Category Archives: business

විදෙස් පාපැදිකරුවෙක් හදිසියේ අතුරුදන් වෙලා

ශ්‍රී ලංකාවේ අතුරු පාරවල් හි ධාවනය කරමින් පැවැත්වෙන Rumble in the Jungle මවුන්ටන් පාපැදි තරඟාවලිය අතරතුරදී විදෙස් පාපැදි කණ්ඩායමේ එක් සාමාජිකයෙකු අතුරුදන්ව ඇති බව වාර්තා වෙයි.

විදේශ පාපැදි කණ්ඩායමේ එක් සාමාජික පාපැදිකරුවෙකු මෙසේ සොයාගැනීමට නොහැකි වී ඇති අතර, ශ්‍රී ලංකා පොලීසිය සහ ප්‍රදේශවාසීන්ගේ සහාය ඇතිව මේ වනවිට එම පාපැදිකරු සෙවීමේ මෙහෙයුම් දියත් කර ඇති බව එය සංවිධානය කරන ශ්‍රී ලංකන් ගුවන් සමාගම නිවේදනය කරයි.

මේ හේතුවෙන් අද දින සිට එම තරඟාවලිය අත්හිටුවීමට කටයුතු යොදා ඇති බව ශ්‍රී ලංකන් ගුවන් සමාගම වැඩිදුරටත් පවසයි.

1_Mounton

 

ඉ-ස්වාභිමානී සම්මාන නාමයෝජනා භාරගැනේ

සමාජ සුබසිද්ධිය සඳහා බලපෑමක් කළ හැකි නවෝත්පාදක හා නිර්මාණාත්මක නිමැයුම් හෝ යෙදවුම් ජාතික ඇගයීමට ලක්කෙරෙන ඩිජිටල් සමාජ සවිබල ගැන්වීමේ '2018 ඉ-ස්වාභිමානී^ සම්මාන ප්‍රදානය සඳහා නාමයෝජනා භාරගැනීම ජූලි මස 25දා දක්වා සිදුකරන බව ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය (ICTA) පවසයි.

රාජ්‍ය හා පුරවැසි සහභාගීත්වය, සෞඛ්‍යය හා සුභසාධනය, ඉගෙනුම හා අධ්‍යාපනය, පරිසරය හා හරිත බලශක්තිය, සංස්කෘතිය සංචාරක ව්‍යාපාරය, සුහුරු ජන ස්ථාපනය හා නාගරීකරණය, ව්‍යාපාර හා වාණිජ්‍යය, අන්තර්ග්‍රහණය හා බලගැන්වීම, ඩිජිටල් විනෝදාස්වාදය යන අංශ යටතේ නාම යෝජනා භාරගැනීම සිදුවනු ඇත.

මෙම සම්මාන ප්‍රදානයට පාත්‍ර වන නිර්මාණකරුවන්ට ජාත්‍යන්තර වශයෙන් පැවැත්වෙන විශ්ව සමුළු සම්මාන ප්‍රදානෝත්සවය නියෝජනය කිරීමේ අවස්ථාව උදාවන බවත්, 011-2369099 දුරකථන අංකයට ඇමතීමෙන් වැඩි විස්තර ලබාගත හැකි බවත් නියෝජිතායතනය පවසයි.

නිෂ්පාදන කර්මාන්ත අංශ ධාරිතාවෙහි සුළු අඩුවීමක්

2017 අප්‍රේල් මස නිෂ්පාදනයට සාපේක්ෂව, 2018 අප්‍රේල් මස නිෂ්පාදන කර්මාන්ත අංශයෙහි නිෂ්පාදන ධාරිතාවයෙහි 0.7%ක අඩුවීමක් වාර්තා වන බව 2018 අප්‍රේල් මසට අදාළ කාර්මික නිෂ්පාදන දර්ශකය නිකුත් කිරීමේ නිල නිවේදනය ප්‍රකාශයට පත්කරමින් ජනලේඛන හා සංඛ්‍යාලේඛන දෙපාර්තමේන්තුව පවසයි.

2017 අප්‍රේල් මස පැවති වැඩකරන දින ගණනට වඩා 2018 අප්‍රේල් මස අඩු වැඩකරන දින ගණනක් පැවතීමද මෙම වෙනසට හේතු වූවා විය හැකි බවත්, 2018 සහ 2017 යන වර්ෂවල අප්‍රේල් මස මෙම දර්ශකය පිළිවෙලින් 97.7ක් සහ 98.3ක් ලෙස ගණනය කොට ඇති බවත් පෙන්වා දෙයි.

2017 අප්‍රේල් මස මාසික නිෂ්පාදන ධාරිතාවයට සාපේක්ෂව 2018 අප්‍රෙල් මස 'දැව හා දැව නිෂ්පාදන', 'සම් සහ සම් ආශ්‍රිත නිෂ්පාදන' සහ'ඇඟලුම් නිෂ්පාදන'වල පිළිවෙළින් 27.6%, 11.% සහ 6.3%ක කැපී පෙනෙන වර්ධනයක් වාර්තා වේ. තවද, 2018 අප්‍රෙල් මස ආහාර නිෂ්පාදන අංශයෙහි  නිෂ්පාදනය 0.5%ක වැඩිවීමක් වාර්තා කරයි.

එසේ වුවත්, ‘ලෝහ නොවන ඛණිජමය ද්‍රව්‍ය නිෂ්පාදන', ‘රබර් සහ ප්ලාස්ටික් ද්‍රව්‍ය නිෂ්පාදන' සහ 'ගෘහ භාණ්ඩ නිෂ්පාදන'වල 2017 වර්ෂයේ අප්‍රේල් මස නිෂ්පාදනයට සාපේක්ෂව පිළිවෙලින් 15.1%, 14.0% සහ 10.7%ක අඩුවීමක් වාර්තා වී තිබේ.

නිශ්චිත යොමු කාලයකට සාපේක්ෂව, දෙන ලද කාල පරිච්ඡේදයකදී ආර්ථිකයේ කර්මාන්ත අංශයෙහි ස්වරූපය පිළිබඳ හඳුනා ගැනීම සඳහා කාර්මික නිෂ්පාදන දර්ශකය යොදා ගැනේ. තව ද මෙමඟින් කර්මාන්ත අංශයේ කෙටි කාලීන වෙනස්කම්ද හඳුනා ගත හැකිය. 

පොඩි බෑග් එකකට බඩු ටිකක් ගන්න ලොකු සූට්කේස් එකක් පුරවල සල්ලි ඕන වෙයි -කබ්රාල්

වත්මන් රජය දේශපාලන වශයෙන්ද, ආර්ථික වශයෙන්ද, සමාජීය වශයෙන්ද මේ රටේ සෑම ක්ෂේත්‍රයකම අර්බුද ඇති කරමින් සිටින බවත්, එකී අර්බුද දිනපතා පෝෂණය කරමින්, වර්ධනය කරමින් සෑම දිනකම අලුත් අර්බුදයක් නිර්මාණය කිරීමට දස්කම් දක්වා ඇති බවත් ශ්‍රී ලංකා මහ බැංකුවේ හිටපු අධිපති අජිත් නිවාඩ් කබ්රාල් මහතා පවසා සිටියේය.

හිටපු මහ බැංකු අධිපතිවරයා මෙසේ අදහස් දක්වා ව්‍යාපාරිකයන් සහ වෘත්තිකයන් පිරිසක් අමතමින් පසුගියදා හම්බන්තොටදී සිදුකළ දේශනයකදීය. එහිදී, වැඩිදුරටත් අදහස් දැක්වූ අජිත් නිවාඩ් කබ්රාල් මහතා,

"මේ රජය හැම පැත්තෙන්ම බදු ගහලා, තවත් බදු ගහනවා. දඩ ගහනවා. මුලින්ම ටයි කෝට් දාගෙන මහ බැංකුවට පැනලා, මහා දවාලේම මහ බැංකුව සුද්ද කළා. එයින් සිදුවූ පාඩුව රුපියල් කෝටි ලක්ෂයක් කියලා, මේ රජයේම ඇමතිවරු කියනවා. 2014 දී, රජයේ සමස්ත බදු ආදායමම රුපියල් කෝටි ලක්ෂයයි. කෝටි ලක්ෂයකින් අපට හම්බන්තොට වගේ වරායන් 07ක් හදන්න තිබුණා. එහෙනම් දිගට හරහට බදු ගහන්නේ ඇයි කියලා දැන් කෙනෙකුට තේරුම් ගන්න පුළුවන්. රජයේ බදු ආදායම කෝටි දෙලක්ෂයක් කරගන්න හදනවා. ඔවුන් එසේ කරන්නේ, තමන් විසින් සිදුකරන ලද පාඩුව පියවා ගන්නට නොවෙයිද?

1996 දී කොටි රැලක් බෝම්බ ගහලා, මහ බැංකුව විනාශ කරන්න තැත් කළත් ඒක සාර්ථක වුණේ නැහැ. නමුත්, 2015 දී අලි රැළක් මහ බැංකුවට ගහලා, මහ බැංකුවයි, සමස්ත ආර්ථිකයයි දෙකම විනාශ කළා. ඒ හරහා රජය සහ සියලුම රට වැසියන් ගෙවන පොලී අනුපාතය සියයට හැටකින් (60%) පමණ වැඩිවුණා. වැඩිපුර පොලිය නිසා පමණක්, ආණ්ඩුවට වසරකට රුපියල් කෝටි 1,000ක විතර පාඩුවක් විඳින්න සිදුවුණා. ඒ වගේම, ශ්‍රී ලංකා රුපියලත් දරුණු ලෙස බාල්දු වුණා. විදේශිකයන් මේ රටේ භාණ්ඩාගාර බැඳුම්කරවල ආයෝජන විකුණලා පළා ගියා.

ජාත්‍යන්තර මූල්‍ය අරමුදල බදු වැඩියෙන් අය කරගන්නා ක්‍රම මේ රජයට කියලා දෙනවා. අපේ රජය ඒ උපදෙස් කියා දුන්නටත් වඩා හොඳින් පිළිපදිනවා. අපි වැඩි වැඩියෙන් ජනතාවට බදු ගහලා, රජයේ ආදායම වැඩිකර ගත්තා කියමින් අපේ නායකයන් කිසිදු ලැජ්ජාවක් නැතිව පුරාජේරු ගහනවා.

වත්මන් රජය ජාතික සම්පත් කුණු කොල්ලයට විකුණනවා. බේබද්දන් මත්පැන් බොන්න මුදල් හොයාගන්න තමන්ගේ ඉඩම් සහ බඩු මුට්ටු විකුණනවා වගේ, මේ රජය අතට හසුවෙන සෑම සම්පතක්ම කුණු කොල්ලයට විකුණනවා. ඒ ද්‍රෝහී ක්‍රියාවට විරුද්ධ වන දේශප්‍රේමී භික්ෂූන් වහන්සේලා සහ ජනතාවට ආරක්ෂක අංශ යොදමින් බැටන් ප්‍රහාර එල්ල කරනවා. කඳුලු ගෑස් සහ ජල ප්‍රහාර එල්ල කරනවා. ආරක්ෂක අංශවල ඉහළම නිලධාරීන් කිසිදු හිරිකිතයකින් තොරව ප්‍රසිද්ධියේම අහිංසක ජනතාවට අතින් පයින් ගහන ආකාරය අප රූපවාහිනියෙන් දකිනවා. ඔවුන් නීතිය අමුඅමුවේ නමනවා. ළාබාල ශිෂ්‍යයන් ඇතුළු අහිංසකයන් හිරේ දමනවා. රටේ හොඳම සම්පත්, උදාහරණයකට උපායමාර්ග සම්පතක් වන හම්බන්තොට වරාය කුණු කොල්ලයට විකුණමින්, ඒ සඳහා චෙක්පතක් ලැබුණු විට මහා ලොකු වැඩක් කළා වගේ ඒ චෙක්පත් පෙන්වමින් පින්තූර ගන්න තරම් මේ අය මෝඩ වෙලා.

මොවුන් රටට ඉතා අහිතකර වෙළෙඳ ගිවිසුම්වලට එළැඹෙනවා. අප රටේ සංස්කෘතික උරුමයන් සහ ආර්ථික පදනම එළිපිට සහ අමු අමුවේ පාවා දෙමින්, ඊනියා වෙළෙඳ ගිවිසුම්වලට අද කඩිමුඩියේ එළැඹෙනවා. අප රටට ආර්ථිකමය වශයෙන් පාඩු වන විදියට සහ වෙන රටවල්වලට වාසි වන විදියට හිතාමතාම වෙළෙඳ ගිවිසුම් මේ අය ගහනවා. හොර රහසේ ඒවා සාකච්ඡා කරනවා. විදේශ රටවලට සහ එන්.ජී.ඕ. කාරයන්ට අවශ්‍ය වන විදියට පිඹුරුපත් හදනවා. රටට ආදරය කරන කිසිම කෙනෙකුට මේ සාකච්ඡාවලට යන්නටවත් මේ අය ඉඩදෙන්නේ නැහැ. ඒ නිසා ඒ සියලුම ගිවිසුම් අප රටට සහ අප ජනතාවට අහිතකර විදියටයි, සිදු කෙරෙන්නේ.

සිංගප්පූරුව සමග ශ්‍රී ලංකාව එළැඹී ඇති නිදහස් වෙළෙඳ ගිවිසුමත් අපේ රටට ඉතා භයානකයි. සිංගප්පූරුව සමග මේ ගිවිසුම අත්සන් කළේ 2018 ජනවාරි 23 වැනිදායි. එහෙත් රජය මේ ගිවිසුම ජනතාවට එළිනොදක්වා ඉතා රහසිගතව 2018 අප්‍රේල් 07 වැනිදා තෙක් එය සඟවා ගත්තා. විවිධ වෘත්තිකයන් දිගින් දිගටම එය එළිදක්වන ලෙස රජයට බලකර සිටි නිසා තොරතුරු දැනගැනීමේ පනත යටතේ නීතිමය පියවර ගැනීමට සූදානම් වනවිට ඉතා අකැමැත්තෙන් එය මාධ්‍යයට නිකුත් කළා. මේ ගිවිසුම මගින් ශ්‍රී ලංකාවේ සම්පූර්ණ භූමියද, ශ්‍රී ලංකාවට වෙන්වී ඇති සම්පූර්ණ මුහුදු සීමාවද, ශ්‍රී ලංකාවට අයත් සුවිශේෂී ආර්ථික කලාපයද ඇතුළු සියලු ගොඩබිම් සහ මුහුදුකරය සිංගප්පූරුවට විවෘත කර තිබෙනවා. එහෙත්, සිංගප්පූරුව ඉතා කුඩා භූමි ප්‍රදේශයකින් සමන්විත රටක් වුවත්, ඔවුන් විවෘත කර ඇත්තේ රජයට හිමි ඉඩම් හැර සෙසු ඉඩම් පමණයි.

මේ ගිවිසුම යටතේ ඕනෑම සිංගප්පූරු ජාතිකයෙකුට සේවය කිරීම සඳහා විවිධ ක්‍රම ඔස්සේ ශ්‍රී ලංකාවට එන්නට පුළුවන්. ඒ සඳහා යම් බාධාවක් පවතින්නේ වෛද්‍ය, ගණකාධිකරණ, නීති සහ මිනුම්දෝරු වෘත්තීන්වලට පමණයි. එහෙත්, යම් ශ්‍රී ලාංකිකයෙක් සිංගප්පූරුවේ සේවය කිරීමට නම්, සිංගප්පූරුවේ බල පැවැත්වෙන සියලුම නීතිරීති සහ රෙගුලාසි සහ අදාළ ක්ෂේත්‍රයේ සුදුසුකම් සපුරාලිය යුතුයි.

ඒ වගේම, මේ ගිවිසුවේ විධිවිධාන ක්‍රියාත්මක කරන විට, එම ගිවිසුම අදාළ වන්නේ ශ්‍රී ලාංකේය පුරවැසියන්ට පමණයි. එහෙත්, ශ්‍රී ලංකාවට පැමිණීමට සිංගප්පූරු පුරවැසියන්ට පමණක් නොවෙයි, සිංගප්පූරුවේ නිත්‍ය පදිංචිකරුවන්ටත් අවස්ථාව තිබෙනවා.

සිංගප්පූරු ජාතිකයෙක් හෝ නිත්‍ය පදිංචිකරුවෙක් ශ්‍රී ලංකාවට පැමිණෙන විට ඔවුන් යම් ක්ෂේත්‍රයක විශේෂ දැනුමක් ඇති අය හෝ කළමනාකරුවෙකු ලෙස හෝ විධායක නිලධාරියෙකු ලෙස හෝ පැමිණීමට පුළුවන්. එවන් ශ්‍රේණි සඳහා ශ්‍රී ලංකාවේ තවමත් පැහැදිලි නිර්වචනයක් නොකර ඇති නිසා එවන් වචන පාවිච්චි කරමින්, විවිධ පුද්ගලයන්ට ශ්‍රී ලංකාවට පිවිසෙන්නට පුළුවන්. එපමණක් නොවෙයි, සිංගප්පූරුවේ පවත්වාගෙන යන මිනිස් ශ්‍රමික ආයතන (Man-power Services companies) හරහා තවත් බෙහෝ පහළ මට්ටමේ ක්ෂේත්‍රවල සේවය කරන අයටත් කිසිදු බාධාවකන් තොරව, ශ්‍රී ලංකාවේ සේවය කිරීමට පුළුවන්. තවදුරටත් සඳහන් කළොත් ගෘහ සේවිකාවන්, රියදුරන්, දරුවන් රැකබලාගන්නන් (Nannies), නිරූපන ශිල්පීන් (Models), සහායකයන් (Companions), යතුරු ලියන්නන්ටත් (Typists) ශ්‍රී ලංකාවට පැමිණ සේවය කරන්නට අවස්ථාව පවතිනවා.

මේ ගිවිසුමට අනුව ශ්‍රී ලංකාව විසින් සිංගප්පූරුවට අපනයනය කරන භාණ්ඩ රැසක් තීරු බදුවලින් නිදහස් වන බව සඳහන් කර තිබෙනවා. එහෙත්, සැබවින්ම එවැනි ගිවිසුම් තිබුණත්, නොතිබුණත් සිංගප්පූරුවට අපනයනය කරන සියලුම භාණ්ඩ පාහේ ඒ රටට ඇතුල් වන්නේ තීරු බදු රහිතවයි. ඒ නිසා වෙනත් රටවලට සාපේක්ෂව වි‍ශේෂ වාසියක් ශ්‍රී ලාංකේය අපනයනකරුවන්ට මේ ගිවිසුම හරහා ලැබෙන්නේ නැහැ. දැනට ශ්‍රී ලංකාවට විවිධ රටවලින් අපනයනය කරන භාණ්ඩ සඳහා ශ්‍රී ලංකාව තීරු බදු අය කරනවා. ඒ හරහා ශ්‍රී ලංකා රජයට සැලකිය යුතු ආදායමක් ලැබෙනවා. ශ්‍රී ලංකාවේ නිෂ්පාදකයන්ට යම් විශේෂ වාසියක්ද ලැබෙනවා. ඒ නිසා දේශීය කර්මාන්තවලට යම් රැකවරණයක් ලැබෙනවා. එහෙත්, ඒ තීරු බදු වසර කිහිපයක් තුළ මේ ගිවිසුම හරහා ක්‍රමක්‍රමයෙන් ලිහිල් කෙරෙනවා. ඒ අනුව, සිංගප්පුරුවේ සිට විවිධ භාණ්ඩ රැසක් පහසුවෙන්ම ශ්‍රී ලංකාවට තීරුබදු රහිතව අපනයනය කිරීමට සිංගප්පූරු සමාගම්වලට අවස්ථාව උදාවෙනවා. ඒ අනුව, ශ්‍රී ලංකාවට විශාල බදු ආදායමක් අහිමි වෙනවා.

මේවායින් පෙනෙන්නේ විවිධ ආකාරයට, ශ්‍රී ලංකාවේ ව්‍යාපාරවලටද, මධ්‍යම සහ කුඩා කර්මාන්තවලටද, කුඩා ව්‍යවසායකයන්ටද, ශ්‍රමිකයන්ටද, දරුණු පහරවල් මේ නිදහස් වෙළෙඳ ගිවිසුම හරහා එල්ල වන බවයි. බොහෝ දෙනෙකුගේ ජීවනෝපාය අහිමි වන බවයි. බොහෝ ව්‍යාපාර විනාශ වන බවයි. සමස්ත ආර්ථිකයටම දැවැන්ත පහරක් එල්ල වන බවයි.

මේ රජය දැන් අනුගමනය කරන ආර්ථික ප්‍රතිපත්ති තවදුරටත් ක්‍රියාත්මක වුණොත්, අප රටේ රැකියා අවස්ථා සහ සුළු හා මධ්‍ය පරිමාණ ව්‍යාපාර අනිවාර්යෙන්ම තොග පිටින් නැති වෙනවා. ව්‍යාපාර එකක් මත එකක් දරුණු ලෙස කඩා වැටෙනවා. මූල්‍ය ක්ෂේත්‍රය විනාශ වෙනවා. රුපියල මස්තබාල්දු වෙනවා. ආර්ථිකය විනාශ වෙනවා.

සමහර විට පොඩි ෂොපින් බෑග් එකකට බඩු ටිකක් අරගෙන යන්න (එක් කලක සිම්බාබ්වේ රාජ්‍යයේ සිදුවුණා වගේ) අපේ රටෙත් ලොකු සූට්කේස් එකක් පුරවල සල්ලි ගෙනියන්න වේවි. එතකොට, අපි ඉබේම විදේශ රටවලට ගැති රටක් බවට පත්වේවි. අපේ සෛවරීභාවය නැති වේවි. මෙහෙම ගියොත්, නුදුරු අනාගතයේදී වෙන්න යන දේ භයානකයි. එහෙම නම්, අපේ රට වෙනුවෙන් මේ රජය දැන් යන ගමන හැකි ඉක්මනින් නවතාලීමට අප සියලු දෙනාම කටයුතු කරන්න අවශ්‍යයයි.

වැඩි කලක් යන්නට පෙර ජනතාවගේ අප්‍රසාදය පෙන්වන්නට සාමූහික ක්‍රියාපටිපාටියක් සූදානම් කිරීමට අප සියලු දෙනාම එක්වෙන්න ඕනෙ. අපි එහෙම නොකළොත්, මේ මුරණ්ඩු ආණ්ඩුව අපේ ජනතාව විඳින පීඩනය සහ දුක ගණන් ගන්නේ විහිලුවක් හැටියටයි. ඔවුන් හිතන්නෙ, සෑමදෙනාම බය කර‍ල, මර්ධනය කරල, හිරේ දැමුවාම, ඒ ප්‍රශ්න විසඳන්න පුළුවන් කියලයි. අප රටේ ජනතාවගේ අයිතිවාසිකම් සහ උන්නතිය රැකගන්නට නම්, අපට යම් දැඩි ක්‍රියාමාර්ගවලට යන්නට සිදුවන බව අනිවාර්යයි.

දැන් අපේ රටේ ආර්ථිකය විනාශ කිරීමේ සහ ජනතාව මත බදු ගැසීමේ සීමාව ඉක්මවා හමාරයි. මේ අසාධාරණ බදු සහ ගිවිසුම්වලට විරුද්ධව නැගී සිටීමට අප සියලු දෙනාටම කාලය එළැඹිලා. වැඩි දිනක් යන්නට මත්තෙන් මේවාට විරුද්ධව නැගී සිටින්නට අප එකතුව සටනට බහින්න ඕනේ. අවුරුදු 30ක් පුරා ජයගන්නට බැරිවූ දරුණු ත්‍රස්තවාදයට විරුද්ධ සටනට එදා නායකයන් පෙරමුණ ගත්තා වගේ, මේ දූෂිත රජයේ මූල්‍ය ත්‍රස්තවාදයට එරෙහිව රට වැසියන්ගේ සාධාරණ සටනටත් නායකත්වය දෙන්නට අප ඔවුන්ට ශක්තිය දිය යුතුයි. ඒ සටන හරහා මේ හොරකම් කරන හොරු රකින ආණ්ඩුව, අප සියලු දෙනා මත පටවා ඇති බදු අඩු කිරීමේ සහ ඊනියා ගිවිසුම් ගැසීම නතර කිරීමේ සටනට බහිමින්, ඒ සටනත් ජයගන්නට අප සියලු දෙනාම එකාමෙන් පෙළ ගැසිය යුතුයි." යනුවෙන් පවසා සිටියේය.

බිම්බෝම්බ ඉවත් කිරීමට ඔස්ට්‍රේ.ඩොලර් ලක්ෂ 7ක්

මයින් ඇක්ෂන් ගෘප් (MAG) සහ ශ්‍රී ලාංකේය ආයතනයක් වන ඩෙව්ලන් ඇසිස්ටන්ස් ෆෝ සෝෂල් හාර්මනි (DASH) යන සංවිධානයන් හි හවුල්කාරීත්වයෙන්, ශ්‍රී ලංකාවේ බිම් බෝම්බ ඉවත්කිරීම සඳහා ඉදිරි දෙවසර තුළ ඔස්ට්‍රේලියානු ඩොලර් ලක්ෂ 7ක ආධාර ලබාදී තිබේ.

මෙමගින් උතුරු පළාතේ මන්නාරම, වවුනියාව, කිලිනොච්චිය යන දිස්ත්‍රික්කවල බිම් බෝම්බ ඉවත් කිරීම සඳහා වැදගත් වන අතිරේක ශක්‍යතා සැපයෙනු ඇති බවත්, එමගින් විශාල පිරිසකට නැවතත් තම ජන ජීවිත ගොඩනගා ගැනීමට ඉඩප්‍රස්ථා ලැබෙන බවත් ශ්‍රී ලංකාවේ ඔස්ට්‍රේලියානු මහ කොමසාරිස් කාර්යාලය පවසයි.

2009 වසරේ සිට මේ දක්වා ශ්‍රී ලංකාවේ බිම් බෝම්බ ඉවත් කිරීමට මේ දක්වා ඔස්ට්‍රේලියානු ඩොලර් මිලියන 20ක් පමණ ලබාදී ඇති බවත්, 2020 වනවිට ශ්‍රී ලංකාව බිම් බෝම්බවලින් තොර රටක් බවට පත්වීමට තැබූ මේ වැදගත් පියවර ඔස්ට්‍රේලියාවේ පැසසුමට ලක්වන බවත් මහ කොමසාරිස් කාර්යාලය වැඩිදුරටත් නිවේදනය කරයි.

Image 2 Image 3 Image 4

Rumble in the Jungle ශ්‍රී ලංකන් හා අද ඇරඹේ

ශ්‍රී ලංකන් ගුවන් සමාගම මේ වසරේදීත් “Rumble in the Jungle 2018” මවුන්ටන් පාපැදි තරඟාවලිය සාඩම්බර ලෙස ඉදිරිපත් කිරීමට සියලු  කටයුතු සූදානම් කර ඇත.

ශ්‍රී ලංකාවේ අතිශය සුන්දර මධ්‍යම කඳුකරයේ දිස්ත්‍රික්ක 04ක් පුරා දර්ශනීය ස්ථාන පසුකරමින් සිදුකරන අභියෝගාත්මක මවුන්ටන්  පාපැදි තරඟාවලිය  සඳහා දෙස් විදෙස් තරඟකරුවන් සිය ගණනක් කාන්තා සහ පිරිමි අංශයෙන් අද (09දා) සිට ජූනි මස 15 වැනිදා  දක්වා තරඟ කිරීමට  නියමිතය.

පිරිමි සහ  කාන්තා  තරඟකරුවන්  සඳහා  ප්රමථම  ස්ථානයේ සිට පස්වැනි ස්ථානය දක්වා ත්යාමග සමසමව බෙදා දීමට කටයුතු කරනු ඇත. කාන්තා සහ පිරිමි වයස් කාණ්ඩයේ ජයග්රා හකයන් සඳහා ජයස්මාරක පිළිගැන්වීමට කටයුතු යොදා  ඇත. සෑම දෛනික අදියරක් තුළින්  ජයග්රාහණය කරන ලබන පළමු කාන්තා සහ පිරිමි ජයග්රාුහකයන් සඳහා ත්යාෑග පිරිනැමීමට කටයුතු  යොදා ඇත. මෙම තරඟය සම්පූර්ණ කළ සියලුම  තරඟකරුවන් සඳහා  සම්මාන  සහ  සිහිවටන පිරිනැමීමට  කටයුතු  කරනු ඇත.

සියලුම  තරඟකරුවන් අද (09දා) මීගමුවේදී රැස්වන අතර, ඊට පසුදින ආරම්භ වීමට නියමිත තරඟය සඳහා මොණරාගල  දිස්ත්‍රික්කයේ  කුඩා ඔය වෙත මීගමුවේ සිට ඔවුන්  රැගෙන යනු ඇත. පළමු වැනි අදියර ආරම්භ වන්නේ මුහුදු මට්ටමේ සිට මීටර් 100ක් උසින් වූ භූමි භාගයක වන අතර, ඒ සඳහා මීටර් 2,386ක දුරක් කඳු වශයෙන් ගමන් කිරීමටත් කි.මී 77ක දුරක් එක් දිනක් තුළ හපුතලේ වෙත තරඟකරුවන්ට ගමන්  කිරීමටත්   සිදුවනු ඇත.

දෙවැනි  දිනයේදී  හපුතලේ සිට ලිප්ටන් තේ වතුයාය දක්වා පාපැදිකරුවන් ගමන් කිරීමට නියමිත වේ. මේ දිනයේදී සමස්ත වශයෙන්  කි.මී 57  සංචාරය කිරීමටද මීටර් 1,857 කඳු තරණය කිරීමට තරඟකරුවන්ට සිදුවනු  ඇත. මෙම  තරගයේ සුවිශේෂි  අවස්ථාවක් වන්නේ තේ වතු මැදින් මීටර් 1,200 ප්‍රමාණයක් කඳු තරණය කිරීමට සිදුවන නිසාය. මෙම සංචාරයේදී මීටර් 500 සහ මීටර් 700 කඳු තරණය කිරීමේ අතිශය වෙහෙසකර පාපැදි තරඟයක්  සඳහා  මුහුණ දීමට සිදුවනු  ඇත.

තෙවැනි දිනයේදී ශ්‍රී ලංකාවේ උසම දියඇල්ල  වන බඹරකන්ද වෙත මීටර් 1300 කඳු තරණය තුළින් තරඟය ආරම්භ වන අතර තරඟකරුවන් විසින් කි.මී 66 ක පමණ දුරක් සංචාරය කරමින් මීටර් 2,900ක් කඳු තරණය කිරීමෙන් නුවරඑළිය වෙත තරගකරුවන් ගමන් කරනු ඇත.

හතරවැනි දිනයේදී තරඟකරුවන් නුවරඑළියේ සිට නකල්ස් කඳු පෙළ වෙත ගමන් කරනු ඇත. මෙම සංචාරය සඳහා සමස්ත වශයෙන් දුර ප්‍රමාණය  කි.මී 100 වන අතර මීටර්  2,003 කඳු තරණය කිරීමක්ද මීට ඇතුලත්ය. මෙම දිනයේදී මහියංගනයෙන් පාපැදි ධාවනය අවසන් වනු ඇත.

පස් වැනි දිනයේ දී තරඟාවලිය සඳහා මීටර් 935ක් කඳු තරණය කිරීම ඇතුළුව  සමස්ත දුර ප්‍රමාණය කිලෝ මීටර්  55 සංචාරය කරමින් හෙට්ටිපොලදී තරඟය අවසන් වන අතර පසුව තරඟකරුවන් සියලු දෙනා වෙත දඹුල්ල නගරයේදී ත්‍යාග ප්‍රදානය සිදුකිරීමට නියමිත බව ශ්‍රී ලංකන් ගුවන් සමාගම පවසයි.

ශ්‍රී ලංකන් ගුවන් සමාගමේ දිගුකාලීන පාර්ශ්වකරුවෙකු වන ත්‍රාසජනක සංචාර සඳහා (www.lsrtravel.com) ශ්‍රී ලංකාවේ ප්‍රමුඛතම සංචාරක මෙහෙයවන්නෙකු වන ලංකා ස්පෝට්ස්රයිසන් (Lanka Sportreizen) (LSR) හා එක්ව ගුවන් සමාගම මෙම වැඩසටහන සංවිධානය කර ඇත.

1_Sri Lankan

NSBM හරිත සරසවියේ විශේෂ නිරීක්ෂණයක්

NSBM හරිත සරසවියේ විශේෂ නිරීක්ෂණ චාරිකාවක නිරත වෙමින් එම ආයතනය මගින් සංවිධානය කළ වැඩසටහන් කිහිපයකටම සහභාගී වීමට අමාත්‍ය ආචාර්ය සරත් අමුණුගම මහතා පසුගියදා කටයුතු කර ඇත.

විද්‍යා, තාක්ෂණ හා පර්යේෂණ, නිපුණතා සංවර්ධන හා වෘත්තීය පුහුණු සහ උඩරට උරුමය අමාත්‍යවරයා NSBM ශ්‍රවණාගාරයේදී එහි ආචාර්යවරුන් හා සිසුන් සහභාගී වූ සුහද හමුවකටද සහභාගී වී තිබේ. එමෙන්ම, “චතුර්විධ මංපෙත්” නමින් පාසල් සිසුන්ගේ සංවර්ධනය සඳහා සංවිධානය කරන විශේෂ සමාජ සද්ව්‍යාපාරයක්ද අමාත්‍ය වරයා වෙත හඳුන්වා දෙනු ලැබූ අතර, අනතුරව සරසවියේ පහසුකම් නිරීක්ෂණය කිරීමක්ද සිදුව තිබේ. 

එසේම සිසුන්ට උපාධිය හදාරන අතරතුර සරසවිය තුළම සේවා පුහුණුව ලබාදීමට පිහිටුවන ලද දිවයිනේ ප්‍රමුඛ පරිගණක ආයතන තුනක කාර්යාල තුනක්ද විවෘත කර ඇත. එමෙන්ම, NSBM උපාධි පාඨමාලා සඳහා වෘත්තීයමය පිළිගැනීමක් ලබාදීමට CIMA සහ ACCA ආයතන සමඟ අවබෝධතා ගිවිසුම් දෙකකට මෙහිදී අත්සන් තැබීම සිදුව තිබේ. එසේම හරිත සරසවියේ පහසුකම් හා සේවා ඇමතිවරයාගේ පැසසුමට ලක්වූ බවද සඳහන් වෙයි. එමෙන්ම මෙම අවස්ථාව සනිටුහන් කරමින් සංවිධානය කළ රුක් රෝපණ කිරීමක්ද අමාත්‍යවරයා අතින් සිදුව ඇති අතර, උපකුලපතිවරයා විසින් අමාත්‍යවරයාට විශේෂ සමරු තිළිණයක් ද පිළිගන්වා තිබේ. 

මෙම අවස්ථාවට අමාත්‍යාංශ ලේකම් සන්ධ්‍යා විජේබණ්ඩාර, NSBM නව සභාපති පී.රණේපුර, උපකුලපති මහාචාර්ය ඊ.ඒ. වීරසිංහ, මහචාර්ය භාරත දොඩම්කොටුව, නියෝජ්‍ය උපකුලපති චමින්ද රත්නායක යන මහත්ම මහත්මීන් සහභාගී වූහ. 

DSC_8254 DSC_8136 DSC_8197

Apple ඩොලර් ට්‍රිලියනයක ප්‍රථම සමාගම වීමට සැරසේ

ඇමෙරිකානු තාක්ෂණික ව්‍යාපාරයේ දැවැන්ත සමාගමක් වන ඇපල් සමාගම ඇ.ඩො.ට්‍රිලියනය ඉක්මවා යන ප්‍රථම සමාගම බවට පත්වීමට ඉතා ආසන්නයට පැමිණ ඇති බව විදෙස් වාර්තා පවසයි.

මෙම සතිය ආරම්භයේදී ඇපල් සමාගමේ වෙළෙඳ පොළ වටිනාකම අ.ඩො.බිලියන 950ක් ලෙස සටහන් වීම මේ තත්ත්වයට හේතු වී තිබේ.

පසුගිය සඳුදා දිනයේ පැවති ඇපල් සමාගමේ වාර්ෂික සම්මේලනයෙන් පසුව, සමාගමේ කොටසක අගය 0.8%කින් ඉහළ යමින් ඩොලර් 191.83 බවට පත්විය.

මෙම වසර ආරම්භයේ මේ දක්වා ඇපල් සමාගමේ iPhone ස්මාට් ජංගම දුරකථන අලෙවිය ශක්තිමත් ස්ථාවරත්වයක් පෙන්වා ඇති අතර, ප්‍රකට ව්‍යාපාරිකයෙකු වන වොරන් බෆට් විසින් පළමු කාර්තුවේදී ඩොලර් මිලියන 75ක කොටස් මිලදී ගැනීමේ ප්‍රවෘත්තියද මේ තත්ත්වයට හේතු වූ බව විශ්ලේෂකයෝ පෙන්වා දෙති.

එමෙන්ම, 2018 වසරේ මේ දක්වා ඇපල් සමාගමේ කොටසක අගය 18%කින් ඉහළ නැඟ ඇති අතර, ඇපල් iPhone විකුණුම් මෙම කාර්තුව තුළ 3%ක වර්ධනයක් පෙන්වා ඇත.

කෙසේ වෙතත්, iPhone X දුරකථනයේ විකුණුම් සම්බන්යෙන් යම් පසුබෑමක් පෙන්වා තිබුණත්, iPhone සෙසු නිෂ්පාදන අලෙවිය ඉතා ඉහළ මට්ටමක පැවති බව සඳහන් විය.

ඒ අනුව, මේ වනවිට සමාගමේ කොටස් අගය ඉතා සුළු ඉහළ යෑමකින් ඇපල් සමාගමට ඉතා පහසුවෙන් ඇ.ඩො.ට්‍රිලියනයක සමාගමක් බවට පත්වීමේ දොරටු විවරව ඇත.

යම් ලෙසකින් ඇපල් සමාගම ඇ.ඩො.ට්‍රිලියනයක වෙළෙඳ පොළ වටිනාකම පසු කළහොත් ඇමෙරිකා එක්සත් ජනපදය තුළ එම අභියෝගය ජයගත් ප්‍රථම සමාගම බවට ඇපල් සමාගම පත්වනු නොඅනුමානය.

නමුදු, තාක්ෂණික ක්ෂේත්‍රයේ තවත් දැවැන්ත සමාගම් වන ඇමසෝන්, ගූගල් සහ මයික්‍රොසොෆ්ට් යන සමාගම්ද ඇ.ඩො.ට්‍රිලියනයේ සීමාව ඉක්මවීමේ අභියෝගය භාරගෙන සිටින සෙසු ඇමෙරිකානු සමාගම් එකතුවේ තරගයක නිරත වන බවද සඳහන් කළ යුතුය.

කෙසේ වෙතත්, ලෝකයේ ඉහළම වෙළෙඳ පොළ වටිනාකම සහිත සමාගම බවට පත්ව සිටින්නේ සෞදි අරාබියේ ජාතික ඛනිජතෙල් සමාගම වන ඇරම්කෝ සමාගම බව ඔබ බොහෝ දෙනෙකු නොදන්නවා විය හැකිය. එහි වෙළෙඳ පොළ වටිනාකම ඇ.ඩො.ට්‍රිලියන 2කි. 

1_Apple 2 3

ජාතික අපනයන මණ්ඩල ICT සම්මේලනය කොළඹදී

ජාතික අපනයනකරුවන්ගේ මණ්ඩලය මෙහෙයවන තොරතුරු සන්නිවේදන තාක්ෂණය පිළිබඳ සම්මේලනය පසුගියදා අග්‍රාමාත්‍ය රනිල් වික්‍රමසිංහ මහතාගේ ප්‍රධානත්වයෙන් කොළඹ ගලදාරි හෝටලයේදී පැවැත්විණි.

එම අවස්ථාවට ජාතික අපනයනකරුවන්ගේ සංගමයේ සභාපති රමල් ජාසිංහ, උප සභාපති රම්‍යා වීරකෝන්, මහලේකම් ෂිහාම් මරිකාර්, තොරතුරු සන්නිවේදන තාක්ෂණ නියෝජිතායතනයේ සභාපති මහාචාර්ය රොහාන් සමරජීව, අයන්වන් ටෙක්නොලජීස් ඇන්ඩ් බෝඩ්පැක් ආයතනයේ විධායක නිලධාරිනි ලක්මිණි විජේසුන්දර යන මහත්ම මහත්මීන්ද, අපනයනකරුවන්ගේ මණ්ඩලයේ නිලධාරීන්ද ඇතුළු ආරාධිතයන් රැසක් සහභාගි වී සිටියහ. 

as3 a3 a5

විද්‍යා හා තාක්ෂණ ක්ෂේත්‍රයේ සහයෝගයෙන් කටයුතු කිරීම සඳහා කොරියාව කැමතියිලු

ශ්‍රී ලංකාවේ ආයෝජන ඉඩප්‍රස්ථා, මෙරට සංවර්ධන වැඩසටහන් සහ වෘත්තීය පුහුණු ක්ෂේත්‍රයේ කිරීමට නියමිත වෙනස්කම් යනාදිය ගැන දකුණු කොරියාවේ අවධානය යොමුව තිබේ.

විද්‍යා, තාක්ෂණ හා පර්යේෂණ, නිපුණතා සංවර්ධන හා වෘත්තීය පුහුණු සහ උඩරට උරුමය අමාත්‍ය ආචාර්ය සරත් අමුණුගම සහ ශ්‍රී ලංකාවේ කොරියානු තානාපති ලී හෙඔන් යන මහත්වරුන් අතර එම අමාත්‍යාංශයේදී පැවති හමුවකදී මේ පිළිබඳ දීර්ඝව සාකච්ඡා කර ඇත.

එමෙන්ම කොරියාව, විද්‍යා හා තාක්ෂණ ක්ෂේත්‍රයේ කටයුතුවලදී ශ්‍රී ලංකාව සමග ඉතා සහයෝගයෙන් කටයුතු කිරීමට කැමැත්තෙන් සිටින බවද කොරියානු තානාපතිවරයා මෙහිදී අමාත්‍යවරයා සමග පැවසූ බව එම අමාත්‍යාංශය වැඩිදුරටත් පවසයි.

මෙම අවස්ථාවට කොරියානු තානාපති කාර්යාලයේ පළමු ලේකම් ක්වොන් මියොන් මෙනවිය සහ අමාත්‍යාංශ ලේකම් සන්ධ්‍යා විජේබණ්ඩාර මහත්මියද සහභාගී වී තිබේ.

1_Sarath