Author Archives: චාමර සම්පත්

බැඳුම්කර වාර්තාවේ පිටපත් 26ක් පාර්ලිමේන්තුවට

බැඳුම්කර ගනුදෙනුවට අදාළ ජනාධිපති පරීක්ෂණ කොමිෂන් සභා වාර්තාවෙහි පිටපත් අද (17දා) පාර්ලිමේන්තුව වෙත යොමුකිරිමට ජනපති ලේකම් කාර්යාලය කටයුතු කර ඇත.

ඒ අනුව එම වාර්තාවේ ඉංග්‍රීසි පිටපත් 26 ක් සහ සංක්ෂිප්ත වාර්තාවක්  මෙසේ පාර්ලිමේන්තුවට යොමුකර ඇත. ඊට අමතරව බරපතල වංචා සහ දූෂණ පිළිබඳ විමර්ශන වාර්තාවෙහි පිටපත් 34 (සිංහල) ක් ද ජනාධිපති කාර්යාලයේ නීති නිලධාරී නීතිඥ  මුදිත දිසානායක මහතා විසින් පාර්ලිමේන්තු මහලේකම්වරයා වෙත බාර දුන් බව කතානායක කාර්යාලය නිකුත් කළ නිවේදනයක දැක්වෙයි.

Parliament_3_1 copy copy

 

ජනපති කැබිනට්ටුවෙනුත් නැගිට යයි

එක්සත් ජාතික පක්ෂ මැතිඇමතිවරුන් ජනාධිපති මෛත්‍රීපාල සිරිසේන මහතා දැඩිලෙස විචේනය කරන බැවින් එක්සත් ජාතික පක්ෂයට සහ ශ්‍රීලංකා නිදහස් පක්ෂයකටතවදුරටත් එකට ගමනක් යා නොහැකි බවත් ජනාධිපති ධූරයෙන් ඉවත්ව යාමට තමා සුදානම් බවත් පවසමින් ජනාධිපති මෛත්‍රීපාල සිරිසේන මහතා කැබිනට් මණ්ඩලයෙන් නැගිට ගොස් තිබේ.

එක්සත් ජාතික පක්ෂය සහ ශ්‍රීලංකා නිදහස් පක්ෂය එකිනෙකා චිවේචනය කරගැනීම සම්බන්ධයෙන් ඊයේ(16දා) කැබිනට් මණ්ඩලයේදී සිදු වූ උණුසුම් වාග් සංග්‍රාමය දුරදිග යාමෙන් මෙලෙස ජනාධිපතිවරයා නැගිට ගොස් ඇත.

එහිදී දැඩි ආවේගයෙන් පැය භාගයක් පමණ දීර්ඝව කතාකරමින්  ජනාධිපතිවරයා මෙසේද පවසා ඇත. &සමහරු මාව බයකරන්න හදනවා, සමහරු මාව යවන්න හදනවා , තවත් අය බණ්ඩාරනායක මහත්තයා ගියපාරේ මාව යවන්න හදනවා කවුරුත් කලබල වෙන්න ඔනෑ නැහැ මම යන්න ලැස්තියි.

 මම විධායක ජනාධිපතිකෙනෙක් විදිහට නෙමෙයි සියල්ලන්ටම සැලකුවේ. ඕනි දෙයක් මාත් එක්ක කතාකරලා විසඳාගන්න පුළුවන්කම තියෙද්දි ඔයගොල්ලෝ ඔය වගේ හැසිරෙනවානම් මටත් විධායකයේ බලය පෙන්නන්න පුළුවන්* යැයි ජනාධිපතිවරයා මෙහිදී පවසා තිබේ.

ජනාධිපතිවරයා නැගිට ගියපසු අග්‍රාමාත්‍යවරයාද නැගිටගොස් ජනාධිපතිවරයා සමග සාකච්ඡා කර තිබේ. පැයක පමණ කාලයක් මෙලෙස ජනාධිපතිවරයා සහ අගමැතිවරයා සාකච්ඡා කර ඇති අතර, එයට ජ්‍යෙෂ්ඨ අමාත්‍යවරුන් කිහිපදෙනෙකුද සහභාගි වී ඇත.

ඉන්පසුව යළි ජනාධිපතිවරයා කැබිනට් මණ්ඩලයට පැමිණ මුලසුන ගෙන කැබිනට් මණ්ඩලයේ කටයුතු ආරම්භකර තිබේ.

එක්සත් ජාතික පක්ෂය සහ ශ්‍රීලංකා නිදහස් පක්ෂය අතර කිසිවෙකු විවේචනය නොකරමින් ඉදිරියේදී ආණ්ඩුව ගෙන යායුතු බව එහිදී මෛත්‍රීපාල සිරිසේන මහතා කැබිනට් මණ්ඩලයට දැනුම්දී ඇති අතර, එයට කැබිනට් මණ්ඩලය එකඟ වී ඇත.

එක්සත් ජාතික පක්ෂ අමාත්‍යවරුන් වන හරින් ප්‍රනාන්දු, සුජීව සේනසිංහ සහ මන්ත්‍රීවරුන් වන නලින් බණ්ඩාර, චමින්ද විජේසිරි සහ එස්.එම්. මරික්කාර් යන අය ජනාධිපතිවරයා දැඩිලෙස විවේචනය කරන බව මෙහිදී ශ්‍රීලංකා නිදහස් පක්ෂ අමාත්‍යවරුන්මෙන්ම ජනාධිපති මෛත්‍රීපාල සිරිසේන මහතාද පවසා තිබේ.

එහිදී එක්සත් ජාතික පක්ෂ අමාත්‍යවරුන් සඳහන් කර ඇත්තේ ශ්‍රීලංකා නිදහස් පක්ෂයේ අමාත්‍යවරුන් ගත වූ වසර තුන තුළම අග්‍රාමාත්‍ය රනිල් වික්‍රමසිංහ මහතා විවේචනය කළ බවයි. එසේ වුවද ඒ පිළිබඳ අග්‍රාමාත්‍යරවයා කිසිවෙකුට පැමිණිලිනොකළ බවද ඔවුන් මෙහිදී පවසා ඇත.

එහිදී ජනාධිපති මෛත්‍රීපාල සිරිසේන මහතා පවසා ඇත්තේ එක්සත් ජාතික පක්ෂය සමග තමා කිසිවිටක අමනාප වී නොමැතිබවයි. එමෙන්ම එක්සත් ජාතික පක්ෂයට මඩ ගැසීමට තමන්ට අවශ්‍ය නැති බවද ජනාධිපතිවරයා ප්‍රකාශ කර තිබේ.

රටේ ජනතාවගේ ඉල්ලීම මත තමා බැඳුම්කර ජනාධිපති කොමිෂන් සභාව පත්කළ අතර, එමගින් එක්සත් ජාතික පක්ෂයට හානියක් සිදුකිරීමට අරමුණු නොකළ බවද ජනාධිපතිවරයා වැඩිදුරටත් මෙහිදී පවසා තිබේ.

එහිදී එක්සත් ජාතික පක්ෂ මන්ත්‍රීවරුන් පවසා ඇත්තේ ආණ්ඩුවට එක්වූ ශ්‍රීලංකා නිදහස් පක්ෂ අමාත්‍යවරුන් වන සුසිල් ප්‍රේම්ජයන්ත, ඩිලාන් පෙරේරා, දයාසිරි ජයසේකර ආදීන් ආරම්භයේ සිටම එක්සත් ජාතික පක්ෂය විවේචනය කරන බවයි.

මෙම සංවාදය දිගින් දිගටම පැවතී ඇති අතර, එහිදී ජනාධිපතිවරයා පවසා ඇත්තේ මෙය සමථයකට පත් නොවන්නේනම් තමා යාමට සුදානම් බවයි.

ජනාධිපති ධුරයේ මෛත්‍රීපාල සිරිසේන මහතා කටයුතු කිරීම ගැන එක්සත් ජාතික පක්ෂයේ කිසිදු විරෝධයක් නොමැති බවත්, ජනාධිපතිවරයා පත්කරගත්තා සේම මේ ආණ්ඩුවේ කාලය අවසන් වනතුරු ජනාධිපතිවරයා ධුරයේ කටයුතු කළ යුතු බව එක්සත්ජාතික පක්ෂයේ අරමුණ බවත් මෙහිදී එක්සත් ජාතික පක්ෂ අමාත්‍යවරුන් පවසා ඇත.

ජනාධිපතිවරයා සහ අගමැතිවරයා ඉවත්ව ගිය අවස්ථාවේදී කැබිනට් මණ්ඩලයේ සිටි එක්සත් ජාතික පක්ෂ අමාත්‍යවරුන් එකිනෙකාට පවසා ඇත්තේ %ජනාධිපති ඉන්නවට අපි කැමතියි. ඉන්න බැහැ කියලා අයින්වෙනවා නම් අගමැතිතුමාව ජනාධිපති කරන්න අපි ලෑස්තියි කියාය.

කෙසේහෝ අවසානයේ යළි කැබිනට් මණ්ඩලය සුපුරුදු පරිදි පවත්වා ඇති අතර, එකිනෙකා විවේචනය කරනොගැනීමටසියලු දෙනා එකඟ වී ඇති බවද සඳහන් වේ.

ඒ අනුවයහපාලන ආණ්ඩුව නියෝජනය කරන එක්සත් ජාතික පක්ෂ සහශ්‍රී ලංකා නිදහස් පක්ෂ මැතිඇමතිවරුන් එකිනෙකා විවේචනය කිරීම වැළැක්වීමටත්,සහයෝගයෙන් ආණ්ඩුවේ ඉදිරි කටයුතු සිදුකිරීමටත් කැබිනට් මණ්ඩලයේදී එකඟතාවකට පැමිණ ඇත.

03 copy

 

 

 

ලංකාවේ දේශපාලන සංස්කෘතිය තුළ කල්මැරීම නිසා බොහෝ දේවල් හමස් පෙට්ටියට යනවා

වත්මන් ජනාධිපතිවරයාත් අගමැතිවරයා ඇතුළු ආණ්ඩුවත් බලයට පත්කිරීමට සිවිල් සංවිධානයක් ලෙස සාධාරණ සමාජයක් සඳහා වූ ජනතා ව්‍යාපාරය ආරම්භයේ සිටම පෙනී සිටියේය. දේශපාලන ප්‍රතිසංස්කරණ සිදුකිරීමේ අවශ්‍යතාව මත වත්මන් ආණ්ඩුව බලයට ගෙන ආ බව ඔවුන් පැවසූ අතර ආණ්ඩුව බලයට පත්වී වසර තුනක් ගතවී හමාරය. මේ තත්ත්වය මත සිවිල් සංවිධානවලට පොරොන්දු වූ කරුණු ආණ්ඩුව ඉටුකර තිබේ ද යන්න පිළිබඳව සාධාරණ සමාජයක් සඳහා වූ ජනතා ව්‍යාපාරයේ කැඳවුම්කරු මහාචාරය සරත් විජේසූරිය මහතා සමග සංවාදයේ යෙදුණෙමු.


sarath wijesooriya2

Q සාධාරණ සමාජයක් සඳහා වු ජනතා ව්‍යාපාරය මැතිවරණයට පෙර ඉදිරිපත් කළ අරමුණු වසර තුනත් ගතවීමෙන් පසුවත් ආණ්ඩුව ඉටුකර තිබෙන්නේ කෙසේද

2015 ජනාධිපතිවරණයට පොදු අපේක්ෂකයෙකු සොයාගෙන ඔහුව ජනාධිපති කරන්නට සෝභිත හාමුදුරුවෝ නායකත්වය ලබාදුන්නේ විධායක ජනාධිපති ක්‍රමය අහෝසි කිරීම සහ අලුත් ආණ්ඩුක්‍රම ව්‍යවස්ථාවක් සම්මත කිරීම කියන ප්‍රධාන කාර්යයන් ඉටු කරගැනීමටයි. එහිදී ප්‍රධාන තේමාව වුණේ විධායක ජනාධිපති ක්‍රමය අහෝසි කිරීම බව පොදු අපේක්ෂකයාට ඡන්දය දුන්නු නුදුන්නු මේ රටේ කවුරුත් දන්නවා. පාර්ලිමේන්තුවෙන් රට පාලනය කරන පාලන ක්‍රමයක් ප්‍රතිස්ථාපනය කිරීමයි එහි අරමුණ වී තිබුණේ.නමුත් ගතවූ වසර තුන තුළ එය ඉටුකිරීමට ආණ්ඩුව අසමත් වී තිබෙනවා. 

තත්ත්වය මෙසේ තිබියදීත් මේ සම්බන්ධයෙන් ඔබතුමාලා හඬ නගන්නේ නැත්තේ ඇයි

අපි මේ සම්බන්ධයෙන් නිරන්තරයෙන්ම හඬ නගනවා. හැට දෙලක්ෂයේ සම්මුතිය හැටියට අපි දීපව්‍යාප්ත මට්ටමෙන් සම්මන්ත්‍රණ පැවැත්වීමක් සිදුකරගෙන යනවා. ඒ වගේම සම්මන්ත්‍රණ පවත්වා තිබෙනවා. මේ පිළිබඳ නායකයන්ට කතා කර තිබෙනවා. මාධ්‍යයන්ට අදහස් පළ කරනවා. සිවිල් පුරවැසියන් විදිහට කරන්න පුළුවන් දේවල් අපි සිදුකර තිබෙනවා.

විධායක ජනාධිපති ධුරය අහෝසි කළ යුතු බවට සිවිල් සංවිධාන ප්‍රකාශ කළත් ජනාධිපතිවරයා සිය ධුර කාලය වසර පහක්ද හයක්ද කියා ශ්‍රේෂ්ඨාධිකරණයෙන් මතය විමසනවා. මේ තත්ත්වය තුළ මුලින් පැවසූ දේ වෙනස් වෙලාද

19 වැනි ආණ්ඩුක්‍රම ව්‍යවස්ථා සංශෝධනයට අනුව ධුර කාලය වසර පහක් ලෙසයි සඳහන්ව තිබෙන්නේ. ජනාධිපතිවරයා මුල් කාලයේදී ප්‍රකාශ කළේ තමන්ට අවුරුදු හතරක් ඇති කියලයි. පනත සම්මත කරන අවස්ථාවේ නීතිඥ කණ්ඩායමේ ඉල්ලීම මතයි එය පහක් දක්වා වැඩි කළේ කියා ජනාධිපතිවරයාම ප්‍රකාශ කර තිබුණා.
ජනාධිපතිවරයා පත්වන විට පැවති ව්‍යවස්ථාවේ නෛතිකභාවය තිබෙනවාද කියනක දේ වෙනම ප්‍රශ්නයක්. නමුත් මෙතැන තිබෙන්නේ දේශපාලන සදාචාරය පිළිබඳ ප්‍රශ්නයක්.
මේ ජනාධිපති පදවිය අහෝසි කිරීමට පැමිණි පුද්ගලයා වසරකින් එය දීර්ඝ කරගැනීමට කල්පනා කරනවා නම් එය හැට දෙලක්ෂයක ජනාතාවට ලබාදුන් පොරොන්දුවට කිසියම් ආකාරයක පටහැනි කටයුත්තක්.

ජනාධිපතිවරණයේදී සහ මහ මැතිවරණයේදී වත්මන් ආණ්ඩුව පාර්ශ්වය වෙනුවෙන් සාධාරණ සමාජයක් සංවිධානය විශාල වශයෙන් පෙනී සිටියා. මෙම ශ්‍රේෂ්ඨාධිකරණ මත විමසුමට ප්‍රථම සිවිල් සංවිධාන කැඳවා ජනාධිපතිවරයා මේ පිළිබඳව විමසා සිටියාද

නැහැ. අපෙන් කිසිම විමසීමක් සිදු කළේ නැහැ. එහෙම විමසීමක් සිදු කළා නම් ආණ්ඩුක්‍රම ව්‍යවස්ථාව සම්මත කිරීමේ ක්‍රියාවලිය සිදුකර ඔහු රටට වුණ පොරොන්දුව ඉටු කළා කියලා රටට කියන්න කියලා අපි ජනාධිපතිවරයාට පැහැදිලිව  කියා සිටිනවා. මෙතෙක් කිසිම ජනාධිපතිවරයෙකු ඉටු නොකළ දෙයක් තමා ඉටුකළා කියලා ජනාධිපතිවරයාට ආඩම්බරයෙන් කියන්නට පුළුවන්.
එහෙම කරලා ජනාධිපතිවරයාට තිබුණා පාර්ලිමේන්තු මැතිවරණයට ඉදිරිපත්වෙලා අග්‍රාමාත්‍යවරයා බවට වරමක් ලබාගෙන රට පාලනය කරන්න. ඇත්ත වශයෙන්ම මේ කාරණය අපි ජනාධිපතිවරයාට යෝජනා කර තිබුණා. සිවිල් සංවිධාන නියෝජිතයෝ ජනාධිපතිවරයා සමග පැවති සාකච්ඡාවලදී අපි ජනාධිපතිවරයාට පැවසුවේ විධායක ජනාධිපති ක්‍රමය අහෝසි කරලා පාර්ලිමේන්තුවෙන් රට පාලනය කිරීමට මහජන වරමක් ඉල්ලා සිටින්න කියලයි. රටට වූ පොරොන්දු ඉටුකිරීමට කැපවුණ නායකයා කවුද කියලා එවිට ජනතාව තීන්දු කරයි. ඒ අනුව ජනාධිපතිවරයාට තිබුණු වැදගත්ම දේ තමයි අග්‍රාමාත්‍යවරයා බවට පත්වෙලා පාර්ලිමේන්තුවෙන් රට පාලනය කරන ක්‍රියාදාමයට අවතීර්ණ වීම. 

රාජගිරිය ගුවන් පාලම සෝභිත නාහිමියන්ගේ නමින් නම් කිරීමට යෝජනා කිරීම පිළිබඳ සාධාරණ සමාජයක් සංවිධානයේ කැඳවුම්කරු ලෙස ඔබ සිටින්නේ කුමන මතයේද

එම ප්‍රකාශය ගැන අපි කනගාටු වෙනවා. සෝභිත නාහිමියන්ගේ නාමයට අපහාස වන ක්‍රියාවලියක් හැටියටයි අපි ඒක දකින්නේ. මේ කටයුත්ත සිදුකරන්න එපා කියලා මම ප්‍රසිද්ධ ප්‍රකාශයකුත් සිදු කළා.

ඉදිරියේදී පළාත් පාලන මැතිවරණය පැවැත්වෙනවා. වත්මන් දේශපාලන තත්ත්වය තුළ ජනතාව ඡන්දය භාවිත කළ යුත්තේ කෙසේද

මැතිවරණ ක්‍රමයේ වෙනසක් අපි අපේක්ෂා කළා. සෝභිත හාමුදුරුවනුත් ප්‍රකාශ කළේ කොට්ඨාස ක්‍රමයට නියෝජිතයෝ තෝරාගැනීමක් අවශ්‍ය බවයි. තමන්ගේ කොට්ඨාසයට තරග වදින පුද්ගලයාගේ පක්ෂය පාට සලකන්නට එපා. මේ ඉදිරිපත්වෙලා ඉන්න පුද්ගලයලන්ගෙන් තමන්ගේ බලප්‍රදේශයට නායකත්වය දෙන්න සුදුසුකම් තිබෙන පුද්ගලයා කවුද කියා තෝරාගන්න. ඔහු සීලාචාර පුද්ගලයෙක්ද, දූෂිත පුද්ගලයෙක්ද , රාජ්‍ය මුදල් අවභාවිත කළ පුද්ගලයෙක්ද, සාපරාධී ලෙස ධනය උපයාගත් පුද්ගලයෙකුද, නීතිගරුක පුද්ගලයෙක්ද කියා හොඳින් සොයා බලා තෝරා ගන්න. මේ කාරණා කල්පනා කරලා නායකා බවට පත්කර ගැනීමට සුදුසු පුද්ගලයා තමන්ගේ නායකයා බවට පත්කර ගන්න. මෙතනදී පුද්ගලයාගේ පක්ෂය කුමක්ද කියනදේ නෙවෙයි වැදගත් වෙන්නේ. තමන්ගේ කොට්ඨාසයට නායකත්වය දෙන්න පුළුවන් පුද්ගලයා තෝරා ගැනීමයි වැදගත්. ඕනෑම තලයක මහජන නියෝජිතයෝ පත්කර ගැනීමේදී ශිෂ්ට සම්පන්න නියෝජිතයන් පත්කර ගැනීමේ වගකීම තිබෙන්නේ ජනතාවට. ජනතාව බුද්ධිමත්ව ඒ කටයුත්ත ඉටුකිරීම තමයි වැදගත් වෙන්නේ.

බැඳුම්කර කොමිෂන් සභාවේ වාර්තාවත්, මහා පරිමාණ දූෂණ වංචා විමර්ශන කොමිෂන් සභාවේ වාර්තා 34 ත් මේ වනතුරු පාර්ලිමේන්තුවට ඉදිරිපත් කර නැහැ. හොරු අල්ලා දඬුවම් දීමට පැමිණි ආණ්ඩුව වසර තුනක් ගතවීමෙන් පසුවත් මේ ආකාරයට කටයුතු කිරීම ගැන ඔබේ අදහස කුමක්ද

බැඳුම්කර කොමිෂන් සභාවේ නිර්දේශ ක්‍රියාත්මක කරන තුරු රටම බලා සිටිනවා. වැරදි කළ පුද්ගලයන් අධිකරණයට ඉදිරිපත් කරලා දඬුවම් ලබාදීම කළ යුතුයි. ඒ නිසා තමා විසින් පත්කළ කොමිෂන් සභාවල නිර්දේශ කඩිනමින් ක්‍රියාත්මක කිරීම ජනාධිපතිවරයාගේ පරම වගකීමයි. මේවා කල්මරන එක ඒතරම් සුදුසු නැහැ. ලංකාවේ දේශපාලන සංස්කෘතිය තුළ කල්මැරීම නිසා බොහෝ දේවල් හමස් පෙට්ටියට යනවා. මේ නිර්දේශ ක්‍රියාත්මක නොකළොත් ජනතාවට මාධ්‍ය සන්දර්ශනයක් පැවැත්වූවා කියායි ගම්‍ය වෙන්නේ.
බැඳුම්කර කොමිසමේ නිර්දේශ ගැන ජනාධිපතිවරයා මාධ්‍යයට නිල ප්‍රකාශයයක් කළා වගේම අනෙක් වාර්තා 34 පිළිබඳවත් ඒ විදිහට කරුණු දැක්වීම කළ යුතුමයි.

ජාතික ආණ්ඩුව අවසන් කිරීමේ ඉල්ලීම් මේ වනවිට ප්‍රධාන පක්ෂ දෙකෙන්ම මතුවී තිබෙනවා. පළාත් පාලන මැතිවරණයෙන් පසුව බලහුවමාරුවක් සිදුවුවහොත් සිවිල් සංවිධාන ලෙස ඔබලා ගන්නා පියවර කුමක්ද
සිවිල් සංවිධාන ලෙස අපි හැමවිටම නායකයන්ට කියන්නේ නීතිය මත පාලන වන රටක් බිහිකිරීමට කැපවෙන්න කියලයි. එක්සත් ජාතික පක්ෂයයි, ශ්‍රී ලංකා නිදහස් පක්ෂයයි එකතු වුණේ මේ රට නීතියෙන් පලනය වන රටක් බවට පත් කරන්නට අවශ්‍ය දේශපාලන ප්‍රතිසංස්කරණ සිදු කිරීමටයි. කොහොම වුණත් බලහුවමාරුවක් වෙන්නට පළාත් පාලන මැතිවරණය හේතුවෙයි කියලා අපි කල්පනා කරන්නේ නැහැ. නෛතික වශයෙක් එහෙම කරන්න පුළුවන්ද කියන එක වෙනම කාරණාවක්. සම්මුතිවාදී ආණ්ඩුව පිහිටුවීමට නායකත්වය දෙන්නේ ජනාධිපතිවරයා සහ අගමැතිවරයා අතර ඇතිවන එකඟතාවක්. මේ සම්මුතිවාදී ආණ්ඩුව පිහිටුවීමේ අරමුණ වුණේ නව ආණ්ඩුක්‍රම ව්‍යවස්ථාවක් ඇති කරගැනීමයි. සම්මුතිවාදී ආණ්ඩුව අත්හැරියා කියන්නේ ඒ කාරණයත් අත්හැරියා කියන දෙයයි. එහෙම වුණොත් සිවිල් සංවිධාන විදිහට මේ රටේ දේශපාලන ප්‍රතිසංස්කරණ වෙනුවෙන් නැවත ක්‍රියාමාර්ගයකට අවතීර්ණ වීමට අපිට සිදුවෙනවා.

ව්‍යවස්ථාදායක සභාවේ ක්‍රියාකලාපය සම්බන්ධයෙන් ඔබේ අදහස කුමක්ද

ව්‍යවස්ථාදායක සභාවක් පත්කරන්න කියන ඉල්ලීම සෝභිත හාමුදුරුවෝ තදින්ම කළ ඉල්ලීමක්. එමගින් අපේක්ෂා කළේ රාජ්‍ය යාන්ත්‍රණය ක්‍රියාත්මක කිරීමට ආදාළ ආයතනවලට පත්කරන පුද්ගලයන්ට ස්වාධීනව තමන්ගේ වගවීම සිදුකිරීමටයි.
පොලිස්පතිවරයා, නීතිපතිවරයා, අගවිනිසුරුවරයා දේශපාලනීකරණය වීම තුළ සිදුවුණ දේවල් රටට යහපතක් වූයේ නැහැ. මේ නිසා තමයි ව්‍යවස්ථා සභාවෙන් මෙම පුද්ගලයන්ට නීතිගරුකව සේවය කිරීමේ නෛතික අවස්ථාව ලබාදුන්නේ. නමුත් වත්මන් පොලිස්පතිවරයාගේ ක්‍රියාදාමයත් සමග ව්‍යවස්ථා දායක සභාව පුද්ගලයන් පත්කළත් ඒ තුළ කිසියම් ආකාරයේ බරපතළ අඩුලුහුඬුකම් තිබෙන බව පෙනෙනෙවා. මොකද මේ පත්කරන පුද්ගලයන් සම්බන්ධයෙන් පසුවිපරමක් ව්‍යවස්ථාදායක සභාවෙන් සිදුවන්නේ නැහැ. මේක විශාල අඩුපාඩුවක්. ව්‍යවස්ථා සභාව අවශ්‍යයි නමුත් එය තවදුරටත් ප්‍රතිසංවිධානය විය යුතුයි. මේ වනවිට පොලිස්පතිවරයාට ස්වාධීනව කටයුතු කිරීමේ අවකාශය ලබාදී තිබෙනවා. එතුමාට දේශපාලනීකරණය වන්නට අවශ්‍ය නැහැ. මේ සම්බන්ධයෙන් ව්‍යවස්ථා සභාව අවශ්‍ය පියවර ගත යුතුයි.

2020 හෝ 2021 ජනාධිපතිවරණයක් පැවැත්වීමට බොහෝ දෙනා උනන්දු වෙනවා. මේ වනවිටම ඇතැම් පක්ෂ ඒ සඳහා අපේක්ෂකයන් පවා ප්‍රකාශ කර තිබෙනවා. නමුත් ජනාධිපති ධුරය අහෝසි කිරීමට ඔබලා වෙහෙසෙනවා. මේ තත්ත්වය මත 2020 හෝ 2021 ජනාධිපතිවරණයක් පැවැත්වුණොත්

විධායක ජනාධිපති ධුරය අහෝසි නොකර ජනාධිපතිවරණයක් පැවැත්වීමේ තැනට කටයටුතු සිදුවුණොත් අපිට ඒ අවස්ථාවේ දේශපාලනික තීන්දුවක් ගන්නට වෙන්නේ ඒ වනවිට පවතින දේශපාලන යථාර්ථය මත. දූෂිතයන්ට දඬුවම් ලබාදීම, අපරාධකරුවන් අධිකරණයට ඉදිරිපත් කිරීම, කොමිෂන් සභා වාර්තා අනුව නිර්දේශ ක්‍රියාත්මක කිරීම ආදී දේවල් සිදුකිරීමට අවංකව කැපවුණේ කුමන පාර්ශ්වයද ඒ පාර්ශ්වය වෙනුවෙන් තමයි අපි එදාට පෙනී සිටින්නේ.
සිවිල් සංවිධානයක් වැඩ කරන්නේ දේශපාලන සංවිධානයක වැඩකරන ආකාරයට නෙවෙයි. දේශපාලන පක්ෂයකට තිබෙන්නේ තමන්ට බලය ලබාගැනීමේ න්‍යාය පත්‍රයක්. සිවිල් සංවිධානයේ න්‍යාය පත්‍රය සකස්වන්නේ මහජනතාවගේ අභිවෘද්ධියට අනුරූපව කටයුතු සිදුකර ගැනීම. එම කාරණය මතයි සිවිල් සංවිධානයක අරමුණු ප්‍රකාශ කිරීමට හැකියාව ඇතිවන්නේ.

දින 365න් දින 124ක් රජයේ නිවාඩු

මෙම වර්ෂයේ (2018) දින 365න්දින 124ක් රජයේ නිවාඩු දින ලෙස යෙදී තිබේ.4427448aee94f51c83cd3173c8f35a39--public-holidays-school-holidays

රාජ්‍ය ආයතනවලින් මහජනතාවට සේවය සැලසීමේදී විශාල නිඩාඩු දින ප්‍රමාණයක් යෙදී තිබීම බාධාවක් විය හැකි බැවින් නිවාඩු ගැන නොසිතා රජයේ නිලධාරීන් සේවය සැලසිය යුතු බව ස්වදේශ කටයුතු අමාත්‍යාංශය රාජ්‍ය නිලධාරීන්ට ප්‍රකාශ කර තිබේ.

මේවසරේ(2018) ස්වදේශ කටයුතු අමාත්‍යාංශයේ ඉදිරි වැඩපිළිවෙළ සහ සංවර්ධන කටයුතු පිළිබඳ රාජ්‍යනිලධාරීන් දැනුවත් කිරීමේ සාකච්ඡාවකට එක්වෙමින් ස්වදේශ කටයුතු අමාත්‍ය වජිර අබේවර්ධන මහතා මේබව පවසා ඇත.

එහිදීවැඩිදුරටත් අදහස් දක්වා ඇති අමාත්‍යවරයා,

&2018 වසර අපට ඉතාම වැදගත් වර්ෂයක්. නිදහස ලබා පෙබරවාරි 04 වැනිදාට වසර 70ක් සපිරෙනවා. අපි රාජ්‍ය සේවය තුළදී යහපත් ප්‍රතිඥා දෙනවා. එය වචනවලට සීමා නොවී කල්පනාවෙන් ක්‍රියා කළ යුතුව තිබෙනවා. ඒ වගේම මේ වසර තවත් සුවිශේෂී වර්ෂයක්. දින 365න් දින 124ක් නිවාඩු දින ඇති වර්ෂයක්. නිවාඩු දින 124ක් ඇති වසරේ, ඒ පිළිබඳ නොසිතා රට හා ජනතාව ගැන සිතා සේවය කළ යුතුයි. ඒ වගේම මේ වසර තවත් සුවිශේෂී වර්ෂයක්.2018  වසරේ පොහොය13යි. පොසොන් මාසයේ පොහොය දෙකයි. වෙසක් පොහොය දිනය අප්‍රේල් 29 වැනිදා. අවුරුදු සියයක ඉතිහාසය තුළ අවුරුදු 20කට 25කට වරක් එවැනි දින යෙදිලා තියෙනවා* යැයිද පවසා ඇත.

 

කතානායක නිසි පරිදි සභාව මෙහෙයවූයේ නෑ – අනුර

කථානායක කරු ජයසූරිය මහතා නිසි පරිදි පාර්ලිමේන්තුව මෙහෙයවීම් නොකළ බැවින් පාර්ලිමේන්තුව තුළ සිදුනොවිය යුතු බොහෝ දේ සිදු වූ බව විපක්‍ෂයේ ප්‍රධාන සංවිධායක අනුර කුමාර දිසානායක මහතා ප්‍රකාශ කළේය.

පාර්ලිමේන්තුවේ සිදු වූ ගුටිබැට හුවමාරුව පිළිබඳ අදහස් දක්වමින් අනුර කුමාර මහතා ඊයේ (10දා) මේ බව පැවසීය. එහිදී වැඩිදුරටත් අදහස් දැක්වූ දිසානායක මහතා,

"පළමු කොටම න්‍යාය පත්‍රයේ තිබෙන්නේ මෙම වාර්තා සභාගත කිරීමයි. ඒ පිළිබඳ අවසන් නිගමනයකට ආ යුතුව තිබුණා. එය සිදුකළා නම් අගමැතිතුමාගේ කතාවට යන්න තිබුණා. පළමු කරුණ නිරාකරණය කර ගන්න ඔබතුමා උත්සාහ කළේ නැහැ. ඒ නිසා සිදුනොවිය යුතු බොහෝ දේ මේ පාර්ලිමේන්තුවේ සිදු වුණා.

මන්ත්‍රීවරුන් අතර ගහගැනීම් සිදු වුණා. ලේ හැලීම් සිදු වුණා. ඔබතුමා නිසි පරිදි සභාව මෙහෙයවීම සිදු නොකළ නිසා මේ තත්ත්වය නිර්මාණය වුණා. අගමැතිතුමාගේ කතාව අතරතුරු රීති ප්‍රශ්නය මතුකළා. නමුත් අවස්ථාව දුන්නේ නැහැ. පළමු කටයුත්ත සිදුකළේ නැහැ. එය එසේ තිබියදීම අගමැතිවරයාගේ කතාවට ඉඩ දුන්න නිසා මෙය සිදුවුණේ. ඒ නිසා තමයි අපි පක්‍ෂ නායක රැස්වීමට සහභාගි නොවුණේ."

anura kumara

බැඳුම්කර කොමිෂන් වාර්තාව නැතිව විවාද කිරීම ඵලදායී නෑ

මහබැංකු බැඳුම්කර ගනුදෙනුව සම්බන්ධ ජනාධිපති කොමිෂන් සභා වාර්තාව පාර්ලිමේන්තුවට ඉදිරිපත් කර නොමැති බැවින්, මේ සම්බන්ධයෙන් පාර්ලිමේන්තු විවාදයක් පැවැත්වීම ඵලදායී නොවන බව ඊයේ (09දා) පැවැති කැබිනට් රැස්වීමේදී ශ්‍රීලංකා නිදහස් පක්ෂ අමාත්‍යවරුන් සඳහන් කර ඇතැයි වාර්තාවේ.

එබැවින් විවාදය පැවත්වීමට ප්‍රථම මේසම්බන්ධයෙන් අවධානය යෙමුකළ යුතු බවද ප්‍රවාහන හා සිවිල් ගුවන් සේවා අමාත්‍ය නිමල් සිරිපාලද සිල්වා මහතා කැබිනට් මණ්ඩලයට ප්‍රකාශ කර තිබේ.

ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් ඊයේ (09දා) පෙරවරුවේ කැබිනට් මණ්ඩලය රැස්විය.

බැඳුම්කර කොමිෂන් සභා වාර්තාව පිළිබඳ විවාදයක් ලබාදීමට ආණ්ඩුව ක්‍රියාකළද මෙතෙක් කොමිෂන් සභා වාර්තාව පාර්ලිමේන්තුවට ඉදිරිපත් කර නැතැයි නිමල් සිරිපාල ද සිල්වා අමාත්‍යවරයාගෙන් පසුව අදහස් දක්වා ඇති අමාත්‍යවරුන් වන සුසිල් ප්‍රේම්ජයන්ත සහ දයාසිරි ජයසේකර යන අමාත්‍යවරුන්ද මෙහිදී පෙන්වා දී ඇත.

එම අමාත්‍යවරුන්ගේ අදහස්වලට පිළිතුරු දෙමින් උසස් අධ්‍යාපන හා මහාමාර්ග අමාත්‍ය ලක්ෂ්මන් කිරිඇල්ල මහතා පවසා ඇත්තේ ශ්‍රීලංකා නිදහස් පක්ෂ්‍ය සහ ඒකාබද්ධ විපක්ෂය බැඳුම්කර කොමිෂන් සභා වාර්තාව පිළිබඳ විවාදයක් ලබාදෙන ලෙස ඉල්ලීම් කළ බැවින් වහාම විවාදය ලබාදීමට කටයුතු කළ බවයි.

එහිදී  කිරිඇල්ල අමාත්‍යවරයාඋණුසුම් අයුරින් අදහස් දක්වමින් විවාද ඉල්ලීමට පෙර කොමිෂන් සභා වාර්තාව පාර්ලිමේන්තුවට ඉදිරිපත් කළ යුතු බව දැන සිටිය යුතුයැයිද පවසා තිබේ.

SLFP-Logo copy

එජාප විශේෂ පක්ෂ සම්මේලනය 07දා

ක්සත් ජාතික පක්ෂයේ විශේෂ පක්ෂ සම්මේලනය අනිද්දා(07දා) පෙරවරු 9.00 ට එක්සත් ජාතික පෙරමුණේ නායක අග්‍රමාත්‍ය රනිල් වික්‍රමසිංහ මහතාගේ ප්‍රධානත්වයෙන් කොළඹ කැම්බල්පිටියේදී පැවැත්වීමට නියමිතය.

එක්සත් ජාතික පෙරමුණෙන් පළාත් පාලන මැතිවරණයට ඉදිරිපත්වන අපේක්ෂකයන් 8000ක්, පාක්ෂිකයන් සහ නියෝජිතයන්මෙවර විශේෂ සම්මේලනයටසහභාගි වීමට නියමිතය.

පසුගිය වසරේ සැප්තැම්බර් 06 වැනිදා රත්නපුරයේදී එක්සත් ජාතික පක්ෂ සම්මේලනය පැවැත්වීමට සූදානම්කර තිබුණද, පැවැති අයහපත් කාලගුණය නිසා එය අවලංගු කෙරිණි. ඒ වෙනුවෙන් පවත්වන සම්මේලනය මෙලෙස 07 වැනිදා පැවැත්වේ.

එක්සත් ජාතික පෙරමුණ නියෝජනය කරන අමාත්‍යවරුන් මන පාඨලී චම්පික රණවක, මනෝ ගනේෂන්, පලනි දිගම්බරන්, රිෂාඩ් බදියුදීන්, රාවුෆ් හකීම් යන මහත්වරුන් ඇතුළු මැති ඇමතිවරුන් රැසක් මෙම සම්මේලනයට සහභාගි වීමට නියමිතය. 

united-national-party-unp-sri-lanka-logo

ආණ්ඩුවෙන් ඉවත්වීමේ තීරණය ශ්‍රීලනිපය හකුළා ගනී

සම්මුතිවාදී ආණ්ඩුවෙන් අද (01දා) සිට ඉවත් වීමට ශ්‍රී ලංකා නිදහස් පක්‍ෂ අමාත්‍යවරුන් ගෙන තිබූ තීරණය හකුළා ගෙන ඇති අතර, පළාත් පාලන මැතිවරණය දෙස බලා ඉදිරි තීරණ ගැනීමට ඔවුන් එකඟ වී ඇතැයි දේශපාලන ආරංචි මාර්ග තහවුරු කළේය.ශ්‍රී ලංකා නිදහස් පක්‍ෂය, එක්සත් ජාතික පක්‍ෂය සමග එක්ව සම්මුතිවාදී ආණ්ඩුවක් සඳහා එකඟතාවට පැමිණි ගිවිසුම ඊයේ (31දා) දිනයෙන් අවසන් විය.

මේ අතර සම්මුතිවාදී ආණ්ඩුව ඉදිරි වසර තුන තුළද පවත්වාගෙන යෑමේ වැදගත්කම ඇතැම් ශ්‍රී ලංකා නිදහස් පක්‍ෂ අමාත්‍යවරුන් පෙන්වා දී ඇති අතර, ඒ වෙනුවෙන්ද මේ දිනවල සාකච්ඡා පැවැත්වෙන බව 'අද'ට වාර්තා වේ.එමෙන්ම ශ්‍රී ලංකා නිදහස් පක්‍ෂය ඉදිරි පළාත් පාලන මැතිවරණයට තරග කිරීමේදී ගන්නා ක්‍රියාමාර්ග සහ ආණ්ඩුවේ ඉදිරි කටයුතු පිළිබඳ සාකච්ඡා වට කිහිපයක්ම පසුගිය දින කිහිපය තුළ පවත්වා ඇති අතර, මැතිවරණයට බලපෑම් කිරීමට විධායක ජනාධිපති ධුරයට හැකි බවද සාකච්ඡා වූ බව ජනාධිපතිවරයාට සමීප පාර්ලිමේන්තු මන්ත්‍රීවරයෙක් සඳහන් කළේය.

මේ අතර සම්මුතිවාදී ආණ්ඩුවෙන් ඉවත්ව එක්සත් ජාතික පක්‍ෂ ආණ්ඩුවක් පිහිටුවන ලෙස එක්සත් ජාතික පක්‍ෂ පසුපෙළ මන්ත්‍රීවරුන් අවස්ථා කිහිපයකදී අග්‍රාමාත්‍ය රනිල් වික්‍රමසිංහ මහතාට දැනුම් දී ඇත.

පළාත් පාලන මැතිවරණය අවසන් වනතුරු ආණ්ඩු පෙරළියක් සිදුනොවන බවත්, එබැවින් පළාත් පාලන මැතිවරණය අවසන් වනතුරු ආණ්ඩු පෙරළියක් ගැන කතා නොකරන ලෙසත් අග්‍රමාත්‍ය රනිල් වික්‍රමසිංහ මහතා එක්සත් ජාතික පක්‍ෂ පසුපෙළ මන්ත්‍රීවරුන්ට දැනුම් දී තිබේ.

එමෙන්ම කිසියම් අවස්ථාවකදී ආණ්ඩු පෙරළියක් සිදුවුව හොත් එක්සත් ජාතික පක්‍ෂ ආණ්ඩුවක් නිර්මාණය කර ගැනීමේ අවස්ථාව තිබෙන බවටත්, ඒ සඳහා සහාය දීමට එක්සත් ජනතා නිදහස් සන්ධානය නියෝජනය කරන පක්‍ෂ විපක්‍ෂ මන්ත්‍රීවරුන්ද සිටින බවටත් අග්‍රාමත්‍යවරයා විසින් පසුපෙළ මන්ත්‍රීවරුන්ට සහතිකයක්ද ලබාදී ඇතැයිද වාර්තා වේ.

සම්මුතිවාදී ආණ්ඩුවේ ගිවිසුම සම්බන්ධයෙන් ක්‍රීඩා අමාත්‍ය දයාසිරි ජයසේකර මහතාගෙන් 'අද' කළ විමසීමකදී අමාත්‍යවරයා පැවසුවේ ශ්‍රී ලංකා නිදහස් පක්‍ෂය ආණ්ඩුවෙන් ඉවත් වීමට මෙතෙක් තීරණය කර නොමැති බවයි. 

එමෙන්ම නියෝජ්‍ය අමාත්‍ය ලසන්ත අලගියවන්න මහතා පැවසුවේ ශ්‍රී ලංකා නිදහස් පක්‍ෂය ආණ්ඩුවෙන් ඉවත් වීම පිළිබඳ මධ්‍යම කාරක සභාව රැස්ව තීරණය කළ යුතු බවත්, මෙතෙක් එවැන්නක් සිදුනොවූ බවත්ය.  පළාත් පාලන මැතිවරණයෙන් පසුව බොහෝ දුරට එය සිදුවීමට ඉඩ ඇතැයිද අමාත්‍යවරයා පවසා සිටියේය.

slfp-unp-logos

මහවැලි ව්‍යාපෘතියේ අවසන් සලකුණ මොරගහකන්ද

මහවැලි ව්‍යාපාරයේ අවසන් ව්‍යාපෘතිය ලෙස සැලකෙන මොරගහකන්ද ජලාශය මේ වනවිට සාදා අවසන් කර ඇත. මේ දිනවල සිදුවනුයේ ජලාශයට ජලය පිරවීමය. චීන ණය ආධාර මත ඉදිකෙරුණු මොරගහකන්ද ජලාශයේ ඉදිකිරීම් ආරම්භ කරන ලද්දේ 2012 වර්ෂයේදීය.


මොරගහකන්ද ජලාශයට ජලය පිරවීමෙන් පසුව ජාතික විදුලිබල පද්ධතියට මෙගාවොට් 25ක විදුලිබල ධාරිතාවක් එක්කරන මොරගහකන්ද ජලවිදුලි බලාගාරයේ පරීක්‍ෂණ කටයුතු මේ දිනවල සාර්ථකව සිදු කෙරෙමින් පවතී.  ඉදිරියේදී එහි නිපදවන විදුලිය ජාතික විදුලිබල පද්ධතියට එක්කිරීමට නියමිතය.

මෙරට කෙටිම කාලයකින් ඉදිකෙරුණු විදුලි බලාගාරය වන මොරගහකන්ද ජලවිදුලි බලාගාරය තුළ අධිපීඩනය මත ක්‍රියාත්මක වන ටර්බයින් හතරකින් විදුලි බලය නිෂ්පාදන කෙරේ.
මොරගහකන්ද ජලාශයේ සම්පූර්ණ ජල ධාරිතාව අක්කර අඩි 450,000කි. එම ජල ධාරිතාවෙන් සියයට 99ක් මේ වන විට සම්පූර්ණ වී තිබෙන අතර, මෙම සතිඅන්තය වනවිට සම්පූර්ණ ජල ධාරිතාවට ළඟාවිය හැකි බව මොරගහකන්ද නේවාසික ඉංජිනේරු සුසන්ත බණ්ඩාර මහතා අප සමග පැවසීය. මොරගහකන්ද ජලාශය සම්පූර්ණයෙන් ජලයෙන් පිරවීමෙන් පසුව එය මුහුදු මට්ටමේ සිට උස අඩි 185ක් පමණ වේ. විදුලි උත්පාදනය සඳහා අවශ්‍ය ජල ධාරිතාව සම්පූර්ණ වීමත් සමග එහි විදුලි උත්පාදන කටයුතු ආරම්භ කෙරෙනු ඇත.
මොරගහකන්ද ව්‍යාපෘතියේ පරීක්‍ෂණ අදියරේ කටයුතු මේ දිනවල සිදුවන අතර, ඉදිරි සතියේදී එහි වාන් දොරටු  විවෘත කිරීමට නියමිතය.
එහි බලාගාර පරීක්‍ෂාව අද (29දා) සිට තවදුරටත් සිදුකිරීමට සැලසුම් කර තිබේ. එමෙන්ම හෙට (30දා) දිනයෙන් පසුව මොරගහකන්දේ රැස්කර තිබෙන ජලය වාරිමාර්ග කටයුතු සඳහා මුදා හැරීමට සැලසුම් කර ඇත. ඉන් පසුව පහළට ජලය බෙදාදීමද  සිදුකිරීමට නියමිතය.
මොරගහකන්ද ව්‍යාපෘතියේ ඉදිකිරීම් කටයුතු සිදුකරන චීන සමාගම එය එළැඹෙන ජනවාරි මස 08 වැනිදා ශ්‍රී ලංකාවට නිල වශයෙන් බාරදීමට නියමිතය. ඒ ජනාධිපති මෛත්‍රීපාල සිරිසේන මහතාගේ ප්‍රධානත්වයෙනි. එලෙස බාරදීමෙන් අනතුරුව මොරගහකන්ද ජලාශයේ වසර දෙකක නඩත්තු කාලසීමාව ආරම්භ වේ. 

05-53-1024x591

මෙම කාලසීමාව අතර යම්කිසි බිඳවැටීමක් සිදුවුවහොත් කොන්ත්‍රාත්කරුවා එහි වගකීම බාරගත යුතුය. මොරගහකන්ද ජලාශය ඉදිකර ඇත්තේ ඇළහැර අමුණට කිලෝමීටර් 02ක් ඉහළින්ය. ඇළහැර අමුණ මගින් යෝධ ඇළටත්, එයින් ගිරිතලේ, මින්නේරිය, කවුඩුල්ල වැව්වලටත් ජලය සපයනු ලැබේ. මොරගහකන්ද ජලාශය ඉදිකිරීම හේතුවෙන් යල-මහ කන්න දෙක තුළදීම මෙම වැව්වලින් ජලය නිදහස් කිරීමට දැන් හැකිව තිබේ.
මොරගහකන්ද ජලාශය මගින් උතුරුමැද පළාත් ඇළක් නිර්මාණය කර එමගින් ඉරණමඩු දක්වා ජලය ලබාදීමට සැලසුම් කර තිබේ. මේ වනවිට එම ඇළ මාර්ගයේ කැණීම් කටයුතු ආරම්භ කර ඇත. දශක හතරකට ආසන්න කාලයක් පුරා සැලසුම්වලට හා දේශපාලන නොසලකා හැරීම්වලට ලක්වෙමින් පැවැති මොරගහකන්ද කළුගඟ ජලාශ ව්‍යාපෘතියේ සංවර්ධන කටයුතු වත්මන් රජයේ ප්‍රමුඛ කාර්යයක් ලෙස සලකා ක්‍රියාත්මක කෙරිණි. 

03

කළුගඟ ව්‍යාපෘතිය

මොරගහකන්ද ජලාශයේ ජල අවශ්‍යතාව සම්පූර්ණ කිරීමේ අරමුණෙන් කළුගඟ ව්‍යාපෘතිය ඉදිකෙරේ. මෙහි ඉදිකිරීම් ආරම්භ කරන ලද්දේ 2014 වර්ෂයේදීය. එය 2018 වර්ෂයේ දෙසැම්බර් මාසයේදී අවසන් කිරීමට සැලසුම් කර ඇත. මෙම ව්‍යාපෘතියද ඉදිකෙරෙනුයේ චීන ණය ආධාර මතය.
මෙම ජලාශයේ ජල ධාරිතාව කියුබික් මීටර් මිලියන 248කි. ජලාශයේ ප්‍රධාන නළ මාර්ගයේ දිග මීටර් 384කි. එමෙන්ම මොරගහකන්ද ජලාශයට ජලය සැපයීමට ඉදිකරන උම‍ඟේ දිග මීටර් 284කි. එමෙන්ම මෙම ජලාශය මගින් වාරිමාර්ග කටයුතු සඳහා ජලය සපයන නළ මාර්ගයේ දිග මීටර් 228 කි. 

කළුගඟ ජලාශයේ ඉදිකිරීම් මේ වනවිට 65%ක් පමණ අවසන් වී ඇත. කළුගඟ සහ මොරගහකන්ද ව්‍යාපෘති සඳහා ලබාගත් ප්‍රදේශවල ජීවත් වූ ජනතාව සඳහා මේ වනවිටත් ඉඩම් ලබාදී අවසන් කර තිබේ. එමෙන්ම ඇතැම් ප්‍රදේශවල අලුතින්ම ගම්මාන ඉදිකර තිබේ. මහවැලි අධිකාරිය මේ සියලුම කටයුතු පිළිබඳ සොයා බලන අතර, ඔවුන්ගේ මූලිකත්වයෙන් ඉඩම් ලබාදීම සිදුකර ඇත. 
මේ වනවිට මෙම ව්‍යාපෘතියට තුළ 1000ක පමණ  ශ්‍රී ලාංකිකයෝ සහ චීන ජාතිකයෝ සම්බන්ධව සිටිති. ඩොලර් මිලියන 1.11ක චීන ණය ආධාර මත ඉදිවන මෙම කළුගඟ ව්‍යාපෘතිය 2018 වසර අග භාගයේදී නිම කිරීමට නියමිතය. එය අවසන් වීමත් සමග මොරගහකන්ද ව්‍යාපෘතිය සම්පූර්ණයෙන්ම අවසන් වන අතර, එමගින් ප්‍රදේශ රැසක ජල අවශ්‍යතාවද සම්පූර්ණ කිරීමට හැකියාව පවතී. 

DSC_3264 IMG_20161214_120137

 

දේශපාලන පළිගැනීමට ලක්වූ විශ්‍රාමික පොලිස් නිලධාරීන් 29දෙනාටම සහන

දේශපාලන පළිගැනීමට ලක්වූ පොලිස් නිලධාරීන් 129 දෙනෙකු අතරින් විශ්‍රාම ගොස් සිටින පොලිස් නිලධාරීන් 29දෙනා සඳහාම සහන සැලසීමට පොලිස් කොමිෂන් සභාව තීරණය කර ඇතැයි ජාතික පොලිස් කොමිසමේ ලේකම් ආරියදාස කුරේ මහතා 'අද'ට පැවසීය.

හිටපු උප පොලිස් පරීක්ෂකවරයෙකු වූ රාජ්‍ය අමාත්‍ය පාලිත රංගේ බණ්ඩාර මහතා ඇතුළු නිලධාරීන් කිහිපදෙනෙකුගේ ලිපි මේවනවිට සකසා අත්සන් යොදා අවසන් බවත්, ඉතිරි නිලධාරීන්ගේද ලිපි ඉතා ඉක්මනින් සකස්කර අවසන්කරන බවත් ආරියදාස මහතා ප්‍රකාශ කළේය.

විශ්‍රාමික නිලධාරීන් 29 දෙනාම නැවත සේවයේ පිහිටුවීමක් නොකරන අතර, ඔවුන්ට සහන සැලසීමේ බාධාවක් නොමැති බැවින් ජාතික පොලිස් කොමිසම මෙම තීරණය ගත් බවද හෙතෙම පැවසීය.

දේශපාලන පළිගැනීමට ලක්වූ  පොලිස් නිලධාරීන් 129 දෙනෙකුට සහන සැලසීමට ගන්නා ලද අමාත්‍ය මණ්ඩල තීරණයට අනුව මෙම සහන සැලසීම ක්‍රියාත්මක වේ.

 

arrest