෙකැයි කිව නොහැකිය. විශේෂයෙන් පසුගිය දිනවල රටේ විද්‍යුත් මාධ්‍යවල දිගින් දිගටම තීරණාත්මක ලෙස ප්‍රචාරය කරමින් තිබෙන දේශපාලන කාරණා තුළින් රටටත්, දේශපාලඥයන්ටත් කිසිදු ප්‍රයෝජනයක් නොවන අතර, එමගින් දේශපාලන ක්ෂේත්‍රය පිළිබඳ රටේ ජනතාව අතර ඇති විශ්වාසය බිඳවැටෙනු ඇත. රටක දේශපාලන කණ්ඩායම් අතර විශ්වාසය ජනතාව තුළින් බිඳ වැටුණු විට සිදුවනුයේ කාටවත්, කිසිවෙකුටත් පිහිට විය නොහැකි විශාල අර්බුදයකි. විශේෂයෙන්ම මෙවැනි තත්ත්වයක් තුළ රටක් අරාජික වීම කිසිවෙකුටත් වැළැක්විය නොහැකිය.

අවසාන වශයෙන් කිවයුත්තේ අද රට මුහුණදී තිබෙන තත්ත්වයෙන් ගොඩඒමට නම් රටේ සියලුම දේශපාලන පක්ෂද, මෙම සියලුම දේශපාලන නායකයන්ද, සිවිල් සංවිධානද එම සංවිධානයේ ක්‍රියාකාරීත්වයද, ජනතාවද, රාජ්‍ය නිලධාරීන්ද කැපවීමෙන් උනන්දුවෙන් හා බුද්ධිමත්ව කටයුතු කළ යුතු බවයි. විශේෂයෙන් මෙහිදී ආණ්ඩුව විසින් තමන්ට ලැබුණු ජනවරමට අනුව කටයුතු කිරීම අත්‍යවශ්‍ය වන අතර, එම ජනවරමට පිටුපෑම අනාගතයේදී බරපතළ දේශපාලන ප්‍රතිඵලවලට මුහුණදීමට හේතුවක් වනු ඇත. එය සම්බන්ධව අවබෝධයෙන් කටයුතු කිරීම සියලුම දේශපාලන පක්ෂවල වගකීමකි.