Author Archives: දිනේෂ් මන්ත්‍රීවිතාන

ජයග්‍රහණයක් පතා දුර්වල පන්දු රැකීමෙන් අත්මිදෙමු

සංචාරක ශ්‍රී ලංකා ටෙස්ට් ක්‍රිකට් කණ්ඩායම සහ සත්කාරක බ.ඉ. කොදෙව් ටෙස්ට් ක්‍රිකට් කණ්ඩායම අතර පැවැත්වෙන තරග තුනකින් සමන්විත ටෙස්ට් ක්‍රිකට් තරගාවලියේ දෙවැනි තරගය අද (14 දා) සාන්ත. ලුසියාහි ඩැරන් සාමි පිටියේදී ඇරඹේ.

පසුගියදා (10දා) අවසන් වූ පළමු ටෙස්ට් ක්‍රිකට් තරගයෙන් ලකුණු 226ක විශිෂ්ට ජයක් හිමිකර ගැනීමට බ.ඉ. කොදෙව් ක්‍රීඩකයන්ට හැකිවිය. ඒ අනුව 1-0ක් ලෙසින් ඔවුන් තරගාවලියේ පෙරමුණ ගෙන සිටියි. බ.ඉ. කොදෙව් දේශයේදී තරගාවලි ජයක් බලාපොරොත්තුවෙන් පිටත්ව ගිය ශ්‍රී ලංකා කණ්ඩායමට එම බලාපොරොත්තුව ඉටුකර ගැනීමට නම් අදින් ඇරඹෙන දෙවැනි ටෙස්ට් ක්‍රිකට් තරගය ජයගන්නට සිදුවේ.

දෙරට අතර පැවැති පළමු තරගයේ පළමු දිනයේදී ශ්‍රී ලංකා කණ්ඩායම දැක් වු දුර්වල පන්දු රැකීම තරගයේ පරාජයට ප්‍රධානම හේතුව විය. එහෙයින් ලැබෙන සෑම පහසු අවස්ථාවක්ම තමන්ගේ වාසියට හරවා ගැනීමට ශ්‍රී ලංකා ක්‍රීඩකයන් උත්සාහ කළ යුතුය. එමෙන්ම අර්ධ අවස්ථාවන්ද ලබාගනිමින් කණ්ඩායමේ පන්දු යවන්නන්ට හැකි සෑම සහයෝගයක් ලබාදීම පන්දු රකින්නන්ගේ වගකීමය.

අබාධයෙන් පසුව පළමු ටෙස්ට් ක්‍රිකට් තරගයට ක්‍රීඩා කළ ඇන්ජලෝ මැතිව්ස් පෞද්ගලික හේතුවක් නිසාවෙන් තරගාවලියෙන් ඉවත් වූ බව ශ්‍රී ලංකා ක්‍රිකට් ආයතනය නිවේදනයක් නිකුත් කරමින් සඳහන් කර සිටි අතර, ලහිරු ගමගේද අබාධයක් හේතුවෙන් තරගාවලියෙන් ඉවත් වූ බව එම නිවේදනයේ වැඩිදුරටත් සඳහන් විය. ඔවුන් දෙදෙනා වෙනුවෙන් ධනුෂ්ක ගුණතිලක සහ දසුන් ශානක කණ්ඩායමට කැඳ වූ බවද එම නිවේදනයේ දැක්විණි.

කෙසේ වෙතත් ඇන්ජලෝ මැතිව්ස් කෙරෙහි අවධානය යොමු කිරීමේ දී පෙනී යන්නේ ඔහු සම්බන්ධයෙන් තීරණයක් ගත යුතු කාලය එළැඹී ඇති බවයි. අබාධයෙන් පසුව කණ්ඩායම සමග එක් වූ මැතිව්ස් පළමු ටෙස්ට් ක්‍රිකට් තරගයට ක්‍රීඩා කළ අයුරු හොඳින් අධ්‍යයනය කළේ නම් ඔහු ඒ සඳහා කිසිදු සූදානමකින් නොසිටි බව වටහා ගැනීමට එතරම් අපහසු නැත.

තීරණාත්මක උඩ පන්දුවක් අතහළ මැතිව්ස් පන්දුවට පහර දුන්නේද කිසිදු විශ්වාසයකින් තොරවය. විශේෂයෙන්ම මැද කෙටී වේගයෙන් ඉපිල එන බවුන්සර් පන්දුවට මැතිව්ස් මුහුණදුන්නේ දැඩි අපහසුවෙනි. මේ නිසා මැතිව්ස් මෙම තරගාවලියේ ඉදිරි තරග සියල්ලම ක්‍රීඩා කළේ නම් බොහෝ දුරට අසාර්ථක වන්නට ඉඩ තිබූ අවස්ථාව වැඩිය. මේ නිසා පෞද්ගලික හේතුවක් යැයි සඳහන් කරමින් මැතිව්ස් තරගාවලියෙන් ඉවත් වූයේද යන්න පිළිබඳව සැක මතුවේ.

එපමණක් නොව ඉදිරියේදී මෙරටදී පැවැත්වීමට නියමිත ද.අප්‍රිකානුවන්ගේ ශ්‍රී ලංකා සංචාරයේදී නැවත වරක් මැතිව්ස් කණ්ඩායම සමගින් එක්ව තමන්ට හුරු පුරුදු තණතීරුවලදී ලකුණු අතර පැමිණ තවත් වසරක් සඳහා කණ්ඩායමේ ස්ථානය වෙන්කර ගැනීමේ යම් සැලැස්මක් ක්‍රියාත්මක නොවන්නේ යැයි කිසිවෙකුටවත් කිව නොහැකි තත්ත්වයක් මේ වන විට උත්ගතව ඇත.

මැතිව්ස් කණ්ඩායම සමගින් එක්වීම නිසා කණ්ඩායම සමබර කරගැනීම ගැටලුකාරී වුවද මේ වන විට මැතිව්ස් කණ්ඩායමේ නොමැති බැවින් අද තරගයට ධනංජය සිල්වා නියත වශයෙන්ම ක්‍රීඩා කරනු ඇත. ඒ අනුව අංක 03 ස්ථානයේ ධනංජය ක්‍රීඩා කරනු ඇතැයි විශ්වාස කළ හැක. ඒ අනුව නායක චන්දිමාල්ට අංක 04 හෝ අංක 05 ස්ථානයේ ක්‍රීඩා කිරීමට අවස්ථාව සකසා ගත හැක. එය ඔහුට මෙන්ම කණ්ඩායමටද හිතකරය.

එහෙත් ලහිරු ගමගේ වෙනුවට අද තරගයට ක්‍රීඩා කරන්නේ කවුරුන්ද යන්න නිශ්චිතව සඳහන් කළ නොහැකය. යම් කිසි විදිහකින් අවස්ථාවක් පවතින්නේ නම් ඔහුගේ ස්ථානයට සුදුසුම ක්‍රීඩකයා වන්නේ දසුන් ශානක බව අපගේ විශ්වාසයයි. එහෙත් දීර්ඝ ගුවන් ගමනකින් පසුව ඔහු අද තරගයට ක්‍රීඩා කරනු ඇතැයි විශ්වාස කළ නොහැක. එහෙයින් කණ්ඩායමේ පිතිකරණ සංයුතිය තව තවත් ශක්තිමත් කිරීමට අපේක්ෂා කරන්නේ නම් ඒ සඳහා ඇති එකම පිළිතුර වන්නේ මහේල උඩවත්තය. ධනංජයට පන්දුවාර කිහිපයක් යැවිය හැකි බැවින් දෙවැනි තරගයට මහේල කැඳවූවද එහි ගැටලුවක් නොමැත. එහෙත් ලහිරු ගමගේ වෙනුවට වේග පන්දු යවන්නෙකු කැඳවන්නේ නම් එම අවස්ථාව අසිත ප්‍රනාන්දුට හිමිවීමට වැඩි අවස්ථාවක් පවතී.

පළමු තරගයේ පළමු ඉනිමේදී නිරෝෂන් දික්වැල්ල කඩුලු අතර දිව යාමේදී දැක් වූ අලස ස්වභාවය ගැන ඔහු නැවත නැවතත් සිතිය යුතුය. මන්ද යම් ස්ථාවරත්වයක් ගොඩනගා ගනිමින් සිටි පිතිකරුවෙකුගේ දැවීයාම කණ්ඩායමට දැඩි බලපෑමක් එල්ල කරන බැවිනි. එහෙත් ඔහු පමණක් නොව සෙසු ක්‍රීඩකයන්ද එවැනි අතපසුවීම් සිදුනොවීමට වගබලාගත යුතුය.

සාන්ත. ලුසියාහි ඩැරන් සාමි පිටිය පිතිකරුවන්ට හිතකර තණතිල්ලක් වුවද පළමු සහ දෙවැනි දින වේග පන්දු යවන්නන්ට සහායක් දක්වන බැවින් එම දින දෙකේදී වේග පන්දු යවන්නන් ඉදිරියට පැමිණෙනු ඇතැයි විශ්වාස කළ හැකිය. එහෙයින් කාසියේ වාසිය හිමිකරගනිමින් දෙවැනි වරට පන්දුවට පහර දෙන්නේ නම් දෙවැනි දිනයේ දිවා විවේකයෙන් පසුව සහ සිව්වැනි දිනයේ දිවා විවේකය දක්වා අතර කාලය පිතිකරුවන්ට හිතකරය.

කෙසේ වෙතත් සිව්වැනි දිනයේ සන්ද්‍යා සමයේ සිට අවසන් දිනයේදී දඟපන්දු යවන්නන්ට තණතීරුවේ සහාය ලබාගත හැකි බැවින් දෙවැනි වරට පන්දුවට පහර දෙන්නේ නම් ශ්‍රී ලංකා පිතිකරුවන් දේවේන්ද්‍ර බිෂුගෙන් පරිස්සම් විය යුතුය. මන්ද බිෂූ මෙම පිටියේදී හොඳින් දක්ෂතා දක්වා ඇති දඟපන්දු යවන්නෙකු බැවිනි. තවද කෙමාරෝච් ද බ.ඉ. කෙදෙව් කණ්ඩායම වෙනුවෙන් මෙම පිටියේදී දක්ෂතා දක්වා ඇති පන්දු යවන්නෙකි.  

cricket-practice-lanka-team-india-session-lanka_ac8e2a50-5ffb-11e8-828c-aa2fd3852b8f

ශ්‍රී ලංකා ක්‍රිකට් ආයතනයට ICCයෙන් රතු එළියක්

ශ්‍රී ලංකා ක්‍රිකට් ආයතනයට අතුරු පාලක මණ්ඩලයක් පත් කිරීමට තමන් එකඟ නොවන අතර, ප්‍රජාතන්ත්‍රවාදී ලෙස පාලක මණ්ඩලයක් පත්කරගන්නා ලෙසත්, පැන නැගී ඇති ගැටලුකාරී තත්ත්වය සම්බන්ධයෙන් ගන්නා ක්‍රියාමාර්ගය එළඹෙන ජූලි 01 වැනිදාට ප්‍රථම ජාත්‍යන්තර ක්‍රිකට් ආයතනයට දැනුම් දෙන ලෙසත් එහි සභාපති ෂශාන්ක් මනෝහර් මහතා විසින් ක්‍රීඩා අමාත්‍ය ෆයිසර් මුස්තාපා, ශ්‍රී ලංකා ක්‍රිකට් ආයතනයේ නිසි බලධාරී කමල් පද්මසිරි සහ ශ්‍රී ලංකා ක්‍රිකට් ප්‍රධාන විධායක නිලධාරී ඈෂ්ලි ද සිල්වා යන මහත්වරුන්ට දැනුම් දී ඇතැයි ක්‍රිකට් ආයතනයේ අභ්‍යන්තර තොරතුරු සඳහන් කරයි. 

මෙම හමුව ඊයේ (06දා) ඩුබායි හි ජගත් ක්‍රිකට් කවුන්සිල මූලස්ථානයේ දී පැවැත්විණි.

ශ්‍රී ලංකා ක්‍රිකට් පරිපාලනය සම්බන්ධයෙන් ඇති වී තිබෙන තත්ත්වය පිළිබඳ ජගත් ක්‍රිකට් කවුන්සිලයේ සභාපතිවරයා දැනුවත් කිරීමට සහ අනාගත සැලසුම් පිළිබඳ සාකච්ඡා කිරීමට මෙම හමුව සංවිධානය කොට තිබිණි. 

7452a6ad-9a55-4e75-9485-a9743db7eaa4

බ.ඉ. කොදෙව් දූපත්හි පළමු ටෙස්ට් තරගාවලි ජය පතා ශ්‍රී ලංකා ටෙස්ට් කණ්ඩායම අද තරග බ්මේ…

සංචාරක ශ්‍රී ලංකා ටෙස්ට් ක්‍රිකට් කණ්ඩායම සහ සත්කාරක බටහිර ඉන්දීය ක්‍රිකට් කණ්ඩායම අතර පැවැත්වෙන තරග තුනකින් සමන්විත ටෙස්ට් ක්‍රිකට් තරගාවලියේ පළමු තරගය අද (06දා) පෝර්ට් ඔෆ් ස්පේන් ක්වීන්ස් පාර්ක් ඕවල් පිටියේදී පැවැත්වේ. 2018 වර්ෂය ආරම්භ කරමින් ශ්‍රී ලංකා ටෙස්ට් ක්‍රිකට් කණ්ඩායම ජනවාරි, පෙබරවාරි තරග සමයේදී බංග්ලාදේශය සමග ටෙස්ට් ක්‍රිකට් තරගාවලියකට මෙරට දී මුහුණ දුන්නේය. එම තරගාවලියෙන් පසුව ශ්‍රී ලංකා කණ්ඩායම ටෙස්ට් ක්‍රිකට් තරගාවලියකට සහභාගි වනුයේ මාස හතරකට පසුවය. එමෙන්ම මෙය 2018 වර්ෂය වෙනුවෙන් ශ්‍රී ලංකා ක්‍රිකට් කණ්ඩායම සහභාගි වන පළමු විදෙස් ටෙස්ට් ක්‍රිකට් තරගාවලියද වේ.

ශ්‍රී ලංකා කණ්ඩායම බ.ඉ. කොදෙව් දූපත්හි ක්‍රිකට් තරගාවලියකට සහභාගි වනුයේ වසර 10කට පසුවය. අවසන් වරට සිදු කළ තරග සංචාරයේදී 1-1ක් ලෙස තරගාවලිය ජය පැරදුමෙන් තොරව අවසන් කර ගැනීමට ශ්‍රී ලංකා කණ්ඩායමට අවස්ථාව උදා විය. ශ්‍රී ලංකා කණ්ඩායම අවසන් වරට සිදු කළ තරග සංචාරයේදී ක්වීන්ස් පාර්ක් ඕවල් පිටියේ පැවැති දෙවැනි ටෙස්ට් ක්‍රිකට් තරගයෙන් කඩුලු 06ක පරාජයක් අත්වින්දේය. තවද ක්වීන්ස් පාර්ක් ඕවල් පිටියේ ටෙස්ට් ක්‍රිකට් තරගයක් පැවැත්වෙනුයේ වර්ෂ 2016න් පසුව වීමද විශේෂත්වයකි. ඒ බ.ඉ. කොදෙව් කණ්ඩායමට වර්තමානය තුළ එතරම් ටෙස්ට් තරගාවලි නොලැබෙන බැවිනි.

වසර 15ක දෙරට අතර ටෙස්ට් තරග ඉතිහාසයේ මේ දක්වා තරග 17ක් පවත්වා ඇති අතර, ඉන් තරග 08ක ජය ශ්‍රී ලංකා කණ්ඩායම හිමිකර ගෙන තිබේ. ඉන් තරග 03ක් පරාජයට පත්ව ඇත. කෙසේ වෙතත් ශ්‍රී ලංකා කණ්ඩායම කොදෙව්හිදී තරග 06කට සහභාගි වී ඉන් තරග තුනක් පරාජයට පත්ව, එක් තරගයක් පමණක් ජයග්‍රහණය කර ඇත. ශ්‍රී ලංකා කණ්ඩායම මේ දක්වා කොදෙව්හිදී ටෙස්ට් ක්‍රිකට් තරගාවලියක් ජයග්‍රහණය කර නොමැති බැවින් මෙවර තරගාවලියේදී එම කඩඉම ජයගැනීමට හැකි වේදැයි ක්‍රීඩාලෝලීහු බලා සිටිති.
ක්වීන්ස් පාර්ක් ඕවල් පිටිය සාමාන්‍යයෙන් වේග පන්දු යවන්නන්ට වැඩි සහායක් දක්වන තණතීරුවක් බැවින් ශ්‍රී ලංකා කණ්ඩායම වේග පන්දු යවන්නන් තිදෙනෙකු සමගින් ක්‍රීඩා කරනු ඇතැයි විශ්වාස කළ හැකිය. බෝහෝ විට එම වේග පන්දු යවන්නන් තිදෙනා සුරංග ලක්මාල්, ළහිරු කුමාර සහ ළහිරු ගමගේ වීමට වැඩි අවස්ථාවක් පවතී. ඔවුන් තිදෙනාට අමතරව රංගන හේරත් සහ ඩිල්රුවන් පෙරේරා දඟ පන්දු යවන්නන් ලෙස කණ්ඩායමට එක්වනු ඇත. ඒ අනුව වේගපන්දු යවන්නන් තිදෙනෙකු සහ දඟපන්දු යවන්නන් දෙදෙනෙකු සමගින් ශ්‍රී ලංකා කණ්ඩායම බ.ඉ. කොදෙව් පිතිකරුවන් ආක්‍රමණය කිරීමට සැලසුම් සකස් කරනු ඇතැයි විශ්වාස කළ හැකිය. පන්දු යවන්නන්ගේ සංයුතිය සකසා ගැනීමේදී එතරම් ගැටලුවක් නොවුණද, ඇන්ජලෝ මැතිව්ස්ගේ පැමිණීම සහ ධනංජය සිල්වා අද තරගයට ක්‍රීඩා කරන්නේ නම් පිතිකරණ සංයුතිය සකසා ගැනීම යම් තරමකට අපහසු විය හැකිය. 

ධනංජය සිල්වා අද තරගයට ක්‍රීඩා නොකරන්නේ නම්, කුසල් ජනිත් පෙරේරා, කුසල් මෙන්ඩිස්, රෝෂේන් සිල්වා, ඇන්ජලෝ මැතිව්ස්, දිනේෂ් චන්දිමාල්, නිරෝෂන් දික්වැල්ල පිතිකරුවන් ලෙස අද තරගයට එක්වනු ඇත. විශේෂයෙන්ම දිල්රුවන් පෙරේරා අංක 7 පිතිකරුවා ලෙස, පිතිකරුවෙකු ලෙසින්ද කණ්ඩායමට අවශ්‍ය සහාය ලබාදෙන බැවින් එයද ප්‍රයෝජනයට ගනිමින් ඉහතින් සඳහන් කළ පිතිකරණ සංයුතියෙන් තරග වැදිය හැකිය. එසේ වුවහොත් නිරෝෂන් දික්වැල්ල කඩුලු රකින්නා ලෙසින් කටයුතු කරනු ඇත. එහෙත් ධනංජය සිල්වා අද තරගයට ක්‍රීඩා කරන්නේ නම්, බොහෝ දුරට නිරෝෂන් දික්වැල්ලට කණ්ඩායමේ ස්ථානය අහිමි වීමට වැඩි අවස්ථාවක් පවතී. මන්ද දිනේෂ් චන්දිමාල්ට සහ කුසල් ජනිත් පෙරේරාට කඩුලු රකින්නෙකු ලෙස කටුයුතු කළ හැකි බැවිනි. එමෙන්ම ධනංජය සිල්වා ආරම්භ පිතිකරු ලෙස යොදා ගනිමින් කුසල් ජනිත් පෙරේරා වෙනුවට නිරෝෂන් දික්වැල්ල කණ්ඩායමට කැඳවිය හැකි වුවද, අප විශ්වාස කරන්නේ ධනංජය ක්‍රීඩා කරන්නේ නම් බොහෝ විට නිරෝෂන් දික්වැල්ලට කණ්ඩායමේ ස්ථානය අහිමි වනු ඇති බවයි.
බ.ඉ. කොදෙව් කණ්ඩායම මිගෙල් කමින්ස්, ෂැනොන් ග්‍රේබ්‍රිෙයල් සහ අත්දැකීම් බහුල කෙමාර් රෝච් යන වේගපන්දු යවන්නන් තිදෙනා සමගින් අද තරග වදිනු ඇතැයි විශ්වාස කළ හැකිය. එම වේගපන්දු යවන්නන් තිදෙනාගෙන් ශ්‍රී ලංකා කණ්ඩායම කෙමාර් රෝච් සහ ග්‍රේබ්යෙල්ගෙන් ප්‍රවේසම් විය යුතුය. ඒ ඔවුන් දෙදෙනා සතුව වේගය මෙන්ම අත්දැකීම්ද ඇති බැවිනි. තවද පාදඟපන්දු යවන දේවේන්ද්‍ර බිෂු ද ශ්‍රී ලංකා කණ්ඩායමට අභියෝගයක් එල්ල කළ හැකි පන්දු යවන්නෙකි. කෙසේ වෙතත් ක්වීන්ස් පාර්ක් ඕවල් පිටිය වේගපන්දු යවන්නන්ට වැඩි සහායක් දක්වන බැවින් ශ්‍රී ලංකා පිතිකරුවන් ජේසන් හෝල්ඩර් ගැනද අවධානයෙන් සිටීම නුවණට හුරුය. ක්‍රෙග් බැත්වෙයිට්, කිරන් පවෙල්, ෂායි හෝප්ද ශ්‍රී ලංකා පන්දු යවන්නන්ට පීඩනයක් එල්ල කළ හැකි පිතිකරුවන්ය. 

ශ්‍රී ලංකා ටෙස්ට් සංචිතය – දිනේෂ් චන්දිමාල් (නායක), අකිල ධනංජය, ධනංජය ද සිල්වා, නිරෝෂන් දික්වැල්ල, අසිත ප්‍රනාන්දු, ලහිරු ගමගේ, ලහිරු කුමාර, සුරංග ලක්මාල්, ඇන්ජලෝ මැතිව්ස්, කුසල් මෙන්ඩිස්, ඩිල්රුවන් පෙරේරා, කුසල් පෙරේරා, කසුන් රාජිත, රෝෂේන් සිල්වා, මහේල උඩවත්ත, ජෙෆ්රි වැන්ඩසේ 

බ.ඉ. කොදෙව් සංචිතය – ජේසන් හෝල්ඩර් (නායක), දේවේන්ද්‍ර බිෂෝ, ක්‍රෙග් බ්‍රැත්වෙයිට්, රොස්ටන් චේස්, මිගෙල් කමින්ස්, ෂේන් ඩෝව්රිච්, ෂැනොන් ග්‍රේබ්රියල්, ජහ්මර් හැමිල්ටන්, ෂිම්රොන් හෙට්මයිඑර්, ශායි හෝප්, කිරන් පවෙල්, කෙමාර් රෝච්, ඩෙවොන් ස්මිත්  

ඉන්දීය කණ්ඩායමේ ප්‍රතිවාදියා කවුද තීරණය අද

'නිදහස් කුසලාන^ පන්දුවාර විස්සයි20 තුන්කොන් එක්දින ක්‍රිකට් තරගාවලියේ අවසන් මහා තරගයේදී ඉන්දීය කණ්ඩායම සමගින් තරග වදින්නේ කවුරුන්ද යන්න අද (16 වැනිදා) පැවැත්වෙන ශ්‍රී ලංකාව සහ බංග්ලාදේශය අතර තරගයේදී තීරණය වනු ඇත.ඒ අද තරගය ජය ගන්නා කණ්ඩායමට ප්‍රසාද ලකුණු දෙකක් සමගින් ප්‍රසාද ලකුණු සටහනේ දෙවැනි ස්ථානයට පැමිණීමට අවස්ථාව හිමිවන බැවිණි.

ශ්‍රී ලංකාව සහ බංග්ලාදේශය අතර පැවැති පළමු වටයේ තරගයෙන් කඩුලු 5ක විශිෂ්ට ජයක් හිමිකර ගන්නට බංග්ලාදේශ කණ්ඩායමට අවස්ථාව උදා වූයේ ශ්‍රී ලංකා කණ්ඩායමේ දුර්වල පන්දු යැවීම හේතුවෙනි. ඒ කෙසේ වෙතත් අද පැවැත්වෙන දෙවැනි වටයේ අවසන් තරගයට එවැනි අතපසුවීම්වලට කිසිදු ඉඩක් නොමැත. අතපසුවීම් වැඩි වශයෙන් සිදුකරන කණ්ඩායමට නියත වශයෙන්ම 'නිදහස් කුසලානය' ජය ගැනීමේ සිහිනය අත් හැරගන්නට සිදුවේ. මේ නිසා ශ්‍රී ලංකා කණ්ඩායම තම උපරිමයෙන් ක්‍රීඩා කර මෙරට ක්‍රීඩාලෝලීන්ගේ බලාපොරොත්තු ඉටු කිරීමට උත්සාහ කළ යුතුය.

ශ්‍රී ලංකා කණ්ඩායම වෙනුවෙන් මේ දක්වා ලකුණු අතර සිටින කුසල් මෙන්ඩිස් මෙන්ම කුසල් ජනිත් අද තරගයේදීද සිය වගකීම් කොටස මැනවින් ඉටුකළහොත් තරගය ජය ගන්නට ශ්‍රී ලංකා කණ්ඩායමට එතරම් අපහසුවක් නොවනු ඇත. ඒ කෙසේ වෙතත් ශ්‍රී ලංකා කණ්ඩායමේ ආරම්භක පිතිකරුවන් දෙදෙනාගෙන් එක් අයෙකුවත් දීර්ඝ ඉනිමක් ක්‍රීඩා කළ යුතුය. එහෙයින් අද තරගයේදී ධනුෂ්ක ගුණතිලක ලකුණු අතරට අවතීර්ණ වෙමින් දීර්ඝ ඉනිමක් ක්‍රීඩාකර මෙරට ක්‍රීඩාලෝලීන්ගේ බලාපොරොත්තු ඉටුකරනු ඇතැයි විශ්වාස කළ හැක.

DSC_6174 copy copy

ශ්‍රී ලංකා කණ්ඩායමට ගැටලුවක්ව ඇත්තේ පන්දු යවන්නන් තවමත් සුපුරුදු රිද්මයේ නොසිටීමයි. එබැවින් අද තරගයේදී ශ්‍රී ලංකා පන්දු යවන්නන් කණ්ඩායමේ ජයග්‍රහණය වෙනුවෙන් දැනෙන යමක් කළ යුතුය. විශේෂයෙන්ම ශ්‍රී ලංකා කණ්ඩායම පන්දු යවන්නෙකු ලෙස වැඩි බලාපොරොත්තු තබා සිටින අකිල ධනංජයගෙන් තවමත් කණ්ඩායමට දැනෙන යමක් සිදු නොවීම ගැටලුවකි. ඔහු අද තරගයට ක්‍රීඩා කරන්නේ නම් කණ්ඩායම අපේක්ෂා කරන දක්ෂතා අතරට අවතීර්ණ විය යුතු යැයි අප විශ්වාස කරන්නෙමු. තවද අවසන් මහා තරගයට සුදුසුකම් ලබාගැනීමේ අවසන් අවස්ථාව මෙය බැවින් භාග අවස්ථාවන්ද උඩපන්දුවක් බවට පරිවර්තනය කර ගැනීමට පන්දු රකින්නන් උත්සාහ කළ යුතුය.

බංග්ලාදේශ එක්දින කණ්ඩායමේ නිත්‍ය නායක සකීබ් අල් හසන් අබාධයෙන් පසුව සම්පූර්ණයෙන් සුවය ලබා නැවතත් කණ්ඩායම සමගින් එක්ව සිටින බව ඊයේ (15දා) වාර්තා වුණි. ඒ අනුව ශකීබ් අද පැවැත්වෙන තරගයට ක්‍රීඩා කිරීමට වැඩි අවස්ථාවක් පවතී. එය එසේ වුවහොත් එය බංග්ලාදේශ කණ්ඩායමේ ශක්තිය තවත් වැඩි කරවන්නකි. ශකීබ් තුන් ඉරියව් ක්‍රීඩකයෙකු බැවින් ඔහුගේ පැමිණීමත් සමගින් කණ්ඩායම තව තවත් සමබර කරගැනීම ඔවුනට පහසුය. තවද ශකීබ් යනු තරග දිනවන්නෙකු බැවින් ඔහුගේ පැමිණීම කණ්ඩායමේ සෙසු ක්‍රීඩකයන්ගේද මානසික ශක්තිය වැඩි කරවන්නට හේතුවක් වනු ඇත. එය ශ්‍රී ලංකා කණ්ඩායමට එතරම් හිතකර තත්ත්වයක් නම් නොවේ.

තරගය අද (16දා) ප.ව. 7.00 ආරම්භ වේ.

වේලාසනම අවසන් තරගයේ ස්ථානයක් වෙන්කර ගනිමු

'නිදහස් කුසලාන' පන්දුවාර විස්සයි20 තුන්කොන් ක්‍රිකට් තරගාවලියේ දෙවැනි වටයේ තරග අද (12දා) ඇරඹේ. ඒ ශ්‍රී ලංකාව සහ ඉන්දියාව අතර කොළඹ ආර්. ප්‍රේමදාස පිටියේදී පැවැත්වෙන තරගයෙනි. පළමු වටයේ තරග අවසානයේදී කණ්ඩායම් තුනම එක් තරගය බැගින් ජය හිමිකරගත් නිසා අවසන් මහා තරගයට සුදුසුකම් ලබාගැනීමට කණ්ඩායම් තුනටම තවමත් අවස්ථාව තිබේ. කෙසේ වෙතත් දළ ලකුණු ලබා ගැනීමේ වේගය අනුව ශ්‍රී ලංකා කණ්ඩායම ප්‍රසාද ලකුණු සටහනේ ඉදිරියෙන් සිටින අතර ඉන්දියාව දෙවැනි ස්ථානයේ පසුවේ.

පළමු වටයේදී දෙරට අතර පැවැති තරගයෙන් ශ්‍රී ලංකා කණ්ඩායම හමුවේ කඩුලු 05ක පරාජයක් අත්විඳි ඉන්දීය කණ්ඩායම බලා සිටින්නේ පරාජයේ වාඩුව ගන්නටය. ඒ සඳහා ඔවුන් හොඳින් සූදානම් වී ඇතිවාට සැකයක් නැත. ඉන්දීය කණ්ඩායම වෙනුවෙන් ශිකර් දවාන් මේ දක්වා ලකුණු අතර සිටියද අද තරගයේදී ශ්‍රී ලංකා කණ්ඩායම වඩාත් පරික්ෂාකාරී විය යුත්තේ නායක රෝහිත් ශර්මා ගැනය. ඒ රෝහිත්ට තවමත්, තමන් පිතිකරුවෙකු ලෙසින් ගොඩ නගාගෙන සිටින ප්‍රතිරූපයට සරිලන ඉනිමක් ක්‍රීඩා කිරීමට අවස්ථාවක් නොලැබුණු හෙයිනි. 

යම් හෙයකින් ඔහුට අද තරගයේ දී ඒ සඳහා අවස්ථාවක් හිමිවුවහොත් ශ්‍රී ලංකා කණ්ඩායමේ සියලු සැලසුම් සුනුවිසුනු කරනු නොඅනුමානය. තවද, නැවත වරක් ඉන්දීය කණ්ඩායමේ නිත්‍ය ස්ථානයක් සොයමින් සිටින සුරේෂ් රයිනාද බලා සිටින්නේ ඒ සඳහා ඔහුට අවස්ථාවක් හිමිවන තුරුය.

දෙරට අතර පැවැති පළමු තරගයට පෙරාතුව අප සඳහන් කර සිටියේ ඉන්දීය කණ්ඩායමේ පාදඟ පන්දු යවන චාහල්ට කඩුලු ලබානොදිය යුතු බවයි. මන්ද වර්තමාන ඉන්දීය කණ්ඩායමේ කඩුලු දවාගන්නා දඟපන්දු යවන්නා චාහල් බැවිණි. ඔහුට කඩුලු නොලැබුණහොත් ඉන්දීය කණ්ඩායම නියත වශයෙන්ම පීඩනයට හසුවේ. එහෙයින් ඔහුගේ පන්දුවාර හතරට කඩුලු ලබානොදී ලකුණු 40ක් වත් රැස්කරගන්නට හැකිවුවහොත් ශ්‍රී ලංකා කණ්ඩායමට විශාල ලකුණු සංඛ්‍යාවක් රැස්කරගන්නට හෝ විශාල ලකුණු සංඛ්‍යාවක් පසුපස හඹා යන්නට එතරම් ගැටලුවක් නොවනු ඇත.

ශ්‍රී ලංකා කණ්ඩායම මුහුණදුන් පළමු වටයේ තරග දෙක තුළදීම පිතිකරුවන් සිය දායකත්වය මැනවින් ලබාදුන්නද පන්දු යවන්නන්ගෙන් තවමත් සැලකිය යුතු මට්ටමේ දායකත්වයක් නම් නොලැබුණි. බංග්ලාදේශය සමග පැවැති තරගයේදී ලකුණු 214 ආරක්ෂා කරගන්නට අපොහොසත් වීම ඉන් කැපී පෙනේ. 
කෙසේ වෙතත් ආර්. ප්‍රේමදාස පිටියේදී දෙවැනි වරට පන්දු යැවීම තරමක් දුෂ්කරය. ඒ පින්නේ බලපෑම නිසාය. පින්න හේතුවෙන් පන්දුව ලිස්සා යෑමට වැඩි අවස්ථාවක් පවතින හෙයින් පන්දු යවන්නන්ට නියමිත ස්ථානයේ පන්දුව පතිත කිරීම දුෂ්කරය. මේ නිසා පිතිකරුවන්ගේ දරුණු ප්‍රහාරයන්ට ලක්වන්නට පන්දු යවන්නන්ට සිදුවේ.

එහෙයින් කාසියේ වාසිය හිමිකරගතහොත් ප්‍රථමයෙන් පන්දු යැවීම නුවණට හුරුය. ඒ ප්‍රේමදාස පිටියේ ඉලක්කයක් පසු පස හඹා යෑම ප්‍රථමයෙන් පන්දුවට පහරදීමට වඩා පහසු බැවිනි. බංග්ලාදේශය සමග පැවති තරගයේදී අඩු පන්දුවාර වේගයක් රඳවා ගැනීම හේතුවෙන් ශ්‍රී ලංකා නායක දිනේෂ් චන්දිමාල්ට තරග දෙකක තහනමක් පනවා ඇත. අද තරගයේදී ශ්‍රී ලංකා කණ්ඩායම මෙහෙයවීමේ වගකීම තිසර පෙරේරා වෙත පැවරී ඇත. 

England & Sri Lanka Nets Session

ප්‍රවේගකාරී පිතිහරඹයක් දියත් කරන්න වෙනවා

'නිදහස් කුසලාන' පන්දුවාර විස්සයි20 එක්දින තරගාවලියේදී ඉන්දීය කණ්ඩායමට එරෙහිව තමන් මුහුණදුන් පළමු තරගයෙන්ම ජය හිමි කරගන්නට හැකිවීම කණ්ඩායමේ සියලු දෙනාගේම විශ්වාසය ඉහළ නංවන්නට හේතුවක් වූ බව, පළමු තරගයේදී වේගවත් ඉනිමක් දියත් කරමින් ශ්‍රී ලංකා කණ්ඩායමේ ජය මාවත විවර කරදුන් කුසල් ජනිත් පෙරේරා තරගයෙන් අනතුරුව පෙරේදා (06දා) මාධ්‍ය වෙත අදහස් දක්වමින් සඳහන් කර සිටියේය. 

“තරගාවලිය ජයග්‍රහණයකින් ආරම්භ කරන්න ලැබීම ඉතාම වැදගත්. මේ ජයග්‍රහණය අපිට අපි ගැන තියෙන විශ්වාසය තව තවත් වැඩි කරන්න හේතුවක්. තව තවත් දියුණු වෙන්න උත්සාහ කරමින් ඉරියට යන්න තමයි අපේ බලාපොරොත්තුව.” යැයි කුසල් මෙහිදී සඳහන් කර සිටියේය.

මෙහිදී වැඩිදුරටත් අදහස් දැක් වූ කුසල්, “අපි හොඳ ආරම්භයක් ලබාගත්තා. නමුත් මැද පන්දුවාර කිහිපයේදී අපේ කඩුලු කිහිපයක් බිඳ වැටුණා. අපි මැද පන්දුවාරවලදී හොඳින් පන්දුවට පහර දුන්නේ නැහැ. නමුත් සමස්තයක් ලෙස ගත්තාම අපි අංශ තුනෙන්ම ඉදිරියෙන් හිටියා. ඒ නිසා අපි අපේ ජයග්‍රහණය ගැන සතුටු වෙනවා.

කෙසේ වෙතත් පන්දුවාර විස්සකදී ලකුණු 175ක් වාර්තා කරනවා කියන්නේ පහසු දෙයක් නෙමේ. ඒ නිසා අනිවාර්යයෙන් පන්දුවාර 6දී උපරිම ලකුණු ප්‍රමාණයක් රැස්කරගත යුතුව තිබුණා. එක් පන්දු යවන්නෙකුට එරෙහිව ආක්‍රමණයක් දියත් කරන්න කලින් සැලසුම් කරලා තිබුණේ නැහැ. නමුත් තෙවැනි පන්දුවාරයේදී ඔහු හොඳින් පන්දු යැව්වේ නැහැ. ඒ නිසා මට ඔහුට එරෙහිව හොඳින් ලකුණු රැස්කර ගන්නට හැකිවුණා. පන්දුවාර විස්සයි20 තරග රටාව එහෙම තමයි. ඔබට සිදුවෙනවා ප්‍රවේගකාරී පිතිහරඹයක් දියත් කරන්න.” යැයි පවසා සිටියේය.

kusalperera1


 

 

නිදහස් කුසලාන විස්සයි20 ක්‍රිකට් තරගාවලිය අද සිට

70 වැනි නිදහස් සැමරුම වෙනුවෙන් සංවිධානය කෙරුණු 'නිදහස් කුසලාන' පන්දුවාර විස්සයි20 තුන්කොන් ක්‍රිකට් තරගාවලිය ආරම්භ කරමින් අද (06දා) කොළඹ ආර්. ප්‍රේමදාස පිටියේදී සත්කාරක ශ්‍රී ලංකා කණ්ඩායමත්, අසල්වැසි ඉන්දීය කණ්ඩායමත් මුහුණට මුහුණ තරග වැදීමට නියමිතය.

සත්කාරක ශ්‍රී ලංකා කණ්ඩායම බංග්ලාදේශයේ සිදුකළ සාර්ථක තරග සංචාරයකින් පසුව ශ්‍රී ලංකාවේදී තරග වදින අතර, ඉන්දීය කණ්ඩායම ද.අප්‍රිකාවේ සිදුකළ සාර්ථක තරග සංචාරයකින් පසුව මෙම තුන්කොන් තරගාවලියට එක්වේ. කණ්ඩායම් දෙකම මානසිකව ඉදිරියෙන් සිටින බැවින් අද තරගයේදී දෙපිලෙන්ම හොඳ තරගයක් අපේක්ෂා කළ හැකිය.

ඉන්දීය කණ්ඩායමේ නිත්‍ය නායක විරාට් කෝලී මෙන්ම මහේන්ද්‍ර සිං දෝනි, හර්දික් පාන්ඩ්‍යා, බුවනේෂ්වර් කුමාර්, අජන්ක්‍යා රහානේ සහ කුල්දීප් යාදෙව් මෙම තුන් කොන් තරගාවලියෙන් විවේක ගන්වා ඇති බැවින් එය යම් ප්‍රමාණයකට ශ්‍රී ලංකා කණ්ඩායමට හිතකර තත්ත්වයකි. එහෙත් අප අමතක නොකළ යුත්තේ තුන්කොන් තරගාවලියේදී ඉන්දීය කණ්ඩායමට නායකත්වය ලබාදෙන රෝහිත් ශර්මා ශ්‍රී ලංකා කණ්ඩායමට එරෙහිව හොඳින් දක්ෂතා දක්වන පිතිකරුවෙකු බවයි.

ඔහු මෙන්ම ආරම්භක පිතිකරු ශිකර් දවාන් මෙන්ම කලකට පසුව ඉන්දීය එක්දින කණ්ඩායමට ඇතුළත්ව සිටින සුරේෂ් රයිනාද ශ්‍රී ලංකා කණ්ඩායමට අභියෝගයක් එල්ල කළ හැකි පිතිකරුවන් දොපළකි. රෝහිත්, දවාන්, රයිනා සහ කාර්තික් හැරෙන්නට සෙසු ඉන්දීය ක්‍රීඩකයන් තවමත් ජාත්‍යන්තර එක්දින තරග බිමේ එතරම් කතා බහට ලක් වූ ක්‍රීඩකයන් නොවන බැවින් ශ්‍රී ලංකා කණ්ඩායමෙන් වැඩි දක්ෂතා අපේක්ෂා කළ හැක. කෙසේ වෙතත් මෑතක සිට ජාත්‍යන්තර පිටියේදී වේගයෙන් දියුණු වෙමින් වැඩි කතා බහට ලක්වන දඟපන්දු යවන්නෙකු වන යුෂ්වෙන්ඩ්ද්‍ර චාහල් වෙත වැඩි අවධානයක් යොමු කිරීම නුවණට හුරුය.

AID_3357 copy

අාබාධයක් හේතුවෙන් බංග්ලාදේශය සමග පැවැති තුන්කොන් එක්දින තරගාවලියේදී කණ්ඩායමෙන් ඉවත් වූ කුසල් ජනිත් පෙරේරා නැවතත් කණ්ඩායම සමගින් එක්ව සිටින බැවින් එය ශ්‍රී ලංකා කණ්ඩායමට හිතකරය. බොහෝ දුරට අද තරගයේදී කුසල් ජනිත් පෙරේරා, කුසල් මෙන්ඩිස්, ධනුෂ්ක ගුණතිලක, දසුන් ශානක, දිනේෂ් චන්දිමාල්, උපුල් තරංග, තිසර පෙරේරා, ජීවන් මෙන්ඩිස්, අකිල ධනංජය, සුරංග ලක්මාල් සහ ඉසුරු උදාන යන ක්‍රීඩකයන් ක්‍රීඩා කිරීමට වැඩි අවස්ථාවක් පවතී. 

තරගාවලිය ගැන දැනුම්වත් කිරීමේ හමුවක් ඊයේ (05 දා) කොළඹ ටාජ් සමුද්‍ර හෝටලයේදී පැවැති අතර, මෙම අවස්ථාවට එක්ව සිටි නායකයන් තිදෙනාම සඳහන් කර සිටියේ තරගාවලියට සාර්ථකව මුහුණදීමට කණ්ඩායමක් ලෙස තමන් සූදානම් බවයි. එමෙන් තරගාවලිය ජය ගැනීමේ හැකියාව තම කණ්ඩායම සතු බවද නායකයන් තිදෙනාම සඳහන් කර සිටියේය. 

ශ්‍රී ලංකා සංචිතය -කුසල් ජනිත් පෙරේරා, කුසල් මෙන්ඩිස්, ධනුෂ්ක ගුණතිලක, දසුන් ශානක, උපුල් තරංග, දිනේෂ් චන්දිමාල් (නායක), තිසර පෙරේරා, ජීවන් මෙන්ඩිස්, අකිල ධනංජය, සුරංග ලක්මාල්, ඉසුරු උදාන, අමිල අපොන්සු, ධනංජය ද සිල්වා, දුෂ්මන්ත චමීර, නුවන් ප්‍රදීප්

ඉන්දීය සංචිතය -රෝහිත් ශර්මා (නායක), ශිකර් දවාන්, ලෝකේෂ් රාහුල්, සුරේෂ් රයිනා, දීපක් හුඩා, දිනේෂ් කාර්තික්, මොහොමඩ් සිරාජ්, යුෂ්වෙන්ද්‍ර චාහල්, මනීෂ් පාන්ඩේ, රිෂාබ් පන්ට්, අක්ෂර් පටෙල්, විජේ ශන්කර්, ශර්දුල් තාකුර්, ජාදෙව් උන්ඩ්කට්, වොෂින්ටං සුන්දර්    

අද (06දා) තරගය මෙරට වේලාවෙන් ප.ව 7.00ට ආරම්භ වීමට නියමිතය.

ඡායාරූපය – ඒෂාන් ප්‍රනාන්දු

 

 

ඔලිම්පික් නිලවරණය දූෂිත නිලවරණයක්

ක්‍රීඩා ඇමතිවරයා විසින් පත්කළ අතුරුපාලක මණ්ඩල විසින් ඔලිම්පික් නිලවරණයේදී ඡන්දය භාවිතා කිරීම නිසා වසර 9කට පසුව පැවැති ඔලිම්පික් නිලවරණය දූෂිත නිලවරණයක්  වූ බව ජ්‍යේෂ්ඨ කථිකාචාර්ය, නීතිඥ, අචාර්ය ප්‍රතිභා මහනාම මහතා ‘අද’ කළ විමසුමේදී සඳහන් කර සිටියේය.

ඒ මහතා මේ බව සඳහන් කර සිටියේ, ක්‍රීඩා ඇමතිවරයා විසින් පත්කළ, අතුරුපාලක මණ්ඩලයක් තිබියදී එමෙන්ම ඔලිම්පික් නිලවරණයේදී ඡන්දය භාවිතා කිරීමෙන් වැළකී සිටින ලෙස දන්වා තිබියදී බැඩ්මින්ටන් අතුරුපාලක මණ්ඩලය සහ හොකී අතුරුපාලක මණ්ඩලය සිය ඡන්දය ප්‍රකාශ කිරීම සම්බන්ධයෙන් අප කළ විමසුමේදීය.    

“පසුගියදා පැවැත් වූ ඔලිම්පික් නිලවරණය වෙනුවෙන් ඡන්දය ප්‍රකාශ කරපු බැඩ්මින්ටන් සංගමයට සහ හොකී සංගමයට තියෙන්නේ අතුරු කමිටු. එයාලට ඡන්දය ප්‍රකාශ කරන්න අයිතියක් නැහැ. ඇමතිතුමා අතුරුපාලක මණ්ඩලයක් දැම්මා. ඇමතිතුමා ඒ අයට ඡන්ද ප්‍රකාශ කිරීමෙන් වැළකී සිටින ලෙස දැනුම් දීලත් තිබෙනවා. එවැනි වටපිටාවක් තුළදී පවා ඔවුන් ඡන්දය ප්‍රකාශ කරලා තිබෙනවා.
මෙහිදී සම්පූර්ණයෙන්ම ක්‍රීඩා නීතිය හැල්ලු වෙනවා විතරක් නෙමේ මේ සම්බන්ධව අගතියට පත් පාර්ශ්වයේ අයගේ මූලික මිනිස් අයිතිවාසිකම් උල්ලංඝනය වීමකුත් සිදුවෙනවා. ඒ නිසා මේ අයට පුළුවන් නඩුවක් ගොනු කරන්න.

මේ අතුරුපාලක මණ්ඩලවලට කිසිම අයිතියක් නැහැ ඡන්දය පාවිච්චි කරන්න. ඒකට ප්‍රධාන හේතුව තමයි අතුරුපාලක මණ්ඩලයේ ඉන්නේ සර්ව ජන ඡන්ද බලයෙන් පත් වූ අය නෙමේ. ක්‍රීඩා ඇමතිතුමා විසින් පත් කරපු අයනේ. දැන් මට ආරංචියක් තියෙනවා ජාත්‍යන්තර ඔලිම්පික් කමිටුව පවා රතු එළි ලංකාවට පාවිච්චි කරනවා කියලා. ඇයි මෙහෙම ක්‍රියා කළේ කියලා. ලෝකේ කිසිම රටක මෙහෙම වෙලා නැහැ. අතුරුපාලක මණ්ඩලවලට පුළුවන් නිරීක්ෂකයන් ලෙස සහභාගි වෙන්න විතරයි. නමුත් මෙතන ඡන්දය පාවිච්චි කරලා තියෙනවා. මේක දූෂිත මැතිවරණයක්. ඒ බව මම පැහැදිලිව කියනවා.

මේ මැතිවරණයට එරෙහිව කාට හෝ ගිහිල්ලා තහනමක් ලබාගන්න පුළුවන්. මෙයින් මෙරට ක්‍රීඩා නීතිය උල්ලංඝනය කරලා තියෙනවා. ජාත්‍යන්තර නීතිය උල්ලංඝනය කරලා තියෙනවා. ඒ නිසා මෙරට ක්‍රීඩා ගැන උනන්දුවෙන කාට හෝ මේ සම්බන්ධයෙන් මැදිහත්වෙලා සාධාරණයක් ලබාගන්න පුළුවන් කියලා මම කියනවා.

ඇමතිතුමාට වඩා බලය තියෙනවා සමහර සංගම්වල නිලධාරීන්ට. ඇමතිතුමා නිකන් පුටුවේ ඉඳගෙන හිටියට ඇමතිතුමා පවා වක්‍රව පාලනය කරනවා. ඇමතිතුමා එපා කිවුවට ඡන්දය දුන්නේ කොහොමද කියන එක හොයලා බලන්න ඕන නේ. ඒක නීතියේ බලය හෑල්ලු කිරීමක්. ඇමතිතුමා එපා කිවුවට ඒ අය ඡන්දය පාවිච්චි කරනවා නම් එය පාවිව්චි වෙන්නේ යම් කිසි පරීක්ෂණ කණ්ඩායමක් හරහා. ඒ පරීක්ෂණ කණ්ඩායම මේ සම්බන්ධයෙන් සම්පූර්ණයෙන් වගකියන්න ඕන. මූලික වශයෙන්ම මෙහි වගකීම තියෙන්නේ මෙහි ඡන්දය මෙහෙය වූ කණ්ඩායමට. මෙහිදී නීතියෙන් බැහැරව ක්‍රියා කරලා තියෙනවා. නීතිය තුට්ටුවකට මායිම් කරලා නැහැ.

ඒ නිසා මෙහි සම්පූර්ණ වගකීම යනවා මේ නිලවරණය මෙහෙය වූ කණ්ඩායමට. ඒ නිසා අගතියට පත් පාර්ශ්වයට පුළුවන් මේ ඡන්දය ශූන්‍ය කරන්න කියලා නඩුවක් ගොනු කරන්න. අවුරුදු නවයකට පසුව නිලවරණයක් පැවැත්වීම ගැන ජාත්‍යන්තර ඔලිම්පික් කමිටුවද පැහැදීමකින් හිටියේ. ඒ නිසා ඔවුන්ට දැන් ගැටලුවක් වෙලා තියෙනවා කෙහොමද නුසුදුසු අය පත්වුණේ කියන එක ගැන. ඇමතිතුමාට පුළුවන් පනත අනුව එතුමාගේ බලය පාවිච්චි කරලා ඔලිම්පික් කමිටුව විසුරුවා හරින්න. ඊට පස්සේ තමන්ගේ අධීක්ෂණය යටතේ නැවත නිලවරණය තියන්න. 

ක්‍රීඩා සංගම්වල අය ඒ ඒ සංගම්වලට පත් වෙන්නේ මෙරට ක්‍රීඩා නීතියට අනුව. ඒ නිසා ඔවුන් මෙරට නීතියට ගරු කරන්න ඕන. එහෙම නැතුව එයාලට හිතෙන විදිහට වැඩ කරන්න ගියාම රටේ ක්‍රීඩා නීතිය හැල්ලුවට ලක්වෙනවා. දැන්වෙලා තියෙන්නෙත් ඒ දේමයි. මේ සංගම්වල කිසිම පාරිදෘශ්‍යභාවයක් නැහැ. ජාත්‍යන්තර ඔලිම්පික් කමිටුව කියනවා සංගමයේ ගිණුම් නිසි පරිදි විගණනය කරන්න කියලා. එතකොට තමයි පාරිදෘශ්‍යභාවය ඇති වෙන්නේ. නමුත් එහෙම වෙන්නේ නැහැ.

ඒවා අති දූෂිතයි. සමහර ඔලිම්පික් තරගාවලි සඳහා රියදුරන්, බිරින්දෑවරු සහ යහළුවන් රැගෙන ගිහින් තියෙනවා. එහෙම කොහොමද ඒ අය යන්නේ. ලංකාවේ ක්‍රීඩා ඇමතිවරයාට පවා මේවා පාලනය කරගන්න බැහැ. මේවාට බලපාන අදෘශ්‍යමාන බලවේග ක්‍රියාත්මක වෙනවා. ඒ බලවේග ක්‍රියාත්මක වුණාම ඇමතිතුමාටවත් මුකුත් කරගන්න බැහැ. 

ලංකාවේ නීති තිබ්බත්, නීති ක්‍රියාත්මක වුණත් ඒවා අමු අමුවේ උල්ලංඝනය කරනවා. විගණක වාර්තා නැහැ. ඒ විගණක වාර්තා නැති අය පවා පත්වෙනවා. ඊට පස්සේ මේක අතිදූෂිත වෙනවා. මේ නිසා අන්තර්ජාතික ඔලිම්පික් සංගමය පවා අපිව තහනම් කරන්න පුළුවන්. අපි ඒ තහනමට ළංවෙලා ඉන්නේ. හිතන්නකෝ යම් විදිහකින් ජාත්‍යන්තර ඔලිම්පික් සංගමය අපිව තහනම් කළොත් ජාත්‍යන්තරව අපිට තරගවලට සහභාගි වෙන්න බැරි වෙනවා. එතනට තමයි මේ ගමන් කරමින් ඉන්නේ.” යැයි අවසන් වශයෙන් සඳහන් කර සිටියේය.

Dr.-Prathiba-Mahanamahewa-640x400

පූර්ණ තරගාවලි ජයක් සොයා සටන් වදිමු

සංචාරක ශ්‍රී ලංකා කණ්ඩායම සහ සත්කාරක බංග්ලාදේශ කණ්ඩායම අතර, පැවැත්වෙන තරග දෙකකින් යුත් පන්දුවාර විස්සයි-20 ක්‍රිකට් තරගාවලියේ දෙවැනි තරගය අද (15දා) ඩකාහිදී ආරම්භ වේ. එක්දින තරගාවලිය මෙන්ම පසුගියදා අවසන් ටෙස්ට් ක්‍රිකට් තරගාවලියද ජයගත් ශ්‍රී ලංකා කණ්ඩායම පන්දුවාර විස්සයි20 තරගාවලියට අවතීර්ණ වන්නේ බංග්ලාදේශ කණ්ඩායමට වඩා ඉදිරියෙන් හිඳිමිනි.

දෙරට අතර මේ දක්වා පන්දුවාර විස්සයි20 තරග හතක් පවත්වා ඇති අතර ඉන් තරග 5කම ජය හිමි කරගන්නට ශ්‍රී ලංකා කණ්ඩායමට හැකිවුවද පසුගිය කාලයේදී, විශේෂයෙන්ම විස්සයි20 තරග බිමේදී ශ්‍රී ලංකා කණ්ඩායම ඉදිරිපත් කළ දක්ෂතා දෙස අවධානය යොමුකිරීමේදී පෙනී යන්නේ තරුණ ශ්‍රී ලංකා කණ්ඩායම තවමත් සිය සුපුරුදු දක්ෂතා අතරට පැමිණ නොමැති බවයි. එහෙයින් අදින් ඇරඹෙන පන්දුවාර විස්සයි 20 තරගාවලියද ශ්‍රී ලංකා කණ්ඩායමට තරමක් අභියෝගාත්මක තරගාවලියකි. ඒ කෙසේ වෙතත් විස්සයි20 තරගාවලියේද ජය හිමි කරගන්නට ශ්‍රී ලංකා කණ්ඩාමට අවස්ථාවක් පවතී. එසේ වුවහොත් සාර්ථක තරගාවලියක් අවසන් කරමින් දිවයිනට පැමිණීමට යොවුන් ක්‍රීඩකයන්ට හැකිය. 

විස්සයි20 තරගාවලියට නම්කළ ශ්‍රී ලංකා සංචිතයට ඇතුළත්ව සිටි කුසල් ජනිත් පෙරේරා වෙනුවට කුසල් මෙන්ඩිස් ඇතුළත් කිරීමට තේරීම් කමිටුව පසුගියදා තීරණය කළේය. ඒ කුසල් ජනිත් පෙරේරාගේ ආබාධය තවමත් සුවවී නොමැති බැවිනි. කුසල් මෙන්ඩිස් එක්දින තරගාවලියේදී මෙන්ම ටෙස්ට් ක්‍රිකට් තරගාවලියේදීද ලකුණු අතරට පැමිණි නිසා ඔහුට අවස්ථාවක ලබාදීම ගැටලුවක් නොමැත. එහෙත් කුසල් පෙරේරා නොමැතිවීම ශ්‍රී ලංකා කණ්ඩායමට පාඩුවකි. කෙසේ වෙතත් උපුල් තරංග සහ තිසර පෙරේරා පන්දුවාර විස්සයි20 බංග්ලාදේශ ප්‍රිමියර් ලීග් තරගාවලියට ක්‍රීඩා කළ බැවින් එය ශ්‍රී ලංකා කණ්ඩායමට හිතකර තත්ත්වයකි. නමුත් සුරංග ලක්මාල් නොමැතිවීම පාඩුවකි.

3EB46E9300000578-0-image-m-47_1490718783327

ටෙස්ට් තරගාවලියේදී ක්‍රීඩා නොකළ උපුල් තරංග මෙන්ම ශ්‍රී ලංකා සංචිතයට ඇතුළත්ව සිටින අසේල ගුණරත්න, ධනුෂ්ක ගුණතිලක, දසුන් ශානක සහ ඉසුරු උදානට අද තරගයේදී අවස්ථාවක් හිමිවිය යුතු යැයි අපගේ විශ්වාසයි. විශේෂයෙන්ම අවසන් පන්දුවාර කිහිපයේදී හොඳින් පන්දු යවන, මේ අවස්ථාව වනවිට ශ්‍රී ලංකාව වෙනුවෙන් සිටින අත්දැකීම් බහුල පන්දුවාර විස්සයි20 පන්දු යවන්නා වන ඉසුරු උදානගෙන් ප්‍රයෝජනයක් ගන්නට ශ්‍රී ලංකා කණ්ඩායම උත්සාහ කළ යුතුය.

එක්දින තරගාවලියේදී ආබාධයකට ලක්වීම නිසා ටෙස්ට් තරගාවලියට ක්‍රීඩා නොකළ බංග්ලාදේශ පන්දුවාර විස්සයි20 කණ්ඩායමේ නිත්‍ය නායක ශකීබ් අල් හසන් නැවතත් බංග්ලාදේශ කණ්ඩායම සමගින් එක්ව සිටින බැවින් එය බංග්ලාදේශ කණ්ඩායමේ විශ්වාසය වැඩි කරවන්නට හේතුවකි. තරගාවලිය පුරාවට ඔහු ක්‍රියාත්මක වුවහොත් තරගාවලිය ජයගන්නට ශ්‍රී ලංකා කණ්ඩායමට දැඩි පරිශ්‍රමයක් දරන්නට සිදුවනු ඇත. එමෙන්ම තමීම් ඉක්බාල්, මුෂ්ෆිකර් රහීම්, සබීර් රෙහ්මාන් සහ මහමුදුල්ලා ශ්‍රී ලංකා කණ්ඩායමට අභියෝගයක් එල්ලකල හැකි බංග්ලාදේශ පිතිකරුවන් වන අතර සහ මුස්ටෆිසුර් රෙහ්මාන් ශ්‍රී ලංකා පිතිකරුවන්ට අභියෝගයක් එල්ල කරන පන්දු යවන්නා වේ.

17_1437052994

ශ්‍රී ලංකා සංචිතය  දිනේෂ් චන්දිමාල් (නායක), උපුල් තරංග, ධනුෂ්ක ගුණතිලක, කුසල් මෙන්ඩිස්, තිසර පෙරේරා, අසේල ගුණරත්න, නිරෝෂන්  දික්වැල්ල, දසුන් ශානක, ඉසුරු උදාන, ෂෙහාන් මධුශංක, ජෙෆ්රි වැන්ඩර්සේ, අකිල ධනංජය, අමිල අපොන්සෝ, ජීවන් මෙන්ඩිස්, අසිත ප්‍රනාන්දු

බංග්ලාදේශ සංචිතය  ශකීබ් අල් හසන් (නායක), තමීම් ඉක්බාල්, සෞම්‍ය සර්කාර්, මුෂ්ෆිකර් රහීම්, මහමුදුල්ලා, සබීර් රෙහ්මාන්, මුස්ටෆිසූර් රෙහ්මාන්, රුබෙල් හුසේන්, මොහොමඩ් සයිෆුද්දීන්, අබු ජායේඩ්, අරිෆුල් හක්, මහේදි හසන්, සකීර් හසන්, ඇෆීෆ් හුසේන්

ජපන් දරුවන්ගේ අති උත්කර්ෂවත් “ෂිචි-ගො-සන්”

සෑම සරත් සෘතුවකම ජපානයේ කුඩා දරුවන් සිටින පවුල් 'ෂිචි-ගෝ-සන්' නමින් හඳුන්වන සාම්ප්‍රදායික මෙන්ම විචිත්‍රවත් උත්සවයක් සමරනවා. ජපන් භාෂාවෙන් 'ෂිචි-ගෝ-සන්' යන්නෙන් අදහස් කරන්නේ '7-5-3' යන්නයි. එනම් වයස අවුරුදු 3 සහ 7 පිරුණු ගැහැනු ළමයින් සඳහා මෙන්ම අවුදුරු 5 පිරුණු පිරිමි ළමයින් වෙනුවෙන් සමරන උත්සවයට තමයි 'ෂිචි-ගෝ-සන්' කියන්නේ. ඔවුන්ගේ අනාගත සුරක්ෂිතතාව සහ සෞඛ්‍ය සම්පන්න බව වෙනුවෙන් දෙමාපියන් සහ පවුලේ සෙසු සාමාජිකයන් සමග පන්සලකට හෝ ආගමික සිද්ධස්ථානයකට ගොස් ආගමික වතාවත් සිදුකරමින් ආශිර්වාද ලබාගැනීම මෙහිදී සිදුවෙනවා. එය සෑම වර්ෂයකම නොවැම්බර් මස 15 වැනිදා සමරනු ලබන අලංකාර උත්සවයක්. 


31164078842_6f269da376_b

ජපන් ජන සමාජය අවුරුදු තුන, පහ හා හත යන කාලයන් දරුවෙකුගේ වර්ධනයේ වැදගත් අවධීන් ලෙස සලකන අතරම ඔත්තේ සංඛ්‍යාද වාසනාවන්ත සංඛ්‍යා ලෙස විශ්වාස කරනවා. නොවැම්බර් 15 වැනිදා %ෂිචි-ගෝ-සන්^ සැමරීමට තවත් හේතුවක් තියෙනවා. ඒ තමයි තුන, පහ හා හත යන අංක තුනේ එකතුව 15 වීමත්, එය සුබ දිනයක් ලෙස සැලකීමත්. කෙසේ වෙතත් අතීතයේ පටන් නොවැම්බර් 15 වැනිදා %ෂිචි-ගෝ-සන්^ සමරනු ලැබූවත් නූතනයේ පවතින කාර්යබහුල දිවිපෙවෙත නිසා දැන් දැන් බොහෝ නාගරික පවුල් එය සති අන්තයේදී හෝ නිවාඩු දිනයකදී සමරන්නට පටන් අරන්. 

නූතන 'ෂිචි-ගෝ-සන්' වෙනුවෙන් ළමයින් අලුත් හා හොඳම ඇඳුමින් හැඩවැඩ කරන්නට දෙමාපියන් මහත් වෙහෙසක් ගන්නවා. විශේෂයෙන්ම මව මේ වෙනුවෙන් වැඩි උනන්දුවක් දක්වන බවයි වාර්තා වෙන්නේ. මෙදින ගැහැනු දරුවන් සාම්ප්‍රදායික %කිමෝනෝවෙන්^ හැඩවෙන අතර, පිරිමි දරුවන් %හකාමා^ ඇඳුමෙන් හැඩ වෙනවා. එසේ හැඩ වූ දරුවන් තම දෙමවුපියන් සමග ඔවුන්ගේ ෂින්ටෝ සිද්ධස්ථානය වෙත හෝ පන්සලකට ගොස් ආගමික වතාවත්වල යෙදෙමින් දරුවාගේ වර්තමාන මෙන්ම අනාගත නිරෝගී බව වෙනුවෙන් ආශිර්වාද ලබාගන්නවා. ඒ වාගේම දෙමාපියන් විසින් දරුවන්ට මෙදින රසකැවිලිද ලබාදෙන අතර, එය %චිටොසෙ-අමෙ^ නමින් හඳුන්වනවා. එහි වචන අර්ථය %අවුරුදු දහසක රසකැවිලි^ යන්නයි. අතීතයේදී, විශේෂයෙන්ම දෙවන ලෝක යුද්ධයෙන් පසුව ජපන් ජන සමාජය විවිධ රෝගාබාධයන්ට වැඩි වශයෙන් ගොදුරු වූ කාලයක් වුණා. එකල ළදරු මරණ අනුපාතිකයද බරපතළ ලෙස ඉහළ අගයක් ගත්තා. එබැවින් %ෂිචි-ගෝ-සන්^ ළදරුවන්ගේ දිවියේ වැදගත් සංධිස්ථානයන් ලෙස සලකන්නට ජපන් ජන සමාජය ක්‍රමක්‍රමයෙන් හුරු වී තිබෙනවා. 

children-in-kimono-photo_preview-933x445

ජපන් බිලිඳෙකුගේ උපතින් දින හතකට පසුව හිසකේ බූගෑම අතීතයේ පටන්ම පැවති සම්ප්‍රදායක්. වර්තමානයේදී එය එතරම්ම දැකගැනීමට නොහැකි වුවත් ඉඳහිට එවැනි බිලිඳෙකු දැකගැනීමට හැකියි. එතැන් පටන් දරුවාට වයස අවුරුදු තුන වනතුරු හිසකේ බූගෑම ජපානයේ පැරණි සිරිත විය. එය දරුවාගේ වැඩීමට අවශ්‍ය කරන ශක්තීන් මනා ලෙස ලැබෙන බව ජපනුන් තුළ පැවති විශ්වාසයක්. ඒ අනුව හිසකේ බූගෑම නතර වන්නේද වයස අවුරුදු තුන පිරුණු පසුවයි. එය මෙම සාම්ප්‍රදායික චාරිත්‍රවල අවස්ථාවයි. එය %කමිඕකි^ නමින් හඳුන්වනවා. මෙතැන් පටන් බිලිඳාගේ හිසකේ හොඳින් වර්ධනය වන බව ජපනුන් විශ්වාස කරන්නක්.

මෙහි දෙවැනි චාරිත්‍රය 'හකාමගි-නො-ගි' යනුවෙන් හැඳින්වෙනවා. එනම් 5 හැවිරිදි පිරිමි දරුවන්ට සාම්ප්‍රදායික 'හකාමා' ඇඳුම (ලිහිල් කලිසම්) පළමු වරට අඳින්නට අවස්ථාව හිමි වීමයි. තවද මෙදින සිට පිරිමි දරුවන්ට සිය කාර්යභාරය හා වගකීම් පිළිබඳ අවවාද ලබාදීමක්ද සිදුවන අතර, ඒ වෙනුවෙන් ඔවුන් හුරුපුරුදු කරන්නේ ද මෙදින සිටයි. තෙවැනි උත්සවය, 'ඕබිටෝකි-නො-ගි' වේ. මෙය අවුරුදු 7 ක් වයසැති ගැහැනු ළමයින් සඳහා පවත්වනු ලබන අතර, ගැහැනු ළමයින්ට මෙදින පළමුවරට සාම්ප්‍රදායික 'ඔබි' ඇඳුමෙන් සැරසෙන්නට අවස්ථාව ලැබෙනවා. මෙය ගැහැනු දරුවන් ක්‍රමයෙන් කාන්තාවන් බවට පත්වෙමින් සිටින බව සංකේතවත් කරන්නක්. 'ඔයිටොකි-නො-ගි' ආරම්භය කමකුරා යුගය දක්වා දිවයන්නක්. එකල එය ගැහැනු දරුවන්ට වයස අවුරුදු 9 සපිරුණු විට සැමරුවත් 'එඩෝ' යුගයේදී මෙය නැවත වරක් වයස අවුරුදු 7 දක්වා අඩු විය.

මේ සෑම අවස්ථාවකදීම අර්ථ ගන්වන්නේ දරුවන් පියවරෙන් පියවර වැඩිහිටියන් ලෙස සමාජයට පැමිණෙමින් තිබෙන බවයි. ඒ වගේම ඔවුන් ජපන් සමාජ සම්ප්‍රදායන්ට අනුව වගකීම් දැරීමට සුදුසු තත්ත්වයට පත්වෙමින් ඒ සඳහා හුරුව ලබාගැනීමයි.
කෙසේ වෙතත් ඉහතින් සඳහන් කළ අතීත විශ්වාසයන්ට හා සාම්ප්‍රදායික වටිනාකම්වලට වර්තමාන ජපන් ජන සමාජය තුළ පවතින ඉඩ පිළිබඳ යම් සැකයක් මතු වුවත් ඔවුන් එය සැමරීමට අමතක නොකරයි. වර්තමානය වන විට %ෂිචි-ගො-සන්^ චාරිත්‍රය හුදෙක් එක් සැමරුමක් බවට පරිවර්තනය වී තිබුණත්, චාරිත්‍රයක් ලෙස ආගමික ස්ථානයන් වෙත යන ජපන් දෙමාපියන් තම දරුවන් වෙනුවෙන් ආශිර්වාද ලබා ගැනීම සඳහා පමණක් එය භාවිත කරයි. තවද මෙය විසිතුරු ඇඳුමින් දරුවන් හැඩ කරවා ඡායාරූප ලබාගැනීමට යොදා ගන්නා තවත් අවස්ථාවක් ලෙසද පෙනෙන්නට තිබේ.  

35dff63ac34e995fdad414dfd8ebd765