Author Archives: ඩිලාන් ක්‍රිෂාන්ත

කුරුලු පිහාටුවෙන් නිර්මාණයන් කරන Chris Maynard

කලා නිර්මාණයන් අද වනවිට විවිධ වූ පැතිකඩයන් ඔස්සේ ඉතාමත් ජනප්‍රියත්වයට පත්ව තිබේ. විවිධ වූ ද්‍රව්‍ය භාවිත කරමින් බොහෝ කලා නිර්මාණයන් ලොවට ප්‍රසිද්ධ කර තිබේ. නිර්මාණයන් විවිධ වන අතර, ඒ සඳහා ලැබෙන වටිනාකමද තව තවත් විශාල වෙයි. Chris Maynard යනු මේ වන විට නිර්මාණ ලෝකය තුළ වෙනස්ම මාදිලියේ දක්ෂතා දක්වන්නෙකි. ඔහු විසින් සිදුකරනු ලැබූ නිර්මාණයන් සඳහා අද වන විට විශාල වටිනාකමක්ද හිමිව තිබේ. ඔහු සිදුකරන ක්‍රියාව ඉතාමත් දුෂ්කර කාර්යයකි. නමුත් ඉන් ලැබෙන අවසාන ප්‍රතිඵලය බොහෝදෙනා විස්මයට පත්කරනු ඇත.

ඔහුගේ කුඩා කාලයේ විනෝදාංශය මේ වන විට වෘත්තිය වී හමාරය. ඔවුන් විසින් පාසල් කාලයේ සිට කරනු ලැබූ පිහාටු එකතු කිරීම ඔස්සේ මෙම නිර්මාණකරණයට හුරු වූ බව ඔහු පවසයි. Chris සිය කුඩා කාලයේ සිටම විනෝදාංශයක් වූ පිහාටු එකතු කිරීම නිර්මාණයක් වූ හැටි තමාවත් නොදන්නා බව සඳහන් කරයි. Chris Maynard යනු විශේෂ කලා හැකියාවන් ගොන්නක් ඇති පුද්ගලයෙකු බවයි බොහෝදෙනා සඳහන් කරන්නේ.

ඔහු පාසල් කාලයේදී කලා විෂය පිළිබඳව වැඩි උනන්දුවක් දැක්වූ අතර, ඉන්පසු පාසල් කාලයේ අමතර විෂයයක් ලෙස ඔහු නිර්මාණ කලාව පිළිබඳව අධ්‍යයනය කර තිබේ. පසුව ඒ පිළිබඳව හදාරමින් ඉදිරියට පැමිණ තිබේ. පාසල් ගමන අවසන් වීමත් සමගින් Chris කලාගාරයක සේවය සඳහා ගොස් තිබේ. එහිදී ඔහු නිර්මාණ කලාව පිළිබඳව අත්දැකීම් ලබාගනු ලැබීය.

කාලයාගේ ඇවෑමෙන් එම කලාගාරයේ ගුරුවරයෙකු වශයෙන් කටයුතු කිරීමට Chrisට අවස්ථාවක් හිමි විය. කෙසේවෙතත් නවතම නිර්මාණ කලාවක් සඳහා යොමු වීම ඔහුගේ එක් හීනයක් විය. ඒ සඳහා සිය වෘත්තියෙන්ද ඉවත් වී නවමු මගක් සෙවූ ඔහු තමන්ගේ විනෝදාංශය වූ කුරුලු පිහාටු පිළිබඳව අවධානය යොමුකරන්නට විය.

එම කුරුලු පිහාටු මගින් නිර්මාණ බිහිකිරීම සඳහා ඔහු විශාල වෙහෙසක් දැරීය. මේ වනවිට කුරුලු පිහාටු නිර්මාණ සහිත කලාගාරයක් ඔහු විසින් පවත්වාගෙන යනු ලබයි. ඕනෑම කෙනෙකුට මෙම කලාගාරයේ ඇති නිර්මාණයන් රසවිදීමට අවස්ථාවද උදාකර දී තිබේ.

Chris Maynardගේ කුරුලු පිහාටු නිර්මාණයන් ලොවටම ගෙන යාමට ඔහුට හැකියාව ලැබී තිබේ. මේ වනවිට ඔහුගේ නිර්මාණයන් ඉතාමත් අධික මිල ගණන් යටතේ අලෙවි වන බවද සඳහන් වෙයි. 

chris-maynard-feathers-6 download (1) download (2) download (7) download (8) download (9) download feather06 Firmament+WEBwm Gesture+WEBwm Maynard_01 Moondance+.+turkey+feathers+.+12-+x+15-+

මම අභියෝගවලට ආසයි

මේ දිනවල කාර්යබහුල ජීවිතයක් ගතකරන ඇය මිස් ශ්‍රී ලංකා කිරුළ කිහිප වතාවක්ම දිනා ඇත්තියකි. ආකර්ෂණීය රූ සපුවකින් හෙබී ටීනා නිරූපණයට අමතරව සිනමාවටද පිවිස සිටින්නීය. ඇගේ ඉදිරි කටයුතු පිළිබඳව 'අද' සමගින් මෙලෙස අදහස් දැක්වූවාය.

Q මේ දවස්වල කොහොමද වැඩකටයුතු?

මේ දවස්වල ටිකක් කාර්යබහුලයි. මගේ ඊළඟ ෆිල්ම් එක සඳහා වැඩකරනවා.

Q මේ පළවෙනි ෆිල්ම් එකද ඔබේ?

නෑ. පළවෙනි ෆිල්ම් එක මේ අවුරුද්දේ රිලීස් වෙනවා. මේ දෙවනි එක. තව ෆිල්ම් එකකට ආරාධනා ලැබිල තියෙනවා. ඒක භාරගන්නවාද නැද්ද කියල හිතාගන්න බැරුව ඉන්නේ.

Q පළවෙනි ෆිල්ම් එක මොකක්ද?

ප්‍රියන්ත කොළඹගේගේ චිත්‍රපටයක්. ඒකෙ නම 'දේදුනු ආකාසේ'. ඇත්තටම සතුටුයි ලංකාවේ ප්‍රවීණ කෙනෙක්ගේ ෆිල්ම් එකකට මුලින්ම දායක වෙන්න ලැබුණ නිසා. ඒ වගේම හේමාල් රණසිංහ වගේ ජනප්‍රිය රංගන ශිල්පියෙක් එක්ක රඟපාන්න ලැබුණා.

ඇත්තටම මොඩ්ල්ස්ලගෙන් මමයි චූලක්ෂියි ගොඩක් වාසනාවන්තයි. මොකද ගොඩක් නළු නිළියන් අතරින් තමයි අපි දෙන්නව තෝර ගත්තේ. ගොඩක් මොඩ්ල්ස්ලට මේ වගේ අවස්ථා යන්නෙ නැහැ. මගේ රසිකයන්ට බලාගන්න පුළුවන් ඉදිරියේදී මගේ ෆිල්ම්ස්.

Q චිත්‍රපටයකට දායක වීම කොහොමද දැනුණේ?

මියුසික් වීඩියෝ එකක කරන්න තියෙන්නේ නිකම් රඟපෑමක් විතරයි. චිත්‍රපටයක එහෙම බෑ. දෙබස් එක්කනේ කරන්න තියෙන්නේ. ඒක නිසා ටිකක් අමාරුයි. අපි රඟපාද්දි සමහර තැන්වලදි දෙබස් අමතක වෙනවා. අපි ගොඩක් පුහුණුවීම් කළා. ප්‍රියන්ත අයියා අපිව ක්ලාස් එකකට යැවුවා.

Q චිත්‍රපටයකට ආරාධනා කරද්දි භාරගන්න බයක් තිබුණේ නැද්ද?

නෑ එහෙම නැහැ. මම ආසයි අභියෝග වලට. නළු නිළියන්ගෙන් පොඩි පොඩි බාධා තියෙනවා. ඊර්ෂ්‍යාකම් එහෙම නැතුවම නෙමෙයි. ප්‍රියන්ත කොළඹගේ වගේ ප්‍රවීණ අධ්‍යක්ෂකවරයෙක් යටතේ රඟපාන්න ලැබුණ එක ගැන ගොඩක් සතුටුයි.

Q ටීනට මේ ක්‍ෂේත්‍රය තුළ ඊර්ෂ්‍යා කරන අය ඉන්නවද?

අනිවාර්යෙන් ඉන්නවා. නැහැයි කියන්න බැහැ. ගොඩක් අය දක්ෂතාවයක් නැතිව සහ අවස්ථාවන් ලැබෙන්නෙ නැති නිසා මට ඊර්ෂ්‍යා කරනවා ඇති කියල මම හිතනවා.

Q නිරූපණයේදී ලිංගික අල්ලස් වගේ බලපෑම් එනවා කියල සමහරු කියනවා. මේක ඇත්තක්ද?

මට දැනට හම්බවුණු අධ්‍යක්ෂකවරුන්ගෙන් එහෙම බලපෑම් ඇවිත් නැහැ. මගේ දක්ෂතාවයට තමයි ඒ අය මට අවස්ථාව දුන්නේ. ප්‍රියන්ත අයියා මාව ගත්තෙත් මගේ දක්ෂතාවයට. මට නර්තනය කරන්න පුළුවන් බටහිර පෙනුමක් තියෙනවා. ඒ වගේම මගේ ශරීරයේ හැඩය ඒ හැමදේම බලලා තමයි මේ චිත්‍රපටයට දායක කර ගත්තේ.

Q මේ ක්‍ෂේත්‍රය තුළ ප්‍රමිතියක් නැති වෙලා නේද දැන්?

නිරූපණ ක්ෂේත්‍රය නම් නැත්තටම නැතිවෙලා තියෙන්නේ. මොකද මේ අලුතින් එන අය හා සමහර ඡායාරූප ශිල්පීන් නිසා. මම ගොඩක්ම මේ පැත්තෙන් ටිකක් ඈත් වෙලා චිත්‍රපට පැත්තට යන්න ගත්තෙත් ඒ නිසා තමයි. ගොඩක් අය මේ ක්ෂේත්‍රය දැන් විවේචනය කරනවා. ලංකාවේ කට්ටිය හිතාගෙන ඉන්නෙ මොඩ්ල් කෙනෙක් වෙන්න හැමෝටම පුළුවන් කියලා. ඒ ගැන ලොකු කණගාටුවක් තියෙන්නේ.

Q අද අඩනිරුවත් මියුසික් වීඩියෝ ට්‍රෙන්ඩ් එකක් වෙලා තියෙනවා. ඔබට ඒ සඳහා ආරාධනා ලැබෙන්නේ නැද්ද?

නැහැ. මම හොඳට කල්පනා කරලා වැඩ කරන්නේ. මම දැන් ගොඩක් දුරට මියුසික් වීඩියෝ නතර කළා. මම ෆිල්ම් පැත්තෙන් යන්න හිතාගෙන ඉන්න නිසා ගොඩක් දේවල් ප්‍රතික්ෂේප කළා.

Q ජනප්‍රිය වෙන්නේ වැරදි පාරකින් කියලා කවුරුත් ඔයාට චෝදනා කරන්නේ නැද්ද?

මම ජනප්‍රිය වෙන්නේ වැරදි පාරකින් කියලා කාටවත් කියන්න බැහැ. මම මිස් ශ්‍රී ලංකා වලින් කිහිප වතාවක්ම ක්‍රවුන් අරන් තියෙනවා. ටීනා කියන චරිතය ඕන කෙනෙක් දන්න චරිතයක්. මම ගොඩක්දුරට හොඳ වැඩ කරලා තියනවා. ඒකයි මිනිස්සු මාව මෙච්චරටම දන්නේ. මම හොඳ නිරූපිකාවක් නිසානේ මට ආරාධනා ලැබෙන්නේ.

Q අද වන විට ටීනා ලංකාවේ බ්‍රෑන්ඩ් නේම් එකක් වෙලා කියලා විශ්වාස කරනවාද?

ඔව් අනිවාර්යයෙන්ම. අද වන විට මම නාට්‍ය කරන්නේ නැති වුණාට මම පාරෙ බැහැලා යද්දි මිනිස්සු මට කතා කරනවා. මම කළ මියුසික් වීඩියෝ ලස්සනයි කියනවා. මිනිස්සුන්ගේ හිතට වදින විදියට දෙයක් කරල තියෙන නිසා මිනිස්සු ඒ චරිත ගැන කතාබහ කරනවා.

මම දන්නවා ලංකාවේ හොඳ මොඩ්ල්ස්ලා අතරේ මගේ නමත් තියෙනවා කියලා. මම අනිත් මොඩ්ල්ස්ලා එක්ක ගත්තාම හරිම වාසනාවන්තයි. මොකද අනිත් අයට හම්බ වෙන්නෙ නැති අවස්ථා මට හම්බ වෙනවා. මට දක්ෂතාවයක් තියෙනවා. මට මීට වඩා ගොඩක් දුර යන්න පුළුවන්.

Q මේ වෙන දේවල් එක්ක ක්‍ෂේත්‍රය ගැන කලකිරීමක් නැද්ද?

ඇත්තටම කලකිරීමක් තියෙනවා. ඔය ඔක්කොම වෙන්නේ අලුතින් මේ ක්‍ෂේත්‍රයට එන අය නිසා. එයාලට ඕන ඉක්මනින් ජනප්‍රිය වෙන්න. ඒ වුණාට එහෙ වැඩි ගමනක් යන්න බැහැ.

Q ඔබේ ඉදිරි බලාපොරොත්තු මොනවාද?

ෆිල්ම් පැත්තට යන්න තමයි බලාපොරොත්තු වෙන්නේ. ඉදිරියේදී ෆිල්ම්ස් හරහා මාව බලන්න පුළුවන්. මම මගේ රසිකයන්ට කියනවා හැමදාම මාත් එක්ක හිටිය වගේ දිගටම මාත් එක්ක ඉන්න කියලා. 

33 44 VI3A8502

භූමි ප්‍රචාරක පටයෙන් ප්‍රේක්ෂක අවධානය දිනූ ඇය Aditi Rao Hydari

මේ දිනවල බොහෝ දෙනෙකුගේ කතාබහට ලක්වන චිත්‍රපටයක් ලෙස සන්ජේ දත් රංගනයෙන් දායක වන 'භූමි' චිත්‍රපටය හැඳින්විය හැකිය. මෙය සන්ජේ දත් 2014 වර්ෂයෙන් පසුව දායක වන චිත්‍රපටයක් වීමද විශේෂත්වයකි. මෙම චිත්‍රපටයේ ප්‍රචාරක පටය පසුගියදා අන්තර්ජාලය යොමු කෙරිණි. මේ සමග ඉන්දියාව නොසන්සුන් වූ බව ඉන්දියානු වෙබ් අඩවි කිහිපයක් වාර්තා කර තිබිණි.

ඊට හේතු වූයේ සන්ජේ දත්ට ආදරය කරන රසික රසිකාවන් විසින් අනර්තර්ජාලය ඔස්සේ කරනු ලැබූ විප්ලවයක් හේතුවෙනි. මේ වනවිට විශාල නැරඹුම් ප්‍රමාණයක්ද එම ප්‍රචාරක පටය සඳහා ලැබී තිබේ. මෙහි ඇත්තේ ඉතාමත් අතලොස්සක චරිත ප්‍රමාණයක් බව ඉන්දියානු මාධ්‍ය වාර්තා කරයි.

සන්ජේ දත් සමගින් ප්‍රධාන චරිතය හැඩ කරන ආදිති රාඕ හයිදරි (Aditi Rao Hydari) පිළිබඳ පුවත් මැවෙමින් පවතී. ඇය ක්‍ෂේත්‍රය තුළ එතරම් ජනප්‍රිය චරිතයක් නොවන බව බොහෝ දෙනාගේ අදහස වෙති. කෙසේ නමුත් ඇය මෙම චිත්‍රපටයේ ප්‍රධාන චරිතයට හැඩ කරයි.

2006 වර්ෂයේදී ක්‍ෂේත්‍රයට පිවිසි ඇය, මුල්ම වශයෙන් රංගනයෙන් දායක වන්නේ 'Prajapathi' නම් 'මලයාලම්' චිත්‍රපටය හරහාය. එය ඇයගේ ප්‍රථම සිනමා නිර්මාණය වේ. ඉන් පසු ඇයට දෙවැනි චිත්‍රපට වරම හිමි වන්නේ දමිළ චිත්‍රපටයක් සඳහාය. ඒ 'මලයාලම්' චිත්‍රපටයක් වන 'Sringaram' චිත්‍රපටය සඳහාය.

2008 වර්ෂයේදී ඇයට හින්දි සිනමාව සඳහා ඒමට අවස්ථාව උදාවන්නේ 'Delhi 6' නම් චිත්‍රපටය සමගිනි. ඇය එතෙක් රංගනයෙන් දායක වූ චිත්‍රපට සඳහා දායක වී තිබුණේ අතුරු චරිතයන් සඳහාය. ඉන් පසු ඇයට 2009 වර්ෂයේදී දායක වූ  'Yeh Saali Zindagi' චිත්‍රපටය හරහා සම්මානයක් සඳහා පාත්‍ර වීමටද අවස්ථාව උදාවිය.

2010 වර්ෂයේදී ඇයට චිත්‍රපටයක් සඳහා දායක වීමට අවස්ථාව උදා නොවුණු අතර, 2011 තිරගත වූ 'Rockstar' චිත්‍රපටය සඳහා රංගනයෙන් දායක වීමට අවස්ථාව ලැබිණි. 2012 වර්ෂයේදී දායක වූ චිත්‍රපටයකද ප්‍රධාන චරිතයක් පණපෙවීමට අවස්ථාව නොලැබිණි. පසුව 2013 වර්ෂයේදී තිරගත වූ 'Murder 03' චිත්‍රපටයේ ප්‍රධාන චරිතය හැඩ කිරීමේ වාසනාව ඇයට හිමිවිය. පසුකාලීනව රංගන ජීවිතයේ වෙනස් පැතිකඩක් නිර්මාණය වූ බව ඇය සඳහන් කරයි. අනතුරුව ඇය චිත්‍රපට 05කට දායක වූවාය.

ඇය 2016 වසරේ තිරගත වූ චිත්‍රපටය පිළිබඳ බොහෝ දෙනෙකු කතාබහ කළහ. විශිෂ්ට නළුවෙකු වන අමිතාබ් බච්චන් සමග ඇයට රංගනයෙන් දායක වීමට වරම් ලැබෙන්නේ 'Wazir' චිත්‍රපටය හරහාය. එම වසරේදී අතිසාර්ථක ලෙස තිරගත වූ 'වසීර්' චිත්‍රපටයේ 'රුහානා අලී' ලෙස රඟපෑ සුරූපී අදිති රාඕ රඟන දමිළ චිත්‍රපටයක් තිරගත වීමට නියමිතව තිබුණද, එය තිරගත නොවුණු බව සඳහන් වේ.

අදිති රංගනයෙන් දායක වූ 'කත්රු වෙලියුදායි' නමැති එම චිත්‍රපටය අධ්‍යක්ෂණය කරනු ලැබ ඇත්තේ ප්‍රකට සිනමා නිර්මාණකරුවෙකු වන මනිරත්නම් විසින්ය. මෙය අදිති රංගනයෙන් දායක වන දෙවැනි දමිළ සිනමා නිර්මාණය වීමද විශේෂත්වයකි.

අදිති සමගින් මෙහි ප්‍රධාන චරිතය නිරූපණය කරන්නේ සූර්යාගේ සොහොයුරා වන කර්ති ශිවකුමාර්ය. රහමන් විසින් සංගීතය අධ්‍යක්ෂණය කරන ලද මෙම චිත්‍රපටය සුන්දර ආදර කතාවක් පදනම් කරගෙන නිර්මාණය කර ඇති බව සඳහන් වේ. කෙසේ වුවද මෙම චිත්‍රපටය කල්යෑමේ හේතුවක් එකල සඳහන් නොවුණි.

තම ජීවිතය වෙනස් කරන චිත්‍රපටයක් මේ වසර අවසානයේදී එළිදැක්වීමට නියමිතව ඇති බව ඇය සඳහන් කරයි. 'Bhoomi' චිත්‍රපටයේ වැඩකටයුතු මේ වනවිටත් සිදුවන බවද ඇය පවසයි. 2016 වර්ෂයේදී තිරගත වීමට නියමිතව තිබූ 'Kaatru Veliyidai' චිත්‍රපටය පසුගියදා තිරගත විය.

ඊට අමතරව ඇයගේ චිත්‍රපටය තුනක් ඉදිරියේදී එළිදැක්වීමට නියමිතව ඇති බව ඉන්දියානු මාධ්‍ය පෙන්වා දෙයි. මෙම වසරේ ආන්දෝලනාත්මක චිත්‍රපටයක් සඳහා දායක වීමට තමන්ට හැකිවීම පිළිබඳ ඉතා සතුටු වන බව ඇය විශේෂයෙන් සඳහන් කර තිබේ.

Aditi-Rao-Hydari-Cute-Looks Aditi-Rao-Hydari-in-Violet-Swimsuit Aditi-Rao-Hydari working-with-sanjay-dutt-super-amazing-says-aditi-rao-hydari-1

කොපියක් වුණත් ඒ නිර්මාණය යම් ආදර්ශයක් ගන්න පුළුවන් සහ නිර්මාණාත්මක ලෙසින් කරලා තියෙනවා නම් ඇයි තවත් වෙන දේවල් හිතන්නේ

මේ දිනවල තිරගත කෙරෙන 'ධර්මයුද්ධය' චිත්‍රපටය බොහෝ දෙනාගේ කතාබහට ලක් වූ චිත්‍රපටයක් ලෙස සඳහන් කළ හැකිය. ප්‍රවීණ රංගවේදී ජැක්සන් ඇන්තනී, දිල්හානි අශෝකමාලා, තිසුරි යුවනිකා සමග විනුමි වන්සදි ප්‍රධාන චරිත රඟපාන මෙය පවුලක් වටා ගෙතුණු කතාවකට අනුව නිර්මාණය වූවකි. මෙහි ප්‍රධාන චරිතයකට පණ පොවන තිසුරි යුවනිකා මෙවර 'අද' තරු කතාබහට එක් විය.

Q 'ධර්මයුද්ධය' සාර්ථකද?

ඇත්තටම සාර්ථකව තිරගත වෙනවා කියලා දැනගන්න ලැබෙනවා. ඒ වගේම හොඳ ප්‍රතිචාර ලැබෙනවා. ඒ වගේම බලපු අය මගේ රංගනය ගැන කතා වෙනවා. හැමෝම හොඳයි කියල කියනවා. මම ගොඩක් මහන්සිවෙලා කරපු චරිතයක්. ඉතිං ඒ නිසා ඒවගේම ප්‍රතිචාර සහ සාර්ථකව තිරගත වෙද්දි මහන්සියේ ප්‍රතිඵල තියෙනවා කියලා හිතනවා.

Q කොහොමද අත්දැකීම්?

අපි හැමෝම ඉතාමත් සහයෝගයකින් වැඩ කළා. ඉතිං ජැක්සන් මාමාගේ ඉඳලා පොඩි නංගි වෙනකන් ඉතාමත් සාර්ථකව වැඩ කළා. මේ සඳහා රංගන ශිල්පීන් විතරක් නෙමෙයි හැම කණ්ඩායමක්ම ඉතාමත් මහන්සි වුණා. මේක කණ්ඩායම් නිර්මාණයක්. ඉතිං චිත්‍රපටය සාර්ථක වෙන්න ඒක එක හේතුවක් කියලා මම හිතනවා.

Q මේ සඳහා අවස්ථාව ලැබුණේ?

මට මේ සඳහා මහරාජා ආයතනයෙන් තමයි ආරාධනා කළේ. මේක භාෂා පහකින් නිර්මාණය වෙලා තියෙනවා, ඉතිං මෙහෙම කරන්න යනවා කියලා කිව්වා. ඊටපස්සේ තිරපිටපත මට ලැබුණා. ඒක කියෙව්වාම මට ආසා හිතුණා මේ සඳහා දායක වෙන්න. මං කරපු චරිතත් එක්ක බලද්දි ටිකක් වෙනස් චරිතයක්.

මම ගොඩක් කරලා තියෙන්නේ පෙම්වතියගේ චරිත නිසා. කාලෙකින් ලැබුණු වෙනස් චරිතයක් වුණා සිනමාව පැත්තෙනුත්. දියණියකට වෙන ප්‍රශ්නයක් නිරාකරණය කරගන්න පවුලේ අය වෙහෙස වෙන ආකාරය. ඇත්තටම ආසා හිතුණා කතාව කියෙව්වාම. ඒ නිසා මම තීරණය කළා මේ දේ කරනවා කියලා.

Q 'ධර්මයුද්ධය' තවත් භාෂාවලින් නිර්මාණය වී තිබෙනවා. ඒවායේඇති චරිතයටම පණ දීමද ඔබ කළේ?

නැහැ. ඒ චරිතයම මම ගෙනාවා කියලා මම හිතන්නේ නැහැ. අනික මම ඒ චිත්‍රපට බැලුවෙත් නැහැ. බැලුවා නම් ඒකම මම කොපි කළා වෙනවා. අපට ඕන වුණේ ලංකාවේ තාත්තා කෙනෙක්, ලංකාවේ දියණියක්, ලංකාවේ පවුලක් කියන ඒ දේ නිර්මාණය කරන්නයි. ඒ නිසයි ලංකාවට උචිත විදිහට මේ නිර්මාණය කළේ.

මේ චිත්‍රපටයේ වෙනස මම හිතන්නේ, මේක ප්‍රතිනිර්මාණයක් වුණාට අපි ලංකාවට හරියන විදිහටයි ඒ හැමදේම කරේ. මට දැනිච්ච දේ සහ අධ්‍යක්ෂවරයාට අවශ්‍ය දේ එකතු කරලා තමයි මම කළේ. මට ඕන වුණේ වෙනස් දෙයක්, වෙනස් දියණියක් ගොඩනගන්නයි. ඒ චිත්‍රපටය බලලා මම කරපු අනිත් චරිත මතක් වෙනවානම් මම එතනදි අසාර්ථකයි. හැබැයි මට ලැබෙන ප්‍රතිචාරත් එක්ක මම යම්තාක් දුරට සාර්ථකයි කියලා මම හිතනවා.

Q 'ධර්මයුද්ධය' ඇතුළෙ ඔබේ පවුල කොහොමද?

ඇත්තටම අපි එක පවුලක් වගේ තමයි කටයුතු කරේ. දවස් තිස්ගාණක් වගේ මට ෂූටින් තිබුණා. අපි හතර දෙනාම එක පවුලක් වගේ හිටියා. මට ඒ කාලෙ කතා කළේ 'ලොකු' කියලා. නංගිට 'පොඩ්ඩි' කියලා. අපි ෂූටින් නැති දවසට ඇවිදින්න යනවා. අම්මා, අප්පච්චි, නංගි කියන හැඟීමෙන් තමයි අපි හිටියේ. චිත්‍රපටයට ඕන නිසා එහෙම හිටියෙ නැහැ. නමුත් එවැනි සම්බන්ධතාවක් මෙහිදී ගොඩනැගුණා.

මේක පවුලක් වුණා. අපි හතර දෙනා එකට කෑවේ, එකට ගමන් බිමන් ගියේ. ෂූටින් නැතිවුණත් එකට හිටියේ. ප්‍රශ්නයක් වුණත් එකට හතර දෙනා විසඳගන්න පුරුදු වුණා. මම හිතනවා ඒක තමන්ගේ කියන හැඟීම තිබුණොත් තමයි රංගනය වුණත් සාර්ථක වෙන්නේ.

එහෙම නැත්නම් ඒකෙ ව්‍යාජ බවක් පේනවා. හැබැයි අපි ඒ රාමුවෙන් මිදුණා කියලා කියන්න පුළුවන්. ෂූටින් ඉවරවෙන දවසෙත් හරි දුකයි. ඇත්තටම පවුලකින් වෙන්වෙනවා කියන හැඟීම දැනුණා. හරි සතුටුයි ඒකාලෙ මතක් වෙද්දිත්. පිස්සු නටනට තමයි ඒ කාලේ වැඩකටයුතුත් කළේ. 

Q 'ධර්මයුද්ධය' කොපියක් කියලා අදටත් විවේචනය කරනවා නේද?

ඇත්තටම 'ධර්මයුද්ධය' කොපියක් තමයි. ඕක මුලින්ම ජපන් කොපියක්. එහෙම එහෙම ඇවිල්ලා තෙලිඟු, හින්දි භාෂාවෙන් ඇවිත් භාෂා 05කින් විතර නිර්මාණය වෙලා තියෙනවා. අපිත් ඒක සිංහලෙන් ප්‍රතිනිර්මාණය කළා. ඒක ප්‍රතිනිර්මාණයක් වුණත් නිර්මාණයට ඉහළ සාධාරණයක් වෙලා තියෙනවා නම් ඒක සාර්ථකයි කියලා මම හිතනවා.

ඉතිං සමරහක් අය නම් කියනවා කොච්චර හොඳ වුණත් මේක කොපියක් කියලා. ඇත්තටම ගොඩක් ඒවා කොපි තමයි තියෙන්නේ. මම කියන්නේ ඇද හොයන්නේ නැතුව නිර්මාණය හොඳට කරලා තියෙනවා නම් ඒක රසවිඳින්න කියලයි. අනික ලොකු පණිවුඩයක් දෙන චිත්‍රපටයක් මේක.

හොඳ ආදර්ශමත් චිත්‍රපටයක් ඒක. අපේ රටෙත් බහුලව තියෙන ප්‍රශ්නයක් මේ චිත්‍රපටය තුළ තියෙනවා. මම හිතනවා ප්‍රතිනිර්මාණයක් වුණත්, කොපියක් වුණත් ඒ නිර්මාණය යම් ආදර්ශයක් ගන්න පුළුවන් සහ නිර්මාණාත්මකව හොඳින් කරලා තියෙනවා නම් ඇයි තවත් වෙන දේවල් හිතන්නේ. හොඳ නිර්මාණයක් නිසානේ ඒක සාර්ථකව තිරගත වෙන්නේ. මම කියන්නේ ඒක රසවිඳින්න. ඒ දේ වටිනවා.

Q විවාහ වෙන්න යනවා කියන්නේ ඇත්තද?

ඔව්, ඒක ඇත්ත. මම විවාහ වෙන්න ඉන්නේ. 

Q ළඟදීම විවාහය සිද්ධ වෙනවාද?

අනේ නැහැ. ඒක සිද්ධ වෙන්නේ ලබන අවුරුද්දේ වගේ.

Q විවාහයෙන් පස්සේ රඟපාන්නේ නැද්ද?

නැහැ. විවාහ වුණා කියලා මම රංගනයට සමුදෙන්නේ නැහැ. මම මේ කාලෙත් කරන්නේ තෝරාගෙන නිර්මාණ සඳහා දායක වෙන එකයි. මම හම්බ වෙන හැම නිර්මාණයක් සඳහාම දායක වෙන්නේ නැහැ. මට හොඳ නිර්මාණයක් සහ හොඳ පිටපතක් නම්, මට ඒකට අලුත් දෙයක් කරන්න තියෙනවා නම් තමයි මම දායක වෙන්නේ.

මට යම්කිසි දෙයක් කරන්න බැරි නම් මම බාරගන්නෙ නැතුව ගෙදරට වෙලා ඉන්නවා. ඒ වගේ තමයි විවාහයෙන් පස්සෙත් මේ දේවල්වලට බාධාවක් කරගන්නේ නැහැ. මොකද මගේ වෘත්තිය මේක. හැමදේම සාර්ථක විදිහට කරන්න තමයි මම කරන්නේ.

Q ඉදිරි බලාපොරොත්තු?

මේ දවස්වලත් නිර්මාණ කිහිපයකට සම්බන්ධ වෙලා තියෙනවා. ඊට අමතරව මම මේ දවස්වල නාට්‍ය දෙකක් රූගත කරනවා. මම කලින් කිව්වා වගේ මම ආස වෙච්ච පිටපත් දෙකක්. ඒ දෙකේ වැඩකටයුතු කරගෙන යනවා. පෞද්ගලක ජීවිතයටත්, මගේ පවුලේ උදවියටත් මුල් තැන දෙමින් කාලය කළමනාකරණය කරගනිමින් කාලය ගෙවනවා.

ඡායාරූප – සඳුන් ගමගේ

සිංහලෝකයේ සිංහයා ඇහැව්වාම තේරෙයි මම මොකක්ද කරල තියෙන්නේ කියලා

චිත්‍රාල් සෝමපාල යනු අප රටෙන් බිහිවූ ජාත්‍යන්තර මට්ටමේ ගායකයෙකු බව බොහෝ දෙනා දන්නා කාරණාවක්. ඔහු විසින් කරනු ලබන ඇතැම් නිර්මාණයන්ට බොහෝ දෙනෙකුගේ ප්‍රසාදය හිමි වුවත්, ඇතැමුන් එය විවේචනය කරනු ලැබුවා.

මේ වන විට ඔහු නවතම ගීතයක් සිදුකර තිබෙනවා. 'සිංහලෝකයේ සිංහයා' ලෙස නම් කර ඇති මෙම ගීතයේ වෙනස්කම් විශාල ප්‍රමාණයක් දැකගන්න පුළුවන් බවයි ඔහුගේ අදහස. මේ ඒ පිළිබඳව ඔහු පැවැසූ අදහස්.

Q අලුත් සිංදුව මොකක්ද?

මේ සිංදුවේ නම 'සිංහලෝකයේ සිංහයා'. මේක මෝර්ටිවේෂන් සෝන්ග් එකක්. අද ලංකාවේ මිනිස්සුන්ට තියෙන ලොකුම ප්‍රශ්නයක් තමයි, ඔවුන් හැමදේම හිතන්නේ නෙගටිව් විදිහටයි. මේ සිංදුවෙන් කියන්නේ තමන්ගේ ඇතුළෙ ඉන්න සිංහයා කොහොමද එළියට දාන්නේ කියලා. මේක ලිව්වේ කැලුම් අයියා. මියුසික් ඔක්කොම කළේ මම. අලුත් පරණ පරපුර අතර යන සිංදුවක් මේක.

Q ඒ ගීතයත් රොක් ආරයට නිර්මාණය වුණ එකක්ද?

ගොඩක් අය හිතයි මේක රොක් සිංදුවක් කියලා. නමුත් මම හිතන්නේ නැහැ මේක රොක් සිංදුවක් කියලා. වර්ෂන් දෙකක් තියෙනවා. එක වර්ෂන් එකක් මම තනියම සිංග් කරනවා. අනික් එකේ, මම වගේම රුවන් හෙට්ටිආරච්චි, සනුක, සමිතා, ජය ශ්‍රී, ළහිරු පෙරේරා, සංගීත් විජේසූරිය, නලීන් පෙරේරා වගේ අය දායක වෙලා ඉන්නවා.

Q කට්ටියම එක්ක මේ වගේ ගීතයක් දාල මොකක්ද කියන්න හදන්නේ?

ලංකාවේ මිනිස්සු සිංදුවල වචන අහන්න කොහොමත් පුරුදු වෙලානේ ඉන්නේ. මම හිතනවා කැලුම් ශ්‍රීමාල් ලියලා තියෙන වචනවලින් සෑහෙන්න ඉහළ මට්ටමක තියෙනවා. මම හදන්නේ මේ තියෙන මල් කියන සහ එක එක ට්‍රෙන්ඩ්වලින් එළියට යන්නයි. 

Q අද නිතරම ඇහෙන, 'ඔයා ගියා', 'දාලා යන්න එපා' වැනි සරල වචනද මේ ගීතයෙත් අඩංගු වෙලා තියෙන්නේ?

මේ ගීතයේ තියෙන්නේ සෑහෙන්න ගැඹුරු වචන. මම කැමති නැහැ, අද තියෙන ගීතවල වචනවලට. 'අරයා ගියා මෙයා ගියා', 'ඔයා මට ලැජ්ජා කෙරුවා' කියලා තමයි අද ගීතවල තියෙන්නේ. මේ ගීතය Classy එකක් තියෙනවා. මම දෙයක් කරන්නේ ජාත්‍යන්තරයට යන්නයි. මේක ඇහුවාම මිනිස්සුන්ට තේරෙයි මම මොකක්ද කරල තියෙන්නේ කියලා. 

Q 'සිංහලෝකයේ සිංහයා' ගීතයට ඔබ ලොකු වියදමක් දරනවා, මේකෙ තියෙන යටි අරමුණ මොකක්ද?

මම අනිත් කට්ටියවත් දාගන්න බැලුවේ. අපේ ලංකාවේ කවුරුත් කරන්නෙ නැහැ මේ වගේ Collaboration එකක්. මට ඕන මාවත් මාර්කට් කරගන්න.

Q ඒ කියන්නේ මේ ගීතය වෙළෙඳ භාණ්ඩයක්ද?

එහෙම නැහැ. මට ඕන වුණේ අලුත් දෙයක් ඉහළ ප්‍රමිතියක් ඇතුව නිර්මාණය කරන්නයි. මම උත්සාහ කළේ ඒ දේයි. මේකෙන් මට මොර්ටිවේට් කරන්න ඕන අපේ මිනිස්සුන්ගේ මනස ක්ලීන් කරන්න. මේ ගීතය ඇහැව්වාම තේරෙයි මම දෙන පණිවුඩය මොකක්ද කියලා. 

Q අද  ගොඩක් අය ගීත නිර්මාණය කරන්නේ Viral යන්න බලාගෙනයි. එහෙමද වෙන්න ඕන නැත්නම් මිනිස්සුන්ගේ සිත් තුළ ගීතය පවතින්න ඕනද?

මම සිංදු කරන්නේ මිනිස්සුන්ගේ හදවතට. මම ගීත Viral යවන්න කැමති නැහැ. Viral යනවා කියන එකත් දැන් ට්‍රෙන්ඩ් එකක්. මගේ මිසුයික් වීඩියෝවල හෙළුවෙන් නටන ගෑනු නැහැ. ආදර කතාවක් නැහැ. ආදර ගීතයක් කළා 'මේ වගේ ආදරයක්' චිත්‍රපටයට.

ඒක වුණත් යම්කිසි මට්ටමක් තියෙනවා. 'ඇහැරෙන්න' වුණත් ආදරය ගීතයක්. ඒකටත් මට්ටමක් තියෙනවා. ඕකත් මිනිස්සුන්ට එපා වෙනවා කාලෙකින්. මොකද ලංකාවේ මිනිස්සුන්ට හැමදේම මතක තියෙන්නේ සති දෙකයිනේ. දැන් ගොඩක් අය මල් සිංදු අහන්නත් කැමති නැහැ.

Q අද මියුසික් වීඩියෝ නිර්මාණය කරන්නේ අඩනිරුවත මූලික කරගෙන. මේ ගැන මොකද හිතන්නේ?

මම ඒ දේවල් කරනවට එකඟ නැහැ. මම මේකටත් විෂුවල් එකක් කළා. ඒක කළේ පාකිස්තාන් වල ඉන්න හොඳම ඩිරෙක්ටර් කෙනෙක්. ඒකෙත් පෙන්නනවා මිනිස්සු බීච් එකේ ඉන්නවා. නමුත් අපි ඒක නිර්මාණය කළේ ධනාත්මක විදිහට මිනිස්සුන්ට හිතන්නයි. අද නිර්මාණය කරන මියුසික් වීඩියෝවලට නම් මම කැමති නැහැ. ඕවා Youtube එකේ වුනත්  Block කරල දාන්න ඕන. 

Q ඔබ ක්ෂේත්‍රයේ ප්‍රවීණයෙක්. නව පරපුරේ දැක්ම ගැන සතුටු වෙනවාද?

සමහර අය ඉන්නවා හොඳට කරනවා. නමුත් සමහර අය ට්‍රෙන්ඩ් එක ෆලෝ කරන්න ගිහින් සවුත්තු වෙනවා. මට ට්‍රෙන්ඩ් එකක් කියල නැහැ. මම කවදාවත් ට්‍රෙන්ඩ් එකක් පස්සෙ යන්නෙ නෑ.

අපි කරන්න ඕන අපිට කරන්න පුළුවන් දේවල්. සමහර අය කරන්න බැරි දේවල් කරන්න ගිහින් අනා ගන්නවා. මම කරන්නේ මට පුළුවන් දේ විතරයි. අලුත් ට්‍රෙන්ඩ් එක ඇවිල්ලා එච්චර හෙල්දි ට්‍රෙන්ඩ් එකක් නෙමෙයි.

Q ඔබ ලංකාවෙත් නැතුව නවකයන්ට චෝදනා කරනවා කියලා කවුරුහරි කිවුවොත්?

කාටද එහෙම කියන්න පුළුවන්. මං ලංකාවට ගොඩක් දේවල් කරලා තියෙනවා. මම ලංකාවේ නම ජාත්‍යන්තරයට ගෙනිහින් තියෙනවා. මම අද වෙනකන් ඒ දේවල් තැන තැන කියලා නැහැ. නමුත් ඒ දේවල් ගැන දැන ගන්න ඕන. අවුරුදු 30ක යුද්ධයක් තිබුණා. ඒ කාලෙදි පිටරටදී මාව ප්‍රතික්ෂේප කළා.

ගොඩක් අය කැමති වුණේ නැහැ මාව බෑන්ඩ් එකට ගන්නත්. නමුත් මම කොහොම හරි ඒ දේවල් වලට විරුද්ධ වෙලා දැන්  නමක් හදාගෙන තියෙන්නේ. ඇමෙරිකාවේ හරි කොහේදි හරි ස්ටේජ් එකකදී හරි මාව දැක්කාම ගොඩක් අය අහනවා 'උඹ කොහෙන්ද? දකුණු ඇමෙරිකාවෙන්ද කියලා', මම කිව්වාම 'මම ශ්‍රී ලංකාවෙන්' කියලා.

කොහෙද ඒ රට තියෙන්නේ කියල අහනවා. ගොඩක් අය ඒක තියෙන්නේ කොහෙද කියලවත් දන්නෙ නැහැ. ඉතිං මම ඔච්චර සේවයක් කරලත් මට එහෙම චෝදනා කරනවා. අලුත් අයට දෙයක් කිව්වොත් හිත අමාරු වෙනවා. අපි වගේ මිනිස්සුන්ට මඩ ගහන්න හදනවා. මම කරන්නේ එක දෙයයි. ලංකාවට ඇවිල්ලා දෙයක් කරලා මම ගියා. මෙතන ඉන්න ගියොත් මගේ තියෙන වටිනාකම නැති වෙනවා.

Q ඔබ දෙයක් දැක්කොත් ඒක ප්‍රසිද්ධියේම විවේචනය කරනවා. ඇයි එවැනි දේවල් කරන්නේ?

මම කාටවත් බය නෑ. මම කියන්න තියෙන දේ මූණටම කියනවා. ගොඩක් අය මේක බෞද්ධ රටක් කිය කියා දාන වීඩියෝ බලන්න. සමාජ ජාලයක් බැලුවොත් සත්තු මරණ  වීඩියෝ දානවා. පොලිටික්ස් වුණත් ලංකාවේ එන්න එන්නම සවුත්තු වෙනවා.

වෙන්න දෙයක් නැහැ වෙලා තියෙන්නේ. ඒ නිසයි මට අසාධාරණය පෙන්නන්න බැරි. මට කවුරුත්ම තාම බලපෑම් කරලා නෑ එහෙම. මගේ ළඟම ඉන්න අය නම් කියනවා දාන්න එපා වැඩක් නෑ දාල, මෝඩයෝ ඉන්නෙ කියලා. මම දැන් නම් ඒ වගේ දේවල් දානවා ටිකක් අඩුයි.

Q ලංකාවේ කොන්සර්ට් එකක් නැද්ද මේ අවුරුද්දේ?

මාව හැමතිස්සෙම දැක්කාම අගයක් නැති නිසා නිතරම කරන්නේ නැහැ. ආරාධනා එනවා භාරගන්නෙ නැහැ. නමුත් ඊළඟ අවුරුද්දේ වගේ කොන්සර්ට් එකක් කරන්න බලාපොරොත්තු වෙනවා. ඒක මගේ තනි කොන්සර්ට් එකක් වෙයි.

Q ඔබේ ඉදිරි වැඩකටයුතු මොනවාද?

මම English ඇල්බම් එකක් කරන්න බලාපොරොත්තු වෙනවා මගේ යාළුවෙක් එක්ක. එයා ඊශ්‍රායල්වල ගිටාරිස් කෙනෙක්. මගේ ඊළඟ ඉලක්කය ඒක තමයි. මගේ අම්මයි, තාත්තගෙයි සිංදු 10ක් රෙකෝඩ් කරලා තියෙනවා. එකෙ 1960, 1970 වැනි සංගීත රටාවක් තියෙන්නේ. මම ඒක මොඩර්න් කළේ නැහැ. ඒ ගීත මම ඔක්තෝම්බර් හෝ නොවැම්බර් මාසයේ එළිදක්වනවා.

Q කට්ටිය ඔබට චෝදනා කළා අම්මගේ හා තාත්තගේ ගීත මොඩර්න් කරලා කියලා ඒවා විනාශ කළා කියලා?

මම කිසිදෙයක් විනාශ කරලා නැහැ. 'දඹුලු ගලේ' මම කළා මගේ වර්ෂන් එකකට. ඒක මම කළේ මොර්ඩන් එකක් නෙවෙයි. ඒක නිව් ඒච් කියලා මියුසික් වර්ෂන් එකක්. මිනිස්සු ඒකට එක එක කතා කිව්වා.

මාව දැක්කාම මගේ කොණ්ඩෙ දිගයි, ඒවයි මේවයි කතා ගොඩයි. ඊට පස්සෙ කියනවා සිංදුව කාලා කියලා. මම ඕවා ගණන් ගන්නෙ නැහැ. ඔතන තනිකර තියෙන්නේ ඊරිසියාව. ආර්ටිස් කෙනෙක් නම් අවදානමක් ගන්න පුළුවන් වෙන්න ඕන. දැන් අය කිසිම අවදානමක් ගන්නෙ නැහැ. චූටි ළමයි වගේ.

Q අපේ රටේ නවක පරපුරට මොකක්ද කියන්න තියෙන්නේ?

මට කියන්න තියෙන්නේ මුලින්ම ඔළුව ඉදිම්මෝගන්න එපා. ලෝකෙ තියෙන සංගීත ශෛලීන් ගැන අහලා හොඳ දැනුමක් ගන්න කාගෙන් හරි. ලංකාවේ අය ඉස්සරහට යන්න ඕන නම් යුරෝපය ඇමරිකාව අනුගමනය කරන්න ඕන.

ඉන්දියාව අද තැනකට ඇවිත් තියෙන්නේ යුරෝපය, ඇමෙරිකාව වැනි රටවල් අනුගමනය කරලා. දැන් බලන්න ඉන්දියාවේ චිත්‍රපට කොහොමද කියලා. හොලිවුඩ් චිත්‍රපටයක් බලනවා වගේ. විවෘත මනසින් හැමදේම හිතන්න ඕන. ප්‍රවීණයන් කියන දේ ඇහුම්කම් දීලා දෙයක් කරන්න බලන්න ඉදිරියටම යන්න පුළුවන් වෙයි.

ඡායාරූප – කවීත් මිලින්ද

VI3A0455 VI3A0466 VI3A0477 VI3A0491

මිනිරන්වලින් සුවිෙශ්ෂී නිර්මාණ බිහිකරන කලාකරුවා

විවිධ වූ මාධ්‍යයන් ඔස්සේ දස්කම්පාන නිර්මාණකරුවන් අතරින් සම්මානලාභී නිර්මාණකරුවන් බොහෝ ප්‍රමාණයක් දැකගැනීමට හැකියාව තිබේ. මෙවර අප කතාකරනු ලබන්නේ එවැනි අද්විතීය නිර්මාණකරුවෙකු වන සියාජුඩීන් කමල් බැචා නම් නිර්මාණකරුවා පිළිබඳවයි.ඔහු සිදු කරනු ලබන නිර්මාණයන් අද වනවිට සම්මානයට පාත්‍ර වී ඇති අතර, මොහුගේ නිර්මාණ මාධ්‍යද සුවිශේෂී බව විශේෂයෙන්ම කිව යුතුය.

මැලේසියානු ජාතිකයෙකු වන මෙම නිර්මාණ ශිල්පියා සිදු කරන නිර්මාණයන් ඉතාමත් සියුම් නිර්මාණයන්ය. ඔහු මේ සඳහා භාවිතා කරන්නේ පැන්සල්වල ඇති මිනිරන්ය.ස්වාධීන චිත්‍ර ශිල්පියෙකු ලෙස මුලදී කටයුතු කළද සිය නිර්මාණයන් සඳහා සුවිශේෂි ස්ථානයක් හිමිනොවූ බැවින්, ඔහු මෙසේ තම නිර්මාණයන් සඳහා වෙනස් මාදිලියක් භාවිතා කර තිබේ. 'Pencil Graphite Sculptures' ලෙස ඔහු තමන්ගේ මෙම නිර්මාණ කලාව හඳුන්වයි. 

භාවිත කරනු ලැබූ පැන්සල්වලින් ලබාගන්නා මිනි රන් මගින් මූර්ති ශිල්පයට අලංකාරයක් එක්කළ හැකි බව ඔහු සිය නිර්මාණයන් තුළින් ලොවටම පෙන්වා දී තිබේ. මේ සඳහා භාවිත කරන ආයුධ කිහිපයක් ඇති බව ඔහු පවසයි. මේ සඳහා ඔහු බොහෝ කලක් අත්හදාබැලීම් සිදුකර ඇති අතර, ඉතාමත් සියුම් නිර්මාණ සංකල්පයක් වන මෙය ඉතාමත් කල්පනාකාරීව සිදුකළ යුතුබව ඔහු පවසයි.

යම් තැනකදී නිර්මාණයට හානියක් සිදුවුව හොත් එය නැවත සකස් කිරීමට නොහැකි හෙයින්, මුළු නිර්මාණයම විනාශ විය හැකි බව ඔහු ප්‍රකාශ කරයි. මෙම නිර්මාණයන් සිදුකිරීම සඳහා පැය 212ක් පමණ ගතවන බවත්,ඇතැම් නිර්මාණයන් සඳහා ඊටත් වඩා කාලයක් ගතවන බවත් ඔහු පවසයි.

සිය නිර්මාණයන් අන්තර්ජාලයට එක්කළ පසු බොහෝ දෙනෙකු ඒවා නිර්මාණයන් බව විශ්වාස නොකරන බවත්, ඇතැමුන් තමන්ගේ වෙළෙඳ සැල වෙත පැමිණ මෙම නිර්මාණයන් රසවිඳ යාමට පුරුදු වී සිටින බවත් සියාජුඩීන් පවසයි. ඔහුගේ නිර්මාණවලට රසිකයන්ගේ ඇති කැමැත්ත සියාජුඩීන්ගේ සමාජ වෙබ් ගිණුම් නරඹන ඕනෑම කෙනෙකුට වටහාගත හැක.

2016072550876249 Amazing-Miniature-Taj-Mahal-Graphite-Sculpture-02 Amazing-Miniature-Taj-Mahal-Graphite-Sculpture-05 image_036_c_c1919270_16731_646 Sirajudeen-Kamal-Batcha

 

සිංදු කියන ළමා නිළිය Elle Fanning

හොලිවුඩයේ දිනෙන් දින නළු නිළියන් පිළිබඳ විවිධ වූ පුවත් මැවෙනු ඇත. ඒ ආකාරයෙන් බොහෝ දෙනා පිළිබඳ විදෙස් මාධ්‍ය සඳහන් කරනු ලබයි. කෙසේ වුවත් ළමා නිළියක ලෙස බොහෝ දෙනා අතර ජනප්‍රියත්වයට පත්ව සිටි Elle Fanning පිළිබඳ පසුගියදා සිට නැවතත් කතාබහක් ඇති විය. රංගන ශිල්පිනියක ලෙස දස්කම් දක්වන තමන්, දක්ෂ ගායිකාවක බවද ඇය පසුගියදා සනාථ කළාය. ඒ 'Miu Miu' නම් සමාජ ශාලාවේ පැවැති සාදයකදී සිය මිතුරන් වෙනුවෙන් ප්‍රසිද්ධ ගීතයක් ගායනා කිරීමෙනි.

මෙම සිදුවීම මේ වනවිට සමාජ ජාල වෙබ් අඩවිවල දැඩි කතාබහට ලක්වන්නකි. ඉදිරියේදී ඇය චිත්‍රපටයක් සඳහා ගායනයෙන් දායක වීමට බලාපොරොත්තුවෙන් සිටින බව විදෙස් මාධ්‍ය වාර්තා කරයි.

මේ වනවිට 19 වැනි වියෙහි පසුවන ඇය සිනමාවට පිවිසෙනු ලබන්නේ ළමා රංගන ශිල්පිනියක ලෙසය. ඒ 2001 වර්ෂයේදී තිරගත වූ 'I Am Sam' නම් චිත්‍රපටය ඔස්සේය. එතැන් පටන් ඇයගේ සිනමා දිවිය පිළිබඳ බොහෝ දේ කතාකිරීමට තිබේ. Elle Fanningව බොහෝ දෙනා මතකයට ගොඩ නැගෙන්නේ 2014 වර්ෂයේදී තිරගත වූ චිත්‍රපටයක් හේතුවෙන් බව කිව යුතුය. Maleficent චිත්‍රපටයේ ඇන්ජලිනා ජොලි සමග ඇය රංගනයෙන් දායක වීමත් සමගින් ඇය බොහෝ දෙනා අතර ජනප්‍රියත්වයට පත් වූවයා.

ඇය සිය දෙවැනි චිත්‍රපටය ලෙස 2003 වර්ෂයේ තිරගත වූ 'Daddy Day Care' චිත්‍රපටය සඳහා දායක වූවාය. ඉන් පසු 2004 වර්ෂයේදී 'The Door in the Floor' නම් චිත්‍රපටය සඳහා දායක විය. මුල් කාලයේදී වසරකට එක් චිත්‍රපටයක් සඳහා පමණක් අවස්ථාව ලබාගෙන මූලික අඩිතාලම සාදාගත් ඇය, මේ වනවිට ක්‍ෂේත්‍රය තුළ සම්මානලාභී නිළියක වී හමාරය.

2005 වර්ෂයේ සිට ඇය වසරකට චිත්‍රපට 03 බැගින් දායකත්වය ලබාදී තිබේ. මේ අතරින් ඇතැම් චිත්‍රපට ආදායම් වාර්තා අතරටද පැමිණ ඇති බව විදෙස් මාධ්‍ය සඳහන් කරයි. 2005 වර්ෂයේ සිට 2016 දක්වා ඇය චිත්‍රපටය 36කට ආසන්න ප්‍රමාණයක් සඳහා දායකත්වය ලබාදී තිබේ. 2017 වර්ෂයේදී ඇය චිත්‍රපට 04ක් සඳහා දායක වී ඇති අතර, ඉන් චිත්‍රපට දෙකක් මේ වනවිට එළිදක්වා ඇත. තවත් චිත්‍රපට දෙකක් ඉදිරියේදී එළිදැක්වීමට නියමිත බව විදෙස් මාධ්‍ය සඳහන් කරයි. 

ඇය සිනමා දිවිය මෙන්ම පුංචි තිරය තුළ දස්කම් පා තිබේ. 2002 සිට 2007 දක්වා ඇය ටෙලි නිර්මාණයන් සඳහා දායකත්වය ලබාදී ඇත. 2007 වසරෙන් පසු ඇය පුංචි තිරයට තාවකාලිව සමුදෙන අතර, නැවත පුංචි තිරයට සම්බන්ධ වෙන්නේ 'HitRecord on TV' නම් වැඩසටහන සඳහාය. ඒ 2014 වර්ෂයේදීය.

එම වැඩසටහනෙන් පසුව ඇය පුංචිතිරය සඳහා සමු දුන්නාය. ඇයගේ ජීවිතයේ පළමු ජයග්‍රහණය ලෙස %Actress of the Year Award^ සම්මානය හිමිකර ගනු ලැබීය. ඉන් පසු ඇය 'Hollywood Film Festival' හිදී 'Spotlight Award' සම්මානය දිනා ගන්නා ලදී. මේ ආකාරයෙන් ඇයට තම රංගන ක්‍ෂේත්‍රය තුළ ඉහළ ස්ථානයක් දිනා ගැනීමට අවස්ථාව උදාවිය.

2018 වර්ෂයේදී ඇය චිත්‍රපට 03ක් සඳහා දායක වීමට නියමිතය. තමන්ගේ රංගන දිවිය තුළින් බොහෝ ජයක් ලබාගැනීමට ඇය අවස්ථා හිමිකර ගත්තාය. රංගනයට මෙන්ම හඬකැවීම් අතින්ද ඇය චිත්‍රපට කිහිපයක් සඳහා දායක වී තිබේ. තම දක්ෂතාව තුළින් බොහෝ ජයග්‍රහණ ලබාගැනීම අරමුණ බව ඇය පවසයි.

0b1eec3dfbd4b72e1edd9415538bec4d--dakota-fanning-style-messy-ponytail 14-elle-fanning-cannes 41606B1C00000578-4598368-image-m-75_1497323287163DCULWJzUQAAtpYw elle18 elle-fanning-at-miu-miu-dinner-haute-couture-fashion-week-in-paris-07-02-2017-1 fashion-2014-08-elle-fanning-vivienne-westwood-dress-hollywood-foreign-press-association-main ELLE's 17th Annual Women In Hollywood Tribute - Red Carpet

අයිස් කඳු කැන්වසයට ගෙනෙන Zaria Forman

කලාකරුවන්ගේ නිර්මාණ බිහිවන්නේ ඔවුන් මානසික නිදහස අත්විඳින අවස්ථාවල බව රහසක් නොවේ.  Zaria Forman පෞද්ගලික ආයතනයක රැකියාව අත්හරින්නේ එම රැකියාව තම ජීවිතයට සතුටක් ලබා නොදෙන බව කියමිනි. ඇය තම රැකියාව අත්හැර වෘත්තීමය වශයෙන් මේ වනවිට නිර්මාණකරණයේ යෙදෙන්නීය.

1982 වර්ෂයේ උපන් ඇය මේ වනවිට ප්‍රසිද්ධව ඇත්තේ එකම නිර්මාණය සංකල්පයක් ඔස්සේය. ඇය මෙම නිර්මාණ කලාව ආරම්භ කළේ 2005 වර්ෂයේදීය. ඇය විශාල සිතුවම් නිර්මාණය කරන අතර, එය අලෙවිකරණය සඳහා වැඩි වශයෙන් යොමු වූයේ 2014 වර්ෂයේදීය. ඇය අයිස් කඳු වැනි නිර්මාණ සිදු කිරීමට වැඩි කැමැත්තක් දක්වයි.

2014_02_ZariaForman-3789-1040x696

Zaria ගේ උපන් භූමිය වන්නේ නිව්යෝර්ක් නුවරයි. පාසල් ගමන අවසානයත් සමග සංචාර සඳහා යොමුව ඇති ඇය වි‍දෙස් සංචාරවලදී බොහෝ සෙයින් කැමැත්තක් දක්වා ඇත්තේ අයිස් කඳු ප්‍රදේශයන්හි සංචාරය කිරීමටය. ඉන්පසු ඇය තමන්ගේ නිර්මාණ සඳහා තමන් කැමතිම අයිස් කඳු සංකල්පය උපයෝගී කරගෙන තිබේ.

තම නිර්මාණයකරණය පිළිබව විශ්වවිද්‍යාල අධ්‍යාපනය හදාරා, එයට අවශ්‍ය මූලික දැනුම මෙන්ම අත්දැකීම් එකතු කරමින් මෙම කාර්යය සාර්ථකව සිදුකරයි. 
මේ ආකාරයෙන් ඇය නිර්මාණය කිහිපයක එකතුවක් තම ප්‍රදර්ශනයක් සඳහා තබා තිබේ. 2005 වසරේදී Zaria Forman, Case Gallery නම් ස්ථානයේ තමන්ගේ පළමු ඒක පුද්ගල නිර්මාණ ප්‍රදර්ශනය පවත්වා තිබේ. මේ සඳහා බොහෝ ප්‍රතිචාර හිමි වූ බව ඇය පවසයි. මෙහිදී ඇය නිර්මාණ 06ක ප්‍රමාණයක් ප්‍රදර්ශනය කර තිබේ. මෙම එක නිර්මාණයක් සිදු කිරීමට සති 03ක කාලයක් හෝ ඊට වැඩි කාලයක් වැය වන බව Zaria කියයි. 

ඇය දෙවැනි ප්‍රදර්ශනය Drawings by Zaria Forman නමින් පවත්වනු ලැබුවේ, 2006 වර්ෂයේදී Bunburry’s Art Galleryහිදීය. ඉන්පසු ඇය එම වර්ෂයේදී තවත් ප්‍රදර්ශනයක් Clearly Nebulous, Allen Sheppard Gallery ස්ථානයේදී පවත්වා තිබේ. ඇය 2008 වර්ෂයේදී තවත් ප්‍රදර්ශනයක් පවත්වා තිබේ. 
ඇය මෙම නිර්මාණ අලෙවිය පටන්ගන්නේ 2014 වර්ෂයේ පැවැති Ice to Island, Winston Waechter Fine Art, Seattle ප්‍රදර්ශනයෙන් පසුවය.

මේ ආකාරයෙන් ඇය 2015 වර්ෂයේදී ප්‍රදර්ශන දෙකක්ද, 2016 වර්ෂයේදී එක් ප්‍රදර්ශනයක්ද, මෙම වර්ෂයේදී තවත් ප්‍රදර්ශනයක්ද පවත්වා තිබේ. මේ ආකාරයෙන් තමන්ගේ නිර්මාණ ඔස්සේ තම ජීවිත ගමන ගෙනයාමට තමන්ට හැකියාව ලැබුණු බව ඇය විශේෂයෙන් සඳහන් කරයි. මෙසේ තමන්ගේ නිර්මාණ ලෝකය පුරා විහිදුවමින් තමන්ගේ නාමය ප්‍රචලිත කිරීමට ඇයට හැකියාව ලැබී තිබේ.

0a99f16774299363d9cdd9efcee9163ba2f52e89_2880x1620  1638350-7 eba6157199135797199214acd2e8b1fe img_3272-1050x689 IMG_8180-2599042562-O  maldives-09 MrTbyPfaimAwRKLd37Yk_1082130089 zaria zaria_08 (1)  Zaria-Svalbard33

 

අපේ මිනිස්සුන්ට හඳ පෙන්නුවාම බලන්නේ ඇඟිල්ල දිහා

මේ දිනවල සමාජ වෙබ් අඩවිවල විවිධ වූ අපහාස චෝදනා ලබමින් කතාබහට ලක්වන චරිතයක් ලෙස පියුමි සිරිනායක හැඳින්විය හැකිය.

ඉරාජ් වීරරත්නගේ 'ක්ලියෝපැට්රා' සහ 'ප්‍රේම සටන' යන මියුසික් වීඩියෝ හේතුවෙන් බොහෝ මතභේදාත්මක හේතු මැවිණි. කෙසේ වෙතත් එවා නිර්මාණයන් ලෙස ඇතැම් පිරිස් පිළිගත්හ. පියුමි තමන් දායක වූ නිර්මාණයන් පිළිබඳව දරන්නේ මෙවැනි මතයකි.

Q මේ දවස්වල ෆේස්බුක් ගොසිප් වගේම ප්‍රතිචාරත් ඇතිනෙ. ඒ ගැන කියමු මුලින්ම?

මේ දවස්වල හොඳ නරක දෙකම සමානව යන්නෙ, මගේ 'ප්‍රේම සටන' වීඩියෝ එක සහ 'ක්ලියෝපැට්රා' වීඩියෝව නිසා. අලුත් දෙයක් කරන්න ඕන නිසා මම ඒ වගේ වීඩියෝ දෙකම කළා. ඒකේ මම කිසිම වැරැද්දක් දකින්නෙ නැහැ.

Q 'ක්ලියෝපැට්රා' ගැන මොකද හිතෙන්නෙ?

'ක්ලියෝපැට්රා' කියන්නෙ අද සමාජයට ගැළපෙන, සමාජයේ කිසිම බයක් නැතුව සිද්ධ වෙන දේවල් ස්ත්‍රී දූෂණ ගැන කියැවෙන දෙයක්. මට කියන්න ඕනෙ අද සමාජයේ ඕනෑතරම් ගැහැනු ළමුන් ඉන්නවා ක්ලබ් යන, මත්ද්‍රව්‍ය පාවිච්චි කරන. අද ඉන්න පෙම්වතා නෙමෙයි හෙට ආශ්‍රය කරන්නෙ.

ඉතිං ඒ වගේ කෙල්ලන්ට මේක හොඳ ආදර්ශයක්. පිරිමි කෙනෙක්ගෙන් අනාථ වෙලා තමන්ට ලැබෙන්න ඉන්න දරුවා මරා දමන්නේ නැතුව මේ ලෝකෙට බිහි කරලා ඒ දරුවා වෙනුවෙන් තමන්ගේ ශරීරය සල්ලිවලට විකුණලා තමන්ගේ දරුවාව හදාගන්න කාන්තාවක් ගැන කියන්නෙ.

මේ වගේ දේවල් අද සමාජයේ ඕන තරම් සිදුවෙනවා. මම ඒ මියුසික් වීඩියෝවේ කිසිම වැරැද්දක් දකින්නෙ නැහැ. මොකද අද සමාජයේ තියෙන ලිංගික ආසාවන් සඳහා අතින් අතට යන කාන්තාවන් ඕන තරම් ඉන්නවා. ක්ලබ් ඕන තරම් තියෙනවා. ඒ ක්ලබ් සමාජය තුළ තමන්ගේ තෘප්තිය වෙනුවෙන් ඇඟ විකුණන කාන්තාවන් අතරින් තමන්ගේ දුව වෙනුවෙන් වෙහෙසෙන කාන්තාවක් ගැන තමයි මේ වීඩියෝවෙන් කියැවෙන්නෙ. 

Q වැඩිපුරම බැණුම්ද මේ වීඩියෝවට ලැබුණේ?

ප්‍රතිචාර හැමදාම හොඳ වගේම නරක දෙකම තියෙනවා. ඇත්තටම අපේ මිනිස්සුන්ට හඳ පෙන්නුවාම බලන්නෙ ඇඟිල්ල දිහා. නමුත් අපේ මිනිස්සු අමරසිරි පිරීස් සර්ගේ 'ලඳුනේ' සිංදුව කියද්දි ඒක හොඳට රසවින්දා. ඉරාජ් එයාගේ විදිහට කිව්ව 'ක්ලියෝපැට්රා' ගැන විවේචනය කරනවා.

යාපනේ වින්ද්‍යා ගැහැනු ළමයාව, සේයා වගේ දරුවො තව ඕන තරම් අහන්න සිදුවුණ දූෂණ, අපරාධ ඒවා ගැන කතා කරන්න තමයි මම මේ වීඩියෝ එක කළේ. ඇත්තටම එඩිට් එකෙන් පස්සේ බලපුවාම මගේම ඇස්වලින් කඳුළු ආවා. මේ නිර්මාණය බලද්දි ඇත්තමට මම මේ වීඩියෝ එක ඉදිරියේ ප්‍රේක්‍ෂිකාවක් විදිහට රසවින්දා.

Q ඔබ මුලින්ම සඳහන් කළා 'ප්‍රේම සටන' අලුත් දෙයක් කියලා? 

අලුත් දෙයක් කියලා කියන්නෙ ලංකාවේ එක දේකට කොටුවෙලා තමයි නිර්මාණයන් කරන්නේ. මිනිස්සු කියන්නේ සංස්කෘතිය බිඳෙනවා, එහෙමත් නැත්නම් ලංකාවේ මිනිස්සුන්ට ඒක ගැළපෙන්නේ නැහැ කියලා. ඒ නිසා ඕනෑම නිර්මාණයක් කරන්නේ යම් සීමාවකට කොටුවෙලා. අපි හිතුවා ඉන්ටර්නැෂන්ල් ලෙවල් එකට නිර්මාණයක් කළානම් වෙනසක් සිදුවෙයි කියලා.

Q ඉන්ටර්නැෂනල් ලෙවල් එකට යන්න නිර්මාණ කරන්න ඕනෙ අඩනිරුවත් වෙලාද?

එහෙම දෙයක් නෙවෙයි සාමාන්‍යයෙන් ඉන්ටර්නැෂන්ල් ෆිල්ම් එකක් ගත්තොත් 80%කගේ වගේ සෙක්ස්ෂුවල් සීන් තියෙනවා. පොඩි ළමයින්ගේ ෆිල්ම්වල පවා තියෙනවා. ඒකෙ නිර්මාණාත්මකභාවය වැඩිවෙන්න රසාත්මක බව වැඩි වෙන්න එහෙම දානවා ඇති. ඉතින් මම හිතන්නේ අපි කරපු නිර්මාණයත් ඒ වගේ දෙයක් කියලා. මිනිස්සු අකමැති දෙයක් නම් බණිනවා නම්, ඒක බලන්නෙ නෑ, ඒකෙ වීවුස් අඩුවෙන්න ඕනෙ. මිනිස්සු බැණ බැණ බලන්නේ ඒක මිනිස්සු කැමති දෙයක් කුතුහලය ඇතිවන දෙයක් නිසානෙ.

Q ඉන්ටර්නැෂනල් ලෙවල් එකේ යම් කාර්යයක් සිදුකරන්න හැකියාව තියෙන්නෙ ඔවුන්ට සංස්කෘතියක් හෝ ඒ කාරණාවක් නැති නිසයි. නමුත් ලංකාවේ ඒ දේ කරන එක ගැන මොකද හිතන්නෙ?

අපේ ලංකාවේ මියුසික් වීඩියෝ වැඩිපුර කරනවා. ටෙලිනාට්‍ය හදනවා අඩුයි ලංකාවේ. පිටරටවලින් ගෙනත් පෙන්වනවා. ඒක කරන්නේ බජට් එකක් මත. ඉතින් අපේ අය කරන්නෙ මියුසික් වීඩියෝ එකක් කරන එක. මියුසික් වීඩියෝවලින් දක්ෂතාව පෙන්වන්න යන්නේ. හොලිවුඩ්, බොලිවුඩ් ගත්තොත් ඒගොල්ලන්ට මියුසික් වීඩියෝ කරකර ඉන්න ඕනේ නෑ.

මොකද ඒගොල්ලන් ලොකු බජට් දාලා සිනමාව හා ටෙලිනාට්‍ය ආක්‍රමණය කරලා ඉවරයි. අපට නිර්මාණයක් විදියට කරන්න පුළුවන් අඩු වියදමකින් මියුසික් වීඩියෝ එකක් විතරයි. මිනිස්සු කැමතිත් ඒකට. මියුසික් වීඩියෝ එකකින් අපට උපරිමයෙන් කරන්න පුළුවන් දේ අපි කරන්න ඕනේ කියලා මම හිතනවා.

Q ඉරාජ් කරපු දෙයක් පස්සේ දැන් හැමෝම යනවා. ඇයි කෙනෙක්ව හැමතිස්සෙම අනුගමනය කරන්නේ?

හැමෝම දෙයක් කරන්න කැමතියි, ඒත් කරන්න බය තියෙනවා. ඕනෙම වැරැද්දක් මුලින්ම කෙනෙක් කරනකම් තමයි බලාගෙන ඉන්නේ. එක්කෙනෙක් ඒ දේ කළොත් අනිත් අයත් ඒක අනුගමනය කරනවා. අපිත් කරලා බලමු කියලා හිතනවා.

ඉතින් මම හිතුවා සංස්කෘතිය කියලා දෙයක් තියෙනවා නම්, මියුසික් වීඩියෝ එකක් නිසා සංස්කෘතිය නැති වෙනවා කියලා හිතනවා නම්, ඒදේ බිඳලා ඉරාජ් බය නැතුව ඒදේ කළා. ඉතින් අනිත් කට්ටියත් ඒක අනුගමනය කරනවා.

ඒකෙ මම වැරැද්දක් දකින්නේ නැහැ. ඕනෑවට එපාවට කරන මියුසික් වීඩියෝත් මම දැකලා තියෙනවා. එහෙම නොකර මියුසික් වීඩියෝ ඉන්ටර්නැෂනල් ලෙවල් එකකින් කළා නම් ඇත්තටම හොඳයි.

Q සංස්කෘතිය බිඳලා වීඩියෝ කරන්න ගත්තොත් ලංකාවට ඉදිරියේදී මොකද වෙන්නේ?

අපේ මිනිස්සු සංස්කෘතිය බලන්නෙ සෙක්ස්වලින්. එහෙමත් නැත්නම් අඩනිරුවත්කමින්. ඒ දෙක නැතිවුණා කියලා මම හිතන්නේ නෑ ලංකාවට ලොකු දෙයක් සිදුවෙනවා කියලා. අපි ඇඟ වහ‍ෙගන ඉන්න ඉන්න ඒ දේ ටිකක් ඇරිය ගමන් මිනිසුන්ගේ ආසාව ඔක්කොම එළියට එනවා. දියුණු රටකට ගිහින් බලපුවාම, මම බාගෙට ඇඳගෙන ගියත් ඒ මිනිස්සු බලන්නෙ නැහැ.

මොකද ඒ මිනිස්සුන්ට හැමදාම ඒක දැකලා දැකලා ඇතිවෙලා. ඒක නිසා වැරදි කරනවා අඩුයි. අපේ ලංකාවේ ඇඟ වහගෙන ඉඳලා ඉඳලා ඩෙනිම් එකක් හිරට ඇඳගෙන ගියොත් හරි බ්ලවුස් එකක් හිරට ඇඳගෙන ගියොත් හරි මිනිස්සුන්ට ඉන්න බෑ.

ඉතින් හිතෙන්නෙ අනේ මට මෙයාව අල්ලන්න තිබුණානම් කියලා. මියුසික් වීඩියෝ එකකින් නැතුව තව ඕනෑතරම් ක්‍රම තියෙනවා සංස්කෘතිය මනින්න. ඒ වගේම හදාගන්න ඒ දේවල් ගැන හිතුවොත් හොඳයි.

Q අලුත් ගීතය නිසා ගොඩක් තරහකාරයො ඇතිවුණා? ඔබ මේ දේ කළේ ජනප්‍රියත්වය නිසා කියලා කට්ටිය කියනවා. ඒ ගැන මොකද හිතන්නෙ?

මම ජනප්‍රියත්වය නිසා මේ වීඩියෝව කළේ නැහැ. මට ජනප්‍රිය වෙන්න ඕනේ නැහැ. ගොඩක් ෆෑන්ස්ලා දන්නවා මාව. මම මියුසික් වීඩියෝ, ටෙලිනාට්‍ය කරලා තියෙනවා.

Q මේ සඳහා ඔබේ ස්වාමිපුරුෂයා දායක වුණා. ඔහුටත් මඩ ප්‍රහාර එල්ල වුණා. ඒ ගැන මොකද හිතන්නෙ?

කතාවට කියනවානේ නරියට මිදි කන්න බැරි වුණාම තිත්තයි කියලා. ඒ වගේ දෙයක් තමයි මෙතැන වෙන්නෙ. මේ වගේ දෙයක් ලස්සනට කරගන්න බැරි වුණාම මේ වගේ තැනකට තමන්ට එන්න බැරි වුණාම ගොඩක් මඩ ප්‍රහාර එල්ල කරනවා.

මගේ සැමියටත් එහෙම කියලා තියෙනවා. මම ගණන් ගන්නේ නෑ ඒක. මොකද හොඳක් කළත්, නරකක් කළත් ලංකාවේ මිනිස්සු බලන්නෙ වපර ඇසින්.

Q ටෙලි නිර්මාණයක ප්‍රධාන චරිතයකට දායක වුණා. ඒ දේ ගැන කිව්වොත්?

සිරස නාළිකාවේ එය විකාශය වුණා. දැන් ඒක ඉවරයි. මට තාම ඒකෙ ප්‍රතිචාර ලැබෙනවා. මේ මාසෙ 20න් පස්සෙ ෂූටින් පටන් ගන්නවා සිරස නාළිකාවේම ටෙලි නාට්‍යයක. ප්‍රධාන චරිතය තමයි මම ඒකෙත් කරන්නෙ. ඉස්සරහදී ඒක බලාගන්න පුළුවන්.

Q ඔබ වෙළෙඳ දැන්වීම් පැත්තට යොමු වුණේ නැද්ද?

වෙළෙඳ දැන්වීම් පැත්තට. යොමු වුණා ගොඩක් අඩුයි. මම මොකද මම ඒ පැත්තට වඩා ගොඩක්ම කැමැති රංගනය පැත්තට.

Q සිනමාව පැත්තට යන්න අදහසක් නැද්ද?

මම ගොඩක් කැමතියි සිනමාව පැත්තට. සිනමාවෙන් මට ආරාධනයක් ලැබුණොත් මම අනිවාර්යයෙන්ම ඒක කරනවා.

Q ඔබට මෙම ක්‍ෂේත්‍රය ගැන කලකිරීමක් ඇතිවෙන්නෙ නැද්ද, මේ එන මඩ ප්‍රහාරත් එක්ක?

ක්‍ෂේත්‍රය ගැන කලකිරීමක් ඇතිවෙන්නෙ නැහැ මේ ක්‍ෂේත්‍රයේ විතරක් නෙවෙයි ඕනෑම තැනක. පිටරට මනුස්සයෙක් වැරැද්දක් කළොත් පවා අපේ ලංකාවේ මිනිස්සු ඒ මිනිස්සුන්ට බණිනවා. ඊරිසියාව හා කුහකකම නිසා මිනිස්සු බලන්නෙ කොහෙන්හරි ප්‍රහාරයක් එල්ල කරන්න. ඒ නිසා මම සැලෙන්නේ නෑ කොහොමටවත්.

Q ඉදිරියේදී තියෙන ලොකුම බලාපොරොත්තුව මොකක්ද?

පොඩි කාලයේ ඉඳන් මම රංගනයට තමයි කැමැති වුණේ. මගේ රංගන කුසලතාව දවසින් දවස දියුණු කරගෙන ඉස්සරහට යන්න තමයි බලාපොරොත්තුව රංගනය පැත්තෙන්. 

ඡායාරූප – කවීත් මිලින්ද

මම කතා කරන්නෙත් හැම කෙනෙක්ම කතා කරන විරහව ගැනම තමයි

මේ දිනවල බොහෝ දෙනෙකුගේ කතාබහට ලක්වන තැනැත්තියක ලෙස උමා අසෙනි හැඳින්විය හැකිය. පසුගියදා සනුක විසින් ගායනා කරනු ලැබූ 'පෙරවදනක්' ගීතයේ රචිකාව වනුයේ ඇයයි. නිවේදිකාවක වශයෙන් කටයුතු කරන ඇය තම කලා කටයුතු පිළිබඳ තොරතුරු බෙදා ගැනීමට 'අද' සමග මෙලෙස එකතු වූවාය.

Q 'පෙරවදනක්' ගීතයේ මූලික කාරණාව ගැන මුලින්ම කතා කළොත්?

ඒක සිංදුවක් කරන්න හිතා‍ෙගන ලියපු එකක් නෙවෙයි. මම සාමාන්‍යයෙන් පුරුද්දක් විදියට මගේ හිතට එන හැමදේම ලියන කෙනෙක්. මගේම අත්දැකීමක් කියන්න බැහැ. එවැනි ඒවත් තිබුණා. මම ඒ වෙද්දි කැම්පස් එකේ හිටියේ. මගේ යාළුවන්ගේ අත්දැකීම් එක්ක මට හිතුණා හැම කෙනෙක්ම කියන්නේ ජීවිතේ පොතක් කියලනේ.

ආදරේ කියන්නේ ඒකෙ පරිච්ඡේදයක්, විදියටනේ හිතන්නේ. මගේ පැත්තෙන් ගත්තොත් මට ආදරේ කියන්නෙත් පොතක් වගේ. අපි එක එක කාලවලදී ආදරය එකඑක විදියට ලබන්නෙ. අපට කෙනෙක් හමුවුණාට පස්සේ අපේ ජීවිතේ ගැන කතා වෙලා අපි දෙයක් ලියනවා, හීන දකිනවා. පෙළින් පෙළට අපි ඒ හීන ගොතාගෙන යනවා. හැබැයි අවසානයේදී නොකියා යන්න යනවා. ගියාට පස්සේ පසුවදනක් ලියන්න බෑනෙ. පසුවදනක් ලියන්න බෑ කියන දේ මත තමයි ඒක නිර්මාණය වුණේ.

Q 'පෙරවදනක්' ගීතයට පණක් ලැබෙන්නේ සනුක වික්‍රමසිංහ නිසා. මේක කොයි විදියට සාර්ථක වුණාද?

මම සිරස ටීවී එකේ ප්‍රසන්ටර් කෙනෙක්. අපේ මෝර්නින් ෂෝ එකේදි 'Next Generation' කණ්ඩායම Interview කරන්න හම්බවෙනවා. ඒකේ සනුකයි, නදීමාලුයි ඒ කට්ටියම. මම සනුකත් එක්ක ගොඩක් කිට්ටු වෙනවා. මම ලිව්ව දේවල් සනුකට යැව්වා දවසක්. ඊට සති කිහිපයකට පස්සේ සනුක මැසේජ් එකක් දැම්මා ඔයා ලිව්ව ඒවගෙන් මම මේක අරගන්නවා ඒ වචන ටිකට මම ආසයි කියලා.

එයා මුලින්ම 'මෙලඩි එක කරන්නේ මෙහෙමයි, ඔයා කැමතිද' කියලා මගෙන් ඇහුවා. මම කැමති වුණා ඒකට. එයා ඒක Develop කරන හැම වතාවකම මට එව්වා ඒක. අවුරුද්දකට කිට්ටු කාලයක් එයා ඒ සිංදුව වෙනුවෙන් වැඩකළා.

එයාට ඕන වුණේ ඒ වචන ටිකත් එක්ක වෙනමම තලයකට ඒක ගෙනියන්න. සංගීත් අංකල්ගෙන් ලැබුණු සහයෝගයත් එක්ක මම හිතනවා ඒක සාර්ථක වුණා කියලා. මියුසික් වීඩියෝ එක නිසා ඒක තවත් ලස්සන වුණා. ඒ ප්‍රඩක්ෂන් ටීම් එකත් එක්ක. ඇත්තටම ඒක ටීම් වර්ක් එකක්.

Q රැල්ලෙන් ඔබ්බට ඔබ නිර්මාණ සිදුකළ නිසා ලැබුණු අත්දැකීම් මොනවද?

මම හිතුවේ නෑ ඒ වචනවලට මුලින්ම මෙහෙම ප්‍රතිචාර ලැබෙයි කියලා. එවැනි රසක් විඳින මිනිස්සු තාම ඉන්නවා කියලා මම හිතුවේ නැහැ. සනුක ඒ වෙනකොට 'සරාගයේ' සිංදුව නිසා ගොඩක් ජනප්‍රිය වෙලා හිටියේ. සනුකව බාරගන්න කොටසක් ඉන්න නිසා සිංදුව හිට්වෙයි කියලා හිතුණා.

ඕනෑම ක්‍ෂේත්‍රයක රැලි තියෙනවා. එනවා යනවා. මම අලුත් දෙයක් කරලා නැහැ. මම කතා කළෙත් විරහව ගැනමයි. නමුත් මගේ වචනවල අනවශ්‍ය බොළඳකමක් නැති එක තමයි ඒ දකින වෙනස මම හිතන විදියට. ගීත සාහිත්‍යයක් තියෙනවනේ. සාහිත්‍ය කියන එක අපෙන් ඈත්වෙලා තියෙනවා. අපි අනවශ්‍ය ප්‍රමාණයට සරල කරලා කියන්න තියන දේ අමුවෙන්ම කියනවා.

වෙනසක් විදියට දැනෙන්නේ මගේ ගීතය සාහිත්‍ය කියන පැත්තට නැඹුරුවක් තියෙන නිසා කියලා මට හිතෙනවා. මිනිසුන්ට ටිකක් හිතන්න පුළුවන් විදියට ඉඩක් හදලා තියෙනවා. නැතුව මම වෙනස්ම තේමාවකින් රචනා කරලාවත් නෑ. මම කතා කරන්නෙත් හැම කෙනෙක්ම කතා කරන විරහව ගැනම තමයි. හැබැයි ඒක මින්සුන්ට ලබා‍ෙදන එකේ වෙනසක් තියෙනවා.

Q පැරණි ගීතවලත් විරහව තිබුණා. නමුත් අද කාලයේ විරහ ගීතවල ගායකයාගේ ඇඬියාව වැඩියි කියලා කිව්වොත්?

පිරිමියෙකුටත් දුක දැනෙනවානේ. ඒක ප්‍රකාශ කිරීමේ වෙනසක් තමයි මේ යුග ගණනාවක් තිස්සේ සිද්ධ වෙන්නෙ. අමරදේව මහතාගේ 'විකසිත පෙම් පොකුරු පියුම්' ගීතයේදී ගායනා වෙන්නෙත් විරහව. පිරිමි කෙනෙකුට ඇහැට කඳුළක් උනන්නේ නැත්තේ නැහැ. හැබැයි ඒක ප්‍රකාශ කරන විදියේ වෙනසක් තිබුණා. ඒකයි මම කිව්වේ අනවශ්‍ය ප්‍රමාණයට සරල වීමක් තමයි දැන් තියෙන්නෙ.

දැන් කියන්නේ මල් සිංදු කියන අය කියලා. මම කැමැති නැහැ එහෙම ලේබල් කරන්න. ඒ අයට හම්බවෙන පද රචනාවල තියෙන්නේ 'ඔයා ගියා මට ඒක දරාගන්න බැහැ' කියන එකනේ. ඒක ඇත්ත. නමුත් ඒ යුගයේ ගීතවල ඒක ඒ තරමටම සරල විදියට කියවිලා නැහැ. ඒක තමයි තියෙන එකම වෙනස.

සුනිල් එදිරිසිංහ මහතාගේ 'මගෙන් වෙන් වී යන්න පෙර මා' කියන ගීතයේ කියන්නේ ඔයා යන්න මම ආයේ ඔයා එන දවසක බාරගන්නවා කියලා.

අද කාලේ සාමාන්‍ය ගායකයෙක් ගායනා කරන ගීතයකත් තියෙන්නේ 'ඔයා යන්න මම ආයේ ඔයා එන දවසක බාරගන්නවා' කියලාමයි. හැබැයි ප්‍රකාශනයන් දෙක දෙකක්. අනවශ්‍ය ප්‍රමාණයට සරල වීම තුළ මිනිසුන් ගැඹුරක් දකින්න නැහැ. ඕනෑම දෙයක් ඕනෑවට වඩා සරල වුණාට පස්සේ ඒකේ වටිනාකම නැතුව යනවා. දැන් තියෙන්නේ එහෙම ප්‍රශ්නයක්.

Q ඔබේ ගීත රචනා පැත්ත ගැනත් කිව්වොත්?

මම ලියලා එළිදැක්වූ පළමු වැනි ගීතය තමයි සනුකගේ ගීතය. ඔක්කොම වගේ තියෙන්නෙ නව පරපුරේ අයට නිර්මාණය කරපුවා තමයි. ඒවා එකක්වත් තාම 'රිලීක්ස්' වෙලා නැහැ. ඉස්සරහට නව පරපුරේ ජනප්‍රිය ගායකයන් කිහිපදෙනෙක් ඉන්නවා ලිස්ට් එකේ. ඒවා දැන්ම 'රිලීස්' වෙයි කියලා බලාපොරොත්තුවකුත් නැහැ.

Q ඔබ නිවේදිකාවක් විදියට කටයුතු කරනවානේ ඒ ගැනත් කියන්න?

මම සිරස ආයතනයට සම්බන්ධ වෙන්නේ 2014. ඒ කාලේ ඉඳන් මේ වෙනකන් නිවේදිකාවක විදිහට කටයුතු කරනවා. මෝර්නින් ෂෝ එක කරනවා. සිරසෙන් කරන ස්පෙෂල් වැඩසටහන් කරනවා. ඒ කියන්නෙ අවුරුදු කාලයේ, වෙසක් කලාප වගේ දේවල් හා ඉසුරු කියන බිස්නස් ප්‍රෝග්‍රෑම් තමයි මම කළේ. මේ වෙනකොට සම්බන්ධ වෙලා ඉන්නේ උදෑසන ප්‍රෝග්‍රෑම් එකත් එක්ක. 

Q අද බොහෝ දෙනා ඔබව නිවේදිකාවකට වඩා දන්නේ 'පෙරවදනක්' නිසා නේද?

අද ගොඩක් වෙලාවට මම ගැන කතා වෙන්නේ 'පෙරවදන' ගීතය නිසා. නිවේදිකාවක විදියට මම ලබන පන්නරය ලියන දේවල්වලට රුකුලක් වෙනවා. මම වැඩකරන්නේ චන්දන සූරිය බණ්ඩාර යටතේ. චන්දන සූරිය බණ්ඩාරයන් කියන්නේ ඇවිදින පුස්තකාලයක්.

ඒ ලබන දැනුම ඒ වගේම සිරස කාර්යමණ්ඩලය එක්ක ඉද්දි විවිධ චරිත මට කියවන්න ලැබෙනවා. නිවේදනය මගේ ජීවිතයේ අනිත් දේවල් හැඩගස්ව ගන්නත් ලොකු පන්නරයක් වෙනවා. මම හිමින් ගමනක් එන්නේ. මට හිතෙනවා නිවේදන වෘත්තියේදීත් යම් සාර්ථකත්වයක් ලබන්න පුළුවන් වෙයි කියලා.

Q නිවේදනය හදාරලාද ඔබ මේ ක්‍ෂේත්‍රයට ආවේ?

මම පාසල් යන කාලේ කළේ සංගීතය, නර්තනය හා රංගනය. නිවේදනය කියන එක ගැන මම ටෙස්ට් කරලත් නැහැ, මට එහෙම හැකියාවක් තියෙනවාද කියලා. හැබැයි මගේ ඉලක්කයක් තිබුණා මම අවුරුදු 27 වෙනකොට ලංකාවේ යම් තැනකට එනවා කියලා. නමුත් මොන අංශයෙන්ද කියලා මගේ ඔළුවේ තිබුණේ නැහැ.

ඔය අතර 2013දී සම්පත් ශ්‍රී ජයසේන මගේ තාත්තාගේ ගෝලයෙක්. එයාගේ එක වැඩසටහනකට වයස 13දී සම්බන්ධ වෙනවා මගේ තාත්තත් එක්ක. ඊට අවුරුදු 10කට පස්සෙ මට සම්පත් අයියාව හම්බවෙනවා.

මාව දැකලා එයා කියනවා සිරසේ මෙහෙම Screen Test වගයක් තියෙනවා ඇප්ලයි කරන්න කියලා. එතැන ඉඳන් ලොකු කතාවක් මේක පිටිපස්සේ තියෙනවා. කොහොම හරි මගේ පළමු වැනි ප්‍රෝග්‍රෑම් එක 2014 සිරස අවුරුද්ද. ඒක ලයිව් එකක්. ඒ පටන් ගත්ත ගමන තමයි මේ ඉන්නෙ.

Q ඉදිරි බලාපොරොත්තු මොනවාද?

මට රැල්ලක් හදන්න වුවමනාවක් නැහැ. අපට හොඳ වෙරළක් හදලා දීලා තියෙනවා අපේ මහගම සේකරයන්ගේ සිට ඉස්සරහට අපේ පරම්පරාවට. එන්න එන්න ඒ වෙරළ විවිධ හේතූන් මත ඛදනය වුණා. මට අවශ්‍ය ඒ වෙරළ පුළුල් කරගන්න කට්ටිය එකතු කරගන්න විතරයි. මම හිතනවා යහපත් අරමුණකින් කරන නිසා ඒ වැඩේ සාර්ථක වෙයි කියලා.

මං වගේ ලියන මට වඩා දක්ෂ අය ඉන්නවා. ඒ අය එකතු කරගෙන අපි ඒ වැඩේ පටන් ගමු කියන තැන තමයි ඉන්නේ. ඉදිරියේදී ඒක යම්තාක් දුරකට හරි සාර්ථක වෙයි කියලා බලාපොරොත්තුවක් තියෙනවා.

නිවේදනය පැත්තනේ විවිධ දේවල්වලින් ඉදිරියේදී දකින්න ලැබෙයි. අනාගතය ගැන කිව්වොත් මගේ තියෙන්නේ වෙනස්ම බලාපොරොත්තුවක් ඒක ලංකාවෙන් එහාගිය බලාපොරොත්තුවක්. ඒ ගැන කියන්න ඕනේ නෑ දැම්ම. රංගනය පැත්තෙනුත් ඉදිරියේදී දකින්න ලැබෙයි. ඒ හා සමාන ලොකු අරමුණක් තියෙනවා. ඒ ගැන දැම්ම කියන්න ඕනේ නෑ. 

20030793_1257389384388404_2006329933_n 20158278_1257389664388376_1087717652_n 20217181_1257389301055079_672707264_n