Monthly Archives: January 2018

නේවි සම්පත් සොයයි

පුද්ගලයන් 11 දෙනෙකු පැහැරගෙන ගොස් නීති විරෝධී ලෙස රඳවාගෙන ඝාතනය කළ බවට චෝදනා එල්ල වී ඇතිනේවි සම්පත් නොහොත් හෙට්ටිආරච්චිලාගේ චන්දන ප්‍රසාද් හෙට්ටිආරච්චි පිළිබඳ තොරතුරු දන්නේ නම් ළඟම පොලීසියට දන්වන ලෙස පොලිස් මූලස්ථානය සඳහන් කරයි.

එසේ නොමැති නම් අපරාධ පරීක්ෂණ දෙපාර්තමේන්තුවේ මෙහෙයුම් මැදිරියේ 0112422176 හෝ අපරාධ පරීක්ෂණ දෙපාර්තමේන්තුවේ 0112320141 සිට 145 දක්වා අංකවලට හෝ සමූහ මංකොල්ල විමර්ශන අංශයේ 0112393621යන දුරකථන අංකවලට දැනුම්දෙන ලෙසද පොලිස් මූලස්ථානය ඉල්ලා සිටියි.

පුද්ගලයන් 11 දෙනෙකු පැහැරගෙන ගොස් නීතිවිරෝධී ලෙස රඳවා තබාගෙන ඝාතනය කිරීමේ චෝදනාව මත නාවික හමුදා නිලධාරීන් කිහිප දෙනෙකු මේ වනවිට අත්අඩංගුවට ගෙන තිබේ.

අපරාධ පරීක්ෂණ දෙපාර්තමේන්තුව සිදුකරන පරීක්ෂණවලට අනුව මෙම අත්අඩංගුවට ගැනීම් සිදුකර තිබෙන අතර, මෙම සැකකරු සම්බන්ධයෙන්ද කොටුව මහේස්ත්‍රාත් අධිකරණයෙන් වරෙන්තුවක් නිකුත් වී තිබෙන බව පොලිස් මූලස්ථානය සඳහන් කරයි.

scan0001

 

තැපැල් ඡන්ද තෙවැනි අදියර හෙට සහ අනිද්දා

පළාත් පාලන ආයතන මැතිවරණයට අදාළ තුන්වන අදියරේ තැපැල් ඡන්ද විමසීම හෙට (01දා) සහ අනිද්දා (02දා) යන දෙදින තුළ පැවැත්වෙන බව මැතිවරණ කොමිෂන් සභාව සඳහන් කරයි.

තැපැල් ඡන්ද භාවිත කිරීමේ පළමු අදියර ජනවාරි 22 වන දින පැවැත්වූ අතර, එදින පොලිස් නිලධාරීන්ට, මැතිවරණ නිලධාරීන්ට හා දිස්ත්‍රික් ලේකම් කාර්යාලවල නිලධාරීන්ට ඡන්දය භාවිත කිරීමට අවස්ථාව ලබාදෙනු ලැබිණි. දෙවන අදියරේ ඡන්ද විමසීම පසුගිය 25 හා 26 යන දෙදින තුළ පැවති අතර, එම දිනවල සෙසු රාජ්‍ය සේවකයන් ඡන්දය භාවිත කිරීම සිදුවිය.

මෙම දින තුන තුළදී ඡන්දය භාවිත කිරීමට නොහැකි වූ තැපැල් ඡන්ද දායකයන් සඳහා ඡන්දය ප්‍රකාශ කිරීමට හෙට (01දා) සහ අනිද්දා (02දා) යන දින දෙක වෙන්කර ඇත. මේ අනුව හෙට සහ අනිද්දා යන දිනයන්හී කාර්යාල වේලාවන් තුළ දිස්ත්‍රික් මැතිවරණ කාර්යාලවලදී හා කොළඹ දිස්ත්‍රික්කය නියෝජනය කරන ඡන්දදායකයන්ට මැතිවරණ මහලේකම් කාර්යාලයේදී ඡන්දය භාවිත කිරීමට අවස්ථාව ලබා දී තිබේ. 

ජනවාරි මාසයේදී රජයේ රෝහල්වලට ඩෙංගු රෝගීන් 6203ක්

මේ වසරේ ජනවාරි පළමු වන දින සිට අද (31දා) දිනය දක්වා කාලය තුළදී ඩෙංගු රෝගීන් හයදහස් දෙසිය තුනක් රජයේ රෝහල් වලින් ප්‍රතිකාර ලබාගෙන තිබේ.

රෝගීන් තිදෙනෙකු මෙම කාලය තුළදී මිය ගොස් තිබෙන අතර, වැඩිම රෝගීන් ප්‍රමාණයක් වාර්තා වී තිබෙන්නේ කොළඹ දිස්ත්‍රික්කයෙනි. එම දිස්ත්‍රික්කයෙන් රෝගීන් දහසක් වාර්තා වී තිබෙන අතර, කොළඹ මහ නගර සභා සීමාව තුළින් රෝගීන් 353ක් වාර්තා වී ඇති බව වසංගත රෝග විද්‍යා අංශය සඳහන් කරයි.

ගම්පහ දිස්ත්‍රික්කයෙන් රෝගීන් 603ක්, කළුතර දිස්ත්‍රික්කයෙන් රෝගීන් 354ක්, මහනුවර දිස්ත්‍රික්කයෙන් රෝගීන් 464ක්, මාතලේ දිස්ත්‍රික්කයෙන් රෝගීන් 129ක්, නුවරඑළිය දිස්ත්‍රික්කයෙන් රෝගීන් 22ක්, යාපනය දිස්ත්‍රික්කයෙන් රෝගීන් 551ක්, මාතර දිස්ත්‍රික්කයෙන් රෝගීන් 115ක්, හම්බන්තොට දිස්ත්‍රික්කයෙන් රෝගීන් 125ක්, කිලිනොච්චිය දිස්ත්‍රික්කයෙන් රෝගීන් 38ක්, මන්නාරම දිස්ත්‍රික්කයෙන් රෝගීන් 08ක්, වවුනියා දිස්ත්‍රික්කයෙන් රෝගීන් 64ක් වශයෙන් රෝගීන් වාර්තා වී තිබේ.

මුලතිව් දිස්ත්‍රික්කයෙන් රෝගීන් 09ක්, මඩකලපුව දිස්ත්‍රික්කයෙන් රෝගීන් 533ක්, ත්‍රිකුණාමල දිස්ත්‍රික්කයෙන් රෝගීන් 466න්, කුරුණෑගල දිස්ත්‍රික්කයෙන් රෝගීන් 466ක්, පුත්තලම දිස්ත්‍රික්කයෙන් රෝගීන් 532ක්, අනුරාධපුර දිස්ත්‍රික්කයෙන් රෝගීන් 73ක්, පොළොන්නරුව දිස්ත්‍රික්කයෙන් රෝගීන් 37ක්, බදුල්ල දිස්ත්‍රික්කයෙන් රෝගීන් 52ක්, මොණරාගල දිස්ත්‍රික්කයෙන් රෝගීන් 177ක්, රත්නපුර දිස්ත්‍රික්කයෙන් රෝගීන් 100ක්, කෑගල්ල දිස්ත්‍රික්කයෙන් රෝගීන් 161ක්, අම්පාර දිස්ත්‍රික්කයෙන් රෝගීන් 447ක් වාර්තා වී ඇත.  

 

පොල් වගාව සඳහා යාන්ත්‍රීකරණය ඉදිරි මාසයේදී හඳුන්වාදෙයි

එළඹෙන මාසයක කාලය තුළදී ශ්‍රී ලංකාවේ පොල් වගාව සඳහා යාන්ත්‍රීකරණය හඳුන්වාදීමට පොල් සංවර්ධන මණ්ඩලය තීරණය කර තිබේ.

එහිදී භූමිය කළමනාකරණය, මයිටා ඇතුළු අනෙකුත් දිලීර ආසාදන පාලනය හා පොල් නෙළීම යනාදී තත්ත්වයන් සඳහා ඉන්දියාවේ තාක්ෂණික ශිල්පීය ක්‍රම වගාකරුවන් වෙත හඳුන්වා දීමට කටයුතු යොදා ඇතැයිද සඳහන් වේ.

ගුවන් තොටුපොළට ආ මොණරා ආපසු හරවා යවළා

චිත්තවේග පාලනය වෙනුවෙන් ඇතැම් පුද්ගලයන් සතුන් යොදා ගැනීම විදෙස් රටවල දැකිය හැකි අතර, මෙම සිදුවීමද එවැනි චිත්ත වේග පාලනයට යොදාගත් මොණරෙකු ගුවන් යානයක රැගෙන යාමේදී ඇති වූ අකරතැබ්බයක් පිළිබඳ කතා පුවතකි.

මෙම මොණරා රැගෙන යාම සඳහා එම සතාගේ හිමිකාරිය විසින් නියමිත පරිදි ගුවන් ටිකට්පතක් ලබාගෙන තිබුණද, නිව් ජර්සි නුවර නිවාක් ගුවන් තොටුපොළට පැමිණි විට මොණරාගේ බර සහ ප්‍රමාණය පිළිබඳ ගැටලුවක් මතු කරමින් එම සත්වයා ගුවනින් රැගෙන යාමට ඉඩ ලබාදිය නොහැකි බව ගුවන් සමාගම පවසා තිබේ.

යුනයිටඩ් ගුවන් සමාගම වැඩිදුරටත් පවසා ඇත්තේ අදාළ කාන්තාවට ගුවන් තොටුපොළට පැමිණීමට පෙර ඔවුන් මෙම කරුණු දැනුම් දුන් බවයි.

කෙසේ වෙතත්, අදාළ කාන්තාව තම මොණරා සමග ගුවන් තොටුපොළට පැමිණ සිටින ඡායාරූප මාධ්‍යයේ පළ වී තිබූ අතර, මොණරාද කිසිදු හැලහොල්මනයකින් තොරව තම හිමිකාරිය සමග ගුවන් තොටුපොළේ සිටින ආකාරය දැකිය හැකි විය.

2 1_Peokok

පොහොට්ටුවේ අනාගත ජනාධිපති අපේක්ෂකයා රටෙන් පැනගිහින් – රාජිත

මිග් යානා ගනුදෙනුවේදී සිදු කළ දූෂණ වංචා හේතුවෙන් අත්අඩංගුවට ගැනීමේ බිය නිසා පොහොට්ටුවේ ආනාගත ජනාධිපති අපේක්ෂකයා රටෙන් පැනගොස් ඇති බව සෞඛ්‍ය, පෝෂණ හා දේශීය වෛද්‍ය අමාත්‍ය දොස්තර රාජිත සේනාරත්න මහතා ප්‍රකාශ කළේය.Rajitha-Senaratne1

ඒ මහතා මේ බව ප්‍රකාශ කළේ අද (31දා) කඩවත කිරිල්ලවල ප්‍රදේශයේදීය.

මෙහිදී වැඩිදුරටත් අදහස් දැක් වූ සෞඛ්‍ය අමාත්‍යවරයා,

“රටේ ප්‍රධාන පෙලේ පුවත්පත් කතුවරයෙකු ප්‍රථම වරට ඝාතනය කළේ රාජපක්ෂ යුගයේදීයි. ඒ ලසන්ත වික්‍රමතුංග මහතායි. හිටපු ආරක්ෂක ලේකම්වරයා විසින් සිදු කළ මිග් යානා ගනුදෙනුව පිළිබඳ මාධ්‍යයේ ලිපි පළකිරීම එම ඝාතනයට හේතු වී තිබෙනවා.

එය රණවිරු ගැහිල්ලක්. අද මෙම රණවිරුවා රටෙත් නැහැ. ඇමෙරිකාවට පැනලා ඉන්නේ. පොහොට්ටුවේ අනාගත ජනාධිපති අපේක්ෂකයා ඔහුයි. රටේ නැති අනාගත ජනාධිපති අපේක්ෂකයා ලංකාවට එන්නේ දොළොස්වනදායි. ඒ  මැතිවරණය අවසන් වූ පසුවයි. අත්අඩංගුවට ගනියි කියලා තමයි රටෙන් පැනලා ඉන්නේ. නමුත් එම රණවිරු ගෝඨාභය අත්අඩගුවට ගැනීමට මේ වනවිට සියල්ල සූදානම්. චෝදනා ඔප්පු වී තිබෙනවා. ඉදිරිකාලයේදී ඔහු හිරේ විලංගුවේ වැටෙනවා. මිග් යානා ගනුදෙනුවෙන් හොරකම් කළ මුදල හොංකොං බැංකුවල තැන්පත් කර තිබෙනවා. එම මුදල් ඉන්දීය ජාතිකයන් පස්දෙනෙකු විසින් තැන්පත් කර තිබෙනවා” යැයි ප්‍රකාශ කළේය.

බැඳුම්කර සිද්ධියට එජාපයට චෝදනා කිරීම දේශපාලන අනාථයන්ගෙ වැඩක් – තලතා

බැඳුම්කර සිදුවීම මූලික කරගනිමින් එක්සත් ජාතික පක්ෂයට චෝදනා කිරීම සඳහා බංකොළොත් වුණු දේශපාලන අනාථයන් කටයුතු කරන බව අධිකරණ හා විදේශ රැකියා ඇමතිනී නීතිඥ තලතා අතුකෝරළ මහත්මිය සඳහන් කළාය.

අමාත්‍යවරිය මේ අදහස් පළකළේ පළාත් පාලන මැතිවරණය වෙනුවෙන් බලංගොඩ, ඉඹුල්පේ ප්‍රදේශයේ ඊයේ (30දා) පැවැති ජනහමුවක් අමතමිනි.

එහිදී අදහස් දැක්වූ අමාත්‍යවරිය,

“බැඳුම්කර සිද්ධිය මුල්කරගෙන එක්සත් ජාතික පක්ෂයට චෝදනා නගන්න බංකොළොත්වුණ දේශපාලන අනාථයන් කටයුතු කරනවා. මේ චෝදනාවට ලක්වුණු අපේ අමාත්‍යවරයෙක් අමාත්‍ය ධුරයෙන් පවා ඉල්ලා අස්වුණා. පක්ෂයක් විදිහට අපි තීරණය කරලා තියෙනවා ඔහුගේ නිර්දෝෂී බව ඔප්පු වනතුරු පක්ෂයේ තනතුරුවලිනුත් ඉවත් වෙලා ඉන්න. ඉතිහාසයේ ප‍්‍රථම වතාවට තමයි බලය තියෙනකොට රටේ අගමැතිවරයෙක් කොමිෂන් සභාවක් ඉදිරියේ සාක්ෂි ලබාදුන්නේ. අපි නිවැරදි පක්ෂයක්. මීට පෙරත් චෝදනා එල්ල වුණු අවස්ථාවක තිලක් මාරපන මහතා අමාත්‍ය ධුරයෙන් ඉල්ලා අස්වුණා. රවි කරුණානායක මහතා ඉවත් වුණා. මේවා හොඳ දේශපාලන ආදර්ශ. රටට ආදර්ශයක් වෙන විදිහට අපි කටයුතු කරලා තියෙනවා. හොරා ඒ පැත්තේ ඉඳන් හොරකම් කළත් එකයි. මේ පැත්තේ ඉඳන් හොරකම් කළත් එකයි. අපි මේ රටේ ජනතාවට පොරොන්දු වුණා හොරු අල්ලලා දඬුවම් දීලා රටේ දේපළ අනිසි විදිහට භාවිත කරපු අයට අනිවාර්යයෙන්ම දඬුවම් ලබාදෙනවා. බැඳුම්කර සිද්ධියට එජාපයට චෝදනා කරන එක බංකොළොත් වුණු දේශපාලන අනාථයන්ගෙ වැඩක්.

ඒ නිසා පෙබරවාරි 10න් පස්සේ කවුරුහරි හිතනවා නම් මේ රටේ බලය වෙනස් වෙනවා කියලා ඒක හීනයක්. මේ සම්මුතිවාදී ආණ්ඩුව 2020 වෙනකම් ජනාධිපතිතුමාත් අගමැතිතුමාත් කරගෙන යනවා. 2020න් පස්සේ බලමු අපි මොකද වෙන්නේ කියලා. එතෙක් කවුරුත් කලබල නොවී කඩාවැටුණු සංවර්ධනය නගා සිටුවන්න සහාය දෙන්න.”

27164326_1211864992278688_9175226578396964275_o

 

 

70වැනි නිදහස් සැමරුමට සමරු මුදල් නෝට්ටුවක්

70 වැනි නිදහස් සංවත්සරය සැමරීම වෙනුවෙන් ශ්‍රී ලංකා මහ බැංකුව විසින් රුපියල් 1000 වටිනාකමක් ඇති සමරු මුදල් නෝට්ටුවක් නිකුත් කිරීමට පියවර ගෙන ඇත.

මෙය මහබැංකුව විසින් නිකුත් කරන සිව්වැනි සමරු මුදල් නෝට්ටුව වෙයි. මුදල් නෝට්ටුව පෙබරවාරි 06 සිට බලපත්‍රලාභී වානිජ බංකු හරහා සංසරණයට නිකුත් කරන බව මහබැංකුව නිකුත් කළ මාධ්‍ය නිවේදනයේ සඳහන් වෙයි.

 

ශ්‍රී ලංකා රජයේ නිළ පුවත් වෙබ් අඩවිය

හවායි මිසයිලය ගැන SMS යැවූ නිලධාරීන් ඉල්ලා අස්වෙයි

මිසයිල අවදානමක් පිළිබඳ කෙටි පණිවුඩයක් වැරදීමකින් යැවීම පිළිබඳ වරද භාර ගනිමින් හවායි හදිසි කළමනාකරණ ඒජන්සියේ ජ්‍යෙෂ්ඨ නිලධාරීන් දෙදෙනෙකු සිය ධුරයන්ගෙන් ඉවත්ව තිබේ.

පසුගිය ජනවාරි 13 වැනිදා යැවුණු මෙම කෙටි පණිවුඩය හේතුවෙන් හවායි දූපත පුරා දැඩි කලබලයක් ඇතිව තිබුණු අතර, එය යළි නිවැරදි කිරීමට විනාඩි 38ක පමණ කාලයක් ගත වී තිබුණි.

හදිසි කළමනාකරණ ඒජන්සියේ පරිපාලක වර්න් මියාගි සහ විධායක නිලධාරී ටොඩී ක්ලෙයාර්මොන්ට් මෙසේ සිය ධුරයන්ගෙන් ඉවත් වූ නිලධාරීන්ය.

ඔවුන් විසින් වැරදීමකින් යවනු ලැබූ මෙම කෙටි පණිවුඩය සම්බන්ධයෙන් සිදුකෙරුණු අභ්‍යන්තර පරීක්ෂණයන්ගෙන්ද ඔවුන් වෙත චෝදනා එල්ල වී තිබුණි. 

1_Hawai q2

මැතිවරණ කටයුතු සාමකාමියි – පැෆරල්

පළාත් පාලන ආයතන මැතිවරණ සඳහා අපේක්ෂකයන් 57252ක් තරග කළ අතර, මෙවර මැතිවරණයේදී අනෙකුත් මැතිවරණ හා සංසන්දනය කිරීමේදී ඉතාමත් imagesසාමකාමී ආකාරයට මැතිවරණ ප්‍රචාරක කටයුතු සිදුවන බව පැෆරල් සංවිධානය සඳහන් කරයි.

යම් යම් සිදුවීම වාර්තාවෙමින් තිබෙන බවත්, එහෙත් මෙවර මැතිවරණයේදී රාජ්‍ය බලය හා දේපොළ අවභාවිතා කිරීම ඉතාමත් අඩු බවත් එම සංවිධානයේ විධායක අධ්‍යක්ෂක රෝහණ හෙට්ටිආරච්චි මහතා අද (31දා) පැවැති මාධ්‍ය සාකච්ඡාවකදී සඳහන් කළේය.

මැතිවරණය සාමකාමීව පැවැත්වෙමින් තිබියදී සමහර දේශපාලනඥයන් ඡන්දයේ වටිනාකම හෑල්ලු කිරීම සඳහා ඡන්ද දායකයන්ට අල්ලස් ලබාදීම සිදු කරමින් තිබෙන බවත්, මෙම ක්‍රියාව අනුමත නොකරන බවත් ඒ මහතා පවසා සිටියේය.

මෙවර මැතිවරණය නිරීක්ෂණය කිරීම සඳහා නිරීක්ෂකයන් 6000ක් යෙදවීමට කටයුතු කරන බවත්, මීට අමතරව ජංගම රථ 350ක් යෙදවීමට කටයුතු කරන බවත් ඒ මහතා වැඩිදුරටත් සඳහන් කළේය.