Author Archives: ෂමිල පෙරේරා

අගෝ.2 කොමිසමට යනවා ‍කැබිනට් දා යන්න බෑ – රවි

බැඳුම්කර සිද්ධියට අදාලව සාක්ෂි විමසීමේදී, තමා පදනම් කර ගනිමින් ඉදිරිපත් වී ඇති කරුණු පිළිබඳ ලබන අගෝස්තු මස 02 වැනි දින බැඳුම්කර කොමිසම හමුවේ නිසි පිළිතුරු දෙන බව විදේශ කටයුතු අමාත්‍ය රවි කරුණානායක මහතා පවසයි.

"මේ අය නොදැනුවත්වද කැබිනට් ඇමතිවරයෙක් වශයෙන් ඊයේ මාව කොමිසම හමුවට කැඳෙව්වේ. කැබිනට් රැස්වීම තිබෙන දවසේ, මෙම කැඳවීම කර තිබුණා. ඒ නිසා නීතිඥයන් මාර්ගයෙන් මම දැනුම් දුන්නා කවදද කොමිසම හමුවට යන්නේ කියල." යැයි අමාත්‍යවරයා වැඩිදුරටත් පවසා තිබේ.

සේවක නිපුණතා සංවර්ධන සඳහා ඔස්ට්‍රේලියානු ආධාර

ශ්‍රී ලංකාව සඳහා වූ නව නිපුණතා සංවර්ධන අරමුදල (එස්.ඩී.එෆ්) ප්‍රකාශයට පත්කරමින් ඔස්ට්‍රේලියානු සංවර්ධන වැඩසටහන යටතේ රු.මිලියන 600ක මුදලක් ඒ වෙත වෙන්කර තිබේ.

ඔස්ට්‍රේලියානු මහ කොමසාරිස් බ්‍රයිස් හචිසන් සහ නිපුණතා සංවර්ධන සහ වෘත්තීය පුහුණු අමාත්‍ය චන්දිම වීරක්කොඩි යන මහත්වරුන්ගේ ප්‍රධානත්වයෙන් පසුගියදා මෙය සිදුකෙරිණි.

ශ්‍රී ලංකා ඔස්ට්‍රේලියා ඒකාබද්ධ වැඩසටහනක් ලෙස ත්‍රිකුණාමලය, මඩකලපුව, අම්පාර සහ පොළොන්නරුව යන දිස්ත්‍රික්ක හතරෙහි නවෝත්පාදක පුහුණු වැඩසටහන් සඳහා මේ යටතේ මූල්‍යාධාර හිමිවන බව ඔස්ට්‍රේලියානු මහ කොමසාරිස් කාර්යාලය පවසයි.

IMF මූලස්ථානය වොෂිංටන් සිට බීජිං නුවරට මාරු වීමක්?

චීනය ඇතුළු අනෙකුත් නැගීඑන රාජ්‍යයන්ගේ ආර්ථික වර්ධන වේගය තවදුරටත් ඉහළ යමින් පවතින්නේ නම් ඉදිරි දශකය තුළ ජාත්‍යන්තර මූල්‍ය අරමුදලේ මූලස්ථානය ඇමෙරිකාවේ වොෂිංටන් නුවර සිට චීනයේ බීජිං නුවර වෙත මාරුවීමක් සිදුවිය හැකි බව එහි ප්‍රධානී ක්‍රිස්ටීන් ලැගාඩ් පවසයි.

විදෙස් වාර්තා පෙන්වාදෙන පරිදි ලැගාඩ් සඳහන් කර ඇත්තේ, ප්‍රබල වර්ධනීය ආර්ථිකයන්හි සිදුවන වෙනස්කම් ජාත්‍යන්තර මූල්‍ය අරමුදලෙහි අධ්‍යක්ෂ මණ්ඩල ඡන්ද සංයුතියෙන් පිළිබිඹු කෙරෙනු ඇති අතර, කලාපය තුළ එහි නියෝජනය සඳහා අරමුදල් සම්පාදනයද වැඩිකළ යුතුව ඇති බවයි.

"අපේ මේ කතාබහ ඉදිරි දශකයක කාලය තුළ තවදුරටත් වොෂිංටන් කාර්යාලය තුළ සිදු නොවිය හැකියි. එය අපි බීජිං නුවර මූලස්ථානයේ සිට සිදුකරනු ඇති" යනුවෙන් ලැගාඩ් සඳහන් කර තිබේ.

ලැගාඩ් පෙන්වා දෙන්නේ මේ වනවිට ලෝකයේ නැගීඑන ආර්ථිකයන් ඉතා බලවත් ලෙස වර්ධනය වන අතර, ඔවුන්ගේ බලපෑමද ප්‍රබල තත්ත්වයක පවතින බවයි.

එමෙන්ම, එහි ප්‍රධාන මූලස්ථානය අරමුදලේ විශාලතම ආර්ථිකය හිමි රාජ්‍ය තුළ ස්ථාපිත කිරීම සඳහා වූ අතුරු ව්‍යවස්ථාවක් ගෙනඒම සම්බන්ධයෙන් ඇය අදහස් දක්වා තිබේ.

මීට වසර 70කට පෙර ජාත්‍යන්තර මූල්‍ය අරමුදල පිහිටුවීමේ සිට මේ දක්වා ඇමෙරිකා එක්සත් ජනපදය එහි මූලස්ථානය පිහිටි රාජ්‍යය විය. ඒ අනුව, ජාත්‍යන්තර මූල්‍ය අරමුදලේ තීරණ ගැනීමෙහි ප්‍රබල නිෂේධ බලයක් ඇමෙරිකාව සතුවූ අතර, එහි අධ්‍යක්ෂ මණ්ඩල ඡන්ද සංයුතියෙහි 16.5% ක කොටසක්ද ඔවුන් සතු විය.

චීනය මේ වනවිට පෙන්වා ඇති 6% කට වඩා වැඩි ආර්ථික වර්ධන පුරෝකථනය අනුව ඉදිරි වසර 10ක කාලය තුළ දළ දේශීය නිෂ්පාදිතයෙන් ඇමෙරිකාව අභිභවා ලෝකයේ විශාලතම ආර්ථිකය හිමි රට බවට චීනය පත්වනු ඇති බව විශ්ලේෂකයන් පෙන්වා දී තිබේ.

මේ අතර, ඇතැම් ආර්ථික විශ්ලේෂකයන් පෙන්වාදී ඇත්තේ චීනය මේ වනවිටත් ගෝලීය ආර්ථික වර්ධනය වෙනුවෙන් වැඩි දායකත්වයක් ලබාදෙන රාජ්‍ය ලෙස කටයුතු කරන බවයි.

ජාත්‍යන්තර මූල්‍ය අරමුදලේ අධ්‍යක්ෂ මණ්ඩල ඡන්ද සංයුතිය අවසන් වරට සීරුමාරු කරනු ලැබුවේ 2010 වසරේදීය. එහිදී, චීනයේ දායකත්වය කොටස දැක්වුණේ 6.41% ක් ලෙසිනි. කෙසේ වෙතත්, ජාත්‍යන්තර මූල්‍ය අරමුදල ඉදිරි වසර තුළද මෙම සංයුතියේ සීරුමාරු කිරීමක් සිදුකිරීමට සැලසුම් කර ඇති බවද විදෙස් වාර්තා වැඩිදුරටත් පෙන්වා දෙයි.

භාණ්ඩාගාර බැඳුම්කර සඳහා නව ප්‍රාථමික නිකුතු ක්‍රමයක්

භාණ්ඩාගාර බැඳුම්කර සඳහා නව ප්‍රාථමික නිකුතු ක්‍රමයක් හඳුන්වාදීමට ශ්‍රී ලංකා මහ බැංකුව කටයුතු කර තිබේ.

2015 පෙබරවාරි මාසයේ සිට භාණ්ඩාගාර බැඳුම්කර සඳහා ක්‍රියාත්මක වූ සම්පූර්ණ වෙන්දේසි ක්‍රමය මත පදනම් වූ නිකුතු ක්‍රමය වෙනුවට 2017 ජූලි 27දා සිට මෙම නව ක්‍රමය බලපැවැත්වෙන බව ශ්‍රී ලංකා මහ බැංකුව පවසයි.

රජයේ දේශීය ණය ගැනීම් හි කාර්යක්ෂමතාව සහ විනිවිදභාවය තවදුරටත් වර්ධනය කිරීම මෙම නව ක්‍රමය හඳුන්වාදීමේ මූලික පමාර්ථය බවද මහ බැංකුව පවසයි. එමෙන්ම, මෙම නව ක්‍රමය වඩා ව්‍යුහගත ක්‍රමයක් වන අතර, ඊට ක්‍රමවත් ලෙස සැලසුම් කළ බැඳුම්කර නිකුතූන් ඇතුළත් වන බවද පෙන්වා දෙයි.

සෑම මාසික නිකුතුවකදීම විවිධ කල්පිරීම් කාල සහිත භාණ්ඩාගාර බැඳුම්කර කාණ්ඩ දෙකක් ඉදිරිපත් කෙරෙන අතර, එම කාණ්ඩවල පරිණතීන් වෙළෙඳ පොළ තුළ පවතින සම්පත් හා ගැළපීම් අපේක්ෂා කෙරෙන බවද ශ්‍රී ලංකා මහ බැංකුව වැඩිදුරටත් පවසයි.

දත්ත අනාවරණයක් ගැන මහ බැංකුවෙන් පරීක්ෂණයක්

පෞද්ගලික බැංකුවක පාරිභෝගිකයන් 4,630කගේ දත්ත අනාවරණය වීම නොසැලකිල්ලක් හේතුවෙන් සිදුව ඇති බව මූලික පරීක්ෂණයෙන් අනාවරණය වූ බව ශ්‍රී ලංකා මහ බැංකුව මහජනතාව වෙත දැනුම් දෙයි.

එමෙන්ම, මෙය බැංකුවේ අභ්‍යන්තර කළමනාකාරීත්වයේ අත්වැරැද්දක්ද යන්න පිළිබඳව මහ බැංකුව හා අදාළ පෞද්ගලික බැංකුව විසින්ද තවදුරටත් පරීක්ෂණ සිදුකෙරෙන බවද ශ්‍රී ලංකා මහ බැංකුව පවසයි.

ජුනි මස උද්ධමනයේ අඩුවීමක්

2017 ජුනි මාසය සඳහා උද්ධමනය, ලක්ෂ්‍යමය පදනම මත 6.3% ක් ලෙස ගණනය කර ඇති අතර, 2017 මැයි මාසයේ වාර්තා වූ 7.1% ක උද්ධමනය සමග සැසඳීමේදී ජුනි උද්ධමනයේ අඩුවීමක් පෙන්නුම් කර ඇත.

ජාතික පාරිභෝගික මිල දර්ශකය නිවේදනය කරමින් ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්‍ෂ ජනරාල් ආචාර්ය අමර සතරසිංහ මහතා මෙම මෙම දත්ත නිවේදනය කරනු ලැබීය.

අතුරුදන් වූවන් කාර්යාලය බලගැන්වීමේ ඊළඟ පියවරට ජනපති අනුමැතිය

අතුරුදන් වූවන් පිළිබඳ සොයාබැලීම සඳහා වන කාර්යාලය බලගැන්වීමේ ඊළඟ පියවර වෙනුවෙන් ජනාධිපති මෛත්‍රීපාල සිරිසේන මහතාගේ අනුමැතිය හිමිවූ බව විදේශ කටයුතු අමාත්‍ය රවි කරුණානායක මහතා පවසා සිටියේය.

අමාත්‍යවරයා මේ බව සඳහන් කළේ ඊයේ (20දා) පස්වරුවේ විදේශ කටයුතු අමාත්‍යංශයේ පැවැති ප්‍රවෘත්ති සාකච්ඡාවකදී නැගුණු ප්‍රශ්නයකට පිළිතුරු දෙමිනි.

එහිදී, රවි කරුණානායක මහතා සඳහන් කළේ අණ්ඩුක්‍රම ව්‍යවස්ථා මණ්ඩලය හරහා අදාළ කාර්යාලයට සාමාජිකයන් පත්කිරීම ඉදිරියේදී සිදුකෙරෙනු ඇති බවයි.

ඉ-ස්වාභිමානී සම්මාන ප්‍රදානයට නාමයෝජනා ගනී

සමාජ සුබ සිද්ධිය සඳහා බලපෑමක් කළ හැකි නවෝත්පාදක හා නිර්මාණාත්මක නිමැයුම් හෝ යෙදවුම් ජාතික ඇගැයීමට ලක් කෙරෙන ඩිජිටල් සමාජ සවිබල ගැන්වීමේ 2017 ඉ-ස්වාභිමානී සම්මාන ප්‍රදානය සඳහා නාමයෝජනා භාරගැනීම අරඹා තිබේ.

ඒ අනුව, ජූලි මස 25දා දක්වා නාමයෝජනා බාරගැනීම සිදුකරන බව ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායතනය (ICTA) පවසයි.

මෙවර සම්මාන ප්‍රදානෝත්සවය පැවැත්වෙන්නේ 07 වැනි වතාවට වන අතර, ශ්‍රී ලංකා තොරතුරු හා සන්නිවේදන තාක්ෂණ නියෝජිතායතනය වාර්ෂිකව මෙය සංවිධානය කරනු ලබයි.

රාජ්‍ය හා පුරවැසි සහභාගිත්වය, සෞඛ්‍ය හා සුභසාධනය, ඉගෙනුම හා අධ්‍යාපනය, පරිසරය හා හරිත බලශක්තිය, සංස්කෘතිය සංචාරක ව්‍යාපාරය, සුහුරු ජන ස්ථාපනය හා නාගරීකරණය, ව්‍යාපාර හා වානිජ්‍ය, අන්තර්ග්‍රහනය හා බලගැන්වීම, ඩිජිටල් විනෝදාස්වාදය යන අංශ යටතේ නාම යෝජනා භාරගැනීම සිදුවෙයි.

මෙම සම්මාන ප්‍රදානයට පාත්‍රවන නිර්මාණකරුවන්ට ජාත්‍යන්තර වශයෙන් පැවැත්වෙන විශ්ව සමුළු සම්මාන ප්‍රදානෝත්සවය නියෝජනය කිරීමේ අවස්ථාව උදාවන බවද නියෝජිතායතනය පවසයි.

ඩෙංගු තුරන් කිරීමට ඩො.මි. එකහමාරක ආධාර – බිෂොප්

ශ්‍රී ලංකාවේ ඩෙංගු රෝගය මැඬලීම සඳහා ඇ.ඩො.මිලියන එකහමාරක ආධාර ලබාදීමට ඔස්ට්‍රේලියානු රජය කටයුතු කරන බව එරට විදේශ කටයුතු අමාත්‍ය ජූලි බිෂොප් මහත්මිය පවසයි.

එහිදී, විශේෂයෙන්ම ලෝක සෞඛ්‍ය සංවිධානය හරහා ඩොලර් ලක්ෂ 5ක ආධාර ලබාදෙන බවත්, මෙම ආධාර යොදා ගනිමින් රෝහල්වල ප්‍රතිකාර කිරීමේ ප්‍රමුඛතාව සහ රෝගි කළමනාකරණය පුළුල් කිරීම, පිරිසුදු කිරීම, මහජන දැනුවත් කිරීම් සහ ආවේක්ෂණ පද්ධති ද ඇතුළත් වන පරිදි පරිපූර්ණ ඩෙංගු වැළැක්වීමේ සහ පාලනය කිරීමේ වැඩසටහනක් ක්‍රියාත්මක කිරීමට ලෝක සෞඛ්‍ය සංවිධානය සහයෝගය ලබාදෙන ඇති බවත් ඇය කියයි.

ඔස්ට්‍රේලියානු රජයේ ඇ.ඩො.මිලියනයක ආධාර සහිතව ශ්‍රී ලංකාවේ දියත් කෙරෙන ඩෙංගු රෝගය තුරන් කිරීමේ වැඩසටහන, ඔස්ට්‍රේලියානු ආධාර වැඩසටහනේ කාර්ය සාධනය සහ ප්‍රතිඵලදායී බව ඉහළ නැංවීම සඳහා විදේශ කටයුතු සහ වෙළෙඳ දෙපාර්තමේන්තුව තුළ ස්ථාපිතක කර ඇති නිවෝත්වාදන හුවමාරුව මගින් සම්බන්ධ කරනු ලැබ තිබේ.

ගෘහ කාණ්ඩ සියයට 90ක ආහාර සුරක්ෂිතයිලු

ශ්‍රී ලංකාවේ මුළු ගෘහ කාණ්ඩ අතරින් ආහාර සුරක්‍ෂිත වු ගෘහ කාණ්ඩ ප්‍රතිශතය 90% ක් තරම් ඉහළ අගයක් වන බව ජනලේඛන හා සංඛ්‍යාලේඛන දෙපාර්තමේන්තුවේ අධ්‍යක්‍ෂ ජනරාල් ආචාර්ය අමර සතරසිංහ මහතා පවසයි.

ජනලේඛන හා සංඛ්‍යාලේඛන දෙපාර්තමේන්තුව විසින් ගෘහ කාණ්ඩවල ආහාර සුරක්ෂිතතාවය පිළිබඳ සමීක්‍ෂණය ප්‍රථම වතාවට 2013/14  යන වසරවලදී සිදුකළ අතර, මුළු දිවයිනම නියෝජනය වන පරිදි නිවාස ඒකක 25,000 ක නියැදියක් මේ සඳහා භාවිත කර තිබේ.

කාර්යක්‍ෂම හා නීරෝගි ජීවිතයක් සඳහා රටක සියලු වැසියන්ට සෑම අවස්ථාවකදීම ප්‍රමාණවත් ලෙස ආරක්ෂිත සහ පෝෂ්‍යදායී ආහාර ලබාගැනීමට ඇති හැකියාව ආහාර සුරක්‍ෂිතතාව ලෙස සළකයි.