Author Archives: චමිල් රූපසිංහ

පළත් සභා මැතිවරණය මනාප ක්‍රමයට

ඉදිරි පළාත් සභා මැතිවරණය පැරණි මනාප ක්‍රමය අනුව පැවැත්වීමට සියලු පක්ෂ එකඟතාව පළකර තිබෙන බවඅමාත්‍ය ලක්ෂ්මන් කිරිඇල්ල මහතා පැවසීය.

අගමැති රනිල් වික්‍රමසිංහ මහතා සමග මල්වතු අස්ගිරි මහනායක ස්වාමීන්ද්‍රයන් වහන්සේ දෙනම අද (18දා) බැහැදැක ආශීර්වාද ලබා ගැනීමෙන් පසුව මාධ්‍ය හමුවේ අදහස් දක්වමින් අමාත්‍යවරයා මේ බව ප්‍රකාශ කළේය.

ආණ්ඩු පක්ෂයේ සිටින මන්ත්‍රීවරු විපක්ෂයට ගියහොත් ඇතිවන තත්ත්වට මුහුණදීමට එජාපය සූදානම් බවත්, ශ්‍රී ලංකා නිදහස් පක්ෂයේ පිරිසක් ආණ්ඩුවෙන් ඉවත් වුවද තවත් කොටසක් ඉදිරියටත් එජාපය සමග ජාතික ආණ්ඩුව තුළ කටයුතු කිරීමට කැමැත්තෙන් සිටින බවත් ඔහු පැවසීය.

විශ්වාසභංගයට පෙර දෙමළ සන්ධානය ඡන්දය දීමෙන් වැළකී සිටින බවත්, එක්සත් ජාතික පක්ෂයේ පිරිසක් ඊට සහය දෙන බවත් ඒකාබද්ධ විපක්ෂය කියා සිටියත් ඒ කිසිවක් සිදු වූයේ නැති අතර, එජාපයේ සියලු දෙනා විශ්වාස භංගයට එරෙහිව ඡන්දය දුන් බවත් කිරිඇල්ල මහතා එහිදී ප්‍රකාශ කළේය.

Lakshman-Kiriella

විශ්වාසභංගයට පක්ෂ වූ අය ආණ්ඩුවෙන් ඉවත්විය යුතුයි

ආණ්ඩුවේ කැබිනට් ඇමැතිකම් දරන්නේ නම් ආණ්ඩුවට විරුද්ධ වීමට නොහැකි බවත්, අගමැතිවරයාට එරෙහිව විශ්වාස භංගයේදී ඡන්දය පාවිච්චි කළ ශ්‍රීලංකා නිදහස් පක්ෂ මන්ත්‍රීවරුන්ට අමාත්‍යය ධුරයන්ගේ තව දුරටත් රැඳී සිටීමට සදාචාරාත්මක අයිතියක් නොමැති බවත් රාජ්‍යය ව්‍යවසාය සංවර්ධන හා මහනුවර සංවර්ධන අමාත්‍යය,සභානායක ලක්ෂ්මන් කිරිඇල්ල මහතා පවසයි.

මහනුවර පුරපති ලෙස යළිත් පත් වූ කේසර සේනානායක මහතා එම ධූරයේ වැඩභාර ගැනීම අද (09දා) සිදු කෙරුණු අතර, එම අවස්ථාවට සහභාගි වෙමින් ඇමැතිවරයා මාධ්‍යය හමුවේ අදහස් දක්වමින් මේ බව ප්‍රකාශ කළේය.

විශ්වාස භංගයට පක්ෂය ඡන්දය දුන් ඇමැතිවරුන් දැන් කළ යුත්තේ වැදගත් ලෙස ඇමැති ධුරවලින් ඉවත් වීම බවත්, පාර්ලිමේන්තුවේ මහත්මා දේශපාලනය එය බවත් හෙතෙම පැවසීය.

තරුණයන්ට පක්ෂය තුළ වැඩ කරන්නට අවශ්‍යය පසුබිම ලබාදෙමින් මෙම මස අවසන් වීමට පෙර එජාප ප්‍රතිසංවිධාන කටයුතු අවසන් කරන බවත්, රටට දැනෙන වෙනසක් කිරීමට මේ වන විට සැලසුම් කර තිබෙන බවත් ලක්ෂ්මන් කිරිඇල්ල මෙහිදී වැඩිදුරටත් ප්‍රකාශ කළේය.

Lakshman-Kiriella

 

හන්තාන බෞද්ධ ධර්ම පුස්තකාලය විනාශ කළ අයට ක්‍රියාමාර්ග නෑ

මහනුවර හන්තානේ පිහිටි ජාත්‍යන්තර බෞද්ධ ධර්ම පුස්තකාල මධ්‍යස්ථානයට කිසියම් පිරිසක් ඇතුළුවී එහි  තිබූ ගොඩනැගිලි විනාශ කර ඒවා බිමට සමතලා කර දින 16ක් ගතවුවත්, නීතිය ක්‍රියාත්මක කිරීමට හා එම පුද්ගලයන් අත්අඩංගුවට ගැනීමට හෝ පොලීසිය අපොහොසත්වී ඇතැයි උඩරට අමරපුර මහා නිකායේ භික්ෂූන් වහන්සේ චෝදනා කරති.

උඩරට අමරපුර නිකායේ මහානායක අතිපූජ්‍යනුවරඑළියේ චන්ද්‍රජෝති නාහිමි ඇතුළු මහ සංඝරත්නය අදාළ ස්ථානය නිරීක්ෂණය කිරීමට පසුගියදා ගිය අතර, එහිදී මහනාහිමි ප්‍රමුඛ මහ සංඝරත්නය අදාළ චෝදනාව මහනුවර පොලීසිය වෙත එල්ල කළහ.

සංවිධානාත්මක පිරිසක් ඉකුත් 14 වෙනිදා මහ දවල් අදාළ ස්ථානයට ඇතුළුවී එහි තිබූ ගොඩනැගිලි තුනක් කඩා බිඳදමා ඇති අතර, එහි තිබූ විශාල බුද්ධ ප්‍රතිමාවක්ද රැගෙන ගොස් තිබෙන බවටද උන්වහන්සේලා චෝදනා කරති.

මහනාහිමි ප්‍රමුඛ මහා සංඝරත්නය අදාළ ස්ථානය නිරීක්ෂණය කරමින් සිටියදී මහනුවර පොලීසියේ කණ්ඩායමක් එහි පැමිණි අතර, එහිදී  උඩරට අමරපුර මහා නිකායේ මහනාහිමියන්පොලිස් නිලධාරීන්ගෙන් විමසා සිටියේ පොලිස් හදිසි ඇමැතුම් අංශයට ලැබුණු ඇමතුමක් මත පොලීසිය එහි පැමිණයද, භාවනා මධ්‍යස්ථාන ගොඩනැගිලි කඩා බිඳ දමන අවස්ථාවේ ක්‍රියාත්මක නොවූ පොලීසිය මෙම අවස්ථාවේ ක්ෂණිකව ක්‍රියාත්මක වීම තුළින් පෙනී යන්නේ වරදකරුවන් රකින්නට පොලීසිය කටයුතු කරන බව යැයිද මහනාහිමියන් පොලිස් නිලධාරීන්ගෙන් ප්‍රශ්න කර සිටියහ.

DSC_0686 copy DSC_0690 copy DSC_0698 copy

 

කුරුඳු පොලු හා ගිනි අවි දෙකක් සමග මෛත්‍රී ගුණරත්න අත්අඩංගුවට

එක්සත් ජාතික නිදහස් පෙරමුණේ සංවිධානත්වයෙන් මහනුවර සිට කොළඹ දක්වා ගමන් ගන්නා පාගමනේ ප්‍රථම අදියරට සහභාගිවීම සඳහා එම පක්ෂයේ නායක මෛත්‍රී ගුණරත්න මහතා ඇතුළු පිරිසක් පැමිණි බව කියන ලෑන්ඩ් කෘසර් වර්ගයේ ජීප් රථ දෙකක තිබී බෝර 12 ගිනි අවි දෙකක් හා කුරුදු පොලු 98 ක් කඩුගන්නාව හා පේරාදෙණිය පොලීසි වල නිලධාරීන් කණ්ඩායමක් විසින් අද (31) දහවල් අත්අඩංගුවට ගෙන ඇත.

එක්සත් ජාතික පක්ෂ නායකත්වයෙන් රනිල් වික්‍රමසිංහ මහතා ඉවත් විය යුතු බව කියමින් අදාළ විරෝධතා පාගමන අද (31) පෙරවරුවේ ගැටඹේ ප්‍රදේශයෙන් ආරම්භ විය.එම අවස්ථාවට එක්සත් ජාතික නිදහස් පෙරමුණේ මෛත්‍රී ගුණරත්න මහතා ඇතුළු සාමාජිකයින් 100 දෙනකු පමණ සහභාගී වී සිටියහ.

පාගමනට සම්බන්ධවූ පිරිස් පැමිණි බව කියන ප්‍රාඩෝ වර්ගයේ ජීප් රථයක් ඊරියගම ප්‍රදේශයේ නවතා තිබියදී පොලීසිය පරීක්ෂාවට ලක්කර තිබෙන අතර එහි තිබී අඩි 04 ක පමණ දිගින් යුත් කුරුදු පොලු 98 ක් පොලීසිය සොයා ගෙන ඇත.එම කුරුඳු පොලු කුමක් සඳහා රැගෙන ආවේද යන්න පිළිබඳව රියදුරුට පැහැදිලි ප්‍රකාශයක් ලබා දීමට නොහැකි වීම නිසා පේරාදෙණිය පොලීසිය මගින් ඔහුව සැකපිට අත්අඩංගුවට ගෙන තිබේ.

මෙම ජීප් රථය මෛත්‍රී ගුණරත්න මහතාගේ බිරිඳගේ නමට ලියාපදිංචි කර තිබෙන බව පොලීසිය පවසයි.

කොඩි කණු ලෙස භාවිත කරන්නට මෙම කුරුඳු පොලු ලෙස රැගෙන ආ බව ඔවුන් සඳහන් කල අතර  ඔවුන්ට කොඩි පෙන් වීමට නොහැකිවූ බවත් පොලීසිය පැවැසිය.

මේ අතර පාගමන සමඟ යමින් තිබූ තවත් ප්‍රාඩෝ වර්ගයේ ජීප් රථයක් තිබී බෝර 12 වර්ගයේ ගිනි අවි දෙකක් හා ජීව උණ්ඩ 10 ක් පොලීසිය සොයා ගෙන ඇත.එම ගිනි අවි සඳහා බලපත්‍ර ඇති බව මෛත්‍රී ගුණරත්න මහතා ප්‍රකාශ කළ බව පොලීසිය පවසයි.

අදාළ ගිනි අවි බලපත්‍ර පොලීසියට ඉදිරිපත් කරන ලෙස පොලීසිය මෛත්‍රී ගුණරත්න මහතාට දැනුම් දී තිබේ. සිද්ධිය සම්බන්ධයෙන් පේරාදෙණිය පොලීසියේ ස්ථානාධිපති ප්‍රධාන පොලිස් පරීක්ෂක මහින්ද කල්දේරා මහතා ඇතුළු කණ්ඩායමක් පරීක්ෂණ පවත්වයි.

1 copy

පේරාදෙණිය ශික්ෂණ රෝහලෙන් විස්මිත සැත්කමක්

ගෙළ ප්‍රදේශයේ විශාල ගෙඩියක් ඇති වීම නිසා ස්වසන මාර්ගය හා පෙනහළු අවහිර වීම නිසා (Teratoma ) නැමැති රෝගී තත්ත්වයෙන් මව්කුස සිටි දරුවෙකුගේ හිස සිට ළය දක්වා කොටස පමණක් සිසේරියන් සැත්කමකින් පිටතට ගෙන පැය දෙකක පමණ සැත්කමකින් පසු දරුවා නිරුපද්‍රිතව පිටතට ගැනීමට පේරාදෙණිය ශික්ෂණ රෝහලේ වෛද්‍ය කණ්ඩායමක් සමත්ව තිබේ.

මෙවැනි සැත්කමක් සාර්ථකව සිදුකර දරුවෙකුගේ ජීවිතය මෙරටදී බේරාගත් ප්‍රථම අවස්ථාව ලෙස මෙය ඉතිහාසයට එක්වෙයි.

දරුවාගේ ස්වසන මාර්ගය අවහිරවන සේ පිහිටි ගෙඩිය සැත්කම මගින් සම්පූර්ණයෙන් ඉවත් කිරීම අසීරු බැවින් ගෙඩිය නිසා ස්වසන මාර්ගයේ පවතින අවහිරතාව සැත්කම මගින් නළයක් යොදා තාවකාලිකව ඉවත් කර ඇත.

පේරාදෙණිය ශික්ෂණ රෝහල ස්ථාපිත කර ගෙවුණු වසර 40 ක කාලය තුළ මෙවැනි සැත්කමක් සිදුකර නොමැති අතර සැත්කමෙන් පසු දරුවා පේරාදෙණිය සිරිමාවෝ බණ්ඩාරනායක ළමා රෝහලේ දැඩි සත්කාර ඒකකයට යොමුකර තිබේ.

දරුවාගේ හිස සහ ගෙළ ප්‍රදේශය පමණක් පිටතට ගෙන තිබියදී දරුවා හා මවගේ පෙකණි වැල අතර සම්බන්ධතාව බිඳ නොදමා ඒ ඔස්සේ දරුවාට හුස්ම ගැනීමට සලස්වමින් වෛද්‍ය කණ්ඩායම මෙම සැත්කම සිදුකර තිබේ.

vlcsnap-2018-03-30-17h01m41s694 copy vlcsnap-2018-03-30-17h01m54s844 copy vlcsnap-2018-03-30-17h02m33s247 copy

රජය පිල් දෙකක්- ආණමඩුවේ ධම්මදස්සි හිමි

ඕනෑම රටක කිසියම් ප්‍රමාණයකට තමන්ගේ රටේ ස්වාධිනත්වය ආරක්ෂා කරගෙන දේශපාලන ආර්ථික වශයෙන් කටයුතු කිරීමට හැකියාවක් තිබිය යුතු බවත් ජාත්‍යන්තරයේ සියලු දේවල් වලට අනුගත වී කටයුතු කරන්නට යැමෙන් රටේ ස්වාධිනත්වය නැති වී යන බවත් එබදු තත්වයකට දැන් පත්වි ඇති බව අස්ගිරි පාර්ශවයේ අනුනායක ආණමඩුවේ ධම්මදස්සි නාහිමියෝ පවසති.

ශ්‍රී ලංකා පොදු ජන පෙරමුණේ සභාපති මහාචාර්ය ජී. එල්. පීරිස් මහතා අද (25දා) මහනුවරට පැමිණි අවස්ථාවේදී උන්වහන්සේ මේ බව ප්‍රකාශ කළහ.

අස්ගිරි පාර්ශවයේ අනුනායක අණමඩුවේ ධම්මධස්සි නාහිමියන් මෙසේද පැවසූහ.

“අපි කළ යුතුතේ ජාත්‍යන්තරය ප්‍රතික්ෂේප කිරීම නෙවෙයි.එක්සත් ජාතීන්ගේ සංවිධානය,මානව හිමිකම් කොමිසම ආදි දේවල් ඒවත් ඒකාබද්ධ කරගෙන ඒවටත් අනුමැතියක් අනුග්‍රහයක් දක්වමින් තමා යන්න අවශ්‍ය. නමුත් ඒ නිසා අපේ සියලු ස්වාධිනත්වයන් නැති වෙලා යනවනම් රටක් ගෙනයාමට නොහැකියි.

දැන් මට පේන විදිහට පහු ගිය රජයේ නොයෙක් විදිහේ දෝෂාරෝපණ චෝදනා ඉදිරිපත් කරළ මේ රජය බලයට පත්වුණායින් පසු පමණට වඩා අන්තර් ජාතික ජාත්‍යන්තරයේ නොයෙක් විදිහේ සංවිධාන වල බලපෑම් වලට යටත් වෙලා යන ගතියක් පේනව.

ඇත්ටම රජය පිල් දෙකක් ජනාධිපතිතුමා නිතර කියන දෙයක් තමා අපේ ශ්‍රි ලංකා නිදහස් පක්ෂයක් බිහිකරගන්න ඕන කියල. මෙලෙස ඒකාබද්ධ වෙලා යමින්ම කියනව,රනිල් වික්‍රමසිංහ අගමැතිතුමා කියනව අපිට එක්සත් ජාතික පක්ෂ රජයක් බිහිකරගන්න ඕන කියල. එතකොට මේ දෙගොල්ලො එකමුතු වෙලා ඉදීම බොරුවක් බව පේනව. ඒ ඇත්තන් එකමුතු වෙලා හිටියත් ඒ දෙපක්ෂයේ අදහස වෙලා තියෙන්නෙ වෙන් වෙලා තමන්ගෙ රජයක් පිහිටුවන්න. ඒකෙන් මේ ඒකාබද්ධ වීම නැතිවී යෑම.”

3 copy

 

දිගන නගරය යථා තත්ත්වයට පත්කිරීමේ ශ්‍රමදානයක්

නොසන්සුන්තාව හේතුවෙන් විනාශයට පත් මහනුවර දිගන නගරයේ සියලුම ගොඩනැගිලි යථා තත්ත්වයට පත් කිරීමේ මූලික ශ්‍රමදානයක් මහා සංඝරත්නයේ හා ශ්‍රී ලංකා යුද හමුදාව හා කුණ්ඩසාලේ ප්‍රාදේශීය ලේකම් කාර්යාලයේ නිලධාරීන් මූලිකත්වයෙන් ආරම්භ විය.

විනාශයට පත්ව තිබුණු ආගමික ස්ථාන, ව්‍යාපාර ස්ථාන හා නිවාස පිළිසකර කිරීම සදහා වූ මූලික අදියරක් වශයෙන් මෙම කාර්්‍ය  සිදුවිය.

දිගන වාලුකාරාම විහාරයට රැස්වූ පිරිස බලගොල්ල බෞද්ධ මධ්‍යස්ථානාධිපති පූජ්‍ය තල්පොත ධම්මජෝති හිමියන්ගේ මූලිකත්වයෙන් ශ්‍රමදාන ව්‍යාපාරය ආරම්භ කළෝය. ශ්‍රී ලංකා යුද හමුදාවේ මධ්‍යම පළාත් ප්‍රධාන අණදෙන නිළධාරී මේජර් ජෙනරාල් නිශ්ශංක රණවන මහතාගේ මූලිකත්වයෙන් දෙසීයකට අධිකව සහභාගීවූ යුද හමුදා නිලධාරීන් දිගන, කෙන්ගල්ල ආදී ප්‍රදේශවල හානියට පත් සියලුම ගොඩනැගිලි පිළිසකර කිරීමේ කටයුතු ආරම්භ කළේය.

මෙම ගොඩනැගිලි සියල්ල විධිමත් අයුරින් ප්‍රතිසංස්කරණය කරන ලෙස ජනාධිපති මෛත්‍රීපාල සිරිසේන මහතා උපදෙස් දී ඇති බවත් ඒ සදහා වූ ප්‍රථම කාර්යය වශයෙන් කැඩිබිදී ගිය සුන්බුන් සියල්ල ඉවත් කරන බව ශ්‍රී ලංකා යුද හමුදාවේ මධ්‍යම පළාත් ප්‍රධාන අණදෙන නිළධාරී මේජර් ජෙනරාල් නිශ්ශංක රණවන මහතා පැවසීය.

vlcsnap-2018-03-16-15h26m43s160 vlcsnap-2018-03-16-15h27m34s748 vlcsnap-2018-03-16-15h28m27s551

මහනුවර සැකකරුවන් CCTV හරහා සොයයි

මහනුවර ප්‍රචණ්ඩකාරී සිදුවීම්වලට දායක වූ පිරිස් සී.සී.ටී.වී දර්ශන ඔස්සේ හඳුනා ගැනීමට පොලීසිය පියවර ගෙන තිබේ.

පහරදීම් හා ගිනි තැබීම් හේතුවෙන් පූජනීය ස්ථාන,ව්‍යාපාරික ස්ථාන, නිවාස හා මෝටර් රථ 465ක පමණ ප්‍රමාණයක් විනාශයට පත්ව තිබෙන අතර ඒ ආශ්‍රිතව ඇති සී.සී.ටී.වී කැමරා දර්ශන පොලීසිය මේ වන විටත් පරීක්ෂා කිරීම් ආරම්භ කර ඇත.

ව්‍යාපාරික ස්ථාන හා නිවාසවලට හානි කිරීමෙන් පසු ඇතැම් පිරිස් භාණ්ඩ මංකාල්ලකා තිබෙන බවටද ලැබී ඇති තොරතුරු මත ඒ සම්බන්ධයෙන්ද පොලීසිය පරීක්ෂණ ආරම්භ කර තිබේ.

පාතාල කල්ලි සමාජිකයෙක් නුවරදී අත්අඩංගුවට

මහනුවර නොසන්සුන්කාරී වාතාරවරණයක් පැවැති පසුගියදා (09දා) හන්තාන ප්‍රදේශයේ හෝටලයක ආයුධ සන්නද්ධව සිටි ප්‍රබල පාතාල සාමාජිකයෙකු ඇතුළු පුද්ගලයන් සිවුදෙනෙකු කොළඹින් පැමිණි විශේෂ පොලිස් කණ්ඩායමක් විසින් අත්අඩංගුවට ගෙන තිබේ.

මිනී මැරුම් හා අපාරාධ රැසකට සම්බන්ධ බව කියන මෙම පිරිස මහනුවර ප්‍රදේශයට පැමිණ සැඟවී සිටින බවට ලද තොරතුරක් මත අදාළ හෝටලය පොලීසිය විසින් වටලා තිබේ.

මහනුවර දැඩි නොසන්සුන්කාරී වාතාවරණයක් පැවැති අවස්ථාවක මොවුන් මහනුවරට පැමිණියේ ඇයි දැයි සොයා පොලීසිය විමර්ශන ආරම්භ කර තිබේ.

Man_Arrested

මහනුවර දේපොළ වෙසක් පොහොයට පෙර යථා තත්ත්වයට

මහනුවර ඇති වූ නොසන්සුන්කාරී තත්ත්වය හේතුවෙන් හානි වූ පූජනීය ස්ථාන හා නිවාස එළඹෙන වෙසක් පුන් පොහෝ දිනට පෙර ප්‍රතිසංස්කරණය කර හිමිකරුවන්ට භාරදෙන බව යුද හමුදාපති ලුතිනන් ජනරාල් මහේෂ් සේනානායක මහතා පැවසීය.

අද (08දා) මල්වතු මහනායක අතිපූජ්‍යය තිබ්බටුවාවේ ශ්‍රී සිද්ධාර්ථ සුමංගල මහනායක ස්වාමීන්ද්‍රයන් බැහැ දැක ආශීර්වාද ලබාගත් අවස්ථාවේ ඒ මහතා මේ බව ප්‍රකාශ කළේය.

විනාශවී ඇති සියලු ගොඩනැගිලි යථා තත්ත්වයට පත්කිරීම සඳහා ජනපති කාර්යාලයෙන් ඊට අවශ්‍යය මුදල් ප්‍රතිපාදන ලබා දෙන බවත්, ජනපති උපදෙස් මත ත්‍රිවිධ හමුදාවේ මෙහෙය වීමෙන් අදාළ වැඩපිළිවෙළ ක්‍රියාත්මක කරන බවත් යුද හමුදාපතිවරයා එහිදි පැවසීය. මෙවර වෙසක් පුන් පොහෝ දිනය එළඹෙන අප්‍රේල් මස 29 දිනට යෙදී තිබේ.

මහනුවර ඇති වූ කලහකාරි සිදුවීම පිටුපස පිට පළාත්වලින් පැමිණි පිරිසක් සිටින බවත්, මේ වනවිට ඔවුන් හඳුනා ගෙන තිබෙන බවත් හෙතෙම ප්‍රකාශ කළේය.

මහනුවර ජීවත්වන සාමකාමී ජනතාව උසිගන්වමින් නොයෙක් කඩාකප්පල්කාරී සිදුවීම් ඇති කිරීම සඳහා මොවුන් නායකත්වය ලබාදෙමින් සිටින බවත්, භික්ෂූන් වහන්සේලා කිහිපනමක්ද ඒ අතර සිටින බවත් යුද හමුදාපතිවරයා ප්‍රකාශ කළේය.

hamuda