Monthly Archives: October 2017

ජනපතිගේ කටාර් සංචාරය හෙට

ජනාධිපති මෛත්‍රීපාල සිරිසේන මහතා හෙට (24දා) කටාරය බලා පිටත්වීමට නියමිතය. කටාර් රාජ්‍යයේ වෙසෙන ශ්‍රී ලාංකිකයන්ගේ ගැටලු විසඳීම මෙම සංචාරයේ ප්‍රධාන අරමුණ වී ඇත. ජනාධිපතිවරයා සමග සෞඛ්‍ය ඇමති රාජිත සේනාරත්න මහතාද මෙම සංචාරයට එක් වෙයි.

z_p02-Solving

 

යාල අද සිට යළි විවෘතයි

වසා දමා තිබූ රුහුණු යාල ජාතික අභය භූමිය යළි නරඹන්නන් සඳහා අද (23දා) දින සිට විවෘත කරන බව තිරසාර සංවර්ධන හා වනජීවී අමාත්‍ය ගාමිණී ජයවික්‍රම මහතා පවසයි.

පසුගිය සැප්තැම්බර් පළමු වැනිදා සිට වසා දැමුණු යාල අභය භූමිය මසකුත් දින 22කට පසුව යළි මෙසේ විවෘත කෙරෙයි. සතුන්ගේ ආවේණික ජෛව පැවැත්මට අදාළ කරුණු සැලකිල්ලට ගෙන සෑම වසරකදීම මෙලෙස යාල වනෝද්‍යානය වසා තබනු ලැබේ.

'යාල' යනු මිනිසාට සොබාදම් මවුන්ගෙන් ලද අපූරුතම දායාදයක් බැවින් එය නැරඹීමේදී සතා සිවුපාවාට අනතුරක්, හිරිහැරියක් නොවන ලෙස මානසිකත්වය ගොඩනගා ගත යුතු බව යාල සුරැකීමේ සංවිධානයේ සභාපති තරිඳු ගිහාන් මහතා පවසා සිටියි. 

yala-national-park-sri-lanka copy

තිස්ස මහාරාම රුක්මන් රත්නායක

හදිසියේ කැඳවූ ජපාන මැතිවරණය ඇරඹෙයි

ජපාන අගමැති ෂින්සෝ අබේ විසින් කැඳවූ හදිසි මැතිවරණය ආරම්භ වෙමින් ඊයේ (22දා) ජපාන ජාතිකයන් සිය ඡන්දය ප්‍රකාශ කිරීමට ඡන්ද මධ්‍යස්ථාන කරා පැමිණෙමින් සිටි බව විදෙස් වාර්තා පවසයි.

උතුරු කොරියාවෙන් වර්තමානයේ එල්ල වන න්‍යෂ්ටික අභියෝග හමුවේ කැඳවුණු මෙම හදිසි මැතිවරණයෙන් විශිෂ්ට ජයග්‍රහණක් ලබාගැනීමට අගමැති ෂින්සෝ අබේ බලාපොරොත්තු වෙයි.

විශේෂයෙන්ම, ජපානයේ විපක්ෂය අතිශය දුර්වල මට්ටමක පවතින වාතාවරණයක මෙන්ම, උතුරු කොරියානු බලපෑම් හමුවේ සෘජුව නැගී සිටින නායකයෙකු ලෙස අබේ මෙම මැතිවරණයට මුහුණදීමද ඔහුට වාසිදායක වනු ඇති බව දේශපාලන විචාරකයෝ පවසති.

මෙවර මැතිවරණයේදී ටෝකියෝ නගරාධිපති යුරිකෝ කොයිකේ විසින්, අගමැති ෂින්සෝ අබේ වෙත පැහැදිලි තරගයක් ලබාදෙනු ඇති බව කියවුණත් ඇය මැතිවරණයට ඉදිරිපත් නොවන බව පැවසීමෙන් වත්මන් අගමැතිවරයාට පැවති ප්‍රබලතම අභියෝගයද ඔහුට තවදුරටත් අභියෝගයක් නොවන බව තහවුරු විය.

ඒ අනුව, මෙවර මැතිවරණයේදී අගමැති ෂින්සෝ අබේගේ ලිබරල් ඩිමොක්‍රටික් පක්ෂය හැර විකල්පයක් ජපාන ජාතිකයන්ට නොමැති බව විචාරකයෝ පවසති. මේ තත්ත්වය තුළ තම පක්ෂයට තුනෙන් දෙකක බහුතර බලයක් හිමිවනු ඇති බව අබේ විශ්වාස කරන අතර, මෙය ව්‍යවස්ථාමය වෙනසක් සඳහා යොදා ගැනීමටද අබේ බලාපොරොත්තුවෙන් සිටියි.

මේ අතර, ජපානයේ මැතිවරණය පැවැත්වෙන අතරවාරයේදී ලෑන් සුළි කුණාටුව සිව්වැනි මට්ටමේ සුළි කුණාටුවක් ලෙස ජපානයේ දකුණුදිග ප්‍රදේශයට බලපෑම් කරමින් සිටියි. කෙසේ වෙතත්, මේ හේතුවෙන් මෙතෙක් මැතිවරණයට ප්‍රබල බලපෑමක් සිදුවූ බවක් වාර්තා නොවෙයි.

1_Japan

ගෙවීගිය වසර 14 තුළ දුප්පත්කම අඩුවෙලාලු

ශ්‍රී ලංකාවෙන් දුප්පත්කම අඩුවීමේ ප්‍රවනතාවක් පසුගිය වසර 14 තුළදීම දක්නට ලැබුණු බව ජනලේඛන හා සංඛ්‍යාලේඛන දෙපාර්තමේන්තුව පවසයි.

දරිද්‍රතා රේඛාව අනුව 2002 වර්ෂයේදී ජනගහන දරිද්‍රතා අනුපාතය 22.7%ක් වී තිබේ. 2016 වසරේදී එය 4.1%ක් දක්වා අඩුවී ඇත.

මෙසේ පසුගිය දශක කිහිපය තුළ ජාතික මට්ටමින් දුප්පත්කම අඩුවීමේ ප්‍රවණතාවක් පෙන්නුම් කළද, දුප්පත්භාවයේ අසමානතා තවමත් පළාත් මට්ටමින්, දිස්ත්‍රික් මට්ටමින් හා නාගරික, ග්‍රාමීය, වතු යන අංශ මට්ටමින් දක්නට ලැබුණු බවද ජනලේඛන හා සංඛ්‍යාලේඛන දෙපාර්තමේන්තුව වැඩිදුරටත් පවසයි.

2016 ගෘහ ඒකක ආදායම් හා වියදම් සමීක්‍‍ෂණ වාර්තාව එළිදක්වමින් ජනලේඛන හා සංඛ්‍යාලේඛන දෙපාර්තමේන්තුව මෙම කරුණු අනාවරණය කරයි.

බාධා තුනක් මතු වී පුංචි ඡන්දය මාර්තුවට කල් යයි?

පළාත් පාලන මැතිවරණය ලබන මාර්තු මාසය දක්වා කල්යාමට බොහෝ දුරට ඉඩ ඇතැයි රජයේ ආරචි මාර්ග සඳහන් කරයි. පළාත් පාලන මැතිවරණය ලබන වසරේ ජනවාරි මාසයේදී පැවැත්වීමට රජය මුලින් අදහස් කර තිබුණද, පළාත් පාලන ආයතනවල සභික සංඛ්‍යාව ගැසට් කිරීම ප්‍රමාද වීමත්, නුවරඑළිය දිස්ත්‍රික්කයේ පළාත් පාලන ආයතන ගණන වැඩි කිරීමට සිදුවීමත් මත මැතිවරණය කල්යනු ඇතැයි එම ආරංචි මාර්ග කියයි.

මැතිවරණය ජනවාරි මස 20 වැනිදා පැවැත්වීමට නම් පළාත් පාලන ආයතනවල සභික සංඛ්‍යාවට අදාළ ගැසට් නිවේදනය ඉකුත් 19 වැනිදා වනවිට විෂය භාර ඇමැතිවරයා ප්‍රකාශයට පත් කළ යුතු බව මැතිවරණ කොමිෂන් සභාවේ සභාපතිවරයා ප්‍රකාශ කර තිබිණි.

එහෙත් සභික සංඛ්‍යාව ගැසට් කිරීම ගිය සතියේ සිදු නොවූ බැවින් සහ නුවරඑළිය දිස්ත්‍රික්කයේ පළාත් පාලන ආයතන කිහිපයක් අලුතින් ස්ථාපනය කරන්නට සිදුවීම යන කාරණා මත මැතිවරණය පැවැත්වීම පෙබරවාරි හෝ මාර්තු මාසය දක්වා කල් යනු ඇතැයි වාර්තා වේ.

මේ අතර නාමයෝජනා බාරගෙන මැතිවරණය කල් දැමූ පුදුකුඩිඉරිප්පු සහ මුහුදුබඩපත්තුව යන ප්‍රාදේශීය සභා දෙකෙහි නාමයෝජනා අවලංගු කර
 මැතිවරණය නව ඡන්ද ක්‍රමය යටතේ පැවැත්වීම සඳහා නව පනතක් ගෙන ආ යුතු බැවින්ද මැතිවරණය කල් යනු ඇතැයි වාර්තා වේ. 

අජන්ත කුමාර අඟලකඩ (ඉරිදා ලංකාදීප)

Sri Lanka Go To The Polls In The Civil War Ravaged North Province

 

මුගාබේට WHO හොඳහිත තානාපතිකම හිමිවේවිද?

ලෝක සෞඛ්‍ය සංවිධානයේ හොඳහිත තානාපතිවරයෙකු ලෙස සිම්බාබ්වේ ජනාධිපති රොබට් මුගාබේ පත්කිරීම සම්බන්ධයෙන් එම සංවිධානයේ සභාපතිවරයා නැවත වරක් සලකා බලා තිබේ.

ආචාර්ය ටෙඩ්රෝස් ඇඩ්හැනොම් විසින් මෙම පත්කිරීම සම්න්ධයෙන් ගනු ලැබූ පළමු තීරණයට බලවත් විවේචන එල්ල වීම මීට හේතු වී ඇත.

ප්‍රජා සෞඛ්‍ය නැංවීම වෙනුවෙන් සිම්බාබ්වේ රාජ්‍ය නායකයා ගනු ලැබූ පියවර මීට පෙර ලෝක සෞඛ්‍ය සංවිධානයේ සභාපතිවරයා විසින් ඇගයීමට ලක් කළේය.

කෙසේ වෙතත්, සිම්බාබ්වේ සෞඛ්‍ය ක්ෂේත්‍රය පිරිහීමකට ලක්ව ඇති බවත්, ප්‍රමාණවත් තරම් ඖෂධ රෝහල් තුළ නොමැති බවත් පවසමින් මෙම නම් කිරීමට එරෙහිව චෝදනා දස දෙසින් පැමිණෙන විට ලෝක සෞඛ්‍ය සංවිධනයේ සභාපතිවරයා තම තීරණය පිළිබඳ නැවත සලකා බැලීමට කටයුතු කර තිබේ.

1_WHO

මගේ වගකීම ඉටුකළා, ආණ්ඩුවට එපා නම් යන්න ලෑස්තියි

කෝප් කමිටු සභාපතිවරයා ලෙස තමාගේ වගකීම අකුරටම ඉෂ්ට කර තිබෙන බවත්, තනතුරේ සිටින තාක්කල් එම වගකීම ඉෂ්ට කරන බවත් කෝප් කමිටු සභාපති සුනිල් හඳුන්නෙත්ති මහතා සඳහන් කළේය.

ආණ්ඩුවට තවදුරටත් කෝප් කමිටු සභාපතිවරයා ලෙස තමන්ගේ සේවය අවශ්‍ය නොවන්නේනම් තනතුරින් යාමට තමන් සූදානම් බවද ඔහු පවසා සිටියේය

සභාපතිවරයා මෙම අදහස් ප්‍රකාශ කළේ ඔහු කෝප් කමිටු සභාපති ධුරයෙන් ඉවත් කිරීමට ආණ්ඩුවේ  බලධාරීන් පිරිසක් කටයුතු කරන බවට වාර්තාවන තොරතුරු සම්බන්ධයෙන් කළ විමසුමකදීය.

Sunil-Handunnetti copy copy

කෝප් කමිටුවෙන් හඳුන්නෙත්ති ඉවතට?

කෝප් කමිටුවේ සභාපති ධුරයෙන් පාර්ලිමේන්තු මන්ත්‍රී සුනිල් හඳුන්නෙත්ති මහතා ඉවත් කිරීමට රජයේ බලධාරීන් සාකච්ඡා කරමින් පවතින බව දැනගන්නට ඇත.

මෙවර අයවැය යෝජනාවලිය සම්මත වූ පසු පාර්ලිමේන්තු සැසිවාරය කල් දැමීමට රජයේ අවධානය යොමු වී ඇතැයිද දැනගන්නට ඇත.

පාර්ලිමේන්තුව නව සැසි වාරය ආරම්භ වීමත් සමග සියලු කාරක සභා අහෝසි වී අලුතෙන් කාරක සභා පත් කළ යුතු වේ.

ඒ අවස්ථාවේදී කෝප් කමිටුවේ සභාපතිත්වයෙන් සුනිල් හඳුන්නෙත්ති මහතා ඉවත් කිරීමට යන බව දැනගන්නට ඇත. 

Parliament_3_1 copy copy

දයාසීලි ලියනගේ (ඉරිදා ලංකාදීප)

 

2016 මාසික ගෘහ ඒකක වියදම රු.54999

2016 වසරේදී ශ්‍රී ලංකාවේ මාසික මධ්‍යන්‍ය ගෘහ ඒකක වියදම රු.54,999ක් වී බවත්,  2012/13 වර්ෂයට වඩා 2016 වර්ෂයෙහි 33%ක වැඩීවීමක් පෙන්නුම් කරන බවත් ජනලේඛන හා සංඛ්‍යාලේඛන දෙපාර්තමේන්තුව පවසයි.

ගෘහ ඒකක වියදම ගණනය කරනු ලබන්නේ ගෘහ ඒකකයක ආහාරපාන හා ආහාරපාන නොවන ද්‍රව්‍යවල වියදම් සලකා බලමිනි.

උතුරු කොරියාවෙන් ඔස්ට්‍රේලියාවට අනතුරු ඇඟවීමේ ලිපියක්

ඇමෙරිකානු පාලනයෙන් ඉවත්ව සිටින ලෙස දන්වමින් උතුරු කොරියාව විසින් ඔස්ට්‍රේලියාවට අනතුරු ඇඟවීමේ ලිපියක් යොමුකර ඇති බව විදෙස් වාර්තා පවසයි.

විශේෂයෙන්ම, උතුරු කොරියාවට පහර දෙන බවට ඇමෙරිකානු ජනපති ට්‍රම්ප් විසින් සිදුකරන ලද ප්‍රකාශයද මෙම ලියවිල්ලෙන් හෙළා දැක තිබේ.

ඔස්ට්‍රේලියානු අගමැතිවරයා පවසා සිටියේ මෙම ලිපිය ඇමෙරිකානු හිතවාදී සෙසු රටවලටද උතුරු කොරියාව විසින් යවා ඇති බවයි.

කෙසේ වෙතත්, මෙම ලිපිය තුළින් උතුරු කොරියාවට එල්ල වී ඇති රාජතාන්ත්‍රික පීඩනය ඔවුන් විසින්ම පිළිගැනීමක් දැකිය හැකි බවද ඔස්ට්‍රේලියානු අගමැතිවරයා පවසයි.

ඉන්දුනීසියාවේ පිහිටි උතුරු කොරියානු තානාපති කාර්යාලය හරහා මෙම ලිපිය ඔස්ට්‍රේලියාව වෙත යොමුකර තිබේ.

1_N korea2