Author Archives: ෂෙහානි දිල්රුක්ෂිකා

විවාහයටත් ප්‍රථම අවධානය යොමු කළ යුතු ගර්භිණී සමයේ පෝෂණය පිළිබඳ ඔබ දැනුම්වත්ද?

ගර්භිණී සමයේදී නිසි පෝෂණය ලැබීම අනිවාර්යෙන්ම සිදුවිය යුත්තකි. මවගේ කුස තුළ වැඩෙන කලලය මව විසින් ගන්නා ආහාර මත පමණක් යැපීමත්, මවගේ ආහාරයේ යම් පෝෂණ ඌණතාවක් ඇතිවුවහොත් එය කුස තුළ වැඩෙන දරුවාට බලපෑමත් එයට ප්‍රධාන වශයෙන් හේතු වේ. එසේම තම සෞඛ්‍ය රැක ගැනීමටද ගර්භිණී මව පෝෂදායී ආහාර වේලක් ගත යුතුය. එසේ නොවුණහොත් මවද දරු ප්‍රසූතියෙන් පසුව විවිධාකාරයේ පෝෂණ ඌණතාවන්ට ලක්විය හැකිය. 


healthy_food

ගර්භිණී වීමට පෙර සිට ඒ සඳහා සූදානම් වීම අවශ්‍යමය. එහෙයින් ගර්භිණී වීමට පෙර සිටම නිසි පෝෂණ තත්ත්වයන් රැකගැනීමට අතපසු නොකළ යුතුය. ගර්භිණී වීමට පෙර කාන්තාවකගේ ශරීර ස්කන්ධ දර්ශකය 18.5- 25ත් අතර තිබේ නම් ඒ සුදුසු තත්ත්වයකි. එලෙසම නීරක්තියෙන් නොපෙළීම, එනම් ප්‍රමාණවත් හිමෝග්ලොබින් මට්ටමක් රැධිරයේ පැවතීමද අවශ්‍යය. 

එපමණක් නොව අප රට තුළ බෝ නොවන රෝග තත්ත්වයන් එනම්, විශේෂයෙන්ම දියවැඩියාව තරුණ වයසේදීම ඇතිවීමේ ඉඩකඩ පවතී. එහෙයින් ගැබිනියක් වීමට පෙර නිසි ශරීර ස්කන්ධ දර්ශකයක් තිබීම, නීරක්තියෙන් හා දියවැඩියාවෙන් නොපෙළීම, යහපත් ගර්භිණී තත්ත්වයක් උරුම කිරීමට මුල්වන සාධක අතර පවතී. 

ඇතැම් කාන්තාවෝ දියවැඩියාවෙන් පෙළෙමින් ඒ බව දැන ප්‍රතිකාර ගනිමින් සිටියදී ගැබ් ගනිති. තවත් සමහරු තමන් දියවැඩියාවෙන් පෙළන බව නොදැන ගැබ් ගනිති. මේ දෙපාර්ශ්වයේම පෝෂණ තත්ත්වය විමර්ශනය කිරීම සහ අවශ්‍ය මගපෙන්වීම ලබාදීම වැදගත් දෙයකි. 
එමෙන්ම ශරීර ස්කන්ධ දර්ශක තොරතුරු අනුව පෙනෙනුයේ එහි 18.5-25 පරාසය තුළ සිටින්නේ අපගේ මව්වරු අතරින් 50%ක් පමණ පිරිසක් බවයි. 25%ක් මව්වරුන් 18.5ට අඩු ශරීර ස්කන්ධ දර්ශක දැක්වීම කලක සිටම පවතින ගැටලුවකි. මෑතක අප දකින තවත් ප්‍රවණතාවක් වන්නේ ගර්භිණී කාන්තාවන් අතරින් 25෴ක්ම 25ට වැඩි ඉහළ ශරීර ස්කන්ධ දර්ශක දැක්වීමයි. මේ දෙපිරිසම සඳහා පෝෂණ මැදිහත්වීම් අවශ්‍යය. මේ හැරුණු විට පවතින අනෙක් ගැටලුව වන්නේ උපත දෙන බිළිදුන්ගේ උපත් බර අඩු වීමය. එනම් දරුවන් උපතේදී කිලෝ ග්‍රෑම් 2.5ට වඩා අඩු උපත් බරක් දැක්වීමයි. පසුගිය කාලය මුළුල්ලේම මෙම ගැටලුව විසඳීම සඳහා බොහෝ මැදිහත්වීම් සිදුකළද ලැබී ඇති ප්‍රගතිය ඉතා අඩුය.

මෙම පෝෂණ අභියෝග ජයගැනීම සඳහා උත්සාහ දැරිය යුත්තේ ගර්භිණීභාවයට පත් වූ පසුව නොව විවාහ වීමටත් ප්‍රථමය. පෝෂණ ගැටලු සමග මවක් ගර්භිණී වන තුරු බලා සිටියහොත් එය මව සහ බිළිඳා යන දෙදෙනාටම හානිකර විය හැකිය. ජාතික වශයෙන් ක්‍රියාත්මක වන පූර්ව- ගර්භිණී සත්කාර වැඩසටහන ජීවන චක්‍ර ප්‍රවේෂයක් ගනු ලබයි. විශේෂයෙන්ම නව යොවුන් වයසේ පෝෂණය සහ ගර්භිණී සමයේ පෝෂණය සහ ගර්භිණී සමයේ පෝෂණය පිළිබඳ විමසමින් ඒ පිළිබඳ මැදිහත්වීම් දැක්වීම එමගින් සිදුකරයි. 

කාන්තාවන් ගර්භිණී වීමට අපේක්ෂා කරන්නේ නම් ෆෝලික් අම්ලය පෙත්ත බැගින් දිනපතා ගැනීම වැදගත්ය. මේ මගින් ළදරුවා තුළ ඇතිවිය හැකි ස්නායුමය සංකූලතා අවම කිරීමට ප්‍රධාන වශයෙන්ම හේතුවේ. එය මවගේ නීරක්තිය මර්දනයටද උදව් වේ. එමෙන්ම ප්‍රසවයේදී හොඳ උපත් බරක් සහිත ළදරුවෙක් ලැබීමත්, මව තුළ සංකූලතා ඇතිවීම වැළැක්වීමත්, මවගේ බර වැඩිවීමත් මේ මගින් අපේක්ෂා කෙරේ. මෙම බර වැඩි වීම පූර්ව ගර්භිණී ශරීර ස්කන්ධ දර්ශක අගය මත රඳා පවතී. 

ගර්භිණී මවගේ බර වැඩි වීම ඒකාකාරීව සිදුවන්නක් නොවේ. සමහර විට මුල් කාලයේදී ආහාර අරුචිය, ඔක්කාරය ආදී හේතූන් නිසා බර අඩු වීම සිදුවිය හැකි වුවත් ගර්භිණී සමයේ අවසන් ත්‍රෛමාසයේදී වැඩිම බර වැඩි වීම සිදුවේ. ගර්භිණී සමයේ ප්‍රමාණවත් ලෙස බර වැඩි වීම සිදුනොවුණහොත් අඩු බර දරු උපතක් ඇති වීම සඳහා මෙන්ම අහිතකර ලෙස බලපෑම් කිරීමටද පුළුවන. එමෙන්ම ගර්භිණී සමයේ අධික බර වැඩිවීම මව හා දරුවා යන දෙදෙනාටම අහිතකර ලෙස බලපෑ හැකිය. මේ නිසා අධිබර හා තරබාරු මව්වරු පැණිරස ආහාර හා පාන වර්ග, තෙලෙන් බදින ලද ආහාර, මේදය හා පිෂ්ඨය බහුල ආහාර, මොල්ට් පාන වර්ග ඇතුළු අධික කැලරි අගයක් සහිත ආහාර ගැනීම තදින්ම සීමා කළ යුතුය. ගර්භිණී සමයේ මුල්මාස තුන ඇතුළත පෝෂණ අවශ්‍යතා ඉහළ යන්නේ සුළු වශයෙනි. එහෙත් ඉන්පසුව විශේෂයෙන්ම  ගර්භයට සති 28ක් ගත වූ පසු එය සැලකිය යුතු ලෙස ඉහළ යෑම දැකගත හැකිය. 

මවගේ නිසි පෝෂණය සිදුවීම සඳහා  අවශ්‍ය සාධක

ගර්භිණී සමයේ බර වැඩිවීම නිසි අයුරින් සිදුවීමට, අවශ්‍ය කැලරි ප්‍රමාණය ආහාර මගින් ලැබීම
දිනපතා සෑම ආහාර කාණ්ඩයකටම අයත් විවිධ ආහාර කෑමට ගැනීම
ප්‍රමාණවත් ලෙස දියර පානය කිරීම (අවම වශයෙන් දිනකට වීදුරු 8-10)
මලබද්ධය වැළැක්වීම සඳහා කෙඳි සහිත ආහාර ප්‍රමාණවත් ලෙස ආහාරයට එකතු කර ගැනීම
සෞඛ්‍ය සම්පන්න ආහාර මවගේ කැමැත්ත අනුව තෝරාගෙන කෑමට ගැනීම
අවම වශයෙන් දිනකට එක් නැවුම් කිරි වීදුරුවක් හෝ ඊට සමාන කිරි ආහාරයක් පානය කිරීම
මධ්‍යසාර ගැනීම හෝ අක්‍රිය හෝ සක්‍රිය හෝ දුම්පානයෙන් වැළකීම
එමෙන්ම ගර්භිණී සමයේ හොමෝන ක්‍රියාකාරීත්වය නිසා වෙනස්කම් රැසක් සිදුවේ. මලබද්ධය, බඩදැවිල්ල, වැනි ගැටලු කාරී තත්ත්වයන්ද ගර්භිණී සමයේ ඇති විය හැකිය. මලබද්දය සඳහා විශේෂ ඖෂධ නොලබා තන්තු සහිත ආහාර වැඩිපුර ගත යුතුය. විශේෂයෙන් පලා වර්ග හා පලතුරු ගැනීම සහ ජලය වැඩිපුර පානය මගින් සහනය ලද හැකිය. බඩ දැවිල්ල පවතී නම් තෙල් හා මිරිස් නොයෙදූ ආහාර ගැනීමෙන් එය සමනය කර ගැනීමට උනන්දු විය යුතුය.
ගර්භිණී සමය තුළදී සමබර ආහාර වේලක් ගැනීම සඳහා සායනය තුළින් ලැබෙන පෙති වර්ග භාවිත කිරීම තුළින් මවගේ කුස සහ කුස තුළ වැඩෙන බිළිඳාගේ පෝෂක අවශ්‍යතා සපිරෙන අතරම, යකඩ, කැල්සියම්, විටමින් සී, අයඩීන් ආදී ක්ෂුද්‍ර පෝෂක අවශ්‍යතාද සපුරා ගැනීමට හැකිවේ. 

8c366c80c6775a4b559480ac20a17a0a

ගර්භිණී මව ලැබිය යුතු අතවශ්‍ය  ක්ෂුද්‍ර පෝෂක

ෆෝලේට්

දරුවාගේ ස්නායු පද්ධතියේ සිදුවිය හැකි ආබාධ ෆෝලේට් ගැනීම මගින් වැළකේ. ගර්භිණී සමයේදී ෆෝලේට්වල අවශ්‍යතාව ඉතා ඉහළ අතර, ගර්භිණී සමයට පෙර සිටම හා ගර්භිණී සමය තුළ ෆෝලේට් ගැනීම මගින් යහපත් ප්‍රතිඵල ලබාගත හැකිය. 

යකඩ

ගර්භිණී සමයේ යකඩ අවශ්‍යතාව ඉතා ඉහළය. ඉහළ යන රැධිර සෛල ප්‍රමාණය නිෂ්පාදනයට, කුස තුළ වැඩෙන කලලයේ වර්ධනයට හා ගර්භාෂයේ පටක හා කලල බන්ධනය වර්ධනයටද යකඩ අවශ්‍යය. 

කැල්සියම්

ගර්භිණී සමයේදී හා කිරිදෙන අවධියේදී කැල්සියම් අවශ්‍යතාව ඉහළ යයි. මව විසින් ලබා ගන්නා කැල්සියම් ප්‍රමාණය අඩු වූ විට මවගේ අස්ථී තුනී වී එම කැල්සියම් දරුවාගේ අස්ථී වර්ධනයට යොදා ගනියි. 

විටමින් සී

විටමින් සී මගින් යකඩ අවශෝෂණය වැඩි කරන අතර, ආසාදිත රෝගවලට ගොදුරු වීමේ ප්‍රවණතාව අඩු කරයි. දිනකට අවශ්‍ය විටමින් සී ප්‍රමාණය ලබා ගැනීම සඳහා පලතුරු ප්‍රමාණ 3ක් හෝ 4ක් ආහාරයට එකතු කරගත යුතුය. 

අයඩීන්

අයඩීන් අඩංගු ලුණු ආහාරයට එකතු කර ගැනීම මගින් ගර්භිණී මවගේ අයඩීන් අවශ්‍යතාව සම්පූර්ණ කරගත හැකිය. 
එමෙන්ම ගර්භිණී මවක් වැඩිපුර ජලය පානය කිරීම අවශ්‍යය. නිතර වැළඳිය හැකි මුත්‍රා අසාදන හා මලබද්ධය දුරලීමට එය උපකාරී වේ. එසේම ගර්භිණී සමයට අහිතකර කඩචෝරු, කෘතීම ආහාර, සිසිල් බීම, මොනෝසොඩියම් ග්ලූටමේට් යොදා සකස් කළ ආහාර ගැනීම නොකළ යුතුය. සෑම විටම නිවසේ පිළියෙල කරන අලුත් ආහාරයක් ගැනීම සුදුසුය. 
ගර්භිණී මව්වරුන්ගේ බර සටහන් කරන ප්‍රස්ථාරය

 

නීතිරීතිවලින් පමණක් සීමා කළ නොහැකි ළමා ශ්‍රම සූරාකෑම

3

මතු බිහිවන දරුවා නීරෝගිමත්, බුද්ධිමත්, රූමත් මෙන්ම ගුණවත් දරුවෙකු වීම සෑම දෙමවුපියෙකුගේම ප්‍රාර්ථනාවක් වුවද සමාජයේ ඇති නැති පරතරය විසින් මෙය ඇතැම් විට ඔවුනට කිසිදිනක සිදුනොවෙනවා සිහිනයක් පමණක් වී තිබේ. දරිද්‍රතාව මුල් වූ පවුලක් හා රටක් තුළ බිහිවන දරුවන්ට නිරායාසයෙන්ම තමන්ගේ අයිතීන් ගිලිහී යයි. ළමා කාලයේ කෙළිදෙ‍ෙළන් ගත කරනවා වෙනුවට ඔවුන්ට සිදුකරන්නට සිදුවනුයේ තම කුස පුරවා ගැනීමට කෙසේ හෝ යමක් කිරීමටය. එයින් ආරම්භ වන්නේ ළමා ශ්‍රමයේ සූරා කෑමයි.  
සමාජයේ නොයෙක් ක්ෂේත්‍රවල ප්‍රබල ලෙස සාකච්ඡාවට භාජන වන ළමුන්ගේ අයිතීන් පිළිබඳව අපි නොයෙක් අවස්ථාවන්හි පුළුල්ව සාකච්ඡා කර ඇත්තෙමු. එමෙන්ම අද වන විට සංවර්ධනය වෙමින් පවතින අනෙක් රටවලට සාපේක්ෂව අපේ රටේ ළමා ශ්‍රමික ප්‍රමාණය අවම මට්ටමක පවතී. නමුත් ලෝකයේ තත්ත්වය දෙස බැලු විට ළමා ශ්‍රමිකයන් වැඩියෙන් සිටිනුයේ සංවර්ධනය මන්දගාමී රටවලය. ඒ නිසා ඒ රටවල වෙසෙන දරු‍වෝ නොයෙක් පීඩාකාරී දරුණු තත්ත්ව යටතේ වුවද තම ශ්‍රමය විකුණා කුසට අහරක් ලබා ගැනීමට වෙහෙසෙති. 
යුනෙස්කෝ සංවිධානය ස්වකීය සමීක්ෂණ වාර්තා මගින් දක්වන ආකාරයට මේ වන විට ලෝකයේ සිටින දරුවන්ගෙන් මිලියන 246ක් ශ්‍රමිකයන් ලෙස සේවයේ යෙදෙන බව දක්වා තිබේ.

1_FtG4Z7H5zyFQrdb6Ns5iHw

කෘෂිකර්මාන්තය, රසායානාගාර ආශ්‍රිත හා අනතුරුදායක යන්ත්‍ර සූත්‍ර ආශ්‍රිත භයානක රැකියාවල මිලියන 170ක් පමණ දරුවන් නියුතු වන බව එක්සත් ජාතීන්ගේ ළමා අරමුදල සිය වාර්තාවක් මගින් ප්‍රකාශ කර තිබේ. අවම වශයෙන් වර්ෂයක් තුළ මිලියනයක පමණ ප්‍රමාණයක් නොයෙක් මිනිස් ජාවාරම්වලට ගොදුරු වන බවට එහි වැඩිදුටත් සඳහන් වෙයි. එමෙන්ම ගණිකා වෘත්තිය සහ බලහත්කාර කාමුක ක්‍රියා සඳහා මිලියන 1.8ක් පමණ දරුවන් ගොදුරු වීම ඉතා ඛේදජනක තත්ත්වයකි. 

ජාත්‍යන්තර කම්කරු සංවිධානයේ (ILO) දත්ත වාර්තා අනුව ලෝකයේ ළමා ශ්‍රමිකයන්ගෙන් අඩකට ආසන්න ප්‍රමාණයක් සිටිනුයේ අප්‍රිකානු කලාපයේය. එය සංඛ්‍යාත්මකව මිලියන 72.1කට ආසන්නය. එමෙන්ම ආසියා හා පැසිෆික් කලාපයේ ළමා ශ්‍රමිකයෝ 62.1ක් වාසය කරති. ඇ‍ෙමරිකාවේ මිලියන 10.7ක්ද, අරාබි රාජ්‍යය් මිලියන 1.2ක්ද, යුරෝපය හා මධ්‍යම ආසියාව තුළ මිලියන 5.5ක්ද තම ශ්‍රමය වගුරති. එමෙන්ම ඔවුන්ගේ දත්ත වාර්තා අනුව පෙන්වා දෙන්නේ වයස අවුරුදු 5-11ත් අතර ළමා ශ්‍රමිකයන් ලෝකය පුරා මිලියන 152ක් සිටින බවයි. එමෙන්ම වයස අවුරුදු 12- 14ත් අතර මිලියන 43ක්, අවුරුදු 15-17ත් අතර මිලියන 37ක් ළමා ශ්‍රමිකයන් සිටින බවට එමගින් වැඩිදුරටත් පෙන්වා දෙයි.

ලෝකය පුරාම ළමා ශ්‍රමය සුරාකෑම සිදුවන අතර, එය එක් එක් රටවල සම්ප්‍රදායන් හා සංස්කෘතීන් අනුව විවිධාකාර ස්වරූප ගනියි. ගිනිකොනදිග ආසියාවේ හා පැසිෆික් කලාපයේ ගණිකා වෘත්තිය, ඇඟලුම් කම්හල් හා ගෘහ සේවිකාවන් ලෙස බොහෝ විට ළමා ශ්‍රමිකයන් සේවයේ නිරතව සිටින බව දැකගත හැකිය. 

අප්‍රිකානු රටවල බොහෝ දෙමවුපියන් තම දරුවන් පශු කර්මාන්තය සඳහා තම දරුවන් ශ්‍රමිකයන් ලෙස යොදා ගැනීම බොහෝ විට දක්නට ලැබෙයි. එම රටවල සිටින ඇතැම් දෙමවුපියන් එළදෙනෙකු ලබා ගැනීම සඳහා ද දරුවෙකු විකුණනු ලබන අවස්ථා ඒ අතරින් වාර්තා වෙයි. මේ අතර එම රටවල ඇතැම් දරුවෝ වතුකරයේ මෙන්ම ගැඹුරු පතල්වල හා ගෘහ සෙවිකාවන් ලෙසද ඔවුන්ගේ ශ්‍රමය වගුරවති. උතුරු ඇමෙරිකාවේ සහ ලතින් ඇමෙරිකාවේ දරුවන් මත්ද්‍රව්‍ය ජාවාරම්කරුවන් විසින් වැඩි වශයෙන් සූරාකනු ලබයි.
ලෝකයේ බොහෝ දරුවන් උදෑසනින්ම අවදි වී එදා වේල සරි කර ගන්නට කර්මාන්ත ශාලාවක, ගොවි‍ෙපාළක එසේත් නොමැතිනම් මෙහෙකරුවන් හෝ ලිංගික ශ්‍රමිකයන් ලෙස වෙහෙස මහන්සි විය යුතුය. එක්සත් ජාතීන්ගේ ස්වකීය ප්‍රකාශනය තුළින් ළමා අයිතිවාසිකම් ආර්ථික සූරාකෑමෙන් ආරක්ෂා කළ යුතු බව අවධාරණයෙන් දක්වා තිබේ. නමුත් නීති සම්පාදනයේ ඇති අඩුපාඩු හා නොපැහැදිලිකම් මත ලක්ෂ සංඛ්‍යාත දරුවෝ අධ්‍යාපනය ලබනවා වෙනුවට ශ්‍රමය වගුරවමින් අනතුරුදායක තත්ත්ව යටතේ නුපුහුණු ශ්‍රමිකයන් ලෙස වහල් සේවයේ නියුතු වෙති. 

child_labour_1_by_gmbakash

සැබැවින්ම දරුවන් කම්කරුවන් ලෙසින් යෙදවීම නීතිය උල්ලංඝනය කිරීමේ ක්‍රියාවකි. කිසියම් හෝ පුද්ගලයෙකු විසින් දරුවන් කම්කරු සේවයේ යෙදවීම සිදුවන්නේ බහුල වශයෙන් දිළිඳු බව නිසාය. විනෝදයෙන් කෙළිදෙ‍ෙළන් ගත කිරීමට තිබෙන්නා වූ සැහැල්ලු අවධියක් ලෙස ළමා කාලය හැඳින්වුවත් මොවුන්ට දිළිඳුකම නිසා දෙමවුපියන්ගේ ආදරය, අනෙක් දරුවන් සමග කෙළිදෙ‍ෙළන් ගත කිරීමට ඇති කාලය, අධ්‍යාපනය ලැබීමේ අවස්ථාව යන සියල්ලම අහිමි වෙයි. දරුවෙකුගේ ළමා කාලය අහිමි කිරීම ළමා මනසට සිදුකරන්නා වූ විශාල අපරාධයකි. ළමා වියේ ඒ සියුමැලි දෑත්වලින් මේ ලෝකය තැනීමට හා ආර්ථිකය ගොඩනැංවීමට ඔවුන්ට කිසිසේත් නොහැකිය.

නීත්‍යනුකූල වයසට පැමිණීමට ප්‍රථම ළමා ශ්‍රමය යොදා ගැනීම

දරුවෙකු ශ්‍රමිකයෙකු වශයෙන් යෙදවීමට අවසර ලබාදී ඇති අවම නීත්‍යනූකූල වයස අවුරුදු 15කි. එය සංවර්ධනය වෙමින් පවතින රටක නම් වසර 14කි. පැය කිහිපයක් පමණක් සීමා වූ සැහැල්ලු වැඩ කිරීමට අවසර ලබා දී ඇති වයස් සීමාව 13 සිට 15 දක්වා වන අතර, එය සංවර්ධනය වෙමින් පවතින රටවල 12 සිට 14 දක්වා වේ. නමුත් අන්තරායකාර වැඩ සඳහා යොදා ගැනීමට නම් ඔහු හෝ ඇය අවුරුදු 18ට ඉක්මවා තිබිය යුතුය. මෙය සංවර්ධනය වෙමින් පවත්නා රටවල අවුරුදු 16කි. නමුත් ඇතැම් අවස්ථාවන්හි තමන්ගේ රටේ පවත්නා නීතියට අනුව මෙහි වෙනස්වීම් දැකගත හැකිය. 

ළමා ශ්‍රමය යොදවන දරුණු ආකාර 

දරුවන් වහල් ශ්‍රමය, වෙළෙඳ ජවාරම්වලට මෙන්ම සන්නද්ධ ගැටුම්කාරී අවස්ථාවන්හිදී හා මත්ද්‍රව්‍ය ජවාරම, ගණිකා වෘත්තිය වැනිදෑ සඳහා බලහත්කාරයෙන් බඳවා ගැනීම නිසා ඔවුන්ගේ ආරක්ෂාව, සෞඛ්‍ය හා සදාචාරය පිළිබඳ ප්‍රබල ගැටලු මේ වනවිට මතුව තිබේ.

අන්තරායකාරී කාර්යය 

 අනතුරුදායක ආයුධ, ද්‍රව්‍ය මෙන්ම ගෘහස්ථ කර්යයන් තුළ දරුවාගේ සෞඛ්‍ය සම්පන්නභාවය විනාශ කිරීම හා දිර්ඝ වේලාවක් එම කාර්ය දරුවාට සිදුකිරීමට නියම කිරීම මෙම කාණ්ඩයට අයත් වේ. එය එක් අතකින් ළමා ශ්‍රමය සුරාකෑමක් ලෙසද හැඳින්විය හැකිය. 

ළමා ශ්‍රමයේ ඇති අහිතකර බලපෑම් 

මේ අයුරින් හිංසාකාරී ලෙස දීර්ඝ කාලයක් තිස්සේ දරුවන්ගේ ශ්‍රමය සූරා කෑමෙන් ඔවුන්ට විශාල බලපෑමක් සිදුවේ. මානසික අවපීඩනය, මත්ද්‍රව්‍යවලට ඇබ්බැහි වීම, මන්දපෝෂණය වැනි ගැටලු ගණනාවක් ඒ ඔස්සේ නිර්මාණය වෙයි. මෙලෙස තම ශ්‍රමය වැය කරන දරුවෙකු බොහෝ අවස්ථාවල කායික, මානසික වශයෙන් හා ලිංගික ප්‍රචණ්ඩත්වයට ගොදුරු වන අවස්ථාද එමටය. 

අංක 182 දරන ජාත්‍යන්තර කම්කරු සංවිධාන සම්මුතියට අනුව ළමා ශ්‍රමයේ වඩාත් අනර්තකාරී ස්වරූප 

ශ්‍රී ලංකාව විසින් පිළිගනු ලැබූ 1999 අංක 182 දරන ළමා ශ්‍රමයේ වඩාත් අනර්ථකාරී ස්වරූප පිළිබඳ ජාත්‍යන්තර කම්කරු සංවිධාන සම්මුතියෙහි 3වැනි ව්‍යවස්ථාවෙහි වඩාත් අනර්තකාරී ස්වරූප වර්ග කර ඇත්තේ මෙලෙසිනි. 
සන්නද්ධ අරගලවලදී යොදා ගැනීම පිණිස දරුවන් බලහත්කාරයෙන් හෝ අනිවාර්ය බඳවා ගැනීම ඇතුළු (සියලු ආකාරයේ) වහල්භාවයන් හෝ දරුවන් විකිණීම හෝ නීති විරෝධී කටයුතුවලට යොදා ගැනීම, ණය හිලවු පිණිස දරුවන් දාසභාවයට ගැනීම සහ බලහත්කාරයෙන්

වැඩ ගැනීම හෝ අනිවාර්ය ශ්‍රමය වැනි වහල්භාවයට සමාන පරිචයන්

ගණිකා වෘත්තිය, අසභ්‍ය නිෂ්පාදන හෝ අසභ්‍ය රංගනය සඳහා දරුවෙකු යොදා ගැනීම, මුදලට ගැනීම හෝ ලබාදීම
තහනම් ක්‍රියාකාරකම් විශේෂයෙන්ම, මත්ද්‍රව්‍ය නිෂ්පාදන හා නීති විරෝධී ලෙස මිලට ගැනීම හෝ විකිණීමට දරුවෙකු යොදා ගැනීම, මුදලට ගැනීම හෝ ලබාදීම.
වැඩෙහි ස්වභාවය හෝ එය සිදු කරගෙන යනු ලබන තත්ත්ව අනුව දරුවන්ගේ සෞඛ්‍යයට, සුරක්ෂිතභාවයට හෝ සදාචාරයට හානිවිය හැකි වැඩ.
ඇතැම් ආර්ථික අංශ මගින් ළමා ශ්‍රමය විශාල වශයෙන් පොළඹවාගෙන යොදා ගනු ලබයි. මේවා අතර, ශ්‍රී ලංකාවේ ධීවර, සංචාරක, කුඩා හා පෞද්ගලික වතු සහ ගෘහස්ථ ශ්‍රමය දක්නට ලැබේ. 2010 වර්ෂයේදී ළමා ශ්‍රමයේ අනර්ථකාරී ස්වරූපයන්හි ලැයිස්තුව මගින් මසුන් ඇල්ලීම හෙවත් ධීවර කටයුතුවලට දරුවන් යෙදවීම දරුවන් අවදානමට ලක් කරනු ලබන ක්‍රියාකාරකම් ලෙස හඳුනාගෙන ඇති බැවින් ඒවා තහනම් කර තිබේ. සංචාරක කර්මාන්තය තුළ විශේෂයෙන්ම තරුණ පිරිමි දරුවන් ලිංගික සූරාකෑමට ලක්වීමද අප රට මුහුණදී ඇති ප්‍රධාන ප්‍රශ්නයකි. 

ශ්‍රී ලංකාවේ ළමා ශ්‍රමය තුරන් කිරීම සඳහා වූ ජාතික ප්‍රතිපත්තියේ සඳහන් වන පරිදි ප්‍රාදේශීය වැවිලි සමාගම් විසින් ළමා ශ්‍රමය ශුන්‍ය කිරීම සඳහා  වූ ප්‍රතිපත්තියක් (Zero tolerance policy) අනුගමනය කර ඇති අතර, එමගින් සේවා නියුක්තියේ අවම වයස අවුරුදු 16 හෝ 18 දක්වා වැඩි කර තිබේ. නමුත් කුඩා හා පෞද්ගලික වතුවල ළමා ශ්‍රමය යොදා ගැනීමට ගැටලුවක්ව පවතී. 

ඉහළ දරිද්‍රතා අනුපාතය, වැඩිහිටි කම්කරුවන් අතර පවතින මත්ද්‍රව්‍යවලට ඇබ්බැහි වීම හා ගෘහස්ථ ප්‍රචණ්ඩත්වය යන කරුණු ළමා ශ්‍රමිකයන් වැඩි වශයෙන් බිහිවීමට බලපා තිබේ. 
මෙම සාධක මත පාසල් හැරයෑමේ අනුපාතිකය ඉහළ නැංවීම, දරුවන් නීතිවිරෝධී කටයුතු සඳහා යොදා ගැනීම, නාගරික ප්‍රදේශවල සිටින දරුවන් ගෘහ මෙහෙකාර සේවයේ යෙදවීම, දෙමවුපියන් රැකියා සඳහා පිටත්ව යෑම හේතුවෙන් සහෝදර සහෝදරින් බලා ගැනීමට දායක වීම ආදිය ප්‍රබල ලෙස දැකගත හැකිය. 

සරණාගත දරුවෝ වැඩි වශයෙන් ලිංගික හිංසනයට හා ක_ර ක්‍රියාවලට ලක් වෙති. අප රටේ සරණාගතයන් නැතත් රොහින්ග්‍යා සරණාගත කඳවුරුවල වෙසෙන බොහෝමයක් ළාබාල ගැහැනු දරුවෝ එසේ ලිංගික හිංසනයට ලක් වෙති. %රොහින්ග්‍යා^ ගැහැනු දරුවන් ඉතා අඩු මිලට ලිංගික කටයුතු සඳහා යොදා ගන්නා බව බී.බී.සී. විදෙස් මාධ්‍ය විසින් පසුගියදා අනාවරණය කෙරිණි.  
මේ ආකාරයට නොයෙක් සමාජ තත්ත්ව නිසා දරුවන්ගේ ළමා කාලය සුන්දරව, විනෝදයෙන් ගත කිරීම ඔවුන්ට අහිමි වෙති. එයින් ඔවුන්ගේ අනාගතය පමණක් නොව මුළු මහත් ලෝකයේම අනාගතය ඉතා බරපතළ අගාධයකට ඇදවැටීමේ ප්‍රවණතාවක් මතුව තිබේ. ලාභදායී සේවය ළමා ශ්‍රමය වුවත් ඔවුන්ගේ අයිතීන් උදුරා ගැනීම සාදාචාරාත්මක ක්‍රියාවක් නොවේ. එම නිසා නීතිය මගින් පමණක් පාලනය කළ නොහැකි මෙය සීමා කිරීම හා අවම කිරිමට කටයුතු කිරීම අපගේ ද යුතුකමකි. 

විධායක ජනාධිපතික්‍රමය පමණක් ඉවත් කිරීමට යෝජනා කිරීම නිසැකවම වංචනික ක්‍රියාවක්

රටේ මෙතරම් ප්‍රශ්න, ගැටලුකාරී අවස්ථා රැසක් තිබියදී ජනතා විමුක්ති පෙරමුණ විසින් පෞද්ගලික මන්ත්‍රී යෝජනාවක් ලෙස ගෙන එනු ලබන සංශෝධනය පිළිබඳ පක්‍ෂයක් ලෙස ජනතා විමුක්ති පෙරමුණ, රටේ මහජනතාව, බුද්ධිමත් පිරිස් හා දේශපාලඥයෝ විවිධ මත ප්‍රකාශ කරති. එසේ ඉදිරිපත් කිරීමට නියමිත සංශෝධය සැබැවින්ම මෙම කාලය තුළ ඉදිරිපත් කිරීමේ ප්‍රධාන අරමුණක් තිබේද, එවැනි සංශෝධනයක් ඔවුන්ට ඉදිරිපත් කළ හැකිද, එසේත් නැතහොත් මෙය එක්තරා ආකාරයට දේශපාලන කුමන්ත්‍රණයක්ද යන්න වීමසීම සඳහා ප්‍රවීණ දේශපාලන විචාරක මොහාන් සමරනායක මහතා අදට සම්බන්ධ කර ගතිමු. ඔහු මේ පිළිබඳ දැක්වූයේ මෙවන් අදහසකි. 


mohan-samaranayake

අපේ රටේ විශාල පිරිසක් දන්නා පරිදි ආණ්ඩුක්‍රම ව්‍යවස්ථාව සංශෝධනය කිරීම සඳහා ජනතා විමුක්ති පෙරමුණ පෞද්ගලික මන්ත්‍රී යෝජනාවක් ගෙනැවිත් තිබෙනවා. මේ සංශෝධනය දැන් ප්‍රකට වී තිබෙන්නේ ආණ්ඩු ක්‍රම ව්‍යවස්ථාවේ 20 වැනි සංශෝධනය ලෙස. එහි මුඛ්‍ය පරමාර්ථය ලෙස ප්‍රකාශ කර තිබෙන්නේ විධායක ජනාධිපති ක්‍රමය අහෝසි කිරීම. මෙම සංශෝධනය පාර්ලිමේන්තුවේ කථානායකවරයාට බාර දීමට නියමිතයි. නමුත් මම මෙහිදී විවරණය කිරීමට අපේක්‍ෂා කරන්නේ එහි අන්තර්ගතය පිළිබඳ නොවේ. මම එමගින් ඇති වන දේශපාලන, ආර්ථික සාධක පිළිබඳ පමණයි විමර්ශනයට ලක් කරන්නේ. මෙහිදී විධායක ජනාධිපති ක්‍රමය යන අදහස පිළිබඳ මා ප්‍රථමයෙන් කිව යුතුයි. 

දේශපාලන මූලධර්මවලට අනුව නම් විධායක ජනාධිපති ක්‍රමය කියා ක්‍රමයක් නැහැ. එහි තිබෙන්නේ ජනාධිපති ආණ්ඩුක්‍රම, මිලිටරි ආණ්ඩුක්‍රම හා රාජාණ්ඩු ක්‍රම යානාදියයි. විධායක ජනාධිපති ක්‍රමය පිළිබඳ අදහස් දක්වන්නට යෑමේදී, අපි දන්නවා නූතන ජාතික රාජ්‍ය තුළ ප්‍රධාන ආයතන තුනක් තිබෙනවා. ඒ ව්‍යවස්ථාදායකය, විධායකය හා අධිකරණය යන නමින්. ජනතාව සතු පරමාධිපත්‍ය බලය ජනාධිපතිවරයාගේ මූලිකත්වයෙන් ක්‍රියාත්මක වන ක්‍රමය විධායක ජනාධිපති ක්‍රමය ලෙස හඳුනා ගන්න පුළුවන්. එමෙන්ම 1978 දී අපේ රටේ පාලනය බාරගෙන තිබුණේ එක්සත් ජාතික පක්‍ෂයේ නායකයා වූ ජේ.ආර්. ජයවර්ධන මහතා. එතුමා හඳුන්වා දුන් ජනාධිපති ආණ්ඩු ක්‍රමයේ සංශෝධනය විය යුතු ලක්‍ෂණ තිබෙනවා. මූලික වශයෙන් ගත් කළ මේ ක්‍රමය යටතේ ජනාධිපතිවරයාට (එයින් අදහස් කරන්නේ තනි පුද්ගලයෙකු) ප්‍රමාණවත් සංවරණ හා තුලනවලට යටත් නැති විශාල බලතල ප්‍රමාණයක් පැවරෙනවා. ජනාධිපතිවරයා නායකත්වය දෙන දේශපාලන පක්‍ෂය පාර්ලිමේන්තුවේ බහුතරය හිමිකර ගෙන තිබෙනවා නම් ජනාධිපතිවරයාට හැකි වෙනවා රටේ ජනමතය පමණක් නොව සාධාරණත්වය යුක්තිය පවා නොතකා තමන්ගේ දේශපාලන අභිලාෂය සපුරා ගැනීම සඳහා පාර්ලිමේන්තුව මෙහෙයවන්න. 

ජේ.ආර්. ජයවර්ධන ජනාධිපතිවරයාගේ සිට වත්මන් අවධිය දක්වාම ක්‍රියාත්මක වී තිබෙන්නේ එයයි. ජේ.ආර්. ජනාධිපතිවරයාට අවශ්‍ය වී තිබුණා 1977 ජනාධිපතිවරණයෙන් බලයට පත් වූ විට එක්සත් ජාතික පක්‍ෂයට බහුතරයක් හිමි වූ පාර්ලිමේන්තුවේ නිල කාලය මැතිවරණයක් නොතබා තවත් වසර හයකින් දීර්ඝ කරන්න. ඒ අනුව මේ මත පදනම් වූ ජනමත විචාරණයකට අවස්ථාව සලසා ගන්න. ඒ සඳහා පාර්ලිමේන්තුවේ අනුමැතිය ගත්තා. ඉතා බරපතළ ලෙස ප්‍රජාතන්ත්‍රවාදය උල්ලංඝනය කළ එක් අවස්ථාවක්. නමුත් පසුගිය මහින්ද රාජපක්‍ෂ පාලන සමයේදී එදා හිටපු අග්‍රවිනිශ්චකාරිනිය වූ ශිරාණි බණ්ඩාරනායක මහත්මියගේ අග්‍රවිනිශ්චකාර ධුරය වෙනස් කිරීම සඳහා පාර්ලිමේන්තු ක්‍රියාදාමයට මුලපිරෙන්නේත් ජනාධිපතිවරයාගේ තීරණය අනුව. මේ ආකාරයට මෙම ජනාධිපති ක්‍රමය රටේ ප්‍රජාතන්ත්‍රවාදයට, සමාජ සාධාරණත්වයට, යුක්ති ධර්මයට පටහැණි, අහිතකර, අනර්ථකාරී බවට ලක්‍ෂණයක්. 

නඩු පැවරීමට ඇති නොහැකියාව, ප්‍රශ්න කිරීමට නොහැකි වීම ආදී කරුණු කාරණා මත ඔහුව සර්ව බලධාරියෙකු බවට පත් කරනවා. ඒවා සංශෝධනය විය යුතුයි. නමුත් එසේ සංශෝධනය කිරීම වුවත් කෙරෙන්න ඕන රටේ ස්ථාවරභාවයක් තිබෙන විට පාර්ලිමේන්තුමය හා ව්‍යවස්ථාමය ක්‍රියාපටිපාටියකින් පමණයි. අතනින්, මෙතැනින් කෑලිකෑලි ඇලවිලි, ගැලවිලි නෙමෙයි. අද අපේ රට තුළ පරාජිත අස්ථාවරභාවයක් තිබෙනවා. ආණ්ඩු අභ්‍යන්තරයේ බරපතළ වශයෙන් බෙදීම් තිබෙනවා. එකම පැත්තකින් ජනාධිපති හා අගමැති ධුරයට පත්වූ නායකයන් බෙදී ප්‍රසිද්ධියේ අද එකිනෙකා විවේචනය කර ගන්නවා. එවැනි අණ්ඩුවක් යටතේ නොව ස්ථාවර, සන්සුන්, සමාජ තත්ත්වයක් යටතේ ඒ සඳහා අනුමත ක්‍රියාපටිපාටිය අනුගමනය කළ යුතුයි. 

නමුත් මේ  පැමිණ ඇති සංශෝධනයේ සැබෑ අරමුණ සත්‍යය වශයෙන්ම එය නොවේ. මේ සංශෝධනයේ තිබෙන අහිතකර ලක්‍ෂණවලින් එකක් තමයි මේ යෝජනාව ගෙන එන ජනතා විමුක්ති පෙරමුණ සිවිල් සමාජය ලෙස හඳුන්වා ගන්නා සංවිධාන මුලා කරන්න හදනවා. අප රටේ දේශපාලන, ආර්ථික, සමාජ, සංස්කෘතික ව්‍යාධිවලට ප්‍රධාන හේතුව විධායක ජනාධිපති ආණ්ඩු ක්‍රමය කියා ඒත්තු ගන්වනවා. එහෙම පිළිගන්න සාක්‍ෂි අපට පොළොවේ දකින්නට නැහැ. එක්සත් ජාතීන්ගේ සමාජික රටවල් 193ක් තිබෙනවා. මේ රටවල් 193න් 95කම පමණ යම්යම් ප්‍රභේද සහිත වුවත් ජනාධිපති ආණ්ඩු ක්‍රම තිබෙනවා. ජනාධිපති ආණ්ඩුක්‍රම නිසර්ගයෙන්ම මහා ශාපයක් නම් ඇයි එපමණ රටවල් ගණනක් එය අනුගමනය කරන්නේ. අපේ රටේ 1978ට කලින්  පැවැති පාර්ලිමේන්තු ආණ්ඩු ක්‍රමය තිබෙන්නේ ලෝකයේ රටවල් 45ක් වැනි සංඛ්‍යාවක පමණයි. එසේ නම් ඒ රටවල් 45 ස්වර්ග රාජ්‍ය බවට පත් වෙන්න ඕන. අනෙත් රටවල් ප්‍රමාණය අපායන් බවට පත් වෙන්න ඕන. නමුත් එසේ වෙන්නේ නැහැ.

දැන් අපේ රටේ ඉතිහාසය ගතහොත් අපේ රටේ ව්‍යාධි, ව්‍යසන ඇති වෙන්නේ මේ ක්‍රමය හඳුන්වා දුන්නට පස්සේ කියා මතයක් තිබෙනවා. නමුත් අපි දන්නවා නිදහස ලැබුණු දා සිටම අපේ රටේ දේශපාලන, ආර්ථික ප්‍රශ්න උද්දමනය වුණා මිසක් සමනය වීමක් සිදු වුණේ නැහැ කියලා. විධායක බලතල සහිත පාර්ලිමේන්තු ආණ්ඩු ක්‍රමයක් තිබියදී තමයි 1970 – 1978 කාලයේදී බණ්ඩාරනායක මැතිනියගේ පාලන කාලය තුළ පාර්ලිමේන්තු කාලසීමාව ජනතාවගේ අනුමැතියකින් තොරව වසර දෙකකින් දීර්ඝ කර ගත්තේ. එම සිදුවීමයි ජේ.ආර්. මහතාගේ ජනමත විචාරණයයි එක අතකින් සමානයි. 

අපි අසල්වැසි ඉන්දියාව පිළිබඳ සලකා බැලුවොත් ඉන්දියාවේ තිබෙන්නේ ඔය කියන්නා වූ ලෙස පාර්ලිමේන්තු ආණ්ඩුක්‍රම රටාවක්. ඉන්දියාව බලවත් ධනවත් රාජ්‍යයක් වූ නමුත් බරපතළ ආර්ථික, සමාජ ව්‍යාධි තිබෙනවා. ඉන්දියාවේ සංඛ්‍යාත්මකව ගත් විට වැඩි පිරිසක් අන්ත දුගී මිනිසුන්. එරට නිෂ්පාදනය කරන ආදායමෙන් 89෴ක් හිමිකර ගන්නේ ඉතා සුළු පිරිසක්. එනිසා ජනාධිපති ක්‍රමය තමයි අපේ රටේ සිවිල් ගැටලුවලට මූලික හේතුව කියන එක සාවද්‍ය අදහසක්. 

අපේ රට පෙළෙන ඇත්ත ප්‍රශ්න ලෙස ශක්තිමත් ආර්ථිකයක් නොමැති වීම, ජනතාවගේ ජීවන මට්ටම ඉතා පහළ මට්ටමකට පත් වීම මම නම් දකින්නෙ. ජන හා සංඛ්‍යා ලේඛන දෙපාර්තමේන්තුවෙන් වාර්ෂිකව කරන ලද ආදායම් වියදම් සමීක්‍ෂණයේ 2016 වාර්තාවේ කියන ලෙස අපේ රටේ ජනගහනයෙන් 80෴ක් අඩු ආදායම් ලාභීන් බව අනාවරණය කර තිබෙනවා. ඒ අයගේ ජීවිතය සුඛිතමුදිත කරන්න ජනාධිපති ක්‍රමය අහෝසි කරන්න යනවා. අපි දකිනවා දිනපතා පුවත්පත්වල ගොවියන්ට වී විකුණා ගන්න බැරිව, වට්ටක්කා ගොවීන්ට වට්ටක්කා විකුණා ගන්න බැරිව සිටිනවා. කිරිගොවියන් කිරි රැස් කරන මධ්‍යස්ථානවලට ඇවිත් ඒවා ලබා දෙන්න බැරිව පාරේ හලා යෑම වැනි සිදුවීම් රැසක් වාර්තා කිරීම දකිනවා. අපේ රටේ තෘතීක අධ්‍යාපනයම එකම අවුලක්. විශ්වවිද්‍යාල ශිෂ්‍යයා වැඩියෙන්ම සිටිනුයේ දේශනාගාරවල නොවේ පාරවල්වල. නමුත් මේ ප්‍රශ්න කිසිවකට මෙම සංශෝධනය මගින් කිසිම විසඳුමක් ලැබෙන්නෙ නැහැ. 

ජනාධිපති ක්‍රමය අහෝසි කිරීම මේ එතිහාසික වකවානුවේ ප්‍රමුඛතාවක්ද? සෑම විටම තම ප්‍රමුඛතා හඳුනාගත යුතුයි. මේ මොහොතේ මා පෙර සඳහන් කළ ආකාරයේ බරපතළ ප්‍රශ්න තිබියදී, ඒවාට විසඳුමක් පෙනෙන තෙක් මානයක දක්නට නොතිබෙද්දි, ජන ජීවිතයට ඍජු බලපෑමක්, සම්බන්ධයක් නැති ජනාධිපති ක්‍රමය අහෝසි කිරීම ඉදිරියට රැගෙන එන්නේ ඔවුන්ට වෙනත් අරමුණක් ඇතිව බවයි මගේ මතය. එය මේ මොහෙතේ ප්‍රමුඛතාවක් නොවේ. මේ මොහොත වන විට ප්‍රමුඛතාවන් රාශියක් තිබෙනවා. ශක්තිමත් ආර්ථිකයක්, ඒ ආර්ථිකය සමානව බෙදී යන සමාජ රටාවක්, ජනතාවට ප්‍රමාණවත් පරිදි ඇඳුම් පැලඳුම්, නිවාස ආදිය සම්පාදනය කිරීම වැනි ඒවා ඒ අතරින් ප්‍රධාන වෙනවා. ලෙඩට, දුකට පහසු එමෙන්ම ගුණාත්මක මට්ටමේ ප්‍රතිකාර ලබා ගැනීමේ හැකියාව ආදී මේ කිසිවකට ජනාධිපති ක්‍රමය තිබීමෙන් හෝ අහෝසි කිරීමෙන් විසඳුමක් ලැබෙන්නෙ නැහැ. අපි ගොවියෙකුගෙන් ඔහුගේ ප්‍රශ්න පිළිබඳ විමසුවොත් මම සිතන්නේ නැහැ කවදාවත් මේ විධායක ජනාධිපති ක්‍රමය නිසා එවැනි ප්‍රශ්නවලින් සිටිනවා යැයි ඔහු පවසාවි කියා. අපේ රට ආසියාව තුළ මන්දපෝෂණය අතින් දෙවැනි ස්ථානයේ සිටින බව වාර්තාවල සඳහන් වෙනවා. නමුත් එයට මූලික හේතුවක් තිබුණා. 

ඊළඟට අපි මුහුණදෙන බරපතළ ප්‍රශ්නයක් තමයි ජනාධිපති ආණ්ඩු ක්‍රමයක් මේ රටට අවේ කොහොමද කියන එක. ඉතාම කෙටියෙන් සඳහන් කළොත් එය හඳුන්වා දෙන්නේ ජේ.ආර්. ජයවර්ධන ජනාධිපතිවරයා. ඔහුට ඒ සඳහා අරමුණක් තිබුණා. ඔහු කල්පනා කළා පූර්ණ ධනවාදී සමාජයක් මේ රටේ ස්ථාපනය වුවහොත් ඉහළ ආර්ථික වර්ධනයක් සහිත සුඛිත මුදිත සමාජයක් බිහි කරන්න හැකියි කියලා. ඔහුගේ කල්පනාවට මුල් වෙනවා 1970 දශකයේදී පමණ ලෝකයේ බලවත් රටවල් අපේ වගේ රටවලට දේශනා කර, අපි මත බලෙන් පටවනු ලැබූ ආර්ථික මාදිලිය. එය අධ්‍යයනය ක්‍ෂේත්‍ර රැසක හඳුන්වන්නේ නව ලිබරල් ආර්ථික සංවර්ධන මාදිලිය ලෙස. ජේ.ආර්. ජනාධිපතිවරයා අපේ රටේ මේ ක්‍රමය හඳුන්වා දෙන විට ආසියාව තුළත්, තවත් ලෝකයේ රටවල් කිහිපයකත් මෙම නව ලිබරල් මාදිලිය ක්‍රියාත්මක කිරීම ආරම්භ කර තිබුණා. නව ලිබරල් මාදිලියේ ස්වභාවය අනුව එය ක්‍රියාත්මක කරන විට එනම්, එයින් කියැවෙන්නෙ ආර්ථිකය රාජ්‍ය අංශයෙන් මුදා හැරලා පෞද්ගලික අංශයට, විදේශ ප්‍රාග්ධනයට අනුව හැසිරෙන්න ඉඩ දෙන එක. එසේ හැසිරීමට ඉඩදෙන විට අඩු ආදායම් ලබන බහුතර ජනතාව පීඩාවට පත්වෙනවා. ජාතික ආර්ථිකය කඩා වැටෙනවා. දේශීය කෘෂිකර්මය විනාශ වෙනවා. සංස්කෘතිය සෝදාපාළුවට යනවා. එවැනි තත්ත්වයකට ජනතාවගෙන් විරෝධය නිසැකයෙන් පැමිණෙනවා. ජනතා විරෝධය මඬින්න නම් දේශපාලන ස්ථායීතාව පවත්වාගෙන යෑම හා ඍජු පාලනයක් අවශ්‍යයි. අන්න ඒ නිසා තමයි ඔහු විධායක ජනාධිපති ක්‍රමය හඳුන්වා දෙන්නෙ. 

ඊට ප්‍රථම අප රටේ අනුගමනය කළේ වෙනස් මාදිලියක ආර්ථික ක්‍රමයක්. ජේ.ආර්. ජනාධිපතිවරයා විධායක ජනාධිපති ක්‍රමය සමග මේ රටේ පැළ කරපු නව ලිබරල් මාදිලිය එසේ තිබියදී, එයින් සිදු වූ බරපතළ ආර්ථික, සමාජීය විනාශය එසේම තිබියදී, ඒ සමග හඳුන්වා දුන් විධායක ක්‍රමය පමණක් ඉවත් කරන්න කියන එක වංචනික ක්‍රියාවක් නොවේද? සත්‍යය නම් අප පෙළෙන ප්‍රශ්නවලට පිළිතුර විධායක ජනාධිපති ක්‍රමය අහෝසි කිරීම නොවේ. මෙම ක්‍රමය ගෙන එන්නට ප්‍රථම පැවැති ආණ්ඩු රාජ්‍ය පාලනය සිදු කළ කාලය තුළ වැරදි තිබූ නමුත් 77 වන විට මේ රටේ යම්තාක් හෝ වර්ධිත ආර්ථිකයක් තිබුණා. ටයර්, සිමෙන්ති, සීනි, කඩදාසි වැනි බොහෝ නිෂ්පාදන තිබුණා. නමුත් අද වන විට ඒ සියල්ල නැති කරලා තිබෙනවා. ඒ වගේම සෞඛ්‍යය, අධ්‍යාපනය වැනි සුභසාධක වියදම් අඩු කර කඩකප්පල් කර තිබෙනවා. ජෝන් කොතලාවල ජාතික ආරක්‍ෂක විශ්වවිද්‍යාලය පිළිබඳ පනතක් ගෙන එනවා. ඒ පනත ක්‍රියාත්මක වුවහොත් මේ රටේ ප්‍රථම වරට තෘතීක අධ්‍යාපනය පෞද්ගලික අංශයට විකිණෙනවා. එවැනි වූ ක්‍රියාදාමයක් සිදුවෙමින් තිබියදී, ඒ කිසිවක් පිළිබඳ කතා නොකර, ඒ විනාශයට මූලික වන ආර්ථික මාදිලිය වෙනස් කිරීමට යෝජනා නොකර, ඒ මාදිලියේ රැකවරණය සඳහා පැමිණි ජනාධිපතික්‍රමය පමණක් ඉවත් කිරීමට යෝජනා කිරීම නිසැකවම දේශපාලනික වශයෙන්  වංචනික ක්‍රියාවක්. 

අනෙක් කාරණය වෙන්නේ ආණ්ඩුක්‍රම ව්‍යවස්ථාව සංශෝධනය කිරීමට අවශ්‍ය බලයේ සිටින ආණ්ඩුව. පෞද්ගලික යෝජනාජවක් ලෙස මෙය ගෙන ආවත්, එය පාර්ලිමේන්තුවට ගෙන එන්න නම් ආණ්ඩුව එය අතට ගන්න ඕන. එය පනතක් ලෙස ගැසට් කරන්න අවශ්‍යයි. ජනතා විමුක්ති පෙරමුණ ජනාධිපති ක්‍රමයට විරුද්ධ වුණාට මේ රටේ ජනතාව ඔවුන්ට ආණ්ඩුක්‍රම ව්‍යවස්ථාව සංශෝධනය කරන්න තියා වෙන මොකකටවත් බලයක් දීලා නැහැ. ඔවුන්ට සිටින්නේ මන්ත්‍රීවරුන් හය දෙනයි. ඒ නිසා මෙය හරියට බල්ලගේ වැඩේ බුරුවා කරන්න යනවා වගේ වැඩක්. කළ යුතු බොහෝ දේ තිබියදී තමන්ට අයිති නැති කාර්යයක් අතට අරගෙන ඉන්නවා. ඇත්තෙන්ම මොකක්ද ඔවුන් කරන්න යන්නේ? මෙහි සත්‍යය අරමුණ එය නොවේ. 2015 වර්ෂයේ ජනවාරි 08 වැනිදා ආණ්ඩු පෙරළිය පිටුපස තිබුණු න්‍යාය පත්‍රය හකුළා ගැනීම සඳහා අවශ්‍ය දේශපාලන පරිසරය ආණ්ඩුවට නිර්මාණය කර දීම තමයි ජවිපෙ සත්‍යය අරමුණ. 

ජනවාරි 08 වැනිදා වෙනස පිටුපස බලවේග රාශියක් සිටියා. එක්සත් ජාතික පක්‍ෂය, දෙමළ ජාතික සන්ධානය, ඊනියා අන්තර්ජාතික ප්‍රජාව (ඇමෙරිකාව, යුරෝපය සංගමය හා ඉන්දියාව වගේ බලවත් රටවල්), ඒ රටවල අරමුදල්වලින් යැපෙන සිවිල් සමාජ හා සංවිධාන ආදියත් එසේම ජනතා විමුක්ති පෙරමුණේ ක්‍රියාකාරී සමාජිකයන්ද සිටියා. ඒ නිසා තමයි ජනතා විමුක්ති පෙරමුණ යහපාලන ආණ්ඩුව බලයට ඇවිත් හැදූ ජාතික විධායක සභාව නමැති කිසිදු නීතියකට අයිති නැති ආයතනයේ සමාජිකයන් වුණේ. 

පැහැදිලිවම එදා සිට ජනතා විමුක්ති පෙරමුණ ආණ්ඩුව අමාරුවකට වැටෙන විට වෙනම බෝඩ් උස්සගෙන ආණ්ඩුව සම්මත කළ රටට අහිතකර අණපනත්වලට අත උසස්ගෙන පාරට එනවා. පසුගිය පෙබරවාරි 10 පැවැති පළාත් පාලන ඡන්ද වීමසීමෙන් පසුව හැමෝටම පැහැදිලි වූ දෙයක් තමයි ඡන්ද වීමසීමට පාදක වූ පාර්ලිමේන්තු පනත කොයිතරම් අවුලක්ද කියලා. එය කොයිතරම් රට අස්ථාවරභාවයට පත් කළාද? ඒ ඡන්දයේදී පොහොට්ටුව දිනපු තැන්වල සභාපති වී තිබෙන්නෙ එ.ජාපෙ. සමාජිකයෙක්. ඒ වගේම එ.ජා.ප.ය ජයග්‍රහණය කළ තැන්වල සභාපති පොහොට්ටුවෙන් පත්කර තිබෙනවා. ඒ අවුල නිර්මාණය කරන්නේ ජ.වි.පෙ. අපේක්‍ෂකයන්. සභා ඡන්ද කල් දැම්මේ ජ.වි.පෙ. ක්‍රියාකාරී සමාජිකයන්. ඔවුන් එළියේ ඉඳන් තමයි ඒ සහයෝගය ලබා දෙන්නෙ. එය හාවුන් සමග සිටිමින් බල්ලන් සමග දඩයම් කරනවා කියා කීම නිවැරදියි. ජනවාරි 08 පසුව ජ.විපෙ.ට කොන්ත්‍රාත්තුවක් පැවරිලා තිබෙනවා ආණ්ඩුව අමාරුවේ වැටෙන විට, ආණ්ඩුවේ ඉලක්ක සපුරාගත නොහැකි පරිසරයක් නිර්මාණය වූ විට ආණ්ඩුව බේරා ගැනීමට.  ජනවාරි 08 ක්‍රියාත්මක වූ ව්‍යාපෘතියට ලෝකයේ බලවත් රටවලත්, දෙමළ ජාතික සන්ධානයේත් කොන්දේසියක් වූයේ අලුත් ආණ්ඩුක්‍රම ව්‍යවස්ථාවක් සකස් කිරීමයි. ඒ උතුරු නැගෙනහිර ෆෙඩරල් පාලන ව්‍යූහයක් නිර්මාණය කිරීම සඳහා. එවැනි ෆෙඩරල් පාලන ව්‍යූහයක් නිර්මාණය වුණාම එය වෙනම රාජ්‍යයක් බවට පත්කර ගන්නා විට ඔවුන්ගේ අභිප්‍රාය කෙසේ හෝ ඉටුකර ගනීවි. එවිට අපට ඒ පිළිබඳ කරදර වෙන්න අවශ්‍ය නැහැ. 

අන්න ඒ කියන අරමුණු සපුරා ගැනීම සඳහා ආණ්ඩුක්‍රම ව්‍යවස්ථාව සම්පාදනය කිරීම අද ආණ්ඩුවට ප්‍රශ්නයක් වී තිබෙනවා. ඒ නිසා දැන් වෙනත් කෙටි මාර්ගයකින් ඒ අරමුණ කරා ළඟා වීමට හැකි පරිසරය සකස් කර දීම එක්සත් ජාතික පක්‍ෂයේ නායකත්වයෙන් යුත් ආණ්ඩුවේ ක්‍රියාකලාපය පිළිබඳ ජනතා කෝපය වෙනතකට හැරවීම සඳහා න්‍යාය පත්‍රය අවුල් කිරීම තමයි මේ ජනතා විමුක්ති පෙරමුණ ගෙන එන සංශෝධනයේ අරමුණ ලෙස මම දකින්නෙ. ඒ නිසා තමයි ජනතා විමුක්ති පෙරමුණේ නායකයන්ට හාස්‍යජනක විහිළු කතා කියන්න සිදු වෙලා තිබෙන්නෙ රටට. ජනතා විමුක්ති පෙරමුණ ඉතා මාක්ස්වාදීයි කියා ගන්නා පක්‍ෂයක්. නමුත් ඔවුන් මෙලෙස ක්‍රියා කරන තත්ත්වයට, ව්‍යාජ කතා කියන තත්ත්වයට පත්ව තිබෙන්නේ අර ව්‍යාජ අරමුණ වසන් කිරීමට දරන ප්‍රයත්නයේ ප්‍රතිඵලයක් ලෙසයි. ජනතා විමුක්ති පෙරමුණ කියා සිටින්නේ තමන් මාක්ස්වාදී පක්‍ෂයක් ලෙසින්. ඒ නිසා කාල් මාක්ස් කියූ වදනකින්ම මා මෙය අවසන් කිරීමට කැමැතියි. %ඉතිහාසය නැවත සිදු වෙනවා. ප්‍රථමයෙන් විගඩමක් ලෙස, දෙවැනුව ඛේදවාචකයක් ලෙස.^ මේ සංශෝධනය සාර්ථක වෙන්නෙ නැති විගඩමක්. එය දැන් හොඳටම පැහැදිලියි. එසේ වූ විට එය ජනතාවට ඛේදවාචකයක් වන එක වළක්වන්න බැහැ. 

 

දෙස් විදෙස් මට්ටමින් ශරීර අභ්‍යාස පුහුණුකිරීම් සිදුකරන අපේ යුවතියක්

තරුණියක්, කාන්තාවක් හැඩට ඇඳීම, පැලඳීම පිළිබඳව මෙන්ම ශරීරයේ හැඩය, පෙනුම පිළිබඳවත් බොහෝ සේ සිතයි. ඒ වෙනුවෙන් ඔවුන් බොහෝ දේ කරයි. බොහෝ අය තමන්ගේ ශරීරයේ හැඩය පවත්වාගෙන යෑමට පුහුණුකරුවන් යටතේ නොයෙක් අභ්‍යාසවල නියුතු වේ. ආහාර සැලසුම් ක්‍රමවේද අනුගමනය කරයි. ලෝකය තුළ මෙන්ම ලංකාව තුළද වර්තමානයේදී එය විලාසිතාවක් වී හමාරය. ඉක්මන් ක්‍රමවේද අනුගමනය නොකර ජීවන කලාවක් ලෙසින් සෞඛ්‍යමත් දිවියක් ගතකිරීමට දෙස්විදෙස් බොහෝ පිරිසකට තම සේවාව සපයන තරුණියක් ලෙස ගයත්‍රි කොඩිතුවක්කු මහත්මිය හඳුනාගත හැකිය. නිවැරදි ආහාර පාලනය, යෝග්‍ය ව්‍යායාම ආදිය තුළින් ඇය ලබාදෙන පුහුණුව මගින් කෙටිකාලීන වශයෙන් නොව දිගුකාලීන වශයෙන් ප්‍රතිඵල ලබාගත හැක. ඇය මේ පිළිබඳව අද සමග පැවසුවේ මෙලෙසිනි. 


අලුත් ක්ෂේත්‍රයක නැවුම් අභිප්‍රායකින් ගමන් කරන ඔබේ මේ ගමනේ ආරම්භය පිළිබඳව කතා කළොත්?

මම ලංකාවේ රජයේ පාසලකින් උසස් පෙළ දක්වා ඉගෙන ගෙන ඕස්ට්‍රේලියාවට ගියේ මගේ උපාධියේ වැඩ කටයුතුවලටයි. මගේ උපාධිය අවසන් කර නැවත පැමිණ මම මාධ්‍ය ක්ෂේත්‍රයේ වසර 05ක් පමණ කාලයක් සේවය කළා. නමුත් ඒ සියලු දේවල් අතරින් අවසානයේ මම තෝරා ගත්තේ මේ දෙයයි. දැන් වසර දෙකක පමණ කාලයක සිට මා ශරීර අභ්‍යාස පුහුණුකිරීම් (fitness trainer) කටයුතු දෙස් විදෙස් මට්ටමින් සිදුකරනවා. ඒ වෙනුවෙනුයි දැන් මගේ සම්පූර්ණ කාලය වෙන් කර තිබෙන්නේ. 

ඔබේ පුහුණුව දේශීය පමණක් නොව විදේශීය සේවාදායකයන්ටත් ලබා දෙනවාද?

ඔව්, මම අන්තර්ජාලය හරහා විදෙස් රටවල වෙසෙන මගේ සේවාදායකයන්ටත් පුහුණුවීම් ලබා දෙනවා. ඔවුන්ට මෙහිදී අවශ්‍ය වන ආහාර ගැනීමේ සැලසුම් ක්‍රම සකස් කර දීම මම සිදුකරනවා. මේ ක්ෂේත්‍රය තුළ ලංකාවේදී එවැනි ඔන්ලයින් පුහුණු ක්‍රමයක් ප්‍රථමයෙන් ආරම්භ කළේ මමයි තව එක්කෙනෙකුයි පමණයි.
මේ ක්ෂේත්‍රය තුළ විශාල වශයෙන් වර්ධනයක් අද වන විට පෙන්නුම් කරනවා. ශාරීරික අභ්‍යාස පුහුණු වීම, ජිම් (GYM) එකකට යෑම කියන එක අද එක අතකින් විලාසිතාවක් බවට පත්වෙලා තිබෙනවා. නව මාධ්‍ය ඔස්සේ ජනප්‍රිය වී මේ ක්ෂේත්‍රයෙන් ඉහළට ගිය බොහෝ පුද්ගලයන් අද වන විට  සිටිනවා. 

මේ ක්ෂේත්‍රය කාන්තාවන්ට සුවිශේෂී එකක් වෙනවාද, ඔවුන්ගේ පුහුණු කිරීම් සිදුකරන්නේ කෙසේද?

සැබෑ ලෙසම ගැහැනු අයගේ ශරීර අභ්‍යාසවල, පිරිමි අයගේ ශරීර අභ්‍යාසවලට වඩා පැහැදිලි වෙනසක් තිබෙනවා. බොහෝ තරුණියන්, කාන්තාවන් සෑම විටම උත්සාහ කරන්නේ බාහිර ස්වරූපයේ ඉක්මන් වෙනසක් දැකීමටයි. ඔවුන්ට තිබෙන්නේ කෙට්ටු වීම, මාස කිහිපයක් ඇතුළත ශරීර බර ප්‍රමාණය මෙපමණ අඩු කරගත යුතුයි කියන සිතුවිලි. ඇතැම් විට විවාහය ආසන්න මාසවලදී ශරීරයේ හැඩය සකස් කර ගැනීම යනාදී විවිධ කාරණා නිසා මෙවැනි අභ්‍යාස කිරීමට ඔවුන් අප වෙත පැමිණෙනවා. එවැනි කෙටි ක්‍රම විනා කිසිවිටෙකත් ජීවිත කාලය පුරාවටම පවත්වාගෙන යා හැකි හොඳ සෞඛ්‍ය පුරුදු තම ජීවිතයට එක්කර ගැනීමට ඔවුන් උත්සාහ කරන්නේ නැහැ. 

නමුත් මෙය දීර්ඝකාලීනව ජීවිතයේ කොටසක් කර සිදුකරන විට එයින් ලැබෙන එක් අතුරු ඵලයක් තමයි ශරීරයේ හැඩය වෙනස් කර ගැනීමට හැකි වීම. ඊට අමතරව තමන්ගේ ශරීර සෞඛ්‍ය තත්ත්වය මේ මගින් යහපත් වෙනවා, ඇවිදින විදිහ, හිතන විදිහ යනාදී සෑම දෙයක්ම වෙනස් වෙනවා. නමුත් මේ පිළිබඳ බොහෝ අය වැඩි අවධානයක් යොමු කරන්නේ නැහැ. ඒ අතින් බැලුවහම ලංකාවේ කාන්තාවන් අනෙක් රටවල කාන්තාවන්ට වඩා පිටුපසිනුයි සිටින්නේ. මම වුණත් මෙම පුහුණු කටයුතු ආරම්භ කළ කාලයේ මහත්ව ඉඳලා කෙට්ටු වුණ කෙනෙක්. 

IMG_5394

ඔබ වැඩියෙන්ම නියැලෙන්නෙ කුමන අභ්‍යාස පුහුණු වීමකද?

මුලින්ම මම මෙම පුහුණුවීම් එකවර ආරම්භ කළේ නැහැ.  දුවන එක තමයි මුලින්ම මම කළේ. පසුව යෝගා ව්‍යායාම කළා. දැන් මම බර ඉසිලීම තමයි වැඩිපුරම කරන්නේ. මම මගේ ශරීරයේ යෝග්‍යතාව පවත්වාගෙන යන්නේ එමගිනුයි. 
අනෙක් රටවල කාන්තාවන් හරිම ශක්තිමත්ව සිටිනවා. ඔවුන්ට කඳු නගින්න පුළුවන්, බර උසුලන්න පුළුවන්. මේ ආදී බොහෝ දේ කිරීමේ හැකියාවක් ඔවුන් සතුව තිබෙනවා. ඒ නිසයි මම මේ ක්ෂේත්‍රයට මේ තරම් ඇල්මක් දක්වන්නේ. මම මෙය ආරම්භ කළ විට මගේ වැඩි කැමැත්තක් තිබුණේ ඒ දක්ෂතා දියුණු කර ගැනීමටයි. පෞද්ගලිකව වුණත් මම වැඩි කැමැත්තක් දක්වන්නේ බර ඉසිලීමේ නියුතු වෙන්නයි.

ලංකාවේ විලාසිතාවක් බවට පත්වී තිබෙන මෙම ක්ෂේත්‍රයේදී සෞඛ්‍ය ගැන වැඩි උනන්දුවක් දක්වමින් පුහුණු කරන කෙනෙක් ලෙස  ඔබ ලබාදෙන දායකත්වය පිළිබඳ කතා කළොත්?

මගේ සේවාදායකයෙකු මේ මාසය තුළ මෙපමණ ප්‍රමාණයක් ශරීරයේ බර අඩු කරගැනීමට අවශ්‍යයි කියා කිවහොත් මම ඒ පිළිබඳව කවදාවත් සහතික වෙන්නේ නැහැ. මොකද මම මෙහි සෞඛ්‍ය හා නීරෝගීකම ගැන පමණයි අවධානය යොමු කරන්නේ.  මම ඒ පිළිබඳ මගේ සේවාදායකයන් වගේම සමාජ ජාලා මාධ්‍ය ඔස්සේත් දක්වා තිබෙනවා. විශේෂයෙන්ම සේවාදායකයාට පෞද්ගලිකව පුහුණුවීම් සිදුකිරීමේදී මම හොඳ තෝරා ගැනීමක් කරනවා. එය ඔවුන්ට මේ සඳහා ඇති උනන්දුව මත ප්‍රධාන වශයෙන් පදනම් වෙනවා. 

අද බොහෝ අය ශරීරයේ හැඩය පවත්වාගෙන යෑමට ඉක්මන් ක්‍රම භාවිත කරනවා. ඔබ සෞඛ්‍යයට ප්‍රමුඛතාව දෙන කෙනෙකු ලෙස ඒ පිළිබඳ මොකක්ද හිතන්නේ?

විදේශ රටවල නිරූපිකාවන්, නළුනිළියන් වුවත් ඔවුන් තමන්ගේ ශරීර හැඩය පවත්වා ගැනීම සඳහා කුමන ආකාරයේ දේවල් භාවිත කරනවාද කියා අපි දන්නේ නැහැ. ඔවුන්ගෙන් සෑහෙන ප්‍රමාණයක් මෙවැනි මත්ද්‍රව්‍ය භාවිත කරනවා. ඇතැම් විට අපි සිතන ස්වාභාවික පෙනුමක් තිබෙන කෙනෙක් වූවත් මේවා භාවිත කරනවා විය හැකියි. ඉතින් අපි අපේ ශරීර හැඩය හදාගන්න උත්සාහ කරන්නේ ඒ වගේ අය දෙස බලලා. 

ඉතින් ඒ වගේම මේවා භාවිත කිරීමේදී බොහෝ අතුරු ආබාධ ඇති වෙන්න පුළුවන්. මේවා මගින් ශරීර අභ්‍යන්තරයේ ඇති විවිධ ඉන්ද්‍රීයන් දියවෙන්න පුළුවන්, පිරිමි කෙනෙකු නම් ඔවුන්ට ළමයින් හදන්න බැරි වෙන තත්ත්වයන් පවා ඇති වීමට පුළුවන්. ලස්සන වෙනුවෙන් ශරීර අභ්‍යන්තරය විනාශ කර ගැනීමට අපිට අවශ්‍යතාවක් නැහැ.  නමුත් දැන් එය විලාසිතාවක් බවට පත්වෙලා තිබෙනවා. අපේ බොහෝ අය ඉක්මන් ක්‍රම අනුගමනය කිරීමට යෑමෙන් තමයි මෙවැනි තත්ත්වයක් ඇතිවෙන්නේ. 

මම වුණත් පුහුණු වීම් ආරම්භ කර දැනට වසර 05ක් වෙනවා. නමුත් මගේ ශරීරය යම් මට්ටමකට හදා ගැනීමට මට තවත් වසර 03ක පමණ කාලයක් ගත වේවි.  අනෙක මෙය ජීවිතය පුරාවටම සිදුකළ යුත්තක්. ඒ නිසා එය මාසයකින්, දෙකකින් සම්පූර්ණ කර ගැනීමට කිසිසේත් පුළුවන්කමක් නැහැ. ඒ නිසා මේ ගැන උනන්දුවක් තිබෙන අයට මම කියන්න කැමතියි මෙය ජීවිතය පුරා කරන්න ඕන දෙයක් ලෙස, ජීවිතයේම කොටසක් (Life style) කරගන්න කියලා. 

තමන්ගේ ශරීරයේ යෝග්‍යතාව ගැන හිතන අයට ඔබ නිර්දේශය කරන්නෙ මොන වගේ ආහාරද?

ලංකාවේ කෑම ඕනෑ තරම් තිබෙනවා. නමුත් ඒ ආහාර පරිභෝජනය කිරීම පිළිබඳ අපිට නිසි දැනුමක් නැහැ. අපේ රට තුළ බොහෝමයක් පෝෂ්‍යදායී ආහාර තිබෙනවා. දූපතක් නිසා අපිට මාළු වුණත් පහසුවෙන් ලබාගැනීමේ හැකියාව තිබෙනවා. අපි වැඩි ප්‍රමාණයක් බත් හෝ පිටි ජාතී කෑම කන්න තමයි පුරුදු වෙලා තියෙන්නේ. නමුත් අපේ රටේ මිනිස්සු දන්නේ නැහැ මේ කෑම පාලනය කරලා කන්නේ කොහොමද කියලා. බත් නොකා ශරීර හැඩය පවත්වා ගැනීමට උත්සාහ කරන අය ඕනෑ තරම් ඉන්නවා. නමුත් එසේ කිරීමට අවශ්‍ය නැහැ. මම වුණත් එක් වේලක් බත් ආහාරයට ගන්නවා. හැබැයි මම උපරිමයෙන්ම බත් ග්‍රෑම් 150ක් හෝ 200ක් පමණයි කන්නේ. ඒ නිසා ඒ පිළිබඳවත් අප අවධානයක් යොමු කළ යුතුයි. 

ඇත්තෙන්ම මෙයින් ඔබේ ජීවිතයේ සැබෑ වෙනසක් සිදුවූවා කියා ඔබ සිතනවාද?

ඇත්තෙන්ම මේ නිසා මම සම්පූර්ණයෙන්ම වෙනස් වුණා කිව්වොත් නිවැරදියි.  එය ශාරීරිකව පමණක් නොව මානසික වශයෙන්ද සැබෑ ලෙසම සිදු වූ දෙයක්. විශේෂයෙන්ම විෂාදය වැනි රෝගී තත්ත්වයන් මේ නිසා ඇත්තෙන්ම නැති වෙනවා. මම ඕස්ට්‍රේලියාවේ සිටින විට විෂාදය කියන තත්ත්වය මට හොඳටම තිබුණු දෙයක්. එයින් මට මිදෙන්න තිබුණු ඕනෑ කමත් මෙවැනි ක්ෂේත්‍රයක් තෝරා ගැනීමට එක් අතකින් බලපෑවා. 

ඉස්සර මට පිරිසක් ඉදිරියේ හරියට කතා කරන්න බැහැ. නමුත් දැන් එහෙම දෙයක් නැහැ. ඒ වගේම දැන් මට හැමදේම තනියම කරගන්න පුළුවන්. 

IMG_5440

ඔබ මේ පුහුණු කිරීමේ කටයුතුවලට අමතරව තවත් දේවල් සිදුකරනවාද?

මම දැන්නම් මගේ කාලයෙන් 90%ක් වගේ යොදවලා තිබෙන්නේ මේ පුහුණු කිරීමේ කටයුතු කරන්නයි. මුලින් නම් මම මාධ්‍ය ක්ෂේත්‍රය තුළ වැඩ කළා. ඒ වගේම දැන් සමහර ආයතන සමග එක්වී අලෙවි සන්නාම ප්‍රවර්ධන වැඩසටහන්වලටද සහාභාගි වෙනවා. ඊට අමතරව අභිප්‍රේරණ වැඩසටහන්ද සිදු කරනවා. 

ඉදිරියේදී මොන වගේ දේවල් කරන්නද ඔබ සැලසුම් කර තිබෙන්නේ?

ඉදිරියේදී මම මේ සම්බන්ධව ව්‍යාපෘතියක් ආරම්භ කිරීමට අපේක්ෂා කරනවා. ශරීර අභ්‍යාස පුහුණු වීමෙන් (fitness training) ලැබෙන ප්‍රතිලාභ පිළිබඳ මේ ඔස්සේ ලාංකේය මහජනයාට ගෙන යෑමට අපේක්ෂා කරනවා. මිනිස්සුන්ට මේ තුළ තිබෙන්නේ ඉතා සීමිත දැනුමක්. ඒ නිසා මිනිසුන් ළඟට ගොසින් මේ පිළිබඳ දැනුමක් ලබාදෙන ව්‍යාපෘතියක් තමයි අපි සිදුකරන්නේ. එය මේ වර්ෂය අවසානයේ සිදු කිරීමට අපේක්ෂා කරනවා. 

ලංකාව තුළ මේ පිළිබඳ ක්‍රමවේදයක් හෝ ක්‍රියාත්මක කිරීමේදී විධිමත් ප්‍රමිතියක් සකස් කර තිබෙනවාද?

ලංකාවේදී මේ සඳහා තිබෙන වැඩමුළුවකට මම සහාභාගි වුණත් එය ප්‍රමාණවත් නොවන බව මට වැටහුණා. ලංකාව ඒ අතරින් මන්දගාමී තත්ත්වයක තිබෙන රටක්. කුමක් හෝ ආබාධයක් ඇතිවුණ විට එයට ප්‍රතිකාර කිරීම සඳහා විධිමත් පුහුණුවක් ලබාගත් අය මෙහි සිටිනුයේ ඉතාම සීමිත ප්‍රමාණයක්. නමුත් දැන් එය විලාසිතාවක් වන නිසා ටිකෙන් ටික වෙනස් වෙමින් පවතිනවා. ඒ නිසා මම ඒ පිළිබඳ ඕස්ට්‍රේලියාවේදීත් වැඩිදුර පුහුණුවීමක් සිදුකළා. 

මේ පිළිබඳව උනන්දුවක් දක්වන අයට ඔබට මොකක්ද කියන්න තියෙන්නෙ?

මම කරන දේට වඩා වෙනස් විදිහට තව කෙනෙකු ඒ දේ කරනවා නම් මේ දෙකෙන් නිවැරදි කුමක්ද කියලා මම සොයනවා. කෙටි ක්‍රම නොමැතිව මේක ටිකක් කල් යන දෙයක් කියලා මුලින්ම කාන්තාවන්, තරුණියන් දැනුවත් කිරීමට අවශ්‍යයි. මුලින්ම තමන්ගේ ශරීරය ගැන බලලා ඒ අනුව තමයි තමන්ට ගැළපෙන දේ තෝරා ගන්න ඕන. මෙය එකපාර ප්‍රගුණ කිරීමට පුළුවන් දෙයක් නෙමෙයි. එය ටිකෙන් ටික වර්ධනය කරගත යුතු දෙයක්. 
මේ පිළිබඳ උනන්දුවක් දක්වන අයෙකුට ඇයව සම්බන්ධ කරගැනීමට හෝ උපදෙස් ලබාගැනීමට අවශ්‍ය නම් 0779265821 යන දුරකථන අංකය අමතා තොරතුරු ලබාගත හැකිය.  

IMG_5535

 

 

මෙම උණ රෝගය අනෙකුත් ප්‍රදේශවලටත් ව්‍යාප්ත වීමේ අවදානමක් තිබෙනවා

කාලයෙන් කාලයට හඳුනා නොගත් නොයෙක් වෛරසයන් අසාදනය වීමෙන් බොහෝ පිරිසක් රෝගී වෙති. එමෙන්ම කාලයත් සමග ඇතැම් වෛරස්වල ස්වභාවය වෙනස් වී රෝග ඇති කරයි. මේ දිනවල අප කතා කරනුයේ දකුණු පළාත තුළ පැතිර යන වෛරස් තත්ත්වය පිළිබඳවය. ඉන්ෆ්ලුවෙන්සා, ඇඩිනෝ හා වෙනස් වෛරස් කිහිපයක් අසාදනය වීමෙන් එම පළාත තුළ දරුවෝ හා වැඩිහිටියෝ කිහිපදෙනෙක් ජීවිතක්‍ෂයට පත් වූහ. මෙවැනි වසංගත තත්ත්වයක් තුළ මහජනතාවගේ දැනුවත්භාවය උදෙසා විවිධ වැඩසටහන් ක්‍රියාත්මක කෙරෙන අතර, එම තත්ත්වයෙන් මිදීම සඳහා අප අනුගමනය කළ යුත්තේ කුමන ක්‍රියාමාර්ගද, එහි වැඩි බලපෑමක් ඇත්තේ කාහටද, එය අනෙක් ප්‍රදේශවලට ව්‍යාප්ත වීම අවම කිරීමට කළ යුත්තේ කුමක්ද යන්න පිළිබඳ වැඩිදුර අදහස් වීමසීම සඳහා වසංගත රෝග විද්‍යාඥ විශේෂඥ වෛද්‍ය පබා පලිහවඩන මහත්මිය අදට සම්බන්ධ කර ගත්තෙමු. ඇය ඒ පිළිබඳ දැක්වූයේ මෙවන් අදහසකි. 


මේ වන විට දකුණු පළාත තුළ ඇති වී තිබෙන රෝගී තත්ත්වය පිළිබඳ කෙටි හැඳින්වීමක් කළොත්?

දකුණු පළාතෙන් වාර්තා වන මෙම තත්ත්වය ශ්වසන රෝග වසංගතයක් ලෙස පැතිර යන ආකාරයක් දැකගන්න පුළුවන්. මාතර, ගාල්ල වැනි දිස්ත්‍රික්කවල මේ වසංගත තත්ත්වය වැඩි වශයෙන් වාර්තා වෙනවා. වෛද්‍ය පර්යේෂණ ආයතනයේ පර්යේෂණවල සඳහන් වන පරිදි ඉන්ෆ්ලුවෙන්සා, රෙසිපිරටරි සින්සිටිල් (RVS), ඇඩිනෝ ආදී වෛරස් කිහිපයක්ම වාර්තා වෙනවා. කෙසේ නමුත් වැඩිපුරම එයින් පෙනී යන්නේ ඉන්ෆ්ලුවෙන්සා රෝගීන්. 
මේ උණ රෝග, ශ්වසන රෝග ඇති කරන වෛරස් ආසාදන අපේ රටේ වරින්වර ඇති වෙනවා. ලෝකයේ විවිධ රටවලත් එය වාර්තා වෙනවා.

සාමාන්‍යයෙන් මෙවැනි වෛරස් අසාදන තත්ත්වයක් තුළ දක්නට ලැබෙන රෝග ලක්‍ෂණ මොනවාද?

බොහෝ වේලාවට ශ්වසන ආශ්‍රිත රෝග තත්ත්වයන් තමයි මෙහි පෙන්නුම් කරන්නේ. උණ, සෙම්ප්‍රතිශ්‍යාව, කැස්ස, උගුරේ වේදනවා, ඇස් රත් පැහැයට හැරීම ආදී බොහෝ රෝග ලක්‍ෂණ පෙන්නුම් කරනවා. ඉන්ෆ්ලුවෙන්සා රෝග ලක්‍ෂණයි අනෙකුත් ශ්වසන ආසාදනවලයි බොහෝ විට පෙන්නුම් කරන්නේ එකහා සමාන රෝග ලක්‍ෂණයි. නමුත් ඉන්ෆ්ලුවෙන්සාහි රෝග ලක්‍ෂණ අනෙකුත් ඒවාට වඩා උත්සන්න වන අවස්ථා තිබෙනවා. 

මෙම තත්ත්වය වැඩි වශයෙන් බලපෑමක් ඇති කරන්නේ කාටද?

අවුරුදු 02කට වඩා අඩු වයසකින් යුතු කුඩා ළමයින්, අවුරුදු 60ට වැඩි වැඩිහිටි පුද්ගලයන්, ඒ වගේම ගර්භිණී මාතාවන්, නිදන්ගත රෝග තිබෙන පුද්ගලයන් හා තවත් එවැනි ඌණතා රෝග තිබෙන අයට මේ ඉන්ෆ්ලුවෙන්සා වගේ වෛරසයක් අසාදනය වුණාම රෝග ලක්‍ෂණ උත්සන්න වන අවස්ථාව වැඩියි. අනෙක් වෛරස් පැතිරෙන තත්ත්වයන් තුළදී වුණත්, අපි ඔවුන්ව හඳුන්වන්නේ අවදානම් කණ්ඩායම් ලෙසින්. ඔවුන්ගේ ප්‍රතිශක්තියේ තිබෙන යම් යම් දුර්වලතා හේතුවෙන් රෝගය උත්සන්න වෙන්න පුළුවන්. 

මේ ඉන්ෆ්ලුවෙන්සා රෝගී තත්ත්වය මෙරට ඇති වන සාමාන්‍යය රෝගී තත්ත්වයක්ද?

අපේ රටේ ඉන්ෆ්ලුවෙන්සා රෝග තත්ත්වය සෑම වර්ෂයකම දෙපාරක් වගේ ඇති වෙන දෙයක්. මාර්තු, අප්‍රේල්, මැයි, ජුනි  වැනි කාලවල මේ තත්ත්වය දැකගන්න පුළුවන්. නැවතත් නොවැම්බර්, දෙසැම්බර් වැනි කාලයේ මේ තත්ත්වයේ වැඩි වීමක් දැකගන්න පුළුවන්. ඒ නිසා එවැනි තත්ත්වයන් තිබෙන බව අපි හැමදාම දන්නවා. අවුරුදු 10ක පමණ සිට අපි මේ තත්ත්වය නිරීක්‍ෂණය කරනවා. ඒ නිසා මේ පිළිබඳ පෙර සූදානමක් අනිවාර්යයෙන් තිබෙන්න ඕන. 

මෙවැනි හදිසි රෝග තත්ත්වයකදී රටක් වශයෙන් ක්‍රියා කළ යුතු වන්නේ කෙසේද?

ඉන්ෆ්ලුවෙන්සා වෛරසය ඇති වුණාම අවශ්‍ය වන ඖෂධ, මෙවලම් යනාදී සියලු දේ පිළිබඳ පෙර සූදානමක් අපට තිබෙන්න ඕන. ඒ වගේ දේවල් පිළිබඳ සුවිශේෂී අවධානයක් අප යොමු කරන්න අවශ්‍යයි. 
අනෙක් පැත්තෙන් ජනතාව විසින් මෙය වසංගතයක් සේ පැතිරී යෑම වළක්වා ගැනීමට කළ යුතු දේවල්, රෝහල්ගත වන විට කරන්න අවශ්‍ය දේවල් වගේම, රෝගය ආසාදනය වූ විට කළ යුතු දේවල් මොන වගේද කියලා පැහැදිලි කිරීමක් කරන්න වෙනවා. 

DSC_0997මෙවැනි වසංගත තත්ත්වයක් තුළ අනුගමනය කළ යුතු ක්‍රියාමාර්ග මොනවාද?

විශාල පිරිසක් එනම්, සෙනඟ ගැවසෙන තැන්වලට නොයෑම වඩාත් හොඳයි. ඒවගේම නිවස තුළ රෝගී පුද්ගලයන් සිටිනවා නම් රෝගියාව මඳක් ඈත්කර තැබීම කළ යුතුයි. රෝග ලක්‍ෂණ තිබේ නම් විවේක ගෙන නිවසේ රැඳී සිටීම කළ යුතුයි. මුඛය, නාස් ආවරණ පැලඳීම. පිරිසුදු ලේන්සුවක් පාව්ච්චි කිරීම, ටිෂූ භාවිත කරන්නේ නම් එය භාවිතයෙන් පසු විෂබීජ පැතිරීම අවම වන සේ නියමිත ස්ථානවලට බැහැර කිරීම, කිවිසීමෙන් හා කැස්සෙන් පසු විෂබීජ දෑත්වල තැවරී යන බැවින් සබන් ගා අත් සෙදීම වැනි කාර්යයන් කිරීම මෙහිදී ඉතා වැදගත් වෙනවා. මෙවැනි දේ හරහා ඉතා ඉක්මනින් කෙනෙකුගෙන් තවකෙකුට ශ්වසන මාර්ගයෙන් ගොස් රෝගී තත්ත්වය ඇති වෙන්න පුළුවන්. ළඟින් ඉන්න, එකට ආශ්‍රය කරන අයට මෙය ඉක්මනින් බෝවෙනවා. ඒ නිසා කාර්යාල, පාසල් තුළ මෙවැනි වෛරස වේගයෙන් පැතිර යන්න පුළුවන්. ඉතින් ඒ තත්ත්වය අවම කර ගන්නත් අප කටයුතු කළ යුතුයි. 

මෙවැනි වසංගත තත්ත්වයක් තුළදී අප ක්‍රියාත්මක විය යුත්තේ කෙසේද?

මුල් දින කිහිපයේ විවේකී සුවයෙන් සිටීම ප්‍රමාණවත්. නමුත් රෝග ලක්‍ෂණ වැඩි වන්නේ නම්, වෛද්‍යවරයෙකුගේ සහාය ලබා ගැනීම සඳහා රෝහලකට යෑම වඩාත් සුදුසුයි.  අපි සෙම්ප්‍රතිශ්‍යාවක්, උණක් ඇති වූ පමණින් රෝහල්ගත වෙන්න අවශ්‍ය නැහැ. එවැනි අවස්ථාවක ඇඳ විවේකය, වැඩිපුර දියර වර්ග පානය කිරීම හා පෝෂ්‍යදායී ආහාර ගැනීම ඉතා වැදගත්. 
කැස්ස, නොනවතින උණ, හුස්ම ගැනීමේ අපහසුතා, පපුවේ වේදනාව වැනි රෝග ලක්‍ෂණ තිබේ නම්, රෝහලකට යෑම ඉතා වැදගත් වෙනවා. රෝහලේදී අවශ්‍ය ප්‍රතිකාර ලබා දෙන්න රෝහල කටයුතු කරන්න ඕන. බොහෝ අයට උණ තත්ත්වය බැස යන නමුත් ටික දෙනෙකුට මේ රෝගී තත්ත්වය උත්සන්න වෙනවා. අවදානම් කණ්ඩායම්වල සිටින රෝගීන් මේ තත්ත්වය යටතේ මිය යනවා. වේලාවට ඖෂධ ලැබෙනවා නම්, නිසි අවස්ථාවේ රෝග තත්ත්වය හඳුනා ගනිමින් ප්‍රතිකාර කරන්නේ නම් රෝගය ඉක්මනින්ම වළක්වා ගන්න පුළුවන්.      

එවැනි තත්ත්වයන් අවම කිරීමට දැනුවත් කිරීම් හා උපදේශන සේවා ක්‍රියාත්මක වෙනවාද?

විශේෂයෙන්ම ශ්වසන ආබාධයක් පැතිරෙන එක අවම කරන්න ටිකක් අපහසු දෙයක්. මොකද එයට ක්‍රියාමාර්ග රැසක් අනුගමනය කිරීමට තිබෙනවා. රොගීන්, රෝහල්වල සිටින නිලධාරීන් හා නිවාරණ අංශයේ සිටින නිලධාරීන් මේ සඳහා ක්‍රියාමාර්ග ගත යුතුයි. මෙවැනි අවස්ථාවකදී කළ යුත්තේ කුමක්ද යන්න පිළිබඳ ජනතාව දැනුවත් කරන එක, මිනිස්සුන්ට කියලා දෙන එක ‍ඇත්තෙන්ම ගොඩක් වටින දෙයක්. 

මෙම වෛරස් තත්ත්වයන් වෙනත් රටකින් පැමිණි ඒවාද?

මෙවැනි අවස්ථා මීට පෙරත් වාර්තා වී තිබෙනවා. ඉන්ෆ්ලුවෙන්සා වෛරස් එක අපේ රටෙත් තිබෙනවා. ඒ වගේම කාලයත් එක්ක වෛරස් වෙනස් වෙනවා. වෙනත් රටවලින් වෛරසයක් පැමිණීමේ හැකියාවත් තිබෙනවා. මේ තිබෙන ජීවන රටාව හා ආර්ථික රටාව තුළ අප රට තුළට ඕනෑම කෙනෙකුට පැමිණීමේ හැකියාව තිබෙනවා. ඒ නිසා අපේ රටට පැමිණෙන ඉන්ෆ්ලුවෙන්සා වෛරසය අලුත් එකක් වෙන්න පුළුවන්. එය අනෙක් වෛරස්වලට වඩා වේගයෙන් පැතිර යන එකක් වෙන්න පුළුවන්. නමුත් අපට එවැනි දෙයක් නතර කරනවා කියන එක ලෙහෙසි දෙයක් නෙමෙයි.  නමුත් මේ තත්ත්වය එසේ ඇති වූවක් නොවේ.   

වෙනත් රටවල මෙවැනි වෛරස් තත්ත්වයන් ඇති වී තිබෙනවාද?

වෙනත් රටවල මෙවැනි තත්ත්වයක් තුළ වැළැක්වීමේ ක්‍රම, ප්‍රතිකාර වගේම එන්නත් ක්‍රම පවා භාවිත කරනවා. එවැනි රෝගී තත්ත්වයකින් පෙළෙන විට පෞද්ගලික අංශයෙන් හෝ අවශ්‍ය එන්නත් ලබා ගැනීමට ඔවුන්ට හැකියි. 

දැනට මෙම තත්ත්වය වාර්තා වෙන්නෙ දකුණු පළාතේ පමණයි. ඉදිරියේදී මේ තත්ත්වය අනෙකුත් ප්‍රදේශවලටත් ඇති වීමේ අවදානමක් තිබෙනවාද?

ඔව්. අනෙකුත් ප්‍රදේශවලට ව්‍යාප්ත වීමේ අවදානමක් තිබෙනවා. ඇත්තෙන්ම ශ්වසන රෝග තත්ත්වයක් නිසා ඉක්මනින් ව්‍යාප්ත වීමේ ඉඩකඩක් පවතිනවා. 

මෙවැනි තත්ත්වයක් තුළ රෝහලක් ක්‍රියාත්මක විය යුත්තේ කෙසේද?

රෝහලට පැමිණෙන රෝගීන් අනෙකුත් රෝගීන්ගෙන් වෙන්කර තබා ගැනීම කළ යුතුයි. ඒ වගේම රෝගීන් බැලීම සඳහා එන ප්‍රමාණය හැකිතාක් අඩු කරන්න ඕන. ඒ පිළිබඳ නියමිත ක්‍රමවේදයක් අප අනුගමනය කළ යුතුයි. ඒ වගේම රෝහලට එන අයට, බාහිර රෝගී අංශවවලට එන අයට, රෝහලේ අනෙකුත් වාට්ටුවලට හා කාර්යමණ්ඩලයට දැනුවත් කිරීම් කරන්න පුළුවන්. 

ළමයින්ටයි, ගර්භිණී මවුවරුන්ටයි මෙය වැලඳීමේ වැඩි අවදානමක් තිබෙනවා. ඔවුන් පිළිබඳ විශේෂයෙන් සැලකිලිමත් විය යුතුද?

අවදානම් මට්ටමේ සිටින අය තුළ අපි දැක්වූ ශ්වසන ආබාධ තිබෙනවා නම් වහාම ඔවුන් වෛද්‍ය පරීක්ෂාවකට ලක් කරන්න අවශ්‍යයි. ඒ වගේම ඔවුන්ට ඉක්මනින් ප්‍රතිකාර ආරම්භ කරන්න ඕන.  

මීට පෙර මෙවන් වසංගත තත්ත්වයක් ඇති වූ විට රජය අනුගමනය කළේ කුමන ක්‍රියාපටිපාටියක්ද?

මෙවැනි ශ්වසන කාරක රෝගයක් හෝ හඳුනා නොගත් රෝගයක් පැමිණෙන විට අපි විශාල පෙර සූදානමකින් කටයුතු කළ යුතුයි. අපි ඉබෝලා, සීකා වැනි රෝග ජනතාව අතර ව්‍යාප්ත වන විට ඒ පිළිබඳ සැලැස්මක් සකස් කර ඒ අනුව තමයි ක්‍රියාත්මක වෙන්නේ. එහි ව්‍යාප්තිය වැඩි කිරීම සඳහා සුවිශේෂී ක්‍රියාමාර්ග ගන්න ඕන. මුල් අවස්ථාවේදී එම රෝගීන් එළියට යන විට එය ව්‍යාප්ත වීම යම් මට්ටමකින් හෝ අවම කරන්නට තිබුණා. 
රෝහල තුළ රෝග තත්ත්වයන් මර්දනය කරන්න රෝහලටත් සුවිශේෂී කාර්යභාරයක් තිබෙනවා. දිස්ත්‍රික් සෞඛ්‍ය නිලධාරීන්ට, මහජන සෞඛ්‍ය පරීක්‍ෂකවරුන්ට මෙවැනි අවස්ථාවලදී සුවිශේෂී කාර්යභාරයක් තිබෙනවා. ඔවුන්ටත් ඉක්මනින් ක්‍රියාත්මක වීම සඳහා සැලැස්මක් අනිවාර්යයෙන් තිබිය යුතුයි. 

මෙම තත්ත්වය අවම කිරීම සඳහා මහජනතාවට දෙන්න කැමැති මොනවගේ පණිවුඩයක්ද?

තමන්ට ශ්වසන ආබාධයක් තිබෙනවා නම්, යම් හෙයකින් රෝග ලක්‍ෂණ උත්සන්න වුවහොත් කළ යුත්තේ කුමක්ද යන්න පිළිබඳ සැලැස්මක් තිබෙන්නට අවශ්‍යයි. ඒ වගේම එය අනෙක් අයට බෝ නොවෙන්නත් තමන් වගබලා ගත යුතුයි. එවිට රෝගය අසාධ්‍ය වී මිය යන ප්‍රමාණය අවම කරගන්න පුළුවන්.

ඉන්ෆ්ලුවෙන්සා සමාන්‍යයෙන් මිනිස් ජීවිතයට කුමන ආකාරයේ බලපෑමක්ද සිදු කරන්නෙ?

මෙය එතරම් භයානක රෝග තත්ත්වයක් නෙමෙයි. සෑම වර්ෂයකම ඉන්ෆ්ලුවෙන්සා තිබෙනවා. ඒ නිසා හොඳ සූදානමක් තමයි අවශ්‍ය වෙන්නේ. ඇඩිනෝ වෛරසයත් එතරම් භයානක එකක් නෙමෙයි.  

මේ ආකාරයට මිනිසුන් රෝගී කරවන වසංගත ආකාරයෙන් පැතිරෙන වෛරස් වර්ග ගැන කතා කළොත්?

වෛරස් වර්ග රාශියක් තිබෙනවා. ඒ වගේම වෛරස් කාණ්ඩ තිබෙනවා. ඒ වෛරස් ඛාණ්ඩවලින් එක එක කාලයට රෝග ඇති කරනවා. 

ඉන්ෆ්ලුවෙන්සා වැනි දෙයක් සතුන්ගෙන් ඇති වීමේ අවදානමක් තිබෙනවාද?

ඇත්තෙන්ම සතුන් අතරත් ඉන්ෆ්ලුවෙන්සා වෛරස් තිබෙනවා. ඒවා තමයි කලාතුරකින් මිනිසුන්ට එන්නේ. කුරුලු උණ කියන එකත් ඒ වගේ රෝගී තත්ත්වයක්. නමුත් දැන් තිබෙන ඉන්ෆ්ලුවෙන්සා තත්ත්වය සතුන්ගෙන් බෝ වෙන්නේ නැහැ. 
සතුන්ගෙන් බෝවෙන වෛරස් ගණනාවක්ම තිබෙනවා. %නීපා^ වෛරසය, Japanese encephalitis වෛරසය ආදිය සතුන්ගෙන් බෝවෙන්න පුළුවන්. 

මේ පිළිබඳ මහජනතාවට දැනුවත් වීම්, උපදේශන සේවා ක්‍රියාත්මක වෙනවාද?

මේ දිනවල මාධ්‍ය හරහා පුළුල් ප්‍රචාරයක් ගෙන යමින් පවතිනවා. ප්‍රාදේශීය වසංගත රෝග විද්‍යාඥයන්, සෞඛ්‍ය අධ්‍යාපන නිලධාරීන්, මහජන සෞඛ්‍ය නිලධාරීන් යනාදී කණ්ඩායම් ඒ ප්‍රදේශවල සිටිනවා. ඒ නිලධාරීන්ට අවශ්‍ය ප්‍රමාණයටත් වඩා පුහුණුවක් ලබා දී තිබෙනවා. ඔවුන් සියලු දෙනා ක්‍රියාත්මක විය යුත්තේ දිස්ත්‍රික්කය හරහා වන අතර, එය වසංගත රෝග විද්‍යා අංශයෙන් ඔවුන්ට දැනුම් දීමක් ප්‍රථමයෙන් කරන්න අවශ්‍යයි. ඒ වගේම සෞඛ්‍ය ප්‍රවර්ධන කාර්යාංශයෙන් දිස්ත්‍රික්කයේ සෞඛ්‍ය අධ්‍යාපන නිලධාරීන් ඔස්සේ මෙය සිදු කරනවා. 

 

විධායක නිලධාරිනියක් ලෙස ගමන් අරඹා ජ්‍යෙෂ්ඨ අලෙවි කළමනාකාරිනියක්ව ලොවක් දිනූ ඇය

හැකියාව, දක්ෂතාව මැනවින් ඔප මට්ටම් කර ගැනීමට සිත තුළ පවතින්නා වූ උනන්දුව අනිවාර්යෙන් තිබිය යුත්තකි. ගැහැනු-පිරිමිභාවය නොසලකා තමා කරන රැකියාව හෝ ව්‍යාපාරය ඉදිරියට ගෙන යන්නට එයින් ලැබෙන්නේ මහත් රුකුලකි. රක්ෂණ ක්ෂේත්‍රයේ එවන් වූ විශිෂ්ට දක්ෂතා රැසක් දක්වා ජනාධිපති සම්මානය පවා දිනාගැනීමට සමත් වූ ඇය නමින් විජිතා සමරක්කොඩිය. ජ්‍යෙෂ්ඨ අලෙවි කළමනාකාරිනියක් ලෙස කටයුතු කරන ඇය ඒ පිළිබඳ %අද^ හමුවේ අදහස් දැක්වූයේ මෙලෙසිනි. 


MAL_7003-(2)

ජ්‍යෙෂ්ඨ අලෙවි කළමනාකාරිනියක් ලෙසින් %ජනශක්ති^ රක්ෂණ සමාගමේ මට වසර 13ක සේවා කාලයක් තිබෙනවා. පසුගිය වර්ෂයේ දැක්වූ දක්ෂතා නිසා ජනාධිපති සම්මානය පවා දිනා ගැනීමට මට හැකි වුණා. එවැනි සම්මානයක් %ජනශක්ති^ ආයතනයේ ඉතිහාසයේ පළවැනි වතාවට තමයි කාන්තාවකට හිමි වුණේ. එය ජීවිත කාලයටම ලැබෙන එක සම්මානයක්. ඒ වගේම රක්ෂණ ක්ෂේත්‍රයේ මිලියන විස්සකට වැඩි මූල්‍යමය ඉලක්කයක් හඹා ගිය එකම කාන්තාවත් මමයි. 
මගේ මෙහෙයවීම යටතේ අලෙවි කටයුතු සිදුකළ කණ්ඩායම පසුගිය වර්ෂයේ (2017) ප්‍රථම ස්ථානය දිනාගත්තේ පළමු වතාවටයි. 

කාන්තා කළමනාකරණ ආයතනය විසින් ඩකාවල සංවිධානය කළ උත්සවයකදී මට %හොඳම අලෙවි කළමනාකාරිණිය^ ලෙසින් සම්මානයක්ද හිමි වුණා. ඒ වගේම මට 2014 හා 2015 වර්ෂවලදී %නෙස්කෝ^ රිදී හා ලෝකඩ පදක්කම් දිනාගැනීමට හැකි වුණා. 
මේ දිනාගත් සෑම දෙයක් පිටුපසම පුදුමාකාර කැපකිරීමක් මගේ ජීවිතයේ තිබුණා. මම ඉපදුනේ කොළඹ වුණත් මට අවුරුදු 08 විතර වෙනකොට මගේ අම්මා මට නැති වුණා. මගේ අම්මා නැති වුණාට පස්සේ අයියලා දෙන්නයි තාත්තයි එක්ක අනුරාධපුර පදවිය ප්‍රදේශයට ගියා. මම උසස් පෙළ දක්වාම අධ්‍යාපන කටයුතු කළේ අනුරාධපුරේ. මගේ තාත්තා කාර්මික ශිල්පියෙක්. අපි සාමාන්‍ය පවුලක එදා වේල හම්බකරන් කාලා ජීවත් වුණ අය. අපේ තාත්තා තමාට ලැබෙන මුදලින් කරපු එකම දෙය තමයි අපිට හොඳට උගන්නපු එක.
මම පොඩිකාලේ ඉඳලම සෙල්ලමට පොඩ්ඩක් බරයි. ඒ දවස්වල සමස්ත ලංකා එල්ලේ කණ්ඩායමට පවා තේරී පත්වෙලා හිටියා. මම එල්ලේ පුහුණුවීම් කරන කොට අපේ පංති භාර ගුරුතුමා දවසක් මාව ගෙන්වලා මට ඉස්සෙල්ලාම ඉගෙනීම් කටයුතු කරලා පස්සේ අනෙකුත් දේවල් කරන්න කියලා අවවාද කළා. ඒ දේ මගේ හිතේ තදින්ම කා වැදුණා. මොකද මගේ තාත්තා නිතරම කියනවා අම්මා නැතුව මෙච්චර දුක් මහන්සියෙන් හදා ගත්තේ. ඒනිසා අමාරුවෙන් ඉගෙන ගන්න කියලා. ඒ තමයි මගේ තාත්තට දෙන්න පුළුවන් ලොකුම දේ. ඉතින් එදා ගුරුතුමා කියපු දේ මගේ හිතට ලොකුවට  දැනුණා. ඒ අවුරුද්දේ අපේ පාසලේ මටයි තව එක පිරිමි ළමයෙකුටයි විතරක් විශ්වවිද්‍යාල සුදුසුකම් ලබන්න පුළුවන් වුණා. මම ඉන් පස්සේ ශ්‍රී ජයවර්ධනපුර විශ්වවිද්‍යාලයට ඇතුළත් වුණා. ඒ කාලයෙන් පසු දිගටම මම ජීවත් වුණේ කොළඹ. 

මම ගමේ හිටපු කාලේ කවදාවත් මුදල් වියදම් කරලා අමතර පන්තිවලට සහාභාගි වෙලා නැහැ. ඒ දවස්වල පාසලේ ගුරුවරයා හවස අමතර පංතියක් තියලා අපිට උගන්වනවා. ඉංග්‍රීසි විෂය විතරයි මම සල්ලි දීලා ඉගෙන ගෙන තිබෙන්නේ. අනිත් හැම දැනුමක්ම අපි ලබාගත්තේ පාසලෙන්. දැන් වගේ අමතර පන්තිවලට මුදල් වියදම් කරන්න අපිට අවශ්‍යතාවක් තිබුණේ නැහැ. ඇත්තෙන්ම ඒ කාලේ හරි සුන්දරයි වගේම විනෝදයි.

පාසලේදී මලල ක්‍රීඩා ඇරෙන්න මම හැම ක්‍රීඩාවකටම වගේ සහභාගි වුණා. ඉතින් ඒ නිසා ඒ හැම වැඩක් ඇතුළෙම මම ඉගෙන ගන්න එකත් හොඳට කළා කියලා මම හිතනවා. ඒ කාලයේ කරපු දේවල් තමයි මට අද මේ කරන හැම දේකටම උදව් වෙන්නේ. 
පාසලේදී මම එල්ලේ, නෙට්බොල්, වොලිබෝල් යන හැම ක්‍රීඩාවක්ම කළා. මගේ කකුලේ ප්‍රශ්නයක් ආපු නිසා ඒවා නතර කළත් මෑතක් වනතුරුම වෙළෙඳ සේවා අංශය නියෝජනය කරමින් ක්‍රීඩා කරන්න මට පුළුවන් වුණා. මට පුළුවන් මට්ටමෙන් හැම ක්‍රීඩාවක්ම කරන්න මම පැකිළෙන්නේ නැහැ. 

nasco

නෙට්බෝල් ගහන්නවත් දන්නේ නැති ගැහැනු ළමයි තමයි දැන් ඉන්නේ. බහුතරයක් කරන්නේ අධ්‍යාපන කටයුතු හදාරන එක විතරයි. නමුත් අපි නම්  එහෙම සීමාවෙලා හිටියේ නැහැ. කුඩා කාලයේ ඉඳලම ඒ ලබපු පන්නරය කියා නිම කළ නොහැකියි. මේ ක්ෂේත්‍රයේ වුණත් පිරිමි අය තමයි හැමදාම ප්‍රමුඛතාව ගෙන තිබුණේ. 

මම ප්‍රථම අලෙවි කළමනකාරිණිය වශයෙන් සම්මානය දිනාගත් විටදී පවා නොයෙක් ගැටලුකාරී තත්ත්වයන් මතුවුණා. බොහෝ පුද්ගලයන් මම වගේ කාන්තාවකට ඇයි මේ වගේ සම්මානයක් ලබාදෙන්නේ යැයි ප්‍රශ්න කළා. විවේචනය කළා. නමුත් මම හැදුණු වැඩුණු හා ඉගෙනගත් පරිසරයත් එක්ක මට එය එතරම් අභියෝගයක් වුණේ නැහැ. 

විශ්වවිද්‍යාල අධ්‍යාපනය අවසන් වූවාට පසුව රජයෙන් මට  එන්.අයි.බී.එම් (NIBN)හි සාමාන්‍ය කළමනාකාරීත්වය සම්බන්ධයෙන් ඩිප්ලෝමා එකක් හිමි වුණා. ඒත් සමගම මම මුලින්ම රැකියාව සඳහා බාටා පාවහන් ආයතනයට ගියා. ඒ කාලේ ඉඳන්ම මම ඉංග්‍රීසි ඉගෙන ගන්න මුදල් වියදම් කරනවා. ඉතින් මම ඇක්වයිනාස්හි පළමු පාඨමාලාව කළා. මම  %බාටා^ ආයතනයේ අවුරුදු 09ක් පමණ සේවය කළා. නමුත් මම එම ආයතනයේ සිටින විට කල්පනා කළා මෙතනින් එහාට මොනවද කරන්නේ කියලා. මම ඇත්තෙන්ම මේ රැකියාව ආරම්භ කිරීමට ප්‍රථමයෙන් සේල්ස් (sells)  කියන දේ ගැන කිසිම දෙයක් මම දැනගෙන හිටියේ නැහැ. ඉන්පසුව මම බාටා ආයතනයෙන් ඉවත් වී මගේ යාළුවත් එක්ක මුලින්ම සෙලින්කෝ ලයිෆ් එකට ගියා. ඒ යනකොට බොහෝ අය කිව්ව දෙයක් තමයි උපාධියක් තිබිලත් ඇයි මේ වගේ රැකියාවක් කරන්න යන්නේ කියලා. රක්ෂණ අලෙවි කිරීම සඳහා උසස් අධ්‍යාපනයක් ලබපු අය යන්නේ නැහැ. ඇයි ඔයා යන්නේ කියලා නොයෙක් අය මැසිවිලි නැගුවා. 

ඇත්තෙන්ම මම රැකියාව ගැන කිසිදු දෙයක් දන්නේ නැතුව ගියේ. නමුත් මගේ පත්වීමේ ලිපිය මට හම්බ වෙනකොට ඒකේ සටහන් වෙලා තිබුණා මගේ මූලික වැටුප රුපියල් 5000ක් කියලා. ඊට අමතරව නොයෙක් දීමනාද ඒ සඳහා එකතු කරලා තිබුණා. ඒ වගේ මුදලක් මට මාසිකව ලැබෙන එක ගැන හිතුණම එදා ඇත්තටම මගේ ඇස් දෙකට කඳුළු ආවා. නමුත් අපි වැඩකරන ප්‍රමාණය අනුව අපිට කොමිෂන් එකක් හිමි වන නිසා මම එයින් කලබල වුණේ නැහැ. අවුරුදු 06ක් මම එහි සේවය කළා. ඒ අතරතුර මම වාහනයකුත් ගත්තා. මේවායින් ලැබෙන්නේ කොමිෂන් නිසා ඇත්තෙන්ම මම මහන්සි වෙලා වැඩකටයුතු කළා. ඒත් සමගම ඇමෙරිකාවේ රක්ෂණය පිළිබඳ පුහුණු පාඨමාලාවක්ද හැදෑරීමට මම ගියා.

nsmail-519 (2)

ඇතැම් විට අපි නොසිතන අයුරින් නොයෙක් බාධක හා ගැටලුවලට මුහුණපෑමට සිදුවෙනවා. මම මගේ යහළුවෙක් එක්ක සම්බන්ධ වී ව්‍යාපාර කටයුතු කරන්න ඒ අවුරුදු ගානක් තිස්සේ කරන් ආපු රැකියාවෙන් ඉවත් වුණා. නමුත් ඒ අවස්ථාවේ යහළුවා මාව රැවට්ටුවා. අවුරුදු ගණනාවක් ගොඩනගාගත් ව්‍යාපාරික පසුබිම එහෙම් පිටින්ම ඒ නිසා මට අහිමි වෙලා ගියා. ඉන්පසුව තමයි මම %ජනශක්ති^ රක්ෂණ සමාගම හා එක්ව කටයුතු කිරීම ආරම්භ කළේ. 

මම මේ ආයතනයට මුලින්ම පැමිණියේ විධායක නිලධාරිනියක් ලෙසින්. නමුත් 2009 වර්ෂයේදී කණ්ඩායමක් බාරව, එම කණ්ඩායමේ නායිකාව වශයෙන් කටයුතු කරන්න අවස්ථාවක් මට ලබාදුන්නා. ඒ කාලයේ සිට අද වනතුරු මට මෙයින් වෘත්තීමය වශයෙන් විශාල ප්‍රගතියක් ලබාගැනීමට හැකිවෙලා තිබෙනවා. මම දැන් මේ ආයතනයේ ජ්‍යෙෂ්ඨ අලෙවි කළමනාකාරිණියක් වශයෙන් කටයුතු කරනවා. ඒ තැනට පැමිණෙන්න සාමාන්‍යයෙන් කෙනෙකු මිලියන 90ක් පමණ ඉලක්කයක් හඹා යන්න ඕනි. දැන් මම මේ තනතුරට ඇවිත් වසර 03ක පමණ කාලයක් ගතවෙලා තිබෙනවා. මගේ මේ හැම දෙයක්ම සැලකිල්ලට ගනිමින් ඉදිරියේදී මට මීට වඩා උසස් තනතුරක් ලැබෙනවා. එය තමයි මම ලබාගත් සාර්ථකත්වය. ඇත්තෙන්ම හරි අමාරුවෙන් තමයි මම මේ ගමන ආවේ. අපි මේ රැකියාව කරන්න ඕනි අපේ පෞද්ගලික දක්ෂතා තුළින්. මගේ පාරිභෝගිකයන් කවදාවත් මගේ ළඟට එන්නේ නැහැ. මම යන්න ඕන ඔවුන් ළඟට. 

අපේ රටේ 57෴ක් පමණ සිටින්නේ  කාන්තාවන්. හැමෝටම වගේ අධ්‍යාපනය සඳහා සමාන ඉඩ ප්‍රස්ථා හිමි වෙනවා. ඒ වගේම විශ්වවිද්‍යාල අධ්‍යාපනය අවසන් කර පිටව යන වැඩි ප්‍රතිශතයක්  කාන්තාවන්. ඒ අතරිනුත් විවාහයෙන් පසුව හෝ විවාහයට පෙර වුවත් රැකියාවන් කරන්නේ අඩු ප්‍රමාණයක්. පවුලේ ප්‍රශ්න හෝ වෙනත් හේතූන් රැසක් ඔවුන්ට එසේ සිදුකිරීමට බලපානවා. නමුත් හැකියාවක් තිබේ නම් අප එයින් ඵලදායී දෙයක් කරන්න ඕන. පවුල වෙනුවෙන් කැපකිරීම් කරන්න එපා කියන දෙය මෙයින් මම අදහස් කරන්නේ නැහැ. නමුත් ඒ සඳහා අවශ්‍ය ඉඩකඩ තබාගත යුතුයි. මට බැහැ කියන දේ හිතන්න හොඳ නැහැ. අනිත් අය කරනවා නම් ඇයි මට බැරි කියන දේ සිතෙහි තබා ගන්න ඕන. 

අපි වගේ දුෂ්කර ප්‍රදේශවල කාන්තාවන් පමණක් නෙමෙයි මේ කොළඹ තදාසන්න ප්‍රදේශවල වෙසෙන කාන්තාවන් පවා රැකියාවක් කිරීමට මැලිකමක් දක්වනවා. සාමාන්‍යයෙන් කාන්තාවන් එක අවස්ථාවකදී කඩා වැටෙනවා කියලා කියනවා. බොහෝ කාන්තාවන් කළමනාකාරීත්වයේ මදක් දුර ගියත් ඉහළටම යන්නේ ඉතා සුළු ප්‍රමාණයයි. මොකද ඇය තීරණ ගන්න තැනට එන්නේ නැහැ. රාත්‍රී කාලයේ, සති අන්තයේ වැඩ කිරීමේ අපහසුතාව ආදී නොයෙක් අපහසුතා නිසා ඉහළ තලයට ඇයගේ පැමිණිම අඩුවෙන් සිදුවෙන්නේ. සාමාන්‍යයෙන් අධ්‍යක්ෂ මණ්ඩලවල, තීරණ ගැනීමේ කමිටුවල, කාන්තාවන් සිටින්නේ මම හිතන විදිහට 05෴ක් වගේ අඩු ප්‍රමාණයක්. දැන් අධ්‍යක්ෂ මණ්ඩල කමිටුවල අවම වශයෙන් එක් කාන්තාවක්වත් සිටින්නට අවශ්‍යයයි කියා තීරණය කර තිබෙනවා. එනමුත් ඒ තත්ත්වයේදී වුණත් පිරිමි පාර්ශ්වය සිතනුයේ කාන්තාවන්ට නිවැරදි සෘජු තීරණයක් ගැනීමට හැකියාවක් නැහැයි කියායි. කුමන කාරණයකදී වුණත් කාන්තාවක් තීරණ ගන්නේ ඇයට ආවේණික වූ ක්‍රමයකටයි. 

nsmail-518 (2)

 ඇත්තෙන්ම කාන්තාවන් තමන්ට පැමිණෙන නොයෙක් ගැටලුකාරී තත්ත්වයන්වලට නොබියව මුහුණදී ජීවත් වෙන්න ඕන. අපිට යම් ආදර්ශවත් කාන්තාවක් දිහා බලලා ඉගෙන ගන්න අද සමාජයේ හැකියාවක් නැහැ. එය ප්‍රධාන ප්‍රශ්නයක්. අපි සෑම අවස්ථාවකම අන්තර්ජාතික කාන්තාවක් තමයි අපේ ආදර්ශය කරගන්නේ. නමුත් අපේ රටේ ඕනෑ තරම් එවැනි කාන්තාවන් සිටිනවා. පළවැනි අග්‍රමාත්‍යවරිය වගේම පළමු ජනාධිපතිනියත් අපේ රටෙන් බිහි වුණේ. නමුත් අපි ඒ පිළිබඳ හරිහැටි දන්නේ නැහැ. ඒ නිසා ලොව ප්‍රසිද්ධියක් උසුලන කාන්තාවන් තමයි බොහෝමයක් තම ආදර්ශය සඳහා ගන්නේ. අපේ රටේ නොයෙකුත් ක්ෂේත්‍රයන්ගෙන් ඉදිරියට ගිහින් දක්ෂතා දැක් වූ අය සිටිනවා. නමුත් එවැනි අය අපි අපේ ආදර්ශයට ගන්න උත්සහා කරනවා තබා ඔවුන්ව හඳුනන්නේවත් නැහැ. තමා කාන්තාවක් වීම නිසා යම් යම් දේවල් කරන්න මැලි වෙනවා. නමුත් කාන්තාවන්ට තමයි වැඩියෙන්ම ශක්තිය තිබෙන්නේ. ඇයට දරා ගැනීමේ ශක්තිය උපරිමයෙන්ම තිබෙනවා. එවැනි ශක්තීන් රැසක් තිබෙන කාන්තාවන් වන අපි එය නිසිආකාරව ප්‍රයෝජනයට ගත යුතුයි. 

ඇත්තෙන්ම මගේ වෘත්තිය වුවත් පිරිමි කෙනෙකුට වඩා ගැහැනු කෙනෙකුට හොඳින් සිදුකරන්න පුළුවන් වෘත්තියක්. මොකද අපේ කාන්තාවන්ට ආකර්ෂණීය ඒ වගේම සංවේදී අයුරින් කතා කිරීමේ හැකියාවක් තිබෙනවා. නමුත් එකම දේ තමයි එළියට යන්න අවශ්‍ය නිසා අපේ කාන්තාවන් මෙවැනි  රක්ෂණ ක්ෂේත්‍ර‍ෙය් රැකියා කරන්න වැඩි කැමැත්තක් දක්වන්නේ නැහැ. මම හිතන විදිහට නම් කාන්තාවගේ ප්‍රතිරූපය රැකියාව මත තීරණය වෙන්නේ නැහැ. එය රඳා පවතින්නේ තමන් විසින් ගෙන ආ සාරධර්ම මතයි. අපි සෑම විටම අභියෝගයක් බාර අරගෙන ඒ මත පිහිටා කටයුතු කරන්න ඕන. මට වුණත් මේ ක්ෂේත්‍රයේ ඉහළට යන්න පුළුවන් අවස්ථා වැඩියි. මොකද මගේ වෘත්තිය තුළ මට තරග කරන්නට සිදුවන්නේ කාන්තාවන් එක්ක නොව පිරිමි අය සමගයි. නමුත් වෘත්තිය තුළ කාන්තාවක් කියා මට විශේෂ සැලකිල්ලක් හිමි ‍ෙවන්නේ නැහැ. මගේ වෘත්තිය තුළ මට මේ මාසය තුළ උපයාගත යුතු මුදල තීරණය කිරීමේ හැකියාව තිබෙනවා. ඒ වගේම ඉදිරි කාලය වන විට මම කොපමණ වැටුපක් හිමි කරගත යුතුද කියා තීරණය කළ යුත්තේද මම විසින්මයි. 
අපේ ස්ථිර නොවන සේවක මණ්ඩලයක්ද සිටිනවා. එසේ වූ විට නිවසේ හා දරුවන්ගේ වැඩකටයුතු කරමින් ඇයට ඉන්පසුව මේ වැඩකටයුතු සිදුකිරීමට පැමිණෙන්න පුළුවන්. 

මම දැන් මගේ වෘත්තිය ජීවිතය තුළින් බොහෝ ඉහළට ගොස් සිටිනවා. මුල්කාලයේ සිටම යා යුතු මාර්ගය පිළිබඳ මාර්ගෝපදේශනයක් ලබා ගැනීමට හැකි වූවා නම් මට මීට වඩා ඉදිරියට යන්න තිබුණා. ඉස්සර එහෙම මග පෙන්වන්න අපිට කවුරුත් හිටියේ නැහැ. 
දැන් අපි කෙනෙක් අලුතින් බඳවා ගන්නා විට ඒ පිළිබඳ උප‍ෙදස් පවා ලබා දෙනවා. අඩුම තරමේ මොකුත් කරන්නේ නැතිනම් භාෂාව හරි ඉගෙන ගන්න කියලා. විශ්වවිද්‍යාලයන් ඉවත් වෙනකම්ම මගේ තාත්තා මට සැලකුවත් ඉන් පසුව මේ ලබා ගත් සෑම දෙයක් සඳහාම වියදම් කළේ මමයි. 

එංගලන්තයේ නොතම්හැම්ට් විශ්වවිද්‍යාලයේ මම මේ වන විට පශ්චාත් උපාධිය හදාරමින් සිටිනවා. ගොඩක් අය කැමති නැහැ සල්ලි වියදම් කරලා පුහුණු වීම්, ඉ‍ෙගන ගන්න දේවල් සඳහා යන්න. වෘත්තිය ක්ෂේත්‍රයේ බොහෝ අය රැකියා ස්ථානයෙන් තෝරා පත්කර යවන තුරු බලා සිටිනවා. නමුත් මම එසේ කරන්නේ නැහැ. ඒ හැම දේකටම මම මගේ සල්ලි වියදම් කරලා යන්නේ. කාන්තා කළමනාකරණ ආයතනයේ සමාජිකාවක් වගේම මම  %සිංගල් මදර්^ ව්‍යාපෘතියේ සභාපතිනිය ලෙස කටයුතු කරනවා. 
ඇත්තෙන්ම කාන්තාවක් ලෙසින් අපට සිදුකිරීමට බැරි දෙයක් නැහැ. ඒ නිසා අපි පසුපසට වී සිටිය යුතු නැහැ. අනිත් අයට තිබෙන දේවල් තමයි අපි හැමෝටම තිබෙන්නේ. අපිට ඊට වඩා ලස්සනට ඒවා පිහිටලා තිබෙනවා. අපිට  ලස්සනට කතා කරන්න පුළුවන්, කෙනෙක් සමග සුහදව කතා කරන්න පුළුවන්. ඒ නිසා ඇයි අපි ඒ අවස්ථාව ප්‍රයෝජනයට ගන්නේ නැත්තේ. මේ වෘත්තිය කරන්න නම් හොඳ මානසික තෘප්තිමත් භාවයක් තිබෙන්නට ඕන. කම්මැලි වෙලා මේ වෘත්තිය කරන්න බැහැ. මට තිබෙන ප්‍රශ්නය වන්නේ බොහෝ අය තමන්ගේ දක්ෂතාව තියාගෙන, විශ්වවිද්‍යාලයේ ගිහින් ඉගෙනගෙන ඇයි වෘත්තියක් කිරීමට මැලි වන්නේ යන්නයි. 

රැකියා නැහැ කිය කියා පාරේ කෑ ගහගහා සිටිනවාට වඩා මෙවැනි වෘත්තියක් කරන එක  හොඳයි. ඒ කාලේ මමත් එහෙම කරානම් මාව දුක්මහන්සියෙන් හදාගත් තාත්තා ගැන බලන්නේ කවුද? ප්‍රශ්න හැමතැනම තිබෙනවා. මම දැන් වැඩකරන විට පවා ප්‍රශ්න ඇතිවෙනවා. ප්‍රශ්න ඇතිවෙනවා කියා අතහැර දැමුවොත් ඒ යන ගමන අපිට යන්න බැහැ. අපි ගමන යනකොට මාර්ගය පාදාගෙන තමයි යන්න ඕන. අපි ඒක තෙරුම් ගන්න ඕන.  

මගේ වෘත්තිය තුළ තමන්ගේ ආදායම තමන්ට වැඩි කරගන්න පුළුවන් නිසා මම ඇඳුමක් ගන්න ගියත් ප්‍රශ්නයක් නැහැ. මම කැමති ඇඳුම ගන්න මට සල්ලි තිබෙනවා. ඔය මොනදේ කළත් සමාජයේ අපි ඉන්න හැටියට තමයි අපිව පිළිගන්නේ. ආයතනයේ අධ්‍යක්ෂ වුණත් සමාජයේ පිළිගැනීමක් නැතිනම් ඔහුගෙන් වැඩක් නැහැ. මම කවුද කියන එක තමයි අනෙක් අයට අපෙන් දැනගන්න තිබෙන්නේ. මට මොන දේ තිබුණත් වැඩක් නැහැ ඒ සමාජය ඉදිරියේ පිළිගැනීමක් නැතිනම්. ඒ ප්‍රතිරූපය තමයි අපි හදා ගන්න ඕන. විශේෂයෙන් කාන්තාවන්ට හැම වෙලාවෙම වගේ මඩ ගහනවා.  ඒක සාමාන්‍යයෙන් සිදුවන දෙයක්. අපි ගැන කතා කරන්න ඕන. එතකොට තමයි අපිව කැපිලා පේන්නේ. 

මම මේ තරම් දුරක් පැමිණියේ මම ගොඩක් කැපකිරීම් කරලා. එතකොට මගේ නරක ගැන කතා වෙන්න බැහැ. මොකද වාසියට මේ වගේ තැනකට එන්න බැහැ. මේ ක්ෙෂ්ත්‍රයේ තමන්ගේ දක්ෂතා පෙන්නන්නම ඕන. තමන් කළා නම් තමන්ට කරපු දේ තමන්ට හම්බ වෙන්නේ. ඒ නිසා මේ රස්සාව කරන ගමන් එය තව තවත් දියුණු කරගන්න ඉබේම ආසාවක් ඇතිවෙනවා.

අපි ක්ෂේත්‍රෙය් වැඩ කරද්දී සමහර පාරිභෝගිකයන් අපට බණිනවා. ඒ වගේම සමහර අය හොඳින් කතා කරනවා. කෙනෙක්ට හොඳයි කියලා හිතෙන දෙයක් තවත් කෙනෙක්ට නරකයි. නමුත් අපි අවංකවම අපේ රැකියාව කරනවා නම් අපිට දුක්වෙන්න බය වෙන්න දෙයක් නැහැ. 
ඉදිරියේදී මම අපේක්ෂා කරනවා මගේම කාන්තා කණ්ඩායමක් හදන්න. ඇත්තෙන්ම ඒ කණ්ඩායම හදන්න කවුරු හරි ඉදිරිපත් වෙන්න කැමති නම් මගෙත් එක්ක සම්බන්ධ වෙලා වැඩකටයුතු කරන්න පුළුවන්. 

 

දික්කසාදයකින් ඔබට හිමි-අහිමි දේවල් තීරණය වන්නේ මෙහෙමයි

කාන්තාවන් සමාජය, සංස්කෘතිය තුළ නොයෙක් භූමිකාවන් නිරූපණය කරන අතර, ඒ තුළ ඇයට පැවරෙන වැඩ ප්‍රමාණයද එකිනෙකට වෙනස් ස්වරූපයක් ගනී. එමෙන්ම ඇය නීතියෙන් වුවද පුරුෂයා හා සමානව සැලකුවද, ඇතැම් සමාජීය, ජීව විද්‍යාත්මක හා ආර්ථික කාරණා මත නීතියෙන් සමාන ආරක්ෂණයක් ලැබුණද ඇතැම් කාරණා සම්බන්ධයෙන් ඇයට අසාධාරණයක් සිදුවේ. ඒ අනුව දික්කසාදය තුළ වුවත් ඇය මුහුණපාන ප්‍රශ්න රාශියකි. පුරුෂයා හා ස්ත්‍රිය දික්කසාදයකදී නීතියෙන් එක හා සමාන ලෙස සලකා නඩුවක් තීන්දු කළද තවත් බොහෝ කාරණා මත ඇය මහත් අසරණබවකට පත්වේ. මේ පිළිබඳ සාකච්ජා කිරීම සඳහා කොළඹ විශ්වවිද්‍යාලයේ නීති පීඨයේ පුද්ගල හා තුලනාත්මක නීති අංශයේ අංශ ප්‍රධාන ආචාර්ය රෝස් විජේසේකර මහත්මිය  සම්බන්ධ කර ගැනීමට අපි සිතුවෙමු.  


divorce-finaicial-provisions

පෙරට වඩා වර්තමානයේ දික්කසාද වන ප්‍රමාණය වැඩියි. දික්කසාදයකට යෑම කියන තැනදී සාමන්‍යයෙන් කාන්තාව පොදු සිංහල සමාජය තුළ නීතිමය අංශයෙන් ඒ තරම් ප්‍රශ්නයකට භාජනය වෙන්නේ නැහැ. නමුත් මුස්ලිම් නීතියේදී එය කාන්තාවන්ට බලපාන්නේ පිරිමි පුද්ගලයෙකු දික්කසාද වීමේදී බලපාන නීති තත්ත්වය අනුව නෙමෙයි. ඒ නිසා ඒ දෙකෙහි ලොකු වෙනසක් අපිට දකින්නට ලැබෙනවා. ඒ නිසා ප්‍රවේශයේදී නීතිමය අංශයෙන් සාමාන්‍ය සිංහල හා ද්‍රවිඩ දෙපිරිසටම ගත්විට ගැටලුවක් ඇතිවෙන්නේ නැහැ. නමුත් පොදුවේ සිංහල හා ද්‍රවිඩ යන කාන්තාවන් දෙපාර්ශ්වයටම සමාජීය වශයෙන් විශාල ප්‍රශ්න රැසකට මුහුණපාන්නට සිදුවෙනවා. 

සාමාජීය හා ආර්ථික වශයෙන් මුහුණපාන ප්‍රශ්න වැඩියි

සිංහල හා ද්‍රවිඩ කාන්තාවන් දික්කසාද වීමේදී නීතිමය වශයෙන් ඔවුන්ට වෙනස්කමක් කිසිවක් සිදුනොවුණත් සමාජීය හා ආර්ථික වශයෙන් මේ අය මුහුණපාන ප්‍රශ්න විශාලයි. සාමාන්‍යයෙන් රැකියාවල නියුතු වන කාන්තාවන් විවාහ වන අවස්ථාවේදී ඇතැම් විට රැකියාවෙන් ඉවත් වීමට පෙළෙඹෙනවා. එමෙන්ම විවාහය තුළින් ඔවුන්ට දරුවන් සිටින්නට වුණත් පුළුවන්. ඒ නිසා ඇය දික්කසාද වන අවස්ථාවේදී බොහෝ විට ආර්ථිකමය වශයෙන් ස්වාමිපුරුෂයා තරම් ප්‍රබල අවස්ථාවේ ඒ වන විට නැහැ. එසේ වන විට නීතිය සමානව සැලකුවත් සමාජීය වශයෙන් ඇය දෙවැනි තැනක සිටින්නේ. ඇය නීතියට ප්‍රවේශ වීම කියන තැනදී පළමුව ලොකු ප්‍රශ්නයකට මුහුණපානවා.

නීතියේ සහාය ලබාගැනීමේදී මුදල් කියන දෙය ප්‍රබල දෙයක් කියලා අපි දන්නවා. නඩු ගාස්තු, නීතිඥ ගාස්තු වගේ දේවල්වලට ඇයට මුදල් යොදවන්න සිදුවෙනවා. නීතිඥ සහාය ලබාගැනීමේදී පිරිමි පාර්ශ්වයට මෙන් ප්‍රබල තත්ත්වයක් නොමැති නිසා බොහෝ වේලාවට නීතිඥ සේවයේත් ඇයට යම් යම් අඩු පාඩුකම් සිදුවෙන්නට පුළුවන්. 
පිරිමි කෙනෙකුගේ චරිතයක් ඝාතනය කරනවට වඩා වෙනස් ආකාරයටයි කාන්තාවගේ චරිතයක් ඝාතනය වීම උසාවිය තුළ සිදුවන්නේ 
දික්කසාද නඩුවකදී නීතිමය ප්‍රශ්නවලට වඩා සිද්ධිමය ප්‍රශ්න ගැන කතා කරනවා. සාමාන්‍යයෙන් වෛවාහික වරදක් කර තිබෙනවා නම් පමණයි නීතියෙන් දික්කසාදයක් ඉල්ලන්න පුළුවන්. වෛවාහික වරදක් යනුවෙන් අදහස් කරන්නේ එක්කෝ විවාහයෙන් පසුව අනාචාරයේ යෙදී තිබෙන්න ඕන. නැතිනම් කිසිම සාධාරණ හේතුවක් නොමැතිව එක් පාර්ශ්වයක් අනෙක් පාර්ශ්වය අතහැර දමා තිබෙන්න ඕන. එසේත් නොමැති අවස්ථාවල එක් පාර්ශ්වයක් ලිංගික බෙලහීනතාවකට පත්වෙලා තිබෙන්න ඕන. මේ කියන කාරණා ත්‍රිත්වය මත පදනම් වෙමින් දික්කසාදයක් ඉල්ලීමේ හැකියාවක් තිබෙනවා. 

එවිට අනෙක් පාර්ශ්වයේ මෙවැනි වැරදි තිබෙන බව කියන කාන්තාව හෝ පුරුෂයා එනම් දික්කසාද නඩුවක් පවරන ඔහු හෝ ඇය ඒ කාරණාව ඔප්පු කර පෙන්වීමට අවශ්‍යයි. එය ඔප්පු කළ යුත්තේ මෙහෙමයි කියා නීතියේ පැහැදිලි කිරීමක් තිබෙනවා. නමුත් මේ යටතේ  හාරලා අවුස්සලා ගන්නේ මිනිස්සුන්ගේ පෞද්ගලික දේවල්. බොහෝ අවස්ථාවන්වලදී පෞද්ගලික කාරණා හාරලා අවුස්සලා ගන්න ගියහම පිරිමි කෙනෙකුගේ චරිතයක් ඝාතනය කරනවට වඩා වෙනස් ආකාරයටයි කාන්තාවගේ චරිතයක් ඝාතනය වීම උසාවිය තුළ සිදුවන්නේ. 

විවාහය කියන සංස්ථාව තුළ සමාජය කාන්තාවකගෙන් බලාපොරොත්තු වන දේවල් වැඩියි 

ද්වේෂ සහගතව සාධාරණ හේතුවක් නොමැතිව අතහැර දමා යන තත්ත්වයකදී වුණත් සමාජයක් විවාහය තුළ පිරිමින්ගේන් අපේක්ෂා කරන දෙය හා කාන්තාවකගෙන් අපේක්ෂා කරන දෙය වෙනස් නිසා පිරිමි කෙනෙක් අත්හැර දමා ගියවිට සාධාරණ හේතුවක් නොමැතිව එක වෛවාහික වරදක්ය කියලා පෙනෙන දෙයට වඩා කාන්තාවක් අතහැරලා ගිය අවස්ථාවකදී ඒක වෛවාහික වරදක්ය කියා කියන දෙය ඔප්පු කරන්න පහසුයි. මොකද කාන්තාවකගෙන් විවාහය කියන සංස්ථාව තුළ සමාජය බලාපොරොත්තු වන දේවල් පිරිමි කෙනෙක්ගෙන් සමාජය බලාපොරොත්තු වන දේවලට වඩා ගොඩක් වැඩියි. එම නිසා නීතිය එසේ වුවත් සමාජයට  භාවිතයත් සමග එය අදාළ වීමේදී පිරිමි කෙනෙකුට අදාළ වෙන්නේ එක විදිහකට, ගැහැනු කෙනෙකුට අදාළ වෙන්නේ තවත් විදිහකට. 

විවාහයෙන් පසුව අනාචාරයේ යෙදී තිබීමRose-250x263

අපි අනාචාරය කියන දෙය ගත්තත් සාමාන්‍යයෙන් පිරිමි කෙනෙක් ගැහැනු කෙනෙක් ඒක්ක රාත්‍රී කාලයේ කුමක් හෝ අවශ්‍යතාවකට ගියවිට තිබෙන වෙනසයි, විවාහක ගැහැනු කෙනෙක් තමන්ගේ ස්වාමිපුරුෂයා නොවන පිරිමි කෙනෙක් සමග රාත්‍රී කාලයේ අවශ්‍යතාවකට ගියවිට බලන ආකාරයයි දෙයාකාර ස්වරූපයක් ගන්නවා. ඇත්තෙන්ම එහිදී වැරැද්දක් යැයි හඳුන්වන දෙයක් නොතිබෙනවා විය හැකියි. විවාහක ගැහැනිය හා විවාහක පුරුෂයා කර තිබෙන්නේ එකම දේ වූ නමුත් මේ දිහා බලන ආකාරය වෙනස්. නීතියේ තිබෙන්නේ එකම කරුණ වුවත්, උසාවියක් තුළ සාක්ෂි විමසන අවස්ථාවේ  විනිශ්චකාරවරයාගේ සිටම නීතිඥවරයා මෙය උලුප්පා දක්වන ආකාරයෙන් කාන්තාව බරපතළ ලෙස වෙනස් තත්ත්වයකටයි මුහුණපාන්නේ. 
ස්වාමිපුරුෂයාට සියලුම ලිංගික අවශ්‍යතාවන් සියලු අවස්ථාවන්හි කොන්දේසි විරහිතව ඉෂ්ට කළ යුතුයි කියා නීතියේ පූර්වේක්ෂණය 
දික්කසාදයක් වීම සඳහා බලපාන තවත් කාරණාවක් ලෙස ලිංගික බෙලහීනතාව හඳුනාගන්න පුළුවන්. අපේ නීතිය තුළින් විවාහයක් ඇතුළත සිදුවන ස්ත්‍රී දූෂණයක් කියා දෙයක් පිළිගන්නේ නැහැ. විවාහ වුණාට පසුව කාන්තාව තමන්ගේ ස්වාමිපුරුෂයාට සියලුම ලිංගික අවශ්‍යතාවන් සියලු අවස්ථාවන්හිදී කොන්දේසි විරහිතව ඉෂ්ට කළ යුතුයි කියා නීතිය පූර්වේක්ෂණය (උපකල්පනයක්) කරනවා. එනිසා තමයි කාන්තාවකගේ අකැමැත්ත මත සිදුවන ලිංගික සංසර්ගය විවාහයක් තුළ සිද්ධ වෙනවිට එය ස්ත්‍රී දූෂණයක් ලෙසින් පිළිගන්නේ නැත්තේ. 

විවාහක කාන්තාවක තමන්ගේ ස්වාමිපුරුෂයා නොවන අයෙකු සමග තමන්ගේ කැමැත්ත නැතිව ලිංගික සංසර්ගයක යෙදුෙණාතින් නීතිය අනුව එය ස්ත්‍රී දූෂණයක් වූවත්, ස්වාමිපුරුෂයා තමන්ගේ භාර්යාවගේ කැමැත්තකින් තොරව ලිංගික සංසර්ගයේ යෙදීම ස්ත්‍රී දූෂණයක් ලෙසින් සලකන්නේ නැහැ. එය ඉංග්‍රීසි භාෂාවෙන් හඳුන්වන්නේ මැරිටල් රේප් (marital rape) යන නමින්. යුරෝපයේ රටවල්, ආසියාවේ ඇතැම් දියුණු රටවල්, සිංගප්පූරුව වැනි රටවල් මෙම වෛවාහික දූෂණය පිළිගන්නවා. නමුත් ඉන්දියාව, ශ්‍රී ලංකාව වගේ රටවල තවමත් ඒ තත්ත්වය පිළිගන්නේ නැහැ. 

ඒ නිසා කොන්දේසි විරහිතව ලිංගික අවශ්‍යතාවන් ඉටුකළ යුතු යැයි පිළිගන්නා තත්ත්වයක් තුළ කාන්තාවගේ යම් යම් ශාරීරික නොහැකියාවන් ලිංගික බෙලහීනතාව කියා අර්ථකථනය කිරීමේ අවදානමක් තිබෙනවා. ඇත්තෙන්ම නීතියේ ලිංගික බෙලහීනතාව කියා පදනමක් කර ගන්නේ වෛද්‍ය විද්‍යාත්මකව ඔප්පු කළ යුතු තත්ත්වයක්. 

නමුත් ශාරීරික වශයෙන් කාන්තාවන් මුහුණදෙන ලිංගික චර්යා චක්‍රයයි, පිරිමි ලිංගික චක්‍රයයි වෙනස්. කාන්තාවන්ට දරුවන් ලැබෙනවා. ඒ වගේම ඔසප් වීම් සිද්ධ වෙනවා, ආර්ථභාවය සිදුවෙනවා. එවැනි ශාරීරික ක්‍රියාවන් නිසා ලිංගික වශයෙන් යම් යම් නොහැකියාවන්වලට වැඩි වශයෙන් භාජනය වන්නේ කාන්තාව. නමුත් නීතියේ බෙලහීනතාව කියා ලියා තිබෙන්නේ කාන්තාව හා පිරිමියාට එක හා සමානවයි. නමුත් මේ භෞතික කාරණා නිසා මෙය කාන්තාවන්ට වෙනස් ආකාරයකට බලපානවා. උසාවියකදී දික්කසාද නඩු ඔප්පු කිරීමේදී මේ වගේ දේවල් එළියට ගන්නවා. එහිදී සිදුවන්නේ ඇත්තෙන්ම කිළිටි රෙදි ප්‍රසිද්ධියේ සෝදනවා වගේ වැඩක්. 
ඔය කියන කාරණා තුනට හා සම්බන්ධ සිද්ධිමය දේවල් ප්‍රසිද්ධියේ උසාවියේ කියැවෙන අවස්ථාවේදී කාන්තාවක් අසීරුතාවකට පත්වෙන ආකාරයයි, පුරුෂයෙකු පත්වන අසීරුතාවයි අපිට සමාන කරන්න පුළුවන්ද? ඒ නිසා එතැනදීත් කාන්තාව අපහසුතාවට වෙනස්කමකට ලක් වෙනවා. 

පවුල් උපදේශනය තුළ කාන්තාව පත්වන අපහසුතාව

දික්කසාදයක් ගැනීමේදී පළමුවෙන්ම පවුල් උපදේශනය සඳහා යොමු කරනවා. මේ පවුල් උපදේශනයට යොමු කිරීම පිළිබඳවත් නොයෙකුත් ගැටලු මතු වී තිබෙනවා. මෙහිදී පිරිමි අය වැඩි වශයෙන් උපදේශකයන් ලෙස කටයුතු කරනවා. ඒ අය පුහුණු උපදේශකවරු තමයි. නමුත් පවුලේ ප්‍රශ්නයක් නිසා උපදේශනයට ගියාම කන්තාවන්ට බලපෑම් ඇතිවන අවස්ථා ඕනෑ තරම් තිබෙනවා. 

දික්කසාද වූ කාන්තාවකට සමාජයේ මුහුණ දෙන්නට සිදුවන ප්‍රශ්න.

තීන්දුව ගත් පසු නැවතත් ඒ කාන්තාව තනි කෙනෙකු බවට පත් වෙනවා. මේ වන විට කාන්තාව හොඳ මූල්‍යමය තත්ත්වයක් දරන කෙනෙකු නම් මූල්‍යමය පැත්තෙන් ඉදිරි කාලය තුළ ජීවිතය ගෙවා දැමීම ඇයට එතරම් අපහසු කටයුත්තක් වෙන්නේ නැහැ. පිරිමි කෙනෙක් රැකියාවක නිරත වීම සුලභ දෙයක්. ඒ නිසා දික්කසාද වූ නිසා පුරුෂයාට එතරම් ගැටලුවක් ඇති වෙන්නේ නැහැ. දික්කසාද කාන්තාවකට සාමාන්‍යයෙන් අවිවාහක කාන්තාවකට වඩා සමාජයෙන් එන වැඩි ප්‍රශ්න ප්‍රමාණයකට මුහුණ දෙන්න සිදුවිය හැකියි. 
නඩත්තු ගෙවීම් පැහැරහරින අවස්ථාවේ මූල්‍යමය අතින් අසරණ වන කාන්තාව
දික්කසාද වන විට දරුවන් සිටියා නම් ඒ දරුවන්ගේ භාරකාරත්වය පිළිබඳ ප්‍රශ්නත් මතුවෙනවා. එහිදී භාරකාරත්වය මවට හෝ පියාට නඩු තීන්දුවේදී ලැබෙන්න පුළුවන්. මව දික්කසාදයේදී නිර්දෝෂී පාර්ශ්වය වී ඒ මවට භාරකාරත්වය හිමිවුණෝතින් පියාටද තම දරුවන්ගේ නඩත්තුව ගෙවන වගකීම ගැනීමට සිදුවෙනවා. නමුත් ඇතැම්විට පියා දික්කසාදයෙන් පසු නඩත්තු ගෙවීම් පැහැරහරින අවස්ථා තිබෙන්නට පුළුවන්. ඒ වගේ අවස්ථාවකදී ඒ කාන්තාවට තමන්ගේ දරුවන්ගේ නඩත්තුව වෙනුවෙන් නඩත්තු නඩු දමා උසාවි යන්නට සිදුවෙනවා. එසේ වූ විට ඇයට උසාවියේ නීතිඥ සේවය ලබාගන්න නැවතත් මුදල් වියදම් කරන්න සිද්ධ වෙනවා. ඇතැම් විට මාස්පතා උසාවිය ඉදිරියේ පෙනී සිටිමින් නඩත්තුව ඉල්ලා සිටින්නට සිදුවෙනවා. එවැනි තත්ත්වයකදී කාන්තාව අසරණ තත්ත්වයකට පත්වෙනවා. 

දික්කසාදයෙන් පසු දේපොළ හිමිකාරීත්වය

දික්කසාදයට පෙර භාර්යාවගේ නමින් යම් දේපොළක් තිබුණානම් එය අයිති වන්නේ ඇයටයි. නැතහොත් ස්වාමිපුරුෂයාගේ නමින් යම් දේපොළක් තිබුණා නම් එය ස්වාමිපුරුෂයාට අයිති වෙනවා. නමුත් භූමිය භාර්යාවගේ වී සෑදූ නිවසේ වියදම ස්වාමිපුරුෂයා දරා ඇති විටෙක ඔවුන් දික්කසාද වීමේදී ඉඩමේ අයිතියට ප්‍රමුඛතාව ලබාදෙනවා. නමුත් අසාධාරණයක් සිදු නොවන්න හානි පූරණයක් සිදුකොට සිදුවුණ අලාභයට යම්කිසි මුදලක් ගෙවා නිවසේ අයිතියද භාර්යාවට ගැනීමේ හැකියාව තිබෙනවා. 

දික්කසාදයේදී නිර්දෝෂි ඇයට හෝ ඔහුට ඇලිමලි දීමනා (එක්වර ගෙවීම)

ස්වාමිපුරුෂයා හා දික්කසාද වීමේදී ඇය නිර්දෝෂී නම් ස්වාමිපුරුෂයාගේ හැකියාව, ඇයගේ අවශ්‍යතාවය, නැතිවුණ දේවල්, වැරැද්ද යන කරුණු කාරණා පදනම්ව එකවර වන්දි මුදලක් පුරුෂයා විසින් ඇයට ගෙවන ලෙස උසාවිය තීරණය කරන්න පුළුවන්. එමෙන්ම ස්වාමිපුරුෂයා නිර්දෝෂී පාර්ශ්වය නම් ඇයට සිදුවෙනවා යම් කිසි මුදලක් ස්වාමිපුරුෂයාට ගෙවන්නට. එනිසා එතැනදී ලොකු අසාධාරණයක් කාන්තාවකට සිදුවෙන්නේ නැහැ. 
එක් පාර්ශ්වයක කැමැත්තකින් තොරව තම දරුවන් විදෙස් රටවලට ගෙන යා නොහැකියි

දරුවන් වෙනත් රටකට ගෙන යෑමේ අවශ්‍යතාවක් ඇති වූ විට උසාවිය ඉදිරිපත් වී අනෙක් පාර්ශ්වයෙන් අවසර ලබාදෙන බවට ලිඛිතව කැමැත්ත ලබාදෙන්න ඕන. 
දික්කසාදයේ අවසන් තීන්දුවට ප්‍රථම තවත් විවාහයක් සිදුකරගත් විට බහු විවාහයකට වරදකරු වේ

දික්කසාද නඩුවකදී තීන්දුව ලබාදෙන්නේ පියවර දෙකකින්. පළමුව ලබාදෙන්නේ නෛයිසයි^නඩු තීන්දුව. එම තීන්දුව ලබාදී අවම වශයෙන් මාස තුනක් පමණ ගිය විටදී අවසාන තීන්දුව ලබාදෙනවා. ඇතැම් අය මේ තත්ත්වය වරදවා වටහා ගනිමින් ඇතැම් විට නෛයිසයි^ තීන්දුවෙන් පසුව විවාහ වෙනවා. එවැනි විවාහයන් නීත්‍යනුකූල වන්නේ නැහැ. එහිදී බහු විවාහයකට ඔහු හෝ ඇය වරදකරු වෙන්න පුළුවන්. 

ගබ්සාව

අපේ රටේ තවමත් තිබෙන්නේ මවගේ ජීවිතයට හානියක් වන අවස්ථාවකදී හැර ගබ්සාවක් සිදුකිරීම නීතිවිරෝධී ක්‍රියාවක් යනුවෙනුයි. යම්කිසි අවස්ථාවක ස්ත්‍රී දූෂණයකට ලක්වී ගැහැනු දරුවෙකු හෝ කාන්තාවක් ගැබ්ගෙන ඇති අවස්ථාවක සහ ශාරීරිකව හා මානසිකව කලලය මත සිටින දරුවා රෝගී තත්ත්වයකින්  පෙළෙන අවස්ථාවකදී යන සීමා සහිත අවස්ථාවන්වලදී ගබ්සාව සඳහා ඉඩ දෙන ලෙස ඉල්ලා නීති සංශෝධනයන් ඉදිරිපත් වුණා. තවමත් ඒ පිළිබඳ සාකච්ඡා වෙමින් පවතිනවා. 
මුස්ලිම් නොවන වෙනත් අෙයකු සමග සිදුකරන විවාහයන් මුස්ලිම් නීතිය පිළිගන්නේ නැහැ 

සිංහල කෙනෙකු ද්‍රවිඩ කෙනෙකු හා විවාහ වීමේදී එය සිදුකළ යුත්තේ සාමාන්‍ය නීතිය යටතේ. ඒ නිසා එම විවාහය දික්කසාද කළ යුත්තේද සාමාන්‍ය නීතිය යටතේයි. නමුත් මුස්ලිම් අයෙකු සිංහල හෝ ද්‍රවිඩ අයෙකු විවාහ කරගත් විට එවැනි නීතියක් සාමාන්‍ය නීතියක් යටතේ සිදුකරන්න පුළුවන්. නමුත් මුස්ලිම් නොවන වෙනත් අයෙකු සමග සිදුකරන විවාහයන් මුස්ලිම් නීතිය පිළිගන්නේ නැහැ. මුස්ලිම් තරුණියක් එසේ වෙනත් ජාතියක කෙනෙක් සමග සාමාන්‍ය නීතිය යටතේ විවාහ වුවහොත් මුස්ලිම් නීතියෙන් ඇය තවදුරටත් පාලනය නොවේ. 
ප්‍රදේශයක කාතිවරයාට අවුරුදු 12ට අඩු ගැහැනු ළමයෙක් වුණත් වැඩිවියට පැමිණ තිබෙනවා නම් විවාහ කර දීමට අවසර ලබාදීමේ හැකියාව තිබෙනවා. ඉතින් මෙය තවමත් නීතියේ තිබෙන තත්ත්වයක්. එය ඇත්තෙන්ම ගැහැනු දරුවන්ගේ අයිතිවාසිකම් උල්ලංඝනය වීමක්. මෙය බරපතළ ලෙස නරක ප්‍රතිඵල ඇති කරන තත්ත්වයක්.

මුස්ලිම් කාන්තාවක් හෝ පිරිමියෙකුගේ විවාහය, දික්කසාදය, දරුවන් හදාගැනීම, දරුවන්ගේ භාරකාරත්වය, වගේ දේවල් සියල්ල නිරූපණය වන්නේ ඔවුන්ගේ මුස්ලිම් නීතිය හරහා. ඒ සඳහා සකස් වුණු වෙනම මුස්ලිම් නීති හා එහි තීන්දු ලබාදීම සඳහා කාති උසාවි පිහිටුවලා තිබෙනවා. 

මුස්ලිම් කාන්තාවකට කාති උසාවියක් තුළ සාධාරණයක් වීමේ ඉඩකඩ සීමිතයි

මේ කාති උසාවිවල සිටින කාතිවරුන් සම්පූර්ණයෙන් පිරිමි පුද්ගලයන්. ඒ නිසා මුස්ලිම් කාන්තාවකට කාති උසාවියක් තුළ සාධාරණයක් වීමේ ඉඩකඩ අඩුයි. මුස්ලිම් සමාජය අතිශයින් පුරුෂ මූලික සමාජයක්. ඒ අය ගැහැනු අය දෙස බලන්නේ එක්තරා විදිහකට. මුස්ලිම් නීතියේදී සාක්ෂිකරුවෙකු ලෙසින් මුස්ලිම් පිරිමි කෙනෙක් කියන දෙයක් පිළිගන්නා නමුත් කාන්තාවක් සාක්ෂිකයක් ලබාදුන්විට එය තහවුරු කිරීමට තවත් කාන්තාවක් සාක්ෂි ලබාදිය යුතුයි. එවැනි තත්ත්වයක් යටතේ අපි කොහොමද කාන්තාවන්ට සමානාත්මතාවක් අපේක්ෂා කරන්නේ. 

විදෙස් රටවලදී බලපාන පෞද්ගලික ජාත්‍යන්තර නීතිය

අපේ රටේ අයෙකු වෙන රටකට ගිය පසුව එතැනදී අපේ රටේ නීතිය සම්පූර්ණයෙන් ක්‍රියාත්මක වෙන්නේ නැහැ. එතැනදී ක්‍රියාත්මක වෙන්නේ පෞද්ගලික ජාත්‍යන්තර නීතිය. අපේ රටේ අෙයකු වෙනත් රටක අපරාධයක් කළ විට එහිදී බලපාන්නේ ඒ අදාළ රටේ අපරාධ නීතිය. ලංකාවේ කාන්තාවක් ජපානයේ පුරුෂයෙකු විවාහ කරගත් විට කුමන රටක නීතියක් අනුවද විවාහ විය යුත්තේ කියා ප්‍රශ්නයක් මතුවෙනවා. ජපන් නීතිය යටතේ විවාහවී ශ්‍රී ලංකාවේද ලියාපදිංචි වුවහොත් එම විවාහය රටවල් දෙකම පිළිගත් විවාහයක් වෙනවා. නමුත් මේ දෙපළටම දරුවෙක් සිටින අවස්ථාවක වෙන් වී මව තම දරුවා රැගෙන ශ්‍රී ලංකාවට පැමිණියහොත් ජපානයේ සිටින ස්වාමිපුරුෂයා කුමක්ද කළ යුත්තේ. එහිදී බලපාන්නේ පෞද්ගලික ජාත්‍යන්තර නීතියයි. 
පුරුෂයාගේ අවසරය නොමැතිව එසේ ලංකාවට දරුවා ගෙන ඒමේදී ලංකාවේ මහාධිකරණයේ මේ සම්බන්ධ විශේෂ නීතියක් තිබෙනවා. මහාධිකරණය, විදේශ කටයුතු අමාත්‍යාංශය මැදිහත් වෙලා ඒ දරුවගේ ප්‍රශ්නේ ඒ අධිකරණයේ විභාග කරන්නේ ලංකාවේ නීතියට අනුව නොව ඒ තිබෙන විශේෂ නීතියට අනුවයි. මෙවැනි ගැටලු ඇතිවන නිසා හැම රටකටම පොදු යම්කිසි නීතියක් තිබෙන්න ඕන. ඒ නිසයි එවැනි අවස්ථාවල පෞද්ගලික ජාත්‍යන්තර නීතිය වැදගත් වෙන්නේ*. 

 

ඔබේ ආයතනයේ පැවැත්ම හා වර්ධනය වැඩි කරගත හැක්කේ කෙසේද?

කිසියම් ආයතනයක පැවැත්ම හා වර්ධනය සම්බන්ධයෙන් බොහෝ කරුණු කාරණා බලපවත්වන අතර, ඒවා නිසි ප්‍රමිතියකින් හා විධිමත්භාවයකින් සිදුකිරීම තුළ ආයතනයේ පුද්ගල ජීවිත හා දේපළ ආරක්ෂා කර ගනිමින් ගුණාත්මක සේවාවක් සැපයිය හැකිය. තරමක් වියදම් අධික වුවත් ආරක්ෂණය වැනි කාරණා සම්බන්ධයෙන් අපි අනිවාර්යයෙන් සැලකිලිමත් විය යුතු අතර, ජපන් එස්-5 ක්‍රමයද භාවිතයට ගැනීම තුළ අඩු ප්‍රාග්ධනයකින් වැඩි ප්‍රතිලාභ අපේක්ෂා කළ හැකිය. මේ පිළිබඳ විමසීම සඳහා ශ්‍රී ලංකා සංවර්ධන පරිපාලන ආයතනයේ හිටපු අධ්‍යක්ෂ ජනරාල් මහාචාර්ය එම්. තිලකසිරි මහතා අද ට සම්බන්ධ කර ගැනීමට අප කටයුතු කළෙමු. 


අපි පසුගිය සාකච්ඡාවකදී අධීක්ෂණ කළමනාකරණය සම්බන්ධයෙන් පුළුල්ව කතා කළ බව ඔබට මතක ඇති. ඒ යටතේදී ආයතනයක ඵලදායීතාව, ගුණාත්මකභාවය සහ ආරක්ෂාව හෙවත් සුරක්ෂිතභාවය ඇති කරන්න, ආයතනයේ ප්‍රතිපත්ති, නීතිරීති හා මාර්ගෝපදේශන සැලසුම් ක්‍රියාත්මක විය යුතු බව අප පෙන්නුම් කළා. එයට අමතරව ක්‍රියාකාරී කටයුතු සඳහා හොඳ වැඩ පරිසරයක් තිබෙන්නට අවශ්‍ය බවත් එහිදී දීර්ඝ වශයෙන් සාකච්ඡා කළා. නමුත් මේ සියල්ල තිබුණත් ආයතනයේ සේවය කරන ඒ ඒ මට්ටම්වල එනම් ඉහළම ස්ථානයේ සිට සනීපාරක්ෂක කම්කරුවන් දක්වා මනා සුපරීක්ෂණයක් හෝ අධීක්ෂණයක් තිබුණේ නැතිනම් ඵලදායීතාව හා ගුණාත්මකභාවය වැඩිකරන්න බැහැ වගේම ජීවිත හා දේපළවල ආරක්ෂාවක් ඇති වෙන්නෙත් නැහැ. ඒ නිසා මෙකී ආරක්ෂාව නැතිවීම හා වෙනත් හේතූන් මත සේවා ස්ථානයේ සුරක්ෂිතභාවය සම්බන්ධයෙන් ඇතිවිය හැකි තත්ත්වයන් පිළිබඳ අපි අද කතා කරමු. 

ආයතනවල ආරක්ෂාව නැතහොත් සුරක්ෂිතභාවය ඇතිකිරීම සඳහා ඒ වෙනුවෙන්ම වෙන් වූ විද්‍යාවක් තිබෙනවා. එය ඉංග්‍රීසි භාෂාවෙන් %ඕගනොමික්^ (ERGONOMICS) ලෙසින් හඳුන්වනවා. එය අපි ස්මක්‍ෂථා විද්‍යාව නමින් සිංහල භාෂාවේදී හඳුන්වනවා. 
වැඩිහිටියන් ජීවත්වීම සඳහා වැඩි කාලයක් එක්කෝ කාර්යාලයක, එසේ නොමැති නම් කර්මාන්ත ශාලාවක වැඩ කරනවා. ගැහැනු පිරිමි දෙපාර්ශ්වයම එසේ වැඩකරන්නේ තමන්ගේ පැවැත්ම තව තවත් වර්ධනය කර ගැනීමටයි. මෙහි වර්ධනය යනුවෙන් අදහස් කරන්නේ වර්ෂයෙන් වර්ෂයට හෝ ඔහුගේ හෝ ඇයගේ ආර්ථික, සමාජ හෝ පවුල් පසුබිම තුළින් දියුණුවක් අපේක්ෂා කිරීමයි. ඒ වැඩ කරන ස්ථානයේ පුද්ගලයා යහපත් ලෙස ජීවත් වෙලා වර්ධනයක් ඇතිවෙන්න නම් ආරක්ෂණය හෙවත් සුරක්ෂිතභාවය අනිවාර්යයෙන් තිබිය යුත්තක්. එය ඉතාම වැදගත්. එය නිවසකදී වුවත් අවශ්‍ය වන දෙයක්. ආරක්ෂාව කියන කාරණය නොසලකා හැරියොත් ඒ පුද්ගලයාගේ පැවැත්ම හා වර්ධනය පමණක් නොව ඔහුගේ ජීවිතය පවා අහිමි වෙන්න පුළුවන්. එමෙන්ම ආයතනයක නම් ජීවිත වගේම දේපළත් නැතිවෙන්න පුළුවන්. නමුත් මේ ජීවිත හා දේපළවලින් උපරිම ප්‍රයෝජන අරගෙන ඒවා චිරාත් කාලයක් පවතින්න නම් වැඩබිම්වල, නැතහොත් සේවා ස්ථානයේ අනිවාර්යෙන් තිබිය යුතු හා අවධානය යොමු කළයුතු ඉතා වැදගත් කරුණ නම් ආරක්ෂාව හෙවත් සුරක්ෂිතභාවයයි. 
ඉදිකිරීම් කටයුතු කරන ස්ථානවල මෙන්ම විශාල කර්මාන්තශාලාවල කොළ පැහැති වර්ණයෙන්  safety first – ආරක්ෂාව ප්‍රථමයෙන් ^ යන දැන්වීම් පුවරු විශාල ප්‍රමාණයෙන් ප්‍රදර්ශනය කර තිබෙනවා ඔබ දැක ඇති. කිසියම් ආයතනයක ආරක්ෂාව ගැන සැලකිලිමත් වී අප පෙර සඳහන් කළ %ස්මක්‍ෂථා විද්‍යාවේ^ මූලධර්ම අනුව කටයුතු කරන්න ඕන. නමුත් අවාසනාවකට වගේ අපේ රටේ රාජ්‍ය හා පෞද්ගලික අංශයේ සමහර ආයතනවල මෙම %ස්මක්‍ෂථා විද්‍යාවේ^ මූලධර්මවලට අනුව කටයුතු නොකිරීම නිසා හදිසි අනතුරු කිහිපයක්ම සිද්ධ වුණා. ඒ නිසා වටිනා ජීවිත, දේපළ හා වත්කම් හානි සිදුවුණා. මේ නිසා ආයතනවල බලධාරීන් ආරක්ෂාව නැතහොත් සුරක්ෂිතතාව තහවුරු කරන්න විවිධ උපායමාර්ග හඳුන්වාදිය යුතුයි. එබැවින් මූලිකවම මේ සඳහා ස්මක්‍ෂථාවය ඇතිකරන්න පැහැදිලි ප්‍රතිපත්තියක් තිබෙන්නට අවශ්‍යයි. එම ප්‍රතිපත්ති මත ක්‍රියාවට නංවන්නට ඊට අදාළ වූ නීතිරීති නිසි ලෙස හඳුන්වා දී ඒවා ක්‍රියාත්මක කළ යුතුයි. ඒ ප්‍රතිපත්ති මත නීති සකස් විය යුතුයි. එමෙන්ම එම ප්‍රතිපත්ති මත අදාළ නීතිරීති ක්‍රියාවට නැංවීමට මාර්ගෝපදේශනයක් ගොඩනගා ක්‍රියාත්මක විය යුතුයි. මේවා සවිස්තරාත්මකව දැක්වෙන හොඳ මාර්ගෝපදේශන අත්පොතක් ගොඩනගන්න අවශ්‍යයි. ඒ වගේම ප්‍රතිපත්ති, නීති, මාර්ගෝපදේශන මාලාවක්, පරීක්ෂණ ලැයිස්තු සකස් කරන විට ස්මක්‍ෂථා විද්‍යාවේ එන මූලධර්මයන් ගැන සැලකිලිමත් විය යුතුයි. එකී මූලධර්ම කිහිපයක් සංක්ෂිප්ත කර මෙසේ දැක්විය හැකියි.

මුලින්ම රැකියාව සඳහා තෝරා ගන්නා පුද්ගලයාට වැඩ කිරීම සඳහා තිබිය යුතු දැනුම හා කුසලතා හඳුනාගත යුතුයි. අදාළ රැකියාව කිරීමට යන පුද්ගලයාට තිබිය යුතු කායික සුදුසුකම් හඳුනාගත යුතුයි. professor thilakasiri
එසේ නොවුණහොත් ඒ ඒ වැඩකටයුතු කිරීමේදී තිබිය යුතු දැනුම, කුසලතා, නීතිරීති, මාර්ගෝපදේශනයන් මොනතරම් හැදුවත්, ආයතනයක් විසින් යම් සේවාවක් කිරීමට ඒ පිළිබඳ හැකියාවක් නැති, කායික ගතිලක්ෂණ හෙවත් කායික අවශ්‍යතා නැති, පළපුරුදු නැති කෙනෙකු දැම්මොතින් ඔහුට හෝ ඇයට එම සේවය හරියාකාරව සිදුකිරීමට නොහැකියි. ඔහු හෝ ඇය අතින් වැරදි අඩුපාඩු දුර්වලතාවන් ඇතිවෙන නිසා ඔහුගේ ජීවිතයත්, අනෙක් අයගේ ජීවිත හා ආයතනයේ දේපළත් විශාල වශයෙන් විනාශ වෙන්න ඉඩ තිබෙනවා. ආයතනයක‍ සේවය කිරීමට  කවුරුහරි  කෙනෙකු බඳවාගැනීම සුදුසු නොවේ. එම රැකියාව කිරීම සඳහා හොඳ ධාරිතාවක්, නිපුණතාව හා දැනුමැති මෙන්ම ඒ කටයුතු කිරීමට හොඳ පළපුරුද්දක් තිබිය යුතු පුද්ගලයෙකු සේවයේ යෙදවිය යුතුයි. එවැනි සුදුසුකම්වලින් පරිපූර්ණ කෙනෙකු සොයා ගැනීමට අපහසු නම් බඳවා ගන්නා පුද්ගලයාට ප්‍රමාණවත් පුහුණුවක් ලබාදීමෙන් පසුව ඔහු හෝ ඇය ඒ රාජකාරී කටයුත්ත සඳහා අනියුක්ත කළ යුතුයි. %ස්මක්‍ෂථා විද්‍යාව^ අනුව මීළඟ කාරණය වන්නේ, සේවා ස්ථානයේ තිබිය යුතු ඉඩ ප්‍රමාණය, වාතාශ්‍ර, උෂ්ණත්වය සහ ශබ්දය වැනි කරුණු ගැන සැලකිලිමත් වීමයි. එමෙන්ම විශාල  යන්ත්‍රෝපකරණ සවිකරනවා නම් ඒවා අතර පරතරය, සේවකයන් කිහිපදෙනෙකු වැඩකරනවා නම් ඔවුනොවුන්ට වැඩ කිරීමට අවශ්‍ය ඉඩකඩ යනාදී කරුණු සැලකිල්ලට ගත යුතුයි. මෙවැනි මූලධර්ම ගැන සැලකිලිමත් නොවී කටයුතු කළහොත් කුමන වේලාවක හෝ උපද්‍රවයක්, ආපදාවක් හෝ හදිසි අනතුරක් සිදුවීමට පුළුවන්. 

මෙම විද්‍යාවේ සඳහන් වන මීළඟ මූලධර්මයෙන් දක්වන්නේ සේවකයා භාවිත කිරීමට යොදා ගන්නා උපකරණ අතර මනා ගැළපීමක් තිබෙන්නට අවශ්‍ය බවයි. සේවකයන් හදිසි අනතුරු, ආපදා තත්ත්වයන් ඇතිවිය හැකි ස්ථානයක් නම් වැඩකරන අවස්ථාවල ආරක්ෂිත මෙවලම් හා ඇඳුම් කට්ටල පැලඳ සිටීම අනිවාර්ය කළ යුතුය. ඒවා නිලඇඳුමක්, හිස් ආවරණයක්,  සපත්තු දෙකක්, කරපටියක් වැනි දෙයක් විය හැකියි. ඒ ඒ එකිනෙකට වෙනස් වූ උපකරණ පලඳින පුද්ගලයාට එය ගැළපෙන හා උචිත එකක් විය යුතුය. සැමටම එකම ප්‍රමාණයේ පොදු උපකරණ මෙහිදී භාවිත කරන්නට බැහැ. ඒ ආරක්ෂිත මෙවලම් පලඳින පුද්ගලයාට එය උචිත විය යුතුයි. සේවකයන් හැඳපැලඳ සිටින ඒ ආරක්ෂිත කට්ටලය ඒ පුද්ගලයාට ප්‍රමාණයෙන් කුඩා හෝ ලොකු වීම බොහෝ කර්මාන්ත හා ගොඩනැගිලි ඉදිකිරීම් ක්ෂේත්‍රයේ සාමාන්‍යයෙන් දක්නට ලැබෙන දෙයක්. 

මීළඟ කාරණය වන්නේ සේවා ස්ථානයේ එනම් කර්මාන්තශාලාව, වැඩබිම හෝ කාර්යාල පරිසරය සේවකයන්ට වැඩකිරීමට සුදුසු ස්ථානයක් විය යුතු බවයි. එනම් සේවා ස්ථානය පිරිසුදු, ප්‍රසන්න, ප්‍රියමනාප, මනා ලෙස සංවිධානය කළ තැනක් බවට පත්විය යුතුය. යන්ත්‍රෝපකරණ හා මෙවලම් සුදුසු පරිදි නැතිනම්, සේවා ස්ථානය අපිරිසුදු නම්, එය අසංවිධිනාත්මක නම් සේවා ස්ථානයේ නොයෙක් ආකාරයේ හදිසි ආපදා තත්ත්වයන් ඇතිවීමට පුළුවන්. ඒ නිසා %ස්මක්‍ෂථා විද්‍යාවට^ අනුව අනිවාර්යයෙන් මේ මූලධර්ම ගැන අප සැලකිලිමත් වී ඒ අනුව කටයුතු කරමින් භාණ්ඩ හා සේවා නිෂ්පාදනය කළ යුතුයි. 

සාමාන්‍යයෙන් මේ මූලධර්ම අනුව කටයුතු කිරීම අධික වියදම් යන වැඩක්. ඉතින් කුඩා පරිමාණ ව්‍යවසායකයන්ට මෙවැනි දේ කිරීම තරමක් අපහසු කාර්යයක්. අපේ රටේ බොහෝමයක් මහා පරිමාණ ඇඟලුම් කර්මාන්ත ශාලා මෙහෙයවන සමාගම් බොහෝදුරට කටයුතු කරන්නේ මෙම මූලධර්මවලට අනුවයි. මේ ඇඟලුම් කර්මාන්තකරුවන්ගේ නිෂ්පාදන ලබාගන්නා ප්‍රබල පෙළේ ඇමෙරිකානු හා යුරෝපීය ගැනුම්කරුවන් අප පෙර සඳහන් කළ ආකාරයට ආරක්ෂිත සේවා ස්ථානයක්, වැඩබිමක් හා කාර්යාල පරිසරයක් නැතිනම් ඒ ආයතනවලින් ඇඟලුම් මිලදී ගන්නෙත් නැහැ. එම විදේශීය ගැනුම්කාර සමාගම්වල නියෝජිතයන් පැමිණ මෙම ස්මක්‍ෂථා මූලධර්ම ගැන ප්‍රථමයෙන් සොයා බැලීමක් සිදුකරනවා. එහිදී කර්මාන්තකරුවන් එහි වැඩකරන සේවකයන්ගේ සුරක්ෂිතතාව පිළිබඳ කටයුතු කරන්නේද කියා සොයා බලන අතර, එය නොකරන්නේ නම් ඔවුන් නිෂ්පාදන ලබාගැනීම ප්‍රතික්ෂේප කරනවා.  

මේ තත්ත්වය තුළ අපේ රටේ ආයතනවල මේ ආකාරයට කටයුතු කළොත් අනිවාර්යෙන්ම සුරක්ෂිතතාවක් ඇතිකරන්න පුළුවන්. සුරක්ෂිතතාව ඇති නොවුණහොත් නොයෙක් ප්‍රශ්න ඇතිවෙන්න පුළුවන්. ඒ නිසා මම ප්‍රකාශ කළ ආකාරයට ප්‍රතිපත්ති සකස්කර  නීති හා අවශ්‍ය මාර්ගෝපදේශනය ක්‍රියාත්මක කර පරීක්ෂණ ලැයිස්තු සකස් කර ක්‍රියාත්මක කළයුතු දෙයක්. ඇතැම් කර්මාන්තකරුවන් කියන්න පුළුවන් මෙය වියදම් අධික දෙයක් කියා.

නමුත් වියදම්කාරී නිසා අවශ්‍ය අවම දේවත් නැති වුණොත් ආපදා තත්ත්වයන්ට මුහුණ දෙන්නට බොහෝ කර්මාන්ත හා ආයතන හිමියන්ට සිදුවේවි. ඒ සඳහා සුරක්ෂිතභාවය ඇතිකරන්නට වැයවන මුදලටත් වඩා වැඩි මුදලක් වියදම් කරන්නට සිදුවෙනවා. මේ නිසා ඇතැම්විට ආයතනය වසා දමන්නට පවා සිදුවෙනවා. ආරක්ෂාව පිළිබඳ කටයුතු කරන්න ස්මක්‍ෂථා විද්‍යාවේ එන මූලධර්ම අනුගමනය කර ආරක්ෂාව වැඩි කළහොත් එහි තිබෙන ප්‍රයෝජන රැසක් අත්විඳින්නට හැකි වේවි. එනම්,
වැඩකරන ස්ථානයේ ඇතිවෙන්න පුළුවන් හදිසි අනතුරු, සේවකයන්ට ඇතිවෙන්න පුළුවන් නොයෙක් ආකාරයේ ලෙඩරෝග අඩු වෙනවා. ඒ නිසා ලැබෙන ආපදා අඩු වීමක් සිදුවෙනවා. සේවකයන්ට වැලඳෙන්න පුළුවන් නොයෙක් ආකාරයේ රෝග, ව්‍යාධි බොහොමයක් අඩු කරගන්න පුළුවන්. 

එමෙන්ම හදිසි අනතුරක් ඇති නොවුණත් සේවකයන්ට නොයෙක් ආකාරයේ රෝග, කැක්කුම්, තුවාලවීම් සිදුවෙන්න පුළුවන්. නමුත් මේ කියන මූලධර්මවලට අනුව කටයුතු කළොත් ඒවා අඩුකර ගැනීමේ හැකියාව තිබෙනවා. 
අනෙක් කාරණය තමයි එසේ රෝග නොමැති වුවත් මේ ක්‍රමය අනුගමනය නොකර සේවකයන්ට හානියක් වුණොත් ආයතනයට සිද්ධ වෙනවා සේවකයන්ට වන්දි ගෙවන්න. මේ ආකාරයට කටයුතු කළහොත් වන්දි ගෙවීම සඳහා යන මුදල අඩු කරගන්න පුළුවන්. 
එමෙන්ම සේවක ප්‍රලාසිතාව හා සේවයකයන් අස්වෙලා යන ප්‍රමාණය අඩු කරගන්න පුළුවන්. කිසියම් ආයතනයක සේවකයන් සුරක්ෂිත නැතිනම් ඔවුන් සෑමවිටම එයින් ඉවත් වී යන්න පෙළඹෙනවා. එමෙන්ම සේවය සඳහා දිනපතා පැමිණෙන්නේ නැහැ. නමුත් උක්ත කියූ ලෙස කටයුතු කිරීම තුළින් මෙම තත්ත්වය අවම කරගන්න පුළුවන්. ඒ ඒ වැඩ පරිසරය ආරක්ෂිත නම් චිත්ත ධෛර්ය වැඩි වී සේවකයන් වැඩියෙන් සේවයට අභිප්‍රේරණය වෙලා සතුටින් කැමැත්තෙන් වැඩකරන තැනක් බවට සේවා ස්ථානය පත්වෙනවා. එමගින් ඒ ඒ අයගේ දිනකට, පැයකට, මාසයකට කරන වැඩවල කාර්යක්ෂමතාවයි, සඵලතාවයි වැඩිවෙලා ආයතනයේ ඵලදායීතාව වැඩි වෙනවා. ඒ වගේම නිපදවන භාණ්ඩ හා සේවාවල ගුණාත්මකභාවයත් වැඩි වෙනවා. මෙහිදී සඳහන් කළ  ආරක්ෂාව පිළිබඳව මනා ලෙස කටයුතු කළොත් හුඟාක් වාසි ප්‍රයෝජන අත්කර ගන්න පුළුවන්. එසේ නොකළහොත් මේ කියන දේවල් අඩුවෙලා දිගුකාලීන වශයෙන් ආයතනයට හානිකර තත්ත්වයන් ඇති වෙන්න පුළුවන්. 

ඕනෑම ආයතනයක ඵලදායීතාව වැඩි කරගන්න හා නිදපදවන භාණ්ඩ හා සේවාවල ගුණාත්මකභාවය ඇතිකරන්නත්, සේවා ස්ථානයේ සුරක්ෂිතභාවය තහවුරු කරන්නත් අඩු වියදමකින් වැඩි වටිනාකමක් ගෙනදෙන ක්‍රමයක් ලෙස ජපන් %එස්-5^ ක්‍රමය සෑම තැනකම යොදාගන්න පුළුවන්. මෙම පංචවිධ සංකල්පය වියදම් යන වැඩක් නොවේ. අවශ්‍ය වන්නේ මිනිසුන්ගේ ඒ පිළිබඳ ඇති දැනුම, ඒ පිළිබඳව තිබෙන කැපවීම වගේම ඒ කෙරෙහි තිබෙන ධනාත්මක ආකල්පය සහ ඒ ඒ මට්ටම්වල සිටින නායකයන් හා සුපරීක්ෂකයන්ගේ ඒ කෙරෙහි ඇති බැඳීම යනාදී කරුණුයි.  එමෙන්ම අප රටේ එම ආයතනවල නිපදවන භාණ්ඩ හා සේවාවල ගුණාත්මකභාවයත් වැඩියි. සේවක ආරක්ෂාවත් ඉතාම ඉහළයි. මේ අනුව ස්මක්‍ෂථා විද්‍යාවේ මූලධර්ම කිසියම් ආයතනයක ක්‍රියාවට නැංවීම සඳහා මෙම %එස්-5^ ක්‍රමය  ඉතාම වැදගත් වෙනවා. ඒ සංකල්ප පහ නම්, 

සෙයිරි – සුසංහරණය

සේවා ස්ථානයේ තිබෙන අනවශ්‍ය දේවල් ඉවත් කරලා අවශ්‍ය දේ පමණයි තබාගත යුත්තේ. කාර්යාලයක සේවය කරන පුද්ගලයෙකුගේ මේසය මත ලිපි ගොනු රැසක් තිබෙනවා නම් තමන්ට අවශ්‍ය ලිපි ගොනුව සොයාගන්න අපහසු වෙනවා. අනවශ්‍ය දේවල් තිබිම තුළ නොයෙක් ආකාරයේ ප්‍රශ්න, අනතුරු ඇතිවෙන්න පුළුවන්. ඒ අනුව තමා ළඟ ඇති දේවල් අවශ්‍ය හා අනවශ්‍ය ලෙස වර්ග කර අවශ්‍ය දේ තබාගෙන අනවශ්‍ය දේ විද්‍යාත්මක ක්‍රමයකට බැහැර කරන්න ඕන. 

 සෙයිතෝන් – සුසංයෝජන

අවශ්‍ය දෑ විද්‍යාත්මක ක්‍රමයකට සකස් කර තබාගැනීම අවශ්‍යයි. තමාගේ අවශ්‍ය සෑමදෙයක්ම තබන්න නිශ්චිත ස්ථානයක් තියෙන්න ඕන. ඒ ස්ථානය ඒ දේ තබන්න වඩාත්ම සුදුසු තැනක් විය යුතුයි. ඒවා භාවිත කළ පසු එය නිවැරදි ලෙසින් නැවත තිබූ ස්ථානයේම තැබිය යුතුයි. ඒ තබන ස්ථානයට අලුත් නමක්, අංකයක්, පාටක් හෝ සංකේතයක් දෙන්න ඕන. ආපදා බහුලව ඇතිවෙන්න බොහෝ විට බලපාන්නේ නිසි අයුරින් උපකරණ හා භාණ්ඩ ස්ථානගත කර නොතිබීමයි. කිසියම් කටයුත්තක් සඳහා අවශ්‍ය දේ සොයාගන්න අමතර වෙලාවක් ගතවෙනවා. එමෙන්ම  ඒවා නිසි පිළිවෙළට තබා නොගැනීමෙන් ජීවිතවලට හා දේපළවලට හානි සිදුවෙන්න පුළුවන්. 

සෙයිසෝ – සුපසන්නතාවය 

ආපදා අඩු වෙන්න නම් ඒ සේවා ස්ථානය සුපසන්න තැනක් වෙන්න ඕන. ඒ නිසා ආයතනයක ආරක්ෂාව වැඩි වෙන්න නම් ඒ ආයතනය දෛනිකව මේ දේ සිදුකරන්න ඕන. තමා වැඩකරන ස්ථානයේ භාවිත වන නොයෙක් දේ නිසා නිතරම දූවිලි කැළිකසළ එකතුවෙනවා නම්, අනිවාර්යෙන්ම උදේ සේවා ආරම්භ කිරීමට ප්‍රථම ඒවා පිරිසුදු කරන්න ඕන. එමෙන්ම සිය රාජකාරි අවසන් වූ විට සේවා ස්ථානය පිරිසුදු කර නිවස බලා යන්න ඕන. එසේ නොකළොත් සේවා ස්ථානය අපිරිසුදු, අප්‍රසන්න තැනක් බවට පත්වේවි. එවන් වූ ස්ථානයක කටයුතු කිරීමේදී නොයෙක් ගැටලු ඇතිවෙන්න පුළුවන්. එය හරිම අනාරක්ෂිතයි. එම නිසා තමන්ගේ සේවා ස්ථානයේ වැඩ ආරම්භ කිරීමට ප්‍රථම මේවා පිරිසුදු කළ යුතුයි. 
මෙම පළමු කාරණා තුන සේවා ස්ථානයේ ආරක්ෂාව තහවුරු කිරීමේදී අත්‍යවශ්‍ය වන බව ජපන් ජාතිකයන් ප්‍රකාශ කරලා තිබෙනවා. ජපන් ජාතිකයන් %එස්-5^ ක්‍රමය තුළින් මුලින්ම හඳුන්වා දුන්නෙත් මෙම සංකල්ප තුනයි.  නමුත් ජපානයේ මේ තුන පමණක් ක්‍රියාත්මක වීමේදී ටික කාලයක් යන විට නොයෙක් ගැටලුකාරී තත්ත්වයන් ඇති වුණා. ඒ නිසා ඔවුන් තව දෙකක් හඳුන්වා දුන්නා. 

 සෙයිකෙට්සු – සුසංස්ථාපනය

පළවැනි සෙයිරි, සෙයිසෝන් හා සෙයිසෝ මනා ලෙස ක්‍රියාත්මක කිරීමෙන් ආයතනය තුළ අත්පත් කරගන්නා දෙය දිනෙන් දින උසස් කරමින් අඛණ්ඩව පවත්වාගෙන යන්න අවශ්‍යයි. ඒවා පවත්වාගෙන යන විට ඇතිවන ගැටලු අත්දැකීම් පදනම් කරගෙන එමෙන්ම වෙනත් වෙනත් ආයතන කරන දේවලුත් හොඳින් හඳුනාගෙන එය ක්‍රමානුකූලව වැඩිදියුණු කරමින් අඛණ්ඩව පවත්වාගෙන යා යුතුයි. මෙම ක්‍රියාවලිය සෙයිකෙට්සු නැතහොත් සුසංස්ථාපනය ලෙස හඳුන්වනවා. අපේ රටේ යමක් ආරම්භ කළාම ඒකම තමයි දිගටම කරන්නේ. ඒ නිසා මුල් කාලයේ හොඳ වුණත් පසුකාලීනව නොයෙක් නොයෙක් ගැටලුකාරී තත්ත්වයන් ඇතිවෙන්න පුළුවන්.   

සිට්සුකේ – සුසංවේදනය

මෙහිදී සේවා ස්ථානයේ සිටින සියලුම සේවකයන් පළමු ක්‍රම 4 ගැන, ඒ වගේම මෙහි පුද්ගලයන්ට, ආයතනයට තිබෙන ප්‍රයෝජන ගැනත්, රටට තිබෙන ප්‍රයෝජන පිළිබඳවත් නිතර නිතර සේවකයන්ව දැනුවත් කරන්න ඕන. සේවකයන්ට මේ පිළිබඳ තිබෙන දැනුම යාවත්කාලීන කරන්න ඕන. එසේ සිදුකොට සේවකයන් තුළ ස්වයං විනයක් හා ස්වයං පාලනයක් ඇතිකරන්න ඕන. සේවකයන් කැමැත්තෙන්ම මේ පළවැනි %එස්-4^ අනුගමනය කළහොත් සේවා ස්ථානයේ වැඩකරන හැමෝටම ඉතාමත් පිරිසුදු, ප්‍රසන්න, ආරක්ෂාකාරී සේවා ස්ථානයක් බවට පත්වෙනවා. ඒ නිසා සේවකයන් තුළ මේ පිළිබඳ දැනුම, අවබෝධයක් ඇතිකරන්න අවශ්‍යයි. එයින් ඔවුන්ගේ ආකල්පමය වෙනසක් සිදුකරන්න ඕන. මෙය ආයතනයේදී පමණක් නොව නිවසේදී සිදුකිරීමට පුහුණුව හා දැනුම ලබාදෙන්න ඕන. 
ඉහතින් විස්තර කළ ස්මක්‍ෂථා මූලධර්ම ක්‍රියාත්මක කිරීමේදී වර්තමානයේ බොහෝ ආයතන අවධාරණය කළයුතු ඊළඟ වැදගත් කාරණය වන්නේ ආයතනවල මිනිස් මොළයෙන්, අත් දෙකෙන් හා කකුල් දෙකෙන් කරන වැඩ තාක්ෂණය හා විද්‍යුත් ක්‍රම භාවිතයෙන් කිරීමයි. මෑතකදී දියුණු වුණ දකුණු කොරියාව, සිංගප්පූරුව, තායිවානය වැනි රටවල්වල රජයේ හා පෞද්ගලික අංශයේ නායකයන් තම ආයතනයේ ඵලදායීතාව, ගුණාත්මකභාවය හා ආරක්ෂාව වැඩිදියුණු කිරීම සඳහා විද්‍යුත්කරණයේ නවෝත්පාදන යොදා ගැනීමට අඛණ්ඩව කටයුතු කර තිබෙනවා. අපේ රටේද රාජ්‍ය හා පෞද්ගලික ආයතනවල නායකයන්, කළමනාකරුවන් මෙම විද්‍යුත්කරණයේ නව සොයා ගැනීම් හඳුනාගෙන ඒවා තම ආයතනවලට හඳුන්වා දී ආයතනයේ කාර්යසාධනය වැඩිදියුණු කරනවා. එමෙන්ම තම ආයතනයේත් එහි වැඩකරන සියලුදෙනාට සහ ඉන් සේවා ලබන්න එන සේවාලාභීන්ටත් සුරක්ෂිත හා කාර්යක්ෂම තැනක් බවට පත්කරගත යුතුයි. මේ සඳහා මම විවිධ පාඨමාලා සම්මන්ත්‍රණ පවත්වා ඇති අතර, ලබන ජුනි 21 වැනිදා Esoft camps ශ්‍රවණාගාරයේදී %Managing Digital Innovations to transform your Organization ^ යටතේ එක්දින වැඩමුළුවක් සංවිධානය කර තිබෙනවා. රාජ්‍ය හා පෞද්ගලික ආයතනවල නායකයන්ට හා කළමනාකරුවන්ට මෙම වැඩමුළුවට සහාභාගී වීමෙන් විද්‍යුත්කරණයේ නවීන සොයාගැනීම් හා ඒවා තම ආයතනයේ ඵලදායිතාව, ගුණාත්මකභාවය හා ආරක්ෂණය ඇතිකර ගැනීමට යොදාගත හැකි ආකාරය පිළිබඳ අවබෝධයක් හා නිපුණතාවක් ලබාගැනීමට පුළුවන්. 

මට ඉදිරිය ගැන ඉලක්කයක් තිබෙනවා

උනන්දුව, කැපවීම හා යම් දෙයක් කෙරේ ඇති කැමැත්ත අපව සාර්ථකත්වයේ මාර්ගය කරා ගෙන යෑමට සමත් වේ. බිරිඳක, මවක ලෙසින් තම ස්වාමියාගේ හා දරුවන්ගේ කටයුතු අත්නොහැර මනා කළමනාකරණයකින් යුතුව ව්‍යාපාර කටයුතු සිදුකරමින් සිය පවුලේ ආර්ථිකයට මෙන්ම රටේ ආර්ථිකයට ශක්තියක් වන ඇය නිල්මිණී දමයන්ති මහත්මියයි. 


ව්‍යාපාරයක් ආරම්භ කිරීමට කිසිම දැනුමක් නොතිබුණු ඇය වර්තමානයේදී තවත් පිරිසකට රැකියා අවස්ථා පවා උදා කර දී තිබේ. නව පේරාදෙණියේ පදිංචි ඇය මැහුම් කලාව ඉගෙන ගනිමින්, එයින් ඉදිරියට යමින් අනාගතයේදී අපේ රටේ රැකියා අපේක්ෂකයන් සියදෙනෙකුට රැකියා අවස්ථා විවර කරදීම අපේක්ෂා කරන තැනැත්තියකි. තමා පැමිණි ගමන් මග පිළිබඳ ඇය අප සමග පැවසුවේ මෙලෙසිනි. 

IMG-20180522-WA0004

"මට ඉන්නේ පුතාලා තුන්දෙනෙක්. මගේ ස්වාමියා ගොඩනැගිලි ඉදිකිරීම් අංශයෙන් තමයි රැකියාව සිදුකරන්නේ. ඒ නිසා ඔහු අපිත් එක්ක රැඳෙන වේලාව ටිකක් අඩුයි. ඔහුට ලැබෙන ගොඩනැගිලි ඉදිකිරීම් අනුව හැම වේලාවෙම වගේ වෙනත් පළාත්වලට යන්න සිද්ධ වෙනවා. ඔහු අපේ ජීවිත සාර්ථක කරන්න වෙන මහන්සිය දැක්කහම ඇත්තෙන්ම මටත් මුදල් උපයන ව්‍යාපාරයක් ආරම්භ කරන්න හිතුණා. මම ව්‍යාපාර ක්ෂේත්‍රය පිළිබඳ කිසි දැනුමක් තිබුණ කෙනෙක් නෙමෙයි. 

ව්‍යාපාරය ආරම්භ කිරීමට ප්‍රථම මම උඩුනුවර ප්‍රාදේශීය ලේකම් කාර්යාලයේ මැහුම් පිළිබඳ පාඨමාලාවක් කළා. එය ඉනෝකා ප්‍රියදර්ශනී මහත්මිය යටතේ නොමිලේ පවත්වපු පාඨමාලාවක්. මැහුම් කලාව ගැන කිසිදෙයක් නොදැන සිටි මට මහන්න මුලින්ම කියලා දුන්නේ ඇය. මේ පාඨමාලාව අවසන් කළ පසු මගේම කියලා ව්‍යාපාරයක් කරන එක මගේ හීනයක්ව තිබුණා. එය ආරම්භ කරද්දී මට ව්‍යාපාරය ගැන නිසි අවබෝධයක් නොතිබුණ නිසා මහන්න කොටස් වශයෙන් ගන්නා තැනක් හා සම්බන්ධ වෙලා තමයි මුලින්ම ව්‍යාපාරය ආරම්භ කළේ. එය මට මේ ව්‍යාපාරය කරගෙන යන්න නව පන්නරයක් වුණා. 

ඒ වගේම මට මහනුවර කුඩා ව්‍යාපාර සංවර්ධන  ආයතනයට සම්බන්ධ වෙන්න ඒත් එක්කම හැකියාව ලැබුණා. ඒ සඳහා මාව යොමු කළේ උඩුනුවර ප්‍රාදේශීය ලේකම් කාර්යාලයේ සේවය නියුතු අසිත මහතා. පසුව ඔවුන් සමග සම්බන්ධ වී ව්‍යාපාරයන් ඉදිරියට පවත්වාගෙන යන්නේ කෙසේද යන්න පිළිබඳ ඥානය මම ලබාගත්තා. 

ඒ ලැබුණු අත්දැකීම් එක්කම මම හිතුවා පාරිභෝගිකයා වෙනුවෙන් මම මැසිය යුත්තේ මොනවගේ ඇඳුම්ද කියලා. මම මුලින්ම අවුරුදු 20 සිට 45 පමණ වයස් කාණ්ඩය දක්වා කාන්තාවන් හට සායවල් මහන්න තීරණය කළා. එහිදීත් මම මහන ඇඳුම පාරිභෝගිකයාට ලබාදීමේදී එය සිදුකළ යුත්තේ කෙසේද යන්න පිළිබඳ සිතුවා. ඒ අනුව තමයි මම විලාසිතා තෝරා ගත්තේ. මෙයත් සමගම මට හොඳ පාරිභෝගික පිරිසකුත් හමුවුණා. 

ඒ නිසා ව්‍යාපාරයත් සාර්ථකව සිදුකරන්න මට හැකි වුණා. ඒ වෙනකොට මගේ ළඟ තිබුණේ මැෂින් එකයි. ඒකෙන් තමයි මම මුලින්ම ඇඳුම් මහන වැඩකටයුතු සියල්ල සිදුකළේ. පස්සේ පිළිමතලාවේ සිංගර් ආයතනයේ උපකාරයත් ඇතිව මට තවත් මැෂින් මිලදී ගන්න හැකිවුණා. ඔවුන් මට ඒ සඳහා විශාල සහයෝගයක් ලබාදුන්නා. 

මේ අතරතුර කුඩා ව්‍යාපාරික හිමියන් විසින් සංවිධානය කරන අලෙවි පොළවල් තුළට සහභාගි වෙන්න ම‍ට අවස්ථාව හිමිවුණා. ඒ සඳහා සහභාගි වෙලා මට තවත් අලුත් පාරිභෝගික පිරිසක් හම්බ වුණා. ඒ අතුර තුර මම මහන ඇඳුම් කඩවලටත් දාන්න පටන් ගත්තා. 
අද වෙනකොට මම ප්‍රවර්ධන ටීෂර්ට් ඇණවුම්ද බාර අරගෙන තිබෙනවා. දැන් මගේ ව්‍යාපාරය සඳහා වෙනම ස්ථානයක් පවා ඉදිකරගෙන තිබෙනවා. ඒ අතරතුර ගැටඹේ පිහිටි කර්මාන්ත අංශයෙන්ද ව්‍යාපාරික දැනුම ලබාගත්තා. ඒ නිසා 2017 වර්ෂයේදී කුඩා පරිමාණ ව්‍යාපාරිකයන් අතර සිටින දක්ෂ කාන්තාවක් ලෙස කුසලතා සම්මානයක් පවා මට දිනාගන්න හැකි වුණා. පසුගිය වර්ෂයේ බණ්ඩාරනායක සම්මන්ත්‍රණ ශාලාවේ පැවැති වෙළෙඳ ප්‍රදර්ශනය සඳහා මම සහභාගි වුණා. එයට සහභාගි වුණ බොහෝමයක් පිරිස මගේ නිෂ්පාදන ගැන අගය කළා. 

මම හැමදාම ඉදිරි දිනය තුළ, ඉදිරි මාසය තුළ මේ මේ දේවල් සිදුකරනවා කියා ඉලක්කයක් හදා ගන්නවා. ඒ අනුව එයට අවශ්‍ය අඩුපාඩුකම් හදා ගනිමින් බාධක ජයගනිමින් ඒ නිශ්චිත කාලයේදී ඒ ඒ ඉලක්කයට ගමන් කිරීමට උත්සාහ ගන්නවා. අද මගේ ව්‍යාපාරය නිසා තවත් පිරිසකට රැකියා අවස්ථා උදාකර දීමට මට හැකි වෙලා තිබෙනවා.  මගේ ව්‍යාපාරය සිදුකරගෙන යන්න රජයෙන්  මූල්‍යමය උපකාරයක් නොලැබුණත් මුදල් උපයන ව්‍යාපාරයක් ආරම්භ කරන්න හොඳ අත්තිවාරමක් දී තිබෙනවා. කුඩා ව්‍යාපාර අංශයට සම්බන්ධ වී වැඩකටයුතු සිදුකිරීම මගේ ජීවිතයේ හැරවුම් ලක්ෂ්‍යයක් කියලයි මම හිතන්නේ. ඇත්තෙන්ම ව්‍යාපාරිකාවක ලෙසින් මට මේ දක්වා පැමිණෙන්න ඔවුන් නිබඳ සහයෝගයක් ලබාදුන්නා. 

IMG-20180522-WA0011

මෙම ව්‍යාපාරය ඔස්සේ මේ දක්වා පැමිණි ගමන් මග තුළ මාහට අත්විඳින්නට වූ බාධක එමටයි. කාන්තාවක්, මවක් ලෙසින් ගත්විට ව්‍යාපාරයක් සිදුකරන ගමන් නිවසේ වැඩකටයුතුත් සමබරව සිදුකිරීමට විශාල කැපකිරීමක් සිදුකරන්නට වෙනවා. 
මගේ ළමයි තුන්දෙනත් එක්ක නිවසේ වැඩයි, ව්‍යාපාරයේ වැඩයි ඔක්කොම සිදු කරනකොට මුල්කාලයේදී නම් බොහෝ ගැටලුවලට මුහුණදීමට සිදුවුණා. මේ ව්‍යාපාරය අතහැර දමන්නට පවා සිතුණු වාර අනන්තයි. නමුත් මම මගේ දරුවන්ට ටිකෙන් ටික එයාලගේ වැඩ තනියම කරගෙන ජීවත් වෙන්න ඉගැන්වුවා. මීට අවුරුදු තුනකට ප්‍රථම මම මේ සියල්ල ඉගැන්වුවා. දැන් මගේ පොඩිම පුතා ඉගෙනුම ලබන්නේ දෙක වසරේ. අද වෙනකොට මම කොහේ හෝ ව්‍යාපාර කටයුත්තක් සඳහා යන විට මගේ දරුවෝ තුන්දෙනාම තමන්ගේ වැඩකටයුතු සිදුකරගෙන සහයෝගයෙන් නිවස තුළට වෙලා ඉන්නවා. 

මගේ පුතාලා තුන්දෙනාගේ නම පටන් ගන්නේ ඒ අකුරෙන්. ඒ නිසා මම මගේ ව්‍යාපාර 'A-3 ෆැෂන්' නමින් හැඳින්වුවා. ඇතැම් විට ව්‍යාපාරය අතාරින්න වෙන අවස්ථාවල්වලදී 'A-3 ' කියන දෙය ඔළුවට එද්දී මට මතක් වෙනවා මම මේ හැම දෙයක්ම කරන්නේ මගේ පුතාලා නිසා නේද කියලා. ඇත්තෙන්ම එය මගේ ව්‍යාපාරයේ නම වුණත් මාව ව්‍යාපාරයෙන් ඉදිරියට තල්ලු කරන හොඳම උත්තේජකයක් වුණා. 

අනෙක් පැත්තෙන් කුමක් හෝ දෙයකට මුදල් යොදවා මහා පරිමාණ වශයෙන් ව්‍යාපාරයක් ආරම්භ කරන්න තරම් ආර්ථික ශක්තියක් අපට තිබුණේ නැහැ. ඒ නිසා මට බොහෝ ගැටලුවලට මුහුණදීමට සිදුවුණා. වෙළෙඳ පොළ තුළ මගේ නිෂ්පාදනවලට හොඳ ඉල්ලුමක් සකස් කර ගැනීමේදී වුණත් විශාල තරගයක් දීමට සිදු වෙනවා. මොකද සුළු පරිමාණ වශයෙන් මේවගේ ව්‍යාපාර සිදුකරන බොහෝ අය සිටින නිසා. 

මම මුලින්ම සායවල් පමණක් මහන එක කළත් මේ වන විට මම ප්‍රවර්ධන ටී – ෂර්ට් ඇණවුම්ද තොග වශයෙන් බාර ගන්නවා. මම දැනට මගේ නිෂ්පාදන අලෙවි සැල්වලට ගෙනවිත් දමන අතර, තොග වශයෙන් ගන්න පාරිභොගිකයෝත් ඉන්නවා. ඒ වගේම තව මාසයක් පමණ කාලයකින් කුඩා ළමයින්ගේ ඇඳුම් මහන්නත් මම අපේක්ෂා කරගෙන සිටිනවා. ඉදිරියේදී මගේම කියලා අලෙවි ප්‍රදර්ශනාගාරයක් ආරම්භ කිරීමට අපේක්ෂා කරනවා. ඒ වගේම මගේ තවත් ආශාවක් තමයි ලංකාවේ තරුණ තරුණියන්ට මගේ අතින් තවත් රැකියා සියයක් පමණ ප්‍රමාණයක් බිහිකරලා දෙන එක. 

මට ව්‍යාපාරයක් හෝ රැකියාවක් කරන්න කිසිදු කැමැත්තක් තිබුණේ නැහැ. උදේට කාර්යාලයට ගිහින් හවසට ගෙදර එන ඒකාකාරී ජීවිතයට මගේ කොහෙත්ම කැමැත්තක් තිබුණේ නැහැ. ඒත් නිදහසේ දෙයක් කරන්න මගේ කැමැත්තක් තිබුණා. රැකියාවක් කළොත් මට කාටවත් උදව් කරන්න ලැබෙන්නේ නැහැ. ඒ නිසා මේ ව්‍යාපාරය හරහා තවත් කෙනෙකුට සහයෝගයක් දක්වන්න පුළුවන් වීම ගැන මම හුඟක් සතුටු වෙනවා. 

පුංචි කාලයේ ඉඳන්ම තව කෙනෙක්ට උදව් කරන්න ඕන කියන හැඟීම මගේ තිබුණා. මොකද අපේ පවුල ධනවත් සල්ලිකාර පවුලක් නෙමෙයි. තාත්තා බස් රථ කොන්දොස්තරවරයෙක්. අම්මා ඒ වෙනකොට රැකියාවක් කළේ නැහැ. ඒ දවස්වල දකින, අසන දේවලුත් එක්ක මම හිතුවේ මම හිතපු දේවල්, මම දැකපු දේවල් මගේ දරුවෙකුටත් නොවෙන්න මාර්ගය හදාගන්නවා කියලයි. ඒ වගේම ඒ තුළින් තවත් එක පවුලකට හරි උදව්වක් කරනවා කියන චේතනාවෙන් තමයි මම හිටියේ. ඒ නිසා බයක් නැතුව මේ ගේ ව්‍යාපාරයක් කරන්න ඕන කියන එක මගේ ඇඟේ තියෙන්න ඇති. 

හැම වෙලේම අපිට ඉලක්කයක් තියාගන්න ඕන. කවුරුත් කියන නිසාවත් කාටවත් පෙන්න ඕන නිසාවත් නෙමෙයි. ඒක තමන්ගේ ඇඟ තුළයි තියෙන්න ඕන. එයින් තමයි කිසිදු බියක් නොමැතිව ඒ දේ කරන්න පුළුවන් වෙන්නේ. ඒ තැනට යද්දී අපිට නොයෙක් බාධක, අභියෝගයන්ට මුහුණදීමට සිදුවේවි. නමුත් අපේ ඔළුවේ තිබෙනවා නම් ඒ අහවල් තැනට තමයි අපි යන්න ඕන කියලා වටපිටාවෙන් එන ප්‍රශ්න, ප්‍රශ්න නෙමෙයි. ඒවා විසඳගෙන යන්න පුළුවන්. තමන් මොනවහරි දෙයක් කරන්න තීරණය කරා නම් හෝ පටන් ගත්තා නම් අපි හරියටම හිතන්න ඕන අපි මේ පටන්ගත් දෙය අපට සුදුසුද කියලා.

එය තමන්ට කරන්න පුළුවන් නම් මොන බාධක ආවත් ඉදිරියට තැබූ අඩිය පිටුපසට ගන්නේ නැතිව බාධක කඩාගෙන ඉදිරියට යන්න පුළුවන් වෙන්න ඕන. මුලින්ම තමන්ගේ ඒ දක්ෂතාව නිවැරදිව හඳුනාගන්න ඕන. මම මේ දක්වා පැමි‘ණි ගමනේදී මගේ අම්මා, තාත්තා වගේම මගේ ආදරණීය ස්වාමි පුරුෂයා හා දරුවන් තිදෙනා ගැන අනිවාර්යයෙන්ම සිහිපත් කළ යුතුයි. ඇත්තෙන්ම කුමන බාධක පැමිණියත් මේ සියල්ල නොබියව මා සිදුකරන්නේ ඔවුන් නිසයි. "

 IMG-20180522-WA0008

මට බැහැ කියන දෙය කවදාවත් මගේ ශබිදකෝෂයට එකතු කරගන්න කැමති නැහැ

ජානමය රෝගයක් හේතුවෙන් ඇයට උපතින්ම ඇගේ අත් යුගල අහිමි විය. නමුත් කුඩා කල පටන්ම ඇගේ දෙමවුපියන් මෙන්ම ඈ තුළ උපන් චිත්ත ශක්තිය නිසා තමාගේ දෛනික වැඩකටයුතුවලට කිසිවිටෙකත් එය බාධාවක් නොවීය. 1983 වර්ෂයේ පෙබරවාරි 02 වැනි දින ඇමෙරිකාවේ ඇරිසෝනාහි උපත ලද ඇය නමින් ජෙසිකා ‍ෙකාක්ස්ය (Jessica Cox ). ඇය මේ වන විට වයස අවුරුදු 35ක් ඉක්ම වූ තැනැත්තියකි. 


fjjjjjjjjjjjjjjjjj
නමුත්, ඒ වයස වන විට ඇය ආ ගමනේ බොහෝ දේ සාර්ථකව ප්‍රගුණ කරමින් ඒවා පසුකර ඒමට ඇයට හැකි විය. ඇය ඇමෙරිකාවේ ඇරිසෝනාහි පිහිටි විශ්වවිද්‍යාලයෙන් මනෝවිද්‍යාව පිළිබඳ සිය උපාධිය අවසන් කළේ 2005 වර්ෂයේදීය. ඇගේ දෙඅත් නොමැති නිසා ඈ කිසිවිටෙකත් පසුබට නොවීය. ඇත්තෙන්ම තමන් සතු දේ තුළින් උපරිම ප්‍රයෝජනයක් ලබා ගන්නේ කෙසේද යන්න පිළිබඳව ඇය සැමවිටම කල්පනා කළාය. 

ඇයට කුඩා කල සිට දෙඅත් නොමැති නිසා ඇය, සෑම කාර්යයක් සිදුකිරීමටම භාවිත කළේ පාද යුගලයයි. ආහාර අනුභව කිරීමට, ඇඳුම් ඇඳීමට, ක්‍රීඩා කිරීමට, අකුරු ලිවීමට, පරිගණකය මනා ලෙස හැසිරවීමට මෙන්ම සෙල්ලම් කිරීමට පවා ඇය තම පාද භාවිතයට ගත්තේය. ඒ නිසා අත්වලින් සිදුකිරීමට හැකි මනා නම්‍යශීලීත්වයක් ඇයගේ පාදවලට තිබුණි. එය කොතරම්ද කියතොත් ඇගේ ඇස්වලට දමන කාචය පවා ඇස් මත තබා ගන්නේත්, එය ඉවත් කරන්නේත් වෙන කිසිවකුගේ ආධාරයක් උපකාරයක් නොමැතිව තම පාදයෙනි. එමෙන්ම තම පාදයේ ඇඟිලි තුඩු මගින් මිනිත්තුවකට පරිගණකයේ වචන 35ක් ටයිප් කිරීමේ දක්ෂතාවයක් ඇයට තිබේ. 

සුපිරි වීරවරියක් සේ අහසේ පියාසර කිරීම ජෙසිකා කුඩා කල සිට දැක තිබෙන එක් සොඳුරු සිහිනයකි. එය කෙසේ හෝ ඉටුකර ගැනීමේ අධිෂ්ඨානයෙන් යුතුව ඇය සිය උපාධිය නිමා කළ වහාම ගුවන් යානා බලපත්‍රය සඳහා අයදුම් කළාය. දෙඅත් අහිමි තැනැත්තියක් කෙසේ ගුවන් යානයක් ගුවනේ හසුරවන්නද? එය ජෙසිකා වෙසෙන සමාජයේ බොහෝ දෙනාට තිබුණු කුතුහලය මුසු ප්‍රශ්නයක් විය. නමුත් තමන් කුඩා කාලයේ සිට දැක තිබුණු සිහිනය සඵල කර ගැනීමට ඇයට වසර තුනක පුහුණුවීමක් ලැබීමට සිදුවිය. ඇය එකී පුහුණුව 2008 වර්ෂයේ අවසන් කරන්නේ දෙඅත් අහිමිව ගුවන්යානා බලපත්‍රයක් හිමි පළමු කාන්තාව ලෙසටය. 

1940 පමණ කාලයේ පාදයෙන් පාලනය කළ හැකි ගුවන් යානා තිබිණි. ඒ ආකෘතියට සමානව ඇය පදවන ගුවන් යානය සකස් කර තිබෙන අතර, එමගින් ඇගේ පාදයට පහසුවෙන් යානය පාලනය කළ හැකිය. කෙසේ නමුත් පුහුණුවෙන් පසුව ඇයට මේ පිළිබඳ වැඩිදුර අධ්‍යයනය සඳහා ශිෂ්‍යත්වයක්ද හිමි විය. මේ වන විට ඇය ගුවන් යානා ක්‍රියාකිරීම සම්බන්ධයෙන් ගිනස් වාර්තාවක්ද තබා තිබේ. 

3aa77f9c-291c-40da-b6a2-053e1ddcd2cf

කුඩා කල පටන් ඇය තුළ තිබූ උනන්දුව නිසා ඇය එක් දෙයකට පමණක් සීමා නොවීය. ඇය ගුවන් නියමුවරියක් පමණක් නොව, ඇය ක්‍රීඩාව තුළින්ද විවිධ දක්ෂතා රැසක් පෙන්නුම් කළ තරුණියකි. ඇය අවුරුදු 10ක් පමණ කුඩා වයසේදී ටයිකොන්ඩෝ ක්‍රීඩාව ප්‍රගුණ කිරීම සඳහා සහභාගි වූ අතර, ඒ පුහුණුවෙන් අවුරුදු 04ක් ගතවන විට ඇයට ටයිකොන්ඩෝ කළුපටි හිමිකාරනියක් වීමට වරම් ලැබුණි. ඇය විශ්වවිද්‍යාලයට ගිය පසුව ටයිකොන්ඩෝ පුහුණුවීම් දිගටම සිදුකළ අතර, ඇමෙරිකානු ටයිකොන්ඩෝ සංගමයේ සමාජිකාවක් ලෙසද ඇය ලියාපදිංචි විය.  ඇය ටයිකොන්ඩෝ ක්‍රීඩාවෙන් දෙඅත් අහිමිව කළුපටි පැලඳූ ලොව ප්‍රථම කාන්තාව විය. එකී  සටන් කලාව ඇයට ක්‍රීඩාවක් ලෙස පමණක් නොව ජීවිතයට අවශ්‍ය වන්නා වූ විනය, හික්මවීම සඳහා මාර්ගෝපදේශනය සපයන්නක් විය. ඒ තුළින් ඉලක්කයක් වෙත පහසුවෙන් ප්‍රවේශ වීමටත්, එය ළඟා කරගත් විට තවත් නව ඉලක්කයක් කරා බාධක දුරලමින් ළඟා වන්නේ කෙසේද යන්න පිළිබඳව සැලැස්මක් ඇයගේ සිතෙහි ඇති කරලීමටත් සමත් විය. 

එමෙන්ම බයිසිකල් පැදීමත් ඇය සිදුකරන්නේ සිත මෙන්ම ශරීරයද පිරිපුන්ව හා වඩා උද්යෝගිමත්ව තබා ගැනීමටය. ඇයට මේ සඳහා සුවිශේෂී පාපැදියක් තිබෙන අතර, එය රෝද තුනකින් සමන්විතය.  ඇය දිනපතා පාපැදියේ ගමන් කිරීම පුරුද්දක් කර ගෙන තිබේ. එමෙන්ම ඇය සමබරතාවය මැනවින් පවත්වාගන්නා කෙනෙකි. ඒ බව ඇය සිදුකරන සියලු ක්‍රීඩාවලින් පැහැදිලි වේ. සර්ෆින් ක්‍රීඩාවටද ඇය බොහෝ සේ ඇලුම් කරන අතර, ඇය බිඳෙන රළ පෙළ මත ලිස්සා යන්නේ මනා සමබරතාවක් පවත්වා ගනිමිනි.  එමෙන්ම පිහිනීම විනෝදයක් කරගත් ජෙසිකා කුඩා කාලයේ සිටම ඒ සඳහා දැක්වූයේ මහත් ලැදියාවකි. කුඩා කල පටන්ම අතපසු නොකර පිහිනීම් කටයුතු කළ ඇයට දැන් ඒ හා සම්බන්ධව ඇත්තේ මනා පලපුරුද්දකි. මේ සියලු වැඩ මනා කළමනාකරණයකින් යුතුව සිදුකරන ඇය කලාවට පවා දක්වන්නේ මහත් ලැදියාවකි. 

ඇය කුඩා කල සිටම නර්තනයට ඉතා දක්ෂ තැනැත්තියකි. තාලයට පාද තබා ඇය රිද්මය මුසු නර්තනයට නව ජවයක් එක් කරයි. වයස අවුරුදු 07දී පමණ පාසල් නර්තන තරගයකට ප්‍රථමයෙන් සහාභාගි වූ ඇය තරගය අවසානයේ තම නර්තන ගුරුවරියගේ දෙනෙතට පවා සතුටු කඳුළක් එක් කිරීමට සමත් විය. දහසකුත් ළමුන් අතරේ ඇයව අගේ කෙරුණේ අත් අහිමි වුවද ඇය තම ශරීරය රිද්මයට අනුව මනා ලෙස චලනය කරන බැවිනි. නර්තනයක තිබිය යුතු බොහෝ දේ ඇගේ නර්තනයේ අන්තර්ගත විය. එමෙන්ම ඇය පාදයේ ඇඟිලි තුඩු මතින් පියානෝව වාදනය කරන්නේ ඉතා අනර්ඝ ලෙසිනි. නර්තනය හා වාදනයට පමණක් නොව ඇය චිත්‍ර ඇඳීමටද ඉතා දක්ෂය. සිය මිතුරිය සමග එක්ව ඇය නොයෙක් තේමාවන් පාදයේ ඇඟිලි තුඩු මගින් මැනවින් වර්ණ සංකලනය කරමින් සිතුවම් කරයි. ඇය තම යහළුවන් හා එක්ව චිත්‍ර ප්‍රදර්ශනයක්ද පවත්වා තිබේ. එහිදී ඇගේ බොහෝ සිතුවම්වල තේමාවන් වූයේ, ක්ෂුද්‍ර ජීව විද්‍යාවේ එන දෘශ්‍යමය පෙළඹවීම් හා කාබනික හැඩයන්ය. එහිදී සැහැල්ලු බව ආරක්ෂා කර ගැනීමට ඇය මනා ලෙස වර්ණ හසුරවා තිබේ.  

jessicacox_plane

දෙඅත් අහිමිවීම ඇය සැලකුවේ තම ජීවිතයට අහිමි වූ ඉතා සුළු දෙයක් ලෙසිනි. ඒ පිළිබඳව ඇය කිසිවිටකත් පසුතැවිලි නොවීය. කුඩා කාලයේ කෘතිම අතක් දමා සිටියද තම ජීවිතයට කෘත්‍රීම දේ බද්ධ කිරීමෙන් පලක් නොවන  බව ඇයට ඒත්තු ගිය බැවින් එය ඉවත් කෙරිණි. 
එමෙන්ම ඇයට අන්තර්ජාලය හරහා එවැනි දෙඅත් අහිමිව සිටින මිතුරියන් රැසක් සමග සම්බන්ධ වීමට ඇයට හැකිවිය. ඔවුන් සමග අදහස් බෙදාගත් ඇය නිරන්තරයෙන් ඔවුන්ගේ චිත්ත ශක්තිය වර්ධනය කිරීමට නිරන්තරයෙන් අවශ්‍ය මාර්ගෝපදේශනය ලබාදුනි. අද වන විට ඇය ලෝකයම හදුනන සුප්‍රසිද්ධ දේශකයෙකි. ඇය විවිධ විෂය පථයන් ඔස්සේ ජීවිතය, ධනාත්මක චින්තනය, හිමි/අහිමි බව, ශක්තිය, හැකියාව පිළිබඳ නොයෙක් තැන්වල දේශන පවත්වයි. ලොව පුරා වෙසෙන ආබාධිත පුද්ගලයන් වෙනුවෙන් ඇය මහත් අනුකම්පාවකින් යුතුව කටයුතු කරයි. එවැනි පුද්ගලයන් හමුවී ඔවුන් සමග කතා කර ඔවුන්ගේ චිත්ත ශක්තිය අවදිකරලීම ඇයගේ පරම අධිෂ්ඨානයයි. විටෙක ඇය විශාල වේදිකාවක් මත දහස් සංඛ්‍යාත ජනයාට සිදුකරන දේශන පමණක් නොව සෝමාලියාව, නේපාලය වැනි රටවලද සංචාරය කරන ඇය ඒ ඒ රටවල්වල අසරණ අබාධිත දරුවන් වෙනුවෙන්ද ස්වකීය කාලය වැය කරයි. ඔවුන් සමග තම අත්දැකීම් හා මුහුණදුන් අභියෝගයන් ඇය සුහදත්වයෙන් යුතුව බෙදා හදා ගනියි.  ඇය මේ වනවිට රටවල් 20කට අධික ප්‍රමාණයකට තමන්ගේ අදහස් පතුරවා තිබේ. 
පසුකාලීනව එනම් 2015දී ඇය තමාගේ මේතාක් දුරක් පැමිණි ගමන පිළිබඳව ඇගේ අත්දැකීම් හා ඇය ජීවිතයේ මුහුණදුන් නොයෙකුත් බාධක ඇසුරෙන් තමන්ගේම චරිතාප්‍රදානයක් රචනා කළේය. එය නමින් disarm your limits ය. එය දෙඅත්වලින් තොර වූ ඔබේ සීමා  යනුවෙන් නම් කළ හැකිය. ඒ තුළින් සීමා වීමට තිබුණු ඇගේ ජීවිතය හරවත් හා පලදායී ලෙස ගත කළේ කෙසේද යන්න පිළිබඳ එම චරිතාප්‍රදානයේ සඳහන් වේ. එමෙන්ම ඇයගේ කතාව ඇසුරෙන්  right footed නම් වාර්තා චිත්‍රපටියද නිර්මාණය වී තිබෙන අතර, ආබාධිතයන්ගේ අයිතිවාසිකම් ගැන සඳහන්වන එම චිත්‍රපටය එමී සම්මානලාභී නික් ස්පාක් විසින් අධ්‍යක්ෂණය කර තිබේ. 

ඇය දෙඅත් අහිමි  වූවත් මේ වන විට විශාල ජයග්‍රහණ ප්‍රමාණයක් අත්පත් කරගෙන අවසානය. නමුත් ඇය තවත් උත්සහවන්තය, එමෙන්ම ජවසම්පන්නය. කිසිම දෙයකින් නොසැලී මැනවින් කාලය කළමනාකරණය කර මේ සියලු කාර්යයන් සිදුකරනුයේ සිතෙහි එවැනි කාර්යයන් සිදුකිරීමට උපන් තෘප්තියෙනි. තමාට දෛනිකව සිදුකිරීමට නියමිත වැඩ බොහෝමක් අතපසු කරමින් කාලය ප්‍රමාණවත් නොවේ යැයි පවසන සියල්ලන්ටම ඇය කදිම උපහැරණයකි. එමෙන්ම ඇය සමාජයේ දිරිය කාන්තාවකි.