Author Archives: සංජීව ධර්මසේන

පොදු රාජ්‍ය මණ්ඩලීය පදක්කම් දිනූවෝ ඇගයෙති

ඔස්ට්‍රේලියාවේ ගෝල්ඩ්කෝස්ට් නුවරදී පසුගියදා (15දා) නිමා වූ 21 වැනි පොදු රාජ්‍ය මණ්ඩලීය ක්‍රීඩා උළෙලේ පදක්කම් ලාභී සියලු ක්‍රීඩක ක්‍රීඩිකාවන් පිළිගැනීමේ උත්සවයක් ක්‍රීඩා අමාත්‍යාංශයේදී අද (19දා) පැවැත්විණි.

මෙවර පොදු රාජ්‍ය මණ්ඩලයීය ක්‍රීඩා උළෙලේදී ශ්‍රී ලංකාව රිදී පදක්කමක් සහ ලෝකඩ පදක්කම් 05ක් සමගින් පදක්කම් 06ක් දිනාගනිමින් සමස්ත තරගාවලියේ 31 වැනි ස්ථානය දිනාගැනීමට සමත්විය. මෙය පොදු රාජ්‍ය මණ්ඩලයීය ක්‍රීඩා ඉතිහාසයේ ශ්‍රී ලංකාව දිනූ වැඩිම පදක්කම් සංඛ්‍යාව ලෙසද ඉතිහාසයට එක්විය.

ඒ අනුව බර ඉසිලීමෙන් පදක්කම් දිනූ ඉන්දික දිසානායක (රිදී), චතුරංග ලක්මාල්, හංසනී ගෝමස් මෙන්ම බොක්සිං ඉසව්වෙන් පදක්කම් දිනූ අනූෂා කොඩිතුවක්කු, ඉශාන් බණ්ඩාර හා තිවංක රණසිංහ මෙහිදී ඇගයීමට ලක්විය.

මෙම වසර ආරම්භයේදී හිටපු ක්‍රීඩා අමාත්‍ය දයාසිරි ජයසේකර මහතා විසින් ජාත්‍යන්තර තරග සඳහා ඉදිරිපත් වී පදක්කම් ජයග්‍රහණය කරන ක්‍රීඩක ක්‍රීඩිකාවන්ට ක්‍රීඩා ශක්ති අරමුදලෙන් ලබාදෙන ත්‍යග මුදල් වැඩිකළ අතර, ඒ වෙනුවෙන් ත්‍යාග ලිපි ලබාදීම අද (19දා) සිදුකෙරිණි.

මෙම අවස්ථාවට නව ක්‍රීඩා අමාත්‍ය (තාවකාලික) පළාත් සභා හා පළාත් පාලන අමත්‍ය ෆයිසර් මුස්තාෆා, හිටපු ක්‍රීඩා අමාත්‍ය දයාසිරි ජයසේකර, ක්‍රීඩා සංවර්ධන දෙපාර්තමේන්තුවේ අධ්‍යක්‍ෂක ජනරාල් බුවනෙක හේරත්, ඔලිම්පික් රිදී පදක්කම් ලාභි සුසන්තිකා ජයසිංහ යන මහත්ම මහත්මීහු ඇතුළු පිරිසක් සහභාගි වූහ.

මෙම උත්සවය හා සමගාමීව නව ක්‍රීඩා අමාත්‍යවරයා ක්‍රීඩා අමාත්‍යාංශයේ රාජකාරි කටයුතු භාර ගැනීමද සිදු වූ අතර, ඒ සඳහා මෙරට තිබෙන බහුතර ක්‍රීඩා සංගම් නියෝජනය කරමින් එම සංගම්හි සමාජිකයෝද සහභාගි වූහ.

 

AID_8824 AID_8833 AID_8860 AID_8887 AID_8890 AID_8894 AID_8897 AID_8908 AID_8912 AID_8920 AID_8922 AID_8924 AID_8926 AID_8929 AID_8931

AID_8945

 

ඡායාරූප- ඉසුරු ෙපර්රා

අධ්‍යාපන අමාත්‍යාංශයේ අවසරකින් තොරව පාසල් බැඩ්මින්ටන් සංගමය මුදලට හැඳුනුම්පත් හදලා

අධ්‍යාපන අමාත්‍යංශයේ නිත්‍යනුකූල අනුමැතියකින් තොරව පාසල් බැඩ්මින්ටන් සංගමය විසින් ඉදිරියේදී තරග සඳහා ඉදිරිපත් වන ළමුන්ගෙන් මුදල් අයකරගෙන හැඳුනුම්පත් සැකසීමේ වැඩපිළිවෙළක් ක්‍රියාත්මක කරගෙන යන බව 'අදට' වාර්තා වේ. මෙම හැඳුනුම්පත වසර තුනකට වලංගු වන පරිදි සකසන අතර, ඒ අනුව වර්ෂයකට රුපියල් 50 බැගින් රුපියල් 150ක මුදලක් අය කෙරේ.

හැඳුනුම්පත් සැකසීමට අදාළ කරුණු දැක්වෙන පොදු උපදෙස් පෝරමය සෑම පාසලකටම ලබාගත හැකි පරිදි යොමුකර ඇති අතර, එමගින් සෑම ක්‍රීඩකයෙකුම හා ක්‍රීඩිකාවකම මෙම හැඳුනුම්පත අනිවාර්යයෙන් සකසාගත යුතු බවට නිල නොවන පරිදි අණ කර ඇත.

මේ සම්බන්ධයෙන් ඇතැම් පාර්ශ්වයන් පෙන්වා දෙන්නේ, හැඳුනුම්පත් සැකසීමට යැයි කියා පාසල් බැඩ්මින්ටන් සංගමය මුදල් උපයා ගැනීමේ ව්‍යාපාරයක නියැළී සිටින බවයි. විශේෂයෙන් හැඳුනුම්පත් සැකසීමට අයකරගන්නා මුදල් පාසල් බැඩ්මින්ටන් සංගමයේ නීත්‍යනුකූල ගිණුමක් තිබියදී වෙනත් පෞද්ගලික ගිණුමකට බැර කරවා ගැනීම ගැටලු සහගත බව ඔවුන්ගේ අදහසයි.

මෙතෙක් කලක් පාසල් ළමුනට තරග සඳහා ඉදිරිපත්වීමට උප්පැන්න සහතිකය හෝ තැපැල් හැඳුනුම්පත හා පාසලේ විදුහල්පතිවරයා සහතික කළ ඡායාරූපයක් තිබීම ප්‍රමාණවත් විය. එවන් තත්ත්වයකදී මෙලෙස හැඳුනුම්පත් සැකසීමක් සිදුවීම ගැටලු සහගතය. එමනිසා මේ පිළිබඳව සොයාබැලීමක් සිදුකිරීම අධ්‍යාපන අමාත්‍යාංශයේ වගකීමක් බව අප පෙන්වා දෙමු.

පාසල් බැඩ්මින්ටන් සංගමයට මෙලෙස හැඳුනුම්පත් සැකසීමට අවශ්‍ය මුදල් අයකර ගැනීමට අවසර ලබාදී තිබෙනවා දැයි අප අධ්‍යාපන අමාත්‍යාංශයේ ලේකම් සුනිල් හෙට්ටිආරච්චි මහතාගෙන් විමසීමක් කළ අතර, එහිදී හෙතෙම පවසා සිටියේ අධ්‍යාපන අමාත්‍යාංශයේ උපදේශක (ක්‍රීඩා හා ශාරීරික අධ්‍යාපන) සුනිල් ජයවීර මහතාගෙන් මේ පිළිබඳ තොරුතුරු විමසන ලෙසයි. ඒ අනුව අප ඒ මහතාගෙන් විමසීමක් කළෙමු‍.

සංගමයේ ගිණුමක් තිබියදී පෞද්ගලික ගිණුමකට මුදල් බැර වෙනවා නම් ඒක වැරදියි

අධ්‍යාපන අමාත්‍යාංශයේ උපදේශක (ක්‍රීඩා හා ශාරීරික අධ්‍යාපන) සුනිල් ජයවීර

"හැඳුනුම්පතක් හදනවා කියලා නම් දන්නවා, ඒත් අනුමැතියක් දීලා තියෙනවාද දන්නේ නැහැ. කර්නල් (මංජුල කාරියවසම්) දුන්නද දන්නේ නැහැ. මට කවුරුහරි එක්කෙනෙක් පැමිණිලි කළා මෙහෙම හැඳුනුම්පත් හදනවා කියලා. නමුත් මට ඇත්ත වශයේම ඒ ගැන හොයන්න බැරි වුණා. හැඳුනුම්පතක් නම් හැදුවට කමක් නැහැ, නමුත් සංගමයේ ගිණුමක් තිබියදී පෞද්ගලික ගිණුමකට මුදල් බැර වෙනවා නම් එක වැරදියි. මාව ඒ සම්බන්ධයෙන් දැනුවත් කරලා නැහැ. මට පාසල් දෙකකින්ම දුරකථනයෙන් මේ ගැන කිවුවා. ඔවුන් කිවුවා ළමයින්ට මුදල් දෙන්නත් බැහැ, පාසලෙන් දෙන්න ගියොත් විශාල මුදලක් වැයවෙනවා කියලා. සමහර පාසල්වල විශාල ළමුන් සංඛ්‍යාවක් බැඩ්මින්ටන් ක්‍රීඩා කරනවා. ඒ නිසා මේ ගැන සොයා බැලීමක් කරනවා".

මම දන්න තරමින් මගෙන් අවසර අරගෙන නැහැ

අධ්‍යාපන අමාත්‍යාංශයේ අධ්‍යක්‍ෂ මංජුල කාරියවසම්

මේ සම්බන්ධයෙන් අධ්‍යාපන අමාත්‍යාංශයේ අධ්‍යක්‍ෂ (ශාරීරික අධ්‍යාපන හා බාහිර ක්‍රියාකාරකම්) මංජුල කාරියවසම් මහතාගෙන්ද විමසීමක් කළේය.

 "මම දන්න තරමින් ඒ අය (පාසල් බැඩ්මින්ටන් සංගමය) මගෙන් අවසර අරගෙන නැහැ. කිසියම් ලිපියකට අත්සන් කළා නම් මම ඒ ගැන දන්නවා. අපි කිසිම ළමයෙකුගෙන් මුදල් එකතු කරන්න අවසර ලබාදෙන්නේ නැහැ. අපි පාසල් සංගම්වලට කියලා තියෙන්නේ සෑම අවස්ථාවකම අනුග්‍රාහකයෙකු හොයාගෙන දෙමාපියන්ටවත්, ළමයින්ටවත් කරදරයක් නොවන ලෙස තරගාවලි පවත්වන්න කියලා.

ඒ නිසයි අපි නීති රීති දාලා ක්‍රමවත් විදිහට කරගෙන යන්නේ. කිසිම අවස්ථාවක අනවශ්‍ය දේවල්වට අනුමැතිය දෙන්නේ නැහැ. ඒ නිසා මේ සම්බන්ධයෙන් මම සම්පූර්ණයෙන් හොයා බලනවා. අපි වැරදි දෙයක් කරන්න සංගම්වලට අවස්ථාව ලබාදෙන්නේ නැහැ" යැයි පැවසීය. මේ සම්බන්ධයෙන් තවදුරටත් අදහස් දක්වමින් හෙතෙම පවසා සිටියේ, මේ පිළිබඳ සොයා බලා සවිස්තරාත්මක වාර්තාවක් ලබාදෙන බවයි.

සංගමයට ආදායමක් උපයාගන්න තමයි හැඳුනුම්පත් හදන්නේ

පාසල් බැඩ්මින්ටන් සංගමයේ භාණ්ඩාගාරික සුජීවා ද සිල්වා

මෙලෙස හැඳුනුම්පත් සකසන්ගේ ඇයි දැයි සහ ඒ වෙනුවෙන් අයකරන මුදල් පාසල් සංගමයේ ගිණුමට බැර නොවී පෞද්ගලික ගිණුමකට බැර කරන්නේ ඇයි දැයි අප පාසල් බැඩ්මින්ටන් සංගමයේ භාණ්ඩාගාරික සුජීවා ද සිල්වා මහත්මියගෙන් කරුණු විමසා සිටියෙමු.

එහිදී ඒ මහත්මිය,

"හැඳුනුම්පත් සැකසීමට අදාළ මුදල් පාසල් බැඩ්මින්ටන් සංගමයේ ගිණුමට මුදල් බැර වෙන්නේ නැහැ. ගනුදෙනු පියවා ගැනීමේ පහසුව නිසයි වෙනත් ගිණුමක් විවෘත කළේ. මොකද අපි හැඳුනුම්පත් හදනකොට ඒ අයට මුදල් ගෙවන්න ඕන. නමුත් අපි සියලුදෙනාම ගුරුවරු. අපේ වැඩකටයුතුත් එක්ක හැඳුනුම්පත් හදන හැම වෙලාවෙම මුදල් ගෙවීම් කර කර ඉන්න වෙලාවක් අපිට නැහැ. ඒ නිසා අපේ නිලධාරීන්ගේ විශ්වාසය මත තමයි එම මුදල් පෞද්ගලික ගිණුමකට බැර කරලා ඒ කටයුතු සඳහා වෙනම කෙනෙක් පත්කරලා තියෙන්නේ.

මේ මුදල් කිහිප දෙනෙකු අතරේ නෙමෙයි, එක්කෙනෙකු අතරෙයි වෙන්නේ. මුදල් සම්බන්ධ වගකීම අපි දරණවා. මේ මුදල් අයකිරීමේදී ගැටලු කිහිපයක් ආවා. සමහර අය අපේ ගිණුමටත් (පාසල් බැඩ්මින්ටන් සංගමයේ) මුදල් දාලා තියෙනවා.

අපේ සංගමයෙන් 2017 ජනවාරි මාසයේ ඉඳන් කිසිම පාසලකින් මුදලක් අය කරන්නේ නැහැ. ෂට්ල්ස්, සහතික, කුසලාන යනාදී ගොඩක් දේවල් අපි දීලා තියෙනවා. ඒවට පාසලකින් මේ දක්වා කිසිම මුදලක් අය කරගෙන නැහැ. ජාතික කනිෂ්ඨ තරගාවලියට නම් අපි ළමයින්ගෙන් මුදලක් අය කරනවා, නමුත් ඒකත් රුපියල් 300කට අඩුයි.

එමනිසා සංගමයට කිසිම ආදායමක් නැහැ. ඒ නිසා තමයි අලුත් යෝජනාවක් විදියට හැඳුනුම්පතක් හදලා ආදායමක් උපයාගමු කියලා පසුගිය වසරේ නාවලපිටියේ පැවැති තරගාවලියේදී සංගමය තීරණය කළේ. අපි වසරකට රුපියල් 50ක් ලෙස වසර තුනට රුපියල් 150ක් අයකර ගන්නවා.

අපට ඕනෑම වේලාවක පාසල්වලින් එකතුවෙලා තියෙන මුදල් ප්‍රමාණය දැනගන්න පුළුවනි. දැනට එකතුවෙලා තියෙන ටික මේ මහ සභා රැස්වීමේදී ඉදිරිපත් කරනවා. සියලුම පාසල්වලින් හැඳුනුම්පත් හදන්න තාම අයදුම්පත් යොමු කරලා නැහැ" යැයි පවසා සිටියාය.

1

 

 

ජාතික කනිෂ්ඨ මලල ක්‍රීඩා තරගාවලිය කල් යයි

postponed copy copy

ශ්‍රී ලංකා මලල ක්‍රීඩා සංගමය වාර්ෂික සංවිධානය කරන ජාතික කනිෂ්ඨ මලල ක්‍රීඩා තරගාවලිය එළඹෙන අප්‍රේල් මාස දක්වා කල් දැමීමට එම සංගමය තීරණය කර ඇත. ජාතික කනිෂ්ඨ මලල ක්‍රීඩා තරගාවලිය පළමුව මේ මස 27, 28 හා 29 තෙදින තුළ සුගතදාස ක්‍රීඩාංගණයේදී පැවැත්වීමට නියමිතව තිබුණත් ලබන මස 2,3,4, දිනයන්හි පැවැත්වීමට තිබුණි.

කෙසේ වෙතත් නැවතත් මෙම තරගාවලිය අප්‍රේල් මස 23, 24, 25 හා 26 දිනවල කොළඹ සුගතදාස ක්‍රීඩාංගණයේදී පැවැත්වීමට සැලසුම් කර තිබේ. සුගතදාස ක්‍රීඩාංගණයේ ධාවන පථය නවිකරණය කිරීම මේ සඳහා හේතුව වන අතර ධාවන පථය නවීකරණය කිරිමෙන් පසුව පැවැත්වෙන පළමු තරගය මෙය වෙයි.

 

 

 

 

මහනුවර මහා ක්‍රිකට් තරග සඳහා දින නියම වෙයි

පැවති අර්බුදකාරී තත්ත්වය හමුවේ මහනුවර නගරයේ ප්‍රධාන පාසල් කිහියක් අතර පැවැත්වීමට තිබූ මහා ක්‍රිකට් තරග දින නියමයක් නොමැතිව කල් දැමුණු අතර අදාළ දින මේ වන විට ප්‍රකාශයට පත් කර ඇත.

ඒ අනුව ත්‍රිත්ව විද්‍යාලය සහ ශාන්ත අන්තෝනි විද්‍යාලය අතර පැවැත්වෙන කඳුරට නිල් මහා සටන මාර්තු 16 සහ 17 දෙදින තුළ අස්ගිරිය ක්‍රිකට් ක්‍රීඩාංගනයේදී පැවැත්වෙනු ඇත. ශාන්ත සිල්වෙස්ටර් සහ විද්‍යාර්ථ විද්‍යාලය අතර පැවැත්වෙන සුරතලුන්ගේ සංග්‍රාමය මාර්තු 21 හා 22 දෙදින තුළ පල්ලෙකැලේ ජාත්‍යන්තර ක්‍රිකට් ක්‍රීඩාංගනයේදී පැවැත්වෙනු ඇත.

එසේම දැනට කිංස්වුඩ් විද්‍යාලය සහ ධර්මරාජ විද්‍යාලය අතර පැවැත්වෙන කන්ද උඩරට සුලෝහිත සංග්‍රාමය මාර්තු 16 සහ 17 දෙදින පල්ලෙකැලේ ජාත්‍යන්තර ක්‍රීඩාංගනයේ පැවැත්වීමට නියමිතව ඇතැයි වාර්තා වන අතර එය හෙට(13දා) දීනයේදී නිශ්චිතව ප්‍රකාශයට පත් කරනු ඇත.

රොස් ටේලර් නොතිබූ ජයක් නවසීලන්තයට ගෙනෙයි

ක්‍රීඩා ලෝලීන්ට අමතක නොවන තරගයක් දැකබලා ගැනීමට අවස්ථාව උදාකර දුන් රොස් ටේලර්ගේ අනගි ඉනිම හේතුවෙන් සංචාරක එංගලන්ත කණ්ඩායම පරාජය කර කඩුලු 05ක විශිෂ්ට ජයක් ලැබීමට සත්කාරක නවසීලන්ත කණ්ඩායම ඊයේ (07දා) සමත් විය. මේ අනුව කණ්ඩායම් දෙකම තරග 05කින් යුත් තරගාවලියේ මේ වන විට තරග 2-2ක් ලෙස සම තත්ත්වයේ පසු වෙයි.

ඩුනේඩින්හිදී පැවැති මෙම තරගයේ පළමුව පන්දුවට පහරදුන් එංගලන්ත කණ්ඩායම පන්දුවාර 50 තුළදී කඩුලු 09ක් දැවී ලකුණු 339ක් රැස්කිරීමට සමත් විය.

පිළිතුරු ඉනිම ක්‍රීඩා කළ නවසීලන්ත කණ්ඩායම තරගයේ 49.3 වැනි පන්දුවෙදී සිය ඉලක්කය පසුකර යෑමට සමත් විය. මෙහිදී විශිෂ්ට ඉනිමක් ක්‍රීඩා කළ රොස් ටේලර් නොදැවී ලකුණු 181ක් රැස්කිරීමට සමත් වූ අතර, එය ඔහුගේ එක්දින දිවියේ හොඳම ඉනිමද වේ. තරගයේ වීරයා සම්මානයද ටේලර්ට හිමිවිය.

 

 

හියුස්ට මරු කැඳ වූ ඇබට්ගෙන් යළිත් මාරාන්තික පන්දුවක්

පන්දුවක් හිසේ වැදී අවාසනාවන්ත අකල් මරණයකට ගොදුරු වූ ඔස්ට්‍රේලියානු ආරම්භක වමත් පිතිකරු ෆිල් හියුස් දිවියෙන් සමුගෙන මේ වනවිට වසර තුනකටක් වැඩිය. හියුස් දිවියෙන් සමුගත් එම ෂෙෆින් ෆීල්ඩ් තරගාවලියේ ඊයේ (04දා) පැවැති තරගයකදී හියුස්ගේ දැවී යාම සිහිගන්වමින් වික්ටෝරියානු ප්‍රාන්ත කණ්ඩායමේ යොවුන් ක්‍රීඩකයෙකු වන 20 හැවිදිරි විල් පුකොව්ස්කිද පන්දුවක් හිසේ වැදී රෝහල වෙත රැගෙන ගියේය.

මෙහි ඇති සුවිශේෂත්වය වන්නේ පුකොව්ස්කිට මෙම පන්දුවද යොමු කළ පන්දු යවන්නා වූයේ, ෆිල් හියුස්ට මරු කැඳ වූ පන්දු යවන්නා වූ නිව් සවුත්වේල්ස් කණ්ඩායමේ ෂෝන් ඇබට් වීමයි.

සිතාමතා යොමු නොකළත්, හියුස්ට එම අවාසනාවන්ත පන්දුව යොමු කිරීමෙන් කලක් දැඩි කනස්සල්ලට පත්ව සිටි ෂෝන් ඇබට්ට මෙම සිදුවීමද මනසට දැඩි වේදනාකාරී විය. මෙහිදී ඔහු, විල් පුකොව්ස්කිව වෛද්‍ය කණ්ඩායම විසින් රැගෙන යනවිට මහත් වේදනාවෙන් ඒ දෙස බලා සිටිනු දක්නට ලැබුනු අතර, වේදනාව දරාගනු නොහී ඔහු හඬනු දක්නට ලැබිනි. කෙසේ නමුත් විල්ගේ තත්ත්වය බරපතළ නොවන බව මෙල්බර්න් නුවරින් වාර්තා වේ.

මෙය ෆිල් හියුස්ට තරම් ඉහළින් එල්ල කළ පන්දුවක් නොවුනද, පිතිකරු පන්දුව මගහැරීමට පහත් වීමත් සමග මෙම අනතුර සිදු විය.

දකුණු ඔස්ට්‍රේලියානු කණ්ඩායම වෙනුවෙන් ක්‍රීඩා කරමින් සිටි ෆිල් හියුස්ද මෙම තරගාවලියේ පසුගිය 2014 වසරේ නොවැම්බර් මසදී පන්දුව හිසේ වැදී දිවියෙන් සමගත් අතර, එය එතෙක් මෙතෙක් ක්‍රිකට් ලොව කැළඹූ මරණයක් විය.

නිදහස් කුසලානයෙන් බිලියනයක ලාබයක් උපයනවා – තිලංග

ශ්‍රී ලංකා ක්‍රිකට් ආයතනය සංවිධානය කරනු ලබන 'නිදහස් කුසලාන' විස්සයි20 තරගාවලියෙන් රුපියල් මිලියන 1000ක ශූද්ධ ලාභයක් උපයා ගැනීමට බලාපොරොත්තු වන බව ශ්‍රී ලංකා ක්‍රිකට් ආයතනයේ සභාපති තිලංග සුමතිපාල මහතා පැවසීය.

ශ්‍රී ලංකාව, ඉන්දියාව හා බංග්ලාදේශය සමග එළඹෙන මාර්තු මාසයේදී පැවැත්වෙන විස්සයි20 තුන්කොන් ක්‍රිකට් තරගාවලිය පිළිබඳ කොළඹදී අද (08දා) පැවති මාධ්‍ය හමුවකදී  අදහස් දක්වමින් හෙතෙම මේ බව පවසා සිටියේය.

මෙහිදී තවදුරටත් අදහස් දැක්වූ සභාපතිවරයා,

"අපි මේ වගේ තරගකාරී තරගාවලියක් සෑම වසරකම පවත්වන්න ඕන. එමගින් දේශීය ක්‍රිකට් හා ජාත්‍යන්තර ක්‍රිකට් අතර තිබෙන පරතරය අඩුවෙනවා. විශේෂයෙන් ක්‍රීඩකයන්ගේ ශක්තියත් වැඩිවෙනවා. ඒ වගේම හොඳ ආදායමක් බලාපොරොත්තු වෙනවා. සියලු ආදායම් දේශීය ක්‍රිකට්වල උන්නතිය වෙනුවෙන් ආයෝජනය කරනවා.

අපි විශ්වාස කරනවා ලංකාවේ පත්වපු තුන්කොන් තරගාවලි අතරින් ශ්‍රී ලංකා ඉතිහාසයේ වැඩිම ආදායමක් ඉපයූ තරගාවලිය බවට මෙය පත්වෙයි. දැනට තිබෙන තත්ත්වය අනුව රුපියල් බිලියනයක (මිලියන 1000) ශූද්ධ ලාභයක් උපයා ගන්න හැකිවෙයි.

ලංකාව විතරයි මුළු ආසියානු කලාපයේම ප්‍රිමියර් ලීග් එකක් ගහන්නේ නැත්තේ. එම නිසා මෙම මුදල් යොදාගෙන මේ වසරේදී ලංකා ප්‍රිමියර් ලීග් තරගාවලියක් ආරම්භ කිරීමට බලාපොරොත්තු වෙනවා." 

ඡායාරූප ශමීර රාජපක්ෂ

DSC_3009 DSC_3020 DSC_3027 DSC_3043

 

 

 

 

විස්සයි20 නායකත්වය චන්දිමාල්ට

ශ්‍රී ලංකා කණ්ඩායමේ බංග්ලාදේශ සංචාරය අවසන් කරමින් පැවැත්වෙන විස්සයි20 තරගාවලිය සඳහා තරග වදින ශ්‍රී ලංකා සංචිතය, ක්‍රිකට් ආයතනය විසින් අද (07දා) නිවේදනය කළේය. ක්‍රීඩකයන් 15 දෙනෙකුගෙන් සමන්විත මෙම සංචිතයේ නායකත්වයට දිනේෂ් චන්දිමාල් පත්කර තිබේ.

ශ්‍රී ලංකාව අවසන් වරට සිදුකළ ඉන්දීය තරග සංචාරයේදී ශ්‍රී ලංකා විස්සයි20 කණ්ඩායම මෙහෙයවූ තිසර පෙරේරාද මෙම සංචිතයට ඇතුළත්ව සිටියදී, චන්දිමාල් නායකත්වයට පත්කිරීම සුවිශේෂී වෙයි.

මීට අමතරව කලකට පසුව 35 හැවිදිරි ජීවන් මෙන්ඩිස්ද කණ්ඩායමට ඇතුළත්ව සිටියි. ජීවන් 2013 වසරෙන් පසු මේ දක්වා කිසිදු ජාත්‍යන්තර විස්සයි20 තරගයක් ක්‍රීඩාකර නොමැත.

ශ්‍රී ලංකා – බංග්ලාදේශ විස්සයි20 තරගාවලිය තරග 02කින් සමන්විත වන අතර, දෙරට අතර පළමු තරගය මෙම මස 15 වැනිදා හා දෙවැනි තරගය 18 වැනිදා පැවැත්වේ. නම්කළ ශ්‍රී ලංකා සංචිතයට ක්‍රීඩා අමාත්‍යවරයාගේද අනුමැතියද හිමිව තිබේ.

ශ්‍රී ලංකා සංචිතය

දිනේෂ් චන්දිමාල් (නායක), උපුල් තරංග, ධනුෂ්ක ගුණතිලක, කුසල් ජනිත් පෙරේරා, තිසර පෙරේරා, අසේල ගුණරත්න, නිරෝෂන් දික්වැල්ල, දසුන් ශානක, ඉසුරු උදාන, ෂෙහාන් මධුසංඛ, ජෙෆ්රි වැන්ඩර්සෙ, අකිල ධනංජය, අමිල අපොන්සු, ජීවන් මෙන්ඩිස්, අසිත ප්‍රනාන්දු

 

 

ගයන්තිකාගේ රන් පදක්කමෙන් ශ්‍රී ලංකාව, ඉන්දියාවත් අබිබවයි

ඉරානයේ ටෙහෙරාන් නුවරදී පැවැති 08 වැනි ආසියානු ගෘහස්ථ මලල ක්‍රීඩා තරගාවලියේදී රන් පදක්කමක් හා ලෝකඩ පදක්කම් 03ක් දිනාගනිමින් පදක්කම් සටහනේ 07 වැනි ස්ථානය හිමි කරගැනීමට ශ්‍රී ලංකාව සමත් විය. ආසියානු ගෘහස්ථ මලල ක්‍රීඩා තරගාවලියක ශ්‍රී ලංකාව දැක්වූ ඉහළම දක්‍ෂතාවද මෙයයි.

පසුගිය බ්‍රහස්පතින්දා (01දා) ආරම්භ වූ මෙම තරගාවලිය පෙරේදා (03දා) අවසන් විය.

ශ්‍රී ලංකාව දිනූ එකම රන් පදක්කම ගයන්තිකා අබේරත්න විසින් දිනාගනු ලැබූ අතර, මීටර 1500 ඉසව්ව නියෝජනය කළ ඇය තරගය අවසන් කිරීම සඳහා විනාඩි 4.26.83ක දක්‍ෂතාවක් දැක්වීමට සමත් වූවාය. මෙම කාලය ශ්‍රී ලංකා වාර්තාවක්ද වන අතර, ඇය විසින් බිඳලනු ලැබුවේ එරංගා රසිකා දුලක්‍ෂි විසින් 2016 වසරේදී (කටාර්/වි. 4.37.10) පිහිටුවා තිබූ වාර්තාවයි. මෙම ඉසව්වේ රිදී පදක්කම කසකස්තාන ක්‍රීඩිකාවකට (වි. 4.28.20) හිමිවූ වූ අතර, ලෝකඩ පදක්කම වියට්නාම ක්‍රීඩිකාවක් (වි. 4.28.87) විසින් දිනාගනු ලැබූවාය.

මෙම තරගාවලියේ ශ්‍රී ලංකාවේ පළමු පදක්කම් හිමිකාරිය වූ නිමාලි ලියනආරච්චි (වි. 2.10.83) මීටර් 800 කාන්තා ඉසව්වේ ලෝකඩ පදක්කම දිනාගත්තාය. කෙසේ නමුත් නිමාලිගේ පෞද්ගලික හොඳම දක්‍ෂතාව මෙහිදී ප්‍රදර්ශනය නොවූ අතර, මීටර් 800 ශ්‍රී ලංකා (ගෘහස්ථ) වාර්තාවේද හිමිකාරිය වන ඇය මි. 2.04.88කින් මෙම වාර්තාව 2016 (කටාර්) වසරේදී පිහිටුවීමට සමත් වූවාය. මෙම තරගයට ගයන්තිකා අබේරත්න (වි. 2.11.20) ක්‍රීඩාකළත්, ඇයට සිවුවැනි ස්ථානය හිමිවිය. ගයන්තිකා මීටර් 800 (එළිමහන්) ශ්‍රී ලංකා වාර්තාවට (වි. 2.02.55) හිමිකම් කියයි.

මීට අමතරව දුර පැනීම ඉසව්වෙන් ශ්‍රී ලංකාවට ලෝකඩ පදක්කමක් දිනාදීමට ජනක විමලසිරි (මී. 7.67) සමත් විය. එහි රන් පදක්කම දිනූ චීන ක්‍රීඩකයෙකු (මී. 8.16) සතු වූ අතර, රිදී පදක්කම චීන තායිපේ (මී. 7.72) ක්‍රීඩකයෙකුට හිමිවිය.

ශ්‍රී ලංකාව දිනූ අනෙක් ලෝකඩ පදක්කම මීටර 400 ඉසව්වෙන් උපමාලිකා වලවගේ විසින් දිනාගත්තාය. ඇය සිය ඉසව්ව තත්. 54.90කින් අවසන් කළ අතර, එම ඉසවේ රන් පදක්කම දිනූ ක්‍රීඩිකාව තත්. 53.28ක දක්‍ෂතාවක් හා රිදී පදක්කම දිනූ ක්‍රීඩිකාකව තත්. 53.49ක දක්‍ෂතාවක් දැක්වූහ. මෙම ක්‍රීඩිකාවන් දෙපළම කසකස්තානය නියෝජනය කළහ.

මෙම තරගාවලිය සඳහා ශ්‍රී ලංකාව නියෝජනය කරමින් තරගකරුවන් 05 දෙනෙක් සහභාගී වූහ.

111111111111111

 

 

කොමන්වෙල්ත් යන කණ්ඩායමෙන් 49ක් හැලෙයි

පොදුරාජ්‍ය මණ්ඩලීය ක්‍රීඩා උලෙළට සහභාගිවීමට නියමිතව සිටින ක්‍රීඩක ක්‍රීඩිකා කණ්ඩායමෙන් 49 දෙනෙකු නිර්දේශ නොකිරීමට තීරණය කර ඇතැයි වාර්තා වේ.

එළඹෙන අප්‍රේල් මස ඔස්ට්‍රේලියාවේදී පැවැත්වෙන මෙවර පොදුරාජ්‍ය මණ්ඩලයීය ක්‍රීඩා උලෙළට ක්‍රීඩා ඉසව් 13ක් යටතේ ක්‍රීඩක ක්‍රීඩිකාවන් 82ක් යෝජනා වී තිබුණද, පංච පුද්ගල කමිටුවක නිර්දේශ මත බැඩ්මින්ටන්, පාපැදි, ජිම්නාස්ටික්, මේසපන්දු හා වෙඩිතැබීම යන ක්‍රීඩාවලින් සහභාගි නොකිරීමට නිර්දේශ කර තිබේ.

මෙවර පොදුරාජ්‍ය මණ්ඩලයීය ක්‍රීඩා උලෙළට ශ්‍රී ලංකාව නියෝජනය කරමින් මලල ක්‍රීඩා, බර ඉසිලීම, බොක්සිං, පිහිනුම්, වෙරළ වොලිබෝල්, බැඩ්මින්ටන්, පාපැදි, මල්ලවපොර, ජිම්නාස්ටික්, මේසපන්දු, ස්කොෂ්, වෙඩි තැබීම හා රග්බි යන ක්‍රීඩාවන්ගෙන් ක්‍රීඩක ක්‍රීඩිකාවන් සහභාගිවීමට නියමිතව තිබේ. කෙසේ නමුත් ක්‍රීඩා උලෙළේදී ශ්‍රී ලංකාවට දක්‍ෂතා දැක්විය හැකි ක්‍රීඩා පමණක් තෝරාගෙන ක්‍රීඩක ක්‍රීඩිකාවන් සහභාගි කරවීමට මෙම කමිටුව නිර්දේශ කර තිබේ.

පොදුරාජ්‍ය මණ්ඩලයීය ක්‍රීඩා උලෙළේදී ශ්‍රී ලංකාව නියෝජනය කරමින් සහභාගිවන ක්‍රීඩක ක්‍රීඩිකාවන් හා ක්‍රීඩාගැන සොයා බැලීම සඳහා ක්‍රීඩා අමාත්‍යවරයා විසින් මෙම පංච පුද්ගල කමිටුව පත්කළ අතර, ඔවුන් විසින් ක්‍රීඩා උලෙළට සහභාගි වන සෑම ක්‍රීඩාවකම නියෝජිතයන් කැඳවා කළ සාකච්චාවකින් අනතුරුව මෙම තීරණය ගෙන ඇතැයි දැනගන්නට ලැබේ.

commenwelth