Author Archives: එච්.අයි.තුෂාර

සයිටම් විරෝධතාවට සෞඛ්‍ය වෘත්තීය සමිති එකමුතුව නෑ

සයිටම් විරෝධී සංවිධාන විසින් හෙට දිනයේදී සෞඛ්‍ය සේවාව තුළ ක්‍රියාත්මක කරනු ලබන වැඩවර්ජනයට සෞඛ්‍ය වෘත්තීය සමිති එකමුතුව යටතේ ක්‍රියාත්මක වන කිසිදු සංගමයක් සහයෝගය නොදක්වන බව එම සංගමයේ කැඳවුම්කරු සමන් රත්නප්‍රිය මහතා සඳහන් කළේය.

තම සංගමය යටතේ වෛද්‍ය, පරිපූරක, අතුරු වෛද්‍ය, ආයුර්වේද වෛද්‍ය, දන්ත වෛද්‍ය, හෙද කනිෂ්ඨ කාර්යමණ්ඩල වෘත්තීය සමිති 30ක් පවතින බවද අද (20දා) පැවැති මාධ්‍ය සාකච්ඡාවකදී හෙතෙම සඳහන් කළේය.

සයිටම් ප්‍රශ්නය දේශපාලන ප්‍රශ්නයක් බවට පත්කර ගත් කණ්ඩායම සෞඛ්‍ය සේවාව අඩපණ කිරීමට උත්සාහ කළද, තම සංගමය ශක්තිමත් සංගමයක් බවද ඔහු කියා සිටියේය.

මේ නිසා රෝගී ජනතාව අපහසුතාවට පත්වීමට ඉඩලබා නොදෙන බවද සමන් රත්නප්‍රිය මහතා සඳහන් කළේය.

ගුරු විදුහල්පති වෘත්තීය සමිති 15 ක් 21 දා ලෙඩ වෙයි

සයිටම් අහෝසි කරන ලෙස ඉල්ලා ගුරු විදුහල්පතිවරුන් නියෝජනය කරනා වෘත්තීය සමිති 15 ක් 21 වැනි දින ලෙඩ නිවාඩු දැමීමේ වෘත්තීය ක්‍රියාමාර්ගයක් දියත් කරන බව ලංකා විදුහල්පති සංගමයේ ප්‍රධාන ලේකම් පියසිරි ප්‍රනාන්දු මහතා සඳහන් කළේය.

මේ නිසා 21 වැනි දින පාසල් පද්ධතියේ වැඩකටයුතු අඩපණ වන බවත්, සයිටම් ගැටලුවට විසඳුම් ලබාදීමට ආණ්ඩුවට දිනෙන් දිනම ප්‍රමාද කරන නිසා මෙම වැඩවර්ජනය දියත් කරන බවද පවසා සිටියේය.

ගුරු හා විදුහල්පති වෘත්තීය සමිති එක්ව අද (18දා) කොළඹදී පැවති මාධ්‍ය සාකච්ඡාවකදී මේ බව සඳහන් කළේය.

සයිටම් ගැටලුව මුල් කරගෙන වෛද්‍ය ශිෂ්‍යයන් පන්ති වර්ජනයක නිරත වී සිටින නිසා වෛද්‍ය විද්‍යාලවලට තේරීපත් වූ උසස් පෙළ සමතුන්ටත් දැඩි අසාධාරණයක් සිදුවෙමින් තිබෙන බවද පවසා සිටියේය.  

වැඩක් නැති ලංගම සේවකයන් 508කට වැටුප් ගෙවනවා

මූල්‍ය අර්බුධය හේතුවෙන් සේවක වැටුප් වාරික වශයෙන් ගෙවන ශ්‍රී ලංගමය රාජකාරියක් නොමැති සේවකයන් 508 දෙනෙකුට මාස 10ක කාලයක් තිස්සේ වැටුප් ගෙවමින් සිටින බව සමස්ත ලංකා ප්‍රවාහන සේවක සංගමය සඳහන් කරයි.

ස්වේච්චා විශ්‍රාම ගැන්වීම යටතේ මෙම සියලුම දෙනාම විශ්‍රාම ගැන්වීමට සැලසුම් කළ බවත්, එහෙත් විශ්‍රාම ගැන්වීමේදී ලබාදිය යුතු වන්දි මුදල මෙතෙක් ලබාදී නොමැති බවත් එම සංගමයේ ලේකම් සේපාල ලියනගේ මහතා සඳහන් කළේය.

විශ්‍රාම ගැන්වීමට අවශ්‍ය කටයුතු කිරීම නිසා ඔවුන්ට ස්ථිර රාජකාරී පැවරීමක් සිදුනොකරණ බවත්, එහෙත් විශ්‍රාම ගැන්වීමේ වන්දි මුදල ලබාදෙන තෙක් ඔවුන් රාජකාරියට වාර්තා කරමින් සිටින බවත් ඒ මහතා පවසා සිටියේය. 

 

ඒඩ්ස් වැළැක්වීමෙන් ලංකාව ඉදිරියට

එච්.අයි.වී. ඒඩ්ස් මර්දනය කිරීම සඳහා රට තුළ ක්‍රියාත්මක කරන වැඩසටහන්වලට අනුව මවගෙන් දරුවාට එච්.අයි.වී. ආසාදනය වීම වළක්වා ගත් ලෝකයේ තුන්වැනි රට බවට ශ්‍රී ලංකාව පත්ව ඇතැයි ලිංගික රෝග හා ඒඩ්ස් මර්දන ව්‍යාපාරය සඳහන් කරයි.

එච්.අයි.වී. ඒඩ්ස් වැලඳුණු මවුවරුන් 11 දෙනෙකු දරුවන් බිහිකර තිබෙන බවත්, එම දරුවන් සියලුම දෙනා නිරෝගීව සිටින බවත් එම ව්‍යාපාරයේ අධ්‍යක්ෂ සිසර ලියනගේ මහතා සඳහන් කළේය.

පසුගිය වසරේදී එච්.අයි.වී ආසාධනය වූ ගැබිනි මවුවරුන් 16 දෙනෙකු දරුවන් බිහිකළ බවත්, ඉන් සිවුදෙනෙකුට යම් ප්‍රශ්නයක් තිබුණද, ප්‍රතිකාර ලබාදී ඔවුන් නිරෝගී දරුවන් බවට පත්කළ බවත් හෙතෙම පවසා සිටියේය.

මේ අනුව මේ වනවිට මවගෙන් දරුවන්ට එච්.අයි.වී. ආසාදනය වීම වැළැක්වීම සඳහා ලෝක සෞඛ්‍යය සංවිධානය ලබාදුන් ඉලක්ක සම්පූර්ණ කර තිබෙන බවද ඔහු සඳහන් කළේය.

මීට පෙර කියුබාව හා තායිලන්තය එම ඉලක්ක සපුරා තිබෙන බවත්, මේ අනුව ඉලක්ක සැපිරූ තෙවැනි රට ශ්‍රී ලංකාව බවද සිසර ලියනගේ මහතා පවසා සිටියේය.

දේශීය ආදායම් පනතෙන් නිදහස් සතුන් පමණලු

සම්මත වූ නව දේශීය ආදායම් බදු පනතින් නිදහස්වී තිබෙන්නේ සතා සිවුපාවුන් පමණක් බව ජාතික භික්ෂු පෙරමුණ සඳහන් කරයි.

මේ නිසා නව දේශීය ආදායම් පනත පරාජයට පත්කිරීම සඳහා ජනතාව පෙළ ගස්වන බව එම සංවිධානයේ සභාපති පූජ්‍ය හඳුගල රතනපාල හිමියෝ අවධාරණය කළහ.

මෙම බදුපනත තුළින් පන්සල, පල්ලිය, කෝවිල හා එදාවේල සොයා ගැනීමට කුලියක් මලියක් කරන ජනතාව මතත් අධික බදු බරක් පටවා තිබෙන බවද උන්වහන්සේ  පවසා සිටියහ.

යටත් විජිත සමයේදීවත් මෙවැනි බදු පැනවීමට යෝජනා නොකළ බවත්, මේ නිසා මෙම බදුපනත පරාජය කිරීමට පාර්ලිමේන්තු නියෝජිතයන් කටයුතු කළ යුතු බවද අද (11දා) පැවැති මාධ්‍ය හමුවකදී සඳහන් කර සිටියහ.

මීට අමතරව භික්ෂු පෙරමුණ ලෙස මෙම පනත සම්මත වීම වැළැක්වීම සඳහා ජනතාව පෙළගස්වන බවද අවධාරණ්‍ය කළහ. 

කුකුළේ ගඟට මිලි මීටර් 123ක වර්ෂාපතනයක්

අද (07දා) පෙ.ව. 8.00 අවසන් වූ පැය 24 තුළදී කුකුළේ ගඟ ප්‍රදේශයට මිලි මීටර් 123ක වර්ෂාපතනයක් ලැබී ඇත. ගාල්ල, නාගොඩ, අඟලවත්ත, බදුරලිය ප්‍රදේශයන්ට මිලි මීටර් 75ක් හා  රත්නපුර, කිරිඇල්ල ප්‍රදේශයට මිලි මීටර් 60ක වර්ෂාපතනයක්ද ලැබී ඇති බව කාලගුණ විද්‍යා දෙපාර්තමේන්තුව සඳහන් කරයි.  

නාය යාම් අවදානම් තත්ත්වය දිස්ත්‍රික්ක 05 ක් දක්වා වැඩිවේ

රත්නපුරසහ කෑගල්ල දිස්ත්‍රික්කවලට ඇති වී තිබෙන අධික වර්ෂා තත්ත්වය නිසා එම දිස්ත්‍රික්කය තුළ පිහිටි නායයාමේ අවදානම පිළිබඳ ජනතාව අවධානයෙන් සිටිය යුතු බවජාතික ගොඩනැගිලි පර්යේෂණ ආයතනය සඳහන් කරයි.

මෙම අනතුරු ඇඟවීම හෙට (06දා) රාත්‍රී 7.30 දක්වා ක්‍රියාත්මක බවද එම ආයතනය පෙන්වා දෙයි.

මීට අමතරව අද දහවල් සහ සවස් කාලයේ ගාල්ල, කළුතර, නුවරඑළිය දිස්ත්‍රික්කවල කඳුනාය යාමේ අවදානමක් තිබෙන බවද ප්‍රකාශයට පත් කෙරිණි.

එම අනතුරු ඇඟවීමද හෙට (06දා) දිනය දක්වා ක්‍රියාත්මක වේ.

STF නවීකරණය කරයි

ජාත්‍යන්තර ත්‍රස්තවාදයට මුහුණදීම සඳහා පොලිස් විශේෂ කාර්ය බළකාය නවීකරණය කිරීමට නීතිය, සාමය හා දක්ෂිණ සංවර්ධන අමාත්‍ය සාගල රත්නායක මහතා සැලසුම් කර තිබේ.

මේ අනුව පොලිස් විශේෂ කාර්ය බළකායට නවීන තාක්ෂණය හා විශේෂ පුහුණුවක් ලබාදීමටත් සැලසුම් කර ඇත.

ත්‍රස්තවාදය හා කැරලි මර්දනය සඳහා පොලිස් විශේෂ කාර්ය බළකාය මෙරට තුළ ස්ථාපිත කළද, අද වනවිට පොලිස් විශේෂ කාර්ය බළකායට මත්ද්‍රව්‍ය ජාවාරම මැඬපැවැත්වීමට හා සංවිධානාත්මක අපරාධ මැඬලීමේ වගකීමත් පැවරී තිබෙන බවද අමාත්‍ය සාගල රත්නායක මහතා සඳහන් කළේය.

තිස් අවුරුදු යුදමය සමයේදී එල්.ටී.ටී.ඊ. සංවිධානය මර්දනය කිරීම සඳහා විශාල දායකත්වයක් ලබාදුන් පොලිස් විශේෂ කාර්ය බළකාය ජාත්‍යන්තර ත්‍රස්තවාදයකට මුහුණ දිය හැකි ආකාරයට නවීකරණය කරන බවද ඒ මහතාවැඩිදුරටත් පවසා සිටියේය.

 

ශ්‍රී ලංකා මානව හිමිකම් කොමිෂන් සභාව හෙට සිට අලුත් තැනක

ශ්‍රී ලංකා මානව හිමිකම් කොමිෂන් සභා කාර්යාලය හෙට (01දා) කොළඹ 04, ආර්.ඒ. ද මැල් මාවතේ අංක 14 ස්ථානයේදී ස්ථාපිත කෙරේ.

මෙම කාර්යාලය දැනට කොළඹ 08 කිංසි පාරේ අංක 165 දරණ ස්ථානයේ පවත්වා ගෙන යනු ලැබේ. සියලුම පාර්ශ්වවල පහසුව පිණිස එම කාර්යාලය මෙම ස්ථානයට රැගෙන ගොස් තිබේ.

ඡන්ද නාම ලේඛනයේ නම තිබේ දැයි පරික්ෂාකර බලන්න

මෙම වසරට අදාළව සකස් කළ ඡන්ද හිමි නාම ලේඛනයේ විස්තර මැතිවරණ දෙපාර්තමේන්තුවේ www.slelections.gov.lkවෙබ් අඩවියට ගොස් පරීක්ෂා කළ හැකි බව පැෆරල් සංවිධානය සඳහන් කරයි.

අදාළ ලේඛනයේ නම ඇතුළත් වී නොමැති නම් හෝ ඇතුළත් කර තිබෙන තොරතුරු අපහැදිලි නම් එය සැප්තැම්බර් මස 06 දිනට පෙර නිවැරදි කරගන්නා ලෙසද එම සංගමයේ විධායක අධ්‍යක්ෂ රෝහණ හෙට්ටිආරච්චි මහතා සඳහන් කළේය.

නම ඇතුළත් කරීමට හෝ තිබෙන නම සංශෝධනය කරීමට අවශ්‍ය අයදුම්පත් ග්‍රාම නිලධාරී කාර්යාලවලින් ලබාගත හැකි බවද පවසා සිටියේය.