Author Archives: චාමර සම්පත්

කෝප් කමිටුව නිල වශයෙන් පිහිටුවීම ලබන සතියේදී

අටවැනි පාර්ලිමේන්තුවේ දෙවැනි සැසිවාරයේදී පොදු ව්‍යාපාර පිළිබඳ කාරක සභාව හෙවත් කෝප් කමිටුව නිලවශයෙන් පිහිටුවීම එළඹෙන පාර්ලිමේන්තු සතියේදී සිදුකිරීමට නියමිත බව කෝප් කමිටු සභාපති,පාර්ලිමේන්තු මන්ත්‍රී සුනිල් හඳුන්නෙත්ති මහතා පැවසීය.

කෝප් කමිටුවේ සභාපතිවරයා ලෙස හිටපු සභාපති සුනිල් හඳුන්නෙත්ති මන්ත්‍රීවරයාම පත්කළ යුතු බවට පාර්ලිමේන්තුවේ පක්ෂ නායක රැස්වීමේදී එකඟතාවකට පැමිණියේය.

ඒ අනුව කථානායක කරු ජයසූරිය මහතා කෝප් කමිටු සභාපතිවරයා ලෙස පාර්ලිමේන්තු මන්ත්‍රී සුනිල් හඳුන්නෙත්ති මහතා පත්කරගත් බව පාර්ලිමේන්තුවට නිවේදනය කළේය.

කෙසේ වෙතත් මේ වනවිට ශ්‍රීලනිප මන්ත්‍රීවරුන් 16 දෙනාගේ කණ්ඩායමේ නියෝජනයක් කෝප් කමිටුවට ලබාගැනීම පිළිබඳවද සංවාදයක් මතුව ඇති බව වාර්තාවේ.

එමෙන්ම පසුගිය කෝප් කමිටුව විසින් විමර්ශනයට ලක්කෙරෙමින් තිබුණු සියලු පරීක්ෂණ ඒ ආකාරයෙන් පවත්වාගෙන යෑමට වත්මන් කෝප් කමිටුව බලාපොරොත්තු වන බවද සභාපති සුනිල් හඳුන්නෙත්ති මහතා පැවසීය.

Sunil-Handunnetti

වෛරස් උණ ගැන සෙවීමට තවත් විශේෂඥ වෛද්‍ය කණ්ඩායමක් දකුණට

දකුණු පළාතේ පැතීරි යන වෛරස් උණ රෝගය පිළිබඳ තවදුරටත් සොයා බැලීම සඳහා වසංගත රෝග විද්‍යා අංශයේ විශේෂඥ වෛද්‍ය කණ්ඩායම් දකුණු පළාතට යොමු කිරීමට සෞඛ්‍ය අමාත්‍යාංශය පියවර ගෙන තිබේ.

වසංගත රෝග විද්‍යා අංශයේ අධ්‍යක්ෂ අනිල් දිසානායක මහතාගේ ප්‍රධානත්වයෙන් යුත් විශේෂ වෛද්‍ය කණ්ඩායමක් පසුගිය දිනවල එම ප්‍රදේශවල සංචාරය කරමින් මෙම රෝගී තත්ත්වය පිළිබඳ පරීක්ෂණ පැවැත්වීය.

එමෙන්ම අද (21දා) දිනයේද තවත් විශේෂඥ වෛද්‍ය කණ්ඩායමක් දකුණු පළාතේ පැතිර යන වෛරස් උණ රෝගය සහ රෝගීන් නිරීක්ෂණය කිරීම සඳහා එම ප්‍රදේශයේ සංචාරයක නිරත විය.

වෛරස් උණ රෝගය ව්‍යාප්තිය පාලනය කිරීමට ගත හැකි ක්‍රියාමාර්ග පිළිබඳ සෞඛ්‍ය සේවා අධ්‍යක්ෂ ජනරාල්වරයාගේ ප්‍රධානත්වයෙන් සෞඛ්‍ය අමාත්‍යාංශයේදී විශේෂ සාකච්ඡාවක් අද (21දා) පැවැත්විණි.

එහිදී දකුණු පළාතේ රෝහල්වලට අවශ්‍ය ඖෂධ වර්ග සහ උපකරණ කඩිනමින් යොමු කිරීමටතීරණය විය. 

Doctors

 

අපේක්ෂා රෝහලේ ඖෂධ නෑ කීම ගැන විමර්ශනයක්

කිසිදු රෝහලක ඖෂධ හිඟයක් නොමැති බවත්, ඖෂධ හිඟයක් පවතින්නේ නම්, එය රෝහල් අධ්‍යක්‍ෂවරයාගේ දුර්වලතාවක් බවත් සෞඛ්‍ය, පෝෂණ හා දේශීය වෛද්‍යඅමාත්‍ය රාජිත සේනාරත්න මහතා පැවසීය.

මහරගම අපේක්‍ෂා රෝහලෙන් ප්‍රතිකාර ලබාගැනීමට පැමිණෙන රෝගීන්ට ඖෂධ නොමැති බවට එම රෝහලේ ඖෂධවේදීන් පිරිසක් සිදු කරන ප්‍රකාශ සම්බන්ධයෙන් වහාම විමර්ශනයක් ආරම්භ කිරීමට තීරණය කළ බවද අමාත්‍යවරයා සඳහන් කළේය.

ඖෂධ හිඟය මගහැරවීම සඳහා මෘදුකාංගයක් හඳුන්වා දී ඇති බැවින්එමගින් හිඟ වන ඖෂධ කඩිනමින් ළඟම පිහිටි රෝහලෙන් ලබාගැනීමේ අවස්ථාව උදා වී ඇති බවද සෞඛ්‍යඅමාත්‍යවරයා සඳහන් කළේය.

Rajitha-Senarathna

 

 

හඳුන්නෙත්ති යළිත් කෝප් සභාපති ධුරයට

අටවැනි පාර්ලිමේන්තුවේ දෙවැනි සැසිවාරයේකෝප් කමිටු (පොදු ව්‍යාපාර පිළිබඳ කාරක සභාවේ) සභාපතිවරයා ලෙස පාර්ලිමේන්තු මන්ත්‍රී සුනිල් හදුන්නෙත්ති මහතාම පත්කරගැනීමට පක්ෂ නායකයන්  තීරණය කර තිබේ.

කථානායක කරු ජයසූරිය මහතාගේ ප්‍රධානත්වයෙන් අද (17දා) පාර්ලිමේන්තුවේදී පක්ෂනායකයන්රැස් වූ අතර, එහිදී මෙම තීරණය ගෙන තිබේ.

එමෙන්ම රාජ්‍ය ගිණුම්කාරක සභාවේ සභාපති ලෙස නියෝජ්‍ය අමාත්‍ය ලසන්ත අලගියවන්න මහතා සහ මුදල් කාරක සභාවේ සභාපති ලෙස එම්.ඒ. සුමන්තරන් මහතා යළි පත්කිරීමටද පක්ෂනායකයන් එකඟ වී ඇත.

ජනාධිපති මෛත්‍රීපාල සිරිසේන මහතා විසින් අටවැනි පාර්ලිමේන්තුවේ පළමු සැසිවාරය අවසන් කළ පසු මෙම කාරකසභා සියල්ලේම කාර්යයන් අවසන් වූ අතර, ඒ සඳහා යළි පිරිස් පත්කරගතයුතුව තිබුණි.

Sunil-Handunnetti

කීත් නොයාර් පැහැර ගැනීම පිළිබඳ කතානායක ප්‍රකාශය සිකුරාදා

කථානායක කරු ජයසූරිය මහතාගෙන් ප්‍රකාශයක් ලබාගැනීම සඳහා ලබන සිකුරාදා (18දා) පස්වරු 6.30ට පාර්ලිමේන්තුවට පැමිණෙන බව අපරාධ පරීක්ෂණ දෙපාර්තමේන්තුවේ නිලධාරීන් විසින් කථානායක කරු ජයසූරිය මහතාට දැනුම්දී තිබේ.

මාධ්‍යවේදී කීත් නොයාර් පැහැරගැනීමේ සිද්ධිය සම්බන්ධයෙන් ප්‍රකාශයක් සටහන්කරගැනීම සඳහා මෙලෙස අපරාධ පරීක්ෂණ දෙපාර්තමේන්තු කථානායක ජයසූරිය මහතා හමුවීමට නියමිතය.

මේ සම්බන්ධයෙන් ප්‍රකාශයක් ගැනීමට අවශ්‍ය බව කථානායක කරු ජයසූරිය මහතාට අපරාධ පරීක්ෂණ දෙපාර්තමේන්තුව මගින් පෙරේදා (15දා) දැනුම්දී ඇති අතර, කරු ජයසූරිය මහතා අද (16දා) මේ සඳහා වේලාවක් ඔවුන්ට ලබාදී ඇත.

එවකට රාජ්‍ය පරිපාලන අමාත්‍යවරයා ලෙස කටයුතු කළ කරු ජයසූරිය මහතා විසින් කීත් නොයාර් පැහැරගැනීමේ සිදුවීම පිළිබඳ එවකට ජනාධිපති මහින්ද රාජපක්ෂ මහතාට මුලින්ම දැනුම්දී තිබේ.

කීත් නොයාර් පැහැරගැනීමේ සිදුවීම කරු ජයසූරිය මහතාට දැනගැනීමට හැකිවූයේ කෙසේද යන්න පිළිබඳවත්, තවත් සිදුවීම් කිහිපයක් පිළිබඳවත් දැනගැනීම සඳහා අපරාධ පරීක්ෂණ දෙපාර්තමේන්තුවේ නිලධාරීන්ට ප්‍රකාශයක් ලබාගැනීමට අවශ්‍යව ඇති අතර, ඒ අනුව මෙම ප්‍රකාශ සටහන්කරගැනීම සිදුවේ.

Karu-Jayasuriya-

අයිසොනෝබ් ඩයි ලංකාවේ නිපදවීමට සැලසුම්

මහරගම පිළිකා රෝහලෙහි සවි කළ පෙට් ස්කෑනරය භාවිතයට ගැනීම සඳහා අවශ්‍ය ‘අයිසොනෝබ්’ නමැති ඩයි වර්ගය ශ්‍රී ලංකාවේ නිෂ්පාදනය කිරීමට කටයුතු කරගෙන යන බව සෞඛ්‍ය, පෝෂණ හා දේශීය වෛද්‍ය අමාත්‍ය රාජිත සේනාරත්න මහතා ප්‍රකාශ කළේය.

 මෙම ඩයි වර්ගය ඉන්දියාවේ නිපදවන නමුත් ඒවා මෙරටට ගෙන ඒමේදී ප‍්‍රවාහනය කෙරෙන කාලය තුළ ගෙන එන ප්‍රමාණයෙන් 80%ක් විනාශ වන බව අමාත්‍යවරයා සඳහන් කළේය.

එබැවින් එය ආනයනය කිරීමේ ගැටලු පවතින නිසා මෙරටදීම අදාළ ඩයි වර්ගය නිපදවීමේ ව්‍යාපෘතියක් ආරම්භ කරන බව අමාත්‍යවරයා වැඩිදුරටත් කීවේය.

රජයේ ප්‍රවෘත්ති දෙපාර්තමේන්තුවේදී අද (16දා) පැවැති කැබිනට් තීරණ දැනුම්දීමේ මාධ්‍ය හමුවේදී මාධ්‍යවේදියෙකු නැගූ පැනයකට පිළිතුරු දෙමින් අමාත්‍යවරයා මේබව කීවේය.

Rajitha-Senarathna

 

ඇමතිවරුන් 4කට අයත්ව තිබූ ආයතන 13ක් විජයදාසට

Wijedasa_0

අමාත්‍යවරුන් සිවුදෙනෙකු යටතේ පැවැති විවිධ දෙපාර්තමේන්තු, ව්‍යස්ථාපිත ආයතන හා රාජ්‍ය සංස්ථා 13ක් විජයදාස රාජක්ෂ මහතා දිවුරුම් දුන් නව අමාත්‍යාංශය වන උසස් අධ්‍යාපන හා සංස්කෘතික කටයුතු අමාත්‍යාංශය යටතට පවරමින් නව අමාත්‍යාංශවල විෂය පථයන් ඇතුළත් අතිවිශේෂ ගැසට් පත්‍රය  නිකුත් කර තිබේ.
මෙසේ නම්කර ඇත්තේ උසස් අධ්‍යාපන අමාත්‍යාංශයට අයත්ව තිබූ ආයතන 06ට අමතරවය. විජයදාස රාජපක්ෂ මහතා දරන උසස් අධ්‍යාපන හා සංස්කෘතික අමාත්‍යාංශයට අලුතින් එක්කර ඇත්තේ අකිල විරාජ් කාරියවසම් මහතා අමාත්‍ය ධුරය දරන අධ්‍යාපන අමාත්‍යාංශය, එස්.බී. නාවින්න මහතා අමාත්‍ය ධුරය දරන අභ්‍යන්තර කටයුතු සහ වයඹ සංවර්ධන අමාත්‍යාංශය, රංජිත් මද්දුම බණ්ඩාර මහතා අමාත්‍ය ධුරය දරන රාජ්‍ය පරිපාලන කළමනාකරණ සහ නීතිය හා සාමය පිළිබඳ අමාත්‍යාංශය සහ මලික් සමරවික්‍රම මහතා අමාත්‍ය ධුරය දරන සංවර්ධන උපායමාර්ග හා ජාත්‍යන්තර වෙළෙඳ අමාත්‍යාංශය යන අමාත්‍යාංශ සතුව පැවැති ආයතන 13කි.  

මීට පෙර කබීර් හෂීම් මහතා අමාත්‍ය ධුරය දැරූ උසස් අධ්‍යාපන හා මහාමාර්ග අමාත්‍යාංශය සතුව පැවැති උසස් අධ්‍යාපන කොටසද මෙම අමාත්‍යාංශයට එක්කර ඇත.
ඒ අනුව විශ්වවිද්‍යාල ප්‍රතිපාදන කොමිෂන් සභාව, ඒ යටතේ ඇති සියලු විශ්වවිද්‍යාල, සියලුම පශ්චාත් උපාධි ආයතන සහ ඒ යටතේ ඇති අනෙකුත් ආයතන, බුද්ධ ශ්‍රාවක භික්ෂු විශ්වවිද්‍යාලය, බෞද්ධ හා පාලි විශ්වවිද්‍යාලය සහ ශ්‍රී ලංකා උසස් තාක්ෂණ හා අධ්‍යාපන ආයතනය, විජයදාස රාජපක්ෂ මහතාගේ අමාත්‍යාංශයට ලබා දී තිබේ.

 එමෙන්ම මහපොළ භාරකාර අරමුදල, සංස්කෘතික කටයුතු දෙපාර්තමේන්තුව, ජාතික කෞතුකාගාර දෙපාර්තමේන්තුව, පුරාවිද්‍යා දෙපාර්තමේන්තුව, ටවර් හෝල් රඟහල පදනම, ප්‍රසිද්ධ රැඟුම් පාලක මණ්ඩලය, ජාතික ප්‍රසාංගික කලා මධ්‍යස්ථානය,  ජාතික කලා මණ්ඩලය, ග්‍රාමෝදය ජනකලා කේන්ද්‍රය, අපේ ගම, ජාතික ලේඛනාරක්ෂක දෙපාර්තමේන්තුව, මධ්‍යම සංස්කෘතික අරමුදල සහ ජාතික චිත්‍රපට සංස්ථාවද විජයදාස රාජපක්ෂ අමාත්‍යවරයා යටතේ ඇති උසස් අධ්‍යාපන හා සංස්කෘතික අමාත්‍යාංශය යටතට පවරා තිබේ.
මේ අතර රංජිත් මද්දුම බණ්ඩාර මහතා අමාත්‍ය ධුරය දැරූ රාජ්‍ය පාරිපාලන අමාත්‍යාශය යටතේ තිබූ රාජ්‍ය මුද්‍රණ නීතිගත සංස්ථාව, අකිල විරාජ් කාරියවසම් මහතා යටතේ ඇති අධ්‍යාපන අමාත්‍යාංශයට ඇතුළත් කර ඇත.
 නව සංශෝධිත විෂය පථයන් අනුව, ජාතික ප්‍රතිපත්ති හා ආර්ථික කටයුතු අමාත්‍යාංශයේ විෂය පථයට අයත් ප්‍රතිපත්ති අධ්‍යයන ආයතනය ඉවත් කර තිබෙන අතර,  සමාජ සවිබලගැන්වීම් හා සුභසාධන අමාත්‍යාංශය යටතේ පැවැති විෂයයන් අමාත්‍යංශ දෙකක් යටතේ ගැසට් කර තිබේ.

ඒ අනුව, සමාජ සවිබලගැන්වීම් අමාත්‍යාංශය යටතේ ගැසට් කර ඇත්තේ, දිවිනැගුම සංවර්ධන දෙපාර්තමේන්තුව, ජාතික සමාජ සංවර්ධන ආයතනය, ග්‍රාම සංවර්ධන පුහුණු හා පර්යේෂණ ආයතන සහ සමාජ ආරක්ෂණ මණ්ඩලය යන ආයතනයි.
සමාජ සුභසාධන හා ප්‍රාථමික කර්මාන්ත අමාත්‍යාංශය යටතට අලුතින් එක් වී ඇති විෂයයන් වන්නේ, වැඩිහිටි තැනැත්තන් සඳහා වන ජාතික සභාව, ජාතික වැඩිහිටි මහලේකම් කාර්යාලය, ආබාධ සහිත තැනැත්තන් සඳහා වන ජාතික මහලේකම් කාර්යාල හා ආබාධිත තැනැත්තන් සඳහා වන ජාතික සභාව යන ආයතනයි.

කර්මාන්ත හා වාණිජ කටයුතු අමාත්‍යාංශය යටතේ පැවැති හිඟුරාන සීනි කර්මාන්ත සමාගම, ලංකා සීනි පෞද්ගලික සමාගම හා ජාතික කඩදාසි සංස්ථාව ඉන් ඉවත් කර රාජ්‍ය ව්‍යවසාය හා මහනුවර සංවර්ධන අමාත්‍යාංශය යටතේ ගැසට් කර තිබේ.
වැවිලි කර්මාන්ත අමාත්‍යාංශය යටතේ පැවැති උක් පර්යේෂණ ආයතනය රාජ්‍ය ව්‍යවසාය හා මහනුවර සංවර්ධන අමාත්‍යාංශය යටතට පවරා තිබේ.
රාජ්‍ය ව්‍යවසාය හා මහනුවර සංවර්ධන අමාත්‍යාංශය යටතේ පැවැති හොටෙල් ඩිවලපර්ස් පෞද්ගලික සමාගම ඉන් ඉවත් කර ඇති අතර,  සියලුම රාජ්‍ය බැංකු, ශ්‍රී ලංකා රක්ෂණ සංස්ථාව, ශ්‍රී ලංකන් ගුවන් සමාගම හා මිහින් ලංකා පෞද්ගලික සමාගම එම අමාත්‍යාංශය යටතේම ගැසට් කර ඇත.

ග්‍රාමීය ආර්ථික කටයුතු අමාත්‍යාංශය යටතේ මෙතෙක් කලක් පැවැති වී අලෙවි මණ්ඩලය හා හදබිම අධිකාරිය  කෘෂිකර්ම අමාත්‍යාංශය යටතේ ගැසට් කර තිබේ.
සංවර්ධන උපායමාර්ග හා ජාත්‍යන්තර වෙළෙඳ අමාත්‍යාංශය යටතේ පැවැති, මහපොළ භාරකාර අරමුදල සහ ඊට සම්බන්ධ කාර්යයන් ඉවත් කර එය උසස් අධ්‍යාපන හා සංස්කෘතික කටයුතු අමාත්‍යාංශයට පවරා තිබේ.
ජනාධිපති මෛත්‍රීපාල සිරිසේන මහතාගේ අත්සනින් යුතු අතිවිශේෂ ගැසට් නිවේදනයක් ලෙස අමාත්‍යාංශ විෂයයන් වෙන් කිරීමේ ගැසට් නිවේදනය පෙරේදා (12දා) නිකුත් කර තිබේ.
ආණ්ඩුවේ අමාත්‍යාංශ කිහිපයක් සඳහා අමාත්‍යවරුන් පසුගියදා දිවුරුම් දුන් අතර, ඒ අනුව අමාත්‍යාංශ සඳහා නව විෂයයන් බෙදීම සිදුකර ඇත. 

එජාපයට CEO තනතුරක්

එක්සත් ජාතික පක්‍ෂ මූලස්ථානය වන සිරිකොත පරිපාලන කටයුතු කාර්යක්‍ෂමව සිදු කිරීම සඳහා ප්‍රධාන විධායක නිළධාරීවරයෙකු පත්කිරීමට එක්සත් ජාතික පක්‍ෂය තීරණය කර තිබේ.

එක්සත් ජාතික පක්‍ෂ ප්‍රතිසංවිධාන ක්‍රියාවලිය සඳහා රාජ්‍ය ආරක්‍ෂක අමාත්‍ය රුවන් විජයවර්ධන කමිටුව මගින් යෝජනා කර ඇති යෝජනා අනුව පක්‍ෂ නායක අග්‍රාමත්‍ය රනිල් වික්‍රමසිංහ මහතා විසින් මෙම තීරණය ගෙන ඇත.

කිසිදු දේශපාලන තනතුරක් නොදරන පාර්ලිමේන්තු කටයුතු නොයෙදෙන පුද්ගලයෙකු පූර්ණ පරිපාලන කටයුතු සඳහා එක්සත් ජාතික ප්‍රධාන විධායක තනතුරට පත්කිරීමට නියමිතය.

පක්‍ෂ මහලේකම්වරයාගේ පරිපාලන කටයුතු සඳහා පූර්ණ දායකත්වය ලබා දීම අභිනව ප්‍රධාන විධායක නිලධාරියාගේ පුමුඛ කාර්යය වේ.

unp

 

 

නොබෙදිය හැකි ශ්‍රී ලංකාවකට සහාය දෙනවා

රටට නව ව්‍යවස්ථාවක් සම්පාදනය කිරීමේ කාර්ය ඉතා ඉක්මනින් සම්පූර්ණ කළ යුතු බව විපක්ෂ නායක ආර්. සම්බන්ධන් මහතා පාර්ලිමේන්තුවේදී ප්‍රකාශ කළේය.

ජනාධිපති මෛත්‍රීපාල සිරිසේන මහතා ඉදිරිපත් කළ ප්‍රතිපත්ති ප්‍රකාශනය පිළිබඳ කල්තැබීමේ විවාදයේදී අදහස් දක්වමින් අද (10දා) පාර්ලිමේන්තුවේදී සම්බන්ධන් මහතා මේ බව ප්‍රකාශ කළේය.

රට බෙදීමට කිසිම පුද්ගලයකු හවුල් නොවිය යුතු බවත්, නොබෙදන නොබෙදිය හැකි ශ්‍රීලංකාවක් වෙනුවෙන් සහය දෙන බවත් සම්බන්ධන් මහතා මෙහිදී ප්‍රකාශ කළේය.

සියලුම ජනතාව සඳහා සමාන අයිතිවාසිකම් ලැබිය යුතු බවට වැඩිදුරටත් අදහස් දක්වමින් විපක්ෂ නායකවරයා මෙහිදී පැවසීය.

Sampanthan-60000-1

 

එජාපයට විරුද්ධ විශාල බලවේගයක් ගොඩනගනවා

එක්සත් ජාතික පක්‍ෂයට විරුද්ධව විශාල බලවේගයක් ගොඩනැගීමට කටයුතු කරන බවත්, ඒ සඳහා විපක්‍ෂයේ සියලු මන්ත්‍රීවරුන් සමග එක්වන බවත් ආණ්ඩුවේ සිට විපක්‍ෂයට එක්වූ පාර්ලිමේන්තු මන්ත්‍රී එස්.බී. දිසානායක මහතා ඊයේ (09දා) පාර්ලිමේන්තුවේදී ප්‍රකාශ කළේය.

පෞද්ගලික ප්‍රකාශයක් සිදුකරමින් එස්.බී. දිසානායක මහතා මේබව පවසා සිටියේය.

අගමැතිවරයාට එරෙහි විශ්වාසභංග යෝජනාවට පක්‍ෂවීම හේතුවෙන් තමන් ඇතුළු ආණ්ඩුව නියෝජනය කළ මන්ත්‍රීවරුන් 16 දෙනෙකු විපක්‍ෂයට පැමිණි බවත්, ඒ හේතුවෙන් අගමැතිවරයාට ආණ්ඩුව කරගෙන යෑමට ඉඩදිය යුතු බව තම කණ්ඩායමේ ස්ථාවරය බවත් හෙතෙම පැවසීය.

එමෙන්ම ආණ්ඩුවේ යහපත් කරුණු සඳහා සහයෝගය ලබාදීමට තම කණ්ඩායම කටයුතු කරන බවද එස්.බී. දිසානායක මහතා ප්‍රකාශ කළේය.‍

SB.DISSANAYAKE-01