Author Archives: බුද්ධිමාල් රුබේරු

බැඳුම්කර වාර්තාව අල්ලස් නිලධාරීන් අතට

භාණ්ඩාගාර බැඳුම්කර නිකුත් කිරීම පිළිබඳ සොයා බැලීම සඳහා පත්කළ ජනාධිපති පරීක්‍ෂණ කොමිසමේ වාර්තාවේ පිටපතක් ජනාධිපති මෛත්‍රීපාල සිරිසේන මහතා විසින් අල්ලස් හෝ දූෂණ චෝදනා පිළිබඳ විමර්ශන කොමිසමට යවා ඇතැයි වාර්තා වේ.

බැඳුම්කර ගනුදෙනුවලදී හා එයට අදාළ සිද්ධිවලදී අල්ලස් චෝදනාවන් ඉදිරිපත් කළ හැකි සිදුවීම් වී ඇති බවට කොමිසම සිය වාර්තාවේ සඳහන් කර තිබීම නිසා ඒ සම්බන්ධයෙන් පියවර ගැනීමට ජනාධිපතිවරයා විසින් එම වාර්තාවේ පිටපතක් මෙලෙස අල්ලස් හෝ දූෂණ චෝදනා පිළිබඳ විමර්ශන කොමිසමට යවා ඇතැයි වාර්තා වේ.

අල්ලස් කොමිසමේ ඉහළ නිලධාරීන් පිරිසක් මේ වන විටත් බැඳුම්කර කොමිසමේ වාර්තාව අධ්‍යයනය කරමින් සිටින බවත්, එම අධ්‍යයනය කිරීම්වලින් අනතුරුව මේ සම්බන්ධයෙන් ගතයුතු ඉදිරි පියවර පිළිබඳ තීරණයක් ගන්නා බවත් අල්ලස් කොමිසමේ ඉහළ නිලධාරියෙක් පැවසීය.

කොමිසම් වාර්තාවේ සඳහන් කරුණු පිළිබඳ අධ්‍යයනය කිරීමෙන් අනතුරුව අවශ්‍ය පියවර ගන්නා බවද එම නිලධාරියා වැඩිදුරටත් පැවසීය.

බැදුම්කර වාර්තාව

අභියාචනාධිකරණ විනිසුරුවන් දෙදෙනෙකුට උසස්වීම්

අභියාචනාධිකරණයේ  විනිසුරුවරුන් දෙදෙනෙකුට උසස්වීම් ලබාදීම සඳහා ව්‍යවස්ථා සභාවේ අනුමැති ලැබී ඇතැයි විශ්වාස කටයුතු ආරංචි මාර්ග වලින් වාර්තා වේ.
අභියාචනාධිකරණයේ  සභාපති විනිසුරුවරයා ලෙස කටයුතු කළ එල්.ටී.බී. දෙහිදෙණිය මහතා ශේෂ්‍යඨාධිකරණ විනිසුරුවරයෙකු වශ්‍යයෙන් පත් කොට ඇති බවද එයින් හිස් වු අභියාචනාධිකරණයේ  සභාපති විනිසුරුධුරය සඳහා අභියාචනාධිකරණ විනිසුරුවරු පී‍්‍රතී පද්මන් සුරසේන මහතා පත් කොට ඇති බවද වාර්තා වේ.
මෙම උසස්වීම් සඳහා එල්.ටී.බී. දෙහිදෙණිය මහතාගේ සහ පී‍්‍රතී පද්මන් සුරසේන මහතාගේ නම් යෝජනා කරමින් ව්‍යවස්ථා සභාව වෙත යොමු කොට තිබු අතර ව්‍යවස්ථා සභාව  ඒ සඳහා අනුමැතිය ලබා දී ඇතැයි වාර්තා වේ.

supremecourt

ලක්ෂ 750කට අදාළව විමල්ට අධිචෝදනා

හෙළි කළ නොහැකි මාර්ගවලින් උපයාගත් රුපියල් ලක්ෂ 750ක පමණ වත්කම් සම්බන්ධයෙන් හිමිකරුවෙකු වීමේ සිද්ධිය සම්බන්ධයෙන් විභාග වන නඩුවකට අදාළව හිටපු අමාත්‍ය විමල් වීරවංශ මහතාට අධිචෝදනා ලබාදීමට කොළඹ මහාධිකරණ විනිසුරු විකුම් කළුආරච්චි මහතා කටයුතු කළේය.

එසේම හිටපු අමාත්‍යවරයා රුපියල් ලක්ෂ 5 බැගින් වූ ශරීර ඇප දෙකක් මත මුදාහරින ලෙසද කොළඹ මහාධිකරණ විනිසුරුවරයා අද 11දා නියෝගය කළේය‍. මෙම  නඩුව ලබන මස 19 දා  විභාගයට  නැවතත් විභාග කිරීමට නියමිතය.

wimal weerwansa

 

රවීට සිතාසි

සතොසට සහල් මිලදී ගැනීමේදී රුපියල් ලක්‍ෂ 40ක මුදලක් අවභාවිත කිරීම සම්බන්ධයෙන් වූ නඩුවකට අදාළව ලබන මාර්තු මස 09 වැනිදා අධිකරණය හමුවේ පෙනී සිටින ලෙස නියම කරමින් කොළඹ අතිරේක මහේස්ත්‍රාත් දුලානි අමරසිංහ මහත්මිය හිටපු මුදල් අමාත්‍ය රවි කරුණානායක මහතාට සිතාසි නිකුත් කළාය.

සතොස හිටපු සාමාන්‍යාධිකාරී නිමල් පෙරේරා මහතාට එරෙහිව අල්ලස් කොමිසම විසින් පවරා ඇති නඩුවක් විභාගයට ගන්නා ලද අවස්ථාවේදී හිටපු මුදල් අමාත්‍ය රවි කරුණානායක මහතා සම්බන්ධයෙන්ද කරුණු හෙළිවීම නිසා ඒ සම්බන්ධයෙන් කරුණු පැහැදිලි කර ගැනීමට මහේස්ත්‍රාත්වරිය මෙලෙස හිටපු මුදල් අමාත්‍යවරයාට සිතාසි නිකුත් කළාය.

2001 සහ 2002 වසරවලදී සතොසට සහල් මිලදී ගැනීමේදී රුපියල් මිලියන 04ක (ලක්‍ෂ 40ක) මුදලක් අවභාවිත කළ බවට චෝදනා කරමින් අල්ලස් හෝ දූෂණ විමර්ශන කොමිසම සතොස හිටපු සාමාන්‍යාධිකාරී නිමල් පෙරේරා මහතාට එරෙහිව නඩු පවරා ඇත.

මෙම නඩුවේ වැඩිදුර විභාගය ලබන මාර්තු 09 වැනිදා දක්වා කල්තැබිණි.

ravi 315

මහින්ද සමයේ බරපතළ වංචා 17කට අදාලකොමිෂන් වාර්තා ජනපතිට

මහින්ද රාජපක්‍ෂ හිටපු ජනාධිපතිවරයාගේ රාජ්‍ය පාලන සමය තුළ සිදුවූබරපතළ වංචා සහ දූෂණ සිද්ධි17කට අදාළ වාර්තා 17ක් බරපතළ වංචා සහ දූෂණ චෝදනා විමර්ශන ජනාධිපති පරීක්‍ෂණ කොමිසම අද (02දා)පෙරවරුවේ ජනාධිපති මෛත්‍රීපාල සිරිසේන මහතාට බාරදීමට නියමිතය.

බරපතළ වංචා සහ දූෂණ චෝදනා විමර්ශන ජනාධිපති පරීක්‍ෂණ කොමිසම විසින් දීර්ඝ සාක්‍ෂි විභාග කිරීම්වලින් අනතුරුව සකස් කර ඇති මෙම බරපතළ වංචා සහ දූෂණ පරීක්‍ෂණ වාර්තා 17ට අමතරව මෙවැනි බරපතළ වංචා සහ දූෂණ සිද්ධි යළි ඇති නොවීම සඳහා ගතයුතු ක්‍රියාමාර්ග ඇතුළත් නිර්දේශයන්ද කොමිසම ජනාධිපතිවරයාට බාරදීමට නියමිතය.

බරපතළ වංචා සහ දූෂණ සිද්ධි යළි ඇති නොවීම සඳහා ගතයුතු ක්‍රියාමාර්ග ඇතුළත් නිර්දේශයන් සහ යෝජනා අඩංගු වාර්තාව පිටු 1200කින් යුත් බව වාර්තා වේ.

හිටපු ජනාධිපති මහින්ද රාජපක්‍ෂ මහතාගේ රාජ්‍ය පාලන සමය වු 2010 ජනවාරී මස පළමුවැනිදාත් 2015 ජනවාරී මස පළමුවැනිදාත් අතර කාලය තුළ සිදුවු බරපතළ වංචා සහ දූෂණ සිද්ධීන් මෙන්ම රාජ්‍ය බලය අවභාවිතා කිරීම මඟින් රාජ්‍ය ආයතන වලට සිදුකළ පාඩු ආදීය සෙවීම සඳහා 2015 මාර්තු මස 15 වැනිදා ජනාධිපති මෛත්‍රීපාල සිරිසේන මහතා විසින් මෙම බරපතළ වංචා සහ දූෂණ චෝදනා විමර්ශන ජනාධිපති පරීක්‍ෂණ කොමිසම පත් කරන ලදී.

බරපතළ වංචා සහ දූෂණ චෝදනා පිළිබඳ විශේෂ ජනාධිපති පරීක්‍ෂණ කොමිසමේ සභාපතිවරයා ලෙස අභියාචනාධිකරණ විනිසුරු ප්‍රීතී පද්මන් සුරසේන මහතා පත්කරන ලද අතර, එහි සෙසු කොමසාරිස්වරුන් වශයෙන් මහාධිකරණ විනිසුරුවරුන් වන විකුම් කළුආරච්චි, ගිහාන් කුලතුංග, පියසේන රණසිංහ සහ හිටපු විගණකාධිපති පී.ඒ. පද්මතිලක යන මහත්වරු කටයුතු කරති.

ප්‍රථමයෙන්ම මෙම කොමිසමේ කොමසාරිස්වරයෙකු වශයෙන් මහාධිකරණ විනිසුරු අමේන්ද්‍ර සෙනෙවිරත්න මහතා කටයුතු කළ අතර, ඒ මහතා මහාධිකරණයේ රාජකාරි කරන අතරතුර හදිසියේ රෝගීවී අභාවප්‍රාප්ත වීමෙන් ඇතිවූ පුරප්පාඩුවට මහාධිකරණ විනිසුරු පියසේන රණසිංහ මහතා පත් කරන ලදී.

ජනාධිපති මෛත්‍රීපාල සිරිසේන මහතා විසින් 2015 මාර්තු මස 15 වැනිදා පත්කරන ලද මෙම බරපතළ වංචා සහ දූෂණ චෝදනා විමර්ශන ජනාධිපති පරීක්‍ෂණ කොමිසමේ කාලය අවස්ථා පහකදී දීර්ඝ කරන ලද අතර, එහි කාලය පසුගිය දෙසැම්බර් 31 වැනිදායින් අවසන් විය.

කොමිසමේ කටයුතු ආරම්භ කිරීමෙන් අනතුරුව පසුගිය රාජ්‍ය පාලන සමය තුළදී සිදුවූ බව කියන බරපතළ වංචා සහ දූෂණ සිද්ධි1599ක් පිළිබඳ පැමිණිලි කොමිසමට ලැබුණු අතර, මූලික විමර්ශනවලින් අනතුරුව පැමිණිලි 1180ක් පිළිබඳ ඉදිරි ක්‍රියාමාර්ග ගැනීම අනවශ්‍ය බව තීරණය කරමින් කොමිසම එම පැමිණිලි ඉවත දමනු ලැබීය. ඉතිරි පැමිණිලි 419ක් සම්බන්ධයෙන් විමර්ශන ආරම්භ කළ කොමිසම ඉන් පැමිණිලි 34ක් හැර සෙසු පැමිණිලි 385ද ඉවත දැමීය.

එම පැමිණිලි 34න් පැමිණිලි 17ක විමර්ශන කටයුතු අවසන් කර එම වාර්තා මීට පෙර අවස්ථාවලදී ජනාධිපති මෛත්‍රීපාල සිරිසේන මහතාට බාරදී ඇති අතර, ඉතිරිව තිබූ පැමිණිලි 17 සම්බන්ධයෙන් වූ වාර්තා අද (02දා)මෙලෙස බාරදීමට නියමිතය.

එලෙස බාරදෙන ලදබරපතළ වංචා සහ දූෂණ සිද්ධි වනුයේ,

01. ජාතික නිවාස සංවර්ධන අධිකාරිය සතු නිවාස හා කඩකාමර රජයේ තක්සේරු මුදලට වඩා අඩු මුදලට ඥාතීන්ට හා හිතවතුන්ට ලබාදුන් බවට හිටපු නිවාස අමාත්‍ය විමල් වීරවංශ මහතා, ජාතික නිවාස සංවර්ධන අධිකාරියේ සභාපතිවරයා ඇතුළු13 දෙනෙකුට එරෙහි සිද්ධිය.

02. උතුරු මැද පළාතේ වකුගඩු රෝගීන්ට ලබාදීම සඳහා ටෙන්ඩර් පටිපාටියෙන් බැහැරව ජලපෙරණ උපකරණ ලබාගෙන වංචා කළ බවට උතුරු මැද පළාත් සභාවේ අමාත්‍ය සේමසිංහ, එහි ගණකාධිකාරිවරයා ඇතුළු13 දෙනෙකුට එරෙහි සිද්ධිය.

03. හෙක්ටර් කොබ්බෑකඩුව කෘෂි පර්යේෂණ ආයතනයේ සිදුවූ වංචා සම්බන්ධයෙන් හිටපු කෘෂිකාර්මික අමාත්‍ය මහින්ද යාපා අබේවර්ධන මහතා ඇතුළු05 දෙනෙකුට එරෙහි සිද්ධිය.

04. ‘මහපොළ‘නෞකාව මිලදී ගැනීමේදී මූල්‍ය අක්‍රමිකතා සිදුකළ බවට වරාය අධිකාරියේ හිටපු සභාපති ප්‍රියත් බන්ධු වික්‍රම සහ ශ්‍රී ලංකා නැව් සංස්ථාවේ හිටපු විධායක අධ්‍යක්‍ෂසංජය සෙනරත් සේදර මහත්වරුන් ඇතුළු05 දෙනෙකුට එරෙහි සිද්ධිය.

05. රෝහල් පිරිසුදු කිරීම සඳහා ‘ක්‍රීෂොල්’ සබන් ටෙන්ඩර් පටිපාටියෙන් බැහැරව මිලදී ගෙන රුපියල් මිලියන දෙකකට අධික පාඩුවක් සිදුකළ බවට වෛද්‍ය සභාවේ සභාපති මහාචාර්ය ශාන්තිලාල් දේවප්‍රිය ජයසිංහ මහතා ඇතුළු06 දෙනෙකුට එරෙහි සිද්ධිය.

06. ‘දැයට කිරුළ’ උත්සවය වෙනුවෙන් අම්පාර ප්‍රදේශයේ මාර්ග අලුත්වැඩියා කටයුතු සංවර්ධනය කිරීමේදී අක්‍රමිකතා සිදුකළ බවට අම්පාර නගර සභාවේ සභාපති ඉන්දික නලීන් ජයවික්‍රම මහතා ඇතුළු07 දෙනෙකුට එරෙහි සිද්ධිය.

07. පොල්ගොල්ල මහින්ද රාජපක්‍ෂ රඟහලට විශේෂ වැදගත් පුද්ගලයින් (වී.අයි.පී.) ආසන මිලදී ගැනීමේදී ටෙන්ඩර් පටිපාටියෙන් බැහැරව කටයුතු කර රජයට පාඩු සිදුකළ බවට මධ්‍යම ඉංජිනේරු උපදේශන කාර්යාංශයේ හිටපු ලේකම් අමරවංශ මහතා ඇතුළු08 දෙනෙකුට එරෙහි සිද්ධිය.

08. පසු අස්වැන්න පිළිබඳ තාක්‍ෂණ ආයතනයේ මුදල් වංචා කළ බවට එහි අධ්‍යක්‍ෂ කමලරාසී ස්වර්ණතිලක ඇතුළු02 දෙනෙකුට එරෙහි සිද්ධිය.

09. බී ලූනු ගෙන්වීමේදී මුදල් වංචා කළ බවට හිටපු ජනාධිපති ලේකම් පී.බී.ජයසුන්දර, ස.තො.ස. හිටපු සභාපති නලීන් රුවන් ප්‍රනාන්දු මහත්වරුන් ඇතුළු04 දෙනෙකුට එරෙහි සිද්ධිය.

10. පෞද්ගලික බස්රථවලට බලපත්‍ර ලබාදීමේදී හා ව්‍යාජ උත්සව පවත්වා ඒ වෙනුවෙන් රජයේ මුදල් අවභාවිත කළ බවට ජාතික ගමනාගමන කොමිෂන් සභාවේ හිටපු සභාපති රේණුක පෙරේරා ඇතුළු08 දෙනෙකුට එරෙහි සිද්ධිය.

11. පසුගිය ජනාධිපතිවරණ සමයේදී හිටපු ජනාධිපති මහින්ද රාජපක්‍ෂ මහතාගේ මැතිවරණ දැන්වීම් ජාතික රූපවාහිනියේ පළකර රජයට පාඩු සිදුකළ බවට ජාතික රූපවාහිනියේ හිටපු සභාපති විමලසේන රූබසිංහ මහතා ඇතුළු07 දෙනෙකුට එරෙහි සිද්ධිය.

12. මධ්‍යම පළාතේ රෝහල්වල ලීභාණ්ඩ ඇතුළු ද්‍රව්‍යඅලුත්වැඩියා කිරීමේදී ටෙන්ඩරය ලබාගෙන රුපියල් ලක්‍ෂ 56ක රජයේ මුදල් වංචා කළ බවට මධ්‍යම පළාතේ සෞඛ්‍ය අධිකාරි කාර්යාලයේ ගණකාධිකාරිවරයාට එරෙහි සිද්ධිය.

13. සුනාමි අනතුරු ඇඟවීම් යන්ත්‍ර අලුත්වැඩියා කරන බව පවසා රජයේ මුදල් ලබාගෙන වංචා කළ බවට ආපදා කළමනාකරණ අමාත්‍යාංශයේ හිටපු ලේකම් එස්.එම්.මොහොමඩ් මහතා ඇතුළු  තිදෙනෙකුට එරෙහි සිද්ධිය.

14. දීඝවාපී විහාරය ප්‍රතිසංස්කරණය කිරීම සඳහා තත්ත්වයෙන් බාල ගඩොල් සපයා රජයේ මුදල් ලබාගෙන වංචා කළ බවට පුරාවිද්‍යා දෙපාර්තමේන්තුවේ නැගෙනහිර ප්‍රදේශයේ හිටපු පුරාවිද්‍යා අධ්‍යක්‍ෂ සෙනරත් බණ්ඩාර මහතා ඇතුළු06 දෙනෙකුට එරෙහි සිද්ධිය.

15. කන්කසන්තුරය සිමෙන්ති සංස්ථාවේ තිබූ අබලි යකඩ විකිණීම සඳහා ටෙන්ඩර් කැඳවා එම යකඩ වෙනුවට කන්කසන්තුරය සිමෙන්ති සංස්ථාවේ තිබූ තඹ සහ පිත්තල කපා විකුණා රුපියල් කෝටි ගණනක මුදල් වංචා කළ බවට හිටපු හමුදාපතිවරුන් වන මහින්ද සතරසිංහ, දයා රත්නායක මහත්වරුන් ඇතුළු06 දෙනෙකුට එරෙහි සිද්ධිය.

16. ඖෂධ නියාමන අධිකාරියේ අධ්‍යක්‍ෂවරයා ලෙස කටයුතු කරමින් ඖෂධ මිලදී ගැනීමේදී සිදුකළ වංචාවලින් රජයට පාඩු සිදුකළ බවට වෛද්‍ය සභාවේ හිටපු සභාපති වෛද්‍ය අමල් සිල්වා මහතා ඇතුළු13 දෙනෙකුට එරෙහි සිද්ධිය.

17. තරුණ වැඩසටහන් පවත්වන බව පවසමින් අසත්‍ය කරුණු ඉදිරිපත් කර රජයේ මුදල් ලබාගෙන වංචා කළ බවට ජාතික තරුණ සේවා සභාවේ හිටපු සභාපති නීතිඥ ලලිත් යූ. පෙරේරා මහතා ඇතුළු07 දෙනෙකුට එරෙහි සිද්ධිය.

0a6112ec7a22994bfb997fcc86e77423_XL

රාජ්‍ය අමාත්‍ය රංගේ බණ්ඩාර නිදොස් කොට නිදහස්

සුඛෝපභෝගී මෝටර් රථයක් පවරා දීමේ පොරොන්දුව මත රුපියල් ලක්‍ෂ 54ක මුදලක් ලබාගෙන වංචා කළ බවට චෝදනා ලබා සිටි වාරිමාර්ග රාජ්‍ය අමාත්‍ය පාලිත රංගේ බණ්ඩාර මහතා නිදොස් කොට නිදහස් කරන ලෙස කොළඹ මහාධිකරණ විනිසුරු ඒ.ඒ.ආර්. හෙයියන්තුඩුව  මහතා නියම කළේය.

පාලිත රංගේ බණ්ඩාර මහතාට එරෙහිව පවරා ඇති නඩුවට පාදක වූ සිද්ධිය සමථයකට පත්වූ බව එහි පැමිණිලි පාර්ශ්වය දිවුරුම් ප්‍රකාශයක් මගින් දැනුම් දී ඇති බවට නියෝජ්‍ය සොලිසිටර් ජනරාල් ඩිලාන් රත්නායක මහතා කළ දැනුම් දීමක් සැලකිල්ලට ගත් විනිසුරුවරයා නඩු කටයුතු අවසන් කරමින් එලෙස නියම කළේය.

2002 මාර්තු මස 22වැනිදා හෝ ඊට ආසන්න දිනයක මාදිවෙලදී සුඛෝපභෝගී මෝටර් රථයක් වසර පහක කාලයකින් පවරා දීමේ පොරොන්දුව මත රුපියල් ලක්‍ෂ 54ක මුදලක් දිනේෂ් රත්නායක නමැත්තාගෙන් ලබාගෙන පොරොන්දු වූ පරිදි මෝටර් රථය පවරා නොදී එම මුදල සම්බන්ධයෙන් සාපරාධී විශ්වාසය කඩකරන ලදැයි විත්තිකරුට  එරෙහිව  නීතිපතිවරයා  විසින්  චෝදනා  නගා තිබිණි.

law-court_2900691b

ධම්මාලෝක හිමියන්ට රට යන්න අවසර

සොරකම් කරන ලද අලි පැටවෙකු බව දැන එම අලි පැටවා තම විහාරස්ථානයේ තබාගෙන සිටි බවට චෝදනා ලැබ සිටින උඩුවේ ධම්මාලෝක හිමියන්ට ධර්ම ප්‍රචාරක කටයුතු සඳහා විදේශගත වීමට කොළඹ මහාධිකරණ විනිසුරු සම්පත් විජේරත්න මහතා අද (12දා) අවසර දුන්නේය.

ධර්ම ප්‍රචාරක කටයුතු සඳහා වැඩම කරන ලෙස උඩුවේ ධම්මාලෝක හිමියන්ට ලෝකයේ විවිධ රටවල සිටින බෞද්ධයන්ගෙන් ආරාධනා ලැබී ඇති හෙයින් ඒ සඳහා විදේශගත වීමට අවසර දෙන්නැයි උන්වහන්සේගේ නීතිඥවරයා කළ ඉල්ලීමක් පිළිගත් විනිසුරුවරයා ලබන ජනවාරි මස 18 වැනිදා තෙක් විදේශගත වීමට මෙලෙස අවසර දුන්නේය.

ඒ අනුව අද (12දා) සිට ලබන ජනවාරි මස 18 වැනිදා තෙක් ඇමෙරිකාව, තායිලන්තය ඇතුළු රටවලට ධර්ම ප්‍රචාරක කටයුතු සඳහා වැඩම කිරීමට විනිසුරුවරයා උඩුවේ ධම්මාලෝක හිමියන්ට අවසර දුන්නේය.

Uduwe-Dhammaloka-Thero

හෙරොයින් නිසා කාන්තාවක් දිවි ඇතිතෙක් සිරගෙට

හෙරොයින් ග්‍රෑම් 11ක් ළඟ තබා ගැනීමේ චෝදනාවට වරදකරු වූ කාන්තාවකට කොළඹ මහාධිකරණ විනිසුරු ගිහාන් කුලතුංග මහතා අද (11දා) ජීවිතාන්තය දක්වා වූ බරපතළ වැඩ සහිත සිරදඬුවමක් නියම කළේය.

අදාළ කාන්තාව මීට වසර 16කට පෙර කොළඹ ගෑන්ඩ්පාස් ප්‍රදේශයේදී හෙරොයින් ග්‍රෑම් 11ක් ළඟ තබාගත් බවට වූ චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇතැයි තීරණය කළ විනිසුරුවරයාඇයට බරපතළ වැඩ සහිත සිරදඬුවම් නියම කළේය.

මෙලෙස සිරදඬුවම් නියම කෙරුණේ, සන්දනම් පිච්චෙයි මේරී මැටිල්ඩා (අවු.48) නමැත්තියකටය.

law-court_2900691b

 

ජෝතිගේ ගීත අවසර නැතිව ගානය කළ මේරියන්ස් නලින්ගෙන් කෝටියක වන්දි ඉල්ලයි

එච්.ආර්. ජෝතිපාල මහතාගේ ගීත අවසරයකින් තොරව ගායනා කිරීමෙන් තමන්ට සිදුවු පාඩුව වෙනුවෙන් රුපියල් කෝටියක වන්දියක් ‘මේරියන්ස්’ සංගීත කණ්ඩායමේ නායක නලීන් පෙරේරාගෙන් අයකර දෙන්නැයි ඉල්ලා එච්.ආර්. ජෝතිපාල මහතාගේ බිරිඳ සහ දරුවන් සිව්දෙනා කොළඹ වානිජ්‍ය මහාධිකරණයේ නඩු පවරා ඇත.

මෙම නඩුව ලබන වසරේ ජනවාරී 10 වැනිදා කැඳවීමට නියම කළ කොළඹ වානිජ මහාධිකරණය එදින අධිකරණයේ පෙනී සිටින ලෙස නියම කරමින් ‘මේරියන්ස්’ නායක නලීන් පෙරේරාට නොතිසි නිකුත් කළේය.

එච්.ආර්. ජෝතිපාල මහතාගේ බිරිඳ වන පෙත්සම්කාර බ්ලොසම් ජෝතිපාල මහත්මිය විසින් මෙම පෙත්සම ඉදිරිපත් කොට ඇති අතර තමන්ගේ සැමියා වන එච්.ආර්. ජෝතිපාල මහතා මෙරට සුවිශේෂි ගායකයෙකු වු බවත් ඔහු ගීත දසදහසකට වඩා ගායනා කොට ඇති බවත් එම පෙත්සමේ සඳහන් කොට ඇත.

එච්.ආර්. ජෝතිපාල මහතා තමන්ගේම ගීත වලින් සංගීත ඇල්බම් සීයයකට වඩා නිකුත් කොට ඇති බවද සඳහන් කරන පෙත්සම්කාර බ්ලොසම් ජෝතිපාල මහත්මිය වගඋත්තරකරුගේ ප‍්‍රධානත්වයෙන් පසුගිය කාලයේ පැවැත ; zkings of 70's unplugZ   සංගීත ප‍්‍රසංගයේදී වගඋත්තරකරු එච්.ආර්. ජෝතිපාල මහතා 70 දෂකයේදී ගායනා කළ ගීත කිහිපයක්ම ගායනා කොට ඇති බවත් ඒ සඳහා ඔහු තමන්ගේ කිසිදු අවසරයක් ලබාගෙන නොමැති බවත් සඳහන් කොට ඇත.

එච්.ආර්. ජෝතිපාල මහතා ගායනා කළ ගීත කිසිදු අවසරයක් නොමැතිව ගායනා කිරීම බුද්ධිමය දේපළ පනත යටතේ වරදක් බව පෙන්වා දෙන පෙත්සම්කාරිය මෙමඟින් වගඋත්තරකරු අයුතු ලෙස මුදල් උපයා ඇති බවද සඳහන් කොට ඇත.

2017-01-22-kings-of-70s-1-1024x682

 

දළපූට්ටුවා ඝාතන පැමිණිල්ල මෙහෙයවීමට නීතිපති ජ්‍යෙෂ්ඨ නිලධාරියෙක් යොදවයි

ගජමුතු ලබාගැනීමේ අදහසින් ගල්ගමුවේ දළපූට්ටුවාට වෙඩිතබා මරා දැමීමේ සිද්ධියට අදාළ පැමිණිල්ල මෙහෙයවීම සඳහා නීතිපති දෙපාර්තමේන්තුවේ ජ්‍යෙෂ්ඨ නිලධාරියෙකු යෙදවීමට වැඩබලන නීතිපති අතිරේක සොලිසිටර් ජෙනරාල් ජනාධිපති නීතිඥ දප්පුල ද ලිවේරා මහතා  තීරණය කොට ඇත.

මෙම සිද්ධියට අදාළව පරීක්ෂණ පවත්වන රහස් පොලිස් නිලධාරීන් නීතිපතිවරයාගෙන් සිදු කළ ඉල්ලීමක් සැලකිල්ලට ගනිමින් එලෙස තීරණය කොට ඇතැයි වාර්තාවේ.

දළපූට්ටුවාගේ ඝාතනය සම්බන්ධයෙන් පරීක්ෂණ පැවැත්වීම පොලිස්පතිවරයා විසින් රහස් පොලීසියට පැවසීමෙන් අනතුරුව මෙම පරීක්ෂණ කටයුතු සඳහා නීතිපති දෙපාර්තමේන්තුවේ නිලධාරීන්ගේ සහාය ලබාදෙන ලෙස රහස් පොලීසිය විසින් ඉල්ලීමක් කොට තිබිණි.

එම ඉල්ලීම පිළිගනිමින් වැඩබලන මහෙස්ත්‍රාත්වරයා විසින් මෙම සිද්ධියේ පැමිණිල්ල මෙහෙයවීමේ කටයුතු සඳහා නීතිපති දෙපාර්තමේන්තුවේ ජ්‍යෙෂ්ඨ නිලධාරියෙකු යෙදවීමට තීරණයකොට ඇතැයි වාර්තාවේ.

මේ සම්බන්ධයෙන් පරීක්ෂණ සිදුකළ රහස් පොලිස් නිලධාරීන් දළපූට්ටුවා ඝාතනයට සම්බන්ධ බව කියන සැකකරුවන් 08 දෙනෙකු අත්අඩංගුවට ගෙන මේ වනවිට රිමාන්ඩ් භාරයට පත්කොට ඇති අතර, දළපූට්ටුවා ඝාතනයට යොදාගත් ගිනිඅවි ඇතුළු උපකරණ රාශියක්ද සොයාගෙන ඇත.

Dala Puttuwa