Author Archives: නරේන් විශ්වජිත්

වසර 700ක් පැරණි ඉන්දීය නුග රුක බේරාගැනීමේ මෙහෙයුම

දකුණු ඉන්දියාවේ තෙලන්ගනා ප්‍රාන්තයේ වූ වසර 700ක් පැරණි සුවිසල් නුග රුක්ෂයක් කෘමි උවදුරකින් බේරාගැනීම සඳහා ඊට විශේෂ ආකාරයක කෘමි නාශක ඉසීමක් සිදුකරන බව වාර්තා වෙයි.

අක්කර තුනක් පුරා පැතිරුණු මෙම සුවිසල් නුග වෘක්ෂය එවැනි වර්ගයේ ලොව පවතින දෙවැනි විශාලතම වෘක්ෂය ලෙසද සැලකෙයි.

වේයන් හේතුවෙන් උපද්‍රවයට පත්ව ඇති විශේෂ සංචාරක ආකර්ෂණයක් දිනාගෙන ඇති මෙම වෘක්ෂය ආරක්ෂා කරගැනීම සඳහා බලධාරීන් දැඩි පරිශ්‍රමයක් ගන්නා අතර, මෙම කෘමි උවදුර පාලනයට ගසේ මුල සිට කෘමි නාශක ඉසීමට පියවර ගෙන තිබේ.

පසුගිය දෙසැම්බර් මාසයේදී මෙම වෘක්ෂයේ කොටසක් කැඩී යාමත් සමග මේ තත්ත්වය සම්බන්ධයෙන් බලධාරීන් අවධානය යොමු කර ඇති අතර, පසුව සංචාරකයන් සඳහාද කෙටි කාලයක් එම කලාපය වසා දැමුණු බවද පැවසේ.

1_Ban Tree

සෙනට් මණ්ඩලයට මව සමග පැමිණි ප්‍රථම බිළිඳිය මාලී

අමෙරිකානු සෙනට් මණ්ඩලය වෙත කුඩා බිළිඳෙකු රැගෙන ඒම වළක්වමින් පැවති තහනම කොංග්‍රසයේ ඉහළ මන්ත්‍රණ සභාව විසින් ඉවත් කිරීමෙන් දිනකට පසුව ඉලිනොයිස් සෙනෙට් සභික ටැමි ඩක්වර්ත් සිය බිළිඳු දියණියද රැගෙන සභාවට පැමිණෙමින් ඉතිහාසය වෙනස් කරන්නට විය.

මෙසේ ප්‍රථම වරට සෙනට් මණ්ඩලය වෙත තම මව සමග පැමිණීමට වාසනාව ලැබූ බිළිඳිය මාලී නම් වූ අතර, එහිදී, ඇගේ මව වූ සෙනට් සභික ඩක්වර්ත් ඇයවද වඩාගෙන පාර්ලිමේන්තු ඡන්ද විමසීමකටද සහභාගී වී ඇත.

 රෝස වර්ණයෙන් යුතු බ්ලැන්කෙට්ටුවක් පොරවාගෙන පැමිණි මාලී මෙම ඓතිහාසික ගමන සිය මව සමග පැමිණෙන විට ඇගේ වයස දින 10ක් පමණක් බව කියැවේ.

ඇමෙරිකානු සෙනට් සභිකයෙකුව සිටියදී පසුගිය සතියේදී මව් පදවිය ලැබූ ඩක්වර්ත් මේ වනවිට 50 වැනි වියේ පසුවීමද සුවිශේෂී කාරණයකි.

1_mali 2

කියුබාවේ ධනවාදයට ඉඩක් දෙන්නේ නෑ – නව ජනපති

රාවුල් කැස්ත්‍රෝ යුගය නිමා කරමින් කියුබාවේ නව ජනපතිවරයා ලෙස මිගෙල් ඩියෑස් කැනෙල් තෝරා පත්කර ගැනීම නිල වශයෙන් සිදුව තිබේ.

වර්ෂ 1959 වූ කියුබානු විප්ලවයෙන් පසුව කැස්ත්‍රෝ පවුලේ සාමාජිකයෙකු බලයේ රැඳී නොසිටීම ඇරඹි ප්‍රථම අවස්ථාව ලෙස මෙය ඉතිහාසයට එක්වෙයි.

පසුගිය වසර පහක කාලය තුළ පළමු උප ජනාධිපතිවරයා ලෙස සේවය කරමින් අත්දැකීම් බහුල අයෙකු ලෙස ඩියෑස් කැනෙල් සැලකෙයි.

කියුබානු විප්ලවයෙන් පසුව උපත ලබා ඇති ඩියෑස් කැනෙල්, රාවුල් කැස්ත්‍රෝගේ දකුණත ලෙස සැලකෙන බැවින් ඔහු කියුබානු පාලනයේ මහා විශාල පෙරළියක් හෝ විප්ලවීය වෙනසක් සිදුනොකරනු ඇති බව දේශපාලන විචාරකයෝ පෙන්වා දෙති.

කියුබාව තුළ ධනවාදය ස්ථාපිත කිරීමට උත්සාහ දරන්නන්ට කිසිදු අවස්ථාවක් හිමි නොවන බව සිය දිවුරුම්දීමේ කතාව කරමින් ඩියෑස් කැනෙල් පවසා සිටියේය.

1_Cuban Leader

ජර්මනියෙන් මතුවූ බෝම්බයක් නිසා බර්ලීන් වැසියන් ඉවත් කෙරේ

ජර්මනියේ බර්ලින් නගරයෙන් මතුවූ දෙවැනි ලෝක යුද්ධයට අයත් බෝම්බයක් නිශ්ක්‍රීය කිරීම වෙනුවෙන් ප්‍රදේශයේ ජනතාව විශාල වශයෙන් ඉවත් කිරීමට ජර්මානු බලධාරීන්ට සිදුව තිබේ.

ඒ අනුව, බෝම්බය හමුවූ ඉදිකිරීම් වැඩබිමේ සිට මීටර් 800ක් දුරින් වූ සියලුම ගොඩනැගිලිවල ජීවත් වූ අය තාවකාලිකව ඉවත් කිරීමට පියවර ගෙන ඇත.

ඒ අනුව, මෙම කලාපයට රජයේ අමාත්‍යාංශ, රෝහලක් මෙන්ම ප්‍රධාන දුම්රිය ස්ථානයක ඇතුළත් වීම නිසා විශාල ජනතාවක් තාවකාලිකව ඉවත් කිරීමට සිදුව තිබේ.

1939 සහ 1945 අතර කාලය තුළ යුද සමයේදී පුපුරා නොගිය දහස් ගණනක් වූ බෝම්බ වරින් වර ජර්මනියෙන් මතුවිය.

කිලෝ ග්‍රෑම් 500ක පමණ බරකින් යුතු බ්‍රිතාන්‍යයන් විසින් හෙළන ලද මෙම බෝම්බයෙන් ක්ෂණිකව හානියක් සිදුවිය හැකි හානියක් බලාපොරොත්තු නොවූවත්, එය ඉතා ඉක්මණින් නිශ්ක්‍රීය කිරීම වඩාත් ආරක්ෂිත පියවර බවට පත්ව තිබේ.

1_German Bomb 2

රටේ උද්ඝෝෂණ නිසා සිරිල් ආ පයින්ම ලන්ඩනයෙන් යයි

පොදු රාජ්‍ය මණ්ඩලීය රාජ්‍ය නායක සමුළුව වෙත පැමිණි දකුණු අප්‍රිකානු ජනපති සිරිල් රාමෆෝසා ලන්ඩනයේදී ඉතා කෙටි වේලාවකට පමණක් සමුළුව සඳහා සහභාගී වී ඇති බව විදෙස් වාර්තා පවසයි.

මේ වනවිට දකුණු අප්‍රිකාව තුළ නව රැකියා සහ නිවාස ඉල්ලමින්ද, රටේ පවතින දූෂණය වහා නතර කරන ලෙස රජයට බල කරමින්ද පැවැත්වෙන දරුණු උද්ඝෝෂණ ව්‍යාපාරය ඔහු මෙසේ හදිසියේ ඉවත්ව යාමට හේතු වී ඇති බව විදෙස් වාර්තා පෙන්වා දෙයි.

රටේ වයඹදිග පළාත්වල මෙම තත්ත්වය වඩාත් දරුණු ස්වරූපයක් ගෙන ඇති අතර, බොහෝ කඩ සාප්පු මංකොල්ල කෑමක්ද සිදුව ඇත.

එමෙන්ම, ප්‍රදේශයේ මාර්ග රැසක් බාධක යොදා හරස් කර ඇති විරෝධතාකරුවන්, මාර්ගවල වූ මෝටර් රථවලට ගිනි තබමින් ගමන් කරන බවද විදෙස් වාර්තා පවසයි.

පසුගිය පෙබරවාරි මාසයේදී බලයට පැමිණි රාමපෝසා රට තුළ නව ආයෝජන බලාපොරොත්තුවෙන් මෙම සංචාරයට එක් වුවත්, රටේ පවතින මෙම දැවැන්ත උද්ඝෝෂණ ව්‍යාපාරය රටට කැළලක් ඇති කරන බැවින් ජනපතිවරයා එය සංසිඳුවීම සඳහා වහා සිය රටට ගොස් ඇත.

1_Cyril 2

නේපාල පිරිමි පරදා ගැහැණු එවරස්ට් තරණයට එක්වෙලා

නේපාල කාන්තාවන් විශාල පිරිසක් වාර්තාගත ලෙස මෙම වසන්ත සෘතුවේදී එවරස්ට් කන්ද තරණය කරමින් සිටින බව එරට බලධාරීහු පවසති.

ඒ අනුව, නේපාල කාන්තාවන් 15 දෙනෙකු මෙවර එවරස්ට් තරණයට සූදානමින් සිටින බවත්, ඊට සාපේක්ෂව එවරස්ට් තරණයට එක්වන නේපාල පිරිමන් සංඛ්‍යාව 5ක් පමණක් බවත් සඳහන් වෙයි.

අවසන් වරට නේපාල කාන්තාවන් වැඩිම පිරිසක් එවරස්ට් තරණය කළ වසර ලෙස 2008 සැලකෙන අතර, එවර කාන්තාවන් 10 දෙනෙකු කඳු මුදුනට ළඟා වීමට සමත්ව තිබුණි.

ස්ත්‍රී පුරුෂ සමානාත්මතාව මෙන්ම පාරිසරික බලපෑම් සම්බන්ධයෙන් ලෝකය තුළ කතාබහක් ඇති කිරීමේ අරමුණින් මේ ආකාරයෙන් වැඩි කාන්තා පිරිසක් මෙවර එවරස්ට් තරණයට සූදානමින් සිටින බවද නේපාලයෙන් වාර්තා වෙයි.

1_Nepal 2 3 4 5

ජර්මනිය පුරා විහිදුණු අපරාධ කල්ලියක් වැටලූ මෙහෙයුම

ජර්මනිය පුරා මිනිස් ජාවාරම් සහ බලහත්කාර වෛශ්‍යා වෘත්තියේ යොදවන බවට චෝදනා ලැබූ අපරාධ කල්ලියකට සම්බන්ධ පුද්ගලයන් 100ක් පමණ අත්අඩංගුවට ගෙන තිබේ.

මෙසේ අත්අඩංගුවට පත්වූවන් අතර ජර්මානුවන් මෙන්ම තායිලන්ත ජාතිකයන්ද සිට ඇති අතර, මෙම විශේෂ මෙහෙයුම සඳහා පොලිස් කමාන්ඩෝ භටයන් යොදාගෙන තිබේ.

ඒ අනුව, ජර්මනිය පුරා පැවති ‍වෛශ්‍ය වෘත්තියේ යෙදෙන ස්ථාන රැසක් සහ ප්‍රාන්ත 12ක් පුරා මහල් නිවාස රැසක් ඉලක්ක කරමින් මෙම සෝදිසි මෙහෙයුම් දියත් කර ඇති බව විදෙස් වාර්තා පවසයි.

මෙසේ අත්අඩංගුවට ගත් විදේශිකයන් ව්‍යාජ ගමන් බලපත්‍ර යොදාගෙන ජර්මනියේ රැඳී සිටි අය බව හෙළි වී ඇත.

මෙම අපරාධ කල්ලිය මෙහෙයවීම සඳහා අපරාධකරුවන් 17 දෙනෙකු සම්බන්ධ වී ඇති අතර, එහි ප්‍රධානියා ලෙස ජර්මානු ජාතිකයෙකු සහ ඔහුගේ තායිලන්ත ජාතික බිරිඳ අත්අඩංගුවට පත්ව තිබේ.

එහිදී, වෛශ්‍යාවන් ලෙස සේවයේ යොදවන පිරිස් මෙම අපරාධ කල්ලිය හරහාම විකිණී ඇති අතර, ඔවුන් උපයන ආදායමෙන් විශාල කොටසක් මෙම අපරාධ කල්ලිය තම භාරයට ගෙන ඇති බවද හෙළි වී ඇත.

ඔවුන්ට ව්‍යාජ ලෙස ජර්මනියට ඇතුළු වීමට ඉඩ ලබාදීම සඳහා වූ කප්පම් මුදල් ලෙස මෙසේ ඔවුන්ගේ සේවයට අදාළ මුදල් මෙම කල්ලිය විසින් ලබාගෙන ඇති බවද පොලීසිය විශ්වාස කරයි.  

1_German 2

පෝර්ටෝ රිකෝ විදුලි බිඳ වැටීමකින් මිලි. 3.4ක් අඳුරේ

පෝර්ටෝ රිකෝ දූපතේ යටිතල පහසුකම් හා විදුලි පද්ධතියට බරපතළ හානි සිදුකරමින් බලපෑ මාරියා සුළි කුණාටුවෙන් මාස හතකට පසුව එහි ප්‍රබල විදුලි බිඳ වැටීමක් වාර්තා වේ.

ඇමෙරිකා එක්සත් ජනපදයට අයත් මෙම දූපතේ විදුලි අධිකාරිය ලෙස කටයුතු කරන ප්‍රෙපා ආයතනය පවසා සිටියේ මිලියන 3.4ක් පමණ වන ජනතාවට බලපා ඇති මෙම විදුලිය බිඳ වැටීම යථාතත්ත්වයට පත්කිරීම සඳහා පැය 24 – 36ත් අතර කාලයක් ගතවනු ඇති බවයි.

දූපත ආශ්‍රිතව සිදුවූ විශාලතම හා ප්‍රබලතම විදුලි බිඳ වැටීම මෙය බව බලධාරීහු සඳහන් කරති.

ඒ අනුව, දූපතේ ආරෝග්‍ය ශාලාවන්, සැන් ජුආන් ගුවන් තොටුපොළ, ජල පොම්පාගාර සහ මූල්‍ය පද්ධති වෙත හැකි ඉක්මණින් විදුලිය සැපයීමට ඔවුන් කටයුතු කරමින් සිටින බවද සඳහන් වෙයි.

1_Porto

උ. කොරියානු සාකච්ඡා ඵල රහිත නම් ඉවත්වෙනවා -ට්‍රම්ප්

උතුරු කොරියානු නායක කිම් ජොන්ග් උන් සමග තමා පැවැත්වීමට සැලසුම් කරගෙන ඇති සාකච්ඡාවටය ඵල රහිත වුවහොත් තමන් එම සාකච්ඡාවලින් ඉවත්වන බව ඇමෙරිකානු ජනපති ඩොනල්ඩ් ට්‍රම්ප් පවසයි.

ජපාන අගමැති ෂින්සෝ අබේ සමග ඇමෙරිකානු නායකයා පැවැත්වූ ඒකාබද්ධ මාධ්‍ය හමුවකදී ඔහු මෙම අදහස් පළ කර ඇත.

එහිදී, ඔවුන් වැඩිදුරටත් පවසා තිබුණේ උතුරු කොරියාවේ න්‍යෂ්ටික වැඩපිළිවෙළ සම්බන්ධයෙන් දැඩි පීඩනයක් ඔවුන් වෙත තවදුරටත් එල්ල කරන බවයි.

ඇමෙරිකාවේ ෆ්ලොරීඩා හි ඇමෙරිකානු ජනපති ඩොනල්ඩ් ට්‍රම්ප්ට අයත් මාර්-අ-ලාගෝ රිසෝට් හිදී ජපාන අගමැතිවරයා හා ඇමෙරිකානු නායකයා අතර මෙම හමුව සිදුව ඇත.

මීට පෙර ඇමෙරිකානු ජනපති ඩොනල්ඩ් ට්‍රම්ප් පවසා තිබුණේ ඇමෙරිකානු බුද්ධි අංශ අධ්‍යක්ෂ මයික් පොම්පෙඕ උතුරු කොරියාව වෙත රහසිගත සංචාරයක නිරත වෙමින් කිම් ජොන්ග් උන් මුණගැසුනු බවයි.

එහිදී, උතුරු කොරියානු නායකයා සමග හොඳ සබඳතාවක් ඇති කරගැනීමට මාර්ක් සමත්ව ඇති බවත් පැවසූ ට්‍රම්ප්, එම සාකච්ඡාව වඩාත් සුමටව සිදුව ඇති බවද සඳහන් කර ඇත.

1_CIA

මෙම සංචාරය වර්ෂ 2000න් පසුව ඇමෙරිකාවේ ජ්‍යෙෂ්ඨ රාජ්‍ය නිලධාරියෙකු උතුරු කොරියාවේ සංචාරය කළ ප්‍රථම අවස්ථාව ලෙසද ඉතිහාසයට එක්වෙයි.

රාවණ තමා පැහැරගෙන යෑම ගැන සීතා සතුටු බව කියලා?

ඉන්දියානු වීර කාව්‍යයක් වන රාමායනයේ එන රාම භක්තිකයන් විසින් තමාව පැහැර ගෙන නොගොස්, රාවණ තමන්ව පැහැරගෙන යෑම ගැන තමා මහත් සේ සතුටට පත්වන බව සීතා පවසා තිබේ.

ඉන්දීය ජාතික මාධ්‍යවේදිනියක හා කාටූන් ශිල්පිනියක වන ස්වාති වඩ්ලාමූඩි විසින් නිර්මාණය කරන ලද නවතම කාටූනයක මේ අදහස ඇය පළ කර තිබුණේ ආසන්න කාලසීමාවේදී ඉන්දියානු දැඩිමතධාරී හින්දු පරිසරය තුළ දිනෙන් දින වර්ධනය වී ඇති ස්ත්‍රී දූෂණ හා ළමා අපචාර සිදුවීම් මුල් කරගෙනය.

ඒ අනුව, රාම දෙවිඳුන්ගේ බිරිඳ වන සීතා දෙවඟන විසින් තම ස්වාමියාගේ අනුගාමිකයන් වන හින්දු දැඩි මතධාරීන්ට වඩා එම සමාජය විසින් යක්ෂයෙකු ලෙස සලකන රාවන් හෙවත් ශ්‍රී ලංකාවේ රාවණ රජු උසස් කොට දක්වමින් ඉන්දියාවේ මුල්බැස ගෙන ඇති ස්ත්‍රී දූෂණයට අතුල් පහරක් එල්ල කර තිබේ.

මෙම කාටූනයත් සමග මේ වනවිට තමන්ට මරණීය තර්ජනය එල්ල වෙමින් පවතින බව සඳහන් කරන මාධ්‍යවේදිනිය වැඩිදුරටත් සඳහන් කරන්නේ ඉන් තමා පසුබට නොවන බවත්, එය තමා ශක්තියක් කරගන්නා බවත්ය.

මෙම කාටූනය මේ වනවිට ඉන්දීය සමාජජාල හරහා වේගයෙන් හුවමාරු වෙමින් පැවතියද, මෙම කාටූනය නිර්මාණය සඳහා රාමායනයේ චරිත යොදාගැනීම තුළ මේ සම්බන්ධයෙන් ආන්දෝලනයක් ඇතිවී තිබේ.

කෙසේ වෙතත්, මෙවැනි උපහාසාත්මක කාටූන් නිර්මාණ පළ කරමින් සමාජයේ ඇස් ඇරවීම තම විනෝදාංශයක් බව මාධ්‍යවේදිනිය සඳහන් කරයි.

එහිදී, මෑතකදී හින්දු පූජකයෙකු මූලිකව අට හැවිරිදි දැරියක සමූහ දූෂණයට ලක්කර මරාදැමීමේ සිද්ධිය මෙන්ම, භාරතීය ජනතා පක්ෂ දේශපාලඥයන් කිහිප දෙනෙකු දූෂකයන් වෙනුවෙන් පෙනී සිටීමත්, එම පක්ෂයේම දේශපාලඥයෙකු විසින් 16 හැවිරිදි තරුණියක දූෂණය කිරීමේ සිද්ධියත් මෙම කාටූනය නිර්මාණයට වස්තු බීජ සපයා ඇති බවද සඳහන් වෙයි.

1_Seetha 2