Author Archives: නරේන් විශ්වජිත්

හවායි වෙත මිසයිල අවදානම් පණිවුඩයක් ලැබී කලබලයක්

ඇමෙරිකා එක්සත් ජනපදයේ හවායි දූපත වෙත ලැබුණු මිසයිල අනතුරු ඇඟවීමේ කෙටි පණිවුඩයක් නිසා බොහෝ දෙනෙකු දැඩි කලබලයකට පත්ව තිබූ බව විදෙස් වාර්තා පවසයි.

සෙනසුරාදා උදය කාලයේදී ලැබුණු මෙම පණිවුඩය වැරදීමකින් එවූ පණිවුඩයක් බව දැනුම්දෙන තුරු බොහෝදෙනා තැති ගැන්මකින් පසුවී තිබුණි.

ජංගම දුරකථන වෙත කෙටි පණිවුඩයක් ලෙස ලැබුණු එහි කියවී තිබුණේ, "හවායි වෙත බැලස්ටික් මිසයිල අවදානමක් පවතින බැවින්, හැකි ඉක්මණින් ආරක්ෂිත පියවර ගන්න. මෙය පුහුණු සරඹයක් නොවෙයි." යනුවෙනි.

ප්‍රාන්ත ආණ්ඩුකාර ඩේවිඩ් ඉග් පවසා සිටියේ සේවකයෙකු විසින් වැරදි බොත්තමක් එබීමෙන් මෙම පණිවුඩය ලැබී ඇති බවයි.

මේ සම්බන්ධයෙන් සම්පූර්ණ පරීක්ෂණයක් සිදුකරන බව ඇමෙරිකානු රජය අවධාරණය කර තිබේ.

හවායි දූපත් කලාපය උතුරු කොරියානු මිසයිල අවදානම වැඩිම කලාපයක් ලෙස සැලකෙන බැවින් පෙර දැනුම්දීමේ අනතුරු ඇඟවීමේ පද්ධතියක් එහි ස්ථාපිත කර තිබේ.

එමෙන්ම, පසුගිය දෙසැම්බර් මාසයේදී එම දූපත තුළ න්‍යෂ්ටික ප්‍රහාර සයිරන් අනතුරු ඇඟවීමේ නලාව පෙර පුහුණුවක් වෙනුවෙන් නාද කරනු ලැබූ අතර, එය සීතල යුද්ධයෙන් පසුව එම නලාව හැඬවූ ප්‍රථම අවස්ථාව බවද කියවුණි.

1_missle 2 3

පාසල් සිසුවියන් 40ක් රැගත් ඉන්දීය යාත්‍රාවක් අනතුරක

ඉන්දියාවේ මුම්බායි නුවර ධනූ වෙරළට නාවික සැතපුම් දෙකක් ඔබ්බෙන් පාසල් සිසුවියන් රැගත් පෞද්ගලික බෝට්ටුවක් පෙරළීමෙන් තිදෙනෙකු ජීවිතක්ෂයට පත්ව සෙසු පිරිස අතුරුදන්ව තිබේ.

පොලීසිය පවසා සිටියේ අනතුර සිදුවන විට එහි සිසුවියන්සි 40ක් ගමන් කර ඇති බවයි. අනතුරින් පසුව සුවියන් 32දෙදෙනෙකු බේරාගැනීමට හැකිවී ඇති නමුත්, අතුරුදන් වූ සෙසු දැරියන් සොයා වෙරළාරක්ෂක කණ්ඩායම් සහ ධීවරයන් එකතුව සෝදිසි මෙහෙයුම් ඇරඹූ බව ඉන්දීය මාධ්‍ය පවසයි.

මියගිය සිසුවියන් තිදෙනා සොනාල් සූරතී, ජාන්හාවි සූරතී සහ සන්ස්කෘතී මායාවන්ෂී ලෙස හඳුනාගෙන ඇති අතර, සියලුම සිසුවියන් 17 වැනි වියෙහි පසුවූවන් බව කියැවේ.

මෙම සිසුවියන් පිරිස විනෝද චාරිකාවක් සඳහා සහභාගී වී සිටියදී මෙම අවාසනාවන්ත ඉරණමට ගොදුරුව ඇති බව පොලීසිය පවසයි.

1_India 2

නීතිපතිට සම්බාධක රතුඉර ඉක්මවූ ඇමෙරිකානු වැඩක්

ඇමෙරිකාව විසින් ඉරානයට පැනවූ නවතම සම්බාධකවලදී ඉරාන නීතිපති අයතුල්ලාහ් සදීක් අමෝලි-ලැරිජානි ඉලක්ක කරමින් සම්බාධක පැනවීම රතු කට්ට පැනීමක් බව ඉරානය පවසයි.

මේ තීරණය සම්බන්ධයෙන් එකට එක කිරීමක් සඳහා තමන් සූදානම් වන බව එරට විදේශ අමාත්‍යාංශය කියා සිටියත් ඔවුන් කවර ක්‍රියාමාර්ගයක් මේ වෙනුවෙන් ගන්නේද යන්න පැහැදිලිව දක්වා නැත.

එමෙන්ම, ලෝක බලවතුන් සමග 2015 වසරේදී ඇති කරගත් සිය න්‍යෂ්ටික සම්මුතිය සම්බන්ධයෙන් කිසිදු ආකාරයක වෙනසක් කිරීමද ඉරානය විසින් ප්‍රතික්ෂේප කර තිබේ.

ඉරාන න්‍යෂ්ටික සම්මුතිය සම්බන්ධයෙන් වූ සම්බධක ලිහිල් කිරීම අවසන් වතාවට පමණක් සිදුකරන බව පවසමින් ඇමෙරිකානු ජනපතිවරයා දින 120ක කාලයකට එය දීර්ඝ කළද, ඉන් නොනැවතී ඉරානය ජාතිකයන් 14 දෙනෙකු සහ තවත් සිදුවීම් කිහිපයක් මුල් කර ගනිමින් එරටට නව සම්බාධක පැනවීමක් සිදුකළේය.

1_Iran

චෙක් ජනපතිවරණයෙන් වත්මන් ජනපති කලින්ම ඉදිරියට ආවාද?

චෙක් ජනරජයේ ජනාධිපතිවරණ ඡන්ද ගණන් කිරීම් තවදුරටත් සිදුවෙමින් පැවතියත් වත්මන් ජනපති මිලෝස් සේමන් කලින්ම ඉදිරියට පැමිණ ඇති බව විදෙස් වාර්තා පවසයි.

ආරම්භයේදීම 30%ක් පමණ ඡන්ද ගණන් කිරීම සිදුවන වනවිට ඔහු වත්මන් ජනපතිවරයා 42%ක ඡන්ද ප්‍රතිශතයක් ලබා සිටි අතර, ඔහුගේ ප්‍රතිවාදී ජිරී ඩ්‍රාහොස් ලබාගෙන තිබුණේ 24%ක් පමණි.

කෙසේ වෙතත්, දැනට දක්නට ලැබෙන වාතාවරණය අනුව කිසිවෙකුට පැහැදිලි බහුතරයක් ලබාගැනීමට නොහැකි වීම නිසා මෙම මාසය තුළම එහි දෙවැනි වටයක් වෙතද යෑමට සිදුවනු ඇති බව විශ්වාස කෙරෙයි.

73 වැනි වියෙහි පසුවන සෙමන් සිය දෙවැනි පස් අවුරුදු ධුර කාලය සඳහා ජන වරම ඉල්ලා සිටියත්, ඔහුගේ පළමු වැනි ධුර කාලය විවාදයට තුඩුදී තිබුණි.

1_Check 2

ඉරානය වෙත නව සම්බාධක පැනවීමට ට්‍රම්ප් කටයුතු කරයි

ඉරානයේ න්‍යෂ්ටික වැඩපිළිවෙළ සම්බන්ධයෙන් 2015 වසරේ ඇති කරගත් සම්මුතිය විවේචනය කරන වත්මන් ඇමෙරිකානු ජනපති ඩොනල්ඩ් ට්‍රම්ප්, පසුගිය සිකුරාදා දිනයේදී ඒ පිළිබඳ වූ සම්බාධක ලිහිල් කිරීමට අවසන් වතාවට පමණක් අවස්ථාව ලබාදෙන බව පවසා සිටියේය.

කෙසේ වෙතත්, ඊට අමතරව ඉරාන ජාතිකයන් 14 දෙනෙකු සහ එරට මානව හිමිකම් සිදුවීම් කිහිපයක් මූලික කරගත් නව සම්බාධක පැනවීමක් ඉරානයට එරෙහිව සිදුකිරීමට ඇමෙරිකානු ජනාධිපතිවරයා කටයුතු කර තිබේ.

ඉරානය සමග ඇති කරගත් සම්මුතියෙන් සිදුව ඇති බලවත් දෝෂය නිවැරදි කිරීමට මේ අවසන් අවස්ථාවේදී ඇමෙරිකාවට සහ යුරෝපයට අවස්ථාව පවතින බව හෙතෙම වැඩිදුරටත් සඳහන් කළේය.

ඒ අනුව, සම්මුතිය සම්බන්ධ සම්බාධක ලිහිල් කිරීම තවදුරටත් දින 120ක කාලයක් සඳහා දීර්ඝ කිරීමට මෙහිදී ට්‍රම්ප් අත්සන් තබනු ඇති බව කියැවෙයි.

ඉරානයේ යුරේනියම් ධනාරෝපය වෙත ස්ථිර බාධකයක් යෙදීම සඳහා යුරෝපා සංගම් බලධාරීන්ගේ අනුමැතිය ධවල මන්දිරය ඉදිරි කාලය තුළ බලාපොරොත්තු වෙයි.

වර්තමානයේ ඇති කරගෙන තිබෙන ගිවිසුම අනුව එය අවසන් වීමට නියමිතව ඇත්තේ වර්ෂ 2025 දීය.

එමෙන්ම, ඉරානයේ බැලස්ටික් මිසයිල වැඩසටහන සම්බන්ධයෙන්ද මේ හරහා සාකච්ඡා කළ යුතු බව ට්‍රම්ප්ගේ මතය වී තිබේ.

1_Iran Missile

මාතර-කතරගම දුම්රිය මඟ බෙලිඅත්තට 2018 දී නිමයි

මාතර සිට කතරගම දක්වා වූ දුම්රිය මාර්ගයේ මාතර සිට බෙලිඅත්ත දක්වා වූ දුම්රිය මාර්ගය පළමු අදියර මෙම වසරේදී විවෘත කිරීමට නියමිතය.

බෙලිඅත්ත දක්වා වූ පළමු අදියරේ රේල්පිලී ඇතිරීමේ කටයුතු ආරම්භ කෙරෙමින් පසුගියදා මෙම කරුණු අනාවරණය කෙරිණි.

චීන රජයේ අධාර යටතේ ඇ.ඩො.බිලියන 248ක වියදමකින් ඉදිකෙරෙන කි.මී.26.4ක මෙම මාර්ගයේ දුම්රිය පැයට කි.මී. 120ක වේගයෙන් ධාවනය කළ හැකි වීම විශේෂත්වයකි.

බ්‍රිතාන්‍ය ජාතිකයන් ශ්‍රී ලංකාවේ දුම්රිය මාර්ග පද්ධතිය ඉදිකිරීමෙන් පසුව නවතම දුම්රිය මාර්ගයක් ලෙස ප්‍රථම වරට ඉදිවන මෙම දුම්රිය මාර්ගයේ ඉදිවෙමින් පවතින සියලුම දුම්රිය ස්ථාන අන්තර්ජාතික මට්ටමේ දුම්රිය ස්ථාන ලෙස ඉදිකෙරෙන බවද පැවසුණි.

එම සුපිරි දුම්රිය ස්ථානවලට අමතරව සුපිරි සහසුකම් සහිතව මෙම දුම්රිය සේවාව ස්ථාපිත කෙරෙන බවත්, බෙලිඅත්ත දක්වා වූ දුම්රිය මාර්ගයේදී මෙරට දිගම දුම්රිය පාලම, ගුවන් පාලමක් ලෙසින් කි.මී. 1.5ක් දක්වා වූ දුරකට ඉදිකර තිබීමක විශේෂත්වයකි.

එමෙන්ම, මෙම දුම්රිය මාර්ගයේදී මෙරට දිගම උමං දුම්රිය මාර්ගයද හමුවන අතර එම උමගේ දිග මීටර් 625කි. එය නාකැටිය ප්‍රදේශයේ කන්දක් හරහා ඉදිකළ බවද ව්‍යාපෘති අධ්‍යක්ෂවරයා සඳහන් කළේය.

එමෙන්ම, උසින් මීටර් 21ක් වන වෙහෙරගොඩ දුම්රිය පාලමද මෙරට උසින් වැඩිම දුම්රිය පාලම බවත් ඔහු පවසා සිටියේය.

බෙලිඅත්ත දක්වා වූ කි‍ලෝමීටර් 26.4ක දුර ප්‍රමාණය සඳහා ප්‍රධාන දුම්රිය ස්ථාන 4ක් සහ උප දුම්රිය ස්ථාන 2ක් ස්ථාපිත කර තිබේ.

එහිදී, ප්‍රධාන දුම්රිය ස්ථාන කැකණඳුර, බඔරැන්ද, වැවුරුකන්නල හා බෙලිඅත්ත දුම්රිය ස්ථාන ලෙසින් හා පිලදූව සම වෙහෙරහේන උපදුම්රිය ස්ථාන ලෙසින්ද ඉදිකෙරෙයි.

එමෙන්ම, මෙරට ප්‍රථම වරට දුම්රිය ස්ථානයක් වෙත භූගත ලෙසින් ගමන් කිරීමට හැකි මාර්ගයක්ද මෙම මාර්ගයේ ස්ථාපිත කෙරෙමින් පවතින අතර තවක් මාස කිහිපයකින් මේ දුම්රිය මඟ විවෘත කිරීමට සියලු කටයුතු යොදා ඇති බවද එහි ව්‍යාපෘති අධ්‍යක්ෂවරයා පවසා සිටියේය.

මේ මාර්ගයේ මාතර ආසන්නයේ ඇති දුම්රිය හරස් මාර්ග හැරෙන්නට අනෙකුත් සියලුම දුම්රිය හරස් මාර්ග දුම්රිය මඟට යටින් හෝ උඩින් ඉදිකර ඇති බවද හෙතෙම වැඩිදුරටත් පවසා සිටියේය.

1_Train 2 3

ජර්මානු ඒකාබද්ධ රජයක් සඳහා සාකච්ඡා සාර්ථකලු

නව ඒකාබද්ධ රජයක් පිහිටුවීම සඳහා ජර්මානු දේශපාලඥයන් පැවැත්වූ තීරණාත්මක සාකච්ඡාව ඵලදායී වී ඇති බව විදෙස් වාර්තා පවසයි.

ජර්මනියේ වත්මන් චාන්සලර් ඇන්ජෙලා මර්කෙල්ගේ ක්‍රිස්ටියන් ඩිමොක්‍රට්ස් පක්ෂය මෙන්ම, ඔවුන්ගේ හිටපු ඒකාබද්ධ සහකරුවන් වූ සෝෂල් ඩිමොක්‍රට්ස් පක්ෂය මෙම සාකච්ඡාවලදී ප්‍රගතියක් පෙන්වා තිබේ.

පිටු 28කින් සමන්විත ඒකාබද්ධ ලියවිල්ල සාකච්ඡා කිරීම සඳහා දේශපාලඥයන් රාත්‍රිය නිදිවරමින් පැය 24ක කාලයක් සාකච්ඡා කර ඇති බවද විදෙස් වාර්තා පවසයි.

අවසන් වශයෙන් සංක්‍රමණික ගැටලුව ඇතුළු ප්‍රධාන සාධක රැසක් සම්බන්ධයෙන් මෙහිදී සාකච්ඡා කර තිබුණි. ඒ අනුව, වසරකට පැමිණෙන සංක්‍රමණිකයන් ප්‍රමාණය ලක්ෂ 2කට සීමා කිරීමට ඔවුන් සැලසුම් කර ඇත.

1_German

සවස 2.00න් පසුව බස්නාහිර ඇතුළු පළාත් කිහිපයක වැසි

බස්නාහිර, සබරගමුව, මධ්‍යම සහ වයඹ පළාත්වලත්, ගාල්ල සහ මාතර දිස්ත්‍රික්කවලත් තැනින් තැන සවස 2.00න් පමණ පසු වැසි හෝ ගිගුරුම් සහිත වැසි ඇති විය හැකි බව කාලගුණ විද්‍යා දෙපාර්තමේන්තුව පවසයි.

විශේෂයෙන්ම බස්නාහිර, සබරගමුව සහ මධ්‍යම පළාත්වලත්, ගාල්ල සහ මාතර දිස්ත්‍රික්කවලත් සමහර ස්ථානවලට තරමක් තද වැසි (මි.මී.50 ට වැඩි)  බලාපොරොත්තු විය හැකි බවද එම දෙපාර්තමේන්තුව පවසයි.

මීට අමතරව, නැගෙනහිර සහ ඌව පළාත්වලත්, හම්බන්තොට දිස්ත්‍රික්කයේත් වැසි වාර කිහිපයක් ඇතිවන බවද එම නිවේදනයේ දැක්වෙයි.

බස්නාහිර, සබරගමුව සහ මධ්‍යම පළාත්වල සමහර ප්‍රදේශවල උදය කාලයේදී මිදුම් සහිත තත්ත්වයක් අපේක්ෂා කළ හැකි බවද සඳහන් වෙයි.

ගිගුරුම් සහිත වැසි ඇති වනවිට එම ප්‍රදේශවල තාවකාලිකව තද සුළං ඇතිවිය හැකි බවත්, අකුණු මගින් සිදුවන අනතුරු අවම කරගැනීමට අවශ්‍ය පියවර ගන්නා ලෙසත් කාලගුණ විද්‍යා දෙපාර්තමේන්තුව ජනතාවගෙන් කාරුණිකව ඉල්ලා සිටියි.

මීට අමතරව, ඉදිරි පැය 24 සඳහා දිවයින වටා ඇති මුහුදේ කාලගුණ තත්ත්වය නිවේදනය කරමින් ඔවුන් පවසන්නේ ත්‍රිකුණාමලය සිට මඩකලපුව හරහා හම්බන්තොට දක්වා වන මුහුදු ප්‍රදේශවල වැසි වාර කිහිපයක් ඇති වන බවයි.

සෙසු මුහුදු ප්‍රදේශවල තැනින් තැන සවස්  කාලයෙ හෝ රාත්‍රී කාලයේ වැසි හේ ගිගුරුම් සහිත වැසි ඇතිවිය හැකි බවද පෙන්වා දෙයි.

දිවයින වටා වන මුහුදු ප්‍රදේශවල සුළං ඊසාන දෙසින් හමන අතර, සුළඟේ වේගය පැ.කි.මී. 30 – 40 ක් පමණ වන බවද එම නිවේදනයේ සඳහන් වෙයි.

එමෙන්ම, මන්නාරම සිට පුත්තලම හරහා කොළඹ දක්වා වන ගැඹුරු මුහුදු ප්‍රදේශවල සුළඟේ වේගය පැ.කි.මී. 50ක් දක්වා වැඩිවිය හැික අතර, එවිට එම මුහුදු ප්‍රදේශ තරමක් රළු විය හැකි බවද කාලගුණ විද්‍යා දෙපාර්තමේන්තුව වැඩිදුරටත් පවසයි.

2

අප්‍රිකානු රටවල් අසූචි වළක් ලෙස හැඳින් වූයේ නෑ – ට්‍රම්ප්

හයිටි රාජ්‍ය, එල් සැල්වදෝරය සහ අප්‍රිකානු රටවල් පිළිබඳ විස්තර කිරීම සඳහා ඇමරිකානු ජනාධිපති ඩොනල්ඩ් ට්‍රම්ප් අශ්ලීල භාෂාවක් යොදාගත් බවට නැගෙන චෝදනා ජනාධිපතිවරයා විසින් ප්‍රතික්ෂේප කර තිබේ.

කෙසේ වෙතත්, ජනාධිපතිවරයා විසින් එක්සත් ජනපද සංක්‍රමණික ප්‍රතිපත්තිය සම්බන්ධයෙන් ජනාධිපති කාර්යාලයේ පැවති සාකච්ඡාවකදී ඉහත කී රටවල් 'අසූචි වළක්' (shithole) ලෙස හඳුන්වා ඇති බවත්, එම ප්‍රකාශය සම්බන්ධයෙන් ජනාධිපතිවරයා සමාවගත යුතු බවත් අප්‍රිකානු සංගමය පවසයි.

මෙය සනාථ කිරීමට ඩිමොක්‍රටික් සෙනට් සභික ඩික් සර්බින්ද අදහස් දක්වා ඇති අතර, ජනාධිපතිවරයා විසින් ඇතැම් අප්‍රිකානු රටවල් 'අසූචි වළවල්' ලෙස හැඳින්වූ බව ඔහු උපුටා දක්වමින් විදෙස් මාධ්‍ය වාර්තා කර තිබේ.

කෙසේ වෙතත්, ජනාධිපති ට්‍රම්ප් විසින් සිදුකළේ යැයි පැවසෙන එම ප්‍රකාශය පිළිබඳ විවිධ අදහස් මතු වුවද, තම සාකච්ඡාව අතරවාරයේ භාවිත කළ භාෂාව පිළිබඳ ට්විටර් පණිවුඩයක් නිකුත් කරමින් ජනාධිපතිවරයා කියා සිටියේ 'තමන් තදින් වචන භාවිත කළත්, ඉහත කී ආකාරයේ භාෂාවක් එම අවස්ථාවේදී යොදා නොගත්' බවයි.

උතුරු මැතිවරණ ව්‍යාපාරයේ ජාතිවාදී LTTE ගීත – කැෆේ

යාපනය, කිලිනොච්චි හා මුලතිව් දිස්ත්‍රික්කයන්හි දේශපාලන පක්ෂ කිහිපයකටම අයත් අපේක්ෂකයන් කිහිප දෙනෙකු සිය ප්‍ර‍චාරක කටයුතු සඳහා ජාතිවාදී හා එල්.ටී.ටී.ඊ සංවිධානය විසින් ප්‍ර‍චලිත කළ ගීත යොදාගැනීම නවතා දමන ලෙස කැෆේ සංවිධානය ඉල්ලා සිටියි.

යාපනය ඥානම් ශාලාවේ පැවති ඡන්ද විමසීමට ඉදිරිපත් වන අපේක්ෂකයන්ගේ රැස්වීමක් ඇමතු කැෆේ විධායක අධ්‍යක්ෂ කීර්ති තෙන්නකෝන් මහතා මෙසේ පැවසීය. 

"යාපනය, කිලිනොච්ච් හා මුලතිව් පළාත් පාලන ආයතන සඳහා අපේක්ෂකයන් කිහිප දෙනෙකුම එල්.ටී.ටී.ඊ සංවිධානය විසින් ප්‍ර‍චලිත කළ ගීත සිය මැතිවරණ ව්‍යාපාරය සඳහා යොදා ගන්නා බව අප නිරීක්ෂණය කළා.  එල්.ටී.ටී.ඊ  විමුක්ති ගීත මැතිවරණ ප්‍ර‍චාරයට යොදා ගැනීම මැතිවරණ නීතිය උල්ලංඝනය කිරීමක් පමණක් නොව රටේ නීතියද උල්ලංඝන කිරීමක්. මෙතැන සිටින සියලුම අපේක්ෂකයන්ගෙන් හා දේශපාලන පක්ෂ හා ස්වාධීන කණ්ඩායම්වලින් මැතිවරණ නීතියත්, රටේ නීතියත් ගරු කරමින් මැතිවරණ ප්‍ර‍චාරක කටයුතු සිදුකරන ලෙස කාරුණිකව ඉල්ලනවා."

උතුරු පළාතේ සමහර ප්‍රදේශවල පළාත් පාලන ඡන්ද විමසීමක් පැවැත්වෙන්නේ වසර 67කට පසුවය. ඡන්දයට ඉදිරිපත් වන දේශපාලන පක්ෂ හා කණ්ඩායම් කිහිපයක් ජාතිවාදී ගීත පමණක් නොව, එල්.ටී.ටී.ඊ සංවිධානය  මගින් ප්‍ර‍චලිත කළ ගීත පවා මැතිවරණ ව්‍යාපාරයට යොදා ගන්නවා. මැතිවරණ නීතියත්, රටේ නීතියත් ගරු කිරීම උතුරු පළාතේ පමණක් නොව රටේම ඡන්දයට ඉදිරිපත්වන අපේක්ෂකයන්ගේ වගකීමක් බව කැෆේ සංවිධානය අවධාරණය කරයි.