විස්ස පරාජය කරනවා – ජනිපෙ

විධායක ජනාධිපති ක්‍රමය අහෝසි කිරීම හෙවත් විසිවැනි ආණ්ඩුක්‍රම ව්‍යවස්ථා සංශෝධනය පරාජය කිරීමට ජාතික නිදහස් පෙරමුණ ජීවිත පූජාවෙන් කටයුතු කරන බව එම පක්ෂයේ ජාතික සංවිධායක පාර්ලිමේන්තු මන්ත්‍රී ජයන්ත සමරවීර මහතා අද (26දා) පැවසීය.

ජනතා විමුක්ති පෙරමුණ විසින් ගෙන ඒමට සූදානම් වන මෙම ආණ්ඩුක්‍රම ව්‍යවස්ථා සංශෝධනය පරාජය කිරීමට එකතුවන්නැයි පාර්ලිමේන්තුව තුළත්,ඉන් පිටතත් සිටින  දෑ හිතකාමී බලවේගවලින් ඉල්ලා සිටින බවද මන්ත්‍රීවරයා මෙහිදී සඳහන් කළේය.

ජාතික නිදහස් පෙරමුණේ ප්‍රධාන කාර්යාලයේ පැවැති මාධ්‍ය හමුවකදී මේ පිළිබඳ වැඩිදුරටත් අදහස් දැක් වූ ජයන්ත සමරවීර මහතා,

“ජීවිත පූජාවෙන් කටයුතු කරපු මහා පරම්පරාවකගේ අභිලාශය තමයි  අද අනුර දිසානායකලා,ජනතා විමුක්ති පෙරමුණ අමු අමුවේ පාවාදෙන්නේ.විසිවැනි ව්‍යවස්ථා සංශෝධනය විධායක ජනපති ධූරය අහෝසි කිරීම නමින් මේ ගේන්නේ දිනන්න කියලා අනුර කුමාර දිසානායක මහත්තයා කියනවා .අපි අනුර දිසානායකට අභියෝග කරනවා මහත්තයෝ පුළුවන් නම් ගේන්න.

මේක දිනන්න දෙන්නෑ. 88/89 දී 60000ක් ජීවිත පූජා කරපු පරම්පරාවන් වෙනුවෙන් ජාතික නිදහස් පෙරමුණ ජීවිත පූජාවෙන් හරි මේ ආණ්ඩුක්‍රම ව්‍යවස්ථාව හෙවත් මේ රටේ ඒකීය භාවය වනසන ,මේ රටේ බෙදුම්වාදීන්ගේ මනදොල පුරවන,දෙමළ බෙදුම්වාදීන්ගේ හාම්පුතාලා වෙච්ච බටහිර බලවේගවල උවමනාවට මේ රට කඩාදැමීම වෙනුවෙන් ගේන විධායක ජනපති ධුරය අහෝසි කිරීමේ මේ ඊනියා සංශෝනය පරාජය කරන්න ලෑස්තියි” යනුවෙන් පවසා සිටියේය.

Jayantha-samaraweera

ඊළමක් ගැන කතා කරන අයත් එක්ක සාකච්ඡාවක් නෑ

එංගලන්තයේදී තමන්ට එරෙහිව එල්.ටී.ටී.ඊ, හිතවාදීන් පැවැත් වූ විරෝධතා පිළිබඳව සතුටුවන බවත්, රට කැඩීමට උත්සාහ දරන පුද්ගලයන් සමග කිසිදු සාකච්ඡාවක් නොමැති බවත් ජනපති මෛත්‍රීපාල සිරිසේන මහතා පවසයි.

එංගලන්තයේ සංචාරය කරන අතරතුරදී බී.බී.සී. සිංහල සංදේශය හා සම්මුඛ සාකච්ඡාවකට එක්වෙමින් ජනපතිවරයා මේ බව සඳහන් කර තිබේ. එහි තෙවැනි කොටස අද (26දා) පළවිය.

එහිදී ජනපතිවරයා මෙසේ ප්‍රකාශ කර තිබේ.

“විරෝධතා කළේ එල්.ටී.ටී.ඊ.කාරයෝ. විරෝධතා කරනවා නම් මම තවත් සතුටුයි. මොනවද ඒ අයගේ සටන් පාඨ. ඒ ගොල්ලන්ට ඇති අවසාන විසඳුම ඊළමලු. ඔය සටන හැමදාම කරනවා. ඕක කෙරෙන එකක් නෙමෙයි.

රට කඩන එකට කිසිම ඉඩක් නෑ. ඊළමක් ගැන කතා කරන අයත් එක්ක මගේ කිසිම සාකච්ඡාවක් නෑ.

ලංකාවේ දේශපාලන සිරකරුවන් එක්කෙනෙක්වත් නෑ. රහසිගත සිරකඳවුරුත් ලංකාවේ නෑ. මගේ රජය යටතේ කිසිම කෙනෙක් හොරෙන් රඳවාගෙන නෑ”.

Sira-03

 

මිරිස්ස අනවසර ඉදිකිරීම් ඉවත් කිරීම තාවකාලිකව නවත්වන්න

මිරිස්ස වෙරළ තීරයේ ඇති අනවසර ඉදිකිරීම ලෙස දකිනා ගොඩනැගිලි ඉවත් කිරීමට පියවර ගැනීම තාවකාලිකව නවතා දැමීමට පියවර ගතයුතු බවත්, එයට මධ්‍යස්ථ විසඳුමක් සොයා ගැනීමේ ප්‍රයත්නය කෙරෙහි සාකච්ඡා  මාර්ගයකට පිවිසිය යුතු බවත් අමාත්‍ය ෆයිසර් මුස්තෆා මහතා නැවත වරක් සඳහන් කරයි.

පසුගියදා මිරිස්ස ප්‍රදේශයේ අනවසර ඉදිකිරීම් සම්බන්ධයෙන් ඇති වූ සිද්ධියට අදාළව මාධ්‍ය වෙත අදහස් දක්වමින් අමාත්‍යවරයා මේ බව පැවසීය. මෙහිදී මේ පිළිබඳ වැඩිදුරටත් අදහස් දැක් වූ ඒ මහතා,

“අනවසර ඉදිකිරීම් තිබිය නොහැකි අතර, රජයේ සැලසුම් හා පුළුල් ප්‍රතිපත්තිවලට ඒවා අනර්ථකාරී බව නීතියෙන් පැහැදිලිව ප්‍රකාශ කර ඇති බව ප්‍රතික්ෂේප කළ නොහැකි බව සියලු දෙනා දන්නා කරුණක්.

මිරිස්ස ප්‍රදේශයේ දිළිඳු ජනතාවට එක්වරම ස්වකීය ජීවිකාව අහිමි නොකරන බවට වගබලා ගන්නා බවට මා ප්‍රකාශ කිරීම තුළින් කිසිදු අවස්ථාවක මම රටේ ආණ්ඩුක්‍රම ව්‍යවස්ථාව සහ නීති පද්ධතිය අවතක්සේරු කිරීමට හෝ පැහැර හැරීමට කිසි විටෙකත් කටයුතු නොකෙළෙමි.

ප්‍රථම පියවරක් ලෙස  අනවසර ඉදිකිරීම් ලෙස දකිනා ගොඩනැගිලි ඉවත් කිරීමට පියවර ගැනීම තාවකාලිකව නවතා දැමීමට පියවර ගතයුතු අතර, එයට මධ්‍යස්ථ විසඳුමක් සොයා ගැනීමේ ප්‍රයත්නය කෙරෙහි සාකච්ඡා  මාර්ගයකට පිවිසිය යුතු වන්නේය.” යැයි පැවසීය.

Faiszer-Musthapha-640x400

 

LNG බලාගාර තුනක්

ඉදිරියේදී විදුලි අර්බුදයක් හෝ අභියෝගයක් නොමැති බවත්,  LNG  (ස්වභාවික ද්‍රවකෘත වායු) බලාගාර 03ක් ඉදිකිරීමට සැලසුම් සකස්කර ඇති බවත් විදුලිබල හා පුනර්ජනනීය බලශක්ති අමාත්‍ය රංජිත් සියඹලාපිටිය මහතා පැවසීය.

රුවන්වැල්ලේදී පැවැති උත්සවයකදී ඔහු මේ බව ප්‍රකාශ කළ අතර, ඉන්දියාව,  ජපානය හා චීනය සමග එක්ව එම බලාගාර ඉදිකිරීමට නියමිත බවත් අමාත්‍යවරයා එහිදී සඳහන් කළේය.

එහිදී වැඩිදුරටත් අදහස් දැක් වූ අමාත්‍යවරයා,

" ජනාධිපතිතුමා නායකත්වය දෙන ජාතික ආර්ථික සභාවෙන් අනුමත වූ මෙම කැබිනට් පත්‍රිකාවේ ආකාරයට ඉන්දියාවෙන් මෙගා වොට් 500ක්, ජපානයෙන් මෙගා වොට් 500ක් සහ චීනයෙන් මෙගා වොට් 400ක් ලබාගත හැකි ස්වභාවික ද්‍රව වායු බලාගාර සෑදීමට අනුමැතිය ලැබුණා. ඊට අමතරව කොරියාව සමග සහසම්බන්ධ වී ස්වභාවික ද්‍රව වායු ඉක්මනින් ලබාගත හැකි සංචිතයක් ඉදිකිරීමේ  අනුමැතියත් එම කැබිනට් පත‍්‍රිකාවෙන්ම ලැබුණා. ඒ වගේම මේ රටට අවශ්‍යවන මිශ‍්‍ර ජනන සැලැස්මක් ක්‍රියාත්මක කිරීමේ අනුමැතියත් අපි ලබාගත්තා" යැයි පැවසීය.

H.F

2017 MSG මෙට්‍රික් ටොන් 2000ක් ආනයනය කරලා

අජිනමොටෝහි අඩංගු MSG හෙවත් මොනොසෝඩියම් ග්ලුටාමේට් රසකාරකය 2017 වසරේදී මෙට්‍රික් ටොන් 2000ක් ශ්‍රී ලංකාවට ආනයනය කර ඇති බව රජයේ වෛද්‍ය නිලධාරීන්ගේ සංගමය පෙන්වා දෙයි.

අද (26දා) කොළඹ පැවැති මාධ්‍ය හමුවකදී එම සංගමයේ මාධ්‍ය කමිටු සාමාජික වෛද්‍ය ප්‍රසාද් කොළඹගේ මහතා මේ බව පැවසීය.

එම සංගමය පෙන්වා දෙන්නේ 2015 වර්ෂයේදී සිදු කළ ග්ලයිපෝසේට් තහනමෙන් පසුව ශ්‍රී ලංකාවේ ආනයනික MSG ප්‍රමාණය වේගයෙන් ඉහළගොස් ඇති අතර ගොවීන් විසින් එය වල් නාශකයක් හා කෘමී නාශකයක් ලෙස භාවිතා කරන බවට පසුව හෙළි වී ඇති බවයි.

MSG රසකාරයක් ලෙස පරිභෝජනය කිරීමෙන් ස්ථුලතාවය, දියවැඩියාව හා අධිරුධිර පීඩනය ඇති කිරීමට සමත් වන බවත් කලල බන්ධය මගින් මවගෙන් දරුවාට ග්ලුටාමේට් පරිවහනය සීමා වුවත්, අධික මාත්‍රාවන්ගෙන් MSG පරිභෝජනය කිරීමෙන් ස්ථුලතාවය හා දියවැඩියාව ඇතිවීමේ අවධානම මත අධික අඩු බර දරුවන් බිහිවන බවට නිරීක්ෂණය වී ඇති බවත් රජයේ වෛද්‍ය නිලධාරීන්ගේ සංගමය අවධාරණය කරයි.

msg

 

රටවල් 104 කට අන්තර්ජාතික ක්‍රිකට් වරම්

අන්තර්ජාතික ක්‍රිකට් කවුන්සිලයේ සාමාජිකත්වය හිමි සියළුම රටවලට අන්තර්ජාතික ක්‍රිකට් වරම් හිමිකර දීමට අයි.සී.සී.ය තිරනය කොට ඇත. ඒ පන්දුවාර විස්ස අංශයෙනි. ලෝක මට්ටමින් ක්‍රිකට් ක්‍රීඩාව දියුණු කිරීමේ ඉදිරි පියවරක් වන මේ අනුව අයි.සී.සී. හි සාමාජිකත්වය දරණ රටවල් 104 කට විස්සයි විස්ස වරම් හිමිවනු ඇත.ඒ කාන්තා හා පිරිමි ඉසව් ද්විත්වයෙන්මය. කෙසේ වෙතත් මෙම තිරණය ක්‍රියාත්මක කිරිමට තිරනය කර ඇත්ත් එලඹෙන ජුලි පළමුවැනිදා සිට ය.

මේ වන විට අයි.සී.සී. පූර්ණ සාමජිකත්වය රටවල් 12 කටද හවුල්කාර (Associate) සාමාජිකත්වය රටවල් 92 කට පිරිනමා ඇති අතර මීට පෙර ජාත්‍යන්තර විස්සයි විස්ස වරම් හිමිවී තිබුනේ එහි පූර්ණ සාමාජිකත්වය දරණ රටවල් සියල්ලට හා හවුල් සාමාජිකත්වය දරන රටවල් 6 කට පමණි.

prv_1524751098

 

ප්‍රමිතියෙන් තොර රන් භාණ්ඩ විකිණීමේ අවකාශයක්

රත්‍රං මිල ඉහළ යෑමත් සමග වෙළෙඳ පොළ තුළ ප්‍රමිතියෙන් තොර රත්‍රං භාණ්ඩ විකිණීමේ අවකාශයක් පවතින බව ජාතික මැණික් හා ස්වර්ණාභරණ අධිකාරිය සඳහන් කරයි.

ඒ අනුව රත්‍රං භාණ්ඩ මිලදී ගැනීමේදී ජාතික මැණික් හා ස්වර්ණාභාරණ අධිකාරියේ ප්‍රමිති සහතික මුද්‍රාව (Hallmark) සහිත රත්‍රං භාණ්ඩ මිලදී ගැනීමට සුපරීක්ෂාකාරී වන ලෙස එම අධිකාරියේ අධ්‍යක්ෂ ජනරාල් මහේෂ් ගම්මන්පිල මහතා පවසයි.

32655-gold-jewellery-pixabay

 

ප්‍රධාන මාර්ගයේ දුම්රිය ප්‍රමාදයක්

ප්‍රධාන මාර්ගයේ දුම්රිය ගමනට බාධා එල්ල වී තිබෙනවා.
එ් මාර්ග අවහිරතාවක් හේතුවෙන්.
ප්‍රධාන මාර්ගයේ ඉහළට හා පහළට ගමන් ගන්නා සියලු දුම්රිය ප්‍රමාද වන බව දුම්රිය දෙපාර්තමේන්තුව පවසයි.

SLFP කොළඹට හා ගම්පහට නව සංවිධායකවරු

ශ්‍රී ලංකා නිදහස් පක්ෂයේ ගම්පහ හා කොළඹ දිස්ත්‍රික් වෙනුවෙන් නව සංවිධායකවරුන් දෙදෙනෙක් පත්කර ඇත.ඒ අනුව ගම්පහ ආසන සංවිධායකවරයා ලෙස අජිත් බස්නායක මහතාත් කොළඹ දිස්ත්‍රික් සංවිධායකවරයෙක් ලෙස චමින්ද කුමාර සුදුසිංහ මහතාත් පත්කර ඇත. ඔවුන් ජනපති මෛත්‍රීපාල සිරිසේන මහතා අතින් අද (26දා) පෙරවරුවේ ජනාධිපති නිල නිවසේදී සිය පත්වීම් ලිපිය ලබා ගත්තේය.

Untitled-1
 
 
 

ඉන්දු – ශ්‍රී ලංකා අධ්‍යාපන සබඳතා ගැන සාකච්ඡාවක්

ඉන්දියාව සහ ශ්‍රී ලංකාව අතර අධ්‍යාපන ක්ෂේත්‍රයේ සබඳතා තවදුරටත් ශක්තිමත් කරගැනීම පිළිබඳව සාකච්ඡාවක් ඉන්දීය අධ්‍යාපන ක්ෂේත්‍රයේ නියෝජිත පිරිසක් සහ අග්‍රාමාත්‍ය රනිල් වික්‍රමසිංහ මහතා අතර පවත්වා තිබේ.

ඉන්දියාවේ සනාවර්හි ලෝරන්ස් විද්‍යාලයේ නියෝජිත පිරිසක් සහ අග්‍රාමාත්‍ය රනිල් වික්‍රමසිංහ මහතා අතර අද (26දා) අරලියගහ මන්දිරයේදී මෙම හමුව පවත්වා ඇත.

ලෝරන්ස් විද්‍යාලය සහ ශ්‍රී ලංකාව අතර ශිෂ්‍ය හුවමාරු ක්‍රමයක් ආරම්භ කිරීම පිළිබඳවද එහිදී සාකච්ඡාවට බඳුන් වී ඇත.

මෙම අවස්ථාවට ඉන්දීය මහ කොමසාරිස් තරංජිත් සිං සන්ධූ, ලෝරන්ස් විද්‍යාලයේ ප්‍රධානාචාර්ය විනායි පාන්ඩේ, එම විද්‍යාලයේ ශිෂ්‍ය ශිෂ්‍යාවන් සහ අග්‍රාමාත්‍ය ලේකම් සමන් ඒකනායක මහතා ඇතුළු පිරිසක් සහභාගී වී තිබේ.

B37A0342 B37A0337 B37A0345 B37A0350 B37A0357