Author Archives: චාමර සම්පත්

අධිවේගී මාර්ග නොව දුම්රිය මාර්ග දෙගුණ කරන්න

මගී ජනතාවගේ ප්‍රශ්නය විසඳීමටනම් අධීවේගී මාර්ග ඉදිකිරීම නවතා වහාම දුම්රිය මාර්ග ප්‍රමාණය දෙගුණ කිරීමට කටයුතු කරන ලෙස පාර්ලිමේන්තු මන්ත්‍රී අතුරලියේ රතන හිමියෝ ආණ්ඩුවෙන් ඉල්ලා සිටියහ.

එමෙන්ම මධ්‍යම අධිවේගී මාර්ගය කුරුණෑගලින් අවසන් කර මහනුවර දක්වා මංතීරු හතරක මාර්ගයක් ඉදිකර සිදුවන පරිසර විනාශය අවමකිරීමට කටයුතු කරන ලෙසද රතන හිමියෝ මහාමාර්ග අමාත්‍යවරයාගෙන් ඉල්ලා සිටියහ.

ඊයේ(19දා) පාර්ලිමේන්තුවේ පැවැති අධිවේගී මාර්ග පිළිබඳ විවාදයට එක්වෙමින් උන්වහන්සේ මේබව පැවසූහ.

මේවනවිට දුම්රිය තුළ ගමන්ගන්නා මගීන් ප්‍රමාණය වැඩි වී ඇති  බවත්, දුම්රියන් තුනක ගමන් කළ යුතු මගීන් එක් දුම්රියක ගමන් ගන්නා බවත් උන්වහන්සේ පෙන්වාදුන්හ.

දුම්රිය මාර්ග ප්‍රමාණය දෙගුණ කරන්නේනම් ජනතාවගේ කාර්යක්ෂ්මතාව 50%කින් වැඩිවන බවද උන්වහස්සේ ප්‍රකාශ කළහ.

Rathana-2 copy copy

 

 

 

කථානායකගෙන් විමල්ට අවවාද

කථානායක කරු ජයසූරිය මහතා පාර්ලිමේන්තු මන්ත්‍රීවිමල් වීරවංශ මහතාට ඊයේ(19දා) පාර්ලිමේන්තුවේදී අවවාද කළේය.

පාර්ලිමේන්තුවේදී විමල් වීරවංශ මහතා රීති ප්‍රශ්නයක් ඉල්ලා සිටිමින් වෙනත් කරුණු මතු කිරීමේදී කථානායකවරයා මෙලෙස විමල් වීරවංශ මහතාට අවවාද කළේය.

“රීති ප්‍රශ්න අවභාවිත කරන්න එපා. රීති ප්‍රශ්න ඉල්ලනවිට ඒ අවස්ථාව දෙනවද? නැද්ද? කියලාමට  නැවත හිතන්න වෙනවා මන්ත්‍රීතුමා" යැයි කථානායකවරයා විමල් වීරවංශ මහතාට පැවසීය.

එමෙන්ම මේ අවස්ථාවේදී නැගී සිටි පාර්ලිමේන්තු මන්ත්‍රී අශෝක ප්‍රියන්ත මහතා පැවසුවේ විමල් වීරවංශ මහතා රීති ප්‍රශ්න නගමින් පාර්ලිමේන්තුවට නොගැළපෙන වචන භාවිත කරන බවයි. ඒ අවස්ථාවේ පාර්ලිමේන්තු සභා ගැලරිය පාසල් සිසුන්ගෙන් පිරී පැවතුණි.

264e779313ec3104f909baa591578167_XL copy copy

 

 

 

අධිවේගී කිලෝමීටර් 2ක වියදමින් වෛද්‍ය විද්‍යාලයක් ඉදිකළ හැකියි

අධිවේගී මාර්ග කිලෝමීටර් දෙකකට වැයවන වියදමින්අං ග සම්පූර්ණ රජයේ වෛද්‍ය විද්‍යාලයක් ඉදිකළ හැකි බව මහා නගර හා බස්නාහිර සංවර්ධන අමාත්‍ය පාඨලී චම්පික මහතා අද (19දා) පාර්ලිමෙන්තුවේදී පැවසීය.අධිවේගී මාර්ග විවාදයට එක්වෙමින් අමාත්‍යවරයා මේබව කීවේය.

2015 සිට 2025 දක්වා අතිරේක අධිවේගී මාර්ග කි.මී. 356 ක් ඉදිකිරීමට සැලසුම් කොට තිබෙන අතර, ඒ සඳහා රුපියල් බිලියන1,644 ක් ණය වීමට නියමිත බව අමාත්‍යවරයාද අවධාරණය කළේය.

අධිවේගී මාර්ගවලට මුදල් වැය කිරීම යනු තවත් තැනක සංවර්ධනයක් අත්හිටුවීම බවදඅධිවේගී මාර්ගයක කිලෝමීටරයක් ඉදිකිරීමට අද වනවිට රුපියල් මිලියන 4,000 - 5,000 අතර ප්‍රමාණයක් වැය වන අතර එය අතිවිශාල ධනස්කන්ධයක් බවද අමාත්‍යවරයා පෙන්වා දුන්නේය.

නමුත් එමගින් කළ හැකි දේ සලකා බැලුවහොත් කොළඹ නගරයේ වැසිකිළිකැසිකිළි පහසුකම් නොමැතිව ජීවත්වන පවුල්20,000කට සෞඛ්‍ය සම්පන්න වැසිකිළි පහසුකම් ලබාදීමට හැකි බවත්කොළඹ නගරයේ ඇළමාර්ග ආශ්‍රිතව අඩු අදායම්ලාභී පවුල් ජීවත්වන නිවාස 1,000 ක් පමණ හඳුනාගෙන තිබෙන අතර, එම අයට මහල් නිවාස තනාදීමටත්පිට පළාත්වල වෙසෙන දුප්පත් පවුල් 5,000කට විධිමත් නිවාස තනාදිය හැකි  බවත් අමාත්‍යවරයා පැවසීය.

මෙම කිලෝමීටර් 01 ක් ඉදිකිරීමට වැයවන මුදලින් කෝටි 10 බැගින් ග්‍රාමීය රෝහල් 50ක් පුනරුත්ථාපනය කළ හැකි බවත්, අධිවේගී මාර්ග කිලෝමීටර් දෙකකට යන වියදමින් රජයේ අංග සම්පූර්ණ වෛද්‍ය විද්‍යලයක් පිහිටුවිය හැකි බවත් චම්පික අමාත්‍යවරයා ප්‍රකාශකළේය.

අධිවේගී මාර්ග කි.මී.03කට වැය වන මුදලින් කොළඹ නගරය ඇතුළු බස්නාහිර පළාතේම කසළ ටොන් 1200 ක් විද්‍යාත්මක කසළ රඳවන එකක හෝ කිහිපයක රඳවා තබාගෙන කසළ ගැටලව මේ සියවස තුළම ඇති නොවන අයුරින් විසඳීමට හැකි බවද ඔහු කීය.

නැනෝ තාක්ෂණයජීව තාක්ෂණයතොරතුරු තාක්ෂණය ඇතුළු තාක්ෂණික සේවා නවෝත්පාදන ක්‍රියාවලියක් මෙම මුදලින් ආයෝජනය කළහොත් අලුත් තාක්ෂණ රැකියා 30,000 ක් එමගින් බිහිකළ හැකි අතර දැනට තිබෙන 4% ආර්ථික වර්ධන වේගය 5% දක්වා ඉහළ නැංවීමට හැකි බවද හෙතෙම සඳහන් කළේය.

අධිවේගී මාර්ග කි.මී. 04කට යන වියදමින්අද දැවෙන ගැටලුවක් වන වාහන තදබදයට ප්‍රධාන හේතුව වන පෞද්ගලික වාහන එක් මාර්ගයකින් 250 ක් ඉවත් කර ඒ සඳහා බස්රථ යෙදවීමට හැකි නම් මිනිත්තු 30කින් එම මාර්ගයේ ගමනාගමනය කාර්යක්‍ෂ්ම කළ හැකි බවත්ඒ අයුරින් කොළඹට පැමිණෙන මාර්ග 07 සඳහා රජය මගින් අධිවේගී මාර්ග කී.මී. 04කට  වැයවන මුදලින් සුඛෝපබෝගී බස්රථ ලබාදීමට හැකි නම් කොළඹ ඇතුළු තදාසන්න ප්‍රදේශවල තිබෙන බලගතු ප්‍රවාහන ගැටලුව විසඳිය හැකි බවත් රණවක මහතා පැවසීය. 

අධිවේගී මාර්ග කි.මී. 06ක් ඉදිකිරීම සඳහා වැයවන මුදලින් කටුනායක ගුවන්තොටුපොළේ දෙවැනි ගුවන්පථය ඉදිකිරීමට හැකි බවත්, එසේම කොළඹ වරායේ නැගෙනහිර පර්යන්තය සහ බටහිර පර්යන්තය යන දෙකම එම වියදමින් ඉදිකළ හැකි බවද අමාත්‍යවරයා තවදුරටත් ප්‍රකාශ කළේය.

04

මධ්‍යම අධිවේගයට පාර්ලිමේන්තු තේරීම් කාරක සභාවක් ඕනෑ

මධ්‍යම අධිවේගී මාර්ගයේ ඉදිකිරීම් වහාම නවතා පාර්ලිමේන්තු තේරීම් කාරක සභාවක් මගින් විධිමත් අධීක්ෂණයකට ලක් කළයුතු බව විපක්ෂයේ ප්‍රධාන සංවිධාය ජනතා විමුක්ති පෙරමුණේ නායක අනුර කුමාර දිසානායක මහතා පැවසීය.

අධිවේගී මාර්ග පිළිබඳ පාර්ලිමේන්තු කල්තැබීමේ යෝජනාව පාර්ලිමේන්තුවට ඉදිරිපත් කරමින් අද (19දා) හෙතෙම මේ බව පැවසීය.

එම පාර්ලිමේන්තු තේරීම් කාරක සභාව ඉතා ඉක්මනින් ස්ථාපිත කළයුතු බවද අනුර කුමාර දිසානායක මහතා පාර්ලිමේන්තුවට ප්‍රකාශ කළේය.

මධ්‍යම අධිවේගී මාර්ගයේ ඉංජිනේරු ඇස්තමේන්තුව හා සසදා බලන විට එකඟ වී ඇති ඇස්තමේන්තුව රුපියල් බිලියන  14 ක වැඩිවීමක් තිබෙන බවද අනුර කුමාර දිසානායක මහතා සඳහන් කළේය.

anura kumara

 

 

මධ්‍යම අධිවේගයේ ගැටලු පැමිණිලි කරන්න – අපිට ඕනතරම් සල්ලි තියෙනවා

මධ්‍යම අධිවේගී මාර්ග ව්‍යපෘතිය සම්බන්ධයෙන් අමාත්‍යවරයා ලෙස ලක්ෂ්මන් කිරිඇල්ල මහතාට හෝ අමාත්‍යාංශ නිලධාරීන්ට කිසියම් හෝ චෝදනා ඇත්නම් ආදාළ ආයතනවලට පැමිණිලි කරන ලෙස උසස් අධ්‍යාපන හා මහාමාර්ග අමාත්‍ය ලක්ෂ්මන් කිරිඇල්ල මහතා අද (19දා) පාර්ලිමේන්තුවේදී පැවසීය.

එලෙස පැමිණිලි කිරීමෙන් වැරදිකරුවෝ බවට පත්වුවහොත් එම වගකීම භාරගැනීමට තමන් සුදානම් බවද කිරිඇල්ල අමාත්‍යවරයා පැවසුවේ පාර්ලිමේන්තුවේ අධිවේගී මාර්ග විවාදයට එක්වෙමිනි.

මහා මාර්ග අමාත්‍යාංශය සෑම මාර්ගයක්ම ටෙන්ඩර් අනුව ලබාදෙන බවද, තමාට කිසිවෙකුගේ මුදල් අවශ්‍ය නොවන අතර අවශ්‍ය තරම් මුදල් තම පවුල සතුව ඇති බවද අමාත්‍යවරයා කීවේය.

LK

 

 

ජනපති අගමැති පාර්ලිමේන්තුවේ ගමන් කරන විදුලි සෝපාන අක්‍රිය වෙයි

පාර්ලිමේන්තුවේ බිම් මහලේ පිහිටි ජනාධිපති, අගමැති, නීතිපති ඇතුළු ඉහළ පෙළේ පිරිස් වෙනුවෙන් වෙන්කර ඇති විදුලි සෝපානය ඊයේ (19දා) පෙරවරුවේ ක්‍රියාවිරහිත වී ඇත.

මේ බව හඳුනාගෙන ඇත්තේ අග්‍රාමාත්‍ය ආරක්ෂක අංශය විසින් සිදුකළ සෝදිසි කිරීමකදීය.

ඒ හේතුවෙන් ඊයේ(19දා) දවස පුරා අග්‍රාමාත්‍යවරයා භාවිත කළේ පාර්ලිමේන්තුවේ අනිකුත් පිරිස වෙනුවෙන් වෙන්කර ඇති විදුලි සෝපානයයි.

මේහේතුවෙන් අග්‍රාමාත්‍යවරයා එම විදුලි සෝපානය භාවිත කරන අවස්ථාවේදී සාමාන්‍ය සේවකයන් දැඩි අපහසුතාවට පත්ව තිබිණි.

Parliament_3_1 copy copy

 

රාජ්‍ය ආයතන 15ක මූල්‍ය අක්‍රමිකතා ගැන කෝප් වාර්තාව එළියට

රාජ්‍ය ආයතන පහළොවක සිදුව ඇති මූල්‍ය අක්‍රමිකතා  සහ ඉහළ නිලධාරීන්ගේ විනය විරෝධී හැසිරීම් සම්බන්ධව සිදුකළ විමර්ශන ඇතුළත් නවතම කෝප් වර්තාව අද (19දා) පොදු ව්‍යාපාර පිළිබඳ කාරක සභාවේ සභාපති සුනිල් හඳුන්නෙත්ති මහතා පාර්ලිමේන්තුවට ඉදිරිපත් කළේය.

ජාතික ගමනාගමන කොමිෂන් සභාව, ශ්‍රී ලංකා සංචාරක සංවර්ධන අධිකාරිය, සී/ස ගුවන් තොටුපළ හා ගුවන් සේවා සමාගම, සමුපකාර තොග වෙළෙඳ සංස්ථාව, මධ්‍යම පරිසර අධිකාරිය, මහජන බැංකුව, ශ්‍රී ලංකා ආයුර්වේද ඖෂධ සංස්ථාව, ජාතික ලොතරැයි මණ්ඩලය, ලංකා ඛනිජ තෙල් නීතිගත සංස්ථාව, සී/ස ඛනිජ වැලි සමාගම, භූ විද්‍යා සමීක්ෂණ සහ පතල් කාර්යාංශය, සීමාසහිත හිඟුරාන සීනී කර්මානත්තායතනය, ලංකා ධීවර සංස්ථාව, ස්වාධීන රූපවාහිනි සේවය, විශ්වවිද්‍යාල ප්‍රතිපාදන කොමිෂන් සභාව යන ආයතන පිළිබඳව මෙම විමර්ශන වාර්තා මගින් හෙළිදරව් කර තිබේ.

රජයේ බැංකුවක් විසින් පෞද්ගලික හෝටලයට නිකුත්කළ රුපියල් කෝටි 10 ක ණය මුදලකට අදාළ පොලිය ලෙස රුපියල් හැත්තෑතුන් ලක්ෂ අසූ ‍දෙදහක මුදලක් 2014 පෙබරවාරි 28 දා ලංකා සංචාරක සංවර්ධන අධිකාරය විසිනි ගෙවා තිබේ.

අධිකාරියට අයත් නිවාඩු නිකේතනයක කාමර 30ක් අලුත්වැඩියාව වෙනුවෙන් රුපියල් දෙකෝටි අසූ එක් ලක්ෂයක් ගෙවා ඇත.

එම මුදලින්  රුපියල් එක්කෝටි දස ලක්ෂයක් ගෙවා ඇත්තේ නොකළ වැඩකොටසක් සඳහා බව අනාවරණය වී ඇත.

එමෙන්ම කල්පිටිය මාර්ගයක් ඉදිරිකිරීම සඳහා ගල් සහ බොරලු පස් කියුබ් සඳහා රුපියල් කෝටියටකට අධික මුදලක්  වැය කර ඇත.  එම ද්‍රව්‍ය භෞතිකව භාරගත් බවට සාක්ෂි හමුවී නොමැති බවද එම වාර්තාවේ දැක්වේ.

කල්පිටියේ කාමර 4000 ක සංචාරක නිකේතනයක් ඉදිකිරීම සඳහා රුපියල් අටකෝටි අසූ හත් ලක්ෂයක් වැය කර ඇතත් 2014/12/31 දිනට එහි එකම කාමරයක් නිමකර නොමැති බවට හෙළිවී ඇත.

මත්තල ගුවන් තොටුපළට අදාළ නිවාඩු නිකේතන ඉදිකිරීම සඳහා පෞද්ගලික පාර්ශ්වයකට රුපියල් ලක්ෂ 70 ක් ලබාදී ඇතත් එම ඉඩම රජයට අයත් ඉඩමක් බව පසුව හෙළිවී ඇත.

එහෙත් පෞද්ගලික  පාර්ශ්වයකට ලබාදුන් ලක්ෂ 70 නැවත අයකර නොමැති අතර, එය වැරැදි ගනුදෙනුවක් බවට නිර්දේශ කර තිබේ.

බණ්ඩාරනායත ජාත්‍යන්තර ගුවන්තොටුපළ සංවර්ධන ව්‍යාපෘතිය වෙනුවෙන් 2010 හා 2012 වර්ෂවල කිසිදු තහවුරු කිරීමක් නොකර රුපියල් දහතුන් කෝටි අනූ අට ලක්ෂක මුදලක් භාණ්ඩාගාර අරමුදලෙන් ගෙවා ඇති බව වාර්තාවේ දැක්වේ.

සමුපකාර තොග වෙළෙඳ සංස්ථාවට ලක් සතොස විසින් 2013 වසරේදී රුපියල් විසි හත්කෝටි අනූ නව ලක්ෂයක ණය මුදලක් ගෙවිය යුතුව ඇත. නමුත් ඒ පිළිබඳ ලියකියවිලි කිසිවක් හමුවී නොමැති බව කෝප් කමිටුව විසින් අනාවරණය කර තිබේ.

2014 වසරේදී කැරම් බෝඩ් 14,000 ක් සහ දාම්බෝඩ් 11,000 ක් මිලට  ගෙන රුපියල් තුන්කෝටි අනූ දහසක මුදල් සතොසට අලාභ කර තිබෙන අතර, එම මුදල ගෙවන ලෙස ක්‍රීඩා අමාත්‍යාංශයේ ලේකම්වරයාට සඳහන් කර ඇති බවද එම වාර්තාවේ වැඩිදුරටත් දැක්වේ.

Sunil-Handunnetti copy copy

 

සයිටම් අහෝසි කරන්න බෑ – තීරණය සඳුදා

මාලඹේ සයිටම් පෞද්ගලික වෛද්‍ය විශ්වවිද්‍යාලය පිළිබඳ රජයේ තීරණය ජනාධිපති මෛත්‍රීපාල සිරිසේන මහතා විසින් සඳුදා (23 දා) ප්‍රකාශයට පත්කරන බව උසස් අධ්‍යාපන හා මහාමාර්ග අමාත්‍ය ලක්ෂ්මන් කිරිඇල්ල මහතා පාර්ලිමේන්තුවට පැවසීය.

පාර්ලිමේන්තු මන්ත්‍රී දිනේශ් ගුණවර්ධන මහතා ස්ථාවර නියෝග 23/2 යටතේ යොමු කළ ප්‍රශ්නයකට පිළිතුරු ලබාදෙමින් අද (19දා) අමාත්‍යවරයා මේ බව පැවසීය.

එමෙන්ම සයිටම් පෞද්ගලික වෛද්‍ය විද්‍යාලය අහෝසි කළ නොහැකි බවත්, එසේ නොකර මධ්‍යස්ථ විසඳුමක් කරා පැමිණිය යුතු බවද කිරිඇල්ල අමාත්‍යවරයා ප්‍රකාශ කළේය.

image_1456887746-a294ecddfa

 

අමාත්‍යාංශ 10ක වැය ශීර්ෂ සාකච්ඡා කිරීමට විශේෂ කාරක සභාවක්

 

2018 වර්ෂයේ අයවැය ඇස්තමේන්තුවලින් තෝරාගත් අමාත්‍යාංශ 10 ක වැය ශීර්ෂ පිළිබඳ සාකච්ඡා කිරීම සඳහා පාර්ලිමේන්තු විශේෂ කාරක සභාවක් පත්කිරීමට නියමිතය.

2018 වර්ෂයේ ඇයවැය ඇස්තමේන්තු පිළිබඳ කාරක සභා අවස්ථාව සඳහා වෙන්කර ඇති කාලසීමාව සීමාකර ඇති බැවින් සහ එක් දිනයකදී වැය ශීර්ෂ කිහිපයක් පිළිබඳ සාකච්ඡා කිරීමට සිදුව ඇති හෙයින් මෙම විශේෂ කාරකසභාව පත්කිරීමට පාර්ලිමේන්තුව තුළ එකඟතාවකට පැමිණ තිබේ.

එමෙන්ම එක් එක් අමාත්‍යාංශයේ වැයශීර්ෂ පිළිබඳ සාකච්ඡාකිරීමට වෙන්කර තිබෙන කාලසීමා සීමිතවීමද එයට හේතුවක් ලෙස සඳහන් කර ඇත.

මෙම පාර්ලිමේන්තු විශේෂ කාරක සභාව යටතේ කඳුරට නව ගම්මාන, යටිතල පහසුකම් හා ප්‍රජා සංවර්ධන අමාත්‍යාංශය, බන්ධනාගාර ප්‍රතිසංස්කරණ, පුනරුත්ථාපන, නැවත පදිංචි කිරීම හා හින්දු ආගමික කටයුතු අමාත්‍යාංශය, ජාතික සහජීවනය සංවාද හා රාජ්‍ය භාෂා අමාත්‍යාංශය, ජාතික ඒකාබද්ධතා සහ ප්‍රතිසන්ධාන අමාත්‍යාංශය, බුද්ධ ශාසන අමාත්‍යාංශය යන අමාත්‍යාංශවල වැයශීර්ෂයන් සාකච්ඡා කිරීමට නියමිතය.

එමෙන්ම තැපැල්, තැපැල් සේවා හා මුස්ලිම් ආගමික කටයුතු අමාත්‍යාංශය, සංචාරක සංවර්ධන හා ක්‍රිස්තියානි ආගමික කටයුතු, විශේෂ කාර්යභාර අමාත්‍යාංශය, විදුලි සංදේශ හා ඩිජිටල් යටිතල පහසුකම් අමාත්‍යාංශය, විද්‍යා තාක්ෂණ හා පර්යේෂණ අමාත්‍යාංශය යන අමාත්‍යාංශද මෙම කාරක සභාව යටතේ සාකච්ඡා කිරීමට  ලක්කර ඇත.

ජනපති කටාර් සංචාරයක

ජනාධිපති මෛත්‍රීපාල සිරිසේන මහතා ලබන සතියේ කටාර් රාජ්‍යයේ තෙදින නිල සංචාරයක නිරතවීමට නියමිතය.

මෙහිදී ශ්‍රීලංකාව සහ කටාර් රාජ්‍යය අතර ක්ෂේත්‍ර තුනකට අදාළ අවබෝධතා ගිවිසුම් අත්සන් කිරීමට නියමිත අතර, ඒසඳහා කැබිනට් මණ්ඩල අනුමැතිය හිමිව තිබේ.

බලශක්ති අවශ්‍යතාව සපුරාගැනීම සඳහා බලශක්ති ක්ෂේත්‍රයේ සහයෝගිතාව පිළිබඳ අවබෝධතා ගිවිසුමක්ද, රාජ්‍යතාන්ත්‍රික පුහුණුව හා පර්යේෂණ ක්ෂේත්‍රයේ සහයෝගිතාව සම්බන්ධ අවබෝධතා ගිවිසුමක්ද, ජල සම්පාදන හා අපජල කළමනාකරණ ක්ෂේත්‍රයේ ද්විපාර්ශ්වික සහයෝගිතාව පිළිබඳ අවබෝධතා ගිවිසුමක් සඳහාද මෙහිදී අත්සන් තැබීමට නියමිතය.

ලබන 24, 25 සහ 26 යන තෙදින තුළ ජනාධිපති මෛත්‍රීපාල සිරිසේන මහතා කටාර් නිල සංචාරයේ නිරතවීමට නියමිත අතර, ඒසඳහා අමාත්‍යවරුන් කිහිපදෙනෙක්ද සහභාගි වීමට නියමිතය.

35dff6e0b4276c48abce61e809637162_XL