Category Archives: columns

අවුරුදු සමයෙන් පසු පීඩන සමය

සිංහල හා හින්දු අලුත් අවුරුද්දෙන් පසුව පාඨක ඔබ හමුවන පළමු අවස්ථාව මෙය වෙයි. එහෙයින් ලැබුවා වූ සිංහල හා හින්දු අලුත් අවුරුද්ද ලංකාවාසී සියලු දෙනාට සාමය හා සෞභාග්‍ය සපිරි සුබ අනාගතයක් වෙනුවෙන් පියවර තබන අවුරුද්දක් වේවායි සුබ පැතීමට මෙය අවස්ථාවක් කර ගනිමි.

කෙසේ වෙතත් මේ ආරම්භ වන අවුරුද්ද ජනතාවට එතරම් යහපත් අවුරුද්දක් නොවනු ඇත. අප්‍රේල් මස 01 වැනිදා සිට නව දේශීය ආදායම් පනත ක්‍රියාවට නැංවිණි. ඉදිරියේදී ඉන්ධන සූත්‍රයක් ඉදිරිපත් කිරීමට නියමිත හෙයින් ඩීසල් හා පෙට්‍රල් මිල ඉහළ යෑමට නියමිතය.
ගෑස් හා කිරිපිටි මිල ඉහළ දැමීමට අදාළව ගෑස් හා කිරිපිටි සම්බන්ධ ව්‍යාපාරිකයන් දැනටමත් රජයෙන් ඉල්ලීම් කර ඇති බව වාර්තා වෙයි. ඒ අනුව මේ සියලු භාණ්ඩවල මිල ඉදිරියේදී ඉහළ නැංවීමට නියමිතය.
ආණ්ඩුව ජනතා අවධානය වෙනත් අතකට යොමුකර එයින් වාසි ලබා ගැනීමට කටයුතු කරන බවට ක්‍රියාවෙන් ඔප්පු කර තිබේ. අලුත් අවුරුදු කාලසීමාව වෙනුවෙන් ජනතාව කටයුතු කරන විට ආණ්ඩුව රත්‍රන් 15෴ක බද්දක් පැනවීමට කටයුතු කළේය. මේ අනුව අවම වශයෙන් රත්‍රන් පවුමක මිල රුපියල් 8,000කින් පමණ වැඩි වී තිබේ.

ජනතාව දිගින් දිගටම පීඩාවට පත්කරන ආණ්ඩුව ඉදිරියේදී පාර්ලිමේන්තුව ප්‍රතිසංස්කරණය කිරීමට රුපියල් කෝටි 100ක් වෙන් කිරීමට අවධානය යොමුකර තිබේ. ජනතාවට වඩාත් පැහැදිලිව පවසන්නේ නම්, මේ අගය රුපියල් ලක්‍ෂ දසදහසකි. පාර්ලිමේන්තුව අලුත්වැඩියා කිරීම මේ අවස්ථාවේ නොකළ යුතු දෙයක් යැයි මා පෞද්ගලිකව දරන මතයයි. ආණ්ඩුව කළ යුතු වන්නේ මේ මුදල් පීඩාවිඳින ජනතාවගේ එම පීඩනය ඉවත් කිරීමට යෙදවීමය.
එසේම ජනතා විමුක්ති පෙරමුණ විසින් ගෙන ඒමට නියමිත විසි වැනි ආණ්ඩුක්‍රම ව්‍යවස්ථා සංශෝධනය පිළිබඳ යම් අදහසක් ප්‍රකාශ කිරීමට මෙය අවස්ථාවක් වෙයි. ජනතා විමුක්ති පෙරමුණ පෞද්ගලික මන්ත්‍රී යෝජනාවක් වශයෙන් 20 වැනි ව්‍යවස්ථා සංශෝධනය ගෙන ඒමට තීරණය කර ඇත්තේ මූලිකවම විධායක ජනපති ධුරය අහෝසි කිරීමේ පදනමිනි.

වත්මන් ආණ්ඩුව 2015 ජනාධිපතිවරණයට ඉදිරිපත් වූයේ විධායක ජනපති ධුරය අහෝසි කරන බවට මූලික පොරොන්දුව මතය. ජනපති මෛත්‍රීපාල සිරිසේන මහතා, අපවත් වී වදාළ අතිපූජ්‍ය මාඳුළුවාවේ සෝභිත හිමියන්ගේ ශ්‍රී දේහය ඉදිරිපිටදී ප්‍රකාශ කළේ, විධායක ජනාධිපති ධුරය අහෝසි කිරීමට පියවර ගන්නා බවයි.

කෙසේ වෙතත් ඔහුගේ ධුර කාලයෙන් දැනට වසර තුනහමාරකට ආසන්න කාලයක් ගෙවී ගොස් අවසන්ය. තවත් ගෙවා දැමීමට ඇත්තේ වසර එකහමාරක් වැනි සුළු කාලයකි. එම කාලසීමාවේදී ජනාධිපති මෛත්‍රීපාල සිරිසේන මහතා විධායක ජනාධිපති ධුරය අහෝසි කරනු ඇතැයි විශ්වාස කළ නොහැකිය. 

විධායක ජනාධිපති ධුරය අහෝසි කිරීම සම්බන්ධයෙන් ඒකාබද්ධ විපක්‍ෂය නියෝජනය කරන පක්‍ෂ අතර විවිධ මත පවතින අතර, ඒකාබද්ධ විපක්‍ෂය විධායක ජනාධිපති ධුරය අහෝසි කිරීම පිළිබඳ අවසන් තීරණයක් ගනු ඇත්තේ සියල්ලන්ගේම එකඟත්වයකිනි.
එසේම ජනතා විමුක්ති පෙරමුණ ගෙන එන මෙම ආණ්ඩුක්‍රම ව්‍යවස්ථා සංශෝධනය පිළිබඳ පනත් කෙටුම්පත පාර්ලිමේන්තුවට ඉදිරිපත් වූ විට කාරක සභා අවස්ථාවේදී සුළු සුළු සංශෝධන ඉදිරිපත් කිරීමට ආණ්ඩු පක්‍ෂය කටයුතු කරනු ඇත.
පසුගිය පනත් කෙටුම්පත් සියල්ලම සම්මත කර ගන්නා අවස්ථාවේදී ආණ්ඩුව එවැනි ආකාරයට කුමන්ත්‍රණකාරී ලෙස කටුයුතු කරමින් කාරක සභා අවස්ථාවේදී රටට අහිතකර බොහෝ දෑ සම්මත කර ගත්තේය. ඒකාබද්ධ විපක්‍ෂ මන්ත්‍රීවරුන් මේ පිළිබඳවද අවධානය යොමුකළ යුතු වෙයි.

අග්‍රාමාත්‍ය රනිල් වික්‍රමසිංහ මහතාට එරෙහිව ඉදිරිපත් වූ විශ්වාසභංග යෝජනාව ආණ්ඩුව ජයග්‍රහණය කළද, ඒ හරහා ඇතිවූ දෙදරීම් තවමත් පෙනෙන්නට තිබේ. ආණ්ඩුව නියෝජනය කළ ශ්‍රී ලංකා නිදහස් පක්‍ෂයේ ඇමතිවරු පිරිස විශ්වාසභංගයට පක්‍ෂව ඡන්දය ප්‍රකාශ කර දැන් විපක්‍ෂයට පැමිණීමට තීරණය කර තිබේ. ඒ අනුව විපක්‍ෂය තවදුරටත් පුළුල් වෙනු ඇත.  

රග්බි ක්‍රීඩාව යනු මාගේ ජීවිතයේ කොටසකට හා සමානය. ශ්‍රී ලංකාවේ රග්බි ක්‍රීඩාව ප්‍රචලිත කිරීම වෙනුවෙන් පසුගිය මහින්ද රාජපක්‍ෂ රජය සමයේදී අපි විශාල කාර්යභාරයක් ඉටු කළෙමු. එම වැඩසටහන ඉදිරියට ක්‍රියාත්මක නොවීම හේතුවේ බලපෑම් එල්ල වූයේ රග්බි ක්‍රීඩාවටමය.

ක්‍රීඩාව යනු පක්‍ෂ, පාට, ජාති, ආගම් භේද නොමැති තැනකි. මාගේ ජීවිතයේ තවත් එක් විශේෂ අවස්ථාවකට එක්වීමට පසුගිය සතියේදී අවස්ථාව ලැබිණි. ඒ කාශ්මීරයේ සිටින කාන්තා රග්බි කණ්ඩායමකට පුහුණු සැසි පැවැත්වීමට අවස්ථාව ලැබීමය. සටහන ලියන විටත් මම සිටින්නේ කාශ්මීරයේ දක්‍ෂතාවලින් පිරිපුන් රග්බි ක්‍රීඩිකාවන් පිරිසකට ඔවුන්ගේ දක්‍ෂතා දියුණු කිරීමට අවස්ථාව උදාකරමිනි.

ඉන්දීය මාධ්‍ය මගින් කරන ලද කරුණු අනාවරණයකින් පසුව ඔවුන් වෙනුවෙන් පුහුණු කඳවුරක් පැවැත්වීමට මා ඉදිරිපත් වූ අතර, ඒ වෙනුවෙන් මට සහාය දැක්වීමට රග්බි ක්‍රීඩකයෙකු මෙන්ම මාගේ සහෝදරයාද වන රෝහිත රාජපක්‍ෂද එක්විය. රග්බි පුහුණුකරුවන් වන රොනී ඊබ්‍රහිම් හා ඉරෝෂනී ප්‍රියංගා දැක්වූ සහායට ස්තූතිය ප්‍රකාශ කිරීමටද මෙය අවස්ථාව කර ගනිමි.
ලබන සතියේදී යළිත් හමුවෙමු!
ඔබට සුබ අනාගතයක්!

පොහොට්ටුවේ අර්බුදය

පළාත් පාලන මැතිවරණයෙන් ජයගත් අයෙක් බැලූ බැල්මට දැකගත නොහැකි තරමට ලංකාවේ දේශපාලනය දෝලනය වෙමින් තිබේ. එයට බලපාන හේතු ගණනාවක් තිබුණද ප්‍රධාන වශයෙන් බලපාන කාරණය වන්නේ ශ්‍රී ලංකා නිදහස් පක්ෂයේ පසුගිය වසර තුනෙහි අවිද්‍යාත්මක ක්‍රියාකලාපයයි. එහි ප්‍රතිඵලය ඔවුන්ට උරුම වූ අතර, පක්ෂයේ මන්ත්‍රීවරුන් දහසය දෙනෙකු අහිමි ව ඔවුන් දේශපාලනිකව අතරමං විය. මෙයට ප්‍රධාන වශයෙන් ලංකාවේ මාධ්‍ය ආයතනවල දේශපාලන ලණු හා ඉහළ නායකත්වයේ අඩුවක් නැති කුහකකම් හා කුඩුකේඩුකම් හේතු වූ බව මගේ හැඟීමයි. මෙම අර්බුදයෙන් ශ්‍රී ලංකා නිදහස් පක්ෂය තීරණාත්මක අර්බුදයකට ගියේය. මා මීට පෙරත් ලියා ඇති පරිදි ශ්‍රී ලංකා නිදහස් පක්ෂය නමැති හැටහය වියැති මහල්ලෙකුගේ ගමනක අවසානය ඔවුන් ළඟා කර ගත්තේය.

එක්සත් ජාතික පක්ෂයද පළාත් පාලන මැතිවරණයෙන් පසු තීරණාත්මක අර්බුදයකට තල්ලු කළේය. සැබැවින්ම එය පැණි වරකා ගහට හෙණ ගැසීමක් බඳුය. පළාත් පාලන මැතිවරණය ආණ්ඩුවේ පාර්ශ්වයට එක්තරා ආකාරයක අවාසිදායක තත්ත්වයක් පවතින බවට පූර්ව නිගමනයක් තිබූ නමුත් විපක්ෂයේ ඡන්දය දැමීමේ අඩු තත්ත්වය මත මේ මොහොතේ දුර්වලව පවතින ආසන ජය ලැබිය හැකියැයි තක්සේරු කොට තිබිණි. නමුත් නව මැතිවරණ ක්‍රමයත්, ආණ්ඩුවේ ඇතුළතින් එල්ල වූ ජනධිපතිවරයාගේ පාර්ශ්වයේ ප්‍රහාරයත්, විපක්ෂයෙන් හා ජවිපෙන් එල්ල වූ  ප්‍රහාරත්, මාධ්‍ය ආයතන කප්පම් නොගෑවීම නිසා ඇතිවී තිබූ තත්ත්වයත් එසේම පක්ෂය අභ්‍යන්තරයේ තිබූ පාක්ෂිකයන්ගේ කලකිරීමත් මෙම තත්ත්වයට හේතු විය.

ප්‍රචාරාත්මක අවාසියක් සිදු වූ බවටද කනින් කොනින් ඇසුණු අතර, එයද එක්තරා ආකාරයකට සත්‍යයක්යැයි පිළිගත හැකිය. නමුත් දශක හතක වයසැති එක්සත් ජාතික පක්ෂය ජය පරාජයන් හොඳින් හුරුපුරුදු පක්ෂයක් වන අතර, පශ්චාත් මැතිවරණ කළමනාකරණය ගැන කප් ගැසූ පක්ෂයකි. එසේ වූ නමුදු මෙවර ආණ්ඩුවේ ශ්‍රී ලංකා නිදහස් පක්ෂයේ පාර්ශ්වය එක්සත් ජාතික පක්ෂය දුර්වල කිරීමේ අභ්‍යන්තර කුමන්ත්‍රණයක නිරත වූ අතර, එයට ජනාධිපතිවරයාගේ මැදිහත්වීම පක්ෂයට බරපතළ තත්ත්වයක් විය. එය පක්ෂ නායකතුමන් හා පක්ෂය බුද්ධිමත්ව කටයුතු කොට හොඳින් කළමනාකරණය කරගත් අතර, එහි ප්‍රතිඵලයක් ලෙස කුමන්ත්‍රණකාරී බලවේග කෑලිවලට කැඩී දුර්වල විය.

එක්සත් ජාතික පක්ෂය විශාල ප්‍රතිසංවිධාන ක්‍රියාවලියක නිරත වෙමින් තිබේ. පක්ෂයේ බලය සම්පූර්ණයෙන්ම පාහේ තරුණ නායකයන් අතට ලැබෙමින් පවතින අතර, 2020 ජයගැනීම සඳහා නව බලයකින් කටයුතු කිරීමට එහි සියල්ලෝම සැදී පැහැදී සිටී. එමෙන්ම එක්සත් ජාතික පක්ෂය ජනවාරි 8 වැනිදා ජනවරමට අදාළ වෙනස්කම් හා ප්‍රතිසංස්කරණ සිදුකිරීමට ජනාධිපතිවරයා පොළඹවා ගැනීමට සිවිල් ප්‍රජාවට පොරොන්දු වී තිබේ. පක්ෂයේ කටයුතු සම්බන්ධයෙන් ආණ්ඩුවේ ආකල්පය විශාල ලෙස වෙනස් කරන ලෙස අගමැතිවරයා අමාත්‍යවරුන්ට උපදෙස් ලබා දී ඇති බවද කනින් කොනින් අසන්නට ලැබේ. දැන් අර්බුදය ඇත්තේ පොහොට්ටුවේය.

එය සැබෑ ලෙසම කාලයක් තිස්සේ පක්ෂ අභ්‍යන්තරයේ පැවති බරපතළ තත්ත්වයක් මතුපිටට පැමිණීමක් ලෙස දැක්විය හැකිය. එහිදී අර්බුදයේ සරල පැති කිහිපයක් එළියට පෙනෙන්නට තිබේ. ප්‍රධාන වශයෙන් මෙහි කණ්ඩායම් දෙකක් තිබේ. එම කණ්ඩායම දෙක ජනාධිපති අපේක්ෂකයාගේ සිට පළාත් පාලන ආයතන පිහිටුවීම දක්වා බෙදීමක් පෙන්වා දෙනු ලැබේ. පොදුජන පෙරමුණෙහි දේශපාලන පදනම මහින්ද රාජපක්ෂ වන අතර, එහි ප්‍රධාන මෙහෙයුම්කරුවා වන්නේ බැසිල් රාජපක්ෂය. බැසිල් රාජපක්ෂ දක්ෂ සංවිධායකයෙකු වන අතර, දේශපාලන උපායකරුවෙකි. මගේ පෞද්ගලික තක්සේරුව නම් ඔහුට සම්පූර්ණ චිත්‍රය පිළිබඳ අවබෝධයක් ඇති අතර එක්සත් ජාතික පක්ෂය තම අනෙකා ලෙස සැලකිය යුත්තේ බැසිල් රාජපක්ෂ සහ ඔහුගේ දේශපාලන වැඩපිළිවෙළයි. දීර්ඝකාලීන අර්බුදයකින් පසු ජයගැනීමට නියමිත වන්නේ එම වැඩපිළිවෙළයි.

පොහොට්ටු පක්ෂයේ අනික් පිල වන්නේ විමල් වීරවංශ ප්‍රමුඛ ජාතික පිලයි. එහි රාජපක්ෂ නියෝජනය ලෙස ඔවුන් හඳුන්වා දෙන්නේ ගෝඨාභය රාජපක්ෂය. නමුත් මා කල්පනා කරනුයේ තාවාකාලික බෙදීමක හැඩ තිබුණද රාජපක්ෂවරුන්ගේ මෙම දෙවන පරපුර නොබෙදෙනු ඇත. තුන්වැනි පරපුර එසේ විය හැකිය. ඒ වෙනුවෙන් ඇති සියලුම වාස්තවික තත්ත්වයන් නාමල් වැනි අයෙකුට තිබේ. විමල් වීරවංශ යනු මහින්ද රාජපක්ෂ නැවත දේශපාලනයට සම්බන්ධ කරවීමට මූලික අඩිතාලම දැමූ පුද්ගලයායි. ඔහුට එරෙහිව ඉතා බරපතළ නඩු කීපයක් අධිකරණයේ විභාග වේ. විශේෂයෙන් ඔහුට එරෙහි ගමන් බලපත් නඩුව බරපතළ අවදානමක පවතී. එබැවින් ඔහු ඔහුගේම රජයක් ගොඩනගා ගැනීමේ විශාල අවශ්‍යතාවකින් සිටී. එසේම දේශපාලන ලෝකයේ පාපිසි යට කතාවලට අනුව විමල් හා ජනාධිපතිවරයා අතර බරපතළ සන්ධානයක් තිබේ. එය විය හැකි තත්ත්වයකි. ඔහුට නඩු හබවලින් ගැලවීමට ආණ්ඩුවක ආරක්ෂාව අවශ්‍යයැයි සිතයි. ඒ ඔහු නියෝජනය කරනු ලබන දේශපාලනයයි. පොහොට්ටුවේ ප්‍රධාන බල කණ්ඩායම් දෙක වන්නේ මෙයයි.

මෙහිදී මහින්ද ආණ්ඩුවේ පැරණි මතවාදීමය බල කණ්ඩායම් විමල් වටා ගොනු කර ගැනීමට ඔහු සමත් වී ඇති අතර, වයසක මහින්ද රාජපක්ෂට ජාතික ලයින් එක එල්ලා පෙරහරේ ගෙන යාම ඔවුන්ගේ පරම අභිලාසය බව පෙනේ. එමගින් සිංහල ඡන්ද හා එම ඡන්ද විශාල වශයෙන් ඇති දිස්ත්‍රික්ක ජයග්‍රහණ කිරීම හෝ එම බලය කේවල් කොට ජනාධිපතිවරයා ප්‍රමුඛ ආණ්ඩුවක් හැකි ඉක්මනින් ගොඩනැගීම ඔවුන්ගේ අරමුණ වේ. 2020දී සිංහල ඡන්දවලින් පමණක් ගෝඨාභය ඉදිරිපත්කොට ජයගත හැකියැයි එම පිල සිතයි. නමුත් විමල් එසේ සිතතැයි මා විශ්වාස නොකළත් ඔහුගේ පැවැත්ම වෙනුවෙන් රාජපක්ෂවරු ජාතික පෙරහරේ ගෙන යාම අනිවාර්යය කොන්දේසියක් ලෙස ඔහු සලකනු ලබන බව පෙනීයයි. ඔහුගේ වැඩසටහනේ සාර්ථක අසාර්ථක බව මැනීමට තවම කල් වැඩි නමුත් විමල් යනු වැඩ කළ නොහැකි දේශපාලන සත්ත්වයෙකු බව ඉතිහාසය පෙන්වා දී තිබේ.

මේ අනුව ශ්‍රී ලංකා නිදහස් පක්ෂයේ අර්බුදය ජනාධිපතිවරයා පරාජය කරමින් විසඳී ඇති අතර, එක්සත් ජාතික පක්ෂය අලුත් වෙමින් අගමැතිවරයා ජයගෙන තිබේ. දැන් පොහොට්ටුවේ වාරයයි. අපි අනාගතයට ඉඩදී බලා සිටිමු.

ali-wanguwa-new-copy

කැසිල්ල

වැඩිපුර දඟලන අයකු දුටුවිට අසන්නේ කැසිල්ල හැදිලාද  කියලාය. එයින් අදහස් වෙන්නේ කැසිල්ල හැදුණු විට වැඩියෙන් දඟලන බවය. සමහර අයට කැසිල්ල හැදුණු විට තැන නොතැන නොබලා කස කසා දඟලනවාය. සමහර අය නම් කැසිල්ල නැති වුණත් ඕනෑවට වැඩිය දඟලන්නේ කැපී පෙනීම සඳහාය.

කහඹිලියා ගෑවුණු විට නැති කැසිල්ල ඇති වෙනවාය. ඉස්සර නම් වැරදි කරන දරුවන්ට දඬුවම් දෙන්නේ කහඹිලියා ගා කැසිල්ල ඇති කිරීමෙන්ය. කහඹිලියා ගෑවුණු විට ආතක් පාතක් නැතුව කසනවාය. කහඹිලියා ගෑවේ නැති වුණාට අද නම් කොල්ලන් කෙල්ලන් සෑම වෙලේම කහඹිලියා ගෑවිලා වගේ කස කසා දඟලනවාය. ඔවුන්ගේ මේ කැසිල්ල නැති වෙන්නේ කාගෙන් හෝ මට්ටු වූ පසුවය. 
විවිධ කැසිලි තියෙනවාය. ඒවා අතර වැඩිපුර ලාභ ප්‍ර‘යෝජන ලැබෙන්නේ පිට කැසිල්ලෙන්ය. කොච්චර හයිකාරයෙකුට වුණත් තමන්ගේ පිට තමන්ටම කසා ගන්නට නම් බැරිය. ඒ හින්දා තම පිට කැසිල්ලට අනුන්ගේ සහාය ලබාගන්නට සිද්ධ වෙනවාය. ඒ බව දන්න සමහරුන් අනුන්ගේ පිට කසලා නොයෙක් වාසි අත්කර ගන්නට උත්සාහ ගන්නවාය. ඒත් මේ පිට කසන්නේ ප්‍ර‘යෝගයකට යැයි කියලා දැන ගතහොත් එයින් බේරෙන්න පිට අයිතිකාරයාට පුළුවන්ය. ඒත් අද වෙලා තියෙන්නේ ඒ බව නොදන්වා පිට කැසිල්ලෙන් වාසි ලබා ගැනිල්ලය.

තුවාලයක් සුව වෙමින් පවතින විටද කැසිල්ල ඇති වෙනවාය. ඒත් එහෙම කසන්නට ගියහොත් සිදුවෙන්නේ තුවාලය තවත් වැඩිවෙන එකය. දද, කුෂ්ට ආදී රෝග හැදුණු විටද කැසිල්ල හැදෙනවාය. එම තුවාල කසන විට සුවයක් දැනුණත් කැසිල්ල නැවැත් වූ විට යළි වේදනාව දැනෙනවාය. ඒ නිසා කැසිල්ලෙන් කිසිවක් නිට්ටාවට සුව කරගත නොහැකි බව දැන ගත්තොත් හොඳය.

හිසේ කැසිල්ල ඇති වෙන්නේ හිසේ උකුණන් බෝවූ විටය. හිසේ කුණු බැදුණු විටද කැසිල්ල හටගන්නවාය. මේ හේතු දෙකම නැති වුණත් තම හිස කසන අය ඉන්නවාය. යම් ප්‍රශ්නයකට පිළිතුරක් නැති බව ව්‍යංගයෙන් පෙන්වන්නේ හිස කැසිල්ලෙන්ය. සමහර අය හිස කසන්නේ තමන්ගේ වාසියටය. අනුන්ට භය පක්ෂපාතකම පෙන්වන්නටද හිස කසන අය ඉන්නවාය. වැඩි යටහත් පහත්කම පෙන්වමින් හිස කසා වාසි ලබාගැනීම ඒ අයගේ බලාපොරොත්තුවය.

කොහොම වුණත් තුවාලය වගේම හිස කැසිල්ලෙන්ද සහනයක් දැනෙනවාය. තම හිස අන් අයෙකු ලවා කසවා ගන්නා විට ඊටත් වඩා සුවයක් දැනෙනවාය. ඒ හින්දා සමහර අය අනුන්ට කියලා හිස කසවා ගන්නට පුරුදු වී සිටිනවාය. එහෙත් එහෙම හිස කසා ගැනීමට ළං කර ගන්නා අය අන්තිමට තම බෙල්ලත් කපන්නට පුළුවන් බව දැනගත යුතුය.

හිස කැසිල්ලට වඩා අල්ල කැසිල්ල හොඳය. ඒ අල්ල කැසිල්ල ඇති වූ විට සල්ලි ලැබෙනවා යැයි පිළිගැනීමක් තිබෙන නිසාය. ඒ නිසා බොහෝ අය අල්ලේ කැසිල්ලක් ඇති වෙනවාට වඩාත් කැමතිය. එහෙත් අද නම් හොර බොරු වංචා කරන අයට අල්ල නොකැසුවත් සල්ලි ලැබිල්ල නවතින්නේ නැත්තේය. උගුරේ කැසිල්ල ඇති වෙන්නේ අසනීපවලටය. සෙම් අමාරු ඇතිවිට උගුර කසනවා යැයි කියනවාය. උෂ්ණාධික ආහාර ගත්විටද උගුර කසනවාය. ඒත් උගුරේ කැසිල්ල හැදුණත් උගුර කසා ගන්නට නම් කාටවත් බැරිය. ඒ නිසා කැසිල්ල විඳවා ගන්නට වෙනවාය.

උගුර වගේම නාසයද කසන්නේ රෝග ලක්ෂණවලටය. පීනස් අමාරුවටද නහය කසනවාය. ඇස්වල කැසිල්ල ඇතිවෙන්නේ ඇසට රොඩු වැටුණු විටය. එහෙම කැසිල්ල ඇති වූ විට කියන්නේ ඇස කෙවෙනවා කියලාය. ඇසේ කැසිල්ල නිසා කඳුළු උනනවාය. ඒ කැසිල්ලෙන් උනන කඳුළු නිසා ඇසේ වැටුණු රොඩු ඉවත්වනවා යැයි කියනවාය. ඇඟිලිකරු කසන්නේ දිය මිටියන් කෑ විටය. මඩ ගොහොරු පාගාගෙන ගිය විට මඩේ සිටින දියමිටියන් කාලා කකුල් කසන්නට පටන් ගන්නවාය. එහෙත් අද නම් වැඩි දෙනා කවදාවත් මහපොළොව පාගන්නේ නැති නිසා කකුල් කසන්නේ නැත්තේය.

ඇඟේ ලේ නරක් වුණාමත් කසනවා යැයි කියනවාය. ඇඟ කැසූවිට පළු මතු වෙනවාය. ඒ පළු තවත් කසන විට තුවාල බවට පත්වෙනවාය. පිරිසුදුකම අඩුවුණාම ඇඟ කසන්නේ කුණු බැඳීම නිසාය. ඇඟ කැසිල්ල වැඩි වුණාම කසානෝ හැදිලාය කියනවාය. ඒ නිසා කසානෝවලට බෙහෙත් නොකළත් පිරිසිදුව සිටින විට කැසිල්ල නවත්වා ගන්නට පුළුවන්ය. මිනිසා තවත් මිනිසෙකු ලවා පිට කසවා ගත්තාට වැරැද්දක් නැත්තේය. එහෙත් මිනිසෙකු ලවා පිට කසවාගත් කොටියෙකු පිළිබඳ කතාවක් තිබෙනවාය. සිල් රකින්නට යන පුංචි ගමරාළ ලවා හැමදාම තම පිට කසවා ගන්නට කොටියෙක් පුරුදුවෙලා සිටියේය. මේ පිට කැසිල්ලේ දඬුවම නිසා පුංචි ගමරාළට රෑට පැල් රකින්නට යෑම තිත්ත වෙලා තිබුණාය. මල්ලීට සිදුව ඇති මේ අකරතැබ්බයෙන් ඔහු බේරා ගන්නට එදා හේනේ පැලට ගිය ලොකු ගමරාළට කොටියා පරණ පුරුද්දට &පිට කහපිය, ගිනි පිඹපිය කියලා පවසා තිබෙනවාය. ලොකු ගමරාළ පිට කසනවා වෙනුවට ගිනි ගොඩේ දමා තිබූ ලොකු අලවංගුවකින් කොටියාගේ පිට පුළුස්සා හොඳ පාඩමක් ඉගැන්නුවේය. එදායින් පසු කොටියාගේ පිට කැසිල්ල සදහටම නැතුව ගියේය.

යුද්ධය පටන් ගත් සමයේ උතුරේ කොටිද උන්ගේ පිට කසා ගැනිල්ලට අසරණ දෙමළ ජනතාව යොදවාගෙන සිටියේය. ඒත් යුද්ධය ජයගත් පසු කොටින්ගේ කැසිල්ල නැත්තටම නැති විය.
බල්ලන් කෑවිට කැසිල්ල ඇති නොවන නමුත් බලුමැක්කන් කෑවිට නම් යහමින් කසනවාය. බල්ලාටත් කැසිල්ල හැදෙන්නේ බලුමැක්කන් බෝවූ පසුය. බලුමැක්කන් කෑවිට අපටත් කැසිල්ල හැදෙන නිසා බල්ලන් ළංකර ගැනීම නොකළ යුතුය. කොහොම වුණත් මේ කැසිල්ල ඇතිවන්නේ වල්බල්ලන්ගෙන් මිස සැපට හදන රටබල්ලන්ගෙන් නොවේය. බල්ලොත් එක්ක නිදා ගත්තොත් බලුමැක්කන් සමග නැගිටින්නට සිද්ධ වෙන්නේ කැසිල්ල හැදෙන නිසාය.

දේශපාලුවන් ඡන්දදාසලා ඉදිරියේ හිස කසන්නේ ඡන්ද ඉල්ලන්නට පටන් ගත්තාමය. ඒ ගොල්ලෝ ඡන්දෙන් දිනලා දියවන්නාවට ගියාට පසු ඡන්දදාසලාට සිද්ධ වෙන්නේ සදාකාලිකවම දේශපාලුවන් ඉදිරියේ හිස කසමින් සිටින්නටය. 

චීන නාවික ශක්තිය ලොවට හෙළි වෙයි

You-I-logo

චීනය දකුණු චීන මුහුදේ තමන්ගේ බලය පෙන්වීමට තීරණය කරන්නේ දකුණු චීන මුහුද සම්බන්ධයෙන් බටහිර රටවලට ඇති වී ඇති උනන්දුව සහ වේදනාව නිසාය. මහජන විමුක්ති හමුදාවේ නාවික අංශය ශක්තිමත් කර දකුණු චීන මුහුදේ චීන බලය වැඩි කළ යුතු යැයි ජනාධිපති ෂී ජින්පින් තීරණය කරන්නේ ඔහු චීනයේ ජනාධිපතිවරයා බවට පත්වූ අලුතය. මේ නිසාම 2012 වන විට චීන නාවික හමුදාවේ ශක්තිය මෙන් දෙගුණයක ශක්තියක් මේ වන විට ඔවුන්ට තිබේ. පසුගිය සතියේ බ්‍රහස්පතින්දා එනම්, අප්‍රේල් 12 වැනිදා ජනාධිපති ෂී චීන නාවික හමුදාවේ ශක්තිය දැකබලා ගත්තේය. 1949 දී මහජන චීන බිහිවීමෙන් පසු චීන නාවික හමුදාව තම ශක්තිය දැවැන්ත ලෙස ප්‍රදර්ශනය කළ පළමු අවස්ථාව මෙය වෙයි. මේ නිසාම චීන ජනතාවගේ පමණක් නොව මුළු ලෝකයේම අවධානය චීනය දෙසට යොමු විය. 
ජනාධිපති ෂී තමන්ගේ නාවික ශක්තිය පෙන්වීමෙන් පසුව මෙතෙක් චීන නාවික ශක්තිය දෙස දෙගිඩියාවෙන් බැලූ බොහෝ රටවල් බියට පත්ව තිබෙන බව පැහැදිලි වෙයි. විශේෂයෙන් තායිවානය මේ සම්බන්ධයෙන් දැඩි නොසන්සුන්තාවකට පත්ව සිටියි. තම බලය පෙන්වූ නාවික සන්දර්ශනයෙන් පසුව දින දෙකක කාලයක් නාවික  අභ්‍යාසවල යෙදුණු චීනය ඊයේ (18දා) තායිවාන මුහුදු සීමාව ආසන්නයේ පැය 16ක නාවික පුහුණු අභ්‍යාසයක නිරත විය. තායිවානය ඇමෙරිකාවෙන් යුදෝපකරණ සහ ගිනිඅවි ලබා ගැනීමට කටයුතු කළේ කාලයක සිටය. ඇමෙරිකාව පසුගිය සතියේ ප්‍රකාශ කළේ, තායිවානයට නවතම සබ්මැරීන් තාක්‍ෂණයද ලබාදෙන බවයි. ජනාධිපති ෂී විශ්වාස කරනුයේ තායිවානය චීනයට අයත් ප්‍රදේශයක් බවත්, එය චීනයෙන් වෙන්වීමට උත්සාහ නොකළ යුතු බවත්ය. චීනය ඊයේ මෙම නාවික අභ්‍යාසය සිදු කළේ එයට සංකේතාත්මකව විරෝධය පෑමක් ලෙස යැයි ජාත්‍යන්තර දේශාපාලන විශේලේෂකයන්ගේ අදහසයි. එහෙත් මෙය එවැන්නක් නොව තමන්ගේ අභ්‍යාසයක නිරත වීමක් පමණක් බව චීනයේ අදහසයි. 

බ්‍රහස්පතින්දා පැවැති නාවික සන්දර්ශනයේදී ජනාධිපති ෂී පැවසුවේ, චීනයට ශක්තිමත් නාවික හමුදාවක් නිර්මාණය කර ගැනීම අත්‍යවශ්‍ය බවත්, එය වෙන කවරදාටත් වඩා අද දිනයේ අවශ්‍යතාවක් වී ඇති බවත්ය. මෙහි අදහස වන්නේ දකුණු චීන මුහුදට බලපෑම් කරන කණ්ඩායම්වලට තම ශක්තිය පෙන්වීමට තමන් සුදානම් බව ලොවට දැන්වීම බව පැහැදිලිය. නාවික හමුදා සාමාජිකයන් 10,000කට වැඩි පිරිසක්, නැව් සහ යාත්‍රා 48ක්, ගුවන් යානා ප්‍රවාහනය කරන නෞකාවක්, ගුවන් යානා 76ක් සහ නවීන සබ්මැරීන් රැසක් මෙම සන්දර්ශනයට එක්විය. 

මෙහිදී නාවිකයන් ඇමතූ ජනාධිපති ෂී වැඩිදුරටත් කියා සිටියේ, චීනය සෑම අවස්ථාවකම ශක්තිමත් නාවික හමුදාවක් ගොඩනැගීමේ අභිලාෂයෙන් සිටි බවයි. එසේම වර්තමාන චීන නාවික හමුදාව නැගෙනහිර කලාපයේ ශක්තිමත්ව නැගී සිටින නවතම බලය බවට පත්ව සිටින බවද ජනාධිපතිවරයා පැවසීය. චීන කොමියුනිස්ට් පක්‍ෂයේ නායකත්වයෙන් චීනයේ සුවිශේෂ සම්ප්‍රදායන් රැකගෙන නව ආකාරයක පෙරමුණක් නිර්මාණය කිරීම සහ වර්තමාන කාලයට ගැළපෙන නාවික ප්‍රහාරක ක්‍රමයක් නිර්මාණය කරගැනීම වැදගත් බවද ඔහු පවසා සිටියේය. 

මේ අතර, පසුගියදා නිමාව දුටු Boao සමුළුවේදී චීන ජනාධිපතිවරයා පැවසුවේ, චීනය අවධානය යොමු කරනුයේ සාමකාමී සංවර්ධනයක් අත්පත් කර ගැනීමට බවයි. එසේම නව ආකාරයේ වෙළෙඳ ගනුදෙනු ගැන අවධානය යොමු කරන බවද චීන ජනාධිපතිවරයා පැවසීය. Boao සමුළුව ලෝක ආර්ථික සමුළුවට සමාන මට්ටමින් පැවැත්වෙන දැවැන්ත සමුළුවකි. මෙහිදී චීන ජනාධිපතිවරයා සිදුකළ කතාව චීන ජනතාවගේ දැඩි ප්‍රසාදයට හේතුව වී තිබේ. ඒ අනුව චීනය ආර්ථික වශයෙන් දැවැන්ත ප්‍රගතියක් කරා යන බවට විශ්වාසය චීන ජනතාවගේ සිත් තුළ ඇතිව තිබේ. 

Boao සමුළුවේදී ඒ ආකාරයෙන් අදහස් දැක්වූ ජනාධිපතිවරයා චීන නාවික හමුදා ශක්තියද පෙන්වීමට කටයුතු කිරීම බොහෝ රටවලට ලබාදුන් අනතුරු ඇඟවීමක් බව දේශපාලන විචාරකයන්ගේ මතයයි.  චීනය තවදුරටත් ආර්ථික බලවතා වෙමින් ඉදිරියට යන අතර තමන්ට අභියෝග කරන ඕනෑම අයෙකුගේ අභියෝග පිළිගැනීමට සූදානම් බව මෙයින් පෙන්වූ බව පැහැදිලිය. එහෙත් චීනය යුද කිරීමට සූදානම් නැත. තවත් රටක් මර්දනය කිරීමට සූදානම් නැත. එහෙත් තමන් මර්දනය කිරීමට යමෙකු ඉදිරියට එන්නේ නම්, සතුරා මර්දනය කිරීමට තමන් සූදානම් බව චීනය ලොවට පෙන්වා දී තිබේ. 

දත්ත තැරැව්කරණය

තොරතුරු තැරැව් කිරීම එසේත් නැත්නම් දත්ත තැරැව් කිරීම යනු මේ වන විට ලෝක මට්ටමින් විශාල කතාබහක් මෙන්ම ආන්දෝලනයක් ඇතිකර තිබෙන සිද්ධියකි. කේම්බ්‍රිජ් ඇනලටිකා නම් සංවිධානයක් විසින් ෆේස්බුක් ඔස්සේ රැස් කර ගත් තොරතුරු දේශපාලන මඩ ව්‍යාපාර ඇතුළු විවිධ කූට ක්‍රියාවන් සඳහා යොදාගැනීම හේතුවෙන් එම තත්ත්වය ඇති විණ. 

දත්ත තැරැව්කරණය 1950 දශකයේ  පමණ සිට පවතින්නකි. එහෙත් 20 වැනි සියවසේ අගභාගයේදී මෙම තත්ත්වය ශීඝ්‍රයෙන් වර්ධනය විය.

කෙසේ වෙතත්, මේ වන විට මිනිසුන්ගේ දත්ත වෙළඳාම් කිරීම විවිධ ස්වරූපවලින් සිදුකිරීම ලෝකයේ ප්‍රධාන පෙළේ තාක්ෂණික සමාගම් සිදුකරමින් සිටී. ඩිජිටල් ආර්ථිකයේ ප්‍රධාන බලවේගය බවට පත් වී ඇත්තේද දත්තයි. මෙම දත්තවලට අප කෑමට කැමති දේ, අඳින්නට කැමති, නැරඹීමට කැමති චිත්‍රපට ආදිය පිළිබඳ තොරතුරුද ඇතුළත් වේ. ගූගල් ෆේස්බුක් වැනි සමාගම් සිදුකරන්නේ එම දත්ත තවත් සමාගම්වලට විකිණීම තුළින් ඔවුනට අවශ්‍ය පාරිභෝගිකයන් සොයා ගැනීමට උපකාර කිරීමයි. 
අප කිසියම් ස්ථානයක ජංගම දුරකථනය අන්තර්ජාලයට සම්බන්ධ කරගෙන සිටියහොත් අප සිටින ස්ථානය පිළිබඳ දත්තද අපගේ අන්තර්ජාල සේවා සම්පාදකයා විසින් සමාගම් වෙත අලෙවි කිරීම සිදුවිය හැකිය. අප සිටින ස්ථානය අනුව විවිධ භාණ්ඩ හා නිෂ්පාදන පිළිබඳ දැන්වීම් අපට යොමු කෙරේ. උදාහරණයක් ලෙස ශ්‍රී ලංකාවේ සිටින අප ඉලක්ක කර ගනිමින් අපට අවශ්‍ය භාණ්ඩ හා සේවා පිළිබඳ වෙළෙඳ දැන්වීම් ලැබෙන්නේ එසේය.

උදාහරණයක් ලෙස කිසියම් ඇඳුමක් හෝ පැලඳුමක් මිලදී ගැනීම සඳහා අන්තර්ජාලය ඔස්සේ යමෙකු සොයා බැලීමක් කළහොත් විවිධ පන්නයේ වෙළෙඳනාම යටතේ දැන්වීම් අදාළ පුද්ගලයා වෙත දිගින් දිගට ගලා එයි. කේම්බ්‍රිජ් ඇනලටිකා සමාගමට එල්ල වූ චෝදනාව වූයේ ඇ‍ෙමරිකා ජනාධිපති ඩොනල්ඩ් ට්‍රම්ප් ඇතුළු විවිධ දේශපාලඥයන්ගේ මැතිවරණ ව්‍යාපාර සඳහා පොදු ජනතාවගෙන්  සොරාගත් දත්ත භාවිත කිරීමයි. 

අප කරන සෑම දෙයක් දෙසම දත්ත තැරැව්කරණයේ යෙදෙන බහුජාතික සමාගම් බලා සිටී. ඔවුන් දත්ත වගාකිරීමක් (farming data) සිදු කරයි. මෙය ඇතැම් විශ්ලේෂකයන් සඳහන් කරන්නේ අලුත් තෙල් (new oil) වශයෙනි. 
අතීතයේදී ලෝක ආර්ථිකය තුළ තෙල් සඳහා මුල්තැනක් දුන්නද දැන් දත්ත සඳහා ඒ තැන ලැබෙමින් පවතින බවයි ඔවුන් පෙන්වා දෙන්නේ. 

දත්ත තැරැව්කරණයේ ඍජු වෙළෙඳ පොළ අගය ඇ‍ෙමරිකානු ඩොලර් බිලියන 200ක් ඉක්මවයි. දත්ත තැරැව්කරණය නීතියෙන් තහනම් දෙයක් නොවූවත් දත්ත තැරැව්කරණය තුළ පාරදෘශ්‍යභාවයක් බොහෝ විට දැක ගැනීමට නොහැකිය. ඊට හේතුව නම් බොහෝ විට පාරිභෝගිකයන් නොදැන හොර රහසේ ඔවුන්ගේ දත්ත ලබාගැනීමයි. නොමිලේ ලැබෙන් මෘදුකාංග, ඊමේල් ගිණුම් ආදිය මගින් මෙසේ දත්ත සොරා ගැනීම සිදුවෙයි. 

දර්ශන අශෝක කුමාර 

 

තුන්වෙනි ලෝක යුද්ධයක්ද?

මේ ලන්ඩන් නේද නෑ මේ 1960දී ඇෆ්ගනිස්ථානයේ කාබුල් විශ්වවිද්‍යාලයේ ගත්ත ඡායාරූපයක්* මේ මාගේ මිත්‍රයන් දෙදෙනෙකු අතර සිදු වූ කතාබහකි. 1960 වර්ෂයේ කාබුල් විශ්වවිද්‍යාලය තුළදී ගත් ඡයාරූපයක් අරබයා වූ මේ කතාබහට කන්දුන් පසු එම ඡායාරූපයන් බැලීමට මටද සිත් පහළ විය. එහි සිටි කෙටි ගවුම්, අවිකණ්ණාඩි පැලඳ සිටින සිසුවියන් දුටු විට සිහිපත් වන්නේ එය යුරෝපා රටක් ලෙසය. නමුත් අද වනවිට ඇෆ්ගනිස්ථානය බටහිර රටවල් විසින් විනාශ කර හමාරය.

පසුගිය සතියේදී බටහිර රටවල් අනෙකුත් රටවල අර්බුද ඇති කරන්නේ කෙසේද යන්න පිළිබඳව සුහුරු සිතිවිලිවලින් ඉදිරිපත් කළ අතර, සිරියාව අස්ථාවර කිරීම පිළිබඳව එහි සටහනක් තැබීමි. මේ වන විට සිරියානු අර්බුදය ලෝක යුද්ධයක් කර දක්වා තල්ලු වී යන ලකුණු පෙන්නුම් කරමින් තිබේ. එම නිසා ලෝකයේ නිර්මාණය කෙරුණු අර්බුදයන් පිළිබඳව තවත් දිගුවක් මෙලෙස ලියා තබන්නට සිතුවෙමි.

පසුගිය සතියේදී ඇමෙරිකා එක්සත් ජනපදය මහා බ්‍රිතාන්‍ය හා ප්‍රංශය සිරියාවට ගුවන් ප්‍රහාර එල්ල කළේය. ඒ වෙන කිසිදු හේතුවක් නිසා නොවේ. ඉරාකයට පහරදීමට යොදා ගත් හේතුවම යොදා ගනිමින් සිරියාවටද පහර දුන්නේය. එනම් රසායනික අවි භාවිත කරන්නේය යන චෝදනාවයි. එවකට ඉරාක ජනාධිපතිවරයා වූ සදාම් හුසේන් ඇමෙරිකාවට දැඩි තර්ජනයක්ව තිබිණි. විශේෂයෙන්ම තෙල් සම්පත ඇති මැද පෙරදිග කලාපයේ බටහිර ගැත්තන් නොවන ඕනෑම නායකයකු පළවා හැරීමට බටහිර වග බලා ගත්තේය. ඇත්තෙන්ම එවකට ඉරාකය සමෘද්ධිමත් රටක් බවට පත්කළ සදාම් හුසෙන්ව ලෝකයේම පිළිකුලට භාජනය කරවූයේද මේ බටහිර රටවල්ය. 1990දී ඉරාකය කුවේටය ආක්‍රමණය කළේ තමන්ගේ තෙල් සම්පත කුවේටය විසින් හොරකම් කිරීම හේතුවෙනි. ඇමෙරිකාව, සවුදි අරාබිය, එංගලන්තය, ප්‍රංශය, ඉතාලිය වැනි රටවල් එකතු කරගෙන ඉරාකයට පහර දුන්නේය. බටහිර රටවලට ඉරාකය කුවේටයට පහරදීම හොඳ ඉල්ලමක් විය.මන්ද ඒ හරහා මැද පෙරදිගට සේන්දු වීමටත්, බටහිර ගැති නායකයෙකු නොවූ සදාම් හුසේන්ව මට්ටු කිරීමටත් ඔවුනට හැකිවීම හේතුවෙනි.
ඉරාකයට පහර දීමට මත්තෙන් බටහිරට ගැති මාධ්‍ය මගින් කුවේට ආක්‍රමණය සදාම් හුසේන්ගේ අත්තනෝමතික තීරණයක් බව ප්‍රකාශ කළේය. එසේම සදාම් හුසේන් රසායනික අවි භාවිත කරන බවට ඒවා මගින් ලෝකය පුරාවටම සන්නිවේදනය කළේය. එකල ඉරාකයට පැමිණි ඇමෙරිකානු සොල්දාදුවන් රසායනික අවිවලට, විෂ වායූන්ට මුහුණදීම සඳහා ආරක්ෂිත ආවරණ පැලඳගෙන සිටින විඩීයෝ පට හා ඡායාරූප ලෝකය පුරාම ප්‍රචාරය කළේය. බටහිර මාධ්‍ය සදාම් හුසේන්ව හැඳින් වූයේ (Butcher of Bhagdad) බැග්ඩෑඩයේ මස් වෙළෙන්දා ලෙසටය. මෙසේ සදාම් හුසේන්ව ලෝකයේම දුෂ්ටයා බවට පත්කළේය. ඉන් අනතුරුව නැවත 2003දී ඉරාකයට පහර දුන් ඇමෙරිකාව ප්‍රමුඛ බටහිර රටවල් සදාම් හුසේන්ව අල්ලා එල්ලා මරා දැමීය. ඉරාකය අස්ථාවර කළ ඇමෙරිකාව ඉරාකයේ තම හමුදා සේනාංක ස්ථාපිත කළේය. විශේෂයෙන්ම ඉරානය, සිරියාව වැනි බටහිර ගැති නොවන රටවල්වලට තර්ජනයක් වීමටත් ඕනෑම අවස්ථාවක ඔවුනට පහරදීමටත් තම හමුදා ඉදිරි පෙළක් (Front line) නිර්මාණය කළේය.

පාකිස්තානයේ හිටපු අගමැතිනි බෙනාසීර් භූතෝගේ ඝාතනයද බොහොම සැකසහිතය. අදටත් බෙනාසීර්ගේ ඝාතනය පිළිබඳ නිශ්චිත තොරතුරු නැත. පාකිස්තානය යනු ලෝකයේ ආර්ථික බලවතුන්ගේ ලැයිස්තුවේ මුල් 10 අතරට පැමිණිය හැකි රටක් ලෙස හඳුනාගෙන තිබේ. පකිස්තානය ස්ථාවර වීම කිසිසේත්ම බටහිරට හිතකර නැත. මන්ද ඇෆ්ගනිස්ථානය අස්ථාවර කිරීමට සුදුසුම ස්ථානය වන්නේ පාකිස්තානය වීමයි. පසුගිය කාලවකවානුව පුරාම කිසිදු රාජ්‍ය නායකයෙකු පාකිස්තානය තුළ ස්ථාවර වූයේ නැත. පාකිස්තානයේ හිටපු ජනපති ජෙනරාල් සියා උල්හක් ගුවන් අනතුරක් නිසා ජීවිතක්ෂයට පත්විය. මෑත භාගයේ බෙනාසීර් භූතෝට විශාල ජනබලයක් ගොඩනැංවී තිබිණි. පකිස්තානය ආර්ථිකමය වශයෙන් ගොඩදාන්නට හැකි යැයි මතයක් බෙනාසීර් ගැන පාකිස්තාන වැසියන් අතර තිබිණි. ජනරාල් ෆිර්වේස් මුෂාරෆ්ව එපා වී තිබූ පාකිස්තානයට බෙනාසීර් භූතෝගේ ආගමනය මහත් අස්වැසිල්ලක් විය. නමුත් රාවල්පිණ්ඩි නගරයේ සිදු වූ බෝම්බ පිපිරීමකින් බෙනසීර්ව ඝාතනය කළේය. අදටත් පාකිස්තානය අස්ථාවරය.

ආසියානු කලාපය තුළ ක්‍රිකට් යනු අතිශය ප්‍රචලිත ක්‍රීඩාවකි. 
ශ්‍රී ලංකාව, ඉන්දියාව, බංගලිදේශය, ඇෆ්ගනිස්තානය තුළ ක්‍රිකට් යනු ආගමක් මෙන්ය. ක්‍රිකට් හරහාද මේ රටවල් අතර සුහඳතාවයන් ගොඩනැගී තිබිණි. ඉන්දියාවෙන් කැඩී ගිය බංග්ලාදේශය හා පකිස්තානය යන රටවල් සමග ඉන්දියාව තරග කළේය. ඒ හරහා ක්‍රිකට් සංස්කෘතියක් බිහිවී තිබිණි. මෙම සංහිඳියාවන් බටහිරට එතරම් සුබවාදී වූයේ නැත. පාකිස්තානයේ ත්‍රස්ත ක්‍රියා වැඩිවෙන තරමට බටහිර කැමතිය. ඒ ඇෆ්ගනිස්ථානයට අත පෙවීමට ලෙහෙසි වන නිසාය.
ඒ වගේම ක්‍රිකට් හරහා සිදුවන බැඳීම නොකැඩුවහොත් පාකිස්තානය හා අනෙකුත් රටවල් අතර ඇතිවන සබඳතාවයන් තව තවත් ශක්තිමත් වන බව බටහිර දුටුවේය. පාකිස්තානයේ ලාහෝර්හි ගඩාෆි ක්‍රීඩාංගණයේදී ශ්‍රී ලංකා ක්‍රිකට් කණ්ඩායම ඉලක්ක කර ගනිමින් ත්‍රස්ත ප්‍රහාරයක් එල්ල කෙරුණි. මේ ත්‍රස්තවාදී කණ්ඩායම් සියල්ල බටහිර බළල් අත්ය.

ඇමෙරිකාවේ බළල් හස්තයන් වූ තලේබාන් හා අල්කයිඩා ත්‍රස්ත කණ්ඩායම් රුසියාව අස්ථාවර කිරීමට හා ඇෆ්ගනිස්තානය අඩපණ කිරීමට පාවිච්චි කළේය. අද රසායනික අවි ගැන කතා කරන ඇමෙරිකාව ප්‍රමුඛ බටහිර රටවල් අලුත්ම සංඛ්‍යා ලේඛනවලට අනුව මිලියන 20ක් ජනතාව ඝාතනය කර තිබේ. වියට්නාමය, කොරියාව, ඉරාකය වගේම වෙනත් රටවල කළ ඝාතනයක් මීට අයත්ය. එදා ඔවුහු ජපානයේ හිරෝෂිමා නාගසාකි නගරවලට න්‍යෂ්ටික බෝම්බ හෙළා ලක්ෂ ගණනන් ජනතාව මරා දැමූහ. වියට්නාම යුද්ධයේදී රසායනික ද්‍රව්‍ය දමා කැලෑ සම්පූර්ණයෙන්ම විනාශ කළේය. කොරියානු යුද්ධයේදී කොරියාව විනාශ කළේය. ඇෆ්ගනිස්ථානය විනාශ කළේය. මෙසේ විනාශ කළ රටවල විශේෂයෙන් කොරියාව, ජපානය හා ඇෆ්ගනිස්තානයේ හමුදා කඳවුරු ඉදිකර ගත්තේය.
දැන් සිරියාවට පහර දෙමින් ඇමෙරිකාව සම්පත් සූරාගෙන කෑමේ මෙහෙයුම පටන් ගෙන තිබේ. නමුත් අද වනවිට තත්ත්වය සම්පූර්ණයෙන්ම වෙනස්ය. මේ වන විට රුසියාව ඇමෙරිකාවට අභියෝග කිරීමට තරම් තැනකට පත්ව තිබේ. එදා වගේ ඇමෙරිකාවට ඕනෑ දේ දැන් කරන්නට බැරිය. සීත යුද්ධ කාලයේ ඇමෙරිකාව විසින්ම පෝෂණය කළ රටවල්ම අද රුසියාවට නැඹුරු වී තිබේ. 

ඩොනල්ඩ් ට්‍රම්ප්ගේ අණ කිරීමෙන් සිරියාවට ක_ස් මිසයිල ප්‍රහාර හා ගුවන් ප්‍රහාර එල්ල කරමින් සිටියි. ඒ රුසියාවේ අනතුරු ඇඟවීම ගණනකට නොගෙනය. නමුත් රුසියාව යම් හෙයකින් සිරියාව අසල මුහුදු තීරයේ ඇති ඇමෙරිකානු යුද නැව්වලට පහරදී විනාශ කළහොත් එකල ප්‍රංශයේ විසූ අනාවැකිකරුවෙකු වූ නොස්ට්‍රඩමුස්ගේ අනාවැකිය ටක්කෙටම හරියනු ඇත.

මහා බලවතුන් අතර හටගන්නා යුද්ධයක් නිසා වසර ගණනක් යුද්ධය පවතිනු ඇත. එය අවසානයේ සාමය උදාවනු ඇත. නමුත් මේ සාමය සතුට විඳ දරා ගැනීමට ඉතිරි වන්නේ ලෝකයෙන්ම බොහොම සුළු පිරිසකි* යන්න ඔහුගේ අනාවැකියයි.
ලෝක බලවතුන් බවට පත්වීමට යන අරගලයේදී අවසානයේදී අප වැනි රටවලට වන්නේ තැළී පෙළී විනාශ වී යාමටය. රටට හිතකර නොවන පාවිච්චි වීමට නුසුදුසු රටවල් ඉවත් කර දැමීම ඉදිරි විදේශ ප්‍රතිපත්ති සැලසුම් හදන සියල්ලන්ගේම අවධානයට යොමු විය යුතු කරුණකි.

නිපුන් ඒකනායක

 

 

බටහිර බුදුදහම

DARSHAN

බටහිර බුදුදහම යැයි  බුදුදහමේ ප්‍රභේදයක් මේ වන විට ගොඩනැගී තිබේ. බටහිර බුදුදහම ලෙස හඳුන්වනු ලබන්නේ ආසියාවෙන් බැහැරව වර්ධනය වී ඇති බුදුදහමයි. ඇමරිකා එක්සත් ජනපදය, යුරෝපය, ඔස්ට්‍රේලියාව, නවසීලන්තය වැනි රටවල ව්‍යාප්ත වී ඇති බුදුදහම බටහිර බුදුදහම ලෙස හඳුන්වනු ලැබේ.  

කෙසේ වෙතත්, බුදුදහම බටහිර ලෝකයට විවර වීම සියවස් ගණනක් ඈතට ඇදී යයි. බටහිර ලෝකයට බුදුදහම පිළිබඳ අදහස මුලින්ම ලැබෙන්නේ ඇලෙක්සැන්ඩර් අධිරාජ්‍යයා මධ්‍යම ආසියාවේ සහ ඉන්දියාවේ ඇතැම් කොටස් ආක්‍රමණය කිරීමත් සමගිනි. එසේම, අශෝක අධිරාජ්‍යයාගේ ධර්මදූත සේවාවන් මගින්ද බුදුදහම පිළිබඳ පණිවුඩය බටහිර ලෝකයට ලැබිණ.

එහෙත් යටත්විජිත ව්‍යාප්ත වීමත් දහනම වැනි සියවසෙන් පසු බටහිර විද්වතුන් බුදුදහම පිළිබඳ සොයා බැලීමට යොමු වීමත් සමග බටහිර ලෝකය තුළ බුදුදහම ව්‍යාප්ත වීම ශීඝ්‍ර වශයෙන් සිදුවිය. බුදුදහම පිළිබඳව ඉංග්‍රීසි ඇතුළු බටහිර භාෂාවලින් පොතපත ලියවීමත් අර්ථ විවරණ සැපයීමත් දාර්ශනික හැදෑරීම් සිදු කිරීමත්  සිදුවන්නේ 19 වැනි සියවසෙන් පසුව බව පැහැදිලි වන කරුණකි. 

ජර්මානු දාර්ශනිකයකු වූ ෂෝපන්හවර් මෙන්ම ඇමෙරිකානු විද්වතෙකු වූ හෙන්රි ඩේවිඩ් තොරෝ  වැනි දාර්ශනිකයන්ගේ පුරෝගාමී හැදෑරීම් මෙහිදී කැපී පෙනෙයි.  දහනම වැනි සියවස අවසන් වන විට බටහිර ලෝකය තුළ බුදුදහම ජනප්‍රිය සංස්කෘතියේ කොටසක් බවට පත් වී තිබිණ. එහි ප්‍රතිඵලයක් වශයෙන් පරමවිඥානාර්ථවාදීන්  වූ  හෙන්රි ස්ටීල් ඕල්කට්තුමා, හෙලේනා බ්ලැවැට්ස්කි මැතිනිය වැනි අය ආසියාතික රටවලට පැමිණ බුදුදහම හැදෑරූහ.

ඇමරිකා එක්සත් ජනපදයට සංක්‍රමණය වූ චීන ජාතික භික්ෂූන් නිසාද 19 සියවස අගභාගයේදී බටහිර ලෝකය තුළ බුදුදහම ව්‍යාප්ත වීම සිදුවිය. සෙන් බුදුදහම පිළිබඳ ලොව එතෙක් මෙතෙක් බිහි වූ විශිෂ්ටතම ආචාර්යවරයකු ලෙස සැලකෙන ඩී. ටී. සුසුකි ඇමරිකා එක්සත් ජනපදයට සම්ප්‍රාප්ත වීම 19 වැනි සියවසේ අග භාගයේදී සිදු වූ විශේෂිත දෙයකි. එතුමාගේ ඉගැන්වීම් ඇමරිකා එක්සත් ජනපදය තුළත්, සෙසු බටහිර ලෝකය තුළත් සෙන් බුදුදහම ප්‍රචලිත කිරීමට බෙහෙවින් ඉවහල් විය. 
කෙසේ වෙතත්, බටහිර ලෝකය තුළ බුදුදහම ව්‍යාප්ත වීම සිදුවන්නේ නව ප්‍රශාඛාවක් ලෙසිනි. එය ආසියාතික බුදුදහමට වඩා වෙනස් වූ ස්වරූපයක් ගන්නා අතර, බටහිර දාර්ශනික කතිකාවන් සමග මිශ්‍ර වීමද සිදුවෙයි. මෙය ඇතැම් උගතුන් විසින් බෞද්ධ නූතනවාදය (Buddhist modernism) ලෙසද  හැඳින්වේ. බුදුදහම තුළට බටහිර ලෝකය තුළ ව්‍යාප්ත වී තිබූ බුද්ධිවාදය, අදේවවාදය, විද්‍යාත්මක ස්වභාවවාදය, රොමාන්තිකවාදය වැනි දෑ එක්විය. එබැවින් නැගෙනහිර බෞද්ධ ලෝකය තුළ බුදුදහම අර්ථ නිරූපණය වූ ආකාරයට වඩා වෙනස් වූ ආකාරයකින් බටහිර ලෝකය තුළ බුදුදහම අර්ථ විවරණය විය.  

බටහිර ලෝකය මෙසේ අර්ථ නිරූපණය වූ බුදුදහම ආසියාතික මෙන්ම බටහිර උගතුන් මගින් නැවතත් ආසියාව වෙතම පැමිණීමේ ස්වභාවයක්ද විසිවැනි සියවස අගභාගයේදී සහ විසි එක් වන සියවස මුල් භාගයේදී දැකගැනීමට ලැබිණි. බෞද්ධ නූතනවාදය තුළදී අවධානයට යොමු වූ ප්‍රධාන ක්ෂේත්‍රයක් වූයේ එවක විද්‍යාවේ පිළිගැනුණු  මනස සහ ශරීරය අතර වෙනස තහවුරු කිරීමයි. ඊට අතිරේකව භාවනාව කෙරෙහි බටහිර බුදුදහම තුළ වැඩි ඉඩක් සම්පාදනය කෙරුණු අතර, විපස්සනා භාවනා ව්‍යාපාර මෙන්ම භාවනා අසපු ගොඩනැගෙන්නට විය. 
එය බොහෝවිට බටහිර ලෝකය තුළ තොරෝ වැනි දාර්ශනිකයන් ව්‍යාප්ත කරමින් තිබූ පරමෝත්කෘෂ්ටවාදය සමග සබැඳියාවක් ඇති කර ගත්තේය. ඩේවිඩ් මැක්මහන් නමැති ආගමික අධ්‍යයනය පිළිබඳ මහාචාර්යවරයා පෙන්වන ආකාරයට බටහිර බුදුදහම අතිවිශාල වශයෙන් බටහිර නූතනවාදය වෙතින් පෝෂණය වූවක් වන අතර, බටහිර අදහස්වලින් සංවර්ධනය වූවකි. 

 

තියෙන අර්බුද මදිවට ඇති කරන අර්බුද

Suhuru

රටක් මිලදී ගන්න ඕනෙ නම් විකුණන්න අය ඉදිරිපත් වෙනවා* මෙහෙම කිව්වේ පැනමාවේ හිටපු නායකයෙකු වූ මැනුවෙල් නොරියේගාය. මැනුවෙල් නොරියේගා සම්පූර්ණයෙන්ම බටහිර ගැත්තෙකු විය. නමුත් ඔහුට මිය යන්නට සිදු වුණේ ඇමෙරිකාවේ හිර ගෙදරකය. මොහුගේ ප්‍රකාශය ඉතාමත් බැරෑරුම්ය. දේශපාලනිකව හිතන පතන අයට නම් මෙහි ඇති ගැඹුරු හරය වටහා ගන්නට එච්චර අපහසු වන්නේ නැත. ඇත්තටම ලෝකය පුරාවටම තමුන්ට උපක්‍රමිකව වැදගත්කමක් ඇති රටක් වේ නම් තමන් සතු සියලු ශිල්ප පෙන්නා එම රටවල් උපායශීලී ලෙස අත්පත් කර ගැනීමට බටහිර ඉතා දක්ෂය. මේ සියලු ලෝක අර්බුදවලට පසුබිම් කතාවක් ඇත. මෙය නිර්මාණශීලී ව්‍යාකූලතාවක් ලෙස හඳුන්වයි. 

අප රටවල් මෙන් නොව ඇමෙරිකාව වගේ බටහිර රටවල්වල විදේශ ප්‍රතිපත්තියක් හදන්නේ ඉදිරිය බලාය. ලෝක බලවතුන් වීමට නම් ඔවුනට සම්පත් අවශ්‍යය. සම්පත් ලබා ගැනීමට එරෙහි වන්නන් මර්දනය කළ යුතුය. ඒ සඳහා යුදෝපායමාර්ගිකව වැදගත් වන්නාවූ භූමි ප්‍ර‘දේශ අවශ්‍යය. එම රටවල් බලෙන් හෝ දේශපාලනික වශයෙන් හෝ අබ්බගාත කර බටහිර රූකඩ ලෙස තබා ගන්නා බව නොරහසකි.

ලෝක යුද්ධයෙන් පසුව බටහිරට මහත් ගැටලුවක්ව පැවතුණේ මැදපෙරදිග හා ආසියානු මුස්ලිම් රටවල් දැඩි ලෙස ප්‍රගතිශීලී ආණ්ඩුවලින් පාලනය කිරීමයි. ඛනිජ තෙල් සම්පත් ඇති අරාබි රටවල් වේගයෙන් සමාජවාදී කොමියුනිස්ට් මතවාදයන්ට කෙමෙන් නැඹුරු වන්නට පටන් ගත්තේය. විශේෂයෙන්ම ඉරානය තුළ තෙල් ඒකාධිකාරය පැවතුණේ %British Petroleum Corperation^ එකටය. නමුත් එවකට ඉරාන අගමැති වූ එමෙන්ම ප්‍රගතිශීලී නායකයකු වූ මොහොමඩ් මොසඩේ (Mohommad Mosaddegh) තෙල් සම්පත් ජනසතු කළේය. එවකට තෙල් ඒකාධිකාරය පැවැති බටහිරට මේ හේතුවෙන් කේන්ති ගියේය. 1951 සිට 1953 දක්වා බලයේ සිටි මොහොමඩ් මොසඩේව ඇමෙරිකානු හා එංගලන්ත ඔත්තු සේවාවල ආධාරයෙන් බලයෙන් පහකළ බව නොරහසකි. විවෘත ආර්ථිකයේ සතුරා යනු ජනසතු කිරීමයි. සූවස් ඇළ යනු ආර්ථික වශයෙන් ඉතාම වැදගත් ස්ථානයකි. එය නැව් ගමන්ගන්නා වටිනාම ඇළ මාර්ගයකි. මෙම සූවස් ඇළ අයිති වන්නේ ඊජිප්තුවටය. 1869 සිට බ්‍රිතාන්‍ය හා ප්‍රංශය මගින් පාලනය වූ සූවස් ඇළ 1956 ජූලි 26 වැනි දින ජනසතු කළේ එවකට ඊජිප්තු ජනාධිපතිවරයාව සිටි අබ්ඩෙල් නසර්ය. (Gamal Abdel Nasser) සූවස් ඇල පිළිබඳව ලෝක බලවතුන් රත්විය. මෙය අර්බුදයක් නිර්මාණය කළේය. ඊශ්‍රා‘යෙලය කුලප්පු කළ බටහිර ජාතීහු ඊජිප්තුවට පහර දුන්හ. ඊජිප්තුව අස්ථාවර කළහ.

සිරියාව යනු මැදපෙරදිග ඇති විශිෂ්ට රටකි. එය උපක්‍රමික වශයෙන් වැදගත් භූමියකි. විශේෂයෙන්ම තෙල් සම්පත වගේම යුරේෂියාවට තෙල් ප්‍රවාහනය කරන නළ පිහිටා ඇත්තේද යේමනය හා සිරියාව හරහාය. වසර ගණනක් තිස්සේ සිරියාව අස්ථාවර කර තිබේ. 1954 සුක්‍රී අල් ක්වාට්ලි රජය අර්බුදයකට පත්කළදා පටන් අද වනතුරු සිරියාවට ගැලවීමක් නොමැත. සිවිල් යුද්ධවලින් සිරියාව ව්‍යාකූල කර තිබේ. නමුත් බටහිර ගැති නැති බෂාර් අල් අසාඩ් (Bashar al-Assad)ට එරෙහිව නොයෙකුත් අවලාද නගන්නේ එහෙයිනි. ජනාධිපති බසාර් අල් අසාඩ් තමන්ගේ ජනතාවටම බෝම්බ ගසන්නේ යැයි මඩ ප්‍රචාර බටහිර මාධ්‍ය දියත් කරමින් සිටී. එදා 1954දී එවකට සිරියාවේ ඇමෙරිකානු තානාපතිවරයා ඇමෙරිකානුවන් සිරියාවේ අර්බුධ නිර්මාණය කරන විට පවසා තිබුණේ &මේ කරන්න යන්නේ වැරදි දෙයක්. මේ දේ කරන්න එපා කියාය* හැබැයි එදා ව්‍යාකූල කළ සිරියාවට අද වනතෙක් ගොඩ ඒමක් නැත.

රුසියාවට විරුද්ධව එදා පාවිච්චි කළ ඇෆ්ගනිස්තානයටද වූයේ ඇමෙරිකානු ග්‍රහණයට යට වීමටය. ඇෆ්ගනිස්තානයට පහරදී බටහිරට අවශ්‍ය වූයේ වෙන කිසිවක් නොවේය. ඇෆ්ගනිස්තානය යනු මධ්‍යම ආසියාව වගේම අප්‍රිකානු හා ආසියාතික රටවල්වලට හොඳ පිවිසුමකි. ඒ වගේම යුරේෂියාවටද පිවිසුම් මාර්ගයකි. ඇෆ්ගනිස්තානයට එක පාරටම පහර දෙන්නට ඇමෙරිකාවට බැරි විය. මුලින්ම තලෙයිබාන් යන ත්‍රස්තවාදීන් සංවිධානයක් ඇතැයි ලොව පුරා ප්‍රචාරය කළේය. එකල තලෙයිබාන්වරුන්ට ලෝකය සමග තියා කිසිදු විදෙස් මාධ්‍යයක් සමග හෝ ගනුදෙනුවක් නොවීය. නමුත් ලෝකයේ ජනප්‍රියතම ප්‍රවෘත්ති නාළිකාවන් මගින් ඇෆ්ගනිස්ථානයේ බාමියාන්හි ඉපැරණි බුද්ධ ප්‍රතිමා වහන්සේලා විනාශ කර දමන අයුරු ප්‍රචාරය කළේය. මෙයින්  වූයේ ඇෆ්ගනිස්තානය කෙරෙහි ආසියානු බෞද්ධ ප්‍රජාව තුළ දැඩි අප්‍රසාදයක් ඇති වීමයි. මේ සමගම සැප්තැම්බර් 11දා ඇමෙරිකාවට ප්‍රහාරයක් එල්ල විය. පෙන්ටගනයට උඩින් මැස්සෙකුටවත් යන්නට බෑ කියපු ඇමෙරිකාවට මෙම ප්‍රහාරය එල්ල වීම ගැනත් ඇත්තේ සැකයකි. එනම් ඇෆ්ගනිස්ථානයට පහරදීමට තවත් මාර්ගයක් සදා ගැනීමට මෙම ප්‍රහාරය ඔවුන්ම සැලසුම් කළාද යන්නයි. මන්ද ඇෆ්ගනිස්ථානය යනු ලෝකයේ දේශපාලනික මෙන්ම ආර්ථිකමය වශයෙන්ද මර්මස්ථානයක් බැවිනි. ඇෆ්ගනිස්ථානයට පහර දුන් බටහිර රටවල් කළේ ලක්ෂ දෙකක හමුදාවකින් සමන්විත ඉදිරි පෙළක් (Front Line) එකක් නිර්මාණය කර ගැනීමයි. මේ මගින් ඕනෑම අවස්ථාවක මධ්‍යම, දකුණු ආසියාවට වගේම අප්‍රිකාව හා රුසියාවටද තර්ජනයක් වීමට පුළුවන.

අග්නිදිග ආසියාවේ මියන්මාරය, තායිලන්තය මේ වන විට ජීවත් වන්නේ බෞද්ධ අන්තවාදීන් ලෙසට යැයි ප්‍රචාර ගෙන යමින් පවතී. පැසිෆික් සාගර කලාපය කේන්ද්‍ර කොටගත් ආර්ථිකයක් දැන් ඉන්දියානු සාගර කලාපය කේන්ද්‍රකර ගනිමින් නිර්මාණය වෙමින් තිබේ. ඒ නිසා ඉන්දියාව, ලංකාව හා අග්නිදිග ආසියානු රටවල් බටහිරට අත්‍යවශ්‍යව තිබේ.

හයිටි රාජ්‍ය මෙන්ම චිලී රාජ්‍යයද මෙවැනි බටහිර අතපෙවීම් හේතුවෙන් ව්‍යාකූල වූ රටවල්ය. සැල්වදෝර් අයන්ඩේ එවකට චිලී රටේ නායකයාය. මාධ්‍ය පාවිච්චි කර ප්‍රගතිශීලී නායකයෙකු වූ අයන්ඩේට මඩ ගසා ඇමෙරිකන් ගැති ඔගස්ටෝ පිනෝෂේ බලයට පත්කළේය. චිලී රටද දැන් නැත්තට නැතිවී ගොසිනි. හයිටිය සීනි නිෂ්පාදනය අතින් ඉහළ මට්ටමක සිටි රටකි. ඒ වගේම කැරිබියන් දූපත් ආශ්‍රිතව තිබූ ස්වයංපෝෂිත රාජ්‍යයකි. නමුත් බටහිර රූකඩ පාලකයන් හයිටිය විනාශ කළේය.

බටහිර රාජ්‍ය අර්බුද මවන්නේ ඔවුනට වාසි වන භූමි උපක්‍රමශීලීව අල්ලා ගැනීමටය. එම නිසා අපේ දේශපාලඥයන්ද මේ ගැන සැලකිලිමත් විය යුතුය. බලය සදාකාලික නොවේ. හැබැයි ජනතාව තාවකාලික වන්නේ නැත. ජීවත් වන්නට රටක් ඉතිරි විය යුතුය. එබැවින් බටහිර නූල් සූත්තරවලට හසු නොවී රටත්, ජනතාවත් බේරා ගෙන ඉදිරියට යෑම ජනතා ඡන්දයෙන් තේරී පත් වූ ජනතා නියෝජිතයන්ගේ වගකීමය. අපට තවත් හයිටිය මෙන් රටක් වීමට වුවමනාවක් නැත.

නිපුන් ඒකනායක

 

පැරදුණත් දිනූ විශ්වාසභංගය

Namal-කුරහන්-සුවඳ

 

අග්‍රාමාත්‍ය රනිල් වික්‍රමසිංහ මහතාට එරෙහිව ඉදිරිපත් වූ විශ්වාසභංග යෝජනාව එතුමා ජයග්‍රහණය කළද විශ්වාසභංගය ගෙන ඒම හරහා දිනුවත්, පැරදුණත් ජයග්‍රහණය ලබාගත් පාර්ශ්වය වූයේ ඒකාබද්ධ විපක්ෂයයි. ඒ පිළිබඳ පැහැදිලි කිරීමට මත්තෙන් මෙම විශ්වාසභංග යොජනාව පරාජයට පත්වීමට බලපෑ ප්‍රධාන හේතුවක් වූයේ ආණ්ඩුව නියෝජනය කරන ශ්‍රී ලංකා නිදහස් පක්ෂයේ මන්ත්‍රී කණ්ඩායමෙන් එක් පාර්ශ්වයක් කළ පාවාදීමක් බව කිවයුතුය.
ඇතැම් මන්ත්‍රීවරු විශ්වාසභංග යෝජනාව බාරදෙන අවස්ථාවේදී එයට අත්සන් කළද, ඡන්දය විමසන අවස්ථාවේ පාර්ලිමේන්තුවට පැමිණ නොසිටියහ. නමුත් බොහෝ දෙනෙකු සඳහන් කළේ අග්‍රාමාත්‍යවරයාට එරෙහිව ඉදිරිපත් වූ විශ්වාසභංග යෝජනාවට පක්ෂව හිටපු ජනාධිපති මහින්ද රාජපක්ෂ මහතා ඡන්දය ප්‍රකාශ නොකරනු ඇති බවයි

එම මත සියල්ලම පුස්සක් බවට පත්කරමින් ඔහු අග්‍රාමාත්‍යවරයාට එරෙහි විශ්වාසභංග යෝජනාවට පක්ෂව ඡන්දය ප්‍රකාශ කළේය. දේශපාලකයන් වේවා පුද්ගලයන් වේවා අන්තර්පුද්ගල සබඳතා පවත්වාගැනීම සාමාන්‍ය දෙයකි. නමුත් දේශපාලනයේදී ඒ සියල්ලටම වඩා පෙරට එන්නේ රටය. මහින්ද රාජපක්ෂ මහතා සියල්ලටම පෙර රට ගැන සිතන හෙයින් විශ්වාසභංග යෝජනාවට පක්ෂව ඡන්දය භාවිත කළේය.

ශ්‍රී ලංකා නිදහස් පක්ෂයේ පිරිසක් මෙය පාවා නොදෙන්නට රනිල් වික්‍රමසිංහ මහතාට එය පහසුවෙන් ජය ගැනීමට අවස්ථාවක් උදා නොවනු ඇත. ආණ්ඩුව නියෝජනය කරන නිදහස් පක්ෂ මන්ත්‍රීවරු 26ක් ජන්දය භාවිත කිරීම වැළකීමෙන් පෙන්නුම් කළේ ඔවුන් බැඳුම්කර වංචාව අනුමත කරන බවයි, ජාතිවාදය අනුමත කරන බවයි. ඒ අනුව ඔවුහු තාන්නමාන්න වරදාන වරප්‍රසාද වෙනුවෙන් අග්‍රාමාත්‍යවරයා ආරක්ෂා කළහ.

කෙසේ වෙතත් ඔවුන්ට 2020දී ජනතාව ඉදිරියට යෑමට සිදුවෙයි. එහිදී ජනතාව ඔවුන්ට නිසි පාඩමක් උගන්වනු ඇත. ආණ්ඩුවේ සිටිමින් අග්‍රාමාත්‍ය රනිල් වික්‍රමසිංහ මහතාට එරෙහිව ඉදිරිපත් වූ විශ්වාසභංග යෝජනාවේදී පක්ෂව ඡන්දය භාවිත කළ නිදහස් පක්ෂ අමාත්‍යවරුන්  පිළිබඳවද මෙහිදී වචනයක් නොකියා බැරිය. ආණ්ඩුවේ සිටිමින් හෝ ඔවුන් ආණ්ඩුවට විරෝධය දැක්වීමට කොන්දක් පැවතීම සුබදායක කරුණකි.

විශ්වාසභංග යෝජනාවට විරුද්ධව ඡන්දය ප්‍රකාශ කළ පාර්ශ්ව අතර දෙමළ ජාතික සන්ධානයද වෙයි. නව ආණ්ඩුක්‍රම ව්‍යවස්ථාවක් මාස තුනක් ඇතුළත ගෙන එන බවට අග්‍රාමාත්‍ය රනිල් වික්‍රමසිංහ මහතා දුන් පොරොන්දුවක් අනුව ඔවුහු විශ්වාසභංග යෝජනාවට විරුද්ධව ඡන්දය ප්‍රකාශ කළහ. එතැන මන්ත්‍රීවරු 16 දෙනෙකි. ආර්. සම්බන්ධන් මහතාගේ දෙමළ ජාතික සන්ධානය පාර්ලිමේන්තුවේ නිල විපක්ෂය ලෙස කටයුතු කළද ඔවුහු ආණ්ඩුවට අවශ්‍ය දෑ විපක්ෂයේ සිටිමින් සිදුකරති. ඔවුන්ගේ ඡන්දය අනුව ඉදිරියේදී රට බෙදන ව්‍යවස්ථාවක් නිර්මාණය වනු ඇත.

විශ්වාසභංගය ඒකාබද්ධ විපක්ෂය දිනුවත් දිනුම්, පැරදුණත් දිනුම් යැයි ප්‍රකාශ කිරීමට හේතු කිහිපයක් තිබෙන අතර එය මෙලෙස පැහැදිලි කළ හැකිය. විශ්වාසභංගයට පක්ෂව ඡන්දය භාවිත කරන බවට ශ්‍රී ලංකා නිදහස් පක්ෂයේ පාර්ලිමේන්තු මන්ත්‍රී කණ්ඩායම ඒකමතිකව තීරණය කර ඡන්ද විමසීම පැවැත්වෙන දින උදෑසන බහුතරයක් ඡන්දය ප්‍රකාශ කරන අවස්ථාවේදී පාර්ලිමේන්තුවට නොපැමිණියහ. ඒ තම තනතුරු, වරදාන වරප්‍රසාද ආරක්ෂා කරගැනීම වෙනුවෙනි. ඒ අනුව ඡනතා ඡන්දය වරදාන වරප්‍රසාද වෙනුවෙන් භාවිත කරන මන්ත්‍රීවරුන් පිළිබඳ අවබෝධයක් ලබාගැනීමට ජනතාවට අවස්ථාව ලැබිණි. එය විශ්වාසභංගය පරාජය වුවද අප ලද ජයග්‍රහණයකි.

මේ හරහා යහපලාන ආණ්ඩුව බෙදීමකට ලක්වූ අතර, රට ගැන සිතා විශ්වාසභංගයට පක්ෂව නිදහස් පක්ෂ මන්ත්‍රීවරුන් පිරිසක් කටයුතු කිරීම හේතුවෙන් යහපාලන ආණ්ඩුවේ තුනෙන් දෙක අවසන් වී තිබේ. ඒ අනුව ආණ්ඩුවට ඉදිරියේදී සිතූ සිතූ පරිදි පාර්ලිමේන්තුවේදී ජනතාවට අහිතකර අණපනත් පාර්ලිමේන්තු බහුතරයකින් සම්මත කරගැනීමට අවස්ථාව උදා නොවනු ඇත. එය විශ්වාසභංගය පරාජය වුවද ලබාගත් ජයග්‍රහණයකි. මේ පිරිස ආණ්ඩුවෙන් ඉවත්වීමට නියමිතව තිබුණද ජනාධිපතිවරයා එම ගමන තාවකාලිකව නවත්වා ඇති බව දැනගන්නට ඇත. එසේම මේ සටහන ලියැවෙන විටත් ශ්‍රී ලංකා නිදහස් පක්ෂයේ මධ්‍යම කාරක සභා රැස්වීම ආරම්භ වී නොතිබුණු අතර, බොහෝ විට එහිදී තම මතය ප්‍රකාශ කොට මෙම මන්ත්‍රීවරුන් පිරිස ආණ්ඩුවෙන් ඉවත්වීමට වැඩි ඉඩක් තිබිණි.
පාර්ලිමේන්තුවේ විපක්ෂය ලෙස කටයුතු කරන දෙමළ ජාතික සන්ධානය විපක්ෂය විසින් ගෙන ආ විශ්වාසභංගයට විරුද්ධව ඡන්දය ප්‍රකාශ කිරීමෙන් පාර්ලිමේන්තුවේ සැබෑ විපක්ෂය ඒකාබද්ධ විපක්ෂය බවට ජනතාවට දැනගැනීමට අවස්ථාව උදාවිය. එසේම දෙමළ ජාතික සන්ධානයේ සහාය ලබාගැනීම වෙනුවෙන් ආණ්ඩුව ඉදිරි මාස තුනක කාලයක් තුළ නව ව්‍යවස්ථාවක් සඳහා %‘ඩීල්’ එකක් දැමුවේය. මේ පිළිබඳ ජනතාවට දැනගැනීමට අවස්ථාව උදා විය. එය විශ්වාසභංගය පරාජයට පත් වුවද අප ලද ජයග්‍රහණයකි. යම් හෙයකින් මෙම විශ්වාසභංගය ජයග්‍රහණය කළා නම් අග්‍රාමාත්‍ය රනිල් වික්‍රමසිංහ මහතාට අග්‍රාමාත්‍ය ධුරය අහිමි වීමට ඉඩ තිබිණි. එය අප මෙයින් ලබා ගැනීමට අපේක්ෂා කළ දිනුමයි.

මේ සියලු කරුණු සාරාංශව පවසන්නේ නම් අප මෙම විශ්වාසභංගය හිටපු ජනාධිපති මහින්දර රාජපක්ෂ මහතා අග්‍රාමාත්‍ය ධුරයට පත් කිරීමට හෝ අපට අමාත්‍ය ධුර බෙදාගැනීම වෙනුවෙන් ගෙනා එකක් නොවේ. එය හුදෙක්ම ජනතා විරෝධී අග්‍රාමාත්‍යවරයෙකුට, ආණ්ඩුවකට එරෙහිව ගෙන ආ විශ්වාසභංගයකි. අනෙක් අතින් මෙම විශ්වාසභංගය ජයග්‍රහණය කිරීමට හෝ පරාජයට පත් කිරීමට අදාළව තුරුම්පු තිබුණේ ජනාධිපති මෛත්‍රීපාල සිරිසේන මැතිතුමා යටතේය. ඔහු එම තුරුම්පු භාවිත කරමින් එක්සත් ජාතික පක්ෂය ආරක්ෂා කිරීමට කටයුතු කළේය.

මෛත්‍රීපාල සිරිසේන මැතිතුමාට මහින්ද රාජපක්ෂ මහතා පරාජයට පත් කළා යැයි තාවකාලික සතුටක් ලබාගැනීමට අවස්ථාව තිබේ. නමුත් අවසාන වශයෙන් පරාජයට පත්ව ඇත්තේ එතුමා හා එතුමාගේ ආණ්ඩුව බව නොබෝ දිනකින්ම ඔහුට වැටහෙනු ඇත.
අවසාන වශයෙන් පැවසීමට අත්තේ විශ්වාසභංගය අග්‍රාමාත්‍ය රනිල් වික්‍රමසිංහ මහතා ජයග්‍රහණය කළද, ජනතා මතය ඇත්තේ ඒකාබද්ධ විපක්ෂයට බවයි. එසේත් නොමැති නම් පොදුජන පෙරමුණට බවයි. ඉදිරියේදී එන පළාත් සභා, ජනාධිපතිවරණ හා පාර්ලිමේන්තු මැතිවරණවල ප්‍රතිඵල අනුව මේ බව පැහැදිලි වනු ඇත. ආණ්ඩුව ජනතා මතයට පිටුපාමින් මේ යන ගමන වහාම නවතා දැමිය යුතුය. මේ සඳහා වහාම පාර්ලිමේන්තු මැතිවරණයක් පැවැත්විය යුතුය.
ලබන සතියේදී යළිත් හමුවෙමු!
ඔබට සුබ අනාගතයක්!

 

ජනාධිපතිවරණයක් ජයගත හැක්කේ රනිල්ට පමණි

 

ශ්‍රී ලංකාවේ 1978 ව්‍යවස්ථාව අනුව මුළු රටම එක මැතිවරණ කොට්ඨාසයක් ලෙස සලකා මැතිවරණයකට යන්නේ නම් ඒ ජනාධිපතිවරණයකටය. එම ව්‍යවස්ථාව මගින් රටේ දේශපාලනය තුළ ජාතිවාදී නායකයෙකුට බලයට පත් වීම සම්පූර්ණයෙන් වැළැක්වීමට කටයුතු කොට තිබිණි. මන්ද රටේ ප්‍රධාන පක්ෂ දෙක සිංහල ඡන්ද පදනම හා අ‍ෙනකුත් ජාතීන් අතරද 50 – 50 ලබාගනිතියි පූර්ව නිගමනයක් අනුව 1978දී ජනාධිපති ධුරය බිහි කෙරිණි. 1978දී රටේ සිවිල් යුද්ධයක් නොතිබුණු අතර, ප්‍රභාකරන්ද දේශපාලනය තුළ නොසිටියේය. එවැනි තත්ත්වයක් තුළ ප්‍රධාන පක්ෂ දෙකට ළඟ ළඟ ප්‍රබල තරගයක් දී ආකර්ෂණීය නායකයා ජනාධිපතිවරණයක් දිනනු ඇත. 1982දීත්, 1989දීත්, ගාමිණී දිසානායක ජීවත්ව සිටියේ නම් 1994දීත් සිදු වන්නේ එයයි. නමුත් 1989 ජනාධිපතිවරණයෙන් පසු 2010 දක්වා සියලුම ජනාධිපති මැතිවරණවල ජයග්‍රාහකයා තීරණය කරන ලද්දේ ප්‍රභාකරන් විසිනි. එහිදී රනිල් ඉදිරිපත් වූ 2001 හා 2005 මැතිවරණවල තීරක බලය වූයේ ප්‍රභාකරන්ය. එනම් 2001 මැතිවරණයේදී වැරදුණු බෝම්බ ප්‍රහාරයක් නිසා චන්ද්‍රිකා මැතිනිය නිකම්ම දිනුවේය. එසේම 2005දී මහින්ද හා ප්‍රභාකරන් හවුල උතුරේ හා නැගෙනහිර දෙමළ ජනතාවට මැතිවරණ වර්ජනයකට බල කොට වැඩි ඡන්ද හතළිස් දහසකින් රනිල් පරාජය කළේය. ප්‍රභාකරන් නොසිටියේ නම් එම මැතිවරණ දෙකම ජය ගන්නේ රනිල් වික්‍රමසිංහයි.

ඉන්පසු එළඹි යුගය තුළ සිංහල ජාතිකවාදී පදනමකින් රාජපක්ෂවරුන් ප්‍රමුඛ ශ්‍රී ලංකා නිදහස් පක්ෂය දකුණේ වැඩි බලයක් ගොඩනගාගත්තේය. සැබැවින්ම රටේ සියලුම සුළු ජාතීන්ට රනිල් වික්‍රමසිංහ හැර සියලුම ජාතික මට්ටමේ නායකයෝ කොකා පෙන්වමින් ඔවුන්ගේ දේපළ හා ජීවිත අනතුරේ හෙළති. ලංකාවේ ජනගහනයෙන් 31%ක් වන සිංහල නොවන ජන කොටස්වල විශ්වාසය 80%කටත් වඩා දිනාගත් නායකයා රනිල් වික්‍රමසිංහය. එසේම එක්සත් ජාතික පක්ෂයේ සිංහල ඡන්ද පදනම ඕනෑම තත්ත්වයක් යටතේ 35෴කි. මේ අනුව රනිල් වික්‍රමසිංහ ඉදිරිපත් වන අවස්ථාවක කිසිදු වෙනත් අපේක්ෂකයෙකුට ජනාධිපතිවරණයක් ජයගත නොහැක්කේය. සැබැවින්ම 2015 ජනාධිපතිවරණයේදී ලංකාවේ දකුණේ සියලුම සිංහල ආසන ජනාධිපති සිරිසේන පරාජයට පත් වූ අතර, ඔහු ජයග්‍රහණය කරනු ලැබුවේ උතුරු නැගෙනහිර ඡන්දවලිනි. එම ඡන්ද සියල්ල ලැබුණේ රනිල් වික්‍රමසිංහට වන අතර, උතුරු නැගෙනහිර ජනතාවගෙන් 33%ක් සිරිසේනගේ නමවත් අසා නොතිබුණු බව එවකට සමීක්ෂණයකින් හෙළි විය. මා පෞද්ගලිකව කල්පනා කරනුයේ 2015 මැතිවරණයද රනිල් ඉදිරිපත් කොට එක්සත් ජාතික පක්ෂයට ජයගැනීමට හැකිව තිබිණි.

රටේ ආර්ථිකය පිළිබඳ දැක්මක් ඇති, ප්‍රජාතන්ත්‍රවාදය හා යහපාලනය වෙනුවෙන් ජීවිතයම කැපකළ, ජාත්‍යන්තරය දිනාගත්, රටේ සියලුම ජන කොටස් එක මිටකට ගොනු කළ හැකි පරිණත නායකයා රනිල් වික්‍රමසිංහය. ඔහු දේශපාලන භූමියෙන් අතුගාදැමීමට සතුරන් දශක ගණනාවක් තිස්සේ උත්සාහ කළද ඔහු නොදැවී දශක හතරක් දේශපාලන භූමියේ ප්‍රධාන භූමිකාව ඉටු කරයි. පසුගිය දශක හතර තුළ ඔහු රටේ ප්‍රධාන ධාරාවේ පත්තරවල, ගුවන්විදුලියේ, රූපවාහිනියේ හා අද සමාජ මාධ්‍යවල කතාබහට ලක්වන නායකයාය. දශක හතරක් අඛණ්ඩව දේශපාලනය තුළ මධ්‍යගත වීම ඉතා අසීරු කාරණයකි. පසුගිය දශක තුන තුළ ඔහුගේ නම මාධ්‍යවල නොකියවුණු දවසක් නොමැති තරම්ය. එවන් නායකයෙකු සතු එක්සත් ජාතික පක්ෂය ඉදිරි ජනාධිපතිවරණයට ඉදිරිපත් කරනු ලබන හා ලැබිය යුතු, ජයග්‍රහණ කළ හැකි නායකයා රනිල්ය.

එක්සත් ජාතික පක්ෂය වැනි දැවැන්ත පක්ෂයක් පවත්වාගෙන යෑම ඉතා අසීරු කාර්යයකි. එහි පූර්ණකාලීන සේවකයන් සිය ගණනකි. ඔවුන්ට පඩිනඩි ගෙවිය යුතුය. පැමිණෙන සෑම මැතිවරණයකටම මුදල් වියදම් කොට තරග කළ යුතුය. පක්ෂ සම්මේලන, මැයි දින පැවැත්විය යුතුය. මේවාට කෝටි ප්‍රකෝටි ගණනින් මුදල් අවශ්‍ය අතර, එම මුදල් ලබාදෙන පාක්ෂිකයන් සිය ගණනක් සමග ළඟ සම්බන්ධයක් පවත්වාගත යුතුය. එවැනි භාරදූර තනතුරක් ආණ්ඩුවේ සල්ලිවලින් උදේට කෑමවේල ගන්නා, දාන මාන දෙන හිස් මිනිසුන්ට කළ නොහැකිය. එසේම ලක්ෂ 40ක් ඡන්දය දෙන පක්ෂයක දිනපතා දහසකුත් ප්‍රශ්න ඇති වේ. ඒවාට මුහුණදිය යුතුය. ආණ්ඩුවේ කටයුතු, පක්ෂයේ කටයුතු, සතුරු කරදර සමග කටයුතු කිරීමට ඉතා දියුණු දැක්මක් හා හැකියාවක් තිබිය යුතු අතර එය රනිල්ට හොඳින්ම තිබේ. මාධ්‍යවේදී ළමයෙකුගේ මයික් එකකට ප්‍රකාශයක් දුන් පළියට නායකයෙකු වී පක්ෂයක්, ආණ්ඩුවක් පවත්වාගෙන යා නොහැක්කේය.

මේ මොහොතේ මේ රටේ හා ජාත්‍යන්තරයේ දේශපාලනය කළමනාකරණයට මෙන්ම, ආර්ථික, සමාජ ප්‍රතිසංස්කරණ ක්‍රියාත්මක කළ හැකි, එමෙන්ම ඒවා විශ්වාස කරන නායකයා රනිල් වික්‍රමසිංහ වේ. එක්සත් ජාතික පක්ෂයට නව නායකයෙකු පෙනෙන තෙක් මානයක තවම නැත. නමුත් ආණ්ඩුව පවතින මොහොතේ නායකයන් බිහිවනු ඇත. එසේ බිහිවන නායකයන්ට පක්ෂයේ වගකීම් පවරා දෙමින් හතළිස් වසරක නොදැවුණු දේශපාලන ඉනිමක් ක්‍රීඩා කළ රනිල් නම් පරිණත නායකයාට මෙරටේ සුක්කානම ලබා දී හැකි උපරිම සේවය ලබාගත යුතුය.

කවුරුන් කෙසේ කීවද රටේ ආර්ථිකය 2014 තිබුණාට වඩා නිරෝගීය. එය නැවත බලාපොරොත්තු තබාගත හැකි මට්ටමට පත් වී තිබේ. එම ක්‍රියාවලිය සාර්ථක කිරීමට විභවාත්මක හැකියාවක් ඇති නායකයා රනිල්ය. මේ මොහොතේ පක්ෂයත්, ආණ්ඩුවත් වෙනුවෙන් කිඹුල් කඳුළු හෙළනුයේ එහි සතුරෝය. එමෙන්ම මිතුරු වෙසින් සිටින සතුරෝය. එබැවින් පක්ෂයේ ශක්තිය රනිල්ට ලබාදිය යුතු වේ.

එක්සත් ජාතික පක්ෂය තනි ආණ්ඩුවක් බිහිකොට රටේ මුළු බලය ප්‍රතිසංස්කරණ සඳහා ඉල්ලා සිටිය යුතුය. එසේම ඒ වෙනුවෙන් වෙහෙස මහන්සි වී වැඩ කළ යුතු පක්ෂයේ තරුණ පිරිස් වෙත බලය ලබා දිය යුතුය.