Author Archives: එච්.අයි.තුෂාර

නලින්ද ජයතිස්ස මෛත්‍රීගෙන් මිලියන 500ක් ඉල්ලයි

ඇලෝසියස්ගෙන් තමා මුදල් ලබාගත් බවට මෛත්‍රී ගුණරත්න විසින් සිදුකරන ප්‍රකාශ සම්පූර්ණයෙන්ම අසත්‍ය බව පාර්ලිමේන්තු මන්ත්‍රී වෛද්‍ය නලින්ද ජයතිස්ස මහතා සඳහන් කළේය.

මේ නිසා තමාට සිදුකළ අපහාසයට වන්දි ලෙස රුපියල් මිලියන 500ක් ලබාදෙන ලෙසට නීතිඥයෙකු මාර්ගයෙන් අද (11දා) එන්තරවාසි යැවූ බවද හෙතෙම පවසා සිටියේය.

ඔහුට එරෙහිව ගතහැකි සියලුම නීතිමය ක්‍රියාමාර්ග ගන්නා බවද නලින්ද ජයතිස්ස මහතා මෙහිදී වැඩිදුරටත් සඳහන් කළේය.  

 

NALAIADA

දුම්රිය වර්ජනය තිබුණත් දුම්රිය ධාවනයේ

දුම්රිය සේවක වර්ජනයක් ආරම්භවී තිබුණද මගී ජනතාව අපහසුතාවයන්ට පත් නොවන ආකාරයට දුම්රිය ධාවනය කිරීමට වැඩපිළිවෙළක් සකස් කර තිබෙන බව අතිරේක දුම්රිය සාමාන්‍යාධිකාරී විජය සමරසිංහ මහතා සඳහන් කළේය.

දුම්රිය එංජින් තුනකට අලාභ හානි සිදුකර තිබෙන බවත්, මීට අමතරව ඩීසල් බලාගාරයේ යම් කඩාකප්පල්කාරී ක්‍රියාවක් සිදුව තිබෙන බවද පවසා සිටියේය.

වර්ජනයක් සිදුකළද හැකි උපරිම ආකාරයට දුම්රිය ධාවනය කිරීමට කටයුතු කරන බවද ඒ මහතා අවධාරණය කළේය.

 මේ වන විට  ඇතැම් දුම්රිය ස්ථාන පරිශ්‍රයන් වෙත පොලිස් ආරක්ෂාවද ලබා දී තිබේ.

 

train-3

දිස්ත්‍රික්ක 11කට තවදුරටත් නාය යෑමේ අනතුරු ඇඟවීම්

පසුගිය පැය 24 තුළදී රත්නපුර, කෑගල්ල, මාතලේ, මහනුවර, නුවරඑළිය, බදුල්ල, කළුතර, ගාල්ල, කුරුණෑගල, කොළඹ හා ගම්පහ දිස්ත්‍රික්කවල කඳු ප්‍රදේශ නාය යෑම්වලට ලක්විය හැකි බව ජාතික ගොඩනැගිලි පර්යේෂණ සංවිධානය සඳහන් කරයි.

නාය යෑම් ලක්ෂණ ඇති වන්නේ නම් වහාම එම ස්ථානවලින් ඉවත්ව ආරක්ෂිත ස්ථානවලට යන ලෙස එම සංවිධානය ජනතාවගෙන් ඉල්ලා සිටියි.

අද (27දා) සවස 4.00 සිට හෙට (28දා) සවස 4.00 දක්වා මෙම අනතුරු ඇඟවීම වලංගු බවද එම සංවිධානය සඳහන් කරයි.

 

 

පළාත් සභා සීමා නිර්ණ වාර්තාව පාර්ලිමේන්තුට ඉදිරිපත් කර නෑ නෑ

පළාත් සභා සීමා නිර්ණය කමිටු වාර්තාව පාර්ලිමේන්තුවට ඉදිරිපත් කර තිබුණත්, මෙතෙක් එම පනත පාර්ලිමේන්තු අනුමැතියට ඉදිරිපත් වී නොමැති බව කැෆේ සංවිධානය සඳහන් කරයි.

මේ නිසා අදාළ කමිටු වාර්තාව ඉදිරි පක්ෂනායක රැස්වීමේදී සාකච්ඡා කර කඩිනමින් පාර්ලිමේන්තු අනුමැතියට ඉදිරිපත් කරන ලෙසට කථානායක කරු ජයසූරිය මහතාට ලිපියක් යවමින් ඉල්ලා සිටි බවද එම සංවිධානයේ විධායක අධ්‍යක්ෂක කීර්ති තෙන්නකොන් මහතා සඳහන් කළේය.

සීමා නිර්ණය කමිටුව විසින් ඉතාමත් කාර්යක්ෂම ලෙස මාස 04ක් වැනි කෙටි කාලයක් තුළ සීමා නිර්ණ වාර්තාව අවසන් කර විෂයභාර අමාත්‍ය ෆයිසර් මුස්තාපා මහතා වෙත ඉදිරිපත් කර තිබෙන බවද පවසා සිටියේය.

අදාළ පනත මේ වනවිට පාර්ලිමේන්තුවට ලබාදී තිබෙන බවත්, මෙම වාර්තාව සම්මතවීම ප්‍රමාද වීම තුළ මැතිවරණය පැවැත්වීම කල් යන බවද සඳහන් කළේය.මේ වසර අවසන් වනවිට පළාත් සභා 9න් 6ක නිලකාලය අවසන් වන බවද පවසා සිටියේය.

SL-Parlyment

 

 

මුලින් එක් අධිකරණයක් පසුව අධිකරණ දෙකක්

විශේෂ අධිකරණ පිහිටුවීම හරහා පසුගිය කාලයේ සිදු වූ දේශපාලන ඝාතන හා මහාපරිමාණ මූල්‍ය වංචාකරුවන්ට ක්‍රියාමාර්ග ගන්නා බවට ආණ්ඩුව ලබාදුන් පොරොන්දුව ඉටුවන බව සම කැබිනට් මාධ්‍ය ප්‍රකාශක අමාත්‍ය රාජිත සේනාරත්න මහතා සඳහන් කළේය.

දුන්න පොරොන්දුව ඉටු නොකළ බවට පසුගිය කාලයේ විශාල විවේචනයක් තිබූ බවත්,  සමහර පිරිස් විපක්ෂය සමග එකතු වී මෙය යට ගැසූ බවටත් චෝදනාවක් තිබූ බවද පවසා සිටියේය.

අද (08දා) පැවති මාධ්‍ය සාකච්ඡාවකදී සඳහන් කළේ විශේෂ අධිකරණ පනත හරහා විශේෂ අධිකරණ තුනක් පිහිටුවීමට හැකියාව තිබෙන බවය.

විශේෂ අධිකරණයේදී යම් නඩුවක් විභාග කිරීම ආරම්භ වූ පසු එක දිගට අදාළ කටයුතු සිදුවන බවත්, නීතිඥවරුන්ට අවශ්‍ය ලෙස කල්ගැනීම සිදුකළ නොහැකි බවද පවසා සිටියේය.

මුලින්ම එක් අධිකරණයක් පිහිටුවන බවත්, ඉන්පසුව ඉතිරි අධිකරණ දෙක පිහිටුවා නඩු ඇසීම සිදුවන බවද කියා සිටියේය. විශේෂ අධිකරණ පනත තුනෙන් දෙකේ ඡන්දයකින් සම්මත කර ගත යුතුව තිබෙන බවද සඳහන් කළේය.

මෙම අධිකරණය හරහා පසුගිය කාලයේ හා වර්තමානයේ වැරදිකරුවන්ට එරෙහිවත් අධිකරණ ක්‍රියාමාර්ග සිදුවන බවද කියා සිටියේය.

image_1499364644-47f149b71f

 

සම ආලේපන නියාමනයට නව නීතියක්

සම පැහැපත් වීමට භාවිත කරන බොහෝ ආලේපන වර්ගවල ශරීරයට අහිතකර ද්‍රව්‍ය ඇති නිසා ආලේපන නියාමනයට නව නීතියක් හඳුන්වා දෙන බව පාරිභෝගික කටයුතු අධිකාරිය සඳහන් කරයි.

මේ අනුව අදාළ ආලේපනයේ අඩංගු ද්‍රව්‍ය හා ආලේප කළයුතු ප්‍රමාණයන් පිළිබඳ ආලේපන ලේබලයේ සඳහන් කළයුතු බවට නීතියක් පැනවීමට නියමිතය.

මීට අදාළ ගැසට් නිවේදනයට පාරිභෝගික කටයුතු අධිකාරියේ සභාපති හසිත තිලකරත්න මහතාඅත්සන් තබා තිබෙන අතර, එය ඉදිරි දිනවල ප්‍රසිද්ධියට පත් කිරීමට සැලසුම් කර තිබේ.

අදාළ නීතියට අනුව කටයුතු කිරීමට නිෂ්පාදකයන්ට සහආනයනය කරන්නන්ට මාස 06ක කාලයක් ලබාදීමටත් නියමිතය.

සම පැහැපත් වීමට ආලේප කරන සමහර ක්‍රීම් වර්ග ප්‍රමිතියෙන් තොර බවට හෙළි වීම සහ ආලේපනය කළයුතු ප්‍රමාණයක් සඳහන් නොවීම නිසාත්, සම පැහැපත් කර ගැනීමට අධික ලෙස ක්‍රීම් වර්ග භාවිත කිරීම නිසා ශරීරයට සිදුවන අහිතකර තත්ත්වය සැලකිල්ලට ගෙන මෙම තීරණය ගෙන තිබේ.

2371802110105074507_4228692

ජනපතිගේ ප්‍රතිපත්ති ප්‍රකාශයට විවාදයක් ඕන

ජනාධිපති මෛත්‍රීපාල සිරිසේන මහතා විසින් හෙට (08දා) පාර්ලිමේන්තුවට ඉදිරිපත් කරනු ලබන ප්‍රතිපත්ති ප්‍රකාශය පිළිබඳ පාර්ලිමේන්තු විවාදයක් ඉල්ලා සිටින බව ඒකාබද්ධ විපක්ෂය සඳහන් කරයි.

පාර්ලිමේන්තු විවාදය හෙට දිනයේදී පැවැත්වුවහොත් ඒ සඳහා සූදානමින් සිටින බවද එම සංවිධානයේ ජාතික සංවිධායක රංජිත් සොයිසා මහතා සඳහන් කළේය.

ඒකාබද්ධ විපක්ෂය නියෝජනය කරන සියලුම දෙනා අද පාර්ලිමේන්තුවට පැමිණෙන බවත්, එහිදී ආණ්ඩුවෙන් ඉවත්ව විපක්ෂයේ වාඩි වන මන්ත්‍රීවරුන් 16 දෙනා සාදරයෙන් පිළිගැනීමට කටයුතු කරන බවත් ඔහු කියා සිටියේය.

ඉදිරියේදී මෙම 16 දෙනා සමග එක්ව ජනතාවට අවශ්‍ය ජයග්‍රහණ ලබාදීමට කටයුතු කරන බවද හෙතෙම සඳහන් කළේය.

Ranjith-zoysa

ජවිපේ 20 සම්මත වුණොත් ක්‍රියාත්මක වීම මෛත්‍රීගෙන් පසුවයි

ජනතා විමුක්ති පෙරමුණ ගෙන ඒමට නියමිත 20 වන ව්‍යවස්ථා සංශෝධනය කඩිනමින් සම්මත වුවත් එය ක්‍රියාත්මක වන්නේ වර්තමාන ජනාධිපතිවරයාගේ ධුර කාලය අවසන් වූ පසුව බව එම පක්ෂයේ ප්‍රචාරක ලේකම් විජිත හේරත් මහතා සඳහන් කළේය.

විධායක ජනාධිපති ධුරය අහෝසි කිරීමට 20 වන ව්‍යවස්ථා සංශෝධනය ගෙන ඒමට කටයුතු කරන බවත්, 20 වන ව්‍යවස්ථා සංශෝධනය තුළින් 1987 සම්මත වූ 13 වන ආණ්ඩුක්‍රම ව්‍යවස්ථාවෙන් ජනාධිපතිවරයා සතු වී තිබෙන බලතල කිසිවක් වෙනස් නොවන බවද එම පක්ෂයේ ප්‍රචාරක ලේකම් විජිත හේරත් මහතා සඳහන් කළේය.

අද (06දා) පක්ෂ මූලස්ථානයේ පැවති මාධ්‍ය සාකච්ඡාවකදී මේ බව සඳහන් කළ ප්‍රචාරක ලේකම්වරයා වැඩිදුරටත් පැවසුවේ, ජනතා විමුක්ති පෙරමුණ යෝජනාවක් ලෙස ගෙන එන 20 වන ව්‍යවස්ථා සංශෝධනය තුළින් ජනාධිපතිවරයා සතු පොදු සමාව දීමේ බලය කැබිනට් මණ්ඩලයේ අනුමැතියට ලක්විය යුතු බවයි.

මීට අමතරව පාර්ලිමේන්තුව කල් තැබීමට ජනාධිපතිවරයා සතුව තිබෙන බලය අහෝසි විය යුතු බවට යෝජනා කර තිබෙන බවද පවසා සිටියේය.

da5663611c129570bc0dcd23ba64f0bc_XL

 

හෙට දිවයිනේ වැසි සහිත කාලගුණ තත්ත්වයේ වැඩිවීමක්

WEATHER-1

ඉදිරි දින 07ක කාලය පුරාම ලංකාවේ බොහෝ ප්‍ර‘දේශවලට වැසි ඇතිවිය හැකි බව කාලගුණ විද්‍යා දෙපාර්තමේන්තුව සඳහන් කරයි.

හෙට (04දා) සිට දිවයිනේ බොහෝ ප්‍ර‘දේශවලට මෙතෙක් ඇති වූ වැසි තත්ත්වය ඉහළ යා හැකි බවද කාර්යයේ නියුක්ත කාලගුණ විද්‍යාඥ දර්ශන ප්‍රේමතිලක මහතා සඳහන් කළේය.

මේ අනුව හෙට (04දා) දිනයේදී බොහෝ ප්‍රදේශවලට සවස 2.00 න් පසු වැසි හෝ ගිගුරුම් සහිත වැසි ඇතිවිය හැකි බවද ඔහු පවසා සිටියේය.

මීට අමතරව අද දිනය තුළදී බස්නාහිර, මධ්‍යම, සබරගමුව, දකුණු පළාත්වල සමහර ස්ථානවලට මිලිමීටර් 100ක් තරම් වූ තද වැසි ඇති විය හැකි බවද ඒ මහතා කියා සිටියේය.

බස්නාහිර, වයඹ හා දකුණ වෙරළබඩ ප්‍ර‘‘දේශවලට උදෑසන කාලයේ වැසි ඇති විය හැකි බවත්, සබරගමුව, මධ්‍යම පළාත්වල සමහර ස්ථානවලට උදෑසන කාලයේ මීදුම් තත්ත්වයක් ඇති විය හැකි බවද සඳහන් කළේය.

ගිගුරුම් සහිත වැසි ඇති වනවිට එම ප්‍ර‘දේශවල සුළඟේ වේගය තාවකාලිකව ඉහළ යා හැකි බවද කාර්යයේ නියුක්ත කාලගුණ විද්‍යාඥවරයා පවසා සිටියේය.

පුත්තලම සිට මන්නාරම හරහා කන්කසන්තුරේ දක්වා සහ මාතර සිට හම්බන්තොට හරහා පොතුවිල් දක්වා වෙරළට ඔබ්බෙන් වන මුහුදු ප්‍රදේශවල සුළඟේ වේගය පැයට කිලෝමීටර් 40 – 50ත් දක්වා ඉහළ යා හැකි බවද කාලගුණ විද්‍යා දෙපාර්තමේන්තුව සඳහන් කරයි.

                                                   

විසිතුරු මසුන් අපනයන රටවල් අතර ලංකාවට 12

විසිතුරු මත්ස්‍ය අපනයනය සිදු කරන රටවල් අතර මේ වනවිට 12 වැනි ස්ථානය ශ්‍රී ලංකාවට හිමිව ඇතැයි නාරා ආයතනය සඳහන් කරයි.

මේ අනුව ලෝක විසිතුරු මත්ස්‍ය ඉල්ලුමෙන් 03%ක් මේ වනවිට ලංකාව විසින් ලබාදෙන බවත්, මෙම තත්ත්වය තවත් වර්ධනය කිරීම සඳහා විසිතුරු මත්ස්‍ය වගාව පිළිබඳ ජනතාව දැනුවත් කිරීමට වැඩසටහන් ක්‍රියාත්මක කරන බවද එම ආයතනයේ මාධ්‍ය හා ව්‍යාපෘති නිලධාරී තරංග බුද්ධික මහතා සඳහන් කළේය.

මේ මස 11 වැනිදා සිට සති අන්තයේ දින තුන බැගින් නව පුහුණු වැඩමුළු පවත්වන බවද ඔහු පවසා සිටියේය.

0112521000 දුරකථන අංකයෙන් අභ්‍යන්තර ජලජීවී වගා ඒකකය ඇමතීමෙන් මෙම පුහුණු වැඩමුළුවට සම්බන්ධ විය හැකි බවද තරංග බුද්ධික මහතා සඳහන් කළේය.

ස්වාභාවිකව අභිජනනය කළ නොහැකි විසිතුරු මත්ස්‍ය විශේෂ කිහිපයක් නව තාක්ෂණය යොදාගෙන අභිජනනය කර තිබෙන බවත්, මෙම දැනුම පවා ජනතාවට ලබාගත හැකි බවත් ඔහු පවසා සිටියේය.

විසිතුරු මත්ස්‍ය වගාව දියුණු කිරීමට සාපේක්ෂව මත්ස්‍ය ආහාර සැකසීම සඳහාදව්‍යාපෘති රාශියක් ක්‍රියාත්මක කරමින් තිබෙන බවද මාධ්‍ය හා ව්‍යාපෘති නිලධාරීවරයා සඳහන් කළේය.

Worlds-Most-Beautiful-Fish-640x375