Author Archives: ෂමිල පෙරේරා

LASL – තක්සේරුකරුවන් අතර සුහද හමුවක්

ශ්‍රී ලංකා ලීසිං සංගමය (LASL) සහ දිවයින පුර විසිරී සිටින වාහන තක්සේරුකරුවන් අතර සුහද හමුවක් පසුගිය 23 වැනිදා කොළඹ ටාජ් සමුද්‍ර හෝටල් පරිශ්‍රයේදී පවත්වා තිබේ.

මෙම සම්මන්ත්‍රණයට ලීසිං සංගමයේ (LASL) සභාපති ආනන්ද සෙනවිරත්න මහතා ඇතුළු ප්‍රධානීන් සහ 50කට අධික තක්සේරු සමාගම් නියෝජනය කරමින් නියෝජිතයන් සහභාගී වූ බව ඔවුහු පවසති.

ලීසිං සංගමය (LASL) සහ වාහන තක්සේරුකරුවන් අතර පවතින ව්‍යාපාරික සබඳතා තවදුරටත් තහවුරු කර ගැනීම මෙම සම්මන්ත්‍රණයේ ප‍්‍රධාන අරමුණ වී ඇති අතර, ලීසිං ක්ෂේත‍්‍රයේ මේ දෙපාර්ශ්වය පවතින ගැටලු පිළිබඳව කිහිපවතාවක්ම හමුවී සාකච්ඡා කළ බවද ඔවුහු පවසති.

මෙහිදී තක්සේරු වාර්තා වටිනාකම වෙළෙඳ පොළ වටිනාකමට වඩා වැඩිවීම, තක්සේරු වාර්තා දෙකක් අතර විශාල පරතරයක් දක්නට ලැබීම, ඡායරූප මගින් පමණක් තක්සේරු වාර්තා සකස් කිරීම, තත්ත්වයෙන් බාල වාහන සඳහා තක්සේරු කිරීම් සිදු කිරීම වැනි ගැටලු රැසක් පිළිබඳව දෙපාර්ශ්වයෙන්ම අදහස් විමසීම් සහ ඒ සඳහා විසඳුම් ඉදිරිපත් කිරීම මෙහිදී සිදුවූ බවද ඔවුහු වැඩිදුරටත් පවසති.

ඇමරිකානු GSP බදු සහනය අප්‍රේල් මාසයේ සිට යළිත්

මෙම අප්‍රේල් මාසයේ සිට යළිත් වරක් ඇමරිකානු GSP බදු සහනය ශ්‍රී ලාංකේය අපනයනකරුවන්ට විවෘත වන බව කර්මාන්ත හා වාණිජ කටයුතු අමාත්‍ය රිෂාඩ් බදියුදීන් මහතා පවසා සිටියේය.

එමෙන්ම, කර්මාන්ත හා වාණිජ කටයුතු අමාත්‍යාංශයේ සංඛ්‍යා ලේඛන හා දත්තවලට අනුව ශ්‍රී ලංකාව විසින් ඇමරිකාවට කරනු ලබන අපනයන ප්‍රමාණය ප්‍රථම වරට ඇ.ඩො.බිලියන 03ක් දක්වා වැඩි වී ඇති බවද පසුගියදා අමාත්‍යාංශයේ පැවති සාකච්ඡාවකදී අමාත්‍යවරයා පෙන්වා දුන්නේය.

Virtual Currencies ගැන මහ බැංකු පැහැදිලි කිරීමක්

ශ්‍රී ලංකාව තුළ හා ජාත්‍යන්තර වශයෙන් අතථ්‍ය මුදල් (Virtual Currencies) පිළිබඳව තිබෙන උනන්දුව වැඩිවෙමින් පවතින බව පෙන්වා දෙන ශ්‍රී ලංකා මහ බැංකුව රට තුළ අතථ්‍ය මුදල් භාවිතය පිළිබඳ මහජනතාව දැනුම්වත් කරයි.

අතථ්‍ය මුදල් යන යෙදුම පොදුවේ භාවිත වන්නේ ඩිජිටල් තාක්ෂණය යොදා පෞද්ගලිකව නිකුත් කරනලද වටිනාකම් සහිත ඒකකයන් වන අතර, ඒවාට ආවේණික ගිණුම් ඒකකද ඇති බව මහ බැංකුව කියයි. අතථ්‍ය මුදල් සඳහා පොදු උදාහරණ වන්නේ බිට්කොයින් (Bitcoin), ලයිට්කොයින් (Litecoin) සහ එතීරියම් (Ethereum) වැනි අප්‍රකාශිත විද්‍යුත් මුදල් (Cryptocurrencies) බවත්, මෙම අතථ්‍ය මුදල් මහ බැංකුව විසින් නිකුත් කරන මුදල් නොවන බවත් පෙන්වා දෙයි.

අප්‍රකාශිත විද්‍යුත් මුදල් වැනි අතථ්‍ය මුදල්, ගනුදෙනු බලාත්මක කිරීම සඳහා පුද්ගලයන් සෘජුව සම්බන්ධ වී විමධ්‍යගත ලෙස සේවා සැපයිය හැකි වන අයුරින් ඩිජිටල් ජාල භාවිත කරන බවද මහ බැංකුව කියයි. එම මුදල්වල වටිනාකම පිළිබඳව සහතික කිරීමට සහ එම ගනුදෙනු නියාමනය කිරීමට මහ බැංකුව වැනි කේන්ද්‍රස්ථ අධිකාරියක් නොමැති වීම හේතුවෙන් ඒවා භාවිත කරන්නන් අතර හෝ ගනුදෙනු ආශ්‍රිත ගැටලු ඇතිවීමේ දී ඒ සඳහා මැදිහත් වන වගකිව යුතු පාර්ශ්වයක් නොමැති බවද මහ බැංකුව පෙන්වා දෙයි. අතථ්‍ය මුදල්වල වටිනාකම තීරණය වන්නේ සමපේක්ෂණ මත වන අතර, එයට පාදක වූ වත්කම් හෝ ඒ සඳහා බලපත්වන නියාමන රාමුවක් නොමැති බවද කියයි. මේ නිසා ඒවායේ වටිනාකම විශාල වශයෙන් උච්චාවචනය විය හැකි බවද මහ බැංකුව පවසයි. ඒ හා සමානව, නීතිවිරෝධී කටයුතු සඳහා අතථ්‍ය මුල් භාවිත කිරීමේ සම්භාවිතාවද ඉහළ යා හැකි බවත්, තවද අතථ්‍ය මුදල් භාවිතය මගින් මුදල් විශුද්ධිකරණය වැළැක්වීමට හා ත්‍රස්තවාදයට අරමුදල් සැපයීම මැඬපැවැත්වීමේ නීති උල්ලංඝනය වීමටද අවකාශ ඇති බවත් මහ බැංකුව කියයි.

එම නිසා වර්තමානයේදී අප්‍රකාශිත විද්‍යුත් මුදල් භාවිත කිරීමෙන් පාරිභෝගිකයන්ට මෙන්ම රටෙහි ආර්ථිකයටද මූල්‍යමය, මෙහෙයුම්, නීතිමය, පාරිභෝගික සුරක්ෂිතභාවය සහ ආරක්ෂාව යන අංශවලින් යුතු අවදානම්ක ඇති කරන බවද මහ බැංකුව පවසයි.

ඒ අනුව, ශ්‍රී ලංකා මහ බැංකුව කිසිදු ආයතනයකට හෝ සමාගමකට අප්‍රකාශිත විද්‍යුත් මුදල් ඇතුළු අතථ්‍ය මුදල් සම්බන්ධව ක්‍රියාමාර්ග ගැනීමට බලපත්‍ර ලබාදී හෝ බලය පැවරීමක් කර නොමැති බව සහ කිසිදු ආයතනයකට මූලික කාසි අර්පණයන් (Initial Coin Offerings- ICOs) සඳහා බලය පැවරීමක් කර නොමැති බවද මහජනතාවට මෙයින් දැනුම් දෙන බව ශ්‍රී ලංකා මහ බැංකුව වැඩිදුරටත් පවසයි.

GEM 2018 සමුළුව ඇමෙරිකාවේදී ඇරඹෙයි

හාවර්ඩ් විශ්ව විද්‍යාලය විසින් සංවිධානය කරනු ලබන ගෝලීය බලගැන්වීම් සමුළුවට (GEM 2018 සමුළුව) සහභාගී වීම සඳහා ජාත්‍යන්තර වෙළෙඳ රාජ්‍ය අමාත්‍ය සුජීව සේනසිංහ මහතා අද (16දා) දිවයිනින් පිටත්ව යයි.

හාර්වඩ් විශ්ව විද්‍යාලයේ ජාත්‍යන්තර සංවර්ධනය සඳහා වන මධ්‍යස්ථානය විසින් සංවිධානය කරනු ලබන ගෝලීය බලගැන්වීම් සමුළුව (GEM 2018) ගෝලීය සංවර්ධනයන් ඉහළ පෙළේ පර්යේෂණ සඳහා වන ප්‍රාථමික සැසියයි.

මෙම සමුළුව සඳහා ලොව ඉහළ පෙළේ ව්‍යවසායකයන්, ප්‍රතිපත්ති සම්පාදකයන් සහ අධ්‍යාපනාඥයන් 100ක් පමණ සහභාගී වීමට නියමිතය.

ශ්‍රී ලංකාව ජාත්‍යන්තර වෙළෙඳ පොළ ජය ගැනීමට සූදානම්ලු

කටුනායක අපනයන සැකසුම් කලාපයේ ක්‍රියාත්මක වන ග්ලෝබල් ස්පෝට්ස් ශ්‍රී ලංකා  (පෞද්.) සමාගම, MAS ඇක්ටිව් ට්‍රේඩින් (පෞද්.) සමාගම, MAS ක්‍රීඩා නිර්මාණ සමාගම සහ ෆිලින්ටෙක් ට්‍රාන්ඩියුසර්ස් (පෞද්.) සමාගම යන ආයතන ශ්‍රී ලංකාවේ සංචාරයක නිරත යුරෝපා සංගමයේ පාර්ලිමේන්තු සභිකයන් පිරිසකගේ නිරීක්‍ෂණයට ලක්ව තිබේ.

මෙම නිරීක්‍ෂණ චාරිකාවට සහභාගී වූ බ්‍රිතාන්‍ය ජාතික පාර්ලිමේන්තු මන්ත්‍රී සජාඩ් කරීම් මහතා අදහස් දක්වමින් කියා තිබුණේ ශ්‍රී ලංකාව තුළ නිෂ්පාදන පර්යේෂණ සහ සංවර්ධන කටයුතු සිදුවන ආකාරය තමා සියැසින් දැකගත් බවයි.  එමෙන්ම ශ්‍රී ලාංකේය නිෂ්පාදනවල ගුණත්වය ගැන තමා විශ්මයට පත්වූ බවද ඔහු සඳහන් කර තිබේ.

තවත් බ්‍රිතාන්‍ය පාර්ලිමේන්තු නියෝජිතයෙකු වන ඩේවිඩ් මාර්ටින් සඳහන් කර ඇත්තේ කටුනායක අපනයන සැකසුම් කලාපයේ නිෂ්පාදන කර්මාන්ත ශාලාවල පිරිසිදු බව සහ ඒවා ජාත්‍යන්තර මට්ටමින් ක්‍රියාත්මක වන ආකාරය ප්‍රශංසනීය බවයි. 

එමෙන්ම, ශ්‍රී ලාංකේය ශ්‍රමිකයන්ගේ කුසලතා ජාත්‍යන්තර තලයේ පවතින බව රමෝන් ට්‍රෙමෝසා නම් වූ ස්පාඤ්ඤ ජාතික නියෝජිතයා සඳහන් කර ඇත.

ඒ අනුව, මෙම නිරීක්‍ෂණ චාරිකාවට සහභාගී වූ සියලුම යුරෝපා පාර්ලිමේන්තු නියෝජිතයන්ගේ මතය වී ඇත්තේ ශ්‍රී ලංකාව ජාත්‍යන්තර වෙළෙඳ පොළ ජයගැනීමට ඇති ශක්‍යතාවත්, ඒ සඳහා ඇවැසි නිර්නායකත් සපුරා ඇති බවයි.

BI6A9836 BI6A9727 BI6A9744

 

ඩොලර් බිලියන 2.5ක ජාත්‍යන්තර ස්වෛරීත්ව බැඳුම්කර නිකුතුවක්

ශ්‍රී ලංකා රජය වෙනුවෙන් ශ්‍රී ලංකා මහ බැංකුව විසින් වසර 5ක පරිනත කාලයකින් යුතු ඇ.ඩො.බිලියන 1.25ක් සහ වසර 10ක පරිනත කාලයකින් යුතු ඇ.ඩො.බිලියන 1.25ක් ලෙස ජ්‍යෙෂ්ඨ සුරැකුම් රහිත ඇ.ඩො.බිලියන 2.5ක ජාත්‍යන්තර ස්වෛරීත්ව බැඳුම්කර නිකුතුවක් සිදුකර තිබේ.

2018 අප්‍රේල් 11දා සිදුකරන ලද මෙම බැඳුම්කර නිකුතුව අනුපිළිවෙළින් 2023 අප්‍රේල් 18දා සහ 2028 අප්‍රේල් 18දා යන දිනයන්හිදී කල්පිරීමට නියමිතය.

මෙම බැඳුම්කර සඳහා මූඩීස් ඉන්වෙස්ටර් සර්විස්, ස්ටෑන්ඩර්ඩ් ඇන්ඩ් පුවර්ස් සහ ෆ්චි රේටින්ග්ස් යන ආයතන පිළිවෙළින් B1, B+ සහ B+ යන ශ්‍රේණිගත කිරීම් ලබාදී ඇත.

මෙය 2007 වසරේ සිට ජාත්‍යන්තර බැඳුම්කර වෙළෙඳ පොළෙහි ශ්‍රී ලංකාව සිදුකළ 12 වැනි ඇ.ඩොලර් බැඳුම්කර නිකුතුව සනිටුහන් කරන බව මහ බැංකුව පවසයි.

එමෙන්ම, මෙය ශ්‍රී ලංකාව තුළ සිදුවූ විශාලතම අක්වෙරළ බැඳුම්කර නිකුතුව නියෝජනය කරන බවත්, එය වසර ගණනාවක් පුරා ශ්‍රී ලංකාව වෙත අඛණ්ඩව ලැබෙන ජාත්‍යන්තර ආයෝජක සහයෝගය ප්‍රබල ලෙස පෙන්නුම් කරන බවත් මහ බැංකුව පවසයි.

මෙම සාර්ථක ගනුදෙනුවේ ඒකාබද්ධ නියමු කළමනාකරුවන් සහ පොත් පවත්වා ගන්නන් ලෙස සිටිගෘප්, ඩොයිෂ් බෑන්ක්, එච්.එස්.බී.සී, ජේ.පී.මෝර්ගන් සහ ස්ටෑන්ඩර්ඩ් චාර්ටර්ඩ් බැංකුව කටයුතු කර තිබේ.

ඒකාබද්ධ හවුල්කාරීත්වය විසින් මෙම නව, වසර 5ක සහ වසර 10ක පරිණත කාල සහිත ණය කාණ්ඩ සඳහා පිළිවෙළින් 6%ක් සහ 7%ක් ලෙස කොන්දේසි සහ මූලික මිල මාර්ගෝපදේශ නිකුත් කර තිබුණු අතර, අවසානයේදී වසර 5 සහ වසර 10 ණය කාණ්ඩ සඳහා පත්‍රිකා මිලකරණය නිව්යෝක් පැය කාල පරාසය තුළදී පිළිවෙළින් 5.75% සහ 6.75%ක කූපන් අනුපාතිකය සහිතව මූලික මිල මාර්ගෝපදේශයට වඩා අඩු අගයකින් සිදුකර තිබේ.

ඒ අනුව, අවසාන ඇණවුම් පොතෙහි වසර 5 හි ණය කාණ්ඩය සඳහා ගිණුම් 235කට අධික ප්‍රමාණයක් තුළින් ඇ.ඩො.බිලියන 3.0කට අධිකවද, වසර 10හි ණය කාණ්ඩය සඳහා ගිණුම් 190කට වඩා වැඩි ප්‍රමාණයක් තුළින් ඇ.ඩො.බිලියන 3.5කට අධිකවද ඇණවුම් ලැබී තිබේ. මෙයින් ශ්‍රී ලංකාව සහ එහි ආර්ථික දැක්ම කෙරෙහි ආයෝජකයන් තුළ පැවති අඛණ්ඩ විශ්වාසය පැහැදිලිව පෙන්නුම් කරන බව ශ්‍රී ලංකා මහ බැංකුව වැඩිදුරටත් පවසයි.

සෘජු විදේශ ආයෝජනවල ඇ.ඩො.බි.1.9ක වැඩිවීමක්

ශ්‍රී ලංකා ඉතිහාසයේ වාර්තාගත වැඩිම සෘජු විදේශ ආයෝජන ප්‍රමාණය 2017 වසර තුළ හිමි කරගෙන ඇති බව මුදල් අමාත්‍යාංශය පවසයි.

2017 වසර තුළ ශ්‍රී ලංකාවට ලැබී ඇති සෘජු විදේශ ආයෝජන ප්‍රමාණය ඇ.ඩො.බිලියන 1.9ක් හෙවත් රු.බිලියන 290ක් පමණ වන බවත්, මෙය 2016 වසරට වඩා සිව් ගුණයක වර්ධනයක් බවත් මුදල් අමාත්‍යාංශය පෙන්වා දෙයි.

මීට පෙර වැඩිම සෘජු විදේශ ආයෝජන ප්‍රමාණයක් වාර්තා වී තිබුණේ වර්ෂ 2014 දීය. ඒ ඇ.ඩො.බිලියන 1.7කි.

2017 වසරේ සෘජු විදේශ ආයෝජන ප්‍රමාණයට හම්බන්තොට වරාය බදුදීම වෙනුවෙන් ලද ඇ.ඩො.මිලියන 300ක පළමු වැනි වාරිකයද අතුළත් වේ. චීන ආයෝජන මෙන්ම, හොංකොං, ඉන්දියාව සහ සිංගප්පූරුව යන රටවල ආයෝජනද මෙම වර්ධනීය තත්ත්වය අත්පත් කරගැනීමට හේතු වී ඇති බව කියැවේ.

2015 සහ 2016 යන වසරවල සෘජු විදේශ ආයෝජන ප්‍රමාණය පිළිවෙළින් දක්වා තිබුණේ ඇ.ඩො.මිලියන 970ක් සහ ඇ.ඩො.මිලියන 450ක් ලෙසිනි.

2017 වසරේ මෙම වර්ධනීය තත්ත්වය අත්පත් කරගැනීමට හේතුවක් ලෙස රජය විසින් රට තුළ ව්‍යාපාරයන්ට හිතකර පරිසරයක් නිර්මාණය කරදීමත්, සරල බදු ක්‍රම හඳුන්වාදීම සහ ව්‍යාපාර ලියාපදිංචි කිරීමේ එක්දින සේවය වැනි දෑ පෙන්වාදිය හැකි බවත් මුදල් අමාත්‍යාංශය පවසයි.

එසේම, ගෙවුම් ශේෂ ගැටලුව ස්ථිර ලෙස විසඳා ගැනීම සඳහා සෘජු විදේශ ආයෝජන සහ අපනයන වැඩි කිරීමට ගෙන ඇති පියවර ද හේතු වී ඇති බව අමාත්‍යාංශය පෙන්වා දෙයි. 2017 වසර තුළ ශ්‍රී ලංකාවේ අපනයනයද බොහෝ සෙයින් වර්ධනය වී ඇති අතර, 2017 වසර ජනවාරියට සාපේක්ෂව ශ්‍රී ලංකාවේ වාර්ෂික අපනයන 2018 ජනවාරි වනවිට 11.6෴කින්, එනම් ඇ.ඩො.මිලියන 965.4 දක්වා වැඩිවී ඇති බවද මුදල් අමාත්‍යාංශය පවසයි.

ඊට අමතරව, විගමනික ශ්‍රමිකයන් විසින් එවනු ලබන ප්‍රේෂණ ප්‍රමාණයද වැඩිවීම හේතුවෙන් ශ්‍රී ලංකාවේ විදේශ සංචිත ප්‍රමාණය 2017 දෙසැම්බර් වනවිට ඇ.ඩො.බිලියන 7.9ක් දක්වා ඉහළ ගිය බවද මුදල් අමාත්‍යාංශය පවසයි. එනමුදු, ශ්‍රී ලංකා මහ බැංකුව විසින් නිකුත් කළ 2018 ජනවාරි මස විදේශීය අංශයේ ක්‍රියාකාරීත්වය පිළිබඳ නිවේදනය අනුව 2018 ජනවාරි මස අවසානය වනවිට ආනයනික මාස 4.3කට ප්‍රමාණවත් වන පරිදි ඇ.ඩො.බිලියන 7.7ක් දක්වා නිල සංචිත පහළ ගොස් තිබේ. මෙම මාසය තුළ ආසියානු නිෂ්කාශන සංගමය වෙත ගෙවීමට නියමිත වාරික ගෙවීම් මේ සඳහා මූලික හේතුව වූ බවද මහ බැංකුව පවසයි. එමෙන්ම, 2017 වසරේ වාර්තා කළ ඇ.ඩො.බිලියන 7.16ක ප්‍රේෂණ, 2016 වාර්තා කළ ඇ.ඩො.බිලියන 7.24ක ප්‍රේෂණවලට වඩා අඩුවීමක් දක්නට ලැබෙන බවද මහ බැංකු වාර්තා පෙන්වා දෙයි. 2009 සිට 2017 දක්වා විගමනික ශ්‍රමිකයන්ගේ ප්‍රේෂණ ඇ.ඩො.බිලියන 3.33ක් (2009), 4.11ක් (2010), 5.14ක් (2011), 5.98ක් (2012), 6.40ක් (2013), 7.01ක් (2014), 6.98ක් (2015), 7.24ක් (2016) සහ 7.16ක් (2017) ලෙස මහ බැංකු වාර්තාවල දැක්වෙයි.

කෙසේ වෙතත්, මෙම වසර අවසානයේදී ඇ.ඩො.බිලියන 2.5ක විදේශීය ආයෝජන ලබාගැනීමේ ඉලක්කය කරා ළඟාවීමට රජය සැලසුම් කර ඇති බවත්, එය 2020 වනවිට ඇ.ඩො.බිලියන 5 දක්වා වර්ධනය කිරීම රජයේ අපේක්ෂාව බවත් මුදල් අමාත්‍යාංශය වැඩිදුරටත් නිවේදනය කරයි.

අද නාස්තිය දූෂණය ඉහළ ගිහින් – රවි

එජාපයේ ඇමතිවරු සිය අමාත්‍යාංශවලින් රටේ ආර්ථිකය පොහොසත් කරන විට, ශ්‍රීලනිපයේ ඇමැතිවරු එම   ආදායම දොවමින් සිටින බව හිටපු මුදල් අමාත්‍ය,  පාර්ලිමේන්තු මන්ත්‍රී රවි කරුණානායක මහතා පවසා සිටියේය.

මන්ත්‍රීවරයා මෙසේ අදහස් දක්වා සිටියේ පසුගිය 09දා කොළඹ සුගතදාස ක්‍රීඩා සංකීර්ණයේ සකස් කළ ජාත්‍යන්තර මට්ටමේ කෘත්‍රිම ධාවන පථය විවෘත කිරීමේ උත්සව අවස්ථාවට එක්වෙමිනි. ක්‍රීඩා අමාත්‍ය දයාසිරි ජයසේකර මහතාගේ ප්‍රධානත්වයෙන් පැවති උත්සවයේදී වැඩිදුරටත් අදහස් දක්වා තිබූ රවි කරුණානායක මහතා,

"අද මේ වැය කරන්නෙ රටේ මුදල්. රටේ මුදල් කියන්නෙ ජනතාවගේ මුදල්. මම මුදල් ඇමැති කාලෙ දයාසිරි ජයසේකර ඇමැතිතුමාගේ ඉල්ලීමකට අනුව මේ ප්‍රතිසංස්කරණ කටයුතු සඳහා විශාල මුදලක් වෙන්කළා. දයාසිරි ඇමැතිතුමා ඒ මුදල්වලට සාධාරණය ඉටුකර තියෙනවා. අනෙකුත් අමාත්‍යාංශවලත් මේ වගේ වැඩ සිදුවෙනවා නම් මේ රට ගොඩ නැඟීම අපහසු නෑ.

අද නාස්තිය දූෂණය ඉහළ ගිහින් තියෙන්නෙ. ආණ්ඩු වෙනස් වුනත්, දූෂණයට සම්බන්ධ සුළුතර නිලධාරීන් වෙනස් වෙලා නැහැ. මේ රට හදන්න පුළුවන්, නිවැරදි දැක්මක් යටතේ වැඩකිරීමෙනුයි. අද වැඩ කරන අයට තමයි, චෝදනා කරන්නෙ. දැන් එජාපය හා ශ්‍රීලනිපය සංසන්දනය කළොත් කොටස් දෙකක්. එක පැත්තකින් පොවනවා, අනෙක් පැත්තෙන් දොවනවා. එජාපයේ ඇමැතිවරුන්ට තියෙන්නෙ පොවන අමාත්‍යාංශ. මුදල්, විදේශ කටයුතු වගේ අමාරුවෙන් කරගෙන යන අමාත්‍යාංශ. ශ්‍රීලනිපයට තියෙන්නෙ දොවන අමාත්‍යාංශ. සමෘද්ධි, කම්කරු, ක්‍රීඩා වගේ අමාත්‍යාංශ. එජාපය පොවනවා, ශ්‍රීලනිපය දොවනවා. ජනතාවට ප්‍රතිලාභ දෙන්න පුළුවන් අමාත්‍යාංශ ටික තියෙන්නෙ, ශ්‍රීලනිපයේ ඇමැතිවරු ළඟ. දැන් විශ්වාස භංගයේදී දායාසිරි ඇමැතිතුමා එක මතයක හිටියේ. ෆවුසි ඇමැතිතුමා තවත් මතයක හිටියෙ. මේක නොවෙයි, අද අවශ්‍ය වෙන්නෙ. මගේ අදහස්වලට විශ්වාස භංග අවශ්‍ය නෑ. නමුත් ජනතාව තුළින් තමයි, විශ්වාසය ගේන්න අවශ්‍ය වන්නෙ." යනුවෙන් පවසා සිටියේය.

මෙහිදී, අදහස් දක්වමින් ක්‍රීඩා අමාත්‍ය දයාසිරි ජයසේකර මහතා පවසා තිබුණේ රවි කරුණානායක හිටපු මුදල් අමාත්‍යවරයාගේ අදහස තමා වෙනස් ආකාරයකින් දකින බවය.

"තණකොළ කවන්නෙ ශ්‍රීලනිපයේ ඇමැතිවරු. දොවන්නෙ එජාපයේ ඇමැතිවරු කියල මම කල්පනා කරන්නෙ.

විශ්වාසභංග යෝජනාවේදී මම හිතට එකඟව පක්ෂපාතීව ඡන්දය භාවිත කළා. මොකද බැඳුම්කර සිද්ධිය ගැටලුකාරි නිසා මගේ හිතට එකඟව ඊට විරුද්ධව ක්‍රියා කරන්න බෑ. සම්මුතිවාදී පාලනයකදී හැමෝටම ගෞරවාන්විතව කටයුතු කරන්න අවකාශ තිබිය යුතුයි.

දැන් ශ්‍රීලනිපයේ විවිධ දේ කියනවා. පිං ඇමැතිවරු කියනවා. විවිධ නම් පට බැඳීලා. තව දවස් දෙක තුනකින් අපි මේ ආණ්ඩුවේ කටයුතු කරනවද, නැද්ද යන්න තීරණය කරනවා" යැයි දයාසිරි ජයසේකර මහතා වැඩිදුරටත් කියා සිටියේ ය.

මෙම අවස්ථාවට අමාත්‍ය ඒ.එච්.එම්. ෆවුසි මහතා ඇතුළු රජයේ මැති ඇමැතිවරු සහ නිලධාරීන් එක්ව සිටියහ.

මුදල් අමාත්‍යාංශ භූමියේ අවුරුදු උළෙල හා පොළ

සිංහල හා දෙමළ අලුත් අවුරුද්ද නිමිත්තෙන් මුදල් හා ජනමාධ්‍ය අමාත්‍යාංශය මගින් සංවිධානය කළ අවුරුදු පොළ සහ බක් මහ උළෙල අමාත්‍ය මංගල සමරවීර මහතාගේ ප්‍රධානත්වයෙන් පසුගිය අප්‍රේල් 10දා අමාත්‍යාංශ පරිශ්‍රයේදී පවත්වා තිබේ.

පසුගිය 09දා පැවැති අලුත් අවුරුදු පොළෙන් රෙදිපිළි, ආහාර ද්‍රව්‍ය, සාම්ප්‍රදායික රසකැවිලි වර්ග, විදුලි උපකරණ ඇතුළු භාණ්ඩ සහන මිලට ලබාගැනීම සඳහා අමාත්‍යාංශයේ සහ අවට කාර්යාල පරිශ්‍රවල සේවක සේවිකාවන්ට අවස්ථාව උදාවී ඇත.

කඹ ඇදීම, කොට්ටා පොර, කණා මුට්ටිය බිඳීම, අවුරුදු කුමරිය තේරීම ඇතුළු සාම්ප්‍රදායික ගැමි ක්‍රීඩා සහ විශේෂාංග රැසකින් සමන්විත බක්මහ උළෙලට අමාත්‍යාංශයේ සහ ඊට අයත් දෙපාර්තමේන්තුවල සේවක සේවිකාවන් සහ ඔවුන්ගේ දූදරුවන් විශාල පිරිසක් සහභාගී වී තිබේ. 

මුදල් හා ජනමාධ්‍ය අමාත්‍ය මංගල සමරවීර, සංවර්ධන උපාය මාර්ග සහ ජාත්‍යන්තර වෙළෙඳ කටයුතු පිළිබඳ අමාත්‍ය මලික් සමරවික්‍රම සහ මුදල් අමාත්‍යාංශ ලේකම් ආචාර්ය ආර්.එච්.එස්. සමරතුංග යන මහත්වරුන් අතින් ජයග්‍රාහකයන්ට ත්‍යාග ප්‍රදානය කිරීම සිදුකර ඇත.

DSC_0926 DSC_0942 DSC_0949 DSC_0951 DSC_0957 DSC_1427 DSC_1480 DSC_1483 Main ImageDSC_1544

කාර්මික නිෂ්පාදන දර්ශකය පෙබරවාරියේදී වර්ධනයක්

2017 වර්ෂයේ පෙබරවාරි මස නිෂ්පාදනයට සාපේක්ෂව, 2018 පෙබරවාරි මස නිෂ්පාදන කර්මාන්ත අංශයෙහි, කාර්මික නිෂ්පාදන දර්ශකයේ 0.5%ක වැඩිවීමක් වාර්තා වන බව ජනලේඛන හා සංඛ්‍යාලේඛන අධ්‍යක්ෂ ජනරාල් ආචාර්ය ඒ.ජේ.සතරසිංහ මහතා පවසයි.

ජනලේඛන හා සංඛ්‍යාලේඛන දෙපාර්තමේන්තුව විසින් 2018 පෙබරවාරි මාසය සඳහා කාර්මික නිෂ්පාදන දර්ශකය නිල වශයෙන් ප්‍රකාශයට පත්කර ඇති අතර, 2018 සහ 2017 යන වර්ෂවල පෙබරවාරි මස මෙම දර්ශකය පිළිවෙලින් 103.9ක් සහ 103.4ක් වූ බව එම දෙපාර්තමේන්තුව පවසයි.