Author Archives: නාලිකා රාජපක්ෂ

නහර ගැටගැසීමෙන් ඔබත් පීඩාවෙන්ද?

දෙපාවල ඇතිවන නහරගැට ගැසීම ඉතාම සුළභ තත්ත්වයක්. විශේෂයෙන්ම මැදිවිය සමග මේ ගැටලුව බොහෝ දෙනෙක් අත්විඳින නමුත් මෙම තත්ත්වය තරුණ වයසේ අයටත් ඇතිවෙන්න පුලුවන්. දෙපාවල ඇතිවන තත්ත්වයක් නිසා බොහෝ දෙනෙක් මේ තත්ත්වයට ශළ්‍යකර්ම කරගන්නට අකමැතිබවක් පලකරනවා.එවැන්නන්  රෝග සුවය සඳහා ඖෂධ ප්‍රතිකාර පිළිබඳ පමණක් උනන්දුවක් දක්වතත් සමහර අවස්ථාවලදී ඇතැම් පුද්ගලයින්ට ශල්‍යකර්ම යෙදීම අත්‍යවශ්‍ය අවස්ථා පැවතිය හැකිය. නහර ගැට ගැසීම නැති නම් වෙරිකෝසිස් වේන් යනුවෙන් හඳුන්වන මේ රෝග තත්ත්වයද ශල්‍යකර්මයකට යොමු විය යුතු අවස්ථාවක් ලෙස මතු විය හැකි ය. ඇතමුන් මේ සඳහා වෙළුම් යෙදීම මෙන්ම එන්නත් පිළිබඳ උනන්දුවෙයි. නමුත් එයින් ලැබෙන ප්‍රතිඵලය ශල්‍යකර්මයකින් ලබන සුවය තරම් තීව්‍රද යන්න විමසීමට අද අපි සෞඛ්‍ය පිටුවේ ප්‍රධානතම ඉඩකඩ වෙන් කර ඔබව දැනුම්වත්කිරීමට අදහස් කරමු..


JV_Nov03_06_2_Sore-Legs-or-Varicose-Veins-This-Is-How-You-Should-Treat-Them

වෙරිකෝසිස් නැතිනම් නහරගැට ගැසීම යන තත්ත්වයට ශල්‍යකර්මයක් අවශ්‍යද යන්න බැලූ බැල්මට තීරණය නොකෙරෙනු ඇත. සාමාන්‍යයෙන් කිසියම් රෝගයක් පිළිබඳ නිර්ණය කිරීමට නිසි වෛද්‍ය පරීක්ෂාවක් සහ ඒ සඳහා නියමිත පරීක්ෂණවලට යොමු වීම අත්‍යවශ්‍යය. නමුත් නහරගැට ගැසීම නැතිනම් වෙරිකෝසිස් වේන් යනු රෝගියාටම පියවි ඇසින් දැක තමන්ට එවන් තත්ත්වයක් ඇති බව තීරණය කරගත හැකි රෝගයකි. මෙවන් තත්ත්වයක් දුටු විට එය රෝගයක් බව පවා බොහෝ දෙනා පිළිනොගන්නා කරුණකි. එයට හේතුව එවන් තත්ත්වයක් පවතින්නට හැරීමෙන් පසුකාලීනව ඇතිවන කරදරකාරී තත්ත්වය සම්බන්ධයෙන් ඔවුන් අත්දැකීමක් ලබා නොතිබීමයි. නහර ගැට ගැසීම ඇතැම් විටෙක ප්‍රවේණියට නැතිනම් ආරයට සම්බන්ධයක් දක්වන  තත්ත්වයක් ලෙසද අනුමාන කෙරෙයි.  දෙමවුපියන්ට මේ තත්ත්වය පැවතියේ නම් ඇතැම් විටෙක දරුවන්ටද ඇතිවිය හැකි යැයි  සැකයක් පවතියි. එය ශිරාවල පිටත පටකවල  උපතින්ම පවතින දුර්වලතාවයක් සහිත මවුපියන්ගේ දරුවන්ටත්වීමට  ඉඩකඩ පවතින  බව විශ්වාසය පදනම් කරගත්  තත්ත්වයකි. සාමාන්‍යයෙන්  නහර ගැට ගැසීම  දෙපා සම්බන්ධයෙන් ඇති විය හැකි තත්ත්වයක් වුවත් කලාතුරකින් අත්වලත් මෙවන් තත්ත්වයක් දැකිය හැකි අවස්ථා හමුවෙන්නට පුලුවන.

මෙසේ නහර ගැට ගැසීමට හේතුව කුමක් වුවත් එය නොසලකා හැරිය යුතු  නොසලකා හැරිය නොහැකි තත්ත්වයක් නොවන බව ඔබ දැන සිටිය යුතුයි. මේ නිසා මතුවන බොහෝ සංකූලතා වලින් ගැලවී සිටීමට ඔබට උපකාරීවන  එම දැනුම පසුකාලීනව මේ රෝගයෙන් ඇතිවන පීඩාවලින් ඔබ මුදවා ගැනීමට සමත්වනු ඇති. ඔබ නහර ලෙස හඳුන්වන්නේ රුධිරය ගෙන යන ශිරා බව ඔබ මුලින්ම දැනගත යුතුයි. මේ ගැට ගැසුණු ශිරාවන් සඳහා ඉක්මන් ප්‍රතිකාර නොකලොත්  යම් විටෙක මේවා නැවත ස්ථීර ලෙස සාමාන්‍ය තත්ත්වයට පත්කරීම නැතිනම් දිගින් හා පළලින් අඩු නොවී ඒ ආකාරයටම පවතින්නට පුලුවන. මේ ආකාරයට මේ ශිරාවන් කැටි ගැසීම නිසා ඒ තුළ රුධිරය කැටි ගැසීම ඇතිවෙන්නට පුලුවන. මේ නිසා රුධිර සංසරණයේ වෙනස්කම් ඇති වී කකුලේ මැද ඇති ප්‍රධාන රුධිර නාලයේද ලේ කැටි ගැසීම් ඇතිවෙන්නට පුලුවන.  ආරය යන හේතුව හැරුණු විට කාන්තාවක් ගර්භිණී වූ විට වඩා ක්‍රියාකාරී ෙවන ඊස්ට්‍රජන් හෝර්මෝනය නිසා ශිරාවල තිබෙන මාංශ ස්ථරයේ හැකිලීම අඩුවීම හේතුවෙන් ශිරාව මහත්විම ඇතිවෙන නිසාත්, ගැබේ සිටින දරුවා උදරයේ ඇති ශිරාවලට තෙරපීම නිසා කකුලේ ශිරාවල පළල්වීමක් ඇති වී  ඒවා ගැට ගැසෙන්නට ඉඩ තිබෙනවා. නමුත් මෙය දරුවා ලැබුණු පසු තරමක් දුරට මග හැරී යන්නට හැකියි. නමුත් මේවා දිගින් දිගටම පවතින්නේ නම් ප්‍රතිකාර පැතීම අවශ්‍යය. මේ හැරෙන්නට යම් අයෙකුගේ උදරයේ ගෙඩි ඇතිවීමකදීත්  නැතිනම් උදරය ඇතුලේ ශිරාවල ලේ කැටි ගැසීමක්  ඇතිවීමේදීත්  දෙපාවල නහර ගැට ගැසීමට ඉඩ කඩ පවතියි.  මේ ලේ කැටි දියවී ගියත් එය  නහර ගැට ගැසීම නතරවීමට හේතු නොවෙන්නේ  ශිරාවල ස්වභාවිකව  පවතින කපාට මෙසේ සිරුරේ ඉහළ සිට පහළට අනවශ්‍ය  තරම් පැමිණ ශිරා විස්තාරණය කිරීමේදී ශිරාවල ඇති කපාට විනාශ වි යන නිසයි. සාමාන්‍යයෙන් වැඩි ස්ථූලතාවයක් සහිත අයට ශිරාවල ලේ කැටි ගැසීම වැඩිපුර ඇතිවන බව දකින්නට ලැබෙයි. එමෙන්ම වැඩිවේලාවක් සිටගෙන ඉන්නා ආකාරයේ රැකියාවන් කරන අයට මේ තත්ත්වයේ වැඩි බවක් දකින්නට ලැබීමත් මේ අනුව එම හේතු මේ තත්ත්වයට  යම් සබඳතාවයක් තිබිය හැකි යැයි  අනුමාන කළ හැකි වුවද එය තහවුරු කොට නැත. නහර ගැට ගැසීමේ තත්ත්වය ඇතිකරන වෙනත් සංකූලතා සම්බන්ධයෙන් පැවතිය හැකි අවදානම පිළිබඳ අප මුලින්ම සඳහන් කළ බව ඔබට මතක ඇති. දැන් අප ඒවා එකින් එක සවිස්තරාත්මකව විග්‍රහ කරමු. මෙහිදී කලාතුරකින් නමුත් දැකිය හැකි තත්ත්වයකි මේ නහර ගැට සිදුරු වී රුධිරය ගැලීම. මෙය ඉතා පීඩාකාරී ලෙස කෙනෙකුට ඇතිවීමට ඉඩ ඇති නිසා මේවා සිදුරු වී රුධිරය ගැලීමට ඇති ඉඩ කඩ අවමකර ගැනීමට මුල් අවස්ථාවේදීම ප්‍රතිකාර ලබා ගැනීම ඉතා වැදගත්ය. veines-variqueuses-douloureuses-d-araignée-varices-sur-une-jambe-sévèrement-affectée-vieillissant-la-maladie-de-vieillesse-101650943

මේ හැරෙන්නට කකුලේ පහළ කොටසේ වළලු කර ප්‍රදේශයේ සාමාන්‍යයෙන් සමේ පවතින මෘදු බව නැතිවී ගොස් තුවාල ඇතිවීමට පටන් ගැනිමත් එම තුවාල කුඩා සිරීමකින් ආරම්භ වී සුව නොවී පැවතිම තවත් එක් සංකූලතාවයක් ලෙස දැක්විය හැකිය.  මේ තුවාල සුව වෙන්නට නම් මුලින්ම ගැට ගැසී ගිය නහරවලට ප්‍රතිකාර ලබා සිටිය යුතුය. නහර ගැට ගැසීම් නැතිවන්නට ප්‍රතිකාර කළත් ඇතැම්විටක මෙසේ ඇති වූ තුවාල සුවනොවී පවතින්නටඑම තුවාලය විසින් ඇතිකරනු ලබන කැළලක් වැනි ලක්ෂණය හේතුවන්නට හැකිය. එය එසේ වෙන්නේ එම කැළල මතින් සම නැවත වර්ධනය නොවන බැවිණි. මෙසේ ඇතිවන තුවාල කකුලේ අස්ථිවලට කිට්ටුවෙන් පවතින නිසා අස්ථිවල තද බල වේදනාවක්ද මතුවන්නට ඉඩ කඩ තිබේ.  අස්ථියේ මතුපිට ස්ථරය ඉදිමීම එයට හේතුවයි. තුවාල බොහෝ කල් පවතින විට  තවත් සංකූලතාවයක් මතුවීමේ අවධානමක් තිබේ. ඒ කකුලේ ඇඟිලි සහ වළළුකර සම්බන්ධව ක්‍රියාකරන කණ්ඩරාවල හැකිලීමක් ඇතිකිරීමයි. මෙවන් තත්ත්වයක් ඇති වූ විට වළළුකර පහළට නැවීයාමක් ඇතිවන අතර එය නැවත යථා තත්ත්වයට  පත්කරවන්නට ප්‍රතිකාර කිරීම  අපහසුය. වසර දහයක් දොළහක් තරම් දිගු කාලයක් මෙම තුවාල සුව නොවී පැවතිය හොත්  එය පිළිකා බවට පත්වෙන්නට ඇති හැකියාව කිසිසේත්ම නොසලකා හැරිය හැකි තත්ත්වයක් නොවේ.  සාමාන්‍යයෙන්  නහර ගැට ගැසීම යථා තත්ත්වට පත්කිරීම සඳහා ප්‍රතිකර්ම ලෙස ශල්‍යකර්ම හා ඖෂධ එන්නත් කිරීමට වෛද්‍යවරු තීරණය කරනු ලබයි. මෙසේ ප්‍රතිකාර තීරණය කරද්දී මුලින්ම සොයා බැලෙන්නේ නහර ගැට ගැසීම  ආරම්භ වනුයේ කොතැනින්ද යන්නයි. එසේ ගැට ගැසීමට අප මුලින්ම කියූ හේතුවලින්  කුමන හේතුවක් බලපා ඇත්දැයි ඊළට සලකා බැලෙන හේතුවයි. සාමාන්‍යයෙන් නහර ගැට ගැසීම ආරම්භ වනුයේ  ඉකිළිය ප්‍රදේශයෙන් සහ දණහිස පිටුපසින්ය.

දණහිස පිටුපසින් ආරම්භ වී ඇත්නම් සහ එහි ශිරාවල ඇති කපාට විනාශ වී ඇත්නම් එය ශල්‍ය කර්මයක් කළ යුතු අවස්ථාවක් ලෙස තීරණය වෙන්නට පුලුවන්. දණහිසත් ඉකිලියත් අතර නම් ඒ සඳහාත් ශල්‍ය කර්මයක් නිර්දේශ වෙන්නට පුලුවන. දණහිස පහළින් පටන් ගෙන විශාල ප්‍රමාණයක් ගැට ගැසී තිබේ නම් එයද ශල්‍ය කර්මයක් මගින් ප්‍රතිකාර යෙදිය යුතු අවස්ථාවකි. නමුත් දණහිසට පහළින් පටන් ගෙන සාමාන්‍ය ප්‍රමාණයක් නහර ගැට ගැසී ඇත්නම් බෙහෙත් විදීම මගින් ප්‍රතිකාර කළ යුතු අවස්ථාවක් ලෙස සැලකිය හැකිය. නමුත් කකුලේ මැද ඇති ප්‍රධාන ශිරාවේ අවහිරතාවයක් පවතියි නම්  පිටින් පෙනෙන නහර ගැට ගැසීමට ප්‍රතිකාර කළ නොහැකිය. එවැනි අයෙකුට පිටත ගැට ගැසී ඇති නහර ඉවත් කර ප්‍රතිකාර කළහොත් රුධිර ගමනාගමනය අවහිරවීම හේතුවෙන් පාදය විශාල ලෙස ඉදිමිය හැකිය. මේ සඳහා ප්‍රතිකාර කිරීම වෙනුවෙන් විශේෂ ස්කෑන් පරීක්ෂණයක් සිදුකර ඒ අනුව ප්‍රතිකාර කළ යුත්තේ කෙසේදැයි තීරණය කෙරෙනු ඇත. මේ නිසා ඔබටත් මෙවන් තත්ත්වයක් ඇත්නම් වහාම ශල්‍ය වෛද්‍යවරයෙකු හෝ ශල්‍ය සායනයකට ගොස්  ප්‍රතිකාර හා උපදෙස් ලබා ගැනීමට නොපමා වෙන්න.නහරගැට ගැසීම සඳහා ශල්‍ය කර්මයකට ලක්වෙන්නෙකුට පාදයේ මැද ශිරාව හොඳින් ක්‍රියාකාරී නම් දින තුනකට පසු රෝහලෙන් පිටව යා හැකිය. ශල්‍යකර්මයට ලක් වූ දිනට පසු දින රෝගියා ඇදෙන් බස්සවනු ලබන අතර ක්‍රේප් බැන්ඩේජ් යොදා රෝගියා ඇවිද්දවීම මගින් නහර වල ලේ කැටි ඇතිවීම වැලැක්වීමට හේතු කාරණා යෙදේ.මේ ප්‍රතිකාර මගින් සියයට හැත්තෑවක් දෙනාට සුවය ලද හැකි අතර සියයට තිහක් පමණ නැවත රෝගය ඇතිවීම සඳහා අවදානමක් පවතින බව අමතක නොකළ යුතුය.

‘අයිවෝ ඩෙනිස්’ නම් වූ ඔහු

ඔහු සංගීත ක්ෂේත්‍රයේ ජ්‍යෙෂ්ඨතම ගායකයෙකු වූ අයිවෝ ඩෙනිස් නම් වෙයි. මේ වන විට පෞද්ගලික රෝහලක දැඩි සත්කාර ඒකකයේ ප්‍රතිකාර ලබමින් පසුවන අයිවෝ ඩෙනිස් මහතා වෙනුවෙන් යුතුකමක් ඉටු කරන්නට අවැසි මොහොතක් උදා වී තිබේ. මේ වෙනුවෙන් සුනිල් සාන්තයන්ගේ පුතු ලංකා සාන්ත මහතා ඇතුළු කලා ක්ෂේත්‍රයට ආදරය කරන සැබෑ කලාකරුවන් විසින් කටයුතු සම්පාදනය කරමින් පසුවන අවදියක අපි ඔහු පිළිබඳ මේ සටහන තබනුයේ අයිවෝ ඩෙනිස් නම් මේ ප්‍රතිභා පූර්ණ ගායකයා සම්බන්ධයෙන් වූ අප්‍රකට තොරතුරු රැසක් ඔහුගේ රසිකයන් වෙනුවෙන් පෙළගස්වමිනි.


 Ivo Dennis

මේ කතාන්දරය ඇරඹෙන්නේ අද ඊ‍ෙය්ක නොවේ. බොහෝ විට තමන්ගේ ගීත අනුන් විසින් ගැයීම සම්බන්ධයෙන් එතරම් කැමැත්තක් නොදක්වන ප්‍රවීණයන් අතීතයේද සිටි බව ඔබ අසා ඇති. නමුත් මේ කතාව ඇසීමෙන් පසු අතීතය හා අතීත කලාකරුවන් ගැන ඔබ සිතා සිටි බොහෝ දේවල් වෙනස් වනු ඇත. ඔබ අද වයසින් කුමන තරාතිරමක පසුවුවත්, එන්න අපි ආපසු නවසිය තිස්දෙක වසර තෙක් ආපස්සට යමු. 

දිනය, වකවානුව පිළිබඳ සැලකිලිමත් වුවහොත් එය මැයි මස විසි අට වැනිදා යෙදුණ ඉරිදා දිනය යැයි තීරණය කරමු. මේ කියන දවසේ ගුවන් විදුලියෙන් ආධුනික පැය නම් වූ වැඩසටහන ප්‍රචාරය වෙමින් පවතියි. නිවේදක ලැඩී රණසිංහ මේ අවස්ථාවේ අසන්නන් වෙත සමීප වෙමින් සිටි අතර, සුනිල් සාන්ත නම්  ඔහු ඒ වැඩසටහන කුමක්දැයි නොසොයා අහඹු ලෙස ගුවන් විදුලිය ශ්‍රවණය කරමින් සිටියි. ස්ථානය  අපේ සංගීත ක්ෂේත්‍රයේ ප්‍රවීණතමයෙකු වූ සුනිල් සාන්තයන්ගේ නිවසයි. 
ජා ඇල දෙහියාගාත පිහිටි සුනිල් සාන්තයන්ගේ නිවසේ ගුවන් විදුලි යන්ත්‍රයෙන් ඔහු ගැයූ, 'වරෙන් හීන් සැරේ' ගීය ප්‍රචාරය වෙමින් පැවතිණි. 
 හදිසියේම ගීය අතරමැදි කොටසකදී ඒ  ගැයුමෙහි යම් දොසක්  ඇසුණෙන් සුනිල් සාන්තයන් විපිළිසරවෙයි. එසේ වන්නට ඉඩක් වූයේ කෙසේද? සුනිල් සාන්තයන් ගැයූ ඒ ගීයේ කිසිදු අඩුවක් නොවූ බව හොඳින්ම දන්නා නමුත් ගුවන් විදුලියේ ප්‍රචාරය වූ තම හඬින්ම ගැයූ මේ ගීයේ  එවැනි අඩුවක් ඇසෙන්නේ කෙසේද? වාදනය වූ ගීතය අවසන් වූ අතර, නිවේදන ලැඩී රණසිංහ  එම ගීතය සීදුවේ අයිවෝ ඩෙනිස් නම් ආධුනිකයා විසින් ආධුනික පැය වැඩසටහන වෙනුවෙන් ගායනා කළ බව  පැවසීමෙන් සුනිල් සාන්තයන්ගේ විපිළිසර බවට පිළිතුර ලැබිණි.

සුනිල් සාන්තයන් ඒ කාර්යය එතැනින් අත්හැර දැමුවා යැයි  ඔබ සිතනවාද? නැත සියල්ල ඇරඹෙන්නේ එතැනිණි. 
 සුනිල් සාන්තයන් ඉතාම තුටු පහටු වූයේය. තමන්ටද හඳුනාගත නොහැකි තරමට තම හඬට සමාන හඬක් දරන මේ ආධුනිකයා පිළිබඳ තතු සොයන්නට සුනිල් සාන්තයන් පවරනුයේ තම සංගීත පංතියේ සිටින තවත් දක්ෂතම සිසුවෙකු වූ පැට්‍රික් දෙනිපිටියටය.  පැට්‍රික් විසින් සොයා දුන් තොරතුරු අනුව සුනිල් සාන්තයන් අයිවෝ ඩෙනිස් තරුණයාගේ නිවෙස සොයා ඔහුට තමන් හමුවන්නට පැමිණෙන ලෙස පණිවුඩයක් තැබුවේය.
සීදුව සාන්ත මරියා දෙව් මැදුරේ කන්තාරු මාස්ටර් හෙවත් ගායනා කණ්ඩායම මෙහෙය වූ ගුරුවරයා වූ දොන් ප්‍රැන්සිස් ඇලෝසියස් මහතා තමන්ගේ පුතු වූ අයිවෝ, මේ සිංදු කෙරුවාවෙන් අයහපතක් කර ගනී යැයි සිතා බියට පත්ව සුනිල් සාන්තයන්ගේ ඉල්ලීමට අනුබල නොදුන් නමුත් විතාරණගේ මරියා රොද්‍රිගු නම් වූ මවගේ අනුබලය මත සුනිල් සාන්තයන් වෙත යොමු විය. %රේඛාව^ චිත්‍රපටයේ  %අනුරාපුර පොළොන්නරුව සීගිරි මන බන්ධනීය^ යන සුනිල් සාන්තයන් විසින් සංගීතවත් කළ විරිදුව ගයමින් චිත්‍රපට පසුබිම් ගායනයට පිවිසි අයිවෝ ඩෙනිස් සුනිල් සාන්තයන් වෙනුවට ඉන්දියාවට ගොස් %රේඛාවේ^ සෙසු ගීත ගැයූ සිසිර සේනාරත්න, ඉන්ද්‍රානී විජය බණ්ඩාර, තිලකසිරි ප්‍රනාන්දු යන අයට ගී ගැයීම් පුහුණු කිරීමද සිදුකළේය. %රේඛාව^ චිත්‍රපටය තිරයේ දිගහැරෙන්නේද අයිවෝ ඩෙනිස්ගේ ගායනයෙන් බව ඔබට මතකද?

02

එපමණක් නොවේ සුනිල් සාන්තයන් විසින් තනු නිර්මාණය කළ ආර්. මුත්තුසාමි මහතා විසින්  සංගීතවත්  කළ 'සංදේශය' චිත්‍රපටයේ ගී පටිගත කිරීම් සඳහාද සුනිල් සාන්තයන් වෙනුවට කටයුතු කරන්නට තෝරා ගැනු‍ෙණ් අයිවෝ ඩෙනිස් නම් මේ කලාකරුවාය. එහිදී ලතා – ධර්මදාස වල්පොල යුවළට මෙන්ම එච්.ආර්. ජෝතිපාල, සිඩ්නි ආටිගල, මොහිදීන් බෙග් වැනි ශිල්පීන්ට ගායනා පුහුණු කරවන්නටද වූයේ ඔහුයි.

මේ අයුරින් සුනිල් සාන්තයන්ගේ මග ගිය අයිවෝ ඩෙනිස් නම් ඔහු සිය ප්‍රථම ගුවන් විදුලි ගායනයට එළඹෙන්නේ 1959 වසරේදීය. ඒ තිලක සුධර්මන් ද සිල්වා විසින් පබැඳු %කුරුළු පරාදීසයේ^ නම් ගීතය ගයමිනි.  ඔහුගේ දෙවැනි ගුවන් විදුලි ගීතය වනුයේ එච්.එම් කුඩලිගම කිවිඳුවිසින් පබැඳු %කේතකී පාටලී ගස් නටවා^ යනුවෙන් ගැයෙන ගංගා ගීතය වන අතර, මේ ගීත දෙකෙහිම තනු නිර්මාණය සුනිල් සාන්තයන්ගේ බවද සඳහන් කළ යුතුය. එම වසරේදීම රජයේ ගුරු සංගීත විභාගයෙන්  සමත්ව ගුරුපත්වීම් ලබන අයිවෝ ඩෙනිස් නම් ගායකයා 1974 රජයේ සංගීත විද්‍යාලයේ  ජන සංගීතය පිළිබඳ සංගීත ගුරු උපදේශක පත්වීම් ලබාගන්නා අතර, 1995 වසරේ රජයේ සංගීත ගුරු සේවයෙන් විශ්‍රාම ලබයි.  ඔහු සංගීත ලෝකයට දායාද කළ සිසු පරපුර වනුයේ එඩ්වඩ් ජයකොඩි, මාලනී බුලත්සිංහල, රෝහණ වීරසිංහ,  කෝලිත භානු දිසානායක සහ බන්දුල විජේවීරයන් ලෙස ජනප්‍රියත්වයට පත් ශිල්පීන්ය.

එහෙත් අප තවමත් කතාකරනුයේ ඔහුගේ සංගීත ජීවිතය පිළිඳවයි. නමුත් අයිවෝ ඩෙනිස් යනු ප්‍රතිභාපූර්ණ නළු‍ෙවකු බවත් සඳහන් කළ යුතුමය.  එමෙන්ම ඔහු රංගනයට පිවිසෙන්නේත් ජේසු ක්‍රිස්තුස් වහන්සේගේ චරිතය රඟපාමින් වීම විශේෂත්වයකි. ඒ රසාංජලී කලායතනය නිර්මාණය කළ , %එසේය අපි ඔහු මැරුවෙමු^ යන නාට්‍ය තුළිනි.  මකුලොළුව මහතාගේ 'දෙපානෝ' නාටකයේ ගායනය කරමින් ඔහු ප්‍රධාන චරිතයක් රඟපෑ අතර, සතිස්චන්ද්‍ර එදිරිසිංහයන්ගේ %තහංචි^ නාට්‍යයේ ප්‍රධාන චරිතය රඟපෑවේය.  'මහවැලි ගීතය' ගීත නාටකයේ මූලික හඬ වූයේද අයිවෝගේ හඬයි. සුනිල් සාන්තයන් විසින් ගුවන් විදුලියේ රිජ්වේ තිලකරත්න යුගයේදී 'මධුර මධු', 'රන් වළාව', 'සීගිරි ගී', 'පංච මධුර' ආදී වශයෙන් ගුවන් විදුලියට කළ සියලුම සංගීත වැඩසටහන්වලදී තම සහයට අයිවෝ ඩෙනිස් නම් වූ ඔහු කැඳවා ගත්තේය .
පණ්ඩිත් ආචාර්ය අමරදේවයන් රස මියුරු සහ විජය ගීතය නමින් කළ සංගීතාත්මක වැඩසටහන්වලද අයිවෝ ඩෙනිස්  ගායකයෙකු ලෙස එක් කරගෙන තිබිණි.  

රවීන්ද්‍රනාත් තාගෝර් තුමාණන්ගේ ගීතයක් වූ ප්‍රේමදාස අලවත්තයන් විසින් සිංහලට නගන ලද ටී.එම් ජයරත්නයන් විසින් ගයන %අඳුරු කුටිය^ තුළ ගීතය  සඳහා ටී.එම් ජයරත්න හඬ හා මුසු කරන්නට ප්‍රේමසිරි කේමදාසයන් විසින් යොදාගත් හඬ වූයේද අයිවෝගේ හඬයි.
 අරිසෙන් අහුබුදු සූරීන් විසින් පබැඳු %එම්බා ගංගා^, %දකුණ නැගෙනහිර^  ගීතයන් ගැයුම සඳහාද සුනිල් සාන්තයන් විසින් තම අතිජාත ගෝලයා වූ අයිවෝ ඩෙනිස් එක්කොට ගෙන තිබේ.

කිතු දන පුබුදුව වෙනුවෙන් ගී තුන්සියයකට ආසන්න තනු නිර්මාණ සකසා ඇති ඔහු  කේමදාසයන්ගේ 'මාගේ කාලේ මවුනි', 'මානස විල', 'පිරිනිවන් මංගල්‍යය' ආදී ඔපෙරා නිර්මාණයන් සඳහාද රජ වැඩ  ශ්‍රවණපටය සඳහාද  ගායනයෙන් දායක වුණි.  

1985 වසර ඔහුගේ කලා දිවියේ සුවිශේෂී සන්ධිස්ථානයක් විය. ඒ ‍ප්‍රේමසිරි කේමදාසයන්ගේ තනුවෙන් හා සංගීතයෙන් යුතුව ඔහු 'හිමකතර' චිත්‍රපටයට ගායනා කළ  'කන්ද එහා වැස්ස වහිනවා'  තේමා ගීතය වසරේ  හොඳම ගායනය වශයෙන් ජනාධිපති සම්මාන ලැබීමය.
'සුමියුරු' නමින් ඒකපුද්ගල සංගීත ප්‍රසංග දෙකක් පවත්වා ඇති නමුත් අයිවෝ ඩෙනිස් මහතා විසින්  තමන් සඳහා ශ්‍රවණ පටයක් හෝ  සංයුක්ත තැටියක් නිර්මාණය කර නොමැති වීමද විශේෂත්වයකි. 
අයිවෝ ඩෙනිස් නම් වූ මේ ජ්‍යෙෂ්ඨයා  1986 නවසීලන්තයේ පැවති  ජගත් ගීත ගායනා තරගයට චන්ද්‍ර කීර්ති කුලරත්නයන් විසින්  පබැඳු  'ඒ තමයි අපේ ආදරේ^ ගීතය වෙනුවෙන් 
ශ්‍රී ලංකාවෙන් ප්‍රථම ස්ථානය දිනාගැනීමෙන්  ජාත්‍යන්තර තරගයක් සඳහා අප රට නියෝජනය කළේය.

අයිවෝ ඩෙනිස් නම් වූ ඔහු කවරෙක්ද? අපේ සංගීත ක්ෂේත්‍රයට කර ඇති සේවාව කුමක්ද? යන්න මෙවන් කුඩා සටහනක් තුළින් ඇගයිය නොහැකි බව සැබෑය.  ඔහු අපේ සංගීත ක්ෂේත්‍රයට කොතරම් සේවයක් ඉටුකොට ඇත්තේද යන්න මත නොව ඔහු කොතරම් අගනා කලාකරුවෙක්ද යන තැන සිට අප අයිවෝ ඩෙනිස් නම් වූ ඔහු සුවපත්කර ගැනීම වෙනුවෙන් අපට දිය හැකි අත හිත ලබාදෙන්නට කටයුතු කළ යුතුය. එබැවින් සැමටම මේ සිහිපත් කිරීම කරනුයේ යුතුකමක් වශයෙන් පමණක් නොව වගකීමක් ලෙසද සලකමිනි. (P.D.H.T.P පැස්කුවල් නම්වූ ඔහුගේ පුතු නමින් ලංකා බැංකුව සීදූව ශාඛාවේ අංක 81780094 දරණ ගිණුමට ඔබේ මනුස්සකමේ අතහිත යෙදිය හැකිය.)

විලවුන් උපකරණ හා ඖෂධ නියාමනය දැන් නැවතත් බලාත්මකයි

අපේ රටේ අලෙවි වෙන විලවුන් සහ ආලේපන සම්බන්ධයෙන් වගකිවයුතු සහතිකයක් නැතිනම් අලෙවිය සඳහා අවසරයක් පවතිනවාද නැද්ද යන්න දැනගැනීමට  පාරිභෝගිකයාට ක්‍රමයක් තිබෙනවාද? යන්න පිළිබඳ ඔබටත් යම් උනන්දුවක් පවතිනවා ඇති. නමුත් කලකට ඉහත ඖෂධ සහ විලවුන් උපකරණ පිළිබඳ පාලනාධිකාරිය විසින් රටතොට විසිර පවතින මෙවන් අනවසර විලවුන්, ආලේපන හා උපකරණ මෙන්ම ඖෂධ සොයා වැටලීම් සිදුකළද, මීට දෙවසරකට ප්‍රථම එය ඖෂධ හා විලවුන් උපකරණ අධිකාරියේ පාලනයෙන් ඉවත් කිරීම නිසා වසර දෙකකට පමණ ආසන්න කාලයක් මෙවැනි වැටලීම් සිදුකළ බවක් වාර්තා වන්නේ නැහැ. නමුත් සෞඛ්‍ය අමාත්‍යවරයාගේ මැදිහත් වීම මත නැවතත් එම කාර්යය සඳහා ජාතික ඖෂධ නියාමන අධිකාරියට කැබිනට් පත්‍රිකාවක් හරහා බලය පවරා ඇති අතර, දැන් නැවතත් මෙරටට පැමිණෙන ආනයනික හා මෙරට නිෂ්පාදිත ආලේප සහ විලවුන් ආදිය එසේ පරීක්ෂාවට ලක්කර අනුමැතිය ලැබීමෙන් තොරව වෙළෙඳ පොළ වෙත නිකුත් කිරීමේ තහනම බලාත්මක වෙන්නට පටන් ගෙන තිබෙනවා. අප මේ සම්බන්ධයෙන් ජාතික ඖෂධ නියාමන අධිකාරියේ අධ්‍යක්ෂ ජනරාල් – ප්‍රධාන විධායක නිලධාරි වෛද්‍ය කමල් ජයසිංහ මහතා සමග සංවාදයක යෙදෙන්නට අදහස් කළා. ඔබගේ අයිතිවාසිකම් සම්බන්ධයෙන් ඔබට පවතින ගැටලු සමහරක් පිළිබඳ ඔහු 'අද' පුවත්පතට සිදු කළ අදහස් පෙළගැස්මකි මේ.


IMG_2059

Q විලවුන් උපකරණ හා ඖෂධ පාලන අධිකාරියට නියාමන කටයුතු සඳහා බලය පැවරෙමින් ක්‍රියාත්මක වූ 1980 අංක 27 දරණ පනත 5015දී බලරහිත වුණා. එයින් පසු වෙළඳ පොළ තුළ අලෙවි වූ විලවුන් සහ විලවුන් උපකරණවල තත්ත්වය නියාමනය කළේ කුමන ආයතනයක්  විසින්ද

2015දී අලුත් ඖෂධ පනත ක්‍රියාත්මක වෙන්න පටන්ගත්තාට පසු එතෙක් පැවැති 1980 පරණ පනතින් අපේ අධිකාරියට පනවා තිබූ විලවුන් උපකරණ සම්බන්ධ  නියාමනය අපෙන් ඉවත්කර තිබුණා. ඒ අනුව අපි ජාතික ඖෂධ නියාමන අධිකාරිය යනුවෙන් නව ආයතනයක් ලෙස බිහිවුණා. නමුත් පරණ පනත සම්පූර්ණයෙන්ම බලරහිත වූ නිසා අපට ඒ සම්බන්ධයෙන් ක්‍රියා කරන්න ක්‍රමයක් තිබුණේ නැහැ. ඒ කාලයේ, ඒ කියන්නෙ වසර දෙකක පමණ කාලයක් මේ නිසා වෙළෙඳ පොළේ අනුමත නැති විලවුන් හා උපකරණ සංසරණය වීම ඇරඹුණා. නමුත් මේ ගැන වහා ක්‍රියාත්මක වුණු සෞඛ්‍ය අමාත්‍යවරයා කැබිනට් පත්‍රිකාවක් සකසමින් ඊට පාර්ලිමේන්තුවේ අනුමැතිය ලබාගනිමින් 1980 පනතේ  විලවුන් හා විලවුන් උපකරණ සම්බන්ධයෙන් තිබූ බලතල නැවත මෙම අධිකාරියට පැවරුවා. ඒ පසුගිය වසරේ ඔක්තෝබර් මාසෙ 27 වැනිදා. එතැන් සිට දැන් නැවතත් ඒ කටයුතු වඩාත් කාර්යක්ෂ්මව සිදු කෙරෙමින් පවතිනවා. දන්නා තරමින් විලවුන් උපකරණ සම්බන්ධ වසර දෙකක පමණ කාලයක් රජයේ මැදිහත්වීමක් සහිත නියාමනයක් සිදුවුණේ නැහැ. නමුත් සුපුරුදු පරිදි පාරිභෝගික සේවා අධිකාරියෙන් වෙළෙඳ පොළ තත්ත්වය සම්බන්ධ යම් යම් කටයුතු සිදුවෙන්න ඇති. නමුත් රජයේ අවසරයක් ලබා අලෙවි කටයුතු සිදු කළයුතු අන්දමේ බලපෑමක් තිබුණේ නැහැ.
?මේ වනවිටත් අනවසර විලවුන් සහ විලවුන් උපකරණ රට තුළ සංසරණය වීම සහ ගෙන්වීම සිදු කෙරෙනවා. මොන ආකාරයෙන්ද දැන් මේවා නියාමනය සඳහා ඔබ ආයතනය ක්‍රියාත්මක වෙන්නේ
මේ වනවිට අවසර ලබා අලෙවි කළ ආලේපන සහ විලවුන්වල අවසර පත් බොහෝමයක්ද කල් ඉකුත් වී තිබෙනවා. ඒවා නැවත හය මසකින් කාලය දීර්ඝ කිරීම සිදු කරන්නට තීරණය කළේ ඒවා ඉහතදී අවසර ලබාගැනීමේ ක්‍රමවේදය අනුව අවසර ලබා තිබූ ඒවා නිසයි. නමුත් දැන් යම් ආලේපන රේගුවෙන් නිදහස් කරන්නට පළමු අපි ඔවුන්ට අපෙන් අනුමැතිය ලබාගත යුතු බව දන්වා තිබෙනවා. රේගුවෙන් නිදහස් කර අපේ අධීක්ෂණය යටතේ ඔවුන් අවසර ගන්නාතුරු ඔවුන්ගේ පරිශ්‍ර තුළ නිසි අයුරින් ඒවා තබාගන්න අපි අවසර දුන්නත් වෙළෙඳ පොළට නිකුත් කරන්නට නම් අනිවාර්යයෙන් අපේ අවසර  පත අවශ්‍යමයි.

ඒ සඳහා පවතින ක්‍රමවේදය ගැන සඳහන් කළොත් 

මේ ගෙන්වා ඇති දේ මොන තරම් උසස් මට්ටමක පවතිනවා යැයි කීවත් ඒවා වරලත් ආයතනයකට සාම්පල් ලබා දී, සිරුරට අහිතකර කිසිවක් නොමැති බව තහවුරු කර ලබාගත්  වාර්තාවක් සමග ලියාපදිංචිය සඳහා අපට අයදුම් කළ යුතුයි. අයි.ටී.අයි. වැනි රාජ්‍ය සහ බියුරෝ වෙරිටාස් වැනි පෞද්ගලික හොඳම මටිටමේ පිළිගත් පරීක්ෂණාගාරයක වාර්තාවක් තමයි අපි සලකා බලන්නේ. අනිවාර්යයෙන්ම ඇක්රෙඩිටඩ් ලැබ් එකක වාර්තාවක් තිබුණත්, අපේ ඒ සඳහා පනවා ඇති විශේෂඥවරුන්ගෙන් සමන්විත කමිටුවේ පොදු අනුමැතිය ලැබිය යුතුමයි.

මෙවැනි වාර්තා මුදල්වලට ලබාගන්න පුළුවන්කමක් තිබිය හැකියි නේද?  එවිට කොහොමද එය එසේ නොවේ යැයි තහවුරු කරන්නේ

මා දන්නා තරමින් වගකිවයුතු පරීක්ෂණාගාරයක් එවැනි හොර පරීක්ෂණ වාර්තා නිකුත් කරන්නේ නැහැ.  ඒ ගැන තවමත් අපට විශ්වාසය තැබිය හැකියි. කෙසේ නමුත් මේවා සමග එක එල්ලේ සම්බන්ධයක් ඇති නිසා තමයි අපි චර්ම විශේෂඥයන්ගෙන් සැදුම්ලත් කමිටුවක් හරහා අනුමැතිය ලබාදෙන්නේ. මෙය තනි පුද්ගලයෙකුගේ මතය අනුව සිදුවෙන්නක් නෙවෙයි, පිරිසක් එක්ව ගන්නා තීරණයක්. ඒ නිසා මුදල් මත ඒ අනුමැතිය දිනාගැනීම ගැන කිසිවෙක් සැක කරනවා නම් එහි පදනමක් නැහැ. මුළුමනින්ම එය විය නොහැකි දෙයක්.

ග්ලූටතයොන් යන නමින් හඳුන්වන පිළිකා සඳහා යොදන කීමෝ තෙරපිවලට ඇතිවෙන අතුරු ආබාධ වෙනුවෙන් පමණක් කෙටිකාලීනව නිර්දේශ කරන රසායනික සංයෝගය , එන්නත් වශයෙන් හෝ කැප්සියුල වශයෙන්, ආලේපන වශයෙන් විකිණීම ලංකාවේ අවසරය ලබා සිදු කරන දෙයක්ද? මෙය ඖෂධයක් විදිහට අනුමතද

කොහෙත්ම නැහැ. මෙය ගෙන්වීමට හෝ විකිණීමට කිසිවෙකුට අවසර ලබා දී නැහැ.
ශ්‍රී ලංකාව තුළ මේ ඖෂධය යොදාගැනීමට බලය පවරලත් නැහැ.

නමුත් අන්තර්ජාලය තුළ විශේෂයෙන් දැන්වීම් පළ කරමින් මේ දැනුත් ග්ලුටතියොන් විකුණන ආයතන සහ පුද්ගලයන් සිටිනවා. අනුමත නැති ඖෂධයක් හෝ කිසියම් සංයෝගයක් එසේ ප්‍රසිද්ධියේ විකුණන්නට දැන්වීම් පළ කරද්දි ඖෂධ නියාමන අධිකාරිය නිහඬ ඇයි? මේ වෙනුවෙන් මෙතෙක් කිසිම ක්‍රියාමාර්ගයක් ගෙන නැහැ. ඒ සම්බන්ධයෙන් ඔබ මොකද කියන්නේ.

ඒ සම්බන්ධයෙන් ඉදිරියේදී ගත හැකි ඉතාම දැඩි පියවර සම්බන්ධයෙන් අපි මේ වනවිටත් සැලසුම් ක්‍රියාත්මක කරමින් ඉන්නේ. අපි නිහඬ නැහැ. අපට මේ සඳහා අවශ්‍ය බලතල ලැබුණේ මාස දෙකකට උඩදියි. ඒ නිසා අන්තර්ජාලය හරහා රටට අලෙවි කරන මෙවැනි දේවල් සම්බන්ධයෙන් අධ්‍යයනය කරමින් වහා යෙදිය හැකි පියවර සම්බන්ධව අපි කඩිනම් තීරණ ගැනීමට කටයුතු යොදා තිබෙනවා.  අපි මේ සඳහා නව වෙබ් අඩවියක් සකසමින් සිටිනවා. ඒ  අනුව අනුමත ඖෂධවල සිට අනුමත නැති ඒවා මොනවාද යන්න පාරිභෝගිකයාටම බලාගත හැකියි. ඒ වගේමයි විලවුන් හා විලවුන් උපකරණ සම්බන්ධයෙනුත් කටයුතු කරන්නේ. ඒ නිසා මේ ගැන අපි නිහඬයි යන්න සිතීම පදනම් විරහිතයි.

දේශීය වශයෙන් නිපදවෙන එවන් ආලේපන සහ ඔසු සම්බන්ධයෙන් අධිකාරියේ මැදිහත් වීම කොහොමද

ලාංකික නිෂ්පාදකයෙක් අපට ඒ සම්බන්ධ දැනුම්වත් කිරීමක් කළොත් අපි වහාම ඉදිරිපත් වෙලා අවශ්‍ය උපදෙස් ආදියත් ලබා දීලා ඒ නිෂ්පාදනාගාරයට ගිහින් අදාළ කටයුතු සොයා බලා නියම ප්‍රමිතියකට අනුව සිදුවනවාද යන්න තහවුරු කර සියල්ලම හොඳම තත්ත්වයේ පවතිනවා නම් කඩිනමින් අවසරය ලබාදෙනවා. ඒ දේශීය කර්මාන්තයක් නගාසිටුවන්නට අතදීමකුත් විදිහට. නමුත් එය නිසි ප්‍රමිතියකට නැතිනම් අපි ඒවා ප්‍රමිතියකට පත් කරගන්නට අවශ්‍ය මගපෙන්වීම ලබා දී එයට ආධාරයක් වෙනවා මිස ඒවා කඩාකප්පල් කරවන්නේ නැහැ. කෙසේ නමුත් මේ නිෂ්පාදන අප යොදන්නේ මිනිස් සිරුරුවලට නිසා ඉතාම ප්‍රවේශම් වීමට තමයි මේ නීති සියල්ල අකුරට ක්‍රියාත්මක කරන්නේ.

බොහෝ විට ආලේපන සම්බන්ධයෙන් අනතුරු ඇඟවෙන්නේ සම පැහැපත් කිරීමට නිපදවා ඇති ආලේපනයන් සම්බන්ධවයි. ඒවායේ ස්ටීරොයිඩ ගණයේ සංයෝග සහ රසදිය මට්ටම, විරංජක (බ්ලීචිං) ගැන සුවිශාල අනතුරු ඇඟවීමක් තිබෙනවා.  විශේෂයෙන් මර්කරි යනුවෙන් හඳුන්වන ලබන රසදිය සම්බන්ධව. නමුත් ස්ටීරොයිඩ සම්බන්ධව වැඩි කතාබහක් නැහැ. අනුමත රසදිය මට්ටම සම්බන්ධ අගයක් දැක්විය හැකිද

ඔව්, මර්කරි ලෙවල් එක තිබෙන්නට හැකි උපරිම සීමාව දසලක්ෂයකට කොටස් එකයි. ප්‍රශ්නය තිබෙන්නේ මෙහි සීමාව ඉක්මවා පැවතීමයි. බොහෝ දෙනෙක් මේ ස්ටීරොයිඩ ගණයේ සංයෝග ඇතුළත් ආලේපන භාවිත කරලා දවසෙන් දෙකෙන් සුදු වෙනවා. නමුත් මෙවැනි ගණයේ සංයෝග සමට ඉතාම අහිතකර බව චර්ම රෝග පිළිබඳ විශේෂඥ වෛද්‍යවරුන් පවසනවා. මේ නිසා සම විනාශ වී විකෘතිතා පවා ඇති වෙනවා. නමුත් එවිට ප්‍රමාද වැඩියි. යුරෝපීයයන් නොවන අපේ සමේ වර්ණක මෙලනින් මත තීරණය වෙන්නක්. එය මතුපිටින් සම බ්ලීච් කර ලබාගන්නට බැහැ. ඇත්තෙන්ම මෙතනදි ඒවා භාවිත කරන්නන් සිතිය යුතු යමක් තිබෙනවා. සුදු වෙන්න අවශ්‍ය ඇයිද යන්නයි. එය සිරුරේ ක්‍රියාකාරීත්වයට සම්බන්ධ දෙයක් නෙවෙයිනේ. ඒ නිසා සම දුඹුරු පැහැ වීමෙන් පුද්ගලයෙකුට කිසිම කරදරයක් ඇති වෙන්නෙත් නැහැනේ. එහෙම නම් තමන්ට සුදු පාට වෙන්න ඕන ඇයි? විරුද්ධ පාර්ශ්වයේ අය කැමති පාට සුදු කියලා ඒ අය තීරණය කරන්නේ කොහොමද? වහාම සමාජීය වශයෙන් මේ ගැන ආකල්පමය වෙනසක් ඇති විය යුතුයි.

ආලේපන පමණක් නෙවෙයි. ෆුඩ් සප්ලිමන්ට් ලේබලය යටතේත් බොහෝ දෑ වෙළෙඳ පොළට එනවා. සමහර දේවල් විවිධ රෝග සුව වන බවට දැන්වීම් පළකරමින් තමයි පාරිභෝගිකයා රවටන්නේ. මේ සම්බන්ධව ඔබේ ආයතනයට ක්‍රියාත්මක විය හැකි සීමාව මොකක්ද

 එවැනි දෙයක් කරන්න අවසර ඇත්තේ කිසියම් පිළිගත් පර්යේෂණයක් හරහා කුමන හෝ රෝගයකට එය භාවිතයෙන් සහනයක් හෝ සුවයක් ලැබෙනවා යැයි තහවුරු කළ සහතිකයක් අපට ඉදිරිපත් කර අපේ අවසරයක් ලැබූ නිෂ්පාදනයකට නම් පමණයි. ඒ හැරෙන්නට එවැනි දෑ සඳහා කිසිම මාධ්‍යයක දැන්වීමක් පළ කරන්නවත් බෑ. එය නීතිවිරෝධියි.  මේ වනවිට අපි නව නීති සම්පාදනය කරමින් සිටිනවා. අපේ අනුමැතිය සහිත සහතිකයක් නොමැතිව කිසියම් ඖෂධ හෝ විලවුන් හා විලවුන් උපකරණ සම්බන්ධ දැන්වීමක් පළ කිරීමත් මාධ්‍ය ආයතනවලට තහනම්. අපේ අනුමැතිය නැති එවැන්නක් මාධ්‍යයක් විසින් ප්‍රචාරය කළහොත් එම ආයතනයද ඊට වගකිවයුතු අයෙකු බවට පත්වෙනවා. ඉදිරියේදී දැනට අප රටේ පවතින තත්ත්වය පාලනය කිරීමට එවන් දැඩි නීති යොදාගන්නට සිදුවෙනවා. ආහාර සංයෝගයක් යැයි කියමින් හෝ කිසිවෙකු දැන්වීම් ලෙස පළ කරවා ප්‍රචාරයක් දෙනවා නම් එය සෞඛ්‍ය අමාත්‍යාංශයේ ආහාර පාලන ඒකකය මගින් හෝ අප ආයතනය මගින්  අනුමැතිය ලබා සිටිය යුතුමයි.

අප රටේත් මේ වනවිට ඖෂධ නිෂ්පාදනය කරනවා. ඒ වගේම තවම අපේ රටේ මව් භාෂාව ලෙස පවතින්නේ සිංහල. නමුත් එසේ නිෂ්පාදනය කරන ඖෂධවල විස්තර පත්‍රිකා තවම ඇතුළත් වෙන්නේ ඉංග්‍රීසි බසින්. මුළු රටේම ඉංග්‍රීසි බාෂාව දන්නා අය නැති බව දැන දැනත් මෙවැනි තැනක පසුවන්නේ ඖෂධ පරිහරණය කිරීමේ අයිතිය ඉංග්‍රීසි නොදත් අයට අහිමි බව දැනුම් දීමටද? නැතිනම් ඉංග්‍රීසි නොදන්නා අයෙකු ලෙඩ වූවොත් ඖෂධ පරිහරණය කරන්නට බැරි යැයි පවසන්නටද

මේ විස්තර පත්‍රිකාවල අඩංගු විස්තර ඇත්තෙන්ම පරිභෝජනය කරන්නා වෙනුවෙන් නෙවෙයි ඇතුළත් කර ඇත්තේ, වෛද්‍යවරයාට හා ඖෂධවේදියාගේ පරිහරණය පිණිසයි. නමුත් ඔය කියන කාරණය සම්බන්ධයෙන් මේ වනවිට අපේ අවධානය යොමු වී තිබෙනවා. දැනටමත් අපි විස්තර පත්‍රිකාවේ සිංහල සහ දෙමළ යන භාෂා දෙකෙනුත් විස්තර ඇතුළත් විය යුතු යැයි තීරණය කර ක්‍රියා කරන ඖෂධ දහයක් හඳුනාගෙන තිබෙනවා. 
ත්‍රෛභාෂා පනත යටතේ අපි මේ තීරණය ගත්තේ.  විශේෂයෙන් බොහෝ ඖෂධ තෝරාගැනීමේදී සමහරුන් විසින් ඇසුරුම ගැටලුවක් කරගෙන තිබෙනවා.  ආකල්පමය වශයෙන් අපි බොහෝ දුරට වෙනස් විය යුතුයි. එසේ නොමැතිව අපට ඖෂධ, විලවුන් සහ විලවුන් උපකරණ පරිහරණය කරන්නන් වෙනුවෙන් අපි සැලසුම් කර ඇති සාධනීයම පිළිවෙත් වෙත යොමු වෙන්න අමාරු වෙයි.
සමහරු රෝහල්වලට පැමිණ නිදහස් සෞඛ්‍ය සේවය යටතේ නිකුත් කළ ඖෂධ විසිකර දමා ගිහින් ඔසුසල්වලින් ඇසුරුම සහිතව එම ඖෂධයම මිලට ගන්නවා. නමුත් ඒ ඔවුන් මිලදී ලබාගන්නා ඖෂධයේත්, නොමිලයේ ලැබුණු ඖෂධයේත් ඖෂධීය ගුණ එක සමානයි. එතැන ගැටලුව වුණේ ඇසුරුම නැතිනම් පොත්ත. 
පෙත්ත එකම නම් පොත්ත ගැන හිතන්න එපා කියලා අපි කලකට ඉහත සිටම ජනතාව දැනුම්වත් කළාට ඒක තවමත් හරිහැටි ජනගත නොවීම නිසා පැන නැගුනු ගැටලු තවමත් පවතිනවා.
සියල්ලන්ටම පළමුව අපි ඔවුන්ට තමන් භාවිත කළ යුත්තේ කුමක්ද යන්න තෝරාගැනීමේ නිදහස ලබාදෙන්නට, ඔවුන්ගේ පරිහරණයට එක්වන දේ හැම අතින්ම ආරක්ෂිත බව තහවුරු කරන්නට වුවමනායි. ඒ සඳහා තමයි මේ සූදානම.

‘හම්බකරපුවා කෝ’ අහන්න එපා මට අංගරචනයට මෙතෙක් ගෙවා ඇති වැඩිම මුදල අටදාහයි

සැනට් දික්කුඹුර කියන්නේ හොඳ නළුවෙක් විතරක් නෙවෙයි හොඳ අංග රචනා ශිල්පියෙක්. සැනට් කීවාට වඩා බොහෝ දෙනා ඔහු හඳුනන්නේ පෝලෝ සීයා කීවාමයි. සැනට් ජීවත් වෙන දෙහිවල නිවසට ඔහු සොයා ගිය ගමනක මතක සටහන් පෙළගැස්මකි මේ.

මම මේ ඉන්න නිවස කලකට ඉස්සර තට්ටු දෙකේ ගෙයක්.  මගේ තාත්තා මාතර කෙනෙක්. කොළඹට ඇවිත් තාත්තා පින්තූර රාමු කිරීම වගේ පොඩි පොඩි වැඩ කරමින් තමයි ජීවත්වෙලා තියෙන්නේ. පොල්හේන ඉස්කෝලෙන් හතේ පන්තියට විතරක් ඉගෙන ගත්ත තාත්තා DSC_0873ගොඩාක් දුප්පත් පවුලක කෙනෙක්. සීයා වඩු කාර්මිකයෙක්. ඉතිං ඉස්කෝලෙ අත ඇරලා කොළඹ ආපු තාත්තා මේසන් වැඩ තමයි කරලා තියෙන්නේ. තාත්තා පොල් කඩේක වැඩ කරන අතර තමයි මේ වැඩ කරලා තියෙන්නේ. තාත්තාට උපකාර කළ මුදලාලිටත් අත්උදව් දීගෙන පිංතූර රාමු කඩයකුයි, ශ්‍රී ලංකා හෝටලය කියලා හෝටලයකුයි කරගෙන තාත්තා ජීවත්වෙන්න පටන් අරන් තියෙනවා. තාත්තා උත්සහවන්තයෙක් බව දැකපු පොල් කඩේ මුදලාලිත් එයාගෙ දුවක් කසාද බන්දලා දීලා තාත්තව පවුලේම කෙනෙක් කරගැනීමෙන් පස්සේ තාත්තා කොළඹම කෙනෙක් වුණා. තාත්තා කුලී ගෙවල්වල ඉන්නකොට තමයි ඇස් ද ඇස් ජයසිංහ මහත්තයා මේ ගෙවල් ලබාදීම ආරම්භ කරලා තියෙන්නේ. ඒ දවස්වල මම ලැබෙන්න ඉන්න කාලෙලු තාත්තා ගෙයක් ඉල්ලලා තියෙන්නේ. නමුත් ඒ වෙනකොට ගෙවල් ඔක්කොම දීලා ඉවරයිලු. ඒත්  කවුරුවත් නොගෙන ඒ  ගෙවල් සියයෙන් එකක් ඉතිරිවෙලා තිබිලා.  ඒ නොම්බර 99 ගෙදර. අනූ නවය අසුබයි කියලා හිතපු මිනිස්සු ඒ ගෙය අත ඇරියට එය ලබාගත්තු තාත්තට එයින් වාසනාව උදා වුණා. සැනට් දික්කුඹුර කියන මටත් වාසනාව උදා වුණේ මේ ගෙදරින්. ඉස්සර අපේ තාත්තා තමයි මුළු කොළඹටම වෙසක් සැරසිලි හැදුව ව්‍යාපාරිකයා. මේ ගෙදරම වෙසක් කූඩු, බකට්, වෙස්මූණු වැනි දෑ හදලා තාත්තා හොඳ ව්‍යාපාරිකයෙක් වුණා. නමුත් ඔහු හදිසි අනතුරකින් මිය ගියා. ඒ දවස්වල අද වගේ හදිසි අනතුරු බහුල නෑ. ඒ කාලේ ලොකුම අනතුරක් විදිහට සැලකුව ඒ අනතුරින් හතරදෙනෙක් මිය ගියා. එයින් තුන් වැනියාට මිය ගියේ මගේ තාත්තා. ඉතිං ඉස්සර තාත්තා හදන වෙස් මූණු පාට කළේ මම. මට හොඳට චිත්‍ර ඇඳීමේ හැකියාවක් තිබුණා. අපේ ගෙදර පිට පළාත්වලින් ආව හැටක් විතර කර්මාන්තයේ නියලුණා. මේ විදිහට ලයනල් වෙන්ඩ්ට් එකට සම්බන්ධ වුණා.

ඒ විදිහට තමයි මම කලාවට පය තිබ්බේ. අංග රචනා ඉගෙන ගත්තෙ පත්මකුමාරි එදිරිවීර කියන ගුරුන්නාන්සේගෙන්. මගෙත් එක්ක ලයනල් වෙන්ඩ්ට් එකේ තවත් බොහෝ පිරිසක් අංග රචනා ඉගෙන ගත්තට අවසානයේ එය කරන්න ඉතිරි වුණේ මං විතරයි. මම අංග රචනාවලින් අදටත් නොයෙකුත් අත්හදා බැලීම් කරනවා. ඇස් යට මෙරූන් පාට තවරන්නේ මම විතරයි. කිසිම කෙනෙක් එය නොකරන දෙයක්. නමුත් එයින් මම ඇස්වල ඉස්මතුවීම වඩාත් තීව්‍ර කරනවා. මගේ එම විශේෂත්වය නිසා බැලූ බැල්මටම එය මගේ අංග රචනයක් බව දැනගන්න හැකි ලකුණක් වෙලා තියෙනවා. නමුත් අපේ කලාවේ මේ කාරිය කොතරම් බැරෑරුම් දෙයක් වුණත් ගෙවන්නේ ඉතාම අඩුවෙන්. මේක්අප් බඩුත් මා විසින්ම සපයගන්නවා. මෙහෙම එක්තරා ජනප්‍රිය ප්‍රවීණ නිළියකගේ චිත්‍රපටයක මේක්අප් කරලා ඇය මට ගෙවුවේ රුපියල් තුන්දාහයි. ඒ විදිහට ශ්‍රමය සූරාකන අය තමයි මට වැඩිපුරම හමුවෙන්නේ. අසූ අටේ මට සම්මානය ලැබුණේ %මෝරා^ නාට්‍යයෙන්. මම එහි පසුතල නිර්මාණය කළා, අංග රචනය කළා, රඟපෑවා. ජයන්ත චන්ද්‍රසිරිගේ බලකිරීමටයි ඒක කළේ. ඒ මගේ පළවෙනි නාට්‍ය. එයින් සම්මාන ලැබුණා. ජයන්ත ඒ බඩු සමහරක් තවමත් අරන් ගියේ නැහැ. ඔය ගේ ඉදිරිපිට තියෙන ලෑලි තට්ටු තමයි ඒ. අද මමත් මගේ යාළුවෝ සහ අයිතිකාරයෝ වුණ බල්ලන් රෑනත් නිදාගන්නේ ඒ ලෑලි තට්ටු මත. ගෙය කඩාවැටුණා. මම විවාහ වුණෙත් නැහැ. මේ ගෙය අපි සහෝදර සහෝදරියන් හයදෙනෙකුට අයිතියි. එකමුතුකමක් නැති අපේ  කට්ටියගේ විවිධ මතිමතාන්තර නිසා මේවා මේ විදිහට ගරා වැටෙන්න කලින් හදාගන්න ක්‍රමයක් තිබුණෙ නැහැ. මගේ ලොකු අක්කත්, මමත් විවාහ වී නැහැ. මම විවාහ වෙන්න නොසිතුවෙත් මම ඉන්න මේ අවුල් ගොඩට තවත් කෙනෙක් ගෙනත් ජීවත් වෙන්න කියන්නේ කොහොමද කියන ගැටලුව තිබුණ නිසා. මම හරි හම්බු කරපු දේවල් කෝ කියල අහන්න එපා. වැඩ කළාට බොහෝ දෙනෙක් මට ඒවට හරියන ගෙවීමක් කරල නැහැ. මෙතෙක් කාලෙකට මම කරපු අංග රචනයකට, එහි රඟපෑමටත් එක්කම ගෙවා ඇති වැඩිම මුදල රුපියල් අටදාහයි. ඒ  'වෙලාවකට පිස්සු වගේ'  කියන වේදිකා නාට්‍යයට. ඒ වගේම තමයි මට මුදල් අයකිරීම සම්බන්ධයෙන් පන්නගෙන යන දැනුමක් නැහැ. මට ලැබුණු පෝලෝ ඇඩ් එකටත් ගෙවුවේ රුපියල් තිස්දාහයි. නමුත් එහි අංග රචනා ශිල්පියා රංජිත් මතගවීර මා එක්ක කිව්වා ඔහුගේ කාරිය වෙනුවෙන් ඔහුට හැත්තෑපන්දාහක්  ගෙවුවා කියලා.  දිලීප අබේසේකර මහත්තයට මම ලොකු ගරුත්වයක් තියෙනවා. ඒ ඔහු අපේ ප්‍රවීණ කලාකරුවෙකුගේ පුත්‍රයෙක් වගේම නිර්මාණශීලී තරුණයෙක් නිසා. ඔහු තමයි මේ ඇඩ් එකට මාව යෝජනා කර තිබෙන්නෙත්. මාව තුන් පාරක් විතර ඒකෙන් විකිණිලා තිබුණා. ඉතිං මේ වැඩේ කතා කරන්න ගියාම මම හිතුවෙ ඒ ගැන මා එක්ක කතා කළ කාන්තාව දිලීප මහත්තයගෙ නෝනා වෙන්න ඇති කියලා. අනේ ඉතිං මගෙන් ඇහුවා එයා කීයක් මේ වැඩේට ඕනෙද කියලා. මම කිව්වා ඒක එයාලටම තීරණය කරන්න කියලා. එහෙමනම් අපි තර්ටි තවුසන්ඩ් දෙන්නම් කිව්වා. මට ඔය ගණන් මිනුම් ඉංග්‍රීසියෙන් කිව්වට ඒ තරම් කල්පනාවක් වුණේ නැහැ. ඒ වෙලාවෙ මට හිතුනෙ ඒ කිවුවෙ දහතුන්දාහක් වෙන්න ඇති කියලා. මම මුකුත් කිව්වෙ නැහැ. දිලීප මහත්තයගෙ මූණට එහෙම ගණන් මිනුම් ගැන කතාකරන්න හරි නැහැනේ කියල හිතුණ නිසා. අන්තිමේ එයින් මට ලැබුණු ගණන අරන් නිකම් හිටියා.  

IMG20180104174943
මට ජීවත්වීමට ක්‍රමයක් දැන් මා සතුව හරියාකරව නැති නිසා මම මේ ළඟදි දවසක විශ්‍රාම වැටුපක් අයදුම් කරන්න ගියා. එහිදී මට වයස වැඩියි කියලා ඒ කියන්නේ හැට දෙකක් කියලා විශ්‍රාම වැටුපක් දෙන්න බැහැ කිව්වා. එයාලගේ වයස් සීමාව හැට විදිහටලු තීරණය කරල තියෙන්නේ. ඉතිං මම ඒ අදහස අත්ඇරියා. නමුත් පෞද්ගලිකව එක් තරුණ මහත්තයෙක් මට මසකට එයා ගානේ ඒ රුපියල් හාරදහසක් ගෙවන්න පොරොන්දු වුණා. ඒ විතරක් නෙවෙයි ඔහු ඒ මුදල දැන් මාස තුනක් තිස්සේම මට ලබාදීලා තියෙනවා. මේ ළඟදී දවසක එයාගෙ නෝනගේ උපන්දිනය දවසේ මට වාහනය ගෙදරටම එවලා මාව එක්කගෙන ගිහින් මට හොඳ වටින ඇඳුම් කට්ටල දෙකක්ම තෑගි කරලා, මුදලුත් දීලා මාව ගෙදරටම ගෙනත් ඇරලුවා. කලා කාරයන් සහ කලාකරුවන් කියන්නේ එක කොටසක් නෙවෙයි, කොටස් දෙකක්. අපේ රටේ සීයට අනූවක් ඉන්නේ කලා කාරයෝ. නමුත් කලාකරුවන් අඩුයි. කලාව වෙනුවෙන් අත හිත දීලා තව පරපුරකට එන්න මග සලසන අය, තවත් කලාකරුවෙකුට කලාව වෙනුවෙන් අතහිත දෙන අය තමයි කලාකරුවො වෙන්නේ. ලංකාවේ එහෙම තරු නෑ. දැන් බලන්න මාලනී ෆොන්සේකා නිළි රැජින. නමුත් කාටවත් උදව්වක් කරල නෑ. එයා කලාකාරිනියක් මිස කලාකරුවෙක් නෙවෙයි. මට වැඩ නැතිවෙන්න හේතුව ඕනම දෙයක දොසක් දැක්කොත් මම නම් ගම් පිටින්ම කියනවා. ඒක ගොඩක් දෙනෙකුට දිරවන්නෙ නෑ. ඒ නිසයි මට වැඩ අඩු. කලාකාරයො වෙන්නෙ කලාව තමන්ගේ බඩ වඩාගැනීම වෙනුවෙන් විතරක් පාවිච්චි කරන අය කියලා මම හිතනවා. එහෙම අය තමයි බහුතරයක් හමුවෙලා තියෙන්නේ. 

අද මම මේ කඩාවැටී අබලන් වුණ ගෙදර මගේ සුරතලුන් එක්ක ජීවත් වෙනවා. මම මගේ කෑම වේල ගෙදර උයාගන්නෙ නැහැ.  කඩෙනුයි ගෙනෙන්නේ. නමුත් මගේ හිතමිතුරන් විදිහට මගේ ළඟින් ඉඳගෙන මට තනියක් නොදැනෙන්න මාව ආරක්ෂා කරන, මට ඇත්තටම හිතවත් මේ බල්ලන් තුන්දෙනා වෙනුවෙන් මම ගෙදර උයනවා. උන්ට බඩ පිරෙන්න කන්න දෙන්න ඕන. මම නොකා හිටියත් මේ තුන්දෙනාට කන්න දෙනවා. බල්ලන් හත්දෙනෙක් හිටියා. වරින් වර මිය ගිහින් දැන් ඉන්නේ මේ කට්ටිය විතරයි. මම නාන වෙලාවට මට හදිසියේවත් දුරකථන ඇමතුමක් ඇවිත් ඒක නෑසෙන තැනක නම් මම ඉන්නේ, මේ එක යාළුවෙක් මට දුරකථන ඇමතුමක් ඇවිත් බව මහ හයියෙන් දැනුම් දෙනවා උඩු බුරලලා.  මෙයා උඩු බුරනකොට මං දන්නවා ඒ මට දුරකථන ඇමතුමක් ඇවිත් කියලා. මෙයාලා තුන්දෙනාම රෑට නිදාගන්නේ මා එක්ක අර ලී තට්ටු උඩ.

IMG20180104174804

ඇත්තටම මිනිසුන්ට වැඩිය පුදුම කෙළෙහිගුණයක් තියෙන්නේ. පොඩි අසනීපයක් හැදුණත් මම මෙයාලට බෙහෙත් අරන් දෙනවා. මේ ගෙදරට ඇතුළු වෙන තැනම ඔය එල්ලලා තියෙන්නේ එයාලගෙ බෙහෙත්හේත්. මම නාන්නේ සන්ලයිට් ගාලා. නමුත් මෙයාලට බේබි සබන් ගාලයි නාවන්නේ. එක සතෙක්වත් මෙයාලාගේ ඇඟේ නැහැ. ඒ තරම් එයාලව පිරිසුදුව තියාගන්න මං වෙහෙසෙනවා.

මං කලකට ඉහත කෑම ගත්තෙ සිංහල හෝටලයකින්. ණයට තමයි ඉතිං. මුදල් ලැබුණු ගමන් ණය ගෙවා දමනවා. ඒත් පස්සෙ මට එතැනින් කෑම අරගන්න එක නවතන්න වුණා. හේතුව වැඩ කරන ළමයි මට පල නොකියා පලා බෙදන්න පටන් ගත්තු නිසා. ඊට පස්සෙ මම මුස්ලිම් හෝටලයකින් තමයි කෑම ගන්න පටන් ගත්තේ. ඒ කෑම කඩේ ඉතාම සැලකිල්ලෙන් මට කෑම ටික දෙනවා. ඒ විතරක් නෙවෙයි. මේ විදිහට මගේ කෑම බිල අසූ හයදහසක් විතර වෙලා තිබුණා. 

නමුත් කවදාවත් සල්ලි ඉල්ලුවේ නැහැ. මට ළඟදී කොළඹ සන්නිය රඟපෑම් වෙනුවෙන් රුපියල් පනස් දහසක් ඇඩ්වාන්ස් ලැබුණා. මම එයින් ණයෙන් කොටසක් ගෙවන්න ගිය වෙලාවෙත් ඒ මුදලාලි ඇහුවා පනස්දාහක්ම දෙන්න සල්ලි අතේ තියෙනවද, නැතිනම් ඒක අපි හෙමින් බේරගමු කියලා. නමුත් මට ඔළුව නිදහස් වීම ඊට වඩා වටිනවා. ඒ නිසා මම එය ගෙවා දැම්මා. මං මේ කිව්වේ අපේ රටේ අපේ මිනිස්සු අපිට සලකන විදිහ මෙහෙමයි කියන්නයි. සමහරු අපිට නාට්‍යයකට මේක්අප් වෙනුවෙන් ගෙවන්නේ රුපියල් දෙදාහයි.  ඇත්තටම වේදිකාවේ මේක්අප් වෙනුවෙන් ගැළපෙන්නේ ග්‍රීස් පේන්ට්. නමුත් දැන් අය කැමති පෑන් කේක් මේක්අප් තමයි. ඉස්සර අපි මේක්අප්වලට කවලම් කළේ පොල් තෙල්. නමුත් දැන් බේබි ඔයිල්. කාලය වෙනස්වෙලා. තවමත් මට මගේ රසිකයින්ගේ ආදරේ තියෙනවා. ඒ මම මුදලට යට නොවුණ මිනිහෙක් නිසා. මට නාට්‍ය ලෝකයේ ලැබුණ සම්මාන වගේම කලාභූෂණ සම්මානයත් ලැබිලා තියෙනවා. මම ඉතිං මේ අබලන්ව කඩාවැටුණු  අංක 99,  ශ්‍රී ගුණාලංකාර පාර, කලුබෝවිල, දෙහිවල කියන ලිපිනයේ තමයි පදිංචිවෙලා ඉන්නෙ. 
දුරකථන අංකය 0779951851 

චිත්ත වික්ෂේපය ගැන ඔබ දැනුම්වත්ද

වැඩිහිටි  නැතිනම් මහළු විය සම්බන්ධයෙන් බොහෝ දෙනෙකු සිතන්නේ  එතරම් කැමැත්තකින් නොවේ. එයට හේතුව වියපත්වීමත් සමගම ඇතිවේ යැයි සිතන රෝගාබාධ මෙන්ම කායික ශක්තියේ මතුවන නොයෙකුත් දුර්වලතා හේතුවෙනි. මේ වන විට අප රටේ වැඩිහිටි ජනගහණය සීඝ්‍රයෙන් ඉහළ යමින් පවතින අතර ඒ සමගම වැඩිහිටියන් වෙනුවෙන් සපයන සෞඛ්‍ය සේවාවන් වැඩි දියුණු කිරීම කෙරෙහිද රජයේ අවධානය යොමුව තිබේ. නමුත් වියපත්වීම යනු රෝගීවීම නොවේ. බොහෝ විට විශ්‍රාම වීවිතය සම්බන්ධයෙන් අප අසන්නට දකින්නට හුරු පුරුදුව ඇත්තේ වැඩක් නොකර නිකම් සිටීමට උදාවන කාලය යන්න වුවත් වැඩිහිටි විය යනු වඩාත් ඵලදායී ලෙස ක්‍රියාකාරීව වැඩ කළ හැකි අවධියක්ය යන්න  ලෝකයේ පිළිගැනීමයි. කෙසේ නමුත් මහළු විය එළැඹීමේදී වඩාත් නිරෝගී විය යුත්තේ මානසිකත්වයයි. ඒ හරහා නීරෝගීමත් ශරීර ශක්තියක් ඇතිකර ගැනීමට යමෙකුට  බාධාවක් නොවේ. එහෙයින් අද අප සෞඛ්‍ය පිටුව තුළින් සාකච්ඡාවට බඳුන් කරනුයේ වියපත්වීම සමග නොදැනීම ඇතිවීමට ඉඩ පවතින මානසික තත්ත්වයේ එක් වෙනස්වීමක් පිළිබඳවය.


160503_dx_sexualharassment_jpg_CROP_cq5dam_web_1280_1280_jpeg

මහළුවිය එළැඹීම , නැතහොත් වියපත්වීම යනු දුර්වලවීම හෝ හැකියාවන්ගෙන් තොරවීම නොවේ. බොහෝදෙනෙකු සිතාසිටින්නේ වියපත්වීම යනු සිරුරින් මනසින් දුර්වල රෝගියෙකු බිහිවීමට මග විවෘතවීමක් ලෙසය. එහෙයින් ඔවුන් කයින් මනසින් ඇතිවන යම් දුර්වලබවක් වයස මත පටවා ප්‍රතිකාර වෙත යොමුවීම මගහැර සිටී එයින් සිදුවන්නේ එය තීව්‍ර රෝගී තත්ත්වයක් ලෙස වැඩි දියුණු වී විශාල සමාජ ප්‍රශ්නයක් ගොඩ නැංවෙන අතර වැඩිහිටියාට ජීවිතයේ සැඳෑ සමය අසතුටින් රෝගී අයෙකු ලෙස සීමා වී ගෙවන්නට සිදුවීමය. ඩිමෙන්ෂියා නැතිනම් චිත්ත වික්ෂේපය  ගැන ඔබ දැන සිටිය යුතුවන්නේ මෙවැනි පසුබිමකය. වයස අවුරුදු 60 ට වැඩි  මෙන්ම ඇතැම් විට ඊට අඩුවයස් වලදීද ඩිමෙන්ෂියා රෝග ලක්ෂණ මතුකරවන්නට ඉඩ ඇති අතර කාන්තාවන් අතර තුන් ගුණයකින් බහුලය. ඩිමෙන්ෂියාවට ප්‍රතිකාර ලබානොගත හොත් මරණීය රෝගයක් දක්වා වැඩි දියුණු විය හැකිවාක් මෙන්ම විෂාදය වැනි වෙනත් මානසික රෝගවලටද ගොදුරුවීමේ ඉඩකඩක් සලසනු ඇත. ඇතැම් විට වැඩිහිටියන් විසින් සිදුකරන සමහර කාර්යයන් අප  ඩිමෙන්ෂියාව යැයි හඳුනානොගන්නා තරමට සුලභ රෝග ලක්ෂණ පෙන්නුම් කරයි.

ආහාර ගෙන සිටින විටත් ආහාර නොගත් බව පැවසීම, උපැස් යුවළ නළලත රඳවාගෙන සිටියදී එය අස්ථානගතව ඇතියි පවසමින් සෙවීම, නිතරම අමතකවීම් සිදුවීම, ලැජ්ජාව බය නොමැති හැසිරීම් පෙන්වීම ,වයස්ගත බවට නොගැලපෙන සේ ආදර සම්බන්ධතා පිළිබඳ තරුණ අයෙකු සේ කතාකිරීම කටයුතු කිරීම, පිරිසක් ඉදිරියේ අඳුම් මාරුකිරීම ,බහිශ්‍රාවීය කටයුතු කරන්නට ඉදිරිපත්වීම හා ලිංගික වශයෙන් යම් යම් වෙනදා නොපැවති හැසිරීම් දැක්වීම තුළින් ඇතමුන් මනමාලකම් පෑම ලෙසින් හඳුන්වන හැසිරීම්වලට නිරන්තරයෙන් යොමුවීම,වැනි ලක්ෂණ චිත්ත වික්ෂේපයේ ලක්ෂණ ලෙස සැළකිය හැකිය. යම් හෙයකින් ඔබේ මව හෝ පියා නැතිනම් විවාහ නොවී  වියපත්ව සිටිමින් පසුවන ඔබේ සොයුරිය,සොයුරා ,වැඩිහිටි ඥාතියා විසින් මෙවැනි හැසිරීමක් පල කරන්නේද? වයසට නොගැලපෙන ඉහත කී හැසිරීම් දක්වන අයෙකු දුටු විට ඔබ ඒ සම්බන්ධයෙන් පළමුව සිතන්නේ කුමක්ද?

අක්කා හැසිරෙන්නෙ හරියට දාසයයි මාසයයි වගේ. කොයිවෙලාවෙත් කතාකරන්නේ ආදරේ කරන හැටියි, කසාද ගැනයි එයාට දැන් මොන මගුල් ද අවුරුදු පණහත් පැනලානේ පොඩි කෙල්ලො වගේ  එයාගේ බොළඳ හැසිරීම් දකිද්දි අප්පිරියයි. අයියා තරුණ කාලෙවත් නැති තරම් මනමාලකම් කරන්න පටන් අරන්නේ දැන් ,අම්මාව ගෙදර තියාගන්නත් බැරි තරම් ජරා විදිහට හැසිරෙන්නේ.? හරියට අපෙන් පළිගන්න වගෙයි. මෙයාව කෙනෙක් ආවට ඉස්සරහට ගන්නවත් පුලුවන්ද ? මොනවා හරි අපිට අවනම්බුවක් වෙන වැඩක්මයි කරන්නේ..
මේ සමහර විට ඩිමෙන්ෂියා රෝගයට ගොදුරු වූ මවක්  සොහොයුරියක් , සොහොයුරෙක් පිළිබඳ ඇතමුන්  සිතන ආකාරය වෙන්නටත් පුලුවන්. නමුත් ඒ අයගේ  හැසිරීමේ අමුත්තක් ඔබ පැහැදිලිවම දකිනවා නම් ඔවුන්  සම්බන්ධයෙන් එවැනි නිගමන වලට එළැඹෙන්නට පළමුව ඔවුන්ව කාරුණිකව මනෝ වෛද්‍යවරයෙකුගේ පරීක්ෂණයකට යොමුකරන්න.

කිසියම් අයෙක් විවාහ නොවී වයස්ගතව සිටින විට ඔවුන් අතින් මෙවන් චිත්ත වික්ෂේප තත්ත්වයක් නිසා මතුවන හැසිරීමේ වැරදි  බොහෝ දෙනෙකු බැර කරන්නේ විවාහවීමට අවස්ථාවක් නොලැබුණු නිසා ඇතිවුණ මනමාලකම් වශයෙන් වීමට ඇති ඉඩ කඩ බොහෝය.  ඒ අයට එම හැසිරීම තමන්ට නොගැලපෙන බව හෝ තමන් දැන් සිටින්නේ එවැනි හැසිරීම් පෑමට උචිත නොවන වයසකය යන්න සිතන්නටද ස්වාධීන මානසික නිරවුල්බවක් නොමැතිවීමෙන් ප්‍රශ්නය තවත් දික් ගැස්සෙයි.මෙවැනි තත්ත්වයක් ඇති අයෙකු දුටු විට එය පිළිබඳ අවබෝධයෙන් වහාම මානසික වෛද්‍යවරයෙකුගේ පරීක්ෂාවකට රෝගියා යොමුකිරීමෙන් මෙම තත්ත්වය උත්සන්නවීමෙන් ඇති විය හැකි ප්‍රශ්න කල්තියාම විසඳාගන්නට හැකියාව ලැබේ.
අප බොහෝ දෙනෙකු සිතන්නේ වයස්ගතවීම අමතකවීමට බලපාන ප්‍රධාන හේතුවක් බවයි. (නමුත් මේ රෝගයට විවාහ වූවාය නොවූවාය යන්න බලපාන්නේ නැත.) ඒ නිසා අම්මට තාත්තට නිතර ඇතිවන අමතකවීම් දැන් ඉතිං වයසයිනේ කියා සාධාරණීකරණය කරන්නට පෙළඹෙන්නට එපා. එය ඔවුන් ප්‍රතිකාර ලබාගත යුතු රෝගයක්.

මේ රෝගය වයස්ගතවන හැම අයෙකුටම ඇතිවෙන්නේ නැහැ. වයස්ගතවීම සෑම රෝගයකටම බලපාන පොදු සාධකයක්ද නොවෙයි. නමුත් ඇතැම් අය වයස්ගතවීම නිසා කායිකව මානසිකව දුර්වලතාවයන් ඇතිකරන්නට සමත් බව සිතා සිටියත් එහි සත්‍යයක් නැති බව ඔබ දැන සිටිය යුතුයි. නමුත් මොළයේ සෛල යම් ආකාරයකින් ප්‍රමාණාත්මකව අඩුවෙන්නට බලපෑ හැකි හේතුවක් හමුවුවොත් මොළයේ ක්‍රියාකාරිත්වය අඩුවෙන්න පුලුවනි. යම් ආකාරයකින් මේ නිසා මොළයට යම් හානිකර තත්ත්වයක් ඇතිවුවහොත් නැවත එය යථා තත්ත්වයට පත්වීම අඩුවෙන්නට පුලුවන්. නමුත් මෙය හඳුනාගෙන ප්‍රතිකාර කිරීමෙන් රෝගය ආපසු හරවා යවන්න පුලුවන්. සාමාන්‍යයෙන් දියවැඩියාව අධිරුධිර පීඩනය සහ කොලෙස්ටරෝල අධිකතාවය වැනි බෝ නොවෙන රෝග හේතුවෙන් මොළය අතුරු ආබාධයන්ට ලක්වීම අද බහුලව දකින්නට තිබෙන තත්ත්වයක්. මෙවැනි තත්ත්වයන් මත ඩිමෙන්ෂියා වැනි තත්ත්වයක් කළින්ම හඳුනාගෙන ප්‍රතිකාර කරන්නට ක්‍රියා නොකළහොත් රෝගය වඩාත් වැඩි දියුණු තත්ත්වයට පත්වෙන්නට හැකියි.

 රෝගයේ ප්‍රධානතම ලක්ෂණ විවිධ ආකාරයෙන් මතුවෙන්නට පුලුවන්. අස්වාභාවික ලෙස හදිසියේ සියලු දේ සැක කරන්නට පටන් ගැනීම . තමන් වයස්ගත බව අමතක කරමින් තරුණ වයසේ පසුවන්නේ යැයි සිතමින්, තමා  සමග  ලිංගික සම්බන්ධකම් පවත්වන  තමන්ගේ ආදරවන්තයා හෝ ආදරවන්තිය  යැයි සිතින් මවාගත් කිසියම් පිරිමියෙකු හෝ ගැහැණියක තවත් කෙනෙක් විසින් උදුරාගන්නට කටයුතු කරනවා යැයි කියමින්  බැණ වැදීම සහ එවැනි කාරණාවලට භාහිර පුද්ගලයින් සමග කළහ කිරීම , තමන්ට කිසියම් නොපෙනෙන අයෙකු ඉතා දරුණු ලෙස චෝදනාකරමින්  බැන වදින්නේ යැයි පැමිණිලි කිරීම, වෙනදා පැවති පෞරුෂය බිඳ වැටෙමින් පවතින බව පෙන්වමින් විවිධ නොගැලපෙන හැසිරීම් මතුකිරීම, ඩිමෙන්ෂියා තත්ත්වයක පෙර නිමිත්තක් වෙන්නට පුලුවන. 

ඇතැම් වැඩිහිටියන් ඔවුන්ට හුරු පුරුදු පරිසර තුළින් ඈත්වන විට නොසන්සුන් ලක්ෂණ පෙන්වන්නට පුලුවන්. ඔහු හෝ ඇය ඩිමෙන්ෂියා තත්ත්වයට යමි සමීපතාවයක් දක්වන්නේ නම් හුදකලාවීම තුළ තත්ත්වය තවත් දරුණු අතට පත්වෙන්නටත් පුලුවන්. බොහෝ විට ඔවුන් තමන්ට නින්ද නොයන බව පවසන්නටත් ඒ සඳහා ඖෂධ ලබාගන්නටත් පෙළඹෙන්නට හැකියි. එමෙන්ම ඔවුන් වෙනදා කළ බොහෝ දෑ කරන්නට නොහැකියාවක් දක්වන්නට පුලුවන්. උයා පිහා ගැනීම  හා යමක් ලියන්නට කියවන්නට වූ හැකියාවද මේ සමග වෙනස් වෙන්නට පුලුවන. ඇතමුන් නින්ද යන්නට යැයි සිතා මත් පැන් බීමට යොමු වෙයි. නමුත් මත් පැන් යනු මනෝ රෝග හෝ කිසිදු අන්දමේ කායික රෝගයකට ඖෂධයක් නොවේ. ඒවා වැඩි දියුණුවීමට බලපානු ලබන හා ක්‍රියාකරනු ලබන සංයුතියක් පමණකි. ඩිමෙන්ෂියා රෝගයේදී  එම රෝගීන් විෂාදයට ගොදුරුවීමද බහුලව දැකිය හැකිය. ඔවුන්ට ස්වාධීන ජීවිත ගතකරන්නට හැකියාවක් නොමැතිව යන අතර  එන්න එන්නම මේ තත්ත්වය වර්ධනය වෙන්නට ඉඩ තිබේ. අමතකවීම තුළින් ආරම්භ වෙන අල්ෂයිමර් ඩිමෙන්ෂියාව මෙන්ම වැස්කියුලර් ඩිමෙන්ෂියාව යන මේ කුමන තත්ත්වයක් වුවත් ඒ සඳහා වෛද්‍යවරයෙකු වෙත යොමුකිරීම අවශ්‍යය. අල්ෂයිමර් ආරම්භ වෙන්නේ මොළයේ බුද්ධිමය හැකියාවන් ඇතිකරන ප්‍රදේශය ආශ්‍රිතව ඉතාම සුලු ප්‍රදේශයක් ආක්‍රමණය කරමිනුයි. එයින් සිදුකරන්නේ මොළයේ සෛල මැරෙමින් මොළය ආක්‍රමණය කිරීමයි. මුලදී සුළුවෙන් පටන් අරගත්තත් පසුව එය ක්‍රමයෙන් පැතිරෙන්නට පටන්ගැනීමත් සමග මොළය ක්ෂයවීමට නැතිනම් හැකිලී  කුඩාවීමට පටන් ගනී.  මේ සමග රෝගියාගේ රෝග ලක්ෂණද තීව්‍ර තත්ත්වයකට පත්වෙයි. එන්න එන්නම වැඩිවෙන  අතර මුදල් හංගා ඒවා හැංගුව තැන් අමතකව යාම , ගෙයින් පිටත ඉබාගාතයේ ඇවිද නැවත එන්නට පාර අමතකවීම,  වදන් පිටකිරීමට නොහැකියාව,  පිරිසක් ඉදිරියේ වෙන අන් කවරදාකවත් නොකළ අන්දමේ හැසිරීම් පෑම, ප්‍රසිද්ධියේ ලැජ්ජා බය නැතිව හැසිරීම , ඇතැම් විට තම පවුලේ අයට මෙන්ම පිටස්තර අයටද  ලිංගිකව අතවර කිරීමට  උත්සහ දැරීම  වැනි ලක්ෂණ පෙන්වන්නටද ඉඩ ඇත. මෙවන් ලක්ෂණ දුටු වහාම ඔහු හෝ ඇය වහාම මනෝ වෛද්‍ය පරීක්ෂණයකට යොමුකිරීම තුළ ස්මරණ හා බුද්ධි පරීක්ෂණයක් සිදුකර හා එයට අදාල අනෙකුත් පරීක්ෂණ මගින් ඩිමෙන්ෂියා රෝග තත්ත්වය තහවුරු කරගන්නා අතර  අදාල ප්‍රතිකාර වෙත යොමු කරමින් තවදුරටත් මොළයේ සෛල විනාශවෙමින් හැකිලීයාම නවතා රෝගියා ප්‍රකෘති මානසික තත්ත්වය වෙත ලඟාකිරීම  කඩිනමින් සිදුකරනු ඇත.  එතෙක් ඔවුන් වෙතින් සිදුවන ක්‍රියාවන් විවේචනය කරමින් හෙලාදකිමින් ඔවුන් වැරදි කරුවන් කිරීම මොහොතකට ප්‍රමාද කරමු. මන්ද සැබවින්ම ඔවුන් වරදිකරුවන් නොවෙන බැවින් ඔවුන් දෙස සානුකම්පිතව බැලීම වැදගත් බැවිණි. ප්‍රතිකාර තුළින් මේ සියලු රෝග ලක්ෂණ පාලනය කළ හැකි වග සිහිතබාගන්න. යම් ආකාරයකින් ඩිමෙන්ෂියාවද යන්න සැකහැර දැනගන්නට හෝ ඩිමෙන්ෂියා රෝගියෙකුගේ ඇවතුම් පැවතුම් මෙන්ම රැකබලාගැනීම සම්බන්ධයෙන්ද  ඔවුන්ගේ ආර්ථිකමය ගැටලු සඳහා ආධාර වශයෙන් සමාජසේවා ආයතන මගින් සිදුකරන සේවාවන් වැනි දෑ සම්බන්ධ තොරතුරුද ඔබට 011 3140844 යන දුරකථන අංකය ඇමතීමෙන් ලබාගත හැකිය. මෙම පුද්ගලයන් රැකබලාගැනීම පවුල තුළ තබාගැනීම තුළින්ම කළ යුතු අතර එම හැසිරීමට මුල්ව ඇත්තේ රෝගි තත්ත්වයක් බැවින් රෝගියා වෙක දක්වන ආදරය කරුණාව දයාව මෙන්ම රැකවරණය ලබාදෙන්නට තරම් සංවේදී වීම වැදගත්ය. ඔවුන්ට ඔබේ ජීවිතය තුළ ඔබ දුන් වටිනාකම රෝගය නිසා නැතිවී යන්නට ඉඩ තබන්නට එපා. නිසි ප්‍රතිකාර තුළින් ආයෙමත් ඔහුට අයට ඔබේ ලෝකයේ ඇති ස්ථානය පිරිනමන්න අත දිය යුතුම මොහොතේ ඔබේ හදවතට ඊට ආරාධනය කරන්න. ඩිමෙන්ෂියාව ජයගන්නට ඔබටද බොහෝ දේ කළ හැකිය.

 

අපේ සෞඛ්‍ය ගැන අලුතින් සිතමු

අද නව වසරේ ඇතැම් පාසල් නැවත විවෘත වන දිනයයි. ඔබේ දරුවා පසුගිය වසරේ හොඳින් නිරෝගීව තම කටයුතු සිදුකරමින් පසුවූවා නම් මෙම වසරේද එම තත්ත්වය වැඩි දියුණු කොට පවත්වාගන්නට කටයුතු කිරීම සම්බන්ධයෙන් මෙම ලිපිය ඔබට වඩාත් වැදගත් මග පෙන්වීමක් කරනු ඇත. නමුත් පසුගිය වසරේ දරුවා වැඩි පුර අසනීප වූවා නම් දරුවාගේ වැඩ කටයුතු අඩාල වූවා නම් මේ වසරේ එවැනි තත්ත්වයකට ඉඩ නොතබා දරුවා වෙනුවෙන් කැපවීමට ඔබට මේ කරුණු වඩා වැදගත් මෙහෙයක් ඉටුකරනු ඇත. අප මේ ඔබේ අවධානය යොමු කරනුයේ දරුවාට දියර හෝ පෙති ලෙස කෘතිමව විටමින් වර්ග ලබා දිය යුතු බව කියන්නටවත්  ෆුඩ් සප්ලිමන්ට් යනුවෙන් හඳුන්වන අතිරේක ආහාරමය නිෂ්පාදන වලට මුදල් වියදම් කළ යුතු බවට අවධාන යොමු කරවීම කෙරෙහි නොවේ. මේ වෑයම පානීය ජලය දරුවෙකුට කොතරම් බලපානවාද යන්න පිළිබඳ ජාතික වශයෙන් යම් අවධානයක් යොමුකරවීමේ මාධ්‍ය මෙහෙවරට අත හිත දෙමින් වසරේ ප්‍රථම සෞඛ්‍ය පිටුව වෙත යොමුවන්නටය


girl-drinks-pure-water-banner

වැඩිහිටියන් බොහෝ දෙනෙකු දරුවාගේ සහ තමන්ගේ පැවැත්ම සම්බන්ධයෙන් කතාකරන විට වැඩි අවදානයක් දක්වන්නේ ආහාර සම්බන්ධයෙනි. කන්නේ මොනවාද සහ කෑමට දිය යුත්තේ මොනවාද යන්න මිස පානය සඳහා වඩා යෝග්‍ය වනුයේ මොනවාද යන්න එතරම් අවධානයකට ලක් නොවෙයි. නමුත් සිරිතට මෙන් නිවසෙන් සකස් කළ වතුර බෝතලයක් දරුවාගේ පාසල් බෑගයත් සමග ලබාදෙන නමුත් ඇතැම් විට ඔබේ දරුවා ඒ වතුර බෝතලය පානය නොකර නැවත නිවසට රැඟෙන එනවා ඇත. මෙවැනි අවස්ථාවක ජලය පානය නොකරේ ඇයි දැයි නාසන ඔබ කෑම පේටියේ කෑම ටික ඉතිරි වූ විට නම් නොකෑවේ ඇයි දැයි අසන්නට පමා නොවනු ඇත. 

ඇතැම් පාසල් ගුරුවරුන් දරුවන් පංති කාමරවලින් පිටට නොයවා රඳවා ගැනීමේ වෑයමක් ලෙස දරුවාට වැසිකිලි යෑමේ අවසරය ලබා දෙන්නේ විවේක කාලයට පමණි. නමුත් අවශ්‍ය තරම් ජලය පානය කරන්නට දරුවාට උවමනාව තිබුණත් පංති කාමරයෙන් පිටට  යෑමේ අවසරය ලබා ගැනීමට ඇති අසීරුතාව නිසා දරුවා ජලය පානය කිරීමෙන් වැළකී ඉන්නා අවස්ථා දරුවන් විසින්ම හෙළි කර තිබීම මෙය ගැටලුවක් බවට ඉස්මතුවී පෙනෙන්ට හේතුවකි. විවේක කාලයද ඉතා සීමිත බැවින් මුලු පාසලටම ලැබෙන එම විවේකයේදී බහිශ්‍රාවීය කටයුතු වෙනුවෙන් යොදවන්නට දරුවන්ට කාලයක් නොලැබීම හේතුවෙන් දරුවන් ජලය පානය නොකර ඉන්නට හුරුව ඇතැයි යන්න ඇතැම් දරුවන් ජලය පානයෙන් ඈත්වී ඉන්නේ ඇයි දැයි ඇසූ විට දැන් දැන් බහුලව ලැබෙන පිළිතුර වී තිබේ. නමුත් දෙගුරුන් මෙන්ම දරුවන්ද ජලය පානය දෛණික ජීවිතයට හා සිරුරේ ක්‍රියාකාරිත්වයට බලපාන්නේ කෙසේදැයි යන අවබෝධය දැඩිව ලබාගත යුතු කාලයකි මේ. මන්ද දැන් දැන් වකුගඩු රෝගී දරුවන් ගැන අසන්නට දකින්නට ලැබෙන අවස්ථා බහුලවීම දිවයිනේ සියලුම පළාත්වලින් වාර්ථාවන බැවිණි.
මිනිස් සිරුරේ දේහ බරින් සියයට හැටකටත් වඩා පවතින්නේ ජලය බව ඔබ දන්නවාද? කෙසේ නමුත් මිනිසෙකුට ජලය නොමැතිව ජීවත් විය හැකි කාලය වනුයේ දින තුන සිට පහ දක්වා අතර කාලයකි.  ආහාර නොමැතිව ඊට වඩා යම් කාල පරාසයක් ජීවත් විය හැකි වුවත් ජලය නොමැතිව  ජීවත්වීමට බැරි බව ඇත්ත කතාවයි.

ජලය එසේ අත්‍යවශ්‍ය වනුයේ ඇයි.

රුධිරයේ ප්‍රධාන සංඝටකයක් ලෙස පෝෂණ ද්‍රව්‍ය හා  සිරුරට ඔක්සිජන් බෙදා හැරීමේ කාර්යයට  ජලය අවශ්‍යය. එමෙන්ම අප ගන්නා කුමන ආහාරයක් හෝ දිරවීමටද ජලය අවශ්‍යය. අප ශරීරයේ උෂ්ණත්වය නිසිලෙස පවත්වා ගැනීමට, ශරීරය අනතුරුවලින් ආරක්ෂාකර ගැනීමට මුඛය, ඇස් නාසය ආදියේ පටලවල තෙතමනය පවත්වා ගැනීමට  , මුත්‍රා සහ දහඩිය ලෙස අපද්‍රව්‍ය ශරීරයෙන් බහිශ්‍රාවය කිරීමට  මෙන්ම මොළයේ ක්‍රියාකාරිත්වය නිසිලෙස පවත්වා ගැනීමට, මළබද්ධය වළක්වා ගැනීමට, අනිවාර්යයෙන් ජලය පානය තුළින් ශරීරයට එක්කර ගැනීම අවශ්‍යය.

පාසලේදී වැසිකිලි යෑමට දරුවන්ගෙන් එන ඉල්ලීම්වලට අවසර නොදීමක් සිදුවනවා යැයි දරුවන් පවසන්නේ සත්‍යයක් නම් ,හා එම නිසා දරුවන් ජලය පානයෙන් වැළකී සිටින්නේ නම් පාසලකින් දරුවාගේ නීරෝගීබවට යම් බාධාවක් එල්ලකරවන බවත් එයින් දරුවාට ඇති විය හැකි ශාරීරික පීඩාවන් සම්බන්ධවත් විෂය කරුණුවලට අමතරව පාසාල්වල ගුරුවරුන් දැනුම්වත්ව සිටීම වැදගත් බවද සිහිපත් කළ යුතුව ඇත. දෛණිකව ඔබ සහ  ඔබේ දරුවා කොතරම් ප්‍රමාණයක් ජලය පානය කළ යුතුද  යන්න ඔබ දන්නවාද?  ඔබ පානය කුළ යුතු ජල ප්‍රමාණය ගණනය  ඔබේ වයස  අනුව සිදු කළ හැකිය.  

අවුරුදු එක සිට පහ දක්වා  ළමා අවධියේ පසුවන දරුවෙකු දිනකට මිලි ලීටර 750 ත් 1000 ත් අතර  ප්‍රමාණයක් ජලය නැතිනම් දියර  පරිභෝජනය කළ යුතුය.  අවුරුදු හය සිට දහය දක්වා දරුවන් විසින් දිනකට පානය කළ යුතු ජලය ප්‍රමාණය මෙයින් වෙනස්ය. ඔවුන් ලීටර් එකේ සිට 1.5 දක්වා  ජල හෝ දියර ප්‍රමාණයක් ශරීරයට එක් කරගත යුතුය. නමුත් දරුවා අවුරුදු එකොළහේ සිට දහ අට දක්වා නවයොවුන් වියේ පසුවන්නෙකු ලෙස පානය කළ යුතු ජල ප්‍රමාණය දෛණිකව ලීටර 1.5 සිට 2 දක්වාය. මෙය ලෝක සෞඛ්‍ය සංවිධානයේ ළමා වර්ධක සටහන සහ සී ඩී සී ළමා වර්ධක සටහන්පත්වලට අනුව මධ්‍යස්ත බරින් යුතු  පිරිමි ළමයෙකුගේ දිනෙක ජල අවශ්‍යතාවය සැළකිල්ලට ගෙන සකස් කරනු ලැබූවකි.  නමුත් වැඩිහිටියන් කොපමණ දියර ප්‍රමාණයක් දෛණිකව ලබා ගත යුතුද යන්න මේවායින් වෙනස්ය.  වැඩිහිටියන් සඳහා සිරුරේ බර කිලෝ ග්‍රෑම්වලින් මැන එය 30 න් බදූ විට එන ප්‍රමාණය ලෙස පහසුවෙන් ගණනය කළ හැකිය. කෙසේ නමුත් මේ දක්වා ඇත්තේ  දිනකට අවශ්‍ය ජල ප්‍රමාණයේ දළ අගයකි.  නමුත් ඇතැම් විශේෂ අවස්ථාවලදී මේ ප්‍රමාණයන් වෙනස් විය හැකි බව සිහිතබා ගන්න. සමහර අවස්ථාවලදී අවශ්‍යතාවයට වඩා ජලය පානය කරන්නට සිදුවෙයි.  ඒ ව්‍යායාම හෝ ක්‍රීඩාවල යෙදෙන අවස්ථාවක, උණුසුම වැඩි දිනවලදී, හිරු රශ්මියට දිගුවෙලාවක් නිරාවරණය වී සිටින විට, ඔබ විදුලි පංකාවක හෝ වායුසමීකරණයක් යටතේ සිටින විට, දැඩි සුළඟට දිගුවෙලාවක් නිරාවරණය සිටින විට,  උණ පාචනය වැනි රෝගවලින් පෙළෙන විට දෛණික අවශ්‍යතාවයට වඩා වැඩියෙන් ජලය පානය කළ යුතු වෙයි.

දරුවා ක්‍රීඩාකරන විට නියමිත ප්‍රමාණයට වඩා ජලය පානය කිරීමෙන් ඇතිවන වාසිය කුමක්දැයි දැන් අප සොයා බලමු.  සැබවින්ම එසේ දෛණික අවශ්‍යතාවය ඉක්මවා ඒ අවස්ථාවලදී ජලය පානය කිරීමෙන්  ඉතාමත් හොඳින් ක්‍රීඩාකිරීමේ හැකියාව ඇතිවෙයි.
දැන් අප ශාරීරික ක්‍රියාකාරකම්වල නියැලෙන විට පානය කළ යුතු ජල ප්‍රමාණයන් ගැන අවබෝධයක් ලබා සිටිමු. ශාරීරික ක්‍රියාකාරකමකට පැයකට පෙර මිලි ලීටර 500 ක පමණ ජල ප්‍රමාණයක් පානය කර සිටින්න. ක්‍රියාකාරකම අතර තුර දී  සෑම ක්‍රියාශිලී මිනිත්තු 15 කට වරක්  මිලි ලීටර් 250 ක්  පානය කරන්නට වග බලා ගන්න. ක්‍රියාකාරකමකට පසු මි ලි ලීටර 250 ක්  පානය කරන්න. මේවා නිර්දේශිත නියම ප්‍රමාණයන් වෙයි.

අප දැන් පානය කරන්නට අවශ්‍ය මොනවාද යන්නත් සොයා බලමු.  අප මේ දියර ප්‍රමාණයන් වශයෙන් කතාබහට ලක්කරනුයේ පැණි බීම හෝ ශක්ති ජනක පානයන් යැයි කියාගන්නා වෙළඳ පොලේ පවතින පාන වර්ග පිළිබඳව නොවේ.  එම පානයන් සියල්ලම කෘතිම පානවර්ග වන අතර  ඒවායේ අඩංගු විවිධ රසායණ ද්‍රව්‍ය දරුවාට ව්ව්ධ ආකාරයේ හානි ඇතිකරවයි.  බොහෝ විට කෘතිම බීම වර්ගවල සීනි බහුලය, උදරයේ අපහසුව ඇතිකරවයි. රසායණික බහුලයි, කැලරි අධිකයි,කෘතිමයි, ස්ථූලබව ඇතිකරයි. 
 නමුත්, ජලය සජලනය ඇතිකරයි, නැවුම් බව ඇතිකරයි, සිරුර සෞඛ්‍යමත් කරයි, කුරුලෑ වළකයි, කැලරි රහිතයි, ස්වභාවිකයි,  තෘප්තිය ඇතිකරයි, සිරුරට ගුණදායකයි. මේ හැරෙන්නට ඔබට වෙනත් ආහාර මගින්ද ජලය ලබාගත හැකිය.  ඒ පලතුරු , පලා, කිරි ආහාර සහ තේ, තැඹිලි, කැඳ සුප්, වැනි පානයන්වලද ජලය විශාල ප්‍රතිශතයක් අන්තර්ගතව පවතියි.  එමෙන්ම ඖෂධීය පාන ලෙස අප කවුරුත් දන්නා රණවරා, පොල්පලා, බෙලි මල් වැනි ඖෂධීය පානයන්  පරිභෝජනයට එක්කර ගැනීමෙන් සිරුරට ජලය ලබාගත හැකිය.
 ඔබ ප්‍රමාණවත් ලෙස ජලය පානය කරන්නේ නම් මුත්‍රා දැවිල්ල ආදී තත්ත්වයන් ඉතාමත් අඩු වන අතර මුත්‍රා අවර්ණ බවකින් යුක්තය.
 පිපාසය ඇතිවන්නට පළමු ඔබ ජලය පානය කළ යුතු බව මතක තබාගන්න.  නිතර නිතර ජලය යම් ප්‍රමාණයක් පානය කිරීමේ පුරුද්ද ඇතිකර ගන්න. එමෙන්ම දවස පුරාම ජලය පානය කිරීමට අවශ්‍යය.  දරුවා පාසල් යන විට ඔබ කිසියම් ගමනකට පිටත්වන විට වතුර බෝතලයක් රැගෙන යන්නට වග බලාගන්න. විශේෂයෙන් උදෑසන අවදි වූ විගසම වතුර වීදුරුවක් බොන්නට පුරුද්දක් ඇතිකර ගන්න, රාත්‍රි නින්දට පෙර හා ස්නානයට නැතිනම් පිහිනීමට ප්‍රථම ජලය පානය කරන්නට හුරුවෙන්න. එවිට ඔය ඔබේ හොඳ සෞඛ්‍ය පුරුදු අතර වඩා හිතකර පුරුද්දක් ලෙස එය පවතිනු ඇත. 

ඔබ දිනකට අවශ්‍ය තරමේ ජලය ප්‍රමාණයක් පාවිච්චි නොකරන්නේ නම්,  
අධ්‍යාපන කටයුතු සඳහා මානසික ඒකාග්‍රතාව පවත්වා ගැනීමට අපහසුවීම
ප්‍රශස්ත මට්ටමින් ක්‍රීඩා සහ විෂය භාර ක්‍රියාකාරකම් කිරීමට නොහැකි වීම
 ශරීරය විජලනයට ලක් වී පිපාසය ඇතිවීම
මුඛය සහ ඇස් වියළීම නිසා ඒවායේ විෂ බීජ වර්ධනය වීම
 නිදිමත ගතිය හා ශාරීරික දුර්වලබව  ඇතිවීම
 ඉක්මණින් කේන්ති යෑම
සම වියළි යාම සහ රැළිවැටීම

 යන ලක්ෂණ පහළ වෙයි.  දැන් ඔබේ පාසල් කාලය තුළ නිවසෙන් රැඟෙන යන ජල බෝතලය පාසල් කාල වේලාව තුළ දී හැකි අයුරින් පානය කිරීම ඔබගේ පාසල් කටයුතුවලට සහ ක්‍රීඩාවට කොතරම් සේවයක් සලසන්නේද යන්න සිතා බලන්නට කාලය මදක් වැය කරන්න.එමෙන්ම ඔබ වැඩිහිටි අයෙකු නම් ජලය නිසි අයුරින් පානය කිරීම තුළ ඔබට අත්විඳින්නට ලැබුණු ක්‍රියාශීලීබව සම්බන්ධයෙන් අන් අයද දැනුම්වත් කරන්න.

මේ දවස්වල බහුලව පැතිරෙන උණ

කලින් කලට හිස ඔසවන වසංගත රෝග අතර බොහෝමයක් රෝගවල මූලික රෝග ලක්ෂණය වන්නේ උණ ඇතිවීමයි. උණ කියන්නේ රෝගයක් නොව රෝග ලක්ෂණයක් බව අප කොතෙකුත් අද සෞඛ්‍ය පිටුව හරහා සාකච්ඡා කර ඇත. නමුත් උණ කියන්නේ ඉස්සර නම් ඒ තරම් ගණනකට ගත් රෝගයක් නෙවෙයි. වෙනිවැල්ගැට, කොත්තමල්ලි ටිකක් තම්බලා බිව්වම ඇරිල යයි කියලා හිතපු උණ කියන රෝග ලක්ෂණය ගැන දැන් අමුතුවෙන් හිතන්න වෙලා තියෙන්නේ පරිසරයේ තිබෙන වෛරස හා ඇතැම් බැක්ටීරියාවන්ගේ ක්‍රියාකාරිත්වය නිසාම විතරක් නෙවෙයි. උණ හැදුණම දැන් දින දෙකකට වඩා ඉවසන් ඉන්න කියලා වෛද්‍යවරුන්ට උපදෙස් දෙන්න බැරි තත්ත්වයක් ඇතිවෙලා. උණ කියන්නේ මනුස්සයෙකුට ජීවිත කාලයේදී වැඩි පුරම අත්දකින්න සිදුවී ඇති තත්ත්වයක් වුණත් අද අපි ඒ ගැන අලුතින් කතාකරන්න පෙළඹෙන්නේ ඒ උණට යටින් ඔබව සොයා එන අනෙකුත් රෝග ගැන නොසැලකිලිමත් වෙන්න බැරි නිසයි. උණ කියන්නේ මොනවගේ දෙයක්ද? ඇත්තටම උණක් ඇතිවෙන්නේ ඇයි 'අද' සෞඛ්‍ය පිටුව තුළින් අද කතාබහ ඒ ගැනයි.


උණ කියන්නේ අපේ සිරුරේ පවතින සාමාන්‍ය උෂ්ණත්වය ඉක්මවා අපේ සිරුරේ උෂ්ණත්වය ඉහළ යන ක්‍රියාවක් බව ඔබ දන්නවා . ඇඟපත රිදීම, හිසරදය, ප්‍රතිශ්‍යාව, කැස්ස , කොන්ද කැක්කුම වැනි ලක්ෂණ කීපයක් එකවර ඇති වුණාම මට උණ ගැනෙන්න වගේ කියලා ඔබම රෝගය තීරණය කරන තරම් සුලබ තත්ත්වයක් තමයි උණ කියන්නේ. නමුත් මෙසේ ශරීර උෂ්ණත්වය නිකරුණේ ඉහළ යන්නෙ නැති බව ඇත්තක්. එයට යම් කිසි හේතුවක් පැවතිය යුතුයි. බහුලම හේතුව ලෙස අපට හමුවෙන්නේ අපේ සිරුරට කිසියම් විෂ බීජයක් වෛරසයක් ඇතුළු වුණාමයි. වෛරසයන් කළින් කළට අවුරුද්දකට කීප වතාවක්ම මෙසේ පැතිර යමින් උණ රෝග ඇතිකරයි. නමුත් හැමවිටම උණ ඇතිවන්නේ වෛරසයක් නිසා නොවේ. විවිධ විෂ බීජ වර්ගවලටද මේ වෙනුවෙන් ඇඟිල්ල දිගුකරන අතර  විෂ බීජයක් හෝ වෛරසයක් යනු පියවි ඇසින් දැනගත නොහැකි  නමුත් වාතය තුළ විශාල වශයෙන් පැවතෙමින් වැඩෙමින් පැතිර යා හැකි වූවකි. 

 සිරුර තුළට මේ විෂ බීජ ආදිය ඇතුළුවෙන්නේ කෙසේදැයි දැන් ඔබට ගැටලුවක් පැන නගිනු ඇත. විෂබීජයක් හෝ වෛරසයකින් ආසාදනයක්  ඇතිවූවෙකුට කිවිසීම හෝ කැස්ස ඇතිවීම රෝග ලක්ෂණයකි. මේවා එවැනි අයෙකුට නිරායාසයෙන්ම ඇතිවෙන්නක්  බව ඔබ අත්දැකීමෙන්ම දනී. නමුත් එවිට අපේ ස්වසන මාර්ගය හරහා  කෝටි ගණනක් විෂ බීජ වාතයට මුදා හැරෙයි.
නමුත් අපිට උණක් හැදෙන්න නම් මේ විෂ බීජ කෝටි ගණන අවශ්‍ය වන්නේ නැහැ. එයින් එකක් පමණක් ශ්වසන මාර්ගයෙන් ශරීරයට ඇතුළු වුණාම ප්‍රමාණවත්.  මේ දිනවල උණ රෝගීන් වැඩි පුර හමුවන්නට හේතුව දැන් දැන් ඔබට යම් අවබෝධයක් ගෙන දෙනු ඇති. මේ දිනවල වැඩි පුර ජනයා ගැවසෙන තැන්වල ඇවිදීම එතරම් සුදුසු දෙයක් නොවන්නේ මෙවැනි විෂබීජ ආසාදනයකින් පෙළෙන අය ඒ ජනාකීර්ණ පරිසර තුළ කෙතරම් ගැවසෙනු ඇත්ද, යන්න ඔබට පියවි ඇසින් දැකගත නොහැකි නිසාමය.  අනෙක එක් අයෙකුගෙන් කෝටි ගණනක් විෂ බීජ පරිසරයට මුදාහැරෙනවා නම් වැඩි පිරිසක් ගැවසෙන ජනාකීර්ණ පරිසරයකින් ඔබට ඇතිවෙන අවධානම කොතරම්ද යන්න මදක් සිතා බලන්න. ඒ නිසා උත්සව සමයේ හැම විටම කිසියම් ආකාරයක වෛරස් උණක් ඇති වී වේගයෙන් පැතිරීම සම්බන්ධව  අසන්නට ලැබීම දැන් දැන් සුලබය.

20525210_1425183577566606_491962029496079411_n

 කෙසේ නමුත් මෙවැනි උණකින් වැඩිපුරම සංකූලතා මතුවිය හැකි අවධානම් සහිත පිරිසක් ලෙස කුඩා අතදරුවන් ගැබිනි මවුවරුන් මෙන්ම වයස්ගත පුද්ගලයන් හඳුන්වන්නට පුළුවන්. උණ සෑදීම ආරම්භ වෙන්නේ එසේ සිරුරකට ඇතිවෙන ආගන්තුක විෂබීජයක් වෛරසයක් ශරීරරය තුළට ඇතුළු වී එය පැතිරයාමට විරුද්ධව සිරුර විසින් ඇතිකරන සටනෙහි ප්‍රතිඵලයක් ලෙසයි. උණ ඇති වූ විට දින කීපයක ඇවෑමෙන් එය ඉබේම බැස යතත් ප්‍රතිකාර එය පවතින්නට ඉඩ නොහැර ඉක්මනින් සුවකර ගන්නේ විෂබීජය පාලනය කරගැනීම අවශ්‍ය වන බැවිනි. සෙම්ප්‍රතිශ්‍යාව ඇති වූ විට එය වෛරසයක් මාර්ගයෙන් ඇති වී නම් එයට බැක්ටීරියාවක බලපෑමක්ද ඇතිවෙන්නට යම් සම්භාවිතාවක් තිබෙනවා. සෙම්ප්‍රතිශ්‍යාව වැනි තත්ත්වයකදී සෙම සුදු පැහැයක් ගන්නා නමුත් එයට බැක්ටීරියා බලපෑමක්ද ඇති වී නම් එය පහසුවෙන් දැනගන්නට ඔබට හැකියාවක් ලැබෙයි. බැක්ටීරියාවක් ඇතුළු වී නම් සෙම සොටු කහපාටවීමක් දකින්නට පුළුවන. එසේම දියර ආකාරයේ සෙම වෙනුවට කැදලි සහිත උකු ස්වරූපයක් බැක්ටීරියාවක බලපෑමට හසුවූ සෙම තුළින් දැකිය හැකියි. මේ තත්ත්වය නොසලකා හැරිය යුතුවූවක් නොවේ. මේ තත්ත්වය නොසලකා හිඳීම තුළ ශ්වසන මාර්ගයේ පතුලට බැක්ටීරියාව ඇතුළුවුවහොත් නියුමෝනියාව වැලඳෙන්නට ඉඩ ඇති බව අමතක කළ යුතු නොවේ. මෙහිදී ප්‍රතිකාර නොසලකා සිටිය හොත් නියුමෝනියාව දරුණු වී මරණාසන්න තත්ත්වයටද පත්වීමට හැකියාව තිබේ.  කහපාට සෙම ලා පැහැති ගුරු පැහැයක් ඇතිවීම හෝ රුධිරය  සහිත බවක්  ඇතිවීම පපුවේ එක් පසෙක වේදනාව දැනීම මෙන්ම නොබසින උණ ලක්ෂණ ලෙස හඳුනාගන්නට හැකියි. කෑම අරුචිය වමනය ආදී තත්ත්වයන් දිගින් දිගටම පැවතීම නිසා  රෝගියාට මුත්‍රා පිටවීම අඩුවෙන්නට හැකි වනුයේ ශරීරය විජලනයට පත්වීම නිසාය.  ඒ නිසා උණ සහිත රෝගියාට වමනය ආදී රෝග ලක්ෂණ පැවතියදී වුවත් දියර වර්ග ලබාදීම අත්‍යවශ්‍ය වන අතර ජීවනී වැනි පාන වර්ගවලින් සිරුරට අවශ්‍ය ලවණ ආදියද ලබාදෙන්නට හැකියාව පවතියි. බොහෝ විට උණ ඇතිවන්නේ වෛරසයකින් වුවත් බැක්ටීරියා ආසාදනයකින් වුවත්  ඔබ විසින් අමතක නොකළ යුතුවන්නේ උණ යනු රෝග ලක්ෂණයක් බැවින් ඒ ගැන අවධානය දැක්වීම ඉතා වැදගත් බවයි. ඇතැම් විට බැක්ටීරියා හෝ වෛරස් ආසාදනයකින් තොරව වුවත් උණ ඇතිවන අවස්ථාවන් පැවතිය හැකිය. ඒ සිරුරේ කිසියම් අවයවයක ඇතිවන වෙනත් රෝග තත්ත්වයක ලක්ෂණයක් ලෙසය. මේ නිසා උණ යනු හෙම්බිරිස්සාවක හෝ සෙම යන තත්ත්වයක ප්‍රතිඵලයක් සේ සිතා නොසලකා හැරීමෙන් වළකින්න. ඩෙංගු වැනි රෝග තත්ත්වයකදී ඇතිවන උණ ,සෙම හෝ කැස්සක සලකුණු නැතිව මතුවිය හැකිය. බොහෝ විට වෛද්‍යවරුන් උපදෙස් දෙනුයේ දින දෙකකට වඩා උණ පැවතියේ නම් වහා රුධිර පරීක්ෂණයක් සිදුකරගන්නා ලෙසයි. එසේ රුධිර පරීක්ෂණයක් සිදුකරගන්නා විට රුධිර පට්ටිකා අඩු බවක් දකින්නට නොවුනේ නම් ඔබ එය ඩෙංගු රෝගයට වැලඳුන උණක් යැයි අමතක කරන්නට ඉඩ තිබේ.

c9e8d9069e929f4898939a62f1adcffd_XL

තෙවැනි දිනයටත් උණ සුව නොවී හෝ අඩු නොවී ඇස්යට වේදනාව, හන්දිපත් වේදනාව වැඩිවෙමින් පවතින්නේ නම් පැරසිටමෝල් හැර අන් ඖෂධයක් පානය නොකොට වහා නැවත රුධිර පරීක්ෂණයක් කළ යුතු බව මතක තබාගන්න. උණ කුමන හේතුවක් නිසා මතුවුවත් පැරසිටමෝල් පමණක් මූලිකව ලබාගන්න. වෛද්‍ය නිර්දේශය නොමැතිව කිසිම වෙනත් ඖෂධයක් හිතුමතයේ නොගන්න වග බලාගන්න. ඇස්ප්‍රීන් වර්ගයේ ඖෂධ ඩෙංගු වැනි තත්ත්වයකදී භයානක ප්‍රතිඵල ගෙනදිය හැකි බැවින් ඒ සම්බන්ධයෙන් දැනුවත්ව සිටින්න. උණ ඇති වූ විට සමහරෙකු ඇඟ සීතල කරන්නේ යැයි කියනු ඔබ අසා ඇති. එවන් අවස්ථාවල බොහෝ දෙනෙකු සිතන්නේ ශරීරය උණුසුම් කිරීමට උණුසුම් ඇඳුම් හෝ බ්ලැන්කෙට්ටුවකින් සිරුර පොරවා ගැනීම අවශ්‍ය බවයි. නැත. කාමර උෂ්ණත්වය ඇති වතුරින් සිරුර හොඳින් තෙත මාත්තු කර ඇඳුම්වලින් සිරුර හොඳ හැටි ආවරණය කිරීමෙන් වැළකී ,පහසු ඇඳුමකින් යුතුව විදුලි පංකාවක් ඇසුරේ රැඳීමෙන් සිරුරේ උෂ්ණත්වය පහළ බසිනු ඇත. සමහර වෛරස් උණ ඇති වූ රුධිරයේ පට්ටිකා ප්‍රමාණයේ යම් පහළ බැසීමක් විය හැකිය. නමුත් එය විශාල ප්‍රමාණයකින් නොවේ. යම් පමණකින් මදක් වැඩි ආකාරයකින් රුධිර පට්ටිකා බැස ඇතැයි රුධිර පරීක්ෂණය අනුව හෙළි වුවහොත් නැවත වතාවක් රුධිර පට්ටිකා සම්බන්ධ පරීක්ෂණයක් සිදුකරවාගෙන බලන්න.

එහිදී ඩෙංගු උණ වැලඳී ඇත්නම් රුධිර පට්ටිකා සැලකිය යුතු ප්‍රමාණයකින් පහළ බැස තිබෙන්නට පුළුවන. කෙසේ නමුත් උණ ඇති වූ විට ඔබ විසින් නොකළ යුතු ක්‍රියා කීපයක් සම්බන්ධයෙන් මතක් කිරීමක් කිරීම වැදගත්ය. උණ ඇති විට ස්නානය කිරීමෙන් වළකින්න. එමෙන්ම ආහාර අරුචිය ඇත්නම් ආහාර සහ පාන යන සියල්ලම නොගෙන සිටීමෙන් වළකින්න. ඇතමුන්ට උණ ඇති වූ විට බඩ බුරුලට යෑමේ ලක්ෂණ පැවතිය හැකිය. එහෙත් බත් කැඳ, වතුර , ජීවනී , සුප්  හෝ සුදුසු පාන වර්ග ගැනීමට වග බලා ගන්න. ඔබේ සිරුරෙන් වමනය ලෙස හා බඩ එළිය ලෙස ද යම් ජලය ප්‍රමාණයක් පිටවන බැවින් විජලනය ඇතිවන්නට පාන වර්ග නොගෙන සිටීම බලපෑ හැකි අතර එය වඩාත් බැරෑරුම් ගැටලු මතුකරවිය හැකි බව අප ඉහතදීද ඔබට සිහිපත් කළෙමු. සෙම හෝ කැස්ස වැනි ලක්ෂණයක් ඇති විට හිතුමතයේ ප්‍රතිජීවක ඖෂධ ලබාගැනීමෙන් වළකින්න.ඔබට වැලඳී ඇත්තේ බැක්ටීරියා ආසාදනයකින් එන තත්ත්වයක්ද වෛරස් ආසාදනයකින් මතුවන තත්ත්වයක්ද යන්න විනිශ්චය කරන්නට ඔබට හැකියාවක් නැති බැවින් එය ඔබේ වෛද්‍යවරයාට බාර කරන්න. හැකි තාක් මද උණුසුම් වතුර පානය කිරීමට උත්සහ කරන්න. කය වෙහෙසවීමෙන් වළක්වා මදක් විවේක ගන්න. ඩෙංගු උණ තත්ත්වයකදී මෙය ඉතා අත්‍යවශ්‍ය දෙයකි. ඔබට උණ වැලඳී ඇත්නම් සෙනඟ ගැවසෙන තැන්වලට යෑමෙන් වළකින්න. මෙකළ උණ වැඩි වීමට හේතුව කුමක්දැයි ඔබම විශ්ලේෂණය කර බලන්න. එවන් ආසාදන සහිත උණ රෝගීන් බහුලව සාමාන්‍ය නිරෝගී පුද්ගලයන් වෙත ගොස් රැඳීමෙන් වළකින්නේ නම් ඔවුන්ගෙන් නිකුත්වන විෂබීජ නිරෝගී පුද්ගලයන්ගේ ශ්වසන මාර්ග හරහා ඔවුන් ආක්‍රමණය කිරීම සෑහෙන දුරකට වළකිනු ඇත.

 

 

මා ලියූ ‘හඬ කැවීම් කලාව’ පොත සියල්ලන්ටම අත්පොතක් වශයෙන් භාවිත කළ හැකියි

ජාතික රූපවාහිනියේ හඬ කැවීම් කලාව සම්බන්ධයෙන් කතා කරන විට අපට එක්වරම සිහිපත් වන දැවැන්ත චරිත දෙකක් තිබේ. ටයි මහත්තයා එයින් පළමු වැන්නාය. එයින් පසු හඬ කැවීම් කලාව සම්බන්ධයෙන් කතා කරන විට කිසිවිටෙක මග හැරිය නොහැකි අනෙක් පුද්ගලයා වනුයේ අතුල රන්සිරිලාල් මහතාය. හඬකැවීම් කලාවේ බොහෝ සොඳුරු අත්දැකීම් ළමා සහ තරුණ අයට පමණක් නොව පවුලේ සැමටම ගුණාත්මක අයුරින් ගෙන දෙන්නට පුරෝගාමීව කටයුතු කළ අතුල, අද ජාතික රූපවාහිනියේ හඬ කැවීම් අංශයෙන් විශ්‍රාම ලබාගැන්ම සිදු වුවද, ඔහු හඬ කැවීම් කලාවේ උන්නතිය වෙනුවෙන් එහි යමක් තබා යන්නට වෙහෙසෙයි. ඒ ජාතික රූපවාහිනියේ රජත මැදිරියේදී අද සවස් භාගයේය. ඔහු විශ්‍රාම ලබමින් ජාතික රූපවාහිනියටත් සමස්ත හඬ කැවීම් කලාවටත් තබා යන ඒ මාහැඟි දායාදය කුමක්ද? මේ සටහන ඒ ගැන විමසීම වෙනුවෙනි.


DSC_1375

'මා විසින් ලියූ 'හඬ කැවීම් කලාව' පොත මා අද, මා සේවය කළ ජාතික රූපවාහිනිය තුළදීම ජනගත කරමින් මගේ සමුගැන්ම කරන්නට සිතුවේ මා හඬ කැවීම් කලාව තුළ අත්දැකීමෙන් හා ඉගෙනීමෙන් ලත් දැනුම නිර්ලෝභීව අලුත් හා ශිල්පීය මට්ටමේ කාහට වුවත් යම් ප්‍රයෝජනයක් ලබාගැනීම පිණිස මෙහි තබා යා යුතු යැයි හැඟුණු නිසයි. මේ පොත හඬ කැවීම් කලාවේ විවිධ ඉසව් ස්පර්ශ කරන ආකාරයේ එකක්. මෙය හඬ ශිල්පීන්ට පමණක් නෙවෙයි කාටූන් නිර්මාණ කරන ශිල්පීන්ට, පිටපත් රචකයන්ට, වැඩසටහන් නිෂ්පාදකවරුන්ට මෙන්ම හඬ කැවීම් සඳහා නිර්මාණ තෝරා ගන්නන්ට ආදී හඬ කැවීම් කලාව හා සම්බන්ධ උනන්දුවක් දක්වන සියල්ලන්ටම අත්පොතක් වශයෙන් භාවිත කළ හැකි අන්දමේ එකක්.'

Q ඇත්තෙන්ම මේ වනවිට හඬ කැවීම් කලාව සම්බන්ධයෙන් විවිධ විවේචන එල්ල වන යුගයක්. ඇතැම් නිර්මාණ අපේ සමාජය හා සංස්කෘතිය හා ගළපන්න ගිහින් විවිධ ගැටලු ඇති වී තිබෙන බවක් පෙනෙන්නට තිබෙනවා. ඔබ එය හා එකඟ වෙනවද?

ජාතික රූපවාහිනියට නම් හඬ කැවීම් කලාව සම්බන්ධ ඔය කියන ගැටලු මතු වී නැහැ. අනෙකුත් හඬ කැවීම් කලාව හා සම්බන්ධ ආයතනවලින් කෙරෙන නිර්මාණවලදී නිර්මාණ තෝරාගැනීමේදී මතුවුණු ගැටලු සමාජයේ යම් යම් මතිමතාන්තර හා ගැටෙන්න පුළුවන්.  ලංකාවේ හඬ කැවීම් කලාව අවුරුදු තිස් පහක විතර ඉතිහාසයක් පවතින්නක්. ඒ දිනවල මම තොටවත්ත මහත්තයා සමග කාටූන් පිටපත් රචනයේ සිට සියලු කාර්යයන් සම්බන්ධ වැඩ කරමින් සිටියා. ‘මල්ගුඩි දවස’ වගේම විවිධ මපට් වැඩසටහන්, ‘දොස්තර හොඳ හිත’ වගේ නිර්මාණ බිහි කිරීමේදී ඒ ඒ පිටපත්වල අපේ සලකුණු ඇති කරන්න ටයි මහත්තයා කළ වික්‍රමයන් විස්මිත ලෙස ජනතාව අතරට ගියා.  ඉංග්‍රීසි පිටපතේ ‘බර්ඩ් කැනොට් ෆ්ලයි’ කියල තිබුණ එක ටයි මහත්තයා ලීවේ ‘බැහැයි කියල බෑ’ කියන වචනවලින්. ‘බෙයා බෙයා’ එකේ වලස්සු ලස්සන වෙන්න ගිහින් ලොම් අහිමි කරගත් එක ගැන ටයි මහත්තයා කීවෙ ‘මොඩ්වෙලා මෝඩ වෙලා’ කියලා. ‘දොස්තර හොඳ හිත’ නිර්මාණයේදී තල්මසෙක් ඇවිත් දොස්තර හොඳහිතට කියනවා ළා තණකොළ පෙත්තාස් කණ්ඩායමේ කට්ටිය ලෙඩ වෙලා කියලා.  ඒ රෝගයට හේතුව දිය රකුස් කෙලෙස් විෂ පෙවීම කියලයි ඔහු ලිවුවේ. එයට ප්‍රතිකාර විදිහට නියම වුණේ දහම් පැන්. ඒ දහම් පැන් බීපු ළා තණකොළ පෙත්තාස් ලා නැවත ඉරිසියාව, වෛරය, ක්‍රෝධය රහිත අර කෙලෙස් විසෙන් ඇති කරගත් සියලු ආබාධ දුරු කරලා සමාජයට එනවා. මෙවැනි ලස්සන සංකල්ප කොහෙද බටහිර පිටපත්වල. ඒවා අපේ සංස්කෘතිය හා ගළපන්න අපට හැකියාව තියෙනවා නම් අපට කිසිම චෝදනාවක් එල්ල වෙන්නෙත් නැහැ. මේවා ගැන මේ පොතේ සියලුම දේ අඩංගුයි. අත්පොතක් යැයි මා කීවේ අධ්‍යාපන පොතක් බව කියන්නයි. එයින් මතු හඬ කැවීම් කලාවේ නියැළෙන අයට, නියැළෙන්න බලාපොරොත්තු වෙන අයට, ගීත රචකයන්ට ආදීන්ටද මෙය ඉතාම වැදගත් වේවි.

113~1

Q විදෙස් නිර්මාණ අපේ සමාජයට ධනාත්මක වශයෙන් බලපා තියෙන බවක්  ඔබට කිවහැකිද? 

 ඔව්, සීයට සීයක් ඒ නිර්මාණ අපේ සමාජයට ගන්න අමාරුයි. මොකද අපට යම් යම් සීමා තිබෙනවා. දුම්පානය කරන , මත්පැන් පානය කරන  දර්ශන අපට ප්‍රචාරය කරන්න අවසර නැහැ. එමෙන්ම ලිංගික දර්ශන  මෙවැනි දර්ශන අසීමාන්තිකව පවතින නිර්මාණයක් අපට අපේ සමාජයේ තිබෙන සංස්කෘතිය හා ගළපන්න බැහැ. මේ නිසා හඬ කැවීම සඳහා නිර්මාණ තේරීමේදී අපට ඉතාම බැරෑරුම්ව සිතන්න අවශ්‍ය දේ මතු වෙනවා. ඒ සම්බන්ධයෙන් මේ පොතේ බොහෝ විස්තර ඇතුළත්. අපි කාටත් අදත් ඔෂීන් කතාව මතකයි නේද, සුජාත දියණිය මතකයි නේද? කිසියම් නිර්මාණයක් තුළින් සමාජ මෙහෙවරක් කරන්නට හැකි වූ බවට ඒ නිර්මාණ උදාහරණයක්.

Q ඔබ අද ජාතික රූපවාහිනියට සමුදෙනවා. නමුත් ඔබෙන් සේවයක් තවදුරටත් ජාතික රූපවාහිනියට අවශ්‍ය වුණොත් ?

ඒ ගැන ඉතිං කියන්න තියෙන්නේ අවශ්‍ය වුණොත් එය සලසන්න අකමැත්තක් නැහැ කියලයි. නමුත් මම වෙනත් වැඩ රාශියක් ආරම්භ කිරීම පිණිස දැනටමත් වැඩපිළිවෙළක් සැලසුම් කරමින් සිටිනවා.  ඒ ‘දොස්තර හොඳ හිත’ කාටූන් චිත්‍රපටයක් ලෙස නිර්මාණය කිරීම,  අපේ විද්වතුන් හා එක්ව ‘මහාවංශය’ සිනමාවට නැගීමත් එක් බලාපොරොත්තුවක්.  අපි ජාතික රූපවාහිනියෙන් හඬ කැවීම් ශිල්පීන් තෝරලා නොමිලේ පුහුණුවක් ලබාදුන්නා. නමුත් හඬ කැවීම් කලාව හෝ ඒවාට අදාළ දේ නිවැරදිව ඉගෙනගන්න විදිහක් අපේ අයට නැතිකම නිසා හොඳ ශිල්පීන් අපට මුණ නොගැසී ඉන්න පුළුවන්. මේ නිසා මං ‘ලංකා රේඩියෝ ඇන්ඩ් ටෙලිවිෂන් ඇකඩමි’ එකක් ආරම්භ කර ඒ අඩුව පූරණය කරන්නට බලාපොරොත්තුව සිටිනවා. 

Q ඔබට මේ හඬ කැවීම් කලාවේ නියැළීමෙන් ලත් සම්මාන අපමණයි. එමෙන්ම ඔබ මේ කාරියේ ඇති අභියෝග ගැන මොනවද හිතන්නේ? 

අභියෝගවලට මම බය නැහැ. ඒවා කැපවීමෙන් සහ වැඩ කිරීමෙන්, පලපුරුද්දෙන් ජයගන්න හැකිවුණ අවස්ථාත් අපමණයි. එමෙන්ම සම්මාන දහස් ගණනක් මේ සේවා කාලය තුළ මට ලැබිලා තියෙනවා. ඒ අභියෝගවලට නොසැලීම පිළිබඳ සාක්ෂි. 
‘හඬ කැවීම් කලාව’ පොත පරිශීලනය තුළින් ඔබට ඒ සම්බන්ධ බොහෝ දෑ අධ්‍යයනය කළ හැකි වේවි. එය බොරැල්ල සදීපා ප්‍රකාශකයන්ගේ ප්‍රකාශනයක්. පොත කියවන්න. ඔබේ දැනුමට එකතු විය යුතු බොහෝ දෑ එයින් හමු වේවි.

 

නිරෝගිමත් ජීවිතයකට යකඩ ඕනෙමද ?

අද යකඩ යැයි කියූ විට ඔබට එක්වරම සිහිපත් වනුයේ  යකඩ නම් වූ ලෝහය විය හැකිය. නමුත් මේ කතාබහ නම් ඒ යකඩ ගැන  නොවේ. අපේ සිරුරට අත්‍යවශ්‍ය නමුත් මේ වන විට එතරම් තැකීමක් ඇතිව ලබා නොගන්නා පෝෂකයක් වූ යකඩ නැතිනම් අයන් පිළිබඳවය.  බොහෝ දෙනෙකු ආහාර  අවශ්‍ය යැයි සලකන්නේ කුසගින්න නිවීමට මිස ශරීරයේ පැවැත්ම උදෙසා නොවේ. අතට අසුවන යමකින් කුසගින්න නිවාගන්නට පෙළඹෙන බොහෝදෙනෙකුට පෝෂණය සම්බන්ධයෙන් අවධානයක් දක්වන්නට මතක් වෙන්නේ කිසියම් රෝගී තත්ත්වයකට මුහුණ දුන්පසුව විය හැකිය. නමුත් යමෙකුට පෝෂණය අවශ්‍ය වෙන්නේ කිසියම් ගැටලුවක් සම්බන්ධයෙන් රෝහල් ගත වූ විට පමණක් නොවේ. මෙවර අපි අද සෞඛ්‍ය පිටුවේ විශේෂ අවධානයට බඳුන් කරනුයේ එම කාරණයයි.


අද බොහෝදෙනෙකු ,පෝෂ්‍යදායක ආහාර යනු කුමක්දැයි සොයන්නට කාලය කැප නොකර අධික මේදය සහිත කෙටි කෑම වර්ග මෙන්ම ප්‍රයිඩ් රයිස් යනුවෙන් හඳුන්වන තෙලින් තෙම්පරාදු කරන ලද බත් ආහාරයට ගැනීම විලාසිතාවක් බවට පත්කරගෙන තිබේ. නමුත් මේවායින් සිරුරට ලැබෙනුයේ කිනම් පෝෂණයක්ද යන්න සෙවීමට උනන්දු නොවෙන්නේ කුසගින්න නිවුනු පසු එයින් එහා ඒ සම්බන්ධයෙන් සිතන්නට කාලයක් වෙන් නොකරන බැවිණි. සමහරු තුන් වේලටම බත් කන්නට පුරුදුව සිටින බව පැවසුවත් ඒ තුන්වේල තුළ ආහාරයට ගත් දේ සමබල ආහාර වේලක අවශ්‍යතාවය පිරිමැහුවාද යන්න තැකීමක් නොකරෙයි. බොහෝ විට පරිප්පු පොල් සම්බල වැනි යමක් සමග උදෑසන බත් වේලක් ආහාරයට ගන්නා අය. නැවත දිවා ආහාරයටත් එක් එළවළුවක් හෝ මාළුවක් යොදාගනිමින් උදය ආහාරවේලෙන් දිවා ආහාර වේලට වෙනසක් ඇතිකරගන්නා අතර  රාත්‍රි ආහාරයටද බත් සමග එක් එළවළුවක් හෝ දෙකක් නැතිනම් පාන් වැනි යමක් ආහාරයට ගන්නට හුරු පුරුදුව සිටී. මෙසේ කළක් වැරදි ආහාර පුරුදු හා ජීවත්වන්නන් විවිධ පෝෂණ ඌණතාවයන් මෙන්ම ඒවා පදනම් කොට ගත් රෝගාබාධයන්ට මෙන්ම විවිධ බෝ නොවන රෝගවලටද ගොදුරු වෙන බව නොරහසකි. 
14927683559867_hd
 
නමුත් අපටම ආවේණික වූ ආහාර රටාවක් පැරැන්නන් අතර වූ බව සත්‍යයකි. උදෑසන ආහාරවේලට කිසියම් ධාන්‍යවර්ගයක් හෝ  කුරහන් ආදියෙන් සකස් කළ තලප හාල්මැස්සන් හෝ වෙල් මාලු වැනි හොද්දක් සමග ගන්නට පුරුදුව සිටි ඔවුන් තේ කෝප්පය වෙනුවටද කොළ කැඳ කෝප්පයක් බොන්නට හුරු පුරුදුව සිටියහ එයින් ඔවුන්ගේ උදෑසන ආහාරවේල රජෙකු මෙන් ගන්නට හැකියාවක් ඔවුනට වූයේ පෝෂණය එතරම්ම උසස් තලයක තිබුණු බැවිණි. දිවා ආහාරය ලෙසත් ඔවුන් ඒකාකාරී ආහාර රටාවක් නොව විවිධත්වයෙන් යුතු ආහාර ගන්නට හුරු පුරුදුව සිටි අතර ඒවා බොහෝ විට තම ගෙවත්තෙන් කොරටුවෙන් නෙලා ගත් එළවලු හෝ පලාවර්ග වූ අතර වෙල් මාලු ආදිය කරවල මේ ආහාර වේල් අතරට එක්ව තිබිණි.නමුත් අද එය දිනකට කුමන හෝ එළවලු වර්ගයක් දෙකක් වන තැනට පත්ව ඇති අතර පලතුරු පරිභෝජනයෙන් බොහෝ ඈත්ය. මේ නිසා මෙකළ බොහෝ දෙනෙකු පෝෂණ අෟණතාවයන්ට මුහුණ දී සිටියි.
 සැබවින්ම මෙසේ පෝෂණ ඌණතාවයන් වෙත ගොදුරුවෙන්නේ අප රටේ අය පමණක් නොවේ මෙය ලොව පුරාම පවතින ගැටලුවකි. කෙසේ වෙතත්  පෝෂණය යනුවෙන් හඳුන්වන්නේ පුළුල් පරාසයකට දිවෙන විෂයක් වුවත් අප එයින් අද යකඩ සම්බන්ධයෙන් පවතින තත්ත්වය විමසා බලමු.
0222
යකඩ, අපේ පෝෂණයට ඉතාම අවශ්‍ය සංඝටකයක්. අපි යකඩ ඌණතාවය ප්‍රබල සෞඛ්‍ය ගැටලුවක් වශයෙන් මේවන  විට හඳුනාගෙන ඇති   තත්ත්වයක්. එමෙන්ම යකඩ ඌණතාවය ලොව පුරාම ඉතා බැරෑරුම් ප්‍රශ්නයක්ව පවතින්නක් වන අතර විශේෂයෙන්ම සංවර්ධනය වෙන රටවල වඩාත් බහුල සෞඛ්‍ය ගැටලුවක් බවට පත්ව තිබෙන්නක්.  බොහෝවිට අප නීරක්තිය නැති නම් රක්තහීනතාවය රෝගයක් ලෙස සැලකුවත් එයට පදනම යකඩ ඌණතාවය බව එතරම් සිතන්නේ නැතිවීම ගැටලුවකි. සැබවින්ම යකඩ අපට අවශ්‍යද ඒ කුමක් සඳහාද යන්න අප දැනුම්වත්ව සිටිය යුතු කරුණකි. ආහාර මගින් අප ගන්නා යකඩ ප්‍රමාණය  අවශෝෂණය වී එය රුධිරට එක්වීමෙන් පසුව එයට රතු පැහැය ලැබෙන රතු රුධිරානුවල අඩංගු හිමෝග්ලොබීන් ප්‍රමාණවත්ව තබා ගැනීමට දායක වෙයි පසුව  පසුව හිමොග්ලොබීන්වලින් පොහොසත් එම රුධිරය ශරීරයේ පැවැත්මට අවශ්‍ය නොයෙක් අවයව කරා ගමන් කරනු ඇත. එයින් වඩාත් විශේෂත්වයක් ගනු ලබන්නේ පෙණහලු සිට ශරිරයේ පටක වෙත ප්‍රමාණවත්ව ගෙන යෑමට අවශ්‍ය හිමෝග්ලොබීන්  මෙම යකඩ නිසා ප්‍රමාණවත්ව පවතින බැවිණි. යම් ආකාරයකින් යකඩ අඩුවුවහොත් රුධිරයේ පවතින හිමෝග්ලොබීන් ප්‍රමාණය අඩුවෙයි. එවන් අවස්ථාවකදී යම් පුද්ගලයෙකු නීරක්තියට පත් වූවෙකු යන්න තීරණය කෙරෙයි.  දැන් අප මෙසේ නීරක්තියට ලක්වීම සම්බන්ධයෙන් මෙතරම් කලබල විය යුත්තේ ඇයිද යන්න විමසා බලමු. ? මෙකී ඌණතාවය මොළය , ස්නායු පද්ධතිය, ඇට මිදුළු, පේශීන් වැනි ශරීරයේ එදිනෙදා ක්‍රියාවලියට බලපාන විශේෂිත කොටස්වලට බාධා පමුණුවයි. නමුත් හානිය මෙතැකින් නිමවන්නේ යැයි පැවසිය නොහැකිය. අක්මාවේ නොයෙකුත් දුෂ්කරතාවලටද, මෙය බලපානු ලබන අතරම මෙය ඉතාම භයානක තත්ත්වයක් ලෙස හඳුනාගත හැකි වන්නේ යොවුන් වයසේ පසුවන තරුණියන් ගැබිනියන් බවට පත්වීමේදීය. අවසාන ප්‍රති ඵලය වෙන්නේ එවන් තැනැත්තියක් විසින් උපත ලබාදෙන බිළිඳා දක්වා මෙම යකඩ ඌණතාවයට ගොදුරුවීමේ ඉඩ කඩ සලසන බැවිණි. අප යකඩ සිරුරට අත්‍යවශ්‍යම පෝෂකයක් ලෙස සැලකීමට හා එම ඌණතාවයන් මගහැර ගැනීමට වෙහෙස ගත යුත්තේ එවැනි ඌණතා අපට මහත් හානි ඇතිකිරීමේ අවදානමක් ඇතිබැවිණි.
අප කවුරුත් එතරම් අවධානයක් නොදැක්වුවත් අපේ සිරුරින් යකඩ ඉවත්ව යන අවස්ථාද තිබෙයි. මෙසේ ඉවත්ව යන අවස්ථා  හඳුනාගෙන එම ඉවත්ව යන ප්‍රමාණයට ද සරිලන පරිද්දෙන් යකඩ සහිත ආහාර ලබාගැනීමට උනන්දුවෙන්නේ නමි එයින් ඇතිවන හානිය අවම කර ගත හැකිය.
 
එසේ යකඩ ශරීරයෙන් බැහැරවන අවස්ථා ලෙස සෛල බිඳීම්, කාන්තාවන්ගේ මාසික ආර්ථවය  හා වෙනත් රුධිර වහනයක් හැඳින්විය හැකිය. නමුත් සමහරෙකු ගේ සිරුරේ යකඩ ප්‍රමාණය ප්‍රමාණවත් වෙන්නේ ද තවත් කෙනෙක්ගේ එසේ නොවන්නේ ඇයිද යන්න අප විසින් අවධානය යොමුකළ යුතු කරුණකි.බොහෝවිට එයින් එක් ප්‍රධාන හේතුවක් වනුයේ  ආහාරයේ යකඩ අවශ්‍ය ප්‍රමාණයට අන්තර්ගත නොවීමය. 
 එසේත් නැතිනම් ආහාරයේ ඇති යකඩ උරාගැනීම  අඩුවිය හැකිය. එමෙන්ම ජීවන චක්‍රයේ සමහර අවස්ථාවල යකඩ අවශ්‍යතාවය වැඩිවෙන විට ඊට අවශ්‍ය ප්‍රමාණය නොගැනීමද විය හැකිය. අප ඊට උදාහරණ සැළකුවහොත් ගර්භිණී සමය ළදරු සමය, 1-2 වසර සඳහා අවශ්‍යතාව, යොවුන් විය, පේශින් වැඩීම, රතු රුධිරානු වැඩිවීම, මාස් ශුද්ධිය  ඇතිවීම සැලකිය හැකිය. මේ හැරුණු කොට ශරීරයෙන් අධිකව රුධිරය පිටවීම සම්බන්ධයෙන්ද  අවධානය දැක්විය යුතුව තිබේ. එයට උදාහරණ සැලකුවහොත් දරු ප්‍රසූතිය, අඩු මස් දරු උපත්, කොකු පණු රෝගය, මළ සමග රුධිරය පිටවීම වැනි දෑ වැදගත්ය. සාමාන්‍යයෙන් යකඩ ඌණතාවය හැම ජන කොටසකටම බලපාන්නකි.  අප දැන් ඒවා වෙන වෙනම විමසමු

ගැබිනි මවුවරුන්ට -

මාතෘ මරණ ඇතිවීමේ අවකාශය වැඩි කරයි. 
කළලයේ වර්ධනය හීන කරයි.
උපතට පෙර හෝ අළුත උපන් බිළිඳ මරණ  වැඩිකරයි.

ළදරුවන්ට සහ ළමුන්ට -

 මානසික වර්ධනය හීන වීම
ශාරිරික වර්ධනය දුර්වලවීම
ක්‍රියාකාරීබව අඩුවීම
 රෝගවලට ගොදුරුවීමේ හැකියාව වැඩිවීම

යෞවන යෞවනියන් -

ළදරුවන්ට  සහ ළමුන්ට පෙර සඳහන් ආකාරයටම සිදුවීම

 වැඩිහිටියන් -

ක්‍රියාශීලී බව අඩුවීම 
මානසික අවධානය දුර්වලවීම
ආදායමි ඉපයීමේ හැකියාව අඩුවීම රෝගවලට ගොදුරුවීමේ හැකියාව වැඩිවීම
 
කොහොම නමුත් යකඩ ඌණතාවය නිසා ඉක්මණින් වෙහෙසට පත්වීම, සුදුමැලි පෙනුම, පාඩම් කිරීමට බාධා ඇතිවීම ඇතිවිය හැකිය. යම් අයුරකින්  යකඩ ඌණතාවයෙන් පෙළෙන  යෞවනියක් ගැබිනියක් වුවහොත් නිතර ලෙඩ රෝග ඇතිවීම, දරුවාගේ උපත් බර අඩුවීම, සිදුවිය හැකි අතර එයින් ඇතිවන බැරෑරුම්ම අවස්ථාවකදී දෙදෙනාගේම මරණය  පවා සිදුවිය හැකිය. 
දැන් අපි මෙහි වැදගත්ම කොටස සම්බන්ධයෙන් විමසමු.  ඒ ආහාරවලින් ශරීරයට යකඩ උරාගන්න  පහසු කරවන්නට අපට කුමක් කළ හැකිද යන්නයි. 
සාමාන්‍යයෙන් සත්ත්ව ආහාර  භාවිතයට ගන්නේ නම් ඒවායින් යකඩ පහසුවෙන් ශරීරරයට උරා ගැනෙයි. ඒත් ශාක ආහාර වලින් එසේ පහසුවෙන් යකඩ අවශෝෂණය කරගන්නට නොහැකිය.  නමුත් නිර්මාංශික අය ශාක ආහාර වේලක් ලබා ගැනීමෙන් අනතුරුව විටමින් සී සහිත ආහාරයක්  ලබා ගත යුතුය .අලුත් පලතුරක් ආහාරයට ගැනීම මේ සදහා ප්‍රමාණවත්ය.මේ හේතුවෙන් එහි ඇති යකඩ ප්‍රමාණය පහසුවෙන් ශරීරයට උරාගැනෙයි.  තවද ශාක ආහාර පිළියෙළ කිරීමේදී ඉතා සුළු වශයෙන් හෝ සත්ත්ව ආහාර ප්‍රමාණයක් එක් කිරීම, එළවළු සහ අනෙකුත් ශාකමය ආහාරවල යකඩ උරා ගැනීමේ ප්‍රවණතාවය පහසු කරයි.  එමෙන්ම එම ආහාර වේල් සඳහා  දෙහි තක්කාලි, විනාකිරි, සියඹලා, වැනි දෑ එක් කිරීම මගින් ඒවායේ අඩංගු ඇසිටික් අම්ලය, නිසා යකඩ උරා ගැනීම පහසු කෙරෙයි.  එමෙන්ම වඩාත් වැදගත් වන කරුණක් වනුයේ යම් ආහාරයක් ගෙන පැයක් හෝ දෙකක් යන තුරු තේ හෝ කෝපි වැනි පානයක් ලබා නොගැනීමයි .එයින් ආහාරයේ ඇති යකඩ ශරීරයට උරා ගැනීමට බාධා පමුණුවයි. 

කුද්දෙටි ඉදිමීම, නොසලකා ඉන්නට එපා

 කුද්දෙට්ටක් අතිවීම ගැන බොහෝ දෙනෙක් එතරම් සැලකිල්ලක් දක්වන්නේ නැත. එසේ ඇතිවන කුඩා ගැටිති කියම් ආකාරයකින් සිරුරේ ඇතිවන කිසියම් අර්බුදයක ලක්ෂණයක් විය හැකිය. නමුත් මෙවන් ගැටිති එළෙස පහසුවෙන් අමතක කර දැමීම එතරම් සුදුසු නොවේ. මේවා පරණවන්නට ඉඩ නොදී ඒ සම්බන්ධයෙන් වෛද්‍ය උපදෙස් පැතිය යුතුය. ඇතැම්විට මේ කියන කාරණය පිළිබඳ ඔබට  මේවන විටත් යම් ගැටලුවක් මතුව තිබෙන්නට පුළුවන. අප ඒවාට කුද්දෙටි යැයි කියු විට මේ කියන්නේ කුමක් ගැනද යන්න ඔබ හොඳින් හඳුනනවා ඇත.  ශරීරයේ කිසියම් තැනක කුද්දෙටි ඉදිමුමක් ඇතිවී වේදනා ගෙනදෙන විට බොහෝ දෙනා මෙය නම් කිසියම් තුවාලයක් සම්බන්ධ දැනුම්දීමක් බව දැන වහා වහා එම තුවාලයට බෙහෙත් යොදවා සුව කරගන්නට වෙහෙසෙන්නේ එසේ නොමැති නම් තුවාලයේ වේදනාවට අමතරව මේ කුද්දෙටි ඉදිමුමේ වේදනාවද දරන්නට සිදුවෙන බැවිණි. සැබවින්ම මෙසේ කුද්දෙටි ඉදිමෙන්නේ ඇයි? ශරීරයේ කිසියම් තැනක කුද්දෙටි ඇතිවීමට අනිවාර්යෙන්ම තුවාලයක් ඇතිවී තිබෙන්නටම උවමනාද? කුද්දෙටි නැතිනම් වසා ගැටිති මෙසේ ඉදිමීමට තුඩුදෙන වෙනත් ශාරීරික හේතුන් තිබිය හැකිද? අද අප සෞඛ්‍ය පිටුව තුළින් මේ කාරණය සාකච්ඡාවට බඳුන්කරමු.


ent-hero-secondary-top
ඇතැම් විටක අප වසා ගැටිත්තක් ඉදිමීම සම්බන්ධයෙන් සැලකිලිමත්වීමේදී එය පිහිටා ඇත්තේ ඉකිළි ප්‍රදේශයේ යැයි පවසමු. තවත් විටෙක එය කිහිල්ලේ යැයි පවසන අප තවත් විටෙක එය ගෙල ප්‍රදේශයේ ඇතිවී තිබෙන්නේ යැයි පවසමු. සැබවින්ම වසා ගැටිති පිහිටා ඇත්තේ කොතැනකද ? තොකැනක පිහිටා තිබුණත් වසා ගැටිත්තක් ඉදිමෙන්නේ  නිකමට යැයි සිතා අමතක කිරීමෙන් වළකින්න. වසාගැටිත්තක් ඔබට ඉඟිකරනුයේ කුමක්ද යන්න ඔබ විශේෂයෙන්ම සොයා බැලිය යුතු කරුණක් වනුයේ එය මූලික ලක්ෂණ අතරින් එකක් ලෙස මතුකර පැන නගින වෙනත් රෝග නිසාමය. ගැටිත්තක් ලෙස වසා ගැටිත්ත ඉදිමී වේදනා දෙන්නේ ඉකිලිවලද , කිහිලි වලද එසේත් නැති නම් ගෙලෙහි කිසියම් ස්ථානයකද යන්න නොව අප මුලින්ම වසා ගැටිත්ත ඉදිමුණේ මන්දැයි සොයා ගන්නට උත්සහ දරමු . ඔබ රුධිර සංසරණය සේම සිරුරේ වසා පද්ධතිය ගැනත් යමක් අසා දැනගෙන ඇති. වසා පද්ධතිය සිරුරට විසල් මෙහෙයක් ඉටුකරන්නකි. එසේම

මිනිස් සිරුරේ වසා ග්‍රන්ථි යන කොටස් සිරුර  පුරා පැතිරී ඇති දෙයකි. මේවායෙන් සිදුවන්නේ කුමක්ද ,ඇත්ත වශයෙන්ම  සිදුවන්නේ සිරුරේ රුධිරයට අමතරව රුධිරයේ තරලය රුධිර වාහිනීවලින් පිටතට ගිය විට ඒවා වසා තරලය බවට පත්වීමයි. මේ වසා තරලය නැවතත් රුධිර පද්ධතියට ඇතුල්විය යුතුය. එසේ නොවුණහොත් එය ශරීරයේ එකතුවී ශරීරය ඉදිමීමක් ඇතිකිරීමට සමත්වෙයි. රුධිරවාහිනීවලින් පිටවන තරල පිටත ඇති පටකවල එක්රැස්වූ විට ඒවා නැවත රුධිර පද්ධතියට එක්කිරීමට ක්‍රියාකරන නාලවලට අප වසා නාල යැයි කියමු. මෙම වසා නාලවලට අප වසාවාහිනී යන නම ව්‍යවහාර කරමු.  වසාවාහිනී හෘදය දෙසට මේවා ගෙන යනවිට ඒවා වසා ගැටිතිවල එකතුවී වසාවාහිනී හරහා ගමන්කරයි. ඒ නිසා සාමාන්‍යයෙන් ප්‍රධානතම වසා ගැටිති බෙල්ලේ, හිසේ පිටුපස ,කිහිල්ලේ, බඩ ඇතුළත
හා උරස් කුහරයේ  ඇතුළත මැදට වෙන්නට , හා ඉකිලිය වැනි තැන් වල පිහිටා තිබේ. මේ හැරෙන්නට පොඩි පොඩි වසා ගැටිති සිරුරේ සෑම තැනකම පවතින්නට පුළුවන. දණහිස පිටුපස දණහිස ඇතුළත ආදී මේවාට උදාහරණවෙයි. දැන් අප මේවා විශාලවීමක් ඇතිවෙන්නට තුඩුදෙන හේතු මොනවාද යන්න හඳුනාගෙන සිටිමු. සැබවින්ම වසා ගැටිතිවල තිබෙන ප්‍රධානතම කාර්යය වෙන්නේ සිරුරට ඇතුළුවෙන විෂබීජ අපේ සිරුරේ පටකවලට ඇතුළුවූ විට  රුධිරවාහිනීවලින් පිටවන තරලය වසා තරලය බවට පත්වෙන බැවින් එවා විසින් මෙවැනි විෂබීජ එකතුකරගෙන ගොස් වසා ගැටිතිවල තැන්පත්කර එම විෂබීජ විනාශයට පත්කිරීමේ කාරියත් අනෙක් අතට එම විෂබීජ  වසා ගැටිත්තෙහි  තිබියදී එම විෂබීජයට විරුද්ධ ප්‍රතිදේහ නිපදවීමත් ආරම්භකරයි. 

How-to-treat-swollen-lymph-glands

එම නිසා මෙම වසා ගැටිති ඉතාම ප්‍රයෝජනවත්ය. උදාහරණයක් වශයෙන් අප පාදයේ පතුලේ ඇතිවූ තුවාලයක් සලකමු. එවිට එයින් ඇතුළුවන විෂබීජයකට විරුද්ධවීම සඳහා ඉකිලියේ ඇති වසා ගැටිත්ත විශාලවී ඉදිමීමක් දකින්නට ලැබිය හැකිය. ඇතැම්විට මේ වසා ගැටිත්තේ පැසවීමක්ද ඇතිවීමට ඉඩ තිබේ.ඇතැම්විට විශාලවශයෙන් බලපෑමක් ඇතිකරන විෂබීජයක් ඇතුළුවූ අවස්ථාවක එයින් ශරීරයට ඇතිකරන පීඩාව බලවත් නම් එයින් මේ වසා ගැටිත්තේ සැරව ගෙඩියක් ඇතිවීමටද ඉඩ තිබේ. වසා ගැටිති විශාලවීමට ඇති ප්‍රධානතම හේතුව මෙයය. විෂබීජ ඇතුළුවන ස්ථානය අනුව එසේ විශාලවන්නේ මොන කාණ්ඩයේ වසා ගැටිතිද යන්න දැනගැනීමට හැකියාව පවතී. මෙයට උදාහරණ සැලකුවහොත් පයක ඇතිවූ තුවාලයකින් නම් ඉකිලියේද, අතක තුවාලයකින් නම් කිහිල්ලේද හිසේ හෝ ශරීරයේ පපු කොටසේ ඇතිවූ තුවාලයකින් නම් ගෙල පිටුපසද, උගුරේ ආසාදනයක් ඇතිවූ විට ගෙල පෙදෙසේ වසා ගැටිතිද  උදරකුහරයේ ඇතිවන තත්ත්ව වලදී උදර කුහරයේ ඇතුළත වසා ගැටිතිද, ඉදිමීමට පුළුවන.මේ හැරෙන්නට වසා ගැටිති ඉදිමීමකට ලක්කරන තවත් හේතුවකි සිරුරේ ඇතිවන පිළිකා. එවිට භාහිරෙන් යම් තුවාලයක් දකින්නට නැතත් වසා ගැටිත්තෙහි ඉදිමුමක් දැකිය හැකි වෙයි. ඒවා වසා නාල දිගේ පැතිරීමටද පුළුවන. එහෙයින් පිළිකා පැතිරෙන එක් ක්‍රමයකි වසා නාල දිගේ පිළිකා සෛල පැතිරීම . එසේ වසා නාල දිගේ පිළිකා සෛල ගමන්කර ඒවා වසාගැටිතිවල තැන්පත්වීමෙන්  වසා ගැටිතිවලද පිළිකා හටගනියි. ඉන් අනතුරුව පිළිකාව එහි වර්ධනයවීමෙන්ද වසා ගැටිති ඉදිමෙයි. එමෙන්ම මෙම පිළිකාවලට එරෙහිව සටන්කිරීමේ හැකියාවක්ද මෙම පිළිකාවලට තිබේ.නමුත් පිළිකාවලට විරුද්ධව කරන සටනින් බොහෝවිට වසා ගැටිති පරාජයවෙන්නේ පිළිකාව යනු සුළු තත්ත්වයක් නොවන බැවිනි. වසා ගැටිතිවල පිළිකාව තැන්පත්වීම නිසා වසා ගැටිත්තෙන් එහාට පිළිකාව පැතිරීම තාවකාලිකව වැළැක්වෙන,ආරක්ෂක ක්‍රමයක් එහි තිබෙයි. එයින් පිළිකා සෛල පෙරීයාමක් වැනි දෙයක් සිදුවෙයි.

පිළිකා සෛල එහි රැඳීමද එක්තරා ආරක්ෂක ක්‍රමයක් ලෙස සැලකෙන්නේ එබැවිනි. පිළිකා සෛල වසා නාල හරහා මුළු ශරීරයේම පැතිරෙනවා වෙනුවට වසා ගැටිතිවලට පමණක් පැතිරී නැවතීමක් සිදුවෙයි.තරමක් සුලභ නොවන හේතු කීපයක්ද මෙහිදී අවධානයට ලක්විය යුතුය. ඒ වෛරස හේතුවෙන් සිදුවන වසා ගැටිති විශාලවීමයි. බොහෝවිට එසේ විශාලවන වසා ගැටිති එම වෛරස ආසාදනය නැතිවී ගිය විට නැවත කුඩාවීමට හැකියාව තිබේ. ක්ෂය රෝග විෂබීජය ඇතුළුවූ විටද එම වෛරස ඇතුළු වූ කොටසේ වසා ගැටිති ඉදිමීමකට ලක්වෙයි. පෙනහළුවලින් ඇතුළු වූ විට පෙනහළුවේ මැද වසා ගැටිති විශාලවෙයි. මෙම විෂබීජය  උගුරෙන් ඇතුළුවූ විට බෙල්ලේ වසා ගැටිති ඉදිමෙයි. ඇතමුන් මෙම වසා ගැටිති හා ෂෙබේසස් සිස්ට් යනුවෙන් හඳුන්වන සමේ ඇතිවන ගැටිති හා පටලවා ගනී. නමුත් වසා ගැටිති හටගන්නේ සමට බොහෝ යටිනි. නමුත් ඇතැම්විටක වඩා විශාල වූ වසා ගැටිති හා විශාලවූ සෙබේෂස් සිස්ට් වෙන්කර හඳුනාගන්නට අපහසුවක් මතුවිය හැකිය. කලාතුරකින් පරපෝෂිතයින් හේතුකොටගෙනද  මෙම වසා ගැටිති මතුවෙන්නට පුළුවන. ලංකාවේ මෙසේ බහුලවම දැකිය හැකි පරපෝෂිත විශේෂයකි බළලුන්ගේ  මළ කොටස්වල වෙසෙන ටොක්සොප්ලාස්මා නම් පරපෝෂිත විශේෂය. මේවා මිනිස් ශරීරවලට ඇතුළු වූ විට වසා ගැටිතිවලට ගිය විට ඒ හේතුවෙන් වසා ගැටිති ඉදිමීමකට ලක්වෙයි.. ඒ නිසා විශේෂයෙන් ගර්භීණී මවකට මෙම පරපෝෂිත විශේෂයෙන් බලපෑමක් ඇතිවූ විට එය ගැබේ සිටින දරුවාට විවිධ සංකූලතා මතුකරවීමට බලපෑ හැකිය. 

ඊළඟට තවත් ආකාරයකින් ලංකාවේ ඇතිවිය හැකි කලාතුරකින් නමුත් වාර්තා වෙන පරපෝෂිත උවදුරකි ලීෂ්මානියා යනුවෙන් හඳුන්වන පරපෝෂිතයා. වැලි මැක්කන්ද එවන් පරපෝෂිත විශේෂයකි. නමුත් මුලදී අප කීවාක් මෙන්  පිළිකා තත්ත්වයන්වලදී හැරුණු විට  තයිරොයිඩ් ග්‍රන්ථියේ ඇතිවෙන පිළිකා තත්ත්ව මුලින්ම බෙල්ලේ ඇතිවෙන කුද්දෙටි ඉදිමීමක් හරහා වුවද දැනගැනීමේ හැකියාව ඇත. එමෙන්ම පියයුරු පිළිකාවලදීද කිහිල්ල ආශ්‍රිතව මෙවන් කුද්දෙටි ඉදිමුමක් දැකිය හැකිය. ශල්‍යකර්මවලට ලක්කිරීමේදී එම පිළිකාවලදී වසා ගැටිතිද ඉවත් කෙරෙයි. වසා ගැටිති විශාලවූ විට ඉවත් කරන්නට පළමුව මේවා නිසි පරිදි පරීක්ෂාවට  ලක්කළ යුතුය.

සාමාන්‍යයෙන් කුද්දෙටිවලින්ම ඇතිවෙන පිළිකාද පවතී. එනම් වසා සෛලවලින් ඇතිවන පිළිකාද මෙහිදී අවධානය යොමුකළ යුතු කරුණකි.මෙය  වඩාත් හොඳින් නිරීක්ෂණය කළ යුතුවන්නේ මෙවැනි අවධානමක් පවතින බැවිනි. සැබවින්ම මෙවැන්නක් දුටුවහාම වෛද්‍ය පරීක්ෂාවකට ලක්වීමට පමා නොවෙන්නට වගබලා ගන්න. අවශ්‍ය පරීක්ෂණවලට යොමුවෙන්න. පළමුව ඉඳිකටුවකින් විද ලබාගන්නා  සෛල පරීක්ෂාවක්ද  අනතුරුව ලොකු සිදුරක් ඇති ඉදිකටුවක් මාර්ගයෙන් කුද්දෙටියෙන් කොටසක් ගෙන සිදුකරන පරීක්ෂණද සම්පූර්ණ කුද්දෙටියම ඉවත්කර කරන පරීක්ෂණද මෙයට ඇතුළත්ය. කෙසේ නමුත් මෙය මදක් සංකීර්ණ කරුණකි. මේ අනුව වසා ගැටිති සම්බන්ධයෙන් නොසැලකිලිමත් නොවිය යුතුය. වසා ගැටිතිවල රෝගය පවතින අවස්ථාවේදී මෙය හඳුනාගතහොත් එයින් පිටතට රෝගය ව්‍යාප්තවීමේ හැකියාව අහුරා දැමිය හැකිය.  මේ නිසා වසා ගැටිත්තක් ඉදිමෙන්නේ එයට ඉටුකරන්නට වෙනත් කාරියක් නැති නිසා නිකමට යැයි නොසිතන්න .

එය ඔබට කිසියම් අනතුරු ඇඟවීමක් සිදුකරන්නේද යන්න දැන ගැනීමට ඔබේ ශල්‍ය වෛද්‍යවරයා මුණගැසී සාකච්ඡා කරන්න. බොහෝ විට මෙවැනි සරල ලක්ෂණ නොතකා හැරීම තුළ ඔබ වඩාත් දරුණු සංකූලතා සමග පොරබදන්නට සිදුවන යුගයකට අතවනනවා විය හැකි බැවින් ප්‍රථමයෙන්ම ඔබ ඔබේ නිරෝගීතාවය සම්බන්ධ කිසියම් නිශ්චය සහතිකයක් ලබන්නට උත්සහ දරන්න. මේ කරුණු ඔබේ මතකයට එක්වීම වඩා වැදගත්වනුයේ ඔබේ සමීපතමයන්ගේ ආරක්ෂාවද මෙවන් තත්ත්වයකදී ඔබ අතින් සහතික වෙන බැවිණි. අදම ඔබ ඔබේ දැනුමට එකතුකරගත් දේ ඔබේ සමීපතමයන්ගේ සෞඛ්‍යයේ සුරක්ෂිතතාව සඳහාද ආදේශ කරන්නට අමතක නොකරන්න. 

Is-Anxiety-Causing-Your-Swollen-Lymph-Node-Pain-Seven-Ways-to-Stop-It