Author Archives: නරේන් විශ්වජිත්

උතුරු කොරියාවෙන් පළා ආ සෙබලා මැවූ එරට සෞඛ්‍ය චිත්‍රය

උතුරු කොරියානු දේශසීමා පැන පළා එමින් සිටියදී එරට හමුදා වෙඩි පහරින් තුවාල වී සිටි සෙබලාගේ ආහාර මාර්ගය තුළ පරපෝෂිත පණුවන් රැසක් සිටි බව දකුණු කොරියානු වෛද්‍යවරු පවසති.

පසුගිය සඳුදා දිනයේදී මෙම සොල්දාදුවා දේශසීමා පැන දකුණු කොරියාව දෙසට පළා ඒමේදී උතුරු කොරියානු හමුදා ඔහුට වෙඩි තැබීය. කෙසේවෙතත්, තුවාල වී සිටි සෙබලා වහාම රෝහල්ගත කිරීමට දකුණු කොරියාව කටයුතු කළේය.

රෝගියාගේ තත්ත්වය බරපතල නොවූවත්, ඔහුගේ බඩවැල් තුළ මින්පෙර නොදුටු අයුරින් පරපෝෂිත පණුවන් සිටීම හේතුවෙන්, එම පරපෝෂිතයන් ඔහුගේ තුවාල අපවිත්‍ර කිරීම ඔහුගේ ඉක්මන් සුවයට බලපාන බව දකුණු කොරියානු වෛද්‍යවරු පවසති.

එමෙන්ම, මෙම තත්ත්වය උතුරු කොරියාවේ ජනජීවිතය මෙන්ම සමස්ත සෞඛ්‍ය ක්ෂේත්‍රය සම්බන්ධයෙන් ලෝකය හමුවේ අඳුරු පැතිකඩක් නිරූපණය කරන බවද විදෙස් වාර්තා පෙන්වා දෙයි.

2

දුර්ලභ ගිරව් ජාවාරම්කළ ඉන්දුනීසියානුවන්ට වැඩ වරදී

කුඩා ජල නළවල සිර කර සිටි දුර්ලභ පක්ෂීන් 125ක් ඉන්දුනීසියාවෙන් හමුවීමත් සමග එරට වනජීවී නිලධාරීන් හා පොලීසිය එක්ව විසින් ඒ සම්බන්ධයෙන් විශේෂ පරීක්ෂණයක් අරඹා තිබේ.

පොලීසිය පවසන පරිදි අත්අඩංගුවට පත් පක්ෂීන් අතර කොණ්ඩා ගිරව් ඇතුළු දුර්ලභ ගිරව් සිට බවත්, ජල නළ කොටට කපා, ඒවායේ දෙපස දැලක් ආකාරයෙන් බැඳ ඒ තුළ මෙම පක්ෂීන් රඳවා තිබූ බව පොලීසිය පවසයි.

ඉන්දුනීසියාවේ වනාන්තර ආශ්‍රිතව මෙම කුරුළු විශේෂ තවදුරටත් ආරක්ෂිතව සිටින අතර, දුර්ලභ සත්ව ජාවාරම එරට තුළ තවදුරටත් සිදුවන බව පොලීසිය පවසයි.

කෙසේ වෙතත්, මේ සම්බන්ධයෙන් පුද්ගයන් සිව්දෙනෙකු පොලිස් අත්අඩංගුවට පත්ව තිබේ.

ඔවුන්ට වසර පහක සිර දඬුවමක් සහ ඇ.ඩො.7,400ක දඩයකට යටත්වීමට සිදුවන බව පොලීසිය පවසයි.

1_Parrot 2

මුගාබේට ඉල්ලා අස්වන ලෙස ඉල්ලා විරෝධතා

සිම්බාබ්වේ ජනාධිපති රොබට් මුගාබේ වෙත බලයෙන් ඉවත්වන ලෙස ඉල්ලා එරට හරාරේ අගනුවර දහස් ගණන් ජනයාගේ සහභාගීත්වයෙන් පෙළපාලියක් සංවිධානය වෙමින් පවතී.

පසුගිය බදාදා දිනයේදී සිම්බාබ්වේ පාලනය සියතට ගත් එරට හමුදාව විසින් මෙම දැවැන්ත රැලියට සහයෝගය දක්වන බව විදෙස් වාර්තා පවසයි.

ජනපති මුගාබේ නියෝජනය කරන සානු පී.එෆ් පක්ෂයේ ප්‍රාදේශීය බල මණ්ඩල මෙන්ම, එරට යුද විරුවන් පවා මුගාබේ ඉවත්විය යුතු බව තරයේ කියා සිටිති. ඔවුන් පසුගිය වසර වනතුරුම මුගාබේ වෙත දැඩි පක්ෂපාතීත්වයක් දැක්වූ පිරිස් වීමද විශේෂත්වයකි.

93 වැනි වියේ පසුවන මුගාබේ පසුගිය දින කිහිපය නිවාස අඩස්සියේ රඳවා තබා ගැනුණද, සිකුරාදා දිනයේදී ඔහු අගනුවර පැවති උපාධි ප්‍රදානෝත්සවයකට සහභාගී වෙමින් යළි මහජනතාව හමුවේ පෙනී සිටියේය.

කෙසේ වෙතත්, සිම්බාබ්වේ උප ජනාධිපතිවරයාව සිටි එමර්සන් නන්ගාවා බලයෙන් පහ කරමින් සිය බිරිඳ වන ග්‍රේස් මුගාබේ බලයට ගෙනඒම සඳහා වත්මන් ජනපතිවරයා ගෙනගිය ක්‍රියාමාර්ගය මේ ආකාරයෙන් බල තුලනය හමුදා බලයෙන් වෙනස් කිරීමට හේතු පාදක විය.

මේ අතර එරට හමුදාවද කියා සිටියේ තමන් මුගාබේ සමග සාකච්ඡා කරමින් සිටින බවත්, හැකි ඉක්මණින්ම යහපත් ප්‍රතිචාරයක් බලාපොරොත්තුවෙන් සිටින බවත්ය.

වර්ෂ 1980 දී සිම්බාබ්වේ දේශය මහා බ්‍රිතාන්‍යයෙන් නිදහස ලැබීමෙන් පසු මේ දක්වා එරට පාලන බලය රොබට් මුගාබේ විසින් ඉසිලීය.

 4 1_Mugabe1

ඉන්දියාවේ බාල වයස්කාර තරුණියක් සමූහ දූෂණයේ

ඉන්දියාවේ, බැංගලෝරයේදී වයස අවුරුදු 17ක තරුණියක සමූහ දූෂණයට ලක්කළ පුද්ගලයන් සිව්දෙනෙකු අත්අඩංගුවට පත්ව තිබේ.

දින 10ක කාලයක් හෝටල් කාමරයක රඳවා තබා ගනිමින් මෙම තරුණියව දූෂණය කර තිබූ බව පොලිස් පරීක්ෂණවලින් හෙළි වී තිබේ.

සිද්ධියට සම්බන්ධ අපරාධකරුවන් සිව්දෙනා අධිකරණයට ඉදිරිපත් කිරීමෙන් පසුව රක්ෂිත බන්ධනාගාරගත කර ඇති අතර, තරුණිය රඳවා තබාගත් හෝටලයේ හිමිකරුද ඒ අතර වන බව කියැවෙයි.

සිද්ධියට සම්බන්ධ එක් පුද්ගලයෙකු තරුණියගේ මිතුරෙකු වන අතර, සාදයකට කැඳවාගෙන යන බව පවසමින් මෙම තරුණිය හෝටලය වෙත රැගෙන ගොස් ඇත්තේ ඔහු විසිනි.

පසුගිය ඔක්තෝබර් මස 26 වැනිදා නිවසින් අතුරුදන්ව ඇති දැරිය පිළිබඳව ඇගේ දෙමවුපියන් පොලීසියට පැමිණිලි කර ඇත්තේ ඔක්තෝබර් 30 වැනිදා බවත් පොලීසිය කියයි.

මෙම තරුණිය බාල වයස්කාරියක් නිසා ළමා ආරක්ෂණ පනත යටතේ ස්ත්‍රී දූෂණය හා පැහැරගෙන යාම යන චෝදනා යටතේ මෙම අපරාධකරුවන්ට එරෙහිව චෝදනා ගොනුකර ඇති බව පොලීසිය පවසයි.

ඉන්දියාවේ ස්ත්‍රී දූෂණ සිදුවීම් වාර්තා වන ප්‍රථම අවස්ථාව මෙය නොවන අතර, මීට වසර කිහිපයකට පෙර දිල්ලියේ බස් රථයක් තුළදී වෛද්‍ය ශිෂ්‍යාවක සමූහ දූෂණය ලක්කර මරා දැමීමේ සිදුවීම තුළ ඉන්දියාව තුළ ස්ත්‍රී දූෂණයට එරෙහිව දැඩි විරෝධතාවක් මෙන්ම, නීති සම්පාදනය කෙරිණි.

කෙසේ වෙතත්, මේ තත්ත්වය තුළ පවා තවදුරටත් ඉන්දියාව තුළ ස්ත්‍රී දූෂණය අවසන්ව නොමැති බව දේශපාලන විචාරකයෝ වැඩිදුරටත් පවසති.

1_bangalore

දකුණු කොරියා භූ කම්පනය කඩඉම් විභාගයක් කල්දමයි

දකුණු කොරියාව මුහුණදුන් රික්ටර් පරිමාණ 5.4ක භූ කම්පනය හේතුවෙන් එරට විද්‍යාල පිවිසුම් විභාගයක් කොරියානු ඉතිහාසයේ ප්‍රථම වරට කල්දැමීමට බලධාරීන්ට සිදුව තිබේ.

මෙම කඩඉම් විභාගය සඳහා ශිෂ්‍ය ශිෂ්‍යාවන් මෙන්ම, දෙමවුපියන්ද මාස කිහිපයක් පුරා සූදානම් වන බව කියැවෙයි.

දකුණ කොරියාවේ ගිණිකොණදිග වරාය නගරයක් වූ පොහැන්ග් ආසන්නයෙන් භූ කම්පනයේ අපිකේන්ද්‍රය වාර්තා වන අතර, ප්‍රධාන කම්පනයෙන් අනතුරුව පසු කම්පන රැසක්ද වාර්තා වී තිබුණි.

එරට භූ කම්පන ඉතිහාසය දෙස බලන විට දකුණු කොරියාවට බලපා ඇති දෙවැනි ප්‍රබලතම භූ කම්පනය ලෙස මෙය සැලකෙන අතර, භූ කම්පනයෙන් ජීවිත හානි නොවූවත් පුද්ගලයන් 57 දෙනෙකු තුවාල ලබා තිබේ.

එමෙන්ම, භූ කම්පනය හේතුවෙන් උන්හිටිතැන් අහිමි පිරිස 1,500ක් පමණ වන බව විදෙස් වාර්තා පවසයි.

1_S Korea 2 3

කාම්බෝජ ප්‍රධාන විපක්ෂය අධිකරණ තීන්දුවකින් විසුරුවයි

කාම්බෝජ ශ්‍රේෂ්ඨාධිකරණ තීරණයකින් එරට ප්‍රධාන විපක්ෂය විසුරුවා හැරීමට තීරණය කිරීමත් සමග ලබන වසරේ පැවැත්වෙන මහ මැතිවරණයේදී වත්මන් රජයට පැහැදිලි තරගයක් නොමැති බව කියයි.

කාම්බෝජ ජාතික ගලවාගැනීමේ පක්ෂය හෙවත් සී.එන්.ආර්.පී. පක්ෂය වත්මන් රජය පෙරලා දැමීම සඳහා කුමන්ත්‍රණය කරන ලදැයි යන චෝදනාව යටතේ මෙම අධිකරණ තීන්දුව ලැබී තිබේ.

එම විපක්ෂය මෙම චෝදනා තරයේ ප්‍රතික්ෂේප කළත් මෙම අධිකරණ තීන්දුවත් සමග එම පක්ෂයේ සාමාජිකයන් 100 දෙනෙකුට වසර 5ක කාලයක් දේශපාලනය තහනම් කර තිබේ.

එමෙන්ම, මෙම අධිකරණ තීන්දුවත් සමග එරට මන්ත්‍රණ සභාවේ ආසන 123න්, ආසන 55ක් හිමි විරුද්ධ පක්ෂ සභිකයන්ට ඔවුන්ගේ තනතුරු අහිමි වන බවද කියැවෙයි.

කාම්බෝජයේ වත්මන් අගමැති හුන් සෙන් වසර 32ක කාලයක් එරට පාලන කරන අතර, මෙය එරට ප්‍රබල විපක්ෂය පසුගිය කාලයේදී අත්කරගත් ශක්මත් වර්ධනය මර්දනය කිරීමක් ලෙස දේශපාලන විචාරකයෝ පෙන්වා දෙති.

1_Cambodia

ඔස්ට්‍රේලියානු රාජතාන්ත්‍රිකයා මහල් නිවාසයෙන් වැටී මරුට

මිතුරු පිරිසක් සමග විනෝදවෙමින් සිටි ඔස්ට්‍රේලියානු රාජතාන්ත්‍රික නිලධාරියෙකු ඇමෙරිකාවේ, නිව්යෝක් නුවර මහල් නිවාසයක සඳලුතලයකින් වැටී ජීවිතක්ෂයට පත්ව තිබේ.

30 හැවිරිදි ජූලියන් සිම්ප්සන් එම මහල් නිවාසයේ හත් වැනි මහලේ සඳලුතලයෙන් වැටී ඇති අතර, ඔහු දෙවැනි මහල වෙත පතිත වී සිටි බව පොලීසිය පවසයි.

ඇමෙරිකා එක්සත් ජනපදයේ ඔස්ට්‍රේලියාව නියෝජනය කරන කණිෂ්ඨ රාජතාන්ත්‍රික නිලධාරියෙකු ලෙස ඔහු සේවය කර ඇති බව කියැවෙයි.

අලුයම 1.00ට පමණ පොලීසිය වෙත ලැබුණු හදිසි ඇමතුමකට අනුව ඔවුන් එම ස්ථානයට පැමිණ තුවාලකරු රෝහල්ගත කරන විටත් ඔහු ජීවතුන් අතර නොසිටි බව කියැවෙයි.

1_Ausi

ලියනාඩෝ ඩා වින්සි සිතුවමට ඉහළම ලන්සුව

ලියනානෝ ඩා වින්සි විසින් මීට වසර 500කට පමණ පෙර සිතුවමට නැගූ බව විශ්වාස කෙරෙන ක්‍රිස්තු චරිතය දැක්වෙන සිතුවම ඇ.ඩො.මිලියන 450ක වාර්තාගත මිලකට නිව්යෝක් නුවරදී වෙන්දේසි වී තිබේ.

සැල්වේටර් මුන්ඩි හෙවත් ලෝකයේ ගැලවුම්කරුවා ලෙසින් මෙම සිතුවම ප්‍රසිද්ධියට පත්ව තිබුණි.

ක්‍රිස්ටීස් වෙන්දේසියකදී ඕනෑම ආකාරයක සිතුවමකට එදාමෙදාතුර වැඩිම මිලක් නියම වූ අවස්ථාව ලෙස මෙය සැලකෙන බව විදෙස් වාර්තා පවසයි.

වර්ෂ 1519 දී ලියනාඩෝ ඩා වින්සි ජීවිතක්ෂයට පත්ව සිටි අතර, ඔහුගේ චිත්‍ර 20ක් පමණ මේ වනවිට ඉතිරිව පවතී. මෙම චිත්‍රය වර්ෂ 1505 දී පමණ ඔහු විසින් සිතුවමට නගනලද චිත්‍රයක් බව විශ්වාස කෙරෙයි.

1_salvator_mundi

සිම්බාබ්වේ හමුදා කුමන්ත්‍රණ ස්වරූපයක් – අප්‍රිකා සංගමය

සිම්බාබ්වේ හමුදාව විසින් එරට පාලන බලය සියතට ගෙන ජනපති රොබට් මුගාබේ නිවාස අඩස්සියේ තබාගෙන සිටීම බැලූ බැල්මට හමුදා කුමන්ත්‍රණයක් බව අප්‍රිකානු සංගමය පවසයි.

අප්‍රිකානු සංගමයේ ප්‍රධානී ඇල්ෆා කොන්ඩේ පවසා සිටියේ රට තුළ කඩිනමින් ව්‍යවස්ථාපිත ප්‍රජාතන්ත්‍රවාදය ස්ථාපිත කරන ලෙස සංගමය ලෙස සිම්බාබ්වේ රාජ්‍යයට බලකර සිටින බවයි.

කෙසේ වෙතත්, සිම්බාබ්වේ හමුදා මෙය හමුදා කුමන්ත්‍රණයක් ලෙස අර්ථ දැක්වීමට අකැමැත්ත ප්‍රකාශ කරන අතර, ඔවුන් පවසන්නේ ජනපති මුගාබේ නිරුපද්‍රිතව හා ආරක්ෂිතව සිටින බවයි. ජනාධිපතිවරයා වටා සිටින අපරාධකරුවන්ගෙන් ඔහු බේරාගැනීමේ මෙහෙයුමක් පමණක් ක්‍රියාත්මක වන බව හමුදාව කියයි.

මුගාබේ ජනාධිපතිවරයාගෙන් පසුව එරට ජනාධිපති ධුරයට පත්වන්නේ කවුද යන්න සම්බන්ධයෙන් එරට තුළ බල අරගලයක් පැවති අවස්ථාවක මෙම හමුදාමය ක්‍රියාමාර්ගය ක්‍රියාත්මක වෙයි.

විශේෂයෙන්ම, එරට උප ජනාධිපතිවරයා ලෙස කටයුතු කළ එමර්සන් මනන්ගාවා ධුරයෙන් පහ කිරීමට ජනාධිපතිවරයා පසුගිය සතියේ කටයුතු කිරීමත් සමග තත්ත්වය උග්‍ර අතට හැරුණි. ඔහු වෙනුවට ජනාධිපති ආර්යා ග්‍රේස් උප ජනාධිපතිවරයා ලෙස පත්කිරීම ඔහුගේ වැඩපිළිවෙළ වී තිබුණි.

කෙසේ වෙතත්, මේ තත්ත්වය තුළ එරට ප්‍රධාන හමුදා නායකයන් සියලු දෙනා එක් පැත්තක් ගනිමින් ජනාධිපතිවරයාට ප්‍රසිද්ධියේ චෝදනා කරන්නට විය.

1980 වසරේදී සිම්බාබ්වේ දේශය මහා බ්‍රිතාන්‍යයෙන් නිදහස ලබාගැනීමේ සිට මේ දක්වා එරට දේශපාලනය සියතට ගත් මුගා‍බේ 93 වැනි වියෙහි පසුවෙයි.

ZIMBABWE-POLITICS-UNREST 2 3 4

ග්‍රීසියේ හදිසි ගංවතුරක් නිසා ජීවිත හානි 15ක්

ග්‍රීසියට බලපෑ දැඩි වර්ෂාපතනයක් සමග ඇති වූ හදිසි ගංවතුර තත්ත්වයක් නිසා මධ්‍යම ග්‍රීසියේ පුද්ගලයන් 15 දෙනෙකු ජීවිතක්ෂයට පත්ව තිබේ.

මධ්‍යම ග්‍රීසියේ කාර්මික නගරයක් වූ මන්ඩ්‍රා, නිආ පෙරාමොස් සහ මෙගාරා මෙන්ම, ඇතන්ස් අගනගරයේ බටහිර පෙදෙස ගංවතුරෙන් බලවත් පීඩාවට පත් ප්‍රදේශ ලෙස සැලකෙයි.

මියගිය වැඩි පිරිසක් වයෝවෘද්ධ පුද්ගලයන් වන අතර, ඔවුන්ගේ සිරුරු පසුව එම නිවෙස්වල තිබී සොයාගෙන ඇත.

මේ වනවිට මංමාවත් රැසක් මඩ වතුරෙන් පිරී ඇති බවත් එරට මාධ්‍ය වාර්තා පවසයි. මේ අතර, මෙම හදිසි අවස්ථාව හමුවේ සිදුවූ ඛේදවාචකය හේතුවෙන් ජාතික ශෝක කාලයක් ප්‍රකාශයට පත්කිරීමට අගමැති ඇලෙක්සි සිප්රාස් කටයුතු කර තිබේ.

මේ අතර, ගංවතුර හේතුවෙන් තුවාල ලැබූ පුද්ගලයන් 37 දෙනෙකු රෝහල්ගත කර ඇති බවත්, තවත් පිරිසක් තවමත් අතුරුදන්ව ඇති බැවින් මියගිය පිරිස මීට වඩා වැඩිවිය හැකි බවත් මන්ඩ්‍රා නගරාධිපතිවරයා පවසයි.

3 1+Greece 2 4