Author Archives: නිඳුක් මධුෂීක

අපි කොමඩි වේදිකාව තුළ කළ නිර්මාණ නැවත සමාජයට වෙනස් අයුරින් ගෙන එන්න බලාපොරොත්තු වෙනවා

වසන්ත දුක්ගන්නාරාළ කියන්නේ කලා ක්ෂේත්‍රය තුළ විවිධ වු භූමිකා නිරූපණය කළ ශිල්පියෙකි. හාස්‍යමය රංගනයට ඉඩකඩ විවර වූ දෙරණ කොමඩි ස්ටාර් රියලිටි වැඩසටහනේ හාස්‍යමය රංගනය ගැන ඔවුනට ඇති හැකියාව විදහා දක්වන්නටත්, එහි ජයග්‍රාහකයන් බවට පත්වන්ටත් දුක්ගන්නාරාලට සහ අජිත් ලොකුගේට හැකියාව ලැබුණි. මේ කතාබහ ඒ ගැනය.


unnamed (4)

Q දෙරණ කොමඩි ස්ටාර් රියලිටි තරගයේ කිරුළ දිනා ගැනීම දක්වා පැමිණි ගමන් මග ගැන මතක් කළොත්

දෙරණ නාළිකාවෙන් ජනප්‍රිය පිරිසකට මේ වැඩසටහනට ආරාධනා කරනවා. ඒ ආරාධනාවට තමයි අපි මේ රියලිටි තරගයට යොමු වුණේ. එහෙම ආරාධනා කරපු අය අතර වෘත්තීමය වශයෙන් ප්‍රහසන රංගනයේ යෙදෙන්නේ නැති දෙදෙනෙක් ලෙස තමයි මම සහ ගාමිණී ලොකුගේ දකින්නේ. අපි එය අභියෝගයක් ලෙස භාරගත්තා. කොමඩි නාට්‍ය කියලා අපි බලද්දි අපිට පෙනෙන්නේ දෙපිට කැපෙන කුණු හරුප සහ වෙනත් තලයක තිබෙන දේවල්. නමුත් කොමඩි කියන්නේ ඒකම නෙමෙයි. මම රංග විද්‍යාව ඉගෙන ගත්ත කෙනෙක්. මගේ ශාස්ත්‍රපති උපාධිය රංග කලාව ගැන ගත්ත උපාධියක්. ඒ උපාධිය කරද්දි මම ප්‍රහසන වර්ග ගණනාවක් ඉගෙන ගෙන තිබෙනවා. ඉන් අපි භාවිත කරන්නේ දශම ගණනක් පමණයි කියලා මට හිතුණා. 
යම් යම් අවස්ථාවල බැලැක් කමඩි, ට්‍රැජි කමඩි භාවිත කර තිබෙනවා. මම සහ අජිත් තීරණය කළා මේ සිටින දැවැන්තයින් එක්ක තරග වදින්න වෙනත් නිර්මාණයක් කරන්න ඕන කියන දේ. අපි පිටපතේ සිටම හිතුවේ වෙනස් නිර්මාණයක් කරන්න. එහෙම හිතලා බ්ලැක් කමඩි කරන්න හිතුවා. ඒ කියන්නේ ප්‍රේක්ෂකයෝ දන්නවා අපි දෙන්නට වැරදිලා කියලා. නමුත් අපි දෙන්නා ඒ දේ දන්නෑ. එවැනි කොමඩි පිටපත් තමයි අපි මේ තරගාවලියේදී කළේ. ඒ වගේම හරි දේශපාලනිකයි. මෙහි ටයිම් ඇන් ස්පේස් විශේෂයි. එය මගහැරුණොත් නාට්‍ය නිර්මාණයම අවුල් වෙනවා. අපි තරග වට අටක් මෙය සිදුකළා. අවසන් මහා තරගයට අපි තේරී පත්වුණා. එහිත් ලොකු අභියෝගයක් තිබුණා. මහින්ද පතිරගේ, ශාන්ත ගාල්ලගේ, ගයාන් මාපලගම, ධනුෂ්කා ඉරෝෂනී වගේ පිරිසක් තමයි අවසන් වටයට තේරී පත්වුණේ. අපි තුළ තිබූ උපක්‍රමශීලීත්වය නිසා මේ ජයග්‍රහණය ලබාගන්න හැකිවුණා කියලයි මම හිතන්නේ.

මෙවැනි කොමඩි නාට්‍ය නිර්මාණයකදිත් පිටපතට හිමිවෙන්නේ සුවිශේෂී තැනක්. මේ කොමඩි නිර්මාණවල පිටපත ගැන අවධානය යොමු කළේ කොහොමද

පිටපත ගැන අවධානය යොමු කරද්දි අපි දෙදෙනා කිහිපදෙනෙක් යෝජනා කළා. පසුව අපි දෙදෙනාම හිතුවා අපිට අවශ්‍ය ලෙස මේ පිටපත රචනා කළ හැක්කේ මිහිර සිරිතිලකට කියන දේ. මිහිර සමග සාකච්ඡාවෙන් පසුව තමයි පිටපත රචනා වුණේ. සමහර පිටපත් ප්‍රතික්ෂේප වුණා. සමහර පිටපත් අපි තෝරාගෙන රංගනය  සිදුකළා.

දුක්ගන්නාරාල සහ අජිත් ලොකුගේ කියන ශිල්පීන්ගේ රංගනයේදී ඇති  සුසංයෝගය කෙබඳුද? නිර්මාණයේ සාර්ථකත්යට එය වැදගත් සාධකයක්

අපි දෙන්නා දෙන්නෙක්. අපි දෙදෙනාගේ බාහිර පෙනුමත් වෙනස්. ඒ නිසා චරිත ද්විත්වයක් වුණා. හිට්ලරුයි චැප්ලිනුයි වගේ වෙනසක් තිබුණා. රංගනයේදිත් අපි දෙන්නා වෙනස්. මම රංගනයේ යෙදෙන්නේ රළු චරිත. අජිත් අයියා සැහැල්ලුවෙන් සිදුකරන සරල චරිත සිදුකළා. අපි දෙන්නා තුළ තිබූ නොගැළපීමම තමයි ගැළපීම බවට පත්වුණේ කියලයි මම හිතන්නේ. අජිත් අයියා මට වඩා වසර දහයක් පමණ වේදිකාවේ සිටි ප්‍රවීණයෙක්. මේ වන විටත් වේදිකා නාට්‍යවල නියැළෙනවා. මම වසර දහයක් පහළොවක් පමණ වේදිකා නාට්‍යවල රංගනය සිදුකර නැහැ. නමුත් අපි දෙන්නා හොඳම සුසංයෝගයක්.

unnamed

කොමඩි කියන දේ ප්‍රේක්ෂකාගාරය තුළ තිබෙන කියවීම සම්බන්ධයෙන් ඔබ තුළ තිබෙන අදහස කෙබඳුද

දෙබසකින් හෝ අගපසග වෙනස් වීම තුළින් සිනහව ගෙන ඒම තමයි ලංකාව තුළ කොමඩි ලෙස මිනිසුන් කියවන්නේ. මිස්ට බීන්, රෝවින්සන් හෝ චැප්ලින් වගේ අයව ඒ තරම් හදාරපු අය නෙමෙයි අපේ රටේ ඉන්නේ. නමුත් අපේ ජෝ අබේවික්‍රම වගේ රංගන ශිල්පීන් ගත්තම, ෆ්‍රෙඩී සිල්වාගේ යම් කාලයක් ගත්තම, බී.එස්, දොන් සිරිසේන, ඩී ආර් නානායක්කාර වගේ ශිල්පීන් ගත්තාම එවැනි ලක්ෂණ දැකගන්න තිබෙනවා. නමුත් පසුව සිනමාවට වේදිකා නාට්‍යවල වෙනත් ලක්ෂණ පැමිණෙන්න ගත්තා. ඒ ලක්ෂණම හාස්‍ය කියලා ප්‍රේක්ෂකාගාරය හිතන්න ගත්තා. අපි හාස්‍ය ගැන කියවන විදිහ ඒක නෙමෙයි. ටෙලිවිෂනයට වුණත් ඒ දේ කරන්න පුළුවන්. නමුත් එය
සිදුකරන්නේ නැහැ.

එවන් තත්ත්වයක් ඇති වීමට හේතුව ලෙස ඔබ දකින්නේ කුමක්ද

මේ වෙලාවේ විකිණෙන දේ තමයි හැමදෙනාම කරන්න බලන්නේ. අලුත් දෙයක් හොයා ගන්න බයයි. අපි දෙන්නත් මේ සිදුකළ දේ වැරදුණා නම් පළමු වටයෙන්ම අපි ඉවත් වෙනවා. දෙවැනි වටය, තෙවැනි වටය යන විට තමයි බොහෝ දෙනෙක් අපි ගැන අවධානය යොමු කරන්න පටන් ගත්තේ. වෙනස් වර්ගයේ ප්‍රහසනයන් ගෙන එන්නට උත්සාහ කළ ටෙලිනාට්‍ය ප්‍රේක්ෂකයන්ගෙන් හෝ නිෂ්පාදකයාගෙන් ප්‍රතික්ෂේප වී තිබෙනවා. පිටපත, රංගය, අධ්‍යක්ෂණය, ප්‍රේක්ෂකයා මේ සියල්ල එකතු විය යුතුයි. ඒ එකතු වීමේ  අඩුපාඩුව අපේ රටේ තිබෙන නිසා මෙවන් තත්ත්වයක් ඇතිවෙන්න ඇති කියලා මම හිතන්නේ. මීට පෙර %කොළඹ සන්නිය^ වගේ සිනමා නිර්මාණ ගත්තත්, %ඇර සොයිසා^ වගේ සිනමා නිර්මාණ ගත්තත් කිසියම් අවර ගණයේ ලක්ෂණ තිබුණත් උසස් ප්‍රහසන අන්තර්ගතව තිබුණා. අපි කොමඩි වේදිකාව තුළ කළ නිර්මාණ නැවත සමාජයට වෙනස් අයුරින් ගෙන එන්න බලාපොරොත්තු වෙනවා. ඒ තුළින් මිනිසුන් අතර වෙනස් මතයක් ගොඩනගන්න හැකිවෙයි කියලා අපි හිතනවා.

unnamed (1)

කොමිඩි ස්ටාර් තරගයෙන් පසු ඒ නිර්මාණ අන්තර්ගත කළ වේදිකා නාට්‍ය නිර්මාණයකටද සුදානම් වෙන්නේ

අපි අවසන් වටයට තරග කරද්දී සිදුකළ නිර්මාණය දිගු නාට්‍යයක් බවට පත්කළ හැකියි කියලා අපිට හිතුණා. ඒ ගණයේ සිනමාපට අපි ලෝකයේ දැක තිබෙනවා. එකම තැනක දෙන්නෙක් දෙතැනක තියා වැඩ කරනවා. එහි අන්තර්ගත වෙන්නේ එවැනි දෙයක්. එහි පිටපත රචනා කිරීමේ කටයුතු ආරම්භකර තිබෙනවා. මම එය නිෂ්පාදනය කරනවා. ප්‍රධානම කාරණය තමයි මේ මොහොතේ විදේශීය රටවල මෙයට තිබෙන ඉල්ලුම. ඒ නිසා අපි මේ වේදිකා නිර්මාණය සිදුකරනවා.

වසන්ත දුක්ගන්නාරාළ කියන්නේ කාලයෙන් කාලයට එක එක දේවල් කරන නිර්මාණකරුවෙක්. මේ වෙද්දි වේදිකාවට වැඩි ඉඩක් වෙන් කරලද

මේ නාට්‍යයේ සංවිධාන කටයුතු කරන්න අජිත් ලොකුගේට භාර දෙනවා. මම එහි රඟපෑමට හා අධ්‍යක්ෂණයට සහභාගී වෙනවා. මගේ චිත්‍රපටයේ කටයුතු හැමදිනම අතපසු වුණා. එය සිදුකරනවා. එහි මූලික කටයුතු නිමකර අවසන්. මේ වන විට මගේ නවකතාවක් රචනා කර තිබෙනවා. ඒ දේ සිදුකරනවා. මේ වසරේ සිනමා නිර්මාණයේ වැඩකටයුතු කරන්න බලාපොරොත්තු වෙනවා. මම කළමනාකරණය, ආර්ථික විද්‍යාව ගැන ඉගෙන ගත් කෙනෙක්. අපේ රටේ අර්බුදවලට හේතුසාධක මොනවද කියලා මම පසුගිය වසර දහයක් තිස්සේ  සමීක්ෂණය කළා. ඒ තුළින්  මම හඳුනාගත් හේතුසාධක 27ක් එකතු කර %රට වැටෙන හැටි^ නමින් ග්‍රන්ථයක් රචනා කරනවා. අපි අපිම ශ්‍රී ලාං‍ෙක්ය ජාතියක් ලෙස කළ වැරදි මම ඒ තුළ කතා කරනවා. මේ පෙබරවාරි 10 වනදා නැවත අපි පසුතැවෙන්න සිදුවෙන  තීන්දුවක් ගන්නවානේ. ඒ ආර්ථික කාරණය හඳුනාගත්තේ නැත්තම් සිදුවන්නේ එය. ඒ නිසා මම සැමට වැටහෙන පරිදි සරල භාෂාවක් උපයෝගී කර ගනිමින් මේ ග්‍රන්ථය රචනා කරන්න අදහස් කරනවා.

ගුත්තිල කාව්‍යය කියන්නේ දේශපාලනිකව ගැඹුරු අන්තර්ගතයක් ඇති නාට්‍ය නිර්මාණයක්

'හිනාවෙලා මිනිත්තුවක්', 'ගිරිකූඨ කාශ්‍යප', 'ඌ වීරයා' වැනි සම්මානනීය වේදිකා නාට්‍ය නිර්මාණය කළ අකිල සපුමල්ගේ නවතම වේදිකා නාට්‍ය නිර්මාණය වන්නේ 'ගුත්තිල කාව්‍යය' වේදිකා නාට්‍ය නිර්මාණයයි. එහි මංගල දර්ශනය මෙම මස 11 වැනිදා සවස 7ට ලයනල් වෙන්ට්ඩ් රඟහලේදී පැවැත්වෙයි. අනතුරුව මෙම මස 18 මීගමුවේදීත්, 19 බොරැල්ල නාමෙල් මාලනී රඟහලේදීත් වේදිකාගත කිරීමට නියමිතය. මේ කතාබහ එම නාට්‍යය ගැනය.


guththila 1

Q ගුත්තිල කාව්‍යය වේදිකා නාට්‍යය ගැන මුලින්ම අපි කතා කරමු

මේක සංගීතමය නාට්‍යයක්. සමාජයේ ඉතාමත්ම ජනප්‍රිය ගුත්තිල කාව්‍ය කෘතිය පදනම් කරගෙන තමයි මේ නාට්‍යය නිර්මාණය කළේ. මේ නාට්‍යයට ගුත්තිල කාව්‍ය කියන නමමයි යොදා ගත්තේ. %හිනාවෙලා මිනිත්තුවක්^, 'ඌ වීරයා', 'ගිරිකූඨ කාශ්‍යප', 'රාවණ' වැනි නිර්මාණවලට වඩා වෙනස් රංග ආකෘතියක් භාවිත කරන සංගීතමය නාට්‍යයක් තමයි ගුත්තිල කාව්‍යය කියන මෙම නාට්‍යය. වෑත්තෑවේ හිමියන්ගේ ගුත්තිල කාව්‍යයේ අන්තර්ගත ප්‍රශස්ත කාව්‍ය නිර්මාණ ඔස්සේ ගලාගෙන යන ගැඹුරු තේමාවකින් යුත් නාට්‍යයක් කියලා මේ නාට්‍යය නිර්මාණය හඳුන්වා දෙන්න පුළුවන්.

ගුත්තිල කාව්‍යය තුළ අන්තර්ගත බොහෝදෙනා දන්නා කතා තේමාවක් වේදිකා නාට්‍යයට යොදා ගත්තේ ඇයි

මම කැමතියි මිනිස්සු දන්න කතාවක් වස්තු විෂය කරගෙන වේදිකා නාට්‍ය නිර්මාණය කරන්න. ඒකට හේතුව ප්‍රේක්ෂකයා එන්නේ දන්න කතාවක් බලන්න. ප්‍රේක්ෂකයා වේදිකා නාට්‍ය නරඹා පිටවෙන්නේ දන්න කතාව ඇතුළේ ඇති නොදන්නා බොහෝ දේවල් එක්ක. එහෙම වුණාම කලා නිර්මාණය සිදුකරද්දි ප්‍රේක්ෂකයා දන්න දේවල් හරහා නොදන්න දේවල්වලට ඉතාම ගැඹුරින්, ඉතාම ප්‍රශස්තව නිර්මාණයට ගෙන එන්න හැකිවෙනවා. ගුත්තිල කාව්‍යය හැමදෙනෙක්ම වගේ දන්නවා. ගුත්තිල පඬිතුමා, මූසිල, බරණැස් රජුන්, ශක්‍රයා කියන චරිත මිනිසුන් හොඳින් දන්නවා. මූසිල පරාජයට පත්වෙනවා, ගුත්තිල පඬිතුමා ජයග්‍රහණය කරනවා කියලත් ඔවුන් දන්නවා. දන්න කතාව වේදිකාවට ගෙන ආවොතින් මම නාට්‍යකරුවෙක් වෙන්නෙ නැහැ. මම ගුත්තිල කාව්‍යය පදනම් කරගෙන නව අත්දැකීමක් වේදිකා නාට්‍ය ප්‍රේක්ෂකාගාරයට ලබා දෙනවා. මේ නාට්‍යයේ ප්‍රධාන චරිතය වෙන්නේ ගුත්තිල කාව්‍යය රචනා කළ වෑත්තෑවේ හිමියන්. වෑත්තෑවේ හිමියන් තමයි ප්‍රේක්ෂකයාට වේදිකාව තුළ වැඩි වේලාවක් දකින්න ලැබෙන්නේ. එහෙම වුණාම වැත්තෑවේ හිමියන් කියන්නේ කවුද? ඒ හිමියන්ගේ ආකල්ප සිතිවිලි කෙබඳුද? කුමන සමාජ පසුබිමක් ඔස්සේද ජීවත් වුණේ කියන කාරණා තුළින් තමයි මේ නාට්‍යය දිගහැරෙන්නේ. වෑත්තෑවේ හිමියන් ගුත්තිල කාව්‍යය ලියන ආකාරය නාට්‍යය තුළ අන්තර්ගත වෙනවා. වෑත්තෑවේ හිමියන්ට කවි සිතිවිලි පහළ වෙන්නේ කෙලෙසකද, හිමියන් මුහුණ පෑ සමකාලීන සිදුවීම් ඒ කාව්‍ය නිර්මාණවලට බලපෑවේ කොහොමද ආදී ලෙස ගුත්තිල කාව්‍යය නම් ප්‍රශස්ත කාව්‍යය අපිට තිළිණ වූ ආකාරය වේදිකාවේ දිගහැරෙනවා. මේ සියල්ල වෑත්තෑවේ හිමියන්ගේ දෘෂ්ටිකෝණයෙන් නිරූපණය වෙනවා. මෙය බාල ගණයේ නාට්‍යයක් නෙමෙයි. සාම්ප්‍රදායිකම කතාවකුත් නෙමෙයි. නව රංග ආකෘතියක් තුළ ගොඩනැගෙන  සියලු දෙනාටම නරඹන්න හැකි, රසවිඳිය හැකි ප්‍රමිතියක් ඇති නාට්‍යයක් බව වගකීමෙන් කියනවා.

IMG_91226 copy

ගුත්තිල කාව්‍ය වේදිකා නිර්මාණය කාව්‍යාත්මක නාට්‍යයක්. මෙවැනි නාට්‍යයක් වේදිකාවට ගෙන ඒමේදී මෙහි ආකෘතිය හා රංග ශෛලිය කොතරම් දුරට ප්‍රේක්ෂකයන්ට සමීප වෙයිද

මම ඒ ගැන අවධානය යොමුකරලා තමයි මෙ නාට්‍යය සිදුකළේ. මෙය ප්‍රේක්ෂකයන් වැලඳ ගන්නා නාට්‍යයක් බවට පත්වෙයි. මෙයට ගුත්තිල කාව්‍ය තුළ ඇති කාව්‍යයන් 55ක් පමණ මම යොදාගෙන තිබෙනවා. ඒ කාව්‍යයන්වල සංගීතය ඉතා මියුරුයි. දිල්ශාන් උමයංග නම් සංගීත අධ්‍යක්ෂකවරයා මෙම නාට්‍යයේ සංගීත අධ්‍යක්ෂකවරයා ලෙස කටයුතු කරනවා. නාට්‍යයේ රංග වින්‍යාසයත්, චලනය, රචනයත් මම සිදුකළා. රංග ශෛලිය ස්වාභාවිකයි. ගීතයත් එක්ක මුසුවන සංගීතයන්ට රිද්මයානුකූල චලනයන් භාවිත කරනවා. මනමේ, සිංහබාහු වැනි නාට්‍යවල ඇති රංග ශෛලිය නෙමෙයි මෙම නාට්‍යයට භාවිත වෙන්නේ. මෙම නාට්‍යයට භාවිත වෙන්නේ මිශ්‍ර රංග ශෛලියක් ස්වාභාවික සංවාද සහ ස්වාභාවික ඉරියව් සමග රිද්මයානුකූල චලනයන් භාවිත වෙනවා. සුත්‍රධාර නමින් වෑත්තෑවේ හිමියන් වාසය කළ ග්‍රාමයේ සිටි රූකඩ නටවන්නෙක්ට වෑත්තෑවේ හිමියන් මිත්‍ර නිසා වෑත්තෑවේ හිමියන් ලියන කවි ඔහුට ලබා දෙනවා. සූත්‍රධාර එම කවිවලට තනු නිර්මාණය කර ගම්වැසියන්ට රූකඩ ලෙස එය ප්‍රදර්ශනය කරනවා. වෑත්තෑවේ හිමියන් ලියන කවිවලට ජීවයක් සපයන කෙනෙකු ලෙස සුත්‍රධාර මම ගෙන එනවා. කරත්තෙක තැන් තැන්වලට ගිහින් ගමේ මිනිසුන්ට නාට්‍යය පෙන්නනවා. ගුත්තිල කාව්‍යය කියන්නේ දේශපාලනිකව ගැඹුරු අන්තර්ගතයක් ඇති නාට්‍ය නිර්මාණයක්. එය සුන්දර අත්දැකීමක් වෙයි.

'ගිරිකූඨ කාශ්‍යප^ ගත්තත්, 'හිනාවෙලා මිනිත්තුවක්' ගත්තත් ඒ වේදිකා නාට්‍ය වැඩි වාර සංඛ්‍යාවක් වේදිකාගත කරන්න ඔබට හැකියාව ලැබුණේ නැහැ.  ඒ අභියෝගයට උපක්‍රමශීලීව මුහුණ දීමක්ද මේ

'හිනාවෙලා මිනිත්තුවක්^ කියන නාට්‍යය යෞවන නාට්‍ය උලෙළේ හොඳම නාට්‍යය බවට පත්වුණා. හොඳම නළුවා, නිළිය සහය නළුවා, සංගීතය, පිටපත, අධ්‍යක්ෂණය ආදී ලෙස සම්මාන දිනපු නාට්‍යයක්. 'ගිරිකූඨ කාශ්‍යප' කියන නාට්‍යයත් එබඳු නාට්‍යයක්මයි. රාජ්‍ය නාට්‍ය උලෙළේ හා යෞවන නාට්‍ය උලෙළේ සම්මාන රැසක් දිනපු ප්‍රශස්ත නාට්‍යයක්. ඒ නිර්මාණ දෙකටම මේ රට තුළ සිටින වේදිකා නාට්‍ය ප්‍රේක්ෂකාගාරය තුළ ලොකු ඉඩක් තිබුණේ නෑ. නාට්‍ය නරඹන්න එන බොහෝ දෙනෙක් කැමැත්ත දක්වන්නේ වෙනත් නාට්‍යයවලට. බොහෝ දෙනෙක් මා කළ මේ නාට්‍ය දෙක අගය කළත්, ප්‍රශස්තයි කියලා සඳහන් කළත් එය දුවන රැල්ලේ නාට්‍ය බවට පත්වුණේ නැහැ. ඒකට හේතුව මම කියලා මම හිතන්නේ නැහැ. ඒකට හේතුව මේ සමාජයමයි. නමුත් දැන් මට සිදුව තිබෙන්නේ දුවන(වැඩි දර්ශන වාර සංඛ්‍යාවක් ප්‍රදර්ශනය කළ හැකි) නාට්‍යයක් හදාගන්න. එයට බාල ගණයේ සරල තේමාවක්, ටෙලිනාට්‍ය නළු නිළියන් කිහිපදෙනෙක් යොදා ගැනීම මම අනුගමනය කරන්නේ නැහැ. මේ වෙලාවේදී මම උපක්‍රමයක් තමයි යොදා ගත්තේ. ගුත්තිල කාව්‍ය පාසල් දරුවන්ගේ විෂය නිර්දේශයට අදාළ කෘතියක් බවට පත්ව තිබෙනවා. ඒ කාව්‍ය සංග්‍රහවල අන්තර්ගත කවි ශිෂ්‍යයන් කටපාඩම් කරගත යුතුයි. එහි වර්ණනා රසවින්දනය කළ යුතුයි. නව විෂය නිර්දේශය යටතේ උසස් පෙළ සඳහා ගුත්තිල කාව්‍ය නිර්දේශ වී තිබෙනවා. එවැනි තත්ත්වයක් යටතේ ගුත්තිල කාව්‍යය ඇසුරින් කළ මේ නිර්මාණය පාසල්වල, විශ්වවිද්‍යාලවල සහ සමාජයේම කතිකාවතක් ඇති කළ හැකි ඒ වේදිකාවට යන්න පුළුවන් නිර්මාණයක් බවට පත්වෙනවා. %මනමේ^, %සිංහබාහු^ වැනි නාට්‍යවල දර්ශන වාර වැඩි ගණනක් සංවිධානය වෙන්නේ එය විෂය නිර්දේශ තුළ අන්තර්ගත නිසා කියලා මම හිතනවා. නමුත් රාජ්‍ය නාට්‍ය උලෙළේ හෝ යෞවන නාට්‍ය උලෙළේ හොඳම නාට්‍යය ලෙස සම්මාන ගත් අපේ නාට්‍යයක් විෂය නිර්දේශයට එන්නේ නෑ. අන්න ඒ නිසා තමයි මම ගුත්තිල කාව්‍ය නාට්‍යය නිර්මාණය කරන්නේ. ඒ නිසා මේ නාට්‍ය නිර්මාණයට පාසල් මට්ටමෙන්, විශ්වවිද්‍යාල මට්ටමින් හොඳ ඉල්ලුමක් ඇති වෙයි. 

guththila 5

රංගන ශිල්පීන් තෝරා ගැනීමේ ක්‍රමවේදය පවා ඔබ සිදුකළ නිර්මාණවලට වඩා වෙනසක් දකින්න පුළුවන්

ඔව් ඒක ඇත්ත. %හිනාවෙලා මිනිත්තුවක්^ සහ %ගිරිකූඨ කාශ්‍යප^ නාට්‍යය නිර්මාණය කරද්දි මම අවධානය යොමු කළේ රංගන ශිල්පියාගේ උපරිම දක්ෂතාව පමණයි. ඔහුගේ ජනප්‍රියතාව ජනතා ආකර්ෂණය ගැන මම අවධානය යොමු කළේ නැහැ. මම පෙර අවධානය යොමු කළේ මම වේදිකාවේ සිදුකරන පර්යේෂණාත්මක රංගයට නර්තනයෙන්, ගායනයෙන්, රංගනයෙන් ආදී හැකියාවෙන් යුතු ශිල්පීන්  දායක කර ගැනීම පමණයි. නමුත් ගුත්තිල කාව්‍ය නාට්‍ය නිර්මාණය කිරීමේදී පෙරට වඩා වෙනස් ක්‍රමවේදයක් රංගන ශිල්පීන් තෝරා ගැනීමේදීත් සිදුකළා. ප්‍රේක්ෂකයන් දන්න රංගන ශිල්පීන් කීපදෙනෙක් යොදා ගන්නවා. ප්‍රතිභාපූර්ණ රංගන ශිල්පියෙක් වන චන්ද්‍රසෝම බින්දුහේවා ප්‍රධාන චරිතයකට යොදා ගන්නවා. ඒ වගේම සෞන්දර්ය විශ්වවිද්‍යාලයේ ජ්‍යෙෂ්ඨ කථිකාචාර්ය ප්‍රසන්නජිත් අබේසූරිය රංගන ශිල්පියෙක් ලෙස දායක වෙනවා. පසුගිය වසරේ රාජ්‍ය නාට්‍ය උලෙළේ හොඳම නිළිය බවට පත්වූ දිනුපා කෝදාගොඩ වගේම %සිංහබාහු^, %මනමේ^ නාට්‍යවල ප්‍රධාන චරිත නිරූපණය කරන ජයනාත් බණ්ඩාර වැනි ශිල්පීන් බොහෝදෙනෙක් මම යොදාගෙන තිබෙනවා. වේදිකා පරිපාලනය සමන් ලියනආරච්චි සහ ඔහුගේ කණ්ඩායමෙන්, අං‘ග රචනය චාමර අනුදත්, රංගන ශිල්පීන් ලෙස ටෝනි කෙවිටියාගල, ලකීෂා, ඉරේෂා ආදී පහළොස් දෙනෙකුගෙන් යුත් රංගන ශිල්පීන් පිරිසක් මෙයට දායක වෙනවා. සංගීතයත් සජීවීවයි පැවැත්වෙන්නේ. එම නිසා පෙර නාට්‍යවලට වඩා වැඩි ජනතා ඉල්ලුමක් ඇතිවෙයි කියලා හිතනවා.

තවත් නිර්මාණකරුවෙකුටමෙහෙම කරන්න එපා

'සීමා නෑ ආකාසේ' චිත්‍රපටය පසුගිය නොවැම්බර් මස 10 වෙනිදා තිරගත වීම ආරම්භ කළේය. එදින සිට  දින 27 ක කාලයක් එය තිරගත විය. මේ වනවිට පවතින ගැටලුකාරී තත්ත්වයක් හේතුවෙන්  සිනමාහල්වලින් එම සිනමා පටය ගලවා ඉවත්කර ඇති බව එහි නිෂ්පාදක තිස්ස බාලසූරිය ආරච්චි අප සමග සඳහන් කළේය. මේ ඒ පිළිබඳ ඔහු සමග කළ සාකච්ඡා සටහනකි.


DSC_5382 copy

Q ‘සීමා නෑ ආකාසේ ‘ චිත්‍රපටයට මේ වනවිට ඇති වී තිබෙන තත්ත්වය ගැන අපි මුලින්ම කතා කරමු?

මේ නිර්මාණය මීට වසර දෙකකට පමණ පෙර සිදුකළ නිර්මාණයක්. එල්.එෆ්.ඩී. මණ්ඩලය මේ චිත්‍රපටය අගෝස්තු මස 17 වැනිදා තිරගත කරන්න කැමති වුණා. පසුව ඔවුන් සඳහන් කළා අගෝස්තු 17 වැනිදා චිත්‍රපටය තිරගත කරන්න නොහැකියි කියලා. සුනිල් ටී මහත්මයාගේ ‘හීන හොයන සමනල්ලු’ චිත්‍රපටය ඊ.ඒ.පී. මණ්ඩලයෙන් ප්‍රදර්ශනය ආරම්භ වුණා. එහි චිත්‍රපටය ප්‍රදර්ශනය වන ගමන් එල්.එෆ්.ඩී. මණ්ඩලයේ සිනමා හල්වලත් තිරගත කළ යුතුයි කියලා සිනමා හල් ඉල්ලා තිබෙනවා. ඒ නිසා මේ චිත්‍රපටය තිරගත කිරීම පමා වුණා. පසුව ඔක්තෝබර් 31 වැනිදාට දිනයක් ලබා දුන්නා. පසුව එම්.පී.එල්. මණ්ඩලයේම උදය කුමාර මහත්මයාගේ ‘අප්පට සිරි’ චිත්‍රපටය පැමිණෙනවා. පසුව එයට ඉඩ ලබාදිය යුතු බව සඳහන් කළා. අපි අගෝස්තු මාසයේ සිටම චිත්‍රපටයේ ප්‍රචාරණ කටයුතු ආරම්භ කළා. චිත්‍රපටය තිරගත වීම පමා වෙන්න වෙන්න වියදම් වීම වැඩි වශයෙන් සිදුවෙනවා. අවසානයේ නොවැම්බර් 10 වෙනිදාට තිරගත කරන බව සඳහන් කළා. ඒ අවස්ථාවේ අපි ගොඩක් මධ්‍යස්ථව තමයි ප්‍රචාරණ කටයුතු සිදුකළේ. ඔවුන් සඳහන් කළා ඉහළින්ම ප්‍රචාරණ කටයුතු සිදුකරන්න කියලා. එසේ සඳහන් කළත් ඒ දිනයේදීවත් චිත්‍රපටය තිරගත වෙයි කියන විශ්වාසය තියාගන්න අපහසු වුණා. මම උදය කුමාර මහත්මයා හමුවුණා. ඔහුගේ සිනමා නිර්මාණය 09 වැනිදා ගලවලා දහ වෙනිදා සිට මගේ සිනමා නිර්මාණයට ඉඩ දෙන බව සඳහන් කළා. ඒ විශ්වාසය එක්ක තමයි ප්‍රචාරණයට එහෙම වියදම් කළේ. ධාරාව තුළ සිනමා හල් හතළිස් ගාණක් තිබෙනවා. නමුත් අපට සිනමාහල් 29 යි හම්බ වුණේ. එහිත් දර්ශන වාර තුනම පැවැත්වෙන සිනමාහල් 13 ක් පමණයි හිමි වුණේ. ඒ සමහර සිනමා හල්වල පහසුකම්වත් නෑ. ඒත්  එහෙම තත්ත්වයක් තිබුණත් ඉතාම  හොඳ ප්‍රේක්ෂකාගාරයක් තිබුණා. නමුත් මේ වසර තුළම තිරගත වෙන්න ඕන චිත්‍රපටයක් නිසා ‘පෝරිසාදයා’ කියන චිත්‍රපටය තිරගත වීම ප්‍රමාද වුණා. මගේ චිත්‍රපටයත් ලබන වසරේ මාර්තු මාසය වනතුරු තිරගත වන බව මණ්ඩලයෙන් සඳහන් කළත් මගේ සිනමා නිර්මාණයත් මම කියපු සිනමා නිර්මාණය නිසා  ගලවන්න සිද්ධ වුණා.

Q සිනමා මණ්ඩල හා චිත්‍රපට නිර්මාණකරුවන් අතර මෙවැනි කටයුතු සිදුවෙන්නේ විනිවිදභාවයකින් නෙමෙයිද?

කිසිම දෙයක් ලිඛිතව සිදුවෙන්නේ නැහැ. කට වචනයට තමයි හැමදේම සිද්ධ වෙන්නේ. ලියුම්වලින් දින වෙනස් වීම් විතරක් කියනවා. විශ්වාසය මත තමයි වැඩ සිදුවෙන්නේ. මම මේ චිත්‍රපටයට ලක්ෂ එකසිය විසිපහක් පමණ වියදම් කළා. මේ චිත්‍රපට තිරගත වනවිට යටින් ඒ චිත්‍රපට ගැලවීමට වැඩපිළිවෙළවල් ක්‍රියාත්මක වෙනවා. ඒ සඳහා බලය තියෙන පිරිසක් මේ ක්ෂේත්‍රයේ ඉන්නවා. ඔවුන්ට ඕන විදිහට තමයි මේ දේවල් පාලනය වෙන්නේ.  මගේ චිත්‍රපටය ගලවනවා කියලා වචනයෙන්වත් කිව්වෙ නෑ.

SAP_7265

Q මේ වෙද්දි ‘සීමා නෑ අාකාසේ ‘ චිත්‍රපටයේ ආදායම් වාර්තා ලැබිලා තියෙනවද?

මණ්ඩලයෙන් පුළුල් ප්‍රචාරණයක් කරන්න කිව්වා. චිත්‍රපටය තිරගත වෙන්න කාලයක් ලබාදෙන නිසා මම එයත් ලක්ෂ සියයක් වැනි ලොකු මුදලක් දරා සිදුකළා. චිත්‍රපටයක් නිර්මාණය කරනවාට වඩා ප්‍රචාරණයට වියදම් කරන්න සිද්ධ වෙනවා. මම මේ චිත්‍රපටය වෙනුවෙන් සවුන්ඩ් සිස්ටම් ලොරියක් හැදුවා ගම් මට්ටමෙන් ප්‍රචාරක කටයුතුවලට. මම වියදම් කළ ලක්ෂ දෙසිය විසිපහෙන් ලක්ෂ පනහක්වත් තවම ලැබුණේ නැහැ. බල පුළුවන්කාරකම්වලින් චිත්‍රපටය ගැලෙව්වා. එක දර්ශන වාරයක් හරි ඉල්ලුවා ඒක ලබාදුන්නෙත් නැහැ. මෙවැනි අසාධාරණකම් මණ්ඩලවලින් සිදු කරන්න එපා. එම්.පී.අයි. හා එල්.එෆ්.ඩී. මණ්ඩල දෙක එකට චිත්‍රපට තිරගත කරනවා. මේ නිසා චිත්‍රපටවල අවස්ථා නැති වෙනවා. අලුත් නිර්මාණකරුවන් අසරණ වෙනවා. ඔවුන් උත්සාහ කරන්නේ කෙනෙක් අමාරුවෙන් චිත්‍රපටයක් නිර්මාණය කළාම තුට්ටු දෙකට චිත්‍රපටය මිලදී ගෙන ඔවුන්ගේ නම එයට ඇතුළත් කරගන්න. මම සාධාරණයක් ඉල්ලන්නෑ. මේ දේවල් වෙලා ඉවරයි. තවත් නිර්මාණකරුවෙකුට මෙහෙම කරන්න එපා කියලා තමයි මම කියන්නේ.

Q ඔබ සඳහන් කළා මේ චිත්‍රපටයට විශාල ප්‍රේක්ෂක පිරිසක් සිටියා කියලා?

මෙහෙමයි. අපට හොද ප්‍රේක්ෂකාගාරයක් හිටියා. නමුත් අපේ මණ්ඩලයේ ටිකට්පත්වල මිල අඩුයි. උදාහරණයක් කිව්වොත් අපේ මණ්ඩලයේ රුපියල් දෙසීයෙන් ටිකට් පතක මිල ආරම්භ වෙන්නේ. ඊ.ඒ.පී. වගේ මණ්ඩලයක රුපියල් හාරසීයෙන් තමයි ටිකට්පතක මිල පටන් ගන්නේ. අපේ චිත්‍රපයටය තිරගත වූ  මණ්ඩලයෙත් හොඳ මට්ටමේ හෝල් අඩුයි. මෙය මුදල්වලින් කතා කරන්න බෑ. නමුත් මේ චිත්‍රපටය නරඹපු ප්‍රේක්ෂකයන් විශාල පිරිසක් ඉන්නවා. චිත්‍රපටය තිරගත වූ දින ගණන එක්ක හොඳ ප්‍රේක්ෂකාගාරයක් ඉන්නවා.

Q චිත්‍රපටයක් තිරගත කිරීමට මේ වනවිට පවතින වැඩපිළිවෙළ ගැන ඔබේ අදහස මොකක්ද?

ජාතික චිත්‍රපට සංස්ථාවට තමයි සියලු බලතල තිබෙන්නේ. සංස්ථාව හරහා නිවැරදිව වැඩපිළිවෙළ නීත්‍යනුකූලව සිදු වෙනවා නම් කිසිම ප්‍රශ්නයක් නැහැ. සෙන්සර් බෝඩ් සහතිකයක් අපට ලැබෙනවා. එහි සඳහන් අංක පිළිවෙළට මෙය තිරගත වෙනවා නම් ගැටලු ඇති වෙන්නෙ නෑ. මෙහිදී සිදුවන්නේ මේ ක්ෂේත්‍රයේ බල පුළුවන්කාරයන්ගේ චිත්‍රපට කලින් තිරගත වීම. ඔවුන්ගේ චිත්‍රපට මාස තුන හතරින් තිරගත වෙනකොට අලුත් නිර්මාණකරුවන්ට චිත්‍රපටය තිරගත කරන්න වසර දෙක තුනක කාලයක් බලන් ඉන්න සිද්ධ වෙලා. මේක අසාධාරණයි. සංස්ථාවේ බලතල භාවිත කළා නම් අද මගේ චිත්‍රපටය ගලවන්න බෑ. නමුත් සංස්ථාවට එය කරන්න බැරිව තිබෙනවා. දේශපාලනය අනුව එහි සභාපතිවරුන් මාරු වෙනවා. ඔවුන් ඒ ගැන අවබෝධය මාස හයකින් පමණ ලබනකොට නැවත මාරු වීම් සිදුවෙනවා. ඒ නිසා මෙහි නීතිමය වශයෙන් කටයුතු සිදුකරගන්න තිබෙන ඉඩ අහුරලා තිබෙන්නේ. මේ කිසිම තැනක විනිවිදභාවයක් නෑ. නව නිර්මාණකරුවන් අමාරුවේ වැටෙනවා.

Q නිෂ්පාදකවරයෙක් ලෙස මේ චිත්‍රපටය ඩීවීඩී වෙළෙඳ පොළට යොමු කරන්න හැකියාව තිබෙනවා නේද?

එහිත් වෙනම මාෆියාවක් තිබෙන්නේ. එහිත් වෙනත් බිස්නස්කාරයන් පිරිසක් බිහි වෙලා. ඩීවීඩී සඳහා කවුරු මිලදී ගත්තත් අන්තිමට එහි හිමිකරු ලෙස සිටින්නේ එක් කෙනෙක්. මේ බලතලත් චිත්‍රපට සංස්ථාවට තිබෙන්න ඕන. දැන් ණය බේරන්නේ කොහොමද කියන දේ තමයි අපට හිතන්න වෙලා තියෙන්නේ.

 

ආදරේ කරන සහ කරපු හැමෝටම මේ ගීතය ගොඩක් සමීප වෙයි

ජනප්‍රිය ගායිකාවක් වන අභිෂේකා විමලවීරගේ නවතම ගී නිර්මාණය %නිස්සාර^ නමින් අද (20දා) සිට අන්තර්ජාලයෙන් මෙන්ම රූපවාහිනී, ගුවන් විදුලි මාධ්‍ය තුළින් ඔබට අසන්නට දකින්නට ලැබෙයි. මේ කතාබහ එම ගී නිර්මාණය පිළිබඳවයි.


IMG_8079-2 copy

Q ‘නිස්සාර’ කියන ගීතය ගැන ගැන අපි කතා කරමු?               

‘නිස්සාර’ කියන මේ ගීතයේ පද රචනාව සිදුකළෙත් මමමයි. එහි සංගීත නිර්මාණය සිදුකළේ දිලුම් තේජන හෙට්ටිආරච්චි. එහි රූපරචනාව සමිල් පතිරණ (තාල රූප) විසින් සිදුකළා. ‘රිදි රිදී ‘ කියන ගීතය තමයි මම අවසානයට නිර්මාණය කළේ. ඒ ගීතය නිර්මාණය කර වසර දෙකට පසුව තමයි මම මේ ගීතය නිර්මාණය කරන්නේ.

Q ‘රිදි රිදී’ කියන ගීතයට පසුව නිර්මාණය වුණ නිස්සාර කියන ගීතය රසිකයන් අතරට ගෙන එන්න වසර දෙකක කාලයක් ගත්තේ  ඇයි?

මගේ තාත්ති කැමතිම ගීතයක් තමයි ‘රිදි රිදී’ කියන ගීතය. තාත්ති නැති වුණාට පසුව රසිකයන්ට ගෙන එන පළමු ගීතය තමයි මෙය. මගේ තාත්තාගේ වියෝවත් එක්ක තමයි මේ ගීතය එළිදැක්වීම පමා වුණේ. ඊට අවශ්‍ය මානසික වටපිටාව නිර්මාණය කරගෙන තමයි මම මේ නිර්මාණය සිදුකළේ.

Q අභිෂේකා සිදුකළ පෙර ගී නිර්මාණ දෙස බලද්දිත් කාලයක් අරගෙන තමයි  ගීතයක් නිර්මාණය කරන්න යොමුව තිබෙන්නේ?

මගේ වෘත්තිය ගායනය නෙමෙයි. මම ප්‍රසංග වේදිකාවේ ගීත ගායනා කරන්නේ නැහැ. මට විවේකය තිබෙන වෙලාවට තමයි මම ගීත නිර්මාණ සිදුකරන්නේ. වැඩි කාලයක් මගේ රැකියාවට ලබා දෙනවා. මගේ පවුල් ජීවිතයට, දුවගේ වැඩකටයුතුවලට වෙලාව වෙන්කර ගන්න ගමන් තමයි ගීත නිර්මාණයන් සිදුකරන්නේ. ඒ නිසා කලබලයක් නැහැ. කාල වේලාව අරගෙන හොඳ නිර්මාණයක් කරන්න තමයි උත්සාහ කරන්නේ.

Q ‘නිස්සාර’ කියන ගීතය තුළ අන්තර්ගත වන තේමාව ගැන කතා කළොත්?IMG_8277 copy

අපේ ජීවිතයේදී දැන් අපි ආදරය කරන කෙනාට අමතරව තව අපි ආදරේ කළ අය ඉන්න පුළුවන්. සම්මත ආදරයෙන් එහාට ගිහින් කෙනෙක් ආදරය කරන්නත් පුළුවන්. ඒ අසම්මත ආදරය ගැනත් ඒ ආදරය අත්පත් කර ගැනීමට බැරි වීම තුළ ජීවිතය නැති කරගත යුතු නැහැ කියන කාරණයත් මෙහි කතා කරනවා. අපි හැමෝම ලෝකෙට පෙනෙන්න සිනාසී සිටියාට අපේ අභ්‍යන්තරයේ සිටින්නේ වෙන මනුස්සයෙක් ඒක අපි පිළිගත යුතුයි. ඒ අභ්‍යන්තර මිනිසාව හඳුනන්නේ සමහර විට හොඳම යාළුවෙක් පමණයි. එසේත් නැත්තම් තමන්ම පමණයි. ඒ දෙස බලන ලෝකයේ බොහෝ දෙනෙක් හිතන්නේ ඔහු හෝ ඇය ගොඩක් සතුටින් ඉන්නවා කියලා. ඒත් යථාර්ථය ඒක නෙමෙයි. මිය යනතුරුම අපි ආදරේ කරනවා. පාසල් යන කාලෙත් පාසලේ තිබෙන නීතිරීති සමග හෝ දෙමව්පියන්ගේ නීතිරීතිත් එක්ක අපි ආදරෙන් පරාජය වෙනවා. පසුව තරුණ කාලෙදී නිවසින් සමාජයෙන් යොමුවෙන ප්‍රශ්නවලට මුහුණ දෙන්න සිද්ධ වෙනවා. ඒ ප්‍රශ්නත් එක්ක ආදරේ මගහැරෙනවා. සමහරවිට විවාහ වෙන්න සිද්ධ වෙන්නෙත් තමන් වඩාත්ම කැමති කෙනා එක්ක නෙමෙයි. විවාහ වූ පසුවත් අසම්මත සබඳතා ඇතිවෙන්න පුළුවන්. සමහරවිට මිය යනතුරුම ඒ දේවල් හිතේ තියාගෙන ජීවත්වෙන මිනිසුන් ලෝකෙ සිටිනවා. මම හිතන්නේ ආදරේ කරන සහ කරපු හැමෝටම මේ ගීතයේ වචන ගොඩක් සමීප වෙයි. ඒ වගේම මේ ගීතයේ මෙලඩියත් විශේෂයි. මේ ගීතය ඇසූ බොහෝ දෙනෙක් මේ ගීතය චිත්‍රපට ගීතයක ආරක් තිබෙනවා කියලා සඳහන් කළා. දිලුම් තමයි එහි සංගීතය සිදුකළේ. මියුසික් වීඩියෝ එක පැත්තෙන් ගත්තත් චමිල් පතිරණ ලොකු වෙනසක් කළා කියලා හිතනවා. මෙවැනි කතා හැමදෙනෙක්ගෙම ජීවිතවල තිබෙනවා. ඒ නිසා මේ තේමාව පාදක කරගෙන නිර්මාණය වූ මේ ගීතය බොහෝ දෙනෙක් ආදරෙන් බාරගනියි කියලා මම හිතනවා.

Q මේ ගී නිර්මාණයට රූපරචනාවකුත් නිර්මාණය වෙනවා. ඒ ගැන කතා කළොත්?

මේ ගීතයේ අන්තර්ගත තේමාවට සමාන රූපරචනාවක් තමයි සිදුකළේ. ලොකු පිරිවැයක් දරමින් සිදුකළ නිර්මාණයක් නෙමෙයි මෙය. ඉතාම අඩු පිරිවැයක් දරා සිදුකළ වැඩක්. හොඳ නිර්මාණයක් කරන්න මුදල් කියන සාධකය නෙමෙයි මූලික වෙන්නේ කියන එක ඔප්පු කරන රූපරචනාවක් කියලා මම හිතනවා. සිරස ජූනියර් සුපර් ස්ටාර් එක්ක බොහෝ දෙනෙක් ප්‍රතිචාර දක්වනවා. මේ ගීතයටත් හොඳ මෙන්ම නරක ප්‍රතිචාර ගැනත් බාරගන්න බලාගෙන සිටිනවා.

Q ගායන කටයුත්තට අමතරව ඔබ නිවේදිකාවක් ලෙස කටයුතු කළා. නමුත් මේ වෙද්දි ඔබ ඉන් ඉවත් වී සිටිනවා?

මම නිවේදිකාවක් ලෙස කටයුතු කිරීමෙන් ඉවත්වී සිටිනවා. අපිට හරියටම කරන්න පුළුවන් මොකක්ද කියලා තේරුම්ගත නොහැකිව ජීවිතේ එක්තරා සංක්‍රාන්තික කාලයක් තිබෙනවා. ඒ කාලෙන් පසුව දැන් මම දන්නවා මගේ ජීවිතේ හරියටම කරන්න පුළුවන් මොකක්ද කියලා. ඒ නිවේදනය නෙමෙයි කියන එක තේරුම් අරගෙන ඉන්නවා. ඒ නිසා මම ඉන් ඉවත් වෙනවා.

Q වර්තමානයේ සිදුවන ගී නිර්මාණ ගැන ඔබේ අදහස කුමක්ද?

ලෝකයේ හැම මිනිසෙක්ම එක වගේ නැහැ. ඒ නිසා එහෙම මිනිසුන් අතින් නිර්මාණය වන්නා වූ නිර්මාණ විවිධයි. ඒ සෑම නිර්මාණයක්ම විඳින්න බලාගෙන සිටින රසික ප්‍රජාවක් සිටිනවා. නමුත් මං සිතන දෙයක් තමයි කලාකාරයාගේ වගකීම වෙන්නේ පහළ මට්ටමේ සිටින රසිකයන් ඉහළ රසඥතාවක් කරා ගෙන එන නිර්මාණ කිරීම. එසේ නොමැතිව ඉල්ලන දේ සිදුකිරීම නෙමෙයි. මිනිසුන්ගේ රසවින්දන පරාසය වැඩිවෙන්න බලපාන පළමු සාධකයත් එය. ලංකාව, ඉන්දියාව වැනි දියුණු වෙමින් පවතින රටවල සිනමාව පැත්තෙන් පහළ රසඥතාවක් තිබෙන නිර්මාණ බිහිවීමට හේතුව වෙන්නෙත් තව තව ඒ රසඥතාවන් පහළට දමන නිර්මාණ සිදුවීමයි. නමුත් අපි රසිකයන් ඉල්ලන දේ සපයනවාට වඩා අපට තේරෙන යම් බුද්ධි මට්ටමකට මිනිසුන් ඔසවා තබන්න උත්සාහ කළ යුතුයි.

Q අභිෂේකා, ජූනියර් සුපර් ස්ටාර් දකින්නෙ කොහොමද?

මේ වෙද්දි මම ජූනියර් සුපර් ස්ටාර් විනිශ්චය මණ්ඩලය තුළ සිටිනවා. එහිදී මම කුඩා ළමයි විනිශ්චය කරනවා. ඔවුන් ඉල්ලන දේ නෙමෙයි අපි ලබාදිය යුත්තේ. මම හැමවිටම උත්සාහ කරන්නේ පවතින සමාජ දැනුම පොතපත ආභාසයෙන් ලබාගත් දැනුම ලබාදෙන්නයි. මම ළමයාගේ මට්ටමට යනවාට වඩා ළමයා මගේ මට්ටමට ගෙන ආ හැකි නම් එය කලාකරුවෙක්ගෙන් වෙන්න ඕන දෙයක් කියලයි මම හිතන්නේ. මම නිර්මාණ කරන්නෙත් ඒ වෙනුවෙන්. මුලින් නිර්මාණයක් සිදුකර මම බලනවා ඉන් මම සතුටුවෙනවද කියලා. එහෙම සතුටක් විඳින්න බැරි නිර්මාණයක් මම සිදුකරන්නේ නෑ.

 

සිනමා නිර්මාණයක් යනු යථාර්ථයම වියයුතු නෑ එය තේරුම් ගැනීම ප්‍රේක්ෂකයා සතු වගකීමක්

වසර විස්සක පමණ කාලයක් කලා අධ්‍යක්‍ෂවරයෙකු ලෙස කටයුතු කළ සුජීව ගුණරත්නයන්ගේ ප්‍රථම සිනමා නිර්මාණය වන %කාල^ මේ දිනවල සිනමා ශාලා රැසක තිරගත වෙයි. මේ කතාබහ කිරීමට ඔහු මෙලෙස 'අද'ට සම්බන්ධ කර ගතිමු.


003 copy

Q ජනකතාවක් පාදක කරගෙන සිනමා නිර්මාණයක් කරන්න හිතුවේ ඇයි?

ඒකට කාරණා කිහිපයක් තිබෙනවා. මේ වනවිට රජකතා මිනිසුන් ප්‍රතික්‍ෂේප කරලා තියෙන්නේ. නමුත් අපේකම තිබෙන දෙයක් සමාජගත කරන්න ඕන කියලා හිතුණාම එයට හොඳම දේ අපේ මේ ජනකතා කියලා මට හිතුණා. ජනප්‍රවාද, ජනශ්‍රැති මේ වන‍විට සමාජයෙන් බැහැරව පවතින්නෙ. ඒ නිසා ජනකතා සමාජගත කිරීම ඉතා හොඳ තත්ත්වයක් කියලා මට හිතුණා. ඒකයි %කාල^ සිනමා නිර්මාණයට ජනකතාවක් පාදක කර ගත්තේ. මට විශ්වාසයක් තිබුණා මේ ජනකතා ප්‍රේක්‍ෂකයන් වැලඳ ගනියි කියලා.

Q නමුත් මේ ජනකතාව සිනමා නිර්මාණයක් ලෙස ගෙන එද්දි එහි මුල් විනාඩි කිහිපය මන්දගාමී වගේම ටෙලිනාට්‍ය ස්වරූපයක් පවතින්නෙ?

විචාරකයන් එහෙම කියනවා. විචාරකයෙක් කියන්නේ එක පුද්ගලයෙක්. නමුත් ඒ එක් එක් පුද්ගලයාට සාපේක්‍ෂව හිතෙන දේ ප්‍රකාශ කරන්න අයිතිය නිදහස තිබෙනවා. නමුත් වේදිකා නාට්‍යය, ටෙලිනාට්‍යය, චිත්‍රපට කියන මාධ්‍ය තුනේම මම සැරිසරලා තිබෙනවා. මම මාධ්‍ය තුන තුළම ක්‍රියාකරලා තිබෙනවා. මම කියන්නේ මෙහෙම විවේචනය කරන්න කලින්  විචාරකයා හඳුනාගෙන ඉන්න ඕන මේ මාධ්‍ය තුන මොකක්ද කියලා. මාධ්‍ය හරියටම නොදැන මේ ගැන විචාර ලියවෙන කාරණා තිබෙනවා. මම කියන්නේ නිර්මාණයක් කරද්දි නින්දා, පැසසුම්, විචාර සියලු දේම විඳින්න සූදානම් වෙන්න ඕන. විචේචනය නොකර විචාර කරනවාට මම කැමැතියි.

IMG20170814155037 copy

Q ඒ වගේම මේ චිත්‍රපටයේ කේන්ද්‍රීය කතාවට පරිබාහිර චරිත හා සිදුවීම් යොදාගෙන තිබෙනවා කියන කාරණයත් කතාබහට ලක්වෙනවා?

අපේ සරල සමාජය ගන්න. මම විතරද මෙහි ජීවත් වෙන්නේ. යථාර්ථය මොකක්ද? මම ඇසුරු කරන ප්‍රමාණය ගත්තත් මම වටා කීදෙනෙක් ඉන්නවද? මෙහෙම චරිත තිබිය යුතුයි. තුන්හතර දෙනෙක් දාගෙන සිනමා නිර්මාණයක් කරනවාද, යථාර්ථයට මුහුණ දෙනවාද කියන එක අපි තීරණය කළ යුතුයි. ඒ නිසා ඕනම පුද්ගලයෙකුට එහෙම චරිත විශාල ප්‍රමාණයක් තියෙන්න පුළුවන්. නමුත් ඒ හැම කෙනාගෙන්ම අපට බොහෝ කාරණා ලබාගන්න තිබෙනවා. ඒ නිසා මම කියන්නේ ඒක ඔය කතා කළාට සරල කාරණාවක්.

Q නමුත් සිනමා නිර්මාණයක් කියන්නේ පවතින යථාර්ථයම නෙමෙයි නේද?

ඔව්. යථාර්ථයම නෙමෙයි. යථාර්ථයම විය යුතු නෑ. මිනිස්සුන්ට විශ්වාසනීයත්වය තිබිය යුතුයි. මම මගේ දේ කළා. එය තේරුම් ගැනීම ප්‍රේක්‍ෂකයා සතු වගකීමක්. මම මගේ වැඩේ සිදුකර අවසන්.

Q ඔබ සඳහන් කළා මේ ජනකතාව ප්‍රේක්‍ෂකයන් වැලඳ ගනියි කියන විශ්වාසය ඔබ තුළ තිබූ බව. මේ වනවිට සිනමා නිර්මාණය තිරගත වෙනවා. ඒ විශ්වාසය යථාර්ථයක් වෙලා තියෙනවද?

අපේකම කියන හැඟීම තිබෙන මිනිසුන් අපේ රටේ නැතුව නෙමෙයි ඉන්නවා. ඒ මිනිසුන් පවුල්පිටින් ඇවිත් මේ චිත්‍රපටය නරඹනවා. පසුගිය කාලයේ ස්වාභාවික කාරණා සහ යම්යම් බලපෑම් අපට තිබුණා. ඒ කාරණා මත ප්‍රේක්‍ෂකයන් යම් ප්‍රමාණයකට අඩු වුණත්, මේ වනවිට ප්‍රේක්‍ෂකයන් නැවතත් සිනමා ශාලා කරා පැමිණෙනවා. තෙල් ප්‍රශ්නය, සවස් කාලයේ පැවැති කාලගුණික තත්ත්වය බලපෑවා. ඒ වගේම මේ වනවිට පවතින ප්‍රධාන කාරණය පාසල් දරුදැරියන් මේ සිනමා නිර්මාණය නැරඹීමට ගෙන්න ගන්න අපහසු තත්ත්වයක් තිබෙනවා. පාසල් අවසන් වාර විභාගය නිසා දෙමවුපියන් ළමයින් එයට යොමුකරන ප්‍රවණතාව වැඩියි. ඒ නිසා දෙසැම්බර් මස තමයි විශාල ප්‍රේක්‍ෂක පිරිසක් බලාපොරොත්තු විය හැක්කේ.

Q බලපෑම් පැවතුණා කියා ඔබ සඳහන් කරන්නේ?

යම් යම් බලපෑම් මත තමයි මේ චිත්‍රපටය ප්‍රදර්ශනය කිරීමට සූදානම් වෙන්නේ. ජාතික චිත්‍රපට සංස්ථාවේ සභාපති හා කාර්යමණ්ඩලය එය හොඳින්ම දන්නවා. සමහර සිනමා ශාලාවල මගේ චිත්‍රපටයේ එක 'ෂෝ කාඩ්' එකක්වත් අද වනතුරු ප්‍රදර්ශනය කළේ නැහැ. මේක දැඩි උපක්‍රමශීලි වැඩක්. මට එය ඔප්පු කළ හැකියි. මේ සිනමා කර්මාන්තයේ බෙදාහැරීමේ ක්‍රමවේදය තුළ විශාල මාෆියාවක් පවතිනවා. මේ මාෆියාව තුළ හතර, පස්දෙනෙක් මෙහි ආධිපත්‍ය රඳවා ගන්න උත්සාහ කරනවා. අප වැනි අංකුර කලාකරුවන්ට, අංකුර සිනමාකරුවන්ට මේ ක්‍ෂේත්‍රයට අවතීර්ණ වෙන්න ඉඩහසර සලසා දෙන්නේ නැහැ. එයට බලපෑම් කරනවා. නව නිෂ්පාදකයන් නිර්මාණය විය යුතුයි. 

ලත්තැන ලොප් කරන්න උත්සාහ කරන පිරිසක් සිටිනවා. මේ වනවිට රූගත කර මාස හයක්වත් ගතවී නැති චිත්‍රපටයක්, අවුරුදු ගණනක් බලන් සිටින සිනමාකරුවන් සිටියදී ප්‍රදර්ශනය කරන්න දින වකවානු ලැබෙනවා. 'කාල' සිනමා නිර්මාණයත් ගලවලා එය තිරගත කරන්න තමයි උත්සාහ දරමින් ඉන්නෙ. ඔවුන් ප්‍රචාරණ කටයුතු ආරම්භ කරන්නේ 'කාල' සිනමා පටයට දින ලැබෙන්නත් පෙර සිට. දෙසැම්බර් නිවාඩුව අරමුණු කරගෙන තමයි මෙය සිදුවෙන්නේ. මේ කාරණාව මම චිත්‍රපට සංස්ථාවටත් සඳහන් කළා. දැන් තිබෙන ක්‍රමවේදය එක්ක දිනක දර්ශන වාර හතරක් තිබේ නම්, හතරෙන් තුනක් එක් සිනමා නිර්මාණයකට, තව එකක් තවත් සිනමා නිර්මාණයකට ලබාදීමට ඔවුන් කටයුතු කරනවා. සමහර සිනමා ශාලාවල දර්ශන වාර දෙකක් එක චිත්‍රපටයකට, අනෙක් දර්ශනවාර දෙක තව චිත්‍රපටයකට ලබාදෙනවා. සිනමාකරුවාට අවශ්‍ය ලෙස ඔවුන් දර්ශන මාරු කරනවා. චිත්‍රපට සංස්ථාවෙන් කිසිම පියවරක් ගන්නේ නැහැ. මණ්ඩල පහ කියන්නේ චිත්‍රපට සංස්ථා පහක් වගේ වෙලා. මෙහි නිසි ක්‍රමවේදයක් නැහැ.

Q මේ තත්ත්වය තුළ ඉදිරි නිර්මාණ කටයුතු ගැන සඳහන් කළොත්?

මට යහපත් දෙයක් සමාජගත කරන්න අවශ්‍යයි. ප්‍රේක්‍ෂකයන්ගේ වින්දනයට, බුද්ධිමණ්ඩලයට දෙයක් ලබාදිය හැකිනම්, කලාකරුවෙක් ලෙස මා ලබන උපරිම තෘප්තිය එයයි. මේ සිනමා නිර්මාණයටත් දායක වූ පිරිසක් සිටිනවා. ඔවුන් මතක් කළ යුතුයි. ඩී.කේ. ආටිගල තිර රචනය සිදුකළේ,  දර්ශන රුවන් දිසානායක සංගීතය, චන්දන ලියනගේ කැමරාකරණය, මහේන්ද්‍ර පෙරේරා, විශ්ව කොඩිකාර, සූර්යයා දයා රුවන් ඇතුළු රංගන ශිල්පීන් පිරිසක් දායක වුණා. මේක සාමූහික ක්‍රියාවලියක්. 
මේ චිත්‍රපටයේ නිෂ්පාදන කටයුතුත් සිදුවුණේ පවුලෙම අය විසින්. මගේ බිරිඳ නදීරා බමුණුසිංහ, ඇයගේ පියා ආනන්ද බමුණුසිංහ, ප්‍රදීප් ලක්ෂාන්ත අපි එකතු වී කළ නිෂ්පාදනයක්. තව නිර්මාණයක් කරන්න තව කාලයක් ගතවෙයි. මම ටෙලිනාට්‍යයක් නිමකර තිබෙනවා. එය විකාශය වීමට නියමිතයි. 

004 copy 002 copy Screen Shot 2017-05-15 at 11.38.58 PM

නිරෝගී අනාගතයක් උදෙසා HIV ගැන දැනගන්න

එව්.අයි.වී. රෝගය සමග ජීවත් වන මානවයෝ අප රට තුළද සිටිති. ඔවුන් කොන්කර, වෙනස්කර සැලකීම වෙනුවට සිදුකළ යුත්තේ ඔවුන්ද සමකොට සැලකීමය. ඔවුන්ට ජීවිතයේ කොතැනකදී හෝ වරදින්නට ඇත. මොවුන්ද මානවයන්ය. මෙවර ලෝක ඒඩ්ස් දින තේමාව වූයේ 'සෞඛ්‍ය සඳහා සැමට තිබෙන අයිතිය' යන්නය. මේ එම රෝගයේ වර්තමාන පැතිකඩ පිළිබඳව තැබෙන සටහනකි.


ලංකාවේ පළමු එච්.අයි.වී. රෝගියා වාර්තා වන්නේ 1987 වසරේදීය. එම වසරේ සිට එච්.අයි.වී. වෛරසය වෙනුවෙන් වැඩසටහන් රැසක් ලංකාව තුළ ක්‍රියාත්මක විය. ප්‍රධාන වශයෙන්ම 
එච්.අයි.වී. ආසාදනය වන්නේ අනාරක්‍ෂිත ලිංගික හැසිරීම් තුළිනි. මවගෙන් දරුවාටත්, මත්ද්‍රව්‍ය විද ගැනීම තුළින්ද මෙම රෝගය ආසාදනය වීමට හැකියාව ඇත. මේ දක්වා විවිධ වූ වැඩසටහන් ලංකාව තුළ ක්‍රියාත්මක විය.
බස්නාහිර පළාත තුළින් වැඩිම 

එච්.අයි.වී. රෝගීන් ප්‍රමාණයක් වාර්තා වීම

බස්නාහිර පළාත තුළින් වැඩිම රෝගීන් ප්‍රමාණයක් වාර්තා වන අතර, 1987 ශ්‍රී ලංකාවේ පළමු එච්.අයි.වී. රෝගියා වාර්තා වූ දින සිට ඉතිහාසයේ සෑම වරකම වැඩිපුර කොළඹ දිස්ත්‍රික්කය තුළින් රෝගීන් වාර්තා වෙයි. බස්නාහිර පළාත තුළත් කොළඹ, ගම්පහ සහ කළුතර යන දිස්ත්‍රික්ක තුන නියෝජනය වෙයි. එයින්  වර්ගකිලෝමීටර් 37ක් වන කොළඹ නරගයෙන් වැඩිම රෝගීන් ප්‍රමාණයක් මේ වනවිට වාර්තා වී ඇත. එයට හේතුකාරණා කිහිපයක් බලපා තිබෙන බව පෙනීයන කරුණකි. එනම්, මෙම වර්ගකිලෝමීටර් 37 ඇතුළත ලක්‍ෂ හතක් ජීවත් වීමය. සාමාන්‍යයෙන් වර්ගකිලෝමීටරයකට ජීවත් වන ජනගහනය දහඅටදහසක් පමණය. නමුත් උතුරු කොළඹ වර්ගකිලෝමීටරයකට විසිහතරදහසක් පමණ ජීවත් වෙති. මෙය ප්‍රංශයේ පැරිස් නුවර ජන ඝනත්වයට සමානය. සිංගප්පුරුව වැනි රටක වර්ගකිලෝමීටරයට අටදහසක ප්‍රමාණයක්  ජීවත් වෙති. උතුරු කොළඹ නගරයේ සියලු ආගමිකයන් සේම විවිධ වයස් කාණ්ඩයන් මෙම රෝගය සමග ජීවත් වන්නන් ලෙස හඳුනාගත හැකිය. උතුරු කොළඹ මෝදර මට්ටක්කුලිය, ගෑන්පාස්, මහවත්ත, මැදකොළඹ සහ බොරැල්ල යන ප්‍රදේශවල එච්.අයි.වී. රෝගීන් වාර්තා වී තිබේ.1200px-Red_Ribbon.svg

පසුගිය වසරේ ජුනි මස සිට මේ වසරේ ජුනි මාසය දක්වා පමණක්  නව රෝගීන් 23 දෙනෙකු වාර්තා වී තිබෙන අතර,  රෝගීන් වාර්තා වීමේ ක්‍රමික වර්ධනයක් තිබීම ගැටලුකාරී තත්ත්වයකි. මේ ගැටලුකාරී තත්ත්වය නිසාම රෝගීන් වාර්තා වූ ප්‍රදේශ ඉලක්ක කරගෙන සෑම මසකම විශේෂිත සායන පවත්වනු ලැබේ. මෙලෙස කෙතරම් සායන පැවැත්වුවද, මෙම රෝගය පිළිබඳ පරීක්‍ෂා කර ගැනීමට යොමුවිය යුත්තේ තමන්මය. එයට බලහත්කාරයෙන් යොමුකිරීම සිදුකර නොහැකිය. වෛද්‍ය ආචාරධර්ම අනුව සිදුකරනු ලබන  පරීක්‍ෂණය ගැන පෙරදීම සඳහන් කළ යුතුය. එම නිසා එච්.අයි.වී. පරීක්‍ෂණය පවත්වන බව සඳහන් කළ විට බොහෝ දෙනෙකු මෙම සායන මගහරින තත්ත්වයක් දැකගත හැකිය. මෙය පවතින ගැටලුකාරී තත්ත්වයකි. සමාජයේ තිබෙන භීතිය නිසා රෝගීන් සැඟව සිටීමට උත්සාහ කරන තත්ත්වයක් ඇතිව තිබේ.

මවගෙන් දරුවාට පැතිර යෑම වැළැක්වීම 

මේ වනවිට කොළඹ නගරය තුළ වසරකට දරුවෝ දසදහසක් පමණ බිහිවෙති. ඉන් මාතෘ සායන සඳහා නවදහසක් පමණ යොමුවෙති. මෙම සායනවලට යොමුවන මවුවරුන් රුධිර පරීක්‍ෂාවන් සඳහා යොමුකිරීම සිදුවෙයි. එහිදී යම් ලෙසක මවට එච්.අයි.වී. ආසාදනය වී ඇත්නම් එය දරුවාට ආසාධනය වීම වැළැක්වීමට ක්‍රියාමාර්ග රැසක් ගනු ලැබේ. 2013 වන‍තුරු අප එච්.අයි.වී. හා 'උපදංශය' යන රෝග මවගෙන් දරුවාට යෑම වැළැක්වීම පිළිබඳ කතා කළේය. 2013 පසුව මෙම රෝගය තුරන් කිරීම ගැන කතා කළේය. 2018 වර්ෂය එම ඉලක්ක සාක්‍ෂාත් කරගැනීමට ඉතා වැදගත් වර්ෂයකි. එක්දහස් නවසිය පනස්දෙකේදී සමාජ රෝග මර්දනය කිරීමේ ව්‍යාපාරයක් ආරම්භ විය. එහි තිබූ ප්‍රධාන අරමුණු හතරින් එකක් වන්නේ මවගෙන් දරුවාට උපදංශ රෝගය යෑම වැළැක්වීමය. එක්දහස් නවසිය පනස්හතර වන විට උපදංශ රෝගය මවගෙන් දරුවාට යෑම වැළැක්වීම ගැන වැඩසටහන් ක්‍රියාත්මක විය. 1982 දී  එච්.අයි.වී. නමැති රෝගය අප දැන ගන්නේය. මේ රෝගය මවගෙන් දරුවාට යෑම ගැන දැනුවත් විය. එය වැළැක්වීමට පරීක්‍ෂණ රැසක් මෙම කාලයේදීද සිදුවිය. මෙම පරීක්‍ෂණ මිල අධික පරීක්‍ෂණය. 2000 වසර පමණ වනවිට තායිලන්තයේ බැංකොක් නගරයේ සිදුකළ පරීක්‍ෂණයකින් කිසියම් ඖෂධ වර්ගයක් භාවිත කිරීමෙන් මවගෙන් දරුවාට මෙම රෝගය යෑම තුනෙන් දෙකක් අඩුකළ හැකි යැයි සොයා ගත්තේය. මේ අනුව 2002 
වසරේ දී ශ්‍රී ලංකාව මවගෙන් උපදංශය වැළැක්වීමේ වැඩසටහන ආරම්භ කළේය. එය සාර්ථකව සිදුකළ ආසියාවේ රටවල් දෙකක් ලෝක සෞඛ්‍ය සංවිධානය සඳහන් කළේය. ඒ රටවල් දෙක වන්නේ ලංකාව හා තායිලන්තයයි. 2011 වසරේ එක්සත් ජාතීන්ගේ ප්‍රධාන සැසි වාරයකදී පැමිණි යෝජනාවකට අනුව %එච්.අයි.වී. මවගෙන් දරුවාට යෑම තුරන් කළ යුතුයි^ යන යෝජනාව ඇති විය. 2013 වසරේදී උපදංශ වැඩසටහනද, මෙම වැඩසටහන් එක්කර මවගෙන් දරුවාට එච්.අයි.වී. හා සිපිලිස් රෝග තුරන් කිරීමේ වැඩසටහන ආරම්භ විය. වැළැක්වීමේ වැඩසටහන වෙනුවට තුරන් කිරීමේ වැඩසටහන ආරම්භ විය. මෙම වැඩසටහන රජයේ මූල්‍යමය ආධාර මත ක්‍රියාත්මක වෙයි. යුනිසෙෆ් හා ලෝක සෞඛ්‍ය සංවිධානයේ මගපෙන්වීම නිරන්තර ලැබෙන්නකි. 2016 වසර අවසන් වනවිට මවගෙන් දරුවාට එච්.අයි.වී. ආසාදිත වූවන් 80 දෙනෙකු වාර්තා විය. මෙම වසරේ තවත් දරුවන් දෙදෙනෙකු වාර්තා විය. ඇස්තමේන්තුවට අනුව අවුරුද්දකට 85 – 100ක් පමණ දරුවන් ඇතිවේ යැයි සඳහන් වෙයි. සිපිලීස්වලට වී.ඩී.ආර්.එල්. පරීක්‍ෂණයත්, එච්.අයි.වී. සඳහා එච්.අයි.වී. පරීක්‍ෂණයත් සිදුකළ හැකිය. සායනවලදී මවගෙන් රුධිරය ගෙන ප්‍රදේශයේ තිබෙන ලිංගාශ්‍රිත රෝග සායනයේ රසායනාගාරයේදී මෙම පරීක්‍ෂණය සිදුකර ගත හැකිය. 2012 වන‍විට ගර්භිණී මවුවරුන්ගෙන් සියයට 5.6ක් පමණක් 
එච්.අයි.වී. පරීක්‍ෂණ සිදුකර ගෙන තිබූ අතර, 2016 වන විට එය සියයට 94.4ක් දක්වා වැඩිකර ගැනීමට හැකියාව ලැබී ඇත. මේ වසරේ මවුවරුන් 26 දෙනෙකුට මවගෙන් දරුවාට එච්.අයි.වී. ඇති වීම වැළැක්වීමට සේවාවන් සපයා තිබේ. මවගෙන් දරුවාට එච්.අයි.වී. තුරන් කළේ යැයි අප සඳහන් කිරීමට නම් උපත් ලක්‍ෂයක් සිදුවන විට එච්.අයි.වී. ආසාදන 50කට අඩු සංඛ්‍යාවක් විය යුතුය. අප රටේ 2016 දී වාර්තා වූයේ  එක් දරුවෙකුට පමණි.

ලෝකයේ හා  ශ්‍රී ලංකාවේ වර්තමාන තත්ත්වය

2016 වනවිට එච්.අයි.වී. ආසාදනයෙන් පෙළෙන රෝගීන් මිලියන 36.7ක් හඳුනාගෙන ඇත. නව ආසාදිතයන් මිලියන 1.8ක් හා එච්.අයි.වී. වෛරසය නිසා වාර්තා වූ මරණ මිලියනයකි. කලාප අනුව ගත්කල මිලියන 36.7ක් එච්.අයි.වී. රෝගය සමග ජීවත් වෙති. ගිනිකොන දිග ආසියාතික කලාපය (ලංකාව සිටින කලාපය) මිලියන 3.5කි. මෙම කලාපයට අයත් රටවල් දහය අතරින් රටවල් පහක සියයට 99ක් එච්.අයි.වී. ආසාදිතයෝ ජීවත් වෙති. ඉන්දියාව, තායිලන්තය, ඉන්දුනීසියාව, නේපාලය, මියන්මාරය යන රටවල් පහ තුළ එච්.අයි.වී. රෝගීන් වැඩි පිරිසක් වාර්තා වෙයි. බංග්ලාදේශය, මාලදිවයින, ශ්‍රී ලංකාව, භූතානය සහ කොරියාව තුළ මිලියන 35න්, 01෴ක පමණ ප්‍රමාණයක් සිටියි. අප අඩු එච්.අයි.වී. ප්‍රවණතාව සහිත රටකි. 2025 වන විට එච්.අයි.වී. ආසාදනය වීම නිසා ඇතිවන්නා වූ මරණ ඉතා අවම කිරීමට සැලසුම් සම්පාදිතය. 2016 වර්ෂයේදී ඇස්තමේන්තු කළ ලංකාවේ එච්.අයි.වී. ආසාදිතයන් ප්‍රමාණය 3900කි. ඇස්තමේන්තු කිරීම් අනුව නව ආසාධිතයන් 550 (2016 වසර තුළ) කි. එමෙන්ම ඒඩ්ස් නිසා ඇති වූ මරණ සංඛ්‍යාව 110කි. ලංකාවේ එච්.අයි.වී. ප්‍රවණතාව 03 කි. පසුගිය මස අවසන් වන විට රට තුළ සිටින එච්.අයි.වී. ආසාදිතයන් සංඛ්‍යාව ‍2783ක් ලෙස හඳුනාගෙන තිබේ. ඉන් 690ක් ඒඩ්ස් තත්ත්වයට පත්ව ඇත. ඒඩ්ස් නිසා ඇතිවූ මරණ 444කි.

පසුගිය වසරේදී ‍එච්.අයි.වී. ආසාදිතයන් 249 දෙනෙකු වාර්තා විය. ඒ පිරිමින් 188 දෙනෙකු සහ කාන්තාවන් 61 දෙනෙකුය. 2009 වසරේ සිට වැඩි වශයෙන් පිරිමි පාර්ශ්වය තුළ රෝගය වැඩි වීමක් දක්නට ලැබේ. පිරිමි තිදෙනෙකුට එක් කාන්තාවක් වාර්තා වීමේ ප්‍රවණතාවක් දක්නට ලැබෙයි. මේ වසරේ ඔක්තෝබර් වනතුරු එච්.අයි.වී. ආසාදිතයන් 226කි. ඒ පිරිමින් 181 දෙනෙකු සහ කාන්තාවන් 45 දෙනෙකි. එච්.අයි.වී. ආසාදනය වන වයස් කාණ්ඩ වෙත අවධානය යොමුකරන විට පෙනීයන කරුණක් වන්නේ රටේ ආර්ථිකයට ඵලදායීම වන කණ්ඩායම මෙයට ගොදුරු වන බවයි. වයස අවුරුදු 25 සිට වයස අවුරුදු 49 වැනි කණ්ඩායම 80%ක් පමණය. මවගෙන් දරුවාට රෝගය ආසාදනය වූ අය වයස අවුරුදු 15ට අඩු කණ්ඩායම්ය. මවගෙන් දරුවාට ආසාදනය වීම් 82ක් මේ වන විට වාර්තා වී ඇත. පසුගිය වසරේ වාර්තා වූ  එච්.අයි.වී. රෝගීන් 249 දෙනාගේ සඳහන් කිරීම්වලට අනුව පිරිමින්, පිරිමින් අතර පවත්වනු ලබන ලිංගික සබඳතා මගින් සියයට 37ක්ද, කාන්තාවන් හා පිරිමින් අතර ඇතිවන ලිංගික සබඳතා මගින් සියයට 51ක්ද, මවගෙන් දරුවාට ඇතිවන 01෴ක්ද වශයෙන්ද දැක්වේ. නිවරදිව ප්‍රකාශ නොකළ පිරිස 11෴කි. එච්.අයි.වී. ආසදිතයන්ගේ පැතිරීම ගත්විට කොළඹ 32.04 (ජනගහනය ලක්‍ෂයකට) කි. ගම්පහ 17.02කි. ලංකාව තුළ සිටින ලිංගික ශ්‍රමිකාවන් ගත්විට 2013 වර්ෂයේ සිදුකරන ලද සමීක්‍ෂණවලට අනුව 14,132 කි. මෙයින් වැඩි ප්‍රමාණයක් සැරිසරනුයේ කොළඹය. එම්.එස්.එම්. 7551කි. ඉන් වැඩි ප්‍රමාණයක් කොළඹ සිටිති. මත්ද්‍රව්‍ය විදගන්නන් අඩු සංඛ්‍යාවක් සිටිති. සංචාරක මගපෙන්වන්නන්ද ඉතා අඩු ප්‍රමාණයකි. තරුණ ප්‍රජාව තුළ පසුගිය වසර තුළ 26 දෙනෙකුට (වයස 15-25) එච්.අයි.වී. ආසාදනය වී තිබිණි. ඔවුන්ගෙන් වැඩි දෙනෙකු සමකාමීන්ය. 2015 වසරේදී දෙලක්‍ෂ හැටතුන්දහසක් පමණ රැකියා අවස්ථා සඳහා විදේශගත වී ඇත. මින් වැඩි දෙනෙකු මැදපෙරදිග රටවලට යොමුවී තිබේ. ඔවුන් නැවත ලංකාවට පැමිණි පසු ඔවුන්ගේ කිහිප දෙනෙකුට එච්.අයි.වී. ආසාදනය වී ඇති බව වාර්තා වී තිබේ. 2016 දී 85 දෙනෙකු හඳුනාගෙන ඇත. ලංකාව තුළ සිටින කාන්තා ලිංගික ශ්‍රමිකයන් බොහෝ ප්‍රමාණයක් ආරක්‍ෂිත උපක්‍රම භාවිත කරන බව පෙනීයන කරුණකි. 2016 වසර තුළ මිලියනයකට අධික පිරිසකගේ එච්.අයි.වී. පරීක්‍ෂාව සිදුකරන ලදී. 

එච්.අයි.වී. යනු මාරාන්තික රෝගයක් නොවෙයි

ලිංගික අධ්‍යාපනය ගැන කතා කිරීම පාසල තුළින්ම ආරම්භ විය යුතුය. සෞඛ්‍ය අධ්‍යාපන කාර්යාංශයට දුරකථන ඇමතුමක් ලබාදී ඕනෑම සෞඛ්‍ය කරුණක් පිළිබඳ විමසීමේ හැකියාව පවතී. මේ රෝගය ගැන කතා කරන විට ප්‍රධාන කරුණු කිහිපයක් ගැන අවධානය යොමුකළ යුතුය. මෙහි ප්‍රධාන කණ්ඩායම් කිහිපයක් සිටියි. ඒ අතර ලිංගික ශ්‍රමිකයන්, සමකාමීන්, මත්ද්‍රව්‍ය එන්නත් කරගන්නන්, සංචාරක මගපෙන්වන්නන් වැනි පිරිස්ය. ඒ අවදානම් සහිත කණ්ඩායම් වෙනුවෙන් මේ වනවිට වැඩසටහන් ක්‍රියාත්මක වෙයි. වර්තමානය වනවිට එච්.අයි.වී. රෝගය යනු මාරාන්තික රෝගයක් නොවෙයි. එයට නිසි ලෙස ප්‍රතිකාර ගැනීම තුළින් සාමාන්‍ය ජීවිතයක් ගතකිරීමේ හැකියාව පවතී. ඉතා මිල අධික ප්‍රතිකාර නොමිලේ ලබාදීම මේ වන විට සිදුවෙයි. එච්.අයි.වී. පිළිබඳ අවදානමක් තිබේ නම්, ඔබට එය තහවුරු කරගත හැක්කේ පරීක්‍ෂණයකින් පමණි. එම නිසා එච්.අයි.වී. පර්යේෂණවලට යොමුවීමට අවශ්‍ය සියලු දේ මේ වන විට මෙම මාසයේද සූදානම්ය. මෙහි ඇති විශේෂත්වය වන්නේ රහස්‍යභාවය සුරැකීමය. ඔබේ නම හෝ ඔවුහු සඳහන් නොකර ගනිති. තමන්ට තනිවම යොමුවී මෙම පරීක්‍ෂණය සිදුකර ගත හැකිය.

දෙසැම්බර් 01 වැනිදාට යෙදී තිබූ ලෝක ඒඩ්ස් දිනය නිමිති කරගෙන පසුගියදා ආර්ථික සංවර්ධන අමාත්‍යාංශයේදී පැවැති මාධ්‍ය හමුවේදී ජාතික එච්.අයි.වී. මර්ධන වැඩසටහන් අධ්‍යක්‍ෂ වෛද්‍ය සිසිර ලියනගේ, කොළඹ මහ නගර සභාවේ ජන සෞඛ්‍ය දෙපාර්තමේන්තුවේ ප්‍රධානී විජයමණි, ජාතික ලිංගාශ්‍රිත හා ඒඩ්ස් මර්දන වැඩසටහනේ වසංගත විද්‍යා ඒකකයේ ප්‍රධානී ප්‍රජා සෞඛ්‍ය විශේෂඥ වෛද්‍ය ශ්‍රියාකාන්ති බෙනරගම, ලිංගාශ්‍රිත රෝග පිළිබඳ  විශේෂඥ වෛද්‍ය ජීවිරසිංහ යන මහත්ම මහත්මීන් ඇතුළු පිරිසක් දැක්වූ දේශන ඇසුරින් මෙම ලිපිය සකස් කරන ලදී.

 

සෑම නාළිකාවක්ම එකවර ජනප්‍රියත්වයට පත්වූයේ නැහැ

මෙරට ප්‍රමුඛ ටෙලිවිෂන් නාළිකා කිහිපයක් තුළින්ම සිය හැකියාවන් ප්‍රකට කරමින් එම ආයතනය ප්‍රේක්ෂකයා වෙත සමීප කරවන්නට සිය දායකත්වය ලබාදුන් කැලුම් පාලිත මහීරත්න වර්තමානයේ සියත ටී.වී. හි අධ්‍යක්ෂ ලෙස කටයුතු කරනු ලබයි. මේ එම නාළිකා සම්බන්ධව හා මෙරට ටෙලිනාට්‍ය කලාව සම්බන්ධව ඔහු සමග කළ සංවාදයකි.


Q ඉතා පුළුල් ප්‍රචාරයක් ලබාදෙමින් මේ නාළිකාව නැවත ආරම්භ කළත්, ඒ තරම් ප්‍රගතියක් දකින්න ලැබුණේ නැහැ නේද?

ප්‍රගතියක් තියෙනවා. ටෙලිවිෂන්වල එකපාරම ප්‍රබෝධයක් දකින්න ලැබෙන්නේ නැහැ. ප්‍රේක්ෂක ආකර්ෂණය දිනාගන්න කාලයක් යනවා. මේක කාලයක් යන ගනුදෙනුවක්. අපි ජනප්‍රිය සංස්කෘතියේ ටෙලිවිෂන් එකක් නෙමෙයි හදන්න යන්නේ. ඒ නිසා මේක උඩුගම් බලා පීනනවා වගේ වැඩක්. අපි කරන්න හදන්නේ දේශීය අපේකමට, අපේ මිනිසුන්ට ගැළපෙන ටෙලිවිෂන් එකක් ඇති කිරීමයි. එය එක්වරම කරගන්න හැකියාවක් නැහැ. ඉන්දියානු ටෙලිනාට්‍ය දෙකක්, කොරියානු ටෙලිනාට්‍ය දෙකක් හඬකවා රූපවාහිනියට ගෙනාවා නම් මේ නාළිකාව ජනප්‍රිය කරගන්න තිබුණා. නමුත් අපි ඉන්නේ එතන නෙමෙයි. අපි ඉන්නේ දේශීය දේත් එක්කයි. මේ වන විට දිනකට පැයක් දිවෙන 'සූරිය නෑයෝ' කියන ටෙලිනාට්‍ය විකාශය කරනවා. එය අපේ කලාකරුවන් සිදුකරන, අපේ උරුමයන්, අපේ දේවල් ගැන කතා කරන ටෙලිනාට්‍යයක්. එයට ප්‍රේක්ෂකාගාරය යොමුකර ගැනීමේ උත්සාහයක තමයි අපි ඉන්නේ. ඒ නිසා එකපාරට කෙනෙකුට දැනෙන්න පුළුවන් මේ නාළිකාවේ මොකුත් වුණේ නෑ නේද කියලා. මේ නාළිකාවේ දෙයක් වෙනවා. උදාහරණයක් ලෙස වර්තමාන ආණ්ඩුව දිහා හුඟදෙනෙක් බලන් ඉඳලා කියන්නෙත් මොකුත් සිදුවුණේ නෑ කියලනේ. නමුත් දෙයක් සිදුවෙනවා. ඒ වෙන දේවල් පිළිබඳ නිවැරදි අවබෝධයක් නොමැති වීම තමයි තිබෙන ගැටලුව. එය ජනතාව අතරින් මතුවෙන්න ටික කාලයක් ගතවෙනවා. ඔය සෑම නාළිකාවක්ම එකවර ජනප්‍රියත්වයට පත්වූයේ නැහැ. වසර පහ හයක් ගිහින් තමයි ජනප්‍රියත්වයට පත්වෙන්නේ. ඒ ගමනේ තමයි අපිත් ඉන්නේ.MBD_9678

ඒ ගමනට බැඳුම්කරයේ  සම්බන්ධයක් තිබෙනවා කියලා තහවුරු වෙලා නේද තියෙන්නේ?

ඒක සම්පූර්ණ බොරුවක්. ඒක අපිව අපහසුතාවට පත්කරන්න කවුරුහරි කළ දෙයක්. ඒකට විරුද්ධව කොමිසමටත් අපි ලිපියක් ඉදිරිපත් කළා. අපේ එහෙම සම්බන්ධයක් නෑ. එහෙම කතා ඕන කෙනෙක්ට හදන්න පුළුවන්. බැඳුම්කර කතාව හතරවටේම අරන් ගියානේ. බැඳුම්කර සල්ලි ලැබුණා නම් මීට වඩා ගොඩක් දේ අපිට කරන්න තිබ්බා.

මේ නාළිකාව එක්ක එකතු වූ පිරිසක් නැවත නාළිකාවෙන් ඉවත් වුණා නේද?

නෑ එහෙම පිරිසක් මේ නාළිකාවෙන් ඉවත් වුණේ නෑ. අපේ ප්‍රවෘත්ති අංශයේ කිහිපදෙනෙක් ඉවත් කළා. ඒකට හේතුව වු‍ණේ ඔවුන්ගේ ක්‍රියාකාරීත්වය සම්බන්ධව ඇති වූ ගැටලුවක්. අපි විනය පිළිබඳ තරයේ ක්‍රියාත්මක වෙනවා. ඒ සම්බන්ධ තිබූ ආයතනික මත ගැටුම් කිහිපයක් උඩ ප්‍රවෘත්ති අංශයෙන් කිහිපදෙනෙක් ඉවත් කළා. ඔවුන් මෙහෙ පෙර සිටි පිරිසක්. ඒක ආයතනයෙන් ගත් තීරණයක්.

අපේකම රැඳි නිර්මා‍වලට ඉඩක් ලබාදෙනවා කියලා ඔබ සඳහන් කළා. නමුත් ඒ ඉඩ ලබාදීම තුළ ඔබේ නාළිකාවටත්, අනෙකුත් නාළිකා එක්ක තරග කරන්න සිද්ධ වෙනව. %රේටින්^ කියන කාරණය සියත නාළිකාවටත් අදාළයි?

නාළිකාවක් රේටින් කියන ප්‍රශ්නය ජයගන්න ඕන. මේ තියෙන ක්‍රමවේදය ඇතුළේ %රේටින්^ කියන එක ඉතාම වැදගත් වෙලා තියෙනවා. ඒක ජයගන්න ඕන. ඒක ජයගන්න නාළිකා විවිධ උපක්‍රම භාවිත කරනවා. අපි ඉතා සුබවාදී තැනක ඉඳගෙන ඉතා සුබවාදී උපක්‍රම භාවිත කරනවා. අනෙක් නාළිකා විදේශීය ටෙලිනාට්‍ය තමයි විකාශය කරන්නේ. විදේශීය ටෙලිනාට්‍ය එක්ක තරග කරනවා කියන්නේ ලෙහෙසි පහසු කාරණයක් නෙමෙයි. ඔබ කලින් ඇහුවේ කෝ අර පටන්ගත්ත ගැම්මට දෙයක් වෙලා නෑනේ කියලා. නමුත් අපිට තරග කරන්න සිද්ධ වෙලා තියෙන්නේ මහා කුමන්ත්‍රණයක් එක්ක. කුමන්ත්‍රණයක් එක්ක තරග කරනකොට ඒ කුමන්ත්‍රණය දිහා බලාගෙන ගමන් කළ යුතුයි. ඒක පීනන්න නම් වතුරට බහින්න ඕන වගේ වැඩක්. ඒ අභියෝගයත් එක්ක තරග කරමින් තමයි අපි යන්නේ.

අපේ නිර්මාණවලට ප්‍රේක්ෂකාගාරය තුළ ඉඩක් නිර්මාණය වෙලා නැහැ කියන දේද මෙයින් කියවෙන්නේ?

ඉඩක් තිබෙනවා. ඇයි හැම අයවැයකින්ම හාල්මැස්සෝ මිල අඩු කරන්නේ. හැම අයවැයකම පළවෙනි දේ හාල්මැස්සන්ගේ මිල රුපියල් දහයකින්වත්  අඩු කිරීම. මොකද ලංකාවේ මිනිස්සුන්ට හාල්මැස්සෝ බත් වගේ දෙයක් බවට පත්වෙලා. අපේ ජාතික ආහාරය බත්නේ. එහෙනම් හාල්මැස්සෝ කොහෙන්ද ආවේ. බත් ජාතික ආහාරය වුණත් ජාතික අයවැයේ ප්‍රධාන ආහාරය වෙන්නේ හාල්මැස්සා. ඒකනේ ඒක අඩු කරන්නේ. ඒ වගේ මේ ටෙලිනාට්‍යයවලත් හොඳ දේ පැත්තකින් තියෙද්දි ඉන්දියානු ටෙලිනාට්‍ය වැලඳ ගන්නවා. ඉන්දියානු ටෙලිනාට්‍ය කියන්නේ රස ආකර. ඒ ගැන කතා කරන්න දෙයක් නැහැ. ඉන්දියාව, කොරියාව, ජපානය ඉන්නේ ඉතා හොඳ තැනක. ඔවුන් පැයක ටෙලිනාට්‍ය කොටසක් වෙනුවෙන් ඉන්දියානු රුපියල් ලක්ෂ 25ක් වියදම් කරනවා. එහෙම සංස්කෘතියක් තුළ ව්‍යාපාරික ගනුදෙනුවකට හදපු ටෙලිනාට්‍යයක් අපේ ඉතා අඩු මුදලකට නිම කරන ටෙලිනාට්‍යයක් සමග තරග කරන්න තිබෙන පරාසය බලන්න. ප්‍රේක්ෂකාගාරය ඇබ්බැහි වීමේ කිසිම තර්කයක් නැහැ. නමුත් ඇබ්බැහි කළේ කවුද? අපිම තමයි. ඒකට ප්‍රේක්ෂකාගාරයට දොස් කියලා ඵලක් නෑ. 'දඬුබස්නාමානය', 'දූදරුවෝ', 'නෑදෑයෝ', 'ගම්පෙරළිය' අපි බැලුවේ නැද්ද? අර හාල්මැස්සන්ගේ මිල අඩු කළා වගේ අපි වෙන කුණු රහකට ප්‍රේක්ෂකාගාරය තල්ලු කළා. එතැනින් වෙනස් වෙන තනි සටනක තමයි අපි ඉන්නේ. මම හිතනවා ඉදිරියේදී ඒ දේ වෙනස් වෙයි කියලා.

විදේශීය ටෙලිනාට්‍ය විකාශය කිරීමේදී තිබූ අනූදහසක බදු මුදල ලක්ෂ එකහමාර දක්වා වැඩි කෙරුණා නේද?

මීට වසර ගණනකට පෙර මම සහ අපේ කණ්ඩායම බරපතළ ලෙස බදු වැඩි කිරීමේ ක්‍රමවේදයට මැදිහත් වුණා. මීට වසර දෙකකට පෙර ලක්ෂ තුනක් දක්වා බදු වැඩි කිරීම සිදුකළා. නමුත් එය ක්‍රියාත්මක වුණේ නැහැ. මෙවර මංගල සමරවීර ඇමතිවරයා මුදල් ඇමති බවට පත්වුණාම අපිට තිබූ සබඳතා උඩ ඔහුව දැනුවත් කළා. ටෙලිනාට්‍ය කර්මාන්තය තුළ අපි දන්න තරමින් පන්දහසක් පමණ පෝෂණය වෙනවා. ඒ සියලුදෙනාගේ පවුල්වලට මෙය බලපාලා තියෙනවා. ඒ නිසා තමයි මේ යෝජනාව අපි ඔහුට ගෙන ආවේ. මෙවර අයවැයෙන් අපේ ඉල්ලීම ඉටුකරලා තිබ්බා. මෙයට සංවිධාන කිහිපයක්ම එකතු වුණා. මෙය ටෙලිනාට්‍ය ක්ෂේත්‍රයට වූ ඉතා සුභවාදී කාරණයක්. එහි ප්‍රතිඵල තව මාස දෙක තුනකින් ප්‍රේක්ෂකාගාරයට භුක්ති විඳින්න හැකි වෙයි.
මේ මොහොතේ බදු වැඩිකිරීමට හැකි වීම කියන කාරණාව විවිධ සංවිධාන දේශපාලනිකව බෙදාගන්න හදනවා නේද?
අපි තුන්වෙනි ලෝකේ රටක්නේ. හොඳ දෙයක් සිද්ධ වුණාම මේක අපි කළේ කියලා බෙදාගන්න කැමතියිනේ. මං ඒකයි කිව්වේ මේකට සංවිධාන කිහිපයක් එකතු වුණා කියලා. කවුරු දිනාගත්තත් ප්‍රතිඵල හොඳ නම් ඒක හොඳයි. ජයග්‍රහණයට පියවරු වැඩියිනේ. මහින්ද රාජපක්ෂ මහතා පරද්දලා මෛත්‍රීපාල සිරිසේන මහතා ජයග්‍රහණය කළ වෙලාවෙත් මේ රටේ  මෛත්‍රීපාල සිරිසේන මහතා දිනවන්න කටයුතු කරපු අය හරියට හිටියා. නමුත් ජයග්‍රහණය කරන්න පෙර හරි අතළොස්සයි දේශපාලන ගනුදෙනුව තුළ හිටියේ. ඒ අය පැත්තක. දන්න අය දන්නවා කවුද වෙහෙසුණේ කියලා. එක දිනක මේ වෙනුවෙන් පුස්තකාල ශ්‍රවණාගාරයට විශාල ප්‍රමාණයක් ගෙන්වනු ලැබුවා. ඒ පිබිදීම බරපතළ ලෙස සිටියා. මේ දේවල්  දිනාගන්න ගිය සමහර සංවිධානවල අයට පරිගණකයක් ලබා දීලා තව මොනවා හෝ පගාවක් දීලා නිහඬ කළ අයත් මේ තුළ හිටියා. කාට වුණත් හෘදසා ක්ෂියට උත්තර බඳින්න වෙනවා.

මේ බදු වැඩිකිරීම අසාධාරණයි කියලා තවත් පිරිසක් සඳහන් කරනවා නේද?

ඔවුන් කියන්නේ හඬකැවීම් ශිල්පීන්ට මේ තුළින් අසාධාරණයක් වෙනවා කියලා. ඔවුන් මින් ඉවත් කරන්න ඕන කොටසක් නෙමෙයි. නමුත් එහි නියැළිලා ඉන්නේ බොහොම සුළු පිරිසක්. කිතුල් ගහට නැගපු මිනිහටත් කියන්න දෙයක් තිබ්බා වගේ කතානේ ඔය. ඒ නිසා ඒක සාධාරණ නෑ. ඒ කතා කරන අය කතා කරද්දි බලන්න ඕන තමන්ගේ නිරුවත කොතරම් ප්‍රදර්ශනය කරනවාද කියලා. රටක පොදුවේ යමක් කතා කරනවා නම් තමන්ගේ හෘද සාක්ෂියට එකඟවෙන්න ඕන. මම නාළිකාවක ප්‍රධානියා ලෙස අවස්ථාවාදී මිනිසෙක් වෙලා කතා කරනවා නම් මම රට වෙනුවෙන් නෙමෙයි කතා කරන්නේ. දෙබස් කැවූ ටෙලිනාට්‍ය විකාශය කිරීම අපිටත් වාසියි. නමුත් වාසනාවකට පාලනාධිකාරිය මේ ප්‍රකාශයන්ට අකමැතියි. බදු ඉවත් කිරීම තුළ සමාජයට කරන්නේ අසාධාරණයක් කියන තැන පාලනාධිකාරිය ඉන්නවා. ඒ වාසිය අපිට ලැබුණා. තව මාස හත අටක් යන විට හොඳ තත්ත්වයක් ඇතිවෙයි. දේශීය ටෙලිනාට්‍යකරුවන්ටත් වගකීමක් තිබෙනවා. දැන් ප්‍රේක්ෂකාගාරය ඉන්නේ ඉහළ තැනක. දැන් ඔවුන් ගහක් යට තියලා එහෙම නැත්තම් තාප්පයක් ළඟ නළු නිළියන් තියලා කරන ටෙලිනාට්‍ය කලාව ප්‍රතික්ෂේප කරනවා. 

නිර්මාණ සඳහා නිසි මුදලක් ලැබෙන්නේ නැහැ කියලා නිර්මාණකරුවන්ට පෙරළා රූපවාහිනී නාළිකා වෙත ඇඟිල්ල දිගු කළ හැකියි නේද?

ඒක කළේ අපිමයි. එක නිර්මාණකරුවෙක් ගිහින් ලක්ෂ දෙකයි කියලා කියනකොට තව කෙනෙක් නෑ මම එකයි පනහට කරල දෙන්නම් කියනවා. තව කෙනෙක් ඇවිත් නෑ මම අසූදාහට කරල දෙන්නම් කියනවා. රුපියල් අසූදාහටත් මේ රටේ ටෙලිනාට්‍ය නිර්මාණය වෙනවා. මේක ඉතාම කුහක පිරිසක් ජීවත් වෙන කර්මාන්තයක්. බදාගෙන ඉබගෙන එකපත කාගෙන ඉන්නවා වගේ කතා කළත් එහෙම නෑ. එකිනෙකාට හොරෙන් තමන් ගැන හිතලා වැඩ කරනවා. ඒ නිසා තමයි මේ තත්ත්වය ඇති වුණේ. අපේ සංවිධාන ගොඩක් තිබෙනවා. නමුත් ඒකමතික තීරණයකට ඇවිත් අපි ලක්ෂ දෙකකට අඩුවෙන් ටෙලිනාට්‍ය දෙන්නේ නැහැ කියල කියන තැනකට ආවෙ නෑ. මේක බාල තැනකට තල්ලු වුණේ ඒ හින්දා තමයි. මම මෙතන ප්‍රධානියා ලෙස කෙනෙක් ඇවිත් කිව්වොත් මම රුපියල් අසූදාහකට ටෙලිනාට්‍යයක් කරලා දෙන්නම් කියලා, මම නොගෙන ඉන්නවද? මම ඒ වෙලාවට මේක කර්මාන්තයට හොඳ නෑ කියල කියන්නෙ නෑ. එතනදී මම ආයතනයේ ඉන්න කෙනා. මේ තත්ත්වය ඇති කළේ ඉන්න නිර්මාණකරුවන්. දැන් එය ගොඩදාන්න හැකියාවක් නෑ.

බොහෝ නාළිකාවල දේශපාලනික න්‍යායපත්‍ර ක්‍රියාත්මක වෙනවා. මේ නාළිකාවේ දේශපාලනික මැදිහත්වීම කෙබඳුද?

අපිට තිබෙන්නේ මහජනතාවගේ දේශපාලනය. මහජනතාව වෙනුවෙන් පෙනී සිටීමේ දේශපාලනයක් තිබෙන්නේ. බරපතළ ලෙස මම දේශපාලනිකයි. මම කාලාන්තරයක් එක්සත් ජාතික පක්ෂය වෙනුවෙන් සිටිය කෙනෙක්. මම මේ නාළිකාව ඇතුළට මගේ දේශපාලනය ගෙනත් නැහැ. ගේන්නෙත් නැහැ. ඒක හරි අපරාධයක්. රටක රූපවාහිනී නාළිකාවකට රජයක් විසින් ලයිසන් එකක් ලබාදෙන්නේ අයිතිකාරයන්ට අවශ්‍ය දේශපාලනය කරන්න නෙමෙයි කියන එකයි මගේ මතය. මේක පොදු ගනුදෙනුවක්. මහජනතාවට විනෝදාස්වාදය, දැනුම ලබාදෙන පරමාර්ථය උඩ තමයි බලපත්‍ර ලබාදෙන්නේ. එය දේශපාලනික කිරීම ඉතා බරපතළයි. අපට දේශපාලනයක් නෑ. අපේ ප්‍රවෘත්තිත් හරි මධ්‍යස්ථයි. ඒ නිසාම අපිට හරි ප්‍රශ්නයකට මුහුණ දෙන්න වෙලා. ප්‍රවෘත්ති විකාශයක් දේශපාලනික වුණාම ජනප්‍රිය කරගන්න ලේසියි. ආණ්ඩුව ගොඩදාන්න දේශපාලනය කරලා වැඩක් නෑ.

කැලුම් පාලිත කියන නිර්මාණකරුවා ගැන කතා කළොත් මොනවද ඉදිරියේදී සිදුවෙන්නේ?

මට චිත්‍රපටයක් කරන්න ආසාවක් තිබෙනවා. එය ලබන වසරේ සිදුකරන්න බලාපොරොත්තු වෙනවා. මං එක චිත්‍රපටයක් කළා. තව එක චිත්‍රපටයක් කිරීමේ ආසාව තිබෙනවා.

අසාව නිසා නිර්මාණ කරනවා කියන්නේ ඒ තුළ ආර්ථික ප්‍රතිලාභ ගන්න වටපිටාවක් නැද්ද?

සිනමා කර්මාන්තය තුළත් ලොකු අර්බුදයක් තිබෙනවා. අපේ සිනමා කර්මාන්තය කාලෙකදි ඉතා සශ්‍රීක කර්මාන්තයක්. සිනමා කර්මාන්තයක් ලෙසයි හැමෝම වැඩ කළේ. දැන් කලාවක් ලෙසයි වැඩ සිදුකරන්නේ. කලාව හා කර්මාන්තය සම සමව තිබුණ නම් හොඳ තත්ත්වයක් තියෙයි. දැන් කරන්නේ චිත්‍රපටයක් නිර්මාණය කරලා සිනමා උලෙළකට යොමු කරලා සම්මාන ලබාගෙන, විදේශීය රූපවාහිනී නාළිකාවකට එය පෙන්නලා සම්මාන ලැබුණ බව සඳහන් කරලා වියදම හොයාගන්න එකයි. පුංචි රාමුවක් ඇතුළේ සතුටුවෙන තත්ත්වයක් තමයි තිබෙන්නේ. ඉන්දියානු සිනමාව ගත්තොත් එය විශාල කර්මාන්තයක් ලෙසනේ අපි දකින්නේ. සල්මන් ඛාන් වසර පහකට සිරගෙට යොමු කරනවා. ඒ සමගම ගන්න ඇපිල් එකේදි ඔහු නිදහස් කරනවා. එය තනිකරම දේශපාලනිකයි. සල්මන් ඛාන් වසර පහකට සිරගත කළොත් ඒ රටේ සිනමාව අවුරුදු දහයකට පස්සට යනවා කියලා ඉන්දියානු රජය දන්නවා. එය ඉන්දියානු රජයට බරපතළ ලෙස බලපානවා. සිනමාව, ටෙලිනාට්‍ය තුළින් ඉන්දියානු ජනතාවගේ ප්‍රශ්න රැසක් අමතක කර දමනවා. ඒක සූක්ෂම දේශපාලන ක්‍රියාවලියක්. ඉන්දියානු රජය මේ දේවල් හොඳින් හඳුනාගෙන තිබෙනවා. නමුත් ලංකාවේ රජයට කලාකරුවෙක්ව, කලාව, රූපවාහිනී නාළිකා හඳුනාගන්න බැහැ. අපේ දේශපාලනය තිබෙන්නේ බාල තැනක. කරන්නෙම තක්කඩි වැඩ. කරන්න තියෙන හිඟන වැඩ මහා පරිමාණයෙන් කරනවා. නමුත් පාරේ ඉන්න හිඟන්නා අල්ලලා හිරේ දානවා. නැත්නම් කොහේ හරි ගිහින් දානවා. මේ එක පාලකයෙකුටවත් ඒ දර්ශනය නැහැ. ඒ නිසා ඒ  වටිනාකම ලැබෙන්නෙත් නැහැ.

මම පෞද්ගලිකව අත්විඳපු අත්දැකීම තමයි මේ පොතට අන්තර්ගතවෙලා තිබෙන්නේ

අධ්‍යාපනය හා මනෝ විද්‍යාව පිළිබඳ ග්‍රන්ථ හතළිහකට ආසන්න ප්‍රමාණයක් රචනා කර ඇති වෛද්‍ය සුදත් දම්සිංහ මහාතාගේ %නිමා නොවූ නිමාව^ නම් නවතම ග්‍රන්ථය අද (01දා) සවස 5.00ට  ජයවර්ධනපුර රෝහලේ හෙද විදුහල් ශ්‍රවණාගාරයේදී එළිදැක්වීමට නියමිතය.


Q 'නිමා නොවූ නිමාව' ග්‍රන්ථය ගැන මුලින්ම කතා කරමු?

මේ වන විට මම ලියූ පොත් අතරින් මෙය විශේෂ වෙන එක් කරුණක් තිබෙනවා. මීට වසර දෙකකට පෙර මම කිසිම රෝගයක් නොමැතිව සිටියදීත් උදෑසනම රුධිරය යන්න පටන් ගත්තා. ඒ අසනීප තත්ත්වය නිසා මට බරපතළ ජීවිත අනතුරකට මුහුණපාන්න සිද්ධ වුණා. කෙනෙක් මරණීය අවස්ථාවට පැමිනුණාම ඒ අවස්ථාවේදී ඔහු මුහුණ දෙන්නේ කෙබඳු අත්දැකීමකටද කියන කාරණය කෙනෙකුට අත්විඳින්න ලැබෙන්නේ නැහැ. ඒ අත්දැකීම අත්විඳපු බොහෝ අය ජීවත් වෙන්නෙත් නැහැ. ඒ නිසා ඒ අත්දැකීම ගැන තව කෙනෙකුට  කියන්න වෙන්නෙත් නැහැ. මම පෞද්ගලිකව අත්විඳපු අත්දැකීම තමයි මේ පොතට අන්තර්ගතවෙලා තිබෙන්නේ. ඉන්පසු රෝගය සුවඅතට හැරෙන අවස්ථාවේ සිදුවූ සිදුවීම් මාලාව හා මට අතීතය මෙනෙහි වීම සිදුවුණු ආකාරය මේ ග්‍රන්ථයේ අන්තර්ගත වෙලා තිබෙනවා.

Q වසර දෙකකට පසුව මේ කාරණාව සමාජගත කරන්න හිතුණ විශේෂ හේතුවක් තිබෙනවාද?

මගේ අත්දැකීම් කාටවත් නොකියා රහසක් ලෙස තබාගන්න තිබුණා. නමුත් මට හිතුණා මේක අනිත් අයට කියන්න ඕන කියලා. ඒකට හේතුව දේශපාලන ලෝකයේ වේවා, වාණිජ ලෝකයේ වේවා, අධ්‍යාපන ලෝකයේ වේවා අද සමාජයේ සිදුවන සෑම දෙයක්ම අවසානයේ කිසිම තේරුමක් නැහැ කියලා එක් වෙලාවකදී සිතෙනවා. අපි විශාල තරගයක් තුළ ජීවිතේ සක්‍රීයව ගත කරන වසර විසිපහක් තිහක කාලයක් තමයි තියෙන්නේ. මේ කාලේ තුළ තමයි අපි මේ සියලුම දේවල් කරන්නේ. ඒ කුමන දේ කළත් ඕනෑම මොහොතක අපි මරණයට පත්වෙන්න පුළුවන්. එහෙම අවබෝධයකින් ජීවත් වෙනවාද කියන ප්‍රශ්නය තිබෙනවා. අපි හැමෝටම අමතක වන සත්‍ය තමයි මරණය. අවුරුදු පනහක් තිස්සේ ඒක අමතක කරලා සක්‍රීය අවධිය නිමා වුණාට පස්සේ අපිට මරණය මතක් වෙනකොට අපේ ජීවිතේ ගොඩක් තැන් අවුල් කරගෙන, වැරදි දේවල් කරගෙන ඉවරයි. ඒ දේ තරුණ වියේදීම තේරුම් කරගෙන තිබුණා නම් මීට වඩා සරලව, මීට වඩා අවබෝධයෙන් ජීවත් වෙන්න තිබුණා. මේ පොතේ තියෙන විශේෂම දේ බොහෝ දේවල්වලට ඇලෙන්නේ නැතුව කොහොමද ජීවත් වෙන්නේ කියන එක සඳහන් වීමයි. ඇලීම සහ ඇලීමෙන් ඉවත්වීම කියන දෙකම මෙහි අන්තර්ගතයි. එයට දැඩි මානසික ශක්තියක් අවශ්‍යයි.

Q මේ කාරණය ග්‍රන්ථයකට ගෙන ඒමේදී ඔබ  අනුගමනය කළ ආකෘතිය කෙබඳුද?

මෙය චරිතාපදානයක් වගේ තමයි. නමුත් එහිදී දෙබස් අන්තර්ගතව තිබෙනවා. සාමාන්‍ය නවකතාවක් ලෙස පාඨකයන්ට කියවන්න හැකියාවක් තිබෙනවා. කර්තෘවරයාගේ නම අමතක කළොත් මෙය නවකතාවක් ලෙස හොඳින් රසවිඳින්න පුළුවන්. මෙහි සාමාන්‍ය පාඨකයාටත් තේරුම්ගත හැකි සරල භාෂාවක් තමයි යොදාගෙන තිබෙන්නේ. සමහර වෛද්‍ය විද්‍යාත්මක කරුණු සංකීර්ණයි. මම ඒ සංකීර්ණ වෛද්‍ය විද්‍යාත්මක කරුණුත් සරලව තේරුම් කරල දෙන්න මෙහිදී  උත්සාහ කර තිබෙනවා.

Book Cover true final

Q ඒ වෛද්‍ය විද්‍යාත්මක කරුණු ඉදිරිපත් කිරීමේදී මනෝ විද්‍යාත්මක ප්‍රවේශය ගැනත් අන්තර්ගතයිද?

ඔව්. ඒ ගැන සඳහන් කරලා තිබෙනවා. ඒ වගේම ආගමික කොටසකුත් මම අන්තර්ගත කරලා තිබෙනවා. ඒකට හේතු වුණේ අවසන් මොහොතට ළං වුණ කෙනෙක් මොකද කරන්නේ කියන දේ ගැන කතා කරන්න අවශ්‍ය වූ නිසයි. සාමාන්‍යයෙන් අවසන් මොහොතට ළං වෙද්දි බොහෝ දෙනෙක් ආගමිකව කරන දේ නෙමෙයි මම සිදුකළේ. මම කළේ ඊට වඩා වෙනස් දෙයක්. ඒ දේ ගැන හොඳ විවරණයක් මෙහි තිබෙනවා.

Q ඔබ රචනා කළ අනෙකුත්  ග්‍රන්ථවලට ලැබෙන පාඨක ප්‍රතිචාර කෙබඳුද?

මම මනෝ විද්‍යාත්මක ග්‍රන්ථ හා අධ්‍යාපනික, විශේෂ අවශ්‍යතා තිබෙන දරුවන් සම්බන්ධයෙන් තමයි බොහෝ පොත් රචනා කර තිබෙන්නේ. දියවැඩියාව, හදවත් රෝග, වකුගඩු රෝග ගැන පොත් ලියලා තිබෙනවා. පෙරපාසල් දරුවන් ගැන, 'හොඳම දේ දරුවන්ට', 'ඔටිසම් හඳුනා ගනිමු', 'ගැබිනියකගේ දිනපොත' ආදී ග්‍රන්ථ රැසක් රචනා කර තිබෙනවා. ඒ වගේම ඔටිසම් පිළිබඳ මීට වසර අටකට පෙර මම ග්‍රන්ථයක් රචනා කළා. මීට පෙර එවැනි විස්තරාත්මක ග්‍රන්ථයක් පළවී තිබුණේ නැහැ. ඔවුන් වෙනුවෙන් තිබෙන චිකිත්සක ක්‍රමය (විශේෂ අවශ්‍යතා ඇති දරුවන් සඳහා) කොහොමද අපි මැදිහත් වෙන්නේ කියන කාරණාව සම්බන්ධයෙන් මම පොත් විශාල සංඛ්‍යාවක් රචනා කර තිබෙනවා. ඒ හැම ග්‍රන්ථයකම අධ්‍යාපනික වටිනාකමක් තිබෙනවා. ඒ පොත් විශාල පාඨක පිරිසක් වැලඳ ගත්තා.

Q ඔබ දේශපාලනිකවත් සක්‍රීයව සිටියා. මේ ග්‍රන්ථයට ඒ දේශපාලනය  අදාළ කරගෙන නැද්ද?

ඒ ගැනත් මේ පොතේ සඳහන් වෙනවා. මම පක්ෂ විපක්ෂ දෙකේම දේශපාලඥයන් හොඳන් හඳුනන බව මේ පොත තුළින් නිරූපණය කර තිබෙනවා. හිටපු ජනාධිපති හා වර්තමාන ජනාධිපති හමු වී අපි කරපු කටයුතු ගැන සඳහන් වෙනවා. දේශපාලනය තුළ පළමු දේ තමයි බලය. ඊට පසුව තමයි ජනතා සේවය තියෙන්නේ. නමුත් අපි ඉදිරියට දාන්නේ ජනතා සේවය. හැබැයි ඇත්තටම උඩින් තියෙන්නේ බලය. ලංකාවේ පමණක් නොවෙයි මුළු ලෝකෙම තිබෙන්නේ බලය. දේශපාලනය කියන්නේ බලය කියන එක. බලයට තිබෙන දැඩි ආශාව නිසා තමයි අපි හැමෝම ඒ දේ කරන්නේ. මම පෞද්ගලිකව දේශපාලනය කළේ බලය සඳහා තමයි. නමුත් මට අරමුණක් තිබුණා. මම දේශපාලනය කරද්දී ඉදිරිපත් කළේ පොතක්. එහි පැහැදිලිව මට කරන්න අවශ්‍ය දේ ලිව්වා. එයට විපක්ෂ දේශපාලඥයන් මට පහර ගැහුවා. මම ගියේ ඒ දේවල් කරන්න. උදාහරණයක් ලෙස මට අවශ්‍ය වෙලා තිබුණා විශේෂ අවශ්‍යතා ඇති දරුවන් සඳහා පැහැදිලි නීති පද්ධතියක් ලංකාවට ගෙනැවිත් ඔවුන්ට තිබෙන විශාල අසාධාරණයෙන් ඔවුන් ගලවන්න. අනතුරකින් පසු සදාකාලික අබ්බගාත තත්ත්වයට පත්වන බොහෝ දෙනෙක් ඉන්නවා. මම වෛද්‍යවරයෙක් ලෙස එය දැක්කා. නමුත් දෙයක් සිදුවුණාට පසුවනේ ඒ දේ වැදගත් වෙන්නේ. ඒ වනතුරු එය නොවැදගත් දෙයක්නේ. මට අවශ්‍ය වුණේ ලංකාවේ සමාජය සමග සම්බන්ධ වෙන ඕනෑම නිලධාරියෙකුට හෘද සම්බාහනයක් කිරීම වැනි දේ ගැන කියල දෙන්නයි. අපේ රටේ රිය අනතුරකදී රෝගියා ප්‍රවාහනය කිරීම තුළින් ඒ රෝගියා තවත් අනතුරට ලක්වෙනවා. මේක වෙනස් වෙන්න ඕන. බෝ නොවන රෝග සඳහා නිසි ප්‍රතිපත්තියක් ගෙන එන්න මට අවශ්‍ය වුණා. මෙවැනි සියුම් දේ ස්පර්ශ කරන්න තමයි මම දේශපාලනයට ආවේ. කිසිම පෝස්ටර්, කටවුට් ප්‍රචාරයක් නැතුව මම දාහතර දහසක් ඡන්ද ගත්තා. මට දැන් ඒ ගැන කිසිම උනන්දුවක් නැහැ. සමහරවිට ඒ මනස වෙනස් වී තව වසර හතරකින් පහකින් පාර්ලිමේන්තු මැතිවරණයකට ඉදිරිපත් වෙන්න අදහසක් ඒවි. නමුත් දැනට එහෙම බලාපොරොත්තුවක් නෑ.

‘අායු’ ප්‍රසංගයට මූලික වන්ෙන් ෙබෟද්ධ දර්ශනයයි

නා නා අරමුණු ඔස්සේ තණ්හව ලුහුබඳින්නා වූ මානවයන් සතුට, සැනසුම, නිදහස ආදී සියලු මානුෂීය හැඟුම් ඇතැර මුදල නම් මිරිඟුව පසුපස දිවයමින් සිටියි. විකෘති මනස්වලින් ජීවිතය දකිනවා වෙනුවට ප්‍රකෘති මනසින් ජීවිතය දකින්නට, ජීවිතය කියවන්නට සප්ත ස්වර සුසංයෝජනය කරන්නට ඔවුන් සූදානම්ය. ඒ දෙසැම්බර් 1 වැනිදා සවස 7ට තලවතුගොඩ ඇක්ට් ෆෝ ආයතනයේදීය. සප්ත ස්වර අතර ජීවිතය කියවන්නට  ඇක්ට් ෆෝ ආයතනය හා එක්ව ඔවුන් 'ආයු' ප්‍රසංගය ගෙන එයි. ඒ ගැන අප හා කතාබහ කළේ එම කණ්ඩායමේ ඉසුරු පෙරේරාය.


1A9A1689
Q 'ආයු' ප්‍රසංගය ගැන මුලින්ම අපි කතා කරමු?
 
'ආයු' කියන මේ ප්‍රසංගයට මූලික වෙන්නේ බෞද්ධ දර්ශනයයි. අනිත්‍ය, දුක්ඛ, අනාත්ම කියන්නේ අපේ ජීවිතේ. ආයු කියන්නේ ජීවන චක්‍රය. අපි මෙය නම් කරන්නේ the journey of life කියලා. අපි එය සංගීත සංයෝජන මගින් පෙන්වනවා.
 

'ආයු' ප්‍රසංගයේ අන්තර්ගත නිර්මාණ ගැන සඳහන් කළොත්?

අපි අදහන ආගම ධර්මය තුළින් ඒ ජීවිත ගැන කතා කරනවා. මුලින්ම සර්වාගමික ආශිර්වාදය ලබාගන්න සංගීත නිර්මාණයක් සිදුකරනවා. පසුව අපි මිනිසෙකුගේ ඉපදීම ගැන සංගීතයෙන් ඉදිරිපත් කරනවා. අනතුරුව ළමා අවධිය, කතා කරන කාලය වැනි දේ අපි සංගීතය තුළින් ඉදිරිපත් කරනවා. පසුව අපි යොවුන් විය ගැන කතා කරනවා. ඒක සංක්‍රාන්තික සමයක්. ජවය, කලබලය සහ ආදරය පිරුණු කාලයක්. ඒ කාලය ගැන අපි සංගීත නිර්මාණයක් කරල තියෙනවා. ඉන්පසු විවාහ ජීවිතය ගැන කතා කරනවා. ඉන් අනතුරුව ජීවිතයේ සැදෑ සමය ගැන සංගීත නිර්මාණයන් ගෙන එනවා. අවසානයට අපේ ජීවිතයේ මරණය ගැන සඳහන් වන නිර්මාණයක් සිදුකරනවා.
 

මේ නිර්මාණවලට මූලික කරගත් සංගීත ශෛලීන් ගැන කතා කළොත්?

මෙයට අපි මූලික කරගන්නේ හින්දුස්ථානි සංගීත ශෛලියයි. මේ කණ්ඩායමේ හැම දෙනාම වගේ සංගීතය ගැන හොඳින් ඉගෙන ගත් අය. ශාන්ති නිකේතනයෙන් සංගීතය ඉගෙන ගත් අයත් සිටිනවා. ඒ වගේම සෞන්දර්ය විශ්වවිද්‍යාලයේ ජ්‍යෙෂ්ඨ කථිකාචාර්ය අසිත් අතපත්තු අපි එක්ක සම්බන්ධ වෙලා ඉන්නවා. ඔහු අපිට ලොකු ශක්තියක්. ඒ වගේම දමින්ද අතාවුද, චින්තක ජයකොඩි වැනි අය ඉන්දියාවෙන් සංගීතය හදාරා පැමිණි අය. ඒ නිසා අපිට මෙය වඩා හොඳින් සිදුකළ හැකි යැයි හිතුවා. ඒ නිසා තමයි අපි මේ සංගීත ශෛලියට මූලිකත්වය දෙන්න හිතුවේ.
 

මෙවැනි ප්‍රසංගයක් කරන්න අපේක්ෂා කළ හේතුව මොකක්ද? මෙහි අරමුණ ගැන සඳහන් කළොත්?

මෙහෙමයි, අපි ඉන්දියාවේ ඉඳන් සංගීතය ඉගෙන ගෙන ලංකාවට ආවට පස්සේ අපිට හැම විටම හිතුණ දෙයක් තමයි, අපි අහපු දෙයක් තමයි හින්දුස්ථානි ක්ලැසිකල් මියුසික් ඉගෙන ගෙන ආවට පස්සේ එයම සිදුකරනවා කියන එක. මට කෙනෙක් කිව්ව දෙයක් මම කියන්නම්. 'ඔයගොල්ලො ඉන්දියාවේ ගිහින් සංගීතය ඉගෙන ගෙන ආවට පස්සේ ඔයාලත් තෙල් බෙහෙත්කාරයෝ වගේ^ කියලා. අපි හින්දුස්ථානි ක්ලැසිකල් මියුසික්වලට අගෞරව කරනවා නෙමෙයි. එය මහා සම්ප්‍රදාය. ඒ සංගීතයත් යොදාගෙන, අපේ සංගීත නාදත් යොදාගෙනයි මෙය සිදුකරන්නේ. මෙහි හින්දුස්ථානි සංගීතය වගේම කර්ණාටක සංගීතය, ජනගී, බටහිර සංගීතය, ජෑස් පවා අපි යොදා ගන්නවා. අපි එක් රාමුවකට කොටු වෙන්නේ නෑ. අපිට තිබෙන ප්‍රධාන අරමුණ තමයි දැන් පවතින කඨෝර සංගීතයෙන් මිදිලා සංගීතයේ රස හොයා ගෙන යෑම. හොඳ දෙයක් සහ හිතන්න දෙයක් ඉතුරු කරන්නයි අපිට අවශ්‍ය වුණේ. මානව ජීවිතවල භාව ප්‍රකාශනවලට මෙහි ඉඩක් තිබෙනවා. මේක කලබලයෙන් කරන දෙයක් නෙමෙයි. හොඳට හිතලා බලලා නිර්මාණය කරන්නේ.
 

මේ පවතින රටාවට අනුගත වෙලා තියෙන ප්‍රේක්ෂකාගාරයට මෙය  කොයි විදිහට බද්ධ වෙයිද?

ඒක සාපේක්ෂයි. අපි මේ සිදුකරන වැඩේට සුදුසු ප්‍රේක්ෂකාගාරයක් සිටිනවා. අපිට කියන්න බැහැ හැම දෙනාම මේක අහයි කියලා. මේක වෙනස් නිර්මාණයන් අන්තර්ගත වූ ප්‍රසංගයක්. ඒ නිසා මේ අත්දැකීම අත්විඳලාම බලලා කතා කරන්න කියලයි අපි කියන්නේ. එක උදාහරණයක් කියන්නම්. ලංකාවට නූර්ති කලාව පැමිණෙන්න පෙර ලංකාවේ තිබුණේ නාඩගම්නේ. නූර්තිවලට ආභාසය වුණේ හින්දුස්ථානි ක්ලැසිකල් මියුසික්. ඒ හින්දුස්ථානි සංගීතය මූලික කරගෙන මෙය ලංකාවට පැමිණි පසු රටේ ජනතාව එය වැලඳ ගත්තා. එහි ප්‍රතිඵලයක් ලෙස තමයි අපිත් ඉන්දියාවට ගිහින් ඒ සංගීතය වැලඳ ගත්තේ. ඒ කාලෙදිත් හොඳ මියුසික්වල රික්තකයක් ලංකාවේ නිර්මාණය වෙලා තිබුණා. දැන් ඒ වගේම රික්තකයක් ලංකාවෙත් ඇතිවෙලා තියනවා. ඒක කාට වුණත් තේරෙනවා. බස්වල ගියත් රසවිඳින්න පුළුවන් සංගීතයක් නෙමෙයිනේ අද ඇහෙන්නේ. අපි නිතරම ඒ ගැන කිය කියා ඉන්නවා. කිය කියාම ඉන්නවාට වඩා අපි දෙයක් කරන්න උත්සාහ කළා. ඒ උත්සාහය තමයි %ආයු^ කියන මේ ප්‍රසංගය. මේ සංගීතය ලංකාවේ කාලීන අවශ්‍යතාවක්. මේ තුළින් තවත් මෙවැනි සංගීත අධ්‍යාපනය ලැබූ අය ඉදිරියට එයි. ඉදිරියේදීත් අපි මෙය කොළඹට පමණක් සීමා නොකර ප්‍රසංගයක් ලෙස හා සංගීතය හදාරණ අය අතරටත් ගෙන එන්න බලාපොරොත්තු වෙනවා.‍ මේ නිර්මාණ තුළ හින්දුස්ථානි රාග තිබෙනවා. රාග කියන්නේ මිනිසෙකුගේ හිත රංජනය කළ හැකි ස්වර සමුදායක්. මේ තුළින් මිනිසෙකුගේ හිත සුවපත් කිරීමක් සිදුකරන්නේ. මේවා පර්යේෂණාත්මකව අත්හදා බැලීම් කළ නිර්මාණ. හොඳ රසවින්දනයක් අපි ලබාදෙනවා. ඉතිං කාර්යබහුලත්වයෙන් මදකට මිදී ඇවිත් මේ ප්‍රසංගය රසවිඳින්න කියලා අපි ආරාධනා කරනවා.
 
ඉසුරු -0779 663429

ළමයින්ට ආදරේ දැනුණොත් ඕනෑම දඩබ්බර ළමයෙක් හොඳ ළමයෙක් වෙනවා

පසුගිය දිනක අප ගාල්ල එස්.ඕ.එස්. ළමා ගම්මානයට ගිය අතර, එහිදී අපට මුලින්ම හමුවූයේ එහි සහකාර ගම්මාන අධ්‍යක්ෂවරයා වූ ලක්සිරි හෙට්ටිගේ මහතාය. ඒ අවස්ථාවේදී එහි සිටි යෞවන යෞවනියන්ගෙන් ඇතැමෙක් ක්‍රීඩාවල නියැළෙමින් සිටියහ. තවත් අය උදෑසන පැවැත්වෙන පන්තියකට සහභාගි වීමට පැමිණෙමින් සිටියහ.“මෙතන කඩේට ගිහින් එන්නම්?” යෞවනයෙක් හෙට්ටිගේ මහතා අසලට පැමිණ ඇසුවේය. “අම්මාට කිව්වද?” ඔහු ඇසුවේය. අප දන්නා තරමින් මෙහි දරුවන්ට මවක හෝ පියෙකු නොමැතිය. එනිසාම අප හෙට්ටිගේ මහතා සමග ඒ ගැන කතා කළෙමු.


“දෙවැනි ලෝක යුද සමයේ 1949 දී මහාචාර්ය හර්මන් මයිනර් මහතාගේ සංකල්පය අනුව තමයි මෙම එස්.ඕ.එස්. ළමා ගම්මාන බිහිවෙන්නේ. මේ වනවිට ලෝකයේ රටවල් 134 ක මෙම සංකල්පය  ක්‍රියාත්මක වෙනවා. ලංකාවට මේ සංකල්පය ආවේ 1981 වසරේදී. මෙහි විශේෂත්වය මේ ගම්මානයේ හැම නිවසකම  අම්මා කෙනෙක් ඉන්නවා. අම්මට ළමයි අටදෙනෙක් දහදෙනක් ලබා දී පවුලක් ලෙස තමයි ඔවුන් ගම්මානයේ ජීවත් වෙන්නේ. එකම පවුලේ දරුවන් අපි වෙන් කරන්නේ නැහැ. ඔවුන් සියලු දෙනා එකට ජීවත් වෙන්නේ. මෙහි සුවි‍ශේෂී දේ තමයි දරුවන් ගැන හිතන අම්මා කෙනෙක් සිටීම. ඔවුන් තමන්ගෙ පවුලෙන් ඈත්වෙලා මේ දරුවන් ගැන හිතන්න, දරුවන් පෝෂණය කරන්න යොමු වෙනවා. ඇය කරන්නේ ලොකු කැපකිරීමක්. ඇගේ පූර්ණකාලීන ජීවිතයම මේ දරුවන් වෙනුවෙන් තමයි කැප කරලා තියෙන්නේ. ඒ නිසාම ඒ අම්මලා විශ්‍රාම ගත්තාම මේ ආයතනය තුළින්ම රැක බලාගන්න වැඩපිළිවෙළක් තිබෙනවා.”

මේ පිළිබඳ දැනගත් පසු අපි මෙම ආයතනයේ වැඩිම කාලයක් මවක ලෙස කටයුතු කළ කාන්තාව සොයා ගියෙමු. මේ වනවිට විශ්‍රාම ලබා සිටින ඇය මෙම ආයතනයේම ඔවුන් වෙනුවෙන් තනා ඇති නිවසේ තවත් එවැනි මවුවරුන් සමග ජීවත් වන්නීය.
තම ලෙයින් උපන් දරුවාද බරක් කොට සලකා, එසේත් නැත්තම් සමාජ අවමානයක් යැයි සිතා කළු ගඟට විසි කරන, මහමග දමා යන සමහර මවුවරුන් සිටින මේ කාලයේ ඇගේ කතාව සියලු මවුවරුන්ට නැවත සිතන්නට මග කියන්නේය. දරුවන් තම කුසින් බිහි නොකළද මවු සෙනෙහස දෙමින් මෙහි මවුවරු කටයුතු කරති. 

ජී.එච්. ගමගේ නම් මෙම කාන්තාවට මේ වනවිට අවුරුදු හැත්තෑ හතරකි. ඇය සිය ජීවන අත්දැකීම් පිළිබඳ පවසමින් අප හා මෙලෙස දොඩමළු වූවාය.  _MBD4859

Q අම්මා මෙහේට එන්නේ කොහොමද?

අපේ මහ ගෙවල් තියෙන්නේ අකුරැස්සේ. අකුරැස්සේ ඉඳන් තමයි ඉතිං මෙහෙට ආවේ. අපි ගෙදරනේ හිටියේ. කසාද බඳින වයස පස්සට ගියා. ඒ නිසා මේ ආයතනයට ගන්නවා කියලා පත්තරේ තියෙනවා දැකලා අයදුම් කරන්න හිතුණා. ඒ 1987 වගේ. මට අවුරුදු 37 ක් වගේ ඇති. පස්සේ මම පිළියන්දල එස්.ඕ.එස්. එකේ ඉන්ටවිව් තුනකට සභභාගි වුණා. 
ඒ පරීක්ෂණවලින් සමත් වෙලා, මාස තුනක පුහුණුවකින් පසු මට මුලින්ම එස්.ඕ.එස්. ගම්මානය තුළ ළමයින් දෙන්නෙක් හදාගන්න ලැබුණා. පිළියන්දලදි තමයි මම මගේ පුංචි පවුල පටන් ගත්තේ. ඒ වෙද්දි ගාල්ල විලේජ් එක හදනවා. පස්සේ තමයි අපි ගාල්ලට ආවේ.

Q දැන් අම්මා මෙහේ හදාගත්ත පවුලට කලින් අම්මගේ පවුල ගැන කතා කළොත්?

අපේ පවුලේ දහ දෙනෙක්. අයියලා හය දෙනයි, අක්කලා දෙන්නයි, මමයි නංගියි. අපේ තාත්ත ව්‍යාපාරිකයෙක්. ඒ වගේ පරිසරයක් තමයි පුංචි කාලේ අපට තිබුණේ. ඇත්තටම අපි හරි සතුටින් හිටියා. අපට අඩුපාඩු දැනෙන්න දුන්නේ නැහැ. මෙහෙම ඉන්නකොට අපේ අම්මගේ සිහිකල්පනාව අඩුවෙන්න ගත්තා. ඒක අපේ හොඳම වයස.

මට එතකොට අවුරුදු විසි ගාණක්. මුළු පවුලෙම අවධානය යොමුවෙලා තිබුණෙ අම්මගේ ලෙඩේ සනීප කරගන්න ඕන කියන එක. විවාහ වෙන වයස දන්නෙම නැතුව කල් ගියා. මට අවුරුදු තිහක් වෙනකොට අපේ තාත්තා නැති වුණා. තාත්තා නිරෝගීව ඉඳලා හාට් ඇටෑක් එකකින් නැති වුණේ. තාත්තා නැති වෙද්දි තාත්තට අවුරුදු 83 ක් වෙනවා. ඊටපස්සේ අම්මා බලාගන්න ඕන. තාත්ත නැති වෙලා අවුරුදු පහයි අම්මා ජීවත් වුණේ. අම්මත් නැතිවුණා. මම ඒ කාලේ මානසිකව සෑහෙන්න වැටිලා හිටියේ. මං ආසයි පොත් කියවන්න, පත්තර කියවන්න.

මේ අතරෙ තමයි පත්තරේ ඇඩ් එක දකින්නේ. වයසත් එක්ක බලනකොට වෙන රැකියාවකට යන්න හැකියාවක් මට තිබුණෙ නැහැ.

Q ඒ කියන්නේ රැකියාවක් කරන්න ඕන නිසාද මේ වගේ තැනකට එන්නේ?

මං ඒ කාලේ මානසිකව වැටිලා හිටියේ. මුලින්ම රැකියාවක අවශ්‍යතාව තිබුණා. ඒ නිසා ආවට, පස්සේ සේවයක් කියලා හිතුණා. ඊටත් පස්සේ මේ මගේ පවුල කියලා හිතුණා. මගේ පවුල බලාගෙන මම හිටියේ.

Q ප්‍රේම සබඳතාවලට එහෙම යොමු වෙන්න ඉඩක් තිබුණේ නැද්ද?

ආදරයට එහෙම නිදහසක් තිබ්බේ නැහැ. අපේ අම්මා තදබල නීතිත් එක්ක හිටපු කෙනෙක්. ඒ නිසා අපට පිටස්තර අය එක්ක සම්බන්ධයක් ඇති කරගන්න ඉඩක් තිබුණෙ නෑ. ඇත්ත වශයෙන්ම කියනවා නම් ගෙදරටම සීමා වුණ ජීවිතයක් තමයි අපි ගත කළේ. ඉස්කෝලේ ඇරුණ ගමන් ගෙදර එන්න ඕන. රැකියාවක්වත් කරන්න යන්න දුන්නේ නැහැ. ගෙදරම තමයි හිටියේ.

Q ඒ කියන්නේ මුල්ම රැකියාව මේකද?

මුලින්ම රැකියාවක් කියලා හිතාගෙන ආවට, පස්සේ මේක මගේ පවුල වුණා. මම වැඩියෙන්ම මෙතනට ආවේ මානසික මට්ටම හොඳ වෙන්න කියලා. මුලින්ම අපි විසි ගාණක් මෙහිදී පුහුණු වුණා. සැහැල්ලුවෙන් හිටියේ. මං සැහැල්ලුවෙන් ඉන්න මනුස්සයෙක්. කිසිම බරක් ඔළුවට ගන්නේ නැහැ. ජීවිතේට ප්‍රශ්න එනවා. ඉවසීමෙන් ඒවට මුහුණදෙන්න ඕන. ප්‍රශ්න ගැනම හිත හිත කලකිරිලා ඉන්නේ නැතුව හොඳින් ජීවත් වෙන්න බලන්න ඕන.

Q ඔබට පෝෂණය කරන්න ලැබෙන්නේ වෙනත් කෙනෙකුගේ දරුවෙක්. මොකද හිතෙන්නේ?

ඇත්තටම ළමයි බරක් කියලා කිසිම අවස්ථාවක මට දැනිලා නැහැ. ඒ දරුවො වෙන කෙනෙකුගේ කියලා කවදාවත් දැනිලත් නැහැ. මුලින්ම එක පවුලෙම අක්කලා, නංගිලා තුන්දෙනෙක් තමයි මට ලැබුණේ. මම ඒ දරුවන්ගේ අම්මා. මම ඔවුන්ව හොඳින් බලාගත්තා. මං ඒ දරුවන්ට ආදරේ කළා. මට හිතුණෙ ඔවුන් මගේ දරුවෝ කියලා. එහෙම ඉන්නකොට පිරිමි ළමයි දෙන්නෙකුත් මට දුන්නා.

Q දැන් ඒ ළමයි ලොකු ඇති?

දැන් ඒ ළමයි කසාද බැඳලා, ඒ ළමයින්ටත් දරුවෝ ඉන්නවා. මහ දඩබ්බර දඟකාර විසේකාරයෝ ටිකක් හිටියා. අවුරුදු 14 වෙනකම් පිරිමි ළමයි ළඟ හැදෙනවානේ. ඒ දඩබ්බරකම් හරි සුන්දරයි. ජීවිතේ රෝස මල් යහනාවක් වගේ නැහැ. කරදර කම්කටොලු තිබුණා. ඒ කරදර කම්කටොලු මැද්දෙන් කිසියම් අධ්‍යාපනයක් ලබාදීලා ළමයි සමාජයේ තැනකට ගෙනා එකට සතුටුයි. සමාජ විරෝධී ළමයි නෙමෙයි, සමාජයේ ඉහළ තනතුරු තානාන්තර තියන අය තමයි ඒ අතර ඉන්නේ. මං බලාගත්ත ලොකුම පුතා දැන් රට ඉන්නේ. අවුරුදු 08 ක් රට ඉන්නේ.

Q ඒ කියන්නේ දැන් ඔබ මිත්තනියක්. මේ වෙද්දි ළමයි කීදෙනෙක් හදා ගත්තද?

මම ළමයි තිස් දෙනෙක් විතර හදාගත්තා. සමහර ළමයි මාව බලන්න එන්නෙ නැහැ. දරු මුණුපුරෝ පහළොවක් විතර ඉන්නවා. සිංහල අවුරුද්ද දවසේ අපේ මහ ගෙදරට (අකුරැස්සේ ඇය හැදී වැඩුණු නිවස) තමයි මගේ එස්.ඕ.එස්. ළමයි එකතු වෙන්නේ. වත්තේ පිටියේ ඉඩ පහසුකම් තියනවා. මමත් අවුරුද්දට ගාල්ලේ ඉන්නේ නෑ. ළමයි මාව බලන්න එනවා.

Q ජීවිතේ ගැන දැන් මොනවද හිතෙන්නේ ?

කසාද බැන්දේ නැති එක හොඳයි කියලා මට නම් හිතෙන්නේ. කසාද බැන්දා නම් අපි එක පවුලකට කොටු වෙලා ඉන්නවනේ. දැන් විසිරුණු පවුල්වල අම්මා මං. මගේ ළමයි ලංකාවේ හොඳ රැකියා කරනවා. මේ ජීවිතේ වැඩියෙන් හොඳයි.

Q වැදූ අම්මා කෙනෙකු නොවී හැදූ අම්මා කෙනෙකු වූ ඔබට සමාජයට කියන්න තියෙන්නේ මොනවද?

ළමයින්ට ඕන ආදරේ. ඒ ආදරේ ළමයින්ට දැනුණොත් ඕන දඩබ්බර ළමයෙක් හොඳ වෙනවා. ආදරේ ළමයි හැඩගස්සනවා. අම්මලා අද ඔෆිස්වලට යනවා. ළමයි ගැන බලන්න වෙලාවක් නැහැ. ඒත් අම්මලාට ළමයා ගැන බලන්න කියලා තමයි මං කියන්නේ. 

ජායාරූප – මිහිර බණ්ඩාර